ལེའུ་བརྒྱད་པ། བཤང་གཅིའི་དམ་ཚིག་གི་རྒྱ་ཆེར་བཤད་པ།
དེ་ལྟར་ཞེས་བྱ་བ་ལ་སོགས་པས་ལེའུ་བརྒྱད་པའི་བཤད་པ་བརྩམ་པར་བྱ་སྟེ། །སྤྱོད་པ་ལ་གནས་པ་ཞེས་པ་ནི་རྣམ་པ་གསུམ་གྱི་སྤྱོད་པ་ལ་རྩོལ་བ་བྱས་པས་སོ། །ཚོགས་ཡོངས་སུ་རྫོགས་པར་བྱ་བའི་དོན་དུ་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་གཉིས་འཕེལ་བར་བྱ་བའི་ཕྱིར་རོ། །དེ་ལ་སྤྱོད་པ་སྤྱོད་པར་འཛིན་པའི་རྣལ་འབྱོར་
པ་ལ་གསང་བའི་དབང་བསྐུར་མེད་པས་དངོས་གྲུབ་ཏུ་མི་འགྱུར་རོ་ཞེས་ལེའུ་བརྒྱད་པས་དེ་སྟོན་པ་ཡིན་ནོ། །དེ་ལ་གསང་བའི་དབང་ཐོབ་པའི་ཕྱིར་བླ་མ་ལ་ཕྱི་དང་ནང་དང་གསང་བའི་མཆོད་པ་བྱས་ན་བསོད་ནམས་ཀྱི་ཚོགས་པ་ཐོབ་པར་འགྱུར་རོ། །གང་གི་ཚེ་མགུ་བར་གྱུར་པའི་བླ་མས་ཀྱང༌། སློབ་མ་ལ་གསང་བའི་དབང་བསྐུར་བྱིན་ན་དེའི་ཚེ་དེས་ཡེ་ཤེས་ཀྱི་ཚོགས་ཐོབ་པར་འགྱུར་རོ། །དེ་ཉིད་བསྟན་པའི་ཕྱིར། བླ་ན་མེད་པའི་མཆོད་པ་བྱའོ་ཞེས་པ་ནི་གང་གིས་ཡེ་ཤེས་ཀྱི་ཚོགས་ཐོབ་པར་འགྱུར་རོ། །སྤྱོད་པ་ཐོས་པའི་འོག་ཏུ་ཞེས་པ་ནི། དེ་ནས་ཀྱི་སྒྲས་དེ་མ་ཐག་པའི་དོན་བཤད་པའི་ཕྱིར་རོ། །དཀོན་མཆོག་དཔལ་ནི་ཅིའི་ཕྱིར་ཞེ་ན་སྨྲས་པ། ནམ་མཁའི་ཁམས་ཀྱི་རང་བཞིན་ནི་བྱང་ཆུབ་ཀྱི་སེམས་ཏེ་དེའི་རང་བཞིན་ཡང་རིན་ཆེན་དཔལ་ལོ་ཞེས་པས་དེ་ལ་འདྲི་བ་པོ་ནི་མཐུན་པའོ། །དེ་ཉིད་བསྟན་པའི་ཕྱིར། བྱང་ཆུབ་ཀྱི་སེམས་ཞེས་པ་ནི་བྱང་ཆུབ་ཀྱི་སེམས་ཀྱིས་བསམ་པ་ཐམས་ཅད་རྫོགས་པར་བྱེད་པས་སོ། །བྱང་ཆུབ་ཀྱི་སེམས་དབང་བསྐུར་བའི་གསོལ་བ་གདབ་པའི་གཞིར་གྱུར་པའི་ཕྱིར་རོ་ཞེས་པ་ནི་གསང་བའི་དབང་བསྐུར་དེའི་རང་བཞིན་གསོལ་བ་འདེབས་པར་བྱེད་པ་ཡིན་པས་སོ། །བྷ་གར་བཞུགས་པས་ན་ཞེས་པ་ནི་བྷ་གའི་ནང་དུ་འདོད་པའི་གདུགས་ཀྱི་རྩལ་བྱང་ཆུབ་ཀྱི་སེམས་གནས་པས་སོ། །རིགས་ཐམས་ཅད་ཀྱི་བདག་ཉིད་ཅན་ཞེས་པ་ནི་རིགས་ལྔ་ཉེ་བར་སྡུད་པས་སོ། །དམ་པ་ནི་སྤྱན་ལ་སོགས་པ་ཞེས་པ་ནི་མཆོག་ཏུ་དགའ་བ་རབ་ཏུ་སྟེར་བ་རིགས་ཀྱི་ཡུམ་བཞི་ཞེས་བྱ་བ་སྟེ་དྲང་བའི་དོན་ཏོ། །མཆོག་གི་དེ་ཁོ་ན་ཉིད་གཞལ་བར་བྱེད་པས་ན་དམ་པ་ནི་འབྱུང་བའི་རྩ་བཞིའོ། །སྤྱན་མ་ལ་སོགས་པ་ནི། རུས་སྦལ་མ་དང་ཟླ་བའམ། །ལྷ་སྦྱིན་མ་དང་ནོར་རྒྱས་མ། །ཞེས་བྱའོ། །དེ་རྣམས་ཀྱི་དབང་ཕྱུག་ནི་གཙོ་བོར་གྱུར་པ་སྟེ་ཞེས་པ་ནི་རྩ་དབུ་མ་བཞི་དང་ལྡན་པ་ཐིག་ལེའི་གཟུགས་སུ་འཇུག་པ་སྟེ་ངེས་པའི་དོན་ཏོ། །རྡོ་རྗེ་འཆང་ཆེན་པོ་ནི་དྲུག་པའོ། །མཉེས་པར་བྱས་སོ་ཞེས་པ་ནི་གསོལ་བ་འདེབས་པར་བྱས་པའོ། །ཚིགས་སུ་བཅད་པ་དེ་བཞིས་དེ་བཞིན་གཤེགས་པ་དྲུག་གི་སྒོ་ནས་བསྟན་པར་བྱ་སྟེ། རྡོ་རྗེ་ལྟར་མི་ཕྱེད་པའི་ཚུལ་གྱིས་མཛེས་པས་ན་ཞེས་པ་ནི་དེ་བཞིན་གཤེགས་
པ་ལྔ་བསྡུ་བར་བྱེད་པ་རྣམ་པར་མི་རྟོག་པའི་ཡེ་ཤེས་མི་ཕྱེད་པའི་དེ་ཁོ་ན་ཉིད་སྟོན་པའི་ངང་ཚུལ་ཅན་ཏེ། བཅོམ་ལྡན་འདས་རྡོ་རྗེ་འཆང་ཆེན་པོའོ། །གང་གིས་སེམས་ཅན་མང་ཞིང་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །སངས་རྒྱས་ཉིད་དུ་སོན་པར་མཛད་པ་ནི་རྡོ་རྗེ་འཆང་ཆེན་པོ་བསྒོམས་ནས་སངས་རྒྱས་ཉིད་ཐོབ་པ་ཡིན་གྱི། གཞན་གྱིས་ནི་མ་ཡིན་ཏེ། རྟོག་པ་དང་བཅས་པའི་ཕྱིར་རོ། །གང་གི་ཕྱིར་དེ་བཞིན་གཤེགས་པའི་དབུགས་དབྱུང་བ་ནི་འཁོར་བ་དང་རྡོ་རྗེ་འཆང་གི་དབུགས་དབྱུང་བ་ནི་མྱ་ངན་ལས་འདས་པ་ཡིན་ནོ་ཞེས་འབྱུང་ངོ༌། །དེས་ནི་རྡོ་རྗེ་འཆང་ཆེན་པོའི་སྒོ་ནས་བསྟོད་པའོ། །དོན་དམ་པའི་བདེན་པ་ནི་རིམ་པ་གཉིས་པའམ། བཞི་པས་ཐོབ་པར་བྱ་བའི་འོད་གསལ་བའོ། །དེ་རྣམ་པར་དག་པའི་སྤྱོད་པ་ནི་ཞེས་པ་ལ་འཇིག་རྟེན་པའི་ཆོས་བརྒྱད་རྣམ་པར་དག་པའི་མཚན་ཉིད་དོ། །ཇི་ལྟར་སྡུག་བསྔལ་དེ་བཞིན་བདེ། །ཞེས་བྱ་བ་ལ་སོགས་པ་འབྱུང་བས་སོ། །དེས་རྣལ་འབྱོར་པའི་རྒྱུད་སྦྱོང་བར་བྱེད་པས་ན་ཞེས་པ་ནི་རྣམ་པར་མི་རྟོག་པར་བྱེད་པའོ། །དེ་སྤྱོད་པས་ནི་སེམས་སོ་སོར་རྟོག་པར་བྱ་བ་ཡིན་ཏེ། དེས་ནི་རིན་ཆེན་འབྱུང་ལྡན་གྱི་སྒོ་ནས་བསྟོད་པའོ། །རྣམ་པར་རྟོག་པ་ཐམས་ཅད་ཀྱི་སྤྲོས་པ་དང་བྲལ་བ་ཞེས་པ་ནི་སེམས་ཅན་རྣམས་ལ་མ་སྨིན་པ་ལ་སོགས་པ་རྟོག་པ་ཐམས་ཅད་དེ། དེ་དང་བྲལ་བ་ནི་སེམས་ཅན་རྣམ་ལ་བསྟན་པ་དང་གྲོལ་བ་དང་སྨིན་པ་ལ་སོགས་པའི་མཚན་ཉིད་ཅན་གྱི་སྤྱོད་པའོ། །དེས་ན་ཕུལ་དུ་བྱུང་བས་ན་ཞེས་པ་ནི་བྱ་བ་ནན་ཏན་གྲུབ་པའི་ཡེ་ཤེས་དང་ལྡན་པའོ། །རྒྱལ་བར་གྱུར་པས་ན་ཞེས་པ་ནི་མཐོང་བ་དང་བསྒོམ་པ་ལ་སོགས་པའི་ལམ་གྱིས་ཉོན་མོངས་པ་དག་པར་མཛད་པས་ན་རྒྱལ་བའོ། །རང་སངས་རྒྱས་ལ་སོགས་པ་སྟེ་ཞེས་པ་ནི་བསེ་རུ་ལ་སོགས་པའོ། །དེ་རྣམས་འོད་ཟེར་གྱིས་བསྐུལ་བས་སྔགས་ཀྱི་ཚུལ་ལ་འཇུག་པར་མཛད་པས་ན་མཆོག་ནི་དོན་ཡོད་གྲུབ་པའོ། །དེས་ནི་དོན་ཡོད་གྲུབ་པའི་སྒོ་ནས་བསྟོད་པའོ། །སྒྲ་ཇི་བཞིན་པའོ་ཞེས་པ་ནི་སྤྱོད་པའི་སྒོ་ནས་བསྟོད་པའི་དོན་བསྟན་པའི་ཕྱིར་རོ། །འདོད་ཆགས་ལ་སོགས་པ་ཉོན་མོངས་པ་དང་ཉེ་བའི་ཉོན་མོངས་པ་རྣམས་འདོད་ཆགས་ལ་སོགས་
པའི་སྒོ་ནས་སྦྱོང་བར་མཛད་པའི་ཕྱིར། འདོད་ཆགས་ཞེས་བྱ་བ་ལ་སོགས་པས་བསྟན་ཏེ། བར་གྱི་སྦྱོང་བ་ཚིག་མི་མངོན་པ་ཞེས་དགོངས་སོ། །དེ་སྟོན་པར་མཛད་པས་ན་དེ་སྐད་ཅེས་བྱའོ། །ནམ་མཁའི་དབྱིངས་དང་མཚུངས་པ་ཞེས་པ་ནི་རྣམ་པར་མི་རྟོག་པའི་བྱང་ཆུབ་ཀྱི་སེམས་ཀྱང་ནམ་མཁའོ། །དེའི་རང་བཞིན་ཡིན་པས་ན་མཆོག་ཅེས་འོད་དཔག་ཏུ་མེད་པའི་སྒོ་ནས་བསྟོད་པའོ། །དུས་གསུམ་དུ་གཤེགས་པའི་དེ་བཞིན་གཤེགས་པ་རྣམས་ཏེ་རྣམ་པར་སྣང་མཛད་ཀྱི་རིགས་ཅན་ནོ། །སྐྱེད་པར་མཛད་པས་ན་ཞེས་པ་ནི་རྣམ་པར་སྣང་མཛད་ཀྱི་རིགས་ལས་འབྱུང་བས་སོ། །བག་ཆགས་མ་ལུས་པ་དང་བྲལ་བ་ཞེས་པ་ནི་ཉོན་མོངས་པ་དང་ཤེས་བྱའི་སྒྲིབ་པ་མེད་པའོ། །འཁོར་བ་ཇི་སྲིད་པར་གནས་པ་ཞེས་པ་ནི་འཁོར་བའི་བར་དུ་གནས་པའོ། །སེམས་ཅན་གྱི་ཁམས་སྦྱོང་བར་བྱེད་པའི་ཡེ་ཤེས་ནི་མེ་ལོང་ལྟ་བུའི་ཡེ་ཤེས་ཏེ་གྲོལ་བར་བྱེད་པས་ན་ཐར་པ་ཞེས་བྱའོ། །ལམ་ནི་ལམ་ལྔའི་མཚན་ཉིད་ཀྱི་རྒྱུའོ། །འཆད་པར་མཛད་པ་ཞེས་པ་ནི་རྣམ་པར་སྣང་མཛད་ཉིད་དོ། །ཉན་ཐོས་ལ་སོགས་པའི་ཐེག་པ་གསུམ་མོ་ཞེས་པ་ནི་དེའི་ཚེ་དགོངས་པས་ཆོས་ཀྱི་འཁོར་ལོ་བསྐོར་བའི་ཕྱིར་རོ། །དེ་ལ་ལན་གྱི་ངོ་བོ་ཉིད་ཀྱིས་རབ་ཏུ་གནས་པས་ན་ཞེས་པ་ནི་ལམ་གྱི་ངོ་བོར་བཅོམ་ལྡན་འདས་གནས་པའོ། །རྣམ་པར་སྣང་མཛད་ལ་སོགས་པ་ཞེས་པ་ནི་སྤྲུལ་པའི་རྣམ་པར་སྣང་མཛད་དང༌། སྤྱན་མ་དང་གཟུགས་རྡོ་རྗེ་མ་ལ་སོགས་པའོ། །དེ་རྣམས་ཀྱི་བདག་པོར་གྱུར་པས་ཞེས་པ་ནི་ལོངས་སྤྱོད་རྫོགས་པའི་སྐུའི་རང་བཞིན་གྱི་རྣམ་པར་སྣང་མཛད་དེ་བདག་པོའོ། །དེས་ན་དག་པའི་བདག་ཉིད་ཅན་གྱིས་ཞེས་པ་ནི་རང་དང་གཞན་གྱི་དོན་ཕུན་སུམ་ཚོགས་པ་ལ་མཁས་པས་དག་པའི་གནས་ཐོབ་པའོ། །དེས་ནི་རྣམ་པར་སྣང་མཛད་ཀྱི་རང་བཞིན་གྱིས་བསྟོད་པའོ། །བྱང་ཆུབ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །དེའི་ངོ་བོའི་ཐུགས་གང་ལ་ཡོད་པ་དེ་ནི་མི་བསྐྱོད་པ་ཞེས་བྱ་བའི་དོན་ཏོ།། རྒྱས་པའི་སྤྱན་དང་ལྡན་པ་གང་ཡིན་པ་དེ་ནི་ཞེས་པ་ནི་སྐྱེས་བུ་ཆེན་པོའི་མཚན་དང་ལྡན་པ་ཉིད་བསྟན་ཏོ། །ཆོས་ཀྱི་འཁོར་ལོ་ནི་རྣམ་པ་བཅུ་གཉིས་པའོ་ཞེས་པ་ནི་བདེན་པ་ནི་བཞི་སྟེ། སྡུག་བསྔལ་བ་དང༌། ཀུན་འབྱུང་དང༌། འགོག་པ་དང༌། ལམ་ཞེས་བྱ་བ་སྟེ། མཐོང་བའི་ལམ་ལའོ། །སྡུག་བསྔལ་
ཤེས་པར་བྱ། ཀུན་འབྱུང་དགག་པར་བྱ། འགོག་པ་མངོན་དུ་བྱ། ལམ་བསྒོམ་པར་བྱ་ཞེས་བྱ་བ་བསྒོམ་པའི་ལམ་མོ། །སྡུག་བསྔལ་ཤེས། ཀུན་འབྱུང་སྤོང༌། འགོག་པ་མངོན་དུ་བྱས། ལམ་བསྒོམ་ཞེས་མི་སློབ་པའི་ལམ་སྟེ། དེ་ལྟར་རྣམ་པ་གསུམ་བསྐོར་བ་ནི་བདེན་པ་བཞི་སྟེ་རྣམ་པ་བཅུ་གཉིས་ཞེས་བྱའོ། །བཅོམ་ལྡན་འདས་ཀྱིས་ཁམས་གསུམ་པོ་ལ་རབ་ཏུ་བསྐོར་བ་མཛད་དོ། །སྐུ་དང་གསུང་དང་ཐུགས་རྡོ་རྗེ་འཆང་གི་ངོ་བོ་ཡིན་པས་ན། རྡོ་རྗེ་གསུམ་མི་ཕྱེད་པའི་མཚན་ཉིད་དོ། །དེས་ནི་མི་བསྐྱོད་པའི་སྒོ་ནས་བསྟོད་པའོ། །དྲང་བའི་དོན་ཞེས་པ་ནི་དེ་བཞིན་གཤེགས་པ་དྲུག་གི་ནི་བསྟོད་པ་ཙམ་བསྟན་པས་སོ། །ད་ནི་རྡོ་རྗེ་འཆང་ཆེན་པོ་ཉིད་ངེས་པའི་དོན་གྱི་སྒོ་ནས་བསྟོད་པར་བྱ་སྟེ། ཡེ་ཤེས་གསུམ་གྱི་སྒོ་ནས་ཞེས་པ་ནི་སྣང་བ་ནི་ཞེ་སྡང་ངོ༌། །སྣང་བ་མཆེད་པ་ནི་འདོད་ཆགས་སོ། །སྣང་བ་ཉེ་བར་ཐོབ་པ་ནི་གཏི་མུག་སྟེ་མ་རིག་པའི་ངོ་བོ་ཡིན་པས་སོ། །དེ་ཉིད་བསྟན་པའི་ཕྱིར། འདོད་ཆགས་ནི་ཐབས་ཀྱི་རང་བཞིན་ཞེས་བྱ་བ་ལ་སོགས་པ་བསྟན་ཏོ། །འོད་གསལ་བ་ཞེས་པ་ནི་མི་ཕྱེད་པའི་ཕྱིར་རོ། །དེ་ཉིད་ཅེས་བྱ་བ་ལ་སོགས་པ་འོད་གསལ་བའི་དྲི་མ་རྣམ་པར་དག་པར་བྱེད་པ་ཉིད་བསྟན་ཏོ། །དབང་པོ་མཆོག་ནི་རྣམ་པར་ཤེས་པ་སྟེ་ཐམས་ཅད་ཀྱི་མཆོག་ཡིན་པས་སོ། །དེ་ཉིད་ཤེལ་སྒོང་དག་པ་དང་མཚུངས་པ་ནི་དབང་པོ་མཆོག་ཙམ་མོ། །དེ་བཟུང་བས་ནི་བཅོམ་ལྡན་འདས་ཏེ་རྣལ་འབྱོར་གྱི་མངོན་སུམ་གྱིས་རྟོགས་པར་བྱ་བ་ཉིད་དུ་བསྟན་ཏོ། །རྡོ་རྗེ་འཆང་ཆེན་པོ་ནི་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་དང་པོར་གྱུར་པས་ན་མཆོག་ཅེས་བྱའོ། །འོད་གསལ་བ་ཡང་དངོས་པོའི་ཚོགས་ཐམས་ཅད་ཀྱི་དང་པོ་ཉིད་ཆོས་ཀྱི་ངོ་བོ་ཡིན་པས་སོ། །རྣམ་པར་སྣང་མཛད་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་རིགས་ལྔ་ལས་བྱུང་བ་སྟེ། གང་དུ་ནི་རྡོ་རྗེ་འཆང་ཆེན་པོའི་རིགས་གཅིག་ལ་ཐིམ་པར་གྱུར་པས་ན་དེ་ལ་དེ་སྐད་ཅེས་བྱ་བའོ། །གཉིས་སུ་མེད་པའི་ཡེ་ཤེས་ཀྱི་བདག་ཉིད་ཅན་ནོ་ཞེས་པ་ནི་འོད་གསལ་བ་དང་དེའི་བདག་ཉིད་ཀྱི་མཆོད་པ་ཞེས་བྱའོ། །རྡོ་རྗེ་སྐུ་ཉིད་ཀྱིས་ཞེས་པ་ནི་ཟུང་དུ་འཇུག་པའི་སྐུ་ཉིད་ཀྱིས་སོ། །ཚད་མེད་པའི་ལྷ་མོ་དང་སྙོམས་པར་
ཞུགས་པས་ཞེས་པ་ནི་རིགས་ཀྱི་ཡུམ་དང་མཆོད་པའི་ལྷ་མོ་དང༌། ཕོ་ཉ་མོ་དང་བཀའ་ཉན་མོ་དང་བྲན་མོའི་པདྨའི་འབྲེལ་པས་སོ། །མཆོག་ཏུ་དགའ་བའི་མཚན་ཉིད་གཅིག་པར་ཞེས་པ་ནི་བདེ་བ་ཆེན་པོའི་ངོ་བོ་གཅིག་གིས་སོ། །ལྷ་དང་མི་ལས་འདས་པའི་ཞེས་པ་ནི་ལྷ་དང་མི་རྣམས་ཀྱི་བདེ་བ་ནི་མ་དག་པ་སྟེ། མི་རྟག་པའི་ཆོས་དང་ལྡན་པའི་ཕྱིར་དང་བྲལ་བའི་སྡུག་བསྔལ་གྱི་རྣམ་པར་སྨིན་པ་ཆེ་བ་ཡིན་པས་དྲི་མ་མེད་པ་མ་ཡིན་ནོ། །བཅོམ་ལྡན་འདས་ཀྱིས་བདེ་བ་ཆེན་པོ་ནི་ཟག་པ་མེད་པ་སྟེ་རྟག་པ་ཞེས་བྱའོ། །ཡོན་ཏན་བརྒྱད་ཀྱི་དབང་ཕྱུག་གི་བདེ་བ་ཞེས་པ་ནི།། སྐུའི་དབང་ཕྱུག་ལ་སོགས་པ་སྟེ་སྔར་བཤད་ཟིན་ནོ། །དེ་ལྟར་གྱུར་པའི་བདེ་བ་ཆེན་པོ་ཐོབ་པའི་ཐབས་ནི་རིགས་དང་བསམ་པ་ལ་སོགས་པའི་དབྱེ་བས་རྣམ་པ་དུ་མ་གང་ཡིན་པ་དེ་སྟོན་པར་མཛད་པ་ནི་དེ་སོ་སོར་སྟོན་པར་མཛད་པས་སོ། །ཤེས་རབ་དང་ཐབས་དང་ཉེ་བར་ཐོབ་པ་གསུམ་ནི་སྣང་བ་གསུམ་མོ། །དེ་ཉིད་བགྲོད་པར་བྱ་བ་ཡིན་པས་ན་ལམ་སྟེ་རྒྱུའོ། །དོན་དམ་པའི་བདེན་པའོ་ཞེས་པ་ནི་རིམ་པ་གཉིས་པ་དང་བཞི་པས་ཐོབ་པར་བྱ་བའི་འོད་གསལ་བའོ། །དེ་ཉིད་བླང་བ་ཡིན་པས་ན་གྲོང་ཁྱེར་དང་འདྲ་བ་ནི་གྲོང་ཁྱེར་ཆེན་པོའོ། །དེར་འཇུག་པར་མཛད་པས་ན་ཞེས་པ་ནི་དེ་སྟོན་པར་བྱེད་པའོ། །བདེ་བ་ཐམས་ཅད་ནི་སྣང་བ་ལ་སོགས་པའོ། །བདག་ཉིད་ནི་འོད་གསལ་བའོ། །དེ་སྒྲུབ་པ་ནི་རྫོགས་པར་བྱེད་པ་ཞེས་བྱ་བའི་ཐ་ཚིག་གོ །བདེན་པ་གཉིས་ཀྱི་བདག་ཉིད་ཅན་ཡིན་པས་ན་ཞེས་པ་ནི་ཀུན་རྫོབ་དང་དོན་དམ་པ་གཉིས་ཀྱི་ངོ་བོ་ཡིན་པའི་ཕྱིར་རོ། །བྱང་ཆུབ་ནི་དོན་དམ་པའི་བདེན་པ་ཞེས་པ་ལ་སོགས་པས་ཟུང་དུ་འཇུག་པའི་རིམ་པ་གཙོ་བོར་གྱུར་པ་བཅོམ་ལྡན་འདས་བསྟན་ཏོ། །རྒྱས་ཤིང་ཞེས་བྱ་བ་ལ་སོགས་པས་མདོར་བསྟན་པའོ། །དེ་གང་ཞེ་ན། ཞེས་པ་ནི་འདྲི་བའོ། །ཤ་ཞེས་བྱ་བ་ལ་སོགས་པ་ནི་རྒྱས་པར་བཤད་པའོ། །དེ་ལ་ཤའི་མིག་གིས་བཅོམ་ལྡན་འདས་སྐྱེས་བུ་ཆེན་པོའི་མཚན་དང་ལྡན་པ་ཞེས་བྱའོ། །ལྷའི་མིག་གིས་རིང་བ་དང་བསྐལ་པ་དང་བར་ཆོད་དང་བཅས་པའི་དངོས་པོ་རྣམས་གཟིགས་སོ། །ཤེས་རབ་ཀྱི་མིག་གིས་དངོས་པོའི་རང་གི་མཚན་ཉིད་གཟིགས་སོ། །ཆོས་ཀྱི་མིག་གིས་ཆོས་
