པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་དུ་མཆོད་པའི་ཆོ་ག།
རྒྱལ་བ་དཔལ་ཡེ་ཤེས།
༄། །རྒྱ་གར་སྐད་དུ། །པདྨ་ཨཱ་བ་ལོ་ཀི་ཏེ་ཤྭ་ར་སྱ་པདྨ་ཛཱ་ལ་ཀྲ་མེ་ཎ་བྷ་ག་བ་ཏེ་མཎྜལ་པཱུ་ཛཱ་བིདྷིཿ། བོད་སྐད་དུ། །པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་དུ་མཆོད་པའི་ཆོ་ག །འཕགས་པ་སྤྱན་རས་གཟིགས་དབང་ཕྱུག་པདྨ་དྲ་བ་ལ་ཕྱག་འཚལ་ལོ། །མཐའ་མེད་འཁོར་བའི་རྒྱ་མཚོ་ཡི། །ནང་དུ་རྒྱུ་བའི་འཇིག་རྟེན་རྣམས། །མངའ་བདག་ཐུགས་རྗེས་ནོན་པས་འདོན། །འཇིག་རྟེན་དབང་ཕྱུག་རྒྱལ་གྱུར་ཅིག །ཀུན་མཁྱེན་གྱིས་ཀྱང་ལེགས་ཤེས་མིན། །ཟབ་ཅིང་རྒྱ་ཆེའི་ཆུ་གཏེར་ནི། །པདྨའི་ཕྱག་གིས་ཐུགས་རྗེས་མཁྱེན། །བརླིང་པར་མཛད་པ་ལ་ཕྱག་འཚལ། །བནྡུ་ཀ་དང་སེ་འབྲུ་མཚལ་བ་ཟངས་པདྨ་རཱ་ག་དང༌། །རྒྱ་སྐྱེགས་ཁུ་བ་ཞུ་བ་དམར་པོའི་གདན་དང་པདྨ་གསེར། །སྣང་ལས་རྣམ་པར་རྒྱལ་ནས་ཐུགས་རྗེས་དམར་པོའི་མཆོག་གི་སྐུ། །འཇིག་རྟེན་དབང་ཕྱུག་བླ་མ་འདི་ནི་མཆོག་གསལ་རྣམ་སྣང་བྱེ། །དེ་ནི་སེམས་ཅན་ཐམས་ཅད་ཡོན་
༄། །ཏན་ཕུན་ཚོགས་ཀུན་འཛིན་པ། །འཇིག་རྟེན་དབང་གི་དབུ་ལ་རྟག་ཏུ་ཡང་དག་གནས་བཅས་པ། །འདོད་ཆགས་ལ་སོགས་ཉེས་པ་བཞི་ལྡན་བདེ་བར་གཤེགས་པའི་གཙོ། །ཡོན་ཏན་མང་པོ་ཡང་དག་གནས་པའི་འོད་དཔག་མེད་ལ་འདུད། །པདྨ་རཱག་རྣམ་པར་བདར་དང་གསེར་དང་སྣང་བྱེད་འོད། །ཚོགས་རྣམས་རབ་འཛག་བྱུ་རུའི་སྡོང་པོ་ཟངས་དང་མཚལ་བ་ཟངས་མཛེས། །མཁའ་མཉམ་སྣང་བ་མཐའ་ཡས་ཡོན་ཏན་རྒྱ་ཆེ་འོད་དཔག་མེད། །བཅོམ་ལྡན་འཇིག་རྟེན་མགོན་པོའི་ཅོད་པན་རྒྱན་གྱུར་ལ་ཕྱག་འཚལ། །གང་གིས་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་མི་ཤེས་པའི་སྤྱོད་པ་ནི་བདག་གི་པགས་པའི་མིག་གི་སྐུ་བཞིའི་ངོ་བོའི་རང་གི་ངོ་བོ་དཀྱིལ་འཁོར་མཆོད་པའི་ཆོ་ག་བརྗོད་པར་བྱའོ། །དེ་ཡང་བདག་ཉིད་བཞད་གད་དུ་བྱེད་པ་གལ་ཏེ་ཡང༌། དེ་ལྟ་ན་ཡང་དེའི་དྲིན་འདིས། །ཚོགས་རྣམས་བདག་ལ་ཆེན་པོར་འཆར། །གང་གི་རྒྱུ་མཚན་དེ་རྣམས་ནི། །ནོར་ལྷའི་ཕྲིན་ལས་བཟང་པོ་རྣམས། །དེ་ཕྱིར་གཞན་ལ་ཕན་དོན་དུ། །ཇི་བཞིན་པ་ནི་མ་ཡིན་ཡང༌། །ཡོངས་སུ་ངལ་གར་ལེགས་པ་ཡི། །ཤིན་ཏུ་ཆུང་གྱུར་ཀྱང་མཛེས་བྱེད། །མཆོད་པའི་ཆོ་ག་དམ་པའི་ལམ། །ལེགས་པ་དེ་འདི་མཉེས་གྱུར་ཅིག །ཅུང་ཟད་ཅི་ཡང་ཤེས་བྱེད་པ། །ལས་ཐམས་ཅད་པ་བདག་གིས་བརྗོད། །དང་པོ་རེ་ཞིག་ཚངས་པའི་ཡུད་ཙམ་ལ་རྡོ་རྗེ་སློབ་དཔོན་སྟན་ལས་ལངས་ནས་གོས་ཡོངས་སུ་བགོས་ཏེ་ལྷའི་ངག་གི་ཐ་སྙད་བྱ་ཞིང་འཇིག་རྟེན་པའི་ཕལ་པའི་སྐད་ཀྱིས་འདྲིས་པ་ཡོངས་སུ་སྤངས་པའམ། མི་སྨྲ་བར་བྱས་པ་ཕྱི་རོལ་གྱི་སར་གཙང་སྦྲའི་ཕྱེད་དུ་ཡང་དག་པར་བརྟེན་པར་བྱའོ། །དེ་ལ་ཉི་མ་སྔ་དྲོ་ཁ་ཤར་ལ་ཕྱོགས་པ་དང༌། ཉི་མ་གུང་ལ་ལྷོར་ཕྱོགས་པ་དང༌། དགོངས་མོ་ནུབ་ཏུ་ཕྱོགས་པས་ཉེ་བར་འདུག་སྟེ་ལངས་ནས་རྟགས་ལ་གཅིག་དང་བཤང་ལམ་ལ་གསུམ་དང་དེ་བཞིན་དུ་ལག་པ་གཡོན་པ་ལ་བཅུ་དང་གཉི་ག་ལ་བདུན་སྦྱིན་པར་བྱ་བས་དག་པར་མངོན་པར་འདོད་དོ་ཞས་པའི་རིམ་པས་གཙང་སྦྲ་བྱའོ། །དེ་ནས་སླར་ཡང་ཁ་བཤལ་ནས་དལ་གྱིས་དཀྱིལ་འཁོར་གྱི་
༄། །ཁང་པར་འཇུག་པར་བྱའོ། །ཞུགས་ནས་ཨོཾ་སརྦ་ཏ་ཐཱ་ག་ཏཱ་ནཱཾ་པཱ་ད་བནད་ནཾ་ཀཱ་རོ་མི། ཨོཾ་ན་མཿསརྦ་བུ་དྡྷ་བོ་དྷི་ས་ཏྭེ་བྷྱཿད་ཤ་དིཀ་ལོ་ཀ་དྷཱ་ཏུ་བྱ་བ་སྠི་ཏེ་བྷྱཿས་སྲ་བ་ཀ་པྲ་ཏེ་ཀ་བུདྡྷེ་བྷྱ། ཞེས་པས་ཤར་དང་ལྷོ་དང་ནུབ་དང་བྱང་དུ་བསྐོར་བས་ཕྱག་བྱའོ། །དེ་ནས་འཇམ་པའི་སྟན་ལ་ཡང་དག་པར་ཉེ་བར་འདུག་ནས། བླ་མ་བདག་ཉིད་གང་དུ་བྲིས་པའི་དཀྱིལ་འཁོར་གྱི་ཤར་གྱི་ཆར་ཁ་ནུབ་ཕྱོགས་པའམ་གལ་ཏེ་མ་ཡིན་ཏེ་བྲིས་པའི་དཀྱིལ་འཁོར་མེད་ན་དེའི་ཚེ་སྟོན་པ་པོ་བློ་བཟང་པོས་གལ་ཏེ་ས་ལ་ཁ་ཤར་དུ་ཕྱོགས་པར་གྱུར་ནས་ཡེ་ཤེས་ཀྱི་ལྷ་ལ་མཆོད་པ་བྱའོ་ཞེས་གསུངས་པའི་ཕྱིར། དེ་ལ་ཨོཾ་བཛྲ་ཨུ་ད་ཀ་ཧཱུཾ་ཞེས་ཁྱོར་བའི་ཆུ་ལ་མངོན་པར་བསྔགས་ཏེ་ཆུའི་ཉེས་པ་བསལ་ནས་ལན་གསུམ་དུ་མགོ་ལ་མངོན་པར་བསྐུར་བར་བྱའོ། །དེ་ནས་ཨོཾ་བཛྲ་ཨུ་ད་ཀ་མ་མཱ་ཤྲཱི་པདྨ་ཨ་ཝ་ལོ་ཀི་ཏེ་ཤྭ་ར་མུ་ནེ་བ་ར་མ་པ་ར་མ་ཨ་ནུ་ཏ་ནོ་ཨཱ་ན་ན་ཨཱ་དི་ཤུདྡྷཾ་གུ་རུ་སྭཱཧཱ། ཞེས་པས་ལག་པ་དང་གདོང་ཁྲུས་བྱའོ། །དེ་ནས་བསམ་གཏན་གྱི་ཕྱག་རྒྱ་བཅིངས་ལ། བཅོམ་ལྡན་འདས་པདྨ་སྤྱན་རས་གཟིགས་དབང་ཕྱུག་ལ་བསྟོད་པས་བསྟོད་པར་བྱའོ། །སྐྱོན་མེད་ཡོན་ཏན་གྱིས་མཛེས་པ། །རྒྱལ་པ་འོད་དཔག་མེད་ཀྱིས་བརྒྱན། །ཅོད་པན་བཀྲ་ཤིས་སྤྱིན་པ་པོ། །ཐུགས་རྗེའི་བདག་ཉིད་ཁྱོད་ལ་འདུད། །པདྨ་མཆོག་གི་འོད་ཀྱི་ལུས། །པདྨ་མཆོག་གིས་འཛིན་པ་དང༌། །པདྨའི་དཔལ་གྱི་གཏེར་གྱི་ཕྱག །པདྨ་ཆེན་པོའི་གདན་ལ་བཞུགས། །རལ་པའི་དཀྱིལ་འཁོར་དམ་པ་འཆང༌། །ཐམས་ཅད་མཁྱེན་པའི་འབྱུང་གནས་འཛིན། །སེམས་ཅན་འདོན་པར་བྱེད་ལ་མཁས། །སེམས་ཅན་དབུགས་འབྱིན་མཛད་པའི་ཕྱག །དམན་དང་གཞན་ལ་རྗེས་བརྩེ་བ། །སེམས་ཅན་སྨིན་པར་མཛད་པ་ལ། །རྟག་ཏུ་སེམས་ཅན་དེས་གནས་པ། །སེམས་དཔའ་ཆེན་པོ་བསྟོད་པའི་བདག །སེམས་དཔའི་སྙིང་པོ་མཆོད་པ་ལ། །རྒྱུ་མེད་སེམས་ཅན་མཉེས་གཤིན་པ། །སྨན་གྱི་རྒྱལ་པོ་དང་མཚུངས་པ། །ཉི་མ་ཟླ་བ་མེ་ཡི་སྤྱན། །ཤིན་ཏུ་རྣམ་པར་དག་ཡོན་བདག །ཤིན་ཏུ་རྣམ་དག་གོ་འཕང་གནས། །ཤིན་ཏུ་རྣམ་དག་རབ་སྦྱིན་པ། །དམ་ཆོས་མཛོད་ཀྱི་བདག་པོ་སྟེ། །ཡིད་བཞིན་ནོར་བུ་མཉམ་
༄། །པའི་འོད། །ཐར་པའི་ལམ་ལ་རབ་གནས་པ། །སྣ་ཚོགས་འཇིགས་པ་འཕྲོག་པར་བྱེད། །ཡོན་ཏན་མགོན་པོ་ཁྱོད་ལ་བསྟོང༌། །ཐུགས་རྗེ་ཆེན་པོ་ཁྱོད་ལ་འདུད། །བྱམས་དང་དགའ་བ་ལ་ཕྱག་འཚལ། །ཕ་རོལ་ཕྱིན་པ་དྲུག་ཕྱག་འཚལ། །ཁྱབ་བདག་ཆེན་པོ་ཁྱོད་ཞབས་ལ། །ས་ལ་ལྷུང་ནས་བདག་ཕྱག་འཚལ། །ས་སྟེངས་འཇིག་རྟེན་དག་བྱས་པ། །ཉེས་པ་ཟད་པར་མཛད་པ་ལ། །ཇི་ལྟར་མཁའ་ནི་ཕ་རོལ་མཐའ་མེད་ཅིང༌། །ཉི་མའི་རབ་གདུང་མཚུངས་མེད་ཇི་བཞིན་ཉིད། །ཇི་ལྟར་སངས་རྒྱས་ཡོན་ཏན་མཐའ་མེད་ཉིད། །ཁྱེད་ཀྱི་བརྩེ་ཆེན་མཐའ་མེད་དེ་བཞིན་ཉིད། །ནམ་མཁའ་མ་ལུས་ཀུན་དུ་གནས། །རྟག་ཏུ་འགྲོ་དྲུག་རྒྱུ་བྱེད་པ། །ཀུན་ནས་འདོན་པ་བྱེད་འདོད་ཁྱོད། །སྲིད་པའི་བར་དུ་བདག་ཕྱག་འཚལ། །འཇིག་རྟེན་བླ་མ་འཕགས་པ་ཁྱོད་ཞབས་པདྨ་ལ། །བདག་གིས་བསྟོད་པའི་བྱ་བ་འདི་དག་ཀུན་ཕུལ་ལས། །ཡང་དག་བྱུང་བའི་བསོད་ནམས་མངོན་བྱུང་ཉེར་ཐོབ་པ། །སྐྱེ་བོ་རྣམས་ཀྱིས་རྟག་པ་ཁོ་ནར་འབྱུང་བར་གྱིས། །ལོང་བ་མགོན་མེད་ལམ་མེད་རབ་ཞུགས་པ། །སྲིད་པའི་སྡིག་པའི་ཚོགས་སུ་ངེས་བྱིན་ལུས། །བསོད་ནམས་འདི་ཡིས་ཉེ་ས་པ་མ་ལུས་པར། །སླར་ནི་མི་སྐྱེ་མྱུར་དུ་གྲོལ་གྱུར་ཅིག །སྡུག་བསྔལ་རྣམ་པར་སྤངས་ཤིང་མུན་པའི་ཚོགས་བསལ་པ། །ཆགས་པ་ཉེ་བའི་ཆགས་བྲལ་འཁོད་པའི་རྒྱུ་ཚོགས་ཀྱིས། །འཁོར་བ་རྒྱུ་བ་པོར་རྒྱུར་ཡུལ་སྤྲུལ་མཆེ་བ་ཡི། །ཕྲག་ཏུ་ཉེར་སོན་ཉེན་པ་བདག་ལའང་རབ་སྲུངས་ཤིག །དམ་པའི་ལམ་སྟོན་མཆོག་ཏུ་ཆེ་བའི་དོན་བཅས་འཛིན། །མཆོག་གི་དབང་ཕྱུག་དང་ནི་མྱུར་དུ་ལམ་སྟོན་ཅིག །ལས་ཀྱི་ཆུ་རླབས་གཡོ་བའི་དྲག་པོའི་ཡུལ་འཛིན་པ། །འཇིགས་པའི་དབང་པོ་རབ་དྲག་ཆུ་སྲིན་འཇིགས་རུང་མཚན། །འཁོར་བའི་རྒྱ་མཚོ་སྒྲོལ་བྱེད་སྐྱ་འཛིན་བཅོམ་ལྡན་འདས། །སྙིང་རྗེའི་གཏེར་གྱིས་མྱུར་དུ་ཕ་རོལ་བདག་དྲོངས་ཤིག །འཇིག་རྟེན་ཁམས་ཀྱི་ལྷ་དབང་པདྨ་སྤྱན་རས་གཟིགས། །སེམས་ཅན་མ་ལུས་སྲིད་པའི་སྡུག་བསྔལ་ཚོགས་རྣམས་འཕྲོག །བདག་དང་འགོ་ཀུན་འཇིགས་འཕྲོག་བདག་ཉིད་ཆེན་པོ་
