ལེའུ་བདུན་པ། སྔགས་ཀྱི་སྤྱོད་པའི་མཆོག་གི་རྒྱ་ཆེར་བཤད་པ།
དེ་ལྟར་ཞེས་བྱ་བ་ལ་སོགས་པས་ལེའུ་བདུན་པའི་བཤད་པ་བརྩམ་པར་བྱ་སྟེ། རྣལ་འབྱོར་པ་ཐ་མལ་པ་དང་མཆོག་རྣམས་ཀྱི་ཞེས་པ་ནི་རིམ་པ་གཉིས་སྒོམ་པར་བྱེད་པའི་
སྒྲུབ་པ་པོ་རྣམས་ཀྱིའོ། །སྤྱོད་པའི་ལེའུ་ལྔ་པ་ལས་བཤད་པ་རྣམ་པ་གསུམ་མོ། །ཡང་དག་པར་བསྟན་ནས་ཞེས་པ་ནི་རྣམ་པར་བཤད་ནས་སོ། །དེ་ཉིད་སླར་ཡང་སྤྲོས་ནས་བཤད་པའི་ཕྱིར་ཞེས་པ་ནི་རྒྱས་པར་སོ་སོར་བཤད་པར་བྱ་བའི་ཕྱིར་རོ། །དམ་ཚིག་ཆེན་པོ་དེ་བཞིན་གཤེགས་པ་ལྔ་སྤྲོ་བ་དང་བསྡུ་བར་མཛད་པས་ན་དམ་ཚིག་ཆེན་པོ་ནི་རྡོ་རྗེ་འཆང་ཆེན་པོའོ་ཞེས་བྱའོ། །ཡན་ལག་དྲུག་གོ་ཞེས་པ་ནི་སོ་སོར་སྡུད་པ་ལ་སོགས་པའི་མཚན་ཉིད་དེ་དེའི་གོ་འཕང་ཐོབ་པར་འགྱུར་ཏེ་དེས་ཉེ་བར་བརྟགས་པས་སོ། །ཐུན་མོང་མ་ཡིན་པའི་སྒྲུབ་པ་པོ་ཞེས་པ་ནི་རྡོ་རྗེ་བཞི་པའོ། །དེ་དག་གི་མངོན་པར་རྫོགས་པར་བྱང་ཆུབ་པ་ཐོབ་པ་ནི་ཞེས་པ་ལ་ཡན་ལག་དྲུག་དང༌། རྡོ་རྗེ་བཞི་པོས་སྔགས་ཀྱི་སྐུ་དང་ཡེ་ཤེས་ཀྱི་སྐུ་ཐོབ་པ་སྟེ་རྡོ་རྗེ་འཆང་བ་ཉིད་དོ། །དེའི་དོན་གྱི་ལེའུ་ནི་ཞེས་བྱ་བ་ལ་སོགས་པ་ནི་དེ་རྗོད་པར་བྱེད་པའི་ཕྱིར་རོ། །ཐ་མལ་མཆོག་གི་དབྱེ་བ་ཡིས། །བསྙེན་པ་རྣམ་པ་གཉིས་ཡིན་ཏེ། །ཐ་མལ་པ་ནི་རྡོ་རྗེ་བཞི། །མཆོག་ནི་ཡན་ལག་དྲུག་གིས་སོ། །ཞེས་འབྱུང་ངོ༌། །འདོད་པ་ཐམས་ཅད་ཅེས་བྱ་བ་འདིས་སྤྲོས་པ་དང་བཅས་པའི་སྤྱོད་པ་བསྟན་པར་བྱ་བའི་ཕྱིར། ཉེ་བར་བརྩམ་པར་བྱ་སྟེ། གཟུགས་ལ་སོགས་པའི་ཡུལ་རྣམས་སོ། །ཞེས་པ་ནི་དམ་ཚིག་གི་ཕྱག་རྒྱ་ལ་གནས་པའམ་ལོགས་སུ་གནས་པའོ། །རྗེས་སུ་མྱོང་ཞིང་བསྟེན་པས་སོ། །ཞེས་པ་ནི་སོ་སོར་སྡུད་པའི་རིམ་པས་བཟུང་ནས་བསམ་གཏན་གྱི་ཡན་ལག་གིས་དེ་བཞིན་གཤེགས་པའི་རང་བཞིན་དུ་རྟོགས་པའོ། །འདོད་པ་ནི་འདུན་པ་སྟེ་ཞེས་པ་ནི་དེ་བཞིན་གཤེགས་པའི་ཡུལ་རྣམས་གཟུང་པའི་འདོད་པའོ། །འདོད་པ་ནི་གཟུང་བའི་རྣམ་པ་སྟེ་ཞེས་པ་ལ་དམན་པ་ལ་སོགས་པའི་མཚན་ཉིད་དོ། །མིག་ལ་སོགས་པས་ཞེས་པ་ནི་དབང་པོ་དྲུག་གིས་སོ། །གཟུགས་ལ་སོགས་པ་ཞེས་པ་ནི་ཡུལ་དྲུག་གོ །ངན་པ་དང་འབྲིང་དང་མཆོག་རྣམས་གཅིག་པའི་སྣང་བ་ཡུལ་དུ་བྱེད་པའོ་ཞེས་པ་ནི་དབང་པོ་རྣམས་ཀྱི་སྐད་ཅིག་མ་དང་པོ་ལ་ངན་པ་ལ་སོགས་པའི་རྣམ་པར་རྟོག་པ་སྐྱེ་བར་མི་འགྱུར་ཏེ་རྟོག་པ་ལས་འདས་པའི་ཕྱིར་རོ། །
མངོན་སུམ་རྟོག་པ་ལས་འདས་པ། །མ་འཁྲུལ་པ་ཞེས་མངོན་པར་བརྗོད། །དོན་རྟོགས་པ་ནི་རྟོགས་པ་སྟེ། །སྤྱི་ལས་ཡང་དག་འབྱུང་བའོ། །ཞེས་བཤད་དོ། །མིག་ལ་སོགས་པ་དེ་རྣམས་ཀྱིས་ཡུལ་རྣམས་གཟུང་བའི་དུས་སུ་ངན་པ་ལ་སོགས་པ་རྣམ་པར་རྟོག་པ་ནི་མེད་དོ། །ངེས་པའི་རྟོག་པས་ནི་དེ་རྣམས་ལ་མེད་པ་དང་ངན་པ་དང་བར་མ་དང་མཆོག་ཉིད་དུ་གཟུང་བར་བྱེད་པ་སྟེ་དངོས་པོ་ནི་ཆ་ཤས་མེད་པའི་ངོ་བོ་ཡིན་པས་སོ། །འཛིན་པར་བྱེད་པའི་རྣམ་པར་རྟོག་པ་གང་ཡིན་པ་དེ་ནི་བདེན་པ་ལས་གཞན་ཡིན་པའི་ཕྱིར་རོ། །རྣལ་འབྱོར་པས་ཀྱང་ཞེས་བྱ་བ་ལ་སོགས་པས་མིག་ལ་སོགས་པའི་རྣམ་པར་ཤེས་པ་དྲུག་པའོ། །གང་དང་གང་འདོད་པ་འབྱུང་བ་དེའི་འདོད་པ་དང་རྗེས་སུ་མཐུན་པའི་ཡུལ་རྣམས་སྤྱོད་པར་བྱའོ་ཞེས་བསྟན་ཏོ། །ཇི་སྐད་དུ། དབང་པོའི་ལམ་ནི་གང་དང་གང༌། །རང་བཞིན་དེ་དང་དེ་ཉིད་འགྲོ། །མཉམ་པར་མ་བཞག་སྦྱོར་བ་ཡིས། །སངས་རྒྱས་ཐམས་ཅད་རང་བཞིན་ལྟ། །དབང་པོའི་ལམ་ནི་དེ་དང་དེས། །སྒྲུབ་པ་པོ་ནི་ཡུལ་ཕྲད་ནས། །མ་ལུས་དེ་བཞིན་གཤེགས་པ་ལ། །ཚིམ་པར་བྱ་ཕྱིར་དབུལ་བར་བྱ། །ཞེས་རྡོ་རྗེ་ཕྲེང་བ་ལས་འབྱུང་ངོ༌། །དེ་ཉིད་ཀྱི་ཕྱིར་རྟེན་པར་བྱེད་པ་ཞེས་བྱ་བ་ལ་སོགས་པའི་ཚིག་གིས་སྤྲོས་པ་དང་བཅས་པའི་སྤྱོད་པ་བསྟན་པར་བྱའོ་ཞེས་བསྟན་ཏོ། །ཅི་ཞིག་ཅེ་ན་ཞེས་བྱ་བ་ལ་སོགས་པས་སྤྱོད་པའི་འབྲས་བུ་བསྟན་ཏོ། །ཡུལ་དང་དབང་པོ་མཉམ་པར་སྦྱོར་བ་ཞེས་པ་ནི་སོ་སོར་སྡུད་པ་དང་བསམ་གཏན་གྱི་ཡན་ལག་གི་ཡུལ་འཛིན་པ་དང༌། དེ་རྣམ་པར་དག་པའི་མཚན་ཉིད་ཀྱི་སྦྱོར་བས་སོ། །རྡོ་རྗེ་འཆང་ཉིད་མྱུར་ཞིང་ཞེས་པ་ནི་དེའི་འོག་ཏུ་ཡན་ལག་བཞིའི་རྣལ་འབྱོར་བསྒོམ་པར་བྱ་བས་སོ། །འདིར་དགོངས་པ་འདི་ཡིན་ཏེ། རེ་ཞིག་དང་པོའི་རྣལ་འབྱོར་པ་རྣམ་པར་སྣང་མཛད་ལ་སོགས་པའི་ལྷ་རྣམས་ཀྱི་གང་ཡང་རུང་བའི་རྣལ་འབྱོར་དང་ལྡན་པས་གདོང་དང་ཕྱག་རྒྱ་དང་དབྱིབས་ལ་སོགས་པ་ཤིང་གིས་བྱས་ལ་ཁང་པ་སུམ་བརྩེགས་ལ་འདུག་སྟེ། །འོག་ཁང་ལ་བཟའ་བ་དང་བཅའ་བ་ལ་སོགས་པ་བཞག་ཅིང༌། བར་ཁང་ལ་གར་དང་རོལ་མོ་ལ་སོགས་པ་ལ་མཁས་པ་བཞག་ཅིང༌། ཡང་ཁང་ལ་སྟན་འཇམ་པོའི་
སྟེང་དུ་དབུས་ཀྱི་གཙོ་བོའི་ང་རྒྱལ་དང་ལྡན་པས་བཞུགས་ལ། ཕྱོགས་བཞི་པོ་ལ་གཟུགས་བཟང་ལེགས་པར་བརྒྱན་པ་དམ་ཚིག་གི་ཕྱག་རྒྱ་ན་སོ་གཞོན་པ་རིགས་ཀྱི་ཡུམ་སངས་རྒྱས་སྤྱན་མ་ལ་སོགས་པའི་ཚུལ་དང་ལྡན་པ་བཞི་པོ་བཞག་ཅིང༌། དེ་རྣམས་ཀྱི་ཡང་ཕྱི་རོལ་གྱི་མཚམས་སུ་གཟུགས་རྡོ་རྗེ་མ་ལ་སོགས་པ་ཡུལ་གྱི་ལྷ་མོ་བཞིའི་ཚུལ་དང་ལྡན་པའི་ཕྱག་རྒྱ་རྣམས་བཀོད་ལ། །དམ་ཚིག་གི་ཕྱག་རྒྱ་མ་གཅིག་རང་གིས་འཁྱུད་ལ་དེ་དང་ལྷན་ཅིག་ཏུ་བྲང་སྐྱེས་དང་མཆན་ཁུང་ལ་སོགས་པ་མཐོ་ཞིང་རེག་ལ། མིག་ཡངས་པ་ལ་སོགས་པའི་ལྟ་བས་ཡིད་དགའ་བར་གྱུར་པ་འདོད་པའི་ཡོན་ཏན་ལྔ་ཉམས་སུ་མྱོང་ཞིང་ཇི་སྲིད་སེམས་རྩེ་གཅིག་པ་ཉིད་ཀྱི་མཚན་ཉིད་བདེ་བ་ཆེན་པོ་བྱུང་བ་དེ་སྲིད་ཀྱི་བར་དུ་གནས་པར་བྱའོ། །དེ་ནི་སྤྲོས་པ་དང་བཅས་པའི་སྤྱོད་པ་སྟེ། བསྐྱེད་པའི་རིམ་པའི་རྣལ་འབྱོར་པའི་སྤྱོད་ཡུལ་ཡིན་ནོ། །དེ་ལྟར་ཞེས་བྱ་བ་ལ་སོགས་པས་ཉེ་བར་བསྡུས་པའོ། །སྤྲོས་པ་མེད་པའི་སྤྱོད་པའི་དབང་དུ་མཛད་ནས་ཞེས་པ་ནི་གཉིས་པ་བརྩམ་པར་བྱ་སྟེ། བདག་ཉིད་འདོད་པ་དང་རྗེས་སུ་མཐུན་པ་ཞེས་པ་ནི་ཇི་ལྟར་རྙེད་པའི་སྤྱོད་པས་སོ། །འདོད་པའི་ཡོན་ཏན་ལྔས་བདག་སྟེ། །ཞེས་པ་ནི་དམ་ཚིག་གི་ཕྱག་རྒྱ་ལ་གནས་པས་སོ། །རང་ཉིད་དང་ནི་བདག་ཉིད་དོ། །གཞན་རྣམས་ལ་ནི་རྣལ་འབྱོར་མ་དམ་ཚིག་གི་ཕྱག་རྒྱ་སྟེ་ཚིམ་པར་བྱ་བ་ནི་དེ་དང་ལྷན་ཅིག་སྙོམས་པར་འཇུག་པར་བྱའོ། །སྒྱུ་མ་ལྟ་བུའི་ཏིང་ངེ་འཛིན་གྱིས་སོ་ཞེས་པ་ནི་བདག་ལ་བྱིན་གྱིས་བརླབ་པའི་བསྒོམ་པས་སོ། །གཙུག་ལག་ཁང་ལ་སོགས་པའི་སྒྲུབ་པའི་དཀའ་ཐུབ་དང་ཞེས་པ་ནི་དེ་དག་བསྒྲུབ་པའི་དོན་དུ་འབད་པ་ཆེན་པོ་ཡིན་པས་དཀའ་ཐུབ་ཡིན་ནོ། །ཤིང་དྲུང་པ་ལ་སོགས་པ་སྦྱངས་པའི་ཡོན་ཏན་བཅུ་གཉིས་ཀྱི་སྡོམ་པ་དང་ཞེས་པ་ནི་འདི་ལྟ་སྟེ། བསོད་སྙོམས་པ་དང༌། ཆོས་གོས་གསུམ་པ་དང༌། ཕྱག་དར་ཁྲོད་པ་དང༌། ཕྱིང་བ་པ་དང༌། ཤིང་དྲུང་པ་དང༌། བླ་གབ་མེད་པ་དང༌། ཕྱིས་མི་ལེན་པ་དང༌། གདན་གཅིག་པ་དང༌། དུར་ཁྲོད་པ་དང༌། ཅོག་པུ་བ་དང༌། དགོན་པ་པ་སྟེ་སྦྱངས་པའི་ཡོན་ཏན་བཅུ་གཉིས་ནི་ལུས་ངལ་བ་དང་འབྲེལ་པའི་ཕྱིར་རོ། །དེ་རྣམས་ཀྱི་ལུས་ངལ་བ་ཡིན་གྱིས་
དེ་ཁོ་ན་ཉིད་རྟོགས་པར་མི་འགྱུར་རོ། །རི་ལས་མཆོང་ཞིང་མར་འཇུག་པ་ལ་སོགས་པ་མི་ཟད་པ་སྟེ་ཞེས་པ་ནི་མུ་སྟེགས་པ་རྣམས་ཀྱི་ལྟ་བ་འདི་ལྟར་ཡིན་ཏེ། རི་ལས་མཆོང་བས་ས་རྣམ་པར་དག་པར་འགྱུར་བ་དང༌། ཆུ་ལས་མཆོང་བས་ཆུ་རྣམ་པར་དག་པར་འགྱུར་བ་དང༌། །མེ་ལས་འཇུག་པས་མེ་རྣམ་པར་དག་པར་འགྱུར་བ་དང༌། མི་ཟ་བར་ཤི་བས་རླུང་རྣམ་པར་དག་པར་འགྱུར་བ་དང༌། འཕོ་བ་ཤི་བས་ནམ་མཁའི་ཁམས་རྣམ་པར་དག་པར་འགྱུར་བའོ། །དེ་བཞིན་སྡུག་བསྔལ་གྲོལ་བར་བྱེད་པའི་དོན་དུ་རྒན་པོ་གསོད་པར་བྱེད་པ་ཞེས་བྱ་བ་ལ་སོགས་པ་ལྟ་བ་ངན་པ་གཞན་ཡང་རྟོགས་པར་བྱའོ། །དེ་རྣམས་ཀྱིས་གདུངས་བཞིན་པས་ནི་ཞེས་པ་ལ་ལུས་དང་ཡིད་ལ་སྡུག་བསྔལ་དང་ཡིད་ཀྱི་སྡུག་བསྔལ་སྦྱིན་པའི་ཕྱིར་རོ། །བྱང་ཆུབ་རྙེད་པར་མི་འགྱུར་རོ། །ཞེས་པ་ནི་ཐབས་མ་ཡིན་པའི་ཕྱིར་དང་ལོག་པའི་ལྟ་བ་ཡིན་པའི་ཕྱིར་རོ། །འོ་ན་ཞེས་བྱ་བ་ལ་སོགས་པས་དཀའ་ཐུབ་བཀག་ནས་བདེ་པའི་སྤྱོད་པ་ལ་ཕན་ཡོན་བསྟན་བར་བྱ་སྟེ། ཐམས་ཅད་ཀྱིས་འདོད་ཅིང་དོན་དུ་གཉེར་བར་བྱ་བ་ཡིན་པའི་ཕྱིར་ཞེས་པ་ནི་སྔར་བཤད་པའི་གཟུགས་ལ་སོགས་པའོ། །དེ་རྣམས་ལ་ཉེ་བར་ལོངས་སྤྱོད་པ་ཞེས་བྱ་བ་ལ་སོགས་པས་དེའི་ལོངས་སྤྱོད་ཀྱི་སྒོ་ནས་གལ་ཏེ་བདག་ཉིད་རྡོ་རྗེ་འཆང་ཆེན་པོ་མཉེས་པར་བྱེད་ན་དེའི་ཚེ་ཕྱག་རྒྱ་ཆེན་པོའི་འབྲས་བུ་མངོན་དུ་བྱེད་པར་འགྱུར་རོ། །ཚེ་འདི་ཉིད་ལ་ཞེས་པ་ནི་ཕ་རོལ་ཏུ་ཕྱིན་པའི་རྣལ་འབྱོར་པ་ལས་ལྡོག་པར་བསྟན་ཏོ། །གང་གི་ཕྱིར་དེ་ནི་བསྐལ་པ་གྲངས་མེད་པ་གསུམ་གྱིས་བྱང་ཆུབ་ཐོབ་པར་འགྱུར་རོ་ཞེས་དགོངས་པའོ། །སྒྲ་ཇི་བཞིན་པ་ཞེས་པ་ནི། སྤྱོད་པ་ཇི་ལྟ་ཇི་ལྟར་གསུངས། །ཞེས་བཤད་པའི་ཕྱིར་རོ། །འདིར་བསྡུས་པའི་དོན་འདི་ཡིན་ཏེ་རེ་ཞིག་དང་པོ་རྣལ་འབྱོར་པ་རྣམ་པར་སྣང་མཛད་ལ་སོགས་པའི་ལྷའི་གཟུགས་འཛིན་པ་ཕྱག་རྒྱ་ཡང་དེ་དང་འདྲ་བར་བྱས་ཏེ་བདག་ལ་བྱིན་གྱིས་བརླབ་པའི་རིམ་པའི་སྒྱུ་མ་ལྟ་བུའི་ཏིང་ངེ་འཛིན་མངོན་དུ་བྱས་ལ། ཇི་ལྟར་རྙེད་པའི་བཟའ་བ་ཙམ་གྱིས་ཆོག་ཤེས་པ། ལུང་བསྟན་པའི་ཕྱག་རྒྱ་དང་ལྡན་པས་ཡུལ་ནས་ཡུལ་དུ་འཁོར་བས་ཇི་སྲིད་ཕྱག་རྒྱ་ཆེན་པོའི་དངོས་གྲུབ་ཐོབ་པ་དེ་སྲིད་དུ་གནས་པར་
བྱའོ། །དེ་ནི་སྤྲོས་པ་མེད་པའི་སྤྱོད་པའོ། །དེ་ལྟར་ཞེས་བྱ་བ་ལ་སོགས་པས་ཤིན་དུ་སྤྲོས་པ་མེད་པའི་སྤྱོད་པ་བཤད་པར་བྱ་སྟེ། ལུས་གདུང་བའི་སྒོ་ནས་ཞེས་པ་ནི་སྔར་བཤད་པའི་ལུས་ངེས་པར་བསྡམས་པས་སོ། །ཕྱག་རྒྱ་ཆེན་པོར་འགྱུར་བ་ཐོབ་པར་བཀག་ནས་ཞེས་པ་ནི། རྡོ་རྗེ་འཆང་ཆེན་པོའི་གོ་འཕང་བཀག་ནས་སོ། །སྒྲུབ་པ་པོའི་ཡིད་ཀྱི་གདུང་བ་ཡང་དགག་པར་བྱ་བའི་ཕྱིར་ཞེས་བྱ་བ་ནི་རྣམ་པར་རྟོག་པའི་སྤྲོས་པའི་མཚན་ཉིད་དགག་པར་བྱ་བའི་ཕྱིར་རོ། །བྱང་ཆུབ་སེམས་དཔའི་རྟོག་པ་ནི་ཉོན་མོངས་པ་ཡིན་ནོ་ཞེས་འབྱུང་བས་སོ། །བརྗོད་པར་མི་བྱའོ་ཞེས་པ་ནི་དམན་པའི་ཚུལ་དུ་གང་ཡང་སྨྲ་བར་མི་བྱའོ། །སློང་མོ་ཟ་བ་ནི་ཉེ་བར་མཚོན་པའི་དོན་ཡིན་ཏེ་ཞེས་པ་ནི་འདྲ་བའི་སྒྲས་སྦྱོར་བའི་ཕྱིར་རོ། །དེ་བས་ན་སློང་དུ་འགྲོ་བ་དང་འདྲ་བར་ཞེས་པ་ནི་བཟའ་བ་སློང་དུ་འགྲོ་བ་ཡིད་གདུང་བ་དང་ཚིག་དམན་པ་ཞེས་རབ་ཏུ་གྲགས་སོ། །ཡོངས་སུ་ཚོལ་བ་ཞེས་པ་ལ་སོགས་པས་ནི་གཡོ་སྒྱུ་དང་ཕ་རོལ་ལ་བསྟོད་པ་དང་ཚིག་སྦྱང་བ་ལ་སོགས་པ་དང་ལྡན་པས་མི་འགྱུར་རོ་ཞེས་བསྟན་ཏོ། །ཉེ་བར་མཚོན་པས་ན་ཞེས་པ་ནི་འདྲ་བའི་རྐྱེན་མི་མངོན་པས་སོ། །ཟས་ལ་ཞེན་པར་མ་གྱུར་པ་ཞེས་པ་ནི་ཕྱིའི་བཟའ་བ་བཀག་པའོ། །ཇི་ཙམ་ཞེས་བྱ་བ་ལ་སོགས་པས་བསམ་གཏན་གྱི་བཟའ་བ་དང་ལྡན་པས་ཤིན་ཏུ་སྤྲོས་པ་མེད་པའི་སྤྱོད་པས་སྦྱང་བར་བྱའོ། །གལ་ཏེ་ཡོད་ན་ཇི་ཙམ་གྱིས་ལུས་གནས་པར་འགྱུར་བ་ཞེས་པ་ནི་འབད་པ་མེད་པར་རྙེད་པས་འབྲས་བུ་དང་རྩ་བ་ལ་སོགས་པ་ནགས་ཚལ་གྱི་ལྷ་མོས་སྦྱིན་པས་ཆོ་ག་ཤེས་པར་བྱ་བའོ། །རྟག་ཏུ་ནགས་ཚལ་སློང་དུ་འཁོར། །བརྟན་པར་ངེས་པའི་སྒྲུབ་པོ་ལ། །ལྷ་མོས་བརྒྱན་པས་བཟའ་བ་ནི། །སྐྲག་ཅིང་འཇིགས་པས་སྟེར་བར་བྱེད། །རྨོངས་པའི་བདག་ཉིད་གྱིས་བལྟས་ནས། །རྡོ་རྗེ་ལྟར་ནའང་འཇིག་པར་འགྱུར། །ཞེས་འབྱུང་ངོ༌། །དེ་ལྷའི་སྦྱོང་པ་ཞེས་བྱ་བ་ལ་སོགས་པས་ཤིན་ཏུ་སྤྲོས་པ་མེད་པའི་སྤྱོད་པར་བྱའོ་ཞེས་བསྟན་ཏོ། །ཡི་གེ་གསུམ་ནི་སྔགས་ཐམས་ཅད་ཉེ་བར་སྡུད་པའི་རང་བཞིན་དང་གསང་བ་ཡིན་པའི་ཕྱིར་རོ། །ལྷ་ཡི་རྣལ་འབྱོར་མི་ཕྱེད་པའི། །ཞེས་པ་ནི་སོགས་པའི་སྒྲ་མི་མངོན་པར་བྱས་ནས། ལྷ་ལ་
སོགས་པའི་རྣལ་འབྱོར་དང་མི་ཕྱེད་པ་བསྒོམ་པར་བྱའོ་ཞེས་བྱ་བའི་དོན་ཏོ། །འདོད་པ་ཀུན་ལ་ལོངས་སྤྱོད་པའི། །སྔགས་པས་ཞེས་པ་ནི་གལ་ཏེ་མི་ཕྱེད་པའི་བཟླས་པ་རྣལ་འབྱོར་བས་སློབ་ན་དེའི་ཚེ་འདོད་པ་ཐམས་ཅད་ཉེ་བར་སྤྱོད་པས་ཀྱང་འགལ་བར་མི་འགྱུར་རོ་ཞེས་དགོངས་པའོ། །དེ་ལྟར་ཞེས་བྱ་བ་ལ་སོགས་པས་ཕན་ཡོན་བསྟན་པར་བྱ་སྟེ། རྩེ་གཅིག་པར་གྱུར་པ་ཞེས་པ་ནི། །རྡོ་རྗེ་བཟླས་པ་ལ་སོགས་པའི་རིམ་པ་བཞི་པོས་ཞེས་བྱ་བ་ནི་རྩེ་གཅིག་པ་ཉིད་དོ། །དེ་ཐོབ་ན་ཞེས་པ་ནི་རིམ་གྱིས་ཐོབ་ནས་སོ། །རྡོ་རྗེ་འཆང་ཆེན་པོ་ཉིད་ཐོབ་ཅིང་ཞེས་པ་ནི་ཟུང་དུ་འཇུག་པའི་རིམ་པས་ཐོབ་པར་བྱ་བའི་རྡོ་རྗེ་འཆང་གི་གོ་འཕང་ཉིད་དོ། །ཡང་དག་པར་ཉམས་སུ་མྱོང་བ་རྙེད་པར་འགྱུར་བའི་ཞེས་པ་ནི་བླ་མས་ཉེ་བར་བསྟན་པའི་བསྒོམ་པའི་ལམ་གྱིས་ཐོབ་པར་འགྱུར་རོ་ཞེས་བྱ་བའི་དོན་ཏོ། །གཞན་དུ་ན་ཞེས་བྱ་བ་ལ་སོགས་པས་དཀའ་ཐུབ་དང་བདེ་བའི་སྤྱོད་པ་དག་ལ་སྐྱོན་དང་ཡོན་ཏན་བསྟན་ཏོ། །ཡང་བ་མ་སྤངས་ཞེས་པ་ནི་རིམས་ལ་སོགས་པ་ངལ་བ་མྱོང་བའི་འབྲེལ་བས་སོ། །དེས་ནི་ཚེ་འདི་ཉིད་ཀྱི་ཚ་བའི་རྣམ་པར་སྨིན་པ་བསྟན་ཏོ། །འཆི་བའི་དུས་བྱས་ཤིང་འདི་ནས་འཕོས་ནས་ཞེས་པ་ནི་ཚེ་འདི་ཉིད་ལ་འཆི་བར་འགྱུར་བས་སོ། །མནར་མེད་པ་ལ་སོགས་པར་ངེས་པར་བསྲེག་པར་འགྱུར་རོ་ཞེས་པ་ནི་གྲང་བ་དང་དྲོ་བའི་དམྱལ་བ་ཆེན་པོ་ལ་ཚིག་པར་འགྱུར་རོ་ཞེས་བྱ་བའི་ཐ་ཚིག་གོ །དྲང་བའི་དོན་ཏོ་ཞེས་པ་ནི་སྤྱོད་པ་ཙམ་བསྟན་པས་སོ། །ལུང་གིས་བཤད་པ་བརྗོད་པར་བྱ་སྟེ་ཞེས་པ་ནི་རྡོ་རྗེ་ཕྲེང་བའི་རྒྱུད་ལས་གསུངས་པ་ཞེས་བྱའོ། །ཐ་དད་ཡི་གེ་སློང་མོ་ཡིན། །ཞེས་བྱ་བས་ནི་སྐུ་གསུང་ཐུགས་ཀྱི་ས་བོན་ནི་ཐ་དད་པར་བརྗོད་པ་ནི་ས་བོན་ཏེ། ཡི་གེ་རྣམས་ཐ་དད་པའི་ཕྱིར་རོ། །དེ་ལྟ་བུའི་ཡི་གེ་ངག་གི་བཟླས་པ་ཙམ་གྱིས་འདོན་པ་གང་ཡིན་པ་དེ་ནི་སློང་མོ་ཟ་བའོ། །ལྐོག་མ་རྐན་དང་ལྕེ་ཡིས་ནི། །གང་ཞིག་དོན་ནི་གཡོ་འགྱུར་བ། །དེ་ནི་མི་འགྱུར་ག་ལ་སྟེ། །འགྱུར་བ་ཉིད་དུ་འཇུག་པའོ། །ཞེས་འབྱུང་ངོ༌། །དེ་དག་སློང་མོ་ཟ་བ་མི་འདོད་ཅེས་པ་ནི་དེ་ལྟར་མི་འགྱུར་བའི་སློང་མོ་ཟ་བ་མི་འདོད་པ་གང་ཡིན་པ། འོན་ཀྱང་དབྱེར་མེད་པས་རྡོ་རྗེ་བཟླས་པ་ལ་སོགས་པའི་རིམ་པས་གང་ཞིག་བཟླས་པ་སྟེ། མི་
