ལེའུ་བཅོ་ལྔ་པ། སེམས་ཅན་ཐམས་ཅད་ཀྱི་དམ་ཚིག་གི་སྙིང་པོ་རྡོ་རྗེ་འབྱུང་བ་ཞེས་བྱ་བའི་རྒྱ་ཆེར་བཤད་པ།
བཤད་པ་དང་མ་བཤད་པ་ཞེས་བྱ་བ་ལ་སོགས་པས་ལེའུ་བཅོ་ལྔ་པའི་བཤད་པ་བརྩམ་པར་བྱ་སྟེ། བསམ་པ་ནི་འདི་ཡིན་ཏེ་བཤད་པ་ནི་ལེའུ་བཅུ་གསུམ་པ་དང་བཅུ་བཞི་པ་ལས་བཤད་པའོ། །མ་བཤད་པ་ནི་ལེའུ་བཅོ་ལྔ་པ་དང་བཅུ་དྲུག་པ་དང་བཅུ་བདུན་པ་ལས་འཆད་པར་འགྱུར་པའི་ལས་ཀྱི་ཚོགས་དེ་རྣམས་སྒྱུ་མ་ལྟ་བུའི་ཏིང་ངེ་འཛིན་མེད་པས་འགྲུབ་པར་མི་འགྱུར་པས་ན་ལེའུ་བཅོ་ལྔ་པ་བསྟན་ཏོ། །སྟོང་པ་བཞིའི་བདག་ཉེད་ཅན་ནོ་ཞེས་པ་ནི་སྟོང་པ་དང༌། ཤིན་ཏུ་སྟོང་པ་དང༌། སྟོང་པ་ཆེན་པོ་དང༌། ཐམས་ཅད་སྟོང་པའོ། །ཡང་ན་སྣང་བ་དང༌། སྣང་བ་མཆེད་པ་དང༌། སྣང་བ་ཉེ་བར་ཐོབ་པ་དང༌། འོད་གསལ་བའོ། །ཡང་ན་པདྨའི་ནང་ན་རྩ་བཞིའོ། །བདག་ཉིད་ནི་དབུས་ཀྱི་རྩ་སྟེ། འདོད་པའི་གདུགས་སོ། །ཇི་སྐད་དུ།
བྷ་གའི་དབུས་ན་ནམ་མཁའ་གང༌། །ནམ་མཁའ་ལྔ་ཡིས་བརྒྱན་པ་སྟེ། །ལྟེ་བ་གེ་སར་དང་ལྡན་པའི། །འདབ་མ་བརྒྱད་ཀྱིས་རྣམ་པར་མཛེས། །ཞེས་འབྱུང་ངོ༌། །རྣམ་པར་མི་འཇིག་པའོ་ཞེས་བྱ་བ་ནི་ཆོས་ཀྱི་སྐུའི་ངོ་བོ་ཡིན་པས་སོ། །དབང་བསྐུར་བ་ཐམས་ཅད་ཅས་བ་ནི་སློབ་དཔོན་དང་གསང་བ་དང་ཤེས་རབ་ཅེས་བྱའོ། །དེ་རྣམས་ཀྱི་ཡང་དབང་བསྐུར་བ་ཞེས་པ་ནི་ཤེས་རབ་ཡེ་ཤེས་ཏེ། བཞི་པ་ཡང་ནི་དེ་བཞིན་ནོ། །ཞེས་བྱ་བ་མཚན་ཉིད་དོ། །དེའི་ངོ་བོ་ཡིན་པས་རྡོ་རྗེ་འཆང་ནི་ཐམས་ཅད་དབང་བསྐུར་པ་ཞེས་བྱའོ། །སེམས་ཅན་གྱི་བསམ་པའི་དབྱེ་བས་རིགས་ཐམས་ཅད་ནི་རིགས་པ་རྒྱའམ་ལྔ་འམ་གསུམ་མོ། །ཇི་སྐད་དུ། རིགས་ནི་རྣམ་པ་བརྒྱར་བཤད་པ། །མདོར་བསྡུས་པས་ན་རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིས། །ཕྱི་ནས་རྣམ་པ་གསུམ་དུ་འགྱུར། །ཞེས་འབྱུང་ངོ༌། །དེའི་བདག་ཉིད་བཅོམ་ལྡན་འདས་ནི་དེ་རྣམས་སྤྲུལ་པར་མཛད་པས་སོ། །དེ་བས་ན་མཁྱེན་པའི་སྒྲ་སྤྲུལ་ལོ་པའི་དོན་ཏོ། །མི་ཕྱེད་པའི་གསུང་ངོ་ཞེས་པ་ནི། ཕྱག་རྒྱ་དང་སྙོམས་པར་ཞུགས་པའི་མཚན་ཉིད་ཀྱི་གསུང་ངོ༌། །དགོངས་པ་མ་ཡིན་པས་བཤད་པ་ཞེས་པ་ནི་ཤིན་ཏུ་གསལ་བའི་དེ་ཁོ་ན་ཉིད་བསྟན་པས་སོ། །སྤྲོས་པ་མེད་པའི་སྤྱོད་པ་ནི་ཇི་སྙེད་པའི་སྤྱོད་པའི་སྒོ་ནས་ཕྱག་རྒྱ་དང་སྙོམས་པར་འཇུག་པའི་མཚན་ཉིད་དོ། །སྨེ་ཤ་ཅན་ཞེས་བྱ་བ་ནས། རྟོག་པའི་རྣལ་འབྱོར་ཡིན་པའི་ཕྱིར་རོ་ཞེས་པའི་བར་དུ་ནི་རིམ་པ་ཇི་ལྟ་བ་བཞིན་དུ་མི་བསྐྱོད་པ་དང༌། རྣམ་པར་སྣང་མཛད་དང་འོད་དཔག་ཏུ་མེད་པའི་རྣལ་འབྱོར་བ་རྣམས་ཀྱིས་སྐྱེ་བོས་དབེན་པའི་ས་ཕྱོགས་སུ་བའི་ལྕི་བ་ལ་སོགས་པས་བྱུགས་པ་ལ། །རྟེན་དང་བརྟེན་པའི་རང་བཞིན་གྱིས་འཁོར་ལོ་བྲིས་པའམ་ཡིད་ཀྱིས་བསྒོམས་ལ་དེའི་དབུས་སུ་རང་གི་རིགས་དང་མཐུན་པའི་ལེགས་པར་བསླབས་པ་གཟུགས་བཟང་བ་ལེགས་པར་བརྒྱན་པ་སྨེ་ཤ་ཅན་དང་བྲུས་མཁན་དང་གར་མཁན་གྱི་བུ་མོ་ལོ་བཅུ་གཉིས་པ་དང་ཉི་ཤུ་པ་དང་བཅུ་དྲུག་ལོན་པ། ཨུཏྤལ་སྔོན་པོ་དང་དམར་པོ་དང་ཁ་དོག་དཀར་བ། རིགས་ལྔས་ཁྱབ་པ་སླར་བཞག་ཅིང་རྗེས་སུ་ཆགས་པ་དང་མཆོད་པ་སྔོན་དུ་འགྲོ་བས་སོ་སོར་སྡུད་པའི་རིམ་པས་ཉེ་བར་སྤྱོད་པ་བྱས་
ཏེ་གནས་པར་བྱའོ་ཞེས་བྱ་བ་དང༌། དེ་བཞིན་དུ་རིན་ཆེན་འབྱུང་ལྡན་དང་དོན་ཡོད་གྲུབ་པའི་རྣལ་འབྱོར་བ་དག་གིས་ཀྱང་གཏི་མུག་གི་རིགས་དང་ཞེས་སྡང་གི་རིགས་ལས་བསྡུས་པས་ཁྲུས་མཁན་དང་སྨེ་ཤ་ཅན་གྱི་བུ་མོ་དག་བསྒྲུབས་ནས་གནས་པར་བྱའོ། །དེ་ལྟར་ཞུགས་པའི་སྒྲུབ་པ་པོས་ཞེས་པ་ནི་སྤྲོས་པ་མེད་པའི་སྤྱོད་པ་ལ་རྩོལ་བ་བྱས་པའོ། །འོད་དཔག་ཏུ་མེད་བའི་རང་བཞིན་ཞེས་པ་ནི་གང་ཞིག་འོད་དཔག་ཏུ་མེད་པའི་ཏིང་ངེས་འཛིན་བསྒོམ་པ་དེ་ནི་དེ་དང་འདྲ་བར་འགྱུར་རོ་ཞེས་བྱ་བའི་གཟུང་གིས་བསྟན་ཏོ། །ཉེ་བར་མཚོན་པ་ཡིན་པས་མི་བསྐྱོད་པ་ལ་སོགས་པའི་རྣལ་འབྱོར་པ་རྣམས་ཀྱང་དེ་དང་འདྲ་བར་འགྱུར་རོ་ཞེས་བྱ་བའི་དོན་ཏོ། །ས་བཅུ་ལ་གནས་པར་འགྱུར་རོ་ཞེས་པ་ནི་ས་བཅུའི་དབང་ཕྱུག་གི་བདག་པོའོ། །དག་གི་དབང་ཕྱུག་དེ་འཛིན་པའོ་ཞེས་པ་ནི་འོད་དཔག་ཏུ་མེད་པའི་རྣལ་འབྱོར་པའི་ཕན་ཡོན་བསྟན་ཏོ། །ཐུགས་ཀྱི་དབང་ཕྱུག་དང་སྐུའི་དབང་ཕྱུག་ཀྱང་མི་བསྐྱོད་པ་དང་རྣམ་པར་སྣང་མཛད་ཀྱི་རྣལ་འབྱོར་པ་དག་ལ་རྟོགས་པར་བྱ་བ་དང༌། དེ་བཞིན་དུ་ནམ་མཁའ་མཛོད་ཉིད་དང་ལས་ཐམས་ཅད་བྱེད་པ་ཉིད་རིན་པོ་ཆེ་དང་དོན་ཡོད་གྲུབ་པའི་རྣལ་འབྱོར་པ་དག་ལ་བཤད་པར་བྱའོ། །དེ་ཡང་དེའི་རྣལ་འབྱོར་དང་ལྡན་པས་དེ་དང་འདྲ་བར་འགྱུར་རོ་ཞེས་བྱ་བའི་གཞུང་གིས་བསྟན་ཏོ། །དབང་ཕྱུག་དམ་པ་དང་ལྡན་པ། །ཞེས་པ་ནི་སྐུའི་དབང་ཕྱུག་ལ་སོགས་པ་དང་ལྡན་པའོ། །སེམས་ཅན་ཐམས་ཅད་ནི་རང་གི་སྡེ་པ་དང་གཞན་གྱི་སྡེ་པའི་ནང་ན་མཆོག་ཡིན་པས་ན་སེམས་ཅན་ཐམས་ཅད་ལས་ཁྱད་པར་དུ་གྱུར་པའོ། །འཁོར་ལོས་སྒྱུར་བར་གྱུར་པ་ཞེས་པ་ནི་དཀྱིལ་འཁོར་གྱི་འཁོར་ལོའི་བདག་པོར་འགྱུར་རོ། །རྟོག་པའི་རྣལ་འབྱོར་པ་ཡིན་པའི་ཕྱིར་རོ་ཞེས་པ་ནི་བསྐྱེད་པའི་རིམ་པ་སྒོམ་པར་བྱེད་པས་སོ། །དེ་ལྟར་ཞེས་བྱ་བ་ལ་སོགས་པས་བསྐྱེད་པའི་རིམ་པའི་རྣལ་འབྱོར་པའི་ཕྱག་རྒྱའི་དབྱེ་བ་བསྟན་པའི་འོག་ཏུ། རྫོགས་པའི་རིམ་པ་ལ་གནས་པ་རྣམས་ལ་ཡང་བསྟན་པར་བྱའོ་ཞེས་བསྟན་ཏོ། །རིགས་བཞི་པོ་ཞེས་བྱ་བ་ནས་རིང་པོར་མི་ཐོགས་པར་འགྱུར་རོ་ཞེས་བྱ་བའི་བར་དུ་ནི་རྫོགས་པའི་རིམ་པའི་རྣལ་འབྱོར་བས་བྲམ་
ཟེ་ལ་སོགས་པ་གང་ཡང་རུང་བའི་བུ་མོ་བླངས་ལ་སྙོམས་པར་ཞུགས་པའི་རིམ་པས་སྣང་བ་ལ་སོགས་པའི་ཡེ་ཤེས་གསུམ་རྒྱུ་དང་རྐྱེན་ལས་འབྱུང་བའི་འོད་གསལ་བ་ཕྱེ་དང་ནང་གི་བདག་ཉིད་ཀྱི་མངོན་པར་བྱང་ཆུབ་པའི་རིམ་པས་མྱོང་ཞིང༌། དེ་ལས་བྱུང་བའི་མི་གནས་པའི་མྱ་ངན་ལས་འདས་པའི་བདག་ཉིད་ཀྱི་ཟུང་དུ་འཇུག་པའི་རྡོ་རྗེའི་སྐུ་དམིགས་ནས་གནས་པར་བྱའོ་ཞེས་བསྟན་ཏོ། །དེ་ཉིད་བསྟན་པའི་ཕྱིར་རིགས་བཞིན་པོ་རྣམས་ལས་གང་ཡང་རུང་བ་ཞེས་པ་ནི་རྫོགས་པའི་རིམ་པ་ལ་གནས་པ་ལ་རྟོག་པ་མེད་པའི་ཕྱིར་རོ། །བླངས་ནས་ཞེས་བྱ་བ་ནི་ལྷན་ཅིག་སྤྱོད་པ་བཞིན་དུ་བླངས་ནས་སོ། །དེ་རྟོགས་པ་དང་ལྡན་པའི་ཞེས་པ་ནི་རྫོགས་པའི་རིམ་པས་ལྷའི་སྐུ་ཐོབ་པའོ། །རྡོ་རྗེ་འཆང་སྟེ་ཞེས་པ་ནི་ཐམས་ཅད་ཀྱི་འབྲས་བུར་གྱུར་པས་སོ། །དེ་རྫོགས་པར་བྱེད་པ་ནི་ཟུང་དུ་འཇུག་པའི་ཏིང་ངེ་འཛིན་སྐྱེད་པར་བྱེད་པའོ། །མངོན་པར་བྱང་ཆུབ་པའི་རིམ་པས་རྫོགས་པར་བྱས་ཏེ་ཞེས་པ་ནི་རིམ་པ་གཉིས་ཀྱིས་སོ། །དེའི་ཐབས་ནི་ཕྱག་རྒྱ་ཆེན་པོའི་དངོས་གྲུབ་ཀྱི་རྒྱའོ། །དམར་ཐག་ཆད་ཅིང་འདས་པར་གྱུར་ཏེ་ཞེས་པ་ནི་དགོངས་ཀ་སྟེ་དེའི་ཚེ་ཉི་མ་ནུབ་པའི་ཕྱིར་རོ། །དེས་ན་མཚན་མོ་བྱུང་བའི་དུས་སུ་ཚོགས་ཀྱི་འཁོར་ལོའི་ཆོགས་དཀྱིལ་འཁོར་གྱི་དབུས་ན་གནས་པའི་བླ་མས་མཆོད་པ་རྣམ་པ་ལྔ་ལ་སོགས་པས་དེ་ཁོ་ན་ཉིད་ཐོབ་པའི་དོན་དུ་གསོལ་བ་འདེབས་པ་སྔོན་དུ་འགྲོ་བས་མཆོད་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་མཆོད་པའི་འོག་ཏུ་མཚན་ཕྱེད་ཀྱི་དུས་སུ་དང་པར་གྱུར་པའི་བླ་མས་ཇི་ལྟ་བ་བཞིན་དུ་གསང་བའི་འོག་ཏུ་ཤེས་རབ་ཀྱི་དབང་བསྐུར་བ་ཐོབ་ནས་རང་རིགས་པ་བསྟན་ཏོ། །བདེ་བ་བྱུང་བས་དབང་བསྐུར་ཐོབ་པའོ། །རོ་དེ་ཉིད་ཀྱི་ནམ་ལངས་ནས་སྐྱ་རེངས་འཆར་བའི་དུས་སུ་ནི་ཉི་མའི་ཁ་ལོས་སྒྱུར་བ་བླ་ན་མེད་པ་འཆར་བའི་དུས་སུ་ནི་མཚན་མོའི་ཆ་འདས་པའོ། །དེ་ཉིད་བསྟན་པའི་ཕྱིར་ཉི་མ་འཆར་བའི་སྟོན་དུ་ཞེས་པ་ནི་དང་པོ་ནི་ཉི་མའི་ཁ་ལོས་སྒྱུར་བ་སྐྱ་རེངས་འཆར་བ་དར་ཕྱི་ནས་ཉི་མ་འཆར་བའོ། །དེའི་དུས་སུ་མངོན་པར་བྱང་ཆུབ་པའི་རིམ་པའི་མན་ངག་གིས་དངོས་གྲུབ་ཐོབ་པར་འགྱུར་རོ། །ཕྱིའི་མངོན་པར་བྱང་ཆུབ་པའི་
རིམ་པ་ཞེས་པ་ནི་ཕྱིའི་དུས་ལ་ལྟོས་པས་དེ་ཁོ་ན་ཉིད་རྟོགས་པའི་མཚན་ཉིད་ཀྱི་མན་ངག་གོ །ནང་གི་བསྟན་པར་བྱ་བའི་ཕྱིར་ཞེས་བྱ་བ་ལ་སོགས་པས་ནང་གི་བདག་ཉིད་ཀྱི་མངོན་པར་བྱང་ཆུབ་པའི་རིམ་པ་བསྟན་པར་བྱ་སྟེ། ཐབས་ཀྱི་ཡེ་ཤེས་ཞེས་པ་ནི་སྣང་བ་མཆེད་པའི་ཡེ་ཤེས་ཏེ་འདོད་ཆགས་ཀྱི་མིང་ཅན་ནོ། །སྙོམས་པར་ཞུགས་པས་མཚོན་པས་ན་སྙོམས་པར་ཞུགས་པའི་མཚན་ཉིད་དོ། །བྱུང་བར་གྱུར་ནས་ཞེས་པ་ནི་དེ་བསྐྱེད་ནས་སོ། །ནུབ་ཅིང་ནི་འདས་ནས་སོ། །ཤེས་རབ་ཀྱི་ངོ་བོ་ཉིད་དུ་གྱུར་པས་ཞེས་པ་ནི་སྣང་བའི་ཡེ་ཤེས་ཀྱི་ཕྱི་ནས་འབྱུང་ཞིང་ཐིམ་པའོ། །དེ་ནས་འོད་གསལ་བ་སྔོན་དུ་འགྲོ་བས་ཞེས་པ་ནི། འོད་གསལ་བ་ལས་སྔོན་དུ་སྣང་བ་ཉེ་བར་ཐོབ་པའི་ཡེ་ཤེས་འབྱུང་བ་ནི་མྱོང་བར་འགྱུར་རོ། །མ་རིག་པ་སྟེ་ཞེས་པ་ནི་སྣང་བ་ཉེ་བར་ཐོབ་པའི་ཡེ་ཤེས་སོ། །དེས་སོང་བར་གྱུར་པའི་དུས་སུ་ཞེས་པ་ནི་དེའི་བག་ཆགས་ཀྱི་ལྷག་མ་མེད་པའི་ཚེའོ། །སྟོང་པ་དང་ཤིན་ཏུ་སྟོང་པ་དང་སྟོང་པ་ཆེན་པོ་ནི་སྣང་བ་ལ་སོགས་པའི་རང་བཞིན་གསུམ་མོ། །རྒྱུ་དང་རྐྱེན་གྱིས་ཞེས་པ་ནི་ཉེ་བར་ལེན་པ་དང་ལྷན་ཅིག་བྱེད་པའི་རྒྱུར་གྱུར་བ་སྟེ་གཅིག་རྒྱུ་དང་གཞན་དག་ཀྱང་ལྷན་ཅིག་བྱེད་པ་ཡིན་བས་སོ། །དེ་རྣམས་ཀྱི་འོད་གསལ་བ་ནི་འབྲས་བུར་གྱུར་པའི་དེ་ཁོ་ན་ཉིད་མངོན་དུ་བྱེད་པས་སོ། །ཕྱག་རྒྱ་ཆེན་པོ་འགྲུབ་པར་འགྱུར་རོ་ཞེས་པ་ནི་ཟུང་དུ་འཇུག་པའི་ཏིང་ངེ་འཛིན་གྱིས་རྡོ་རྗེའི་སྐུ་འབྱུང་བར་འགྱུར་རོ་ཞེས་བྱ་བའི་དོན་ཏོ། །ཇི་སྐད་དུ། སྐྱེ་རངས་ཤར་བའི་དུས་སུ་ནི། །རྡོ་རྗེ་ལྟ་བུའི་ཏིང་འཛིན་གྱིས། །བྱང་ཆུབ་ཤིང་དྲུང་བཞུགས་ནས་ནི། །དེས་ནི་བདུད་རྣམས་འཛོམས་པར་མཛད། །སྟོང་པ་ཤིན་ཏུ་སྟོང་པ་དང༌། གསུམ་པ་སྟོང་པ་ཆེན་པོ་དང༌། །བཞི་པ་ཐམས་ཅད་སྟོང་པ་ནི། །རྒྱུ་དང་འབྲས་བུའི་བྱེ་བྲག་གོ །ཞེས་འབྱུང་བས་སོ། །མཚན་མོ་སྣང་བའི་ཆ་སྟེ་ཉི་མའི་ཟེར་འགྱེད་སྣང་བ་མཆེད་པ་ཡིན། །མཚམས་ནི་སྣང་བ་ཐོབ་པ་རང་གི་རང་བཞིན་རྣམས་དང་རྟག་ཏུ་བཅས། །མཚན་མིན་མཚམས་མེད་ཉིན་མེད་གང་ཞིག་རང་བཞིན་གྱིས་དག་པ། །དེ་ནི་བྱང་ཆུབ་སྐད་ཅིག་བླ་མ་མཆོག་བཤད་
