ཧེ་རུ་ཀའི་རྣམ་པར་དག་པ།
ཤྲདྡྷཱ་ཀ་ར་ཝརྨྨ།
༄། །ཧེ་རུ་ཀའི་རྣམ་པར་དག་པ་བཞུགས། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །བཅོམ་ལྡན་རྗེ་བཙུན་དཔལ་ཧེ་རུ་ཀའི་རྣམ་པར་དག་པ་གསུངས་པ་ནི། ཡང་དག་པའི་ཏིང་ངེ་འཛིན་རྣམ་པར་དག་པའི་རང་བཞིན་ཅན་ནོ། །ཡང་དག་པ་ནི་ཕྱིན་ཅི་མ་ལོག་པ་སྟེ། ཉན་ཐོས་ལ་སོགས་པ་དང་ཐུན་མོང་མ་ཡིན་པའི་ཕྱིར་རོ། །སེམས་སོ་སོར་རིག་པ་ལ་སོགས་པ་ཟླ་བ་དང༌། རྡོ་རྗེའི་རྣམ་པ་དང༌། རིགས་ལྔ་དང༌། ཕུང་པོ་གཅིག་གིས་རྣམ་པར་ཤེས་པའི་རང་བཞིན་ཉིད་ཡིན་པའི་ཕྱིར། དེ་ཉིད་ནི་མོས་པས་སྤྱོད་པའི་ས་ཡིན་ལ། མོས་པ་ནི་ལྷག་པར་མོས་པས་ཏེ། ཁྱད་པར་ཅན་གྱིས་ལྷའི་རྣམ་པར་བསྒོམ་པའི་བྱང་ཆུབ་ཀྱི་ཕྱོགས་ཀྱི་ཆོས་མ་ལུས་པ་རོ་གཅིག་པའི་བདག་ཉིད་ཅན་གྱི་སྤྱོད་པ་ནི། མ་རིག་པའི་གཉེན་པོ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །ཡང་ན་དངོས་པོ་སོ་སོའི་རྣམ་པར་དག་པ་གཞན་དང་གཞན་མ་ཡིན་ཏེ། ཞལ་བཞི་ནི་དགའ་བ་བཞིའི་རང་བཞིན་ཅན་ཏེ། འབྱུང་བ་ཆེན་པོ་བཞི་འདུས་ཏེ་རེག་པ་ལས་བྱུང་བའི་དགའ་བ་དང༌། སྟོང་པ་ཉིད་ལ་སོགས་པ་རྣམ་པར་ཐར་པའི་སྒོའི་ཁྱད་པར་ཅན་གྱི་འབྲས་བུའི་རང་བཞིན་ཡིན་པའི་ཕྱིར་རོ། །དེ་ལ་ཕྱག་བཅུ་གཉིས་ཀྱི་དང་པོས་ཌ་མ་རུ་ནི་སྦྱིན་པའི་ཕ་རོལ་ཏུ་ཕྱིན་པའི་རྣམ་པར་དག་པ་ཡིན་ཏེ། འདི་ལྟར་རང་དང་གཞན་དབྱེར་མེད་པའི་དཀྱིལ་འཁོར་གྱི་འཁོར་ལོའི་རྣམ་པ་རྟག་ཏུ་ཆོས་ཀྱི་སྒྲ་ཉན་པའི་ཕྱིར་རོ། །སེར་སྣ་དང་གཞན་གྱི་བདེ་བ་འཕྲོག་པའི་གཉེན་པོ་
༄། །ཡིན་ནོ། །དེ་ཉིད་ནི་ས་རབ་ཏུ་དགའ་བ་སྟེ། བདག་དང་གཞན་དབྱེར་མེད་པའི་བདེ་བ་ཆེན་པོའི་དགའ་བ་དེ་སྐྱེད་པར་བྱེད་པ་ཉིད་ཡིན་པའི་ཕྱིར་རོ། །དགྲ་སྟ་ནི་ཚུལ་ཁྲིམས་ཀྱི་ཤེལ་དག་པ་དང་འདྲ་བར་དག་པ་ཡིན་ཏེ། འདི་ལྟར་སྲོག་གཅོད་པ་ལ་སོགས་པ་མི་དགེ་བ་དང༌། བཟའ་བར་བྱ་བའི་དམ་ཚིག་ལས་འདས་པ་ལ་སོགས་པ་འཆལ་བའི་ཚུལ་ཁྲིམས་ཀྱིས་འདུས་བྱས་གཅོད་པར་བྱེད་པའི་ཕྱིར་རོ། །དེ་ཉིད་ནི་ས་དྲི་མ་མེད་པ་སྟེ། སྡིག་པ་ཐམས་ཅད་ལས་ལྡོག་པར་བྱེད་པ་ཉིད་ཡིན་པའི་ཕྱིར་རོ། །གྲི་གུག་ནི་བཟོད་པའི་ཕ་རོལ་ཏུ་ཕྱིན་པ་རྣམ་པར་དག་པ་སྟེ། ཕ་རོལ་ཀུན་ནས་འཁྲུག་པས་མཚོན་དང་དབྱིག་པ་དང༌། ཕག་དུམ་ལ་སོགས་པས་བསྣུན་པས་རྣམ་པར་ཤེས་པ་འཁྲུག་ཅིང་མི་བཟོད་པ་ཀུན་ནས་གཅོད་པར་བྱེད་པ་ཡིན་པའི་ཕྱིར་རོ། །དེ་ཉིད་ནི་ས་འོད་བྱེད་པ་ཡིན་ཏེ། མི་འཁྲུགས་པས་སེམས་ལ་གནས་ཤིང༌། གནས་པས་མི་ཤེས་པ་རྣམ་པར་འཇིག་ལ། དེ་མེད་པས་ཡེ་ཤེས་རྙོགས་པ་མེད་པ་རབ་ཏུ་གསལ་བར་བྱེད་པ་ཞེས་བྱ་བའི་དོན་ཏོ། །རྩེ་གསུམ་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡིན་ཏེ། སྙོམ་ལས་དང་ལེ་ལོ་དང་བརྩོན་འགྲུས་མེད་པ་དང༌། སྤྲོ་བ་མེད་པས་ལམ་མ་ཡིན་པ་ལ་རྗེས་སུ་སྤྱོད་པའི་ཕྱིར་ངན་འགྲོ་ངན་སོང་དམྱལ་བ་ལ་སོགས་པའི་མིང་དང་གཟུགས་འབྱུང་བ་དེའི་གཉེན་པོ་ལུས་དང་ངག་དང་ཡིད་མཁྱེན་པའི་རྩེ་གསུམ་རྣོན་པོའི་རང་བཞིན། བདེ་བར་གཤེགས་པ་སྐུལ་བར་བྱེད་པའི་བརྩོན་འགྲུས་ཀྱི་མཚན་ཉིད་ཅན་ནོ། །དེ་ཉིད་ནི་ས་འོད་འཕྲོ་བ་ཡིན་ཏེ། འོད་ནི་འོད་ཟེར་ཏེ། ཡེ་ཤེས་རྣམ་པར་འཕྲོ་བའི་བློའི་ཁྱད་པར་ཤེས་རབ་ཀྱི་མཐུ་གང་གིས་བདེ་བར་གཤེགས་པ་ཉིད་དུ་འགྱུར་བ་ཞེས་བྱ་བར་དགོངས་སོ། །ཁ་ཊྭཱཾ་ག་ནི་བསམ་གཏན་གྱི་ཕ་རོལ་ཏུ་ཕྱིན་པ་རྣམ་པར་དག་པ་སྟེ། འདི་ལྟར་བསམ་གཏན་རྩེ་གཅིག་པས་སྐྱེ་མཆེད་དྲུག་གིས་རྣམ་བར་གཡེང་བ་སྤངས་པས། ཕུང་པོ་ལ་སོགས་པ་མ་ལུས་པའི་མགོ་བོ་ནས་བརྩམས་ཏེ། རྐང་པའི་མཐར་ཐུག་རྣམ་པར་བཅད་ན། ནང་སྟོང་པ་ཉིད་དུ་རོ་གཅིག་ཅིང་གཡོ་བ་མེད་པ་ཉིད་ནི་དུང་དང༌། ཀུནད་དང༌། ཟླ་བ་དང༌། ཤེལ་དག་པ་དང་འདྲ་བ་ཡིན་ཏེ། སེམས་ཀྱི་རང་བཞིན་དུ་གྱུར་