ཐམས་ཅད་སྟོང་པ་ཡེ་ཤེས་ལྔ་གཟིགས་སོ། །སངས་རྒྱས་ཀྱི་མིག་གིས་འབའ་ཞིག་དྲི་མ་མེད་པ་མཐའ་ཡས་པ་ནམ་མཁའ་དང་མཚུངས་པ་ཆོས་ཀྱི་དབྱིངས་སོ་སོར་རྟོགས་པར་འགྱུར་རོ། །འདུས་བྱས་པ་དང་འདུས་མ་བྱས་པ་བདེན་པ་གཉིས་ཀྱི་བདག་ཉིད་ཅན་ནོ་ཞེས་པ་ནི་ཀུན་རྫོབ་དང་དོན་དམ་པ་ལ་སོགས་པའོ། །དེ་སེམས་ཅན་གྱི་འཇིག་རྟེན་དུ་རབ་ཏུ་སྟོན་པར་མཛད་པས་ན་ཞེས་པ་ནི་དེའི་མན་ངག་སྟོན་པར་བྱེད་པས་སོ། །ཡང་དག་པའི་མཐའ་ནི་འོད་གསལ་བའོ། །དེས་རྣམ་པར་དག་པའི་སྐུ་གསུམ་ལ་སོགས་པ་བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བའོ། །དེའི་བདག་ཉིད་ཅན་ནི་དེའི་རང་བཞིན་ཡིན་པའི་ཕྱིར་རོ། །མི་འཇིགས་པའི་ལམ་གྱི་བདག་ཉིད་ཡིན་པས་ན་ཞེས་པ་ནི་ཕྱིར་མི་ལྡོག་པའི་ལམ་གྱི་རང་བཞིན་ཡིན་པས་སོ། །ངེས་པའི་དོན་ཏོ་ཞེས་པ་ནི་ཡང་དག་པའི་དེ་ཁོ་ན་ཉིད་སྟོན་པའི་ཕྱིར་རོ། །ཐམས་ཅད་སྟོང་པ་སྟེ་ཞེས་པ་ནི་དེ་ཁོ་ན་ཉིད་བཞི་པ་སྟེ། ནམ་མཁའ་ལ་ནི་ནམ་མཁའ་སྦྱར། །ཐམས་ཅད་ནམ་མཁའ་ནམ་མཁའ་ཆེ། །ཞེས་འབྱུང་ངོ༌། །ཡེ་ཤེས་ཆེན་པོ་ལ་ལྟོས་པས་ཆེན་པོ་ཡང་ཡིན་ལ། འོད་གསལ་ཡིན་པའི་ཕྱིར་མི་འགྱུར་བ་ཡང་ཡིན་ནོ་ཞེས་བསྡུ་བའོ། །ཐམས་ཅད་ཀྱི་དབང་བསྐུར་བར་གྱུར་པས་ན་ཞེས་པ་ནི། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཆང་ཆེན་པོ་ནི་ཅོད་པན་དུ་འགྱུར་བས་སོ། །ནམ་མཁའི་མཛོད་ཀྱི་ཏིང་ངེ་འཛིན་གྱིས་ཞེས་པ་ལ་སོགས་པ་ནི་མི་ཟད་པའི་གཏེར་གྱིས་ཕུན་སུམ་ཚོགས་པར་བྱེད་པའི་དངོས་པོ་དང་ལྡན་པས་སོ། །འཇིག་རྟེན་གསུམ་གྱིས་མཆོད་པར་བྱ་བ་དྲག་པོ་དང་ཁྱབ་འཇུག་དང་ཚངས་པ་ལ་སོགས་པ་རྣམས་ཀྱི་ཡང་བདག་པོ་ཡིན་པས་སོ། །དོན་དམ་པའི་བདེན་པ་ཞེས་པ་ནི་གཉིས་པའམ་བཞི་པའི་འོད་གསལ་བ་སྟེ་མི་ཕྱེད་པའི་ཕྱིར་རོ། །བསམ་པ་ཐམས་ཅད་རྫོགས་པར་བྱེད་པས་ཞེས་པ་ནི་སྒྱུ་མ་ལྟ་བུའི་ཏིང་ངེ་འཛིན་གྱིས་འགྲོ་བའི་དོན་རྫོགས་པར་བྱེད་པས་སོ། །བདག་ལ་བྱིན་གྱིས་བརླབ་པའི་རིམ་པས་ཐོབ་པར་བྱ་བའི་ཡེ་ཤེས་ཀྱི་སྐུ་ནི་རིན་ཆེན་ཞེས་བྱའོ། །དེའི་ངོ་བོ་ཉིད་ཀྱིས་དེ་ཟུང་དུ་འཇུག་པར་བྱེད་པས་ན་ཞེས་ཟུང་དུ་འཇུག་པའི་རིམ་པ་བསྟན་ཏོ། །དགོངས་པ་མ་ཡིན་པར་བཤད་པ་ཞེས་པ་ནི་ཤིན་ཏུ་
གསལ་བའི་དེ་ཁོ་ན་ཉིད་སོ་སོར་བསྟན་པས་སོ། །དུས་གསུམ་དུ་བཞུགས་པའི་རྒྱལ་བ་རྣམས་ནི་འདས་པ་ལ་སོགས་པའི་དུས་གསུམ་ལ་བཞུགས་པས་སོ། །དེ་དང་འབྲེལ་པ་དང་ལྡན་པའི་མཆོད་པ་ནི་ཞེས་པ་ལ། དེ་བཞིན་གཤེགས་པ་ཐམས་ཅད་འཇུག་པ་སྔོན་དུ་འགྲོ་བར་བྱང་ཆུབ་ཀྱི་སེམས་སྤྲོ་ཞིང་སྤྱོད་པའི་ཕྱིར་རོ། །བསྐྱེད་པའི་རིམ་པ་ལ་གནས་པའི་ཐུན་མོང་མ་ཡིན་པས་ཞེས་པ་ནི་ཏིང་ངེ་འཛིན་གསུམ་སྒོམ་པར་བྱེད་པའི་རྣལ་འབྱོར་བ་རྣམས་ལ་སྤྱོད་ཡུལ་མ་ཡིན་པའི་ཕྱིར་རོ། །འོ་ན་དང་པོ་དབང་བསྐུར་བའི་དུས་སུ་ཇི་སྲིད་སློབ་དཔོན་དང་གསང་བ་དང་ཤེས་རབ་དང་བཞི་པ་ཡང་ནི་དེ་བཞིན་ནོ་ཞེས་བྱ་བས་དབང་མ་བསྐུར་ན་དེ་སྲིད་སྔགས་ཀྱི་ཐེག་པ་བསྟན་པ་དང་ཉན་པ་དང་བསམ་པ་དང་བསྒོམ་པ་ལ་དབང་བ་མ་ཡིན་ནོ། །བསྐྱེད་པའི་རིམ་པའི་རྣལ་འབྱོར་པ་རྣམས་ཀྱིས་ཀྱང་འདི་དག་ཐམས་ཅད་བྱེད་པས་ན་ཇི་ལྟར་ཐུན་མོང་མ་ཡིན་པ་ཞེས་བཤད་ཅེ་ན། སྨྲས་པ། བསྐྱེད་པའི་རིམ་པའི་རྣལ་འབྱོར་པ་རྣམས་ལ་དབང་བསྐུར་བའི་རིམ་པ་ཐམས་ཅད་བླ་མ་རྣམས་ཀྱིས་ཀུན་དུ་སྤྱོད་པར་བྱེད་པ་སྟེ། སྣོད་དུ་བྱ་བའི་ཕྱིར་རོ། །དེ་རྣམས་ཀྱི་ཕ་རོལ་ལ་བསྟན་པའི་ཕྱིར་དབང་ནི་མ་གནང་སྟེ་རྫོགས་པའི་རིམ་པ་མི་རྟོག་པའི་ཕྱིར་རོ། །རྫོགས་པའི་རིམ་པའི་རྣལ་འབྱོར་པ་རྣམས་ཀྱིས་ཐམས་ཅད་ལ་དབང་བྱེད་པ་ཡིན་ནོ་ཞེས་ཉེས་པ་ནི་ཅུང་ཟད་ཀྱང་མེད་དོ། །རྡོ་རྗེ་མི་ཕྱེད་གསུམ་ཞེས་པ་ནི་སྐུ་གསུང་ཐུགས་ཀྱི་རྡོ་རྗེ་འཆང་ཆེན་པོ་དབྱེར་མེད་པའི་རང་བཞིན་ནོ། །དེ་ནི་ཁམས་གསུམ་པ་རྣམས་ཉིད་ཀྱི་སྐུ་དང་གསུང་དང་ཐུགས་དང་འདུས་པར་མཛད་པས་ན་ཞེས་པ་ནི་ཁམས་གསུམ་གྱི་ནང་ན་གནས་པ་རྒྱལ་བའི་ཚོགས་དང༌། རང་གི་སྐུ་ལ་སོགས་པ་དང་ལྷན་ཅིག་ཏུ་གཅིག་ཏུ་བྱའོ། །གསང་བའི་དབང་བསྐུར་བའི་དུས་སུ་ཁམས་གསུམ་ན་གནས་པའི་དེ་བཞིན་གཤེགས་པ་ཐམས་ཅད་རྡོ་རྗེ་སློབ་དཔོན་གྱིས་ཁ་སྦྱར་དུ་བྱའོ་ཞེས་བསྟན་ཏོ། །རྒྱལ་བ་རྣམས་འདི་ལས་འབྱུང་བར་གྱུར་པས་ན་ཞེས་པ་ནི་དེ་སྤྱོད་པ་ཐ་མལ་པའི་ལུས་སྤངས་ནས་སློབ་མ་རྣམས་ཀྱིས་རྡོ་རྗེ་འཆང་གི་རྣམ་པར་སྨིན་པའི་སྐུ་ཐོབ་པར་འགྱུར་རོ། །དེ་དུས་བརྩམས་ནས་དེ་ནི་རྟོག་པ་མེད། །དེ་ཡི་དབྱིབས་དང་ཁ་དོག་ཇི་ལྟར་མཚོན། །བསམ་གྱིས་མི་ཁྱབ་རྣམ་པར་སྨིན་པའི་སྐུ།།
བྱ་བ་བྱས་པས་སྡོམ་པ་དེ་ལས་ཐོབ། །ཅེས་འབྱུང་ངོ༌། །དགོངས་པས་བཤད་པ་ཞེས་པ་ནི། །འགལ་བའི་ཚིག་གི་སྦྱོར་བས་དེ་ཁོ་ན་ཉིད་སོ་སོར་བསྟན་པས་སོ། །དེ་ཉིད་ཅེས་བྱ་བ་ལ་སོགས་པས་གསང་བའི་དབང་བསྐུར་བ་སྦྱིན་པར་བྱ་བའི་ཕྱིར་རྫོགས་པའི་རྣལ་འབྱོར་བདག་ལ་བྱིན་གྱིས་བརླབ་པའི་རིམ་པས་ཡེ་ཤེས་ཀྱི་སྐུ་གཟུང་བ་བསྟན་ཏོ། །ཡིད་དུ་འོང་བའི་གཟུགས་ཅན་ཡིན་པས་ན་ཞེས་པ་ནི་འཇའ་ཚོན་ལྟར་འོད་སྤྲོ་བའི་བདག་ཉིད་དམ་རྣམ་པ་ཐམས་ཅད་མཆོག་དང་ལྡན་པའོ། །བདེན་པ་གཉིས་ཀྱི་བདག་ཉིད་ཅན་ནི་སེམས་རྣམ་པར་དག་པའི་རིམ་པས་དོན་དམ་པའི་བདེན་པའི་བདག་ཉིད་ཅན་དང་བདག་ལ་བྱིན་གྱིས་བརླབ་པའི་རིམ་པས་ཀུན་རྫོབ་ཀྱི་བདེན་པའི་བདག་ཉིད་ཅན་ནོ། །གཟུགས་བཟང་ཞེས་པ་ནི་ཆོག་མི་ཤེས་པའི་གཟུགས་སོ། །གཞོན་པས་བརྒྱན་པའི་ཞེས་པ་ནི་རྣམ་པ་ཐམས་ཅད་མཆོག་དང་ལྡན་པས་སོ། །ལྷ་ཉི་ཤུ་རྩ་ལྔའི་བདག་ཉིད་ཅན་གྱི་ཞེས་པ་ནི་ཉེ་བར་མཚོན་པ་ཙམ་ཡིན་ཏེ། ལྷ་སུམ་ཅུ་རྩ་གཉིས་འཁོར་དང་ལྡན་པ་ཞེས་བྱ་བའི་ཐ་ཚིག་གོ །བདག་ལ་བྱིན་གྱིས་བརླབ་པའི་མཚན་ཉིད་ཅན་ཞེས་པ་ནི་ཅིག་ཅར་རམ་སྣང་བ་ཉེ་བར་ཐོབ་པ་ལ་སོགས་པའི་རིམ་པས་འོད་གསལ་བ་ལས་འབྱུང་བ་ཞེས་བྱ་བའི་དོན་ཏོ།། བླ་མའི་ཁ་ནས་རྙེད་པ་ཞེས་པ་ནི་རྡོ་རྗེ་སློབ་དཔོན་གྱི་ཞལ་ནས་ཐོབ་ནས་སོ། །ཡང་ན་དགོངས་པས་བཤད་པས་བླ་མའི་ཁ་ནི་འོད་གསལ་བ་སྟེ་དེ་ལས་རྙེད་ནས་སོ། །དེ་ཉིད་དང་བླ་ན་མེད་པའི་མཆོད་པ་རབ་ཏུ་བརྟག་ཅིང་བྱ་བའོ་ཞེས་པ་ནི་བདག་ལ་བྱིན་གྱིས་བརླབ་པའི་རིམ་པའི་མཚན་ཉིད་ཀྱི་ཡེ་ཤེས་ཀྱི་སྐུ་གཟུང་བའི་རང་བཞིན་གྱི་མཆོད་པ་ཞེས་བྱའོ། །དབུས་ཀྱི་གཙོ་བོའི་བདག་ལ་བྱིན་གྱིས་བརླབ་པའི་རིམ་པས་སྐྱེ་བར་བསྟན་ནས། དཀྱིལ་འཁོར་པ་རྣམས་ལ་ཇི་ལྟ་བུ་ཡིན་ཞེ་ན། སྨྲས་པ། བྱོལ་སོང་གི་སྒྲས་ནི་ལོགས་ན་ཡོད་པ་ལ་བྱ་སྟེ་ཞེས་པ་ནི་ཤར་ལ་སོགས་པའི་ཕྱོགས་དང་མཚམས་བརྗོད་པའི་ཕྱིར་རོ། །དེས་ན་བདག་པོ་ལས་གཞན་པ་ནི་འཁོར་རྣམས་ལའོ། །དཀྱིལ་འཁོར་གྱི་ལྷའི་སྐུ་ཞེས་པ་ནི་འཁོར་གྱི་ལྷའི་སྐུ་རྣམས་སོ། །རྡོ་རྗེ་འཆང་ཆེན་པོ་དང་འདྲ་བར་བཟུང་སྟེ་ཞེས་པ་ནི་ཅིག་ཅར་རམ་སྣང་བ་ཉེ་བར་ཐོབ་པའི་རིམ་པ་