འཇིག་པ་ཙམ་ལ་གནས་པས་རྡོ་རྗེ་བཟླས་པར་བྱེད་པ་དེ་དག་ལ་དགའ་བར་མི་འགྱུར་ཏེ། ངག་གི་བཟླས་པ་ཙམ་ལ་མཆོག་ཏུ་གཞོལ་བར་མི་འགྱུར་རོ་ཞེས་དགོངས་པའོ། །དབུགས་དབྱུང་བ་ཞེས་པ་ནི་ཡི་གེ་ཧཱུཾ་ལྡང་བའི་བདག་ཉིད་བསྒོམ་པར་བྱའོ། །རྔུབ་པ་ནི་ཡི་གེ་ཨོཾ་གྱིས་འཇུག་པར་བྱེད་པའོ། །སྦྱོར་བ་བཞི་ཞེས་པ་ནི་མྱུར་བ་དང་ལངས་པ་དང༌། རྣམ་པར་བཅིངས་པ་དང་འཁྱིལ་བ་སྟེ། །མ་ལོང་ལ་སོགས་པའི་དཀྱིལ་འཁོར་བཞི་པོ་ལས་སྣའི་རྩེ་མོར་ཐུན་ཕྱེད་ཕྱེད་ཀྱི་དུས་སུ་འཛིན་པར་བྱེད་པས་ཤེས་རབ་ནི་ཡི་གེ་ཨཱཿ་སྟེ་དབྱངས་ཀྱི་སྡེ་ཚན་ཉེ་བར་སྡུད་པར་བྱེད་པས་སོ། །ཐབས་ནི་ཡི་གེ་ཧཱུཾ་སྟེ་གསལ་བྱ་མ་ལུས་པའི་ཚོགས་མདོར་བསྡུས་པས་སོ། །གཞན་ནི་མ་ནིང་སྟེ་ཡི་གེ་ཨོཾ་མོ། །དེར་གནས་ནས་ཞེས་པ་འཇུག་པ་ལ་སོགས་པའི་ངོ་བོ་ཡི་གེ་གསུམ་མི་དམིགས་པར་བྱེད་པའོ། །སྔགས་ཀྱི་ཡན་ལག་མ་ཉམས་བཟླས། །ཞེས་པ་ནི་ལྷ་ལ་སོགས་པའི་སྦྱོར་བ་དང་མ་ཉམས་པའི་ཡི་གེ་གསུམ་བཟླ་བར་བྱའོ། །རྣལ་འབྱོར་དབང་པོ་ཞེས་བྱ་བ་ལ་སོགས་པས་ཉིན་མོ་དང་མཚན་མོ་སྟོང་ཕྲག་ཉི་ཤུ་རྩ་གཅིག་དང་དྲུག་བརྒྱ་རྣལ་འབྱོར་པས་བཟླས་པར་བྱ་ཞེས་བཟླས་པའི་གྲངས་བསྟན་ཏེ། རླུང་རྒྱུ་བ་ནི་དེ་ཙམ་གྱི་རྩིས་ཡིན་པས་སོ། །ཞེས་བསྟན་ཏོ། །ངེས་པའི་དོན་ཏོ་ཞེས་པ་ནི་རྡོ་རྗེ་བཟླས་པའི་རིམ་པ་བསྟན་པས་སོ། །འདིར་ནི་བསྡུས་པའི་དོན་འདི་ཡིན་ཏེ། རྫོགས་པའི་རིམ་པའི་རྣལ་འབྱོར་པ་ཡེ་ཤེས་ཀྱི་ཕྱག་རྒྱ་དང་སྙོམས་པར་ཞུགས་པ་བསྒོམས་པས་གང་ཡང་རུང་བའི་ནགས་ཚལ་ལས་འབྱུང་བའི་བཟའ་བཅའི་ཆོག་ཤེས་པའམ་བསམ་གཏན་གྱི་བཟའ་བཅའ་དང་ལྡན་པ་བདག་དང་བདག་གི་མེད་པ་འགྲོ་བ་ཐམས་ཅད་སྒྱུ་མ་དང་མཚུངས་པར་མཐོང་བ་སྨྱོན་པའི་བརྟུལ་ཞུགས་འཛིན་པ། འཇིག་རྟེན་པས་བཞད་གང་དུ་བྱས་པ་གཅེར་བུའམ་ཚེམ་པོ་གྱོན་པས་རི་དགས་དགོན་པ་ལ་སོགས་པ་ལ་བླ་ན་མེད་པའི་ཕྱག་རྒྱ་ཆེན་པོའི་སྐུ་དཔལ་རྡོ་རྗེ་འཆང་གི་གོ་འཕང་དེ་ཇི་སྲིད་ཐོབ་པ་དེ་སྲིད་དུ་གནས་པར་བྱའོ། །གཅེར་བུའམ་ནི་གཅེར་བུ་མིན། །གང་དང་གང་དུ་ཇི་ལྟ་བཞིན། །རང་ལྷག་ལྷ་ཡི་རྣལ་འབྱོར་གྱིས། །དེ་ཉིད་གཅིག་པུ་བསམ་པར་བྱ། །སྨྱོན་པའི་བརྟུལ་ཞུགས་ལ་བརྟེན་ཏེ། །
ཕུན་སུམ་ཚོགས་ཀུན་འགྲུབ་པར་འགྱུར། །ཞེས་འབྱུང་ངོ༌། །དེས་ན་རྫོགས་པའི་རིམ་པའི་རྣལ་བྱོར་པ་ཤིན་དུ་སྤྲོས་པ་མེད་པའི་སྤྱོད་པ་བསྟན་ཏོ། །འདས་པ་ཞེས་བྱ་བ་ལ་སོགས་པས་སྤྱོད་པ་གསུམ་གྱི་སྒོ་ནས་ཡེ་ཤེས་ཅན་གྱི་དངོས་གྲུབ་ཐོབ་པོ་ཞེས་བསྟན་ཏོ། །ཡེ་ཤེས་ཅན་ཞེས་པ་ནི་སྔར་གྲུབ་པ་མི་བསྐྱོད་པ་ལ་སོགས་པའོ། །སྤྱོད་པ་འདི་ཉིད་ཀྱིས་ཞེས་པ་ནི་རྣམ་པ་གསུམ་གྱི་སྤྱོད་པས་སོ། །ཉིད་ཀྱི་སྒྲ་ནི་ངེས་པར་གཟུང་པའི་དོན་ཏོ། །ཐབས་གཞན་གྱིས་མ་ཡིན་ནོ། །རིན་ཆེན་ལྟ་བུའི་གང་ཟག་ཅེས་པ་ནི་དབང་པོ་རྣོ་བའོ། །པདྨ་དཀར་པོ་ལྟ་བུའི་གང་ཟག་ལ་སོགས་པའོ་ཞེས་པ་ནི་དབང་པོ་དམན་པའོ། །བྱ་བའི་རྒྱུད་ནི་སྒྲོན་མ་འབྱུང་བ་ལ་སོགས་པའོ། །སྤྱོད་པའི་རྒྱུད་ནི་རྣམ་པར་སྣང་མཛད་མངོན་པར་བྱང་ཆུབ་པ་ལ་སོགས་པའོ། །གཉིས་ཀའི་རྒྱུད་ནི་དཔལ་མཆོག་དང་པོ་ལ་སོགས་པའོ། །དེ་ལས་བཤད་པའི་སྤྱོད་པ་ནི་ཁྱད་པར་གྱི་སྤྱོད་པ་སྟེ་དམ་ཚིག་རྣམས་སོ། །དེ་དག་གི་མཆོག་ནི་རྣལ་འབྱོར་གྱི་སྤྱོད་པ་སྟེ་ཞེས་པ་ནི་དཔལ་འདུས་པ་ལས་གསུངས་པ་རྣམ་པ་གསུམ་གྱི་སྤྱོད་པའོ། །དེ་རྣམས་སྤྱོད་པའི་ངང་ཚུལ་ཅན་གང་ཡིན་པ་དེ་ནི་དེ་བཞིན་དུ་ཞེས་པ་ནི་སྔར་བཤད་པ་དང་འཆད་པར་འགྱུར་བའི་རིམ་པས་དེས་བསྙེན་པའི་རང་བཞིན་གང་ལ་ཡོད་པ་དེ་ནི་རིན་པོ་ཆེ་ལྟ་བུ་ལ་སོགས་པ་ཞེས་བྱའོ། །ཀུན་རྫོབ་ཀྱི་བདེན་པ་ཞེས་པ་ནི་རྟོག་པ་དང་བཅས་པས་སོ། །དོན་དམ་པའི་བདེན་པ་ཞེས་པ་ནི་མི་འཇིགས་པའི་ཕྱིར་རོ། །དེ་བས་ན་བར་གྱི་ཚིག་མི་མངོན་པ་ནི་ལས་འཛིན་པའོ། །དེ་དག་ཟུང་དུ་འཇུག་པའི་བདག་ཉིད་ཅན་ཞེས་པ་ནི་མི་གནས་པའི་མྱ་ངན་ལས་འདས་པའི་དབྱིངས་ཀྱི་བརྡར་བྱས་པ་དེ་ཉིད་རྡོ་རྗེ་འཆང་ཆེན་པོ་ཉིད་ཅེས་བསྟན་ཏོ། །དབང་ཕྱུག་ཐམས་ཅད་ཀྱི་གཞིར་གྱུར་པས་ན་ཞེས་པ་ནི་ཕུན་སུམ་ཚོགས་པ་ཐམས་ཅད་ཀྱི་གཞིར་གྱུར་པས་སོ། །ཕུལ་དུ་བྱུང་བ་ནི་དམ་པའོ། །མངོན་སུམ་དུ་བྱས་པ་ཞེས་པ་ནི་རང་རིག་པར་བྱས་པར་འགྱུར་རོ། །རྩེ་གཅིག་པར་མི་འགྱུར་པའི་ཕྱིར་ཞེས་པ་ནི་དལ་བ་དང་བཅས་པས་སེམས་གཡེང་བར་བྱེད་པས་སོ། །ཡང་ཞེས་བྱ་བ་ལ་སོགས་པའི་སླར་ཡང་དཀའ་ཐུབ་དགག་པ་བསྟན་ཏོ། །དགོངས་པ་མ་ཡིན་པ་
བཤད་པའོ་ཞེས་པ་ནི་སྤྱོད་པ་གསུམ་གྱི་རྒྱུས་ཐོབ་པ་ཤིན་དུ་གསལ་བའི་དེ་ཁོ་ན་ཉིད་བསྟན་པའི་ཕྱིར་རོ། །དེ་རྣམས་ཀྱིས་ཞེས་བྱ་བ་ལ་སོགས་པས་སྤྲོས་པ་དང་བཅས་པ་ལ་སོགས་པའི་སྤྱོད་པ་གསུམ་རྒྱས་པར་བསྟན་པར་བྱ་སྟེ། ཡུལ་ཐོབ་པ་རྣམས་ལ་ཞེན་པ་ཡིན་ལ་ཞེས་པ་ནི་ཡུལ་ལ་མངོན་པར་ཞེན་པ་ཅན་ནོ། །དེ་ཡང་གཉིས་སུ་མེད་པའི་ཡེ་ཤེས་འདོད་ཅིང་ཞེས་པ་ནི་ཡན་ལག་དྲུག་གི་རྣལ་འབྱོར་གྱི་རིམ་པས་སྤྲོས་པ་མེད་པའི་གོ་འཕང་འདོད་པ་སྟེ་སྤྱོད་པའི་འབྲས་བུ་ཡིན་པའི་ཕྱིར་རོ། །སྤྱོད་ལམ་ཐམས་ཅད་དུ་ཞེས་པ་ནི་ལྡང་བ་དང་འདུག་པ་དང་ཉལ་བ་དང་འཆག་པ་ཞེས་བྱ་བ་ལ་བརྟེན་པས་སོ། །སེམས་ཅན་ཐམས་ཅད་ཀྱི་འདོད་ཅིང་ཞེས་པ་ནི་འགྲོ་བ་རིགས་དྲུག་པོ་ལ་གནས་པར་འདོད་པ་སྟེ་འདོད་པའི་ཁམས་དེའི་རང་བཞིན་ཡིན་པས་སོ། །སངས་རྒྱས་ཉིད་རབ་ཏུ་སྟེར་པའི་ཡོན་ཏན་དང་ལྡན་པས་ན་ཞེས་པ་ནི་སོ་སོར་སྡུད་པ་དང་བསམ་གཏན་གྱི་ཡན་ལག་གིས་དེ་རྣམས་སངས་རྒྱས་ཉིད་སྟེར་བས་སོ། །ཐབས་ལ་མཁས་པས་བསྟེན་པའི་སྐྱོན་རྣམས་ཀྱང་ཡོན་ཏན་ཉིད་དུ་འགྱུར་བར་མཐོང་སྟེ། སྔགས་ཀྱིས་བྱིན་གྱིས་བརླབས་པའི་དུག་ཟོས་པ་ལ་བདུད་རྩི་ཉིད་དུ་འགྱུར་བ་ཡིན་ནོ། །དེ་ནས་ལས་འཛིན་པ་སྟེ། ཡོན་ཏན་གཉིས་རྫས་གཅིག་གི་ཡུལ་ཅན་ཡིན་པའི་ཕྱིར་རོ། །ལྔ་པོ་དེ་དག་ནི་ཞེས་པ་ལ་སོགས་པ་ལ་ཆོས་ཀྱི་དབྱིངས་ཡོངས་སུ་སྤངས་ནས་སོ་ཞེས་ཚིག་གི་ལྷག་མའོ། །མིག་ལ་སོགས་པ་ཞེས་བྱ་བ་ལ་སོགས་པ་ནི། རྡོ་རྗེ་སྐྱེ་མཆེད་རྣམས་དང་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་བཤད་པའི་ཕྱིར་རོ། །བྱང་ཆུབ་ནི་ས་ལ་སོགས་པའི་རང་བཞིན་དེ་སྤྱན་ལ་སོགས་པ་ཞེས་པ་ནི་སྙོམས་པར་ཞུགས་པའི་སྦྱོར་བས་བྱང་ཆུབ་ཐོབ་པར་བྱེད་པའི་ཕྱིར་རོ། །ས་ཡི་ཁམས་ནི་སྤྱན་མར་བཤད། །ཆུ་ཁམས་མཱ་མ་ཀཱི་ཡིན་ཏེ། །མེ་ནི་གོས་དཀར་མོ་ཞེས་བྱ། །རླུང་ནི་དམ་ཚིག་སྒྲོལ་མར་བཤད། །ཅས་འབྱུང་ངོ༌། །འོད་གསལ་བ་ལས་ཉོན་མོངས་པ་ངེས་པར་བསྲེག་པའི་ལྷ་མོ་དང་སྙོམས་པར་ཞུགས་པ་ལས་འབྱུང་བའི་བདེ་བས་ཆགས་པ་ལ་སོགས་པའི་རང་བཞིན་རྣམས་སྤངས་པའོ། །རྣམ་པར་སྣང་མཛད་ལ་
སོགས་པ་ཞེས་པ་ནི་དེ་བཞིན་གཤེགས་པ་ལྔའོ། །གཟུགས་ཀྱི་ཕུང་པོ་ལ་སོགས་པ་ངོ་བོ་ཉིད་དུ་ཞེས་པ་ནི་རྣམ་པར་སྣང་མཛད་ལ་སོགས་པའི་མིང་གི་ཐ་སྙད་དུ་བྱས་པས་སོ། །མདོར་བསྡུས་པས་ནི་ཕུང་པོ་ལྔ། །སངས་རྒྱས་ལྔར་ནི་རབ་ཏུ་བཤད། །ཅེས་འབྱུང་ངོ༌། །དགྱེས་པར་གྱུར་ལ་ཚེམ་པར་བྱའོ། །ཞེས་པ་ནི་ཡན་ལག་དང་པོ་གཉིས་པས་སོ། །རྣམ་པ་གསུམ་པོ་ཞེས་བྱ་བ་ལ་སོགས་པས་སོ་སོར་སྡུད་པའི་ཡན་ལག་སྤྲོས་པར་བསྟན་ཏེ། དམན་པ་དང་བར་མ་དང་མཆོག་གསུམ་ནི་ངན་པ་དང་འབྲིང་དང་དམ་པའོ། །མཆོག་གསུམ་དུ་རྣམ་པར་ཤེས་ཤིང་ཞེས་པ་ནི་དམ་པ་ལྷག་པར་མོས་པས་ངན་པ་དང་འབྲིང་དག་མཆོག་ལ་བསྡུས་པས་སོ། །དེ་བཞིན་དུ་ཀུན་དང་སྦྱོར་རོ། །རང་གི་རིགས་ཀྱི་ལྷ་རྣམས་ཞེས་པ་ནི་རྣམ་པར་སྣང་མཛད་ལ་སོགས་པའི་རིགས་ཅན་ཏེ། ཕུང་པོ་དང་ཁམས་དང་སྐྱེ་མཆེད་རྣམས་ལའོ། །གཟུགས་སྣ་ཚོགས་པས་ཞེས་པ་ནི་མིག་ཡངས་པ་ལ་སོགས་པའི་སྤྲོས་པས་སོ། །སྤྲོས་པ་དང་བཅས་པའི་སྤྱོད་པ་ལ་གནས་པའི་སྔགས་པས་ཞེས་པ་ནི་སྔར་བཤད་པའི་རིམ་པ་དང་ལྡན་པས་སོ། །ལྷའི་འཁོར་ལོ་མཆོད་པར་བྱ་ཞིང་ཞེས་པ་ནི་ལུས་ཀྱི་འཁོར་ལོའི་ནང་དུ་གནས་པ་རྣམ་པར་སྣང་མཛད་ལ་སོགས་པའི་དཀྱིལ་འཁོར་པའི་འཁོར་ལོ་ཞེས་བྱའོ། །དེ་ཉིད་ལྷའི་མོས་པ་ཉིད་གཟུགས་ལ་སོགས་པ་རྣམ་པ་གསུམ་ཞེས་བྱ་བ་ལ་སོགས་པས་བསྟན་ཏོ། །གང་གསུངས་པ་ནི་རྣམ་པ་གསུམ་དུ་གསུངས་པའོ། །དེ་དང་གཞན་མ་ཡིན་པ་ཞེས་པ་ནི་ལོགས་སུ་དམིགས་པ་མ་ཡིན་པའོ། །ཐམས་ཅད་ཀྱི་བདག་ཉིད་ཅན་ཞེས་པ་ནི་བརྟན་པ་དང་གཡོ་བའི་ངོ་བོ་ཉིད་དོ། །མེ་ལོང་ལྟ་བུའི་ཡེ་ཤེས་ཀྱིས་ཉོན་མོངས་པ་དང་ཤེས་བྱའི་སྒྲིབ་པ་དག་པའི་མཚན་ཉིད་དང་ལྡན་པས་ན་བཅོམ་ལྡན་འདས་སོ། །རྣམ་པར་སྣང་མཛད་དོ་ཞེས་པ་ནི་ཁྱད་པར་དུ་སྣང་བ་སྟེ་རགས་པ་ཉིད་དུ་སྣང་བའི་ཕྱི་རོལ་གྱི་དོན་གྱི་ཚོགས་དག་པར་བྱེད་པ་བཞི་པའི་ངོ་བོ་ཡིན་པས་སོ། །ཤེས་པར་ནི་སོ་སོར་སྡུད་པས་དམིགས་ནས་སོ། །རང་གི་རིགས་ཞེས་པ་ནི་རིན་ཆེན་འབྱུང་ལྡན་གྱི་རིགས་ཀྱི་རྣམ་པར་དག་པས་གནས་པ་ཕུང་པོ་དང་ཁམས་
དང་སྐྱེ་མཆེད་རྣམས་ལའོ། །མཉམ་པ་ཉིད་ཀྱི་ཡེ་ཤེས་སོ་སོར་ཐ་དད་པའི་རྣམ་པར་རྟོག་པ་བཅོམ་པས་ན་བཅོམ་ལྡན་འདས་སོ། །རྣམ་པ་བཅོ་བརྒྱད་ཀྱིས་ཚོར་བའི་ཕུང་པོ་སྦྱོར་བས་ན་རིན་ཆེན་ལྟར་དཀོན་པ་གང་ལ་ཡོད་པ་དེ་ནི་རིན་ཆེན་འབྱུང་ལྡན་ནོ། །ཡང་ན་བསམ་པ་ཐམས་ཅད་རྫོགས་པར་བྱེད་པས་ན་རིན་ཆེན་འབྱུང་ལྡན་ཏེ། རྒྱས་པའི་རང་བཞིན་ཡིན་པས་སོ། །འོད་དཔག་ཏུ་མེད་པའི་རིགས་ཅན་ཞེས་པ་ནི་འོད་དཔག་ཏུ་མེད་པའི་རིགས་ཀྱི་རྣམ་པར་དག་པས་གནས་པ་ཕུང་པོ་དང་ཁམས་དང་སྐྱེ་མཆེད་རྣམས་ལའོ། །འོད་དཔག་ཏུ་མེད་པ་ཞེས་པ་ནི་ཡན་ལག་བཅུ་གཉིས་པའི་གསུང་རབ་རྣམ་པར་དག་པ་འཛིན་པ་དང༌། ངག་སྦྱངས་པའི་ངོ་བོ་ཡིན་པས་སོ། །ཡང་ན་སོ་སོར་རྟོག་པའི་ཡེ་ཤེས་མཐའ་ཡས་པའི་ཡེ་ཤེས་རང་བཞིན་གྱི་འོད་གང་ལ་ཡོད་པ་དེ་ནི་འོད་དཔག་ཏུ་མེད་པའོ། །ཡང་ན་བྱང་ཆུབ་སེམས་ཀྱི་རང་བཞིན་གྱི་འོད་དང་ལྡན་པས་ན་འོད་དཔག་ཏུ་མེད་པ་སྟེ། དབང་གི་ངོ་བོ་ཡིན་པས་སོ། །ལས་ཀྱི་རིགས་ཅན་ཞེས་པ་ནི་དོན་ཡོད་གྲུབ་པའི་རྣམ་པར་དག་པས་གནས་པ་ཕུང་པོ་དང་ཁམས་དང་སྐྱེ་མཆེད་རྣམས་ལའོ། །འགྲུབ་པའི་ཕྲིན་ལས་མཛད་པས་ན་བཅོམ་ལྡན་འདས་སོ། །བྱ་བ་ནན་ཏན་གྲུབ་པའི་ཡེ་ཤེས་ཀྱིས་འགྲོ་བ་ཐམས་ཅད་རྗེས་སུ་གཟུང་བར་མཛད་པས་ན་དོན་ཡོད་གྲུབ་པའོ། །ཡང་ན་དགུག་པའི་ངོ་བོ་ཡིན་པས་སོ། །བདག་གི་རིགས་ཏེ་རྡོ་རྗེ་རིགས་ཅན་རྣམས་ལ་ཞེས་པ་ནི་ཐུགས་ཀྱི་རྡོ་རྗེ་འཆང་ནི་རིགས་ཐམས་ཅད་ཀྱི་ནང་ན་མཆོག་ཡིན་པས་སོ། །མི་བསྐྱོད་པ་ཞེས་པ་ནི་ཆོས་ཀྱི་དབྱིངས་ཀྱི་ཡེ་ཤེས་མངོན་དུ་མཛད་པས་ན་བདུད་བཞིས་མི་ཕྱེད་པའི་ཕྱིར་རོ། །ཡང་ན་མངོན་སྤྱོད་ཀྱི་ལས་ལ་ནུས་པ་མ་ཉམས་པས་ན་མི་བསྐྱོད་པ་ཞེས་བྱའོ། །བཤད་མ་ཐག་པའི་དོན་ཞེས་པ་ནི་ཡུལ་ལྔ་ཉེ་བར་སྤྱོད་པའི་མཚན་ཉིད་དོ། །བསྡུས་ནས་སྟོན་པ་ནི་མདོར་བསྟན་ནས་བཤད་པའོ། །དེ་ལྟར་ཞེས་བྱ་བ་ལ་སོགས་པ་ནི་གཟུགས་ལ་སོགས་པ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་རང་བཞིན་ཡིན་ཏེ་དེ་ལ་ཕྱི་རོལ་དུ་སྣང་བའི་གཟུགས་ནི་རགས་པ་ཉིད་དུ་སྣང་ངོ༌། །དེ་ལས་གཞན་སྒྲ་ལ་སོགས་པ་ནི་ཕྲ་བ་ཉིད་དུ་སྣང་ངོ༌། །དེ་བཞིན་དུ་མེ་ལོང་ལྟ་བུ་ལ་སོགས་པའི་ཡེ་ཤེས་རྣམས་ཀྱང་
རགས་པ་དང་ཕྲ་བ་ཉིད་དང་གོང་ནས་གོང་གི་རིམ་པས་སྣང་བར་འགྱུར་བས་གཟུགས་ལ་སོགས་པ་རྣམ་པར་སྣང་མཛད་ཀྱི་རང་བཞིན་ཡིན་པའི་ཕྱིར་རོ། །དེ་རྣམས་ལ་ཞེས་པ་ནི་རྒྱུ་དེ་ལས་གཟུགས་ལ་སོགས་པ་ལའོ། །ཉིན་དང་མཚན་ཞེས་པ་ནི་དེས་རྣལ་འབྱོར་པ་ལ་དོན་མེད་པའི་སྐད་ཅིག་མ་ཡང་བཀག་སྟེ་ཡུན་རིངས་དང་བར་ཆད་མེད་པ་དང་དད་པས་བསྟེན་ནས་བསྟན་པར་འགྱུར་རོ་ཞེས་འབྱུང་བས་སོ། །ཡིད་ལ་བྱེད་པ་ནི་ལྷག་པར་མོས་པ་དེ་བསྐྱེད་པར་བྱའོ། །འདི་ནི་ཞེས་བྱ་བ་ལ་སོགས་པས་ཕན་ཡོན་བསྟན་ཏེ། སེམས་བསྐྱེད་པ་ཞེས་པ་ནི་སོ་སོར་སྡུད་པ་དང་བསམ་གཏན་དག་གི་ཡན་ལག་དག་ལས་འབྱུང་བའི་ཡིད་ལ་བྱེད་པའི་ཁྱད་པར་རོ། །སྦ་བར་གྱུར་པ་ཞེས་པ་ནི་ཞལ་གྱི་མན་ངག་གི་རྒྱུད་ལ་གནས་པའོ། །སངས་རྒྱས་ཀྱི་འབྲས་བུ་ཐོབ་པར་བྱེད་པས་ནི་ཟུང་དུ་འཇུག་པའི་རིམ་པས་ཐོབ་པར་བྱ་བ་དཔལ་རྡོ་རྗེ་འཆང་གི་གོ་འཕང་ཐོབ་པར་བྱེད་པས་སོ། །དེ་ཉིད་སྙིང་པོ་བཏུས་པ་ཞེས་བྱའོ། །ཐབས་ཀྱི་རང་བཞིན་དུ་ཞེས་པ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་རིགས་ཀྱི་ངོ་བོས་སོ། །སྤྱན་མ་ལ་སོགས་པ་ཤེས་རབ་ཀྱི་ངོ་བོ་ཉིད་དུ་ཞེས་པ་ནི་སྟོང་པ་བཞིའི་རང་བཞིན་གྱི་རིགས་ཀྱི་ཡུམ་བཞིའི་ངོ་བོས་སོ། །ཡོངས་སུ་གྱུར་པ་ཞེས་པ་ནི་དེས་བྱིན་གྱིས་བརླབ་པ་ཉིད་དོ། །འདིར་ནི་ཆོས་ཀྱི་དབྱིངས་ཀྱི་ཡེ་ཤེས་ནི་གཅིག་སྟེ་དབྱེར་མེད་པ་གཅད་དུ་མེད་པ་མི་འཇིགས་པ་ཉིད་བཅོམ་ལྡན་འདས་རྡོ་རྗེ་སེམས་དཔའོ། །དེས་ནི་གཞན་རྣམས་ཡོངས་སུ་གཟུང་བའི་ཕྱིར་རྣམ་པ་གཉིས་སུ་སྣང་སྟེ། དེ་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་གཟུགས་ཀྱིས་ཐབས་ཀྱི་ངོ་བོ་སྟེ་ཕོའི་རྟགས་ལྟར་སྣང་ངོ༌། །སྤྱན་མ་ལ་སོགས་པ་རིགས་ཀྱི་ཡུམ་བཞིའི་གཟུགས་ཀྱིས་ཤེས་རབ་ཀྱི་ངོ་བོ་སྟེ། མོའི་རྟགས་ལྟར་སྣང་བར་འགྱུར་ཏེ། སྙིང་རྗེ་ཆེན་པོ་དང་སྟོང་པ་ཉིད་ཀྱི་རང་བཞིན་ཡིན་པའི་ཕྱིར་དང༌། ཆོས་ཀྱི་དབྱིངས་ནི་ཆ་གཉིས་ཀས་ཐོབ་པའི་ཕྱིར་རོ། །ཇི་སྐད་དུ། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ཀྱི་དབྱེ་བ་མི་འཐད་དེ། །བརྟེན་པའི་ཆོས་ཀྱིས་དབྱེ་བ་ཡིས། །དེ་ཡི་དབྱེ་བ་རབ་ཏུ་བཤད། །ཅེས་འབྱུང་ངོ༌། །རྒྱུད་ཕྱི་མ་ལས་ཀྱང༌། །གང་ཞིག་ཤེས་རབ་དངོས་མེད་དེ། །ཐབས་ནི་དངོས་པོའི་མཚན་ཉིད་དོ། །ཐབས་དང་ཤེས་
རབ་སྙོམས་འཇུག་པ། །རྣལ་འབྱོར་ཞེས་ནི་མངོན་པར་བརྗོད། །ཅེས་འབྱུང་ངོ༌། །ཕྱོགས་གཞན་སྟོན་པར་བྱེད་པའི་ཚིག་ཕྲང་ཅེས་པ་ནི་ཤེས་རབ་ཀྱི་ཕྱོགས་སྟོན་པར་བྱེད་པའོ། །ཤེས་རབ་ནི་རིགས་ཀྱི་ཡུམ་རྣམས་ལས་གང་ཡང་རུང་བ་ཞེས་བྱའོ། །གཟུགས་རྡོ་རྗེ་ལ་སོགས་པར་རིགས་ཀྱི་དབྱེ་བས་ཞེས་པ་ནི་དེའི་སྤྲུལ་པའི་རང་བཞིན་ཡིན་པས་སོ། །རིགས་ཀྱི་དབྱེ་བས་ཞེས་པ་ནི་ཡུལ་རྣམ་པར་དག་པའི་ངོ་བོ་ཡིན་པས་སོ། །གཟུགས་རྡོ་རྗེ་ལ་སོགས་པ་རིགས་ལྔ་ལས་བྱུང་བ་ཞེས་པ་ནི་མཆོད་པའི་ལྷ་མོ་དང་བྱང་ཆུབ་སེམས་དཔའ་དང༌། ཁྲོ་བོའི་མཐའི་བར་དུ་དབང་པོ་ལ་སོགས་པ་རྣམ་པར་དག་པར་བྱེད་པ་དེ་རྣམས་ཀྱིས་སོ། །རྡོ་རྗེ་འཆང་ཆེན་པོར་དམིགས་པར་བྱེད་དེ་ཞེས་པ་ནི་ཇི་ལྟར་མོས་པས་གཟུགས་ལ་སོགས་པ་སྤྱོད་ཅིང་ཡན་ལག་དྲུག་གི་རྣལ་འབྱོར་ཡོངས་སུ་རྫོགས་ནས་དཔལ་རྡོ་རྗེ་སེམས་དཔའི་གོ་འཕང་ཐོབ་པར་བྱའོ་ཞེས་བྱ་བ་ལ་སོགས་པ་སྦྱོར་བ་ཐམས་ཅད་ལ་ནི་སྔར་བཤད་ཟིན་ཏོ། །སྤྱིའི་དོན་ཏོ་ཞེས་པ་ནི་མདོ་སྡེ་པ་ལ་སོགས་པའི་འགྱོད་པ་ཟློག་པར་བྱེད་པ་དང༌། བསྐྱེད་པའི་རིམ་པ་བསྟན་པས་སོ། །སྤྲོས་པ་དང་བཅས་པའི་སྤྱོད་པའོ་ཞེས་པ་ནི་ཆགས་པ་ལ་སོགས་པའི་རོལ་པ་རྒྱ་ཆེ་བའི་དོན་དང་ལྡན་པས་སོ། །ཡིད་དུ་འོང་བ་དང་ཡིད་དུ་མི་འོང་བ་དང་ལུང་དུ་མ་བསྟན་པའི་དབྱེ་བས་རྣམ་པ་གསུམ་ཞེས་པ་ནི་བདེ་བ་དང་སྡུག་བསྔལ་དང་བཏང་སྙོམས་ཀྱི་དབྱེ་བས་གསུམ་མོ། །སྣང་བ་ནི་ཕྱི་རོལ་དུ་གཟུགས་སུ་སྣང་བས་ན་སྣང་བ་གསུམ་སྟེ་རྣམ་པར་ཤེས་པ་གསུམ་མོ། །དེ་ལས་བྱུང་བ་ནི་ཞེས་པ་ནི་སེམས་ལས་བྱུང་བའི་རང་བཞིན་ནོ། །ཆགས་པ་དང་ཆགས་པ་དང་བྲལ་བ་དང་བཏང་སྙོམས་ཀྱི་རང་བཞིན་རྣམས་ཀྱི་ཞེས་པ་ནི་ཉིན་མོ་དང་མཚན་མོར་བརྒྱ་དྲུག་ཅུའི་རང་བཞིན་གྱིས་སོ། །ཡུལ་ཞེས་བྱ་བ་ལ་སོགས་པས་ནི་རང་བཞིན་དེ་རྣམས་ཀྱིས་ཕྱི་རོལ་གྱི་ངོ་བོར་སྣང་བ་གཟུགས་ལ་སོགས་པ་གང་ཡིན་པ་རྣམས་མིག་ལ་སོགས་པའི་རྣམ་པར་ཤེས་པས་ཉམས་སུ་མྱོང་ཞིང༌། རྣམ་པར་ཤེས་པ་གསུམ་ལས་བྱུང་བའི་ཆགས་པ་དང་བྲལ་བ་ལ་སོགས་པའི་རང་བཞིན་གྱི་ངོ་བོ་ཡུལ་དེ་དག་ཡིན་ནོ་ཞེས་མིག་ལ་སོགས་པའི་རྣམ་པར་ཤེས་པས་ཉམས་སུ་མྱོང་ཞིང་མཆོད་པར་བྱ་ཞེས་བསྟན་ཏོ། །མཆོད་པ་དང་ལེན་པ་ཉེ་བར་མཚོན་པའི་ཞེས་པ་ནི་བྱ་བའི་སྟོབས་ཀྱིས་
