དཔལ་སངས་རྒྱས་ཐོད་པ་ཞེས་བྱ་བའི་དཀྱིལ་འཁོར་གྱི་ཆོ་གའི་རིམ་པ་གསལ་བ་ཞེས་བྱ་བ།
ས་ར་ཧ།
༄། །རྒྱ་གར་སྐད་དུ། ཤྲཱི་བུདྡྷ་ཀ་པཱ་ལ་མཎྜལ་ཀྲ་མ་པ་དྱོ་ཏ་ན་ནཱ་མ་བི་དྷིཿ། བོད་སྐད་དུ། དཔལ་སངས་རྒྱས་ཐོད་པ་ཞེས་བྱ་བའི་དཀྱིལ་འཁོར་གྱི་ཆོ་གའི་རིམ་པ་གསལ་བ་ཞེས་བྱ་བ། དཔལ་སངས་རྒྱས་ཐོད་པ་ལ་ཕྱག་འཚལ་ལོ། །དཔལ་ལྡན་ཁྲག་འཐུང་རྒྱལ་པོ་ཆེ། །ཉི་ཤུ་རྩ་བཞི་དྲ་བའི་སྡོམ། །དངོས་ཀུན་རང་བཞིན་འགྲོ་བ་སྐྱོབ། །སྣ་ཚོགས་སྡེ་ལ་ཕྱག་འཚལ་ཏེ། །སངས་རྒྱས་ཐོད་པའི་དཀྱིལ་འཁོར་མཆོག །ཇི་ལྟར་རྒྱུད་གཞན་ཆོ་ག་མཐོང༌། །བླ་མ་བརྒྱུད་རིམ་ལས་འོངས་པ། །བདག་གིས་གསལ་བར་བཤད་པར་བྱ། །བླ་མ་མཚན་ཉིད་བཟང་ལྡན་པ། །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་ཤེས་པས། །ལེགས་པར་བརྟགས་པས་སློབ་མའི་ཕྱིར། །དཀྱིལ་འཁོར་བྲི་བའི་ལས་བྱའོ། །དེ་ཡང་སློབ་མ་བློ་ཆེན་པོ། །ཤིན་ཏུ་དང་བའི་སེམས་དང་ལྡན། །འདོད་མེད་དབང་པོ་འདུལ་བ་དང༌། །ཆགས་དང་ཆགས་བྲལ་རྣམ་པར་སྤངས། །སེམས་ཅན་དོན་ལ་རབ་ཏུ་བརྩོན། །གཏི་མུག་ཞེ་སྡང་ཕྲག་དོག་སྤངས། །སངས་རྒྱས་ཀུན་གྱིས་བྱིན་གྱིས་བརླབས། །དེ་རྣམས་ལ་ནི་དེ་ཉིད་བཤད། །སློབ་མ་དེ་ནི་ཡོངས་སུ་གཟུང༌། །ད་ནི་དངོས་གྲུབ་མ་ལུས་པའི། །སྒྲུབ་བྱེད་ཆོ་ག་བཤད་པར་བྱ། །ལྷ་རྣམས་མགུ་བར་མ་བྱས་ན། །བདག་ཉིད་ངེས་པར་སུན་འབྱིན་འགྱུར། །དུར་ཁྲོད་ལ་སོགས་གནས་དག་ཏུ། །དཔལ་ལྡན་ཁྲག་འཐུང་སོགས་འཁོར་ལོ། །རབ་ཏུ་མཉེས་པར་བྱ་བའི་ཕྱིར། །མཛེས་པའི་མཎྜལ་ལེགས་བྱས་ཏེ། །ཆུ་ལ་སོགས་པའི་རྣམ་ལྔ་དང༌། །བ་བྱུང་མར་སོགས་ལེགས་པར་བྱུགས། །
༄། །འབྱོར་བའི་ཡོ་བྱད་ཆོགས་གྱུར་པས། །རྒྱུད་ལས་གསུངས་པའི་ཚུལ་བཞིན་དུ། །བསྐྱེད་པའི་ཚུལ་གནས་བླ་མ་ཡིས། །དཀྱིལ་འཁོར་བདག་པོ་བཟླས་པ་ནི། །བསོད་ནམས་ཆེ་འབྲིང་ཆུང་བ་དག །བྱེ་བ་འབུམ་དང་ཁྲིས་འགྲུབ་འགྱུར། །འཁོར་རྣམས་གཙོ་བོའི་ཡན་ལག་ཕྱིར། །ཐ་དད་པར་ནི་བཟླས་མི་བྱ། །གལ་ཏེ་མཚན་མ་མཐོང་གྱུར་ན། །བཟླས་པའི་འཕྲོ་ཡང་བཤོལ་བས་འགྲུབ། །ལྷ་ཡི་བྱིན་བརླབས་ལྡན་གྱུར་པས། །དཀྱིལ་འཁོར་མཆོག་ནི་བྲི་བའི་ཕྱིར། །རི་དང་ཕུག་དང་ཚང་ཚིང་ངམ། །ཡང་ན་དུར་ཁྲོད་དག་གི་ནི། །གདོད་ནས་གྲུབ་པའི་གནས་སུའམ། །འོན་ཏེ་རྒྱ་མཚོའི་འགྲམ་དག་ཏུ། །ཕྱི་ཡི་དཀྱིལ་འཁོར་ལེགས་བྲིའི་ཕྱིར། །ཡིད་འོང་གནས་དང་ལེགས་པའི་སར། །བཅོས་མའི་མཎྜལ་ལེགས་པར་བརྩིགས། །དྲི་དང་བ་སོགས་བདུད་རྩིས་བྲན། །གྲངས་མཉམ་ལྷ་ཡི་གནས་བཀོད་དེ། །དེར་ནི་ཡིད་འོང་མེ་ཏོག་དགྲམ། །ཁྲག་འཐུང་འཁོར་ལོ་རྫོགས་བསྐྱེད་ཅིང༌། །སྐྱེ་སོགས་ནུས་པ་ཡེ་ཤེས་ལྷ། །དགུག་སོགས་བྱས་ཏེ་དབང་བསྐུར་ནས། །མཆོད་བསྟོད་མཐར་ནི་གསོལ་བ་གདབ། །སངས་རྒྱས་ཐམས་ཅད་བདག་ལ་དགོངས། །ཁྱེད་རྣམས་མཆོད་པའི་ཕྱིར་དང་ནི། །སློབ་མ་རྣམས་ལ་ཕན་པ་ཡིས། །སངས་རྒྱས་ཐོད་པ་ཞེས་བྱ་བའི། །དཀྱིལ་འཁོར་བཟང་པོ་བྲི་བར་འཚལ། །བདག་ལ་བྱིན་བརླབས་གནད་པར་མཛོད། །དེ་ལྟར་གསོལ་བ་གདབ་བྱས་ནས། །མཆོད་དང་གཏོར་མ་ཉེར་ལྡན་པས། །ལྷ་མོ་མཛེས་དགའ་བསྐུལ་བའི་ཕྱིར། །སྔོན་བྱུང་སངས་རྒྱས་ཚུལ་ཇི་བཞིན། །ལག་པས་ལ་བྲབ་བྱས་པས། །ས་འོག་འཐོན་པའི་ལྷ་མོ་ནི། །གསེར་མདོག་ཞི་བའི་རང་བཞིན་ཅན། །རིན་ཆེན་མཛེས་པའི་རྒྱན་ཆ་ཅན། །གསེར་གྱི་བུམ་འཛིན་ཅི་བགྱི་ཞེས། །དེ་ལ་མཆོད་ཡོན་རྐང་བཀྲུ་སོགས། །མཆོད་དང་གཏོར་མས་མཉེས་པར་བྱ། །གཟི་བརྗིད་ཅན་གྱིས་འདི་སྐད་སྨྲ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་
༄། །འཁོར་བྲི། །དེ་སྐད་ལན་གསུམ་བརྗོད་ནས་ནི། །དགའ་བའི་མདངས་ཀྱིས་ལྷ་མོ་ཡང༌། །ཁྱོད་ནི་སློབ་དཔོན་ཡིན་པས་ན། །དཀྱིལ་འཁོར་མཆོག་གི་ལས་ཀྱིས་ཤིག །ཟེར་ནས་ས་ལ་ཐིམ་པར་མཛད། །དེ་ནས་ཕྱོགས་སྐྱོང་རྣམས་དག་ལ། །ཚུལ་བཞིན་གཏོར་མ་བྱིན་ནས་ནི། །ས་ཕྱོགས་གནས་པའི་ལྷ་དང་ཀླུ། །གནོད་སྦྱིན་དྲི་ཟ་ལྷ་མ་ཡིན། །གང་དག་རྫུ་འཕྲུལ་ཆེ་ལྡན་པ། །རྡོ་རྗེ་སྤྱན་དང་སྙན་མངའ་བ། །བདག་མིང་ཆེ་གེ་ཞེས་བྱ་བས། །བདེ་གཤེགས་རྣམས་ལ་མཆོད་པ་དང༌། །སེམས་ཅན་ཀུན་ལ་ཕན་པའི་ཕྱིར། །དགེ་བའི་ས་ཕྱོགས་འདི་ཉིད་དུ། །དཀྱིལ་འཁོར་དམ་པ་ཆེར་འབྱུང་བ། །སངས་རྒྱས་ཐོད་པ་རྒྱུད་རྒྱལ་གྱི། །དཀྱིལ་འཁོར་ཆེན་པོའི་ལས་བྱེད་པས། །ཁྱོད་ཀྱིས་བར་ཆད་མ་བྱེད་པར། །དགེ་བའི་གྲོགས་པོ་ཉིད་དུ་མཛོད། །ལན་གསུམ་གསོལ་བ་འདེབས་པ་ནི། །ས་བླང་ཆོ་ག་མཛེས་པ་ཡིན། །དེའི་འོག་མགུལ་རྒྱན་རྣ་ཆ་སོགས། །ཐལ་བའི་གོས་དང་རྒྱན་ཆར་ལྡན། །དཔལ་ལྡན་ཁྲག་འཐུང་རྒྱལ་ཆེན་པོ། །ས་གཞིའི་དབུས་སུ་འདུག་ནས་ནི། །རྣལ་འབྱོར་གོ་རིམས་རྫོགས་པར་བྱ། །དེ་ཚེ་མཁའ་འགྲོ་མ་བཞི་ཡི། །གནས་ལ་གནས་པའི་རྣལ་འབྱོར་པས། །མཆོད་ཅིང་བསྟོད་པས་མཉེས་བྱས་ནས། །དཀྱིལ་འཁོར་ཀུན་གྱི་གཙོ་བོ་ནི། །སྡིག་པ་མ་ལུས་ཟད་བྱེད་པའི། །སངས་རྒྱས་ཐོད་པའི་དཀྱིལ་འཁོར་ནི། །མགོན་པོ་ཆེན་པོས་བཤད་དུ་གསོལ། །གསོལ་བའི་ཚིག་དེ་མཁྱེན་ནས་སུ། །སྙིང་རྗེ་འགྲོ་བ་བལྟས་ནས་ནི། །བགེགས་ནི་བསྐྲད་པའི་ཆོ་ག་བྱ། །ཁྲག་འཐུང་ང་རྒྱལ་ལྡན་པ་ཡི། །མིག་ཏུ་མ་དང་ཊ་ལས་ནི། །ཉི་མ་ཟླ་བ་གསལ་བསྒོམས་ལ། །མིག་འབྲས་ཧཱུཾ་ལས་གྱུར་པ་ཡི། །རྡོ་རྗེ་མཐིང་ནག་བསྒོམ་པར་བྱ། །རྐང་པ་གཉིས་སུ་ཨཱཿ་ལས་ནི། །སྣ་ཚོགས་རྡོ་རྗེ་འབར་བ་བསམ། །རྡོ་རྗེ་ལྟ་བའི་མིག་འབྲས་ལས། །ཁྲོ་ཚོགས་སྤྲོས་པས་བགེགས་བསལ་ཞིང༌། །རྐང་འགྲོས་རྡོ་རྗེ་རེ་བ་སྤྲུལ། །རྡོ་རྗེ་གསོར་ཞིང་དྲིལ་བུ་དཀྲོལ། །དབང་ལྡན་མཚམས་སུ་སོང་ནས་ནི། །ཉོན་ཅིག་བགེགས་ཚོགས་མ་ལུས་ཀུན། །ལྷ་དང་ལྷ་མིན་གསང་བ་པ། །གནོད་པར་གྱུར་བའི་བགེགས་ཚོགས་རྣམས། །སངས་རྒྱས་ཐོད་པའི་རྣལ་འབྱོར་གཙོ། །བདེ་ཆེན་ཡེ་ཤེས་ལས་བྱུང་བ། །
༄། །དེ་ནི་ཧེ་རུ་ཀ་དཔལ་དངོས། །བཀའ་ཡི་འཁོར་ལོ་རབ་སྦྱོར་བྱེད། །གལ་ཏེ་བཀའ་ལས་འདས་གྱུར་ན། །རྡོ་རྗེ་རབ་ཏུ་འབར་བ་ཡིས། །མགོ་ནི་ཚལ་བ་བརྒྱར་འགས་ཤིང༌། །འཇིག་པར་འགྱུར་བ་གདོན་མི་ཟ། །དེ་བས་གཞན་དུ་འགྲོ་བར་གྱིས། །ཞེས་བརྗོད་བགེགས་ལ་བཀའ་བསྒོས་ནས། །དབང་ལྡན་ཕྱོགས་ནས་བརྩམས་ནས་ནི། །གཡས་སྐོར་ལན་གསུམ་བགྲོད་བྱ་བ། །བསྐལ་བའི་མེ་བཞིན་འོད་ཟེར་ཅན། །རྐང་པའི་འོག་ནས་བྱུང་ནས་སུ། །གདུག་པ་རྣམས་ནི་བསྲེགས་གྱུར་བས། །ཕན་ཚུན་འབྱེར་བར་གྱུར་བར་བསམ། །གཡས་དང་གཡོན་དུ་བསྐོར་བ་དང༌། །འཁྱུད་དང་ཀུ་ཙ་པ་ཡི་དང༌། །བྷ་ར་ཏི་དང་ས་ཏི་ཀི །པྲེ་ཏེ་ཀ་ཤི་ཀྱ་ལ་སོགས། །ཆགས་བཅས་ཚུལ་གྱིས་སྦྱོར་བས་ནི། །རོལ་པས་རབ་ཏུ་འཕྱང་བ་དང༌། རོལ་བའི་གོམ་སྟབས་བཅས་པའམ། །གོམ་པ་བརྒྱད་པས་གར་བྱའོ། །རྐང་པ་བསྐྱོད་དང་ལག་པ་བསྐྱོད། །སྨིན་མ་འདེགས་དང་རབ་དགས་འབྲང༌། །ཅུང་ཟད་ངོ་ཚའི་ཟུར་མིག་དང༌། བརླ་རྒྱས་ལྟ་ན་འདུད་པ་དང༌། །མིག་གཡས་གར་ནི་བྱེད་འགྱུར་ཞིང༌། །ཁ་ཡི་པདྨའི་འཛུམ་དང་བཅས། །ཅུང་ཟད་དམར་བའི་མཆེ་བ་འཆང༌། །ཀུན་ད་ལྟར་དཀར་སོ་ཡི་ཕྲེང༌། །དཔལ་ལྡན་ཁྲག་འཐུང་རྣལ་འབྱོར་ཆེ། །སེམས་ཅན་དགྲོལ་བ་རྨད་དུ་བྱུང༌། །དེ་ལ་སོགས་པའི་གར་གྱིས་ནི། །བགེགས་ཀུན་མ་ལུས་བསྐྲད་པར་བྱ། །ཧཱུཾ་བཞི་ལ་སོགས་གསང་སྔགས་ཀྱིས། །ཕུར་བུ་བསྐྱེད་པའི་ཆོ་ག་བྱ། །ཨོཾ་བཛྲ་ཀཱི་ལི་ཀཱི་ལ་ཡ། །བྱིན་གྱིས་བརླབས་པ་བཟླས་རྫོགས་ནས། །གྷ་གྷ་ལ་སོགས་སྔགས་ཀྱིས་གདབ། །རྡོ་རྗེའི་རབ་དྲ་བ་སྤྲུལ། །དཀྱིལ་འཁོར་གྱི་ནི་ས་ཡི་ཆ། །མཉེས་དང་ཡང་དག་ལྡན་གྱུར་པ། །བགེགས་རྣམས་བསལ་བའི་ཆོ་གའོ། །སངས་རྒྱས་ཐོད་པའི་རྣལ་འབྱོར་གྱིས། །ལག་པས་ལ་ཕབ་བྱས་ཏེ། །ཧཱུཾ་ཁཾ་ཞེས་ནི་བརྗོད་པ་ཡིས། །རྣམ་དག་ནམ་མཁའ་བསམས་ནས་ནི། །ཧཱུཾ་ལཾ་སྔགས་ཀྱིས་གསེར་གྱི་ནི། །ས་གཞི་རྡོ་རྗེར་ལྡན་པར་བསམ། །ཨོཾ་མེ་དི་ནཱི་བཛྲའི་བྷ་བ་བནྡྷ་ཧཱུཾ། རྙེད་པའི་ས་ཕྱོགས་དེ་ཉིད་དུ། །ཞི་དང་དྲག་པོ་མེ་ཡི་ལས། །ཡང་དག་སེལ་བར་བྱས་ནས་ནི། །ལས་ཀྱི་ཁྱད་པར་མཁས་པ་ཡིས། །ལྟོ་འཕྱེའི་རིམ་པ་ཤེས་བྱས་ལ། །གཡས་
