ལེའུ་ལྔ་པ། རྒྱུད་གཞན་རྣམས་དང་ལེའུ་གཞན་རྣམས་ཀྱི་དོན་གསལ་བར་བྱེད་པ།
༄། །ཆོས་ཀྱི་སྐུ་ཉིད་ལས་ལྷ་བསྐྱེད་པ་མ་ཡིན་ནམ་ཅིའི་ཕྱིར་སྔགས་ཀྱིས་ཡིན་ཞེ་ན། དངོས་མེད་ཅེས་བྱ་བ་ལ་སོགས་པ་གསུངས་ཏེ། དངོས་མེད་ནི་རྣམ་པར་མི་རྟོག་པའི་ཏིང་ངེ་འཛིན་ནོ། །དངོས་པོ་ནི་ལུས་སོ། །བསྒོམ་པ་མིན་པ་ནི་བརྗོད་པ་མེད་པའོ། །རྨི་ལམ་ལས་ཀྱང་སད་པར་བྱེད་པ་སྐྱེ་བ་མེད་པ་ཉིད་རྣམ་པར་རྟོག་པ་ལ་མི་རྒྱུག་པ་དེ་བཞིན་དུ། ཆོས་ཀྱི་སྐུ་ལས་ཀྱང་ལྷ་བསྐྱེད་པ་ནི་སྔགས་དང་བྲལ་བས་མ་ཡིན་ནོ། །ཁྱོད་ཅེས་བྱ་བ་ནི་བུད་མེད་ལ་བོད་པའོ། །བསྒོམ་པར་བྱ་བ་དང༌། ངེས་པར་སྤྱད་པར་བྱ་བ་སྟེ། བསྒོམ་བྱ་ནི་སྔགས་སོ། །དེ་ལྟར་ཞེས་བྱ་བ་ནི་དེ་བཞིན་ཏེ། །སྔགས་ཞེས་བྱ་བའི་དོན་ཏོ། །ཆོས་ལ་སྤྱོད་པ་ཞེས་བྱ་བ་ནི། ཆོས་ལ་ངེས་པར་སྤྱོད་པར་བྱེད་པའོ། །སེམས་ལས་ཞེས་བྱ་བ་ནི་སྔགས་ཀྱིས་བར་དུ་ཆོད་པའི་རྣམ་པར་མི་རྟོག་པ་ལས་སོ། །བསྒོམ་པ་ནི་ལུས་སོ། །སེམས་ལས་དངོས་ལ་ཞེས་བྱ་བ་ལ་སོགས་པས་ནི། རིག་པ་གཞན་སྨྲས་པ། སེམས་ལས་ཞེས་བྱ་བ་ནི་སྤྲོས་པ་མེད་པ་ལས་སོ། །དངོས་ལ་ནི་ལུས་ཀྱིའོ། །གཞུང་ལུགས་མེད་པ་ནི་ཐར་པའོ། །དེ་ནི་ཞེས་བྱ་བ་ནི་རྒྱུ་དེ་ཡིས་སོ། །བསྒོམ་པར་བྱ་བ་ནི་སྔགས་སོ། །མེད་པ་གང་ཡིན་ཞེ་ན། དངོས་པོའི་ཞེས་བྱ་བ་ལ་སོགས་པ་གསུངས་ཏེ། དངོས་པོ་ནི་ལུས་སོ། །དེའི་རང་བཞིན་ནི་སེམས་ཀྱིའོ། །གཞུང་ལུགས་མིན་པ་ནི་ཐར་པ་དང་འགལ་བའི་ཕྱིར་རོ། །རིག་པ་ཇི་ལྟ་བུ་ཞེ་ན། གང་སེམས་ཀྱི་ནམ་མཁའ་དང་མཉམ་པའི་རང་བཞིན་རྣམ་པར་ཤེས་པ་རྣམས་ཀྱིས་གནས་དང་ལུས་དང་ལོངས་སྤྱོད་དུ་སྣང་བ་མེད་ཅིང་ས་བོན་དང་བཅས་པར་ཡོངས་སུ་ཟད་པའི་ཕྱིར་དང༌། ཚོགས་བསགས་པའི་ཤུགས་ཀྱིས་སོ། །གལ་ཏེ་དེ་ཡང་དེ་ཉིད་ལུས་ཅན་དུ་གྱུར་པ་ཡིན་ནམ་ཞེ་ན། སེམས་ཀྱི་ཞེས་བྱ་བ་ལ་སོགས་པ་གསུངས་ཏེ། གྲོལ་བར་བྱེད་པའི་སེམས་ཀྱི་ཁྱད་པར་གྱིས་དག་ཅིང་ཕྱིར་མི་ལྡོག་པར་ཟད་པའོ། །གང་ལས་ཞེས་སྔ་མ་བཞིན་ཏེ། སྔ་མ་ཇི་ལྟ་བ་བཞིན་ནོ། །གྲོལ་
