དཔལ་འཁོར་ལོ་བདེ་མཆོག་འབྱུང་བ་ཞེས་བྱ་བའི་དཀྱིལ་འཁོར་གྱི་ཆོ་ག།
དབུ་བ་བློ་ལྡན།
༄། །རྒྱ་གར་སྐད་དུ། ཤྲཱི་ཙ་ཀྲ་སམྦ་རོ་ད་ཡ་ནཱ་མ་མཎྜལ་ནོ་པི་ཀཱ། བོད་སྐད་དུ། དཔལ་འཁོར་ལོ་བདེ་མཆོག་འབྱུང་བ་ཞེས་བྱ་བའི་དཀྱིལ་འཁོར་གྱི་ཆོ་ག །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣལ་འབྱོར་བདུད་རྩི་རོ་གཅིག་གསོལ་བས་རྣམ་པར་དག་པའི་ཐུགས། །གནས་ལ་སོགས་པ་ཡུལ་དུ་བགྲོད་པས་རྣམ་པར་དག་པའི་སྐུ། །དཔལ་ལྡན་གནས་ཀྱི་དབུས་ན་དཀྱིལ་འཁོར་འཁོར་ལོའི་མཆོག །བླ་མ་མཆོག་ལ་རྟག་ཏུ་སྤྱི་བོས་བཏུད་དེ་ཕྱག་འཚལ་ལོ། །གང་གི་རྒྱུད་ནི་དེ་ནས་ཤེས། །ཞེས་སོགས་རྫོགས་པ་གསུང་ཆེ་བ། །འཁོར་ལོ་སྡོམ་པ་འདྲེན་པ་མོ། །རྡོ་རྗེ་ཕག་མོ་དེ་ཕྱག་འཚལ། །ལྷ་མོའི་ཕྲེང་བས་བརྒྱན་ཅིང་རིན་ཆེན་སྐུ། །ལུས་ཀུན་ལ་ནི་རྟག་ཏུ་ས་བོན་གྱིས་མཛེས་པ། །འཁོར་ལོ་ལ་གནས་རང་བཞིན་དྲི་མ་མེད། །རྟག་ཏུ་སྡོམ་པར་སྦྱོར་བའི་སྙིང་པོ་ལ་ཕྱག་འཚལ། །པདྨ་མཆོག་གི་ནང་ན་སྙིང་པོ་ཡི་གེ་ཨེ་འདྲའི་གཞི། །དེ་ཡི་དབུས་ན་དང་བ་མཆོག་དང་ཀུནད་དཀར་པོ་ལྟར་སྐྱེས་ཐམས་ཅད་བདག །ཐམས་ཅད་མཁྱེན་ཅིང་ལེགས་པ་རྣམ་དག་སངས་རྒྱས་གཞི་དང་ལྷ་མོའི་གཞིར་གྱུར་མཛེས། །ལྷན་ཅིག་སྐྱེས་པ་དྲི་མེད་མཆོག་ཏུ་དགའ་བ་འདྲེན་པ་བདེ་མཆོག་དཔལ་ལ་བདག་ཕྱག་འཚལ། །དཔལ་ལྡན་རིན་ཆེན་མངོན་བརྗོད་རི་ནི་རྡོ་རྗེ་ཐུགས་ཀྱི་རང་བཞིན་མཆོག་གི་གཞི། །གཅིག་ཏུ་དཔའ་བོ་བཞུགས་ཤིང་སྣ་ཚོགས་མང་པོར་སྤྲོ་བ་འབྱུང་གནས་སྒྲ་ཡི་ཚུལ། །རྣལ་འབྱོར་ཆེན་པོ་མཆོག་གི་འཁོར་ལོ་བཟང་པོ་མང་པོའི་དབུས་སུ་ངེས་པར་ངོ་མཚར་ཡང༌། །དེ་རུ་གནས་ནས་བདག་གཞན་སྐྱེ་བོ་ལ་ཕན་སྒྲུབ་པའི་ཐབས་བཤད་བྱ། །གཅིག་ཏུ་ཐུགས་ནི་སྙིང་པོ་ལྷན་ཅིག་སྐྱེས་
༄། །པ་དཔེ་མེད་རྡོ་རྗེ་སྤྱོད་པའི་བདག །རྡོ་རྗེ་ལྷ་མོ་ཕག་མོ་དང་ནི་བླ་མ་མཆོག་གི་ཞབས་ལ་ལུས་ཀུན་ཕུལ་ནས་ཕྱག་བྱས་ཏེ། །དག་དང་མ་དག་བདག་གིས་མི་ཤེས་རྟག་ཏུ་རང་ཡིད་བདེ་བ་སྐྱེད་པའི་ཕྱིར། །གང་ཞིག་བདག་གིས་ཅུང་ཟད་ཐོབ་པའི་དཀྱིལ་འཁོར་བྲི་བའི་ཆོག་བདག་གིས་བཤད། །ཇི་ལྟར་བ་ལང་ཤི་བའི་བློ་ལས་དཱུར་བའི་མྱུ་གྱུར་སྐྱེ་བ་དང༌། །ཡུང་བ་དང་ནི་ཕྱེ་མར་གྱུར་པར་རྫས་རྣམས་དམར་པོར་འགྱུར་བ་དང༌། །འཁོར་བའི་རྡོ་རྙེད་པས་ནི་མྱུར་དུ་ལྕགས་འཁོར་འགྱུར་བ་བཞིན། །སེམས་ལ་རོལ་བས་རྣལ་འབྱོར་པ་ནི་རྣལ་འབྱོར་རིན་ཆེན་དེ་བཞིན་ནོ། །འདིར་ནི་གང་གིས་གཞུང་མང་བའམ། །ཉུང་བ་མཐོང་བར་འགྱུར་བ་དེ། །བླ་མའི་སྐྱོན་མིན་བདག་བློའི་ཉེས་པ་ཡིན། །གང་ཡང་དཀྲུགས་དང་མ་དཀྲུགས་ལུགས་འབྱུང་ལུགས་བཟློག་ཟ་བ་པ་ཡིན། །རྒྱུད་འདི་བླ་མའི་མན་ངག་ལས་ཤེས་རང་ཉིད་དྲན་ཕྱིར་འདི་བྲི་བྱ། །གཞན་ཕན་ལ་བརྩོན་རྣལ་འབྱོར་པ། །བསམ་དང་བསམ་མེད་ཏིང་འཛིན་ལྡན། །རྣམ་པར་མཁས་ཤིང་རྣམ་པར་རྒྱས་པའི་ཞལ། །རྟག་ཏུ་སྲིད་པ་ཞི་བར་མཛད་པའི་རང་བཞིན་ཅན། །ཐོག་མར་ཆུ་དང་ཐོད་ལ་གཙུག་ཏོར་རྡོ་རྗེ་དང༌། བདག་པོ་བསྙེམས་པར་བྱས་དང་མིང་དང་རིག་པའི་དབང༌། །མཆོག་ཏུ་དགའ་བར་བྱས་པ་གསང་བ་རྣལ་འབྱོར་མ་ནི་ཡེ་ཤེས་དབང༌། །མིང་བཏགས་གྱུར་ནས་ལུང་བསྟན་དབུགས་དབྱུང་མཐའ། །དངོས་གྲུབ་བསྒྲུབ་པའི་དོན་དུ་ངེས་པར་སྡོམ་ཞེས་བྱ་བའི་འཁོར་ལོས་སྒྱུར། །མར་ངོའི་ཚེས་བརྒྱད་དང་ནི་གང་ཞིག་མར་ངོའི་བཅུ་བཞིར་གྱུར་དང་ཟླ་བ་ཡི། །མཚན་མོ་མཆོད་བྱས་བླ་མའི་ཞབས་དང་དཔའ་བོ་ལ་བཏུད་ནས། །དག་ཅིང་གཅིག་ཏུ་དཔའ་བོས་སྐྱེ་བོ་ཀུན་ལ་ཕན་པའི་དོན་དུ་དེར་ནི་བརྩམ་པར་བྱ། །དེ་བཞིན་དུ་ཡང་གསུངས་པ་ལ། །དཀྱིལ་འཁོར་ཇི་བཞིན་དེ་བཞིན་དུ། །གང་གིས་ནུས་པར་རབ་ཏུ་བརྟག། གང་གི་ལྷག་པའི་ལྷར་སྦྱོར་བས། །སྒྲུབ་པའི་དཀྱིལ་འཁོར་བརྟག་པར་བྱ། །བསོད་ནམས་དོན་དང་སློབ་མས་བསྐུལ། །སྔགས་པས་སྒྲུབ་པའི་དོན་དུ་བྲི། །གཞན་དུ་རྫས་ཀྱི་དོན་དུ་ནི། །སྐྱེ་བ་བྱེ་བར་དངོས་གྲུབ་མེད། །ལྷན་ཅིག་སྐྱེས་དོན་བསྟན་པ་ཡི། །དཀྱིལ་འཁོར་བསྒྲུབ་པ་ལ།
༄། །སོགས་པ། །འཁོར་ལོ་སྡོམ་པའི་རྒྱུད་ཀྱི་ནི། །དཀྱིལ་འཁོར་བྲི་བར་མི་བྱ་སྟེ། །དངོས་གྲུབ་དོན་དུ་དམ་བཅས་ནས། །བདེ་མཆོག་གི་ནི་དཀྱིལ་འཁོར་བྲི། །གང་དུའང་མཆོག་ཏུ་མ་ཡིན་ཞེས། །ངེས་མེད་དོན་དུ་བདག་གིས་བསྟན། །ལྷན་ཅིག་སྐྱེས་བྱས་རྣལ་འབྱོར་མ་ལ་མྱུར་དུ་གུས། །རྨོངས་པ་ཀུན་སྤངས་སྡིག་པ་ཀུན་ལས་གྲོལ། །རྣལ་འབྱོར་སྙིང་ལ་སྤས་ཤིང་བརྡ་ཡི་དངོས་པོ་གོམས། །བདེ་བར་འདྲི་ཞིང་དག་པའི་སེམས་ལྡན་རྣལ་འབྱོར་པ། །གང་ལ་ཡོད་པའི་རྣམ་རྟོག་ཚེས་གྲངས་དང་ནི་སྨྱུང་བ་ལ་སོགས་མེད། །དེ་ནི་བདེ་མཆོག་བྱང་ཆུབ་མཆོག་འདི་ངེས་པར་རྙེད། །རང་ཡིད་ངེས་བྱས་རྒྱུད་ཀྱི་དཀྱིལ་འཁོར་བྲི་བར་ལྡན། །གཅིག་ཏུ་རྣལ་འབྱོར་ཀུན་དང་གསང་བ་ཀུན་རིག་པ། །དེ་ནས་ཆོ་གར་ལྡན་པར་གཅིག་ཏུ་གསང་སྔགས་འབུམ་དུ་བཟླས། །ཡི་གེ་བདུན་དང་སྙིང་པོ་ཡང་ནི་དེ་བཞིན་གསུང༌། །སྙིང་རྗེར་བཅས་པའི་འོད་ཀྱི་ཚོགས་ཀྱིས་བདུད་ཀྱི་ལས་འཇིག་པ། །དཔའ་བོ་དཔའ་མོའི་དབང་ཕྱུག་མ་ཡི་ངེས་པར་ཁྲི་ཕྲག་གཅིག་ཏུ་བཟླས། །རང་ཡིད་ཡོངས་སུ་དགའ་ཞིང་ཧེ་རུ་ཀ་ཡི་བཀའ་ཐོབ་དང༌། །རང་བཞིན་ལས་སྐྱེས་འཁོར་ལོའི་ལྷ་དང་ལྷ་མོའི་ལུང་ཐོབ་དང༌། །རྣལ་འབྱོར་པ་དེ་བརྟན་པར་གྱུར་ཅིང་དཀྱིལ་འཁོར་འདྲི་ལ་བརྩོན། །འདིར་ནི་ང་རྒྱལ་ཅན་དང་བརྐམ་ཆགས་སེམས་མ་ཡིན། །དཔལ་ལྡན་ཨོ་ཌྱ་ན་གནས་ནས་བླ་མའི་གསུང་གི་རིམ་པ་ལས་མངོན་དུ། །བདག་ཉིད་དགའ་བའི་དོན་དུ་ཐམས་ཅད་བདག་གིས་སྨྲ། །ཇི་ལྟར་བུ་རམ་མངར་བ་དང༌། །མེ་ནི་ཙ་བ་ཇི་བཞིན་དུ། །དེ་བཞིན་ལྷ་མོ་དཔལ་ཆེན་པོའི། །དགའ་བའི་ཡེ་ཤེས་རྣམ་པར་གནས། །དེ་ལ་རོལ་བ་ལྟ་བུ་ཡི། །དཀྱིལ་འཁོར་ལྟར་གྱུར་ལེགས་པར་གནས། །ལུས་ཀྱི་དཀྱིལ་འཁོར་ཞེས་བསྟན་དང༌། །རྡུལ་ཚོན་དཀྱིལ་འཁོར་དེ་བཞིན་ཉིད། །ཇི་སྲིད་ནད་མེད་ལུས་དང་ནི། །རྣམ་པར་མཁས་པས་བརྩམ་པར་བྱ། །དཀྱིལ་འཁོར་གཉིས་པོ་བསྒྲུབ་དོན་དུ། །དེ་སྲིད་ཧེ་རུ་ཀ་ལ་བརྗོད། །གཡུལ་ཆེན་མི་སྡུག་ཤིན་ཏུ་འཇིགས། །ཡི་དགས་མོ་ཚོགས་འཇིགས་པའི་སྒྲ། །འབྱུང་པོ་ཤ་ཟ་མོ་དང་ཅེ་སྤྱང་མོ་ལ་སོགས། །དུར་ཁྲོད་དུ་ནི་ངེས་པར་སྔོན་དུ་བསྙེན་པ་བྱ། །ཤིན་ཏུ་ཤེས་རབ་ལ་ཆགས་སྙིང་
༄། །རྗེས་བརླན་པའི་སེམས། །རྣལ་འབྱོར་བདུད་རྩི་མྱང་བའི་ཆོགས་མི་ངོམས་ཤིང༌། །བྱམས་པའི་ལེགས་པར་སྤྱད་པས་སྲིད་གསུམ་དབང་དུ་གྱུར། །དཀྱིལ་འཁོར་སྒྲུབ་པའི་ཐབས་དོན་རབ་ཏུ་བརྩམ། །གང་ཞིག་བསྟན་དང་མ་བསྟན་པ། །དེ་ཀུན་ཧེ་རུ་ཀ་ལ་གནས། །འདི་དོན་ལེགས་པར་ཤེས་བྱས་ན། །འདུས་པ་ལ་སོགས་ལེགས་པར་གནས། །བླ་མའི་ལེགས་པའི་ཞབས་གཉིས་ནི། སྤྱི་བོའི་གནས་སུ་རྣམ་པར་བསམ། །གནས་སོགས་སྦྱོར་བས་བཀོད་ནས་ནི། །ལེགས་པར་མཆོད་ནས་བསམ་གཏན་བརྩམ། །གཡོན་པས་བརླ་མནན་ལེགས་པར་བརྟན། །རྐང་པས་རྡོ་རྗེ་སྐྱིལ་ཀྲུང་གནས། །ཕུར་བུ་རི་བ་སྔོན་རིག་པས། །ཕྱོགས་བཅུར་དྲ་བ་ཁྲོ་གཟུགས་ཀྱིས། །ལག་ན་ཌ་མ་རུ་འཛིན་ཅིང༌། །རྡོ་རྗེ་ཁ་ཊྭཱཾ་ཕྱག་བསྣམས་པའི། །ཧེ་རུ་ཀ་དཔལ་ཞེས་བྱ་བསམ། །བྱང་ཆུབ་ཡན་ལག་སོགས་ཀུན་གྱིས། །ལེགས་མཛེས་དེ་ཉིད་རིན་ཆེན་བསྒོམ། །ཨོཾ་སུམྦྷ་ནི་སུམྦྷ་ཧཱུཾ་ཕཊ། །ཨོཾ་གྲྀ་ཧྞ་གྲྀཧྞ་ཧཱུཾ་ཕཊ། །ཨོཾ་གྲྀཧྞ་པ་ཡ་གྲྀཧྞཱ་པ་ཡ་ཧཱུཾ་ཕཊ། །ཨོཾ་ཨཱ་ན་ཡ་ཧོ་བྷ་ག་པཱ་ན་བཛྲ་རཱ་ཛ་ཧཱུཾ་ཕཊ། །གཟུགས་ནི་རྣམ་པར་སྣང་མཛད་ཅེས་བྱ་བར་རྟག་ཏུ་འགྱུར། ཚོར་བ་རྡོ་རྗེ་ཉི་མར་རབ་ཏུ་འགྱུར། །འདུ་ཤེས་དཔལ་ལྡན་རྡོ་རྗེ་གར་ཏེ་འདུ་བྱེད་ནི། །རྡོ་རྗེ་རྒྱལ་པོ་ཡོན་ཏན་སྣ་ཚོགས་གཞི། །རྣམ་པར་ཤེས་པ་རྡོ་རྗེ་སེམས་ཏེ་མ་ལུས་རྒྱལ། །རང་བཞིན་ཚོགས་ཀྱི་སྙིང་པོ་སྟེ། །ངེས་པར་ཧེ་དང་རྡོ་རྗེ་འདི་ནི་ལེགས་པར་ང་རྒྱལ་ཐོབ་པར་བསམ། །མིག་ནི་དཔལ་ལྡན་གཏི་མུག་རྡོ་རྗེ་ལྷན་ཅིག་སྐྱེས་པ་ཡི། །བདེ་བ་ཡིད་དེ་རྣ་བ་ཞེ་སྡང་རྡོ་རྗེའོ། །སྣ་ནི་སེར་སྣ་རྡོ་རྗེ་ཞེས་གྲགས་ཁ་ལ་ནི། །མཆོག་ཏུ་དགའ་བ་ལས་བྱུང་འདོད་ཆགས་རྡོ་རྗེའོ། །རེག་ལ་སེར་སྣ་རྡོ་རྗེ་ཡུལ་དང་ཡང་དག་ལྡན་གྱུར་ཁམས་ཀྱི་དག་པ་དེ་བཞིན་ཉིད། །རྣམ་པ་ཀུན་གྱིས་ལེགས་གནས་མཆོག་ཏུ་བདེ་བའི་རྣམ་པར་རྣལ་འབྱོར་མ་ཆོགས་རོལ། །ས་ནི་དཔལ་ལྡན་སྤྱན་ཞེས་གྲགས་པ་བྱམས་པ་ལྟུང་བར་བྱེད་མ་ཞེས་བྱའི་ལྷ་མོར་རབ་ཏུ་བསྟན། །ཆུ་ཡི་ཁམས་ལ་གསོད་བྱེད་མ་གང་རྡོ་རྗེ་རིགས་ཀྱི་དངོས་པོ་སྙིང་རྗེའི་སེམས་ཀྱིས་བརྒྱན། །མེ་ལ་རྣོ་བའི་འགུགས་བྱེད་མ་གནས་རླུང་ལ་གར་དབང་ཕྱུག །ནམ་མཁའ་ལ་
༄། །ནི་པདྨའི་འོད་ཟེར་བདེ་བ་ཀུན་མཛད་ཆོས་དབྱིངས་རང་བཞིན་ནོ། །ལུས་རྗེས་དྲན་པས་དག་པའི་ཆུ་ཡི་གཟུགས་ནི་མཁའ་འགྲོ་མ་ཡིས་རྟག་ཏུ་མཚན་པའོ། །ཚོར་བའི་མིང་ཡང་ལཱ་མ་སྒྲོལ་མ་རླུང་གི་རང་བཞིན་ནོ། །ཆོས་རྗེས་དྲན་བྱེད་སྐྱེ་བ་རུ་སྐྱེས་དུ་མ་སྐྱེས་མ་ཞེས་བྱ། །སེམས་རྗེས་དྲན་པའི་རང་བཞིན་གཟུགས་ཅན་མ་དེ་སྤྱན་ཞེས་གྲགས། །འདུན་པ་རབ་གཏུམ་གཏུམ་མིག་མ་ནི་བརྩོན་འགྲུས་རྫུ་འཕྲུལ་རྣམ་པར་འཕྲུལ། །འོད་ལྡན་མ་ནི་དཔྱོད་པ་སྣ་ཆེན་མ་ནི་སེམས་སུ་གྱུར། །དཔའ་བོའི་བློ་མ་དད་དབང་གསུངས། །བརྩོན་འགྲུས་དབང་པོ་མི་ཐུང་མ། །ལང་ཀ་ཞེས་གྲགས་དྲན་མའི་མིང༌། །ཏིང་འཛིན་མིང་ནི་ལྗོན་གྲིབ་མ། །ལྷ་མོ་ཆེན་མོ་ས་སྲུང་མ། །ཤེས་རབ་དབང་པོར་ཡང་དག་བྱུང༌། །དབང་པོ་ལྔར་གྲགས་འདི་རྣམས་ནི། །ལྷ་མོ་དེ་ཡི་བདག་ཉིད་ཅན། །དད་སྟོབས་ཤིན་ཏུ་དཔའ་མོ་སྟེ། །རླུང་གི་ཤུགས་མ་བརྩོན་འགྲུས་སོ། །ཆང་འཐུང་མ་ནི་དྲན་པ་ཉིད། །སྔོ་བསངས་ལྷ་མོ་ཏིང་འཛིན་སྐྱེས། །ཤིན་ཏུ་བཟང་མོ་ཤེས་རབ་སྟོབས། །ཕྱག་རྒྱ་ལྔ་སྟོབས་དག་པར་གསུངས། །རྟ་རྣ་ཏིང་འཛིན་ཡན་ལག་གྱུར། །བརྩོན་འགྲུས་ཡན་ལག་བྱ་གདོང་མ། །འཁོར་ལོའི་ཤུགས་མ་རྟག་ཏུ་དགའ། །ཤིན་ཏུ་དབྱངས་མ་དུམ་སྐྱེས་མ། །ཆོས་ཡན་ལག་ནི་ཤཽཎྜི་ཉིད། །འཁོར་ལོའི་གོ་ཆ་དྲན་ཡན་ལག །བཏང་སྙོམས་ཡན་ལག་རབ་དཔའ་མོ། །བྱང་ཆུབ་ཡན་ལག་བདུན་གྲགས་པ། །ཡན་ལག་འདིས་ནི་རྟག་ཏུ་མཚན། །རྣལ་འབྱོར་ས་ཡི་སྟེང་ན་རོལ། །ཡང་དག་ལྟ་བ་སྟོབས་པོ་ཆེ་སྟེ་ཡང་དག་དག་ནི་ཀུན་རྟོག་ལེགས་པར་ཟ། །ཡང་དག་རྟོག་པ་ལེགས་པའི་འཁོར་ལོ་མ་སྟེ་རྟག་ཏུ་སེམས་ཅན་མཆོག་ཕན་བརྩོན། །ཡང་དག་རྟག་ཏུ་སྣ་ཚོགས་མཛེས་པས་བརྒྱན་པའི་བརྩོན་འགྲུས་ཆེན་མོ་ཡི། །ཡང་དག་ལས་ནི་ཕ་རོལ་གནོན་ལ་མཁས་པ་དེ་མིང་ཁྭ་ཡི་གདོང་ཅན་མ། །ཡང་དག་འཚོ་བ་ཉིན་རེ་བཞིན་དུ་མཆོག་ཏུ་ལེགས་པར་སྲུང་བ་འུག་གདོང་མངོན་བརྗོད་མཆོག །ཡང་དག་རྩོལ་བ་རྟག་ཏུ་མཛེས་པས་ཡང་དག་བརྒྱན་པ་ལྷ་མོ་ཁྱི་གདོང་མ། །ཡང་དག་དྲན་པ་ཉེ་བར་སྤྱོད་པས་མཛེས་པ་ཕག་གདོང་ཞེས་བྱ་ཉིད། །ལྷ་མོ་འདི་དག་ཐམས་ཅད་རྣམ་པ་ཀུན་གྱི་
༄། །མཆོག་ལྡན་རང་གི་ལས་ལ་མཁས་པའོ། །བསོད་ནམས་མ་སྐྱེས་བསྐྱེད་པ་གཤིན་རྗེ་བརྟན་མར་གྱུར་པ་ཉིད། །དཔག་ཏུ་མེད་པར་རྟག་ཏུ་བསོད་ནམས་བསྐྱེད་པ་སྲུང་བ་གཤིན་རྗེ་ཕོ་ཉ་མོའོ། །མ་སྐྱེས་པ་ཡི་སྡིག་པ་སྤང་བ་གཤིན་རྗེ་མི་ཆེ་བར་རབ་ཏུ་གྲགས། །སྐྱེས་པའི་སྡིག་པ་སྤོང་བ་གཤིན་རྗེ་འཇོམས་མར་གསུངས། །བདུན་པ་བཞིའོ། །ཏིང་འཛིན་ཡང་དག་རང་བཞིན་དཔལ་ལྡན་ཕག་མོར་ཤིན་ཏུ་ལེགས་པར་གནས། །སུམ་ཅུ་དྲུག་ཏུ་འབྱུང་བ་ཡི། །བྱང་ཆུབ་ཡན་ལག་དེ་ཡིས་རྫོགས། །སོ་དང་སེན་མོའི་ཕྱོགས་སུ་མགོན་པོ་ཐོད་པའི་དུམ་བུ་སྟེ། །ཐོག་མར་ཆེན་པོ་ཀེང་རུས་མཐའ་ནི་སྐྲ་དང་སྤུ་རུ་བྱུང༌། །གྲུབ་པའི་དཔའ་བོ་རྐང་རུས་པགས་པ་དྲི་མ་རྣམ་དག་ཤ་ལ་འཇིགས་པའི་མཆེ་བར་གྱུར། །དཔེ་མེད་རོ་ཡི་རང་བཞིན་ཆད་དགྲ་དཔག་མེད་ཡོན་ཏན་རྣམ་འགྱུར་དཔག་མེད་འོད་ནི་རུས་པར་བྱུང༌། །ཡིད་ལ་བྱས་པའི་སྙིང་ནི་རྡོ་རྗེ་འོད་ཀྱི་རང་བཞིན་དྲི་མེད་སྙིང་གི་ཕྱོགས་སུ་རྡོ་རྗེ་ལུས་སུ་གྱུར། །མིག་ལ་མྱུ་གུ་ཅན་དགོད་མཁྲིས་པ་ལ་ནི་རལ་ཅན་གནས། །གློ་བ་ལ་ནི་དཔའ་བོ་ཆེན་པོ་རྒྱུ་མར་ཧཱུཾ་མཛད་མཛེས། །གཉེ་མར་ཤིན་ཏུ་རབ་ཏུ་བཟང་པོ་གྲོད་པར་རྡོ་རྗེ་བཟང༌། །འཇིགས་བྱེད་བཤད་པའི་ལམ་སྟེ་མིག་མི་བཟང་ནི་མདོམས་པར་མཛེས། །བད་ཀན་སྟོབས་པོ་ཆེ་སྟེ་རིན་ཆེན་རྡོ་རྗེ་རྣག་ལ་བསམ། །ཁྲག་ལ་རྟ་མགྲིན་ནམ་མཁའི་སྙིང་པོ་རྡུལ་དུ་གྱུར། །ཚིལ་ལ་ཧེ་རུ་ཀ་དཔལ་མཆི་མར་པདྨ་གར། །མཆིལ་མར་མགོན་པོ་རྣམ་སྣང་མཛད་དེ་སྣབས་ལ་དང་པོའི་སངས་རྒྱས་གྱུར། །བརྟན་པ་དཔའ་བོར་ཡང་དག་གསུངས། །རྣལ་འབྱོར་མ་ནི་གཡོ་བར་གནས། །གཉིས་པོ་སྡུད་པར་གྱུར་པ་ནི། །ཧེ་རུ་ཀ་ཡི་ཡན་ལག་གསུངས། སྙིང་གའི་དབུས་དེར་རྡོ་རྗེ་མགོན་པོ་ཧཱུཾ་ཡིག་འོད་དང་ལྡན། །སྤྲོས་པའི་འོད་ཀྱིས་གསལ་བར་བསམས་ནས་ཆོ་ག་བཞིན་དུ་དང་པོར་རྡོ་རྗེ་ལྡན་པའི་ཕུར་བུ་སོགས་དབུས་སུ། །སྙིང་ག་མགོ་བོ་སྤྱི་གཙུག་ཕྲག་པ་མིག་དང་ཡན་ལག་ཀུན་ཏེ་ཡན་ལག་དྲུག །དགོད་བྱས་དཔེ་མེད་བདེ་མཆོག་ཅེས་བྱའི་གཟི་རབ་འབར་བ་གསུངས། །དང་པོ་དང་ནི་སྣང་མཛད་ཉིད་དང་པདྨ་གར་དབང་ཆེ། །ཧེ་རུ་ཀ་དང་རྡོ་རྗེ་ཉི་མ་ཡན་ལག་དྲུག་ལ་
༄། །རྟ་དང་ཡང་དག་ལྡན། །ཨོཾ་ཧ་ན་མ་ཧི་སྭཱ་ཧཱ་ཧུ་བོ་ཥཊ་ཧེ་ཧཱུཾ་ཧཱུཾ་ཧོ་ཕཊ་ཧཾ། །ལྟེ་བར་ཕག་མོ་གཤིན་རྗེ་མ་ནི་འབར་བའི་ཕྲེང་བ་ཅན་ཏེ་སྙིང་གར་རྣམ་པར་གནས། །ཁ་ལ་གཏི་མུག་པ་སྟེ་མགོ་བོར་ཤིན་ཏུ་མཛེས་པའི་སྐྱོད་བྱེད་མའོ། །སྤྱི་གཙུག་དབུས་སུ་སྐྲག་བྱེད་མ་ནི་འཇིགས་པའི་གཟུགས་ཅན་འབར་བའི་མེ་དང་འདྲ། །ཡན་ལག་ཀུན་གྱི་ཕྱོགས་སུ་གཏུམ་མོ་ལུས་ལ་མཆོག་ཏུ་བརྒྱན་པའི་སྔགས་ནི་ལུས་ཀྱི་གོ་ཆའོ། །ཨོཾ་བཾ་ཧཾ་ཡོཾ་ཧྲིཾ་མོཾ་ཧྲེཾ་ཧྲིཾ་ཧཱུཾ་ཧཱུཾ་ཕཊ་ཕཊ། །སྙིང་པོའི་གསང་སྔགས་བཞི་ནི་ལྷན་ཅིག་སྐྱེས་གྱུར་རྟག་ཏུ་དགའ་བའི་རང་བཞིན་སེམས། །རྣམ་ཀུན་གཅིག་ཏུ་སྙིང་པོ་འཕྲོ་བའི་སྤྲིན་མཁའ་འགྲོ་ཡི་དྲ་བར་རོལ། །རྟོག་དང་རྟོག་མེད་ལས་གྲོལ་ཐུབ་པའི་ཡོན་ཏན་སྐྱེས་ཤིང་བདེ་མཆོག་ཅེས་བྱ་ཤིན་ཏུ་ལེགས་པར་གནས། །བློ་བཟང་པོས་ནི་རྡོ་རྗེ་མཆོག་གི་ཁ་དང་ལྟེ་བ་སྙིང་ག་ཀླད་པར་བསམ་པར་བྱ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བྲྞ་ནཱི་ཡེ་ཧཱུཾ་ཕཊ་སྭཱ་ཧཱ། ཨོཾ་བཛྲ་བཻ་རོ་ཙ་ནཱི་ཡེ་སྭཱ་ཧཱ། ཨོཾ་ཧྲིཿ་ཧ་ཧ་ཧཱུཾ་ཧཱུཾ་ཕཊ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ། ཌཱ་ཀི་ནྣཱི་ཛཱ་ལ་སམྦ་ར་སྭཱ་ཧཱ། ཤར་གྱི་ཞལ་དུ་མཁའ་འགྲོ་མ། །གཡོན་པའི་ཞལ་དུ་ལཱ་མའོ། །རྒྱབ་ཀྱི་ཞལ་དུ་དུམ་སྐྱེས་མ། །ལྷོ་ཡི་ཞལ་དུ་གཟུགས་ཅན་མའོ། །གཅིག་དང་དུ་མའི་རང་བཞིན་མཆོག་ཏུ་བདེ་བྱེད་རྟག་པ་ལ་སོགས་རང་བཞིན་ཅན། ཐོད་པ་བཞི་པོ་གང་ཞིག་བདུད་རྩི་རང་བཞིན་ལྡན་ཞིང་སྟོང་ཉིད་ལས་བྱུང་སྣ་ཚོགས་པ། །དགའ་ཀུན་གཅིག་ཏུ་སྙིང་པོས་གསུམ་སྐྱེས་པདྨའི་ལྟེ་བའི་ཕྱོགས། །དེ་ཡང་རྟག་ཏུ་རང་བཞིན་ལས་སྐྱེས་གཅིག་ཏུ་དཔའ་བོ་སངས་རྒྱས་ཀུན་གྱི་རང་བཞིན་དགོད། །བུ་སྟེ་མགོ་བོར་རབ་གཏུམ་མོ་ནི་ཐོད་པར་ལྡན་པ་སྤྱི་གཙུག་ཏུ། །ཛཱ་ལནྡྷ་ར་ཞེས་བྱར་ཀེང་རུས་ཆེན་པོ་དང་ནི་གཏུམ་མིག་བཞུགས། ཨོ་སྟེ་རྣ་བ་གཡས་པ་ཨོ་རྒྱན་ཞེས་བྱ་བར། །ཀེང་རུས་དང་བཅས་འོད་ལྡན་མ་དང་ཨ་ནི་ཨར་བུ་དེར་གནས་པ། །མཆེ་བ་རྣམ་པར་གཙིགས་དང་སྣ་ཆེན་མ་ནི་རྒྱབ་ཀྱི་ཚིགས་པར་གནས། །འདི་ནི་སྟན་གྱི་རྣམ་པར་དགོད་པ་བདེ་མཆོག་ནང་ནས་གསུངས། །གོ་སྟེ་རྣ་བ་གཡོན་པ་གོ་དཱ་བཱ་རི་ཞེས་བྱ་བར། །དཔའ་བོའི་བློ་མ་དང་ལྡན་ཆང་ལ་དཔའ་བོ་ལེགས་པར་བཞུགས། །སྨིན་མའི་དབུས་སུ་རཱ་སྟེ་རཱ་མེ་ཤཱ་རར་ལེགས་
༄། །པར་རྣམ་གནས་པ། །འོད་དཔག་མེད་དང་ལྡན་པའི་མི་ཐུང་མ་ནི་ཁྲོ་བོའི་གཟུགས་ཅན་མའོ། །དེ་སྟེ་མིག་གི་ཕྱོགས་སུ་དེ་བཱི་ཀོ་ཊ་རི་རྣམ་གནས་པ། །དཔའ་བོ་ཆེན་པོ་རྡོ་རྗེ་འོད་དང་ལངྐའི་དབང་ཕྱུག་ཡང་དག་ལྡན། །མཱ་སྟེ་དཔུང་པའི་རྩ་བར་མཱ་ལ་བར་གྲགས་ཤིན་ཏུ་ལེགས་གནས་པ། །རྡོ་རྗེ་ལུས་དང་ཤིང་གྲིབ་མ་སྟེ་ཉེ་བའི་གནས་སུ་རབ་ཏུ་གྲགས། །ཐུགས་ཀྱི་འཁོར་ལོའི་རང་བཞིན་གྱི། །དཔའ་བོ་དཔའ་མོའི་དབང་ཕྱུག་བཞུགས། །མཁའ་སྤྱོད་ཅེས་པའི་འཁོར་ལོ་ནི། །འཁོར་ལོ་བདེ་མཆོག་ལས་རབ་བསྟན། །ཀཱ་ཞེས་པ་ནི་ཀཱ་མ་རཱུ་པ་མཆན་ཁུང་དག་ལ་རྣམ་གནས་པ། །དཔའ་ཆེན་མྱུ་གུ་ཅན་དང་ཨེ་རཱ་ཝ་ཏཱིར་ཡང་དག་ལྡན། །ཨོ་སྟེ་ནུ་མའི་ཕྱོགས་སུ་ཨོ་ཊྱེར་རྡོ་རྗེ་རལ་པ་ཅན་དང་ནི། །འཇིགས་བྱེད་ཆེན་པོར་ལྡན་པར་བཞུགས་ཞེས་མངོན་པར་བརྗོད། །ཏྲི་སྟེ་ཏྲི་ཤ་ཀུ་ནེར་ལྟེ་བའི་ཕྱོགས་སུ་རྟག་བཞུགས་པ། །དཔའ་བོ་ཆེན་པོར་ཡང་དག་ལྡན་པའི་རླུང་གི་ཤུགས་མ་ལེགས་པའི་གཟུགས་ཅན་མའོ། །ཀོ་སྟེ་སྣ་ཡི་རྩེ་མོར་རྡོ་རྗེ་ཧཱུཾ་མཛད་ཀོ་ས་ལར། །ཆང་འཐུང་མ་དང་ཡང་དག་ལྡན་པ་ཉེ་བའི་ཞིང་དུ་རབ་ཏུ་གྲགས། །ཀ་སྟེ་ཁ་ཡི་ཕྱོགས་སུ་ཤྱཱ་མ་དེ་བིར་ཡང་དག་ལྡན། །རབ་ཏུ་བཟང་པོར་གྲགས་པ་བསྟེན་པར་གྱུར་བ་ཀ་ལིངྒར་ནི་རྡོ་རྗེ་འཆང་བའོ། །ལ་སྟེ་མགྲིན་པའི་ཕྱོགས་སུ་ལམ་པཱ་ཀ་ཞེས་བྱ་བར་རྣམ་གནས་པ། །རྡོ་རྗེ་འོད་དང་ཤིན་ཏུ་བཟང་མོར་ཡང་དག་ལྡན་པ་ཚ་ནོད་ཧའོ། །ཀཱ་སྟེ་སྙིང་གར་དགོད་པ་ཀཱ་ཉྩི་ཕྱོགས་སུ་རྣམ་གྲགས་ལ། །དཔའ་བོ་ཆེན་པོར་ཡང་དག་ལྡན་པའི་རྟ་རྣ་མ་ནི་འཇིགས་པའི་གཟུགས། །ཧི་སྟེ་མདོམས་སུ་འབར་བ་ཆེན་པོ་མིག་མི་བཟང་ནི་བྱ་གདོང་མ་དང་ཡང་དག་ལྡན། །ཧི་མཱ་ལ་སྟེ་ཉེ་བའི་ཚན་དོ་ཞེས་སུ་གྲགས། །གསུང་གི་འཁོར་ལོ་ས་ལ་སྤྱོད་པ་ལྷ་མོ་འཛུམ་པར་བཅས་པའི་དཔའ་བོ་ཡང་དག་ལྡན། །དངོས་གྲུབ་ཐམས་ཅད་རྟག་ཏུ་བྱེད་ཅིང་ལྷན་ཅིག་སྐྱེས་པའི་དགའ་བས་ལེགས་པར་གནས། །པྲེ་སྟེ་པྲེ་ཏ་བུ་རིང་རྡོ་རྗེའི་ཕྱོགས་སུ་རྣམ་གནས་པ། །སྟོབས་པོ་ཆེ་དང་ཡང་དག་ལྡན་པའི་འཁོར་ལོའི་ཤུགས་མའི་རྣལ་འབྱོར་མའོ། །གྲྀ་སྟེ་བསང་བའི་གནས་སུ་གྲྀ་ཧ་དེ་བ་ཏཱ་དང་ཡང་དག་ལྡན། །དུམ་སྐྱེས་མ་དང་རིན་ཆེན་ཤིན་ཏུ་ལེགས་
