ནམ་མཁའ་དང་མཉམ་པ་ཞེས་བྱ་བའི་རྒྱ་ཆེར་འགྲེལ་པ།
རིན་ཆེན་འབྱུང་གནས་ཞི་བ།
ལེའུ་དང་པོ། དེ་ཁོ་ན་ཉིད་གསལ་བར་བྱེད་པ།
༄། །རྒྱ་གར་སྐད་དུ། ཁ་ས་མ་ན་ནཱ་མ་ཊཱི་ཀཱ །བོད་སྐད་དུ། ནམ་མཁའ་དང་མཉམ་པ་ཞེས་བྱ་བའི་རྒྱ་ཆེར་འགྲེལ་པ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐུ་གསུམ་རྣམས་ཀྱིས་ནམ་མཁའ་མཉམ་པའི་དང༌། །དང་པོའི་མཆོག་ལ་རབ་ཏུ་ཕྱག་འཚལ་ནས། །དེ་ཡི་དོན་དང་ནམ་མཁའ་མཉམ་རྒྱུད་ཀྱི། །མཁའ་མཉམ་རྒྱ་ཆེར་འགྲེལ་པ་བདག་གིས་བྱ། །འདིར་བཅོམ་ལྡན་འདས་རྡོ་རྗེ་འཛིན་པ་ནི། སངས་རྒྱས་རྣམས་ཀྱི་བྱང་ཆུབ་སྟེ། དེ་ཡང་རྟེན་ཡོངས་སུ་གྱུར་པའི་མཚན་ཉིད་དོ། །རྟེན་ནི་ལུས་སོ། །དེ་ཡང་རྣམ་པ་གསུམ་སྟེ། དེ་ལ་སེམས་ཀྱི་རྒྱུན་གྱི་མཚན་ཉིད་ཀྱི་རྟེན་ཇི་སྲིད་ཀུན་ནས་ཉོན་མོངས་པ་ཅན་གྱི་ཆོས་ཀྱི་ས་བོན་དེའི་བག་ཆགས་རྣམས་ཀྱིས་ཏེ། གནས་ངན་ལེན་ཞེས་བྱ་བའི་རྟེན་དེ་སྲིད་ཀུན་གཞིའོ། །ཕྱིས་འཕགས་པའི་ལམ་སྤྲོས་པ་མེད་པ་ཡུན་རིང་དུ་བསྒོམས་པ་རྣམས་ཀྱིས་ཀུན་གཞི་གནས་དང༌། ལུས་དང་ལོངས་སྤྱོད་དུ་སྣང་བའི་རྣམ་པར་ཤེས་པ་དེ་ཡོངས་སུ་ཟད་པ་དང༌། གཞན་ཡང་ཀུན་ནས་ཉོན་མོངས་པ་ཅན་གྱི་ཆོས་སྐྱེས་པ་རྣམས་ནུབ་པ་དང༌། མ་སྐྱེས་པ་རྣམས་ཤིན་ཏུ་མི་སྐྱེ་བའི་བདག་ཉིད་ནི་ལྡོག་པ་ངེས་པའོ། །ནམ་མཁའ་རྣམ་པར་དག་པ་ལྟ་བུ་སྤྲོས་བ་མེད་པ་
༄། །རབ་ཏུ་གསལ་བའི་བདག་ཉིད་མཐའ་ཡས་པའི་ངེས་པ་སྟེ། ཡོངས་སུ་གྱུར་པ་དེ་ནི་སངས་རྒྱས་རྣམས་ཀྱི་གནས་ངན་ལེན་གྱི་རྟེན་ཡོངས་སུ་གྱུར་པའོ། །དེ་ཡང་དེ་རྣམས་ཀྱི་ཟག་བ་མེད་པའི་ཁམས་སུ་བརྗོད་པར་བྱ་སྟེ། སངས་རྒྱས་ཀྱི་ཟག་པ་མེད་པའི་ཆོས་རྣམས་ཀྱི་ས་བོན་འཛིན་པའི་ཕྱིར་རོ། །དེ་ཡང་དེ་རྣམས་ཀྱི་ལམ་གྱི་རྟེན་ཏེ། དེ་ཡོངས་སུ་གྱུར་པ་ནི་འཇིག་རྟེན་པའི་ངོ་བོ་ཤིན་ཏུ་ལྡོག་པ་དང༌། འཇིག་རྟེན་ལས་འདས་པ་ཡང་ཤིན་ཏུ་འཇུག་པའོ། །ཆོས་ཐམས་ཅད་ཀྱི་དེ་བཞིན་ཉིད་ཀྱང་དེ་རྣམས་ཀྱི་རྟེན་ཡིན་ལ། དེ་ཡོངས་སུ་འགྱུར་པ་ནི་གློ་བུར་གྱི་སྒྲིབ་པ་ཐམས་ཅད་ཤིན་ཏུ་རྣམ་པར་དག་པའོ། །གང་སངས་རྒྱས་ཀྱི་གནས་ངན་ལེན་གྱི་རྟེན་དང༌། ལམ་གྱི་རྟེན་དང༌། དེ་བཞིན་ཉིད་ཀྱི་རྟེན་ཡོངས་སུ་གྱུར་པའོ། །དེ་ཉིད་དེ་རྣམས་ཀྱི་བྱང་ཆུབ་དང༌། དེ་ཉིད་ཆོས་ཀྱི་སྐུ་དང༌། སངས་རྒྱས་ཀྱི་ཆོས་རྣམས་ཀྱི་སྐུའི་རྟེན་ཞེས་བྱ་ཞིང་རང་བཞིན་གྱི་སྐུ་ཞེས་བརྗོད་པར་བྱ་སྟེ། དེ་བཞིན་ཉིད་དང༌། རབ་ཏུ་གསལ་བའི་རང་བཞིན་གྱི་ངོ་བོར་ཤིན་ཏུ་གནས་པའི་ཕྱིར་རོ། །དེ་ནི་འདིར་སངས་རྒྱས་ཀྱི་བྱང་ཆུབ་ཀྱི་མཚན་ཉིད་བཅོམ་ལྡན་འདས་རྡོ་རྗེ་འཛིན་པའི་རང་བཞིན་གྱིས་ནམ་མཁའ་དང་མཉམ་པའོ། །རང་བཞིན་ནི་འདིར་རང་བཞིན་གྱི་སྐུའོ། །དེ་ལྟ་བས་ན་ནམ་མཁའ་དང་མཉམ་པ་ཉིད་དེ་སྣང་བ་མེད་པ་མཐའ་ཡས་པ་ཤིན་ཏུ་རྣམ་པར་དག་པ་རབ་ཏུ་གསལ་བ་དང༌། དེ་བཞིན་ཉིད་ཀྱི་རང་བཞིན་ཡིན་པའི་ཕྱིར་རོ། །ལོངས་སྤྱོད་རྫོགས་པས་ནི་གང་ཡང་རྣམ་པ་སྣ་ཚོགས་པའི་ཕྱིར་རྣམ་པ་ཇི་ལྟ་བ་བཞིན་གྱི་ནམ་མཁའ་དང་མཉམ་པ་ནི་མ་ཡིན་ལ། འོན་ཀྱང་ཇི་ལྟ་བ་བཞིན་སྣང་བའི་ནམ་མཁའ་དང་མཉམ་པ་ཉིད་ཆོས་ཀྱི་སྐུ་ནམ་མཁའ་དང་མཉམ་པའི་དེ་ཁོ་ན་ཉིད་ཀྱི་ཆོས་དེ་སྒྲིབ་པ་མེད་པ་ཉམས་སུ་མྱོང་ལ། ལོངས་སྤྱོད་རྫོགས་པའི་སྐུས་དེ་བཞིན་དུ་ཡོངས་སུ་སྤྱོད་པ་ཉམས་སུ་མྱོང་བ་དང་རྒྱུ་མཐུན་པའི་ཕྱིར་རོ། །ཇི་ལྟར་ན་དེ་བཞིན་དུ་ཡོངས་སུ་གཅོད་པ་ཡིན་ཞེ་ན། གཟུང་བ་དང་འཛིན་པ་དེར་སྣང་བ་མེད་པར་ཡོངས་སུ་གཅོད་པའི་ཕྱིར་རོ། །འདི་ལྟ་སྟེ་བྱིས་པ་རྣམས་ཀྱིས་བུམ་པ་ལ་སོགས་པ་ཉམས་སུ་མྱོང་བ་དང་རྒྱུ་མཐུན་པ་ངེས་པ་
༄། །ཡོད་བ་དང་ཇི་ལྟར་བྱིས་པ་རྣམས་ཀྱིས་བུམ་པའི་རྣམ་པ་ཤིན་ཏུ་གསལ་བར་ཉམས་སུ་མྱོང་བ་ཉིད་བརྗོད་པ་དང་བྲལ་བ་ལ་ཡོད་པ་ཉིད་དུ་ཡོངས་སུ་གཅོད་དེ། སྔོན་ངེས་པའི་བག་ཆགས་ཀྱི་སྟོབས་ལས་སོ། །དེ་བཞིན་དུ་སངས་རྒྱས་རྣམས་ཀྱིས་བརྗོད་པ་མེད་ཀྱང་ལོངས་སྤྱོད་རྫོགས་པའི་སྐུ་རང་གི་རྣམ་པ་མེད་པ་ཉིད་ཡོངས་སུ་གཅོད་པའོ། །ཡོངས་སུ་གཅོད་པ་དེ་ཉིད་རབ་ཏུ་སྣང་བའི་སྒྲས་བཤད་པར་བྱའོ། །རབ་ཏུ་སྣང་བ་ནི་རྣམ་པ་གཉིས་ཏེ། ཡང་དག་པར་རིག་པ་དང་ཉེ་བར་མཚོན་པའོ། །དེའི་ཕྱི་རོལ་ལོངས་སྤྱོད་རྫོགས་པའི་སྐུ་ཡང་སངས་རྒྱས་ཀྱི་སྣང་བ་ཇི་ལྟ་བ་བཞིན་ནམ་མཁའ་དང་མཉམ་པ་ཉིད་དོ། །སྤྲུལ་པའི་སྐུ་ཡང་ཤིན་ཏུ་ནམ་མཁའ་དང་མཉམ་པ་སྟེ། སྒྱུ་མའི་རྣམ་པས་ཀྱང་རང་གིས་སྤྲུལ་པའི་སྐུ་ལ་སོགས་པ་མེད་པ་ཡོངས་སུ་གཅོད་པའོ། །དེ་ཡང་རྡོ་རྗེ་འཛིན་པ་སངས་རྒྱས་ཐམས་ཅད་སྐྱེད་པར་བྱེད་པའོ། །དེ་དག་ཀྱང་ནམ་མཁའ་དང་མཉམ་པ་སྟེ། རྒྱུ་མཐུན་པའི་ཕྱིར་ཞེས་བྱ་བ་གྲུབ་པའི་མཐའོ། །འདིར་གྲུབ་པའི་མཐའ་ལ་བརྒལ་བ་རྡོ་རྗེ་འཛིན་པ་ནི་སངས་རྒྱས་ཀྱི་ནི་བསྐྱེད་པ་མ་ཡིན་ནོ། །འོ་ན་གང་ཡིན་ཞེ་ན། སངས་རྒྱས་རྣམས་ཀྱི་སྲས་ཡིན་ཏེ། སངས་རྒྱས་ལྔའི་དབུ་རྒྱན་ཡོད་པའི་ཕྱིར་རོ། །དེ་རྣམས་དང་ལྷ་མོའི་འཁོར་ལོ་ལ་སྐུ་དང་གསུང་དང་ཐུགས་སུ་སྦྱོར་བའི་ཕྱིར་སྤྲོས་པ་ཉིད་དང༌། འདི་སྤྲོས་པ་འཇུག་པར་བྱེད་པའི་གཞུང་ལུགས་ཀྱང་ཡིན་ནོ། །ནམ་མཁའ་དང་མཉམ་པ་ཡང་མ་ཡིན་ཞིང༌། ནམ་མཁའ་མཉམ་པའི་གཞུང་ལུགས་རབ་ཏུ་འཇུག་པར་བྱེད་པ་ཡང་མ་ཡིན་ནོ་ཞེས་བྱའོ། །འདིའི་ལན་གསུངས་པ། སངས་རྒྱས་ལྔའི་ཞེས་བྱ་བ་ལ་སོགས་པ་ལ། །སངས་རྒྱས་ལྔ་ཡི་དབུ་རྒྱན་རྟེན། །ཞེས་བྱ་བ་ནི་དབུ་རྒྱན་གནས་པའོ། །གང་ཞིག་ཅེས་བྱ་བ་ནི་རྡོ་རྗེ་སེམས་དཔའ་ལ་བརྗོད་དོ། །སྐུ་གསུང་ཐུགས་ཀྱི་གསང་བ་གསུམ་དང་རྣལ་འབྱོར་མའི་དཀྱིལ་འཁོར་བསྡུས་པ་ནི་སྲིད་པ་གསུམ་མོ། །ཡང་ན་བུད་མེད་ཅེས་བྱ་སྟེ། །རྣལ་འབྱོར་མ་རྣམས་སོ། །དེ་རྣམས་ཀྱི་སྲིད་པ་ནི་དཀྱིལ་འཁོར་ཏེ་སྲིད་པ་གསུམ་མོ། །དེ་ཡང་གང་གི་སྙིང་བོ་ནི་རྫས་ཏེ། རྡོ་རྗེའི་གཞུང་ལུགས་ཡིན་པའི་ཕྱིར་རོ། །
༄། །དཔལ་གསང་བ་འདུས་པར་ཇི་སྐད་གསུངས་པ་བཞིན་ཏེ། གཏི་མུག་ཞེ་སྡང་འདོད་ཆགས་ཀྱི། །རྟག་ཏུ་རྡོ་རྗེ་དགའ་མར་གནས། །ཐབས་ནི་སངས་རྒྱས་ཐམས་ཅད་དེ། །རྡོ་རྗེ་ཐེག་པ་ཞེས་བྱར་གྲགས། །འཁོར་ལོས་སྒྱུར་བ་དྲུག་གི་དང་པོར་སངས་རྒྱས་རྡོ་རྗེ་སེམས་དཔའོ། །འཁོར་ལོས་སྒྱུར་བའི་ཕྱིར་དབུ་རྒྱན་དང་བཅས་པ་དང༌། དཀྱིལ་འཁོར་དང་བཅས་པའོ། །དེ་ཡང་བཅོས་མ་ནི་བཅོམ་པར་བྱེད་པ་སྟེ། ཀུན་རྫོབ་ཀྱི་ངོ་བོ་ཡོད་པ་དེ་ལ་དེ་སྐད་ཅེས་བྱའོ། །ཇི་ལྟ་བུར་གྱུར་པ་ཡིན་ན། གང་སྤྱོད་པ་དེ་ནི་ཐ་སྙད་དང་ཀུན་རྫོབ་སྟེ། རང་གི་སྐུ་དང་གསུང་དང༌། ཐུགས་དང་དབུ་རྒྱན་གྱི་སངས་རྒྱས་ལ་སོགས་པའི་དབུ་རྒྱན་ནོ། །དེ་ནི་ནམ་མཁའ་དང་མཉམ་པ་ནི་ནམ་མཁའ་དང་མཉམ་པ་ཉིད་ཀྱིས་སྣང་བའི་ཕྱིར་རོ། །ཇི་ལྟར་ཡིན་ཞེ་ན་རྣམ་པ་མེད་པ་ཉིད་ཀྱིས་ཡོངས་སུ་གཅོད་པའི་ཕྱིར་རོ། །དེ་ལྟ་བས་ན་བཅོམ་ལྡན་འདས་ཉིད་ཀྱང་ནམ་མཁའ་དང་མཉམ་པའོ། །ནམ་མཁའ་དང་མཉམ་པ་ཡང་རྡོ་རྗེའི་གཞུང་ལུགས་ཀྱིས་འཇུག་པར་བྱེད་པའོ། །ཉིད་ཀྱིས་སངས་རྒྱས་རྣམས་ཀྱི་དབུ་རྒྱན་དང་ཀུན་རྫོབ་ཀྱི་དེ་ཉིད་ཀྱིས་བྱས་པས་སོ། །ཡང་ཇི་ལྟར་ཡིན་ཞེ་ན། སངས་རྒྱས་རྣམས་སྤྲོས་པས་སོ། །དེ་ལྟ་བས་ན་སངས་རྒྱས་རྣམས་སྐྱེད་པར་བྱེད་པ་ཉིད་དོ། །འདི་སངས་རྒྱས་ཀྱི་སྲས་སུ་ཡང་བརྗོད་པར་བྱ་བ་མ་ཡིན་ནམ། ཇི་ལྟར་ཡིན་ཞེ་ན། རེས་འགའ་བྱང་ཆུབ་སེམས་དཔའི་ངོ་བོ་ཡིན་པའི་ཕྱིར་ལ། བྱང་ཆུབ་སེམས་དཔའ་ནི་སངས་རྒྱས་རྣམས་ཀྱི་སྲས་ཡིན་པའི་ཕྱིར་རོ། །སྔགས་ཀྱི་ལུགས་ལ་བཅོམ་ལྡན་འདས་ཀྱི་སྐུ་དང་གསུང་དང་ཐུགས་ཀྱི་དཀྱིལ་འཁོར་བསྒོམ་པར་བྱ་བ་མ་ཡིན་ནམ། དེ་ལྟ་བས་ན་སྣང་བ་མེད་པའི་ཆོས་ཀྱི་སྐུ་ཐོབ་པར་བྱེད་པ་མ་ཡིན་ནོ། །དེ་མ་ཐོབ་ན་དེ་ལ་བརྟེན་པའི་ལོངས་སྤྱོད་རྫོགས་པ་དང་སྦྲུལ་པའི་སྐུ་ཤིན་ཏུ་ཡང་ཐོབ་པར་བྱེད་པ་མ་ཡིན་ནོ། །ཡང་ན་དེ་བསྒོམ་པ་གཞན་ཡིན། འོ་ན་དེ་སྨྲོས་ཤིག་ཅེས་བྱའོ། །དེ་ལྟ་བས་ན་གསུངས་པ། གལ་ཏེ་ཞེས་བྱ་བ་ལ་སོགས་པ་ལ་འདི་ནི་ཞེས་བྱ་བ་ནི་ཕྱི་མ་ཕྱེད་ཀྱིས་བཤད་པར་བྱའོ། །བསྒོམ་པ་ཞེས་བྱ་བ་ནི་རྣམ་པས་སོ། །
༄། །སེམས་ནི་རྣལ་འབྱོར་པའོ། །འགོག་པ་ནི་མཉམ་པར་གཞག་པར་བྱ་བའོ། །འདིའི་དོན་དམ་པ་ནི་རྡོ་རྗེ་སེམས་དཔའ་སྟེ། བསྒོམ་པ་ནི་དེ་ལས་གཞན་དུ་མ་ཡིན་ནོ། །བསྒོམ་པ་གང་ཡིན་ཞེ་ན། ཤེས་བྱ་ཞེས་བྱ་བ་ལ་སོགས་པ་གསུངས་ཏེ། ཤེས་བྱ་ནི་སེམས་ལས་ཕྱི་རོལ་པ་སེམས་ཀྱིས་གཟུང་བར་བྱའོ། །དེའི་རང་བཞིན་ཡིན་པ་ནི་ཤེས་བྱའི་རང་བཞིན་ནོ། །དེ་ནི་ངེས་པར་མ་མཐོང་བ་ནི་དམིགས་པར་བྱ་བ་མ་ཡིན་པ་དང༌། བརྟག་པར་བྱ་བ་མ་ཡིན་པའོ། །རྣམ་པར་ཤེས་པའི་རང་བཞིན་དུ་གྱུར་པའི་རྣམ་པ་ཡང་མེད་དེ། གཅིག་དང་དུ་མའི་དེ་སྤྱད་པ་མི་བཟོད་པའི་ཕྱིར་རོ། །འདི་ལྟར་གཟུང་བ་དང་འཛིན་པ་མི་དམིགས་པས་གཉིས་སུ་མི་དམིགས་པའི་ངོ་བོ་ནི་ཆོས་ཀྱི་སྐུ་འཐོབ་པའི་རྒྱུའོ། །སྐུ་གསུང་ཐུགས་བསྒོམ་པ་ནི་ལོངས་སྤྱོད་རྫོགས་པ་དང་སྤྲུལ་པའི་སྐུ་དག་གིའོ། །དེའི་ཕྱིར་འདི་དེའི་བསྒོམ་བ་སྟེ། མྱུར་དུ་སྐུ་གསུམ་ཐོབ་པར་བྱེད་པ་ཞེས་བྱའོ། །འདིའི་རྡོ་རྗེ་འཛིན་པའི་བསྒོམ་པ་ལྷ་ཡིན་ན་སངས་རྒྱས་ལ་སོགས་པའི་ཇི་ལྟར་བསྒོམ་པ་ཡིན་ཞེ་ན། སངས་རྒྱས་ཞེས་བྱ་བ་ལ་སོགས་པ་ལ། སངས་རྒྱས་ཀྱི་དང་རྡོ་རྗེ་འཛིན་པ་དང༌། །རིན་ཆེན་ཏོག་དང་པདྨ་ལྷན་ཅིག་འཇུག ། ལྷ་འདི་རྣམས་དང་རང་བཞིན་མེད། །དང་པོ་སངས་རྒྱས་མཁའ་རང་བཞིན། །སངས་རྒྱས་ཞེས་བྱ་བ་ནི་རྣམ་པར་སྣང་མཛད་ཀྱིའོ། །རྡོ་རྗེ་འཛིན་པ་ཞེས་བྱ་བ་ནི་མི་བསྐྱོད་པའིའོ། །རིན་ཆེན་ཏོག་ཅེས་བྱ་བ་ནི་རིན་ཆེན་འབྱུང་ལྡན་གྱིའོ། །པདྨ་ཞེས་བྱ་བ་ནི་སྣང་བ་མཐའ་ཡས་ཀྱིའོ། །འཇུག་པ་ཞེས་བྱ་བ་ནི་ལས་ཀྱི་སྟེ། དོན་ཡོད་གྲུབ་པ་ཞེས་པའི་དོན་ཏོ། །འདི་རྣམས་ཀྱི་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱིའོ། །ལྷ་ཞེས་བྱ་བ་ནི་ལྷ་མོ་རྣམས་ཀྱི་དང་རིགས་རྣམས་ཀྱིའོ། །རང་བཞིན་ཡོད་པ་མ་ཡིན་ཞེས་བྱ་བ་ནི་གཟུང་བ་དང་འཛིན་པ་གཉིས་སུ་སྣང་བ་བརྫུན་པའི་ཕྱིར་རོ། །གལ་ཏེ་གཉིས་བརྫུན་པ་ཡིན་ན་འོ་ན་འདི་རྣམས་ཀྱི་རང་གི་ངོ་བོ་གང་ཡིན་ཞེ་ན། དང་པོའི་སངས་རྒྱས་ཞེས་བྱ་སྟེ། །རྡོ་རྗེ་འཛིན་པའོ། །མཁའ་ཞེས་བྱ་བ་ནི་ནམ་མཁའ་དང་མཉམ་པ་སྟེ་ཆོས་ཀྱི་སྐུའི་མཚན་ཉིད་ཀྱི་ཕྱིར་དང༌། ནམ་མཁའ་དང་མཉམ་པ་ཉིད་
