ལེའུ་གསུམ་པ། རྡོ་རྗེ་བཀོད་པའི་ཏིང་ངེ་འཛིན་ཞེས་བྱ་བའི་རྒྱ་ཆེར་བཤད་པ།
རྣལ་འབྱོར་པ་རྣམ་པ་གཉིས་ཀྱིས་ཞེས་བྱ་བ་ལ་སོགས་པས་ལྷའི་ལེའུ་གསུམ་པ་བསྟན་པར་བྱ་སྟེ། གང་གི་ཕྱིར་བྱང་ཆུབ་ཀྱི་སེམས་ཀྱི་ལེའུ་ལས་སྟོང་པ་ཉིད་ཐོབ་ནས་དེ་ནས་བསྐྱེད་པའི་རིམ་པས་ལྷའི་འཁོར་ལོ་བསྒོམ་པར་བྱའོ། །དེ་བཞིན་དུ་དང་པོ་སྦྱོར་བ་དང་དཀྱིལ་འཁོར་རྒྱལ་བ་
མཆོག་ཡོངས་སུ་རྫོགས་ནས་ལས་ཀྱི་རྒྱལ་བ་མཆོག་གསལ་བར་བྱ་བའི་ཕྱིར་ཕྲ་མོའི་རྣལ་འབྱོར་བསྒོམ་པར་བྱའོ། །རྫོགས་པའི་རིམ་པའི་རྣལ་འབྱོར་པས་ཕྲ་མོའི་རྣལ་འབྱོར་བསྒོམ་པར་བྱ་བའི་ཕྱིར་རྡོ་རྗེ་བཟླས་པའི་རིམ་པ་བསྟན་པར་བྱའོ། །རྣལ་འབྱོར་པ་གཉིས་ཀྱི་ནི་བསྐྱེད་པ་དང་རྫོགས་པའི་རིམ་པའི་རྣལ་འབྱོར་བ་དག་གིས་སོ། །ཕྲ་མོའི་རྣལ་འབྱོར་བསྒོམ་པ་གཉིས་བྱའོ་ཞེས་པ་ལ་བསྐྱེད་པའི་རིམ་པའི་རྣལ་འབྱོར་པས་རྡོ་རྗེ་ལ་སོགས་པ་ཕྲ་མོའི་རྣལ་འབྱོར་བསྒོམ་པ་དང༌། རྫོགས་པའི་རིམ་པའི་རྣལ་འབྱོར་པས་ཀྱང་འདོད་ཆགས་དང་ཞེ་སྡང་དང་གཏི་མུག་གི་རིགས་ཀྱི་དབྱེ་བས་གསང་བ་དང་སྙིང་ག་དང་གདོང་གི་སྣ་རྩེར་ཕྲ་མོའི་ཐིག་ལེ་བསྒོམ་པར་བྱའོ། །དེ་ལ་འདོད་ཆགས་ཀྱི་རིགས་ཅན་གྱི་རྣལ་འབྱོར་པས་སྟོང་ཕྲག་བདུན་ཅུ་རྩ་གཉིས་ཀྱི་རྩའི་ཁོང་སྟོང་ནས་རྒྱུ་བའི་བྱང་ཆུབ་ཀྱི་སེམས་ཀྱི་ཐིག་ལེ་རྡོ་རྗེ་ནོར་བུའི་རྩེའམ། །པདྨའི་ལྟེ་བའི་རྩེར་ཡུངས་ཀར་གྱི་འབྲུའི་ཚད་ཙམ་གྱི་ཐིག་ལེ་བསྒོམ་པར་བྱའོ། །ཞེ་སྡང་གི་རིགས་ཀྱི་རྣལ་འབྱོར་པས་ཡི་གེ་གསུམ་ཆ་ཤས་བསྡུས་ནས་ཐུགས་རྡོ་རྗེ་འཆང་གི་ས་བོན་གྱི་ཐིག་ལེ་ཙམ་སྙིང་གར་དམིགས་ལ་སྔགས་ཀྱི་ཐིག་ལེ་བསྒོམ་པར་བྱའོ། །གཏི་མུག་གི་རིགས་ཅན་གྱིས་དཀྱིལ་འཁོར་བཞི་པོ་ལས་གཡས་དང་གཡོན་དང་དམན་པ་དང་དལ་བུས་རྒྱུ་བའི་དབྱེ་བས་སྤྲོས་པའི་འོད་ཟེར་གྱི་ཚོགས་ཀུན་རྫོབ་ཀྱི་སྣ་རྩེར་ཐིག་ལེའི་གཟུགས་བསྒོམ་པར་བྱའོ། །དེ་བཞིན་དུ་རིན་ཆེན་འབྱུང་ལྡན་དང་དོན་ཡོད་གྲུབ་པའི་རྣལ་འབྱོར་པ་དག་གིས་ཀྱང་སྨིན་མཚམས་དང་ལྟེ་བའི་དཀྱིལ་དུ་ཐིག་ལེ་བསྒོམ་པར་བྱ་བ་ནི་ཕྲ་མོའི་རྣལ་འབྱོར་རྟོགས་པར་བྱའོ། །དེ་བཞིན་གཤེགས་པ་ཐམས་ཅད་ནི་ཞེས་པ་ལ་ཕུང་པོ་ལྔ་དང་དེ་རྣམས་བསྡུ་བར་བྱེད་པ་སྐུ་ལ་སོགས་པའོ། །དེ་དག་ཉེ་བར་སྡུད་པར་བྱེད་པའི་ཕྱིར་སྐུ་གསུང་ཐུགས་ཀྱི་རྡོ་རྗེ་ནི་རྡོ་རྗེ་འཆང་ཆེན་པོ་སྟེ་དྲུག་པའོ། །དེ་བཞིན་གཤེགས་པ་ཐམས་ཅད་ནི་མི་བསྐྱོད་པ་ལ་སོགས་པ་སྟེ་ཕྱག་རྒྱ་ལེགས་པར་སྦྱང་བའི་སྔོན་དུ་འགྲོ་བར་ཕྱུང་བའི་སྔགས་ཀྱི་རིམ་པས་དམ་ཚིག་གི་དཀྱིལ་འཁོར་དང་སྒྲུབ་པའི་དཀྱིལ་འཁོར་སྤྲོས་ལ་ལྷ་སུམ་ཅུ་རྩ་གཉིས་ཀྱི་བདག་ཉིད་ཅན་གྱི་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའ་
དང་ཁྲོ་བོ་རྣམས་སོ། །དེ་རྣམས་ཀྱིས་སེམས་ཅན་གྱི་དོན་གྱི་ཕྱིར་ཞེས་པ་ནི་དེ་དག་གིས་འགྲོ་བའི་དོན་མཛད་པའི་ཕྱིར་རོ། །ཕྱོགས་བཅུར་ཁྱབ་པ་ཞེས་པ་ལ་རེག་བྱ་རྡོ་རྗེ་མའི་ཆོས་འབྱུང་བའི་ནང་ནས་ཕྱི་རོལ་དུ་སྤྲོས་ཏེ་མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་དུ་འཇུག་པར་བྱ་བའི་ཕྱིར་ཕྱོགས་བཅུར་གཤེགས་པའོ། །དེ་ཉིད་ནི་ཆོས་ཀྱི་ཆར་འབེབས་པས་ན་ཞེས་པ་ནི་ཉེ་བར་མཚོན་པ་ཙམ་ཡིན་ཏེ། །བརྟན་པ་དང་སྨིན་པ་དང་གྲོལ་བ་དང་སངས་རྒྱས་ཀྱི་ཞིང་ལ་འཇུག་པའི་ཕྱིར་རོ། །དེ་ཉིད་ནི་སེམས་ཅན་བསམ་པ་སྣ་ཚོགས་པས་ཕྱེ་བ་ལ་ཞེས་པ་ནི་འདོད་ཆགས་ལ་སོགས་པའི་རིགས་ཅན་རྣམས་ཀྱིས་སེམས་ཅན་གྱི་བསམ་པའི་རྗེས་སུ་འབྲངས་ནས་བུད་མེད་དང་སྐྱེས་པའི་དབྱེ་བས་སྤྲོ་བ་དང་ཞི་བ་དང་དྲག་པོའི་གཟུགས་དང་སྒེག་པ་ལ་སོགས་པའི་ཉམས་དང་ལྡན་པའི་སྐུའི་དབྱེ་བས་ཀྱང་སྤྲོ་བ་ཞེས་བྱ་བའི་ཐ་ཚིག་གོ །སྐུ་དུ་མར་སྟོན་པའི་ཕྱིར་བཀོད་པའོ་ཞེས་པ་ནི་ཞལ་གསུམ་པ་ལ་སོགས་པ་དང་རིགས་སྣ་ཚོགས་པའི་རང་གི་སྐུ་བསྟན་པའི་ཕྱིར་རོ། །གང་གི་ཕྱིར་རྡོ་རྗེ་འཆང་ཆེན་པོ་གཅིག་པུ་ཁོ་ན་ཆོས་ཀྱི་དབྱིངས་ཀྱི་རང་བཞིན་ཡིན་ན་ཡང་ཁ་དོག་ལྔ་དང་ཞི་བ་དང་དྲག་པོ་དང་ཕོ་དང་མོའི་དབྱེ་བས་རབ་ཏུ་སྣང་སྟེ། དེ་དོན་དམ་པར་དབྱེ་བ་ནི་མེད་དེ། །འོད་གསལ་བའི་རང་བཞིན་ཡིན་པའི་ཕྱིར་རོ། །དེ་ལྟ་བུའི་ཚུལ་གྱིས་ཞེས་བྱ་བ་ལ་སོགས་པ་ནི་དང་པོའི་སྦྱོར་བ་ལ་སོགས་པའི་མཚན་ཉིད་ཅན་ཞེས་བྱ་བའི་ཐ་ཚིག་གོ །རྡོ་རྗེ་ནི་དེ་བཞིན་གཤེགས་པ་རྣམས་སོ་ཞེས་པ་ལ་རྡོ་རྗེ་བཞིན་དུ་མེ་ལོང་ལྟ་བུ་ལ་སོགས་པའི་ཡེ་ཤེས་རྣམས་ཀྱིས་མི་ཕྱེད་པའི་ཕྱིར་རོ། །འདིར་དེ་བཞིན་གཤེགས་པའི་སྒྲ་ནི་ཉེ་བར་མཚོན་པ་ཡིན་ཏེ་དེས་ན་དེའི་རིགས་ལས་བྱུང་བའི་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོ་རྣམས་ཀྱང་གཟུང་ངོ༌། །དེ་སྐད་ཅེས་བྱ་བའི་ཏིང་ངེ་འཛིན་གྱི་གཞིའི་ལེའུ་ཞེས་བྱ་བ་ལ། །ཏིང་ངེ་འཛིན་ནི་གཞི་ཅན་ནོ། །ལེའུ་ནི་གཞིའོ། །གཞི་དང་གཞི་ཅན་གྱི་དབྱེར་མེད་པར་བྱས་ནས་ཏིང་ངེ་འཛིན་གྱི་ལེའུ་ཞེས་བསྟན་ཏེ། ཚེམ་བུ་དུ་བ་བཞིན་ནོ། །ཚེམ་བུ་ལ་གནས་པའི་བུ་ཆུང་དུ་བ་ཞེས་བྱ་བའི་ཐ་ཚིག་གོ །དེ་ལྟར་ཞེས་བྱ་བ་ལ་སོགས་པས་ལེའུའི་མིང་དོན་དང་ལྡན་པས་བསྟན་ཏོ། །ལྷ་རྣམས་བསྐྱེད་པའི་ཡན་ལག་དག་ཏུ་གྱུར་པའི་གསང་སྔགས་དང་
པོར་སྟོན་པ་ནི་ཞེས་པ་ལ་དང་པོ་སྦྱོར་བའི་ཏིང་ངེ་འཛིན་གྱི་ཡན་ལག་ཏུ་གྱུར་པའི་རྣལ་འབྱོར་གྱི་ཕྱོགས་གཅིག་པ་སྟོང་པ་ཉིད་བསྒོམ་པ་བརྟན་པར་བྱེད་པའི་མཚན་ཉིད་ཀྱི་སྔགས་དང་པོ་བསྟན་པར་བྱའོ་ཞེས་པའི་དོན་ཏོ། །ཨོཾ་ཞེས་བྱ་བ་ལ་སོགས་པ་ལ་དོན་དམ་པའི་དཀྱིལ་འཁོར་བསྒོམས་པའི་འོག་ཏུ་སྔགས་འདི་བརྗོད་པར་བྱ་ཞེས་བྱ་བའི་དོན་ཏོ། །ཆོས་འབྱུང་བ་ལ་གནས་པའོ་ཞེས་པ་ནི་བགེགས་བསྐྲད་པ་དང་སྟོང་པ་ཉིད་བསྒོམས་པའི་འོག་ཏུ་ཡི་གེ་ཧཱུཾ་གི་ས་བོན་ལས་བསྐྱེད་པའི་གཞིའི་དཀྱིལ་འཁོར་གྱི་རང་བཞིན་གྱི་ཆོས་འབྱུང་གི་ཕྱག་རྒྱའི་སྟེང་དུ་ཡི་ཤེས་ཀྱི་ས་གཞི་འབྱུང་བ་ཆེན་པོ་བཞིའི་རང་བཞིན་དང་རི་རབ་ཡོངས་སུ་གྱུར་པ་ལས། །རིན་ཆེན་སྣ་བདུན་གྱི་གཞལ་ཡས་ཁང་པའི་ནང་ན་སྣ་ཚོགས་པདྨ་དང༌། ཟླ་བ་དང༌། ཉི་མའི་དཀྱིལ་འཁོར་དུ་སྐད་ཅིག་གིས་རྫོགས་པའི་ལྷ་སུམ་ཅུ་རྩ་གཉིས་ཀྱིས་ལྷག་པར་མོས་པའི་དཀྱིལ་འཁོར་རྣམ་པར་བསྒོམ་པ་ལ། དེ་ཉིད་རྡོ་རྗེ་ཕྲེང་བ་ལས་གསུངས་པའི་གཟུགས་ཕུང་གཏོགས་པ་ཞེས་བྱ་བ་ལ་སོགས་པས་དོན་དམ་པའི་དཀྱིལ་འཁོར་དུ་བྱས་ལ། ཡབ་ཡུམ་རོ་གཅིག་པར་གྱུར་ནས་སྔགས་འདིར་བརྟན་པར་བྱས་ཏེ། ཡང་ཡི་གེ་གསུམ་ལས་བྱུང་བའི་པདྨ་དང་ཟླ་བ་དང་ཉི་མའི་སྟེང་དུ་ཡི་གེ་གསུམ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ལ་སྔ་མའི་པདྨ་ལ་སོགས་པ་གསུམ་ཞུགས་ཏེ་ཆོས་ཀྱི་དབྱིངས་ཀྱི་སྔགས་ཀྱིས་རང་གི་སེམས་བརྟན་པར་བྱས་ལ། དེའི་སྟེང་དུ་ཡི་གེ་གསུམ་རྣམ་པར་བཀོད་ལ་དེ་ནས་སྤྲོ་བ་དང་བསྡུ་བ་སྔོན་དུ་འགྲོ་བར་རྡོ་རྗེ་བསྐྱེད་ལ། །དེ་ཡོངས་སུ་གྱུར་པ་ལས་རྡོ་རྗེ་འཆང་ཆེན་པོ་ལ་སོགས་པའི་ལྷའི་འཁོར་ལོ་གང་ཡང་རུང་བ་རྣམ་པར་བསྒོམས་ཏེ། ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་དགོད་པའི་མཚན་ཉིད་ཀྱི་རྗེས་སུ་རྣལ་འབྱོར་བྱས་ལ་ཕུང་པོ་དང་ཁམས་དང་སྐྱེ་མཆེད་ལ་ཡིག་འབྲུ་དགོད་པའི་མཚན་ཉིད་ཀྱི་ཤིན་ཏུ་རྣལ་འབྱོར་རྫོགས་ནས་སྐུ་ལ་སོགས་པ་ལ་བྱིན་གྱིས་བརླབ་པའི་རྣལ་འབྱོར་ཆེན་པོ་བྱས་ཏེ། ཕྱག་རྒྱ་འདུས་ནས་རེག་བྱ་རྡོ་རྗེ་མའི་ཆོས་འབྱུང་གི་ནང་དུ་ཕྱུང་བའི་སྔགས་ཀྱིས་དཀྱིལ་འཁོར་པ་རྣམས་སྤྲུལ་ཏེ། དེ་ལས་ཕྱི་རོལ་དུ་སྤྲོས་ལ་འགྲོ་བའི་དོན་བྱས་ནས་སླར་ཡང་
གཤེགས་ཏེ། ཤར་ལ་སོགས་པའི་ཕྱོགས་དང་མཚམས་སུ་དཀྱིལ་འཁོར་པ་རྣམས་རིམ་གྱིས་བཞུགས་པར་བསམས་ལ། དབང་བསྐུར་བ་དང་རྒྱས་བཏབ་ཅིང་དེའི་འོག་ཏུ་འཆད་པར་འགྱུར་བའི་ལས་ཀྱི་རྒྱལ་བ་མཆོག་གི་ཏིང་ངེ་འཛིན་གྱི་ཡན་ལག་ཕྲ་མོའི་རྣལ་འབྱོར་བསྒོམ་པར་བྱའོ། །དེ་ཉིད་བསྟན་པར་བྱ་བའི་ཕྱིར་རྣམ་པར་སྣང་མཛད་ལ་སོགས་པའི་ལྷ་རྣམས་ཀྱི་འཁོར་ལོ་ཞེས་སྨོས་ཏེ། ཡི་གེ་གསུམ་ཡོངས་སུ་གྱུར་པ་ལས་སྐྱེས་པའི་འཁོར་ལོའི་ཕྱག་མཚན་ལས་བྱུང་བའི་རྣམ་པར་སྣང་མཛད་ཀྱི་སྤྲུལ་པའི་ལྷ་སུམ་ཅུ་རྩ་གཉིས་ཀྱི་བདག་ཉིད་ཀྱི་འཁོར་ལོ་ཞེས་བྱ་བའི་དོན་ཏོ། །རིགས་དང་དེར་འབྲེལ་བའི་ལྷ་རྣམས་ཏེ་ཞེས་པ་ནི་རྣམ་པར་སྣང་མཛད་ལ་སོགས་པའི་རིགས་ཀྱི་འབྲེལ་བ་དང་ལྡན་པའི་ལྷ་རྣམས་ཞེས་བྱ་བའི་ཐ་ཚིག་གོ །དེ་ཉིད་གནས་ཇི་ལྟ་བ་བཞིན་དུ་ཡང་དག་པར་གནས་པས་ན་ཞེས་པ་ལ་ཤར་ཕྱོགས་ལ་སོགས་པའི་གནས་ལ་ཉེ་བར་བཀོད་པས་སོ། །རང་གི་བདག་པོའི་སྐུ་མདོག་དང་འདྲ་བའོ་ཞེས་པ་ནི་དབུས་ཀྱི་གཙོ་བོ་ལ་ལྟོས་པས་དབུས་ཀྱི་སའི་ཆ་ནི་བདག་པོ་དང་མཚུངས་པ་ཞེས་པའི་དོན་ཏོ། །དེ་ལྟར་རྣམ་པར་སྣང་མཛད་ཀྱི་དཀྱིལ་འཁོར་གྱི་དབུས་ཀྱི་སའི་ཆ་ནི་དཀར་པོའོ། །ཤར་དང་ལྷོ་དང་ནུབ་དང་བྱང་གི་སའི་ཆ་རྣམས་ནི་ནག་པོ་དང་སེར་པོ་དང༌། དམར་པོ་དང་ལྗང་གུའོ། །དེ་བཞིན་དུ་མི་བསྐྱོད་པའི་དཀྱིལ་འཁོར་གྱི་དབུས་ཀྱི་སའི་ཆ་ནི་ཁ་དོག་ནག་པོ་དང་ཤར་ལ་སོགས་པ་དཀར་པོ་དང་སེར་པོ་དང༌། དམར་པོ་དང་ལྗང་གུའོ། །རིན་ཆེན་འབྱུང་ལྡན་གྱི་དཀྱིལ་འཁོར་གྱི་དབུས་ཀྱི་སའི་ཆ་ནི་སེར་པོ་དང༌། ཤར་ལ་སོགས་པ་དཀར་པོ་དང་ནག་པོ་དང༌། དམར་པོ་དང༌། ལྗང་གུའོ། །སྣང་བ་མཐའ་ཡས་ཀྱི་དཀྱིལ་འཁོར་གྱི་དབུས་ཀྱི་སའི་ཆ་ནི་དམར་པོ་དང་ཤར་ལ་སོགས་པ་སྔ་མ་བཞིན་ནོ། །འོན་ཀྱང་ནུབ་ནི་ནག་པོའོ། །དོན་ཡོད་གྲུབ་པའི་དཀྱིལ་འཁོར་གྱི་སའི་ཆ་ནི་ལྗང་གུ་དང་། ཤར་ལ་སོགས་པ་སྔ་མ་བཞིན་ནོ། །འོན་ཀྱང་བྱང་ནི་ནག་པོའོ། །དེ་ལྟར་སངས་རྒྱས་སྤྱན་མ་ནས་བརྩམས་ཏེ་གནོད་མཛེས་ཀྱི་རྒྱལ་པོའི་བར་དུ་ལྷ་སུམ་ཅུ་རྩ་གཉིས་ཀྱི་བདག་ཉིད་ཅན་གྱི་དཀྱིལ་འཁོར་སུམ་ཅུ་རྩ་གཉིས་སུ་ཤེས་པར་བྱའོ། །དེ་རྣམས་མདོར་བསྡུས་ན་སྟོང་ཕྲག་གཅིག་དང་ཉི་ཤུ་རྩ་
བཞིའི་ལྷ་རྣམས་སུ་འགྱུར་རོ། །དེ་རྣམས་བདག་པོ་ལ་ལྟོས་ཏེ་གནས་ཇི་ལྟ་བ་བཞིན་དུ་དགོད་པར་བྱའོ། །ཁ་དོག་སྣ་ལྔའི་སའི་ཆ་དང་ལྡན་པའོ་ཞེས་པ་ལ། བདག་པོ་ལ་ལྟོས་ཏེ་ཤར་ལ་སོགས་པའི་ཕྱོགས་སུ་ཁ་དོག་ལྔ་དང་ལྡན་པའོ། །ཐམས་ཅད་དུ་བཟང་པོའི་ཞེས་པ་ནི་ནང་གི་དཀྱིལ་འཁོར་གྱི་ཁྱད་པར་རོ། །ཕྱིའི་དཀྱིལ་འཁོར་ནི་གྲུ་བཞི་པ་ཉིད་དོ། །གཟུགས་རྡོ་རྗེ་ལ་སོགས་པ་དང་ལྡན་པའོ་ཞེས་པ་ནི་ལྷའི་སྣམ་བུ་དང་དྲ་བ་ཕྱེད་པ་དང་རིན་པོ་ཆེའི་ཕ་གུ་དང་པ་ཉྩ་རཱ་ག་ལ་སོགས་པ་དང་ལྡན་པའོ། །ལྷ་ལ་སོགས་པ་ཉེ་བར་བསྟན་པའི་མཆོད་པ་རྣམ་པ་ལྔ་དང་བཅས་པའོ་ཞེས་པ་ལ། ཤིན་ཏུ་དད་པ་ལས་འོངས་པའི་བརྒྱ་བྱིན་ལ་སོགས་པའི་ལྷའི་ཚོགས་ཀྱི་ལག་པས་འབུལ་བ་རྣམ་པ་སྣ་ཚོགས་པའི་མཆོད་པ་དང་བཅས་པ་ཞེས་བྱ་བའི་ཐ་ཚིག་གོ །མདོར་ན་ཞེས་པ་ནི་སྔར་བཤད་པའི་བསྐྱེད་པའི་རིམ་པས་སོ། །ལྷའི་འཁོར་ལོ་འདི་ལྟར་བསམ་པར་བྱའོ་ཞེས་བྱ་བ་ནི་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་གྱི་སྒོ་ནས་བསྐྱེད་པའི་དེ་བཞིན་གཤེགས་པ་ལ་སོགས་པའི་ལྷའི་འཁོར་ལོ་བསྒོམ་པར་བྱའོ། །བདག་ཉིད་ནི་དཀྱིལ་འཁོར་གྱི་འཁོར་ལོ་ལས་ལོགས་སུ་བདག་ཉིད་ཀྱང་ཐ་དད་པར་བསྒོམ་པར་མི་བྱའི། འོན་ཀྱང་དཀྱིལ་འཁོར་གྱི་བདག་པོའི་རང་བཞིན་དུ་བཞུགས་པར་བདག་ཉིད་བསམ་པར་བྱ་བའི་དོན་ཏོ། །འཁོར་ལོའི་དཀྱིལ་དུ་ཞེས་པ་ལ་ལྷ་སུམ་ཅུ་རྩ་གཉིས་ཀྱི་ལྷའི་འཁོར་ལོའི་དབུས་སུའོ། །བདག་པོར་གྱུར་པ་ཉིད་ཀྱིས་གཞག་གོ་ཞེས་པ་ནི་རྣལ་འབྱོར་བཞིས་བདག་ཉིད་ཀྱི་དང་པོ་སྦྱོར་བའི་ཏིང་ངེ་འཛིན་གྱི་ཞེས་བྱ་བའི་དོན་ཏོ། །སྐད་ཀྱི་བྱིངས་བརྗོད་པ་ནི་དོན་དུ་མ་ཡིན་པས་བསྒོམ་པའི་སྒྲ་ནི་གཞག་པའི་དོན་ལ་འཇུག་གོ །དེ་ནས་ཞེས་བྱ་བ་ལ་སོགས་པས་རྡོ་རྗེ་འཆང་ཆེན་པོ་ལ་རྗེས་སུ་འཇུག་པས་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བསྒོམ་པ་བསྟན་ཏོ། །གང་གི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོ་ནི། ཤེས་པ་དང་ཤེས་བྱ་ཉེ་བར་བསྡུས་པའི་ངོ་བོ་ཆོས་ཐམས་ཅད་ཀྱི་ཆོས་ཉིད་ཀྱི་རང་བཞིན་ནོ། །དེ་བས་ན་དེས་བྱིན་གྱིས་བརླབས་པའི་དེ་བཞིན་གཤེགས་པའི་སྐུ་རྣམས་ཀྱིས་བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་སྟེར་པར་འགྱུར་རོ། །གཞན་དུ་ན་བརྟག་པར་བྱ་བ་ཙམ་དེ་རྣམས་ཀྱི་
འབྲས་བུ་གང་ཡང་སྟེར་བར་མི་འགྱུར་རོ། །དེ་ལ་རྗེས་སུ་ཞུགས་པའི་ལྷའི་སྐུ་བརྟགས་པ་ཡང་ཡོངས་སུ་དག་པའི་སྐུར་འགྱུར་རོ། །དེ་ཉིད་ཀྱི་ཕྱིར་ལེའུ་བཅུ་གསུམ་པ་ལས་ཀྱང༌། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །དེ་ནི་སྔགས་རྣམས་ཐམས་ཅད་ཀྱི། །རྒྱལ་པོ་རྟག་པ་མཆོག་ཡིན་ནོ། །ཞེས་འབྱུང་ངོ༌། །རབ་ཏུ་བྱེད་པ་ལས་ཀྱང༌། །དེ་ནི་རང་བྱུང་བཅོམ་ལྡན་འདས། །གཅིག་པུའི་བདག་ཉིད་ཆེ་བའི་ལྷ། །མན་ངག་རྣམས་ནི་རབ་སྟེར་བས། །རྡོ་རྗེ་སློབ་དཔོན་དེ་བས་ལྷག །ཅེས་འབྱུང་ངོ༌། །རྡོ་རྗེ་འཆང་གི་སྤྲུལ་པ་ཡི། །ཞེས་པ་ནི། རྡོ་རྗེ་འཆང་ཆེན་པོས་བསྐྱེད་ཅིང༌། དེ་ལ་རྗེས་སུ་ཞུགས་ཏེ་དེའི་རྣམ་པ་ཉིད་དུ་འགྱུར་པའོ། །བརྟན་པ་དང་གཡོ་བའི་བདག་ཉིད་འཇིག་རྟེན་པ་འདི་ཇི་སྲིད་དེ་དག་ཐམས་ཅད་རྡོ་རྗེ་འཆང་བ་ལས་བསྐྱེད་ཅིང་དེ་ཉིད་དུ་ཐིམ་མོ། །ཇི་སྐད་དུ། ཕ་རོལ་འགྲོ་བ་ཁ་ཅིག་གང༌། །རྟགས་ཀྱི་དབྱེ་བས་རྣམ་པར་གནས། །དེ་རྣམས་ཀྱང་འདིས་སྨོད་མི་བྱ། །རྡོ་རྗེ་སེམས་དཔས་སྤྲུལ་པ་ཡིན། །ཞེས་འབྱུང་ངོ༌། །ནམ་མཁའི་དབྱིངས་ནི་ཐམས་ཅད་ལ། །རྡོ་རྗེ་སེམས་དཔའ་དཔལ་ལྡན་བཞུགས། ཞེས་བདེ་མཆོག་ལས་འབྱུང་ངོ༌། །རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་ནི་རྡོ་རྗེ་འཆང་ཆེན་པོའི་ལྷག་པར་མོས་པས། བསྒོམ་པའི་རྣམ་པར་སྣང་མཛད་ལ་སོགས་པའི་སྐུ་ཞེས་བྱ་བའི་ཐ་ཚིག་གོ །སྐུ་རྡོ་རྗེ་ཉིད་དུ་གྱུར་པ་ཡིན་ཡང༌། །ཞེས་པ་ནི་སྐུ་རྣམ་པར་དག་པའི་རང་བཞིན་ཉིད་དུ་གྱུར་པའོ། །ཡོན་ཏན་གྱི་ངོ་བོ་ཉིད་ཀྱང་མངའ་བས་ཞེས་པ་ནི་ནང་དུ་ཆུད་པའི་གསུང་དང་ཐུགས་ཀྱི་ནུས་པས་སོ། །གང་གི་ཕྱིར་བཅོམ་ལྡན་འདས་རྣམ་པར་སྣང་མཛད་ནི་སྐུ་རྡོ་རྗེ་རྣམ་པར་དག་པ་ཡིན་པར་མ་ཟད་ཀྱི། འོན་ཀྱང་གསུང་དང་ཐུགས་རྣམ་པར་དག་པའི་ངོ་བོ་ཡང་ཡིན་ནོ། །དེ་ཉིད་ཀྱི་ཕྱིར་དེ་བཞིན་གཤེགས་པ་རྣམས་ཀྱི་གཙོ་བོར་གྱུར་པའི་ཆ་གཅིག་གིས་མཚན་གྱི་ཐ་སྙད་བྱ་བ་ཡིན་ཏེ། དཔེར་ན་སྙིང་རྗེའི་རང་བཞིན་འཇིག་རྟེན་དབང་ཕྱུག་བཞིན་ནོ། །དེ་ལ་སྙིང་རྗེ་གཅིག་པུ་ཡོད་ཀྱི་ཤེས་རབ་ལ་སོགས་པ་སངས་རྒྱས་ཀྱི་ཡོན་ཏན་གཞན་མེད་པ་མ་ཡིན་ནོ། །གཙོ་བོ་དང་གཙོ་བོ་མ་ཡིན་པའི་སངས་རྒྱས་ཀྱི་ཡོན་ཏན་དང་ལྡན་པ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡིན་