རྣལ་འབྱོར་བ་ཉིད་ཡུལ། །ཞེས་འབྱུང་ངོ༌། །དེ་ལྟར་ཕྱི་ནང་གི་མངོན་པར་བྱང་ཆུབ་ཀྱི་རིམ་པས་འོད་གསལ་བ་མྱོང་ཞིང་དེ་ལས་བྱུང་བའི་རྡོ་རྗེའི་སྐུ་སྤྲོ་བར་བསྟན་ཏོ། །མཚན་རྣམས་ཐམས་ཅད་ཀྱིས་བརྒྱན་པ། །ཞེས་པ་ནི་མཚན་དང་དཔེ་བྱད་ཀྱིས་བརྒྱན་པའོ། །སྟོབས་བཅུ་ནི་གནས་དང་གནས་མ་ཡིན་པ་ལ་སོགས་པའོ། །མི་འཇིགས་པ་ནི་བཞི་སྟེ་དེ་བཞིན་དུ་ལ་སོགས་པའི་སྒྲས་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་ལམ་གྱི་ཡན་ལག་ལ་སོགས་པ་སངས་རྒྱས་ཀྱི་ཡོན་ཏན་དེ་དང་ལྡན་པ་ནི་ལྡན་པའོ། །དེའི་ཁྱད་པར་ནི་ཕྱག་རྒྱ་ཆེན་པོ་རྫོགས་པ་སྟེ་རྡོ་རྗེ་སེམས་དཔའི་སྐུའི་བདག་ཉིད་ཅན་ནོ། །དེ་ལྟར་ཞེས་བྱ་བ་ལ་སོགས་པས་དེ་ཁོ་ན་ཉིད་ཐོབ་པའི་ཕན་ཡོན་བསྟན་ཏོ། །ཁམས་གསུམ་ཞེས་པ་ནི་འཇིག་རྟེན་གསུམ་པའི་སངས་རྒྱས་ཉིད་ཐོབ་པས་ན་མངོན་པར་འདོད་པའི་དོན་གྱིས་འབྲས་བུ་སྟེར་བའོ། །དེ་བཞིན་དུ་རབ་ཏུ་གྲགས་པའི་མཚན་རྣམས་ནི་ཐུན་མོང་མ་ཡིན་པའི་དྲན་པ་ཉེ་བར་གཞག་པ་ལ་སོགས་པ་དེ་དང་ལྡན་པའོ། །དཔག་ཚད་བརྒྱ་ཞེས་བྱ་བ་ལ་སོགས་པས་རང་གི་སྣང་བ་མཐའ་ཡས་བའི་འཇིག་རྟེན་གྱི་ཁམས་སྣང་བར་བྱེད་པར་འགྱུར་རོ་ཞེས་བསྟན་པ་དང༌། དེ་བཞིན་དུ་ཀུན་རྫོབ་དང་དོན་དམ་པར་དབྱེར་མེད་པའི་ངོ་བོ་ཟུང་དུ་འཇུག་པའི་ཏིང་ངེ་འཛིན་གྱིས་འགྲོ་བའི་དོན་ཞིབ་ལ་སོགས་པ་འདི་བྱེད་དོ་ཞེས་བསྟན་ཏོ། །བཤད་མ་ཐག་པ་ཞེས་པ་ལ་སོགས་པས་རྫོགས་པའི་རིམ་པའི་ཏིང་ངེ་འཛིན་མི་འདའ་བ་ཉིད་དུ་བསྟན་ཏོ། །སྒྲུབ་པ་པོ་ཞེས་བྱ་བ་ལ་སོགས་པའི་གང་ཞིག་རྣལ་འབྱོར་པ་དབང་པོ་དང༌། །ཡུལ་ཉེ་བར་སྤྱོད་པའི་སྒོ་ནས་སོ་སོར་སྡུད་པའི་ཏིང་ངེ་འཛིན་གྱིས་འོད་གསལ་བར་ཉེ་བར་མཚོན་པས་མི་གནས་པའི་མྱ་ངན་ལས་འདས་པ་ཞེས་པ་ནི་ཟུང་དུ་འཇུག་པའི་བདག་ཉིད་དེ་ཁོ་ན་ཉིད་ཞི་བ་ནི་སྤྲོས་པ་ཐམས་ཅད་དང་བྲལ་བ། གཞན་གྱི་དོན་ཕུན་སུམ་ཚོགས་པ་གཙོར་གྱུར་པས་ན་དགེ་བ་བླང་བར་བྱ་བས་ན་དེ་ཁོ་ན་ཉིད་མ་འཁྲུལ་པས་ན་མི་སླུ་བ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་གཙོ་བོར་གྱུར་པས་ན་ཕུལ་དུ་བྱུང་བ་ཐོབ་བར་འགྱུར་རོ་ཞེས་སྡུད་པ་པོས་བསྟན་ཏོ། །འདོད་པ་ཞེས་བྱ་བ་ལ་སོགས་པས་བདེན་
བ་གཉིས་ཀྱི་དབྱེར་མེད་པར་གྱུར་པའི་མཚན་ཉིད་ཀྱི་རྡོ་རྗེ་འཆང་གིས་གསུངས་སོ་ཞེས་ཉེ་བར་བསྡུས་པ་བསྟན་ཏོ། །དགོངས་པ་བཤད་པའོ་ཞེས་པ་ནི་འགལ་བའི་སྒྲའི་སྦྱོར་བས་དེ་ཁོ་ན་ཉིད་བསྟན་ཏོ། །དེ་ལྟར་ཞེས་བྱ་བ་ལ་སོགས་པ་ཕྲན་ཆོགས་ཀྱི་དངོས་གྲུབ་བཤད་པར་བྱ་སྟེ། དེ་ནས་ཞེས་བྱ་བ་ལ་སོགས་པས་གཤིན་རྗེས་གཤེད་ཀྱི་ཏིང་ངེ་འཛིན་ལ་ཞུགས་པ་ཉིད་དུ་བསྟན་ཏོ། །དེ་བཞིན་གཤེགས་པ་ཞེས་བྱ་བ་ལ་སོགས་པས་གདུག་པ་སྐྲག་པར་བྱེད་པ་གཤེན་རྗེ་གཤེད་ཀྱི་སྔགས་བརྗོད་པ་བསྟན་ཏོ། །ཨོཾ་ཞེས་བྱ་བ་ལ་སོགས་པ་སྔགས་ཀྱི་དོན་བཤད་པ་ནི་གོ་སླའོ། །གཤིན་རྗེ་གཤེད་ཀྱི་སྔགས་སྤེལ་བ་ནི་སྦྱོར་བ་སྟེ་བསྟན་པར་བྱ་བ་ཞེས་པའི་སྒྲའོ། །དེ་ནས་དོན་འདི་ཡིན་ཏེ་བསྟན་པར་བྱ་བས་ནས་དགྲ་ཐམས་ཅད་གསོད་པར་གྱིས་ཤིག་ཅེས་བྱ་བའི་དོན་ཏོ། །གཞན་དག་གིས་ནི་ཧཱུཾ་གི་སྔགས་སྤེལ་བ་ཞེས་བསྟན་ཏེ། ཧཱུཾ་ཕཊ་མཐའ་ཡིས་གསོད་པའི། །ཞེས་བཤད་པའི་ཕྱིར་རོ། །སྡོང་བུ་ཞེས་བྱ་བ་ལ་སོགས་པས་བ། ཤིན་རྗེ་མཐར་བྱེད་ལ་སོགས་པའི་རྣམ་པ་ལ་དམིགས་ཏེ་ཚེར་མ་ལས་བྱུང་བའི་མེ་དང་ལྡན་པའི་གྲུ་གསུམ་གྱི་མེའི་ཐབས་ཏུ་སྔགས་བརྗོད་པ་སྔོན་དུ་འགྲོ་བ་དུག་དང་ཁྲག་དང་ལན་ཚྭ་དང་སྐེ་ཚེ་དང༌། འབྲུ་མར་དང་འདྲེས་ནས་བུ་མོ་འམ་ཕ་རོལ་གྱི་དབུར་གང་ཡང་རུང་བ་ལ་དམིགས་ནས་མཚན་ཕྱེད་དམ་ཉིན་ཕྱེད་ཀྱི་དུས་སུ་བསྲེགས་ནས། དེ་ཞག་གསུམ་གྱིས་རེངས་པར་འགྱུར་རོ་ཞེས་བསྟན་ཏོ། །དེ་ཉིད་བསྟན་པའི་ཕྱིར། བུ་མོ་དག་དང་འབྲེལ་པའི་ལོངས་སྤྱོད་ཀྱི་རྒྱུར་ཞེས་བྱ་བ་སྨོས་ཏེ། བུ་མོའི་ལུས་ལ་ལོངས་སྤྱོད་པའི་ཕྱིར་དང་དེའི་ཕའི་སྦྱོར་བ་ལ་ལོངས་སྤྱོད་པའི་ཕྱིར་རོ། །དེའི་ཕྱིར་སྒྲུབ་པ་པོ་གཞན་ལས་ཞེས་པ་ནི་དེ་མ་གཏོགས་པ་གཞན་ལ་འགྲོ་བར་མི་འགྱུར་རོ། །དེ་འབའ་ཞིག་ཏུ་མ་ཟད་ཀྱི་ཇི་སྲིད་བྱིས་བ་དང་ལང་ཚོ་དང་རྒན་པའི་གནས་སྐབས་སུ་ཡང་དེ་མེད་པས་དགའ་བར་མི་འགྱུར་གྱི་དེ་ལ་ཆགས་པར་འགྱུར་རོ་ཞེས་བྱ་བའི་དོན་ཏོ། །རྣམ་པར་སྣང་མཛད་ཀྱི་རྣལ་འབྱོར་བའོ་ཞེས་བྱ་བ་ལ་སོགས་པས་སྐུ་རྡོ་རྗེ་ལ་སོགས་པའི་རྣལ་འབྱོར་པ་སུམ་ཅུ་རྩ་གཉིས་ཀྱིས་གལ་ཏེ་སྦྱོར་བ་འདི་མི་བརྩི་ན།
དེའི་ཚེ་དེ་རྣམས་ཀྱི་ལས་དེ་རྩོམ་པ་དོན་མེད་པ་ཞེས་བསྟན་ཏོ། །སྦྱོར་བ་གཞན་བསྟན་པའི་ཕྱིར་ཞེས་བྱ་བ་ལ་སོགས་པར་འབྱུང་པོའི་ཞག་ལ་དུར་ཁྲོད་ཀྱི་གོས་ལ་དུར་ཁྲོད་ཀྱི་སོལ་བས་ཁ་སྦྱོར་གྱི་ནང་དུ་བརྒྱ་རྩ་བརྒྱད་བཟླས་པས་གཤིན་རྗེ་མཐར་བྱེད་ཀྱི་གཟུགས་བྲིས་ལ་དེའི་སྙིང་གར་མིང་སྤེལ་ཏེ་སྔགས་བརྗོད་པ་སྔོན་དུ་འགྲོ་བར་ཆེ་གེ་མོ་ལ་ཨི་དཾ་ད་པ་ཡ་ཕྲི་སྭཱ་ཧཱ་ཞེས་པའི་སྔགས་སྤེལ་བ་བྱས་པ་བརྗོད་ཅིང་བརྒྱ་རྩ་བརྒྱད་བཟླས་པའི་རྣལ་འབྱོར་པ་སྒྲུབ་པ་པོས་ཕ་རོལ་རྣམས་ལ་མངོན་པར་འདོད་པའི་འབྲས་བུ་སྟེར་བར་འགྱུར་རོ་ཞེས་བསྟན་ཏོ། །སྔགས་འདི་ཉིད་ཅེས་བྱ་བ་ལ་སོགས་པར་དུར་ཁྲོད་ཀྱི་གོས་ལ་སོལ་པས་དགྲ་བོའི་གཟུགས་བརྙན་བྲིས་ལ་དེའི་སྙིང་གར་མིང་སྤེལ་ཞིང་ཉིན་ཕྱེད་དམ་མཚན་ཕྱེད་ཀྱི་དུས་སུ་འབྱུང་བོའི་ཞག་ལ། ཁྲོ་བོའི་རྣམ་པ་དང་ཁྲོ་བོའི་བསམ་པས། མཚོན་ཆ་རྣོ་བའི་བསམ་པས་གསོལ་བས་མགོ་ངོ་ནས་བརྩམས་ཏེ། རྐང་པའི་དཀྱིལ་འཁོར་གྱི་བར་དུ་དབུས་སུ་རེག་བཏབ་ནས། དགྲ་པོ་འགགས་པར་འགྱུར་རོ་ཞེས་བསྟན་ཏོ། །ཐོ་བ་ཞེས་བྱ་བ་ལ་སོགས་པས་དགྲ་བོའི་རྐང་བའི་རྡུལ་དང་གཙང་པོའི་འགྲམ་གཉིས་ཀྱི་སས་བསྒྲུབ་བྱའི་གཟུགས་བརྙན་བྱས་ལ། སྔར་བཤད་པའི་དུས་སུ་གཤིན་རྗེ་གཤེད་ཀྱི་རྣལ་འབྱོར་དང་ལྡན་པས་ཁྲོས་ནས་ཡི་གེ་ཕཊ་བཟླས་པས་དེའི་མགོ་བོར་ཐོ་བ་ཕབ་ན་དེའི་ཚེ་མངོན་གསུམ་དུ་དེའི་མགོ་བོར་ཐོ། ཕབ་པ་གང་གིས་སྲོག་དང་བྲལ་བར་འགྱུར་རོ་ཞེས་བསྟན་ཏོ། །ཡང་ན་བསམ་གཏན་གྱིས་ཀྱང་འདི་དག་ཐམས་ཅད་བྱའོ་ཞེས་པ་ནི་ཏིང་ངེ་འཛིན་གྱིས་ཀྱང་རྣམ་པར་བྱས་ཏེ། གང་གིས་ཕྱི་རོལ་གྱི་ཟས་ལ་ལྟོས་པར་མི་འགྱུར་རོ། །ཧཱུཾ་ཞེས་བྱ་བ་ལ་སོགས་པས་ཐུགས་རྡོ་རྗེ་ཡོངས་སུ་གྱུར་པ་ལས་བདག་ཉིད་གནོད་མཛེས་ཀྱི་རྒྱལ་པོར་བསམས་ལ། རང་གི་ལག་པར་ཡི་གེ་ཧཱུཾ་ཡོངས་སུ་གྱུར་པ་ལས་དྲག་པོའི་རྡོ་རྗེ་ཡི་གེ་ཧཱུཾ་གྱིས་འབར་བའི་ཕྲེང་བ་དང་ལྡན་པ་བསམས་ལ། སྔ་མ་བཞིན་དུ་བསྒྲུབ་བྱའི་གཟུགས་བརྙན་མགོ་བོར་ཕབ་པར་བྱའོ་ཞེས་བྱ་བ་འདིས་ཕྱིའི་རྫས་ལ་ལྟོས་པ་མེད་པ་ཉིད་དུ་བསྟན་ཏོ། །རྡོ་རྗེ་རྒྱུད་ཅེས་བྱ་བ་ལ་སོགས་པ་ནས་གདོན་མི་ཟའོ་ཞེས་པའི་བར་དུ་ནི་དུར་
ཁྲོད་ཀྱི་གོས་ལ་སོགས་པ་ལ་ཁམས་ཀྱི་རྫས་ཀྱིས་སྐྱེས་པའམ་བུང་མེད་གང་ཡང་རུང་བའི་གཟུགས་བརྙན་བྲིས་ལ། ཡི་གེ་ཧཱུཾ་ཡོངས་སུ་གྱུར་པ་ལས་དགྲ་སྟ་རྣོ་བ་རང་གི་ལག་པ་ན་ཡོད་པར་བསམས་ཏེ། དེས་བསྒྲུབ་བྱའི་སྐེ་བ་ཡི་གེ་ཕཊ་བརྗོད་པས་བཅད་ལ་དེའི་ཚེ་དགྲ་བོའི་སྐེ་བ་གཅོད་པར་འགྱུར་རོ། །དེ་ཉིད་ཀྱི་ཕྱིར་བསྒྲུབ་པར་བྱ་བ་ཉིད་དུ་ཤེས་པ་དང་ཞེས་སྨོས་ཏེ་རྒྱལ་པོ་བྱ་བ་འགྲུབ་པར་མི་འགྱུར་རོ། །འདིར་ཡང་དང་ཡིད་ཀྱི་བདག་ཉིད་ཅན་ཞེས་པ་ནི་ཤིན་ཏུ་མཛེས་པའི་ལུས་དང་ལྡན་པའོ། །མཆོག་དང་འབྲིང་དང་ཐ་མ་ཞེས་པ་ནི་བྲམ་ཟེ་དང་རྒྱལ་རིགས་དང་རྗེ་རིགས་དང་དམངས་རིགས་སོ། །དེ་རྣམས་ལ་མི་རིགས་པས་ཕན་འདོགས་པར་མི་བྱེད་པའོ། །དེ་ཉིད་ཀྱི་ཕྱིར་ཤིན་ཏུ་པག་མེད་པ་ལ་གནས་པ་ནི་དྲག་པོའི་ལས་བྱེད་པའོ། །སྦྱོར་བ་འདིས་ནི་དགྲ་སྟའི་སྦྱོར་བས་ལྔ་པ་ཉིད་དུ་འགྱུར་རོ་ཞེས་གདོན་མི་ཟའོ། །བདུད་རྩི་ཐབ་སྦྱོར་ཞེས་བྱ་བ་ལ་སོགས་པས་ཤིན་ཏུ་ཆར་འབབ་པའི་དུས་སུ་བདུད་རྩི་འཁྱིལ་པའི་ཏིང་ངེ་འཛིན་ལ་གནས་པས་གྲོང་ངམ་གྲོང་ཁྱེར་ལ་སོགས་པའི་ནམ་མཁའི་ཕྱོགས་སུ་ཡི་གེ་ཧཱུཾ་ལས་སྐྱེས་པ་ཁ་དོག་སེར་པོ་སྣ་ཚོགས་རྡོ་རྗེ་བསམས་ལ་དེའི་དབུས་སུ་ཡི་གེ་ཧཱུཾ་ལས་བྱུང་བའི་འབར་བའི་རྡོ་རྗེ་བསམས་ལ། དེ་ལས་བྱུང་བའི་འབར་བའི་ཚོགས་ཀྱིས་ཆར་སྐམས་པར་འགྱུར་པར་བསྒོམས་ན་ཆར་རེངས་པར་འགྱུར་རོ་ཞེས་བསྟན་ཏོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཞེས་བྱ་བ་ལ་སོགས་པ་ནི་དཀྱིལ་འཁོར་ཆེན་པོ་བྲི་བའི་དུས་སུ་རླུང་དང་ཆར་དང་ཐོག་ལ་སོགས་པ་ནམ་མཁའ་ལས་འབྱུང་བ་དང༌། དཀྱིལ་འཁོར་གྱི་འོག་ནས་ཀྱང་ཆུད་དང་སྤྲུལ་ལ་སོགས་པ་འབྱུང་བ་དང༌། སོགས་པའི་སྒྲས་ས་འགུལ་བ་དང་ཤ་ཟ་ལ་སོགས་པ་འབྱུང་བས་སོ་ཞེས་གཟུང་ངོ༌། །གཞན་གྱིས་རབ་ཏུ་སྦྱར་བ་ཞེས་པ་ནི་ཚོགས་ཀྱི་བདག་པོ་ལ་སོགས་པ་མུ་སྟེགས་པས་སྐྱོན་བྱས་པའོ། །གང་གི་ཚེ་འབྱུང་བར་འགྱུར་ན་དེའི་ཚེ་བཅོམ་ལྡན་འདས་འོད་དཔག་ཏུ་མེད་པ་ཡོངས་སུ་གྱུར་པ་ལས་ཞལ་གསུམ་ཕྱག་དྲུག་པ་སྤྱན་གསུམ་པ་གཡོན་བརྐྱང་པ་ལ་གནས་པ་འཕགས་པ་རྟ་མགྲིན་དུ་
