མེ་ཏོག་ཕྲེང་འཛིན་གྱི་བསྟོད་པ།
ཐམས་ཅད་མཁྱེན་པའི་བཤེས་གཉེན།
༄། །རྒྱ་གར་སྐད་དུ། སྲགྡྷ་ར་སྟོ་ཏྲཾ། བོད་སྐད་དུ། མེ་ཏོག་ཕྲེང་འཛིན་གྱི་བསྟོད་པ། རྗེ་བཙུན་འཕགས་མ་སྒྲོལ་མ་ལ་ཕྱག་འཚལ་ལོ། །ཕོངས་སྐྱབས་འཕགས་མ་སྒྲོལ་མ་ཁྱེད་ཞབས་ལྷ་ཚོགས་རྣམས་ཀྱི་མགོ་བོའི་གཙུག་གི་ནོར་བུའི་འོད། །ཉི་མ་འཆར་ཀའི་སྣང་བ་ལྟ་བུར་དམར་བའི་ཕུན་སུམ་ཚོགས་པ་ཕོག་པས་དམར་བ་ནི། །སྨུག་རྩི་དམར་བ་གསལ་པོ་བཀོད་ནས་ཤིན་ཏུ་ཡུན་རིང་མ་ལོན་པ་དང་འདྲ་དག་ལ། །མགོ་བཏུད་སྤྱི་བོར་ཐལ་སྦྱར་བཀོད་པ་བདག་གིས་བསྟོད་གསར་མེ་ཏོག་ཕྲེང་བས་གུས་མཆོད་བགྱི། །རྒལ་བར་དཀའ་བའི་སྡུག་བསྔལ་མེ་ནང་ལུས་ལྷུང་སྐལ་ངན་ཕྱོགས་གང་ཞིག་ལ་བརྟེན་སྙམ་པ། །བླུན་ཞིང་ཅི་ཅི་བགྱི་སྙམ་ལན་ཅིག་མ་ལགས་རྩོམ་བགྱི་དོན་མ་མཆིས་པས་དུབ་པ་བདག །མིག་ཉམས་གཞན་གྱི་འགྲོས་ཀྱིས་འགྲོ་བ་སྣང་བ་རེ་བར་
༄། །བཅས་པས་ནམ་མཁའི་ཉི་ཟླ་ཡི། །འོད་ལྟར་གཞན་དག་རྣམས་ལས་ཁུམས་ཏེ་སྡིག་པ་འཇོམས་པར་མཛད་པ་ཁྱོད་ལ་བརྟེན་པར་བགྱིད། །ཁྱོད་ཀྱི་ཐུགས་རྗེས་ངེས་པར་སེམས་ཅན་ལམ་རྣམས་ཀུན་ལ་བྱེ་བྲག་མེད་པར་རབ་བཞུགས་ཤིང༌། །དེ་དག་བཟུང་བས་བདག་འདྲའང་དེ་དག་རྣམས་ཀྱི་ནང་དུ་གདོན་མི་འཚལ་བར་བཟུང་འགྱུར་བ། །ནུས་མཐུ་འགྲོ་བ་མཐའ་དག་སྡིག་མུན་ཉི་མའི་གཟུགས་ལའང་དོ་ཟླ་མཆིས་པ་མ་ལགས་མོད། །དེ་ལྟ་ན་ཡང་ཁོ་བོ་སྡུག་བ་ཀྱེ་མའོ་ཉེས་བྱས་ངན་མཁས་ངན་པ་རབ་ཏུ་བརྗིད། །ཉི་མའི་འོད་ཟེར་གྱིས་ཀྱང་མུན་པ་རབ་ཏུ་མི་བསལ་རི་བོ་གངས་ཅན་ཀླུང་ངོགས་ཀྱི། །ཤང་ཤོང་ཁ་བའི་དུམ་གྲུགས་དཀྲིགས་པས་བསིལ་བར་དབྱར་སྐམ་རིན་ཆེན་གླིང་གི་ཚོང་ཁང་གི །ནོར་བུའི་ཕུག་ཡངས་ཁང་པའི་ནང་ན་དབུལ་ཞིང་འཇིག་རྟེན་ཀུན་གྱི་ཡུམ་གཅིག་བཅོམ་ལྡན་འདས། །ཁྱོད་ཀྱིས་མགོན་དུ་བགྱིས་ཀྱང་མགོན་པ་མཆིས་པས་སྐལ་ཉམས་བདག་ནི་སྨད་ཅིང་སྨད་པའི་གནས། །མ་ཡང་ནུ་མའི་ཆེད་དུ་རྣམ་པ་མང་དུ་དུ་བའི་བུ་ལ་སྐྱོ་བར་འགྱུར་བ་ལགས། ཉི་མ་རེ་རེ་དམ་པ་མ་ཡིན་དོན་དུ་གཉེར་ལ་བསྐོས་པའི་