༄། །ཁྱོད། །རྟག་ཏུ་མི་འབྲལ་མཐོང་བར་འདིར་ནི་ཡོད་གྱུར་ཅིག །སྐྱོ་དང་ཉེར་ཆགས་སྤངས་པ་མཚུངས་མེད་དྲི་བྲལ་བརྩོན་འགྲུས་ལྡན། །གཞན་ཕན་ངེས་དགའ་བདག་ནི་ངེས་པ་བདག་ལ་དོགས་པ་མེད། །རྒྱ་ཆེ་ཡོན་ཏན་རྟག་ཏུ་ཕྱུག་པ་ཉེས་པ་རབ་རྒྱས་གྲོལ། །རབ་མཆོག་པདྨའི་ཕྱག་ཁྱོད་ཇི་བཞིན་ཁོ་ནར་བདག་གྱུར་ཅིག །ཅེས་བསྟོད་པ་བྱའོ། །དེ་ནས་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །དེ་ལྟར་བསྒོམ་པར་བྱས་ལ་བདག་ཉིད་སྔགས་ཀྱི་དཀྱིལ་འཁོར་བསྲུང་བའི་དོན་དུ་སྡིགས་མཛུབ་དང་མཐེ་བོའི་སེ་གོལ་རྣམས་ཀྱིས་ཤར་ལ་སོགས་པའི་ཕྱོགས་དང་ཕྱགས་བྲལ་རྣམས་སུ་བགེགས་བསྐྲད་པར་བྱ་སྟེ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་པའི་སྔགས་ཀྱིས་སོ། །དེ་ནས་རང་གི་སྙིང་གར་པཾ་ལས་སྐྱེས་པའི་པདྨ་དམར་པོ་དེའི་སྟེང་དུ་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་ཁ་དོག་དཀར་པོ་བསམས་ནས་ནམ་མཁར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པ་ཐམས་ཅད་སྣང་བར་གྱུར་པར་རྣམ་པར་བསམ་པར་བྱའོ། །རང་གི་འདོད་པའི་ལྷའི་གཟུགས་རྣམས་དཀྱིལ་འཁོར་གྱི་འཁོར་ལོ་བླ་མ་རྣམས་དང་བཅས་པ་སྣང་བར་གྱུར་པར་བྱའོ།། ཨོཾ་སརྦ་ཏ་ཐཱ་ག་ཏ་ཨཱ་ད་ཡ་སཾ་སྲ་བ་ཀ་པྲ་ཏྱེ་ཀ་བུདྡྷ་བོ་དྷི་སཏྭ་ཨཱཏྨ་ཀཾ་ཨ་ནུ་གྲ་ཧཱ་ཡག་ག་ན་ཏ་ལེ་ཨཱ་བིར་བྷཱ་བནྟུ་ཧཱུཾ་ཧཱུཾ་ཧཱུཾ་ཡུཥྨ་བྷྱཾ་ན་མཿསྭཱཧཱ། ཞེས་པ་སྣང་བར་གྱུར་པའི་སྔགས་སོ། །སླར་ཡང་ཧྲཱིཿཡིག་དེ་ལས་གཟུགས་དང་སྒྲ་དང་དྲི་དང་རོ་དང་རེག་བྱ་རྡོ་རྗེ་མའི་ལྷ་།མོ་རྣམས་དང་ཕྱི་རོལ་གྱི་རྣམ་པ་སྣ་ཚོགས་པའི་མེ་ཏོག་ལ་སོགས་པའི་ལྷ་མོ་རྣམས་ཀུན་དུ་སྤྲོས་ནས་དེ་ཉིད་ཡང་དག་པར་མཆོད་དེ་བདག་དེ་རྣམས་ལ་དབུལ་པར་བྱས་ནས་ཐལ་མོ་སྦྱར་ཏེ་ཕྱག་དང་བཅས་པར་བྱའོ། །དེ་བཞིན་དུ་སྔགས་ཀྱང་བཀླག་པར་བྱའོ། །ཨོཾ་སརྦ་ཏ་ཐཱ་ག་ཏ་བུ་ཥྤ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡ་ཤྲི་ཡཾ་ཧཱུཾ། དེ་བཞིན་དུ་དྷཱུ་བ་ལ་སོགས་པ་རྣམས་སོ། །འདི་ལྟར་ནམ་མཁར་སྣང་བར་གྱུར་པའི་དཀྱིལ་འཁོར་མཆོད་པར་བྱའོ། །དེ་ནས་སྡིག་པ་བཤགས་པ་སྔོན་དུ་འགྲོ་བས་དཀོན་མཆོག་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བཀླག་པར་བྱའོ། །སངས་རྒྱས་
༄། །བླ་མ་ཕྱག་འཚལ་ལོ། །སྐྱོབ་པའི་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལའང་རྟག་ཏུ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ཤོག ། སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འབྱུང་གྱུར་ཅིག །སྡིག་པ་ཐམས་ཅད་བཤགས་པ་དང༌། །བསོད་ནམས་རྗེས་སུ་ཡི་རང་དང༌། །གང་འཕགས་ཡན་ལག་བརྒྱད་གསོ་སྦྱོང༌། །བྱས་སམ་ཀུན་དུ་སྤྱད་པར་བགྱིའོ། །ཞེས་སོ། །དེ་ནས་སླར་ཡང་ཚངས་པའི་གནས་བཞི་བསྒོམ་པར་བྱས་ནས་དོན་དམ་པ་ལས་ཆོས་ཐམས་ཅད་བདག་མེད་པ་འདུས་བྱས་ཐམས་ཅད་སྐད་ཅིག་པ་མྱ་ངན་ལས་འདས་པ་ཞི་བའོ་ཞེས་ཁམས་གསུམ་པ་སེམས་ཙམ་ཁོ་ནའོ་ཞེས་སྔགས་ཀྱི་དོན་བསྒོམ་པར་བྱའོ། །ཨོཾ་སྭཱ་བྷཱ་བ་ཤུདྡྷཿསརྦ་དྷརྨཱཿསྭཱ་བྷཱ་བ་ཤུདྡྷོཉཧཾ། ཨོཾ་སྭཱ་བྷཱ་བཤཱུ་ནྱེཿསརྦ་དྷརྨཱཿསྭཱ་བྷཱ་བ་ཤཱུ་ནྱོཉཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོཉཧཾ། ཞེས་སོ། །དེ་ནས་ནང་གི་མི་ཤེས་པའི་མུན་པ་ཡོངས་སུ་བསྐོར་བའི་སྙིང་གའི་ཁུང་བུའི་ནང་དུ་སོན་པ་སེམས་ལ་གནས་པ་རྣམས་པར་བསམས་ནས། དེའི་མུན་པའི་རྣམ་པའི་རང་གི་ངོ་བོ་མི་ཤེས་པ་བཟློག་པའི་ཕྱིར་སྙིང་གི་པདྨ་རབ་ཏུ་རྒྱས་པ་ལ་བརྒྱ་ཕྲག་བཅུར་འོད་གསལ་བའི་ཉི་མ་ལ་སོགས་པ་རྣམ་པར་བསྒོམ་པར་བྱའོ། །དེས་སེམས་དྲི་མ་མེད་པ་ཅན་དུ་བྱས་པ་ཀུན་དུ་བལྟ་བར་བྱའོ། །དེ་ལ་སེམས་ཀྱི་ནང་དུ་ཧཱུཾ་ཡོངས་སུ་གྱུར་བ་འཆད་བཞིན་པའི་རིམ་པས་རྡོ་རྗེའི་གུར་ལ་སོགས་པའི་རིམ་པའོ། །དཔེར་ན་དང་པོར་རེ་ཞིག་ཆོས་འབྱུང་གི་ཕྱག་རྒྱ་གདེངས་ཀ་གྱེན་དུ་ཕྱོགས་པ་དཀར་པོ་ཟུར་གསུམ་འོག་ཏུ་རྩེ་མོ་ཕྱོགས་པ་བསྒོམ་པར་བྱའོ། །དེའི་དབུས་སུ་སྣ་ཚོགས་པདྨ་
༄། །དང་སྣ་ཚོགས་རྡོ་རྗེའོ། །དེའི་འོག་ཏུ་ཡཾ་ལས་སྐྱེས་པའི་རླུང་གི་དཀྱིལ་འཁོར་ནག་པོར་སྣང་བའོ། །དེའི་སྟེང་དུ་རཾ་ལས་སྐྱེས་པའི་དཀྱིལ་འཁོར་དམར་པོ་ཟུར་གསུམ་པ། དེའི་སྟེང་དུ་བཾ་ལས་སྐྱེས་པའི་ཆུའི་དཀྱིལ་འཁོར་དཀར་པོ་ཟླུམ་པོ། དེའི་ལྟེང་དུ་ལཾ་ལས་སྐྱེས་པའི་དབང་ཆེན་གྱི་དཀྱིལ་འཁོར་སེར་པོ་གྲུ་བཞི། དེའི་སྟེང་དུ་སུཾ་ལས་སྐྱེས་པའི་ལྷུན་པོ་ཆོས་མངོན་པ་མཛོད་ཀྱིས་འཇིག་རྟེན་གྱི་ཁམས་མཉམ་པར་གཞག་པར་གསུངས་པ་བཞིན་རི་བདུན་དང་གླིང་དང་བཅས་པ་དེའི་སྟེང་དུ་ཨ་ཡོངས་སུ་གྱུར་པའི་ཟླ་བ། དེའི་སྟེང་དུ་པཾ་ཡིག་སེར་པོ་ཡོངས་སུ་གྱུར་པ་ལས་སྣ་ཚོགས་པདྨ། དེའི་སྟེང་དུ་བཾ་ཡོངས་སུ་གྱུར་པའི་སྣ་ཚོགས་རྡོ་རྗེའོ། །དེའི་ལྟེ་བ་ལ་བྷཱུཾ་ལས་སྐྱེས་པའི་འཁོར་ལོ། དེའི་ལྟེ་བར་རྣམ་པར་སྣང་མཛད་ཀྱི་རང་གི་ངོ་བོ་ཡེ་ཤེས་ཀྱི་མཆོད་རྟེན་ཁང་པ་བརྩེགས་པ་བལྟ་བར་བྱའོ་ཞེས་པ་རྒྱུད་ཐམས་ཅད་ལ་ངེས་པའོ། །ཁང་པ་བརྩེགས་པ་དེ་ཉིད་ལ་གྲུ་བཞི་པ་སྒོ་བཞི་པ་ཞེས་དཀྱིལ་འཁོར་གྱི་ཆོ་གར་བྲིས་པ་འཆད་བཞིན་པའི་རིམ་པས་ཐམས་ཅད་རྣམ་པར་བསམས་པར་བྱས་ནས་དེའི་བདག་ཉིད་མཆོད་པའི་ཡོ་བྱང་དུ་གྱུར་པར་དབུལ་བར་བྱའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭཱ་བྷཱ་བ་ཨཱཏྨ་ཀོཉཧཾ། ཞེས་སོ། །དེ་ནས་མགོ་བོར་འཁོར་ལོ་རྩིབས་བཅུ་གཉིས་པ་དཀར་པོའི་སྟེང་དུ་ཨོཾ་ཡིག་དཀར་པོ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭཱ་བྷཱ་བ་ཨཱཏྨ་ཀོཉཧཾ། དེའི་རྗེས་སུ་མགྲིན་པར་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཨཱཿདྨར་པོ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭཱ་བྷཱ་བ་ཨཱཏྨ་ཀོཉཧཾ། དེའི་རྗེས་སུ་སྙིང་གར་རྡོ་རྗེ་ནག་པོའི་སྟེང་དུ་ཧཱུཾ་ཡིག་ནག་པོ། ཨོཾ་སྭཱརྦ་ཏ་ཐཱ་ག་ཏ་ཙིཏྟ་བཛྲ་སྭཱ་བྷཱ་བ་ཨཱཏྨ་ཀོཉཧཾ། ཨོཾ་ཨཱཿཧཱུཾ། སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་སྭཱ་བྷཱ་ཝ་ཨཱཏྨ་ཀོཉཧཾ། ཞེས་བསམས་ནས། དེ་ནས་གཡས་སུ་ཞབས་བསིལ་དང་མཆོད་ཡོན་གྱི་སྣོད་མདུན་དུ་བཞག་ནས། ཨོཾ་བཛྲ་ཨརྒྷཾ་ཨཱཿཧཱུཾ་ཞེས་ཉེ་བར་རེ་གནས་སྐུའི་དབང་པོ་ལ་སོགས་པའི་ས་བོན་གསུམ་གྱིས་བྱིན་གྱིས་བརླབ་པོ། །དེ་ནས་ཞབས་བསིལ་དེས་མཆོད་རྫས་གཞན་ལ་མངོན་པར་གཏོར་བར་བྱའོ། །ཨོཾ་ཨརྒྷཾ་པྲ་ཏཱིཙྪ་བཛྲ་པ་དྱཾ་པྲ་ཏཱིཙྪ་བཛྲ་པུཥྤེ་ཨཱཿཧཱུཾ། བཛྲ་དྷཱུ་པེ་ཨཱཿཧཱུཾ་ཞེས་པ་ལ་སོགས་པ་རང་རང་
༄། །གི་ཕྱག་རྒྱས་དབུལ་བར་བྱའོ། །དེ་ནས་རང་གི་དོན་གྱི་ཆོ་གས་བྲིས་པ་མ་ཡིན་པའི་དཀྱིལ་འཁོར་སྔར་གྱི་རིམ་པས་ཡེ་ཤེས་སེམས་དཔའ་བཀུག་ནས་རྡོ་རྗེ་ལྕགས་ཀྱུ་ལ་སོགས་པའི་རིམ་པས་ནང་དུ་གཞུག་པར་བྱའོ། །སླར་ཡང་ཀུན་ཏུ་སྤྲོས་ནས་སེམས་ཅན་ལ་ཕན་པའི་དོན་བྱེད་དུ་བཅུག་ནས་དམ་ཚིག་གི་དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་དག་གཅིག་ཉིད་དུ་བྱས་ནས་དཀྱིལ་འཁོར་དང་དཀྱིལ་འཁོར་པ་རྣམས་རང་རང་གི་སྙིང་པོའི་སྔགས་ཀྱིས་མཆོད་པར་བྱ་ཞིང་བཟླས་པ་དང་བསྟོད་པར་བྱས་ལ་མཐར་གཤེགས་སུ་གསོལ་བར་བྱའོ་ཞེས་པ་དཀྱིལ་འཁོར་དང་བྲལ་བ་རང་གི་དོན་གྱི་ཆོ་གར་མདོར་བསྡུས་པ་ལས་རྒྱས་པས་གཞན་གྱི་དོན་དུ་དཀྱིལ་འཁོར་ལ་བརྗོད་པར་བྱའོ་ཞེས་པ་དང་པོར་སྦྱོར་བ་སྒྲུབ་པ་པོ་རང་གི་དོན་ཆོས་ཀྱི་སྐུའོ། །དེ་ནས་དཀྱིལ་འཁོར་རྒྱལ་པོ་མཆོག་གི་ཆོ་ག་རྒྱས་པས་དཀྱིལ་འཁོར་གྱི་ཆོ་ག་བརྗོད་པར་བྱའོ། །དེ་ལ་དང་པོར་རེ་ཞིག་དཀྱིལ་འཁོར་གྱི་གནས་ཞིང་གི་བདག་པོ་ལ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་པས་གཏོར་མ་སྦྱིན་པར་བྱའོ། །དེ་ལ་དཀྱིལ་འཁོར་དུ་ཉེ་བར་རུང་བའི་ས་ལ་བ་ལས་བྱུང་བ་བཅུ་ཕྱེད་ཀྱིས་ཉེ་བར་བྱུག་པར་བྱའོ། །དེ་ལ་སྔགས་ནི་ཨོཾ་ས་མནྟ་དྷ་ར་ཤུདྡྷེ་དྷ་ར་དྷ་ར་ཧཱུཾ། ཨོཾ་ནི་རྨ་ལ་ཤུདྡྷ་ཧཱུཾ་ཞེས་སོ། །དེ་ནས་ས་གཞི་དེ་ཁོ་ནའི་བགེགས་བཟློག་པའི་དོན་དུ་ཞི་བ་ཅན་གྱི་སྦྱིན་སྲེག་བྱའོ། །དེ་ལ་དཀྱིལ་འཁོར་དུ་ཉེ་བར་བྱས་ནས་གཡས་སུ་སྤོས་ཕོར་གཡོན་དུ་དྲིལ་བུ་བཟུང་ནས་ལྷ་སྤྱན་དྲང་བ་འདི་བཀླག་པར་བྱའོ། །ད་ནི་རྡོར་སེམས་རང་ངོ་བོ། །དཀྱིལ་འཁོར་མཆོག་ནི་འདྲི་བར་བྱེད། །ལྷ་རྣམས་བདག་ལ་གྲུབ་པའི་ཕྱིར། །མྱུར་དུ་བསྙེན་པར་མཛད་དུ་གསོལ། །ཞེས་གསོལ་བ་གདབ་པར་བྱའོ། །དེ་ནས་སློབ་དཔོན་རྡོ་རྗེ་སེམས་དཔའི་རང་གི་གཟུགས་སུ་བསམས་ནས་གཡོན་པ་དྲིལ་བུ་ཐོགས་པ་གཡས་པ་ཁ་ཊྭཱཾ་ག་སྟེང་དུ་རྩེ་མོ་ལྔ་པའི་རྡོ་རྗེ་འཆང་བར་བསམས་ནས་བདག་དེ་དང་འདྲ་བའི་ཕྱག་རྒྱ་བཅིངས་ནས་གཞན་སློབ་མ་རྣམས་ཤར་ལ་སོགས་པའི་ཕྱོགས་སུ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་བཞིའི་ལུས་སུ་ཡོངས་སུ་བཞག་ནས་དེ་རྣམས་ཀྱིས་དཀྱིལ་འཁོར་གྱི་སའི་སྟེང་གི་བླ་མ་སྔགས་ཀྱིས་མཆོད་
༄། །པར་བྱའོ། །དེ་ནས་དེ་རྣམས་རྡོ་རྗེ་དྲིལ་བུ་གསིལ་ཞིང་ཤར་དུ་མཉམ་པའི་རྐང་སྟབས་དང་རྗེས་སུ་རྐང་པ་ལ་སོགས་པ་རྐང་སྟབས་བཞིས་གར་བྱས་ནས་རང་རང་གི་གནས་སུ་ཉེ་བར་འདུག་སྟེ་དེ་རྣམས་རྣམ་པར་སྣང་མཛད་ལ་སོགས་པ་རང་རང་གི་ཁ་དོག་དང་ཕྱག་རྒྱས་མཛད་པར་བཞག་ནས་བླ་མ་རང་ཉིད་ཤར་དུ་མངོན་པར་ཕྱོགས་པ་ཇི་ལྟར་གནས་པ་དེ་བཞིན་ཁོ་ནར་འདུག་པར་བྱའོ། །དེ་ནས་སློབ་མ་དེ་རྣམས་རྡོ་རྗེ་སེམས་དཔའི་རང་གི་ངོ་བོ་བླ་མ་ལ་རྡོ་རྗེ་མེ་ཏོག་ལ་སོགས་པའི་མཆོད་པ་བཅུ་གསུམ་བྱའོ། །དེ་ལ་སྔགས་ནི། ཨོཾ་བཛྲ་པུཥྤེ་ཨཱཿ་ཧཱུཾ། ཨོཾ་བཛྲ་དྷཱུ་པེ་ཨཱཿ་ཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བེ་དྱ་ཨཱཿཧཱུཾ། ཨོཾ་བཛྲ་ཤབད་ཨཱཿཧཱུཾ། ཨོཾ་བཛྲ་ལཱ་སྱེ་ཨཱཿཧཱུཾ། ཨོཾ་བཛྲ་མཱ་ལེ་ཨཱཿཧཱུཾ། ཨོཾ་བཛྲ་གཱིརྟི་ཨཱཿཧཱུཾ། ཨོཾ་བཛྲ་ནྲྀ་ཏྱེ་ཨཱཿཧཱུཾ། ཨོཾ་རཱ་ས་བཛྲ་ཨཱཿཧཱུཾ། ཨོཾ་སྤཪྴེ་ཛཱ་ཏེ་ཨཱཿཧཱུཾ། ཨོཾ་བཛྲ་ཨརྒྷཾ་ཨཱཿ་ཧཱུཾ། ཞེས་པ་བཅུ་གསུམ་པོ་རང་རང་གི་ཕྱག་རྒྱ་རྣམས་ཀྱིས་མཆོད་པར་བྱའོ། །དེ་ནས་ཨོཾ་བཛྲ་བྷཱུ་མི་ཨཱཿཧཱུཾ། ཨོཾ་བཛྲ་རེ་ཁེ་ཨཱཿཧཱུཾ། ཞེས་པས་ས་རྣམ་པར་སྦྱང་བར་བྱའོ། །དེ་ནས་ཡང་སློབ་མ་དེ་རྣམས་སླར་ཡང་རྐང་སྟབས་བཞིས་གར་བྱེད་པས་རྡོ་རྗེ་དྲིལ་བུ་བཟུང་ནས་ཨི་དཾ་ཏེ་གུ་རུ་མཎྜལ་ཀཾ་ནི་ཪྻ་ཏ་ཡཱ་མི་ཞེས་པས་དབུལ་བར་བྱའོ། །ཞེས་པ་སློབ་མ་བཞིས་རིམ་པས་སོ། །མེད་ན་སློབ་དཔོན་གཅིག་པུ་ཁོ་ནས་ཐམས་ཅད་བྱའོ། །དེ་ནས་རྡོ་རྗེ་སེམས་དཔའི་རང་གི་ངོ་བོ་བླ་མ་རྡོ་རྗེ་དྲིལ་བུ་དང་བཅས་པས་ཕྱག་དག་གིས་པདྨའི་བསྐོར་བས་གར་གྱི་རྣམ་པས་རྐང་སྟབས་བཞིས་རྗེས་སུཾ་རྐང་པ་ལ་སོགས་པས་ཡོངས་སུ་བསྐོར་ནས། ཨོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཞེས་པས་རྡོ་རྗེ་གསོར་བར་བྱས་དྲིལ་བུ་གཡོན་དུ་ཁ་གྱེན་དུ་ཕྱོགས་པར་བྱས་ནས་གནས་པར་བྱའོ། །ཧཱུཾ་ཧཱུཾ་ཞེས་བརྗོད་ལ་བགེགས་བསྐྲད་པར་བྱའོ། །སླར་ཡང་རཀྵ་རཀྵ་ཧཱུཾ་ཞེས་བརྗོད་ནས་དབང་ལྡན་ལ་སོགས་པར་གཡོན་སྐོར་གྱིས་བལྟ་བར་བྱའོ། །སླར་ཡང་དབང་ལྡན་ལ་སོགས་པར་གཡས་སྐོར་གྱིས་བལྟ་བར་བྱའོ། །དེ་ནས་རྡོ་རྗེའི་གུར་བསྒོམ་པར་བྱ་སྟེ་སྔགས་འདི་རྣམས་ཀྱིས་སོ། །ཨོཾ་བཛྲ་མེ་དི་ནཱི་བཛྲཱི་བྷ་བ་བནྡྷ་ཧཱུཾ་ཕཊ། ཨོཾ་བཛྲ་པཉྫ་ར་ཧཱུཾ་བཾ་ཧཱུཾ་ཕཊ། ཨོཾ་བཛྲ་པྲཱ་ཀཱ་ར་ཧཱུཾ་པཾ་ཧཱུཾ་ཕཊ། ཨོཾ་བཛྲ་ཤ་
༄། །ར་ཛཱ་ལ་ཏྲཱཾ་སཾ་ཏྲཱཾ་ཕཊ། ཨོཾ་བཛྲ་ཨ་ཙ་ན་གྲྀ་ཧེ་ཧཱུཾ་ཕཊ། ཨོཾ་བཛྲ་བི་དཱ་ན་ཧཱུཾ་བཾ་ཧཱུཾ་ཕཊ། ཨོཾ་བཛྲ་སུ་ཁ་ཨཱ་ས་ན་ཧཱུཾ་ཕཊ། ཅེས་པས་རྡོ་རྗེའི་གུར་བསྒོམ་པར་བྱའོ། །དེ་ནས་རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་གུང་མོ་གཉིས་ས་ལ་གནས་པར་བྱས་ནས། ཨོཾ་བཛྲ་ཨུཏྟིཥྛ་ཞེས་པས་ནམ་མཁར་བཏེག་ནས་དཀྱིལ་འཁོར་གདེག་པར་བྱའོ། །དེ་ནས་རྗེས་སུ་རྐང་པ་ལ་སོགས་པའི་རིམ་པ་བཞི་པོ་བྱས་ནས་རྐང་པ་བརྡབ་པར་བྱས་ཏེ། ཧཱུཾ་ཞེས་བརྗོད་པས་ཁྲོ་བོ་སྤྲོས་ནས། ཨོཾ་བཛྲོད་གྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། རིམ་པས་སྒོ་བཞི་པོའི་སྒོ་གླེགས་དབྱེ་བར་བྱའོ། །དེ་ནས་སྡིགས་མཛུབ་ཕུར་པའི་ཕྱག་རྒྱས་ཨོཾ་བཛྲ་མཎྜལ་ཧཱུཾ་ཛཿ་ཞེས་བརྗོད་པས་ཡེ་ཤེས་ཀྱི་དཀྱིལ་འཁོར་དགུག་པར་བྱའོ། །དམ་ཚིག་དང་ཡེ་ཤེས་ཀྱི་དཀྱིལ་འཁོར་དག་གཅིག་ཏུ་བྱའོ། །དེ་ནས་སེང་ལྡེང་གི་ཕུར་པ་ལྔ་པོ་རྣམས་འབྲུ་ལྔ་རྣམས་ལ་བཞག་ནས་ཨོཾ་ཞེས་བརྗོད་ནས་དེ་ནས་ཕྱུང་སྟེ་སོ་མ་བཏང་བའི་ཕ་གུ་རྣམས་དབང་ལྡན་ལ་སོགས་པ་རྣམས་སུ་ཡོངས་སུ་བཞག་ནས། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷྣཱཾ་བནྡྷ་ཧཱུཾ་ཕཊ། ཅེས་བརྒྱད་ལྷག་པའི་བརྒྱ་ཡོངས་སུ་བཟླས་ནས་དབང་ལྡན་ལ་སོགས་པའི་ཕྱོགས་རྣམས་སུ་ཕུར་བུས་གདབ་པོ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུ་ཥྚཱན་ཀཱི་ལ་ཡ་ཀཱི་ལ་ཡ། སརྦ་པཱ་པཾ་བིགྷྣཱཾ་བཛྲ་ཀཱི་ལ་ཡ་བཛྲ་དྷ་ར་ཨཱ་ཛྙཱ་པ་ཡ་ཏི་སྭཱ་ཧཱ། ཞེས་བརྗོད་ནས་རྡོ་རྗེ་ཐོ་བས་ཕུར་བུས་གདབ་པར་བྱའོ། །དཀྱིལ་འཁོར་གྱི་སྙིང་པོར་རྐོ་བར་བྱེད་པ་འཇིགས་པའི་ཕྱིར་ཤར་སྒོར་ཕུར་བུས་གདབ་པོ། །འདིས་བགེགས་རྣམས་ཕུར་བུས་གདབ་པོ་ཞེས་པའི་དོན་ཏོ། །དེ་ནས་བདུད་རྩི་འཁྱིལ་པའི་སྔགས་ཀྱིས་བུམ་པ་དཀར་པོ་བྱས་ནས་སྣམ་བུ་དམར་པོས་དཀྲིས་ཏེ་འབྲུ་ལྔ་ལ་སོགས་པ་དང་བཅས་པ་མཆོད་ཡོན་དང་བཅས་ཤིང་མཚན་མ་དང་བཅས་པར་བྱས་ནས། དེའི་སྟེང་དུ་པདྨ། པདྨའི་སྟེང་དུ་ཟླ་བའམ་ཉི་མ། དེའི་སྟེང་དུ་པདྨ་ལྕགས་ཀྱུའམ་བགེགས་མཐར་བྱེད་དམ་བདུད་རྩི་འཁྱིལ་པ་བསམས་ནས་དེའི་དབུས་སུ་རྡོ་རྗེ་ལྕགས་ཀྱུའི་རིམ་པས་ཡེ་ཤེས་པ་བཅུག་ནས་ཁ་བཤལ་བའི་དོན་དང་དག་པའི་དོན་དུ་དཀྱིལ་འཁོར་གྱི་ཁང་པའམ་སྒོའི་གཡོན་དུ་གཞག་