༄། །པ་ཉིད་ཀྱི་ཕྱིར་རོ། །དེ་ཉིད་ནི་ས་རབ་ཏུ་སྦྱང་དཀའ་བ་ཡིན་ཏེ། རབ་ཏུ་སྟེ་ངེས་པར་མི་མཐུན་པའི་ཕྱོགས་བདུད་ཀྱིས་ཐུབ་པར་དཀའ་བ་ཉིད་ཀྱི་ཕྱིར་རོ། །དྲིལ་བུ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པའོ། །འདི་ལྟར་ཤེས་རབ་ནི་འཆལ་པའི་ཚུལ་ཁྲིམས་དང་ངག་གི་ཐ་སྙད་ལ་སོགས་པའི་གཉེན་པོ་ཡིན་ཏེ། ཆོས་ཀྱི་གསུང་རིན་པོ་ཆེའི་སྒྲ་སྙན་པ་སྐྱེ་བ་མེད་པའི་སྒྱོར་བས། འགྲོ་བ་ཡང་དག་པར་སྟོན་པར་བྱེད་པའི་ཕྱིར་རོ། །དེ་ནི་ས་མངོན་དུ་གྱུར་པ་ཡིན་ཏེ། ཆོས་ཐམས་ཅད་སྐྱེ་བ་མེད་པ་ཞེས་བྱ་བའི་སྒྲ་མངོན་དུ་གྱུར་པས་བརྗོད་པ་ནི་ལྡོག་པ་མེད་པ་ཡིན་ཏེ། ཆོས་ཉིད་དེས་རྣམ་པ་ཐམས་ཅད་མཁྱེན་པ་ཉིད་ཀྱི་འབྲས་བུར་འགྱུར་རོ་ཞེས་བྱ་བའི་དོན་ཏོ། །རྡོ་རྗེ་ནི་ཐབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡིན་ཏེ། །གང་གིས་སྦྱིན་པ་ལ་སོགས་པ་ལ་ཉེ་བར་སྤྱོད་ཅིང་ནན་ཏན་དུ་བྱེད་པ་དེ་ནི་ཐབས་ཡིན་ཏེ། སེར་སྣ་ལ་སོགས་པ་ཐབས་མ་ཡིན་པའི་གཉེན་པོ་ཉིད་ཡིན་པའི་ཕྱིར་རོ། །དེའི་འབྲས་བུར་གྱུར་པ་ནི་གྲངས་ཇི་ལྟ་བ་བཞིན་དུ་མེ་ལོང་ལྟ་བུའི་ཡེ་ཤེས་ལ་སོགས་པ་ལྔ་རང་བཞིན་གཅིག་ཟབ་པ་དང་རྒྱ་ཆེ་བའི་རང་བཞིན་ཉིད་ཡིན་པའི་ཕྱིར་རོ། །དེ་ཉིད་ནི་ས་རིང་དུ་སོང་བ་ཡིན་ཏེ། །གང་གི་ཕྱིར་འདི་ལྟར་སྟོང་པ་ཉིད་དང་སྙིང་རྗེ་ཆེན་པོ་དབྱེར་མེད་པའི་ལམ་གྱི་སྒོ་ནས་ཤིན་ཏུ་བདེ་བ་ལ་སོགས་པ་མྱོང་བ་ལས་དེས་སེམས་ཅན་ཐམས་ཅད་སྐད་ཅིག་མ་གཅིག་གིས་རིང་དུ་སོང་བར་བྱེད་པ་སྟེ། ཐོབ་པར་བྱེད་ཅེས་བྱ་བའི་ཐ་ཚིག་གོ །པདྨའི་སྣོད་ནི་སྨོན་ལམ་གྱི་ཕ་རོལ་ཏུ་ཕྱིན་པ་རྣམ་པར་དག་པ་ཡིན་ཏེ། འདི་ལྟར་དང་པོ་སེམས་བསྐྱེད་པའི་དུས་སུ། བདག་དཔལ་ཧེ་རུ་ཀར་གྱུར་ཅིག་ཅེས་བྱ་བ་ལ་སོགས་པའི་སྒོ་ནས་དམ་བཅས་པའི་སྨོན་ལམ་ཡིན་ཏེ། སེམས་ཅན་གྱི་དོན་ལ་བབ་པ་སྨོན་ལམ་གྱི་རྒྱན་གྱིས་ཉེ་བར་བརྒྱན་པ་ནི། སྨོན་ལམ་མ་ཡིན་པའི་ཤེས་པའི་རྩ་བ་ཅན་འཁོར་བར་འབྱིན་པར་བྱེད་པའི་སྲེད་བ་དེའི་གཉེན་པོར་གྱུར་པས། ཡེ་ཤེས་ཀྱི་བདུད་རྩིས་ནང་ཀུན་ནས་བཀང་བ་ཅན་མངོན་པར་འདོད་པའི་ཕྱིར་རོ། །རང་དང་གཞན་གྱི་དོན་ལ་དབྱེ་བ་མེད་པ་རྒྱུན་མི་འཆད་པ་སྒྲུབ་པར་བྱེད་པའི་ཕྱིར་རོ། །དེ་ཉིད་ནི་ས་མི་གཡོ་བ་ཞེས་བྱ་བའི་དོན་ཏོ། །ཞགས་པ་