༄། །སྐོར་ལྟོ་ནས་བརྐོ་བར་བྱ། །གསེག་མ་མགལ་དུ་མ་གྱོ་མོ་དང༌། །ཕུབ་མ་རུས་པ་རོ་རྣམས་བསལ། །ས་དེ་མི་འཆི་བཅུ་ཕྱེད་དང༌། །དྲི་ཞིམ་ཆུ་ལ་ཧཱུཾ་བཟླས་དགང༌། །ཚད་ལྡན་འཐས་པར་བཅགས་སྟེང་དུ། །ཆུ་སོགས་པ་ལང་ལས་བྱུང་དང༌། །བདུད་རྩི་ལྔ་ཡིས་སྙོམས་པར་བྱུག །མཁའ་འགྲོ་མ་རྣམས་མཉེས་པར་འགྱུར། །ཤར་དང་བྱང་དུ་གཞོལ་བས་ནི། །སྔགས་རྣམས་ཀྱི་ནི་དངོས་གྲུབ་འགྱུར། །དབུས་སུ་མཐོ་བས་རྒྱལ་སྲིད་དམ། །རིག་པ་འཛིན་པའི་གནས་དག་ཐོབ། །བྱང་དུ་མཐོ་བས་འཆི་འགྱུར་རམ། །ནོར་རྣམས་འཇིག་པར་འགྱུར་བསྐྱེད། །ཇི་སྐད་བཤད་པའི་ཤར་མཐོ་བས། །མྱུར་དུ་རིགས་རྣམས་ཟད་པར་བྱེད། །དབུས་སུ་དམའ་བའི་རང་བཞིན་གང༌། །སྒྲུབ་པ་པོ་ནི་འཇོམས་དང་ལྡན། །མཚན་ཉིད་གསལ་བར་ཤེས་པར་དཔྱད། །དེ་ལྟར་འདུས་བྱས་ས་དེ་ལ། །སངས་རྒྱས་ཐོད་པའི་རྣལ་འབྱོར་གྱིས། །བདུད་རྩི་ལྔ་ཡི་ཆུས་བྲན་ཞིང༌། །ཨོཾ་ཧཱུཾ་དྷྲི་ཧཱུཾ་ཁཾ་ཧཱུཾ་ཏིཥྛ་བཛྲ་ས་མ་ཡ་ཨ་དྷིཥྛ་ཡ་ཏེ། ཞེས་བརྗོད་ས་དེ་སྟོང་པར་བསྒོམ། །ས་སྦྱང་དུས་སུ་འབྱུང་ཆེན་ལ། །གཏོར་མ་རབ་ཏུ་སྦྱིན་པར་བྱ། །ཨོཾ་ཧེ་རུ་ཀ་བཛྲ་ས་མ་ཡཱ་དྷི། སརྦ་དུཥྚ་ན་ས་མ་ཡ་མུ་དྲ། པྲ་བྷཉྫ་ཀ་ཧཱུཾ། རུ་ལུ་རུ་ལུ་བྷྱོ་ཧཱུཾ་ཧཱུཾ་ཕཊ། དེ་ནས་ལེགས་སྦྱང་དྲི་ཞིམ་ཆུ། །བདུད་རྩི་ལྔ་ལྡན་བྱུགས་པའི་སར། །ཐིག་ལེ་བྲི་ཞིང་མེ་ཏོག་དགོད། །ཁྲག་འཐུང་རྒྱལ་པོ་ལ་སོགས་པ། །ཉི་ཤུ་རྩ་ལྔའི་འཁོར་ལོ་བསྐྱེད། །ཨོཾ་ཧེཾ་ལ་སོགས་གོ་བགོ་ཞིང༌། །གནས་གསུམ་བྱིན་གྱིས་བརླབས་རྗེས་སུ། །ཡེ་ཤེས་འཁོར་ལོས་བྱིན་བརླབས་ནས། །དབང་བསྐུར་རྒྱས་གདབ་རིམ་བྱ་བ། །མཆོད་དང་བདུད་རྩིས་ཚིམ་བྱ་ཞིང༌། །བསྟོད་པས་མགོན་པོ་མཉེས་བྱས་ལ། །བཏུང་དེ་གསོལ་བ་གདབ་པར་བྱ། །གཉིས་མེད་ཡེ་ཤེས་ལས་བྱུང་བའི། །ཁྱབ་བདག་དངོས་ཀུན་བདག་ཅག་ཉིད། །སྟོན་པའི་གཙོ་བོ་ཁྲག་འཐུང་དཔལ། །སྣ་ཚོགས་སྡེ་མར་ཡང་དག་ལྡན། །ཕྱོགས་མཚམས་རྣམས་ཀྱི་མཁའ་འགྲོ་མ། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་རྣམས་ལ་ཕན་པ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པ། །ནང་
༄། །པར་དཀྱིལ་འཁོར་འདྲི་བར་འཚལ། །རྗེས་སུ་བརྩེ་བར་ཉེར་དགོངས་ཏེ། །ཀུན་གྱིས་བྱིན་གྱིས་བརླབ་ཏུ་གསོལ། །ལན་གསུམ་གསོལ་བ་གདབ་རྗེས་སུ། །དྲི་ཞིམ་མེ་ཏོག་ཕྲེང་ལྡན་དང༌། །ཐོད་པ་བདུད་རྩི་ལྔ་ལྡན་པས། །དཔལ་ལྡན་ཁྲག་འཐུང་ལ་སོགས་ཀུན། །བདུག་སྤོས་ལ་སོགས་ལེགས་ཕུལ་ནས། །དེ་འོག་རང་གི་དབུགས་དབྱུང་བ། །ཆོ་གས་བརྟུལ་ཞུགས་ཀུན་བྱའོ། །ལྷ་ལ་གསོལ་གདབ་ཆོ་གའོ། །དེ་འོག་གསེར་དངུལ་ལ་སོགས་རིན་ཆེན་ལས་བྱུང་བའི། །ཞབས་ཕྲ་ལྟོ་ཆེ་མགྲིན་རིང་མཆུ་ཕྲ་ཉི་ཤུ་དྲུག །དྲི་ཞིམ་དཀར་རྩིས་བྱུགས་ཤིང་ནག་ནོག་ར་རི་མེད། །པདྨའི་ལྟེ་བར་རང་མཚན་མ་རྣམས་ཀྱིས་མཚན། །རས་དཀར་ཟུང་རེས་བུམ་པའི་མགུལ་དུ་བཅིང་བར་བྱ། །ཆུ་ནི་འོ་མ་བསྲེས་པ་ཆང་དང་བཅས་པ་དང༌། །རིན་ཆེན་རྣམ་པ་ལྔ་གཞུག་ཅིང༌། །བུམ་པ་ཀུན་ནས་འབྲུ་ལྔ་དང༌། །སྨན་དང་བདུད་རྩི་ཤ་ལྔར་བཅས། །རྣམ་པར་རྒྱལ་བའི་ནང་བཅུག་སྟེ། །ཨ་མྲའི་ལྕུག་མས་དགབ་པར་བྱ། །བགེགས་བསྐྲད་བུམ་པ་བྱིན་བརླབས་ནས། །དེ་རྗེས་སློབ་དཔོན་བློ་ཆེན་གྱིས། །སངས་རྒྱས་ཐོད་པའི་སྦྱོར་དང་ལྡན། །བུམ་པའི་ནང་དུ་བསྒོམ་བྱ་བ། །པདྨའི་སྟེང་དུ་ཉི་མ་སྟེ། །དེ་སྟེང་རོ་ཡིས་ཡང་དག་མནན། །དེ་སྟེང་ཡེ་ཤེས་ལྔ་ལས་བྱུང༌། །གཙོ་བོ་ཡབ་ཡུམ་བསྒོམ་པར་བྱ། །དེ་ནས་བུམ་པ་གཞན་དག་ཏུ། །ཡུད་ཙམ་གྱིས་ནི་ལྷ་མོ་རྣམས། །རབ་ཏུ་གསལ་བར་བསྐྱེད་པར་བྱ། །ལས་ཀུན་བྱེད་པའི་བུམ་པ་ལ། །སྣ་ཚོགས་རྡོ་རྗེས་མཚན་བྱས་ནས། །ཆོ་ག་གསུམ་གྱིས་བདུད་རྩི་འཁྱིལ། །བསྐྱེད་པའི་ཆོ་ག་རྫོགས་པར་བྱ། །དཀྱིལ་འཁོར་ཚུལ་དུ་བཀོད་བྱས་ལ། །གོ་ཆ་བགོས་དང་གནས་གསུམ་བརླབ། །དགུག་སོགས་དབང་བསྐུར་ལེགས་ཟིན་ནས། །ཐོད་པའི་མཆོད་ཡོན་སྔོན་འགྲོ་བས། །སྤོས་སོགས་ལྷ་བཤོས་དག་གི་བར། །ལྷ་ཡི་གྲངས་དང་མཉམ་པར་དབུལ། །ནང་དང་གསང་བར་བཅས་པས་ཀྱང༌། །བུམ་པའི་ལྷ་རྣམས་མཉེས་པར་བྱ། །དེ་བཞིན་སྔར་གསུངས་ལྷ་ཚོགས་ལའང༌། །མཆོད་པའི་ཆོ་ག་རབ་ཏུ་བྱ། །དེ་འོག་བཟླས་པ་དབུལ་བྱ་བ། །རྣམ་པར་རྒྱལ་བའི་བུམ་པ་ལ། །སྙིང་པོ་དག་གིས་མཉེས་པར་བྱ། །
༄། །དེ་ལས་གཞན་པ་རྣམས་ལ་ནི། །ཉི་མའི་སྙིང་པོ་རབ་ཏུ་སྦྱར། །ལས་ཀུན་བྱེད་པ་རང་སྔགས་སོ། །གསོལ་གདབ་གཞན་དང་མཚུངས་པར་བྱ། །དེ་ལྟར་ཆོ་གའི་ཚུལ་དག་ནི། །བུམ་པ་ལྷག་པར་གནས་པའོ། །དེ་ནས་སློབ་མའི་གཙོ་བོ་སོགས། །ལྷག་གནས་མཆོད་པར་བྱ་བའི་ཕྱིར། །སྔར་བཤད་མཚན་ཉིད་དང་ལྡན་ཚོགས། །ལུས་གཙང་གོས་གཙང་གྱོན་པ་དང༌། །མེ་ཏོག་སྙིམ་པ་རབ་བཀང་ནས། །མཛེས་པའི་མཎྜལ་ཕུལ་རྗེས་སུ། །འདོད་པའི་གསོལ་གདབ་གུས་པར་བརྗོད། །དགའ་ཆེན་ཁྱོད་བདག་སྟོན་པ་པོ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །དེ་ལྟར་གསོལ་འདེབས་སློབ་མ་རྣམས། །རང་སྙིང་འོད་ཀྱིས་བུར་བྱས་ལ། །ཚིག་ནི་འདི་སྐད་བསྒྲག་པར་བྱ། །བུ་ཚུར་ཐེག་པ་ཆེན་པོ་ལ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་པའི་ཆོ་ག་ནི། །ཁྱོད་ལ་ཡང་དག་བཤད་པར་བྱ། །རྫོགས་པའི་སངས་རྒྱས་གང་འདས་དང༌། །དེ་བཞིན་གང་དག་མ་བྱོན་པ། །དེ་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་ཀུན། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྤྱོད་པ་མཉམ་མེད་དེ། །སྐྱོབ་པ་དཔལ་ལྡན་ཧེ་རུ་ཀས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །གོང་ནས་གོང་གི་སྡོམ་པ་ནི། །བུ་ཁྱོད་ཀྱིས་ནི་བསྲུང་བྱ་སྟེ། གྲོལ་བའི་རྒྱུ་ནི་དེ་ལས་གཞན། །ཐབས་ནི་གང་ཡང་ཡོད་མ་ཡིན། །མཁའ་འགྲོའི་ཡན་ལག་ལས་བྱུང་བའི། །བཤགས་པ་ལ་སོགས་སློབ་མ་ལ། །བྱང་ཆུབ་ཐོབ་པའི་དོན་གྱི་ཕྱིར། །ཆོ་ག་ཐམས་ཅད་ཚོགས་པར་སྤྱད། །བདག་གིས་སྡིག་
༄། །པ་བགྱིས་པ་དང༌། །བགྱིད་དུ་སྩལ་དང་ཡི་རང་དང༌། །སངས་རྒྱས་སྤྱན་སྔར་མཆིས་ནས་ནི། །མ་ལུས་སོ་སོར་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང༌། །རང་རྒྱལ་དགྲ་བཅོམ་འགྲོ་རྣམས་ཀྱི། །བསྒོམ་དང་བཟླས་བརྗོད་བསོད་ནམས་རྣམས། །ཚོགས་དག་ལ་ནི་ཡི་རང་ངོ༌། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །སངས་རྒྱས་ཐོད་པ་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའི་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །རྟག་ཏུ་བདག་ནི་སྐྱབས་སུ་མཆི། །དཔལ་ལྡན་ཁྲག་འཐུང་དཔའ་བོ་དང༌། །རྣལ་འབྱོར་མ་དང་སྣང་མཛད་སོགས། །བྱང་ཆུབ་སེམས་དཔའ་དཔག་མེད་སོགས། །ཐམས་ཅད་བདག་ལ་དགོངས་སུ་གསོལ། །ཆེ་གེ་དུས་འདི་ནས་བཟུང་ནས། །ཇི་སྲིད་གཉིས་མེད་ལ་གནས་པར། །དེ་ཡི་ཚངས་སྤྱོད་གཉིས་མེད་པ། །བྱང་ཆུབ་མཆོག་སེམས་བསྐྱེད་པར་བགྱི། །བདག་གི་དགེ་བའི་ལས་རྣམས་ཀྱིས། །སངས་རྒྱས་མྱུར་དུ་བསྒྲུབ་བྱས་ཏེ། སེམས་ཅན་འཁོར་བའི་རྒྱ་མཚོ་ལས། །བླ་མེད་གནས་སུ་བསྒྲལ་བར་བགྱི། །ཡུད་ཙམ་སློབ་མ་ལྷར་བྱས་ནས། །གནས་གསུམ་ཐིག་ལེ་བཀོད་པའི་སར། །རྡོ་རྗེས་མཚན་པའི་འབྲུ་གསུམ་བསྒོམ། །སྐུ་གསུང་ཐུགས་ཀྱི་མཚན་མར་གྱུར། །དེ་དཀྱིལ་འབྲུ་གསུམ་ནུས་མཆོག་གིས། །བཀུག་བསྟིམ་ལྷ་རུ་གསལ་བྱས་ལ། །སྤྱི་བོར་མེ་ཏོག་མདུན་དུ་སྤོས། །དྲི་དང་མར་མེ་སྙིང་གར་ཏེ། །ལྷ་བཤོས་ཞལ་དུ་སྙན་ལ་སྒྲའོ། །ཨུ་དུ་མྦཱ་ར་ཨ་ཤྭ་ད་སོགས། །སོར་བཅུ་གཉིས་ཀྱི་ཚད་ཙམ་ལ། །སྐྱོན་བལ་མེ་ཏོག་རྩེར་བཅིངས་སྦྱིན། །ཤར་རམ་བྱང་དུ་ཁ་བལྟས་ཏེ། །མི་སྨྲ་བར་ནི་སོ་ཤིང་བཅའ། །བ་ཀོ་ཙམ་ལྕི་བྱུགས་པའི་སར། །སོ་ཤིང་མདུན་ནི་དྲང་པོར་དོར། །དེ་ཚེར་རང་ལ་བལྟ་བ་དང༌། །རྩེ་མོ་གྱེན་དུ་འགྲེང་གྱུར་ན། །དངོས་གྲུབ་མཆོག་ཏུ་དེ་བཤད་དོ། །མཚམས་དང་བྱང་དུ་བལྟས་པ་ན། །འཇིག་རྟེན་པ་ཡི་དངོས་གྲུབ་ཐོབ། །དེ་བཞིན་གཞན་དུ་ཁ་བལྟས་ན། །དངོས་གྲུབ་འབྲིང་བོ་
༄། །ཉིད་དུ་འགྱུར། །སོ་ཤིང་བར་བ་བརྒྱ་ཞིག་ལ། །གལ་ཏེ་ཐུར་དུ་ཁ་བལྟས་ན། །དེ་ནི་ངེས་པར་ས་འོག་གི །དངོས་གྲུབ་དག་ལ་ཐེ་ཚོམ་མེད། །ཨོཾ་ཧྲཱིཿ་ལ་སོགས་གསང་སྔགས་ཀྱིས། །སྐྱོར་མོ་བསྡམས་པའི་ཆུ་བླུད་བྱ། །འཇིག་རྟེན་དུ་ནི་ཀུན་མཁྱེན་ཀྱང༌། །ཨུ་དུམྦཱ་རི་མེ་ཏོག་ལྟར། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ༌། །གསང་སྔགས་སྤྱོད་པའི་ཚུལ་འདི་ནི། །དེ་བས་ཀྱང་ནི་རྙེད་དཀའ་སྟེ། །གང་གིས་སེམས་ཅན་མཉམ་མེད་དོན། །བླ་ན་མེད་པར་བྱེད་ནུས་པ། །གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་སངས་རྒྱས་ཐོབ་བྱེད་པའོ། །དང་པོ་བསྐལ་པ་གྲངས་མེད་ནས། །བསགས་པའི་སྡིག་པ་གང་དང་གང༌། །དེ་ཀུན་ཟད་པར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །དེ་རྗེས་འབྲུ་གསུམ་སྔགས་མཆོག་གིས། །ཀུ་ཤ་བྱིན་གྱིས་བརླབ་བྱས་ཏེ། །སྔས་དང་སྟན་དུ་གདིང་བར་བྱ། །གཙོ་བོའི་སྙིང་པོ་རབ་བཟླས་པའི། །སྲད་བུ་དམར་ལ་མདུད་པ་གསུམ། །བྱ་སྟེ་དཔུང་པ་གཡོན་པར་བཅིང༌། །སེང་གེའི་ཉལ་སྟངས་བསྟན་བྱས་ཏེ། །ཀུ་ཤའི་སྟན་ལ་ཁྱོད་ཉོལ་ལ། །ནང་པར་བཞིན་བཟངས་རྣམས་ལོངས་ཤིག །སང་གི་ནང་པར་ཁྱོད་རྣམས་ཀྱིས། །དཔལ་ལྡན་སངས་རྒྱས་ཐོད་པ་ཡི། །གྲོང་ཁྱེར་ཆེན་པོ་མཐོང་ཞེས་བརྗོད། །དེ་ནས་རང་སྙིང་ས་བོན་ལས། །སྔགས་ཞུགས་མདུན་དུ་ལྷ་རྣམས་སྤྲུལ། །ཕྱི་ནང་བདག་ཉིད་ཅན་གྱིས་ཀྱང༌། །དཔལ་ལྡན་ཁྲག་འཐུང་ལ་སོགས་པའི། །འཁོར་ལོ་རྣམས་ནི་རབ་ཏུ་མཆོད། །འབྱུང་པོ་རྣམས་ཀྱང་མགུ་བར་བྱ། །ནང་བར་གྱི་ནི་དུས་དག་ཏུ། །རྨི་ལམ་མཚན་མ་དྲི་བར་བྱ། །དེས་ཀྱང་མཚན་མ་གང་མཐོང་རྣམས། །འཛེམ་པ་མེད་པར་སྨྲ་བར་བྱ། །གལ་ཏེ་བཟང་ན་དངོས་གྲུབ་བསྟེན། །ངན་ན་བགེགས་རྣམས་བཟློག་པར་བྱ། །སློབ་མ་ལྷག་གནས་ཆོ་གའོ། །དེ་ལྟར་ལྷག་པར་གནས་བྱས་ནས། །ཤེས་རབ་ཅན་གྱིས་ནང་པར་དུ། །ཐིག་དག་གདབ་པར་བྱ་བའི་ཕྱིར། །སློབ་དཔོན་མཚན་ཉིད་སྔར་གསུངས་པས། །ཐོད་པ་ལས་བྱས་སྤྱི་བོར་འཆང༌། །ཡན་ལག་ཐལ་བས་རྣམ་པར་བྱུགས། །ལུས་ལ་ཕྱག་རྒྱ་དྲུག་ལ་སོགས། །ཁ་ཊྭཱམ་ག་ནི་ལག་ན་ཐོགས། །
༄། །བརྒྱ་ཕྱེད་ཕྲིང་བས་རྣམ་པར་བརྒྱན། །ཧེ་རུ་ཀ་དཔལ་རང་བྱས་ཏེ། །འཁོར་ལ་བལྟས་པས་སྙིང་གར་དགོད། །བདག་ཉིད་གསལ་བར་གོ་གྱོན་ཅིང༌། །སྔགས་དང་ཕྱག་རྒྱས་བརྒྱན་ནས་ནི། །དངོས་གྲུབ་མཆོག་ནི་སྩོལ་བ་ཡི། །དཀྱིལ་འཁོར་འཇིགས་པ་བྲི་བར་བྱ། །ག་མི་ཏ་ཀ་ལ་སོགས་པས། །ན་ར་རུ་དྷི་རས་སྤངས་པས། །ཤེས་རབ་དཀྱིལ་འཁོར་ཉིས་འགྱུར་སོགས། །ཚད་ལྡན་སྲང་བུ་བཀལ་བྱས་ནས། །ཁྲག་འཐུང་གྲོང་ཁྱེར་ཉམས་དགའ་བ། །ཇི་སྲིད་མཐོ་ལྡན་བརྩམས་ནས། །བཅུ་གཉིས་བཅུ་དྲུག་མཐར་ཐུག་པར། །རྣལ་འབྱོར་དབང་ཕྱུག་དམ་པ་ཡི། །ཤེས་རབ་ཅན་གྱིས་ཐིག་གདབ་སྟེ། །སྲད་བུ་ཁ་དོག་སྣ་ལྔ་རུ། །རྣམ་པར་ཕྱེ་སྟེ་བཙོས་ནས་ནི། །ཐོད་པའི་སྣོད་གཞག་དག་མོས་པས། །ས་བོན་ལས་བྱུང་རིགས་ལྔར་བསྐྱེད། །དཔལ་ལྡན་ཁྲག་འཐུང་ལ་སོགས་ཀུན། །སྤྱན་དྲངས་ནས་ནི་དེ་རུ་གཞུག །སངས་རྒྱས་ཀུན་གྱི་མཁའ་འགྲོ་མ། །གཙོ་བོའི་སྔགས་དང་གཉིས་མེད་པས། །པདྨའི་སྣོད་ལ་ལེགས་གཞག་ཅིང༌། །རུང་བྱུང་མེ་ཏོག་དག་གིས་མཆོད། །ཡེ་ཤེས་སྐུ་པ་སྐྱེད་བྱས་ནས་སུ། །མཁས་པས་ཐིག་ནི་གདབ་བྱ་བ། །སྔོན་ཆད་ཆོ་ག་མཐོང་བ་ཡིས། །ཡེ་ཤེས་ཐིག་སྐུད་གདབ་བྱའི་ཕྱིར། །བླ་མས་ཁུ་ཚུར་གྱིས་བཟུང་ཞིང༌། །གཅིག་ནི་མཐའ་རུ་ཤི་ཥ་ཡིས། །དབུགས་འབྱིན་འགྲོ་བར་བསམས་ནས་སུ། །ཐིག་གཉིས་དག་ནི་ལེགས་པར་བསྒྲིལ། །གཉིས་སུ་མེད་པའི་གསང་སྔགས་ཀྱིས་།བསྒྲིལ་ནས་ཐིག་ནི་དེར་བྱའོ། །ཛྫ་ཛྫ་ཞེས་པས་ལེགས་བཏང་ཞིང༌། །བློ་ལྡན་རྒྱབ་ནས་འགྲེང་བར་བྱ། །དང་པོ་བྱང་དང་ལྷོ་ཡི་ནི། །སྒོ་དབུས་ཇི་བཞིན་གནས་ནས་སུ། །ལྷོ་རུ་མངོན་པར་ཕྱོགས་ནས་སུ། །དེ་བཞིན་ནམ་མཁའི་ཐིག་གདབ་བོ། །ནུབ་དང་ཤར་ནས་གཉིས་པ་གདབ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ། དེ་རྗེས་གཡོན་པའི་ཁུ་ཚུར་གྱིས། །ལྟེ་བའི་ཕྱོགས་སུ་བཟུང་ནས་ཀྱང༌། །ཤར་དུ་བལྟས་ནས་འགྲོ་མགོན་གྱིས། །ས་ལ་ཚངས་པའི་ཐིག་གཉིས་གདབ། །ཐིག་སྐུད་དག་ནི་འདེབས་པའི་ཚེ། །འཇིག་རྟེན་ཁམས་ནི་མ་ལུས་པའི། །སངས་རྒྱས་ལ་སོགས་འགྲོ་བའི་དོན། །ཁྱེད་ཀྱི་