༄། །བའི་སྔོན་དུ་འཁྲུལ་པ་དང༌། འཁྲུལ་པའི་རྒྱུ་མཚན་སྣང་བ་ཡོད་པས་སོ། །དེ་ནས་ཅི་ཡིན་ཞེ་ན། ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་དེའི་ལུས་ལ་སོགས་པའི་ཕྱིར་མི་ལྡོག་པར་ཟད་པ་སྒོམ་པར་བྱེད་པ་མ་ཡིན་ནམ་ཞེ་ན། མ་ཡིན་ཏེ་འགལ་བའི་ཕྱིར་རོ། །དེ་ལྟ་མོད་ཀྱི་སེམས་ཀྱི་རྣམ་པ་རང་བཞིན་དུ་ཡོད་ལ། དེ་ལྟ་བས་ན་སེམས་རྣམ་པར་དག་པ་ཡང་ལུས་ཀྱི་རྣམ་པར་སྐྱེའོ། །འདིར་འགྲུབ་པར་ཞེས་བྱ་བ་ལ་སོགས་པ་གསུངས་ཏེ། དེ་ཡང་དངོས་མེད་ཅེས་བྱ་བ་ནི་དེ་ཡང་ལུས་མེད་པའོ། །ཚུལ་ནི་དོན་དམ་པའོ། །མི་འགྲུབ་པ་ནི་ཕྱི་རོལ་དང་སེམས་ཀྱི་བདག་ཉིད་ཀྱི་སྟེ། གཅིག་དང་དུ་མའི་རང་བཞིན་དང་བྲལ་བའི་ཕྱིར་རོ། །དེ་ལྟ་བས་ན་སེམས་ནི་ནམ་མཁའི་རང་བཞིན་ཉིད་དེ་རྣམ་པ་བརྫུན་པ་ཉིད་ཀྱི་ཕྱིར་རོ། །བརྫུན་པར་སྣང་བ་ཡང་འཁྲུལ་པ་ཡིན་གྲོལ་བའི་སེམས་ལ་འཁྲུལ་པ་ཡོད་པ་མ་ཡིན་ནོ་ཞེས་བྱ་བའོ། །དེའི་ལུས་གང་ཞེ་ན། དེའི་ཕྱིར་ཞུ་བ་ཆོས་ཀྱི་སྐུ་ལས་གཞན་ཉིད་དེའི་རྒྱུ་མཐུན་པར་གྱུར་པ་རྣམ་པར་ཤེས་པ་ལུས་ལ་སོགས་པར་སྣང་བ་སྐྱེས་ཤིང་རང་གི་རྣམ་པ་བརྫུན་པ་ཉིད་ཀྱིས་བདག་ཉིད་ཀྱང་སྒྱུ་མ་ལྟ་བུར་ཡོངས་སུ་གཅོད་པ་ཞེས་བྱ་བར་དགོངས་སོ། །མཇུག་བསྡུ་བ་ནི་དབུས་སུ་ཞེས་བྱ་བ་ལ་སོགས་པ་གསུངས་ཏེ། རྣམ་པར་མི་རྟོག་པ་ལས་རྣམ་པར་རྟོག་པའོ། །དེ་ལྟ་བས་ན་ལུས་ཞེས་བྱ་བ་སྟེ། རིག་པ་འདིས་སོ། །དབུས་ནི་བར་དུའོ། །གོ་འཕང་ནི་ས་བོན་གྱི་སྔགས་ལ་དཔྱོད་པའོ། །དེ་ལྟར་སྔགས་ཀྱིས་བར་དུ་ཆོད་པའི་སེམས་ལས་རྣམ་པར་རྟོག་པ་སྒོམ་པར་བྱེད་པ་སྟེ་ལུས་སོ། །དེ་ལྟར་ན་རྡོ་རྗེ་སེམས་དཔའ་པ་སྐྱེད་པར་བྱ་སྟེ། ཐུགས་ཀྱི་དཀྱིལ་འཁོར་ལ་སོགས་པ་སྣ་ཚོགས་པའི་རང་བཞིན་ནོ། །སེམས་ཅན་ཐམས་ཅད་ཡོངས་བསྒོམ་བྱ། །བྱས་ནས་ཐར་པའི་རང་བཞིན་ནོ། །ཞེས་གསུངས་པ་དེ་ཡང་ཐར་པ་སྟེ། སེམས་ཙམ་དུ་རོ་གཅིག་པའོ། །དེ་ཡང་ཇི་ལྟ་བུ་ཞིག་བསྒོམ་པར་བྱ་ཞེ་ན། གསལ་ཞིང་ཞེས་བྱ་བ་ལ་སོགས་པ་གསུངས་ཏེ། གསལ་བ་ནི་རང་བཞིན་གྱིས་དག་པས་སོ། །དྲི་མ་མེད་པ་ནི་གློ་བུར་གྱི་དྲི་མ་ཟད་པས་སོ། །ཆུ་དང་ཆོས་མཐུན་པས་ཆུ་
