ལེའུ་བཅུ་དྲུག་པ། དངོས་གྲུབ་ཐམས་ཅད་ཀྱི་དཀྱིལ་འཁོར་རྡོ་རྗེ་མངོན་པར་རྫོགས་པར་བྱང་ཆུབ་པ་ཞེས་བྱ་བའི་རྒྱ་ཆེར་བཤད་པ།
སྔར་བཤད་པའི་ཞེས་བྱ་བ་ལ་སོགས་པས་ལེའུ་བཅུ་དྲུག་པའི་བཤད་པ་བརྩམ་པར་བྱ་སྟེ། སྔར་བཤད་པའི་མཚན་ཉིད་ནི་ལེའུ་བཅུ་གསུམ་པ་ལས་གསུངས་པའོ། །དངོས་གྲུབ་ཐམས་ཅད་ཅེས་པ་ནི་འཇིག་རྟེན་པ་དང་འཇིག་རྟེན་ལས་འདས་པ་སྟེ་ཞིབ་ལ་སོགས་པ་དང༌། ཁམས་ལ་སྤྱོད་པ་ལ་སོགས་པའོ། །དེ་རྣམས་དཀྱིལ་འཁོར་དུ་དབང་བསྐུར་བ་ཉིད་ལ་ཞེས་པ་ནི་སྐུ་དང་གསུང་གི་དཀྱིལ་འཁོར་དག་གི་དབུས་སུ་རྡོ་རྗེ་སློབ་དཔོན་གྱིས་ཡང་དག་པར་དབང་བསྐུར་བ་ཉིད་ལ་འགྲུབ་པར་འགྱུར་རོ་ཞེས་བྱ་བའི་ཞེས་བསྟན་པར་བྱ་བའི་ཕྱིར་ཞེས་པ་ནི་བསྟན་པའི་ཕྱིར་རོ། །སློབ་མ་སྣོད་དུ་བྱ་བའི་དོན་དུ་ཞེས་པ་ནི་སྣོད་དུ་གྱུར་པ་བསྐྱེད་པའི་ཕྱིར་རོ། །དཀྱིལ་འཁོར་ཞེས་པ་ནི་སྐུ་དང་གསུང་དང་ཐུགས་ཀྱི་དཀྱིལ་འཁོར་བསྒྲུབ་པ་ནི་དེ་ལས་ཉེ་བར་དགོངས་པ་སྟེ་དེའི་ཐབས་སུ་གྱུར་བ་ལ་ལེའུ་བཅུ་དྲུག་པ་བརྩམ་པར་བྱའོ། །དགོངས་པ་ནི་འདི་ཡིན་ཏེ། རེ་ཞིག་ལེའུ་བཞི་པ་ལས་ཐུགས་ཀྱི་དཀྱིལ་འཁོར་གྱི་ཆོ་ག་བསྟན་ཏོ། །འདིར་ནི་སྐུ་དང་གསུང་གི་དཀྱིལ་འཁོར་དག་བསྟན་པར་བྱའོ། །དེ་ནས་གང་ཞིག་དབུས་ཀྱི་བདག་པོར་གྱུར་པ་དེས་ཡང་དེའི་དཀྱིལ་འཁོར་ཡིན་ནོ་ཞེས་རིན་ཆེན་འབྱུང་ལྡན་དང་དོན་ཡོད་གྲུབ་པའི་དཀྱིལ་འཁོར་རྟོགས་པར་བྱའོ། །དེ་དག་ཐམས་ཅད་གཅིག་ཏུ་བསྡུས་ནས་སུམ་ཅུ་རྩ་གཉིས་ཀྱི་བདག་ཉིད་ཀྱི་དཀྱིལ་འཁོར་སུམ་ཅུ་རྩ་གཉིས་རྟོགས་པར་བྱའོ། །དགོངས་པ་གཅིག་ཏུ་གྱུར་ནས་ཞེས་པ་ནི་བསམ་པ་གཅིག་ཏུ་གྱུར་ནས་སོ། །རྡོ་རྗེ་འཆང་ཆེན་པོ་ལ་ཞེས་བྱ་བ་ནས་ལྷག་མའོ་ཞེས་བྱ་བའི་བར་དུ་ནི་དཀྱིལ་འཁོར་གྱི་ཆོ་ག་ཐོས་པའི་དོན་དུ་ནི། དེ་བཞིན་གཤེགས་པ་ཀུན་ཞི་བ། །ཞེས་བྱ་བ་ལ་སོགས་པ་ཚིགས་སུ་བཅད་ལས་གསོལ་བ་འདེབས་པ་དང༌། མི་བསྐྱོད་རྡོ་རྗེ་ཞེས་བྱ་བ་ལ་སོགས་པའི་བསྟོད་པས་
བསྟོད་ཅིང་ཕྱིའི་མེ་ཏོག་ལ་སོགས་པ་དང༌། ནང་གི་བདུད་རྩི་ལྔ་ལ་སོགས་པ་དང༌། གང་བ་ནི་ཡུམ་རེག་བྱ་རྡོ་རྗེ་མ་ལ་སོགས་པ་དང་སྙོམས་པར་ཞུགས་པའི་བདེ་བས་མཆོད་པར་འགྱུར་རོ་ཞེས་བསྟན་ཏོ། །རྡོ་རྗེ་ཐམས་ཅད་ཅེས་བྱ་བ་ནས་ཕྱུང་པའོ་ཞེས་པའི་བར་དུ་ནི་སྐུའི་དཀྱིལ་འཁོར་གྱི་ཏིང་ངེ་འཛིན་ལ་སྙོམས་པར་ཞུགས་ནས་སྐུའི་དཀྱིལ་འཁོར་གྱི་ཆོ་ག་བསྟན་པར་བྱ་སྟེ། དེ་ནས་ཞེས་བྱ་བ་ནས་དངོས་གྲུབ་ཐམས་ཅད་སྩོལ་བའོ་ཞེས་པའི་བར་དུ་ནི་བཅོམ་ལྡན་འདས་ཀྱི་དེ་བཞིན་གཤེགས་པ་རྣམས་ལ་བསྟན་པ་རྩོལ་བ་བསྟན་ཏོ། །རྣམ་པར་སྣང་མཛད་ཀྱི་དཀྱིལ་འཁོར་ནི་སྐུ་རྡོ་རྗེའི་དཀྱིལ་འཁོར་རོ། །དངོས་གྲུབ་ཐམས་ཅད་སྩོལ་བ་ཞེས་པ་ནི་ཞི་བ་ལ་སོགས་པའི་དངོས་གྲུབ་སྟེར་བའོ། །མི་བསྐྱོད་པའི་དཀྱིལ་འཁོར་དང་འདྲ་བའོ་ཞེས་པ་ནི་ལེའུ་བཞི་པ་ལས་གསུངས་པའི་ཐུགས་ཀྱི་དཀྱིལ་འཁོར་དང་འདྲ་བའོ་ཞེས་བྱའོ། །དེ་ཉིད་བསྟན་པར་བྱ་བའི་ཕྱིར། གྲུ་བཞི་ལ་སོགས་པའི་ཡོན་ཏན་གྱིས་ཞེས་སྨོས་སོ། །སོགས་པའི་སྒྲས་ནི་སྒོ་བཞི་དང་རྟ་བབས་བཞི་ལ་སོགས་པ་དང་བཅས་པའི་མཆོག་ཏུ་གྱུར་པས་ཞེས་པ་ནི་བྱ་བ་ལ་སོགས་པའི་རྒྱུད་ཀྱི་དཀྱིལ་འཁོར་ལ་ལྟོས་པས་སོ། །ཁྲུ་ནི་བཅུ་དྲུག་ཅེས་པ་ནི་སའི་ཁམས་ནི་ཁམས་བཞིའི་ངོ་བོའི་ཆ་ཤས་ལ་ལྟོས་པས་གྲངས་བཅུད་རུག་ཡིན་པས་སོ། །ཟུར་བཞི་ལ་ལྟོས་པ་སྟེ་ཞེས་པ་ནི་ཁ་ཅིག་ན་རེ་ཀུན་དུ་ངོས་རེ་རེ་ཁུ་བཅུ་དྲུག་པ་བྱའོ་ཞེས་ཟེར་རོ། །དེ་ཡང་ཕུན་སུམ་ཚོགས་པ་དང་ལྡན་པའི་རྒྱལ་པོ་དང་བློན་པོ་དང་ཁྱིམ་བདག་རྣམས་ལ་བྱའོ། །ཐ་མལ་པ་རྣམས་ལ་ཕྱོགས་བཞི་ལ་ལྟོས་པས་སོ། །ཟླུམ་པོ་མ་ཡིན་ཞེས་བྱ་བ་ནི་ཕྱིའི་དཀྱིལ་འཁོར་བཀག་པའོ། །ནང་གི་དཀྱིལ་འཁོར་ནི་ཟླུམ་པོ་ཁོ་ན་ཞེས་དགོངས་པའོ། །དྲི་མ་མེད་པའི་ཚོན་ཞེས་པ་ནི་ཚོན་དག་པས་སོ། །སངས་རྒྱས་ཀུན་གྱིས་ཞེས་པ་ནི་སྤྲུལ་པར་འགྱུར་བའོ། །དེ་བཞིན་གཤེགས་པ་ཐམས་ཅད་ཀྱི་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་རྡོ་རྗེ་འཆང་གིས་སོ། །རབ་ཏུ་བསྔགས་པ་ཞེས་པ་ནི་བསྟན་པའོ། །བདག་པོ་ཉིད་ཀྱིས་མཛེས་པར་གྱུར་པ་ནི་གཙོ་བོས་བརྒྱན་པ་སྟེ། སྐུ་རྡོ་རྗེའི་
གཙོ་བོ་དཀྱིལ་འཁོར་ཡིན་པས་སོ། །ནང་དུ་ནི་ཕྱིའི་དཀྱིལ་འཁོར་བཀག་པའོ། །ཆོ་ག་ནི་ཞེས་བྱ་བ་ལ་སོགས་པས་དེ་ཁོ་ན་ཉིད་འདུས་པ་ལས་གསུངས་པའི་ཇི་ལྟར་དཀྱིལ་འཁོར་གྱི་ཆོ་ག་དེ་གཟུང་བ་ལ་རྩོལ་བའི་བློས། སྐུའི་དཀྱིལ་འཁོར་དང་འཆད་བར་འགྱུར་བའི་གསུང་གི་དཀྱིལ་འཁོར་ཡང་བྲི་བར་བྱའོ་ཞེས་བསྟན་ཏོ། །དེ་ཡང་ལེའུ་བཞི་པ་ལས་རྒྱས་པར་བསྟན་པས་ན་འདིར་མ་བཤད་དོ། །ཞར་ལ་འོག་ཏུ་ཡང་ཅུང་ཟད་བཤད་པར་བྱའོ། །དེ་ལྟར་དཀྱིལ་འཁོར་བྲིས་ནས་ཞེས་བྱ་བ་ལ་སོགས་པས་གཞིའི་དཀྱིལ་འཁོར་བྲིས་ཏེ། གཞི་ཅན་གྱི་དཀྱིལ་འཁོར་རྣམ་པར་སྣང་མཛད་ཀྱི་བདག་པོ་ལྷ་སུམ་ཅུ་རྩ་གཉིས་ཀྱིས་བསྐོར་བ་བྲི་བར་བྱའོ་ཞེས་བསྟན་ཏོ། །སློབ་དཔོན་ཏེ་ཞེས་པ་ནི་དེ་ཁོ་ན་ཉིད་བཅུ་མཁྱེན་པས་སོ། །དེ་ཁོ་ན་ཉིད་བཅུ་ནི། དཀྱིལ་འཁོར་ཏིང་ངེ་འཛིན་དང་ཕྱག་རྒྱ་དང༌། །སྔགས་དང་བྱེད་དང་འདུག་སྔགས་སྦྱིན་སྲེག་དང༌། །སྔགས་དང་ཕྱག་རྒྱ་དེས་བྱ་འདུས་པ་ནི། །སྔགས་ཀྱི་ཚུལ་ལ་དེ་ཉིད་བཅུ་བསྟན་ཏོ། །ཞེས་འབྱུང་ངོ༌། །རྡོ་རྗེ་པདྨ་ཡང་དག་པར་འདུས་པར་ཞེས་བྱ་བ་ནས་སྐུའི་དཀྱིལ་འཁོར་འདི་ཡིན་ནོ་ཞེས་པའི་བར་དུ་ནི་རབ་ཏུ་གནས་པའི་ཆོ་ག་དང་མཆོད་པའི་ཆོ་ག་དང་སློབ་མ་འཇུག་པ་དང༌། ལྷག་པར་གནས་པ་དང་དབང་བསྐུར་བ་ལ་སོགས་པ་བྱས་ནས་པདྨ་དང་རྡོ་རྗེ་སྙོམས་པར་ཞུགས་པའི་མཚན་ཉིད་ཀྱི་གསང་བའི་མཆོད་པས་མཆོད་ལ་བདུད་རྩི་ལྔ་དང་ལྕགས་ཀྱུ་ལྔས་སྐུའི་དཀྱིལ་འཁོར་མཆོད་པར་བྱའོ་ཞེས་བསྟན་ཏོ། །དེ་ནས་ཞེས་བྱ་བ་ནས་དེ་སྟོན་པའོ་ཞེས་པའི་བར་དུ་ནི་གསུང་གི་དཀྱིལ་འཁོར་བསྟན་པའི་ཕྱིར་འོད་དཔག་ཏུ་མེད་པའི་ཏིང་ངེ་འཛིན་ལ་སྙོམས་པར་ཞུགས་པ་བཅོམ་ལྡན་འདས་ཀྱིས་བསྟན་པའི་ཕྱིར་རོ། །ཁྲུ་ཉི་ཤུ་ཞེས་པ་ནི་རྣམ་པ་བཞིའི་ངག་རེ་རེ་རྣམ་པར་ཤེས་པ་ལྔ་ལས་བྱུང་བའི་རྣམ་པར་དག་པའི་ངོ་བོ་ཡིན་པས་སོ། །ངོས་རེ་རེ་ཞིང་ཁྲུ་ལྔ་ལྔ་ཞེས་པ་ནི་ཐ་མལ་པ་རྣམས་ཀྱིའོ། །འབྱོར་པ་ཚོགས་ན་ཕྱོགས་རེ་རེར་ཁྲུ་ཉི་ཤུ་རྒྱལ་པོ་ལ་སོགས་པ་ལ་བྱའོ། །དེ་བཞིན་གཤེགས་པ་ལྔའི་ཁ་དོག་གིས་ཞེས་བྱ་བ་ལ་སོགས་པས་སྔར་བཤད་
པའི་མཚན་ཉིད་ཀྱི་ཐིག་སྐུད་ཀྱིས་དབུས་ཀྱི་དཀྱིལ་འཁོར་ཟླུམ་པོ་པདྨའི་ཕྲེང་བས་བསྐོར་བ། རིགས་དང་རྗེས་སུ་མཐུན་པ་བྲི་བར་བྱའོ་ཞེས་བསྟན་ཏོ། །དཀྱིལ་འཁོར་དེར་ཞེས་བྱ་བ་ནས་དགྱེས་པར་འགྱུར་ཞེས་པའི་བར་དུ་ནི་གཞིའི་དཀྱིལ་འཁོར་རྫོགས་ན་གཞི་ཅན་གྱི་དཀྱིལ་འཁོར་འོད་དཔག་ཏུ་མེད་པ་བདག་པོ་ལྷ་སུམ་ཅུ་རྩ་གཉིས་ཀྱིས་བསྐོར་བར་བྱའོ། །དེའི་ཚེ་དེ་བཞིན་གཤེགས་པ་རྣམས་མཉེས་པར་འགྱུར་བ་དང༌། དཀྱིལ་འཁོར་ལ་བྱིན་གྱིས་བརླབ་པར་འགྱུར་རོ་ཞེས་བསྟན་ཏོ། །བཤད་གཅིག་ཞེས་བྱ་བ་ནས་འོད་དཔག་ཏུ་མེད་པའི་དཀྱིལ་འཁོར་རོ་ཞེས་བའི་བར་དུ་ནི་སྔ་མ་བཞིན་དུ་རབ་ཏུ་གནས་པ་ལ་སོགས་པ་བྱས་ནས་བདུད་རྩི་ལྔ་དང་ལྕགས་ཀྱུ་ལ་སོགས་པས་བདག་ཉི་དང་སློབ་མ་དང་དཀྱིལ་འཁོར་པ་རྣམས་ཚིམ་པར་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ནས་ཚུལ་བསྟན་པར་བྱ་བའི་ཕྱིར་ཞེས་བྱ་བའི་བར་དུ་ནི་ལེའུ་བཞི་པ་ལ་གསུངས་པའི་ཐུགས་ཀྱི་དཀྱིལ་འཁོར་དང་བཅས་པ་སྐུ་གསུང་ཐུགས་ཀྱི་དཀྱིལ་འཁོར་བསྟན་པ་དང་དེའི་འོག་ཏུ་རིན་ཆེན་འབྱུང་ལྡན་དང་དོན་ཡོད་གྲུབ་པ་དང༌། དཀྱིལ་འཁོར་པ་སུམ་ཅུ་རྩ་གཉིས་ཀྱི་ནང་ན་གང་ཡང་རུང་བའི་དབུས་ཀྱི་གཙོ་བོ་ཡིན་ན་དེའི་དཀྱིལ་འཁོར་ཡིན་ནོ་ཞེས་བསྟན་ཏོ། །དེ་ལྟར་ལྷ་སུམ་ཅུ་རྩ་གཉིས་བདག་ཉིད་ཅན་གྱི་དཀྱིལ་འཁོར་སུམ་ཅུ་རྩ་གཉིས་གཅིག་ཏུ་བསྡུས་ནས་ལྷ་སྟོང་ཕྲག་གཅིག་དང་ཉི་ཤུ་རྩ་བཞིར་འགྱུར་རོ། །དེ་ནས་ཞེས་བྱ་བ་ནས། སྐུ་ལ་སོགས་པ་ཕྱུང་ངོ་ཞེས་པའི་བར་དུ་ནི་རྣམ་པ་སྣ་ཚོགས་པའི་དཀྱིལ་འཁོར་པ་རྣམས་སྤྲོས་པས་འགྲོ་བའི་དོན་བྱས་པའི་ཏིང་ངེ་འཛིན་ལ་སྙོམས་པར་ཞུགས་ནས་བཅོམ་ལྡན་འདས་ཀྱིས་དོན་དེ་ཉིད་གསུངས་སོ་ཞེས་བསྟན་ཏོ། །རྡོ་རྗེ་འཛིན་པ་ཞེས་བྱ་བ་ནས་དེའི་ནང་དུ་འདུས་པ་ཡིན་ནོ་ཞེས་པའི་བར་དུ་ནི་རེ་ཞིག་སྐུ་ལ་སོགས་པ་རྣམ་པར་དག་པས་གཙོ་བོར་གྱུར་པའི་དཀྱིལ་འཁོར་གསུམ་བྱས་ཏེ། འོན་ཀྱང་རིན་ཆེན་འབྱུང་ལྡན་དང་དོན་ཡོད་གྲུབ་པའི་རིགས་དེའི་ནང་དུ་འདུས་པར་འགྱུར་རོ། །དེ་ལ་གལ་ཏེ་ང་རྒྱལ་གཏི་མུག་ལས་བྱུང་བ་ཡིན་ན་དེའི་ཚེ་རྣམ་པར་སྣང་མཛད་ཀྱི་རིགས་ཀྱི་ནང་དུ་བསྡུས་སོ། །གལ་ཏེ་དེ་ཉིད་