༄། །དུས་ནི་ཡིན་ཞེས་བསྐུལ། །བླ་མ་ཉིད་དམ་གྲོགས་མཆོག་གིས། །གཡོན་ནས་བསྐོར་བ་ཤིན་ཏུ་བརྩོན། །རླུང་དང་དབང་ལྡན་ཕྱོགས་གནས་དང༌། །མེ་དང་བདེན་བྲལ་ཁར་གནས་ཏེ། །བླ་མས་མཚམས་སུ་ཐིག་གཉིས་གདབ། །བྱང་ནས་མངོན་པར་བལྟས་ནས་ནི། །བདེན་བྲལ་དུ་ནི་སྲད་བུ་སྤྲིང༌། །མེ་ཡི་ཕྱོགས་སུ་གནས་པ་དང༌། །དབང་ལྡན་ཕྱོགས་སུ་གནས་པ་ཡིས། །ཤར་གྱི་ཐིག་ནི་གང་ཡིན་པ། །བརྟུལ་ཞུགས་ཅན་གྱིས་ཆོ་གས་གདབ། །ཕྱོགས་སྐོར་ལ་སོགས་དབྱེ་ཤེས་པ། །ཀུན་གྱི་ཐིག་ནི་ཐམས་ཅད་ཀྱང༌། །བླ་མའི་མན་ངག་རིམ་ཐོབ་པས། །བླ་མ་མཁས་པས་ཐིག་གདབ་པོ། །བླ་མ་མེར་གནས་བདེན་བྲལ་དང༌། །བླ་མ་རླུང་དང་དབང་ལྡན་དུ། །གནས་བྱས་ལྷོ་བྱང་ཐིག་གདབ་པོ། །རང་མེ་རི་བོར་བྱས་པའི། །ཆ་ལྡན་བཅུ་དྲུག་རབ་དབྱེ་བྱ། །དང་པོ་དྲུག་ནི་ནང་དོར་ནས། །གཉིས་གསུམ་བདུན་པ་བཞི་བཞིར་དབྱེ། །བཞི་པ་དེ་ཞིན་ལྔ་དང་བརྒྱད། །དབུས་མ་དོར་བའི་ཆོ་ག་བྱ། །གཙོ་བོའི་ཕོ་བྲང་ཆ་ཆེན་གཅིག །ལྟེ་བ་ཟེའུ་འབྲུ་ལྡན་པར་གདབ། །པདྨ་རིམ་གསུམ་འདབ་མ་བརྒྱད། །ཆ་ཆེན་གསུམ་གྱིས་ཡིན་ཏེ། །ཆ་ཕྲན་གསུམ་གསུམ་པདྨ་སྟེ། །ཆ་ཕྲེང་རེ་རེ་རྡོ་རྗེའི་ཕྲེང༌། །སྒོ་ནི་འཁོར་ལོའི་བརྒྱད་ཆ་སྟེ། །ཁྱམས་ནི་དེ་ཡི་ཕྱེད་དུ་བྱ། །སྒོ་ཁྱུད་དག་ནི་སྒོ་ཡི་ཚད། །ཚོན་སྣ་ལྔ་ཡང་དེ་ཡི་ཕྱེད། །རིན་ཆེན་ཕ་གུ་ཚོན་གྱི་ཚད། །ཉིས་འགྱུར་དྲ་བ་དྲ་ཕྱེད་ཡིན། །སྒོ་ཡི་སུམ་འགྱུར་རྟ་བབས་ཏེ། །བ་དན་དྲིལ་བུ་འོད་ཟེར་གྱིས། །བརྒྱན་པར་ཐམས་ཅད་ཐིག་གདབ་ཅིང༌། །གདུགས་དང་འཁོར་ལོ་རི་དགས་བཅས། །ཕྱོགས་སུ་རྡོ་རྗེ་རྒྱ་གྲམ་མཛེས། །ཕྱི་རྒྱ་རབ་མེ་རི་སྟེ། །བརྒྱད་དུ་མ་གཏོགས་ཆ་ཆེན་གཅིག །རིམ་གཉིས་ཐིག་ནི་གདབ་པར་བྱ། །དང་པོ་དཀར་རྩི་ཐིག་སོགས་ལས། །རིམ་བཞིན་ཐིག་གདབ་དེས་པར་བྱ། །དེ་སྟེང་ཡེ་ཤེས་ཐིག་བཏབ་པས། །ཀུན་ནས་ཡོངས་སུ་བརྐྱང་བར་བྱ། །རྡུལ་ཚོན་སྔོན་པོ་རོ་བསྲེགས་པའི། །སོལ་བ་ནག་པོས་བྱ་བ་ཡིན། །རྡུལ་ཚོན་དམར་པོ་དུར་ཁྲོད་ཀྱི། །སོ་ཕག་ལས་ནི་བྱ་བར་བཤད། །དེ་བཞིན་རྡུལ་ཚོན་ལྗང་གུ་ནི། །ནིམ་པའི་འདབ་མ་དག་ལས་སོ། །རྡུལ་ཚོན་དཀར་པོའི་རྒྱུ་དག་ནི། །མི་རུས་ཕྱེ་མ་དག་ལས་སོ། །རྡུལ་ཚོན་
༄། །སེར་པོའི་རྒྱུ་དག་ནི། །ཡུང་བའི་ཕྱེ་མ་དག་ལས་བྱའོ། །དེ་ལྟར་རྡུལ་ཚོན་ལྔ་རྣམས་ཀྱིས། །མཁས་པས་དཀྱིལ་འཁོར་བྲི་བར་བྱ། །དེ་ལྟར་དུར་ཁྲོད་ས་རྣམས་ནི། །དབང་ཕྱུག་ཆེན་པོའི་རྒྱན་ཡིན་ཕྱིར། །ལྔ་པོ་ལྔར་ནི་རབ་སྤྲུལ་བྱ། །ཡེ་ཤེས་ཐིག་གི་ཆོ་ག་བཞིན། །བསྐྱེད་པའི་ལྷ་སོགས་རྒྱས་པར་བྱ། །སེམས་དག་ནང་པར་ལངས་ནས་ནི། །དཀྱིལ་འཁོར་ལས་ནི་རབ་ཏུ་བརྩམ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་གྲོལ་བྱེད། །སངས་རྒྱས་ཐོད་པ་རྒྱལ་ཆེན་པོ། །དེ་བཞིན་གཤེགས་པ་ཀུན་གྱི་གནས། །ཉེས་པ་མ་ལུས་རབ་ཞི་པའི། །ཚོན་གྱི་ལས་ལ་ཡང་དག་འཇུག །སློབ་དཔོན་གྱིས་ནི་དབང་པོར་ནི། །གཡོན་པའི་ཁུ་ཚུར་སར་གཞག་སྟེ། །དབང་ལྡན་མཚམས་ནས་བརྩམས་ནས་སུ། །རི་མོ་ལྔ་པ་རྒྱབ་ཏུ་བྲི། །ཚོན་དང་འདྲེ་བའི་ལས་བྱེད་པ། །དམ་ཚིག་སྡོམ་པ་ལྡན་པར་སྦྱིན། །མཐེའུ་ཆུང་དང་མཐེ་བོའི་དཔངས། །དྲངས་ཏེ་མཐོ་བར་ཡང་དག་བྲི། །གཡས་སུ་བསྐོར་ཞིང་རྒྱུན་མི་བཅད། །སྔོ་ཞིང་དཀར་བ་སེར་བ་དང༌། །པདྨ་རཱ་ག་མ་རྒད་བཞིན། །རབ་ཏུ་བསྒྲིམས་ཏེ་བྲི་བར་བྱ། །ཕྱི་ནས་ཀུན་དུ་སློབ་མས་སོ། །གལ་ཏེ་རི་མོ་མི་མཉམ་ཞིང༌། །ཡོ་ཞིང་དམའ་དང་ཚད་པ་ཡང༌། །རི་མོ་དམའ་བས་མི་འགྲུབ་ཅིང༌། །ཡོན་པོས་གདུང་བ་སྐྱེད་པར་བྱེད། །ཆད་པས་སློབ་དཔོན་སློབ་མ་དག །གཉིས་ཀ་འཆི་བར་ཤེས་པར་བྱ། །དེ་ཕྱིར་མཚན་ལྡན་རི་མོ་ནི། །མཚན་ཉིད་ཀུན་གྱིས་ལེགས་པར་མཚན། །ཕོ་བྲང་རིམ་གསུམ་ཟླུམ་པོ་ལ། །རྡོ་རྗེ་གསུམ་གྱིས་ཡོངས་སུ་བསྐོར། །ཕྱི་རོལ་གྲུ་བཞི་ལྷམ་པ་ལ། །སྒོ་བཞིར་རྟ་བབས་རྣམས་ཀྱིས་བརྒྱན། །བ་དན་རྣམ་པ་བཞི་ཡིས་བརྒྱན། །དྲ་བ་དྲ་བ་ཕྱེད་པས་སྤྲས། །ཕྱི་རོལ་ཁ་ཁྱེར་དག་པ་དང༌། །རིན་ཆེན་ཕ་གུར་ཡང་དག་ལྡན། །པདྨ་ཉི་ཤུ་རྩ་ལྔ་ཡི། །གདན་རྣམས་ཀྱིས་ནི་ཤིན་ཏུ་མཛེས། །དེ་ལ་རིམ་པ་དང་པོ་ནི། །འདབ་བརྒྱད་སྣ་ཚོགས་ལྟེ་བར་བཅས། །པདྨའི་ལྟེ་བ་སྔོན་པོ་བྲི། །དཀར་སེར་དམར་ཞིང་གནག་པ་སྟེ། །ཤར་དང་བྱང་ཕྱོགས་ཕྱོགས་ཀྱི་རྡུལ། །མཚམས་བཞིར་མཛེས་པའི་ཁ་དོག་ཅན། །བདུད་རྩིས་གང་བའི་ཐོད་པས་མཛེས། །རྡོ་རྗེ་ཕྲེང་བ་
༄། །སྔོན་པོས་བརྒྱན། །དེ་འོག་རིམ་པ་གཉིས་པ་ནི། །འཁོར་ལོ་རྩིབས་བརྒྱད་དམར་པོ་ལ། །རྩིབས་མཆན་ལྗང་གུས་ཡང་དག་བྲི། །པདྨ་དམར་པོའི་ཕྲེང་བས་བརྒྱན། །རིམ་གསུམ་པ་ཡི་འཁོར་ལོ་ནི། །རྩིབས་བརྒྱད་ཁ་དོག་དཀར་པོ་ལ། །རྩིབས་མཆན་ཁ་དོག་ནག་པོ་བྲི། །དེ་ཡང་རྡོ་རྗེ་རབས་བརྒྱན། །དཀར་བའི་ཚོན་གྱིས་ལེགས་པའོ། །སྒོ་བཞིར་རིགས་ཀྱི་རིམ་ཇི་བཞིན། །སྒོ་མ་བཞི་ནི་ངེས་པར་གནས། །ཕོ་བྲང་དབུས་ཀྱི་ལྟེ་བ་ལ། །རོ་སྟེང་རྡོ་རྗེ་ནག་པོ་དང༌། །གྲི་གུག་དམར་པོ་ལེགས་པར་དགོད། །པད་འདབ་འཁོར་ལོ་རྣམས་ཀྱི་སྟེང༌། །ཉི་མའི་དཀྱིལ་འཁོར་ལ་གནས་པའི། །གྲི་གུག་ལྷ་མོའི་མདོག་བཞིན་བྲི། །སྒོ་བཞི་རྣམས་སུའང་དེ་བཞིན་ནོ། །དེ་དག་ཚོན་གྱི་ཆོ་གའོ། །དེ་ལྟར་ཡིད་འོང་སྣ་ཚོགས་པའི། །ལྷ་རྣམས་གཞལ་ཡས་ཁང་མཛེས་པ། །དེ་སྐད་གསུངས་པ་རྫོགས་པར་བྱ། །སྣ་ཚོགས་གོས་དང་རྒྱལ་མཚན་དང༌། །བླ་རེ་ལ་སོགས་བྲེ་བ་དང༌། །སྤོས་དང་མེ་ཏོག་ལ་སོགས་པའི། །མཆོད་པའི་རྒྱན་གྱིས་རྣམ་པར་བརྒྱན། །རྒྱན་ཆ་ཆེ་ལྡན་བླ་མ་ཡིས། །རང་གི་རྣལ་འབྱོར་རྫོགས་བྱས་ལ། །བདེ་བ་ཆེན་པོ་སྟེར་བྱེད་པའི། །ཁྲག་འཐུང་རྒྱལ་པོའི་དཀྱིལ་འཁོར་མཆོག །རྡུལ་ཚོན་བྲིས་པའི་ཁང་པ་ལ། །མཚན་ཉིད་ལྡན་པ་བསྐྱེད་པར་བྱ། །པདྨ་ཉི་མ་ཉི་ཤུ་ལྔ། །གདན་རྣམས་ཤིན་ཏུ་མཛེས་པ་ལ། །དེ་ཡི་དབུས་ཆུད་ས་བོན་ནི། །ཡི་གེ་ཧཱུཾ་གི་རང་བཞིན་སྔོ། །སྐད་ཅིག་ཙམ་གྱིས་ཧེ་རུ་ཀ །སྐུ་མདོག་སྔོན་པོ་གྲགས་ཆེན་པོ། །གཡས་ན་གྲི་གུག་ཅང་ཏེའུ་འཛིན། །གཡོན་ན་ཐོད་པ་ཁ་ཊྭཱཾ་ག །སྐྱིལ་ཀྲུང་ཕྱེད་པའི་འཇིགས་ཆེན་པོ། །ཞལ་གྱི་མཆེ་བ་ཅུང་ཟད་གཙིགས། །རལ་པའི་ཅོད་པན་གྱིས་བརྒྱན་ཞིང༌། །སངས་རྒྱས་ཐོད་པའི་ཅོད་པན་ཅན། །དབུ་ལ་སྣ་ཚོགས་རྡོ་རྗེས་མཚན། །ཟླ་བ་ཕྱེད་པ་འཛིན་པའི་ལྷ། །སྐུ་ལ་ཐལ་བའི་རྡུལ་གྱིས་བྱུགས། །དཔའ་བོ་ཕྱག་བཞི་ཕྱག་མཚན་འཆང༌། །ཤིན་ཏུ་ཧཱུཾ་སྒྲོགས་འཇིགས་བྱེད་པ། །གར་གྱི་སྟབས་ཀྱིས་རྣམ་པར་བཞུགས། །མགོ་བོ་རློན་པའི་ཕྲེང་བ་ཅན། །མཆོད་ཕྱིར་ཐོགས་པའི་ཕྲེང་བ་འཆང༌། །ཐོད་པ་གཏི་མུག་རྣམ་དག་པའི། །ཕྲེང་བ་བརྒྱུས་པས་བརྒྱན་པའི་ལྷ། །མགུལ་དོ་དང་ནི་འཁོར་ལོ་དང༌། །རྐང་གདུབ་དང་ནི་དཔུང་རྒྱན་དང༌། །གདུ་བུ་རྐེད་པའི་སྐེ་
༄། །རགས་དང༌། །དཔའ་བོ་རྣ་ཆ་མཆོག་གིས་བརྒྱན། །འདི་འདྲའི་གཟུགས་ཅན་གཙོ་བོ་ནི། །ཧཱུཾ་ཞེས་བཟླས་པ་བྱེད་པར་བསྒོམ། །དེ་ལས་བྱུང་བའི་རྣལ་འབྱོར་མ། །ཉི་ཤུ་རྩ་བཞིའི་བདག་ཉིད་རྣམས། །སྐུ་མདོག་སྣ་ཚོགས་གྲགས་ཆེན་མོ། །ཤིན་ཏུ་འཇིགས་པའི་གཟུགས་ཅན་མ། །ཞལ་གཅིག་ཕྱག་ནི་ཐོད་པ་འཆང༌། །གཡས་པ་ན་ནི་གྲི་གུག་འཛིན། །སོ་སོ་ཡི་ནི་མིང་ཇི་བཞིན། །རབ་ཏུ་གསལ་བར་བཤད་པར་བྱ། །རིམ་པ་དང་པོའི་ཕྱོགས་བཞི་ནི། །ཕྲེང་བཟངས་མ་དང་འདོད་ཅན་མ། །འཇིགས་མ་དང་ནི་ཐུབ་དཀའ་མ། །མཚམས་སུ་ཐོད་པས་ཡང་དག་བརྒྱན། །རིམ་གཉིས་གསུང་གི་འཁོར་ལོ་ལ། །བདེ་བའི་སྐེ་རགས་ཅན་དང་ནི། །གཟུགས་ཅན་འབྱུང་གནས་རྣམ་རྒྱལ་མ། །ཤར་སོགས་ཕྱོགས་བཞིར་གཡོན་རིམ་གནས། །ཐོད་ཅན་མ་དང་མཚོན་ཆེན་མ། །རྒྱུད་བྱེད་མ་དང་གསོད་བྱེད་མ། །དབང་ལྡན་མཚམས་སོགས་གཡས་རིམ་བཞུགས། །རིམ་གསུམ་སྐུ་ཡི་འཁོར་ལོ་ལ། །སྒྲོལ་བྱེད་མ་དང་འཇིགས་མ་དང༌། །ལྷ་མོ་མི་ཕམ་མ་བཞི་ནི། །ཤར་ཕྱོགས་ལུགས་འཇུག་ཕྱོགས་བཞིར་རོ། །དགེ་མ་འཛུར་བྱེད་མ་དང་ནི། །དུས་མཚན་མ་དང་གྲགས་ཆེན་མ། །དབང་ལྡན་མཚམས་སོགས་ལུགས་ལས་བཟློག །མཛེས་སྡུག་མ་དང་ནོར་འཛིན་མ། །སྐལ་བཟངས་མ་དང་གྲགས་མཐོང་མ། །ཤར་སོགས་སྒོ་བཞིར་ཡང་དག་གནས། །འདི་ལྟ་བུ་ཡི་དཀྱིལ་འཁོར་མཆོག །ཁ་དོག་རྣམ་པ་ལྔ་ཡིས་བརྒྱན། །དེ་ཡི་དབུས་གནས་ལྷ་མོ་ནི། །ཧེ་རུ་ཀ་ལ་བདེ་སྟེར་མ། །སྐྱིལ་ཀྲུང་ཕྱེད་པའི་གར་བྱེད་མ། །མི་ཡི་རུས་པའི་ཕྲེང་བས་བརྒྱན། །ལྷ་མོ་འོད་ཟེར་དཔག་དཀའ་ཞིང༌། །སྐྲ་སེར་གྱེན་དུ་འབར་བ་སྟེ། །ཧཱུཾ་གི་བདག་ཉིད་ལས་སྐྱེས་འཇིགས། །ཞལ་ནས་ཁྲག་ནི་འཐོར་བྱེད་མ། །དཀར་མོ་ནག་མོ་ལྗང་གུ་མ། །ཐམས་ཅད་ཁུ་བ་ལྡན་གྱུར་མའོ། །ལྷ་ཡི་དཀྱིལ་འཁོར་བསྐྱེད་པ་ནི། །ཉི་ཤུ་རྩ་ལྔའི་བདག་ཉིད་གསུངས། །མདོག་དང་ཕྱག་མཚན་ཆ་ལུགས་ལྡན། །སྒྲུབ་པའི་ཐབས་བཞིན་བསྒོམ་པར་བྱ། །སྔར་གསུངས་སྟ་གོན་ལྷ་རྣམས་ནི། །སྙིང་ག་ཉིད་ནས་རབ་སྤྲུལ་ནས། །དཀྱིལ་འཁོར་ལ་ནི་བྱིན་གྱིས་བརླབས། །
