ངེས་པར་བསྟན་པ་བདུན་པ།
༄། །དེ་ནས་གོ་ཆ་གཉིས་པོ་ནི། །ཞེས་བྱ་བ་ལ་སོགས་པ་ནི། བཅོམ་ལྡན་འདས་དང་བཅོམ་ལྡན་འདས་མའི་གོ་ཆའི་སྔགས་དྲུག་ཚན་གཉིས་སོ། །ཇི་ལྟར་ཞེ་ན། གསུངས་པ། རྒྱུད་དུ་སྦས་པ་ངེས་བཤད་བྱ། །ཞེས་བྱ་བ་ནི་དྲུག་པ་གཉིས་པོ་དེས་ངེས་པར་བརྒྱན་པ་ནི་རྒྱས་པའི་རྒྱུད་དུ་སྦས་པ་སྟེ། གང་གིས་དེའི་ངེས་པར་གྱུར་པའི་རྒྱུད་དེར་སྦས་པ་རྒྱུད་འདིར་གསལ་བར་བསྟན་པར་བྱ་བའི་དོན་ཏོ། །ཡན་ལག་ཅེས་བྱ་བ་ནི་ཆོས་ཀྱི་བརྡ་སྟེ། ཡན་ལག་ཐམས་ཅད་དོ། །སྦྱར་ཞེས་བྱ་བ་ནི་ཨོཾ་ཧ་ལ་སོགས་པས་སྙིང་ག་ལ་སོགས་པ་རྣམས་སུ་སྦྱར་བར་བྱའོ་ཞེས་དགོངས་སོ། །དང་པོ་རྡོ་རྗེ་སེམས་དཔའ་སྟེ། །ཞེས་བྱ་བ་ནི་སྙིང་གར་རྡོ་རྗེ་སེམས་དཔའ་དངོས་སུ་འམ་
༄། །ལྷག་པར་མོས་པས་བལྟ་བར་བྱའོ་ཞེས་དགོངས་སོ། །དེ་ལྟར་རྣམ་པར་སྣང་མཛད་ལ་སོགས་པ་དང༌། རྡོ་རྗེ་ཕག་མོ་ལ་སོགས་པ་རྗེས་ཐོགས་སུ་ཡོངས་སུ་བསམ་པར་རིག་པར་བྱའོ། །ཡན་ལག་ནི་ཞེས་བྱ་བ་ནི་ཡན་ལག་ཐམས་ཅད་དོ། །དཔའ་བོ་གཉིས་མེད་རྣལ་འབྱོར་མ། །ཞེས་བྱ་བ་ནི་དཔའ་བོ་དང་ལྷན་ཅིག་གཉིས་སུ་མེད་པའི་ཡེ་ཤེས་ཀྱི་རྣལ་འབྱོར་གྱིས་སྙོམས་པར་འཇུག་པའོ། །དེ་གང་ལ་ཡོད་པ་དེ་ལ་དཔའ་བོ་གཉིས་སུ་མེད་པའི་རྣལ་འབྱོར་མ་ཞེས་དགོངས་པའོ། །འདི་ནི་ངེས་པར་བསྟན་པ་བདུན་པའོ།། །།