བྱེད་པ་པོ་དང་ལས་ནི་མཆོད་པར་བྱ་བ་དང་མཆོད་པར་བྱེད་པ་དག་མཆོག་ཏུ་འཛིན་ནོ། །རྣལ་འབྱོར་པས་བདག་ཉིད་ལ་ཞེས་པ་ནི། བདག་ཉིད་སངས་རྒྱས་ཀུན་ཉིད་དོ། །བྱང་ཆུབ་སེམས་དཔའ་ཀུན་རང་བཞིན། །དེ་ཕྱིར་འབད་པ་ཐམས་ཅད་ཀྱིས། །རང་གི་བདག་ཉིད་མཆོད་པར་བྱ། །ཞེས་འབྱུང་ངོ༌། །བརྟན་པ་དང་གཡོ་བའི་བདག་ཉིད་ཅེས་པ་ནི་སེམས་ཅན་དང་སྣོད་ཀྱི་འཇིག་རྟེན་གཉི་གའི་རང་བཞིན་ནོ། །རིགས་ཐམས་ཅད་ཀྱི་བདག་ཉིད་ཅན་ཞེས་པ་ནི་རྣམ་པར་སྣང་མཛད་ལ་སོགས་པའི་སྐུའི་རིགས་ཀྱི་བདག་ཉིད་ཅེས་བྱ་བའི་དོན་ཏེ། རྡོ་རྗེ་འཆང་ཆེན་པོ་ནི་རིགས་ཐམས་ཅད་ཀྱི་བསྐྱེད་པའི་རྒྱུ་ཡིན་པས་སོ། །མགོན་པོ་སངས་རྒྱས་ཀུན་བདག་ཉིད། །ཅེས་འབྱུང་ངོ༌། །གང་དུ་ཐིམ་པར་གྱུར་པ་ཞེས་པ་ནི་སྐད་ཀྱི་བྱིངས་ཉེ་བར་བསྡུས་པ་ཡིན་ན་ཡང་དོན་དུ་མ་ཡིན་པས་བསྐྱེད་པའི་དོན་དུ་འཇུག་གོ །དེས་ན་རྣམ་པར་སྣང་མཛད་ཀྱི་གཞི་ནི་རྣམ་པར་སྣང་མཛད་བསྐྱེད་པར་མཛད་པ་ཞེས་སྟོན་ཏོ། །ཚོགས་གཉིས་དང་ལྡན་པ་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་གཙོ་བོར་གྱུར་པར་རིམ་པ་གཉིས་སྟོན་པར་མཛད་པའོ། །དེ་ཉིད་རྣལ་འབྱོར་པ་ཞེས་པའོ་ཞེས་པ་ནི་འོད་གསལ་བས་ཡེ་ཤེས་གསུམ་སྤངས་ནས་རྡོ་རྗེ་འཆང་བ་ཉིད་དུ་ཐོབ་པར་འགྱུར་བའི་ཕྱིར་རོ།། ཤེས་རབ་དང་ཐབས་ཉེ་བར་ཐོབ་པ་རྣམས་ལ་འཇུག་པའི་རྣམ་པར་ཤེས་པ་དང་ཉོན་མོངས་པ་ཅན་གྱི་རྣམ་པར་ཤེས་པ་དང་ཀུན་གཞི་རྣམ་པར་ཤེས་པ་དང་དེ་ལས་བྱུང་བའི་རང་བཞིན་རྣམས་ལ་དབུལ་བར་བྱ་བ་ནི་དེའི་ངོ་བོ་ཉིད་དུ་བསྡུ་བར་བྱའོ། །རིན་ཆེན་འབྱུང་གནས་གཙོ་ཞེས་པ་ནི་བརྟན་པ་དང་གཡོ་བའི་བདག་ཉིད་ཅན་གྱི་འགྲོ་བའོ། །འདི་ལས་རིན་པོ་ཆེ་རྣམས་འབྱུང་བས་ན་ཞེས་པ་ནི་དེ་དག་གང་ལས་བྱུང་བ་དེ་ནི་རིན་ཆེན་འབྱུང་གནས་གཙོ་བོ་སྟེ། འོད་གསལ་བའི་བདག་ཉིད་རྡོ་རྗེ་འཆང་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་སྣ་ཚོགས་ཀྱི་བདག་ཉིད་རྡོ་རྗེ་འཆང་ཆེན་པོ་ཞེས་བསྟན་ཏོ། །དེས་ནི་ཐམས་ཅད་འདི་ཁྱབ་སྟེ། །ཏིལ་མར་གྱིས་ནི་ཏིལ་སོགས་བཞིན། །ཞེས་རྡོ་རྗེ་ས་འོག་ལས་འབྱུང་ངོ༌། །རྣམ་པར་ཤེས་པ་གསུམ་གྱི་བདག་ཉིད་ཅན་ཞེས་པ་ལ་དེ་རྣམས་ཉེ་བར་བསྡུ་བར་བྱེད་པ་འོད་གསལ་བའི་དེ་ཁོ་ན་ཉིད་ཀྱི་བདག་ཉིད་ཅན་ཞེས་བྱའོ། །རྣལ་འབྱོར་ཅན་དེ་ཉིད་དོ་ཞེས་པ་ནི་དབྱེར་མེད་པ་ཉིད་དུ་
བསྟན་ཏོ། །སྣང་བ་ལ་སོགས་པ་དབུལ་བར་བྱའོ་ཞེས་པ་ནི། སྣང་བ་དང་སྣང་བ་མཆེད་པ་དང་སྣང་བ་ཉེ་བར་ཐོབ་པ་ནི་ཟླ་བ་དང་ཉི་མ་དང་མཚམས་ཀྱི་སྣང་བ་རྣམས་དེའི་བདག་ཉིད་དུ་ཤེས་པར་བྱའོ། །འདོད་ཆགས་རྣམ་པར་དག་པར་བྱེད་པས་ན་འོད་དཔག་ཏུ་མེད་པའོ། །རྡོ་རྗེ་འཆང་ཆེན་པོ་ཞེས་པ་ནི་དེ་ལས་བྱུང་བ་དང་དེར་བསྡུས་པའི་ཕྱིར་རོ། །དེ་བསྐྱེད་པའི་ངོ་བོ་ཉིད་ཀྱིས་འཆང་བར་མཛད་པས་ན་ཞེས་པ་ནི་སྤྲོ་བ་དང་བསྡུ་བའི་རང་བཞིན་དེ་ལ་དེ་སྐད་ཅེས་བྱའོ། །བདག་ཉིད་ལ་དབུལ་བར་བྱའོ་ཞེས་པ་ནི་བདག་ཉིད་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རང་བཞིན་ཡིན་པའི་ཕྱིར་རོ། །བདག་ཉིད་སངས་རྒྱས་ཐམས་ཅད་ཉིད། །ཅེས་འབྱུང་བས་སོ། །ཀུན་དུ་ཀུན་ནས་ཐམས་ཅད་ནི། །ཀུན་ངོ་རྣམ་པ་ཀུན་བདག་ཉིད། །སངས་རྒྱས་ཀུན་གྱི་རང་བཞིན་གྲུབ། །རང་གི་བདག་ཉིད་དེས་མཐོང་ངོ༌། །ཞེས་འབྱུང་ངོ༌། །མི་བསྐྱོད་པར་སྣང་བ་ཞེས་པ་ནི་རྣལ་འབྱོར་པ་དེའི་རྣམ་པས་སྣང་བའོ། །རྡོ་རྗེ་འཆང་ཆེན་པོ་དེ་ཉིད་དོ་ཞེས་པ་ནི་དབྱེར་མེད་པ་བསྟན་པའོ། །བཤད་མ་ཐག་པའི་དོན་གཉིས་གསལ་བར་སྟོན་པ་ཡིན་ཏེ་ཞེས་པ་ནི་སྤྲོས་པར་བཤད་པའོ། །འདས་པ་དང་མ་འོངས་པའི་སྐད་ཅིག་མ་མེད་པར་ཞེས་པ་ནི། གང་ཞིག་འདས་པ་དེ་མེད་པ། །མ་འོངས་པ་ནི་མ་བྱུང་བའོ། །ཞེས་བཤད་པའི་ཕྱིར་རོ། །ད་ལྟར་གྱི་སྐད་ཅིག་མས་ཞེས་པ་ནི་དེ་ལྟར་བྱུང་བ་སྐད་ཅིག་མ་དང་ཡུད་ཙམ་དང་ཐང་ཅིག་ལ་སོགས་པའོ། །སྐད་ཅིག་ཐང་ཅིག་ཡུད་ཙམ་དང༌། །མིག་བཙུམས་ཐལ་མོ་སྦྱར་བ་སྟེ། །སྐད་ཅིག་སེ་གོལ་གཏོགས་པ་ཙམ། །ཐང་ཅིག་ཡུངས་ཀར་བསྐོར་བ་ཙམ། །ཡུད་ཙམ་དབུགས་རྔུབ་འབྱུང་བ་སྟེ། །མིག་བཙུམས་མིག་ནི་འཛུམས་པའི་བར། །ལག་གཉིས་ཐལ་མོ་སྦྱར་བ་སྟེ། །སྐད་ཅིག་མ་སོགས་མཚན་ཉིད་དོ། །དེ་རྣམས་གང་ཡང་རུང་བ་ལ་སྐད་ཅིག་མ་ཞེས་བྱའོ། །རྣམ་པར་ཤེས་པ་གསུམ་ལ་སྦྱོར་བར་བྱའོ་ཞེས་པ་ནི་སྣང་བ་ལ་སོགས་པ་ཡེ་ཤེས་གསུམ་ཡོངས་སུ་སྤངས་ནས་འོད་གསལ་བའི་རང་བཞིན་དུ་བྱའོ། །གཟུགས་ལ་སོགས་པ་སེམས་ཉིད་དུ་ཤེས་པར་བྱའོ་ཞེས་པ་ནི་གཟུགས་ལ་སོགས་པ་ཕྱི་རོལ་གྱི་ཡུལ་ལྔ་གང་ཡིན་པ་དེ་རྣམས་ནི་རང་གི་སྣང་བ་མེད་པས་ཀུན་གཞི་ལ་སོགས་པ་རྣམ་པར་ཤེས་པ་གསུམ་གྱི་ངོ་བོ་ཉིད་དོ། །དེ་རྣམས་ཀྱི་རང་
བཞིན་ཡོད་པ་མ་ཡིན་ཏེ། གཅིག་དང་དུ་མ་དང་བྲལ་བའི་ཕྱིར་རོ། །བདག་དང་ཆོས་རྣམས་ཉེར་བརྟགས་པ། །རྣམ་པ་སྣ་ཚོགས་གང་ཞིག་འཇུག །རྣམ་པར་ཤེས་པ་ཡོངས་གྱུར་ཏེ། །འགྱུར་བ་དེ་ཡང་རྣམ་གསུམ་ཡིན། །རྣམ་པར་སྨིན་དང་ཡིད་དང་ནི། །ཡུལ་ནི་རྣམ་པར་རིག་པའོ། །ཞེས་འབྱུང་ངོ༌། །དེ་བཞིན་དུ། གཅིག་ནི་རྣམ་པ་གཉིས་སྣང་བ། །སེམས་ནི་རྣམ་པར་འཁྲུལ་པ་ཅན། །གཟུང་བ་འཛིན་པའི་དབྱེ་བ་ཡིས། །ཇི་ལྟར་ཤིན་ཏུ་མཁས་པ་ཡིན། །དབྱེར་མེད་པ་ཡང་ཐ་དད་པས། །ཕྱིར་འགྲོ་མིང་དང་ཕྱི་རོལ་དང༌། །ཡུལ་གྱི་རྣམ་པ་དྲི་མ་ཅན། །སེམས་ནི་རྣམ་པ་དུ་མར་སྣང༌། །ཞེས་འབྱུང་ངོ༌། །དགོངས་སོ་ཞེས་པ་ནི་དགོངས་པའོ། །འདི་ཞེས་བྱ་བ་ལ་སོགས་པས་ཕན་ཡོན་བསྟན་པ་བྱ་སྟེ། བཤད་མ་ཐག་པ་ཉིད་ཡོངས་སུ་ཤེས་པ་ཞེས་བྱ་བ་ལ་སོགས་པ་རྣམ་པར་ཤེས་པ་གསུམ་གྱི་བདག་ཉིད་ཀྱི་གཟུགས་ལ་སོགས་པའི་ཡུལ་གྱི་ཚོགས་ཞེས་བྱ་བའི་དོན་ཏོ། །རིན་པོ་ཆེ་ལྟ་བུའི་གང་ཟག་རྣམས་ལ་སྦྱིན་པར་བྱ་བ་ཡིན་གྱི་ཞེས་པ་ནི་དབང་པོ་རྣོ་བའི་ཕྱིར་རོ། །ཙནྡན་ལྟ་བུ་ལ་སོགས་པ་རྣམས་ལ་བསྟན་པར་བྱ་བ་མ་ཡིན་པས་ན་ཞེས་པ་ནི་བསྐྱེད་པའི་རིམ་པ་ཙམ་དེ་རྣམས་ཀྱི་ཡུལ་ཡིན་ནོ་ཞེས་དགོངས་པའོ། །ཡང་དག་པ་ཞེས་པ་ནི་ཇི་ལྟ་བ་བཞིན་དུའོ། །བླངས་ནས་བསགས་ཤིང་ཞེས་པ་ནི་བཤད་པའི་རྒྱུད་ལ་སོགས་པ་ལས་བཏུས་ཏེ་རྫོགས་པའི་རིམ་པ་ཉིད་ཀྱིས་བསག་པར་བྱ་བ་ཞེས་པའི་ཐ་ཚིག་གོ །དེ་ཉིད་བསྟན་པའི་ཕྱིར། དུས་གསུམ་དུ་བཞུགས་པའི་དེ་བཞིན་གཤེགས་པ་རྣམས་ཏེ་ཞེས་པ་ནི་སྙིང་པོར་གྱུར་པའི་ཆོས་ཀྱི་དབྱིངས་རྟོགས་པར་གྱུར་བས་སོ། །ཡང་ན་ཡང་དག་པའི་ཡེ་ཤེས་གང་ལ་ཡོད་པ་དེ་ལ་འདི་སྐད་ཅེས་བྱའོ། །བཤད་མ་ཐག་པའི་ཚུལ་ལོ་ཞེས་པ་ནི་སེམས་རྣམ་པར་དབེན་པའི་རིམ་པའི་མཚན་ཉིད་དོ། །སྔགས་པས་ཏེ་ཡན་ལག་མ་ཉམས་པར་བཟླས་པས་ཞེས་པ་ནི་རྡོ་རྗེ་བཟླས་པའི་རིམ་པའི་མཐར་ཐོབ་ནས་སེམས་ལ་དམིགས་པ་བསྒོམ་པར་འདོད་པས་སོ། །རྡོ་རྗེ་བཟླས་ནས་རྣལ་འབྱོར་པས། །སེམས་ལ་དམིགས་པ་ཐོབ་པར་འགྱུར། །ཞེས་འབྱུང་ངོ༌། །རྣམ་པ་གསུམ་ནི་སྔར་བཤད་ཟིན་པས་སོ། །ཡེ་ཤེས་གསུམ་དུ་ཤེས་པར་བྱའོ་ཞེས་པ་ནི་དག་པར་འགྱུར་ན་དེ་ཉིད་ལྷའི་རྣམ་པ་ཉིད་དུ་འགྱུར་རོ་ཞེས་དགོངས་པའོ། །
རང་བཞིན་གྱི་དབྱེ་བ་ཉིད་ནི་དེའི་སེམས་ལས་བྱུང་བའི་རྣམ་པའོ། །རིགས་ཏེ་ཞེས་པ་ནི་ཉོན་མོངས་པའི་བག་ཆགས་དང་ལྡན་པའི་སེམས་ཀྱི་ཆོས་རྣམས་སོ། །ཆགས་པ་ཞེས་པ་ནི་ཐབས་ཀྱི་རང་བཞིན་བཞི་བཅུ་སྟེ་ཉོན་མོངས་པ་ཅན་གྱི་ཡིད་ལས་བྱུང་བའོ། །ཆགས་པ་དང་བྲལ་བ་ནི་ཤེས་རབ་ཀྱི་རང་བཞིན་སུམ་ཅུ་རྩ་གསུམ་སྟེ་འཇུག་པའི་རྣམ་པར་ཤེས་པ་ལས་འབྱུང་བའོ། །ཆགས་པ་བར་མ་ནི་ཤེས་རབ་དང་ཐབས་སྙོམས་པར་ཞུགས་པ་ལས་བྱུང་བ་རང་བཞིན་བདུན་ཏེ་ཀུན་གཞི་ལས་འབྱུང་བའོ། །རང་བཞིན་ཞེས་པ་ནི་སེམས་ལས་བྱུང་བའི་ཆོས་རྣམས་སོ། །དེ་རྣམས་ཀྱི་དབྱེ་བ་ནི་ཁྱད་པར་རྣམས་ཀྱི་ཚུལ་ལ་ཞེས་པ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པ་ལ་སོགས་པའི་དབྱེ་བའི་མཚན་ཉིད་དོ། །དེ་ནི་འདི་སྐད་ཅེས་བྱ་བ་ལ་སོགས་པ་ཕྱི་རོལ་གྱི་རྣམ་པ་ཉིད་དུ་གཟུགས་ལ་སོགས་པའི་ཡུལ་རྣམས་སྣང་བ་གང་ཡིན་པར་དམན་པ་ལ་སོགས་པའི་དབྱེ་བས་ཉེ་བར་མཚོན་པ་དེ་དག་རྣམ་པར་ཤེས་པ་གསུམ་གྱི་རྒྱུ་ཅན་རང་བཞིན་བརྒྱ་དྲུག་ཅུའི་ངོ་བོ་ཡིན་ནོ་ཞེས་ངེས་པར་བྱས་ལ་དེ་རྣམས་ཀྱི་འོད་གསལ་བ་ཉིད་རང་བཞིན་ཡིན་ནོ་ཞེས་སྔགས་དང་ཕྱག་རྒྱའི་རིམ་པས་དེ་དག་སྦྱངས་ལ་འོད་གསལ་བའི་ངོ་བོ་ཉིད་དུ་ཤེས་པར་བྱའོ། །སྦས་པ་ཞེས་པ་ནི་ཡེ་ཤེས་གསུམ་རྣམ་པར་སྤྱོད་པའི་མཚན་ཉིད་ཀྱི་དོན་བསྟན་པས་སོ། །འདི་ནི་སྤྲོས་པ་མེད་པའི་སྤྱོད་པའོ་ཞེས་པ་ལ་སེམས་རྣམ་པར་དག་པའི་རིམ་པ་སྒོམ་པར་བྱེད་པའི་རྣལ་འབྱོར་པས་ཇི་ལྟར་རྙེད་པའི་སྤྱོད་པའི་དོན་བསྟན་པས་སོ། །མཆོག་ལ་སོགས་པ་ཞེས་པ་ལ་སོགས་པ་ནི་ཡིད་དུ་འོང་བ་དང་ཡིད་དུ་མི་འོང་བ་དང་གཉིས་ཀའི་ངོ་བོ་ཉིད་དོ། །སྣང་བ་གསུམ་གྱི་ངོ་བོ་ཉིད་དུ་ཡོངས་སུ་ཤེས་པའོ་ཞེས་པ་ནི་སྔགས་དང་ཕྱག་རྒྱའི་རིམ་པས་རྣམ་པར་སྦྱངས་ནས་འོད་གསལ་བའི་ངོ་བོ་ཉིད་དུ་བྱའོ། །རང་བཞིན་ཤེས་པའོ་ཞེས་པ་ནི་ཆགས་པ་དང་ཆགས་པ་དང་བྲལ་བ་དང་ཆགས་པ་བར་མའི་བསྒོམ་པའི་སྒོ་ནས་ཆགས་པ་ལ་སོགས་པ་དེ་རྣམས་ཀྱི་འོད་གསལ་མངོན་དུ་བྱེད་པའོ། །འོད་གསལ་བའི་ངོ་བོ་ཉིད་དུ་ཡོངས་སུ་བསྟིམ་པ་སྟེ་ཞེས་པ་ནི་བདེ་བ་ཆེན་པོའི་ངོ་བོ་དང་རོ་གཅིག་པར་བྱའོ། །འདི་ཉིད་ནི་བླ་ན་མེད་པའི་མཆོད་པ་སྟེ་ཞེས་པ་ནི་འོད་གསལ་བ་ལ་འཇུག་པའི་
མཚན་ཉིད་དོ། །དེ་ཉིད་ཀྱི་ཕྱིར་ལེའུ་བཅུ་བདུན་པ་ལས། རྡོ་རྗེ་གསུམ་མཆོག་ཕྱག་མི་བྱ། །ཞེས་བྱ་བས་འོད་གསལ་བ་ལ་འཇུག་པའི་དགོངས་པས་ཕྱི་རོལ་གྱི་ཕྱག་དང་མཆོད་པ་ལ་སོགས་པ་བཅོམ་ལྡན་འདས་ཀྱིས་དགག་པར་གསུངས་སོ། །དེ་བཞིན་དུ། སངས་རྒྱས་ཐམས་ཅད་མཉེས་བྱེད་ལ། །དེ་ནི་མཆོད་པ་ཆེན་པོར་འདོད། །ཅེས་འབྱུང་ངོ༌། །དེ་ཉིད་རྡོ་རྗེ་འཆང་ཆེན་པོ་སྟེ་ཞེས་པ་ནི། འདི་ནི་རྫོགས་པའི་རྣལ་འབྱོར་ཞེས། །རྡོ་རྗེ་འཆང་ཆེན་དེ་ཉིད་དེ། །རྣམ་པ་ཐམས་ཅད་མཆོག་ལྡན་པ། །དེ་ལས་ཀུན་མཁྱེན་འབྱུང་བར་འགྱུར། །ཞེས་བཤད་པས་སོ། །དེའི་བསྐྱེད་པའི་རྒྱུར་གྱུར་པའི་ཕྱིར་རོ་ཞེས་པ་ནི་རིམ་པ་བཞི་པ་ལ་ཟུང་དུ་འཇུག་པའི་རིམ་པས་རྡོ་རྗེ་འཆང་ཆེན་པོ་འབྱུང་བའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པས་སྒྲ་ལ་སོགས་པ་རྣམས་ཀྱང་འོད་གསལ་བ་ལས་ངེས་པར་སྦྱར་བར་བྱའོ་ཞེས་བསྟན་ཏོ། །ཇི་སྐད་དུ་བཤད་པའི་རྒྱུད་ལས་ཞེས་པ་ནི་དགོངས་པ་ལུང་བསྟན་པ་ལས་སོ། །ནང་ནི་རང་གི་རྒྱུད་ལ་གནས་པའོ། །ཕྱི་རོལ་ནི་གཞན་གྱི་རྒྱུད་ལ་གནས་པ་དང༌། སྣོད་ཀྱི་འཇིག་རྟེན་ལ་གནས་པ་ནི་གཉི་ག་ཞེས་བྱའོ། །དེ་ལྟ་བུའི་རྣམ་པ་གསུམ་གྱི་གཟུགས་ལ་སོགས་པ་མི་དམིགས་པ་སྟེ་གཅིག་དང་དུ་མ་དང་བྲལ་བའི་ཕྱིར་རོ། །དེ་བས་ན་འོད་གསལ་བའི་རང་བཞིན་དུ་བྱ་བ་གང་ཡིན་པ་དེ་ནི་ལྷ་རྣམས་ལ་དབུལ་བ་ཞེས་བྱའོ། །ཤིན་ཏུ་སྤྲོས་པ་མེད་པའི་སྤྱོད་པ་སྟེ་ཞེས་པ་ནི་ཡེ་ཤེས་ཀྱི་ཕྱག་རྒྱ་དང་སྙོམས་པར་འཇུག་པ་ལ་མངོན་པར་བྱང་ཆུབ་ཀྱི་སྦྱོར་བས་སྤྱོད་པ་བསྟན་པའི་ཕྱིར་རོ། །མཐར་ཐུག་པའོ་ཞེས་ནི་འོད་གསལ་བ་ལ་འཇུག་པའི་མཚན་ཉིད་ཀྱི་དོན་སྟོན་པས་སོ། །ད་ནི་ཞེས་བྱ་བ་ལ་སོགས་པས་རྗེས་སུ་དྲན་པ་དྲུག་གི་སྒོ་ནས་རྒྱུར་ཐམས་ཅད་ཀྱི་སྙིང་པོར་གྱུར་པ་རིམ་པ་གཉིས་ལས་གཅིག་ནི་རིགས་བརྒྱའི་དབྱེ་བའི་བར་དང༌། གཉིས་པ་ནི་རིམ་པ་ལྔ་པའི་མཚན་ཉིད་སོ་སོར་བསྟན་པར་བྱ་སྟེ་གཅིག་གི་རྗེས་སུ་དྲན་པ་གཅིག་གིས་བསྐྱེད་པའི་རིམ་པ་ལྔས་ནི་རིམ་པ་ལྔ་བསྟན་ཏོ། །རིགས་བརྒྱའི་དབྱེ་བས་ཞེས་པ་ནི་སྔར་རྒྱས་པར་བཤད་པས་སོ། །ལུས་རྣམ་པར་དབེན་པས་བྱེད་པ་ཞེས་པ་ནི་ལུས་ཀྱི་ཆ་ཆའི་དབྱེ་བས་རིགས་ལྔའི་དེ་བཞིན་གཤེགས་པ་ཉིད་དུ་རྟོགས་པར་བྱེད་པའོ། །
དེ་ཉིད་ཀྱི་ཕྱིར་སངས་རྒྱས་རྗེས་སུ་དྲན་པ་ནི་ཕུང་པོ་དང་ཁམས་དང་སྐྱེ་མཆེད་རྣམས་དེ་བཞིན་གཤེགས་པ་ཉིད་དུ་རྗེས་སུ་དྲན་པ་ཞེས་བྱའོ། །དེ་བཞིན་དུ་རྡོ་རྗེ་བཟླས་པ་མཐར་ཐུག་པ་ཞེས་པ་ནི་རྡོ་རྗེ་འཆང་ཆེན་པོ་ལ་སོགས་པ་རྣམ་པ་བཅུ་གཅིག་གི་རྡོ་རྗེ་བཟླས་པ་ཡོངས་སུ་རྫོགས་ནས་སོ། །ངག་རྣམ་པར་འབྱེད་པ་ནི་ཉོན་མོངས་པའི་ངག་སྦྱང་བས་སོ། །ཆོས་རྗེས་སུ་དྲན་པ་ཞེས་པ་ནི་ཨཱ་ལི་དང་ཀཱ་ལིའི་རང་བཞིན་གྱི་ཡི་གེ་དང་ཚིག་དང་ངག་དང་ཆེན་པོ་ལ་སོགས་པའི་དབྱེ་བ་དང་ལྡན་པའི་ངག་གི་སྤྲོས་པ་ནི་ཆོས་རྣམས་སོ། །རྗེས་སུ་དྲན་པ་ནི་དེ་རྣམས་ཀྱི་རང་བཞིན་ཡོངས་སུ་ཤེས་པར་འགྱུར་རོ། །རྡོ་རྗེ་བཟླས་པའི་རིམ་པ་འདིས། །གསུང་གི་རྡོ་རྗེ་སྒྲུབ་བྱེད་པ། །ཡེ་ཤེས་གསུམ་གྱི་དབྱེ་བ་ཡིས། །སེམས་ཙམ་ལ་ནི་ངེས་པར་སྦྱོར། །ཞེས་འབྱུང་བས་སོ། །རང་བཞིན་སྣང་བའི་རིམ་གྱིས་ཞེས་པ་ནི། །སྔགས་དང་ཕྱག་རྒྱའི་རིམ་པས་ཉེ་བར་བསྡུས་པའི་རྣམ་པར་ཤེས་པ་གསུམ་དང༌། །དེའི་རང་བཞིན་གྱི་ཆོས་བསྒོམ་པའི་སྒོ་ནས་སོ། །སེམས་ལ་རྣམ་པར་རྟོག་པ་ནི། །ཞེས་པ་ལ་རྣམ་པར་ཤེས་པ་གསུམ་པོ་འོད་གསལ་བའི་གོ་འཕང་ལ་འཇུག་པར་བྱེད་པས་སོ། །རྡོ་རྗེ་རྗེས་སུ་དྲན་པའོ། །ཞེས་པ་ནི་རྡོ་རྗེ་ལྟར་མི་ཕྱེད་པ་གཉིས་སུ་མེད་པའི་ཡེ་ཤེས་ཀྱི་རང་བཞིན་གྱི་འོད་གསལ་བ་ལས་རྗེས་སུ་དྲན་པའོ། །སྣང་བ་ལ་སོགས་པ་ཡེ་ཤེས་གསུམ་ཐོབ་ནས་ཕྱི་ནས་འོད་གསལ་བ་མངོན་དུ་འགྱུར་རོ། །ལུས་དང་ངག་དང་ཡིད་དོ་ཞེས་པ་ལ་རྡུལ་ཕྲ་རབ་དུ་མ་ཚོགས་པའི་བདག་ཉིད་ཡིན་པས་སོ། །ཡེ་ཤེས་གསུམ་གྱི་ངོ་བོ་སོ་སོར་ཡོངས་སུ་ཤེས་པའོ་ཞེས་པ་ནི་ཡེ་ཤེས་གསུམ་གྱི་བདག་ཉིད་ཅན་ནི་ལུས་ལ་སོགས་པ་ཡིན་ནོ་ཞེས་ལྷག་པར་མོས་པ་གང་ཡིན་པའོ། །སྦྱོར་བ་ནི་ཕྱིས་གཅིག་ཏུ་བྱས་པ་སྟེ་ཞེས་པ་ནི་འོད་གསལ་བ་རྟོགས་པས་རོ་གཅིག་ཏུ་འགྱུར་བ་སྟེ། ངོ་བོ་ཉིད་མེད་རྫོགས་པའོ། །དེ་བས་ན་ཞེས་བྱ་བ་ལ་སོགས་པས་སྣང་བ་ཉེ་བར་ཐོབ་པ་ལ་སོགས་པའི་རིམ་པ་ལས་འབྱུང་བ་ཡེ་ཤེས་ཀྱི་སྐུ་སྟེ་བདག་བྱིན་གྱིས་བརླབ་པའི་རིམ་པའི་མཚན་ཉིད་དོ། །ཁྲོ་བོ་ནི་ཐབས་ཀྱི་ཡེ་ཤེས་སོ་ཞེས་པ་ནི་མ་རིག་པའི་འོག་ཏུ་འབྱུང་བ་ཞེས་བརྗོད་པར་བྱའོ། །དེས་ན་སྣང་བ་ཉེ་བར་ཐོབ་པ་དང་སྣང་བ་