༄། །སྟེ། ཤིན་ཏུ་སྦྱངས་པའི་བདེ་བ་ཞུ་བ་ཞེས་བྱ་བའི་དོན་ཏོ། །དེ་ལ་ཞེས་པ་ནི་རྡོ་རྗེ་སེམས་དཔའ་བསྐྱེད་པ་དེར་རོ། །མྱུར་བ་ནི་མྱུར་བར་རོ། །བསྒོམ་ཞེས་བྱ་བ་ནི་བསྒོམ་དེ་སྟེ། དེས་ལུས་བྱས་པའོ། །དེར་ངས་ཞེས་བྱ་བ་ནི་བདག་གི་དེར་རོ། །སྨྲས་པ་གང་ལས་འདས་པ་ནི་བསྟན་པར་བྱ་བ་མ་ཡིན་པར་བསྟན་པའོ། །རྡོ་རྗེ་འཛིན་པ་ཞེས་བྱ་བ་ལ་སོགས་པས་དམ་ཚིག་བསྟན་པ་སྟེ་དངོས་ཞེས་བྱ་བ་ནི་རང་གི་ལུས་སོ། །དེར་ཞེས་བྱ་བ་ནི་དེར་ཡིན་པའོ། །རྡོ་རྗེའི་ཆུ་ནི་ཆང་ངོ༌། །དེ་ལྟར་ན་རང་བཞིན་ཞེས་བྱ་བ་ནི་བྱང་ཆུབ་སེམས་ཀྱི་རང་བཞིན་ནོ། །སེམས་ཀྱི་རང་བཞིན་ཞེས་བྱ་བ་ནི་རྡོ་རྗེ་སེམས་དཔའི་རྣལ་འབྱོར་ལ་གནས་པའོ། །ཆོས་ཞེས་བྱ་བ་ལ་སོགས་པ་ལ། ཆོས་དང་དགེ་འདུན་རྡོ་རྗེ་ཆུའི། །འདི་རྣམས་ཀྱི་ནི་མཚུངས་རང་བཞིན། རྡོ་རྗེའི་ཆུ་ནི་བྱང་ཆུབ་ཀྱི་སེམས་སོ། །དེ་ཉིད་ཆོས་ཏེ་འཕགས་པའི་ལམ་ཡིན་པའི་ཕྱིར་རོ། །དེ་ཉིད་དགེ་འདུན་ཏེ། འཕགས་པའི་གང་ཟག་ཐམས་ཅད་སྡུད་པར་བྱེད་པའི་ཕྱིར་རོ། །ཞག་ལ་སོགས་པ་མཚུངས་པའི་རང་བཞིན་བྱང་ཆུབ་ཀྱི་སེམས་ཉིད་དོ། །རབ་ཏུ་གསལ་བ་ཙམ་ཉིད་ཀྱི་ཕྱིར་དང༌། ཆོས་རྣམས་ཀྱི་རྣམ་པ་བརྫུན་པ་ཉིད་ཀྱི་ཕྱིར་རོ། །ཀྱེ་ལྷ་མོ་བསྒོམ་པར་བྱ་བ་ནི་གོམས་པའམ། བསམ་པ་སྟེ་རྣལ་འབྱོར་པ་རྣམས་ཀྱི་ས་ཞེས་བྱ་བ་ལྷག་མའོ། །བཟའ་དང་སྟོན་མོ་མལ་སྟན་ལ་སོགས་དེ་རྣམས་ཐམས་ཅད་ཅེས་བྱ་བ་ལ་འདི་རྣམ་ཐམས་ཅད་ཀྱིའོ། །གང་ཞིག་ཏིང་ངེ་འཛིན་དུ་གསུངས་པ་ནི་ཆོས་ཞུ་བ་ལས་བྱུང་བ་ཐུགས་ཀྱི་དཀྱིལ་འཁོར་ལ་སོགས་པའོ། །དེ་ལྟར་རང་བཞིན་ནམ་གཅིག་གི་རང་བཞིན་གང་ཡིན་པ་སྟེ། བྱང་ཆུབ་ཀྱི་སེམས་སོ། །དེ་བས་ན་བསྐྱེད་པའི་གཟུགས་རྡོ་རྗེ་སེམས་དཔའ་འདི་ཇི་ལྟར་བལྟ་བར་བྱ་ཞེ་ན་སངས་རྒྱས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཞེས་བྱ་བ་ནི་རྟོགས་པ་ཉིད་ཀྱིས་ཐམས་ཅད་མཁྱེན་པས་སོ། །གསུམ་པ་སྐུ་དང་གསུང་དང་ཐུགས་ཀྱི་ངོ་བོའི་རང་བཞིན་དེ་ཡོད་པ་དེ་ལ་དེ་སྐད་ཅེས་བྱའོ། །བྱེད་པ་ནི་བལྟ་བའོ། །དོན་དམ་པ་ཉིད་ཇི་ལྟ་བུ་ཞེ་ན། ཆོས་ཀུན་དངོས་མེད་དེ་ནམ་མཁའ་དང་མཉམ་པའི་ཡེ་ཤེས་སོ། །རང་བཞིན་ནི་རང་གི་ངོ་བོ་ཡོད་པ་དེ་ལ་དེ་སྐད་ཅེས་བྱ་སྟེ། རྣམ་པ་དང་བཅས་པ་
