ལེའུ་ཉི་ཤུ་པ། རྣལ་འབྱོར་མ་ཐམས་ཅད་ཀྱི་ལག་པའི་ཕྱག་རྒྱའི་བརྡའི་ཆོ་གའི་རྣམ་པར་བཤད་པ།
དེ་ལྟར་ལྷ་མོ་གསུམ་གྱི་མཚན་ཉིད་བསྟན་ནས། ལྷ་མོ་གསུམ་གྱི་བརྡ་བསྟན་པ་ནི། དེ་ནས་གཞན་ཡང་བཤད་བྱ་བ། །ཞེས་བྱ་བ་གསུངས་ཏེ། དེ་ལ་དང་པོ་དབང་གི་ལྷ་མོའི་བརྡ་བསྟན་ཏེ། མཁའ་འགྲོ་གཡོན་གྱི་གྲྭ་རྣམས་ཏེ། །ཞེས་བྱ་བ་ནི་ཡེ་ཤེས་དང་གནས་དང་སྔགས་ལས་སྐྱེས་པས་སོ། །གཡོན་གྱི་བརྡ་ནི་ཞི་གནས་ཀྱི་བདེ་བ་དང༌། ལྷག་མཐོང་སྟོང་པ་ཉིད་སྒོམ་པ་ནི་བརྡའོ། །དགོས་པ་ཅི་ཡིན་ཞེ་ན། སྤུན་དང་སྲིང་མོར་ཤེས་པའོ། །ཁ་སྦྱོར་དང་མཉམ་སྦྱོར་ལས་བརྡ་འདི་རྣམས་ནི་སངས་རྒྱས་དང་བྱང་ཆུབ་སེམས་དཔའི་བརྡ་ཡིན་པས་ཐ་མལ་པའི་སྤྱོད་ལམ་བཞག་ནས་ཟག་པ་མེད་པའི་སྤྱོད་ལམ་ལ་འཇུག་པ་ཡིན་ནོ་ཞེས་གསུངས་སོ། །རྒྱུད་འདིར་སྦྱོར་བའི་དུས་སུ་སྤུན་དང་སྲིང་མོར་ཤེས་པར་བྱ་བ་དང༌། དངོས་གཞིའི་ཚེ་དེ་བཞིན་གཤེགས་པའི་བརྡ་བྱེད་པ་དང་གཉིས་ཀ་ཡིན་པར་ཤེས་པར་བྱའོ། །དེ་ལྟར་མདོར་བསྟན་ནས་རྒྱས་པར་བཤད་པ་ནི་ལག་པ་གཡོན་པ་སྟོན་པས་ཕྱག་འཚལ་བ་དང་སྲིན་ལག་སྟོན་པས་ཕྱག་འཚལ་བ་ལ་སོགས་པའི་ལན་དུ་སྟོན་པ་ནི་སྦྱོར་བའི་ཚེ་ནའོ། །ངོ་ཤེས་པར་བྱེད་པ་
དང༌། དངོས་གཞི་ཟག་བཅས་ཀྱི་སྤྱོད་པ་བཏུལ་ནས་ཟག་མེད་ཀྱི་སྤྱོད་པ་ལ་འཇུག་པ་ཡིན་ནོ། །ལྷག་མ་ནི་གོ་སླ་བས་མ་བཤད་དོ། །ལེའུ་ཉི་ཤུ་པའི་རྣམ་པར་བཤད་པའོ།། །།