ཞེ་སྡང་ལས་བྱུང་ན་དེའི་ཚེ་མི་བསྐྱོད་པའི་རིགས་ཀྱི་ནང་དུ་བསྡུས་སོ། །ཕྲག་དོག་ནི་ཞེ་སྡང་ལས་བྱུང་བས་ན་ཐུགས་རྡོ་རྗེའི་རིགས་ཀྱི་ནང་དུ་དོན་ཡོད་གྲུབ་པས་བསྡུས་སོ། །དེ་ལྟར་སྐུ་གསུང་ཐུགས་ཀྱི་རྡོ་རྗེའི་རིགས་གསུམ་ལ་བརྟེན་ནས་དཀྱིལ་འཁོར་སུམ་ཅུ་རྩ་གཉིས་དེའི་རང་བཞིན་དུ་ཤེས་པར་བྱའོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ནས་དེ་ལ་དེ་སྐད་ཅེས་བྱའོ་ཞེས་པའི་བར་དུ་ནི་སྐུ་རྡོ་རྗེ་ལ་སོགས་པའི་དཀྱིལ་འཁོར་གསུམ་ཉེ་བར་བསྡུས་པ་བསྟན་ཏོ། །དེ་ནས་ཞེས་བྱ་བ་ནས་ཕྱུང་ཞིང་གསུངས་སོ་ཞེས་བྱ་བའི་བར་དུ་ནི་གཞིའི་དཀྱིལ་འཁོར་རྫོགས་པར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་པ་ཉིད་དུ་བསྟན་ཏོ། །སྐུ་ལ་སོགས་པའི་གསང་བ་ནི་རྣམ་པ་གསུམ་གྱི་དཀྱིལ་འཁོར་ལའོ། །དེ་བཞིན་གཤེགས་པའི་འཁོར་ལོ་ཞེས་པ་ནི་བདག་པོ་དང་བཅས་པའི་དཀྱིལ་འཁོར་བའི་ཚོགས་སོ། །སེམས་དགའ་བར་བྱེད་པ་ཞེས་པ་ནི་དེ་རྣམས་མངོན་དུ་བྱེད་པའོ། །དེ་ཉིད་ལྷ་ཡིན་པས་ཞེས་པ་ནི་བརྗོད་པར་བྱ་བ་དང་རྗོད་པ་དག་དབྱེར་མེད་པའི་ཕྱིར་རོ། །དཀྱིལ་འཁོར་གསུམ་པོ་ཐིག་གདབ་པ་ནི་དབྱེ་བ་བསྐྱེད་པ་ལ་ཉེ་བར་དགོངས་པས་ཐིག་ཅེས་བྱའོ། །མི་འཇིགས་པ་ཞེས་པ་ནི་ནུས་པ་མ་ཉམས་པ་སྟེ། རང་གི་ནུས་པ་ལས་མི་འགྱུར་བའི་ཕྱིར་རོ། །སྔགས་ཐམས་ཅད་ཀྱི་ཞེས་པ་ནི་སྙིང་པོ་དང་ཉེ་བའི་སྙིང་པོ་བསྐུལ་བ་དང་རིགས་སྔགས་དང་གཟུངས་སྔགས་དང༌། ཕྲེད་པའི་སྔགས་དང་ས་བོན་དང་ཆོས་ཀྱི་ཡི་གེ་དང་སྦྲུལ་དང་མགོ་མེད་དང་མཐའ་མེད་དང་བསྡུ་བ་ལ་སོགས་པ་རྣམས་སོ། །གནས་སུ་གྱུར་པ་ནི་བསྡུ་བར་གྱུར་པས་ན་ཐ་ཚིག་གོ །དེ་ཡང་སྔར་བཤད་ཟིན་ཏོ། །ཨོཾ་ཨཱཿ་ཧཱུཾ་ཞེས་བྱ་བ་ནི་དཔེ་བསྟན་པའོ། །རྡོ་རྗེ་ཞེས་བྱ་བ་ལ་སོགས་པ་ནས་དགོངས་སོ་ཞེས་བྱ་བའི་བར་དུ་ནི་ཡི་གེ་གསུམ་གྱིས་བྱིན་གྱིས་བརླབས་པའི་སྲད་བུས་ཨ་ནུ་ག་ཏ་དང་ཞེས་བྱ་བ་ལ་སོགས་པའི་སྔགས་ཀྱིས་བསྒྲིལ་ལ་ནམ་མཁའ་ལ་ཞུགས་པའི་དེ་བཞིན་གཤེགས་པ་དང་གཅིག་ཏུ་བྱས་ཏེ། དེ་བཞིན་གཤེགས་པ་ལྔའི་རང་བཞིན་གྱི་ཐིག་སྐུད་ཀྱིས་དཀྱིལ་འཁོར་ལ་ཐིག་གདབ་པ་དང༌། དེ་བཞིན་དུ་ཁ་དོག་ལྔ་དང་ལྡན་པའི་རྡུལ་ཚོན་དབྱེ་བར་བྱའོ། །
འདུས་པ་ལས་གསུངས་པའི་ཆོ་ག་བྱ་བ་ཡིན་གྱི་གཞན་དུ་ན་དངོས་གྲུབ་མི་འགྱུར་རོ་ཞེས་བསྟན་ཏོ། །དེ་བས་ཞེས་བྱ་བ་ནས་བསྒྲུབ་པར་བྱའོ་ཞེས་པའི་བར་དུ་ནི་རྡོ་རྗེ་སློབ་དཔོན་གྱིས་ལྷན་ཅིག་སྤྱོད་པ་དམ་ཚིག་གི་ཕྱག་རྒྱ་ལྟ་མོའི་གཟུགས་སུ་བསྐྱེད་དེ་རིགས་ལྔས་ཁྱབ་པར་བྱས་ལ་དེ་དང་ལྷན་ཅིག་ཏུ་དཀྱིལ་འཁོར་ལ་ཐིག་གདབ་པར་བྱའོ་ཞེས་བསྟན་ཏོ། །དེ་ལྟར་ཐུན་མོང་གི་ཞེས་བྱ་བ་ནས་སྡུད་པར་བྱེད་པའི་ཚིག་གོ་ཞེས་པའི་བར་དུ་ནི་སྐུ་ལ་སོགས་པའི་དཀྱིལ་འཁོར་གསུམ་བྲི་བར་འདོད་པའི་སྔགས་པ་རྣམས་ཀྱིས་བསྐྱེད་པའི་རིམ་བས་རྣམ་པར་སྣང་མཛད་དང་མི་བསྐྱོད་པ་དང་འོད་དཔག་ཏུ་མེད་བའི་གཟུགས་སུ་བདག་ཉིད་བསྐྱེད་ལ། དམ་ཚིག་གི་ཕྱག་རྒྱ་རྣམས་ཀྱང་སྤྱན་མ་དང་གོས་དཀར་མོ་དང་མཱ་མ་ཀཱིའི་གཟུགས་ཅན་སྔ་མ་བཞིན་དུ་རིགས་ལྔས་བྱིན་གྱིས་བརླབས་པར་བྱས་ལ། སྔ་མ་བཞིན་དུ་ཐིག་གདབ་བར་བྱའོ། །དེ་ལྟར་གྱུར་བའི་ཐུགས་རྡོ་རྗེ་ལ་སོགས་པས་སྒྲུབ་བ་པོ་དང་ཕྱག་རྒྱ་དག་གིས་ལུས་ལ་འཇུག་ཅིང༌། དེའི་གཟུགས་ཀྱིས་དཀྱིལ་འཁོར་བྲི་བར་བསྟན་ཏོ། །སྔགས་ཀྱི་དངོས་གྲུབ་ཅེས་བྱ་བ་ནས་རྫོགས་པར་བྱེད་པའོ་ཞེས་པའི་བར་དུ་ནི་དཀྱིལ་འཁོར་བྲི་བ་རྫོགས་པར་གྱུར་ན། རང་གི་སྙིང་ག་ནས་གནོད་མཛེས་ཀྱི་རྒྱལ་པོ་སྤྲོས་ལ། དེ་ལ་གསོལ་བ་གདབ་པ་སྔོན་དུ་འགྲོ་བར་དེ་བཞིན་གཤེགས་པ་རྣམས་དགུག་ཅིང་དཀྱིལ་འཁོར་བ་དང་གཅིག་ཏུ་བྱས་ཏེ། སྒོ་བཞི་ལ་ཕྱག་འཚལ་བ་སྔོན་དུ་འགྲོ་བར་ཁྲུས་ལ་སོགས་པ་རྫོགས་ནས། མཆོད་པ་རྣམ་པ་ལྔ་ཡིས་དུས་གསུམ་གྱི་དེ་བཞིན་གཤེགས་པ་དང་དབྱེར་མེད་པས་མཆོད་པར་བྱའོ། །དེའི་ཚེ་འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་ཐོབ་པར་འགྱུར་རོ་ཞེས་བསྟན་ཏོ། །སྔགས་ཐམས་ཅད་ཅེས་བྱ་བ་ནས་བྱ་བར་དགོངས་སོ་ཞེས་བའི་བར་དུ་ནི་དཀྱིལ་འཁོར་དེ་ཉིད་ལ་མཆོད་པའི་དུས་སུ་རྡོ་རྗེ་སློབ་དཔོན་དང་རྡོ་རྗེའི་སྤུན་དང༌། དགེ་སློང་དང་དགེ་ཚུལ་དང་དགེ་བསྙེན་དང་རྣལ་འབྱོར་པ་དམ་ཚིག་ཅན་དེ་ལ་གནས་བ་གང་ཡིན་པ་དེ་རྣམས་བཤད་བ་ལ་སོགས་པའི་སྒྲས་བརྡར་བྱས་བའི་འདོད་པའི་ཡོན་ཏན་ལྡས་མཆོད་པར་བྱའོ། །དེ་མེད་ན་དགག་པའི་མྱ་ངན་གཅོད་པའི་
ཆང་གིས་ཚིམ་པར་བྱའོ། །ད་ནི་ནང་གི་སྦྱིན་སྲེག་དང་འདའ་བར་དཀའ་བའི་དམ་ཚིག་དང་སྡོམ་པ་དེ་ཉིད་ཡིན་ནོ། །དེས་ནི་ཚོགས་ཀྱི་འཁོར་ལོའི་ཆོ་ག་བསྒྲུབ་པར་བྱའོ་ཞེས་བསྟན་ཏེ་དེ་ཡང་སྔར་བཤད་ཟིན་པའོ། །དེ་ལྟར་ལེགས་པར་བསླབས་པའི་ཕྱག་རྒྱ་ཞེས་བྱ་བ་ནས་ཤེས་པར་བྱའོ་ཞེས་བྱ་བའི་བར་དུ་ནི་གང་གི་ཚེ་དཀྱིལ་འཁོར་གསུམ་འདྲི་བར་འདོད་པའི་རྣལ་འབྱོར་པས་ཕྱག་རྒྱ་མེད་ན་དེའི་ཚེ་བདག་ཉིད་སྐུའི་དཀྱིལ་འཁོར་བྲི་བའི་དུས་སུ་རྣམ་པར་སྣང་མཛད་བསྒོམས་ལ། སློབ་མ་རྡོ་རྗེ་སེམས་དཔའ་འམ་བདུད་རྩི་འཁྱིལ་བར་བསམ་པར་བྱའོ། །དེ་བཞིན་དུ་གསུང་གི་དཀྱིལ་འཁོར་འདྲི་བར་འདོད་པས་བདག་ཉིད་འོད་དཔག་ཏུ་མེད་པར་བསྒོམས་ནས་སློབ་མས་རྣམ་པར་སྣང་མཛད་དམ་བདུད་རྩི་འཁྱིལ་བར་བསམ་པར་བྱའོ། །དེ་བཞིན་དུ་ཐུགས་ཀྱི་དཀྱིལ་འཁོར་བྲི་བར་འདོད་པས་བདག་ཉིད་མི་བསྐྱོད་པར་བསམས་ལ། སློབ་མ་འོད་དཔག་ཏུ་མེད་པ་འམ་བདུད་རྩི་འཁྱིལ་པར་བསམ་པར་བྱའོ་ཞེས་བསྟན་ཏོ། །སངས་རྒྱས་རྒྱལ་པོ་ཞེས་བྱ་བ་ནས་བགྲོད་པ་དམ་པའོ་ཞེས་བྱ་བའི་བར་དུ་ནི་ཁ་དོག་ལྔ་དང་ལྡན་པའི་ཐིག་སྐུད་རེ་རེ་སྣལ་མ་ལྔ་དང་ལྡན་པ། དེ་བཞིན་དུ་རྡུལ་ཚོན་རྣམས་ཀྱང་དེ་བཞིན་དུ་བྱས་ལ་དཀྱིལ་འཁོར་ལ་ཐིག་བཏབ་པ་དང་བྲི་བར་བྱའོ་ཞེས་བསྟན་ཏོ། །འདིར་གཙོ་བོ་དང་ཡོན་ཏན་པའི་ཚུལ་གྱིས་ཞེས་པ་ནི་དེ་ལ་ཐུགས་ཀྱི་རྡོ་རྗེ་འཆང་གཅིག་པུ་ཡང་རྣམ་པར་སྣང་མཛད་ལ་སོགས་པ་གཞན་རྣམ་པ་བཞི་དང་དབྱེར་མེད་པའི་ངོ་བོ་ཉིད་ཡིན་ཏེ། ཆོས་ཀྱི་དབྱིངས་ཀྱི་ཡེ་ཤེས་ལ་སོགས་པ་ནི་གཞན་གྱི་ཆ་དང་ལྡན་པའི་ཕྱིར་རོ། །དེ་ལ་གཙོ་བོ་ནི་ལས་ཁ་ཅིག་ཉོན་མོངས་པ་ལ་སོགས་པ་རྣམ་པར་དག་པ་ལ་བདག་པོ་ཉིད་དོ། །ཡོན་ཏན་པ་ནི་ཕྲིན་ལས་གཞན་མ་ལ་སོགས་པ་ལའོ། །དེའི་ནུས་པ་དེ་མེད་པ་མ་ཡིན་པ་སྟེ། ཡེ་ཤེས་ལྔ་ནི་ནུས་པ་ཐམས་ཅད་དང་ལྡན་པའི་ཕྱིར་རོ། །ཇི་སྐད་དུ། གདུལ་བྱའི་བསམ་པའི་དབྱེ་བ་ཡིས། །ཡོན་ཏན་པ་དང་གཙོ་བོར་བརྟགས། །སངས་རྒྱས་རྣམས་ཀྱི་ཡེ་ཤེས་ལྔ། །ནུས་པ་ཀུན་དང་ལྡན་པ་ཡིན། །ཞེས་འབྱུང་ངོ༌། །དཀྱིལ་འཁོར་བྲི་བའི་དུས་སུ་ཞེས་བྱ་བ་ནས་བགེགས་བྱེད་པར་མི་ནུས་ས་སོ་ཞེས་