བདག་ཉིད་བསམས་ལ། དེའི་ཕྱག་མཚན་ལས་བྱུང་བའི་འབར་བའི་ཚོགས་ཀྱིས་ཕྱོགས་བཅུ་ལ་གནས་པའི་བགེགས་ཀྱི་ཚོགས་བསྲེག་ཅིང་ཐལ་བར་གྱུར་པར་བསམ་པར་བྱེད་ན་དེའི་ཚེ་རླུང་ལ་སོགས་པ་ཞི་བར་འགྱུར་རོ་ཞེས་བསྟན་ཏོ། །གལ་ཏེ་རང་བཞིན་དེ་ལྟར་མི་ཕྱེད་ན་ཞེས་བྱ་བ་ལ་སོགས་པས་དེ་མ་བསྒོམས་པས་དཀྱིལ་འཁོར་བྲི་བའི་བདག་ཉིད་ཅན་གྱི་རྣལ་འབྱོར་མའི་བྱ་བ་འགྲུབ་པར་མི་འགྱུར་རོ། །འདིར་ཡང་དྲག་པོའི་ལས་ལ་རང་གི་སྡེ་པ་དང་གཞན་གྱིས་ངེ་པའི་བགེགས་གསོང་བར་བྱེད་པའི་ཡི་གེ་ཕཊ་ཀྱིས་ས་བོན་གསོད་པ་ནི་དགྲ་བོ་འཚེ་བའི་དུས་སུ་སྦྱོར་བར་བྱའོ་ཞེས་བསྟན་ཏོ། །ད་ནི་ཞེས་པ་ལ་སོགས་པས་སྤྲོས་པ་དང་བཅས་པའི་རྣལ་འབྱོར་པས་ལྷའི་ཁང་པ་སུམ་བརྩེགས་ལ་གནས་ཏེ། བདག་ལ་བྱིང་ཡིས་བརླབས་པ་རྣམ་པར་སྣང་མཛད་ལ་སོགས་པ་གང་ཡང་རུང་བ་ཡེ་ཤེས་ཀྱི་སྐུ་དམིགས་ཏེ། ཕྱོགས་བ་ཞི་ལ་གཟུགས་བཟང་བ་ཤིན་ཏུ་ལེགས་པར་བརྒྱན་པའི་དམ་ཚིག་གི་ཕྱག་རྒྱ་བཞི་བཞག་ནས་དེ་དང་ལྷན་ཅིག་འདོད་པའི་ཡོན་ཏན་ལྔ་ཉེ་བར་སྤྱོད་པ་དང་སྙོམས་པར་ཞུགས་པ་དང༌། སོ་སོར་སྡུད་པ་དང་བསམ་གཏན་གྱི་རིམ་པས་བདེ་བ་ཆེན་པོ་མྱོང་བར་འགྱུར་རོ་ཞེས་བསྟན་ཏོ། །ཡེ་ཤེས་ཀྱི་རིམ་པས་བསྐྱེད་པ་ཞེས་པ་ནི་བདག་ལ་བྱིན་གྱིས་བརླབས་པའི་རིམ་པས་སྤྲོས་པའོ། །དེའི་སྦྱོར་བ་ནི་ཞེས་པ་ནི་མདོར་བསྟེན་པའོ། །སྐད་ཅིག་གིས་དམིགས་པ་ཞེས་པ་ནི་རྒྱས་པར་བཤད་པའོ། །དེས་ན་སྣང་བ་ཉེ་བར་ཐོབ་བ་ལ་སོགས་པའི་རིམ་པ་བཀག་གོ །གདན་རྣམ་པ་བཞིའི་དབུས་སུ་ཞེས་པ་ནི་ལྷ་མོ་བཞིའི་གདན་གྱི་དབུས་སུའོ། །རྡོ་རྗེ་འཆང་ཆེན་པོའི་སྐུ་ཞེས་པ་ནི་ཉེ་བར་མཚོན་པ་ཙམ་ཡིན་ཏེ། རྣམ་པར་སྣང་མཛད་ལ་སོགས་པ་རྣམས་ཀྱི་ཡང་སྐུ་བསྒོམ་པར་བྱའོ། །ལྷའི་དེ་ཁོ་ན་ཉིད་ཤེས་པས་སོ་ཞེས་པ་ནི་བདག་ཉིད་དང་ལྷན་ཅིག་ལྷ་མོ་བཞི་ཡེ་ཤེས་ལྔའི་ངོ་བོ་ཤེས་པའོ། །སྤྱན་མ་ལ་སོགས་པའི་གནས་རྣམས་སུ་ཞེས་པ་ནི་ཤར་ཕྱོགས་ལ་སོགས་པ་ལའོ། །རྣ་པར་དག་པའི་རིམ་པ་དེས་ཕྱིའི་མངོན་པར་ཞེན་པ་སྤོང་པ་དང༌། སོ་སོའི་སྐྱེ་བོ་བཞིན་དུ་སྤྱོད་པའང་བཀག་པར་བྱས་པ་
ཡིན་ནོ། །སྔགས་དང་ཕྱག་རྒྱ་ལེགས་པར་སློབ་པ་ཞེས་པ་ནི་སྔགས་གཙོ་བོར་གྱུར་པའི་ཕྱག་རྒྱ་ནི་སྔགས་ཀྱི་ཕྱག་རྒྱ་སྟེ་སྔགས་ཀྱི་ཐེག་པའོ། །དེ་ལ་ལེགས་པར་བསླབ་པ་ནི་ཐོས་པ་ལ་སོགས་པའི་རིམ་གྱིས་མཐར་ཕྱིན་པ་དང་ཕ་རོལ་ལ་ཉེ་བར་སྟོན་པའོ། །སྤྱན་མ་ལ་སོགས་པའི་དངོས་པོ་ཡོངས་སུ་བརྟགས་པ་ཞེས་པ་ནི་རིགས་ཀྱི་ཡུམ་བཞི་པོའི་གཟུགས་སུ་བསྒོམ་པའོ། །བུད་མེད་བཞི་ནི་བཞི་ཁོ་ནའོ། །ཉིན་མཚན་ནི་རྟག་ཏུའོ། །རྒྱན་རྣམས་ཐམས་ཅད་ཀྱིས་ཞེས་བྱ་བ་ལ་སོགས་པས་ལྷན་ཅིག་སྐྱེས་པ་དང༌། ཆ་ལུགས་ཀྱི་ཡོན་ཏན་རྣམས་ཀྱིས་བརྒྱན་པ་ཉིད་དུ་བསྟན་ཏོ། །རང་གི་སྙིང་གའི་པདྨ་ཞེས་པ་ནི་རང་གི་སེམས་སོ། །ཁའི་པདྨ་ནི་ཞལ་གྱི་པདྨའོ། །རྒྱས་པ་ནི་དེ་ལྟ་བས་དགའ་བ་བསྐྱེད་པར་བྱས་ལ་དེའི་འོག་ཏུ་འཁོར་ལོ་ལྔའི་བདག་ཉིད་གང་ཡིན་པ་དེ་ཉིད་སེམས་ཙམ་ཡིན་གྱི་གཞན་ནི་མ་ཡིན་ནོ་ཞེས་བསམ་པར་བྱའོ། །འོད་ཟེར་ལྔ་ནི་ཞེས་བྱ་བ་ལ་སོགས་པས་དབང་པོ་དང་ཡུལ་ཉེ་བར་སྤྱོད་པའི་མཚན་ཉིད་ཀྱི་སོ་སོར་སྡུད་པའི་རིམ་པས་བདེ་བ་ཆེན་པོ་དེ་དང་ལྷན་ཅིག་ཏུ་མྱང་བར་བྱའོ་ཞེས་བསྟན་ཏེ། །དེ་ལྟར་སྤྱོད་པ་ཞེས་བྱ་བ་ལ་སོགས་པས་རྣམ་པར་སྣང་མཛད་ལ་སོགས་པར་དེ་བཞིན་གཤེགས་པ་ལྔ་དང་མཚུངས་པར་འགྱུར་རོ་ཞེས་བསྟན་ཏོ། །ཕྱག་རྒྱ་གཅིག་དང་ཡང་ལྷན་ཅིག་སྤྱོད་པ་ཞེས་པ་ནི་སྤྲོས་པ་མེད་པའི་སྤྱོད་པ་དང་ལྡན་པའི་རྣལ་འབྱོར་བའིའོ། །དགོངས་པ་ནི་རྡོ་རྗེ་འཆང་ཆེན་པོ་ལ་སོགས་པའི་རྣལ་འབྱོར་བས་བྲམ་ཟེ་ལ་སོགས་པ་གང་ཡང་རུང་བའི་ཕྱག་རྒྱ་བླངས་ཏེ། བདག་ཉིད་དང་དེས་རྣམ་པར་སྣང་མཛད་དང་སྤྱན་མ་ལ་སོགས་པའི་རྣམ་པ་བསྐྱེད་ལ་ཡུལ་ནས་ཡུལ་དུ་འགྲོ་བར་ཇི་ལྟར་རྙེད་པའི་ཁ་ཟས་ཅན་ནགས་ཚལ་ལ་སོགས་པ་སྐྱེ་བོས་དབེན་པ་ལ་སྙོམས་པར་ཞུགས་པའི་སྒོ་ནས་ཡེ་ཤེས་གསུམ་རྣམ་པར་དག་པའི་ངོ་བོ་འོད་གསལ་བ་ལ་སློབ་པར་བྱེད་དེ་དེའི་ཚེ་རྡོ་རྗེ་འཆང་ཆེན་པོ་དང་འདྲ་བར་འགྱུར་རོ་ཞེས་བསྟན་ཏོ། །ཐམས་མལ་པའི་བདག་ཉིད་རང་བཞིན་ཡོངས་སུ་སྤངས་ནས་ཞེས་པ་ནི་ཡེ་ཤེས་ཀྱི་རིམ་པས་བསྒྲུབ་པའི་སྔགས་ཀྱི་སྐུའོ། །དེའི་འོག་ཏུ་ནི་རྒྱུ་དེ་ལས་སོ། །བདག་པོ་ནི་
ཁམས་གསུམ་གྱི་བདག་པོའི། །ཕྱག་རྒྱ་དང་བཅས་པར་དངོས་གྲུབ་ཐོབ་པས་ན་ཞེས་པ་ནི་དེ་ཡང་དེ་བཞིན་དུ་གྲུབ་པར་འགྱུར་རོ། །ནམ་མཁའ་མཛོད་ཀྱི་ཞེས་བྱ་བ་ལ་སོགས་པས་ཕྱག་རྒྱ་ཆེན་པོའི་དངོས་གྲུབ་ཐོབ་བས་སེམས་ཅན་གྱི་དོན་མཛད་པ་བསྟན་ཏོ། །དེ་ནི་སྤྲོས་པ་མེད་པའི་སྤྱོད་པའོ། །ད་ནི་སྤྲོས་བ་མེད་པའི་སྤྱོད་པ་དང་ལྡན་པའི་རྣལ་འབྱོར་བའི་ཇི་སྙེད་པའི་ཟས་ལེགས་པར་སྦྱངས་ནས་སྤྱོད་པས་གནས་པ་བསྟན་པར་བྱ་སྟེ། ཐུན་མོང་དུ་གྱུར་པ་ནི་རབ་ཏུ་གྲགས་པའོ། །བ་ལང་གི་ལྕི་བ་ལ་སོགས་པ་ཞེས་པ་ནི་དེ་ཁོ་ན་ཉིད་ཐོབ་པ་ལ་ཞིམ་དང་མི་ཞིམ་གྱི་རྣམ་པར་རྟོག་པ་མེད་པའི་ཕྱིར་རོ། །ཤ་ནི་ཇི་རྙེད་པ་དང་ཞེས་པ་ནི་ཁ་ན་མ་ཐོ་བ་མེད་པ་རྙེད་པ་སྨོད་པའམ་མ་སྨད་པའོ། །གཞན་དག་གང་ཅིའང་རུང་བ་ཞེས་པ་ནི་བཏུང་བ་ལ་སོགས་བའོ། །བཟའ་བ་དང་བཏུང་བ་ལ་སོགས་པ་དེ་དག་སྦྱངས་པ་ལ་སོགས་པའི་རིམ་གྱིས་སྦྱངས་ལ་སྙིང་ག་དང་ལག་བ་དང་ལྐོག་མ་སྦྱངས་ནས་ཇི་ལྟར་སོ་སོའི་སྐྱེ་བོས་མ་མཐོང་བ་དེ་སྲིད་བཟའ་བར་བྱའོ་ཞེས་བསྟན་ཏོ། །འོག་ནས་བཤད་པ་ལ་ལྟོས་པ་ཡིན་ནོ་ཞེས་པ་ནི་རི་ལུ་ལ་སོགས་པའི་གྲུབ་པ་རྣམས་ཀྱང་རྡོ་རྗེ་འཆང་ཉིད་ཀྱིས་གསུངས་སོ་ཞེས་སྦྱར་རོ། །བཤད་པ་ཞེས་བྱ་བ་ལ་སོགས་པས། །ཉིན་ཞག་དེ་ལ་སྐྱེས་པའི་བུ་ཆུང་གི་ཚན་བུས་ལ་མ་ལྷུང་བ་ཁམ་ཕོར་ཁ་སྦྱར་ལ་བཞག་ཅིང་གཤིན་རྗེ་གཤེད་ཀྱི་སྔགས་ཀྱིས་བརྒྱ་རྩ་བརྒྱད་བཟླ་ཞིང་ཡི་གེ་གསུམ་གྱིས་བྱིན་གྱིས་བརླབས་ནས་ལྕགས་གསུམ་གྱིས་བསྐོར་བའི་རི་ལུ་ཁར་བཅུག་ན་རིག་པ་འཛིན་པ་རྣམས་ཀྱིས་ཀྱང་མཐོང་བར་མི་འགྱུར་ན། མི་རྣམས་ཀྱིས་སྨོས་ཀྱང་ཅིང་གོས་ཏི་མི་སྣང་བའི་སྦྱོར་བ་བསྟན་པ་དང༌། དེ་བཞིན་དུ་ཁྱི་ལ་སོགས་པའི་མངལ་གྱི་རི་ལུ་ཐོད་པ་ཁ་སྦྱར་ལ་བཞག་ཅིང༌། སྔ་མ་བཞིན་དུ་མངོན་པར་བཟླས་ལ་ཁར་བཅུག་སྟེ་འགྲུབ་པ་ལ་སོགས་པས་མཐོང་བར་མི་འགྱུར་རོ་ཞེས་བསྟན་ཏོ། །དེ་ནི་མི་སྣང་བའི་སྦྱོར་བ་ཁོ་ནའོ། །བཤང་བ་དང་ཞེས་བྱ་བ་ལ་སོགས་པས་བདུད་རྩི་ལྔའི་རི་ལུ་ལྕགས་གསུམ་གྱིས་བསྐོར་བ་བྱས་ལ་ཟླ་བ་གཟས་ཟིན་པའི་དུས་སུ་ཕྱག་རྒྱའི་བྷ་གར་བཅུག་ལ་སྙོམས་པར་
ཞུགས་པ་སྔོན་དུ་འགྲོ་བ་ཟླ་བ་གཟས་གྲོལ་བར་གྱུར་ན་དེ་ནས་བཏོན་ཏེ་དུ་བ་ལ་སོགས་པའི་རྟགས་ཉེ་བར་མཚོན་ཞིང་ཁར་བཅུག་ན་སངས་རྒྱས་རྣམས་ཀྱིས་ཀྱང་མཐོང་བར་མི་འགྱུར་རོ་ཞེ་བསྟན་ཏོ། །དེ་ཡང་མི་སྣང་བའི་སྦྱོར་བ་ཁོ་ནའོ། །དེ་བཞིན་དུ་ཞེས་བྱ་བ་ལ་སོགས་པས་སྔ་མ་བཞིན་དུ་མི་སྣང་བ་ཉིད་བསྟན་ཏེ། འོན་ཀྱང་ཤ་ཆེན་འདིར་གཙོ་བོར་ཡིན་ནོ། །བ་ལང་ཤ་ཞེས་བ་ལ་སོགས་པས་སྔ་མ་བཞིན་དུ་བཤད་པར་བྱ་སྟེ་མི་སྣང་བ་ཉིད་ཁོ་ན་བསྟན་ཏོ། །སྲོག་ཆགས་ཞེས་བྱ་བ་ནས་གསུངས་སོ་ཞེས་པའི་བར་དུ་ནི་བཤང་བ་ལས་འབྱུང་བའི་སྲོག་ཆགས་ཀྱི་རི་ལུ་དང་ག་པུར་ཙནྡན་གྱི་རི་ལུ་དང༌། གི་ཝང་ཨ་ག་རུ་ནག་པོའི་རི་ལུ་དང་བདུད་རྩི་ལྔའི་རི་ལུ་དང་ག་བུར་དད་གུར་གུམ་གྱིས་སྦྱར་བའི་བདུད་རྩི་ལྡའི་རི་ལུ་སྟེ་རིགས་ལྔའི་དབྱེ་བས་སྦྱངས་ལ་ལྕགས་གསུམ་གྱིས་བསྐོར་བ་བྱས་ཏེ་ཁར་བཅུག་ལ། དེའི་ཚེ་སྟོབས་མི་ཉམས་པ་དང་ལྷ་ལ་སོགས་པ་རྣམས་ཀྱིས་ཀྱང་མི་མཐོང་བར་འགྱུར་རོ་ཞེས་པ་བསྟན་ཏོ། །དེ་ནི་མི་སྣང་བའི་སྦྱར་བ་ཁོ་ནའོ། །དེ་ནི་ཞེས་བྱ་བ་ལ་སོག་པས་འཇིག་རྟེན་པའི་དངོས་གྲུབ་ཀྱི་སྒོ་ནས་འཇིག་རྟེན་ལས་འདས་པའི་དངོས་གྲུབ་ཐོབ་པར་འགྱུར་རོ་ཞེས་བསྟན་ཏོ། །དཀྱིལ་འཁོར་པའི་ཞེས་བྱ་བ་ལ་སོགས་པ་སྔར་བཤད་པའི་ཞི་བ་ལ་སོགས་པ་བསྒྲུབ་པའི་དོན་དུ་ཞི་བའི་དོན་དུ་ཞི་བའམ་དྲག་པོའི་ངོ་བོའི་སྐུ་བསྒོམ་པའི་རྣལ་འབྱོར་བས་ཞི་བ་ལ་སོག་པ་སྒྲུབ་པར་བྱེད་པ་འབའ་ཞིག་ཏུ་མ་ཟད་ཀྱང་དེའི་ཕྱག་དེའི་ཕྱག་རྒྱ་ཆེན་པོས་ཞི་བའི་ངོ་བོ་རྡོ་རྗེ་འཆང་ཆེན་པོའི་སྐུའི་དབང་ཕྱུག་ལ་སོགས་པ་དང༌། སྟོབས་ཆེན་པོ་ལ་སོགས་པ་དང་ལྡན་པར་འགྱུར་རོ་ཞེས་བསྟན་ཏོ། །གཞན་ཡང་སྐད་ཅིག་མ་གཅིག་གིས་ཞེས་བྱ་བ་ལ་སོག་པས་མཁའ་སྤྱོད་དད་ས་སྤྱོད་དང་ཕྱོགས་སྤྱོད་ཀྱི་དངོས་གྲུབ་ཐོབ་པར་འགྱུར་རོ་ཞེས་བསྟན་ཏོ། །ཕྱག་རྒྱའི་ཚོགས་དཔག་ཏུ་མེད་པ་ཞེ་པ་ནི་ལྷའི་བཞོན་པ་ལ་གནས་པ་དམ་ཚིག་གི་ཕྱག་རྒྱའི་རང་བཞིན་སྤྱན་མ་ལ་སོགས་པ་དེ་དང་ལྷན་ཅིག་སྤྱོད་པས་ན་དཔལ་ལྡན་ནོ། །སྟོབས་བཅུ་ཞེས་བྱ་བ་ལ་སོགས་པས་སངས་རྒྱས་ཀྱི་ཡོན་ཏན་དང་ལྡན་པ་ཉིད་དུ་བསྟན་ཏོ། །
ཇི་ལྟར་དགའ་བར་འགྲོ་བའི་ཕྱིར། །ཞེས་པ་ནི་ཐོགས་པ་མེད་པའི་འགྲོ་བ་དང་ལྡན་པས་སོ། །རྒྱལ་ཆེན་རིས་བཞི་ཞེས་བྱ་ལ་སོགས་པས་ལྷའི་རིགས་དྲུག་དང་ལྡན་པའི་འདོད་པའི་ཁམས་ལ་བདེ་བ་ལ་སོགས་པ་ལྷའི་བཙུན་མོ་ཇི་སྲིད་དང་དེ་བཞིན་དུ་རམ་པ་ཏི་ལ་མཆོག་ལ་སོགས་དང་ལྷའི་སྨད་འཚོང་མ་དང་ལྷའི་ལོང་སྤྱོད་དང་མཚུངས་པ་གླིང་བཞིའི་བདག་པོ་འཁོར་ལོས་སྒྱུར་བ་རྣམས་ཀྱི་བུ་མོ་དང༌། དེ་བཞིན་དུ་དམིགས་དང་རྣམ་པར་འཇིག་པ་ལ་སོགས་པ་ལྷ་མ་ཡིན་གྱི་བུ་མོ་དང༌། འཇོག་པོ་དང་དུང་སྐྱོང་དང་རིགས་ལྡན་དང་པདྨ་དང་པདྨ་ཆེན་པོ་ལ་སོགས་པའི་ཀླུ་རྣམས་ཀྱི་བུ་མོ་སྟོབས་ཀྱིས་མནན་ནས་ཉེ་བར་སྤྱོད་པར་འགྱུར་རོ་ཞེས་བསྟན་ཏོ། །གཟུགས་ཀྱི་ཁམས་པ་སྒོམ་ཆེན་འདོད་ཆགས་དང་བྲལ་བར་གནས་པ་གལ་ཏེ་དེ་ལ་བུད་མེད་ཡོད་ན་ཞེས་བྱ་བ་འདི། །སྲིད་ན་ཞེ་ཕུལ་དུ་གྱུར་བའི་ཚིག་ཏུ་བསྟན་ཏོ། །ཐ་མལ་པའི་ལུས་ཞེས་པ་ནི་ཉེ་བར་ལེན་པའི་ཕུང་པོ་ལྔའི་བདག་ཉིད་ཅན་ནོ། །དེ་ཏིང་ངེ་འཛིན་ཁྱད་པར་ཅན་གང་གིས་མི་སྣང་བར་བྱས་པ་དེ་ལ་དེ་སྐད་ཅེས་བྱའོ། །དེ་ནས་ཞེས་བྱ་བ་ལ་སོགས་པས་རིན་པོ་ཆེ་ལྟ་བུའི་གང་ཟག་བྱང་ཆུབ་སེམས་དཔའ་སྔར་བཤད་པའི་ཏིང་ངེ་འཛིན་གྱི་ཁྱད་པར་ཐོས་པ་དང་བསམ་པ་དང༌། བསྒོམ་པས་འཁྲུལ་པ་ལས་བྱུང་བའི་ཐེ་ཚོམ་དང་བྲལ་བར་འགྱུར་བ་ནང་ན་མྱོང་བའི་མན་ངག་གི་ཚིག་བཅོམ་ལྡན་འདས་ལ་བསྟོད་པའི་སྒོ་ནས་བསྟན་ཏོ། །སྔགས་གཅིག་པུ་ཞེས་པ་ནི་གཤིན་རྗེ་མཐར་བྱེད་ཀྱི་སྔགས་གཅིག་པུ་ལས་ཀྱི་རབ་འབྱམ་བསྒྲུབ་པ་ནི་ཕུར་བུས་གདབ་པ་དང༌། གནས་སྤོང་པ་དང་རེངས་པ་དང་མངོན་སྤྱོད་ལ་སོག་པ་བསྒྲུབ་པའོ། །དེ་བཞིན་དུ་བུད་མེད་དང་ལྷན་ཅིག་ཏུ་རོལ་པས་ཀྱང་ཞེ་པ་ནི་སྤྲོས་པ་དང་བཅས་པ་དང་སྤྲོས་པ་མེད་པ་དག་གིས་སྤྱོད་པའི་གསང་བ་ལྔའི་དཀྱིལ་འཁོར་ཆེན་པོའི་རིམ་པས་ཕྱག་རྒྱ་བཞི་དང་ལྷན་ཅིག་སྤྱོད་པའམ་རྒྱ་གཅིག་དང་སྤྱོད་པས་འདོད་ཆས་རོལ་པ་ལ་སོ་པའི་རྒྱ་ཆེ་བས་འཇིག་རྟེན་པ་ལ་སོགས་པའི་དངོས་གྲུབ་སྒྲུབ་པ་གང་ཡིན་པའོ། །དེ་བཞིན་དུ་བདུད་རྩི་ལྔ་དང་སྒྲོན་མ་ལྔ་ནི་དམ་
