ལེའུ་དྲུག་པ། སྐུ་དང་གསུང་དང་ཐུགས་བྱིན་གྱིས་རློབ་པའི་རྒྱ་ཆེར་བཤད་པ།
བདག་ལ་བྱིན་གྱིས་བརླབ་པའི་ང་རྒྱལ་ཞེས་བྱ་བ་ལ་སོགས་པས་ལེའུ་དྲུག་པའི་བཤད་པ་རྩོམ་པར་བྱེད་དོ། །བདག་ནི་ལྷའི་སྐུ་ལའོ། །བྱིན་གྱིས་བརླབ་པ་ནི་སྐུ་ལ་སོགས་པ་བྱིན་གྱིས་བརླབ་པའོ། །སྔོན་དུ་འགྲོ་བའི་སྤྱོད་པ་བྱ་བ་ནི་རྣལ་འབྱོར་ཆེན་པོའི་མཐའི་བར་དུ་དང་པོར་སྦྱོར་བ་བསྒོམས་ནས་ལྷའི་རྣམ་པ་ཐོབ་པས་སྤྱོད་པ་བྱའོ། །གཞན་དུ་ན་ཁྱི་དང་སྤྱང་ཀི་ལ་སོགས་པ་དང༌། །སོ་སོའི་སྐྱེ་བོའི་བཞིན་དུ་སྤྱད་པ་ཐལ་བར་འགྱུར་རོ། །སྐུ་ལ་སོགས་པ་བྱིན་གྱིས་བརླབ་པའི་རིམ་པ་ཞེས་པ་ནི་རྣལ་འབྱོར་དང་རྗེས་སུ་རྣལ་འབྱོར་དང༌། །ཤིན་ཏུ་རྣལ་འབྱོར་རྫོགས་ནས་རྣལ་འབྱོར་ཆེན་པོའི་མཚན་ཉིད་ཅན་གྱི་དང་པོའི་སྦྱོར་བའི་ཡན་ལག་ཏུ་གྱུར་པ་ཞེས་བྱ་བའི་དོན་ཏོ། །རབ་ཏུ་སྟོན་ཏོ་ཞེས་པ་ནི་རབ་ཏུ་ཕྱེ་ནས་བཤད་པར་བྱ་བའི་དོན་ཏོ། །མི་བསྐྱོད་པ་ཞེས་བྱ་བ་ནི་སྐུ་ལ་སོགས་པ་དེའི་རང་བཞིན་ཡིན་པས་སོ། །དེ་བྱིན་གྱིས་རློབ་པའི་གསང་སྔགས་ཏེ་ཞེས་པ་ནི་གང་བརྗོད་པས་ཐུགས་རྡོ་རྗེས་སྒྲུབ་པ་པོ་བྱིན་གྱིས་བརླབ་པར་འགྱུར་རོ། །གང་ལ་མིང་དེ་སྐད་ཅེས་བྱ་བའི་ཐུགས་རྩེ་གཅིག་ཏུ་མཛད་དེ་ཞེས་པ་ནི་ཐུགས་བྱིན་གྱིས་རློབ་པར་བྱེད་པའི་སྔགས་རྗེས་
སུ་དྲན་པའི་མཚན་ཉིད་ཀྱི་བློ་ཞེས་བྱ་བའི་དོན་ཏོ། །ཐུགས་བྱིན་གྱིས་བརླབ་པ་གང་ཡིན་པ་ཞེས་པ་ནི་རྟོག་པ་དང་བཅས་པའི་ཐ་མལ་པའི་ངོ་བོ་བྲལ་ནས་སྟོན་ཀའི་ཟླ་བའི་དཀྱིལ་འཁོར་རྫོགས་པ་དང་འདྲ་བ་གང་གིས་བྱེད་པ་དེ་ལ་དེ་སྐད་ཅེས་བཤད་དོ། །ཡིད་སྐྱོབ་པས་ན་ཞེས་པ་ལ་དེ་ལ་གཅིག་ཏུ་གཞོལ་བས་རྣམ་པར་རྟོག་པ་གཞན་ལས་སྐྱོབ་པས་སོ། །དབང་པོ་དང་ནི་ཡུལ་དག་ལ། །བརྟེན་ནས་གང་ཞིག་ཡིད་བྱུང་བ། །ཡིད་དེ་མན་ཞེས་བཤད་པ་སྟེ། །ཏྲ་ནི་སྐྱོབ་པའི་དོན་ཡིན་ནོ། །ཞེས་འབྱུང་ངོ༌། །བཀའ་སྩལ་པར་གྱུར་ཏོ་ཞེས་པ་ནི་བཅོམ་ལྡན་འདས་ཀྱིས་ཏེ་ཚིག་ལྷག་མའོ། །ཨོཾ་ཞེས་བྱ་བ་ལ་སོགས་པ་ནི་ཐུགས་ལ་བྱིན་གྱིས་བརླབ་པའི་སྔགས་སོ། །དེ་བརྗོད་པ་ཙམ་གྱིས་ཐུགས་བྱིན་གྱིས་བརླབ་པར་འགྱུར་རོ། །མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཅན་ཞེས་པ་ལ་ཉོན་མོངས་པ་དང་ཤེས་བྱའི་སྒྲིབ་པའི་རྡུལ་རྣམས་མེད་པ་དང་མི་ཕྱེད་པའི་ཕྱིར་རོ། །དེ་བྱིན་གྱིས་རློབ་པའི་སྔགས་ཏེ། ཞེས་པ་ནི་སྐད་ཀྱི་བྱིངས་དོན་དུ་མ་ཡིན་པས་གནས་ཀྱི་སྒྲ་ནི་བྱིན་གྱིས་བརླབ་པའི་རྣམ་གྲངས་སོ། །སྐུ་བྱིན་གྱིས་བརླབ་པའི་སྔགས་གསུངས་པ་ནི་ཞེས་པ་ལ་གང་གི་ལུས་ཀྱི་ཐ་མལ་པའི་ངོ་བོ་སྤངས་ནས་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་རྣམ་པར་སྤྲས་པ། །རྣམ་པ་ཐམས་ཅད་ཀྱི་མཆོག་དང་ལྡན་པར་བྱ་བ་དེ་ལ་དེ་སྐད་ཅེས་བྱའོ། །ཨོཾ་ཞེས་བྱ་བ་ལ་སོགས་པ་ནི་ལུས་བྱིན་གྱིས་བརླབ་པའི་སྔགས་སོ། །དེ་བརྗོད་པས་ལུས་བྱིན་གྱིས་བརླབ་པར་འགྱུར་རོ། །ཚད་མེད་གང་ལས་བརྙེས་པ་ཞེས་པ་ནི་བྱང་ཆུབ་ཀྱི་སེམས་ལ་སྤྱོད་པའི་རྣལ་འབྱོར་པ་རྣམས་ཡུན་རིང་དུ་འཚོ་བར་འགྱུར་རོ། །དེ་ཕྱིར་འབད་པ་ཐམས་ཅད་ཀྱིས། །འཕོ་བའི་ཆགས་པ་བྲལ་བར་བྱ། །ཞེས་འབྱུང་ངོ༌། །རགྟ་གྱེན་དུ་འདྲེན་པའི་བཅོམ་ལྡན་འདས་སངས་རྒྱས་རྣམས་ནི་བསྐལ་པའི་བར་དུ་ཐུབ་པར་འགྱུར་ཏེ་བྱང་ཆུབ་ཀྱི་སེམས་མི་འཕོ་བས་སོ།། དེ་དུས་བརྩམས་ནས་དེ་ནི་རྟོག་པ་མེད། །དེ་ཡི་དབྱིབས་དང་ཁ་དོག་ཇི་ལྟར་མཚན། །བསམ་གྱིས་མི་ཁྱབ་རྣམ་པར་སྨིན་པའི་སྐུ། །སྡོམ་པ་དེ་ལ་བྱ་བ་བྱས་པས་ཐོབ། །ཅེས་རྡོ་རྗེ་ཧཱུཾ་མཛད་ཀྱི་སྒྲུབ་ཐབས་ལས་འབྱུང་ངོ༌། །དེའི་ངོ་བོ་ནི་ཚེ་དཔག་ཏུ་མེད་པར་བསྟན་ཏོ། །སོ་སོར་རྟོག་པའི་ཡེ་
ཤེས་ཀྱི་བདག་ཉིད་ཅན་ཞེས་པ་ནི་མཉམ་པ་ཉིད་ཀྱི་ཡེ་ཤེས་དང་ཐ་མི་དད་པ་སོ་སོར་རྟོག་པའི་ཡེ་ཤེས་ཡིན་ཏེ་ཆོས་ཐམས་ཅད་ཀྱི་རང་བཞིན་རྣམ་པར་དཔྱད་པར་བྱས་ན་མཉམ་པ་ཉིད་ཀྱིས་ཁྱབ་པའི་ཕྱིར་རོ། །དེ་མེད་པས་དངོས་པོ་ཐམས་ཅད་སོ་སོར་རྟོག་པར་མི་འགྱུར་རོ། །དེའི་རང་བཞིན་འོད་དཔག་ཏུ་མེད་པ་སྟེ་ཆོས་རྣམས་སོ་སོར་རྟོག་པར་མཛད་པས་སོ། །དེ་བྱིན་གྱིས་རློབ་པར་བྱེད་པ་ཞེས་པ་ནི་དེ་མངོན་དུ་འགྱུར་བ་དང་བརྟན་པ་ཉིད་སྒྲུབ་པའི་ཕྱིར་རོ། །མི་ཕྱེད་པའི་ངོ་བོ་ཉིད་ཀྱི་སྔགས་ཏེ་ཞེས་པ་ནི་གསུང་གི་དབང་ཕྱུག་ལ་སོགས་པའི་དངོས་གྲུབ་དང་དུག་དང་དབྲལ་བ་ལ་སོགས་པ་ལ་ནུས་པ་མ་ཉམས་པའོ། །ཐ་མལ་པའི་དག་སྤངས་ནས་ཡན་ལག་དྲུག་ཅུ་དང་ལྡན་པ་གཡས་སུ་འཁྱིལ་བའི་དུང་དང་འདྲ་བའི་མགྲིན་པ་ལ་གནས་པའི་གདོང་གི་དཀྱིལ་འཁོར་ཁྱབ་པར་བྱེད་པའི་ལྗགས་དང་བཅས་པ་གང་གིས་བྱེད་པ་དེ་ནི་གསུང་བྱིན་གྱིས་བརླབ་པའི་སྔགས་གསུངས་པ་སྟེ་སྔ་མ་བཞིན་ནོ། །ཨོཾ་ཞེས་བྱ་བ་ལ་སོགས་པ་སྔགས་ཏེ་དེ་བརྗོད་པས་གསུང་བྱིན་གྱིས་བརླབ་པར་འགྱུར་རོ། །དེ་ལྟར་ཞེས་བྱ་བ་ལ་སོགས་པས་སྔགས་རྣམས་ལ་མདོར་བསྟན་པ་དང་རྒྱས་པར་བཤད་པ་ཡིན་ཏེ། རིམ་པ་གང་གིས་སྐུ་ལ་སོགས་པ་བྱིན་གྱིས་བརླབ་པར་བྱ་ཞེས་བསྟན་ཏོ། །མི་བསྐྱོད་པ་ལ་སོགས་པའི་ངོ་བོ་ཉིད་ནི་ཤིན་ཏུ་རྣལ་འབྱོར་གྱི་རིམ་པས་ཤེས་པར་བྱའོ། །ཉན་ཐོས་ལ་སོགས་པས་ཡོངས་སུ་མི་ཤེས་པས་ན་ཞེས་པ་ནི་ཉན་ཐོས་ནས་བརྩམས་ཏེ་རྣལ་འབྱོར་གྱི་རྒྱུད་ཀྱི་རྣལ་འབྱོར་པའི་བར་དུ་ཞེས་བྱ་བའི་དོན་ཏོ། །སྐུ་དང་གསུང་དང་ཐུགས་རྡོ་རྗེ་གང་ཡིན་པ་ཞེས་པ་ནི་བསྐྱེད་པའི་རིམ་པས་སེམས་དཔའ་གསུམ་གྱི་བདག་ཉིད་ཡིན་པས་སོ། །དེ་ལ་དམ་ཚིག་སེམས་དཔའ་ནི་སྐུའི་རང་བཞིན་ཏེ་ཕྱིའི་གཟུགས་སུ་སྣང་བས་སོ། །ཡེ་ཤེས་སེམས་དཔའ་ནི་གསུང་གི་ངོ་བོ་སྟེ་བར་ན་གནས་པས་སོ། །ཏིང་ངེ་འཛིན་སེམས་དཔའ་ནི་ཐུགས་ཀྱི་རང་བཞིན་ཏེ་ཕྲ་བའི་ངོ་བོ་ཡིན་པས་སོ། །ཡང་ན་ལྷའི་སྐུ་དམ་ཚིག་སེམས་དཔའ་ཞེས་བྱ་བ་སྐུ་ལ་སོགས་པའི་རང་བཞིན་ཞེས་བྱ་བའོ། །དེ་ཉིད་བསྟན་པར་བྱ་བའི་ཕྱིར་ལུས་ཞེས་སྨོས་ཏེ། རྣལ་འབྱོར་གསུམ་གྱིས་རྫོགས་པའི་རྡོ་རྗེ་འཆང་ཆེན་པོ་ལ་སོགས་པའི་སྐུའོ། །ལྷ་རྣམས་
ཀྱི་འཁོར་ལོའི་གཞིར་གྱུར་པའི་ཕྱིར་རོ་ཞེས་པ་ནི་རྗེས་སུ་རྣལ་འབྱོར་དང༌། །ཤིན་དུ་རྣལ་འབྱོར་གྱི་རིམ་པས་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོ་ཐམས་ཅད་ཀྱི་ངོ་བོ་ཡིན་པས་སོ། །སྤྱན་ལ་སོགས་པ་བཀོད་པ་གསུམ་པ་ཞེས་པ་ནི་འཁོར་དང་བཅས་པའི་སྤྱན་མ་ལ་སོགས་པའི་ལྷ་མོ་གསུམ་ཞེས་བྱ་བའི་དོན་ཏོ། །བདག་དང་གཞན་གྱི་དོན་ཕུན་སུམ་ཚོགས་པའི་གཞིར་གྱུར་པའི་ཕྱིར་རོ་ཞེས་པ་ནི་སྤྱན་མ་ལ་སོགས་པ་གསུམ་པོ་སྤྲོས་ནས་ཞི་བ་ལ་སོགས་པའི་ཕྲིན་ལས་གྲུབ་པས་ན་གཞན་གྱི་དོན་ཕུན་སུམ་ཚོགས་པ་དང༌། དེས་འགུགས་པའི་རྣམ་པར་སྣང་མཛད་ལ་སོགས་པས་རང་གི་སྐུ་ལ་སོགས་པ་བྱིན་གྱིས་བརླབ་པའི་ཕྱིར་རང་གི་དོན་ཕུན་སུམ་ཚོགས་པ་ཡང་འགྲུབ་པར་འགྱུར་རོ། །སྐུ་རྡོ་རྗེ་ལ་སོགས་པ་བྱིན་གྱིས་བརླབ་པའི་ཕྱིར་ཞེས་པ་ནི་རྣམ་པར་སྣང་མཛད་ལ་སོགས་པས་རང་གི་ལུས་ལ་སོགས་པ་དེའི་རང་བཞིན་དུ་བྱ་བའི་ཕྱིར་རོ། །སྤྲོས་པ་ནི་ཡི་གེ་ཨོཾ་ལ་སོགས་པ་ལས་འོད་ཟེར་གྱི་སྒོ་ནས་ཕྱུང་པ་ཞེས་བྱ་བའི་དོན་ཏོ། །མི་བསྐྱོད་པ་ལ་སོགས་པ་སྟེ་ཞེས་པ་ལ་ཡིད་ཀྱི་རྣམ་པར་རྟོག་པའི་འཇིག་པ་ལས་སྐྱོབ་པའི་ཕྱིར་རོ། །དེ་རྣམས་ཀྱིས་མཚོན་པ་གང་ཡིན་པ་ཞེས་པ་ནི་བརྗོད་པར་བྱ་བ་དང༌། རྗོད་པར་བྱེད་པ་མི་ཕྱེད་པའི་ཕྱིར་དང་། །རྒྱུ་དང་འབྲས་བུའི་དབྱེ་བས་འཆད་པར་འདོད་པ་མ་ཡིན་པའི་ཕྱིར་རོ། །དེས་ནི་ཡི་གེ་གསུམ་གྱིས་སོ། །མགོ་དང་ལྐོག་མ་དང་སྙིང་གའི་ཕྱོགས་སུ་ཞེས་བྱ་བ་ནི་ཟླ་བ་དང་པདྨ་དང་རྡོ་རྗེ་རྣམས་ཀྱིས་མཚོན་པའོ། །རྣམ་པར་བཀོད་པ་ཞེས་པ་ནི་དེ་རྣམས་བཀོད་ནས་སོ། །དེས་ཤིན་དུ་མཚན་པ་ཞེས་པ་ནི་ལྷའི་སྐུ་གང་ཡིན་པ་དེ་ཉིད་སྔར་བཤད་མ་ཐག་པ་ཞེས་པ་ལ། སྐུ་ལ་སོགས་པ་བྱིན་གྱིས་བརླབ་པའི་སྔགས་སྔར་བཤད་པ་གསུམ་གྱིས་དམ་པར་གྱུར་པ་ཞེས་པ་ནི་དེ་བཞིན་གཤེགས་པ་མངོན་དུ་བྱེད་པ་རྣམས་ཀྱིས་བྱིན་གྱིས་བརླབ་པོ་ཞེས་བསྟན་པ་བསྐྱེད་པར་བྱའོ། །འདིར་བསྡུས་པའི་དོན་ནི་རྣལ་འབྱོར་དང་རྗེས་སུ་རྣལ་འབྱོར་དང་ཤིན་དུ་རྣལ་འབྱོར་བྱས་ལ། །རང་གི་མགོ་བོ་དང་ཀློག་མ་དང་སྙིང་གར་ཟླ་བ་དང་པདྨ་དང༌། ཉི་མའི་དཀྱིལ་འཁོར་བཀོད་ལ་དེ་རྣམས་སུ་དཀར་པོ་དང་དམར་པོ་དང་ནག་པོ་ཡི་གེ་གསུམ་བཀོད་ནས། །ཨོཾ་ལ་
སོགས་པའི་ཡི་གེ་གསུམ་པོའི་ཐིག་ལེའི་ནང་ནས་སྤྱན་མ་དང་གོས་དཀར་མོ་དང༌། མཱ་མ་ཀཱི་རང་དང་འདྲ་བའི་མཐའ་ཡས་པའི་སྦྱིན་མ་ལ་སོགས་པའི་འཁོར་གྱིས་བསྐོར་བར་སྤྲོས་ཏེ། དེས་ནམ་མཁའི་ཁམས་གང་བར་བྱས་ནས་འོག་མིན་དང་བདེ་བ་ཅན་དང་མངོན་པར་དགའ་བའི་སངས་རྒྱས་ཀྱི་ཞིང་ལ་བཞུགས་པའི་རྣམ་པར་སྣང་མཛད་དང༌། འོད་དཔག་མེད་དང་མི་བསྐྱོད་པ་གསུམ་སྤྱན་མ་ལ་སོགས་པའི་ཚོགས་དེས་ཚིག་སྙན་པ་དང༌། སྒེག་པས་མགུ་བ་བྱས་ལ་དཔུང་པའི་ཞགས་པས་འཁྱུད་ཅིང་བཀུག་ལ་ཤར་ཕྱོགས་ཀྱི་སྒོ་རུ་པདྨ་དང༌། ཟླ་བའི་དཀྱིལ་འཁོར་གྱི་སྟེང་ན་བཞུགས་པར་མཐོང་ནས། དཔལ་ལྡན་སྐུ་ཡི་རྡོ་རྗེ་འཆང༌། །ཞེས་བྱ་བ་ལ་སོགས་པ་གསུམ་གྱིས་གསོལ་བ་བཏབ་ནས་མཆོད་པ་རྣམ་པ་ལྔས་མཆོད་ལ་སྤྱན་མ་ལ་སོགས་པའི་ཚོགས་དེ་ཉིད་དང་བཅས་པ་ཡི་གེ་གསུམ་དེ་དག་ལ་འཇུག་ཅིང༌། སངས་རྒྱས་ཀུན་གྱི་སྐུ་གང་ཡིན། །ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས་ང་རྒྱལ་བྱས་ལ་སྐུ་གསུང་ཐུགས་ནི་རྣམ་པར་ཐམས་ཅད་ཀྱི་མཆོག་དང་ལྡན་པ་ལ་སོགས་པས་མཚན་པ་མཐོང་སྟེ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། །ཞེས་བྱ་བ་ལ་སོགས་པའི་སྔགས་གསུམ་གྱིས་བྱིན་གྱིས་བརླབ་པར་བྱའོ་ཞེས་པ་འདི་ནི་སྐུ་ལ་སོགས་པ་བྱིན་གྱིས་བརླབ་པའི་བདག་ཉིད་ཅན་གྱི་རྣལ་འབྱོར་ཆེན་པོ་བསྟན་པ་སྟེ་དང་པོ་སྦྱོར་བའི་ཏིང་ངེ་འཛིན་ཏོ། །དྲང་བའི་དོན་ཏོ་ཞེས་པ་ནི་བསྐྱེད་པའི་རིམ་པའི་ཡན་ལག་ཏུ་གྱུར་པའི་དང་པོ་སྦྱོར་བའི་ཏིང་ངེ་འཛིན་གྱི་ཕྱོགས་གཅིག་པ་རྣལ་འབྱོར་ཆེན་པོ་སོ་སོར་བསྟན་པས་སོ། །རྫོགས་པའི་རིམ་པའི་རྣལ་འབྱོར་པ་རྣམས་ཀྱིས་ཞེས་པ་ནི། རྡོ་རྗེ་བཟླས་པ་ལ་སོགས་པའི་རིམ་པ་ལྔ་པོ་བསྒོམ་པས་སོ། །བཤད་པའི་རྒྱུད་ལས་ཞེས་པ་ནི་རྡོ་རྗེ་ཕྲེང་བའི་རྒྱུད་ཅེས་བྱ་བ་ལས་སོ། །དེ་ནས་དཔལ་ཆེན་ཞེས་བྱ་བ་ལ་སོགས་པའི་ཏིང་ངེ་འཛིན་གྱི་དོན་སྔར་བཤད་ཟིན་ཏོ། །ཨོཾ་ཞེས་བྱ་བ་དང་པོ་ཞེས་པ་ནི་རྣམ་པར་སྣང་མཛད་དོ། །སརྦ་ནི་རིན་ཆེན་འབྱུང་ལྡན་ཏེ་ནམ་མཁའི་ཁམས་ནི་ཐམས་ཅད་ཀྱི་བདག་ཉིད་ཡིན་ནོ། །ཏ་ཐཱ་ག་ཏ་ནི་འོད་དཔག་ཏུ་མེད་པ་སྟེ་བྱང་ཆུབ་ཀྱི་སེམས་དེ་བཞིན་གཤེགས་པའི་བདག་ཉིད་ཡིན་པས་སོ། །ཡོན་ཏན་ཡིན་པས་ཞེས་
པ་ནི་སྙིང་སྟོབས་དང་རྡུལ་དང་མུན་པ་སྟེ་ཡོན་ཏན་གསུམ་མོ། །དེས་ན་རྣམ་པར་མཛད་དང་རིན་ཆེན་འབྱུང་ལྡན་དང་འོད་དཔག་ཏུ་མེད་པ་སྟེ་དེ་བཞིན་གཤེགས་པ་གསུམ་ཞེས་བྱ་བའི་དོན་ཏོ། །ཙི་ཏྟ་བཛྲ་ཞེས་བྱ་བ་ནི་ཚིག་གཉིས་ཏེ་ལྡན་པ་ནི་གཅིག་ཏུ་གྱུར་ནས་ཚིག་གཅིག་གོ ། དེས་ན་མི་བསྐྱོད་པ་ཡིན་ཏེ་ཐུགས་རྡོ་རྗེའི་རང་བཞིན་ཡིན་པས་སོ། །སྭ་བྷཱ་ཝ་ཨཱཏྨ་ཀོ་ཞེས་པ་ནི་རླུང་གི་ཁམས་ཀྱི་རང་བཞིན་དོན་ཡོད་གྲུབ་པ་སྟེ་ལྔ་པའོ། །ཨ་ཧཾ་ཞེས་པ་ནི་སྣ་ཚོགས་ཀྱི་ང་རྒྱལ་གྱི་རང་བཞིན་དུ་གནས་པ་བཅོམ་ལྡན་འདས་རྡོ་རྗེ་འཆང་སྟེ་དེ་ཉིད་དུ་དྲུག་པའོ། །སྐུ་དྲུག་ཅེས་བྱ་བ་ལ་སོགས་པས་དེ་དག་དང་དེ་བཞིན་གཤེགས་པ་དྲུག་སྐུ་གསུམ་གྱི་ངོ་བོ་ཡིན་ཏེ། དེའི་རང་བཞིན་ནང་ཡིན་ནོ་ཞེས་ལྷག་པར་མོས་པ་ཉིད་དུ་ཐུགས་བྱིན་གྱིས་བརླབ་པ་བསྟན་ཏོ། །དེ་བཞིན་དུ་འོག་མ་ལ་ཡང་སྦྱར་རོ། །དེ་ནས་ཞེས་བྱ་བ་ལ་སོགས་པ་ནི་སྔར་བཤད་ཟིན་ཏོ། །ཨོཾ་ཚངས་པར་བཤད་ཅེས་པ་ནི་དང་པོ་ཡིན་པ་དང༌། གཅིག་ཡིན་པས་ཚངས་པ་ནི་རྣམ་པར་སྣང་མཛད་དེ་དང་པོའོ། །སརྦ་ཏ་ཐཱ་ག་ཏ་ཞེས་པ་ནི་རིན་ཆེན་འབྱུང་ལྡན་ཏེ་དེ་བཞིན་གཤེགས་པ་ཐམས་ཅད་ཀྱི་ནང་ན་ཆོས་ཀྱི་རྒྱལ་སྲིད་ལ་མངའ་མཛད་པའི་ཕྱིར་རོ། །ཆགས་གཏོགས་དབང་ཕྱུག་ཅེས་པ་ནི་འདོད་ཆགས་རྣམ་པར་དག་པའི་རང་བཞིན་ཏེ་འོད་དཔག་ཏུ་མེད་པའོ། །ཀཱ་ཡ་ཞེས་པ་ནི་ཀཱ་ནི་སྒྲ་སྟེ་དེས་ན་གསུང་གི་རང་བཞིན་གསུམ་པའོ། །བཛྲ་ནི་ཐུགས་རྡོ་རྗེ་སྟེ་བཞི་པའོ། །སྙན་ངང་གི་རིག་བྱེད་དང་མཆོད་སྦྱིན་གྱི་རིག་བྱེད་དང་སྲིད་སྲུང་བའི་རིག་བྱེད་དང་མང་དུ་བརྗོད་པའི་རིག་བྱེད་དེ་བཞི་པའོ། །སྭ་བྷཱ་ཝ་ཨཱཏྨ་ཀོ་ཞེས་པ་ནི་སྔ་མ་བཞིན་དུ་དོན་ཡོད་གྲུབ་པའོ། །འདོད་ལྷ་ནི་གཟུགས་ལ་སོགས་པ་འདོད་པའི་ཡོན་ཏན་ལྔ་སྟེ་དེས་ན་ལྔའོ། །ཨ་ཧཾ་ནི་སྔ་མ་བཞིན་དུ་རྡོ་རྗེ་སེམས་དཔའོ། །སྨིན་དྲུག་ནི་སྨིན་དྲུག་གི་བུ་ཀར་ཏི་ཀ་སྟེ་གདོང་དྲུག་པ་ཡིན་པའི་ཕྱིར་རོ། །དེས་ན་དེ་བཞིན་གཤེགས་པ་དྲུག་གི་རང་བཞིན་ནི་ངའི་སྐུ་ཡིན་ནོ་ཞེས་ལྷག་པར་མོས་པ་གང་ཡིན་པ་དེ་ནི་སྐུ་བྱིན་གྱིས་བརླབ་པ་ཞེས་བྱའོ། །དགོངས་པ་ཡིས་ནི་ཡང་དག་བརྟགས། །ཞེས་པ་ནི་ཚིག་གི་ཚོགས་དེ་དག་དགོངས་པས་བཤད་པ་ཡིན་ཞེས་བྱ་བའི་དོན་ཏོ། །ཤེས་རབ་དབྱེ་བས་བྱ། །ཞེས་པ་ནི་རྡོ་རྗེ་
