ཕག་མོའི་སྲུང་བའི་་འཁོར་ལོ།
༄། །ཕ་ག་མོའི་སྲུང་བའི་འཁོར་ལོ་ལ། ཟངས་གཞོང་གི་ནང་དུ་རང་བྱུང་གི་ཁྲག་དང༌། དངུལ་ཆུ་ཟངས་རྡོག་མ་གཅིག་གིས་ཞག་པར་མཉེ། དེ་ཐང་བའི་ཟུར་གྱི་གྲྭར་བཙིར་ལ། ཞུ་བ་དེ་ཟངས་སྲབ་མོའམ་གྲོ་ག་ལ་སོགས་པ་ལ་འཁོར་ལོ་ཇི་ལྟ་བ་བཞིན་དུ་བྲིས། དེ་ལ་རབ་གནས་བྱས་ཏེ་སྙིམ་པར་བཅུག་ལ། ཕག་མོའི་རྐང་པ་བརྒྱད་པ་བརྒྱ་རྩ་བརྒྱད་བཟླས་ལ་དྲིལ་ནས། སྔར་བཙིར་བའི་ཚིགས་མས་རབ་བྱུང་ཡིན་ན་ཐང་བའི་ཟུར་དུ་གཏུམས་ལ་ཕྲག་པ་གཡོན་པར་བཀལ། སྐྲ་ཅན་ཡིན་ན་གོང་བ་གཡོན་པར་གཏུམ་མོ། །དྲག་པོ་མངོན་སྤྱོད་ཀྱི་ལས་ལ། གཞུང་ནས་བྱུང་བ་ལྟར་གཟུགས་བརྙན་བྱས་ཏེ། སྐེ་ཚེའི་མར་ཁུ་བསྐུ། རང་གི་སྔས་སུ་དྲག་པོའི་ཐབ་ཁུང་གྲུ་གསུམ་པ་གཅིག་བྲུ། དེ་ཚེར་མ་ཅན་གྱི་ཤིང་ལ་དུར་ཁྲོད་ཀྱི་སོལ་དུམ་གྱི་མེ་སྦར་བ་དང༌། གཟུགས་བརྙན་དེ་ལྕགས་ཀྱི་སྐམ་པས་བཟུང་སྟེ། དམར་ལྷང་གིས་མ་སོང་བར་དུ་བསྲོའོ། །དེ་ལྟར་སོང་བ་དང་དུག་གི་ཆུའམ་བོང་བུའི་ཆུས་བསད་ལ། དེ་དོང་དུ་བཅུག་ནས་གཡོམ་པ་ལ་ཕག་མོའི་འཁོར་ལོ་བྲིས་པ་གཅིག་གིས་ཁ་བཅད། སྔགས་བཟླས། ལིང་ག་ཡང་དང་ཡང་དུ་བསྲོ་ཞིང་བསྒྲུབ། བསད་པའི་སྔགས་གོ་ཆའི་ལྷ་མོའི་སྔགས་ལ་མཱ་ར་ཡ་བཏགས་ཤིང་བཟླས་སོ། །