ཚིག་དང་ལྕགས་ཀྱུ་རྣམས་སོ། །དེས་བྱས་པའི་རི་ལུ་རྣམས་ཀྱིས་དངོས་གྲུབ་ཀྱི་ཕུན་སུམ་ཚོགས་པ་སྟེ་མཁའ་ལ་སྤྱོད་པ་དང་མི་སྣང་བའི་མཚན་ཉིད་ཅན་ནོ། །ཆོས་སྟོང་པ་ཉིད་ལ་སོགས་པའི་རང་བཞིན་གྱིས་དག་པ་སྟེ། ཁ་ན་མ་ཐོ་བ་མེད་པའི་ཕྱིར་རོ། །དེ་བཞིན་དུ་གང་ཡང་རུང་བའི་ཕྱག་རྒྱ་ཆེན་པོ་ཞེས་པ་ནི་ལྷ་སུམ་ཅུ་རྩ་གཉིས་ཀྱི་ནང་ན་གང་ཡང་རུང་བའི་དམིགས་པ་ལ་བརྟེན་ནས་རྡོ་རྗེ་འཆང་ཉིད་དུ་འགྱུར་བ་དང་དེ་ལ་ཡང་མ་ཆགས་པ་ཞེས་བྱ་བ་གང་གསུང་པ་དེ་དག་ཐམས་ཅད་ནི་ངོ་མཚར་བ་སྟེ་རྨད་དུ་གྱུར་པ་བཅོམ་ལྡན་འདས་ཀྱིས་བསྟན་ཏོ། །སྔར་མ་ཐོས་མ་བཤད་པ་ཞེས་བྱ་བའི་ཐ་ཚིག་གོ །དགོངས་པས་བཤད་པའོ་ཞེས་པ་ནི་འགལ་བའི་སྒྲའི་སོག་ནས་དེ་ཁོ་ནས་དེ་ཁོ་ན་ཉིད་བསྟན་པས་སོ། །ད་ནི་ཞེས་བྱ་བ་ལ་སོགས་པས་ཕྱིར་མི་ལྡོག་པའི་དབང་བསྐུར་ཐོབ་ནས་རྒྱས་བཏབ་བ་བསྟན་པར་བྱ་སྟེ། གདུག་པ་ཐམས་ཅད་འདུལ་བས་ན་ཞེས་པ་ནི་མཚམས་མེད་པ་ལྔ་ལ་སོག་པ་བྱེད་པ་འདུལ་བར་མཛད་པས་སོ། །རྣམ་པར་སྣང་མཛད་ལ་སོགས་པ་ཞེས་བྱ་བ་ནི་དེ་བཞིན་གཤེགས་པ་ལ་སོག་པའི་རིགས་ལྔའི། །འབྱིན་པས་ནི་སྐྱེད་པར་བྱེད་པ་སྟེ་རྡོར་ཇེ་འཆང་ཆེན་པོའི་རིགས་ལས་རྣམ་པར་སྣང་མཛད་ལ་སོགས་པ་དེ་རྣམས་མེ་སྟག་ལྟ་བུར་འབྱུང་བས་སོ། །འཇིག་རྟེན་པ་ནི་ཞི་བ་ལ་སོག་པའོ། སོགས་པའི་སྒྲས་ནི་འཇིག་རྟེན་ལས་འདས་པ་མཁའ་སྤྱོད་ལ་སོགས་པའོ། །སྐྱེས་པར་མཛད་པ་ན་ཞེས་པ་ནི་དེ་སྦྲུལ་པར་མཛད་པས་སོ། །གཞན་ཡང་ནི་དེ་བཞིན་ཡང་ངོ༌། །དྲུག་པའི་ངོ་བོ་ཉིད་དུ་གྱུར་པས་ཞེས་པ་ནི་ལྔ་པོ་བསྡུ་བར་མཛད་པས་སོ། །དེ་ལྟར་སྤྲོ་བ་དང་བསྡུ་བའི་བདག་ཉིད་ཅན་གྱིས་བཅོམ་ལྡན་འདས་རྡོ་རྗེ་འཆང་གི་ཆེ་བ་བསྟན་པ་ཡིན་ནོ། །སངས་རྒྱས་ཞེས་བྱ་བ་ལ་སོགས་པས་མི་བསྐྱོད་པ་ལ་སོགས་པ་གསུམ་པོའི་བདག་ཉིད་ཀྱི་བཅོམ་ལྡན་འདས་ཀྱིས་བཀའ་སྩལ་ཏོ་ཞེས་བསྟན་ནོ། །སེམས་དཔའི་རྡོ་རྗེ་ཞེས་ཞེས་བྱ་བ་ལ་སོགས་པ་མི་བསྐྱོད་པའི་རིགས་ཅན་མཱ་མ་ཀཱི་དང་ལག་ན་རྡོ་རྗེ་དང་ནམ་མཁའི་སྙིང་པོ་དང་སྒྲ་རྡོ་རྗེ་མ་དང་ཤེས་རབ་མཐར་བྱེད་རྣམས་ལ་མི་བསྐྱོད་པས་
རྒྱས་གདབ་པར་བྱའོ་ཞེས་བསྟན་ཏོ། །རྣམ་པར་སང་མཛད་དོ་ཞེས་བྱ་བ་ནས་ཉེ་བར་བསལ་བར་བྱའོ་ཞེས་པའི་པར་དུ་ནི་རྣམ་པར་སྣང་མཛད་ཀྱི་རིགས་ཅན་སྤྱན་མ་དང་སའི་སྙིང་པོ་དང་བྱམས་པ་དང༌། གཟུགས་རྡོ་རྗེ་མ་དང་གཤིན་རྗེ་མཐར་བྱེད་རྣམས་ལ་རྣམ་པར་སྣང་མཛད་ཀྱིས་རྒྱས་གདབ་པར་བྱའོ་ཞེས་བསྟན་ཏོ། མཱ་མ་ཀཱི་ཞེས་བྱ་བ་ནས་དཀོན་མཆོག་དཔལ་གྱི་དབང་བསྐུར་བྱའོ་ཞེས་བྱ་བའི་བར་དུ་ནི་མཱ་མ་ཀཱི་ལ་སོགས་པ་ལ་རིན་ཆེན་འབྱུང་ལྡན་གྱིས་རྒྱས་གདབ་བར་བྱའོ་ཞེས་བསྟན་ཏོ། །མཱ་མ་ཀཱི་ལ་སོག་པ་གཉིས་ཀའི་རིགས་དང་ལྡན་པའི་ཕྱིར་རོ། །རིགས་པའི་རྒྱལ་མོ་ནི་གོས་དཀར་མོ་སྟེ་ཞེས་པ་ནི་ངག་གི་སྤྲོས་པ་ཐམས་ཅད་ཀྱི་གཞིར་གྱུར་པའི་ཕྱིར་རོ། །འབྲེལ་བས་འབྲེལ་པ་གང་ཡིན་པ་ཞེ་པ་ནི་རེ་ཞིག་འོད་དཔག་ཏུ་མེད་པ་དང་གོས་དཀར་མོ་འབྲེལ་ཏོ། །དེའི་འབྲེལ་བས་ཀྱང་པདྨའི་རིགས་ཅན་རྣམས་ལ་དེ་སྐད་ཅེས་བྱའོ། །དེའི་ཕྱིར་པདྨའི་རིགས་ཞེས་པ་ནི་གོས་དཀར་མོ་དང་སྦྱང་རས་གཟིགས་ཀྱི་དབང་ཕྱུག་དང་འཇམ་དཔལ་དང་དྲི་རྡོ་རྗེ་དང་པདྨ་མཐར་བྱེད་རྣམས་ལ་འོད་དཔག་ཏུ་མེད་པས་རྒྱས་གདབ་པ་བྱའོ་ཞེས་བསྟན་ཏོ། །ལས་ཀྱི་རིགས་རྣམས་ཞེས་བྱ་བ་ལ་སོགས་པས་དོན་ཡོད་གྲུབ་པའི་རིགས་ཅན་སྒྲོལ་མ་དང་སྒྲིབ་པ་རྣམ་པར་སེལ་བ་དང་ཀུན་དུ་བཟང་པོ་དང་རོ་རྡོར་ཇེ་མ་དང་བདུད་རྩི་འཁྱིལ་པ་རྣམས་ལ་དོན་ཡོད་གྲུབ་པས་རྒྱས་གདབ་པར་བསྟན་ཏོ། །རྣམ་པར་སྣང་མཛད་ལ་སོགས་པ་ལ་ཞེས་པ་ནི་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་ཏུ་མེད་པ་དང་དོན་ཡོད་གྲུབ་པ་རྣམས་ཀྱི་མི་བསྐྱོད་པ་སྟེ་རིགས་ཀྱི་བདག་པོ་རྒྱས་གདབ་པ་ཞེས་བསྟན་ཏོ། །མི་བསྐྱོད་པ་ལ་རྡོ་རྗེ་འཆང་གིས་རྒྱས་གདབ་པ་དང་རྡོ་རྗེ་སེམས་དཔའ་ལ་མི་བསྐྱོད་པས་རྒྱས་གདབ་པར་བྱའོ་ཞེས་མན་ངག་གོ །རྡོ་རྗེ་རོ་ལངས་མ་ལ་སོགས་པ་ཞེས་བྱ་བ་ལ་སོགས་པས་རྡོ་རྗེ་རོ་ལངས་མ་དང་གཞན་གྱིས་མི་ཐུབ་མ་དང་ཁྲོ་གཉེར་མ་དང་སྣ་ཚོགས་རྡོ་རྗེ་མ་དང་རིན་ཆེན་སྣ་ཚོགས་མ་དང་སྣ་ཚོགས་པདྨ་དང་ལས་སྣ་ཚོགས། ས་འཛིན་མ་དང་ནམ་མཁའ་སྒྱུར་མ་སྟེ་ཁྲོ་བོའི་རྒྱལ་པོའི་བཙུན་མོ་རྣམས་ལ་གཤིན་རྗེ་མཐར་
བྱད་ཀྱིས་རྒྱས་གདབ་པར་བྱའོ་ཞེས་བསྟན་ཏོ། །གལ་ཏེ་དེ་རྣམས་ལ་རང་རང་གི་རིགས་ཀྱི་བདག་པོ་དང་རྗེས་སུ་མཐུན་པ་རྣམ་པར་སྣང་མཛད་ལ་སོགས་པས་རྒྱས་གདབ་པ་ཐོབ་པར་འགྱུར་ན་དེ་བཞིན་དུ་ཡང་གཤིན་རྗེ་མཐར་བྱེད་ཀྱིས་རྒྱས་གདབ་པ་ལ་ནུས་པ་ཡོད་དོ་ཞེས་བཅོམ་ལྡན་འདས་ཀྱིས་གསུངས་སོ། །དེ་རྣམས་ཀྱི་ཞེས་བྱ་བ་ལ་སོགས་པས་སྤྱི་བོར་བཞུགས་པ་དེ་བཞིན་གཤེགས་པ་རྣམས་གང་ཡིན་པ་དེ་རྣམས་རང་རང་གི་ཕྱག་རྒྱ་དང་བཅས་པར་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ཀྱི་རྫས་ཀྱིས་རྒྱུན་གྱིས་རྟེན་དུ་གྱུར་བ་རྒྱས་གདབ་པར་བྱ་བ་དབང་བསྐུར་བར་བྱ་བ་བསམ་པར་བྱའོ་ཞེས་བསྟན་ཏོ། །རྒྱས་གདབ་པ་ཞེས་བྱ་བ་ལ་སོགས་པས་རྒྱས་གདབ་པའི་སྒོ་ནས་རང་གི་ཕྱག་རྒ་ཆེན་པོ་མཉེས་པར་འགྱུར་རོ་ཞེས་བསྟན་ཏོ། །ཇི་སྐད་དུ། རྒྱས་བཏབ་པས་ན་ལྷར་གྲུབ་དང༌། །རིགས་ལའང་བྱིན་གྱིས་རློབ་པ་སྟེ། །རིགས་འཆོལ་བ་ཡི་སྦྱོར་བ་ཡིས། །དངོས་གྲུབ་མེད་ཅིང་བསྒྲུབ་བའང་མེད། །ཅེས་འབྱུང་ངོ༌། །སློབ་པ་རྣམས་ལ་ཕན་པ་སྟེ། །ཞེས་པ་ནི་བསྐྱེད་པའི་རིམ་པའི་རྣལ་འབྱོར་པ་རྣམས་ཀྱིས་རང་གི་ལྷ་རྗེ་སུ་དྲན་པར་བྱེ་དཔའོ། །ཕྱག་རྒྱ་ཆེན་པོ་སྟེ་ཞེས་པ་ནི་རང་རང་གི་ཕྱག་རྒྱ་ཆེན་པོའི་སྐུའོ། །དེ་སྐྱོད་པར་བྱེད་པ་ཞེས་པ་ནི་རྫོགས་པར་བྱེད་པ་སྟེ་དེས་ནི་ལྷ་གྲུབ་པའི་བདག་ཉིད་ཀྱིས་རྒྱས་གདབ་པ་ཡིན་ནོ་ཞེས་བསྟན་པ་ཡིན་ནོ། །དེ་ནི་ཞེས་བྱ་བ་ལ་སོགས་པས་དཀྱིལ་འཁོར་བྲི་བར་བྱ་བའི་ཕྱིར་སྣོད་ལ་གདབ་པའི་ཆོ་ག་བསྟན་པར་བྱ་སྟེ། བགེགས་ཐམས་ཅད་ཅེས་པ་ནི་བརྒྱ་བྱིན་ལ་སོགས་པའོ། །དེ་རྩམ་ཉེ་བར་ཞི་བར་མཛད་པས་ཞེས་པ་ནི་ལྡོག་པར་མཛད་པས་ན་སྟོན་པ་ཞེས་བྱའོ། །གཟུགས་ལ་སོགས་པ་ཕུང་པོ་ལྔ་སྦྱོར་བར་བྱེ་དཔས་ན་ཆོས་ཀུན་གྱི་དབང་ཕྱུག་གོ །ཁམས་གསུམ་གྱིས་ཕྱག་བཅལ་བར་བྱ་སྟེ་ཉན་ཐོས་ལ་སོག་པ་གང་ཡིན་པ་དེ་རྣམས་རྗེས་སུ་སྟོན་པར་མཛད་པ་གཙོ་བོ་ཡིན་པས་ན་བདག་པོའོ། །རྡོ་རྗེ་གསུམ་ཞེས་པ་ནི་སྐུ་རྡོ་འཆང་ལ་སོགས་པའོ། །དེ་རྣམས་སྤྲོ་བ་དང་སྡུ་བར་མཛད་པས་རྡོ་རྗེ་གསུམ་གྱི་མི་ཕྱེ་པའི་ངོ་བོའི་བདག་ཉིད་ཅན་ནོ། །
འདས་པ་ལ་སོགས་པ་ཡོངས་སུ་མཁྱེན་པའི་ཆོ་ག་ཞེས་པ་ནི་སྣོད་ལ་བབ་པ་འདས་པ་ལ་སོགས་པ་ཡོངས་སུ་མཁྱེན་པའི་རྒྱུ་ཡིན་པས་སོ། །བཀའ་སྩལ་པའོ་ཞེས་པ་ནི་སྡུད་པ་པོའི་ཚིག་གོ །རི་བོ་དང་འདྲ་བས་ན་རི་སྟེ་ཞེས་པ་ནི་ཤིན་ཏུ་མཐོ་བ་ནམ་མཁར་སླེབ་པ་ཁང་པ་བརྩེགས་མ་ཆེན་པོ་ནི་ཁང་པ་བཟང་པོ་སུམ་བརྩེགས་ལ་སོགས་པའོ། །སྟེང་གིས་ཕྱོགས་ཞེ་པ་ནི་བྱ་ཚང་གིས་ཉེ་བར་མཚོན་པའི་ཁང་ཐོས་རྣམས་ལའོ། གནས་གཞན་དང་ཞེས་པ་ནི་མ་མོའི་ཁང་པ་ལ་སོགས་པ་ལའོ། །དེ་རྣམས་ཀྱི་ཁྱད་པར་ནི་སྐྱེ་བོའི་འདུ་འཛི་དང་བྲལ་པ་རྣམས་ཏེ་ཞེས་པ་ནི་ཤིན་ཏུ་དབེན་པ་ལའོ། །སྐྱེད་མོས་ཚལ་ལ་སོག་པ་ཞེས་པ་ནི་རྫིང་བུའི་འགྲམ་དང་ཆུ་འགྲམ་དང་དུར་ཁྲོད་དང་ཁྲོང་སྟོང་དང༌། རྟགས་གཅིག་དང་ཤིང་གཅིག་དང་སུམ་མདོ་དང་བཞི་མདོ་ལ་སོགས་པ་དངོས་གྲུབ་ཀྱི་གནས་རྣམས་ལའོ། །གནས་གཞན་གང་ཡང་རུང་པ་ཞེས་པ་ནི་ཇི་ལྟར་མངོན་པར་འདོད་པའི་གནས་ལའོ། །ཡིད་དང་རྗེས་སུ་མཐུན་པ་ཞེས་པ་ནི་ཡིད་དུ་འོང་བ་ལའོ། །སྒྲུབ་པ་པོས་ཞེས་པ་ནི་རྡོ་རྗེ་སློབ་དཔོན་གྱིས་སོ། །ཕྱག་རྒྱ་ཆེན་པོ་རྣ་པ་གཉིས། །ཞེས་པ་ནི་རིམ་པ་གཉིས་ཀྱི་སྔགས་ཀྱིས་སྐུའི་མཚན་ཉིད་དང་ཡེ་ཤེས་ཀྱི་སྐུའི་མཚན་ཉིད་དོ། །དེ་ལ་དམིགས་པར་བྱའོ་ཞེས་པ་ནི་བསྐྱེད་པར་བྱ་བ་དང་སྤྲོས་བར་བྱ་བ་སྟེ། དབང་པོ་དམན་པ་དང་རྣོ་བའི་དབྱེ་བས་དམིགས་པར་བྱའོ། །དེའི་འོག་ཏུ་རྣམས་པ་གཉིས་ཀྱི་རྣལ་འབྱོར་བས་ངག་གི་བཟླས་པ་དང༌། རྡོ་རྗེ་བཟླས་པ་གཉིས་ཀྱི་དབྱེ་བས་བཟླས་པར་བྱའོ། །ཅིའི་ཕྱིར་བྱ་ཞེ་ན། སྨྲས་པ་རྡོ་རྗེ་སེམས་དཔའ་ཞེས་བྱ་བ་ལ་སོགས་པས་རང་རང་གི་ཕྱག་རྒྱ་ཆེན་པོ་དམིགས་པ་དང༌། རང་རང་གི་སྔགས་བཟླས་པས་བསྐུལ་པ་ཐུགས་རྡོ་རྗེ་ལ་སོགས་པ་རྣམ་པ་སྣ་ཚོགས་པའི་ལས་སྟེར་བར་འགྱུར་རོ་ཞེས་བསྟན་ཏོ། །དོན་དེ་ལ་མི་སླུ་བ་ཉིད་རྟོགས་པར་བྱ་བའི་ཕྱིར་བཅོམ་ལྡན་འདས་འདོད་དཔག་ཏུ་མེད་པའི་པའི་གསུང་གི་བདེན་པ་ཉིད་དུ་བསྟན་ཏོ། །ད་ལྟར་ཞེས་བྱ་བ་ནས་རབ་ཏུ་འགྲུབ་པར་ཉེ་བར་འགྱུར་རོ་ཞེས་པའི་བར་དུ་རིམ་པ་གཉིས་བསྒོམས་པའི་མི་བསྐྱོད་པའི་རྣལ་འབྱོར་པས་དང་པོ་སྦྱོར་བའི་རིམ་
