རྡོ་རྗེ་ཕག་མོའི་པྲ་བརྟག་པ།
སྔོན་དུ་བསྙེན་པའི་ཆོ་ག
༄། །སྔོན་དུ་བསྙེན་པའི་ཆོ་ག་དང༌། དེ་ནས་སྒྲུབ་པའི་ཆོ་གའོ། །དེ་ལ་བསྙེན་པ་ནི་གནས་དབེན་པས་སྟན་བདེ་བ་ལ་འདུག་སྟེ། གཏོར་མ་ལ་སོགས་པ་བཤམས་ལ། དང་པོར་ཚོགས་བསགས་པའི་ཕྱིར་ཕྱག་འཚལ་བ་
༄། །ནས་དགེ་བའི་རྩ་བ་ཡན་ཆོད་བྱ། དེ་ནས་སྐད་ཅིག་གིས་རང་བཅོམ་ལྡན་འདས་མར་བསྐྱེད། སྙིང་གནས་འོད་ཟེར་སྤྲོས་ལ་ཡེ་ཤེས་སེམས་དཔའ་དགུག་གཞུག་བྱ། གཉིས་སུ་མེད་པའི་བཅོམ་ལྡན་འདས་མ་གསལ་བར་བསྒོམ། ཡི་གེ་གསུམ་གྱིས་ལུས་ངག་ཡིད་གསུམ་བྱིན་གྱིས་བརླབ། དངོས་སུ་འབྱོར་ན་རབ། མ་འབྱོར་ན་ཏིང་ངེ་འཛིན་གྱིས་མཆོད་པ་བྱ། དེ་ནས་ཏིང་ངེ་འཛིན་དང་མ་བྲལ་བར་བཟླས་པ་ཐུན་རེ་ལ་ཉིས་སྟོང་རེ་བྱ། ཞག་གཅིག་ལ་བཞིའམ་ལྔར་བསྒོམ། བཟླས་པ་འབུམ་བཟླས་པའི་ཚེ་བསྙེན་པ་རྫོགས་སོ། །
སྒྲུབ་པའི་ཆོ་ག
༄། །སྒྲུབ་པ་ནི་དང་པོ་བུམ་པ་དང་རྣམ་ལྔ་དང་གཏོར་མ་གཙང་མ་གང་བར་བཤམ། ཁྱེའུའམ་བུ་མོ་གཙང་མ་སྔར་ནས་ཉེར་བསྔོགས་བྱ། ཁྲུས་བྱ། ཁ་ཟས་བཟང་པོས་ཚིམ་བར་བྱ། བུམ་པ་སྦོས་ཆུ་གཙང་མས་དགང༌། དེའི་ནང་དུ་སྐད་ཅིག་གིས་ལྷ་མོར་བསྐྱེད། ཡེ་ཤེས་པ་དགུག་གཞུག་བྱ། སྐུ་གསུང་ཐུགས་བྱིན་གྱིས་བརླབ། མཆོད་པ་དབུལ། དེ་འོད་དུ་ཞུ་བ་ལས་བདུད་རྩིར་གྱུར་པར་བསམ། དེ་ནས་སྐད་ཅིག་གིས་བདག་ཉིད་ལྷ་མོར་བསྐྱེད། ཡེ་ཤེས་སེམས་དཔའ་བསྟིམ། སྐུ་གསུང་ཐུགས་བྱིན་གྱིས་བརླབ། མཆོད་པ་ལྔ་དབུལ། དེ་ནས་ཁྱེའུའམ་བུ་མོ་སྐད་ཅིག་གིས་ལྷ་མོར་བསྐྱེད། ཡེ་ཤེས་སེམས་དཔའ་བསྟིམ། སྐུ་གསུང་ཐུགས་བྱིན་གྱིས་བརླབ། མཆོད་པ་རྣམ་ལྔ་དབུལ། དེ་ནས་རྩ་བའི་ལྷ་མོར་བསམས་ལ། གནས་གསུམ་ལ་མཆོད་པ་དབུལ། དེ་ནས་སྣོད་ལ་ཆགས་པའི་དུད་པས་སྣག་ཚ་བྱས་ཏེ་མཐེ་བོང་བསྐུ། དེ་ནས་མཐེ་བོང་གི་རྩ་མཐེབ་འཛྦུ་གཉིས་ཀྱིས་བཟུང་ལ། བསྒོམ་ཞིང་བཟླས་པ་བྱས། ཁྱེའུའམ་བུ་མོ་མཐེ་བོང་བལྟ་རུ་གཞུག་ཅིང༌། ཇི་ལྟར་མཐོང་བ་བཞིན་སྨྲ་རུ་གཞུག །ཨོཾ་ཧྲིཾ་ཧྲིཾ་ཁྲིཾ་ཁྲིཾ་ཁྱུཾ་ཁྱུཾ་དྷ་ན་ཧཱུཾ་ཕཊ་སྭཱ་ཧཱ། ཞེས་པ་རྡོ་རྗེ་ཕག་མོའི་པྲ་བརྟག་པ་རྫོགས་སོ།།