ལ་སོགས་པ་གཟུང་བའོ། །རྡོ་རྗེ་འཆང་ཆེན་པོའི་རྣམ་པར་འཕྲུལ་པའི་ཕྱིར་རོ་ཞེས་པ་ནི་དེའི་སྤྲུལ་པའི་སྐུའི་རང་བཞིན་ཡིན་པའི་ཕྱིར་གཏན་ཚིགས་བཤད་དོ། །དགོངས་པས་བཤད་པའོ་ཞེས་པ་ནི་བུ་མོ་ལ་སོགས་པའི་འགལ་བའི་སྒྲའི་སྒོ་ནས་བདག་ལ་བྱིན་གྱིས་བརླབ་པའི་རིམ་པ་བསྟན་པས་སོ། །འཇིག་རྟེན་ལས་འདས་པའི་རྣལ་འབྱོར་པ་ཞེས་པ་ནི་རྫོགས་པའི་རིམ་པའི་རྣལ་འབྱོར་པ་རྣམས་སོ། །དེ་ནི་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱི་ཞེས་པ་ནི་སྔགས་ལ་མོས་པའི་བརྟགས་པའི་རྣལ་འབྱོར་པ་རྣམས་ཀྱིའོ། །སའི་ཕྱོགས་ཞེས་པ་ནི་གཙུག་ལག་ཁང་དང་ནགས་ཚལ་དང་ཆུ་བོའི་འགྲམ་ལ་སོགས་པ་ལའོ། །ས་སྦྱང་བ་ལ་སོགས་པའི་རིམ་པས་ཞེས་པ་ནི་ས་སྦྱང་བ་ལ་སོགས་པ་རྣམ་པ་ཉི་ཤུའི་ཚོགས་སོ། །ཡོངས་སུ་དག་པ་ནི་ཞེས་པ་ལ་རྡོ་དང་ཕུབ་མ་ལ་སོགས་པ་བཏོན་པའོ། །ཇི་སྐད་དུ། ཕུབ་མ་རྡོ་དང་རྡེའུ་དང་ནི། །སོལ་བ་ལ་སོགས་བཏོན་བྱས་ནས། །འབྲུ་དང་རིན་ཆེན་སྨན་སྙིང་པོ། །ཤིན་ཏུ་ལེགས་པར་བརྡུང་བར་བྱ། །ཞེས་འབྱུང་ངོ༌། །སྐྱེ་བ་དང་འདུས་པ་དང་བྲལ་བས་ཞེས་པ་ནི་དེའི་དབང་གིས་སེམས་རྩེ་གཅིག་པར་འགྱུར་རོ། །ལམ་གྱི་སྒྲ་ནི་ཐ་དད་པའི་རིམ་པ་སྟེ་ས་ལ་སོགས་པའི་སྒྲ་ལས་འོག་ཏུ་བལྟ་བར་བྱའོ། །ཕྱོགས་གཞན་སྟོན་པ་ཡིན་པར་བལྟ་པར་བྱའོ་ཞེས་པ་ནི་རྣམ་པར་རྟོག་པ་རབ་ཏུ་སྟོན་པའི་ཕྱིར་རོ། །སྔགས་པའོ་ཞེས་པ་ནི་སྔགས་པ་སྒྲུབ་པ་ལ་གཞོལ་བའི་སྒྲུབ་པ་པོའོ། །སྐྱེ་བོ་དམ་པའོ་ཞེས་པ་ནི་སྐྱེས་བུ་དམ་པ་སྟེ་དགེ་བསྙེན་རྣམས་སོ། །དེ་རྣམས་ཀྱི་ཁྱིམ་ནི་མཆོད་ཁང་ལའོ། །ལྷའི་ཁང་པ་ཞེས་པ་ནི་ལྷ་ཆེན་ལ་སོགས་པའི་ལྷ་ཁང་ལའོ། །གང་གི་ཕྱིར་དབང་ཕྱུག་དང་ལྷ་ཆེན་པོ་ལ་སོགས་པ་སྨོད་པར་བྱ་བ་མ་ཡིན་ཏེ། བཅོམ་ལྡན་འདས་རྡོ་རྗེ་འཆང་གི་སྤྲུལ་པ་ཡིན་པས་སོ། །ཇི་སྐད་དུ། ཕ་རོལ་རྒོལ་བ་ཁ་ཅིག་གང༌། །རྟགས་ཀྱི་དབྱེ་བས་རྣམ་པར་གནས། །དེ་རྣམས་འདིར་སྨོད་མི་བྱ་སྟེ། རྡོ་རྗེ་སེམས་དཔའི་སྤྲུལ་པའི་ཕྱིར།། ཞེས་འབྱུང་ངོ༌། །བའི་ལྕི་བ་ལ་སོགས་པའི་ཞེས་པ་ནི་བའི་འབྲེལ་བ་དང་ལྡན་པའི་ལྕི་བ་དང་ཆུ་བླང་བར་བྱ་སྟེ་གཙང་སྦྲ་ཡིན་པའི་ཕྱིར་རོ། །ཤིང་ཤུན་དྲི་བཟང་པོ་ལ་སོགས་པ་ཡོངས་སུ་བཟུང་སྟེ་ཞེས་པ་ནི་ཙནྡན་ལ་སོགས་པའི་དྲིའི་ཆུ་ཞེས་བྱ་བའི་ཐ་ཚིག་གོ །བྱུག་ཅིང་དཀྱིལ་འཁོར་བྱའོ་ཞེས་པ་ནི་གྲུ་བཞིན་
པའི་དཀྱིལ་འཁོར་བྱའོ། །ལམ་གྱི་སྒྲ་ནི་མ་བཤད་པ་དག་ཀྱང་བསྡུ་བའི་དོན་ཏེ་ཞེས་པ་ནི་མེ་ཏོག་ལ་སོགས་པ་ཡང་གཟུང་བའི་ཕྱིར་རོ། །དེས་ན་མེ་ཏོག་ལ་སོགས་པ་ཞེས་བྱ་བ་ལ་སོགས་པ་བསྟན་ཏོ། །རང་གི་ལྷ་མཉེས་པར་བྱ་བའི་དོན་ཏོ་ཞེས་པ་ནི་རང་གི་ཡི་དམ་གྱི་ལྷ་ཡོངས་སུ་མགུ་བར་བྱ་བའི་དོན་ཏོ།། ཉིན་རེའོ་ནི་ཇི་སྲིད་དཀྱིལ་འཁོར་གྱི་ཆོ་ག་ཡོངས་སུ་རྫོགས་པའོ། །དེ་ལྟར་ཞེས་བྱ་བ་ལ་སོགས་པས་སྙིང་རྗེ་ཆེན་པོ་བྱ་བ་སྔོན་དུ་འགྲོ་བར་གནས་གཟུང་བ་དང་བགེགས་བསྐྲད་པ་དང༌། སྟོང་པ་ཉིད་བསྒོམ་པ་དང༌། ཡེ་ཤེས་ཀྱི་ས་གཞི་དང༌། གཞལ་ཡས་ཁང་བསྐྱེད་པ་དང༌། ལྷག་པར་མོས་པའི་དཀྱིལ་འཁོར་དང་། དོན་དམ་པའི་དཀྱིལ་འཁོར་བསྒོམ་པ་དང༌། གདན་པ་ལ་སོགས་པའི་དབྱེ་བ་དང༌། ཆོས་ཀྱི་དབྱིངས་ཀྱི་སྔགས་བརྗོད་པ་སྔོན་དུ་འགྲོ་བར་སྔགས་དགོད་པ་དང་ཕྱག་མཚན་ལས་རྡོ་རྗེ་འཆང་གི་སྐུ་སྒྲུབ་པ་དང་མི་བསྐྱོད་པ་རྗེས་སུ་འཇུག་པས་དབུས་ཀྱི་གཙོ་བོ་རྫོགས་པ་དང༌། ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་བསྒོམ་པར་བྱས་ལ་འཆད་པར་འགྱུར་བའི་ཞེས་བྱ་བ་སྟེ། དེ་ཉིད་བསྟན་པར་བྱ་བའི་ཕྱིར། རྣལ་འབྱོར་དང་རྗེས་སུ་རྣལ་འབྱོར་བྱས་ལ་བསྟན་ཏོ། །བདག་ཉིད་ནི་རང་གི་ལྷའི་སྐུའོ། །རང་གི་ཕྱག་རྒྱ་ནི་དམ་ཚིག་གི་ཕྱག་རྒྱ་དང་ཡེ་ཤེས་ཀྱི་ཕྱག་རྒྱ་དག་ལས་གང་ཡང་རུང་བའོ། །རིགས་ལྔར་བྱ་བ་ནི། ཕུང་པོ་དང་ཁམས་དང་སྐྱེ་མཆེད་ལ་སྔགས་དགོད་པའི་མཚན་ཉིད་ཅན་གྱི་ཤིན་ཏུ་རྣལ་འབྱོར་དང༌། དེ་བཞིན་དུ་སྐུ་ལ་སོགས་པ་བྱིན་གྱིས་བརླབ་པའི་རྣལ་འབྱོར་ཆེན་པོ་ཞེས་བྱའོ། །དེ་སྲིད་ཀྱི་བར་འདིར་ཡི་གེ་ཧཱུཾ་སྟེ་རྣམ་པར་ཤེས་པ་ནི་སྙིང་ལ་གནས་པའི་ཕྱིར་མི་བསྐྱོད་པའི་རིགས་དགོད་པར་ཤེས་པར་བྱའོ། །སྐྲ་སྐྱེ་བའི་གནས་ཇི་སྲིད་པའི་བར་དུ་ཡི་གེ་ཨོཾ་ལས་བྱུང་བའི་རྣམ་པར་སྣང་མཛད་དགོད་དོ་ཞེས་པ་ནི་ཡན་ལག་དང་ཉིང་ལག་ཐམས་ཅད་ཀྱི་རང་བཞིན་གྱི་ལུས་ཀྱི་མགོ་བོ་གཙོ་བོ་ཡིན་པའི་ཕྱིར་རོ། །ལུས་ཀྱི་རང་བཞིན་ཡང་རྣམ་པར་སྣང་མཛད་ཡིན་པའི་ཕྱིར་རོ། །བསྐྱེད་པའི་རིམ་པ་ཤེས་པའོ་ཞེས་པ་ནི་ཤིན་ཏུ་རྣལ་འབྱོར་གྱི་དགོད་པ་ཤེས་པས་སོ། །འདིར་ཡི་གེ་ཨ་ལས་བྱུང་བའི་འོད་དཔག་ཏུ་མེད་པ་དགོད་པར་བྱའོ་ཞེས་པ་ནི་འོད་དཔག་ཏུ་མེད་པ་ནི་ངག་གི་རང་བཞིན་ཡིན་པའི་ཕྱིར་རོ། །ངག་ཀྱང་ལྐོག་མ་ནས་གསལ་བར་འགྱུར་རོ་ཞེས་བྱ་བའི་ཐ་ཚིག་གོ །དེར་