བྱ་བའི་བར་དུ་ནི་གང་གི་ཚེ་དཀྱིལ་འཁོར་བྲི་བར་འདོད་པར་བརྩམས་ནས་ས་དང་ཆུ་དང་རླུང་དང་མེ་དང་ནམ་མཁས་བྱས་པའི་བགེགས་འབྱུང་བར་འགྱུར་ན་དེའི་ཚེ་བདག་ཉིད་རྡོ་རྗེ་ཧཱུཾ་མཛད་ཞལ་གསུམ་པ་ཕྱག་དྲུག་པ་སྐུ་མདོག་ནག་པོ་སྤྱན་གསུམ་པ་གཡས་པ་དང་གཡོན་པའི་ཞལ་དཀར་པོ་དང་དམར་པོ་མངའ་བ། རྡོ་རྗེ་དང་འཁོར་ལོ་དང་པདྨ་དང་དྲིལ་བུ་དང༌། ནོར་བུ་དང་རལ་གྲི་བསྣམས་པ་གཡོན་བརྐྱང་བ་མཆེ་བ་རྣམ་པར་གཙིགས་པ་བསྒོམས་ཏེ། རྡོ་རྗེ་ལྕགས་ཀྱུ་འགོད་པའི་རྐང་པ་དག་གིས་དཀྱིལ་འཁོར་གྱི་ས་གཞིའི་ཕྱོགས་ཀུན་དུ་འཁོར་བས་སྔགས་བརྗོད་ཅིང་ཡིད་ཀྱིས་ཆོས་ཐམས་ཅད་སྟོང་པ་ཉིད་དུ་བསྒོམས་ལ། རང་གི་ཕྱག་མཚན་ལས་འབྱུང་བའི་ར་བར་བའི་ཚོགས་ཀྱིས་བགེགས་དེ་རྣམས་བསྲེགས་ཤིང་ཐལ་བར་གྱུར་པར་བསམས་ལ་ཐལ་བ་ཡང་རླུང་དྲག་པོས་ཁྱེར་བར་གྱུར་པར་བསམ་པར་བྱའོ། །དེའི་ཚེ་བདེ་བས་དཀྱིལ་འཁོར་རྫོགས་པར་འགྱུར་རོ་ཞེས་བསྟན་ཏོ། །རྡོ་རྗེ་བུམ་པ་བཞག་པ་ཞེས་བྱ་བ་ནས་ཇི་ལྟ་བ་བཞིན་དུ་གཞག་པར་བྱའོ་ཞེས་པའི་བར་དུ་ནི་དེ་ཁོ་ན་ཉིད་འདུས་པའི་རྒྱུད་ལ་མངོན་པར་བརྩོན་པའི་སྒྲུབ་པ་པོས་རྣམ་པར་རྒྱལ་བ་ལ་སོགས་པའི་བུམ་པ་རྣམས་དཀྱིལ་འཁོར་བའི་གྲངས་ཀྱིས་སུམ་ཅུ་རྩ་གཉིས་དང༌། ལས་ཐམས་ཅད་པའི་བུམ་པ་དེ་མ་འཚོགས་ན་དེ་བཞིན་གཤེགས་པ་དང་ལྷ་མོའི་བུམ་པ་སྟེ་དགུ་དང༌། ལས་ཐམས་ཅད་ཀྱི་བུམ་པ་སྟེ་བཅུ་ལས་ཉུང་པར་མི་བྱའོ་ཞེས་བྱ་བ་གསུངས་པས་བསྡུས་པ་དེ་རྣམས་ཀྱང་མགྲིན་པ་རིང་བ་ལྟོ་བ་རྒྱས་པ། ནག་པོ་དང་རྩ་བ་མེད་པའི་ཤིང་གི་ཡལ་ག་དང༌། རས་ཀྱིས་མགྲིན་པར་བརྒྱན་པ། ཧ་ས་དེ་བ་དང༌། ཀཎྜ་ཀ་རི་དང༌། བྲྀ་ཧ་ཏི་དང༌། བྷ་ལ་མུ་ཏ་དང༌། དཎྜོཏྤ་ལ་སྟེ་སྨན་ལྔའི་སྙིང་པོ་ཅན་དང༌། དེ་བཞིན་དུ་ཨིནྡྲ་ནཱི་ལ་དང༌། མར་གད་དང༌། པདྨ་རཱ་ག་དང༌། བཻཌཱུཪྻ་དང༌། ཤེལ་ཏེ་རིན་པོ་ཆེ་ལྔ་དང་ལྡན་པ། ནས་དང༌། ཏིལ་དང་མ་ཤ་དང༌། སོ་བ་དང༌། གྲོ་སྟེ་འབྲུ་ལྔ་དང་ལྡན་པ་དྲི་བཟངས་ཀྱི་ཆུས་ཡོངས་སུ་གང་བ། འོག་ཏུ་འབྲས་དང་གླ་གོར་ཞོ་ཤ་དང་བིལ་བ་དང༌། ཛཱ་ཏི་ཕ་ལ་དང༌། ཏརྐ་ཀ་དང༌། པ་ནི་དང་བཅས་པའི་སྣོད་གང་བས་བརྒྱན་པ་རྣམ་པ་སྣ་ཚོགས་པའི་མཆོད་པ་རྣམ་པ་ལྡས་མཆོད་པར་
བྱས་པ་མེ་ཏོག་གི་ཕྲེང་བ་དད་དར་དབྱངས་ཀྱིས་བརྒྱན་པ་ལེགས་པར་བདུགས་པས་རང་རང་གི་རིགས་ཀྱི་ཆོས་ཀྱི་ཡི་གེས་མཚན་པ་ཤར་ལ་སོགས་པ་ཕྱོགས་དང་མཚམས་དང་མདུན་དང་གཡས་ཕྱོགས་སུ་གཞག་པར་བྱའོ་ཞེས་བསྟན་ཏོ། །དེ་ལྟར་དཀྱིལ་འཁོར་ཡོངས་སུ་རྫོགས་ནས་ཞེས་བྱ་བ་འདིས་རྒྱུད་ཀྱི་ཚིག་རྣམས་མདོ་སྤྲོས་བྱས་ནས་དཀྱིལ་འཁོར་གྱི་ཆོ་ག་ཐམས་ཅད་རྫོགས་ལ། དེ་ནས་སྦྱིན་སྲེག་བྱའོ་ཞེས་བྱ་བ་འདིས་སྔགས་ཀྱི་ལྷ་རྣམས་ཚིམ་པར་བྱ་བའི་ཕྱིར་དང༌། དེ་བཞིན་དུ་བགེགས་རྣམས་ཞི་བར་བྱ་བའི་ཕྱིར་དང༌། སློབ་མའི་ཚོགས་དང་རྒྱལ་པོ་ལ་སོགས་པ་དང༌། སྐྱེ་དགུ་རྣམས་ལ་ཞི་བའི་ཕྱིར་སྦྱིན་སྲེག་བྱ་སྟེ། དམ་ཚིག་གི་མེ་ལྷའི་ཞལ་ནས་ཡེ་ཤེས་ཀྱི་མེ་ལྷ་དང་དཀྱིལ་འཁོར་པ་རྣམས་ཚིམ་པར་བྱའོ་ཞེས་དགོངས་པའོ། །ཇི་སྐད་དུ། མ་བཟླས་པས་ནི་སྔགས་མི་འགྲུབ། །སྦྱིན་སྲེག་མ་བྱས་འབྲས་མི་འབྱིན། །དེ་ཕྱིར་ལས་རྣམས་ཐམས་ཅད་ལ། །སྦྱིན་སྲེག་ལས་ནི་རབ་ཏུ་འདོད། །ཆར་དཀོན་དུས་སུ་ཇི་ལྟར་འབྲུ། །སྐམས་པ་ཆར་གྱིས་ཚིམ་གྱུར་པ། །དེ་བཞིན་སྐྱེ་དགུ་ཐམས་ཅད་ནི། །སྦྱིན་སྲེག་གིས་ནི་ཚིམ་པར་འགྱུར། །ཞེས་འབྱུང་ངོ༌། །དེ་ལ་མེ་ཐབ་ནི། གདུལ་བྱའི་དབང་གིས་མཐའ་ཡས་པ། །རིགས་ཀྱི་དབྱེ་བ་རྣམ་པ་ལྔ། །ལས་ཀྱི་དབྱེ་བས་བཞི་ཡིན་ཏེ། །མེ་ཐབ་དེ་ལྟར་གཏན་ལ་དབབ། །ཞི་བ་ལ་ནི་ཟླུམ་པོ་དཀར། །རྒྱས་པར་སེར་པོ་གྲུ་བཞི་པ། །དབང་ལ་དམར་པོ་གྲུ་གསུམ་པ། །གསོད་ལ་ནག་པོ་གཞུ་བཞིན་ནོ། །དེ་རྣམས་ཀྱི་རིམ་པ་ཇི་ལྟ་བ་བཞིན་དུ་དཀྱུས་དང་དཔངས་སུ་ཁྲུ་གཅིག་དང་ཁྲུ་ཕྱེད་དང་ཁྲུ་གཉིས་དང་ཁྲུ་བཞི་དང་ལྷག་མ་རྣམས་དེ་དང་འདྲ་བ། ཁྲུ་བཞི་པ་དང༌། ཁྲུ་གཉིས་པ་དང༌། ཁྲུ་བརྒྱད་པ་དང༌། ཁྲུ་བཞི་པ་ཞེས་བྱའོ། །ཁྲུ་གང་གི་ཚད་ཙམ་གྱིས་མེ་ཐབ་ལས་སོར་བཞི་དཔངས་ཏེ། དཔངས་དང་དཀྱུས་སུ་ཁ་ཁྱེར་སོར་བཞི་པ་དེ་འདྲ་བར་བྱའོ། །དེ་བཞིན་དུ་བརྒྱད་དང་བཅུ་དྲུག་ཅེས་བྱའོ། །མེ་ཐབ་ཐམས་ཅད་ཀྱི་རང་རང་དང་འདྲ་བའི་ཁ་ཁྱེར་བྱའོ། །མེ་ཐབ་ཐམས་ཅད་ཀྱི་ཕྱི་རོལ་དུ་གྲུ་བཞི་པ་དང་སྒོ་བཞིའི་དཀྱིལ་འཁོར་དུ་ཐིག་བཏབ་ནས་ཤར་གྱི་སྒོ་ལ་སོགས་པ་ལ་ལྕགས་ཀྱུ་དང་ཞགས་པ་
དང་ལྕགས་སྒྲོག་དང་དྲིལ་བུ་རྣམས་ཀྱི་ཕྱག་མཚན་བྲི་བར་བྱའོ། །དེའི་ཤར་གྱི་སྣམ་བུ་ལ་པདྨ་དང་ནགས་ཀྱི་ལྕུག་མ་དང་བགྲང་ཕྲེད་དང་གུནྡྷེ་དང༌། ཀྲིཥྞ་ས་རའི་པགས་པ་བྲིའོ། །ལྷོའི་སྣམ་བུ་ལ་རྩེ་གསུམ་དང༌། ཟླ་བ་ཕྱེད་པ་དང༌། རྒྱལ་མཚན་དང༌། རལ་པའི་ཐོར་ཚུགས་དང༌། མིག་ཅེས་པ་ལྔའོ། །ནུབ་ཀྱི་སྣམ་བུ་ལ་འཁོར་ལོ་དང༌། རལ་གྲི་དང༌། ཕུབ་དང༌། མདུང་དང༌། བེ་ཅོན་ཏེ་ལྔའོ། །བྱང་གི་སྣམ་བུ་ལ་མདུད་རྩེ་དང༌། དྲིལ་བུ་དང༌། བ་དན་དང༌། རྨ་བྱ་དང༌། ར་སྐྱེས་ཏེ་ལྔ་བྲི་བར་བྱའོ། །དེ་ལྟ་བུའི་མེའི་ཐབ་ཀྱི་དབུས་སུ། འཁོར་ལོ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་སྟེ་རིམ་པ་ཇི་ལྟ་བ་བཞིན་དུ་དེ་བཞིན་གཤེགས་པའི་མཚན་མས་བརྒྱན་པར་བྱས་ལ་ལས་ཐམས་ཅད་པ་ནི་རྡོ་རྗེ་ཕྲེང་བས་རྣམ་པར་བརྒྱན་པར་བྱའོ། །ཡང་ན་ལས་ཐམས་ཅད་པ་ནི་ཟླུམ་པོ་ཁོ་ན་སྟེ། འོན་ཀྱང་ནང་གི་པདྨའི་ལྟེ་བར་སྣ་ཚོགས་རྡོ་རྗེ་དང༌། འདབ་མ་རྣམས་ལ་རྡོ་རྗེ་བརྒྱད་བྲིས་ལ། ལྷག་མ་ནི་སྔ་མ་བཞིན་ནོ། །དཀྱིལ་འཁོར་རམ་ལྷའི་ཁང་པར་ཤར་ཕྱོགས་སུ་ཞི་བའི་མེ་ཐབ་དང༌། དེ་བཞིན་དུ་ལྷོ་དང༌། ནུབ་དང་བྱང་ཕྱོགས་སུ་རྒྱས་པ་དང་དབང་དང་དྲག་པོའི་མེ་ཐབ་བྱའོ། །ཡང་ན་ལས་དང་རྗེས་སུ་མཐུན། །རྡུལ་ཚོན་གྱིས་ནི་མེ་ཐབ་བྲི། །དེ་ཕྱིར་བརྐོས་དང་རྡུལ་ཚོན་གྱིས། །མེ་ཐབ་རྣམ་པ་གཉིས་སུ་འདོད། །ཅེས་འབྱུང་ངོ༌། །དེ་ནི་མེ་ཐབ་ཀྱི་མཚན་ཉིད་དོ། །ཡམ་ཤིང་རྣམས་ཀྱི་མཚན་ཉིད་ནི། །བླང་དོར་དབྱེ་བས་བཤད་པར་བྱ། །བ་ལ་ཤ་དུ་མ་ཨ་མྲ་དང༌། ཀ་དམ་པ་དང་ཀས་མི་རྒྱ། །ཨ་ཤྭང་པླག་ཤ་ལས་འབྱུང་བ། །ཤ་མི་ཁ་དང་འོ་མ་ཅན། །འོ་མ་དང་བཅས་རློན་པ་སྟེ། །མཉམ་པོར་བཅད་པར་འདོད་པ་ཡིན། །མཐོ་གང་ཙམ་གྱི་ཚད་དང་ལྡན། །སྦྲང་རྩི་འོ་མ་མར་གྱིས་བྱུགས། །དཀར་པོའི་དྲི་ཆུས་བསྐུས་པ་ཡི། །འོ་མ་དང་བཅས་ཡམ་ཤིང་འདོད། །ཇི་སྐད་དུ། རྒྱས་པར་སོར་ནི་བཅུ་བཞི་པ། །ཞི་བར་སོར་ནི་བཅུ་གཉིས་ཏེ། །དབང་ལ་སོར་ནི་བཅུ་པ་དང༌། །སྡང་དང་དགར་བ་སོར་བརྒྱད་པའོ། །རྙིང་ཞིང་ཆག་པ་འབུས་ཟོས་པ། །འབད་དེ་རྣམ་པར་སྤང་བར་བྱ། །མཆོད་སྤྱིན་པ་ཡི་ཤིང་རྣམས་ཀྱི། །སྲོག་ཆགས་མེད་པའི་བུད་ཤིང་གང༌། །མེ་
ཐབ་ལས་ནི་ཅུང་ཉུང་བའི། །ཚད་དང་ལྡན་པ་ངེས་པར་བྱ། །ཡང་ན་དགོན་པའི་ལྕི་བ་སྟེ། །བློ་དང་ལྡན་པས་བླང་བར་བྱ། །ཞེས་བྱ་བ་ལ་ནི་ཡམ་ཤིང་དང་བུད་ཤིང་གི་མཚན་ཉིད་དོ། །གསེར་རམ་ཟངས་ཀྱི་རང་བཞིན་ཏེ། །ནིམ་པའམ་ནི་སེང་ལྡེང་ངམ། །འོ་མ་ཅན་གྱི་ཤིང་སོགས་ཀྱི། །སྦྱོར་བ་འདི་ནི་རབ་ཏུ་གྲགས། །སོར་ནི་ཉི་ཤུ་རྩ་བཞི་ཡི། །དེ་ཉིད་ཀྱིས་ནི་ཚད་བྱས་ཏེ། །སྣོད་དང་དབྱིག་པ་གཉིས་བྱས་ནས། །དེ་ཡི་ཁ་ནི་སོར་དྲུག་པ། །ད་ནི་ཀུན་དུ་སོར་བཞི་པ། །རྡོ་རྗེ་ཕྲེང་བསོར་གཉིས་ཏེ། །དེ་ལས་གཞན་ནི་དབུས་ཡིན་ཏེ། །སོར་ནི་བཞི་ཡི་ཚད་ཙམ་བྱ། །དེ་ཡང་འོག་ཏུ་བརྐོས་ནས་ནི། །བརྐོ་སའི་ཚད་ནི་སོར་གཉིས་པ། །དེ་ཡི་དབུས་སུ་པདྨ་སྟེ། །ལྟེ་བ་རྡོ་རྗེ་མཚན་པར་བྱ། །སོར་མོ་མཐེ་ཆུང་ཚད་ཙམ་གྱི། །ཁུ་བཅུད་འཛག་པར་རབ་ཏུ་གྲགས། །རྩེ་མོའི་ཆ་རུ་རིན་པོ་ཆེ། །སོར་དགུ་ཀུན་དུ་མཐོ་བར་བྱ། །པདྨའི་འདབ་མ་དང་འདྲ་བ། །མཐར་ནི་རྒྱལ་བས་གསུངས་པ་ཡིན། །དེ་དབུས་རྡོ་རྗེ་རྩེ་གསུམ་པ། །དབྱིག་པའི་མཐར་ནི་སོར་དྲུག་སྟེ། །ཟླ་བ་རིན་ཆེན་དེ་ཡི་མཐར། །གང་གིས་དབྱིག་པ་ཉེས་མི་འགྱུར། །དེ་ཉིད་ཀྱི་ནི་ཚད་ཀྱིས་ཏེ། །བླུགས་གཟར་གྱི་ནི་ཆོ་ག་བྱ། །མཐར་ནི་སོར་གཉིས་རྒྱ་ཆེ་བས། །ཁ་ནི་པདྨ་འདབ་དང་མཚུངས། །དེ་ཡི་བྱེད་ཙམ་བརྐོས་པ་སྟེ། །དེ་ཡི་དབུས་ནི་རྡོ་རྗེས་མཚན། །དེ་ལྟར་དགང་གཟར་བླུགས་གཟར་གྱི། །མཚན་ཉིད་ཆེན་པོ་གསུངས་པ་ཡིན། །ཞེས་དེ་ནི་སྦྱིན་སྲེག་གི་སྣོད་ཀྱི་མཚན་ཉིད་དོ། །དེ་ནས་རྡོ་རྗེ་སློབ་དཔོན་ནི། །ཁྲུས་ཤིང་གཙང་སྦྲ་དྲིས་བྱུགས་པ། །ཇི་ལྟར་གསུངས་པའི་རྒྱན་དང་ལྡན། །ཞི་བ་རྒྱས་དང་དབང་དགུག་དང༌། །སྡང་བ་དགར་བ་གསོད་པ་སྟེ། །སྦྱིན་སྲེག་ལས་ལ་བརྩོན་བདག་ཉིད། །རང་ལྷག་ལྷ་ཡི་རྣལ་འབྱོར་ལྡན། །སེམས་ཅན་ཀུན་ལ་ཕན་ལ་བརྩོན། །ཇི་ལྟར་གསུངས་པ་ཐམས་ཅད་བྱ། །དེ་ལ་ཞི་བ་ལ་ནི་གོས་དཀར་པོ་དང་ཅོད་པན་ཐོགས་པ་དག་བྱེད་པ་དང་གདུ་བུ་དང་ཇི་ལྟར་གསུངས་པའི་བསྲུང་བའི་འཁོར་ལོ་བཟླས་པ། བྱམས་པ་ཆེན་པོའི་སེམས་དང་ལྡན་པ་མི་སྨྲ་བས་སྦྱིན་སྲེག་གི་ས་རུ་འཇུག་སྟེ་འཇམ་པའི་གདན་ལ་པདྨའི་སྐྱིལ་མོ་ཀྲུང་གིས་
འདུག་སྟེ། ལག་པ་གཉིས་མཁྲིག་མའི་བར་དུ་དྲི་བཟང་གིས་བྱུགས་ལ་སྲོད་ལ་སྲོད་ལ་ཤར་དུ་ཁ་བལྟས་པས་བསྒྲུབ་བྱ་བླངས་ནས་ཉའམ་ཚེས་གཅིག་ལ་བརྟེན་ཏེ་ཞག་གསུམ་མམ་བདུན་གྱི་བར་དུ་གཞན་གྱི་དོན་དུ་ཞི་བའི་ལས་བྱའོ། །དེ་བཞིན་དུ་གོས་སེར་པོ་ལ་སོགས་པའི་རྒྱན་དང་ལྡན་པའམ། རྣམ་པ་སྣ་ཚོགས་པའི་གོས་དང་ལྡན་པ་ཡིད་དགའ་བ་བྱང་དུ་ཁ་བལྟས་པ་བཟང་པོའི་འདུག་སྟངས་ཀྱིས་གནས་པ་རྐང་པ་གཡོན་པས་རྐང་པ་གཡས་པ་མནན་ཞིང་མིག་མི་གཡོ་བ། སོ་རྣམས་གཙིགས་པ་ཉ་ནས་བརྩམས་ཏེ་ཕྱི་མའི་བར་དུ་རྒྱས་པའི་ལས་བྱའོ། །དེ་བཞིན་དུ་ཁྲོས་བས་གོས་སྔོན་པོ་ལ་སོགས་པའི་རྒྱན་དང་ལྡན་པ་ཁྲག་དང་ཆུས་གཤེར་བའི་གོས་དང་ལྡན་པ་རོའི་སྟེང་དུ་ཙོག་བུའི་འདུག་སྟངས་ཀྱིས་གནས་པ་རྐང་པ་གཡོན་པས་རྐང་པ་གཡས་པ་མནན་ཞིང་མིག་མི་གཡོ་བར་སོ་རྣམས་གཙིགས་པ་སྙིང་རྗེས་དཀོན་མཆོག་གསུམ་ལ་གནོད་པར་བྱེད་པ་ལ་འཇིགས་པར་བྱེད་པའི་ཕྱིར་མངོན་སྤྱོད་ཀྱི་ལས་བྱའོ། །དེ་ནི་སྒྲུབ་པ་པོའི་ཚོགས་པའོ། །དེ་ནས་རང་གི་འདོད་པའི་ལྷའི་རྣལ་འབྱོར་ཇི་ལྟར་གསུངས་པ་ལས་དང་རྗེས་སུ་མཐུན་པ་བྱས་ཏེ། བགེགས་ཀྱི་ཚོགས་ལ་ཕུར་བུས་གདབ་པ་དང་རྡོ་རྗེ་དྲ་བ་ལ་སོགས་པ་བྱས་ཏེ། ཡི་གེ་ཧཱུཾ་ངམ་རང་གི་ཆོས་ཀྱི་ཡི་གེ་ལས་མེ་ཐབ་བསྐྱེད་ལ། དེའི་དབུས་ཀྱི་ལྟེ་བར་ཡི་གེ་རཾ་འབར་བ་ཡོངས་སུ་གྱུར་པ་ལས་གྲུ་གསུམ་བསམས་ལ། དེའི་ཟུར་གསུམ་ཤར་ལ་སོགས་པ་ལ་ཨོཾ་ཨཱཿ་ཧཱུཾ་ཞེས་བྱ་བའི་ཡི་གེ་གསུམ་ལས། འདོད་པ་དང་གཟུགས་དང་གཟུགས་མེད་པའི་ཁམས་གསུམ་གྱི་ངོ་བོ་འཁོར་ལོ་དང་པདྨ་དང་རྡོ་རྗེ་གསུམ་ས་བོན་དང་བཅས་པར་བསྐྱེད་ལ་དབུས་སུ་ཡི་གེ་རཾ་ཡོངས་སུ་གྱུར་བ་ལས་འབར་བ་དང་བཅས་པར་ལྟ་སྟེ། ཕྱག་མཚན་གསུམ་དང་ཡི་གེ་རཾ་དེ་དག་ཡོངས་སུ་གྱུར་པ་ལས་འབར་བའི་དབུས་སུ་ཆུའི་དཀྱིལ་འཁོར་ལ་གནས་པ་དག་བྱེད་ཀྱི་མེ་ལྷ་ཁམས་གསུམ་གྱི་བདག་ཉིད་ཞི་བའི་དོན་ཏུ་བསྒོམ་པར་བྱའོ། །ཞི་བ་ལ་དཀར་པོ་ཞལ་གཅིག་པ་སྤྱན་གསུམ་པ་ཕྱག་བཞི་པ་རལ་པའི་ཐོར་གཙུག་ཅན། ཕྱག་གཡས་པ་དག་ལ་དབྱིག་པ་དང་མི་འཇིགས་པ་གཡོན་བ་དག་ལ་ཕྲེང་བ་དང་གུནྡྷེ་འཛིན་པ་ན་བཟའ་
དཀར་པོ་དང་རྒྱན་དང་ལྡན་པ། མཆོད་ཕྱིར་ཐོགས་པ་ཡན་ལག་ཐམས་ཅད་ལས་བདུད་རྩི་དཀར་པོ་སྤྲོ་བར་བྱེད་པ་བལྟ་བར་བྱའོ། །རྒྱས་པ་ལ་ཡང་དེ་བཞིན་ནོ། །འོན་ཀྱང་ཁ་དོག་སེར་པོ་གོས་དང་རྒྱན་ལ་སོགས་པ་སེར་པོས་བརྒྱན་པ། དབང་ཆེན་གྱི་དཀྱིལ་འཁོར་ལ་གནས་པ་ཡེ་ཤེས་ཀྱི་མེ་ལྷ་མཆོག་སྦྱིན་གྱི་ཕྱག་གིས་སེམས་ཅན་ཐམས་ཅད་ལ་སྟོབས་དང་ཁ་དོག་དང་དབལ་གྱིས་ཕུན་སུམ་ཚོགས་བ་འཕེལ་བར་བྱེད་པ་བསྒོམ་པར་བྱའོ། །དེ་བཞིན་དུ་དབང་དང་དགུག་པ་དག་ལ་ཁ་དོག་དམར་པོ་འདོད་པའི་མེ་ལྷ་མེའི་དཀྱིལ་འཁོར་ལ་གནས་པ་ན་བཟའ་དང་རྒྱན་དམར་པོ་ལ་སོགས་པས་བརྒྱན་པ། ཕྱག་གཡས་པ་དང་གཡོན་པ་དག་ལ་ལྕགས་ཀྱུ་དང་ཞགས་པ་འཛིན་པ་བསྒོམས་ཏེ་ལྷག་མ་ནི་སྔ་མ་བཞིན་ནོ། །གསོད་པ་ལ་རླུང་གི་དཀྱིལ་འཁོར་ལ་གནས་པ་ཁ་དོག་ནག་པོ་མཆེ་བ་རྣམ་པར་གཙིགས་པ་མིག་གཡོ་བ། ཡི་གེ་ཧཱུཾ་ལས་བྱུང་བ་ཁ་དོག་ནག་པོ་ན་བཟའ་ལ་སོགས་པས་བརྒྱན་པ། ཕྱག་གཡས་པ་རལ་གྲི་དང་གཡོན་པ་ལ་སྡིགས་མཛུབ་འཆང་བ། སྐྲ་འབར་བ་གྱེན་དུ་བརྗེས་པ། འཇིགས་བྱེད་ཆེན་པོའི་འབར་བ་ནག་པོས་ཁམས་གསུམ་ཁྱབ་བ་རླུང་གི་མེ་ལྷ་བསྒོམ་པར་བྱའོ་ཞེས་མེ་ལྷ་མདོར་བསྟན་པའོ། །དེ་ལ་འོ་མ་ཅན་གྱི་ཤིང་ལས་བྱུང་བའམ་དགོན་པ་ལས་བྱུང་བའམ། རྒྱུན་ཆགས་ཀྱི་མེ་འམ་ཐ་མལ་པའི་བྲམ་ཟེའི་མེ་ཞི་བའི་ལས་ལ་བླང་བར་བྱའོ། །རྒྱལ་པོའམ་བློན་པོའམ་ནགས་ཚལ་ལམ་ཚང་བང་གི་མེ་རྒྱས་པ་ལའོ། །རྗེ་རིགས་སམ་སྨད་འཚོད་མའི་མེ་ནི་དབང་ལའོ། །གར་མཁན་དང་མཚན་མཁན་དང་འགྲོན་པོའི་མེ་ནི་དགུག་པ་ལའོ། །དུར་ཁྲོད་ཀྱི་མེའམ་རྡོ་ལས་བྱུང་བའི་མེ་མངོན་སྤྱོད་ལ་གཟུང་བར་བྱའོ་ཞེས་མེའི་ངོ་བོ་མདོར་བསྟན་པའོ། །དེ་ནས་ལས་དང་རྗེས་སུ་མཐུན་པའི་གསེར་ལ་སོགས་པའི་སྣོད་གཉིས་ཏེ། ཨ་རྒྷའི་སྣོད་དང་ལས་ཐམས་ཅད་པའི་སྣོད་དོ། །གཉི་ག་ཡང་དྲི་བཟང་གི་ཆུས་གང་བ་དེ་ལ་ཡང་ཨརྒྷའི་སྣོད་ནི་ཞོ་དང་ཀུ་ཤ་དང་འབྲུ་ལ་སོགས་པ་དང་ལྡན་པ་བྱས་ལ་གཉི་ག་ལ་ཡང་མེ་ཏོག་དགྲམ་ཞིང༌། ཨརྒྷའི་སྣོད་ནི་གཡོན་ཕྱོགས་སུ་རང་གི་རིགས་ཀྱི་ལྷའི་སྔགས་ཀྱིས་མངོན་པར་བཟླས་
ནས་གཞག་པར་བྱའོ། །རྡོ་རྗེ་གནོད་སྦྱིན་དང༌། རྡོ་རྗེ་རྩེ་མོའི་སྔགས་དག་གིས་ལས་ཐམས་ཅད་པའི་སྣོད་ལན་ཉི་ཤུ་རྩ་གཅིག་མངོན་པར་བཟླས་ནས་གཞག་པར་བྱའོ། །ཨོཾ་བཛྲ་ཤེ་ཁ་རེ་རུ་དྲ་མཊ། རྡོ་རྗེ་ཁུ་ཚུར་གཉིས་ཀྱིས་མཐེ་ཆུང་གཉིས་མཆེ་བའི་ཚུལ་དུ་བསྟན་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་རི་བོའི་ཚུལ་དུ་བྱ་བ་ནི་རྡོ་རྗེ་རྩེ་མོའི་ཕྱག་རྒྱ་སྟེ། ཨརྒྷའི་སྣོད་ཀྱི་ཆོ་གའོ། །དེ་ནས་ཡོ་བྱད་ཐམས་ཅད་གཡས་ཕྱོགས་སུ་བཞག་ལ་མར་དང་དགང་གཟར་དང་བླུགས་གཟར་མདུན་དུའོ། །གཡོན་ཕྱོགས་སུ་དྲིལ་བུ་དང་གཡས་ཕྱོགས་སུ་རྡོ་རྗེ་གཞག་གོ །དེ་ནས་སྦྱིན་སྲེག་གི་ཡོ་བྱད་ལ་སོགས་པ་ཐམས་ཅད་ལ་ལས་ཐམས་ཅད་པའི་ཆུས་ལན་གསུམ་བསང་གཏོར་བྱའོ། །དེ་ནི་རྫས་གཞག་པའི་རིམ་པའོ། །རྫས་ནི་ཡམ་ཤིང་མར་དང་ནི། །ཏིལ་དང་འབྲས་དང་དེ་བཞིན་ནས། །གྲོ་དང་མ་ཤ་འབྲས་སོ་བ། །ཡོས་དང་སྟརྒ་བིལ་བ་དང༌། །གླ་གོར་ཞོ་ཤ་འོ་མ་ཞོ། །དཱུར་བ་དང་ནི་ཀུ་ཤ་དང༌། །འབྲས་བུ་གསུམ་དང་སླེ་ཏྲེས་དང༌། །ཁ་ར་ཕྱེ་མ་ཁར་ལོ་མ། །གསེར་དང་ནི་ཙནྡན་དང༌། སྤྲི་ཡང་ཀུ་དང་གུར་ཀུམ་དང༌། །སྤོས་གཉིས་དང་ནི་སྨན་ཀུན་དང༌། །ཛཱ་ཏི་ཕ་ལ་རིན་པོ་ཆེ། །དར་དབྱངས་སོ་རྩི་མེ་ཏོག་ཕྲེང༌། །དེ་བཞིན་མཆོད་པ་རྣམ་པ་ལྔ། །དེ་ལྟར་རྣལ་འབྱོར་རྒྱུད་རྣམས་ལས། །གོ་རིམས་ཀྱིས་ནི་རྫས་གསུངས་སོ། །དེ་ནི་རྫས་ཀྱི་གྲངས་ཀྱི་གོ་རིམས་སོ། །དེ་ནས་ཕྱི་རོལ་གྱི་མེ་རྡོ་རྗེ་གནོད་སྦྱིན་གྱི་སྔགས་དང་ཕྱག་རྒྱས་མངོན་པར་བསྔགས་ལ། ཀུ་ཤའི་རྩེ་མོ་བླངས་པའི་ཆུས་དེ་ལ་ལན་གསུམ་བསངས་ཏེ། གཙང་མས་བསྒོས་པའི་ཙ་དང་བཅས་པ་མེ་ཐབ་ལ་བཅུག་ནས། ཨོཾ་ཛྭ་ལ་ཧཱུཾ་ཞེས་བྱ་བ་སྔགས་དང་བཅས་པ་རླུང་གཡབ་ཀྱི་རླུང་གིས་འབར་དུ་བཅུག་སྟེ། །དམ་ཚིག་སེམས་དཔའི་མེ་ལྟ་སྔར་བཤད་པ་དེའི་དབུས་སུ་བསམས་ཏེ། ཡེ་ཤེས་སེམས་དཔའི་མེ་ལྟ་སྔགས་དང་ཕྱག་རྒྱ་འདིས་དགུག་པར་བྱས་ཏ། ལག་པ་གཡས་པ་མི་འཇིགས་པར་བྱས་ནས་མཐེ་བོང་གི་རྩེ་མོ་སྲིད་ལག་གི་རྩ་བའི་ཚིགས་ལ་བརྡབ་པ་ནི་དགུག་པའི་ཕྱག་རྒྱའོ། །ཚུར་གཤེགས་ཚུར་གཤེགས་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་
བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཞེས་བྱ་བ་དང༌། ཨོཾ་བ་ཀཱ་གན་ཡེ་སྭཱ་ཧཱ་ཞི་བ་ལའོ། །ཨོཾ་མ་ཧེ་དེ་བཱ་གན་ཡེ་སྭཱ་ཧཱ་རྒྱས་པ་ལའོ། །ཨོཾ་ཀཱ་མཱ་གན་ཡེ་སྭཱ་ཧཱ་དབང་དང་དགུག་པ་ལའོ། །ཨོཾ་ཀྲོ་དྷཱ་གན་ཡེ་ཛ་ཧེ་ཀྲོ་ཊ་ཡ་ཨ་མུ་ཀཾ་མཱ་ར་ཡ་ཧཱུཾ་ཕཊ་མངོན་སྤྱོད་ལའོ། །མེ་ལྷ་བྱོན་པ་ལ་བསང་གཏོར་ལ་སོགས་པ་བྱས་ནས་དགུག་པ་ལ་སོགས་པས་དམ་ཚིག་གི་མ་ལྷ་ལ་འཇུག་པར་བྱའོ། །དེ་ནས་ཨརྒྷའི་སྣོད་བླངས་ལ་ཡིད་ཀྱིས་ཞབས་ལ་ཞབས་བསིལ་དབུལ་བར་བྱ་སྟེ། ཨོཾ་པྲ་བ་ར་ས་ཀྟཱ་རཾ་པྲ་ཏཱི་ཙྪ་སྭཱ་ཧཱ། དེ་ནས་ཨརྒྷཾ་མ་མ་ཡ་ད་ཏ་མཱ་གན་ཧ་ན་སིདྡྷི་མྨེ་པྲ་ཡཙྪ་སྭཱ་ཧཱ། སྔགས་འདིས་ལན་གསུམ་ཨརྒྷ་དབུལ་བར་བྱ་སྟེ་སྤྱན་དྲང་བའི་ཆོ་གའོ། །དེ་ནས་ཨོཾ་ཨཱཿཧཱུཾ་ནི་མགོ་བོ་དང་ལྐོག་མ་དང་སྙིང་གའི་ཕྱོགས་སུ་དཀར་པོ་དང་དམར་པོ་དང་ནག་པོ་སྟེ་ས་བོན་གསུམ་ཟླ་བ་ལ་གནས་པའི་འཁོར་ལོ་དང་པདྨ་དང་རྡོ་རྗེའི་ཆང་གཟུངས་ལ་གནས་པ་ཁམས་གསུམ་བྱིན་གྱིས་བརླབས་ནས་སེམས་མ་རྡོ་རྗེ་མ་ལ་སོགས་པས་ཡིད་ཀྱིས་དབང་བསྐུར་ལ་ལཱ་སྱ་ལ་སོགས་བའི་མཆོད་པ་རྣམ་པ་བརྒྱད་ཀྱིས་མཆོད་ལ། དར་དཔྱངས་དང་མེ་ཏོག་ཕྲེང་བ་བཅིངས་ནས་གོ་ཆ་བགོས་ཏེ། མེ་ལོང་ལྟ་བུ་སྨན་ཐམས་ཅད་ལ་སོགས་པའི་སྐུ་ཁྲུས་ཀྱི་ཡོ་བྱད་ཀྱིས་སྤོས་གཏུལ་བ་དང་དྲིལ་བུ་དཀྲོལ་བ་སྔོན་དུ་འགྲོ་བས་རྗེ་བཙུན་མའི་ཡི་གེ་བརྒྱ་པ་ལན་ཅིག་བརྗོད་ནས་སྐུ་ཁྲུས་བྱའོ། །དེ་ནས་རིགས་ཀྱི་ཡུམ་བཞིའི་མངོན་བར་སྔགས་བཟླས་པའི་བུམ་པ་བཞི་ཡིས། རང་རང་གི་སྔགས་དང་བཅས་བས་དབང་བསྐུར་བ་སྦྱིན་པར་བྱའོ། །དེ་ནས་ཞི་བ་ལ་རྣམ་པར་སྣང་མཛད་ཀྱིས་རྒྱས་བཏབ་པ་མེ་ལྷ་བསམ་པར་བྱ་བ་དང༌། རྒྱས་པ་ལ་རིན་ཆེན་འབྱུང་ལྡན་གྱིས་རྒྱས་གདབ་པ་དང༌། དབང་ལ་འོད་དཔག་ཏུ་མེད་པའི་ཅོད་པན་ཅན་དང༌། གསོད་པ་ལ་མི་བསྐྱོད་པའི་ཅོད་པན་ཅན་བསྒོམ་མོ། །དེ་ནས་མེ་ལྷའི་བདག་པོའི་ས་བོན་པ་གོད་པ་དང་དགང་གཟར་བླུགས་གཟར་གྱི་རྩེ་མོར་ཡང་དགོད་དོ། །དེ་ནས་ཨོཾ་ཛིཀ་སྭཱ་ཧཱ་ཞེས་བྱ་བས་ཞི་བ་ལ་མར་ལ་མངོན་པར་སྔགས་བཏབ་པའོ། །དེ་བཞིན་དུ་རྒྱས་པ་ལ་སོགས་པར་རིན་ཆེན་འབྱུང་ལྡན་ལ་སོགས་
པའི་སྔགས་རྣམས་ཀྱིས་མངོན་པར་སྔགས་བཏབ་པའོ། །དེ་ནས་དང་པོ་སྦར་བའི་དོན་དུ་བླུགས་གཟར་གྱིས་དགང་བླུགས་གསུམ་ཨོཾ་ཛྭ་ལ་ཛྭ་ལ་ཧཱུཾ་ཞེས་དབུལ་ལོ། །དེ་ནས་འབར་བ་དང་ཁ་དོག་དང་སྒྲ་ལ་སོགས་པས་མེ་ལ་བགེགས་མེད་པར་ཤེས་ནས་བགེགས་ཐམས་ཅད་བཅིང་བའི་དོན་དུ་དང༌། ལས་རྫོགས་པའི་དོན་དུ་ཕྱོགས་བཞི་ལ་ཀུ་ཤ་དགྲམ་མོ། །ཀུ་ཤ་འདི་ནི་དགེ་བའི་མཆོག །གཙང་མ་གཙང་མའི་རྒྱུ་ལས་བྱུང༌། །དཀོན་མཆོག་གསུམ་དགའ་ཡིད་འཕྲོག་པ། །སའི་སྙིང་པོ་ལས་སྐྱེས་པའོ། །ཞེས་བྱ་བ་དང༌། ཨ་བིགྷྣཱཾ་མ་མ་ཤཱནྟིཾ་ཀུརྦནྟུ་སྭཱ་ཧཱ་ཞེས་བྱ་བའི་རིམ་པ་འདིས་རྩ་བ་ལས་བཏོན་པ་མཚན་ཉིད་དང་ལྡན་པ་སྔོན་པོའི་ཀུ་ཤ་ནི་ཞི་བ་དང་རྒྱས་པ་ལའོ། །གཞན་དུ་ནི་མཉམ་པར་བཅད་པ་ཡོན་པོ་མ་ཡིན་པའི་རིམ་པ་འདིས་མེའི་ཤར་ཕྱོགས་སུ་ཤར་དུ་བལྟས་པ་དང༌། ལྷོ་རུ་ལྷོའི་རྩེ་མོ་དང་ལྡན་པ་དང༌། ནུབ་ཏུ་ནུབ་ཀྱི་རྩེ་མོ་དང་ལྡན་པ་དང༌། །བྱང་དུ་བྱང་གི་རྩེ་མོ་དང་ལྡན་པ་བྱའོ། །མེ་ཐབ་ཀྱིས་གཞི་ཀུན་དུ་ལས་ཐམས་ཅད་ཀྱི་ཆུས་བསང་གཏོར་བྱས་ལ། རྡོ་རྗེ་གནོད་སྦྱིན་དང་རྡོ་རྗེ་རྩེ་མོས་མངོན་པར་བསྔགས་ལ་ཚོན་སྐུད་ལྔའི་སྐུད་པ་དང་མདའ་བཞི་འམ་བརྒྱད་མངོན་པར་བསྔགས་ལ་ཕྱོགས་དང་མཚམས་སུ་བཀོད་ལ་ཚོན་སྐུད་ལྔའི་སྲད་བུས་བསྐོར་ལ་རྡོ་རྗེ་བཅིངས་པར་བྱས་པར་འགྱུར་ཏེ་ཀུ་ཤ་དགྲམ་པའི་ཆོ་གའོ། །དེ་ནས་མེ་ལྷའི་ལས་དང་རྗེས་སུ་མཐུན་པ་དངུལ་ལ་སོགས་པའི་སྣོད་མདུན་དུ་བསམས་ལ། ཡང་ཨརྒྷ་དང་འཐོར་འཐུང་དང་ཞབས་བསིལ་བྱིན་ནས་དགང་བླུགས་དབུལ་ལོ། །དེའི་རིམ་པ་ནི་བུས་མོའི་ནང་དུ་ལག་པ་གཉིས་བཞག་ལ་ལག་པ་གཡས་བའི་རྡོ་རྗེ་ཁུ་ཚུར་གྱིས་དགང་གཟར་བླངས་ཏེ། མཐོ་བོ་དང་མཐེ་ཆུང་གིས་བརྟན་བོར་བཟུང་ལ་སོར་མོ་ལྷག་མ་དབྱིག་པའི་སྟེང་དུ་བརྐྱང་ལ་མར་གྱིས་དགང་བར་བྱས་ལ་དགང་བླུགས་བདུན་ནམ་གསུམ་མམ་གཅིག་མེའི་ལྷའི་སྔགས་ཀྱིས་མེ་ལྷའི་ཞལ་ལ་དབུལ་ལོ། །ཨོཾ་ཨགྣ་ཡེ་ཨ་མོ་ཀ་སྱ་ཤཱ་ནྟིཾ་ཀུ་རུ་སྭཱ་ཧཱ་ཞེས་དེ་བཞིན་དུ་ཐམས་ཅད་ལའོ། །དེ་ནས་སྲེག་རྫས་ཀྱི་རིམ་པ་བསྟན་པར་བྱ་སྟེ། དགད་བླུགས་ཀྱི་འོག་ཏུ་ཡམ་ཤིང་འོད་ཀྱི་དཀྱིལ་
འཁོར་ལའོ། །མར་ནི་ཞལ་ལའོ། །དེ་ནས་ཏིལ་དང་ཞོ་དང་བཅས་པའི་འབྲས་ཆན་ནི་ཕྱག་ཏུའོ། །ཀུ་ཤ་དང་དཱུར་བའི་མྱུ་གུ་ནི་གཙུག་ཕུད་ལའོ། །ནས་དང་གྲོ་དང་འབྲས་སོ་བ་དང་མ་ཤ་ལ་སོགས་པ་ནི་ཞལ་དུའོ། །ཞུ་བའི་རྫས་ཐམས་ཅད་ཀྱང་དེ་བཞིན་ནོ། །དྲི་ནི་སྙིང་གར་རོ། །མེ་ཏོག་ནི་དབུ་ལ་ལོ། །སྤོས་ནི་འབར་བ་ལའོ། །ཞབས་བསིལ་ནི་ཞབས་ལའོ། །ཨརྒྷ་དང་འཐོར་འཐུང་ནི་ཕྱག་ལའོ། །མར་མེ་ནི་མདུན་དུའོ་ཞེས་རིམ་པའོ། །དེ་ནས་སྡིག་པ་བསྲེག་པའི་ཕྱིར་དང་པོར་ཏིལ་བསྲེག་པར་བྱ་སྟེ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ་ཏིལ་རྣམས་ཀྱིའོ། །ཡང་ན་རྫས་ཐམས་ཅད་སྔགས་གཅིག་གིས་བསྲེག་པར་བྱ་སྟེ། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཛྭ་ལ་སརྦ་བྷ་སྨིན་ཀུ་རུ་སརྦ་བིགྷྣཱཾ་ཧཱུཾ་ཕཊ། ཨ་མོ་ཀ་སྱ་ཤཱ་ནྟིཾ་ཀུ་རུ་སྭཱ་ཧཱ། ཡང་ན་ཐ་དད་པའི་སྔགས་ཡིན་ཏེ། ཨོཾ་བཛྲ་ཡ་ཛྙ་སྭཱ་ཧཱ་ཡམ་ཤིང་གིའོ། །ཨོཾ་ཨེ་གན་ཡི་སྭཱ་ཧཱ་མར་གྱིའོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཨ་མོ་ཀ་སྱ་པཱ་པཾ་ད་ཧ་སྭཱ་ཧཱ། ཏིལ་དང་ཡུངས་ཀར་གྱིའོ། །སརྦ་སཾ་པ་དེ་སྭཱ་ཧཱ་ཞོ་དང་འབྲས་ཆན་གྱིའོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ་ཀུ་ཤ་རྣམས་ཀྱིའོ། །ཨོཾ་བཛྲ་ཨཱ་ཡ་ཥེ་སྭཱ་ཧཱ་དཱུ་ར་བའི་མྱུ་གུའིའོ། །ཨོཾ་མ་ཧཱ་བེ་གཱ་ཡ་སྭཱ་ཧཱ། ནས་རྣམས་ཀྱིའོ། །ཨོཾ་བཛྲ་གྷ་སྨ་ར་ཡེ་སྭཱ་ཧཱ་གྲོ་འིའོ། །ཨོཾ་བཛྲ་བི་ཛ་ཡེ་སྭཱ་ཧའ་འབྲས་སོ་བའིའོ། །ཨོཾ་མ་ཧཱ་བ་ལཱ་ཡ་སྭཱ་ཧཱ་མ་ཤའིའོ། །ཨོཾ་བཛྲ་པུ་ཥཊ་ཡེ་སྭཱ་ཧཱ། འབྲས་ཀྱིའོ། །ཨོཾ་མ་ཧཱ་ཤྲི་ཡེ་ཝ་ཡེ་སྭཱ་ཧཱ་བིལ་བ་དང་སྟ་རྒ་དང་ཛཱ་ཏི་ཕ་ལ་འིའོ། །ལྷ་མ་ནི་ཞུ་བའི་རྫས་ཐམས་ཅད་མེ་ལྷ་ལ་རང་གི་སྔགས་ཀྱིས་དབུལ་ལོ། །ཨུ་དུམྦཱ་ར་ལ་སོགས་པའི་ཤིང་གི་ཡལ་ག་རྣམས་ནི་དང་པོར་ཨོཾ་དང་རང་རང་གི་མིང་དང་སྭཱ་ཧཱའི་མཐའ་ཅན་གྱི་སྔགས་ཀྱིས་དབུལ་བར་བྱའོ་ཞེས་རིམ་པའོ། །དེ་ནས་མེ་ལྷ་ལ་འཐོར་འཐུང་དང་བསད་གཏོར་ལ་སོགས་པ་ཕུལ་ནས། མེ་ཐབ་ཏུ་མེ་ལྷ་འབར་བའི་གཟུགས་སུ་ཐིམ་པར་བྱའོ་ཞེས་ཁ་ཅིག་ཟེར་རོ། །རང་གི་གཟུགས་སུ་མེ་ལྷ་མེའི་མཚམས་སུ་གཞག་པར་བྱའོ་ཞེས་ཁ་ཅིག་ཟེར་རོ། །ཁ་ཅིག་ན་རེ་གཤེགས་སུ་གསོལ་ཞེས་ཟེར་རོ། །ཁ་ཅིག་ན་རེ་མེ་ཐབ་ཀྱི་ནང་དུ་མེའི་མཚམས་སུ་གཞག་
པར་བྱའོ་ཞེས་ཟེར་རོ། །དེ་ལྟར་མང་པོ་སྨྲས་ཏེ་འདིར་བཅོམ་ལྡན་འདས་ཀྱིས་བཀའ་སྩལ་པ། མེ་ལྷའི་གཙོ་བོ་ལྷ་རྣམས་ནི། །སྦྱིན་སྲེག་དེ་ཉིད་ལ་ནི་གནས། །སྦྱིན་སྲེག་གིས་ནི་ཚིམ་བྱས་ཏེ། །ཚིམ་པས་དངོས་གྲུབ་སྟེར་བར་འགྱུར། །མེ་ལྷ་སྟོང་པའི་སྦྱིན་སྲེག་ནི། །རོ་ཁར་བསྲེགས་བཞིན་འབྲས་མེད་འགྱུར། །ཞེས་འབྱུང་ངོ༌། །གཞན་ལས་བཅོམ་ལྡན་འདས་ཀྱིས། མེ་ཡི་གནས་ནི་མི་ཤེས་པས། །གང་ཞིག་སྦྱིན་སྲེག་བྱེད་པ་ན། །དེ་ཉིད་མ་ཡིན་སྦྱང་བ་མིན། །ལས་ཀྱི་འབྲས་བུར་མི་འགྱུར་རོ། །ཞེས་འབྱུང་ངོ༌། །ཁོ་བོ་ཅག་གི་བླ་མའི་ཞལ་གྱི་མན་ངག་ནི་ཆོས་ཀྱི་དབྱིངས་ཀྱི་ཡི་གེ་ཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ལས་མ་ལུས་པའི་གཞིར་གྱུར་པའི་འཇིག་རྟེན་ལས་འདས་པའི་ཡེ་ཤེས་ཀྱི་མེ་ལྷ་དེའི་སྙིང་གའི་པདྨའི་སྟེང་དུ་རང་གི་ལྷའི་ས་བོན་ཡོངས་སུ་གྱུར་པ་ལས་ཕྱག་མཚན་ལས་བྱུང་བའི་ལས་དང་རྗེས་སུ་མཐུན་པ། ཁ་དོག་དང་རྒྱན་ལ་སོགས་པ་དང་ལྡན་པ་རྣམ་པར་སྣང་མཛད་ལ་སོགས་པ་དམིགས་ལ་རང་གི་སྙིང་གའི་ཡེ་ཤེས་སེམས་དཔའི་ས་བོན་གྱི་འོད་ཟེར་དང་རང་རང་གི་དམ་ཚིག་གི་ཕྱག་རྒྱ་རྣམས་ཀྱིས་ཡེ་ཤེས་སེམས་དཔའ་བཀུག་ལ་བྱང་ཆུབ་མཆོག་གི་ཕྱག་རྒྱ་བཅིངས་ལ། ཨོཾ་ཨེ་ཧྱེ་ཧི་བྷ་ག་བཱན་ནེ་ཧ་བཱཀྟེ་ཛ་ས་མ་ཡེ་ན་ཙ་ཨ་རྒྷཾ་ཏོ། །སཾ་པྲ་ཏཱི་ཙྪ་སྭའ་པཱུ་ཛཾ་ཙ་པེ་པྲ་སིདྡྷ་མི་འདིས་ལྷོ་ཕྱོགས་སུ་བལྟས་ཏེ། བཛྲ་དྷཱ་ཏུ་སྭཱ་ཧཱ་ཞེས་བྱ་བས། ཞབས་བསིལ་དང༌། ཨརྒྷ་ཕུལ་ནས་ལཱ་སྱེ་ལ་སོགས་པས་མཆོད་ཅིང་རྡོ་རྗེ་བསྡམས་པས་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་རྣམས་ཀྱིས་དགུག་བ་དང་གཞུག་པ་དང་བཅིང་པ་དང་དབང་དུ་བྱའོ། །ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་ས་མ་ཡ་ཧོཿ་ཞེས་བྱ་བས་མེ་ལྷའི་ཞལ་ནས་དམ་ཚིག་སེམས་དཔའ་ལ་རྣམ་པ་ཐམས་ཅད་དུ་འཇུག་པར་བྱའོ། །དེ་ནས་ཨོཾ་ཧྲི་ཧཱུཾ་ཞེས་བྱ་བ་ཡི་གེ་གསུམ་གྱིས་དཀར་པོ་དང་སེར་པོ་དང་ནག་པོས་མགོ་བོ་ལ་སོགས་པ་བྱིན་གྱིས་བརླབས་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ཕྱག་རྒྱས་དབང་བསྐུར་ལ་སྔ་མ་བཞིན་དུ་ཁྲུས་བྱས་ནས་དར་དཔྱངས་དང་མེ་ཏོག་གི་ཕྲེང་བ་བཅིངས་ལ། ཡེ་ཤེས་སེམས་དཔའི་སྙིང་གར་རང་གི་ཕྱག་མཚན་རྡོ་རྗེའི་
ཆང་གཟུངས་ལ་རང་གི་ཆོས་ཀྱི་ཡི་གེ་དཀྱིལ་འཁོར་བའི་ལྷ་མ་ལུས་པའི་ངོ་བོ་བལྟས་ལ། ཡང་ཨརྒྷ་དབུལ་ཞིང་སྔ་མ་བཞིན་དུ་སྦྱིན་སྲེག་གི་ཡོ་བྱད་ཐམས་ཅད་བསང་གཏོར་བྱས་ལ། དེ་བཞིན་དུ་དགང་གཟར་བླངས་ལ་ཇི་སྙེད་པའི་དགང་བླུགས་མེ་ལྷ་དེའི་ཞལ་དུ་དབུལ་ལོ། །དེ་ནས་བླུགས་གཟར་གྱིས་བརྒྱ་རྩ་བརྒྱད་དམ་དེའི་ཕྱེད་དམ། སྦྱིན་སྲེག་བྱས་ནས་དགང་བླུགས་དབུལ་ཏེ། སྤོས་གཏུལ་བ་དང་དྲིལ་བུའི་སྒྲ་དང་ལྷན་ཅིག་ཡི་གེ་བརྒྱ་པ་ལན་གསུམ་མ་མ་ལན་ཅིག་བརྗོད་ལ་ལྷག་མ་སྦྱིན་སྲེག་གི་ཡོ་བྱད་སྔ་མ་བཞིན་དུ་སྔགས་འདིས་དབུལ་བར་བྱའོ། །ཨོཾ་བཛྲ་དྷཱ་ཏུ་ར་ཨ་མོ་ཀ་སྱ་ཤཱནྟིཾ་ཀུ་རུ་སྭཱ་ཧཱ། ཡང་ན་ཛི་ན་ཛི་ཀ་ཅེས་བྱ་བས་སོ། །དེ་བཞིན་དུ་རྒྱས་པ་ལ་སོགས་པ་ལ་ཡང་ངོ༌། །དྲི་བཟང་གི་མེ་ཏོག་ནི་ཚོགས་གང་ཡང་རུང་བ་དེ་དག་ཐམས་ཅད་དང་དེ་བཞིན་དུ་བདག་ཉིད་ཀྱི་ཁ་ཟས་ལ་སོགས་པ་ཕུན་སུམ་ཚོགས་པའི་ཕྱིར་བསྲེག་པར་བྱའོ། །ཇི་ལྟར་མངོན་པར་འདོད་པའི་སྦྱིན་སྲེག་བྱས་ལ་མཐར་ཨོཾ་ཨཱཿ་ཧཱུཾ་ཧྲཱིཿ་ཞེས་བྱ་བས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསུམ་མམ་བདུན་ནམ་ཉི་ཤུ་རྩ་གཅིག་མར་གྱི་དགང་བླུགས་ཀྱིས་སྦར་དུ་བཅུག་ལ་ཞབས་བསིལ་དང་ཨརྒྷ་དང་འཐོར་འཐུང་དང་དྲིལ་བུ་དཀྲོལ་བ་སྔོན་དུ་འགྲོ་བས་བྱིན་ཏེ་མཐར་དགང་བླུགས་ཕུལ་ནས། ཡང་ཨརྒྷ་ལ་སོགས་པ་ཕུལ་ནས་མཆོད་ཅིང་བསྟོད་ལ་མངོན་པར་འདོད་པའི་དོན་བསྒྲུབ་པའི་ཕྱིར་ཞུས་ལ་བཟོད་པར་གསོལ་ཏེ། སེམས་མ་རྡོ་རྗེ་མའི་ཕྱག་རྒྱ་བཅིངས་ནས་མུ་ཞེས་བྱ་བས་གྱེན་དུ་དཀྲོལ་བར་བྱའོ། །ཁྱོད་ཀྱིས་སེམས་ཅན་དོན་ཀུན་མཛད། །ཇི་ལྟར་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་སེམས་ཅན་དོན་ལ་གཤེགས། །ཞེས་བྱ་བས། ཡེ་ཤེས་སེམས་དཔའ་གཤེགས་སུ་གསོལ་བ་སྦྲུལ་པ་ནི་མེའི་ནང་དུ་ཆོས་ཀྱི་དབྱིངས་སུ་གྱུར་པ་ལ་ཐིམ་ནས་སླར་ཡང་མཆོད་ཡོན་ལ་སོགས་པ་ཕུལ་ཏེ་ལྷག་མ་སྦྱིན་སྲེག་གི་ཡོ་བྱད་དབུལ་ལོ། །སྦྱིན་སྲེག་གི་མཐར་སློབ་མ་ལ་བརྟེན་ཏེ་དགང་བླུགས་ཕུལ་ནས། ཞབས་བསིལ་དང་ཨ་རྒྷ་དང་མཆོད་ཡོན་བྱིན་ཏེ། སློབ་མའི་མངོན་པར་འདོད་
པའི་དངོས་གྲུབ་ལ་གསོལ་བ་གདབ་པར་བྱའོ། །མེ་ལྷ་ཁྱོད་ནི་གཤེགས་པར་མཛོད། །ལྷ་ཡི་དྲང་སྲོང་བྲམ་ཟེ་མཆོག །བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཏེ་གཤེགས། །སྤྱན་འདྲེན་པའི་ཕྱག་རྒྱའི་མཐེ་བོང་འགྲོལ་བའི་ཚུལ་གྱིས་མེ་ལྷ་གཤེགས་སུ་གསོལ་ནས་འབར་བའི་ངོ་བོར་བལྟས་ཏེ། རང་གི་ཡི་དམ་གྱི་ལྷའི་ང་རྒྱལ་གྱིས་ཕྱོགས་སྐྱོང་ལ་གཏོར་མ་སྦྱིན་བར་བྱ་སྟེ། རང་གི་ཆོས་ཀྱི་ཡི་གེ་ཡོངས་སུ་གྱུར་པ་ལས་ལྷའི་དབང་པོ་ལ་སོགས་པ་ཕྱོགས་སྐྱོང་ཁ་དོག་དང་དབྱིབས་ཇི་ལྟར་བཤད་པ་དང་ལྡན་པ། ཕྱོགས་བཅུ་ལ་འཁོར་དང་བཅས་པ་བསམས་ཏེ། སྣོད་བཅུད་བཟའ་བ་དང་ཆང་དང་ཤ་ལ་སོགས་པས་བཀང་བ། ཆུའི་མཎྜལ་ལ་བཞག་ནས་མཆོད་པ་རྣམ་པ་ལྔ་ཡིས་མཆོད་ཅིང་སྤོས་གཏུལ་བ་དང་དྲིལ་བུ་དཀྲོལ་བས་དེ་རྣམས་བཀུག་བས་དེ་རྣམས་བཀུག་ལ་སྔོན་དུ་བྱས་ཏེ། གཡས་བརྐྱང་བས་འཇིགས་པ་མེད་པའི་སེམས་དང་ལྡན་བས་སྔགས་འདི་རྣམས་ཀྱིས་གཏོར་མ་གཏང་ངོ༌། །ཨོཾ་ཨིནྡྲ་ཡ་སྭཱ་ཧཱ་ལྷའི་དབང་ལྡན་པོའིའོ། ཨོཾ་ཝེ་ཝཱ་ས་ཏྭཱ་ཡ་སྭཱ་ཧཱ་གཤིན་རྗེའོ། །ཨོཾ་ཨ་བཾ་པ་ཏ་ཡེ་སྭཱ་ཧཱ་ཆུ་ལྷའིའོ། །ཨོཾ་དྐྵ་ན་ཝེ་ཪྻ་དཱ་རེ་སྭཱ་ཧཱ་རྣམ་ཐོས་སྲས་ཀྱིའོ། །ཨོཾ་ཨང་ཡེ་སྭཱ་ཧཱ་མེ་ལྷའིའོ། །ཨོཾ་རཱ་ཀྵ་པ་ཏེ་ཡེ་སྭཱ་ཧཱ་བདེན་བྲལ་གྱིའོ། །ཨོཾ་ཝཱ་ཡ་ཝེ་སྭཱ་ཧཱ་རླུང་ལྷ་འིའོ། །ཨོཾ་རུ་དྲའ་ཡ་སྭཱ་ཧཱ་དབང་ལྡན་གྱིའོ། །ཨོཾ་བྲ་ཧྨ་ནི་སྭཱ་ཧཱ། ཨོཾ་སཱུ་ཪྻ་གྲ་དཱ་དྷི་པ་ཏ་ཡེ་སྭའ་ཧཱ། ཨོཾ་ཙནྡྲ་ན་ཀྵ་ཏྲ་དེ་བི་ཏ་ཡེ་སྭཱ་ཧཱ་སྟེང་དུའོ། །ཨོཾ་པྲྀ་ཐྭཱི་སྭཱ་ཧཱ། ཨོཾ་སྭ་ཡེ་བྷྱཿ་སྭཱ་ཧཱ། ཨོཾ་ནཱ་གི་ནི་བྷྱཿ་སྭཱ་ཧཱ་འོག་ཏུའོ། །དེའི་འོག་ཏུ་སྔགས་འདི་རྣམས་ཀྱིས་རང་རང་གི་ཕྱོགས་དང་མཚམས་སུ་ཉེ་བའི་སྒྲུབ་པ་པོ་བདུད་རྩི་འཁྱིལ་པའི་སྔགས་བཟླས་པའི་སྒྲུབ་པ་པོས་གཏོར་མའི་སྣོད་ཤིང་གཅིག་ལ་སོགས་པ་ལ་གཏོར་བར་བྱའོ། །བློ་ལྡན་གང་ཞིག་གཏོར་མ་གཏང༌། །བདུད་རྩི་འཁྱིལ་པའི་སྔགས་ཀྱིས་ནི། །དེ་ལ་བསང་གཏོར་བྱ་བ་སྟེ། །གཞན་དུ་ན་དེ་དེ་སྤྱོད་འགྱུར། །ཞེས་འབྱུང་ངོ༌། །དེའི་འོག་ཏུ་ལྷ་ཁང་ལ་སོགས་པའི་བསྲུང་བ་ནག་པོ་ཆེན་པོ་གདོང་བཞི་ལག་པ་བརྒྱད་པ་ཁ་དོག་དམར་པོ་དང་ནག་པོ་དང་དཀར་པོ་དང་ལྗང་གུའི་གདོང་ཡོད་པ། ཐོད་པ་དང་ཁ་ཊྭཱཾ་ག་དང་རྒྱུད་མངས་དང་མདུང་དང༌། རལ་གྲི་དང་དབྱིག་
པ་དང་གླང་པོའི་ལགས་པ་བསྣམས་པ། གཡོན་བརྐྱང་བས་མི་མགོ་གཉིས་ལ་གནས་པ་ཀུ་ཙོ་ཆེན་པོ་དང་བཅས་པའི་མཁའ་འགྲོ་མའི་ཚོགས་ཀྱིས་ཡངས་སུ་བསྐོར་བ། མཆེ་བ་རྣམ་པར་གཙིགས་པ་བསྒོམས་ཏེ་སྐུ་ལ་སོགས་པ་བྱིན་གྱིས་བརླབ་པ་དང་ཡེ་ཤེས་སེམས་དཔའ་ཏིང་ངེ་འཛིན་སེམས་དཔའ་བྱིན་གྱིས་བརླབ་པ་མངོན་དུ་བྱས་ཏེ་ཚད་ཆེན་པོ་བུམ་པ་གཅིག་ཆུས་བསྐང་པ། ཨོཾ་ལོ་པོ་ལ་ལ་སོགས་པ་བཟའ་བ་དང་བཏུད་བ་དང་མྱང་བ་དང་འཇིག་པ་དང་ཐུབ་པ་དང༌། བྱིས་པའི་རྩེད་མོ་དང༌། མྱོས་པ་དང་ཆང་དང༌། བེ་ནེ་དང་དང་ནག་པོ་དང་སྒོག་ཀྱའི་དབྱེ་བ་དང་ཙམ་པོ་ལི་དང་ཤ་ཀོ་ལི་ལ་སོགས་པས་བཀད་བར་བྱ་སྟེ། དྲི་བུའི་སྒྲ་དང་སྤོས་གཏུལ་བ་བཀུག་ལ་སྔགས་འདིས་དབུལ་ལོ། །ཨོཾ་མ་ཧཱ་ཀཱ་ལཀྵེ་ཏྲ་པའི་ལ་སརྦ་དུ་ཥཊཱཾ་ཌཱ་ཀི་ནྰཾ་བ་ལིཾ་པྲ་ཏཱི་ཙྪ་ས་མ་ཡ་མནུ་སྨར་ཡ་ཧཱུཾ་ཕཊ་སཱ་ཧཱ་ཞེས་བྱ་བ་འདི་དུར་ཁྲོད་ལ་གཏོར་བར་བྱའོ། །དེ་བཞིན་དུ་མེ་གཙོ་བོར་གྱུར་པ་གནོད་སྦྱིན་དང་སྲིན་པོ་དང་འབྱུང་པོ་དང་ཡི་དགས་དང༌། ཤ་ཟ་དང་སྨྱོ་བྱེད་དང་བརྗེད་བྱེད་དང༌། མཁའ་འགྲོ་ལ་སོགས་པ་རང་རང་གི་ཆོས་ཀྱི་ཡི་གེ་ཡོངས་སུ་གྱུར་པ་ལས་བྱུང་བ་དབྱིབས་འགྱུར་བ་རྣམ་པ་སྣ་ཚོགས་པའི་མཚོན་ཆ་འཛིན་པ་བསམས་ཏེ། དེ་བཞིན་དུ་བཀུག་ལ་མངོན་དུ་བྱས་ཏེ། སྔ་མ་བཞིན་དུ་སྣོད་གཅིག་རྫས་ཐམས་ཅད་ཀྱིས་བཀད་བར་བྱས་ལ། མཆོད་པ་རྣམ་པ་ལྔ་ཡིས་མཆོད་ཅིང་དྲིལ་བུའི་སྒྲ་དང་སྦོས་ཀྱིས་བཀུག་ལ་སྔགས་འདིས་གཏོར་མ་གཏང་ངོ༌། །ཨོཾ་ཨང་ཡེ་སརྦ་བྷཱུ་ཏཱ་དྷི་པ་ཏ་ཡེ་སྭཱ་ཧཱ་ཞེས་བྱ་བ་བརྗོད་ནས། གཞི་མདོ་ལ་སོགས་པར་གཏོར་མ་གཏང་ངོ༌། །དེ་ནས་གྲེ་དུ་ཝ་ཞེས་བྱ་བ་ལ་སོགས་པས་གཤེགས་སུ་གསོལ་ཏེ། རྗེ་བཙུན་མའི་ཡི་གེ་བརྒྱ་པ་ལན་བདུན་བརྗོད་ནས་ལངས་ཏེ། ཨོཾ་བཛྲ་ཀཱི་ལ་ཡ་ཞེས་བྱ་བས་ཕུར་བུ་དང་མདའ་རྣམས་བཏོན་ཏེ། ལས་ཐམས་ཅད་པའི་ཆུ་འོ་མ་དང་བཅས་པས་སྤྱན་མའི་སྔགས་བཟླས་བཞིན་བས་མདའ་རྣམས་བཙུགས་ལ་བསྐོར་བ་གསུམ་བྱས་ཏེ། གར་དང་གླུ་ལ་སོགས་པ་སྔོན་དུ་འགྲོ་བས་ཇི་ལྟར་བདེ་བར་གནས་པར་བྱའོ། །གལ་ཏེ་ཡིད་བཞིན་གྱི་ནོར་བུ་དང་དཔག་བསམ་གྱི་ནོར་བུ་དང་དཔག་བསམ་གྱི་ཤིང་དང་བུམ་པ་བཟང་པོ་དང་རལ་གྲི་དང་རྡོ་རྗེ་དང་རྐང་མགྱོགས་དང་མིག་སྨན་དང་ཚངས་པའི་སྐུད་པ་དང་