མཆེད་པ་དང་སྣང་བ་སྟེ། མཚན་མོ་དང་ཉིན་མོ་དང་ཟླ་བའི་སྣང་བ་དང་འདྲ་བས་རོ་གཅིག་ཏུ་བསྒོམ་པ་ནི་ཁྲོ་བོ་རྗེས་སུ་དྲན་པ་སྟེ། སྒྱུ་མའི་སྐུ་ཡི་རྒྱུར་གྱུར་པ། །ཞེས་བསྟན་ཏོ། །རང་གི་ཟླ་བའི་གཟུགས་བརྙན་འདྲ། །བདག་ཉིད་ཀྱིས་ནི་སེམས་ཉིད་མཐོང༌། །གལ་ཏེ་ཟླ་བ་ལ་དམིགས་ནས། །རྡོ་རྗེ་མཚན་ནི་རབ་ཏུ་བརྟག །དེ་ནི་ཐབས་ཏེ་སྟོན་བྱེད་པ། །རྡོར་སོགས་བསྐྱེད་པའི་རྣལ་འབྱོར་པའི། །ཟླ་བ་རྡོ་རྗེ་སོགས་སྦྱོར་བས། །སེམས་དང་སེམས་བྱུང་ཡང་དག་སྦྱར། །ཤེས་རབ་ཐབས་དང་ཀུན་སྦྱོར་བས། །ལྷ་ཡི་སྐུ་ནི་འབྱུང་བར་འགྱུར། །ཞེས་འབྱུང་ངོ༌། །ལྷ་ནི་ཕྱག་རྒྱ་ཆེན་པོའི་ཚུལ་ལོ་ཞེས་པ་ནི་མ་ལུས་ལུས་པ་མེད་པ་དེ་བཞིན་གཤེགས་པ་ཐམས་ཅད་ཀྱི་སྐུ་རྣམས་ཀྱིས་བྱིན་གྱིས་རློབ་པ་ཡེ་ཤེས་ཀྱི་སྐུ་ཞེས་བྱ་བའི་ཐ་ཚིག་གོ །དེའི་རྗེས་སུ་དྲན་པ་ནི་དེ་མཐོང་བ་སྟེ་སྒྱུ་མ་ལ་སོགས་པ་དང་འདྲ་བར་ཡོངས་སུ་ཤེས་པའོ། །དེ་ཉིད་བསྟན་པར་བྱ་བའི་ཕྱིར། ཆུ་ཟླ་ལ་སོགས་པའི་རྣམ་པས་ཡོངས་སུ་ཤེས་པའོ་ཞེས་པ་ནི་ཆུ་ཟླ་ལ་སོགས་པ་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པ་ཞེས་བྱ་བའི་དོན་ཏོ། །དེས་ནི་བདག་ལ་བྱིན་གྱིས་བརླབ་པའི་རིམ་པ་བསྟན་པ་ཡིན་ནོ། །དོན་དམ་པའི་བདེན་པས་གཅིག་ཏུ་བྱས་པའོ་ཞེས་པ་ནི་ཕྱི་དང་ནང་གི་མངོན་པར་བྱང་ཆུབ་པའི་རིམ་པའམ་རིལ་པོར་འཛིན་པ་དང་རྗེས་སུ་གཞིག་པའི་ཏིང་ངེ་འཛིན་གཉིས་ཀྱིས་རིམ་པས་འོད་གསལ་བ་ཉིད་དུ་འགྱུར་བ་མན་ངག་བཞི་པས་མངོན་དུ་བྱ་བ་ཞེས་བྱ་བའི་དོན་ཏོ། །ངེས་ནི་མངོན་པར་བྱང་ཆུབ་པའི་རིམ་པ་བསྟན་པ་ཡིན་ནོ། །དེ་བས་ན་རྗེས་སུ་སྦྱོར་བས་ཞེས་པ་ནི་དོན་དམ་པའི་བདེན་པ་དང་གཅིག་ཏུ་བྱས་པ་སྟེ། ཡེ་ཤེས་ཀྱི་སྐུ་དང་འོད་གསལ་བ་རོ་གཅིག་ཏུ་གྱུར་པའི་མཚན་ཉིད་ཀྱི་མངོན་པར་བྱང་ཆུབ་པའི་རིམ་པ་ལས་སོ་ཞེས་བྱ་བའི་དོན་ཏོ། །བསྒོམ་པ་ནི་བདེན་པ་གཉིས་ཀྱི་རྣམ་པས་དམིགས་ནས་ཞེས་པ་ནི་ཉེ་བར་མཚོན་པ་ཙམ་ཡིན་ཏེ། རྣམ་པ་དང་བཅས་པ་དང་རྣམ་པ་མེད་པ་དང་ཐབས་དང་ཤེས་རབ་ལ་སོགས་པ་དབྱེར་མེད་པས་ཀྱང་བསྒོམ་པར་བྱའོ་ཞེས་བྱ་བའི་དོན་ཏོ། །ཇི་སྐད་དུ། རྣམ་བཅས་དངོས་པོ་རྟོག་པ་དང༌། །རྣམ་པ་མེད་པའི་རྟོག་པ་སྟེ། །གཅིག་ཏུ་བྱས་ནས་གང་དུ་སྤྱོད། །དེ་ནི་ཟུང་དུ་འཇུག་པར་བཤད། །
ཅེས་འབྱུང་ངོ༌། །ཆོས་ཐམས་ཅད་ཇི་ལྟ་བ་བཞིན་དུ་ཡོངས་སུ་ཤེས་པའི་མཚན་ཉིད་ནི་བྱང་ཆུབ་པོ། །དེ་ཉིད་བདེ་བ་ཆེན་པོའི་མཚན་ཉིད་གཅིག་པ་ཞེས་པ་ནི་ཆོས་ཀྱི་སྐུ་རོ་གཅིག་པའི་ངོ་བོ་རྟག་ཏུ་བདེ་བའི་རང་བཞིན་ཞེས་བྱ་བའི་དོན་ཏོ། །ཇི་སྐད་དུ། དེ་ཉིད་ཟག་པ་མེད་པའི་དབྱིངས། །བསམ་གྱིས་མི་ཁྱབ་དགེ་བ་རྟག །བདེ་བ་རྣམ་པར་གྲོལ་བའི་སྐུ། །ཐུབ་པ་ཆེན་པོའི་ཆོས་ཞེས་བྱ། །ཞེས་འབྱུང་ངོ༌། །རྡོ་རྗེ་འཆང་ཆེན་པོ་ཐོབ་པར་འགྱུར་བའོ་ཞེས་པ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་སྐུའོ་ཞེས་པའི་དོན་ཏོ། །དེས་ནི་ཟུང་དུ་འཇུག་པའི་རིམ་པ་བསྟན་པ་ཡིན་ནོ། །དོན་འདི་ཉིད་ཅེས་པ་ནི་རྡོ་རྗེ་བཟླས་པ་ལ་སོགས་པ་རྫོགས་པའི་རིམ་པའི་མཚན་ཉིད་དོ་ཞེས་བྱ་བའི་དོན་ཏོ། །བཤད་པའི་རྒྱུད་ལས་ཞེས་པ་ནི་རྡོ་རྗེ་ཕྲེང་བ་ལས་སོ། །ཉམས་དགའ་སངས་རྒྱས་ཀུན་གྱིས་བསྟེན། །ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་སྐུ་རྣམ་པར་དབེན་པའོ། །བྷ་ག་ནི་བསོད་ནམས་དང་ཡེ་ཤེས་ཀྱི་ཚོགས་དང་ལྡན་པའོ། །ཞི་བ་གཅིག་པུའི་མིང་ཞེས་པ་ནི་འགྲོ་བ་དང་འོང་བ་རྣམ་པར་གྲོལ་བའི་རང་བཞིན་གྱི་རྡོ་རྗེ་བཟླས་པའི་མཐར་ཐུག་པ་མ་ནིང་གི་བཟླས་པའོ། །རང་གི་སྐུ་ལ་སོགས་པའི་དེ་ཁོ་ན་ཉིད་དེ་སྣང་བ་ལ་སོགས་པའི་ཡེ་ཤེས་རྣམས་སོ། །དེ་ཉིད་གཉིས་མེད་ཅེས་པ་ནི་སྟོང་པ་གསུམ་མོ། །དེ་འབྱུང་བ་ནི་གང་ལས་སྐྱེས་པ་སྟེ་དེ་ནི་རང་གི་ངོ་བོ་ཉིད་གཉིས་མེད་འབྱུང་སྟེ་འོད་གསལ་བའོ། །རྡོ་རྗེ་ནི་སྔར་བཤད་པའི་ལུས་ལ་སོགས་པའོ། །དེ་ཉིད་དུ་སྦྱོར་བཞེས་པ་ནི་འོད་གསལ་བའི་དེ་ཁོ་ན་ཉིད་བཞི་པ་དེ་ལ་སྔགས་དང་ཕྱག་རྒྱའི་རིམ་པས་མི་སྣང་བར་བྱའོ། །སངས་རྒྱས་རྗེས་དྲན་སྦྱོར་བ་སྟེ། །ཞེས་པ་ནི་དེ་བཞིན་གཤེགས་པ་ཐམས་ཅད་རོ་གཅིག་པར་བྱེད་པ་འོད་གསལ་བ་རྟོགས་པའི་མཚན་ཉིད་ཀྱི་དེ་ཁོ་ན་ཉིད་ཅེས་བྱ་བའི་དོན་ཏོ། །དེ་ཉིད་བྷ་གར་ནི་འོད་གསལ་བ་ལའོ། །ལིང་ག་ནི་ཐིམ་པ་ཉིད་ཡིན་པར་གྲགས་པ་ནི་བསྟན་ཏོ་ཞེས་བྱ་བའི་དོན་ཏོ། །དེས་ནི་སེམས་རྣམ་པར་དག་པའི་རིམ་པ་བསྟན་ཏོ། །བཞུགས་པ་ཞེས་པ་སྒྱུ་མ་ལ་སོགས་པའི་རྣམ་པས་སོ། །གཉིས་མེད་སྦྱོར་བ་སྟེ་ཞེས་པ་ནི་སྦྱོར་བ་ནི་ཐ་མི་དད་དོ། །སངས་རྒྱས་གཟུགས་སུ་བསྒོམ་པའོ། །ཞེས་པ་ནི་
དེ་ལྟར་གྱུར་པའི་སངས་རྒྱས་ཀྱི་སྐུ་སྒྱུ་མའི་རྣམ་པའི་ལྷའི་སྐུའོ། །སྒོམ་པའི་ཞེས་པ་ནི་སྣང་བ་ཉེ་བར་ཐོབ་པ་ལ་སོགས་པའི་རིམ་པའམ་ཅིག་ཅར་དུ་སྤྲོ་བར་བྱའོ། །དེས་ནི་བདག་ལ་བྱིན་གྱིས་བརླབ་པའི་རིམ་པ་བསྟན་པ་ཡིན་ནོ། །དེ་ལས་ནི་དེ་ལ་དམིགས་ནས་མངོན་པར་བྱང་ཆུབ་པའི་རིམ་པའི་མཚན་ཉིད་ཀྱི་མན་ངག་གང་ཡིན་བ་དེ་ལས་ནི་མན་ངག་བཞི་པ་མངོན་དུ་བྱེད་པའི་མཚན་ཉིད་འོད་གསལ་བ་ལས་སོ། །བློ་ལྡན་གྱིས་ཞེས་པ་ནི་རྣལ་འབྱོར་པ་ལས་སོ། །སྤྲོ་བ་ནི་ཞི་བ་དང་སྐྱེ་བ་ལ་མི་གནས་པ་རྡོ་རྗེ་འཆང་ཆེན་པོའི་སྐུ་བསྐྱེད་པར་བྱའོ། །དེའི་ཚེ། །བ་སྤུའི་བུ་གའི་རྩེ་མོར་གནས། །ཞེས་པ་ནི་བ་སྤུའི་བུ་ག་ལ་སོགས་པ་ལ་གནས་པའོ། །མཉམ་པ་མེད་པ་ཁྱད་པར་དུ། །ཞེས་པ་ནི་བརྗོད་དུ་མི་ནུས་པའོ། །སངས་རྒྱས་སྤྲིན་རྣམས་དེར་སྤྲོའོ། །ཞེས་པ་ནི་གཞན་གྱི་དོན་བྱ་བའི་ཕྱིར་དེ་བཞིན་གཤེགས་པ་རྣམས་སྤྲོ་བར་བྱའོ་ཞེས་པ་འདིས་ཟུང་དུ་འཇུག་པའི་རིམ་པ་བསྟན་པ་ཡིན་ནོ། །དགོངས་པས་བཤད་པའོ་ཞེས་པ་ནི་འགལ་བའི་ཚིག་གི་སྒོ་ནས་རིམ་པ་ལྔའི་དེ་ཁོ་ན་ཉིད་ཀྱི་མཚན་ཉིད་བསྟན་པའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པས་སྔར་བཤད་པའི་དོན་བསྡུ་བའི་ཕྱིར་བཤད་པར་བྱ་སྟེ། ཡོངས་སུ་དག་པའི་ལྷ་ཡི་སྐུ། །ཞེས་པ་ནི་ཟུང་དུ་འཇུག་པའི་རིམ་པས་ཐོབ་པར་བྱ་བའི་རྡོ་རྗེ་འཆང་ཆེན་པོའི་ཕྱག་རྒྱའི་སྐུ་བསྐྱེད་ནས་སོ། །རྣལ་འབྱོར་པ་ཐམས་ཅད་ཀྱི་ཐུན་མོང་གི་ཞེས་པ་ནི་བསྐྱེད་པ་དང་རྫོགས་པའི་རིམ་པ་དག་གིས་ཐུན་མོང་པའོ། །སྙོམས་པར་འཇུག་པའི་རིམ་པ་ཞེས་པ་ནི་དབང་པོ་གཉིས་ཡང་དག་པར་སྦྱོར་བའི་མཚན་ཉིད་ཅན་གྱི་རིམ་པ་ཞེས་བྱ་བའི་དོན་ཏོ། །དེ་ལ་བསྐྱེད་པའི་རིམ་པའི་རྣལ་འབྱོར་པ་ལ་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་རྩོམ་ན་ཕྱག་རྒྱ་ལེགས་པར་སྤྱོད་པའི་དུས་སུ་སྙོམས་པར་འཇུག་པའི་རིམ་པ་བསྟན་པ་དང༌། རྫོགས་པའི་རིམ་པའི་རྣལ་འབྱོར་པ་ལ་རིམ་པ་ལྔ་ཆར་ལ་ཡང་སྙོམས་པར་འཇུག་པའི་རིམ་པ་བསྟན་ཏོ། །ན་ཚོད་གཞོན་པ་ལ་སོགས་པ་དང་ལྡན་པའི་ཞེས་པ་ནི་གཞོན་པ་ཉིད་དང་མཛེས་པ་ཉིད་དང་དམ་ཚིག་དང་སྡོམ་པ་ལ་སོགས་པ་དང་ལྡན་པ་ཞེས་བྱ་བའི་དོན་ཏེ། བུད་མེད་ནི་དམ་ཚིག་དང་ཡེ་ཤེས་ཀྱི་ཕྱག་རྒྱ་ལས་གང་ཡང་རུང་བའོ། །རྙེད་
ཅིང་ཞེས་པ་ནི་རྙེད་པ་དང་བསྒོམ་པར་བྱས་ནས་སོ། །དེར་ཇི་ལྟར་རྙེད་པའི་གཟུགས་དང་ཞེས་པ་ནི་ཐམས་ཅད་མ་ཚོགས་ན་ལས་ཀྱི་ཕྱག་རྒྱ་སྟེ། བྱོལ་སོང་ས་ལ་འང་རབ་ཏུ་བརྟག །ཅེས་འབྱུང་བས་སོ། །ཡན་ལག་མ་ཉམས་པ་གཟུགས་དང་ལྡན་ཞིང་ཞེས་པ་ནི་རིགས་དང་རྗེས་སུ་མཐུན་པ་ཨུཏྤལ་སྔོན་པོའི་ཁ་དོག་དང་འདྲ་བ་ཞེས་བྱ་བའི་ཐ་ཚིག་གོ །རབ་ཏུ་དབེན་ཞིང་ཡིད་དང་མཐུན་པ་ཞེས་པ་ནི་སྤྲོས་པ་དང་བཅས་པ་དང་སྤྲོས་པ་མེད་པའི་རྣལ་འབྱོར་པ་དག་གིས་ལྷ་ཁང་སུམ་བརྩེགས་ལ་སོགས་པའོ། །གཟུགས་ལ་སོགས་པའི་ཡུལ་གྱི་མཚན་ཉིད་ཀྱི་མཆོད་པ་བརྩམ་པར་བྱའོ་ཞེས་པ་ནི་དཔལ་སངས་རྒྱས་ཐམས་ཅད་དང་མཉམ་པར་སྦྱོར་བ་མཁའ་འགྲོ་དྲ་བའི་བདེ་མཆོག་གི་རིམ་པའི་རྒྱུད་ལས་གསུངས་པས་ཆགས་པའི་རོལ་པ་ལ་སོགས་པའི་རྒྱ་ཆེ་བའི་མཚན་ཉིད་ཀྱི་ཡུལ་གྱི་མཆོད་པ་བྱའོ། །གང་གིས་ཤེ་ན་ཞེས་བྱ་བ་ལ་སོགས་པས་བརྩོན་པའི་དུས་སུ་བྱ་བ་བཤད་པར་བྱ་སྟེ། ཡུལ་དུ་བྱིན་གྱིས་བརླབས་པ་ན། །ཞེས་པ་ནི་ཡུལ་རྣམས་ལེན་པའམ་དམིགས་པའམ་དེ་ལས་གཟུང་བའི་གཙོ་བོའི་སྒོ་ནས་འབྱུང་བའོ། །འདོད་ཆགས་ལ་སོགས་པ་རང་བཞིན་གསུམ་ཞེས་པ་ནི་ཆགས་པ་བྲལ་བ་དང་ཆགས་པ་དང་ཆགས་པ་བར་མ་ལ་སོགས་པ་སྟེ། ཤེས་རབ་དང་ཐབས་དང་ཉེ་བར་ཐོབ་པ་གསུམ་ཞེས་བྱ་བའི་ཐ་ཚིག་གོ །ཡིད་དུ་འོང་བའི་ཡུལ་རྣམས་ཞེས་པ་ནི་རྣམ་པ་གསུམ་གྱི་ཡུལ་རྣམས་གཅིག་ཏུ་བྱ་སྟེ་ཡིད་དུ་འོང་བའི་ཡུལ་ཞེས་བྱའོ། །ཡུལ་གསུམ་པོ་དག་གིས་ཞེས་པ་ནི་འདོད་ཆགས་ལ་སོགས་པའི་རྒྱུར་གྱུར་པའི་ཡུལ་རྣམས་ཞེས་བྱ་བའི་དོན་ཏོ། །ངག་གི་བདག་ཉིད་མཆོད་པར་བྱའོ་ཞེས་པ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རིགས་ཀྱི་འབྲེལ་པ་དང་ལྡན་པའི་ཡུལ་རྣམས་ཉེ་བར་སྤྱོད་པ་ལ་བརྟེན་ནས་རང་གི་རྒྱུད་ཚིམ་པར་བྱའོ་ཞེས་བྱ་བའི་དོན་ཏོ། །དེ་ལྟར་རྡོ་རྗེ་འཆང་ཆེན་པོ་ནི་དབུས་ཀྱི་གཙོ་བོ་སྟེ་དཔལ་རྡོ་རྗེ་སེམས་དཔའོ། །རེག་བྱ་རྡོ་རྗེ་ནི་དབུས་ཀྱི་གཙོ་བོ་སྟེ་ཁྱད་པར་དུ་མ་གཟུང་བས་སོ། །རྣམ་པར་སྣང་མཛད་ལ་སོགས་པ་ཞེས་པ་ནི་རིགས་ཀྱི་དབྱེ་བས་གནས་པ་ཞེས་པའི་ཐ་ཚིག་གོ །འདི་ནི་དེ་བཞིན་གཤེགས་པའི་ཡིན་པས་ན་ཞེས་པ་ནི་
རྣམ་པར་སྣང་མཛད་ཀྱི་རིགས་ལས་འབྱུང་བའོ། །རིགས་དེའི་ཕྱག་རྒྱ་གཞན་རྣམས་ཀྱིས་ནི་ཞེས་པ་ལ་རྣམ་པར་སྣང་མཛད་དེ་བཞིན་གཤེགས་པའི་རིགས་ཀྱི་འབྲེལ་པ་དང་ལྡན་པའི་ཕྱག་རྒྱ་གང་ཡིན་པ་དེ་རྣམས་ཀྱི་ནང་ན་གཙོ་བོ་ནི་བཙུན་མོ་ཡིན་པས་སོ། །ཉོན་མོངས་པ་དང་ཤེས་བྱའི་སྒྲིབ་པ་ལ་སོགས་པ་སྤོང་བའི་ཕྱོགས་སུ་མེ་ལོང་ལྟ་བུའི་ཡེ་ཤེས་དང་པོ་གཙོ་བོ་ཡིན་པས་སོ། །བཙུན་མོ་ཆེན་མོ་སྟེ་སྔར་བཤད་པ་ཞེས་པ་ནི་སྔ་མ་བཞིན་དུ་མཚན་ཉིད་དང་ལྡན་པ་ཞེས་བྱའོ། །མ་བཤད་པ་རྣམས་ཀྱང་བསྡུས་པའི་དོན་ཏོ་ཞེས་པ་ནི་རིན་ཆེན་འབྱུང་ལྡན་ལ་སོགས་པའི་དེ་བཞིན་གཤེགས་པའི་རིགས་གཟུང་བར་བྱ་བའི་ཕྱིར་རོ། །དེ་ཉིད་རིན་པོ་ཆེའི་རྣལ་འབྱོར་པས་མཱ་མ་ཀཱི་ར་བསྒོམ་པར་བྱའོ་ཞེས་པ་ནི་རིགས་ཀྱི་དབང་གིས་བསྒོམ་པར་བྱའོ་ཞེས་དགོངས་པའོ་ཞེས་སྦྱོར་རོ་ཞེས་པ་ནི་བྱ་བའི་ཚིག་མེད་ཀྱང་རྟོགས་པར་བྱའོ་ཞེས་བྱ་བའི་དོན་ཏོ། །དེ་ལྟར་ཞེས་བྱ་བ་ལ་སོགས་པས་གསུང་རྡོ་རྗེ་ལ་སོགས་པའི་རྣལ་འབྱོར་པ་རྣམས་ཀྱིས་ཀྱང་དེ་ཉིད་གོས་དཀར་མོ་དང་སྒྲོལ་མའི་གཟུགས་སུ་བསྒོམ་པར་བྱ་ཞེས་བསྟན་ཏོ། །སྐྱེས་པ་དང་བུད་མེད་ཀྱི་དབང་པོ་ཞེས་པ་ནི་རྡོ་རྗེ་དང་པདྨ་གཉིས་ཞེས་བྱ་བའི་དོན་ཏོ། །ཕན་ཚུན་རྗེས་སུ་ཆགས་པས་སྔོན་དུ་འགྲོ་བས་ཞེས་བྱ་བའི་རིམ་པ་ཡིན་ཏེ། རེ་ཞིག་དང་པོར་རྣལ་འབྱོར་པས་ཇི་ལྟར་བཤད་པའི་མཚན་ཉིད་དང་ལྡན་པའི་ཕྱག་རྒྱ་བླངས་ལ། དེའི་ཡན་ལག་དང་ཉིང་ལག་ལ་དེ་བཞིན་གཤེགས་པ་ལྔ་ལ་སོགས་པའི་ས་བོན་དགོང་ཅིང་མིག་དང་ལྕགས་ཀྱུ་དང་བ་དན་དང་སྡིགས་མཛུབ་གཉིས་ལ་སོགས་པའི་ལག་པའི་ཕྱག་རྒྱ་དེའི་པདྨའི་ནང་དུ་བཅུག་ལ་བྱང་ཆུབ་སེམས་འཛག་པ་འདོད་པའི་གདུགས་ལ་སོགས་པའི་རྩ་རྣམས་དྲོ་བའི་རེག་པ་རྙེད་པའི་བར་དུ་བསྐུལ་ནས་རང་གི་རྡོ་རྗེའི་རྩེ་མོ་ནས་འོད་ཟེར་གྱི་ཚོགས་སྤྲོ་ཞིང༌། ལྷ་མོའི་པདྨའི་སྔར་ཞུགས་པ་དེས་དེའི་ལུས་པོའི་ནང་གསལ་བར་བྱས་ནས་པདྨ་ལས་ཀྱང་འོད་ཟེར་གྱི་ཚོགས་སྤྲོས་ཏེ། རྡོ་རྗེའི་ལམ་ནས་ཐབས་ཀྱི་ལུས་དེས་གསལ་ཞིང་འདོད་པས་འབྱུང་ན་རང་ཉིད་ཀྱིས་ཐབས་ཀྱི་རྐེ་ལ་འཁྱུད་པའི་འདོད་པ་དང་ལྡན་པའི་ཕྱག་རྒྱ་འགྱུར་ན། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱ་ཏྨཱ་ཀོ྅ ཧཱུཾ། །ཞེས་བརྗོད་ནས་རྡོ་རྗེ་
དང་པདྨ་སྦྱོར་བའི་དུས་སུ་ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་བརྗོད་པས་བསྒོམ་པ་གང་ཡིན་པ་དེ་ནི་ཕན་ཚུན་རྗེས་སུ་ཆགས་པར་རྣལ་འབྱོར་པས་བསྒོམ་པར་བྱའོ་ཞེས་བྱ་བའི་དོན་ཏོ། །འཁྱུད་པ་ལ་སོགས་པའི་ལས་རྗེས་སུ་བསྟེན་པ་སྟེ་ཞེས་པ་ནི་འཁྱུད་པ་དང་འོ་དང་འཇིབ་པ་དང་སོ་དང་སེན་མོ་གདབ་པ་ལ་སོགས་པ་རང་གི་བྱ་བ་རྫོགས་པར་བྱའོ་ཞེས་བྱ་བའི་ཐ་ཚིག་གོ །རྡོ་རྗེ་འཆང་ཆེན་པོ་ཞེས་པ་ནི་སངས་རྒྱས་ཐམས་ཅད་ཀྱི་ངོ་བོ་གཅིག་པས་སོ། །མཆོག་ཏུ་དགའ་བའི་མཚན་ཉིད་གཅིག་པ་སྟེ་ཞེས་པ་ནི་བདེ་བ་ཆེན་པོ་ཞེས་བྱའོ། །འདིར་ཞེས་བྱ་བ་ལ་སོགས་པས་རིམ་པ་གཉིས་སྒོམ་པ་པོའི་ནང་ན་བསྐྱེད་པའི་རིམ་པའི་རྣལ་འབྱོར་པ་རྣམས་ལ་ངེས་པར་གཟུང་བར་བྱ་སྟེ་སྔགས་པ་རྗེས་སུ་གཞོལ་བ་རྣམས་ཀྱི་ཞེས་པ་ནི་སྔགས་ལ་མངོན་པར་ཞེན་པ་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱིའོ། །ཆོ་ག་ནི་སྔགས་དགོད་པའི་མཚན་ཉིད་ཅན་ཞེས་བྱ་བའི་དོན་ཏོ། །ཡི་གེ་ཧཱུཾ་ཡོངས་སུ་གྱུར་པ་ལས་ནི་ཐུགས་རྡོ་རྗེའི་ས་བོན་ལས་འབྱུང་བ་རྩེ་ལྔ་པའི་རྡོ་རྗེ་བསྒོམ་པར་བྱའོ། །ཨོཾ་གྱིས་ནོར་བུའི་ཆ་བྱིན་གྱིས་བརླབ་པར་བསམ་པ་དང་ཞེས་པ་ནི་སྲ་བ་ཡིན་པས་རྣམ་པར་སྣང་མཛད་ཀྱི་ས་བོན་གྱིས་བྱིན་གྱིས་བརླབ་པར་བྱའོ། །ཨ་ལས་ཕྱག་རྒྱའི་པདྨ་མངོན་པར་འདུས་བྱས་པ་ཞེས་པ་གསུང་རྡོ་རྗེ་འཆང་གི་ས་བོན་ཤེས་རབ་ཀྱི་རང་བཞིན་གྱིས་དམ་ཚིག་གི་ཕྱག་རྒྱའི་ཆོས་འབྱུང་ས་བོན་དེ་ཉིད་ལས་བསྐྱེད་ཅིང་དེ་ཉིད་དགོད་པར་བྱ་སྟེ། དེ་ཤེས་རབ་ཀྱི་ཡན་ལག་ཡིན་པས་ཤེས་རབ་ཀྱི་རང་བཞིན་ཡིན་པའི་ཕྱིར་རོ། །རིན་ཆེན་འབྱུང་ལྡན་གྱི་ང་རྒྱལ་དང་ལྡན་པས་ནི། ནམ་མཁའི་ཁམས་ཀྱི་རང་བཞིན་གྱི་རྒྱ་ཆེ་བའི་སེམས་ཀྱིས་སོ། །ཡི་གེ་ཧཱུཾ་གི་རླུང་དང་དགའ་བ་ཉིད་ཀྱིས་རྡོ་རྗེ་དང་པདྨ་སྙོམས་པར་ཞུགས་པ་ལས་འབྱུང་བའི་ཡི་གེ་ཧཱུཾ་གི་དབུགས་བསྒོམས་པས་མཉེས་ནས་ཏེ། རང་གི་ཕྱག་རྒྱ་མཉེས་ནས་མཆོག་གི་བསྙེན་པ་ལ་སོགས་པས་སྣང་བ་ལ་སོགས་པའི་ཡེ་ཤེས་འབྱུང་བ་དང་ཡང་དག་པར་སྦྱར་ནས་སོ། །ཡི་གེ་ཕཊ་ཀྱི་སྒྲས་བྱང་ཆུབ་ཀྱི་སེམས་དབབ་པར་བྱའོ་ཞེས་པ་ནི་ལྷན་ཅིག་སྐྱེས་པ་ཞེས་བྱ་བ་བདེ་བ་ཆེན་པོ་ཉམས་སུ་