༄། །ཡང་ནི་སྙིང་གའི་ས་བོན་གྱིས། །ཡེ་ཤེས་ལྷ་རྣམས་བཀུག་བྱས་ཏེ། །དཀྱིལ་འཁོར་ལྷ་རྣམས་བྱིན་གྱིས་བརླབས། །ཨོཾ་བུདྡྷ་ཀ་པཱ་ལི་ནི་ཨཿ། ཁཾ་གྲཾ་དྲཱུཾ་ཤཱུཾ། ཨཿ་ཨཿ། ཧཱུཾ་ཧཱུཾ་ཧཱུཾ་ཕཊ། རྩ་ཡི་འཁོར་ལོ་འཛག་ཚུལ་གྱིས། །དབང་བསྐུར་རྒྱས་གདབ་ཕུན་སུམ་ཚོགས། །མ་ལུས་པ་ནི་འདིར་བྱའོ། །དེ་ནས་མེ་ཏོག་སྤོས་ལ་སོགས། །ལྷ་ཡི་གྲངས་དང་མཉམ་པར་དབུལ། །དེ་བཞིན་གོས་ནི་ཟུང་རེས་མཆོད། །རང་བྱུང་མེ་ཏོག་ལ་སོགས་པའི། །བདུད་རྩི་ལྔས་ཀྱང་དེ་བཞིན་མཆོད། །ཐོད་པ་བདུད་རྩི་ལྔས་བཀང་བ། །ཧེ་རུ་ཀ་ཡིས་བཏུང་བར་བྱ། །དེ་ཡིས་འཐུངས་པ་ཙམ་གྱིས་ནི། །འགྲོ་བའི་བླ་མ་བདག་ཉིད་ཆེ། །གཙོ་བོ་ལས་གཞན་ཐ་དད་གཟུགས། །རྣལ་འབྱོར་མ་ཀུན་དེ་དང་འདྲ། །འདོད་པའི་ཡོན་ཏན་སྣ་ཚོགས་དང༌། །ཚོགས་ཀྱི་སྦྱོར་བ་ཆེ་ལྡན་ཞིང༌། །ནམ་མཁའ་ཅ་ཅོའི་སྒྲས་བཀང་ནས། །བཀྲ་ཤིས་གླུ་ཡིས་བསྟོད་བྱ་ཞིང༌། །བཟླས་པ་ཡིས་ཀྱང་མགུ་བར་བྱ། །ལྟོ་བའི་གནས་སུ་སྦྱིན་སྲེག་བྱ། །པདྨའི་འདབ་མ་བརྒྱད་ལྡན་དུ། །ཁྲག་འཐུང་མཁའ་འགྲོ་ཉི་ཤུ་ལྔ། །གེ་སར་པདྨའི་ལྟེ་བ་ལ། །བདག་ཉིད་ལྷ་ཡི་དངོས་བྱས་ནས། །སྦྱིན་སྲེག་ཆོ་ག་ལྡན་བྱས་ན། །སྒྲུབ་མི་དགོས་པར་དངོས་གྲུབ་འགྱུར། །བཟའ་དང་བཅའ་བཏུང་མྱོང་བ་དང༌། །བརྟུལ་ཞུགས་ཅན་གྱིས་ཅི་སྤྱོད་པ། །ཡེ་ཤེས་བདུད་རྩི་ལྔ་ཉིད་དུ། །བསྒྲུབས་ཏེ་ཐམས་ཅད་སྤྱད་པར་བྱ། །བདག་ཉིད་ལྷ་ནི་ལྷ་ཡི་མཆོག །བདག་ཉིད་ལྷ་ནི་ལྷ་དམ་པ། །རང་གི་གཟུགས་ལ་མ་ཆགས་པས། །གཟུགས་བརྙན་ལ་སོགས་བཞིན་དུ་ཤེས། །བདག་ཉིད་སངས་རྒྱས་མ་ལུས་དང༌། །མཁའ་འགྲོ་མ་ཀུན་གནས་ཡིན་ཏེ། །དེ་ཕྱིར་རྩོལ་བ་མ་ལུས་ཀྱིས། །བདག་ཉིད་ཧེ་རུ་ཀ་དཔལ་མཆོད། །བྲ་ཁུར་ལ་སོགས་བཟའ་བ་དང༌། །ཟན་དྲོན་ཤ་དང་ཉ་ཤ་དང༌། །བདུད་རྩི་ལྔ་སོགས་ཅི་འབྱོར་པ། །ཐོད་པའི་ནང་དུ་ལེགས་གཞག་སྟེ། །སྦྱང་སོགས་རིམ་གྱིས་བྱིན་བརླབས་ནས། །ཞིང་སྐྱོང་རྣམས་ལ་གཏོར་མ་སྦྱིན། །མཆོད་པའི་བྱ་བ་རྫོགས་གྱུར་ནས། །སློབ་མ་གཞུག་པའི་ཆོ་ག་ཡིས། །དང་པོ་ཉིད་དུ་སློབ་དཔོན་གཞུག །མཚན་ཉིད་ལྡན་པའི་སློབ་མའི་ཚོགས། །ཁྲུས་བྱས་མཛེས་
༄། །པའི་གོས་གྱོན་ཏེ། །བུ་སྡུག་དེ་དག་རྣམས་ཀྱི་ནི། །གདོང་པ་དར་གྱིས་གཡོགས་བྱས་ནས། །གསོལ་བ་འདེབས་པ་སྔོན་དུ་འགྲོ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །དཔའ་བོ་རྣལ་འབྱོར་མ་འཁོར་ལོ། །རྣལ་འབྱོར་གནས་ལ་བདག་ཕྱག་འཚལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །དོན་དམ་སྨྲ་བའི་སེང་གེ་རྣལ་འབྱོར་ཞེས་བྱ་བ། །ཉོན་མོངས་གཅོད་པའི་དོན་ལ་ཤིན་ཏུ་མཁས་གྱུར་པ། །སྲིད་པའི་ཉེས་བརྒྱ་བསྐྱད་པའི་ཉོན་མོངས་གཅོད་མཛད་པ། །རྣལ་འབྱོར་དོན་དམ་རྒྱལ་པོ་དེ་ཉིད་གྲུབ་པར་མཛོད། །ལན་གསུམ་དུ་ནི་གསོལ་བ་གདབ། །དེ་ནས་སློབ་དཔོན་གྱིས། །ཀྱེ་ཁྱོད་སུ་ཞེས་སྨྲའོ། །སློབ་མས་བདག་ནི་རྒྱལ་བའི་སྲས། །ཞེས་སྨྲའོ། །དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་ད་པ་ལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །དེ་ནས་ལྷོ་སྒོར་མངོན་ཕྱོགས་ནས། །དཀྱིལ་འཁོར་མཁའ་འགྲོའི་ཆོགས་དག་ལ། །སྒོ་གསུམ་དང་བས་ཕྱག་བཙལ་བ། །ཨོཾ་ན་མ་ཏེ་ཧཱུཾ། ན་མ་མི་ཧཱུཾ། ན་མོ་ན་མཿ་ཧཱུཾ་སྭཱ་ཧཱ། ཞེས་བརྗོད་སྐུ་གསུང་ཐུགས་ཀྱི་ནི། །སྒོ་ནས་ལན་གསུམ་སྔོན་འགྲོ་ཕྱག །ཨོཾ་སརྦ་བཱི་ར་ཡོ་གི་ནཱི་པཱུ་ཛོ་པ་སྠ་ནཱ་ཡ་ཨཱ་ཏྨ་ནཱཾ་ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནཱི། ཨཱ་ཏྨ་མ་ལེ་ཨ་བྷི་ཏིཥྛ་སྭ་མཱཾ། ཞེས་བརྗོད་ལུས་ནི་ཐམས་ཅད་ཀྱིས། །གུས་པས་རབ་ཏུ་ཕྱག་འཚལ་ལོ། །དེ་ནས་ཤར་གྱི་སྒོར་གནས་ལ། །སྙིང་གའི་གཡོན་དུ་ཐལ་མོ་སྦྱར། །ཨོཾ་སརྦ་བཱི་ར་ཡོ་གི་ནཱི་པཱུ་ཛོ་པསྠ་ནཱ་ཡ་ཨ་བྷི་ཥེ་ཀ་ཡ་ཨཱ་ཏྨ་ནཱཾ། ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་ཀ་མ་མ་དྷཱ་ཨ་བྷི་ཥིཉྩ་ཏུ་མཱཾ། དེ་རྗེས་བྱང་གི་སྒོར་ཕྱོགས་ཤིང༌། །ཐལ་མོ་དེ་ཉིད་དཔྲལ་བར་གཞག །ཨོཾ་སརྦ་བཱི་ར་ཡོ་གི་ནཱི་པཱུ་ཛ་པྲ་བརྟ་ནཱ་ཡ་ཨཱཏྨ་ནཱཾ། ནི་ཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱིར་ཡོ་གི་ནཱི་ཨཱཏྨ། མཻ་མ་པྲ་བྷ་དྷ་ན་མཱཾ། དེ་ནས་ནུབ་ཀྱི་སྒོར་འདུག་ལ། །ཐལ་མོ་དེ་ཉིད་མགོར་གཞག་སྟེ། །ཨོཾ་སརྦ་བཱི་ར་ཡོ་གི་ནཱི་པཱུ་ཛ་ཀརྨ་ཨཱཏྨ་ནཱཾ། ནིཪྻཱ་ཏ་ཡཱ་མི་སརྦ་ཏ་ཐཱ་ག་ཏ་བཱི་ར་ཡོ་གི་ནཱི་ཨཱཏྨ་ཨཱཪྻ་ཀརྨ་ཀུ་རུ་མཱཾ། བྱིན་གྱིས་བརླབ་ཕྱིར་ཕྱག་བཞི་འཚལ། །དེ་ནས་ལྷོ་སྒོར་འདུག་ནས་ཀྱང༌། །ལས་ནི་བུམ་པའི་
༄། །ཆུ་ཡིས་གཏོར། །སློབ་མའི་ལག་པ་བཟུང་བྱས་ལ། །སངས་རྒྱས་ཐོད་པའི་སྡོམ་པ་མཆོག །བརྗོད་དེ་ཐམས་ཅད་སྦྱིན་པར་བྱ། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་དོང༌། །འདི་ནི་སངས་རྒྱས་རིགས་ཡིན་ཏེ། །སྡོམ་པ་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་ནི། །བློ་ཆེན་ཁྱོད་ཀྱིས་གཟུང་བར་བགྱི། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཤེས་རབ་གྲགས། །སློབ་དཔོན་ཁྱོད་ཀྱིས་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེ་རིགས་དག་པའི། །དམ་ཚིག་སྡོམ་པ་ཡིན་པར་བཤད། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་ནམ་ལན་དྲུག་ཏུ། །ཆོས་དང་ཟང་ཟིང་མི་འཇིགས་བྱམས། །སྦྱིན་པ་རྣམ་བཞི་རབ་ཏུ་སྦྱིན། །ཕྱི་དང་གསང་བའི་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང༌། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །དེ་ལྟར་སྡོམ་པ་བཟུང་ནས་ནི། །མེ་ཏོག་ཕྲེང་དང་བཅས་པ་ཡིས། །སྙིང་གར་རྡོ་རྗེ་རབ་བཞག་ལ། །ཨོཾ་བཛྲ་ཡོ་ག་ཙིཏྟ་ཨུཏྤཱ་ད་ཡཱ་མི། ཨོཾ་སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། རྣལ་འབྱོར་དུ་ནི་སེམས་བསྐྱེད་དོ། །ཡོངས་སུ་སྦྱངས་པའི་བུ་སྡུག་དེ། །ལས་ཀུན་བྱེད་པའི་ཆུས་གཏོར་ལ། །དཀྱིལ་འཁོར་དུ་ནི་གཞུག་པར་བྱ། །ཨོཾ་ཨཱ་ཁཾ་བཱི་ར་ཧཱུཾ། དེང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དང་དཔའ་བོ་དང་རྣལ་འབྱོར་མ་རྣམས་ཀྱི་དངོས་གྲུབ་ཀྱང་ཐོབ་པར་འགྱུར་ན། །དངོས་གྲུབ་གཞན་ལྟ་ཅི་སྨོས། ཁྱོད་ཀྱིས་དཀྱིལ་འཁོར་མ་མཐོང་བའི་མདུན་དུ་སྨྲ་བར་མི་བྱ་སྟེ། དམ་ཚིག་ཉམས་པར་གྱུར་ཏ་རེ། ཧེ་རུ་ཀ་དཔལ་དེང་ཁྱོད་ཀྱེས། །སྙིང་ལ་ཡང་དག་ཞུགས་པ་ནི། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །རྗེས་སུ་མནའ་ཆུ་བླུད་པ་ནི། །ཙནྡན་དང་ནི་ག་བུར་བཅས། །བདེ་འབྱུང་མེ་ཏོག་ཆུ་དང་ལྡན། །བློ་གྲོས་བརྟན་པའི་སློབ་མ་ལ། །མཚན་