༄། །ནི་སྟོབས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡིན་ཏེ། འདི་ལྟར་སྟོབས་དང་མཐུ་དང་ནུས་པ་མ་ཚང་བ་མེད་པས་ཀུན་དུ་རྟོག་པའི་ཉེ་བར་ལེན་པའི་གཉེན་པོར་གྱུར་པའི་ཕྱིར་རོ། །ཚུལ་བཞིན་གཡོ་བ་མེད་པའི་ཆོས་ལ་འཇུག་པ་རྒྱུན་མི་འཆད་པ་དང༌། ཀུན་ནས་དབང་དུ་བྱེད་པའི་ཕྱིར་རོ། །དེ་ཉིད་ནི་ས་ལེགས་པའི་བློ་གྲོས་ཡིན་ཏེ། ལེགས་པའི་བློ་གྲོས་ནི་དགེ་བའི་བློ་སྟེ། རྣམ་པར་རྟོག་པ་འཛིན་པ་གཅོད་པའི་ཕྱིར་རོ། །བཅོམ་ལྡན་འདས་རྡོ་རྗེ་ཕག་མོ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་སྟེ། འདི་ལྟར་ཐམས་ཅད་མཁྱེན་པའི་ཡེ་ཤེས་ལྷུན་གྱིས་གྲུབ་པ་མཚོན་བྱ་དང༌། མཚོན་བྱེད་དང་བྲལ་བ། བརྗོད་པ་མེད་པར་རོ་གཅིག་པའི་དགའ་བ་བདེ་བ་ཆེན་པོའི་རང་བཞིན་ཅན་བདག་དང་བདག་གིར་འཛིན་པའི་མི་ཤེས་པ་དང༌། དངོས་པོར་འཛིན་པའི་གཉེན་པོས་སྣང་བ་མེད་པར་བྱེད་པར་བཟོད་པ། བྱིང་བ་དང༌། རྒོད་པའི་ཕྱོགས་གཉིས་ཀ་ཡོངས་སུ་གཅོད་པའོ། །དེ་ཉིད་ཀྱི་ཕྱིར་དེ་དག་གཅོད་པར་བྱེད་པས་ཏེ། གྲི་གུག་ཡིན་ལ། དེ་གཉིས་ཀ་མཉམ་པ་ཉིད་ཀྱི་རོ་མྱང་བའི་ཕྱིར། །ཁྲག་གིས་ཡོངས་སུ་བཀང་བའི་སྣོད་ཡིན་ནོ། །དེ་ཉིད་ནི་ས་ཆོས་ཀྱི་སྤྲིན་ཡིན་ཏེ། འདི་ལྟར་སྤྲོས་པ་མེད་པའི་རང་བཞིན་ཅན་གྱི་ཆོས་ཉིད་ནི་སྤྲིན་ཡིན་ཏེ། སྤྲིན་དང་འདྲ་བར་རང་བཞིན་གྱི་ཆུའི་རྒྱུན་གྱིས་རླན་པར་བྱེད་པའི་ཕྱིར། སེམས་ཅན་གྱི་ཁམས་མ་ལུས་པ་ཚིམ་པར་བྱེད་ཅེས་བྱ་བའི་དོན་ཏོ། །ཚངས་པའི་མགོ་བོ་ནི་ཕུང་པོའི་བདུད་ཀྱི་རང་བཞིན་ཡིན་ཏེ། འདི་ལྟར་ཁམས་གསུམ་པ་ཕུང་པོ་ལྔའི་བདག་ཉིད་ཅན་གྱི་ལུས་དེ་སྐྱེད་པར་བྱེད་པ་ཚངས་པའི་ངར་འཛིན་པ་ཅན་ལོག་པར་སྨྲ་བ་དེ་ཉིད་ནི་གཟུགས་ལ་སོགས་པའི་ཕུང