ཡི་གེ་ཧ་ལས་བྱུང་བའི་དོན་ཡོད་གྲུབ་པ་དགོད་པར་བྱའོ་ཞེས་པ་ནི་རྐང་པའི་བར་དང་རྐང་པ་གཉིས་ལ་ལས་ཀྱི་རྡོ་རྗེ་དགོད་པར་བྱ་སྟེ། དོན་ཡོད་གྲུབ་པ་ནི་འགྲོ་བ་དང་འོང་བའི་རང་བཞིན་གྱི་རླུང་གི་ཁམས་ཀྱི་མཚན་ཉིད་དང་མཐུན་པའི་ཕྱིར་རོ། །ལྟེ་བ་ཞེས་པ་ལ་སོགས་པས་ལྟེ་བ་ལ་སོགས་པ་ལས་སྭཱ་ལས་བྱུང་བའི་རིན་ཆེན་འབྱུང་ལྡན་དགོད་པར་བྱ་སྟེ་ལྟེ་བ་ལ་སོགས་པ་ཁོང་སྟོང་ཡིན་པས་ནམ་མཁའི་ཁམས་ཀྱི་ངོ་བོ་རིན་ཆེན་འབྱུང་ལྡན་དང་མཐུན་པའོ། །རྒྱལ་བ་དང་རྒྱལ་བའི་སྲས་དག་ནི་རྒྱལ་བའི་སྲས་ཞེས་བྱ་སྟེ་ཞེས་པ་ནི་མི་འདྲ་བ་རྣམས་ཀྱང་གཅིག་ཏུ་བསྡུ་བར་འགྱུར་རོ། །རྣམ་པར་སྣང་མཛད་ལ་སོགས་པ་ཞེས་བྱ་བ་ལ་སོགས་པས་མདོར་བསྡུས་པའི་སྒྲུབ་ཐབས་ལ་སོགས་པའི་རིམ་པས་དེ་རྣམས་ཀྱི་ཁ་དོག་ལ་སོགས་པ་ཤེས་པར་བྱའོ་ཞེས་བསྟན་ཏོ། །རིགས་ལྔའི་བདག་ཉིད་དགོད་པ་ཞེས་པ་ནི་རྣམ་པར་སྣང་མཛད་ལ་སོགས་པ་དང་དེའི་རིགས་ཅན་རྣམས་དགོད་དོ། །ཇི་ལྟ་ཇི་ལྟ་བར་བྱའོ་ཞེས་པ་ནི་དེ་བཞིན་གཤེགས་པ་ལ་སོགས་པ་གང་དང་གང་གི་གནས་ལ་དེ་དང་དེ་དགོད་པར་བྱ་བ་དང༌། སྐུ་གསུང་ཐུགས་ཀྱི་བྱིན་གྱིས་བརླབ་པ་ཡང་བྱའོ། །དེ་ལྟར་བྱས་པའི་སྙོམས་པར་འཇུག་པའི་ཕྱག་རྒྱ་སྦྱོང་བ་སྔོན་དུ་འགྲོ་བར་རྡོ་རྗེ་དང་པདྨ་མཉམ་བར་སྦྱར་བར་བྱས་པས་སོ། །དེས་ནི་ཡན་ལག་བཞི་པ་དང་པོ་སྦྱོར་བ་ཞེས་བྱ་བའི་ཏིང་ངེ་འཛིན་བསྟན་ཏོ། །དཀྱིལ་འཁོར་རྒྱལ་བའི་མཆོག་བསྟན་པའི་ཕྱིར། རང་གི་ཕྱག་རྒྱའི་ཆོས་འབྱུང་སྟེ། ཞེས་སྨོས་ཏེ་རེག་བྱ་རྡོ་རྗེ་མ་ལ་སོགས་པའི་པདྨའོ། །དེའི་དབུས་སུ་གནས་པ་ཞེས་བྱ་བ་ལ་སོགས་པས་འདི་སྐད་བཤད་པ་ཡིན་ཏེ། ཕྱག་རྒྱ་འདུས་བྱས་པའི་འོག་ཏུ་རྗེས་སུ་ཆགས་པ་བྱས་ལ་རེག་བྱ་རྡོ་རྗེ་མ་ལ་སོགས་པའི་ཆོས་འབྱུང་གི་ནང་དུ་ཟླ་བའི་དཀྱིལ་འཁོར་བསམས་ཏེ། དེ་ལས་འོད་ཟེར་གྱི་ཚོགས་སྤྲོ་ཞིང་དེ་ནམ་མཁའི་དབྱིངས་ལ་བཞུགས་པ་དེ་བཞིན་གཤེགས་པ་ཐམས་ཅད་བཀུག་ཅིང་བཅུག་ལ། རྩ་དབུ་མ་ནས་སྤྲོས་ཏེ་ཟླ་བའི་དཀྱིལ་འཁོར་དེ་ཉིད་ལ་མཆོད་པའི་ལྷ་མོའི་གཟུགས་སུ་བསྐྱེད་ཅིང་སྤྲོས་ལ། དེ་རྣམས་ཀྱིས་བླ་ན་མེད་པ་དང་བཅས་པ་རྣམ་པ་ལྔ་བྱས་ཏེ་སླར་ཡང་བསྡུས་ནས་བྱང་ཆུབ་ཀྱི་སེམས་ཀྱི་ངོ་བོ་པདྨའི་ནང་དུ་ཐིག་ལེའི་གཟུགས་སུ་ཡོངས་སུ་གྱུར་ནས་དེའི་
ནང་དུ་རྡོ་རྗེ་འཆང་གི་རྣམ་པའི་བདག་ཉིད་བསྒོམ་པར་བྱའོ། །དེ་ཉིད་བསྟན་པའི་ཕྱིར། བྱང་ཆུབ་ཀྱི་སེམས་སོ་ཞེས་པ་ནི། དེ་བཞིན་གཤེགས་པ་འཇུག་པ་ཡོངས་སུ་གྱུར་པ་ལས་སྐྱེས་པའོ། །ཀུན་རྫོབ་བྱང་ཆུབ་ཀྱི་སེམས་ཀྱི་དབུས་ན་གནས་པར་ཞེས་པ་ནི་དེ་བཞིན་གཤེགས་པ་ཞུགས་པ་ཡོངས་སུ་གྱུར་པའི་བྱང་ཆུབ་ཀྱི་སེམས་ཀྱི་ནང་ན་གནས་པ་བསམ་པར་བྱའོ། །དེ་བཞིན་གཤེགས་པ་རྣམས་སྤྲོ་བར་བྱའོ་ཞེས་པ་ནི་མཆོད་པའི་ལྷ་མོའི་གཟུགས་སུ་དེ་རྣམས་རྣམ་པར་སྤྲོས་ནས་སོ། །སེམས་རྩེ་གཅིག་པའོ་ཞེས་པ་ནི་ཟླ་བའི་དཀྱིལ་འཁོར་གྱི་རྣམ་པ་བསྒོམ་པ་ལ་སེམས་བརྟན་པ་ཉིད་དུ་བསྟན་ཏོ། །བདག་ཉིད་ཀྱི་སྙིང་གར་བསྡུ་བ་དག་ཀྱང་རབ་ཏུ་བྱའོ་ཞེས་པ་ནི་མཆོད་པ་བྱས་ནས་སླར་ཡང་བདག་ཉིད་ཀྱི་རྩ་དབུ་མ་ལ་བསྡུ་བར་བྱའོ། །བསྡུ་བ་ཞེས་པ་ལ་སོགས་པས་དཀྱིལ་འཁོར་རྒྱལ་བ་མཆོག་གི་གནས་སྐབས་སུ་དཀྱིལ་འཁོར་བ་སྤྲོ་བ་ནི་གཙོ་བོ་ཡིན་ལ། སྔར་བཤད་པའི་དེ་བཞིན་གཤེགས་པ་འཇུག་པ་དང་མཆོད་པ་དང་མཆོད་པའི་ལྷ་མོ་སྤྲོས་པ་དང་སླར་ཡང་བསྡུ་བའི་གཙོ་བོ་མ་ཡིན་པ་གལ་ཏེ་རྣལ་འབྱོར་པ་འདོད་ན་དེའི་ཚེ་བྱ་སྟེ་གཞན་དུ་ནི་མ་ཡིན་ནོ་ཞེས་བསྟན་ཏོ། །ད་ནི་དཀྱིལ་འཁོར་པ་སྤྲོ་བར་བྱ་བའི་ཕྱིར། དེ་ལྟར་ཞེས་བྱ་བ་ལ་སོགས་པ་སྨོས་ཏེ། སླར་ཡང་བདག་ཉིད་ཀུན་རྫོབ་བྱང་ཆུབ་ཀྱི་སེམས་ཀྱི་ནང་ནས་ལངས་ལ་ཁམས་བཞིའི་རང་བཞིན་གྱི་སྤྱན་མ་ལ་སོགས་པ་ལྷ་མོ་བཞིའི་རང་བཞིན་གྱི་ངོ་བོ་རྣམ་པ་ཐམས་ཅད་ཀྱི་མཆོག་དང་ལྡན་པ་སེམས་དཔའ་གསུམ་གྱི་བདག་ཉིད་རེག་བྱ་རྡོ་རྗེ་མ་དང་སྙོམས་པར་ཞུགས་པར་བསམས་ཏེ། རྗེས་སུ་ཆགས་པའི་དམ་པའི་ཏིང་ངེ་འཛིན་གྱིས་སྣང་བ་ལ་སོགས་པའི་ཡེ་ཤེས་འབྱུང་བ་ཡང་དག་པར་དམིགས་ལ། ཐིག་ལེ་སྤྲོ་བའི་སྐབས་སུ། བཛྲ་དྷྲྀ་ཀ་ཅེས་བྱ་བ་ལ་སོགས་པ་ཕྱུང་བའི་སྔགས་ཡོངས་སུ་གྱུར་པ་ལས་མི་བསྐྱོད་པ་ལ་སོགས་པ་དེ་ཉིད་དུ་བསྐྱེད་ཅིང་ཕྱི་རོལ་དུ་སྤྲོས་ལ་དེ་རྣམས་ཀྱིས་ཀྱང་འགྲོ་བའི་དོན་བྱས་ཏེ། སླར་ཡང་གཤེགས་ནས་ཤར་ལ་སོགས་པའི་ཕྱོགས་དང་མཚམས་རྣམས་སུ་གོ་རིམས་ཀྱིས་གནས་པ་ཡོངས་སུ་བསྐོར་བ་བསྒོམ་པར་བྱའོ་ཞེས་བསྟན་ཏོ། །དཀར་པོ་ལ་སོགས་པ་ཞེས་པ་ནི་འོད་ཟེར་ལྔས་བརྒྱན་པ་སྟེ། དེ་བཞིན་གཤེགས་པ་ལྔའི་རང་བཞིན་ཡིན་པས་སོ། །དེ་བཞིན་གཤེགས་པ་
རྣམས་སོ་ཞེས་པ་ནི་མེ་ལོང་ལྟ་བུ་ལ་སོགས་པའི་ཡེ་ཤེས་པའི་རང་བཞིན་ཡིན་པས་སོ། །དུས་གསུམ་དུ་བཞུགས་པ་སྟེ་ཞེས་པ་ནི་དུས་གསུམ་ལ་ཡང་འགྲུབ་པའོ། །ཞིང་དུ་གྱུར་པ་ཡིན་པར་རྣམ་པར་བསམ་པ་སྟེ་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ཀྱིས་མཛད་པ་ཞེས་བྱ་བའི་དོན་ཏོ། །སྔར་བཤད་པའི་བདག་གི་བ་སྤུའི་བུ་ག་རྣམས་ལས་ཞེས་པ་ནི་ལྷ་མོའི་པདྨ་ནས་སྤྲོས་ཏེ། དེའི་བ་སྤུའི་བུ་ག་ནས་ཐམས་ཅད་ལས་སྤྲོ་བར་བྱའོ། །བསྐྱེད་པའི་རིམ་པ་ལ་བྱུང་བའི་མཁས་པས་ཞེས་པ་ནི་དཀྱིལ་འཁོར་རྒྱལ་བ་མཆོག་ལ་གཞོལ་བའི་སྒྲུབ་པ་པོ་ཞེས་བྱ་བའི་དོན་ཏོ།། ཇི་ལྟར་འདོད་པའི་དོན་རྫོགས་པར་བྱེད་པས་ཞེས་པ་ནི་ཞེ་སྡང་ལ་སོགས་པའི་ཉོན་མོངས་པ་རྣམ་པར་སྦྱང་བ་སྔོན་དུ་འགྲོ་བར་མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་ལ་རབ་ཏུ་གནས་པས་སོ། །རྗེས་སུ་འཛིན་པར་མཛད་པས་ན་མཆོད་པ་སྟེ་ཞེས་པ་ནི་དོན་དེ་ཉིད་དོ། །དེ་བཞིན་གཤེགས་པ་སྟེ་ཞེས་པ་ནི་རྣམ་པར་སྣང་མཛད་ལ་སོགས་པའོ། །ཚོགས་ཏེ་ཞེས་པ་ནི་དཀྱིལ་འཁོར་པ་སྟེ། ལྷ་མོ་དང་བྱང་ཆུབ་སེམས་དཔའ་དང་ཁྲོ་བོ་རྣམས་སོ། །སྒྲ་ཇི་བཞིན་པ་ཞེས་པ་ནི་དང་པོ་སྦྱོར་བ་དང་དཀྱིལ་འཁོར་རྒྱལ་བ་མཆོག་གི་ཏིང་ངེ་འཛིན་གཉིས་སོ་སོར་བསྟན་པས་སོ།། ང་ནི་ཞེས་བྱ་བ་ལ་སོགས་པས་རིམ་པ་གཉིས་ཀྱི་རྣལ་འབྱོར་བ་ལ་མཆོད་པ་བྱ་སྟེ། དེ་ལ་བསྐྱེད་པའི་རིམ་པའི་རྣལ་འབྱོར་པ་ལ་ལས་ཀྱི་རྒྱལ་བ་མཆོག་གི་ཏིང་ངེ་འཛིན་གྱི་ཕྱོགས་གཅིག་ཏུ་གྱུར་པ་མཆོད་པའི་ཆོ་ག་དང༌། རྫོགས་པའི་རིམ་པའི་རྣལ་འབྱོར་བས་རྡོ་རྗེ་བཟླས་པའི་རིམ་པ་སྐྱོབ་པ་ཉིད་མཆོད་པའོ། །ཇི་སྐད་དུ། དེ་ཡི་བརྟུལ་ཞུགས་མ་བཤད་དེ། །ཕྲེང་བ་མ་ཡིན་སྡོམ་པ་མིན། །འཛིན་པ་སྦྱིན་སྲེག་ལས་རྣམས་ནི། །ཡང་ཡང་འཇུག་པ་མིན་ཞེས་བྱ། །ཞེས་འབྱུང་ངོ༌། །རིགས་རྣམ་པ་ལྔའི་དབྱེ་བས་ཤེས་པར་བྱས་ལ་ཞེས་པ་ནི་རྣམ་པར་སྣང་མཛད་ལ་སོགས་པའི་ཁ་དོག་ལྔའི་དབྱེ་བས་སོ། །ཀུནད་མ་ལི་ཀ་མ་ལ་ཏི། །སངས་རྒྱས་རྡོ་རྗེ་ཅན་ལ་དབུལ། །དེ་བཞིན་དུ་ཞེས་བྱ་བ་ལ་སོགས་པས་དེ་དང་འདྲ་བའི་དཔེ་བསྟན་ཏོ། །ཛཱ་ཏི་ནི་ཁ་དོག་གསུམ་ཡོད་པས་ཏེ་ཞེས་པ་ནི། དཀར་པོ་དང་དམར་པོ་དང་ནག་པོ་སྟེ་སྐུ་ལ་སོགས་པ་རིགས་གསུམ་གཙོ་བོ་ཡིན་པས་སོ། །དེ་བཞིན་ཀརྞེ་ཀ་ར་དང༌། །ཞེས་བྱ་བ་ལ་སོགས་པ་རྣམ་
