ལེའུ་བཞི་བཅུ་རྩ་བཞི་པ། རྣལ་འབྱོར་མ་དྲུག་གི་ཡི་གེ་བདུན་གྱི་ལས་ཀྱི་ཆོ་གའི་རྣམ་པར་བཤད་པ།
དེ་ལྟར་ཡི་གེ་བདུན་པའི་འཁྲུལ་འཁོར་བཤད་ནས། ད་ནི་གོ་ཆའི་ལྷ་མོ་དྲུག་གི་འཁྲུལ་འཁོར་བཤད་པ་ནི། དེ་ནས་ཕོ་ཉ་མོ་རྣམས། ཡི་གེ་བདུན་ཡང་ལྡན་འགྲུབ་པ། །ཞེས་བྱ་བ་སྨོས་ཏེ། ཡི་གེ་བདུན་པའི་འཁྲུལ་འཁོར་གྱི་རྩིབས་ལ་གོ་ཆའི་ལྷ་མོ་དྲུག་གི་སྔགས་བཀོད་ན་ལས་བཅུ་གཉིས་གང་འདོད་པ་ལ་བརྩོན་འགྲུས་བསྐྱེད་ན་མྱུར་དུ་གྲུབ་པར་འགྱུར་རོ། །དེ་ལྟར་མདོར་བསྟན་ནས་རྒྱས་པར་བཤད་པ་ནི། དེ་བཞིན་དུ་ནི་ཡི་གེ་བདུན། །ཞེས་བྱ་བ་སྨོས་ཏེ། ལག་པའི་དབུས་སུ་ཡི་གེ་བདུན་པའི་འཁྲུལ་འཁོར་བཀོད་ལ་འཁོར་ལོའི་རྩིབས་དྲུག་ལ་རྣལ་འབྱོར་མ་དྲུག་གི་སྔགས་དང་སྤེལ་ན་དབང་དུ་བྱ་བར་འདོད་པའི་གཟུགས་བརྙན་བྱས་ལ་སྔགས་ཟློས་ཤིང་གཟུགས་བརྙན་སྙིང་གར་མནན་ནས་ལག་པ་གཡོན་པ་དེ་ལ་བསྟན་ན་དེ་མྱུར་དུ་འགུགས་པར་འགྱུར་རོ། །ལས་གཉིས་པ་ནི་ཙནྡན་དམར་པོའི་རྡུལ་དང་སྐེ་ཚེ་དང་ལན་ཚྭ་དང་བསྒྲུབ་བྱའི་རྐང་རྗེས་ཀྱི་ས་རྣམས་ལས་གཅིག་ཏུ་བྱས་ཏེ། མཚན་མོའི་དུས་སུ་སྨེ་ཤ་ཅན་གྱི་མེའམ། དམངས་རིགས་ཀྱི་མེའམ་དུར་ཁྲོད་ཀྱི་མེ་ལས་གཟུགས་བརྙན་ཕྱེ་མར་བྱས་ནས་ལན་བརྒྱ་སྦྱིན་སྲེག་བྱས་ནས་འགུགས་པར་འགྱུར་རོ། །ལས་གསུམ་པ་ནི་རྡུལ་དེ་ཉིད་ལྕགས་ཀྱི་ཕྱེ་མ་དང་བསྲེས་ནས་དུར་ཁྲོད་ཀྱི་རས་ལ་གཏུམ་སྟེ་ལམ་གྱི་བཞི་མདོར་སོར་ཉི་ཤུ་རྩ་བཞི་བརྐོས་ནས་དགྲའི་མིང་དང་བཅས་ཏེ་སྦས་ན་མྱུར་དུ་གནོན་པར་འགྱུར་རོ། །ལས་བཞི་པ་ནི་གཟུགས་བརྙན་དེ་ཉིད་ས་འོག་ནས་བཏོན་ལ་འོ་མས་བཀྲུས་ན་སླར་འཚོ་བར་འགྱུར་རོ། །ལས་ལྔ་པ་ནི་སྔར་གྱི་ཕྱེ་མ་དེ་ཉིད་ཀྱི་སྟེང་དུ་མྱོས་བྱེད་ལྔ་པོ་དང་རྒྱའི་ལུང་ཏང་དང༌། ཐང་ཕྲོམ་དང༌། ཁྲེ་རྒོད་དང་
གསེར་ཤིང་དང་སྦྱང་དུག་དང་ལྔ་སྦྱར་བ་དུར་ཁྲོད་ཀྱི་རས་ལ་དགྲ་བོའི་མིང་རུས་དང་བཅས་པ་སྔགས་བརྒྱ་རྩ་བརྒྱད་དུ་བཟླས་ཤིང་སྦས་ན་འཕྲལ་དུ་སྨྱོ་བར་འགྱུར་རོ། །ལས་དྲུག་པ་ནི་དེ་ཉིད་བསྟུན་ནས་འོ་མས་བཀྲུས་ནས་སླར་འཚོ་བར་འགྱུར་རོ། །ལེའུ་བཞི་བཅུ་རྩ་བཞི་པའི་རྣམ་པར་བཤད་པའོ།། །།