ནོ། །དཔེར་ན་ཞི་བའི་རང་བཞིན་རྣམ་པར་སྣང་མཛད་ཡིན་ནོ་ཞེས་ཞི་བ་ཙམ་གྱི་ངོ་བོ་ཡང་མ་ཡིན་ཏེ། རྒྱས་པ་ལ་སོགས་པ་ཡང་མཛད་པའི་ཕྱིར་རོ། །དེ་བཞིན་དུ་རྒྱས་པ་ལ་སོགས་པའི་རང་བཞིན་རིན་ཆེན་འབྱུང་ལྡན་ལ་སོགས་པ་ཡང་ཤེས་པར་བྱའོ། །སེམས་ཅན་རྣམས་ཀྱི་བསམ་པ་དང་བག་ལ་ཉལ་དང་བག་ཆགས་དང་རིགས་ཀྱི་དབྱེ་བས་དེ་དང་རྗེས་སུ་མཐུན་པའི་གཙོ་བོར་གྱུར་པའི་ཡོན་ཏན་གྱི་ཁྱད་པར་དམིགས་ཏེ། བཅོམ་ལྡན་འདས་ཀྱིས་དེ་བཞིན་གཤེགས་པ་དང་བྱང་ཆུབ་སེམས་དཔའ་ལ་སོགས་པའི་རང་བཞིན་བསྟན་ཏོ། །དེ་བཞིན་དུ་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་རྣམ་པར་སྣང་མཛད་ལ་སོགས་པ་རེ་རེ་ལ་ཡོད་ན་ཡང་མོས་པའི་དབྱེ་བས་ཡེ་ཤེས་རེ་རེའི་རང་བཞིན་དུ་བསྟན་ཏོ། །ཉོན་མོངས་པ་དང་ཤེས་བྱའི་སྒྲིབ་པ་མེད་པ་མངོན་པར་བྱང་ཆུབ་པ་རྣམ་པ་ལྔའི་རིམ་པས་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དེ་བཞིན་གཤེགས་པ་རྣམས་ལ་བར་ཆོད་མེད་དེ་གང་གིས་དེ་རྣམས་རེ་རེས་མིང་ཐོབ་པ་ཡིན་གྱི་ཚང་པས་ནི་མ་ཡིན་ནོ། །ལས་དང་པོ་པ་འཇུག་པར་བྱ་བའི་ཕྱིར་རིམ་གྱིས་ཡེ་ཤེས་ཐོབ་པ་ཡིན་ནོ་ཞེས་མེ་ལོང་ལྟ་བུ་ལ་སོགས་པའི་རང་བཞིན་བསྟན་ཏོ། །ཆོས་དང་ཆོས་མིན་དཀའ་ཐུབ་སྟོང༌། །བསྡམས་དང་ངེས་བསྡམས་འདུལ་བ་དང༌། །དུད་འགྲོ་དམྱལ་བ་ཡི་དགས་དང༌། །ལྷ་དང་བཅས་པའི་མི་རྣམས་དང༌། །སྟོན་པ་དང་ནི་ཉན་ཐོས་དང༌། །ཐམས་ཅད་དེ་དག་ཀུན་རྫོབ་སྟོན། །ལས་དང་པོ་ཡི་འཇིག་རྟེན་པ། །དོན་དམ་པ་ལ་འཇུག་པའི་ཕྱིར། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །དེ་ལྟར་བྱིས་པའི་སྨྲ་བ་འདི། །མཐར་ནི་ཐམས་ཅད་འཇིག་པར་འགྱུར། །བརྗོད་དུ་མེད་ཅིང་བརྗོད་མེད་པའི། །གང་ཡང་དེ་ཉིད་སྣང་བའོ། །ཞེས་འབྱུང་ངོ༌། །དེ་བས་ན་དེ་བཞིན་གཤེགས་པ་ཐམས་ཅད་སྐུ་གསུང་ཐུགས་ཀྱི་རྣམ་པར་དག་པའི་རང་བཞིན་ཡང་གདུལ་བྱའི་དབང་གིས་ངོ་བོ་གཅིག་ཡིན་ནོ་ཞེས་བསྟན་ཏོ། །རྒྱུ་དུ་མ་ཚོགས་པ་ལས་སྐྱེས་པའི་འབྲས་བུ་གང་ལས་དེ་མ་ཐག་ཏུ་སྐྱེས་པ་དེ་དེས་མིང་གི་ཐ་སྙད་དུ་བྱས་ཏེ། དཔེར་ན་རྔ་བོ་ཆེའི་སྒྲ་དང་ནས་ཀྱི་མྱུ་གུ་བཞིན་ནོ། །དེ་བཞིན་དུ་གང་ལ་དམིགས་ནས་རྣམ་པར་དག་པ་འབྱུང་བ་གང་ཡིན་
པ་དེ། དེའི་མིང་གིས་བསྟན་པ་ཡིན་ཏེ། དཔེར་ན་སྐུ་རྡོ་རྗེ་དང་གསུང་རྡོ་རྗེ་དང་ཐུགས་རྡོ་རྗེ་ལ་སོགས་པ་བཞིན་ནོ། །འདི་ལ་ལྷ་རྣམས་ཀྱི་འཁོར་ལོ་བསྡུས་པས་ན་ཞེས་པ་ལ། རྡོ་རྗེ་འཆང་ཆེན་པོ་ཉིད་ལ་དཀྱིལ་འཁོར་གྱི་འཁོར་ལོ་ཐམས་ཅད་ཡོངས་སུ་བསྡུ་བར་འགྱུར་ཏེ། གང་གི་ཕྱིར་ཟུང་དུ་འཇུག་པའི་རིམ་པས་ཐོབ་པར་བྱ་བའི་རྡོ་རྗེ་འཆང་ཆེན་པོའི་སྐུ་ལ་ཕུང་པོ་ལ་སོགས་པའི་དཀྱིལ་འཁོར་གྱི་འཁོར་ལོ་ཐིམ་པར་སྣང་སྟེ། བདེན་པ་གཉིས་གཉིས་སུ་མེད་པའི་ཕྱིར་རོ། །དེ་ནི་ཉེ་བར་མཚོན་པ་ཙམ་ཡིན་ཏེ། །ཉོན་མོངས་པ་དང་ཉེ་བའི་ཉོན་མོངས་པའི་ཁམས་གསུམ་པ་ཡང་དེ་ལ་ཐིམ་པར་འགྱུར་ཏེ། ཇི་སྐད་དུ། དབྱིབས་དང་ཁ་དོག་སྣ་ཚོགས་པའི། །ཇི་སྲིད་སྤྲིན་ནི་དུ་མ་རྣམས། །ནམ་མཁའི་ཁམས་ལས་བྱུང་ནས་ནི། །དེ་ཉིད་དུ་ནི་ཐིམ་པར་འགྱུར། །དེ་བཞིན་རང་བཞིན་ཐམས་ཅད་ནི། །སྣང་བ་གསུམ་གྱི་རྒྱུར་གྱུར་པ། །མ་ལུས་ཡུལ་ལ་ཞུགས་ནས་ནི། །འོད་གསལ་བར་ནི་འཇུག་པར་འགྱུར། །ཞེས་འབྱུང་ངོ༌། །ཐེག་པ་ཆེན་པོའི་མདོ་ལས་ཀྱང༌། །སྐྲ་རྩེ་གཅིག་ལས་སངས་རྒྱས་དུ་མ་ནི། །གང་གཱའི་བྱེ་མ་སྙེད་དང་མཚུངས་པ་སྟེ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པའོ། །ཞེས་འབྱུང་ངོ༌། །རྡོ་རྗེ་འཆང་ཆེན་པོའི་སྐུ་ཞེས་པ་ནི་དྲུག་པའོ། །དེ་དང་ལྷན་ཅིག་ཏུ་སྦྱོར་བ་ཞེས་པ་ནི་དང་པོ་སྦྱོར་བའི་ཏིང་ངེ་འཛིན་གྱི་ཕྱོགས་གཅིག་ནི་ཏིང་ངེ་འཛིན་གྱིས་རྫོགས་ལ་རྡོ་རྗེ་འཆང་ཆེན་པོའི་སྐུ་བསྒོམས་པའི་འོག་ཏུ་རང་གི་ཐུགས་ཀ་ནས་མི་བསྐྱོད་པ་སྤྲོས་ཏེ། །དེས་འགྲོ་བའི་དོན་བྱས་ལ་དེ་དང་ལྷན་ཅིག་དུས་གཅིག་ཏུ་གྱུར་ནས་མི་བསྐྱོད་རྡོ་རྗེར་བདག་ཉིད་བསྒོམ་པར་བྱ་ཞེས་བྱ་བའི་དོན་ཏོ། །དེ་བཞིན་དུ་ཞེས་བྱ་བ་ལ་སོགས་པས་རིན་ཆེན་འབྱུང་ལྡན་ལ་སོགས་པའི་ཏིང་ངེ་འཛིན་བསྟན་ཏོ། །སྐུ་མདོག་ཅེས་བྱ་བ་ལ་སོགས་པས་ཞེ་སྡང་རྡོ་རྗེ་ལ་སོགས་པའི་སྐུ་མདོག་དང་ཕྱག་མཚན་དང་ཉམས་དང་རྣམ་པར་དག་པ་བསྟན་ཏེ། ཁྲོ་བ་དང་འདོད་ཆགས་ཆེན་པོ་འདྲེས་པར་གྱུར་པས་ཞེས་པ་ནི་རྣལ་འབྱོར་ཆེན་པོའི་རྒྱུད་ནི་འདོད་ཆགས་དང༌། ཞེ་སྡང་རྣམ་པར་དག་པའི་རང་བཞིན་ཡིན་པའི་ཕྱིར་རོ། །དེ་ལ་མཆེ་
བ་ཅུང་ཟད་གཙིགས་པའོ་ཞེས་པ་ནི་ཁྲོ་བོའི་ཉམས་དང་ལྡན་པ་དང་རེག་བྱ་རྡོ་རྗེ་མས་འཁྱུད་པ་ཆགས་པའི་རོ་དང་ལྡན་པར་བསྟན་ཏོ། །ཤེལ་ཞེས་བྱ་བ་ལ་སོགས་པས་རྣམ་པར་སྣང་མཛད་ཀྱི་དབྱིབས་དང་སྐུ་མདོག་དང་ཕྱག་མཚན་རྣམས་བསྟན་ཏོ། །གསེར་གྱི་མདོག་ཅན་ལ་ཞེས་པ་ནི་རྒྱས་པའི་རང་བཞིན་ཡིན་པའི་ཕྱིར་རོ། །དེ་བཞིན་གཤེགས་པའི་སྤྲིན་གྱིས་ཀུན་དུ་འཁྲིགས་པར་བསྒོམ་པའོ་ཞེས་པ་ནི་དབུས་ཀྱི་གཙོ་བོ་ཉིད་དུ་བཞུགས་ནས་འགྲོ་བ་དབུལ་བའི་སྡུག་བསྔལ་བཅོམ་པའི་ཕྱིར་རང་དང་རྗེས་སུ་མཐུན་པ་ཛམྦྷ་ལ་ལ་སོགས་པ་སྤྲོ་བར་མཛད་པའོ། །རྡོ་རྗེ་རྩེ་དགུ་པ་ཞེས་པ་ནི་དེ་བཞིན་གཤེགས་པ་ལྔ་དང་ལྷ་མོ་བཞིའི་རང་བཞིན་ཡིན་པའི་ཕྱིར་རོ། །བཤད་པའི་རྒྱུད་ལས་ཀྱང༌། དབུས་རྩེ་རྣམ་པར་སྣང་མཛད་དང༌། །ཤར་ལ་མི་བསྐྱོད་རིན་ཆེན་ལྷོར། །ནུབ་དང་བྱང་གི་རྩེ་དག་ལ། །འོད་དཔག་མེད་དང་དོན་ཡོད་གྲུབ། །པདྨ་འདབ་མ་བརྒྱད་པ་ནི། །དེ་ཡི་འདབ་མ་རེ་རེ་ལ། །ཤིན་དུ་གསལ་བའི་ཕྱག་མཚན་ཅན། །བྱང་ཆུབ་སེམས་དཔའ་བརྒྱད་ཡིན་ཏེ། །ལག་ན་པདྨ་བྱམས་པ་དང༌། །ནམ་མཁའི་སྙིང་པོ་ཀུན་དུ་བཟང༌། །གནོད་སྦྱིན་བདག་པོ་འཇམ་དཔལ་དང༌། །རྣམ་པར་སེལ་དང་ས་སྙིང་པོ། །འོག་ཏུ་ཤར་རྩེར་རྡོར་མཁའ་འགྲོ། །ལྷོར་འཇིགས་མ་ཡི་མཁའ་འགྲོ་མ། །ནུབ་ཏུ་གཏུམ་མོ་ཞེས་ནི་བྱ། །རོ་ལངས་མ་ནི་བྱང་དུ་དགོད། །དབུས་སུ་ཡེ་ཤེས་མཁའ་འགྲོ་མ། །འོག་རྩེ་རྣམ་པར་དག་པ་ཡིན། །སྤྱན་མ་དང་ནི་མཱ་མ་ཀཱི། །གོས་དཀར་མོ་དང་སྒྲོལ་མ་དང༌། །སྐུལ་བྱེད་མ་དང་རིན་ཆེན་སྒྲོན། །སྐེ་རགས་གཞན་གྱིས་མི་ཐུབ་མ།། པདྨ་ལ་གནས་མཁའ་འགྲོ་མ། །རྡོ་རྗེ་དེ་ཉིད་འདི་ཡིན་ནོ། །དབུས་ཀྱི་ཆང་ཟུང་ཡེ་ཤེས་དབྱིག །སྤྲོ་དང་བསྡུ་བ་མཛད་པའོ། །ཞེས་འབྱུང་ངོ༌། །དེ་ལྟར་ལྷ་ཉི་ཤུ་རྩ་བརྒྱད་ཀྱི་རང་བཞིན་ནི་རྡོ་རྗེ་ཡིན་ནོ། །མརྒཏ་ཞེས་བྱ་བ་ནི་ནམ་མཁའ་ལྟར་སྔོ་བ་ཞེས་བྱ་བའི་ཐ་ཚིག་གོ །རིན་ཆེན་འབྱུང་ལྡན་གྱི་ཕྱག་མཚན་གསུངས་པའོ་ཞེས་པ་ནི་ཟུར་དྲུག་པའི་རིན་པོ་ཆེ་སྟེ་འགྲོ་བ་རིགས་དྲུག་པའི་སེམས་ཅན་གྱི་ཁམས་ཀྱི་ཟུར་རེ་རེས་བསམ་པ་ཐམས་ཅད་རྫོགས་པར་བྱེད་པའི་ཕྱིར་རོ། །འོད་དཔག་ཏུ་མེད་པའི་ཕྱག་མཚན་གསུངས་པའོ་ཞེས་པ་ནི་ཁ་བྱེད་པའི་ཕྱག་རྒྱ་དང་ལྡན་པའི་པདྨ་རཱ་གའི་ཁ་དོག་དང་འདྲ་བའི་
པདྨ་ཞེས་བྱ་བའི་ཐ་ཚིག་གོ །ཇི་ལྟར་པདྨ་དམར་པོ་འདི། །འདམ་གྱི་སྐྱོན་གྱིས་མ་གོས་པ། །དངོས་པོའི་སྐྱོན་ནི་སྣ་ཚོགས་པས། །དེ་བཞིན་ཁམས་གསུམ་པ་ནི་དག །ཅེས་འབྱུང་ངོ༌། །སྣ་ཚོགས་པའི་འགྲོ་བ་མ་ལུས་པའི་དོན་སྒྲུབ་པར་མཛད་པའི་ངོ་བོ་ཉིད་ཡིན་པས་ཞེས་པ་ལ། དོན་ཡོད་པ་ནི་བྱ་བ་ནན་ཏན་གྲུབ་པའི་ཡེ་ཤེས་ཀྱི་རང་བཞིན་ཡིན་པའི་ཕྱིར་རོ། །འོད་ཟེར་དཀར་པོ་ལ་སོགས་པ་དང་ལྡན་པའི་ཕྱིར་རོ་ཞེས་པ་དེ་ནི་དོན་ཡོད་གྲུབ་པ་ལས་ཐམས་ཅད་ཡིན་པའི་ཕྱིར་རོ། །རལ་གྲི་བསྣམས་པ་ནི་ཉོན་མོངས་པ་ཐམས་ཅད་གཅོད་པར་བྱེད་པའི་ཤེས་རབ་ཀྱི་ངོ་བོ་འཆང་བས་སོ།། དེས་ནི་སེམས་ཅན་རྣམས་གདུལ་བར་བྱ་བའི་ཕྱིར་ཡེ་ཤེས་ཉིད་སྔོན་པོ་ལ་སོགས་པའི་ཁ་དོག་གི་ཁྱད་པར་གྱི་རྣམ་པ་ཉིད་དུ་བསྟན་ཏོ། །ཨིནྡྲ་བྷཱུ་ཏིའི་ཞལ་སྔ་ནས་ཀྱིས་ཀྱང༌། །ཤིན་ཏུ་རྣམ་དག་ངོ་བོའི་ཕྱིར། །ཁ་དོག་དཀར་པོས་རབ་ཏུ་བསྟན། །ཀུན་ལ་གཏོང་བས་སེར་པོ་ཉིད། །རྟག་ཏུ་བརྩེ་བས་དམར་པོ་ཡིན། །དཀོན་མཆོག་གསུམ་ལ་གནོད་བྱེད་སོགས། །འདུལ་བར་བྱེད་པ་ལ་བརྩོན་པ། །འགྲོ་བའི་དོན་ལ་མཛད་པའི་མཆོག །ཡེ་ཤེས་དེ་ནི་ནག་པོར་བཤད། །སྣ་ཚོགས་ཐབས་ཀྱིས་གདུལ་བའི་ཕྱིར། །ཁ་དོག་ལྗང་གུ་རབ་བསྟན་པའོ། །ཞེས་གསུངས་སོ། །དེ་བཞིན་དུ་ཐུགས་རྡོ་རྗེ་འཆང་བ་ལ་སོགས་པའི་རྡོ་རྗེ་ལ་སོགས་པ་ཕྱག་མཚན་གང་ཡིན་པ་དེ་རྣམས་ཡེ་ཤེས་ཀྱི་ཁྱད་པར་ཉིད་ཡིན་ནོ། །ཇི་སྐད་དུ། གཟུགས་ལ་སོགས་པ་སྐྱེ་མཆེད་རྣམས། །གང་ཕྱིར་རང་ཉིད་ཀྱིས་བརྗོད་པ། །དེས་ན་སངས་རྒྱས་ཡེ་ཤེས་ནི། །དེ་བཞིན་གཤེགས་པས་ཕྱག་དྲུག་གསུངས། །བྱང་ཆུབ་སེམས་ནི་རྡོ་རྗེ་སྟེ། །ཤེས་རབ་དྲིལ་བུ་མངོན་པར་བརྗོད། །མ་རིག་གཅོད་བྱེད་འཁོར་ལོ་སྟེ། །རིན་ཆེན་རིན་ཐང་མེད་པའི་ཕྱིར། །སྲིད་པའི་སྐྱོན་གྱིས་མ་གོས་པས། །ཡེ་ཤེས་དེ་ནི་པདྨར་བཤད། །རལ་གྲི་ཉོན་མོངས་དགྲ་གཅོད་པ། །ཨུཏྤལ་དེ་ལས་སྐྱོབ་པའི་ཕྱིར། །འཁོར་པའི་དྲ་བ་ངེས་ཚིག་པའི། །གང་ཕྱིར་ཡེ་ཤེས་ཉིད་སྐྱེས་པ། །སངས་རྒྱས་རྗེས་གནང་སེམས་ཅན་གྱིས། །རྡེག་པར་བྱེད་པ་ཐོབ་པར་བཤད། །ཆད་པས་གདུལ་ཕྱིར་དབྱུག་པ་སྟེ། །སེམས་ཅན་འདུལ་བྱེད་དེ་ཤེས་ཡིན། །ཕན་ཚུན་ཁྱབ་པ་མི་
བྱེད་ཕྱིར། །སྣ་ཚོགས་རྡོ་རྗེ་ཡིན་པར་བཤད། །སྐུ་མདོག་དང་ཕྱག་མཚན་དང་ཡེ་ཤེས་ཀྱི་རང་བཞིན་འབའ་ཞིག་ཏུ་མ་ཟད་ཀྱི། །འོན་ཀྱང་རྣམ་པར་སྣང་མཛད་ལ་སོགས་པ་ཡང་དེའི་ངོ་བོ་ཉིད་དོ། །སེམས་ཅན་ཀུན་ལ་སྣང་བྱེད་ཕྱིར། །རང་གི་རང་བཞིན་སྣང་བྱེད་པས། །དེ་བཞིན་གཤེགས་ཞེས་དག་པ་ནི། །དེ་ནི་རྣམ་པར་སྣང་མཛད་བཤད། །མ་རུངས་ཐམས་ཅད་སྐྱེ་བོ་དང༌། །བླ་མ་ལ་ནི་ལོག་པ་རྣམས། །མི་སྟོན་པ་ཡི་རང་བཞིན་ཕྱིར། །དེ་ནི་མི་བསྐྱོད་རབ་ཏུ་བཤད། །གང་ཕྱིར་སངས་རྒྱས་ལ་སོགས་པ། །རིན་པོ་ཆེ་རྣམས་རབ་བྱུང་པས། །སེམས་ཅན་དོན་ལྡན་ཡེ་ཤེས་ནི། །རིན་ཆེན་འབྱུང་ལྡན་བཤད་པ་ཡིན། །མི་གནས་མྱ་ངན་ལས་འདས་པའི། །སྲིད་དང་ཐར་པ་མི་དམིགས་པ། །མཐའ་ཡས་ཡོན་ཏན་དང་ལྡན་པས། །དེ་ནི་སྣང་བ་མཐའ་ཡས་བཤད། །སེམས་ཅན་ཀུན་གྱི་དོན་མཛད་པའི། །གང་ཕྱིར་རང་ཉིད་གྲུབ་པས་ན། །དོན་དང་བཅས་པའི་ཡེ་ཤེས་ཏེ། །དོན་ཡོད་གྲུབ་བར་བཤད་པ་ཡིན། །ཁམས་གསུམ་པས་ནི་ཡོངས་བསྒོམས་པས། །ཕྲ་བ་དང་ནི་རགས་པའི་གཟུགས། །ཞིང་ཀུན་ལ་གནས་གཟིགས་པའི་ཕྱིར། །དེས་ན་སངས་རྒྱས་སྤྱན་མར་བཤད། །གང་ཕྱིར་བདག་དང་བདག་གིར་ནི། །དེ་བཞིན་གཤེགས་ཀུན་ཡེ་ཤེས་ཏེ། །ཕན་ཚུན་ཁྱབ་པར་བྱེད་པ་ན། །དེས་ནི་མཱ་མ་ཀཱི་རུ་བཤད། །སྐྱོན་ཀུན་འཕྲོགས་པའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་མཆོག །སེམས་ཅན་སྦྱང་བ་ལ་བརྩོན་པའི། །གོས་དཀར་མོར་ནི་བཤད་པ་ཡིན། །རྟག་ཏུ་ཐུགས་རྗེ་ཆེན་པོ་ཡིས། །འགྲོ་བ་འདོན་པའི་བསམ་པ་ཅན། །སེམས་ཅན་སྒྲོལ་པ་ལ་བརྩོན་པ། །སྒྲོལ་མ་ཤེས་རབ་ཏུ་ནི་གྲགས། །ས་ལ་སོགས་པའི་ཁམས་གྱུར་པ། །སངས་རྒྱས་ཡེ་ཤེས་ཀྱིས་བརྗོད་པས། །འདོད་པ་ཐམས་ཅད་ལོངས་སྤྱོད་ཕྱིར། །སྤྱན་མ་ལ་སོགས་རབ་ཏུ་གྲགས། །འཆི་སོགས་འཇིགས་པ་ལས་གྲོལ་བའི། །དེ་བཞིན་གཤེགས་པ་ཀུན་གྱི་མཆོག །གདུལ་དཀའ་འདུལ་བའི་ཡེ་ཤེས་ནི། །དེ་ཕྱིར་སྙིང་རྗེ་མཐར་བྱེད་བཤད། །དག་པས་སྤྱད་ན་འགྲོ་བ་ནི། །ཐམས་ཅད་དགའ་བའི་རང་བཞིན་འགྱུར། །སྲིད་པས་མི་གོས་རྟོགས་པའི་ཕྱིར། །དེ་ནི་པདྨ་མཐར་བྱེད་བཤད། །ཡེ་ཤེས་དོན་ཀུན་སྒྲུབ་བྱེད་པ། །སངས་རྒྱས་ཀུན་གྱི་རང་བཞིན་གྲུབ།།
བགེགས་ལ་སོགས་པས་མི་གནོད་པ། །དེ་ཕྱིར་བགེགས་ནི་མཐར་བྱེད་བཤད། །རྨོངས་པའི་སེམས་ཅན་གྱིས་སྨྲས་པ། །ལོག་པའི་ཤེས་པ་རྣམ་སྤྱད་ནས། །ཡང་དག་ཡེ་ཤེས་ལ་འཇོག་པས། །ཤེས་རབ་མཐར་བྱེད་བཤད་པ་ཡིན། །ཤེས་བྱ་མེད་པས་ཤེས་པ་མིན། །སྙོམས་པར་ཞུགས་པ་བཤད་པ་ཡིན། །ཆགས་པ་ལ་སོགས་གསུམ་སྦྱངས་པས། །སྲིད་གསུམ་མངོན་འགྱུར་ཡེ་ཤེས་ནི། །སངས་རྒྱས་ཀུན་གྱི་རང་བཞིན་འགྲུབ། །དེས་ནི་ཞལ་གསུམ་བཤད་པ་ཡིན། །ཞེས་བྱ་བ་ལ་སོགས་པ་འབྱུང་ངོ༌། །དེས་ནི་དེ་བཞིན་གཤེགས་པ་ལྔ་ཡེ་ཤེས་ལྔའི་རང་བཞིན་ཉིད་དུ་བསྟན་ཏོ། །དེ་རྣམས་ཀྱི་ངེས་ཚིག་ནི། དེ་ལས་ཀྱང་ཇི་སྐད་དུ། ཇི་ལྟར་གཟུགས་བརྙན་མེ་ལོང་ལ། །རང་གི་གཟུགས་ནི་གཉིས་སྣང་བ། །ཆོས་སྐུར་དེ་བཞིན་ཡེ་ཤེས་ནི། །མེ་ལོང་ཤེས་བྱ་སྣང་བ་ཡིན། །དེ་བཞིན་གཤེགས་ཀུན་ཡེ་ཤེས་ནི། །སྲོག་ཆགས་རྣམས་ཀྱི་རང་ལྷ་ཉིད། །རང་ཉིད་གཅིག་ཏུ་རྟོགས་པའི་ཕྱིར། །མཉམ་ཉིད་ཡེ་ཤེས་བཤད་པ་ཡིན། །གཟོད་མ་ནས་དག་མ་སྐྱེས་པའི། །རང་བཞིན་ཉིད་ཀྱིས་འོད་གསལ་བ། །ཕན་ཚུན་ཁྱབ་པར་བྱེད་པས་ན། །སོ་སོར་རྟོག་པའི་ཡེ་ཤེས་བཤད། །ཀུན་དུ་རྟག་ཏུ་ཀུན་ནས་ནི། །སངས་རྒྱས་མཛད་པ་རབ་འཇུག་པ། །སངས་རྒྱས་ཀུན་མཛད་གཅིག་ཡིན་ཕྱིར། །བྱ་བ་ནན་ཏན་གྲུབ་པར་བཤད། །ཉོན་མོངས་ཤེས་བྱའི་སྒྲིབ་པ་ཀུན། །གང་ཚེ་གྲོལ་ན་དེ་ཚེ་ཡི། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་པར་དག་ཅེས་བཤད། །ཅེས་འབྱུང་ངོ༌། །དེ་རྣམས་བསྐྱེད་པའི་ཞེས་བྱ་བ་ལ་སོགས་པ་ཞེས་པ་ནི། དང་པོའི་སྦྱོར་བའི་ཕྱོགས་གཅིག་ཏུ་གྱུར་པའི་དོན་དམ་པའི་དཀྱིལ་འཁོར་གྱི་འོག་ཏུ་པདྨ་ལ་སོགས་པ་བསྡུ་བར་བྱེད་པའི་ཟླ་བའི་དཀྱིལ་འཁོར་གྱི་རྣམ་པའི་སེམས་བརྟན་པར་བྱ་བའི་ཕྱིར་ཆོས་ཀྱི་དབྱིངས་ཀྱི་སྔགས་བརྗོད་པའི་མཚན་ཉིད་ཅེས་བྱ་བའི་དོན་ཏོ། །གང་ཆོས་ཀྱི་དབྱིངས་ཀྱི་ངོ་བོ་ཉིད་དུ་གྱུར་པ་ཞེས་བྱ་བ་ནི་སྟོང་པ་ཉིད་ཀྱི་ཡེ་ཤེས་ཀྱི་རང་བཞིན་ནོ། །སྐྱེད་པར་མཛད་པ་སྟེ་ཞེས་པ་ནི་དོན་དམ་པའི་དཀྱིལ་འཁོར་གྱི་རིམ་པས་འོད་གསལ་བར་བྱས་ལ་ཡང་དེའི་ངོ་བོ་ཉིད་དུ་སྐུ་གསུང་ཐུགས་བསྐྱེད་པར་བྱའོ། །བྱང་ཆུབ་ཀྱི་སེམས་ཀྱི་ཟླ་བའི་དཀྱིལ་འཁོར་གྱི་ངོ་བོ་ནི་རྡོ་རྗེ་འཆང་གི་སྐུ་གསུང་ཐུགས་ཞེས་བྱ་བའོ། །ཨོཾ་ཞེས་བྱ་བ་ལ་