༄། །པར་གནས་པ་འདུས་པའོ། །བརླ་ཡི་ཕྱོགས་སུ་རྟ་མགྲིན་ཤཽཎྜི་ནཱི་དང་ལྷན་ཅིག་འདི་ནི་འདོད་པའི་ལྷ་མོའོ། །སཽ་སྟེ་སཽ་རཱཥྚར་རྡོ་རྗེ་དྲ་བར་ལྡན་མའོ། །སུ་སྟེ་བྱིན་པ་དག་ལ་འཁོར་ལོའི་གོ་ཆ་མ་ཉིད་དང༌། །ནམ་མཁའི་སྙིང་པོར་ཡང་དག་ལྡན་པ་གསེར་གླིང་ལ་ལེགས་གནས། །དེ་ནི་དཔའ་པོའི་ཉེ་བའི་འདུས་པ་འོན་ཏེ་སོར་མོར་ལེགས་གནས་པ། །ན་ག་རར་ནི་ཧེ་རུ་ཀ་དང་ལྡན་པའི་ལྷ་མོ་ཤིན་ཏུ་དཔའ་མོའོ། །སི་སྟེ་སིནྡྷུར་རྐང་བའི་བོལ་ལ་པདྨ་གར་གྱི་དབང་ཕྱུག་དང༌། །སྟོབས་ཆེན་མོ་དང་ཡང་དག་ལྡན་ཞུགས་དུར་ཁྲོད་དོ། །མ་སྟེ་མཐེ་བོའི་ཕྱོགས་སུ་མ་རུར་རྣམ་པར་སྣང་མཛད་བཞུགས། །འདོད་པའི་དངོས་གྲུབ་ཀུན་སྟེར་དགྱེས་ཉིད་འཁོར་ལོས་སྒྱུར་མའོ། །ཀུ་སྟེ་པུས་མོའི་ཕྱོགས་སུ་ཀུ་ལ་ཏཱ་ར་ནི་རྣམ་དག་པ། །རྡོ་རྗེ་སེམས་དཔའ་བརྩོན་འགྲུས་ཆེན་མོར་ཡང་དག་ལྡན་པར་རྟག་ཏུ་གྱུར། །སྐུ་ཡི་འཁོར་ལོ་ས་འོག་སྤྱོད་པའི་ལྷ་མོ་རྣམ་པར་གནས། །འཁོར་ལོ་གསུམ་བཀོད་ནང་དང་ཕྱིར་བཅས་གནས་པར་བསྟན། །པུ་ལ་སོགས་པར་བཀོད་པའི་དཔའ་བོ་རྡོ་རྗེ་སེམས་དཔའ་དང་པོར་བརྗོད། །པདྨ་ཉི་མར་ལྡན་པའི་གདན་ལ་རྣལ་འབྱོར་མས་ནི་ལེགས་པར་བསྲུང༌། །ཡན་ལག་ལ་དགོད་སྨྲ་བ་སློབ་དཔོན་གཞན་གྱི་གཞུང༌། །ལུགས་གཉིས་གང་འདོད་དེ་བླངས་ནས་ནི་ལེགས་པར་སྤྱད། །ས་བོན་ཐིག་ལེ་ཡང་དག་ལྡན་པར་གང་ཞིག་ཀུན་དུ་གྱུར། །དེ་ནི་འབྲས་བུ་ཡིན་ཞེས་རྣལ་འབྱོར་པ་ཡིས་གསུངས། །ཐིག་ལེགས་ཀུན་དུ་ཁྱབ་ཅིང་གང་ཕྱིར་མི་འགྱུར་མཚན་ཉིད་གྱུར་པ་གང༌། །དེ་ནི་དགར་གྱུར་དགའ་ལས་ལྷན་ཅིག་སྐྱེས་པར་གྱུར། །ལྷན་ཅིག་སྐྱེས་པས་འགྲོ་བ་བསྐྱེད་པ་བསྐྱེད་པའི་ལྷན་ཅིག་སྐྱེས་པར་གྱུར། །བསྐྱེད་པའི་ལྷན་ཅིག་སྐྱེས་པའི་བྱེ་བྲག་འདི་ནི་ཀུན་རྫོབ་ཅེས་སུ་བདག་གིས་བསྟན། །ལྷ་མོ་ཁྭ་དང་འུག་པའི་གདོང་ཅན་དང༌། །ཁྱི་ཡི་གདོང་དང་ཕག་གི་གདོང་ཅན་དང༌། །ཞལ་ལ་དགོད་པར་གསུངས་པ་ཞལ་བཞི་རྣམ་དག་པ། །གཤིན་རྗེ་བརྟན་མ་དང་ནི་གཤིན་རྗེ་ཕོ་ཉ་མོ། །གཤིན་རྗེ་མཆེ་བ་མ་རྣམས་དེ་བཞིན་ཉིད། །གཤིན་རྗེ་འཇོམས་མ་དང་ལྡན་དགོད་པ་ནི། །མཚམས་སུ་བཞུགས་པར་གྱུར་པའོ། །ཕ་རོལ་ཕྱིན་བཅུ་རྣམ་དག་པ། །ས་བཅུ་རྣམས་སུ་རབ་ཏུ་གནས། །
༄། །ཤེས་པ་བཅུ་ཡི་རང་བཞིན་བདག །བཅུ་ཡི་དབྱེ་བས་རྣམ་པར་གནས། །སྟན་ནི་རབ་ཏུ་དགའ་བའི་ས། །དེ་ནི་སྦྱིན་པའི་ཕ་རོལ་ཕྱིན། །དྲི་མེད་ཚུལ་ཁྲིམས་ཡང་དག་ལྡན། །ཉེ་བའི་སྟན་དུ་རབ་ཏུ་གྲགས། །ཞིང་ནི་འོད་བྱེད་ཤེས་པར་བྱ། །དེ་ནི་བཟོད་པའི་ཕ་རོལ་ཕྱིན། །ཉེ་བའི་ཞིང་ནི་བརྩོན་འགྲུས་གྱུར། །འོད་འཕྲོ་བ་དང་ཡང་དག་ལྡན། །ཚནྡོ་བསམ་གཏན་ཡང་དག་ལྡན། །མངོན་གྱུར་ཞེས་བྱའི་ས་རུ་གནས། །ཉེ་བའི་ཚནྡོ་ཤེས་རབ་སྟེ། །དེ་ནི་སྦྱང་དཀའི་ས་ཞེས་བྱ། །འདུས་པ་རྟག་ཏུ་ཐབས་ཡིན་ཏེ། །རིང་དུ་སོང་བའི་ས་རུ་གནས། །ཉེ་བའི་འདུས་པ་རྟག་ཏུ་ནི། །མི་གཡོ་བ་དང་ཐབས་སུ་གནས། །དུར་ཁྲོད་སྨོན་ལམ་རྟག་ཏུ་གསུངས། །ལེགས་པའི་བློ་གྲོས་ས་དང་ལྡན། །རྒྱལ་ཆེན་དཔལ་དང་ཧེ་རུ་ཀ །དེ་རུ་རོལ་པས་ལེགས་པར་བཞུགས། །རྣམ་པ་ཀུན་གྱི་མཆོག་ལྡན་པ། །རང་འབྱུང་མཆོག་གི་དབང་ཕྱུག་སྟེ། །སྟོན་པ་དཔའ་བོ་ཀུན་གྱི་གཞི། །རྣམ་པ་ཀུན་གྱི་མཚན་ཉིད་གཅིག །ས་གཞན་དང་པོར་ཚོགས་ལྡན་ཐ་མར་སྤྲིན་ཏེ་རྟག་ཏུ་ཡེ་ཤེས་མཆོག་ཏུ་གྲགས། །ཉེ་བའི་དུར་ཁྲོད་འབྱུང་པོའི་གནས་ཏེ་ཧེ་རུ་ཀ་ཆགས་བདག་གིས་བསྟན། །སྟན་ནི་སྡུག་བསྔལ་དག་ཏུ་ཤེས། །ཉེ་བའི་སྟན་ནི་ཀུན་འབྱུང་སྟེ། །ཞིང་གི་མིང་ནི་འགོག་པའོ། །ལམ་ནི་རྟག་ཏུ་ཉེ་བའི་ཞིང༌། །ཟད་པ་ཤེས་པ་ཚནྡོ་ཧ། །ཉེ་བའི་ཚནྡོ་མི་སྐྱེ་བ། །ཆོས་ནི་འདུས་པ་ཉིད་ཡིན་ནོ། །ཉེ་བའི་འདུས་པ་རྗེས་སུ་ཤེས། །དུར་ཁྲོད་ཀུན་རྫོབ་ཤེས་པའོ། །དོན་དམ་ཉེ་བའི་དུར་ཁྲོད་དོ། །ཤེས་པ་བཅུ་ཡི་རང་བཞིན་གྱིས། །གནས་ལ་སོགས་པ་དག་པར་གྲགས། །ཟབ་མོ་འབུམ་གྱི་མདོ་ལས་ཀྱང༌། །ཡེ་ཤེས་གྲགས་པར་གྱུར་པ་ཡང༌། །སངས་རྒྱས་གཟུགས་ཀྱི་རང་བཞིན་དུ། །འཁོར་ལོ་བདེ་མཆོག་ལ་གནས་པའོ། །འཆད་པར་འགྱུར་པའི་ཕྱག་དང་ལྡན། །ཁ་དོག་མཚོན་ཆ་དང་ལྡན་པ། །ལྷ་མོ་རྣམས་དང་དཔའ་བོ་ཀུན། །པུ་ལླིར་ལ་སོགས་རབ་བསམ་བྱ། །བྱང་ཆུབ་ཀྱི་ཆོས་སུམ་ཅུ་བདུན། །རྣལ་འབྱོར་མ་ཡི་དག་པའོ། །སེན་སོགས་ལན་ལག་བཀོད་པ་ཡང༌། །དེ་ནི་གོ་ཆ་ཆེན་པོར་དྲན། །རྣལ་འབྱོར་འདི་དང་ཡང་དག་ལྡན། །ལྷན་ཅིག་སྐྱེས་
༄། །པ་གཞན་ཡིན་ནོ། །ཕྱི་རོལ་ནང་དང་མཉམ་ལྡན་པ། །ཧེ་རུ་ཀ་སྐུར་ཡང་དག་གནས། །མ་སྐྱེས་པ་ཡི་རང་བཞིན་ཕྱིར། །སྟོང་པ་ཞེས་ནི་མངོན་པར་བརྗོད། །གང་ཕྱིར་རྒྱུ་དང་བྲལ་བའི་ཕྱིར། །དེ་ནི་མཚན་མ་མེད་པར་བརྗོད། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཐོག་མར་སྟོང་བསྒོམས་དེ་རྗེས་མཁའ་བྱས་རླུང་དང་མེ་དབུས་ཆུ། །གཞི་བསམ་གཞན་ཡང་བརྒྱ་བྱིན་རྡོ་རྗེས་མཚན་པའི་གཟུགས་སུ་བྱུང༌། །དེ་སྟེང་རྩེ་མོ་བརྒྱད་དང་མཚན་པའི་རི་རབ་བརྩེ་མོར་གསེར་གྱི་རྡོ་རྗེ་དང་ནི་གཞལ་ཡས་ཁང༌། །གཅིག་ཏུ་མེ་ཏོག་སྣ་ཚོགས་ཀྱིས་མཛེས་སྣ་ཚོགས་མང་པོའི་རས་ཆེན་བཟང་པོས་གཅིག་ཏུ་མཛེས། །དྲིལ་བུ་འཕན་དང་ཡང་དག་ལྡན་པའི་སྒྲ་ཡིས་ཕྱོགས་སུ་གྲགས་ཤིང་དྲིལ་ཆུང་སྙན་པའི་སྒྲ། །འཁོར་ལོའི་རྣམ་པའི་རང་དབུས་ཁ་སྦྱོར་གསུམ་མཆོག་མེ་ཏོག་ཕྲེང་བས་མཛེས། །ཕྱི་རོལ་སྒོ་བཞིར་རྟ་བབས་ཆེན་པོ་ཉིད་ཀྱིས་མཆོག་ཏུ་མཛེས། །དབུས་སུ་སྣ་ཚོགས་པདྨ་ལ་གནས་སྲིད་པ་ལས་བྱུང་རྡོ་རྗེ་སྔོན་པོ་ཆེན་པོའོ། །དེའི་མཐར་བདེ་མཆོག་ཅེས་གྲགས་ཡུལ་དང་ཡང་དག་ལྡན་པ་འབྱུང་བ་ལྔ་ཡི་རང་བཞིན་ཅན། །སྔོན་པོ་ལྟ་བུའི་འོད་བཟང་ལྡན་ཞིང་ལྟེ་བར་བྱས་པ་ཡིད་ནི་ཧཱུཾ་ལས་བྱུང་བ་མཐའ་ཡས་མགོན་པོའོ། །སྤྲོས་པའི་ཤེས་རབ་ཡན་ལག་སྦྱོར་བ་ཕྱོགས་སུ་ཕྱིར་བཟློག་གྱུར་ནས་བསྡུས་ཏེ་རྡོ་རྗེ་མགོན་པོའོ། །སྒྱུ་མ་ལྟ་བུའི་རང་བཞིན་སྲིད་པ་ཀུན་དང་མཉམ་པ་པདྨའི་དབུས་སུ་བསྒོམ། །དུ་བ་ལྟ་བུའི་འོད་ཟེར་བཟང་པོ་ཐོག་མར་གཙོ་བོའི་ཞལ་ནི་ཟླ་ཚེས་ལྟ་བུ་ཡི། །མཆེ་བ་ལྡན་ཞིང་གཡོན་པའི་ཞལ་བཟང་ལྗང་གུ་རྒྱབ་ཞལ་རྣམ་པར་འགྱུར་བ་བཟང་པོའི་སྤྱན། །གཡས་པར་ཧ་ཧར་དགོད་བཅས་ཧི་ཧི་ཞེས་ཞི་གསེར་འདྲ་ཤིན་ཏུ་འཇིགས། །གཡས་པ་བརྐྱང་བས་དུས་མཚན་དང་ལྡན་འཇིགས་བྱེད་མནན་ཅིང་དྲི་མེད་མཁའ་འགྲོ་དྲ་བས་རོལ། །མགོ་བོ་ལྔ་བཅུའི་ཕྲེང་བས་བརྒྱུད་པའི་དོ་ཤལ་མཛེས་པར་འཕྱང་བས་བརླ་ནས་ཕྲག་པའི་བར། །ལུས་ནི་ཕྱག་རྒྱ་དྲུག་བརྒྱན་མི་མོག་སྣ་ཚོགས་བཅིངས་ཤིང་དབུ་སྐྲ་ཁམ་པ་གྱེན་དུ་བརྫེས། །ཅོད་པན་ཟླ་བ་ཕྲེང་བས་མཚན་པ་ས་སྟེང་མུན་པ་སེལ་བ་སྤྱི་བོར་སྣ་ཚོགས་རྡོ་རྗེས་མཚན། །སྦྱངས་པར་གྱུར་པའི་ཕྱག་ཆེན་པོ་ནི་མཆོག་གྱུར་མང་པོ་ཟད་བྱེད་འཕྲོ་བའི་དྲིལ་བུ་དག་པའི་རྡོ་
༄། །རྗེའོ། །གང་གི་གླང་པོའི་པགས་པ་ཁྲག་གིས་བརླན་པ་གྱེན་དུ་འཕྱར་བ་བསྣམས་པས་མཛེས་པར་བསྟན། །གཡས་ན་རྣོ་བའི་མདུང་དང་ཞགས་པ་མཆོག་ལྡན་ཌ་མ་རུ་དང་གྲི་གུག་གོ །གཡོན་ན་ཁ་ཊྭཱཾ་ག་དང་པདྨ་ས་གསུམ་ལས་རྒྱལ་ཞགས་པ་མགོ་བོ་བཟང་པོས་མཛེས། །རྣམ་ཀུན་རང་བཞིན་སྲིད་པ་ཀུན་མཉམ་དེ་ཡི་གཟུགས་སུ་རབ་ཏུ་བྱེད། །ཕྱག་ན་རྡོ་རྗེ་ལྡན་ཞིང་གདུག་པ་ཀུན་ལ་སྡིགས་མཛུབ་སྐྲ་གྲོལ་ལེགས་པར་དམར། །རབ་ཏུ་ཆགས་པས་མགྲིན་པར་འཁྱུད་ཅིང་ཞལ་ནི་ཁྲག་གིས་གང་ཞིང་ཕྱག་གཡོན་པདྨ་བསྣམས། །ཐབས་དང་ཤེས་རབ་གཅིག་ཏུ་སྦྱོར་བས་ལྷན་ཅིག་སྐྱེས་བདེ་རྟག་ཏུ་དགའ་སེམས་རང་བཞིན་ཅན། །སྤྲིན་ལྟར་སྣང་བ་ལྷ་མོའི་ཚོགས་ནི་མཐའ་ཡས་སྤྲོ་བ་ལྷ་མོ་ཕག་མོ་སྟེ། །ཞལ་གྱི་གྲྭ་ཡི་ཕྱོགས་ནས་ཁྲག་འཛག་པས། །ཡན་ལག་ཀུན་ལ་བྱུགས་པས་མཛེས་པ་དང༌། །མགོ་བོ་ཐོད་དང་མགོ་ཡི་ཕྲེང་བ་དང༌། །གཅེར་བུ་མི་ཡི་རུས་པས་རྣམ་པར་བརྒྱན། །གཡས་པའི་བྱིན་པས་བདག་པོ་ཡི། །གཡོན་པའི་བརླ་ནི་ཡོངས་སུ་འཁྱུད། །འཁོར་ལོ་ཀུན་བདག་སྦྱོར་བ་ཡིས། །རྣལ་འབྱོར་པ་རྣམ་སེམས་དགའ་མ། །རྟག་ཏུ་ཁྲོས་པ་ཕག་གདོང་དུ། །བདག་གིས་བརྟགས་ནས་བཤད་པའོ། །ཡང་ན་བུད་མེད་ལྟ་བུའི་ཞལ། །འཁོར་ལོའི་གཙོ་མོ་བསྒོམ་པར་བྱ། །ཡང་ན་དེ་ནི་དུ་བའི་མདོག །དགའ་ཀུན་མཚན་ཉིད་གཅིག་པ་ཡི། །ཡིད་བཞིན་ནོར་བུ་ལྟ་བུ་ཡི། །རྡོ་རྗེ་ཕག་མོ་བསྒོམ་པར་བྱ། །འཁོར་ལོའི་དབུས་རྟག་ལྷ་མོ་ནི། །གང་ཞིག་བསྐྱོད་པའི་སྦྱོར་བས་གནས། །རྡོ་རྗེ་ཕག་གདོང་གཙོ་མོ་ནི། །སྐྱེས་པ་ལྟ་བུར་བྱེད་པར་གསུངས། །རྡོ་རྗེ་པག་མོ་ལྷ་མོ་ཆེ། །ལྷ་མོ་ཀུན་དང་མཉམ་ལྡན་པ། །གཙོ་བོའི་གཟུགས་ཀྱིས་བསྒོམ་བྱ་བ། །བདེ་མཆོག་དོན་དུ་རྣམ་པར་ཤེས། །སྟག་གི་པགས་པའི་གོས་དང་ལྡན། །སྤྱན་གསུམ་རྟག་ཏུ་བསྒོམ་པར་བྱ། །སིལ་སིལ་ཟེར་བའི་སྒྲ་ཡིས་ནི། །བརླ་གཉིས་མཉམ་པར་ཁྱབ་པའོ། །འབར་བའི་ཕྲེང་ཁྱབ་འཇིགས་པའོ། །འཇིགས་བྱེད་ཆེན་པོ་འཇིགས་པར་བྱེད། །ལྷན་ཅིག་སྐྱེས་རོལ་དུར་ཁྲོད་དེ། །ལྷན་ཅིག་སྐྱེས་དགའ་ཧེ་རུ་ཀ །ཆགས་བཅས་འཁྱུད་པ་ཡང་དག་ལྡན། །འོ་བྱེད་པས་ནི་རྟག་ཏུ་གནས། །བསྐྱོད་པ་ཆེན་
༄། །པོའི་སྦྱོར་བ་ཡིས། །འཁོར་ལོའི་གཙོ་བོ་བསྒོམ་པར་བྱ། །ཟླ་བའི་ཁ་དོག་ལྟ་བུའི་ཁྲོས་པ་སྟེ། །སྤྱན་གསུམ་ཞལ་ནི་ལྷ་རུ་གཟིགས། །མཆེ་བ་བཞི་ཡི་མྱུ་གུས་བརྒྱན། །དམ་པའི་དོན་དུ་རབ་ཏུ་གྲགས། །གཡས་པའི་ཕྱག་ན་ས་གསུམ་ལས་རྒྱལ་སྣ་ཚོགས་རྡོ་རྗེ་གསོར་བས་འཇིགས།། གཡོན་ན་དངོས་གྲུབ་ཟླ་བ་ལྟར་དཀར་སྣོད་ནི་ཁྲག་གིས་བཀང་བ་བསྣམས། །ཕྱག་གཉིས་གཙོ་ལ་འཁྱུད་པས་ལྷན་ཅིག་སྐྱེས་པའི་བསེ་ལྡན་རྡོ་རྗེ་དྲིལ་བུ་འཛིན། །བན་དུ་ལྟར་དམར་འོད་ཚོགས་མང་པོ་ལྡན་པའི་རྡོ་རྗེ་ལྷ་མོ་བསམ། །མཁའ་འགྲོ་མ་དང་ལཱ་མ་དང༌། །དུམ་སྐྱེས་མ་དང་གཟུགས་ཅན་མ། །དགའ་དང་བདེ་བས་མགུ་བ་ཡི། །རྡོ་རྗེ་སྦྱོར་བས་བསྒོམ་པར་བྱ། །སྔོན་པོ་ལྗང་གུ་དམར་པོའི་སྐུ། །སེར་བའི་འོད་ཉིད་རྣལ་འབྱོར་མ། །ཕྱོགས་བཞིར་པདྨའི་འདབ་མ་ལ། །ལྷན་ཅིག་སྐྱེས་དགའ་ཤིན་ཏུ་མཛེས། །གྲུབ་པའི་རྣལ་འབྱོར་མ་བཞི་པོ། །ཕྱི་དང་ནང་ན་ཡང་དག་བཞུགས། །ཆུ་དང་རླུང་དང་མེ་ཆེན་པོ། །ས་ཡི་རྣམ་པའི་དངོས་པོར་བྱུང༌། །བྱམས་པ་སྨོན་ལམ་མཱ་མ་ཀཱི། །བཏང་སྙོམས་ཡེ་ཤེས་སྒྲོལ་མ་སྟེ། །གོས་དཀར་མོ་ནི་སྟོབས་སུ་གསུངས། །ཕྱག་རྒྱ་མངོན་འབྱུང་བྱེད་པ་མོ། །བཏང་སྙོམས་སྤྱན་མར་གྲགས་པ་སྟེ། །སྙིང་རྗེ་དང་ནི་མཉམ་ལྡན་ན། །མཁའ་འགྲོ་མ་སོགས་རྣམ་དག་པ། །བླ་མའི་རིམ་ལས་འོངས་པས་བསྟན། །མཁའ་འགྲོ་མ་སོགས་གཟགས་བཟང་རོ་ཡིས་སྟན་བྱས་ཕྱག་ན་པདྨ་ཁ་ཊྭཱཾ་ག །གཡས་པའི་ཕྱག་ན་གྲི་གུག་དང་ན་ཌ་མ་རུ་ལྡན་བསྣམས་ཤིང་སྐྲ་གྲོལ་སྤྱན་གསུམ་པའོ། །ཕྱག་རྒྱ་དྲུག་གིས་སྐུ་ལ་བརྒྱན་ཅིང་མི་མགོ་མཆོག་གི་ཐོད་འཆང་གཅེར་བུའི་གཟུགས་ཅན་ཤིན་ཏུ་འཇིགས། །སྟན་ལ་གཡས་བརྐྱང་བཞུགས་ཤིང་རྣམ་འགྱུར་ཞལ་མཛད་ཧཱུཾ་སྒྲོགས་དགའ་བའི་སྙིང་པོའོ། །སྟག་གི་པགས་པའི་ན་བཟའ་དང༌། །མི་རོའི་སྟེང་ན་ལེགས་པར་བཞུགས། །དངོས་གྲུབ་ཀུན་སྟེར་བསམ་པར་བྱ། །ལྷོ་དང་ཤར་དང་རྒྱབ་དང་ནི། །ནུབ་ཀྱི་ཕྱོགས་ཀྱི་ཆ་རུ་ནི། །ཞལ་བཞི་ཞལ་རྣམས་ཉིད་ཀྱིས་ནི། །འོ་བྱེད་པར་ནི་རྣམ་པར་བསམ། །རྒྱལ་པོ་དང་ནི་རྒྱལ་རིགས་ཉིད། །མ་དང་ཕ་དང་མཉམ་ལྡན་པ། །རྒྱལ་རིགས་སོགས་གཞན་བླངས་ནས་ནི། །ཐོད་པ་རྣམས་ནི་
༄། །མཚམས་སུ་གཞག །མཆོད་པ་བཞི་པོ་ལེགས་གསུངས་པ། །གཏི་མུག་ཆེན་པོ་རྣམ་དག་པ། །མཆོད་པའི་དོན་གྱིས་འཁོར་ལོ་ཡི། །འཁོར་ལོ་བདེ་མཆོག་དཔལ་ལས་གསུངས། །རབ་གཏུམ་ཐོད་པའི་དུམ་བུ་ནི། །ལྷོ་ཡི་རྩིབས་ལ་རྣམ་པར་གནས། །གཏུམ་མིག་མ་དང་ཡང་དག་ལྡན། །ཀེང་རུས་ཆེན་པོ་ཤར་ཕྱོགས་སུ། །འོད་ལྡན་མ་དང་ལེགས་སྦྱོར་བ། །ཀེང་རུས་བྱང་གི་ཆ་རུའོ། །སྣ་ཆེན་མ་དང་ཡང་དག་ལྡན། །མཆེ་བ་རྣམ་གཙིགས་བྱང་དུའོ། །དཔའ་བོ་བློ་མ་ཡང་དག་ལྡན། །ཆང་ལ་དཔའ་བ་བདེན་བྲལ་དུ། །འོད་དཔག་མེད་དང་མི་ཐུང་ཉིད། །རླུང་གི་ཕྱོགས་སུ་རྟག་ཏུ་བཞུགས། །རྡོ་རྗེ་འོད་ལྡན་ལྷ་མོ་ནི། །ལངྐའི་དབང་ཕྱུག་མ་རྟག་ཏུ། །དབང་ལྡན་ཕྱོགས་སུ་ལེགས་པར་བཞུགས། །འདི་དག་སེམས་ཅན་ཀུན་དོན་མཛད། །མེ་ཕྱོགས་རྡོ་རྗེ་ལུས་དང་ནི། །ལྗོན་གྲིབ་མ་དང་ཡང་དག་ལྡན། །ཐུགས་ཀྱི་འཁོར་ལོ་མཁའ་སྤྱོད་དུ། །བདེ་མཆོག་ལས་ནི་འདི་དག་གསུངས། །ཐུགས་ཀྱི་འཁོར་ལོའི་ཕྱི་རོལ་དུ། །རྡོ་རྗེ་སྔོན་པོའི་ཕྲེང་བས་བསྐོར། །དཔའ་བོ་དཔའ་མོའི་དབང་ཕྱུག་སྔོ། །སངས་རྒྱས་ཚོགས་འཕྲོ་ཡང་དག་ལྡན། །ས་སྲུང་མ་དང་ཡང་དག་ལྡན། །མྱུ་གུ་ཅན་ནི་ལྷོ་རུ་དགོད། །འཇིགས་བྱེད་ཆེན་པོ་དང་ལྷན་ཅིག །རྡོ་རྗེ་རལ་ཅན་ཤར་དུ་བཞུགས། །བྱང་དུ་འཇིགས་བྱེད་ཆེན་པོ་དང༌། །རླུང་གི་ཤུགས་མ་ལེགས་པར་བཞུགས། །ནུབ་ཏུ་རྡོ་རྗེ་ཧཱུཾ་མཛད་དང༌། །ཆང་འཐུང་མ་དང་ཡང་དག་ལྡན། །སྔོ་བསངས་ལྷ་མོ་ལེགས་སྦྱར་བ། །ཤིན་ཏུ་བཟང་པོ་བདེན་བྲལ་ཕྱོགས། །རྡོ་རྗེ་བཟང་དང་ཤིན་ཏུ་བཟང༌། །ལྷན་ཅིག་རླུང་གི་ཕྱོགས་སུ་བརྟེན། །དབང་ལྡན་ཕྱོགས་ཀྱི་གནས་སུ་ནི། །རྟ་དང་ཤིན་ཏུ་འཇིགས་བྱེད་མཛེས། །མེ་ཕྱོགས་བྱ་གདོང་མ་དང་ནི། །མིག་མི་བཟང་དང་ཡང་དག་ལྷན། །ས་སྤྱོད་གསུང་གི་འཁོར་ལོ་སྟེ། །པདྨའི་ཕྲེང་དང་ཡང་དག་ལྡན། །སྤྲོ་ཞིང་བསྡུ་བར་བྱེད་པ་པོ། །རྟག་ཏུ་ཁ་དོག་དམར་པོར་བསྒོམ། །ལྷོར་ནི་རྟག་ཏུ་སྟོབས་ཆེན་དང༌། །འཁོར་ལོའི་ཤུགས་མས་མཛེས་པའོ། །དུམ་སྐྱེས་མ་དང་ཡང་དག་ལྡན། །རིན་ཆེན་རྡོ་རྗེ་ཤར་དུ་དགོད། །ཤཽཎྜི་ནིའི་སྦྱོར་ཡང་དག་ལྡན། །རྟ་མགྲིན་བྱང་གི་ཕྱོགས་
༄། །ཉིད་ནའོ། །ནམ་མཁའི་འཁོར་ལོའི་གོ་ཆ་མ། །ཆུ་ཡི་ཕྱོགས་སུ་དགོད་པར་བྱ། །ཧེ་རུ་ཀ་དཔལ་སུ་བཱི་ར། །རྟག་ཏུ་བདེན་བྲལ་དུ་བསྒོམ་བྱ། །པདྨ་གར་གྱི་དབང་ཕྱུག་དང༌། །སྟོབས་ཆེན་པོ་ནི་རླུང་གི་ཕྱོགས། །འཁོར་ལོས་སྒྱུར་དང་གཏི་མུག་ཆེ། །རྟག་ཏུ་དབང་ལྡན་དུ་བསྒོམ་བྱ། །རྡོ་རྗེ་སེམས་དང་བརྩོན་ཆེན་མོ། །སྐུ་ཡི་འཁོར་ལོར་བསམ་པར་བྱ། །ཕྱི་རོལ་འཁོར་ཕྲེང་དཀར་པོའོ། །ཁ་དོག་དཀར་པོར་རྣམ་པར་བསྒོམ། །འདི་ནི་ས་འོག་འཁོར་ལོ་ཡི། །སྦྱོར་བའི་མཚན་ཉིད་གྱུར་པའོ། །དཔའ་བོ་ཐམས་ཅད་ཕྱག་བཞི་སྟེ། །གཡོན་ན་ཁ་ཊྭཱཾ་འཛིན་པའོ། །ཌ་མ་རུ་ནི་གཡས་ན་འཛིན། །རལ་པ་བཅིངས་པས་རྣམ་པར་མཛེས། །སྤྲོ་ཞིང་སྡུད་པའི་གཟུགས་ཅན་ཏེ། །རོ་ཡི་གདན་ལ་ལེགས་པར་བཞུགས། །གཡས་བརྐྱང་བ་དང་ཡང་དག་ལྡན། །རུས་པའི་ཕྲེང་བས་རྣམ་པར་བརྒྱན། །ཕྱག་ན་རྡོ་རྗེ་དྲིལ་བུ་དང༌། །ལྷ་མོ་འཁྱུད་ལ་མཆོག་ཏུ་བརྩོན། །གཅེར་བུའི་གཟུགས་ཅན་ཧཱུཾ་ཞེས་སྒྲོགས། །མགོ་ཡི་ཕྲེང་བས་ཉེ་བར་མཛེས། །ལྷན་ཅིག་སྐྱེས་དགའ་འཁོར་ལོར་བཅས། །དཔའ་བོ་རྣལ་འབྱོར་མ་བསྒོམ་བྱ། །དཔའ་བོ་ཀུན་དང་མཉམ་སྦྱོར་བས། །བདེ་མཆོག་ཅེས་བྱ་རྣམ་པར་འབྱུང༌། །རབ་གཏུམ་མོ་སོགས་ལྷ་མོ་དེ། །ཞལ་གཅིག་གིས་ནི་མཛེས་པའོ། །ཕྱག་གཉིས་དབུ་སྐྲ་གྲོལ་བ་སྟེ། །གཅེར་བུ་མི་རུས་སོགས་པས་བརྒྱན། །གཡོན་ན་ཁྲག་གི་ཐོད་པ་སྟེ། །གཡས་ན་སྡིགས་མཛུབ་གྲི་གུག་གོ །ཐམས་ཅད་སྤྱན་གསུམ་ཧཱུཾ་སྒྲོགས་པ། །མཆོག་ཏུ་དགའ་བའི་གཟུགས་སུ་བྱུང༌། །རིག་མའི་སྐེད་པར་སྐེ་རགས་ཏེ། །རབ་ཏུ་འབད་ནས་བསྒོམ་པར་བྱ། །གཅིག་དང་དུ་མའི་རང་བཞིན་ཅན། །གདུག་པའི་ཁྲག་གསོལ་བ་ལ་དགྱེས། །མཁའ་འགྲོ་མ་སོགས་ལྷ་མོ་བཞི། །སྔོན་དུ་གཡོན་དུ་བསྐོར་བ་ཅན། །གང་ཕྱིར་འགྲོ་ཀུན་གཡོན་ལས་བྱུང༌། །དེ་ནས་བདེ་མཆོག་ལས་ནི་གསུངས། །དཀར་པོ་སྔོན་པོ་མཉམ་སྦྱོར་བས། །ངེས་པར་དུ་བ་ལྟ་བུར་གྱུར། །མཁའ་འགྲོ་མ་ནི་སྔོན་པོར་སྟན། །དེ་ནས་མདུན་དུ་ལེགས་པར་བཞུགས། །ཁྭ་དང་འུག་པ་ཁྱི་ཡི་གདོང༌། །ཕག་གི་གདོང་རྣམས་དེ་བཞིན་དུ། །སྔོན་པོ་ལྗང་གུ་དེ་བཞིན་དམར། །སེར་པོའི་འོད་ཅན་སྒོ་རུ་
༄། །བཞུགས། །རྟག་ཏུ་བདེན་བྲལ་མཚམས་སུ་ནི། །གཤིན་རྗེ་བརྟན་མ་མཆོག་ཏུ་འཇིགས། །རླུང་ཕྱོགས་རྣམ་པར་དག་བསྒོམ་པ། །གཤིན་རྗེ་ཕོ་ཉ་མཛེས་པའི་ཤལ། །དབང་ལྡན་གཤིན་རྗེ་མཆེ་བ་མ། །གཡོན་པའི་སྦྱོར་བར་གཅིག་ཏུ་འགྲོ། །ཤིན་ཏུ་རྣམ་དག་གཤིན་རྗེ་འཇོམས། །མེ་ཡི་གནས་སུ་རྟག་ཏུ་བསམ། །རིམ་པ་མིན་དང་རིམ་པ་ཡིས། །འདི་དག་ཤིན་ཏུ་གྲགས་པའོ། །རྣལ་འབྱོར་རྒྱུད་ལ་རིམ་མིན་པ། །རྣལ་འབྱོར་མ་ལས་རིམ་པ་གསུངས། །ལྷ་མོའི་གཟུགས་ནི་གཟི་བརྗིད་ཆེན། །ཁ་དོག་གཉིས་སང་ཡང་དག་ལྡན། །མཚམས་ཀྱི་ལྷ་མོ་མཆོག་འདི་དག །འགྲོ་བའི་བགེགས་ནི་རྣམ་འདྲེན་པ། །གཡོན་ན་ཁ་ཊྭཱཾ་པདྨ་སྟེ། །གཡས་ན་ཅང་ཏེའུ་གྲི་གུག་གོ །འདི་དག་སྒོ་ལ་སོགས་པར་བཞུགས། །ཧེ་རུ་ཀ་འཁྱུད་ལེགས་པར་བཞུགས། །པུ་ཛཱ་ཨོ་ཨ་གོ་རཱ་དེ་མཱ་ཀཱ་ཨོ་ཏྲི་ཀོ་ཀ་ལ་ཀཱ་ཧི་པྲེ་ཀྲྀ་སཽ་སུ་ན་སི་མ་ཀུ། མཁས་པས་མགོ་དང་སྤྱི་གཙུག་སོགས། །པུ་ལ་སོགས་པ་བསམ་བྱས་ཏེ། །ལྷན་ཅིག་སྐྱེས་དགས་མཛེས་པ་ཡིས། །འཁོར་ལོ་ཕྱི་ནས་སྤྱན་དྲང་སྟེ། །རྐང་པ་མནན་ཅིང་གྱེན་དུ་བལྟ། །གྱེན་དུ་པེཾ་གི་སྒྲ་བསྒྲགས་ཤིང༌། །ཕྱོགས་བཅུ་འཇིག་རྟེན་ཁམས་བཞུགས་པའོ། །དཔའ་བོ་རྣམ་འབྱོར་མ་རྣམས་དགུག །མཛུབ་མོ་མདུད་པ་བྱས་པ་དང༌། །གུང་མོ་སྦྱར་བར་བྱས་ནས་ཀྱང༌། །མཐེ་བོ་མཉམ་པར་ལྡན་པ་ནི། །དཔྲལ་བའི་ཕྱོགས་སུ་བཟུང་བྱས་ཏེ། །དེ་ལྟར་ཕྱོགས་བསྐོར་རྣལ་འབྱོར་བས། །མགུ་བའི་གསང་སྔགས་བརྗོད་པར་བྱ། །ལྷག་གནས་རང་གི་འཁོར་ལོར་བཞུགས། །རྡོ་རྗེ་པདྨ་མཆོག་དག་པ། །ཡི་གེ་དྱ་ཡིས་ལྟེ་བ་བསྐྱེད། །ཡི་གེ་བྱཱ་ལས་རྡོ་རྗེར་བྱུང༌། །སྔོན་དུ་ཡན་ལག་བཞི་བཀོད་ནས། །ཕྱིས་ནི་བདེ་བ་ལེགས་པར་སྤྱད། །དང་པོའི་དགའ་བ་དཔའ་བོ་སྟེ། །ཆོག་ཏུ་དགའ་པ་རྣལ་འབྱོར་མ། །ཐམས་ཅད་ལྷན་ཅིག་སྐྱེས་དགའ་སྟེ། །ལེགས་པར་བདེ་བའི་ཐབས་སུ་སྦྱོར། །མཐོ་རིས་ས་སྟེང་སོགས་འཇིགས་རྟེན། །སྐད་ཅིག་གིས་ནི་སྐུ་གཅིག་གྱུར། །འཁོར་ལོ་སྡོམ་ལས་དཀའ་ཀུན་གསུངས། །དཔའོ་མོ་གཉིས་མེད་ཡང་དག་ལྡན། །ལྷ་རྣམས་སེམས་ཀྱི་རྣམ་པར་སྣང༌། །ལྷན་ཅིག་སྐྱེས་ནས་འཁོར་ལོའི་དབུས། །སྙིང་རྗེ་ཆེ་ལྡན་རྣལ་འབྱོར་
༄། །པས། །ཕྱི་ནང་བདག་ཉིད་མཆོད་པ་ཡིས། །དཀྱིལ་འཁོར་ཁྱད་བདག་ལེགས་པར་མཆོད། །སྦྱིན་བདག་ལ་སོགས་མི་དམིགས་པས། །མཐའ་གསུམ་སྦྱོར་བས་ལེགས་པར་གནས། །གང་དུ་མཆོད་ཅིང་སྟོད་པ་དེར། །རྒྱུད་རྣམ་ལས་ནི་མཐོང་བའོ། །འདི་དོན་ལེགས་པར་དཔྱད་ནས་ནི། །མཉམ་པར་བཞག་ནས་དཔའ་བོ་མཆོད། །དཔལ་ལྡན་རྡོ་རྗེ་མཁའ་འགྲོ་མཆོག་གི་རྣལ་འབྱོར་མ་ཡིས་མགུལ་ནས་འཁྱུད། །དཀུ་ལ་དཔའ་བོའི་ཕྲེང་བལ་ལེགས་པར་བྱས་ཤིང་རྣམ་པ་སྣ་ཚོགས་གཟུགས། །འཁོར་ལོ་ལ་གནས་བདེ་མཆོག་སྙིང་རྗེ་ཆེན་པོའི་སྟོབས་ཀྱིས་བརླབ། ཁྱབ་བདག་ཁྱོད་ཀྱི་ཞབས་ཀྱི་པདྨར་རྟག་ཏུ་ཕྱག་འཚལ་ལོ། །རལ་པ་ལ་ནི་མི་སྐྱོད་པས་མཛེས་འབར་བའི་ཕྱག་རྒྱས་རྣམ་པར་བརྒྱན། །སངས་རྒྱས་ཀྱི་གཞི་རུ་གྱུར་ཅིང་དམ་པའི་དོན་དུ་གསུངས་པའོ། །བདག་གི་བླ་མའོ་བློས་གསུངས་པ། །སྣ་ཚོགས་རྡོ་རྗེ་རལ་བའི་སྟེང༌། །དེ་ནི་དབང་བསྐུར་བར་གསུངས་པ། །བརྟུལ་ཞུགས་སྤྱོད་པའི་རིམ་ལས་འོང༌། །ཟུར་བཞི་འཁོར་ལོ་ཆེན་པོ་ནི། །འདྲེན་པ་རིན་ཆེན་འབྱུང་ལྡན་ནོ། །པདྨ་འདབ་བརྒྱད་དེ་བཞིན་དུ། །རལ་གྲི་དོན་ཡོངས་གྲུབ་པའོ། །ཁྭ་སོགས་མཆོག་གི་ལྷ་མོ་རྣམས། །རྡོ་རྗེ་ལྕགས་ཀྱུ་ལ་སོགས་བསྣམས། །ལུགས་གཞན་བསྒོམ་པར་བྱ་བའམ། །བརྒྱད་པོ་རོ་ཡི་སྟེང་ན་བཞུགས། །ཁྭ་ལ་སོགས་པའི་ལྷ་མོ་རྣམ། །གསུངས་པ་ཇི་བཞིན་དེ་ཡི་ཞལ། །བདག་གི་བླ་མའི་རིམ་ལས་འོངས། །རྒྱུ་དེ་ཡིས་ནི་བྲིས་པ་ཡིས། །གཞན་དག་ལྷ་མོ་རྣམས་ཀྱི་ཞལ། །བུད་མེད་གདོང་ལྟ་བུ་ཡིན་ཟེར། །རྟག་ཏུ་རྣལ་འབྱོར་བ་ཡིས་ནི། །ལུགས་གཉིས་གང་འདོད་བླང་བར་བྱ། །ཀེང་རུས་ཆེན་པོ་དང་ཀེང་རུས། །རྟ་མགྲིན་དང་ནི་གླང་སྣ་མ། །བྱ་གསོང་མ་དང་རྟ་རྣམ་སོགས། །གསུངས་པ་ཇི་བཞིན་འདི་དག་བསྒོམ། །སྣ་ཚོགས་སྤྲུལ་པའི་གཟུགས་ཀྱིས་ནི། །དཔའ་བོ་ལ་སོགས་རབ་ཏུ་གྲགས། །གསུངས་པ་ཇི་བཞིན་རྣམ་རོལ་པར། །དཔལ་དན་བདེ་མཆོག་འདི་དག་བསྒོམ། །སྔོན་དུ་ཕུང་པོ་བྱིན་བརླབས་ནས། །ཇི་སྲིད་མཆོད་དང་བསྟོད་འགྱུར་བ། །བསྐྱེད་པའི་དང་པོའི་སྦྱོར་བ་སྟེ། །ཆུང་ངུའི་སྦྱོར་བར་མངོན་པར་བརྗོད། །རི་རབ་ལ་གནས་ས་བོན་རྫོགས། །དཀྱིལ་