སློབ་དཔོན་བསྟེན་པ་ལས་ཐོབ་པའི་ཤེས་རབ་ཀྱི་ཁྱད་པར་གྱིས་ངེས་པར་རྟོགས་པར་བྱའོ། །དེ་ནས་ཞེས་བྱ་བ་ལ་སོགས་པའི་དོན་བཤད་ཟིན་ཏོ། །ཨོཾ་ནི་དང་པོ་སྟེ་རྣམ་པར་སྣང་མཛད་སྔ་མ་བཞིན་ནོ། །སརྦ་ཏ་ཐཱ་ག་ཏ་ཞེས་པ་ནི་རིན་ཆེན་འབྱུང་ལྡན་ཏེ་གཉིས་པའོ། །ཝཱ་ཀ་ནི་ངག་གི་རང་བཞིན་ཏེ་འོད་དཔག་ཏུ་མེད་པ་གསུམ་པའོ། །བཛྲ་ནི་ཐུགས་ཀྱི་རྡོ་རྗེའོ། །རྫོགས་ལྡན་དང༌། སུམ་ལྡན་དང༌། ཉིས་ལྡན་དང༌། རྩོད་པ་སྟེ་དུས་བཞིའོ། །དེ་བས་ན་བཞི་པ་ཞེས་བྱ་བའི་དོན་ཏོ། །སྭ་བྷཱ་ཝ་ཨཱཏྨ་ཀོ་ཞེས་པ་ནི་དོན་ཡོད་གྲུབ་པའོ། །འདོད་ལྷ་ནི་འདོད་པའི་ལྷའི་སྨྱོ་བྱེད་དང༌། ཉམས་བྱེད་དང༌། རྨོངས་བྱེད་དང༌། གདུང་བྱེད་དང༌། སྐེམ་བྱེད་དེ་མདའ་ལྔའོ། །དེས་ན་ལྔ་པ་ཞེས་བྱ་བའི་དོན་ཏོ། །ཨ་ཧཾ་ཞེས་པ་ནི་རྡོ་རྗེ་འཆང་ངོ༌། །དུས་ནི་དགུན་སྟོད་དང༌། དགུན་སྨད་དང༌། དཔྱིད་ཀ་དང་སོས་ཀ་དང༌། དབྱར་ཀ་དང་སྟོན་ཏེ་དྲུག་གོ །དེས་ན་དྲུག་པ་ཞེས་པའི་དོན་ཏོ། །དེས་ན་དོན་འདི་ཡིན་ཏེ་དེ་བཞིན་གཤེགས་པ་དྲུག་གི་རང་བཞིན་ནི་ངའི་ངག་ཡིན་ནོ་ཞེས་ལྷག་པར་མོས་པ་གང་ཡིན་པ་དེ་ནི་གསུང་བྱིན་གྱིས་བརླབ་པའོ་ཞེས་བྱའོ། །ཉེ་བར་བསྡུས་པ་བསྟན་པའི་ཕྱིར་དེ་ལྟར་ཞེས་བྱ་བ་ལ་སོགས་པ་སྨོས་ཏེ། གསུམ་ནི་སྐུ་ལ་སོགས་པ་བྱིན་གྱིས་བརླབ་པ་གསུམ་མོ། །ཇི་ལྟ་བུ་ཡིན་ཞེ་ན། རེ་རེ་ནི་སྐུ་བྱིན་གྱིས་བརླབ་པ་དང༌། གསུང་བྱིན་གྱིས་བརླབ་པ་དང༌། ཐུགས་བྱིན་གྱིས་བརླབ་པ་ལའོ། །དྲུག་གསུམ་དུ་བཤད་པ་ཞེས་པ་ནི། དེ་བཞིན་གཤེགས་པ་དྲུག་སྐུ་གསུམ་གྱི་རང་བཞིན་དུ་བཤད་པའོ། །ཐུགས་ཞེས་བྱ་བ་ལ་སོགས་པ་ནི་ཐུགས་གསུང་སྐུ་ཞེས་བརྗོད་པར་བྱ་བར་རིགས་ན་ཐུགས་སྐུ་གསུང་ཞེས་ཅིའི་ཕྱིར་གོ་རིམས་ལོག་ཅེ་ན། སྨྲས་པ། དེ་ལྟར་བཤད་མོད་ཀྱི། འོན་ཀྱང་གོ་བཟློག་བ་བསྟན་ཏེ། རང་གི་གླེགས་བམ་མཐོང་བ་རྣམས་ཀྱིས་འཁྲུལ་པ་སྐྱེད་པའི་ཕྱིར་རོ། །གཞན་དུ་ན་སློབ་དཔོན་དང་སློབ་མའི་འབྲེལ་པ་དང༌། བསྙེན་བཀུར་བྱ་བ་དང༌། བསྙེན་བཀུར་བྱེད་པའི་འབྲེལ་པ་ཡང་ཆད་པར་འགྱུར་རོ། །དེས་ན་དངོས་གྲུབ་ཀྱང་ཐོབ་པར་མི་འགྱུར་རོ། །རྡོ་རྗེ་གསུམ་ཞེས་པ་ནི་སྐུ་རྡོ་རྗེ་ལ་སོགས་པའི་རང་བཞིན་ནི་ལུས་ལ་སོགས་པ་ཡིན་ནོ་ཞེས་འདུ་ཤེས་དང་ཡིད་ལ་བྱེད་པ་གང་ལ་ཡོད་པ་དེ་ནི་རྡོ་རྗེ་གསུམ་ཞེས་བྱ་བ་སྟེ་རྫོགས་པའི་རིམ་པའི་
རྣལ་འབྱོར་པ་རྣམས་སོ། །བདག་པོའི་ཆོས་ཅན་གཅིག་ཏུ་བྱུང༌། །ཞེས་པ་ནི་ཁམས་གསུམ་པ་འདུལ་བར་བྱ་བའི་དབང་བྱེད་པ་བྱིན་གྱིས་བརླབས་པས་འབྱུང་ངོ་ཞེས་སྐུ་ལ་སོགས་པ་བྱིན་གྱིས་བརླབ་པ་དང་ལྡན་པས་རྣལ་འབྱོར་པ་རྣམས་ལ་ཕན་ཡོན་བསྟན་ཏོ། །རྫོགས་པའི་རིམ་པའི་ཏིང་ངེ་འཛིན་གསུམ་བསྒོམ་པའི་དོན་དུ་ཡེ་ཤེས་གསུམ་ཞེས་བྱ་བ་སྨོས་ཏེ། སྣང་བ་ལ་སོགས་པའི་ཡེ་ཤེས་གསུམ་སྟེ་ཐ་མལ་པ་རྣམས་ཀྱིས་མི་ཕྱེད་པའི་ཕྱིར་རོ། །དེ་བཞིན་གཤེགས་པ་རྣམས་ལས་བྱུང་བ་ཞེས་པ་ནི་དེ་བཞིན་གཤེགས་པ་ལ་སོགས་པ་འབྲེལ་པ་དྲུག་གི་སྒྲོན་ནས་བྱུང་བའོ། །ཡང་ན་དེ་བཞིན་གཤེགས་པ་ནི་འོད་གསལ་བའོ། །དེ་ལས་བྱུང་བ་ནི་སྤྲོས་པའོ། །ཇི་ལྟར་ཆུ་བོ་དང་བ་ལས། །ཉ་དག་མྱུར་དུ་ལྡང་བར་འགྱུར། །ཞེས་བཤད་པའི་ཕྱིར་རོ། །བསྐྱེད་པའི་རིམ་པ་ལ་གནས་པའི་རྣལ་འབྱོར་པའི་སྤྱོད་ཡུལ་མ་ཡིན་པའི་ཕྱིར་རོ་ཞེས་པ་ལ་གང་གི་ཕྱིར་བསྐྱེད་པའི་རིམ་པའི་རྣལ་འབྱོར་པ་རྣམས་ནི་ཡེ་ཤེས་གསུམ་རྣམས་འབྱེད་པ་ལས་སྣོད་མ་ཡིན་ཏེ། དེ་ནི་རྫོགས་པའི་རིམ་པའི་ཡན་ལག་ཡིན་པའི་ཕྱིར་རོ། །དོན་དམ་པའི་བདེན་པ་སྟེ་ཞེས་པ་ནི་སེམས་རྣམ་པར་དག་པའི་རིམ་པས་ཐོབ་པར་བྱ་བའི་འོད་གསལ་བའོ། །རྣམ་པར་ཤེས་པ་གསུམ་གྱི་གནས་སུ་གྱུར་པ་ཡིན་པའི་ཕྱིར་རོ་ཞེས་པ་ནི་དེ་ཉིད་ལས་དེ་བསྐྱེད་པའི་ཕྱིར་རོ། །ཀུན་རྫོབ་ཀྱི་བདེན་པ་སྟེ་ཞེས་པ་ནི་སྣང་བ་ལ་སོགས་པའི་རང་བཞིན་གྱི་ཚོགས་ཀྱི་མཚན་ཉིད་ནི་རྟོག་པ་དང་བཅས་པའི་ཕྱིར་རོ། །བསྐྱེད་པར་གྱུར་པ་ཞེས་པ་ནི་འོད་གསལ་བ་ཉིད་ལས་ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་འབྱུང་བས་སོ། །གལ་ཏེ་དེ་ལྟར་ཡིན་ན་གཉིས་སུ་མེད་པའི་རང་བཞིན་ནི་ཇི་ལྟར་ཐ་དད་པར་འགྱུར་པ་དང༌། དེ་ཡོད་ན་ཐ་མི་དད་པ་ཇི་ལྟར་ཡིན་ཞེ་ན། སྨྲས་པ། རེ་ཞིག་འོད་གསལ་བ་ནི་ཐ་མི་དད་པའི་རང་བཞིན་ཡིན་ཏེ། བརྟེན་པར་གྱུར་པ་སྙིང་པོ་མེད་པའི་ཆོས་ཀྱི་དབྱེ་བས་དེའི་དབྱེ་བ་སོ་སོར་སྣང་སྟེ་ནམ་མཁའ་དང་ཆར་བཞིན་ནོ། །གང་གི་ཕྱིར་ནམ་མཁའ་ནི་ངོ་བོ་གཅིག་ཡིན་ན་ཡང་དངོས་པོའི་དབྱེ་བས་དབྱེ་བར་འགྱུར་ཏེ། བུམ་པའི་ནམ་མཁའ་དང་སྣམ་བུའི་ནམ་མཁའི་ཐ་སྙད་བཞིན་ནོ། །ཆར་ངོ་བོ་གཅིག་ཡིན་ན་ཡང་བུ་རམ་གྱི་ཤིང་ལ་
སོགས་པའི་འབྲེལ་བས་མངར་བ་ལ་སོགས་པའི་རོ་དང་ལྡན་པ་ཉིད་དུ་ཐ་སྙད་དུ་བྱའོ། །དེ་བཞིན་དུ་འོད་གསལ་བ་ཡང་དངོས་པོའི་ཚོགས་དེ་དང་དེ་བསྐྱེད་པ་དང་འཇིག་པའི་འབྲེལ་བས་དབྱེ་བས་ཐ་སྙད་དུ་བྱ་བ་ཡིན་གྱི་འོད་གསལ་བ་ལ་ནི་དབྱེ་བ་གང་ཡང་མེད་དོ། །ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ཀྱི་དབྱེ་བ་རིགས་མ་ཡིན། །བརྟེན་པའི་ཆོས་ཀྱི་དབྱེ་བ་ཡིས། །དེ་ཡི་དབྱེ་བ་རབ་ཏུ་བརྗོད། །ཅེས་འབྱུང་ངོ༌། །སྐྱེ་བོ་བྱིས་པས་དོན་དམ་པའི་བདེན་པ་ངོ་བོ་གཅིག་ཡིན་ན་ཡང་ཐ་དད་པར་སྣང་སྟེ་རྟོག་པ་དང་བཅས་པའི་ཕྱིར་རོ། །དངོས་པོའི་ངོ་བོ་མཐོང་བའི་རྣལ་འབྱོར་པ་རྣམས་ཀྱིས་མ་ཡིན་ཏེ། རྟོག་པ་མེད་པའི་ཕྱིར་རོ། །རྩངས་པ་ཡིས་ནི་བདག་ཉིད་ལུས། །སྔོ་དང་སེར་པོར་སྣང་བ་བཞིན། །བྱིས་པ་རྣམས་ལ་གཞན་སྟོན་དང༌། །མཁས་པ་རྣམས་ལ་གཞན་སྟོན་ཏོ། །དེ་ཡི་ངོ་བོ་དང་བ་ནི། །རྣམ་མེད་གོས་པ་མེད་པར་འདོད། །ནམ་ཡང་སངས་རྒྱས་མ་ཡིན་པས། །དེ་ནི་ཤེས་པར་བྱ་མི་ནུས། །ཇི་ལྟར་སྐྱེ་བོ་གཞན་དག་གིས། །དེ་བཞིན་སངས་རྒྱས་ཀྱིས་མི་རིག །དེ་ཡི་རང་བཞིན་གང་ཡིན་པ། །དེ་ཉིད་ཀྱིས་ནི་མཁྱེན་པ་ཡིན། །དམ་ཆོས་ལུང་སོགས་ལ་མཐོང་ནས། །ཁོ་བོ་ཅག་ནི་འབའ་ཞིག་སྨྲ། །མིག་དང་བཅས་པའི་སྤྱོད་ཡུལ་ནི། །དམུས་ལོང་རྣམས་ཀྱི་གཟུགས་བཞིན་ནོ། །ཞེས་འབྱུང་ངོ༌། །དོན་དམ་པའི་བདེན་པ་དེ་ཉིད་ཀྱི་ཁྱད་པར་རོ་ཞེས་པ་ནི་སྔར་བཤད་པའི་མཚན་ཉིད་དང་འབྲེལ་པས་སོ། །སྟོང་པ་ཉིད་བཞི་ཞེས་པ་ནི་འོད་གསལ་བ་དང་བཅས་པའི་ཡེ་ཤེས་གསུམ་མོ། །དེ་བཞིན་གཤེགས་པ་རྣམས་སོ་ཞེས་པ་ནི། །སྔགས་ཀྱི་སྐུ་ཡིན་པས་སོ། །འོད་ཟེར་ལྔ་སྟེ་ཞེས་པ་ནི་དེ་རྣམས་ཀྱི་དེ་བཞིན་གཤེགས་པའི་རང་བཞིན་མཚོན་བར་འགྱུར་གྱི་གཞན་དུ་མ་ཡིན་ནོ། །ཡུལ་དུ་གྱུར་པའི་ཞེས་པ་ནི་འོད་ཟེར་ལྔས་མཛད་པའོ། །རྡོ་རྗེ་སྐུ་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་འབྱུང་བ་ཡེ་ཤེས་ཀྱི་སྐུ་ཞེས་བྱ་བའི་ཐ་ཚིག་གོ །བསྐྱེད་པར་བྱའོ་ཞེས་པ་ནི་སྤྲོ་བར་བྱའོ། །ངེས་པའི་དོན་ཏོ་ཞེས་པ་ནི་སེམས་རྣམ་པར་དག་པ་དང༌། བདག་ལ་བྱིན་གྱིས་བརླབ་པའི་རིམ་པ་གཉིས་འཆད་པར་འདོད་པའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པས་དང་པོར་སྦྱོར་བའི་འོག་ཏུ་དཀྱིལ་འཁོར་རྒྱལ་བ་མཆོག་ལ་འཇུག་པའི་ཕྱིར་
རོ། །ཕྱག་རྒྱ་སྦྱང་བའི་ཆོ་ག་བསྟན་པར་བྱ་སྟེ། །སྐུ་བྱིན་གྱིས་བརླབ་པ་ལ་སོགས་པ་བྱས་ནས། །ཞེས་པ་ནི་རྣལ་འབྱོར་ཆེན་པོའི་མཐའི་བར་དུ་ཞེས་ཚིག་ལྷག་མའོ། །རང་གི་རིགས་ཀྱི་ཡུམ་ལ་ཞེས་པ་ནི་མི་བསྐྱོད་པ་ལ་སོགས་པའི་རིགས་དང་མཐུན་པ་སྨེ་ཤ་ཅན་ལ་སོགས་པའི་བུ་མོ་ལའོ། །རིགས་ལྔ་དགོད་པར་བྱས་ལ་ཞེས་པ་ནི་དེ་བཞིན་གཤེགས་པ་ལ་སོགས་པའི་ཡིག་འབྲུ་རྣམས་ཀྱི་ཡན་ལག་བྱིན་གྱིས་བརླབ་པ་བྱས་ནས་སོ། །གཉིས་ཀའི་འཁོར་ལོ་རྗེས་སུ་མཉེས་པའི་གསང་སྔགས་བསྟན་པའི་ཕྱིར་ཞེས་པ་ནི་ཐབས་དང་ཤེས་རབ་དག་གི་བརྡར་བྱས་པ། སྐྱེས་པ་དང་བུད་མེད་གཉིས་ཀྱི་ཡན་ལག་ལ་གནས་པ་དཀྱིལ་འཁོར་པ་རྣམས་མཉེས་པ་ལ་འཇུག་པའི་ཕྱིར་རོ། །བཤད་ཟིན་ཏོ་ཞེས་བྱ་བ་ནི་ལེའུ་དང་པོ་ནས་སོ། །ཨོཾ་ཞེས་བྱ་བ་ལ་སོགས་པ་ནི་སྔགས་སོ། །འདིས་འཁྱུད་པར་བྱའོ་ཞེས་པ་ནི་སོར་མོ་གཞུག་པ་ལ་སོགས་པ་བྱས་ནས་རྡོ་རྗེ་དང་པདྨ་དག་སྙོམས་པར་འཇུག་པར་བྱའོ་ཞེས་བྱ་བའི་ཐ་ཚིག་གོ །དེ་ཉིད་བསྟན་པར་བྱ་བའི་ཕྱིར་སྙོམས་པར་ཞུགས་པའི་འོག་ཏུ་ཞེས་པ་སྨོས་ཏེ། འཁོར་ལོ་གཉིས་ལ་ཞུགས་པའི་དེ་བཞིན་གཤེགས་པ་ཐམས་ཅད་ཀྱིའོ། །མཆོད་པའི་སྔགས་བསྟན་པའི་ཕྱིར་ཞེས་པ་ནི་སྣང་བ་ལ་སོགས་པའི་ཡེ་ཤེས་ལས་འབྱུང་བ་རང་རིག་པའི་བདེ་བ་མྱོང་བའི་ཕྱིར་རོ། །ཨོཾ་ཞེས་པ་ནི་མཆོད་པའི་སྔགས་སོ། །འདིས་བདག་ཉིད་ཀྱི་སྣང་བ་ལ་སོགས་པའི་ཡེ་ཤེས་ལས་འབྱུང་བའི་བདེ་བ་མྱོང་ནས་དེ་ཉིད་བྱིན་གྱིས་བརླབ་པར་བྱའོ། །དེ་ཉིད་བསྟན་པར་བྱ་བའི་ཕྱིར་བཤད་མ་ཐག་པའི་ཆོ་ག་ཞེས་བྱ་བ་ལ་སོགས་པས་བསྟན་ཏོ། །དེ་ཉིད་ལ་བསྟན་པར་བྱ་བ་བསྐྱེད་པའི་ཕྱིར་ཞེས་པ་ནི་རྡོ་རྗེ་དང་པདྨ་སྙོམས་པར་ཞུགས་པ་ལའོ། །དེས་ནི་དཀྱིལ་འཁོར་རྒྱལ་མཆོག་བསྒོམ་པར་བྱ་བའི་ཕྱིར། དང་པོ་ཕྱག་རྒྱ་སྦྱོང་བའི་མཚན་ཉིད་ཀྱི་དོན་བསྟན་ཏེ། དེ་ཡང་སྒྲུབ་པའི་ཐབས་ལས་སྔར་བཤད་ཟིན་ཏོ། །རྫོགས་པའི་རིམ་པ་ལ་གནས་པའི་རྣལ་འབྱོར་པ་རྣམས་ཀྱི་ཡང་ཞེས་པ་ནི་རིན་པོ་ཆེ་ལྟ་བུའི་སྤྱོད་ཡུལ་གྱི་མཆོད་པ་བསྟན་ཏོ། །ཉེ་བར་འཕྲོག་ཅིང་ཞེས་པ་ནི་ཉེ་བར་བསྒྱུར་བ་དང་བཅས་པའི་འཕྲོག་པའི་སྐད་ཀྱི་བྱིངས་ནི་ཞུ་བའི་དོན་ལ་འཇུག་སྟེ་ཉེ་བར་གྱུར་པའི་དབང་གིས་ནི། སྐད་ཀྱི་བྱིངས་ལས་དོན་གཞན་འགྱུར། །གང་གཱའི་
ཆུ་ནི་མངར་མོད་ཀྱང༌། །རྒྱ་མཚོའི་ཆུ་ཡིས་ཇི་བཞིན་ནོ། །ཞེས་བཤད་པས་སོ། །ལྔ་ནི་རྣམ་པར་སྣང་མཛད་ལ་སོགས་པའོ། །དྲུག་པ་ནི་དེ་བཞིན་གཤེགས་པའི་ཞེས་པ་ནི་ཡེ་ཤེས་ལྔའི་འོད་གསལ་བ་ལ་ཐིམ་པས་སོ། །དེ་བཞིན་གཤེགས་པ་ཞེས་བྱ་བ་ལ་སོགས་པས་མེ་ལོང་ལྟ་བུ་ལ་སོགས་པ་ཡེ་ཤེས་ལྔ་ནི་རྒྱུའོ། །འོད་གསལ་བ་ཁོང་དུ་ཆུད་པ་ནི་འབྲས་བུའོ། །དེ་ཡང་རིམ་པ་ལྔ་དང་སྦྱར་རོ། །གང་གི་ཕྱིར་རྡོ་རྗེ་བཟླས་པའི་རིམ་པ་ལ་སྐུ་ལ་སོགས་པའི་བཟླས་པ་རྣམ་པར་སྣང་མཛད་ལ་སོགས་པའི་ཡེ་ཤེས་ལྔའི་རང་བཞིན་གྱིས་མ་ནིང་གི་བཟླས་པའི་དུས་སུ་འོད་གསལ་བ་རྟོགས་པར་འགྱུར་རོ། །སེམས་ལ་དམིགས་པའི་རིམ་པ་ལ་ཡང་ཕྱག་རྒྱའི་རིམ་པས་བྱང་ཆུབ་ཀྱི་སེམས་ཀྱི་ཐིག་ལེ་མེ་ལོང་ལྟ་བུ་ལ་སོགས་པ་ནི་ཡེ་ཤེས་ལྔའི་རང་བཞིན་ཉམས་སུ་མྱོང་བས་འབྲས་བུར་གྱུར་པའི་འོད་གསལ་བའི་དེ་ཁོ་ན་ཉིད་མངོན་དུ་གྱུར་ཏོ། །བདག་ལ་བྱིན་གྱིས་བརླབ་པའི་རིམ་པ་ལ་ཡང་དེ་བཞིན་གཤེགས་པ་ལྔའི་སྐུ་བླངས་ནས་སྒྱུ་མ་ལྟ་བུའི་ཏིང་ངེ་འཛིན་གྱིས་འོད་གསལ་བ་ཉིད་མྱོང་བར་འགྱུར་རོ། །མངོན་པར་བྱང་ཆུབ་པའི་རིམ་པ་ཡང་ཡེ་ཤེས་ལྔའི་རང་བཞིན་གྱི་རྟགས་ལྔས་འོད་གསལ་བ་ཉིད་རྟོགས་པར་འགྱུར་རོ། །ཟུང་དུ་འཇུག་པའི་རིམ་པ་ལ་ཡང་རྡོ་རྗེ་བཟླས་པ་ལ་སོགས་པས་སྔར་བཤད་པའི་རིམ་པས་ཡེ་ཤེས་ལྔའི་རང་བཞིན་གྱི་རྒྱུས་མི་གནས་པའི་མྱ་ངན་ལས་འདས་པའི་དབྱིངས་ཀྱི་ངོ་བོ་འོད་གསལ་བའི་དེ་ཁོ་ན་ཉིད་རྟོགས་པར་འགྱུར་རོ། །ཡན་ལག་དྲུག་པའི་རིམ་པས་ཀྱང་འདི་ལྟ་སྟེ། ཡུལ་དང་དབང་པོ་གཅིག་ཏུ་གྱུར་པའི་མཚན་ཉིད་ཅན་གྱི་དེ་བཞིན་གཤེགས་པ་ལྔའི་ངོ་བོ་ཡེ་ཤེས་ལྔའི་རང་བཞིན་གྱིས་སོ་སོར་སྡུད་པས་བདེ་པ་ཆེན་པོའི་ངོ་བོ་འོད་གསལ་བ་རྟོགས་པར་འགྱུར་རོ། །དེ་རྣམ་པར་དག་པར་བྱེད་པ་ཡེ་ཤེས་ལྔའི་ངོ་བོ་དབྱེ་བ་ལྔས་ཕྱེ་བའི་བསམ་གཏན་གྱི་ཡན་ལག་གི་རྒྱུས་སེམས་རྩེ་གཅིག་པའི་མཚན་ཉིད་ཅན་འོད་གསལ་བའི་དེ་ཁོ་ན་ཉིད་རྟོགས་སོ། །སྟེང་དང་འོག་ཏུ་འདྲེན་པ་དེ་བཞིན་གཤེགས་པ་ལྔའི་ངོ་བོ་ཡེ་ཤེས་ལྔའི་རང་བཞིན་གྱི་སྲོག་གི་རླུང་གི་རྒྱུས་འོད་གསལ་བ་དེ་ཁོ་ན་ཉིད་རྟོགས་པར་འགྱུར་རོ། །ཡེ་ཤེས་ལྔའི་རང་བཞིན་གྱི་ཐིག་ལེ་སྣ་གསུམ་གྱི་རྩེ་མོར་འཛིན་
པས་འོད་གསལ་བའི་དེ་ཁོ་ན་ཉིད་རྟོགས་སོ། །ཡེ་ཤེས་ལྔའི་རང་བཞིན་གྱི་དེ་བཞིན་གཤེགས་པའི་དཀྱིལ་འཁོར་གྱི་འཁོར་ལོ་སྤྲོས་པས་འབྲས་བུར་གྱུར་པའི་འོད་གསལ་བའི་དེ་ཁོ་ན་ཉིད་རྟོགས་པར་འགྱུར་རོ། །དེ་དག་ཉེ་བར་སྡུད་པར་བྱེད་པ་བདེན་པ་གཉིས་དབྱེར་མེད་པའ་བདག་ཉིད་ཅན་གྱི་ཏིང་ངེ་འཛིན་གྱི་རྒྱུས་མི་གནས་པའི་མྱ་ངན་ལས་འདས་པའི་དབྱིངས་ཀྱི་མཚན་ཉིད་ཅན་འོད་གསལ་བའི་དེ་ཁོ་ན་ཉིད་རྟོགས་པར་འགྱུར་རོ། །རྩའི་རིམ་པས་ཀྱང་འདི་ལྟ་སྟེ་འདོད་པའི་གཟུགས་ལ་སོགས་པའི་རྩ་ལྔ་པོ་ལ་ཀུན་དུ་སྤྱོད་པ་ཡེ་ཤེས་ལྔའི་བདག་ཉིད་ཀྱི་བྱང་ཆུབ་ཀྱི་སེམས་ཀྱི་དོན་དམ་པ་བྱང་ཆུབ་ཀྱི་སེམས་ཀྱི་ངོ་བོ་འོད་གསལ་བའི་དེ་ཁོ་ན་ཉིད་རྟོགས་པར་འགྱུར་རོ། །དེ་བཞིན་དུ་རླུང་གི་དེ་ཁོ་ན་ཉིད་དང་སྔས་ཀྱི་དེ་ཁོ་ན་ཉིད་ལ་སོགས་པ་ཡང་ཤེས་པར་བྱའོ། །དེ་ཡང་འོག་ཏུ་ལེའུ་བཅུ་གཉིས་པ་ལས་འཆད་པར་འགྱུར་རོ། །མཆོད་པ་དེ་རྣམས་ཀྱིས་ཞེས་པ་ལ་རྡོ་རྗེ་བཟླས་པ་ལ་སོགས་པ་རྫོགས་པའི་རིམ་པའི་སྒོམ་པ་རྣམས་ཀྱིས་ཞེས་བྱ་བའི་དོན་ཏོ། །སངས་རྒྱས་ཉིད་ཅེས་བྱ་བ་ལ་སོགས་པས་བསྐལ་པ་གྲངས་མེད་པ་གསུམ་གྱིས་ཐོབ་པར་བྱ་བའི་བྱང་ཆུབ་ཤེས་རབ་ཀྱི་ཕ་རོལ་ཏུ་ཕྱིན་པའི་རྣལ་འབྱོར་པ་ལས་ལྡོག་པ་བསྟན་ཏོ། །མཆོད་པ་རྣམ་པ་གཉིས་སྨོས་པས། །ཞེས་པ་ནི་རིམ་པ་གཉིས་ཀྱི་དབྱེ་བས་སོ། །རྡོ་རྗེ་འཆང་ཆེན་པོས་ཞེས་པ་ནི་བཀའ་སྩལ་ཏོ་ཞེས་སྡུད་པ་པོའི་ཚིག་གོ །མཆོད་པའི་ཆོ་ག་ཞེས་བྱ་བ་ལ་སོགས་པས་ལུང་གི་ཚད་མ་ཉིད་དུ་བསྟན་པར་བྱ་སྟེ། གཟུགས་ཞེས་བྱ་བ་ལ་སོགས་པ་ནི་གཟུགས་ལ་སོགས་པ་ཕྱིའི་སྐྱེ་མཆེད་དུ་དྲུག་གོ །དེ་དག་དངོས་པོ་མེད་བྱས་པ། །ཞེས་པ་ནི་སོ་སོར་སྡུད་པ་དང་བསམ་གཏན་གྱི་ཡན་ལག་དག་གི་ངོ་བོ་ཉིད་མེད་པ་གང་ཡིན་པ་དེ་ནི་སངས་རྒྱས་ལ་མཆོད་པ་བླ་ན་མེད་པ་བསྟན་ཏོ། །དེས་ནི་སོ་སོར་སྡུད་པ་དང་བསམ་གཏན་དག་གིས་བསྡུས་པའི་སེམས་རྣམ་པར་དག་པའི་རིམ་པ་བསྟན་ཏོ། །མིག་ལ་སོགས་པ་ཞེས་བྱ་བ་ལ་སོགས་པས་ཐ་མལ་པའི་མིག་ལ་སོགས་པ་དང་དེའི་རྣམ་པར་ཤེས་པ་དང་དེ་དག་འོད་གསལ་བ་ལས་ཅིག་ཅར་རམ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་སོ། །ཡེ་ཤེས་ལས་བྱུང་བ་ནི་སྤྲོས་ཏེ་མངོན་པར་ཤེས་པ་ལྔས་ཉེ་བར་མཛེས་པར་བྱས་ལ་རྣལ་འབྱོར་བས་
སྒོམ་པ་གང་ཡིན་པ་དེ་ནི་མྱུར་དུ་བྱང་ཆུབ་ཉིད་ཐོབ་པར་འགྱུར་ཏེ། སྒྱུ་མའི་དཔེ་བཅུ་གཉིས་ཀྱི་ཉེ་བར་མཚོན་པའི་ཡེ་ཤེས་ཀྱི་སྐུ་ཐོབ་པར་འགྱུར་རོ་ཞེས་བྱ་བ་འདིས་བདག་ལ་བྱིན་གྱིས་བརླབ་པའི་རིམ་པ་བསྟན་ཏོ། །དགོངས་པས་བཤད་པའོ་ཞེས་པ་ནི་འགལ་བའི་ཚིག་གི་སྒོ་ནས་འོད་གསལ་བའི་དེ་ཁོ་ན་ཉིད་དང་ཡེ་ཤེས་ཀྱི་སྐུ་བསྟན་པའོ། །དེ་ལྟར་ཕྱི་དང་ནང་གི་མཆོད་པ་བསྟན་ནས་ཞེས་པ་ནི་བརྟགས་པ་དང་རྫོགས་པའི་རིམ་པ་གཉིས་ཀྱི་མཆོད་པ་ཞེས་པའི་ཐ་ཚིག་གོ །རྫོགས་པའི་རིམ་པ་དང་བྲལ་བས་ཞེས་པ་ནི་རྡོ་རྗེ་བཟླས་པ་ལ་སོགས་པའི་རིམ་པ་ལྔ་མེད་པ་ཞེས་བྱ་བའི་དོན་ཏོ། །གང་གི་ཕྱིར་རིམ་པ་ལྔ་ལས་མ་གཏོགས་པར་རྫོགས་པའི་རིམ་པ་གཞན་ནི་མེད་དོ། །ཡོད་ན་ཡང་དེའི་ནང་དུ་བསྡུས་པར་འགྱུར་ཏེ་དེ་ཡང་འོག་ནས་བཤད་པར་བྱའོ། །རྡོ་རྗེ་འཆང་ཆེན་པོ་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྔགས་བསྟན་ཏོ། །སྔགས་ལ་དམིགས་པ་ཞེས་བྱ་བ་ལ་སོགས་པས་རིམ་པ་ལྔ་གསལ་པོར་བསྟན་ཏོ། །སྔགས་ཞེས་པ་ནི་བསམ་པ་དང་བག་ལ་ཉལ་དང་རིགས་དང་བག་ཆགས་ཀྱི་དབྱེ་བས་བཅོམ་ལྡན་འདས་ཀྱིས་དབྱེ་བ་བདུན་ཅུ་རྩ་གཉིས་གསུངས་སོ། །དེ་དག་ཐམས་ཅད་ཨཱ་ལི་དང་ཀཱ་ལིའི་ངོ་བོ་ཡི་གེ་བཞི་བཅུ་རྩ་དགུའི་བདག་ཉིད་ཅན་གྱི་ཡི་གེ་ཕྱི་མོས་བྱུང་བ་ནི་བསྐྱེད་པའོ། །ནམ་མཁའ་ལས་རླུང་རབ་ཏུ་བྱུང༌། །ཞེས་བྱ་བ་ལ་སོགས་པའི་རིམ་པས་སོ། །སྒྲ་ལ་སོགས་པའི་ངོ་བོ་ཡིན་ལ་ཞེས་པ་ནི་ལྟེ་བའི་ཕྱོགས་ནས་དང་པོ་ཡིད་ཀྱིས་བསྐུལ་བ་མི་གསལ་བའི་སྒྲའི་ངོ་བོ་འབྱུང་ངོ༌། །དེ་ནས་གནས་དང་བྱེད་པ་དང་འབད་རྩོལ་གྱི་དབང་གིས་གནས་བརྒྱད་ལ་རེག་ཅིང་གསལ་བར་འགྱུར་བ་གང་ཡིན་པ་དེ་ནི་སྒྲའོ། །དེ་བས་ན་ཡི་གེ་དང་ཚིག་དང་ངག་དང་དག་ཆེན་པོའི་རིམ་གྱིས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་འབྱུང་ངོ༌། །ཡང་ན། ཡི་གེ་དབྱངས་དང་སྒྲ་དང་ནི། །མཐའ་སྒྲ་ཀུ་ཅོ་འབྲུག་སྒྲ་གླུ། །ཕུག་ནས་འབྱུང་འདོད་ཆག་དྲག་དང༌། །སྒྲ་ཡི་མཚན་ཉིད་བཅུ་ཡིན་ནོ། །ཞེས་རྡོ་རྗེ་ས་འོག་གི་རྒྱུད་ལས་འབྱུང་ངོ༌། །སྒྲ་ལ་སོགས་པའི་རང་བཞིན་དེ་དག་བསྟན་ཏོ། །དེ་རྣམས་ནི་ཞེས་པ་ནི་སྔགས་རྣམས་ཀྱིའོ། །བུད་མེད་དང་སྐྱེས་པ་དང་མ་ནིང་ཉིད་ཀྱིས་ཞེས་པ་ནི་བུད་མེད་ཀྱི་རང་བཞིན་ནི་ཡི་གེ་ཨཱ་སྟེ་ཤེས་རབ་
ཀྱི་རང་བཞིན་ཡིན་པས་སོ། །སྐྱེས་པའི་རང་བཞིན་ནི་ཡི་གེ་ཧཱུཾ་སྟེ་ཐབས་ཀྱི་རང་བཞིན་ཡིན་པས་སོ། །མ་ནིང་གི་རང་བཞིན་ནི་ཨོཾ་སྟེ། གཉི་ག་དང་སྙོམས་པར་ཞུགས་པའི་ངོ་བོ་ཡིན་པས་སོ། །དེ་ལ་སྡེ་ཚན་བརྒྱད་ནི་དང་པོའི་ཡི་གེ་བརྒྱད་ལ་བསྡུས་ནས་བཞིར་འགྱུར་རོ། །བཞི་པོ་ཨ་ཀ་ཡ་ཞེས་བྱ་བའི་གསུམ་ལ་བསྡུའོ། །དེ་རྣམས་ཀྱང་ཡི་གེ་ཕྱི་མོ་མ་ལུས་པ་ཉེ་བར་བསྡུས་པའི་སྒོ་ནས་ཡོངས་སུ་འགྱུར་ཞིང་སྦྱར་ལ། ཨོཾ་ཨཱཿ་ཧཱུཾ་གསུམ་ཞེས་ཡི་གེ་གསུམ་དུ་འགྱུར་རོ། །ཡི་གེ་གསུམ་གྱིས་གཞིར་གྱུར་པས། །ཞེས་པ་ནི་ཡི་གེ་གསུམ་གྱིས་བསྡུས་པས་སྔགས་ཀྱི་སྒྲས་ནི་ཡི་གེ་གསུམ་བཤད་དོ། །དེ་ཉིད་བསྟན་པའི་ཕྱིར། སྔགས་ནི་ཡི་གེ་གསུམ་ཞེས་བྱའོ། །དེ་རྣམས་ཀྱི་ཞེས་པ་ནི་ཡི་གེ་གསུམ་གྱིའོ། །འཇུག་པ་ལ་སོགས་པ་ནི་འགྲོ་བ་དང་འོང་བ་དང་བར་དུ་གནས་པའི་རིམ་པས་སོ། །ཡོངས་སུ་ཤེས་པ་ཞེས་པ་ནི་ཡན་ལག་མཉམས་པའི་ལྷའི་རྣལ་འབྱོར་གྱི་རིམ་པས་བཟླས་པའོ། །དེ་ལ་སྲོག་ལ་སོགས་པ་རླུང་གསུམ་དང༌། །དེ་བཞིན་གཤེགས་པ་གསུམ་དང༌། ཁམས་གསུམ་དང༌། ཡེ་ཤེས་གསུམ་དང༌། སྲིད་པ་གསུམ་དང༌། སྐུ་གསུམ་དང༌། སྐུ་དང་གསུང་དང་ཐུགས་དང༌། ཏིང་ངེ་འཛིན་གསུམ་དང་རྩ་གསུམ་དང༌། ཡེ་ཤེས་སེམས་དཔའ་གསུམ་ལ་དབྱེར་མེད་པར་ལྷག་པར་མོས་ནས་འཇུག་པ་ལ་སོགས་པའི་རིམ་པས་ཡི་གེ་གསུམ་བཟླས་པ་གང་ཡིན་པ་དེ་ནི་སྔགས་ལ་དམིགས་པ་སྟེ་ཡན་ལག་མ་ཉམས་པའི་རིམ་པས་རྡོ་རྗེ་བཟླས་པ་ཞེས་བྱ་བའི་དོན་ཏོ། །ཇི་སྐད་དུ། དོན་རྟོགས་པ་ཡི་བཟླས་པ་ནི། །ངོ་བོ་ཉིད་མེད་བཟང་པོ་སྟེ། དུས་གསུམ་སངས་རྒྱས་རྣམས་སྤྱོད་པས། །དེ་ནི་རྡོ་རྗེ་བཟླས་པར་བཤད། །ཅེས་འབྱུང་ངོ༌། །དེ་ལས་ཞེས་བྱ་བ་ལ་སོགས་པས་རྡོ་རྗེ་བཟླས་པ་ལ་ལུས་ངག་ཡིད་ནི་ལྷན་ཅིག་བྱེད་པ་ཡིན་ནོ་ཞེས་བསྟན་ཏོ། །སྤྲུལ་པའི་ལུས་དང་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་སྤྲོས་པའི་ལུས་ཀྱིས་སོ། །དེས་ནི་རྫོགས་པའི་རིམ་པ་བསྒོམ་པས་ཡེ་ཤེས་ཀྱི་སྐུ་གཟུང་བ་ཡིན་གྱི་སྔགས་ཀྱི་སྐུ་ནི་མ་ཡིན་ནོ་ཞེས་བསྟན་ཏོ། །རྡོ་རྗེ་བཟླས་པ་ཉེ་བར་མཚོན་པས་ཞེས་པ་ནི་དེ་ལྟར་གྱུར་པའི་མཚོན་པའི་དོན་དུ་བྱེད་ཚིག་གསུམ་པ་བསྟན་ཏོ། །སྙིང་གར་གནས་པའི་རྡོ་རྗེ་སེམས་དཔའ་ཞེས་པ་
ནི་རྡོ་རྗེ་བཟླས་པའི་དུས་སུ་རྡོ་རྗེ་སེམས་དཔའི་མོས་པས་སོ། །ཇི་ལྟ་བ་བཞིན་དུ་ཡོངས་སུ་ཤེས་པས་ཡུལ་དུ་བྱས་པའོ་ཞེས་པ་ནི། ཤེས་པ་དང་ཤེས་བྱ་དང་བྲལ་བའི་འོད་གསལ་བའི་དེ་ཁོ་ན་ཉིད་ལྷག་པར་རྟོགས་པ་མངོན་དུ་བྱས་པའོ། །ཕྱག་རྒྱ་ཆེན་པོ་རྣམ་པར་དག་པའི་ཕྱིར་རོ་ཞེས་པ་ནི་ཕྱག་རྒྱ་དང་ཏིང་ངེ་འཛིན་གྱི་རིམ་པས་སྒྱུ་མའི་སྐུ་ལ་མངོན་པར་ཞེན་པ་བཅོམ་པའི་ཕྱིར་རོ། །དོན་དམ་པའི་བདེན་པའོ། །ཞེས་པ་ནི་མངོན་པར་བྱང་ཆུབ་པའི་རིམ་པས་ཐོབ་པར་བྱ་བ་འོད་གསལ་བ་ཞེས་བྱ་བའི་དོན་ཏོ། །སྲིད་པ་དང་ཞི་བའི་ཞེས་པ་ནི་འཁོར་བ་དང་མྱ་ངན་ལས་འདས་པ་དང༌། རྟག་པ་དང་ཆད་པ་ལ་སོགས་པ་ལྟ་བ་གཞན་རྣམས་ཀྱི་གཅིག་གི་མཚན་ཉིད་ཅན་ཞེས་པ་ནི་གཉིས་སུ་མེད་པ་ཉིད་དུ་སྣང་བ། ཡིད་དུ་འོང་བའི་ཞེས་པ་ནི་འབྲས་བུར་གྱུར་པ་ཉིད་ཀྱིས་མངོན་པར་འདོད་པ་རྡོ་རྗེ་འཆང་ཆེན་པོའི་སྐུ་ནི་མི་གནས་པའི་མྱ་ངན་ལས་འདས་པའི་དབྱིངས་ཀྱི་ངོ་བོ་རྡོ་རྗེ་འཆང་ཆེན་པོའི་ཕྱག་རྒྱ་ཆེན་པོའི་སྐུ་བསྐྱེད་པར་གྱུར་པའོ་ཞེས་པ་འདིས་ཟུང་དུ་འཇུག་པའི་རིམ་པའི་མདོར་བསྟན་ཏོ། །དངོས་གྲུབ་ནི་བདག་ལ་བྱིན་གྱིས་བརླབ་པའི་མཚན་ཉིད་ཅན་ཕྱག་རྒྱ་ཆེན་པོའོ་ཞེས་པ་ལ་འོད་གསལ་བ་ལས་ཅིག་ཅར་དུ་བྱུང་བ་སྒྱུ་མའི་དཔེས་ཉེ་བར་མཚོན་པ་རྡོ་རྗེ་འཆང་ལ་སོགས་པའི་སྐུ་ཞེས་བྱ་བའི་དོན་ཏེ། །དེས་ནི་བདག་ལ་བྱིན་གྱིས་བརླབ་པའི་རིམ་པ་མདོར་བསྟན་ཏོ། །ཕུལ་དུ་བྱུང་བ་ཞེས་པ་ནི་རང་བཞིན་དང་སྣང་བའི་དྲི་མ་བྲལ་བར་བྱེད་པས་མཆོག་གོ །སེམས་རྣམ་པར་དབེན་པའི་མཚན་ཉིད་ཅན་ཞེས་པ་ནི་རྣམ་པར་ཤེས་པ་གསུམ་གྱི་རང་བཞིན་གྱི་སེམས་སྔགས་དང་ཕྱག་རྒྱའི་རིམ་པས་རྣམ་པར་སྦྱོང་བའི་ཕྱིར་རོ། །རྡོ་རྗེ་བཟླས་པ་ལས་ལྕག་པ་ཡིན་པའི་ཕྱིར་རོ་ཞེས་པ་ནི་ངག་དབེན་པ་ལས་སེམས་རྣམ་པར་དབེན་པ་ནི་བསྒོམ་པར་དཀའ་བའོ་ཞེས་བྱ་བས་སོ། །དེ་ནི་སེམས་རྣམ་པར་དག་པའི་རིམ་པ་མདོར་བསྟན་ཏོ། །རྣལ་འབྱོར་པའི་རྒྱུད་ལས་ཞེས་པ་ནི་སྒྲུབ་པ་པོའི་སེམས་ལའོ། །འོག་ནས་བཤད་པའི་གནས་སྐབས་བཞི་པོ་ཞེས་པ་ནི་སེམས་རྣམ་པར་དག་པ་ལ་སོགས་པའོ། །བསྐྱེད་པར་བྱ་སྟེ་བཅོམ་ལྡན་འདས་རྡོ་རྗེ་སེམས་དཔའ་ཞེས་ཚིག་ལྷག་མའོ། །འདི་སྐད་བཤད་པ་ཡིན་ཏེ་རྡོ་རྗེ་བཟླས་པའི་རིམ་པ་བསྒོམས་ནས་དེའི་འོག་ཏུ་སེམས་ལ་སོགས་པ་རྣམ་པར་དག་པའི་ཕྱིར་
སེམས་ལ་དམིགས་པ་ལ་སོགས་པ་རིམ་པ་བཞི་བསྒོམ་པར་བྱའོ་ཞེས་བྱ་བའི་དོན་ཏོ། །འདི་དག་གིས་ནི་ཞེས་པ་ནི་རིམ་པ་བཞི་བསྒོམ་པའི་སྒོ་ནས་སོ། །རྡོ་རྗེ་བཟླས་པ་ཞེས་པ་ནི་རིམ་པ་དང་པོའི་ཕན་ཡོན་གསུངས་པ་ནི་བསྟོད་པ་བསྟན་ཏོ། །གང་གི་ཕྱིར་རྡོ་རྗེ་བཟླས་པ་སློབ་པའི་རྣལ་འབྱོར་པས་རིམ་པ་བཞིར་ཐོབ་པར་འགྱུར་རོ། །དེ་བས་ན་རྫོགས་པའི་རིམ་པའི་ཡན་ལག་གཙོ་བོ་དེ་ཉིད་ཡིན་ནོ། །སྔགས་དང་སེམས་དང་དེ་ནས་ལུས། །རྣམ་པར་དག་དང་ཟུང་འཇུག་སྟེ། །རིམ་པ་ལྔ་ཡིས་བསྡུས་པའི་དོན། །ཤེས་པས་མཐའ་དྲུག་ལ་ནི་འཇུག །ཅེས་འབྱུང་ངོ༌། །མདོར་བསྟན་པའི་ཚིག་བཞི་ཞེས་པ་ནི་རིམ་པ་བཞི་སྟོན་པར་བྱེད་པའི་ཚིག་རྣམས་སོ། །བཤད་པར་བསྟན་པའི་ཕྱིར་ཞེས་པ་ནི་རྒྱས་པར་བཤད་པའི་ཕྱིར་རོ། །རིམ་པ་གཉིས་པས་ཇི་ལྟ་བ་བཞིན་དུ་ཡོངས་སུ་ཤེས་པའོ་ཞེས་པ་ནི་སྔགས་དང་ཕྱག་རྒྱའི་རིམ་པས་རང་བཞིན་དང་ཡེ་ཤེས་ཀྱི་ཚོགས་སྤངས་ནས་ཐམས་ཅད་སྟོང་པ་མངོན་དུ་བྱས་པའོ། །དེ་ཉིད་སེམས་ནི་བདག་མེད་པ་སྟེ་སེམས་གནས་འགྱུར་བའི་ཕྱིར་རོ། །ངག་དང་ལུས་དག་ཀྱང་ཞེས་པ་ནི་རྡོ་རྗེ་བཟླས་པའི་རིམ་པའི་མཚན་ཉིད་ཀྱི་ངག་དང་ཡེ་ཤེས་ཀྱི་སྐུའི་མཚན་ཉིད་ཀྱི་ལུས་གང་ཡིན་པ་དེ་དག་ཀྱང་སེམས་རྣམ་པར་དག་པའི་རིམ་པས་བདག་མེད་པ་ཉིད་དུ་བསྒོམ་པར་བྱའོ། །གང་གི་ཕྱིར་ལུས་དང་ངག་དག་གི་རྒྱུ་ནི་སེམས་ཡིན་ནོ་ཞེས་སྤངས་པས་འབྲས་བུར་གྱུར་པའི་ལུས་དང་ངག་ཀྱང་སྤོང་བར་འགྱུར་རོ་ཞེས་རྒྱུ་མི་དམིགས་པའོ། །སེམས་སོ་སོར་རྟོག་པར་བསྒྲུབ་པར་བྱའོ་ཞེས་པ་ནི་ཡེ་ཤེས་གསུམ་གྱི་རང་བཞིན་ཅན་གྱི་སེམས་ནི་འོད་གསལ་བའི་ངོ་བོར་བྱའོ། །འདིས་ནི་ཞེས་པ་ནི་འདས་མ་ཐག་ཏུ་བཤད་པའི་སྒོམ་པའི་རིམ་པས་སོ། །སྐུ་དང་གསུང་དང་ཐུགས་ཀྱི་མཚན་ཉིད་ཅེས་པ་ནི་ལུས་ལ་སོགས་པ་རྣམ་པར་དག་པར་བྱེད་པ་ལས་ནུས་པ་ཅན་ནོ། །ཤེས་རབ་དང་ཐབས་དང་ཉེ་བར་ཐོབ་པ་གསུམ་ཞེས་པ་ནི་ཤེས་རབ་ཀྱི་རང་བཞིན་སུམ་ཅུ་རྩ་གསུམ་དང༌། དེའི་རྒྱུར་གྱུར་པ་འཇུག་པའི་རྣམ་པར་ཤེས་པ་དང་ཐབས་ཀྱི་རང་བཞིན་བཞི་བཅུ་དང༌། དེའི་རྒྱུར་གྱུར་པའི་ཉོན་མོངས་པ་ཅན་གྱི་ཡིད་ཀྱི་རྣམ་པར་ཤེས་པ་དང༌། མ་རིག་པའི་རང་བཞིན་བདུན་དང༌། དེའི་རྒྱུར་གྱུར་པ་ཀུན་གཞི་རྣམ་
པར་ཤེས་པ་ཉེ་བར་སྡུད་པར་བྱེད་པ་སྟོན་པར་གྱུར་པ་ཡིན་ནོ་ཞེས་པ་ནི་འོད་གསལ་བ་བསྟན་ཏོ། །དེ་ནི་སེམས་རྣམ་པར་དག་པའི་རིམ་པ་རྒྱས་པར་བཤད་པའོ། །དེ་ནས་ཞེས་བྱ་བ་ལ་སོགས་པས་རིམ་པ་གསུམ་པ་བཤད་པར་བྱ་སྟེ། དོན་དམ་པའི་བདེན་པ་སྟེ་ཞེས་བྱ་བ་ལ་སོགས་པས་འོད་གསལ་བ་ལས་ཅིག་ཅར་དུ་སྤྲོ་བར་བསྟན་ཏོ། །བསྐྱེད་པར་བྱའོ་ཞེས་པ་ནི་འོད་གསལ་བ་ལས་སྤྲོ་བར་བྱའོ། །སྦྱོར་བ་གསུམ་པོ་གཅིག་ཏུ་གྱུར་པ་དེ་ནི་ཞེས་པ་ནི་གོ་བཟློག་པས་སྣང་བ་ཉེ་བར་ཐོབ་པ་དང་སྣང་བ་མཆེད་པ་དང་སྣང་བ་རྣམས་ཡོངས་སུ་གྱུར་པ་ལས་བྱུང་བའི་རྡོ་རྗེ་འཆང་ལ་སོགས་པའི་སྐུའོ། །དེ་ཉིད་བསྟན་པར་བྱ་བའི་ཕྱིར། །ཡིད་ཀྱི་རང་བཞིན་གྱི་ལྷའི་གཟུགས་ཞེས་བསྟན་ཏོ། །དེས་ནི་བདག་ལ་བྱིན་གྱིས་བརླབ་པའི་རིམ་པ་རྒྱས་པར་བཤད་པ་བསྟན་ཏོ། །ལུས་ཞེས་བྱ་བ་ལ་སོགས་པས་རིམ་པ་བཞི་པ་བསྟན་པར་བྱ་སྟེ། །ལུས་དང་ངག་དང་སེམས་ཀྱི་དམིགས་པ་ཉེ་བར་རྟོགས་པ་ཞེས་པ་ནི། །ལུས་ལ་སོགས་པའི་སྒྱུ་མ་ལྟ་བུ་ཡོངས་སུ་ཤེས་པའོ། །གང་ཐོབ་པའི་ཀུན་རྫོབ་ཀྱི་བདེན་པ་ངོ་བོ་ཉིད་དེ་ཞེས་པ་ནི་འཇའ་ཚོན་ལྟར་སོ་སོར་སྣང་བ་རྡོ་རྗེ་འཆང་ལ་སོགས་པའི་སྐུའོ། །དེ་ནི་དམིགས་སུ་མེད་པ་སྟེ། །ཞེས་པ་ནི་སྔགས་དང་ཕྱག་རྒྱའི་རིམ་པས་འོད་གསལ་བ་ལ་ཐིམ་པས་སོ། །གཏན་ཚིགས་བསྟན་པར་བྱ་བའི་ཕྱིར། །ཐམས་ཅད་ཅེས་བྱ་བ་ལ་སོགས་པ་སྨོས་ཏེ། །ཐམས་ཅད་ནི་སྒྱུ་མ་ལྟ་བུ་ཉིད་ཀྱིས་མཚན་པ་རྡོ་རྗེ་འཆང་ལ་སོགས་པའི་ཡེ་ཤེས་ཀྱི་སྐུའོ། །དོན་དམ་པའི་བདེན་པ་ཉིད་རྟོགས་པས་སོ་ཞེས་པ་ནི་ཡང་དག་པའི་མཐའ་ལ་འཇུག་པའི་ཕྱིར་རོ། །འདིས་ནི་མངོན་པར་བྱང་ཆུབ་པའི་རིམ་པ་གསལ་བར་བྱེད་དོ་ཞེས་པ་ནི་མངོན་པར་བྱང་ཆུབ་པའི་རིམ་པ་རྒྱས་པར་བསྟན་ཏོ་ཞེས་བྱ་བའི་དོན་ཏོ། །ད་ནི་བརྟགས་པའི་རྣལ་འབྱོར་གྱིས་ཐར་པ་ཐོབ་པར་མི་འགྱུར་རོ་ཞེས་བསྟན་པའི་ཕྱིར་འདིར་ཞེས་བྱ་བ་ལ་སོགས་པ་སྨོས་ཏེ། འདིར་ནི་རིམ་པ་བཞི་བསྒོམ་པར་བྱས་ནས་ཡང་ངོ༌། །ཡེ་ཤེས་ཀྱི་རང་བཞིན་གྱི་སྐུ་ལ་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བ་ལའོ། །རབ་ཏུ་གནས་པ་མི་དམིགས་ཀྱང༌། །ཞེས་པ་ནི་དབང་པོ་དམན་པས་གནས་པར་མི་འགྱུར་རོ། །ཀྱང་གི་སྒྲས་འོད་གསལ་བ་ལ་ཡང་ངོ༌།།
