དཔའ་བོ་གཅིག་པའི་སྒྲུབ་ཐབས་ཞེས་བྱ་བ།
མར་མེ་མཛད་ཡེ་ཤེས།
༄། །རྒྱ་གར་སྐད་དུ། ཨེ་ཀ་བཱི་ར་སཱ་དྷ་ནཾ་ནཱ་མ། བོད་སྐད་དུ། དཔའ་བོ་གཅིག་པའི་སྒྲུབ་ཐབས་ཞེས་བྱ་བ། དཔལ་ལྷན་ཅིག་སྐྱེས་བ་རང་གི་ལྷ་ལ་ཕྱག་འཚལ་ལོ། །དང་པོར་སྔགས་པས་ཕྱི་ནང་གི་དྲི་མ་དག་པར་བྱས་ལ་སྟན་བདེ་བ་ལ་འདུག་སྟེ། རང་སྐད་ཅིག་གིས་ཧེ་རུ་ཀར་བསྐྱད་བའི་སྙིང་གའི་ཧཱུཾ་གི་འོད་ཀྱིས་གདུག་པ་ཅན་ཐམས་ཅད་ཞི་བར་བྱས་ཏེ། འོད་ཚུར་འདུས་པ་ལས་སྲུང་བའི་འཁོར་ལོ་བསྒོམ་པར་བྱའོ། །དེ་ནས་ཚངས་པའི་གནས་བཞི་བསྒོམ་པར་བྱ་སྟེ། སེམས་ཅན་ཐམས་ཅད་བདེ་བ་དང་ལྡན་པར་བྱ་སྙམ་པའི་བྱམས་པ་དང༌། སྡུག་བསྔལ་དང་བྲལ་བར་བྱ་སྙམ་པའི་སྙིང་རྗེ་དང༌། ཧེ་རུ་ཀའི་གོ་འཕང་ལ་དགོད་པར་འདོད་པའི་དགའ་བ་དང༌། འཇིག་རྟེན་དང་འཇིག་རྟེན་ལས་འདས་པའི་དགེ་བའི་རྩ་བ་མ་ལུས་པ་ལ་དགོད་པར་འདོད་པའི་བཏང་སྙོམས་ཚད་མེད་པ་བསྒོམ་པར་བྱའོ། །དེ་ནས་དད་པ་དང་གུས་པས་མདུན་གྱི་ནམ་མཁའ་ལ་བླ་མ་བརྒྱུད་པ་དང་བཅས་པ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་བསམས་ཏེ། དེ་དག་ཐམས་ཅད་འོད་ཀྱི་གོང་བུ་ལས། དཔལ་ཧེ་རུ་ཀར་གྱུར་པ་ལ་མཆོད་པ་དང༌། བསྟོད་པ་དང༌། སྡིག་པ་བཤགས་པ་དང༌། སྡོམ་པ་གཟུང་བ་དང༌། གསོལ་བ་གདབ་པ་ལ་སོགས་པ་བྱའོ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ། ཞེས་བརྗོད་
༄། །པས་སྟོང་པ་ཉིད་དུ་བསམ་པར་བྱའོ། །འབྱུང་བ་རིམ་བརྩེགས་རི་རབ་ཀྱི་སྟེང་དུ་པདྨ་ལ་ཉི་མ་དང་ཟླ་བའི་སྟེང་དུ་ཧཱུཾ་འོད་ཟེར་ལྔ་འཕྲོ་བ་དང་འདུ་བ་རྡོ་རྗེ་སེམས་དཔའི་རང་བཞིན་ཅན། དེ་ཡོངས་སུ་གྱུར་པ་ལས་བཅོམ་ལྡན་འདས་དཔའ་བོ་གཅིག་པ་སྐུ་མདོག་མཐིང་ག་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཞབས་གཡས་བརྐྱང་བས་འཇིགས་བྱེད་མནན་པ། གཡོན་བསྐུམ་པས་དུས་མཚན་མ་མནན་པ་རལ་པ་ནག་པོ་གྱེན་དུ་གཡེངས་པའི་ཅོད་པན་ཅན། སྤྱི་གཙུག་གི་ནོར་བུ་དང༌། སྣ་ཚོགས་རྡོ་རྗེ་དང་ཟླ་བ་ཕྱེད་པའི་དབུ་རྒྱན་ཅན། མི་བསྐྱོད་པས་དབུ་བརྒྱན་པ་དར་དཔྱངས་ཀྱི་ཅོད་པན་ཅན། སྒེག་པ་ལ་སོགས་པའི་ཉམས་དང་ལྡན