༄། །འཁོར་ལ་སོགས་རྣམ་བསྒོམ་པ། །བློ་ཡི་དབྱེ་བས་བྱས་པ་ནི། །ཤིན་ཏུ་སྦྱོར་བའི་མཚན་ཉིད་དོ། །སྐད་ཅིག་གཅིག་མངོན་རྫོགས་བྱང་ཆུབ། །ཡེ་ཤེས་རྟོགས་པའི་མཚན་ཉིད་ནི། །རྣལ་འབྱོར་པས་རྟག་རྣལ་འབྱོར་ཆེར། །ཆེན་པོ་ཞེས་ནི་རབ་ཏུ་གྲགས། །རྣལ་འབྱོར་ལྷག་པའི་སྦྱོར་དབུས་སུ། །རྣལ་འབྱོར་ཆེན་པོ་རྣམ་པར་གནས། །ཆེན་པོའི་ཡང་ནི་ཆེན་པོ་རུ། །རྟག་ཏུ་རྣལ་འབྱོར་ཀུན་ཤེས་བྱ། །རྣམ་པ་ཀུན་གྱི་མཆོག་ལྡན་ཞིང༌། །ལྷན་ཅིག་སྐྱེས་པའི་དགའ་བས་གང༌། །དཔལ་ལྡན་དཔའ་བོ་ཀུན་གྱི་གཞི། །རང་བྱུང་རྣལ་འབྱོར་ཐམས་ཅད་རིག །དཔལ་ལྡན་སྨད་འཚོང་ཞབས་ཀྱིས་ནི། །བྱིན་གྱིས་བརླབ་པའི་མཚན་ཉིད་གསུངས། །དེ་བས་བླ་མ་མཉེས་བྱས་ནས། །རྣལ་འབྱོར་ཐམས་ཅད་ལེགས་པར་བརྩམ། །དགོད་པ་དང་ནི་དུ་བ་ཉིད། །ཤིན་ཏུ་ཡིད་འཕྲོག་པ་ཡི་གར། །སྣ་ཚོགས་ཀུན་བྱེད་ཐམས་ཅད་མཁྱེན། །རྣལ་འབྱོར་མ་ཡི་ཚོགས་ཀྱིས་མཛེས། །འདི་ཉིད་ལས་ནི་གང་གསུངས་པ། །མཉེས་བྱེད་རྣམ་པར་དག་པ་དང༌། །གསལ་བྱེད་ཡོན་ཏན་ལྡན་པའི་མི། །བྱང་ཆུབ་ཕྱོགས་དང་གོ་ཆར་བཅས། །གོ་ཆ་ཆེན་པོར་ཡང་དག་ལྡན། །ཐོག་མར་འདི་རྣམས་རབ་ཏུ་བྱ། །གྲུབ་ན་ཡོངས་སུ་སྤང་བ་དང༌། །ཡི་གེ་གསུམ་གྱི་ཆོ་ག་ཡིས། །གྲུབ་ན་དེ་ལ་བཀོད་བྱ་སྟེ། །འཁོར་ལོ་གསུམ་གྱི་རང་བཞིན་དུ། །སྐུ་གསུང་སྦྱོར་བས་དག་པ་བྱ། །ཨོཾ་ནི་སྐུ་ཡི་འཁོར་ལོ་སྟེ། །ཡི་གེ་ཨཱཿ་ནི་ངག་ཏུ་གནས། །ཧཱུཾ་ནི་སེམས་ལ་རྣམ་དགོད་པ། །བྱས་ནས་ཆོ་ག་སྤང་བར་བྱ། །རྟོག་པའི་དབང་གིས་ལེགས་བྱུང་བ། །སེམས་ཅན་གཟུང་བའི་རྒྱུ་ཡིན་ནོ། །ཡི་གེ་གསུམ་གྱི་དགོད་པ་འདི། །དེ་ཉིད་ཀྱི་ནི་གཟུགས་སུ་སྦྱོར། །དེ་བཞིན་དུ་ཡང་གསུངས་པ་དང༌། །སྐུ་ཡི་ཡི་གེ་སྐྱེ་བ་མེད། །གསུང་དང་ཐུགས་ཀྱང་ཡི་གེ་མེད། །ནམ་མཁའི་རྡོ་རྗེ་རྟོགས་ལས་བྱུང༌། །ལོག་པར་གཟུང་བས་ཟིན་པའོ། །ཨོཾ་ནི་ཐམས་ཅད་གསལ་བྱེད་དོ། །ཧཱུཾ་ཧཱུཾ་ཕཊ་དང་ཡང་དག་ལྡན། །དངོས་གྲུབ་བསྒྲུབ་པའི་རྒྱུ་རུ་ནི། །མིང་བཟླས་པ་ནི་ལེགས་པར་བརྩམ། །སྟོང་པ་ཉིད་ཀྱི་སྔགས་བརྗོད་ཅིང༌། །གནོད་མཛེས་རྒྱལ་པོ་དེ་བཞིན་ནོ། །རབ་དྲ་བ་བསམ་བྱས་ཤིང༌། །རྡོ་རྗེ་ས་གཞི་དེ་བཞིན་ནོ། །རླུང་དང་མེ་ནི་ཡང་
༄། །དག་རྫོགས། །ཆུ་དང་ས་ཡི་དཀྱིལ་འཁོར་ལ། །རི་རབ་སྣ་ཚོགས་རྡོ་རྗེ་དང༌། །སྣ་ཚོགས་པདྨ་ཡང་དག་ལྡན། །དཔེ་བྱད་བརྒྱད་ཅུ་ལས་བྱུང་བ། །དེ་སྟེང་ཟླ་བའི་དཀྱིལ་འཁོར་ཏེ། །ཟླ་བ་ལ་གནས་ཧཱུཾ་ལས་བྱུང༌། །ཧེ་རུ་ཀ་ཡི་དཀྱིལ་འཁོར་རོ། །ཕག་མོ་ལ་སོགས་ཡང་དག་ལྡན། །ཁ་དོག་སྣ་ཚོགས་སོགས་ཀྱིས་བརྒྱན། །འཇིགས་བྱེད་ཆེན་པོ་གཡོན་བརྐྱང་བ། །སྒོ་སྐྱོང་རྣམས་དང་ཡང་དག་ལྡན། །དཔའ་དྲུག་རྣལ་འབྱོར་མ་གོ་ཆ། །གོ་ཆ་ཆེན་པོ་ཡང་དག་ལྡན། །དངོས་གྲུབ་ཀུན་མཛད་དཔའ་བོ་སྟེ། །བདེ་མཆོག་མཛེས་པ་བསྒོམ་པར་བྱ། །སྔོན་དུ་ཡི་གེ་གསུམ་བཀོད་དེ། །བཟླས་པ་ལེགས་པར་བརྩམ་པར་བྱ། །འདི་ལྟར་དཔལ་ལྡན་བདེ་མཆོག་ནི། །བསྒོམ་པ་རྣལ་འབྱོར་གཞན་དག་ཟེར། །དངོས་པོ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེས་ནི་དེ་ཡི་རང་བཞིན་འགྱུར། །སྣ་ཚོགས་ནོར་བུ་ཇི་བཞིན་ནོ། །ཨོཾ་ན་མོ་བྷ་ག་བ་ཏེ་བཱི་རེ་ཤཱ་ཡ་ཧཱུཾ་ཧཱུཾ་ཕཊ། ཨོཾ་མ་ཧཱ་ཀ་ལྤཱ་གནི་ས་ནན་བྷཱ་ཡ་ཧཱུཾ་ཧཱུཾ་ཕཊ། ཨོཾ་ཛ་ཊཱ་མ་ཀུ་ཊོ་ཏྐ་ཊཱ་ཡ་ཧཱུཾ་ཧཱུཾ་ཕཊ། ཨོཾ་དཾ་ཥྚྲཱ་ཀ་རཱ་ལོ་གྲ་བྷཱི་ཥ་ཎ་མུ་ལཱ་ཡ་ཧཱུཾ་ཧཱུཾ་ཕཊ། ཨོཾ་ས་ཧ་སྲ་བྷུ་ཛ་བྷཱ་སུ་རཱ་ཡ་ཧཱུཾ་ཧཱུཾ་ཕཊ། ཨོཾ་པ་ར་ཤུ་པཱ་ཤོ་དྱ་ཏ་ཤཱུ་ལ་ཁ་ཊྭཱཾ་ག་དྷཱ་རི་ཎེ་ཧཱུཾ་ཧཱུཾ་ཕཊ། ཨོཾ་བྱཱ་གྷྲྰ་ཛི་ན་ཨམྦ་ར་དྷ་རཱ་ཡེ་ཧཱུཾ་ཧཱུཾ་ཕཊ། ཨོཾ་མ་ཧཱ་དྷུ་མྲཱ་ནྡྷ་ཀཱ་ར་ཝ་པུ་ཥཱ་ཡ་ཧཱུཾ་ཧཱུཾ་ཕཊ། ཨོཾ་ཀ་ར་ཀ་ར་ཧཱུཾ་ཧཱུཾ་ཕཊ། ཨོཾ་ཀུ་རུ་ཀུ་རུ་ཧཱུཾ་ཧཱུཾ་ཕཊ། ཨོཾ་ཀུ་རུ་ཀུ་རུ་ཧཱུཾ་ཧཱུཾ་ཕཊ། ཨོཾ་བནྡྷ་བནྡྷ་ཧཱུཾ་ཧཱུཾ་ཕཊ། ཨོཾ་ཏྲཱ་ས་ཡ་ཏྲཱ་ས་ཡ་ཧཱུཾ་ཧཱུཾ་ཕཊ། ཨོཾ་ཀྵོ་བྷ་ཡ་ཀྵོ་བྷ་ཡ་ཧཱུཾ་ཧཱུཾ་ཕཊ། ཨོཾ་ཧྲཽཾ་ཧྲཽཾ་ཧཱུཾ་ཧཱུཾ་ཕཊ། ཨོཾ་ཧྲཿ་ཧྲཿ་ཧཱུཾ་ཧཱུཾ་ཕཊ། ཨོཾ་ཕེཾ་ཕེཾ་ཧཱུཾ་ཧཱུཾ་ཕཊ། ཐུགས་ཀྱི་འཁོར་ལོའི་དཔའ་བོ་རྩ་བའི་སྔགས་སོ།། །།ཨོཾ་ད་ཧ་ད་ཧ་ཧཱུཾ་ཧཱུཾ་ཕཊ། ཨོཾ་པ་ཙ་པ་ཙ་ཧཱུཾ་ཧཱུཾ་ཕཊ། ཨོཾ་བྷ་ཀྵ་བྷ་ཀྵ་ཧཱུཾ་ཧཱུཾ་ཕཊ། ཨོཾ་བ་ཤ་རུ་དྷི་ར་ཨནྟྲ་མཱ་ལཱ་བ་ལ་མྦི་ནེ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་ས་པྟ་པཱ་ཏཱ་ལཱ་ག་ཏ་བྷུ་ཛཾ་ག་ས་རྤཾ་པཱ་ཏ་རྫ་ཡ་ཏ་རྫ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ཀ་ཌྜྷྱ་ཨཱ་ཀ་ཌྜྷྱ་ཧཱུཾ་ཧཱུཾ་ཕཊ། ཨོཾ་ཧྲིཾ་ཧྲིཾ་ཧཱུཾ་ཧཱུཾ་ཕཊ། ཨོཾ་ཀྵྨཱཾ་ཀྵྨཱཾ་ཧཱུཾ་ཧཱུཾ་ཕཊ། གསུང་གི་འཁོར་ལོའི་དཔའ་བོའི་རྩ་བའི་སྔགས་སོ།། །།ཨོཾ་ཧཾ་ཧཾ་ཧཱུཾ་ཧཱུཾ་ཕཊ། ཨོཾ་ཧིཾ་ཧིཾ་ཧཱུཾ་ཧཱུཾ་ཕཊ། ཨོཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ། ཨོཾ་ཀི་ལི་ཀི་ལི་ཧཱུཾ་ཧཱུཾ་ཕཊ། ཨོཾ་སི་ལི་སི་ལི་ཧཱུཾ་ཧཱུཾ་ཕཊ། ཨོཾ་ཙི་ལི་ཙི་ལི་ཧཱུཾ་ཧཱུཾ་ཕཊ། ཨོཾ་དྷི་ལི་དྷི་ལི་ཧཱུཾ་ཧཱུཾ་ཕཊ། ཨོཾ་ཧི་ལི་ཧི་ལི་ཧཱུཾ་ཧཱུཾ་ཕཊ། སྐུའི་
༄། །འཁོར་ལོའི་དཔའ་བོའི་རྩ་བའི་སྔགས་སོ། །ཀ་ར་ལ་སོགས་དཔའ་མོ་ཡི། །དབང་ཕྱུག་གིར་གྲགས་གཞན་དག་ཟེར། །བདག་གི་བླ་མའི་ལུགས་ཉིད་ཀྱིས། །དཔའ་བོ་རྣམས་ཀྱི་སྔགས་སུ་བཤད།། །།ཨོཾ་ན་མོ་བྷ་ག་བ་ཏི་བཛྲ་བཱ་རཱ་ཧཱི་ཨ་པ་ར་ཛི་ཏེ་ཏྲཻ་ལོ་ཀྱ་མཱ་ཏེ་བི་དྱེ་ཤྭ་རི་སརྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲེ་བཛྲཱ་ས་ནེ་ཨ་ཛི་ཏི་ཨ་པ་རཱ་ཛི་ཏེ་ཝ་ཤྱཾ་ཀ་རི་ནེ་ཏྲ་བྷྲཱ་མ་ཎི། བི་ཥ་རོ་ཥ་ཀྲོ་དྷ་ཀ་རཱ་ལི་ཏྲི་ཏེ་ཏྲཱི་ཀཱ་མ་ནཱི་པྲ་བྷེ་ད་ཎཱི་ཨ་པ་རཱ་ཛ་ཡ་བི་ཛ་ཡ་ཛ་མྦྷ་ནི་སྟྭ་མྦྷ་ནི་མོ་ཧ་ནི། བཛྲ་བཱ་རཱ་ཧཱི་མ་ཧཱ་ཡོ་གི་ནཱི། ཀའ་མེ་ཤྭ་རི་ཁ་གེ །ཏ་དྱ་ཐཱ། པྲོ་ཏཾ་གེ་པྲོ་ཏཾ་གེ །ཧ་ན་ཧ་ན་པྲཱ་ཎཱཾ། ཀིཾ་ཀི་ནི་ཁིཾ་ཁི་ནི་དྷུ་ན་དྷུ་ན། བཛྲ་ཧ་སྟེ། ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་ག་ཀ་པཱ་ལ་དྷཱ་རི་ཎི་མ་ཧཱ་པི་ཤི་ཏ་མཱཾ་སཱ་ས་ནི། མ་ནུ་ཥཱ་ནྟྲ་པྲཱ་བྲི་ཏེ་སནནི་དྷྱཾ་ན་ར་ཤི་རོ་མཱ་ལཱ་གྲནྠི་ཏ་དྷ་རི་ཎི་སུ་མྦྷ་ནི་སུ་མྥེ། ཧ་ན་ཧ་ན་པྲཱ་ཎཱཾ་སརྦ་པཱ་པ་སྟྭ་ནཱཾ། སརྦ་པ་ཤུ་ནཾ་མ་ཧཱ་མཱཾ་ས་ཙྪེ་ད་ནི་ཀྲོ་དྷ་མཱུ་རྟི། དཾ་ཥྚྲཱ་ཀ་རཱ་ལི་ནི་མ་ཧཱ་མ་དྲེ་ཤྲཱི་ཧེ་རུ་ཀ །དེ་བ་སྱཱ་གྲ་མ་ཧི་ཥི། ས་ཧ་སྲ་ཤི་རེ་ས་ཧ་སྲ་བཱ་ཧཱ་བེ། ཤ་ཏ་ས་ཧ་སྲཱ་ན་ནེ་ཛྭ་ལི་ཏ། ཏེ་ཛ་སྱ་ཛྭ་ལ་མུ་ཁི་པིངྒ་ལ་ལོ་ཙ་ནེ། བཛྲ་ཤ་རཱི་རེ་བཛྲཱ་ས་ནི། མི་ལི་ཏ་ཙི་ལི་ཏ། ཧེ་ཧེ་ཧཱུཾ་ཧཱུཾ་ཁ་ཁ་དྷུ་དྷུ་རུ་རུ་དྷུ་རུ་དྷུ་རུ་མུ་རུ་མུ་རུ། ཨ་དྭེ་ཏེ་མ་ཧཱ་ཡོ་གི་པ་ཋི་ཏ་སིདྡྷེ། དྲེཾ་དྷཾ་དྲེཾ་དྷཾ། གྲཾ་གྲཾ། ཧེ་ཧེ། ཧ་ཧ། བྷཱི་མེ། ཧ་ས་ཧ་ས། བཱི་རེ། ཧ་ཧ་ཧོ་ཧོ་ཧཱུཾ་ཧཱུཾ་ཏྲཻ་ལོ་ཀྱ་བི་ནཱ་ས་ནི། ཤ་ཏ་ས་ཧ་སྲ་ཀོ་ཊཱི་ཏ་ཐཱ་ག་ཏ་པ་རི་བཱ་རེ་ཧཱུཾ་ཕཊ། སིཾ་ཧ་རཱུ་པེ་ཁཿ་ག་ཛ་རཱུ་པེ་གཿ། ཏྲཻ་ལོ་ཀྱེ་ད་རེ་ས་མུ་དྲ་མེ་ཁ་ལེ། གྲ་ས་གྲ་ས་ཧཱུཾ་ཧཱུཾ་ཕཊ། བཱི་ར་དྭེ་ཏེ་ཧཱུཾ་ཧཱུཾ་ཧཱ་ཧཱ་མ་ཧཱ་པ་ཤུ་མོ་ཧ་ནི་ཡོ་གེ་ཤྭ་རི་ཏྭཾ་དཱ་ཀི་ནི། ལོ་ཀི་ནི་ལོ་ཀི་ཀཱ་ནཱཾ་བནྡྷ་ནི་སྡྱཾ་བི་དྱེ་ཧཱུཾ་ཕཊ། བྷཱུ་ཏ་ཏྲཱ་ས་ནི་མ་ཧཱ་བཱི་རེ་པ་ར་མ་སིདྡྷྱེ་མི་དྱེ་ཤྭ་རི་ཕཊ་ཧཱུཾ་ཧཱུཾ་ཕཊ་ཕཊ་སྭཱ་ཧཱ།། །།རྣལ་འབྱོར་པས་བཟླས་སྔགས་འདི་རྣམས། །འདོད་པའི་དོན་ཀུན་ལེགས་པར་སྟེར། །རྣལ་འབྱོར་མ་དང་དཔའ་བོར་ལྡན། །གཞན་བདེ་མཆོག་ལས་བྱུང་བའོ། །ཨིནྡྲ་བྷཱུ་ཏིའི་རིམ་ཉིད་དང༌། །སཉྩ་རེ་དང་སྨད་འཚོང་གཞུང༌། །དཔའ་བོ་དང་ནི་ལྷ་རྣམས་ནི། །ཕྱག་གཉིས་ཞལ་གཅིག་ཉིད་དུ་བསྟན། །ཛ་ལནྡྷ་ར་དཔལ་ཞབས་དང༌། །ཀཙྪ་པ་དའི་ལུགས་ཀྱིས་ཀྱང༌། །དཔའ་བོ་རྣམས་དང་རྣལ་འབྱོར་མ། །ཞལ་གཅིག་ཕྱག་གཉིས་རབ་ཏུ་གྲགས། །མཁའ་
༄། །འགྲོ་མ་སོགས་དཔའ་བོར་བཅས། །སྒོ་སྐྱོང་རྣམས་དང་ཡང་དག་ལྡན། །ཞལ་གཅིག་ཕྱག་བཞི་རབ་ཏུ་གྲགས། །ཁྲོ་བོའི་གཟུགས་ཅན་ཧཱུཾ་དང་བཅས། །རབ་གཏུམ་མ་སོགས་ལྷ་མོ་རྣམས། །ཁ་དོག་སྣ་ཚོགས་བྱེ་བྲག་དང༌། །ཕྱག་གཉིས་པ་དང་ཞལ་གཅིག་པ། །ཙཪྻ་པ་ཡི་གཞུང་ཡིན་ནོ། །ཡང་ན་སེམས་ཀྱི་རྣམ་དག་པས། །གཅིག་ཏུ་ཁ་དོག་སྔོན་པོར་གནས། །དཔའ་བོ་ལྷ་མོ་རྣམས་དང་ལྡན། །གཞུང་འདི་ལེགས་ཞེས་ཁ་ཅིག་གསུངས། །སྐུ་གསུམ་དག་པའི་དབྱེ་བ་ཡིས། །ཁ་དོག་གསུམ་དུ་རྣམ་པར་གནས། །གང་ཕྱིར་འཁོར་ལོ་གསུམ་གསུངས་པ། །དེ་ཕྱིར་ཁ་དོག་གསུམ་དུ་དབྱེ། །ལུགས་འདི་རྣམས་ནི་གང་འདོད་པ། །རྣལ་འབྱོར་རིགས་པས་དེ་བསྟེན་བྱ། །ཕྱག་གཉིས་ཐོག་མ་ནས་བརྩམས་ནས། །ཇི་སྲིད་འབུམ་གྱི་ཕྱག་དང་ཞལ། །ཕྱག་ཞལ་མཐའ་ཡས་དངོས་གྲུབ་ཕྱིར། །བསམ་མི་ཁྱབ་སྦྱོར་གྱིས་བསམ་བྱ། །དེ་ལྟར་བློ་བཟང་གིས་ཤེས་བྱ། །སྤྱོད་དང་བྲལ་བས་སྦྱར་བ་མིན། །འདི་ཀུན་མཆོག་ཏུ་དགའ་བ་སྟེ། །གང་ཞིག་བསྒོམ་བྱ་དེ་འབྲས་བཟང༌། །སྔོན་དུ་གུས་པའི་སེམས་ཀྱིས་ནི། །བླ་མས་གསུངས་པ་བླང་བར་བྱ། །འབར་བའི་ཕྱག་རྒྱ་བདེ་མཆོག་ལས། །སློབ་དཔོན་ཁ་ཅིག་གིས་གསུངས་པ། །ཧེ་རུ་ཀ་འབྱུང་རྒྱུད་ལས་གསུངས། །བདེ་མཆོག་ལ་ནི་གནས་པ་མིན། །བདག་གིས་མ་བྲིས་པ་དེས་ན། །དཔའ་བོ་རྡོ་རྗེ་བཟོད་པ་མཛོད། །མན་ངག་གིས་ནི་ཕག་མོ་ནི། །འབར་བའི་ཕྱག་རྒྱ་ཞེས་སུ་གྲགས། །བདེ་མཆོག་གཏོར་མའི་ལས་དང་ནི། །དཀྱིལ་འཁོར་དགུག་པའི་དོན་གྱིས་སོ། །ཧེ་རུ་ཀ་འབྱུང་རྒྱུད་དུ་ནི། །ཧེ་རུ་ཀ་ཡི་ཕྱག་ན་གནས། །དཔའ་བོའི་བདག་པོའི་སྔགས་གསུངས་གོས་ཀྱི་དོན་གྱིས་སྟག་གི་པགས་པ་རྣམས། །བདག་གི་བླ་མ་ཡིས་བསྟན་ལྷན་ཅིག་སྐྱེས་པ་གོས་མེད་རྡོ་རྗེ་མཁའ་འགྲོའི་གཟུགས། །རྟག་ཏུ་དྲག་པོའི་དུད་མདོག་དཀར་ཞིང་དམར་བའི་སྐུ་ནི་རིགས་དྲུག་བསྡུས་པའི་དོན་གྱིས་སོ། །ཁ་དོག་ཐོག་མ་འདྲ་བའི་གཟུགས་ཏེ་ཐོག་མའི་ཉི་མ་ལྟ་བུའི་ཞལ་ཏེ་ལྷ་མོ་སྐྲ་གྲོལ་བའོ། །ལུགས་གཉིས་གྱུར་པ་དཔྱད་ནས་སེམས་ལ་གང་འདོད་དེ་དག་བྱ། །གཡས་ན་རྩ་གཞན་ཁྲག་སྟེ་མྱུར་དུ་འབབ་པ་མེ་ཏོག་ལྡན་པའོ། །
༄། །གཡོན་ན་ཁུ་བ་སྟེར་བ་རྒྱ་མཚོ་ལྟ་བུ་དེ་ནི་དཔའ་བོའི་རང་བཞིན་ནོ། །རྐང་དང་རུས་པ་རྩ་དང་ཆུ་དང་ལྔ་པ་ཁུ་བར་ལྡན་པ་འདི་ནི་ཕ་རུ་གྱུར། །མ་ནི་པགས་པ་ཤ་དང་ཁྲག་དང་སྙིང་དང་མེ་དང་ལྷན་ཅིག་པ་སྟེ་གང་འདི་གཉིས་པོ་དངོས་གྲུབ་པོ། །མགོན་པོ་དཔལ་ལྡན་ཧེ་རུ་ཀ་འདི་བསྐྱེད་པས་བསྐྱེད་པ་གང་ཞིག་ཕ་དང་བྱེ་བྲག་མེད། །འདིར་ནི་དཔལ་ལྡན་བདེ་མཆོག་ཅེས་བྱ་ཡོན་ཏན་ཀུན་གྱི་གཞི་སྟེ་དངོས་པོ་ཀུན་གྱི་རང་བཞིན་ནོ། །དེ་ལྟར་ཤེས་ནས་དེ་ཡི་གཟུགས་ནི་ས་གསུམ་བདེ་བ་སྟེར་བའི་དེ་ཉིད་རྣལ་འབྱོར་བ་ཡིས་བསྒོམ། །འབྱུང་གནས་སྒྲ་ཡི་གཟུགས་ལས་ནི། །རྣམ་པར་བྱུང་སོགས་གང་ཤེས་པ། །དེ་ཡི་དོན་ནི་བདག་གིས་བསྟན། །རབ་ཏུ་འཇུག་པའི་མཚན་ཉིད་ནི། །རབ་འཇུག་དཀྱིལ་འཁོར་སོགས་རྣམས་ཀྱི། །ཕྱི་རོལ་རྣམ་པའི་མཚན་ཉིད་གཅིག །དངོས་པོ་ཀུན་གྱི་རང་བཞིན་ཏེ། །སངས་རྒྱས་ཀུན་གྱིས་དེ་དག་གསུངས། །གང་ཞིག་ལྡོག་པར་རྟག་གསུང་བ། །འཁོར་ལོ་བདེ་མཆོག་ལ་ལེགས་གནས། །དེ་ནི་ལྷན་ཅིག་སྐྱེས་འདྲི་དངོས། །རྟག་ཏུ་སྙིང་ལ་གནས་པའོ། །ཕྱི་ནང་བདག་ཉིད་མཉམ་པའི་དཀྱིལ་འཁོར་འཁོར་ལོ་སེམས་ལ་རྣམ་དགོད་བསྟན། །དཔལ་ལྡན་ཧེ་རུ་ཀ་རོལ་ལུས་ལ་གནས་པར་ད་ལྟ་བསྟན། །རྣམ་དག་ཧེ་རུ་ཀ་ཡི་ཡན་ལག་ལྷན་ཅིག་སྐྱེས་གནས་མཉམ་པར་གཞག །ཕྱིས་ནི་རྣལ་འབྱོར་པ་ཡི་རིམ་གྱིས་ལུས་སྐྱེས་རྣམ་པར་བསྒོམ། །ལྷན་ཅིག་སྐྱེས་མཉམ་མ་ལུས་ཕུར་བུ་བགས་པ་བཅིངས་པར་རབ་ཏུ་སྦྱར། །བརྟན་ཞིང་མཁྲེགས་པས་བཅིངས་པའི་རུས་པའི་ཕྲེད་བ་དྲ་བའོ། །སྣ་ཚོགས་ཀྱིས་མཛེས་སྣ་ཚོགས་ཕྱག་རྒྱས་བརྒྱན་པའི་སྐུ། །གོ་ཆ་མཁྲེགས་པས་དག་པ་དེ་ནི་གོ་ཆ་ཆེན་པོར་ལྡན། །གང་ཞིག་དམིགས་དང་བྲལ་བའི་རྩ་ནི་སེམས་ཅན་ཀུན་ཕན་འདོད། །ལྷ་དང་ལྷ་མིན་མི་དང་བཅས་པ་འདི་ཀུན་དེ་ཡིས་ཁྱབ། །བྷེ་རམ་པ་ཡི་རླུང་ནི་རྐང་པའི་མཐིལ་དུ་ཤིན་ཏུ་ལེགས་པར་གནས། །ལྟེ་བར་སོང་བའི་འབར་བའི་དཀྱིལ་འཁོར་དམར་པོའི་གཟི་བརྗིད་ཅན། །ལྟོ་བར་དཀར་བའི་ཆུ་ཡི་གཞི་ནི་ཡིད་འོང་གཟུགས་ཏེ་སྙིང་གར་དབང་པོས་རྣམ་མཛེས་སེར་པོའོ། །མགྲིན་པའི་སྟེང་ན་རི་བོའི་མཆོག་ནི་བརྒྱད་པ་དང་ལྡན་རི་རབ་སྟེ། །བདུན་
༄། །བསྐོར་ཟླ་བ་ཉི་མ་དབུས་ན་འཆར་ཞིང་ནུབ་པའོ། །པདྨའི་འདབ་མ་སུམ་ཅུ་རྩ་དྲུག་ལྡན་པར་གྱུར་པའི་རྡོ་རྗེའི་དབུས། །གྲུབ་པའི་ཨཱ་ལི་ཀཱ་ལི་ལས་བྱུང་ཧཱུཾ་སྒྲོགས་མཛེས་པའི་མགོ །དེར་གནས་གསེར་གྱི་གདན་ནི་སྣ་ཚོགས་དབུས། །མིང་ནི་དང་པོ་ཞེས་བྱ་ལས་ནི་ལྷན་ཅིག་སྐྱེས་པ་དྲི་མེད་ཟླ་བའི་འོད། །ཡན་ལག་ཀུན་གྱི་མཚམས་སུ་འགྲོ་བར་འགྱུར་བའི་རིམ་པ་ཡིས། །བསྐྱེད་པའི་པདྨའི་སྣ་ཡིས་དབུས་ཕྱོགས་སུ། །ལེགས་པར་བསྐུལ་བས་མགོ་བོ་ཐོག་མ་མེད་པར་གྱུར་པའི་སངས་རྒྱས་སྐྱེས། །སུམ་ཅུ་རྩ་དྲུག་རོ་དང་ལྡན་པ་མཛེས་པ་ལེགས་པར་གྱུར་པའི་རྩ་རྣམས་ཀྱིས། །མི་མཐུན་ཕྱོགས་ནི་བཞད་པར་གྱུར་ནས་ཤིན་ཏུ་རྣམ་པར་དག་པའི་ཁམས། །མཁའ་འགྲོ་མ་ཡི་དྲ་བ་ཞེས་པའི་སྒྲ་ཡི་དོན་ནི་དེ་ལྟ་བུའོ། །རྒྱ་མཚོའི་ཆུ་ནི་ཤིན་ཏུ་རྣམ་པར་སྣ་ཚོགས་འགྲམ་ན་རི་ཡི་དབང་པོར་ལྡན། །ཟབ་ཅིང་མཛེས་པའི་སྙིང་པོ་ཐོག་མར་གྲུབ་པའི་དུར་ཁྲོད་དོ། །རྒྱལ་མཚན་སྣ་ཚོགས་འཕན་དང་དྲིལ་བུའི་དོ་ཤལ་མཛེས། །གསུམ་དུ་བྱུང་བའི་འཁོར་ལོའི་དཀྱིལ་འཁོར་དེ་ནི་ལུས་ཡིན་ནོ། །མཆོག་ཏུ་མཛེས་ཤིད་ལེགས་པའི་སྐུད་པ་དང་ནི་རྡ་ཡབ་ཀྱིས་མཚན་པ། །དྲི་མ་མེད་པའི་མཚོན་ནི་རོལ་པས་རྣམ་པར་དག །བུམ་པ་ལ་སོགས་གནས་པ་དེ་ཡི་དངོས་དང་ལྡན་པས་ཁེངས། །ལྷན་ཅིག་སྐྱེས་གནས་སེམས་ལས་སྐྱེས་པས་བྲིས་པ་ཐལ་བའོ། །པདྨ་ལ་གནས་ཁྲོ་སྤངས་ཤིང༌། །གཙང་ཞིང་བརྩོན་པ་མཉམ་གཞག་པའི། །རྣལ་འབྱོར་ཡེ་ཤེས་མཉམ་ལྡན་པའི། །སེམས་ནི་ཧེ་རུ་ཀ་རུ་གསུངས། །རྒྱུད་ལྔ་དག་གི་འབྲས་དག་ནི། །རྡོ་རྗེ་ཞེས་སུ་མངོན་པར་བརྗོད། །དེར་གནས་ས་བོན་རྫོགས་པ་ནི། །དེ་དཔལ་ཧེ་རུ་ཀ་རུ་བརྗོད། །ཤྲཱི་ཡི་སྒྲ་ནི་གཉིས་མེད་དོན། །ཧེ་ནི་རྒྱུ་དང་བྲལ་བ་ཉིད། །རུ་ནི་གཟུགས་དང་བྲལ་བའི་དོན། །ཀ་ནི་གང་དུའང་མི་གནས་པའོ། །ཨཱ་ལི་ཀཱ་ལི་མཉམ་སྦྱོར་བ། །དཀར་པོ་དམར་བོའི་རང་བཞིན་ནོ། །ཤྲི་ཡིག་ཏུ་ནི་ལེགས་གནས་པ། །ཤིན་ཏུ་ཐམས་ཅད་བསྐྱེད་པའི་རྒྱུ། །ཤྲཱི་ཡི་བརྡ་ཡིས་བརྗོད་པ་ནི། །བྷ་གའི་དོན་དུ་མངོན་པར་བརྗོད། །སེམས་ནི་ཧེ་རུ་ཀ་ཉིད་དེ། །དཔལ་ལྡན་ཧེ་རུ་ཀ་ཞེས་གསུངས། །བཱ་ནི་དག་ལམ་འདས་པའི་སྒྲ། །རཱ་ནི་རྡུལ་དང་བྲལ་བ་ཉིད། །
༄། །ཧཱི་ནི་རྒྱུ་རྣམས་མི་དམིགས་པ། །ཕག་མོའི་སྒྲ་རུ་རབ་ཏུ་གྲགས། །རལ་པའི་རྩ་བ་ཞེས་གྲགས་པ། །བདེ་བ་སྐྱེད་པར་བྱེད་པའོ། །སྣ་ཚོགས་སེམས་ཅན་དོན་མཛད་ཕྱིར། །སྣ་ཚོགས་རྡོ་རྗེ་རྣམ་པར་གནས། །བྱང་ཆུབ་སེམས་ནི་ཟླ་བར་གསུངས། །དཔལ་ནི་བདེ་ཆེན་འཁོར་ལོས་སྒྱུར། །དེར་གནས་རྟག་ཏུ་འཛག་པ་ནི། །རྡོ་རྗེ་པདྨའི་མཐར་གནས་པའོ། །དུས་ཀུན་ཡོངས་སུ་རྫོགས་པ་རྒྱ་མཚོའི་ལམ་དུ་འབབ་པ་ལྟ་བུ་ཡི། །ལྟེ་བའི་འགྲམ་དུ་གནས་གྱུར་ཉི་མ་བཅུ་དྲུག་བསྟེན་པ་བསྐྱེད་པའོ། །སྟོང་པ་ལྟ་བུའི་རྣལ་འབྱོར་གྱིས། །ལྷ་དང་ལྷ་མིན་མིར་བཅས་རྣམས། །གཅིག་གི་རང་བཞིན་ལེགས་དག་པ། །སྡིག་མཛུབ་ལེགས་པའི་མཚན་ཉིད་དོ། །བྱང་ཆུབ་སེམས་ལས་བྱུང་གྱུར་ཅིང༌། །ཡན་ལག་ཀུན་ལ་རྣམ་པར་གནས། །དེ་ཕྱིར་རྟག་ཏུ་དག་པ་ཉིད། །ཕྱི་དང་ནང་དུ་གནས་པར་བསྟན། །ཡན་ལག་བཅུ་གཉིས་ལས་བྱུང་ཕྱིར།། ཕྱག་ནི་བཅུ་གཉིས་རྣམས་དང་ལྡན། །ཞལ་བཞི་རྣམས་སུ་ལེགས་བསྟན་པ། །རྣམ་ཐར་བཞི་པོ་དག་པ་ཉིད། །ལྷ་མོའི་གཟུགས་ཅན་མཁའ་འགྲོ་མ། །དུམ་སྐྱེས་མ་དང་ལཱ་མ་སྟེ། །གྲུབ་པའི་རྣལ་འབྱོར་མ་བཞི་པོ། །གཡོ་དང་མི་གཡོ་བ་རྣམས་སྐྱོང༌། །གཉིས་མེད་རྣམ་པའི་རྣལ་འབྱོར་གྱིས། །དབང་པོ་ལ་སོགས་གང་འཐུང་བ། །དེ་ནི་གསོལ་བ་ཞེས་སུ་བསྟན། །ཕྱག་རྣམས་ཀྱི་ནི་མཚན་ཉིད་ནི། །སྐུ་གསུང་དག་ཕྱིར་མདུང་ཐུང་སྟེ། །གླང་པོ་གཏི་མུག་རྣམ་པར་སྤངས། །དགྲ་སྟེ་ཞེ་སྡང་གཅོད་པ་སྟེ། །ལུས་དང་ངག་སེམས་ལས་བྱུང་བའོ། །སེམས་ཅན་དོན་གྱི་གྲི་གུག་རྣོ། །འཕྱར་བ་བརྩོན་འགྲུས་ཡང་དག་ལྡན། །རྟག་ཏུ་དགའ་བའི་རང་བཞིན་གྱིས། །ཌ་མ་རུ་ཡི་སྒྲ་རུ་བརྟག །རྡོ་རྗེ་སྟོང་ཉིད་མི་ཚིག་པའི། །ཡེ་ཤེས་ལྔ་ཡི་རང་བཞིན་ཉིད། །བྱང་ཆུབ་སེམས་ཀྱི་རང་བཞིན་ཕྱིར། །ཁ་ཊྭཱཾ་ཡན་ལག་ལ་བསྣམས་གནས། །བདེ་བ་བསྐྱང་ཕྱིར་ཐོད་པ་དང༌། །ཞགས་པ་ཡུལ་གྱི་ཡོན་ཏན་ཏེ། །མགོ་བོ་ཚངས་པའི་རང་བཞིན་ནོ། །དྲིལ་བུ་ཤེས་རབ་རང་བཞིན་ནོ། །ཡི་གེ་ལྔ་བཅུ་རྣམས་ཀྱིས་ནི། །མགོ་བོ་མཛེས་པའི་རང་བཞིན་ཉིད། །ཡན་ལག་བརྒྱན་པའི་མགོ་ཡི་ཕྲེང༌། །དངོས་གྲུབ་ཀུན་གཞི་བདག་ཉིད་ཅན། །མཆེ་བ་བཞི་