གལ་ཏེ་ནི་དམ་ཚིག་ཉམས་པ་ལ་སོགས་པའི་སྐྱོན་གྱི་དབང་གིས་སོ། །རྟོགས་པའི་རྣལ་འབྱོར་གྱིས་ཞེས་པ་ནི་རྡོ་རྗེ་བཞི་པོ་བསྒོམས་པས་སོ། །ལྷའི་སྐུར་གནས་པ་དམིགས་པར་ཞེས་པ་ནི་སྔགས་ཀྱི་སྐུ་ལ་གནས་པར་འགྱུར་རོ། །དེ་བཟློག་པའི་ཕྱིར་ཞེས་པ་ནི་སྤོང་བའི་ཕྱིར་རོ། །ཨོཾ་ལ་སོགས་པ་ནི་སྦས་ནས་བརྗོད་པས་སོ། །དེས་ལུས་སུ་བྱས་ལ་ཞེས་པ་ནི་ཡོངས་སུ་གྱུར་པ་ལས་སྐྱེས་པའོ། །རྡོ་རྗེ་བཞི་པོ་ཞེས་པ་ནི། །དང་པོ་བྱང་ཆུབ་སྟོང་པ་ཉིད། །གཉིས་པ་ས་བོན་བསྡུས་པ་དང༌། །གསུམ་པ་སྐུ་ནི་བསྐྱེད་པ་དང༌། །བཞི་པ་ཡི་གེ་དགོད་པའོ། །ཞེས་འབྱུང་ངོ༌། །རྡོ་རྗེ་ནི་དེ་བཞིན་གཤེགས་པའི་སྐུ་རྣམས་སྐྱེད་པར་བྱེད་པའོ། །བཞི་པོ་ནི་བསྒོམ་པ་བཞི་ཞེས་བྱ་བའི་དོན་ཏོ། །དེས་ནི་རྡོ་རྗེ་བཞི་པོས་སོ། །སངས་རྒྱས་པ་ཉིད་ཅེས་པ་ནི་རྡོ་རྗེ་འཆང་གི་ཕྱག་རྒྱ་ཆེན་པོ་ཐོབ་པར་མི་འགྱུར་རོ། །གང་གི་ཕྱིར་ཞེ་ན་ཞེས་བྱ་བ་ལ་སོགས་པས་སྔགས་ལས་འབྱུང་བའི་སྐུ་བདེན་པ་མ་ཡིན་ནོ་ཞེས་བསྟན་ཏོ།། སྔགས་ཀྱི་ཡི་གེ་ཞེས་པ་ནི་སྔགས་ཀྱང་ཡིན་ལ་ཡི་གེ་ཡང་ཡིན་པས་ན་སྔགས་ཀྱི་ཡི་གེའོ། །སྦ་བར་བྱ་བས་ན་སྔགས་སོ། །གནས་དང་བྱེད་པ་དང་འབད་པའི་རྗེས་སུ་སྟོབས་ཀྱིས་འབྱུང་བས་ན་ཡི་གེའོ། །དེ་སྲིད་ཚོགས་པ་ལས་སྐྱེས་པ་ཡིན་ཏེ་ཞེས་པ་ནི་འདོད་པ་དང་གནས་དང་དབྱེ་བ་ལ་སོགས་པའི་འབྲེལ་པ་འབྱུང་བའི་ཕྱིར་རོ། །སྐྱེས་ནས་འཇིག་པར་འགྱུར་བས་ཞེས་པ་ནི་ཨོཾ་བརྗོད་པའི་དུས་སུ་ཨཱ་མི་དམིགས་པར་འགྱུར་བ་དང༌། དེ་དག་བརྗོད་པའི་དུས་སུ་ཡང་ཧཱུཾ་མི་དམིགས་སོ། །དེ་བཞིན་དུ་ཨོཾ་བརྗོད་པའི་དུས་སུ་འཇུག་པའི་དབྱངས་མི་དམིགས་སོ། །དེ་བཞིན་དུ་ཐམས་ཅད་ལ་སྦྱར་རོ། །ནམ་མཁའ་དང་མཉམ་ན་ཞེས་པ་ནི་སྟོང་པའོ། །དེ་བས་ན་སྟོང་པའི་རང་བཞིན་གྱི་སྔགས་ལས་སྔགས་ཀྱི་སྐུ་ནི་ལྷའི་སྐུ་གང་ལས་སྐྱེད་པར་འགྱུར་རོ། །གང་གི་ཕྱིར་ནམ་མཁའི་མེ་ཏོག་གི་ནམ་མཁའ་རྒྱུར་གྱུར་པ་མ་ཡིན་ཏེ། གཉི་ག་ཡང་བརྫུན་པས་སོ། །དེ་ཉིད་བསྟན་པའི་ཕྱིར། བསྒོམ་པར་བྱ་བའི་ལྷའི་སྐུ་མེད་པས་ཞེས་པ་ནི་ལས་མི་དམིགས་པས་གཟུགས་ལ་སོགས་པའི་བསྒོམ་པའི་བྱ་བ་ཡང་མེད་དོ། །དེ་བས་ན་བསྒོམ་པར་བྱ་བ་དང༌། སྒོམ་པ་དག་མེད་པས་གང་ལ་དམིགས་ཏེ་སྒོམ་པ་པོས་བྱང་ཆུབ་ཀྱི་མཚན་ཉིད་ཀྱི་འབྲས་བུ་ཐོབ་པར་
འགྱུར་རོ། །དེ་བས་ན་ཞེས་བྱ་བ་ལ་སོགས་པས་ཉེ་བར་བསྡུས་པ་བསྟན་ཏེ། བསྐྱེད་པའི་རིམ་པའི་ཆོས་ནི་ཆོས་ཀྱི་སྐུ་སྟེ། དོན་དམ་པའི་བདེན་པ་འབའ་ཞིག་གཙོ་བོ་ཡིན་པས་ཆད་པའི་རང་བཞིན་གྱི་ཕྱིར་གཞན་གྱི་དོན་ཇི་ལྟར་ནུས་ཏེ་སྤང་བྱའོ། །ལོངས་སྤྱོད་རྫོགས་པའི་སྐུ་ཡང་སྟོང་པའི་རང་བཞིན་གྱི་སྔགས་ལས་འབྱུང་བས་མ་སྐྱེས་པ་ཉིད་དོ། །དེ་བརྫུན་ཡིན་ན་སྤྲུལ་པའི་སྐུ་ཡང་མེད་དོ། །ཞེས་བསྟན་ཏོ། །བླང་བར་གྱུར་པའི་ཟུང་དུ་འཇུག་པའི་རིམ་པའི་ཏིང་ངེ་འཛིན་བསྟན་པར་བྱ་བའི་ཕྱིར། ཞི་བ་དང་སྐྱེ་བ་མི་གནས་པའི་ཞེས་སྨོས་ཏེ། འཁོར་བ་དང་མྱ་ངན་ལས་འདས་པ་དག་ལ་མི་གནས་པ་སྟེ། ཤེས་རབ་ཀྱིས་ནི་སྲིད་མི་གནས། །སྙིང་རྗེས་ཞི་བ་ལ་གནས་མིན། །ཞེས་འབྱུང་ངོ༌། །རྡོ་རྗེ་འཆང་ཆེན་པོའི་གོ་འཕང་ཞེས་པ་ནི་དཔལ་རྡོ་རྗེ་སེམས་དཔའི་གོ་འཕང་ཞེས་བྱ་བའི་དོན་ཏོ། །སྐུ་དང་གསུང་དང་ཐུགས་ཀྱི་མཚན་ཉིད་ཅེས་པ་ནི་སྐུ་ནི་བདག་ལ་བྱིན་གྱིས་བརླབ་པའི་རིམ་པའི་སྒྱུ་མ་ལྟ་བུ་དང༌། གསུང་ནི་རྡོ་རྗེ་བཟླས་པའི་རིམ་པ་སྦྱོང་བ་དང༌། ཐུགས་ནི་རིམ་པ་གཉིས་པས་འོད་གསལ་བ་རྟོགས་པ་དང༌། མཚན་ཉིད་ནི་ཡེ་ཤེས་ཀྱི་སྐུ་ཡང་མངོན་པར་བྱང་ཆུབ་པའི་རིམ་པས་འོད་གསལ་བར་བྱ་བ་དཔྱད་པས་སོ། །སྔགས་ལ་དམིགས་པ་ལ་སོགས་པའི་རིམ་གྱིས་ཞེས་བྱ་བ་ལ་སོགས་པ་ནི་དེ་ཉིད་ཀྱིས་བཤད་པའོ། །སྟོང་པ་ཉིད་གསུམ་ཞེས་པ་ནི་སེམས་རྣམ་པར་དག་པའི་རིམ་པས་ཐོབ་པར་བྱ་བ་སྟོང་པ་གསུམ་གྱི་རྒྱུ་ཅན་འོད་གསལ་བའོ། །ཀུན་རྫོབ་ཀྱི་བདེན་པ་ཉིད་ཀྱིས་ཤེས་པ་ནི་ཡེ་ཤེས་ཀྱི་སྐུ་བཟུང་བས་སོ། །གཅིག་ཏུ་བྱས་པས་ཞེས་པ་ནི་དེ་དག་གཉིས་སུ་མེད་པར་བྱས་པ་རིམ་པ་ལྔ་པ་ཞེས་བྱའོ། །དེ་ཉིད་ཀྱི་ཁྱད་པར་བསྟན་པར་བྱ་བའི་ཕྱིར། །འོད་ཟེར་ལྔ་ནི་དེ་བཞིན་གཤེགས་པ་སྔགས་ཀྱི་སྐུ་ལས་བྱུང་ངོ༌། །དེ་རྣམས་བསྐྱེད་པར་ཞེས་པ་ནི་དེ་བཞིན་གཤེགས་པ་ལྔའི་རང་བཞིན་གྱི་འོད་ཟེར་ལྔས་རྣམ་པར་སྤྲས་པ་ཞེས་བྱ་བའི་དོན་ཏོ། །རྡོ་རྗེ་ལྟ་བུའི་ཏིང་ངེ་འཛིན་ཏོ་ཞེས་པ་ནི་ཀུན་དུ་འོད་ཀྱི་ས་ལ་དེ་རྟོགས་པས་སོ། །དོན་དམ་པའི་བདེན་པ་ཞེས་པ་ནི་རིམ་པ་གཉིས་པ་དང་བཞི་པ་ལས་བསྟན་པ་འོད་གསལ་བ་ཞེས་བྱའོ། །དེ་དང་སྦྱར་བ་ཞེས་པ་ནི་འོད་གསལ་བ་དང་འབྲེལ་པ་སྟེ་དེ་ལས་སྐྱེས་པའོ། །བསླབ་པར་བྱ་བ་ཞེས་པ་ནི་གོམས་པར་བྱའོ། །འདིས་ནི་
སྔར་བཤད་པའི་སྒོམ་པའི་རིམ་པས་སོ། །ཟུང་དུ་སྦྱོར་བའི་རིམ་པ་སྟོན་པ་ཡིན་ཏེ་ཞེས་པ་ནི་ཟུང་དུ་འཇུག་པའི་རིམ་པ་རྒྱས་པར་བཤད་པ་ཡིན་ནོ། །དགོངས་པས་བཤད་པའོ་ཞེས་པ་ནི་འགལ་བའི་ཚིག་གི་སྦྱར་བས་རིམ་པ་ལྔའི་དེ་ཁོ་ན་ཉིད་ཀྱི་དོན་བསྟན་པས་སོ། །ད་ནི་ཞེས་བྱ་བ་ལ་སོགས་པས་རིམ་པ་གཉིས་ཀྱི་རྣལ་འབྱོར་པ་རྣམས་ལ་རྣམ་པ་གསུམ་གྱི་ཕྲ་མོའི་རྣལ་འབྱོར་གྱི་སྒོམ་པ་ལེའུ་གསུམ་པ་ནས་བཤད་པ་ཡང་བསྟན་པར་བྱ་སྟེ། མདོར་བསྟན་པ་ནི་རྒྱས་པར་བཤད་པའི་ཕྱིར་རོ། །དེ་ལ་འདོད་ཆགས་དང་ཞེ་སྡང་དང་གཏི་མུག་གི་རིགས་ཅན་ལ་རྫོགས་པའི་རིམ་པ་ལ་བརྟེན་ནས་རྣམ་པ་གསུམ་གྱིས་ཕྲ་མོའི་རྣལ་འབྱོར་དང༌། དེའི་ཕྱོགས་གཅིག་པ་ཡང་བརྟགས་པའི་རྣལ་འབྱོར་པ་ལ་གཅིག་ཅེས་བྱ་བའི་དོན་ཏོ། །རྣམ་པར་ཤེས་པ་རླུང་དང་བཅས་པ་ཞེས་པ་ནི་རླུང་དང་རྣམ་པར་ཤེས་པ་དག་ནི་རྟ་དང་རྟ་བའི་རིགས་པའི་ཚུལ་དུ་འཇུག་པའོ། །དེ་དག་གིས་འདྲེས་པར་གྱུར་པ་ལས་འབྱུང་བ་ཐིག་ལེ་གང་ཡིན་པ་དེ་ནི་རླུང་དང་རྣམ་པར་ཤེས་པ་དང་བཅས་པའོ། །རྫོགས་པའི་རིམ་པ་བསྟན་པའི་འོག་ཏུ་འོ་ཞེས་པ་ནི་རིམ་པ་ལྔའི་མཚན་ཉིད་ཀྱི་རྫོགས་པའི་རིམ་པ་བསྟན་པའི་འོག་ཏུ་ཞེས་བྱའོ། །ཚོགས་གཉིས་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་གཉིས་སོ། །དེ་ལ་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་ལྔ་ནི་བསོད་ནམས་ཀྱི་ཚོགས་སོ། །སྟོང་པ་ཉིད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཡེ་ཤེས་ཀྱི་ཚོགས་ཏེ་དེ་དང་ལྡན་པའོ། །རྡོ་རྗེ་འཆང་བར་མཛད་པ་སྟེ། །ཞེས་པ་ནི་རྩེ་ལྔ་པའི་ཕྱག་མཚན་འཆང་བས་སོ། །ཡི་གེའི་དོན་ཏོ་ཞེས་པ་ནི་ཕྱག་མཚན་ཙམ་བསྟན་པའི་ཕྱིར་རོ། །མེ་ལོང་ལྟ་བུ་ལ་སོགས་པ་ཡེ་ཤེས་ལྔ་པོ་ཞེས་པ་ནི་མཐོང་བ་དང་སྒོམ་པའི་རིམ་པས་ཐོབ་པའི་ཡེ་ཤེས་ལྔ་འཆང་བས་སོ། །སྤྱིའི་དོན་ཏོ་ཞེས་པ་ནི་མདོ་སྡེ་པ་ལ་སོགས་པའི་འགྱོད་པ་སེལ་བའི་ཕྱིར་རོ། །ཡིད་ཀྱི་རང་བཞིན་གྱི་སྐུ་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བའི་ཡེ་ཤེས་ཀྱི་སྐུའོ། །སྦས་པའོ་ཞེས་པ་ནི་ཀུན་རྫོབ་ཀྱི་བདེན་པའི་མཚན་ཉིད་ཀྱི་དོན་བསྟན་པར་དབྱེ་བས་སོ། །གཉིས་སུ་མེད་པའི་ཡེ་ཤེས་ཏེ་ཞེས་པ་ནི་རིམ་པ་བཞི་པས་ཐོབ་པར་བྱེད་པའི་འོད་
གསལ་བའོ། །མཐར་ཐུག་པའོ་ཞེས་པ་ནི་འོད་གསལ་བ་ལ་ཞུགས་པའི་མཚན་ཉིད་ཀྱི་དོན་བསྟན་པས་སོ། །སྤྱན་ལ་སོགས་པ་སྟེ་ཞེས་པ་ལ་འདིར་དེ་བཞིན་གཤེགས་པའི་སྒྲ་ནི་མ་གཏོགས་སོ། །དེ་རྣམས་ཀྱི་མཆོད་པས་ན་ཞེས་པ་ནི། བདེ་བ་ཆེན་པོའི་མཚན་ཉིད་ཅན་གྱི་མཆོད་པས་མཆོད་པ་ཞེས་པའི་དོན་ཏོ། །རྣམ་པར་སྣང་མཛད་ལ་སོགས་པ་སྟེ་ཞེས་པ་ནི་ཡེ་ཤེས་ལྔ་རྟོགས་པས་སོ། །མཆོག་ཏུ་གྱུར་པ་ཞེས་པ་ནི་དེ་རྣམས་ཉེ་བར་སྡུད་པར་མཛད་པས་སོ། །ཐུགས་རྡོ་རྗེ་ཞེས་པ་ནི། སེམས་ཀྱི་རང་བཞིན་ཁམས་གསུམ་པ་ཡོངས་སུ་ཤེས་པས་སོ་བཀའ་སྩལ་ཅིང་ཞེས་པ་ནི་འདས་པའི་དུས་སུ་དེ་ལྟར་བྱུང་བའི་རྐྱེན་ནོ། །འོད་གསལ་བ་ལ་གནས་པའོ་ཞེས་པ་ནི་སེམས་རྣམ་པར་དག་པའི་རིམ་པས་ཐོབ་པར་བྱ་བ་ཐམས་ཅད་སྟོང་པའི་གནས་ལ་གནས་པའོ། །སྣང་བའི་ཚོགས་སོ་ཞེས་པ་ནི་ཟླ་བ་དང་ཉི་མ་དང་མཚམས་ཀྱི་སྣང་བ་དང་འདྲ་བའི་འོད་ཟེར་གྱི་འཁོར་ལོའོ། །དང་པོར་ལོངས་སྤྱོད་རྫོགས་པའི་སྐུ་བསྐྱེད་པའོ་ཞེས་པ་ནི་སྣང་བ་གསུམ་ཡོངས་སུ་གྱུར་པ་ལས་སྣང་བ་ཉེ་བར་ཐོབ་པ་ལ་སོགས་པའི་རིམ་པས་ཡེ་ཤེས་ཀྱི་སྐུ་བསམ་པར་བྱའོ། །ཕྱི་ནས་སེམས་ཅན་ལ་སོགས་པ་རྗེས་སུ་ཞུགས་པས་ཞེས་པ་ནི་ལུས་མཆོག་ཏུ་དགའ་བའི་ཆགས་པའི་སྒྲས་ཁམས་གསུམ་གྱི་ནང་ན་གནས་པ་རྫོགས་པ་དང་མ་རྫོགས་པའི་སེམས་ཅན་དང་དེ་བཞིན་གཤེགས་པ་རྗེས་སུ་ཞུགས་པས་སོ། །དེ་བཞིན་གཤེགས་པ་ཐམས་ཅད་ཀྱི་ཕྲ་རབ་ལས་བསྒྲུབས་པའི་ཞེས་པ་ནི་མ་ལུས་པ་ལུས་པ་མེད་ཅིང་རིགས་ལྔའི་དེ་བཞིན་གཤེགས་པ་རྣམས་ཀྱི་ཆ་ཤས་རྣམས་ཀྱིས་རྫོགས་པ་ཞེས་བྱ་བའི་དོན་ཏོ། །སྤྲུལ་པའི་སྐུར་ཞེས་པ་ནི་འོད་གསལ་བ་ལས་བྱུང་བའི་སྐུ་ནི་སྤྲུལ་པའི་སྐུ་སྟེ། དེ་ལ་ཅིག་ཅར་རམ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་འབྱུང་བ་ཞེས་བྱ་བའི་དོན་ཏོ། །འཆད་པར་གྱུར་པའི་རིམ་གྱིས་ཞེས་པ་ལ་འོག་ནས་འཆད་པའི་བསྒོམ་པའི་རིམ་པས་སོ། །ཕྲ་མོའི་རྣལ་འབྱོར་ཀུན་ཏུ་བརྩམ་པར་བྱའོ་ཞེས་པ་ནི་རྣམ་པ་གསུམ་གྱི་སྣའི་རྩེ་མོར་ཐིག་ལེའི་རྣལ་འབྱོར་བསྒོམ་པར་བྱའོ། །རྡོ་རྗེའི་མདོ་ཞེས་པ་ནི་ཟབ་པའི་དོན་དང་ལྡན་པའི་ཚིག་གིས་སོ། །ཡི་གེ་ཉུང་དང་ཐེ་ཚོམ་མེད། །སྙིང་པོ་ཅན་ཏེ་དོན་ཟབ་པ། །མདོ་ནི་
མཁས་པ་རྣམས་ཀྱིས་བཤད། །ཅེས་འབྱུང་ངོ༌། །མདོའི་དོན་བསྟན་པར་བྱ་བའི་ཕྱིར། །ཐ་མལ་པའི་སེམས་ཅན་རྣམས་ཀྱི་སྐྱེ་བ་ཞེས་བྱ་བ་ནི་སེམས་ཅན་གྱི་འཇིག་རྟེན་གྱི་ངོ་བོ་སེམས་ཅན་གྱི་རིགས་རྣམ་པ་བཞི་སྐྱེ་བའོ། །བརྟགས་པའི་ལྷར་དམིགས་པ་ཞེས་པ་ནི་དམ་ཚིག་གི་དཀྱིལ་འཁོར་གྱི་རིམ་པས་དེ་བཞིན་གཤེགས་པ་ལ་སོགས་པ་ལ་དམིགས་པར་གྱུར་པའོ། །རླུང་གི་དེ་ཁོ་ན་ཉིད་དང་ཞེས་པ་ནི་སྲོག་ལ་སོགས་པའི་རླུང་གི་ཚོགས་སྡུད་པར་བྱེད་པའི་བདག་ཉིད་ཅན་གྱི་དེ་ཁོ་ན་ཉིད་དོ། །སྔགས་ཀྱི་དེ་ཁོ་ན་ཉིད་དང་ཞེས་པ་ནི་སྔགས་ཀྱི་དབྱེ་བ་བདུན་ཅུ་རྩ་གཉིས་བསྡུ་བར་བྱེད་པའི་ཡི་གེ་གསུམ་པའི་ཡང་སྙིང་པོ་ཞེས་བྱ་བའོ། །ཡེ་ཤེས་ཀྱི་དེ་ཁོ་ན་ཉིད་དང་ཞེས་པ་ནི་སྣང་བ་ལ་སོགས་པ་དོན་དམ་པ་འཇུག་པའི་རང་བཞིན་ཏེ། ལྷག་པར་མོས་པའི་རྣལ་འབྱོར་གྱིས་སོ། །ཡོངས་སུ་དག་པའི་ལྷའི་དེ་ཁོ་ན་ཉིད་ངེས་པ་ནི་འདིར་བསྒོམ་པར་བྱ་བ་ལྷའི་སྐུ་ནི་རྣམ་པ་གཉིས་ཏེ་བརྟགས་པ་དང་ཡོངས་སུ་དག་པའོ། །དེ་ལ་བརྟགས་པ་ནི་བསྐྱེད་པའི་རིམ་པས་སོ། །ཡོངས་སུ་དག་པ་ནི་བདག་ལ་བྱིན་གྱིས་བརླབ་པའི་རིམ་པས་སོ། །དེ་ཉིད་ཀྱི་ཕྱིར་སྔགས་ཀྱི་སྐུ་དང་ཡེ་ཤེས་ཀྱི་སྐུ་སྟེ། དེའི་མིང་གི་རྣམ་གྲངས་སོ། །སྟོན་ཏོ་ཞེས་པ་ནི་དེ་ལྟར་ཕྲ་མོའི་རྣལ་འབྱོར་བསྒོམས་ན་དེ་བཞིན་གཤེགས་པ་དྲུག་གི་རང་བཞིན་ཐ་མལ་པའི་སེམས་ཅན་རྣམས་སྐྱེ་བ་ལ་སོགས་པ་དེ་ཁོ་ན་ཉིད་དྲུག་བསྒོམ་པར་འགྱུར་རོ། །དང་པོ་ཞེས་བྱ་བ་ལ་སོགས་པས་ཡན་ལག་དང་པོ་བསྟན་པར་བྱ་སྟེ། སྟེང་ན་གནས་པའི་སྲོག་དང་རྩོལ་བ་ཞེས་བྱ་བ་ནི་གདོང་གི་སྣའི་བུ་གནས་རྒྱུ་བའོ། །དབང་པོ་གཉིས་པོ་ནི་རྡོ་རྗེ་དང་པདྨ་དག་འབྲེལ་བ་ལས་སོ། །ནང་གི་ཤེས་རབ་དང་ཐབས་སྙོམས་པར་འཇུག་པའི་ཞེས་པ་ནི་ཤེས་རབ་དང་ཐབས་ལ་རྒྱུར་གྱུར་པ་བུད་མེད་དང་སྐྱེས་པ་གཉིས་ཀྱིས་ཉམས་སུ་མྱོང་བ་སྣང་བའི་ཡེ་ཤེས་ཕྲད་པས་སོ། །དགའ་བས་དྲངས་པ་ཞེས་པ་ནི་སྣང་བའི་ཡེ་ཤེས་འབྱུང་བས་སོ། །ཡན་ལག་མ་ལུས་པ་ལས་ཞེས་པ་ནི་བདུན་ཁྲི་ཉིས་སྟོང་གི་རྩའི་ཁོང་སྟོང་ལས་སོ། །འདོད་ཆགས་ཆེན་པོའི་མེས་ཞེས་པ་ནི་སྣང་བ་མཆེད་པའི་བརྡ་ཅན་གྱི་མཆོག་ཏུ་དགའ་བའི་མེས་སོ། །བཞུས་པར་གྱུར་ནས་ཞེས་པ་ནི་ཡན་ལག་ཐམས་ཅད་ཀྱི་ཚོགས་ལས་བྱུང་ཞིང༌། རྡོ་རྗེའི་རྩེ་འམ་དེའི་དཀྱིལ་དུ་