ཕ་ཡང་ཁྲོ་སེལ་ན། །ཁྱོད་ནི་འཇིག་རྟེན་གསུམ་འདོད་འབྲས་བུ་ཡངས་པ་དཔག་བསམ་ལྗོན་ཤིང་ཡལ་ག་མཆོག་ཆེན་ཏེ། །ཀུན་ལ་མངོན་པར་འདོད་དོན་སྩོལ་ཡང་ཁྱོད་ལ་ནམ་ཡང་རྣམ་འགྱུར་འགའ་ཡང་ཡོད་མི་མངའ། །གང་དང་གང་ཞིག་སྡུག་བསྔལ་ཚོགས་མེས་ལུས་བསྲེགས་དེ་དང་དེ་ནི་ང་ཡིས་བསྒྲལ་ལོ་ཞེས། །ཉིད་ཀྱི་དམ་བཅའ་ཞལ་བཞེས་སྡུག་བསྔལ་ས་འོག་བྱིང་བ་བདག་ལ་འབྲས་བུ་བཅས་པར་མཛོད། །ཇི་སྲིད་སྲོག་ཆགས་རྣམས་ཀྱིས་ཟིལ་གནོན་རྩུབ་ལྡན་སྡུག་བསྔལ་ཤུགས་དེ་འཕེལ་བ་དེ་སྲིད་དུ། །ཡང་དག་རྫོགས་པའི་སངས་རྒྱས་ཐེག་པའི་སྨོན་ལམ་བློ་མངའ་རྣམས་ལ་རྗེས་བརྩེ་མངའ་བ་ལགས། །ཡུམ་གཅིག་དེ་ལྟར་ལག་བསྒྲེང་བསྟོད་པའི་ཚིག་ཟོལ་ཆོ་ངེའི་ང་རོ་དཔངས་མཐོར་འདོན་པ་ལ། །གཞན་གྱིས་ཀྱང་ནི་བཏང་སྙོམས་བྱ་བར་འོས་པ་མིན་ན་ཁྱེད་འདྲས་ལྟ་ཞིག་བློས་ཅི་འཚལ། །ཁྱོད་ལས་གཞན་དག་རྣམས་ཀྱིས་མངོན་འདོད་འབྱོར་པ་དོན་གཉེར་འདོད་པ་རྙེད་པ་མ་ཁུམས་ན། །ནང་གི་གདུང་བ་རྒྱུན་ཆགས་
༄། །མི་དགའི་ས་གཞི་སྲན་དུ་མེད་པས་ཤིན་ཏུ་ཡང་ཡང་བསྲེག །གལ་ཏེ་ཁོ་བོ་སྡིག་ཅན་ལགས་ན་ཁོ་བོའི་ཁྱོད་གུས་ཆེན་པོ་འདི་དག་ཅི་ཕྱིར་འཕེལ། །བདེན་གསུང་མཚན་ཙམ་ཁུམས་ཤིང་དྲན་པ་ཡིས་ཀྱང་ཁྱོད་གཅིག་ཁོ་ནས་ནན་གྱིས་སྡིག་སེལ་བ། །དེ་ཡི་ཕྱིར་ན་ཁྱོད་ཀྱི་ཁོ་བོའི་བགྱི་བའི་ཁུར་བུ་བོར་བ་ཇི་ལྟར་ལགས་པ་གསུངས། །ནད་པ་འཆི་བར་འགྱུར་ནའང་སྨན་པ་སྙིང་རྗེ་རྒྱ་ཆེན་སྨན་འཕྲོ་གཅོད་པར་བགྱིད་དམ་ཅི། །གང་གི་ཕྱིར་ན་འགྲོན་གནས་རྔ་མོ་ཆ་ཤས་དུ་མའི་ཐུན་མོང་བ་ལྟར་རྒྱུ་དང་ནི། །སེར་སྣ་ང་རྒྱལ་ལ་སོགས་རང་སྐྱོན་ཐ་ཆད་རྣམས་ཀྱིས་རིམ་དང་དུས་གཅིག་བསྐུལ་བས་ན། །ཉིན་གཅིག་ཞབས་ཀྱི་པདྨ་མཆོད་པ་སྐད་ཅིག་ཙམ་ཡང་མ་རྙེད་དེ་ཕྱིར་ཁྱད་པར་དུ། །བཀྲེན་ཞིང་ཕོངས་པའི་ཚིག་དང་ཡི་གེར་བཀོད་འདིས་བདག་ལ་འདོད་པའི་འབྲས་བུ་མཆིས་པར་མཛོད། །ལྷ་མོ་གྲུ་ཆག་ཆུར་བྱིང་སྙིང་རྗེ་དང་བཅས་དུ་བའི་ཆོ་ངེ་གཡོ་མེད་ཞན་པ་རྣམས། །ཁྱོད་ལ་མངོན་བསྟོད་ལྷུར་བླངས་པ་ཡིས་འཕྲལ་དུ་རྒྱ་མཚོ་དུས་མཐའི་རླུང་གྱེན་འཚུབས་པའི་ཆུ། །གཙུབས་པའི་ཆུ་རླབས་གཡོ་ཞིང་འགུལ་བའི་རོལ་པས་དཀྲུགས་པས་བཏེག་པའི་རྦ་རླབས་འགྲམ་ངོགས་ལ། །བརྡབས་པའི་སྒྲ་གྲག་གད་རྒྱངས་ཅན་གྱི་ཕ་རོལ་འགྲམ་དུ་རང་དགའི་ཉམས་ཀྱིས་རྒལ་པར་འགྱུར། །དུ་བ་འཁྱིལ་བའི་སྤྲིན་ནང་འཐོན་ཞིང་ནམ་མཁའི་ཁྱིམ་དུ་འཕྲོ་བའི་མེ་སྟག་ཅན་གྱི་མེ། །མེ་ལྕེ་འབར་ཞིང་འཕྲོ་བའི་ཤུགས་ཀྱིས་ནང་དུ་ཞུགས་པའི་ཁྱིམ་ན་མལ་དུ་ཉལ་བ་རྣམས། །ཁྱོད་ལ་རབ་བཏུད་ཐལ་མོ་སྤྱི་བོར་སྦྱར་ཞིང་ལྡབ་ལྡིབ་གསོལ་བ་བཏབ་པས་སྐད་ཅིག་ལ། །གློག་རབ་འགྱུར་བའི་སྒེག་པས་དམར་པོར་གྱུར་པའི་སྤྲིན་གྱི་ཆུ་རླབས་དག་གིས་ཁེབས་པར་འགྱུར། །འགྲམ་པའི་གདུ་བུ་མྱོས་པའི་ཆུ་ཡིས་གང་བ་གཉིས་ཀ་ལ་བརྟེན་བུང་བའི་ཕྲེང་བ་ཡི། །དར་དིར་སྒྲ་ཡིས་བབ་པའི་བན་གླང་ཟླ་བོས་ཞེ་སྡང་མེ་ལྕེ་སྦར་བའི་གླང་ཆེན་གྱི། །མཆེ་བའི་རྩེ་མོ་འོད་ལི་མཐོན་པོའི་སྟེང་དུ་ལུས་པོ་གཞག་པའང་ཁྱོད་རྗེས་དྲན་པ་ཡིས། །རི་བོ་མཐོན་པོའི་ཟོམ་རྩེའི་མཁར་ལ་འདུག་བ་བཞིན་དུ་དགའ་ཞིང་འཆི་བདག་ཕྱིར་ཟློག་བགྱིད། །མདུང་རིངས་བསྣུན་
༄། །བསད་མི་ཡི་མགོ་དང་གསལ་ཤིང་ཅན་གྱི་གཏོར་མའི་སྟོན་འགྱེད་འབྲོག་སྟོང་དུ། །རྐུན་པོའི་ལག་རྩེས་བཟུང་བས་གཡོ་བའི་ཕུབ་དང་རལ་གྲིས་དྲེགས་པ་ཤས་ཆེར་འཐོན་གྱུར་ཅིང༌། །མིག་ནི་ཁྲོ་གཉེར་བཅས་ཤིང་སྨིན་འཁྱོག་ཟུར་མིག་ལྟ་དང་ལྡན་རྣམས་བྲན་དུ་སྒོ་བྱེད་པ། །དེ་ནི་ཁྱོད་མཚན་དཔལ་གཞི་བསམ་པའི་སྨྱུ་གུས་སྐྱོ་བ་མེད་ཅིང་གསལ་བར་བྲིས་པ་ལགས། །རྐང་པའི་སྦར་མོ་རབ་རྣོ་རྡོ་རྗེ་ལྟ་བུས་ཚབས་ཆེར་བསྣུན་པས་གླང་ཆེན་མྱོས་པའི་གླང༌། །བསྐམས་ནས་ཁྲག་མང་ཟགས་པས་བཀྲུས་པའི་རལ་པ་གསལ་པོ་འཇིགས་རུང་ཡ་ངས་གཉའ་ཁེབས་ཤིང༌། །ཁྲོས་ཏེ་རྒྱང་ནས་མགོ་ལ་འཛིན་འདོད་མཆེ་བ་རྣོན་པོ་གཙིགས་པའི་ཁ་ཅན་རི་དགས་དགྲ། །ཁྱོད་ཀྱི་འཐད་པའི་སྤྱོད་པ་བསྟོད་པའི་དོན་ཚིམ་མཁས་ལ་སྐྲག་སྟེ་ལོག་ནས་འགྲོ་བ་ལགས། །དུ་བ་འཁྱིལ་འདྲ་མུན་པའི་གཟུགས་ཅན་རྣམ་འགྱུར་གདེངས་ཅན་ཕུས་འདེབས་གྲགས་པའི་འགྲམ་དགང་བར། །བྱ་བའི་ཆེད་དུ་ཁ་གདངས་འགྱུར་བའི་ལྕེ་ཅན་ཐག་པ་དང་འདྲ་གཤིན་རྗེའི་ཞགས་པ་དང༌། །སྡིག་དབང་གིས་ཕྲད་སླར་ཡང་ཁྱོད་ཀྱི་ཡོན་ཏན་བགྲང་བ་ལྷུར་ལེན་ཁྱོད་བདག་ལྷུར་བྱེད་པས། །བུང་བ་མྱོས་པའི་ཕྲེང་བའི་གདུབ་ཅན་ཨུཏྤལ་ཕྲེང་བའི་རྒྱན་གྱིས་མཛེས་པ་འཆང་བར་འགྱུར། །རྗེ་བོས་སྨིན་བསྐྱོད་བསྐུལ་ཏེ་བཀྲབས་པ་རེམ་ཞིང་རྩུབ་པས་ཅོ་ཏོ་དྲངས་ཤིང་གཟིངས་གྱུར་པ། །གོ་ཁོལ་བསྐྱོད་པའི་ཚིག་རྩུབ་ཀྱིས་སྤྱོས་འཆིང་བའི་ཞགས་པ་རྩུབ་མོས་ཉེར་བཅིང་བཀྲེས་པ་དང༌། །སྐོམ་པས་མཆུ་དང་མགུལ་པ་གང་ཞིང་འཕགས་མ་སྒྲོལ་མའི་ཞབས་ལ་སྐྱབས་འགྲོ་བ། །དེ་ནི་བྱམས་པའི་གཉེན་གྱིས་སྦངས་ཀྱང་མ་རུངས་རྒུད་པ་དེ་དག་འཕྲལ་དུ་སྦང་བར་འགྱུར། །སྲིན་པོ་སྒྱུ་མ་སྤྲུལ་པ་ལས་ཚུལ་གྱིས་བྱས་བདེན་པ་མ་ཡིན་གཟུགས་བརྩམས་ཆ་ལུགས་ཚུལ། །རྣམ་འགྱུར་དུ་མདག་དང་རྗེས་སུ་འཚམ་པའི་མཚོན་ཆའི་འོད་ཟེར་ཚོགས་ཀྱིས་མི་བཟད་ཅིང༌། །མི་རོ་བརྒྱུས་པའི་རྒྱུ་མའི་ཐ་གུའི་ཚོགས་དག་ཕྲེང་བར་བཀོད་པ་རྣམས་ཀྱང་ཁྱོད་རྒྱུས་ལས། །བཏུས་པའི་གསང་སྔགས་དྲན་པས་སྡིག་བསལ་བསྲུང་བ་ཕམ་པ་བྱེད་པར་འགྱུར། །ཆེམ་ཆེམ་སྒྲ་སྒྲོགས་ཆར་སྤྲིན་ལུས་ཅན་བན་གླང་མྱོས་
༄། །ཆུའི་ཀླུང་གིས་རྒྱུན་གྱི་མུན་གཏིབས་ཤིང༌། །མཚོན་ཆ་གློག་ལྟར་འགྱུ་བའི་འོད་ཟེར་དང་ལྡན་མདའ་ཡི་ཆར་འབབ་གཡུལ་ངོ་འགྱེད་བའི་ཚེ། །ཕྱེ་མར་རློག་པར་བྱེད་ཅིང་དཔུང་སྟོབས་ཆེ་བའི་རྣམ་པར་སྡང་བ་རྣམས་ཀྱིས་བཀག་པ་ཡང༌། །ཁྱོད་ཀྱི་སྤྲོས་པ་གསོལ་བཏབ་དཔའ་བོ་གཅིག་གིས་དགྲ་བོའི་ས་གཞི་ནན་གྱིས་འཐག་པར་བྱེད། །སྡིག་སྤྱོད་རྒྱུན་ཆགས་ལས་བྱུང་ཕོལ་མིག་ཚབས་ཆེན་དག་ལས་རྣག་ཁྲག་རུལ་པ་ཟགས་པ་ཡིས། །མྱགས་པའི་ཤ་ལྤགས་དང་འབྲལ་རྩ་སྒོའི་བུ་གར་སྲོག་ཆགས་འགུལ་བས་ཟོས་པས་ལུས་ཟད་རྣམས། །ཁྱོད་ཀྱི་ཞབས་ལ་བརྟེན་པའི་སྨན་མཆོག་རི་ལུ་གོམས་པར་བསྟེན་ལ་རབ་ཏུ་དགའ་བ་ཡིས། །ས་ལེ་སྦྲམ་དང་འདྲ་བའི་ལུས་དང་ལྡན་ཞིང་པདྨ་དཀར་པོ་ལྟར་ཡངས་