ལེའུ་བཅུ་གཉིས་པ། ཚིགས་སུ་བཅད་པ་གསུམ་གྱིས་སྔགས་ཀྱི་རྒྱ་ཆེར་འགྲེལ་པ་བསྟན་པ།
༄། །ལེའུ་བཅུ་གཉིས་པ་སྔགས་ཀྱི། །སྐབས་ལ་དོན་དང་ཚིག་དང་ནི། །རྟགས་ཀྱི་སྔགས་དང་གསུམ་དུ་འདོད། །དང་པོ་སངས་རྒྱས་ཐུགས་ཡིན་ལ། །གཉིས་པ་ཨཱ་ལི་ཀཱ་ལིའོ། །གསུམ་པ་ལྷ་དང་ཡེ་ཤེས་དང༌། །ཕྲིན་ལས་བཞི་ལ་སྦྱོར་བ་ནི། །རྟགས་ཀྱི་སྔགས་སུ་འདོད་པ་ཡིན། །དེ་ཡང་བཤད་ན་འདི་ལྟ་སྟེ། །ཨོཾ་ནི་ཡེ་ཤེས་ལྔ་ཡིན་ལ། །སརྦ་དྷརྨ་འཁོར་འདས་གཉིས། །ངོ་བོས་སྟོང་པ་ཨ་བྷཱ་བ། །དེ་ཉིད་བླ་མའི་གདམས་པ་ཡིས། །སྟོང་པར་མྱོང་བ་སྭ་བྷཱ་བ། །དབྱེར་མེད་རྣམ་དག་བི་ཤུདྡྷ། །བཛྲ་གཉིས་མེད་ཡེ་ཤེས་ལ། །ཨ་ཨཱ་ཨོཾ་ཨཿ་དགའ་བ་བཞི། །པྲ་ཀྲྀ་ཏི་རྒྱུ་ལམ་འབྲས་བུའི་དུས། །བ་རི་ཤུདྡྷཿ་སྒྲིབ་མེད་པའོ། །སརྦ་དྷརྨ་ཀུན་མཁྱེན་པར། །ཡ་དུ་ཏ་སྣང་སྟོང་གཉིས་མེད་པའོ། །སརྦ་ཏ་ཐཱ་ག་ཏ་ནི། །དུས་གསུམ་བཞུགས་པའི་སངས་རྒྱས་ཉིད། །བདེ་ཆེན་ཛྙཱ་ན་ཀཱ་ཡ་ལ། །མ་ཉྫུ་ཤྲཱི་ནི་ཐིག་ལེའི་ཁམས། །པ་རི་ཤུདྡྷི་མི་འཛག་པ། །ཏཱ་ཞེས་དེ་ལས་མཆོག་མེད་པའོ། །མུ་པ་དཱ་ནི་ཟག་པའོ། །ཡེ་ཏི་ཨ་ནི་དེ་ལྟར་ན། །མི་འཛག་དགའ་བ་ལམ་མཆོག་གོ །ལམ་མཆོག་དེ་ཉིད་གང་ཞེ་ན། །ཤིན་ཏུ་བསྡུས་པའི་རྒྱུད་འདི་ཡིན། །རྒྱས་བསྡུས་གཉིས་སུ་ཇི་ལྟ་
༄། །བར། །བཤད་ཚོད་འདི་ལ་ཡོད་པའོ། །ཨ་ཨཱ་མི་སྐྱེ་ལས་སྐྱེའོ། །སརྦ་ཏ་ཐཱ་ག་ཏ་ཧྲྀ་ད་ཡ། །ཧ་ར་ཧ་ར་ཞེས་པ་ནི། །སོ་སོར་སྡུད་པའི་རྟགས་མཐར་ཕྱིན། །དེ་བཞིན་གཤེགས་པ་ཀུན་གྱི་ཐུགས། །ཧ་ར་སོ་སོར་ཡོད་པ་སྟེ། །ཧ་རས་བསྡུས་པ་མཉམ་པ་ཉིད། །ཨོཾ་ཧཱུཾ་ཧྲཱིཿ་ནི་གནས་འབྱུང་འཇུག །བྷ་ག་བཱ་ན་ནི་ཉི་ཁྲི་དང༌། །བཞི་སྟོང་བཅོམ་པས་བཅོམ་ལྡན་འདས། །སྲོག་རྩོལ་ཡན་ལག་ཡིན་པར་འདོད། །ཛྙཱ་ན་མཱུརྟྟི་བསམ་གཏན་ཏེ། །རྗེས་ལ་བཱ་གཱི་ཤྭ་ར་ན། །མ་ཧཱ་པཱ་ཙ་འབྱུང་བའོ། །སརྦྦ་དྷ་རྨ་ག་ག་ན། ཏིང་ངེ་འཛིན་གྱི་ཡན་ལག་གོ །ཨ་མ་ལ་སུ་པ་རི་ཤུདྡྷ། ཞེས་པ་འཛིན་པའི་ཡན་ལག་གོ །དྷརྨ་དྷཱ་ཏུ་ཛྙཱ་ན་གརྦྷ་ཨཱཿ་ཞེས་པས་རྗེས་སུ་དྲན་པའོ། །སྔགས་ལ་ཤློཀ་གསུམ་གྱིས། །ཁམས་གསུམ་པོ་ནི་དག་པའོ། །སྔགས་ཀྱི་རྒྱ་ཆེར་འགྲེལ་པ་སྟེ་ལེའུ་བཅུ་གཉིས་པའོ། །