༄། །ཀྱིས་སྣང་བའི་ཕྱིར་རོ། །དེ་ནི་འདི་རྣམས་ཀྱི་རང་གི་ངོ་བོའི་བདག་ཉིད་དེ། འདི་རྣམས་ཀྱི་རྒྱུ་མཐུན་པའི་ཕྱིར་རོ། །མཇུག་བསྡུས་ནས་དང་པོ་ཞེས་བྱ་བ་ལ་སོགས་པ་གསུངས་ཏེ། དང་པོའི་ཆོས་ནི་རྡོ་རྗེ་སེམས་དཔའ་སྟེ། ཆོས་ཀྱི་སྐུའི་བདག་ཉིད་ཀྱི་ཕྱིར་རོ། །དེའི་ཕྱིར་དེ་རྣམས་ནི་ནམ་མཁའ་དང་མཉམ་པ་སྐུ་དང་གསུང་དང་ཐུགས་རྣམས་ཀྱི་སྐྱེ་བའོ། །སྒྲིབ་པ་མ་ལུས་པ་ཟད་ཅིང་བསལ་བར་གྱུར་བ་ཉིད་དེའི་སྐྱེ་བ་སྟེ། ཁང་བཟངས་ཞིག་པས་ནམ་མཁའ་སྐྱེ་བ་བཞིན་ནོ། །འདིའི་ནམ་མཁའ་སྐྱེ་བའི་མཚན་མ་ནི་དཔེ་སྟེ། དེ་བཞིན་དུ་དཔལ་མཆོག་དང་པོ་ལས། ནམ་མཁའ་སྐྱེ་བའི་མཚན་མ་ལས། །ཐོག་མ་ཐ་མ་མེད་པའི་མཆོག །རྡོ་རྗེའི་རང་བཞིན་སེམས་ཅན་ཀུན། །རྡོ་རྗེ་སེམས་དཔའ་མཆོག་བདེ་བ། །ཞེས་བྱ་བ་གསུངས་ཏེ། དེ་ལྟ་བས་ན་སེམས་ཅན་ནི་སངས་རྒྱས་ལ་སོགས་པ་སྐྱེས་པའོ། །མེད་པའི་རྣམ་བ་ཉིད་ཡོངས་སུ་གཅོད་པའི་ཕྱིར་ནམ་མཁའ་དང་མཉམ་པའོ། །རྣལ་འབྱོར་གྱི་རྒྱུད་རྣམས་ལ་ཕྱག་རྒྱ་ཆེན་པོའི་དངོས་གྲུབ་ཉིད་བྱང་ཆུབ་མ་ཡིན་ནམ། དེའི་ནམ་མཁའ་དང་མཉམ་ཡེ་ཤེས་ནི་རྒྱུ་ཉིད་ཡིན་ཏེ། རང་གི་ངོ་བོ་ནི་མ་ཡིན་ནོ། །དེའི་ཕྱིར་རྣལ་འབྱོར་གྱི་རྒྱུད་ཐམས་ཅད་དང༌། ནམ་མཁའ་དང་མཉམ་པའི་རྒྱུད་འགལ་བར་འགྱུར་རོ་ཞེ་ན་ལུགས་ཞེས་བྱ་བ་ལ་སོགས་པ་གསུངས་ཏེ། ལུགས་ནི་བཤད་པར་བྱ་བ་འདིའི་གཞུང་ལུགས་སོ། །བཅོམ་ལྡན་འདས་གང་གིས་དྲང་བའི་དོན་གྱི་མདོ་སྡེ་བཤད་པ་དེ་ནི་གཞུང་ལུགས་སོ། །དེར་དོན་ཡི་གེ་ལམ་བརྟེན་པ་ཡང་མ་ཡིན་ནོ། །བསྟན་བཅོས་ནི་བཅོམ་ལྡན་འདས་ཀྱིས་བསྟན་པའོ། །ཚད་མར་བྱས་པ་ནི་དེ་དང་ཕྱིན་ཅི་ལོག་མེད་པའོ། །དེ་ནས་སྔགས་དང་ཕྱག་རྒྱ་ལ་སོགས་པ་རྣམས་དང་བཅས་པའི་ཡེ་ཤེས་ཇི་ལྟར་རིགས་ཞེས་བྱ་ཞེ་ན། དང་པོ་ཞེས་བྱ་བ་ལ་སོགས་པ་གསུངས་ཏེ། དང་པོ་ངག་པ་ནི་དང་པོའི་དག་པ་སྟེ་ཆོས་ཀྱི་སྐུའོ། །དེ་ཉིད་གནས་ཏེ་དམིགས་པའོ། །མཁའ་མཉམ་ནི་མཉམ་པའི་ཡེ་ཤེས་རྒྱུ་མཐུན་པ་སྔགས་དང་ཕྱག་རྒྱ་ལ་སོགས་པ་རྣམས་ཀྱི་སྟེ། ནམ་མཁའ་དང་མཉམ་པ་ཉིད་ཀྱིས་དེ་རྣམས་ཀྱི་སྣང་བ་ཡིན་པའི་ཕྱིར་རོ། །དེ་ལྟ་བས་ན་
༄། །རྒྱུད་ཐམས་ཅད་ལ་རྒྱུད་འདི་མ་ཡིན་ནོ། །དཔལ་ཐམས་ཅད་གསང་བ་ལས་ཀྱང་གསུངས་པ། རྒྱུ་ཡི་དེ་ཉིད་ཅུང་ཟད་མིན། །འབྲས་བུའི་དེ་ཉིད་དེ་བཞིན་ནོ། །དེ་ཉིད་དེ་བཞིན་ཉིད་ཡེ་ཤེས། །རྣལ་འབྱོར་པ་ཡིས་དེ་ལ་སྤྱོད། །ཅེས་བྱའོ། །རྒྱུའི་དེ་ཉིད་ནི་སེམས་ཀྱི་རྟོག་པ་ལ་སོགས་པ་རྣམ་པ་བཞིའོ། །འབྲས་བུའི་དེ་ཉིད་ནི་རྣམ་པ་ལྔའོ། །དེ་གཉིས་ཀའི་རྣམ་པ་ཇི་ལྟ་བ་བཞིན་དུ་མེད་པའི་ཕྱིར་དེ་བཞིན་ཉིད་ཀྱི་ཡེ་ཤེས་སོ། །དེའི་དེ་ཉིད་ནི་རང་གི་རྣམ་པ་ཉིད་ཡོངས་སུ་གཅོད་པའི་ཕྱིར་རོ། །གཅོད་པ་དེ་ལ་རྣལ་འབྱོར་པས་སྤྱོད་ཅེས་བྱ་བའི་དོན་ཏོ། །དཔལ་གསང་བ་འདུས་པ་ལས་ཀྱང་གསུངས་པ། སྐུ་མི་འགྱུར་བ་སྐྱེ་བ་མེད། །གསུང་དང་ཐུགས་ནི་མཚན་ཉིད་མེད། །ནམ་མཁའི་རྡོ་རྗེ་རྟག་པར་འགྱུར། །མི་བདེན་བསྡུས་པ་ཡིན་ཞེས་བྱའོ། །མི་འགྱུར་བྱེད་པས་ནི་མི་འགྱུར་བ་ནི་གསང་བ་སྟེ། སྐུའི་གསང་བ་དང༌། གསུང་དང་ཐུགས་ཀྱི་གསང་བའོ། །དེ་ཐམས་ཅད་སྐྱེ་བ་མེད་པ་ནི་རང་བཞིན་མེད་པ་སྣང་བ་སྟེ། རྣམ་པ་ཇི་ལྟ་བ་བཞིན་མེད་པ་ཡོངས་སུ་གཅོད་པའི་ཕྱིར་རོ། །ནམ་མཁའི་རྡོ་རྗེ་ནི་ཆོས་སྐུ་སྟེ། ཆོས་ཞུ་བ་ཉིད་ཉམས་སུ་མྱོང་བའོ། །རྟག་པར་འགྱུར་བ་ནི་ཡོངས་སུ་གཅོད་པའི་བདག་ཉིད་དོ། །ནམ་མཁའ་དང་མཉམ་པའི་དེ་ཁོ་ན་ཉིད་ཀྱིས་ཡོད་པ་ཉིད་དང༌། རྣམ་པ་ཇི་ལྟ་བ་བཞིན་མེད་པ་ཉིད་ཡོངས་སུ་གཅོད་པའི་ཕྱིར་རོ། །དེ་ནི་མི་བདེན་པ་སྟེ། རྣམ་པ་དང་བཅས་པའི་ཕྱིར་རོ། །བསྡུས་པ་ཡང་དེ་ཡིན་ཏེ། ཡང་དག་པར་ཡོངས་སུ་གཅོད་པའི་ཕྱིར། དེས་ན་བསྡུས་པ་ཡོད་པ་དེ་ལ་དེ་སྐད་ཅེས་བྱ་སྟེ། དག་པ་འཇིག་རྟེན་པའི་ཡེ་ཤེས་ལ་བསྡུས་པ་ཞེས་བྱ་བའི་དོན་ཏོ། །དེ་ལྟར་ན་རེ་ཞིག་རྣལ་འབྱོར་གྱི་རྒྱུད་ཐམས་ཅད་ལས་ཐུན་མོང་དུ་ནམ་མཁའ་དང་མཉམ་པའི་དོན་བསྒོམ་པ་གསུངས་སོ། །ད་ནི་དཔལ་གསང་བ་འདུས་པ་ལ་སོགས་པ་ཉིད་ཐུན་མོང་དུ་ནམ་མཁའ་དང་མཉམ་པའི་དོན་བསྒོམ་པའི་སྐབས་དབྱེ་བའི་ཕྱིར། སངས་རྒྱས་ཞེས་བྱ་བ་ལ་སོགས་པ་གསུངས་ཏེ། ཇི་ལྟ་བུ་ཞིག་ཡིན་ཞེ་ན། སངས་རྒྱས་ལྔ་ཡི་དབུ་རྒྱན་ཡང༌། །ཞེས་བྱ་བ་ནི་སྐུ་དང་ལྡན་པའོ། །གང་གི་
༄། །ཆོས་རྣམས་ཀྱི་སྐུ་ཉིད་ཀྱི་རང་བཞིན་ཏེ། ཆོས་ཀྱི་སྐུ་ཉིད་ནམ་མཁའ་དང་མཉམ་པ་རོ་མཉམ་པར་གྱུར་པ་སངས་རྒྱས་ཀྱི་ཆོས་ཐམས་ཅད་ཀྱི་ངོ་བོ་དེས་ཡང་དག་པར་བསྟན་པའི་ཕྱིར་རོ། །ཡང་ཇི་ལྟ་བུ་ཡིན་ཞེ་ན། སྲིད་པ་གསུམ་ནི་རྣལ་འབྱོར་མའི་འཁོར་ལོའོ། །ཆོས་རྣམས་ནུས་པ་ནི་ཆོས་སྟོན་པ་སྟེ། ཆོས་རྫོགས་པར་ལོངས་སྤྱོད་པ་ཡོད་པ་དེ་ལ་དེ་སྐད་ཅེས་བྱའོ། །དཔལ་རྡོ་རྗེ་རྩེ་མོ་ལས་གསུངས་པ། དེ་ནས་རང་བཞིན་སྐུ་ཉིད་ལས། །ལོངས་སྤྱོད་རྫོགས་པ་ཡང་ནི་འབྱུང༌། །ཞེས་བྱའོ། །འདིར་བསྒོམ་པ་ཉིད་རབ་ཏུ་འདུད་པར་འདོད་དེ། རང་གི་ལུས་དང་ངག་དང་ཡིད་ཀྱིས་དེའི་སྐུ་དང་གསུང་དང་ཐུགས་རྣམས་སུ་རབ་ཏུ་འཇུག་པར་བྱེད་པ་ནི་རབ་ཏུ་འདུད་པའོ། །འདུད་པའི་ཕན་ཡོན་རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། བསོད་ནམས་ཀྱང་ཞེས་བྱ་བའི་ཀྱང་ཞེས་བྱ་བའི་སྒྲས་ཡེ་ཤེས་ཀྱང་ངོ༌། །མཐའ་ཡས་ཞེས་བྱ་བ་ནི་ཇི་སྲིད་དུ། བསོད་ནམས་ཀྱི་ཚོགས་བསགས་པར་འགྱུར་རོ། །གཞན་ཡང་འདུད་པར་བྱེད་པ་ནི་གང་གི་ཕྱིར་འདུད་པར་བྱེད་པ་ཆོས་ཀྱི་ཆེ་བའི་བདག་ཉིད་དོ། རྡོ་རྗེ་འཛིན་པའི་ཆེ་བའི་བདག་ཉིད་དོ། །པུ་སྟི་ལ་ལས་ཆེན་པོའི་གནས་སུ་རང་བཞིན་གྱི་སྒྲ་ཟེར་ཏེ་དེར་མཐའི་ཡི་གེ་མི་སྐྱེ་བའོ། །དེ་ཡང་ཉེས་པ་འཁྲུལ་པའི་ཕྱིར་རོ། །ཆོས་ཀྱི་སྐུ་ཉིད་རྡོ་རྗེ་སེམས་དཔའི་སྐུ་ཉིད་དུ་འགྲོ་བར་གསུངས་ཏེ། དེ་ལ་ཆོས་སྔོན་དུ་མ་བྱས་ཀྱང་བརྡ་ཡིས་བསྒོམ་པར་བྱའོ། །དེ་ནི་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སྒྱུ་མའི་བདེ་བའི་སྒྲས་རྫོགས་པའི་སངས་རྒྱས་ཐམས་ཅད་ཀུན་ལ་སྙིང་གར་བཅུག་ནས་ཞུ་པ་པདྨར་འགྲོ་བ་བསྒོམ་པར་བྱའོ། །བྱ་བ་འདི་ནི་ཐར་པའི་རང་བཞིན་ནི་སྟོན་ཀའི་ཟླ་བ་ཞུ་ཞིང་དཀར་བ་བཞིན་སངས་རྒྱས་ཀྱི་ཆོས་རྣམས་ཀྱི་རོ་མཉམ་པའི་ཆོས་ཀྱི་སྐུའོ། །དེ་ནས་ཅི་བྱ་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་ན་སྐུ་དང་ལྡན་པར་བྱ་ཞེ་ན། འཇིག་རྟེན་པའི་ཞེས་བྱ་བ་ལ་སོགས་པ་གསུངས་པ་ལ་འཇིག་རྟེན་པའི་རྒྱུ་ནི་འཇིག་རྟེན་པའི་དོན་ཞེས་བྱ་བའི་ཐ་ཚིག་གོ །བྱས་པ་ནི་ཡང་དག་པར་བསྟན་པ་སྟེ། རྡོ་རྗེ་སེམས་དཔའི་རྣམ་པ་གཞན་གྱི་རང་བཞིན་དུའོ།།
༄། །བརྡ་ཇི་ལྟ་བར་གདུལ་བྱ་རྣམས་ལ་དེ་བསྒྱུར་བ་ནི་ཡོངས་སུ་ཤེས་པའོ། །དོན་དམ་པར་ཡང་ཆོས་ཀྱི་སྐུའི་རྒྱུ་མཐུན་པར་གྱུར་པ་ཡེ་ཤེས་གཞན་ཉིད་དེའི་རྣམ་པར་སྐྱེས་ཏེ། རྣམ་པ་ཇི་ལྟ་བ་བཞིན་དུ་མེད་པ་ཉིད་ཀྱིས་བཅོམ་ལྡན་འདས་སྣང་བ་ཞེས་བྱའོ།། དེར་རྡོ་རྗེ་སེམས་དཔའ་སྐྱེ་བ་ནི་གང་ཡིན། སྐྱེ་བའི་གནས་ནི་གང་ཡིན་ཞེས་བྱ་བར་དོགས་པ་ལ། སྐུ་དང་གསུང་དང་དེར་ནི་ཐུགས། །ཞེས་བྱ་བ་གསུངས་ཏེ། ཆོས་གསུམ་པོ་འདི་རྡོ་རྗེ་སེམས་དཔའི་སྐྱེ་བའོ། །རྣལ་འབྱོར་གནས་པ་ནི་རབ་ཏུ་གནས་པ་སྟེ། བཅོམ་ལྡན་འདས་མ་ཙུན་དཱའི་སྐུ་ཆེན་མོ་དེར་རྡོ་རྗེ་སེམས་དཔའ་སྐྱེ་བའོ། །ཕ་དང་མ་ནི་གང་ཡིན་ཇི་ལྟར་ན་ཡང་སྐྱེ་བ་ཡིན་ཞེ་ན། དེ་ལ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཞེས་བྱ་བ་ནི་རྣལ་འབྱོར་གྱི་གནས་སོ། །རྡོ་རྗེ་ཞེས་བྱ་བ་ནི་མི་བསྐྱོད་པའོ། །གཅིག་རང་བཞིན་ཞེས་བྱ་བ་ལ། རང་བཞིན་ནི་རང་སྣང་བའི་རིག་མ་དག་ཡང་དག་པར་ལྡན་པའི་ཕྱིར་དེ་ནི་གཅིག་ཀྱང་ཡིན་ལ་རང་བཞིན་ཡང་ཡིན་ནོ། །ཆོས་ཀྱི་ངོ་བོ་ཞེས་བྱ་བ་ནི་ཐར་པ་སྟེ་སྔ་མ་བཞིན་ནོ། །རྡོ་རྗེའི་རང་བཞིན་ནི་རྡོ་རྗེ་སེམས་དཔའི་སྐུ་བསྐྱེད་པའོ། །དེ་ཉིད་རལ་པ་ཞེས་བྱ་བ་ལ་སོགས་པ་ལ་རལ་པའི་ཐོར་ཚུགས་ནི་སངས་རྒྱས་ལྔས་རྣམ་པར་སྤྲས་པ་དེས་བརྒྱན་པའི་བཅོམ་ལྡན་འདས་སོ། །དེའི་སྐུ་མདོག་ནི་སྔོན་པོའོ། །དེ་ལྟར་ན་རྡོ་རྗེ་སེམས་དཔའི་ཡང་དག་པའི་ཏིང་ངེ་འཛིན་བསྒོམ་པར་བྱའོ། །འདི་ཞེས་པ་ནི་རྣལ་འབྱོར་པའོ། །བཅས་པ་བསྒོམ་པ་ནི་བསྒོམ་པ་དང་བཅས་པས་གུས་པ་དང་བཅས་པ་ཞེས་བྱ་བའི་དོན་ཏོ། །མི་བསྐྱོད་པའི་རལ་པའི་ཐོར་ཚུགས་ནི་ཕྱི་རོལ་དུ་རིན་པོ་ཆེ་གཅིག་གིས་མཚན་པ་ཡིན་གྱི། སངས་རྒྱས་རྣམས་ཀྱིས་མཚན་པ་ནི་མ་ཡིན་ནོ། །དེ་ནས་མི་བསྐྱོད་པའི་ཡང་ཅི་ཟླ་བ་ཞུ་བ་ལས་སྐྱེས་པ་ཡིན་ནམ་ཞེ་ན། མ་ཡིན་ཏེ། ཉི་མ་ཞེས་བྱ་བ་ལ་སོགས་པ་གསུངས་པ་ལ་ཉི་མ་ནི་ཉི་མའོ། །ཡི་གེ་ནི་ཧཱུཾ་ཡིག་སྔོན་པོའོ། །རྡོ་རྗེ་སེམས་དཔའི་ས་བོན་ཡང་ཧཱུཾ་གྱིས་དཀར་པོའོ། །རྡོ་རྗེའི་རང་བཞིན་ཞེས་བྱ་བ་ནི་མི་བསྐྱོད་པའི་སྐུར་རོ། །རྡོ་རྗེ་སེམས་དཔའི་བསྐྱེད་པ་ཡང་སྔགས་ཉིད་ཡིན་པར་ཆུ་མཐའ་སྐྱེས་ཞེས་བྱ་བ་ལ་སོགས་པ་
༄། །གསུངས་ཏེ། ཆུ་མཐའ་སྐྱེས་བསྒོམ་སྔགས་པ་ཡིས། །ཆུ་ནི་ཟླ་བ་ཞུ་བའོ། །དེ་ཉིད་ནི་མཐའ་སྟེ་སེམས་ཅན་རྣམས་ཀྱི་ཕ་མ་དག་གོ །དེ་ལས་སྐྱེས་པའོ། །བདག་ཉིད་གཟུགས་ཀྱི་རང་བཞིན་ནི་རང་གི་ལྷའི་ས་བོན་ཞེས་བྱ་བའི་དོན་ཏོ། །དེ་ཡང་སྔགས་པས་ཟླ་བའི་དཀྱིལ་འཁོར་གྱི་དབུས་སུ་གནས་པར་བསྒོམ་ཞིང་ས་བོན་དེས་རྡོ་རྗེ་སེམས་དཔའ་བསྒོམ་པ་ནི་གཉིས་མེད་ངོ་བོའི་རང་བཞིན་ནོ། །ཇི་ལྟ་བས་ན་གཉིས་སུ་མེད་པའི་ངོ་བོ་ཞེ་ན། དོན་མ་ཡིན་ཞིང་ཤེས་པ་ཡང་མ་ཡིན་པ་དེ་ལྟར་སྣང་བའི་ཕྱིར་རམ། རང་གི་རིག་མ་དང་ཡང་དག་པར་སྦྱོར་བའི་ཕྱིར་རོ།། རྣལ་འབྱོར་མཇུག་བསྡུ་བ་དང༌། དེའི་འབྲས་བུ་འདི་ཞེས་བྱ་བ་ལ་སོགས་པ་གསུངས་ཏེ། ཐུགས་ཡོངས་སུ་རྫོགས་པ་ནི་རྡོ་རྗེ་འཛིན་པའི་ཐུགས་སུ་སྦྱོར་བའོ། །བསྒོམ་པས་ཞེས་བྱ་བ་ནི་རྣམ་པས་སོ། །བསྒོམ་བྱ་ཞེས་བྱ་བ་ནི་རྡོ་རྗེ་སེམས་དཔའོ། །དེ་འགྲུབ་པ་སྟེ་རྡོ་རྗེ་འཛིན་པའི་ཐུགས་ཀྱི་རང་བཞིན་ནོ། །གལ་ཏེ་རྡོ་རྗེ་འཛིན་པ་ཡང་སྔགས་པས་བསྐྱེད་ན་སྤྲོས་པ་མེད་པའི་ཏིང་ངེ་འཛིན་ལ་གནས་པ་སྐུར་བསྐྱེད་པ་མི་རུང་བའི་ཕྱིར་དང་དེ་ལྟ་མོད་ཀྱི་ཏིང་ངེ་འཛིན་དེ་ལས་མ་བསྐུལ་ཏེ། བཞེངས་པ་རྣམ་པར་གཡེངས་པ་ཉིད་དང༌། གཙོ་བོའི་ཆོས་མ་ཡིན་པ་ཉིད་དོ་ཞེས་བྱའོ་ཞེ་ན། ལྷ་མོ་ཞེས་བྱ་བ་ལ་སོགས་པ་གསུངས་ཏེ་ལྷ་མོ་བཞི་ནི་ལྷ་མོ་བཞི་ཞེས་བྱ་བའི་ཐ་ཚིག་གོ །རང་བཞིན་གཅིག་ཅེས་བྱ་བ་ནི་ཐར་པའི་ངོ་བོར་རོ། །གླུ་ཡིས་ཞེས་བྱ་བ་འཆད་པར་འགྱུར་བའི་གླུ་བཞི་ཡིས་སོ། །བསྒོམ་བྱ་ནི་དགོངས་པ་སྟེ། དེ་དང་ལྡན་པར་བྱེད་པ་ནི་བསྒོམ་བྱའོ། །སྔགས་ཀྱི་རྣམ་པ་དགོངས་པས་བསྐྱེད་པས་ན་སད་པར་བྱེད་པ་ཞེས་བྱ་བའི་དོན་ཏོ། །ཇི་ལྟར་སད་པར་བྱེད་པ་ཡིན་ཞེ་ན། མཁའ་མཚུངས་དངོས་ཏེ་དངོས་པོ་མཉམ་ཞིང་ནམ་མཁའ་དང་མཉམ་པའི་ཆོས་ཞུ་བཞེས་བྱ་བའི་ཐ་ཚིག་གོ །འདི་ལྟར་གྱི་སྒྲ་ནི་དེ་ལྟར་གྱི་དོན་ཏོ། །དེ་ལྟར་ཡིན་ན་ནི་རྣལ་འབྱོར་པའི་ཆོས་ནི་ཞུ་བར་བྱས་པའོ། །ཐུགས་ཀྱི་རང་བཞིན་དུ་བྱས་པ་ནི་རྡོ་རྗེ་འཛིན་པའི་སྐུར་རོ། །བསྒོམ་བྱ་ནི་ལྷ་མོའི་སྐུར་རོ། །ཐར་པའི་རང་བཞིན་ནི་ཤིན་ཏུ་རྣམ་པར་དག་པའི་ཐུགས་རྡོ་རྗེ་སེམས་དཔའ་ཡིན་ཞིང་ཤིན་ཏུ་རྣམ་པར་དག་པའི་དེ་བཞིན་ཉིད་ནི་ལྷ་མོ་ཞེས་
