ལེའུ་བཅུ་བཞི་པའི་བཤད་པ།
༄། །ད་ནི་ལག་པའི་མཆོད་པ་ལ་སོགས་པ་བསྟན་ཏེ། དེ་ནས་ཞེས་པ་ནི་སྔ་མ་བཞིན་ནོ། །རྒྱུད་ཐམས་ཅད་དུ་སྦས་པ་ནི་བྱ་བ་ལ་སོགས་པར་རོ། །དེར་སྦས་པས་ཆོ་ག་ནི་ལག་མཆོད་དོ། །སངས་རྒྱས་བཞི་ནི་བུམ་པ་བཞིའོ། །དེའི་གདན་ལ་བཞུགས་པ་བདུད་རྩི་ལྔའོ། །བདུད་རྩི་ལྔ་བོ་དེ་ཡང་སངས་རྒྱས་ལྔ་ཡབ་ཡུམ་གྱི་ངོ་བོ་སྟེ། རྡོ་རྗེ་ལ་སོགས་པ་ནི་མི་བསྐྱོད་པ་ལ་སོགས་པའི་སངས་རྒྱས་ལྔའོ། །མཁའ་འགྲོ་མ་ལ་སོགས་པ་ནི་ཡུམ་ལྔའོ། །རྡོ་རྗེའི་དཔའ་བོ་ནི་ཉི་ཤུ་རྩ་བཞི། དེའི་དབང་ཕྱུག་ནི་གཙོ་བོ་སྟེ་རིགས་ལྔའོ། །མེ་ལོང་ལ་སོགས་པའི་ཡེ་ཤེས་བཞིའི་རྣམ་པ་སངས་རྒྱས་བཞི་བུམ་པ་བཞིའོ། །གཉིས་མེད་གཉིས་སུ་མེད་སྦྱོར་ཉིད་ནི་ཐབས་དང་ཤེས་རབ་ལྔ་གཉིས་སུ་མེད་པའོ། །གཉིས་མེད་ནི་ལྷ་མོ་བཞི་དང་བུམ་པ་བཞིའོ། །རྫས་ནི་མེ་ཏོག་ལ་སོགས་པ་སྟེ། མེ་ཏོག་ནི་རང་བྱུང་སྟེ། སོགས་ནི་ཤ་ལྔ་བདུད་རྩི་ལྔའོ། །རེ་རེ་ནས་ནི་ཞེས་པ་ནི་ལྷ་རྣམས་ལ་རིམ་གྱིས་སྔགས་ཀྱིས་དབུལ་ཞེས་བའོ།། ཕྱག་རྒྱ་ནི་ལྔའོ། །སོགས་ནི་གོ་ཆ་དྲུག་གོ །མཆོག་ལུས་ནི་ལྷའི་འཁོར་ལོའོ། །ཕ་རོལ་སོན་པ་ཞེས་པ་རྣམས་ནི་གོ་ཆ་དྲུག་གི་ལྷ་ནི་ཕ་རོལ་ཏུ་ཕྱིན་པ་དྲུག་སྟེ། ལག་པའི་མཆོད་པའི་དུས་སུ་ལག་པ་ལ་དགོད་པའོ། །སོགས་ཡེ་ཤེས་ཅན་ཞེས་པ་ནི་བདུད་རྩི་མྱང་བ་དབང་བསྐུར་བ་བློ་ལྡན་གྱི་རྣལ་འབྱོར་པ་སྟེ། ལག་པ་གཡོན་པའི་སོར་མོ་རྣམས་དང༌། སེན་མོ་ལ་དཔའ་བོ་དྲུག་བཀོད་ལ། ལག་མཐིལ་དུ་ཡང་དགོད་དོ། །རྣལ་འབྱོར་མ་དྲུག་གོ་རིམས་བཞིན་ཞེས་པ་ནི་གཡས་གཡོན་ལ་དགོད་དོ། །རྡོ་རྗེ་སེམས་སོགས་གཡས་པ་ལ་དགོད་པའོ། །ལག་པའི་མཆོད་པ་ལ་སོགས་པས་བསྟོད་ཅེས་པ་ནི། ལག་པའི་མཆོད་པ་དང༌། གཏོར་མ་དང་ཚོགས་བྱའོ། །ལྔ་པོ་བདུད་རྩི་ལྔ་དང་བསྲེ་བ་ནི་བདུད་རྩིའི་འོ་མ་དང་བྱང་སེམས་མཆོད་པ་དེས་ཞེས་པ་ནི་ཨོཾ་ཨཱཿ་ཧཱུཾ་གསུམ་གྱིས་བྱིན་གྱིས་
༄། །བརླབས་བའོ། །སྤྱོད་དང་ཞེས་པ་ཕན་ཡོན་ཏེ། དབུལ་བའི་འདོད་དོན་ནི་རང་ལ་གང་མེད་པའི་དོན་བསྒྲུབ་པར་འདོད་ནས་བསྒྲུབས་ན་འགྲུབ་ཅེས་བྱ་བའོ། །སེམས་ནི་གཞན་དུ་གྱུར་པ་དང༌། །ཞེས་པ་ནི་སེམས་གཡེངས་བ་དང་མ་གཡེངས་པ་དང་བཅས་ཀྱང་རུང་སྟེ་འགྲུབ་ཅེས་པའོ། །དཔའ་བོ་འདི་ནི་ཞེས་པ་འདི་རྣམས་ཀྱིས་ནི་མཚན་ཉིད་དང་ལྡན་པའི་དཔའ་བོ་དང་རྣལ་འབྱོར་མས་ཚོགས་འཁོར་བྱས་ནས་དངོས་གྲུབ་ཐོབ་ཅེས་པའོ། །ལེའུ་བཅུ་བཞི་པའི་བཤད་པའོ།། །།