དཔལ་འཁོར་ལོའི་སྡོམ་པའི་བསྟོད་པ།
ཨིནྡྲབྷཱུཏི།
༄། །རྒྱ་གར་སྐད་དུ། ཤྲཱི་ཙཀྲ་སམྦ་ར་སྟོ་ཏྲཿ། བོད་སྐད་དུ། དཔལ་འཁོར་ལོ་སྡོམ་པའི་བསྟོད་པ། དཔལ་བདེ་མཆོག་འཁོར་ལོ་ལ་ཕྱག་འཚལ་ལོ། །ཞེ་སྡང་ཚུལ་གྱིས་ཞེ་སྡང་འཇོམས་མཛད་ཅིང༌། །ཆོས་དབྱིངས་རྣམ་དག་ཡེ་ཤེས་ངོ་བོ་ཉིད། །རྡོ་རྗེ་མཁའ་འགྲོ་མ་དང་མཉམ་པར་སྦྱོར། །ཞེ་སྡང་རྡོ་རྗེ་ཁྱོད་ལ་ཕྱག་འཚལ་ལོ། །ཧཱུཾ་གི་རྡོ་རྗེ་ལམ་བྱུང་ཆར་སྤྲིན་མདོག །དགའ་བ་རྣམ་དག་དྲག་པོའི་ཞལ་བཞིར་སྣང༌། །གར་གྱི་ཉམས་དགུས་གདུལ་དཀའ་འདུལ་མཛད་པ། །ཧཱུཾ་མཛད་རྡོ་རྗེ་ཁྱོད་ལ་ཕྱག་འཚལ་ལོ། །རྟེན་འབྲེལ་བཅུ་གཉིས་དག་པས་ས་རྣམས་རྫོགས། །བཅུ་གཉིས་ཕྱག་གིས་ཕྱག་མཆན་སྣ་ཚོགས་འཛིན། །ཡུལ་དང་ཡུལ་ཅན་རྣམ་རྟོག་འཇོམས་མཛད་པའི། །ངོ་མཚང་མཚོན་ཆ་བསྣམས་ལ་ཕྱག་འཚལ་ལོ། །ཧཱུཾ་གི་ང་རོས་སྲིད་གསུམ་སྐྲག་མཛད་ཅིང༌། །རྔམ་པའི་རྐན་སྒྲ་ཕཊ་ཀྱི་སྒྲ་སྒྲོགས་པས། །བདུད་དང་བགེགས་ཚོགས་གདུལ་དཀའ་མ་ལུས་འདུལ། །རྣམ་རྟོག་བགེགས་བདུད་འཇོམས་ལ་ཕྱག་འཚལ་ལོ། །སྤྲོས་བྲལ་བདེ་མཆོག་པདྨ་རཱ་གའི་མདོག །སྟོང་ཉིད་འོད་གསལ་དུས་གསུམ་བདེ་གཤེགས་བློ། །རྣམ་རྟོག་དྲ་བ་མ་ལུས་འཇོམས་མཛད་པའི། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ས་ཆུ་མེ་རླུང་འབྱུང་བ་རྣམ་པར་དག །དག་པའི་ཞལ་བཞི་རིགས་ཀྱི་ཡུམ་དུ་སྣང༌། །དྲན་པ་ཉེར་གཞག་བཞི་ཡི་ངོ་བོ་ཉིད། །མཁའ་འགྲོ་མ་སོགས་ཡུམ་ལ་ཕྱག་འཚལ་ལོ། །སེམས་ཀྱི་རྣམ་རྟོགས་བླའི་སྲིད་པ་སྦྱོང༌། །ཞེ་སྡང་རྣམ་དག་ཐུགས་ཀྱི་འཁོར་ལོར་སྣང༌། །ཐོད་པའི་དུམ་བུ་རབ་གཏུམ་མ་ལ་སོགས། །གནས་དང་ཉེ་གནས་རྣམས་ལ་ཕྱག་འཚལ་ལོ། །གསུང་གི་ང་རོས་ས་སྟེངས་
༄། །སྲིད་པ་སྦྱོང༌། །འདོད་ཆགས་རྣམ་དག་གསུང་གི་འཁོར་ལོར་སྣང༌། །མྱུ་གུ་ཅན་དང་ས་སྲུངས་མ་ལ་སོགས། །ཞིང་དང་ཉེ་ཞིང་རྣམས་ལ་ཕྱག་འཚལ་ལོ། །སྐུ་ཡི་རོལ་པས་ས་འོག་སྲིད་པ་སྦྱོང༌། །གཏི་མུག་རྣམ་དག་སྐུ་ཡི་འཁོར་ལོར་སྣང༌། །སྟོབས་པོ་ཆེ་དང་འཁོར་ལོའི་ཤུགས་ཅན་སོགས། །འདུས་སོགས་གནས་ལ་བཞུགས་ལ་ཕྱག་འཚལ་ལོ། །ཡང་དག་ལས་མཐའ་འཚོ་བ་རྩོལ་དྲན། །བདེ་ཆེན་དགའ་བ་མོས་དང་གཙོ་ལ་ཕྱོགས། །གདུག་པའི་ཚོགས་རྣམས་མ་ལུས་སྲུང་མཛད་པ། །སྒོ་བཞི་མ་མོར་སྣང་ལ་ཕྱག་འཚལ་ལོ། །བརྩོན་འགྲུས་རྣམ་ངག་ཡང་དག་སྤོང་བ་བཞི། །གཤིན་རྗེ་བརྟན་མ་ལ་སོགས་མ་མོར་སྣང༌། །ཕྱོགས་གཉིས་འཛིན་པས་སྐུ་མདོག་ཕྱེད་གཟུགས་མ། །རྒྱལ་བའི་ཡུམ་དུ་བསྟན་ལ་ཕྱག་འཚལ་ལོ། །བདེ་གཤེགས་བརྒྱད་ཀྱིས་བསྟན་པའི་སྙིང་པོར་བསྟན། །བདག་མེད་དཀྱིལ་འཁོར་དུར་ཁྲོད་བརྒྱད་དུ་གནས། །བྱང་ཆུབ་རྐྱེན་དུ་ཤིང་བརྒྱད་མངོན་དུ་བྱུང༌། །འཇིག་རྟེན་ཆོས་བརྒྱད་བསྲེགས་ལ་ཕྱག་འཚལ་ལོ། །དཔལ་འཁོར་ལོ་སྡོམ་པའི་བསྟོད་པ། རྒྱལ་པོ་ཆེན་པོ་ཨིནྡྲ་བྷཱུ་ཏིས་མཛད་པ་རྫོགས་སོ།།