༄། །བྱ་བར་དགོངས་སོ། །བསྒོམ་པ་འདི་ཡིས་སངས་རྒྱས་ཉིད་ཐོབ་པར་བྱ་བ་ཡིན་པ་དེ་བས་ན་འདིར་དོན་ནི་བདག་ཉིད་དཔེར་བྱ་བའི་ཕྱིར་འཁོར་ཚོགས་པའི་ནང་དུ་སངས་རྒྱས་གཅིག་མ་གསུངས་པའི་དོན་ཀྱང་རྡོ་རྗེ་སེམས་དཔའ་ཞེས་བྱ་བ་ལ་སོགས་པ་སྟེ། བུད་མེད་ཅེས་བྱ་བ་ནི་བཙུན་མོའོ། །མཐའ་དག་མཚུངས་ཞེས་བྱ་བ་ནི་བཅོམ་ལྡན་འདས་ཉིད་དང་ཐམས་ཅད་མཚུངས་པའོ། །ཇི་ལྟར་ན་བཅོམ་ལྡན་འདས་བསྒོམ་ཞེ་ན། སངས་རྒྱས་ལྔ་ཡིས་བརྒྱན་པ་རལ་པའི་ཐོར་ཚུགས་ཅན་གཡས་ན་སྣ་ཚོགས་རྡོ་རྗེ་འཛིན་པ། གཡོན་པས་སྣ་ཚོགས་རྡོ་རྗེས་མཚན་པའི་དྲིལ་བུ་འཛིན་པ། དེ་བཞིན་དུ་བཅོམ་ལྡན་འདས་མ་འདི་ཡང་གནས་སོ་ཞེས་བྱའོ། །གང་ཞེས་བྱ་བ་ནི་ལྷག་མའོ། །ཆ་ལུགས་ནི་རབ་ཏུ་བརྒྱན་པའོ། །མཚུངས་དངོས་ལས་ཞེས་བྱ་བ་ནི་དངོས་པོ་དང་མཚུངས་པ་ལས་སོ། །དངོས་པོ་ཞེས་བྱ་བ་ནི་སེམས་ཅན་ཐམས་ཅད་ཀྱི་དེ་ཁོ་ན་ཉིད་ཀྱི་ཕྱིར་ཆོས་ཞུ་བ་ཞེས་བྱ་བའི་དོན་ཏོ། །རྒལ་བ་ཞེས་པ་ནི་ཡོངས་སུ་གཅོད་པ་སྟེ། དེ་ཞེས་བྱ་བ་ནི་ལྷག་མའོ། །ཇི་ལྟར་ཡིན་ཞེ་ན། བཞུགས་པ་ཞེས་བྱ་བ་ལ་སོགས་པ་གསུངས་ཏེ། བཞུགས་པ་ནི་ཡིད་ལ་མཉམ་པར་གཞག་པ་ཉིད་ཅེས་བྱ་བའི་ཐ་ཚིག་གོ །བཞི་ཞེས་བྱ་བ་ལ་སོགས་པ་ལ་སངས་རྒྱས་ཐམས་ཅད་ཀྱི་རེ་རེ་ཡང་སྐུ་གསུང་ཐུགས་ཀྱི་དབྱེ་བ་དང༌། དེའི་ལུས་ཀྱི་དབྱེ་བས་སོ། །མདོར་བསྡུས་ནས་ཡང་གསང་བ་བཞི་བྱ་སྟེ། སྐུའི་གསང་བ་དང༌། གསུང་གི་གསང་བ་དང༌། ཐུགས་ཀྱི་གསང་བ་དང༌། ལས་ཀྱི་གསང་བའོ། །དེ་རྣམས་ཀྱི་དེ་བཞིན་ཉིད་ནི་གོ་རིམས་བཞིན་དུ་ལྷ་མོ་བཞི་སྟེ། དེའི་ཕྱིར་རང་བཞིན་བཞི་ཡིས་སོ། །དེ་ལྟ་བས་ན་དཀར་པོ་དང༌། སྔོན་པོ་དང༌། དམར་པོ་དང༌། ལྗང་ཀུ་སྟེ། གཡས་པ་རྣམས་ཁ་དོག་དང་མཚུངས་པའི་རྡོ་རྗེ་འཆང་བ། གཡོན་པ་རྣམས་ཀྱིས་འཁོར་ལོ་དང༌། ཨུཏྤལ་དམར་པོ་དང༌། པདྨ་དང་ཨུཏྤལ་སྔོན་པོ་འཆང་བའོ། །རང་གི་རིགས་ཀྱི་དེ་བཞིན་གཤེགས་པས་བརྒྱན་པའི་རིན་པོ་ཆེའི་ཅོད་པན་དེ་རྣམས་ཀྱི་དབུས་སུ་བཞུགས་པ་ནི་རྡོ་རྗེ་སྐྱིལ་མོ་ཀྲུང་གིས་སོ། །དེ་རྣམས་ཉིད་སྒྱུ་མ་ལྟ་བུ་ཉིད་ཀྱིས་
༄། །སྣང་བའི་ཕྱིར་དེ་རྣམས་ཀྱིས་བསྡུས་པ་ནི་སྲིད་པ་གསུམ་སྟེ། དེ་བཞིན་གཤེགས་པའི་གསང་བ་གསུམ་སྒྱུ་མ་ལྟ་བུ་ཉིད་ཀྱི་ས་འཇུག་པ་དང་རྒལ་བ་སྟེ་ཡོངས་སུ་གཅོད་པའོ། །དེ་ལ་སྣ་ཚོགས་རྡོ་རྗེ་ཞེས་བྱ་བ་ལ་སོགས་པ་ལ། དེ་ལ་ཞེས་བྱ་བ་ནི་སྙིང་གའི་ཟླ་བའོ། །ལྷ་ནི་རྡོ་རྗེ་འཛིན་པའོ། །སངས་རྒྱས་རྣམས་ནི་ཐམས་ཅད་ཀྱང༌། །རོལ་པ་བྱེད་པའི་འདི་ཡི་ནི། །དེ་ལས་དེ་རྣམས་སྤྲོས་པའི་ཕྱིར། །སངས་རྒྱས་རྣམས་ཀྱིས་སྤྲོས་པའོ། །དགོས་པ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ལྷ་ཡིན་ཞེས་བྱ་པ་ནི་ལྷར་གྱུར་པའོ། །ཀྱེ་ཞེས་བྱ་བ་ནི་བོད་པའོ། །ཐམས་ཅད་དུ་ནི་རྣམ་པར་རོལ། །སངས་རྒྱས་རྣམས་ཀྱི་ཐོབ་པ་ངེས་པ་སྟེ། །དེ་ཞེས་བྱ་བ་ནི་ལྷག་མའོ། །སྣ་ཚོགས་རྡོ་རྗེ་དང་སངས་རྒྱས་རྣམས་ཀྱི་རྣམ་པར་རོལ་པ་ཡིན་ན་ཅི་ཕྱིར་རྡོ་རྗེ་སེམས་དཔའ་ཞེས་བྱ་ཞེ་ན། ལྷ་རྣམས་ཀྱི་ཞེས་བྱ་བ་ལ་སོགས་པ་སྨོས་ཏེ། ལྷ་རྣམས་ཀྱི་མ་ལུས་པ་རྣམས་ཀྱིའོ། །དེ་ཙམ་གྱིས་ཞེས་བྱ་བ་ནི་དེ་ཐམས་ཅད་ཅེས་བྱ་བའི་དོན་ཏོ། །དེ་ཐམས་ཅད་ནི་རྡོ་རྗེ་སེམས་དཔའ་ཉིད་རྣམ་པར་རོལ་པ་ཞེས་བྱ་བའི་བར་དུ་སྟེ། རྡོ་རྗེ་སེམས་དཔའ་ཉིད་དེ་དང་དེའི་རྣམ་པས་སྐྱེ་ཞེས་བྱ་བར་དགོངས་སོ། །དེ་ནས་བལྟ་བྱ་ཞེས་བྱ་བ་ལ་སོགས་བ་གསུངས་ཏེ། ཐམས་ཅད་ཀྱི་ནི་སྣ་ཚོགས་རྡོ་རྗེ་ལ་སོགས་པའི་ཆོས་ཁོ་ནའོ། །རང་བཞིན་ནི་གཉིས་སུ་མེད་པའི་ཡེ་ཤེས་ཉིད་དེ། དོན་མ་ཡིན་ཞིང་ཤེས་པ་མ་ཡིན་ཞེས་ཡོངས་སུ་གཅོད་པའི་ཕྱིར་རོ། །དེ་ལྟ་བས་ན་སྲིད་པ་གསུམ་ནི་རྣལ་འབྱོར་མའི་འཁོར་ལོའམ། སྣ་ཚོགས་པ་ཐམས་ཅད་རྫོགས་པ་ནི་གཅིག་པའི་རང་བཞིན་ཉིད་དོ། །མཐོང་ཞེས་བྱ་བ་ནི་འཇུག་པའོ། །རོལ་པ་ཞེས་བྱ་བ་ལ་སོགས་པ་ལ་རོལ་པ་བྱས་པ་ལས་སངས་རྒྱས་ཀྱིས་བདག་མཐོང་བ་དང༌། དེའི་རྣལ་འབྱོར་མའི་དབང་ཕྱུག་ཀྱང་ཐམས་ཅད་དུ་མཐོང་བའོ། །ལྷ་ཞེས་བྱ་བ་ལ་སོགས་པ་ལ། ལྷ་ནི་རྡོ་རྗེ་སེམས་དཔའ་ལ་སོགས་པའོ། །དེ་རྣམས་ཡང་དག་པར་རྟོགས་པ་ནི་དེ་ཁོ་ན་ཉིད་དེ། དེ་གསལ་བར་བྱེད་པའི་ལེའུའོ། །དང་པོ་ནི་ཐོག་མའོ། །ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ་ནམ་མཁའ་དང་མཉམ་པ་ལས་ལེའུ་དང་པོའོ།། །།
ལེའུ་གཉིས་པ། ཐུགས་ཀྱི་དཀྱིལ་འཁོར་སྟོན་པར་བྱེད་པ།
༄། །ཕྱོགས་ལ་ལར་ལྷ་མོ་ཟེར་ཞིང་ལ་ལར་བཙུན་མོ་བཞི་ཟེར་བ་དེ་ལྟ་བས་ན་ཐེ་ཚོམ་བསལ་བར་བྱ་བའི་ཕྱིར་ལྷ་མོའི་གྲངས་ལྷ་མོ་བཞིས་ཞུས་པའོ། །འདིར་བཤད་པར་འདོད་པ་ཞེས་བྱ་བ་ལ་སོགས་པ་ལ་འདིར་བཤད་པར་འདོད་པ་ནི་ལྷ་མོ་ཞེས་བྱ་བ་དང་འབྲེལ་ཏོ། །ཀྱེ་མཆོག་དང་བཅས་པ་སྟེ། གཙོ་བོའི་ལྷ་མོའོ། །བཅས་པ་ནི་ཡང་དག་པར་ལྡན་པ་སྟེ། མཆོག་ཡོད་པས་མཆོག་དང་བཅས་པའོ། །སྡུད་པ་པོས་དེར་ཞེས་བྱ་བ་ལ་སོགས་པ་སྨྲས་པའི་དྲི་བ་འདིར་གླུ་བཞི་བཀའ་སྩལ་པ་ནི་བཅོམ་ལྡན་འདས་ཀྱིས་སོ། །ཅིའི་ཕྱིར་ཞེ་ན་འདིར་དེ་རྣམས་ཀྱི་མིང་བསྟན་པའི་ཕྱིར་རོ། །འཇིག་རྟེན་ན་མང་པོ་རྣམས་ཀྱིས་ཡང་གཙོ་བོ་སྔོན་དུ་སོང་བའི་རིམ་པ་བསྟན་པ་ལས་རབ་ཏུ་རྟོགས་པའི་ཕྱིར་རོ། །སྣང་བའི་ལྷ་མོ་གཙོ་མོ་ཉིད་ཞི་བ་ལ་སོགས་པའི་ལྷ་མོ་རྣམས་ཀྱི་ཡང་གོ་རིམས་བཞིན་དུ་ཤར་ཕྱོགས་ལ་སོགས་པ་ཕྱོགས་ཀྱི་འདབ་མ་རྣམས་སུ་བསྐོར་བ་ཇི་ལྟ་བ་བཞིན་དུ་རྟོགས་པ་ཡིན་གྱི་གྲངས་ཙམ་ནི་མ་ཡིན་ནོ། །སྟོང་པ་ཁྱད་མེད་ཅེས་བྱ་བ་ལ་སོགས་པ་ལ། གླུ་བཞི་པོ་འདི་རྣམས་ནི་གོ་རིམས་བཞིན་དུ་ཐུགས་དང༌། གསུང་དང་སྐུ་དང༌། གསང་བ་རྣམས་ཀྱི་སྒྱུ་མ་ལྟ་བུ་ཉིད་གསལ་བར་བྱེད་པའོ། །དེ་རྣམས་ཉིད་ཡོངས་སུ་གཟུང་བར་བྱ་བ་དང་ཆོས་ཞུ་བ་ལ་སྤྲོ་བར་བྱེད་པ་རབ་ཏུ་བགྲང་བའི་ཚིགས་སུ་བཅད་པའོ། །འདིའི་རྐང་པ་སོ་སོར་ཚོགས་བཞིའོ། །ཚོགས་རེ་རེ་ལ་ཕྱི་མོ་བཞིའོ། །དང་པོ་དང་གཉིས་པ་ནི་ལྕི་བའི་མཐའ་ཅན་ནོ། །གཉིས་པའི་དབུས་མ་ལྕི་བའོ། །རྣམ་པ་རྣམས་ནུས་པས་སྟོང་པ་ཉིད་ཡིན་ཞིང་དེ་ཉིད་ཐ་དད་པར་ཉེ་བར་མི་མཚོན་པའི་ཕྱིར་ཁྱད་པར་མེད་ཅེས་བྱ་སྟེ། སྟོང་པ་ཁྱད་མེད་དོ། །ནམ་མཁའ་བྱེད་པའི་རིགས་པས་སྐྱེ་བའི་ཕྱིར་བྱས་པའོ། །སངས་རྒྱས་ཐམས་ཅད་ཀྱི་ཆོས་ཞུ་བའི་ངོ་བོ་ཡིན་པའི་ཕྱིར་ཆོས་སོ། དེ་ལྟར་ན་རྐང་པ་གསུམ་གྱིས་བོས་ནས་ལྷ་མོས་བསྐུལ་བའོ། །མཉམ་པ་ཞེས་བྱ་བ་ནི་ཁྱོད་ཉིད་ཀྱིས་མཚུངས་པ་སྟེ། ཁྱོད་ཀྱི་དེ་བཞིན་ཉིད་བདག་ཉིད་ཡོད་པའི་ཕྱིར་རོ། །དེ་རྣམས་གང་ཡིན་ཞེ་ན་སྣང་བ་ཞེས་བྱ་བ་ལ་སོགས་པ་སྟེ། བདག་པོའི་ཡན་ལག་ཏུ་གྱུར་
༄། །པའི་ཕྱིར། རྟག་ཏུ་བརྒྱན་པ་ཞེས་བྱ་སྟེ། སྟོང་པའམ་ལྷ་མོ་བཞིས་བསྡུས་པའི་ངོ་བོ་ཉིད་ཀྱི་ཕྱིར་ཤིན་ཏུ་བརྒྱན་པ་ཞེས་བྱ་སྟེ་སྣང་བའོ། །ལུས་ཐམས་ཅད་ཀྱི་འཚོ་བ་ཞི་བར་བྱ་བའི་ཕྱིར་ཞི་བའོ། །སེམས་ཀྱི་སྒྲིབ་པ་ཐམས་ཅད་ལས་ཐར་པའི་ཕྱིར་ཐར་པའོ། །སངས་རྒྱས་ཐམས་ཅད་ཀྱི་ཆོས་ཀྱི་དགའ་བ་རྣམས་མཉམ་དུ་ཉམས་སུ་མྱོང་བའི་ཕྱིར་ཤིན་ཏུ་མཉམ་པའོ། །མཐའ་ཡས་པའི་སྤྲུལ་པའི་སྐུར་འགྲོ་བ་རྣམས་ཀྱི་དོན་བྱེད་པས་ན་མི་མཉམ་པའོ། །དེ་ལྟ་བས་ན་ལྷ་མོ་ལྔ་པོ་རྣམས་མཉམ་པ་ཡིན་ནའོ་ན་ཇི་ལྟར་སྣང་བའི་ལྷ་མོ་ལ་སོགས་པའི་གཟུགས་ཀྱིས་སྣ་ཚོགས་པ་ཡིན། སྨྲས་པ། སྒྱུ་མ་ཡང་ཞེས་བྱ་བ་ནི་གང་ཞིག་མཚུངས་པ་དེ་བཞིན་དུ་ཡང་སྒྱུ་མ་ཞེས་བྱ་སྟེ། ཡང་གི་སྒྲའི་དོན་ཏོ། །སྔགས་ལ་སོགས་པའི་བྱིན་རླབས་ཀྱིས་ཤིང་ལ་སོགས་པ་མེད་པ་ཉིད་ཀྱི་གླང་པོ་ཆེ་ལ་སོགས་པའི་ངོ་བོ་གསལ་བར་བྱེད་པ་ནི་སྒྱུ་མའོ། །དེ་དང་ཆོས་མཐུན་པ་ལྷ་མོ་རྣམས་ཀྱང་སྒྱུ་མ་སྟེ། ཆོས་ཀྱི་སྐུ་དང་རྒྱུ་མཐུན་པ་དག་འཇིག་རྟེན་པའི་ཡེ་ཤེས་ལ་དེ་རྣམས་མེད་པ་ཉིད་སྐུ་དང་གསུང་དང་ཐུགས་ཀྱི་སྣང་བ་སྣ་ཚོགས་པར་སྣང་བའི་ཕྱིར་རོ། །རྒྱུ་མཚན་ཅིའི་ཆེད་དུ་ལྷ་མོ་རྣམས་སྒྱུ་མ་བྱེད་ཅེ་ན། སྨྲས་པ། བྱ་ཕྱིར་ཞེས་བྱ་བ་སྟེ། བྱ་བའི་རྒྱུ་མཚན་འགྲོ་བའི་དོན་བྱེ་བའི་རྒྱུར་རོ། །དེ་ལྟ་བས་ན་སངས་རྒྱས་དང་མཉམ་པའོ། །སངས་རྒྱས་ནི་རྡོ་རྗེ་སེམས་དཔའ་ལ་སོགས་པས་མཉམ་པའོ། །དེ་ཡང་ཆོས་ཀྱི་སྐུས་མཉམ་པ་དང༌། དེ་དང་རྒྱུ་མཐུན་པ་དག་པ་འཇིག་རྟེན་པའི་ཡེ་ཤེས་ཀྱི་རང་བཞིན་ལོངས་སྤྱོད་རྫོགས་པའི་སྐུས་རྣམ་པ་སྣ་ཚོགས་པར་སྣང་སྟེ་འགྲོ་བའི་དོན་བྱ་བའི་ཆེད་དུའོ། །དེ་གང་ཡིན་ཞེ་ན། རོལ་པ་ཞེས་བྱ་བ་ལ་སོགས་པ་གསུངས་ཏེ། ཐམས་ཅད་མཁའ་མཉམ་ནི་ལྷ་མོ་རྣམས་དང་སངས་རྒྱས་རྣམས་ཀྱི་རོལ་པ་སྟེ། ཚོགས་ནས་སྣ་ཚོགས་པའི་དོན་སྤྱོད་པ་ནི་མཆོག་ཏུ་རོལ་པའོ། །དུས་ཇི་ཙམ་དུ་ཞེ་ན། ཞི་བ་ཞེས་བྱ་བ་ལ་སོགས་པ་གསུངས་ཏེ་ཞི་བ་བླ་ན་མེད་པ་ནི་ཞི་བ་བླ་ན་མེད་པ་སྟེ། རྟག་པའི་སྐུ་དེ་བཞིན་གཤེགས་པ་ཞེས་བྱ་བའི་ཚིག་ལས་སོ། །རྟག་པ་ནི་དེ་བཞིན་གཤེགས་པ་རྣམས་ཀྱི་སྐུ་གསུམ་