ཕྱིན་པས་སོ། །བྱང་ཆུབ་ཀྱི་སེམས་ཀྱི་ཐིག་ལེའི་གཟུགས་སུ་ཞེས་པ་ནི་འོད་གསལ་བའི་བདག་ཉིད་དོ། །པདྨའི་སྣའི་རྩེ་མོར་ལྷུང་བ་ཞེས་པ་ནི་སྣང་བ་ཉེ་བར་ཐོབ་པའི་དུས་སུ་ཆོས་འབྱུང་བའི་ལྟེ་བ་ལས་ཕྱུང་ཞིང་སྤྲོ་བར་འགྱུར་རོ། །འདིར་ནི་ཞེས་པ་ནི་ཐིག་ལེ་ཙམ་མོ། །སྲིད་པ་སྐྱེ་བའི་རིམ་པ་ལྟར་ཞེས་པ་ནི་ཁམས་གསུམ་གྱི་ནང་ན་གནས་པའི་སེམས་ཅན་གྱི་ཚོགས་བསྐྱེད་པའི་རིམ་པའོ། །བསྒོམ་པ་རྣམས་ལ་ཞེས་པ་ནི། དེའི་ངོ་བོ་བསམ་པར་བྱེད་པའི་རྣལ་འབྱོར་པ་རྣམས་ལའོ། །དེ་བཞིན་གཤེགས་པ་རྣམས་ཀྱི་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་རྡོ་རྗེ་འཆང་གིས་སོ། །ཡུངས་ཀར་གྱི་སྒྲས་མཚོན་པར་མཛད་ཅེས་པ་ནི། ཤིན་དུ་ཕྲ་བ་ཡིན་པས་བྱང་ཆུབ་སེམས་ཀྱི་ཐིག་ལེ་ཉིད་ལ་བརྡ་བསྟན་ཏོ། །ཐ་མའི་བདེ་བའི་དབང་གིས་ནི། །སྐད་ཅིག་མས་ནི་ཁམས་གསུམ་སྐྱེས། །མེ་དང་ཟླ་བའི་ཆ་མཉམ་པས། །འབྱུང་བ་བཞི་ཡི་བག་ཆགས་འབྱུང༌། །རླུང་གི་སྟོང་པ་ཉིད་ངོ་བོ། །ཡེ་ཤེས་དང་ནི་འདྲེས་གྱུར་པས། །དབང་པོའི་ལམ་ནས་བྱུང་ནས་ནི། །ཡུལ་རྣམས་ལ་ནི་བཟུང་བར་འགྱུར། །གང་ཚེ་སྣང་བ་དང་ལྡན་པ། །རླུང་ནི་བཞོན་པ་ཉིད་གྱུར་ན། །དེ་ཚེ་རང་བཞིན་ཐམས་ཅད་ནི། །མ་ལུས་ཡུལ་ལ་འཇུག་པར་འགྱུར། །འདིར་ནི་བསྡུས་པའི་དོན་འདི་ཡིན་ཏེ། རེ་ཞིག་དང་པོ་རྣལ་འབྱོར་པས་བདག་ལ་བྱིན་གྱིས་བརླབ་པའི་རིམ་པས་ཡེ་ཤེས་ཀྱི་སྐུ་བླངས་ལ་ཤེས་རབ་ཀྱང་དེའི་ངོ་བོ་ཉིད་དུ་དམིགས་ལ་འདོད་ཆགས་ཆེན་པོའི་སྒྲས་དེ་བཞིན་གཤེགས་པ་འཇུག་པ་སྔོན་དུ་འགྲོ་བར་ལེགས་པར་སྦྱངས་པའི་རྡོ་རྗེ་དང་པདྨར་སྦྱར་ལ་ཚངས་པའི་བུ་ག་ནས་བྱང་ཆུབ་ཀྱི་སེམས་འཕོ་བའི་དུས་སུ་སྣང་བའི་ཡེ་ཤེས་དང༌། ཡན་ལག་ཐམས་ཅད་ལ་ཁྱབ་པའི་དུས་སུ་སྣང་བ་མཆེད་པའི་ཡེ་ཤེས་དང༌། རྡོ་རྗེའི་རྩེ་མོར་བྱིན་པའི་དུས་སུ་འོད་གསལ་བའི་དེ་ཁོ་ན་ཉིད་ཉམས་སུ་མྱོང་ཞིང་དོན་དམ་པའི་བདེན་པ་ལ་གནས་པ་མི་རིགས་སོ་ཞེས་རྣམ་པར་དཔྱང་ནས་རིག་མའི་པདྨའི་ནང་དུ་དེ་ཉིད་སྤྲོ་བར་བྱའོ། །དེ་ཉིད་ཀྱི་སེམས་ཅན་གྱི་ཁམས་རྣམ་པ་བཞི་ཐམས་ཅད་སྐྱེ་བར་འགྱུར་རོ། །འདུས་པའི་རྒྱུད་ཕྱི་མ་ལས་ཀྱང་གསུངས་ཏེ་ཞེས་པ་ནི་ལེའུ་བཅོ་བརྒྱད་པ་ལགས་སོ། །ཡེ་ཤེས་ལྔ་ཡི་རང་བཞིན་དབུགས། །ཞེས་པས་ནི་དེའི་གསལ་
བ་ཉིད་གང་ཡིན་པ་དེ་ནི་མེ་ལོང་ལྟ་བུའི་ཡེ་ཤེས་སོ། །ཁམས་ཉི་ཤུ་རྩ་བཞིའི་རྫས་དེ་དག་གཅིག་ཏུ་གྱུར་པ་གང་ཡིན་པ་དེ་ནི་མཉམ་པ་ཉིད་ཀྱི་ཡེ་ཤེས་སོ། །དེའི་ནང་དུ་དོན་དམ་པའི་མཆོག་ཏུ་འཛིན་པ་གང་ཡིན་པ་དེ་ནི་སོ་སོར་རྟོག་པའི་ཡེ་ཤེས་སོ། །དེའི་སྤྲོ་བ་དང་བསྡུ་བའི་རིམ་པས་སེམས་ཅན་གྱི་དོན་བྱ་བ་གང་ཡིན་པ་དེ་ནི་བྱ་བ་ནན་ཏན་གྲུབ་པའི་ཡེ་ཤེས་སོ། །དེའི་དོན་དམ་པའི་ཆོས་ཉིད་གང་ཡིན་པ་དེ་ནི་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །རླུང་བཅུ་ཉེ་བར་བསྡུས་པས་ན་དབུགས་སོ། །འབྱུང་བ་ལྔ་ནི་ས་ལ་སོགས་པ་སྟེ་དེའི་ངོ་བོ་ཉིད་ནི་དེའི་རང་བཞིན་ནོ། །དེ་ལ་དེར་སྲ་བ་གང་ཡིན་པ་ནི་འབྱུང་བ་ཆེན་པོ་སའོ། །དེའི་གཤེར་པ་ཉིད་གང་ཡིན་པ་དེ་ནི་འབྱུང་བ་ཆེན་པོ་ཆུའོ། །དེའི་དྲོ་བའི་རེག་པ་གང་ཡིན་པ་དེ་ནི་འབྱུང་བ་ཆེན་པོ་མེའོ། །དེའི་འགྲོ་བ་དང་ལྡོག་པའི་མཚན་ཉིད་གང་ཡིན་པ་དེ་ནི་འབྱུང་བ་ཆེན་པོ་རླུང་ངོ༌། །དེའི་འབའ་ཞིག་ཞི་བ་སྤྲོས་པ་མེད་པའི་ངོ་བོ་གང་ཡིན་པ་དེ་ནི་འབྱུང་བ་ཆེན་པོ་ནམ་མཁའ་འོ། །དེ་ལྟར་གྱུར་པའི་བྱང་ཆུབ་སེམས་ཀྱི་ཐིག་ལེ་པདྨའི་སྣ་རྩེར་ཞེས་པ་ནི་ཉེ་བར་མཚོན་པ་ཡིན་ཏེ། དེས་ན་རྡོ་རྗེའི་སྣ་རྩེར་ཡང་ངོ༌། །ཕྱུང་ནས་ནི་ཞེས་པ་ལ་ཡན་ལག་དང་ཚིགས་ཐམས་ཅད་ཀྱི་སྒོ་ནས་སྤྲོས་ནས་སོ། །ཐིག་ལེའོ་གཟུགས་སུ་བརྟག་པར་བྱ། །ཞེས་པ་ནི་ཡུངས་ཀར་གྱི་འབྲུའི་ཚད་ཙམ་གྱི་གང་བུ་རྡོ་རྗེའི་རིན་པོ་ཆེའི་རྩེར་འཛིན་པར་བྱའོ། །དེ་ཉིད་ཉེ་བར་བསྡུ་བའི་སྒོ་ནས་ཁྱད་པར་བསྟན་པར་བྱ་བའི་ཕྱིར། རིན་ཆེན་ཁ་དོག་སྣ་ལྔ་པ། །ཞེས་སྨོས་ཏེ། རང་དང་གཞན་གྱི་དོན་འགྲུབ་པ་ལ་ནུས་པས་རིན་ཆེན་ནོ། །ཡང་ན་རྣམ་པ་སྣ་ཚོགས་ཀྱི་སེམས་ཅན་གྱི་ཁམས་སྐྱེད་པར་བྱེད་པས་ན་རིན་ཆེན་ནོ། །དེ་བཞིན་གཤེགས་པ་ལྔའི་རང་བཞིན་ཡིན་པས་ཁ་དོག་སྣ་ལྔ་པའོ། །སྲོག་དང་རྩོལ་བ་ཞེས་པ་ནི་སྲོག་གི་རླུང་སྟེ་རྟག་ཏུ་གྱེན་དུ་རྒྱུའོ། །རྩོལ་བ་ཞེས་པ་ནི་དེ་ཉིད་ཉེར་བར་བསྡུས་པས་ཐུར་དུ་སེལ་བ་སྟེ་།སྲོག་དང་རྩོལ་བ་ཞེས་བྱའོ། །དེས་ནི་ཐ་མལ་པའི་སེམས་ཅན་བསྐྱེད་པའི་མཚན་ཉིད་དེ་ཡན་ལག་དང་པོ་བསྟན་ཏོ། །ས་བོན་གྱི་ཐིག་ལེའི་དབུས་སུ་ཞེས་པ་ནི་བྱང་ཆུབ་སེམས་ཀྱི་ནང་ནའོ། །སྐྱེ་བཞིན་པར་ཤེས་པར་བྱ་སྟེ་ཞེས་པ་ནི་མོས་པའི་རྣལ་འབྱོར་གྱིས་བསྐྱེད་པ་ཞེས་
བྱ་བའི་དོན་ཏོ། །བདུད་རྩི་ས་བོན་ཞེས་བྱ་བ་ལ་སོགས་པའི་ཚིག་ནི་དཔལ་རྡོ་རྗེ་བདུད་རྩིའི་རྣལ་འབྱོར་གྱི་རྒྱུད་ལས་འབྱུང་ངོ༌། །རྟོག་པའི་རྣལ་འབྱོར་སློབ་པ་ན། །ཞེས་པ་ནི་ལྷག་པར་མོས་པའི་རྣལ་འབྱོར་བསྒོམ་པས་སོ། །རྒྱུ་བ་དང་མི་རྒྱུ་བ་ཞེས་པ་ནི་བརྟན་པ་དང་གཡོ་བའི་ཁམས་གསུམ་པའི་རྣམ་པ་ཅན་གྱི་རྡོ་རྗེ་སེམས་དཔའ་བསམ་མོ་ཞེས་པ་ནི་ལྷག་པར་མོས་པར་བྱའོ། །འདི་ཉིད་ཀྱི་ཁྱད་པར་ནི་ཞེས་པ་ནི་དེའི་ལྷག་པར་གྱུར་པའི་ཚིག་ཅེས་བྱའོ། །མེ་ལོང་ལྟ་བུ་ལ་སོགས་པའི་ཡེ་ཤེས་རྣམས་ཀྱི་གཞིར་གྱུར་པས་ན་ཡེ་ཤེས་གནས་སོ། །རྣམ་པ་སྣ་ཚོགས་པའི་སངས་རྒྱས་སྤྲུལ་པས་ན་ཉམས་དགའ་བའོ། །བྱ་བ་ལ་སོགས་པའི་ཚུལ་ལ་འཇུག་པ་ལ་མ་བསྟན་པས་ན་གསལ་བའོ། །ཡང་ན་ད་ནི་རྡོ་རྗེའི་རྩེ་མོ་དང་འདྲ་བ་ཡིན་པས་རྡོ་རྗེའོ། །ཧ་ནི་བྱའི་གདོང་དང་འདྲ་བས་པདྨའོ། །སྱ་ནི་འཛག་པའི་དོན་སྟོན་ཏེ། དེས་ན་ར་ཧ་དང་འདྲ་བས་རྡོ་རྗེ་དང་པདྨ་ལས་སྱ་ནི་འཛགས་པས་ན། ར་ཧ་སྱ་ནི་གསང་བ་སྟེ་བྱང་ཆུབ་ཀྱི་སེམས་ཞེས་བྱ་བའི་དོན་ཏོ། །ཡེ་ཤེས་ཀྱིས་བརྟགས་པ་ཞེས་པ་ནི་རང་རིག་གི་མངོན་སུམ་གྱི་ཚད་མའི་སྤྱོད་ཡུལ་ཞེས་བྱ་བའི་ཐ་ཚིག་གོ །དྲང་བའི་དོན་ཞེས་པ་ནི་རྫས་ཀྱི་ངོ་བོ་ཉིད་དུ་བསྟན་པས་སོ། །རྫོགས་པའི་རིམ་པ་ཡང་ཞེས་པ་ནི། ཡང་གི་སྒྲ་ནི་སླར་ཞེས་བྱ་བའི་དོན་ཏོ། །དེས་ན་རྫོགས་པའི་རིམ་པའི་འབྲེལ་པ་དང་ལྡན་པའི་ཕྲ་མོའི་རྣལ་འབྱོར་གཞན་ཡང་བཤད་པར་བྱ་ཞེས་བྱ་བའི་དོན་ཏོ། །སྙིང་ག་ཞེས་བྱ་བ་ལ་སོགས་པ་ལ་ལྐོག་མ་ལ་སོགས་པའི་གནས་བཞི་པོ་ལ་གྲུ་གསུམ་དང་ཟླུམ་པོ་དང་གཞུའི་དབྱིབས་ཅན་དང་གྲུ་བཞིའོ། །གོས་དཀར་མོ་དང་མཱ་མ་ཀཱི་དང་སྒྲོལ་མ་དང་སྤྱན་མས་བྱིན་གྱིས་རློབ་པ། འོད་དཔག་ཏུ་མེད་པ་དང་མི་བསྐྱོད་པ་དང༌། དོན་ཡོད་གྲུབ་པ་དང་རྣམ་པར་སྣང་མཛད་ཀྱིས་དབང་བྱས་པ་དམར་པོ་དང་ལྗང་གུ་དང་དཀར་པོ་དང་ཁ་དོག་སེར་པོར་ལྡན་པ། དེ་དང་འདྲ་བའི་འོད་སྤྲོ་བ་དབང་དང་ཞི་བ་དང་འགུགས་པ་དང་རྒྱས་པའི་ལས་ཅན་གཡས་གཡོན་དང་གཉིག་དང་དལ་བུས་དམན་པར་རྒྱུ་བ། མེ་དང་ཆུ་དང་རླུང་དང་སའི་ཁམས་ཀྱི་ངོ་བོ་དཀྱིལ་འཁོར་བཞི་བསམས་ལ། དེ་རྣམས་ལ་ཐུན་དང་པོ་ནས་བརྩམས་ཏེ་ཉིན་མོ་དང་མཚན་མོའི་རིམ་པས་ཁ་དོག་དམར་པོ་ལ་སོགས་པའི་འོད་ཟེར་གྱི་ཚོགས་སྤྲོས་ལ་
གདོང་གི་སྣ་རྩེར་ཐུན་ཕྱེད་ཕྱེད་ཀྱི་དུས་སུ་འཛིན་ནས་ཇི་སྲིད་སེམས་རྩེ་གཅིག་པར་གྱུར་པ་དེ་སྲིད་གནས་པར་བྱས་པས་འབད་རྩོལ་མེད་པར་ཞི་བ་ལ་སོགས་པའི་ལས་ཀྱི་ཚོགས་འགྲུབ་པར་འགྱུར་རོ། །དེ་ནི་གཏི་མུག་གི་རིགས་ཅན་གྱི་རྣལ་འབྱོར་པའི་ཕྲ་མོའི་ཐིག་ལེ་བསྒོམ་པའི་མན་ངག་གོ །ལུས་ཐམས་ཅད་ལ་གནས་པ་ཞེས་པ་ནི་རྩ་རྒྱུས་ཐམས་ཅད་ཀྱི་ལུས་ལ་ཞེས་བྱ་བའི་དོན་ཏོ། །ཡེ་ཤེས་ལྔའི་ངོ་བོ་ཞེས་པ་ནི་རྣམ་པར་སྣང་མཛད་ལ་སོགས་པའི་ངོ་བོས་སོ། །འོད་ཟེར་ལྔ་པོ་ཞེས་པ་ནི་སྲོག་ལ་སོགས་པའི་རླུང་ལྔ་སྟེ། བཞི་པོ་ནི་ཕུང་པོ་བཞི་ལ་གནས་པ་སྟེ་གསལ་བའོ། །ལྔ་པ་ནི་མི་གསལ་བའོ། །དེ་ཉིད་ཀྱི་ཕྱིར། རླུང་གི་ལས་ཀུན་རྗེས་འགྲོ་བའོ། །སྤྱོད་པ་ཀུན་ལ་རབ་འཇུག་པ། །རྣམ་པར་སྣང་མཛད་ངོ་བོ་སྟེ། །འཆི་བའི་ལུས་ལས་འཕོ་བར་འགྱུར། །ཞེས་བཤད་པས་སོ། །སྲོག་དང་རྩོལ་བར་གྱུར་ནས་ཞེས་པ་ནི། ལྔའི་བདག་ཉིད་ཀྱི་རླུང་དེ་ཉིད་སྲོག་དང་རྩོལ་བ་ཉིད་དུ་གྱུར་ནས་སོ། །སྟེང་གི་སྣ་ཡི་བུ་ག་ལས། །ཞེས་པ་ནི། ཀུན་རྫོབ་ཀྱི་སྣ་ཁུང་གཡས་པ་ལ་སོགས་པའི་དབྱེ་བས་ཕྱེ་བར་གྱུར་པ་ལས་སོ། །དཀྱིལ་འཁོར་བཞི་ཡི་ཁ་དོག་གིས། །ཞེས་པ་ནི་ཉིན་མོའི་ཐུན་དང་པོ་ལ་མེའི་དཀྱིལ་འཁོར་འཆར་བ་དང༌། གཉིས་པ་ལ་རླུང་གི་དཀྱིལ་འཁོར་དང༌། །གསུམ་ལ་སའི་དཀྱིལ་འཁོར་དང་བཞི་པ་ལ་ཆུའི་དཀྱིལ་འཁོར་འཆར་བ་དེ་བཞིན་དུ་མཚན་མོར་རྟོགས་པར་བྱའོ། །གོ་རིམས་བཞིན་དུ་ངེས་པར་འབྱུང༌། །ཞེས་པ་ནི་གཡས་པ་ལ་སོགས་པའི་དབྱེ་བས་རིམ་པ་ཇི་ལྟ་བ་བཞིན་དུ་འབྱུང་ངོ་ཞེས་བྱ་བའི་དོན་ཏོ། །ཇི་སྐད་དུ་ཞེས་པ་ལ་སོགས་པའི་ལུང་ཚད་མ་ཉིད་དུ་བསྟན་ཏོ། །སྣ་རྩེ་ནི་གདོང་གི་སྣ་རྩེར་རོ། །ཡུངས་ཀར་ཞེས་པ་ནི་ཡུངས་ཀར་གྱི་འབྲུའི་ཚད་ཙམ་གྱི་འོད་ཟེར་གྱི་ཐིག་ལེའོ། །སྲོག་དང་རྩོལ་བའི་བརྟག་པའོ། །ཞེས་པ་ནི་དེ་ཉིད་རླུང་ཉེ་བར་བསྡུས་པའོ། །ཐིག་ལེ་དེ་ཉིད་སྲོག་དང་རྩོལ་བ་ལ་སངས་རྒྱས་ཀྱི་རང་བཞིན་ཏེ། དེ་བཞིན་གཤེགས་པའི་ངོ་བོ་འོད་ཟེར་ལྔ་ཡོད་དེ་དཀྱིལ་འཁོར་རེ་རེ་འང་དེ་བཞིན་གཤེགས་པ་ལྔའི་བདག་ཉིད་ཡིན་པས་སོ། །འོད་ཟེར་དེ་རྣམས་ནི་སྟེང་གི་སྣ་ལས་ཏེ་གདོང་གི་སྣ་ལས་ངེས་པར་འབྱུང་བར་འགྱུར་རོ། །སྒོ་
ལས་འབྱུང་བའི་རིམ་པ་བཤད་པའི་ཕྱིར། གཡོན་ཞེས་བྱ་བ་ལ་སོགས་པ་སྨོས་ཏེ། རླུང་གི་དཀྱིལ་འཁོར་གཡོན་ནས་འབྱུང་བ་དང་མེའི་དཀྱིལ་འཁོར་གཡས་ལས་འབྱུང་བ་དང་སའི་དཀྱིལ་འཁོར་གཉི་ག་ལས་འབྱུང་བ་དང༌། ཆུའི་དཀྱིལ་འཁོར་གཉི་ག་ལས་དལ་བུས་རྒྱུ་བའོ། །དེ་ཉིད་ནང་གི་དུས་ཡིན་བར་བཤད་པ་ནི་རྣལ་འབྱོར་པ་རྣམས་ཀྱི་ནང་གི་དུས་ཡིན་ནོ། །དུས་ཀྱི་རིམ་པ་འདིས་རྣལ་འབྱོར་པས་ཞི་བ་ལ་སོགས་པའི་ལས་བྱེད་དེ། རང་ནི་འོད་གསལ་བ་སྟེ་མི་ཤིགས་པའི་ངོ་བོའོ། །དེ་ལས་བྱུང་བའི་སྔགས་ནི་ཡི་གེ་གསུམ་མོ། །དེའི་གཞི་ནི་དཀྱིལ་འཁོར་བཞིའོ། །དེ་རྣམས་ཀྱི་སྦྱོར་བ་ནི་རབ་ཏུ་སྦྱོར་བ་སྟེ་འོད་ཟེར་སྤྲོ་བའི་རིམ་པའོ། །ཉིན་མཚན་ནི་ཉིན་མོ་དང་མཚན་མོར་དེས་གནས་ཤིང་སྣའི་རྩེ་མོར་འོད་ཟེར་དེ་འཛིན་པར་བྱའོ། །ཐུན་ཕྱེད་ཕྱེད་ནི་ཆུའི་ཚོད་བརྒྱད་ཀྱི་བདག་ཉིད་ཀྱི་དུས་ནི་ཐུན་ནོ། །དེའི་ཕྱེད་ནི་ཆུ་ཚོད་བཞིའོ། །དེ་ཡང་ཕྱེད་ནི་ཆུ་ཚོད་གཉིས་སོ། །དེས་ན་ཐུན་རེ་རེར་ཆུ་ཚོད་གཉིས་གཉིས་ཀྱི་བར་དུ་འོད་ཟེར་གྱི་ཐིག་ལེ་འཛིན་པས་འོད་གསལ་བ་རྟོགས་པར་འགྱུར་རོ། །རིམ་ནི་ཞེས་པ་ནི་ཁ་དོག་དམར་པོ་ལ་སོགས་པའི་དབྱེ་བ་དང༌། གཡས་པ་ལ་སོགས་པའི་དབྱེ་བས་སོ། །གོ་རིམས་ཇི་བཞིན་དུ་ཞེས་པ་ནི་མེ་དང་རླུང་དང་ས་དང་ཆུའི་དཀྱིལ་འཁོར་ཤར་བའི་རིམ་པས་སོ། །རྡོ་རྗེའི་ཚིག་གི་དོན་ཞེས་པ་ནི་དོན་ཟབ་པ་དང་ལྡན་པའི་ཚིག་གིས་བརྗོད་པར་བྱའོ། །རླུང་གི་དེ་ཁོ་ན་ཉིད་ཅེས་པ་ནི་ཡུངས་ཀར་གྱི་འབྲུའི་ཚད་ཙམ་གྱི་བྱང་ཆུབ་ཀྱི་སེམས་ཀྱི་ཐིག་ལེའི་དེ་ཁོ་ན་ཉིད་དོ། །སྔགས་ཀྱི་དེ་ཁོ་ན་ཉིད་ཅེས་པ་ནི་ཡི་གེ་གསུམ་གྱིས་བསྐྱེད་པའི་རྒྱུར་གྱུར་པའི་མི་འཇིགས་པའི་མཚན་ཉིད་དོ། །དེས་ལས་དཀྱིལ་འཁོར་དང་རླུང་དང་ཡི་གེ་གསུམ་ཡང་འབྱུང་བའི་ཕྱིར་རོ། །ཡེ་ཤེས་ཀྱི་དེ་ཁོ་ན་ཉིད་བསྟན་པའི་ཕྱིར་ཞེ་སྡང་གི་རིགས་ཅན་གྱི་ཕྲ་མོའི་རྣལ་འབྱོར་བསྟན་པར་བྱ་སྟེ། རྣམ་པར་ཤེས་པ་གསུམ་ནི་སེམས་ཅན་དང་སྣོད་ཀྱི་འཇིག་རྟེན་གྱི་རང་བཞིན་ཀུན་གཞི་ལ་སོགས་པའི་མཚན་ཉིད་ཅན་ནོ། །བྱང་ཆུབ་ཀྱི་བདག་ཉིད་ཅན་གྱི་སེམས་ཞེས་པ་ནི་སྣང་བ་ལ་སོགས་པའི་རང་བཞིན་ཅན་ནོ། །ཁམས་ཕྲ་བ་སྟེ་ཞེས་པ་ནི་ཨོཾ་དང་ཨཱཿ་ཉེ་བར་བསྡུས་ནས་ཐུགས་རྡོ་རྗེ་ཡིག་འབྲུའི་ཐིག་
ལེ་ལྷག་མར་གྱུར་པའི་ཁམས་ཕྲ་བའོ། །སྙིང་ག་ལ་གནས་པའི་དེ་ལ་རྟེན་དང་བརྟེན་པར་གྱུར་པ་ཞེས་པ་ནི་འགྲོ་བ་དེ་ཉིད་རྣམ་པར་ཤེས་པར་བྱེད་དེ་བསམ་པར་བྱའོ། །དེ་ནི་ཡེ་ཤེས་ཀྱི་དེ་ཁོ་ན་ཉིད་དེ་ཡན་ལག་ལྔ་པའོ། །རླུང་དང་རྣམ་པར་ཤེས་པ་ཞེས་བརྟགས་པའི་ཞེས་པ་ནི་རླུང་མ་ལུས་པའི་འཁོར་ལོ་དང་རྣམ་པར་ཤེས་པ་གསུམ་གྱི་རང་བཞིན་གྱི་སྔགས་ཀྱི་ཐིག་ལེ་དེ་ལའོ། །ཡེ་ཤེས་ཀྱི་སྐུ་ཞེས་པ་ནི་ཅིག་ཅར་དུ་འབྱུང་བ་འཇའ་ཚོན་བཞིན་ནོ། །འཇའ་ཚོན་ལྟར་ཞེས་པ་ནི་ཡོད་པ་དང་མེད་པ་གཉིས་དང་བྲལ་བའོ། །དཀར་པོ་ལ་སོགས་པ་ཞེས་པ་ནི་འོད་ཟེར་གྱི་ཚོགས་དང་ལྡན་པའོ། །རྟོག་པའི་རྣལ་འབྱོར་པ་རྣམས་ཀྱི་སྤྱོད་ཡུལ་མ་ཡིན་པའི་ཕྱིར་ཞེས་པ་ནི་བསྐྱེད་པའི་རིམ་པའི་རྣལ་འབྱོར་པ་རྣམས་ལ་བསྟན་པར་མི་བྱ་བ་འོད་གསལ་བ་ལས་འབྱུང་བ་རྡོ་རྗེ་འཆང་ཆེན་པོའི་སྐུ་བསྒོམ་པར་བྱའོ། །དེས་ཡོངས་སུ་དག་པའི་ལྷའི་དེ་ཁོ་ན་ཉིད་བསྟན་ཏོ། །ཐེག་པ་ཆེན་པོའི་མདོ་སྡེ་ཞེས་པ་ནི་རྗེ་བཙུན་རིན་ཆེན་ཏེ་ལ་ལས་སོ། །དགོངས་པས་བཤད་པ་ཞེས་པ་ནི་འགལ་བའི་ཚིག་གི་སྦྱོར་བས་སོ། །སྐྲ་ཙམ་ཞེས་བྱ་བ་ལ་སོགས་པ་ནི་སྐྲའི་རྩེ་མོ་དང་འདྲ་བ་ཤུ་ཀྲ་དང་སྔགས་དང་འོད་ཟེར་གྱི་བདག་ཉིད་ཀྱི་ཐིག་ལེ་ལ་ཇི་སྲིད་གང་གཱའི་ཀླུང་གི་བྱེ་མ་དང་འདྲ་བར་བཞུགས་པ་དེ་བཞིན་དུ་རྡུལ་རེ་རེའི་ཆ་ཆའི་དབྱེ་བས་རྡུལ་ཇི་སྲིད་ཡོད་པ་དེའི་རྩིས་ཀྱིས་དེ་ལ་ཡང་བྱང་ཆུབ་སེམས་དཔའ་དེ་དང་འདྲ་བར་བཞུགས་སོ་ཞེས་བསམ་པར་བྱའོ། །དེས་ནི་བརྟན་པ་དང་གཡོ་བའི་རང་བཞིན་གྱི་དཀྱིལ་འཁོར་གྱི་འཁོར་ལོའི་བདག་ཉིད་ཅན་ཐིག་ལེ་ཡིན་ནོ་ཞེས་བསྟན་ཏོ། །ལྷའི་དེ་ཁོ་ན་ཉིད་ཅེས་བྱ་བ་ནི་ཉེ་བར་བསྡུ་བའོ། །ངེས་པའི་དོན་ནི་རྡོ་རྗེ་བཟླས་པའི་རིམ་པའི་ཡན་ལག་ཏུ་འགྱུར་བ་རླུང་གི་དེ་ཁོ་ན་ཉིད་ལ་སོགས་པ་བསྟན་པས་སོ། །ད་ནི་ཞེས་བྱ་བ་ལ་སོགས་པས་གཏི་མུག་གི་རིགས་ཅན་ལ་ལྟོས་ནས་ཕྲ་མོའི་རྣལ་འབྱོར་སྤྲོས་པས་བསྟན་པར་བྱ་སྟེ། སྔགས་དང་རླུང་མཉམ་པར་སྦྱོར་བ་ལས་ཞེས་པ་ནི་འཇུག་པ་ལ་སོགས་པའི་རང་བཞིན་གྱིས་སྲོག་ལ་སོགས་པའི་ངོ་བོ་སྣང་བར་འགྱུར་བའི་ཡི་གེ་གསུམ་དང་འཇུག་པ་ལ་སོགས་པའི་མཚན་ཉིད་ཅན་གྱི་རླུང་དང་འབྲེལ་བས་དཀྱིལ་འཁོར་བཞི་བྱུང་བ་ཞེས་བྱ་བ་ནི་གཡས་
པ་ལ་སོགས་པ་ལས་རྒྱུ་བའོ། །དེ་ལྟར་གྱུར་ན་ཡན་ལག་མ་ཉམས་པའི་བཟླས་པ་ལ་ཞེས་པ་ནི་ཡན་ལག་མ་ཉམས་པའི་ལྷ་ལ་སོགས་པའི་དབྱེར་མེད་པའི་སྦྱོར་བས་བཟླས་པ་གང་ཡིན་པ་དེའི་རིམ་པ་ནི་གོ་རིམས་བསྟན་པའི་ཕྱིར་ཞེས་པ་ནི་གསལ་བར་བྱ་བའི་ཕྱིར་རོ། །མི་ཤིགས་པ་ཞེས་པ་ནི་སྤྲོས་པ་ཐམས་ཅད་མེད་པའི་མཚན་ཉིད་འོད་གསལ་བའོ། །དེ་ལས་བྱུང་བ་ནི་འོད་གསལ་བ་ལས་མེ་ལ་སོགས་པ་དཀྱིལ་འཁོར་བཞི་འབྱུང་བའོ། །མེའི་དཀྱིལ་འཁོར་ཁ་དོག་དམར་པོའི་ངོ་བོ་ཞེས་པ་ནི་ཉི་མའི་དཀྱིལ་འཁོར་ནི་དམར་པོ་ཡིན་པས་སོ། །གཡས་ལས་འབྱུང་བ་ཞེས་པ་ནི་ངོ་བོ་ཉིད་ཀྱིས་དེའི་དེ་ལམ་ཡིན་པའི་ཕྱིར་རོ། །རྣམ་པར་སྣང་མཛད་དོ་ཞེས་པ་ནི་དེ་བཞིན་གཤེགས་པའི་རིགས་ཡིན་པས་སོ། །སྐུ་ནི་ཉི་མའི་དཀྱིལ་འཁོར་འོད་དཔག་ཏུ་མེད་པ་སྟེ་ཁ་དོག་དམར་པོ་ཡིན་པས་སོ། །ཨོཾ་དང་ཨཱཿ་སྟེ་ཞེས་པ་ནི་དེ་དག་གིས་བསྐྱེད་པའི་ས་བོན་ཡིན་པས་སོ། །དེ་ཉིད་འཇུག་པ་དང་གནས་པ་ཞེས་པ་ནི་སྔགས་དང་རླུང་གི་ཐ་དད་པ་མ་ཡིན་གྱི་འོན་ཀྱང་དེའི་བདག་ཉིད་དུ་འཇུག་པའོ། །ཡི་གེ་ཧཱུཾ་ལྡང་བའི་བདག་ཉིད་ཅན་ཞེས་པ་ནི་ཐུགས་རྡོ་རྗེའི་ས་བོན་ཡིན་པས་དབང་པོ་ལ་བརྟེན་ནས་ཕྱི་རོལ་ཡུལ་ལ་འབྱུང་བའི་རང་བཞིན་ཡོངས་སུ་བརྟག་པ་སྟེ་བསྒོམ་པར་བྱའོ། །འདི་ནི་འོད་དཔག་ཏུ་མེད་པའི་བཟླས་པའོ་ཞེས་པ་ནི་མེའི་དཀྱིལ་འཁོར་ལ་དབང་བྱེད་པའི་ཕྱིར་རོ། །ཆུའི་དཀྱིལ་འཁོར་ཏེ་ཞེས་པ་ནི་ཟླ་བ་དང་འདྲ་བས་སོ། །སྤྱན་གྱི་ཡི་གེ་ནི་ཡི་གེ་ཨོཾ་མོ། །ཚུལ་ནི་ཁ་དོག་དཀར་པོའོ། །དཀར་ཞིང་ཞེས་པ་ནི་དེ་ཉིད་དོ། །དེ་ནས་ཏེ་ཞེས་པ་ནི་ཚིག་ཕྲད་དོན་དུ་མ་ཡིན་པས་དེ་ནས་ཀྱི་སྒྲ་ནི་བཀྲ་ཤིས་ཀྱི་དོན་རྗོད་པར་བྱེད་པ་སྟེ་ཡི་གེ་ཨོཾ་གྱི་རྣམ་གྲངས་སོ། །འདས་མ་ཐག་པའི་དོན་ཡང་ཡིན་ཏེ་སྔ་མ་འདས་པ་ལ་ལྟོས་པས། བཀྲ་ཤིས་དང་ནི་དབང་ཉིད་བརྗོད། །དེས་ན་སྒྲ་དང་དེའི་ཕྱིར་སྒྲས། །རིམ་དང་གཏན་ཚིགས་དོན་སྟོན་ཏོ། །ཞེས་འབྱུང་ངོ༌། །ཡི་གེ་ཨོཾ་ནི་བཀྲ་ཤིས་ཀྱི་དོན་ལ་རབ་ཏུ་གྲགས་སོ། །ཡོངས་སུ་གྱུར་པའི་རྗེས་ལ་ཞེས་པ་ནི་དེ་ཉིད་འཇུག་པའི་བདག་ཉིད་ཀྱི་བཟླས་པའི་འོག་ཏུ་འོ། །ཡི་གེ་ཨཱཿ་ནི་པདྨའི་རིགས་ཀྱི་ས་བོན་ཡིན་པས་སོ། །ཡི་གེ་ཧཱུཾ་ནི་རྡོ་རྗེ་རིགས་ཀྱི་ས་བོན་ཡིན་
པས་སོ། །རྡོ་རྗེ་བཟླས་པ་ཞེས་པ་ནི་ཐུགས་རྡོ་རྗེའི་བཟླས་པའོ། །ཁ་དོག་སེར་པོ་ཞེས་པ་ནི་རིན་ཆེན་འབྱུང་ལྡན་གྱི་དཀྱིལ་འཁོར་ཏེ་རྒྱས་པའི་རང་བཞིན་ཡིན་པས་སོ། །ཡི་གེ་གསུམ་ཞེས་པ་ནི་སྔགས་ཐམས་ཅད་ཀྱི་སྐྱེད་པའི་རྒྱུ་ཡིན་པས་སོ། །རྩེ་གཅིག་ཏུ་བསྒོམ་ཞིང་ཞེས་པ་ནི་དཀྱིལ་འཁོར་གྱི་རྣམ་པ་དང་ཁ་དོག་དང་སྒོ་ལ་སོགས་པ་ལ་མཉམ་པར་གཞག་པས་སོ། །རིན་པོ་ཆེའི་བཟླས་པ་ཞེས་པ་ནི་ཉེ་བར་བསྡུས་པའོ། །མི་ཤིགས་པ་ནི་འོད་གསལ་བ་ལས་སོ། །རླུང་གི་དཀྱིལ་འཁོར་ཏེ་ཞེས་པ་ནི་གཞུའི་དབྱིབས་ཅན་ནོ། །སངས་རྒྱས་ཀྱི་ཚུལ་ཏེ་ཡི་གེ་ཧཱུཾ་ཞེས་པ་ནི་སངས་རྒྱས་ཐམས་ཅད་ཀྱི་བདག་པོ་མི་བསྐྱོད་པ་བསྐྱེད་པའི་ས་བོན་ཡིན་པས་སོ། །ཞི་བ་ཐུང་དུ་ཞེས་པ་ནི། དེ་ཉིད་ཀྱི་ཁྱད་པར་ཏེ་ལྡང་བའི་རང་བཞིན་ཡིན་པས་སོ། །འཇུག་པ་དང་གནས་པའི་རྗེས་ལ་ཞེས་པ་ནི་ཡི་གེ་ཨོཾ་དང་ཨའི་གཞི་འཇུག་པ་དང་གནས་པའི་འོག་ཏུ་ཞེས་བྱ་བའི་དོན་ཏོ། །དོན་ཡོད་བཟླས་པ་ཞེས་པ་ནི་ཉེ་བར་བསྡུ་བའོ། །དེ་ནི་གསུང་རྡོ་རྗེ་ལ་སོགས་པ་རྣམ་པ་བཞི་ཡན་ལག་མ་ཉམས་པའི་བཟླས་པ་བསྟན་ཏེ་སྔགས་དང་རླུང་དང་རྣམ་པར་ཤེས་པ་ལ་སོགས་པ་དབྱེར་མེད་པའི་ཕྱིར་རོ། །སློང་མོ་ཟ་ཞིང་མི་བཟླ་སྟེ། །མ་བླངས་པ་ལ་ཆགས་མི་བྱ། །འདོད་པ་ཐམས་ཅད་ལོངས་སྤྱོད་པས། །ཡན་ལག་མ་ཉམས་གསང་སྔགས་བཟླ། །ཞེས་འབྱུང་ངོ༌། །རེ་རེའི་ཞེས་པ་ལ་མེའི་དཀྱིལ་འཁོར་ལ་སོགས་པ་རེ་རེའི་འོ། །དཀྱིལ་འཁོར་གསུམ་པོ་འཁོར་དུ་གྱུར་པས་ཞེས་པ་ནི་ཆུ་ལ་སོགས་པའི་དཀྱིལ་འཁོར་གསུམ་པོའོ། །དེའི་ནང་དུ་ཆུད་པ་སྤྲོ། །ཞེས་པ་ནི་དེའི་ཆ་ཤས་ཉིད་ཀྱིས་སྤྲོ་བར་བྱ་སྟེ་འབྱུང་བ་ཆེན་པོའི་གཅིག་ནི་འབྱུང་བ་བཞིའི་རང་བཞིན་ཡིན་པས་སོ། །བཤད་པའི་རྒྱུད་ཅེས་པ་ནི་དགོངས་པ་ལུང་བསྟན་པའི་གསང་བ་འདུས་པའི་རྒྱུད་ལས་སོ། །གོས་དཀར་ཅན་སོགས་བཟླས་བཤད་པ། ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་པོའི་དོན་ནི་ལེའུ་གསུམ་པ་ནས་བཤད་ཟིན་ཏོ། །རྣལ་འབྱོར་པ་གཉི་ག་ཞེས་བྱ་བ་ལ་སོགས་པས་བརྟགས་པ་དང་རྫོགས་པའི་རྣལ་འབྱོར་པ་རྣམས་ལ་ཕྲ་མོའི་རྣལ་འབྱོར་བསྟན་པར་བྱ་སྟེ། ཨུཏྤལ་མཐིང་ཀའི་ཁ་དོག་དང་འདྲ་བ་ཞེས་
པ་ནི་མི་བསྐྱོད་པའི་རིགས་ཡིན་པའི་ཕྱིར་རོ། །རང་གི་རྡོ་རྗེའི་བུ་གར་ཞེས་པ་ནི་གསང་བའི་རྡོ་རྗེའི་རྩེ་མོའི་བུ་ག་ལའོ། །མི་བསྐྱོད་པའི་རྣལ་འབྱོར་པ་དེ་ཉིད་ཀྱིས་སྨེ་ཤ་ཅན་གྱི་ཕྱག་རྒྱའི་པདྨའི་ནང་དུ་ནས་ཀྱི་འབྲུའི་ཚད་ཙམ་གྱི་རྡོ་རྗེ་ཕྲ་མོ་བསྒོམ་པར་བྱའོ། །ཙ་ན་ཀ་ཞེས་བྱ་བ་ལ་སོགས་པས་རྣམ་པར་སྣང་མཛད་ལ་སོགས་པའི་རྣལ་འབྱོར་པ་རྣམས་ཀྱིས་འཁོར་ལོ་ལ་སོགས་པ་བསྒོམ་པར་བྱའོ་ཞེས་བསྟན་ཏོ། །དེ་ཉིད་བསྟན་པའི་ཕྱིར་རིགས་ཀྱི་དབྱེ་བ་ཞེས་བྱ་བ་ལ་སོགས་པ་སྨོས་སོ། །དེས་ནི་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱི་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་གྱི་དང་པོ་ཕྱག་རྒྱ་ལེགས་པར་སྦྱོང་བའི་དུས་སུ་དེ་དག་བསྡོམ་པར་བྱའོ། །རྫོགས་པའི་རིམ་པའི་རྣལ་འབྱོར་པ་རྣམས་ཀྱིས་ཀྱང་རིམ་པ་ལྔ་ཆར་ཡང་རྟག་ཏུ་བསྒོམ་པར་བྱའོ། །དེས་ཀྱང་ཅིར་འགྱུར་ཞེ་ན་ཞེས་བྱ་བ་ལ་སོགས་པས་ཕྲ་མོའི་རྣལ་འབྱོར་བསྒོམས་པའི་འབྲས་བུ་བསྟན་ཏོ། །ཞི་བ་ལ་སོགས་པ་ཞེས་པ་ནི་ཞི་བ་དང་རྒྱས་པ་དང༌། དབང་དང་དགུག་པ་དང་རྣམ་པར་སྡང་བ་དང་གསོད་པ་དང་དགར་བ་དང་རེངས་པ་ལ་སོགས་པའོ། །འདོད་པའི་དབང་ཕྱུག་ལ་སོགས་པ་བརྒྱད་ཅེས་པ་ནི། སྐུ་དབང་ཕྱུག་དང་གསུང་དབང་ཕྱུག །དེ་བཞིན་ཐུགས་ཀྱི་དབང་ཕྱུག་དང༌། །ཆོས་འཕྲུལ་ཡོན་ཏན་དབང་ཕྱུག་དང༌། །བྱེད་དང་ལོངས་སྤྱོད་ཡོན་ཏན་བརྒྱད། །ཅེས་བཤད་པའི་ཕྱིར་རོ། །གཉིས་སུ་མེད་པའི་ཡེ་ཤེས་ཞེས་པ་ནི་ཟུང་དུ་འཇུག་པའི་མཚན་ཉིད་དོ། །རྒྱུ་ནི་བཞིའོ། །དོན་དམ་པའི་བདེན་པ་ནི་རིམ་པ་གཉིས་པ་དང་བཞི་པ་དག་གིས་ཐོབ་པར་བྱ་སྟེ་འོད་གསལ་བའོ། །ཉོན་མོངས་པ་ཐམས་ཅད་རྣམ་པར་དག་པས་ན་ཞེས་པ་ནི་འདོད་ཆགས་དང་བྲལ་བ་ལ་སོགས་པ་རང་བཞིན་བརྒྱ་དྲུག་ཅུ་སྤོང་བའི་ཕྱིར་རོ། །ཡིད་དགའ་བའོ་ཞེས་པ་ནི་འདོད་ཆགས་དང་འདོད་ཆགས་བྲལ་བ་དང་འདོད་ཆགས་པར་མ་སྤོང་བའི་ཕྱིར་རོ། །དེ་ལྟར་བུའི་དངོས་གྲུབ་ཐམས་ཅད་ཀྱི་གཞིར་གྱུར་པ་ཞེས་པ་ནི། དངོས་གྲུབ་ཐམས་ཅད་དེ་ལས་བྱུང་བ་ཡིན་གྱི་གཞན་ལས་མ་ཡིན་ནོ། །རྣལ་འབྱོར་པ་དེའི་མངོན་དུ་གྱུར་པ་ཞེས་པ་ནི་རྣལ་འབྱོར་པའི་མངོན་སུམ་གྱི་ཚད་མའི་སྤྱོད་ཡུལ་དུ་འགྱུར་རོ་ཞེས་བྱ་བའི་དོན་ཏོ། །དོན་དམ་པ་ཞེས་བྱ་བ་ལ་སོགས་པས་དེ་ཁོ་ན་ཉིད་ཐོབ་པའི་ཐབས་བསྟན་པར་བྱ་སྟེ།།
ཕུང་པོ་ལ་སོགས་པའོ་ཞེས་པ་ནི་དེའི་རྣམ་པར་དག་པའི་རང་བཞིན་ཡིན་པས་སོ། །སྤྲུལ་པའི་སྐུའི་གནས་སྐབས་སོ། །ཞེས་པ་ནི་སྔགས་ཀྱི་སྐུ་བླང་བའི་སྐབས་ཀྱིས་བཟུང་བའོ། །ཡེ་ཤེས་གསུམ་གྱི་སྦྱོར་བས་གནས་པར་ཞེས་པ་ནི་སྔགས་དང་ཕྱག་རྒྱ་དག་གི་རིམ་པ་གང་ཡང་རུང་བས་སྣང་བ་ལ་སོགས་པ་ངོ་བོས་བྱས་ནས་སོ། །དོན་དམ་པའི་བདེན་པ་དེར་སྤྲོ་ཞིང་འཇུག་པའོ་ཞེས་པ་ནི་འོད་གསལ་བ་ལ་དེ་རྣམས་འཇུག་པར་བྱ་སྟེ་རིམ་པ་བཞི་པས་འོད་གསལ་བའི་གོ་འཕང་ལ་འཇུག་པའོ། །ལྡང་བ་བསྟན་པར་བྱ་བའི་ཕྱིར། ཞེས་པ་ནི་དོན་དམ་པའི་བདེན་པ་ལ་འཇུག་པས་གཞན་གྱི་དོན་མེད་པའི་ཕྱིར་ཞེས་བྱ་བའི་ཐ་ཚིག་གོ །སྐུ་གསུམ་གྱི་བདག་ཉིད་ཅན་ནོ་ཞེས་པ་ནི་ཆོས་དང་ལོངས་སྤྱོད་རྫོགས་པ་དང་སྤྲུལ་པའི་སྐུའི་རང་བཞིན་ནོ། །འོད་གསལ་བའོ་ཞེས་པ་ནི་ཆོས་ཐམས་ཅད་ཀྱི་རང་བཞིན་དུ་གྱུར་པ་སྟེ་རིམ་པ་གཉིས་པ་དང་བཞི་པས་ཐོབ་པར་བྱ་བའི་དེ་ཁོ་ན་ཉིད་དོ། །རྒྱུ་གང་ཡིན་པ་ཞེས་པ་ནི་ས་བཅུ་པ་ལ་ཡེ་ཤེས་ཀྱི་དབང་ཐོབ་ནས་བདག་ལ་བྱིན་གྱིས་བརླབ་པའི་རིམ་པས་སྐུ་བླངས་ཏེ། མངོན་པར་བྱང་ཆུབ་པའི་རིམ་པས་རྡོ་རྗེ་ལྟ་བུའི་ཏིང་ངེ་འཛིན་ཐོབ་ནས་ཟུང་དུ་འཇུག་པའི་རིམ་པས་ས་བཅུ་གཅིག་པ་ཐོབ་པར་འགྱུར་རོ་ཞེས་བྱ་བས་འོད་གསལ་བ་ཉིད་ཟུང་དུ་འཇུག་པའི་རིམ་པའི་རྒྱུ་ཡིན་ནོ། །དེ་གང་ཡིན་ཞེ་ན། རྡོ་རྗེ་འཆང་ཆེན་པོའི་བདག་ཉིད་དུ་བསྐྱེད་པར་བྱའོ་ཞེས་པ་ནི་ཞི་བ་དང་སྐྱེ་བ་ལ་མི་གནས་པ་དཔལ་རྡོ་རྗེ་འཆང་གི་ཕྱག་རྒྱ་ཆེན་པོའི་སྐུ་རྫོགས་པར་བྱའོ་ཞེས་བྱ་བའི་དོན་ཏོ། །འདི་སྐད་བཤད་པ་ཡིན་ཏེ། བསྐྱེད་པའི་རིམ་པའི་རྣལ་འབྱོར་པས་རྡོ་རྗེ་དང་པདྨ་ལ་སོགས་པའི་ཕྲ་མོའི་རྣལ་འབྱོར་བསྒོམས་པས་འབྲས་བུར་གྱུར་པའི་ཟུང་དུ་འཇུག་པའི་ཏིང་ངེ་འཛིན་ལ་སྣོད་དུ་གྱུར་པ་ཡིན་གྱི་དེའི་དུས་སུ་ཐོབ་པ་མ་ཡིན་ཏེ། དེའི་དབང་པོ་དམན་པ་ཉིད་ཀྱིས་དེ་ཁོ་ན་ཉིད་སྣང་ན་ཡང་མངོན་དུ་མི་འགྱུར་པའི་ཕྱིར་རོ། །རྫོགས་པའི་རིམ་པའི་རྣལ་འབྱོར་པས་ནི་རྡོ་རྗེ་འཆང་ཆེན་པོའི་བདག་ཉིད་དམིགས་ནས་ཕྲ་མོའི་རྣལ་འབྱོར་བསྒོམ་པ་དེ་མ་ཐག་ཏུ་སེམས་རྣམ་པར་དག་པ་ལ་སོགས་པའི་རིམ་གྱིས་འོད་གསལ་བ་ལ་འཇུག་ནས་དེའི་འབྲས་བུར་གྱུར་པ་ཟུང་དུ་འཇུག་པའི་རིམ་པ་ཐོབ་པར་འགྱུར་རོ། །དགོངས་
པས་བཤད་པ་ཞེས་པ་ནི་འགལ་བའི་ཚིག་གི་སྦྱོར་བས་ཟུང་དུ་འཇུག་པའི་ཏིང་ངེ་འཛིན་ཐོབ་པའི་ཕྱིར་རྡོ་རྗེ་བཟླས་པ་ལ་སོགས་པའི་མཚན་ཉིད་ཅན་གྱི་རྫོགས་པའི་རིམ་པ་བསྟན་པས་སོ། །ད་ནི་ཞེས་བྱ་བ་ལ་སོགས་པས་འདོད་པའི་ཡོན་ཏན་ལྔ་ལ་བརྟེན་པས་བྱང་ཆུབ་ཐོབ་པར་འགྱུར་རོ་ཞེས་བསྟན་ཏོ། །གང་གི་ཕྱིར་བརྟུལ་ཞུགས་དང་སྦྱངས་པའི་ཡོན་ཏན་ལ་སོགས་པ་དང་ལུས་ངལ་བས་སངས་རྒྱས་ཉིད་ཐོབ་པར་མི་འགྱུར་རོ། །དཀའ་ཐུབ་བསྡམས་པས་མ་རུངས་པའི། །སྡུག་བསྔལ་གྱིས་ནི་ལུས་སྐམས་འགྱུར། །སྡུག་བསྔལ་གྱིས་ནི་སེམས་གཡེངས་ཏེ། །གཡེངས་པས་དངོས་གྲུབ་ཐོབ་མི་འགྱུར། །ཞེས་དཔལ་མཆོག་དང་པོ་ལས་འབྱུང་ངོ༌། །གང་ཕྱིར་ལུས་ནི་གདུང་བ་ཡིས། །འབའ་ཞིག་གིས་ནི་ཆོས་མེད་དོ། །དེས་གཞན་འཚེ་བ་བྲལ་མིན་དང༌། །གཞན་དག་རྗེས་སུ་གཟུང་བ་མིན། །སྦྱིན་པ་ཚུལ་ཁྲིམས་བཟོད་པས་གསལ། །དམ་པའི་ཆོས་ནི་ལམ་ཆེན་པོ། །གང་ཞིག་བོར་ནས་ལུས་ངལ་བའི། །ལམ་ངན་ནས་ནི་འགྲོ་འགྱུར་ན། །འཁོར་བའི་དགོན་པ་མ་རུངས་པ། །སྐྱེ་བོ་མཐའ་ལས་ཤིང་དྲུང་ཅན། །ཉོན་མོངས་སྤྲུལ་གྱིས་ལུས་བཅིངས་པ། །དེ་ནི་ཡུན་རིང་འཁོར་བར་འགྱུར། །ཞེས་འབྱུང་ངོ༌། །འདོད་པའི་ཡོན་ཏན་ལྔ་ཞེས་པ་ནི། གཟུགས་ལ་སོགས་པ་ཡུལ་ལྔ་ཉེ་བར་སྤྱོད་པའི་མཚན་ཉིད་དོ། །རྫོགས་པའི་རིམ་པ་ཞེས་པ་ནི་སོ་སོར་སྡུད་པ་དང་བསམ་གཏན་གྱི་རིམ་པས་ཐོབ་པར་བྱ་བ་རྡོ་རྗེ་འཆང་ཉིད་ཅེས་བྱ་བ་འི་ཐ་ཚིག་གོ །ཕྲ་མོའི་རྣལ་འབྱོར་བཤད་པའི་འོག་ཏུ་ཞེས་པ་ནི་རིམ་པ་གཉིས་ཀྱིས་བསྒོམ་པར་བྱ་བའི་ཕྲ་མོའི་རྣལ་འབྱོར་རྣམ་པ་གསུམ་གྱི་འོག་ཏུ་ཞེས་བྱ་བའི་ཐ་ཚིག་གོ །གཉིས་སུ་མེད་པའི་ཡེ་ཤེས་ཏེ། །ཞེས་པ་ནི་སེམས་ཅན་ཐམས་ཅད་ཀྱིས་དེ་ཉིད་འདོད་པར་བྱ་བས་སོ། །ཀུན་ནི་ཞེས་བྱ་བ་རྣམ་པ་གསུམ་མོ། །སྤྲོས་པ་དང་བཅས་པ་ཞེས་པ་ནི་ཆགས་པའི་རོལ་བ་ལ་སོགས་པའི་རྒྱ་ཆེ་བས་ཉེ་བར་མཚོན་པའོ། །སྤྲོས་པ་མེད་པ་ཞེས་པ་ནི་ཇི་ལྟར་རྙེད་པའི་སྤྱོད་པས་ཉེ་བར་མཚོན་པའོ། །ཤིན་དུ་སྤྲོས་པ་མེད་པ་ཞེས་པ་ནི་བླ་ན་མེད་པའི་མངོན་པར་བྱང་ཆུབ་པའི་འབྲས་བུ་ཅན་མངོན་པར་བྱང་ཆུབ་པའི་སྦྱོར་བས་སོ། །དེ་རྣམས་ཀྱི་མཆོག་ནི་ལོངས་སྤྱོད་པ་དང་གྲོལ་བའི་སྤྱོད་པའོ་
ཞེས་པ་ནི་དེ་ལ་ལོངས་སྤྱོད་རྫོགས་པའི་སྐུས་སེམས་ཅན་ཐམས་ཅད་ལ་ཆོས་ཀྱི་བདུད་རྩི་སྦྱིན་པར་བྱེད་པའི་ལོངས་སྤྱོད་ཀྱིས་ཚིམ་པར་བྱེད་པ་དང༌། རང་གི་བདག་ཉིད་ཀྱང་དེ་བཞིན་དུ་ཚིམ་པར་བྱེད་པ་སྟེ་ལོངས་སྤྱོད་པའི་སྤྱོད་པའོ། །གྲོལ་བའི་སྤྱོད་པ་ནི་ཆོས་ཀྱི་སྐུའི་མཚན་ཉིད་དེ་རྟོག་པ་ཐམས་ཅད་ཡོངས་སུ་སྤོང་བའི་རང་བཞིན་ནོ། །དེ་རྣམས་ཀྱི་དག་པ་ནི་རྣམ་པར་དག་པའི་གནས་ཐོབ་པར་བྱེད་པའོ། །རྡོ་རྗེ་འཆང་ཆེན་པོའི་གོ་འཕང་ཐོབ་པས་སོ་ཞེས་པ་ནི་དཔལ་རྡོ་རྗེ་སེམས་དཔའི་གོ་འཕང་ཐོབ་པར་བྱེད་པ་ཡིན་པའི་ཕྱིར་རོ། །གསང་བའི་དམ་པ་ཞེས་པ་ནི་ཉན་ཐོས་པ་ལ་སོགས་པ་ལ་བསྟན་པར་མི་བྱའོ། །འོག་ནས་བཤད་པ་སྟེ་ཞེས་པ་ནི་འཆད་པར་འགྱུར་བའོ། །གཟུགས་ལ་སོགས་པ་ཞེས་པ་ནི་དུས་ཀྱི་ཚད་བསྟན་པར་བྱ་སྟེ། །གཟུགས་དང་སྒྲ་དང་དྲི་དང་རོ་དང་རེག་དང་ལྡན་པ་ཞེས་པ་ནི་གཟུགས་ལ་སོགས་པ་འདོད་པའི་ཡོན་ཏན་ལྔ་ཉེ་བར་སྤྱོད་པའི་མཚན་ཉིད་ཅན་གྱི་ཡུལ་རྣམས་ཀྱི་ཞེས་བྱ་བའི་དོན་ཏོ། །རྡོ་རྗེ་ལྟར་མི་ཕྱེད་པའི་རང་བཞིན་གྱི་བདག་ཉིད་ཅན་དུ་ཤེས་ནས་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས། ཆོས་དང་ལོངས་སྤྱོད་རྫོགས་པ་དང་སྤྲུལ་པའི་སྐུ་གསུམ་གྱི་བདག་ཉིད་ཅན་ཡེ་ཤེས་ཀྱི་སྐུ་ཤེས་ནས་ཞེས་པའི་དོན་ཏོ། །ཟས་སུ་དྲི་ཆུ་ཞེས་བྱ་བ་ལ་སོགས་པས་སྦྱང་བ་དང་བསང་པ་དང་སྦྱར་བར་བྱ་བ་ལ། སྔོན་དུ་འགྲོ་བར་བདུད་རྩི་ལྔ་རང་གིས་སྤྱད་ནས་གཏོར་མའི་དོན་དུ་ལྷ་རྣམས་ལ་ཡང་དབུལ་བར་བྱའོ་ཞེས་སྟོན་ཏོ། །སངས་རྒྱས་བྱང་ཆུབ་སྐྱོན་མེད་པ། །ཞེས་པ་ནི་མི་གནས་པའི་མྱ་ངན་ལས་འདས་པའི་དབྱིངས་ཀྱི་བརྡར་བྱས་པ་ཟུང་དུ་འཇུག་པའི་གོ་འཕང་ཞེས་བྱ་བའི་ཐ་ཚིག་གོ །ཟས་སུ་ཞེས་བྱ་བ་ལ་སོགས་པས། ལྕགས་ཀྱུ་རྣམས་ཀྱང་དབུལ་བར་བྱ། །ཞེས་བསྟན་ཏོ། །ཁྲོ་བོའི་ལྷ་རྣམས་ལ་དབུལ་བར་བྱ་བའི་ཕྱིར་ཏེ་ཞེས་པ་ནི་གཤིན་རྗེ་མཐར་བྱེད་ལ་སོགས་པའི་ཁྲོ་བོའི་འཁོར་ལ་དབུལ་བར་བྱ་ཞེས་པའི་དོན་ཏོ། །དེའི་ཚེ་ཤ་ཆེན་པོ་བརྟག་པར་བྱའོ་ཞེས་པ་ནི་ཁ་ན་མ་ཐོ་བ་མེད་པ་དཔལ་རྡོ་རྗེ་བདུད་རྩིའི་རྒྱུད་ཀྱི་རིམ་པས་བླང་བ་ཞེས་བྱ་བའི་དོན་ཏོ། །གསང་བ་ནི་སྦ་བར་བྱ་སྟེ་ཞེས་པ་ནི་དྲག་པོའི་ལས་ཏེ་དེའི་ཡུལ་ཅན་ནི་དེའི་རྒྱུར་གྱུར་པའོ། །སྐུ་གསུང་ཐུགས་ཞེས་པ་ནི་རྣལ་འབྱོར་