༄། །མེད་པ་ཉིད་ཀྱི་ཕྱིར་རོ་ཞེས་བྱ་བར་དགོངས་སོ། །རྡོ་རྗེ་ཅན་ནི་རྡོ་རྗེ་འཛིན་པའོ། །དེས་སྒྱུ་མའི་རང་བཞིན་ཉིད་དུ་གསུངས་ཏེ། དེ་ལྟར་ཡོངས་སུ་གཅོད་པའི་ཕྱིར་རོ། །མཁའ་མཉམ་ཡིན་ཏེ། གཟུགས་བཅས་སྣང་བ་ན་གང་གི་ཕྱིར་ནམ་མཁའ་དང་མཉམ་པ་ལས་གཟུགས་ཅན་དུ་རབ་ཏུ་སྣང་བའོ། །གཞན་དག་ནི་རྐང་པ་བཞི་པ་མེད་ཅིང་རྐང་པ་གསུམ་པ་ཡིན་ནོ་ཞེས་ཟེར་ཞིང་སྒྱུ་མའི་ཞེས་བྱ་བ་ལ་སོགས་པས་འབྲས་བུ་གསུངས་པ་ཆོས་ཀྱི་རང་བཞིན་དད་སྒྱུ་མའི་རང་བཞིན་དཔྱད་པས་སོ། །རྡོ་རྗེ་ནི་ཆོས་ཀྱི་སྐུའོ། །བྱ་བ་ནི་སྔར་གྱི་ཚོགས་ཀྱིས་འཇུག་པ་སྟེ། དེ་ངེས་པར་ཐོབ་པའི་ཆེད་དུའོ། །ཕྱིན་ཅི་ལོག་གི་ངེས་པ་ཡོད་པ་ཞེས་བྱ་བ་ལ་སོགས་པ་གསུངས་ཏེ། ཡོད་པ་ནི་གཟུགས་ལ་སོགས་པའི་རང་བཞིན་གང་འདོད་པ་དེ་ནི་ཡོད་པའི་རང་བཞིན་ནོ། །དེའི་མེད་པའི་ཚུལ་ནི་ཆོས་ཀྱི་སྐུའོ། །དེས་ན་འདི་སེམས་ཉིད་དུ་འདོད་ན། དེའི་ཡང་ཐུགས་ཀྱི་སྙིང་པོ་འདི་ལ་གནས་ཏེ་རིག་པའོ། །གང་གི་ཕྱིར་སྒྱུ་མ་ལྟ་བུ་ཉིད་རྣམ་པ་བརྫུན་པའི་ཕྱིར་རོ། །སྤྲོ་བ་དང་བསྡུ་བའི་དབང་དུ་བྱས་ཏེ། དེ་ལྟའི་ཞེས་བྱ་བ་ལ་སོགས་པ་གསུངས་ཏེ། སེམས་ནི་རི་རབ་ཧཱུཾ་དང་མཉམ་པར་བྱེད་པ་ནི་མཐོ་བ་དང༌། རྒྱ་ཆེ་བ་དང༌། རབ་ཏུ་གསལ་བ་རྣམས་ཀྱིས་སོ། །རྒྱ་ཆེ་བ་མ་ཡིན་པ་དང༌། མཐོ་བ་མ་ཡིན་པ་དང༌། མི་གསལ་བ་ནི་རྣམ་པར་གཡེང་བར་ཐལ་བར་འགྱུར་བའི་ཕྱིར་རོ། །མུན་པ་མ་ཡིན་པ་ནི་མུན་པ་དང་གཉིད་དུ་ཐལ་བར་འགྱུར་བའི་ཕྱིར་རོ། །དེ་ནས་དེའི་སེམས་བསྐྱེད་པར་བྱ་སྟེ། སངས་རྒྱས་དག་པ་ཞེས་པ་ནི་སངས་རྒྱས་ཀྱི་དག་པ་ཉིད་འབའ་ཞིག་སྟེ། དེ་བཞིན་གཤེགས་པ་ཐམས་ཅད་སྤྲོས་པས་ཁྱབ་པའི་ཕྱིར་རོ། །དེ་ནས་སེམས་སྐྱོ་བར་གྱུར་ན་དེ་སྔགས་པས་བསྡུའོ། །དེ་བཞིན་གཤེགས་པ་ཐམས་ཅད་བསྡུས་ནས་རྡོ་རྗེ་འཛིན་པའི་རང་བཞིན་རང་གི་སེམས་དཔྱོད་པར་བྱེད་པའོ། །བསྡུས་པ་དེར་སྔགས་པས་དྲན་པར་བྱ་ཞིང་བསམ་པར་བྱའོ། །ཕྱིས་རི་རབ་དང་མཉམ་པར་འབར་བ་ནི་སྣང་བ་གོང་བུའི་གཟུགས་ཀྱིས་ཏེ། དེར་སྣང་བ་ནི་ཕུང་པོས་སོ། །རྡོ་རྗེ་སེམས་དཔའི་སྐུའི་ངོ་བོས་དེ་ལ་གཡོ་བ་ནི། དེའི་སྐུ་བྱེ་བ་བརྒྱ་ཕྲག་སྟོང་གིས་གང་བའི་ཕྱིར་རོ། །
