རྡོ་རྗེ་ཕག་མོའི་སྒྲུབ་ཐབས།
༄། །རྒྱ་གར་སྐད་དུ། བཛྲ་བཱ་རཱ་ཧཱི་སཱ་དྷ་ནཾ། བོད་སྐད་དུ། རྡོ་རྗེ་ཕག་མོའི་སྒྲུབ་ཐབས། བཅོམ་ལྡན་འདས་མ་རྡོ་རྗེ་ཕག་མོ་ལ་ཕྱག་འཚལ་ལོ། །ཡི་གེ་པཾ་ཡོངས་སུ་གྱུར་པ་ལས་པདྨ་དམར་པོའོ། །དེའི་སྟེང་དུ་ཡི་གེ་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་ཁ་དོག་ནག་པོ་གཞུའི་ཚུལ་རྒྱལ་མཚན་གྱིས་བརྒྱན་པའོ། །ཡི་གེར་རཾ་ཡོངས་སུ་གྱུར་པ་ལས་མེའི་དཀྱིལ་འཁོར་དམར་ཟུར་གསུམ་པ་འབར་བས་མཚན་པའོ། །ཡི་གེ་བཾ་ཡོངས་སུ་གྱུར་པ་ལས། ཆུའི་དཀྱིལ་འཁོར་ཟླུམ་པོ་ཁ་དོག་དཀར་པོ་བུམ་པས་མཚན་པའོ། །ཡི་གེ་ལཾ་ཡོངས་སུ་གྱུར་པ་ལས་སའི་དཀྱིལ་འཁོར་ཟུར་བཞི་པ་ལྗང་གུ་རྡོ་རྗེས་མཚན་པའོ། །ཡི་གེ་སུཾ་ཡོངས་སུ་གྱུར་པ་ལས་རི་རབ་ལྷུན་པོ་ཟུར་བཞི་པ་རིན་པོ་ཆེ་བཞི་ལས་གྲུབ་པ་རྩེ་མོ་བརྒྱད་ཀྱིས་ཉེ་བར་མཛེས་པའོ། །དེའི་དབུས་སུ་ཡི་གེ་བཾ་ཡོངས་སུ་གྱུར་པ་ལས་སྣ་ཚོགས་པདྨའོ། །དེའི་དབུས་སུ་ཡི་གེ་ཧཱུཾ་ཡོངས་སུ་གྱུར་པ་ལས་སྣ་ཚོགས་རྡོ་རྗེའི། །དེའི་དབུས་སུ་ཨཱ་ལི་ཀཱ་ལིའི་སྦྱོར་བའོ། །དེའི་དབུས་སུ་ཡི་གེ་བཾ་ཡོངས་སུ་གྱུར་པ་ལས་རྡོ་རྗེ་སྟེ། དེའི་ལྟེ་བ་ལ་ཡི་གེ་བཾ་མོ། །དེ་ཡོངས་སུ་གྱུར་བ་ལས་རྗེ་བཙུན་མ་རྡོ་རྗེ་ཕག་མོ་སྐུ་མདོག་དམར་པོ་སྐྲ་བཤིག་པ་གཅེར་མོ། །འོག་པག་དུམ་བུས་བརྒྱན་པ། མིའི་མགོ་བོ་རློན་པ་ལྔ་བཅུའི་ཕྲེང་བ་དཔྱངས་པ། ཕྱག་གཡོན་པའི་ཐོད་པ་ན་སྡང་བ་བདུད་ལ་སོགས་པའི་ཁྲག་བསྣམས་པ། གཡས་པ་ཕྱོགས་ཐམས་ཅད་དུ་སྡང་བ་ལས་བསྡིགས་པའི་རྡོ་རྗེ་ཅན་གྱིས་སྡིགས་མཛུབ་མཛད་པ། བསྐལ་པའི་མེ་བཞིན་ཆེར་འབར་བ། །ཁྲག་ལ་དགྱེས་པ་ཁྲག་འཛག་པ། གཡས་བརྐྱང་པས་གདན་ལ་བཞུགས་པ། །མཁའ་འགྲོ་དེ་བཞིན་ལཱ་མ་དང༌། དུམ་སྐྱེས་མ་དང་གཟུགས་ཅན་མ། འདིའི་བཟླས་པའི་སྔགས་ནི་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞཱ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཉེ་བའི་སྙིང་པོའི་སྔགས་སོ། །དཔལ་ཨུ་རྒྱན་རྡོ་རྗེ་རྣལ་འབྱོར་མའི་གནས་ནས་རྣམ་པར་བྱུང་བ་རྡོ་རྗེ་ཕག་མོའི་སྒྲུབ་ཐབས་རྫོགས་སོ།། །།བོད་ཀྱི་ལོ་ཙཱ་བ་བནྡེ་མར་བ་ཆོས་ཀྱི་དབང་ཕྱུག་ཉིད་ཀྱིས་བསྒྱུར་བའོ།། །།