སོགས་པ་ལ། ཨོཾ་ནི་སྐུ་གསུང་ཐུགས་ཉེ་བར་སྡུད་པར་བྱེད་པའི་ངོ་བོ་དོན་དམ་པའི་བདེན་པའི་རྣམ་པ་ཅན་རྡོ་རྗེ་འཆང་ཆེན་པོའོ། །དྷརྨ་དྷཱ་ཏུ་ནི་ཆོས་ཐམས་ཅད་གཉིས་སུ་མེད་པའི་ངོ་བོ་ཉིད་ཡིན་པའི་ཕྱིར་རོ། །སྭ་བྷཱ་བ་ནི་རང་བཞིན་གང་ལ་ཡོད་པ་དེ་ནི་ཆོས་ཀྱི་དབྱིངས་ཀྱི་རང་བཞིན་ཁམས་གསུམ་གྱི་བདག་ཉིད་གཡོ་བ་དང་བརྟན་པའི་འགྲོ་བ་སྟེ། །དེའི་རྣམ་པ་བདག་ཡིན་ནོ་ཞེས་རྣལ་འབྱོར་པས་ང་རྒྱལ་བསྐྱེད་པར་བྱའོ། །འདིས་ནི་བདག་ཉིད་ཟླ་བའི་དཀྱིལ་འཁོར་དང་འདྲ་བར་བྱིན་གྱིས་བརླབས་ལ་ཞེས་པ་ནི་ཡི་གེ་གསུམ་ཡོངས་སུ་གྱུར་པ་ལས་སྐྱེས་པའི་པདྨ་ལ་སོགས་པ་གསུམ་གྱི་སྟེང་དུ་ཡི་གེ། གསུམ་ཡོངས་སུ་གྱུར་པ་ལས་སྐྱེས་པའི་ཟླ་བ་ལ་སྔར་བསྒོམས་པའི་པདྨ་ལ་སོགས་པ་གསུམ་དང་རོ་གཅིག་པར་གྱུར་པའི་ཟླ་བའི་དཀྱིལ་འཁོར་དང་འདྲ་བའི་སེམས་ཉིད་བྱིན་གྱིས་བརླབས་ནས་ཞེས་བྱ་བའི་དོན་ཏོ། །ཡིད་མི་བདེ་བ་ལས་གྲོལ་བའི། །རྣམ་རྟོག་མུན་པ་སེལ་བྱེད་ཅིང༌། །ཉོན་མོངས་དྲི་མ་ཀུན་ལས་དག །ཟླ་བ་བཞིན་དུ་སེམས་ཟླ་བའོ། །ཞེས་འབྱུང་ངོ༌། །རྩ་བའི་རྒྱུད་ལས་ཀྱང༌། བཅོམ་ལྡན་འདས་ཟླ་བའི་དཀྱིལ་འཁོར་དང་འདྲ་བའི་སེམས་མཐོང་ངོ་ཞེས་འབྱུང་ངོ༌། །དེའི་སྟེང་དུ་ཡི་གེ་གསུམ་ལ་སོགས་པའི་ལྷའི་སྐུར་བསྐྱེད་དེ་ཞེས་པ་ལ་ཟླ་བའི་དཀྱིལ་འཁོར་གྱི་སྟེང་དུ་ཡང་ཡི་གེ་གསུམ་བཀོད་པ་དེ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་འམ་འཁོར་ལོ་ལ་སོགས་པ་བསྒོམས་ལ། །དེ་ལ་ཡང་ཡིག་འབྲུ་དགོད་ཅིང་སྤྲོ་བ་དང་བསྡུ་བའི་རིམ་པའི་གྲོ་བའི་དོན་བྱས་ལ་བཛྲ་ཨཱཏྨ་ཀོ྅ཧཾ་ཞེས་བྱ་བས་ང་རྒྱལ་བྱས་ལ། དེ་ཡོངས་སུ་གྱུར་པ་ལས་རྡོ་རྗེ་འཆང་ཆེན་པོའི་སྐུ་དང་གཅིག་ཏུ་གྱུར་པའི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཕྱག་རྒྱའི་སྐུ་བསྒོམས་ལ། ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་དགོད་ཅིང་ཕུང་པོ་དང་ཁམས་དང་སྐྱེ་མཆེད་རྣམ་པར་དག་པར་བྱ་སྟེ། སྐུ་ལ་སོགས་པ་བྱིན་གྱིས་བརླབ་པའི་མཚན་ཉིད་ཀྱི་རྣལ་འབྱོར་ཆེན་པོ་ཡོངས་སུ་རྫོགས་ཤིང་དབུས་ཀྱི་གཙོ་བོར་གྱུར་ནས། དང་པོ་སྦྱོར་བའི་འོག་ཏུ་ཕྱག་རྒྱ་ལེགས་པར་སྦྱང་ཞིང་དཀྱིལ་འཁོར་པ་རྣམས་སྤྲུལ་ལ་དཀྱིལ་འཁོར་ལ་དགོད་དེ། དབང་བསྐུར་བ་དང་རྒྱས་གདབ་པའི་བར་དུ་དཀྱིལ་འཁོར་རྒྱལ་བ་མཆོག་ཡོངས་སུ་རྫོགས་ཏེ་ལས་ཀྱི་རྒྱ་བ་མཆོག་གི་
ཕྱོགས་གཅིག་པ་འཆད་པར་འགྱུར་བའི་རིམ་པས། ཕྲ་མོའི་རྣལ་འབྱོར་ཞེས་པ་ནི་འོག་ནས་འཆད་པར་འགྱུར་བའི་རིམ་པས་བསྒོམ་པར་བྱའོ། །དྲང་བའི་དོན་ཏོ་ཞེས་པ་ནི་ཏིང་ངེ་འཛིན་གཉིས་འཆད་པར་འདོད་པའི་ཕྱིར་རོ། །དེ་ཉིད་གསལ་བར་བྱ་བའི་ཕྱིར། །བསྐྱེད་པའི་རིམ་པའི་ཏིང་ངེ་འཛིན་ཏོ་ཞེས་སྨྲས་པ་ལ། འཆད་པར་འགྱུར་བའི་ཕྲ་མོའི་རྣལ་འབྱོར་དང་ལྷན་ཅིག་ཏུ་ཏིང་ངེ་འཛིན་གསུམ་གྱི་བདག་ཉིད་ཅེས་བྱ་བའི་ཐ་ཚིག་གོ །ད་ནི་ལེའུ་བརྩམ་པ་ནས་བརྩམས་ཏེ་ཚིག་དེ་རྣམས་ཉིད་རྡོ་རྗེ་བཟླས་པ་ལ་སོགས་པ་རྫོགས་པའི་རིམ་པའི་སྒོ་ནས་བསྟན་པར་བྱ་བའི་ཕྱིར་འོད་ཟེར་ལྔ་པོ་ཞེས་སྨོས་པ་ལ། མེ་ལ་སོགས་པའི་དཀྱིལ་འཁོར་བཞི་པོ་ལས་འབྱུང་བའོ། །སྟེང་གི་སྒོ་ནས་འབྱུང་བ་ཞེས་བྱ་བ་ནི་གདོང་གི་སྣ་ཁུང་གཉིས་ཀྱི་ལམ་ནས་སོ། །ཚོགས་སོ་ཞེས་པ་ནི་ཉིན་མོ་དང་མཚན་མོར་ཉི་ཁྲི་ཆིག་སྟོང་དྲུག་བརྒྱ་སྲོག་དང་རྩོལ་བ་འབྱུང་བའོ། །དཀྱིལ་འཁོར་རེ་རེ་ལ་དཀྱིལ་འཁོར་བཞི་རབ་ཏུ་འབྱུང་ཞིང་ཞེས་པ་ལ་ལྐོག་མའི་གནས་སུ་མེའི་དཀྱིལ་འཁོར་ཡིན་ན་ཡངས་དང་ཆུ་དང་རླུང་གི་ཁམས་ཀྱི་རང་བཞིན་གྱི་ཆ་གསུམ་གྱིས་ཁྱབ་པའོ། །དེ་བཞིན་དུ་སྙིང་ག་ཆུའི་དཀྱིལ་འཁོར་ཡང་ས་དང་མེ་དང་རླུང་གི་དཀྱིལ་འཁོར་གྱི་ཆུས་ཁྱབ་པའོ། །དེ་བཞིན་དུ་ལྟེ་བར་རླུང་གི་དཀྱིལ་འཁོར་ཡངས་དང་ཆུ་དང་མེའི་ཁམས་ཀྱི་ཆས་ཁྱབ་པའོ། །དེ་བཞིན་དུ་གསང་པའི་གནས་སུ་སའི་དཀྱིལ་འཁོར་ཡང་ཆུ་དང་མེ་དང་རླུང་གི་ཁམས་ཀྱི་ཆས་ཁྱབ་པའོ། །དེ་བཞིན་དུ་དཀྱིལ་འཁོར་གྱི་ཆ་རེ་རེ་ལ་ཉིས་བརྒྱ་དང་ཉི་ཤུ་རྩ་ལྔའི་གྲངས་ཀྱིས་ཆ་བཞི་པོ་ལ་དགུ་བརྒྱར་འགྱུར་རོ། །འཇུག་པ་དང་ལྡང་བ་དང་གནས་པའི་རིམ་པས་དཀྱིལ་འཁོར་གཅིག་ལ་ཉིས་སྟོང་བདུན་བརྒྱར་འགྱུར་རོ། །ཆུ་དང་རླུང་དང་སའི་དཀྱིལ་འཁོར་རྣམས་སུ་ཡང་ཉིས་སྟོང་བདུན་བརྒྱ་དང་ཉིས་སྟོང་བདུན་བརྒྱའི་གྲངས་ཀྱིས་སྟོང་ཕྲག་བཅུ་དང་བརྒྱད་བརྒྱར་འགྱུར་རོ། །དེ་བཞིན་དུ་མཚན་མོར་ཡང་སྟོང་ཕྲག་བཅུ་དང་བརྒྱད་འགྱུར་རོ། །གཅིག་ཏུ་བསྡུས་ཏེ་ཉི་ཁྲི་ཆིག་སྟོང་དྲུག་བརྒྱར་འགྱུར་རོ། །དེ་ཉིད་ཀྱི་ཕྱིར་དཀྱིལ་འཁོར་བཞི་པོ་ལ་འཇུག་པ་ལ་སོགས་པའི་རིམ་གྱིས་ཉིན་མོར་རྒྱུ་བ་བཅུ་གཉིས་དང་མཚན་མོར་རྒྱུ་བ་བཅུ་གཉིས་
ཏེ་གཅིག་ཏུ་བསྡུས་ནས་ཉི་ཤུ་རྩ་བཞིར་འགྱུར་རོ། །དེ་ཉིད་ཀྱི་ཕྱིར་དཀྱིལ་འཁོར་བཞི་པོ་ལ་འཇུག་པ་ལ་སོགས་པའི་རིམ་གྱིས་དགོངས་པ་ལུང་བསྟན་པའི་བཤད་པའི་རྒྱུད་ལས་ཀྱང༌། གོས་དཀར་མོ་ལ་སོགས་པར་བཤད། །བརྒྱ་ཕྲག་གཉིས་དང་ཉེ་ཤུ་ལྔ། །བཞི་པོ་ལེགས་པར་བསྒྲེས་པས་ནི། །སྦྱོར་བཞི་བསྡུས་པས་བརྒྱ་ཕྲག་དགུ། །དགུ་བརྒྱ་དག་ཏུ་གང་བསྟན་པ། །ཉི་ཤུ་རྩ་བཞིའི་རིམ་པ་ཡིས། །ལེགས་པར་བསྡུས་ཏེ་དེ་དག་ནི། །ཉི་ཁྲི་ཚིག་སྟོང་དྲུག་བརྒྱར་འགྱུར། །ཞེས་འབྱུང་ངོ༌། །དཀར་པོ་ལ་སོགས་པ་ཁ་དོག་རྣམས་ཀྱིས་ཕྱེ་བས་ན་བཀོད་པ་སྟེ་ཞེས་པ་ནི། འདིར་དཀྱིལ་འཁོར་རེ་རེ་གལ་ཏེ་རིགས་དང་རྗེས་སུ་མཐུན་པས་ཁ་དོག་དམར་པོ་ལ་སོགས་པ་དང་ལྡན་པ་ཡིན་ན་ཡང་དེ་བཞིན་དུ་ཁ་དོག་ལྔའི་འོད་ཟེར་གྱི་ཚོགས་དང་ལྡན་པ་དེ་དག་ཤེས་པར་བྱའོ། །གཡས་པ་ལས་བྱུང་འོད་ཟེར་ནི། །དེ་ཉིད་མེ་ཡི་དཀྱིལ་འཁོར་ཏེ། །ཁ་དོག་དམར་པོ་དེ་གསལ་བས། །དེར་ནི་པདྨའི་མགོན་པོ་ལྷ། །གཡོན་པ་ལས་བྱུང་འོད་ཟེར་ནི། །རླུང་གི་དཀྱིལ་འཁོར་ཞེས་བྱ་བའི། །ལྗང་སེར་ཁ་དོག་དང་མཚུངས་པའི། །དེར་ནི་ལས་ཀྱི་མགོན་པོ་ལྷ། །གཉི་ག་ལས་བྱུང་འོད་ཟེར་ནི། །ཁ་དོག་སེར་པོ་འོད་ཆེན་པོ། །དབང་ཆེན་དཀྱིལ་འཁོར་དེ་ཉིད་དེ། །དེར་ནི་རིན་ཆེན་མགོན་པོ་ལྷ། །དལ་བུས་དམན་པར་རྒྱུ་བ་ནི། །དཀར་བ་ཀུན་ད་ཟླ་བ་མཚུངས། །དེ་ཉིད་ཆུ་ཡི་དཀྱིལ་འཁོར་ཏེ། །དེར་ནི་རྡོ་རྗེ་མགོན་པོ་ལྷ། །རླུང་ནི་ལུས་ཀུན་རྗེས་འགྲོ་བའི། །བྱ་བ་ཀུན་ལ་རབ་འཇུག་པ། །རྣམ་པར་སྣང་མཛད་རང་བཞིན་ཏེ། །འཆི་བའི་ལུས་ལས་འབྱུང་བར་འགྱུར། །ཞེས་འབྱུང་ངོ༌། །ཏིང་ངེ་འཛིན་ལ་ཡང་དག་པར་དམིགས་པའོ་ཞེས་པ་ནི་རྡོ་རྗེ་བཟླས་པའི་མཚན་ཉིད་ཅན་གྱི་ཏིང་ངེ་འཛིན་ལ་དམིགས་ནས་སོ། །རྡོ་རྗེ་ཡི་གེ་གསུམ་མོ་ཞེས་པ་ནི་སྐུ་རྡོ་རྗེ་ལ་སོགས་པའི་ས་བོན་ཡིན་པའི་ཕྱིར་རོ། །དེའི་བཀོད་པ་ནི་ཚོགས་ཏེ་ཞེས་པ་ནི་བཅོམ་ལྡན་འདས་རྡོ་རྗེ་འཆང་གིས་སེམས་ཅན་རྣམས་ཀྱི་བསམ་པ་དང་བག་ཆགས་དང་བག་ལ་ཉལ་དང་རིགས་ཀྱི་དབྱེ་བས་སྔགས་ཀྱི་དབྱེ་བ་བདུན་ཁྲི་ཉིས་སྟོང་གསུངས་སོ། །དེ་དག་ཐམས་ཅད་སྐུ་གསུང་ཐུགས་ཀྱི་རང་བཞིན་གྱི་ཡི་གེ་གསུམ་ལ་བསྡུ་བར་འགྱུར་ཏེ། །དེ་ལ་འབྱུང་བའི་རིམ་པ་ནི་ལྟེ་བའི་ཕྱོགས་ནས་སྲོག་ཅེས་བྱ་བའི་
རླུང་གི་གནས་བརྒྱད་ལ་རེག་པས་ཡི་གེ་རྣམས་འབྱུང་ངོ༌། །དེ་རྣམས་ཀྱིས་ཚིག་དང་དེས་ཀྱང་ངག་ཆེན་པོ་སྐྱེ་བར་འགྱུར་རོ། །དེ་རྣམས་ཀྱིས་ཀྱང་བྱ་བ་དང་བྱེད་པ་པོ་དང་རྟགས་དང་བསྡུ་བ་དང་བདག་གི་ཚིག་དང་གཞན་གྱི་ཚིག་དང་བྱེད་པ་དང་དེ་ལ་ཕན་པ་དང་ཀུན་དུ་བཤད་པ་དང་ཚིག་ཕྲད་དང་ཉེ་བར་བསྒྱུར་བ་དང་ལས་རབ་ཏུ་བརྗོད་པ་ལ་སོགས་པའི་དབྱེ་བས་རོལ་མོ་དང་ཚིག་ལྷུག་པ་ལ་སོགས་པ་དང༌། །བྱ་བ་དང་སྤྱོད་པ་ལ་སོགས་པའི་དབྱེ་བས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འབྱུང་བར་འགྱུར་རོ། །དེ་ལྟར་ངག་གི་སྤྲོས་པ་ཐམས་ཅད་ཀྱི་ཡི་གེ་ཕྱི་མོ་གཅིག་པུ་ཉིད་རྩ་བ་ཡིན་ཏེ། དེ་ལ་སྡེ་ཚན་བརྒྱད་ནི་རྣམ་པར་ཤེས་པ་བརྒྱད་ཀྱི་རང་བཞིན་ནོ། །དབྱངས་ཀྱི་སྡེ་ཚན་གཅིག་དང་ཀ་ལ་སོགས་པ་དུ་མའི་བར་དུ་རེག་པའི་སྡེ་ཚན་ལྔ་དང༌། མཐར་གནས་པ་དང་དྲོད་ཀྱི་སྡེ་ཚན་གཉིས་སོ། །དེ་རྣམས་ཀྱང་ཨ་ལ་སོགས་པ་དང་པོའི་ཡི་གེ་རྣམས་ལ་བསྡུ་བར་འགྱུར་རོ། །དེ་རྣམས་ཀྱང་ཨ་ཀ་ཡ་ཤའི་ཡི་གེ་བཞི་པོ་ལ་ཐིམ་པར་འགྱུར་ཏེ། ཁམས་བཞིའི་རང་བཞིན་ཡིན་པའི་ཕྱིར་རོ། །ཡི་གེ་བཞི་པོ་ཡང་ཨ་ཀ་ཡ་ཡི་གེ་གསུམ་ལ་ཐིམ་པར་གྱུར་ཏོ། །དེ་རྣམས་ལས་ཤེས་རབ་ཀྱི་རང་བཞིན་ཡི་གེ་ཨ་ཡོངས་སུ་གྱུར་པ་འོད་དཔག་ཏུ་མེད་པའི་རང་བཞིན་གྱི་ཡི་གེ་ཨ་འགྱུར་ཏེ། དབྱངས་ཀྱི་སྡེ་ཚན་ནི་མོ་རྟགས་ཡིན་པས་སོ། །ཐབས་ཀྱི་རང་བཞིན་ཡི་གེ་ཀ་ཡོངས་སུ་གྱུར་པ་ལས་ཧཱུཾ་བྱུང་བར་གྱུར་ཏེ། དེ་ནི་ཕོ་རྟགས་ཡིན་པའི་ཕྱིར་རོ། །གཉིས་ཀའི་རང་བཞིན་གྱི་ཡི་གེ་ཡ་ཡོངས་སུ་གྱུར་པ་ལས་ཡི་གེ་ཨོཾ་བྱུང་བར་གྱུར་ཏེ། དེ་ནི་མ་ནིང་གི་རྟགས་ཡིན་པའི་ཕྱིར་རོ། །དེ་ལྟར་ཡི་གེ་ཨོཾ་ཨཱཿཧཱུཾ་ཡི་གེ་གསུམ་པོ་ནི་སྐུ་གསུང་ཐུགས་ལ་སོགས་པའི་རང་བཞིན་དུ་ཤེས་པར་བྱའོ། །དགོངས་པ་ལུང་བསྟན་པའི་རྣལ་འབྱོར་ཆེན་པོའི་རྒྱུད་ལས་ཀྱང༌། །དང་པོ་གཅིག་ནི་དགུ་དབུས་ན། །གང་ཞིག་བཅུ་ཡིས་མ་བཅིངས་པ།། དེ་ནི་བཅིངས་མེད་ཅེས་བྱ་སྟེ། །དེ་ཡིས་མཆོག་གི་གནས་ཤེས་སོ། །དབྱངས་དང་གསལ་བྱེད་ཡི་གེ་སྟེ། །གྲངས་དགུ་རུ་ནི་རྗེས་འཇུག་པ། །ཨས་བཅིངས་ཕན་ཚུན་ཡང་དག་སྦྱོར། །གང་གིས་ཤེས་ཏེ་འགྲོ་བའི་བླ། །འབྱུང་བའི་མཐའ་དང་ཡང་དག་ལྡན། །ཚ་ལ་སོགས་པ་བཅུ་
དྲུག་གནས། །ལྔ་པ་ལྔ་དང་ཡང་དག་ལྡན། །བཞི་ནི་གསུམ་དུ་ངེས་པར་སྦྱར། །ཡི་གེ་ཨོཾ་བཅས་རིང་བོར་བཅས། །ཡོན་ཏན་སྦྱོར་སོགས་ཕྱིས་དང་མཚུངས། །ཐུང་དུ་མ་ལུས་དག་ཏུ་འགྱུར། །གཅིག་མིན་དུ་མའང་མ་ཡིན་ནོ། །དྲུག་བཤད་བཞི་དང་གསུམ་གཅིག་དང༌། །ངོ་བོ་ཉིད་མེད་རང་བཞིན་ཅན། །དེ་དག་དང་པོའི་དོན་སྦྱར་ནས། །དུས་གསུམ་ཡེ་ཤེས་སྐྱེ་བར་འགྱུར། །ཞེས་བྱ་བ་ལ་སོགས་པ་འབྱུང་ངོ༌། །ཡི་གེ་གསུམ་པོ་དེ་དག་འཇུག་པ་ལ་སོགས་པའི་རིམ་གྱིས་ཉིན་མཚན་ཏུ་སྟོང་ཕྲག་ཉི་ཤུ་རྩ་གཅིག་དང་དྲུག་བརྒྱའི་རླུང་རྣམས་རྒྱུའོ། །དེ་ཉིད་ཡན་ལག་མ་ཉམས་པའི་བཟླས་པས་ངག་རྣམ་པར་དག་པ་བྱེད་དེ། །དེ་ཉིད་ཆ་ཤས་སུ་ཐིམ་པས་མ་ནིང་གི་བཟླས་པའི་མཐར་འོད་གསལ་བ་ཉིད་ཐོབ་པར་བྱེད་དོ། །དེ་ཉིད་ཁྲོ་བོའི་བཟླས་པའི་དུས་སུ་བཟླས་པར་གྱུར་པས་ཞི་བ་ལ་སོགས་པའི་ལས་བྱེད་པར་འགྱུར་རོ། །དེ་ཉིད་ཀྱིས་ཀྱང་བསྐྱེད་པའི་རིམ་པའི་རྣལ་འབྱོར་པ་རྣམས་ལ་རྡོ་རྗེ་ལ་སོགས་པ་ཡོངས་སུ་གྱུར་པ་ལས་ལྷའི་སྐུ་ཡོངས་སུ་རྫོགས་པར་བྱེད་དོ། །དེ་ཉིད་ཀྱིས་ཀྱང་དེ་བཞིན་གཤེགས་པའི་ཐུགས་བསྐུལ་བའི་སྒོ་ནས་དེ་རྣམས་ཀྱི་ནུས་པ་འགུགས་པར་བྱེད་དོ།། དེ་ཉིད་གྱེན་དུ་རྒྱུ་བས་སྔགས་ཐམས་ཅད་ཀྱི་རྒྱུར་གྱུར་པའི་ཨཱ་ལི་དང་ཀཱ་ལིའི་ཚུལ་དུ་རྣམ་པར་འཇུག་གོ །དེ་ཉིད་ཐབས་དང་ཤེས་རབ་ཀྱི་སྙོམས་པར་ཞུགས་པས་ཐུར་དུ་རྒྱུ་བ་ཅན་ཁུ་བ་དང་ཁྲག་དང་ཆུའི་ངོ་བོ་ཉིད་རིན་ཆེན་འབྱུང་ལྡན་དང་སྣང་བ་མཐའ་ཡས་དང་མི་བསྐྱོད་པའི་གཟུགས་སུ་རྗེས་སུ་འཇུག་གོ །དེ་ཉིད་ཆོས་འབྱུང་བའི་ནང་དུ་སྤྲོས་པས་བུ་དང་ཚ་བོ་ལ་སོགས་པའི་ཚུལ་དུ་ཁམས་གསུམ་པ་དང་དེའི་རྣམ་པར་དག་པའི་ངོ་བོ་ཉིད་དཀྱིལ་འཁོར་གྱི་འཁོར་ལོ་ཡང་སྐྱེད་པར་བྱེད་དོ། །མཐའ་མར་འོད་གསལ་བ་ལ་ཞུགས་ནས་རྡོ་རྗེ་འཆང་ཆེན་པོའི་གོ་འཕང་ཐོབ་པར་བྱེད་དོ། །དེའི་ཕྱིར་ཁམས་གསུམ་ཁྱབ་པར་བྱེད་པ་ལ་ལོངས་སྤྱོད་དང་གྲོལ་བའི་འབྲས་བུ་སྟེར་བ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་གསུམ་གྱི་བདག་ཉིད་ཡི་གེ་གསུམ་པོ་ཁོ་ན་སྔགས་ཐམས་ཅད་ཀྱི་ཚུལ་དུ་གྲགས་པས་ཚོགས་ཞེས་བཤད་དོ། །དེ་བས་ན་སྔགས་པ་ཏུ་བ་ལ་སོགས་པ་
བཞི་པོ་གོང་དུ་བཤད་པ་གང་ཡིན་པ་དེ་དག་ཡི་གེ་གསུམ་པོ་ཁོ་ན་ལ་བརྟེན་ཏེ་བཅོམ་ལྡན་འདས་ཀྱིས་གསུངས་སོ། །ཇི་སྐད་དུ། བརྗོད་དང་དམིགས་པར་གྲགས་པ་དང༌། །བརྡར་གྱུར་དང་ནི་དོན་དམ་མོ། །ཚིག་གི་བརྗོད་པ་ཐུན་མོང་སྟེ། །དམིགས་པར་བཅས་པ་སངས་རྒྱས་ཉིད། །སྔགས་ཀྱི་དེ་ཉིད་བརྡ་རུ་བཤད། །དོན་དམ་དེ་བཞིན་ཉིད་ཡིན་ནོ། །ཞེས་འབྱུང་ངོ༌། །གཏན་ཚིགས་བཤད་པར་བྱ་བའི་ཕྱིར་ཨཱ་ལི་ཀཱ་ལི་ཞེས་བྱ་བ་ལ་སོགས་པ་སྨོས་ཏེ། ཨ་ལ་སོགས་པའི་ཕྲེང་བ་ནི་ཨཱ་ལིའོ། །ཨ་ལ་སོགས་པ་དབྱངས་ཀྱི་ཡི་གེ་བཅུ་དྲུག་ཟླ་བའི་ཆའི་ངོ་བོ་ཉིད་གང་ཡིན་པ་དེ་རྣམས་ཀྱི་རྩ་བ་ནི་ཨ་ཉིད་དོ། །ཇི་སྐད་དུ། སྙིང་གི་དཀྱིལ་ནི་མི་ཤིགས་པའི། །འབར་བའི་མར་མེ་ལྟ་བུ་ནི། །ཡི་གེ་དམ་པ་ཕྲ་བ་ནི། །ཨ་ཡིག་གསལ་བའི་གཙོ་བོར་གནས། །ཞེས་འབྱུང་ངོ༌། །དབྱངས་ཡིག་གི་ཕྲེང་བ་དེ་ཉིད་ཐབས་དང་ཤེས་རབ་ཉིས་འགྱུར་དུ་བྱས་ཏེ་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཉིད་དུ་འགྱུར་རོ། །དེ་ཉིད་ཚེག་དྲག་དང་རྗེས་སུ་འཇུག་པའི་དབྱངས་དང་ལྕེའི་རྩ་བའི་ཡི་གེ་དང་བུང་བའི་ཡི་གེ་དང་རྗེས་སུ་དབྱངས་དང་བཅས་པའི་མཐར་གནས་པའི་ཡི་གེ་གསུམ་དང་བཅས་པར་གསལ་བྱ་སུམ་ཅུ་རྩ་གསུམ་ཉིས་འགྱུར་གྱིས་དཔེ་བྱད་བརྒྱད་ཅུའི་རང་བཞིན་དུ་འགྱུར་རོ། །དེ་ཉིད་ཐུང་དུ་ལྔའི་བདག་ཉིད་ཀྱིས་ཕུང་པོ་ལྔའི་ངོ་བོ་ཉིད་ཡེ་ཤེས་ལྔའི་མཚན་ཉིད་ཅན་ཐབས་ཀྱི་རང་བཞིན་དེ་བཞིན་གཤེགས་པ་ལྔའི་བདག་ཉིད་དུ་འགྱུར་རོ། །དེ་ཉིད་རིང་པོ་ལྔ་དང་འབྲེལ་པའི་ཡི་གེ་བཞིའི་ཚུལ་གྱིས་ཤེས་རབ་ཀྱི་རང་བཞིན་གྱི་སངས་རྒྱས་སྤྱན་མ་ལ་སོགས་པའི་ཡུམ་བཞི་དང་གཟུགས་རྡོ་རྗེ་མ་ལ་སོགས་པ་མཆོད་པའི་ལྷ་མོ་ལྔར་ཤེས་པར་བྱའོ། །མ་ནིང་གི་ཡི་གེ་བཞི་ཡོངས་སུ་སྤངས་ནས་དབྱངས་བཅུ་གཉིས་ཀྱི་ཚུལ་དུ་ཕྱི་དང་ནང་གི་སྐྱེ་མཆེད་ཀྱི་རང་བཞིན་དུ་འགྱུར་རོ། །ཐུང་བ་དང་རིང་བ་གཉིས་ཀྱི་ཚུལ་དུ་འབྲེལ་བའི་ཡི་གེ་བཞི་དང་ལྷན་ཅིག་སྤྱན་མ་ལ་སོགས་པས་འཁྱུད་པ་དེ་བཞིན་གཤེགས་པ་ལྔ་དང་གཤིན་རྗེ་མཐར་བྱེད་ལ་སོགས་པའི་ཁྲོ་བོ་བཞི་སྟེ་བཅུ་གསུམ་གྱི་བདག་ཉིད་ཅན་གྱི་དཀྱིལ་འཁོར་གྱི་འཁོར་ལོའི་རང་བཞིན་ཉིད་དུ་འགྱུར་རོ། །དེ་ཉིད་ཀ་ལ་སོགས་པའི་ཡི་གེ་ལྔ་ལྔ་