༄། །པོས་སོ། །རང་བཞིན་གྱིས་ནི་རང་བཞིན་གྱིས་རྟག་པ་སྟེ། ཐོག་མ་དང་ཐ་མ་མེད་པའི་ཕྱིར་རོ། །ལོངས་སྤྱོད་རྫོགས་པས་ནི་རྒྱུན་མི་འཆད་པས་རྟག་པ་སྟེ་ཐོག་མ་དང་ཐ་མ་མེད་པའི་ཕྱིར་རོ། །སྤྲུལ་པའི་སྐུ་ནི་རྒྱུན་གྱིས་རྟག་པ་སྟེ། ལ་ལར་ཞིག་ཀྱང་དེ་ཉིད་གཞན་དུ་སྐྱེ་བ་དང་གཞན་དུ་གནས་པའི་ཕྱིར་འབྲོག་དགོན་པ་ཆེན་པོ་མེའི་ཕུང་པོ་བཞིན་ནོ། །དེ་ལྟར་ཆོས་དང་ལོངས་སྤྱོད་རྫོགས་པའི་རང་བཞིན་དང༌། རོལ་པའི་སེམས་ཡོངས་སུ་བསྲུང་བ་ལ་སྤྲོ་བའོ། །འགྲོ་བའི་དོན་སྒྲུབ་པར་བྱེད་པའི་ཕྱིར་དང༌། རྣམ་པར་དག་པའི་ཕྱིར་དང༌། འཚེ་བ་མེད་པའི་ཕྱིར་རྟག་པ་ཉིད་དོ། །འདིར་ངེས་པ་ནི་ཡི་གེ་དྲུག་པའི་སྔགས་ཏེ། རུ་ལུ་རུ་ལུ་བྷྱོ་རུ་ལུ་ཊའོ། །སྒྱུ་མ་ཞེས་བྱ་བ་ལ་སོགས་པ་ལ། ནམ་མཁའ་དང་མཉམ་པ་ཞེས་བྱ་བ་ནི་ཆོས་ཀྱི་སྐུའི་རང་བཞིན་སངས་རྒྱས་རྣམས་དང་ལྷ་མོ་རྣམས་ཀྱིའོ། །ཆོས་ཞེས་བྱ་བ་ནི་གསུངས་པའི་ཆོས་རྣམས་སོ། །མཐའ་དག་ཉིད་ཀྱིས་དེ་ཡང་ནམ་མཁའ་དང་མཉམ་པ་སྟེ། ནམ་མཁའ་དང་མཉམ་པ་ཉིད་ཀྱིས་སྣང་བའི་ཕྱིར་ཞེས་བྱ་བའི་ཐ་ཚིག་གོ །རོལ་པ་མ་ཡིན་པ་ནི་ནམ་མཁའ་དང་མཉམ་པ་རོལ་པ་མ་ཡིན་ནོ། །གང་ནམ་མཁའ་དང་མཉམ་པ་ཡིན་ཞེ་ན། གང་ཞིག་དེ་རྣམས་སྒྱུ་མ་འདྲ་བའི་ངོ་བོ་ཡིན་ཞིང་མཚུངས་པར་ངོ་བོར་སྣང་སྟེ། དེ་བཞིན་དུ་ཡོངས་སུ་གཅོད་པའི་ཕྱིར་རོ། །སྒྲ་དང་འདྲ་བ་ནི་སྒྲ་བརྙན་བཞིན་ཏེ་དེའི་བདག་ཉིད་སྒྲ་དང་འདྲ་བའི་ཆོས་སོ། །དེས་མཉམ་པ་ནི་སྣང་བ་ཙམ་ཡིན་པའི་ཕྱིར་རོ། །སྦྱོར་བ་ནི་ཡང་དག་པར་སྦྱོར་བའོ། །དེ་མེད་པ་ནི་སྦྱོར་བ་མེད་དོ། །ཆ་ནི་ཡི་གེ་ཡོད་པ་ཞེས་བྱའོ། །སྦྱོར་མེད་ཆའི་ཆོས་ཡི་གེ་རིམ་པ་བཞིན་དུ་བརྗོད་པའི་ཕྱིར་དང་བརྗོད་པ་ཞིག་པའི་ཕྱིར་དང༌། སྦྱོར་བ་མེད་པའི་ཕྱིར་ཡི་གེ་ནི་རྗོད་པར་བྱེད་པ་མ་ཡིན་ནོ། །རྗོད་པར་བྱེད་པ་མ་ཡིན་པས་ཆོས་མ་ཡིན་ནོ། །དེའི་ཕྱིར་ནམ་མཁའ་དང་མཉམ་པའི་ཆོས་སོ། །དེ་ལྟ་བས་ན་རང་གི་ནི་རང་བཞིན་གྱིས་སོ། །པི་ཝང་མཉམ་པ་ནི་པི་ཝང་གི་སྒྲ་དང་མཚུངས་སོ། །དེའི་རྗོད་པར་བྱེད་པའི་སྒྲ་མ་ཡིན་པའི་ཕྱིར་དང༌། འབྲེལ་པ་མེད་པའི་ཕྱིར་རོ། །ཆུ་ནི་ཆུའོ། །གསལ་བ་ནི་ཟླ་བ་སྟེ། ཆུ་དང་མཚུངས་པ་
༄། །ཞེས་བྱ་བའི་དོན་ཏོ། །ཡང་ན་གསལ་བ་ནི་མར་མེ་སྟེ། གསལ་བར་བྱས་པར་མཚུངས་པས་མུན་པ་མི་སྣང་བའི་འཇིག་རྟེན་རྣམས་ལ་ཡེ་ཤེས་ཀྱི་སྣང་བར་གྱུར་པ་ཞེས་བྱ་བའི་དོན་ཏོ། །དེ་ཙམ་གྱིས་ནི་འདིའི་འགྲོ་བའི་དོན་སྒྲུབ་པར་བྱེད་པའི་ཕྱིར་ཁྱབ་པའོ། །ལྷག་མས་རྣམ་པར་དག་པ་ཉིད་དེ། དེའི་ཕྱིར་ཁྱེད་ཡང་གཞེས་ལ་ཆོས་བསྟན་དུ་གསོལ་ཞེས་བྱ་བ་ནི་བསྡུས་པའི་དོན་ཏོ། །གང་ཞིག་ཅེས་བྱ་བ་ལ་སོགས་པ་ལ་རོ་མཉམ་པོར་གྱུར་པའི་སངས་རྒྱས་ཐམས་ཅད་ཀྱི་ཆོས་ཁོ་ན་སྣང་བ་སྟེ། རབ་ཏུ་གསལ་བའི་ངོ་བོའི་ཕྱིར་རོ། །ནམ་མཁའ་དང་མཉམ་པ་ཡང་སྣང་བ་མེད་པའི་ཕྱིར་རོ། །དེར་རང་བཞིན་གྱི་རྡོ་རྗེ་ནི་རྡོ་རྗེ་སེམས་དཔའོ། །རོལ་བ་ནི་སེམས་ཅན་གྱི་དོན་དུ་སྤྱོད་པ་བསྟན་པའོ། །ཅི་དེ་གཟུགས་ཀྱི་རང་བཞིན་ཡིན་ནམ་ཞེ་ན། གཟུགས་དང་མཉམ་ཞེས་བྱ་བ་གསུངས་ཏེ། གཟུགས་སུ་སྣང་བ་ཉིད་དེས་བདག་ཉིད་ཡོངས་སུ་གཅོད་པའི་ཕྱིར་རོ། །དེ་རྣམས་ཀྱི་རྡོ་རྗེའི་གཞུང་ལུགས་ནི་དཀྱིལ་འཁོར་རོ། །དེར་ཇི་ལྟ་བུ་ཞིག་ཡིན་ཞེ་ན། གཟུགས་སོགས་ཞེས་བྱ་བ་གསུངས་ཏེ། གཟུགས་ལ་སོགས་པའི་འདོད་པ་ལྔའོ། །དེ་རྣམས་ཀྱི་བདེ་བ་མི་ཟད་པ་དེ་སྟེར་བར་བྱེད་པ་དེ་ལ་དེ་སྐད་ཅེས་བྱའོ། །ཆུ་ནི་ཆུ་བོ་དང་རྫིང་ལ་སོགས་པའོ། །འདིའི་ཟླ་བ་ནི་ཟླ་བའོ།། དེ་མཚུངས་པ་ནི་གཟུགས་བརྙན་མཚུངས་པ་ཉིད་ཀྱིས་ཡོངས་སུ་གཅོད་པའི་ཕྱིར་རོ་།དེ་ལྟ་བས་ན་སངས་རྒྱས་ཐམས་ཅད་ཉིད་ནམ་མཁའ་དང་མཉམ་པའོ། །སེམས་ཅན་གྱི་དོན་གྱི་ཆེད་དུ་སྐུ་དང་སྐུ་ཅན་གྱི་དཀྱིལ་འཁོར་སྟོན་ལ། དེ་བཞིན་དུ་ཁྱེད་ཀྱང་བསྟན་དུ་གསོལ་ཞེས་བྱ་བར་དགོངས་སོ། །རྣལ་འབྱོར་ཞེས་བྱ་བ་ལ་སོགས་པ་ལ་གང་ལ་རྣལ་འབྱོར་མང་པོའི་གནས་ཡོད་པ་དེ་ལ་དེ་སྐད་ཅེས་བྱ་སྟེ། དེ་རྣམས་སུ་ཡོད་པའི་ཕྱིར་རོ། །རྡོ་རྗེའི་ངོ་བོ་ནི་བདག་ཉིད་རྡོ་རྗེ་འཛིན་པའོ། །གདུལ་བྱའི་བསམ་པ་ཐ་དད་པས་འཛིན་པའོ། །དེ་ཉིད་ནི་གཟུགས་ལ་སོགས་པའི་དབྱེ་བས་སྤྲོ་བའོ། །དེ་ཉིད་སེམས་ཅན་ཏེ། སངས་རྒྱས་ལ་སོགས་པ་རྣམས་ཀྱི་བདག་ཉིད་མཚུངས་པ་ནི་དེ་དང་རྒྱུ་མཐུན་པའི་ཕྱིར་རོ། །དེས་ཞེས་བྱ་བ་ནི་སེམས་ཅན་དེ་རྣམས་ཀྱིས་སོ། །རྡོ་རྗེ་ནི་རྡོ་རྗེ་འཛིན་པའོ། །སྟེར་བ་ནི་སྟེར་བར་བྱེད་པའོ། །མཆོག་ཅེས་བྱ་བ་ནི་འདོད་པ་སྟེ།
༄། །སངས་རྒྱས་ཉིད་ལ་སོགས་པ་རྣམས་སོ། །དབྱིངས་དང་མཉམ་པ་ཞེས་བྱ་བ་ནི། རིགས་དང་མཚུངས་བ་སྟེ། རིགས་ཇི་ལྟ་བ་ཞེས་བྱ་བའི་དོན་ཏོ། །ལ་ལས་རྒྱལ་བ་ཞེས་ཟེར་ཏེ། །རྒྱལ་བར་བྱེད་པ་དང༌། འདུལ་བར་བྱེད་པ་སྟེ་མཆོག་གི་དབྱིངས་སོ། །སྟོང་གསུམ་གྱི་འཇིག་རྟེན་གྱི་ཁམས་དང་མཚུངས་པ་ནི་དུས་མཚུངས་པ་སྟེ། དེའི་དོན་འདི་ཡིན་ནོ། །འདི་ལྟ་བུའི་གཞན་གྱི་དོན་གྱི་བྱ་བ་རྡོ་རྗེ་འཛིན་པ་དེས་འཇུག་པར་བྱེད་པ་ཞེས་བྱ་བར་དགོངས་སོ། །དེ་ལྟར་ན་ལྷ་མོའི་གྲངས་ལ་སོགས་པ་ཤེས་པར་བྱ་བའི་ཕྱིར་གླུ་བཞི་དང་ལྷ་མོ་བཞི་པོས་བསྟན་པ་དེ་སྦྱར་བའི་ཕྱིར་ལྷ་མོ་ཞེས་བྱ་བ་ལ་སོགས་པ་སྟེ། ཀྱེ་ལྷ་མོ་བཞི་པོས་གླུ་འདི་གསུངས་པ་འདིས་སོ། །མཁའ་མཉམ་ནི་ཏིང་ངེ་འཛིན་ལ་གནས་པ་སྟེ་རང་གི་བདག་པོ་ལ་བསྐུལ་བའོ། །གང་ཞིག་གླུ་འདི་ཉན་ཞེས་བྱ་བ་ནི་སྒྲའི་ལུས་ཀྱིས་མཐོང་བའོ། །ཡིད་གཅིག་གིས་ཞེས་བྱ་བ་ནི་མཉམ་པར་གཞག་པས་སོ། །རྒལ་བ་ནི་དོན་གྱི་ལུས་ཀྱིས་སོ། །སེམས་ཡིད་ཀྱིས་ཞེས་བྱ་བ་ནི་བརྗོད་པ་དང་བཅས་པའི་ཡིད་ཀྱིས་སོ། །དེ་ནས་གང་ཡིན་ཞེ་ན། གླུ་འདི་ཞེས་བྱ་བ་ལ་སོགས་པ་གསུངས་ཏེ། གླུ་འདི་ནམ་མཁའ་དང་མཉམ་པ་ནི་དེ་བཞིན་ཉིད་དུ་སྣང་བའི་ཕྱིར་རོ། །གཟུགས་མཚུངས་པ་ནི་རྡོ་རྗེ་འཛིན་པ་ལ་ལེན་པ་ཞེས་བྱའོ། །དེའི་ཕྱིར་རྡོ་རྗེའི་རང་བཞིན་ནི་ཆོས་ཞུ་བའི་བདག་ཉིད་དོ། །ཐུགས་སད་པ་ནི་བཞེངས་པར་བྱེད་པའོ། །གཅིག་གི་རང་བཞིན་རྒྱུད་ནི་རྡོ་རྗེའི་གཞུང་ལུགས་ལེན་པ་ཞེས་བྱའོ། །དེ་ནས་རྡོ་རྗེ་དང་རྡོ་རྗེའི་གཞུང་ལུགས་ཀྱིས་བསྐྱོད་པའི་སྔགས་གང་ཞེ་ན། རྡོ་རྗེ་གོ་འཕང་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་གོ་འཕང་ནི་རྡོ་རྗེ་འཛིན་པའི་ས་བོན་ཧཱུཾ་ཡིག་གོ །དེ་ནས་གཞན་རང་བཞིན་ནི་ཐ་དད་པའི་ས་བོན་ནོ། །གཅིག་གི་ས་བོན་ནི་ཆོས་ཞུ་བ་དེ་ཉིད་ཀྱིས་ཧཱུཾ་ཡིག་ལྔ་བསྒོམ་པར་བྱ་ཞེས་བྱ་བར་སྦྱར་རོ། །དེ་ཅི་ཡིན་ཞེ་ན། སེམས་ཞེས་བྱ་བ་ལ་སོགས་པ་གསུངས་ཏེ། སེམས་ནི་རྡོ་རྗེ་འཛིན་པ་སྔོན་པོའོ། །གང་གི་ཕྱིར་དེ་དབུས་སུ་གྱུར་པ་དེའི་དཀྱིལ་འཁོར་ཐམས་ཅད་བསྒོམ་པར་བྱའོ། །དེ་ལྟར་ཆོས་ཞུ་བ་ལས་ས་བོན་ལྔ་བསྒོམ་ཞེ་ན། ཆོས་ཞེས་བྱ་བ་ལ་སོགས་པ་གསུངས་ཏེ་དཀྱིལ་འཁོར་ནི་གཞལ་ཡས་ཁང་ངོ༌། །དེའི་
༄། །དབུས་གནས་པདྨའི་མཆོག་ནི་དེར་སྒོམ་པ་དེ་ལ་དེ་སྐད་ཅེས་བྱའོ། །ཆོས་ལས་དེ་བཞིན་དུ་བསྒོམ་པ་ནི། ཆོས་ཀྱི་དཀྱིལ་འཁོར་དབུས་གནས་པ། །པདྨའི་མཆོག་ནི་བསྒོམ་པའོ། །དེའི་སྣ་ཚོགས་པ་ཞེས་བྱ་བ་ནི་ཆོས་དེའི་སྣ་ཚོགས་པ་དང་ཐ་དད་པའོ། །བསྒོམ་པར་བྱ་ཞེས་བྱ་བ་ནི་ལྷག་མའོ། །ལྟེ་བ་དང་འདབ་མ་རྣམས་སུ་ཆོས་དེ་ལས་ཟླ་བ་མནན་པ་ཧཱུཾ་ཡིག་གི་གཟུགས་ཀྱིས་ཡོངས་སུ་གྱུར་པའི་ཕྱིར་རོ། །དེ་ནས་ཅི་བྱ་ཞེ་ན། སྒྱུ་མ་ཞེས་བྱ་བ་ལ་སོགས་པ་གསུངས་ཏེ། སྒྱུ་མའི་རང་བཞིན་ཐམས་ཅད་ཀྱི་ངེས་པར་གཟུགས་རྣམས་སྤྱོད་པར་བྱེད་པ་སྟེ། གྱིས་ཤིག་ཅེས་བྱ་བ་ལྷག་མའོ། །སེམས་ཀྱི་རང་བཞིན་ཉིད་རྡོ་རྗེའི་གཞུང་ལུགས་མ་ཡིན་ནམ་འདི་སྒྱུ་མ་ཡིན་ནོ་ཞེ་ན། སེམས་ཞེས་བྱ་བ་ལ་སོགས་པ་གསུངས་ཏེ། རྣམ་པ་མེད་པ་ཉིད་དེ་གཅིག་དང་དུ་མའི་རང་བཞིན་དང་བྲལ་བའི་ཕྱིར་རོ། །དེ་ལྟ་བས་ན་སེམས་ནི་ནམ་མཁའ་དང་མཚུངས་པའོ།། དེའི་ཕྱིར་སེམས་ཀྱི་གཞུང་ལུགས་རང་བཞིན་མ་ཡིན་པ་ནི། རྡོ་རྗེའི་གཞུང་ལུགས་དང༌། སེམས་ཀྱི་གཞུང་ལུགས་ཀྱི་རང་གི་ངོ་བོ་སྟེ། རང་བཞིན་མ་ཡིན་པ་དང་རང་གི་ངོ་བོ་མེད་པ་དང་བརྫུན་པ་ཞེས་བྱ་བའི་དོན་ཏོ། །སྣང་བ་ཐ་དད་པའི་ཕྱིར་རྡོ་རྗེ་ཡང་གཞན་ཡིན་ཞིང་རྡོ་རྗེའི་གཞུང་ལུགས་ཀྱང་གཞན་མ་ཡིན་ནམ། དེ་ཇི་ལྟར་གཅིག་གི་རང་བཞིན་ཡིན་ཞེ་ན། གཉིས་ཀའི་ཞེས་བྱ་བ་ལ་སོགས་པ་གསུངས་ཏེ། སྣ་ཚོགས་པའི་རང་བཞིན་མེད་པས་གཞུག་པར་རིགས་པ་སྟེ། ནམ་མཁའ་དང་མཉམ་པ་གསལ་བ་ཙམ་གྱིས་རྣམ་པ་བརྫུན་པའི་ཕྱིར་རོ། །དེར་གནས་པ་ལས་རྡོ་རྗེ་ཉིད་ནམ་མཁའ་དང་མཉམ་པ་རྡོ་རྗེ་འཛིན་པ་ཉིད་ཀྱི་རང་བཞིན་ནོ། །ལྷག་མ་ནི་སྒྱུ་མ་སྟེ་བརྫུན་པའི་ཕྱིར་རོ། །རྡོ་རྗེ་སེམས་དཔའ་ཞེས་བྱ་བ་ལ་སོགས་པ་ལ། དང་པོས་ནི་བཅོས་མ་དང་བཅོས་མ་མ་ཡིན་པའི་ངོ་བོར་གསུངས་ལ། གཉིས་པས་ནི་ཐུགས་དང་གསུང་གི་གསང་བའོ། །ཀྱེ་རྡོ་རྗེ་སེམས་དཔའ་ཁྱོད་ཉིད་གཅིག་གི་རང་བཞིན་ནོ། །འཇིག་རྟེན་པའི་རྒྱུ་མཚན་དུ་བྱས་པ་ནི་སྒྱུ་མའི་རང་བཞིན་ཏེ། ཁྱོད་ནི་ཞེས་བྱ་བ་ནི་ལྷག་མའོ། །ཇི་ལྟར་ཡིན་ཞེ་ན། སེམས་ཅན་ཞེས་བྱ་བ་ལ་སོགས་པ་གསུངས་ཏེ། འདུལ་བར་བྱེད་པ་ནི་
༄། །སྐུ་ཐ་དད་པ་འདིས་སེམས་ཅན་རྣམས་འདུལ་བར་བྱེད་པའོ། །སེམས་ཅན་སད་པར་བྱེད་པ་ནི་འདུལ་བར་བྱེད་པའི་རང་བཞིན་ནོ། །ཀྱེ་ལགས་རྡོ་རྗེ་སེམས་དཔའ་ཁྱོད་ནི་གཅིག་གི་རང་བཞིན་ཏེ་གཅིག་གི་ངོ་བོའོ། །ལྷ་མོ་ནི་སྣང་བའི་ལྷ་མོའོ། །རྡོ་རྗེ་ནི་འཛིན་པའོ། །སྨྲས་པ་གསོལ་པའོ། །གསང་བ་ཞེས་བྱ་བ་ནི་གསང་བར་བྱེད་པ་སྟེ། གསང་བའི་ཐུགས་དང་གསུང་གི་གསང་བའི་ངོ་བོ་ཞེས་བྱ་བའི་ཐ་ཚིག་གོ །ནང་ཞེས་བྱ་བ་ནི་རང་གི་སྙིང་གར་རོ། །རོལ་པ་ཞེས་བྱ་བ་ནི་རོལ་བར་ཕྱེད་པའོ། །སེམས་ཀྱི་རང་བཞིན་ཞེས་བྱ་བ་ནི་ཟླ་བའི་དཀྱིལ་འཁོར་ལ་གནས་པ་སྣ་ཚོགས་རྡོ་རྗེའི་རྣམ་པས་སོ། །དེར་ངེས་ཞེས་བྱ་བ་ནི་སྙིང་གར་ངེས་པའོ། །སེམས་གསང་ཞེས་བྱ་བ་ནི་སྣ་ཚོགས་རྡོ་རྗེའི་ལྟེ་བར་བབས་པའོ། །ཆོས་འབྱུང་ཞེས་བྱ་བ་ནི་སྔགས་ཡང་འབྱུང་བ་སྟེ། དེ་ཡང་ཧཱུཾ་ཡིག་གོ །སྤྲོ་བའི་དབང་དུ་བྱས་ནས་སྤྲོ་བ་ཞེས་བྱ་བ་གསུངས་ཏེ། སྤྲོ་བར་བྱས་པའི་རྡོ་རྗེ་ནི་སྙིང་གའི་སྔགས་སོ། །ནམ་མཁའི་རང་བཞིན་ནི་སེམས་ཅན་རྣམས་སྒྱུ་མ་ལྟ་བུའོ། །ཡང་སྡུད་པ་ནི་གང་གི་ཕྱིར་སེམས་ཀྱི་རང་བཞིན་གཅིག་པའོ། །གང་གི་ཕྱིར་སེམས་ལ་སྤྱོད་པར་བྱེད་པ་ནི་གང་གི་ཕྱིར་ནི་ཧིའི་དོན་ཏོ། །ཐམས་ཅད་ཉིད་དུ་སེམས་མཉམ་པར་མཐོང་བ་ནི་སྒྱུ་མ་ལྟ་བུའོ། །ཡང་དང་ཡང་དུ་སེམས་ཅན་སྦྱོར་བ་ནི་བསྡུས་ནས་གཅིག་གི་རྣམ་པར་བྱེད་པའོ། །འདི་ཐམས་ཅད་ཀྱིས་འདི་སྐད་གསུངས་པ་ཡིན་ཏེ། འདིར་བླ་ན་མེད་པའི་མཆོད་པ་རྣམ་པ་བདུན་དང༌། སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་སྔོན་དུ་སོང་བ་ཙམ་གྱིས་སེམས་ཙམ་ཉིད་དུ་མོས་པར་བྱས་ལ་ནམ་མཁའ་དང་མཉམ་པའི་བྱང་ཆུབ་ཀྱི་སེམས་མངོན་དུ་བྱ་སྟེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་པས་བྱིན་གྱིས་བརླབ་པར་བྱའོ། །དེའི་རྗེས་ལ་ཙུཾ་ཡིག་ལས་སྐྱེས་པའི་ལྷ་མོ་ཙུན་དཱ་ཟླ་བ་བཞིན་དུ་དཀར་བ་ཕྱག་བཞི་པ་ཏིང་ངེ་འཛིན་གྱི་ཕྱག་རྒྱས་རོའི་སྣོད་འཛིན་པ། ཅིག་ཤོས་དག་གིས་ཕྲེང་བ་དང་པུསྟི་འཛིན་པ། རལ་བའི་ཅོད་པན་ཅན་རྡོ་རྗེ་སྐྱིལ་མོ་ཀྲུང་གིས་པདྨ་ཆེན་པོ་དང་ཟླ་བ་ལ་བཞུགས་པ་འཇིག་རྟེན་གྱི་ཁམས་ཀྱི་ཚད་ཙམ་བསྒོམ་པར་བྱའོ། །དེའི་པདྨའི་ལྟེ་བ་མུ་ཏིག་གི་འབྲས་བུ་
