ལྷན་ཅིག་སྐྱེས་པའི་དེ་ཁོ་ན་ཉིད་སྣང་བ།
ཀུ་ས་ལི་པ།
༄། །རྒྱ་གར་སྐད་དུ། ས་ཧ་ཛ་ཏཏྭ་ཨཱ་ལོ་ཀ །བོད་སྐད་དུ། །ལྷན་ཅིག་སྐྱེས་པའི་དེ་ཁོ་ན་ཉིད་སྣང་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཀུན་སྤྱོད་མངོན་པར་འབྱུང་བརྗོད་སོགས། །རྒྱུ་རྣམས་ཀུན་དུ་སྦས་པ་ཡི། །ཟབ་མོའི་དེ་ཉིད་གསང་ཆེས་པ། །བླ་མའི་དྲིན་གྱིས་རྟོགས་པས་བཤད། །བརྟག་དཀའ་རྟོག་གེའི་ཡུལ་མིན་ཞིང༌། །ཟབ་མོ་སྤྲོས་པ་ཉེར་ཞི་བ། །ལྐུགས་པ་ཡི་ནི་རྨི་ལམ་དང༌། །གཞོན་ནུས་མྱོང་བའི་བདེ་བ་ལྟར། །ཚིག་གིས་མཚོན་མིན་རང་རིག་པ། །སེར་སྣ་མེད་སོགས་ཚུལ་བཞི་ཡིས། །བླ་མ་ཉེ་བར་བསྟེན་པ་ཡི། །དྲིན་ཐོབ་ཤེས་རབ་ཡེ་ཤེས་ཀྱི། །སྐད་ཅིག་གསུམ་པར་གང་སྐྱེས་པ། །དོན་མཚུངས་མཚོན་པས་དཔེར་ཉིད་དེ། །ཁྱིམ་གནས་བུ་གའི་ནམ་མཁའ་དང༌། །དམུས་ལོང་གླང་ཆེན་ཡན་ལག་ལྟར། །དོན་མཐོང་མ་ཡིན་འབྲས་ཟན་གྱི། །སྤགས་པའི་བུ་རམ་རོ་བཞིན་ནོ། །ཆ་ཤས་དང་ནི་རྫོགས་པ་དང༌། །སྒྲིབ་བཅས་སྒྲིབ་པ་དང་བྲལ་བའི། །དབྱེ་བ་ལས་ནི་རྣམ་རྨོངས་པས། །ཚེས་མ་ཐག་དང་གང་
༄། །བ་ཡི། །ཟླ་བ་སྤྲིན་གྱིས་བསྒྲིབས་པ་དང༌། །གསལ་བའི་བྱེ་བྲག་མ་ཤེས་སོ། །དེ་ལྟ་ན་ཡང་དེར་མྱོང་བ། །བླ་མའི་གསུང་གིས་ལེགས་མཚོན་ཏེ། །རྒྱུད་དུ་ཡང་དག་གོམས་པ་ལས། །དང་བའི་ཆུ་ལ་ཟླ་བ་དང༌། །མིག་དག་པ་ལ་གཟུགས་བཞིན་དུ། །གསལ་བར་འགྱུར་གྱི་ཡིད་ཆེས་གྱིས། །དངོས་པོ་སྣ་ཚོགས་སྣང་འདི་རྣམས། །སེམས་ལས་ཕྱི་རོལ་འགྱུར་མེད་ཀྱང༌། །རང་རིག་བག་ཆགས་དབང་བྱས་ནས། །ཡུལ་དང་དབང་པོར་སྣང་བའི་སེམས། །དབང་པོའི་ལམ་ན་རྗེས་འགྲོ་བས། །ཡུལ་རྣམས་ལ་ནི་མངོན་ཞུགས་ཏེ། །ཆགས་སོགས་ཉོན་མོངས་རྒྱུར་གྱུར་པ། །ལས་ཀྱི་ཤིང་རྟའི་འཁོར་ལོ་ལྟར། །ཡུན་རིང་སྲིད་པར་ཡང་དང་ཡང༌། །སྡུག་བསྔལ་དང་བཅས་རྣམ་པར་འཁོར། །ནང་དུ་ཡང་དག་འཇོག་པ་ཡི། །ཐབས་ཀྱིས་དེ་ལས་རྣམ་བཟློག་ནས། །རླུང་བྲལ་མར་མེ་ལྟ་བུ་ཡི། །རྣལ་འབྱོར་རྒྱུན་དུ་གོམས་བྱས་ནས། །མ་རྙོག་ལྟེང་ཀའི་ཆུ་བཞིན་དུ། །རང་གི་དེ་ཉིད་གསལ་མཐོང་འགྱུར། །ཤིན་ཏུ་བཞིན་བཟངས་མིག་ཡངས་མ། །གཟུགས་བཟང་ལང་ཚོ་ཕུན་ཚོགས་པ། །ཁྲོ་མེད་རྗེས་སུ་བརྩེ་བ་དང༌། །དད་དང་ཐོས་སོགས་ཡོན་ཏན་ཅན། །སྒྲུབ་ལས་གཞན་དུ་མི་བལྟ་ཞིང༌། །སྐལ་བཟང་བྱེད་པ་འཆིང་བ་ཡི། །སྦྱོར་བ་ལ་ནི་རབ་གོམས་པ། །མི་མོ་དངོས་གྲུབ་ས་གཞི་ཡིན། །དེ་དང་ལྷན་ཅིག་དབེན་པར་གནས། །སྟོབས་བཟང་མྱོས་བྱེད་བཅས་བཟའ་ཞིང༌། །བལྟ་བ་དང་ནི་རིག་པ་དང༌། །འཁྱུད་དང་མ་མཆུའི་རོ་མྱངས་པས། །རྗེས་སུ་ཆགས་པར་འགྱུར་བ་ནི། །མཚན་མའི་དབྱེ་བས་གསལ་རྟོགས་བྱ། །ཆགས་པ་ཆེན་པོས་རབ་རྒྱས་རྩ། །འཚིར་དང་ཟློས་པའི་སྦྱོར་བ་ཡིས། །མངོན་སུམ་ལྕེ་ཡི་ཐུར་མས་དྲངས། །ནོར་བུའི་ནང་དུ་ལེགས་ཆུད་པས། །མུན་པ་ལ་ནི་མར་མེ་ལྟར། །གསལ་བར་ངེས་ཀྱིས་གཞན་དུ་མིན། །དེ་ཉིད་དུ་ནི་ཡེ་ཤེས་མཆོག །སྡོམ་བྱ་ཐུན་ནམ་ཉིན་གཅིག་གམ། །ཟླ་ཕྱེད་ཟླ་གཅིག་ཁྱུད་ཀོར་དང། །བསྐལ་པ་བསྐལ་པ་སྟོང་དག་ཏུ། །དེ་གོམས་པ་ལས་མི་འགྱུར་བའི། །ཡེ་ཤེས་དམ་པ་འཐོབ་པར་འགྱུར། །དེར་ནི་ལེགས་འདུའི་དམ་ཚིག་རྫས། །རླུང་གི་སྟོབས་ཀྱིས་ཐོབ་པའམ། །དམན་པའི་སེམས་ཀྱིས་དོར་མིན་པས། །ཕྱི་རོལ་ནས་ནི་ལྕེས་བླང་བྱ། །བླ་མའི་དྲིན་ཐོབ་
༄། །དགའ་བ་ཡིས། །སེམས་ཀྱི་ཟབ་མོའི་དེ་ཁོ་ན། །ལེགས་བཀོད་གང་འདིས་འགྲོ་བ་རྣམས། །གཉུག་མའི་ལམ་གྱི་བགྲོད་གྲུབ་ཤོག །དཔལ་འཁོར་ལོ་སྡོམ་པའི་ལྷན་ཅིག་སྐྱེས་པའི་དེ་ཁོ་ན་ཉིད་སྣང་བ་སློབ་དཔོན་ཀུ་ས་ལི་པས་མཛད་པ་རྫོགས་སོ།། །།