པའི་སྡེ་ཚན་ལྔའི་རང་བཞིན་གྱི་ལྷ་མོ་བཞིས་ཡོངས་སུ་བསྐོར་བའི་དེ་བཞིན་གཤེགས་པ་ལྔའི་དཀྱིལ་འཁོར་ལྔ་མཐར་གནས་པ་དང་དྲོད་ཀྱི་ཡི་གེ་དང་ཚེག་དྲག་དང་རྗེས་སུ་འཇུག་པའི་དབྱངས་དང་ལྷན་ཅིག་ཏུ་ཁྲོ་བོའི་རྒྱལ་པོ་བཅུས་བསྐོར་བའི་དཀྱིལ་འཁོར་གྱི་འཁོར་ལོ་ཉིད་དུ་འགྱུར་རོ། །དེ་ནི་ཐུང་བ་དང་རིང་བ་དང་འཕར་བའི་དབྱེ་བས་རྣམ་པ་བཅོ་བརྒྱད་ཀྱི་ཚུལ་གྱིས་ཁམས་བཅོ་བརྒྱད་ཀྱི་ངོ་བོ་ཉིད་དུ་འགྱུར་རོ། །དེ་ལ་ཐུང་བ་དང་རིང་བ་དང་འཕར་བ་སྟེ་རེ་རེ་ལ་རྗེས་སུ་འཇུག་པའི་དབྱངས་དང་བཅས་པ་དང་རྗེས་སུ་འཇུག་པའི་དབྱངས་མེད་པ་དང་མཐོ་བ་དང་དམའ་བ་དང་བར་མའོ། །ཇི་སྐད་དུ། ཐུང་དང་རིང་དང་འཕར་མ་དང༌། །དབྱངས་ནི་གསུམ་པོ་དང་སྦྱར་དང༌། །སྣ་རྗེས་འགྲོ་བའི་མེད་པ་ཡིས། །གྲངས་སུ་རྣམ་པ་བཅོ་བརྒྱད་ཡིན། །ཞེས་འབྱུང་ངོ༌། །དེ་ལྟར་གྱུར་པའི་ཡི་གེ་ཨའི་འབྲེལ་བ་དང་ལྡན་པའི་ཕྲེང་བ་ནི་ཨཱ་ལི་ཞེས་བྱའོ། །དེ་བཞིན་དུ་ཀའི་འབྲེལ་བ་དང་ལྡན་པའི་ཕྲེང་བ་ནི་ཀཱ་ལི་ཞེས་བྱའོ། །ཨཱ་ལི་དང་ཀཱ་ལི་དེ་དག་ཡི་གེ་བཞི་བཅུ་རྩ་དགུའི་ཡི་གེ་ནི་ཕྱི་མོའི་རང་བཞིན་ནོ། །མ་ནིང་ལ་སོགས་པའི་གཟུགས་ཅན་རྣམས་ནི་ཞེས་པ་ནི་དེ་ལ་བུད་མེད་ཀྱི་རང་བཞིན་ནི་ཡི་གེ་ཨ་ལ་སོགས་པ་སྟེ། ཤེས་རབ་ཀྱི་ངོ་བོ་ཡིན་པའི་ཕྱིར་རོ། །ཕོ་རྟགས་ཀྱི་རང་བཞིན་ནི་ཀ་ལ་སོགས་པ་སྟེ། ཐབས་ཀྱི་ངོ་བོ་ཡིན་པའི་ཕྱིར་རོ། །གཉིས་ཀ་དང་སྙོམས་པར་ཞུགས་པའི་རང་བཞིན་ཡ་ལ་སོགས་པ་སྟེ་མ་ནིང་གི་རྟགས་ཀྱི་ངོ་བོར་ཤེས་པར་བྱའོ། །ཡི་གེ་གསུམ་དུ་ཞུགས་པས་མོ་རྟགས་ལ་སོགས་པའི་རང་བཞིན་གྱི་ཨ་ལ་སོགས་པ་དེ་རྣམས་སྐུ་གསུང་ཐུགས་ཀྱི་བདག་ཉིད་ཀྱི་ཡི་གེ་གསུམ་ལ་བསྡུས་པའི་ཕྱིར་རོ། །ད་ནི་འདི་ལྟར་དཔྱད་པར་བྱ་སྟེ། མོ་རྟགས་དང་ཕོ་རྟགས་དང་མ་ནིང་གི་རྟགས་ནི་ཇི་ལྟ་བུ་ཡིན་ཞེ་ན། དེ་ལ་ཁ་ཅིག་ན་རེ། ནུ་མ་སྐྲ་ཅན་བུད་མེད་ཡིན། ཁ་སྤུ་དང་ལྡན་སྐྱེས་པར་བཤད། །གང་ཞིག་གཉིས་ཀ་ལས་འདས་པའི། །དེ་ནི་མ་ནིང་བཤད་པ་ཡིན། ཞེས་ཟེར་རོ། །དེ་ཡང་མི་རིགས་ཏེ། གལ་ཏེ་ནུ་མ་དང་སྐྲ་ཅན་མོ་རྟགས་ཡིན་ན། དེའི་ཚེ་ཕྲེང་བ་དང་ཉལ་ཁྲི་ལ་སོགས་པ་དག་མོ་རྟགས་སུ་མི་འགྱུར་ཏེ། དེ་རྣམས་ནུ་མ་དང་སྐར་མི་ལྡན་པའི་ཕྱིར་རོ། །འབྲེག་པའི་སྐྲ་དང་ལྡན་པའི་ས་ཕྱོགས་དག་ཀྱང་མོ་རྟགས་སུ་འགྱུར་རོ། །སྦྱར་བའི་ནུ་མ་
དང་སྐྲའི་ཆ་ལུགས་འཛིན་པའི་གར་མཁན་སྐྱེས་པ་ཡང་མོ་རྟགས་ཉིད་དུ་ཐལ་བར་འགྱུར་རོ། །དེ་བཞིན་དུ། ཁ་སྤུ་དང་ལྡན་པ་ཕོ་རྟགས་ཡིན་ན་སྒོག་པ་ལ་སོགས་པ་ཡང་དེ་ཉིད་དུ་ཐལ་བར་འགྱུར་ཏེ། དེ་རྣམས་ནི་སྒྲའི་གཟུགས་ལ་ལྟོས་པས་མ་ནིང་གི་རྟགས་ཡིན་པའི་ཕྱིར་རོ། །གནས་ལ་སོགས་པ་གནས་པའི་རྣལ་འབྱོར་མ་རྣམས་ཁ་སྤུ་དང་ལྡན་པས་ཕོ་རྟགས་སུ་འགྱུར་བ་དང༌། སྐྱེས་པ་ཁ་ཅིག་ཁ་སྤུ་དང་མི་ལྡན་པས་མོ་རྟགས་སུ་ཐལ་བར་འགྱུར་རོ། །དེ་ཡང་མི་འཐད་དེ། གཉིས་ཀའི་རང་བཞིན་གྱི་རྟགས་མ་ནིང་ཡིན་ནས་ལ་སོགས་པ་རྣམས་ཀྱང་མ་ནིང་ཉིད་དུ་ཐལ་བར་འགྱུར་རོ། །དེ་ཡང་མི་འཐད་དེ། དེ་རྣམས་མོ་རྟགས་ཡིན་པའི་ཕྱིར་རོ། །གཞན་ན་རེ་འཕེལ་བ་དང་འགྲིབ་པ་དང༌། བར་མ་ནི་ཕོ་རྟགས་ལ་སོགས་པའི་མཚན་ཉིད་ཡིན་ནོ་ཞེས་ཟེར་རོ། །དེ་ལ་འཕེལ་བ་ནི་ནུས་པ་དང་པོ་དང་ལྡན་པའོ། །འགྲིབ་པ་ནི་ནུས་པ་ཆུང་བ་དང་ལྡན་པའོ། །བར་མ་ནི་ནུས་པ་བར་མ་དང་ལྡན་པའོ་ཞེ་ན། དེ་ཡང་མ་ཡིན་ཏེ། གང་གི་ཕྱིར་གལ་ཏེ་འགྲིབ་པ་ནི་མོ་རྟགས་ཀྱི་མཚན་ཉིད་ཡིན་ན་དེའི་ཚེ་བུ་མོ་སྐྱེ་ན་དེའི་ཚེ་ནུས་པ་འཕེལ་བས་ཕོ་རྟགས་སུ་ཐལ་བར་འགྱུར་རོ། །དེ་ཡང་མི་འཐད་དེ། དེ་བཞིན་དུ་འཕེལ་བ་ཞེས་བྱ་བ་ཕོ་རྟགས་ཀྱི་མཚན་ཉིད་ཡིན་ན་དེའི་ཚེ་སྐྱེས་བུ་རྒས་པས་དེའི་ནུས་པ་འགྲིབ་པར་འགྱུར་ན་མོ་རྟགས་སུ་ཐལ་བར་འགྱུར་རོ། །དེ་ཡང་མི་འཐད་དེ། སྐྱེས་པ་དང་མ་བྲལ་བའི་ཕྱིར་རོ། །ནུས་པ་བར་མ་མ་ནིང་གི་རྟགས་ཀྱི་མཚན་ཉིད་ཡིན་ན་དེའི་ཚེ་སྐྱེས་པའམ་བུད་མེད་ནུས་པ་བར་མ་དང་ལྡན་པས་མ་ནིང་ཉིད་དུ་ཐལ་བར་འགྱུར་རོ། །དེ་བས་ན་མཚན་ཉིད་དེ་དག་ནི་མ་ངེས་པ་ཡིན་ནོ། །ཁ་ཅིག་ན་རེ་སྐད་རགས་པ་ལ་སོགས་པ་ཕོ་རྟགས་ཀྱི་མཚན་ཉིད་ཡིན་ལ། །སྐད་ཕྲ་བ་ལ་སོགས་པ་ནི་མོ་རྟགས་ཀྱི་མཚན་ཉིད་ཡིན་ནོ། །དེ་དག་མེད་ན་ནི་མ་ནིང་གི་མཚན་ཉིད་ཡིན་ནོ་ཞེ་ན། དེ་ཡང་མ་ཡིན་ཏེ། གལ་ཏེ་སྐད་རགས་པ་ལ་སོགས་པ་ཕོ་རྟགས་ཀྱི་མཚན་ཉིད་ཡིན་ན། དེའི་ཚེ་མཛེས་ཟིན་པའི་སྐྱེས་པ་རྣམས་སྐད་ཕྲ་བ་ཡིན་པས་མོ་རྟགས་སུ་ཐལ་བར་འགྱུར་བ་དང༌། དབྱངས་རགས་པའི་མོ་རྣམས་ཀྱང་ཕོ་རྟགས་སུ་ཐལ་བར་འགྱུར་རོ། །གཉིས་ཀ་མེད་པ་མ་ནིང་ཡིན་ན་ཕྲེང་བ་དང་ཉལ་
ཁྲི་ལ་སོགས་པ་མ་ནིང་དུ་ཐལ་བར་འགྱུར་རོ། །དེ་ཡང་མི་འཐད་དེ། དེ་རྣམས་མོ་རྟགས་ཡིན་པའི་ཕྱིར་རོ། །སྐད་རགས་པ་དང་ལྡན་པའི་རྫ་རྔ་ལ་སོགས་པ་ཡང་ཕོ་རྟགས་སུ་ཐལ་བར་འགྱུར་རོ། །དེ་ཡང་མི་འཐད་དེ། མ་ནིང་ཡིན་པས་སོ། །དེ་བས་ན་མཚན་ཉིད་དེ་ཡང་མ་ངེས་པའོ། །བུ་ཆུང་ཆགས་པ་ལ་སོགས་པ་ཡང་མོ་རྟགས་ཀྱི་མཚན་ཉིད་དུ་མི་རིགས་ཏེ། མོ་བཤམ་ལ་དེ་མེད་པས་སྐྱེས་པ་ཉིད་དུ་ཐལ་བར་འགྱུར་བའི་ཕྱིར་རོ། །ཤེས་རབ་དང་ལྡན་པ་ཕོ་རྟགས་ཀྱི་མཚན་ཉིད་དུ་མི་རིགས་ཏེ། དེ་དང་ལྡན་པའི་མོ་རྣམས་ཀྱང་སྐྱེས་པ་ཉིད་དུ་ཐལ་བར་འགྱུར་རོ། །ཆགས་པའི་ཆ་ཆེ་བ་དང་ཆུང་བས་མོ་རྟགས་དང་ཕོ་རྟགས་ཡིན་ན་དེའི་ཆགས་པ་ཆེ་བའི་སྐྱེས་པ་ཡང་མོ་རྟགས་ཉིད་དུ་ཐལ་བར་འགྱུར་བ་དང༌། ཆགས་པ་ཆུང་བའི་བུད་མེད་ཀྱང་སྐྱེས་པ་ཉིད་དུ་ཐལ་བར་འགྱུར་རོ། །དེ་བས་ན་མཚན་ཉིད་དེ་ཡང་མ་ངེས་པའོ། །ཕོའི་དབང་པོ་དང་མོའི་དབང་པོ་དང་ལྡན་པ་ཡང་ཕོ་རྟགས་དང་མོ་རྟགས་ཀྱི་མཚན་ཉིད་དང་ལྡན་པ་མ་ཡིན་ཏེ། །ནང་དུ་ཆུད་པས་ཕོའི་དབང་པོ་མི་མངོན་པའི་སངས་རྒྱས་དང་བྱང་ཆུབ་སེམས་དཔའ་རྣམས་མོ་རྟགས་སུ་ཐལ་བར་འགྱུར་བའི་ཕྱིར་རོ། །མོའི་དབང་པོ་དང་ལྡན་པ་ཡང་མོ་རྟགས་མ་ཡིན་ཏེ། མ་ནིང་ལ་དེ་ཡོད་པའི་ཕྱིར་རོ། །དེ་བས་ན་མཚན་ཉིད་དེ་ཡང་མ་ངེས་སོ། །རྟགས་ནི་ཁྱད་པར་མེད་པ་སྟེ། །འཇིག་རྟེན་ལ་བརྟེན་པའི་ཕྱིར་རོ་ཞེས་བྱ་བར་བརྡ་སྤྲོད་པ་རྣམས་ཀྱིས་སྨྲ་བ་དེ་ནི་མ་ཡིན་ཏེ། གལ་ཏེ་འཇིག་རྟེན་ལ་བརྟེན་པའི་རྟགས་ཡིན་ན། དེའི་ཚེ་དངོས་པོ་ཐམས་ཅད་ནི་རྟགས་ཐམས་ཅན་དང་ལྡན་པར་ཐལ་བར་འགྱུར་ཏེ། འགྲམ་དང་ཁང་པ་ལ་སོགས་པའི་སྒྲ་བཞིན་ནོ། །དེ་བས་ན་ཕོ་རྟགས་ལ་སོགས་པའི་མཚན་ཉིད་ནི་རིགས་པས་གྲུབ་པ་མ་ཡིན་ནོ། །འདིར་སྨྲས་པ་ཁྱབ་པར་བྱ་བ་དང་ཁྱབ་པར་བྱེད་པ་དང་གཉིས་ཀ་དང་བྲལ་བ་ནི་ཕོ་རྟགས་དང་མོ་རྟགས་དང་མ་ནིང་གི་རྟགས་ཡིན་ཏེ། གང་གི་ཕྱིར་སྙོམས་པར་ཞུགས་པའི་དུས་སུ་ལྷན་ཅིག་སྐྱེས་པའི་དགའ་བའི་བདེ་བ་ཆེན་པོས་གང་གིས་ཁྱབ་པར་བྱེད་པ་ནི་སེམས་ཀྱི་རྒྱུད་དེའི་རང་བཞིན་དུ་བྱེད་པ་ཁྱབ་པར་བྱེད་པ་དེ་ནི་མོ་རྟགས་ཡིན་ནོ། །བདེ་བ་ཆེན་པོས་ཁྱབ་པར་བྱ་བ་ནི་ཕོ་རྟགས་ཡིན་ནོ། །བདེ་བ་ཆེན་པོས་ཁྱབ་པ་དང་ཁྱབ་པར་བྱེད་པ་མེད་པས་
གཉིས་ཀ་དང་བྲལ་བ་ནི་མ་ནིང་གི་རྟགས་ཡིན་ཏེ། སྣོད་ཀྱི་འཇིག་རྟེན་ནོ། །སྣོད་ཀྱི་འཇིག་རྟེན་གྱི་དངོས་པོ་རྣམས་ལ་མོ་རྟགས་ལ་སོགས་པ་གང་ཡོད་པ་དེ་ནི་བརྟགས་པ་བ་ཡིན་ཏེ། དོན་དམ་པར་དེ་མེད་པའི་ཕྱིར་རོ། །དེ་བཞིན་དུ་དབྱངས་ཀྱི་སྡེ་ཚན་ཟླ་བའི་ཆ་བཅུ་དྲུག་གི་རང་བཞིན་གྱིས་གསལ་བྱའི་སྡེ་ཚན་ཁྱབ་པར་བྱེད་པས་ནི་ཚིམ་པར་བྱེད་པ་ཤེས་རབ་ཀྱི་རང་བཞིན་ནི་ཨཱ་ལི་སྟེ་མོ་རྟགས་སོ། །ཁྱབ་པར་བྱ་བ་ནི་དེ་རྣམས་ཀྱིས་བརྗོད་པར་བྱ་བ་དེ་ནི་ཀཱ་ལི་སྟེ་ཐབས་ཀྱི་རང་བཞིན་གྱི་ཕོ་རྟགས་ཡིན་ནོ། །ཁྱབ་པར་བྱ་བ་དང་ཁྱབ་པར་བྱེད་པ་གཉིས་ཀའི་རང་བཞིན་ནི་ཡ་ལ་སོགས་པའི་སྡེ་ཚན་ཏེ་མ་ནིང་གི་རྟགས་སོ། །དེ་ཉིད་ཀྱི་ཕྱིར་མོ་རྟགས་ཀྱི་རང་བཞིན་དབྱངས་ཀྱི་སྡེ་ཚན་གྱི་ཐོག་མ་དང་ཐ་མའི་ཡི་གེ་གཉིས་ཡང་དག་པར་སྦྱར་ནས་ཤེས་རབ་ཀྱི་རང་བཞིན་གྱི་ཡི་གེ་ཨ་རུ་འགྱུར་རོ། །ཡི་གེ་ཀ་ལ་སོགས་པ་ཡང་དག་པར་སྦྱོར་བས་ཐབས་ཀྱི་རང་བཞིན་ནི་ཡི་གེ་ཧཱུཾ་སྟེ་ཕོ་རྟགས་ཡིན་ནོ། །ཡ་ལ་སོགས་པ་སྡེ་ཚན་ཡོངས་སུ་གྱུར་པ་ལས་ཡི་གེ་ཨོཾ་དུ་འགྱུར་རོ། །དེ་ལ་ཨ་ཨུ་མ་ཞེས་ཡང་དག་པར་སྦྱོར་བས་ཨོཾ་དུ་འགྱུར་རོ། །ཡི་གེ་ཨ་ནི་ཤེས་རབ་ཀྱི་རང་བཞིན་ནོ། །ཡི་གེ་མ་ནི་ཐབས་ཀྱི་རང་བཞིན་ཏེ། །གསལ་བྱ་ཡིན་པའི་ཕྱིར་རོ། །ཡི་གེ་ཨོཾ་ནི་དེ་དང་སྦྱོར་བའི་རང་བཞིན་ཏེ་མ་ནིང་ཞེས་བྱའོ། །དེ་ཉིད་ཀྱི་ཕྱིར་ཤེས་རབ་དང་ཐབས་གཉིས་ཀ་ཡང་དག་པར་སྦྱོར་བའི་རང་བཞིན་གྱི་མ་ནིང་གི་རྟགས་སོ། །དེ་ལྟར་ཕོ་རྟགས་དང་མོ་རྟགས་གཉིས་ཀའི་རང་བཞིན་ནི་ཨོཾ་ལ་སོགས་པའི་ཡི་གེ་གསུམ་ཡིན་ནོ། །མཉམ་པར་གཞག་ཅིང་ཞེས་པ་ནི་སྐད་ཀྱི་བྱིངས་དོན་དུ་མ་ཡིན་པའི་ཕྱིར་མཉམ་པར་གཞག་པའི་སྒྲ་ནི་བཟླས་པའི་དོན་ལ་འཇུག་པའོ། །དེ་ཉིན་དང་མཚན་དུ་ལྡང་བ་དང་འཇུག་པ་དང༌། གནས་པ་དང་ཞེས་པ་ནི་སྲོག་གི་རླུང་ནང་དུ་ཞུགས་པ་ནི་འཇུག་པའོ། །མེ་དང་མཉམ་པའི་རླུང་བར་དུ་གཞག་པ་ནི་གནས་པའོ། །སྲོག་གི་རླུང་གྱེན་དུ་རྒྱུ་བ་ནི་ལྡང་བ་ཡིན་ནོ། །དེ་བས་ན་རླུང་གི་བྱ་བ་དེ་དག་གསུམ་ནི་འགུགས་པ་དང༌། བཞུགས་སུ་གསོལ་བ་དང༌། གཤེགས་སུ་གསོལ་བའི་རང་བཞིན་དུ་ཤེས་པར་བྱའོ། །གང་གི་ཕྱིར་ཡི་གེ་ཨོཾ་བརྗོད་པའི་
དུས་སུ་ནང་གི་ཚུལ་དུ་རླུང་འཇུག་པར་འགྱུར་རོ། །ཡི་གེ་ཧཱུཾ་བརྗོད་པའི་དུས་སུ་ཕྱིའི་ཚུལ་དུ་རླུང་འབྱུང་བར་མཚོན་པའོ། །ཡི་གེ་ཨ་བརྗོད་པའི་དུས་སུ་རླུང་ནི་བར་ན་གནས་པ་མཚོན་པར་འགྱུར་ཏེ། རླུང་དང་ཡི་གེ་ཐ་མི་དད་པའི་ཕྱིར་རོ། །དེ་ལ་རླུང་རྒྱུ་བས་ཡི་གེ་རྣམས་འབྱུང་བ་ཡིན་ཏེ། ཡི་གེ་བརྗོད་པའི་དུས་སུ་རླུང་ཉིད་ཀྱིས་རྩོལ་བར་བྱེད་པའི་ཕྱིར་རོ། །དེ་བས་ན་བྱ་བ་དང་བྱེད་པའི་འབྲེལ་བའམ་ཕན་གདགས་པར་བྱ་བ་དང་ཕན་འདོགས་པར་བྱེད་པའི་འབྲེལ་པས་རླུང་དང་ཡི་གེ་དབྱེར་མེད་པ་ཡིན་ནོ། །རླུང་གི་ལས་ཀྱི་བདག་ཉིད་ཀྱི་འཇུག་པ་ལ་སོགས་པའི་བྱ་བ་ནི་རླུང་དང་དེའི་བདག་ཉིད་དུ་འཇུག་པས་རླུང་ལས་ཐ་དད་པ་མ་ཡིན་ཏེ། འགྲོ་བ་དང་བསྐུམ་པ་དང་བརྐྱང་བའི་མཚན་ཉིད་དེ་ཡིན་པའི་ཕྱིར་རོ། །ཇི་སྐད་དུ། ཡི་གེ་ཨོཾ་གྱི་དབུགས་ནི་ནང་དུ་འཇུག་པ་དང༌། ཡི་གེ་ཨའི་སྔགས་ནི་བར་དུ་གནས་པ་དང༌། ཡི་གེ་ཧཱུཾ་གྱི་སྔགས་ནི་ལྡང་བར་གྱུར་པ་སྟེ། རྐན་དང་མཆུ་དག་འབྲེལ་མེད་གསང་སྔགས་བཟླ། །ཞེས་འབྱུང་ངོ༌། །དེར་ནི་འགྲོ་བ་དང་འོང་བ་དང་བར་དུ་གནས་པའི་འཇུག་པ་དང་གནས་པ་དང་ལྡང་བ་དེ་རྣམ་པ་གསུམ་གྱིས་བཟླས་པས་ན་ཞེས་པ་ནི་ཡན་ལག་མ་ཉམས་པའི་བཟླས་པས་རྡོ་རྗེ་འཆང་ཆེན་པོ་ལ་སོགས་པའི་རྣམ་པ་བཅུ་གཅིག་པའི་རྡོ་རྗེ་བཟླས་པ་ཏིང་ངེ་འཛིན་གང་གིས་བྱེད་པ་དེ་ལ་དེ་སྐད་ཅེས་བཤད་དོ། །ཡན་ལག་མ་ཉམས་པའི་བཟླས་པ་ནི་སྔགས་དང་རླུང་དང་ལྷའི་རྣམ་པར་དག་པའི་ངོ་བོ་ཡེ་ཤེས་གསུམ་དང་ཁམས་གསུམ་དང་རྩ་གསུམ་དང་དེ་ཁོ་ན་ཉིད་གསུམ་དང་རྣམ་པར་ཐར་པའི་སྒོ་གསུམ་དང་སྐུ་གསུང་ཐུགས་དང་སྐུ་གསུམ་དང་རྫས་གསུམ་དང་སྲིད་པ་གསུམ་དང་འཇིག་རྟེན་གསུམ་ལ་སོགས་པ་གཅིག་ཏུ་བྱས་པའི་ཡིད་ལ་བྱེད་པའི་མོས་པས་རྡོ་རྗེ་ཚིག་གིས་སེམས་རྩེ་གཅིག་པ་ཐོབ་པའི་བར་དུ་རྡོ་རྗེ་བཟླས་པ་བྱ་བ་ཡིན་གྱི། ཕྱི་རོལ་གྱི་བཟླས་པ་བརྗོད་པའམ་ཐོས་པ་ངག་གི་བཟླས་པའི་རང་བཞིན་བརྟག་པར་བྱ་བ་མ་ཡིན་ནོ། །རྐན་དང་མཆུ་དང་ལྕེ་སོགས་ཀྱི། །གང་ཞིག་གཡོ་བར་གྱུར་པ་ནི། །དེ་ཉིད་མི་འགྱུར་ག་ལས་ཏེ། །འགྱུར་བ་ཉིད་དུ་གནས་པའི་ཕྱིར། །ཞེས་ཀམ་པ་ལའི་ཞལ་སྔ་ནས་ཀྱིས་གསུངས་པའི་ཕྱིར་རོ། །དེ་བཞིན་དུ། ཡི་གེ་རང་བཞིན་སྔགས་རྣམས་
ནི། །དེ་ཉིད་ཀྱི་ཕྱིར་མི་འཐད་དེ། །གང་ཕྱིར་རྩྭ་མཆོག་ཙམ་ཉིད་ནི། །འགུགས་པར་བྱེད་པར་མི་ནུས་སོ། །ཞེས་གསུངས་སོ། །རབ་ཏུ་བྱེད་པ་ལས་ཀྱང༌། དེ་ཡི་བརྟུལ་ཞུགས་མ་བཤད་ཅིང༌། །བགྲང་ཕྲེང་མ་ཡིན་འདས་པ་མིན། །འཛིན་དང་སྦྱིན་སྲེག་ལས་རྣམས་ནི། །ཡང་དང་ཡང་དུ་འཇུག་པ་མིན། །ཞེས་འབྱུང་ངོ༌། །རྩ་བའི་རྒྱུད་ལས་ཀྱང༌། །སློང་མོ་ཟ་ཞིང་མི་བཟླ་སྟེ། །མ་བླངས་པ་ལ་འང་ཆགས་མི་བྱ། །ཐབས་དང་ཤེས་རབ་ལ་གནས་པས། །ཡན་ལག་མ་ཉམས་གསང་སྔགས་བཟླས། །དེ་བཞིན་དུ་དེ་ཉིད་ལས་ཀྱང༌། །དོན་རྟོགས་པ་ཡིས་བཟླས་པ་ནི། །ངོ་བོ་ཉིད་མེད་མཛེས་པ་སྟེ། །དུས་གསུམ་སངས་རྒྱས་རྣམ་དཔྱོད་པས། དེ་ནི་རྡོ་རྗེ་བཟླས་པར་བཤད། ཅེས་གསུངས་སོ། །དེ་ལྟ་བུ་ཏིང་ངེ་འཛིན་ཞེས་པ་ནི་རླུང་གི་དེ་ཁོ་ན་ཉིད་དང་སྔགས་ཀྱི་དེ་ཁོ་ན་ཉིད་རྗེས་སུ་རྟོགས་པ་སྔོན་དུ་འགྲོ་བར་རྡོ་རྗེ་བཟླས་པའི་མཚན་ཉིད་ཅན་གྱི་སེམས་རྩེ་གཅིག་པ་ཉིད་དོ། །གང་ཡིན་པ་དེ་ལ་དེ་སྐད་ཅེས་བྱ་སྟེ་ཞེས་པ་ལ། བརྗོད་པར་བྱ་བའི་སྒོ་ནས་ལེའུ་གང་དུ་ཡོད་པ་ཞེས་ཚིག་གི་དོན་ཏོ། །དོན་འདི་ཉིད་ནི་ཞེས་པ་ནི་གཙོ་བོར་གྱུར་པའི་དང་པོ་རྡོ་རྗེ་བཟླས་པ་དང༌། དེའི་འོག་ཏུ་སེམས་རྣམ་པར་དག་པ་ལ་སོགས་པའི་རིམ་པ་གཞན་རྣམས་ཀྱང་ཞེས་བྱ་བའི་ཐ་ཚིག་གོ །ཨོཾ་ནི་དང་པོ་གཅིག་དང་ལྡན་པ་ཞེས་པ་ནི་བཅོམ་ལྡན་འདས་རྣམ་པར་སྣང་མཛད་དེ། དེའི་ཡི་གེ་འབྲུ་ཡིན་པའི་ཕྱིར་རོ། །ཤཱུ་ནྱ་ཏཱ་ནི་གཉིས་པ་སྟེ་ཞེས་པ་ནི་ནམ་མཁའི་དབྱིངས་ནི་སྟོང་པ་ཉིད་དེ་དེའི་རང་བཞིན་ནི་རིན་ཆེན་འབྱུང་ལྡན་ཏེ་གཉིས་པའོ། །ཛྙཱ་ན་ཞེས་པ་གསུམ་པ་ཉིད་ཅེས་པ་ནི་མཁྱེན་པས་ན་ཡེ་ཤེས་སོ། །དེ་བས་ན་དངོས་པོ་ཐམས་ཅད་སོ་སོར་རྟོག་པའི་ཡེ་ཤེས་ཀྱི་བདག་ཉིད་ནི་བཅོམ་ལྡན་འདས་སྣང་བ་མཐའ་ཡས་ཏེ་གསུམ་པའོ། །བཛྲ་ཞེས་བྱ་བ་ནི་བཞི་པའོ་ཞེས་པ་ནི་རྡོ་རྗེ་ལྟར་མི་ཕྱེད་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ནི་བཞི་པ་སྟེ་མི་བསྐྱོད་པའོ། །སྭ་བྷཱ་བ་ཨཱཏྨ་ཀོ྅ ལྔ་པ་ཞེས་པ་ནི་བྱ་བ་ནན་ཏན་གྲུབ་པའི་ཡེ་ཤེས་ཀྱི་རང་བཞིན་ནམ། རླུང་གི་ཁམས་ཀྱི་རང་བཞིན་ཏེ། ལྔ་པ་དེ་དོན་ཡོད་གྲུབ་པའོ། །ཨ་ཧཾ་ཞེས་པ་དྲུག་པར་བརྗོད། །ཅེས་པ་ནི་དེ་བཞིན་གཤེགས་པ་ལྔ་སྡུད་པར་བྱེད་པ་ཐམས་ཅད་