པ་བཞིའི་རིགས་ཀྱི་ཡུམ་བཞི་གཙོ་བོ་ཡིན་པས་དབུལ་བར་བྱའོ། །བསམ་གཏན་གྱི་སྟོབས་ཀྱིས་རབ་ཏུ་བསྐྱེད་ནས་ཞེས་པ་ནི་ཕྱི་རོལ་གྱི་མེ་ཏོག་མེད་ན་ཡིད་ཀྱི་མཆོད་པས་དེ་བཞིན་གཤེགས་པ་རྣམས་མཆོད་པར་བྱའོ། །དྲང་བའི་དོན་ཏོ་ཞེས་པ་ནི་ཕྱིའི་མཆོད་པ་ཙམ་བསྟན་པས་སོ། །ལུང་གིས་བཤད་པར་བྱ་བ་སྟེ་ཞེས་པ་ནི་རྡོ་རྗེ་ཕྲེང་བའི་རྒྱུད་ལས་ཏེ་ཚིག་གི་ལྷག་མའོ། །གང་ཞིག་རླུང་ནི་བཅུར་བསྒྲགས་པ། །ཞེས་པ་ནི་སྲོག་ལ་སོགས་པ་རླུང་ལྔ་དང་རྒྱུ་བ་ལ་སོགས་པ་ཉེ་བའི་རླུང་ལྔ་སྟེ། བཅུ་ནི་ཕུང་པོ་དང་དབང་པོ་ལ་བརྟེན་པའི་ཕྱིར་རོ། །དེ་ནི་པདྨ་ཨུཏྤལ་མིང༌། །ཞེས་པ་ནི། ཤིན་ཏུ་ཟབ་པ་འོད་གསལ་བའི་དེ་ཁོ་ན་ཉིད་ཀྱི་མཚོ་ལས་སྐྱེས་པའི་ཕྱིར་རོ། །དེ་ཉིད་ནི་ཡི་གེ་གསུམ་མོ། །རྡོ་རྗེ་གསུམ་ནི་སྐུ་ལ་སོགས་པའོ། །དེ་ཉིད་རྣམ་པ་གསུམ་ནི་ཛཱ་ཏི་གཅིག་པུ་འདོད་པ་སྟེ་སྐུ་ལ་སོགས་པ་ཉིད་ཡི་གེ་གསུམ་ལས་འབྱུང་བའི་ཕྱིར་རོ། །ཀརྞི་ཀ་ར་ལ་སོགས་པས་མེའི་དཀྱིལ་འཁོར་ལ་སོགས་པ་བཞི་ཡིན་ཏེ། ཁ་དོག་དང་མཐུན་པའི་ཕྱིར་རོ། །མཆོད་པའི་དོན་བཤད་པར་བྱ་སྟེ། དངོས་མེད་གོ་འཕང་ལ་གོམས་པས། །ཞེས་པ་ནི། འོད་གསལ་བའི་གོ་འཕང་བསྒོམས་པས་སོ། །ལྷ་རྣམས་ཀྱི་ནི་སྐུར་སྦྱོར་བ། །ཞེས་པ་ནི་དཀྱིལ་འཁོར་བཞི་ལ་དབང་བྱེད་པ་སྤྱན་མ་ལ་སོགས་པའི་གཟུགས་དང་མཐུན་པས་རྡོ་རྗེ་བཟླས་པ་ལ་སློབ་པ་གང་ཡིན་པ་དེ་ནི་གཅིག་ཏུ་སངས་རྒྱས་ཀུན་མཉེས་པའི་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཕུང་པོ་དང་ཁམས་དང་སྐྱེ་མཆེད་སྦྱོང་བར་བྱེད་པས་མཆོད་པ་ཆེན་པོར་དེ་འགྱུར་རོ་ཞེས་པ་ནི་བླ་ན་མེད་པའི་མཆོད་པ་འདོད་པར་བསྟན་པའོ། །དེ་ཉིད་ནི་དགོངས་པས་བཤད་པས་མེ་ཏོག་བསྟན་ཏོ། །ཕྱི་དུས་སྐྱེ་བོས་མི་ཤེས་པ། །ཞེས་པ་ནི་མ་འོངས་པའི་དུས་སུ་སེམས་ཅན་རྣམས་ཀྱིས་ཤེས་པར་མི་འགྱུར་རོ། །མ་རྟོགས་པ་ཞེས་བྱ་བ་ལ་སོགས་པས་དགོངས་པའི་དོན་མ་རྟོགས་པས་རྡོ་རྗེ་འཆང་ཆེན་པོའི་དངོས་གྲུབ་ཐོབ་པར་མི་འགྱུར་བ་དང༌། མོས་པ་དམན་པའི་དབང་གིས་ཉན་ཐོས་པའི་རིགས་ཅན་དང་འདྲ་བ་བདག་ཅག་སྔགས་ཀྱི་ཐེག་པ་ཆེན་པོ་ལ་སྣོད་མ་ཡིན་ནོ་ཞེས་སྨྲས་ན་ལྷའི་ངོ་བོ་རང་གི་བདག་ཉིད་སྨོད་ནས་མི་སྡུག་པའི་སྒོམ་པ་བཤང་གཅི་ལ་སོགས་པའི་རང་བཞིན་རྟོགས་པས་དེ་སྨོད་པ་སངས་རྒྱས་ཐམས་ཅད་ཀྱང་
སྨོད་པར་འགྱུར་པའི་ཕྱིར་འཁོར་བ་ལ་འཁོར་བར་འགྱུར་རོ་ཞེས་བསྟན་ཏོ། །ངེས་པའི་དོན་ཏོ་ཞེས་པ་ནི་རྡོ་རྗེ་བཟླས་པའི་རིམ་པ་སོ་སོར་བསྟན་པས་སོ། །རྣལ་འབྱོར་པ་གཉི་གའི་ཐུན་མོང་ཞེས་པ་ནི་རྫོགས་པ་དང་མ་རྫོགས་པའི་རྣལ་འབྱོར་པའི་སྤྱོད་ཡུལ་ལོ། །ངོས་རེ་ཞིང་དཔག་ཚད་ཉི་ཤུ་རྩ་ལྔ་ཡོད་པས་ན་ཞེས་པ་ནི་རིགས་བརྒྱའི་དབྱེ་བ་རྣམ་པར་དག་པས་སོ། །དེ་ནི་ཉེ་བར་མཚོན་པ་ཙམ་ཡིན་ཏེ། སྟོང་དང་ཁྲི་དང་འབུམ་ལ་སོགས་པ་རྒྱ་ཆེ་བ་ཡིན་ཏེ། རྣལ་འབྱོར་པའི་སེམས་ཀྱི་རྒྱུད་ཀྱི་མོས་པ་རྒྱ་ཆེ་བ་ཡིན་པའི་ཕྱིར་རོ། །ཉེ་བར་མཚོན་པས་ཞེས་པ་ནི་ཕྱག་མཚན་གྱི་སྒོ་ནས་དེ་བཞིན་གཤེགས་པ་ཉེ་བར་མཚོན་པས་སོ། །ཡིད་ཀྱིས་སམ་བྲིས་པས་བསྐྱེད་པར་བྱའོ་ཞེས་པ་ནི་གལ་ཏེ་རྒྱལ་པོ་ལ་སོགས་པ་སློབ་མ་ཡིན་ན་དེའི་ཚེ་དཔག་ཚད་བརྒྱའི་ཚད་ཙམ་གྱིས་རྒྱས་པ་བྲི་བར་བྱའོ། །ཁྱིམ་པ་ལ་སོགས་པ་རྣམས་ལ་རྣམ་པར་སྣང་མཛད་ཀྱིས་དཀྱིལ་འཁོར་ནི་རྒྱུད་ལས་གསུངས་པའི་ཚད་དང་ལྡན་པ་བྲི་བར་བྱའོ། །ཡིད་ཀྱིས་ནི་དཔག་ཚད་བརྒྱ་ཙམ་གྱི་ཚད་ཙམ་བསྒོམ་པར་བྱའི་འབྲི་བ་ནི་དགག་པ་མ་ཡིན་ནོ་ཞེས་དགོངས་པའོ། །འོག་ནས་བཤད་པ་ཞེས་པ་ནི་མི་བསྐྱོད་པ་ལ་སོགས་པའི་དཀྱིལ་འཁོར་བཞི་པོ་ལ་ཡང་གྲུ་བཞི་པ་ལ་སོགས་པ་དང་སྦྱར་རོ། །དེ་ཡང་ཕྱིའི་དཀྱིལ་འཁོར་གྱི་ཚད་ཡིན་ཏེ། ནང་གི་དཀྱིལ་འཁོར་ནི་ཟླུམ་པོ་ཉིད་དོ། །བག་ཡོད་པ་དུས་ཐམས་ཅད་དུའོ་ཞེས་པ་ནི་དཀྱིལ་འཁོར་འབྲི་བ་ལ་སོགས་པ་ལ་སེམས་རྩེ་གཅིག་པའོ། །མི་བསྐྱོད་པ་ལ་སོགས་པའི་རིགས་རྣམས་ཏེ་ཞེས་པ་ནི་ཐུགས་རྡོ་རྗེ་འཆང་དང༌། དེས་སྤྲུལ་པའི་རིགས་རྣམས་སོ། །དེ་ཡང་ཞེས་བྱ་བ་ལ་སོགས་པས་རྣམ་པར་སྣང་མཛད་ཀྱི་མཚན་མ་དང་འདྲ་བར་འོད་དཔག་ཏུ་མེད་པ་ལ་སོགས་པའི་ཡང་མཚན་མའི་སྒོ་ནས་དཀྱིལ་འཁོར་མཚོན་པ་བསྟན་ཏོ། །སྡེབ་སྦྱོར་གྱི་དོན་དང་འགལ་བ་ཞེས་པ་ནི་ཚིགས་སུ་བཅད་པ་མ་ཚང་བར་འགྱུར་རོ། །ཨུཏྤལ་ནི་རིན་པོ་ཆེ་སྟེ་རྡོ་རྗེའི་ཁྱད་པར་ཡིན་པས་སོ། །དེ་ཡང་དཔག་ཚད་ནས་བརྩམས་ཏེ་ཞེས་བྱ་བ་ལ་སོགས་པས་སློབ་དཔོན་དང་སློབ་མ་དག་ལ་མོས་པའི་ཁྱད་པར་བསྟན་ཏོ། །མཆོད་རྟེན་དང་འདྲ་བས་ན་མཆོད་རྟེན་ཏེ་ཞེས་པ་ནི་སངས་རྒྱས་ཐམས་ཅད་ཀྱི་གཞི་ཡིན་པས་སོ། །རིན་པོ་ཆེ་སྣ་བཞིའི་བདག་ཉིད་ཡིན་པས་ན་ཞེས་པ་ནི་ཤར་ལ་སོགས་པའི་ཕྱོགས་ཀྱི་དབྱེ་བས་སོ། །འདིས་ནི་ཁ་དོག་དཀར་པོ་ཡོངས་སུ་གཟུང་བ་ཞེས་པ་ནི་དབུས་ཀྱིས་གཞིའི་ཁ་དོག་བསྟན་ཏོ། །དེ་བཞིན་གཤེགས་པ་བདག་པོའི་དབང་གིས་