མྱོང་ཞིང་དེ་ནས་དམ་ཚིག་གི་དཀྱིལ་འཁོར་བསྐྱེད་པར་བྱ་བའི་ཕྱིར་རྡོ་རྗེའི་ལམ་ནས་པདྨའི་ནང་དུ་རང་གི་རགྟ་སྤྲོ་བར་བྱའོ། །རྡོ་རྗེའི་ཚིག་གི་དོན་འདི་ཡིན་ནོ་ཞེས་པ་ནི་ཟབ་པའི་དོན་དང་ལྡན་པའི་ཚིག་དོན་ཞེས་བྱའོ། །འདི་དག་ཐམས་ཅད་སྐུ་གསུམ་གྱི་རྟོག་པ་ཞེས་པ་ནི་སྣང་བ་ལ་སོགས་པ་ཡེ་ཤེས་གསུམ་གྱི་རྫོགས་པའི་རིམ་པ་དང་དམ་ཚིག་དང་ཡེ་ཤེས་དང་ཏིང་ངེ་འཛིན་སེམས་དཔའ་གསུམ་གྱི་བདག་ཉིད་དེ་བསྐྱེད་པའི་རིམ་པས་སོ། །རྣམ་པར་རྟོག་པ་ཙམ་ཉིད་ཡིན་གྱི་ཞེས་པ་ནི་བརྟགས་པ་ཡིན་པའི་ཕྱིར་རོ། །དེ་ཁོ་ན་ཉིད་མ་ཡིན་ནོ་ཞེས་པ་ནི་ཐབས་དང་ཤེས་རབ་ཀྱི་བདག་ཉིད་དུ་བསྒོམ་པ་ཡང་ཡིན་པ་དེ་ནི་དོན་དམ་པ་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ཁོ་ན་ཉིད་ནི་སྤྲོས་པ་དུ་མས་བསྒྲུབ་བྱ་མ་ཡིན་ཏེ་འབའ་ཞིག་ཏུ་རང་སྣང་བའི་ཕྱིར་རོ། །ཕྱག་རྒྱ་ལ་སོགས་པའི་རྒྱུའི་ཚོགས་པ་དེ་ཁོ་ན་ཉིད་གསལ་བར་བྱེད་པ་ཡིན་གྱི་བྱེད་པ་ནི་མ་ཡིན་ནོ། །དེ་ཁོ་ན་ཉིད་ནི་རང་སྣང་བ་ཁམས་གསུམ་ལ་གནས་པ་སྟེ། གློ་བུར་གྱི་དྲི་མའི་བག་ཆགས་མང་བས་མི་སྣང་ངོ་ཞེས་ཕལ་ཆེར་དུ་སྔར་བཤད་པས་འདིར་མ་བསྟན་ཏོ། །སྙོམས་པར་ཞུགས་པའི་དུས་སུ་ཞེས་བྱ་བ་ལ་སོགས་པས་སྙོམས་པར་ཞུགས་པའི་བསྒོམ་པའི་རིམ་པའི་ཁྱད་པར་བསྟན་པར་བྱ་སྟེ། དཀར་པོ་ལ་སོག་པའི་འོད་ཟེར་ལྔ་ཞེས་པ་ནི་དེ་བཞིན་གཤེགས་པ་ལྔའི་རང་བཞིན་ཡིན་པ་འམ། རྡོ་རྗེ་དང་པདྨ་དག་གིས་འདོད་པའི་གདུགས་ལ་སོགས་པའི་རྩ་ལྔ་དང་ལྡན་པ་ཞེས་བྱ་བའི་དོན་ཏོ། །ཟླ་འོད་ཅེས་བྱ་བ་ལ་སོགས་པས་ཞེས་པ་ནི་ཁ་དོག་དཀར་པོ་འོད་སྤྲོ་བ་ཞེས་བྱའོ། །ཟླ་འོད་ཅེས་བྱ་བ་ལ་སོགས་པས་མེ་ལོང་ལྟ་བུའི་ཡེ་ཤེས་ཀྱི་ངོ་བོས་ཕྱི་རོལ་དུ་ཡང་རྣམ་པ་སྣ་ཚོགས་ཀྱི་འོད་ཟེར་གྱི་ཚོགས་སྤྲོ་བ་ཞེས་བྱ་བའི་ཐ་ཚིག་གོ །ཡིད་འཕྲོག་པའི་བུད་མེད་ཅེས་པ་ནི་ཕྱག་རྒྱའི་མཚན་ཉིད་ནུ་མ་རྒྱས་པ་དང་པདྨ་ཅན་དང་བྱང་ཆུབ་ཀྱི་སེམས་འཛག་པ་དང་བདེ་བའི་སྒྲ་མཁས་པ་ལ་སོགས་པའི་རྣལ་འབྱོར་པའི་སེམས་འཕྲོག་པ་ཞེས་བྱ་བའི་དོན་ཏོ། །བསམ་པ་འདི་ནི་ཉེ་བར་མཚོན་པ་ཞེས་པ་སྟེ་གསུང་དང་ཐུགས་དང་རིན་ཆེན་དང་དོན་ཡོད་གྲུབ་པའི་རྣལ་འབྱོར་པ་རྣམས་ཀྱིས་རང་གི་རྗེས་སུ་འབྲངས་ནས། དམར་པོ་དང་སྔོན་པོ་དང་སེར་པོ་
པོ་དང་ཁ་དོག་ལྗང་གུ་དང་ལྡན་པ་སྔར་བཤད་པའི་ཡོན་ཏན་གྱི་ཚོགས་ཀྱིས་བརྒྱན་པའི་ཕྱག་རྒྱ་བསྒོམ་པར་བྱ་ཞེས་བྱ་བའི་ཐ་ཚིག་གོ །དགོངས་པ་མ་ཡིན་པས་བཤད་པའོ་ཞེས་པ་ནི་ཤིན་ཏུ་གསལ་བའི་དེ་ཁོ་ན་ཉིད་བསྟན་པའི་ཕྱིར་རོ། །སྔར་གསུངས་པའི་རྗེས་སུ་དྲན་པ་དྲུག་ཅེས་པ་ནི་རིམ་པ་གཉིས་རྗོད་པར་བྱེད་པའོ། །ངེས་པར་སྟོན་པར་བཞེད་ནས་ཞེས་པ་ནི་ཕྱོགས་གཅིག་ཏུ་ཆད་པར་བཞེད་པས་སོ། །གཞན་དུ་ན་མདོར་བསྟན་པ་དང་རྒྱས་པར་བཤད་པ་མཐུན་པར་མི་འགྱུར་རོ། །གང་གི་ཕྱིར་ལུས་རྣམ་པར་དབེན་པ་ནས་བརྩམས་ཏེ་རྗེས་སུ་དྲན་པ་དྲུག་མདོར་བསྟན་པར་བྱས་སོ། །འདི་ནི་བསྐྱེད་པའི་རིམ་པ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་སྐུ་བསྒོམས་ནས་རིམ་པ་གཉིས་ཀྱིས་འོད་གསལ་ལ་ཞུགས་ནས་བདག་ལ་བྱིན་གྱིས་བརླབས་པས་དེ་རྣམས་རྡོ་རྗེ་འཆང་ཆེན་པོའི་སྐུ་བསྒོམ་པར་བྱའོ། །དེ་ལྟར་ན་ཕྱོགས་གཅིག་གི་སྒོ་ནས་མདོར་བསྟན་པ་དང་རྒྱས་པར་བཤད་པ་རྣམས་དང་འབྲེལ་ལོ། །ལ་ལ་ནི་མ་ལུས་པས་འབྲེལ་ཏེ་ཞེས་ཟེར་ཏེ་གང་གི་ཕྱིར་བསྐྱེད་པའི་རིམ་པའི་རྣམ་པར་སྣང་མཛད་ལ་སོགས་པའི་སྐུ་བསྒོམས་ལ། རིམ་པ་དང་པོས་ངག་རྣམ་པར་དབེན་པར་བྱས་ཏེ་གཉིས་པས་འོད་གསལ་བ་ལ་འཇུག་ཅིང་གསུམ་པས་དེ་རྣམས་རྣམ་པར་སྣང་མཛད་ལ་སོགས་པ་བསྒོམས་ཏེ་བཞི་པས་འོད་གསལ་བར་བྱས་ནས་ལྔ་པས་རྡོ་རྗེ་འཆང་གི་ཕྱག་རྒྱ་ཆེན་པོའི་སྐུ་བསམ་པར་བྱའོ། །དེ་བས་ན་མདོར་བསྟན་པ་དང་རྒྱས་པར་བཤད་པ་རྣམས་མཐུན་པ་ཡིན་ནོ་ཞེས་གནས་སོ། །དེ་ཉིད་བསྟན་པར་བྱ་བའི་ཕྱིར་གནས་སྟོན་པར་མཛད་པ་ཡིན་ཏེ་ཞེས་སྨོས་ཏེ། རྒྱས་པར་བཤད་པའི་རིམ་པས་བརྩོན་པར་བཤད་དོ། །སྟོན་པ་པོ་རང་ཉིད་ཀྱིས་ཞེས་པ་ནི་འདྲི་བ་དང་ལན་འདེབས་པར་རང་ཉིད་ཀྱིས་མཛད་པ་སྟེ་ཕ་རོལ་གྱི་རྟོག་པ་ལ་དགོངས་ནས་ཞེས་ཚིག་ལྷག་མའོ། །དེ་ཉིད་ཡང་ནས་ཡང་བསླབ་པར་བྱ་བ་ཡིན་པར་ཤེས་པ་ཤིན་ཏུ་གསལ་བར་བྱ་བའི་ཕྱིར་རོ། །སྒོམ་པ་ནི་སེམས་རྩེ་གཅིག་པའི་ཏིང་ངེ་འཛིན་གྱི་ཁྱད་པར་རོ། །བྷ་ག་ནི་དོན་དམ་པའི་བདེན་པ་ཞེས་པ་ནི་ཆགས་པ་དང་བྲལ་བ་ལ་སོགས་པའི་རང་བཞིན་
བཅོམ་པས་སོ། །དེ་ཐིམ་པས་ན་ཞེས་པ་ནི་དེ་ལས་འབྱུང་བ་འམ་དེ་ལ་འཇུག་པའོ། །ཀུན་རྫོབ་ཀྱི་བདེན་པའོ་ཞེས་པ་ནི་སྒྱུ་མ་ལྟ་བུའི་སྐུའོ། །འོད་གསལ་བ་ལ་རབ་ཏུ་ཞུགས་ནས་ཞེས་པ་ནི་ཕྱག་རྒྱ་དང་ཏིང་ངེ་འཛིན་གྱི་རིམ་པས་སྟོང་པར་བྱས་ནས་སོ། །སངས་རྒྱས་ཀྱི་སྐུ་ཞེས་བྱ་བ་ལ་སོགས་པས་ཟུང་དུ་འཇུག་པའི་རིམ་པ་བསྟན་པར་བྱ་སྟེ། དོན་དམ་པའི་བདེན་པ་ལས་ལྡང་བར་བྱའོ་ཞེས་པ་ནི་མངོན་པར་བྱང་ཆུབ་པའི་རིམ་པ་ལས་ཕྱག་རྒྱ་ཆེན་པོའི་སྐུ་བླང་བར་བྱའོ། །བ་སྤུའི་བུ་ག་ཞེས་བྱ་བ་ལ་སོགས་པས་རིམ་པ་ལྔ་པ་ལ་གནས་པས་གཞན་གྱི་དོན་བསྟན་ཏོ། །དེ་ལ་གང་ལས་བྱུང་བ་དེ་ནི་བ་སྤུའི་བུ་ག་སྟེ་བ་སྤུའི་རྩ་བ་ཞེས་བྱའོ། །དེ་རྣམས་ཀྱི་མཐའ་ནི་རྩེ་མོའོ། །བ་སྤུའི་གཉི་གའི་བར་ཞེས་པ་ནི་བ་སྤུའི་བར་ལ་བྱའོ། །དེས་ན་དོན་འདི་ཡིན་ཏེ་དང་པོ་བསྐྱེད་པའི་རིམ་པས་རྣམ་པར་སྣང་མཛད་ལ་སོགས་པའི་སྐུ་བསྒོམས་ལ་རྫོགས་པའི་རིམ་པས་མི་གནས་པའི་མྱ་ངན་ལས་འདས་པའི་དབྱིངས་ཀྱི་རང་བཞིན་དེ་ཁོ་ན་ཉིད་ཐོབ་ནས་དེ་བཞིན་གཤེགས་པ་ཐམས་ཅད་སྤྲོ་བ་སྔོན་དུ་འགྲོ་བར་གཞན་གྱི་དོན་བྱའོ་ཞེས་ཚིག་གི་དོན་ཏོ། །མཁས་པ་ནི་རང་བཞིན་ཤེས་པ་ཞེས་བྱ་བ་ལ་སོགས་པའི་རིམ་པ་གཉིས་ཐོབ་ནས་རྡོ་རྗེ་འཆང་གི་གཟུགས་ཀྱི་རང་བཞིན་ཤེས་པས་སྤྲོ་བར་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ལ་སོགས་པས་སྤྲོ་བའི་ཁྱད་པར་བཤད་པར་བྱ་སྟེ། གཏི་མུག་ལ་སྤྱོད་པ་ཞེས་བྱ་བ་ལ་སོགས་པས་གཏི་མུག་གི་རིགས་ཅན་རྣམས་སངས་རྒྱས་སྤྲོ་ཞིང་གཏི་མུག་གི་དྲི་མ་དེ་ལས་བཟློག་སྟེ། རྣམ་པར་སྣང་མཛད་དུ་གྱུར་པས་འོད་ཟེར་གྱི་སྦྱོར་བས་དེ་རྣམས་རང་གི་རྡོ་རྗེའི་སྐུ་ལ་འཇུག་པར་བྱའོ་ཞེས་གཞན་གྱི་དོན་ཕུན་སུམ་ཚོགས་པ་སྒྲུབ་པར་བསྟན་ཏོ། །དེ་བཞིན་དུ་གསུང་རྡོ་རྗེ་ལ་སོགས་པ་ལ་ཡང་ཤེས་པར་བྱའོ། །མི་འཇིགས་པའི་ངོ་བོ་ཉིད་ཡིན་པའི་ཕྱིར་རོ་ཞེས་པ་ནི། བརྟན་པ་སྙིང་པོ་ཁོང་སྟོང་མེད། །གཅད་མེད་དབྱེར་མེད་མཚན་ཉིད་དེ། །སྲེད་པ་མེད་ཅིང་འཇིག་མེད་པ། །སྟོང་པ་ཉིད་ནི་རྡོ་རྗེར་བཤད། །ཅེས་འབྱུང་བས་སོ། །དེ་ལ་སྔར་བཤད་པའི་རིམ་པས་ཞེས་པ་ནི་འདོད་ཆགས་ཀྱི་སྤྱོད་པ་དང་ལྡན་པ་སེམས་ཅན་གྱི་ཁམས་སྦྱང་བའི་རིམ་པས་སྤྲོ་ཞིང་བསྡུ་བར་བྱའོ། །རྡོ་རྗེ་
སེམས་དཔའ་ནི་རྡོ་རྗེ་འཆང་ཆེན་པོའོ་ཞེས་པ་ནི། ལྔ་སྤོང་བ་དང་ལྔ་རིག་པ། །རྡོ་རྗེ་ཞེས་བྱར་བཤད་པ་ཡིན། །དེ་ལ་སེམས་དཔའ་ནི་རང་བཞིན་གང་ལ་ཡོད་པ་དེ་ལ་རྡོ་རྗེ་སེམས་དཔའ་ཞེས་བྱའོ། །སྐུ་ནི་སའོ་ཞེས་པ་ནི་ཚིག་ཕྲད་ཀྱི་དོན་དུ་མ་ཡིན་པས་སོ། །ལ་སྟེ་འཛིན་ཅིང་བདག་གིར་མཛད་པས་ན་ཞེས་པ་ནི་རེ་བ་ཐམས་ཅད་ཡོངས་སུ་རྫོགས་པས་སོ། །རིན་ཆེན་འབྱུང་ལྡན་ནི་ནམ་མཁའི་མཛོད་ཀྱི་ཉེ་བར་མཚོན་པས་སོ། །སངས་རྒྱས་ཐམས་ཅད་ཀྱི་རང་བཞིན་ཡིན་པས་ན་རྡོ་རྗེ་འཆང་ཆེན་པོའོ། །དམ་ཚིག་གིས་ཁྲོ་བར་མཛད་པས་ན། ཞེས་པ་ནི་དམ་ཚིག་ཉམས་པ་ལ་ཁྲོས་པའི་སྟོབས་ཀྱིས་ངེས་པར་བསྡམས་པའམ་སྦྱང་བར་བྱེད་པའོ། །དམ་ཚིག་གསོས་པ་ལ་བཅོམ་ལྡན་འདས་དོན་ཡོད་གྲུབ་པ་དབང་བྱེད་པ་ཡིན་ནོ་ཞེས་བླ་མའི་རྒྱུད་ཡིན་ནོ། །ཞེ་སྡང་ལས་བྱུང་བའི་ཕྱིར་ཁྲོ་བོ་ནི་མི་བསྐྱོད་པ་ཞེས་བྱའོ། །དེ་ནི་སངས་རྒྱས་རྗེས་སུ་དྲན་པ་ལ་སོགས་པ་ལྔ་པོས་རིམ་པ་གཉིས་སྔར་མདོར་བསྟན་པས་ནི་རྒྱས་པར་བཤད་པ་ཡིན་ནོ། །དམ་ཚིག་གི་རྗེས་སུ་དྲན་པས་ལས་ཀྱི་རྒྱལ་བ་མཆོག་གི་ཡན་ལག་གཅིག་ཚིམ་པར་བྱ་བའི་ཆོ་ག་བསྟན་པར་བྱ་སྟེ། དམ་ཚིག་ཐམས་ཅད་སྤྲུལ་པར་མཛད་པས་ན་དམ་ཚིག་ནི་རྡོ་རྗེ་འཆང་ཆེན་པོའོ། །ཡེ་ཤེས་ཀྱི་སྐུའི་རང་བཞིན་གྱི་ཞེས་པ་ནི་ཡེ་ཤེས་ལྔའི་རང་བཞིན་གྱི་ལྷའི་སྐུ་ཞེས་བྱ་བའི་དོན་ཏོ། །བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བའི་ཡེ་ཤེས་ཀྱི་སྐུ་འདིར་འཆད་པར་འདོད་པ་མ་ཡིན་ཏེ། དེ་རྫོགས་པའི་རིམ་པ་ཡིན་པས་བདུད་རྩིས་ཚིམ་པའི་ཆོ་ག་མི་རིགས་པའི་ཕྱིར་རོ། །དགོས་ན་ཡང་རྫོགས་པའི་རིམ་པ་ཉམས་པར་འགྱུར་རོ། །དེའི་ཕྱི་ནས་རྗེས་སུ་དྲན་ཞིང་ཞེས་པ་ནི་ཏིང་ངེ་འཛིན་གཉིས་ཀྱིས་རྫོགས་པ་རྡོ་རྗེ་འཆང་ནི་སྐུ་ཕྱི་མའི་དུས་སུའོ། །སྤྲུལ་པའི་སྐུའོ་ཞེས་པ་ནི་སྤྱན་མ་ལ་སོགས་པ་ལྷ་མོ་བཞིས་བསྐུལ་བ་དང༌། མི་བསྐྱོད་པ་ལ་སོགས་པ་དེ་བཞིན་གཤེགས་པ་ལྔས་བསྟོད་པ་ལས་འབྱུང་བའོ། །དེ་རྒྱས་པར་བྱ་བའི་ཕྱིར་ཞེས་པ་ནི་དེ་ཚིམ་པའི་ཕྱིར་རོ། །ལྕེ་རྡོ་རྗེ་ནི་རྡོ་རྗེ་ལྟ་བུའི་ལྕེ་བསྒོམས་ནས་སོ། །རྐན་གྱི་པདྨ་ཞེས་པ་ནི་རྐན་གྱི་ཕྱོགས་སོ། །རྡོ་རྗེ་པདྨ་ལ་སོགས་པས་དཔེ་བསྟན་ཏོ། །ཀླད་རྒྱས་ན་
གནས་པའི་བདུད་རྩི་ཞེས་པ་ནི་ཚངས་པའི་བུ་གའི་ནང་ན་གནས་པའི་བྱང་ཆུབ་ཀྱི་སེམས་སོ། །ཐིགས་པའི་བསྐུལ་བ་དབབ་པའི་ཆ་རྣམས་ཀྱིས་ཞེས་པ་ནི་ཨོཾ་གྱིས་ཡི་གེ་འབར་བས་བཞུས་པ་དང་དབྱངས་བཅུ་དྲུག་གི་བདག་ཉིད་ཀྱི་ཟླ་བའི་དཀྱིལ་འཁོར་ཞེས་བྱའོ། །གཟུགས་ཀྱི་ཕུང་པོ་ལ་སོགས་པ་ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ཀྱི་བདག་ཉིད་ཀྱི་ལུས་སོ། །སེམས་དང་སེམས་ལས་བྱུང་བ་རྣམས་ཞེས་པ་ནི་སེམས་དང་སེམས་ལས་བྱུང་བའི་རང་བཞིན་ཏེ། རྣམ་པར་ཤེས་པ་ལུས་བདེ་བར་གྱུར་ན་སེམས་ལ་ཡང་ཡིད་བདེ་བ་བསྐྱེད་པའི་ཕྱིར་རོ། །ཚིམ་པར་བྱ་ཞེས་པ་ནི་ཚིམ་པ་ཉིད་མཆོད་པ་ཞེས་དགོངས་པའོ། །བདུད་རྩི་དབབ་པ་ཞེས་བྱ་བ་ལ་སོགས་པས་བདུད་རྩི་མྱང་བའི་ཆོ་ག་ལ་ཕན་ཡོན་བསྟན་ཏོ། །ཚིག་གི་དོན་འདི་ཡིན་ཏེ། ཕྲ་མོའི་རྣལ་འབྱོར་དང་བཟླས་པ་དང་འོད་དུ་ཞུ་བ་དང་ལྷ་མོས་བསྐུལ་བས་ལྡང་བ་དང༌། དེ་བཞིན་གཤེགས་པས་བསྟོད་པའི་འོག་ཏུ་སེམས་དུབ་པར་འགྱུར་ན་མཐོ་གང་ཙམ་བོར་ནས་རང་གི་སྤྱི་བོར་ཆ་བཅུ་དྲུག་ཡོངས་སུ་གྱུར་པ་ལས་གདུགས་དཀར་པོ་ལྟ་བུ་རྒྱས་པ་བདུད་རྩི་ལྔའི་རང་བཞིན་གྱི་ཟླ་བའི་དཀྱིལ་འཁོར་དཀར་པོ་བསམས་ལ། དེའི་དཀྱིལ་དུ་ཐུར་དུ་ཁ་བལྟས་པ་ཡི་གེ་ཨོཾ་འབར་བ་དགོད་དེ། ལྕེའི་རྡོ་རྗེ་རྐན་གྱི་ཕྱོགས་སུ་ཡང་དག་པར་སྦྱར་ཞིང་ཡི་གེ་ཨོཾ་དེའི་འབར་བས་དེ་བཞུས་པར་འགྱུར་བ་ཚངས་པའི་སྒོ་ནས་འཛག་པ་ལྕེས་མྱང་བར་བསམས་ལ་ཀུན་དུ་སྤྱོད་པའི་རིམ་པས་ལུས་པོ་ཐམས་ཅད་ཚིམ་པར་འགྱུར་བ་བསྒོམ་པར་བྱའོ། །དེའི་ཕན་ཡོན་ནི། རྒ་བ་མ་ཡིན་གཉེར་བ་མིན། །དེ་བཞིན་དུས་མེད་འཆི་བ་མེད། །རྡོ་རྗེ་སེམས་དཔའ་བཞིན་དུ་དེའི་ཚེ་དང་ནད་མེད་གཞོན་པར་འགྱུར་ཞེས་འབྱུང་ངོ༌། །དེ་ནི་ལས་ཀྱི་རྒྱལ་བ་མཆོག་གི་ཏིང་ངེ་འཛིན་ཏོ། །དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་གྱི་དང་པོའི་ཡན་ལག་བཤད་པར་བྱ་སྟེ། མཆོག་སྒྲུབ་པ་ལ་གནས་པ་ཞེས་པ་ནི་སྙོམས་པར་འཇུག་པ་ལ་གནས་པའོ། །ཕྱིའི་བུད་མེད་དང་ཡང་དག་པར་སྦྱོར་བས་ཞེས་པ་ནི་ལེགས་པར་སྦྱངས་པ་ཤིན་ཏུ་སློབ་པ་དམ་ཚིག་གི་ཕྱག་རྒྱ་དང་འབྲེལ་པས་སོ། །བདུད་རྩི་འབྱིན་པའི་དགོས་པ་བསྟན་པར་བྱ་བའི་ཕྱིར་ཞེས་པ་ནི་སྙོམས་པར་འཇུག་པ་ལས་འབྱུང་
བའི་བྱང་ཆུབ་ཀྱི་སེམས་སྤྲོ་བར་བྱའོ། །ཕྱུང་བའི་དཀྱིལ་འཁོར་ཞེས་བྱ་བ་ནི་བཛྲ་དྷྲྀ་ཀ་ཅེས་བྱ་བ་ལ་སོགས་པའི་ཕྱུང་བའི་སྔགས་ཀྱི་ངོ་བོ་བྱང་ཆུབ་སེམས་ཀྱི་ཐིག་ལེ་རྣམས་ཀྱིས་སྤྲུལ་པའི་དཀྱིལ་འཁོར་ཞེས་བྱ་བའི་དོན་ཏོ། །རང་གི་བྱ་བ་ལ་དབང་བྱེད་པས་ན་དབང་པོའོ་ཞེས་པ་ནི་དཀྱིལ་འཁོར་པ་སྤྲོ་བའི་ཕྱིར་བདག་པོ་ཡིན་པས་སོ། །སྐྱེས་པ་དང་བུད་མེད་ཀྱི་བདག་པོ་དག་སྟེ་ཞེས་པ་ནི་སྔར་བཤད་པའི་རིམ་པས་སྔགས་ཀྱི་ཡི་གེ་མ་ལུས་པ་དགོད་པ་གསང་བའི་རྡོ་རྗེ་དང་པདྨའོ། །འཁྱུད་པ་ལ་སོགས་པའི་སྦྱོར་བ་ལ་བྱང་བའོ་ཞེས་པ་ནི་དཔལ་རྡོ་རྗེ་གདན་བཞིའི་རྒྱུད་ལས་གསུངས་པའི་སྒོང་ཐོག་ལ་སོགས་པའི་བྱ་བ་ལ་མཁས་པའོ། །རང་གི་ས་བོན་ཞེས་པ་ནི་བྱང་ཆུབ་ཀྱི་སེམས་སོ། །རྩ་སྦུབས་སྟོང་བདུན་ཅུ་རྩ་གཉིས་བསྐུལ་ནས་ཞེས་པ་ནི། རྡོ་རྗེ་དང་པདྨ་སྙོམས་པར་འཇུག་པའི་མཚན་ཉིད་ཀྱི་སྦྱོར་བས་སོ། །སྙིང་གར་ཕྱིན་པ་ཞེས་པ་ནི་རྩ་ཐམས་ཅད་ཀྱི་གཙོ་བོར་གྱུར་པ་སྙིང་ག་ནི་འདོད་པའི་གདུགས་ཏེ་རྩ་དབུ་མའོ། །དེ་ལས་ཐོབ་པའི་བྱང་ཆུབ་སེམས་ཞེས་བྱའོ། །རྡོ་རྗེའི་ལམ་ནས་ཕབ་པའོ་ཞེས་པ་ནི་སྣང་བ་ལ་སོགས་པའི་ཡེ་ཤེས་གསུམ་མྱོང་ཞིང་རྟགས་ལྔ་མཚོན་པ་སྔོན་དུ་འགྲོ་བའི་འོད་གསལ་བ་ལ་འཇུག་སྟེ། བཛྲ་དྷྲྀ་ཀ་ཅེས་བྱ་བ་ལ་སོགས་པ་ཕྱུང་བའི་སྔགས་ཀྱི་བདག་ཉིད་ཕཊ་ཀྱི་སྒྲ་སྟེ་སྤྲོ་བར་བྱའོ། །དེ་ནས་ཞེས་བྱ་བ་ལ་སོགས་པས་བྱང་ཆུབ་ཀྱི་སེམས་སྤྲོ་བའི་འབྲས་བུ་བསྟན་པར་བྱ་སྟེ། བུ་དང་ཚ་བོ་ལ་སོགས་པའི་དཀྱིལ་འཁོར་ཞེས་པ་ནི་རྡོ་རྗེ་འཆང་ཆེན་པོ་ལས་འབྱུང་བའི་ཕྱིར་བུ་ནི་དེ་བཞིན་གཤེགས་པ་ལྔའོ། །དེའི་སྤྲུལ་པ་ཡིན་པ་དང་དེའི་བྱ་བ་བྱེད་པས་ཚ་བོ་ནི་སའི་སྙིང་པོ་ལ་སོགས་པ་བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་དཀྱིལ་འཁོར་ནི་རང་རང་གི་ཕྱུང་བའི་སྔགས་ལས་འབྱུང་བའོ། །དེ་ལྟར་གྱུར་པའི་དཀྱིལ་འཁོར་ནི་བརྒྱན་པ་ཞེས་བྱ་བ་ལ་ཆོས་འབྱུང་བའི་ནང་དང་དམ་ཚིག་གི་དཀྱིལ་འཁོར་དང་སྒྲུབ་པའི་དཀྱིལ་འཁོར་ལ་ཡང་རྒྱན་དུ་གྱུར་པའོ། །སངས་རྒྱས་ཉིད་རབ་ཏུ་སྟེར་བས་ན་སངས་རྒྱས་ཀྱི་བུར་གྱུར་པའོ། །དེ་ལྟར་ཞེས་བྱ་བ་ལ་སོགས་པས་ཉེ་བར་བསྡུས་པ་བསྟན་ཏོ། །དགོངས་པས་བཤད་པ་ཞེས་པ་ནི་འགལ་བའི་
སྒྲའི་སྒོ་ནས་དཀྱིལ་འཁོར་གྱི་དེ་ཁོ་ན་ཉིད་བསྟན་པས་སོ། །དཀྱིལ་འཁོར་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །རྣལ་འབྱོར་ནི་ཐུགས་རྗེ་ཆེན་པོ་བསྒོམ་པ་སྔོན་དུ་འགྲོ་བ་ཁྱད་པར་གྱི་གནས་བཟུང་བ་དང་བགེགས་བསྐྲད་པ་དང༌། སྟོང་པ་ཉིད་བསྒོམ་པ་དང༌། ཡེ་ཤེས་ཀྱི་ས་གཞི་བསྒོམ་པ་དང༌། གཞལ་ཡས་ཁང་པ་བསྐྱེད་པ་དང༌། ལྷག་པར་མོས་པའི་དཀྱིལ་འཁོར་བསྒོམ་པ་དང༌། དོན་དམ་པའི་དཀྱིལ་འཁོར་བསྒོམ་པ་དང༌། གདན་ལ་སོགས་པའི་དབྱེ་བ་དང༌། ཆོས་ཀྱི་དབྱིངས་ཀྱི་སྔགས་ཀྱིས་བྱིན་གྱིས་བརླབ་པ་དང༌། ཟླ་བའི་དཀྱིལ་འཁོར་བསྒོམ་པ་དང་། །དེ་ལ་ས་བོན་དགོད་པ་དང༌། །དེ་ཡོངས་སུ་གྱུར་པ་ལས་ཕྱག་མཚན་དང༌། དེ་ཡོངས་སུ་གྱུར་ནས་རྡོ་རྗེ་སེམས་དཔའ་ལ་སོགས་པའི་སྐུ་རྫོགས་པ་དེ་རྣལ་འབྱོར་རོ། །ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་གཉིས་བསྒོམ་པ་ནི་རྗེས་སུ་རྣལ་འབྱོར་རོ། །ཕུང་པོ་དང་ཁམས་དང་སྐྱེ་མཆེད་དང༌། དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའི་ས་བོན་གྱི་བྱིན་གྱིས་བརླབས་པ་ནི་ཤིན་ཏུ་རྣལ་འབྱོར་རོ། །དེ་རྫོགས་ནས་གང་ཞིག་བྱ་བ་ཡིན་པ་དེ་ཞེས་པ་ནི་སྐུ་ལ་སོགས་པ་བྱིན་གྱིས་བརླབས་པའི་མཚན་ཉིད་ཅན་གྱི་རྣལ་འབྱོར་ཆེན་པོའོ། །དེ་བསྟན་པའི་ཕྱིར་ཞེས་པ་ནི་གསལ་བར་བཤད་པའི་ཕྱིར་རོ། །རྣམ་པར་སྣང་མཛད་ལ་སོགས་པ་ཞེས་པ་ནི་གཞུང་གི་འདི་སྐད་བཤད་པར་བྱ་སྟེ། མགོ་བོ་དང་ལྐོག་མ་དང་སྙིང་གའི་ཕྱོགས་སུ་ཟླ་བ་དང་པདྨ་དང་རྡོ་རྗེ་ཡི་གེ་གསུམ་ལས་འབྱུང་བ་བསྒོམས་ནས། དེའི་སྟེང་དུ་དཀར་པོ་དང་དམར་པོ་དང་སྔོན་པོའི་ཡི་གེ་ཨོཾ་ལ་སོགས་པ་གསུམ་པོ་དེ་ཉིད་བཀོད་ལ། དེ་རྣམས་ལས་བྱུང་བའི་འོད་ཟེར་གྱི་ཚོགས་ལས་སྤྱན་མ་དང་ན་བཟའ་དཀར་མོ་དང་མཱ་མ་ཀཱིའི་ཚོགས་སྤྲོས་ལ་དེས་འོག་མིན་དང་བདེ་བ་ཅན་དང་མངོན་པར་དགའ་བའི་སངས་རྒྱས་ཀྱི་ཞིང་ན་བཞུགས་པ། རྣམ་པར་སྣང་མཛད་དང་འོད་དཔག་ཏུ་མེད་པ་དང་མི་བསྐྱོད་པ་རྣམས་ཚིག་སྙན་པ་དང་རོལ་པའི་ཉམས་ཀྱིས་གསོལ་བ་འདེབས་ཤིང་རྗེས་སུ་ཆགས་པར་བྱས་ལ་ཕྱག་གི་ཞགས་པས་འཁྱུད་ཅིང་འགུགས་ཏེ་མདུན་དུ་གཞལ་ཡས་ཁང་པའི་ཤར་ཕྱོགས་ཀྱི་སྒོར་སྣ་