གཅིག་གི་བདག་ཉིད་ཅན་རྡོ་རྗེ་འཆང་ཆེན་པོ་ཞེས་བྱ་བའི་དོན་ཏོ། །དེ་ལྟར་བདེ་གཤེགས་དྲུག་པོ་ནི། །རྣམ་པར་སྣང་མཛད་ལ་སོགས་པ་དྲུག་པོ་རྫོགས་པའི་རིམ་པ་སྒོམ་པར་བྱེད་པའི་རིན་པོ་ཆེ་ལྟ་བུའི་གང་ཟག་ལ་བསྟན་ཏོ། །དེས་ན་དོན་འདི་ཡིན་ཏེ། རྡོ་རྗེ་བཟླས་པ་བསྒོམ་པར་བྱ་བར་འདོད་པའི་རྣལ་འབྱོར་པས་དང་པོར་ཅིག་ཅར་དུ་ལྷའི་སྐུ་བསྐྱེད་ཅིང་དེ་བཞིན་གཤེགས་པ་དྲུག་གི་རང་བཞིན་བསྒོམས་ལ། དེ་ནས་རྣམ་པ་བཅུ་གཅིག་བཟླས་པར་བྱའོ། །ཡང་ན་སྒྲ་ཇི་བཞིན་མ་ཡིན་པ་བཤད་པའི་རིམ་པས་ཡི་གེ་དྲུག་གིས་མཚོན་པའི་རྣམ་པར་སྣང་མཛད་ལ་སོགས་པ་དྲུག་གི་རྣལ་འབྱོར་པས་ཟླ་བ་གཅིག་གིས་འབུམ་ཕྲག་དྲུག་བཟླས་པར་བྱའོ། །དེ་ལ་ཉིན་མཚན་གཅིག་གིས་ཉི་ཁྲི་ཆིག་སྟོང་དྲུག་བརྒྱར་འགྱུར། ཞག་ལྔས་འབུམ་ཕྲག་གཅིག་དང་སྟོང་རྩ་བརྒྱད་ནི་འབུམ་ཕྲག་གཅིག་ཅེས་བསྟན་པ་ཡིན་ནོ། །གྲངས་འདི་ཉིད་ཀྱིས་མདོར་ན་ཟླ་བ་གཅིག་གིས་འབུམ་ཕྲག་དྲུག་ཏུ་འགྱུར་རོ། །ཇི་སྐད་དུ། སྔགས་ནི་རྣམ་ཤེས་ལས་འབྱུང་བའི། །འབུམ་ཕྲག་དྲུག་ཏུ་བཟླས་བྱས་ཏེ། །རྡོ་རྗེ་སེམས་ལ་ཕྱག་འཚལ་ནས། །དེ་ནི་ཉལ་འགྲུབ་པར་འགྱུར། །ཞེས་འབྱུང་ངོ༌། །རྣམ་པ་གཞན་གྱིས་ཀྱང་རྡོ་རྗེ་བཟླས་པ་བསྟན་པའི་ཕྱིར། ཨོཾ་ཤཱུ་ནྱ་ཏཱ་ཞེས་བྱ་བ་ལ་སོགས་པ་སྨོས་ཏེ། ཟུང་ནི་ཚིག་གཉིས་སོ། །དང་པོ་རྣམ་པར་སྣང་མཛད་དོ། །ཛྙཱ་ན་བཛྲ་གཉིས་པོ་ཞེས་པ་ནི་སྣང་བ་མཐའ་ཡས་སོ། །སྭ་བྷཱ་བ་ཨཱཏྨ་ཀོ྅ཧཾ་གྱུར་ཞེས་པ་ནི་ཚིག་གཉིས་ཀྱིས་མི་བསྐྱོད་པ་བསྟན་ཏོ། །དེ་ཉིད་གསུམ་དུ་འདིར་བརྟགས་པའོ་ཞེས་པ་ལ་སྐུ་གསུང་ཐུགས་ཀྱི་བདག་ཉིད་ཅན་གྱི་རྡོ་རྗེ་འཆང་ཆེན་པོ་ཨ་ཧཾ་ཞེས་ཅིག་ཅར་དུ་ང་རྒྱལ་བསྐྱེད་ལ་སྔ་མ་བཞིན་དུ། ལྷ་ལ་སོགས་པའི་རྣལ་འབྱོར་གྱི་བཟླས་པ་བྱའོ། །རབ་ཏུ་བྱེད་པ་ལས་ཀྱང༌། འཇུག་པ་དང་ནི་གནས་པ་དང༌། །ལྡང་བ་ཡི་ནི་རིམ་པ་ཡིས། །མཚོན་བྱ་མཚོན་བྱེད་གྲངས་ཀྱིས་ནི། །ཡན་ལག་མ་ཉམས་གསང་སྔགས་བཟླས། །ཞེས་འབྱུང་ངོ༌། །ཡང་ན་སྐུ་རྡོ་རྗེ་ལ་སོགས་པ་རྣལ་འབྱོར་པ་གསུམ་གྱིས་སྣའི་རྩེ་མོར་ཡུངས་ཀར་གྱི་འབྲས་བུའི་ཚོད་ཙམ་གྱི་ཐིག་ལེ་ཕྲ་མོར་བསྒོམས་ལ་བརྟན་པའི་རྟགས་མཐོང་བའི་བར་དུ་བཟླས་པར་བྱའོ། །དེ་ཉིད་གསུམ་ནི་
གཅིག་གྱུར་པ། །ཞེས་པ་ནི་སྐུ་ལ་སོགས་པ་ཉེ་བར་སྡུད་པ་ལས་འབྱུང་བའི་གཟུགས་སོ། །ཡང་དག་ཅེས་པ་ནི་རྣལ་འབྱོར་པའི་མངོན་སུམ་མམ་རང་རིག་པའི་མངོན་སུམ་གྱིས་ཐོབ་པར་བྱ་བ་གསལ་བར་སྣང་བ་རྣམ་པར་མི་རྟོག་མ་འཁྲུལ་བ་ཞེས་པའི་ཐ་ཚིག་གོ །གསལ་བ་ཞེས་བྱ་བ་ནི་དག་ཅིང་ཟླ་བ་དང་ཀུན་ད་ལྟར་མཚུངས་པའི་ཕྱིར་རོ། །མི་གསལ་ཞེས་པ་ནི་ཁམས་ཉི་ཤུ་རྩ་བཞི་ཉེ་བར་བསྡུས་པ་ལས་བྱུང་བའི་ཞལ་དང་ཕྱག་དང་སྐུ་མདོག་དང་དབྱིབས་ལ་སོགས་པ་དང་བྲལ་བ་ཐིག་ལེའི་གཟུགས་ཞེས་བྱ་བའི་དོན་ཏོ། །ལྷ་མོ་བཞིས་ཡོངས་སུ་ཞུས་པའི་བཤད་པའི་རྒྱུད་ལས་ཀྱང༌། །དེ་ཕྱིར་ལྷ་མོ་བཤད་བྱ་བ། །སྙིང་པོ་ལས་ནི་སྙིང་པོ་མཆོག །སངས་རྒྱས་ཀུན་གྱི་གསང་བ་ན། །ཐམས་ཅད་བདག་ཉིད་གང་ཞིག་གནས། །དེ་ཉིད་ཡེ་ཤེས་ལྔ་རང་བཞིན། ཡུངས་ཀར་གྱི་ནི་འབྲུ་ཚོད་ཙམ། །དེ་ཡི་དབུས་ན་གནས་པའི་ལྷ། །མི་གསལ་གསལ་བའི་བདག་ཉིད་ཅན། །ཞེས་འབྱུང་ངོ༌། །རྡོ་རྗེ་བཟླས་པ་བཤད་ནས། སེམས་ལ་དམིགས་པ་ལ་སོགས་པའི་རིམ་པ་བཞི་བསྟན་པར་བྱ་བའི་ཕྱིར། །ཡང་དག་པར་སྦྱོར་བ་གསུམ་གྱི་སྐུར་བསྒོམ་ཞིང་ཞེས་པ་ནི་སྣང་བ་ལ་སོགས་པ་གསུམ་གྱིས་ཉེ་བར་མཚོན་པའི་འོད་གསལ་བའི་དེ་ཁོ་ན་ཉིད་དོ།། སྣང་བ་གསུམ་གྱི་ཚོགས་ཀྱིས་སྣང་བ་འཁྲིགས་པའོ་ཞེས་པ་ནི་སྔགས་དང་ཕྱག་རྒྱའི་རིམ་པས་ཐོབ་པའི་ཟླ་བ་དང་ཉི་མ་དང་མཚམས་ཀྱི་སྣང་བ་དང་འདྲ་བའི་སྣང་བ་ལ་སོགས་པའི་ཡེ་ཤེས་ཀྱི་ངོ་བོ་སྟེ་དེ་ཁོ་ན་ཉིད་བཞི་པོ་འོད་ཀྱི་ཚོགས་དང་བཅས་པ་སྤྲིན་མེད་པའི་ནམ་མཁའ་དང་མཚུངས་པ་ཐམས་ཅད་སྟོང་པ་ཞེས་བྱ་བའི་དེ་ཁོ་ན་ཉིད་བསྒོམ་པར་བྱའོ། །དེས་ནི་སེམས་ལ་དམིགས་པའི་རིམ་པ་བསྟན་ཏོ། །འཇའ་ཚོན་ལྟར་ཞེས་བྱ་བ་ལ་སོགས་པ་ནི་སྔོན་གྱི་སྨོན་ལམ་གྱི་ཤུགས་ཀྱིས་ཡེ་ཤེས་ཀྱི་སྐུ་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པ་བསྒོམ་པར་བྱའོ། །དཀར་པོ་ལ་སོགས་པའི་འོད་ཟེར་ལྔས་བརྒྱན་པའོ་ཞེས་པ་ནི་དཀར་པོ་ལ་སོགས་པའི་སྐུ་མདོག་ལྔས་ཉེ་བར་མཚོན་པའི་དེ་བཞིན་གཤེགས་པ་རིགས་ལྔ་ལས་འབྱུང་བ་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོའི་རྒྱལ་པོ་དང་བཅས་པའོ། །ཁམས་ཕྲ་བ་ཞེས་པ་ལ། འོད་གསལ་བའི་དེ་ཁོ་ན་ཉིད་དོ། །སྣང་བ་མཆེད་པ་
ལ་སོགས་པའི་རིམ་པ་འམ་ཅིག་ཅར་གྱི་རྣལ་འབྱོར་གྱིས་དེ་ལས་འབྱུང་བའི་ཡོངས་སུ་རྫོགས་པ་ཞེས་བྱའོ། །དངོས་པོ་ཐམས་ཅད་ཀྱི་ངོ་བོ་ཉིད་དོ་ཞེས་པ་ལ་བརྟན་པ་དང་གཡོ་བའི་བདག་ཉིད་དམ། རང་དང་གཞན་གྱི་རྒྱུད་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པའི་རང་བཞིན་ཡིན་ནོ། །རྒྱུ་བ་ལ་སོགས་པའི་འོད་ཟེར་ལྔ་སྟེ་ཞེས་པ་ལ་རྒྱུ་བ་དང་རྣམ་པར་རྒྱུ་བ་དང་ཡང་དག་པར་རྒྱུ་བ་དང༌། རབ་ཏུ་རྒྱུ་བ་དང་ངེས་པར་རྒྱུ་བ་དང་ཞེས་བྱ་བ་ཡན་ལག་གི་རླུང་ལྔ་སྟེ་སྒྲ་ཇི་བཞིན་མ་ཡིན་པས་རྡོ་རྗེའི་སྒོ་ཞེས་བྱ་བའི་རྣལ་འབྱོར་ཆེན་པོའི་རྒྱུད་ལས། སྦྲུལ་དང་རུས་སྦལ་རྩངས་པ་དང༌། །ལྷ་སྦྱིན་དང་ནི་གཞུ་ལས་རྒྱལ།། ཞེས་འབྱུང་ངོ༌། །དེ་རྣམས་ཀྱི་འོད་ཟེར་ནི་ཡུལ་གཟུང་བར་བྱ་བའི་ཕྱིར་མིག་ལ་སོགས་པའི་དབང་པོ་རྣམས་འཇུག་གོ །དེ་དང་ལྡན་པ་ནི་སོ་སོར་སྡུད་པ་དང་བསམ་གཏན་གྱི་ཡན་ལག་དག་གིས་ཡུལ་དང་དབང་པོའི་ཉེ་བར་སྤྱོད་པ་དང་ལྡན་པ་ཞེས་བྱ་བའི་ཐ་ཚིག་གོ །ཇི་སྐད་དུ། གང་ཞིག་མཐོང་བ་རེག་པ་དང༌། ཐམས་ཅད་སྒྱུ་མ་བཞིན་མཐོང་སྟེ། །ཀུན་རྫོབ་ཏུ་ནི་མི་གནས་པས། །སྒྱུ་མ་བཞིན་དུ་མཚོན་པར་བྱ། །དབང་པོ་གང་དང་གང་ལམ་གྱིས། །དེ་དང་དེ་ཡི་རང་བཞིན་འགྲོ། །མཉམ་པར་མ་བཞག་སྦྱོར་བ་ཡིས། །སངས་རྒྱས་ཀུན་གྱི་རང་བཞིན་ལྷ། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཉིད་དག་ལ། །མིག་ལ་སོགས་པའི་འཇུག་པ་ནི། །སྒྱུ་མ་བཞིན་དུ་མཚོན་པར་བྱ། །འདིར་ནི་མང་པོ་སྨོས་ཅི་དགོས། །རྡོ་རྗེ་ཐེག་པར་དེ་ཉིད་ལ། །གང་ཡང་རྣལ་འབྱོར་པས་དམིགས་པའི། དེ་དེ་སྒྱུ་མ་བཞིན་གཞན་མིན། །ཞེས་འབྱུང་ངོ༌། །ཡུལ་རྣམས་ལ་ཉེ་བར་ལོངས་སྤྱོད་པ་ཞེས་པ་ནི་སོ་སོར་སྡུད་པའི་རིམ་པས་གཟུང་སྟེ། བསམ་གཏན་གྱི་རིམ་པས་རྣམ་པར་དག་པ་ཐོབ་པ་གང་ཡིན་པའོ། །དབང་པོ་ལྔ་རྣམས་སོ་ཞེས་པ་ནི་མིག་ལ་སོགས་པའོ། །དེ་རྣམས་ཀྱིས་བརྒྱན་པ་ཞེས་པ་ལ་སྒྱུ་མ་ལྟ་བུའི་དབང་པོ་དང་ལྡན་པ་ཡིན་གྱི། ཁྲག་དང་ཤ་ལ་སོགས་པའི་རང་བཞིན་ནི་མ་ཡིན་ནོ། །རབ་ཏུ་བྱེད་པ་ལས་ཀྱང༌། །ཁྱོད་ཀྱི་སྐུ་ལ་ཁོང་སྟོང་མེད། །ཤ་དང་རུས་པ་ཁྲག་ཀྱང་མེད། །ནམ་མཁའི་འཇའ་ཚོན་དང་མཚུངས་པའི། །ཁྱོད་ཀྱི་སྐུ་ནི་སྟོན་པར་བྱེད། །སྐུ་ལ་སྙུན་དང་མི་གཙང་མེད། །བཀྲེས་དང་སྐོམ་པ་མི་སྲིད་དེ། །ཁྱོད་
ཀྱིས་འཇིག་རྟེན་འཇུག་པའི་ཕྱིར། །འཇིག་རྟེན་བྱ་བ་བསྟན་པར་མཛད། །ཅེས་འབྱུང་ངོ༌། །དབང་པོ་ཚང་བའི་ཕྱིར་རོ་ཞེས་པ་ནི་ཇི་ལྟར་དྲི་ཟའི་སེམས་ཅན་གཟུགས་དང་དབང་པོ་ཕྲ་བ་དང་ལྡན་པ་དེ་བཞིན་དུ་སྒྱུ་མའི་སྐུ་ཡང་གཟུགས་དང་དབང་པོ་ཕྲ་བ་དང་ལྡན་པ་ཞེས་བྱའོ། །དབང་པོ་ཚང་བའི་དྲི་ཟ་ནི། །དེ་ཉིད་དྲི་ཟའི་སེམས་ཅན་ཏེ། །རྡོ་རྗེའི་སྐུ་ཡང་དེ་ཉིད་དོ། །ཞེས་འབྱུང་ངོ༌། །དེ་ལྟ་བུའི་རྣམ་པ་ཞེས་པ་ནི་སྒྱུ་མ་ལྟ་བུའི་སྐུའོ། །སངས་རྒྱས་ཀྱི་དཀྱིལ་འཁོར་གསལ་བར་འཇུག་ཅིང་ཞེས་པ་ལ། སངས་རྒྱས་ནི་དེ་བཞིན་གཤེགས་པ་རྣམས་ལ་དཀྱིལ་ནི་སྙིང་པོའོ། །དེ་ལེན་ཞིང་འཛིན་པར་བྱེད་པས་ན་སངས་རྒྱས་ཀྱི་དཀྱིལ་འཁོར་རོ། །ཆོས་ཀྱི་དབྱིངས་དང་དེ་བཞིན་ཉིད་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང་ཡང་དག་པའི་མཐའ་དང་ཆོས་ཉིད་ཀྱི་རང་བཞིན་འོད་གསལ་བ་ཞེས་པའི་ཐ་ཚིག་གོ །དེ་ལ་འཇུག་ཅིང་ཞེས་པ་ནི་ཕྱག་རྒྱའི་རིམ་པའམ་ཏིང་ངེ་འཛིན་གྱི་རིམ་པས་ཡང་དག་པའི་མཐར་འཇུག་པར་བྱའོ་ཞེས་པའི་དོན་ཏོ། །དེ་ལྟར་བདག་ཉིད་ཅེས་བྱ་བ་ལ་སོགས་པས་བདག་ལ་བྱིན་གྱིས་བརླབ་པས་མཚན་ཉིད་ཀྱི་སྐུ་རིམ་པ་བཞི་པས་འོད་གསལ་བ་ལ་འཇུག་པར་བྱའོ། །སྐད་ཅིག་མའི་རྣམ་པར་ཤེས་པ་ནི་ཅིག་ཅར་དུ་སྤྲོ་བའོ། །རྡོ་རྗེ་འཆང་ཆེན་པོའི་སྐུ་ཞེས་པ་ལ་རྡོ་རྗེ་སྐུའི་རྣམ་གྲངས་ཅན་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་སོ། །འཁོར་བ་དང་མྱ་ངན་ལས་འདས་པ་དག་གི་དབུས་སུ་ཞེས་པ་ནི། སྲིད་པ་དང་ཞི་བའི་རོ་མཉམ་པའི་རང་བཞིན་ཅན་ནོ། །ཡོད་པ་དང་མེད་པའི་ཕྱོགས་དང་བྲལ་བ་ཞེས་པ་ལ། དེ་ནི་ཉེ་བར་མཚོན་པ་ཙམ་ཡིན་ཏེ། ཡོད་པ་དང་མེད་པ་དང་དངོས་པོ་དང་དངོས་པོ་མ་ཡིན་པ་དང་རྟག་པ་དང་ཆད་པ་དང་ཀུན་རྫོབ་དང་དོན་དམ་པ་དང་བརྟགས་པ་དང་ཡོངས་སུ་རྫོགས་པ་དང་སྔགས་ཀྱི་སྐུ་དང་ཡེ་ཤེས་ཀྱི་སྐུ་དང༌། ཐབས་དང་ཤེས་རབ་དང་སྟོང་པ་ཉིད་དང་སྙིང་རྗེ་ལ་སོགས་པའི་རྣམ་པར་རྟོག་པ་དང་བྲལ་བའོ། །བདག་ཉིད་ཅེས་པ་ནི་རང་གི་སྐུའོ། །ཤེས་པར་བྱ་བ་ལ་རྗེས་སུ་དྲན་པར་བྱའོ། །དེས་ནི་ཟུང་འཇུག་གི་རིམ་པ་བསྟན་པའོ། །རིམ་པ་འདི་ཉིད་ཀྱིས་ཞེས་བྱ་བ་ལ་སོགས་པས་རྡོ་རྗེ་བཟླས་པ་ལ་སོགས་པའི་རིམ་པའི་མཚན་
ཉིད་ཅན་གྱི་རྫོགས་པའི་རིམ་པས་སོ། །རྣམ་པར་སྣང་མཛད་ལ་སོགས་པར་ཞེས་པ་ནི་དེ་བཞིན་གཤེགས་པ་དྲུག་གི་ཕྱག་རྒྱ་ཆེན་པོའི་སྐུའོ། །བསམ་པ་ཇི་ལྟ་བའི་དབྱེ་བས་ཞེས་པ་ནི་གཏི་མུག་ལ་སོགས་པའི་ཉོན་མོངས་པའི་བག་ཆགས་ཀྱི་དབྱེ་བའི་སྒོ་ནས་སོ། །རང་གི་བདག་ཉིད་བསྐྱེད་པ་ལ། །ཞེས་པ་ནི་སྤྲོས་ནས་སོ། །བདག་གི་དོན་བྱའོ་ཞེས་པ་ལ་ཉེ་བར་མཚོན་པ་ཙམ་ཡིན་ཏེ་གཞན་གྱི་དོན་ཀྱང་བྱའོ་ཞེས་བྱ་བའི་ཐ་ཚིག་གོ །དེ་བས་ན་ཞེས་བྱ་བ་ལ་སོགས་པས་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོའི་སྐུ་རྫོགས་པའི་རིམ་པས་བསྒོམ་པར་བྱའོ་ཞེས་བསྟན་ཏོ། །རྡོ་རྗེ་འཆང་ཆེན་པོའི་རྣལ་འབྱོར་ཞེས་བྱ་བ་ནི་རྫོགས་པའི་རིམ་པ་ལས་འབྱུང་བའི་རྡོ་རྗེ་འཆང་ཆེན་པོའི་ལྷའི་སྐུའོ། །འདི་ཉིད་ནི་རིམ་པ་ལྔའི་སྒོ་ནས་རྫོགས་པའོ། །བརྟེན་པར་བྱ་བའི་ཕྱིར་ཞེས་པ་ནི་ཆོས་ཀྱི་དབྱིངས་ཀྱི་ངོ་བོ་ཉིད་ནི་དེ་བཞིན་གཤེགས་པ་དྲུག་གི་རང་བཞིན་དུ་བྱ་བའི་ཕྱིར་རོ། །གསུངས་ཏེ་ནི་སྡུད་པ་པོའི་ཚིག་ཅེས་ལྷག་མའོ། །འོད་གསལ་བའོ་ཞེས་པ་ནི་དངོས་པོ་ཐམས་ཅད་དེའི་རང་བཞིན་ཡིན་པའི་ཕྱིར་རོ། །ཏིང་ངེ་འཛིན་ཏོ་ཞེས་པ་ནི་སྤྲོས་པ་ཐམས་ཅད་དང་བྲལ་བའི་སེམས་རྣམ་པར་དག་པའི་རིམ་པས་ཐོབ་པར་བྱ་བའམ་མངོན་པར་བྱང་ཆུབ་པའི་རིམ་པས་ཐོབ་པར་བྱའོ། །དེ་ལ་དམིགས་པའོ་ཞེས་པ་ནི་བསྒོམ་པར་བྱས་ནས་སོ། །བསྐྱེད་པ་དེ་ནི་ཞེས་པ་ལ་རྫོགས་པའི་རིམ་པས་ཡེ་ཤེས་ཀྱི་སྐུའི་རང་བཞིན་ནམ་རྡོ་རྗེའི་སྐུའི་རང་བཞིན་དུ་བསྒྲུབ་པར་བྱ་ཞེས་བྱ་བའི་དོན་ཏོ། །འདིའི་དོན་ནི་བཤད་པའི་རྒྱུད་ལས་ཞེས་པ་ནི་རྡོ་རྗེ་ཕྲེང་བའི་རྒྱུད་ལས་སོ། །ཨོཾ་ནི་དང་པོར་ཤེས་པར་བྱ། །ཞེས་པ་རྣམ་པར་སྣང་མཛད་དེ། དེ་ནི་ཨོཾ་ལས་འབྱུང་བའི་ཕྱིར་རོ། །དྷརྨ་ཞེས་བྱ་གཉིས་པའོ། །ཞེས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་རྣམ་པར་དག་པའི་རང་བཞིན་གྱི་རྡོ་རྗེ་ཆོས་ཏེ་སྣང་བ་མཐའ་ཡས་སོ། །དྷཱ་ཏུ་ཞེས་བྱ་གསུམ་པར་བཤད། །ཅེས་པ་ནི་ཆོས་ཐམས་ཅད་ཀྱི་རང་བཞིན་ཆོས་ཀྱི་དབྱིངས་རྣམ་པར་དག་པའི་ངོ་བོ་ནི་མི་བསྐྱོད་པའོ། །སྭ་བྷཱ་བར་གྲགས་བཞི་པའོ། །ཞེས་པ་ནི་ནམ་མཁའི་ཁམས་ཀྱི་རང་བཞིན་རིན་ཆེན་འབྱུང་ལྡན་ནོ། །ཨཱཏྨ་ཀོ྅ ནི་ལྔ་པ་ཡིན། །ཞེས་པ་ནི་ཐམས་ཅད་ཀྱི་བདག་ཉིད་ལས་ཐམས་ཅད་པ་སྟེ་དོན་ཡོད་པར་གྲུབ་པའོ། །ཨ་ཧཾ་དུ་གྱུར་དྲུག་པར་འདོད། །ཅེས་པ་ནི་དེ་
བཞིན་གཤེགས་པ་ལྔ་ཉེ་བར་སྡུད་པར་བྱེད་པའི་རྣམ་པ་ཅན་ཏེ་རྡོ་རྗེ་འཆང་ཆེན་པོའོ་ཞེས་པའི་དོན་ཏོ། །སྔགས་ནི་དབང་པོ་ཐམས་ཅད་དང་རྣམ་པར་ཤེས་པ་རྣམ་པར་དག་པའི་མཚན་ཉིད་ཅན་གྱི་བསྒོམ་པའི་རྣམ་པའོ། །འདི་བརྗོད་ནས་ཞེས་པ་ནི་དེ་བཞིན་གཤེགས་པ་དྲུག་གི་མོས་པ་བྱས་ནས་སོ། །རྒྱུད་ཕྱི་མ་ལས་ཀྱང༌། དབང་པོ་དང་ནི་ཡུལ་གྱིས་ཡིད། །རྟེན་ཏེ་བྱུང་བ་གང་ཡིན་པ། །དེ་ནི་མིན་ཞེས་བཤད་པ་སྟེ། །ཏྲ་ནི་སྐྱོབ་པའི་དོན་ཡིན་ནོ། །ཞེས་འབྱུང་ངོ༌། །དེའི་འོག་ཏུ་ཞེས་པ་ནི་དེ་དང་འདྲ་བའི་ལྷག་པར་མོས་པ་བྱས་ནས་སོ། །སྒོམ་པའི་བདག་ཉིད་ཅན་གྱིས་ཞེས་པ་ནི་རྫོགས་པའི་རིམ་པའི་རྣལ་འབྱོར་པས་སོ། །བསྒོམ་ཞེས་པ་ནི་ཟུང་དུ་འཇུག་པའི་རིམ་པའི་ཏིང་ངེ་འཛིན་གྱི་དེ་བཞིན་གཤེགས་པ་དྲུག་གི་ང་རྒྱལ་བྱ་ཞེས་བྱ་བའི་དོན་ཏོ། །ངེས་པའི་དོན་ནི་རྫོགས་པའི་རིམ་པ་སོ་སོར་བསྟན་པའི་ཕྱིར་རོ། །དེ་ལྟར་ལེའུ་ནས་བརྩམས་ཏེ་ཡོངས་སུ་དག་པ་དང་ཡོངས་སུ་མ་དག་པའི་ལྷའི་སྐུའི་དབྱེ་བས་རིམ་པ་གཉིས་བསྟན་ཏོ། །བསྐྱེད་པའི་རིམ་པའི་ཕྱོགས་སུ་དང་པོའི་སྦྱོར་བ་དང་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་དག་གིས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔ་དང་དེའི་ལྷའི་དཀྱིལ་འཁོར་བསྟན་ཏོ། །རྫོགས་པའི་རིམ་པའི་ཕྱོགས་སུ་ཡང་རྡོ་རྗེ་བཟླས་པ་ལ་སོགས་པའི་རིམ་པས་ཟུང་དུ་འཇུག་པའི་བར་དུ་རྡོ་རྗེ་འཆང་ཆེན་པོའི་སྐུ་རྫོགས་པར་བསྟན་ཏོ། །ད་ནི་ཞེས་པ་ནི་བསྐྱེད་པའི་རིམ་པའི་ཡན་ལག་ཏུ་གྱུར་པའི་ལས་ཀྱི་རྒྱལ་བ་མཆོག་གི་ཕྱོགས་གཅིག་ཕྲ་མོའི་རྣལ་འབྱོར་ཞེས་བྱ་བ་ཡན་ལག་དང་པོ་བསྟན་པར་བྱ་བ་ཡིན་ནོ། །རང་གི་སེམས་བརྟན་པར་བྱ་བའི་ཕྱིར་ཞེས་པ་ནི་རྡུལ་ཕྲ་རབ་དང་ཤིན་ཏུ་རགས་པའི་བསྒོམ་པའི་མཐའི་བར་དུ་སེམས་དབང་དུ་འགྱུར་བའི་ཕྱིར་རོ། །དགོངས་པ་ནི་ས་འོག་བདུན་གྱི་བར་དུ་ཁྱབ་པར་བྱེད་པའི་ཞབས་ཀྱི་པདྨ་དང༌། སྲིད་པའི་རྩེ་མོའི་བར་དུ་སྤྱི་བོས་ཁྱབ་པ་ཕྱག་རྣམས་ཀྱིས་ཕྱོགས་བཅུ་དང་ནམ་མཁའི་དཀྱིལ་ཁྱབ་པར་བྱེད་པའི་རྡོ་རྗེ་འཆང་ཆེན་པོ་ལ་སོགས་པའི་ལྷའི་སྐུ་སྣ་ཚོགས་པའི་རང་བཞིན་ཡིན་ནོ་ཞེས་གང་གི་ཚེ་རྣལ་འབྱོར་པས་བསྒོམས་ན་དེའི་ཚེ་རང་གི་སེམས་བརྟན་པར་འགྱུར་རོ། །གང་གི་ཚེ་ཡུངས་ཀར་གྱི་འབྲུའི་ཚད་ཙམ་གྱི་ཕྲ་བ་བརྟན་པ་དང་གཡོ་བའི་ཁམས་གསུམ་གྱི་རང་བཞིན་སྐྲའི་རྩེ་མོའི་