༄། །པར་བྱའོ། །གཞན་དུ་སློབ་དཔོན་རང་ངམ་སློབ་མས་ལག་པ་གཅིག་པོ་ཞི་བ་ཅན་གྱི་སྦྱིན་སྲེག་མདོར་བསྡུས་པའི་ཆོ་ག་བྱེད་དུ་གཞུག་གོ །དེ་ལ་དཀྱིལ་འཁོར་གྱི་ཁང་པར་དབང་པོ་ལ་སོགས་པ་འཇིག་རྟེན་སྐྱོང་བ་བཅུའི་ལྷ་དང་ལྷ་མ་ཡིན་ལ་སོགས་པ་རྣམས་དང༌། ཡི་དགས་ལ་སོགས་པ་དང༌། ཀླུ་རྣམས་ཀྱི་གཏོར་མ་གསུམ་གྱི་སྣོད་གསུམ་སྦྱིན་པར་དེ་ལ་རིམ་པ་ནི། ལོ་ཏོག་ནས། གྲོ། སོ་བ། འབྲས། མ་ཤ་།མོན་སྲན་སྡེའུ། སྲན་ཆེན་ཨོ་སྐྱ་ཀ །སྲན་ཅུང་མ་སྡུ་ར་བདུན་དང༌། ཆང་དང་ཤ་དང་ཉ་ལ་སོགས་པ་བླངས་ནས་སྣོད་གསུམ་པོ་རྣམས་སུ་བགོས་ནས་བཅུག་སྟེ་བྱིན་གྱིས་བརླབ་པར་བྱས་ནས་སྔགས་ཀྱིས་ཀྱང་བྱིན་གྱིས་བརླབ་པར་བྱའོ། །ཨོཾ་ཨིནྡྲཱ་ཡ། ཨགྣ་ཡེ། ཡ་མ་ཡེ། ནཻརྲྀ་ཏི་ཡེ། ཐ་རུ་ཎཱ་ཡ། བཱ་ཡ་བེ། ཀུ་བེ་རཱ་ཡ། ཨཱི་ཤྭ་ནཱ་ཡ། ཨུརྡྷཾ་བྲཧྨ་ཎི། ཙནྡྲ་སཱུཪྻ་བྷྱཾཿ་ཨརྠཿ་པྲྀ་ཐི་བྱཻ་སྭཱ་ཧཱ། ནཱ་གེ་བྷྱཿ་ཨ་སུ་རེ་བྷྱཿ། དེ་བ་ཡཀྵ། གནྡྷརྦ། ཨ་སུ་ར། ག་རུ་ཌ། ཀིནྣ་ར། མ་ཧོ་རག །མ་ནུ་ཥྱ། ཨ་མ་ནུ་ཥྱ་བྷྱཿ། ས་པ་རི་བཱ་རེ་བྷྱ་སྭཱ་ཧཱ། ཨོཾ་གུཾ་གུཾ་སྭཱ་ཧཱ། ཨོཾ་གུཾ་ཀ་རེ་གུཾ་ཀ་རེ་སྭཱ་ཧཱ། བགེགས་བཟློག་པའི་དོན་དུ་གཏོར་མ་སྦྱིན་པར་བྱའོ། །ཨོཾ་ཚངས་སོགས་ལྷ་མིན་ཐམས་ཅད་དང༌། །དབང་སོགས་འཇིག་རྟེན་སྲུང་བ་པོ། །ཀླུ་དང་དྲི་ཟ་གནོད་སྦྱིན་རྣམས། །གཏོར་མ་འདི་ཡིས་ཚིམ་གྱུར་ཅིག །ཅེས་སོ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱ་ཨཱདྱ་ནུདྤནྣ་ཏྭཱཏ། ཅེས་དང་མཆོད་ཡོན་དང་མེ་ཏོག་ལ་སོགས་པ་སྦྱིན་ནས། ཨོཾ་བཛྲ་མུཿ་ཞེས་བཀླགས་ནས་རོལ་མོའི་སྒྲས་གཤེགས་སུ་གསོལ་ཏེ་ཕྱོགས་ཀྱི་གཏོར་མའོ། །དེ་ནས་སློབ་དཔོན་ཞལ་བསིལ་གྱི་བུམ་པས་ཁ་བཤལ་ནས་གདོང་བཀྲུས་ཏེ་ཉེ་བར་འདུག་ལ། བསྟོད་པ་ལ་སོགས་བཀླག་པར་བྱའོ། །སྔ་མ་བཞིན་དུ་རང་ངམ་གཞན་གྱི་གཏོར་མའི་ལས་ལག་པ་གཉིས་ཀྱིས་བྱས་ནས་མི་སྨྲ་བར་འདུག་པར་བྱའོ། །དེ་ནས་དབང་བསྐུར་བར་གསོལ་བ་འདེབས་བཞིན་པ་མཚན་ཉི་ཤུ་རྩ་ལྔ་དང་ལྡན་པ་ཡོངས་སུ་བརྟགས་ནས་དགུག་པར་བྱའོ། །སློབ་མ་འོངས་ནས་བླ་མ་ལ་ཕྱག་འཚལ་ཏེ་མེ་ཏོག་ཐལ་མོས་བཟུང་ནས། ཨོཾ་བཛྲ་བྷཱུ་མི་ཨཱཿ།
༄། །ཨོཾ་བཛྲ་རེ་ཁེ་ཨཱཿ་ཞེས་པས་ས་གཞི་ངེས་པར་བརྟག་པར་བྱས་ལ། དཀྱིལ་འཁོར་མཆོད་པ་དང་བླ་མ་ལ་བསྟོད་དེ་དབང་བསྐུར་བའི་དོན་དུ་གསོལ་བ་གདབ་པར་བྱའོ། །དེ་ལ་ཚིགས་སུ་བཅད་པའི། གང་གི་འོད་ཟེར་འཕྲོས་པའི་དྲིན་གྱིས་བདག་ཉིད་ཀྱི། །མུན་པ་རབ་བཅོམ་དེ་ཉིད་རིན་ཆེན་གསལ་མཛད་པ། །རང་ཉིད་རྣམ་རྒྱལ་མཐོན་པོས་མཚུངས་མེད་རྙོག་བྲལ་གཟིགས། །དེ་ཕྱིར་གསལ་མཛད་བླ་མ་འདི་ལ་ཕྱག་བྱེད་དོ། །ཞེས་བརྗོད་དོ། །བླ་མ་དེའི་ལྷ་ལྷག་པར་གནས་པར་བྱ་སྟེ་དེ་ཁོ་ནའོ། །ཨོཾ་བཛྲ་གནྡྷེ། བཛྲ་པུཥྤེ། བཛྲ་དྷཱུ་པེ། བཛྲ་ཨཱ་ལོ་ཀེ་ཞེས་བཀླགས་ནས་སྙིང་གར་དྲི་དང༌། ཁ་ལ་བདུག་པ་དང༌། ལག་པ་གཡོན་དུ་མེ་ཏོག་དང༌། མིག་དག་ལ་མར་མེ་སྦྱིན་པར་བྱའོ། །དེ་ནས་ཨ་ཤྭཏྠ་འམ། ཨུ་དུམྺཱ་རའི་སོ་ཤིང་སོར་བཅུ་གཉིས་པ་རྩེ་མོར་མེ་ཏོག་དང་བཅས་པ་སློབ་མ་ལ་སྦྱིན་པར་བྱའོ།། དེ་སློབ་མ་དེས་སོས་ཀུན་ནས་རེག་ནས་བ་ལང་གི་ཀོ་བ་ཙམ་ཉེ་བར་བྱུགས་པའི་ས་ལ་དོར་བར་བྱའོ། །ལྷུང་བའི་དགེ་བ་དང་མི་དགེ་བ་རྣམ་པར་དཔྱད་པར་བྱས་ནས་རྡོ་རྗེ་བཞིན་དུ་ལྷུང་བ་ལས་དངོས་གྲུབ་པོ་ཞེས་རྒྱུད་ཐམས་ཅད་ནས་བཤད་པའི་ལུགས་སོ། །ཨོཾ་པདྨ་ནེ་ཏྲོ་ཧྲཱིཿ་ཞེས་པ་སོ་ཤིང་དོར་བའི་སྔགས་སོ། །དེ་ནས་གཡས་སུ་ཉི་ཤུ་རྩ་གཅིག་པའི་ཀུ་ཤའི་རྩེ་མོ་བཟུང་ནས་གཡོན་དུ་བཅུ་གཉིས་པ་བཟུང་སྟེ། ཨོཾ་པདྨ་བཛྲི་ཎི་ཧྲཱིཿ་ཞེས་པས་གློ་གཉིས་སུ་བྱིན་པར་བྱའོ། །དེ་ནས་རང་གི་ལག་པ་གཉིས་སུ་ཚད་ཀྱི་སྐུད་པ་བ་སྒྲིལ་བ་བཀུག་ནས་སུམ་སྒྲིལ་དུ་བྱས་ནས་རྡོ་རྗེའི་མདུད་པ་བྱིན་ཏེ། ཨོཾ་པདྨ་ཨཾ་ཀུ་ཤ་ཧཱུཾ་ཕཊ་ཅེས་མངོན་པར་བསྔགས་ནས་ལག་པ་དག་ལ་བཅིང་བར་བྱའོ། །གསེར་དང་བཅས་པའི་རིལ་བུ་ཡང་ངོ༌། །བཅིངས་པའི་བར་མ་ཆད་པར་བགེགས་མཐར་བྱེད་ཀྱི་སྔགས་ཀྱིས་བསྲུང་བར་བྱའོ། །བུདྡྷ་མཻ་ཏྲི་བཛྲ་སྔོན་མའོ་ཞེས་པའི་སྔགས་ཀྱིས་སེ་གོལ་སྦྱིན་པར་བྱའོ། །ཨོཾ་བཛྲ་ཨུཥྞཱི་ཥ་ཞེས་པས་སློབ་མའི་གཙུག་ཏོར་བཅིང་བར་བྱའོ། །སང་ཆོས་སྟོན་པར་འགྱུར་རོ་ཞེས་སློབ་མ་གཉིད་ལོག་ཏུ་གཞུག་པར་བྱའོ། །དགེ་བ་དང་མི་དགེ་བའི་རྨི་ལམ་བརྗོད་དོ་ཞེས་པ་དང་བཤད་
༄། །པར་བྱའོ། །དེ་ནས་སློབ་དཔོན་རྡོ་རྗེ་དྲིལ་བུ་བཟུང་ནས་གསིལ་ཞིང༌། རྡོ་རྗེའི་སྟེང་དུ་བདུག་སྤོས་བཟུང་ནས་སུ། །ཆོ་ག་ཇི་བཞིན་རིམ་ཇི་བཞིན། །སང་ནི་དཀྱིལ་འཁོར་བྲི་བར་བགྱི། །ལྷ་རྣམས་ལྷ་མོ་མཉམ་པར་བཅས། །ཉེ་བར་གནས་པར་མཛད་པར་རིགས། །ཨོཾ་སརྦ་ཏ་ཐཱ་ག་ཏཱ་ནཾ། པཱ་ད་བནྡྷ་ནཾ་ཀ་རོ་མི། ཞེས་པས་ཕྱག་བྱས། སྔར་བརྗོད་པའི་བཅོམ་ལྡན་འདས་ལ་བསྟོད་པ་བཀླགས་ནས་མཆོད་ཡོན་ལ་སོགས་པ་ཕུལ་ཏེ། ལྷ་དང་རང་གི་མིང་སྙིང་པོར་བྱས་པས་རོལ་མོའི་སྒྲ་བསྒྲགས་ནས་གཏོར་མ་བྱིན་ཏེ། བཛྲ་མུཿ་ཞེས་བཀླགས་ནས་དབང་ལྡན་གྱི་ཟུར་གྱི་ཆ་གཅིག་ཏུ་བླ་མ་རང་ཡང་ཉལ་བར་བྱའོ། །ཐོ་རངས་ལངས་ནས་སྔར་བཞིན་དུ་གཙང་སྤྲལ་སོགས་པ་བྱས་ཏེ། སློབ་མ་རྣམས་ཀྱིས་དགེ་བ་དང་མི་དགེ་བའི་རྨི་ལམ་བསྟན་ཏེ་མི་དགེ་བ་རྣམས་ལ་བགེགས་ལ་སོགས་པ་བསྲུང་བ་དང༌། ཞི་བའི་མེ་ལ་སོགས་པ་བྱས་ནས་བསྲུང་བར་བྱའོ། །དེ་ནས་དཀྱིལ་འཁོར་བྲི་བའི་ཆོ་ག་བརྗོད་པར་བྱའོ། །དེ་ལ་མཆོག་དཔག་ཚད་ཀྱི་གྲངས་སོ། །འབྲིང་རྒྱང་གྲགས་ཏེ། ཆུང་དུ་ནི་ཀུན་དུ་ཁྲུ་ཡིས་སོ། །དེ་ལ་ཡང་ཁྲུ་བརྒྱ་ཡིས་འཁོར་ལོས་སྒྱུར་པས་སོ། །སའི་བདག་པོས་དེའི་ཕྱེད་ཀྱིས་སོ། །བློན་པོ་ཆེན་པོས་ནི་དེའི་ཕྱེད་དོ། །སློབ་མ་དབང་བསྐུར་བ་ལ་དེའི་ཕྱེད་དོ། །སློབ་དཔོན་རང་གི་འདོད་པའི་ལྷ་མཉེས་པའི་དོན་དུ་དཀྱིལ་འཁོར་གྱི་ཚད་བྱའོ། །དེའི་ཚད་ཙམ་མེད་པ་ལས་ཐམས་ཅད་པ་ལ་ཁྲུ་བཞིའོ། །དེ་ལ་བཅོམ་ལྡན་འདས་དཔལ་པདྨ་སྤྱན་རས་གཟིགས་དབང་ཕྱུག་གི་དཀྱིལ་འཁོར་འདི་ལ་ཁྲུ་བཞི་པ་ལ་སོགས་པའི་རིམ་པ་ཇི་ལྟ་བར་ཁྲུ་བཞིར་ཐམས་ཅད་ཁྲུ་བཅུ་དྲུག་པའོ། །དེ་ལ་སྙིང་པོ་ནས་ཕྱོགས་རྣམས་སུ་ཁྲུ་གཉིས་པར་འགྱུར་རོ། །དེའི་ཁྲུ་གཉིས་པོ་ནི་ཆ་གཉིས་སུ་བྱས་ནས་དེའི་ནང་མའི་ཆ་གཅིག་ལ་ཡང་ཆ་གསུམ་གྱིས་པདྨ་རིམ་པ་གསུམ་མོ། །ནང་དུ་འདབ་མ་བརྒྱད་པའོ། །དེའི་སུམ་ཆས་ཟེའུ་འབྲུའོ། །ཕྱི་རོལ་དུ་འདབ་མ་བཅུ་གཉིས། དེའི་ཕྱི་རོལ་དུ་འདབ་མ་བཅུ་དྲུག་གོ་ཞེས་པ་སྡོང་བུ་གཅིག་ལ་རིམ་པ་གསུམ་མོ། །ཆ་གཉིས་པའི་དང་པོ་ལ་བྱང་ཆུབ་སེམས་དཔའི་སྣམ་བུའོ། །བར་མ་ལ་