ཚོགས་པདྨ་དང་ཟླ་བའི་དཀྱིལ་འཁོར་གྱིས་སྟེང་དུ་བཞུགས་ནས། མཆོད་པ་ལྔས་མཆོད་ཅིང་མཉེས་པ་བྱས་ནས་སྤྱན་མ་ལ་སོགས་པ་དེ་དང་ལྷན་ཅིག་ཏུ་འཇུག་པར་བྱ་སྟེ། དཔལ་ལྡན་རྡོ་རྗེ་གསུང་གི་ལམ། །ཞེས་བྱ་བའི་གསོལ་བ་གདབ་པ་སྔོན་དུ་འགྲོ་བས་ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙི་ཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་ལ་སོགས་པ་སྔགས་ཀྱི་ཚིག་རྣམས་ཀྱིས་བརྟན་པར་བྱས་ལ། ཚིགས་སུ་བཅད་པ་འདི་རྣམས་ཀྱིས་ང་རྒྱལ་བྱའོ། །རྣམ་པར་སྣང་མཛད་དེ་ཞེས་པ་ནི་ལུས་རྣམ་པར་དག་པའི་རང་བཞིན་ཡིན་པས་སོ། །དུས་གསུམ་ཞེས་པ་ལ་སོགས་པས་ལོངས་སྤྱོད་རྫོགས་པ་དང་སྤྲུལ་པའི་སྐུའི་རང་བཞིན་གྱིས་རྣམ་པར་སྣང་མཛད་ཀྱི་དཀྱིལ་འཁོར་དུ་ཞུགས་པས་དེའི་རང་བཞིན་གྱི་ང་རྒྱལ་བྱའོ་ཞེས་བསྟན་ཏོ། །སྤྲུལ་པའི་སྐུ་གང་ཞིག་ཡོད་པ་ཞེས་པ་ནི་སེམས་ཅན་གྱི་དོན་མཛད་པའི་ཕྱིར་དང་འབྱུང་བའི་སྐུ་ནི་སྤྲུལ་པའི་སྐུ་ཞེས་བྱའོ། །གཞན་དུ་ན་རྟག་ཏུ་དགའ་བ་ནམ་མཁའ་དང་མཚུངས་པ་མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་རང་བཞིན་གྱི་དེ་བཞིན་གཤེགས་པ་རྣམས་ལ་སྐུ་དང་འབྲེལ་བ་ཅི་དགོས་སོ། །ཇི་སྐད་དུ། དམར་དང་ལྗང་གུ་དུར་ཁ་སྟེ། །ཁྱེད་ལ་སྐུ་མདོག་ཡོད་པ་མིན། །དཀར་ནག་སེར་པོ་མ་ཡིན་པའི། །ཁ་དོག་ལས་འདས་ཁྱོད་ལ་འདུད། །ཆེན་པོ་མ་ཡིན་ཐུང་བ་མིན། །རིང་པོ་མ་ཡིན་ཟླུམ་པོ་མིན། །ཚད་མེད་ཀྱི་ནི་ཚུལ་ཐོབ་པའི། །ཚད་མེད་ཁྱོད་ལ་ཕྱག་འཚལ་བསྟོད། །ཅེས་འབྱུང་ངོ༌། །བདག་གི་སློབ་མར་གྱུར་པ་ཡང༌། །ཞེས་པ་ནི་སློབ་མར་འདོད་པའི་ཡང་ངོ༌། །ལུས་ནི་ལྟ་བུའི་ངོ་བོར་གྱུར་ཅིག་པ་སྟེ་ཞེས་པ་ནི་རྣམ་པར་སྣང་མཛད་ཀྱི་རང་བཞིན་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་བརྒྱན་པ། དཔེ་བྱད་བཟང་པོ་བརྒྱད་ཅུ་དང་ལྡན་པར་གྱུར་ཅིག །གསོལ་བ་ནི་གསོལ་པ་འདེབས་པར་བྱའོ། །དེའི་ངོ་བོ་ཉིད་དུ་གྱུར་པས་ན་ཞེས་པ་ནི་གསུང་རབ་ཡན་ལག་བཅུ་གཉིས་ཀྱི་རང་བཞིན་ཡིན་པས་ན་འོད་དཔག་ཏུ་མེད་པའོ་ཞེས་གྲགས་སོ། །བྱང་ཆུབ་ཀྱི་སེམས་ཀྱི་ངོ་བོ་ཡིན་པས་ན་རྡོ་རྗེའོ། །གསུང་རབ་ཐམས་ཅད་ཀྱི་ཆོས་ཀྱི་རང་བཞིན་ཡིན་པས་ན་ཆོས་སོ། །རྡོ་རྗེ་ཡང་ཡིན་ལ་ཆོས་ཀྱང་ཡིན་པས་ན་རྡོ་རྗེ་ཆོས་ཏེ་ངག་གི་དབང་ཕྱུག་
ཅེས་བྱ་བའི་དོན་ཏོ། །ངེས་པ་ནི་མིང་གི་རྣམ་གྲངས་ཐམས་ཅད་ཀྱི་སྒོ་ནས་བཤད་པ་ནི་གསུང་བ་སྟེ་ངེས་པར་བཤད་པའོ། །ཡང་དག་པ་ཞེས་པ་ནི་ཕྱིན་ཅི་མ་ལོག་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཉེ་བར་མཚོན་པ་ཙམ་སྟེ་ཞེས་པ་ནི་ངེས་པའི་ཚིག་འབའ་ཞིག་ཏུ་མ་ཡིན་ནོ། །དེས་ཞེས་བྱ་ལ་སོགས་པ་ནི་དེ་ལ་ཆོས་སོ་སོ་ཡང་དག་པར་རིག་པ་ནི་གསུང་རབ་ཡན་ལག་བཅུ་གཉིས་ཀྱི་ཆོས་མ་ལུས་པ་ཁ་ཏོན་དུ་མངའ་བའོ། །དོན་སོ་སོ་ཡང་དག་པར་རིག་པ་ནི་དེའི་བརྗོད་པར་བྱ་བའི་དོན་དྲན་པའོ། །སྤོབས་པ་སོ་སོ་ཡང་དག་པར་རིག་པ་ཞེས་པ་ནི་སྔར་མ་བྱུང་བའི་གཞལ་བྱ་རྩོམ་པར་བྱེད་པ་སྟེ། ཇི་སྐད་དུ། སར་ཞིང་སར་པའི་གཞལ་བྱ་ནི། །རྩོམ་པའི་ཤེས་རབ་སྤོབས་པར་བཤད། །ཅེས་འབྱུང་ངོ༌། །ཆོས་འཛིན་པ་དང་འདྲ་བར་གྱུར་ཅིག་པའོ་ཞེས་པ་ནི་ཡན་ལག་དྲུག་ཅུ་དང་ལྡན་པ་པདྨའི་འདབ་མ་དང་མཚུངས་པ་མངའ་བ་གཡས་སུ་འཁྱིལ་པའི་དུང་དང་འདྲ་བའི་ལྐོག་མའི་ཕྱོགས་སུ་གནས་པ་གསུང་རྣམས་སུ་གྱུར་ཅིག་ཅེས་གསོལ་བ་འདེབས་པའོ། །མི་བསྐྱོད་པའོ་ཞེས་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་སེམས་ཡིན་པས་སོ། གློ་བུར་གྱི་དྲི་མ་སོ་སོར་སྣང་བ་དང་ལྡན་པས་འཁོར་བར་འཁོར་བར་འགྱུར་རོ། །སེམས་འདིའི་རང་བཞིན་འོད་གསལ་ཏེ། གློ་བུར་པ་རྣམས་དྲི་མ་ཡིན། །ཆུ་ཁམས་གསེར་དང་ནམ་མཁའ་ཡི། །དག་པ་བཞིན་དུ་དག་པར་འདོད། །ཅེས་འབྱུང་ངོ༌། །གསང་བ་ནི་གཉིས་སུ་མེད་པའི་ཡེ་ཤེས་སོ་ཞེས་པ་ནི་ཆོས་ཀྱི་དབྱིངས་གྱི་ཡེ་ཤེས་སོ། །དེ་གསུང་ཞིང་སྟོན་པར་མཛད་པ་སྟེ་ཞེས་པ་ནི་དེ་སྟོན་པར་མཛད་པས་ན་གུ་ཧྱ་ཀ་ནི་གསང་བ་སྟེ་བཅོམ་ལྡན་འདས་རྣམ་པར་སྣང་མཛད་ལ་སོགས་པའོ། །དེ་ཁོ་ན་ཉིད་བསྟན་པ་རྣམས་ཀྱི་གཙོ་བོར་གྱུར་པ་ཞེས་པ་ནི་དེ་རྣམས་ཀྱི་བདག་པོ་ཡིན་པས་ཐུགས་རྡོ་རྗེའོ། །བློ་ནི་རེག་བྱ་རྡོ་རྗེའི་ཞེས་པ་ནི་ཤེས་རབ་ཀྱི་རང་བཞིན་ཡིན་པའི་ཕྱིར་རོ། །ཀུན་ནས་བཟང་བས་ན་ཞེས་པ་ལ་ཐོག་མ་དང་བར་མ་དང་ཐ་མར་བཟང་བ་ནི་དེ་དག་གང་ལས་འབྱུང་བ་དེ་ནི་ཀུན་དུ་བཟང་པོ་སྟེ་དཔལ་ཐུགས་ཀྱི་རྡོ་རྗེ་འཆང་བའོ། །དེ་ལྟ་བུའི་ཞེས་བྱ་བ་ལ་སོགས་པས་ཉོན་མོངས་པ་དང༌། ཤེས་བྱའི་སྒྲིབ་པ་དང་བྲལ་བཟླ་བའི་
དཀྱིལ་འཁོར་རྫོགས་པ་དང་འདྲ་བར་བདག་ལ་ཡང་སེམས་གྱུར་ཅིག་ཅེས་གསོལ་བ་འདེབས་པས་ང་རྒྱལ་བྱའོ། །སྒྲ་ཇི་བཞིན་པའོ་ཞེས་པ་ནི་དང་པོ་སྦྱོར་བའི་ཏིང་ངེ་འཛིན་གྱི་ཕྱོགས་གཅིག་རྣལ་འབྱོར་ཆེན་པོའི་མཚན་ཉིད་འཆང་བར་འདོད་པའི་ཕྱིར་རོ། །དེ་ནི་སོགས་པའི་སྒྲས་ཤེས་པར་བྱའོ། །ད་ནི་ཞེས་བྱ་བ་ལ་སོགས་པས་བསྐྱེད་པའི་རིམ་པའི་རྣལ་འབྱོར་པ་རྣམས་ལ་སྐུ་ལ་སོགས་པ་བྱིན་གྱིས་བརླབ་པ་བསྟན་ནས་རྫོགས་པའི་རིམ་པའི་རྣལ་འབྱོར་པ་རྣམས་ལ་ཡང་བསྟན་པར་བྱ་སྟེ། སྒྲུབ་པའི་མཆོག་ལ་གནས་པའི་ཞེས་པ་ནི་རྫོགས་པའི་རིམ་པའི་རྣལ་འབྱོར་པའོ། །རང་བཞིན་ཡོངས་སུ་ཤེས་པ་ཙམ་གྱིས་ཞེས་པ་ནི་ཁམས་གསུམ་ལ་གནས་པའི་སེམས་ཅན་གྱི་ཁམས་ཀྱི་ལུས་ལ་སོགས་པ་དང༌། བདག་གི་ཡང་ལུས་ལ་སོགས་པ་གང་ཡིན་པ་དེ་དག་ཐམས་ཅད་ངོ་བོ་ཉིད་དུ་མཉམ་པ་ཡིན་ཏེ། ཆོས་ཀྱི་དབྱིངས་ཀྱི་རང་བཞིན་ཡིན་པས་སོ། །སྒོ་ང་ལས་སྐྱེས་པ་དང་ཞེས་པ་ནི། འདབ་ཆགས་བྱ་ལ་སོགས་པའོ། །མངལ་ནས་སྐྱེས་པ་དང་ཞེས་པ་ནི་མི་དང་ཕྱུགས་དང་རི་དགས་ལ་སོགས་པའོ། །དྲོད་གཤེར་ལས་སྐྱེས་པ་དང་ཞེས་པ་ནི་སྦྲང་བུ་ལ་སོགས་པའོ། །བརྫུས་ཏེ་སྐྱེས་པ་དང་ཞེས་པ་ནི་དམྱལ་བ་དང་ཡི་དགས་དང་ལྷ་དང་ལྷ་མ་ཡིན་རྣམས་སོ། །བཤད་མ་ཐག་པ་རྣམས་ཀྱིའོ་ཞེས་པ་ནི་རྣམ་པ་བཞིའི་སེམས་ཅན་རྣམས་ཀྱི་སྐྱེ་གནས་ཞེས་བྱ་བའི་ཐ་ཚིག་གོ །འདི་ནི་ལུས་སོ་ཞེས་པ་ནི་རྐང་པའི་དཀྱིལ་ནས་བརྩམས་ཏེ་མགོ་བོའི་བར་དུ་བཤང་གཅི་ལ་སོགས་པའི་རྫས་རྣམས་ཀྱིས་གང་བའོ། །འདི་ནི་དག་གོ་ཞེས་པ་ནི་རྣམ་པ་བཞིའི་གནས་ངན་ལེན་པ་ལ་སོགས་པའི་རྟོག་པ་བཞི་དང་བཅས་པའོ། །འདི་ནི་སེམས་སོ་ཞེས་པ་ནི་རྣམ་པར་ཤེས་པ་བརྒྱད་ཀྱི་མཚན་ཉིད་རྣམ་པ་སྣ་ཚོགས་པའི་སེམས་ལས་བྱུང་བའི་ཆོས་དང་ལྡན་པའོ། །བརྟགས་པ་ཞེས་བྱ་བ་ལ་སོགས་པས་དེ་ལྟར་གྱུར་པ་ལུས་ལ་སོ་སོར་སྣང་བའི་སེམས་ནི་ཁམས་གསུམ་པ་དང༌། བདག་གིས་གང་ཡིན་པ་དེ་ནི་འདྲ་བ་ཡིན་ནོ། །ཅིའི་ཕྱིར་ཞེ་ན་ཞེས་པས་གཏན་ཚིགས་བཤད་པར་བྱ་སྟེ། དེ་ཁོ་ན་ཉིད་རིག་པ་ཞེས་པ་ནི་རྫོགས་པའི་རིམ་པ་ལ་གནས་པའི་རྣལ་འབྱོར་པ་
རྣམས་ཀྱིའོ། །གང་གི་ཕྱིར་སེམས་དེ་ནམ་མཁའ་དང་འདྲ་བའི་ཞེས་པ་ནི་ནམ་མཁའི་དཀྱིལ་དང་མཚུངས་པའོ། །འདྲེས་པར་གྱུར་པས་ཞེས་པ་ནི་སེམས་ཉམས་པས་སོ། །ཇི་སྐད་དུ། དངོས་པོ་ཀུན་ནི་དངོས་པོ་གཅིག་རང་བཞིན། །དངོས་པོ་གཅིག་ནི་དངོས་པོ་ཀུན་ངོ་བོ། །གང་གིས་དངོས་གཅིག་དེ་ཉིད་དུ་མཐོང་ན། །དངོས་པོ་ཀུན་གྱི་དེ་ཉིད་ངེས་མཐོང་འགྱུར། །ཞེས་འབྱུང་ངོ༌། །འདིས་ནི་ཐམས་ཅད་དུ་སོང་བའི་དབང་ཕྱུག་ཏུ་བསྟན་པས་ཞེས་པ་ནི་ཐམས་ཅད་དུ་སོང་བ་ནི་ཁམས་གསུམ་གྱི་ཡུལ་ཅན་ནོ། །དབང་ཕྱུག་ནི་སེམས་ཀྱི་དབང་ཕྱུག་གང་ཡིན་པ་དེ་བསྟན་པས་སོ། །ཐུགས་བྱིན་གྱིས་བརླབ་པར་འགྱུར་རོ་ཞེས་པ་ནི་སེམས་ཀྱི་མཉམ་པ་ཉིད་ཤེས་པས་སོ། །ཟླ་བའི་དཀྱིལ་འཁོར་དང་འདྲ་བའི། །སེམས་ནི་རང་ཉིད་ཀྱིས་མཐོང་འགྱུར། །ཞེས་འབྱུང་ངོ༌། །དེ་ནི་ཐུགས་བྱིན་གྱིས་བརླབ་པའོ། །ཚིག་ཐམས་ཅད་དོན་ཞེས་པ་ནི་སྔགས་ཀྱི་སྒྲས་ཚིག་གི་དོན་སྟོན་པས་སོ། །ཕུང་པོ་དེ་དག་གི་ཚོགས་སོ་ཞེས་པ་ནི་འབྱུང་བ་ཆེན་པོ་ལས་རྒྱུར་གྱུར་པའི་སྒྲ་ཟིན་པ་ལ་སོགས་པའི་དབྱེ་བའམ། ཡི་གེ་དང་ཚིག་དང་ངག་དང་ངག་ཆེན་པོ་ལ་སོགས་པའི་དབྱེ་བའམ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་དབྱེ་བས་སོ། །སྐུ་དང་ཞེས་བྱ་བ་ནི་བརྗོད་པར་བྱ་བའི་ཐུགས་གང་ཡིན་པ་ཞེས་པ་ལ་ལུས་ཉིད་དུ་སྣང་བའི་སེམས་སོ། །སྐུའི་ངོ་བོ་ཉིད་དུ་ཡོངས་སུ་གྱུར་པ་དེ་ནི་ཞེས་པ་སེམས་ཉིད་ལུས་ཀྱི་རྣམ་པ་ཉིད་དུ་སྣང་བའི་ཕྱིར་རོ། །ལུས་ནི་ལོགས་སུ་ཡོད་པ་མ་ཡིན་ཏེ། གཞན་གྱི་སྣང་བ་ཡིན་པའི་ཕྱིར་རོ། །རང་སྣང་བ་གང་ཡིན་པ་དེ་ནི་དོན་དམ་པར་ཡོད་པ་སྟེ། རང་གི་རྣམ་པར་ཤེས་པ་ཡིན་ནོ། །གཟུགས་ལ་སོགས་པ་ནི་གཞན་གྱི་སྣང་བ་ཡིན་ནོ་ཞེས་རང་བཞིན་གྱི་གཏན་ཚིགས་སོ། །སེམས་ཅན་ཐམས་ཅད་ཀྱི་སྔགས་ཀྱི་གཟུགས་དང༌། སྐུ་དང་གསུང་དང་ཐུགས་གང་ཡིན་པ་ལ་ཞེས་པ་ནི་ངག་དང༌། ལུས་ཀྱང་གང་ཞེས་བྱ་བའི་དོན་ཏོ།། ཡན་ལག་ཅེས་པ་ནི་ངག་དང་ལུས་དང་ཅེས་བྱ་བའི་དོན་ཏོ། །ངག་ཡིན་ལ་ཞེས་པ་ནི་སྨྲ་བའི་དོན་དང་ལྡན་པས་སོ། །མི་ཕྱེད་པས་ན་རྡོ་རྗེའོ་ཞེས་པ་ནི་སོ་སོ་སྐྱེ་བོ་རྣམས་ཀྱིས་དགག་པར་བྱ་བ་མ་ཡིན་པའོ། །ལུས་ངག་ཡིན་པ་ནི་ལུས་ཀྱི་སྒྲ་ནི་ཚོགས་ཀྱི་རྣམ་གྲགས་སོ། །དེ་
ཉིད་བསྟན་པར་བྱ་སྟེ། སྒོ་ང་ལས་སྐྱེས་པ་ལ་སོགས་པའི་སྒྲའི་ཚོགས་གང་ཡིན་པ་དེ་ནི། དེ་རྣམས་ཀྱི་རྣམ་པ་སྣ་ཚོགས་པའི་སྐད་རྣམས་སོ། །དེས་ནི་སེམས་ཅན་ཐམས་ཅད་ཀྱི་ངག་གི་ཚོགས་བསྟན་ཏོ། །ཀུན་དུ་རྟོགས་པས་ན་ཞེས་པ་ནི་བསྒོམ་ཞིང་ཐ་སྙད་དུ་བྱའོ། །ཚིག་གི་སྐུ་རྣམ་པར་བསྒོམ་པ་ནི་ངག་གི་སྒོ་ནས་ལུས་ཐ་སྙད་དུ་བྱའོ། །ཚིག་ཏུ་བརྗོད་ཅིང་སྐུ་ཞེས་བཏགས་པ་ནི་ངག་གིས་བརྗོད་པ་ལུས་ཞེས་བརྡར་བསྟན་པར་བྱ་སྟེ། རྣམ་པར་རྟོག་པའི་ཚིག་འབྱུང་བ་དང༌། ཚིག་ལས་སྒྲ་འབྱུང་བའི་ཕྱིར་སྒྲ་རྣམས་ཀྱི་ལས་ཞེས་ཐ་སྙད་དུ་བྱས་ཏེ། སྒྲ་རྣམས་ཀྱིས་ནི་བརྡ་སྟོན་པ། །དེ་ནི་ཐ་སྙད་བྱ་ཕྱིར་བཤད། །ཅེས་འབྱུང་ངོ༌། །དེ་དང་འདྲ་བའི་སྐུ་ཞེས་པ་ནི་ངག་གི་བརྗོད་པ་ཐ་སྙད་དུ་བྱས་པའོ། །སེམས་ཅན་ཐམས་ཅད་ཀྱི་སྔགས་ཀྱི་གཟུགས་དང་ཞེས་པ་ནི་ཚིག་གི་ཚོགས་སོ། །དེ་རྣམས་ཉིད་ཀི་སྒོ་ང་ལ་སོགས་པ་སྔར་བཤད་པ་རྣམས་ཀྱིའོ། །རྡོ་རྗེ་ཆེན་པོའི་སྐུ་ཞེས་པ་ནི་ལུས་ཉིད་དོ། །བདག་གི་ལུས་ཞེས་བྱ་བ་ལ་སོགས་པས་ཁམས་གསུམ་ལ་གནས་པའི་ལུས་དང་ངག་དང་བདག་གི་ཡང་དེ་དག་མཉམ་པ་ཡིན་ནོ་ཞེས་བྱ་བའི་ཐ་ཚིག་གོ །དུས་གསུམ་ནི་འདས་པ་ལ་སོགས་པའི་དུས་གསུམ་ལའོ། །དེ་ནི་དུས་མཉམ་པ་ཡང་རབ་ཏུ་བསྟན་པ་ཡིན་ནོ། །འོ་ན་འདས་པ་དང་མ་འོངས་པ་ནི་འཇིག་པ་དང་མ་ཕྱིན་པའི་ཕྱིར་ཇི་ལྟར་མཉམ་པ་ཡིན་ཞེ་ན། ད་ལྟར་བྱུང་ཞིང་ཞེས་བྱ་བ་ལ་སོགས་པ་ནི་ད་ལྟར་བྱུང་བའི་དུས་ནི་དུས་ཀུན་ལ་འདྲ་བ་ཡིན་པས་དེ་ལ་ལོག་པར་རྟོག་པ་ནི་མེད་དོ། །འདས་པ་དང་མ་འོངས་པ་གང་ཡིན་པ་དེ་དག་དེའི་ཆ་ཙམ་གྱིས་བརྟེན་ཏེ་དུས་གསུམ་བརྟག་པར་བྱའོ་ཞེས་སྐྱོན་མེད་དོ། །ཡང་རྒྱུན་རྟག་པ་ཉིད་ཀྱིས་ད་ལྟར་བྱུང་བའི་དུས་ནི་འདས་པ་དང༌། མ་འོངས་པའི་ཚུལ་དུ་ཐོབ་པས་དུས་གསུམ་ལ་གནས་པའི་སེམས་ཅན་ཐམས་ཅད་ཀྱི་ངག་དག་དང་ལུས་མཉམ་པ་ཉིད་ཀྱི་ལྷག་པར་མོས་པ་རྣལ་འབྱོར་པས་བྱའོ་ཞེས་དགོངས་པའོ། །སྔགས་འཛིན་པ་ནི་རྡོ་རྗེ་འཆང་ཆེན་པོ་སྟེ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་སྤྲོ་བ་དང་བསྡུ་བ་མཛད་པའི་ཕྱིར་རོ། །དེས་ནི་རྫོགས་པའི་རིམ་པའི་རྣལ་འབྱོར་པ་རྣམས་ཀྱིས་རྡོ་རྗེ་
འཆང་ཆེན་པོའི་ལྷག་པར་མོས་པས་ཁྱམས་གསུམ་གྱི་ཡུལ་ཅན་གྱི་ལུས་ལ་སོགས་པ་དང༌། རང་གི་བདག་ཉིད་ཀྱི་ལུས་ལ་སོགས་པ་ཡང་མཉམ་པ་ཉིད་དུ་རྟོགས་པར་བྱའོ་ཞེས་བསྟན་པ་ཡིན་ནོ། །བདག་ནི་སངས་རྒྱས་ཀུན་ཉིད་དེ། །བྱང་ཆུབ་སེམས་དཔའ་ཐམས་ཅད་ཉིད། །དེ་ཕྱིར་འབད་པ་ཐམས་ཅད་ཀྱིས། །རང་གི་བདག་ཉིད་རྟག་ཏུ་མཆོད། །ཅེས་འབྱུང་ངོ༌། །དེ་བཞིན་དུ། ནམ་མཁའི་དབྱིངས་ནི་ཐམས་ཅད་ལ། །དཔལ་ལྡན་རྡོ་རྗེ་སེམས་དཔའ་བཞུགས། །ཞེས་དཔལ་བདེ་མཆོག་ལས་འབྱུང་ངོ༌། །དགོངས་པས་བཤད་པ་ཞེས་པ་ནི་སྔགས་དང་སྐུ་ལ་སོགས་པའི་འགལ་བའི་ཚིག་གི་སྒོ་ནས་རྫོགས་པའི་རིམ་པ་བསྟན་པས་སོ། །རྣལ་འབྱོར་པ་ཐམས་ཅད་ཀྱི་ཐུན་མོང་གི་ཞེས་པ་ནི་རིམ་པ་གཉིས་སྒོམ་པར་བྱེད་པའི་རྣལ་འབྱོར་པ་དག་གིས་ལྷག་པར་རྟོགས་པས་ན་མཉམ་པའོ། །དོན་དམ་པའི་དཀྱིལ་འཁོར་གྱི་རིམ་གྱིས་ཞེས་པ་ནི་ངོ་བོ་མེད་པའི་མཚན་ཉིད་དེ་དཀྱིལ་འཁོར་མ་ལུས་པ་ཉེ་བར་བསྡུས་པས་སོ། །དེ་ལ་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱིས་དཀྱིལ་འཁོར་རྒྱལ་བ་མཆོག་གི་མཐར་ལས་ཀྱི་རྒྱལ་མཆོག་གི་ཕྱོགས་གཅིག་དཀྱིལ་འཁོར་མ་ལུས་པ་ཉེ་བར་སྡུད་པའི་མཚན་ཉིད་ཀྱི་དོན་སྟོན་པ་དང༌། རྫོགས་པའི་རིམ་པ་ཡང་སེམས་རྣམ་པར་དག་པའི་རིམ་པས་འོད་གསལ་བར་བྱ་ཞེས་པའི་དོན་ཏོ། །མི་འདའ་བའི་དོན་ནི་འོད་གསལ་བ་སྟེ་ཐམས་ཅད་ཀྱིས་དེ་ཉིད་འདོད་པས་སོ། །སེམས་ནི་རབ་ཏུ་འཇུག་པའི་ཕྱིར། །དཔྱོད་ལ་འཇུག་པར་མི་བྱ་སྟེ། །འཁོར་བ་འཇོམས་པར་བྱ་བའི་ཕྱིར། །མ་ལུས་པ་ཡི་བློ་མཉམ་པའོ། །ཞེས་འབྱུང་ངོ༌། །སངས་རྒྱས་ཀྱི་སྐུ་བཀྱེད་པའི་རྗེས་ཐོགས་ལ་ཞེས་པ་ནི་དང་པོར་སྦྱོར་བ་དང༌། དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་དག་གི་སེམས་ཅན་གྱི་ཁམས་ལུས་པ་སྤྱོད་བར་བྱེད་པའི་རྣལ་འབྱོར་པས་སོ། །དོན་དམ་པའི་བདེན་པ་རྟོགས་པ་སྟེ་ཞེས་པ་ནི་ཕྲ་མོའི་རྣལ་འབྱོར་དང་བཟླས་པའི་འོག་ཏུ་ཞུ་བའི་དེ་ཉིད་བསྟན་པའི་ཕྱིར། དམ་ཚིག་ལས་ནི་ཁུ་བ་ཕྱུང་སྟེ་ཞེས་བྱ་བ་ལ་སོགས་པས་ལེགས་པར་སྦྱངས་པའི་ཕྱག་རྒྱ་དང་སྙོམས་པར་ཞུགས་པས་དེ་བཞིན་གཤེགས་པ་ཐམས་ཅད་འཇུག་པ་