༄། །ལྡན་ཐོད་པར་བླུགས་ནས་ནི། །གཟི་བརྗིད་ཅན་གྱིས་འདི་སྐད་སྨྲ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འགྱུར། །ཨོཾ་པ་ཉྩ་ཨ་མྲྀ་ཏ་ཨུ་ད་ཀ་ཋ་ཋ་ཋ་ཧཱུཾ། དེང་ནས་བརྩམས་ཏེ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི་ངས་གང་འདི་བྱོས་ཤིག་བསྒོ་བ་དེ་ཁྱོད་ཀྱིས་བྱའོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །ཁྱོད་མི་བདེ་བ་མ་སྤངས་པར་དུས་བྱས་ནས་དམྱལ་བར་གྱུར་ཏ་རེ། དེ་རྗེས་སློབ་མའི་གཙོ་བོ་ཡིས། །དཔའ་བོ་དང་ནི་རྣལ་འབྱོར་མ། །ཐམས་ཅད་ཀྱིས་ནི་བྱིན་རློབས་ལ། །ཧེ་རུ་ཀ་དཔལ་རྣལ་འབྱོར་མ། །བདག་ལ་ཡེ་ཤེས་དབབ་ཏུ་གསོལ། །སྔར་གསུངས་རྒྱན་ལྡན་བླ་མ་ཡིས། །གཟི་ལྡན་སྦྱིན་བཅས་སློབ་མ་ལ། །མི་འཆི་བཅུ་ཕྱེད་རོ་རས་དང༌། །བྱི་བྲུན་གུ་གུལ་ནག་པོ་དང༌། །གྲིར་ཤི་ཀླད་ཁྲག་ཚིལ་ཆེན་བཅས། །རང་སྐྲ་དང་བཅས་ཞིབ་མོར་བརྡུངས། །པདྨའི་སྣོད་དུ་རབ་བཞག་ནས། །དུར་ཁྲོད་ཡི་དགས་མེས་གདུངས་ལ། །གཉིས་མེད་སྔགས་ཀྱིས་གཅུན་པར་བྱ། །དྲིལ་བུའི་སྒྲ་ནི་རབ་བསྒྲགས་ནས། །རང་ཉིད་འོད་ཀྱིས་མཁའ་འགྲོ་གཞུག །གལ་ཏེ་འབབ་པར་མ་གྱུར་ན། །སློབ་མའི་སྙིང་གར་ཉི་མ་ལ། །སངས་རྒྱས་ཐོད་པ་ཡུམ་བཅས་ཤིང༌། །ཡུངས་ཀར་ཙམ་གྱི་སྐུར་བསམས་ལ། །དེ་ཡི་གསང་དང་མཁའ་བསྐྱོད་པས། །འོད་ཟེར་དམར་པོས་ལུས་ཀུན་ཡང༌། །རོས་གང་གཅིག་གྱུར་སྔགས་བཟླས་ཤིང༌། །བདུག་དང་བསམ་གཏན་ཆོ་ག་ཡིས། །སྐད་ཅིག་ཉིད་ལ་དཔའ་བོ་དང༌། །མཁའ་འགྲོ་འཁོར་བཅས་སྙིང་ལ་འཇུག །ཨོཾ་ཏིཥྛ་མ་ཧཱ་ཀྲོ་དྷཱ་ཨཱ་ཝེ་ཤ་ཧཱུཾ། ཨོཾ་ཤྲཱི་ཧེ་རུ་ཀཱ་ཡ། བིད་མ་ཧེ་བིདྱ་རཱ་ཛཱ་ཡ་བྷི་མ་ཧེ་སྭཱ་ཧཱ། མཁའ་འགྲོ་བསྐུལ་བས་ངེས་པར་འབབ། །ལྕེ་ལ་ཨ་ནི་དམར་བསམས་ནས། །གསུངས་ཤིག་རྡོ་རྗེ་དགེ་མི་དགེ། །སྐུ་གསུང་ཐུགས་ལ་ཕེབས་གྱུར་ནས། །བརྟན་པའི་གསང་སྔགས་བརྗོད་པར་བྱ། །འདིར་ནི་བསོད་ནམས་ཇི་ལྟ་བུ། །ལྷ་རྣམས་རིགས་ཀྱི་རིམ་ཇི་བཞིན། །འདི་ནི་དངོས་གྲུབ་གང་ཡིན་པ། །དཀྱིལ་འཁོར་འདིར་ནི་དེ་བཞིན་ཤོག །པྲ་ཏཱི་ཙྪ་དང་བཛྲ་ཧོཿ། །དཀྱིལ་འཁོར་དུ་ནི་མེ་ཏོག་དོར། །གང་རྙེད་དེ་ཡི་རིགས་ཡིན་ཏེ། །དབུས་སོགས་
༄། །མཚན་མ་ཤེས་བྱས་ལ། །སླར་ཡང་སློབ་མའི་མགོ་ལ་བཅིང༌། །ཤ་མིག་དག་པའི་ལྟས་ཀྱི་ཕྱིར། །ཅི་མཐོང་དྲི་བའི་ཆོ་ག་བྱ། །དེ་ནས་ལག་པ་ནས་བཟུང་སྟེ། །མིག་ཕྱེ་དཀྱིལ་འཁོར་བསྟན་པར་བྱ། །ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་ཏེ། །རྡོ་རྗེའི་མིག་ནི་བླ་ན་མེད། །ཨོཾ་བཛྲ་ནཻ་ཏྲ་ཡ་ཨ་པ་ཧ་ར་པ་ཊ་ལཾ་ཧྲཱིཿ། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་དོན་ཕུན་སུམ་ཚོགས་ཀུན་དང༌།། དངོས་གྲུབ་ཀུན་མཁྱེན་མངོན་དུ་འགྱུར། །དམ་ཚིག་ཐམས་ཅད་བསྐྱང་བ་དང༌། །གསང་སྔགས་ལ་ཡང་བརྩོན་པར་གྱིས། །དེ་ནས་དཀྱིལ་འཁོར་འཁོར་ལོ་ཡི། །ལྷ་ཡི་སྐུ་མདོག་ཇི་བཞིན་དང༌། །མཚན་མ་ལ་སོགས་དེ་བཞིན་དུ། །སློབ་མ་རྣམས་ལ་བསྟན་པར་བྱ། །སྣ་ཚོགས་པདྨའི་དཀྱིལ་སྟེང་ནས། །གཉིས་སུ་མེད་པར་ལེགས་འཁྱུད་པའི། །དངོས་པོ་ཀུན་གྱི་རང་བཞིན་ཅན། །དངོས་གྲུབ་མ་ལུས་སྩོལ་བ་པོ། །ཁྲག་འཐུང་ཆེ་ལ་བུ་ཁྱོད་ལྟོས། །སྣ་ཚོགས་སྡེ་མས་གཙོར་མཛད་པའི། །ཕྲེང་བཟངས་མ་སོགས་ལྷ་མོ་ལྔ། །ཐོད་པ་བཞི་པོར་བཅས་པ་ཡི། །རབ་ཟབ་ཐུགས་ཀྱི་འཁོར་ལོ་དང༌། །དགེ་བའི་སྙེ་རགས་ཅན་ལ་སོགས། །གཟུང་གི་རྣམ་དག་འཁོར་ལོ་དང༌། །སྒྲོལ་བྱེད་མཁའ་འགྲོ་མ་ལ་སོགས། །རྣམ་དག་སྐུ་ཡི་འཁོར་ལོ་སྟེ། །རབ་དང་འབྲིང་དང་ཐ་མ་ཅན། །མཛེས་སྡུག་ལ་སོགས་ལྷ་མོ་བཞི། །གཟུགས་སོགས་དག་པའི་བདག་ཉིད་འགྱུར། །ལྷ་རྣམས་དེ་ཉིད་མཚན་མ་ཡིན། །དེ་ནས་སློབ་མ་བློ་ལྡན་གྱིས། །བླ་མའི་ཞབས་ལ་ཕྱག་འཚལ་ཏེ། །ཡོན་གྱི་མཆོག་ཆེན་ཕུལ་ནས་སུ། །དབང་བསྐུར་དོན་དུ་གསོལ་བ་གདབ། །ཧེ་རུ་ཀ་དཔལ་དབང་སྒྲུབ་པ། །འགྲོ་བ་སྐྱོབ་ཅིང་གཟི་བརྗིད་ཅན། །དེ་ལྟར་ཡོན་ཏན་འབྱུང་གནས་སོགས། །དེ་བཞིན་བདག་ལ་དེང་སྩོལ་ཅིག །དཔའ་བོ་ཆེན་པོས་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་རྟག་ཏུ་སློབ་དཔོན་བགྱིད། །འཇུག་སྒོ་ལྷོ་ཡི་ཕྱོགས་སུ་ནི། །བདག་
༄། །ཉིད་ཧེ་རུ་ཀ་དཔལ་སེམས། །པདྨ་འདབ་བརྒྱད་བྲིས་སྟེང་དུ། །སེང་གེའི་ཁྲི་ནི་བཤམ་བྱ་སྟེ། །སྣ་ཚོགས་མཛེས་པའི་བསྟན་བཏིང་ལ། །གཉིས་མེད་བློ་ལྡན་དེར་བཞག་སྟེ། །ཧེ་རུ་ཀ་དཔལ་སྤྲུལ་པར་བྱ། །གདུགས་དཀར་སྟེང་དུ་ཕུབ་ནས་ཀྱང༌། །དཔའ་བོ་རྣལ་འབྱོར་མ་ཚོགས་ཀྱིས། །བཀྲ་ཤིས་སྒྲ་ཡིས་ལེགས་གང་བ། །རོལ་མོ་སྙན་དང་གླུ་དབྱངས་རྣམས། །ནམ་མཁའ་ཅ་ཅོ་ཡིས་བཀང་སྟེ། །དབང་བསྐུར་བ་ནི་འདོད་པ་ཡིན། །དེ་ལ་བར་ཆོད་ཞི་བའི་ཕྱིར། །ཡུངས་ཀར་རྣལ་འབྱོར་བ་ཡིས་ཀྱང༌། །བཟླས་བརྗོད་ཆོ་ག་བཞིན་བྱས་ལ། །གསང་སྔགས་བརྗོད་ནས་བརྡེག་པར་བྱ། །དེ་འོག་ལག་གཉིས་འདབ་རྩེ་ཡིས། །བུམ་པ་རྣམས་བཏེག་སྔགས་པ་ཡི། །ལུས་ནང་རྟོགས་གྱུར་དཀྱིལ་འཁོར་ལ། །ཆོག་གའི་ཚུལ་གྱིས་དབང་བསྐུར་བྱ། །རྣམ་རྒྱལ་ལ་སོགས་བུམ་པའི་ཆུ། །ལྷག་མ་མེད་པར་བསྡུ་བྱས་ལ། །གླུ་བླངས་དྲིལ་བུ་ལ་སོགས་བརྡུང༌། །དཔའ་བོ་རྣལ་འབྱོར་མ་ལུས་ཀུན། །བསྒོམས་ལ་ཐམས་ཅད་དབང་བསྐུར་རོ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡི་གནས་ལས་བྱུང༌། །ཁམས་གསུམ་ཀུན་གྱིས་ཕྱག་འཚལ་བ། །ཆུ་ཡི་དབང་བསྐུར་སྦྱིན་པར་བྱ། །ཨོཾ་བཛྲ་ཨ་བྷི་ཥི་ཉྩ་ཞེས། །བརྗོད་དེ་རང་སྙིང་འོད་ལས་བྱུང༌། །རིག་པའི་ལྷ་མོ་རྫུ་འཕྲུལ་ཅན། །བདུད་རྩི་ཆུ་ཡིས་བཀྲུ་བར་བྱ། །དབུ་རྒྱན་རིན་ཆེན་རྒྱུ་ལས་བྱུང༌། །དར་དབྱངས་བཅིངས་ལ་དབང་བསྐུར་ཏེ། །ཐོར་ཚུགས་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དམ་པའི་དབུ་རྒྱན་དང༌། །དར་དབྱངས་དབང་བསྐུར་སྦྱིན་པར་བྱ། །ཨོཾ་བཛྲ་པ་ཊཾ་ཀ་བཛྲ་ཨ་ར་ལི་ཧོཿ། རྡོ་རྗེ་ཆེན་པོ་རྩེ་དགུ་པ། །དེ་ཉིད་ལྡན་པ་བྱིན་བརླབས་ནས། །སངས་རྒྱས་རྡོ་རྗེའི་དབང་བསྐུར་པས། །དེ་རིང་ཁྱོད་ལ་དབང་བསྐུར་བྱ། །འདི་ནི་སངས་རྒྱས་ཐམས་ཅད་ཉིད། །ཤིན་ཏུ་གྲུབ་ཕྱིར་རྡོ་རྗེ་ཟུང། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི། ལག་ཏུ་བྱིན་ལ་དབང་བསྐུར་བྱ། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་
