དཔལ་འཁོར་ལོ་སྡོམ་པའི་ལག་མཆོད་ཀྱི་ཆོ་ག་ཞེས་བྱ་བ།
པྲ་ཛྙཱ་རཀྵི་ཏ།
༄། །རྒྱ་གར་སྐད་དུ། ཤྲཱི་ཙ་ཀྲ་སམྦ་ར་ཧསྟ་པཱུ་ཛི་བིདྷི་ནཱ་མ། བོད་སྐད་དུ། དཔལ་འཁོར་ལོ་སྡོམ་པའི་ལག་མཆོད་ཀྱི་ཆོ་ག་ཞེས་བྱ་བ། དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །རྣལ་འབྱོར་མ་ཡི་གཙོ་མོ་ནི། །རྡོ་རྗེ་ཕག་མོ་ལ་བཏུད་དེ། །བདག་གི་ལག་པའི་མཆོད་པ་ཡི། །ཆོ་ག་མན་ངག་བཞིན་དུ་བསྡུ། དེ་ལ་ཚོགས་ཀྱི་འཁོར་ལོ་ལ་སོགས་པར་དཔལ་འཁོར་ལོ་བདེ་མཆོག་གི་རྣལ་འབྱོར་དང་ལྡན་པའི་སྔགས་པས་ལག་པ་གཡོན་པའི་མཐེ་བོ་དང་མཛུབ་མོ་དང་གུང་མོ་དང་སྲིན་ལག་དང་མཐེའུ་ཆུང་དང་དེ་དག་གི་སེན་མོ་རྣམས་སུ་རྡོ་རྗེ་སེམས་དཔའ་དང་རྣམ་པར་སྣང་
༄། །མཛད་དང༌། འོད་དཔག་མེད་དང་མི་བསྐྱོད་པ་དང་རིན་ཆེན་འབྱུང་ལྡན་དང་དོན་ཡོད་གྲུབ་པའི་རང་བཞིན་ཅན་གྱི་གོ་རིམས་ཇི་ལྟ་བར་དཀར་པོ་དང་སེར་པོ་དང་དམར་པོ་དང་ནག་པོ་དང༌། ལྗང་གུའི་མདོག་ཅན་གྱིས། ཨོཾ་ཧ། ན་མ་ཧི། སྭཱ་ཧཱ་ཧཱུ། བཽ་ཥ་ཊ་ཧེ། ཧཱུཾ་ཧཱུཾ་ཧོཿ། ཕཊ་ཧཾ་ཞེས་བྱ་པའི་ཡི་གེ་རྣམས་དགོད་དོ། །ལག་པའི་མཐིལ་དུ་ཡང་སྐད་ཅིག་གིས་གྲུབ་པའི་པདྨ་དམར་པོ་འདབ་མ་ལྔ་པ་བསྒོམས་ལ་དེའི་ཤར་ལ་སོགས་པའི་ཕྱོགས་རྣམས་སུ་གཡོན་སྐོར་དུ་རིམ་པ་ཇི་ལྟ་བ་བཞིན་ཡ་མི་ནཱི་དང་རྨོངས་བྱེད་མ་དང་སྐྱོད་བྱེད་མ་དང་འཇིགས་བྱེད་མ་དང་ཙཎྜི་ཀའི་རང་བཞིན་ཅན་ནག་པོ་དང་དཀར་པོ་དང་སེར་པོ་དང་ལྗང་གུ་དང་དུ་བའི་མདོག་དང་ལྡན་པ། ཧཾ་ཡོཾ། ཧྲིཾ་མོཾ། ཧྲེཾ་ཧྲིཾ། ཧཱུཾ་ཧཱུཾ་ཕཊ་ཕཊ། ཅེས་པའི་ཡེ་གེ་རྣམས་དང༌། ལྟེ་བ་ལ་ནི་རྡོ་རྗེ་ཕག་མོའི་རང་བཞིན་ཁ་དོག་དམར་མོ་ཨོཾ་བཾ་ཞེས་བྱ་བའི་ས་བོན་དག་བལྟ་བར་བྱའོ། །ལག་པའི་བོལ་ལ་ཡང་འདི་དག་ཉིད་ཀྱི་གཟུགས་བརྙན་ནམ་འཁོར་ལོ་གསུམ་ཡོངས་སུ་རྫོགས