པས་སྣོད་ནི་རྡོ་རྗེ་ཆོས་སུ་བྱས་ལ་རྣལ་འབྱོར་ཆེན་པོའི་རིམ་གྱིས་མགོ་པོ་ལ་སོགས་པ་ལ་ཡི་གེ་གསུམ་དགོད་ཅིང་དེ་རྣམས་ལ་རྣ་པར་སྣང་མཛད་དང་སྤྱད་མ་ལ་སོགས་པའི་ཚོགས་འཇུག་ལ་དེ་ནས་འཆད་པར་འགྱུར་པའི་འབབ་པའི་ཆོ་ག་བྱའོ། །དེ་ལྟར་གྱུར་ནས་རྣལ་འབྱོར་པ་རབ་ཏུ་ཉེ་བར་འགྱུར་བ་ནི་འཇིག་རྟེན་པ་ལས་གྲགས་པར་འགྱུར་གྱི་གཞན་དུ་ནི་མ་ཡིན་ཞེས་བསྟན་ཏོ། འགྱུར་བ་ནི་ས་ལ་ཁྲུ་གཅིག་གམ་ཁྲུ་གཉིས་ལ་སོགས་པ་འཕར་བའོ། གཡོ་བ་ནི་ཡན་ལག་དང་ཉིང་ལག་ཐམས་ཅད་གཡོ་བའོ། །འཁོར་བ་ནི་ཕྱོགས་བཅུ་རུ་འཁོར་ལོ་བཞིན་དུ་ཡོང་སུ་འཁོར་ལོའོ། །དེ་ལྟར་རྣམ་པ་གསུམ་གྱི་དབང་ཡིད་ནི་བསྒུལ་བ་ཡིན་ནོ། །དེ་རྣམས་ཀྱི་རང་ན་གང་ཡང་རུང་བ་བསྒུལ་བ་ཞེས་བྱ་སྟེ་དེའི་ཡན་ལག་ཡིན་པའི་ཕྱིར་རོ། །དེ་བཞིན་དུ་སྣོད་དེ་ཉིད་ལ་རྡོ་རྗེ་འཆང་ལ་སོགས་པ་མི་འཇུག་ན་ཐ་མལ་པའི་ལུས་པོའི་ང་རྒྱལ་མེད་པས་དྲི་མ་མེད་ཅིང་རླུང་མེད་པ་དཔའ་རླབས་མེད་པའི་རྒྱ་མཚེ་དང་འདྲ་བ། །ཉེ་བར་ཞི་བ་ལ་འཇུག་ཕར་གནས་པ་གང་ཡིན་པ་དེ་ནི་རེང་པའོ། །ཤིང་ལྟར་ནི་ཤིང་ལས་བྱས་པའི་གཟུང་བརྙན་དང་འདྲ་བའོ། །དེ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའ་ལ་སོག་པ་སྣོད་ཀྱི་ལུས་ལ་ཞུགས་ནས་རེངས་པ་དང་རྡུང་དང་བ་སྤུ་ལྡན་པ་དང་སྐད་འགྱུར་བ་དང་འདྲ་བ་དང་ཁ་དོག་ལོག་པ་དང་མཆི་མ་འཛགས་པ་དང་ཐིམ་པར་འགྱུར་བ་སྐྱེས་པ་གང་ཡིན་པ་དེ་ནི་ལྷ་ཆེན་པོའོ། །དེའི་འོག་ཏུ་རྡོ་རྗེ་སློབ་དཔོན་གྱིས་བྲིས་པའི་སྣོད་ཀྱིས་འདས་པ་ལ་སོག་པ་སྟོན་པ་གང་ཡིན་པ་དེ་ནི་འཕགས་པའི་ལམ་མོ། དབབ་པ་ཞེས་བྱ་བ་ལ་སོགས་པས་སྔགས་ཀྱི་སྐུ་གྲུབ་པ་དང་ཡུན་རིང་དུ་དཀའ་ཐུབ་སྤྱོད་པའི་སྒྲུབ་པ་པོས་བྱ་བ་ཡིན་གྱི་གཞན་དུ་ནི་མ་ཡིན་ནོ་ཞེས་བསྟན་ནོ། །སྣོད་ཀྱི་མཚན་ཉིད་ཅེས་བྱ་བ་ནས་སྨད་པར་འགྱུར་རོ་ཞེས་བྱ་བའི་བར་དུ་ལོ་བཅུ་གཉིས་ལོན་པ་ཁྱེའུ་དང་བུ་མོ་གྲོང་གི་ཆོས་ཀྱིས་མ་མྱོང་བ་མཚན་ཉིད་ཐམས་ཅད་ན་ལྡན་པ་བླངས་ཏེ་སྔར་བཤད་པའི་རྣམ་པ་བཞིའི་འབབ་པ་དང་སར་བཤད་པའི་བསྐྱེད་པའི་རིམ་པས་རྡོ་རྗེས་ཆོས་ཀྱི་
གཟུགས་སུ་བསྐྱེད་ལ་དབབ་པར་བྱའོ། །གཞན་དུ་ན་མཆོག་ལ་སོགས་པའི་དབྱེ་བས་ཕྱེ་བའི་སེམས་ཅན་གྱི་ཁམས་ཀྱི་རྣལ་འབྱོར་པ་ནི་བཞད་གང་དུ་འགྱུར་ཞེས་བསྟན་ཏོ། །ཐུགས་ལས་བྱུང་བ་ནི་རྡོ་རྗེ་སེམས་དཔའ་ཐུགས་ལས་བྱུང་བའོ། །གསང་བ་ཡིན་པས་ཞེས་པ་ནི་དབྱེ་བ་ལ་སོགས་པའི་ཚུལ་བརྟེན་པ་ལ་མི་བརྟེན་པའི་ཕྱིར་རོ། །ཡི་གེ་ནི་ཧཱུཾ་ལ་སོགས་པ་ཞེས་པ་ནི་ཧཱུཾ་ཨཱཿ་ཧཱ་ཛྷཻཾ་ཞེས་བྱ་བའོ། །བཞིའོ་ཞེས་པ་ནི་སྐུ་རྡོ་རྗེ་ལ་སོགས་པ་གསུམ་གྱི་རང་བཞིན་དང་ལས་ཐམས་ཅད་པ་ཡིན་པས་སོ། །དབབ་པའི་གཞིར་གྱུར་པས་སོ་ཞེས་པ་ནི་དབབ་པའི་ཆོ་གའི་རྒྱུ་ཡིན་པས་སོ། །རིམ་པ་འདིས་ཞེས་བྱ་བ་ལ་སོགས་པས་ནམ་མཁའི་ཁམས་དང་འདྲ་བ་སྟོང་བའི་ལུས་དང་རྣམ་པར་མི་རྟོག་པའི་ངོ་བོ་རྡོ་རྗེ་འཆང་གི་སྐུ་ཡག་འབབ་པར་འགྱུར་རོ་ཞེས་འབབ་པའི་ཆོ་ག་ལ་མཐུ་བསྟན་པ་ཡིན་ནོ་ཞེས་པའོ། །དགོས་པ་བསྟན་པ་ཞེས་བྱ་བ་ནས་འབེབས་པར་བྱེད་པའོ་ཞེས་པའི་བར་དུ་ཉི་གེ་ཧཱུཾ་ལ་སོགས་པ་གསུམ་ཐུགས་རྡོ་རྗེ་འཆང་ལ་སོགས་པའི་རང་བཞིན་ཡི་གེ་ཛྷཻཾ་ནི་འགུལ་བ་ལ་སོག་པ་བྷི་པོ་བྱེད་པ་དང་དེ་བཞིན་དུ་སྔགས་འདི་ཉིད་ཀྱིས་ཡན་དག་པར་བསྐུལ་བའི་སྣོད་རྣམས་ནམ་མཁའ་ལ་འཕུར་བར་འགྱུར་བ་དེ་བཞིན་དུ་ཡི་གེ་ཛྷཻཾ་གིས་འགུལ་བ་ལ་སོགས་བྱེད་པ་དེ་བཞིན་དུ། ཡི་གེ་ཧཱུཾ་ལ་སོག་པ་བཞི་པོས་ཀྱང་བྱེད་དོ་ཞེས་བསྟན་ནོ།། འདིར་མདོ་བསྡུས་པ་ཞེས་བྱ་བ་ནས་གོ་ཆ་ལ་སོགས་པས་བསྲུང་བར་བྱའོ་ཞེས་བྱ་བའི་བར་དུ་ནི་སྣོད་ལ་དབབ་པའི་ཆོ་གའི་བསྒོམ་པའི་གོ་རིམས་བསྟན་ཏོ། །དེ་ཡང་གོ་སླ་སྟེ་འགྲེལ་བ་མཁན་གྱིས་བཤད་པའི་ཕྱིར་རོ། །རྣག་གི་བྱ་བ་ཞེས་པ་ནི་དཀྱིལ་འཁོར་བྲི་བའོ། །གཞན་གྱི་བྱ་བ་ཞེས་པ་ནི་དེ་བསྟན་པའི་འདས་པ་ལ་སོགས་པ་ཡོངས་སུ་ཤེས་ནས་སེམས་ཅན་གྱི་དོན་གྲུབ་པའོ། །ངེས་པར་བྱས་ནས་ཞེས་པ་ནི་རྣམ་པར་བཞག་ནས་སོ། །གདུག་པ་འདུལ་བ་ལ་ཞུགས་པའི་ཞེས་པ་ནི་དྲག་པོའི་ལས་ཀྱིས་གདུག་པ་འདུལ་བར་བྱེད་པའི་རྣལ་འབྱོར་བའིའོ། །སྒྲུབ་པ་བསྟན་པ་ཞེས་པ་ནི་ནན་ཏན་བསྟན་པར་བྱ་བའི་ཕྱིར་རོ། །སྐུ་གསུང་ཐུགས་ནི་སྣང་བ་ལ་སོགས་པའི་ཡེ་ཤེས་གསུམ་
མོ། །དེ་ལ་གནས་ནི་གཞིར་གྱུར་པའོ། །འོད་གསལ་བ་ནི་ཐམས་ཅད་སྟོང་བའོ། །དེ་ཡོངས་སུ་དག་པས་ནི་རྡོ་རྗེ་འཆང་ཆེན་པོའོ། །འདི་སྐད་བཀའ་སྩལ་པ་ནི་དྲག་པོའི་ལས་འཆད་པར་འགྱུར་བ་བཀའ་སྩལ་པའོ། །ཞིང་དང་ཚོང་ཞེས་བྱ་བ་ལ་སོགས་པ་ནས་བར་དུའོ་ཞེས་པའི་བར་དུ་རྣམ་པ་སྣ་ཚོགས་པའི་ཞིང་དང་ཚོང་ལ་སོགས་པ་ལ་འབྲེལ་བས་ཀྱང་ལྷ་སུམ་ཅུ་རྩ་གཉིས་ཀྱི་ངོ་བོ་མི་བསྐྱོད་པའི་སྐུ་ལ་དམིགས་ནས་བསྒོམ་ན་དེའི་ཚེ་གདུག་པ་རྣམས་གསད་པར་བྱའོ་ཞེས་བསྟན་ཏོ། །དགྲ་བོའི་གཟུགས་བརྙན་ཞེས་བྱ་བ་ནས་སྔགས་བཏོན་ཏོ་ཞེས་བྱ་བའི་བར་དུ་ནི་མངོན་སྤྱོད་ཀྱི་རྫས་ཀྱིས་དགྲའི་གཟུགས་བརྙན་བྱས་ལ་དུར་ཁྲོད་ཀྱི་གོས་ལ་དེའི་མིང་བྲིས་ནས་དེའི་སྙིང་གར་བཅུག་སྟེ་གཅེར་བུ་སྐྲ་གྲོལ་བ་ཁྲོ་བོའི་སྔགས་བརྗོད་པ་དེའི་གཟུགས་ཅན་ལྷོ་ཕྱོགས་སུ་ཁ་བལྟས་པ་གཡས་བརྐྱང་བ་རྡོ་རྗེ་ལྕགས་ཀྱུས་མཚན་པའི་རྐང་པ་གཡོན་པ་ས་མནན་ཞིང་ཇི་སྲིད་དགྲ་བོ་འཆི་བ་དེ་སྲིད་བསྒོམ་པར་བྱའོ་ཞེས་བསྟན་ཏོ། །བསྲེགས་པའི་ཞེས་བྱ་བ་ནས་ངེས་པར་འཆི་བར་འགྱུར་རོ་ཞེས་པའི་བར་དུ་ནི་དུར་ཁྲོད་ཀྱི་ཐལ་བ་དང་འབྲུ་མར་དང་བཅས་པས་དགྲ་བོའི་གཟུགས་བརྙན་བྱས་ལ་ཞེ་སྡང་རྡོ་རྗེ་ཏིང་ངེ་འཛིན་གྱིས་སྔ་མ་བཞིན་དུ་མནན་ཞིང་གསད་པར་བྱའོ་ཞེས་བསྟན་ཏོ། །རོ་བསྲེགས་པའི་ཐལ་བ་ཞེས་བྱ་བ་ནས་ལས་ཀྱི་ཆེ་བའི་བདག་ཉིད་བསྟན་པར་བྱའོ་ཞེས་པའི་བར་དུ་ནི་དུར་ཁྲོད་དེའི་ཐལ་བས་གྲུ་གསུམ་མེའི་དཀྱིལ་འཁོར་བྲིས་ལ་ཚེར་མ་ཅན་གྱི་མེ་སྤར་ཞིང་ཤ་ལ་སོགས་པ་ལས་བྱས་པའི་དགྲའི་གཟུགས་བརྙན་གྲི་གུག་གིས་གཅོད་ཅིང་བཅད་ནས་བསྲེགས་ན་འཆི་བར་འགྱུར་རོ་ཞེས་བསྟན་ཏོ། །ཤ་ཆེན་ཞེས་བྱ་བ་ལ་སོགས་པས་ཤ་ཆེན་པོ་ལས་བྱས་པའི་གཟུགས་བརྙན་བསྲེགས་ན་ཐམས་ཅད་ཀྱི་ཕུལ་དུ་བྱུང་བའི་དྲག་པོའི་ལས་ཡིན་ནོ་ཞེས་བསྟན་ཏོ། །དགྲའི་ཞེས་བྱ་བ་ནས་གསུངས་སོ་ཞེས་བྱ་བའི་བར་དུ་ནི་སྨེ་ཤ་ཅན་ལ་སོགས་པའི་བཤང་བ་དང་གཅི་བས་དགྲ་པོའི་གཟུགས་བརྙན་བྱས་ལ་སྔ་མ་བཞིན་དུ་གྲུ་གསུམ་གྱི་མེ་ཐབ་ལ་བསྲེགས་པར་བྱས་ན་འཆི་བར་འགྱུར་རོ་ཞེས་བསྟན་ཏོ། །ཆུ་བོ་འབབ་བ་ཞེས་
བྱ་བ་ནས་བསྐྱེད་པའི་རིམ་པ་དང་ལྡན་པ་རྣམས་ཀྱིས་གསུངས་པ་ཡིན་ནོ་ཞེས་པའི་བར་དུ་ནི་ནུབ་ཀྱི་རྒྱ་མཚོ་ལ་རྒྱུ་བའི་ཆུ་བོ་འགྲམ་གཉིས་ཀྱིས་བླངས་ལ་དེས་དགྲ་བོའི་གཟུགས་བརྙན་བྱས་ཏེ་དུག་དང་ཤིང་མ་ད་ནའི་ཚེར་མ་དང་སྦྲུལ་ལ་སོགས་པའི་གྲ་མས་བཀང་བར་བྱས་ཏེ། བསྲེག་པ་དང་མངོན་སྤྱོད་ཀྱི་རྫས་ཀྱིས་བྱས་པའི་གཟུགས་བརྙན་ལ་ཡང་དེ་བཞིན་དུ་བྱས་ནས་བསྲེགས་པས་དགྲ་འཆི་བར་འགྱུར་རོ་ཞེས་བསྟན་ཏོ། །འདིར་དཀོན་མཆོག་གསུམ་ལ་གནོད་པ་བྱེད་པ་རྣམས་དགག་པར་བྱ་བའི་ཕྱིར་ཞེས་བྱ་བ་འདིས་དྲག་པོའི་ལས་ཀྱི་ཡུལ་བསྟན་ཏོ། །གཞན་དུ་ཇི་ལྟ་ཇི་བཞིན་དུ་མངོན་སྤྱོད་ཀྱི་ལས་བྱེད་ན་སྡིག་པ་ཆེན་པོ་བསྐྱེད་པར་འགྱུར་ཏེ། སྙིང་རྗེ་མེད་པས་འགྲུབ་པར་མི་འགྱུར་ཞེས་གསུངས་པས་སོ། །རྫོགས་པའི་རིམ་པ་ལ་གནས་པ། །ཞེས་པ་ནི་རྡོ་རྗེ་བཟླས་པ་ལ་སོགས་པའི་རིམ་པ་ལ་གནས་པ་རྣམས་སོ། །གསོད་པའི་ལས་ཞེས་པ་ནི་རྣམ་པར་འཚེ་བའོ། །ལེའུ་དགུ་པ་ལས་གསུངས་པའི་ཚུལ་དུ་ཞེས་པ་ནི་དེ་ལས་གསུངས་པའི་ཏིང་ངེ་འཛིན་གྱིས་རྟོགས་པར་བྱའོ། །དཔེར་ན་དགོངས་པའི་ཆོས་གཅིག་པུ་ཞེས་པ་ནས་ངེས་པའི་དོན་ཞེས་བྱ་བའི་བར་དུ་བཤད་པའི་རྒྱུད་ཀྱི་ཚིགས་སུ་བཅད་པས་བསྟན་ཏོ། །སོ་ལ་ཁུས་ཞེས་བྱ་བ་ནས་བསྒྲུབ་བྱའི་རིམས་དང་ཚ་བ་བསྐྱེད་པར་བྱའོ་ཞེས་པའི་བར་དུ་ནི་སྐེ་ཚེ་ལ་སོགས་པའི་རྫས་ཀྱིས་བྱས་པའི་གཟུགས་བརྙན་བྱས་ལ་དུར་ཁྱོད་ཀྱི་སོལ་ཆུས་གཤེར་བའི་གོས་གོན་པའི་རྣལ་འབྱོར་པ་ཆེ་གེ་མོ་རཱཀྵ་ས་ཀྲི་ཎ་ཏོ་ཞེས་བྱ་བ་ལ་སོགས་པའི་སྔགས་བརྗོད་ལ་ཇི་སྲིད་དེ་སྲིན་པོ་རྣམས་ཀྱི་གཟུང་བ་དེ་སྲིད་དུ་བཟླ་བར་བྱ་བ་དང་དེ་བཞིན་དུ་དུག་དང་ཁྲག་དང་མི་རུས་ཀྱི་ཕྱེ་མས་དགྲ་བོའི་གཟུགས་བརྙན་བྱས་ལ་སྔ་མ་བཞིན་དུ་སྔགས་སྤེལ་ཞིང་སྲིན་པོ་རྣམས་ཀྱིས་གཟུང་བ་དང་དེ་བཞིན་དུ་སྐེ་ཚེ་དང་བཤང་གཅིས་གཟུགས་བརྙན་བྱས་ལ་བདུད་རྩི་ཐབ་སྦྱོར་གྱི་སྔགས་ཀྱིས་ཆེ་གེ་མོ་ཞ་རུ་གྲེ་ཎ་ཏོ་ཞེས་བྱ་བའི་སྔགས་བརྗོད་ལ་བདུད་རྩི་འཁྱིལ་པའི་རྣལ་འབྱོར་དང་ལྡན་པས་སྔ་མ་བཞིན་དུ་མནན་ཞིང་དགྲ་བོ་རྣམས་རིམ་གྱིས་གཟུང་བར་འགྱུར་རོ་ཞེས་བསྟན་ཏོ། །དེ་ལ་ཞེས་བྱ་བ་ལ་སོགས་
པས་དྲག་པོའི་ལས་ལ་བདུད་རྩི་འཁྱིལ་པའི་སྔགས་བསྟན་ཏོ། །སྔགས་ཀྱི་དོན་ཡང་སྔར་བཤད་པ་སྟེ་གོ་སླའོ། །སྦྱིན་སྲེག་ཅེས་བྱ་བ་ལ་སོགས་པས་སྔར་བཤད་པའི་སྦྱིན་སྲེག་དང་འཆད་པར་འགྱུར་བའི་ཏིང་ངེ་འཛིན་གྱིས་བདུད་རྩི་འཁྱིལ་པའི་ཏིང་ངེ་འཛིན་གྱིས་ཕྲིན་ལས་གྲུབ་པར་འགྱུར་རོ་ཞེས་བསྟན་ཏོ། །རྡོ་རྗེ་སེམས་དཔའ་ཞེས་བྱ་བ་ནས་འུག་པ་ཞེས་བྱ་བ་ལ་སོགས་པ་ནི་གོ་སླའོ་ཞེས་བྱ་བའི་བར་དུ་ནི་གཤིན་རྗེ་མཐར་བྱེད་ལ་སོགས་པའི་གང་ཡང་རུང་བའི་རྣལ་འབྱོར་དང་ལྡན་པས་གདུག་པའི་སེམས་ཅན་མཆེ་བ་རྣམ་པར་གཙིགས་པ་ཁྲོ་གཉེར་དང་ལྡན་པ་དགྲ་སྟ་དང་ཐོབ་ལག་ན་ཐོགས་པས་ཁམས་གསུམ་ལ་གནས་པའི་སེམས་ཅན་ཐམས་ཅད་དང་ཕྱོགས་བཅུའི་འཇིག་རྟེན་གྱི་ཁམས་ལ་བཞུགས་པའི་དེ་བཞིན་གཤེགས་པ་ཐམས་ཅད་དགྲ་སྟ་དེས་བཅད་ཅིང་ཐོ་བས་ཕྱེ་མར་བཏགས་པར་བསམ་པར་བྱེད་པ་དེའི་ཚེ་སྡིག་པ་བསགས་པའི་བསྒྲུབ་བྱ་གཅེར་བུ་སྐྲ་གྲོལ་ཞིང་ལུས་ཏིལ་མར་གྱིས་བྱུགས་པ་སྐྱབས་མེད་པ་མེའི་དཀྱིལ་འཁོར་གྲུབ་གསུམ་ལ་གནས་པ་འཇིགས་པས་གདུང་བ་བསྒོམ་ཏེ་ནམ་མཁའི་ཁམས་ན་རྣམས་པ་སྣ་ཚོགས་པའི་མཚོན་པའི་མཚོན་ཆ་འཛིན་པ། གཟུགས་འཇིགས་པའི་སྲིན་པོ་དང་ཀང་ཀ་དང་ཁྭ་དང་བྱ་རྒོད་དང་འུག་པ་མཆུ་རྣོ་བ་དང༌། ཤིན་ཏུ་རྒྱགས་པའི་ཁྱི་དང༌། སྤྱད་ཀི་དང་དྲེད་དེར་ལ་པའི་ཚོགས་ཀྱིས་འཇིགས་པ་རྡོ་རྗེ་ལྟར་མཆེ་བ་རྣོ་བ་རྣམ་པར་བསམས་ལ་དེ་དག་ཐམས་ཅད་ཀྱིས་སྐྲག་པར་བྱ་བ་དུམ་བུ་བུ་དུམ་བུར་ཟ་བ་སྲོག་དང་བྲལ་བ་བསྒོམ་པར་བྱའོ་ཞེས་བསྟན་ཏོ། །སྦྲུལ་ནག་ཅེས་བྱ་བ་ནས་སྡིག་པ་ལ་སོགས་པའི་ཆོ་ག་འདི་ཉིད་ཡིན་ནོ་ཞེས་བྱ་བའི་བར་དུ་ནི་གང་ཡང་རུང་བའི་ཁམས་ཀྱི་རྫས་ཀྱིས་གདེངས་ཀ་ལྔ་པ་ལྕེ་གཉིས་པ་འཇིགས་པར་བྱེད་པ་སྦྲུལ་ནག་པོ་བྲིས་ལ་དེའི་སྙིང་གར་བཀོད་པའི་ཡི་གེ་ཧྲྀཾ་གི་འོད་ཟེར་གྱིས་བརྟན་པ་དང་གཡོ་བ་ལ་སོགས་པའི་དུག་བཀུག་ལ་ཁའི་ནང་དུ་བཀོད་པའི་ཡི་གེ་ཁཾ་གི་ནང་དུ་འཇུག་ཅིང་དེའི་ཚེ་སྲོག་དང་ལྡན་པ་བཞིན་དུ་འགུལ་བར་འགྱུར་བ་ཨ་མུ་ཀཾ་བ་ཤ་ཡ་ཞེས་བྱ་བ་དེས་བསྐུལ་ཞིང་དེས་ཟོས་པའི་བསྒྲུབ་བྱ་འཆི་བར་འགྱུར་རོ། །དེ་བཞིན་དུ་སྡིག་པ་ལ་སོགས་པ་