བརྒྱ་སྟོང་གི་ཆའི་ཚད་ཙམ་ཐིག་ལེའི་བདག་ཉིད་བསྒོམས་ན་དེའི་ཚེ་རང་གི་སེམས་དབང་དུ་འགྱུར་རོ། །འདིར་ནི་རྡུལ་ཕྲ་རབ་བསྒོམ་པའི་གནས་སྐབས་ཡིན་ཏེ། ཤིན་ཏུ་རགས་པའི་བསྒོམ་པ་ནི་སྔར་བཤད་པའི་ཕྱིར་རོ། །ཕྲ་མོའི་རྣལ་འབྱོར་རྣམ་པ་གསུམ་བསྒོམ་པ་གསུངས་ཏེ་ཞེས་པ་ནི་བསྐྱེད་པའི་རིམ་པའི་རྣལ་འབྱོར་པའི་གཅིག་དང་གཞན་མ་གཉིས་རྫོགས་པའི་རིམ་པའི་རྣལ་འབྱོར་པའོ། །འཆད་པར་འགྱུར་བའི་གསུམ་པ་ལ་ཡང་རྫོགས་པའི་རིམ་པའི་རྣལ་འབྱོར་པ་ཉིད་ཀྱིའོ། །བསྡུས་པའི་དོན་ནི་འདི་ཡིན་ཏེ། སྤྱིའི་དོན་གྱི་ཕྱོགས་སུ་བསྐྱེད་པའི་རིམ་པའི་རྣལ་འབྱོར་པས་ཕྲ་མོའི་རྣལ་འབྱོར་བསྒོམ་པ་དང༌། སྦས་པ་དང་མཐར་ཐུག་པའི་བཤད་པའི་ཕྱོགས་དང་འོག་ནས་བཤད་པའི་ངེས་པའི་དོན་གྱི་ཕྱོགས་སུ་ཡང་རྫོགས་པའི་རིམ་པའི་རྣལ་འབྱོར་པས་ཕྲ་མོའི་རྣལ་འབྱོར་བསྒོམ་པའོ། །དེ་ལྟར་བསྐྱེད་པའི་རིམ་པ་དང་རྫོགས་པའི་རིམ་པའི་རྣལ་འབྱོར་པ་དག་ལ་ཕྲ་མོའི་རྣལ་འབྱོར་རྣམ་པ་གསུམ་གྱི་བསྒོམ་པ་བསྟན་ཏེ། འདོད་ཆགས་དང་ཞེ་སྡང་དང་གཏི་མུག་གི་རིགས་ཅན་གྱི་རྣལ་འབྱོར་པའི་དབྱེ་བས་སོ། །དེ་ལ་དང་པོ་བཤད་པའི་ཕྱིར། །རྡོ་རྗེ་ལ་སོགས་པའི་ཕྱག་མཚན་ཏེ་ཞེས་པ་ནི་རྡོ་རྗེ་དང་འཁོར་ལོ་དང་རིན་པོ་ཆེ་དང་པདྨ་དང་རལ་གྲི་ལ་སོགས་པའོ། །རིན་ཆེན་ལྟར་རིན་ཆེ་བ་ཉིད་དོ་ཞེས་པ་ནི་མཐའ་ཡས་པའི་འཇིག་རྟེན་གྱི་ཁམས་ལ་གནས་པའི་སེམས་ཅན་རྣམས་ཀྱི་བསམ་པ་ཐམས་ཅད་ཅིག་ཅར་དུ་རྫོགས་པར་བྱེད་པའི་ཕྱིར་རོ། །རིགས་ལས་བྱུང་བས་སོ་ཞེས་པ་ནི་རིགས་ལྔའི་འབྲེལ་པ་དང་ལྡན་པའི་དེ་བཞིན་གཤེགས་པ་ལ་སོགས་པ་སྤྲོ་བའི་རྒྱུ་སྟེ་ཐིག་ལེའི་ཁྱད་པར་རོ། །དེ་ནི་ཡུངས་ཀར་གྱི་འབྲུའི་ཚད་ཙམ་ཞེས་པ་ནི་ནས་དང་ཙ་ན་ཀ་ལ་སོགས་པའི་འབྲུའི་ཚད་ཙམ་ཡང་ཡིན་ནོ་ཞེས་བྱ་བའི་ཐ་ཚིག་གོ །སྣའི་རྩེ་མོར་ཞེས་པ་ནི་རེག་བྱ་རྡོ་རྗེ་མའི་ཆོས་འབྱུང་བ་ལའོ། །རང་གི་ལྷ་ཡི་རྣལ་འབྱོར་གྱིས། །ཞེས་པ་ནི་རྣམ་པར་སྣང་མཛད་ལ་སོགས་པའི་ལྷའི་ཕྱག་རྒྱ་ཆེན་པོ་ལ་སོགས་པའི་གཟུགས་ཀྱིས་སོ། །ཉིན་མཚན་དུ་ནི་དུས་ཇི་སྲིད་ཀྱི་སེམས་རྩེ་གཅིག་ཏུ་འགྱུར་བའོ། །གང་གི་ཚེ་མཐོང་བའི་མཚན་མ་ཞེས་བྱ་བ་ལ་སོགས་པ་ནི་གང་གི་ཚེ་ཐིག་ལེ་བསྒོམ་པ་བརྟན་པར་འགྱུར་ན་དེའི་ཚེ་རྣལ་འབྱོར་པ་ལ་མཚན་མ་འདི་ལྟར་འབྱུང་སྟེ།
ཐིག་ལེ་ཙམ་ལ་ཁམས་གསུམ་ཐམས་ཅད་ཀྱི་ང་རྒྱལ་དང་ཕྱིའི་སེམས་ཅན་དུ་གྱུར་པའི་རྣམ་པར་རྟོག་པ་དང་བྲལ་བ་དང༌། སེམས་དང་སེམས་ལས་བྱུང་བའི་ཆོས་མི་འབྱུང་བ་དང༌། གམ་ན་གནས་པའི་སྒྲ་ལ་སོགས་པ་མི་ཟིན་པ་དང༌། རང་གི་ལུས་མི་ཚོར་བ་ཞེས་བྱ་བ་ལ་སོགས་པའོ། །དེའི་ཚེ་རྡོ་རྗེ་ལ་སོགས་པ་ཞེས་པ་ནི་ཐུགས་རྡོ་རྗེ་ལ་སོགས་པའི་རྣལ་འབྱོར་པ་རྣམས་ཀྱིས་བསྒོམ་པར་གྱུར་པའི་རང་གི་ཕྱག་མཚན་ནོ། །བསྒོམ་པས་མི་གཡོ་བར་ཤེས་ནས་ཞེས་པ་ནི་བསྒོམ་པར་བྱ་བ་དང་སྒོམ་པ་དག་གཅིག་ཏུ་གྱུར་པའི་མཚན་ཉིད་ཀྱིས་དེའི་བདག་ཉིད་དུ་ཤེས་ནས་སོ། །བསྒོམ་པ་ལ་དབང་དུ་གྱུར་པ་བསྐྱེད་པའི་ཕྱིར་ཞེས་པ་ནི་ཐིག་ལེ་བསྒོམ་པ་འདི་ནི་བརྟན་པ་ཡིན་ནམ་མི་བརྟན་པ་ཡིན་ཞེས་དབང་ཉིད་དུ་རྫོགས་པར་བྱ་བའི་ཕྱིར་རོ། །སྤྲོ་བར་བྱའོ་ཞེས་པ་ནི་འཆད་པར་འགྱུར་བའི་འོད་ཟེར་ལ་སོགས་པ་སྤྲོ་བར་བྱའོ། །བསྒོམ་པ་ལ་སློབ་བཞིན་པར་མི་སྤྲོ་བའོ་ཞེས་པ་ནི་བསྒོམ་པའི་དུས་སུ་དེ་ཉིད་མ་རྫོགས་ན་དེ་ལས་སྤྲོ་བ་ག་ལ་ཡོད་དེ། དེ་ཉིད་ཀྱི་ཕྱིར་སློབ་བཞིན་པར་ཞེས་བྱ་བ་ནི་ད་ལྟར་བྱུང་བའི་དུས་ཀྱི་རྐྱེན་གྱིས་བསྟན་པའོ། །རྡོ་རྗེ་ལ་སོགས་པ་ཁ་དོག་སྣ་ལྔ་པའི་འོད་ཟེར་དང་ཕྱག་མཚན་རྣམས་བསྟན་པར་གྱུར་པའོ། །ཕྱག་རྒྱ་ཆེན་པོའི་གཟུགས་ཀྱང་ཞེས་པ་ནི་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོའི་ཚོགས་རྣམས་ཀྱང་སེམས་ཅན་གྱི་དོན་བྱ་བའི་ཕྱིར་སྤྲོ་བར་བྱའོ། །དཀར་པོ་ལ་སོགས་པའི་ཁ་དོག་དང་ལྡན་པའོ་ཞེས་པ་ནི་རང་གི་རིགས་དང་མཐུན་པའི་འོད་ཀྱིས་མཛེས་པའོ། །སངས་རྒྱས་ཀྱི་ཚོགས་སོ་ཞེས་པ་ནི་དེ་བཞིན་གཤེགས་པའི་ཚོགས་སོ། །འཁོར་ལོ་དང་ཞེས་བྱ་བ་ལ་སོགས་པས་དེ་རྣམས་ཀྱི་ཕྱག་མཚན་རྣམས་བསྟན་ཏོ། །ཉེ་བར་མཚོན་པས་ཞེས་བྱ་བ་ལ་སོགས་པས་སྤྲུལ་པའི་སྐུའི་རང་བཞིན་གྱི་བྱང་ཆུབ་སེམས་དཔའ་དང་ལྷ་མོ་དང་ཁྲོ་བོ་རྣམས་ཀྱང་སྤྲོ་བར་བྱའོ་ཞེས་བསྟན་ཏོ། །ནམ་མཁའ་ཁྱབ་པར་སྤྲོ་བར་བྱ་ཞིང་གཡོགས་པར་བྱའོ་ཞེས་པ་ལ་འགྲོ་བའི་དོན་བྱ་བའི་ཕྱིར་ནམ་མཁའི་ཁམས་སྔར་བཤད་པའི་སྤྲིན་གྱིས་གཡོགས་པར་བྱའོ་ཞེས་བྱ་བའི་དོན་ཏོ། །སྤྱི་དོན་ཞེས་བྱ་བ་ནི་བསྐྱེད་པའི་རིམ་པའི་ཕྱོགས་གཅིག་ལས་ཀྱི་རྒྱལ་བ་མཆོག་གི་ཡན་ལག་དང་པོ་སྟེ་ཕྲ་མོའི་རྣལ་འབྱོར་ཡིན་པའི་ཕྱིར་རོ། །
དེ་བས་ན་བསྡུས་པའི་དོན་ནི་འདི་ཡིན་ཏེ། དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་གྱི་མཐར་ཞེ་སྡང་རྡོ་རྗེའི་ཏིང་ངེ་འཛིན་ལ་གནས་པའི་རྣལ་འབྱོར་པས་རང་ལ་འཁྱུད་པའི་རེག་བྱ་རྡོ་རྗེ་མའི་ཆོས་འབྱུང་བའི་ཕྱག་རྒྱའི་ནང་དུ་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་དཀྱིལ་འཁོར་བ་དང་ལྷན་ཅིག་དཀྱིལ་འཁོར་གྱི་བདག་པོའི་ཚུལ་དུ་བདག་ཉིད་བསྒོམས་ལ། ཐབས་དང་ཤེས་རབ་སྙོམས་པར་ཞུགས་པའི་རྗེས་སུ་ཆགས་པའི་དམ་པའི་སྒྲས་དེ་བཞིན་གཤེགས་པ་ཐམས་ཅད་འགུགས་ཤིང་འཇུག་ལ། འདོད་ཆགས་ཆེན་པོའི་རང་བཞིན་གྱི་ཡེ་ཤེས་ཀྱི་མེས་བཞུས་ལ། ཐིག་ལེའི་གཟུགས་སུ་དམིགས་ལ་དེ་ཉིད་ཡུངས་ཀར་གྱི་འབྲུའི་ཚད་ཙམ་གྱི་ནང་ན་ལྷ་སུམ་ཅུ་རྩ་གཉིས་ཀྱི་ལྷའི་འཁོར་ལོ་ཅིག་ཅར་དུ་བསམས་ལ། དེ་རྣམས་ཀྱི་ཐུགས་ཀར་ཡང་ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་དག་བསྒོམས་ལ། ཡེ་ཤེས་སེམས་དཔའི་ཡིག་འབྲུའི་ཐིག་ལེར་ཡང་སུམ་ཅུ་རྩ་གཉིས་ཀྱི་བདག་ཉིད་ཀྱི་དཀྱིལ་འཁོར་གྱི་འཁོར་ལོའམ། གསང་བ་ལྔའི་དཀྱིལ་འཁོར་ཆེན་པོ་བསམས་ལ་སེམས་ཅན་དང་སྣོད་ཀྱི་འཇིག་རྟེན་གཉིས་ཀྱི་རྣམ་པར་རྟོག་པ་སྤངས་ནས། གམ་ན་གནས་པའི་སྒྲ་ལ་སོགས་པ་མི་ཟིན་པས་བསྒོམ་པ་ལ་དབང་བསྐྱེད་པར་བྱ་བའི་ཕྱིར་དང་པོ་ཁ་དོག་ལྔ་པའི་འོད་ཟེར་གྱི་འཁོར་ལོ་སྤྲོ་ཞིང་དེས་སེམས་ཅན་གྱི་ཁམས་སྦྱངས་ཏེ་སླར་ཡང་བསྡུས་ལ་དེ་ཉིད་དུ་ཞུགས་ཏེ། དེ་ནས་རང་གི་རིགས་དང་རྡོ་རྗེས་སུ་མཐུན་པའི་རྡོ་རྗེ་ལ་སོགས་པ་སྤྲོ་ཞིང་ནམ་མཁའི་ཁམས་ཁྱབ་ལ་དེ་ལས་བྱུང་བའི་འོད་ཟེར་གྱི་ཚོགས་ཀྱིས་འགྲོ་བ་མ་ལུས་པའི་དོན་བྱས་ཏེ། སླར་ཡང་བསྡུ་ཞིང་དེ་ཉིད་དུ་འཇུག་པར་བྱས་ལ་དེ་ནས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་ཕྱག་རྒྱ་ཆེན་པོའི་སྐུ་ཡང་སྤྲོས་ཏེ། འགྲོ་བའི་དོན་བྱ་བ་དེ་ནི་རྡོ་རྗེ་འཆང་ཆེན་པོའི་རྣལ་འབྱོར་པའི་ཕྲ་མའི་རྣལ་འབྱོར་བསྒོམ་པའི་རིམ་པའོ། །སྐུ་རྡོ་རྗེའི་རྣལ་འབྱོར་པས་སངས་རྒྱས་སྤྱན་མའི་ཆོས་འབྱུང་བའི་ནང་དུ། ཡུངས་ཀར་གྱི་འབྲུའི་ཚད་ཙམ་གྱི་འཁོར་ལོའི་ཕྱག་མཚན་བསྒོམས་ལ་དེའི་ལྟེ་བར་སྔ་མ་བཞིན་དུ་བདག་ཉིད་བསམས་ལ། བརྟེན་པའི་རྟགས་མཐོང་ནས་སྤྲོ་བ་དང་བསྡུ་བས་སྐུ་རྡོ་རྗེའི་རིགས་ཀྱིས་འགྲོ་བའི་འདོན་བྱས་ཏེ། སྐུ་རྡོ་རྗེའི་རྣལ་འབྱོར་པའི་ཕྲ་མོའི་རྣལ་འབྱོར་བསྒོམ་པའི་རིམ་པའོ། །དེ་བཞིན་དུ་གསུང་རྡོ་རྗེའི་
རྣལ་འབྱོར་པས་གོས་དཀར་མོའི་ཆོས་འབྱུང་གི་ནང་དུ་ཙ་ན་ཀའི་འབྲུའི་ཚད་ཙམ་གྱི་པདྨ་དམར་པོ་བསམས་ལ་དེའི་ལྟེ་བར་སྔ་མ་བཞིན་དུ་བདག་ཉིད་བསམས་ཏེ། བརྟན་པའི་རྟགས་མཐོང་ཞིང་གསུང་རྡོ་རྗེའི་ལྷའི་རིགས་སྤྲོ་བ་དང་བསྡུ་བར་བྱ་བ་ནི་གསུང་རྡོ་རྗེའི་རིགས་ཀྱི་རྣལ་འབྱོར་བའི་ཕྲ་མོའི་རྣལ་འབྱོར་བསྒོམ་པའི་རིམ་པའོ། །རིན་ཆེན་འབྱུང་ལྡན་གྱི་རྣལ་འབྱོར་པས་མཱ་མ་ཀཱིའི་ཆོས་འབྱུང་བའི་ནང་དུ་ཁ་དོག་སེར་པོ་ཙ་ན་ཀའི་འབྲུའི་ཚད་ཙམ་གྱི་ཟུར་དྲུག་པའི་རིན་པོ་ཆེ་བསྒོམས་ལ། དེའི་ཆང་ཟུང་ལ་སྔ་མ་བཞིན་དུ་བདག་ཉིད་བསམས་ལ། བརྟན་པའི་རྟགས་མཐོང་བས་རིན་པོ་ཆེའི་རིགས་ཀྱི་ལྷ་རྣམས་སྤྲོ་བ་དང་བསྡུ་བ་རིན་ཆེན་འབྱུང་ལྡན་གྱི་རྣལ་འབྱོར་པའི་ཕྲ་མོའི་རྣལ་འབྱོར་བསྒོམ་པའི་རིམ་པའོ། །དམ་ཚིག་རྡོ་རྗེའི་རྣལ་འབྱོར་པས་སྒྲོལ་མའི་ཆོས་འབྱུང་བའི་ནང་དུ་ཡུངས་ཀར་གྱི་འབྲུའི་ཚོད་ཙམ་གྱི་རལ་གྲི་བསྒོམས་ལ། དེའི་ཆང་ཟུང་དུ་སྔ་མ་བཞིན་དུ་བདག་ཉིད་བསམས་ཏེ་བརྟན་པའི་རྟགས་མཐོང་ཞིང་དམ་ཚིག་གི་རིགས་ཀྱི་ལྷ་རྣམས་སྤྲོ་བ་དང་བསྡུ་བར་བྱེད་པའི་དམ་ཚིག་གི་རྡོ་རྗེའི་རྣལ་འབྱོར་པའི་ཕྲ་མོའི་རྣལ་འབྱོར་བསྒོམ་པའི་རིམ་པའོ། །དེས་ནི་རིགས་དྲུག་གི་རྗེས་སུ་འབྲང་བའི་ཕྲ་མོའི་རྣལ་འབྱོར་བསྟན་ཏོ། །ཕྲ་མོའི་རྣལ་འབྱོར་དེས་ཀྱང་དཀྱིལ་འཁོར་བྲི་བ་དང་དེ་ལ་སློབ་མ་གཞུག་པ་དང༌། སྔགས་དང་ཕྱག་རྒྱ་དང་ཏིང་ངེ་འཛིན་རྣམས་ཕ་རོལ་ལ་སྟོན་པ་དང༌། སྔགས་ཀྱི་ཐེག་པ་བཤད་པའི་ཕྱིར་མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་ལ་བཞུགས་པའི་བཅོམ་ལྡན་འདས་དེ་བཞིན་གཤེགས་པ་རྣམས་ཀྱིས་རྣལ་འབྱོར་པ་ལ་ལུང་སྟོན་པར་འགྱུར་རོ། །རྫོགས་པའི་རིམ་པའི་ཕྲ་མོའི་རྣལ་འབྱོར་བསྟན་པའི་ཕྱིར། ཀུན་རྫོབ་བྱང་ཆུབ་ཀྱི་སེམས་ཏེ་ཞེས་སྨོས་པ་ལ། ཐབས་དང་ཤེས་རབ་སྙོམས་པར་ཞུགས་པ་ལས་བྱུང་བའི་ཤུ་ཀྲའི་ཐིག་ལེའི་གཟུགས་སོ། །ཡུངས་ཀར་གྱི་འབྲུའི་ཚད་ཙམ་ཞེས་བྱ་བ་འདིས་ཤིན་ཏུ་ཕྲ་བ་ཉིད་བསྟན་ཏོ། །རང་གི་རྡོ་རྗེའི་ཁར་ཞེས་པ་ནི་རང་གི་གསང་བའི་རྡོ་རྗེའི་བུ་ག་ལའོ། །དེ་བཞིན་གཤེགས་པ་ལྔའི་བདག་ཉིད་དུ་བྱས་ལ་ཞེས་པ་ནི་འབྱུང་བ་ཆེན་པོ་ལྔའི་རང་བཞིན་དང་ཡེ་ཤེས་ལྔའི་ངོ་བོ་ཉིད་དུ་བྱས་ལའོ། །དེ་ལ་དེའི་སྲ་བ་ཉིད་གང་ཡིན་པ་དེ་ནི་སའི་ཁམས་སོ། །དེའི་གཤེར་བ་ཉིད་གང་ཡིན་པ་དེ་ནི་ཆུའི་ཁམས་སོ། །དེའི་དྲོ་བའི་
མཚན་ཉིད་གང་ཡིན་པ་དེ་ནི་མེའི་ཁམས་སོ། །དེའི་འགྲོ་བ་དང་ལྡོག་པ་ལ་སོགས་པའི་མཚན་ཉིད་གང་ཡིན་པ་དེ་ནི་རླུང་གི་ཁམས་སོ། །དེའི་ནང་ན་ཁྱབ་པའི་བདེ་བ་ཆེན་པོའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་ཁྱད་པར་གང་ཡིན་པ་དེ་ནི་ནམ་མཁའི་ཁམས་སོ། །དེ་བཞིན་དུ་དག་པ་ཀུན་ད་དང་ཟླ་བ་དང་འདྲ་བའི་གསལ་བའི་རང་བཞིན་གྱི་ཚུལ་གང་ཡིན་པ་དེ་ནི་མེ་ལོང་ལྟ་བུའི་ཡེ་ཤེས་སོ། །དེ་བཞིན་དུ་དེའི་ཁམས་ཉི་ཤུ་རྩ་བཞི་སྡུད་པར་བྱེད་པའི་ཁམས་དྲུག་གི་ཚུལ་གང་ཡིན་པ་དེ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་རྣམ་པར་མི་རྟོག་པའི་མཚན་ཉིད་ཅན་གྱི་སྤྱོད་པ་གང་ཡིན་པ་དེ་ནི་སོ་སོར་རྟོག་པའི་ཡེ་ཤེས་སོ། །དེ་བཞིན་དུ་དེའི་འོད་ཟེར་གྱི་ཚོགས་སྤྲོ་བས་སེམས་ཅན་གྱི་དོན་རྫོགས་པ་གང་ཡིན་པ་དེ་ནི་བྱ་བ་ནན་ཏན་གྲུབ་པའི་ཡེ་ཤེས་སོ། །དེ་བཞིན་དུ་དེའི་རྟག་པ་དྲི་མ་མེད་པ་ཟག་པ་མེད་པའི་ཆོས་ཀྱི་སྐུའི་མཚན་ཉིད་ཅན་གྱི་དོན་དམ་པ་བྱང་ཆུབ་ཀྱི་སེམས་ཀྱི་ངོ་བོ་ཉིད་གང་ཡིན་པ་དེ་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །ཇི་སྐད་དུ་བཤད་པའི་ཆོ་ག་ཞེས་བྱ་བ་ལ་སོགས་པ་ནི་ཆོ་ག་འདི་ཡིན་ཏེ། དང་པོར་རྡོ་རྗེ་དང་པདྨའི་གནས་དང་པོ་སྟོང་པ་ཉིད་དུ་བསྒོམས་ལ། །དེ་ནས་ཧཱུཾ་ཨཱཿ་ས་བོན་གཉིས་ཡོངས་སུ་གྱུར་པ་ལས་རྩེ་ལྔ་པའི་གསང་བའི་རྡོ་རྗེ་དང་པདྨ་འདབ་མ་བརྒྱད་པ་ཡང་བསྒོམས་ལ། དེ་དག་གི་རྩེ་མོར་ཚད་གཅད་པའི་དོན་དུ་ཧཱུཾ་དང་ཕཊ་བཀོད་ཅིང་རིན་ཆེན་འབྱུང་ལྡན་དང༌། དོན་ཡོད་གྲུབ་པའི་སྔགས་དག་གིས་རྡོ་རྗེ་དང་པདྨ་སྦྱོར་ཞིང་བསྐྱེད་པར་བྱ་སྟེ་རྗེས་སུ་ཆགས་པའི་མཆོག་གི་སྒྲས་དེ་བཞིན་གཤེགས་པ་བཀུག་ཅིང་འཇུག་ལ་བདུན་ཁྲི་ཉིས་སྟོང་གི་རྩ་ནས་ཆུའི་རྒྱུན་དང་འདྲ་བའི་བྱང་ཆུབ་ཀྱི་སེམས་དབུ་མའི་ལམ་ནས་རྡོ་རྗེའི་རྩེ་མོར་སྨིག་རྒྱུ་ལ་སོགས་པའི་རྟགས་ལྔ་མཚོན་པ་སྔོན་དུ་འགྲོ་བར་བྱང་ཆུབ་ཀྱི་སེམས་ལ་མཆོག་ཏུ་དགའ་བ་ཉམས་སུ་མྱོང་ཞིང་དེའི་མཐར་བྱང་ཆུབ་ཀྱི་སེམས་ལས་སྔ་མ་བཞིན་དུ་འོད་ཟེར་དང་ཕྱག་མཚན་དང༌། ཕྱག་རྒྱ་ཆེན་པོའི་གཟུགས་སྤྲོ་ཞིང༌། དེ་རྣམས་གྱིས་འགྲོ་བའི་དོན་བྱས་ལ་སླར་ཡང་བསྡུས་ཏེ་དེ་ཉིད་དུ་འཇུག་པར་བསམ་པར་བྱའོ་ཞེས་བསྟན་ཏོ། །བྱང་ཆུབ་ཀྱི་སེམས་ཕྱུང་བ་ལས་ཞེས་པ་ནི་བྱང་ཆུབ་ཀྱི་སེམས་དེ་ཉིད་འོད་ཟེར་གྱི་ཚོགས་ཀྱི་སྒོ་ནས་སངས་རྒྱས་དང་བྱང་ཆུབ་སེམས་དཔའི་ཚུལ་དུ་སྤྲོ་བར་བྱའོ་ཞེས་བྱ་བའི་ཐ་ཚིག་གོ །བུ་ནི་རྡོ་རྗེ་འཆང་ཆེན་
པོ་ལ་ལྟོས་པས་དེ་བཞིན་གཤེགས་པ་ལྔའོ། །ཚ་བོ་ནི་དེ་རྣམས་ལས་ཀྱང་བྱུང་བའི་བྱང་ཆུབ་སེམས་དཔའ་རྣམས་སོ། །སོགས་པའི་སྒྲས་ནི་རིགས་ཀྱི་ཡུམ་དང་མཆོད་པའི་ལྷ་མོ་དང་ཁྲོ་བོའི་འཁོར་ལོ་ཡང་བསྟན་ཏོ། །སྦས་པའོ་ཞེས་པ་ནི་འདོད་ཆགས་ཀྱི་ཆོས་ཉིད་བསྟན་པའི་ཕྱིར་རོ། །འདོད་ཆགས་ཀྱི་རིགས་ཅན་གྱི་རྣལ་འབྱོར་པའི་ཕྲ་མོའི་རྣལ་འབྱོར་ཏེ་རྫོགས་པའི་རིམ་པའི་ཕྱོགས་སུ་ཡིན་ནོ། །ཞེ་སྡང་གི་རིགས་ཅན་གྱི་རྣལ་འབྱོར་པའི་ཕྲ་མོའི་རྣལ་འབྱོར་གཉིས་པ་བསྟན་པར་བྱ་བའི་ཕྱིར། །དེ་བཞིན་གཤེགས་པའི་བདག་ཉིད་ཅན། །ཞེས་སྨོས་པ་ལ་སྐུ་རྡོ་རྗེ་ལ་སོགས་པ་དེ་བཞིན་གཤེགས་པ་གསུམ་གྱི་ཡིག་འབྲུ་ཉེ་བར་བསྡུས་པ་ལས་འབྱུང་ངོ༌། །མི་ཤིགས་པར་གྲགས་པ་སྟེ་ཞེས་པ་ནི་འབའ་ཞིག་ཏུ་སྔགས་ཀྱི་ཐིག་ལེ་བརྗོད་དུ་མི་ནུས་པའི་ཕྱིར་རོ། །སངས་རྒྱས་ཀྱི་རིན་པོ་ཆེ་སྐྱེད་པས་སོ་ཞེས་པ་ནི་དེ་ལས་ཀྱང་སྤྲོ་བའི་སྦྱར་བས་སངས་རྒྱས་འབྱུང་བའི་ཕྱིར་རོ། །ཡུངས་ཀར་གྱི་འབྲུ་ཚད་ཙམ་ནི་རྗེས་སུ་འཇུག་པའི་དབྱངས་ཁོ་ནའོ། །ཐིག་ལེའི་གཟུགས་ཅན་ཡིན་པས་སོ་ཞེས་པ་ནི་རྗེས་སུ་འཇུག་པའི་དབྱངས་ཀྱི་རང་བཞིན་ཡིན་པའི་ཕྱིར་རོ། །སྙིང་གའི་པདྨའི་ལྟེ་བར་ཞེས་པ་ནི་ཐུགས་རྡོ་རྗེ་འཆང་གི་གནས་ལའོ། །དེ་ལ་ཞེན་པས་ནི་དེ་ལ་སེམས་རྩེ་གཅིག་པས་སོ། །དེ་ཉིད་ཀྱི་བཤད་པ་ནི་འཇུག་པ་དང་ལྡང་བ་དང་། གནས་པ་དང་སྡུད་པའི་རྣལ་འབྱོར་གྱིས་སོ། །ཐུགས་རྡོ་རྗེ་འཆང་གི་ཡིག་འབྲུ་འབའ་ཞིག་ཏུ་དམིགས་ལ། དེའི་ཆ་ཤས་ཉེ་བར་བསྡུ་ཞིང་སྲོག་དང་རྩོལ་བ་དང་མེ་དང་མཉམ་པའི་རླུང་གསུམ་གྱི་བྱ་བའི་མཚན་ཉིད་ཀྱིས་འགྲོ་བ་དང་འོང་བ་དང་བར་དུ་གནས་པའི་ཚུལ་གསུམ་དུ་གནས་པར་བྱའོ། །སྡུད་པའི་རྣལ་འབྱོར་ཞེས་པ་ནི་རླུང་གི་གསུམ་པོ་ཡང་སྔགས་ཀྱི་ཐིག་ལེ་དེ་ཉིད་དུ་ཕྱིན་ནས་བསྡུ་བར་བྱའོ། །སྔ་མ་བཞིན་དུ་བརྟན་པའི་རྟགས་མཐོང་བ་སྔོན་དུ་འགྲོ་བས་སྤྲོ་བར་བྱའོ་ཞེས་བྱ་བས་རྟག་པ་སྟེ་ཞེས་སྟོན་ཏེ། ཐིག་ལེ་ཉེ་བར་སྡུད་པའི་མཚན་ཉིད་ཅན་གྱི་འོད་གསལ་བའོ། །མི་ཤིགས་པ་ཞེས་པ་ནི་རྡོ་རྗེ་འཆང་གི་ས་བོན་གྱི་ཐིག་ལེའོ། །དེ་ལ་རིན་པོ་ཆེ་སྟེ་འོད་གསལ་བའོ། །དེ་རྟོགས་ཤིང་མངོན་དུ་བྱས་ལ་དེས་ཡང་དག་པར་སྦྱོར་བ་ནི་སྤྲོ་བའི་དུས་སུ་ཡང་དེ་ཉིད་དུ་ལྷག་པར་མོས་པར་བྱའོ། །འོད་ཟེར་གྱི་ཚོགས་ཞེས་པ་ལ་ཁ་དོག་ལྔ་དང་ལྡན་པའི་དཀྱིལ་འཁོར་དེ་ལས་ཡོངས་