༄། །ལྟར་གསལ་ཞིང་དཀར་བ་ཆོས་འབྱུང་གི་རྣམ་པ་འཛིན་པར་བྷྲཱུཾ་ལས་སྐྱེས་པའི་རྣམ་པར་སྣང་མཛད་དོ། །དེ་ཡོངས་སུ་གྱུར་པ་ལས་མཆོག་ཏུ་འབར་བའི་རིན་པོ་ཆེ་ལྔ་ལས་བྱུང་བའི་གཞལ་ཡས་ཁང་ངོ༌། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །ཁྱམས་བཞི་པོ་ནི་མཛེས་པ་སྟེ། །མཆོད་པས་འབྲེལ་བའི་ལྷ་མོའི་ཚོགས། །དྲ་བ་དྲ་ཕྱེད་དར་དང་ཕྲེང༌། །རྔ་མ་ལ་སོགས་པ་ཡིས་བརྒྱན། །རླུང་གིས་བསྐྱོད་པ་སྣ་ཚོགས་རྩེ། །བ་དན་དྲིལ་བུའི་སྒྲ་བསམ་བྱ། །དེའི་དབུས་སུ་པདྨ་དམར་པོ་འདབ་མ་བརྒྱད་པ་བསམས་ཏེ། དེའི་ལྟེ་བར་ཉི་མའི་དཀྱིལ་འཁོར་ལ་ཧཱུཾ་ཡིག་གིས་བཅོམ་ལྡན་འདས་མི་བསྐྱོད་པ་ཨིནྡྲ་ནཱི་ལའི་མདོག་དང་མཚུངས་པ། ནོར་བུ་རིན་པོ་ཆེས་མཚན་པའི་རལ་བའི་ཅོད་པན་ཅན། མ་རུངས་པའི་མཆེ་བ་གཙིགས་པ་ཅན། སྣ་ཚོགས་པའི་གོས་ཀྱིས་བརྒྱན་པ། རྡོ་རྗེ་དང་རྡོ་རྗེ་དྲིལ་བུ་འཛིན་པ། ཕྱག་གཉིས་ཀྱིས་རང་སྣང་བའི་རིག་མ་ལ་འཁྱུད་པ་བསྒོམ་པར་བྱའོ། །སྒྱུ་མའི་བདེ་བའི་སྒྲས་ཕྱོགས་ཀྱི་དེ་བཞིན་གཤེགས་པ་བཀུག་སྟེ། ཞལ་དུ་བཅུག་ལ་ཞུ་ནས་པདྨའི་ནང་དུ་སོང་བའི་བདེ་བ་ཆེན་པོའི་བདག་ཉིད་བསམ་པར་བྱའོ། །དེའི་སྣང་བས་ཡབ་ཡུམ་ཞུ་བར་བལྟས་ལ། དེའི་པདྨར་ཟླ་བ་བཞིན་སངས་རྒྱས་རྣམས་ཀྱི་སྐུས་གང་བར་བལྟའོ། །དེའི་རྗེས་ལ་ཞི་བ་མ་དང་ཐར་བ་མ་དང༌། ཤིན་ཏུ་མཉམ་མ་དང༌། མི་མཉམ་མ་ཞེས་བྱ་བའི་ལྷ་མོ་བཞིས་སྒོ་བཞིར་ཟླ་བ་རྣམས་ལ་བཞུགས་ཏེ་ཆོས་ཀྱི་སྐུའི་བདག་ཉིད་རྡོ་རྗེ་འཛིན་པ་ཆེན་པོ་དེ་ནི་སྤྲོས་པ་མེད་པ་ཐར་པ་ཆེན་པོའི་བདེ་བའི་ཏིང་ངེ་འཛིན་ལས་བསླང་བར་བྱ་བའི་ཕྱིར་གླུ་བཞིས་བསྐུལ་བ། སུ་ནཱ་ཨི་ཨེ་ཨེ་ཀ་ཨ་དྷརྨྨ་ས་མ། བྷཱ་སནྟི་མོ་ཁ་སུ་ས་མཱ་ཨ་ས་མཱ། མཱ་ཨ་ཏུ་ཀ་སྱ་ཧཾ་བུདྡྷ་ས་མཱ། ཀི་ཏ་ནྟི་སརྦ་ཁ་ས་མཱ་རུ་ལུ་རུ་ལུ་བྷྱོ་རུ་ལུ། མཱ་ཨ་ས་དྷ་བ་ཀ་ཨ་ཛོ་ཨ་ས་མ། བྷ་སནྟི་དུ་ལ་ལ་ར་བ་དྷརྨྨ་ས། དྷརྨ་ཨ་ཀི་ཊ་ཁ་ས་མཱ་ཎ་ས་མ། ཨ་ས་མཱ་ག་མཾ་ས་ས་ཨུ་བི་ཎ་ས་མཱ། ཛྷོ་དྷརྨྨ་ལོ་ཨ་ཨཱ་ས་ས་མོ། །ཀུ་བནྟི་བཛྲ་ཏི་ཧེ་རུ་ཨ་ས་མཱ། རུ་བཱ་ཏི་ཀ་མ་སུ་ཧ་ཨ་ཀྑ་ཨ་ད། ཛ་ལ་ཧེནྡུ་ཏུལླ་ཏ་ཧི་བཛྲ་ན་ཨུ། བྷ་ཧཱུ་ཛོ་ཨ་པ་ཊ་ཏ་ཧི་བཛྲ་ན་ཨ། བ་ཧཱུ་རུ་ཨ་དྷ་རི་ཏ་ཧི་བཛྲ་
༄། །མ་ཨུ། ཕ་ར་ན་ཧི་སཏྭ་ཨ་སྱ་ན་ས་མཱ། ཏ་ཧི་བཛྲ་དེ་ཨི་བ་ར་དྷ་ཨ་ས་མཱ། དེ་ལྟར་ལྷ་མོ་བཞིས་གླུ་བླངས་ནས་རང་གི་ཕྱོགས་ཀྱི་འདབ་མའི་ཞུ་བ་རྣམས་སུ་ཞུགས་ཤིང་ཞུ་བས་རོ་མཉམ་པར་འགྱུར་རོ། །གླུ་མ་རྣམས་ཀྱིས་གསོལ་བ་བཏབ་པས། ཟླ་བ་ཞུ་བ་དེས་ལྟེ་བ་དང་ཤར་ལ་སོགས་པའི་འདབ་མ་རྣམས་སུ་ཟླ་བའི་གདན་ཅན་ཧཱུཾ་ཡིག་ལྔར་གྱུར་ཏོ། །སྔོན་པོ་དང་དཀར་པོ་དང༌། སྔོན་པོ་དང་དམར་པོ་དང༌། ལྗང་གུ་གོ་རིམས་བཞིན་ཏེ། ལྟེ་བར་ཧཱུཾ་ཡིག་གིས་སྣ་ཚོགས་རྡོ་རྗེ་བསམ་པར་བྱ་ཞིང༌། ཤར་ལ་སོགས་པར་ཧཱུཾ་ཡིག་གི་ཁ་དོག་དང་མཚུངས་པའི་རྡོ་རྗེ་རྩེ་ལྔའོ། །ལྟེ་བའི་སྙིང་པོར་འབྱུང་བའི་ས་བོན་གྱི་འོད་ཟེར་རྣམས་སྤྲོས་པས་འགྲོ་བ་རྣམས་ལ་ཕན་པར་བྱས་ཤིང་རྡོ་རྗེ་དེ་རྣམས་ཅི་རིགས་པར་ལྷ་དྲུག་གི་ངོ་བོར་འགྱུར་རོ། །དེ་ལ་སྣ་ཚོགས་རྡོ་རྗེ་དང་ས་བོན་ཡོངས་སུ་གྱུར་པ་ལས་བཅོམ་ལྡན་འདས་རྡོ་རྗེ་སེམས་དཔའ་ཨིནྡྲ་ནཱི་ལའི་མདོག་དང་མཚུངས་པ་རལ་པའི་ཅོད་པན་ཅན། ལང་ཚོ་གསར་པ་རྣམ་པ་སྣ་ཚོགས་ན་བཟས་བརྒྱན་པ། རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཉིས་པོ་དག་གིས་སྣ་ཚོགས་རྡོ་རྗེ་དང་སྣ་ཚོགས་རྡོ་རྗེས་མཚན་པའི་དྲིལ་བུ་འཛིན་ཅིང་རང་གསལ་བའི་ལྷ་མོ་སྣང་བ་ལ་འཁྱུད་པས་རྣམ་པར་གནས་པ་དཔའ་ཞིང་སྒེག་པའི་ཉམས་དང་ལྡན་པའོ། །ཤར་གྱི་འདབ་མར་རྡོ་རྗེ་དཀར་པོ་དང༌། ས་བོན་ལས་བྱུང་བའི་ཞི་བ་མ་སྐུ་མདོག་དཀར་མོའོ། །ལྷོའི་འདབ་མར་རྡོ་རྗེ་སྔོན་པོ་དང་ས་བོན་ལས་བྱུང་བའི་ཐར་པ་མ་སྐུ་མདོག་སྔོན་མོའོ། །ནུབ་ཀྱི་འདབ་མར་རྡོ་རྗེ་དམར་པོ་དང༌། ས་བོན་ལས་བྱུང་བའི་ཤིན་ཏུ་མཉམ་མ་སྐུ་མདོག་པདྨ་རཱ་ག་ལྟ་བུའོ། །བྱང་གི་འདབ་མར་རྡོ་རྗེ་ལྗང་གུ་དང་ས་བོན་ལས་བྱུང་བའི་མི་མཉམ་མ་སྐུ་མདོག་མ་རྒད་ལྟ་བུའོ། །དེ་ལྟར་ལྷ་མོ་བཞི་པོ་ལང་ཚོ་གསར་པ། དཔའ་བ་དང་སྒེག་པའི་ཉམས་ཅན། རིན་པོ་ཆེའི་ཅོད་པན་ཅན་རྣམ་པ་སྣ་ཚོགས་པའི་ན་བཟས་བརྒྱན་པ་དགོད་པ་དང་བཅས་པའི་བཅོམ་ལྡན་འདས་ལ་ཟུར་གྱིས་བལྟ་བ། ཕྱག་གཡས་པ་རྣམས་ཀྱིས་ཁ་དོག་དང་མཚུངས་པའི་རྡོ་རྗེ་རྩེ་ལྔ་པ་འཛིན་པ།
༄། །གཡོན་པ་རྣམས་ཀྱིས་འཁོར་ལོ་དང༌། ཨུཏྤལ་དམར་པོ་དང་པདྨ་དང༌། ཨུཏྤལ་སྔོན་པོ་འཛིན་པ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེའི་རྗེས་ལ་བཅོམ་ལྡན་འདས་དང་ལྷ་མོ་སྣང་བའི་ནུ་མའི་བར་དུ་ཟླ་བ་དང་སྣ་ཚོགས་རྡོ་རྗེའི་ལྟེ་བར་ཟླ་བ་ལ་ཧཱུཾ་ཡིག་སྔོན་པོ་འོད་ཟེར་གྱི་ཕྲེང་བ་ཅན་བལྟས་ཏེ། ཨོཾ་དྷརྨྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་བྱིན་གྱིས་བརླབ་པར་བྱའོ། །མགོ་དང་མགྲིན་པ་དང་སྙིང་གའི་ཟླ་བ་རྣམས་ལ་རབ་པོ་དང་ནག་པོ་རྣམས་བསམས་ལ་སྔགས་ཀྱིས་པོ་དང་ནག་པོ་རྣམས་བསམས་ལ་སྔགས་ཀྱིས་བྱིན་གྱིས་བརླབ་པར་བྱ་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱ་ག་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ་བྱའོ། །ལྷ་མོ་བཞི་པོ་རྣམས་ཀྱི་ནུ་མའི་བར་དུ་ཟླ་བ་ལ་གནས་པའི་ཁ་དོག་དང་མཚུངས་པའི་རྡོ་རྗེ་རྩེ་ལྔ་པ་དང༌། ལྟེ་བར་གནས་པ་རྣམས་ལ་རང་གི་ས་བོན་ནོ། །མགོ་བོ་དང་མགྲིན་པ་དང༌། སྙིང་གའི་ཟླ་བ་རྣམས་ལ་རབ་བསྔགས་ལ་སོགས་པ་བལྟའོ། །དེ་ནས་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྣམས་ཀྱི་དེ་ཁོ་ན་ཉིད་ཇི་ལྟ་བ་བཞིན་དུ་ནམ་མཁའ་དང་མཉམ་པ་སྟེ། རྣམ་པ་ཇི་ལྟ་བ་བཞིན་དུ་མེད་པའི་ཕྱིར་སྐྱེ་བ་མེད་པ་དང༌། རང་བཞིན་མེད་པར་ངེས་པར་བྱས་ཤིང་ཚིགས་སུ་བཅད་པས་བྱིན་གྱིས་བརླབ་པར་བྱ་སྟེ། སྐུ་མི་འགྱུར་བ་སྐྱེ་བ་མེད། །གསུང་དང་ཐུགས་ནི་མཚན་ཉིད་མེད། །ནམ་མཁའི་རྡོ་རྗེ་རྟག་པར་འགྱུར། །བརྫུན་པ་བསྡུས་པ་བསྡུས་བའོ། །ཞེས་བྱའོ། །དེ་ནས་རང་རང་གི་ས་བོན་གྱི་འོད་ཟེར་ཕྱོགས་བཅུར་སོང་བ་རྣམས་ཀྱིས་ཡེ་ཤེས་ཀྱི་དཀྱིལ་འཁོར་བཀུག་པ་མདུན་གྱི་བར་སྣང་དུ་གཞག་ལ་རང་གི་སྔགས་བཟླས་པས་ཡོན་ཆབ་དབུལ་ཞིང་ཛཿ་ཧཱུཾ་བཾ་ཧོཿ་ཞེས་པ་རྣམས་ཀྱིས་ཡེ་ཤེས་ཀྱི་དཀྱིལ་འཁོར་དགུག་པ་དང༌། གཞུག་པ་དང༌། བཅིང་བ་དང་དགྱེས་པར་བྱས་ལ་དམ་ཚིག་གི་དཀྱིལ་འཁོར་དེས་ལྷན་ཅིག་རོ་མཉམ་པར་གྱུར་པའོ། །དེ་ནས་སྙིང་གའི་སྔགས་ཀྱི་འོད་ཟེར་གྱིས་དེ་བཞིན་གཤེགས་པ་སྤྱན་དྲངས་ལ་ཡེ་ཤེས་ཀྱི་ཆུས་གང་བའི་རིན་པོ་ཆེའི་བུམ་པ་བསྣམས་པ་རྣམས་ཀྱིས་བདག་དང་དཀྱིལ་
༄། །འཁོར་བ་རྣམས་ལ་དབང་བསྐུར་བར་མོས་པར་བྱའོ། །ཆུ་རྫོགས་པ་ན་ལྷ་རྣམས་ཀྱི་དབུ་རྒྱན་ལ་རིགས་ཀྱི་དེ་བཞིན་གཤེགས་པ་བལྟའོ། །དེ་ལ་རང་གི་རལ་བའི་ཅོད་པན་གྱི་སྟེང་དུ་བཅོམ་ལྡན་འདས་མི་བསྐྱོད་པ་ཨིནྡྲ་ནཱི་ལ་ལྟ་བུ་ས་ལ་རེག་པའི་ཕྱག་རྒྱས་བཞུགས་པའོ། །དཔྲལ་བའི་སྟེང་དུ་རྣམ་པར་སྣང་མཛད་ཟླ་བ་ལྟ་བུ་བྱང་ཆུབ་མཆོག་གི་ཕྱག་རྒྱས་བཞུགས་པའོ། །རྣ་བ་གཡས་པའི་སྟེང་དུ་རིན་ཆེན་འབྱུང་ལྡན་གསེར་གྱི་མདོག་ཅན་མཆོག་སྦྱིན་གྱི་ཕྱག་རྒྱས་བཞུགས་པའོ། །མགྲིན་པའི་རྒྱབ་ཀྱི་སྟེང་དུ་སྣང་བ་མཐའ་ཡས་པདྨ་རཱ་ག་ལྟ་བུ་ཏིང་ངེ་འཛིན་གྱི་ཕྱག་རྒྱས་བཞུགས་པའོ། །རྣ་བ་གཡོན་པའི་སྟེང་དུ་དོན་ཡོད་གྲུབ་པ་མ་ར་ཀ་ཏ་ལྟ་བུ་མི་འཇིགས་པའི་ཕྱག་རྒྱས་བཞུགས་པའོ། །དེ་ལྟར་ལྷ་མོ་སྣང་བའི་ཡང་ངོ༌། །ལྷ་མོ་བཞི་པོའི་རིན་པོ་ཆེའི་ཅོད་པན་གྱི་སྟེང་དུ་གོ་རིམས་བཞིན་དུ་རྣམ་པར་སྣང་མཛད་དང༌། མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པའོ། །དེ་ནས་སྙིང་གའི་སྔགས་ཀྱི་འོད་ཟེར་ལས་བྱུང་བའི་ལྷ་མོ་སྤྲོས་པའི་སྦྱོར་བས་ནམ་མཁའི་ངོས་ཁྱབ་པ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་མཆོད་པར་བྱའོ། །དེ་ནས་གསང་བའི་མཆོད་པ་དང་དཔའ་བོ་ལྔའི་མཆོད་པ་ཆོ་ག་དང་ལྡན་པས་ཡང་དག་པར་མཆོད་པར་བྱ་སྟེ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་བྱིན་གྱིས་བརླབ་པར་བྱའོ། །དེ་ནས་ཚིགས་སུ་བཅད་པ་གསུམ་གྱིས། ལྷ་མོ་བཞིའི་ཞལ་ནས་བཅོམ་ལྡན་འདས་ལ་བསྟོད་པ། སངས་རྒྱས་ལྔ་ཡི་དབུ་རྒྱན་བསྟེན།། གང་གི་སྲིད་གསུམ་སྙིང་པོ་སྟེ། །དང་པོ་སངས་རྒྱས་བཅོས་རང་བཞིན། །དེ་ཡི་སྤྱོད་པ་མཁའ་དང་མཉམ། །སངས་རྒྱས་ལྔ་ཡི་དབུ་རྒྱན་ཡང༌། །གང་གི་ཆོས་རྣམས་རང་བཞིན་ཉིད། །རྡོ་རྗེ་སེམས་དཔའ་ལ་རབ་འདུད། །སྲིད་གསུམ་ཆོས་རྣམས་ནུས་པ་ཡི། །རྡོ་རྗེ་སེམས་ལ་འདུད་བྱེད་པ། །བསོད་ནམས་ཀྱང་ཡིན་མཐའ་ཡས་སོ། །རྡོ་རྗེ་སེམས་དཔའ་ལ་རབ་འདུད། །ཐོབ་བྱའི་ཆོས་ཀྱི་ཆེན་པོ་ཉིད། །དེ་ནས་མཆོག་གི་བདེ་བ་ཡང་དག་པར་གཏད་པས་བདག་དང་དཀྱིལ་འཁོར་ཇི་སྲིད་འདོད་པ་བསྒོམ་པར་བྱའོ། །དེ་ནས་སྙིང་གའི་སྔགས་ཀྱི་འོད་ཟེར་གྱི་