ཁ་དོག་ལྡོག་པར་ཤེས་པར་བྱའོ། །དཀྱིལ་འཁོར་གྱི་དེ་ཁོ་ན་ཉིད་ཀྱི་བདག་ཉིད་ཅན་ཡིན་པས་ཞེས་པ་ནི་དཀྱིལ་འཁོར་གྱི་རྣམ་པ་དག་དང་ལྡན་པས་སོ། །གཞིར་གྱུར་པ་ཞེས་པ་ནི་རྟེན་དང་བརྟེན་གྱི་རང་བཞིན་ནོ། །གསང་བའི་དབང་བསྐུར་བའི་ཕྱིར་ཞེས་པ་ནི་སློབ་མ་ལ་དེ་སྦྱིན་པའི་ཕྱིར་རོ། །བསྒོམ་པར་བྱའོ་ཞེས་པ་ནི་རྫོགས་པའི་རིམ་པ་ལ་ལྟོས་ནས་བསམ་པར་བྱའོ། །དེ་ལྟར་ཞེས་བྱ་བ་ལ་སོགས་པས་སློབ་མའི་བྱ་བ་བསྟན་པར་བྱ་སྟེ་གཟུགས་ལ་སོགས་པ་ཡུལ་ལྔ་ཞེས་པ་ནི་ན་བཟའ་ལ་སོགས་པ་ཕྱིའི་ཡོ་བྱད་རྣམས་སོ། །དཀྱིལ་འཁོར་ལ་བརྟེན་པར་གྱུར་པའམ་ལྷ་རྣམས་ལ་ཞེས་པ་ནི་མི་བསྐྱོད་པ་ལ་སོགས་པ་རྣམས་ལའོ། །མཆོད་པ་སྣ་ཚོགས་པའི་རྒྱ་མཚོ་ཞེས་པ་ནི་མཐའ་ཡས་པ་མཐར་ཐུག་པ་མེད་པའི་མཆོད་པའོ། །འདོད་པའི་ཡོན་ཏན་ཞེས་བྱ་བ་ལ་སོགས་པས་མཆོད་པའི་སྤྲོས་པ་བསྟན་ཏོ། །པདྨ་རཱ་ག་ལ་སོགས་པ་ཞེས་པ་ནི་རིགས་ཀྱི་དབྱེ་བས་རྣམ་པ་སྣ་ཚོགས་པའི་རིན་པོ་ཆེ་དབུལ་བར་བྱའོ། །ན་བཟའ་ནི་དར་དང་བལ་ལ་སོགས་པ་སྟེ་ཞེས་པ་ནི་དར་དཔྱང་ལ་སོགས་པའོ། །མིག་ཅེས་བྱ་བ་ལ་སོགས་པས་དབང་པོ་ལྔའི་སྤྱོད་ཡུལ་བསྟན་ཏོ། །དྲི་མའི་རྙོག་པ་ཐམས་ཅད་འཁྲུད་པས་ཞེས་པ་ནི་གཙང་བ་དང་མི་གཙང་བ་ལ་སོགས་པའི་རྣམ་པར་རྟོག་པའི་དྲི་མ་གསང་བའི་དབང་བསྐུར་གྱིས་ལྡོག་པར་འགྱུར་རོ། །དེ་ཐོབ་པའི་འདོད་པས་ཀྱང་མཆོད་པར་བྱའོ། །ཇི་སྲིད་དབང་བསྐུར་བ་ཡོངས་སུ་རྫོགས་ཀྱི་བར་དུ་ཞེས་པ་ནི་དེ་བཞིན་གཤེགས་པ་རྣམས་དགུག་པའི་ཕྱིར་རོ། །མེ་ཏོག་ལ་སོགས་པ་ཞེས་བྱ་བ་ལ་སོགས་པས་བླ་མ་དང་ལྷ་དག་ལ་མཆོད་པ་དབུལ་བར་བསྟན་ཏོ། །ཐུན་མོང་གི་མཆོད་པ་ཞེས་པ་ནི་གཉི་ག་ལ་ཡང་མཚུངས་པའོ། །བླ་མའི་ཁྱད་པར་གྱི་མཆོད་པ་ནི་གསང་བའི་མཆོད་པའོ། །འཁོར་བ་ཇི་སྲིད་པར་གནས་པ། །ཞེས་པ་ནི་བླ་མའི་བཀའ་དྲིན་གྱིས་བསྐལ་པ་ལ་སོགས་པའི་དུས་ཀྱི་བར་དུ་གནས་པའོ། །བསྐལ་པའམ་ནི་བསྐལ་སྟོང་པར། །ཡེ་ཤེས་དབང་བསྐུར་གྱིས་གནས་འགྱུར། །ཡེ་ཤེས་གསུམ་ལས་དམ་པ་ཡིན་པས་ན་མཆོག་གོ །ཆགས་པ་ལ་སོགས་པའི་རང་བཞིན་བརྒྱ་དྲུག་ཅུ་དང་བྲལ་བས་ན་ཟག་པ་མེད་པའོ། །འོད་གསལ་བ་ཡིན་པས་ན་བདེ་བ་ཆེན་པོའོ། །དེ་སྐྱེད་པའི་ཞིང་དུ་གྱུར་པས་ཞེས་པ་ནི་ཕྱག་རྒྱ་མཚོན་པས་སོ། །ལང་ཚོ་མ་ཉམས་པའོ་ཞེས་པ་ནི་ལོ་བཅུ་གཉིས་ནས་བརྩམས་ཏེ་རིགས་ཀྱི་དབྱེ་བས་ལོ་བཅུ་གཉིས་པའི་བར་དུའོ། །ཐམས་ཅད་མེད་ན་ཉི་ཤུ་རྩ་ལྔ་པ་ལས་ཕྱི་མ་བླང་བར་མི་བྱའོ་
ཞེས་དཔལ་འདུས་པའི་རྒྱུད་ཀྱི་མན་ངག་གོ །བུད་མེད་ཀྱི་ཡོན་ཏན་ཐམས་ཅད་དང་ལྡན་པ་ཞེས་པ་ནི་བྲང་སྐྱེས་དང་ཡན་ལག་མཆོག་ལ་སོགས་པ་རྒྱས་པ་དང་ལྡན་པའོ། །པདྨ་ཅན་ནོ་ཞེས་པ་ན། པདྨ་འབྲིང་པོའམ་སྤུ་མེད་པ་དང་མཚན་མོའི་པདྨའོ། །དཔག་ཏུ་མེད་པ་ཐ་དད་པ་ཞེས་བྱ་བ་ལ་སོགས་པས་ཆ་ལུགས་ཀྱི་མཛེས་པ་ཉིད་བསྟན་ཏོ། །འབྲས་བུ་ཐ་མལ་པའོ་ཞེས་པ་ནི་ཞི་བ་ལ་སོགས་པའི་ལས་ཀྱི་ཚིགས་སོ། །ཁྱད་པར་ཅན་གྲུབ་པ་སངས་རྒྱས་ཉིད་དེ་ཞེས་པ་ནི་ཕྱི་མའི་སྤྲོས་པ་ལ་མི་ལྟོས་པའི་ཕྱིར་རོ། །འགྲུབ་པའི་རྒྱུར་ཞེས་པ་ནི་འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་ཀྱི་དོན་ཏོ། །སངས་རྒྱས་ཐམས་ཅད་ཀྱི་རང་བཞིན་ཡིན་པས་ཞེས་པ་ནི། རྡོ་རྗེ་སློབ་དཔོན་སྐུ་འདི་ལ། །གོ་རིམས་ཀྱི་ནི་རྒྱལ་བ་གནས། །ཞེས་འབྱུང་བའི་ཕྱིར་རོ། །དེ་ཉིད་བསྟན་པའི་ཕྱིར། བླ་མ་ཞེས་བྱ་བ་ལ་སོགས་པས་བསྟན་ཏོ། །རབ་ཏུ་བཏབ་པ་ཞེས་པ་ནི་དད་པས་དབུལ་བའོ། །བླ་མ་ལ་ཁྱད་པར་ཅན་གྱི་རྫས་དབུལ་བར་བྱ་བའི་དོན་དུ་ཞེས་པ་ནི་དབུལ་བར་བྱ་བའི་རྫས་ཀྱི་ཕྱིར་རོ་ཞེས་བྱ་བའི་དོན་ཏོ། །ཚད་ཡོངས་སུ་ཆད་པ་མེད་པ་ཞེས་པ་ནི་བླ་མ་ལ་དབུལ་བའི་ཡོན་ལ་ཡོངས་སུ་གཅོད་པའི་ངེས་པ་ནི་མེད་དེ་ཐམས་ཅད་ཡོངས་སུ་དབུལ་བའི་ཕྱིར་རོ། །པདྨ་རཱ་ག་ལ་སོགས་པ་ནི་རིན་པོ་ཆེ་བདུན་ནོ། །ཡོངས་སུ་བཀང་བའི་ཞེས་པ་ནི་གལ་ཏེ་ཡོད་ན་དེའི་ཚེ་དབུལ་བར་བྱའོ། །ཡང་ན་བུད་མེད་ལ་སོགས་པ་རིན་པོ་ཆེ་བདུན་ཏེ་ལམ་གྱི་སྒྲའི་དོན་ཏོ། །དེ་ལ་བུད་མེད་རིན་པོ་ཆེ་ནི་གཞོན་པ་མ་ཉམས་པ་ལོ་བཅུ་དྲུག་ལོན་པའོ། །སྐྱེས་པ་ནི་མཛོད་དེ་ནོར་མི་ཟད་པའོ། །ནོར་བུ་རིན་པོ་ཆེ་ནི་ཡིད་བཞིན་གྱི་ནོར་བུ་རིན་པོ་ཆེ་སྟེ་བསམ་པ་ཐམས་ཅད་རྫོགས་པར་བྱེད་པའོ། །འཁོར་ལོ་ནི་འཁོར་ལོ་རིན་པོ་ཆེའོ། །རལ་གྲི་ནི་རལ་གྲིས་ཉེ་བར་མཚོན་པའི་དམག་དཔོན་ནོ། །གླང་པོ་ནི་ཁ་དོག་དཀར་པོ་མཆེ་བ་དྲུག་པའོ། །རྟ་རིན་པོ་ཆེ་ནི་ཨུཏྤལ་སྔོན་པོ་དང་འདྲ་བའོ། །བསོད་ནམས་དང་ཡེ་ཤེས་ཀྱི་ཚོགས་ལ་མཁས་པ་ནི་ཞེས་པ་འདིས་ནི་བསོད་ནམས་དང་ཡེ་ཤེས་ཀྱི་ཚོགས་འཕེལ་བར་འགྱུར་རོ་ཞེས་བསམ་པ་དང་ལྡན་པའོ། །མཐར་ཐུག་པའི་ཡེ་ཤེས་དང་ལྡན་ཞིང་ཞེས་པ་ནི་སྔགས་ཀྱི་ཐེག་པའི་དོན་མ་ལུས་པ་རྟོགས་པའོ། །གཉིས་སུ་མེད་པའི་ཡེ་ཤེས་ཞེས་པ་ནི་བྱང་ཆུབ་ཀྱི་སེམས་སྤྱོད་པས། གཙང་བ་དང་མི་གཙང་བ་ལ་སོགས་པའི་རྣམ་པར་རྟོག་པ་གཉིས་དང་བྲལ་བའི་དེ་ཁོ་ན་ཉིད་ཅེས་བྱའོ། །སོ་སོར་རྟོགས་པར་བྱ་བར་འདོད་ཅིང་ཞེས་པ་ནི་དེ་མངོན་སུམ་དུ་བྱ་བའི་ཕྱིར་འདོད་པ་དང་ལྡན་པའོ། །དེའི་མན་ངག་
གིས་ཞེས་པ་ནི་གསང་བའི་དབང་བསྐུར་གྱི་མན་ངག་གིས་སོ། །ཕྱག་རྒྱ་ཆེན་པོའི་དངོས་གྲུབ་བསྒྲུབ་པར་འདོད་པས་ཞེས་པ་ནི་དཔལ་རྡོ་རྗེ་འཆང་གི་གོ་འཕང་ཐོབ་པའི་རྒྱུར་གྱུར་པ་ཤེས་རབ་དང་ཡེ་ཤེས་འདོད་པས་སོ། །ཤེས་རབ་དང་ཡེ་ཤེས་ཀྱི་དབང་བསྐུར་བ་ནི་གསང་བའི་དབང་བསྐུར་བ་སྔོན་དུ་འགྲོ་བས་སོ། །བསམ་གཏན་ཞེས་བྱ་བ་ལ་སོགས་པས་ཕྱིའི་ཡོ་བྱད་མེད་ན་ཡིད་ཀྱིས་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ལ་སོགས་པས་བླ་མའི་བྱ་བ་བསྟན་ཏེ། ཇི་ལྟར་རང་གི་ཞེས་བྱ་བ་ལ་སོགས་པས་དཀྱིལ་འཁོར་གྱི་བདག་པོ་གང་ཡང་རུང་བའི་རྡོ་རྗེ་འཆང་གི་ཕྱག་རྒྱ་ཆེན་པོ་བསྒོམ་པར་འདོད་པ་བླངས་ནས་དེ་བཞིན་གཤེགས་པའི་འཁོར་ལོའི་དབུས་སུ་ནི་ལྷའི་ཚོགས་ཀྱི་ནང་དུ་གནས་པ། སངས་རྒྱས་ནི་དེ་བཞིན་གཤེགས་པ་སྟེ་རང་གི་ཕུང་པོ་དང་ཁམས་དང་སྐྱེ་མཆེད་རྣམས་ལ་རེག་བྱ་རྡོ་རྗེ་མ་ལས་འབྱུང་བའི་བདེ་བ་ནི་རང་གི་ཕྱག་རྒྱ་དང་སྙོམས་པར་ཞུགས་པ་ལས་འབྱུང་བའི་བདེ་བ་ཆེན་པོ་དབུལ་བར་བྱའོ་ཞེས་བསྟན་ཏོ། །དེ་ཡང་ཅི་ལྟར་ཞེ་ན་ཞེས་པས་དེ་ཉིད་སྤྲོས་པར་བསྟན་ཏེ། དེའི་དབུས་ན་གནས་པར་ཞེས་པ་ནི་ནམ་མཁའི་དཀྱིལ་ལ་ཞུགས་པའི་དེ་བཞིན་གཤེགས་པའི་ཚོགས་སོ། །གཟུགས་ཀྱི་ཕུང་པོ་ལ་སོགས་པར་གྱུར་པའི་ཞེས་པ་ནི་གཟུགས་ལ་སོགས་པའི་ཕུང་པོ་ལྔ་ལའོ། །རྣམ་པར་སྣང་མཛད་ལ་སོགས་པའི་ཞེས་པ་ནི་ནམ་མཁའི་དབྱིངས་ལ་བཞུགས་པ་རྟག་པ་ལ་སོགས་པའོ། །ཡེ་ཤེས་ཀྱི་རང་བཞིན་གྱི་སྐུ་ལ་ཞེས་པ་ནི་བདག་བྱིན་གྱིས་བརླབ་པའི་རིམ་པ་ལས་འབྱུང་བའི་སྐུ་ལའོ། །སྤྲུལ་པའི་སྐུ་འཛིན་པར་བྱ་བའི་ཕྱིར་