སུ་བརྟགས་ཏེ་གཡས་པ་ལ་སོགས་པའི་དབྱེ་བས་མེའི་དཀྱིལ་འཁོར་ལ་སོགས་པའི་རིམ་གྱིས་དེ་བཞིན་གཤེགས་པའི་ཚོགས་སྤྲོ་བར་བྱའོ་ཞེས་བྱ་བའི་དོན་ཏོ། །མཐར་ཐུག་པའོ་ཞེས་པ་ནི། ཐུགས་ཀྱི་བཟླས་པའི་འོང་གསལ་བའི་དེ་ཁོ་ན་ཉིད་བསྟན་པའི་ཕྱིར་རོ། །འདིར་ནི་བསྡུས་པའི་དོན་ནི་འདི་ཡིན་ཏེ། ཞེ་སྡང་རྡོ་རྗེའི་རྣལ་འབྱོར་པས་མགོ་བོ་ལ་སོགས་པར་ཡི་གེ་གསུམ་བཀོད་ལ་འཇུག་པ་དང་ལྡང་བ་ལ་སོགས་པའི་རིམ་གྱིས་དེ་ཉིད་བཟླ་ཞིང་ཀུན་རྫོབ་ཀྱི་ཕྱོགས་འདོར་བར་བྱ་བ་ཡིན་པས་སྐུ་རྡོ་རྗེའི་ཡིག་འབྲུ་གསུང་རྡོ་རྗེའི་ས་བོན་ལ་འཇུག་ཅིང༌། དེའི་ཆ་རྣམས་ཀྱང་སྙིང་གའི་པདྨ་ལ་གནས་པའི་ཐུགས་ཀྱི་རྡོ་རྗེའི་ཡི་གེ་འབྲུའི་ཐིག་ལེ་ལ་བསྡུས་ཏེ། དེའི་ཆ་རྣམས་ཀྱང་དེ་ཉིད་དུ་ཐིམ་ལ་འོད་གསལ་བ་ཉིད་དུ་དམིགས་ནས། དེ་ལས་སྤྲོས་པའི་དཀྱིལ་འཁོར་བཞིའི་འོད་ཟེར་གྱི་སྒོ་ནས་དེ་བཞིན་གཤེགས་པའི་ཚོགས་ཀྱིས་ནམ་མཁའི་དཀྱིལ་ཁྱབ་པར་བྱས་ལ། །དེ་རྣམས་ཀྱིས་འགྲོ་བའི་དོན་བྱས་ཏེ་དེ་ཉིད་དུ་འཇུག་པར་བྱའོ་ཞེས་པ་ནི། ཞེ་སྡང་གྱི་རིགས་ཅན་གྱི་རྣལ་འབྱོར་པའི་ཕྲ་མོའི་རྣལ་འབྱོར་བསྟན་ཏོ། །དེ་ལྟར་ཕྲ་མོའི་རྣལ་འབྱོར་པ་རྣམ་པ་གསུམ་ལས་བསྐྱེད་པའི་རིམ་པ་གཙོ་བོར་གྱུར་པའི་རྣམ་པ་དྲུག་ནི་གཅིག་ཡིན་ཏེ་རིགས་དྲུག་ལས་བྱུང་བའི་ཕྱིར་རོ། །གཉིས་པ་དང་གསུམ་པ་ནི་རྫོགས་པའི་རིམ་པའི་རྣལ་འབྱོར་པ་འདོད་ཆགས་དང་ཞེ་སྡང་གི་རིགས་ཅན་དག་ལ་བསྟན་ཏོ། །གཏི་མུག་གི་རིགས་ཅན་དག་ལ་ནི་འོག་ནས་འཆད་པར་འགྱུར་རོ། །ད་ནི་སྔར་བཤད་པའི་རྣམ་པར་སྣང་མཛད་ལ་སོགས་པའི་བསྐྱེད་པའི་རིམ་པའི་ཡན་ལག་ཏུ་གྱུར་པ་རྣལ་འབྱོར་དང་རྗེས་སུ་རྣལ་འབྱོར་བསྟན་པར་བྱ་བའི་ཕྱིར་རྣམ་པར་སྣང་མཛད་ཅེས་པ་ལ་སོགས་པ་སྨོས་ཏེ། དེ་བཞིན་ཉིད་ལ་དམིགས་པ་སྔོན་དུ་འགྲོ་བས་ཞེས་པ་ནི་དོན་དམ་པའི་དཀྱིལ་འཁོར་བསྒོམ་པ་སྔོན་དུ་འགྲོ་བས་སོ། །ཟླ་བའི་དཀྱིལ་འཁོར་བསྒོམས་ལ་ཞེས་པ་ནི་ཡི་གེ་གསུམ་ཡོངས་སུ་གྱུར་པ་ལས་བསྐྱེད་པའི་པདྨ་དང་ཟླ་བ་དང་ཉི་མའི་གདན་གྱི་སྟེང་དུ་ཡི་གེ་གསུམ་བཀོད་པ་ཡོངས་སུ་གྱུར་པ་ལས་སྐྱེས་པའི་ཟླ་བའི་དཀྱིལ་འཁོར་ལ་སྔར་བཤད་པའི་པདྨ་ལ་སོགས་པ་ཐིམ་ཞིང་རོ་གཅིག་པར་བྱས་ལ་ཆོས་ཀྱི་དབྱིངས་ཀྱི་སྔགས་ཀྱིས་བརྟན་པར་བྱས་པའི་ཟླ་བའི་དཀྱིལ་འཁོར་ཞེས་བྱ་བའི་དོན་ཏོ། །
དེའི་སྟེང་དུ་འཁོར་ལོ་བསམས་ཏེ་ཞེས་པ་ནི་ཟླ་བའི་དཀྱིལ་འཁོར་དེ་ཉིད་ལ་ཡི་གེ་གསུམ་བཀོད་ཅིང་ཡི་གེ་གཉིས་ཡི་གེ་ཨོཾ་ལ་ཞུགས་ཏེ། སྤྲོ་བ་དང་བསྡུ་བ་བྱས་ལ་དེ་ཡོངས་སུ་གྱུར་པ་ལས་སྐྱེས་པའི་ཁ་དོག་དཀར་པོ་རྩིབས་བཅུ་གཉིས་པའི་འཁོར་ལོ་བསྒོམ་པར་བྱའོ་ཞེས་བྱ་བའི་དོན་ཏོ། །བསྒོམ་མོ་ཞེས་པ་ནི་འཁོར་ལོ་དེའི་ལྟེ་བའི་དབུས་སུ་ཡང་ཡི་གེ་ཨོཾ་བཀོད་ལ། སྤྲོ་བ་དང་བསྡུ་བ་བྱས་ཏེ་ཟླ་བ་དང་འཁོར་ལོ་དང་ས་བོན་ཡོངས་སུ་གྱུར་པ་ལས་བཅོམ་ལྡན་འདས་རྣམ་པར་སྣང་མཛད་བསྒོམ་པར་བྱའོ་ཞེས་བྱ་བའི་དོན་ཏོ། །དེ་བཞིན་དུ་ཞེས་བྱ་བ་ལ་སོགས་པས་དེ་བཞིན་གཤེགས་པ་བཞི་པོའི་བསྐྱེད་པའི་རིམ་པ་སྟོན་ཏོ། །སྣང་བ་མཐའ་ཡས་པའི་རྣལ་འབྱོར་པས་བགེགས་བསྐྲད་པ་ནས་བརྩམས་ཏེ་ཆོས་ཀྱི་དབྱིངས་ཀྱི་སྔགས་ཀྱི་བར་དུ་རང་གི་སེམས་ཟླ་བའི་དཀྱིལ་འཁོར་དང་འདྲ་བར་དམིགས་ལ་དེའི་སྟེང་དུ་ཡི་གེ་གསུམ་དགོད་ཅིང་ཡི་གེ་གཉིས་རང་གི་ས་བོན་ལ་ཞུགས་ཏེ། །དེ་ཡོངས་སུ་གྱུར་པ་ལས་བསྐྱེད་པའི་ཁ་དོག་དམར་པོ་པདྨ་འདབ་མ་བརྒྱད་པ་བསམས་ལ། དེའི་ལྟེ་བར་ཡང་ཡིག་འབྲུ་དེ་ཉིད་དགོད་ཅིང་ཟླ་བ་དང་པདྨ་དང་ཡིག་འབྲུ་ཡོངས་སུ་གྱུར་པ་ལས་བཅོམ་ལྡན་འདས་འོད་དཔག་ཏུ་མེད་པ་བསྒོམ་པར་བྱའོ། །རིན་ཆེན་འབྱུང་ལྡན་གྱི་རྣལ་འབྱོར་པས་བགེགས་བསྐྲད་པ་ནས་བརྩམས་ཏེ་ཆོས་ཀྱི་དབྱིངས་ཀྱི་སྔགས་ཀྱི་བར་དུ་རང་གི་སེམས་ཟླ་བའི་དཀྱིལ་འཁོར་དང་འདྲ་བར་ལྷག་པར་མོས་ལ། དེའི་སྟེང་དུ་ཡི་གེ་གསུམ་སྭ་དང་བཅས་པར་དགོད་ཅིང་ཡི་གེ་གསུམ་ཡང་རང་གི་ས་བོན་ལ་དགོད་དེ། དེ་ཡོངས་སུ་གྱུར་པ་ལས་ཁ་དོག་སེར་པོ་ཟུང་དྲུག་པའི་རིན་པོ་ཆེ་བསྒོམས་ལ། དེ་ལས་ས་བོན་དེ་ཉིད་དགོད་དེ་ཟླ་བ་དང་རིན་པོ་ཆེ་དང་ཡིག་འབྲུ་ཡོངས་སུ་གྱུར་པ་ལས་བསྐྱེད་པའི་བཅོམ་ལྡན་འདས་རིན་ཆེན་འབྱུང་ལྡན་བསྒོམ་པར་བྱའོ། །དོན་ཡོད་གྲུབ་པའི་རྣལ་འབྱོར་པས་བགེགས་བསྐྲད་པ་ནས་བརྩམས་ཏེ། ཆོས་ཀྱི་དབྱིངས་ཀྱི་སྔགས་ཀྱི་བར་དུ་རང་གི་སེམས་ཟླ་བའི་དཀྱིལ་འཁོར་དང་འདྲ་བར་བསྒོམས་ལ། ཡི་གེ་གསུམ་ཧ་དང་བཅས་པར་དགོད་དེ། ཡི་གེ་གསུམ་ཡང་རང་གི་ས་བོན་ལ་འཇུག་ཅིང་སྤྲོ་བ་དང་བསྡུ་བར་བྱས་ཏེ། དེ་ཡོངས་སུ་གྱུར་པ་ལས་བསྐྱེད་པའི་རལ་གྲི་བསྒོམས་ལ། དེའི་ཆང་ཟུང་ལ་ཡིག་འབྲུ་དེ་ཉིད་དགོད་དེ། ཟླ་བ་དང་རལ་
གྲི་དང་ས་བོན་ཡོངས་སུ་གྱུར་པ་ལས་བཅོམ་ལྡན་འདས་དོན་ཡོད་གྲུབ་པར་བསྒོམ་པར་བྱའོ། །མི་བསྐྱོད་པའི་རྣལ་འབྱོར་པས་བགེགས་བསྐྲད་པ་ནས་བརྩམས་ཏེ། ཆོས་ཀྱི་དབྱིངས་ཀྱི་སྔགས་ཀྱི་བར་དུ་རང་གི་སེམས་ཟླ་བའི་དཀྱིལ་འཁོར་དང་འདྲ་བར་བསྒོམས་ལ། དེའི་སྟེང་དུ་ཡི་གེ་གསུམ་དགོད་ཅིང་ཡི་གེ་གཉིས་ཐུགས་ཀྱི་རྡོ་རྗེའི་ས་བོན་ལ་ཞུགས་ཏེ། སྤྲོ་བ་དང་བསྡུ་བ་བྱས་ལ་དེ་ཡོངས་སུ་གྱུར་པ་ལས་བསྐྱེད་པའི་རྡོ་རྗེ་རྩེ་ལྔ་པ་རྣམ་པར་བསྒོམས་ལ། དེ་ཉིད་ཀྱི་དབུས་ཀྱི་རྩེ་མོར་ཡིག་འབྲུ་དེ་ཉིད་དགོད་ཅིང་ཟླ་བ་དང་རྡོ་རྗེ་དང་ས་བོན་ཡོངས་སུ་གྱུར་པ་ལས་བསྐྱེད་པའི་བཅོམ་ལྡན་འདས་མི་བསྐྱོད་པ་བསྒོམ་པར་བྱའོ། །དེ་ཙམ་གྱིས་དང་པོའི་སྦྱོར་བའི་ཏིང་ངེ་འཛིན་གྱི་ཕྱོགས་གཅིག་པར་གྱུར་པའི་རྣལ་འབྱོར་དང་རྗེས་སུ་རྣལ་འབྱོར་བསྟན་ཏོ། །དེ་ཡང་ཉེ་བར་མཚོན་པ་ཙམ་ཡིན་ཏེ། ཕྱག་རྒྱ་ལེགས་པར་སྦྱང་བ་སྔོན་དུ་འགྲོ་བར་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་ཡང་བསྒོམ་པར་བྱའོ། །ལས་ཀྱི་རྒྱལ་བ་མཆོག་གི་ཕྱོགས་གཅིག་ཕྲ་མོའི་རྣལ་འབྱོར་ནི་རང་གི་ཚིག་གིས་གསུངས་སོ་ཞེས་ཏིང་ངེ་འཛིན་གསུམ་གྱི་བདག་ཉིད་ཅན་གྱི་བསྐྱེད་པའི་རིམ་པ་བསྟན་པ་དང་རྫོགས་པའི་རིམ་པ་ཡང་རྡོ་རྗེ་བཟླས་པ་ལ་སོགས་པའི་དབྱེ་བའི་སྒོ་ནས་བསྟན་ཏོ། །དེ་ལྟར་རིམ་པ་གཉིས་ནི་གསལ་བར་བཤད་པ་ཡིན་ནོ། །དེ་ལྟར་པདྨ་ཡོངས་སུ་གྱུར་པ་ལས་ཞེས་པ་ནི་ཟླ་བ་དང་པདྨ་དང་ཡིག་འབྲུ་ཡོངས་སུ་གྱུར་པ་ལས་ཞེས་བྱ་བའི་དོན་ཏོ། །པདྨ་རཱ་གའི་འོད་ཅན་ནི་དབང་གི་ལས་ལ་ནུས་པའི་ཕྱིར་རོ། །ཁ་དོག་སེར་པོ་ནི་རྒྱས་པའི་ལས་ལ་ནུས་པའི་ཕྱིར་ཏེ་གསེར་བཞིན་ནོ། །སྣ་ཚོགས་རྡོ་རྗེ་ནི་སྒྲ་ཇི་བཞིན་མ་ཡིན་པས་རལ་གྲི་འམ་རང་གི་གཟུགས་སོ། །ནམ་མཁའ་དང་འདྲ་བ་དེར་གནས་པ་ནི་ཞེས་པ་ནི་དེའི་ཁ་དོག་དང་ལྡན་པའོ། །ནམ་མཁའ་ལྟར་སྔོ་བསངས་ཞེས་བྱ་བའི་དོན་ཏོ་ཞེས་པ་ནི་དེ་ཉིད་ཀྱི་བཤད་པའོ། །སྐུ་དང་གསུང་དང་ཐུགས་སྒྲུབ་པས་མཚོན་པའི་ཞེས་པ་ནི་སྐུ་གསུང་ཐུགས་རྡོ་རྗེའི་ནང་ནས་ཐུགས་རྡོ་རྗེ་ཉིད་གཙོ་བོ་ཡིན་ཏེ། ལུས་དང་ངག་གི་རྩ་བ་དེ་ཡིན་པའི་ཕྱིར་རོ། །དེ་བས་ན་སྐུ་གསུང་ཐུགས་ཀྱི་སྒྲུབ་པ་ནི་དེ་བསྐྱེད་པ་ནི་རྒྱུར་གྱུར་པ་ཡི་གེ་གསུམ་མོ། །དེས་མཚོན་པ་ནི་ཐུགས་རྡོ་རྗེ་འཆང་ཉིད་དེ་འོད་གསལ་བའི་རང་བཞིན་གྱི་ཐུགས་ལ་ཡི་གེ་གསུམ་
བྱུང་བའི་ཕྱིར་རོ། །དེ་དང་འདྲ་བ་བཅོམ་ལྡན་འདས་ནི་མི་བསྐྱོད་པའོ། །དེའི་རྡོ་རྗེ་ལས་བྱུང་བའོ་ཞེས་པ་ནི་ཟླ་བ་དང་རྡོ་རྗེ་དང་ཡིག་འབྲུ་དང་དེའི་བདག་ཉིད་ཀྱི་ང་རྒྱལ་ལས་བསྐྱེད་པ་ཞེས་བྱ་བའི་ཐ་ཚིག་གོ །ཐམས་ཅད་མཁྱེན་པ་ཉིད་ནི་ཞེས་པ་ལ་རང་གི་གོ་འཕང་ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་མེ་ལོང་ལྟ་བུའི་ཡེ་ཤེས་ལ་སོགས་པའོ། །སེམས་ཅན་རྣམས་དམིགས་ཤིང་ཞེས་པ་ནི་སེམས་ཅན་རྣམས་ལ་སྟེར་བར་བྱེད་པ་བཅོམ་ལྡན་འདས་རྣམ་པར་སྣང་མཛད་ལ་སོགས་པ་རྣམས་སོ། །ངང་ཚུལ་གང་ལ་ཡོད་པ་དེ་ལ་དེ་སྐད་ཅེས་བྱའོ་ཞེས་པ་ནི་ཉེ་བར་བསྡུ་བའི་སྒོ་ནས་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་བསྟན་ཏེ་དེ་ནི་སེམས་ཅན་གྱི་དོན་བྱེད་པའི་ངོ་བོ་ཡིན་པའི་ཕྱིར་རོ། །རྡོ་རྗེ་ནི་དེ་བཞིན་གཤེགས་པ་རྣམས་སོ་ཞེས་པ་ནི་རྡོ་རྗེ་ལྟར་མི་ཕྱེད་པའི་ཡེ་ཤེས་དང་ལྡན་པའོ། །འདུས་པ་མཛད་པ་ཞེས་པ་ནི་དེ་བཞིན་གཤེགས་པ་ལྔའི་བདག་པོ་ཉིད་ཀྱིས་སོ། །དེ་རྣམས་ཀྱི་རེ་རེ་ལ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར་རོ། །དེ་ལྟར་དཀྱིལ་འཁོར་སུམ་ཅུ་རྩ་གཉིས་ནི་ལྷ་སུམ་ཅུ་རྩ་གཉིས་ཀྱི་བདག་ཉིད་བསྡུས་པར་མཛད་པའོ། །དྲང་བའི་དོན་ནི་བསྐྱེད་པའི་རིམ་པ་བསྟན་པའི་ཕྱིར་རོ། །གཏི་མུག་གི་རིགས་ཅན་གྱི་རྣལ་འབྱོར་པའི་ཕྲ་མོའི་རྣལ་འབྱོར་བསྟན་པར་བྱ་བའི་ཕྱིར་འོད་གསལ་བའོ་ཞེས་སྨོས་པ་ལ། །ལུས་རྣམ་པར་དབེན་པའི་མཐར་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་འོད་གསལ་བའི་དེ་ཁོ་ན་ཉིད་ཅེས་བྱ་བའི་ཐ་ཚིག་གོ །དེའི་དབུས་སུ་གནས་པའི་ཟླ་བའི་དཀྱིལ་འཁོར་དེ་མི་ཤིགས་པའོ་ཞེས་པ་ནི་ཟླ་བའི་དཀྱིལ་འཁོར་ལྟར་འབར་བར་འགྱུར་བའི་དབྱངས་ཀྱི་ཡི་གེ་དང་པོ་མི་ཤིགས་པ་ཞེས་བྱའོ།། རབ་དུ་བྱེད་པ་ལས་ཀྱང༌། ཐུང་དུ་ལུས་ངག་ཡིན་ཏེ། །གཅིག་མིན་དུ་མ་མ་ཡིན་ནོ། །ཞེས་འབྱུང་ངོ༌། །རྡོ་རྗེ་དཀྱིལ་འཁོར་གྱི་རྒྱན་ལས། འབར་ཞིང་མར་མེ་དང་མཚུངས་པའི། །སྙིང་གའི་དབུས་ན་མི་ཤིགས་པ། །མི་འགྱུར་པདྨ་ཕྲ་བ་སྟེ། །ཨ་ཡིག་གཙོ་བོ་མཆོག་ཡིན་ནོ། །ཞེས་འབྱུང་ངོ་། །སྒྱུ་འཕྲུལ་དྲ་བ་ལས་ཀྱང༌། །ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། ཅེས་འབྱུང་ངོ༌། །མི་ཤིགས་པ་ལ་ངེས་པར་འབྱུང་བའི་
ཞེས་པ་ནི་ཆོས་ཀྱི་དབྱིངས་ཀྱི་འཁོར་ལོ་རྩིབས་བརྒྱད་པའི་ཡི་གེ་ཨ་ལས་འབྱུང་ཞིང་དེའི་སྤྲུལ་པ་ལས་བསྐྱེད་པའོ། །ཆུའི་དཀྱིལ་འཁོར་ཏེ་མི་བསྐྱོད་པའི་ངོ་བོ་ཉིད་ཁ་དོག་དཀར་བ་ནི་ཞེས་པ་ལ་སྙིང་གར་གནས་པའི་ཕྱིར་དང༌། ཆུའི་ཁམས་ཁ་དོག་དཀར་བའི་ཕྱིར་དང༌། ཞི་བའི་ལས་ལ་བརྩོན་པའི་ཕྱིར་རོ། །དལ་བར་རྒྱུ་བའི་ཕྱིར་རོ་ཞེས་པ་ནི་རླུང་གི་དཀྱིལ་འཁོར་བཞིན་དུ་ཆུ་ནི་དྲག་པར་རྒྱུ་བ་མ་ཡིན་ཏེ། འོན་ཀྱང་རང་བཞིན་གྱི་ཆུའི་ཁམས་དལ་བར་རྒྱུ་བ་སྟེ། སྟེང་དང་འོག་གི་གནས་ཀྱི་འབྲེལ་པས་དེ་རྣམས་ཀྱི་མྱུར་བ་དང་དམན་པ་དང་བར་མ་རྒྱུ་བ་ཡིན་ཏེ། ཆུ་བོ་དང་རྒྱ་མཚོ་ལ་སོགས་པ་བཞིན་ནོ། །མེའི་དཀྱིལ་འཁོར་ཁ་དོག་དམར་པོའོ་ཞེས་པ་ལ་དེ་ཉིད་ཀྱི་རང་བཞིན་ལས་བྱུང་བ་གྲུ་གསུམ་པ་ལྐོག་མར་གནས་པའོ། །གཡས་ནས་འབྱུང་བ་ཞེས་པ་ནི་སྣ་ཁུང་གཡས་པ་ལས་འབྱུང་བའོ། །མེའི་དཀྱིལ་འཁོར་གྱི་རང་གི་ཁ་དོག་ནི་དམར་པོ་ཉིད་དོ་།དབང་ཆེན་གྱི་དཀྱིལ་འཁོར་ཞེས་པ་ནི་སའི་དཀྱིལ་འཁོར་ཏེ། །དེ་ཉིད་ཀྱང་ཡི་གེ་ལཾ་ལས་བྱུང་བ་གསང་བའི་གནས་སུ་གྲུ་བཞི་པར་གནས་པའོ། །གཉི་ག་ལས་འབྱུང་བར་ཞེས་པ་ནི་སྣ་ཁུང་གཉི་ག་ལས་འབྱུང་ངོ༌། །སའི་དཀྱིལ་འཁོར་ཁ་དོག་སེར་པོ་སྟེ་གསེར་གྱི་རང་བཞིན་ཡིན་པའི་ཕྱིར་རོ། །དེ་ཡང་དལ་བུས་དམན་པར་རྒྱུ་བ་ཡིན་ཏེ་ས་གཞི་ནི་སྣོད་ཀྱི་འཇིག་རྟེན་ཡིན་པས་བརྟན་པའི་ཕྱིར་རོ། །རླུང་གི་དཀྱིལ་འཁོར་ཏེ་ཞེས་པ་ནི་དེ་ཉིད་ཀྱི་ཡི་གེ་ཡཾ་ལས་བྱུང་བ་གཞུའི་དབྱིབས་ཅན་ལྟེ་བར་གནས་པའོ། །ཁ་དོག་ནག་པོ་ཞེས་པ་རླུང་ནི་ངོ་བོ་ཉིད་ཀྱིས་ཁ་དོག་སྔོ་བ་ཡིན་པས་སོ། །གཡོན་ནས་རྒྱུ་བ་ཡིན་པར་ཞེས་པ་ནི་སྣ་ཁུང་གཡོན་པ་ལས་རྒྱུ་བའོ། །ཡིན་པར་ཤེས་པར་བྱ་སྟེ་ཞེས་པ་ནི་བསམ་པར་བྱའོ། །དེ་རྣམས་ནི་དེ་བཞིན་གཤེགས་པའི་ངོ་བོ་ཉིད་འོད་ཟེར་བཞིའི་རབ་ཏུ་རྒྱུ་བ་ཞེས་པ་ནི་མི་བསྐྱོད་པ་ལ་སོགས་པའི་ངོ་བོ་ཉིད་དོ། །དེ་ནི་ཉེ་བར་མཚོན་པ་ཙམ་ཡིན་ཏེ། གོས་དཀར་མོ་ལ་སོགས་པ་ལྷ་མོ་བཞིའི་རང་བཞིན་དང༌། ས་ལ་སོགས་པའི་ཁམས་བཞི་དང༌། ཞི་བ་ལ་སོགས་པ་ཕྲིན་ལས་བཞི་དང༌། དཀར་པོ་ལ་སོགས་པ་འོད་ཟེར་འབྱུང་བ། གཡས་དང་གཡོན་དང་གཉི་ག་དང་དལ་བུས་རྒྱུ་བ་དང༌། ཝ་ལ་སོགས་པའི་ཡི་གེ་ལས་བྱུང་བ་དང་གྲུ་
གསུམ་དང་ཟླུམ་པོ་དང་གཞུའི་དབྱིབས་དང་གྲུ་བཞི་དང་ཁ་དོག་དམར་པོ་ལ་སོགས་པ་དང་ལྡན་པར་ཤེས་པར་བྱའོ། །བཤད་པ་ཡིན་ནོ་ཞེས་པ་ནི་སྡུད་པ་པོས་བཤད་པའོ། །སྐུ་ལ་སོགས་པ་བསྐྱེད་པས་ན། །ཞེས་པ་ནི་འ་ཇིག་རྟེན་ལས་འདས་པའི་ཡེ་ཤེས་ཀྱི་སྐུའི་རང་བཞིན་གྱི་སྐུ་གསུང་ཐུགས་རྫོགས་པར་བྱེད་པ་ཞེས་བྱ་བའི་ཐ་ཚིག་གོ །དེ་ཉིད་བསྟན་པར་བྱ་བའི་ཕྱིར་འོད་གསལ་བ་ལས་བཞེངས་ཏེ་ཞེས་སྨོས་ཏེ། རིམ་པ་བཞི་པས་ཐོབ་པའི་དེ་ཁོ་ན་ཉིད་ལས་འབྱུང་བའོ། །བདེན་པ་གཉིས་ཀྱི་བདག་ཉིད་ཅན་གྱི་ཞེས་པ་ནི་མི་གནས་པའི་མྱ་ངན་ལས་འདས་པའི་དབྱིངས་ཀྱི་རང་བཞིན་ནོ། །ལྷའི་དཀྱིལ་འཁོར་ཡིན་པར་ཤེས་པར་བྱའོ་ཞེས་པ་ནི་མི་བསྐྱོད་པ་ལ་སོགས་པ་དེ་བཞིན་གཤེགས་པའི་ཚོགས་བསྒོམ་པར་བྱའོ། །ཐམས་ཅད་མཁྱེན་པའི་གོ་འཕང་ཐོབ་པར་འདོད་པའི་ཞེས་པ་ནི་རྣལ་འབྱོར་པས་ཞེས་ཚིག་ལྷག་མའོ། །དེ་ནི་བྱེད་པའི་དྲུག་པ་ཡིན་ནོ། །དགོངས་པ་ནི་འདི་ཡིན་ཏེ། རེ་ཞིག་དང་པོའི་རྣལ་འབྱོར་པས་ཅིག་ཅར་དུ་ཡེ་ཤེས་ཀྱི་སྐུ་དམིགས་ལ། ལྟེ་བའི་ཕྱོགས་སུ་རྩིབས་བརྒྱད་པའི་ཆོས་ཀྱི་དབྱིངས་ཀྱི་འཁོར་ལོའི་ཡི་གེ་ལས་ཡ་ར་ལ་ཝ་སྤྲུལ་ཏེ། དེ་དག་ཡོངས་སུ་གྱུར་པ་ལས་ལྐོག་མ་ལ་སོགས་པའི་གནས་བཞི་ལས་གྲུ་གསུམ་དང་ཟླུམ་པོ་དང་ཟླ་གམ་གྲུ་བཞི་པའི་མེ་དང་ཆུ་དང་རླུང་དང་སའི་དཀྱིལ་འཁོར་རྣམས་བསྒོམས་ལ། །དེ་རྣམས་རེ་རེ་ལ་ཡི་གེ་གསུམ་དམིགས་པ་སྔོན་དུ་འགྲོ་བར་འཇུག་པ་ལ་སོགས་པ་གསུམ་གྱི་རིམ་པས་བཟླས་པར་བྱ་སྟེ། དེ་ལས་བྱུང་བའི་འོད་ཟེར་གྱི་འཁོར་ལོས་ཕྲ་མོའི་རྣལ་འབྱོར་བསླབ་པར་བྱའོ། །དེའི་རིམ་པ་ནི་མེའི་དཀྱིལ་འཁོར་ལ་ཁ་དོག་དམར་པོ་འོད་ཟེར་སྣ་ཁུང་གཡས་པ་ལས་འབྱུང་ཞིང་གདོང་གི་སྣ་རྩེར་ཐུན་ཕྱེད་ཕྱེད་ཀྱི་དུས་སུ་ཟིན་ན་དེའི་ཚེ་རྣལ་འབྱོར་པས་འབད་རྩོལ་མེད་པར་དབང་གི་ལས་འགྲུབ་པར་འགྱུར་རོ། །དེ་བཞིན་དུ་རླུང་གི་དཀྱིལ་འཁོར་ལས་ཁ་དོག་ལྗང་སེར་སྣ་བུག་གཡོན་པ་ནས་འབྱུང་ཞིང་གདོང་གི་སྣ་རྩེར་ཐུན་ཕྱེད་ཕྱེད་ཀྱི་དུས་སུ་ཟིན་ན་དེའི་ཚེ་རྣལ་འབྱོར་པས་འབད་རྩོལ་མེད་པར་དགུག་པ་དང་མངོན་སྤྱོད་དག་གྲུབ་པོ། །དེ་བཞིན་དུ་སའི་དཀྱིལ་འཁོར་