བའི་འོ། །རྗེས་སུ་མཐུན་པ་འབྱུང་བར་གྱུར་པའོ། །ཞེས་པ་ནི་གསོད་པ་ལ་སོགས་པ་དྲག་པོའི་ལས་དང་མཐུན་པར་འགྱུར་རོ་ཞེས་བྱ་བའི་དོན་ཏོ། །དེ་ཡང་གཤིན་རྗེ་མཐར་བྱེད་ཀྱི་རྒྱུད་ལ་སོགས་པ་ལས་རྟོགས་པར་བྱའོ། །དེ་དག་ལ་སོགས་པ་འབའ་ཞིག་ཏུ་བསྟན་པར་མ་ཟད་ཀྱི་ཞེས་བྱ་བ་ལ་སོགས་པས་དྲག་པོའི་ལས་ཀྱིས་ཀྱང་དངོས་གྲུབ་ཐོབ་པར་མ་ཟད་ཀྱི། འོན་ཀྱང་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱང་ཐོབ་པར་འགྱུར་རོ་ཞེས་བསྟན་ཏོ། །དེ་རྣམས་ཇི་ལྟ་བ་བཞིན་དུ་བསྟན་པར་བྱ་བའི་ཕྱིར། རི་ལུ་ལ་སོགས་པའི་དངོས་གྲུབ་རྣམས་ཞེས་པ་ནི། རི་ལུ་དང་མིག་སྨན་དང་རྐང་མགྱོགས་དང་རལ་གྲི་དང་པྲ་དབབ་པ་དང༌། སྨན་མཆོག་དང་བཅུད་ཀྱིས་ལེན་དང་བདུད་རྩི་དང༌། ཁམས་སྦྱོར་བ་དང་དབང་དུ་བྱ་བ་དང་ནམ་མཁའ་ལྡིང་དང་ས་འོག་གྲུབ་པ་དང༌། རོ་ལངས་དང་སྔགས་སྨྲ་བ་དང༌། ཞི་བ་དང་རྒྱས་པ་དང་དབང་དང་དགུག་པ་དང༌། རྣམ་པར་སྡང་བ་དང་གསོད་པ་དང་དགར་བ་དང་རེངས་པ་ལ་སོགས་པའོ། །དེ་དང་འདྲ་བའི་དངོས་གྲུབ་རྣམས་ལ་རྣལ་འབྱོར་པ་དེ་ཞེས་པ་ནི་ཁྲོ་བོ་ལ་ལྷ་བཤོས་དབུལ་བར་བྱེད་པའི་འོ། །ལུས་དང་ངག་དང་ཡིད་ལེགས་པར་གནས་པར་འགྱུར་བ་ཞེས་པ་ནི་ལས་སུ་རུང་བ་ཉིད་འགྲུབ་པར་འགྱུར་རོ།། དེ་ལྟར་རྡོ་རྗེ་རིགས་ཀྱི་ཞེས་པ་ནི་མི་བསྐྱོད་པའི་རིགས་ཅན་གྱི་ཁྲོ་བོའི་ལྷ་རྣམས་ལ་སྟེ། རྡོ་རྗེ་རིགས་ནི་ཐམས་ཅད་ཀྱི་མཆོག་ཡིན་པའི་ཕྱིར་ན་ཤ་ཆེན་འབུལ་ལོ། །དེ་བཞིན་གཤེགས་པ་ལ་སོགས་པའི་རིགས་ཀྱི་ཞེས་བྱ་བ་ལ་སོགས་པས་རྣམ་པར་སྣང་མཛད་ཀྱི་རིགས་ཀྱི་ཁྲོ་བོ་རྣམས་ལ་གླང་པོའི་ཤ་དང༌། རིན་ཆེན་འབྱུང་ལྡན་གྱི་རིགས་ཀྱི་ཁྲོ་བོ་རྣམས་ལ་རྟའི་ཤ་དང༌། འོད་དཔག་ཏུ་མེད་པའི་རིགས་ཀྱི་ཁྲོ་བོ་རྣམས་ལ་ཁྱིའི་ཤ་དང༌། དོན་ཡོད་གྲུབ་པའི་རིགས་ཅན་གྱི་ཁྲོ་བོ་རྣམས་ལ་བ་ལང་གི་ཤ་དབུལ་བར་བྱའོ། །དམ་པ་ཞེས་པ་ནི་བ་ལང་གི་ཤ་སྟེ། འཇིག་རྟེན་པ་རྣམས་ཀྱི་བ་ལང་ནི་མཆོག་ཡིན་ནོ་ཞེས་སེམས་སོ། །དེ་བཞིན་གཤེགས་པའི་རིགས་ལ་སོགས་པའི་ཁྲོ་བོའི་ཚོགས་ཀྱིས་ཞེས་པ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་བཞི་པོའི་འབྲེལ་པ་དང་ལྡན་པའི་ཁྲོ་བོའི་ཚོགས་ཀྱིས།
ཞེས་བྱ་བའི་དོན་ཏོ། །དེ་རྣམས་མེད་ན་ཇི་ལྟར་བྱ། །ཞེས་པ་ནི། ཇི་ལྟར་བཤད་པའི་ཆོ་གས་གཟུང་བའི་ཁ་ན་མ་ཐོ་བ་མེད་པའི་ཤམ་རྙེད་ན་ཞེས་བྱ་བའི་དོན་ཏོ། །ཟས་གཞན་ཞེས་བྱ་བ་ལ་སོགས་པ་གསུངས་ཏེ་ཞེས་པ་ནི་འཇིག་རྟེན་པ་དང་མི་འགལ་བ་གཟུགས་བརྙན་ལ་སོགས་པའི་ཤ་སྟེ་བག་ཟན་གྱིས་གཟུགས་བརྙན་བྱས་ནས་དེ་དང་འདྲ་བའི་ཕྱུགས་རྣམས་ཀྱི་བརྟགས་པའི་ཤ་ཞེས་བྱ་བའི་ཐ་ཚིག་གོ །འབྲས་ཆེན་ནོ་ཞེས་བྱ་བ་ལ་སོགས་པས་འབྲས་ཆན་བཟའ་བ་བཀག་པར་བྱ་སྟེ། འཇིག་རྟེན་ཐམས་ཅད་དང་མཐུན་པའི་བཟའ་བས་དེ་ནི་དངོས་གྲུབ་ཀྱི་ཡན་ལག་མ་ཡིན་ཏེ་ཁྱད་པར་དུ་ནི་ཁྲོ་བོའི་རྒྱལ་པོ་ཚིམ་པ་ཞེས་སྨོས་ཅི་དགོས། འབྲས་བུ་བསྟན་པར་བྱ་བའི་ཕྱིར། །ཞེས་བྱ་བ་ལ་སོགས་པས་སྔར་བཤད་པའི་ཕྲ་མོའི་རྣལ་འབྱོར་ལ་སོགས་པ་བསྒོམ་པ་ཁྲོ་བོ་རྣམས་ལ་ཟས་དབུལ་བའི་བར་གྱིས་མཐོང་བའི་ཆོས་སུ་སྐྱེ་བ་དང་གནས་པ་དང་འཇིག་པ་དང་བྲལ་བ་རྡོ་རྗེའི་སྐུ་ཐོབ་པའི་མཚན་ཉིད་ཅེས་བྱ་བའི་ཐ་ཚིག་གོ །རིགས་དེ་དང་འབྲེལ་པའི་ཞེས་བྱ་བ་ལ་སོགས་པས་སྲིད་པའི་རྩེ་མོའི་སྟེང་ན་གནས་མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་ལ་བཞུགས་པ་འཁོར་ལོས་སྒྱུར་བ་ལྔ་དང༌། རང་གི་ཕྱག་རྒྱ་གཟུགས་རྡོ་རྗེ་མ་ལ་སོགས་པའི་ལྷ་མོ་དང་བཅས་པ་དེ་དང་དེའི་རིགས་ཀྱི་འབྲེལ་པ་དང་ལྡན་པ་བྱང་ཆུབ་སེམས་དཔའ་སའི་སྙིང་པོ་ལ་སོགས་པ་རྣམས་ཀྱང་སྔགས་ཀྱིས་སྦྱངས་པའི་ལྕགས་ཀྱུ་ཕུལ་བས་སྒྲུབ་པ་པོ་ལ་མགུ་ཞིང་མངོན་དུ་འགྱུར་གྱི་གཞན་དུ་ནི་མ་ཡིན་ནོ་ཞེས་བསྟན་ཏོ། །དེ་ཉིད་བསྟན་པར་བྱ་བའི་ཕྱིར། །རང་གི་རིགས་ཀྱི་མཆོད་པ་བྱས་ནས་ཞེས་པ་ནི་རིགས་དང་རིགས་ཅན་དབྱེར་མེད་པའི་ཕྱིར་རོ། །འདི་སྐད་བཤད་པ་ཡིན་ཏེ་སྔགས་ཀྱིས་བརླབས་པའི་ཁ་ན་མ་ཐོ་བ་མེད་པའི་ལྕགས་ཀྱུ་ལྔ་ཕུལ་བས་མི་བསྐྱོད་པ་ལ་སོགས་པ་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའ་དང༌། ཁྲོ་བོའི་ཚོགས་ཀྱིས་རྣལ་འབྱོར་པ་ལ་ཀུན་ཏུ་བསྲུང་ཞིང་རྗེས་སུ་གཟུང་བར་འགྱུར་རོ། །ཡང་འདི་ཉིད་ཀྱི་ཕན་ཡོན་ཞེས་བྱ་བས་ནི་འཇིག་རྟེན་པ་དང་འཇིག་རྟེན་ལས་འདས་པའི་མཚན་ཉིད་ཅན་ཞེས་བྱ་བའི་དོན་ཏོ། །འཇིག་རྟེན་ལས་འདས་པ་
བསྟན་པར་བྱ་བའི་ཕྱིར། །གཏོར་མའི་སྦྱོར་བ་འདི་ཡིས་ནི། །ཞེས་པ་སྨོས་ཏེ། ལྕགས་ཀྱུ་དབུལ་བའི་སྦྱོར་བས་སོ། །བྱང་ཆུབ་པ་ཉིད་ཐོབ་པར་འགྱུར་བ་ཞེས་པ་ནི་རྡོ་རྗེ་འཆང་ཆེན་པོའི་གོ་འཕང་ཐོབ་པར་འགྱུར་རོ། །རྣམ་པར་དག་པ་རྗེས་སུ་དྲན་པས་ལྷ་བཤོས་དབུལ་བས་ཡེ་ཤེས་ཀྱི་ཚོགས་ཐོབ་པར་འགྱུར་གྱི་གཞན་དུ་ནི་མ་ཡིན་ཏེ། བསོད་ནམས་ཀྱི་ཚོགས་ཀྱི་རྒྱུ་ཡིན་པའི་ཕྱིར་རོ། །བསོད་ནམས་ཀྱི་ཚོགས་དེ་ཡང་དེ་ལས་དམན་པ་ཡིན་ཏེ་སོ་སོའི་སྐྱེ་བོ་བཞིན་ནོ། །ཡེ་ཤེས་དང་ལྡན་པ་འབའ་ཞིག་ཏུ་མ་ཟད་ཀྱི་ཞེས་བྱ་བ་ལ་སོགས་པས་ཡེ་ཤེས་ཀྱི་ཚོགས་ཐོབ་པ་འབའ་ཞིག་ཏུ་དགག་པར་བྱེད་དོ། །འདོད་པའི་ཁམས་ནི་བུད་མེད་ཐམས་ཅད་ཅེས་པ་ནི་འདོད་པའི་ལོངས་སྤྱོད་ཀྱི་བདེ་བའི་གཞི་ཡིན་པའི་ཕྱིར་རོ། །བུད་མེད་ཐམས་ཅད་ནི་ལྷ་མོ་དང་ཀླུ་མོ་ལ་སོགས་པའོ། །ཇི་སྐད་དུ། ལྷ་མོ་ཀླུ་མོ་གནོད་སྦྱིན་མོ། །ལྷ་མ་ཡིན་མོ་མི་མོ་ཡང༌། །རྙེད་ནས་རིག་པའི་བརྟུལ་ཞུགས་བྱ། །དེ་ལྟར་སྒྲུབ་སྟེ་ཐེ་ཚོམ་མེད། །ཅེས་འབྱུང་ངོ༌། །དེ་རྣམས་ཀྱི་ཡུལ་ལ་དགའ་བའི་དབང་དུ་འགྱུར་རོ་ཞེས་པ་ནི་ཐམས་ཅད་རྣམས་ཀྱང་དབང་དུ་བྱས་པས་རོལ་པའི་བདག་པོར་འགྱུར་ཏེ། དེ་ཁོ་ན་ཉིད་ཤེས་པ་ལ་ཕྱིའི་དངོས་གྲུབ་ནི་ཞར་ལས་འབྱུང་བའི་ཕྱིར་རོ། །དེ་ཡང༌། རི་རབ་སུམ་ཅུ་རྩ་དྲུག་གི །ཞེས་བྱ་བ་ལ་སོགས་པ་ནི་ལེའུ་བཅུ་གསུམ་པ་ལས་འཆད་པར་འགྱུར་རོ། །ལས་ཀྱིས་ཞེས་པ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པ་ལ་སོགས་པའི་ལས་ཀྱིས་ཉེ་བར་མཚོན་པ་འགྲོ་བ་ལྔའོ། །ཕྱིར་མི་ལྡོག་པའོ་ཞེས་པ་ནི་ས་བརྒྱད་པ་ལ་བསྐྱེད་པའི་རིམ་པའི་ཏིང་ངེ་འཛིན་གྱིས་ཐོབ་པར་བྱའོ། །དེའི་ལས་ནི་གཞན་གྱི་དོན་གྱི་མཚན་ཉིད་དོ། །སེམས་ཅན་སྨིན་ཅིང་གྲོལ་བར་བྱེད་པའི་མཚན་ཉིད་ཅན་ནོ་ཞེས་པ་ནི་མ་བསྒྲལ་བ་སྒྲོལ་བར་བྱེད་པ་དང༌། མ་གྲོལ་བ་གྲོལ་བར་བྱེད་པ་དང༌། དབུགས་མ་ཕྱུང་བ་དབུགས་དབྱུང་བ་སྦྱིན་པ་དང་ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་འདའ་བར་བྱ་ཞེས་བྱ་བའི་ཐ་ཚིག་གོ །ཡོངས་སུ་བརྟགས་པའི་རྣལ་འབྱོར་པ་རྣམས་ཀྱི་ཞེས་པ་ནི་བྱ་བ་དང༌། སྤྱོད་པ་དང༌། རྣལ་འབྱོར་རྒྱུད་ཀྱི་རྣལ་འབྱོར་པ་རྣམས་དང༌། རྣལ་འབྱོར་ཆེན་
པོའི་རྒྱུད་ཀྱིས་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱི་མཆོག་ཏུ་གྱུར་པ་ནི་ཟུང་དུ་འཇུག་པའི་རིམ་གྱིས་ས་བཅུ་གཉིས་པ་ཐོབ་པའི་ཕྱིར་རོ། །སྡུག་བསྔལ་བ་ཞེས་པ་ནི་སྡུག་བསྔལ་གསུམ་མོ། །ཡིད་མི་བདེ་བ་ཞེས་པ་ནི་འདོད་ཆགས་ལ་སོགས་པ་བག་ཆགས་ཀྱི་མཚན་ཉིད་དོ། །ཟིལ་གྱིས་མི་གནོན་པའི་གཟི་བརྗིད་ནི་དེ་རྣམ་པར་སྤྱོད་པར་བྱེད་པ་འོད་གསལ་བའི་མཚན་ཉིད་ཅན་གྱི་སྣང་བའོ། །དེ་ཡོད་པས་ན་གཟི་བརྗིད་ཅན་ནོ་ཞེས་པ་ནི་འོད་གསལ་བ་མངོན་དུ་བྱས་པ་ཞེས་བྱ་བའི་ཐ་ཚིག་གོ །འཇིག་རྟེན་གྱི་ཆོས་བརྒྱད་ཀྱིས་ཞེས་པ་ནི་རྙེད་པ་དང་མི་རྙེད་པ་ལ་སོགས་པས་སོ། །ཟུང་དུ་འཇུག་པ་ཐོབ་པས་འཇིག་རྟེན་གྱི་ཆོས་མངོན་དུ་མི་འགྱུར་ཏེ། གཉིས་སུ་མེད་པ་ཡིན་པའི་ཕྱིར་རོ། །ཇི་ལྟར་དྲག་པོ་རྡོ་རྗེ་ཅན། །ཞེས་བྱ་བ་ལ་སོགས་པ་བཤད་པའི་ཕྱིར་རོ། །རྡོ་རྗེ་སེམས་དཔའི་ཞེས་བྱ་བ་ལ་སོགས་པ་ནི་རྡོ་རྗེ་སེམས་དཔའ་བཞིན་དུ་མི་ཤིགས་པ་ཚེ་དང་ན་སོས་ལྡན་པ་སྟེ་བསམ་གཏན་གྱི་ཟས་ཀྱིས་མི་འཇིགས་པའི་ཕྱིར་རོ། །རྟག་ཏུ་རབ་ཏུ་དགའ་བར་གྱུར་པས་ན་ཞེས་པ་ནི་བསམ་གཏན་གྱི་བདེ་བ་ལ་ལོངས་སྤྱོད་པས་མི་ཟད་པའི་དགའ་བ་ཐོབ་པའི་ཕྱིར་རོ། །རྣལ་འབྱོར་ཆེན་པོ་དང་ལྡན་པ་ཞེས་པ་ནི་བྱ་བ་ལ་སོགས་པའི་ཚུལ་ལ་བརྟན་པ་ལ་ལྟོས་པས་སོ། །མཐོང་བ་ནི་ཁོང་དུ་ཆུད་པ་སྟེ་ཞེས་པ་ནི་སྐད་ཀྱི་བྱིངས་དོན་དུ་མ་ཡིན་པས་མཐོང་བ་ནི་ཤེས་པའི་དོན་ལ་འཇུག་གོ །མིག་ནི་མཐོང་བ་སྟེ་མིག་གི་རྣམ་པར་ཤེས་པས་ཡོངས་སུ་ཤེས་པའོ། །རྣ་བས་མཐོང་བ་ཞེས་པ་ནི་རྣ་བའི་རྣམ་པར་ཤེས་པས་ཡོངས་སུ་ཤེས་པའོ། །ཡིད་ཀྱིས་མཐོང་བ་ནི་ཡིད་ཀྱི་རྣམ་པར་ཤེས་པས་ཡོངས་སུ་ཤེས་པའོ། །དེ་ལ་མཐོང་བ་ཙམ་ཞེས་པ་ནི་མིག་ལ་སོགས་པས་མཐོང་བ་དང་ཐོས་པ་དང་རྟོགས་པར་བྱས་ནས་སོ། །སྣ་ཚོགས་པས་རྣམ་པར་ཕྱེ་བ་ཞེས་པ་ནི་སློབ་པ་དང་མི་སློབ་པ་ལ་སོགས་པའི་ཁྱད་པར་དང་ལྡན་པའོ། །དབང་དུ་བྱེད་པར་འགྱུར་བ་སྟེ་ཞེས་པ་ནི་མངོན་པར་ཤེས་པ་ཐོབ་པས་སོ། །སྤྱིའི་སྤྲོས་པས་འགྲུབ་པར་བྱ་བ་ལས་ཀྱི་རབ་འབྱམས་ཀྱི་སྒོ་ནས་དབང་དུ་འགྱུར་ཞེ་ན། སྨྲས་པ་མ་ཡིན་ཏེ། ཕྱིའི་སྔགས་དང་ཕྱག་རྒྱ་ལ་སོགས་པ་ནི་ངག་གིས་བཟླས་པར་བྱ་
བའི་ཡེ་གེའི་བདག་ཉིད་ཅན་ནི་སྔགས་སོ། །ལག་པའི་བྱ་བ་ལ་སོགས་པའི་མཚན་ཉིད་ཁྱད་པར་ནི་ཕྱག་རྒྱའོ། །དེ་རྣམས་ཀྱིས་བསྐུལ་བ་ནི་དྲངས་པས་དབང་བྱེད་པར་མི་འགྱུར་གྱི་འོན་ཀྱང་ལྷུན་གྱིས་གྲུབ་པས་སོ། །འདས་པ་དང་ནི་མ་འོངས་པ། །ད་ལྟར་བྱུང་བ་སྲིད་གསུམ་གྱི། །འོད་གསལ་རྣམ་པར་དག་འཛིན་པས། །སྐད་ཅིག་དེ་ལ་མ་ལུས་མཐོང༌། །ཡ་ཡི་དོན་གྱིས་ཅི་ཡང་རུང༌། །དངོས་གྲུབ་འདོད་པས་བྱ་བ་ནི། །ར་ལ་སོགས་པ་གསུམ་གྱིས་ནི། །འགྲོ་བའི་དོན་ལ་རབ་ཏུ་འཇུག །ཅེས་འབྱུང་ངོ༌། །དོན་དམ་པར་ནི་དོན་གཅིག་མཐོང་བ་ན། །འགྲོ་བ་ཐམས་ཅད་དོན་གཅིག་མཐོང་བར་འགྱུར། །འགྲམ་གྱི་ཕྱོགས་སུ་ཆུ་ནི་འཐུངས་པ་ཡིས། །རྒྱ་མཚོ་མ་ལུས་པ་ནི་མྱོང་བར་འགྱུར། །ཞེས་འབྱུང་ངོ༌། །མཚན་མ་དང་བཅས་པའི་ཏིང་ངེ་འཛིན་ལ་གནས་པ་ལས་མཚན་མ་མེད་པའི་འབྲས་བུ་མི་འབྱུང་ངོ་ཞེས་པ་ལ་མཚན་མ་དང་བཅས་པའི་ཏིང་ངེ་འཛིན་ནི་རྣམ་པར་རྟོག་པ་དང་བཅས་པའོ། །དེ་ལ་གནས་པ་ནི་དེ་ལ་དམིགས་པ་ལའོ། །མཚན་མ་མེད་པའི་འབྲས་བུ་ནི་མི་འགྱུར་བ་ཐར་པ་ཆེན་པོའི་བདེ་བའི་མཚན་ཉིད་ཅན་གྱིས་སངས་རྒྱས་ཉིད་ཐོབ་པར་མི་འགྱུར་ཏེ། རྒྱུ་དང་འབྲས་བུ་མི་འདྲ་བའི་ཕྱིར་རོ། །རྒྱུ་མཐུན་པ་ལས་འབྲས་བུ་འདྲ་བར་འགྱུར་ཏེ་གཞན་དུ་ནི་མ་ཡིན་ནོ། །ནས་ཀྱི་ས་བོན་ལས་འབྲས་ཀྱི་མྱུ་གུ་བཞིན་ནོ། །དེ་བཞིན་དུ་སྔགས་དང་ཕྱག་རྒྱ་ལ་གནས་པའི་རྣལ་འབྱོར་པ་ལས་མཚན་མ་མེད་པའི་འབྲས་བུ་འབྱུང་བར་མི་འགྱུར་གྱི། །འོན་ཀྱང་རྣམ་པར་མི་རྟོག་པའི་ཏིང་ངེ་འཛིན་ལ་གནས་པ་ལའོ། །རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ནི་གཉི་གའི་རྒྱུད་དེ། དེ་ལས་གསུངས་པ་ཞེས་བྱ་བ་འདིས་ལུང་ཚད་མ་ཉིད་དུ་བསྟན་ཏོ། །བདེ་བ་ཐམས་ཅད་བསྡུས་པ་ནི་བདེ་བ་ཐམས་ཅད་དེ་འོད་གསལ་བའོ། །ལྷུན་གྱིས་གྲུབ་པ་ཉིད་དོ་ཞེས་པ་ནི་འབད་རྩོལ་མེད་པས་རྫོགས་པར་འགྱུར་ཏེ་ཟུང་དུ་འཇུག་པའི་རིམ་པ་ལ་དེ་ཁོ་ན་ཉིད་རང་གསལ་བའི་ཕྱིར་རོ། །ཟུང་འཇུག་ཏིང་འཛིན་ལ་གནས་པས། །སླར་ཞིང་གང་ལ་ཡང་མི་སློབ་པོ། །འདི་ནི་རྫོགས་པའི་རྣལ་འབྱོར་ཞེས། །དེ་ཡང་རྡོ་རྗེ་འཆང་ཆེན་པོ། །རྣམ་པ་ཐམས་ཅད་མཆོག་ལྡན་པའི། །དེ་ལས་ཐམས་ཅད་མཁྱེན་
