སུམ་ཅུ་རྩ་གསུམ་པ། གསང་བའི་མཆོད་པ་དང་བསྙེན་བཀུར་གྱི་མཆོད་པའི་རིམ་པར་ཕྱེ་བ།
ད་ནི་བཟའ་བ་དང་བཅའ་བའི་སུན་འབྱིན་པར་བྱེད་པའི་ཉན་ཐོས་དེ་གཞུག་པར་བྱ་བའི་ཆེད་དུ་གསུངས་པ། དེ་ནས་མཆོག་ཅེས་བྱ་བ་ལ་སོགས་པ་སྟེ། དེ་ནས་ནི་བཟའ་བ་དང་བཏུང་བའོ། །མཆོག་ནི་གཙོ་བོ་སྟེ་ཐམས་ཅད་ཀྱི་ཐམས་ཅད་དུ་མེད་
པའོ། །སྦྱོར་བ་ཀུན་ཞེས་པ་ནི་རྣལ་འབྱོར་གཞན་ཐམས་ཅད་ཀྱི་ནང་ནས་སོ། །སྒྲུབ་པ་པོ་ཞེས་པ་ནི་སྒྲུབ་པ་པོ་སྟེ་རྒྱུའི་ཕྱིར་ནའོ། །བཟའ་བ་ནི་གོ་ཀུ་ད་ཧ་ན་ལ་སོགས་པ་རྣམས་བཟའ་བར་བྱ་སྟེ་ཞེས་བྱ་བར་འབྲེལ་ཏོ། །བཟའ་བ་འབའ་ཞིག་ལས་བྱ་བ་མེད་དམ་ཞེ་ན་གསུངས་པ་ཉ་ཞེས་བྱ་བ་ལ་སོགས་པ་སྟེ། ཉ་ནི་རོ་ཧི་ཏ་ལ་སོགས་པའོ། །ཤ་ནི་ར་ལ་སོགས་པའི་སྒྲ་སྨོས་པས། དེ་བཞིན་དུ་ཁུ་བ་དང་ཚོད་མ་ཡང་ཞེས་པའོ། །ཅི་ནུས་པས་ཞེས་པ་ནི་སྦྱོར་ཚད་ཀྱི་ཚུལ་དང་མཐུན་པའོ། །དངོས་སུ་མེད་ཀྱང་ཞེས་བྱ་བ་ལ་སོགས་པ་དེ་ནི་དཀའ་འགྲེལ་ཉིད་ལས་གསལ་ལོ། །མཚན་མོ་ཞེས་བྱ་བ་ལ་སོགས་པ་ནི་རེ་ཞིག་ཉིན་མོའི་བྱ་བ་ཉིད་དོ། །ནུབ་མོ་ནི་གདོན་མི་ཟ་བར་རྟག་ཏུ་བྱ་བ་ཡིན་པར་བསྟན་ཏོ། །ཕོ་ཉ་ཞེས་བྱ་བ་ལ་སོགས་པ་ནི་བདག་ཉིད་གཅིག་པུ་མི་ཟ་བར་འོན་ཀྱང་རྣལ་འབྱོར་མ་ཕོ་ཉ་མ་ལ་ཡང་བཟའ་བ་དང་བཏུང་བ་ལ་སོགས་པ་དབུལ་བར་བྱའོ་ཞེས་སོ། །ཕྱིས་ཅི་བྱ་ཞེ་ན། གསུངས་པ། རང་གི་པང་པར་ཞེས་བྱ་བ་ལ་སོགས་པ་ནི་ཕོ་ཉ་མོ་ཡང་ལོགས་སུ་བཞག་ལ་ལག་པ་གཡོན་པས་འཁྱུད་པའོ། །དཔའ་བོ་གཉིས་མེད་མཆོད་པར་བྱ། །ཞེས་པ་ནི་དཔའ་བོར་གྱུར་བས་བདག་ཉིད་གཉིས་སུ་མེད་པའི་ཡེ་ཤེས་ཀྱི་དོན་དུ་མཆོད་པ་ཇི་ལྟ་བར་འགྱུར་བ་དེ་བཞིན་དུ་ཕོ་ཉ་མོ་དེ་ལ་གསང་བའི་མཆོད་པ་བྱའོ་ཞེས་དགོངས་པའོ། །མ་ཞེས་བྱ་བ་ལ་སོགས་པ་ཕོ་ཉ་མོ་བསྟན་པ་ཡིན་ནོ། །དེ་ལྟའི་ཆོ་ག་ཞེས་པ་ནི་འདིས་ཕོ་ཉ་སྟེ་ཆོ་གས་རྡོ་རྗེ་ཕག་མོའི་རྣམ་པར་བསྒོམ་པར་བྱའོ། །གསང་བའི་མཆོད་པ་ཞེས་པ་ཚིག་གི་ལྷག་མའོ། །ཅིའི་དོན་དུ་ཞེ་ན། གསུངས་པ། བཅིངས་པ་ལེགས་པར་གྲོལ་བར་བྱ། །ཞེས་པ་སྟེ། བཅིངས་པ་ནི་འཁོར་བའི་མཚན་ཉིད་ཀྱི་ཕྱིར་རོ། །གྲོལ་བ་ནི་མཆོག་གི་ཞེས་དགོངས་སོ། །དེ་ནས་ཞེས་བྱ་བ་ལ་སོགས་པ་ནི་དེ་ནས་གསང་བའི་མཆོད་པའི་རྗེས་ཐོགས་སུའོ། །སྔགས་ནི་འགྲུབ་འགྱུར་ཏེ་ཞེས་པ་ནི་སྔགས་འདིས་འདི་ལྷན་ཅིག་སྐྱེས་པའི་ཡེ་ཤེས་ཀྱི་མིང་རྫོགས་པར་གྱུར་ཏེ། སྒྲུབ་པ་པོ་ཞེས་པ་ནི་ལྷག་མའོ། །ཇི་སྲིད་མེ་ཆུ་ཡོད་པར་དུ། །ཞེས་པ་ནི་ཇི་སྲིད་དུ་བསྟན་པ་ཡོངས་སུ་ཞིག་པའི་བར་དུའོ། །སློབ་དཔོན་ཞེས་བྱ་བ་ལ་སོགས་པ་ལ། མཆོད་ཅེས་པ་ནི་ཕྱི་དང་ནང་གི་མཆོད་པའོ། །བཟའ་བ་
ཞེས་པ་ནི་བཟའ་བ་ཉིད་བསྟན་ཏེ་གོ་ཀུ་ད་ཧ་ན་ལ་སོགས་པའོ། །ཕྱག་རྒྱ་ཞེས་པ་ནི་ཕོ་ཉ་མོའོ། །འདི་ཐམས་ཅད་སྒྲུབ་པ་པོས་རྡོ་རྗེ་འཛིན་པའི་སྐུར་བ་ལྟ་ཞིང་ཁས་འཆེ་བའོ་ཞེས་དགོངས་སོ། །ཀླུ་ཞེས་བྱ་བ་ལ་སོགས་པ་དཀའ་འགྲེལ་ལས་གོ་སླའོ། །དེ་སྲིད་ཅེས་བྱ་བ་ལ་སོགས་པས་ཐབས་དང་ཤེས་རབ་ཀྱི་རྣལ་འབྱོར་ལས་བྱུང་བའི་ཡེ་ཤེས་ཀྱི་ཆེ་བའི་བདག་ཉིད་གསུངས་ཏེ་གོ་སླའོ། །དེ་ཉིད་གསུངས་པ། མཆོད་པར་བྱ་བ་ལ་སོགས་པ་སྟེ། ཕྱག་རྒྱ་ཞེས་པ་ནི་ཕོ་ཉ་མོའོ། །མཆོད་པར་འདོད་པ་ཞེས་པ་ནི་མཆོད་པས་ན་མཆོད་པ་སྟེ། སྒྲུབ་པ་པོ་དེ་རྗེས་སུ་གཟུང་བའོ། །ངེས་པར་སྲེག་ཅེས་བྱ་བ་ལ་སོགས་པ་སྟེ། གོ་སླའོ། །ཕོ་ཉ་མོ་རྒྱུད་གཞན་དང་ཐུན་མོང་དུ་བསྟན་པར་བྱ་བའི་ཕྱིར་གསུངས་པ། དང་པོ་སྒྲུབ་ཅེས་བྱ་བ་ལ་སོགས་པ་སྟེ། དང་པོ་ཞེས་བྱ་བ་ནི་སྒྲུབ་པའོ། །དཔའ་བོ་རྣམས་ལས་དཔའ་བོ་ཉིད། །སྤྱད་པར་བྱ་ཞེས་བྱ་བ་ནི་དཔའ་བོ་རྣམས་ལས་དཔའ་བོ་ཉིད་ནི་ཕྱག་རྒྱ་ཆེན་པོའི་དངོས་གྲུབ་ལ་སོགས་པ་བསམས་པ་ཇི་ལྟ་བ་བཞིན་དུ་འགྲུབ་པོ་ཞེས་བྱ་བའི་དོན་ཏོ། །མཆོད་པའི་འབྲས་བུ་གསུངས་པ། ས་འོག་ཅེས་བྱ་བ་ལ་སོགས་པ་ནི་རྨོངས་པར་བྱེད་པ་དང་འགུགས་པར་བྱེད་པའོ། །ལས་ཀྱི་དངོས་གྲུབ་ཀྱི་ཕྱིར་མཆོད་པ་ཡིན་པས་ཞི་བ་ལ་སོགས་པའི་ལས་བསྒྲུབ་པར་བྱའོ། །དེ་ལྟ་བུའི་ཆོ་ག་ནི་སྒྲུབ་པ་པོ་ཇི་སྐད་དུ་བསྟན་པའི་ལས་དཀའ་བ་མེད་པ་ཉིད་ཀྱིས་འགྲུབ་པར་འགྱུར་བ་གསུངས་པ། ལས་རྣམས་ཐམས་ཅད་ཅེས་བྱ་བ་ལ་སོགས་པ་སྟེ། ཞི་བ་ལ་སོགས་པ་ལས་འདི་རྣམས་ཐམས་ཅད་ཀྱི་ནང་ནས་གང་ཅུང་ཟད་ཅི་ཡང་རུང་བའི་ལས་ཉོན་མི་མོངས་པར་དེར་འགྲུབ་པོ། །དངོས་གྲུབ་ཐམས་ཅད་ཅེས་པ་ནི་ས་འོག་ལ་སོགས་པའི་དངོས་གྲུབ་ཀྱང་དེ་ཡིས་འགྲུབ་པར་འགྱུར་བ་ཡིན་ནོ། །འདི་ནི་རིམ་པར་ཕྱེ་བ་སུམ་ཅུ་རྩ་གསུམ་པའོ།། །།