དེ་ཁོ་ན་ཉིད་ཀྱི་མན་ངག་གི་འགྲེལ་པ།
བློ་བཟང་སྙིང་པོ།
༄། །རྒྱ་གར་སྐད་དུ། ཏཏྟྭ་ཨུ་པ་དེ་ཤ་བྲྀཏྟི། བོད་སྐད་དུ། དེ་ཁོ་ན་ཉིད་ཀྱི་མན་ངག་གི་འགྲེལ་པ། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །གང་དུ་སྙིང་གི་པདྨ་ཁ་སྦྱར་དབུས་གནས་གསལ། །ཕྲ་བར་བལྟ་བ་རང་བྱུང་མྱོང་བའི་སེམས་འཇུག་པ། །ཁམས་གསུམ་མ་ལུས་གཉིས་མེད་པར་ནི་ཉེར་འགྲོ་བ། །གསལ་བ་ཆོས་ཀྱི་དབྱིངས་མཆོག་དེ་ལ་བདག་ཕྱག་འཚལ། །ཞེས་པ་ལ། གང་དུ་ཞེས་བྱ་བ་ནི་ཆོས་ཀྱི་དབྱིངས་ཞེས་བྱ་བ་དང་སྦྱར་ཏེ། འདི་ནི་གནས་བཞི་སྟེ་བདུན་པ་ཡིན་ལ། གང་དད་དེ་གཉིས་ནི་རྟག་ཏུ་འབྲེལ་པ་ཡིན་པའི་ཕྱིར་དེ་ལ་ཕྱག་འཚལ་བ་ཡིན་ནོ། །དེ་ལ་ཆོས་ཞེས་བྱ་བ་ནི་དེ་བཞིན་ཉིད་དེ་ཡང་དག་པའི་མཐའ། །དེ་འཛིན་པར་ཆོས་ཀྱི་དབྱིངས་ཏེ། དྷཱ་ཏུ་ནི་བསྟུན་ཞེས་བྱ་བ་དབྱེ་བའི་ཚིག་གིས་ནི་གང་དུ་ཆོས་ཀྱི་དབྱིངས་ཡིན་བདེ་ནི་ཁམས་གསུམ་པ་ཉེ་བར་འགྲོ་ཞིང་སོང་བ་ཡིན་པས་དེ་ལ་ཕྱག་འཚལ་བའོ། །གང་དུ་ཞེ་ན། སྙིང་གི་པདྨ་ཁ་སྦྱར་དབུས་གནས་ཞེས་བྱ་བ་སྨོས་ཏེ། སྙིང་གི་ནི་སྙིང་པོ། པདྨ་ནི་ཆུ་སྐྱེས་ཏེ། འདབ་མ་བཞི་པ་ཁ་དོག་དམར་པོ་འབྱུང་བ་ཆེན་པོ་བཞིའི་རང་བཞིན་ནོ། །དེ་ལ། ལྟེ་བའི་དབུས་གནས་ཁ་སྦྱར་གསལ། ཞེས་བྱ་བ་ཟླ་བ་དང་ཉི་མ་གཉིས་ལས་ཡོངས་སུ་གྲུབ་པ་སྟེ། འདི་གཉིས་ཀ་ཡང་འབྱུང་བ་ཆེན་པོ་བཞིའི་ངོ་བོ་ཉིད་དོ། །དེ་ལ་ཟླ་བ་ནི་ས་དང་ཆུའི་རང་བཞིན་ནོ། །ཉི་མ་ནི་མེ་དང་རླུང་གི་རང་བཞིན་ཏེ། ཁ་སྦྱར་དེའི་དབུས་སུ་གནས་པའི་ངང་ཚུལ་འདི་ལ་ཡོད་པས་
༄། །ན་ཁ་སྦྱར་གྱི་དབུས་ན་གནས་པའོ། །དེ་ལ་འདིའི་དོན་ནི་འདི་ཡིན་ཏེ། ཡོན་ཏན་བརྒྱད་ཀྱི་ཕྲེང་བའི་རྣལ་འབྱོར་མའི་ངོ་བོ་ཉིད་ཀྱི་དབུས་ན་བཞུགས་པ་དེ་ནི་བཅོམ་ལྡན་འདས་ཆོས་ཀྱི་དབྱིངས་ཏེ། དེ་བཞིན་ཉིད་དང་ཡང་དག་པའི་མཐར་ཐུག་པའོ། །གསལ་བྱེད་ཅེས་བྱ་བ་ནི་འབར་པ་སྟེ། གཉིས་སུ་མེད་པའི་ངོ་བོ་ཉིད་ཀྱིས་སྣང་བར་བྱེད་པའོ། །ཇི་ལྟ་ཞེ་ན་ཕྲ་བར་བལྟ་བ་ཞེས་བྱ་བ་སྨོས་ཏེ། ཕྲ་བ་ནི་བཅོམ་ལྡན་འདས་ཡིན་ལ། དེ་ནི་ཕྲ་བ་རྣམས་ལས་ཀྱང་ཕྲ་རབ་ཏུ་གྱུར་པ་རྡོ་རྗེ་ནམ་མཁའི་ཁམས་དང་མཉམ་དུ་འཇུག་པའོ། །དེ་ལ་མྱོང་བ་ནི་ཉེ་བར་འགྲོ་བའོ། །དེར་བལྟ་བ་ནི་རྣམ་པར་བལྟ་བ་སྟེ། པདྨའི་རྩ་བའི་སྣལ་མ་ཤིན་ཏུ་ཕྲ་བའི་བུ་ག་ལ་མི་ཡེང་བར་བལྟ་བའོ། །ཡང་ན་ཕྲ་བ་ཡང་ཡིན་ལ་བལྟ་བ་ཡང་དེ་ཉིད་ཡིན་པས་ན་ཕྲ་བར་བལྟ་བ་ཞེས་བྱ་བར་སྦྱར་རོ། །དེའི་རང་བྱུང་བ་ནི་རྒྱུན་གྱིས་འབབ་པས་རབ་ཏུ་འཇུག་པའོ། །དེ་ལ་མྱོང་བ་རིང་པོ་མ་ཡིན་པས་བར་མ་ཆོད་པར་ཉེ་བར་འགྲོ་བའོ། །སེམས་ཀྱིས་འཇུག་པ་ནི་སེམས་ལས་བྱུང་བ་ནི་འཇུག་པ་གང་ཡིན་པ་སྟེ། རྒྱུ་དེའི་ཕྱིར་རོ། །དེ་ཡང་གང་ཞེ་ན། ཁམས་གསུམ་ཞེས་བྱ་བ་ལ་སོགས་པ་སྨོས་ཏེ། ཁམས་གསུམ་ནི་འདོད་ཁམས་དག་གཟུགས་ཁམས་དང༌། གཟུགས་མེད་པ་སྟེ། དེ་རྣམས་གཅིག་ཏུ་བསྡུས་པ་ནི་ཁམས་གསུམ་མོ། །བསྡུས་པའི་དོན་གྱིས་ཁམས་གསུམ་པ་སྟེ། ཁམས་གསུམ་གྱི་ངོ་བོ་ཉིད་ནི་ཁམས་གསུམ་པའོ། །མ་ལུས་པ་ཞེས་བྱ་བ་ནི་ལྷག་མ་མེད་པའོ། །གཉིས་སུ་མེད་པར་ཉེ་བར་འགྲོ་བ་ཞེས་བྱ་བ་ནི་སོང་བ་སྟེ། བསྡུས་པའི་ཚུལ་གྱིས་སོ་སོར་སྣང་ཞིང་འདི་དག་ཐམས་ཅད་ནམ་མཁའི་གཟུགས་སུ་ཡོངས་སུ་དག་པར་གྱུར་པའོ་ཞེས་བྱ་བའི་དོན་ཏོ། །ཇི་སྐད་དུ། དེར་འགྲོ་ཡིད་ཀྱི་གོང་བུ་ལྟར། །གཟུགས་གཅིག་ཏུ་ནི་སྒོམ་པར་བྱེད། །ཅེས་བཤད་པ་དང༌། གཞན་ཡང་འགྲོ་བ་རྣམས་ཀྱི་དེ་ཉིད་གཅིག་པུ་ཉིད་ཅེས་བཤད་པས་སོ། །ཇི་ལྟར་ན་གཉིས་སུ་མེད་པར་འགྲོ་བ་ཡིན་ཞེ་ན། ཅུང་ཟད་ཙམ་ཡང་མི་གསལ་བ་མ་ཡིན་གྱི། རྙོག་མ་མེད་པ་ལ་གསལ་བར་གྱུར་པ་ཡིན་ཏེ། དེ་ལྟ་བུར་གྱུར་པའི་བཅོམ་ལྡན་འདས་ཆོས་ཀྱི་དབྱིངས་ཀྱི་ཡེ་ཤེས་དེ་ལ་ཕྱག་འཚལ་ལོ་ཞེས་བྱ་བར་སྦྱར་རོ། །ཆོས་ཀྱི་དབྱིངས་