༄། །ཕྱི་ནས་ཡང་སྤྲོས་ནམ་མཁའི་ངོ་བོ་ནི། །རྡོ་རྗེ་འཛིན་པའི་སྐུ་རྣམས་ཀྱི་རིམ་པས་བསྡུས་པའི་ཕྱིར་རོ། །དེ་ལྟར་སྤྲོ་དང་བསྡུ་བའི་རང་བཞིན་ནོ་ཞེས་བྱ་བ་ནི་མུག་བསྡུས་པའོ། །དེ་བཞིན་གཤེགས་པ་བསྡུས་པ་ལས། དེ་བཞིན་གཤེགས་པ་ཉིད་སྤྲོ་བར་རིགས་སོ་ཞེ་ན། འགྲུབ་པ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའ་འགྲུབ་པ་ནི་སེམས་དེ་ལའོ། །རོ་མཉམ་པ་ནི་དེ་བཞིན་གཤེགས་པ་ཐམས་ཅད་བསྡུས་པས་སོ། །དེ་ལྟ་བས་ན་སྤྲོ་བ་དང་བསྐྱེད་པ་ཡང་རྡོ་རྗེ་འཛིན་པས་སོ། །སྤྲོ་བའི་དུས་བསྟན་པ་ནི་སྔགས་པས་ཞེས་བྱ་བ་ལ་སོགས་པ་གསུངས་ཏེ། བརྟན་པ་ལ་སྤྲོ་བར་བྱ་བ་ནི་རྣལ་འབྱོར་པས་སོ། །མི་བརྟན་ཉིད་ལས་སྤྲོ་བ་མིན། །ཞེས་བྱ་བ་ནི། མི་བརྟན་པ་ལས་འདིས་སྤྲོས་ན། །འབྲས་བུ་མེད་ཅིང་འཁྲུགས་པ་མེད། །འབྲས་བུ་ཐོབ་པ་མེད་ཅིང་འཁྲུགས་པ་ཡིན་ནོ་ཞེས་བྱ་བའི་དོན་ཏོ། །རྒྱུད་འདིར་དངོས་གྲུབ་ཐོབ་པར་སླ་བ་ཞེས་བྱ་བ་གསལ་བར་བྱ་བའི་ཕྱིར། །ཚིགས་སུ་བཅད་པ་དྲུག་གསུངས་པ། ཐམས་ཅད་ཅེས་བྱ་བ་ལ་སོགས་པ་ལ་ཐམས་ཅད་བདེན་པ་ནི་སྒྲ་ཇི་ལྟ་བ་བཞིན་དུ་ང་ཡིས་གསུངས་པ་སྟེ། འདིར་ཞེས་བྱ་བ་ལྷག་མའོ། །དངོས་གྲུབ་ནི་རང་བཞིན་གྱི་དངོས་གྲུབ་ཀྱི་ཕྱིར་རོ། །ཐེག་པ་ནི་བྱང་ཆུབ་ཀྱི་ལམ་མོ། །ངོ་བོར་ལྡན་པ་ནི་དེ་ཁོ་ན་ཉིད་དང་ལྡན་པའོ། །རང་བཞིན་གྱིས་གྲུབ་པ་ནི་འདིར་ཐེག་པ་ཡིན་ན། བདག་གི་སེམས་འདི་དྲི་མ་ཅན་ཡིན་ནོ་ཞེ་ན། སེམས་ཞེས་བྱ་བ་ལ་སོགས་པ་གསུངས་ཏེ། སེམས་སུན་མ་ཕྱུང་མཁའ་མཉམ་པ་ནི་རང་བཞིན་གྱིས་དག་པའི་ཕྱིར་རོ། །མཉམ་པ་ནི་དེའི་རང་བཞིན་མི་འགྱུར་བའི་ཕྱིར་རོ། །ཇི་ལྟར་ཡིན་ཞེ་ན། གང་ཞིག་དྲི་མ་ཅིས་ཀྱང་གོས་པ་མེད། །ཅེས་བྱ་བ་གསུངས་ཏེ། དྲི་མ་རྣམས་ཀྱིས་སོ། །དེའི་རང་བཞིན་ནི་གློ་བུར་བ་ཡིན་པའི་ཕྱིར་ནམ་མཁའ་ལ་དུ་བ་དང༌། མུན་པ་དང་སྤྲིན་དང་ཁུག་རྣ་བཞིན་ནོ། །རྣལ་འབྱོར་པ་ཞེས་བྱ་བ་ལ་སོགས་པས་ལྷ་རྣམས་ཀྱི་སྟོབས་གསུངས་པ། ཀྱེ་རྣལ་འབྱོར་པས་བཅོམ་ལྡན་འདས་མ་འདི་ཙུན་རཱ་དང་པོའི་རང་བཞིན་ནོ། །སངས་རྒྱས་ཐམ་ཅད་སྐྱེད་བྱེད་མ་བསྒོམས་པས་རྡོ་རྗེ་ཡིར་ནི་འགྱུར་བ་སྟེ། འགྱུར་བ་ནི་འགྱུར་བར་
༄། །བྱེད་ཅིང་སྐྱེ་བའོ། །དེ་ནས་སངས་རྒྱས་ཐམས་ཅད་སྐྱེད་པར་བྱེད་པ་ཡིན་ན། རྡོ་རྗེ་འཛིན་པས་ཅི་ཞིག་བྱེད་ཅེ་ན། ཞལ་ལྷ་མོ་ཞེས་བྱ་བ་ལ་སོགས་པ་གསུངས་ཏེ། ལྷ་མོ་རྣམས་ནི་ལྷ་དང་སྟེ། །རྡོ་རྗེ་འཛིན་པ་དང་གཅིག་ཁོ་ནའི་རང་བཞིན་ནོ། །དེའི་ཡང་འདི་རྣམས་ལྟ་བུར་གྱུར་པའོ། །སངས་རྒྱས་རྣམས་དོན་ཅི་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་གསུངས་ཏེ། བཅོམ་ལྡན་འདས་སངས་རྒྱས་རྣམས་ཉིད་ཡིན་ཞིང༌། གཙོ་བོ་དང་སྙིང་པོ་སྟེ། ཆོས་ཀྱི་སྐུའི་རང་བཞིན་ཡིན་པའི་ཕྱིར་རོ། །དེ་ལྟ་བས་ན་དེ་ནི་རྩ་བ་སྟེ་སངས་རྒྱས་རྣམས་ཀྱི་སྐུ་གཉིས་སྡུད་པར་བྱེད་པ་དང༌། ཐོག་མ་དང་ཐ་མ་མེད་པའི་ཕྱིར་ཆོས་ཀྱི་སྐུའི་དེ་ཉིད་རྩ་བའོ། །དེ་ནི་དེ་ལྟར་རྡོ་རྗེ་འཛིན་པས་སྡུད་པ་སྟེ། དུས་གསུམ་གྱི་སངས་རྒྱས་རྣམས་བྱིན་གྱིས་རློབ་པར་བྱེད་ཅེས་བྱ་བ་ནི་ལྷ་རྣམས་ཀྱི་སྟོབས་སོ། །བསམ་པའི་སྟོབས་དང་སྔགས་ཀྱི་སྟོབས་ནི་ཡིད་ཀྱི་ཕན་པ་ཞེས་བྱ་བ་ལ་སོགས་པ་གསུངས་ཏེ། ཡིད་ཀྱི་ཕན་པ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་བསམ་པའོ། །དེའི་བསྒོམ་པ་ནི་གསུམ་པའི་གཅིག་གི་ཚིག་གི་བསྒོམ་པ་སྟེ། དེ་ཡིས་དངོས་གྲུབ་ངེས་པའོ། །ཧཱུཾ་ཡིག་གིས་ཀྱང་ཕན་པར་བྱ་བའི་དོན་དུའོ། །དེའི་ཕྱིར་སྐྱིལ་མོ་ཀྲུང་ཐ་ཅད་པ་མེད་པས་རྒྱུན་མི་འཆད་པར་བདག་ཉིད་རྣལ་འབྱོར་གོམས་པར་བྱ་ཞེས་བསྟན་པའི་ཕྱིར། སྙིང་བར་ཞེས་བྱ་བ་ལ་སོགས་པ་གསུངས་ཏེ། བདག་བརླན་པ་དང༌། བདག་རྐང་པ་ན་བཞེས་བྱ་བ་འདི་བྲལ་དང་རྐང་པར་རྣམ་པར་རྟོག་པའོ། །དོན་མེད་པ་ནི་འབྲས་བུའི་བགེགས་ཡིན་པའི་ཕྱིར་རོ། །ཡང་ན་རྨོངས་པ་སྟེ་མི་ཤེས་པ་རབ་ཏུ་སྐྱེ་བའི་ཕྱིར་རོ། །དེའི་སྙིང་གར་མི་བྱ་སྟེ། །སྙིང་གར་སྦྱོར་བ་བྱེད་པ་མ་ཡིན་ནོ་བགེགས་ཡོད་པ་མ་ཡིན་ནམ་དེ་ལས་གང་དངོས་གྲུབ་ཡིན་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། དབང་པོ་དང་མེ་དང་གཤིན་རྗེ་དང༌། བདེན་བྲལ་ལ་སོགས་པ་ཕྱོགས་བཅུའི་འབྱུང་པོ་འཁོར་དང་བཅས་པ་བགེགས་བྱེད་པ་ནི་འཇིག་རྟེན་གསུམ་མོ། །དེའི་འཁོར་ལོ་ནི་ཚོགས་སོ། །རྡོ་རྗེ་འབར་བ་རྣམས་ཀྱིས་དེ་བསལ་བའོ། །སྙིང་གའི་རྡོ་རྗེ་ལས་བྱུང་བ་སྤྲོས་ཤིང་འབར་བ་རྡོ་རྗེའི་