༄། །དང་མཉམ་ལྡན་པ། །བདུད་བཞི་རྣམ་པར་འཇོམས་པ་པོ། །ཟབ་བར་འཕྲོ་བ་དང་ལྡན་པའི། །རྟག་ཏུ་སོ་ཡི་ཕྲེང་བ་གཉིས། །ཕ་རོལ་ཕྱིན་དྲུག་རྣམ་དག་པའི། །ཕྱག་རྒྱ་དྲུག་གིས་བརྒྱན་པའོ། །ཕྱོགས་ཀྱི་གོས་ཀྱི་རང་བཞིན་གྱི། །གཟུགས་སུ་བྱུང་བའི་གོས་དང་བྲལ། །ཨཱ་ནི་ཀུན་ནས་འགྲོ་བ་ཀུན། །ལི་ལ་སྟོད་པར་སྦྱོར་བར་ཉིད། །དེ་ནས་གཡས་བརྐྱང་ཞབས་སུ་གྲགས། །ཧེ་རུ་ཀ་ཡི་བྱེ་བྲག་གོ །ཡན་ལག་གཡོན་པ་བསྐུམ་པ་ཞེས་པ་ཡི། །ཚིག་ཏུ་གསུངས་པའི་ལེགས་པར་ཐོབ་པའི་མཚན་ཉིད་ནི། །གཡས་བརྐྱང་བ་ཡིས་ཀུན་ནས་འཁོར་ལོའི་ཚོགས་ནི་དཔལ་ཧེ་རུ་ཀ་འབྱུང་བའོ། །སློབ་དཔོན་གཞན་གྱི་ལུགས་ཀྱིས་ཞབས་གཡས་བསྐུམ་པར་འདོད། །བློ་བཟང་གང་ཞིག་ཀྱང་ནི་གཞན་དུ་གར་གྱི་རྐྱང་པ་ཟེར་ཏེ་བདག་ནི་གཡོན་པར་འདོད། །གཡོན་པས་གཡོན་པའི་སྐྱེ་བོའི་རྒྱན་བྱས་དོན་ཀུན་སྟེར་བར་ནུས། །རྒྱལ་བྱེད་གཡོན་པས་འཚེ་བ་ཀུན་སྤངས་ལེགས་པའི་རྣལ་འབྱོར་པ། །དེ་ཕྱིར་ཆོ་གའི་ཐམས་ཅད་དགེ་བའི་གཡོན་པས་གཟུང༌། །གང་ཕྱིར་བདེ་མཆོག་འདྲེན་པས་ཐམས་ཅད་གཡོན་པ་ལས་བྱུང་བརྩམ། །སེམས་དང་སེམས་མེད་འགོག་པ་དགེ་བའི་ལམ་དུ་གང་ཞིག་བརྟགས་པའི་པདྨ་ལ། །རྡོ་རྗེའི་མཐའ་ལས་བྱུང་བ་མཉམ་ཞིང་རོ་གཅིག་པ་དང་མཐའ་ཡས་པའོ། །ཕག་མོ་མཆོག་ཏུ་སྦྱོར་བ་ལས་བྱུང་སྐྱེས་པ་གང་ཕྱིར་གཙོ་བོར་གནས། །དེ་ཕྱིར་གཡོན་བའི་གཞི་ཡིས་བརྒྱན་པ་མཆོག་གི་ལྷ་མོའི་བདེ་མཆོག་གོ །ཟླ་བ་ཉི་མ་རྣམ་དག་སྲིད་པར་སྐྱེས་པའི་རང་བཞིན་རོ་དང་བཅས། །པདྨ་མཆོག་ཏུ་བྱུང་བ་རི་བོ་ལས་བྱུང་ཤིན་ཏུ་མཉམ་པར་ལྡན་བྱུང་ཁུ་བའོ། །དེ་ནི་ནམ་མཁར་འགྲོ་མ་ཞེས། །སངས་རྒྱས་ཁམ་སུ་རྣམ་པར་བརྟག །ནམ་མཁའ་ཀུན་དུ་སྤྱོད་གྲུབ་པས། །མཁའ་འགྲོ་མ་ཞེས་མངོན་པར་བརྗོད། །དེས་བསྐྱེད་པ་ཡི་གཟུགས་གང་ཡིན། །གཟུགས་ཅན་མ་ཞེས་མངོན་པར་བརྗོད། །གཟུགས་སུ་སྐྱེ་བའི་རིམ་བ་ཉིད། །རྟོགས་པར་གྱུར་པ་དུམ་སྐྱེས་མ། །གང་ཞིག་མཛེས་པར་ལེགས་བརྗོད་པ། །མི་དང་བུད་མེད་སོགས་པར་བྱུང༌། །མཚན་ཉིད་ཐམས་ཅད་ཀུན་རྫོགས་པ། །དེས་ན་ལཱ་མར་རབ་ཏུ་གྲགས། །བདུད་ཀུན་ལ་སོགས་རྣམ་པར་བྲལ། །དེ་ནས་
༄། །གཞལ་ཡས་ཁང་དུ་གྲགས། །ཆོས་ཀྱི་དབྱིངས་ཀྱི་རང་བཞིན་གྱིས། །པདྨ་སངས་རྒྱས་བཞི་དེའོ། །རྟག་ཏུ་འདོད་ཆགས་དང་བྲལ་ཞིང༌། །གང་དུ་མཚན་ཉིད་བཞི་སྦྱོར་བ། །རྣམ་པ་ཀུན་གྱི་མཆོག་དང་ལྡན། །དེ་ནི་དཔའ་བོ་ཞེས་སུ་གསུངས། །སྟོང་ཉིད་སྙིང་རྗེའི་བདག་ཉིད་ཅན། །དེར་ནི་དབང་ཕྱུག་ལེགས་པར་ཐོབ། །ལྷན་ཅིག་སྐྱེས་པ་དགའ་བའི་དངོས། །དེ་ནི་དཔའ་བོའི་དབང་ཕྱུག་གྱུར། །གཞོམ་མེད་དཔག་ཏུ་མེད་པ་དགའ་བ་བདེ་མཆོག་འཁོར་ལོ་དེ་ནི་སྡེ་ཚན་མཐའ། །རྟག་ཏུ་ཐུར་དུ་ཕྱོགས་པ་འདི་ནི་ཡན་ལག་ཀུན་ལ་ཡིད་དུ་འོང་བ་འཛག །འདོད་ཆགས་ལ་སོགས་རྩྭ་དང་འདྲ་བ་འབིགས་པའི་ཡེ་ཤེས་ཀྱིས་ཟོས་སོ། །རྣམ་པར་མི་རྟོག་རང་བཞིན་གྱིས། །དེ་ནི་ཀུན་རྫོབ་མྱོང་བའོ། །ནམ་མཁའི་པདྨར་ནམ་མཁའི་དབུས་སུ་མཁའ་སྤྱོད་འཁོར་ལོ་རོལ་པའི་རང་བཞིན་ནོ། །དེར་གནས་ཤིང་ཏུ་རྣམ་པར་བརྟགས་པ་མཁའ་སྤྱོད་འཁོར་ལོར་ལེགས་པར་གྲགས། །བྷུ་ཞེས་པ་ནི་སའི་དབུས་གནས་སྐྱེས་པ། །ལྟེ་བའི་པདྨ་དེར་གནས་ཤིན་ཏུ་རྣམ་པར་བརྟགས་པ་ས་སྤྱོད་འཁོར་ལོའོ། །ས་འོག་ཅེས་པར་གང་བསྟན་པདྨར་བྱང་ཆུབ་ལྟུང་བའོ། །ཕྱིར་རོལ་དེས་པའི་ཡིད་ནི་ས་འོག་གནས་པའི་མཚན་མའོ། །ཆོས་དང་ལོངས་སྤྱོད་སྤྲུལ་རྣམས་ཀྱིས། །ཧེ་རུ་ཀ་གཟུགས་ལེགས་པར་གནས། །ཨཱ་ལི་ཀཱ་ལི་ཡང་དག་ལྡན། །ལྷན་ཅིག་སྐྱེས་པའི་དགའ་བས་མཛེས། །ཨ་ཡིག་སྤྲུལ་པའི་འཁོར་ལོ་རུ། །པདྨོའི་ནང་དུ་ལེགས་པང་གནས། །ལྷན་ཅིག་སྐྱེས་པས་རོལ་པ་ཡིས། །འཇིག་རྟེན་གསུམ་གྱི་རྒྱན་དུ་གྲགས། །ཨོཾ་ཏྲཱཾ་ཧྲཱིཿ་ཁཾ་འདབ་མར་ལཱཾ་མཱཾ་པཱཾ་ཏཱཾ་མཚམས་ཀྱི་ཆ་རུའོ། །དབུས་སུ་ཧེ་རུ་ཀ་ཡི་ས་བོན་མཆོག་གི་སེམས་ནི་པདྨར་ཤིན་ཏུ་ལེགས་པར་གནས། །ཆོས་སེམས་པདྨ་ཆེན་པོ་ལ། །སྟོང་པའི་རྡོ་རྗེ་རྣམ་པར་གནས། །དེར་གནས་རྟག་ཏུ་འཛག་པ་ནི། །འདོད་པའི་དོན་ཀུན་འགྲུབ་པའོ། །དེ་ཡི་སྟེང་དུ་ལོངས་སྤྱོད་ལ་ནི་ཕྱག་འཚལ་འོག་ཏུ་ལྟ་བ་རྟག་ཏུ་བལྟ། །ཨཱ་ཨཱི་ལྷན་ཅིག་ཨོ་ཨཽ་མཆོག་གི་རྣལ་འབྱོར་མ་དང་དཔའ་བོར་ལྡན། །དེར་གནས་མགྲིན་པའི་ཕྱོགས་སུ་ནི། །གང་དུ་མཁའ་འགྲོ་མ་རྣམས་རོལ། །དེར་ནི་རྟག་པའི་དུས་མཆོད་པ། །
༄། །མཆོག་ཏུ་དགའ་བར་ལེགས་པར་ཤེས། །ཧཾ་ནི་བདེ་ཆེན་འཁོར་ལོ་རུ། །ཟླ་བ་ལྟ་བུ་ལེགས་པ་འཛག །བགྲོད་དང་བགྲོད་པ་མ་ཡིན་པ། །དེར་ནི་མིག་གིས་མཐོང་བ་མིན། །ཏྭ་རི་ཏི་ན་གྱེན་དུ་གྲགས། །བཱ་ཥྤ་ཕྱོགས་སུ་རྣམ་པར་གནས། །བི་བིདྷོ་ནི་དབུས་སུ་གནས། །བི་ཤྭ་ཤྠ་ནི་ཐུར་དུ་གྲགས། །རྒྱུ་མཐུན་པ་དང་རྣམ་པར་སྨིན། །སྐྱེས་ཐུ་དེ་བཞིན་དྲི་མ་བྲལ། །འབྲས་བུ་བཞིན་པོ་འདི་རྣམས་དང༌། །དགའ་བ་རྣམས་སུ་རབ་ཏུ་གྲགས། །ཆུང་དུ་འབྲིང་པོ་ཆེན་པོ་དང༌། །ཆེན་པོ་ཡི་ཡང་ཆེན་པོ་སྟེ། །སེམས་ཀྱི་དབྱེ་བས་བཞི་རྣམས་སུ། །མི་ལ་སོགས་པ་རྣམས་སུ་རོལ། །པདྨར་སྤྲུལ་པའི་འཁོར་ལོ་ཐམས་ཅད་སེམས་ཀྱི་སྐད་ཅིག་ངེས་པར་འབྱུང༌། །སེམས་ཀྱི་ཆོས་ཀྱི་རང་བཞིན་འདྲེན་ཅིང་རྟག་ཏུ་སྡུག་བསྔལ་སེལ་བ་རྣམ་པར་སྨིན། །མགྲིན་པར་གནས་པའི་ཧེ་རུ་ཀ་མགོན་མང་པོ་རྟོག་པ་ཐམས་ཅད་དཔྱོད་པའི་རང་བཞིན་ནོ། །ཤེས་དང་མི་ཤེས་སྤྱི་བོར་གནས་པ་ང་རྒྱལ་དང་བྲལ་དེ་ནི་རྣམ་པའི་མཚན་ཉིད་རང་བཞིན་ནོ། །སྐད་ཅིག་བཞི་པོ་གང་འདི་སྐད་ཅིག་གཅིག་གིས་བསྐྱེད། །འཁོར་ལོར་སྐད་ཅིག་དེ་ནི་གཙོ་བོ་ཡིན་ཏེ་གཞན་ནི་མཐའ་ཡས་དངོས་པོར་འགྱུར། །མེ་ཏོག་ཕྲེང་དང་ཙནྡན་བུད་མེད་སོགས། །ཇི་སྲིད་བལྟས་པས་བདེ་བར་གྱུར། །དེ་སྲིད་དགའ་བར་ལེགས་པར་གྲགས། །སེམས་ཅན་ཀུན་ལ་ལེགས་པར་གནས། །རྡོ་རྗེ་པདྨ་མཉམ་སྦྱོར་བས། །གང་ཞིག་སེམས་ནི་རྣམ་པར་གནས། །དེ་ཡི་སེམས་ཀྱི་མཚན་ཉིད་གང༌། །དགའ་བ་ཆེན་པོ་ཞེས་སུ་བརྗོད། །ལེགས་པར་སྦྱོར་ལས་བྲལ་བའི་སེམས། །བདེ་བའི་མཐའ་རུ་ལེགས་པར་གནས། །དེ་བྲལ་ཞེས་པའི་མིང་དུ་གསུངས། །རྣམ་པར་སེལ་བ་བསྐྱེད་པར་གྲགས། །དགའ་དང་མཆོག་ཏུ་དགའ་བ་དང༌། །དགའ་དང་བྲལ་བ་གསུམ་པ་སྟེ། །ལྷན་ཅིག་སྐྱེས་པའི་རང་བཞིན་འདི། །བརྟན་གཡོ་ཀུན་གྱི་རང་བཞིན་ནོ། །གང་དེ་ལྷན་ཅིག་སྐྱེས་དེ་ཀུན། །བསམ་གྱིས་མི་ཁྱབ་ཅེས་གསུངས་སོ། །ཚིག་མེད་ཀུན་སོང་ཞི་བ་སྟེ། །ཡེ་ཤེས་ཧེ་རུ་ཀ་རུ་བརྗོད། །གཞན་གདན་ཞེས་པ་ཤེས་རབ་བསྟན། །བདག་གི་གདན་ནི་ཐབས་ཡིན་ཏེ། །འདི་དག་གཉིས་མེད་རང་བཞིན་ནི། །སྦྱོར་བའི་གདན་དུ་རྣམ་པར་
༄། །གནས། །དེ་ཉིད་བདག་ནི་དེས་བསྐྱེད་པའོ། །དེ་སྤངས་པ་ཡི་དངོས་པོ་ནི། །ལྷན་ཅིག་སྐྱེས་ཞེས་ཡང་དག་གསུངས། །ཚིག་ལམ་སྤྱོད་ཡུལ་ལས་འདས་པའོ། །བདག་གི་དེ་ཉིད་རྟག་ཏུ་བསྔགས། །དཀྱིལ་འཁོར་དེ་ཉིད་ཡང་དག་ལྡན། །ཆོས་དང་ལོངས་སྤྱོད་སྤྲུལ་བ་ནི། །ལུས་དང་རྣམ་པར་གནས་པའོ། །དམིགས་པའི་དངོས་པོ་སངས་རྒྱས་ཏེ། །མི་དམིགས་པ་ནི་རྡོ་རྗེ་འཛིན། །གནས་གཉིས་མཉམ་པར་དམིགས་ནས་ནི། །ཤེས་རབ་གཉིས་ནི་བསྟན་པའོ། །བརྟན་སོགས་བཅུ་ནི་ས་རྣམས་དང༌། །ཕ་རོལ་ཕྱིན་པ་བཅུ་མཆོག་གོ །ཉི་ཤུ་རྩ་བཞི་དབྱེ་བ་ཡིས། །ལུས་ཀུན་ལ་ནི་རྣམ་པར་གནས། །རིམ་པ་ཇི་ལྟ་བ་བཞིན་དུ་འདི་དག་སྟེ། མགོ་དང༌། སྤྱི་གཙུག་དང༌། རྣ་བ་གཡས་པ་དང༌། རྒྱབ་ཀྱི་ཚིགས་པ་དང༌། རྣ་བ་གཡོན་པ་དང༌། སྨིན་མའི་དབུས་དང༌། མིག་དང༌། དཔུང་པའི་རྩ་བ་དང༌། ནུ་མ་གཉིས་དང༌། ལྟེ་བ་དང༌། སྣའི་རྩེ་མོ་དང༌། ཁ་དང༌། མགྲིན་པའི་ཕྱོགས་དང༌། སྙིང་ག་དང༌། ཆུ་སོ་དང༌། མཚན་དང༌། བཤད་བའི་ལམ་དང༌། བརླ་གཉིས་དང༌། བྱིན་པ་དང༌། སོར་མོ་དང༌། རྐང་པའི་བོལ་དང༌། མཐེ་བོ་དང༌། པུས་མོ་རྣམས་སུ་བདག་པོ་ལ་སོགས་པ་སྐྱེ་བ་དང་གནས་པ་དང༌། རབ་ཏུ་ཐིམ་པ་ཞེས་སོ། །པུལླི་རུ་ནི་བདག་པོ་སྟེ། །ཛཱ་ལནྡྷ་རང་སྤྱོད་པས་གནས། །ཨོ་ཌྱ་ན་དུ་ནི་ཐིམ་པས་གནས། །སྟན་ལ་སོགས་པའི་གནས་རྣམས་སུ། །ཡན་ལག་ཀུན་དུ་ཐིམ་གྱུར་པ། །བདེ་མཆོག་གི་ནི་མཚན་ཉིད་དོ། །སྤྲུལ་པ་རུ་ནི་སྐྱེས་པ་སྟེ། །ལོངས་སྤྱོད་པ་རུ་གནས་པའོ། །ཆོས་ཀྱི་སྐུ་ཡི་རང་བཞིན་གྱིས། །ཐིམ་པར་གྱུར་པར་སོམ་ཉི་མེད། །དེ་ལྟར་སྐུ་རྣམས་ཆ་ཤས་ཀྱིས། །བདག་པོ་ལོངས་སྤྱོད་ཐིམ་པའོ། །གནས་སུ་ཇི་ལྟར་དེ་བཞིན་དུ། །སྐྱེ་བ་དང་ནི་གནས་པ་ཉིད། །ཐིམ་པར་གྱུར་པའི་རིམ་པ་ཡིས། །རྟག་ཏུ་དགའ་བ་སྐྱེ་བར་འགྱུར། །གནས་བྱེད་པ་ཡི་སྒོ་ནས་ནི། །རྡོ་རྗེ་མཁའ་འགྲོ་བསྐུལ་པའོ། །དཔལ་ལྡན་ཛཱ་ལནྡྷ་རར་ནི། །སྐད་ཅིག་དེ་ལ་བདེ་བར་འགྱུར། །བདེ་བར་བསྐྱེད་པའི་བསྡུས་པ་ནི། །བརྟན་གཡོ་ཀུན་གྱི་བདག་ཉིད་དོ། །དེ་ལྟར་ཧེ་རུ་ཀ་ཕག་མོ། །དང་པོའི་སངས་རྒྱས་དཔའ་བོར་ལྡན། །
༄། །དེ་ཡི་ཕྱག་སོགས་སངས་རྒྱས་ཏེ། །ཁམས་ཀྱི་མིང་ནི་འབྱུང་བའོ། །ལྷན་ཅིག་སྐྱེས་པ་རྣམ་གཉིས་ཏེ། །བུད་མེད་སྐྱེས་པ་ལ་སོགས་བརྟག །ཐམས་ཅད་ཡུལ་དུ་རབ་ཏུ་བསྟན། །ནམ་མཁའ་བདུད་རྩིའི་ངོ་བོའོ། །དེ་ལ་སྤྱོད་པ་གང་ཡིན་ཏེ། །ཐམས་ཅད་ནམ་མཁའ་སྤྱོད་པར་དེ་ཤེས། །ཐམས་ཅད་མཁའ་འགྲོ་དྲ་བ་ཡི། །སྙིང་པོ་བདེ་མཆོག་མཆོག་ཡིན་ཏེ། །འདིར་ནི་ཕྲེང་མེད་བཟླས་པ་མེད། །ལྷན་ཅིག་སྐྱེས་པར་ཀུན་དུ་གནས། །དེ་བས་ཤིན་ཏུ་རྟོག་བྲལ་བས། །གུས་པ་བསྐྱེད་ཅིང་འབད་པ་ཡིས། །འཇིགས་དང་མཛེམ་པ་རྟག་སྤངས་ནས། །རྣལ་འབྱོར་རོལ་བས་གནས་པར་བྱ། །འདིར་ནི་མྱ་ངན་འདས་དང་སྦྱིན་སྲེག་རྣལ་འབྱོར་བསམ་བྱ་དཀྱིལ་འཁོར་ལ་སོགས་པ། །བུམ་པ་རྡུལ་ཚོན་ཐིག་སྐུད་ཆོ་ག་ལུས་ལ་ལྷན་ཅིག་སྐྱེས་ནས་རིག་པར་བྱ། །གཙུབ་ཤིང་གཙུབས་པའི་སྦྱོར་བ་ཡིས། །ཡེ་ཤེས་མེ་ནི་ཤིན་ཏུ་འབར། །རླུང་གིས་བསྐྱོད་པར་གྱུར་པ་ལས། །ལྟེ་བའི་པདྨ་རྣམ་པར་གནས། །དུ་བ་རྟག་ཏུ་ལྷ་མོ་སྟེ། །ལེགས་འབར་ལྷན་ཅིག་སྐྱེས་པའི་གཟུགས། །ཡེ་ཤེས་འཁོར་ལོའི་སངས་རྒྱས་དང༌། །ལོངས་སྤྱོད་འཁོར་ལོར་གྱུར་བསྲེགས་ནས། །ཐབས་ནི་རབ་ཏུ་མཆོད་བྱས་ནས། །སྨིན་མཚམས་མཛོད་པུར་སོང་གྱུར་ནས། །ཨོ་ཌྱ་ན་ཞེས་ནི་བྱ་བ་ཡི། །གནས་ཀྱི་སྒོ་ནས་འཕྲོས་ནས་ནི། །ཛཱ་ལནྡྷ་རར་རབ་ཏུ་ཞུགས། །དེ་བཞིན་གཤེགས་པ་ཐམས་ཅད་བསྲེག །ཡིད་ཀྱི་ཤུགས་ལྡན་ལྷ་མོ་ནི། །མིག་གིས་མཐོང་བ་མ་ཡིན་ནོ། །སངས་རྒྱས་སྙིང་ག་ན་བཞུགས་ཁྱབ། །བདུད་རྩིའི་ཚོགས་ནི་བླང་བྱས་ཏེ། །འོ་མ་ཡི་ནི་རྒྱུན་ལྟ་བུར། །གསེར་གྱི་སྒོ་རུ་རབ་ཏུ་ཞུགས། །རྐན་གྱི་དབུས་ནས་འཛག་པ་ནི། །ལོངས་སྤྱོད་འཁོར་ལོར་ལེགས་པར་གནས། །ཟོ་ཆུའི་འཁྲུལ་འཁོར་བཞིན་དུ་ནི། །སྔོན་དུ་སེམས་ནི་རྣམ་པར་གནས། །ཐ་མ་མེད་པར་ལེགས་པར་བསྲེག །ལེགས་པར་སངས་རྒྱས་མཉེས་པ་སྟེ། །ཡང་ནི་འདོད་དང་ལྡན་གྱུར་ནས། །ལྟེ་བའི་འཁོར་ལོར་ལེགས་པར་གནས། །འདིར་བཞུགས་ཡང་ནི་འགྲོ་བ་དང༌། །འོང་བར་གྱུར་བ་དེ་བཞིན་ནོ། །ཀུན་སྤྱོད་མཁའ་འགྲོ་མ་རྣམས་ཀྱི། །འཁོར་ལོ་བདེ་མཆོག་ལས་གསུངས་སོ། །ལྡོག་པ་ཡི་ནི་མཚན་ཉིད་དོ།།
༄། །འདི་དག་ཐམས་ཅད་བདག་གིས་བཤད། །གང་གཞན་བདེ་བའི་དངོས་གྲུབ་ནི། །བླ་མ་ལ་གུས་དེ་ཤེས་བྱ། །སྣ་ཚོགས་སྔགས་བཟླས་རྣལ་འབྱོར་མཁས་པས་ཀུན་གྱི་བདག་ཉིད་ཀྱིས་ལེགས་མཆོད། །འཁོར་ལོ་ལ་གནས་བླ་མ་རྡོ་རྗེ་དཔའ་བོའི་ཚོགས་དང་ལེགས་པའི་རྣལ་འབྱོར་མ་ཡི་ཞབས། །ང་རྒྱལ་བཅས་པས་རྒྱུད་རྣམས་ཀུན་གྱི་སྙིང་པོའི་གནས་ནི་ལེགས་པར་བརྟགས། །ཕྱི་ནས་བློ་དང་ལྡན་པས་སེམས་ཅན་དོན་འདོད་རྩོམ་པས་དཀྱིལ་འཁོར་བརྩམ། །སངས་རྒྱས་ཀུན་གྱི་ལྷ་རྣམས་ནི། །བྲི་བ་སྨད་འཚོང་གཞུང་ཡིན་ནོ། །ཧེ་རུ་ཀ་འབྱུང་སོགས་ལས་ཀྱང༌། །ཛཱ་ལནྡྷ་ར་སོགས་པ་གསུངས། །འདུས་པ་ལ་སོགས་རྒྱུད་རྣམས་ཀྱི། །མིང་དེ་ཅི་ཡི་ཕྱིར་ན་འགལ། །སྔགས་པས་འཁོར་ལོ་སྡོམ་དཀྱིལ་འཁོར། །བདེ་མཆོག་དོན་དུ་བྲི་བར་བྱ། །སློབ་དཔོན་གྱི་ནི་མཚན་ཉིད་བསྟན། །རྒྱུད་ལས་ཇི་ལྟར་བསྟན་པར་འདོད། །གཡོན་པའི་ལག་ན་ཁ་ཊྭཱཾ་ག་གཞན་ན་ཅང་ཏེའུ་ཧཱུཾ་སྒྲོགས་པ། །ཡང་དག་ཡེ་ཤེས་རྒྱུད་ཤེས་ཤིང༌། །ཧེ་རུ་ཀ་དཔལ་གསང་སྔགས་ཤེས། །ཁྲོ་མེད་གཙང་ལ་མཁས་པ་དང༌། །སྦྱོར་ཤེས་ཡེ་ཤེས་ཕ་རོལ་སོན། །སྤྱི་བོ་ལས་སྐྱེས་ཐོད་པས་བརྒྱན། །ཡན་ལག་ཐལ་བས་རྗེས་སུ་བྱུག །བླ་མ་ཆེན་པོས་སློབ་མ་ལ། །མཆོད་པ་ལ་སོགས་དེ་དག་དྲི། །དགའ་བས་དེ་ནི་སྨྲ་བར་བྱ། །བདག་གིས་ཐམས་ཅད་ཚོགས་པར་གྱུར། །བཟའ་དང་བཏུང་པ་ལ་སོགས་པ། །རས་དང་ལྷ་བཤོས་ཐམས་ཅད་ལྡན། །དཔའ་བོ་ལྷ་མོ་མཆོད་པའི་དོན། །བདག་གིས་ཆོ་ག་བྱེད་པར་ནུས། །དཔའ་བོ་ཆེན་པོས་དེ་ནས་འདིར། །ཤེས་རབ་ཡན་ལག་གཉིས་མེད་འདུས། །ཧེ་རུ་ཀ་དཔལ་རྣལ་འབྱོར་ཆེ། །འཁོར་ལོ་ཀུན་ལ་རྣམ་པར་གནས། །མདུན་དུ་གནས་པའི་སློབ་མ་ནི། །བསོད་ནམས་ལྡན་ཞིང་བློ་དང་ལྡན། །ཐོག་མར་སྲུང་བ་བྱས་ནས་ནེ། །དེ་ནས་ས་ནི་རྣམ་པར་བརྟག །རྒྱུད་ལས་བསྟན་པའི་དཀྱིལ་འཁོར་གནས། །ཁྲོ་བོའི་སྦྱོར་བས་མནན་ནས་ཀྱང༌། །གནོད་མཛེས་གསང་སྔགས་བཟླས་ནས་ནི། །འབད་པས་བགེགས་ནི་བསྐྲད་པར་བྱ། །སློབ་མ་མཁས་པ་ལེགས་པར་གཟུང༌། །བདེ་བའི་མཆོག་ནི་མཉེས་ནུས་པ། །བདེ་མཆོག་ལས་གསུངས་བྱ་བ་ལྡན། །སྔོན་དུ་ཕག་མོ་ལ་གུས་པ། །བསོད་
༄། །ནམས་འདོད་ཅིང་གཙང་ལ་མཁས། །དཀྱིལ་འཁོར་འདྲི་བའི་ཕ་རོལ་སོན། །དགའ་ཞིང་སྡུག་པ་ཡང་ཡིན་ཏེ། །དེ་དང་ལྷན་ཅིག་ལེགས་པར་བརྩམ། །གཏོར་མ་སྦྱིན་སོགས་བྱིན་ནས་ནི། །ཧེ་རུ་ཀ་དང་གཉིས་མེད་གནས། །བླ་མ་དཔའ་བོ་ལེགས་མཆོད་ནས། །ས་བཞི་དག་པ་ལེགས་བར་བརྩམ། །རི་ཕུག་ནགས་ཀྱིས་མཁྲེགས་པ་དང༌། །རྒྱ་མཚོ་ཆེན་པོའི་འགྲམ་དུའམ། །སྔོན་དུ་གྲུབ་པའི་དུར་ཁྲོད་དུ། །དེར་ནི་དཀྱིལ་འཁོར་བྲི་བར་བྱ། །དེར་ནི་ལྕི་བ་མ་ལྷུང་བས། །དཀྱིལ་འཁོར་ས་ནི་ཉེ་བར་བྱུང་།དུར་ཁྲོད་ཐལ་བར་ལྡན་པ་དང༌། །བདུད་རྩི་ལྔ་དང་མཉམ་ལྡན་པས། །ས་དེ་ཉེ་བར་བྱུག་པར་བྱ། །དེར་ནི་དཀྱིལ་འཁོར་བརྩམ་པར་བྱ། །བར་མ་མཆོག་དང་དབུགས་དབྱུང་དང༌། །དྲི་ཡི་ཆུ་དང་ལྷན་ཅིག་པས། །འབད་པས་མཉམ་པར་བརྡུང་བར་བྱ། །ས་ནི་མཉམ་ཞིང་གཙང་བར་བྱ། །དབུས་དང་ཐོག་མ་གང་བསྟན་པའི། །ལྷག་མའི་བཤད་པ་ཡང་དག་ལྡན། །བླ་མ་དམ་པ་ལས་ཤེས་བྱ། །དེས་ཤེས་གང་དེ་བཞིན་དུ་མིན། །ཤར་དང་བྱང་དུ་གཞོལ་བ་ནི། །སྔགས་པ་རྟག་ཏུ་དངོས་གྲུབ་འགྱུར། །དབུས་སུ་མཐོ་བས་རྒྱལ་སྲིད་དང༌། །རིག་པ་འཛིན་པའི་གནས་སུ་འགྱུར། །བྱང་དུ་མཐོ་བས་འཆི་བའམ། །ཡང་ན་ནོར་ནི་ཟད་པར་འགྱུར། །ཇི་སྐད་བཤད་པའི་ཤར་མཐོ་བས། །མྱུར་དུ་རིགས་རྣམས་ཟད་པར་འགྱུར། །དབུས་སུ་དམའ་བའི་ས་གཞི་གང༌། །སྒྲུབ་པ་པོ་ནི་འཇིགས་པར་འགྱུར། །དེ་ལྟར་མཚན་ཉིད་བཅས་པ་ཡི། །དཔའ་བོའི་དབང་པོ་སོགས་པས་བརྟག །སའི་མཚན་ཉིད་དོ། །མགུལ་རྒྱན་དང་ནི་གདུ་བུ་ཉིད། །རྣ་རྒྱན་སྤྱི་བོའི་ནོར་བུ་དང༌། །མཆོད་ཕྱིར་ཐོགས་དང་ཐལ་བ་སྟེ། །ཕྱག་རྒྱ་དྲུག་གིས་རྣམ་པར་བརྒྱན། །མཁའ་འགྲོ་མ་ཚོགས་ཕྱོགས་བཞི་རུ། །རྡོ་རྗེ་རྣལ་འབྱོར་མ་བཞག་ནས། །རྡོ་རྗེ་དྲིལ་བུ་ཕྱག་ན་འཛིན། །རང་གི་གཙོ་ལ་གསོལ་བ་གདབ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་བདག་པོ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་མིན་ཐམས་ཅད་སྤངས་པ་སྟེ། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་
༄། །གསོལ། །ཞི་བའི་ཆོས་ནི་མཆོག་ལས་བྱུང༌། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་སྙིང་པོ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མེད་པ། །ཀུན་དུ་བཟང་པོ་ཐུགས་ཀྱི་མཆོག། དཀྱིལ་འཁོར་སྙིང་པོ་བཤད་དུ་གསོལ། །གང་ཞིག་ལག་ན་ཐོད་པ་དང༌། །ཆང་ལ་དགའ་བས་མྱོས་པ་རྣམས། །སྤྱོད་པ་གཟུགས་ཅན་རྣལ་འབྱོར་མ། །ལྷ་མོ་ཆེན་མོ་མཉེས་པ་སྟེ། །ཁམས་ཀྱི་རང་བཞིན་ཐམས་ཅད་དམ། །དེ་བཞིན་སྲོག་དང་རྩ་རང་བཞིན། །རང་ལྷག་ལྷ་ལ་རབ་ཕྱོགས་པས། །གྲུབ་པའི་ཕྱག་རྒྱ་རབ་ཏུ་བསྒྱུར། །ཧེ་རུ་ཀ་དཔལ་རྣལ་འབྱོར་ཆེ། །བསམས་ནས་བགེགས་ནི་རབ་ཏུ་གཞོམ། །བགེགས་ཀྱི་ཚོགས་ནི་གཞན་རྣམས་དང༌། །གདུག་པའི་ཚོགས་ནི་བསྐྲད་པར་བྱ། །རྐང་པའི་འོག་ཏུ་དགོད་བྱ་བ། །རྡོ་རྗེ་འབར་བ་ཧཱུཾ་ལས་བྱུང༌། །ཨཾ་ཡིག་མིག་གཉིས་ཤེས་ནས་ནི། །ཟླ་བ་ཉི་མར་རྣམ་པར་བསམ། །རྡོ་རྗེ་དྲིལ་བུ་བླངས་ནས་ནི། །གཡས་ན་རྡོ་རྗེ་ཡང་དག་ལྡན། །བློ་དང་ལྡན་པས་ཕྱོགས་ཀུན་བལྟ། །ཁྲོས་པས་སེམས་ཅན་དོན་ལ་བརྩོན། །དེ་རུ་གནས་པའི་གདུག་པ་དང༌། །བདུད་དང་བགེགས་དང་ལོག་འདྲེན་དང༌། །དེ་རྣམས་བསྐྲད་པའི་དོན་གྱི་ཕྱིར། །ཚིག་འདི་དག་ནི་བརྗོད་པར་བྱ། །གང་ཞིག་ས་ཡི་བདག་པོ་རྣམས། །ཀླུ་དང་གནོད་སྦྱིན་དྲི་ཟ་སོགས། །འབྱུང་པོ་འབྱུང་མོ་མཁའ་འགྲོ་མ། །སེམས་ཅན་དོན་དུ་བྱ་བར་བརྩོན། །མྱུར་དུ་འགྲོ་བ་ཉིད་དུ་གྱིས། །ཧེ་རུ་ཀ་ཡི་བཀའ་ཐོས་ནས། །མྱུར་བ་ཉིད་དུ་བོར་ནས་ནི། །ཁྱེད་རྣམས་འགྲོ་བ་ཉིད་དུ་གྱིས། །གལ་ཏེ་འགྲོ་བར་མི་འགྱུར་ན། །རྡོ་རྗེ་འབར་བ་ཁ་ཊྭཱཾ་གིས། །དེ་ཡི་མགོ་ནི་བརྒྱར་དགས་བྱ། །ཨོཾ་སུམྦྷ་ནི་སུམྦྷ་ཧཱུཾ་ཕཊ། །ཨོཾ་གྲྀཧྞ་གྲྀཧྞ་ཧཱུཾ་ཕཊ། །ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་བཱན་བཛྲ་ཧཱུཾ་ཕཊ། དབང་ལྡན་ཕྱོགས་ནས་བརྩམས་ནས་ནི། །གཡོན་དུ་བསྐོར་བ་ལ་བརྩོན་པས། །དཔའ་བོ་ཆེན་པོ་ཁྲོས་པས་བསྐོར། །བསྐལ་པའི་མེ་ལྟར་ལངས་ནས་ནི། །དེ་ལས་བྱུང་བའི་འོད་སོགས་ཀྱིས། །བདུད་ལ་སོགས་པ་ཐམས་ཅད་བསྲེགས། །འདི་ལྟར་སེམས་པའི་རྣལ་འབྱོར་དག །ཧཱུཾ་སྒྲ་བསྒྲགས་
༄། །པར་གར་བྱས་ཏེ། །མྱ་ངན་ཁྲོ་དང་འཇིགས་པ་མེད། །དེ་བཞིན་དྲག་དང་བརྩེ་བ་གཉིས། །རྗེས་སུ་ཆགས་ལྡན་རོ་འདི་དག །དང་པོ་ཞལ་ལ་ལེགས་པར་གནས། །མི་སྡུག་པ་དང་ངོ་མཚར་གང༌། །འཇིགས་དང་གཡོ་དང་དེ་བཞིན་དུ། །རྗེས་སུ་ཆགས་གནས་རོ་འདི་ཡིས། །གཡོན་པའི་ཞལ་དུ་གྱུར་པར་གསུངས། །བཞད་དང་དགའ་བ་དབང་ཕྱུག་དང༌། །བཞད་པ་དང་ནི་སྒེག་པ་ཉིད། །རྗེས་སུ་ཆགས་ནས་རོ་ཉིད་དང༌། །དེ་ནི་ནུབ་ཀྱི་ཞལ་ཡིན་ནོ། །སྨོད་པ་དང་ནི་ངོ་མཚར་ཉིད། །བརྐམ་པར་གྱུར་པ་གང་ཡིན་པ། །དཔའ་བོ་འཇིགས་བྱེད་གནས་འདི་དག །གཡས་ཀྱི་ཞལ་ལ་དེ་དག་གནས། །པདྨ་རྡོ་རྗེ་དབུས་སུ་ནི། །གང་ཞིག་སེམས་ནི་ལེགས་གནས་ཤིང༌། །ཞི་བ་དེ་ནི་ལེགས་དག་པ། །ལྷན་ཅིག་སྐྱེས་པ་དགའ་བའི་གར། །གར་ནི་ཆོས་ཀྱི་དེ་ཉིད་དུ། །ཤེས་པའི་གར་དུ་ཐེ་ཚོམ་མེད། །འཇིག་རྟེན་ལ་ཕན་རྒྱུ་ཡི་ཕྱིར། །འཇིག་རྟེན་ཆོས་ཅན་གར་བྱའོ། །གླང་པོ་ཆེ་ཡི་པགས་པ་དང༌། །མདུད་དང་ཞགས་པ་གྲི་གུག་དང༌། །ཌ་མ་རུ་དང་ཁ་ཊྭཱཾ་དང༌། །ཐོད་པ་དང་ནི་ཞགས་པ་དང༌། །མགོ་བོ་རྡོ་རྗེ་དྲིལ་བུ་དང༌། །མགོ་བོ་ལྔ་བཅུའི་ཕྲེང་བ་དང༌། །དེ་རྣམས་ཐོགས་པའི་སྣང་བའོ། །མགུལ་རྒྱན་ཐོགས་ཤིང་གཡོན་པ་དང༌། །གཡས་ན་གདུ་བུ་དེ་བཞིན་དུ། །རྣ་རྒྱན་རྣ་བ་ལ་བཀོད་ཅིང༌། །གཡོན་གྱི་སྤྱི་བོ་ནོར་བུ་དང༌། །གཡས་པ་ཡིས་ནི་ཐལ་པ་དང༌། །མཆོད་ཕྱིར་ཐོགས་དང་ཡང་དག་ལྡན། །བདེ་བྱེད་ལྟ་བུ་བྱ་བ་དང༌། །རི་མོ་ལྟ་བུ་བྱ་བའོ། །པདྨོ་ལྟ་བུའི་ལག་བྱས་ཏེ། །པདྨ་ལྟ་བུ་གྱུར་པའོ། །ཇི་སྲིད་རི་མོ་ལྟ་བུ་ཡི། །གར་ནི་རྣལ་འབྱོར་མ་ལྷན་ཅིག །ཟླ་བ་གཉིས་པོ་མི་འགྱུར་བ། །ཌ་མ་རུ་ནི་སྐྱེད་བྱེད་པའོ། །མཚན་ཉིད་བདག་གིས་བསྟན་པའོ། །ཡོངས་སུ་ལྡན་པས་བལྟ་བའོ། །བདེ་མཆོག་དོན་ནི་ལེགས་མཐོང་ནས། །རྣལ་འབྱོར་མ་ཡི་མཚན་ཉིད་དང༌། །གཞན་ཡང་གར་དང་དངོས་གྲུབ་དང༌། །དཀྱིལ་འཁོར་དོན་དང་ཆོ་ག་བཤད། །དེ་ལྟར་བསྟན་པ་ནི་སམྦ་རའི་སྒྲ་ཞེས་བྱ་བའོ། །ཅུང་ཟད་ངོ་ཚའི་མིག་ཟུར་གྱིས། །ཧེ་རུ་ཀ་ཞལ་འོ་བྱེད་ཅིང༌། །ལེགས་པའི་ཕག་མོ་གང་བྱའོ། །ཀུན་ཏ་ཟླ་བ་དྲི་མེད་སོ། །དམར་འོད་ལྟ་བུ་ཧཱུཾ་སྒྲོགས་པ། །ཁྲོས་པས་བགེགས་ཀུན་རླག་པར་བྱེད། །ལྷན་