༄། །ཀྱི་ཡེ་ཤེས་དེ་ལ་ཕྱག་འཚལ་ནས། ཅི་ཞིག་བྱ་ཞེ་ན། དབང་པོ་གཡོ་བའི་རྟ་ཀུན་ནང་དུ་ངེས་སྦྱར་བའི། །ཡེ་ཤེས་རྒྱལ་བ་མ་ལུས་འདུས་པའི་སྣོད་གྱུར་པ། །ཁམས་གསུམ་སྐྱེ་བའི་རྒྱུ་ཉིད་དུ་ནི་ཉེར་འགྲོ་བ། །མཐོང་བ་མཁའ་དང་འདྲ་བ་དི་མེད་དཔལ་དུ་འགྱུར། །ཞེས་སྨོས་ཏེ། འཕེལ་བ་དང་འགྲིབ་པ་བཤད་པར་བྱ་སྟེ། ཡེ་ཤེས་ནི་ཡང་དག་པའི་མཐའོ། །མཐོང་བ་ནི་སོ་སོར་རྟོག་པར་བྱེད་པ་སྟེ། དེ་ལྟ་བུའི་རྣལ་འབྱོར་འདི་དྲི་མ་མེད་པའི་དཔལ་དུ་འགྱུར་རོ་ཞེས་བྱ་བ་དང་སྦྱར་རོ། །དེ་ལྟ་ན་ནི་བཟློག་པར་དཀའ་བའི་དབང་པོ་འདི་དག་ནི་རྟ་ལྟ་བུ་ཡིན་ན་རྣལ་འབྱོར་པ་འདི་ཇི་ལྟར་ནམ་མཁའ་དང་འདྲ་བར་འགྱུར་ཞེ་ན། དབང་པོ་ཞེས་བྱ་བ་སྨོས་ཏེ། དབང་པོའི་ཚོགས་དྲུག་པོ་ནི་གཡོ་ཞིང་མི་སྲུན་ལ། རང་གི་ཡུལ་རྣམས་ལ་འཕྱར་ཞིང་བརྐམ་པས་རྟ་དང་འདྲ་བའི་ཕྱིར་ན་རྟ་སྟེ། དེ་ལྟ་བུའི་རྣམ་པར་གཡེང་བར་བྱེད་པ་ཐམས་ཅད་ནང་དུ་སེམས་ཀྱིས་ཡང་དག་པར་བསྡུ་བ་ལ་ངེས་པར་སྦྱར་ཞིང༌། གཡོ་བ་མ་ལུས་པ་ངེས་པར་བརྟགས་པའོ། །དེ་ལྟར་མ་ལུས་པའི་མཐར་ཐུག་པ་ཐོབ་པའི་རྣལ་འབྱོར་པ་ནི་ཕྱི་ནས་དྲི་མ་མེད་པར་འགྱུར་རོ། །ཡེ་ཤེས་དེ་ཡང་ཇི་ལྟ་བུ་ཞེ་ན། ཡེ་ཤེས་རྒྱལ་བ་མ་ལུས་ཞེས་བྱ་བ་ལ་སོགས་པ་སྨོས་ཏེ། རྒྱལ་བ་ནི་སྡིག་པ་ཐམས་ཅད་ལས་རྒྱལ་བའི་ཕྱིར། སངས་རྒྱས་བཅོམ་ལྡན་འདས་ལ་བྱའོ། །མ་ལུས་ཞེས་བྱ་བ་ནི་ཕྱིས་འབྱུང་བ་དེ་དང་མཚམས་སྦྱར་བའོ། །དེ་རྣམས་ཀྱིས་འདུས་པ་ནི་ཡང་དག་པར་འདུ་བར་མཛད་པ་སྟེ། དེ་ལྟ་བུའི་སྣོད་དང་གནས་སུ་གྱུར་པ་ཡིན་ནོ། །འདི་སྐད་དུ་སྟོན་པར་འགྱུར་ཏེ། དེ་བཞིན་གཤེགས་པ་དེ་དག་ཐམས་ཅད་ནི་ཡེ་ཤེས་ལས་སྐྱེས་པ་ཡིན་ལ། རྒྱལ་བ་མཆོག་གཅིག་པུ་དེ་ལས་འཁྲུངས་པར་མ་ཟད་ཀྱི། །ཁམས་གསུམ་པོ་དེ་ཡང་དེ་ལས་སྐྱེས་པ་ཡིན་ཏེ། ཁམས་གསུམ་སྐྱེད་པའི་རྒྱུར་གྱུར་པ་ནི་ཁམས་གསུམ་མ་ལུས་པ་ཡེ་ཤེས་ཀྱི་རྣམ་པ་ཅན་ནོ་ཞེས་བྱ་བའི་དོན་ཏོ། །དེ་ལྟ་བུར་གྱུར་པའི་ཕྲ་བའི་རྡོ་རྗེ་མཐོང་བར་གྱུར་པའི་བསྒོམ་པ་ནི་ནམ་མཁའ་དང་འདྲ་བར་གྱུར་པ་ཡིན་ཏེ། ནམ་མཁའ་ནི་གོ་འབྱེད་པ་ཡིན་ཏེ། དེ་དང་འདྲ་བའི་དྲི་མ་མེད་པའི་ཡེ་ཤེས་དཔལ་གྱིས་མཛེས་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ལ་རྣམ་པར་རྟོག་པའི་གདོན་གྱིས་ཟིན་པས་འགྲོ་བ་
༄། །རྣམས་ལ་གཉིས་སུ་སྣང་བ་ཡིན་ཏེ། ཇི་སྐད་དུ། རྣམ་རྟོག་གཏི་མུག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་བཤད་པའི་ཕྱིར་རོ། །འོ་ན་བཅོམ་ལྡན་འདས་འདི་ཇི་ལྟར་བསྒོམ་པར་བྱ་སྟེ། སངས་རྒྱས་རྗེས་དྲན་སྦྱོར་བ་ཡིས། །ཆོས་ནི་རྗེས་སུ་དྲན་པ་བསྒོམ། །ཆོས་རྗེས་དྲན་པའི་སྦྱོར་བ་ཡིས། །ཆོས་ཀྱི་སྐུར་ནི་རང་ཉིད་འགྱུར། །ཞེས་སྨོས་ཏེ་འདིར་སངས་རྒྱས་ཞེས་བྱ་བ་ནི་གཟུང་བ་དང་འཛིན་པའི་རྟོག་པ་རྩ་བ་ནས་བཏོན་པ་ལ་བྱ་བར་བཤད་ལ། རྡོ་རྗེ་རྣལ་འབྱོར་མ་བཞི་ནི་གཟུགས་ལ་སོགས་པའི་རང་བཞིན་ཏེ། འདི་རྣམས་ཀྱི་དབུས་ན་བཅོམ་ལྡན་འདས་ཆོས་ཀྱི་དབྱིངས་དེ་དང་ལྷན་ཅིག་ཡང་དག་པར་སྦྱར་བར་བྱའོ། །སྦྱོར་བ་དེས་ཅི་ཞིག་བྱ་ཞེ་ན། ཆོས་ནི་ཞེས་བྱ་བ་ལ་སོགས་པ་སྨོས་ཏེ། ཆོས