༄། །རྣམ་པའི་འོད་ཟེར་ནི་རྡོ་རྗེའི་འོད་དེ། དེ་རྣམས་ཀྱིས་བསལ་བ་ནི་སེལ་བར་བྱེད་པའོ། །དེ་ལྟ་བས་ན་འདིར་བགེགས་མེད་ཅིང་རབ་ཏུ་སྐྱེ་བ་ཞེས་བྱ་བར་དགོངས་སོ། །གལ་ཏེ་ཁྲོ་བོའི་ལྷའི་རྣལ་འབྱོར་གྱིས་བགེགས་རྣམས་བཅོམ་ཞིང་རྒྱལ་བ་ཡིན་ནམ་ཞེ་ན། སྤྲོ་བྱ་སྟེ་ཞེས་བྱ་བ་ལ་སོགས་པ་གསུངས་ཏེ། རྣལ་འབྱོར་པས་སྤྲོ་ནམ་མཁའི་དཀྱིལ་དུ་ནི། བྱེ་བ་སྟོང་གི་ཁྲོ་བོའི་ལྷ་རྣམས་སོ། །རྡོ་རྗེ་གཅིག་གི་རང་བཞིན་གྱིས། །ཞེས་བྱ་བ་ལ་རྡོ་རྗེ་འཛིན་པ་དང༌། ཐ་མི་དད་པར་མོས་པས་སོ། །ཡང་ན་ཡང་དག་བསྡུ་བར་ངེས་པ་ནི་དེ་རྣམས་རྡོ་རྗེའི་རང་བཞིན་གྱིས་སོ། །འདིར་ཡང་ནམ་མཁའ་དང་མཉམ་པའི་རྒྱུད་ཀྱི་དོན་གཙོ་བོ་ཡིན་པའི་ཕྱིར་དེ་ཉིད་བསྟན་པར་བྱ་སྟེ། དེ་ལྟ་བས་ན་དེ་ཉིད་མཇུག་བསྡུ་བར་བྱ་བའི་ཕྱིར་སེམས་ཀྱི་ཞེས་བྱ་བ་ལ་སོགས་པ་གསུངས་ཏེ། སེམས་ཀྱི་རང་བཞིན་ནི་དེ་བཞིན་ཉིད་དོ། །དེའི་བྱང་ཆུབ་ཀྱི་ཚུལ་ནི་བྱང་ཆུབ་ཀྱི་དེ་ཁོ་ན་ཉིད་དེ། དྲི་མ་རྣམས་མེད་པའོ། །དེས་ན་དེ་རྣམས་ཀྱི་ཟད་པ་དང་དེའི་རང་བཞིན་མི་ཟད་པ་ལས་བྱང་ཆུབ་ཐོབ་པར་སླའོ། །བྱང་ཆུབ་ནི་མཐའ་ཡས་པའི་སངས་རྒྱས་ཀྱི་ཆོས་རྣམས་མ་ཡིན་ནམ་དེ་ཇི་ལྟར་དེ་ཁོ་ན་ཉིད་ཡིན་ཞེ་ན། བྱང་ཆུབ་ཀྱང་ནི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་ཀྱི་ཚུལ་གྱི་དེ་ཁོ་ན་ཉིད་སེམས་ཀྱི་རང་བཞིན་ཉིད་དོ། །སེམས་ཀྱི་དེ་བཞིན་ཉིད་དོ། །དེ་ཉིད་སངས་རྒྱས་རྣམས་ཀྱི་ཆོས་ཀྱི་སྐུ་སྟེ། སངས་རྒྱས་རྣམས་ཀྱི་ཆོས་རྣམས་ཀྱི་རྟེན་ཡིན་པའི་ཕྱིར་རོ། །སངས་རྒྱས་ཀྱི་ཆོས་རྣམས་ནི་མ་ཡིན་ཏེ། དེ་རྣམས་དེའི་རྫས་ཡིན་ཞིང་རང་གི་ནི་མ་ཡིན་ནོ། །གལ་ཏེ་དེ་གཉིས་ཀའི་དེ་བཞིན་ཉིད་དང་དེ་ཁོ་ན་ཡིན་ན་དེ་ཡང་སྟོང་པ་ཉིད་གཉིས་མེད་པའོ། །དུས་ཐམས་ཅད་དུ་གཉིས་པོ་མེད་པའི་ཕྱིར་ཤིན་ཏུ་མེད་པ་ཡིན་ཏེ། རི་བོང་གི་རྭ་བཞིན་ནོ། །དངོས་པོ་ཤིན་ཏུ་མེད་པ་ནི་རང་བཞིན་ཡང་མ་ཡིན་ནོ། །དེ་མངོན་སུམ་དུ་ཡོད་པ་ཡང་མ་ཡིན་ཏེ། མི་གསལ་བའི་བདག་ཉིད་ཀྱི་ཕྱིར་རོ་ཞེ་ན། གཉིས་ཀའི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་ཀྱི་སེམས་དང་བྱང་ཆུབ་ནི་གཉིས་ཀའོ། །དེ་དག་གི་རང་བཞིན་ནི་དེ་བཞིན་ཉིད་དོ། །དེའི་སེམས་ཀྱི་ཚུལ་ནི་དོན་དམ་པ་སྟེ། གཉིས་དང་བྲལ་