༄། །ཅིག་སྐྱེས་དགའ་རོལ་པ་ཡིས། །སེམས་ཅན་དོན་ནི་བྱེད་ལ་བརྩོན། །དེ་དང་ལྷན་ཅིག་དཔའ་བོ་ཆེ། །འཁོར་ལོའི་ས་ཡི་དབུས་སུ་གནས། །ཟ་བའི་ཕྱག་རྒྱ་ལ་སོགས་པས། །བགེགས་རྣམས་ཀུན་ནི་བསྐྲད་པར་བྱ། །ཇི་སྲིད་གར་གྱི་བསྟན་བཅོས་ལས། །སྙིང་རྗེའི་ཕྱག་རྒྱ་ལ་སོགས་པ། །ཧེ་རུ་ཀ་དཔལ་ཕྱག་རྒྱ་སྟེ། །དེ་ནི་དངོས་གྲུབ་ཀུན་སྟེར་པའོ། །ཞལ་བཞི་ལ་སོགས་སྔགས་ཀྱིས་ནི། །ཕུར་བུ་ར་བ་དྲ་བ་དང༌། །ཇི་བཞིན་སྔོན་གྱི་རྗེས་འབྲངས་ནས། །ཆོ་ག་ཐམས་ཅད་བྱ་བའོ། །དེ་ལྟར་གོ་བགོས་བདག་ཉིད་ནི། །འོག་ཏུ་མཚོན་ཆ་ངེས་པར་གཞག ། འཁོར་ལོ་ལྷན་ཅིག་བདག་ཉིད་ནི། །སྟེང་དུ་མདའ་ནི་བྲི་བའོ། །བདག་ཉིད་མཁའ་སྤྱོད་དྲ་བ་ནི། །དེ་ལྟར་གོ་བགོས་གོ་དང་ལྡན། །སུམ་ཅུ་གསུམ་པས་ཀྱང་མི་ཕིག །མཐའ་ཡི་དབྱངས་ཡིག་ལས་བྱུང་བ།། །སྣ་ཚོགས་རྡོ་རྗེ་གཟི་བརྗིད་བཟང༌། །དེས་ན་རྟག་ཏུ་མི་ཕིག་པ། །འབར་བའི་གཟུགས་སུ་རྣམ་པར་བསམ། །འདིས་ནི་ཧཱུཾ་འབྱུང་ཁྲོ་བོ་ཡིས། །ནམ་མཁའི་དཀྱིལ་འཁོར་དགང་བར་བྱ། །ཡི་གེ་བདུན་པ་བཟླས་པ་ཡིས། །རྡོ་རྗེའི་ལྟ་བ་ཀུན་དུ་བལྟ། །ས་གཞི་དག་པར་བལྟས་ནས་ནི། །བགེགས་རྣམས་ཀུན་ནི་རྣམ་པར་སྤངས། །བདུད་རྩི་ལྔ་སོགས་ལེགས་པར་བྱུག། བློ་བཟང་གིས་ནི་མེ་ཏོག་གཏོར། །མཁའ་འགྲོ་མ་རྣམས་ཡང་དག་ལྡན། །རྡོ་རྗེ་ས་དབུས་ལེགས་པར་གནས། །དཔའ་བོ་རྡོ་རྗེ་དྲིལ་བུ་འཛིན། །མངའ་བདག་ཧེ་རུ་ཀ་བསྒོམ་བྱ། །འབྱུང་གནས་སྒྲ་གཟུགས་ལ་སོགས་པའི། །རྣལ་འབྱོར་རིགས་པས་རྣལ་འབྱོར་དམིགས། །དཔལ་ལྡན་བདེ་མཆོག་འཁོར་ལོ་ཆེ། །དངོས་གྲུབ་ས་ལ་བརྩམ་པར་བྱ། །ཡ་སྡེ་བརྒྱད་པའི་ས་བོན་ནི། །སྟོང་བས་སྟེང་དུ་བརྒྱན་པར་བྱ། །དེ་ནི་ལན་གསུམ་བརྗོད་བྱས་ཏེ། །ས་ལ་རེག་པས་ས་རེག་གནས། །བཀུག་ནས་མདུན་དུ་བལྟ་བར་བྱ། །མཛེས་མ་ཞེས་བྱའི་མ་མོ་ནི། །ལེགས་པའི་གཟུགས་ཅན་ལེགས་གཟུགས་དེས། །ཧེ་རུ་ཀ་ལ་དགའ་བས་གསོལ། །མགོན་པོ་བདག་གིས་ཅི་ཞིག་བགྱི། །རྡོ་རྗེ་ཅན་བདག་བཀའ་སྩོལ་ཅིག །ཁྱེད་ཀྱི་དཀྱིལ་འཁོར་དོན་གྱིས་ན། །བདག་གིས་བུམ་པ་གཟུང་བར་བྱ། །མ་ལ་སོགས་དང་ཡང་དག་ལྡན། །བློ་དང་ལྡན་པས་
༄། །ཐོད་པ་གཞག །ཆོ་གས་མཆོད་པ་བྱས་ནས་ནི། །ཨརྒྷ་བྱིན་ནས་ལྷག་པར་གནས། །ཏྭཾ་དེ་བཱི་སཀྵི་བྷཱུ་ཏཱ་ཡི་སརྦ་བུདྡྷཱ་ནཱཾ་ཏཱ་ཡི་ནཾ། ཙཪྻཱ་ན་ཡ་བི་ཤེ་ཥེ་ཥྱ་བྷཱུ་མི་པཱ་ར་མི་ཏ་སུ་ཙ། མཱ་ར་སཻ་ནྱཾ་ཡ་ཐཱ་བྷ་ག་ཤཱཀྱ་སིདྷེ་ན་ཏཱ་ཡི་ནཱ། ཏ་ཐཱ་མཱ་ར་བ་ལཾ་ཛི་ཏྭ་མཎྜལཾ་སཾ་ལི་ཁ་མ་ཧཾ། ལན་གསུམ་བརྗོད་པ་ཙམ་གྱིས་ནི། །མཛེས་མ་དགའ་ནས་སྨྲས་པ་ནི། །ཁྱེ་མགོན་པོ་ཁྱོད་ཀྱི་བསོད་ནམས་ནི། །དྲི་མེད་བསགས་པ་བདག་གིས་ཤེས། །ད་ལྟར་ཁྱོད་ནི་དེ་ཕྱིར་རོལ། །ཐམས་ཅད་ཁྱོད་ཀྱིས་དབང་དུ་གནས། །གང་ཞིག་བྱ་བ་དེ་བཀའ་སྩོལ། །བདག་ནི་དེ་དག་བྱེད་པས་སྤྲོ། །ཞེས་པའི་ཚིག་ནི་སྨྲས་གྱུར་ནས། །ས་དེར་ཐིམ་པར་གྱུར་བར་བསམ། །ལས་ཀྱི་དཀྱིལ་འཁོར་སྒྲུབ་པའི་ཐབས། །སྔགས་པས་དེ་ནས་བྱས་པའོ། །ས་གཞི་ལྷག་པར་གནས་པའི་ཆོ་གའོ། །བདུད་རྩི་ལྔ་ཡི་ཆུ་ཉིད་ཀྱིས། །ས་ནི་ལེགས་པར་བྱུགས་པར་མཛེས། །དཔའ་བོ་དཔའ་མོའི་དབང་ཕྱུག་གནས། །བློ་བཟང་གིས་ནི་མཎྜལ་བྱ། །སྣ་ཚོགས་མེ་ཏོག་དགྲམ་པ་དང༌། །སྤོས་ཀྱི་དྲི་ཡིས་ལེགས་བསྒོས་ཏེ། །མཆོག་ཏུ་དགའ་བའི་སྦྱོར་ལས་བྱུང༌། །ལེགས་པའི་འཁོར་ལོ་དེར་སྤྱན་དྲངས། །འབྱུང་གནས་སྒྲ་ཚུལ་ལ་སོགས་པའི། །རྣལ་འབྱོར་སྔོན་དུ་དམིགས་ནས་ནི། །འཁོར་ལོའི་གཟུགས་བདག་སྦྱོར་བ་ཡིས། །གནས་དང་གནས་སུ་རྣམ་པར་བསམ། །དཔལ་ལྡན་ཧེ་རུ་ཀ་སོགས་ལྡན། །རྣམ་པ་ཀུན་གྱི་མཚན་ཉིད་གཅིག །དངོས་གྲུབ་ཀུན་གྱི་གཞིར་སྦྱོར་བ། །བདེ་མཆོག་དངོས་གྲུབ་ཐམས་ཅད་སྟེར། །ལམ་ལ་གནས་ཤིང་འབྲས་བུར་གནས། །དཔའ་བོ་དཔའ་མོ་དབང་ཕྱུག་མཛེས། །ཡུལ་ལ་སོགས་པ་གནས་སྟན་དུ། །གསང་བ་སྤྱན་དྲང་བསྒོམ་བྱ་སྟེ། །ཡེ་ཤེས་འཁོར་ལོ་མཉམ་སྦྱོར་བ། །དམ་ཚིག་དཀྱིལ་འཁོར་བསམ་པར་བྱ། །ངོ་བོ་གཅིག་པའི་ལེགས་དག་པ། །ལྷན་ཅིག་སྐྱེས་དགའ་ཤིན་ཏུ་མཛེས། །རྐང་པ་མནན་ཅིང་གྱེན་དུ་བལྟ། །གྱེན་དུ་ཕེཾ་གི་སྒྲ་བསྒྲགས་ཤིང༌། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་དགུག །མཛུབ་མོ་མདུད་བྱས་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་བོར་རབ་སྦྱོར་ཏེ། །དཔྲལ་བའི་དབུས་ཕྱོགས་ལེགས་བཞག་ནས། །ཕྱག་རྒྱ་མཆོག་གིས་མ་ཚོགས་
༄། །བསྐུལ། །མཁའ་སྤྱོད་ལ་སོགས་མཉམ་ལྡན་པའི། །ཡེ་ཤེས་འཁོར་ལོ་ཤིན་ཏུ་མཛེས། །གཡོན་དུ་བསྐོར་བའི་བྱེ་བྲག་གིས། །བསྐོར་བ་ཉིད་ཀྱིས་དགུག་པར་བྱ། །བདུད་རྩི་ལྔ་དང་ལྡན་པ་ཡི། །པདྨ་བླངས་པར་གྱུར་ནས་ནི། །སྔགས་པས་དེ་ནས་ཨརྒྷ་བྱིན། །ཞབས་བསིལ་ཉིད་ཀྱི་བྱེ་བྲག་གོ །དྲི་ལ་སོགས་པས་ཡོངས་བཀང་བའི། །པདྨ་བཞི་པོས་ལེགས་པར་མཆོད། །བདུག་སྤོས་ཐ་དད་ཉིད་ཀྱིས་ནི། །དཀྱིལ་འཁོར་མཆོག་ནི་བདུག་པར་བྱ། །ཡེ་ཤེས་དཀྱིལ་འཁོར་སྤྱན་དྲངས་པའི་ཆོ་གའོ། །གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲ། །ཨཱ་ལི་ཀཱ་ལི་ཞེས་བརྗོད་ནས། །རྒྱུ་སོགས་སྟོང་པ་སྔོན་འགྲོ་དང༌། །འཇུག་པ་སྒྲ་ལ་སོགས་པ་ནས། །ཇི་སྲིད་གསུངས་པའི་སྦྱོར་ལྡན་པའོ། །བདུད་རྩིས་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་དང༌། །གོ་ཆ་ཆེན་པོས་ལེགས་པར་བསྲུང༌། །སྔགས་རྣམས་ཀུན་གྱིས་མཆོད་པ་སྟེ། །དེ་ལྟར་དེ་ཉིད་བཅུ་བཞི་ནི། །དུས་ཀུན་དུ་ནི་ལེགས་པར་བརྩམ། །བདེ་བའི་སྟན་ལས་འབད་པ་ཡིས། །ཤེས་རབ་ཡན་ལག་སྟན་གྱི་སྟེང༌། །མགུལ་རྒྱན་གདུ་བུ་དཔུང་རྒྱན་དང༌། །རྣ་རྒྱན་ཚངས་པའི་སྐུད་པ་དང༌། །མགྲིན་པར་བརྒྱན་བྱས་མགོ་བོའི་ཕྲེང༌། །སྐ་རགས་སིལ་སིལ་སྒྲ་སྒྲོགས་པ། །རལ་པ་ཅོད་པན་དར་དང་ནི། །བཅོས་པའི་སྐྲ་ཡིས་རྒྱན་དུ་བྱས། །རྡོ་རྗེ་པདྨ་ཁ་ཊྭཱཾ་བཅས། །ཌ་མ་རུ་སྒྲ་སྒྲོགས་པ་དང༌། །དཔའ་བོ་ཀུན་དང་རྣལ་འབྱོར་མ། །གོ་ཆ་གསུམ་གྱིས་བརྒྱན་བྱས་ཤིང༌། །ཧེ་རུ་ཀ་དཔལ་རྒྱལ་པོ་ཆེ། །རྣལ་འབྱོར་དབང་ཕྱུག་ངེས་པར་བྱས། །སེམས་ཅན་ཀུན་གྱི་དོན་གྱི་ཕྱིར། །བུམ་པ་ལྷག་པར་གནས་པར་བྱ། །མགྲིན་པ་རིང་ལ་ལྟེ་བ་ཆེ། །མཆུ་འཕྱང་རྩ་བ་རྣམ་པར་སྤངས། །ཁ་དོག་གནག་སོགས་སྤངས་པ་ཡི། །བུམ་པ་བཅུ་ནི་བྱ་བའོ། །དེ་རྣམས་ནང་ནས་མཆོག་གཅིག་ནི། །ཕག་མོ་རུ་ནི་རབ་ཏུ་བརྟག །དགྲ་སྟ་ཞགས་པ་དེ་བཞིན་མདུང༌། །ཁ་ཊྭཱཾ་ག་ཡང་ལེགས་པར་བྲི། །དེ་ལྟར་ཁྲོ་བོའི་རྡོ་རྗེ་དང༌། །པདྨའི་ལོ་མ་སོགས་པས་བརྒྱན། །བདུད་རྩི་ལྔ་ཡི་ཆུ་ཉིད་ཀྱིས། །བཀང་ཞིང་དྲི་ཡིས་ལེགས་པར་བྱུག །འབྲུ་དང་རིན་ཆེན་སྨན་རྣམས་ནི། །སོ་སོར་ལྔ་དང་ལྡན་པའོ། །
༄། །ལྷ་མོའི་སྔགས་ཀྱིས་བསྔགས་པ་ཡི། །མེ་ཏོག་ཕྲེང་བས་རྣམ་པར་བརྒྱན། །རས་བཟང་པོ་ཡིས་མགུལ་པ་དཀྲི། །རྣལ་འབྱོར་མ་ཚོགས་གཙོ་བོ་ཡིས། །རྡོ་རྗེ་ཕག་མོའི་བུམ་པ་ཆེ། །སྔགས་པས་སེམས་ཅན་དོན་གྱི་རྒྱུར། །ལྷོ་ཡི་སྒོ་ཡི་གཡོན་དུ་ནི། །འཁོར་ལོའི་རི་མོ་དང་ཉེ་བར། །རྣམ་པར་རྒྱལ་བའི་བུམ་པ་གཞག །མཁའ་འགྲོ་མ་ཚོགས་བུམ་པ་བཞི། །དེ་ཡི་མཚན་མས་མཛེས་པར་བྱ། །ཇི་ལྟའི་གནས་སུ་བཞག་ནས་ནི། །དྲི་དྲུག་སོགས་པས་ལེགས་པར་དགང༌། །བདུད་རྩི་ལྔ་ཡིས་ལེགས་བཀང་བའི། །ཐོད་པའི་མཚན་མ་ལེགས་པར་བརྟག །བུམ་པ་བཞི་པོ་གཞན་རྣམས་ནི། །འབད་པས་མཚམས་སུ་གཞག་པར་བྱ། །ལས་ཀུན་བྱེད་པའི་བུམ་པ་ནི། །ཧེ་རུ་ཀ་ཡི་མཚན་མས་མཚན། །བི་མུ་མཱ་ར་བདེ་ལེགས་བཀང༌། །བགེགས་ཀུན་རྣམས་པར་སེལ་བར་བྱེད། །མཆོད་ནས་གུས་པས་གསོལ་བཏབ་སྟེ། །ལྷོ་ཡི་སྒོ་རུ་ལེགས་པར་གཞག་རྟག་ཏུ་རྡོ་རྗེས་གདུག་པ་ཀུན། །མྱུར་བ་ཉིད་དུ་སེལ་བར་བྱེད། །ཕྱི་རོལ་བུམ་པའི་མཚན་མ་གང༌། །ཐམས་ཅད་ཇི་ལྟར་གསུངས་བཞིན་བསྟན། །ལུས་ཀྱི་དཀྱིལ་འཁོར་བུམ་པ་ཡི། །མཚན་ཉིད་ལུས་ལས་བྱུང་བའོ། །བུམ་པ་ལྷག་པར་གནས་པའི་ཆོ་གའོ། །ལྷོ་རུ་མངོན་ཕྱོགས་སྔགས་པ་ནི། །ལྷ་མོ་བཞི་དང་ཡང་དག་ལྡན། །ཧེ་རུ་ཀ་མ་དང་སྦྱོར་ལ། །ལེགས་ཆགས་འཛུམ་བཅས་དགའ་ཞིང་སྤྲོ། །བར་མ་མཆོག་དང་དབུས་དབྱུང་དང༌། །མེ་ཏོག་སྤོས་ལ་སོགས་པ་ཡིས། །གཡོན་པའི་སྤྱོད་པ་རྟག་སྤྱོད་པས། །བདེ་མཆོག་དཔའ་བོ་མཆོད་པར་བྱ། །གཡོན་པས་བླངས་པའི་སྤོས་དང་ནི། །མི་ཡི་ཤ་དང་ལྡན་པ་ཡིས། །བདུགས་པར་གྱུར་ནས་སྔགས་པ་ཡིས། །སངས་རྒྱས་རྣམས་དང་དཔལ་ལྡན་ཧེ་རུ་ཀ་སོགས་ནམ་མཁའི་དཀྱིལ་གྱུར་མཁའ་སྤྱོད་ས་སྤྱོད་དང༌། །ས་འོག་གནས་བཞུགས་ལྷན་ཅིག་སྐྱེས་པའི་བདེ་དང་ལྡན་བ་སྟན་དང་ཚནྡོ་ཧ་ལྷ་མོ། །དཀྱིལ་འཁོར་གནས་པ་དེ་ཀུན་དུས་མཐའི་མེ་ལྟར་སྤྱོད་ལ་དངོས་གྲུབ་རྒྱུར་ནི་གསོལ་བ་བཏབ། །ཧེ་རུ་ཀ་དཔལ་ཕག་མོར་བཅས། །རིག་པའི་ལྷ་མོ་རྫུ་འཕྲུལ་ཆེ། །ཕྱོགས་ཀུན་བཞུགས་པ་དཔའ་བོ་དང༌། །བྱང་ཆུབ་སེམས་དཔའ་བདག་ཕྱག་འཚལ། །རྫུ་འཕྲུལ་ཆེན་པོ་ཀུན་བརྙེས་ཤིང༌། །དེ་
༄། །རྣམས་བཞུགས་པར་གྱུར་པ་རྣམས། །ཆེ་གེ་མོ་བདག་རྡོ་རྗེ་ཆེ། །སློབ་མ་རྣམས་ལ་བརྩེ་བ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་འདྲི་བར་འཚལ། །བརྩེ་བས་བསྐྱེད་པར་གྱུར་ནས་ནི། །ཉེ་བ་ཉིད་དུ་མཛད་དུ་གསོལ། །དྲི་ཞིམ་མེ་ཏོག་ལེགས་པར་བསྲེགས། །བདུད་རྩི་ལྔ་ཡི་ཐོད་པ་ནི། །བླངས་ནས་སྤོས་བདུག་འཁོར་ལོ་དང༌། །སྐྱེ་བོ་དམ་པ་ཀུན་འདུས་པའོ། །ལྷ་ལྷག་པར་གནས་པའི་ཆོ་གའོ། །དཔའ་བོ་ལྷ་མོ་དཀྱིལ་འཁོར་བཟང༌། །མཆོད་ཅིང་གསོལ་བཏབ་དེ་ནས་ནི། །ཕྱི་རོལ་སོང་ནས་སློབ་མ་བཟང༌། །སྟོབས་ཆེན་མེ་ཏོག་ལག་ན་ཐོགས། །བརྩོན་འགྲུས་ཆེ་ལྡན་ཤེས་རབ་ཆེ། །རིགས་དང་ལྡན་ཞིང་ང་རྒྱལ་མེད། །བདེ་མཆོག་མཉེས་བྱེད་མཁས་པ་དང༌། །ཕག་མོ་ལ་གུས་སྙིང་དུ་སྡུག །ཕྱག་རྒྱ་ལྔ་དང་ཡང་དག་ལྡན། །ཐལ་བ་ཡིས་ནི་བྱུགས་པ་དང༌། །རྣལ་འབྱོར་རྒྱུད་ཀྱི་ཆོ་ག་ཤེས། །རྣལ་འབྱོར་མ་རྒྱུད་ལ་དད་པའོ། །གང་གང་གུས་དང་ལྡན་པ་ཡི། །སྔགས་དང་རྒྱུད་ལ་ལེགས་པར་བསླབས། །གཟུགས་བཟང་ཤིན་ཏུ་མཛེས་བརྩོན་དང༌། །ཆང་ལ་དགའ་བས་མྱོས་པ་ལ། །སློབ་མའི་དབང་བསྐུར་དོན་གྱིས་ནི། །ཀུན་ནས་དེ་ལ་གསོལ་བ་གདབ། །དཔའ་བོ་དཔའ་མོའི་དབང་ཤེས་ན། །འབྱུང་གནས་ལ་སོགས་རྣམ་པར་བསམ། །མཉེས་བྱེད་རྣམ་པར་དག་པ་དང༌། །གསལ་བྱེད་ཡོན་ཏན་ལྡན་པའི་མི། །སྐྱེས་པའམ་བུད་མེད་འདི་དོན་དུ། །དཔལ་ལྡན་བདེ་མཆོག་ལས་རབ་བསྟན། །བདེ་མཆོག་ལྟ་བུར་རྫོགས་ནས་ནི། །གསོལ་བ་འདེབས་པར་རྣམ་པར་བསམ། །དཔའ་བོ་ཁྱོད་བདག་རྡོ་རྗེ་ཆེ། །ཕག་མོ་ལྷན་ཅིག་ཡང་དག་ལྡན། །མགོན་པོ་ཆེན་པོ་བདག་འཚལ་ལོ། །བྱང་ཆུབ་ཆེན་པོའི་ཚུལ་བསྟན་པ། །དམ་ཚིག་དེ་ཉིད་བདག་ལ་གསོལ། །བྱང་ཆུབ་སེམས་ཀྱང་བདག་ལ་གསོལ། །དཔའ་བོ་དཔའ་མོའི་དབང་ཕྱུག་རྣམས། །ཕག་མོ་དང་ནི་ཧེ་རུ་ཀའི། །གསང་བའི་སྟན་སོགས་ལེགས་པར་དག །གནས་པའི་ལུགས་ནི་བསྟན་དུ་གསོལ། །སློབ་མའི་གཙོ་བོ་མདུན་བྱས་ཏེ། །མེ་ཏོག་ཕྲེང་འཛིན་དག་སེམས་ལ། །གཡོན་པས་ཀུན་ནས་བལྟ་བྱས་ཏེ། །རབ་ཏུ་རྒྱས་པའི་བཞིན་གྱིས་སྨྲ། །བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་
༄། །སྣོད་ཡིན་པས། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་དཔའ་བོ་ནི། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱི་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །ཤེས་རབ་ཡན་ལག་གཉིས་མེད་ཆུབ། །དཔའ་བོས་ཐམས་ཅད་མཁྱེན་པ་ཐོབ། །གསང་སྔགས་སྦྱོར་བ་མཉམ་མེད་དེ། །ཧེ་རུ་ཀ་དཔལ་སོགས་མཆོག་གིས། །བདུད་སྡེ་འཇིགས་པ་ཆེན་པོ་ཡི། །སྟོབས་ཆེན་པོ་ནི་གང་གིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །བྱང་ཆུབ་བསྒྲུབ་པའི་དོན་གྱི་རྒྱུད། །ཆོ་ག་ཐམས་ཅད་ཁྱོད་ལ་སྦྱིན། །དེ་ནས་སློབ་མ་སེར་སྣ་བྲལ། །དཔའ་བོ་ཆེན་པོ་རྣམ་དག་པའི། །བླ་མ་ལ་གསོལ་དགའ་བ་དེས། །སྡོམ་པ་མཆོག་ནི་བདག་ལ་གསོལ། །སངས་རྒྱས་ཆོས་དང་དགེ་འདུན་དང༌། །འཁོར་ལོ་གསུམ་གྱི་རྣམ་གཟུགས་ཅན། །མཁའ་འགྲོ་མ་རྣམས་བྱེ་བྲག་གིས། །དཔའ་བོ་དཔའ་མོའི་དབང་ཕྱུག་གང༌། །རྒྱལ་བའི་སྲས་འདི་ཐམས་ཅད་ལ། །ཀུན་ལ་བདག་ནི་སྐྱབས་སུ་མཆི། །དངོས་པོ་ཀུན་གྱི་དེ་ཉིད་ཀྱིས། །བླ་མ་ལ་ནི་སྐྱབས་སུ་མཆི། །འདིར་ནི་དངོས་གྲུབ་ཀུན་མཛད་ཅིང༌། །སྙིང་རྗེའི་རོ་ཡིས་ཁེངས་གྱུར་པ། །དཔལ་ལྡན་ཧེ་རུ་ཀ་སོགས་དང༌། །ལྷ་མོ་ཀུན་གྱིས་བདག་བསྲུང་མཛོད། །ཆེ་གེ་མོ་བདག་དཔའ་བོ་ཆེ། །སེམས་ཅན་ཀུན་ལ་ཕན་པར་དགའ། །ཇི་སྲིད་བྱང་ཆུབ་སྙིང་པོའི་བར། །དངོས་གྲུབ་སྦྱིན་བདག་བདག་གྱུར་ཅིག །བློ་ལྡན་སྟོན་པའི་ཁྲག་གིས་ནི། །དེ་དག་རྣམས་ལ་ཐིག་ལེ་བྱ། །སྙིང་རྗེ་སེམས་ཅན་དོན་ལ་བརྩོན། །དེ་དག་ཐམས་ཅད་བསྲུང་བར་འགྱུར། །ཞལ་གྱིས་སྤྱན་རས་གཟིགས་བླངས་ཏེ། །མགོ་ཡི་སྟེང་དུ་བླུགས་པར་བྱ། །སློབ་མ་འདི་དག་ཐམས་ཅད་ནི། །བསྲུང་བར་གྱུར་པར་ཐེ་ཚོམ་མེད། །ལྷག་པར་གནས་པའི་སློབ་མ་ནི། །འབད་བས་བཏང་སྟེ་མཉམ་པར་གཞག །དཔའ་བོ་དཔའ་མོའི་དབང་དགྱེས་ལ། །མཆོད་པ་ཀུན་གྱིས་མཆོད་བྱས་ནས། །བུད་མེད་བཞི་དང་ཡང་དག་ལྡན། །ཕག་མོའི་ནུ་མ་འཆིར་བ་དང༌། །བཟའ་དང་བཅའ་བ་ལ་སོགས་པས། །ཀུན་གྱིས་འཁོར་ལོ་བདེ་མཆོག་མཆོད། །སློབ་མ་ལྷག་
༄། །པར་གནས་པའི་ཆོ་གའོ།། །།ནང་པར་དཔའ་བོ་ཆེན་པོ་ནི། །ལྷ་མོ་བཞི་དང་མཉམ་ལྡན་པས། །ཕག་མོར་སྦྱོར་བར་ལེགས་གནས་པའི། །དཀྱིལ་འཁོར་འཇིགས་པ་བྲི་བར་བྱ། །ཁྲོ་མེད་གཙང་མ་མཁས་པ་དང༌། །སྦྱོར་ཤེས་ཡེ་ཤེས་ཕ་རོལ་སོང༌། །ཐོད་པས་སྤྱི་བོ་རབ་བརྒྱན་ཅིང༌། །ཡན་ལག་ཐལ་བས་བྱུགས་པ་དང༌། །སྐུ་ལ་ཕྱག་རྒྱ་དྲུག་ལ་སོགས། །རུས་པའི་ཕྲེད་བས་བརྒྱན་པ་དང༌། །ཁ་ཊྭཱཾ་ག་ནི་ལག་ན་ཐོགས། །ཕྲེང་བ་བརྒྱ་ཡི་ཕྱེད་ཀྱིས་བརྒྱན། །ཧེ་རུ་ཀ་ཡི་བདག་ཉིད་བྱས། །འཁོར་ལོ་སྙིང་གར་བསམ་བྱས་ཏེ། །དེ་ལྟར་བདག་ཉིད་གོ་བགོས་ཤིང༌། །སྔགས་དང་ཕྱག་རྒྱས་བརྒྱན་བྱས་ནས། །དངོས་གྲུབ་ཆེན་པོ་རབ་སྟེར་བའི། །དཀྱིལ་འཁོར་འཇིགས་པ་བྲི་བར་བྱ། །དེ་ནས་རོ་ཡི་སྐུད་པ་ནི། །ཁྲག་ཆེན་པོ་ཡིས་བརླན་བྱས་ཏེ། །ཧེ་རུ་ཀ་དཔལ་གོ་འཕང་མཆོག །དཀྱིལ་འཁོར་འཇིགས་པ་ཐིག་གདབ་པའོ། །ཁྲུ་གང་པའམ་ཁྲུ་གཉིས་པ། །ཡང་ན་བཞི་པ་དག་ཀྱང་རུང༌། །བཅུ་གཉིས་པའམ་བཅུ་དྲུག་ལས། །ལྷག་པ་ཡོངས་སུ་མི་བརྟག་གོ །དེ་ལས་གཞན་དུ་བརྟགས་ན་ནི། །སློབ་དཔོན་ཡེ་ཤེས་དམན་གྱུར་པ། །གང་དུ་སྡིག་ཅན་མི་འགྲོ་བའི། །འཇིགས་པའི་དམྱལ་བར་དེ་འགྲོ་འགྱུར། །མཁའ་འགྲོ་མ་སོགས་རང་གཟུགས་སུ། །སྐད་ཅིག་ཙམ་གྱིས་ལེགས་པར་བྱུང༌། །ཉི་ཤུ་རྩ་ལྔའི་དབྱེ་བ་ཡིས། །ཡེ་ཤེས་ལྔ་དང་ལྡན་པའི་ཐིག །དེ་བཞིན་དུ་ཡང་གང་གསུངས་པ། །སངས་རྒྱས་ལྔ་ཡི་ཡེ་ཤེས་ཆེ། །ཐིག་གི་དབུས་སུ་གྱུར་པར་དགོད། །འདི་དག་སངས་རྒྱས་ཐམས་ཅད་ཀྱི། །གསང་ཆེན་དམ་པ་རྨད་དུ་བྱུང༌། །མིག་ཏུ་ཛཿ་ལས་ཉི་ཟླ་བསམ། །ཧེ་རུ་ཀ་དཔལ་བདག་ཉིད་གནས། །འབར་བའི་བལྟ་བ་ལེགས་བཀུག་ནས། །རང་རང་ཐིག་ལ་གཞུག་པར་བྱ། །ཧེ་རུ་ཀ་སོགས་འཁོར་ལོ་བཟང༌། །ཤེས་རབ་ཐབས་དང་མཉམ་ལྡན་པས། །ཕྱི་རོལ་སྟན་གནས་བཀུག་ནས་ནི། །ཐིག་གི་དབུས་སུ་རྣམ་པར་བསམ། །རྩ་སོགས་པ་ཡི་གསང་སྔགས་དང༌། །སྙིང་པོ་ཉེ་བའི་སྙིང་པོ་ཡིས། །མེ་ཏོག་ལྡན་པའི་ཁྲག་གིས་བྱུག །རྣལ་འབྱོར་རིག་པས་ཐོད་པར་གཞག །ཐིག་སྐུད་ལེགས་པར་མངོན་པར་བསྔགས། །མཁའ་འགྲོ་མ་ཡི་སྔགས་ཀྱིས་བསྲུང༌། །བདུད་རྩི་
༄། །ལྔ་དང་ཡང་དག་ལྡན། །ཁ་དོག་ལྔ་པ་ཆོ་ག་ལྡན། །ཐིག་སྐུད་དེ་ནི་གཅིག་ཏུ་བསྒྲིལ། །སངས་རྒྱས་ཀུན་གྱིས་བྱིན་གྱིས་བརླབ། །དཔལ་ལྷ་དངོས་གྲུབ་ཀུན་བྱེད་ཅིང༌། །ཆོས་ཀྱི་གནས་ཏེ་དྲི་མ་མེད། །བླ་མ་ཕྲེང་ལྡན་གྱིས་བླངས་ནས། །གཡོན་པས་སློབ་མ་ལ་བྱིན་བྱ། །གཉིས་མེད་རྣམ་པའི་སྦྱོར་བ་ཡིས། །འཁོར་ལོའི་གཙོ་བོ་བསྒྲིལ་བར་བྱ། །ལེགས་བསྒྲིལ་སློབ་མ་ལ་བཏང་ནས། །ཛ་ཛ་ཞེས་པས་བདུན་དུ་གནས། །དེ་ནས་སློབ་མས་ཀྱང་བརྗོད་པ། །རང་གིས་ཀྱང་ནི་ཛ་ཛ་བརྗོད། །བླ་མ་སློབ་མས་བླངས་ནས་ནི། ཕག་མོའི་སྦྱོར་བས་ལེགས་པར་གནས། །དང་པོའི་ལས་ཅན་སྔགས་པ་ཡིས། །དཔའ་བོའི་དཀྱིལ་འཁོར་ཐིག་གདབ་པོ། །ཡེ་ཤེས་ཅུང་ཟད་ཐོབ་པ་ཡིས། །ཁྱེའུ་བཟང་དང་བུ་མོ་ལ། །དཔའ་བོ་རྣལ་འབྱོར་མ་ཕབ་ནས། །ཐིག་གདབ་ཕྱིར་ན་གསོལ་བ་བཏབ། །དེ་ཡིས་འཁོར་ལོ་བདེ་མཆོག་བཟང༌། །སྟན་སོགས་པ་ཡི་ལྷ་མོ་ཀུན། །ལྷན་ཅིག་སྐྱེས་དང་ཡང་དག་ལྡན། །མཛེས་པར་གསལ་བར་མཐོང་བར་འགྱུར། །དེ་བཞིན་དུ་ཡང་གསུངས་པ། རྡོ་རྗེའི་ཐིག་ནི་གདབ་པ་དང༌། །ཚོན་རྩི་དག་ནི་དགྱེ་བ་དང༌། །སྔགས་ཀྱི་སེམས་པས་མི་བྱ་སྟེ། །བྱས་ན་བྱང་ཆུབ་རྙེད་པར་དཀའ། །དེ་བས་དམ་ཚིག་ཆོ་ག་ཤེས། །སྔགས་ཀྱི་ལྷ་རྣམས་བཅུག་ནས་ནི། །བྱིན་རླབས་གོ་གོར་བསམས་བྱས་ནས། །དཀྱིལ་འཁོར་རྣམས་ནི་རབ་ཏུ་བརྟགས། །རྡོ་རྗེ་སེམས་དཔའ་རྒྱལ་ཆེན་པོ། །མཱ་མ་ཀཱི་ནི་དབབ་པར་བྱ། །དེ་ཉིད་སྔགས་རྣམས་ཐམས་ཅད་ཀྱི། །གསང་བ་མཆོག་སྟེ་རྨད་དུ་བྱུང༌། །རང་ཉིད་མཁས་པར་གྱུར་པ་ཡིས། །དེ་ལྟར་བྱས་ན་ཉེ་བར་འགྱུར། །བྱོན་པར་གྱུར་ནས་གསང་བའི་མཆོག །མཉེས་པར་ལྡན་པས་འདི་དག་བྲི། །དེ་བཞིན་དུ་ཡང་གསུངས་པ། ཇི་བཞིན་འཁོར་ལོའི་ཇི་བཞིན་གནས། །ཇི་བཞིན་བཀོད་པ་འགྲོ་ཇི་བཞིན། །འཁོར་རྣམས་བསྡུ་བར་གྱུར་ནས་ནི། །དེ་ལྟར་འཁོར་ལོ་མཆོག་རྣམས་སྤྲོ། །དཔལ་ལྡན་རྡོ་རྗེ་སེམས་དཔའི་ལྷ། །འཁོར་ལོ་མངོན་སུམ་མཐོང་གྱུར་བ། །ཕྱི་ནས་བྲིས་པར་གྱུར་པ་ཡང༌། །ཇི་བཞིན་བསོད་ནམས་བརྟག་པའོ། །དེ་བཞིན་དུ་ཡང་གསུངས་པ། །རྡོ་རྗེ་སྒྲ་ཆེན་དེ་དང་དེས། །ཐིག་གིས་ཐིག་གདབ་ལེགས་པར་གནས། །མཐའ་ཡས་ཞིང་ན་