་ནི་ཞེས་བྱ་བ་ནི་ཁ་སྦྱོར་གྱི་ནང་ན་བཞུགས་པའི་བཅོམ་ལྡན་འདས་ཡིན་ལ། དེ་ཡང་སྔ་མ་བཞིན་དུ་བསྒོམས་པས་ཕྱིས་ཆོས་ཀྱི་དབྱིངས་སུ་ཡང་དག་པར་སྐྱེ་ཞིང༌། ནམ་མཁའ་སྣང་བར་ཉེ་བར་འགྲོ་སྟེ། རྣལ་འབྱོར་པ་རང་ཉིད་ཆོས་ཀྱི་སྐུར་འགྱུར་རོ། །དེའི་དོན་ནི་འདི་སྐད་སྟོན་པར་འགྱུར་བ་དེ་ཡིན་ཏེ། པདྨའི་སྟེང་དུ་ཐིག་ལེ་བཞི་ལས་ལྷ་མོ་བཞིར་བསྐྱེད་ལ། ལྟེ་བའི་ཐིག་ལེ་ལས་བཅོམ་ལྡན་འདས་བསྐྱེད་པ་ནི་རང་གི་བདག་པོར་བྱ་སྟེ། དེའི་ཐུགས་ཀའི་པདྨ་ཁ་སྦྱར་གྱི་དབུས་ན་ནི་ཆོས་ཀྱི་དབྱིངས་སོ། །ཇི་ལྟ་ཞེ་ན། གང་གི་ཚེ་རྣལ་འབྱོར་པ་འགྲོ་བ་དང་འོང་བ་དང་གནས་པའི་རིམ་གྱིས་དལ་བུ་དལ་བུས་སྐད་ཅིག་རེ་རེ་ལ་སློབ་པར་བྱེད་པས་དེའི་ཚེ་ཞི་བ་ཉིད་ལ་རབ་ཏུ་འཇུག་པར་འགྱུར་རོ། །ཞི་བར་གྱུར་ནས་ནི་རྩ་དབུགས་གཉིས་འགག་པར་འགྱུར་རོ། །དེ་གཉིས་འགགས་ནས་ཀྱང་དངོས་པོ་མེད་པའི་གནས་སུ་འགྱུར་རོ། །ཇི་སྐད་དུ། འགྲོ་དང་འོད་དང་གནས་པ་ཉིད། །དལ་གྱིས་དལ་བའི་རིམ་གྱིས་ནི། །དེ་ནས་དངོས་པོ་མེད་འགྱུར་ཏེ། །ཞི་བ་གཅིག་པུ་མངོན་ཕྱོགས་ནས། །ཞེས་བཤད་པ་ནི་མན་ངག་གོ །ཡེ་ཤེས་དེ་བསྒོམས་པ་ལས་ཁྱད་པར་ཅི་ཞིག་སྐྱེ་ཞེ་ན། དབུས་ན་གསལ་བྱེད་རྣམ་པར་ཤེས།།
༄། །ཡེ་ཤེས་མཆོག་ནི་ཤེས་རྣམས་ཀྱིས། །ཤིན་ཏུ་བསྒོམས་པ་གོམས་པ་ལས། །འབར་བ་འདི་ལ་ཐེ་ཚོམ་མེད། །ཅེས་བྱ་བ་ལ། དབུས་ཀྱིས་གསལ་བར་བྱེད་པ་ནི། །དབུས་ན་གསལ་བར་བྱེད་པའོ། །གསལ་བར་བྱེད་པ་ཡིན་པས་ན་གསལ་བར་བྱེད་པའོ། །ཉེ་བར་སྣང་བར་བྱེད་པའི་ཡེ་ཤེས་ཏེ། དབུས་ན་གསལ་བར་བྱེད་པ་དང་རྣམ་པར་ཤེས་པ་ཞེས་བྱ་བར་སྦྱར་རོ། །རྣམ་པར་ཤེས་པ་ཞེས་བྱ་བ་ནི་སེམས་ལ་བྱ་སྟེ། ཇི་སྐད་དུ་སེམས་དང་ཡིད་དང་རྣམ་པར་ཤེས་པ་ཞེས་བྱ་བར་རྣམ་གྲངས་སུ་བཤད་པའི་ཕྱིར་རོ། །དེའི་དབུས་སུ་གསལ་བར་བྱེད་པའི་ཡེ་ཤེས་ནི་སྙིང་གའི་པདྨ་ཁ་སྦྱར་གྱི་ནང་དུ་ཆུད་པའི་མི་གཡོ་བས་ལྟ་བར་བྱེད་པའི་ཡེ་ཤེས་ཏེ་ཆོས་ཀྱི་དབྱིངས་སུ་གྱུར་པའོ། །དེ་གང་ཞིག་ཅེ་ན། མཆོག་གི་ཡེ་ཤེས་རྣམས་ཀྱི་ཞེས་བྱ་བ་སྨོས་ཏེ། དེ་ཁོ་ན་ཉིད་མཐོང་བ་རྣམས་ཀྱིའོ། །གྱི་ན་ཙམ་གྱིས་འབྱུང་བར་འགྱུར་རམ་ཞེ་ན། ཤིན་ཏུ་ཞེས་བྱ་བ་ལ་སོགས་པ་སྨོས་ཏེ། ཤིན་ཏུ་ཡང་རྒྱུན་མི་འཆད་པར་སྦྱོར་བས་སྒོམ་ཞེ་ན། སེམས་པས་རྒྱུན་མི་ཆད་པར་གོམས་ཤིང་བསླབ་པའི་ཚུལ་གྱིས་རྣམ་པར་ལྟ་བའི་རྒྱུ་དེ་ན་འབར་བར་འགྱུར་ཞིང་འདི་ན་སྟེ། སྙིང་ལ་གསལ་ཞིང་སྣང་བར་འགྱུར་བར་ཐེ་ཚོམ་མེད་དོ། །འདིའི་དོན་ནི་འདི་ཡིན་ཏེ། ཏིང་ངེ་འཛིན་གྱི་གནས་སྐབས་ལ་གནས་པའི་རྣལ་འབྱོར་པ་རྣམས་ལ་ནི་སྐད་ཅིག་ཙམ་གྱིས་ཡེ་ཤེས་ཀྱི་སྣང་བ་འབྱུང་བར་འགྱུར་ཏེ། ཇི་སྐད་དུ། སྲོག་དང་རྩོལ་བ་བསྡམས་ནས་ནི། །བསྒོམས་ན་སྐད་ཅིག་དེ་ལ་འབར། །ཞེས་བཤད་པས་ན་སོམ་ཉི་མི་བྱའོ། །དོན་འདི་ཉིད་གསལ་བར་བྱ་བའི་ཕྱིར། སྙིང་ལ་རྟག་ཏུ་གནས་པ་ཡིས། །ཐིག་ལེ་གཅིག་པུ་ཡི་གེ་མེད། །སྐྱེས་བུས་དེ་ནི་བསྒོམས་གྱུར་ན། །ཡེ་ཤེས་སྐྱེ་བར་འགྱུར་བའི་མཆོག །ཅེས་བྱ་བ་ལ་སྙིང་ལ་ཞེས་བྱ་བ་ནི་པདྨ་ཁ་སྦྱར་ལ་བྱ་བ་སྟེ། དེར་ཐིག་ལེ་ཞེས་བྱ་བ་ལ། རྡོ་རྗེ་ཕྲ་མོའི་ངོ་བོ་ཉིད་གནས་ཤིང་དུས་ཐམས་ཅད་དུ་འདུག་པའོ། །ཅི་འདི་དངོས་པོ་ཡིན་ནམ། །འོན་ཏེ་མ་ཡིན་ཞེ་ན། ཡི་གེ་མེད་ཅེས་བྱ་བ་སྨོས་ཏེ། དངོས་པོ་མེད་པའི་ངོ་བོ་ཉིད་ཀུན་གཞི་རྣམ་པར་ཤེས་པའི་རང་བཞིན་ཁྱད་པར་སྣང་བའོ། །དེ་ལྟ་བུའི་ངོ་བོ་ཉིད་ཀྱི་སྒོམ་པ་ལས་ནི་ཡེ་ཤེས་སྐྱེ་བར་འགྱུར་རོ། །ཅི་ཉན་ཐོས་ལ་སོགས་པ་དང་འདྲའམ།