ཡང་བསྐུལ་བར་བྱའོ་ཞེས་བསྟན་ཏོ། །དེ་བཞིན་དུ་ཕྱོགས་བཅུའི་ཞེས་བྱ་བ་ནས་ལས་གཞན་ལ་ལྟོས་པས་སོ་ཞེས་བྱ་བའི་བར་དུ་ནི་ཁམས་གསུམ་གྱི་ནང་ན་གནས་པའི་ནད་ཇི་སྲིད་དང་དུག་གི་བུང་དང་བཅས་པའི་སྦྲུལ་གྱི་འབར་བ་དང་འཇིགས་པ་རྣམས་དང་ཁམས་གནོད་པ་ལས་འབྱུང་བའི་ལུས་ལ་སོགས་པའི་འགྱུར་བ་དེ་སྲིད་ཡིད་ཀྱིས་བསྡུས་ཏེ་ཁ་དོག་ནག་པོ་འབྱུང་པོའི་གཟུགས་ཀྱིས་བསྒྲུབ་བྱའི་ལུས་ལ་སོགས་པར་འཇུག་པར་བྱའོ། །དེའི་ཚེ་དེ་འཇུག་པའི་མཐུས་གདུལ་བར་དཀའ་བ་འཆི་བར་འགྱུར་རོ་ཞེས་བསྟན་ཏོ། །བསྐུལ་བའི་ལས་གཞན་ལ་ཞེས་པ་ནི་སྔར་བཤད་པའི་དྲག་པོའི་ལས་རྣམས་སོ། །དེ་ལ་ལྟོས་པས་མཆོག་ནི་ཕུལ་དུ་བྱུང་བ་ཡིན་པ་སྟེ་གནོད་པ་ཐམས་ཅད་བསྡུ་བའི་ངོ་བོ་ཡིན་པས་སོ། །དེ་ལྟ་བུ་ཞེས་བྱ་བ་ནས་བཀའ་བཞིན་དུ་ཞེས་པའི་བར་དུ་ནི་གཤིན་རྗེ་གཤེད་བསྒོམས་པས་བསྒྲུབ་བྱའི་བྲང་ལ་ཐོ་བས་བརྡེག་པར་བྱའོ། །དེའི་ཚེ་འཆི་བར་འགྱུར་རོ་ཞེས་བསྟན་ཏོ། །བསྒྲུབ་པར་བྱ་བ་དེ་ཉིད་ལ་ཞེས་བྱ་བ་ནས་འཆི་བར་འགྱུར་རོ་ཞེས་བྱ་བའི་བར་དུ་ནི་ཐག་མདུང་ལ་སོགས་པས་ཀྱང་གསད་པར་བྱའོ་ཞེས་བསྟན་ཏོ། །བསྲུང་བར་ཞེས་བྱ་བ་ནས་རྡོ་རྗེ་འཆང་ཆེན་པོས་གསུངས་པའོ་ཞེས་པའི་བར་དུ་ནི་གདུག་པའི་བསྒྲུབ་བྱ་དེ་ཉིད་ལ་ཕ་རོལ་གྱིས་བྱས་པའི་བསྲུང་བའི་འཁོར་ལོ་དང་དེ་རྣམས་ཀྱིས་བཟླས་པར་བྱ་བའི་སྔགས་དང་དེ་རྣམས་ཀྱིས་བརྟན་པའི་ཡི་དམ་གྱི་ལྷ་དང་ཕྲེང་བའི་སྔགས་ལ་སོགས་པ་གཞན་དག་གང་ཡིན་པ་དེ་རྣམས་ཁྲོ་བོའི་རྣལ་འབྱོར་དང་ལྡན་པས་སྔར་བཤད་པའི་ཆོ་གས་ཕུར་བུས་གདབ་པར་བསྟན་པར་བྱའོ་ཞེས་སོ། །གསོད་པའི་ཡུལ་ཞེས་བྱ་བ་ནས་མི་འགྱུར་རོ་ཞེས་བྱ་པའི་བར་དུ་ནི་བསམ་གཏན་གྱི་རིམ་པས་གསད་པར་བྱ་བ་དང༌། སྐྱེ་བ་བཞིའི་དབྱེ་བས་ཕྱེ་བའི་སྔར་བཤད་པའི་ཏིང་ངེ་འཛིན་གྱིས་སྲོག་མེད་པར་བྱས་ནས་དེ་རྣམས་ཀྱི་རྣམ་པར་ཤེས་པ་དྲི་མ་མེད་པ་རླུང་མེད་པའི་ཕྱོགས་སུ་མར་མེ་གསལ་བ་དང་འདྲ་བར་བསམ་ཏེ། དེ་ཡོངས་སུ་གྱུར་པ་ལས་ཡི་གེ་ཧཱུཾ་ལས་འབྱུང་བའི་རྡོ་རྗེ་ལས་བསྐྱེད་པའི་མི་བསྐྱོད་པའི་གཟུགས་བསྐྱེད་ལ། རང་གི་སྙིང་ག་ལས་འཇུག་ཅིང་དེ་ནས་སྤྲོས་ཏེ་མངོན་པར་
དགའ་བའི་སངས་རྒྱས་ཀྱི་ཞིང་དུ་སེང་གེའི་ཁྲི་ལ་བཞུགས་ཤིང་ཆོས་སྟོན་པ་དེ་བཞིན་གཤེགས་པས་ཡོངས་སུ་བསྐོར་བ་བསམ་པར་བྱའོ་ཞེས་གསོད་པའི་སྒོ་ནས་རྣམ་པར་དག་ཉིད་དུ་བསྟན་ཏོ། །དེ་ཉིད་ཅེས་བྱ་བ་ནས་སྡུད་པར་བྱེད་པའི་ཚིག་གོ་ཞེས་བྱ་བའི་བར་དུ་ནི་རྩིབས་བརྒྱད་པའི་ཆོས་ཀྱི་དབྱིངས་ཀྱི་འཁོར་ལོའི་ནང་དུ་ཡི་གེ་ར་འབར་བའི་མགོ་བོ་ནས་རྐང་བའི་མཐིལ་གྱི་བར་དང་རྐང་བའི་མཐིལ་ནས་ཀྱང་རང་གི་སྙིང་གའི་བར་དུ་མི་སྣང་བར་བྱའོ་ཞེས་རིལ་པོར་འཛིན་པའི་ཏིང་ངེ་འཛིན་དང་དེ་བཞིན་དུ་དང་པོ་ཁམས་གསུམ་པོ་རཾ་ཡིག་འབར་བས་མི་སྣང་བར་བྱས་ནས་ཕྱི་ནས་བདག་ཀྱང་དེ་བཞིན་དུ་བྱའོ་ཞེས་རྗེས་སུ་འཇིག་པའི་ཏིང་ངེ་འཛིན་བྱའོ། །ཏིང་ངེ་འཛིན་དེ་དག་གིས་རང་དང་གཞན་གྱི་རྒྱུད་ལ་གནས་པ་ལུས་ལ་སོགས་པ་མི་སྣང་བར་བྱེད་པ་གང་ཡིན་པ་དེ་ནི་རྫོགས་པའི་རྣལ་འབྱོར་བའི་གསོད་པའི་ལས་ཡིན་ཏེ། ཐ་མལ་བའི་ཕུང་པོ་ལ་སོགས་པ་མ་དམིགས་པའི་ཕྱིར་རོ། །ཞེ་སྡང་རྡོ་རྗེ་དང་དེའི་བདག་ཉིད་དུ་ཞུགས་པ་རྡོ་རྗེ་འཆང་ནི་རྡོ་རྗེ་ཁྲོ་བོ་ཡིན་ནོ། །དེ་ནས་ཞེས་བྱ་བ་ནས་གསུངས་སོ་ཞེས་བྱ་བའི་བར་དུ་ཐོག་མ་ནས་མ་སྐྱེས་པའི་རང་བཞིན་གྱི་དངོས་པོ་རྣམས་ལ་དེ་བཞིན་གཤེགས་པ་རྣམས་ཀྱིས་འགྲོ་བ་གདུལ་བར་བྱ་བའི་ཕྱིར་སྔར་བཤད་པའི་ཞི་བ་ལ་སོགས་པ་བསྟན་ཏོ་ཞེས་བྱ་བ་ངོ་མཚར་བ་སྟེ་སངས་རྒྱས་ཀྱི་རོལ་མོ་རྣམ་པ་སྣ་ཚོགས་པ་ཡིན་ནོ་ཞེས་བསྟན་ཏོ། །འདིར་ཡིད་བཞིན་ནོར་བུ་དང་འདྲ་བ་ཞེས་བྱ་བ་ནི་གདུག་པ་རྣམས་ཚར་བཅད་པའི་དོན་དུ་མངོན་པར་འདོད་པའི་འབྲས་བུ་སྟེར་བར་མཛད་པས་སོ། །ཆོས་བདག་མེད་པ་ཞེས་བྱ་བ་ནས་དེའི་མཚན་ཉིད་ལ་མཁས་པའོ་ཞེས་པའི་བར་དུ་ནི་རྡོ་རྒྱུས་སམ་སོ་བ་ལ་སོགས་པའི་རྫས་ཀྱི་ཁྱད་པར་གྱིས་ས་ཕྱོགས་སུ་གདེངས་ཀ་གཉིས་པའམ་གདེངས་ཀ་གཅིག་པ་འཇིགས་པ་ཆེན་པོའི་དུས་ཀྱི་དུ་བ་ལྟར་སྔོ་བ་མཆེ་བ་རྣམ་པར་གཙིགས་པའི་སྤྲུལ་ནག་པོ་བྲིས་ནས་དེའི་ཁར་ཡི་གེ་ཁཾ་བཀོད་ཅིང་དེ་ཡོངས་སུ་གྱུར་བ་ལས་ཀ་ལ་ཀུ་ཏ་དང་ཧ་ལ་ཧ་ལའི་དུག་ཁ་ལ་གནས་པ་བསྒོམས་ཏེ། སྙིང་ག་ལ་བཀོད་པའི་ཡི་གེ་ཧྲིའི་འོད་ཟེར་གྱིས་ནོར་རྒྱས་ཀྱི་བུ་ལ་སོགས་པ་རིགས་ཀྱི་ཀླུ་བརྒྱད་ཀྱི་རྣམ་པར་ཤེས་པ་བཀུག་ཅིང་དེ་ལ་འཇུག་སྟེ་ཡང་རིམ་པ་དེ་
ཉིད་ཀྱིས་བརྟན་པ་དང་གཡོ་བ་ལ་སོགས་པའི་དུག་བཀུག་ཅིང་དེ་ལ་འཇུག་པས། སྦྲུལ་གཡོ་བར་འགྱུར་བར་བསམ་པར་བྱའོ། །དེའི་ཚེ་གཡོ་བར་འགྱུར་བ་དེས་ཆེ་གེ་མོ་བ་ཤ་ཡ་ཞེས་བསྐུལ་བ་དེས་ཟོས་པར་འགྱུར་པས་དགྲ་རྣམས་འཆི་བར་འགྱུར་རོ་ཞེས་བསྟན་ཏོ། །དེ་བཞིན་དུ་བྲིས་པའི་སྦལ་པ་ལ་སོགས་པ་མངོན་པར་བྱས་ལ་སྔ་མ་བཞིན་དུ་བྱའོ་ཞེས་བསྟན་ཏོ། །དེ་ལ་ཞེས་བྱ་བ་ནས་རྡོ་རྗེ་འཆང་ཆེན་པོའོ་ཞེས་བྱ་བའི་བར་དུ་ནི་དུག་འཕོ་བ་བསྟན་ཏོ། །དེའི་སྦྱོར་བ་འདི་ཡིན་ཏེ་རྣམ་པར་སྣང་མཛད་ལ་སོགས་པའི་རྣལ་འབྱོར་པས་ལྟ་བའི་དུག་ལ་སོགས་པའི་སྤྱི་བོར་ཁ་དོག་དཀར་པོ་ཡི་གེ་ཨོཾ་བཀོད་ལ། དེའི་འོད་ཟེར་གྱིས་དུག་ཐུར་དུ་དྲངས་ལ་རྐང་པའི་དཀྱིལ་ལ་ཕྱིན་པ་བསྒོམས་ཏེ། དེ་ནས་བསྒྲུབ་བྱའི་སྙིང་གར་ཡི་གེ་ཁཾ་གི་སྟེང་དུ་ཡི་གེ་ཧྲིཾ་གི་འོད་ཟེར་གྱིས་བཀུག་ལ་ཡི་གེ་ཁཾ་དེ་ཉིད་ལ་རིལ་པོའི་ཚུལ་དུ་འཇུག་ཅིང་ཡི་གེ་ལཾ་ཡོངས་སུ་འགྱུར་པའི་དབང་ཆེན་གྱི་དཀྱིལ་འཁོར་གྱིས་བསྐོར་བར་བྱའོ། །དེའི་ཚེ་བསྒྲུབ་བྱ་ལ་དུག་འཕོ་བར་འགྱུར་རོ་ཞེས་བསྟན་ཏོ། །འདིར་ལྟ་བའི་དུག་ནི་གང་གིས་མཐོང་བ་ཙམ་གྱིས་དུག་འཕོ་བར་འགྱུར་རོ། །མཆེ་བའི་དུག་ཅེས་པ་ནི་གང་གི་མཆེ་བ་ལ་དུག་ཡོད་པའོ། །གང་རེག་པ་ཙམ་གྱིས་དུག་འཕོ་བ་དེ་ནི་རེག་པའི་དུག་གོ །གང་དྲན་ནས་ཉིན་ཞག་གཅིག་གམ་ཟླ་བ་ཕྱེད་དམ་ཟླ་གཅིག་གམ་ལོ་སྐོར་གྱིས་དུག་འཕྲོ་བ་དེ་ནི་དྲན་པའི་དུག་གོ །མི་ཟད་པའི་དུག་ཅེས་པ་ནི་ཨ་ཛ་ཀ་ར་དང་བ་སྣ་དང་དོ་འོད་བ་ལ་སོགས་པའི་སྦྲུལ་རྣམས་སོ། །གང་མཐོང་བ་ཙམ་གྱིས་འདིར་རི་བོ་འམ་ནག་ཚལ་ཡོད་དོ་ཞེས་བློ་སྐྱེའོ། །གང་ཁྲོས་པས་གྲོང་དང་གྲོང་རྡལ་དང་གྲོང་ཁྱེར་དང༌། སྐྱེ་བོའི་གནས་དང་ཡུལ་འཁོར་དང་རྒྱལ་ས་དང༌། སྐྱེ་བོ་དང་ནོར་དང་འབྲུ་དང་བཅས་པར་བསྲེགས་པར་འགྱུར་རོ། །དེ་རྣམས་ཀྱི་ཡང་དུག་འཕོ་བར་འགྱུར་ཞེས་སྦྱོར་བའི་ཁྱད་པར་བསྟན་ཏོ། །དེ་ལ་ཞེས་བྱ་བ་ནས་དེ་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུ་བསྒྲུབ་བྱའི་རྐང་པའི་དཀྱིལ་དུ་ཡི་གེ་ཧཱུཾ་ཟླ་བའི་ཁ་དོག་དང་འདྲ་བ་བཀོད་ལ་དེའི་འོད་ཟེར་གྱི་ཚོགས་ཀྱིས་ཁོང་སྟོང་གི་ཆ་བཤད་བའི་སྒོར་
ཕྱིན་པར་བསྒོམས་ལ། དེ་ལས་ལྟེ་བའི་ཕྱོགས་སུ་ཕྱིན་པ་དང་དེ་ལས་སྙིང་ག་དང་དེ་ལས་མགྲིན་པར་ཕྱིན་པར་དུག་བསམས་ཏེ། ཁ་དོག་ནག་པོ་དེ་ཁའི་སྒོ་ནས་སྐྱུག་པ་བསམ་པར་བྱའོ། །དེ་བཞིན་དུ་ཚངས་པའི་སྒོ་ནས་བརྩམས་ཏེ་གནས་བཞིར་བསྡུ་བའི་རིམ་པས་བཤང་སྒོའི་ལམ་ནས་དུག་བཤལ་བར་གྱུར་བར་བསམ་པར་བྱའོ། །དེའི་ཚེ་སྐྱུགས་པ་དང་ཁྲུས་དག་གིས་དུག་བྲལ་བར་འགྱུར་རོ་ཞེས་བསྟན་ཏོ། །དེ་ལ་ཞེས་བྱ་བ་ལ་སོགས་པ་ནས་ཕྱག་ན་རྡོ་རྗེ་བཀའ་བསྟན་པ་ཇི་ལྟ་བ་བཞིན་དུ་ཞེས་པའི་བར་དུ་ནི་ཉེ་བའི་དུག་རྣམས་སེལ་བ་ཉིད་དུ་མདོར་བསྟན་པའོ། །ཉེ་བའི་དུག་ནི་ལོང་ཏང་དང་ལང་ཀ་ལི་དང་རྩི་གུ་དང་དེ་རྣམས་ལྷན་ཅིག་སྐྱེས་པའོ། །སྦྱོར་བའི་དུག་ཅེས་པ་ནི་རྫས་སྦྱར་བ་ལས་བྱུང་བའོ། །དཔེར་ན་མར་དང་སྦྲང་རྩི་ཚད་མཉམ་པ་དང་ཞོ་མ་ལངས་པ་སྦྲང་རྩི་དང་ལྡན་པའོ། །སྦལ་པའི་ཚིལ་དང་སྦྲུལ་གྱི་ཚིལ་དང༌། སྦྱར་བའི་གཤའ་མ་ཀའི་རྩ་བསྐོལ་བའི་སྦྱར་བའི་དུག་གོ །བྱི་ལ་ནི་སྦྲུལ་ཁྲ་བོ་དང་གར་ད་བ་ནི་བོང་བུའོ། །སོགས་པའི་སྒྲས་དུག་གི་བྱི་བ་དང་ཁྱི་སྨྱོན་པ་དང་ཞེས་བྱ་བ་ལ་སོགས་པ་སྲོག་ཆགས་རྣམས་སོ། །རིམས་དང་དབུགས་མི་བདེ་བ་དང་སྨྱོ་བྱེད་དང་སྐེམས་བྱེད་དང་མཛེ་དང་རྡོ་རྗེ་དང་རྒན་རྒོན་དང་མཆིན་པ་ན་བ་དང་ལྷོག་པ་ལ་སོགས་པ་དང་རླུང་དང་མཁྲིས་པ་དང་བད་ཀན་དང་འདུས་པ་ལས་བྱུང་བ་ལུས་ཀྱི་ནད་རྣམས་སོ། །པདྨ་ཆེན་པོ་འདབ་མ་བརྒྱད་པ་ཞེས་བྱ་བ་ནས་འོད་གསལ་བ་ཡོངས་སུ་སྦྱངས་པའི་ཕྱིར་དང་ཞེས་པའི་བར་དུ་ནི་ཉེ་བའི་དུག་དང་བྲལ་བར་བྱ་བའི་ཕྱིར་བསམ་གཏན་གྱི་ཁྱད་པར་བསྟན་ཏོ། །འོད་དཔག་ཏུ་མེད་པའི་རྣལ་འབྱོར་པས་ལག་པ་གཡས་པ་ལ་ཡི་གེ་ཨ་ཡོངས་སུ་གྱུར་པ་ལས་པདྨ་འདབ་མ་བརྒྱད་པ་བསྒོམས་ལ་དེའི་དབུས་ཀྱི་ལྟེ་བ་ལ་ཁ་དོག་དཀར་པོ་ཡི་གེ་ཨ་དགོད་པ་དང་འདབ་མ་རྣམས་ལ་ཁ་དོག་དཀར་པོ་ཡི་གེ་ཧྲི་བརྒྱད་བཀོད་ལ་དེ་ལས་བྱུང་བའི་ཁ་དོག་དཀར་པོ་འོད་ཟེར་རྣམས་ཀྱིས་བསྒྲུབ་བྱའི་ལུས་ལས་དུག་བཀུག་ལ་ཡི་གེ་ཨ་ལ་འཇུག་ཅིང་ཁུ་ཚུར་གྱིས་སྡུད་པའི་རིམ་གྱིས་ས་ལ་བསྐུལ་བར་བསམ་པར་བྱའོ། །དེའི་དགུག་པ་ལ་ཁ་དོག་
དཀར་པོ་དང་དུག་རེངས་པ་ལ་ནག་པོ་བསྒོམ་པར་བྱའོ་ཞེས་བསྟན་ཏོ། །ཉི་མའི་དུག་ཅེས་བྱ་བ་ནས་ནད་ལས་ཐར་བར་འགྱུར་རོ་ཞེས་པའི་བར་དུ་ནི་ཕྱི་དང་ནང་གི་ནད་རྣམས་སོས་པ་ཉིད་དུ་བསྟན་ཏོ། །མཚོན་ཆ་ལ་སོགས་པ་གློ་བུར་གྱི་རྒྱུ་ལས་བྱུང་བ་དང་ཞེས་པ་ནི་མཚོན་ཆ་བརྒྱབ་པ་ལས་བྱུང་བ་དང༌། སེམས་ཅན་དང་སེམས་ཅན་མ་ཡིན་པས་བྱས་པའི་ནད་རྣམས་སོ། །མངོན་སྤྱོད་ཀྱི་རྒྱུ་ལས་བྱུང་བ་ནི་ཞེས་པ་ལ། དེ་བཞིན་དུ་སྔགས་ལ་མཁས་པའི་ཕ་རོལ་པོའི་དྲག་པོའི་ལས་ལས་བྱུང་བ་གང་ཡིན་པ་དེ་རྣམས་ཕྱིའོ། །ཁམས་དང་དྲི་མ་དང་ཁ་ཟས་མི་མཐུན་པའི་རྒྱུ་ལས་བྱུང་བ་ནི་ནང་གིའོ་ཞེས་པ་ནི་ཁམས་ཀྱི་སྐྱོན་ནི་རླུང་དང་མཁྲིས་པ་དང་བད་ཀན་དང་འདུས་པ་རྣམས་ཀྱིས་བྱ་བའོ། །དྲི་མ་ནི་དྲི་མ་བསྡུ་བ་ལས་བྱུང་བ་སྐྲན་ལ་སོགས་པའོ། །ཁ་ཟས་མི་མཐུན་པ་ནི་ཉུང་པའམ་ལྷག་པ་སྟེ་དེ་ལ་ཉུང་བ་ལ་སྐེམ་ནད་ལ་སོགས་པ་དང༌། ཧག་པ་ལས་མ་ཞུ་བ་ལ་སོགས་པ་དེ་རྣམས་ནང་གིའོ། །དེ་རྣམས་གཞོམ་པའི་ཕྱིར་རེ་ཞིག་དང་པོ་རྣམ་པར་སྣང་མཛད་ལ་སོགས་པ་གསུམ་གྱི་ནད་པའི་ལྟེ་བར་ཡི་གེ་ཧཱུཾ་ཡོངས་སུ་གྱུར་བ་ལས་རྡོ་རྗེ་གནོད་སྦྱིན་མཆེ་བ་རྣམས་པར་གཙིགས་པ་དྲག་ཅིང་རྣོ་བ་གཡས་བརྐྱང་པ་ལས་གནས་པ། སྡིགས་མཛུབ་དང་རྡོ་རྗེ་གསོར་བར་བྱེད་པ་བསམས་ཏེ། དེས་ཡི་གེ་ཀཾ་ལས་བྱུང་བ་བསྒྲུབ་བྱའི་སྙིང་གའི་ཕྱོགས་སུ་སྤྲོ་བ་ལ་སོགས་པའི་རྣམ་པ་གང་ཡང་རུང་བའི་ནད་དྲངས་པའི་ཁ་ནས་བྱུང་བ་མདུན་དུ་རྡོ་རྗེ་གནོད་སྦྱིན་དེ་ཉིད་ཀྱིས་རྡོ་རྗེ་བརྒྱབ་པས་ཕྱེ་མར་བཏགས་ལ་རང་གི་ལག་པ་ལ་གནས་པའི་འབར་བའི་རྡོ་རྗེ་ལ་སོགས་པའི་མེའི་འོད་ཀྱིས་བསྲེགས་པར་འགྱུར་ཞིང་ཐལ་བར་གྱུར་པར་བྱའོ། །དེའི་ཚེ་ནད་རྣམས་འཇོམས་པར་འགྱུར་རོ། །དེའི་འོག་ཏུ་ཡེ་ཤེས་སེམས་དཔའི་འོད་ཟེར་གྱི་ཚོགས་ཀྱི་གཟུགས་ཅན་རྣམ་པར་སྣང་མཛད་དང་སྤྱན་མ་ལ་སོགས་པའི་ཚོགས་སྤྲོས་ལ། སྙོམས་པར་ཞུགས་པ་ལས་བྱུང་བའི་བྱང་ཆུབ་སེམས་ཀྱི་རྒྱུན་གྱིས་དེ་རྣམས་ལ་དབང་བསྐུར་ཞིང་བསྒྲུབ་བྱའི་ལུས་པོར་འོད་ཟེར་གྱི་སྒོ་ནས་མར་ལ་མར་བཞིན་ཐིམ་པར་གྱུར་པར་བསམ་པར་བྱའོ། །དེའི་ཚེ་དེ་བཞིན་གཤེགས་པ་
ཐམས་ཅད་ཀྱིས་བྱིན་གྱིས་བརླབས་པས་བསྒྲུབ་བྱ་རྡོ་རྗེའི་སྐུ་ལྟ་བུར་འགྱུར་རོ་ཞེས་བསྟན་ཏོ། །རྫོགས་པའི་རིམ་པ་ལ་གནས་པ། །ཞེས་བྱ་བ་ནས། རྡོ་རྗེ་སེམས་དཔའ་གསུངས་པའོ། །ཞེས་པའི་བར་དུ་ནི་ཕྱི་དང་ནང་གི་ནད་རྣམས་ཀྱིས་དཀྲུགས་པའི་དབང་པོ་དང་ཕུང་པོ་དང་ཁམས་དང་སྐྱེ་མཆེད་རྣམས་མདུན་དུ་དམིགས་ལ་རྡོ་རྗེ་འཆང་ཆེན་པོ་ལ་སོགས་པའི་གང་ཡང་རུང་བའི་རྣལ་འབྱོར་པས་སེམས་རྣམ་པར་དག་པས་ཐོབ་པར་བྱ་བའི་འོད་གསལ་བར་བསྒོམས་པས་དཀྱིལ་འཁོར་རྣམས་ལས་གཡས་པ་དང་གཡོན་པ་གཡོན་པ་གཉིས་དང་དལ་བུས་དམན་པར་རྒྱུ་བ་དམར་པོ་ལ་སོགས་པའི་འོད་ཟེར་གྱི་ཚོགས་སྤྲོས་ལ་དཀྱིལ་འཁོར་རེ་རེ་ལ་དགུ་བརྒྱ་དགུ་བརྒྱ་བཟླས་པས་ཉིན་མོ་དང་མཚན་མོར་ཉི་ཁྲི་ཆིག་སྟོང་དག་གིས་དྲུག་བརྒྱ་བཟླས་ནས་གདོང་གི་སྣའི་རྩེ་མོར་འོད་ཟེར་གྱི་ཐིག་ལེ་འཛིན་ན་དེའི་ཚེ་ནད་པའི་ནད་གྲོལ་བར་འགྱུར་རོ། །ཇི་སྐད་དུ། ཡ་ཡི་དོན་གྱི་གང་ཅི་འང་རུང༌། །དངོས་གྲུབ་འདོད་པས་བྱ་བ་སྟེ། །ར་ལ་སོགས་པ་གསུམ་ཉིད་ཀྱིས། །འགྲོ་བའི་དོན་ལ་རབ་ཏུ་འཇུག །མེ་དང་རླུང་དང་དབང་ཆེན་དང༌། །ཆུ་ཡི་དཀྱིལ་འཁོར་རེ་རེ་ལ། །ཐུན་ནི་ཕྱེད་ཕྱེད་དུས་སུ་ནི། །ལས་ནི་གཉིས་གཉིས་བྱེད་པར་འགྱུར། །ཞེས་འབྱུང་ངོ༌། །དེ་ནི་རྡོ་རྗེ་བཟླས་པའི་རིམ་པས་ནད་ལས་ཐར་བའོ། །དེ་བཞིན་འོད་གསལ་བ་ལས་ཅིག་ཅར་དུ་ཡེ་ཤེས་ཀྱི་སྐུ་འམ་རྡོ་རྗེའི་སྐུ་སྤྲོས་ལ། བ་སྤུའི་བུ་ག་ཐམས་ཅད་ལས་འོད་ཟེར་གྱི་འཁོར་ལོ་སྤྲོས་ལ་དེ་བཞིན་གཤེགས་པའི་རྣམ་པ་ཅན་གྱི་འོད་དེས་ནད་པའི་ལུས་ནད་མེད་པར་བྱས་ནས་དེ་ཉིད་དུ་འཇུག་པར་བསམ་པར་བྱའོ། །དེའི་ཚེ་བསྒྲུབ་བྱ་ནི་ནད་མེད་པར་འགྱུར་རོ། །དེ་ས་ནི་བདག་ལ་བྱིན་གྱིས་བརླབ་བ་དང་ཟུང་དུ་འཇུག་པ་དག་གིས་ནད་མེད་པར་འགྱུར་རོ་ཞེས་བསྟན་ཏོ། །དེ་ལྟར་རྫོགས་པའི་རིམ་པའི་སྤྱོད་པ་དང་ལྡན་པས་ཕ་རོལ་རྣམས་ཀྱི་ནད་འཇོམས་པར་བྱེད་དེ། དེ་ལྟར་ཞེས་བྱ་བ་ནས་དངོས་སོ་ཞེས་བྱ་བའི་བར་དུ་ནི་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་གི་སྒྱུ་མ་ལྟ་བུའི་དངོས་པོ་རྨི་ལམ་གྱི་དབེའི་སྒོ་ནས་སོ་སོར་སྣང་བ་ཙམ་གྱི་སྙིང་པོར་གྱུར་པ་ལ་རྟག་པ་དང་ཆད་པའི་འཁྲུལ་པ་ཡོད་དོ་ཞེས་
གསུངས་སོ། །སྒྲུབ་པ་པོ་རྣམ་པ་གཉིས་ཀྱིས་ཞེས་པ་ནི་རྫོགས་པ་དང་མ་རྫོགས་པ་རྣམས་སོ། །མཚན་མ་དང་བཅས་པ་དང་མཚན་མ་མེད་པའི་དབྱེ་བས་ཞེས་པ་ནི་རྟོག་པ་དང་བཅས་པ་དང་རྟོག་པ་མེད་པའི་རྒྱུས་རྨི་ལམ་མཐོང་བའོ། །རྣམ་པ་གཉིས་ཀྱིས་དེ་ཉིད་ཀྱི་འབྲས་བུ་དང་འབྲེལ་བ་ཡིན་ནོ། །དེ་ལ་ཞེས་བྱ་བ་ནས་མངོན་གསུམ་དུ་བྱེད་པར་འགྱུར་རོ་ཞེས་བྱ་བའི་བར་དུ་ནི་སེམས་རྣམ་པར་དག་པའི་རིམ་པར་འོད་གསལ་བ་ཐོབ་ནས་དེ་ལས་བྱུང་བའི་ཡེ་ཤེས་ཀྱི་སྐུ་དང་དེ་བཞིན་དུ་མངོན་པར་བྱང་ཆུབ་པའི་རིམ་པས་འོད་གསལ་བ་ལ་འཇུག་པས་རྡོ་རྗེའི་སྐུ་བརྒྱ་བྱིན་ལ་སོགས་པའི་འཇིག་རྟེན་པ་སངས་རྒྱས་དང་བྱང་ཆུབ་སེམས་དཔའི་འཇིག་རྟེན་ལས་འདས་པས་མཆོད་པར་འགྱུར་བ་བདག་ཉིད་རྨི་ལམ་དུ་མཐོང་ན་དེའི་ཚེ་མྱུར་དུ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །སེམས་ཅན་ཆེན་པོ་ཞེས་བྱ་བ་ནས་རྨི་ལམ་གྱི་འབྲས་བུའོ་ཞེས་པའི་བར་དུ་ནི་ཐུགས་རྡོ་རྗེ་ལ་སོགས་པ་དེ་བཞིན་གཤེགས་པ་ལྔའི་རྣམ་པ་ཅན་སངས་རྒྱས་དང་བྱང་ཆུབ་སེམས་དཔའ་ལ་སོགས་པས་མཆོད་པར་གྱུར་པ་དེའི་ཚེ་ཕ་རོལ་རྣམས་ལ་ཡང་དེའི་རྣམ་པ་སྟེར་བ་ལ་ནུས་པ་དང་ལྡན་པར་འགྱུར་རོ་ཞེས་བསྟན་ཏོ། །རྒྱན་རྣམས་ཐམས་ཅད་ཅེས་བྱ་བ་ནས་རིག་པར་འགྱུར་རོ་ཞེས་བྱ་བའི་བར་དུ་ནི་ལྷའི་བུ་མོ་གཟུགས་བཟང་བ་ལེགས་པར་བརྒྱན་པ་དང་དེ་བཞིན་དུ་མི་ལ་སོགས་པའི་བུ་མོ་དང་ཁྱེའུ་རྣལ་འབྱོར་པ་ལ་མཆོད་པ་བྱེད་པ་མཐོང་ན་དེ་ཞི་བ་ལ་སོགས་པའི་དངོས་གྲུབ་ཐོབ་པར་འགྱུར་རོ་ཞེས་བསྟན་ཏོ། །ཁྱེའུ་དང་བུ་མོ་ནི་ཤེས་རབ་དང་ཐབས་ཀྱི་རང་བཞིན་ཡིན་པས་སོ། །ཕྱོགས་བཅུ་ཞེས་བྱ་བ་ནས་རྨི་ལམ་མཐོང་བའི་འབྲས་བུ་ཞེས་པའི་བར་དུ་ནི་རྣལ་འབྱོར་བ་གང་ཞིག་སངས་རྒྱས་ཀྱི་ཞིང་ལ་གནས་པ་དེ་བཞིན་གཤེགས་པའི་ཚོགས་མཐོང་བ་དང༌། དེ་བཞིན་དུ་གང་ལ་བཅོམ་ལྡན་འདས་མ་ལ་སོགས་པའི་ཤེས་རབ་ཀྱི་གླེགས་བམ་དེ་བཞིན་གཤེགས་པས་ལག་ཏུ་སྩོལ་བ་དང༌། གང་ཞིག་སེང་གེའི་ཁྲི་ལ་བཞུགས་པ་ཆོས་སྟོན་པ་ལ་རྩོལ་བ་སངས་རྒྱས་དང་བྱང་ཆུབ་སེམས་དཔས་ཡོངས་སུ་བསྐོར་བར་བདག་ཉིད་མཐོང་ན་དེས་
ཕྱག་རྒྱ་ཆེན་པོའི་འབྲས་བུ་ཐོང་བར་འགྱུར་རོ་ཞེས་བསྟན་ཏོ། །ཀུན་དགའ་ར་བ་ནས་རྨི་ལམ་གྱི་འབྲས་བུ་ཐོབ་པར་འགྱུར་རོ་ཞེས་ཀྱང་གསུངས་སོ་ཞེས་པའི་བར་དུ་ནི་ལྷའི་བུ་དང་བུ་མོས་བརྒྱན་པ་ཀུན་དགའ་ར་བ་དང་ནགས་ཚལ་ལ་སོགས་པ་བསྐྱེད་པའི་རིམ་པ་ནི། རྣལ་འབྱོར་པ་གང་ཞིག་མཐོང་བ་དེས་ནི་ཞི་བ་ལ་སོགས་པའི་དངོས་གྲུབ་ཐོབ་པར་འགྱུར་རོ་ཞེས་གསུངས་སོ། །དེ་བཞིན་དུ་སངས་རྒྱས་དང་བྱང་ཆུབ་སེམས་དཔའ་དབང་བསྐུར་བ་གང་ཞིག་མཐོང་བ་དེ་ནི་རིག་པ་འཛིན་པའི་གཙོ་བོར་འགྱུར་རོ་ཞེས་བསྟན་ཏོ། །མངོན་པར་འདོད་པའི་རྨི་ལམ་ཞེས་བྱ་བ་ནས་གྲུབ་ཅིང་ཐོབ་པར་འགྱུར་རོ་ཞེས་བྱ་བའི་བར་དུ་ནི་སྔར་བཤད་པའི་དགེ་བའི་རྨི་ལམ་གྱིས་ཕྱག་རྒྱ་ཆེན་པོའི་དངོས་གྲུབ་ཐོབ་པ་ཉིད་དུ་བསྟན་ཏོ། །གདོལ་བ་ཞེས་བྱ་བ་ནས་བར་དུའོ་ཞེས་པའི་བར་དུ་ནི་རྣལ་འབྱོར་པ་གང་ཞིག་གདོལ་པ་ལ་སོགས་པའི་རིགས་ངན་དང་དེ་བཞིན་དུ་གཟུགས་འཇིགས་པ་སྤྲེ་དང་ཡི་དགས་ལ་སོགས་པར་མི་ལམ་དུ་མཐོང་ན་དེས་ངེས་པར་དམ་ཚིག་ཉམས་པ་ཡིན་ནོ་ཞེས་བསྟན་ཏོ། །དམ་ཚིག་སྟོང་པའི་རྒྱུ་དེས་དངོས་གྲུབ་སྒྲུབ་པ་ལ་འཇུག་པར་འགྱུར་ན་ནད་ལ་སོགས་པས་ལུས་ཟིལ་གྱིས་མནན་པར་འགྱུར་རོ་ཞེས་བསྟན་ཏོ། །དེ་ལ་དེ་ཁོ་ན་ཉིད་བསྒྲུབ་པ་ཞེས་བྱ་བ་ནས་ཆོས་ཉིད་མེད་པའོ་ཞེས་པའི་བར་དུ་ནི་བརྟན་པ་དང༌། གཡོ་བའི་རང་བཞིན་གྱི་དངོས་པོ་རྣམས་རང་གི་སེམས་ཀྱི་སྣང་བ་ཙམ་ལས་ལྡོག་པ་ནི་མེད་དེ། རྨི་ལམ་དང་འདྲ་བས་སོ། །སེམས་ཀྱང་རྣམ་པར་དཔྱད་ན་འོད་གསལ་བའི་རང་བཞིན་ཡིན་པས་སོ། །འོད་གསལ་བ་ཡང་རྣམ་པར་མི་རྟོག་པའི་གནས་སྐབས་སུ་འདི་ཉིད་དང་བདག་ཉིད་དུ་མི་དམིགས་ཏེ་རྣམ་པར་མི་རྟོག་པའི་ཕྱིར་རོ། །དེ་ལྟར་ཆོས་ཅན་དང་ཆོས་ཉིད་གཉི་ག་ཡང་རྣལ་འབྱོར་པའི་མངོན་སུམ་གྱི་ཚད་མས་མི་དམིགས་ཏེ། འབའ་ཞིག་དྲི་མ་མེད་པས་བྱང་ཆུབ་ཙམ་ལ། གནས་པའི་རྒྱུ་དང་ལྡན་པའི་རྣལ་འབྱོར་པ་རྣམ་གཉིས་མི་དམིགས་པའི་ཕྱིར་རོ། །རྣམ་བཅས་དངོས་པོའི་རྟོག་པ་དང༌། །རྣམ་པ་མེད་པའི་རྟོག་པ་སྟེ། །གཅིག་ཏུ་བྱས་ནས་གང་སྤྱོད་པ། །དེ་ནི་ཟུང་འཇུག་བཤད་པ་ཡིན། །ཞེས་འབྱུང་ངོ༌། །དེ་བཞིན་ཁམས་དང་ཞེས་བྱ་བ་
ལ་སོགས་པ་ལ་དབང་པོ་དང་རྣམ་པར་ཤེས་པ་ཉེ་བར་བསྡུས་པའི་བདག་ཉིད་ཅན་གྱི་ཤེས་པ་གཉིས་པོ་ནི་སྣང་བ་དང་སྣང་བ་མཆེད་པ་ཞེས་བྱ་བའོ། །ལེགས་འདུས་པ་ནི་རྟག་ཏུ་སོ་སོར་སྣང་བར་འགྱུར་བའོ། །སྟོང་ཆེན་ཉིད་འགྱུར་ནི་སྣང་བ་ཉེ་བར་ཐོབ་པའི་ཡེ་ཤེས་ཡོད་ནའོ། །རླུང་ལ་བརྟེན་པ་ནི་རླུང་གི་ཚོགས་ཀྱི་དབང་གིས་སོ། །ངེས་པར་རྨི་ལམ་མཐོང་བ་ཞེས་པ་ནི་སད་པའི་གནས་སྐབས་སུ་མཐོང་བ་གང་ཡིན་པ་དེ་རྨི་ལམ་དུ་མཐོང་བར་འགྱུར་ཏེ། རྟོག་པ་དང་བཅས་པའི་ཕྱིར་རོ། །གང་ཞིག་རྨི་ལམ་དང་མཚུངས་པའི་ཆོས་རྣམས་ཡོངས་སུ་ཤེས་པས་འབྲས་བུ་འདོད་པའི་འོད་གསལ་བའི་གོ་འཕང་མངོན་དུ་བྱེད་པའི་རྣལ་འབྱོར་པ་དེས་ཀུན་བརྟགས་པ་ནི་རྨི་ལམ་དང་སད་པ་ལ་བྱེ་བྲག་མི་རྟོག་པའོ། །ཆོས་རྣམས་ཞེས་བྱ་བ་ལ་སོགས་པས་རྣལ་འབྱོར་པ་དེ་ཉིད་ཀྱིས་བརྫུན་དང་བདེན་པ་ལས་གྲོལ་བ་དངོས་པོ་རྨི་ལམ་དང་མཚུངས་པ་སྣང་བར་འགྱུར་རོ། །ཇི་སྐད་དུ། གཉིད་ལོག་པ་དང་སད་པ་ཞེས། །དེ་དག་རྟོགས་ནི་གཉིས་སྤངས་པའི། །སྟོན་པས་ཟུང་འཇུག་གསུངས་པ་སྟེ། །གཉིད་ལོག་སད་དང་རྣམ་བྲལ་བའོ། །ཞེས་འབྱུང་ངོ༌། །དེ་ལྟར་ཡི་གེ་གསུམ་ཙམ་ལ་གནས་པའི་རྣལ་འབྱོར་བ་རྟོག་པ་དང་བཅས་པར་འགྱུར་བས་རྨི་ལམ་མཐོང་བ་དང་འོད་གསལ་བ་ལ་འཇུག་པས་ཅུང་ཟད་མཐོང་ངོ༌། །འོན་ཀྱང་གཉིད་ལོག་པ་དང་སད་པ་དང་འདྲ་བར་དངོས་པོའི་ངོ་བོ་མཐོང་བར་འགྱུར་རོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ལ་སོགས་པས་དངོས་པོ་རྣམས་སྒྱུ་མ་ལྟ་བུར་ཤེས་ནས་ངོ་བོ་མེད་པར་འགྱུར་ན། རྨི་ལམ་དང་རྨི་ལམ་གྱི་འབྲས་བུ་དེ་རྣམས་གང་ལས་འགྱུར་ཞེས་བཅོམ་ལྡན་འདས་ལ་ཞུས་པ་དང༌། ངོ་མཚར་བ་དང་རྨད་དུ་བྱུང་བ་ཐོབ་པར་འགྱུར་རོ་ཞེས་བསྟན་ཏོ། །དེ་བཞིན་གཤེགས་པའི་དགོངས་པ་ཞེས་བྱ་བ་ལ་སོགས་པ་ནས་འོད་གསལ་བའི་ངོ་བོ་ཉིད་དོ་ཞེས་བྱ་བའི་བར་དུ་ནི་དངོས་པོ་རྣམས་ཀྱི་ངོ་བོ་མེད་པ་ཉིད་བསྟན་ཏོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ནི་མི་བསྐྱོད་པ་ལ་སོགས་པ་བོད་པའོ། །བུམ་པ་དང་སྣམ་བུ་ལ་སོགས་པ་ཞེས་བྱ་བ་ནི་སེམས་དང་ལྡན་པ་དང་སེམས་དང་མི་