༄། །ཐུབ་དབང་ཟླ་བ་རྣམས། །འདིར་ནི་སེམས་ཅན་དོན་གྱི་དུས་ལ་བབ། །ཐོག་མར་སྔགས་པ་ཡི་དགས་བལྟ། །འཁོར་ལོ་ས་ཡི་བྱང་དུ་གནས། །ནམ་མཁའི་ས་ལ་གདབ་བྱ་སྟེ། །བློ་ལྡན་ཐིག་ནི་གཡོན་པས་བསྐོར། །ཨོཾ་བཛྲ་ས་མ་ཡ་སུ་ཏྲ་མཱ་ཏི་ཀྲ་མ་ཧཱུཾ། །ཕྱོགས་བཅུ་འཇིག་རྟེན་ཁམས་བཞུགས་པ། །སེམས་ཅན་དོན་ཕྱིར་དེ་བཞིན་གཤེགས། །དཔའ་བོ་དཔའ་མོའི་དབང་ཕྱུག་མའི། །ལྷ་མོའི་ཐིག་གི་སྒྲ་ཡིས་བསྐུལ། །ཤར་དུ་གནས་ནས་ནུབ་བལྟས་ཏེ། །ཚངས་ཐིག་གཉིས་པ་ཡང་གདབ་པོ། །མེ་རུ་གནས་ནས་ནུབ་ཏུ་ཞལ། །ལྷོ་ཡི་ཕྱོགས་སུ་ཐིག་གདབ་པོ། །ནུབ་ཕྱོགས་གནས་ནས་ཤར་དུ་བལྟ། །བྱང་གི་ཕྱོགས་ཀྱི་ཐིག་གདབ་པོ། །བསྐོར་ནས་སློབ་དཔོན་རླུང་གནས་ཏེ། །ལྷོ་རུ་མངོན་པར་ཕྱོགས་གྱུར་ནས། །ནུབ་ཀྱི་ཆ་རུ་ལེགས་པར་གདབ། །བྱང་དུ་མངོན་ཕྱོགས་སྔགས་པ་ནི། །མེ་ཡི་གནས་སུ་རྣམ་གནས་ཏེ། །ཤར་གྱི་ཆ་ཡི་ཐིག་བརྩམ་མོ། །དབང་ལྡན་མེར་གནས་རྣལ་འབྱོར་པ། །མཚམས་ཀྱི་ཐིག་ནི་གདབ་པར་བྱ། །ཕྱོགས་ལ་སོགས་པའི་དབྱེ་ཤེས་ནས། །ཐིག་གདབ་པ་ནི་ལེགས་པར་བརྩམ། །ཚངས་ཐིག་དང་པོ་དབུས་སུ་ནི། །ཐིག་བཞི་རྣམས་ནི་གདབ་པར་བྱ། །ཐུགས་དང་གསུང་དང་སྐུ་འཁོར་ལོ། །རྡོ་རྗེ་ཕྲེང་བ་ལ་སོགས་བྱ། །ཁ་སྦྱོར་དབུས་སུ་རི་མོ་ལྔ། །བློ་དང་ལྡན་པས་ཟླུམ་པོར་བྱ། །རི་མོ་བཞི་པོ་གཞན་རྣམས་ནི། །རྡོ་རྗེ་ཕྲེང་བ་ལ་སོགས་བྱ། །དམའ་བས་ནད་དེ་ཆད་པས་ཟད། །ཡོ་བས་དངོས་གྲུབ་མེད་པར་འགྱུར། །གཡས་སུ་བསྡུ་བའི་སྦྱོར་བ་ཡིས། །སློབ་མ་རྣམས་ནི་བརླག་པར་འགྱུར། །འཁོར་ལོ་ཉིས་འགྱུར་རིང་བ་སྟེ། །སྒོ་ཡི་ཉི་ཤུའི་ཆར་གྱུར་པ། །ཧེ་རུ་ཀར་བདག་འདུག་ནས་ནི། །ཐིག་སྐུད་ཀྱིས་ནི་ཐིག་གདབ་པོ། །ཟུར་བཞི་པ་དང་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །ས་འོག་གནས་པའི་ཧ་མོ་རྣམས། །འཁོར་ལོའི་ཕྲེང་བ་སོགས་པས་བསྐོར། །ཐིག་བཞི་དང་ནི་ཡང་དག་ལྡན། །འཕན་དང་མེ་ཏོག་ཕྲེང་བས་བསྐོར། །མཚམས་ཀྱི་ཆ་ནི་ཐམས་ཅད་དང༌། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་གྱིས་བརྒྱན་པར། །ཕྱི་རོལ་དཀྱིལ་འཁོར་ཐིག་གདབ་པོ། །དེ་ཡི་དབུས་སུ་པདྨ་ནི། །འདབ་མ་བརྒྱད་
༄། །པ་ལྟེ་བར་བཅས། །ཕྱི་རོལ་རྡོ་རྗེ་ཕྲེང་བས་བསྐོར། །འཕྲོ་བའི་རྡོ་རྗེའི་ཚོགས་སྤྲུལ་བའོ། །འཁོར་ལོ་རྩིབས་བརྒྱད་ལེགས་པར་བྲི། །དངོས་གྲུབ་ཀུན་དང་ཡོན་ཏན་གཞི། །ཕྱི་རོལ་དུ་ནི་ནག་པོས་བསྐོར། །མིང་ནི་མཁའ་སྤྱོད་ཅེས་བྱའོ། །རྩིབས་བརྒྱད་ལ་སོགས་འཁོར་ལོ་སྟེ། །པདྨའི་ཀ་བའི་ཕྲེང་གིས་བསྐོར། །ས་འོག་གནས་པའི་ལྷ་མོ་ནི། །འཁོར་ལོའི་ཕྲེང་བས་དང་པོར་བསྐོར། །རྩིབས་ཀྱི་མཚམས་སུ་རྡོ་རྗེ་ནི། །མཉམ་གཞག་རྣལ་འབྱོར་པ་ཡིས་བྲི། །འཁོར་ལོ་ཕྲེང་བའི་མཐར་ཐུག་པར། །འབར་བའི་རི་མོ་དེ་བཞིན་ནོ། །ཧེ་རུ་ཀ་དཔལ་རྣལ་འབྱོར་ཆེ། །འཁོར་ལོའི་དབུས་སུ་ལེགས་གནས་ནས། །ཧི་སྒྲོགས་ཁྲོ་བོའི་ལྟ་བ་ཡིས། །དེ་ནས་སྒོ་ནི་དབྱེ་བར་བྱ། །སྒོ་ནི་འཁོར་ལོའི་བརྒྱད་ཆ་སྟེ། །ཁ་ཁྱེར་དག་ནི་ཡངས་པའོ། །སྒོ་ཁྱུད་དང་ནི་སྒོ་ཡི་ཚད། །ལྷ་ཡི་སྣམ་བུའང་དེ་བཞིན་ནོ། །ཁ་ཁྱེར་ཀུན་ནས་སྒོ་ཡིས་ཕྱེད། །འགྲམ་དང་ལོགས་དང་དེ་བཞིན་ནོ། །དྲ་བ་དྲ་ཕྱེད་ཉི་ཟླ་དང༌། །འཕན་དང་མེ་ཏོག་ཕྲེད་བས་སྤྲས། །ཚོན་གྱི་ས་ནི་དེ་ཡི་ཕྱེད། །རྩ་བའི་ཐུག་གི་ས་ཡི་རྒྱབ། །རྡོ་རྗེ་ལ་སོགས་ཀ་བ་ཡི། །ས་ནི་ཚོན་གྱི་ས་དང་མཉམ། །རྟ་བབས་སྒོ་ལས་སུམ་འགྱུར་ཏེ། །འཕན་དང་དྲིལ་བུ་དང་ལྡན་པ། །དྲིལ་བུ་རླུང་གིས་བསྐྱོད་པ་ཡི། །འཕན་ནི་ཕྱི་རོལ་མཚམས་སུའོ། །དང་པོར་ནམ་མཁའི་ཐིག་ཡིན་ནོ། །དེ་ཡི་འོག་ཏུ་ཡེ་ཤེས་ཐིག །ཕྱོགས་ཀུན་མཉམ་པར་བགྲོད་ནས་ནི། །རྣལ་འབྱོར་པ་ཡི་ཆོ་གས་གདབ། །ལུགས་བྱུང་ལུགས་བཟློག་པ་འདིས་ནི། །ཕྱི་རོལ་དཀྱིལ་འཁོར་ཐིག་ཡིན་ནོ། །དེ་བཞིན་ནང་གི་བདག་ཉིད་ལུས། །ཚོགས་པ་ལས་བྱུང་མགོན་པོ་ཡིས། །ལུས་ཀྱི་དཀྱིལ་འཁོར་ཐིག་གདབ་པོ། །ལྷན་ཅིག་སྐྱེས་ཤིང་རང་བཞིན་དག །དཔའ་བོ་དཔའ་མོའི་དབང་ཕྱུག་ལྡན། །ཕྱི་དང་ནང་གི་ཐིག་གདབ་པའི་ཆོ་གའོ།། །།དུར་ཁྲོད་རུས་པ་ལེགས་པར་བླང༌། །ཐལ་བ་ལོ་མ་ལ་སོ་ཕག་དང༌། །བ་བླ་དག་དང་ལྡན་པ་ཡིས། །ལེགས་བྲིས་ཧེ་རུ་ཀ་འཁོར་ལོ། །ཐོད་པར་རྡུལ་ཚོན་བཞག་ནས་ནི། །བློ་བཟང་ཐིག་གདབ་ཆོ་གས་སོ། །འབར་བའི་ལྟ་བས་བཀུག་ནས་ནི། །ཡེ་ཤེས་འཁོར་ལོའི་སྙིང་པོ་གཞུག །སངས་རྒྱས་ཀུན་གྱི་མཁའ་འགྲོ་མའི། །གསང་སྔགས་ཉིད་ཀྱིས་མངོན་
༄། །བསྔགས་ཏེ། །དཔལ་ལྡན་ཧེ་རུ་ཀ་རྒྱལ་བདག །འཁོར་ལོའི་དབུས་སུ་ལེགས་པར་གཞུག །དུར་ཁྲོད་ལས་བྱུང་ཐམས་ཅད་ནི། །དབང་ཕྱུག་མཆོག་གི་ཕྱག་རྒྱའོ། །ཉི་ཤུ་རྩ་བཞིའི་དབྱེ་བ་ཡིས། །རྡུལ་ཚོ་ན་བྲི་བ་བརྩམ་པར་བྱ། །ལག་པ་གཡོན་པས་མེ་ཕྱོགས་ནས། །བློ་དང་ལྡན་པས་གཡོན་དུ་བསྐོར། །དཀར་པོ་སེར་པོ་དེ་བཞིན་དུ། །དམར་མོ་ལྗང་གུ་དེ་བཞིན་ཉིད། །ལྷ་མོ་བཞི་དང་མཉམ་ལྡན་ཞིང༌། །དཔའ་བོ་བཞིས་ནི་བསྐོར་བའོ། །དག་ཅིང་བར་དུ་ནས་ཀྱི་ཚད། །རི་མོ་ལྡན་པོ་བྲི་བར་བྱ། །ཇི་ལྟ་བ་བཞིན་དུ་གསུངས་པ། །སྒོ་ཡི་ཉི་ཤུ་ཆ་རུ་ནི། །མཉམ་པར་དགྱེས་པས་བྲི་བར་བྱ། །སྤོམ་པས་ནད་ནི་འབྱུང་བར་འགྱུར། །ཕྲ་བ་ཡིས་ནི་ནོར་ཟད་ཅིང༌། །ཡོན་པོ་ཡིས་ནི་རྣམ་པར་སྡང༌། །ཆད་པས་སློབ་དཔོན་སློབ་མ་འཆི། །གཡས་སུ་བསྐོར་ནས་བྲིས་པ་ཡིས། །རྡུལ་ཚོན་རྣམས་ནི་མཐུ་མེད་འགྱུར། །ལྷོ་ཡི་ས་ནི་ནག་པོ་སྟེ། །ཤར་ལྗང་དེ་བཞིན་བྱང་དུ་དམར། །ནུབ་ཕྱོགས་ས་ནི་སེར་པོ་བྲི། །གསང་སྔགས་རིམ་པས་ཡིད་འོང་བར། །དབུས་སུ་པདྨའི་འདབ་མ་ནི། །ཕྱོགས་ཀྱི་མདོག་ཏུ་བརྟག་པར་བྱ། །རྣལ་འབྱོར་མ་ཡི་འཁོར་ལོ་འབྱུང༌། །ཧེ་རུ་ཀ་ཡི་དཀྱིལ་འཁོར་བྱ། །སྔོན་པོ་དམར་པོ་དཀར་པོ་ཆེ། །ཐུགས་གསུང་སྐུ་ཡི་འཁོར་ལོའོ། །གཞན་མ་ཐམས་ཅད་ཅི་མཛེས་པར། །ཕྱི་རོལ་རྟ་བབས་བྲི་བར་བྱ། །ལྷ་མོ་ཆེན་མོ་དང་ལྡན་པའི། །དཔའ་བོ་ལྟེ་བར་དགོད་པར་བྱ། །མཁའ་འགྲོ་མ་སོགས་ཡང་དག་ལྡན། །ཧེ་རུ་ཀ་རྡོར་འདབ་མ་ལའོ། །དེ་བཞིན་ཁྲ་སོགས་ལྷ་མོ་རྣམས། །ཧེ་རུ་ཀ་སོགས་ཡང་དག་ལྡན། །སྒོ་དང་མཚམས་ཀྱི་ཆ་རྣམས་སུ། །སྔགས་པས་མཉམ་པར་བཞག་པས་བྲི། །ཕྱི་རོལ་ཡི་དགས་གནས་དེ་བཞིན། །སྲིན་མོ་ལ་སོགས་ཡང་དག་ལྡན། །འོད་ཟེར་འཕྲོ་ཞིང་ཁ་གྱེས་པའི། །རྡོ་རྗེ་རྟ་བབས་སྟེང་དུའོ། །རྡུལ་ཚོན་བཀྱེ་བས་རྣམ་མཛེས་པའོ། །ཕྱི་རོལ་གྱི་ནི་དཀྱིལ་འཁོར་བསྟན། །བླ་མ་མཉེས་བྱས་བློ་ལྡན་པས། །ནང་གི་བདག་ཉིད་རྣམ་ཤེས་བྱ། །བསམ་གྱིས་མི་ཁྱབ་སྦྱོར་བ་ཡིས། །རྡུལ་ཚོན་བྲི་བ་སྐྱོན་ཡིན་ནོ། །ལྷན་ཅིག་སྐྱེས་དགའ་རོལ་པ་ཡིས། །དགའ་བའི་སེམས་ཀྱིས་བདག་ཉིད་བྲི། །དཀྱིལ་འཁོར་ལ་སོགས་རྩོམ་པ་ཡི། །རླུང་ལ་སོགས་
༄། །པ་བྱུང་བ་ན། །ཧེ་རུ་ཀ་དཔལ་བདག་སྦྱོར་བས། །གདུག་པ་ཐམས་ཅད་བསལ་བར་བྱ། །ཕྱི་དང་ནང་གི་ཚོན་དགྱེ་བའི་ཆོ་གའོ།། །།བུ་ཡི་ཐོག་མའི་ཡེ་ཤེས་རྣམས། །རྩིབས་སུ་ཁ་དོག་བཟང་པོ་གང༌། །བསམ་གཏན་དེ་ཡི་འོད་ཟེར་གྱིས། །ཡེ་ཤེས་འཁོར་ལོ་མཉམ་པར་དགུག །ལྷ་མོའི་ཚོགས་ནི་དུ་མ་དང༌། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་ཉིད་ཡང་དག་རིན་ཆེན་བརྒྱན། །གཞན་པའི་དཔའ་བོ་སྟོབས་ཆེན་རྣམས། །རྟག་ཏུ་རྒྱུད་ལས་བྱུང་ཆོ་གས། །འཁོར་ལོ་བདེ་མཆོག་བློ་ལྡན་པས། །ཡང་ན་སརྦ་བུདྡྷ་སོགས། །རྒྱུད་ལས་མཆོད་པའི་ཆོ་གས་མཉེས། །དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །གཅིག་ཏུ་མེ་ཏོག་ཕྱག་རྒྱ་ནི། །འདོད་པའི་ཡོན་ཏན་ལྔ་རང་བཞིན། །རྒྱ་སྐྱེགས་པ་བླ་རམས་མཆོག་དང༌། །ཚོན་སྣ་ལྔ་ལ་རྗེས་སུ་བཅོས། །དཀར་པོ་ལྔ་ཡི་རང་བཞིན་རྒྱས། །མཉམ་པར་མཆོད་པས་འགྲུབ་པར་འགྱུར། །ཁམས་ཀྱི་རང་བཞིན་ཐམས་ཅད་དང༌། །དེ་བཞིན་སྲོག་དང་རྩ་རང་བཞིན། །རྣམ་པ་སྣ་ཚོགས་དྲི་དང་ལྡན། །སྔོན་བཞིན་མཉམ་པར་འགྲུབ་པར་འགྱུར། །ཙནྡན་གཉིས་དང་རི་དགས་སྐྱེས་དང་ག་པུར་བཅས། །ཤ་ལ་ཀ་དང་ན་གའི་སྤོས་ནི་བུ་རམ་ལྡན། །ལས་ཀུན་རབ་སྒྲུབ་སྤོས་ལ་སོགས། །གུ་གུལ་ས་རྫ་ར་དང་ག་བུར་དང༌། །རི་དགས་ལས་སྐྱེས་སྤོས་རྣམས་ནི། །རྫས་འདི་རྣམས་ནི་བཅོས་པ་ཡི། །མར་ཁུས་སྤར་བའི་སྣང་བ་བྱ། །ཙནྡན་གུར་ཀུམ་པྲི་ཀྭ་དང༌། །ག་པུར་རི་དགས་ལས་སྐྱེས་སྤོས། །བཅོས་ཤིང་གདུག་པར་གྲུབ་པའི་རས། །ཕྱག་རྒྱ་བཟང་པོའི་རས་ཡིན་ནོ། །ཀཀྐོ་ལ་དང་ཨེ་ལེ་དང༌། །མུ་སྟ་ཀཾ་དང་ག་པུར་དང༌། །རི་དགས་ལས་བྱུང་བ་ཡི་དྲི། །འདི་རྣམས་ཞིབ་མོར་བཏགས་ནས་ནི། །སེང་ལྡེང་རི་ལུར་དགོད་པར་བྱ། །ཏྭ་ག་འདབ་མ་ལོ་དྷ་དང༌། །མ་རི་ཙ་དང་ག་པུར་རྣམས། །རབ་ཏུ་བསྟེན་པར་བྱ་བའོ། །ས་ཧཱ་ཀཱ་རིའི་མར་ཁུ་ལྡན། །ཁ་ལ་བསྒོས་པས་ཞེས་སུ་དྲན། །དེ་འོག་གཏོར་མའི་མཆོད་པ་སྦྱིན། །རྣམ་པར་བསྒྱིངས་མ་བཅོས་པའི་ཆང༌། །ཆང་དང་བདུད་རྩི་དེ་བཞིན་ནོ། །དཔའ་བོ་གཅིག་དང་རྒུན་འབྲུ་དང༌། །གླད་པ་དང་ནི་བི་ཊ་དང༌། །ཤྩེ་ཊི་རྣམས་ནི་དེ་བཞིན་ནོ། །ལན་ཚྭ་ལ་སོགས་རོ་རྣམས་ཀུན། །ཤ་ཀ་ར་སོགས་བདུད་
༄། །རྩི་འདྲ། །ཐམས་ཅད་བདག་ཉིད་རོས་དངོས་གྲུབ། །མ་ལུས་ལུས་པ་མེད་པ་སྒྲུབ། །སྣ་ཚོགས་སྟོན་མོས་དངོས་གྲུབ་ནི། །ཆང་དང་ཤ་དང་ཡང་དག་ལྡན། །འདོད་པ་ཉེ་བར་ལོངས་སྤྱོད་དང༌། །སྐལ་བཟང་ཆེ་མཆོག་རབ་ཏུ་འགྲུབ། །པ་ཀྭའི་འབྲས་བུ་པ་ནས། །རྒུན་འབྲུ་དང་ནི་ན་ལེ་ཀ །ཨ་ལུ་ཀ་ལ་སོགས་པ་ཡི། །འབྲས་བུའི་ཕྱག་རྒྱ་འདི་གཏན་དུ། །དངོས་གྲུབ་ཀུན་གྱི་འབྲས་བུར་སྤྲོ། །ཤ་ཀ་ར་དང་སྦྱར་རྩིར་བྱུག །ཨ་མྲའི་རུས་པ་རྣམས་ལ་བྱུག །ས་ཧ་ཀ་རིའི་མར་ཁུ་སོགས། །མཉམ་པའི་དྲི་རུ་རབ་ཏུ་གྱུར། །ཇི་ལྟར་རིགས་པར་ཤུན་པ་སོགས། །བ་བླ་རྒྱ་སྐྱེགས་ཀྱིས་བཙོས་ཏེ། །མཆོད་པའི་དུས་སུ་དབུལ་བར་བྱ། །ལུས་སྐྱེས་པ་དང་ཡང་དག་ལྡན། །ཕྱི་རོལ་མཆོད་པ་བདག་གིས་བསྟན། །ལེགས་པར་མཆོད་པར་མཉེས་བྱས་ཏེ། །ཕྱི་རོལ་སོང་སྟེ་གཏོར་མ་སྦྱིན། །གཅེར་བུ་སྐྲ་གྲོལ་གྱུར་པ་དང༌། །ཁ་ཊྭཱཾ་ག་ཐོགས་ལེགས་གནས་ཏེ། །ཆང་དང་ཤ་དང་ཡང་དག་ལྡན། །མཁའ་འགྲོ་མ་སོགས་ལ་འབུལ་ལོ། །འབྱུང་གནས་ལ་སོགས་རྣལ་འབྱོར་ཆེ། །བློ་དང་ལྡན་པས་སྤངས་བྱས་ཤིང༌། །ལྷོ་རུ་མངོན་པར་ཕྱོགས་བྱས་ཏེ། །གནས་ནི་མཐོན་པོར་རྣམ་པར་གནས། །གཡོན་པས་གཡས་པའི་རྐང་པ་མནན། །གྱེན་དུ་ལྟ་བས་བལྟས་ནས་ནི། །འབར་བའི་ཕྱག་རྒྱ་ཡང་དག་ལྡན། །ཕེཾ་བརྗོད་པ་ཡི་བདག་ཉིད་ཅན། །ཨོཾ་ཨ་རལླི་ཧོ་ཛཿ་ཧཱུཾ་བཾ་ཧོཿ་།ཨོཾ་བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོ། །གཅིག་དང་ལྡྔ་དང་དེ་བདུན་དུ། །སྔོན་དུ་གདང་སྔགས་བརྗོད་པར་བྱ། །དམ་ཚིག་རྫས་དང་ཡང་དག་ལྡན། །ཐོད་པའི་ནང་དུ་རྣམ་པར་བསམ། །རྡོ་རྗེ་ཐལ་མོ་གྱེན་ཁ་དབྱེ། །ཕྲེང་བའི་ཕྱག་རྒྱར་རབ་ཏུ་གྲགས། །དཔའ་བོ་དཔའ་མོའི་དབང་ཕྱུག་ཀུན། །ལམ་ལ་གནས་རྣམས་མཉེས་པའོ། །ཕྱོགས་སྐྱོང་ཡི་དགས་འབྱུང་པོ་ལ། །མཉམ་པར་བཞག་ནས་གཏོར་མ་སྦྱིན། །ཁ་ཁ་ལ་སོགས་སྔགས་འདི་ཡིས། །འདོད་པ་ཐམས་ཅད་བསྒྲུབ་པའོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱ་ཀཱ་སཱ་བྷཱུ་ཏ་པྲེ་ཏ་པི་ཤཱ་ཙི་ཨུནྨཱ་ད་ཨ་པ་སྨཱར་བཛྲ་ཌཱ་ཀི་ནཡཱ་ད་ཡ། །ཨི་མཾ་བ་ལིཾ་གྲྀཧྞ་ནྟུ་སརྦ་སིདྡྷི་མྨེ་པར་ཡྩྪནྟུ་ཡ་ཐཻ་བཾ་ཡ་ཐེ་ཥྚཾ་བྷུ་ཛ་ཐ་པི་པ་ཐ་མཱ་ཏི་ཀྲ་མ་ཐ། །མ་མ་སརྦ་ཀཱ་རྟ་ཡ་སྪུ་ཁ་བི་ཤུདྡྷཱ་ཡེ་ས་ཧ་ཡི་ཀཱ་བྷ་བནྟུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཏོར་མ་
༄། །བྱིན་ནས་དེའི་འོག་ཏུ། །སྔགས་པས་སྤྱད་དང་བཟའ་བ་བརྩམ། །དཔའ་བོ་དཔའ་མོའི་དབང་ཕྱུག་ལྡན། །སྙིང་རྗེའི་སྟོབས་ཀྱི་སྦྱོར་བ་ཅན། །རྡོ་རྗེས་མཚན་ཅིང་ཁྲོ་བོའི་གཟུགས་ཅན་རོ་ཡི་ཁ་ནི་གདངས་པ་སྤྱི་བོར་ཟླ་བ་ཕྱེད་པས་བཅིང༌། །ཡིད་འོང་དྲིལ་བུའི་སྒྲ་ཡིས་མཛེས་ཤིང་སྣ་ཚོགས་མང་པོས་འཕྱང་བའི་རྒྱལ་མཚན་ཚོགས། །བརྒྱན་པའི་དྲག་པོའི་སྒྲ་དང་སྣ་ཚོགས་མང་པོའི་མེ་ཏོག་གིས་མཚན་ཕྲེང་བ་བཅིངས། །ཁ་ཊྭཱཾ་ག་ནི་འབར་བ་མཆོག་ཏུ་དགའ་བ་བསྐྱེད་པ་རྡོ་རྗེ་རྣལ་འབྱོར་བས་གཟུང་དོ། །དཔལ་ལྡན་རྡོ་རྗེ་ལྷ་མོ་དེ་རྗེས་བླ་མ་ཆོག་དང་ཧེ་རུ་ཀ་འཁོར་མགོན་པོ་ལ་ཕྱག་འཚལ། །སློབ་མ་བཟང་པོ་ཡོན་ཏན་མཆོག་ལྡན་དང་ནི་མཆོད་པ་ཀུན་གྱི་བྱེ་བྲག་བླངས་ནས་ནི། །གཡས་ན་འཁྲོལ་བའི་ལེགས་པའི་ཌ་མ་རུ་ནི་དྲི་མེད་ཧཱུཾ་སྒྲོགས་དགའ་བའི་མཆོག །སློབ་དཔོན་རོལ་པ་མཛད་པས་ངེས་པར་དཀྱིལ་འཁོར་ཁང་བའི་དབུས་སུ་འཇུག །ལྷོ་ཡི་སྒོ་རུ་སོང་ནས་ནི། །ལྷག་མ་རྣམས་སུ་ཡོངས་སུ་བསྐོར། །ལྷ་མོ་རྒྱུད་གསུངས་རིམ་པའོ། །རྣལ་འབྱོར་རྒྱུད་རིགས་ཤར་སོགས་ནས། །ལྷོ་ཡི་སྒོ་རུ་འགྲོ་བ་ནི། །གང་བསྟན་བདེ་བར་གསུངས་པ་ཡི། །དཀྱིལ་འཁོར་བྲི་བར་བརྟག་པ་ནི། །ཀུན་རྫོབ་དོན་དུ་རྟོགས་པར་བྱ། །ཕྱོགས་ནི་མཐའ་ཡས་ཆ་ཤས་ཀྱིས། །ལྷོ་ལ་སོགས་པ་བརྟགས་ན་ནི། །ལྷོ་ཡི་ཞལ་ནི་གང་ཡིན་ཉིད། །རྣལ་འབྱོར་པས་ནི་ཀུན་རྫོབ་ཉིད། །དང་པོར་དཔའ་བོ་དྲུག་དང་ལྷ་མོའི་བཀོད་པ་བ་སྲུང་བའི་འཁོར་ལོ་བྱ། །སྔགས་ཀྱིས་མངོན་བསྔགས་ཆོག་ལྡན་པས་དཀྱིལ་འཁོར་བསྒྲུབ་པ་དེ་ནས་བྱ། །བདེ་བའི་སྟན་ལ་འབད་པ་ཡིས། །ཤེས་རབ་ཡན་ལག་སྟན་གྱི་སྟེང༌། །དཀྱིལ་འཁོར་ས་ཡི་དབུས་སུ་ནི། །སྔོན་དུ་བསྟན་པའི་མཚན་ཉིད་ལྡན། །མཛེས་པའི་གསེར་དང་རིན་ཆེན་ཀུན། །དཀྱིལ་འཁོར་ལ་ནི་གཏོར་བར་བྱ། །ཤ་ཆེན་པོ་དང་ཡང་དག་ལྡན། །གནས་བརྒྱད་དུ་ནི་ལེགས་པར་བདུག །མར་ཁུ་ཆེན་པོ་དང་ལྡན་པའི། །མར་མེ་བརྒྱད་ནི་དབུལ་བར་བྱ། །མེ་ཏོག་སྣ་ཚོགས་རྣམ་པར་དགྲམ། །སྣ་ཚོགས་དྲི་ཡིས་ལེགས་པར་བསྒོ། །སྒོ་བཞི་རུ་ནི་དཔའ་བོ་དང༌། །རྣལ་འབྱོར་མ་དང་གཉིས་མེད་གནས། །ལུས་ལ་ཕྱག་རྒྱ་ལྔ་ས་སོགས། །མགོ་བོ་ལྔ་ཡིས་མཚན་པ་དང༌། །གང་ཡང་གཅེར་
༄། །བུའི་གོས་དང་ནི། །ཆང་ལ་དགའ་བས་མྱོས་པའོ། །ཐམས་ཅད་རལ་པའི་ཅོད་པན་བཅས། །སྤྱད་དང་བཟའ་བ་མཆོག་ཏུ་བརྩོན། །མཚམས་ཀྱི་ཆ་ནི་གཞན་རྣམས་སུ། །དཔའ་བོ་དཔའ་མོའི་དབང་ཕྱུག་ལྡན། །རྡོ་རྗེ་དྲིལ་བུ་མཉམ་འཁྱུད་ཅིང༌། །ནུ་མ་འཚིར་བ་ལ་བརྩོན་པའོ། །ཚོགས་ཀྱི་གཙོ་བོའི་བདག་པོ་ནི། །དཔལ་ལྡན་འཁོར་ལོས་སྒྱུར་ལེགས་གནས། །ལྷ་མོ་བཞི་དང་ཡང་དག་ལྡན། །ཕག་མོའི་ཞལ་ལའོ་བྱེད་པའོ། །ལ་ལ་གླུ་ཡིས་གླུ་ལེན་ཅིང༌། །ལ་ལ་གར་བྱེད་རྣལ་འབྱོར་པ། །ལ་ལ་བཞད་པ་རབ་ཏུ་བྱེད། །བཟའ་དང་སྤྱོད་པ་ལ་ཆགས་པའོ། །ལ་ལ་རྫ་ཡི་རྔ་བརྡུང་དང༌། །བཀྲ་ཤིས་གླུ་ནི་སྣ་ཚོགས་ཀྱིས། །འཁོར་ལོ་བདེ་མཆོག་བདེ་བ་ཡི། །དཔའ་བོ་ཆེན་པོ་ལ་མཆོད་དོ། །ཐམས་ཅད་དཔའ་བོ་དྲུག་དང་ལྡན། །རྣལ་འབྱོར་མས་ནི་རྒྱན་དུ་བྱས། །གོ་ཆ་ལ་སོགས་ཡང་དག་ལྡན། །རྡོ་རྗེ་དཀྱིལ་འཁོར་ལེགས་པར་གནས། །དེ་ལྟར་གོ་བགོས་བདག་ཉིད་ནི། །སུམ་ཅུ་གསུམ་པས་ཀྱང་མི་ཤིགས། །ཧེ་རུ་ཀ་ལ་སྤྲོ་བྱས་ནས། །བཟའ་དང་སྟོན་མོ་ལེགས་པར་བརྩམ། །ཕྱི་དང་ནང་གི་བདག་ཉིད་ཀྱི་དཀྱིལ་འཁོར་གྱི་ལྷ་དང་དཔའ་བོ་དང་དབང་ཕྱུག་མ་ལ་མཆོད་པའི་ཆོ་གའོ། །དམ་ཚིག་འཁོར་ལོ་དྲུག་པ་ནི། །ཡེ་ཤེས་འཁོར་ལོ་ཡང་དག་ལྡན། །སེམས་ཀྱིས་ཁ་སྦྱོར་བྱས་པ་སྟེ། །གྱེན་དུ་ལྟ་བས་བལྟས་ནས་ནི། །སྔོན་དུ་སྤྱན་དྲངས་ཕྱག་རྒྱར་བཅས། །སྔགས་དང་ཕེཾ་སྒྲོགས་སྦྱར་བ་ཡིས། །མཐའ་ཡས་ཕྱོགས་ན་བཞུགས་པ་ཡི། །ལྷ་རྣམས་མཉེས་ནས་དངོས་གྲུབ་སྟེར། །དཔའ་བོ་དཔའ་མོའི་དབང་ཕྱུག་ལྡན། །སྔོན་གྱི་མཚན་མ་སོགས་པས་བརྒྱན། །འཇིག་རྟེན་མགོན་པོ་སྙིང་བརྩེ་ཅན། །རྫོགས་པའི་སངས་རྒྱས་གཤེགས་པར་འགྱུར། །གཉིས་སུ་མེད་པའི་དངོས་གྲུབ་ཐོབ། །དཀྱིལ་འཁོར་ཧེ་རུ་ཀ་ཡི་ཞིང༌། །བྱིན་རླབས་གོ་འཕང་ཡིད་འོང་བར། །བྱེད་པ་སོམ་ཉི་མེད་པའོ། །ཕྱི་དང་ནང་གི་ཡེ་ཤེས་ཀྱི་འཁོར་ལོ་སྤྱན་དྲང་པའི་ཆོ་གའོ།། །།ཕྱི་དང་ནང་གི་སེམས་ཀྱིས་ནི། །རྣལ་འབྱོར་མ་ཡི་འཁོར་ལོ་མཆོད། །རང་འབྱུང་གི་ནི་མེ་ཏོག་ཉིད། །པུ་སོགས་གནས་ན་ལེགས་པར་བཞུགས། །དེ་ཡིས་གདོང་ནི་བསྐུས་ནས་ནི། །གང་ཡང་གཞན་པའི་འཁོར་ལོར་
༄། །གནས། །གཉིས་མེད་གཉིས་སུ་མེད་སྔགས་ཀྱིས། །མངོན་པར་བསྔགས་ནས་བྱིན་གྱིས་བརླབ། །མཁའ་འགྲོ་མ་ཡི་གསང་སྔགས་ཀྱིས། །སྒོ་དང་སྒོ་རུ་བྱིན་གྱིས་བརླབ། །བརྒྱད་བརྒྱ་མཆོག་ཏུ་བཟླས་པ་ནི། །མཉམ་གཞག་སྔགས་པ་ཉིད་ཀྱིས་བྱ། །ཨཱ་ལི་ཀཱ་ལི་བཟླས་ནས་ནི། །ཕྱི་ནས་དཀྱིལ་འཁོར་བྱིན་གྱིས་བརླབ། །འཇིགས་པའི་སྒྲ་ནི་མང་པོ་དང༌། །འཇིགས་པའི་ལྷ་མོའི་ལུས་བཟང་བ། །ཁྱིམ་ལྔ་ཡི་ནི་ལྷ་མོ་མཆོག །བྱོན་པར་གྱུར་ནས་མདུན་དུ་བཞུགས། །སྒྲུབ་པ་པོ་ལ་དངོས་གྲུབ་ནི། །རྒྱ་ཆེན་སྟེར་བར་ཐེ་ཚོམ་མེད། །དེ་བཞིན་དུ་ཡང་གསུངས་པ། རྟག་ཏུ་དེ་ནི་མཆི་མ་འབྱུང༌། །བདག་ཉིད་ལས་བྱུང་ཟས་དེ་བཞིན། །རྡོ་རྗེ་ལ་ནི་འགོམ་མི་བྱེད། །དེ་བཞིན་གཅེར་བུར་གྱུར་བས་མཆོད། །གཡོན་པའི་དབང་ཕྱུག་ཐམས་ཅད་ཀྱིས། །འདི་དེ་ཕྱག་རྒྱའི་ཚོགས་ཀྱི་རིམ། །བཟའ་དང་སྤྱད་པས་ཡང་དག་འགྲུབ། །མགྲིན་པ་ལེགས་བཟུང༌། སྒྲུབ་པ་པོ། །རང་གནས་སོང་ནས་དེ་མཉེས་ཤིང༌། །རྣལ་འབྱོར་མ་རྣམས་གྲུབ་འདོད་པའོ། །རྫུ་འཕྲུལ་ཆེ་རྟོགས་སྔགས་པ་ནི། །ཧེ་རུ་ཀ་ནི་མཆོག་ཏུ་སྐྱེ། །ཡང་ན་མཁའ་སྤྱོད་འཁོར་ལོ་དང༌། །ས་སྤྱོད་ལ་སོགས་ཡང་དག་ལྡན། །བརྩེ་ཞིང་ཧེ་རུ་ཀར་གྱུར་ནས། །འདོད་པའི་དོན་ཀུན་སྒྲུབ་པའོ། །དཔལ་ལྡན་སངས་རྒྱས་ཞིང་བསྐོར་ནས། །སངས་རྒྱས་ཀུན་གྱིས་མཆོད་པར་འགྱུར། །ཡང་ན་བསོད་ནམས་ཞན་པའི་ཕྱིར། །དཀྱིལ་འཁོར་གནས་པ་མ་གྲུབ་ན། །སེམས་ཅན་དོན་ལ་གཅིག་ཏུ་བརྩོན། །བཟའ་དང་སྤྱད་པ་བརྩམ་པའོ། །བཞད་དང་སྒེག་པ་ལ་སོགས་ལྡན། །གླུ་དང་གར་གྱིས་དགའ་བའོ། །སྣ་ཚོགས་སྟེན་མོས་དཔའ་བོ་དང༌། །རྣལ་འབྱོར་མ་རྣམས་མཆོད་པར་འགྱུར། །གར་གྱི་བསྟན་བཅོས་ཐམས་ཅད་ནི། །བྱེད་པའི་ཕྱག་རྒྱ་ལ་སོགས་པ། །དེ་ནི་ཧེ་རུ་ཀ་དཔལ་རྒྱ། །དངོས་གྲུབ་ཐམས་ཅད་རབ་སྟེར་བ། །ནང་གི་བདག་ཉིད་སྦྱིན་སྲེག་གིས། །དཔའ་བོ་ལྷ་མོ་ལེགས་པར་མཆོད། །དཔལ་ལྡན་བདེ་མཆོག་ཡང་དག་ལངས། །དངོས་གྲུབ་ཐམས་ཅད་རབ་ཏུ་སྟེར། །ཞི་བའི་བཏུང་བར་གྱུར་པའི་སེམས། །རྟག་པ་མཆོག་གི་གོ་འཕང་ངོ༌། །ཞི་བའི་བཏུང་བ་གཞན་མ་ནི། །ཆང་དང་ཤ་སོགས་ཡང་དག་ལྡན། །ཨོཾ་སརྦ་