་པར་བལྟ་བར་བྱའོ། །དེ་ནས་ལག་པ་ལ་གནས་པའི་འབྱུང་བས་དང་ཆུ་དང་མེ་དང་རླུང་དང་ནམ་མཁའ་རྣམས་ལྟུང་བྱེད་མ་དང་གསོད་བྱེད་མ་དང༌། འགུགས་བྱེད་མ་དང༌། གར་གྱི་དབང་ཕྱུག་མ་དང༌། པདྨའི་དྲ་བ་ཅན་གྱི་རང་བཞིན་དུ་ལྷག་པར་མོས་པར་བྱའོ། །དེ་ནས་ལག་པ་ལ་གནས་པའི་ས་བོན་གྱི་ཡི་གེ་དག་ལ་ཁུ་བའི་རྫས་ཀྱིས་བྱུགས་ཏེ་ལག་མཐིལ་དེ་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་བརླབས་པའི་འཁོར་ལོ་གསུམ་གྱི་རང་བཞིན་དུ་ལྷག་པར་མོས་པར་བྱས་ནས་ཁུ་པ་ལ་སོགས་པའི་རྫས་དེ་ཡི་གེ་གསུམ་གྱི་སྔགས་སམ་རྐང་པ་བརྒྱད་པའི་སྔགས་ཀྱིས་དབུལ་བར་བྱའོ། །དེ་ནས་ཡང་དག་པར་མཆོད་ནས་ཆོ་ག་ལྷག་པ་དང་མ་ཚང་བ་དག་པར་བྱ་བའི་དོན་དུ་ཡི་གེ་བརྒྱ་པའི་སྔགས་བཏོན་ཏེ། ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་བཏབ་ནས་རྫས་གཞན་ནམ་ཡང་ན་དེ་མ་ཡིན་པ་གཞན་དུ་གཞག་སྟེ། ལག་པའི་མཐིལ་དུ་སྦྱར་བའི་རྫས་སྲིན་ལག་གིས་བླངས་པ་ལས་སྙིང་ག་དང་ལྟེ་བ་དང་མགོ་རྣམས་སུ་ཡི་གེ་ཧཱུཾ་དང་ཨཱཿ་དང་ཨོཾ་བརྗོད་པ་སྔོན་དུ་འགྲོ་བས་བྱུགས་པ་ན་ལྷའི་ཚོགས་དེ་དག་བདག་ཉིད་ལ་ཞུགས་པར་མོས་
༄། །པར་བྱའོ། །ཆོ་ག་འདི་ཡང་ཀུན་སྤྱོད་པའི་རྒྱུད་དང་འབྲེལ་བ་ཡིན་ནོ། །ལག་པའི་མཆོད་པའི་ཆོ་གའོ། །ཡང་ན་སྔར་བརྗོད་པའི་ཆོགས་སྦྱངས་པའི་ལག་པ་གཡོན་པའི་སྲིན་ལག་གིས་གནས་དང་ཉེ་བའི་གནས་ལ་སོགས་པའི་རང་བཞིན་དུ་པུ་ཛཱ་ཞེས་བྱ་བ་ལ་སོགས་པའི་ཡི་གེ་ཉི་ཤུ་རྩ་བཞི་བརྗོད་ཅིང་ཇི་ལྟར་སྦྱངས་པའི་ཆང་གིས་གྲུ་གསུམ་གཉིས་བྱུགས་ནས་དེའི་དབུས་སུ་ཡང་དཀྱིལ་འཁོར་ཟླུམ་པོའོ། །དེ་རང་གི་སྙིང་གའི་ས་བོན་ལས་བྱུང་བའོ་འོད་ཟེར་གྱིས་རྟེན་དང་བརྟེན་པའི་དཀྱིལ་འཁོར་དང་བཅས་པའི་བཅོམ་ལྡན་འདས་བཀུག་པར་བསམས་ཏེ། དེ་ལ་བདུད་རྩི་ལྔ་ལ་སོགས་པའི་རང་བཞིན་དུ་གྲུབ་པའི་བཟའ་བ་དང་བཅའ་བ་ལ་སོགས་པ་ཡི་གེ་གསུམ་མ་མ་རྐང་པ་བརྒྱད་པའི་སྔགས་ཀྱིས་ཕུལ་ནས་པདྨའི་སྣོད་ལ་གནས་པའི་ཆང་བདུད་རྩིར་བསྒྲུབས་པ་སྲིན་ལག་དང་མཐེ་བོས་བླངས་ཏེ་བཅོམ་ལྡན་འདས་དང་བཅོམ་ལྡན་འདས་མ་ལ་རང་རང་གི་སྙིང་པོ་དང་ཉེ་བའི་སྙིང་པོ་དག་གིས་དང༌། མཁའ་འགྲོ་མ་ནས་བརྩམས་ཏེ་གཤིན་རྗེ་འཛོམས་མའི་མཐར་ཐུག་པ་རྣམས་ལ་ཡང་འདི་རྣམས་ཉིད་ཀྱི་རང་རང་གི་སྔགས་ཇི་ལྟ་བདག་གིས་ཚིམ་པར་བྱའོ། །དེ་ནས་ཡང་དག་པར་མཆོད་ནས་མ་ཚང་བ་དང་ལྷག་པ་དག་པར་བྱ་པའི་དོན་དུ་ཡི་གེ་བརྒྱ་པ་བཏོན་ནས་ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་གདབ་པའོ། །ཨོཾ་ཡོ་ག་ཤུདྡྷཿ་སརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་བཞིན་པར་པདྨ་བསྐོར་པའི་ཕྱག་རྒྱས་མཉེས་པར་བྱ་སྟེ་ཕྱག་རྒྱ་དེ་སྡུད་པ་ན་འཁྱུད་པའི་སྟངས་ཀ་སྔོན་དུ་འགྲོ་བས་སྲིན་ལག་གིས་ས་ལ་རེག་ཅིང་ཨོཾ་བཛྲ་མུཿ། ཞེས་བརྗོད་པས་གཤེགས་སུ་གསོལ་ཏེ། འཁོར་ལོ་དེ་བདག་ཉིད་ལ་གཞུག་པར་བྱའོ། །དེ་ནས་ས་དེ་ལ་གནས་པའི་ཆང་ལག་པ་གཡོན་པའི་སྲིན་ལག་གིས་བླངས་ནས་དེས་སྙིང་ག་དང་ལྕེ་དང་མགོ་རྣམས་སུ་ཡི་གེ་ཧཱུཾ་དང་ཨཿ་དང་ཨོཾ་བརྗོད་པ་སྔོན་དུ་འགྲོ་བས་བྱུག་ཅིང་ལག་པ་དེ་ལ་གནས་པའི་ལྷའི་འཁོར་ལོ་ཡང་བདག་ཉིད་ལ་གཞུག་པར་བལྟ་བར་བྱའོ། །གྲུབ་གསུམ་དཀྱིལ་འཁོར་ལོ་གནས་པ། མགོན་པོ་འཁོར་ལོ་བདེ་མཆོག་ལ། །ལག་པས་མཆོད་པ་བཤད་པ་འདི། །རྣལ་འབྱོར་པ་ལ་ཕན་
༄། །བྱེད་ཡིན། །ལག་པའི་མཆོད་པའི་ཆོ་ག་དཔལ་པྲཛྙཱ་རཀྵི་ཏས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཔལ་སུ་མ་ཏི་ཀཱི་རྟི་དང༌། སྒྲ་བསྒྱུར་གྱི་ལོ་ཙཱ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་བའོ།།