དཔལ་འཁོར་ལོ་སྡོམ་པའི་དེ་ཁོ་ན་ཉིད་ཀྱི་མན་ངག།
ཀུ་ས་ལི་པ།
༄། །རྒྱ་གར་སྐད་དུ། །ཤྲཱི་ཙ་ཀྲ་སམྦྦ་ར་ཏཏྭ་ཨུ་པ་དེ་ཤ་།བོད་སྐད་དུ། དཔལ་འཁོར་ལོ་སྡོམ་པའི་དེ་ཁོ་ན་ཉིད་ཀྱི་མན་ངག །དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །དག་པའི་དེ་ཉིད་མཚོན་པ་ཡི། །ཨེ་ཝཾ་སྦྱོར་བ་ལས་སྐྱེས་པ། །མཁའ་མཉམ་དྲི་མ་རྣམ་སྤངས་པའི། །དབྱེར་མེད་ཆོས་ལ་ཕྱག་འཚལ་ལོ། །རྒྱུད་རྣམས་ཀུན་དུ་ཆེས་གསང་བ། །བླ་མ་རིམ་བརྒྱུད་ལས་འོངས་ནས། །ཇི་བཞིན་བདག་གིས་ངེས་རྟོགས་པ། །དེ་འདིར་རྣམ་པར་གསལ་བར་བྱ། །འཁོར་ལོ་སྡོམ་པ་པདྨའི་ཚལ། །སྤྱོད་འཚང་གསུང་གི་ཉི་ཟེར་གྱིས། །ཕྱེ་བས་ལེགས་ཐོབ་སྙིང་པོ་མཆོག །འགྲོ་རྣམས་ཚིམས་པར་བྱེད་པ་འདིའོ། །གང་དུ་བསྐལ་པ་གྲངས་མེད་པར། །འབད་ཀྱང་འདོད་དོན་མི་འཐོབ་པ། །དེ་འདིར་ཚེ་འདི་ཉིད་སོགས་ཀྱི། །དངོས་གྲུབ་གོ་འཕང་བླ་མེད་འགྱུར། །ལུས་གདུང་སེམས་ནི་གཡེང་བྱེད་པའི། །དཀའ་ཐུབ་ལ་སོགས་རྣམ་སྤངས་ཏེ། །འདོད་པ་ཉེ་བར་བརྟེན་པ་ཡི། །ལམ་གྱིས་བདེ་བའི་འབྲས་བུ་བསྒྲུབ། །གང་ཞིག་བརྟེན་པས་ཡུལ་ཀུན་གྱི། །བདེ་བས་ཡོངས་སུ་ཚིམས་བྱེད་ཅིང༌། །སྤྱོད་དང་གྲོལ་བའི་འབྲས་སྟེར་བ། །མཚན་ཉིད་ཕུན་སུམ་ཚོགས་ལྡན་པའོ། །འཇིག་རྟེན་རྟོག་པས་བརྟགས་པ་ཡི། །རིགས་ཀྱི་ཞེན་པ་ཀུན་སྤངས་ནས། །དབྱིབས་དང་ཁ་དོག་ལོང་ཚོ་དང༌། །ན་ཚོད་ལ་སོགས་རྗེས་མཐུན་ཞིང༌། །དམ་ཚིག་སྤྱོད་པ་སོགས་བརྟེན་པའི། །ཡོན་ཏན་རྣམས་ཀྱི་རྟེན་གྱུར་པ། །བརྟེན་པས་སྒྲུབ་པོ་དབང་ཕྱུག་གི །དངོས་གྲུབ་ཀུན་གྱི་གཞི་བྱེད་པའོ། །ལེགས་བརྟགས་ཤིན་ཏུ་ལེགས་རྟོགས་པ། །བརྟེན་བྱ་དེ་ལས་གཞན་དུ་ནི། །ཆགས་སོགས་འཇིག་རྟེན་དབང་གྱུར་པས། །བརྟེན་ནས་སྤྱོད་སྡུག་བསྔལ་འགྱུར། །ཆགས་ཅན་ཡེ་ཤེས་མངོན་འདོད་པས། །ཚུལ་འདི་ཉིད་ཀྱིས་བགྲོད་བྱ་ཡི། །དེ་ལས་གཞན་པའི་ལམ་གྱིས་ནི། །ནམ་ཡང་གྲུབ་ལ་
༄། །བརྟེན་མི་འགྱུར། །ཤིན་ཏུ་དབེན་པའི་སར་གནས་ཏེ། །འཇིག་རྟེན་གཡེང་བ་ཀུན་སྤངས་པས། །བདེ་བའི་ཡེ་ཤེས་འཕེལ་བྱེད་པའི། །རྗེས་མཐུན་ལོངས་སྤྱོད་བརྟེན་པ་དང༌། །རིགས་དང་ཡང་དག་སྦྱོར་བའི་སེམས། །མི་མཉམ་བདེ་བའི་རྟེན་གྱུར་པ། །དེ་འདིར་རང་གི་སྟོབས་ཀྱིས་སམ། །དེ་བཞིན་ཕྱག་རྒྱའི་སྟོབས་ཀྱིས་ཀྱང༌། །ནོར་བུའི་ནང་སོན་དབྱེར་མེད་པས། །བདེ་མཆོག་བླ་ན་མེད་གོམས་བྱ། །དེ་གོམས་པ་ཡི་སྦྱོར་བ་ཡིས། །རས་དཀར་ལ་ནི་སྣུམ་དང་ནི། །ཟས་ལ་བཅུད་ཀྱིས་ཕུག་པ་དང༌། །ཆབ་རོམ་ལས་ནི་ཆུ་ཉིད་དང༌། །ཆུ་རྣམས་ལས་ཀྱང་རྒྱ་མཚོ་དང༌། །ཆུ་རླབས་ལས་ནི་ཆུ་བཞིན་འགྱུར། །གང་ཞིག་མཆོག་ཏུ་གོམས་པའི་མཐུས། །སྣ་ཚོགས་སྣང་བ་དེར་འགྱུར་ཏེ། །ཇི་ལྟར་བུ་རམ་ལས་བྱས་གཟུགས། །སྣ་ཚོགས་མངར་བའི་རོ་བཞིན་ནོ། །གང་འདིར་ཐུན་ནམ་ཉིན་གཅིག་གམ། །ཟླ་ཕྱེད་ཟླ་གཅིག་ཁྱུད་ཀོར་དུ། །གོམས་པས་བསྐལ་མང་བྱེ་སྟོང་དུ། །མི་འགྱུར་པ་ཡི་ཡེ་ཤེས་ཐོབ། །འཁོར་ལོ་སྡོམ་དཔལ་གཞུང་ལུགས་ལས། །བླ་མའི་དྲན་གྱིས་ལེགས་ཐོབ་པ། །དེ་འདིར་བདག་གིས་གསལ་བྱས་པས། །དགེ་དེས་འགྲོ་ཀུན་བླ་མེད་ཤོག །དཔལ་འཁོར་ལོ་སྡོམ་པའི་དེ་ཁོ་ན་ཉིད་ཀྱི་མན་ངག་ཀུ་ས་ལི་པས་མཛད་པ་རྫོགས་སོ།། །། ཁ་ཆེའི་མཁས་པ་བྷ་དྲ་བོ་དྷི་དང༌། ལོ་ཙཱ་བ་མར་པ་ཆོས་ཀྱི་དབང་ཕྱུག་གིས་བསྒྱུར་བའོ།།