༄། །བུདྡྷ་ཌཱ་ཀི་ནཱི་སརྦ་བྷཀྵཾ་ཤོ་དྷ་ཡ་གུ་ཧྱ་བཛྲི་ཎི་ཧཱུཾ་སྭཱ་ཧཱ། མངོན་པར་བསྔགས་ནས་བྱིན་གྱིས་བརླབ། །ཡང་ན་ལྷན་ཅིག་སྐྱེས་པའི་གཟུགས། །བཟའ་བ་ཀུན་སོགས་རྣལ་འབྱོར་པས། །ཤེས་ནས་ཁ་ཟས་བཟའ་བ་བློ་ལྡན་རྣལ་འབྱོར་པ་མོས་པས། །ལྷན་ཅིག་སྐྱེས་པའི་ལྟོ་བ་ཐབ་ཁུང་ལྟེ་བའི་པདྨ་འདབ་བརྒྱད་ནི། །ལྟེ་བར་དགའ་བར་འབྱུང་བ་ཤིན་ཏུ་འཇིགས་པའི་ཧེ་རུ་ཀ་ཡི་ཞལ། །ངེས་པར་འདབ་མས་དཀྲིས་པ་ཆེན་པོ་ལྷ་མོའི་པདྨ་ཐོད་པར་ནི། །དེ་ཡི་རྗེས་སུ་འཁོར་ལོ་གསུམ་དང་སྒོ་སྐྱོད་རྣམས་དང་ལྡན། །སྣ་ཚོགས་མད་པའི་རོ་སྟེར་བ་གྱེས་པ་དཔལ་གྱི་བདུད་རྩི་སོགས། །སྣ་ཚོགས་མཆོག་གི་སྲེག་རྫས་ཀྱིས་ནི་ཕུང་པོའི་བུད་ཤིང་རབ་འབར་བ། །སྐད་ཅིག་གྱུར་པ་ཀུན་མཁྱེན་མེ་ཡི་རང་བཞིན་ལ། །སྔགས་པ་བཟང་པོས་རྟག་ཏུ་འདི་དག་དེ་ར་ནི་སྦྱིན་སྲེག་བྱ། །དེ་བཞིན་དུ་ཡང་གསུངས་པ། །རྡོ་རྗེ་ནང་གི་བདག་ཉིད་ཉོན། །ཇི་ལྟར་སྦྱིན་སྲེག་རབ་འགྲུབ་པ། །འབར་བ་ཆེན་པོ་གཟི་བརྗིད་ཆེ། །རྣམ་པར་མི་རྟོག་པ་རུ་བསྲེག །བཟའ་བ་བཏུང་བ་གང་ཅུང་ཟད། །དེ་དག་ཐམས་ཅད་མཁས་པས་བསྲེག །ཇི་ལྟར་བསྟན་པའི་ཡམ་ཤིང་ནི། །གཟུགས་ཕུད་ལ་སོགས་རང་བཞིན་དག །རྣམ་པར་མི་རྟོག་པ་ཡིས་བསྲེག །གང་ཞིག་སེམས་ནི་རང་བཞིན་ཀུན། །ཁུ་བ་ཁྲག་དང་དེ་བཞིན་ཤ །བཤད་དང་གཅི་བ་ལྔ་པ་སྟེ། །རྣམ་པར་མི་རྟོག་པ་ཡིས་བཟའ། །རང་བཞིན་མེད་པའི་བློ་ལྡན་པས། །དེ་བཞིན་ང་རྒྱལ་གཏི་མུག་ཆེ། །ཞེ་སྡང་འདོད་ཆགས་དེ་བཞིན་དུ། །ཕྲག་དོག་སེར་སྣ་ཕྲ་མ་སྟེ། །དམ་ཚིག་བསྟེན་པ་དྲི་མ་མེད། །དེ་ཉིད་བཟང་པོར་མཉམ་སྦྱོར་བས། །ལུས་ཀྱི་དཀྱིལ་འཁོར་ལྷན་ཅིག་སྐྱེས། །གཏོར་མ་ལ་སོགས་གང་ཅུང་ཟད། །ལུས་ཀྱི་དཀྱིལ་འཁོར་འཁོར་ལོར་སྦྱིན་སྲེག་བྱ། །མཚན་མོ་སྐྲ་གྲོལ་གྱུར་པ་དང༌། །གཅེར་བུས་ཕྱི་རོལ་གཏོར་མ་སྦྱིན། །སྔོན་དུ་བསྟན་པའི་ཆོ་ག་ཡིས། །ལམ་ལ་གནས་ཤིང་གཟི་བརྗིད་ཆེ། །རྣལ་འབྱོར་མ་དང་དཔའ་བོར་ལྡན། །གཏོར་མ་བྱིན་པས་མཉེས་པར་འགྱུར། །སེམས་ཅན་བསམ་པ་དང་མཐུན་པར། །ཕྱི་རོལ་གྱི་ནི་སྦྱིན་སྲེག་བཤད། །རྣལ་འབྱོར་རྒྱུད་དཔལ་ལས་བསྟན་པ། །ལུས་ཀྱི་འཁོར་ལོར་སྦྱིན་སྲེག་
༄། །བྱ། །གང་ཕྱིར་ལུས་ཀྱི་སངས་རྒྱས་ནི། །དམ་ཚིག་དེས་ན་དེ་བསྲེག་བྱ། །རྟེན་དང་བརྟེན་པ་པདྨའོ། །དབུས་སུ་སྦྱིན་སྲེག་བྱ་བའོ། །ཤ་དང་བདུད་རྩི་བཟའ་བ་སྟེ། །ཆང་ནི་བཏུང་བར་ཡང་དག་ལྡན། །དེ་བཞིན་དུ་ཡང་གསུངས་པ། ཕུང་པོའི་བུད་ཤིང་སྒྲིབ་པས་བརླན་ཞིང་གཡོགས་པ་ཡང༌། །ཡེ་ཤེས་མེ་ནི་བྱེད་པའི་རླུང་གིས་བསྐུལ་བས་དེ། །དུ་བ་འབྱུང་ཞིང་མེ་ལྕེ་འབར་བ་ཉིད་ཀྱིས་བསྲེག །ཁྱབ་ཅིང་རྒྱལ་བ་དེ་ནི་ཆོས་ཀྱི་དབྱིངས་སུ་མཐོང༌། །ལུས་ཀྱི་སྦྱིན་སྲེག་ཡང་དག་ལྡན། །ཕྱི་རོལ་སྦྱིན་སྲེག་གིས་མཉེས་ཏེ། །རྡོ་རྗེ་བདུད་རྩི་ལ་སོགས་བསྟེན། །ཕྱི་རོལ་སྦྱིན་སྲེག་ཡང་དག་བརྩམ། །ཁྲུ་གང་ཙམ་གྱི་ཐབ་ཁུང་གྱུར། །ཐོད་པ་ལྟ་བུས་མཛེས་པའོ། །ལྷོ་རུ་ཁ་བལྟས་ཆོ་ག་ཡིས། །དེ་ལ་ཁ་བལྟས་བསྐོར་བས་འགྲུབ། །དབུས་སུ་པདྨ་འདབ་བརྒྱད་ནི། །རི་ཡི་སྟེང་ན་ལེགས་པར་གནས། །པདྨར་དགྲ་སྟེ་དེ་བཞིན་ཞགས། །མདུད་དང་ཁ་ཊྭཱཾ་ཡང་དག་ལྡན། །ཁྲོ་བོ་ལྟ་བུ་ཤིན་ཏུ་འཇིགས། །རྡོ་རྗེ་ལྟེ་བར་དགོད་པ་དང༌། །ཕྱི་རོལ་རྡོ་རྗེ་ཕྲེང་བ་བྱ། །པདྨ་ལྟ་བུའི་ཁ་ཁྱེར་བཟང༌། །རྣལ་འབྱོར་རྒྱུད་ཀྱི་དགང་གཟར་དང༌། །བླུགས་གཟར་ཉིད་ཀྱང་དེ་བཞིན་ནོ། །ཅུང་ཟད་ཁ་ལ་ཐོད་པ་འདྲ། །དབུས་སུ་ཁྲོ་བོའི་རྡོ་རྗེ་བྲི། །ཨཱ་ལི་ཀཱ་ལི་ལེགས་པར་བརྗོད། །འབྱུང་གནས་ལ་སོགས་རྣལ་འབྱོར་རིག །གཡོན་དུ་སྦྱིན་སྲེག་ལ་སོགས་རྫས། །གཡོན་པའི་སྤྱོད་པས་སྦྱིན་སྲེག་བྱ། །གཉིས་མེད་ལ་སོགས་རྒྱུད་ཆེན་ལས། །མཆོད་པ་བྱ་བའི་ཆོ་ག་ཡིས། །མེ་དང་ཧེ་རུ་ཀ་དཔལ་སོགས། །སྦྱིན་སྲེག་བྱས་ནས་ཡོན་བླང་ངོ༌། །མི་དང་བ་ལང་རྔ་མོ་དང༌། །ཅེ་སྤྱང་རྟ་དང་གླང་པོ་ཡི། །ཤ་ནི་དངོས་གྲུབ་འདོད་པ་དེས། །རྣལ་འབྱོར་རིག་པས་སྦྱིན་སྲེག་བྱ། །གསང་བར་སྐྲ་གྲོལ་གཅེར་བུ་དང༌། །སྔོན་དུ་སྤྱད་ཅིང་བཟའ་བ་ཡིས། །དཔལ་ལྡན་བདེ་མཆོག་རྣལ་འབྱོར་ཆེས། །གཏོར་མའི་ལས་ནི་ལེགས་པར་བརྩམ། །ཕྱི་དང་ནང་གི་སྦྱིན་སྲེག་གི་ཆོ་གའོ།། །།སྔགས་པ་རྣལ་འབྱོར་མ་ལྷན་ཅིག །ལྷོ་རུ་བལྟས་ཤིང་ལྷོ་རུ་ནི། །དཀྱིལ་འཁོར་ལ་གནས་སློབ་མ་ལ། །ཆོ་ག་ཡིས་ནི་འདི་སྐད་སྨྲ། །བུ་ཡིས་ངེས་པར་རབ་འབད་པས། །སྡོམ་པའི་མཆོག་རྣམས་སྲུང་བར་གྱིས། །དཔལ་ལྡན་བདེ་མཆོག་ལས་མཆོག་མེད། །ལྷན་ཅིག་
༄། །སྐྱེས་པས་ཉེ་བར་མཚོན། །དཀྱིལ་འཁོར་གྱི་ནི་མདུན་བྱས་ཏེ། །ཡང་ན་གསུངས་པར་གྱུར་པ་སྟེ། །མ་ལ་སོགས་པ་ཐོད་པར་གནས། །སློབ་མའི་སྡིག་པ་སེལ་བ་སྟེ། །གཡོན་པའི་ལག་པས་ལེགས་པར་བླངས། །ཡི་གེ་བདུན་པ་རྗེས་སུ་དྲན། །ཧེ་རུ་ཀ་ཡི་སྦྱོར་དམིགས་ཏེ། །ང་རྒྱལ་བཅས་པས་ལེགས་པར་གནས། །ཕག་མོ་དང་ནི་འོ་བྱེད་པ། །སློབ་མ་ཀུན་གྱི་ཁ་རུ་ནི། །ནུས་པ་འཕྲོག་ཅིང་བདུད་མེད་པ། །བློ་བཟང་ཀྱིས་ནི་རིམ་པར་གཏོར། །དཔའ་བོ་དྲུག་སོགས་སྔགས་ཀྱིས་ལས། །བྱས་ནས་སློབ་མ་ཤིན་ཏུ་བསྲུང༌། མཁའ་འགྲོའི་སྔགས་ཀྱིས་བསྔགས་པ་ཡི། །དར་དབྱངས་བཅིང་བར་བྱ་བའོ། །རྒྱན་རྣམས་ཀུན་གྱིས་བརྒྱན་པ་ཡི། །སློབ་མས་ལྷོ་ནས་གསོལ་བ་བཏབ། །དངོས་གྲུབ་ཐམས་ཅད་བསྒྲུབ་པ་ཡི། །སྐྱེ་བོ་ལ་ནི་དངོས་གྲུབ་སྟེ། །དེ་ནས་བླ་མའི་ལག་གཡོན་གྱིས། །རྟག་ཏུ་སློབ་མ་བཟུང་ནས་ཀྱང༌། །ལྷོ་ཡི་སྒོ་རུ་བཞག་ནས་ནི། །པོ་ཏང་གི་ཡི་ཚིག་གིས་དྲི། །སློབ་མས་ཀྱང་ནི་དེ་ནས་ཚིག །པྲ་ཏི་པོ་ཏང་གི་ཀྱེ་ཁྱབ་བདག །ཧེ་རུ་ཀ་ཡིས་ཀཱ་ཡ་དྲི། །དེ་ནས་དཔའ་བོས་བརྗོད་པར་བྱ། །ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བིདྱ་རཱ་ཛ་ཡ་དྷཱི་མ་ཧེ་སྭཱ་ཧཱ། འདི་ནི་གཱ་ཡ་དྲིའོ། །དཀྱིལ་འཁོར་འདིར་ནི་དངོས་གྲུབ་སྟེ། །མཁའ་འགྲོ་མ་ཡི་དྲ་བའི་གཙོ། །བདེ་མཆོག་གི་ནི་གཞིར་གྱུར་པ། །བུ་ཁྱོད་ཀྱིས་ནི་བླང་བར་གྱིས། །ལྷོ་སྒོར་སློབ་མས་འདི་སྐད་བརྗོད། །ཨོཾ་ན་མ་ཏེ་ཧཱུཾ། ན་མ་མི་ཧཱུཾ། ན་མོ་ན་མ་ཧཱུཾ་སྭཱ་ཧཱ། ཞེས་སོ། །མཁའ་སྤྱོད་ལ་སོགས་རབ་དབྱེ་བས། །ཕྱག་གསུམ་དག་ནི་བྱ་བའོ། །ཐལ་མོ་སྤྱི་བོར་བྱས་ནས་ནི། །ཡན་ལག་ཀུན་གྱིས་ཕྱག་བྱའོ། །ཨོཾ་སརྦ་བཱ་རི་ཡོ་གི་ནཱི་བྷྱཿ་པཱུ་ཛོ་བ་སྠ་ནཱ་ཡ། ཨཱཏྨ་ནཱཾ་ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནྱ་ཏཱཾ་ཌཱ་ཀི་ནྱཻ་ཨ་དྷི་ཏཥྛི་སྭ་མཱཾ། གཡོན་པས་ཐལ་མོ་སྦྱར་ནས་ནི། །སྙིང་ག་རུ་ནི་བྱས་ནས་ནི། །ཡོན་ཏན་ཀུན་གྱི་གཞིར་གྱུར་པ། །སློབ་མས་སྒོ་ཀུན་ལ་ཕྱག་བྱ། །ཨོཾ་སརྦ་བཱི་ར་ཡོ་གི་ནཱཾ་པཱུ་ཛ་ཨ་བྷི་ཥེ་ཀཱ་ཡ་ཨཱཏྨཱ་ནཱཾ་ནི་ཪྻཱི་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནྱཱ་ཏྨ་ལཱ་མཱ་ཡི་ཨ་བྷི་ཥིཉྩ་མཱཾ། གཡོན་པའི་ཐལ་མོ་འཕྲལ་བ་དུ། །བྱས་པར་གྱུར་ནས་དེ་ནས་ཡང༌། །བྱང་གི་སྒོ་རུ་བརྟེན་ནས་ནི། །རྣལ་འབྱོར་མ་ལ་ཕྱག་བྱའོ། །ཨོཾ་སརྦ་བཱི་ར་ཡོ་གི་ནཱི།
༄། །བྷྱཿ་པཱུ་ཛ་པྲ་བརྟ་ནཱ་ཡཱཏྨ་ནཾ་ནི་ཪྻཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནྱཱ་ཏྨཾ་ཁཎྜ་རོ་ཧཱ་ཡཻ་པྲ་བརྟཱ་ཡ་མཱཾ། སྔགས་པས་དེ་ནས་ཕྱི་ནས་སྒོར། །སྤྱི་བོར་ཐལ་མོ་བྱས་ནས་ནི། །སྔོན་དུ་གསང་སྔགས་བརྗོད་པ་ཡིས། །དཔའ་བོ་ཧེ་རུ་ཀར་ཕྱག་བྱ། །ཨོཾ་སརྦ་བཱི་ར་ཡོ་གི་ནཱི་ནཾ་པཱུ་ཛ་ཀརྨ་ཎི་ཨཱཏྨཱ་ནཱཾ་ནི་ཪྻཱ་ཏ་ཡཱ་མེ། སརྦ་ཏ་ཐཱ་ག་ཏ་བཱི་ར་ཡོ་གི་ནྱཱ་ཏྨཾ་རཱུ་པི་ཎྱཻ་ཀརྨ་ཀུ་རུ་མཱཾ། ཕྱག་བཞིའི་ཆོ་གའོ། །ལྷོ་ཡི་སྒོ་རུ་སོང་ནས་ནི། །ལྷོ་རུ་བལྟས་ནས་ལེགས་པར་གནས། །གཡོན་པས་སློབ་མ་བཟུང་ནས་ནི། །སྡོམ་པའི་མཆོག་ནི་སྦྱིན་པར་བྱ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདིར་ནི་སངས་རྒྱས་རིགས་ཡིད་འོང༌། །སྡོམ་པ་བརྟན་པོར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ཡང༌། །བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་རྡོ་རྗེ་སྟེ། །ཤེས་རབ་དྲིལ་བུ་ཞེས་བྱའོ། །སློབ་དཔོན་ཁྱོད་ཀྱིས་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའོ། །སྡོམ་པ་དམ་ཚིག་ཅེས་སུ་བརྗོད། །རིན་ཆེན་རིགས་ལ་རྟག་ཏུ་ནི། །ཉི་མ་རེ་རེ་དུས་དྲུག་ཏུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་སྦྱིན་པར་བྱ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་ཁྱོད་ཀྱིས་གཟུང༌། །འདི་ནི་པདྨའི་རིགས་དག་པའི། །སྡོམ་པ་མཆོག་གི་གོ་འཕང་ངོ༌། །སྡོམ་པ་ཐམས་ཅད་ཡང་དག་ལྡན། །བདག་གིས་བརྟན་པོར་སོ་སོར་གཟུང༌། །མཆོད་པའི་ལས་ཀྱང་ཅི་ནུས་བགྱི། །ལས་ཀྱི་རིགས་ཆེན་རྟག་པའོ། །སྡོམ་པའི་ཆོ་གའོ།། །།བུ་སྐྱེས་སོ་སོར་གནས་པར་གྱིས། །རིགས་ཀྱི་དེ་ཉིད་ཀུན་དུ་བལྟ། །དཔའ་བོ་ལྷ་མོ་ལེགས་པར་བྱུང༌། །ཧེ་རུ་ཀ་ལྟར་ཤིན་ཏུ་མཛེས། །གང་གིས་བསྐྱེད་པ་མཁའ་ལྟར་སྟོང༌། །མཆོག་གི་གོ་འཕང་ཐོབ་པར་འགྱུར། །ཧེ་རུ་ཀ་དཔལ་ཡེ་ཤེས་དེ། །ང་ཡིས་མཆོག་ནི་ཁྱོད་ལ་སྦྱིན། །དཀྱིལ་འཁོར་མ་མཐོང་བ་རྣམས་ལ། །ཁྱོད་ཀྱིས་ཀྱང་ནི་སྨྲ་མི་བྱ། །གལ་ཏེ་སྨྲས་ན་བུ་ཁྱོད་ཀྱི། །དམ་ཚིག་ཉམས་པར་གྱུར་ཏ་ཏེ། །དཔལ་ལྡན་ཕག་མོ་ཁྱོད་ཉིད་ཀྱི། །སྙིང་ལ་ཡང་དག་ཞུགས་པ་འདི། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་གཤེགས། །བདུད་རྩི་ལྔ་ཡི་ཆུ་ཡི་
༄། །སྣོད། །སློབ་མ་མཆོག་ལ་སྦྱིན་པར་བྱ། །མཁའ་འགྲོ་མ་ཡི་སྔགས་བཟླས་ཤིང༌། །ཚིག་འདི་དག་ནི་བརྗོད་པར་བྱ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འོང༌། །བདུད་རྩི་ལྔ་ཡི་ཆུ་འཐུང་ཤིག །ཨོཾ་པཉྩ་ཨམྲྀ་ཏོད་ཀ་ཐ་ཧཱུཾ། དེད་ཕན་ཆོད་ཁྱོད་ཀྱི་དཔལ་ཕག་མོ་ང་ཡིན་གྱིས། གང་ང་ཡིས་སྨྲས་པ་དེ་འབད་པས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཁྱོད་ཡང་ང་བ་མ་སྤངས་པར་དུས་བྱས་ནས། །དམྱལ་བར་ལྟུང་བར་གྱུར་ཏ་རེ། །བུ་ཡིས་འདི་དག་སྨྲ་བར་གྱིས། །དཔའ་བོ་དང་རྣལ་འབྱོར་མ་རྣམས་བདག་ལ་བྱིན་གྱིས་རློབ་ལ། དཔལ་ཧེ་རུ་ཀ་ལ་སོགས་པ་བདག་ལ་དབབ་ཏུ་གསོལ། །གོས་ངན་ཁྲག་ནི་བླངས་ནས་ནི། །བདུད་རྩི་ལྔ་དང་གུ་གུལ་དང༌། །བྱི་ལའི་རྟུག་པ་ཡང་དག་ལྡན། །བདུག་པ་བྱས་ནས་བསྔགས་ནས་ནི། །ཐོད་པའི་ནང་དུ་གཞག་པར་བྱ། །རོ་བསྲེགས་མེ་ཡིས་ལེགས་པར་བདུག །ཁྲོས་ཤིང་བསྒྱིངས་བཅས་སེམས་དང་ནི། །གཉིས་སུ་མེད་པས་བསྔགས་པར་བྱ། །སྔོན་དུ་བསྟན་པའི་རྒྱན་དང་ལྡན། །གོ་ཆ་ཡན་ལག་དེ་བཞིན་ནོ། །སློབ་མའི་ལུས་ལ་བློ་ལྡན་པས། །ཡང་ནི་འཁོར་ལོ་ཐམས་ཅད་གཞུག །ལྟེ་བའི་པད་གནས་འཁོར་ལོ་བཟང༌། །གསལ་ཞིང་འོད་དང་བཅས་པའོ། །རྐང་པའི་འོག་ཏུ་རླུང་གིས་བསྐྱོད། །སློབ་མ་ལ་ནི་དབབ་པར་བལྟ། །གཉིས་སུ་མེད་པའི་གསང་སྔགས་བཟླས། །གཡས་བརྐྱང་སྟན་ལ་ཡང་དག་ལྡན། །མཁས་པས་སྔོན་དུ་བསྟན་པ་ཡི། །བདུག་པ་རྣམས་ཀྱིས་བདུག་པར་བྱ། །ཨོཾ་ཏིཥྛ་མ་ཧཱ་ཀྲོ་དྷ་ཨཱ་བེ་ཤ་ཧཱུཾ། ཨོཾ་ཤྲཱི་ཧེ་རུ་ཀཱ་ཡ་བིད་མ་ཧེ་བ་བྱཱིརཱ་ཛ་ཡ་དྷི་མ་ཧེ་སྭཱཧཱ། ཞེས་བྱ་བས་དཔའ་བོ་རབ་ཏུ་བསྐུལ་ལ། དེ་ཡི་ལག་ནས་ལག་པས་བཟུང༌། །མིག་ཕྱེ་ནས་ནི་བསྟན་པར་བྱ། །དཔལ་ལྡན་ཕག་མོ་ད་ཁྱོད་ཀྱིས། །མིག་འབྱེད་པར་ནི་བརྩོན་པར་མཛད། །ཐམས་ཅད་མིག་ནི་འབྱེད་གྱུར་པ། །རྡོ་རྗེ་མིག་ནི་བླ་ན་མེད། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཕཊ་སྭཱ་ཧཱ། དད་པའི་ཤུགས་ཀྱིས་ད་ལྟ་ནི། །དཀྱིལ་འཁོར་འདི་ལ་བལྟ་བར་གྱིས། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །མེ་ཏོག་གཏོར་བ་ལ་
༄། །བལྟས་ཏེ། །སྟན་སོགས་གནས་ན་ལེགས་པར་གནས། །གང་དུ་མེ་ཏོག་ལྟུང་བ་དེ། །དེ་ལ་དངོས་གྲུབ་འགྱུར་བའོ། །ཕྱི་རོལ་དབབ་པའི་ཆོ་གའོ། །རྣལ་འབྱོར་ཁ་ཅིག་ཕྱི་རོལ་འདོད། །བདག་གི་བླ་མའི་དབབ་པའི་ལུགས། །བདག་ཉིད་བྱིན་གྱིས་བརླབ་པར་གྱུར། །དཀྱིལ་འཁོར་བྱ་བའི་ཆོ་ག་ནི། །ཅུང་ཟད་བསྒོམས་པའི་བརྟུལ་ཞུགས་ཅན། །བྱིན་གྱིས་བརླབ་པའི་རིམ་པ་ཉིད། །རྣལ་འབྱོར་མ་ཡི་ལུས་ཀྱིས་གསུངས། །ལུས་ཀྱི་རིན་ཆེན་བསྐྱོད་པ་ནི། །སྐད་ཅིག་གིས་ནི་རང་བཞིན་འཕར། །རྣལ་འབྱོར་བཟང་པོས་འདས་པའི་རིགས། །མ་འོངས་པ་ཡང་མཐོང་བར་འགྱུར། །དབབ་པའི་ཆོ་གའོ།། །།ཧེ་རུ་ཀ་དང་གཉིས་མེད་གནས། །དཔའ་བོ་ཆེ་ལ་བུ་ཡིས་ལྟོས། །པདྨའི་འདབ་མར་ལྷ་མོ་བཞི། མཆོད་པ་བཞི་དང་ཡང་དག་ལྡན། །འཁོར་ལོ་གསུམ་གྱི་བདག་ཉིད་ཅན། །སྒོ་སྐྱོད་ལ་སོགས་རྣམས་ཀྱིས་སྲུང༌། །བློ་གྲོས་ཆེན་པོ་དབུས་གནས་པའི། །འཁོར་ལོ་བདེ་མཆོག་བདེ་བའི་མཆོག །བླ་མའི་ཞབས་ལ་ཕྱག་བྱས་ཏེ། །སློབ་མ་གུས་ཤིང་ཡིད་འོང་བཟད། །གཡོན་པ་ཐལ་སྦྱར་སྙིང་གར་གཞག །དབང་སྐུར་དོན་དུ་གསོལ་བ་གདབ། །ཧེ་རུ་ཀ་དཔལ་དབང་སྐུར་བ། །འགྲོ་བ་སྐྱོད་ཕྱིར་གཟི་བརྗོད་ཅན། །རྡོ་རྗེ་སེམས་དཔས་ཇི་ལྟར་བྱིན། །དེ་བཞིན་བདག་ལ་དེང་གསོལ་ཅིག །ལྷོ་ཡི་སྒོ་རུ་རབ་ཞུགས་ནས། །ཧེ་རུ་ཀ་སོགས་བདག་སེམས་ལ། །སེང་གེའི་སྟན་ལ་གནས་པ་ཡི། །སྣ་ཚོགས་པདྨ་ལ་འཕན་སོགས། །སློབ་མ་ཕྱག་རྒྱ་ལྔ་དང་ལྡན། །ཁ་ཊྭཱཾ་ག་བརྟེན་ལེགས་པར་གནས། །སྟེང་དུ་གདུགས་བཟང་ལྷ་མོས་གཟུང༌། །ཌ་མ་རུ་ནི་ལག་ན་ཐོགས། །རྣལ་འབྱོར་མ་དང་དཔའ་ཚོགས་ཀྱིས། །བསྐོར་ནས་དབུས་སུ་བསྒྱུར་ནས་ནི། །གླུ་ལ་སོགས་པའི་བཀྲ་ཤིས་ཀྱིས། །འབད་ནས་མཆོད་པ་བྱས་ནས་ནི། །ཐོག་མར་གནས་པའི་དངོས་གྲུབ་དོན། །བླངས་ནས་སྔགས་དང་ཡང་དག་ལྡན། །གསང་སྔགས་རིག་པས་དཔའ་བོ་དང༌། །རྣལ་འབྱོར་མ་ཆོགས་འཁོར་ལོར་གཏོར། །དེ་ནས་དགྱེས་པས་ལངས་ནས་ནི། །དཔའ་བོ་ཧེ་རུ་ཀ་དཔལ་སོགས། །དབང་བསྐུར་རིན་ཆེན་ཆེན་པོ་ཡི། །གཉིས་མེད་ཆུ་ནི་སྟེར་བར་བྱེད། །ཧེ་རུ་ཀ་ཡི་བཀའ་ཐོབ་ནས། །ཐོག་མར་སྙིང་
༄། །པོ་བཟླས་པ་ཡིས། །དབང་བསྐུར་བ་ནི་སྦྱིན་པར་བྱ། །གཞན་དག་ཏུ་ནི་བཞད་གད་འགྱུར། །ནུས་པ་མེད་གྱུར་རྣལ་འབྱོར་མའི། །སྙིང་གའི་དཀྱིལ་འཁོར་འོད་ཟེར་གྱིས། །སློབ་མའི་ལུས་ལ་བཀང་ནས་ནི། །དབང་བསྐུར་སྦྱིན་པ་བསམ་པར་བྱ། །དབང་བསྐུར་བ་ནི་བཅུ་བཞི་ནི། །སྔོན་གྱི་རྣལ་འབྱོར་པས་གང་བསྟན། །རྒྱས་པ་དགོས་པ་མེད་པའི་ཕྱིར། །ཐམས་ཅད་བདག་གིས་མ་བྲིས་སོ། །བསྐྱེད་པ་རྣལ་འབྱོར་རྒྱུད་དུའོ། །རྫོགས་པ་རྣལ་འབྱོར་མ་ཡི་རིམ། །བདག་གིས་དེ་བགྲོས་རྫོགས་པ་ཡི། །རིམ་པ་འདི་ནི་རབ་ཏུ་བསྒྲགས། །ཡུངས་ཀར་འོད་ཟེར་དུ་ནི་བསྟན། །གང་ཕྱིར་དེས་ནི་ལེགས་བསྐུལ་བའོ། །སངས་རྒྱས་རོལ་པ་འདི་ལྟ་བུ། །བདག་ཉིད་ཆེན་པོ་ཕབ་ནས་ནི། །སངས་རྒྱས་ལྔ་ཡི་རང་བཞིན་ཏེ། །བརྟན་གཡོ་ཀུན་གྱི་བདག་ཉིད་དོ། །དེས་ན་ཐོག་མར་དབང་བསྐུར་ལྔ། །བདེ་ཞིང་འབྱོར་པ་སྦྱིན་པར་བྱ། །འགྲོ་བ་རྒྱུ་དང་མི་རྒྱུ་བ། །དབང་བསྐུར་སྐད་ཅིག་གིས་རྫོགས་སོ། །གང་ཕྱིར་འགྲོ་དབང་ངོ་བོ་སྟེ། །དེ་ཕྱིར་དབང་བསྐུར་སྦྱིན་མི་བྱ། །མི་ཤེས་དེ་ཉིད་མི་རིག་སྟེ། །དེ་ཡང་དེ་ཉིད་རང་བཞིན་ནོ། །རྫོགས་པའི་ཡེ་ཤེས་བསྐྱེད་པ་ནི། །ཡང་ནི་སྨྲ་བར་བྱ་བའོ། །ཐོག་མར་ཆུ་ནི་སྦྱིན་པར་བྱ། །མཁའ་འགྲོ་མ་ཡི་སྔགས་ཀྱིས་བསྔགས། །ཕྱི་ནས་དབུ་རྒྱན་སྦྱིན་པར་བྱ། །སངས་རྒྱས་ཀུན་གྱི་རིམ་པས་སོ། །ཇི་ལྟ་བ་བཞིན་དུ་གསུངས་པ། །ཆོས་ཀྱི་དབྱིངས་ཀྱི་རང་བཞིན་ནམ། །དེ་བཞིན་སྲོག་དང་རྩ་རང་བཞིན། །ཐོད་པའི་ཕྲེང་བའི་དབུ་རྒྱན་ཏེ། །རྡོ་རྗེ་གཙུག་གི་ནོར་བུ་ཐོད། །སྣ་ཚོགས་ཀུན་གྱི་བླ་མ་དང༌། །ཐམས་ཅད་ཀུན་གྱི་སློབ་དཔོན་ཕྱིར། །མ་ལུས་ལུས་པ་མེད་འགྲུབ་ཅིང༌། །རྒྱལ་སྲིད་ཐམས་ཅད་རབ་ཏུ་འགྲུབ། །སྣ་ཚོགས་རང་བཞིན་པདྨ་གཅིག །སྣ་ཚོགས་ཀྱིས་མཛེས་དེ་བཞིན་ནོ། །སངས་རྒྱས་པདྨའི་དབང་བསྐུར་བས། །སློབ་མ་ཐམས་ཅད་དབང་བསྐུར་ཏེ། །གསང་སྔགས་འདི་ཉིད་བརྗོད་པར་བྱ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཕཊ་སྭཱ་ཧཱ། སྙིང་གར་གནས་པའི་ཐུགས་རྡོ་རྗེ། །དེ་རྗེས་ཀྱང་ནི་དབང་བསྐུར་ཏེ། །བདག་ཉིད་ཧེ་རུ་ཀ་རྡོར་ཆེ། །ཡིད་དུ་འོང་བའི་ཚིག་འདི་བརྗོད། །དཔའ་བོ་རྡོ་རྗེ་དབང་བསྐུར་བས། །དེ་རིང་ཁྱོད་ལ་དབང་བསྐུར་བྱ། །དཔའ་
༄། །བོ་ཀུན་དུ་རབ་འགྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང༌། །རྡོ་རྗེ་དྲིལ་བུའི་ལག་པ་ཡིས། །ཧེ་རུ་ཀ་ཡི་སྦྱོར་བས་འཁྱུད། །དེ་ཡི་གཡས་པའི་བརླ་སྟེང་དུ། །གཡོན་པའི་བྱིན་པས་མནན་པའོ། །ཨོཾ་ཧེ་རུ་ཀ་ཨ་དྷི་པ་ཏི་ཏྭཱཾ་ཨ་བྷི་ཥིཉྩཱ་མི་ཏིཥྛ་བཱི་ར་ས་མ་ཡ་སྟཾ། བདག་པའོ། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་ཏྭཾ་ཨ་བྷི་ཥིཉྩཱ་མི་ཤྲཱི་ཧེ་རི་ཀ་ནཱ་མ་ཨ་བྷི་ཥེ་ཀ་ཏ། ཡང་ན་རྣལ་འབྱོར་མ་ཡི་གཙོ། །ལྷ་མོ་རྒྱུད་ལས་ཐམས་ཅད་དུ། །དེ་མིང་རྣལ་འབྱོར་མ་ལུང་བསྟན། །དེ་ཉིད་རིག་པས་སྦྱིན་པར་བྱ། །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་ཏྭཾ་ཨ་བྷི་ཥྙྩཱི་མི་ཤྲཱི་ཧེ་རུ་ཀ་ནཱ་མ་ཨ་བྷི་ཥེ་ཀ་ཏ། གདོད་ནས་ཆོས་ལ་མིང་མེད་དེ། །ཀུན་རྫོབ་ཏུ་ནི་མིང་དུ་གྲགས། །དམ་པའི་དོན་གྱི་རང་བཞིན་གྱིས། །མིང་མེད་མིང་དང་ལྡན་པའང་མེད། །ཤིན་ཏུ་རྣམ་དག་ཆུ་ཡིན་ཏེ། །མཉམ་པ་ཉིད་ནི་དབུ་རྒྱན་གྱུར། །རྡོ་རྗེ་རྟག་ཏུ་སོ་སོར་རྟོག །བདག་པོ་དམ་ཚིག་ལས་བྱུང་བའོ། །བརྟུལ་ཞུགས་ལུང་བསྟན་དབུགས་དབྱུང་བ། །དཔལ་ལྡན་རྣམ་སྣང་གཙོ་བོའོ། །དབང་བསྐུར་འདི་དག་ཡང་དག་ལྡན། །བུམ་པའི་དབང་དུ་རྣམ་པར་བསྟན། །འདི་དེ་སངས་རྒྱས་ཐམས་ཅད་ཀྱི། །ཧེ་རུ་ཀ་ཡི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅང༌། །ཧེ་རུ་ཀ་ཡི་བརྟུལ་ཞུགས་བརྟན། །ཨོཾ་སརྦ་བཱི་ར་ཏྭཾ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི་ཧི་ཧི་ཧི་ཧི་ཧཱུཾ། རྡོ་རྗེ་བརྟུལ་ཞུགས་དེ་བྱིན་ཏེ། །དེ་ཡི་རྡོ་རྗེ་སྦྱོར་བས་བཟུང༌། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །མཁའ་འགྲོ་དྲ་བ་ཀུན་བདག་ཉིད། །རྡོ་རྗེ་བསྙེམས་པ་བདག་པོའི་བདག །དྲིལ་བུ་དེ་ཉིད་གཟུགས་ཀྱིས་ནི། །རྣམ་པར་མཁས་པས་དེ་ལ་སྦྱིན། །འདི་དེ་རྣལ་འབྱོར་མ་ཀུན་གྱི། །ཤེས་རབ་དབྱངས་ནི་རྗེས་སུ་དྲན། །ཁྱོད་ཀྱིས་ཀྱང་ནི་རྟག་ཏུ་བཅང༌། །བྱང་ཆུབ་མཆོག་ཏུ་རྒྱལ་བ་ཞེས། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་དངོས་བྱས་པ། །རང་བཞིན་དག་པའི་སེམས་དཔའ་ཡིས། །དམ་པའི་སྲིད་པ་བྱེད་པའོ། །དཔའ་བོ་ཆེན་པོ་ཆེན་པོ་སྦྱིན། །ཁ་ཊྭཱཾ་ག་མཆོག་གཟུང་བར་གྱིས། །ཧེ་རུ་ཀ་དཔལ་སྐུ་ཡན་ལག །བརྟན་གཡོའི་བདག་ཉིད་ཀུན་ཡན་ལག །བུ་ཡིས་རྟག་ཏུ་དམ་དུ་ནི། །རབ་ཏུ་འབད་པས་གཟུང་བར་གྱིས། །ཐོད་པའི་ཕྲེང་བ་ཡང་
