ལེའུ་བཅུ་དྲུག་པའི་བཤད་པ།
༄། །ད་ནི་ཚོགས་འཁོར་བསྟན་ཏེ། དེ་ལ་ལྔ་ལས་དང་པོ་དགོས་པ་བསྟན་བ་ནི། གཞན་ཡང་ཞེས་པ་རྣམས་ཏེ། དུས་མཐར་དངོས་གྲུབ་མི་ཐོབ་སྟེ། །ཞེས་པ་ནི་སྙིགས་མ་ལྔའི་དུས་སུ་རྣལ་འབྱོར་བས་བསྒྲུབས་ཀྱང་འབྲས་བུ་ཐོབ་པར་དཀའ་ཞེས་པའོ། །དེ་ཅིའི་ཕྱིར་ཞེ་ན། བློ་ནི་ཞེས་པ་རྣམས་སྨོས་ཏེ། བློ་གཞན་དུ་གྱུར་པ་ནི་ཉོན་མོངས་པ་མང་བས་སོ། །བདེ་བ་ཉམས་བག་ཏུ་མི་འགྲུབ་པས་སྡུག་བསྔལ་དང་བཅས་པར་གྱུར་བས་ན་དེ་ལྟ་བུའི་བསྐྱར་ཆོག་ཏུ་ཚོགས་འཁོར་བསྟན་པའོ། །འབད་དེ་ཞེས་པ་རྣམས་ཀྱིས་འབྲས་བུ་བསྟན་ཏེ། འདོད་བྱ་ནི་དངོས་གྲུབ་གསུམ་མོ། །དེ་ཉིད་ཀྱི་བདག་རྣལ་འབྱོར་པ་ཇི་ལྟར་ཧེ་རུ་ཀའི་ཡེ་ཤེས་ཡིན་ཞེས་པ་ནི། དཔེར་ན་ཐབས་ཕྱག་རྒྱ་བཞིས་རྣལ་འབྱོར་པ་ལ་ཧེ་རུ་ཀའི་ཡེ་ཤེས་སྐྱེ་བ་བཞིན་དུ་རྣལ་འབྱོར་པ་ལ་མངོན་ཤེས་ཀྱང་སྐྱེ་སྟེ། ཅི་འདོད་པར་ནི་ཞེས་པ་ལ་སོགས་པས་བསྟན་ཏོ། །ཆོས་འདི་ཞེས་པ་ལ་སོགས་པས་བསྟན་ཏེ། ཆོས་འདི་ཞེས་པ་རྣམས་མཇུག་སྡུད་དོ། །ད་ནི་ཐབས་བསྟན་པ་ནི་ཤེས་རབ་ཅེས་པ་རྣམས་ཏེ། ཤེས་རབ་ཆེན་པོར་བྱས་པ་ཚོགས་འཁོར་བྱེད་པའི་རྣལ་འབྱོར་པའོ། །གཉིས་མེད་ནི་རྟོགས་པ་མེད་པའོ། །བརྟུལ་ཞུགས་ནི་ལྷའི་ཆ་ལུགས་སུ་ཞུགས་པའི་རྣལ་འབྱོར་རྣམས་སོ། །ཨཱ་ལི་ནི་ཤེས་རབ་ཀཱ་ལི་ནི་ཐབས་ཏེ། རྒྱུ་རྐྱེན་ཚོགས་པ་འདི་མ་རྟོག་
༄། །པར་ཆོས་ཤེས་པ། འབྲས་བུ་འདོད་པའི་གང་ཟག་གིས་ཐབས་གཞན་བརྟེན་པ་དོན་མེད་ཅེས་པ་སྟེ། དེ་ཡང་རྩ་བའི་རྒྱུད་ལས། ཤེས་རབ་ཐབས་ཀྱི་སྦྱོར་ཇི་བཞིན། །ཞེས་གསུངས་སོ། །རྒྱུད་དང་བརྟེན་པ་གཞན་ལས་བརྟེན་པ་དག་གིས་དོན་ཀྱང་བདེན་པ་གཉིས་སུ་འདུས་པར་བསྟན་པ་ནི། མདོ་དང་ཞེས་པ་ལ་སོགས་པ་སྟེ། མདོ་སྡེ་ལ་སོགས་པ་ཐེག་པ་བྱེ་བྲག་དང༌། སེམས་ཅན་ལ་བཤད་པ་ནི་བྱང་ཆུབ་ཐོབ་པའི་ཕྱིར་བཤད་པ་ཡིན་ལ། དེ་ཡང་ཚོགས་གཉིས་ལ་བརྟེན་ཞེས་པ་ནི་ཚོགས་གཉིས་ཞེས་པ་རྣམས་སོ། །ཐམས་ཅད་བདེན་པ་གཉིས་ལ་ནི། །བརྟེན་པར་ངས་ནི་བཤད་པ་ཞེས་པ་ནི་བསྐལ་པ་བར་མ་ལ་མཚན་ཉིད་ཀྱི་ཐེག་པ་བཤད་པའི་དུས་སུའོ། །དེ་དག་ཏུ་བདེན་པ་གཉིས་ལ་བདེན་པར་བཤད་ཀྱང་རྒྱུད་ལ་མངོན་སུམ་དུ་སྐྱེ་བའི་ཐབས་མེད་དེ། གསང་སྔགས་ཀྱི་ཐེག་པ་འདི་འདིར་ནི་མངོན་སུམ་སྟོན་ཏོ། །སྤྲོས་པ་ཀུན་ནི་བསྐྱེད་རིམ་ལྷའི་བསྒོམ་པའོ། །སྤྲོས་པ་མེད་པར་བྱ་བ་ནི་བསྐྱེད་རིམ་ལ་བརྟེན་ནས་ཐ་མལ་པའི་རྣམ་པར་རྟོག་པ་བཀག་ལ་རྫོགས་རིམ་བསྒོམ་མོ། །ད་ནི་ཐབས་ཀྱི་རྒྱུད་ལྔ་དང་ཤེས་རབ་ཀྱི་རྒྱུད་བཞི་ལས་བསྟན་པ་ནི་རྒྱུད་རྣམས་ཀུན་དུ་ཞེས་བས་བསྟན་ཏེ། ཐབས་དང་ཤེས་རབ་ཀྱི་རྒྱུད་རྣམས་སུ་གསང་བའི་སྤྲུལ་པ་ཞེས་པ་ལྔ་དང༌། དེ་ཉིད་ཅེས་པ་སྟོང་པ་ཉིད་དང༌། སེམས་ནི་རང་བཞིན་བརྒྱད་ཅུའོ། །ལོངས་སྤྱོད་ནི་འདོད་ཡོན་ལྔའོ། །ད་ནི་ཁྱད་པར་དུ་བདེ་མཆོག་འཁོར་ལོ་བསྟན་པ་ནི། བློ་ལྡན་ཞེས་པ་ལ་སོགས་པ་སྟེ། འཁོར་ལོ་སྡོམ་པ་ལ་རྣམ་པར་སྤྱོད་པ་ནི་ལྷ་དྲུག་ཅུ་རྩ་གཉིས་སོ། །རྣལ་འབྱོར་པའི་མཚན་མ་ནི་གདོང་བརྙན་ནོ། །གཟུགས་ཁ་དོག་དང་དབྱིབས། བརྡ་དྲུག་ཁྱིམ་ལྔ་ནི་མཁའ་འགྲོ་མ་བཞི་དང་ཕག་མོའི་གནས་ཡུལ་ཉི་ཤུ་རྩ་བཞི་སྟེ། དེ་དག་ཏུ་རྣལ་འབྱོར་མ་ནི་ལྔ་ཉིད་གནས། །ཞེས་པ་ནི། གོང་གི་ཁྱིམ་ལྔར་རྣལ་འབྱོར་མ་ལྔ་ལྔ་ལྷའི་ཆ་བྱད་ཅན་བཞག་པའོ། །བསྒྲུབ་པར་བྱ་བའི་གནས་ཀུན་ཞེས་པ་ནི། གནས་རྩ་བཞིར་རྣལ་འབྱོར་ཕོ་མོ་རྩ་བཞི་ལྷའི་ཆ་བྱད་ཅན་དགོད་པའོ། །ཇི་ལྟར་སྔར་བཤད་ཅེས་པ་ནི་ལེའུ་ལྔ་པ་དང་དྲུག་པར་བཤད་པའི་
༄། །ལྷའི་གྲངས་དང་མཉམ་པའི་བརྟུལ་ཞུགས་ཅན་ཞེས་པ་ནི་རྣལ་འབྱོར་པའོ། །དཔའ་བོའི་སྔགས་ཚོགས་ཞེས་པ་ནི་ལུས་ལ་དགོད་པའོ། །ཤར་གྱི་འདབ་མར་ཞེས་པ་ནི་ཁྱད་པར་དུ་ས་འོག་གི་དངོས་གྲུབ་བསྒྲུབ་པའི་ཕྱིར་ངེས་བརྗོད་ནས་འབྱུང་བ་བཞིན་བྱ་བའོ། །ཧེ་རུ་ཀ་དཔལ་གོ་འཕང་ནི་ཆ་བྱད་དོ། །ལུས་ངག་ཡིད་ཀྱི་ལས་ནི་སྐུ་གསུང་ཐུགས་ཀྱི་དངོས་གྲུབ་བོ། །བཤད་པས་ས་འོག་སྐུའི་དངོས་གྲུབ་པོ། མ་བཤད་པ་གསུང་དང་ཐུགས་སོ། །ལེའུ་བཅུ་དྲུག་པའི་བཤད་པའོ།། །།