་པོའི་བདུད་ལས་སྐྱེས་པའི་རྨོངས་པ་དེ་ལ། རྣམ་པར་ཤེས་པ་ངར་འཛིན་པའི་ང་རྒྱལ་གཅོད་པར་བྱེད་པའི་ཕྱིར། ཚངས་པའི་མགོ་གདོང་བཞི་པ་ཡིན་ནོ་ཞེས་བྱ་བའི་དོན་ཏོ། །འཇིགས་བྱེད་ནི་ཉོན་མོངས་པའི་བདུད་ཀྱི་རང་བཞིན་ཡིན་ཏེ། ཉོན་མོངས་པ་ནི་འདོད་ཆགས་ཀྱི་རྩ་བ་ཅན་ཡིན་ལ། འདོད་ཆགས་ནི་དབང་ཕྱུག་ཆེན་པོ་ཡིན་ཏེ། འདོད་པས་ཞེན་པའི་འདོད་པས་སྤྲོ་བ་དང་བསྡུ་བའི་ང་རྒྱལ་ཅན།
༄། །བདག་འཆིང་བར་བྱེད་པ་དེ་ཉིད་འཁོར་བ་ཡིན་ནོ། །མཉམ་པ་དང་མི་མཉམ་པ་ལ་སོགས་པས་ལུས་རྒས་པ། རྙིང་པ། སྨིན་མ་དང་སྨ་ར་ལ་སོགས་པ་འཇིགས་པར་བྱེད་པའི་བདག་ཉིད། ངག་གི་རང་བཞིན་འབྲུག་སྒྲ་ལ་སོགས་པ་སྒྲོགས་པ་ཉིད་ཀྱི་ཕྱིར་རོ། །དེའི་ང་རྒྱལ་བཟློག་པའི་དོན་དུ་རོལ་པས་ངེས་པར་མ་བཟུང་ཞིང་འབད་རྩོལ་མེད་པར་གཡོན་པའི་ཞབས་ཀྱིས་གན་རྐྱལ་དུ་མནན་པ་ཡིན་ནོ་ཞེས་བྱ་བའི་དོན་ཏོ། །དུས་མཚན་ནི་འཆི་བདག་གི་བདུད་ཀྱི་རང་བཞིན་ཡིན་ཏེ། ཕུང་པོ་རྣམ་པར་འཇིག་ཅིང་སྟོང་པ་ཉིད་དོ། །འདས་པ་དང༌། མ་འོངས་པ་དང༌། ད་ལྟར་བྱུང་བའི་དུས་གསུམ་ན་ཡོད་པའི་ཕྱི་དང་ནང་གི་བདག་ཉིད་ཅན་གྱི་འཁོར་བའི་ཆོས་ཟབ་པར་བྱེད་པའི་བདག་ཉིད་ཅན་གཅིག་ཏུ་མྱ་ངན་ལས་འདས་པའི་རང་བཞིན་ཅན་ཁོང་ཁྲོ་བའི་སེམས་ཀྱི་རྒྱུན་ཐམས་ཅད་མེད་པ། འདོད་ཆགས་དང་བྲལ་བ་མཚན་མོ་མི་ཤེས་པ་མུན་པ་དེ་ལ་ཞབས་གཡས་པ་རེག་པས་བསྐྱེད་པའི་བདེ་བ་ཆེན་པོའི་རྣམ་པའི་ཡེ་ཤེས་ངེས་པར་འཛིན་པའི་ཕྱིར། འདོད་ཆགས་ཆེན་པོ་ཡང་དག་པའི་ཐབས་ཡིན་ནོ་ཞེས་བྱ་བའི་དོན་ཏོ། །གླང་པོ་ཆེའི་པགས་པ་ནི་ལྷའི་བུའི་བདུད་ཡིན་ཏེ། ལྷ་ནི་ལྷ་ཆེན་པོའོ། །དེའི་བུ་ནི་དེ་ལས་སྐྱེས་པའོ། །གླང་པོ་ཆེན་པོ་བགེགས་ཀྱི་དབང་ཕྱུག་སྟེ། ལོག་འདྲེན་ཉོན་མོངས་པ་སྒྲིབ་པ་མུན་པ་མུན་ནག་རྨོངས་པ། ཐབ་པ་དང་རྒྱ་ཆེ་བའི་ཡེ་ཤེས་ཐོབ་པར་བྱེད་པའི་རྒྱུ་དང་འགལ་བར་བྱེད་པ་དེའི་ཉོན་མོངས་པའི་པགས་པ་བཤུས་ཏེ། ཕྱག་གཡས་པ་དང་གཡོན་པ་གཉིས