ཁ་དོག་སེར་པོ་སྣ་ཁུང་གཉིས་ཀ་ལས་འབྱུང་ཞིང་གདོང་གི་སྣ་རྩེར་ཐུན་ཕྱེད་ཕྱེད་ཀྱི་དུས་སུ་ཟིན་ན། དེའི་ཚེ་རྣལ་འབྱོར་པས་འབད་རྩོལ་མེད་པར་རྒྱས་པའི་ལས་གྲུབ་བོ། །དེ་བཞིན་དུ་ཆུའི་དཀྱིལ་འཁོར་ལས་གཉི་ག་ལས་བྱུང་བའི་ཁ་དོག་དཀར་པོ་འོད་ཟེར་འབྱུང་ཞིང་གདོང་གི་སྣ་རྩེར་ཐུན་ཕྱེད་ཕྱེད་ཀྱི་དུས་སུ་ཟིན་ན། དེའི་ཚེ་རྣལ་འབྱོར་པས་འབད་རྩོལ་མེད་པར་ཞི་བའི་ལས་གྲུབ་བོ། །འོད་ཟེར་གྱི་ཐིག་ལེ་དེ་ལས་སྔ་མ་བཞིན་དུ་བརྟན་པའི་རྟགས་མཐོང་བ་སྔོན་དུ་འགྲོ་བར་འོད་ཟེར་དང་ཕྱག་མཚན་དང་དེ་བཞིན་གཤེགས་པའི་ཕྱག་རྒྱ་ཆེན་པོ་སྤྲོ་ཞིང་སླར་ཡང་དཀྱིལ་འཁོར་དེ་ཉིད་དུ་འཇུག་པ་ནི། །གཏི་མུག་གི་རིགས་ཅན་གྱི་རྣལ་འབྱོར་པའི་ཕྲ་མོའི་རྣལ་འབྱོར་བསྒོམ་པའོ། །འདི་དང་སྔ་མ་གཉིས་བསྡུས་ཏེ་རྫོགས་པའི་རིམ་པའི་རྣལ་འབྱོར་པའི་སྐུ་རྡོ་རྗེ་ལ་སོགས་པའི་དབྱེ་བས་ཕྲ་མོའི་རྣལ་འབྱོར་རྣམ་པ་གསུམ་བསྟན་ཏོ། །རིན་ཆེན་འབྱུང་ལྡན་དང་དོན་ཡོད་གྲུབ་པའི་རྣལ་འབྱོར་པ་དག་གིས་ཀྱང༌། །སྨིན་མཚམས་དང་ལྟེ་བའི་དབུས་སུ་ཐིག་ལེ་ཙམ་བསྒོམ་པར་བྱའོ། །དེ་ལ་གསང་བའི་གནས་ཀྱི་བྱང་ཆུབ་ཀྱི་སེམས་ཀྱི་ཐིག་ལེ་གང་ཡིན་བ་དེ་ཉིད་ཐུར་དུ་སེལ་བའི་རླུང་བཟློག་ནས་གྱེན་དུ་འདྲེན་པར་བསྒོམ་པར་བྱའོ་ཞེས་བླ་མའི་མན་ངག་གོ །ཡང་ན་སྐུའི་རིགས་ལ་སོགས་པ་ལ་བསྡུས་པའི་ཕྱིར་ལོགས་སུ་བསྒོམ་པར་མི་བྱ་སྟེ། གང་གི་ཕྱིར་རིན་ཆེན་འབྱུང་ལྡན་ནི་ང་རྒྱལ་གྱི་རང་བཞིན་ནོ། །ང་རྒྱལ་ཡང་གཏི་མུག་ལས་འབྱུང་བའམ་ཞེ་སྡང་ལས་བྱུང་བའོ། །དེ་ལ་གཏི་མུག་ལས་འབྱུང་ན་རྣམ་པར་སྣང་མཛད་ཀྱི་རིགས་ལ་བསྡུའོ། །ཞེ་སྡང་ལས་འབྱུང་ན་མི་བསྐྱོད་པའི་རིགས་ལ་བསྡུའོ། །དོན་ཡོད་གྲུབ་པ་ཡང་ཕྲག་དོག་གི་རང་བཞིན་ཏེ་ཕྲག་དོག་ཀྱང་ཞེ་སྡང་ལས་འབྱུང་བས་ན་ཐུགས་རྡོ་རྗེའི་རིགས་ཀྱི་ནང་དུ་བསྡུའོ། །དེའི་ཕྱིར་རྣམ་པར་སྣང་མཛད་དང་མི་བསྐྱོད་པ་དག་གི་ཕྲ་མོའི་རྣལ་འབྱོར་གྱི་བསྒོམ་པ་གང་ཡིན་པ་དེ་དག་ནི་དེ་ཉིད་རིན་པོ་ཆེ་དང་དོན་ཡོད་གྲུབ་པའི་རྣལ་འབྱོར་པས་བསྒོམ་པར་བྱ་ཞེས་གུད་ནས་བཤད་པར་མི་བྱའོ། །དེ་ཉིད་ཀྱི་ཕྱིར་རྒྱུད་ཕྱི་མ་ལས་ཀྱང༌། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་བྱ་མངོན་པར་བཤད། །རིགས་ནི་རྣམ་པ་
བརྒྱར་བཤད་དེ། །མདོར་བསྡུས་པས་ནི་རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིས། །གསུམ་དུ་ཡང་ནི་བསྟན་པ་ཡིན། །ཞེས་འབྱུང་ངོ༌། །རྡོ་རྗེའི་བདག་ཉིད་ཅན་གྱི་ཚོགས་ཏེ་ཞེས་བྱ་བ་ནི་ཉེ་བར་བསྡུས་པའོ། །ཡོངས་སུ་རྫོགས་པའི་ལྷའི་སྐུ་ཡིན་ལ་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་ཡེ་ཤེས་ཀྱི་སྐུ་བསྐྱེད་པ་ཞེས་བྱ་བའི་དོན་ཏོ། །དེའི་དོན་སྟོན་པའི་ལེའུ་ལ་ཡང་དེ་སྐད་ཅེས་བྱའོ་ཞེས་པ་ནི། དེའི་དོན་སོ་སོར་སྟོན་པའི་ཚིག་གི་ཚོགས་ནི་ལེའུ་ཞེས་བྱའོ། །བཤད་པའི་རྒྱུད་ནི་ཞེས་པ་ལ། །དགོངས་པ་ལུང་བསྟན་པ་འདུས་པའི་བཤད་པའི་རྒྱུད་ལས་སོ། །གསལ་བར་སྟོན་པ་ཞེས་པ་ནི་ཐེ་ཚོམ་མེད་པའོ། །དེ་འདིར་འཇུག་པར་བྱ་སྟེ་ཞེས་པ་ནི་འགྲེལ་པ་འདིར་ཡང་བསྟན་པར་བྱའོ། །ཐོག་མཐའ་མེད་པ་ཞེས་པ་ནི། ཐོག་མ་དང་ཐ་མའི་སྐད་ཅིག་མ་དང་བྲལ་བའོ། །དེ་ལ་ཐོག་མ་ནི་སྣང་བ་དང་སྣང་བ་མཆེད་པ་དག་གོ །ཐ་མ་ནི་སྣང་བ་ཉེ་བར་ཐོབ་པའོ། །དེ་མེད་པ་ནི་ཐོག་མ་དང་ཐ་མ་མེད་པའོ། །རྣལ་འབྱོར་ཞེས་པ་ནི་ཐབས་དང་ཤེས་རབ་ཡང་དག་པར་སྦྱོར་བས་ཐོབ་པར་བྱ་བ་སྟེ་རྒྱུ་ལ་འབྲས་བུའི་མིང་བཏགས་པའི་ཕྱིར་རོ། །ཕྲ་མོ་ནི་ཞེས་པ་ལ་རྣལ་འབྱོར་གྱི་མངོན་སུམ་གྱི་ཚད་མས་ལྷག་པར་རྟོགས་པར་བྱ་བ་ཏིང་ངེ་འཛིན་གྱི་ཁྱད་པར་གྱིས་ཐོབ་པས་ཏེ་སངས་རྒྱས་ཀྱི་སྤྱོད་ཡུལ་ཡིན་པའི་ཕྱིར་རོ། །ཕྲ་བར་གཟིགས་པའི་སངས་རྒྱས་ཀྱིས། །ཕྲ་ཕྱིར་རང་གི་རིག་པ་ཡིན། །རང་བཞིན་གནས་ཀྱང་བདག་འདྲ་བའི། །བློ་རགས་པ་ནི་མ་མཐོང་ངོ༌། །ཞེས་འབྱུང་ངོ༌། །དབྱིག་གཉེན་གྱི་ཞལ་སྔ་ནས་ཀྱིས་ཀྱང༌། །རྣམ་རིག་ཙམ་ནི་གྲུབ་པ་སྟེ།། རང་ནུས་འདྲ་བ་བདག་གིས་ནི། །བྱས་པ་ཐམས་ཅད་བསམ་མི་ཁྱབ། །སངས་རྒྱས་རྣམས་ཀྱི་སྤྱོད་ཡུལ་ཡིན། །ཞེས་འབྱུང་ངོ༌། །དེ་ལྟ་བུའི་འོད་གསལ་བའི་དེ་ཁོ་ན་ཉིད་དབྱངས་ཀྱི་ཡི་གེ་དང་པོ་གཟོད་མ་ནས་མ་སྐྱེས་པའི་ཡེ་ཤེས་ཀྱི་རང་བཞིན་གྱིས་མཚོན་པར་བྱ་བ་སྟེ། ཉེ་བར་བརྟགས་པས་ཡི་གེ་ཨ་ཡང་ཕྲ་མོའི་སྒྲས་བསྟན་ཏོ། །དེ་ཡང་ཇི་ལྟ་བུ་ཡིན་ཞེ་ན། མི་གསལ་བ་ཞེས་པ་ནི་སྤྲོས་པ་ཐམས་ཅད་དང་བྲལ་བས་སོ། །གསལ་བར་ཡང་དག་སྦྱོར་ཞེས་པ་ནི་དེ་ལས་དཀྱིལ་འཁོར་བཞི་ཕྱུང་བའི་ཕྱིར་རོ། །དངོས་མེད་ཅེས་པ་ནི་གཟོད་མ་ནས་མ་སྐྱེས་པའོ། །ངོ་བོ་ཉིད་དུ་བྱུང་ཞེས་པ་ནི་འོད་གསལ་
བ་ལས་བྱུང་བའོ། །ཨ་ཡིག་ཆོས་ཀུན་སྒོ་ཡིན་ཏེ། །གཟོད་མ་ནས་མ་སྐྱེས་པའི་ཕྱིར་ཞེས་འབྱུང་ངོ༌། །རང་བཞིན་གྱིས་གྲུབ་པ་ཞེས་པ་ནི། ཆོས་ཉིད་ཀྱི་ངོ་བོ་ཡིན་པས་སོ། །དང་པོ་ཞེས་པ་ནི་ཆོས་ཐམས་ཅད་ཀྱི་གཙོ་བོར་གྱུར་པའམ། ཨཱ་ལི་དང་ཀཱ་ལིར་ཐོག་མར་དམིགས་པའི་ཕྱིར་རོ། །གཅིག་ནི་སྡེ་ཚན་བརྒྱད་སྡུད་པར་བྱེད་པའི་དངོས་པོའི་ཡི་གེ་བརྒྱད། །དེ་སྡུད་པར་བྱེད་པའི་ཡི་གེ་བཞི་ཡོངས་སུ་གྱུར་པ་ལས་ཡི་གེ་གསུམ་སྡུད་པར་བྱེད་པའི་རང་བཞིན་ཡིན་པའི་ཕྱིར་རོ། །ཇི་སྐད་དུ། དང་པོ་གཅིག་ནི་དགུ་དབུས་ན། །གང་ཞིག་བཅུ་ཡིས་མ་བཅིངས་པ། །དེ་ནི་བཅིངས་མེད་ཅེས་བྱ་སྟེ། །ཡེ་ཤེས་པ་ནི་མཆོག་གི་གནས། །དབྱངས་དང་གསལ་བྱེད་ཡི་གེ་སྟེ། །གྲངས་དགུ་ཡི་ནི་རྗེས་འཇུག་པ། །ཨས་བཅིངས་ཕན་ཚུན་ཡང་དག་སྦྱོར། །གང་གིས་ཤེས་ཏེ་འགྲོ་བའི་བླ། །འབྱུང་བའི་མཐའ་དང་ཡང་དག་ལྡན། །ཆ་ལ་སོགས་པ་བཅུ་དྲུག་གནས། །ལྔ་པ་ལྔ་དང་ཡང་དག་ལྡན། །བཞི་ནི་གསུམ་དུ་ངེས་པར་སྦྱར། །ཡི་གེ་ཨོཾ་བཅས་རིང་པོར་བཅས། །ཡོན་ཏན་སྦྱོར་སོགས་ཕྱིས་དང་མཚུངས། །ཐུང་དུ་མ་ལུས་ངག་ཏུ་འགྱུར། །གཅིག་མིན་དུ་མ་མ་ཡིན་ནོ། །ཡི་གེ་གང་ཞིག་སྔར་བཤད་དང༌། །གང་ཡང་མངོན་པར་ཕྱོགས་པ་རྣམས། །སྐྱེས་པ་བུད་མེད་མ་ནིང་དང༌། །ཁམས་ལ་སོགས་པ་ཡོངས་སུ་བརྟགས། །སྟེང་དང་འོག་ཏུ་བཅས་པར་ནི། །ཤེས་ནས་བློ་ནི་ངེས་པར་སྦྱར། །བརྗོད་པ་ཡི་ནི་སྔགས་འདི་དག །དངོས་མེད་ངོ་བོ་ཉིད་དུ་འབྱུང༌། །ཞེས་གསུངས་སོ། །གཅིག་དང་དུ་མ་རྣམས་སྤངས་པ། །ཞེས་པ་ནི་ཡི་གེ་ཕྱི་མོ་ཐམས་ཅད་དེ་ཉིད་ཀྱི་ནང་དུ་བསྡུས་པའི་ཕྱིར་དང༌། །དེ་ཉིད་ལ་ངག་གི་སྤྲོས་པ་ཐམས་ཅད་འབྱུང་བའི་ཕྱིར་རོ། །རྟེན་ཅིང་འབྲེལ་འབྱུང་ཆོས་སུ་གྲགས། །ཞེས་པ་ནི་རྟེན་ཅིང་འབྲེལ་པར་འབྱུང་བའི་རང་བཞིན་གྱིས་ལས་དང༌། ཉོན་མོངས་པ་དང༌། སྐྱེ་བའི་ངོ་བོ་སྲིད་པ་གསུམ་གྱི་བདག་ཉིད་ཅན་གྱི་འཁོར་བའི་འཁོར་ལོའི་ཆོས་ཉིད་ཡིན་ཏེ། དེ་དག་སྟོང་པ་ཡིན་པའི་ཕྱིར་རོ། །དེ་བཞིན་དུ། དངོས་པོ་ཀུན་གྱི་འབྱུང་གནས་གཅིག །ཅེས་པ་ནི་སེམས་ཅན་དང་སྣོད་ཀྱི་འཇིག་རྟེན་ཞེས་བྱ་བའི་འབྱུང་བའི་གནས་གཅིག་གོ །གང་ལས་འབྱུང་བ་ནི་འབྱུང་གནས་ཏེ་སྐྱེད་པའི་རྒྱུའོ། །དེ་ལ་ཁམས་གསུམ་ཐམས་ཅད་བསྐྱེད་པའོ། །བརྗོད་
པ་ཀུན་གྱི་རྒྱུ་ཡི་མཆོག །ཅེས་འབྱུང་བའི་ཕྱིར་རོ། །སྲིད་པ་གསུམ་པོ་འདི་དག་ནི། །མ་ལུས་མུན་པ་ལྟར་འགྱུར་ཏེ། །གལ་ཏེ་སྒྲ་ཞེས་སྒྲོན་མ་ཡིས། །ཐ་སྙད་འདི་དག་མི་གསལ་ན། །ཞེས་འབྱུང་བས་སོ། །བདག་ཉིད་འདི་ལྟར་བྱས་ན་ནི། །ཞེས་པ་ལ་འོད་གསལ་བ་གཅིག་པུ་ལས་འབྱུང་བའི་ཡི་གེ་ཨའི་རང་བཞིན་དུ་བྱས་ནས་སོ། །ཆོས་ཀྱི་དཀྱིལ་འཁོར་བྲི་བར་བྱ། །ཞེས་པ་ནི་ཆོས་ཀྱི་དེ་བཞིན་གཤེགས་པ་བཞི་པོའི་དཀྱིལ་འཁོར་ནི་མེ་ལ་སོགས་པའི་དཀྱིལ་འཁོར་བཞི་ཞེས་བྱ་བའི་དོན་ཏོ། །དཀྱིལ་འཁོར་ཞེས་བྱ་བ་ནི་རིགས་ཀྱི་དོན་དུ་ཚིག་གཅིག་དང་སྦྱར་རོ། །དེ་རྣམས་ཀྱི་ཁ་དོག་བཤད་པའི་ཕྱིར་དམར་པོ་ཞེས་བྱ་བ་ལ་སོགས་པ་སྨོས་ཏེ། དམར་པོ་ནི་མེའི་དཀྱིལ་འཁོར་ཏེ་ལྐོག་མར་རོ། །ནག་པོ་ནི་རླུང་དཀྱིལ་འཁོར་ཏེ་ལྟེ་བར་རོ། །སེར་པོ་ནི་སའི་དཀྱིལ་འཁོར་ཏེ་གསང་བར་རོ། །དཀར་པོ་ནི་ཆུའི་དཀྱིལ་འཁོར་ཏེ་སྙིང་གར་རོ། །མདོར་བསྡུས་པ་ནི་འབྱུང་བ་ཆེན་པོ་བཞིའི་ངོ་བོ་ཡིན་པས་སོ། །བཞི་བཞི་ཡི་ནི་སྦྱོར་བ་ཡིས། །ཞེས་པ་ནི་དཀྱིལ་འཁོར་རེ་རེ་ལ་ཡང་ཆ་བཞིས་ཁྱབ་པའི་ཕྱིར་རོ། །དེ་ལ་ལྐོག་མའི་དཀྱིལ་འཁོར་མེའི་ཁམས་ཀྱི་ངོ་བོ་ཡང་ས་དང་ཆུ་དང་རླུང་གི་ཁམས་ཀྱི་ཆས་ཁྱབ་པའོ། །སྙིང་གའི་དཀྱིལ་འཁོར་ཆུའི་ཁམས་ཀྱི་ངོ་བོ་ཡང་ས་དང་མེ་དང་རླུང་གི་ཁམས་ཀྱི་ཆས་ཁྱབ་པའོ། །ལྟེ་བའི་དཀྱིལ་འཁོར་རླུང་གི་རང་བཞིན་ཡང་ས་དང་མེ་དང་ཆུའི་ཁམས་ཀྱི་ཆས་ཁྱབ་པའོ། །གསང་བའི་དཀྱིལ་འཁོར་སའི་རང་བཞིན་ཡང་ཆུ་དང་མེ་དང་རླུང་གི་ཁམས་ཀྱི་ཆས་ཁྱབ་པའོ། །ས་ལ་སོགས་པ་འབྱུང་བ་ཆེན་པོ་རྣམས་ནི་ཕན་ཚུན་མེད་པར་མི་འབྱུང་བའི་འབྲེལ་པ་དང་ལྡན་པ་ཡིན་ཏེ། བྱས་པ་དང་མི་རྟག་པ་བཞིན་ནོ། །གོས་དཀར་ལ་སོགས་ལེགས་པར་བྲི། །ཞེས་པ་ནི་སྣང་བ་མཐའ་ཡས་ལ་སོགས་པའི་དེ་བཞིན་གཤེགས་པ་བཞི་པོའི་བཙུན་མོ་ཁམས་བཞིར་བྱིན་གྱིས་བརླབ་པ་ཞེས་བྱ་བའི་དོན་ཏོ། །ས་ནི་སྤྱན་མ་ཞེས་པ་སྟེ། །ཆུ་ཡི་ཁམས་ནི་མཱ་མ་ཀཱི། །གོས་དཀར་མ་ནི་མེར་བཤད་པ། །རླུང་ནི་སྒྲོལ་མར་རབ་ཏུ་གྲགས། །ཞེས་འབྱུང་ངོ༌། །དེ་ཡི་དབུས་སུ་རང་གི་ལྷ། །ཞེས་པ་ནི་དཀྱིལ་འཁོར་བཞི་པོའི་ནང་ན་རང་གི་ལྟ་སྟེ་འོད་དཔག་ཏུ་མེད་པ་དང་མི་བསྐྱོད་པ་དང་དོན་ཡོད་གྲུབ་པ་དང༌། རིན་ཆེན་འབྱུང་
ལྡན་གྱི་བྱིན་གྱིས་བརླབས་པར་ཤེས་པར་བྱ་སྟེ། འདིར་ནི་པདྨའི་མགོན་པོ་ལྷ། །ཞེས་བྱ་བ་ལ་སོགས་པ་བཤད་པའི་ཕྱིར་རོ། །སྦྱོར་བ་བཞི་ཡི་གོ་འཕང་མཆོག །ཅེས་པ་ནི་གྲུ་གསུམ་དང་ཟླུམ་པོ་དང་གཞུའི་དབྱིབས་དང་གྲུ་བཞི་པ་དང་ལྐོག་མ་དང་སྙིང་ག་དང་ལྟེ་བ་དང་གསང་བའི་གནས་དང༌། དམར་པོ་དང་ནག་པོ་དང་སེར་པོ་དང་དཀར་པོའི་ཁ་དོག་ལ་སོགས་པ་དང་ལྡན་པའི་ཕྱིར་རོ། །སྟེང་དང་ཟུར་དང་མཉམ་དང་འོག །ཅེས་པ་ནི་སྟེང་ནི་ལྐོག་མའོ། །ཟུར་ནི་སྙིང་གའོ། །མཉམ་པ་ནི་ལྟེ་བའོ། །འོག་ནི་གསང་བའོ། །ཡང་ན་སྟེང་ནི་མེའི་དཀྱིལ་འཁོར་གཡས་པའི་སྒོ་ནས་འབྱུང་བའོ། །ཟུར་ནི་རླུང་གི་དཀྱིལ་འཁོར་གཡོན་ནས་རྒྱུ་བའོ། །མཉམ་པ་ནི་ཆུའི་དཀྱིལ་འཁོར་གཉིས་ཀ་ལས་རྒྱུ་བའོ། །འོག་ནི་སའི་དཀྱིལ་འཁོར་གཉིས་ཀ་ཁོ་ན་ལས་བྱུང་བ་ཞེས་བྱ་བའི་ཐ་ཚིག་གོ །གོས་དཀར་ལ་སོགས་ཞེས་པ་ནི་གོས་དཀར་ལ་སོགས་པའི་ལྷ་མོ་བཞིས་ཉེ་བར་མཚོན་པའི་དཀྱིལ་འཁོར་པ་བཞི་ཞེས་བྱ་བའི་ཐ་ཚིག་གོ །ཇི་བཞིན་དུ་ཞེས་པ་ནི་རིམ་པ་ཇི་ལྟ་བ་བཞིན་དུ་ཞེས་བྱ་བའི་དོན་ཏོ། །མེ་དང་རླུང་དང་དབང་ཆེན་དང་ཆུ་སྟེ་ཞེས་པ་ནི་དཀྱིལ་འཁོར་རྣམས་ཀྱི་གནས་ཀྱི་རིམ་པས་ནི་མ་ཡིན་གྱི། །འོན་ཀྱང་རླུང་རབ་ཏུ་རྒྱུ་བའི་རིམ་པས་སོ། །དེ་ལ་ཐུན་དང་པོར་མེའི་དཀྱིལ་འཁོར་གཡས་པ་ལས་རྒྱུ་བའོ། །ཐུན་གཉིས་པ་ལ་རླུང་གི་དཀྱིལ་འཁོར་ནི་གཡོན་ལས་རྒྱུ་བའོ། །ཐུན་གསུམ་པ་ལ་སའི་དཀྱིལ་འཁོར་གཉི་ག་ལས་རྒྱུ་བའོ། །ཐུན་བཞི་པ་ལ་ཆུའི་དཀྱིལ་འཁོར་དལ་བུས་དམན་པ་གཉི་ག་ལས་རྒྱུ་བའོ། །སོ་སོའི་དཀྱིལ་འཁོར་རོ་ཞེས་པ་ནི་ཉིན་མོ་དང་མཚན་མོ་འཇུག་པ་དང་གནས་པ་དང་ལྡང་བའི་རིམ་གྱིས་རྒྱུ་བའི་ཉི་ཤུ་རྩ་བཞིར་འགྱུར་རོ། །རྒྱུ་བ་དེ་རྣམས་ཀྱི་ཉི་ཁྲི་ཆིག་སྟོང་དྲུག་བརྒྱར་རླུང་གི་གྲངས་སུ་འགྱུར་རོ། །གོས་དཀར་ལ་སོགས་བཟླས་བཤད་པ། །བརྒྱ་ཕྲག་གཉིས་དང་ཉི་ཤུ་ལྔ། །བཞི་པོ་ལེགས་པར་བསྒྲེས་པས་ན། །སྦྱོར་བཞི་བསྡུས་པས་བརྒྱ་ཕྲག་དགུ། །དགུ་བརྒྱ་དག་ཏུ་གང་བཤད་པ།། ཉི་ཤུ་རྩ་བཞིའི་རིམ་པ་ཡིས། །ལེགས་པར་བསྡུས་ཏེ་དེ་དག་ནི། །ཉི་ཁྲི་ཆིག་སྟོང་དྲུག་བརྒྱར་འགྱུར། །ཞེས་འབྱུང་ངོ༌། །དེ་ལ་དོན་བསྡུས་པ་ནི་གཏི་མུག་གི་རིགས་ཅན་གྱི་རྣལ་འབྱོར་པས་ཕྲ་མོའི་རྣལ་འབྱོར་བསྒོམ་པར་འདོད་པས་སེམས་རྣམ་པར་དག་པའི་རིམ་པས་འོད་གསལ་བ་ལ་འཇུག་སྟེ་
དེ་ལས་བདག་བྱིན་གྱིས་བརླབ་པའི་རིམ་པས་ཡེ་ཤེས་ཀྱི་སྐུ་དམིགས་ལ། ལྟེ་བའི་ཕྱོགས་སུ་རྩིབས་བརྒྱད་པའི་ཆོས་ཀྱི་དབྱིངས་ཀྱི་འཁོར་ལོ་ཅིག་ཆར་དུ་བསྒོམ་ཞིང་དེའི་ལྟེ་བར་དང་པོ་ཡི་གེ་འབར་བ་བསམས་ཏེ་དེའི་མེ་སྟག་དང་འདྲ་བའི་ར་ལ་སོགས་པ་ཡི་གེ་བཞིའི་ལྐོག་མ་ལ་སོགས་པའི་གནས་ལས་སྤྲོས་ཏེ། དེ་ཡོངས་སུ་གྱུར་པ་ལས་མེ་ལ་སོགས་པའི་དཀྱིལ་འཁོར་བཞི་བསྒོམས་ལ། ཁ་དོག་དམར་པོ་ལ་སོགས་པའི་དབྱེ་བ་དང་གཡས་པ་ལ་སོགས་པའི་སྒོའི་དབྱེ་བས་འོད་ཟེར་གྱི་ཚོགས་སྤྲོས་ཏེ། དེ་ཉིད་སྣའི་རྩེ་མོར་ཐུན་ཕྱེད་ཕྱེད་ཀྱི་དུས་འཛིན་ནས་བརྟན་པའི་རྟགས་མཐོང་བ་སྔོན་དུ་འགྲོ་བས་སྤྲོ་བ་དང་བསྡུ་བ་བྱས་ལ། འབད་རྩོལ་མེད་པར་ཞི་བ་ལ་སོགས་པ་བསྒྲུབས་ལ་ཇི་སྲིད་སེམས་རྩེ་གཅིག་པར་འགྱུར་བ་དེ་སྲིད་ཀྱི་བར་དུ་གནས་པར་བྱའོ་ཞེས་གཏི་མུག་གི་རིགས་ཅན་གྱི་རྣལ་འབྱོར་པའི་རྫོགས་པའི་རིམ་པའི་སྒོ་ནས་ཕྲ་མོའི་རྣལ་འབྱོར་བསྒོམ་པ་བསྟན་ཏོ། །དེ་ལྟར་རྫོགས་པའི་རིམ་པའི་རྣལ་འབྱོར་པའི་རྣམ་པ་གསུམ་གྱི་ཕྲ་མོའི་རྣལ་འབྱོར་བསྒོམ་པ་བསྟན་པ་དང༌། བསྐྱེད་པའི་རིམ་པའི་རྣལ་འབྱོར་པ་ནི་གཅིག་སྟེ། མདོར་བསྡུས་པའོ་ཞེས་བཅོམ་ལྡན་འདས་ཀྱིས་གསུངས་ཏེ་ཞེས་པ་ནི་སྡུད་པ་པོའི་ཆིག་གོ །ངེས་པའི་དོན་ཏོ་ཞེས་པ་ནི་རྡོ་རྗེ་བཟླས་པའི་རིམ་པའི་རྒྱུར་གྱུར་པ་ཕྲ་མོའི་རྣལ་འབྱོར་བསྟན་པའི་ཕྱིར་རོ། །རླུང་གི་དེ་ཉིད་རིམ་གྱིས་ནི། །སྔགས་ཀྱི་དེ་ཉིད་ཡང་དག་འཇུག །སྔགས་ཀྱི་བསྐྱེད་པ་རྟོགས་ནས་ནི། །རྡོ་རྗེ་བཟླས་པ་རྣམས་ལ་སློབ། །ཅེས་འབྱུང་ངོ༌། །སྒྲོན་མ་གསལ་བའི་ཊཱི་ཀཱ་ལས་ལེའུ་གསུམ་པའོ།། །།