༄། །རི་མོ་ལྔ་ཕྲ་མོའོ། །ཕྱི་མ་ལ་རི་མོ་ལྔ་སྤོམ་པོའོ། །རི་མོ་རྣམས་ཀྱི་རིམ་པ་འདི་ཡིན་ཏེ། དཀར་པོ་དང༌། སེར་པོ་དང༌། སྔོན་པོ་དང༌། ནག་པོ་དང༌། ཐམས་ཅད་ཀྱི་ནང་དུ་དམར་པོའོ། །དེ་རིགས་ཀྱི་བདག་པོ་ཡིན་པའི་ཕྱིར་རོ་ཞེས་པ་གྲུ་བཞི་པ་སྒོ་བཞི་བ་རྟ་བབས་བཞིས་བརྒྱན། དྲ་བ་དང་དྲ་བ་ཕྱེད་པ་དང༌། མེ་ཏོག་གི་ཕྲེང་བ་དང༌། མེ་ལོང་ལ་སོགས་པས་བརྒྱན་པ། ཟླ་བ་དང་ཉི་མ་ལ་སོགས་པ་དང་ཡང་དག་པར་ལྡན་པ་བུམ་པ་དང་བཅས་པའོ། །དེ་ལྟར་དཀྱིལ་འཁོར་རྫོགས་ནས་དེའི་སྙིང་པོར་པདྨའི་མཚན་མ་དམར་པོའི་སྟེང་དུ་ཟླ་བའི་མཚན་མ་གོ་ཡུའི་འབྲས་བུའི་ཚད་དུ་བྱའོ། །དེ་ལ་ཚོན་གདབ་པའི་དུས་སུ་ཚོན་སྣ་ལྔའི་སྣོད་རྔ་ཡབ་བཀུག་སྟེ་དབུས་སུ་ཚོན་དམར་བའི་སྣོད་ཤར་དུ་དཀར་པོ། ལྷོར་སེར་པོ། ནུབ་ཏུ་སྔོན་པོ། བྱང་དུ་ནག་པོ་ཡོངས་སུ་བཞག་ནས་དེ་རྣམས་ལ་ཧྲཱིཿ་ཨོཾ་ཏྲཱཾ་ཨཱཿ་ཧཱུཾ་ཞེས་པ་རྣམ་པར་བྲིས་ནས། ཨོཾ་པདྨ་ཨོཾ་ཀ་ཤ་ཧཱུཾ་ཕཊ་ཀྱིས་བསྲུངས་ནས། སྭཱ་བྷཱ་བ་ཤུདྡྷཿ་སརྦ་དྷརྨཱཿ་ཞེས་བཀླགས་ནས་ནམ་མཁའ་རྣམ་པར་བལྟས་ནས་ཛཿ་ཧཱུཾ་བཾ་ཧོཿ་ཞེས་པས་ཡེ་ཤེས་པ་བཅུག་ནས། ཧྲཱིཿ་ཧྲཱིཿ་ཧྲཱིཿ་ཧྲཱིཿ་ཧྲཱིཿ་ཞེས་པས་སོ་སོ་རེ་རེའི་ས་བོན་ལྔ་པ་དགོད་པར་བྱའོ། །སྣོད་དེ་རྣམས་སུ་ཨོཾ་བཛྲ་ཛྭཱ་ལ་ཨ་ན་ལརྐ་ཧཱུཾ་ཞེས་པས་ནང་གི་ཚོན་ལས་འོད་ཟེར་སྤྲོས་པར་བྱའོ། །ཨོཾ་བཛྲ་བེ་ག་ཞེས་བརྗོད་ནས་ཡེ་ཤེས་ཀྱི་རི་མོ་བཀུག་པར་བྱས་ནས་ཚོན་སྣ་ལྔས་རེ་ཁཱ་ལྔ་པོ་རིམ་པས་དབང་ལྡན་ལ་སོགས་པ་རི་མོ་བྱ་ཞིང་ཀུན་དུ་བསྲུང་བ་ཡང་ངོ༌། །དེ་ནས་དབུས་སུའོ། །དེ་ནས་ཐམས་ཅད་དུ་རིམ་པ་བཞིན་ནོ། །དེ་བཞིན་དུ་དཀྱིལ་འཁོར་འདིའི་ཕྱི་རོལ་དུ་པདྨའི་ཕྲེང་བ་དམར་པོ། དེའི་ཕྱི་རོལ་དུ་དུར་ཁྲོད་སྣ་ཚོགས་མདོག །དེའི་ཕྱི་རོལ་དུ་འབར་བའི་ཕྲེང་བའོ་ཞེས་པ་ཐམས་ཅད་བྱའོ། །རྒྱས་པ་ནི་དེ་ཁོ་ན་ཉིད་བསྡུས་པར་བརྗོད་དོ། །དེ་བཞིན་དུ་ཁྲུ་བཞི་ལ་སོགས་པ་ནས་ཁྲུ་བརྒྱད་པ་དེ་སྲིད་རིམ་པ་ཁོ་ནའོ་ཞེས་སོ། །དཀྱིལ་འཁོར་རྫོགས་ནས་གཏོར་མ་སྦྱིན་པར་བྱའོ། །དེ་ནས་སློབ་དཔོན་ལངས་ནས་དཀྱིལ་འཁོར་གྱི་ཤར་དུ་ཉེ་བར་འདུག་པར་བྱའོ། །ཉེ་བར་འདུག་ནས་སྔར་བརྗོད་པའི་རིམ་པས་བསྟོད་པ་ལ་སོགས་པ་བྱའོ། །དེའི་རྗེས་སུ་
༄། །སྒྲུབ་ཐབས་སུ་བརྗོད་པའི་རིམ་པས་དཀྱིལ་འཁོར་རྣམ་པར་དག་པར་བསྒོམ་པར་བྱའོ། །དེ་ནས་མཆོད་པའི་ཡོ་བྱད་མཆོག་ཏུ་གྱུར་པ་ཐམས་ཅད་ཕུལ་ནས་བསམ་གཏན་གྱི་ཕྱག་རྒྱ་བཅིངས་ཏེ་ཡིད་གཡོ་བ་མེད་པར་བྱས་ནས་ཧྲཱིཿ་ཡིག་ལས་འོད་ཟེར་ཀུན་དུ་སྤྲོས་ནས་དེའི་འོད་ཟེར་རྣམས་ཀྱིས་ཕྱོགས་ཐམས་ཅད་དུ་གནས་པའི་དེ་བཞིན་གཤེགས་པ་རྣམས་རང་གི་སྙིང་གར་རབ་ཏུ་ཞུགས་པར་བསམ་པར་བྱའོ། །རྣམ་པར་བསམས་ནས་སླར་ཡང་རྣམ་པར་སྤྲོས་ནས་སེམས་ཅན་དེ་རྣམས་ལ་ཕན་པ་བྱེད་དུ་བཅུག་ནས་སླར་ཡང་རབ་ཏུ་ཞུགས་པར་བྱའོ། །དེའི་རྗེས་སུ་གཡས་དང་གཡོན་དུ་ཞབས་བསིལ། དེ་བཞིན་དུ་སྔགས་དང་མཆོད་ཡོན་གྱི་སྣོད་གཉིས་ཕུལ་ནས་རྡོ་རྗེ་རྩེ་གསུམ་གྱི་ཕྱག་རྒྱས་བྱིན་གྱིས་བརླབ་པར་བྱས་ནས། ཨོཾ་ཨཱཿ་ཧཱུཾ་ཞེས་པས་ལྷག་པར་གནས་པར་བྱའོ། །སྔགས་དང་གཡོན་གྱི་མཆོད་ཡོན་གྱི་སྣོད་བདུད་རྩི་ལྔ་ལ་སོགས་པས་གང་བ་དེས་དམ་ཚིག་གི་མཆོད་པའི་རྫས་ལ་བསང་གཏོར་བྱའོ། །དེ་ནས་རིགས་ལྔ་པོ་དགོད་པར་བསྒོམ་པར་བྱའོ། །བྷྲཱུཾ་ཡིག་དཀར་པོ་མགོ་བོ་ལ། །ཉི་མ་དང་མཚུངས་ཧྲཱིཿ་ཞལ་ལ། །ཧཱུཾ་ཡིག་ནག་པོ་སྙིང་ག་རུ། །གསེར་གྱི་འོད་ཅན་ཨཱཿ་ལྟེ་བར། །གསང་བའི་ཕྱོགས་སུ་ཁཾ་ལྗང་གུ། །བསམ་པར་བྱའོ་ཆོག་ལས། །ཞེས་བྱས་ནས་རང་གི་ལྷའི་སྔགས་ཀྱིས་བདག་ཉིད་མཆོད་པར་བྱ་ཞིང་དབང་བསྐུར་བར་གསོལ་བ་གདབ་པར་བྱའོ། །ཨོཾ་ཨ་བྷིཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་སོ། །ཨོཾ་བཛྲ་ཨརྒྷཾ་ཨཱཿ་ཧཱུཾ། ཨོཾ་བཛྲ་པུཥྤེ་ཨཱཿ་ཧཱུཾ། ཨོཾ་བཛྲ་ཨརྒྷཾ་པྲ་ཏཱིཙྪ་པཱ་དྱཾ་པྲ་ཏཱིཙྪ་ཞེས་བརྗོད་ནས་དམ་ཚིག་གི་མཆོད་པའི་རྫས་བྱིན་གྱིས་བརླབ་པར་བྱའོ། །དེ་ནས་ཨོཾ་བཛྲ་རཱ་ཛཱ་ཧཱུཾ་ཞེས་པས་རྡོ་རྗེ་བྱིན་གྱིས་བརླབས་ནས། ཨོཾ་བཛྲ་གཎྜེ་ཨཱཿ་ཞེས་པས་དྲིལ་བུ་བྱིན་གྱིས་བརླབ་པར་བྱའོ། །དེ་ནས་ཨོཾ་ཨཱཿ་ཡཱ་ཧཱི་བྷ་ག་བཱན། པདྨ་ཨཱ་བ་ལོ་ཀི་ཏེ་ཤྭ་ར་སྭཱ་བྷཱ་བ་པྲཛྙཱ་པཎྜ་ར་བཱ་སི་ནཱི་ཨ་ལིརྒ་ཏ་ཀནྡྷ་ར་པྲ་པཱ་དཱ་ཙ་དཱ་ཡཱན་ཙ་ཀུ་རུ་པུ་ཛཾ་གྲྀཧྞ་ཨི་ཧ་སནྣི་ཧི་ཏོ་བྷ་བ་ཨ་དྷིཥྛཱ་ནཾ་ཀུ་རུ་མེ་སྭཱ་ཧཱ། ཞེས་པ་སྤྱན་དྲངས་པའི་ཚིགས་སུ་བཅད་པ་བཀླག་གོ །ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ་བཛྲ་སཏྭ་ཏྭེ་ནོ་པ་ཏཥྛི་དྲྀ་ཌྷོ་མེ་བྷ་བ་སུ་ཏོཥྱོ་མེ་
༄། །བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་པ། སརྦ་སིདདྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙི་ཏཏཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱ་ན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲི་བྷ་བ་མ་ཧཱ་ས་མ་ཡ་ས་ཏྭ་ཨཱཿ། ཨོཾ་བཛྲ་གནྟེ་ར་ནི་ཏ་པྲ་ར་ནི་ཏ་སཾ་པྲ་ར་ནི་ཏ་སརྦ་བུདྡྷ་ཀྵེ་ཏྲ་པྲ་ཙ་ལི་ཏེ་པྲ་ཛྙཱ་པ་ར་མི་ཏཱ་ནཱ་ད་སྭཱ་བྷཱ་བ་བཛྲ་དྷ་རྨ་ཧྲྀ་ད་ཡ་སནྟོ་ཥ་ནི་ཀ་རི་ཨོཾ་ཨཱཿཧཱུཾ་ཕཊ་ཅེས་དྲིལ་བུ་དང་རོལ་མོའི་སྒྲ་བྱའོ། །དེ་ནས་བདེ་བ་ཅན་གྱི་སངས་རྒྱས་ཀྱི་ཞིང་ན་གནས་པའི་ཡེ་ཤེས་ཀྱི་འཁོར་ལོ་ཡང་དག་པར་བཀུག་ནས་དཀྱིལ་འཁོར་ལ་བཅུག་པར་བསམ་སྟེ་དེ་ཡིད་ཀྱིས་ཕྱིའི་མེ་ཏོག་ལ་སོགས་པའི་མཆོད་པ་དང་གསང་བའི་མཆོད་པ་བྱའོ། །ཕྱག་བྱ་བ་ལ་སོགས་པ་ཡང་ངོ༌། །སརྦ་དེ་བ་ཏཱ་དེ་བ་ཏཱི་ནཾ་པ་ད་བནྡྷ་ནཾ་ཀ་རོ་མི། ཞེས་སོ། །དེ་ནས་བཅོམ་ལྡན་འདས་ཀྱི་ཕྲེང་བའི་སྔགས་བཟླས་པར་བྱའོ། །ན་མོ་བྷ་ག་བ་ཏི་པདྨ་ཨ་བ་ལོ་ཀེ་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀ་རུ་ནི་ཀཱ་ཡ། ཙ་ཏུ་རྨུ་ཁཱ་ཡ། དྭཱ་ད་ཤ་ནེ་ཏྭཱ་ཡ། བཛྲ་པདྨ་ཨཾ་ཀུ་ཤ་པཱ་ཤ་ཀ་པཱ་སླ་ཁ་ཊྭཱཾ་ག་རཏྞ་པཱ་ན་ཡེ། སྭཱ་བྷཱ་པྲ་བྷཱ་པནྜ་ར་ནཱ་སི་ནཱི་ཨཱ་ལངྒའི་ཏ་ཀཾ་དྷ་རཱ་ཡ། པཱ་མི་རྩ་ཏུ་རྠ་བྷུ་ཛ་དེ་བི་སྟན་པ་ར་ཤ་ན་ར་ཏཱ་ཡ་བི་ཤ་ཨ་ཉྫ། ཤ་ཤི་མ་དྷྱ་སྠཱ་ཡ་ད་ཧ་སརྦ་མཱ་རཱ་ན་མ་དྷ་མ་དྷ་བྷཱུ་ཏ་བཻ་ཏཱ་ལ་ཀུ་མབྷཾ་ཊ་ཡ་ཀྵ་སཱཾ་བཛྲ་ཎ་ཙེ་ཥཱཾ་ཧྲྀ་ད་ཡཱ་ནི་བྷིཾ་ཇི་བྷཾ་ཛ། མཾ་མ་ནོ་ར་ཐཾ་པ་ནི་པཱུ་ར་ཡ་སརྦ་བྷུ་མཱི་ཤྭ་ར་ཏུ་བྷྱཾ། ཧྲཱིཿ་ཞེས་པས་རྡོ་རྗེ་དྲིལ་བུ་དཀྲོལ་བར་བྱའོ། །དེ་ནས་པདྨ་ཨོཾ་ཀུ་ཤ་ཨཱཿ་ཀཪྵ་ཡ་ཛཿ། པདྨ་པཱ་ཤ་པར་བེ་ཤ་ཡ་ཧཱུཾ། པདྨ་སྥོ་ཊ་བནྡྷ་ཡ་པཾ། པདྨ་ཨ་བེ་ཤ་ཏོ་ཥ་ཡ་ཧོཿ། ཞེས་བཀླགས་ནས་དམ་ཚིག་དང་ཡེ་ཤེས་ཀྱི་དཀྱིལ་འཁོར་དག་འོ་མ་བཞིན་གཅིག་ཏུ་འདྲེས་པ་ཉིད་དུ་བྱའོ། །དེ་ནས་སྒྲུབ་པའི་ཐབས་ཀྱི་རྗེས་སུ་འབྲང་བས་དཀྱིལ་འཁོར་པ་རྣམས་ཀྱི་རང་གི་གཟུགས་ཕྱག་དང་ཁ་དོག་ལ་སོགས་པ་བསམས་ནས་ཨ་རྒྷཾ་པྲ་ཏཱི་ཙྪ་ཞེས་པས་ཕུལ་ནས། མེ་ཏོག་ལ་སོགས་པའི་མཆོད་པ་རྣམས་རང་རང་གི་མིང་ཇི་ལྟ་བ་བཞིན་དུ་མཆོད་པར་བྱའོ། །དེ་ལ་ཇི་ལྟ་བ་བཞིན་དུ་རང་ལ་ལྷ་མོའི་གླུ་རྣམས་ཀྱིས་མཆོད་བཞིན་པ་དང༌། ཕྱིའི་པི་ཝང་མ་ལ་སོགས་པའི་ལྷ་མོ་རྣམས་ཀྱིས་གར་གྱི་ཀུན་དུ་མཉེས་པར་
