དཔལ་རྡོ་རྗེ་རྣལ་འབྱོར་མའི་སྦྱིན་སྲེག་གི་ཆོ་ག།
སངས་རྒྱས་བྱིན།
༄། །རྒྱ་གར་སྐད་དུ། །ཤྰྲི་བཛྲ་ཡོ་གི་ནཱི་ཧོ་མ་བི་དྷི། བོད་སྐད་དུ། དཔལ་རྡོ་རྗེ་རྣལ་འབྱོར་མའི་སྦྱིན་སྲེག་གི་ཆོ་ག །དཔལ་རྡོ་རྗེ་ཕག་མོ་ལ་ཕྱག་འཚལ་ལོ། །དང་པོར་རེ་ཞིག་དཔལ་རྡོ་རྗེ་རྣལ་འབྱོར་མའི་བཞེད་པས་འཇིག་རྟེན་དང༌། །འཇིག་རྟེན་ལས་འདས་པའི་ལས་ཀྱི་ཚོགས་དང༌། དངོས་གྲུབ་བསྒྲུབ་པའི་དོན་དུ་སྦྱིན་སྲེག་གི་བྱ་བ་བྱེད་པར་འདོད་པའི་སྔགས་པས། གྲུ་གསུམ་པའི་རྣམ་པ་ཅན་གྱི་ཐབ་ཁུང་གི་རྒྱ་ཁྱོན་གྱི་ཕྱེད་ཐུར་དུ་བརྐོས་པ་ཕྱི་སྐོར་དང་བཅས་པ་དམར་བ་ལ་སོགས་པའི་མདོག་དང་ལྡན་པ་ལེགས་པར་འཆོས་པ་བྱས་ལ། །ནུབ་ལ་སོགས་པར་བལྟས་པའི་ཚུལ་གྱིས་འདུག་ལ། མཆོད་པའི་ཡོ་བྱད་ལྡས་མཆོད་དེ་ཐབ་ཁུང་དུ་བསྲེག་ཅིང་བཀོད་ནས་ཡི་གེ་རཾ་གྱི་ས་བོན་ལས་སྐྱེས་པའི་མོ་ལྷ་མདོག་དམར་པོ་རིལ་བ་སྤྱི་བླུགས་དང༌། མི་འཇིགས་པ་སྦྱིན་པ་དང༌། དབྱིག་པ་དང༌། བགྲང་ཕྲེང་ལག་ན་འཛིན་པ་རྣམ་པར་བསྒོམ་པར་བྱའོ། །དེ་ནས་ཡེ་ཤེས་སེམས་དཔའ་དགུག་པ་ལ་སོགས་པ་བྱས་ནས་ནི། །ཡང་དག་པར་མཆོད་དེ། དེའི་ལྕེའི་རྩེ་མོར་རཾ་བཀོད་ནས་
༄། །བདུད་རྩི་ལྔ་ལ་སོགས་པའི་རྫས་དང༌། འཇིག་རྟེན་པའི་རྫས་རྣམས་ཨོཾ་ཨགྣེ་དེ་བ་ཏཱ་སྰྭ་ཧཱ། །ཞེས་བྱ་བའི་སྔགས་འདིས་སྦྱིན་སྲེག་བྱས་ནས་སྔགས་དེ་ཉིད་ཀྱིས་དགང་བླུགས་དབུལ་བར་བྱའོ། །དེ་ནས་དེ་བཞིན་ཉིད་ཀྱི་ཡེ་ཤེས་ཀྱི་བདག་ཉིད་ཀྱི་སྔགས་ཀྱིས་མེ་ལྷའི་དཀྱིལ་འཁོར་དུ། །དཀྱིལ་འཁོར་གྱི་འཁོར་ལོ་ལྷག་པར་མོས་པར་བྱས་ནས་མཆོད་པ་ལ་སོགས་པ་བྱས་ཏེ། །བདུད་རྩི་ལྔ་ལ་སོགས་པའི་རྫས་རྣམས་ཀྱིས་ལྷ་མའམ་ལྷ་རྣམས་ལ་སྔགས་ཀྱིས་སྦྱིན་སྲེག་བྱའོ། །ཞི་ལ་བསྲེག་རྫས་མར་སོགས་ཏེ། རྒྱས་པ་ལ་ནི་མངར་ཉིད་དོ། །དབང་ལ་མར་དང་ལན་ཚྭ་ཉིད། །དྲག་པོ་ཚ་དང་ཁ་སོགས་ཀྱིས། །ཞི་ལ་གཟུགས་ནི་དཀར་པོ་སྟེ། །རྒྱས་པ་ལ་ནི་སེར་པོ་བསྒོམ། །དབང་ལ་དམར་པོ་ཞེས་བྱར་བརྗོད། །དྲག་པོ་ནག་པོར་རབ་ཏུ་གྲགས། །དངོས་གྲུབ་སྒྲུབ་པའི་དུས་སུ་ནི། །ཁ་དོག་དམར་པོར་རྣམ་པར་བསྒོམ། །དེ་ལྟར་བྱས་ནས་དཀྱིལ་འཁོར་གྱི་འཁོར་ལོ་རང་གི་ལུས་ལ་བཅུག་ནས། །གཏོར་མ་བཏང་སྟེ་ཚོགས་ཀྱི་འཁོར་ལོའི་ཚུལ་དུ་འཇིག་རྟེན་ལས་འདས་པའི་མཆོད་པ་བྱས་ནས། རང་མངོན་པར་འདོད་པའི་དངོས་གྲུབ་ཞུ་བར་བྱའོ། །བསྟན་པར་བྱ་མིན་སྦྱིན་སྲེག་འདི། །རབ་ཏུ་འབད་པས་སྦ་བར་བྱ། །དེ་ནས་དངོས་གྲུབ་སྐྱེ་འགྱུར་གྱི། །གཞན་དུ་གྲུབ་ལ་བརྟེན་མི་འགྱུར། །ཡང་དག་དད་པས་རྗེས་སྦྱར་བ། །ཡིད་བཞིན་ནོར་བུ་ལྟ་བུའི་སྔགས། །ཕྱག་རྒྱ་ཆེན་པོའི་འདོད་པ་ཡི། །དད་ལྡན་རྣམས་ལ་བསྟན་པར་བྱ། །དཔལ་རྡོ་རྗེ་རྣལ་འབྱོར་མའི་བཞེད་པ་ལས། གསང་བའི་སྦྱིན་སྲེག་གི་ཆོ་ག་སློབ་དཔོན་ཆེན་པོ་བསོད་སྙོམས་པའི་སློབ་མ་རྒྱལ་བས་བྱིན་གྱི་ཚ་བོ་སངས་རྒྱས་བྱིན་གྱིས་མཛད་པ་རྫོགས་སོ།། །།བལ་པོའི་པཎྜི་ཏ་བྷ་རེནྡྲ་རུ་ཙི་དང༌། །བོད་ཀྱི་ལོ་ཙཱ་བ་བློ་ལྡན་ཤེས་རབ་ཀྱིས་བསྒྱུར་བའོ།། །།འགྲོ་ཀུན་སངས་རྒྱས་ཐོབ་པར་ཤོག །