༄། །འོན་ཏེ་མ་ཡིན་ཞེ་ན། མཆོག་ཅེས་བྱ་བ་སྨོས་ཏེ། དེ་བཞིན་གཤེགས་པ་རྣམས་ཀྱི་ཡེ་ཤེས་རྣམ་པར་མི་རྟོག་པའོ། །དེ་ལྟར་ཕྱག་འཚལ་བ་སྔོན་དུ་འགྲོ་བའི་ཚིགས་སུ་བཅད་པ་ལྔས་དེ་ཁོ་ན་ཉིད་ཀྱི་མན་ངག་བཤད་ནས། དེ་ནི་ཕྱི་རོལ་གྱི་མཆོད་པ་གཡེང་བ་དག་ག་པར་བྱ་བའི་ཕྱིར། །རྡོ་རྗེ་མཁའ་འགྲོ་ཐུགས་རྗེ་ཅན། །འདི་ཉིད་དུ་ནི་གནས་མཛད་ཅིང༌། །རྫོགས་སངས་རྒྱས་ཀུན་བྱང་ཆུབ་སེམས། །འགྲོ་བ་གསུམ་པོ་འདི་ལ་གནས། །ཞེས་བྱ་བ་སྨོས་ཏེ། སྙིང་གའི་པདྨ་ཁ་སྦྱར་བའི་དབུས་འདི་ཉིད་དུ་བཅོམ་ལྡན་འདས་ཡུམ་རྡོ་རྗེ་མཁའ་འགྲོ་མ་རྣམ་པར་རྟོག་པའི་དྲ་བ་རྣམ་པར་བསལ་བའི་ཐུགས་རྗེ་ཆེན་པོ་འཁྲིགས་པ་བཞུགས་ཏེ། དེ་རྣམས་ནི་སེམས་ཀྱི་ངོ་བོ་ཉིད་ཡིན་པའི་ཕྱིར་རོ། །དེ་ནི་ནམ་མཁའ་འགྲོ་མ་ཞེས་བྱ་བའི་རྡོ་རྗེའི་ཚིག་གིས་ཡེ་ཤེས་ལྔའི་བདག་ཉིད་ཅན་དུ་བཤད་དོ། །དེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །རྫོགས་སངས་རྒྱས་ཀུན་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ལ་སོགས་པའོ། །བྱང་ཆུབ་སེམས་དཔའ་ཞེས་བྱ་བ་ནི་བྱམས་པ་ལ་སོགས་པའོ། །བྱང་ཆུབ་ཅེས་བྱ་བ་རྣམ་པར་མི་རྟོག་པའི་ཡེ་ཤེས་ལ་སེམས་དཔའ་སྟེ། དགོངས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་སྐད་དུ། གཟུང་དང་འཛིན་པའི་མཚན་ཉིད་ལ། །བྱང་ཆུབ་ཅེས་བྱ་འགའ་ཡང་མེད། །རྟོག་པའི་ཤེས་པ་ལས་གྲོལ་བའི། །སེམས་ནི་བྱང་ཆུབ་ཡིན་ཞེས་བཤད། །ཅེས་བཤད་པའི་ཕྱིར། དེ་དག་འབའ་ཞིག་ཏུ་མ་ཟད་ཀྱི། འགྲོ་བ་གསུམ་པོ་དག་ཀྱང་གནས་པའོ། །འོ་ན་འདི་ལྟར་འགྲོ་བ་གསུམ་པོ་དག་ཀྱང་འདི་ཉིད་དུ་གནས་སོ་ཞེས་བྱ་བ་ནི་ཚིག་འདི་ཇི་ལྟར་རིག་པ་ཡིན་ཞེ་ན། བཤད་པར་བྱ་སྟ། གང་གི་ཕྱིར་ཁམས་གསུམ་པོ་འདི་དག་ཐམས་ཅད་ནི་སེམས་རྣམ་པ་ཡོངས་སུ་གྱུར་པ་ཡིན་གྱི། །ཕྱི་རོལ་ན་ཡོད་པ་མ་ཡིན་ཏེ། བེམས་པོའི་བདག་ཉིད་ཅན་རྣམས་ནི་སྣང་བར་མི་རིགས་པའི་ཕྱིར་རོ་ཞེས་བྱ་བར་དགོངས་ཏེ། ཇི་སྐད་དུ། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ་ཞེས་གསུངས་པའི་ཕྱིར་རོ། །འོ་ན་ཕྱི་རོལ་ལ་ལྟོས་པ་མེད་ན། གང་གིས་ཇི་ལྟར་མཆོད་ཅེ་ན། འདི་ཉིད་མཆོད་པ་ཉིད་ཀྱིས་ན། །མཆོད་འོས་ཐམས་ཅད་མཆོད་པ་ཡིན། །གང་ཞིག་འདི་ལ་
༄། །རྟག་ལྟ་བ། །དེ་ནི་རྒྱལ་བ་མཆོད་པར་བཞེད། །ཅེས་བྱ་བ་སྨོས་ཏེ། འདི་ཉིད་ཅེས་བྱ་བ་ནི་ཐིག་ལེའི་རྒྱལ་པོ་དངོས་པོ་མེད་པ་དེ་ལ་མཆོད་པས་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་དུས་ཐམས་ཅད་དུ་མཆོད་པ་ཡིན་ནོ། །གལ་ཏེ་དེ་རྣམས་ལ་མཆོད་པའི་ཕྱིར་ཕྱི་རོལ་གྱི་མཆོད་པ་ལྔ་ལ་ལྟོས་ན་ནི། དེས་རྣལ་འབྱོར་པ་རྣམ་པར་གཡེང་བར་འགྱུར་རོ་ཞེ་ན། གང་ཞིག་ཅེས་བྱ་བ་ལ་སོགས་པ་སྨོས་ཏེ། བཅོམ་ལྡན་འདས་ཕྲ་བའི་རྡོ་རྗེ་མགོན་པོ་འདི་ལ་རྟག་ཏུ་ལྟ་ཞིང་གཉིས་སུ་མེད་པ་ཉིད་ཀྱིས་སྐད་ཅིག་རེ་རེ་ལ་དེ་ཉིད་མཆོད་པ་ཡིན་ཏེ། ཕྱི་རོལ་གྱི་མཆོད་པ་རྣམ་པར་གཡེང་བར་བྱེད་པ་རྣམས་ཀྱིས་ཅི་ཞིག་བྱ། །འོ་ན་དེ་ལྟར་ན་ནི་མཆོད་པ་ཞེས་བྱ་བ་མེད་དེ། དེས་ན་འདི་ནི་འགལ་བ་ཉིད་དུ་ཤེས་སོ་ཞེ་ན། ནང་གི་སྦྱོར་བའི་རྡོ་རྗེ་ཡིས། །རྣལ་འབྱོར་རྡོ་རྗེ་ཅན་དུ་འདོད། །དེ་བས་རྡོ་རྗེ་མཆོད་པ་ཡིས། །ཡིད་འདོད་རྣམས་ཀྱིས་ལུས་ལ་མཆོད། །ཅེས་བྱ་བ་སྨོས་ཏེ། བདག་ཉིད་ཀྱི་དབང་དུ་བྱས་པའི་རྣལ་འབྱོར་ནི་ནང་གི་སྦྱོར་བའོ། །དེ་ཡང་རྣལ་འབྱོར་ནི་