༄། །ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང༌། །བྱང་ཆུབ་མཆོག་ཏུ་རྒྱལ་བ་བཞེད། །དེ་དུས་དྲིལ་བུའི་སྒྲ་བསྒྲགས་ལ། །སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་རྣམས། །སྲིད་པའི་དམ་པ་བྱེད་པར་ཤོག །ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཏིཥྛ་བཱི་ར་ས་མ་ཡ། དྲིལ་བུ་གཡོན་དུ་སྦྱིན་པར་བྱ། །རྡོ་རྗེ་དྲིལ་བུ་ཡང་དག་འཁྱུད། །གཡོན་བསྙེམས་པ་དང་སྒྲོས་གནོན་འཆང༌། །གཉིས་མེད་གཉིས་མེད་རྣལ་འབྱོར་བདག །ཕྱག་རྒྱ་ཆེན་པོར་བྱིན་གྱིས་བརླབས། །བྱིན་རླབས་ཆེ་ལྡན་སྔགས་ཀྱིས་ནི། །སྔགས་ཀྱི་དབང་བསྐུར་སྦྱིན་པར་བྱ། །ཨོཾ་ཤྲཱི་ཧེ་རུ་ཀ་ཨ་དྷེ་པ་ཏི་སྟྭཾ་ཨ་བྷི་ཎིཉྩ་མཾ། ཤྲཱི་ཧེ་རུ་ཀ་ནཱ་མ་ཨ་བྷི་ཥི་ཀ་ཏེ། ཤྲཱི་ཡི་སྒྲ་དང་བཅས་པ་ཡིས། །མིང་གི་དབང་བསྐུར་སྦྱིན་པར་བྱ། །འདི་ནི་སངས་རྒྱས་ཐམས་ཅད་ཀྱི། །ཧེ་རུ་ཀ་དཔལ་ཕྱག་ནག་ནས། །ཁྱོད་ཀྱིས་ཀྱང་ནི་རྟག་ཏུ་བཅང། །ཧེ་རུ་ཀ་དཔལ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷྱ་བཛྲ་ས་མ་ཡ་ཏི་ཥྛ་ཨེ་ཥ་སྟྭཾ་དྷ་རཱ་ཡ་མི་ཧཱུཾ་ཧ་ཧ་ཧ་ཧེ་ཧོཿ། འདིས་ནི་རྡོ་རྗེའི་བརྟུལ་ཞུགས་སོ། །ཁ་ཊྭཱཾ་ཌ་མ་རུ་བཟང་བཅས། །བྱིན་གྱིས་བརླབ་ཅིང་དབང་བསྐུར་བྱ། །ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌ་མ་རུ། །རྡོ་རྗེ་ཁ་ཊྭཱཾ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང༌། །ཚངས་པའི་སྐུད་ཐོགས་རྣལ་འབྱོར་བདག །ཁ་ཊྭཱཾ་ག་དང་རྣལ་འབྱོར་སྣོད། །དཔའ་བོ་ཆེན་པོས་བླང་བར་གྱིས། །ཞི་དང་རྒྱས་དང་དབང་དགུག་དང༌། །སྡང་དང་དབྱེ་དང་མནན་ལ་སོགས། །བསོད་དང་བསྐྲད་པ་མ་ལུས་པའི། །ལས་རྣམས་དེ་ནི་སྒྲུབ་པར་གྱིས། །རལ་གྲི་མིག་སྨན་ས་འོག་དང༌། །མཆིལ་ལྷ་མ་དེ་བཞིན་རིལ་བུ་སྟེ། །རྣལ་འབྱོར་མ་ཡི་དངོས་གྲུབ་བསྒྲུབ། །དེ་ནས་ཅི་དགར་སྒྲུབ་པར་གྱིས། །ཤཱཀྱ་ཐུབ་པར་བསྒོམ་བྱས་ལ། །ལག་གཡོན་གྱིས་ནི་ཆོས་གོས་མཐའ། །གཡས་ཀྱིས་མི་འཇིགས་ཕྱག་རྒྱར་གནས། །སློབ་མ་ལ་ནི་ལུང་བསྟན་བྱ། །ཧེ་རུ་ཀ་དཔལ་རྣལ་འབྱོར་ཆེ། །འཁོར་ལོ་མ་ལུས་རྣམ་གནས་ཤིང༌། །ཧེ་རུ་ཀ་དཔལ་ལུང་བསྟན་བཞིན། །མགྲིན་གཅིག་ཏུ་ནི་ཐམས་ཅད་ཀྱིས། །འདི་ལྟར་ང་ཡིས་ལུང་བསྟན་ཏེ། །ཧེ་རུ་ཀ་
༄། །དཔལ་དེ་བཞིན་གཤེགས། །དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཤྲཱི་ཧེ་རུ་ཀ་ནཱ་མ་སརྦ་ཏ་ཐཱ་ག་ཏ་ཏིཥྛ་སིདྡྷི་ས་མ་ཡ་སྟྭཾ་བྷུ་རྦྷུ་བ་སྭཿ། དེ་ཚེ་ཧེ་རུ་ཀ་དཔལ་དང༌། །མཁའ་འགྲོ་མ་དང་བླ་མར་བཅས། །མགྲིན་གཅིག་ལུང་སྟོན་བསམ་པར་བྱ། །དེ་རྗེས་དབུགས་དབྱུང་སྦྱིན་པ་ནི། །གསང་ཆེན་མཆོག་གི་དཀྱིལ་འཁོར་དུ། །མཐོང་བ་དང་ནི་བཅུག་པ་ཡིས། །སྡིག་པ་ཀུན་ལས་གྲོལ་འགྱུར་བར། །ཁྱོད་ནི་ཤིན་ཏུ་དེ་རིང་གནས། །དབང་ནི་བསྐུར་བ་ཙམ་གྱིས་ཀྱང༌། །སློབ་མ་ཡོན་ཏན་བདག་པོར་འགྱུར། །སློབ་དཔོན་ཉིད་ཀྱི་བདེ་བ་ཡིས། །བརྟན་དང་གཡོ་ཀུན་དམ་ཚིག་ཡིན། །སེམས་དག་ཐོ་རངས་དུས་ལངས་ཏེ། །བཟའ་དང་བསྲུང་བ་ལ་སོགས་པའི། །སྡོམ་པའི་བདག་ཉིད་ཅན་སྲུང་ངོ༌། །ལུས་དང་སྲོག་ལ་མི་ལྟོས་པར། །དམ་ཚིག་དང་ནི་སྡོམ་པ་བསྲུངས། །ཉིན་དང་མཚན་མོ་ལན་གསུམ་དུ། །རྟག་ཏུ་བཟླས་ལ་གཞོལ་བར་བྱོས། །གང་ཚེ་ཉམས་ན་རྣལ་འབྱོར་པ། །ཁ་ན་མ་ཐོ་སྦོམ་པོར་འགྱུར། །དགུན་ཟླ་འབྲིང་པོ་ནས་བརྩམས་ཏེ། །ཟླ་བ་རེ་རེ་བསྲུང་བ་ནི། །གཉིས་སུ་མེད་པའི་འཁོར་ལོར་གནས། །ཚེས་བཅུ་དུས་སུ་མཆོད་པར་བྱ། །ཤ་དང་ཆང་སོགས་གང་ཅིའང་རུང༌། །དཔའ་བོ་རྣལ་འབྱོར་མ་ཡི་ཚོགས། །ཧེ་རུ་ཀ་སོགས་རབ་ཏུ་མཆོད། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་དག་ཀྱང་ཡང་མི་སྤང༌། །མྱ་ངན་འདས་ལ་དགར་མི་འགྲོ། །དཔའ་བོ་རྣལ་འབྱོར་མ་ཀུན་ལ། །ཁྱོད་ཀྱིས་བརྙས་པར་མི་བྱའོ། །ཕྱག་རྒྱ་བཞོན་པ་མཚོན་ཆ་དང༌། །མཚན་མ་འགོམ་པར་མི་བྱའོ། །དམ་ཚིག་རབ་བསྲུང་བསོད་ནམས་ཀྱིས། །ཚེ་འདི་ཉིད་ལ་འགྲུབ་པར་འགྱུར། །བུད་མེད་ཐམས་ཅད་མཐོང་བ་ན། །གཡོན་ནས་ལན་གསུམ་བསྐོར་བྱས་ལ། །སྤྱི་བོར་ཕྱག་ནི་བྱས་ནས་ཀྱང༌། །ལན་གསུམ་བར་དུ་གསོལ་བ་གདབ། །བདག་ནི་མ་ཁྱོད་བུ་ཡིན་ཏེ། །ཇི་སྲིད་བྱང་ཆུབ་འབྱུང་བར་དུ། །བྱང་ཆུབ་ཡན་ལག་ནུ་མ་ལས། །བྱུང་བའི་རང་གི་འོ་མས་སྐྱོང༌། །གཉིས་མེད་ཡེ་ཤེས་སྤྱོད་ལྡན་པའི། །བསླབ་པ་བླང་བ་སྔོན་འགྲོ་བས། །ཚངས་པར་སྤྱོད་པ་ཤིན་ཏུ་བསྲུང༌། །དམ་ཚིག་དེ་ལ་རྟག་གནས་ཏེ། །དེ་སྔོན་འགྲོ་བའི་
༄། །གསང་བ་ཡིན། །སྤྱོད་དང་གྲོལ་བའི་གནས་འདོད་པའི། །ཡིད་ལ་འདོད་པ་ཀུན་འགྲུབ་འགྱུར། །གཙོ་བོས་ཇི་ལྟར་བཀའ་སྩལ་བ། །དེ་ལྟར་བདག་གིས་བགྱིད་པར་འཚལ། །དེ་ལྟར་ཡོངས་སྨིན་སློབ་མ་ལ། །གསང་བའི་དབང་མཆོག་སྦྱིན་པར་བྱ། །དཔེར་ན་བུ་ཚ་མེད་པའི་ཁྱིམ། །ཤི་མ་ཐག་ཏུ་སྟོང་པར་འགྱུར། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དབང་མཆོག་ཐོབ་འདོད་སློབ་མ་ཡིས། །སྣ་ཚོགས་ཟས་དང་སྣ་ཚོགས་སྐོམ། །སྣ་ཚོགས་རོལ་མོ་མཆོག་གསུངས་དང༌། །དྲི་ཞིམ་ལྔ་དང་མེ་ཏོག་སྤོས། །འདི་དག་ལ་སོགས་བླ་མ་མཆོད། །མཆོད་ཡོན་ཞབས་བསིལ་དེ་བཞིན་ཁྲུས། །གླུ་ཡི་མཆོད་པ་རྣམ་མང་བས། །སངས་རྒྱས་ཀུན་གྱི་རང་བཞིན་ཆེ། །འདི་དག་གིས་ནི་བླ་མ་མཆོད། །ན་ཚོད་ལྡན་པའི་བུ་མོ་ཡང༌། །མཚན་ཉིད་ལྡན་པ་དབུལ་བར་བྱ། །དེ་ནས་ཡང་དག་རབ་བཤད་པ། །དབང་དུས་ཆོ་ག་ཇི་བཞིན་དུ། །སློབ་མ་དད་བརྟན་གང་ཞིག་གིས། །ཤེས་རབ་མ་ལ་གསོལ་བ་འདེབས། །དྲི་ཞིམ་པ་ཡི་དངོས་པོ་ཡིས། །མཎྜལ་རྣམ་པ་ལྔ་བྱས་ཏེ། སངས་རྒྱས་ཀུན་གྱིས་བརྒྱན་བྱས་པ། །བླ་མ་ཆེ་ལ་གསོལ་བ་འདེབས། །ཤིན་ཏུ་དྲི་མེད་སེམས་ཀྱིས་ནི། །དེ་ནས་འདིར་ནི་གསོལ་བ་འདེབས། །འཁོར་བའི་འདམ་དུ་བྱིང་བ་བདག །དཔུང་གཉེན་ཁྱོད་ཀྱིས་བསྒྲལ་དུ་གསོལ། །བདག་ནི་སྩོལ་ཆུང་སྐལ་དམན་ཞིང༌། །སངས་རྒྱས་ཆོས་ནི་རྣམ་པར་སྤངས། །ཀྱེ་ཀྱེ་སྟོན་པ་བླ་མ་ཆེ། །མགོན་པོ་ཁྱོད་ཀྱིས་བརྩེ་བར་མཛོད། །དེ་ནས་སློབ་དཔོན་ཆེ་ལྡན་པས། །ལྷ་ཡི་རྣལ་འབྱོར་དང་ལྡན་པས། །སྔར་གསུངས་ཆོ་ག་བཞིན་དུ་ནི། །ཆུ་སོགས་དབང་རྣམས་བསྐུར་བར་བྱ། །གསང་བའི་གོ་འཕང་འདི་བརྗོད་བྱ། །དམ་ཚིག་ཕྱག་རྒྱར་རབ་གསུངས་པ། །ཡིད་ཀྱི་ལུས་ནི་བརྟན་ཕྱིར་རོ། །གང་གིས་ལུས་ཀུན་བརྟན་བྱེད་པ། །དེ་ནི་ཕྱག་རྒྱར་རབ་ཏུ་གྲགས། །སློབ་མ་ལ་ནི་དེ་བརྗོད་ནས། །བདག་ཉིད་རིག་པ་ལྷན་ཅིག་ཏུ། །ཡིད་དང་རྗེས་མཐུན་བཟའ་དང་བཅའ། །བཏུང་བ་ལ་སོགས་རྗེས་སྤྱད་ཅིང༌། །ཁ་ལ་སོགས་པར་ག་པུར་གྱི། །དྲི་ཞིམ་མཆོག་ཏུ་བསྒོས་པ་ལས། །ཡིད་ལ་འཕྲོག་པའི་བགད་པ་དང༌། །སྒེག་དང་རོལ་