སྔོན་དུ་འགྲོ་བར་རེག་བྱ་རྡོ་རྗེ་མའི་ཆོས་འབྱུང་བའི་ནང་དུ་བཛྲ་དྷྀ་ཀ་ཅེས་བྱ་བ་ལ་སོགས་པ་ཕྱུང་བའི་སྔགས་ཀྱིས་དཀྱིལ་འཁོར་པ་མ་ལུས་པ་སྤྲོ་བས་དམ་ཚིག་གི་དཀྱིལ་འཁོར་བསྐྱེད་ལ། དེ་ལས་ཀྱང་ཕྱི་རོལ་དུ་སྤྲོས་ཏེ་ཕྱོགས་བཅུ་ལ་གནས་པའི་སེམས་ཅན་གྱི་ཁམས་རབ་ཏུ་སྦྱོར་བ་སྔོན་དུ་འགྲོ་བར་སྒྲུབ་པའི་དཀྱིལ་འཁོར་དགོད་པ་དང༌། དབང་བསྐུར་བ་དང༌། རྒྱས་གདབ་པ་བྱས་ལ་ཕྲ་མོའི་རྣལ་འབྱོར་དང་བཟླས་པ་བྱས་ཏེ། བྱ་བ་བྱས་ནས་དཀྱིལ་འཁོར་ལ་འཇུག་པ་སྔོན་དུ་འགྲོ་བར་དབུ་མ་ནས་བྱུང་རོ་མཉམ་པར་གྱུར་པ་འོད་དུ་ཞུ་བ་ཉིད་བསྟན་ཏོ། །ཤེས་རབ་དང་ཐབས་སུ་སྦྱོར་བས་སོ་ཞེས་པ་ནི་ཐུགས་རྡོ་རྗེ་དང་རེག་བྱ་རྡོ་རྗེ་མ་ལ་སྙོམས་པར་ཞུགས་པས་སོ། །དེ་ནས་མེར་མེར་པོ་ལ་སོགས་པའི་རིམ་གྱིས་ཞེས་པ་ནི་སྣང་བ་ལ་སོགས་པ་ཉམས་སུ་མྱོང་བ་སྔོན་དུ་འགྲོ་བར་དབུ་མ་ནས་འབྱུང་བའི་བྱང་ཆུབ་ཀྱི་སེམས་ཀྱི་ཐིག་ལེ་འཛག་པ་དང་སྲ་བར་གྱུར་པ་དང་བསྡུ་བར་གྱུར་པའི་རིམ་པས་སོ། །མངོན་པར་འཕེལ་ལོ་ཞེས་པ་ནི་སྔགས་ལ་སོགས་པའི་གཟུགས་ཀྱིས་འཕེལ་བར་འགྱུར་རོ། །དེ་ཉིད་ས་བོན་དང་མྱུ་གུ་དང་འདྲ་བ་ཞེས་པ་ནི་བཛྲ་དྷྀ་ཀ་ལ་སོགས་པ་ཕྱུང་བའི་སྔགས་ཀྱི་གཟུགས་ནི་ས་བོན་ནོ། །དེ་ཡོངས་སུ་གྱུར་པ་ལས་དཀྱིལ་འཁོར་པ་རྣམས་འབྱུང་བ་ནི་མྱུ་གུའོ། །གཞོན་ནུ་ནི་ཐིག་ལེ་ཕྱུང་བའི་མཚན་ཉིད་དོ། །བར་མ་ནི་ཕྱུང་བའི་སྔགས་ཡོངས་སུ་གྱུར་པའི་མཚན་ཉིད་དོ། །གནས་སྐབས་ཞེས་པ་ནི་རྣམ་པར་སྣང་མཛད་ལ་སོགས་པའི་དཀྱིལ་འཁོར་བ་རྣམས་ཀྱི་གཟུགས་གྲུབ་པའི་མཚན་ཉིད་དོ། །ཡང་ན་གཞོན་ནུ་ནི་དམ་ཚིག་སེམས་དཔའ་བསྐྱེད་པའི་མཚན་ཉིད་དོ། །བར་མ་ནི་ཡེ་ཤེས་སེམས་དཔའ་དགོད་པའི་མཚན་ཉིད་དོ། །སྐབས་ནི་ཏིང་ངེ་འཛིན་སེམས་དཔའ་དགོད་པའི་མཚན་ཉིད་དོ། །དེ་ནས་ཆོས་འབྱུང་གི་ནང་དུ་སེམས་དཔའ་གསུམ་གྱི་བདག་ཉིད་དཀྱིལ་འཁོར་པ་བསྐྱེད་པ་ནི་གཞོན་ནུ་དང་བར་མའི་གནས་སྐབས་ཐོབ་པ་ཞེས་བྱའོ། །དེ་ཉིད་བསྟན་པར་བྱ་བའི་ཕྱིར། རྣམ་པར་སྣང་མཛད་ལ་སོགས་པ་སྐུའི་དཀྱིལ་འཁོར་ནི་ཡོངས་སུ་རྫོགས་པ་མཚང་བ་མེད་པར་བཞུགས་པ་ནི་སངས་རྒྱས་ཀྱི་བྱ་བ་རྫོགས་པ་འགྲོ་བའི་དོན་རྫོགས་ནས་ཤར་ལ་སོགས་པ་ལ་བཞུགས་པའོ། །འདོད་པའི་ཡོན་ཏན་ལྔ་རྗེས་སུ་མྱོང་
བར་འགྱུར་རོ་ཞེས་པ་ནི་རང་གི་ཕྱག་རྒྱ་དང་སྙོམས་པར་ཞུགས་པས་གཟུགས་ལ་སོགས་པའི་ཡུལ་ལྔ་སོ་སོར་སྡུད་པ་དང༌། བསམ་གཏན་གྱི་ཡན་ལག་གིས་མྱོང་ཞིང་སྤྱོད་པར་འགྱུར་རོ། །དེས་ནི་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་རབ་ཏུ་བསྟན་ཏོ། །དེ་ནས་ཞེས་བྱ་བ་ལ་སོགས་པས་ཕྲ་མོའི་རྣལ་འབྱོར་དང་བཟླས་པའི་འོག་ཏུ་འོད་དུ་ཞུ་བ་ཉིད་བསྟན་ཏེ། རྡོ་རྗེ་ཕྲེང་བ་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། བྱ་བ་བྱས་པར་བདག་ཉིད་ཤེས་ན་རྣམ་པར་སྣང་མཛད་དང༌། སྤྱན་མ་དང༌། གཟུགས་རྡོ་རྗེ་མ་དང༌། སའི་སྙིང་པོ་དང༌། བྱམས་པ་དང༌། གཤིན་རྗེ་མཐར་བྱེད་དང་། འདོད་པའི་རྒྱལ་པོ་རྣམས་འོད་ཟེར་གྱི་སྦྱོར་བས་བསྡུས་ལ་གཟུགས་ཀྱི་ཕུང་པོ་ལ་འཇུག་གོ །རིན་ཆེན་འབྱུང་ལྡན་དང༌། མཱ་མ་ཀཱི་དང༌། སྒྲ་རྡོ་རྗེ་མ་དང༌། ནམ་མཁའི་སྙིང་པོ་དང༌། ལག་ན་རྡོ་རྗེ་དང༌། ཤེས་རབ་མཐར་བྱེད་དང༌། མི་གཡོ་བ་རྣམས་ནི་ཚོར་བའི་ཕུང་པོ་ལ་འཇུག་གོ ། འོད་དཔག་ཏུ་མེད་པ་དང༌། གོས་དཀར་མོ་དང༌། དྲི་རྡོ་རྗེ་མ་དང༌། འཇམ་དཔལ་དང༌། སྤྱན་རས་གཟིགས་དང༌། པདྨ་མཐར་བྱེད་དང༌། དབྱུག་སྔོན་ཅན་རྣམས་འདུ་ཤེས་ཀྱི་ཕུང་པོ་ལ་འཇུག་གོ །དོན་ཡོད་གྲུབ་པ་དང༌། དམ་ཚིག་སྒྲོལ་མ་དང༌། རོ་རྡོ་རྗེ་མ་དང༌། སྒྲིབ་པ་ཐམས་ཅད་རྣམ་པར་སལ་བ་དང༌། ཀུན་དུ་བཟང་པོ་དང༌། བགེགས་མཐར་བྱེད་དང༌། སྟོབས་པོ་ཆེ་སྟེ་འདུ་བྱེད་ཀྱི་ཕུང་པོ་ལ་འཇུག་གོ །གནོད་མཛེས་རྒྱལ་པོ་དང༌། གཙུག་ཏོར་འཁོར་ལོས་སྒྱུར་བ་གཉིས་དང༌། སྔར་བཤད་པའི་ཕུང་པོ་བཞི་པོ་རྣམ་པར་ཤེས་པའི་ཕུང་པོ་ལ་འཇུག་གོ །རྣམ་པར་ཤེས་པ་གསུམ་པ་ཡང་འོད་གསལ་བ་ལ་འཇུག་པར་བྱ་སྟེ། དེའི་རིམ་པ་ནི་རེག་བྱ་རྡོ་རྗེ་མ་དང་སྙོམས་པར་ཞུགས་པས་བདག་ཉིད་རྟག་ཏུ་དགའ་བ་དང་ལྡན་པར་བསྒོམས་ཏེ་ཚངས་པའི་སྒོ་ནས་བྱང་ཆུབ་ཀྱི་སེམས་འབྱུང་བའི་དུས་སུ་སྣང་བའི་ཡེ་ཤེས་ཉེ་བར་མཚོན་ཞིང་ཡན་ལག་ཐམས་ཅད་ཀྱི་ཚིགས་ཁྱབ་པའི་དུས་སུ་མཆོག་ཏུ་དགའ་བའི་བདེ་བ་སྣང་བ་མཆེད་པའི་ཡེ་ཤེས་ཉམས་སུ་མྱོང་ཞིང་རྡོ་རྗེའི་དཀྱིལ་འཁོར་ལ་བྱང་ཆུབ་ཀྱི་སེམས་གནས་པར་གྱུར་ན་སྣང་བ་ཉེ་བར་ཐོབ་པའི་ཡེ་ཤེས་མངོན་དུ་བྱས་ཏེ། སྨིག་རྒྱུ་དང༌། དུ་བ་དང་མཁའ་སྣང་དང༌། མར་མེ་
དང་། སྤྲིན་མེད་པའི་ནམ་མཁའ་དང་འདྲ་བའི་རྟགས་ལྔ། དེ་ཉིད་མཐོང་བ་ལ་མི་སླུ་བ་མཐོང་ནས་སྤྲོས་པ་ཐམས་ཅད་དང་བྲལ་བའི་དེ་ཁོ་ན་ཉིད་བཞི་པ་མངོན་དུ་བྱའོ། །དེ་ནི་དོན་དམ་པའི་དཀྱིལ་འཁོར་ལ་འཇུག་པའི་ཆོ་གའོ། །རང་བཞིན་ལྔ་བཅུའི་ཞེས་པ་ནི་གཟུགས་ནི་རྣམ་པ་གཉིས་ཏེ། ཁ་དོག་དང་དབྱིབས་ཀྱི་དབྱེ་བས་སོ། །ཁ་དོག་ནི་རྣམ་པ་བཅུ་གཉིས་དབྱིབས་ནི་རྣམ་པ་བརྒྱད་དེ། དེ་ལྟར་གཟུགས་ནི་རྣམ་པ་ཉི་ཤུའོ། །ཚོར་བ་ནི་བདེ་བ་ལ་སོགས་པ་རྣམ་པ་གསུམ་རྣམ་པར་ཤེས་པ་ཚོགས་དྲུག་གི་དབྱེ་བ་བཅོ་བརྒྱད་དུ་འགྱུར་རོ། །འདུ་ཤེས་ནི་རྣམ་པ་གཅིག་གོ །འདུ་བྱེད་ནི་དགེ་བ་དང༌། མི་དགེ་བ་དང༌། ལུང་དུ་མ་བསྟན་པའི་དབྱེ་བས་རྣམ་པ་གསུམ་མོ། །ཀུན་གཞི་ལ་སོགས་པ་རྣམ་པར་ཤེས་པའི་དབྱེ་བས་རྣམ་པར་ཤེས་པའི་ཕུང་པོ་ནི་རྣམ་པ་བརྒྱད་དེ་ལྔ་བཅུ་བསྟན་ཏོ། །དོན་དམ་པའི་བདེན་པ་ལ་འཇུག་པར་བྱའོ་ཞེས་པ་ནི་སྔར་བཤད་པའི་རིམ་པས་མི་སྣང་བར་བྱའོ། །འབྲས་བུ་འདོད་པ་ཞེས་བྱ་བ་ལ་སོགས་པས་རིམ་པ་བཞི་པས་རྟོགས་པར་བྱ་བ་ཟུང་དུ་འཇུག་པའི་རིམ་པ་མངོན་དུ་བྱ་བ་བསྟན་ཏོ། །ཇི་ལྟར་དོན་དམ་པའི་དཀྱིལ་འཁོར་གྱི་རིམ་པས་སོང་ཞིང་ཞུ་བར་གྱུར་པ་ཞེས་པ་ནི་འོད་གསལ་བ་ལ་རབ་ཏུ་ཞུགས་པའོ། །དེ་བཞིན་དུ་སླར་འོང་བས་ན་ཞེས་པ་ནི་དེ་ལས་ཀྱང་སེམས་ཅན་གྱི་དོན་བྱ་བའི་ཕྱིར་ཡང་དག་པར་འབྱུང་བའོ། །རྣམ་པར་སྣང་མཛད་ལ་སོགས་པའི་བརྟགས་པའི་གཟུགས་ཀྱི་ཕུང་པོ་ལ་སོགས་པ་ཞེས་པ་ནི་དེའི་རྣམ་པར་དག་པའི་རིམ་པས་འཆད་པར་འདོད་པ་གཟུགས་ལ་སོགས་པའོ། །སྲོག་དང་རྩོལ་བ་ལ་གནས་པ་དེ་བཅད་དེ་ཞེས་པ་ནི་རྡོ་རྗེ་བཟླས་པའི་རིམ་པས་འཇུག་པ་ལ་སོགས་པས་སྲོག་བཀག་པ་ནི། དོན་དམ་པའི་བདེན་པ་ལ་འཇུག་པར་བྱའོ་ཞེས་པ་ནི་སེམས་རྣམ་པར་དག་པའི་རིམ་པས་ཐོབ་པར་བྱ་བའི་འོད་གསལ་བ་སྔགས་དང་ཕྱག་རྒྱའི་རིམ་པས་འཇུག་པ་ནི་དེའི་རང་བཞིན་དུ་བྱའོ། །ཤིན་ཏུ་མཆོག་ཏུ་གྱུར་པའི་ཞེས་པ་ནི་ཟུང་དུ་འཇུག་པའི་ཏིང་ངེ་འཛིན་གྱིས་ཐོབ་པར་བྱ་བའོ། །ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་བའོ་ཞེས་པ་ནི་རྡོ་རྗེ་འཆང་གི་ཕྱག་རྒྱ་ཆེན་པོའི་སྐུ་ཐོབ་པར་འགྱུར་རོ། །དེས་ནི་རྫོགས་པའི་རིམ་པའི་རྣལ་འབྱོར་
པས་ཡང་དག་པའི་མཐའ་ལ་འཇུག་པ་བསྟན་ཏོ། །རྫོགས་པའི་གོ་རིམས་རྟོགས་པར་གྱུར་ཀྱང་ཞེས་པ་ནི་རྡོ་རྗེ་བཟླས་པ་ལ་སོགས་པའི་རིམ་པ་ལྔ་བསྒོམས་པས་སོ། །གལ་ཏེ་རྟུལ་བ་ཅན་གྱི་བརྩོན་འགྲུས་ཅན་མ་ཡིན་ན་ཞེས་པ་ནི་བརྩོན་འགྲུས་དམན་པ་མ་ཡིན་པའོ། །དེའི་ཚེ་འགྲོ་བའི་རྒྱུད་ཉིད་དུ་བྱས་ནས་ཞེས་པ་ནི་མཐོང་བའི་ཆོས་ཀྱིས་མྱོང་བའི་ལུས་ཀྱི་སེམས་རྣམ་པར་དག་པའི་རིམ་པ་འོད་གསལ་བ་མངོན་དུ་བྱས་ནས་སོ། །ལངས་ཏེ་ཞེས་པ་ནི་དེ་ལས་ཅིག་ཅར་དུ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་རྡོ་རྗེ་འཆང་གི་ཕྱག་རྒྱ་ཆེན་པོའི་སྐུ་སྤྲོས་ནས་སོ། །སྒྱུ་མ་ལྟ་བུའི་ཏིང་ངེ་འཛིན་གྱིས་མངོན་དུ་བྱེད་དོ་ཞེས་པ་ནི་ཡེ་ཤེས་ཀྱི་སྐུ་དམིགས་པར་བྱའོ་ཞེས་དོན་བསྡུས་པའོ། །རྡོ་རྗེའི་ཚིག་འདི་ཉིད་ཀྱི་དོན་ཞེས་པ་ནི་དོན་སྦས་པ་དང་ལྡན་པའི་ཚིག་གིས་བརྗོད་པར་བྱ་བའོ། །དམ་ཚིག་རྗེས་སུ་དྲན་པ་ནི་ཇི་ལྟ་བུ་ཡིན་ཞེ་ན་སྨྲས་པ། དེ་བས་ན་རྡོ་རྗེ་དང་པདྨའི་སྙོམས་པར་འཇུག་པའི་འབྲེལ་པས་སོ། །ཚངས་པ་ནི་དེ་ཁོ་ན་ཉིད་ཀྱི་ངོ་བོར་རཀྟ་སྟེ་བྱང་ཆུབ་ཀྱི་སེམས་ཤིན་ཏུ་བྱུང་བ་ནི་ཕྱག་རྒྱའི་ཆོས་འབྱུང་ལ་ཕྱུང་བའོ། །དེས་ནི་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་བསྟན་ཏོ། །དེའི་རྗེས་ལ་དོན་དམ་པའི་དཀྱིལ་འཁོར་གྱི་རིམ་པས། དངོས་མེད་གཅིག་ཏུ་སྦྱོར་བ་ཡིས། །ཞེས་པ་ནི་ཐིམ་པའི་ཆོ་གའི་རིམ་པའི་མན་ངག་གིས། མཁས་པས་ཆོ་ག་བཞིན་དུ་བཏུད། །ཅེས་པ་ནི་དོན་དམ་པའི་དཀྱིལ་འཁོར་གྱི་ཆོ་གས་མི་སྣང་བར་བྱའོ། །དེ་ནི་བརྟགས་པའི་རྣལ་འབྱོར་བས་འོད་གསལ་བ་རྟོགས་པའོ། །རྫོགས་པའི་རིམ་པའི་རྣལ་འབྱོར་པ་ལ་ཡང་བསྟན་པར་བྱ་སྟེ། དེ་བཞིན་གཤེགས་པ་ཚོགས་ཆེ་བ་ནི་ཞེས་པ་ལ་སྔ་མ་བཞིན་ནོ། །དངོས་མེད་ཅེས་བྱ་གསད་པ་སྟེ། །ཞེས་པ་ནི་སྔགས་དང་ཕྱག་རྒྱའི་རིམ་པས་ཐ་མལ་པའི་ཕུང་པོ་ལ་སོགས་པ་མི་སྣང་བར་བྱེད་པ་སྟོང་པ་ཉིད་ཅེས་བྱའོ། །བློ་དང་ལྡན་པ་ཞེས་པ་ནི་ཕན་ཡོན་ནོ། །དོན་འདི་ཉིད་རྡོ་རྗེ་གཙུག་ཏོར་གྱི་རྒྱུད་ལས་ཀྱང་རྒྱས་པར་བཤད་པར་བྱ་སྟེ། འཆི་བ་ཞེས་བྱ་བ་ནི་ཕུང་པོ་འཇིག་པའི་མཚན་ཉིད་དེ་ནི་མི་རྟག་པ་སྟེ་དོན་དམ་པར་སྐྱེ་བ་དང་འཇིག་པ་མེད་པའི་ཕྱིར་རོ། །ཇི་སྐད་དུ། འདིར་ནི་ཁ་ཅིག་མི་སྐྱེ་ཞིང༌། །ཁ་ཅིག་ཡང་ནི་འཆི་བ་མེད། །སེམས་ཀྱི་རྣམ་པར་
དངོས་གནས་པའི། །འཁོར་བ་ཉིད་དུ་ཤེས་པར་བྱ། །མ་རིག་རྐྱེན་ལས་བྱུང་བ་ཡི། །ཡང་དག་ཡེ་ཤེས་ཀྱིས་བལྟས་ན། །སྐྱེ་བའམ་ནི་འཇིག་པ་དག །ཁ་ཅིག་དམིགས་པར་མི་འགྱུར་རོ། །ཞེས་འབྱུང་ངོ༌། །རྒྱུ་དེ་ལས་ཁ་ཅིག་ཀྱང་འབྱུང་བ་དང་འགོག་པར་མི་འགྱུར་གྱི། འོན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་མ་ནི་ཆོས་ཐམས་ཅད་བདག་མེད་པའི་མཚན་ཉིད་དེ་བསྐྱེད་པའི་རིམ་པའི་རྣལ་འབྱོར་པ་དག་ལ་དེ་ཉིད་ཚུལ་ནི་ལམ་སྟེ་ཏིང་ངེ་འཛིན་གསུམ་སྒོམ་པའི་བདག་ཉིད་ཅན་ནོ། །རྣམ་པར་རྟོག་པའི་རང་བཞིན་ཅན་གྱི་ཐ་མལ་པའི་ལུས་ངག་གིས་སྦྱོང་བར་བྱའོ། །དེ་བཞིན་དུ་རྫོགས་པའི་རིམ་པའི་རྣལ་འབྱོར་པ་ལ་ཡང་འཇུག་པ་ལ་སོགས་པའི་རིམ་པ་རྣམ་པ་བཅུ་གཅིག་གིས་རྡོ་རྗེ་བཟླས་པའི་རིམ་པ་སློབ་པ་ན་ཐ་མལ་པའི་རྣམ་པར་རྟོག་པའི་བདག་ཉིད་ཅན་གྱི་ངག་སྤངས་ནས་འཇིག་རྟེན་ལས་འདས་པའི་རང་བཞིན་སྐྱེ་བ་ཤེས་རབ་ཕ་རོལ་ཕྱིན་མ་གསུང་རྡོ་རྗེ་སྐྱེ་བར་འགྱུར་རོ། །རྡོ་རྗེ་བཟླས་པའི་རིམ་པ་འདི། །གསུང་གི་རྡོ་རྗེ་སྒྲུབ་བྱེད་པའོ། །ཞེས་འབྱུང་བས་སོ། །ཡང་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་དེ་ཉིད་རྟོག་པ་དང་བཅས་པ་རྣམ་པར་ཤེས་པ་གསུམ་གྱི་འབྲེལ་བ་དང་ལྡན་པ་རང་བཞིན་གྱི་ཚོགས་བརྒྱ་དྲུག་ཅུ་སྤོང་བས་འོད་གསལ་བ་ཐོབ་པར་བྱེད་པས་དྲན་པ་ནི་དེ་ཁོ་ན་ཉིད་ཡིད་ལ་བྱེད་པ་མངོན་དུ་བྱ་བའི་སེམས་ལ་དམིགས་པ་ཞེས་བྱའོ། །དེ་བཞིན་དུ་དེ་ཉིད་སེམས་ཅན་གྱི་དོན་བྱེད་པའི་ཕྱིར་འཇའ་ཚོན་ལྟར་ཡོངས་སུ་སྣང་བ་རྣམ་པ་ཐམས་ཅད་མཆོག་དང་ལྡན་པ་ཡེ་ཤེས་ཀྱི་སྐུ་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པ་བྱང་ཆུབ་ཅེས་བྱ་སྟེ་སྒྱུ་མའི་རྣམ་པ་ཉིད་ཀྱིས་མ་ལུས་པ་ལུས་པ་མེད་པའི་དངོས་པོ་རྟོགས་པའི་ཕྱིར་རོ། །དེ་བཞིན་དུ་དེ་ཉིད་སྒྱུ་མ་ལྟ་བུའི་རྣམ་པ་ཅན་གྱི་ཀུན་རྫོབ་སྦྱང་བའི་ཕྱིར་འོད་གསལ་བ་ལ་ཐིམ་པས་ན་ཐིམ་པ་ཞེས་བྱའོ། །དེ་བཞིན་དུ་དེ་ཉིད་བདེན་པ་གཉིས་སུ་མེད་པར་བྱེད་པའི་མཚན་ཉིད་སྲིད་པ་དང་ཞི་བ་རོ་གཅིག་པར་གྱུར་པ་ཟུང་དུ་འཇུག་པའི་བདག་ཉིད་ཅན་དཔལ་རྡོ་རྗེ་འཆང་གི་ཕྱག་རྒྱ་ཆེན་པོའི་སྐུ་ནི་གྲོལ་བ་ཞེས་བྱ་སྟེ། མི་སློབ་པའི་ལམ་གྱི་ངོ་བོ་ཡིན་པས་སོ། །དེ་ཉིད་ཀྱི་ཕྱིར་འཁོར་པའི་བར་དུ་སེམས་ཅན་གྱི་དོན་སྒྲུབ་པར་བྱེད་པས་ན་བསམ་པ་
ཐམས་ཅད་རྫོགས་པར་བྱེད་པ་ཞེས་བསྟན་ཏོ། །དེ་ལྟར་བཤད་པའི་རྒྱུད་ཀྱི་ཚིགས་སུ་བཅད་པ་གཉིས་ཀྱི་རིམ་པ་གཉིས་བཤད་པས་དམ་ཚིགས་རྗེས་སུ་དྲན་པ་ཡང་བཤད་དོ། །དགོངས་པས་བཤད་པའོ་ཞེས་པ་ནི་འགལ་བའི་སྒྲའི་སྦྱོར་བས་དེ་ཁོ་ན་ཉིད་སོ་སོར་བསྟན་པས་སོ། །དེ་ལ་ཞེས་བྱ་བ་ལ་སོགས་པས་རིམ་པ་བཞི་པས་ཐོབ་པར་བྱ་བའི་འོད་གསལ་བ་ཐོབ་པར་བྱ་སྟེ། ཤེས་རབ་ནི་སྣང་བའོ་ཞེས་པ་ནི་ཟླ་བའི་སྣང་བ་དང་འདྲ་བ་ནི་དགའ་བའོ། །འདིར་རྩོམ་པའི་སྒྲ་ནི་མི་མངོན་པར་བྱས་པ་ཡིན་པར་བལྟ་བར་བྱ་སྟེ། དོན་རྟོགས་པས་མི་སྦྱོང་བ་ཉིད་མི་མངོན་པའོ། །དེ་བས་ན་ཤེས་རབ་ནི་བཤད་ཟིན་ཏོ། །ཐབས་ནི་ཉི་མའི་སྣང་བ་དང་འདྲ་བ་སྟེ་སྣང་བ་མཆེད་པའོ། །ཉེ་བར་ཐོབ་པ་ནི་མཚམས་ཀྱི་སྣང་བ་དང་འདྲ་བ་སྟེ་སྣང་བ་ཉེ་བར་ཐོབ་པའོ། །མཐར་ཕྱིན་པ་ཞེས་པ་ནི་སྤོང་བར་བྱས་ནས་གནས་པའོ། །དོན་དམ་པའི་བདེན་པ་ཞེས་པ་ནི་ཡང་དག་པའི་མཐའི་མཚན་ཉིད་ཅན་གྱི་འོད་གསལ་བའོ། །དེ་ཉིད་ནི་སེམས་ཅན་ཐམས་ཅད་ཀྱི་འདའ་བར་མི་བྱ་བ་ཡིན་པས་ཞེས་པ་ནི་སེམས་ཅན་ཐམས་ཅད་ཀྱི་ཆོས་ཅན་ཡིན་པའི་ཕྱིར་རོ། །ཇི་སྐད་དུ། སངས་རྒྱས་ཐམས་ཅད་འགྱུར་བ་སྟེ། །རྒལ་མིན་འཁོར་བར་ཡོད་པ་མིན། །ཡང་དག་རྫོགས་པའི་བྱང་ཆུབ་ནི། །འགྲུབ་ཕྱིར་ལེ་ལོ་མི་བྱའོ། །ཞེས་འབྱུང་ངོ༌། །དེ་རིལ་པོར་འཛིན་པ་ཞེས་པ་ནི་རང་གི་ལུས་ཀྱི་ཕུང་པོ་ལ་སོགས་པ་མི་སྣང་བར་བྱེད་པའོ། །རྗེས་སུ་འཇུག་པའི་རིམ་གྱིས་ཞེས་པ་ནི་རྩིབས་བརྒྱད་པ་ཆོས་ཀྱི་དབྱིངས་ཀྱི་འཁོར་ལོ་ལ་གནས་པ་ཡི་གེ་རཾ་འབར་བས་རང་གི་ལུས་ཀྱི་ཕུང་པོ་ལ་སོགས་པ་བསྲེག་ཅིང་ཕ་རོལ་གྱི་ཡང་བསྲེག་གོ །དེ་ཉིད་ལ་རྒྱུན་མི་འཆད་པ་ནི་ཡང་དང་ཡང་དུའོ། །ཇི་སྐད་དུ། མེ་ལོང་ལ་ནི་དབུགས་ཀྱི་རླུང༌། །ཇི་ལྟར་དེ་ལ་ཐིམ་འགྱུར་བ། །ཡང་དག་མཐའ་ལ་རྣལ་འབྱོར་པས། །ཡང་དང་ཡང་དུ་དེ་བཞིན་འཇུག །ཅེས་འབྱུང་ངོ༌། །ཀུན་ཏུ་སྣང་བ་ལ་སོགས་པ་སྣང་བ་གསུམ་པོ་ནི་ཆགས་བྲལ་དང་ཆགས་པ་དང་ཆགས་པ་བར་མ་རྣམས་སོ། །འདོད་ཆགས་ལ་སོགས་པ་རང་བཞིན་བརྒྱ་དྲུག་ཅུ་དང་བཅས་པ་རྣམས་ནི་ཞེས་པ་ནི་དགེ་བ་དང་མི་དགེ་བ་དང་ལུང་དུ་མ་བསྟན་པའི་སེམས་ལས་བྱུང་བའི་ཆོས་དང་བཅས་པའོ། །འོད་གསལ་བ་ཞེས་པ་
ནི་དྲི་མ་མེད་པ་སྟེ། ཕྱག་རྒྱ་དང་ཏིང་ངེ་འཛིན་གྱི་རིམ་པས་སྤངས་ན་ཤེལ་སྒོང་དག་པ་དང་འདྲ་བར་འགྱུར་རོ། །ཐམས་ཅད་སྟོང་པ་ལ་ལྟོས་པས་ཞེས་པ་ནི་དེ་ཁོ་ན་ཉིད་བཞི་པ་ལ་འཇུག་པས་སོ། །སྒྱུ་མ་ལྟ་བུའི་ལུས་མི་ལེན། །ཞེས་པ་ནི་བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བའི་སྒྱུ་མའི་ལུས་སྦྱོང་བར་བྱེད་པས་སོ། །ཡེ་ཤེས་གསུམ་ནི་སྣང་བ་སྟེ། །དེ་མེད་པས་ན་སྣང་བ་མེད་པས་སོ། །འབྲས་བུའོ་ཞེས་པ་ནི། ཟུང་དུ་འཇུག་པའི་ཏིང་ངེ་འཛིན་ཏོ། །དེ་ཐོབ་པའི་རྒྱུ་སྟེ་ཞེས་པ་ནི་རྡོ་རྗེ་བཟླས་པ་ལ་སོགས་པ་རིམ་པ་གསུམ་མོ། །རྟོག་པ་གཉིས་པོ་དེ་དག་དེ་ནས་ཡོད་པ་མ་ཡིན་ནོ་ཞེས་པ་ནི་རིམ་པ་བཞི་པ་ལ་རིམ་པ་དང་པོ་ལ་སོགས་པ་གསུམ་དང་རིམ་པ་ལྔ་པ་ཡང་མེད་པས་སོ། །དངོས་པོ་ཐམས་ཅད་རང་བཞིན་གྱིས། །རང་རང་ངོ་བོ་ལ་གནས་སོ། །ཞེས་འབྱུང་ངོ༌། །དངོས་པོ་ནི་དངོས་པོ་གཞན་ལས་ལྡོག་པ་ལ་འཇུག་པའོ། །གནས་ནི་ཕྱག་རྒྱའི་པདྨའོ། །གནས་པའོ་ཞེས་པ་ནི་གསང་བའི་རྡོ་རྗེའོ། །ཏིང་ངེ་འཛིན་གྱི་རིམ་པ་ལ་ཡང་གནས་ནི་རྩིབས་བརྒྱད་པའི་ཆོས་ཀྱི་དབྱིངས་ཀྱི་འཁོར་ལོའོ། །གནས་པ་ནི་འོད་སྤྲོ་བའི་རིམ་པའོ། །གཉིས་པོ་དེ་དག་འོད་གསལ་བ་ལ་འཇུག་པ་དེས་ན་མི་དམིགས་པར་འགྱུར་ཏེ་ཞེས་པ་ནི་རྣམ་པར་མི་རྟོག་པ་ཡིན་པས་སོ། །ཇི་སྐད་དུ། །ཇི་སྲིད་སྒོམ་པའི་སྦྱོར་བ་ནི། །དེ་སྲིད་ལས་ནི་དང་པོ་ཅན། །ཡོངས་སུ་རྫོགས་པའི་རྣལ་འབྱོར་ནི། དེ་ནི་འོད་གསལ་བསྟན་པར་བྱ། །ཞེས་འབྱུང་ངོ༌། །དགོངས་པ་མ་ཡིན་པས་བཤད་པའོ་ཞེས་པ་ནི་ཤིན་ཏུ་གསལ་བའི་དེ་ཁོ་ན་ཉིད་བསྟན་པས་སོ། །དེ་ནི་ཟུང་དུ་འཇུག་པའི་རིམ་པ་ཞེས་བྱ་བ་ནི་རིམ་པ་ལྔ་པས་སོ། །ལྡང་བའི་གནས་བསྟན་པའི་ཕྱིར་ཞེས་པ་ནི་འོད་གསལ་བ་དེ་ལས་རྡོ་རྗེའི་སྐུ་གཟུང་བའི་གནས་བསྟན་པའོ། །འཛིན་པའི་ཡན་ལག་ཅེས་པ་ནི་ཡན་ལག་བཞི་པའི་རྒྱུད་ཕྱི་མ་ལས་ཀྱང༌། སོ་སོར་སྡུད་དང་བསམ་གཏན་དང༌། །སྲོག་དང་རྩོལ་བ་འཛིན་པ་དང༌། །རྗེས་སུ་དྲན་དང་ཏིང་འཛིན་ནི། །ཡན་ལག་དྲུག་གི་རྣལ་འབྱོར་བཤད། །ཅེས་འབྱུང་ངོ༌། །དེའི་རྗེས་སུ་འོག་ཏུ་དྲན་པ་ནི་ལྡང་བའི་ཞེས་པ་ནི་རྨི་ལམ་དང་སྒྱུ་མ་དང་མཚུངས་པས་དེ་ལས་སྤྲོ་བ་ཞེས་བྱའོ། །དེ་བསྒོམ་པ་ནི་བདེན་པ་གཉིས་ཀྱི་བདག་ཉིད་དེ་