༄། །གོང་ནས་དེ་བཞིན་གཤེགས་པ་ཐམས་ཅད་སྤྲོས་པས་འགྲོ་བ་རྣམས་དེའི་བདག་ཉིད་དུ་བྱས་ཤིང་སེམས་ཀྱིས་སྣ་ཚོགས་པ་དེ་བསམ་པར་བྱའོ། །ཡང་དེ་རྣམས་བསྡུས་ཏེ་སེམས་གཅིག་གི་རང་བཞིན་དུ་བལྟའོ། །རྒྱུད་འདིར་ཏིང་ངེ་འཛིན་གསུམ་གྱི་ཐ་སྙད་མེད་ཅིང་འདིར་ཏིང་ངེ་འཛིན་དཀྱིལ་འཁོར་རྒྱལ་པོ་མཆོག་ཅེས་བྱ་བ་གཅིག་ཉིད་དོ། །བསྒོམས་པས་སྐྱོ་བར་གྱུར་ན་སྔགས་བཟླས་པར་བྱ་སྟེ། སྣ་ཚོགས་རྡོ་རྗེའི་ལྟེ་བའི་ནང་དུ་སོང་བ་སྙིང་པོའི་སྔགས་ཧཱུཾ་ངམ། ཉེ་བའི་སྙིང་པོའི་སྔགས་ཨ་ནུ་རཱ་ག་སྙིང་པོའམ། གཉིས་ཀའི་ཨ་ནུ་རཱ་ག་ཡ་མི་ཧཱུཾ་ངམ། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ་སུ་ར་ཏ་སྟྭཾ་ཞེས་བྱ་བའི་ཡི་གེ་བཅུ་བདུན་པའམ་གཞན་ཇི་སྙེད་པའི་སྔགས་དང་རིག་པ་ལ་སོགས་པ་བཟླས་པར་བྱའོ། །དེ་ནས་མདོར་བསྡུས་པའི་ཚིགས་སུ་བཅད་པ་གཉིས་ཀྱིས་སྨོན་ལམ་གདབ་པར་བྱ་སྟེ། སངས་རྒྱས་ཐམས་ཅད་བདོག་པ་ཀུན། །རྡོ་རྗེ་འཛིན་པ་ཆེན་པོའི་གནས། །དགེ་བ་འདི་ཡིས་ཐོབ་གྱུར་ཅིག །འགྲོ་བས་ཀྱང་ནི་དེ་ཐོབ་ཤོག །རྫོགས་པའི་བྱང་ཆུབ་གང་སྤྱོད་དང༌། །རྫོགས་སངས་རྒྱས་ཀྱིས་གང་ཡིན་པ། །བྱང་ཆུབ་རྡོ་རྗེས་གང་བསྔགས་པའི། །སྤྱོད་པ་དེ་དང་བདག་ལྡན་ཤོག །དེ་ནས་རང་གི་སྙིང་གའི་འོད་ཟེར་གྱིས་དམ་ཚིག་གི་དཀྱིལ་འཁོར་བཀུག་ལ་དེར་ནུབ་པར་བསྒོམ་པར་བྱའོ། །དེ་ནས་ལངས་པ་ན་བདག་ཉིད་རང་གི་ལྷའི་ང་རྒྱལ་དང་འབྱུང་བ་ཆེན་པོ་བཞི་པ་ཇི་ལྟར་བདེ་བར་གནས་པར་བྱའོ། །འདིའི་བསྒོམ་པ་ནི་ཐུན་མཚམས་དང་པོའོ། །མཚམས་གཞན་དུ་སྐད་ཅིག་ལ་བདག་ཉིད་རིག་མ་དང་བཅས་པའི་རང་གི་ལྷའི་ངོ་བོར་ཐམས་ཅད་རྫོགས་པར་དམིགས་པར་བྱས་ལ་རང་གི་སྙིང་གའི་སྔགས་ལ་རིམ་པས་ལྷ་མོ་བཞི་ཕྱུང་ལ་གནས་ཇི་ལྟ་བ་བཞིན་དུ་གཞག་པར་བྱའོ། །སྐུ་གསུང་ཐུགས་ཀྱི་བྱིན་གྱིས་བརླབ་པ་ལ་སོགས་པ་ཐམས་ཅད་སྔ་མ་བཞིན་དུ་བྱའོ། །དེ་ལྟར་ཐུན་ཐ་མ་ལ་ཡེ་ཤེས་ཀྱི་དཀྱིལ་འཁོར་ཡང་དག་པར་མཆོད་ཅིང༌། ཡོན་ཆབ་ཕུལ་ལ་ཨོཾ་བཛྲ་མུཿ་ཞེས་བྱ་བ་འདིས་གཤེགས་སུ་གསོལ་བར་བྱའོ། །བདག་ཉིད་བསྲུང་བ་བྱས་ལ་དམ་ཚིག་གི་དཀྱིལ་འཁོར་རང་གི་
༄། །སྔགས་སུ་ནུབ་པར་གྱུར་པར་བསྒོམ་པར་བྱའོ། །གཉིད་ཀྱི་དུས་སུ་སྣང་བ་མེད་པ་མཐའ་ཡས་པའི་ཡེ་ཤེས་སྔོན་དུ་བྱས་ལ་ཉལ་བར་བྱ་ཞིང་ལྷ་མོ་བཞིའི་གླུས་བསྐུལ་བས་གཉིད་ལས་ལངས་པར་བྱའོ། །དེ་ལྟར་ཉི་མ་རེ་རེར་བྱ་བ་ནི་ཇི་སྲིད་དངོས་གྲུབ་ཀྱི་མཚན་མ་མཐོང་བ་དེ་སྲིད་ཅེས་བྱའོ། །ཐུགས་གཙོར་བྱེད་པའི་དཀྱིལ་འཁོར་ནི་ཐུགས་ཀྱི་དཀྱིལ་འཁོར་ཏེ། དེ་སྟོན་བར་བྱེད་པའི་ལེའུའོ། །ནམ་མཁའ་དང་མཉམ་པའི་རྒྱུད་ཀྱི་འགྲེལ་པ་ནམ་མཁའ་དང་མཉམ་པ་ལས་ཐུགས་ཀྱི་དཀྱིལ་འཁོར་གྱི་ལེའུ་སྟེ་གཉིས་པའོ།། །།
ལེའུ་གསུམ་པ། གསུང་གི་དཀྱིལ་འཁོར་སྟོན་པར་བྱེད་པ།
༄། །གསུང་གི་དཀྱིལ་འཁོར་བཤད་པར་བྱ་སྟེ། གསུང་ནི་ཤེས་རབ་ཡིན་ཞིང་ཐུགས་ནི་ཐབས་ཏེ། ཐབས་དང་ཤེས་རབ་གཉིས་སུ་མེད་པའི་ངོ་བོ་ནི་གསུང་གི་དཀྱིལ་འཁོར་རོ། །དེ་ཡང་ཤེས་རབ་གཙོར་གྱུར་པ་དེའི་ཕྱིར། ལྷ་མོ་སྣང་བའི་སྐབས་དབྱེ་བ་གསུངས་པ། གཉིས་སྐྱེས་ཞེས་བྱ་བ་ལ་སོགས་པ་ལ། གཉིས་སྐྱེས་ནི་བྲམ་ཟེའོ། །དེ་རྣམས་དང་གཏུམ་མོ་རང་བཞིན་མཚུངས་ཏེ། རྣམ་པར་ཤེས་པ་ཙམ་གྱི་རང་བཞིན་དང༌། དེ་རྣམས་ཐ་དད་པར་བྱེད་པའི་རྣམ་པ་མེད་པ་ཉིད་ཀྱི་ཕྱིར་རོ། །དཔེ་འདི་སངས་རྒྱས་ཀྱིས་གསུངས་པའི་ཆོས་རྣམས་ཀྱི་རང་བཞིན་ཏེ། རང་བཞིན་གསལ་བ་ཙམ་ཉིད་ནི་ནམ་མཁའ་དང་མཉམ་པའོ། །དངོས་པོ་རྣམས་ཀྱི་རང་བཞིན་ནི་དུ་མ་དང་གཅིག་གི་རང་བཞིན་སྣང་བས་གྲུབ་ལ་མི་གསལ་བའི་བདག་ཉིད་ལ་སྣང་བ་མི་རུང་བ་མ་ཡིན་ནམ། དེ་ཇི་ལྟར་གཅིག་པ་ཉིད་དུ་བརྗོད་པར་བྱ་ཞིང་སྣ་ཚོགས་པར་བརྗོད་པར་མི་བྱ་ཞེ་ན་གཅིག་ཅེས་བྱ་བ་ལ་སོགས་པ་གསུངས་ཏེ། གཅིག་གི་རང་བཞིན་ནི་སེམས་ཙམ་ཉིད་དོ། །དེའི་ཡོད་པར་གནས་པ་ནི། དོན་དམ་པ་ཉིད་ཀྱི་ཕྱིར་རོ། བརྟགས་པའི་ཕྱིར་རོ། །རྡོར་ཇེ་འཛིན་གྱིས་གསུངས་པ། མཚུངས་པའི་རང་བཞིན་ནི་དེར་ཡིན་ནོ། །དཔེ་གཞན་བྲམ་ཟེ་ཞེས་བྱ་བ་ལ་སོགས་པ་གསུངས་ཏེ། ཁྱི་དང་བྲམ་ཟེ་གཅིག་པའི་རང་བཞིན་ནོ། །རུས་པ་དང་ཆ་ལུགས་ཀྱི་ལག་གདུབ་དང༌། རྣ་རྒྱན་ལ་སོགས་པ་སྒྱུ་མ་སྟེ། ཡང་དག་པ་མ་ཡིན་པའི་ཕྱིར་རོ། །རྡོ་རྗེའི་གོ་འཕང་ཞེས་བྱ་བ་ནི་རྡོ་རྗེའི་གོ་འཕང་བརྟན་པའི་ངོ་བོ་
༄། །སེམས་ཙམ་ཉིད་དོ། །དེར་བྲམ་ཟེ་དང་ཁྱི་ལ་སོགས་པ་བདེན་ཏེ་དོན་དམ་པར་རོ། །ཡང་དེ་ལ་མཚུངས་པའི་རང་བཞིན་གང་གིས་མཐོང་ཞེ་ན། ངས་མཐོང་ཞེས་བྱ་བ་གསུངས་ཏེ། ངས་མཐོང་བའོ། །དཔེ་གཞན་གསང་བ་ཞེས་བྱ་བ་ལ་སོགས་པ་གསུངས་ཏེ། ལྷ་མོ་ནི་ལྷ་མོ་སྣང་བས་སོ། །དེ་ཞེས་བྱ་བ་ནི་དེའི་གཅིག་པའི་རང་བཞིན་གྱིས་སོ། །སྦྱོར་བའི་རང་བཞིན་ཞེས་བྱ་བ་ནི་སྦྱོར་བ་ནི་ཏིང་ངེ་འཛིན་ཏོ། །དེར་ཞེས་བྱ་བ་ནི་རྣལ་འབྱོར་དེར་རོ། །ཐམས་ཅད་ཁྱོད་ཅེས་བྱ་བ་ནི་ཐམས་ཅད་ཉིད་དོ། །ལྷ་མོ་བཞི་ཞེས་བྱ་བའི་ཐ་ཚིག་གོ །རྡོ་རྗེ་སེམས་དཔའི་དངོས་པོས་གཅིག་གི་རང་བཞིན་ཡིན་ལ། བརྒྱན་པ་ནི་རབ་ཏུ་བསྒོམ་པར་བྱ་བ་དང་ཡང་དག་པར་སྟོན་པར་བྱེད་པའོ། །བསྟན་པ་ནི་སྐུ་ཡིས་ཏེ། སྐུ་གཅིག་གིས་ཞེས་བྱ་བའི་དོན་ཏོ། །མཚུངས་པ་ཞེས་བྱ་བ་ལ་སོགས་པ་ལ། །མཚུངས་པའི་རང་བཞིན་ནི་ཕྱེད་ཞུ་བ་ཉིད་ཀྱི་ཕྱིར་རོ། །གཅིག་ཡིད་ནི་གཅིག་གིས་སྔགས་སོ། །རྡོ་རྗེ་རྣམ་སྤངས་ནི་རྡོ་རྗེ་སེམས་དཔའ་རྣམ་པར་སྤངས་པའོ། །འགྲོ་བ་གཅིག་ནི་གཅིག་པུ་ཉིད་དོ། །གལ་ཏེ་ཡབ་དང་ཡུམ་དག་གར་སོང་ཞེ་ན། དེར་ཞེས་བྱ་བ་ལ་སོགས་པ་གསུངས་ཏེ། ཆོས་ཞུ་ཞིང་རིག་པ་དེར་ཞེ་སྡང་དང་དེའི་རང་བཞིན་དག་ནི་མི་བསྐྱོད་པ་དང་རིག་མའོ། །ཡན་ལག་ཕྱེད་པའི་ཞེས་བྱ་བ་ནི་ལུས་ཕྱེད་ཀྱིའོ། །ཆོས་ནི་རྡོ་རྗེ་སེམས་དཔའིའོ། །ནུས་ནི་རབ་ཏུ་བསྒོམ་པའོ། །གཞན་ཕྱེད་གང་གིས་ཤེ་ན། རྡོ་རྗེ་བུ་མོ་ཞེས་བྱ་བ་ལ་སོགས་པ་ལ། རྡོ་རྗེ་བུ་མོ་ཞེས་བྱ་བ་ལ་སོགས་པ་ནི་རྡོ་རྗེའི་བཙུན་མོ་སྟེ། ལྷ་མོ་སྣང་བ་མའོ། །དེར་ཞེས་བྱ་བ་ནི་ཆོས་རབ་ཏུ་བསྒོམ་པར་རོ། །སྟེར་བར་ནི་རྣལ་འབྱོར་མའོ། །རྡོ་རྗེ་ནི་རྡོ་རྗེ་འཛིན་པའོ། །གཅིག་གི་རང་བཞིན་ནི་སྐུ་གཅིག་པ་སྟེ་དེ་ཉིད་དང་ལྡན་པ་རང་སྣང་བ་ཉིད་ཀྱིས་གཡོན་གྱི་ཕྱེད་གང་བའི་ཕྱིར་རོ། །གང་གི་དུས་སུ་འབྱུང་བ་ཡིན་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ནི་ཆོས་ཞུ་བའིའོ། །སྒྲ་བསྒྲགས་པ་ནི་ལྷ་མོ་བཞིའི་གླུ་འདིས་སོ། །བསྔགས་པ་ནི་བསྟོད་པ་བྱས་པ་ཇི་སྲིད་དེ་སྲིད་དུ་དེའི་རྗེས་ཐོགས་ཉིད་དུའོ། །ཅི་ཆོས་རབ་ཏུ་བསྒོམ་པ་ཞེས་བྱ་བ་ལ་འཇུག་གམ། དེ་ནས་བསྐུལ་བའི་ལྷ་མོ་བཞི་པོ་གར་སོང་ཞེ་ན། ལྷའི་ཞེས་བྱ་བ་
༄། །ལ་སོགས་པ་གསུངས་ཏེ། ལྷ་ནི་རྡོ་རྗེ་སེམས་དཔའོ། །གཡོན་པའི་ཕྱེད་ནི་ལྷ་མོ་སྣང་བ་མའི་ཆ་ཡིས་གཅིག་གི་རྣམ་པར་མཐོང་ཞེས་བྱ་བའི་ཐ་ཚིག་གོ །རྡོ་རྗེ་སེམས་དཔའ་བདག་གིས་བསྒོམ་པར་བྱ་བ་མ་ཡིན་ནམ། འདིར་ཡང་ལྷ་གཞན་ཏེ་བུད་མེད་ཀྱང་མ་སྐྱེས་པ་ཡང་མ་ཡིན་ནོ་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའ་ཉིད་དེ་ཡིན་ནོ། །བསྟོད་པ་ནི་བསྒོམ་པར་བྱའོ། །ཚིག་ཚད་མར་བྱེད་པ་ནི་ངའིའོ། །གང་གི་ཕྱིར་ཡང་བཅོམ་ལྡན་འདས་དེ་ཉིད་དོ་ཞེས་བྱ་བར་དགོངས་སོ། །འདི་སྐད་དུ་གསུངས་པ་ཡིན་ཞེ་ན། བླ་ན་མེད་པ་རྣམ་པ་བདུན་ལ་སོགས་པའི་རིམ་པས་ནམ་མཁའ་དང་མཉམ་པའི་བྱང་ཆུབ་ཀྱི་སེམས་མངོན་དུ་བྱས་ལ། ཨོཾ་ཡིག་གིས་སྟོང་གསུམ་གྱི་ཚད་ཀྱི་སྐུ་བཅོམ་ལྡན་འདས་མ་ཙུན་དཱ་བསམ་པར་བྱའོ། །དེའི་པདྨའི་ལྟེ་བར་རྣམ་པར་སྣང་མཛད་ཡོང་སུ་གྱུར་པ་ལས་སྐྱེས་པའི་གཞལ་ཡས་ཁང་བསྒོམ་པར་བྱའོ། །དེའི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་ལ་བཅོམ་ལྡན་འདས་མི་བསྐྱོད་པ་རང་སྣང་བའི་རིག་མས་ཡང་དག་པར་འཁྱུད་པར་བསམ་པར་བྱའོ། །སངས་རྒྱས་ཐམས་ཅད་བཅུག་ཅིང་ཞུ་བས་པདྨའི་ནང་དུ་སོང་ནས་སྣང་བ་དེ་ཉིད་ཀྱིས་ཐབས་དང་ཤེས་རབ་ཞུ་ཞིང་རོ་མཉམ་པར་གྱུར་པར་བལྟའོ། །ལྷ་མོ་བཞིའི་གླུ་བཞིས་བསྐུལ་བས་ཆོས་ཞུ་བ་ཡང་དག་པར་བསྡུས་ཏེ། ཟླ་བའི་དཀྱིལ་འཁོར་ལ་དབུས་སུ་འབྱུང་བ་ཧཱུཾ་ཡི་གེ་དམར་པོ་ལས་སྐྱེས་པ། སྣ་ཚོགས་རྡོ་རྗེ་དང་དེའི་ལྟེ་བར་ས་བོན་བསམ་མོ།། དེ་ཡོངས་སུ་གྱུར་པ་ལས་བཅོམ་ལྡན་འདས་གཡས་པའི་ཕྱེད་ཀྱིས་ལྷ་མོ་སྣང་བ་མའི་གཟུགས་འཛིན་པ་པདྨ་རཱ་ག་ལྟ་བུ་གཡོན་གྱི་ཕྱེད་ལ་ནུ་མ་འབུར་བ་དང༌། གཡོན་གྱི་དྲལ་བར་སྐྲ་འཁྱིལ་པས་བརྒྱན་པ་རལ་པའི་ཐོར་ཚུགས་ཅན་རྣམ་པ་སྣ་ཚོགས་ཕས་བརྒྱན་པའི་ན་བཟའ་དང་སྒེག་པའི་ཉམས་དང་ལྡན་པ་བསམ་མོ། །ལྷ་མོ་བཞི་པོ་དེ་ཉིད་ཀྱི་གཡོན་གྱི་ཕྱེད་དུ་ཞུགས་ཤིང་རོ་གཅིག་པར་གྱུར་པར་བསམ་མོ། །ལྷག་མ་རྣམས་སངས་རྒྱས་ལྔའི་དབུ་རྒྱན་ལ་སོགས་པ་ཅི་རིགས་པར་སྔ་མ་བཞིན་ནོ། །གསུང་གི་དཀྱིལ་འཁོར་སྟོན་པར་བྱེད་པའི་ལེའུ་ལ་དེ་སྐད་ཅེས་
༄། །བྱའོ། །ནམ་མཁའ་དང་མཉམ་པའི་རྒྱུད་ཀྱི་འགྲེལ་པ། ནམ་མཁའ་དང་མཉམ་པ་ལས་གསུང་གི་དཀྱིལ་འཁོར་གྱི་ལེའུ་སྟེ་གསུམ་པའོ།། །།
ལེའུ་བཞི་པ། སྐུའི་དཀྱིལ་འཁོར་སྟོན་པར་བྱེད་པ།
༄། །སྐུའི་དཀྱིལ་འཁོར་བཤད་པར་བྱ་སྟེ། དེ་ལ་ལུས་ཀྱིས་ལུས་རྒྱས་པར་བྱེད་པས་མཆོག་གི་དམ་ཚིག་ནི། གླང་པོ་ཞེས་བྱ་བ་ལ་སོགས་པས་གསུངས་ཏེ། མཁའ་མཉམ་རང་བཞིན་ཞེས་བྱ་བ་ནི་རྡོ་རྗེ་སེམས་དཔའི་རྣལ་འབྱོར་དང་ལྡན་པས་སོ། །ཡོ་གིས་ཞེས་བྱ་བ་ནི་ཀྱེ་རྣལ་འབྱོར་པས་སོ། །བསྒོམས་སེམས་ལྡན་པ་ནི་རྩེ་གཅིག་པའི་ཡིད་དོ། །རྩེ་གཅིག་ཡིད་ནི་རྡོ་རྗེ་འཛིན་པར་གཅིག་པའི་ཡིད་དེས་འགྲུབ་པའོ། །གཟུགས་དང་མཚུངས་པ་ཞེས་བྱ་བ་ནི་རྡོ་རྗེ་སེམས་དཔའི་གཟུགས་ཀྱི་རྣམ་པའོ། །ལ་ལ་གཟུགས་དང་མཉམ་པ་ཞེས་ཟེར་ཏེ། དེ་ལ་དོན་ནི་གཟུགས་ཐུན་མོང་པས་ཞེས་བྱའོ། །དེ་ནས་ལྷ་མོ་ཞི་བ་ལ་མས་ཚིགས་སུ་བཅད་པ་བཞིས་དེ་བཞིན་ཉིད་གསུངས་ཏེ། དེ་བཞིན་ཉིད་ཀྱི་རང་བཞིན་ཡིན་པའི་ཕྱིར་རོ། །གྱིས་ཞེས་བྱ་བ་ནི་གྱིས་ཤིག་པའོ། །དེ་ལྟར་ཞེས་བྱ་བ་ནི་དེ་བཞིན་དུ་སྟེ། ཇི་ལྟར་བཤད་པར་བྱ་བ་བཞིན་དུའོ། །ཆོས་མཉམ་ཞེས་བྱ་བ་ནི་ཆོས་མཚུངས་པའོ། །ཤེས་པ་ཞེས་བྱ་བ་ནི་ཡང་དག་པར་ཏེ། ཡང་དག་པར་ཤེས་པའོ། །མང་པོ་ཡིན་ཡང་གཅིག་གི་ཚིག་ཏུ་བྱས་པའོ། །དེ་ལྟར་རྣམ་སྤྱད་པ་ཞེས་བྱ་བ་ནི་དེ་ལྟར་རྣམ་པར་སྤྱོད་ཅིང་ངེས་པའོ། །ལྷ་འདི་ཞེས་བྱ་བ་རྡོ་རྗེ་སེམས་དཔའོ། །རྣམ་པར་སྣང་མཛད་ནི་རྟག་པའོ། །ལྷ་མོ་རྣམ་པ་ལྔ་སྟེ། དེ་རྣམས་རང་བཞིན་གཅིག་པའོ། །མི་བསྐྱོད་པ་ཞེས་བརྗོད་པར་བྱ་བ་མ་ཡིན་ནམ། རྣམ་པར་སྣང་མཛད་ནི་མ་ཡིན་ནོ་ཞེ་ན། མཚུངས་པ་ཞེས་བྱ་བ་ལ་སོགས་པ་གསུངས་ཏེ། སེམས་མཉམ་པའི་རྣལ་འབྱོར་པས་རོ་གཅིག་པའི་ཆོས་ཀྱི་སྐུ་འགྲུབ་པའོ། །དེ་ལྟ་བས་ན་འདིར་ནི་མ་ཡིན་ཏེ། སེམས་དཔའ་ལས་ནི་མི་བསྐྱོད་པ་ལས་སོ། །བསྒོམ་པ་ནི་སྐྱེ་བའོ།། འོ་ན་གང་ཡིན་ཞེ་ན། རྣམ་པར་སྣང་མཛད་ལས་ཏེ། རབ་ཏུ་གྲུབ་པའི་ངེས་པའི་ཆས་མཉམ་པ་ཉིད་གསལ་བར་བྱེད་པའི་ཕྱིར་རོ། །དེ་ནས་རྣམ་པར་སྣང་མཛད་ལས་སྐྱེས་པ་ལ་ཡོན་ཏན་ཅི་ཡོད་ཅེ་ན། སྐུའི་དཀྱིལ་འཁོར་ཉིད་དོ། །མཇུག་བསྡུ་བ་ནི་རྡོ་རྗེ་སེམས་དཔའ་ཞེས་བྱ་བ་ལ་