༄། །བསམ་པར་བྱའོ། །བཅོམ་ལྡན་འདས་མ་དེའི་སྔགས་རིམ་པ་བཞིན་དུ་བཟླས་པར་བྱས་ནས་མཆོད་པ་བྱའོ། །དེ་ལ་སྔར་ནི་སྒྲུབ་པའི་ཐབས་སུ་རིམ་པ་མིན་པས་བརྗོད་པ་འདིར་རིམ་པས་བཀླག་གོ །ཨོཾ་པཱཾ་པརྣ་ཤ་བར་བཱ་སི་ནི་ར་ཧྲིཿ་ཨོཾ་པཱཾ་ཧྲཱིཾ། ཨོཾ་ཧྲིཾ། པདྨ་ཨ་བ་ལོ་ཀི་ཏེ་ཤྭ་ར་མ་ཧཱ་སུ་ཁ། པདྨོ་ཨཱཿ་ཧཱུཾ་ཧྲིཾ། ཨོཾ་ཧྲཱི་ཧཱུཾ་ཧྲཾ་ཞེས་པ་བཅོམ་ལྡན་འདས་དང༌། བཅོམ་ལྡན་འདས་མའི་རྩ་བའི་སྔགས་དང་སྙིང་པོ་རིམ་པས་སོ་ཞེས་པས་སྙིང་པོར་རོ། །ཨོཾ་པདྨ་ལོ་ཙ་ནི་ཧྲཱིཾ། ཨོཾ་རཏྣ་པདྨ་ཧྲཱིཾ། ཨོཾ་པདྨ་བཛྲ་ནི་ཧྲཱིཾ། ཨོཾ་པདྨ་ཏཱ་རེ་ཧྲཱིཾ་ཞེས་བཤར་ལ་སོགས་པའི་ཕྱོགས་སུའོ། །ཨོཾ་པདྨ་བཱ་སི་ནི་ཧཱུཾ། ཨོཾ་པདྨ་ཛཱ་ལེ་ཧྲཱིཾ། ཨོཾ་པདྨ་བྷྲྀ་ཀུ་ཊི་ཧྲཱིཾ། ཨོཾ་པདྨ་ཤེ་ཁ་རེ་ཧྲཱིཾ་ཞེས་པ་མེ་ལ་སོགས་པའི་ཕྱོགས་བྲལ་རྣམས་སུའོ་ཞེས་པ་དང་པོའི་འདབ་མ་བརྒྱད་ལའོ། །ཨོཾ་པདྨ་ཨུ་ལྐེ་ཧྲཱིཾ། ཨོཾ་པདྨ་ཡ་ཡེ་ཧྲཱིཾ། ཨོཾ་པདྨ་ཤེ་མེ་ཤྭ་རེ་ཧྲཱིཾ། ཨོཾ་པདྨ་བཱ་ཏི་ཧྲཱིཾཿ་ཨོཾ་པདྨ་ནི་བྷྱ་ཧྲཱིཾ། ཨོཾ་པདྨ་ཙཎྜེ་ཤྭ་རེ་ཧྲཱིཾ། ཨོཾ་པདྨ་གུ་ཧྲྱེ་ཧྲཱིཾ། ཨོཾ་མ་ཧཱ་པདྨེ་ཧྲཱིཾ། ཨོཾ་པདྨ་ཙནྜེ་ཧྲཱིཾ། ཨོཾ་པདྨ་ཨཱ་བྷེ་ཧྲཱིཾ། ཨོཾ་པདྨ་གཽ་རཱི་ཧྲཱིཾ། ཨོཾ་པདྨ་ཀཽ་ཥེ་ཧྲཱིཾ་ཞེས་པ་གཉིས་པ་འདབ་མ་བཅུ་གཉིས་པ་ལའོ། །ཨོཾ་པདྨེ་ཤྭ་རི་ཧྲིའིཾ། ཨོཾ་པདྨ་མུ་ཁེ་ཧྲཱིཾ། ཨོཾ་པདྨ་ཙཎྜེ་ཧྲཱིཾ། ཨོཾ་པདྨ་བི་དྷྱོ་མེ་ཧྲཱིཾ། ཨོཾ་པདྨ་སཱ་གཱ་རི་ཎི་ཧྲཱོ། ཨོཾ་པདྨ་པ་བྷ་ཀ་རི་ཧྲཱིཾ། ཨོཾ་པདྨ་ཙིནད་མ་ནི་ཧྲཱིཾ། ཨོཾ་པདྨ་ཀཱ་མེ་ཧྲཱིཾ། ཨོཾ་པདྨ་རི་ཧྲཱིཾ། ཨོཾ་པདྨ་ཨ་མྦྷི་རེ་ཧྲཱིཾ། ཨོཾ་པདྨ་ལེ་ཁི་ཧྲཱིཾ། ཨོཾ་པདྨ་ཀཱ་ལི་ཧྲཱིཾ། ཨོཾ་པདྨ་སུ་ཁེ་ཧྲཱིཾ། ཨོཾ་པདྨ་ནེ་ཏྲ་ཧྲཱིཾ། ཨོཾ་པདྨ་ནི་དྷེ་ཧྲཱིཾ། ཨོཾ་པདྨ་ཡོ་གེ་ཤྭ་རེ་ཧྲཱིཾ། ཞེས་པ་འདབ་མ་བཅུ་དྲུག་པ་ལའོ། །ཨོཾ་པདྨ་ཨོཾ་ཀུ་ཤ་ཛཿ་ཧཱུཾ་ཕཊ། ཨོཾ་ཧཱུཾ་པདྨ་པཱ་ཤ་ཧཱུཾ་ཕཊ། ཨོཾ་བཾ་པདྨ་སྥོ་ཊ་ཧཱུཾ་ཕཊ། ཨོཾ་ཧོཿ་པདྨ་ཨཱ་བེ་ཤ་ཧཱུཾ་ཕཊ་ཅེས་སྒོ་རྣམས་སུའོ། །ཨོཾ་བེཏྟཱ་ལི་ཧཱུཾ་ཕཊ། ཨོཾ་གྷོ་ར་གྷོ་ར་ཥེ་ཧཱུཾ་ཕཊ། ཨོཾ་བཛྲ་དཾ་ཥྚྲི་ཧཱུཾ་ཕཊ། ཨོཾ་མ་ཧཱ་བ་ལེ་ཧཱུཾ་ཕཊ་ཅེས་པ་གྲྭ་རྣམས་སོ། །དེ་ལྟར་བཞི་བཅུ་རྩ་དྲུག་གི་དཀྱིལ་འཁོར་དང་དཀྱིལ་འཁོར་བའི་ལྷ་རྣམས་ཤར་དང་ལྷོ་ལ་སོགས་པའི་རིམ་པས་དང༌། དེ་བཞིན་དུ་མེ་ལ་སོགས་པའི་རིམ་པས་ལུགས་དང་མཐུན་པས་མཆོད་པར་བྱའོ། །སློབ་དཔོན་གྱིས་གཡོན་སྐོར་གྱིས།
༄། །དཀྱིལ་འཁོར་གྱི་གཡས་སྐོར་གྱིས་སོ། །ལྷ་འདི་རྣམས་ཀྱི་སྐུ་མདོག་དང་ཕྱག་དང་ཕྱག་མཚན་གྱི་རྣམ་པར་དག་པ་སྒྲུབ་པའི་ཐབས་ཀྱི་རྗེས་སུ་འབྲངས་ནས་རྟོགས་པར་བྱའོ། །དེ་ལ་ལྷ་དང་ལྷ་མོའི་རིམ་པ་གསུམ་ལ་ཁ་དོག་དཀར་པོ། སྒོ་སྐྱོང་གི་མཁའ་འགྲོ་མ་རྣམས་སྒྲུབ་པའི་ཐབས་སུ་བརྗོད་པའི་སྐུ་མདོག་སྔགས་འདི་ལྟ་བུས་དཀྱིལ་འཁོར་གྱི་འཁོར་ལོ་ལ་ཡང་དག་པར་མཆོད་ནས་སླར་ཡང་སྔར་བརྗོད་པའི་བསྟོད་པས་བསྟོད་པར་བྱའོ། །བསྟོད་པས་སྐྱོ་བར་གྱུར་ན་བཟླས་པ་བྱའོ། །དེ་ནས་ཡཾ་རཾ་ཨཱཿཨོཾ་ཞེས་བདུད་རྩི་ལྔ་གཡོན་ན་གནས་པའི་མཆོད་ཡོན་གྱི་སྣོད་ལྷག་པར་གནས་པ་དང༌། ཁཾ་ཏྲཱཾ། ཨོཾ་ཧྲཱིཾ་ཧཱུཾ་ཞེས་པས་བདུད་རྩི་ལྔ་པོ་གཉིས་ཀ་ཞུ་ཞིང་ལྷུང་བར་བྱས་ནས། ཧཱུཾ་ཨཱཿ་ཨོཾ་ཞེས་པ་རིམ་པ་ལས་བཟློག་པས་བདག་ཉིད་བྱིན་གྱིས་བརླབས་ནས། ཨོཾ་ཤོ་དྷ་ཡ་ཤོ་དྷ་ཡ། མཾ་ཧཱུཾ་ཨོཾ། རཀྵ་རཀྵ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་པ་ཉྩ་ཨ་མྲྀ་ཏ་མ་ད་ན་ཧཱུཾ། ཨོཾ་སརྦ་ཏ་ཐཱ་ག་ཏ་པ་ཉྩ་ཨ་མྲྀ་ཏ་མ་དན་པར་མ་ར་ཨཱ་ཡ་ནཾ་བྷ་བ་ཧཱུཾ། ཨོཾ་སརྦ་ཏ་ཐཱ་ག་ཏ་པ་ཉྩ་ཨ་མྲྀ་ཏ་མ་ད་ན་མཾ་པདྨ་ཨ་བ་ལོ་ཀི་ཏེ་ཤྭ་ར། མུ་ནི་བ་རི་ས་རཱུ་པཾ་ས་མ་གྲ་དེ་བའི་བྲྀ་ནྷ་ས་ཧི་ཏེ་ཨ་བྷི་ཥིཉྩ་ཧཱུཾ། ཨོཾ་བཛྲ་མེ་དེ་ནཱི་ཧཱུཾ། ཨོཾ་བྷཱུཾ་ཧཱུཾ། ཨོཾ་ཏྲཻ་ལོ་ཀྱ་བཱི་ར་ཧཱུཾ། ཨོཾ་ཙཎྜ་བཛྲ་པ་ཎ་ཡེ་ཧཱུཾ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ། ཨོཾ་སརྦ་ཏ་ཐཱ་ག་ཏ་བཛྲ་ཨ་མྲྀ་ཏ་ཨུ་ད་ཀ་སརྦ་ཕྲེ་ཏ་པི་ཏཏཱི་ན་སནྟ་ར་པ་ཡ་ཧཱུཾ་ཞེས་པས་བདུད་རྩི་ལྔའི་ཆུས་ཀུན་ཏུ་ཚིམ་པར་བྱའོ། །དེ་ནས་དཀྱིལ་འཁོར་གྱི་ཁོར་ཡུག་ཏུ་གནས་པའི་བུམ་པ་རྣམས་ཀྱིས་མངོན་པར་གཏོར་པར་བྱའོ། །དེ་ལ་དེ་རྣམས་ཀྱི་ངེས་པ་ཇི་ལྟ་བ་བཞིན་དུ་དཀྱིལ་འཁོར་གྱི་བདག་པོ་དང་ལྷན་ཅིག་དཀྱིལ་འཁོར་པ་རྣམས་བཞི་བཅུ་རྩ་བཞིར་འགྱུར་ཏེ། དཀྱིལ་འཁོར་གྱི་བདག་པོ་ནི་པདྨ་སྤྱན་རས་གཟིགས་ཀྱི་དབང་ཕྱུག་སྟེ་ལྷ་མོ་ནི་གོས་དཀར་མོའོ་ཞེས་པས་དེ་ལ་བཞི་བཅུ་རྩ་དྲུག་སྟེ། དེའི་ཕྱིར་ཕར་ལ་བུམ་པ་ཡོངས་སུ་བརྟགས་པ་ལྷ་དང་མཚུངས་པའི་བུམ་པ་ཡོངས་སུ་གཞག་པར་བྱའོ། །ལས་ཐམས་ཅད་པ་བགེགས་མཐར་བྱེད་ཀྱི་བུམ་པ་ནི་དེའི་སྟེང་དུ་ལྷག་པའོ། །ཡང་ན་བཅུ་ཉིད་དོ། །དེ་མེད་པ་ལས་ལྔའོ་ཞེས་པ་རྒྱུད་ཐམས་ཅད་ལ་
༄། །ངེས་པའོ། །དེ་ལ་བཅོམ་ལྡན་འདས་དང་བཅོམ་ལྡན་འདས་མའི་ཐ་དད་པ་མེད་པའི་ཕྱིར་བུམ་པ་གཅིག་བྱིན་གྱིས་བརླབ་པ་ཁོ་ནའོ་ཞེས་པ་ཁ་ཅིག་གོ །དེ་རྣམས་ནི་ཁོ་ར་ཡུག་ཏུ་གནས་པའི་བུམ་པ་དཀར་པོ། མགྲིན་པ་གོས་དཀར་པོས་དཀྲིས་པ་འབྲུ་ལྔ་ལ་སོགས་པ་དང་ལྡན་པ་དེ་རྣམས་ཡོངས་སུ་བཞག་ནས་མཆོད་ཡོན་དང་མེ་ཏོག་ལ་སོགས་པས་ཡང་དག་པར་མཆོད་དེ། སྔར་བརྗོད་པའི་བདུད་རྩི་ལྔས་ཀྱང་མངོན་པར་གཏོར་བར་བྱའོ་ཞེས་པ་དཀྱིལ་འཁོར་མཆོད་པ་ཇི་ལྟར་འབྱོར་པ་བྱས་ན་ལྷ་མོས་དཀྱིལ་འཁོར་གྱི་གཙོ་བོ་ལ་བསྟོད་པར་བྱའོ། །ཕྱག་འཚལ་ཕྱག་འཚལ་རྡོ་རྗེ་ཆེ། །ཕྱག་འཚལ་ཕྱག་འཚལ་བདེ་བ་ཆེ། །ཕྱག་འཚལ་ཕྱག་འཚལ་པདྨ་ཆེ། །ཕྱག་འཚལ་ཕྱག་འཚལ་དགའ་བ་ཆེ། །ཕྱག་འཚལ་ཕྱག་འཚལ་ཕྲིན་ལས་ཆེ། །ཕྱག་འཚལ་ཕྱག་འཚལ་ཁྱབ་བདག་ཆེ། །ཁྱོད་ལས་རྡོ་རྗེ་དང་སེམས་དཔའ། །ཁྱོད་ལས་པདྨ་དྲི་མེད་མཛེས། །ཁྱོད་ལས་རིན་ཆེན་ལྷ་མོ་ཆེ། །སྣ་ཚོགས་རྡོ་རྗེ་དེ་བཞིན་ཉིད། །ཁྱོད་ལས་སངས་རྒྱས་དཔའ་བོ་ཆེ། །ཡང་དང་ཡང་དུ་འབྱུང་བར་བྱེད། །ཁྱོད་ལས་ཆོས་དང་དགེ་འདུན་ཡང༌། །ཁྱོད་ལས་ཕ་རོལ་ཕྱིན་པའི་ཚོགས། །བྱང་ཆུབ་སེམས་དཔའ་སེམས་དཔའ་ཆེ། །ཁྱོད་ལས་གཟུངས་ཀྱི་དཀྱིལ་འཁོར་ཏེ། །ཁྱོད་ལས་སྔགས་དང་ཕྱག་རྒྱ་དང༌། །སླར་ཡང་ཁྲོ་བོའི་རྒྱལ་པོའི་ཚོགས། །ཞེས་པ་ལ་སོགས་པས་བསྟོད་པར་བྱའོ། །སླར་ཡང་བཟླས་པ་བྱ་ཞིང་དྲིལ་བུ་དཀྲོལ་བར་བྱའོ། །སྨོན་ལམ་གདབ་པར་བྱ་སྟེ། བདག་ནི་བུད་མེད་ཉིད་མིན་བདག་ཁོལ་དངོས་མ་ཡིན། །རྨོངས་པ་ཉིད་མིན་ཡུལ་ངན་རྣམས་སུ་སྐྱེ་བ་མིན། །བདག་ནི་ལོག་ལྟ་ཅན་གྱི་སྐྱེ་བར་འབྱུང་བ་མིན། །སྐྱེ་དང་སྐྱེ་བར་སངས་རྒྱས་གུས་པར་འགྱུར་བར་ཤོག །སྐྱེས་པ་དང་ནི་སྐྱེ་བཞིན་མ། །མངལ་དུ་གནས་པའི་ལུས་སུ་ཡང། །གང་དུ་སངས་རྒྱས་ལྷ་མེད་པར། །ང་ཡི་རིགས་སུ་སྐྱེ་མི་འགྱུར། །དམ་ཚིག་རྣམ་པ་བརྒྱར་ཞིག་གུས་པ་ཅན་དང་གོས་ངན་དང༌། །དྲི་མས་གོས་པའི་ལུས་དང་བརྟེན་མེད་སྡིག་པའི་ངང་ཚུལ་ཅན། །གཤིན་རྗེ་ཁྲོ་གཉེར་འཇིགས་ཤིང་ནད་ལྡན་སྡུག་བསྔལ་རབ་ཐོབ་