་ཀྱིས་གོས་བཞིན་དུ་རྒྱལ་མཚན་གྱི་བླ་མར་ཕུབ་པ་དང་འདྲ་བར་ཀུན་ནས་བགེགས་མེད་པར་བྱ་བ་དང༌། སྲིད་པ་དང་ཞི་བ་གཉིས་ཀྱིས་གདུང་བ་གཉིས་སུ་མེད་པའི་རོ་གཅིག་པ་ཆེན་པོའི་གྲིབ་མ་བསིལ་བ་དང་འདྲ་བར་ཚིམ་པར་བྱེད་པ་ཉིད་ཀྱི་ཕྱིར་རོ་ཞེས་བྱ་བའི་དོན་ཏོ། །དེ་དག་ཉིད་ནི་སངས་རྒྱས་ཀྱི་ས་བཅུ་གཉིས་པ་ཡིན་ཏེ། འདི་ལྟར་བདུད་བཞིའི་སྟོབས་དང་ངར་འཛིན་བཅོམ་ནས། ཤིན་ཏུ་རྨོངས་པ་ཆེན་པོ་ལ་སོགས་པའི་གཉེན་པོ་སྒོམ་པའི་སྟོབས་རྟོགས་པ་ལས་སྐྱེས་པ་ཕྱག་རྒྱ་ཆེན་པོའི་
༄། །འདུས་ཏེ་རེག་པའི་ཀུན་དུ་བཟང་པོ་རོ་གཅིག་པ་དང་མཐའ་གཉིས་ཀ་མ་ལུས་པའི་རྣམ་པའི་ཡེ་ཤེས་དྲི་མ་མེད་པའི་གཡོ་བ་མེད་པ། གཉིས་སུ་མེད་པའི་ཆོས་ཉིད་ཀྱི་སྙིང་པོ་ཞེས་བྱ་བའི་དོན་ཏོ། །སྟག་གི་པགས་པ་ནི་ཞི་ཁྲོ་བ་ཡིན་ཏེ། ཡུལ་དྲུག་ལ་དགོད་པ་དང༌། འདོད་པ་ལ་ཆགས་པ་དང༌། ལུས་དང་ངག་དང་སེམས་ཆེར་འཁྲུགས་པ་ལས་ཁྲོ་བ་སྐྱེ་བར་འགྱུར་རོ། །དེ་ཉིད་ནི་ཤིན་ཏུ་ཁྲོ་བ་ཉིད་ཀྱི་ཕྱིར་དང༌། སྣ་ཚོགས་པ་ལ་མངོན་པར་འདོད་པ་ཉིད་ཀྱི་ཕྱིར། སྟག་ནི་སྣ་ཚོགས་པའི་རྣམ་པ་ཡིན་ནོ། །དེ་ལས་བཤུས་ནས་མནབས་པ་ནི་ཚངས་པར་སྤྱོད་པ་ལ་རྗེས་སུ་སྤྱོད་པའི་ངང་ཚུལ་ཅན་ཉིད་ཡིན་པའི་ཕྱིར་རོ། །དབང་པོའི་མདུད་པའི་ཀུན་ནས་དྲེགས་པ་ཞི་བས་ཁྲོ་བ་མེད་པའི་སྐད་ཅིག་མའི་བདག་ཉིད་ཅན་ནོ་ཞེས་བྱ་བའི་ཐ་ཚིག་གོ །དེ་ཉིད་ནི་རྡོ་རྗེ་ལས་ཀྱི་ཕ་རོལ་ཏུ་ཕྱིན་པ་སྟེ། འདི་ལྟར་རྡོ་རྗེ་འདྲ་བར་དབྱེར་མེད་ཅིང་མི་འཁྲུགས་པ་དབང་པོའི་སྒོ་ནས་བདེ་བ་ཆེན་པོ་ཡིད་ལ་བྱེད་པའི་ལས་ལ་མཁས་པ། ལས་མ་ཡིན་པའི་གཉེན་པོ་ཡེ་ཤེས་ཀྱི་སྤྱོད་པའི་ངང་ཚུལ་ཅན་ཞེས་བྱ་བའི་དོན་ཏོ། །ཆགས་པ་ནི་མི་མགོའི་ཕྲེང་བ་ཡིན་ཏེ། འདི་ལྟར་འགྲོ་བ་ཐམས་ཅད་ལོངས་སྤྱོད་པའི་དོན་དུ་ཕུང་པོ་ལ་སོགས་པ་ལ་ཆགས་ཤིང༌། མངོན་པར་ཞེན་པར་འགྱུར་ཏེ། དེ་བཟློག་པའི་དོན་དུ་བཅོམ་ལྡན་འདས་ཀྱིས་ཕུང་པོ་དེ་ཉིད་ཀྱི་མགོ་ལ་སོགས་