སྦྱོར་བའི་ཕྲེང་བ།
སངས་རྒྱས་གྲགས་པས་མཛད།
རྒྱ་གར་སྐད་དུ། ཡོ་ག་མཱ་ལཱ། །བོད་སྐད་དུ། སྦྱོར་བའི་ཕྲེང་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བདག་གི་ལྷ་ལ་ཕྱག་འཚལ་ལོ། །ལྷན་སྐྱེས་དྲི་མེད་དེ་དེ་བཞིན། །ཡེ་ཤེས་འཆར་བའི་མན་ངག་ནི། །ཅུང་ཟད་བདག་གིས་ཕྲི་བར་བྱ། །འགྲོ་བ་ཉོན་མོངས་ཀྱིས་བཅིངས་པ། །ཐར་ལ་ཉོན་མོངས་འཇིག་བྱེད་པའི། །ཡང་དག་ཡེ་ཤེས་སྦྱོར་གོམས་པས། །དེ་ནི་འཇིག་པར་འགྱུར་བ་ཡིན། །འདིར་ནི་རྣལ་འབྱོར་རབ་ཀྱིས་ནི། །ཟླ་བ་དྲུག་ཏུ་གོམས་པའམ། །ལོ་དང་རྒྱུན་མི་འཆད་པས་ཀྱང༌། །ཡང་དག་དངོས་གྲུབ་གཅིག་ཏུ་འགྱུར། །སྤྲོས་པ་ཐམས་ཅད་བཏང་ནས་ནི། །རྣལ་འབྱོར་འདོད་ལ་རབ་འབད་པས། །འཆད་པར་འགྱུར་བའི་སྦྱོར་རྣམས་ལ། །གཅིག་ཏུ་བཟུང་སྟེ་རྣམ་བསྒོམ་བྱ། །ཕོ་མོ་མ་ནི་ང་ཁ་དོག་དང༌། །འགྲོ་འོང་གནས་པ་རྣམ་པ་ལྟས་ཏེ། །དེ་མཐོང་བ་ཡི་འབྲས་བུ་ནི། །མྱུར་དུ་སྒྲུབ་པ་པོ་ཡིས་ཐོབ། །གཞན་ཡང་ཡོན་ཏན་སྐྱོན་རྣམས་ཀྱི། །རྒྱུ་ནི་སྐྱེས་པ་བུད་མེད་དེ། །དེ་གསད་པ་ཡི་རྣམ་པ་ཡིས། །མ་ནིང་འདིར་ནི་རྒྱས་པར་བྱ། །མ་ནིང་དེ་ནི་རྒྱས་གྱུར་ན། །གསེར་གྱི་རི་བོ་རྩེ་ལ་ཁྱེར། །ཡོན་ཏན་ཕུན་ཚོགས་མ་ལུས་པ། །དེ་ལས་འབྱུང་བར་ཐེ་ཚོམ་མེད། །གཞན་ཡང་ཕོ་མོ་མ་ནིང་ནི། །འབད་པ་ཡིས་ནི་གནས་ནས་འབྱུང༌། །གདོན་ཏེ་དེ་ཡིས་གནས་རྣམས་ལས། །ཡོན་ཏན་རིན་ཆེན་ཕུན་ཚོགས་ཐོབ། །
ཡང་ན་ཕོ་མོ་མ་ནིང་ནི། །གནས་འདི་ཉིད་དུ་གཞུག་པར་བྱ། །དེ་གཞུག་དེ་ལ་མྱོས་བྱེད་བླུད། །བླུད་ནས་སྐྱེས་པ་བུད་མེད་ནི། །འབད་པས་མ་ནིང་ཁར་གཞུག་བྱ། །བཅུད་ལ་བརྟེན་པའི་ཡུལ་རྣམས་ལ། །མྱོས་པར་བྱེད་པ་བླུད་པར་བྱ། །བླུད་ནས་རབ་ཏུ་འབད་པ་ཡིས། །མ་ནིང་ཁར་ནི་གཞུག་པར་བྱ། །དེ་བཞིན་བྱས་གྱུར་དཔག་བསམ་ཤིང༌། །འདྲ་བ་འདི་ལ་ཐེ་ཚོམ་མེད། །དེ་ལྟར་སྦྱོར་བ་འདི་རྣམས་ཀྱིས། །རྟེན་ནི་འདི་རུ་བཤད་པར་བྱ། །གསུམ་པོ་དུས་དང་དབྱེ་བ་ཡིས། །དྲུག་དང་ལྔ་ནི་གོ་རིམས་བཞིན། །སྟེང་འོག་རབ་ཏུ་ཕྱེ་བ་ཡིས། །དེ་ཡི་སོ་སོར་རྣམ་གཉིས་འདོད། །ཤེས་བྱའི་དངོས་པོ་འདི་རྣམས་ནི། །དེ་ཕྱིར་རྣལ་འབྱོར་པས་ཤེས་བྱ། །ཡང་ན་ལྕེ་ཆུང་རྣལ་འབྱོར་པས། །རྡོ་རྗེ་ལྕེ་ནི་བསྐྱོད་པར་བྱ། །དེ་བསྐྱོད་པ་ལས་བདུད་རྩིའི་རྒྱུན། །འབབ་པར་འདི་ལ་ཐེ་ཚོམ་མེད། །གང་ཡང་ས་བོན་ཚོགས་ཀྱིས་སྤྲུལ། །ཡང་ན་གཟུགས་སྐུ་མཛེས་པའམ། །ལྷན་ཅིག་སྐྱེས་པ་དྲི་མ་མེད། །ལྷ་ཡི་གཟུགས་ནི་བསྒོམས་པ་ཡིས། །མངོན་པར་འདོད་པས་བསྒྲུབ་པར་བྱ། །སྦྱོར་བ་རིན་ཆེན་འདི་རྣམས་ལ། །སྦྱིན་དང་ཚུལ་ཁྲིམས་སྙིང་རྗེ་ཆེ། །ཐོག་མར་རབ་ཏུ་འབད་པ་ཡིས། །དེ་ལ་གོམས་པ་ཡང་ཡང་བྱ། །འདི་ནི་རྒྱུད་རྣམས་ཐམས་ཅད་དང༌། །མདོ་སྡེ་དག་ནི་ཐམས་ཅད་ལས། །སངས་རྒྱས་རྣམས་ཀྱིས་སྙིང་པོར་གསུངས། །དོན་དམ་པ་ཡི་སྒྲུབ་ཐབས་སོ། །སྦྱོར་བའི་སྤྲོས་པ་འདི་རྣམས་ནི། །ཡང་དག་པར་ནི་སྦྱར་བར་བྱ། །སློབ་མ་བཟང་པོ་དེ་ལ་ནི། །བླ་མ་རང་གིས་ཉམས་མྱོང་བསྟན། །སྦྱོར་བའི་ཕྲེང་བ་འདི་རྣམས་ལ། །དེ་ཉིད་རིན་ཆེན་རབ་སྦྱར་བྱ། །དེ་ཉིད་རིན་ཆེན་མ་ཐོབ་ན། །དངོས་གྲུབ་ཉིད་ནི་ཇི་ལྟར་ཐོབ། །དེ་བས་སློབ་མ་བཟང་པོ་ཡིས། །འདོད་པས་བླ་མ་རྟག་ཏུ་མཆོད། །གང་ཕྱིར་བླ་མ་མཉེས་པ་ཡིས། །དེ་ཉིད་རིན་ཆེན་རབ་ཏུ་བསྟན། །རིན་ཆེན་གང་ཟག་ཤེས་བྱས་ལ། །འབད་པས་དེ་ཉིད་བརྗོད་པར་བྱ། །པདྨ་དཀར་སོགས་སློབ་མ་ལ། །ཚིག་ཙམ་ཡང་ནི་བརྗོད་མི་བྱ། །བརྗོད་ན་རབ་ཏུ་འབད་པ་ཡིས། །མན་ངག་འཁྲུལ་པར་གྱུར་ཕྱིར་རོ། །བླ་མ་སྣ་ཚོགས་མན་ངག་ནི། །མཁས་པ་སངས་རྒྱས་གྲགས་པས་བསྡེབས། །སྦྱོར་བའི་ཕྲེང་བ་པཎྜི་ཏ་སངས་རྒྱས་གྲགས་པས་མཛད་པ་རྫོགས་སོ།། །།ལོ་ཙཱ་བ་དགེ་ཚུལ་ཤེས་རབ་དཔལ་གྱིས་བསྒྱུར་
པའོ།།