༄། །པ། །སྐྱེ་བོ་མི་བསྲུན་ཡོངས་སུ་གྱུར་ལ་འཇིག་རྟེན་མགོན་བདག་སྲུངས། །ཁྱོད་ཉིད་མ་དང་ཁྱོད་ཉིད་ཕ། །ཁྱོད་ཉིད་གཉེན་ཁྱེད་ཉིད་བླ་མ། །ཁྱོད་ཉིད་རིག་པ་ཁྱོད་ཉིད་རྫས། །ཁྱོད་ཉིད་པད་དབང་ཐམས་ཅད་ཡོད། །ཀུན་ཐོབ་ཡོད་པར་སྐྱབས་ཡོད་བྱེད། །ཀུན་ཚེ་ཐམས་ཅད་གནས་ཡོད་བྱེད། །བཅོམ་ལྡན་འདས་ཁྱོད་རབ་རྫོགས་བྱེད། །འཇིག་རྟེན་མགོན་ཀྱེ་བདག་ལ་སྲུངས། །དབུལ་བ་ཉིད་དང་འཆི་བའི་སྡུག་བསྔལ་མང་པོ་ཟློག་བྱེད་པ། །དགོངས་པའི་དོན་རྣམས་ཐམས་ཅད་སྦྱིན་པ་ཡོངས་རྫོགས་པ། །འཇིག་རྟེན་མགོན་པོ་དཔལ་ཞེས་ལྔ་པོ་འདི་ནི་རྒྱལ་བྱེད་ཀྱི། །གཞན་པའི་ཡི་གེ་བརྒྱ་ཕྲག་འབྲས་མེད་ཕལ་བས་ཆེ། །ཞེས་པ་སྨོན་ལམ་བྱས་ནས་གཏོར་མ་སྦྱིན་པར་བྱའོ། །དེ་ལ་མྱོས་བྱེད་དང་ཤ་དང་འབྲུ་བདུན་ཆུས་ཡོངས་སུ་གང་བར་བྱས་ནས་བདུད་རྩི་ལྔའི་ཆུས་མངོན་པར་གཏོར་ཏེ། ཨོཾ་ཨཱཿཧཱུཾ་གིས་བདག་ཉིད་བྱིན་གྱིས་བརླབ་པར་བྱས་ནས། གཏོར་མ་བྱིན་གྱིས་བརླབ་པར་ཡང་བྱའོ། །དེ་ལ་གཏོར་མ་ལ་ཡེ་ཤེས་པ་བཅུག་ནས་ལྷ་དང་ལྷ་མ་ཡིན་དང་ཡི་དགས་དང་ཤ་བྲ་དང་དྲི་ཟ་རྣམས་བྱིན་གྱིས་བརླབ་པར་བྱའོ། །དེ་ནས་སྔགས་ཀྱི་བྱིན་གྱིས་བརླབ་པར་བྱས་ནས་མཆོད་ཡོན་དང༌། མེ་ཏོག་དང༌། བདུག་པ་དང༌། མར་མེ་ལ་སོགས་པས་མཆོད་པ་བྱའོ། །དེ་ལ་སྔགས་ཀྱི་ནི། ཨོཾ་ན་མོ་བྷ་ག་བ་ཏེ། ཨཱ་ཪྻ་ཨཱ་བ་ལོ་ཀེ་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ནི་ཀཱ་ཡ། ཏདྱ་ཐཱ། དེ་བ། ཨ་སུར། །ག་རུ་ཊ། གནྡྷ་རྦྷ། མ་ནུ་ཥྱ། ཨ་མ་ནུ་ཥྱ། པྲེ་ཏཱ་ས་པ་རི་བཱ་ར། ཏྲཻ་དྷཱ་ཏུ་ཀཱི་སྛཱི་ཏཱ། ཡེ་ཨ་ཉ་ཙ། ཛྙཱ་ཏ་ཨ་ཛྙཱ་ཏཱཿ་ཀུ་ཤ་ལ། ཨ་ཀུ་ཤ་ལཱ། ཏྲི་པྟ། ཨ་ཏྲི་པྟཱ། པཱ་པ། ཨ་པཱ་པ། ཀྲུ་དྷ། ཨ་ཀྲུ་དྷཿ་སཽ་མྱཻཿ། ཨ་སཽ་མྱཻཿ། ཤཱ་ནྟ། ཨ་ཤཱནྟཱ། མྟྡཱཿ། ཨ་མ་དྷཱཿ། ཧྲཱི་ཥྚིཾ། ཨ་ཧྲཱི་ཥཊཾ། ས་སནྟཱ་ནཱཿ་ཨ་སནྟཱ་ནཱ། སྀ་རདྡྷ་ཀཱ། ཨ་རྀ་དདྷི་ཀཱ། ས་པྲ་དྷཱ་བཿ། ཨ་པྲ་བྷཱ་བཿ། སྭཱ་སྭཱ་སྠ་ན་ནི་བཱི་ས་ནཱ་ཏྭེ། སརྦེ་པ་ར་ས་པ་ར་ཨ་བྷི་རོ་དཧཱི་ན། ཨི་མཾ་པ་ལི་མ་ཪྻ་མཱཾ་ས་ཨཱ་དི་ས་ཧི་ཏཾ་བྷུ་ཉྫ་ནྟུ་ཛཱི་གྷཾ་ཏུ། པོ་བནྟ་ས་མ་ཡཾ་ར་ཀྵཾ་ཏུ་མ་མཱ་ཏི་ཀྲ་མནྟུ་སནྟུ་ཥཋཿ་པ་རི་པཱུ་ར་ནཱ་ཨུ་དཱ་ར་བྷ་
༄། །བཾ་ཏུ། ཨ་ཉོ་ཉ་ཀཱ་ལི་ནཱ། སརྦ་ཡ་བཱ་སུ་ཁཾ་པྲཱ་བྷུ་བནྟུ་ཀུ་ཀྵིན་པཱུ་ར་ཡཱ་ནྟུ། ཨ་ཉྫ་ཡཾ། ཨནྟ་པ་ན། ཨུ་པ་ལ། བནྡྷུ་ཡ་ཐཱ། བི་པྲཱ་བྷ་སུ་ཁཾ་པྲཾ་སྱ་སོ་ཀ་རྠཱ་ནཾ། གྩྪནྟུ་སྭཱཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ནའཾ། ཨཱ་དྱ་ནུ་ཏྤནན་ཏྭཱ་ཏ། ཨོཾ་ཨཱཿ་ཧཱུཾ་ཕཊ་སྭཱ་ཧཱ། ཞེས་གཙོ་བོའི་གཏོར་མ་དང། ཡང༌། ཨོཾ་ཧཱ་རཱི་ཏྱཻ་ཡཀྵི་ཎྱི། ཨི་མཾ། པནྜིཾ། པ་ཡ་ཙྪ་བ་སྭཱ་ཧཱ། ཨོཾ་པྲི་ཡཾ་ཀཱ་རཱ་ཡ་སྭྰ་ཧཱ། ཨོཾ་བཛྲ་ཡ་ཀྵཱ་ཡ་སྭཱ་ཧཱ། ཞེས་པས་ཆང་བུ་དང་བཅས་པའི་གཏོར་མ་སྦྱིན་པར་བྱའོ། །དེ་ནས་སླར་ཡང་དག་པར་མཆོད་པར་བྱའོ། །དེ་ནས་གཏོར་མ་རྣམས་གཤེགས་པའམ་མི་གཤེགས་པའོ། །སློབ་མ་ལ་དབང་བསྐུར་བ་བརྩམ་པར་བྱའོ། །དེའི་རྗེས་སུ་སློབ་མ་རྣམས་བརྒྱན་པར་བྱས་ནས་མེ་ཏོག་གི་ཕྲེང་བ་རྣམས་བཟུང་སྟེ། པུས་མོ་ས་ལ་བཙུགས་ནས་སྔགས་ཀྱི་ཚུལ་བྱུང་བ་ཉིད་ལ་བསོད་ནམས་འདོད་པ་ཁ་ཅིག་དཀྱིལ་འཁོར་འདིར་རབ་ཏུ་འཇུག་པར་བྱེད་དེ། འཇིག་རྟེན་ཕ་རོལ་ཉེར་བརྟེན་པའི། །དད་པ་མང་དུ་བྱས་ནས་ནི། །བློ་ལྡན་དཀྱིལ་འཁོར་འདིར་འཇུག་བྱའི། །འདི་ཡི་འབྲས་བུ་གཉེར་མི་བྱ། །ཞེས་རྗེས་སུ་བསྟན་ནས་སངས་རྒྱས་ཀྱི་གཟུགས་སུ་བྱའོ། །དེ་ནས་དེ་རྣམས་ཁོ་ན་བླ་མ་ལ་གསོལ་བ་འདེབས་སུ་གཞུག་གོ །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དང་གསོལ་ཀྱི། །ཞེས་གསོལ་བ་གདབ་པ་དང་ལྡན་པའི་སློབ་མ་རྣམས་པར་འདུད་པ་ལ་མི་བསྐྱོད་པའི་གཟུགས་སུ་དམིགས་ནས། རང་གི་རིག་མ་སྐྱེས་བུ་རྡོ་རྗེ་ཅན་དུ་བསམས་ནས་རྡོ་རྗེས་སེམས་སུ་རབ་ཏུ་བསྒོམས་པས་ཁོར་ཡུག་གི་བུམ་པས་བརྒྱད་ཀྱི་ཆུ་གཏོར་བར་བྱའོ། །དེ་ནས་རྡོ་རྗེ་ཁུ་ཚུར་གྱིས་བསུམ་པའི་ཆུ་བླངས་ནས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང༌། །སངས་རྒྱས་ཀུན་གྱིས་སྦྱིན་པར་བྱེད། །ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་ཞེས་སློབ་མ་འཁོར་ལོས་སྒྱུར་བ་ལྟ་བུར་དབང་བསྐུར་བར་བྱའོ། །ཆུའི་དབང་བསྐུར་བའི་ཆོ་ག་མེ་ལོང་ཡེ་ཤེས་སོ། །དེ་ནས་བཤད་མ་ཐག་པ་ལ་
༄། །སོགས་པའི་རིམ་པས་གསེར་རམ་གོས་ལས་བྱས་པའི་ཅོད་པན་སློབ་མའི་མགོ་ལ་སྦྱིན་པར་བྱའོ། །རིན་ཆེན་འབྱུང་ལྡན་གྱི་རབ་ཏུ་སྦྱོར་བ་ལས་ནམ་མཁའི་མཐིལ་དུ་སོན་པའི་དེ་བཞིན་གཤེགས་པ་ཐམས་ཅད་རིགས་ཀྱི་བདག་པོའི་གཟུགས་ཀྱིས་ཅོད་པན་ཁོ་ནར་གནས་པར་བསམ་པར་བྱའོ། །ཨོཾ་ཨཿ་བཛྲ་མུ་ཀུ་ཊ་ཨ་བྷི་ཉྩ་ཧཱུཾ་སུ་ར་ཏ་སྟྭཾ་ཨ་ཧཾ། ཞེས་པས་ཅོད་པན་བལྟ་བར་བྱའོ། །སླར་ཡང་ཅོད་པན་གྱི་གནས་སུ་ཨོཾ་བཛྲ་རྡྷཱ་ཏྭཱ་ཤ་ཏི་ཨ་བྷི་ཥི་ཉྩ་ཧཱུཾ། ཨོཾ་སྟྭ་བྫྲཱི། །རཏྣ་བཛྲི། དྷ་རྨཱ་བྫྲི། ཀརྨ་བྫྲི། ཨ་བྷི་ཥཉྩ་ཧཱུཾ། འདིས་ནང་གི་པདྨ་འདབ་བརྒྱད་ཀྱི་ཕྱོགས་སུ་གནས་པའི་ལྷ་མོ་བརྗོད་པ་རྣམས་དང༌། དབུས་ཀྱི་གོས་དཀར་མོ་ནི་རྡོ་རྗེ་དབྱིངས་ཀྱི་དབང་ཕྱུག་མར་ཤེས་པར་བྱའོ་ཞེས་པས་མཉམ་པ་ཉིད་ཡེ་ཤེས་ཏེ་ཅོད་པན་གྱི་དབང་བསྐུར་བའོ། །དེ་ནས་རྡོ་རྗེ་ཆེན་པོ་རྩེ་མོ་ལྔ་པ་སྙིང་ག་ལ་སོགས་པའི་གནས་རྣམས་སུ་བཞག་ནས་ལག་པ་གཡས་པས་གཏད་པར་བྱའོ། །སློབ་མ་རྡོ་རྗེ་སེམས་དཔའ་ཞེས་བྱ་བ་འཇིག་རྟེན་དབང་ཕྱུག་གི་རྣམ་པ་ལ་གཏད་པར་བྱའོ། །སངས་རྒྱས་རྡོ་རྗེ་དབང་བསྐུར་ལ། །དེ་རིང་ཁྱོད་ལ་དབང་བསྐུར་གྱུར། །སངས་རྒྱས་ཐམས་ཅད་རབ་བསྒྲུབ་ཕྱིར། །རྡོ་རྗེ་འདི་དེ་ཁྱོད་ཀྱིས་གཟུང༌། །ཞེས་བཀླགས་ནས་ལག་པ་གཡས་སུ་རྡོ་རྗེ་སྦྱིན་པར་བྱའོ། །སོ་སོར་རྟོག་པ་ཡེ་ཤེས་རྡོ་རྗེའི་དབང་བསྐུར་བའོ། །དེ་ནས་དོན་ཡོད་གྲུབ་པའི་གཟུགས་ཀྱིས་དྲིལ་བུ་ལག་པ་གཡོན་དུ་བྱིན་ནས། ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩཱ་མི་ཏི་ཥཐ་ས་མ་ཡ་སྟྭཾ། ཞེས་བཀླགས་ནས་ལག་པ་གཡོན་དུ་སྟེ་དྲིལ་བུའི་དབང་བསྐུར་བའི་ཆོ་ག་བྱ་བ་ནན་ཏན་གྱི་ཡེ་ཤེས་སོ། །དེ་ནས་སློབ་མ་རྣམ་པར་སྣང་མཛད་དུ་བྱིན་གྱིས་བརླབས་ནས། མགོ་བོར་རྡོ་རྗེ་དྲིལ་བུ་བྱིན་ཏེ། ཨོཾ་བཛྲ་སཏྭ་སྟྭཾ། ཨ་བྷི་ཥི་ཉྩའ་མི། བཛྲ་ནཱ་མ་ཨ་བྷི་ཥེ་ཀ་ཏཿ། ཀྱེ་དཔལ་གཏི་མུག་རྡོ་རྗེ། ཀྱེ་དཔལ་ཞེས་སྡང་རྡོ་རྗེ། ཞེས་མིང་གི་དབང་བསྐུར་བར་བྱའོ་ཞེས་པ་ལ་སོགས་པ་རིགས་དང་རྗེས་སུ་མཐུན་པའི་མིང་གི་དབང་བསྐུར་རོ། །ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །མངོན་པར་