་ཞིང་ཤིན་ཏུ་འགྱིང་བག་དང་ལྡན་པ། སྟག་གི་པགས་པས་སྨད་དཀྲིས་ཤིང༌། མི་མགོ་ལྔ་བཅུས་དོ་ཤལ་བྱས་པ། ཕྱག་རྒྱ་དྲུག་དང་ལྡན་པར་བསྒོམ་པར་བྱའོ། །དེའི་སྤྱན་སྔར་ཡུམ་བཅོམ་ལྡན་འདས་མ་རྡོ་རྗེ་བག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་པ་ཕྱག་གཡོན་ན་ཐོད་པ་བསྣམས་ནས་ཡབ་ལ་འཁྱུད་པ། གཡས་རྡོ་རྗེ་དང་སྡིགས་མཛུབ་བྱས་ནས་གདུག་པ་ཅན་སྐྲག་པར་བྱེད་པ། སྐྲ་གྲོལ་བ་གཅེར་བུ་དུམ་བུས་སྐྱེ་རགས་ཅན། མི་མགོ་སྐམ་པོའི་ཕྲེང་བས་སེ་རལ་ཁར་འཕྱང་བ། ཞབས་གཡས་བྱིན་པ་ལ་འཁྲིལ་ཞིང་གཡོན་བརྐྱང་བ། ཕྱག་རྒྱ་ལྔ་དང་ལྡན་པ་བདེ་བ་ཆེན་པོའི་བདག་ཉིད་ཅན། ཡབ་ཡུམ་སྣང་སྟོང་ཟུང་དུ་འཇུག་པ་བསྒོམ་པར་བྱའོ། །དེ་ལས་ལུས་སྐྱོ་ཞིང་སེམས་དུབ་ན་བསྐྱེད་རིམ་གྱི་ངང་ལས་བླ་མའི་མན་ངག་གིས་བཟླས་པར་བྱའོ། །དེ་ཡང་ཧེ་རུ་ཀའི་ཐུགས་ཀ་ནས་ཡེ་ཤེས་སེམས་དཔའ་དེའི་ཐུགས་ཀ་ནས་ཏིང་ངེ་འཛིན་སེམས་དཔའི་ཡི་གེ་ཧཱུཾ་སྔོན་པོ་ལ་སྙིང་པོའི་སྔགས་ཀྱིས་བསྐོར་བ་ལ་སེམས་གཏད་དེ་བཟླས་པ་བྱའོ། །ཨོཾ་ཧྲཱིཿ་ཧ་ཧ་ཧཱུཾ་ཧཱུཾ་ཕཊ། དེ་ལས་སྐྱོ་བར་གྱུར་ན་ཁམས་གསུམ་ཐམས་ཅད་འོད་ཀྱི་རང་བཞིན་དུ་བྱས་ཏེ། འོད་ཟེར་ཡང་རིམ་གྱིས་བསྡུས་ནས། ཧེ་རུ་ཀ་ཡབ་ཡུམ་ལ། དེ་སྙིང་གའི་ཧཱུཾ་ལ། ཧཱུཾ་ཞབས་གྱུ་ནས་ནཱ་དའི་བར་དུ་བསྡུས་ལ། འོད་གསལ་བསམ་གྱིས་མི་ཁྱབ་པའི་ངང་ལ་ཇི་སྲིད་གནས་ཀྱི་བར་དུ་བསྒོམ་མོ། །དེ་ལས་ཀྱང་ལུས་སྐྱོ་སེམས་དུབ་ན། འོད་གསལ་ལས་ཟུང་
༄། །འཇུག་གི་སྐུར་ལངས་ཏེ། སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟ་བུ་ཁ་དོག་དང་བཅས་པ་འཇའ་ཚོན་ལྟ་བུ། སྒྲོ་སྐུར་དང་བྲལ་བ་ཆུ་ཟླ་ལྟ་བུར་ལངས་ཏེ་ཟུང་འཇུག་ཏུ་བསྒོམ་པར་བྱའོ། །སྤྱོད་ལམ་དང་ཐུན་མཚམས་ཀྱི་རྣལ་འབྱོར་དང་ལྡན་པས་ཐུན་བཞིར་ཉམས་སུ་བླང་ངོ༌། །དཔལ་བདེ་མཆོག་འཁོར་ལོ་དཔའ་བོ་གཅིག་པའི་སྒྲུབ་ཐབས་ཡུལ་བྷཾ་ག་ལའི་སློབ་དཔོན་བསོད་སྙོམས་པ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།བོད་ཀྱི་ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བས་བསྒྱུར་བའོ།། །།