མིག་ཅན་འགྱུར། །གང་གི་རྣ་བའི་སྣོད་དུ་བླ་མ་རྣམས་ཀྱིས་ཉེར་སྦྱར་མན་ངག་གླེང་མོ་མ་ལྷུང་ཞིང༌། །ཐོས་པའི་ནོར་དང་བྲལ་བས་མཁས་པའི་ཚོགས་སར་ལྐུགས་པ་ཉིད་དུ་ཁས་ལེན་གང་ཡིན་པ། །དེ་ཡང་ཁྱོད་ལ་གུས་པའི་ནུས་པས་རྒྱན་རྣམས་ཀུན་གྱིས་མཛེས་པའི་འབྱོར་པ་དང་བཅས་པའི། །ངག་གི་དབང་ཕྱུག་ཐོབ་ནས་མི་བདག་མདུན་སར་རྒོལ་བའི་སེང་གེའི་ཁྲི་དག་འཕྲོག་པར་བྱེད། །སར་ཉལ་རྔུལ་གྱིས་ལུས་གོས་རྐེད་ངོས་མདོམས་དཀྲིས་རས་རལ་ཡན་ལག་རྣམ་པར་མངོན་འགྱུར་ཞིང༌། །ཤིག་གིས་ཚེ་དག་རབ་གཙེར་གཞན་གྱི་ཁྱིམ་སྒོར་རྫ་ཆག་དུམ་བུར་ཟས་དག་སློང་བ་ཡང༌། །ཁྱོད་མཉེས་བགྱིས་བས་ན་ཆུང་མཆོག་ངལ་རྣམས་ཀྱིས་གཡབས་བའི་རྔ་ཡབ་ཀྱིས་འཛུམ་མཛེས་པའི་ས། །གླང་ཆེན་མྱོས་པའི་ཆུ་ཡིས་གདོང་པའི་མཆེ་བ་གཏམས་ཤིང་གདུགས་གཅིག་གྱེན་དུ་བཏེག་པ་འཛིན། །སྐྱེ་བོ་བཀྲེན་པ་རྣམས་ཀྱིས་ཡུམ་གཅིག་ཞབས་འབྲིང་དང་ནི་སོ་ཚིས་བཟོ་ཡི་སྤྱོད་པ་རྣམས། །སྤོང་པའི་ཐབས་ཀྱིས་རྣམ་གྲངས་དག་གིས་དུབ་ཅིང་སྐྱེ་བ་སྔ་མར་ཉེར་བླངས་བསོད་ནམས་ཀྱིས། །ཉེར་བསགས་དགེ་འབྲས་ནོར་མ་ཐོབ་དང་ནོར་བྲལ་རྣམས་ཀྱིས་ཕྱ་ལས་འདའ་བར་མཛད་ཁྱོད་ལ། །གསོལ་བ་བཏབ་པས་ཕྱི་ནས་ནོར་བུ་ས་ལས་གཏེར་ནི་གསེར་ཚོགས་འབྱུང་བ་ཐོབ་པར་འགྱུར། །འཚོ་བ་ཆད་པས་ངོ་ཚ་ཁྱིམ་ཐབ་གོས་ཟད་
༄། །མ་ཡིས་སྤྱོ་བར་བྱེད་ཅིང་བདག་ཉིད་ནི། །གསོ་བར་བྱེད་ཕྱིར་གཉེན་འདབ་བུ་དང་གཉེན་བཤེས་རྣམས་ཀྱིས་རྒྱང་རིངས་སྤངས་པར་གྱུར་པ་ཡིས། །ཁྱོད་ལ་རང་གི་སྡུག་བསྔལ་ཞུས་པས་རང་གི་ཁྱིམ་ཐབ་བུད་མེད་གདུ་བུའི་སིལ་སིལ་སྒྲས། །གཉིད་ལོག་སད་པར་འགྱུར་ཞིང་རྟ་རྨིག་རྩེ་མོས་མཚམས་བརྐོས་ཁང་ཁྱིམ་རྣམས་ཀྱི་བདག་པོ་བྱེད། །གལ་ཏེ་ཁྱོད་ཀྱི་བཀའ་དྲིན་ཆ་ཤས་ཙམ་ཞིག་མཆིས་ན་ཕྱོགས་ཚོགས་ཁྱབ་པའི་འཁོར་ལོ་དང༌། །བུད་མེད་མཚན་བརྒྱན་འོག་པག་ཆེན་པོ་གཡོ་དང་གླང་ཆེན་དོན་པོ་མཆེ་བ་དྲུག་པ་དང༌། །རྟ་མཆོག་སྤུ་ཁ་སྡོ་བསངས་རྨ་བྱའི་མགྲིན་ལྟར་འཚེར་དང་ཡོན་ཏན་དྲི་མེད་ནོར་བུ་ནི། །ཉི་ལྟར་མདངས་ལྡན་འོད་ཅན་ཁྱིམ་བདག་མཛོད་ཁེངས་བློན་པོ་རྟུལ་ཕོད་དམག་ལྡན་འབྱུང་བར་འགྱུར། །ཁྱོད་ཀྱིས་རིག་པའི་གྲུབ་པ་ཐོབ་པས་ཙནྡན་ཆུ་ཡིས་དྲི་ཞིམ་ནོར་བུའི་རྡོ་སྟེང་དུ། །སྡུ་གུ་མ་ཡིས་དུས་འདེབས་སྡུག་པ་དང་རོལ་རྫེས་སུ་ཆགས་པས་བདེ་བའི་ཉེར་སྤྱད་གསར། །གུས་པར་སྦྱར་ཞིང་ལག་སྦོམ་མཐོན་པོ་རལ་གྲིའི་འོད་ཟེར་སྔོན་པོས་དཔུང་རྒྱན་གཡོ་བ་ཡིས། །རིག་འཛིན་དབང་པོ་རང་དགར་གྱུར་ཏེ་མཱ་ལ་ཡ་ཡི་མེ་ཏོག་སྐྱེད་མོས་ཚལ་དུ་འགྲོ། །ནུ་མའི་ཐོན་ཀོར་དོ་ཤལ་གྱིས་མནན་མིག་དཀྱུས་རིང་པོས་རྣ་བའི་ཨུཏྤལ་ལ་འགྲན་ཅིང༌། །སྐྲ་བསྐྱིལ་མནད་ར་བས་བརྒྱངས་པའི་ཟེ་འབྲུ་སར་པའི་དྲི་ཡིས་མྱོས་པའི་བུང་བ་དང་ལྡན་པའི། །ལྷ་ཡི་བུ་མོ་རྐང་གདུབ་རགས་པའི་སིལ་སྙན་འོག་པག་སྒྲ་ཡི་རྒྱུན་གྱིས་ཤིན་ཏུ་དཔངས། །བསྐྱེད་པའི་འདོད་དྲན་དྲེགས་དགའ་ཁྱོད་མགོན་ལྡན་པ་དག་ལ་གུས་དང་བཅས་པས་གསོལ་བ་འདེབས། །རྫིང་བུའི་ནང་ལོགས་རིན་པོ་ཆེས་སྤྲས་གསེར་གྱི་པད་མཚོ་ཟེ་འབྲུ་རྡོ་རྗེའི་ཚོགས་ལྡན་ཞིང༌། །ཡོངས་འདུའི་ལྗོན་ཤིང་སྐྱེ་ཞིང་མེ་ཏོག་ཟེ་འབྲུ་དྲི་ཞིམ་རྡུལ་གྱི་བླ་རེ་མཐོར་བྲེས་ཏེ། །ལྷ་ཡི་གྲོང་ཁྱེར་རངས་བགྱིད་ལྷ་མོ་བི་ཝང་གླིང་བུ་སྒྲོགས་པ་མཁས་པས་སིལ་སྙན་ནི། །སྙན་པར་བསྒྲགས་པའི་དགའ་ཚལ་ལྷ་མོ་ཁྱོད་ལ་མཆོད་པ་བགྱིད་པས་ཡུན་རིངས་མྱོང་བར་འགྱུར། །སེམས་རྒྱུད་ཁྱོད་ལ་གཏད་པས་བསོད་ནམས་མཐུ་འབར་རྣམས་ནི་མཛེས་མ་དག་དང་ལྷན་ཅིག་ཏུ། །ག་པུར་ཨེ་ལ་ལི་ཤི་ཤིང་ཚ་ཨ་ཀ་རུ་དང་
༄། །སྤང་སྤོས་ཕྱེ་མའི་དྲི་ཆུ་ཅན། །གློང་འཁོར་རྦ་རླབས་བུད་མེད་སྡུ་གུའི་ནུ་མ་འདོད་པའི་དྲེགས་པས་འབུར་བའི་སྐྱིབས་འཁྱིལ་བ། །དལ་འབབ་གང་གཱའི་ཆུ་ལ་ཆུ་རྩེད་ཆུ་ནི་དྲག་ཏུ་འཐོར་བས་རྩེད་མོ་བྱེད་པར་འགྱུར། །ཁྱོད་ཀྱི་སྤྱན་རས་མང་དུ་ཕོག་པས་དག་པའི་བཀའ་ལ་ལྷ་གཙོ་དུལ་བའི་ཁུར་བུ་ཡིས། །ཅོད་པན་འདུད་པ་རྣམས་ཀྱིས་ཕྱག་བྱས་མཐོ་རིས་སྟེང་ན་ལྷ་ཡི་གླང་ཆེན་ཐལ་གོང་ནི། །ཁྲོལ་ཁྲོལ་རྒྱན་གྱིས་སྤུད་པ་ལ་ཞོན་ལུས