ལྡན་པ་སྟེ། ཐབས་དང་ཤེས་རབ་སྙོམས་པར་འཇུག་པའོ། །དེ་སྐད་དུ། ཤེས་རབ་ཐབས་ཀྱིས་སྙོམས་འཇུག་པ། །རྣལ་འབྱོར་ཞེས་ནི་བྱ་བར་བཤད། །ཅེས་གསུངས་པའི་ཕྱིར་དེ་ཉིད་ནི་མི་ཕྱེད་པའི་ཕྱིར་རྡོ་རྗེ་དང་འདྲ་བས་ན་རྡོ་རྗེའོ། །རྒྱུ་དེའི་ཕྱིར་རྣལ་འབྱོར་པ་ཉིད་རྡོ་རྗེ་ཅན་ཡིན་པར་འདོད་ཅེས་གསུངས་པའོ། །དེ་བས་ཞེས་བྱ་བ་ནི་ཉེ་བར་བསྡུ་བ་བཤད་པ་ཡིན་ཏེ། རྒྱུ་དེའི་ཕྱིར་ན་རྡོ་རྗེའི་མཆོད་པ་ཡིས་ཞེས་བྱ་བ་ནི་མི་ཕྱེད་པའི་མཆོད་པའི་ཏིང་ངེ་འཛིན་བསྒོམས་པས་ཡིད་ལ་རྣལ་འབྱོར་འདོད་པ་རྣམས་ཀྱིས་ལུས་མཆོད་པར་བྱའོ། །དེ་ལྟར་ན་བཅོམ་ལྡན་འདས་ཐམས་ཅད་བཟློག་པར་མཛད་པ་ཡིན་ཏེ། རྒྱལ་བ་རྣམས་ཀྱིས་མཆོད་པ་འདི་དག་ཉིད་རྒྱུད་ལས་གསུངས་པ་ཅིའི་ཕྱིར་ཞེ་ན། མཆོད་པ་ལྔ་ཡི་སྦྱོར་བ་ཡིས། །མྱུར་དུ་སངས་རྒྱས་ཉིད་ཐོབ་པར། །གང་འདི་རྒྱུད་ལས་གསུངས་བདག །དེ་ནི་ཕྱི་རོལ་གཞན་དུ་འདོད། །ཅེས་བྱ་བ་སྨོས་ཏེ། མཆོད་པ་ནི་དབུལ་བར་བྱ་སྟེ། མེ་ཏོག་ལ་སོགས་པ་ལྔ་པོ་འདི་དག་ཕྱི་ནང་གི་བདག་ཉིད་ཅན་རྣམས་ཡིན་ལ། དེས་མྱུར་དུ་སངས་རྒྱས་ཉིད་ཐོབ་པར་འགྱུར་རོ་ཞེས་བྱ་བ་འདི་ཉིད་ཡིན་ཏེ། དེ་ལྟར་ཡིན་དུ་ཟིན་ཀྱང༌། གང་
༄། །འདི་རྒྱུད་རྣམས་ལས་གསུངས་པ། དེ་ནི་ཕྱི་རོལ་པ་ཉིད་ཡིན་ལ། །ཕྱིའི་རྩོམ་པའི་ཚོགས་ཀྱིས་རྣལ་འབྱོར་པ་ཐམས་ཅད་རྨོངས་པར་འགྱུར་རོ། །དེ་ལྟར་ཡིན་དུ་ཟིན་ན་ནི་མཆོད་པ་ཞེས་བྱ་བ་མེད་དེ་ཆད་པར་ལྟ་བ་དང་མཚུངས་སོ་ཞེ་ན། དངོས་མེད་གཞི་ལ་བཀོད་པ་ཡིས། །ལྷ་ཡི་གཟུགས་སུ་བསྒོམ་པ་ནི། །མཉམ་ཉིད་མཆོད་པ་ཆེན་པོ་སྟེ། །སངས་རྒྱས་ཐམས་ཅད་རབ་བསྒྲུབ་པའོ། །ཞེས་བྱ་བ་སྨོས་ཏེ། དངོས་པོ་མེད་པའི་གཞི་ནི་གཟུང་བ་དང་འཛིན་པའི་རྣམ་པ་དམིགས་པ་མེད་པ་ཞེས་བྱ་བའི་གནས་ཏེ་དངོས་པོ་དང་བཅས་པའོ། །དེ་མེད་ན་དངོས་པོ་མེད་པ་སྟེ་དམིགས་པ་མེད་པ་ཞེས་བྱ་བའི་དོན་ཏོ། །དེ་ལ་བཀོད་པ་ནི་ཡང་དག་པར་དམིགས་པ་མེད་པ་སྟེ། རྒྱུ་དེས་རང་གི་ལྷག་པའི་ལྷར་ངོ་བོ་ཉིད་ཀྱི་རྗེས་སུ་བྱེད་པའོ། །དེ་ཉིད་ནི་མཆོད་པ་ཆེན་པོར་འདོད་དེ། དེ་བཞིན་གཤེགས་པ་མ་ལུས་པ་དང༌། རྡོ་རྗེའི་རྣལ་འབྱོར་མ་རྣམས་མཉེས་པར་བྱེད་པར་འདོད་པ་ཡིན་ན། རྣམ་པར་གཡེང་བར་བྱེད་པའི་ཕྱིའི་མཆོད་པ་རྣམས་ཀྱིས་ཅི་ཞིག་བྱ། གལ་ཏེ་གཞུང་དུ་ཡང་དག་པར་དགོད་པའི་བདག་ཉིད་ཅན་གྱིས་དགོངས་པ་དང་འགལ་བར་འགྱུར་རོ་ཞེ་ན། བསྟན་པ་ཙམ་དུ་ལེགས་འབྱུང་བའི། །རྒྱུད་འདི་དོན་དམ་མ་ཡིན་ཏེ། །དོན་དམ་ཡང་དག་སྐྱེས་པས་ན། །སྟོན་པ་མེད་ཅིང་བསྟན་པ་མེད། །ཅེས་བྱ་བ་སྨོས་ཏེ། བསྟན་པ་ཞེས་བྱ་བ་ནི། འཇིག་རྟེན་གདུལ་བར་བྱ་བའི་དོན་དུ་གསུངས་པ་ཡིན་ལ། ཡང་དག་སྐྱེས་པས་ན་ཞེས་བྱ་བ་ནི། སེམས་ལས་ཡེ་ཤེས་འབྱུང་བའོ། །སྟོན་པ་མེད་ཅིང་ཞེས་བྱ་བ་ནི་སྟོན་པར་བྱེད་པ་མེད་པའོ། །བསྟན་པ་མེད་ཅེས་བྱ་བ་ནི་གཞུང་གི་ཚོགས་ཀྱང་མེད་པ་སྟེ། རྣམ་པར་མི་རྟོག་པ་ཉིད་ཡིན་པའི་ཕྱིར་རོ། །ཕྱི་རོལ་དུ་གཡེང་བའི་བློ་ཅན་རྣམས་ཀྱི་གནས་ལ་སོགས་པར་འཁོར་བར་བྱེད་པ་དང་ལྡན་པ་རྣམས་དགག་པར་བྱ་བའི་ཕྱིར། ཉི་ཤུ་རྩ་བཞིར་ཕྱེ་བ་ཡི། །གནས་སོགས་དེ་ཉིད་ལ་གནས་ཏེ། །དེ་བས་དེ་ཀུན་འཁོར་བ་ཉིད། །སྐྱོ་བྱ་དེ་ཉིད་ཅན་གྱིས་མིན། །ཞེས་བྱ་བ་སྨོས་ཏེ། ཉི་ཤུ་རྩ་བཞིར་ཕྱེ་བ་ཡི། །ཞེས་པ་ནི། རྣམ་པ་ཉི་ཤུ་རྩ་བཞིར་བསྲེས་ཤིང་བགྲང་བ་སྟེ། དེ་ལ་གནས་དང་ཉེ་