ཞེས་པ་ནི་དེ་ཡོངས་སུ་གྱུར་པ་ལས་རྡོ་རྗེ་འཆང་ཆེན་པོའི་སྐུ་རྫོགས་པའི་དོན་ཏོ། །དེ་ནས་ཞེས་བྱ་བ་ལ་སོགས་པས་དེ་བཞིན་གཤེགས་པ་ཐམས་ཅད་བཞུགས་ནས་སངས་རྒྱས་ཐམས་ཅད་ཀྱི་རང་བཞིན་གྱི་རྡོ་རྗེ་འཆང་ཆེན་པོ་བསྒོམ་པར་བྱའོ་ཞེས་བསྟན་ཏོ། །ཡུལ་དང་དབང་པོའི་གཟུགས་རྣམས་ཀྱིས། །ཞེས་པ་ནི་སྙོམས་པར་ཞུགས་པའི་རིམ་པས་སོ། །རྣམ་ལ་མཆོད་ཅིང་ཞེས་པ་ནི་རང་གི་བདག་ཉིད་ཚིམ་པར་བྱའོ། །མཆོད་པ་དེ་ཉིད་ཅེས་བྱ་བ་ལ་སོགས་པ་སྙོམས་པར་ཞུགས་པའི་མཆོད་པ་བསྟན་པར་བྱ་བའི་ཕྱིར་བསྟན་པའོ། །དགའ་བས་སེམས་རབ་ཏུ་དང་པའི་ཡིད་ཅེས་པ་ནི་མཆོད་པ་ལ་སོགས་པའི་སྦྱིན་པ་ལས་བྱུང་བའི་རབ་ཏུ་དགའ་བས་དྲི་མ་མེད་པས་ཤིན་ཏུ་མགུ་བའི་ཡིད་དང་ལྡན་པའོ། །ཚིམ་པར་བྱེད་པའི་ཕྱིར་ཞེས་པ་ནི་ན་སོ་གཞོན་པ་དང༌། མཛེས་པ་ལ་སོགས་པའི་ཁྱད་པར་གྱིས་ཡིད་ཚིམ་པར་བྱེད་པའི་ཕྱིར་རོ། །ཡིད་དུ་འོང་བ་ནི་དགའ་བར་བྱེད་པའོ། །སློབ་
མས་བསྟབས་པའོ་ཞེས་པ་ནི་གསང་བའི་དབང་བསྐུར་བའི་དོན་དུ་སློབ་མས་དབུལ་བའོ། །ལྷག་པར་གནས་པས་ན་ཞེས་པ་སྐུ་ལ་སོགས་པ་ལ་དམིགས་ནས་གང་གིས་རྗེས་སུ་བཟུང་བ་དེ་ལ་དེ་སྐད་ཅེས་བྱའོ། །ཨོཾ་ལ་སོགས་པ་ས་བོན་རྣམས་ནི་སྐྱེད་པའི་ས་བོན་རྣམས་སོ། །དེའི་ཕྱག་རྒྱའི་ལུས་ལ་ཞེས་པ་ནི་དམ་ཚིག་གི་ཕྱག་རྒྱའི་ལུས་ལའོ། །གནས་ཇི་ལྟ་བ་བཞིན་དུ་ཞེས་པ་ནི་ཡན་ལག་དང་ཉིང་ལག་རྣམས་ལ་བཀོད་ནས་སོ། །རིགས་ལྔས་བྱིན་གྱིས་བརླབ་པར་བྱས་ལ་ཞེས་པ་ནི་དེ་བཞིན་གཤེགས་པ་ལྔ་པོའི་ས་བོན་གྱི་བྱིན་གྱིས་བརླབ་པ་བྱས་པའོ། །སྙོམས་པར་འཇུག་པའི་མཚན་ཉིད་ཅན་ཞེས་པ་ནི་རྡོ་རྗེ་དང་པདྨ་སྦྱོར་བའི་རང་བཞིན་ཞེས་བྱ་བའི་ཐ་ཚིག་གོ །ཕྱིའི་མཆོད་པ་ནི་མཆོད་པ་རྣམ་པ་ལྔའི་མཚན་ཉིད་དང་ཡིད་ཀྱིས་ཏེ། དེ་ལ་ལྟོས་ནས་དེ་ཁོ་ན་ཉིད་ཀྱིས་མཆོད་པ་ནི་མཆོག་ཅེས་བྱའོ། །གཏན་ཚིགས་བསྟན་པའི་ཕྱིར། ཆགས་པ་དང་ཆགས་པ་དང་བྲལ་པ་དང་ཆགས་པ་བར་མ་ནི་སྣང་བ་ལ་སོགས་པ་ཡེ་ཤེས་གསུམ་མོ།། ཉོན་མོངས་པ་རྣམ་པར་དག་པའི་གནས་ནི་འོད་གསལ་བ་སྟེ། སྣང་བ་ལ་སོགས་པ་དང་དེ་ལས་བྱུང་བའི་རང་བཞིན་རྣམས་ཀྱང་སྦྱོར་བར་བྱེད་པའི་ཕྱིར་རོ། །མངོན་སུམ་དུ་བྱེད་པའི་ཕྱིར་རོ་ཞེས་པ་དེ་ནི་དེ་མྱོང་བས་སོ། །སློབ་མ་ལ་བླ་མས་བྱིན་པ་ཞེས་བྱ་བ་ལ་སོགས་པས་སྙོམས་པར་ཞུགས་པའི་ཆོ་གའི་འོག་ཏུ་འོད་གསལ་བ་ལ་དམིགས་པའི་ཕྱི་མའི་དུས་སུ་ཕཊ་ཀྱི་སྒྲས་བྱང་ཆུབ་ཀྱི་སེམས་སྤྲོ་ཞིང་ས་ལ་མ་ལྷུང་བ་དུང་ཕོར་གྱི་པདྨའི་ནང་ནས་བླངས་ཏེ། བླ་མས་བྱིན་པ་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཕུང་པོ་ལ་སོགས་པ་ཚིམ་པར་བྱ་བ་དང༌། ཀྱེ་མའོ་བདེ་བ་ཆེན་པོ་ཞེས་སྨྲ་བའི་སློབ་མས་སྤྱོད་པར་བྱ་བ་དང༌། བླ་མས་ཀྱང་བདུད་རྩི་ལྔ་དང་འདྲེས་ཤིང་སྤྱོད་པ་ལས་ལྷག་མ་བྱང་ཆུབ་ཀྱི་སེམས་དེ་ཉིད་ཀྱིས་བཀྲ་ཤིས་ཀྱི་ཚིགས་སུ་བཅད་པ་སྔོན་དུ་འགྲོ་བར་སློབ་མ་ལ་སྤྱི་བོར་དབང་བསྐུར་བར་བྱའོ་ཞེས་བསྟན་ཏོ། །ལ་ལ་ནི་སྙོམས་པར་ཞུགས་པའི་འོག་ཏུ་ཤེས་རབ་ཀྱི་པདྨ་ཉིད་ཅེས་བྱ་བ་ལ་འཇུག་པར་བྱའོ་ཞེས་ཤེས་རབ་ཀྱི་གསང་བའི་དབང་བསྐུར་རོ། །རྡོ་རེ་སློབ་དཔོན་གྱི་བྱང་ཆུབ་ཀྱི་སེམས་ཀྱི་ཐིག་ལེ་འཛག་པ་པདྨའི་ནང་ནས་བསྟན་པ་གསང་བའི་རྡོ་རྗེ་མྱང་བ་ལ་འཇུག་གོ་ཞེས་ཐབས་ཀྱི་གསང་བའི་དབང་བསྐུར་བ་ལ་འཇུག་གོ །དེ་བས་ན་ཐབས་དང་ཤེས་རབ་ཀྱི་གསང་བའི་དབང་བསྐུར་ཡིན་ནོ་ཞེས་ལང་ག་ལིའི་ཞལ་སྔ་ནས་ཀྱིས་གསུངས་སོ། །ཇི་སྐད་དུ་ཞེས་བྱ་བ་ལ་སོགས་པས་ལུང་
ཚད་མ་ཉིད་དུ་བསྟན་ཏོ། །བྱང་ཆུབ་སེམས་ཞེས་བྱ་བ་ལ་སོགས་པས་རིན་པོ་ཆེ་ལྟ་བུ་བསམ་པ་ཐམས་ཅད་རྫོགས་པར་བྱེད་པའི་བྱང་ཆུབ་ཀྱི་སེམས་སྤྲོ་བར་བྱ་སྟེ། དེ་བཞིན་གཤེགས་པ་ཐམས་ཅད་འཇུག་པ་སྔོན་དུ་འགྲོ་བར་བྱས་ལ་ནམ་མཁའི་ཁམས་ལ་བཞུགས་པ་རྒྱལ་བ་མ་ལུས་པའི་རྣམ་པར་དག་པའི་སྐུ་ནི་དྲི་མ་མེད་པའི་ཡེ་ཤེས་ཀྱི་རང་བཞིན་གྱི་སྐུ་ལྷག་པར་མོས་ཏེ། དབང་བསྐུར་བ་ནི་སློབ་མའི་ཁ་ལ་ངེས་པར་འཇུག་པའོ། །དེ་བཞིན་དུ་རིན་ཆེན་དང་འདྲ་བ་རྡོ་རྗེ་ལས་བྱུང་བ་ཡེ་ཤེས་ཀྱི་ཆུ་བདུད་རྩི་ལྔ་དང་ལྡན་པའི་བྱང་ཆུབ་ཀྱི་སེམས་ཀྱི་ཐིག་ལེ་དང་བཅས་པས་སྤྱི་བོར་ཡང་དབང་བསྐུར་བར་བྱའོ་ཞེས་བསྟན་ཏོ། །འདི་ནི་ཞེས་བྱ་བ་ལ་སོགས་པས་ཕན་ཡོན་བསྟན་པར་བྱའོ། །མཆོད་པ་བསྟན་པས་ཞེས་པ་ནི། བླ་ན་མེད་པའི་མཆོད་པའི་ཚུལ་གྱིས་སོ། །གསང་བའི་དབང་བསྐུར་བ་སྟེ་ཞེས་པ་ནི་སྔར་བཤད་པའོ། །དེ་བཞིན་གཤེགས་པ་ཐམས་ཅད་དང་འབྲེལ་པར་གྱུར་པའོ་ཞེས་པ་ནི་ནམ་མཁའི་དབྱིངས་ལ་བཞུགས་པའི་དེ་བཞིན་གཤེགས་པ་ཐམས་ཅད་འཇུག་པ་ཡོངས་སུ་གྱུར་པ་ལས་བྱུང་བའོ། །མི་འཇིགས་པའི་སྐུ་དང་གསུང་དང་ཐུགས་བསྐྱེད་པ་ཞེས་བྱ་བ་ནི་རྣམ་པར་སྨིན་པ་དཔལ་རྡོ་རྗེ་འཆང་གི་སྐུ་ལ་སོགས་པ་རྫོགས་པར་བྱེད་པའོ། །ཇི་སྐད་དུ། དེ་དུས་ནས་བརྩམས་དེ་ནི་རྟོག་པ་མེད། །དེ་ཡི་ཁ་དོག་དབྱིབས་དང་ཇི་ལྟར་མཚན། །བསམ་གྱིས་མི་ཁྱབ་རྣམ་པར་སྨིན་པའི་སྐུ། །སྡོམ་པ་དེ་ལས་བྱ་བ་བྱས་པས་ཐོབ། །ཅེས་འབྱུང་ངོ༌། །སློབ་བཞིན་པའི་རྣལ་འབྱོར་པ་རྣམས་ཀྱིས་ཞེས་པ་ནི་བསྐྱེད་པའི་རིམ་པ་སྒོམ་པར་བྱེད་པའི་རྣལ་འབྱོར་པ་རྣམས་སོ། །བྱ་བའི་རྒྱུད་ལ་སོགས་པ་ལ་ཞུགས་པ་རྣམས་ལ་གསང་བ་ཡིན་པས་སོ་ཞེས་པ་ནི་བྱ་བའི་རྒྱུད་ལ་སོགས་པ་འཇུག་པ་ལ་སྦ་བར་བྱའོ། །འཇིག་རྟེན་པའི་དངོས་གྲུབ་ནི་ཞི་བ་ལ་སོགས་པའོ། །ཨཱ་ལི་དང་ཀཱ་ལི་ལས་བྱུང་བ་ཞེས་བྱ་བ་ནི་ཨཱ་ལི་དང་ཀཱ་ལི་བསྡུ་བར་བྱེད་པའི་ཡི་གེ་གསུམ་གྱིས་སློབ་པའོ། །སྤྲུལ་ཞེས་བྱ་བ་ལ་སོགས་པ་ཞེས་པ་ནི་སྤྲུལ་དང༌། མགོ་མེད་དང༌། མཐའ་མེད་དང༌། བསྡུ་བ་ལ་སོགས་པའོ། །མ་ཚང་བ་མེད་པའི་དངོས་གྲུབ་སྐྱེད་པ་ཞེས་བྱ་བ་ནི་ཞི་བ་ལ་སོགས་པའི་ཕྲིན་ལས་ཡོངས་སུ་ཚང་བར་བྱེད་པའོ། །སྒྲ་ཇི་བཞིན་པ་ཞེས་བྱ་བ་ནི་སྤྱོད་པའི་དོན་བསྟན་པ་སྟེ། སྤྱོད་པ་ཇི་ལྟ་ཇི་ལྟར་གསུངས། །ཞེས་འབྱུང་བའི་ཕྱིར་རོ། །སྒྲོན་མ་གསལ་བར་བྱེད་པའི་འགྲེལ་པའི་ཊཱི་ཀཱ་ལས་ལེའུ་བརྒྱད་པའི་རྒྱ་ཆེར་བཤད་པའོ།། །།