༄། །སོགས་པ་གསུངས་ཏེ། འདི་རྣམས་གཅིག་གི་རང་བཞིན་དུ་བསམ་པར་བྱའོ། །ཇི་ལྟར་བྱ་ཞེ་ན། སྔ་མ་བཞིན་དེ་ཙུན་དཱའི་པདྨའི་ལྟེ་བར་རྣམ་པར་སྣང་མཛད་ལས་ཏེ། གྱུར་པ་ལས་གཞལ་ཡས་ཁང་གི་དབུས་སུ་པདྨའི་གདན་ལ་རྣམ་པར་སྣང་མཛད་དང༌། དེའི་སྣང་པ་དག་གི་བདེ་པ་ལས་བྱུང་བ་དང་དེ་དག་ཞུ་བའོ། །བཞེངས་པའི་ལྷ་མོ་བཞིས་ཞུ་བའི་རྗེས་ཐོགས་ལ་ཞུ་བ་མཁྲེགས་པའི་དངོས་པོ་ལས་སྐྱེས་པ་ཟླ་བ་ལ་ཧཱུཾ་ཡིག་དཀར་པོ་ལས་སྐྱེས་པའི་རྡོ་རྗེ་འཛིན་པ་སྐུ་མདོག་དཀར་པོ་བསྒོམ་པ་ལས་སོ། །གཅིག་གི་རང་བཞིན་ནི་ཆོས་ཀྱི་སྐུ་ལས་སོ། །རྡོ་རྗེའི་ཚུལ་ནི་རྡོ་རྗེའི་ཐེག་པ་ལའོ། །དེ་ལྟ་མོད་ཀྱི་རྣལ་འབྱོར་གནས་ཀྱི་དོན་ཅི་ཡིན་ཞ་ན། ཙུན་དཱ་ཞེས་བྱ་བ་ལ་སོགས་པ་གསུངས་ཏེ། དངོས་པོ་ནི་གང་ཆོས་རྣམས་ཐམས་ཅད་ཀྱིའོ། །རང་བཞིན་ནི་ངོ་བོ་སྟེ་སྟོང་པ་ཉིད་ཡིན་ལ། དེ་ནི་ཙུན་དཱའོ།། དེར་རྡོ་རྗེ་སེམས་དཔའ་ཅི་བྱེད་ཅེ་ན། དེར་ཞེས་གསུངས་ཏེ། རྣལ་འབྱོར་གྱི་གནས་སུའོ། །གཟུགས་ལྡན་གྱི་སྐུ་དང་བཅས་པ་ཡིན་པའོ། །མཐོང་བ་གཅིག་གི་རང་བཞིན་ནི་དངོས་པོ་རྣམས་ཀྱིའོ། །བསྒོམ་ཞེས་བྱ་བ་ནི་སྒོམ་པར་བྱེད་པ་སྟེ། རྣམ་པར་སྣང་མཛད་དང་རྟག་པའོ།། ལྷ་མོ་རྣམས་ཀྱི་ཞེས་བྱ་བ་ནི་ལྷ་མོ་རྣམས་སོ། །བདེན་པ་ནི་བདེན་པ་རྡོ་རྗེ་ཅན་ནོ། །དེའི་སྐྱེ་བ་ནི་སྐུ་ཡིས་སྐྱེ་ཞིང་སྐུའི་རྟག་པ་ཉིད་དོ། །དེའི་ཕྱིར་དེ་ཉིད་བསྐྱེད་པ་བསྟན་པར་བྱའོ། །ཇི་ལྟར་ཡིན་ཞེ་ན། འདི་ཞེས་བྱ་བ་ལ་སོགས་པ་གསུངས་ཏེ། འདི་ཞེས་བྱ་བ་ནི་རྣལ་འབྱོར་པས་སོ། །ཟླ་བའི་དཀྱིལ་འཁོར་དབུས་གནས་པ། །ཞེས་བྱ་བ་ནི། ཆོས་ཞུ་བ་བསྡུས་པ་ལས་སྐྱེས་པ་ཟླ་བའི་དཀྱིལ་འཁོར་གྱི་དབུས་སུ་གནས་པའོ། །རྡོ་རྗེ་ནི་རྡོ་རྗེ་འཛིན་པའི་སྔགས་ཀྱི་ས་བོན་ཧཱུཾ་ཡིག་དཀར་པོའོ། །རྡོ་རྗེ་རྣམ་སྒོམ་གཅིག་ཡིད་ཀྱིས། །ཞེས་པ་ནི་སྔགས་དེས་སོ། །རྩེ་གསུམ་ཞེས་བྱ་བ་ནི། ཕྱོགས་རེ་རེར་རྩེ་གསུམ་སྟེ། རྩེ་མོ་བཅུ་གཉིས་ཞེས་བྱ་བའི་ཐ་ཚིག་གོ །འབར་བ་ཞེས་བྱ་བ་ནི་འབར་བ་ལས་སོ། །དབུས་གནས་པ་ཞེས་བྱ་བ་ནི་དབུས་སུ་གནས་པར་བྱེད་པའོ། །རྡོ་རྗེའི་རང་བཞིན་ཞེས་བྱ་བ་ནི་རྡོ་རྗེ་འཛིན་པའི་སྐུའོ། །དེ་ལྟར་བདག་གིས་ཞེས་
༄། །བྱ་བ་ནི་དེ་ལྟར་ང་ཡིས་སོ། །རྡོ་རྗེའི་གཞུང་ནི་རྡོ་རྗེ་འཛིན་པས་བསྐྱེད་པའོ། །ཆོས་ཞེས་བྱ་བ་ནི་ཆོས་རྣམས་ཀྱིའོ། །ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ། ནམ་མཁའ་དང་མཉམ་པ་ལས་སྐུའི་དཀྱིལ་འཁོར་གྱི་ལེའུ་སྟེ་བཞི་པའོ།། །།
ལེའུ་ལྔ་པ། རྒྱུད་གཞན་རྣམས་དང་ལེའུ་གཞན་རྣམས་ཀྱི་དོན་གསལ་བར་བྱེད་པ།
༄། །ཆོས་ཀྱི་སྐུ་ཉིད་ལས་ལྷ་བསྐྱེད་པ་མ་ཡིན་ནམ་ཅིའི་ཕྱིར་སྔགས་ཀྱིས་ཡིན་ཞེ་ན། དངོས་མེད་ཅེས་བྱ་བ་ལ་སོགས་པ་གསུངས་ཏེ། དངོས་མེད་ནི་རྣམ་པར་མི་རྟོག་པའི་ཏིང་ངེ་འཛིན་ནོ། །དངོས་པོ་ནི་ལུས་སོ། །བསྒོམ་པ་མིན་པ་ནི་བརྗོད་པ་མེད་པའོ། །རྨི་ལམ་ལས་ཀྱང་སད་པར་བྱེད་པ་སྐྱེ་བ་མེད་པ་ཉིད་རྣམ་པར་རྟོག་པ་ལ་མི་རྒྱུག་པ་དེ་བཞིན་དུ། ཆོས་ཀྱི་སྐུ་ལས་ཀྱང་ལྷ་བསྐྱེད་པ་ནི་སྔགས་དང་བྲལ་བས་མ་ཡིན་ནོ། །ཁྱོད་ཅེས་བྱ་བ་ནི་བུད་མེད་ལ་བོད་པའོ། །བསྒོམ་པར་བྱ་བ་དང༌། ངེས་པར་སྤྱད་པར་བྱ་བ་སྟེ། བསྒོམ་བྱ་ནི་སྔགས་སོ། །དེ་ལྟར་ཞེས་བྱ་བ་ནི་དེ་བཞིན་ཏེ། །སྔགས་ཞེས་བྱ་བའི་དོན་ཏོ། །ཆོས་ལ་སྤྱོད་པ་ཞེས་བྱ་བ་ནི། ཆོས་ལ་ངེས་པར་སྤྱོད་པར་བྱེད་པའོ། །སེམས་ལས་ཞེས་བྱ་བ་ནི་སྔགས་ཀྱིས་བར་དུ་ཆོད་པའི་རྣམ་པར་མི་རྟོག་པ་ལས་སོ། །བསྒོམ་པ་ནི་ལུས་སོ། །སེམས་ལས་དངོས་ལ་ཞེས་བྱ་བ་ལ་སོགས་པས་ནི། རིག་པ་གཞན་སྨྲས་པ། སེམས་ལས་ཞེས་བྱ་བ་ནི་སྤྲོས་པ་མེད་པ་ལས་སོ། །དངོས་ལ་ནི་ལུས་ཀྱིའོ། །གཞུང་ལུགས་མེད་པ་ནི་ཐར་པའོ། །དེ་ནི་ཞེས་བྱ་བ་ནི་རྒྱུ་དེ་ཡིས་སོ། །བསྒོམ་པར་བྱ་བ་ནི་སྔགས་སོ། །མེད་པ་གང་ཡིན་ཞེ་ན། དངོས་པོའི་ཞེས་བྱ་བ་ལ་སོགས་པ་གསུངས་ཏེ། དངོས་པོ་ནི་ལུས་སོ། །དེའི་རང་བཞིན་ནི་སེམས་ཀྱིའོ། །གཞུང་ལུགས་མིན་པ་ནི་ཐར་པ་དང་འགལ་བའི་ཕྱིར་རོ། །རིག་པ་ཇི་ལྟ་བུ་ཞེ་ན། གང་སེམས་ཀྱི་ནམ་མཁའ་དང་མཉམ་པའི་རང་བཞིན་རྣམ་པར་ཤེས་པ་རྣམས་ཀྱིས་གནས་དང་ལུས་དང་ལོངས་སྤྱོད་དུ་སྣང་བ་མེད་ཅིང་ས་བོན་དང་བཅས་པར་ཡོངས་སུ་ཟད་པའི་ཕྱིར་དང༌། ཚོགས་བསགས་པའི་ཤུགས་ཀྱིས་སོ། །གལ་ཏེ་དེ་ཡང་དེ་ཉིད་ལུས་ཅན་དུ་གྱུར་པ་ཡིན་ནམ་ཞེ་ན། སེམས་ཀྱི་ཞེས་བྱ་བ་ལ་སོགས་པ་གསུངས་ཏེ། གྲོལ་བར་བྱེད་པའི་སེམས་ཀྱི་ཁྱད་པར་གྱིས་དག་ཅིང་ཕྱིར་མི་ལྡོག་པར་ཟད་པའོ། །གང་ལས་ཞེས་སྔ་མ་བཞིན་ཏེ། སྔ་མ་ཇི་ལྟ་བ་བཞིན་ནོ། །གྲོལ་
༄། །བའི་སྔོན་དུ་འཁྲུལ་པ་དང༌། འཁྲུལ་པའི་རྒྱུ་མཚན་སྣང་བ་ཡོད་པས་སོ། །དེ་ནས་ཅི་ཡིན་ཞེ་ན། ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་དེའི་ལུས་ལ་སོགས་པའི་ཕྱིར་མི་ལྡོག་པར་ཟད་པ་སྒོམ་པར་བྱེད་པ་མ་ཡིན་ནམ་ཞེ་ན། མ་ཡིན་ཏེ་འགལ་བའི་ཕྱིར་རོ། །དེ་ལྟ་མོད་ཀྱི་སེམས་ཀྱི་རྣམ་པ་རང་བཞིན་དུ་ཡོད་ལ། དེ་ལྟ་བས་ན་སེམས་རྣམ་པར་དག་པ་ཡང་ལུས་ཀྱི་རྣམ་པར་སྐྱེའོ། །འདིར་འགྲུབ་པར་ཞེས་བྱ་བ་ལ་སོགས་པ་གསུངས་ཏེ། དེ་ཡང་དངོས་མེད་ཅེས་བྱ་བ་ནི་དེ་ཡང་ལུས་མེད་པའོ། །ཚུལ་ནི་དོན་དམ་པའོ། །མི་འགྲུབ་པ་ནི་ཕྱི་རོལ་དང་སེམས་ཀྱི་བདག་ཉིད་ཀྱི་སྟེ། གཅིག་དང་དུ་མའི་རང་བཞིན་དང་བྲལ་བའི་ཕྱིར་རོ། །དེ་ལྟ་བས་ན་སེམས་ནི་ནམ་མཁའི་རང་བཞིན་ཉིད་དེ་རྣམ་པ་བརྫུན་པ་ཉིད་ཀྱི་ཕྱིར་རོ། །བརྫུན་པར་སྣང་བ་ཡང་འཁྲུལ་པ་ཡིན་གྲོལ་བའི་སེམས་ལ་འཁྲུལ་པ་ཡོད་པ་མ་ཡིན་ནོ་ཞེས་བྱ་བའོ། །དེའི་ལུས་གང་ཞེ་ན། དེའི་ཕྱིར་ཞུ་བ་ཆོས་ཀྱི་སྐུ་ལས་གཞན་ཉིད་དེའི་རྒྱུ་མཐུན་པར་གྱུར་པ་རྣམ་པར་ཤེས་པ་ལུས་ལ་སོགས་པར་སྣང་བ་སྐྱེས་ཤིང་རང་གི་རྣམ་པ་བརྫུན་པ་ཉིད་ཀྱིས་བདག་ཉིད་ཀྱང་སྒྱུ་མ་ལྟ་བུར་ཡོངས་སུ་གཅོད་པ་ཞེས་བྱ་བར་དགོངས་སོ། །མཇུག་བསྡུ་བ་ནི་དབུས་སུ་ཞེས་བྱ་བ་ལ་སོགས་པ་གསུངས་ཏེ། རྣམ་པར་མི་རྟོག་པ་ལས་རྣམ་པར་རྟོག་པའོ། །དེ་ལྟ་བས་ན་ལུས་ཞེས་བྱ་བ་སྟེ། རིག་པ་འདིས་སོ། །དབུས་ནི་བར་དུའོ། །གོ་འཕང་ནི་ས་བོན་གྱི་སྔགས་ལ་དཔྱོད་པའོ། །དེ་ལྟར་སྔགས་ཀྱིས་བར་དུ་ཆོད་པའི་སེམས་ལས་རྣམ་པར་རྟོག་པ་སྒོམ་པར་བྱེད་པ་སྟེ་ལུས་སོ། །དེ་ལྟར་ན་རྡོ་རྗེ་སེམས་དཔའ་པ་སྐྱེད་པར་བྱ་སྟེ། ཐུགས་ཀྱི་དཀྱིལ་འཁོར་ལ་སོགས་པ་སྣ་ཚོགས་པའི་རང་བཞིན་ནོ། །སེམས་ཅན་ཐམས་ཅད་ཡོངས་བསྒོམ་བྱ། །བྱས་ནས་ཐར་པའི་རང་བཞིན་ནོ། །ཞེས་གསུངས་པ་དེ་ཡང་ཐར་པ་སྟེ། སེམས་ཙམ་དུ་རོ་གཅིག་པའོ། །དེ་ཡང་ཇི་ལྟ་བུ་ཞིག་བསྒོམ་པར་བྱ་ཞེ་ན། གསལ་ཞིང་ཞེས་བྱ་བ་ལ་སོགས་པ་གསུངས་ཏེ། གསལ་བ་ནི་རང་བཞིན་གྱིས་དག་པས་སོ། །དྲི་མ་མེད་པ་ནི་གློ་བུར་གྱི་དྲི་མ་ཟད་པས་སོ། །ཆུ་དང་ཆོས་མཐུན་པས་ཆུ་
༄། །སྟེ། ཤིན་ཏུ་སྦྱངས་པའི་བདེ་བ་ཞུ་བ་ཞེས་བྱ་བའི་དོན་ཏོ། །དེ་ལ་ཞེས་པ་ནི་རྡོ་རྗེ་སེམས་དཔའ་བསྐྱེད་པ་དེར་རོ། །མྱུར་བ་ནི་མྱུར་བར་རོ། །བསྒོམ་ཞེས་བྱ་བ་ནི་བསྒོམ་དེ་སྟེ། དེས་ལུས་བྱས་པའོ། །དེར་ངས་ཞེས་བྱ་བ་ནི་བདག་གི་དེར་རོ། །སྨྲས་པ་གང་ལས་འདས་པ་ནི་བསྟན་པར་བྱ་བ་མ་ཡིན་པར་བསྟན་པའོ། །རྡོ་རྗེ་འཛིན་པ་ཞེས་བྱ་བ་ལ་སོགས་པས་དམ་ཚིག་བསྟན་པ་སྟེ་དངོས་ཞེས་བྱ་བ་ནི་རང་གི་ལུས་སོ། །དེར་ཞེས་བྱ་བ་ནི་དེར་ཡིན་པའོ། །རྡོ་རྗེའི་ཆུ་ནི་ཆང་ངོ༌། །དེ་ལྟར་ན་རང་བཞིན་ཞེས་བྱ་བ་ནི་བྱང་ཆུབ་སེམས་ཀྱི་རང་བཞིན་ནོ། །སེམས་ཀྱི་རང་བཞིན་ཞེས་བྱ་བ་ནི་རྡོ་རྗེ་སེམས་དཔའི་རྣལ་འབྱོར་ལ་གནས་པའོ། །ཆོས་ཞེས་བྱ་བ་ལ་སོགས་པ་ལ། ཆོས་དང་དགེ་འདུན་རྡོ་རྗེ་ཆུའི། །འདི་རྣམས་ཀྱི་ནི་མཚུངས་རང་བཞིན། རྡོ་རྗེའི་ཆུ་ནི་བྱང་ཆུབ་ཀྱི་སེམས་སོ། །དེ་ཉིད་ཆོས་ཏེ་འཕགས་པའི་ལམ་ཡིན་པའི་ཕྱིར་རོ། །དེ་ཉིད་དགེ་འདུན་ཏེ། འཕགས་པའི་གང་ཟག་ཐམས་ཅད་སྡུད་པར་བྱེད་པའི་ཕྱིར་རོ། །ཞག་ལ་སོགས་པ་མཚུངས་པའི་རང་བཞིན་བྱང་ཆུབ་ཀྱི་སེམས་ཉིད་དོ། །རབ་ཏུ་གསལ་བ་ཙམ་ཉིད་ཀྱི་ཕྱིར་དང༌། ཆོས་རྣམས་ཀྱི་རྣམ་པ་བརྫུན་པ་ཉིད་ཀྱི་ཕྱིར་རོ། །ཀྱེ་ལྷ་མོ་བསྒོམ་པར་བྱ་བ་ནི་གོམས་པའམ། བསམ་པ་སྟེ་རྣལ་འབྱོར་པ་རྣམས་ཀྱི་ས་ཞེས་བྱ་བ་ལྷག་མའོ། །བཟའ་དང་སྟོན་མོ་མལ་སྟན་ལ་སོགས་དེ་རྣམས་ཐམས་ཅད་ཅེས་བྱ་བ་ལ་འདི་རྣམ་ཐམས་ཅད་ཀྱིའོ། །གང་ཞིག་ཏིང་ངེ་འཛིན་དུ་གསུངས་པ་ནི་ཆོས་ཞུ་བ་ལས་བྱུང་བ་ཐུགས་ཀྱི་དཀྱིལ་འཁོར་ལ་སོགས་པའོ། །དེ་ལྟར་རང་བཞིན་ནམ་གཅིག་གི་རང་བཞིན་གང་ཡིན་པ་སྟེ། བྱང་ཆུབ་ཀྱི་སེམས་སོ། །དེ་བས་ན་བསྐྱེད་པའི་གཟུགས་རྡོ་རྗེ་སེམས་དཔའ་འདི་ཇི་ལྟར་བལྟ་བར་བྱ་ཞེ་ན་སངས་རྒྱས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཞེས་བྱ་བ་ནི་རྟོགས་པ་ཉིད་ཀྱིས་ཐམས་ཅད་མཁྱེན་པས་སོ། །གསུམ་པ་སྐུ་དང་གསུང་དང་ཐུགས་ཀྱི་ངོ་བོའི་རང་བཞིན་དེ་ཡོད་པ་དེ་ལ་དེ་སྐད་ཅེས་བྱའོ། །བྱེད་པ་ནི་བལྟ་བའོ། །དོན་དམ་པ་ཉིད་ཇི་ལྟ་བུ་ཞེ་ན། ཆོས་ཀུན་དངོས་མེད་དེ་ནམ་མཁའ་དང་མཉམ་པའི་ཡེ་ཤེས་སོ། །རང་བཞིན་ནི་རང་གི་ངོ་བོ་ཡོད་པ་དེ་ལ་དེ་སྐད་ཅེས་བྱ་སྟེ། རྣམ་པ་དང་བཅས་པ་