པ་འབྱུང༌། །ཞེས་བཤད་པའི་ཕྱིར་རོ། །ཉེ་བར་བསྡུ་བ་བསྟན་པར་བྱ་བའི་ཕྱིར། །རྟོག་པའི་རྣལ་འབྱོར་ཐམས་ཅད་དེ། །ཞེས་པ་ནི་ཐ་མལ་པའི་སྤྲོས་པ་ཐམས་ཅད་སྤོང་བའི་ཕྱིར་ལྷའི་སྐུ་སྒོམ་པར་བྱེད་པའོ། །དེ་རྣམས་ཀྱི་ཕུལ་དུ་བྱུང་བའི་ཞེས་པ་ནི་དབང་པོ་རྣོ་བ་ཡིན་པས་དམ་པའོ། །རྟོགས་ཤིང་ཞེས་པ་ནི་རིམ་པ་ལྔ་ཡོངས་སུ་ཤེས་པའོ། །རྫོགས་པའི་རིམ་པའི་ཏིང་ངེ་འཛིན་ལ་གནས་པའོ་ཞེས་པ་ནི་རྡོ་རྗེ་བཟླས་པ་ལ་སོགས་པའི་རིམ་པ་ལྔ་པོ་སྒོམ་པར་བྱེད་པའོ། །དེ་རྣམས་ཀྱི་གསང་བ་ནི་སྦ་བ་སྟེ་རྣལ་འབྱོར་པ་དེ་རྣམས་ཀྱིས་བྱ་བའི་རྒྱུད་ལ་སོགས་པའི་ཚུལ་ལ་བརྟེན་པའི་རྣལ་འབྱོར་པ་རྣམས་ལ་བསྟན་པར་མི་བྱའོ། །དེ་སྐུ་གསུང་ཐུགས་བྱིན་གྱིས་བརླབ་པ་ནི་དྲང་བ་དང༌། ངེས་པའི་དོན་གྱི་དབྱེ་བས་རྣམ་པ་གཉིས་དང་ཕྲ་མོའི་རྣལ་འབྱོར་རྣམ་པ་གཉིས་ཀྱིས་བསྡུས་པའི་རྣལ་འབྱོར་པ་ལ་བསྟན་པའི་ཕྱིར་རོ། །བྱང་ཆུབ་དམ་པ་ཞེས་པ་ནི་ཉན་ཐོས་པ་ལ་སོགས་པ་ལ་ལྟོས་ནས་རྡོ་རྗེའི་སྐུ་ཞེས་བྱ་བ་ཟུང་དུ་འཇུག་པའི་སྐད་ཅིག་མ་རྡོ་རྗེ་འཆང་ཆེན་པོའི་གོ་འཕང་ངོ༌། །དེས་ཐོབ་པར་འགྱུར་བ་ཞེས་པ་ནི། །སྔར་བཤད་པ་བསྒོམ་པའི་སྒོ་ནས་དེ་མངོན་དུ་བྱེད་པས་སོ། །ཉེ་བར་བརྟགས་པས་སོ་ཞེས་པ་ནི་རྒྱུ་ལ་འབྲས་བུ་ཉེ་བར་བརྟགས་པ་སྟེ་མར་ནི་ཚེ་བཞིན་ནོ། །དེ་བཞིན་གཤེགས་པའི་གསང་བའོ་ཞེས་པ་ནི་སྐུ་རྡོ་རྗེ་ལ་སོགས་པས་བྱིན་གྱིས་བརླབས་པའི་གསང་བ་ཞེས་བྱ་བའི་དོན་ཏོ། །ཐ་མལ་པའི་ལུས་དང་ངག་དང་སེམས་ལས་ཞེས་པ་ནི་ཉེ་བར་ལེན་པའི་ཕུང་པོ་ལྔའི་རང་བཞིན་བདེན་པ་མ་མཐོང་བའི་ལུས་ལ་སོགས་པ་ལས་སོ། །འདའ་བ་ནི་སྦྱང་བ་སྟེ་ཏིང་ངེ་འཛིན་གང་གིས་དག་པར་བྱ་བ་ཁོ་ན་ཉིད་དེ་ལ་དེ་སྐད་ཅེས་བྱའོ། །དེ་ཉིད་ནི་དེ་ཁོ་ན་ཉིད་ཐོབ་པར་བྱེད་པའི་ཏིང་ངེ་འཛིན་ཡང་དེ་ཉིད་དེ་ཉེ་བར་བཏགས་པས་སོ། །འདི་སྐད་སྟོན་པར་འགྱུར་ཏེ་ཞེས་བྱ་བ་ལ་སོགས་པས་ཉེ་བར་བསྡུས་པ་བསྟན་ཏེ། ཐ་མལ་པའི་ལུས་ཞེས་པ་ནི་ཉེ་བར་ལེན་པའི་ཕུང་པོ་ལྔའི་མཚན་ཉིད་དོ། །བརྟག་པར་བྱ་བ་སྤངས་པའོ། །གང་གིས་ནི་སྒོམ་པའི་རིམ་པས་སོ། །རྡོ་རྗེའི་རང་བཞིན་གྱི་ལུས་ཐོབ་པར་འགྱུར་བའི་ཞེས་པ་ནི་འཇིག་རྟེན་ལས་འདས་པའི་རྡོ་རྗེ་འཆང་ཆེན་པོའི་རང་བཞིན་
འགྲུབ་པར་འགྱུར་བའོ། །དེ་ཁོ་ན་ཉིད་དེ་ལྟ་བུ་ཡིན་ནོ་ཞེས་པ་ལ་ལེའུ་དྲུག་པ་འདི་ཉིད་ལས་གསུངས་པ་ལྟ་བུའོ། །དེ་སྐད་དུ་ཞེས་པ་ནི་གསང་བ་གྲུབ་པ་ལས་ཞེས་ཚིག་ལྷག་མའོ། །རྣམ་རྟོག་མེད་པའི་སྔགས་པས་ནི། །ཞེས་པ་ལ་སྒོམ་པ་ལ་མངོན་པར་ཞེན་པའི་རྣམ་པར་རྟོག་པ་དང་བྲལ་བས་སོ། །འདི་ལྟ་བུའི་ཏིང་ངེ་འཛིན་ལྡན་པ་དག་ཅེས་པ་ནི་སྔར་བཤད་པའི་རྣམ་པ་གཉིས་ཀྱི་ཏིང་ངེ་འཛིན་གང་ཡིན་པ་དེ་དང་ལྡན་པས་སོ། །ངེས་པའི་དུས་ནི་ཞེས་པ་ཟླ་བ་ལ་སོགས་པའི་མཚན་ཉིད་ཀྱི་འོད་ཙམ་གྱི་དུས་ཀྱི་ཚད་ཡོངས་སུ་སྤངས་ནས་སོ། །བླ་མེད་གོ་འཕང་ཐོབ་པར་འགྱུར། །ཞེས་པ་ནི་ཕྱག་རྒྱ་ཆེན་པོའི་མཚན་ཉིད་རྡོ་རྗེ་འཆང་ཆེན་པོའི་གནས་ཐོབ་པར་འགྱུར་རོ་ཞེས་ཚིགས་སུ་བཅད་པའི་དོན་ཏོ། །དྲང་བའི་དོན་ཏོ་ཞེས་པ་ནི་ལྕགས་ཀྱུ་ལྔའི་ལྷ་བཤོས་འབུལ་བས་བླ་ན་མེད་པའི་གོ་འཕང་ཐོབ་པར་བསྟན་པའི་ཕྱིར་རོ། །རྡོ་རྗེའི་ཚིག་ཅེས་བྱ་བ་ལ་སོགས་པས་རྡོ་རྗེ་ཕྲེང་སའི་རྒྱུད་ལས་ཚད་མ་ཉིད་དུ་བསྟན་ཏོ། །དེ་ནས་ཞེས་བྱ་བ་ལ་སོགས་པའི་ཚིགས་སུ་བཅད་པའི་དོན་ནི་སྔར་བཤད་ཟིན་ཏོ། །སྐད་ཅིག་ནི་སེ་གོལ་བརྡབ་པའི་དུས་སོ། །ཐང་ཅིག་ནི་ཡུངས་ཀར་བསྐོར་བའི་དུས་སོ། །ཡུད་ཙམ་ནི་དབུགས་དབྱུང་བའོ། །ཞག་བཅོ་ལྔ་ནི་ཟླ་བ་ཕྱེད་དོ། །ཞག་སུམ་ཅུ་ནི་ཟླ་བའོ། །དེ་བཅུ་གཉིས་ཀྱིས་ལོའི་དུས་སོ། །དེ་རྣམ་པ་དྲུག་གིས་དུས་ཀྱི་དབྱེ་བའོ། །དེ་རྣམས་ཀྱིས་འཇིག་རྟེན་པ་འདི་འགྲོ་བ་དང་ལྡོག་པས་སྲིད་པར་འཁོར་བར་འགྱུར་བ་དང༌། སྐྱེ་བ་དང་གནས་པ་དང་འཇིག་པས་ངལ་བར་འགྱུར་རོ། །དེ་བས་ན་རྣམ་པ་དྲུག་ལ་གནས་པའི་དུས་དེ་དང་བསྐལ་པ་གྲངས་མེད་པ་གསུམ་པོ་ནི་ཐིག་ལེ་དྲུག་ཅུའི་རྩིས་སུ་མ་འགྱུར་ལ་བརྟེན་ཏེ་དུས་ཀྱི་སྤྲོས་པ་གང་ཡིན་པའོ། །དེ་ནི། སྐད་ཅིག་གཅིག་ནི་ཡིན་པར་བཤད། །ཅེས་པ་ནི་སྐད་ཅིག་མ་གཅིག་གིས་མོས་པའི་འོད་གསལ་བས་མྱོང་བར་བྱ་བའི་སྐད་ཅིག་མ་ཞེས་བྱའོ། །ཟླ་བ་དྲུག་བཤད་དེ་ཉིད་ཡིན། །ཞེས་པ་ནི་སྐད་ཅིག་མ་གཅིག་གིས་སྔར་བཤད་པའི་མཚན་ཉིད་ཅན་གྱི་དུས་དྲུག་གི་དབྱེ་བ་ཞེས་བྱ་བ་དེའི་དངོས་མེད་གང་ཡིན་པ་དེ་ནི་རྫོགས་པར་ལོངས་སྤྱད་པ་སྟེ། འོད་གསལ་བའི་སྒོམ་པའི་སྐད་ཅིག་མ་ཞེས་བྱའོ། །དེ་
ཉིད་ཀྱི་སྐད་ཅིག་མ་གཅིག་ཏུ་ཞེས་པ་ནི་འོད་གསལ་བ་ལ་འཇུག་པའི་མཚན་ཉིད་ཀྱིས་སྐད་ཅིག་མའོ། །དུས་གསུམ་ལས་འདས་ཡིན་པར་དགོངས། །ཞེས་པ་ནི་འདས་པ་དང་མ་འོངས་པ་དང་ད་ལྟར་བྱུང་བའི་རང་བཞིན་གྱི་སྣང་བ་དང་སྣང་བ་མཆེད་པ་དང་སྣང་བ་ཉེ་བར་ཐོབ་པའི་སྐད་ཅིག་མ་དང་བྲལ་བའི་ངོ་བོས་བསམ་པར་བྱ་ཞེས་པའི་ཐ་ཚིག་གོ །གཟུགས་དང་སྒྲ་དང་རོར་ལྡན་པ། །ཞེས་པ་ནི་དམ་ཚིག་གི་ཕྱག་རྒྱ་ལ་གནས་པའི་གཟུགས་ལ་སོགས་པའི་ཡུལ་རྣམས་ལ་སྤྱོད་པར་གྱུར་པས་སོ། །རྣལ་འབྱོར་པས་ནི་ཟླ་དྲུག་བསྒོམ། །ཞེས་པ་ནི་དུས་ཀྱི་དབྱེ་བ་གང་ཡིན་པ་དེ་འོད་གསལ་བ་ཉིད་དུ་བསྒོམ་པར་བྱའོ། །མཆོད་ཆེན་དེ་ནི་ཞེས་པ་ལ་འོད་གསལ་བ་ལ་འཇུག་པའི་མཚན་ཉིད་ཀྱི་མཆོད་པ་ཆེན་པོ་དེ་ལྟར་བྱས་ནས་སོ། །གསང་བའི་དེ་ཉིད་ཅེས་པ་ནི་འོད་གསལ་བའི་དེ་ཉིད་བསྒོམ་པར་བྱའོ་ཞེས་པའི་དོན་ཏོ། །ཡུལ་དང་དབང་པོ་ཞེས་བྱ་བ་ལ་སོགས་པ་སྔར་བཤད་པའི་རིམ་པས་ཡུལ་དང་དབང་པོ་ཉེ་བར་བསྡུ་བའི་མཚན་ཉིད་ཅན་རིམ་པ་གཉིས་པས་ཐོབ་པར་བྱ་བའི་དེ་ཁོ་ན་ཉིད་གང་ཡིན་པ་དེ་ཉིད་བཤང་གཅི་ཟས་སུ་བྱེད་པའོ་ཞེས་བསྟན་ཏོ། །དེ་ཉིད་ཀྱི་དེ་འདྲ་བའི་དངོས་གྲུབ་སྟེ། དེ་མངོན་དུ་བྱེད་པའི་མཚན་ཉིད་དོ།། བཟའ་བ་རྣམ་རྟོག་མེད་པའོ། །ཞེས་པ་ནི་ཕྱིའི་བཟའ་བ་སྤངས་ནས་བསམ་གཏན་གྱི་བཟའ་བའི་མཚན་ཉིད་ཅེས་བྱ་བའི་དོན་ཏོ། །དེ་ཉིད་ཀྱི་ཕན་ཡོན་བསྟན་པར་བྱ་བའི་ཕྱིར། དེ་ཉིད་ཅེས་བྱ་བ་ལ་སོགས་པ་སྨོས་ཏེ། བླ་ན་མེད་པའི་འོད་གསལ་བའི་མཚན་ཉིད་དོ། །བྱང་ཆུབ་སེམས་གཅིག་ལས་འབྱུང་བའོ་ཞེས་པ་ནི། ཕྱག་རྒྱའི་རིམ་པས་ཀུན་རྫོབ་བྱང་ཆུབ་ཀྱི་སེམས་ལ་དམིགས་པ་ལས་འབྱུང་བའོ། །རྟོག་པ་མེད་པ་ནི་སྤྲོས་པ་མེད་པའོ། །འདུས་མ་བྱས་པ་ནི་རྣམ་པར་ཤེས་པ་གསུམ་དང་བྲལ་བའོ། །དྲི་མེད་དོན་ནི་ཞེས་པ་ལ་རང་བཞིན་བརྒྱ་དྲུག་ཅུ་དང་བྲལ་བའོ། །འགྲུབ་པར་འགྱུར་བ་ནི་རྣལ་འབྱོར་བས་མངོན་དུ་འགྱུར་རོ། །སེམས་རྣམ་བར་དག་པའི་རིམ་པའི་ཐབས་ཕྱག་རྒྱའི་རིམ་པའི་མཚན་ཉིད་བཤད་པར་བྱ་སྟེ། མ་ཞེས་པ་ནི་མིང་གི་ཡི་གེ་དང་པོས་ཉེ་བར་མཚོན་པ་དང༌། །དམ་ཚིག་གི་ཕྱག་རྒྱའི་རང་
བཞིན་མཱ་མ་ཀཱིའོ། །དེ་བཞིན་དུ་མིང་གི་ཡི་གེ་དང་པོས་ཉེ་བར་མཚོན་པ་ནི་ཕྱག་རྒྱ་དེའི་བཀའ་དྲིན་རྟོགས་ནས་མངོན་པར་བྱང་ཆུབ་པའི་སེམས་རྣམ་པར་དག་པའི་མཚན་ཉིད་ཉམས་སུ་མྱོང་བར་འགྱུར་རོ། །དེ་ལྟར་གྱུར་པའི་བསམ་གཏན་ལས་དགའ་བ་དང་བཅས་པའི་བདེ་བ་ཆེན་པོ་གང་ཡིན་པ་དེ་ནི་དགའ་བཅས་ཟས་ཏེ་ཤ་ཞེས་བྱའོ། །དེ་ནི་བསམ་གཏན་གྱི་བཟའ་བཅའི་མཚན་ཉིད་ཀྱི་དེ་ཁོ་ན་ཉིད་དེ་ཤའི་སྒྲའི་དོན་ཏོ། །རབ་ཏུ་བྱེད་པ་ལས་ཀྱང༌། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །གསལ་བར་འདི་ལས་མཚོན་པར་འགྱུར། །ཆགས་པ་མ་ཡིན་ཆགས་བྲལ་མིན། །བར་མ་ཡང་ནི་མི་དམིགས་སོ། །སྟོང་པ་མ་ཡིན་མི་སྟོང་མིན། །བར་མ་ཡང་ནི་མི་དམིགས་སོ། །ཞེས་འབྱུང་ངོ༌། །དེ་ཁོ་ན་ཉིད་དེ་ནམ་མཁའི་ཁམས་དང་འདྲ་བ་མཐའ་ཡས་པ་ཡིན་པ་དེའི་རྣལ་འབྱོར་དང་ལྡན་པས་ཆེན་པོའི་སྒྲས་ཁྱད་པར་དུ་བྱས་ནས་ཤ་ཆེན་དེ་ནི་ཡིན་པར་བཤད་པ་སྟེ་ཚད་མེད་པ་ཡིན་པས་སོ། །དམ་པ་ཚད་མེད་མཁས་པ་དང༌། །བརྩོན་འགྲུས་སྤྲོ་བའི་བདག་ཉིད་དང༌། །རྨད་དུ་བྱུང་བའི་བྱེད་པ་ནི། །ཆེན་པོ་ཞེས་བྱར་རྟག་ཏུ་བཤད། །ཅེས་འབྱུང་ངོ༌། །ཕན་ཡོན་བསྟན་པར་བྱ་བའི་ཕྱིར། །གསང་བ་ཞེས་བྱ་བ་ལ་སོགས་པ་སྨོས་ཏེ། གསང་བ་ནི་བསྐྱེད་པའི་རིམ་པའི་རྣལ་འབྱོར་པ་རྣམས་ལ་བསྟན་པར་མི་བྱའོ། །གོ་འཕང་ནི་བརྟན་པ་དང་གཡོ་བའི་བདག་ཉིད་ཀྱི་ཁམས་གསུམ་པ་ཐམས་ཅད་ཀྱི་གཞིའོ། །མཆོག་ནི་ཡེ་ཤེས་ལ་ལྟོས་ནས་བླ་ན་མེད་པའོ། །དེ་ཉིད་ཀྱི་ཁྱད་པར་ནི་རྡོ་རྗེ་གསུམ་བསྡུ་བར་བྱེད་པ་ནི། རྡོ་རྗེ་གསུམ་སྟེ། འོད་གསལ་བའི་ག་འཕང་ནི་རྒྱུར་གྱུར་པ་སྣང་བ་ལ་སོགས་པའི་ཡེ་ཤེས་གསུམ་མོ། །དེ་མྱུར་དུ་འགྲུབ་པ་ནི་རྫོགས་པ་སྟེ་འོད་གསལ་བ་ལ་འཇུག་པས་དག་པར་འགྱུར་རོ་ཞེས་བྱ་བའི་དོན་ཏོ། །དམ་ཚིག་ཆེན་པོ་ཞེས་བྱ་བ་ལ་སོགས་པས་དེ་ཁོ་ན་ཉིད་ཕུང་པོ་ལྔ་རྣམ་པར་དག་པར་བྱེད་པ་གླང་པོ་ལ་སོགས་པའི་ལྕགས་ཀྱུ་ལྔའི་བརྡས། བརྡར་བྱས་པ་གང་དང་སྦྱོར་པས་རྣལ་འབྱོར་པ་ནི་བསམ་གཏན་གྱི་ཟས་དང་ལྡན་པར་འགྱུར་རོ་ཞེས་བསྟན་ཏེ། ཁམ་ཞེས་པ་ནི་ཕྱིའི་བཟའ་བའི་ངོ་བོའི་མིང་ངོ༌། །དེ་ཉིད་འཇིག་རྟེན་པའི་བཟའ་བ་ཡིན་ནོ། །འཇིག་རྟེན་ལས་འདས་པ་ནི་
དགོངས་པས་བཤད་པ་བསམ་གཏན་གྱི་བཟའ་བ་ཞེས་བྱའོ། །དེ་ཁོ་ན་ཉིད་ཐོབ་པའི་ཕན་ཡོན་བསྟན་པའི་ཕྱིར་གང་ཡང་ཞེས་སྨོས་ཏེ། འཇིག་རྟེན་འདས་མཆོག་ཅེས་པ་ནི་ཟག་པ་མེད་པའི་ཡེ་ཤེས་ཐོབ་པའོ། །རྣམ་བར་མི་རྟོག་པ་ལ་མཁས། །ཞེས་པ་ནི་འོད་གསལ་བའི་དེ་ཁོ་ན་ཉིད་ལ་གཅིག་ཏུ་གཞོལ་བ་ཞེས་བྱ་བའི་དོན་ཏོ། །དེ་བཞིན་ནི་ཆོས་ཉིད་དེ་དེ་ཉིད་དུ་རོ་གཅིག་པ་ནི་དེའི་བདག་ཉིད་དུ་འཇུག་པ་ཞེས་བྱ་བའི་དོན་ཏོ། །འཁོར་བ་ནི་ཀུན་རྫོབ་ཀྱི་བདེན་པའི་བདག་ཉིད་དོ། །ཅིག་ཤོས་ནི་དོན་དམ་པའི་བདེན་པ་སྟེ་སྤངས་པ་ནི་དེ་ལ་དབྱེར་མེད་པ་མངོན་དུ་བྱེད་པ་ཟུང་དུ་འཇུག་པའི་ཏིང་འཛིན་ལ་རབ་ཏུ་གནས་པར་འགྱུར་རོ། །རྣལ་འབྱོར་བརྟུལ་ཞུགས་བཟང་པོ་འདིས། །ཞེས་པ་ནི་སྔར་བཤད་པའི་སེམས་རྣམ་པར་དག་པའི་རིམ་པ་དང་རྫོགས་པའི་རིམ་པའི་མཚན་ཉིད་ཀྱི་བསྒོམ་པའི་བརྟུལ་ཞུགས་བཟང་པོས་སོ། །བྱང་ཆུབ་སེམས་དཔའ་བློ་ཅན་དང༌། །ཞེས་པ་ནི་ཕྱག་རྒྱ་དང་ལྡན་པའི་སའི་སྙིང་པོ་ལ་སོགས་པ་རྣམས་ཀྱིའོ། །སངས་རྒྱས་ཀྱི་དབང་བསྐུར་བ་ཐོབ་པས་སངས་རྒྱས་རྣམས་ནི་མཉེས་པར་འགྱུར་བའོ། །དངོས་གྲུབ་ནི་ཡང་དག་པར་རྫོགས་པའི་བྱང་ཆུབ་སྟེ་རིམ་པ་ལྔས་ཐོབ་པར་བྱ་བའི་རྡོ་རྗེ་འཆང་ཆེན་པོའི་གོ་འཕང་ཞེས་བྱ་བའི་དོན་ཏོ། །མྱུར་དུ་ནི་བདེ་བ་དང་ཡུན་རིང་པོ་མ་ཡིན་པས་ཐོབ་པར་འགྱུར་རོ། །འདོད་ཁམས་དབང་ཕྱུག་ཅེས་པ་ནི་ཁམས་གསུམ་གྱི་བདག་པོའོ། །ལས་ཀྱི་གོ་འཕང་ཞེས་པ་ནི་ཐམས་ཅད་ཀྱི་གཞིར་གྱུར་པའི་དངོས་གྲུབ་ཐོབ་པར་འགྱུར་རོ། །གཟི་བརྗིད་དང་ལྡན་པ་ཞེས་པ་ནི་ཡེ་ཤེས་ཀྱི་དབང་ཐོབ་པས་འབར་བ་དང་སྣང་བ་ལ་སོགས་པ་སྟོན་པར་བྱེད་པའོ། །སྟོབས་ཀྱིས་ཕྱུག་ཅེས་པ་ནི་གཞན་ལ་མེད་པ་སངས་རྒྱས་ཀྱི་སྤྱོད་ཡུལ་གནས་དང་གནས་མ་ཡིན་པ་མཁྱེན་པའི་སྟོབས་ལ་སོགས་པ་དང་བཅས་པའོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུ་དང་ལྡན་པས་ན་མདངས་དང་ལྡན་པའོ། །མ་འདྲེས་པའི་དྲན་པ་ཉེ་བར་གཞག་པ་དང་ཐུགས་རྗེ་ཆེན་པོ་དང་ཐུན་མོང་མ་ཡིན་པའི་སངས་རྒྱས་ཀྱི་ཆོས་བཅོ་བརྒྱད་དང༌། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་ལྡན་པས་ན་མཐོང་ན་དགའ་བའོ། །མཐོང་བ་ཙམ་གྱིས་ཞེས་པ་ནི་ཆོག་
མི་ཤེས་པའི་སྐུ་མཐོང་བས་སོ། །བསྐུལ་ནས་ཞེས་པ་ནི་ལམ་ལ་འཇུག་པར་མཛད་པའོ། །འཇིག་རྟེན་འདི་དག་དབང་དུ་འགྱུར། །ཞེས་པ་ནི་ཚངས་པ་ལ་སོགས་པ་ལྷའི་ཚོགས་འདུལ་བར་མཛད་པས་སོ། །ཉེ་བར་བསྡུ་བ་བསྟན་པར་བྱ་བའི་ཕྱིར་རོ། །འདི་ན་ཞེས་བྱ་བ་ལ་སོགས་པ་སྨོས་ཏེ། སངས་རྒྱས་ཐམས་ཅད་ཀྱི་ཞེས་པ་ནི་རིན་པོ་ཆེ་ལྟ་བུའི་གང་ཟག་རྣམས་ཀྱིའོ། །གསང་བ་བྱང་ཆུབ་དམ་པའོ། །ཞེས་པ་ནི་ཙནྡན་ལ་སོགས་པ་ལ་བསྟན་པར་མི་བྱ་བ་རྫོགས་པའི་རིམ་པའི་དེ་ཁོ་ན་ཉིད་ཅེས་བྱ་བའི་དོན་ཏོ། །ཡང་དག་སྔགས་ཀྱིས་བསང་བ་འདིས། །ཞེས་པ་ནི་སེམས་སྐྱོ་བ་བསང་བར་གྱུར་པའོ། །རྡོ་རྗེ་གསུམ་འདས་དམ་པའོ། །ཞེས་པ་ནི་ཡེ་ཤེས་གསུམ་ཡོངས་སུ་སྦྱོང་བར་བྱེད་པ་ཀུན་གྱི་མཆོག་ཅེས་བྱ་བའི་དོན་ཏོ། །དེ་བས་ན་རང་དང་གཞན་གྱི་དོན་ཕུན་སུམ་ཚོགས་པ་རྫོགས་པར་མཛད་པས་ན་གཙོ་བོའོ། །དེ་བཞིན་གཤེགས་པ་ཐམས་ཅད་བསྡུ་བར་མཛད་པའི་རྡོ་རྗེ་འཆང་ཆེན་པོ་ལས་འབྱུང་བས་ན་དེ་བཞིན་གཤེགས་པ་ཀུན་ནོ། །དམ་ཚིག་ནི་དམ་ཚིག་གི་སྤྱོད་པས་ཐོབ་པར་བྱ་བ་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱི་སྔགས་ཀྱི་སྐུའོ། །དེ་ལས་ཀྱང་དམ་ཚིག་ནི་འཇུག་པ་ལ་སོགས་པའི་རིམ་པས་ཐོབ་པ་སྔགས་ཀྱི་དེ་ཁོ་ན་ཉིད་མངོན་དུ་བྱེད་པའི་མཚན་ཉིད་དེ་རྡོ་རྗེ་བཟླས་པའི་རིམ་པའོ། །དེ་ལས་ཀྱང་མཆོག་ནི་སེམས་ལ་དམིགས་པའི་དེ་ཁོ་ན་ཉིད་ཀྱི་མཚན་ཉིད་དོ། །ངེས་པའི་དོན་ཏོ་ཞེས་པ་ནི་སེམས་རྣམ་པར་དག་པའི་རིམ་པ་བརྗོད་པས་སོ། །དེ་ཁོ་ན་ཉིད་རྣམ་པར་མི་འཇིགས་པའི་ངོ་བོ་ཉིད་ཅེས་པ་ནི་འོད་གསལ་བས་སོ། །ལུས་དང་ངག་དང་ཡིད་ནི་ཡེ་ཤེས་གསུམ་མོ། །བྱིན་གྱིས་རློབ་ཅིང་བསྐྱེད་པ་ཞེས་པ་ནི་གང་གིས་སྦྱང་བར་བྱ་བའོ། །དེ་བརྗོད་པའི་གཞུང་གི་ཚོགས་ཀྱི་ལེའུ་ནི་ཞེས་པ་ལ་དེའི་དོན་སྟོན་པར་བྱེད་པའི་ཚིག་གི་ཚོགས་ནི་ལེའུ་ཞེས་བྱའོ།། སྒྲོན་མ་གསལ་བར་བྱེད་པའི་འགྲེལ་བའི་ཊཱི་ཀཱ་ལས་ལེའུ་དྲུག་པའི་རྒྱ་ཆེར་བཤད་པའོ།། །།