༄། །བའི་སེམས་ཉིད་དང༌། གཉིས་ཀྱིས་སྟོང་པ་ཉིད་དོ། །གལ་ཏེ་དེ་ལྟ་ན་སེམས་ཉིད་སྟོང་པ་ཉིད་ཡིན་ན། སེམས་ནི་དང་པོ་ཉིད་ནས་འཁྲུལ་པའོ། །དེ་ཉིད་དེའི་རང་བཞིན་ཡིན་ན་བྱང་ཆུབ་འཁྲུལ་པར་འགྱུར་རོ་ཞེ་ན། དེ་ནི་མི་རིགས་ཏེ་བག་ཆགས་དང་བཅས་པའི་འཁྲུལ་པ་ཐམས་ཅད་ཡོངས་སུ་སྤངས་པའི་མཚན་ཉིད་ཀྱི་ཕྱིར་བྱང་ཆུབ་པོ་ཞེས་བྱ་བ་གསུངས་པ། སེམས་ནི་ཞེས་བྱ་བ་ལ་སོགས་པ་ལ། གང་གི་ཕྱིར་གློ་བུར་བ་ནི་འཁྲུལ་བའི་རྒྱུ་མཚན་དྲི་མའོ། །རང་བཞིན་སེམས་ནི་མཁའ་དང་མཉམ་པ་སྟེ། རྣམ་པ་མེད་པ་ཉིད་ཀྱི་ཕྱིར་རེས་འགའ་ནུབ་པ་ཡང་རེས་འགའ་མེད་པ་ཉིད་དུ་ཡོངས་སུ་གཅོད་པའི་ཕྱིར་འཇིག་རྟེན་པ་དང༌། འཇིག་རྟེན་ལས་འདས་པ་དང༌། རྗེས་ལ་ཐོབ་པའི་སེམས་ཀྱི་གནས་སྐབས་རྣམས་སུ་གོ་རིམས་བཞིན་ནོ། །གང་གི་ཕྱིར་གློ་བུར་གྱི་དྲི་མ་དེ་ཉིད་སྤངས་ན་བྱང་ཆུབ་ཐོབ་པར་སླ་བའོ། །དེ་ལ་གློ་བུར་གྱི་དྲི་མ་དག་པ་བསྒྲུབ་པར་བྱ་ཞིང་རང་བཞིན་གྱིས་དག་པ་ནི་གྲུབ་པ་ཉིད་དོ། །རྒྱུད་གཞན་རྣམས་དང༌། ལེའུ་གཞན་རྣམས་ཀྱི་དོན་ཐུན་མོང་བ་དེ་གསལ་བར་བྱེད་པའི་ལེའུའོ། །དཔལ་དང་ལྡན་པའི་ནམ་མཁའ་མཉམ་པའི་རྒྱུད་ལ་བདག་གི་ཚིག་གིས་མཆོད་བྱས་པས། །བསོད་ནམས་ཐོབ་པ་ཡོངས་སུ་གྱུར་ལས་སྟོན་ཀའི་ཟླ་བའི་ཟེར་བཞིན་འོད་ཟེར་མཛེས། །སྣ་ཚོགས་དོན་དུ་ནུས་པ་ཡིན་ཏེ་ཡོན་ཏན་འོད་ཟེར་གང་ལ་སྦྱོར་བ་རྣམས། །དེ་ཡིས་མྱུར་བར་རྒྱལ་བ་རྣམས་ཀྱི་ནམ་མཁའ་དང་མཉམ་མི་མཉམ་ཚངས་པར་འགྲོ། །དཔའ་ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ་ནམ་མཁའ་དང་མཉམ་པ་ལས་ལེའུ་ལྔ་པའོ།། །།ནམ་མཁའ་དང་མཉམ་པའི་རྒྱུད་ཀྱི་རྒྱ་ཆེར་འགྲེལ་པ། པཎྜི་ཏ་ཆེན་པོ་རིན་ཆེན་འབྱུང་གནས་ཞི་བས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་ཤཱུ་ནྱ་ཏཱ་སཱ་མ་དྷི་དང༌། ལོ་ཙཱ་བ་དགེ་སློང་ཤེས་རབ་ཡེ་ཤེས་ཀྱིས་བསྒྱུར་བའོ།།