་ཀྱི་བ་སྤུ་ཤས་ཆེར་ལངས་པའི་བདེ་སོགས་ཀྱི། །ལག་རིངས་འདོ་ལི་བར་མེད་བསྐྱིལ་ཅིང་འཆང་བ་རྡོ་རྗེ་དང་འབྲེལ་ལྷ་ཡི་ཡུལ་ལས་སྐྱོང༌། །ཁྱོད་སྐུ་གཙུག་གི་རིན་ཆེན་རྒྱན་གྱི་གདན་བཞུགས་བདེ་བར་གཤེགས་འོད་མཁའ་ཁྱབ་བླ་རེ་ཅན། །ཉི་མ་ཤར་ཀ་བྱེ་བ་ལྟ་བུར་ཆེས་གསལ་འོད་ཟེར་དག་གིས་འཇིག་རྟེན་གསུམ་འགེངས་ཤིང༌། །ཞབས་གཅིག་གཡས་བརྐྱང་གོམ་སྟབས་ཆེན་པོའི་བརྗིད་ལ་ཚངས་དབང་ཁྱབ་འཇུག་དྲག་པོ་རྣམས་འདུད་པ། །བསྒོམས་པས་སྐྱེ་བ་ལ་བརྟེན་རྣམས་ཀྱིས་སྲིད་པའི་འཇིགས་པ་རྒྱུན་ནི་གཅོད་པར་བགྱིད་པར་འགྱུར། །ལ་ལ་ཁྲོ་བ་དང་བཅས་ཕྱག་ཚོགས་ཕྱག་ཆ་རྣམས་ཀྱི་འོད་ཟེར་དག་དང་འབྲེལ་པ་ཡིས། །ནམ་མཁའི་ཁོངས་ཁྱབ་སྦྲུལ་གྱི་གདུ་བུའི་གདེངས་ཀ་དག་གིས་སྤྱོད་པ་མི་འཕྲོགས་མི་བཟད་པའི། །སྡང་རྣམས་སྐྲག་མཛད་གད་མོའི་ཅང་ཏེའུ་དྲག་པོ་བརྡུངས་བས་བརླང་བསྐྱེད་ཚེ་ན་རོ་ལངས་ནི། །ཐལ་མོའི་སྒྲ་ཆེན་སྒྲོགས་པས་བསྒྱིངས་ཤིང་བསྙེམས་པའི་རོལ་པ་ཆེན་པའི་ཅ་ཅོ་དྲགས་པར་ཁུམས། །ལ་སྦུའི་ཁུང་རེ་ནས་བྱུང་ནམ་མཁའ་ཁྱབ་པའི་སར་གནས་ས་འོག་མཐོ་རིས་གནས། །ཚངས་པ་དབང་པོ་ལ་སོགས་ལྷ་དང་ཀླུ་དང་དྲི་ཟ་མི་དང་གྲུབ་པ་རྣམས་གནས་ཤིང༌། །ཕྱོགས་ཚོགས་ཁྱབ་པའི་འོད་ཟེར་ལ་བཞུགས་བདེ་གཤེགས་བརྒྱ་ཕྲག་སྤྲུལ་པ་མཐའ་ཡས་ཀྱིས་དང༌། །ངོ་མཚར་ཁམས་གསུམ་ཕྱག་འོས་བརྟན་དང་གཡོ་བར་གནས་པའི་དངོས་པོ་མ་ལུས་ངོ་བོར་ཁུམས། །ལ་ལས་རྒྱ་སྐྱེགས་ལི་ཁྲིའི་ཚོན་འདྲ་ཉི་མ་གཞོན་ནུ་ཆེས་དམར་ལྟ་བུར་དམར་བར་ཁུམས། །དེ་བཞིན་གཞན་གྱི་དཔལ་ལྡན་ཨནད་རྙིལ་དུ་བཏགས་པའི་ཕྱེ་མ་འཐུལ་
༄། །འདྲར་སྔོན་པོར་ཁུམས། །ལ་ལས་འོ་མའི་རྒྱ་མཚོ་དཀྲུགས་དང་ཞོ་བས་ཆེས་ལྷག་དཀར་དང་གསེར་འོད་ལྟར་ཁུམས་ཏེ། །ཁྱོད་སྐུ་སྣ་ཚོགས་ངོ་བོར་ཤེས་བཞིན་ཉེ་བར་གཞག་པ་དང་འབྲེལ་དབྱེ་བས་ཐ་དད་འགྱུར། །ཁྱོད་ཀྱི་ཡོན་ཏན་ཚོགས་ཀྱི་གྲངས་ནི་ཀུན་མཁྱེན་ཡེ་ཤེས་སྒྲོན་མེས་རབ་ཏུ་གསལ་བ་ཡི། །ཤེས་བྱ་མཐའ་དག་དེ་ཉིད་དབང་གཅིག་ཐམས་ཅད་མཁྱེན་པ་དངོས་དང་དེ་སྲས་ཀྱིས་མཁྱེན་ཏེ། །བདག་འདྲ་བྱ་རོག་སྒྲོགས་ལྟར་ཁ་གདངས་ཀུ་ཅོ་ཆེར་འདོན་གང་ལགས་དེ་ནི་མི་བཟད་པའི། །སྡུག་བསྔལ་རིམས་ནད་དག་གིས་བསྐྱེད་པའི་ནད་ཅན་སེམས་ཀྱི་རྒྱུད་ལ་བཞད་གད་རྒྱུ་ཞིག་ལགས། །བདག་གིས་ཞུ་བ་གང་ལགས་དེ་ནི་ནང་གི་དང་པོར་ཁྱོད་ཀྱིས་ཁྱད་པར་དུ་མཁྱེན་ཅིང༌། །དེ་བཀླག་བརྗོད་པས་ངལ་བའི་ཚུལ་ནི་མི་མཁས་རང་སེམས་ཚི་མ་པའི་བྱེ་བྲག་ལགས་མོད་ཀྱི། །འོན་ཀྱང་སྡུག་པར་དོན་ཤེས་ཟིན་པའི་གཉེན་འདུན་བྱམས་པའི་མདུན་དུ་འདུག་བཞིན་ཚིག་དག་གིས། །སྡུག་བསྔལ་ཕྱུང་སྟེ་སྙིང་ཡང་སེང་ཞེས་བྱེད་པ་ཉིད་དུ་གྱུར་ནས་རྣལ་མར་གནས་ཚོར་བཞིན། །དགེ་ལེགས་ཀུན་དགའི་རྒྱ་མཚོར་ཟླ་བའི་ཆ་ཤས་གསལ་མ་ཁྱོད་བསྟོད་ཆུ་ཡིས་ཡིད་དག་པར། །བགྱིས་པ་བདག་ལ་ཚིམ་བྱེད་མཐོང་བ་སྩོལ་ཅིག་ཡེ་ཤེས་ཉེར་བསྟན་དག་གིས་རྒྱས་པར་མཛོད། །ཐུགས་རྗེ་ཤས་ཆེས་ནང་གི་མུན་སོལ་གང་ཕྱིར་ཁྱོད་ཀྱི་བསྟོད་པ་ཙམ་ཞིག་ཀྱང༌། །དོན་ཡོད་འགྲོ་བ་དག་ན་སྐྱེ་དགུ་རྣམས་ཀྱི་བདེ་ལེགས་གནས་ནི་གཅིག་བུ་ལགས་བར་ཁུམས། །ཁྱོད་ཀྱི་ཡོན་ཏན་ཚོགས་ཀྱི་ཆ་ཙམ་བསྟོད་ནས་བདག་གིས་འདི་ཙམ་ཞེས་བྱ་མ་ངེས་པའི། །བསོད་ནམས་བཀྲ་ཤིས་འདོད་པའི་འབྲས་བུ་མངར་བ་རོ་མྱང་མ་གྲོལ་བར་དུ་ལོངས་སྤྱད་པ། །གང་ཐོབ་དེ་ཡིས་འཇིག་རྟེན་འདི་ནི་འཕགས་པ་འཇིག་རྟེན་དབང་ཕྱུག་ཞབས་མཐིལ་བཀྲ་ཤིས་ཀྱི། །བདེ་ལེགས་རྟགས་ཅན་བདེ་གཤེགས་སྲས་པོའི་གྲོང་ཁྱེར་བདེ་བ་ཅན་ཞེས་བྱ་དེར་མྱུར་འགྲོ་ཤོག །རྗེ་བཙུན་འཕགས་མ་སྒྲོལ་མའི་བསྟོད་པའི་མེ་ཏོག་ཕྲེང་བ་འཛིན་པ་ཞེས་བྱ་བ་སློབ་དཔོན་ཆེན་པོ་ཐམས་ཅད་མཁྱེན་པའི་བཤེས་གཉེན་ཞེས་བྱ་བ་བྱང་ཆུབ་སེམས་དཔའི་སྤྱོད་པ་རྩེ་གཅིག་ཏུ་བྱེད་པས་མཛད་པ་རྫོགས་
༄། །སོ།། །།རྒྱ་གར་གྱི་མཁན་པོ་ཀ་ན་ཀ་ཝ་རྨཱ་དང༌། བོད་ཀྱི་ལོ་ཙཱ་བ་པ་ཚབ་ཉི་མ་གྲགས་ཀྱིས་བསྒྱུར་བ་ལས། སླད་ཀྱིས་པཎྜི་ཏ་ཆེན་པོ་མ་ཎི་ཀ་ཤྲཱི་ཛྙཱ་ནའི་ཞལ་སྔ་ནས་དང༌། ཆག་ལོ་ཙཱ་བ་ཤཱཀྱའི་དགེ་སློང་ཆོས་རྗེ་དཔལ་གྱིས་ཅུང་ཟད་བཅོས་ཏེ་དག་པར་བྱས་སོ།། །།