༄། །བའི་གནས། །ཞེས་བྱ་བ་ལ་སོགས་པ་རྒྱ་ཆེར་སྦྱར་རོ། །རྒྱུ་དེ་སྣ་གནས་ཀྱི་རྡོ་རྗེ་ལ་སོགས་པ་རྣམས་ཀྱང་སེམས་ཀྱིར་དོ་རྗེ་ལ་གནས་སོ། །དེ་བས་ཞེས་བྱ་བ་ནི་ཉེ་བར་བསྡུ་བ་སྨྲ་བ་ཡིན་ཏེ། དེ་རྣམས་སུ་འཁོར་བ་ཉིད་ཀྱིས་ཁམས་ཟད་པར་བྱེད་པ་ཡིན་པས་སྐྱོ་ཞིང་ཞུམ་པ་ཉིད་མི་བྱའོ། །གང་གིས་ཤེ་ན། དེ་ཉིད་ཅན་གྱིས་མིན་ཞེས་བྱ་བ་སྨོས་ཏེ། རྣལ་འབྱོར་ཆེན་པོ་རྣམས་ཀྱིས་མི་བྱའོ། །འོ་ན་ཕྱི་རོལ་དུ་ཞེན་པ་སྐྱོན་ཡིན་ན། གཙོ་བོར་བྱ་བ་གང་ཡིན་ཞེ་ན། གལ་ཏེ་དེ་ཉིད་མེད་གྱུར་ན། །དེ་ཡི་འཁྲུལ་པས་ཅི་ཞིག་བྱ། །ཡང་ན་དེ་ཉིད་ལྡན་གྱུར་ན། །དེ་ལ་འཁྲུལ་པ་ཅི་ཞིག་ཡོད། །ཅེས་བྱ་བ་སྨོས་ཏེ་འདི་ནི་གོ་སླའོ། །འོན་ཏེ་བཅོམ་ལྡན་འདས་ཉིད་ཀྱིས་གནས་ལ་སོགས་པ་བགྲོད་པས་དྲི་མ་མེད་པ་ཉིད་དུ་འགྱུར་ཏེ། དེ་བས་ན་རང་གི་གཞུང་ཉིད་དང་འགལ་བར་འགྱུར་རོ་ཞེ་ན། གནས་དང་ཉེ་བའི་གནས་སོགས་རྣམས། །བརྟེན་པས་དྲི་མ་མེད་པར་འགྱུར།། ཡང་ན་མི་ནུས་བག་མེད་པའི། །མི་ཡིས་གནས་ནི་བསྒྲག་པར་བྱ། །ཞེས་བྱ་བ་སྨོས་ཏེ། གནས་དང་ཉེ་བའི་གནས་ལ་སོགས་པ་ལ་བརྟེན་ཅིང༌། བསྙེན་བཀུར་བྱ་བས་རྣལ་འབྱོར་པ་དྲི་མ་མེད་པར་འགྱུར་ཞེས་བྱ་བ་ནི་སྲིད་དེ། རྡོ་རྗེ་རྣལ་འབྱོར་མ་རྣམས་ཀྱིས། འགྲོན་པོ་དང་བཅས་བའི་གནས་སུ་བགྲོད་ཅིང་མཆོད་པས་བསོད་ནམས་སུ་འགྱུར་རོ་ཞེས་བྱ་བ་ལ་སོགས་པ་ནི་ངོ་མཚར་མེད་དེ། ཡང་ན་ལ་ལ་ཞིག་བགྲོད་པར་མི་ནུས་པའམ། བག་མེད་ཅིང་བྱ་བ་མང་པོས་གཡེང་པ་སྟེ། དེ་གཉིས་ཀྱིས་ཀྱང་གནས་པ་ལ་སོགས་པའི་མིང་བསྒྲགས་པས་དག་པ་འཕེལ་བར་འགྱུར་རོ། །དེ་ཡང་ཅི་དོན་དམ་པ་ཉིད་དུ་བརྟེན་པ་ཡིན་ནམ་ཞེ་ན། མ་ཡིན་ཏེ། ང་ཡིས་འདི་ལྟར་བཤད་པ་ནི། །སེམས་ཅན་བསམ་པའི་དབང་གིས་ཏེ། །བསམ་གཏན་ལས་གཞན་བདེ་མེད་ཕྱིར། །དེ་བས་བསམ་གཏན་མཆོག་གཞོལ་བྱ། །ཞེས་བྱ་བ་སྨོས་ཏེ། གང་བདག་ཅག་རྣམས་ཀྱིས་དེ་སྐད་དུ་སྨྲས་པ་དེ་ནི་སེམས་ཅན་རྣམས་ཀྱི་བསམ་པའི་དབང་དུ་བྱས་པ་ཡིན་ཏེ། གང་གནས་བགྲོད་པས་དྲི་མ་མེད་པ་ཉིད་དུ་འདོད་པ་དེའི་ཕྱིར་བསྟན་པ་ཡིན་གྱི། དེ་ཡང་དོན་དམ་པར་ནི་མ་ཡིན་ནོ། །དེའི་ཕྱིར་བསམ་གཏན་ཞེས་བྱ་བ་ལ་སོགས་པ་སྨོས་ཏེ། བསམ་གཏན་ཞེས་བྱ་བ་ནི་སེམས་
༄། །རྩེ་གཅིག་པའི་མཚན་ཉིད་ཅན་ཡིན་ལ་འདི་ཉིད་ལས་བདེ་བ་ཞེས་བྱ་བ་གཞན་མེད་དེ། །དེ་བས་ན་ཉིན་མཚན་རྟག་ཏུ་བསམ་གཏན་ཁོ་ན་མཆོག་ཏུ་བསྟེན་ཅིང་དེ་ལ་གཞོལ་བར་བྱའོ། །འོ་ན་ཕྱི་རོལ་མངོན་པར་ཞེན་ཅིང་བཙལ་བ་ལ་སྐྱོན་ཅི་ཡོད་ཅེ་ན། རྣལ་འབྱོར་པ་ནི་ཕྱི་རོལ་འཁོར། །དེ་ཡིས་ཁམས་རྣམས་ཟད་པར་འགྱུར། །དེ་བས་ཕྱི་རོལ་སྤངས་ནས་ནི། །རྣལ་འབྱོར་རོལ་པས་གནས་པར་བྱ། །ཞེས་སྨོས་ཏེ། ཕྱི་རོལ་གྱི་སྦྱོར་བ་ལ་མངོན་པར་དགའ་བའི་རྣལ་འབྱོར་པ་དེ་རྣམས་ཀྱི་ཁམས་རྣམས་ཡོངས་སུ་སྐམས་པར་འགྱུར་ཏེ། དེ་བས་ན་ཕྱི་རོལ་གྱི་བྱ་བ་རྣམས་ཡོངས་སུ་སྤངས་ལ། །རྣལ་འབྱོར་རྣམ་པར་རྩེ་བས་དེ་ཁོ་ན་ཉིད་ཀྱི་སྦྱོར་བ་ལ་གནས་པར་བྱའོ། །འོ་ན་ཁྱད་པར་ཅན་དག་བཞུགས་པའི་གནས་ལ་བགྲོད་པས་དགོས་པ་འགྲུབ་བམ་ཞེ་ན། དཔལ་ལྡན་རྡོ་རྗེའི་རྣལ་འབྱོར་ཅན། །རྣམ་དག་ཡེ་ཤེས་སྤྱན་གྱིས་ནི། །ཐུགས་རྗེ་ཐུགས་གདུང་རིང་པོ་ནས། །རྡོ་རྗེ་རྣལ་འབྱོར་ཅན་རྣམས་གཟིགས། །ཞེས་བྱ་བ་སྨོས་ཏེ། བཅོམ་ལྡན་འདས་དེ་རྣམས་ཀྱིས་ཡེ་ཤེས་དྲི་མ་མེད་པའི་སྤྱན་གྱིས་ཐུགས་རྗེའི་དབང་གིས་རིང་པོ་ཉིད་ནས་ཀྱང་བསམ་གཏན་ལ་རྣམ་པར་གཟིགས་ཏེ། དེ་བས་ན་གནས་བགྲོད་པ་ལ་སོགས་པ་མི་བྱའོ། །འོ་ན་དེ་དག་གིས་གཟིགས་པས་ཅིར་འགྱུར་ཞེ་ན། དེ་རྣམས་དགྱེས་པས་དངོས་གྲུབ་མཆོག །ཅི་འདོད་པར་ནི་སྩོལ་བར་འགྱུར། །དེས་ནི་རྗེ་བཙུན་ཡེ་ཤེས་ཀྱང༌། །རབ་ཏུ་འབད་དེ་བསྒྲུབ་པར་བྱ། །ཞེས་བྱ་བ་སྨོས་ཏེ། བཅོམ་ལྡན་འདས་རྡོ་རྗེའི་རྣལ་འབྱོར་ཅན་དགྱེས་པར་གྱུར་ནས་ཐུགས་རྗེའི་དབང་གིས། དངོས་གྲུབ་ཀྱི་མཆོག་གི་ཡེ་ཤེས་སྩོལ་བར་འགྱུར་ཞིང་བསྟེན་པར་མཛད་པ་དང༌། གཞན་ཡང་རལ་གྲིའི་དངོས་གྲུབ་ལ་སོགས་པ་ཇི་ལྟར་མངོན་པར་དགའ་བ་བཞིན་དུ། །རྣལ་འབྱོར་པ་རྣམས་ལ་སྩོལ་བར་མཛད་དོ། །དེ་བས་ན་ཡེ་ཤེས་ཀྱི་དེ་ཁོ་ན་ཉིད་རྣམ་པ་ཐམས་ཅད་དུ་འབད་པས་བསྒྲུབ་པར་བྱ་ཞིང་མཉེས་པར་བྱའོ། །ཅི་རྗེ་བཙུན་ཡེ་ཤེས་མཉེས་པར་བྱེད་པས་སྤྱོད་པ་དང༌། བརྟུལ་ཞུགས་རྣམས་ལ་ལྟོས་པར་བྱའམ་ཞེ་ན། སྣ་ཚོགས་སྤྱོད་པར་ཡང་དག་ལྡན། །སྤྱོད་དང་བརྟུལ་ཞུགས་བཤད་པ་ཡི། །སྤྱོད་དང་བརྟུལ་ཞུགས་འདིར་
༄། །སྤངས་ལ། །དེ་ཉིད་བརྟུལ་ཞུགས་ལ་དགའ་བྱ། །ཞེས་བྱ་བ་སྨོས་ཏེ། ཉོན་མོངས་པའི་རྣམ་པ་དུ་མ་སྤྱོད་པ་དང༌། བརྟུལ་ཞུགས་རྣམས་རྒྱུད་དེ་དང་དེ་ལས་གསུངས་པ་རྣམས་ཀྱིས་ལུས་སེམས་རྣམ་པར་གཡེང་བར་འགྱུར་ཏེ། དེ་བས་ན་དེ་སྤངས་ཤིང་དོར་ལ་རྣལ་འབྱོར་པ་རྣམས་ཀྱིས་རྗེས་སུ་མཐུན་པའི་དེ་ཁོ་ན་ཉིད་ཀྱི་བརྟུལ་ཞུགས་སྤྱད་པར་བྱའོ། །བཅོམ་ལྡན་འདས་ཀྱིས་ཀྱང་བསམ་པའི་དབང་གིས་སྤྱོད་པ་དང་བརྟུལ་ཞུགས་གསུངས་པ་ཡིན་ནོ་ཞེས་བྱ་བར་གསུངས་སོ། །ཅི་བྱ་བའི་རྒྱུད་རྣམས་ལས་ཁ་ཟས་ཇི་ལྟ་བུར་གནས་པར་གསུངས་པ་དེ་ལྟ་བུའི་ཁ་ཟས་ཀྱིས་གནས་པར་བྱའམ། འོ་ན་ཏེ་མ་ཡིན་ཞེ་ན། གང་ཡང་རུང་བའི་ཟས་གནས་པ། །རྣམ་པ་དེ་བྱས་བརྟུལ་ཞུགས་ཅན། །བསམ་གཏན་ཟས་མཆོག་གཞོལ་འགྱུར་བ། །སྨྱོན་པའི་སྤྱོད་པས་གནས་པར་གྱིས། །ཞེས་བྱ་བ་སྨོས་ཏེ། ཁ་ཟས་བསོད་པ་རྣམས་ཀྱང༌། བསོད་པ་མ་ཡིན་པའམ། བསླང་བའམ། བསླངས་པ་བརྟགས་པའམ། བརྟགས་པ་མ་ཡིན་པའམ། གང་ཡང་རུང་བའི་ཟས་ལ་ལོངས་སྤྱོད་ཅིང་གནས་པ་ནི་ཟས་ཀྱིས་གནས་པའོ། །བརྟུལ་ཞིང་ཞུགས་པའི་ཕྱིར་བརྟུལ་ཞུགས་ཏེ། ལུང་ལས་བཤད་པའི་སྔོམ་པའོ། །དེ་ལྟ་བུའི་བརྟུལ་ཞུགས་དང༌། ཟས་ལ་མ་ལྟོས་པར་བསམ་གཏན་ཉིད་ཟས་དང་འདྲ་བས་ན་ཟས་སོ། །ཟས་དེ་ལ་མཆོག་ཏུ་གཞོལ་བར་གྱུར་པས་ན་སུས་ཀྱང་རྗེས་སུ་རྟོག་པར་མི་འགྱུར་བར་སྨྱོན་པའི་སྤྱོད་པས་གནས་པར་གྱིས་ཤིག་ཅེས་བྱ་བ་སྟེ། གཞན་དུ་སྐྱེ་བོ་རྣམས་དང་ཉེ་བར་འདྲེས་པས་ཀུན་དུ་གཙེས་པར་འགྱུར་རོ། །རྣལ་འབྱོར་པ་གོས་ལ་སོགས་པ་སློང་བ་ལ་སོགས་པས་བརྟུལ་ཞུགས་ཅན་གཡེང་བར་གྱུར་ན་དགེ་བ་ཇི་ལྟར་བྱེད་ཅེ་ན། གཅེར་བུའམ་ཡང་ན་གཅེར་བུ་མིན། །གང་དུ་ཇི་ལྟ་དེ་ལྟ་བུར། །རང་གི་ལྷག་པའི་ལྷར་དམིགས་ལ། །དེ་ཉིད་གཅིག་པུ་རྣམ་པར་བསམ། །ཞེས་བྱ་བ་སྨོས་ཏེ། གཅེར་བུའམ་ཡང་ན་གཅེར་བུ་མིན། །ཞེས་བྱ་བ་ནི་གོ་སླའོ། །བྱ་བའི་རྒྱུད་ལ་སོགས་པ་ནས་གནས་ཀྱི་ངེས་པ་བཤད་པ་འདིར་ཡང་དེ་བཞིན་དུའམ་ཞེ་ན། །གང་ཡང་རུང་བ་ཞེས་བྱ་བ་སྨོས་ཏེ། ལམ་གྱི་བཞི་མདོ་ལ་སོགས་པའི་ངེས་པ་མེད་དོ། །འོ་ན་
༄། །སྐྱིལ་མོ་ཀྲུང་བཅས་ནས་མཆན་ཐོག་ཐག་བཟླས་བརྗོད་བྱ་བའི་སྤྱོད་པས་ནི་ལུས་ལ་གནོད་པར་འགྱུར་རོ་ཞེ་ན། ཇི་ལྟ་དེ་ལྟ་བུར་ཞེས་བྱ་བ་སྨོས་ཏེ། གནས་སྐབས་གང་ཡང་རུང་བ་དག་ཏུ་སྟེ། སྤྱོད་ལམ་རྣམ་བཞིར་དེ་ཁོ་ན་ཉིད་རྣམ་པར་བསམ་ཞིང་བསྒོམ་པར་བྱའོ། །ཅི་རྟོག་པ་མང་པོ་དག་གིས་འདིའི་ཡེ་ཤེས་འགྲུབ་པར་འགྱུར་རམ་ཞེ་ན། ཟླ་དྲུག་ཙམ་གྱིས་ངེས་པར་ནི། །ཞེས་བྱ་བ་སྨོས་ཏེ། ངེས་པར་ཟླ་བ་དྲུག་གིས་འདི་འཚང་རྒྱ་བ་ཉིད་ཀྱང་ངེས་པར་འགྲུབ་པ་ནི། །ཅི་སྐྱེ་བོ་རྣམས་དང་འདྲེས་ཤིང་གཡེངས་པས་སམ་ཞེ་ན། ལྐུགས་པའི་དངོས་པོར་ཐལ་འགྱུར་བས། །ཟླ་དྲུག་ཙམ་གྱིས་ངེས་པར་ནི། །རྣལ་འབྱོར་ཅན་གྱིས་ཉེར་བརྟེན་ན། །རྣལ་འབྱོར་ཆེན་པོ་འདི་གསལ་འགྱུར། །ཞེས་བྱ་བ་སྨོས་ཏེ། ལྐུགས་པའི་དངོས་པོར་ཐལ་འགྱུར་པས། །ཞེས་བྱ་བ་ནི་དགོངས་པའི་དབང་གིས་མི་སྨྲ་བའི་བརྟུལ་ཞུགས་ལ་གནས་པ་ཡང་ངེས་པ་མེད་དོ། །དེ་བས་ན་རྣལ་འབྱོར་ཆེན་པོ་འདི་ཡང་གསལ་ཞིང་འབར་བར་འགྱུར་ཏེ། རྡོ་རྗེ་མཁའ་འགྲོའི་ཚོགས་རྣམས་ཀྱིས་ཉེ་བར་བརྩེ་བར་འགྱུར་རོ། །འོ་ན་འདི་ཉིད་ཀུན་གྱིས་བཀུར་བ་དང་བསྙེན་པའི་འོས་སུ་འགྱུར་རམ་ཞེ་ན། ཡེ་ཤེས་སྒྲོན་མ་མཆོག་མཐོང་ན། །རྣལ་འབྱོར་མ་རྣམས་ལེགས་འདུས་ཏེ། །པདྨའི་འབྱུང་གནས་ཉམས་དགའ་ལ། །ངང་པའི་ཚོགས་འདུས་ཇི་བཞིན་ནོ། །ཞེས་བྱ་བ་ལ། །ཡེ་ཤེས་ནི་རྣམ་པར་རྟོག་པ་མ་ལུས་པ་བསལ་བའི་ངོ་བོ་ཉིད་དོ། །དེའི་སྒྲོན་མ་ནི་སྣང་བའོ། །དེས་མཆོག་ཏུ་གྱུར་པ་ནི་དམ་པ་སྟེ། དེ་ལྟ་བས་ན་ལྷ་མོ་རྣམས་ཡང་དག་པར་ཉེ་བར་སྡུད་དོ། །ཇི་ལྟ་བུ་ཞེ་ན། དཔེར་ན་པདྨའི་འབྱུང་གནས་ཀྱི་མཚོ་པདྨས་ཁྱབ་པར་གནས་པ་ལ་ངན་པའི་ཚོགས་རྣམས་འབབ་པར་འགྱུར་བ་དང་འདྲའོ། །ཇི་ལྟར་འབྲས་བུ་བསྟན་པར་བྱ་བའི་ཕྱིར། །མིག་འཕྲུལ་མཁན་ལྟར་འཇིག་རྟེན་དུ། །འགྲོ་ཀུན་དོན་ནི་བྱེད་པའོ། །དཔལ་ལྡན་རྡོ་རྗེ་འཛིན་པ་ནི། །མངོན་འགྱུར་འདི་ལ་ཐེ་ཚོམ་མེད། །ཅེས་སྨོས་ཏེ། འདི་དག་ནི་གོ་སླའོ། །གཞུང་རྩོམ་པར་བྱེད་པས་བསྐུལ་བར་བྱ་བའི་ཕྱིར། །སྤྱོད་པ་འདིས་ནི་ངེས་པར་ནི། །ཇི་སྐད་བཤད་པར་དེར་འགྱུར་བས། །སེམས་ནི་དག་པར་གྱིས་ཤིག་ཅེས། །སེམས་ཅན་རྣམས་ལ་བདག་གསོལ་འདེབས། །ཞེས་བྱ་བ་སྨོས་ཏེ།
༄། །དེ་ནི་གོ་སླའོ། །གང་ཕྱིར་ཤིན་ཏུ་གསང་བས་ན། །དེ་ཉིད་བདག་གིས་གསལ་མ་བྱས། །དེས་ན་བླ་མ་ཡང་དག་པར། །མཉེས་བྱས་ཡང་དག་འདོད་པས་བླངས། །ཞེས་བྱ་བ་ལ་དེ་ཁོ་ན་ཉིད་ཤིན་ཏུ་གསང་ཞིང་གཅིག་ཏུ་སྦ་བར་བྱ་བ་ཉིད་ཡིན་པས་ངས་གསལ་བར་མ་བཤད་དེ། དེ་བས་ན་ཀྱེ་སེམས་ཅན་རྣམས་བླ་མ་ཡང་དག་པར་མཉེས་ཤིང་མགུ་བར་བྱས་ནས་བླང་ཞིང་གཟུང་བར་བྱའོ། །ད་ནི་གཞུང་བྱེད་པས་བསྐུལ་བ། དགེ་ལ་དམིགས་པས་ཉེ་བར་བསགས་ཏེ་འཕེལ་བ་ཡིས། །བློ་གྲོས་བརྟན་རྣམས་མངོན་དགའི་དངོས་གྲུབ་གནས་སུ་འགྲོ། །འགྲོ་བའི་སྤྱོད་པ་དེ་ལྟར་སྙིང་ལ་ཡོངས་བསྒོམས་ལ། །དགེ་ལ་མངོན་པར་དགའ་བར་སྐད་ཅིག་རེ་རེས་གྱིས་། །ཞེས་བྱ་བ་སྨོས་ཏེ། དགེ་ལ་དམིགས་པ་ནི་དེ་ལ་བརྟེན་པའོ། །ཉེ་བར་བསགས་ཏེ་ནི་རྣལ་འབྱོར་གྱིས་ལས་ཀྱི་ལམ་ཡོངས་སུ་བསགས་པའོ། །འཕལ་བ་ནི་དེ་ཉིད་ཁྱད་པར་དུ་གྱུར་པའོ། །ཇི་ལྟ་བུ་ཞེ་ན། །བརྟན་པ་ཞེས་བྱ་བ་ལ། བརྟན་པ་ནི་མི་འགྱུར་བ་ཅན་ནོ། །དེ་ཉིད་ཀྱི་ཕྱིར་མངོན་དགའི་གནས་སུ་འགྲོ་བར་འགྱུར་བས་ན། འགྲོ་བ་གཙོར་བྱས་བའི་སྤྱོད་པ་ཐམས་ཅད་དེ་ལྟར་ཡིད་ལ་བྱས་ཏེ། དུས་ཐམས་ཅད་དུ་དགེ་བ་རྒྱུན་མི་འཆད་པར་གྱིས་ཤིག་པའོ། །དེ་ཁོ་ན་ཉིད་ཀྱི་མན་ངག་བྲིས་པ་ལས། དགེ་བ་གང་ཞིག་ཡང་དག་པར་ཐོབ་པའི་རྩ་བ་བསྡོ་པ་ནི། །དེ་ཉིད་བསྟན་པ་ལེགས་བྲིས་ལས། །བདག་གིས་དགེ་བ་གང་བསགས་པ། །དེས་ནི་སེམས་ཅན་མ་ལུས་ཀུན། །དེ་ཉིད་རིན་ཆེན་རབ་གསལ་ཤོག །ཅེས་གསུངས་སོ། །དེ་ཁོ་ན་ཉིད་ཀྱི་མན་ངག་གི་འགྲེལ་པ། སློབ་དཔོན་བློ་བཟང་སྙིང་པོའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀཱ་མ་ལ་གུཔྟ་དང་ཞུ་ཆེན་གྱི་ལོ་ཙཱ་བ་རིན་ཆེན་བཟང་པོས་བསྒྱུར་ཅིང་ཞུས་ནས་གཏན་ལ་ཕབ་པའོ།།