ལྡན་བའི་བདག་ཉིད་ཀྱི་དངོས་པོས་སོ། །མི་ལྡན་པ་ནི་གཅིག་གི་ངོ་བོ་མ་ཡིན་ཏེ་ཐ་དད་པ་ཉིད་དུ་སྣང་བའི་ཕྱིར་རོ། །དེ་ལ་བུམ་པ་ལ་སོགས་པ་དངོས་པོ་རྣམས་ནི་འདུས་བྱས་ཏེ། རྒྱུ་དང་རྐྱེན་གྱིས་བསྐྱེད་པའི་ཕྱིར་རོ། །ནམ་མཁའ་ནི་འདུས་མ་བྱས་པ་སྟེ། རྒྱུ་མེད་པའི་ཕྱིར་རོ། །གཟུགས་དང་ལྡན་པ་དང་གཟུགས་མེད་པ་ཉིད་ཀྱིས་བུམ་པ་ལ་སོགས་པ་དང་ནམ་མཁའ་ནི་ཐ་དད་པ་ཡིན་ནོ། །མི་ལྡན་པ་ཡང་མ་ཡིན་ཏེ་ལྡན་པ་ཁོ་ནའོ། །དངོས་པོ་ཐམས་ཅད་ཅེས་པ་ནི་སེམས་ཅན་དང་སྣོད་ཀྱི་འཇིག་རྟེན་གྱི་བདག་ཉིད་ཀྱི་དེའི་ངོ་བོ་ཡིན་པའི་ཕྱིར་རོ་ཞེས་པ་ནི་ནམ་མཁའ་ནི་དངོས་པོ་ཐམས་ཅད་ཀྱི་ནང་དུ་ཆུད་པའི་ཕྱིར་རོ། །ཁྱབ་པ་ནི་ནམ་མཁའ་ཁྱབ་པར་བྱེད་པ་སྟེ། མེ་དྲོ་བའི་རེག་པ་བཞིན་ནོ། །ངོ་བོ་ཉིད་ལ་གནས་པ་ཞེས་པ་ནི་དངོས་པོ་རྣམས་ལ་མེད་པར་མི་འབྱུང་བས་གནས་པ་སྟེ། དངོས་པོ་ནི་འབྱུང་བ་ཆེན་པོ་ལྔའི་རང་བཞིན་ཡིན་པའི་ཕྱིར་རོ། །གཉིས་པོ་དེ་དག་ནི་ཁྱབ་པར་བྱེད་པ་དང་མཐོང་བ་མེད་པ་ཉིད་དོ། །མངོན་པའི་ང་རྒྱལ་ཡང་ཞེས་པ་ནི་སེམས་པ་མེད་དེ། དེ་བེམས་པོ་ཡིན་པའི་ཕྱིར་རོ། །ནམ་མཁའ་དེ་ཞེས་བྱ་བ་ལ་སོགས་པས་དེ་ཉིད་བསྡུ་བར་བྱེད་དེ། དེ་ལྟར་ཞེས་བྱ་བ་ལ་སོགས་པས་དཔེ་བསྟན་ནས་དཔེ་ལས་བྱུང་བ་བསྟན་པར་བྱ་སྟེ། ཇི་ལྟར་ནམ་མཁའ་ལ་བུམ་པ་ལ་སོགས་པས་ལྡན་པ་དང་མི་ལྡན་པ་མེད་པ་དེ་བཞིན་དུ་རྨི་ལམ་དང་དེའི་འབྲས་བུ་དག་ལ་ཡང་ལྡན་པ་དང་མི་ལྡན་པ་དག་མེད་དོ་ཞེས་བསྟན་ཏོ། །དགོངས་པ་ནི་འདི་ཡིན་ཏེ། རེ་ཞིག་རྨི་ལམ་ནི་དོན་མེད་པ་རང་གི་རྣམ་པར་རྟོག་པའི་བག་ཆགས་ལས་འབྱུང་བར་འགྱུར་ཏེ། དེའི་འབྲས་བུ་དང་འབྲེལ་བས་ག་ལས་འགྱུར་ཞེས་བྱ་བ་ནས་རྨི་ལམ་དང་འབྲས་བུ་དག་མི་ལྡན་པའོ། །འོན་ཀྱང་རྣམ་པར་མི་རྟོག་པ་ཉིད་རྨི་ལམ་ལྟར་སོ་སོར་སྣང་བའི་འབྲས་བུའི་རྣམ་པར་སྣང་བར་འགྱུར་རོ་ཞེས་དེ་དག་དང་ལྡན་པའོ། །དེ་ཉིད་ཀྱི་རྣམ་པར་དག་པ་ཞེས་པ་ནི་ནམ་མཁའི་དེ་ཁོ་ན་ཉིད་བསྟན་ཏོ། །ཇི་ལྟ་ཇི་ལྟར་ནམ་མཁའ་ལ་མཐོང་བ་མེད་པ་དང་ཐོས་པ་མེད་པ་ཉིད་ཡོད་པ་དེ་བཞིན་དུ་དངོས་པོ་ཐམས་ཅད་སོ་སོར་སྣང་བ་སྟེ། རང་བཞིན་མེད་
པའོ། །ཅི་དགོས་ཞེས་བྱ་བ་ལ་སོགས་པས་རྨི་ལམ་དེའི་འབྲས་བུ་དག་ངོ་བོ་མེད་པ་ཡང་མ་ཡིན་ནོ་ཞེས་བསྟན་ཏོ། །བརྟགས་པ་ཡིན་པའི་ཕྱིར་རོ། །ཆོས་ཐམས་ཅད་ཅེས་བྱ་བ་ལ་སོགས་པས་སེམས་ཅན་གྱི་འཇིག་རྟེན་དང་སྣོད་ཀྱི་འཇིག་རྟེན་དང་ཁམས་གསུམ་ལ་གནས་པའི་ངག་གི་སྤྲོས་པ་དེ་དག་ཐམས་ཅད་སེམས་ཀྱི་རང་བཞིན་ཁོ་ན་དང་དེ་བཞིན་དུ་སེམས་ཀྱི་རྣམ་པ་སོ་སོར་སྣང་བ་ལུས་དང་ངག་དང་སེམས་དང་ཕུང་པོ་དང༌། ཁམས་དང་སྐྱེ་མཆེད་ཀྱི་ཆོས་ཐམས་ཅད་གང་ཡིན་པ་དེ་རྣམས་ལ་ཁྱབ་པར་བྱེད་པ་ནམ་མཁའ་དང་ཁྱབ་པར་བྱ་བའི་སེམས་ཅན་གྱི་རིགས་བཞིའི་དབྱེ་བས་གནས་པ་དེ་དང་ཐམས་ཅད་ཇི་ལྟར་སྔར་བཤད་པའི་རིགས་པས། ནམ་མཁའ་དང་འདྲ་བ་བཞིན་དུ་ཆོས་ཐམས་ཅད་བསྐྱེད་པ་དང༌། གནས་པ་དང་འཇིག་པ་མེད་པས་འོད་གསལ་བའི་རང་བཞིན་ཡིན་ནོ་ཞེས་བསྟན་ཏོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པས་སྒྱུ་མའི་སྐུས་དངོས་པོ་རྣམས་སྒྱུ་མ་ལྟ་བུ་ཉིད་དུ་བསྟན་ཏོ། །དུས་གསུམ་དུ་གཤེགས་པ་ཞེས་པ་ནི་འདས་པ་ལ་སོགས་པའི་དུས་གསུམ་ལ་བཞུགས་པའོ། །དེ་རྣམས་ཀྱི་ཡེ་ཤེས་ཀྱི་སྐུའོ་ཞེས་པ་ནི་འོད་གསལ་བ་ལས་ཅིག་ཅར་དུ་འབྱུང་བའོ། །དེ་འབྱུང་བར་བྱེད་པ་ཞེས་པ་ནི་ཡེ་ཤེས་ཀྱི་སྐུ་སྐྱེད་པར་བྱེད་པ་རྡོ་རྗེའི་གནས་ལྟ་བུ་ནི་མི་ཕྱེད་པའི་གཞིའི་རང་བཞིན་ནོ། །བྱང་ཆུབ་ཀྱི་སེམས་ནི་སྟོང་པ་ཉིད་དང་སྙིང་རྗེ་དབྱེར་མེད་པ་དང༌། ཐམས་ཅད་སྟོང་པའི་བདག་ཉིད་འོད་གསལ་བའོ། །སྟོང་ཉིད་སྙིང་རྗེ་དབྱེར་མེད་ནི། །བྱང་ཆུབ་སེམས་ཞེས་བཤད་པ་ཡིན། །ཞེས་འབྱུང་ངོ༌། །བྱང་ཆུབ་སེམས་ཞེས་བྱ་བ་ལ་སོགས་པས་འོད་གསལ་བའི་རང་བཞིན་གྱི་བྱང་ཆུབ་ཀྱི་སེམས་དེ་ཡང་འདོད་པའི་ཁམས་ལ་སོགས་པ་ལ་མི་གནས་ཏེ། སོ་སོར་ངེས་པ་གནས་པ་མེད་པས་ཁྱབ་པར་བྱེད་པ་དེ་ཉིད་ཀྱི་ཕྱིར་དེ་ལ་དོན་དམ་པར་སྐྱེ་བ་དང་འཇིག་པ་མེད་པ་དེ་བཞིན་དུ། ཆོས་ཐམས་ཅད་ལ་ཡང་སྐྱེ་བ་དང་འཇིག་པ་མེད་པ་སྟེ། འོད་གསལ་བའི་ངོ་བོ་ཡིན་པའི་ཕྱིར་རོ། །དེ་ལྟར་ཞེས་བྱ་བ་ལ་སོགས་པས་རྨི་ལམ་གྱི་དཔེས་དངོས་པོ་རྣམས་ངོ་བོ་མེད་པ་
ཡིན་ནོ་ཞེས་ཉེ་བར་བསྡུས་པ་བསྟན་ཏོ། །གཞན་ཡང་ཞེས་བྱ་བ་ནས་ཁོང་དུ་ཆུད་པར་བྱའོ་ཞེས་པའི་བར་དུ་ནི་ཇི་ལྟར་རྨི་ལམ་དང་སྐྱེས་བུ་དག་ལ་མཐོང་བར་བྱ་བ་དང༌། མཐོང་བ་པོའི་མངོན་པའི་ང་རྒྱལ་མེད་པ་འོན་ཀྱང་ཕན་ཚུན་སྣང་བར་བྱ་བ་དང་སྣང་བ་པོའི་བརྫུན་པའི་སོ་སོར་སྣང་བ་ཡོད་པ་དང༌། དེ་བཞིན་དུ་སད་པའི་སྐབས་སུ་ཡང་དགེ་བ་དང་མི་དགེ་བ་ལས་སོགས་པའི་བྱ་བ་རྨི་ལམ་དང་འདྲ་བ་ཇི་ལྟར་འགྱུར་བ་དེ་བཞིན་དུ་རྫོགས་པ་དང་མ་རྫོགས་པའི་རྣལ་འབྱོར་པའི་སྒྱུ་མ་ལྟ་བུའི་སྐུ་དང་འདྲ་བར་དངོས་པོ་ཐམས་ཅད་རྟོགས་པར་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ལ་སོགས་པས་ཡིད་བཞིན་གྱི་ནོར་བུ་སེམས་ཅན་ཐམས་ཅད་ལ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་མངོན་པའི་ང་རྒྱལ་མེད་པས། སྦྱིན་པ་པོ་དང་སྦྱིན་པར་བྱ་བ་དང༌། ལེན་བ་མི་ལྟོས་པས་སེམས་ཅན་ཐམས་ཅད་ལ་འདོད་པའི་འབྲས་བུ་སྟེར་བ་དེ་བཞིན་དུ་སྒྱུ་མ་ལྟ་བུའི་སྐུ་དང་ཞི་བ་ལ་སོགས་པའི་ཕྲིན་ལས་གང་ཡིན་པ་དེ་དག་འོད་གསལ་བའི་ངོ་བོ་རྡོ་རྗེ་འཆང་ཆེན་པོ་ལས་འབྱུང་བ་ཡིན་ནོ། །བཅོམ་ལྡན་འདས་ཞེས་བྱ་བ་ནས་རྨད་དུ་བྱུང་བའོ་ཞེས་པའི་བར་དུ་ནི་ཤིན་ཏུ་ཟབ་བའི་ཆོས་ཐོས་པས་མི་བསྐྱོད་པ་ལ་སོགས་པ་རྣམས་ཀྱིས་ངོ་མཚར་གྱི་སྤྱན་རྒྱས་པ་དང་འོད་གསལ་བ་ལས་བྱུང་བའི་སྒྱུ་མའི་སྐུ་ལ་ཆེད་དུ་བརྗོད་པ་ཉིད་བསྟན་ཏོ། །དེ་ནས་ཞེས་བྱ་བ་ནས་ཞུས་པའོ་ཞེས་པའི་བར་དུ་ནི་བཅོམ་ལྡན་འདས་ཀྱི་ཞབས་ལ་ཕྱག་འཚལ་བ་སྔོན་དུ་འགྲོ་བར་རུ་རུ་ཕུ་རུ་ཞེས་བྱ་བ་ལ་སོགས་པ་སྔར་གསུངས་པའི་སྔགས་དེ་དང་རྗེས་སུ་མཐུན་པའི་ཏིང་ངེ་འཛིན་དང་སྔགས་དང་ཏིང་ངེ་འཛིན་དག་གིས་བསྒྲུབ་པར་བྱ་བ་ལ་སོགས་པ་ལས་ཀྱི་ཁྱད་པར་གང་ཡིན་པ་དེ་དག་ལས་བྱུང་ཞེས་ཞུས་པ་བསྟན་ཏོ། །ལན་དེ་ཞེས་བྱ་བ་ནས་ངོ་བོ་ཉིད་མེད་པར་གྲུབ་པའོ་ཞེས་པའི་བར་དུ་ནི་དོན་དམ་པའི་ཕྱོགས་ལ་བརྟེན་ཏེ། སྔགས་དང་ཏིང་ངེ་འཛིན་དང་ལས་ཀྱི་ཚོགས་རྣམས་གང་དུ་ཡང་མི་གནས་གང་ལས་ཀྱང་མ་བྱུང་ཞེས་བསྟན་ཏོ། །འོན་ཀྱང་ཞེས་བྱ་བ་ནས། དམིགས་སུ་ཡོད་དོ་ཞེ་ན་ཞེས་པའི་བར་དུ་ནི་ཀུན་རྫོབ་ཀྱི་བདེན་པའི་བདག་ཉིད་ཅན་སྐུ་ལ་
སོགས་པ་དང་དེ་ལ་དམིགས་པའི་སྔགས་དང་ཏིང་ངེ་འཛིན་དང་ལས་རྣམས་ཀུན་རྫོབ་ཏུ་ཡོད་དེ་ཞེས་བསྟན་ཏོ། །འདི་སྐད་བཤད་པ་ཡིན་ཏེ་རིམ་པ་གཉིས་ཀྱི་སྐུ་ལ་དམིགས་ནས་དེ་དག་ཐམས་ཅད་བསྒྲུབ་པར་བྱའོ། །དོན་དམ་པར་སྐུ་ནི་སྐུ་མ་ཡིན་ནོ། །དེ་བཟློག་པར་བྱ་བ་ཞེས་པ་ནས་རྟེན་དང་བརྟེན་པ་དགག་པའོ་ཞེས་བྱ་བའི་བར་དུ་ནི་དོན་དམ་པའི་ཕྱོགས་ལ་བརྟེན་ཏེ། ལུས་ལ་སོགས་པ་ཡོད་པ་མ་ཡིན་པ་དང༌། འདོད་པའི་ཁམས་ལ་སོགས་པ་ལ་མི་གནས་པ་དང༌། སེམས་ནི་ལུས་ལ་མི་གནས་སོ་ཞེས་པ་ལ་སོགས་པ་ཕན་ཚུན་རྟེན་དང་བརྟེན་པ་ཉིད་མེད་པ་སྟེ། ངོ་བོ་མེད་པའི་ཕྱིར་ནམ་མཁའ་བཞིན་ནོ་ཞེས་བསྟན་ཏོ། །དེ་ནས་ཞེས་བྱ་བ་ནས་བདག་ཉིད་ལ་གནས་སོ་ཞེས་བྱ་བའི་བར་དུ་ནི་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་གང་དུ་གནས་ཞེས་ཞུས་པ་ལ་ཡིད་ཀྱི་རང་བཞིན་གྱི་ལུས་ལ་གནས་སོ་ཞེས་ལན་ནོ། །ཡང་ལུས་ལ་སོགས་པ་སོ་སོར་སྣང་བའི་སེམས་གང་དུ་གནས་ཞེས་ཞུས་པ་ལ། ནམ་མཁའ་ལྟ་བུ་འོད་གསལ་བ་ལ་གནས་པ་ཞེས་ལན་བསྟན་པ་དང༌། འོད་གསལ་བ་ནི་གང་དུ་གནས་ཞེས་ཞུས་པ་ལ་གང་དུ་འང་མི་གནས་བདག་ཉིད་ལ་གནས་ཏེ་ཆོས་ཉིད་ཡིན་པས་ན་འོད་གསལ་བ་ནི་ཐམས་ཅད་ལ་གནས་སོ་ཞེས་བསྟན་ཏོ། །ཇི་སྐད་དུ། བུ་རམ་མངར་བ་མེ་དྲོ་བ། །ཇི་ལྟར་རང་བཞིན་ཡིན་པ་སྟེ། །ཆོས་ཀུན་ལ་ནི་སྟོང་པ་ཉིད། །དེ་ལྟ་བུ་ནི་རང་བཞིན་འདོད། །རྣམ་པ་དུ་མས་ཐ་དད་པ། དངོས་པོ་རྣམས་ནི་གོས་དང་འདྲ། སྟོང་པ་ཉིད་མེས་བསྲེགས་གྱུར་ན། །ཐལ་བའི་དབྱེ་བ་གང་ཡང་མེད། །ལྟ་བ་ཀུན་གྱིས་བྱས་བ་རྣམས། །སྟོང་པ་ཉིད་ནི་མཐའ་ཕྱིར་བསྟན། །ཞེས་འབྱུང་བས་སོ། །དེ་ནས་ཞེས་བྱ་བ་ནས་མི་སྨྲ་བར་གྱུར་པའོ་ཞེས་པའི་བར་དུ་ནི་ཤིན་ཏུ་ཟབ་པའི་དོན་ཐོས་ནས་རྒྱུ་དང་འབྲས་བུ་དག་ལ་ངོ་མཚར་བ་རྨད་དུ་གྱུར་བ་ཉིད་ཐོབ་ནས་དེ་བསམ་པ་དང་བསྒོམ་པའི་ནུས་པ་རྩེ་གཅིག་པ་ཉིད་ཀྱིས་དོན་དེ་ཉིད་དམིགས་པས་ཅང་མི་སྨྲེ་བར་གྱུར་ཏོ་ཞེས་བསྟན་ཏོ། །རྒྱུ་བ་དང་ཞེས་བྱ་བ་ལ་སོགས་པས་དངོས་པོ་ཐམས་ཅད་ཀྱི་རང་བཞིན་གྱི་རྡོ་རྗེ་འཆང་དང་ཞིབ་ལ་སོགས་པའི་ལས་ཀྱི་ཚོགས་
དང༌། དེ་སྟོན་པར་བྱེད་པའི་གཞུང་གི་ཚོགས་ཀྱི་ལེའུ་ཡིན་ནོ་ཞེས་བསྟན་ཏོ། །དགོངས་པས་བཤད་པའོ་ཞེས་པ་ནི་ཤིན་ཏུ་གསལ་བའི་དེ་ཁོ་ན་ཉིད་འགལ་བའི་ཚིག་གི་སྒོ་ནས་སོ་སོར་བསྟན་པས་སོ། །སྒྲོན་མ་གསལ་བར་བྱེད་པའི་འགྲེལ་བའི་ཊཱི་ཀཱ་ལས་ལེའུ་བཅྭ་ལྔ་པའི་རྒྱ་ཆེར་བཤད་པའོ།། །།