པའི་ཡན་ལག་སོ་སོ་ཐ་དད་པར་བཀོད་པ་ཙམ་རེ་རེ་ཞིང་ཕྱེ་ན་མི་བརྟན་པ་ཉིད་དུ་དེ་དག་ཁོང་དུ་ཆུད་པའི་ཕྱིར་མགྲིན་པ་ནས་བརྩམས་ཏེ། བུས་མོའི་བར་དུ་མེ་ཏོག་གི་ཆུན་འཕྱང་དང་འདྲ་བའི་ཐོད་པའི་ཕྲེང་བ་ཤིན་ཏུ་རློན་པ་བརྒྱུས་པ་ནི་ཕུང་པོ་ལྔ། ལྔ་ལྔའི་བདག་ཉིད་ཅན་དང༌། འབྱུང་བ་བཞི་རེ་རེ་ཞིང་ལྔ་ལྔའི་བདག་ཉིད་ཅན་དང༌། མིག་གི་རྣམ་པར་ཤེས་པ་ལ་སོགས་པ་ལྔ། བྱང་ཆུབ་སེམས་ཀྱི་རང་བཞིན་དུ་བསྟན་པའི་ཕྱིར་རོ། །དེ་ཉིད་ནི་རིན་ཆེན་པདྨའི་ཕ་རོལ་ཏུ་ཕྱིན་པ་སྟེ། རིན་པོ་ཆེ་ནི་རྡོ་རྗེ་ཡིན་ལ། པདྨ་ནི་ཆོས་འབྱུང་བ་ཡིན་ཏེ། དེ་གཉིས་རྣམ་པར་སད་པ་ལས། རིན་ཆེན་འབྱུང་ལྡན་དང༌། འོད་དཔག་མེད་པ་རོ་གཅིག་ཏུ་སྐྱེས་པའི་བདེ་བ་ཆེན་པོའི་བདག་ཉིད་ཅན་གྱི་ལུས་ཕུང་པོ་
༄། །ལྔ་ལ་སོགས་པའི་རང་བཞིན་དེའི་ཕ་རོལ་ཏེ་ངོགས། ཕྱག་རྒྱ་ཆེན་པོ་དེར་ཕྱིན་ཅིང་ཐོབ་པའི་ཕྱིར། ཕ་རོལ་ཏུ་ཕྱིན་པ་སྟེ། དེའི་རང་བཞིན་ནི་མི་མགོའི་ཕྲེང་བ་ཡིན་ནོ་ཞེས་བྱ་བའི་དོན་ཏོ། །དེ་ཁོ་ན་ཉིད་ཡོངས་སུ་རྫོགས་པའི་རྣམ་པར་དག་པ་ནི་རལ་པ། དང་ཅོད་པན་ཡིན་ཏེ། དེ་ཁོ་ན་ཉིད་མ་ལུས་པ་གཅིག་ཏུ་བྱས་པ་འཇིག་པ་མེད་པར་སྟོན་པར་བྱེད་ལ། ཟབ་པ་དང་རྒྱ་ཆེ་བའི་སྐྲ་ལན་བུ་གཉིས་གཅུས་པའི་ཉིས་སྒྲིལ་དང་སྤྱི་བོར་སྣ་ཚོགས་རྡོ་རྗེ་རིགས་ལྔ་ཅན་གྱིས་བརྒྱན་པ་དང༌། ཡེ་ཤེས་ལྔའི་བདག་ཉིད་ཐོད་པ་ལྔའི་ཚད་སོར་ལྔ་པས་སྦྲས་པ་དང༌། གཡོན་གྱི་ཆར་ཡེ་ཤེས་འོད་གསལ་བ་ཟླ་བས་མཚན་པ། ཁམས་གསུམ་པ་རོ་གཅིག་པའི་བདག་ཉིད་མི་བསྐྱོད་པའི་དབང་ཕྱུག་དང་མཚུངས་པར་ཆགས་པའི་འཁོར་ལོས་རྒྱས་བཏབ་ཅེས་བྱ་བའི་དོན་ཏོ། །སྒྲའི་ཕྱོགས་གཅིག་མི་ཤིགས་པའི་རྣམ་པར་བསྐྱོད་མི་ནུས་པ་ལ་བརྟེན་ནས། རྣམ་པར་གཡེང་བའི་ཚུལ་དུ་འབྱུང་བའི་སྒྲ་མི་སྙན་པའི་དོན་ཡིན་ན་ཡང་དེའི་བདག་ཉིད་མ་ལུས་པའི་བྱང་ཆུབ་ཀྱི་ངོ་བོ་སྐྱེ་བའི་རྒྱུའི་མཚན་ཉིད་ནི་རྣ་བའི་ཕྱག་རྒྱ་ཡིན་ནོ། །མགུལ་རྒྱན་ནི་སྐལ་བ་ངན་པའི་ངག་གི་བརྗོད་པ་ཡོངས་སུ་སྤང་བ་དང༌། ཉིན་མཚན་དུ་རྒྱུན་མི་འཆད་པར་སྔགས་ཟློ་བའི་བདག་ཉིད་དང༌། སེམས་ཅན་གདོན་པའི་རྒྱུས་གྲགས་པ་ཕུན་སུམ་ཚོགས་པའི་རིན་པོ་ཆེའི་བདུད་རྩི་མྱོང་བའི་རང་བཞིན་ཅན་ཡིན་ནོ། །གདུ་བུ་ནི་སྲོག་གཅོད་པ་ལ་སོགས་བརྗེས་སུ་སྤྱོད་པ་ལས་ལྡོག་པའི་དོན་དང༌། བསོད་ནམས་དང་ཡེ་ཤེས་ཀྱི་ཚོགས་དང་གཉིས་སུ་མེད་པའི་ཡེ་ཤེས་ཀྱི་དཔལ་ཕུན་སུམ་ཚོགས་པའི་རང་བཞིན་ཅན་རྣམ་པར་སྣང་མཛད་འོད་འཕྲོ་བའི་མཚན་ཉིད་ཅན་ཡིན་ནོ། །སྐུ་རེགས་ནི་ཕྱག་རྒྱ་ཆེན་པོ་དོན་ཡོད་པ་མོ་གཤམ་མ་ཡིན་པ། འབྲས་བུ་དང་བཅས་པའི་དངོས་གྲུབ་ཀྱི་སྣོད་ཡེ་ཤེས་ཕུན་སུམ་ཚོགས་པ་རོ་གཅིག་པ་ཅན་ཡིན་ནོ། །ཐལ་བ་ནི་ཡེ་ཤེས་ཀྱི་མེ་འབར་བས་ཕུང་པོ་དང་འབྱུང་བ་བསྲེགས་པས་སྣང་བ་མེད་པས། ཤེལ་དང་འདྲ་བར་གསལ་བ། བྱང་ཆུབ་ཀྱི་སེམས་
༄། །དཀར་པོས་ཡོངས་སུ་བྱུགས་པ་དང༌། ལྷན་ཅིག་སྐྱེས་པ་དང༌། ནམ་མཁའ་དང༌། ཡེ་ཤེས་ཀྱི་སྣལ་མས་སེ་རལ་ཁར་བྱས་པ་ཡིན་ཏེ། རབ་ཀྱི་མཐར་ཕྱིན་པ་ཐོབ་པ་དང་པོའི་རྡོ་རྗེ་འཆང་གི་རང་བཞིན་ཅན་ནི། ཐལ་བ་དང་ཚངས་པའི་སྐུད་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་སྐད་ཅིག་མ་བཅུ་དྲུག་དང༌། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང༌། པ་རོལ་ཏུ་ཕྱིན་པ་བཅུ་དང༌། ས་བཅུ་དང་དབང་ཕྱུག་ལ་སོགས་པ་དྲུག་གི་ཆོས་ཀྱི་རང་བཞིན་ཅན་བཅོམ་ལྡན་འདས་དཔལ་ཧེ་རུ་ཀ་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་བདུད་བཞི་འདུལ་བར་མཛད་པ། བདེ་བ་ཆེན་པོའི་ཡེ་ཤེས་རོ་གཅིག་པ་འགྲིབ་པ་མེད་པ་ཉམས་སུ་མྱོང་བའི་མཚན་ཉིད་ཅན་རྡོ་རྗེ་འཆང་གི་ས་སྟེ། བཅུ་གསུམ་པ་རྣམ་པར་དག་པ་ཞེས་བྱ་བའི་དོན་ཏོ། །སློབ་དཔོན་ཤྲདྡྷཱ་ཀ་ར་ཝརྨྨས་མཛད་པ། ཧེ་རུ་ཀའི་རྣམ་པར་དག་པ་རྫོགས་སོ།། །། སློབ་དཔོན་དེ་ཉིད་དང༌། ལོ་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།