༄། །དག་ལྡན། །དབུ་རྒྱན་མཆོག་ཏུ་གཟུང་བར་གྱིས། །གར་དང་གླུ་དང་དེ་བཞིན་ཕྲེང༌། །དྲི་དང་བདུག་པ་དེ་བཞིན་ཏེ། །འདི་དག་ལྷན་ཅིག་སྐྱེས་པར་གྲགས། །འཁོར་དང་ཤིན་ཏུ་མཛེས་པའོ། །མེ་ལོང་ཡེ་ཤེས་མེ་ལོང་དང༌། །དུང་ནི་དེ་བཞིན་བདེ་བའོ། །མིག་སྨན་བདེ་བ་ཅེས་བྱར་གསུངས། །སེམས་ཅན་ཀུན་ལ་རབ་ཏུ་བསྐུར། །ཕྱི་རོལ་གྱི་ནི་བུམ་པ་འདི། །སློབ་དཔོན་ཐམས་ཅད་བཞེད་པའོ། །བུམ་པ་གཞན་ནི་ལྷན་ཅིག་སྐྱེས། །ལུས་ལ་རྟག་ཏུ་གནས་པའོ། །ཀ་ནི་བྱང་ཆུབ་ཅེས་སུ་གསུངས། །འབར་བ་ལྡན་པར་གང་ཞིག་གྱུར། །དེ་ནི་བུམ་པ་ཞེས་སུ་བསྟན། །སེམས་ཅན་ཀུན་ལ་ལེགས་པར་གནས། །བུམ་པས་ལེགས་པར་དབང་བསྐུར་བར། །སེམས་ཅན་ཐམས་ཅད་སོམ་ཉི་མེད། །བླ་མའི་མན་ངག་རིམ་མེད་པས། །བུམ་པ་ཤེས་པར་མི་འགྱུར་རོ། །དེ་བར་ནུས་པ་འཁོར་ལོ་དབུས་སུ་ཀུན་གྱི་སྙིང་པོ་ནི། །བླ་མ་དང་ནི་རྣལ་འབྱོར་མ་དང་དཔའ་བོའི་འཁོར་ལོ་ལ་གུས་ཀྱིས། །སྐྱེ་བོ་ངན་པའི་ཚོགས་དང་གདུག་པའི་སེམས་སོགས་སྤོངས། །ལྷན་ཅིག་སྐྱེས་པར་འབྱུང་བའི་སེམས་དང་ཧེ་རུ་ཀ་ཡི་རྡོ་རྗེ་ཁྱོད་ཉིད་དོ། །བུམ་པས་དབང་བསྐུར་སློབ་མ་ཡིས། །ནམ་མཁའ་ལྡིང་གི་ཚུལ་གནས་ལ། །སྙན་པའི་ཚིག་གིས་སྨྲ་བར་བྱ། །བགྲོད་དང་མི་བགྲོད་སོགས་མཚན་ཉིད། །ཞི་དང་རྒྱས་སོགས་གང་ཅུང་ཟད། །རལ་གྲི་མིག་སྨན་རྐང་མགྱོགས་དང༌། །རྣལ་འབྱོར་མ་ཡི་སྒྲུབ་པ་གང༌། །ལས་དེ་ཐམས་ཅད་བསྒྲུབ་པར་བྱ། །ནང་པར་སྔར་ལངས་སེམས་དག་ཉིད། །ཐམས་ཅད་ལུས་ལ་བྱས་ནས་ནི། །བགྲོད་དང་མི་བགྲོད་གང་ཅུང་ཟད། །ཀུན་ལ་སྦྱར་བས་བྱ་བའོ། །ལུས་ཀྱི་སྡུག་བསྔལ་ཡོངས་སྤངས་ནས། །དམ་ཚིག་དང་ནི་སྡོམ་པ་བཟུང༌། །བདེ་མཆོག་གིས་ནི་བྱིན་པ་བཞིན། །བུ་ཡིས་རྟག་ཏུ་སྦྱིན་པར་བྱ། །རྒྱལ་དང་སྟོང་དང་དེ་བཞིན་གང༌། །ཕྱོགས་ནི་གཉི་ག་ལ་དེ་བཞིན། །རྣལ་འབྱོར་མ་དང་དཔའ་བོ་མཆོད། །རང་ཉིད་ཀྱིས་ནི་འབད་ནས་མཆོད། །དཔའ་བོ་དཔའ་མོའི་དབང་ཕྱུག་ཚོགས། །ཆད་ལ་དགའ་བས་རོལ་བར་བྱ། །འཁོར་ལོ་བདེ་མཆོག་དཀྱིལ་འཁོར་དུ། །བུ་ཁྱོད་ཀྱིས་ནི་རྟག་ཏུ་རོལ། །དཔའ་བོ་ཕྱོགས་ལ་རབ་འབད་པས། །ལག་པའི་བརྡ་ནི་སྦྱིན་པར་བྱ། །
༄། །དཔའ་བོ་དམ་ཚིག་ཤེས་ནས་ནི། །དེ་དང་ལྷན་ཅིག་བཟའ་ཞིང་སྤྱད། །ཐེག་པ་དམན་ལ་དགའ་བ་ནི། །བཟང་པོས་ནམ་ཡང་མི་བྱའོ། །འཁོར་བ་དག་ཀྱང་མི་གཏོང་ཞིང༌། །མྱ་ངན་འདས་རྟག་དགའ་མི་བྱ། །རྣལ་འབྱོར་མ་དང་དཔའ་བོའི་ཚོགས། །གནོད་པའི་བསམ་པ་མི་བྱའོ། །དཔའ་བོ་སྤྱོད་པའི་བརྟུལ་ཞུགས་བལྟ། །རྩ་བའི་སྔགས་ནི་རྟག་ཏུ་བཟླས། །བདེ་མཆོག་མཉེས་པས་དངོས་གྲུབ་ཏུ། །འགྱུར་བར་ཐེ་ཚོམ་མེད་པའོ། །དེ་ནས་འབད་པས་སྐྱོང་བ་ནི། །དམ་ཚིག་གྲུབ་པ་ཐེ་ཚོམ་མེད། །གསང་བའི་དམ་ཚིག་བསྐྱང་བ་ཡིས། །སྤྱོད་ཅིང་མོས་པར་འགྱུར་བའོ། །བསྐལ་པ་མཐའ་ཡས་བརྒྱ་ཡིས་ཀྱང༌། །ཉམས་པར་གྱུར་པས་མི་འགྲུབ་པོ། །བླ་མའི་ཞབས་ཀྱི་པདྨ་ལ། །དངོས་པོ་ཀུན་གྱིས་ཕྱག་བྱས་ནས། །ཁྱབ་བདག་ཁྱོད་ཀྱིས་ཇི་ལྟར་བསྟན། །ཀུན་མཁྱེན་བདག་ནི་བགྱི་བར་འཚལ། །སྡོམ་པ་བསྐྱང་བའི་ཆོ་གའོ། །ལྷན་ཅིག་སྐྱེས་པའི་སེམས་ཀྱིས་ནི། །མི་བྱ་བ་ནི་ཅི་ཡང་མེད། །ཚངས་པར་སྤྱོད་པས་བརྟགས་ནས་ནི། །འདོད་པ་ལྔ་ལ་སྤྱད་པར་བྱ། །འདོད་པ་ཀུན་ལ་ལོངས་སྤྱོད་པས། །ཇི་ལྟར་འདོད་པ་ཡིད་ཀྱིས་བསྟེན། །ཧེ་རུ་ཀ་དཔལ་རྣལ་འབྱོར་ཆེ། །བསམས་ནས་ཐམས་ཅད་རབ་ཏུ་བརྟག །བདག་ཉིད་སངས་རྒྱས་ཐམས་ཅད་ཉིད། །ཡན་ལག་ཐམས་ཅད་མཁའ་འགྲོའི་གནས། །དེ་བས་ཀུན་ནས་རབ་འབད་བྱ། །བདག་ཉིད་ཧེ་རུ་ཀ་མཆོད་དོ། །འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་གཞན་མེད། །དེ་བས་ཆགས་དང་ཆགས་བྲལ་བར། །ཁྱོད་ཀྱིས་གཟུང་བར་མི་བྱའོ། །དམ་ཚིག་བསྲུང་བའི་ཆོ་གའོ། །གཡས་པས་ཆོས་གོས་བཟུང་ནས་ནི། །གཡོན་པས་མཆོག་སྦྱིན་ལེགས་གནས་དཔའ་བོ་ཡིས། །ནམ་མཁའ་ལྡིང་ལྟང་གནས་པའི་སློབ་མ་དངོས་པོ་ཀུན་བྱས་ཏེ། །འདི་ལྟར་ང་ཡིས་ལུང་བསྟན་ཁྱོད། །ཧེ་རུ་ཀ་དཔལ་དེ་བཞིན་གཤེགས། །སྲིད་པ་མཆོག་ཏུ་དག་པའི་ཕྱིར། །སྲིད་པ་ངན་འགྲོ་རྣམས་ལས་འདོན། །ཤྲཱི་ཧེ་རུ་ཀ་ནི་རྨ་ཎཏ་ཐཱ་ག་ཏ་སིདྡྷི་ས་མ་ཡ་སྟྭཾ་བྷུར་བྷུ་བ་སྭ། དོན་ཡོང་གྲུབ་པའི་ཕྱག་རྒྱ་ཆེན་པོར་རྣམ་པར་གནས་པའི་ཐབས་འདིས། མཆོག་ཏུ་གསང་བའི་ཆོ་གས་རྒྱལ་བ་རྣམས་ཀྱིས་མགྲིན་གཅིག་ཏུ་ལུང་བསྟན་པ་སྟེ་དེ་ཧེ་རུ་ཀར་འགྱུར་རོ། །ལུང་བསྟན་པའི་ཆོ་
༄། །གའོ། །ཁམས་གསུམ་ཀུན་གྱི་རྒྱལ་སྲིད་ཆེ། །རྒྱལ་པོའི་བདག་པོར་བརྟན་པ་དང༌། །དི་རིང་བདུང་ལས་རྣམ་རྒྱལ་ཞིང༌། །གྲོང་ཁྱེར་མཆོག་ཏུ་ཞུགས་པ་ཡིན། །དབང་འདི་བསྐུར་བ་ཙམ་གྱིས་ནི། །དེང་ནི་སངས་རྒྱས་ཉིད་དུ་ནི། །ཐོབ་པར་འགྱུར་བར་ཐེ་ཚོམ་མེད། །ཆུ་དང་དབུ་རྒྱན་རྒྱུ་མཐུན་ཏེ། །རྡོ་རྗེ་བདག་པོས་མཚོན་པ་སྨིན། །རྫོགས་སངས་རྒྱས་དབང་སྐྱེས་བུ་སྟེ། །གསང་བར་སྦྱོར་བ་དྲི་མ་མེད། །མ་དང་བུ་མོ་སྲིང་མོ་དང༌། །ཚ་མོ་ཉིད་དེ་ཕོ་ཉ་མོ། །གཏུམ་མོ་དང་ནི་གར་མཁན་ནམ། །གཞན་མ་ལ་ཡང་སེམས་སྦྱིན་ཏེ། །དེ་རྣམས་ནང་ནས་མེ་ཏོག་ལྡན། །སྔགས་པ་བཟང་པོས་གཟུང་བྱས་ཏེ། །དབང་སྐུར་བ་ལ་སྤྲོ་བ་ཆེ། །རྒྱུད་ཀྱི་མཚན་ཉིད་ཡང་དག་ལྡན། །དཔལ་ལྡན་མེ་ཏོག་ཤ་ལྔ་དང༌། །པདྨར་གནས་བྱས་བློ་བཟང་བས། །ཕྱག་རྒྱ་འདི་དག་དཀྱིལ་འཁོར་དུ། །རྒྱུད་བསྲུངས་བསྲུང་བར་ཐེ་ཚོམ་མེད། །ཕྱག་རྒྱ་དྲུག་དང་ཐལ་བར་ལྡན་ཞིང་གོས་དང་བྲལ་བ་སྐྲ་གྲོལ་ཕྱག་རྒྱ་ནི། །ཕྱག་རྒྱ་གཡོན་ན་ཁ་ཊྭཱཾ་ག་སྟེ་གཡས་ན་ཌ་མ་རུ་ནི་དྲི་མེད་དཀྲོལ་བ་ཡི། །མདུན་གྱི་ཕྱོགས་སུ་བླངས་ནས་བརླ་གཡོན་དབུས་སུ་སློབ་མ་མཁའ་ལྡིང་ཁ་བྱས་ཏེ། །བཟའ་བ་ལེགས་གནས་རབ་མཆོག་བླ་མ་མཆོག་གིས་ཟླ་བའི་འདོད་པ་བྱ། །རྣལ་འབྱོར་བ་ཡིས་སྤྲོས་པར་གྱུར་པ་གང་ཞིག་དྲི་མེད་དེ་ནི་ལྕེ་ཡིས་རབ་བླངས་ནས། །དེ་ནས་དེ་ཡི་ཐོད་པར་རབ་ཏུ་རྒྱས་པའི་ཞལ་གྱིས་སློབ་མ་ལ་ནི་གསང་བ་སྦྱིན། །པདྨ་ལ་གནས་མཆོག་ཏུ་དགའ་བར་འབྱུང་ཞིང་སྙིང་པོར་གྱུར་པ་ཁྱོད་ཀྱིས་ལྕེ་ཡིས་ལོང༌། །དེ་ནས་ལག་ནས་བཟུང་སྟེ་ཆོ་ག་བཞིན་དུ་སྐྱོན་མེད་རྣལ་འབྱོར་མ་ནི་དེ་ལ་སྦྱིན། །ལྷ་མོ་འདི་ནི་དངོས་གྲུབ་སྟེར། །ཁམས་ལྔ་བཅུད་ཀྱི་བདག་ཉིད་ཅན། །ཧེ་རུ་ཀ་བདག་སྦྱོར་བ་ཡིས། །བདེ་ལ་ལེགས་པར་མྱང་བར་གྱིས། །བུ་ཀྱེ་མདུན་དུ་དགའ་བས་མཚོ་སྐྱེས་མཆོག་ནི་དགའ་བས་བརྟན་པར་འཁྱུད། །ཚིག་མེད་བརྗོད་དུ་མེད་པ་གང་ཞིག་ལེགས་པའི་མཐུ་ནི་བདེ་མཆོག་རང་བཞིན་སྙིང་པོའོ། །གཞན་པ་ཐམས་ཅད་ཇི་ལྟར་བསྟན་པ་བདེ་བ་སྐྱེས་པས་དགའ་བའི་ངོ་བོ་ལ་སོགས་དེ། །ཤེས་པར་བྱས་ནས་ཕྱིས་ནི་ཇི་ལྟར་འདོད་པ་བྱ་ཞིང་ཉིན་དང་མཚན་དུ་དེ་ཉིད་རིན་ཆེན་བསྒོམ། །ལྷ་མོའི་མཚན་
༄། །ཉིད་མངོན་དུ་བསྟན་པས་རྡོ་རྗེའི་དབྱངས་ཀྱིས་སྨྲ་བར་བྱ། །དཔའ་བོ་ཁྱོད་ནི་ཅི་ལ་སྤྲོ། །པདྨ་ལས་བྱུང་བཟའ་བ་དང༌། །དགའ་བ་བཞི་པོ་གང་ཡིན་དང༌། །དེ་ཡང་མི་ཕྱེད་ལེགས་པའི་བློ། །ནུས་སམ་ཧེ་རུ་ཀ་ཡིས་སྨྲོས། །སློབ་མས་ཀྱང་ནི་དེ་ནས་སྨྲ། །རྟག་ཏུ་བདག་གིས་བྱེད་པར་ནུས། །པདྨ་རྒྱས་པ་མགུ་བ་ཡིས། །དག་པའི་སེམས་ལ་སྨྲ་བར་བྱ། །པདྨ་རྗི་ལྟར་བྱ་བར་གྱིས། །བདེ་མཆོག་མཉེས་པ་ལ་སོགས་པ། །འཇིགས་དང་ངོ་ཚ་རྟག་ཏུ་ཐོང༌། །བདེ་བའི་མཆོག་ལ་རོལ་བར་གྱིས། །སློབ་དཔོན་གྱིས་ནི་ཇི་ལྟར་བསྟན། །བློ་བཟང་གིས་ནི་དེ་ཀུན་ནི། །སངས་རྒྱས་བཞི་ཡི་སྟན་ལ་གནས། །རྡོ་རྗེ་པདྨ་ལེགས་པར་གནས། །དགའ་བ་བཞི་ཡི་མཚན་ཉིད་ནི། །རིམ་པ་ཉིད་ཀྱིས་རྗེས་སུ་སྤྱད། །དེ་འོག་འབྱུང་བ་ལེགས་བཟའ་ཞིང༌། །བླ་མ་རྣལ་འབྱོར་མ་ཕྱག་བྱ། །རྡོ་རྗེ་སྙིང་པོ་དབེན་པར་མཉམ་པའི་རོ་ལ་རབ་ཏུ་དགའ་བས་ཧེ་རུ་ཀ་ཡིས་བྱ། །ལྷ་མོའི་ཚོགས་ནི་དཔའ་བོ་དང་བཅས་མང་པོའི་རོ་དང་བཅུད་ནི་ཁྲོ་དང་སྒྱུར་ལས་རྣམ་པར་གྲོལ། །པདྨ་ལ་གནས་སྦྱོང་བའི་སེམས་ནི་མཆོག་ཏུ་དགའ་བར་འབྱུང་བ་ཟླ་བའི་འོད་རང་བཞིན། །གཅིག་ཏུ་རོལ་བ་ལ་ཆགས་སྙིང་པོ་ལྷན་ཅིག་སྐྱེས་པའི་རང་བཞིན་སངས་རྒྱས་ཀུན་གྱི་དངོས། །དགའ་བ་དང་བཅས་དཔའ་བོ་མགོན་པོས་ངེས་པར་བཞི་བའི་མཚན་ཉིད་གསུངས། །དེ་ནི་ཀུན་མཁྱེན་རང་བཞིན་ས་གསུམ་དང་བཅས་བདེ་མཆོག་སྙིང་པོའོ། །ལྷག་མའི་བརྟུལ་ཞུགས་ལ་སོགས་སྦྱིན་ཞིང་བདེ་མཆོག་ཏུ་སྤས་གང་ཡིན་སེམས་ནི་བདེ་བར་བྱ། །རྣལ་འབྱོར་མ་ཡིས་གསང་བའི་མཚན་ཉིད་ངེས་པར་རྒྱུད་ཀྱི་སྙིང་པོས་ངེས་པར་བརྡར་བསྟན་བྱ། །རྣལ་འབྱོར་སེམས་ཀྱི་མཚན་ཉིད་ནི། །བདེ་མཆོག་གཞི་ལས་མ་ཤེས་ན། །རྣལ་འབྱོར་མ་ཚོགས་ཅི་ཡི་དོན། །སེམས་ཅན་ལ་བསྟན་ཅི་ཡི་དོན། །དོན་འདི་དག་དང་ཡང་དག་ལྡན། །དབང་བསྐུར་བ་ནི་རྣམ་པ་བཞི། །དཔལ་ལྡན་བདེ་མཆོག་རྒྱུད་ལས་ནི། །ཇི་ལྟར་བསྟན་པ་དེ་བཞིན་གསུངས། །དེ་བཞིན་དུ་ཡང་གསུངས་པ། །བུམ་པའི་དབང་ནི་དང་པོ་སྟེ། །གཉིས་པ་གསང་བའི་དབང་ཡིན་ནོ། །ཤེས་རབ་ཡེ་ཤེས་གསུམ་པ་སྟེ། །བཞི་པ་དེ་ནས་ཡང་དེ་བཞིན། །དཔལ་
༄། །ལྡན་འདུས་པའི་རྒྱུད་ལས་མཆོག་ཏུ་དགའ་བའི་མཚན་ཉིད་གཅིག་པའི་རང་བཞིན་ནི། །ལེགས་པར་བསྔགས་པའི་དངོས་གྲུབ་གསུངས་པ་ལྷན་ཅིག་སྐྱེས་མི་གནས། །དཔལ་ལྡན་བདེ་མཆོག་རྒྱུད་དུ་ཐོག་མར་ལྷན་ཅིག་སྐྱེས་པའི་སེམས་ནི་རྣམ་པར་བཀོད། །བློ་དང་ལྡན་པས་མངོན་དུ་བརྡ་ཡིས་བསྟན་པས་གོ་བར་བྱ། །ལྷན་ཅིག་སྐྱེས་པའི་དགའ་བར་འཁོར་བར་ཐམས་ཅད་རྣལ་འབྱོར་བ་ནི་རྟག་ཏུ་འགྱུར། །དེ་ཉིད་དུ་ནི་སྔགས་དང་ཕྱག་རྒྱ་ལྷན་ཅིག་སྐྱེས་པར་ཆོག་ཐ་དད་གསུངས། །ལྷན་ཅིག་སྐྱེས་པ་ཧེ་རུ་ཀར་བརྗོད་པའི། །དགའ་བ་བསྟན་པ་མི་ཤེས་ནི། །དེ་ནི་བདེ་མཆོག་ཕྱི་རོལ་འཁོར། །དེ་ནི་དངོས་གྲུབ་ཤིན་ཏུ་རིང༌། །རྟག་པའི་དུས་སུ་བདེ་མཆོག་གང༌། །འདུས་པ་ཞེས་བྱར་དེས་གསུངས་སོ། །འདུས་པ་དང་ནི་བདེ་མཆོག་དག །རྟེན་ཅིང་འབྲེལ་བར་འབྱུང་བར་གནས། །འདུས་པ་ཞེས་བྱ་ཆོགས་བསྟན། །འཁོར་ལོ་བདེ་མཆོག་དེ་ལས་བྱུང༌། །འདུས་པ་བདེ་མཆོག་ཅེས་བྱ་སྟེ། །དེ་ཀུན་ཧེ་རུ་ཀ་རུ་བརྗོད། །གང་ཞིག་བདེ་མཆོག་ལྷན་ཅིག་སྐྱེས་པ་ཐོག་མེད་སངས་རྒྱས་ཏེ། །རང་རིག་ཆོགས་རྣམ་པར་སྤྲུལ་པ་སྣ་ཚོགས་གཟུགས། །རྡོ་རྗེ་པདྨར་འབྱོར་བ་རྒྱུ་ལས་མ་སྐྱེས་དཔལ་ལྡན་འདི་ནི་ཧེ་རུ་ཀ་བཅས་མགོན་པར་གྱུར། །ཡོན་ཏན་ཀུན་གནས་རྒྱུད་ལས་ནི། །འདི་ཡི་དོན་ནི་ལེགས་པར་གསུངས། །ཧེ་རུ་ཀ་དཔལ་ལེགས་སྦྱོར་བ། །འདོད་པའི་དོན་ཀུན་སྒྲུབ་པ་པོ། །ཕ་རོལ་ཡན་ལག་ཅེས་གྲགས་པ། །གང་ཡིན་སློབ་མ་དབང་བསྐུར་བའོ། །དེ་ཉིད་ལྷན་ཅིག་སྐྱེས་ཡན་ལག །ཅེས་པ་རྣལ་འབྱོར་མ་ལུས་གྲགས། །ལྷན་ཅིག་སྐྱེས་མ་གཟུགས་ཅན་མ། །ཡན་ལག་ཕྱག་རྒྱ་འདི་སྤངས་ནས། །གང་ཞིག་ཡང་དག་རིག་འདོད་པ། །གཞན་དུ་སྡུག་བསྔལ་སྐལ་བ་ཅན། །ཇི་ལྟར་ཆགས་པའི་ཆོ་ག་ཡིན། །བདེ་མཆོག་ལས་ནི་སེམས་ཅན་འཛིན། །ལྷན་ཅིག་སྐྱེས་དགའ་སྟོང་པ་ཉིད།། འཁོར་བ་ན་ནི་མཆོག་ཡིན་ནོ། །དེ་གསུངས་པ། རྡོ་རྗེ་བདག་པོ་ཐམས་ཅད་ཀྱིས། །འདོད་ཆགས་དེ་ཉིད་དོན་བསམ་ཞིང༌། །འདོད་ཆགས་ལས་སྐྱེས་བྱང་ཆུབ་བྱ། །སེམས་ཅན་ཀུན་ལ་ཕན་པ་ཡི། །སྔགས་པས་ཁོང་དུ་ཆུད་དོན་འདི། །སྐུ་དང་གསུང་དང་ཐུགས་སུ་འདོད། །དེ་ཀུན་རྟོགས་
༄། །པའི་བློ་ཡིས་ནི། །ཆོ་ག་ཡིས་ནི་ལས་བྱའོ། །གྲུབ་པའི་དམ་ཚིག་སྡོམ་པ་ནི། །འདི་ནི་རྟག་ཏུ་བསྲུང་བར་བྱ། །སངས་རྒྱས་ཀུན་གྱིས་ལེགས་པར་གསུངས། །གནང་བའི་མཆོག་འདི་བརྟག་པའོ། །གང་གསུངས་པ། འབྲས་བུ་འབྱུང་བ་མང་པོ་རྒྱས་པ་ནི། །གསང་སྔགས་སྨྲ་བས་བསྟན་པ་ནི། །སེམས་ཀྱི་སྒྲུབ་པའི་ཁྱད་པར་གྱིས། །སེམས་ལས་རྫོགས་པའི་བྱང་ཆུབ་འབྱུང༌། །དེ་གསུངས་པ། བྱང་ཆུབ་སེམས་ཀྱི་འབྲས་བུ་གང༌། །དེ་ནི་སངས་རྒྱས་ཡེ་ཤེས་མཆོག །རྡོ་རྗེ་ཧེ་རུ་ཀ་འདི་མངོན་དུ་འགྱུར། །ཆོས་དང་ལོངས་སྤྱོད་སྤྲུལ་པ་ཡི། །དཔའ་བོ་རྣལ་འབྱོར་མ་རྣམས་གཟུགས། །རྣམ་པ་སྣ་ཚོགས་མཆོག་གིས་སེམས། །ལྷན་ཅིག་སྐྱེས་བྱས་མཉེས་ནས་ནི། །གསང་སྔགས་ཟློས་ལ་མཆོག་ཏུ་བརྩོན། །རྡུལ་ཚོན་ལྷན་ཅིག་སྐྱེས་པའི་གཟུགས། །ལེགས་མཆོད་ནས་ནི་གཤེགས་སུ་གསོལ། །རྡུལ་ཆོན་བག་ཙམ་དོན་བྱིན་ནས། །ཆུ་བོ་ཆེན་པོ་སོགས་པར་འདོར། །དེ་ནས་དཔའ་བོ་ལྷ་མོ་རྣམས། །མཚན་མོ་ཕྱེད་ནས་མཁས་པ་ཡིས། །སྤྱད་དང་བཟའ་བ་སྔོན་བྱས་ཏེ། །རྒྱུད་ཉིད་ཀྱིས་ནི་མཆོད་པ་བྱ། །དཀྱིལ་འཁོར་ས་ཡི་གནས་སུ་ནི། །འོངས་པར་གྱུར་ནས་བླ་མ་མཆོད། །ཕྱི་དང་ནང་དུ་ཡང་དག་ལྡན། །འདོད་པ་ལྔ་ལ་ཉེ་བར་སྤྱོད། །ཧེ་རུ་ཇི་བཞིན་ལྷ་མོ་བཞིན། །བླ་མ་ཡང་ནི་དེ་བཞིན་ནོ། །ཧེ་རུ་ལྷ་མོ་བླ་མ་ལ། །མཆོད་པའི་འབྲས་བུ་འདྲ་བའོ། །དེ་ནས་བླ་མ་ལ་དབུལ་བ། །དེ་བཞིན་གཤེགས་པ་གསུངས་པའི་ཡོན། །གསེར་ནི་བརྒྱ་སྟོང་དབུལ་བ་དང༌། །རིན་ཆེན་རྣམ་པ་སྣ་ཚོགས་དང༌། རས་ནི་ཟུང་གྱུར་བརྒྱ་ཉིད་དང༌། །གླང་པོར་དང་ཡུལ་འཁོར་དང༌། །རྣ་རྒྱན་དང་ནི་ལག་རྒྱན་དང༌། །མགུལ་རྒྱན་སོར་གདུབ་དམ་པ་དང༌། །གསེར་ལས་བྱས་པའི་མཆོད་ཕྱིར་ཐོགས། །རང་གི་ཆུང་མ་བུ་མོ་དང༌། །བྲན་དང་བྲན་མོ་སྲིང་མོ་རྣམས། །ཕྱག་བྱས་ནས་ནི་དབུལ་བར་བྱ། །དངོས་པོ་ཀུན་གྱི་བདག་ཉིད་ཀྱིས། །བློ་དང་ལྡན་པས་བླ་མར་རབ་དབུལ་བྱ། །དེང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་ཕུལ་བ་ལགས། །དེ་ལྟར་ཆོ་ག་དེ་བྱས་ནས། །སྒྲུབ་པ་པོ་ཡིས་ཤིན་ཏུ་ངེས། །དེ་ནས་དེ་དང་དེ་ཡི་ནི། །མཁའ་འགྲོ་མ་དང་སྦྱོར་བའོ། །ཌཱ་ཀི་ནཱི་དང་ལཱ་མ་དང༌། །
༄། །ཁཎྜ་རོ་ཧཱ་རཱུ་པི་ཎི། །འདི་དག་འགྲོ་བར་རྣམ་པར་སྤྱོད། །མཁའ་འགྲོ་མ་དང་སྒྲུབ་པོར་བཅས། །ཐམས་ཅད་དེ་ཡི་བྲན་བཞིན་དུ། །སྒྲུབ་པ་པོ་ནི་སོ་མ་ཉི་མེད། །སྦྱོར་བ་གྲུབ་པར་གྱུར་པ་དེའི། །འཇིག་རྟེན་གསུམ་གྱིས་མི་བཟློགས་སོ། །སློབ་དཔོན་ལུས་སུ་གནས་ནས་ནི། །འབད་པ་ཡིས་ནི་མཆོད་པ་ལེན། །འདི་དོན་བདག་གིས་རབ་ཏུ་བསྟན། །བླ་མ་ལ་ནི་མཆོད་པ་བྱ། །ཧེ་རུ་ཀ་སོགས་བདེ་མཆོག་ལ། །དངོས་པོ་ཀུན་གྱིས་ལེགས་མཆོད་པ། །རྫོགས་པར་གྱུར་ནས་མཁས་པ་ཡིས། །དེ་ཡི་འོག་ཏུ་སྤྱོད་པ་བྱ། །དབང་བསྐུར་བའི་ཆོ་གའོ།། །། ཡང་ན་ཡིད་ནི་མངོན་དགའི་གནས་སུ་འཁོར་ལོའི་བདག་ཉིད་རྣལ་འབྱོར་ལྡན་པ་ཡི། །དབང་བསྐུར་དོན་དུ་ཡིད་འོང་བ་ཡི་འཁོར་ལོར་ཆོ་ག་ཐམས་ཅད་བྱས། །སྔོན་དུ་བསྟན་པའི་རྣལ་འབྱོར་ལྡན་པའི་སྔགས་པས་ཟས་བཟང་པོ་ཡི་རྒྱན་དང་ཆོ་ག་ནི། །སྔོན་དུ་བསྟན་པའི་དེ་འདྲའི་སློབ་མ་ལ་ནི་དབང་བསྐུར་སྦྱིན། །གནས་དེར་རྣལ་འབྱོར་བ་ནི་དང་པོའི་དཔའ་བོ་དང་ནི་དགུས་དང་གཡོན་པར་ལྡན། །གཡོན་པའི་སྦྱོང་བའི་ཆོ་གས་ཤིན་ཏུ་མཛེས་པ་ཐམས་ཅད་རྟག་ཏུ་སྦྱིན། །ཤིན་ཏུ་རྒྱུད་དུ་སྤས་པའི་དགའ་བ་བཞི་ཡི་ཆོ་ག་ལེགས་པར་བསྟན། །སྙིང་རྗེའི་སྟོབས་ནི་ལྷན་ཅིག་སྐྱེས་པར་ལེགས་གནས་བཤད་པར་གྱིས། །པདྨའི་ནང་ན་མཆོག་གི་སྣ་ཡི་རྩེ་མོ་རུ། །རྡོ་རྗེ་ལས་བྱུང་འོ་མ་རྒྱ་མཚོ་གཟུགས་ནི་ཡིད་བཞིན་ནོར་བུ་འགྲོ་ཀུན་རང་བཞིན་ནོ། །དཔལ་ལྡན་བདེ་མཆོག་རིག་པ་རྟག་ཏུ་འབབ། །གཏོར་མའི་ཆོ་ག་བསྲུང་འཁོར་ལོ། །ཁ་སྦྱོར་གྲོལ་བ་བཟང་པོ་དང༌། །སྔགས་བཏུ་བ་དང་དེ་བཞིན་བསྲུང༌། །སྤོབས་པ་དཀྱིལ་འཁོར་སྒྲུབ་ཐབས་ཏེ། །དེ་དག་ཐམས་ཅད་ཡང་དག་ལྡན། །སློབ་དཔོན་དེས་ནི་བསྟན་པར་བྱ། །དེ་ཡི་ལག་ཏུ་འོངས་པའི་དཔལ། །འདོད་པ་ཐམས་ཅད་རབ་སྟེར་བའོ། །དཔལ་ལྡན་འདུས་པའི་རྒྱུད་དུ་བདེན་སྤས་གྱུར་པའི་དབང་བསྐུར་ཤེས། །སློབ་མ་ལ་ནི་བླ་མ་དེས་ནི་རྒྱུད་དུ་དེ་བཞིན་གསུངས། །ཕྱི་རོལ་གྱི་དཀྱིལ་འཁོར་དུ་དབང་བསྐུར་བར་འདོད་པའི་ཆོ་གའོ། །ལེགས་པར་རབ་གནས་ཆོ་ག་འདི། །གདོད་ནས་དག་པ་སྐྱོན་མེད་པའི། །དཀྱིལ་འཁོར་ཀུན་དང་ཡང་དག་ལྡན། །རྣམ་པ་ཀུན་གྱིས་ལེགས་པར་དཀྲིས། །
༄། །གང་ཕྱིར་འགྲོ་བ་སེམས་ལས་བྱུང༌། །ལྷན་ཅིག་སྐྱེས་པའི་མཚན་ཉིད་དོ། །དེ་ཡི་ཕྱིར་ན་གནས་ཀུན་དུ། །བློ་བཟང་གིས་ནི་རབ་གནས་ཀྱིས། །ལུགས་མ་དང་ནི་གླེགས་བམ་ནི། །འཇིག་རྟེན་དོན་དུ་རབ་གནས་གསུངས། །འཇིག་རྟེན་ཀུན་རྫོབ་ལ་བརྟེན་ནས། །མཁས་པ་ཡིས་ནི་རབ་གནས་བྱ། །ཉེ་བའི་སྙིང་པོས་རི་ལུ་གྲུབ་པ་དེ་ཡི་ཡུལ་ལ་ལྷག་པར་གནས་པ་གསུངས། །དེ་ནི་བགྲོད་ནས་སྔགས་པ་བཟང་པོས་རབ་ཏུ་གནས་པ་མདོར་བསྡུས་བྱ། །ཟླ་བའི་བཏུང་པ་སྔོན་བྱས་ནས། །རྒྱན་རྣམས་ཀུན་གྱིས་རྣམ་པར་བརྒྱན། །དཔའ་བོའི་སྲུང་བ་ཡང་དག་ལྡན། །རབ་ཏུ་འཇུག་ལམ་ལ་ལེགས་གནས། །ཨཱ་ལི་ཀཱ་ལི་ལེགས་བརྗོད་ནས། །ལྷ་རྣམས་ལྷག་པར་གནས་པར་བྱ། །ལུགས་མ་གླེགས་བམ་ལ་སོགས་རྣམས། །དེ་ཀུན་རབ་ཏུ་གནས་པར་བྱ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ་ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ་།རྣམ་རྒྱལ་བུམ་པ་བཟླས་པ་ཡིས། །མཁས་པས་ལྷ་ཡི་ཁྲུས་བྱའོ། །དེ་ནས་བུམ་པ་གཞན་གྱིས་ཀྱང༌། །དངོས་གྲུབ་རྒྱུར་ནི་དབང་བསྐུར་རོ། །རྣལ་འབྱོར་ཆུང་ངུ་རྡོ་རྗེ་སེམས། །དེ་ལྟ་བུར་ནི་མཚན་ཉིད་གྱུར། །ཆོ་ག་ཐམས་ཅད་བྱ་བ་སྟེ། །རྒྱུད་ལས་ཇི་ལྟར་བསྟན་པ་འདོད། །འདས་པ་བར་མའི་སྦྱོར་བ་ཡིས། །རྟེན་ལ་བར་མའི་ཆོ་ག་བྱ། །རབ་གནས་ལ་སོགས་གང་ཡིན་ཀུན། །གང་བསྟན་པ་ནི་དེ་བཞིན་གསུངས། །ལྷན་ཅིག་སྐྱེས་པའི་དགའ་ལྡན་བདག །དཔའ་བོའི་ཡིད་ནི་མི་གཡོ་བའོ། །ཆེན་པོའི་ཡོན་ཏན་དང་ལྡན་པས། །སེམས་ཙམ་ཉིད་དུ་ཀུན་ལ་སྤྱད། །སྐད་ཅིག་གིས་ནི་ཐམས་ཅད་ཉིད། །རབ་ཏུ་གནས་པར་ངེས་པར་གྱུར། །རྣམ་པ་ཀུན་གྱི་མཆོག་ལྡན་ཞིང༌། །རྫོགས་པའི་སངས་རྒྱས་ཀུན་གྱིས་བསྔགས། །ཆེན་པོ་ཡང་ནི་ཆེན་པོ་ཡི། །རྣལ་འབྱོར་གཉིས་མེད་མཚན་ཉིད་དོ། །དཔལ་ལྡན་འཁོར་ལོ་ཀུན་གྱི་གཞི། །རང་འབྱུང་བདེ་མཆོག་ལས་བྱུང་བའོ། །རྣམ་པ་བཞིར་གྱུར་རྣལ་འབྱོར་པ། །དགའ་བ་བཞི་ཡི་མཚན་ཉིད་དང༌། །མཚན་ཉིད་བཞི་དང་ཡང་དག་ལྡན། །སངས་རྒྱས་ཐམས་ཅད་རབ་ཏུ་མཆོད། །ཟླ་བའི་བཏུང་བ་ལ་
༄། །སོགས་བྱ། །བཞད་དང་སྲེག་པ་ལ་སོགས་ལྡན། །མཚན་མོ་དགའ་བ་ཆེན་པོས་དེར། །དཔའ་བོ་དཔའ་མོའི་དབང་ཕྱུག་ལྡན། །འདུས་པ་ལ་སོགས་ལེགས་བརྟེན་ནས། །རབ་ཏུ་གནས་པའི་ཆོ་ག་མཆོག །རྟག་ཏུ་གཡོན་དུ་བསྒྱུར་བ་ཡིས། །བློ་དང་ལྡན་པས་ཐམས་ཅད་བྱ། །རབ་ཏུ་གནས་པའི་ཆོ་གའོ།། །།དཔལ་ལྡན་བདེ་མཆོག་འཁོར་ལོ་ཆེ། །བདེ་མཆོག་ལྟ་བུའི་སྦྱོར་བ་ཡིས། །བཅངས་ན་བདེ་མཆོག་ཏུ་འགྱུར་རོ། །ཨེ་ལྟ་བུ་ཡི་དབུས་ཕྱོགས་སུ། །དཔལ་ལྡན་མཁས་པས་གསང་སྔགས་རྒྱལ་པོ་བྲི། །གྲོ་གུར་གུམ་ཙནྡན་སོགས། །ཆོ་གས་དཔལ་ལྡན་དང་པའི་རྒྱལ་པོ་ཉིད། །གནོད་པ་ཀུན་སེལ་རྒྱལ་བྱེད་ལེགས་པའི་དཔུང་པར་རྟག་ཏུ་བཅིང༌། །གསང་སྔགས་སྣ་ཚོགས་བཟླས་ཤིང་ཆོ་གས་དངོས་གྲུབ་སྟེར། །ཞི་ལ་མཐའ་དུ་སྭཱ་ཧཱ་བྲི། །རྒྱས་པ་ལ་ནི་ཕྱག་འཚལ་ཏེ། །དབང་ལ་ཧོཿ་དང་ཡང་དག་ལྡན། །བསད་ལ་ཧཱུཾ་ཕཊ་སྦྱར་བར་བྱ། །ཧེ་རུ་ཀ་སྦྱོར་མི་ཤེས་ན། །སེམས་ཅན་དོན་ལ་བརྩོན་པར་གནས། །དུབ་ཅིང་ངལ་བ་དེ་རྣམས་ཀྱི། །སེམས་ཅན་དོན་དུ་མི་འགྱུར་རོ། །སྒྲུབ་ཐབས་གཏོར་མ་སྦྱིན་སྲེག་དང༌། །རབ་གནས་དཀྱིལ་འཁོར་དེ་བཞིན་ཏེ། །འདི་དག་ཐམས་ཅད་ཡང་དག་ལྡན། །ཧེ་རུ་ཀ་དཔལ་ལུས་མཚན་ཉིད། །དཔལ་ལྡན་རིན་ཆེན་རི་གནས་ཏེ། །སེམས་ཅན་ཀུན་གྱི་དོན་གྱི་རྒྱུར། །སློབ་དཔོན་དབུ་བ་བློ་ལྡན་པས། །དཀྱིལ་འཁོར་ཐབས་འདི་བྱས་པ་ཡིན། །འཁོར་ལོ་སྡོམ་པའི་དཀྱིལ་འཁོར་གྱི་ཆོ་ག་རྫོགས་སོ།།