༄། །དབང་བསྐུར་བ་ལྔ་པོ་འདི་རྣམས་ཀྱིས་ཀྱང་སློབ་མ་སྔགས་དང་རྒྱུད་ཉན་པ་དང་བཤད་པ་དང་སྒྲུབ་པ་ལ་དབང་བར་བྱས་པར་འགྱུར་རོ། །དབང་བསྐུར་བ་ལྔ་པོ་རིག་པའི་དབང་བསྐུར་བ་ཞེས་བརྗོད་པར་བྱ་སྟེ། ཐམས་ཅད་དུ་སྤྱན་མ་ལ་སོགས་པའི་རིག་མ་རྣམ་ཀྱིས་བྱ་བའི་ཕྱིར་རོ། །དེའི་བར་མ་ཆད་པར་འདུལ་བས་སློབ་མ་དོན་དུ་གཉེར་བ་དང་ལྡན་པ་ལ། བླ་མས་སློབ་དཔོན་གྱི་དབང་བསྐུར་བར་བྱ་སྟེ། ཇི་ལྟར། གང་གི་བདག་གི་ཁྱོད་དྲིན་ལས། །རང་དང་གཞན་དོན་ནུས་འགྱུར་བ། །རྡོ་རྗེ་སློབ་དཔོན་གྱི་ནི་དབང༌། །ཐུགས་རྗེའི་གཏེར་གྱིས་བདག་ལ་སྩོལ། །ཞེས་གསོལ་བ་འདེབས་པ་དང་ལྡན་པའི་སློབ་མ་རྒྱན་ཐམས་ཅད་ཀྱིས་བརྒྱན་པ་སྟེང་དུ་གདུགས་དང་རྒྱལ་མཚན་དང་བླ་རེ་ལ་སོགས་པས་བརྒྱན། ཤར་གྱི་སྒོར་སེང་གེའི་ཁྲི་ལ་གནས་པ་སྣ་ཚོགས་པདྨ་འདབ་མ་བརྒྱད་པའི་སྟེང་དུ་རྡོ་རྗེ་སེམས་དཔའི་གཟུགས་སུ་དམིགས་ནས་ཧཱུཾ་ཡིག་ལས་སྐྱེས་པའི་རྡོ་རྗེར་བསམས་ནས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའི་བདེ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བ་སྙེམས་པའི་བདག་པོ་བདག །དཔལ་མཆོག་དང་པོའི་སྐྱེས་བུ་ཁྱེད། །ཅེས་དེ་ཁོ་ན་ཉིད་ཀྱིས་གཟུང་བར་བྱའོ། །དེའི་རྗེས་སུ། ཨཱཿཡིག་ལས་སྐྱེས་པའི་དྲིལ་བུ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང༌། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་པས་ལག་པ་གཡོན་དུ་སྦྱིན་པར་བྱའོ། །དེའི་རྗེས་སུ། ཡིད་ཀྱི་ལུས་ནི་བརྟན་པའི་ཕྱིར། །ཕྱག་རྒྱའི་དམ་ཚིག་རབ་ཏུ་བརྗོད། །གང་གི་ལུས་ནི་ཐམས་ཅད་བརྟན། །དེས་ན་ཕྱག་རྒྱ་རབ་ཏུ་གྲགས། །ཞེས་པ་འདིས་རང་གི་འདོད་པའི་ལྷའི་སྐུ་རུ་ནང་གི་བདག་ཉིད་ཅན་གྱི་ཕྱག་རྒྱ་ཆེན་པོ་ལྷག་པར་གནས་པ་ལ་འཁྱུད་པར་བྱའོ། །དེའི་རྗེས་སུ་སློབ་དཔོན་རང་གི་སྙིང་གའི་ས་བོན་ལས་བྱུང་བ་ནམ་མཁའ་གནས་པའི་ལྷའི་ཚོགས་ཀྱིས་མངོན་པར་དབང་བསྐུར་བཞིན་པར་བསམ་སྣས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡི་ཕྱག་བྱས་པ། །གསང་གསུམ་
༄། །གནས་ལས་ཡང་དག་བྱུང༌། །སངས་རྒྱས་ཀུན་གྱི་སྦྱིན་པར་བྱེད། །ཅེས་མངོན་པར་དབང་བསྐུར་བར་བྱའོ། །ཇི་ལྟར་གསུངས་པ། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་ལས། །ཁྱོད་ནི་སློབ་དཔོན་འབྱུང་བར་འགྱུར། །ཞེས་སློབ་དཔོན་དུ་དབང་བསྐུར་བར་འདོད་དོ། །དེའི་ཆེད་དུ་སློབ་དཔོན་དུ་དབང་བསྐུར་བའི་དབང་དུ་བྱ་བ་དེའི་ཆེད་དུ་བྱིན་ནོ། །དཀྱིལ་འཁོར་གྱི་དེ་ཁོ་ན་ཉིད་དང༌། དཀྱིལ་འཁོར་གྱི་རྣམ་པར་དག་པ་མདོར་བསྡུས་ནས་བཤད་པར་བྱ་སྟེ། ལྟར་དཀྱིལ་འཁོར་པདྨ་ཞེས་སུ་བརྗོད། །ཡིད་ཀྱི་དཀྱིལ་འཁོར་བཤད་པར་བྱ་སྟེ། ཁང་བརྩེགས་ཞེས་པ་ཡེ་ཤེས་ཏེ། །སེམས་ཀྱི་བརྩེགས་པ་ཡང་དག་བསྒྲེང༌། །ཕུང་པོ་ལྔ་ཡི་རང་བཞིན་གྱིས། །སངས་རྒྱས་ལྔ་རུ་རབ་ཏུ་གྲགས། །དེ་ཕྱིར་རྣམ་པར་སྣང་མཛད་གཟུགས་སུ་དམིགས་པའི་སློབ་མ་ལ་རྗེས་སུ་གནང་བ་སྦྱིན་པར་བྱའོ། །འཇིག་རྟེན་ཀུན་ལ་ཐམས་ཅད་ནས། །དངོས་གྲུབ་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པ། །ཆོས་ཀྱི་འཁོར་ལོ་རབ་ཏུ་བསྐོར། །ཆོས་ཀྱི་གནས་སུ་རྡོ་རྗེ་དང་རིན་ཆེན་དང༌། ལས་དང་ཁྲོ་བོའི་སྒྲ་གཅིག་པའི་ཚིགས་སུ་བཅད་པས་རྗེས་སུ་གནང་བ་སྦྱིན་པར་བྱའོ། །དེའི་རྗེས་སུ་རྡོ་རྗེའི་བརྟུལ་ཞུགས་སྦྱིན་པ་དང༌། །ལུང་བསྟན་པ་དང༌། དབུགས་དབྱུང་བ་སྦྱིན་ནོ་ཞེས་པ་རྒྱན་ཐམས་ཅད་ཀྱི་རྗེས་སུ་འབྲངས་པ་སྦྱིན་པར་བྱའོ། །དེ་ལྟར་སློབ་དཔོན་དུ་དབང་བསྐུར་བས་རྡོ་རྗེ་རྣམ་པར་སྦྱང་བར་བྱའོ། །གསང་བ་གསུམ་གྱི་དབང་བསྐུར་བས་གསུང་གི་རྡོ་རྗེ་ཡང་རྣམ་པར་སྦྱང་བར་བྱ་སྟེ། དེ་ལྟ་བུའི་རིམ་པས་རྒྱུད་ཐམས་ཅད་ལ་བརྗོད་པའི་ཚོགས་དབང་བསྐུར་དགུས་གྲོལ་བ་སྦྱིན་པར་བྱའོ། །དེ་ལ་རིམ་པ་ནི། ཆུ་དང་ཅོད་པན་རྡོ་རྗེ་དང་ནི་དྲིལ་བུ་ལ་སོགས་མིང༌། །རིགས་གསུམ་དམ་ཚིག་སྐལ་ལྡན་སློབ་དཔོན་གསང་བ་མཆོག་སོགས་ཀྱིས། །དབང་བསྐུར་རྣམ་པར་དགུ་པོ་གང་གི་མཚུངས་མེད་བསོད་ནམས་ཀྱིས། །སྐྱེར་འཇུག་སྲིད་པ་དག་པ་བླ་མ་ཚོགས་དེ་ལ་ཕྱག་འཚལ། །ཞེས་པ་ཕྱག་བྱས་ནས་
༄། །དབང་བསྐུར་བ་ཐམས་ཅད་ཐོབ་ནས། དེ་ནས་སློབ་མས་ལུས་ལ་སོགས་པ་ཅི་རིགས་པའི་ཡོན་དབུལ་བར་བྱའོ། །བླ་མས་ཀྱང་ཞེན་པ་མེད་པའི་སེམས་ཀྱིས་བླངས་ནས་དེ་ལ་བཀྲ་ཤིས་བརྗོད་པར་བྱའོ། །དེ་ནས། བཅོམ་ལྡན་འདས་སངས་རྒྱས་བཀྲ་ཤིས་དང༌། །ཆོས་དང་དགེ་འདུན་བཀྲ་ཤིས་དང༌། །བསོད་ནམས་འདི་ཀུན་ཉིད་ཀྱིས་ནི། །སློབ་མ་རྣམས་ཀྱི་བཀྲ་ཤིས་ཤོག །ཕུན་སུམ་ཚོགས་པ་མདའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨོ་རྒྱས་པ་འདབ་འདྲའི་སྤྱན་མདའ་བ། བཀྲ་ཤིས་དེ་ནི་ཁྱོད་ལ་ཞི་བར་བྱེད་གྱུར་ཅིག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམ་སླ་ཞི་བྱེད་པ། །དེ་ནི་ཁྱོད་ལ་འཇིག་རྟེན་བཀྲ་ཤིས་གཉིས་པའོ། །དགེ་འདུན་དམ་པའི་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚར་ཤེས་དང་དཔལ་གྱི་གཞི། །དེ་ནི་ཁྱོད་ལ་འཇིག་རྟེན་བཀྲ་ཤིས་གསུམ་པའོ། །ཞེས་སློབ་མ་རྣམས་ལ་བཀྲ་ཤིས་སྦྱིན་པར་བྱའོ། །དེ་རྣམས་བསྔགས་པ་དང། །དེ་ནས་སློབ་མ་དེ་རྣམས་རེ་རེ་ནས་རིམ་པས་ཕྱག་འཚལ་ནས་འགྲོར་གཞུག་གོ །དེ་ནས་བླ་མ་སླར་ཡང་མཆོད་པ་དང་བསྟོད་པ་བརྗོད་པ་ལ་སོགས་པ་ཐམས་ཅད་བྱའོ། །གཞན་ཡང་ཐིག་ལེའི་རྣལ་འབྱོར་ལ་སོགས་པ་བསྒོམ་པར་བྱ་བའི་ཐབས་སུ་བཤད་པའི་ཆོ་གས་བྱས་ནས་གཅིག་གམ་ལྔའམ་བདུན་ནམ་ལྔ་བཅུའམ། བརྒྱད་ལྷག་པའི་བརྒྱར་གཏོར་མ་བྱིན་ནས་མཆོད་པ་བྱས་ཏེ་དཀྱིལ་འཁོར་དང་དཀྱིལ་འཁོར་གྱི་དབང་པོའི་ལྷ་རྣམས་བཟོད་པར་མཛོད་ཅིང་བཟོད་པར་མཛོད་ཅིག་ཅེས་བརྗོད་ནས་དཀྱིལ་འཁོར་ལ་བསྐོར་བ་བྱས་ཏེ་གཏོར་མ་ཡང་ངོ༌། །སླར་ཡང་ཉེ་བར་འདུག་སྟེ་ཡང་དག་པར་བསྟོད་ནས་བཛྲ་མུཿ་ཞེས་བཟླས་ཏེ་རོལ་མོའི་སྒྲས་གཏོར་མ་གཤེགས་སུ་གསོལ་བར་བྱའོ། །དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་གྱི་སེམས་དཔའི་རང་གི་ངོ་བོ་བྡྲ་མུཿ་ཞེས་བཀླགས་ནས། ཁྱེད་ཀྱིས་སེམས་
༄། །ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཨོཾ་བཛྲ་མུཿཞེས་པས་ཡེ་ཤེས་སེམས་དཔའ་གཤེགས་སུ་གསོལ་བར་བྱའོ། །དམ་ཚིག་གི་དཀྱིལ་འཁོར་རང་གི་སྙིང་གའི་ས་བོན་ལ་རབ་ཏུ་གཞུག་པར་བྱའོ་ཞེས་སོ། །དཀྱིལ་འཁོར་གྱི་རྡུལ་ཚོན་ནི་ཀླུང་གི་གནས་སུ་རབ་ཏུ་གཞུག་པར་བྱའོ། །གཞན་ཉི་མ་གཉིས་པ་ལ་རྣམ་ཐོས་སྲས་ལ་སོགས་པའི་གཏོར་མ་སྦྱིན་པར་བྱའོ་ཞེས་པ་རྒྱུད་ལས་གསུངས་པ་ངེས་པའོ། །པདྨ་སྤྱན་རས་གཟིགས་དབང་གི །དཀྱིལ་འཁོར་མཆོད་པའི་ཆོ་ག་ནི། །འཇིག་རྟེན་རྣམས་ལ་ཕན་འདོད་པས། །རྒྱལ་དཔལ་ཡེ་ཤེས་ཀྱིས་བྱས་པའི། །བསོད་ནམས་དེ་ལས་སྐྱེ་དགུར་བཅས། །རྟག་ཏུ་སྐྱེ་དགུ་བདེ་ལྡན་འགྱུར། །བདག་ཀྱང་བསོད་ནམས་འདི་ཡིས་ནི། །ཀུན་མཁྱེན་གོ་འཕང་ཐོབ་གྱུར་ཅིག །ཅེས་པ་པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་མཆོད་པའི་ཆོ་ག་རྫོགས་སོ།། །།རྒྱལ་བ་དཔལ་ཡེ་ཤེས་མིང་གཞན་པདྨ་རྡོ་རྗེ་ཞེས་བྱ་བས་མཛད་པ་རྫོགས་སོ།། །། ཁ་ཆེའི་པཎྜི་ཏ་ཆེན་པོ་སུ་མ་ན་ཤྲཱི་བྷ་དྲ་དང༌། བོད་ཀྱི་ལོ་ཙཱ་བ་དགེ་སློང་རིན་ཆེན་གྲུབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།