༄། །སོགས་སྔར་བྱས་ཏེ། །དབང་པོ་གཉིས་ཀྱི་སྙོམས་འཇུག་པས། །བདེ་དགའ་རྒྱ་མཚོ་བྱུང་གྱུར་པས། །ཞལ་དུ་བཟའ་བའི་རྫས་མཆོག་བསྟབ། །རྫས་དེ་རྣམས་ནི་གསོལ་བ་དང༌། །ཡིད་ནི་ཚིམ་ཞིང་ཐུགས་དགྱེས་ཕྱིར། །ཨ་ཏི་སུ་ཁ་ཞེས་བརྗོད་དོ། །ཁམས་གསུམ་ཐབས་དང་ཤེས་རབ་གཅིག །བདེ་ཆེན་གཉིས་མེད་ཡེ་ཤེས་གསལ། །སློབ་མ་ནུས་དང་ལྡན་པར་འགྱུར། །དེ་ལྟར་དབང་མཆོག་བསྐུར་བྱས་པས། །མགོན་པོ་ས་བཅུ་དང་མཉམ་འགྱུར། །དེ་ནས་གསང་དབང་ཐོབ་གྱུར་བའི། །སློབ་མ་བཟང་ལ་བླ་མ་ཡིས། །ཤེས་རབ་ལ་བརྟེན་ཡེ་ཤེས་ཀྱི། །དབང་བསྐུར་བཟང་པོ་སྦྱིན་པའི་ཕྱིར། །དཀྱིལ་འཁོར་བཟང་པོའི་ཕྱི་རོལ་དུ། །སྔར་བཞིན་དཀྱིལ་འཁོར་རྫོགས་བསྒོམས་ལ། །དེ་ཡི་དབུས་གནས་བླ་མ་ནི། །སངས་རྒྱས་ཐོད་པའི་རྣལ་འབྱོར་ཅན། །མེ་ཏོག་ལ་སོགས་མཆོད་པ་དང༌། ཆང་ལ་སོགས་པའི་དགའ་སྟོན་གྱིས།། མཆོད་ཅིང་བསྟོད་པས་མཉེས་བྱས་ལ། །ཡོན་མཆོག་དམ་པ་ཕུལ་ནས་ནི། །བླ་མ་ཆེ་ལ་གསོལ་འདེབས་པ། །བླ་མ་ལྷ་མོ་དགྱེས་མཐོང་ནས། །ཚིག་འདི་དག་ནི་སྨྲ་བར་བྱེད། །རྣམ་པར་རྟོག་པ་མང་པོ་ཡིས། །གཡོགས་པའི་བག་ཆགས་རབ་ལྡན་པ། །འཁོར་བའི་འདམ་དུ་བྱིང་བ་བདག །མཛེས་མ་ཁྱོད་ཀྱིས་སྐྱོབ་པར་མཛོད། །གྲགས་ཆེན་སྙིང་རྗེ་ལྡན་པ་ཡི། །ལྷ་མོ་དེས་ནི་ཞི་བར་མཛོད། །གསོལ་བ་བཏབ་རྗེས་བླ་མ་ཆེ། །རང་གི་རྣལ་འབྱོར་རྫོགས་བྱས་ནས། །དཔའ་བོ་རྫོགས་པར་མཐོང་ནས་ནི། །རྩ་ཡི་འཁོར་ལོ་ལས་ནི་འཛག །འཛག་པ་དེ་ལས་རྣལ་འབྱོར་མ། །རྣམ་མང་བརྩེ་བ་ཆེར་ལྡན་པ། །བདེ་གཤེགས་ཀུན་གྱིས་བྱིན་བརླབས་མ། །སྣ་ཚོགས་རྒྱན་གྱིས་རྣམ་པར་ཀླུབས། །སྣ་ཚོགས་པ་ཡི་ན་བཟའ་མ་ནབས། །གཟུགས་ནི་ལང་ཚོ་གཞོན་པས་བརྒྱན། །ལོ་ནི་བཅུ་དང་གཉིས་ལོན་པ། །ཕྱག་གཡས་བྱང་ཆུབ་སེམས་གང་པའི། །བུམ་པ་ཨ་མྲའི་ལྕུག་བཅས་བསྣམས། །ཞལ་ནི་རབ་བཞད་དང་བ་ཡིས། །ཧེ་རུ་ཀ་ནི་རྒྱལ་གྱུར་ཅིག །རྒྱལ་བར་གྱུར་ཅིག་ཅེས་སྨྲས་པས། །ཆུ་སོགས་བུམ་པ་གསང་བ་དག །དབང་བསྐུར་ཅེས་སུ་ཤེས་རབ་ཀྱི། །དབང་ནི་རབ་ཏུ་བསྐུར་བར་བྱ། །དཔེར་ན་པི་ཝང་སྦྱོར་
༄། །ཀུན་ཚོགས། །རྒྱུད་དང་བྲལ་ན་བརྡུང་མི་རུང༌། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །ལོ་བཅུ་གཉིས་པའི་བུ་མོ་ནི། །ཚུལ་ཁྲིམས་མ་ཉམས་ཆགས་ཆུང་བས། །ཐོས་དང་ལྡན་ཞིང་གྲགས་ཆེན་མོ། །ནད་མེད་སྙིང་རྗེ་དང་ལྡན་པ། །སེམས་ཅན་དོན་ལ་གཅིག་ནན་ཏན། །དགོད་ཅིང་པདྨའི་སྤྱན་དང་ལྡན། །ཟླ་བའི་ཆ་འདྲ་གདོང་མཛེས་མ། །མུ་ཅོར་མི་སྨྲ་བརྟན་ཞིང་དུལ། །ཤེས་རབ་པདྨའི་ནང་དབུས་སུ། །དཔག་ཚད་བྱེ་བའི་དཀྱིལ་འཁོར་ལ། །སུམ་བརྩེགས་དག་པའི་བདག་ཉིད་ལུས། །འཁོར་བའི་འཇིགས་པ་ལས་སྐྱོབ་པ། །དཀྱིལ་འཁོར་དེ་ཡི་དབུས་གནས་པ། །མཁས་པས་སློབ་མ་བཟང་དབང་བསྐུར། །གལ་ཏེ་བྱང་ཆུབ་བླ་མེད་འདོད། །ཕྱི་ཡི་དཀྱིལ་འཁོར་བྱ་བ་མིན། །ལྷ་རྣམས་བཤིག་པ་ཙམ་གྱིས་ནི། །སྡིག་པ་ཆེན་པོ་སྐྱེ་བར་འགྱུར། །དེ་ནས་རྡུལ་ཚོན་ཙམ་གྱིས་ནི། །དེ་བཞིན་ལྷ་རྣམས་དག་མི་འགྱུར། །རྡོ་རྗེ་འཁོར་ལོ་རིན་ཆེན་དང༌། །དེ་བཞིན་པདྨ་རལ་གྲི་ཉིད། །བྱས་ནས་སླར་ཡང་འཆད་བྱེད་པ། །སྐྱེས་བུ་ཐ་ཤལ་དམྱལ་བར་འགྲོ། །གང་གིས་སངས་རྒྱས་སྤྱན་འདྲེན་ཞིང༌། །གང་གིས་གཤེགས་སུ་གསོལ་བ་ཡིན། །རྡོ་རྗེ་སེམས་དཔའ་བྱོན་པ་དང༌། །དེ་བཞིན་གཤེགས་པ་བྱོན་པ་རྣམས། །གང་ནའང་བཞུགས་པ་མ་ཡིན་ཏེ། །དྲི་མ་མེད་ཅིང་དག་པའི་ལུས། །གང་གིས་སྤྱན་དྲངས་གཤེགས་སུ་གསོལ། །དེ་ཉིད་ཀྱིས་ན་བརྟག་མེད་ན། །དེ་བཞིན་གཤེགས་པ་རྣམས་ཕྱག་བྱ། །མཛེས་པའི་ཕྱག་རྒྱ་བྱིན་བརླབས་ནས། །སློབ་མ་བཟང་ལྡན་དེ་ལ་གཏད། །གང་གིས་ཤེས་རབ་མ་མཉེས་པ། །སངས་རྒྱས་ཐམས་ཅད་ཀྱིས་ནི་མཆོད། །འདི་ཉིད་ལ་ནི་སངས་རྒྱས་བཞུགས། །གཞན་གང་དངོས་གྲུབ་གཙོ་བོ་དང༌། །སྙིང་རྗེ་ལྡན་པ་གཞན་གང་ཞིག །མཁའ་འགྲོ་མ་ཀུན་དེ་ལ་བཞུགས། །གསང་བ་ཕྱི་ཡི་ལྔ་དང་ནི། །བདུན་དང་བཅུ་བཞིར་བཤད་པ་དང༌། །གཉིས་ཀ་གཅིག་ཏུ་འདུས་པའོ། །གསང་བའི་དེ་ཉིད་བཤད་པར་བྱ། །དེ་འོག་སློབ་མ་སྟན་བཟང་ལ། །ཐབས་དང་ཤེས་རབ་སྙོམས་འཇུག་པས། །དགའ་བ་ལ་སོགས་བསྐྱེད་བྱས་ནས། །རྣལ་འབྱོར་དམ་པ་མཚོན་པར་བྱ། །གང་དུ་དབང་པོ་འགགས་གྱུར་པ། །བདག་རྟོག་རང་
༄། །བཞིན་ཉམས་པ་སྟེ། །ཀྱེ་དེ་ལྷན་ཅིག་སྐྱེས་གྱུར་པ། །བླ་མའི་ཞལ་སྔར་གསལ་བར་ཞུས། །ལྷན་ཅིག་སྐྱེས་པ་རྟོགས་གྱུར་པ། །གསང་བའི་དེ་ཉིད་བཤད་པར་བྱ། །གང་ཞིག་འཆར་དུས་དབང་པོ་དང༌། །ཡུལ་མཉམ་ནུབ་གྱུར་དེ་ལ་ཕྱག་འཚལ་ལོ། །མཁས་པ་རྣམས་ཀྱིས་སྙིང་སྦས་སུ་སད་པ། །ཕྱིས་ནི་མངོན་དགའ་རྒྱལ་བའི་མཛེས་སྐུ་གཅིག །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །སློབ་མ་ལེགས་པར་ལྡན་པ་དང༌། །བརྩེ་ལྡན་སེམས་གཞན་མེད་པ་ཡི། །གསེར་ནི་འབུམ་ཕྲག་བཅུ་དྲུག་དང༌། །ས་གཞི་ཡུལ་འཁོར་ལྡན་པ་དང༌། །གླང་པོ་བུད་མེད་དམ་པ་དང༌། །རལ་གྲི་འཁོར་ལོ་རྟ་དང་ནི། །ཡོངས་འདྲེན་སྐྱེས་བུ་རིན་ཆེན་རྣམས། །སྦྱོར་དང་ལྡན་པའི་སེམས་ཀྱིས་ནི། །དེ་ནི་བླ་མར་དབུལ་བར་བྱ། །དེར་ནི་རྒྱན་རྣམས་ཐམས་ཅད་དང༌། །ལྷབ་ལྷུབ་རྒྱན་རྣམས་དབུལ་བར་བྱ། །དད་པ་བརྟན་པའི་སེམས་ཀྱིས་ནི། །དེ་ནས་བདུད་རྩི་དབུལ་བར་བྱ། །སྣ་ཚོགས་ཟས་དང་སྣ་ཚོགས་བཏུང༌། །དེ་ཡི་མདུན་དུ་དབུལ་བར་བྱ། །མཚམས་མེད་ལྔ་ནི་བྱེད་པ་དང༌། །རྨོངས་གང་མ་རུངས་ལས་བྱེད་དང། །སྐྱེ་བ་དམན་གྱུར་འགྲོ་བ་རྣམས། །རྡུལ་ཚོགས་མཐོང་བས་གྲོལ་བར་འགྱུར། །དཀྱིལ་འཁོར་དག་ཏུ་མངོན་ཞུགས་པས། །གཙང་མའི་གནས་སུ་སྐྱེ་བར་འགྱུར། །ཤིན་ཏུ་སྦྱོར་བའི་སེམས་ཀྱིས་ནི། །སྐྱེ་འདིར་དངོས་གྲུབ་མ་ཐོབ་ཀྱང༌། །སྐྱེ་གཞན་སྲིད་པར་དངོས་གྲུབ་འགྱུར། །དབང་བསྐུར་ཡང་དག་སྦྱིན་ལྡན་ན། །སྐྱེ་དང་སྐྱེ་བར་དངོས་གྲུབ་འགྱུར། །དེ་ཡི་སྐྱེ་བ་བདུན་ལ་ནི། །མ་བསྒྲུབས་པར་ཡང་དངོས་གྲུབ་ཐོབ། །གང་ཡང་བསྒོམ་པ་དང་ལྡན་ཞིང༌། །གལ་ཏེ་དམ་ཚིག་སྡོམ་ལ་གནས། །སྐྱེ་འདིར་ལས་དབང་གང་མ་གྲུབ། །རེ་ཞིག་དམ་ཚིག་ཉམས་པ་ལ། །དངོས་གྲུབ་ཐོབ་པ་ལྟ་ཞོག་གི །མི་ཡི་སྐྱེ་བའང་རྙེད་པར་དཀའ། །གང་ཡང་བླ་མ་བརྒྱུད་པ་ཡི། །རིམ་འོང་དེ་ཉིད་རིག་པ་ཡི། །སྒྲུབ་པ་པོ་ཡིས་འགྲུབ་སྙམ་དགོངས། །རྡོ་རྗེ་དྲིལ་འཛིན་སློབ་མའི་མགོར། །བླ་མས་གདུགས་ཕུབ་བཀྲ་ཤིས་བརྗོད། །ལན་གསུམ་
༄། །དཀྱིལ་འཁོར་བསྐོར་བྱས་ཏེ། །ཤར་ནས་ཕྱག་བྱས་ས་ལ་ནི། །བདེ་གཤེགས་རྣལ་འབྱོར་མ་ཚོགས་ལ། །བཟའ་བཏུང་ལ་སོགས་དགའ་བ་ཡི། །རོལ་པ་ཕུལ་ལ་སྨོན་ལམ་གདབ། །དེ་ནས་ཅི་བདེར་གཤེགས་སུ་གསོལ། །ཚོན་རྩི་ལ་སོགས་དངོས་པོ་ཀུན། །ཐོ་རངས་དུས་སུ་བསྡུ་བྱས་ལ། །གསེར་སོགས་བུམ་པའི་ནང་དུ་ནི། །བཅུག་ནས་ཆུ་བོ་ཆེན་པོར་དོར། །བུམ་པ་ཐམས་ཅད་བསྡུས་ནས་ཀྱང༌། །ཆུ་བོ་ཆེ་ལ་བཀྲུ་བར་བྱ། །དེ་ནས་བདུད་རྩི་ལྔ་སོགས་དང༌། །སྦྱར་བའི་ས་ནི་བྱུག་པར་བྱ། །དེ་ནས་ཞི་བའི་སྦྱིན་སྲེག་ནི། །མེ་ཡི་ཕྲིན་ལས་ཚུལ་བཞིན་དུ། །བདག་དང་སློབ་མའི་ཚོགས་རྣམས་ལ། །སྡིག་པ་ཞི་བའི་སྦྱིན་སྲེག་བྱ། །རིགས་མཐུན་མཛའ་སྡུག་བཅས་པ་རྣམས། །སྣོད་ལྡན་སྐྱེ་བོ་འདུས་པ་ཀུན། །བཀྲ་ཤིས་གླུ་དང་རྡོ་རྗེ་དྲིལ། །མཁའ་འགྲོ་མཉེས་ཕྱིར་རོལ་པར་བྱ། །སངས་རྒྱས་ཐོད་པའི་རྒྱུད་འདི་རུ། །བུམ་པའི་དབང་ནི་གསལ་མོད་ཀྱང༌། །གསང་བ་མཛོད་སོགས་རྗེས་འབྲངས་ནས། །དཀྱིལ་འཁོར་ཆོ་ག་བདག་གིས་བྱས། །དགེ་བ་འདི་ཡིས་འགྲོ་བ་རྣམས། །སྒྲིབ་པའི་ཚོགས་དག་སྤང་བྱས་ནས། །ཡེ་ཤེས་ལྡན་པའི་ས་གནས་སུ། །མི་ལྡོག་པར་ནི་འགྲོ་བར་ཤོག །དཔལ་སངས་རྒྱས་ཐོད་པའི་དཀྱིལ་འཁོར་གྱི་ཆོ་གའི་རིམ་པ་གསལ་བ་ཞེས་བྱ་བ་དངོས་གྲུབ་ཀྱི་མཆོག་བརྙེས་པའི་སློབ་དཔོན་ས་ར་ཧའི་ཞལ་སྔ་ནས་མཛད་པ་རྫོགས་སོ།། །།ག་ཡ་དྷ་ར་དང༌། གྱི་ཇོ་ཟླ་བའི་འོད་ཟེར་གྱིས་བསྒྱུར་བའོ། །