༄། །མེད་པ་ཉིད་ཀྱི་ཕྱིར་རོ་ཞེས་བྱ་བར་དགོངས་སོ། །རྡོ་རྗེ་ཅན་ནི་རྡོ་རྗེ་འཛིན་པའོ། །དེས་སྒྱུ་མའི་རང་བཞིན་ཉིད་དུ་གསུངས་ཏེ། དེ་ལྟར་ཡོངས་སུ་གཅོད་པའི་ཕྱིར་རོ། །མཁའ་མཉམ་ཡིན་ཏེ། གཟུགས་བཅས་སྣང་བ་ན་གང་གི་ཕྱིར་ནམ་མཁའ་དང་མཉམ་པ་ལས་གཟུགས་ཅན་དུ་རབ་ཏུ་སྣང་བའོ། །གཞན་དག་ནི་རྐང་པ་བཞི་པ་མེད་ཅིང་རྐང་པ་གསུམ་པ་ཡིན་ནོ་ཞེས་ཟེར་ཞིང་སྒྱུ་མའི་ཞེས་བྱ་བ་ལ་སོགས་པས་འབྲས་བུ་གསུངས་པ་ཆོས་ཀྱི་རང་བཞིན་དད་སྒྱུ་མའི་རང་བཞིན་དཔྱད་པས་སོ། །རྡོ་རྗེ་ནི་ཆོས་ཀྱི་སྐུའོ། །བྱ་བ་ནི་སྔར་གྱི་ཚོགས་ཀྱིས་འཇུག་པ་སྟེ། དེ་ངེས་པར་ཐོབ་པའི་ཆེད་དུའོ། །ཕྱིན་ཅི་ལོག་གི་ངེས་པ་ཡོད་པ་ཞེས་བྱ་བ་ལ་སོགས་པ་གསུངས་ཏེ། ཡོད་པ་ནི་གཟུགས་ལ་སོགས་པའི་རང་བཞིན་གང་འདོད་པ་དེ་ནི་ཡོད་པའི་རང་བཞིན་ནོ། །དེའི་མེད་པའི་ཚུལ་ནི་ཆོས་ཀྱི་སྐུའོ། །དེས་ན་འདི་སེམས་ཉིད་དུ་འདོད་ན། དེའི་ཡང་ཐུགས་ཀྱི་སྙིང་པོ་འདི་ལ་གནས་ཏེ་རིག་པའོ། །གང་གི་ཕྱིར་སྒྱུ་མ་ལྟ་བུ་ཉིད་རྣམ་པ་བརྫུན་པའི་ཕྱིར་རོ། །སྤྲོ་བ་དང་བསྡུ་བའི་དབང་དུ་བྱས་ཏེ། དེ་ལྟའི་ཞེས་བྱ་བ་ལ་སོགས་པ་གསུངས་ཏེ། སེམས་ནི་རི་རབ་ཧཱུཾ་དང་མཉམ་པར་བྱེད་པ་ནི་མཐོ་བ་དང༌། རྒྱ་ཆེ་བ་དང༌། རབ་ཏུ་གསལ་བ་རྣམས་ཀྱིས་སོ། །རྒྱ་ཆེ་བ་མ་ཡིན་པ་དང༌། མཐོ་བ་མ་ཡིན་པ་དང༌། མི་གསལ་བ་ནི་རྣམ་པར་གཡེང་བར་ཐལ་བར་འགྱུར་བའི་ཕྱིར་རོ། །མུན་པ་མ་ཡིན་པ་ནི་མུན་པ་དང་གཉིད་དུ་ཐལ་བར་འགྱུར་བའི་ཕྱིར་རོ། །དེ་ནས་དེའི་སེམས་བསྐྱེད་པར་བྱ་སྟེ། སངས་རྒྱས་དག་པ་ཞེས་པ་ནི་སངས་རྒྱས་ཀྱི་དག་པ་ཉིད་འབའ་ཞིག་སྟེ། དེ་བཞིན་གཤེགས་པ་ཐམས་ཅད་སྤྲོས་པས་ཁྱབ་པའི་ཕྱིར་རོ། །དེ་ནས་སེམས་སྐྱོ་བར་གྱུར་ན་དེ་སྔགས་པས་བསྡུའོ། །དེ་བཞིན་གཤེགས་པ་ཐམས་ཅད་བསྡུས་ནས་རྡོ་རྗེ་འཛིན་པའི་རང་བཞིན་རང་གི་སེམས་དཔྱོད་པར་བྱེད་པའོ། །བསྡུས་པ་དེར་སྔགས་པས་དྲན་པར་བྱ་ཞིང་བསམ་པར་བྱའོ། །ཕྱིས་རི་རབ་དང་མཉམ་པར་འབར་བ་ནི་སྣང་བ་གོང་བུའི་གཟུགས་ཀྱིས་ཏེ། དེར་སྣང་བ་ནི་ཕུང་པོས་སོ། །རྡོ་རྗེ་སེམས་དཔའི་སྐུའི་ངོ་བོས་དེ་ལ་གཡོ་བ་ནི། དེའི་སྐུ་བྱེ་བ་བརྒྱ་ཕྲག་སྟོང་གིས་གང་བའི་ཕྱིར་རོ། །
༄། །ཕྱི་ནས་ཡང་སྤྲོས་ནམ་མཁའི་ངོ་བོ་ནི། །རྡོ་རྗེ་འཛིན་པའི་སྐུ་རྣམས་ཀྱི་རིམ་པས་བསྡུས་པའི་ཕྱིར་རོ། །དེ་ལྟར་སྤྲོ་དང་བསྡུ་བའི་རང་བཞིན་ནོ་ཞེས་བྱ་བ་ནི་མུག་བསྡུས་པའོ། །དེ་བཞིན་གཤེགས་པ་བསྡུས་པ་ལས། དེ་བཞིན་གཤེགས་པ་ཉིད་སྤྲོ་བར་རིགས་སོ་ཞེ་ན། འགྲུབ་པ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའ་འགྲུབ་པ་ནི་སེམས་དེ་ལའོ། །རོ་མཉམ་པ་ནི་དེ་བཞིན་གཤེགས་པ་ཐམས་ཅད་བསྡུས་པས་སོ། །དེ་ལྟ་བས་ན་སྤྲོ་བ་དང་བསྐྱེད་པ་ཡང་རྡོ་རྗེ་འཛིན་པས་སོ། །སྤྲོ་བའི་དུས་བསྟན་པ་ནི་སྔགས་པས་ཞེས་བྱ་བ་ལ་སོགས་པ་གསུངས་ཏེ། བརྟན་པ་ལ་སྤྲོ་བར་བྱ་བ་ནི་རྣལ་འབྱོར་པས་སོ། །མི་བརྟན་ཉིད་ལས་སྤྲོ་བ་མིན། །ཞེས་བྱ་བ་ནི། མི་བརྟན་པ་ལས་འདིས་སྤྲོས་ན། །འབྲས་བུ་མེད་ཅིང་འཁྲུགས་པ་མེད། །འབྲས་བུ་ཐོབ་པ་མེད་ཅིང་འཁྲུགས་པ་ཡིན་ནོ་ཞེས་བྱ་བའི་དོན་ཏོ། །རྒྱུད་འདིར་དངོས་གྲུབ་ཐོབ་པར་སླ་བ་ཞེས་བྱ་བ་གསལ་བར་བྱ་བའི་ཕྱིར། །ཚིགས་སུ་བཅད་པ་དྲུག་གསུངས་པ། ཐམས་ཅད་ཅེས་བྱ་བ་ལ་སོགས་པ་ལ་ཐམས་ཅད་བདེན་པ་ནི་སྒྲ་ཇི་ལྟ་བ་བཞིན་དུ་ང་ཡིས་གསུངས་པ་སྟེ། འདིར་ཞེས་བྱ་བ་ལྷག་མའོ། །དངོས་གྲུབ་ནི་རང་བཞིན་གྱི་དངོས་གྲུབ་ཀྱི་ཕྱིར་རོ། །ཐེག་པ་ནི་བྱང་ཆུབ་ཀྱི་ལམ་མོ། །ངོ་བོར་ལྡན་པ་ནི་དེ་ཁོ་ན་ཉིད་དང་ལྡན་པའོ། །རང་བཞིན་གྱིས་གྲུབ་པ་ནི་འདིར་ཐེག་པ་ཡིན་ན། བདག་གི་སེམས་འདི་དྲི་མ་ཅན་ཡིན་ནོ་ཞེ་ན། སེམས་ཞེས་བྱ་བ་ལ་སོགས་པ་གསུངས་ཏེ། སེམས་སུན་མ་ཕྱུང་མཁའ་མཉམ་པ་ནི་རང་བཞིན་གྱིས་དག་པའི་ཕྱིར་རོ། །མཉམ་པ་ནི་དེའི་རང་བཞིན་མི་འགྱུར་བའི་ཕྱིར་རོ། །ཇི་ལྟར་ཡིན་ཞེ་ན། གང་ཞིག་དྲི་མ་ཅིས་ཀྱང་གོས་པ་མེད། །ཅེས་བྱ་བ་གསུངས་ཏེ། དྲི་མ་རྣམས་ཀྱིས་སོ། །དེའི་རང་བཞིན་ནི་གློ་བུར་བ་ཡིན་པའི་ཕྱིར་ནམ་མཁའ་ལ་དུ་བ་དང༌། མུན་པ་དང་སྤྲིན་དང་ཁུག་རྣ་བཞིན་ནོ། །རྣལ་འབྱོར་པ་ཞེས་བྱ་བ་ལ་སོགས་པས་ལྷ་རྣམས་ཀྱི་སྟོབས་གསུངས་པ། ཀྱེ་རྣལ་འབྱོར་པས་བཅོམ་ལྡན་འདས་མ་འདི་ཙུན་རཱ་དང་པོའི་རང་བཞིན་ནོ། །སངས་རྒྱས་ཐམ་ཅད་སྐྱེད་བྱེད་མ་བསྒོམས་པས་རྡོ་རྗེ་ཡིར་ནི་འགྱུར་བ་སྟེ། འགྱུར་བ་ནི་འགྱུར་བར་
༄། །བྱེད་ཅིང་སྐྱེ་བའོ། །དེ་ནས་སངས་རྒྱས་ཐམས་ཅད་སྐྱེད་པར་བྱེད་པ་ཡིན་ན། རྡོ་རྗེ་འཛིན་པས་ཅི་ཞིག་བྱེད་ཅེ་ན། ཞལ་ལྷ་མོ་ཞེས་བྱ་བ་ལ་སོགས་པ་གསུངས་ཏེ། ལྷ་མོ་རྣམས་ནི་ལྷ་དང་སྟེ། །རྡོ་རྗེ་འཛིན་པ་དང་གཅིག་ཁོ་ནའི་རང་བཞིན་ནོ། །དེའི་ཡང་འདི་རྣམས་ལྟ་བུར་གྱུར་པའོ། །སངས་རྒྱས་རྣམས་དོན་ཅི་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་གསུངས་ཏེ། བཅོམ་ལྡན་འདས་སངས་རྒྱས་རྣམས་ཉིད་ཡིན་ཞིང༌། གཙོ་བོ་དང་སྙིང་པོ་སྟེ། ཆོས་ཀྱི་སྐུའི་རང་བཞིན་ཡིན་པའི་ཕྱིར་རོ། །དེ་ལྟ་བས་ན་དེ་ནི་རྩ་བ་སྟེ་སངས་རྒྱས་རྣམས་ཀྱི་སྐུ་གཉིས་སྡུད་པར་བྱེད་པ་དང༌། ཐོག་མ་དང་ཐ་མ་མེད་པའི་ཕྱིར་ཆོས་ཀྱི་སྐུའི་དེ་ཉིད་རྩ་བའོ། །དེ་ནི་དེ་ལྟར་རྡོ་རྗེ་འཛིན་པས་སྡུད་པ་སྟེ། དུས་གསུམ་གྱི་སངས་རྒྱས་རྣམས་བྱིན་གྱིས་རློབ་པར་བྱེད་ཅེས་བྱ་བ་ནི་ལྷ་རྣམས་ཀྱི་སྟོབས་སོ། །བསམ་པའི་སྟོབས་དང་སྔགས་ཀྱི་སྟོབས་ནི་ཡིད་ཀྱི་ཕན་པ་ཞེས་བྱ་བ་ལ་སོགས་པ་གསུངས་ཏེ། ཡིད་ཀྱི་ཕན་པ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་བསམ་པའོ། །དེའི་བསྒོམ་པ་ནི་གསུམ་པའི་གཅིག་གི་ཚིག་གི་བསྒོམ་པ་སྟེ། དེ་ཡིས་དངོས་གྲུབ་ངེས་པའོ། །ཧཱུཾ་ཡིག་གིས་ཀྱང་ཕན་པར་བྱ་བའི་དོན་དུའོ། །དེའི་ཕྱིར་སྐྱིལ་མོ་ཀྲུང་ཐ་ཅད་པ་མེད་པས་རྒྱུན་མི་འཆད་པར་བདག་ཉིད་རྣལ་འབྱོར་གོམས་པར་བྱ་ཞེས་བསྟན་པའི་ཕྱིར། སྙིང་བར་ཞེས་བྱ་བ་ལ་སོགས་པ་གསུངས་ཏེ། བདག་བརླན་པ་དང༌། བདག་རྐང་པ་ན་བཞེས་བྱ་བ་འདི་བྲལ་དང་རྐང་པར་རྣམ་པར་རྟོག་པའོ། །དོན་མེད་པ་ནི་འབྲས་བུའི་བགེགས་ཡིན་པའི་ཕྱིར་རོ། །ཡང་ན་རྨོངས་པ་སྟེ་མི་ཤེས་པ་རབ་ཏུ་སྐྱེ་བའི་ཕྱིར་རོ། །དེའི་སྙིང་གར་མི་བྱ་སྟེ། །སྙིང་གར་སྦྱོར་བ་བྱེད་པ་མ་ཡིན་ནོ་བགེགས་ཡོད་པ་མ་ཡིན་ནམ་དེ་ལས་གང་དངོས་གྲུབ་ཡིན་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། དབང་པོ་དང་མེ་དང་གཤིན་རྗེ་དང༌། བདེན་བྲལ་ལ་སོགས་པ་ཕྱོགས་བཅུའི་འབྱུང་པོ་འཁོར་དང་བཅས་པ་བགེགས་བྱེད་པ་ནི་འཇིག་རྟེན་གསུམ་མོ། །དེའི་འཁོར་ལོ་ནི་ཚོགས་སོ། །རྡོ་རྗེ་འབར་བ་རྣམས་ཀྱིས་དེ་བསལ་བའོ། །སྙིང་གའི་རྡོ་རྗེ་ལས་བྱུང་བ་སྤྲོས་ཤིང་འབར་བ་རྡོ་རྗེའི་
༄། །རྣམ་པའི་འོད་ཟེར་ནི་རྡོ་རྗེའི་འོད་དེ། དེ་རྣམས་ཀྱིས་བསལ་བ་ནི་སེལ་བར་བྱེད་པའོ། །དེ་ལྟ་བས་ན་འདིར་བགེགས་མེད་ཅིང་རབ་ཏུ་སྐྱེ་བ་ཞེས་བྱ་བར་དགོངས་སོ། །གལ་ཏེ་ཁྲོ་བོའི་ལྷའི་རྣལ་འབྱོར་གྱིས་བགེགས་རྣམས་བཅོམ་ཞིང་རྒྱལ་བ་ཡིན་ནམ་ཞེ་ན། སྤྲོ་བྱ་སྟེ་ཞེས་བྱ་བ་ལ་སོགས་པ་གསུངས་ཏེ། རྣལ་འབྱོར་པས་སྤྲོ་ནམ་མཁའི་དཀྱིལ་དུ་ནི། བྱེ་བ་སྟོང་གི་ཁྲོ་བོའི་ལྷ་རྣམས་སོ། །རྡོ་རྗེ་གཅིག་གི་རང་བཞིན་གྱིས། །ཞེས་བྱ་བ་ལ་རྡོ་རྗེ་འཛིན་པ་དང༌། ཐ་མི་དད་པར་མོས་པས་སོ། །ཡང་ན་ཡང་དག་བསྡུ་བར་ངེས་པ་ནི་དེ་རྣམས་རྡོ་རྗེའི་རང་བཞིན་གྱིས་སོ། །འདིར་ཡང་ནམ་མཁའ་དང་མཉམ་པའི་རྒྱུད་ཀྱི་དོན་གཙོ་བོ་ཡིན་པའི་ཕྱིར་དེ་ཉིད་བསྟན་པར་བྱ་སྟེ། དེ་ལྟ་བས་ན་དེ་ཉིད་མཇུག་བསྡུ་བར་བྱ་བའི་ཕྱིར་སེམས་ཀྱི་ཞེས་བྱ་བ་ལ་སོགས་པ་གསུངས་ཏེ། སེམས་ཀྱི་རང་བཞིན་ནི་དེ་བཞིན་ཉིད་དོ། །དེའི་བྱང་ཆུབ་ཀྱི་ཚུལ་ནི་བྱང་ཆུབ་ཀྱི་དེ་ཁོ་ན་ཉིད་དེ། དྲི་མ་རྣམས་མེད་པའོ། །དེས་ན་དེ་རྣམས་ཀྱི་ཟད་པ་དང་དེའི་རང་བཞིན་མི་ཟད་པ་ལས་བྱང་ཆུབ་ཐོབ་པར་སླའོ། །བྱང་ཆུབ་ནི་མཐའ་ཡས་པའི་སངས་རྒྱས་ཀྱི་ཆོས་རྣམས་མ་ཡིན་ནམ་དེ་ཇི་ལྟར་དེ་ཁོ་ན་ཉིད་ཡིན་ཞེ་ན། བྱང་ཆུབ་ཀྱང་ནི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་ཀྱི་ཚུལ་གྱི་དེ་ཁོ་ན་ཉིད་སེམས་ཀྱི་རང་བཞིན་ཉིད་དོ། །སེམས་ཀྱི་དེ་བཞིན་ཉིད་དོ། །དེ་ཉིད་སངས་རྒྱས་རྣམས་ཀྱི་ཆོས་ཀྱི་སྐུ་སྟེ། སངས་རྒྱས་རྣམས་ཀྱི་ཆོས་རྣམས་ཀྱི་རྟེན་ཡིན་པའི་ཕྱིར་རོ། །སངས་རྒྱས་ཀྱི་ཆོས་རྣམས་ནི་མ་ཡིན་ཏེ། དེ་རྣམས་དེའི་རྫས་ཡིན་ཞིང་རང་གི་ནི་མ་ཡིན་ནོ། །གལ་ཏེ་དེ་གཉིས་ཀའི་དེ་བཞིན་ཉིད་དང་དེ་ཁོ་ན་ཡིན་ན་དེ་ཡང་སྟོང་པ་ཉིད་གཉིས་མེད་པའོ། །དུས་ཐམས་ཅད་དུ་གཉིས་པོ་མེད་པའི་ཕྱིར་ཤིན་ཏུ་མེད་པ་ཡིན་ཏེ། རི་བོང་གི་རྭ་བཞིན་ནོ། །དངོས་པོ་ཤིན་ཏུ་མེད་པ་ནི་རང་བཞིན་ཡང་མ་ཡིན་ནོ། །དེ་མངོན་སུམ་དུ་ཡོད་པ་ཡང་མ་ཡིན་ཏེ། མི་གསལ་བའི་བདག་ཉིད་ཀྱི་ཕྱིར་རོ་ཞེ་ན། གཉིས་ཀའི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་ཀྱི་སེམས་དང་བྱང་ཆུབ་ནི་གཉིས་ཀའོ། །དེ་དག་གི་རང་བཞིན་ནི་དེ་བཞིན་ཉིད་དོ། །དེའི་སེམས་ཀྱི་ཚུལ་ནི་དོན་དམ་པ་སྟེ། གཉིས་དང་བྲལ་
༄། །བའི་སེམས་ཉིད་དང༌། གཉིས་ཀྱིས་སྟོང་པ་ཉིད་དོ། །གལ་ཏེ་དེ་ལྟ་ན་སེམས་ཉིད་སྟོང་པ་ཉིད་ཡིན་ན། སེམས་ནི་དང་པོ་ཉིད་ནས་འཁྲུལ་པའོ། །དེ་ཉིད་དེའི་རང་བཞིན་ཡིན་ན་བྱང་ཆུབ་འཁྲུལ་པར་འགྱུར་རོ་ཞེ་ན། དེ་ནི་མི་རིགས་ཏེ་བག་ཆགས་དང་བཅས་པའི་འཁྲུལ་པ་ཐམས་ཅད་ཡོངས་སུ་སྤངས་པའི་མཚན་ཉིད་ཀྱི་ཕྱིར་བྱང་ཆུབ་པོ་ཞེས་བྱ་བ་གསུངས་པ། སེམས་ནི་ཞེས་བྱ་བ་ལ་སོགས་པ་ལ། གང་གི་ཕྱིར་གློ་བུར་བ་ནི་འཁྲུལ་བའི་རྒྱུ་མཚན་དྲི་མའོ། །རང་བཞིན་སེམས་ནི་མཁའ་དང་མཉམ་པ་སྟེ། རྣམ་པ་མེད་པ་ཉིད་ཀྱི་ཕྱིར་རེས་འགའ་ནུབ་པ་ཡང་རེས་འགའ་མེད་པ་ཉིད་དུ་ཡོངས་སུ་གཅོད་པའི་ཕྱིར་འཇིག་རྟེན་པ་དང༌། འཇིག་རྟེན་ལས་འདས་པ་དང༌། རྗེས་ལ་ཐོབ་པའི་སེམས་ཀྱི་གནས་སྐབས་རྣམས་སུ་གོ་རིམས་བཞིན་ནོ། །གང་གི་ཕྱིར་གློ་བུར་གྱི་དྲི་མ་དེ་ཉིད་སྤངས་ན་བྱང་ཆུབ་ཐོབ་པར་སླ་བའོ། །དེ་ལ་གློ་བུར་གྱི་དྲི་མ་དག་པ་བསྒྲུབ་པར་བྱ་ཞིང་རང་བཞིན་གྱིས་དག་པ་ནི་གྲུབ་པ་ཉིད་དོ། །རྒྱུད་གཞན་རྣམས་དང༌། ལེའུ་གཞན་རྣམས་ཀྱི་དོན་ཐུན་མོང་བ་དེ་གསལ་བར་བྱེད་པའི་ལེའུའོ། །དཔལ་དང་ལྡན་པའི་ནམ་མཁའ་མཉམ་པའི་རྒྱུད་ལ་བདག་གི་ཚིག་གིས་མཆོད་བྱས་པས། །བསོད་ནམས་ཐོབ་པ་ཡོངས་སུ་གྱུར་ལས་སྟོན་ཀའི་ཟླ་བའི་ཟེར་བཞིན་འོད་ཟེར་མཛེས། །སྣ་ཚོགས་དོན་དུ་ནུས་པ་ཡིན་ཏེ་ཡོན་ཏན་འོད་ཟེར་གང་ལ་སྦྱོར་བ་རྣམས། །དེ་ཡིས་མྱུར་བར་རྒྱལ་བ་རྣམས་ཀྱི་ནམ་མཁའ་དང་མཉམ་མི་མཉམ་ཚངས་པར་འགྲོ། །དཔའ་ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ་ནམ་མཁའ་དང་མཉམ་པ་ལས་ལེའུ་ལྔ་པའོ།། །།ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ། པཎྜི་ཏ་ཆེན་པོ་རིན་ཆེན་འབྱུང་གནས་ཞི་བས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ཤཱུ་ནྱ་ཏཱ་སཱ་མ་དྷི་དང༌། ལོ་ཙཱ་བ་དགེ་སློང་ཤེས་རབ་ཡེ་ཤེས་ཀྱིས་བསྒྱུར་བའོ།།