ཉེ་བར་མཚོན་པས་རྣམ་པ་དང་བཅས་པ་དང་རྣམ་པ་མེད་པ་ལ་སོགས་པ་གཉིས་ཀྱི་བདག་ཉིད་ཀྱང་ཡིན་ནོ་ཞེས་བྱའོ། །རྡོ་རྗེ་འཆང་ཆེན་པོ་ཞེས་པ་ནི་དྲུག་པའི་འོ། །ཏིང་ངེ་འཛིན་ནི་རྩེ་གཅིག་པ་ཉིད་ཀྱིས་དམིགས་པའོ། །དེ་ནས་ཞེས་བྱ་བའི་སྒྲ་ནི་ཐ་དད་པའི་རིམ་པ་སྟེ་ཞེས་པ་ནི་ཚིག་གཉིས་པ་ལས་དྲངས་ཏེ་འདིར་བཤད་པར་བྱའོ། །དེ་ཉིད་བསྟན་པར་བྱ་བའི་ཕྱིར། །འཛིན་པའི་ཡན་ལག་འོག་ཏུ་ཞེས་པ་ནི་མན་ངག་བཞི་པའི་འོག་ཏུ་ཞེས་བྱ་བའི་དོན་ཏོ། །ཀུན་རྫོབ་ཀྱི་བདེན་པ་སྟེ་ཞེས་པ་ནི་བྱིས་པའི་སྐྱེ་བོས་དེ་ཉིད་རང་བཞིན་བཟུང་པས་སོ། །དོན་དམ་པའི་བདེན་པ་སྟེ་ཞེས་པ་ནི་སྤྲོས་པ་ཐམས་ཅད་བྲལ་བ་རབ་ཏུ་སྣང་བའི་ཕྱིར་རོ། །རང་བཞིན་དང་ལྡན་པའི་ཞེས་བྱ་བ་ལ་སོགས་པ་ནི་བར་མའི་ཚིག་མི་མངོན་པའི་ལས་འཛིན་པའི་བསྡུས་བ་སྟེ་ལོ་མའི་རྒྱལ་པོ་བཞིན་ནོ། །དེ་གང་ཡིན་ཞེ་ན་ཞེས་པ་ནི་དྲི་བའོ། །གཉིས་སུ་མེད་པའི་ཡེ་ཤེས་ཀྱི་བདག་ཉིད་ཅན་ཞེས་པ་ནི་ཀུན་རྫོབ་དང་དོན་དམ་པ་དབྱེར་མེད་པའི་རང་བཞིན་ནོ། །རྡོ་རྗེ་འཆང་ཆེན་པོའི་སྐུའོ་ཞེས་པ་ནི་དྲུག་པའོ། །དེ་ན་གནས་པའི་འཇའ་ཚོན་ཞེས་པ་ནི་དབང་པོའི་གཞུ་སྟེ། རྟེན་དང་བརྟེན་པ་དབྱེར་མེད་པའི་ཕྱིར་ཚེམ་བུ་དུ་བ་བཞིན་ནོ། །དེ་དང་མཉམ་པས་ན་ཞེས་པ་ནི་མིག་ཡོར་དང༌། སྒྱུ་མ་ཉིད་དུ་སྣང་བས་དེ་ཉིད་ནམ་མཁའོ། །རྒྱུ་ནི་རིམ་པ་བཞི་པའོ། །འབྲས་བུ་ནི་རིམ་པ་ལྔ་པའོ། །དེ་དག་གཉིས་སུ་མེད་པ་ནི་དབྱེར་མེད་པས་སོ། །ཟུང་དུ་འཇུག་པའི་རིམ་པ་ལ་རྒྱུ་དང་འབྲས་བུར་སྣང་བ་ནི་མེད་དེ། །རྣམ་པར་མི་རྟོག་པའི་ཕྱིར་རོ། །སྔ་མའི་སྨོན་ལམ་གྱི་དབང་གིས་སེམས་ཅན་གྱི་དོན་འགྲུབ་པ་ཡིན་གྱི་དགོངས་པས་ནི་མ་ཡིན་ནོ། །སྐྱེས་བུ་ཡིད་བཞིན་ནོར་བུ་ལྟར། །དེ་ཡི་ཕྲད་པ་ཙམ་གྱིས་ནི། །རྩིག་པ་ལ་སོགས་རྣམས་ལས་ཀྱང༌། །ཇི་བཞིན་བསྟན་པ་རྣམས་འབྱུང་ངོ༌། །ཞེས་འབྱུང་ངོ༌། །འཇིག་ཅིང་ཟད་པས་ན་ཞེས་པ་ནི་འདུས་བྱས་པའི་དངོས་པོ་སྐྱེ་བའི་ཆོས་དང་ལྡན་པའོ། །དེ་ལས་གཞན་བསྟན་མི་ཟད་པའོ་ཞེས་པ་ནི་མི་འཇིག་པའི་ཆོས་ཅན་གྱི་ངོ་བོ་ལས་བྱུང་བས་ན། མི་འགྱུར་བ་སྟེ་ཞེས་པ་ནི་གཉིས་ཀ་དང་བྲལ་བའོ། །སྐྱེ་བ་དང་འཇིག་པ་དང་བྲལ་བ་ཞེས་བྱ་བའི་བར་དུའོ་ཞེས་པ་ནི་ཉེ་བར་མཚོན་པ་ཡིན་ཏེ། འོན་ཀྱང་ཡོད་པ་དང་མེད་པ་དང་དངོས་པོ་དང་
དངོས་པོ་མ་ཡིན་པ་དང༌། འཕེལ་བ་དང་འགྲིབ་པ་དང༌། སྟོང་པ་དང་སྙིང་རྗེ་དང༌། ཐབས་དང་ཤེས་རབ་དང༌། རྟག་པ་དང་ཆད་པ་དང༌། འགྲོ་བ་དང་འོང་བ་ལ་སོགས་པ་དང་བྲལ་བ་ཞེས་བྱའོ། །བདེན་པ་གཉིས་སོ་ཞེས་བྱ་བ་ལ་སོགས་པས་གང་གི་ཚེ་ཡེ་ཤེས་དེ་ལ་བདེན་པར་གཉིས་པོ་རོ་གཅིག་པར་འགྱུར་བར་སྣང་བ་དེའི་ཚེ་གཉིས་སུ་མེད་པ་ཡིན་ནོ། །གང་གི་ཚེ་ཟུང་འཇུག་དེ་ལ་ཡོད་པ་དེའི་ཚེ་གཉིས་སུ་མེད་པ་ཡང་ཡོད་པ་མ་ཡིན་ནོ། །སྡུག་བསྔལ་ཐམས་ཅད་ནི་འཇིག་རྟེན་པའི་ཆོས་བརྒྱད་ལ་སོགས་པའི་རྣམ་པར་རྟོག་པའོ། །ཉེ་བར་ཞི་བའི་མཚན་ཉིད་ཅན་ཡིན་པས་ན་ཞེས་པ་ནི་དེ་བཅོམ་པར་བྱེད་པས་ན་ཞི་བ་ཞེས་བྱའོ། །དེ་ཉིད་ཀྱི་ཕྱིར་ཟག་པ་ནི་ཆགས་པ་ལ་སོགས་པ་དང་དེ་ལས་བྱུང་བ་རང་བཞིན་བརྒྱ་དྲུག་ཅུའོ། །དེ་མེད་པས་ན་ཟག་པ་མེད་པའོ། །རེག་བྱའི་ཡུལ་མ་ཡིན་པས་ན་ཞེས་པ་ནི་འདུས་བྱས་པའི་དངོས་པོ་ནི་རེག་པར་བྱ་བར་ནུས་ཏེ། །འདུས་བྱས་མ་ཡིན་པའི་རང་བཞིན་གང་ཡིན་པ་དེ་ནི་གང་གིས་རེག་པར་བྱའོ། །དགོངས་པས་བཤད་པའོ་ཞེས་པ་ནི་འགལ་བའི་ཚིག་གི་སྒོ་ནས་དེ་ཁོ་ན་ཉིད་སྟོན་པས་སོ། །དེ་ལྟར་ཞེས་བྱ་བ་ལ་སོགས་པས་སྔར་བཤད་པའི་དོན་བསྡུས་ན་བཤད་པར་བྱ་སྟེ། ཆོས་ཀྱི་སྐུན་ནི་རིམ་པ་གཉིས་པ་དང་བཞི་པ་དག་གིས་ཐོབ་པར་བྱའོ། །ལོངས་སྤྱོད་རྫོགས་པའི་སྐུ་ནི་རིམ་པ་གསུམ་པ་དང་ལྔ་པས་ཐོབ་པར་བྱའོ། །གཉིས་སུ་མེད་པའི་མཚན་ཉིད་ཅན་དུ་ངེས་པར་བྱས་ནས་ཞེས་པ་ནི་དེ་དག་དབྱེར་མེད་པ་སྟེ་ཟུང་དུ་འཇུག་པའི་རིམ་པ་བཤད་ནས་སོ། །སྤྲུལ་པའི་སྐུ་བཞི་ཞེས་པ་ནི་བརྟག་པའི་རྣལ་འབྱོར་པས་རྟོགས་པར་བྱ་བའི་སྐུའི་ཕྱག་རྒྱ་བཞི་བསྟན་པར་བྱ་བའི་ཕྱིར་བཤད་པར་བྱ་སྟེ། ཞེ་སྡང་སྦྱོང་བར་མཛད་པས་ན་མི་བསྐྱོད་པ་ནི་ཐུགས་ཀྱི་རྡོ་རྗེའོ། །རང་གི་བདག་ཉིད་ལས་ངེས་པར་བྱུང་བའི་ལྷ་མོ་རྣམས་ཀྱི་འཁོར་ལོ་ཞེས་པ་ནི་སྙོམས་པར་ཞུགས་པ་ལས་བྱུང་བའི་རིགས་ཀྱི་ཡུམ་བཞི་དང༌། གཟུགས་ལ་སོགས་པ་ཡུལ་ལྔའི་ལྷ་མོའི་ཚོགས་སོ། །བུད་མེད་གྱི་གཟུགས་སུ་མངོན་པར་སྤྲུལ་ནས་ཞེས་པ་ལ་སོགས་པ་ནི་ལེའུ་དང་པོ་ནས་བཤད་པས་ན། འདིར་མ་བཤད་དོ། །དེས་ཞེས་བྱ་བ་ལ་སོགས་པས་ནི་ལྷ་མོའི་འཁོར་ལོས་བྱས་པའི་ཕྱི་དང་ནང་དང་གསང་བའི་མཆོད་པ་
བསྟན་ཏོ། །ཆགས་པ་ལ་སོགས་པ་ཉམས་སུ་མྱོང་བ་ཞེས་པ་ནི་སྙོམས་པར་འཇུག་པའི་དབང་གི་ཡེ་ཤེས་གསུམ་རང་གིས་རིག་པའོ། །བུ་མོའོ་ཞེས་པ་ནི་སྨེ་ཤ་ཅན་གྱི་བུ་མོ་སྟེ་ཨུཏྤལ་སྔོན་པོའི་ཁ་དོག་འདྲ་བའོ། །རང་བཞིན་བརྟན་པ་ཐོབ་ཅིང་རྙེད་པ་ཞེས་པ་ནི་དམ་ཚིག་དང་སྡོམ་པ་ལ་སོགས་པ་ལ་བརྟེན་པར་བརྟན་པ་སྟེ་ཡིད་མ་འཁྲུལ་བ་རྙེད་པའམ་རང་གིས་བཙལ་བའམ་བཅོམ་ལྡན་འདས་ཀྱིས་ལུང་བསྟན་པས་ཐོབ་པའམ་དགུ་པའོ། །ཇི་སྐད་དུ། ལྷ་མོ་ཀླུ་མོ་གནོད་སྦྱིན་མོ། །ལྷ་མ་ཡིན་མོ་མི་མོ་ཡང༌། །རྙེད་དེ་རེག་པའི་བརྟུལ་ཞུགས་བྱ། །ཐེ་ཚོམ་མེད་པས་དེ་ལྟར་འགྲུབ། །ཅེས་འབྱུང་ངོ༌། །པདྨ་ཅན་ཞེས་བྱ་བ་ལ་སོགས་པ་རིགས་བཞི་ཞེས་པ་ནི་པདྨ་ཅན་དང་དུང་ཅན་དང༌། ཨུཏྤལ་ཅན་དང༌། བ་ཞེས་བྱའོ། །དེ་ལ་པདྨ་ཅན་ནི་ཐུན་མོང་གི་པདྨ་དང་ལྡན་པའོ། །དུང་ཅན་ནི་ཡོན་པོའི་པདྨ་དང་ལྡན་པའོ། །ཨུཏྤལ་ཅན་ནི་པདྨ་ཕྲ་མོའོ། །པ་ནི་ཤིན་ཏུ་རྒྱས་པ་ཡན་ལག་མཆོག་དང་ལྡན་པའོ། །གཞན་དག་ན་རེ་བུད་མེད་ནི་གསུམ་སྟེ། རི་དགས་མོ་དང༌། རྒོད་མ་དང༌། གླང་པོ་མོའོ། །སྐྱེས་པ་ནི་གསུམ་སྟེ། རི་བོང་དང༌། གླང་དང༌། རྟའོ་ཞེས་ཟེར་རོ། །དེར་བྱས་པའི་རབ་ཏུ་དབྱེ་བའི་ལས་ཀྱིས་སོ་ཞེས་པ་ནི་ཇི་ལྟར་རྡོ་རྗེའི་རབ་དང༌། པདྨ་ཆུང་བ་དང༌། མཉམ་པོར་འགྱུར་རོ། །དེ་བཞིན་དུ་རྡོ་རྗེ་ཕྲ་བ་དང་པདྨ་ཆེ་བ་མཉམ་པོར་འགྱུར་རོ། །དེ་ལྟར་རྡོ་རྗེ་བར་མ་དང་ཕྲ་བའི་པདྨ་ལ་སོགས་པ་ལ་ཡང་ཤེས་པར་འགྱུར་རོ། །ལས་ཀྱི་དབྱེ་བས་དེ་ཡང་དྲུག་ཅུ་རྩ་བཞིའི་བྱ་བའི་སྦྱོར་བས་བསྒྲུབ་པར་བྱ་བ་དཔལ་རྡོ་རྗེ་གདན་བཞིའི་རྒྱུད་ལས་རྫས་སུ་འབྲང་བར་བྱའོ། །འདོད་པའི་བསྟན་བཅོས་ལས་ཀྱང༌། ཡང་དག་པར་འཇུག་བྱེད་ཅེས་དབྱེར་མེད་དངོས། །ཁྱད་པར་སྦྱོར་བས་དེ་ཉིད་སྣ་ཚོགས་དགའ། །དེ་ཡི་སྤྲོ་བ་དང་ནི་བཤད་བྱ་བ། །འཁོར་བའི་ལམ་ནི་རྒྱས་དང་བསྡུ་བའི་ཕྱིར། །ཞེས་འབྱུང་ངོ༌། །བདག་ཉིད་ཀྱིའོ་།ཞེས་པ་ནི་རྣལ་འབྱོར་པས་སོ། །ཤུ་ཞེས་བྱ་བ་ལ་སོགས་པས་མྱ་ངན་ནི་ཤིང་དང་འདྲ་བ་སོག་ལེ་དང་འདྲ་བས་གང་གིས་གཅོད་པར་འགྱུར་བ་དེ་ནི་མཆོག་ཏུ་དགའ་བ་ཞེས་བྱའོ། །ཁུ་བ་དེ་དང་བདག་ཉིད་མཆོད་པར་བྱའོ་ཞེས་པ་ནི་གཉིས་ཀས་ཀྱང་བདག་ཉིད་ཚིམ་པར་བྱའོ། །འདོད་པའི་དབང་ཕྱུག་ཏུ་གསལ་
བར་བསྟན་པ་ཡིན་ནོ་ཞེས་པ་ནི་སྤྲོས་པའི་སྤྱོད་པའི་སྒོ་ནས་ཆགས་པའི་རོལ་པ་ལ་སོགས་པ་རྒྱ་ཆེ་བ་བསྟན་པའོ། །རྗེས་སུ་དྲན་པའི་འབྲས་བུ་ནི་ཕན་ཡོན་ནོ། །ཡོངས་སུ་ཤེས་པས་ནི་ཞེས་པ་ལ། །སྒོམ་པ་ཡོངས་སུ་རྫོགས་ནས་མངོན་དུ་བྱེད་པས་སོ། །རྣམ་པར་སྣང་མཛད་ལ་སོགས་པའི་ངོ་བོ་ཉིད་ཀྱིས་ཞེས་པ་ནི་སྐུ་རྡོ་རྗེ་ལ་སོགས་པའི་རང་བཞིན་ནོ། །རྫུ་འཕྲུལ་དང་ལྡན་པའི་སྐུ་ཐོབ་པར་འགྱུར་པ་དང་ཞེས་པ་ནི་སྐུའི་དབང་ཕྱུག་ལ་སོགས་པའི་དངོས་གྲུབ་བརྒྱད་དང་ལྡན་པར་འགྱུར་རོ། །འདས་ཞེས་བྱ་བ་ལ་སོགས་པས་ཡུན་རིང་དུ་གནས་པ་ཉིད་བསྟན་ཏོ། །མི་བསྐྱོད་པ་དང་འབྲེལ་པའི་ཞེས་བྱ་བ་ལ་སོགས་པས་ཐུགས་ཀྱི་རང་བཞིན་ཡིན་པས་སེམས་ཀྱི་དབང་ཕྱུག་ཉིད་ཐོབ་པར་འགྱུར་རོ་ཞེས་བསྟན་ཏོ། །ཡིད་ལ་གང་དང་གང་འདོད་པ་ཞེས་པ་ནི་འཁོར་ལོས་སྒྱུར་བའི་རྒྱལ་སྲིད་ལ་སོགས་པའི་ཞེས་བྱ་བའོ། །རི་བོ་ལ་སོགས་གཡོ་བ་དང༌། །དེ་བཞིན་འཇིགས་པ་འཕྲོག་པ་དང༌། དེའི་སྟེང་དུ་ཆུ་བཞིན་དུ་ནུས་པ་དང་འབྱུང་བར་འགྱུར་ཞེས་འབྱུང་ངོ༌། །དེའི་གསུང་ནི་དེ་དང་འབྲེལ་པས་ཞེས་པ་ནི་འོད་དཔག་ཏུ་མེད་པའི་འབྲེལ་བ་དང་ལྡན་པའི་གསུང་གི་དབང་ཕྱུག་ཉིད་ཐོབ་པར་འགྱུར་ཏེ། དེ་ནི་གསུང་གི་རང་བཞིན་ཡིན་ནོ་ཞེས་བསྟན་པའི་ཕྱིར་རོ། །ཇི་ལྟ་བུ་ཞེ་ན་ཞེས་པ་ནི་དྲི་བའོ། །སྒྲ་བརྙན་དང་མཚུངས་པའི་སྒྲའི་ངོ་བོ་ཉིད་ཅེས་པ་ནི་དེའི་ངོ་བོ་ཉིད་ཅེས་པའོ། །གང་ཞིག་སྨྲ་བར་འགྱུར་པ་ཞེས་པ་ནི་དམོད་པ་འདེབས་པ་དང་རྗེས་སུ་གཟུང་བ་ལ་སོགས་པའི་ཚིག་གང་ཡིན་པ་དེ་ནི་རང་བཞིན་ཡོངས་སུ་ཤེས་པ་ཉིད་ཀྱིས་འགྲུབ་པར་འགྱུར་བ་ནི་ངག་གི་དབང་ཕྱུག་གོ །ཡང་ན་སྔར་མེད་པའི་བསྟན་བཅོས་སོ་སོར་རྩོམ་པས་ན་ངག་གི་དབང་ཕྱུག་གོ །སྐྱེ་བ་སྲིད་པ་ཐ་མ་ཡིན་ཞིང་ཞེས་པ་ནི་སྐྱེ་བ་ཕྱི་མ་དང་མི་ལྡན་པ་སྟེ་སྐྱེ་བ་གཞན་མེད་པའི་ཕྱིར་རོ། །ཟུང་དུ་འཇུག་པའི་བདག་ཉིད་ཅན་གྱི་ནི་ཞེས་པ་ལ་ཐམས་ཅད་མཁྱེན་པའི་ཡེ་ཤེས་ཐོབ་པའིའོ། །ཚེ་འདི་ཉིད་ལས་ཞེས་བྱ་བ་སྟེ་ཞེས་པའི་བསྐལ་པ་གྲངས་མེད་པ་གསུམ་གྱིས་བྱང་ཆུབ་ཐོབ་པའི་ཤེས་རབ་ཕ་རོལ་ཕྱིན་པའི་རྣལ་འབྱོར་པ་ལས་ལྡོག་པ་བསྟན་ཏོ། །ལས་ཀྱི་དབང་གིས་ཞེས་པ་ནི་ས་དགུ་པ་ལ་ལས་ཀྱི་དབང་གིས་ཐོབ་པའི་
རྒྱུར་གྱུར་པས་སོ། །སྐྱེ་བར་འགྱུར་བ་དགག་པར་མཛད་པས་ཞེས་པ་ནི་སླར་ཡང་སྲིད་པའི་སྐྱེ་བ་ལེན་པ་དགག་པ་ཡིན་ནོ། །སྐྱེ་པའི་ལས་ནི་རྩ་བ་ཡིན་ཏེ། ལས་དབང་དུ་འགྱུར་ན་སྐྱེ་བ་ཡང་མེད་དོ། །རླུང་གི་སྦྱོར་བ་མེད་པ་ཡིས། །སེམས་ཀྱི་རང་བཞིན་མ་དམིགས་ཏེ། །སེམས་ནི་རང་བཞིན་རྒྱུར་གྱུར་པས། །ལས་དང་སྐྱེ་བ་འབྱུང་བར་འགྱུར། །ཞེས་འབྱུང་ངོ༌། །མཐོང་བའི་ཆོས་ནི་མྱ་ངན་འདས། །ཞེས་བྱ་བ་ལ་སོགས་པ་འཕགས་པའི་ཚིག་གིས་ཚད་མ་ཉིད་དུ་བསྟན་ཏོ། །འབྲས་བུའི་ཁྱད་པར་ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་ཁྱད་པར་རོ། །ཕྱག་རྒྱ་ཆེན་པོ་འགྲུབ་པའོ། །ཞེས་པ་ནི་དཔལ་རྡོ་རྗེ་འཆང་ཆེན་པོའི་ལྷའི་སྐུ་སྒྲུབ་པའོ། །སྔགས་ལ་རྗེས་སུ་གཞོལ་བ་རྣམས། །ཞེས་པ་ནི་བསྐྱེད་པའི་རིམ་པའི་རྣལ་འབྱོར་པ་རྣམས་སོ། །འཇིག་རྟེན་པའི་དངོས་གྲུབ་རྣམས་ཀྱང་ཞེས་པ་ནི་སྨན་མཆོག་དང་བཅུད་ཀྱིས་ལེན་ལ་སོགས་པ་སྟེ། འཇིག་རྟེན་པ་རྣམས་འདུལ་བ་ཙམ་བྱེད་པས་སོ། །ཟུང་དུ་འཇུག་པའི་ཏིང་ངེ་འཛིན་ལ་གནས་པ་རྣམས་ལ་འགྲུབ་པར་འགྱུར་རོ་ཞེས་པ་ནི་འབད་རྩོལ་མེད་པས་འགྲུབ་པར་འགྱུར་རོ་ཞེས་ཚིག་གི་ལྷག་མའོ། །ཁམས་གསུམ་མོ་ཞེས་པ་ནི་ཁམས་གསུམ་གྱི་རང་བཞིན་ཏེ། །སངས་རྒྱས་ཐམས་ཅད་དོ། །དབྱེར་མེད་པར་གྱུར་པའོ་ཞེས་པ་ནི་དུས་གསུམ་པའི་སངས་རྒྱས་དང་བདག་ཉིད་དབྱེར་མེད་པའི་མོས་པས་སོ། །བསྒོམས་པའི་རྒྱུ་དེས་ན་འགྲུབ་པར་འགྱུར་བ་སྟེ་དབྱེར་མེད་པའི་བསྒོམ་པས་སོ། །ཡན་ལག་མ་ཉམས་པར་བཟླས་ཤིང་ཞེས་པ་ནི་ལྷ་ལ་སོགས་པ་དབྱེར་མེད་པ་དང་ལྡན་པའི་རྡོ་རྗེ་བཟླས་པས་སོ། །བདེན་པ་མཐོང་བས་སོ་ཞེས་པ་ནི་ཆོས་ཐམས་ཅད་རྟོགས་པའི་མཚན་ཉིད་ཀྱི་དེ་ཁོ་ན་ཉིད་ཡིད་ལ་བྱེད་པས་སོ། །གལ་ཏེ་ཞེས་བྱ་བ་ལ་སོགས་པས་ཐ་མི་དད་པའི་བསྒོམ་པས་འཇིག་རྟེན་པའི་དངོས་གྲུབ་ཀྱང་ཐོབ་པར་མི་འགྱུར་ན་འཇིག་རྟེན་ལས་འདས་པའི་དངོས་གྲུབ་ཐོབ་པར་འགྱུར་རོ་ཞེས་སྨོས་ཀྱང་ཅི་དགོས་པའོ། །གང་གི་ཕྱིར་དངོས་གྲུབ་ཐམས་ཅད་ཀྱི་རྒྱུ་ནི་གཉིས་སུ་མེད་པའི་ཏིང་ངེ་འཛིན་ཏེ་དེ་ཁོ་ན་ཉིད་ཡིད་ལ་བྱེད་པའི་ངོ་བོ་ཡིན་པས་སོ། །ཐུབ་པ་ཆེན་པོའི་ཆོས་ཀྱི་ཕུང༌། །བརྒྱད་ཁྲི་བཞི་སྟོང་ཤེས་ན་ཡང༌། །གང་ཞིག་དེ་ཉིད་མི་ཤེས་པས། །དེ་དག་ཐམས་
ཅད་འབྲས་བུ་མེད། །ཅེས་འབྱུང་ངོ༌། །རྣལ་འབྱོར་ཐམས་ཅད་ཅེས་བྱ་བ། །ལ་སོགས་པས་ལུང་ཚད་མ་ཉིད་བསྟན་ཏེ། རྣལ་འབྱོར་ཐམས་ཅད་ནི་ཐབས་གང་ལ་ཡོད་པ་དེ་ནི་རྣལ་འབྱོར་ཐམས་ཅད་དེ་ཐབས་ཐམས་ཅད་ཀྱིས་བསྒྲུབ་པར་བྱ་བའོ། །ཉོན་མོངས་པའི་སྒྲིབ་པ་ལ་སོགས་པ་བཅོམ་པས་ན་བཅོམ་ལྡན་འདས་སོ། །རྡོ་རྗེ་སེམས་དཔའ་ནི་རྡོ་རྗེ་འཆང་ཆེན་པོའོ། །དེ་ཉིད་ཐོབ་པ་དང་དེ་ལས་གཤེགས་པ་ནི་དེ་བཞིན་གཤེགས་པའོ། །ཁམས་གསུམ་མ་ལུས་ཞེས་པ་ནི་འགྲོ་བ་ཐམས་ཅད་དོ། །དེའི་ལོངས་སྤྱོད་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་སྟེར་བའི་སྒོ་ནས་དཔལ་རྡོ་རྗེ་སེམས་དཔའི་དབང་དུ་གྱུར་པའོ། །འདི་སྐད་བཤད་པ་ཡིན་ཏེ། འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་དཔལ་རྡོ་རྗེ་སེམས་དཔའ་ལ་རག་ལུས་པ་ཡིན་ནོ་ཞེས་བྱ་བས་དེ་ཉིད་ལ་འབད་རྩོལ་བྱའོ་ཞེས་དགོངས་པའོ། །འདོན་ཅིང་ཟློས་པ་ཞེས་པ་ནི་ཡན་ལག་མ་ཉམས་པའི་རིམ་པ་དང་ངག་གིས་བཟླས་པ་གང་ཡིན་པ་དེ་དག་སྒྲུབ་པ་པོས་ནི་རིམ་པ་གཉིས་ལ་གནས་པའི་རྣལ་འབྱོར་པ་ཞེས་བྱའོ། །སྤྲོས་པ་མེད་པ་ལ་སློབ་པའི་ངོ་བོ་ཉིད་ཅེས་པ་ནི་ཉེ་བར་མཚོན་པ་སྟེ་སྤྲོས་པ་དང་བཅས་པ་དང་ཤིན་ཏུ་སྤྲོས་པ་མེད་པ་དག་ཀྱང་སློབ་པ་ཞེས་བཤད་པར་བྱ་སྟེ། ལེའུའི་བརྗོད་བྱ་དེ་རྣམས་ཡིན་པས་སོ། །དེ་ཉིད་མཆོག་ཅེས་པ་ནི་དཔལ་རྡོ་རྗེ་འཆང་གི་གནས་ཐོབ་པར་བྱེད་པའམ་བྱ་བ་དང་སྤྱོད་པ་ལ་སོགས་པ་ལས་ཁྱད་པར་དུ་གྱུར་པས་སོ། །དེ་སྟོན་པ་ནི་སྤྱོད་པ་གསུམ་སྟོན་པར་བྱེད་པའོ། །སྒྲའི་ཚོགས་ཞེས་པ་ནི་ཚིག་གི་ཚོགས་ཏེ་ལེའུ་ཞེས་བྱའོ། །སྒྲ་ཇི་བཞིན་པ་ཞེས་པ་ནི་ཕན་ཡོན་ཙམ་སོ་སོར་བསྟན་པ་སྟེ། སོགས་པའི་སྒྲས་ཤེས་པར་བྱའོ། །སྒྲོན་མ་གསལ་བའི་འགྲེལ་པའི་ཊཱི་ཀཱ་ལས་ལེའུ་བདུན་པའི་རྒྱ་ཆེར་བཤད་པའོ།། །།