ཁམས་སྦྱར་བ་དང་བཅུད་ཀྱིས་ལེན་པ་ལ་སོགས་པའི་དངོས་གྲུབ་ཆེན་པོ་བསྒྲུབ་པའི་ཕྱིར་སྔགས་ལ་ཚིམ་པ་དང་སྔར་བ་དང་གསོལ་བ་ནི་ཆོ་ག་འདིས་བྱས་ནས་ཕྱིན་ནས་ཐམས་ཅད་བསྒྲུབ་པར་བྱའོ། །དེའི་རིམ་པ་ནི་རྒྱ་མཚོ་ལ་རྒྱུ་བའི་གཙང་པོའི་གམ་དུ་ཕྱིན་ནས། དེའི་འགྲམ་གཉིས་ཀྱིས་བླངས་ནས་མ་འདྲེས་པར་བརྡུངས་ཏེ་ཨ་ཀ་རུ་དང་ཙནྡན་དང་པདྨ་གེ་སར་གྱི་ཕྱེ་མ་དང་འདྲེས་པས་གོང་བུ་བྱས་ཏེ་པདྨའི་སྣལ་མས་བཅིངས་ལ་ག་པུར་དང་སྤོས་ཀྱིས་བདུགས་ལ་ཉིན་ཞག་གཅིག་ཏུ་མར་དང་སྦྲང་རྩིས་བཀང་བའི་སྣོད་ལ་གཞག་སྟེ་ཕྱི་ནས་ཞག་གསུམ་གྱི་བར་དུ་དྲི་ཆུ་དཀར་པོའི་འཇམ་གྱི་རྒྱུན་གྱིས་སྔགས་འདིས་དབང་བསྐུར་བར་བྱའོ། །ཨོཾ་སརྦ་དེ་བ་དེ་བྱ་མུ་ཏྟ་རེ་སྭཱ་ཧཱ། ཨོཾ་ཧཱུཾ་ཕཊ་ནེ་སྭཱ་ཧཱ་རིམ་པ་ཇི་ལྟར་བཞུ་བ་དེ་བཞིན་དུ་དེའི་ཚེ་རྒྱ་མཚོ་ལ་རྒྱུ་བའི་གཙང་པོར་ཕྱིན་ནས་བསྐྱལ་བར་བྱའོ། །དེ་ལྟར་སྔགས་ཀྱིས་ལྷ་ཚིམ་པས་མྱུར་དུ་དངོས་གྲུབ་སྟེར་བར་འགྱུར་རོ། །བླུགས་གཟར་གྱིས་ཀྱང་མར་གྱི་དགང་བླུགས་སྟོང་གིས་སྦར་བ་དང་གསལ་བ་ཨོཾ་ཧྲི་ཞེས་སྔགས་ཀྱིས་བྱའོ། །དེ་ལྟར་ཚིམ་པ་དང་དབུལ་བའི་རིམ་གྱིས་ཐམས་ཅད་འགྲུབ་པར་འགྱུར་རོ། །དེ་ནས་ཕྱིའི་སྦྱིན་སྲེག་གི་ཆོ་ག་བསྟན་ཏོ། །དེ་ཉིད་བསྟན་པའི་ཕྱིར་སྦྱིན་སྲེག་བྱ་ཞེས་པ་ནི་ཕྱིའི་སྦྱིན་སྲེག་བྱ་བའོ། །འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་འདོད་པ་ནི་ཞི་བ་ལ་སོགས་པ་དང་སངས་རྒྱས་ཉིད་འདོད་པའོ། །སྔགས་པའོ་ཞེས་པ་ནི་སྦྱིན་སྲེག་གི་ཆོ་ག་ལ་མཁས་པའི་རྡོ་རྗེ་སློབ་དཔོན་ནོ། །གཉི་གའི་རྒྱུད་ནི་རྣལ་འབྱོར་དང་རྣལ་འབྱོར་ཆེན་པོའི་རྒྱུད་དོ། །དེ་ལས་གསུངས་པའི་ཆོ་ག་ནི་རིམ་པ་ཇི་ལྟར་སྔར་བཤད་པའོ། །དེ་ཡན་ཆད་ཀྱིས་ཕྱིའི་སྦྱིན་སྲེག་བཤད་དོ། །ནང་གི་ཞེས་བྱ་བ་ནས་གོ་སླ་སྟེ་ཞེས་པའི་བར་དུ་ནི་ཇི་ལྟར་བཏུང་བ་དང་བཟའ་བ་ཇི་ལྟར་རྙེད་པ་བདུད་རྩི་ལྔའི་ཚོགས་ལེགས་པར་སྦྱངས་ལ་ལག་པ་དང་མགྲིན་པ་སྦྱངས་ཤིང་ཡེ་ཤེས་སེམས་དཔའི་མེ་ལྷ་བསྲེག་པར་བྱ་བ་དང༌། དེ་བཞིན་དུ་ཚོགས་ཀྱི་འཁོར་ལོའི་མཐར་ལྷག་མ་ཐམས་ཅད་བསྡུས་ལ། དབང་པོ་གཉིས་དང་སྙོམས་པར་ཞུགས་པ་སྔོན་དུ་འགྲོ་བའི་ལས་ཀྱི་དབྱེ་བས། དཀར་པོ་ལ་སོགས་པའི་ཁ་དོག་གི་རྣམ་པ་ཅན་གྱི་མེ་ཐབ་ཀྱི་ནང་དུ་ཤིན་ཏུ་སྦར་བའི་མེའི་ལྟའི་ཞལ་ནས་ཡེ་ཤེས་
ཀྱི་མེ་ལྷ་སྦྱིན་པར་བྱའོ་ཞེས་བསྟན་ཏོ། །དེ་ནི་ནང་གི་སྦྱིན་སྲེག་གོ །གཞན་ཡང་དངོས་པོ་མེད་པའི་ནང་གི་མཚན་ཉིད་ཀྱི་སྦྱིན་སྲེག་ཡིན་ཏེ། ཇི་སྐད་དུ། ནང་གི་སྦྱིན་སྲེག་ལས་ནི་རྣམ་པར་རྟོག་པའི་ཚོགས། །སྲེག་པར་བྱེད་དེ་ཐུབ་དབང་ཟླ་བས་གསུངས། །བགེགས་དང་དངོས་གྲུབ་རྣམ་པར་རྟོག་པ་ཙམ། །གཉིས་མེད་དེ་ཉིད་རྣམ་པར་རྟོག་པས་སྟོང༌། །ཐམས་ཅད་སྟོང་པའི་དབང་ཡིད་དེ་ཐབ་ཅེས་བྱ་བ། །པདྨ་རྡོ་རྗེ་དང་ལྡན་དངོས་པོ་ཐམས་ཅད་བུད་ཤིང་གིས་ཕྱུག་པ། །ནམ་མཁའི་དཀྱིལ་བཞིན་དྲི་མེད་རྒྱ་ཆེན་རྟོག་བ་ཙམ་ནི་འབྲུ་དང་ལྡན།། ཤེས་རབ་མེ་ཡིས་ཤིན་ཏུ་འབར་ཞིང་ཉོན་མོངས་སྡིག་པ་རབ་ཏུ་ཞི། །སྲས་བཅས་བདེ་གཤེགས་ཡུམ་གྱི་གཟི་བརྗིད་འབར་བས་རབ་ཏུ་ཁྱབ། །ཁམས་གསུམ་སྲིད་པའི་ཐབ་ལ་འདུ་བྱེད་ཐམས་ཅད་བསྲེག་བྱ་ཡིན། །ངན་སོང་ལམ་ལ་ངེས་སྦྱར་ཕུང་པོ་ཁམས་སོགས་བུད་ཤིང་རྣམས་ཀྱིས་ནི། །རྟོག་པ་ཐམས་ཅད་ལས་གྲོལ་ཞི་བའི་ལས་ནི་གྱིས། །དེ་བཞིན་དུ་དཔལ་སངས་རྒྱས་ཡེ་ཤེས་ཞབས་ཀྱིས་ཀྱང༌། ཕྱི་ཡི་སྦྱིན་སྲེག་ཆོ་ག་རྟོགས་བྱ་བ། །ཡིད་ཀྱིས་བྱས་པ་ནང་གི་བདག་ཉིད་དེ། །ཕུང་པོ་ལ་སོགས་བུད་ཤིང་སྲེག་བྱེད་པ། །ཡེ་ཤེས་འབར་བ་བླ་ན་མེད་པར་བཤད། །ཅེས་འབྱུང་ངོ༌། །སྒྲ་ཇི་བཞིན་མ་ཡིན་པར་བཤད་པའོ་ཞེས་པ་ནི་འཇིག་རྟེན་དང་བསྟན་བཅོས་ལས་ཕྱི་རོལ་དུ་བྱས་པའི་སྒྲའི་སྒོ་ནས་ནང་གི་སྦྱིན་སྲེག་གི་བརྡ་བསྟན་པའི་ཕྱིར་རོ། །རྣམ་པར་སྣང་མཛད་ཅེས་བྱ་བ་ནས་དེར་འཇུག་པར་བྱའོ་ཞེས་བྱ་བའི་བར་དུ་ནི་རྡོ་རྗེ་འཆང་ཆེན་པོ་ཡོངས་སུ་གྱུར་པ་ལས་བདག་ཞེ་སྡང་རྡོ་རྗེ་ཉིད་བསྒོམས་ལ་མདུན་དུ་ཡི་གེ་གསུམ་ཡོངས་སུ་གྱུར་པ་ལས་འོད་དཔག་ཏུ་མེད་པའི་རྣམ་པ་ཅན་ཁ་དོག་དམར་པོ་སློབ་མས་བསྒོམས་ལ། དེའི་ཡན་ལག་ཐམས་ཅད་ལ་ཡི་གེ་ཨ་བཀོད་ནས་མགོ་བོ་དང་ལྐོག་མ་དང་སྙིང་ག་དང་རྐང་པའི་འོག་ཏུ་ཡི་གེ་ཧཱུཾ་ཛྷཻཾ་བཀོད་ལ། ཡང་ཡི་གེ་ཛྷཻཾ་ལས་འོད་ཟེར་གྱི་ཚོགས་རྐང་པའི་ཁོང་སྟོན་གནས་ཞུགས་པས་ཡི་གེ་ཧཱུཾ་ལ་སོགས་པ་ཡོངས་སུ་གྱུར་པ་ལས་བསྐྱེད་པའི་མི་བསྐྱོད་པ་ལ་སོགས་པ་བཀུས་ཞིང་མགུལ་བ་ལ་སོགས་པ་གསུམ་པོ་ཉེ་བར་མཚོན་ནས། དེའི་ལྕེ་ལ་ཨ་བཀོད་པ་ལས་
བྱུང་བའི་འོད་དཔག་ཏུ་མེད་པ་བསྒོམས་ཏེ། རྡོ་རྗེ་སྨྲོས་ཤིག་ཅེས་དྲིས་ནས་དེའི་ངག་ནས་འདས་པ་ལ་སོགས་པ་ཤེས་ནས་མི་བསྐྱོད་པ་ལ་སོགས་པ་ལ་གཤེགས་སུ་གསོལ་བར་བྱས་ཏེ་སྲུང་བའི་འཁོར་ལོས་སྣོད་བསྲུང་བར་བྱའོ་ཞེས་བསྟན་ཏོ། །འདི་ནི་ཞེས་བྱ་བ་ནས་སྔགས་ཀྱི་རྡོ་རྗེ་ནི་འདི་ཡིན་ནོ་ཞེས་པའི་བར་དུ་ནི་དཀྱིལ་འཁོར་དུ་འཇུག་པ་ལས་སྔོན་དུ་དཀྱིལ་འཁོར་གྱི་སྒོ་ལ་གནས་པ་གོས་དམར་པོས་མིག་ལ་བཀབ་པའི་སློབ་མ་ཡི་གེ་ལྔ་པའི་སྔགས་ཀྱིས་དཀྱིལ་འཁོར་དུ་གཞུག་སྟེ། དེ་ནས་སྔར་བཤད་པའི་རྡོ་རྗེ་དབབ་པར་བྱའོ་ཞེས་བསྟན་ཏོ། །དེ་ལ་ཞེས་བྱ་བ་ནས་བསྟིམ་པར་བྱའོ་ཞེས་པའི་བར་དུ་ནི་རྡོ་རྗེ་སློབ་དཔོན་གྱིས་སློབ་མ་ལ་དབང་བསྐུར་བའི་དོན་དུ་དཀྱིལ་འཁོར་བྲིས་ལ་ནམ་མཁའ་ལ་བཞུགས་པའི་དེ་བཞིན་གཤེགས་པ་རྣམས་གཟུགས་རྡོ་རྗེ་མ་ལ་སོགས་པས་མཆོད་ཅིང་དེ་རྣམས་བཀུག་ནས་དཀྱིལ་འཁོར་ལ་བསྟིམ་པར་བྱའོ་ཞེས་བསྟན་ཏོ། །རྡོ་རྗེ་སྐུ་གསུམ་ཞེས་བྱ་བ་ནས་དགོད་པར་བྱའོ་ཞེས་བྱ་བའི་བར་དུ་ནི་རིགས་པའི་དབང་བསྐུར་བའི་དུས་སུ་ཐབས་དང་ཤེས་རབ་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ཀྱི་ཐིག་ལེ་འོད་ཟེར་གྱི་ཚོགས་ཀྱིས་བསྐུལ་བའི་དེ་བཞིན་གཤེགས་པ་དང༌། དེ་བཞིན་དུ་ཡེ་ཤེས་ཀྱི་ཆུས་གང་བའི་བུམ་པ་བསྣམས་པ་སྤྱན་ལ་སོགས་པ་རྡོ་རྗེ་སེམས་དཔའ་རིང་ངེ་འཛིན་ལ་གནས་པའི་རྡོ་རྗེ་སློབ་དཔོན་གྱིས་བསྒོམ་ལ། དེ་རྣམས་ཀྱིས་སློབ་མ་དབང་བསྐུར་ཏེ་དེའི་བ་སྤུའི་བུ་གའི་སྒོ་ནས་དེ་རྣམས་བཅུག་ལ་དེ་བཞིན་གཤེགས་པ་ཐམས་ཅད་ཀྱི་ངོ་བོར་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ནས་སློབ་མས་དབུགས་དབྱུང་བར་བྱའོ་ཞེས་པའི་བར་དུ་ནི་རིག་པའི་དབང་བསྐུར་སྦྱིན་པའི་ཕྱིར་རམ། ཕྱིར་མི་ལྡོག་པའི་དབང་སྦྱིན་པའི་དོན་དུ་ཁམས་གསུམ་པའི་ཆོས་ཀྱི་རྒྱལ་སྲིད་ལ་རབ་ཏུ་གཞག་པར་བྱེད་པ། མི་ཕྱེད་པ་རྡོ་རྗེ་འཆང་ཆེ་པོའི་རང་བཞིན་དབང་བསྐུར་ཁྱོད་ལ་སྦྱིན་ན་དེ་ནས་ཁྱོད་ཀྱིས་ཇི་ལྟ་བ་བཞིན་དུ་ནན་ཏན་བྱའོ་ཞེས་བསྟན་ཏོ། །དེ་ལ་ཞེས་བྱ་བ་ནས་བླ་མས་དབང་བསྐུར་སྦྱིན་པར་བྱའོ་ཞེས་པའི་བར་དུ་ནི་ཇི་ལྟར་བཅོམ་ལྡན་འདས་རྡོ་རྗེ་འཆང་ཆེན་པོས་མི་བསྐྱོད་པ་ལ་སོགས་པ་
ལ་དབང་བསྐུར་བ་དེ་བཞིན་དུ་ཤིན་ཏུ་བསྒྲལ་བར་དཀའ་བའི་འཁོར་བའི་རྒྱ་མཚོ་ལས་བསྒྲལ་བའི་དོན་དུ་བཅོམ་ལྡན་འདས་རྡོ་རྗེ་བླ་མ་དེ་བཞིན་དུ་བདག་ལ་ཡང་སྩོལ་ལོ་ཞེས་རྡོ་རྗེ་སློབ་མས་བླ་མ་ལ་གསོལ་བ་གདབ་པར་བྱ་བ་དང་དེ་བཞིན་དུ་དེ་དང་འདྲ་བའི་ཞུ་བས་མགུ་བའི་རྡོ་རྗེ་སློབ་དཔོན་གྱིས། ཕྱིར་མི་ལྡོག་པའི་དབང་དེ་ལ་སྦྱིན་པར་བྱའོ་ཞེས་བསྟན་ཏོ། །ལྷའི་གཟུགས་ཞེས་བྱ་བ་ནས་དགོད་པར་བྱའོ་ཞེས་པའི་བར་དུ་ནི་ཕྱིར་མི་ལྡོག་པའི་དབང་བསྐུར་གྱི་མཐར་ནམ་མཁའི་ཁམས་ན་བཞུགས་པའི་དེ་བཞིན་གཤེགས་པ་ལ་སོགས་པ་གང་གིས་སློབ་མ་དབང་བསྐུར་བ་དེ་རྣམས་གཅིག་ཏུ་བསྡུས་ཏེ་འོད་ཟེར་གྱི་ཚོགས་ཀྱི་ཚུལ་དུ་ཚངས་པའི་སྒོ་ནས་འཇུག་ཅིང་སྐུའི་དཀྱིལ་འཁོར་ཁྱབ་ནས་གནས་པ་བསྒོམས་ལ། དེའི་སྙིང་གའི་པདྨར་ལྷག་པར་མོས་པའི་དབང་གིས་ཡི་དམ་གྱི་ལྷ་དགོད་པར་བྱའོ་ཞེས་བསྟན་ཏོ། །དེ་ལྟར་ཞེས་བྱ་བ་ནས་ཞེས་ཀྱང་གསུངས་ཞེས་པའི་བར་དུ་ནི་སྣང་བར་གྱུར་པའི་ཤེས་རབ་དང་ལྡན་པའི་སློབ་མ་ལ་དཀྱིལ་འཁོར་གྱི་དེ་ཁོ་ན་ཉིད་དང༌། །ལྷའི་དེ་ཁོ་ན་ཉིད་དང༌། ལེའུ་ལྔ་པ་ལས་གསུངས་པའི་དམ་ཚིག་ལྔ་སྦྱིན་པར་བྱའོ་ཞེས་བསྟན་ཏོ། །སྔགས་ཀྱིས་ཞེས་བྱ་བ་ནས་ལྷའི་རྣལ་འབྱོར་བྱིན་ལ་ཞེས་པའི་བར་དུ་ནི་སློབ་མས་ཞུས་པའི་བླ་མས། དེའི་མོས་པ་སྤྱད་ཅིང་དྲིས་ལ་དེ་དང་རྗེས་སུ་མཐུན་པའི་སྔགས་དང་དེའི་བརྗོད་པར་བྱ་བར་འགྱུར་བའི་ལྷའི་ཏིང་ངེ་འཛིན་ལ་སྦྱིན་པར་བྱའོ་ཞེས་བསྟན་ཏོ། །གསང་བ་ཞེས་བྱ་བ་ནས་རྙེད་པར་མི་དཀའ་བའོ་ཞེས་བྱ་བའི་བར་དུ་ནི་མཆོད་པ་སྔོན་དུ་འགྲོ་བར་གསོལ་བ་གདབ་སྟེ། སློབ་མས་བླ་མ་ལ་ཕྱག་རྒྱ་དབུལ་བར་བྱ་བ་དང༌། དེས་ཀྱང་སྙོམས་པར་ཞུགས་པའི་རིམ་གྱིས་སངས་རྒྱས་ཐམས་ཅད་བཀུག་ལ། ངག་གི་ལམ་ནས་ཞུགས་ཏེ་སྣང་བ་ལ་སོགས་པའི་རིམ་གྱིས་དེ་ཁོ་ན་ཉིད་མྱོང་ཞིང་ཕྱག་རྒྱའི་པདྨར་བྱང་ཆུབ་ཀྱི་སེམས་སྤྲོ་ཞིང་དེ་ལས་ས་ལ་མ་ལྷུང་བ་དུང་ཕོར་གྱིས་བླངས་ལ་ལྷག་མ་བདུད་རྩི་བཞི་དང་སྦྱར་ཏེ་ཡི་གེ་གསུམ་གྱིས་སྦྱངས་པ་ལ་སོགས་པ་བྱས་ནས་དེ་བཞིན་གཤེགས་པ་ཐམས་ཅད་བསྡུས་པའི་བློས་ཀྱེ་མ་ཧོ་བདེ་བ་ཆེན་པོ་ཞེས་ཚིག་
བརྗོད་པའི་སློབ་མ་སྤྱོད་དུ་གཞུག་གོ་ཞེས་བསྟན་ཏོ། །རྙེད་པར་མི་དཀའ་བ་ནི་རྡོ་རྗེ་སེམས་དཔའི་གོ་འཕང་རྙེད་པར་དཀའ་བ་མ་ཡིན་ཏེ་དེའི་དུས་ནས་བརྩམས་ཏེ་ཞེས་བྱ་བ་ནས་འབྱུང་བས་སོ། །དེ་ལྟར་ཞེས་བྱ་བ་ནས་བར་དུའོ་ཞེས་བྱ་བའི་བར་དུ་ནི་རིག་པའི་དབང་བསྐུར་བའི་འོག་ཏུ་སློབ་མ་ལ་ལྷའི་དེ་ཁོ་ན་ཉིད་བསྟན་པར་བྱ་སྟེ། དེ་ལ་སོགས་པ་ཁམས་བཞིའི་རང་བཞིན་གྱི་སྤྱན་མ་ལ་སོགས་པ་དཀྱིལ་འཁོར་དུ་སྣང་བ་ཡིན་པ་དེ་རྣམས་འདོད་ཆགས་ཀྱི་རིགས་ཅན་སེམས་ཅན་རྗེས་སུ་གཟུང་བའི་དོན་དུ་རྣམ་པར་སྣང་མཛད་ལ་སོགས་པ་ཡོངས་སུ་གྱུར་པ་ལས་བྱུང་བ་ཡིན་གྱི་ཞི་བ་ལ་སོགས་པའི་ལས་ཀྱི་ཚོགས་བཞི་སྒྲུབ་པར་བྱེད་པའི་ཕྱིར་ཡིན་པར་བསྟན་ཏེ། དེ་ཁོ་ན་ཉིད་ལ་སྐྱེས་པ་དང་བུད་མེད་ཀྱི་དབྱེ་བ་ནི་མེད་དེ་ཐ་མི་དད་པའི་ཕྱིར་རོ། །དེ་ཡང་ཉེ་བར་མཚོན་པ་ཙམ་ཡིན་ཏེ་གཞན་ཡང་ཞི་བ་དང་དྲག་པོ་དང་བར་མའི་གཟུགས་ཅན་གྱི་དེ་བཞིན་གཤེགས་པ་དང་བྱང་ཆུབ་སེམས་དཔའ་དང་ལྷ་མོ་དང་ཁྲོ་བོ་རྣམས་ནི་དེ་དང་དེ་རྣམ་པར་དག་པ་དང་ལྡན་པ་རྟོགས་པར་བྱའོ། །དེ་ལས་ཞེས་བྱ་བ་ནས་མཉེས་པར་འགྱུར་རོ་ཞེས་པའི་བར་དུ་ནི་མཆོད་པའི་དུས་དང་སྦྱིན་སྲེག་གི་དུས་སུ་རྡོ་རྗེ་འཆང་ཆེན་པོ་ལ་སོགས་པའི་རྣལ་འབྱོར་པ་རྣམས་ཀྱིས་ཁ་ན་མ་ཐོ་བ་མེད་པ་གླང་པོ་ལ་སོགས་པའི་ཤ་སྦྱང་བ་ལ་སོགས་པའི་རིམ་གྱིས་སྦྱངས་བས་དཀྱིལ་འཁོར་པ་རྣམས་ཚིམ་པ་དང་དམ་ཚིག་གི་མེ་ལྷའི་ཞལ་ནས་ཡེ་ཤེས་ཀྱི་མེ་ལྷ་ཚིམ་པ་དང༌། དེ་ཚིམ་པས་མ་གུ་བར་གྱུར་པ་དེ་བཞིན་གཤེགས་པ་རྣམས་ཀྱིས་སྒྲུབ་པ་པོ་ལ་དངོས་གྲུབ་སྩོལ་བར་འགྱུར་རོ་ཞེས་བསྟན་ཏོ། །ཉིན་རེ་ཞེས་བྱ་བ་ནས་ཞེས་བྱ་བར་དགོངས་སོ་ཞེས་པའི་བར་དུ་ནི་གསང་བའི་དབང་བསྐུར་ཐམས་ཅད་ཀྱི་མཐར་རམ། ཕྱི་དང་ནང་དང་གསང་བའི་མཆོད་པས་ཚོགས་ཀྱི་འཁོར་ལོ་བྱའོ་ཞེས་བསྟན་ཏོ། །དེ་ཡང་ལེའུ་དང་པོ་ནས་རྒྱས་པར་བསྟན་པས་འདིར་མ་བཤད་དོ། །བདུད་རྩི་ལྔ་ཞེས་བྱ་བ་ནས་བཀའ་སྩལ་ཏོ་ཞེས་པའི་བར་དུ་ནི་བདུད་རྩི་ལྔའི་སྤྱོད་པའི་དུས་སུ་དེ་ཉིད་སྦྱང་བ་ལ་སོགས་པའི་རིམ་པས་སྦྱངས་ནས་འབར་བར་འགྱུར་རོ། །དེའི་མཐུས་ཀྱང་ལས་དང་པ་པོ་རྣམས་ཀྱིས་སྨོད་པའི་སེམས་བཟློག་ནས་རྟོག་པ་མེད་པའི་སེམས་ཀྱིས་སྤྱོད་པ་ལ་རྩོལ་བར་
འགྱུར་རོ་ཞེས་བསྟན་ཏོ། །རྫོགས་པའི་རིམ་པ་ལ་གནས་པའི་རང་བཞིན་གྱིས་དག་པའི་ཆོས་ཐམས་ཅད་ཡོངས་སུ་ཤེས་པས་སྨོད་པའི་སེམས་མི་འབྱུང་སྟེ། ཆོས་ཐམས་ཅད་རང་བཞིན་གྱིས་དག་པས་ཀྱང་རང་བཞིན་གྱིས་དག་པའོ་ཞེས་བཤད་པའི་ཕྱིར་རོ། །དེ་ཡང་རིགས་པ་དང་ལུང་དག་གིས་སྔར་བཤད་ཟིན་ཏོ། །འདི་ལྟར་ཞེས་བྱ་བ་ནས་གོ་སླའོ་ཞེས་པའི་བར་དུ་ནི་སྔགས་ཀྱི་ལམ་གྱིས་ཞི་བ་དང་རྒྱས་པ་དང་དབང་དང་དགུག་པ་དང་རྣམ་པར་སྡང་བ་དང༌། གནས་སྤོང་བ་དང་རེངས་བ་ཞེས་བྱ་བ་འཇིག་རྟེན་པའི་དངོས་གྲུབ་བརྒྱད་དང་འཁོར་ལོ་དང་རྡོ་རྗེ་དང་རིན་ཆེན་དང་པདྨ་དང་རལ་གྲི་དང་རི་ལུ་དང་མིག་སྨན་དང་རྐང་མགྱོགས་ལ་སོགས་པ་དངོས་གྲུབ་ཆེན་པོ་བརྒྱད་དང༌། འཇིག་རྟེན་ལས་འདས་པའི་ཕྱག་རྒྱ་ཆེན་པོའི་དངོས་གྲུབ་ཀྱང་འགྲུབ་པར་འགྱུར་རོ་ཞེས་བསྟན་ཏོ། །ཕ་རོལ་ཕྱིན་པའི་ཚུལ་གྱིས་ནི། །ཤིན་ཏུ་འབད་པས་བསྒྲུབ་པར་བྱའོ། །ཞེས་བྱ་བ་ནི། ཕ་རོལ་ཕྱིན་པའི་རྣལ་འབྱོར་པས་མཐོང་བ་དང་བསྒོམ་པའི་ལམ་གྱི་རིམ་གྱིས་བསྐལ་པ་གྲངས་མེད་པ་གསུམ་གྱིས་བྱང་ཆུབ་ཐོབ་པར་འགྱུར་རོ། །འདིར་ནི་འབད་རྩོལ་མེད་པས་སོ། །བཤང་གཅིས་ཞེས་བྱ་བ་ནས་དེ་སྐད་ཅེས་གསུངས་ཏེ་ཞེས་པའི་བར་དུ་ནི་མར་ཝེ་ཤོ་མུ་དང་ཀུ་གོ་ད་ཧ་ན་ཆ་མཉམ་པར་བྱས་ནས་བཏགས་ཏེ་ཐོད་པ་ཁ་སྦྱར་དུ་བཞག་ནས་ཡི་གེ་དགུ་པའི་སྔགས་ཀྱིས་བྱིན་གྱིས་བརླབས་ནས་སྦྱང་བ་ལ་སོགས་པའི་རིམ་གྱིས་སྦྱངས་ལ་ཚེས་བརྒྱད་པའམ་བཅུ་བཞི་པའི་གང་ཡང་རུང་བའི་ཞག་ལ་ཡུངས་ཀར་གྱི་འབྲུའི་ཚད་ཙམ་གྱི་རི་ལུ་སུམ་བརྒྱ་དྲུག་ཅུ་གྲིབ་མ་ལ་བསྐམ་པར་བྱས་ནས། ཉིན་རེ་རི་ལུ་གཅིག་ཅིག་ཁར་བཅུག་ནས་སྒོམ་པར་བྱེད་ན་དེའི་ཚེ་རིག་པ་འཛིན་པ་དང་འདྲ་བར་འགྱུར་རོ་ཞེས་བསྟན་ཏོ། །དེ་ལ་ཞེས་བྱ་བ་ནས་བཀའ་བསྒོ་པའི་ཚིག་གོ་ཞེས་པའི་བར་དུ་ནི་རྣམ་པར་སྣང་མཛད་ལ་སོགས་པའི་རྣལ་འབྱོར་པ་རྣམས་ཀྱིས་ཁ་དོག་དམར་པོའི་འོད་ཟེར་ལྔའི་ཚོགས་དང་བཅས་པའི་ཡི་གེ་ཧྲ་ནམ་མཁའ་ལ་བསམས་ཏེ། ནམ་མཁའི་ཁམས་དེ་ཡང་ཐུགས་རྡོ་རྗེ་ལ་སོགས་པ་དེ་བཞིན་གཤེགས་པ་རྣམས་དང་ལྷ་མོ་དང་
བྱང་ཆུབ་སེམས་དཔའ་དང་ཁྲོ་བོ་རྣམས་ཀྱིས་ཡོངས་སུ་གང་བར་བསྒོམས་ལ། དེ་རྣམས་ཀྱི་སྐུ་གསུང་ཐུགས་ཀྱི་ས་བོན་ཨ་ཁཾ་དྷི་ཞེས་བྱ་བ་ཡི་གེ་ཧྲི་ལ་ཞུགས་ཏེ། དེ་ཡོངས་སུ་གྱུར་བ་ལས་གནོད་མཛེས་རྒྱལ་པོ་ལ་སོགས་བ་གང་ཡང་རུང་བའི་ཁྲོ་བོ་བསམས་ལ། དེ་ལ་ཨོཾ་ཞེས་བྱ་བའི་སྔགས་ཀྱིས་བཀའ་སྦྱིན་ཏེ། དེ་སོང་ཞིང་ལོག་ན་སྒྲུབ་པ་པོ་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་སྩོལ་བར་འགྱུར་རོ་ཞེས་བསྟན་པ་དང༌། དེ་བཞིན་དུ་རྣམ་པར་སྣང་མཛད་ཀྱི་རྣལ་འབྱོར་པས་ཟླ་བ་དང་ཉི་མ་ལ་གནས་པའི་གཤིན་རྗེ་མཐར་བྱེད་དང༌། འོད་དཔག་ཏུ་མེད་པའི་རྣལ་འབྱོར་པས་པདྨ་དང་ཉི་མ་ལ་གནས་པའི་རྟ་མགྲིན་དང༌། མི་བསྐྱོད་པའི་རྣལ་འབྱོར་པས་པདྨ་དང་ཉི་མ་ལ་གནས་པའི་གནོད་མཛེས་ཀྱི་རྒྱལ་པོ་འམ་གཞན་གྱིས་མི་ཐུབ་པའི་བཀའ་ཉན་བསྒྲུབ་པར་བྱའོ་ཞེས་བསྟན་ཏོ། །དེ་ལྟར་བདག་པོ་ཞེས་བྱ་བ་ནས་གསུངས་སོ་ཞེས་པའི་བར་དུ་ནི་རིགས་ཀྱི་དབྱེ་བས་འདོད་པའི་རྒྱལ་པོ་ལ་སོགས་པ་ཁྲོ་བོ་དྲུག་ལག་ན་ལྕགས་ཀྱུ་ལ་སོགས་བ་ཐོགས་པ་བསྒྲུབ་པར་བྱའོ་ཞེས་བསྟན་ཏོ། །ལྕགས་ཀྱུ་དབྱིག་བ་རྩེ་གསུམ་དང༌། །རལ་གྲི་གྲྭ་རུ་དགོད་པར་བྱ། འདོད་པ་དབྱིག་པ་མི་གཡོ་སྟོབས། །གནོད་མཛེས་གཙུག་ཏོར་སྟེང་འོག་གོ །ཞེས་གསུངས་པའི་ཕྱིར་རོ། །དེས་ནི་ཁྲོ་བོ་བཅུའི་བཀའ་ཉན་བསྒྲུབ་པར་བྱའོ་ཞེས་བསྟན་ཏོ། །འོ་ན་དེ་བཞིན་གཤེགས་པ་དང་ལྷ་མོ་དང་བྱང་ཆུབ་སེམས་དཔའི་བཀའ་ཉན་ཅིའི་ཕྱིར་མ་གསུངས་ཤེ་ན་སྨྲས་པ། འདིར་དངོས་གྲུབ་འདོད་པའི་སྒྲུབ་པ་པོས་ལོ་སྐོར་གཅིག་གམ་ཟླ་བ་དྲུག་གམ་བཞི་འམ་གསུམ་མམ་གཅིག་གམ་ཟླ་ཕྱེད་ཀྱིས་རྩོམ་པས་ཀྱང་དངོས་གྲུབ་ཐོབ་པར་མི་འགྱུར་ན། དེའི་ཚེ་ཞག་བདུན་གྱིས་དངོས་གྲུབ་ཐོབ་པའི་ཕྱིར་ཁྲོ་བོའི་གཟུགས་ཅན་བཀའ་ཉན་ཁོ་ན་སྒྲུབ་པར་བྱེད་དེ། དེའི་ཚེ་དེའི་མཐུས། བཟང་དང༌། སྦྱིན་པ་དང༌། དབྱེ་བ་དང༌། འཆད་པ་ཞེས་བྱ་བའི་ཐབས་བཞི་པོས་དེ་བཞིན་གཤེགས་པ་རྣམས་ལ་བརྟེན་ཏེ། སྟོབས་ཀྱིས་དངོས་གྲུབ་ཐོབ་པར་འགྱུར་རོ། །ད་ཡང་ལེའུ་བཅུ་པ་ནས་རྒྱས་པར་བཤད་པས་འདིར་མ་བསྟན་ཏོ། །དོན་ནི་བཤད་ཟིན་ཏོ་ཞེས་པ་ནི་ལེའུ་བཅུ་གཉིས་པ་
ནས་དྲང་བ་དང་ངེས་པའི་དོན་གྱི་དབྱེ་བས་བཤད་དོ། །འདིར་ཞེས་པ་ནི་གནས་ལའོ། །སངས་རྒྱས་ནི་རྡོ་རྗེ་འཆང་ཉིད་དོ། །བསྒྲུབ་པར་བརྩམ་པ་ཉིད་དོ་ཞེས་པ་ནི་འཆད་པར་འགྱུར་བ་བསྒྲུབ་པར་བྱའོ་ཞེས་ཚིག་ལྷག་མ་སྟེ། བཀའ་ཉན་བསྐུལ་བ་ཞེས་བྱ་བའི་ཐ་ཚིག་གོ །རི་རབ་ཅེས་བྱ་བ་ནས་རྡོ་རྗེ་འཆང་ཆེན་པོའོ་ཞེས་པའི་བར་དུ་ནི་བཀའ་ཉན་སྒྲུབ་པའི་སྒྲུབ་པ་པོའི་གྲངས་མེད་ཅིང་ཚད་མེད་པ་བྲན་དང་བྲན་མོ་དང་ཕོ་ཉ་དང་ཕོ་ཉ་མོ་དང་བཀའ་ཉན་དང་བཀའ་ཉན་མོ་ལ་སོགས་པ་འཁོར་རྣམས་དབང་དུ་འགྱུར་བ་དང༌། དེ་བཞིན་དུ་གྲངས་མེད་ཅིང་ཚད་མེད་པ་བཅོམ་ལྡན་འདས་སངས་རྒྱས་ཀྱིས་བཞུགས་པར་གྱུར་པའི་ཞིང་གང་ཡིན་པ་དེ་རྣམས་སྐད་ཅིག་ཙམ་གྱི་ཕྱིན་ནས་ལོག་པ་དང༌། དེ་བཞིན་དུ་མངོན་པར་དགའ་བ་ལ་སོགས་པའི་སངས་རྒྱས་ཀྱི་ཞིང་ལ་བཞུགས་པའི་དེ་བཞིན་གཤེགས་པའི་དྲུང་དུ་ཕྱིན་ནས་དེའི་མན་ངག་ཐོས་པའི་ནུས་པས་མཐར་བདེན་པ་གཉིས་དབྱེར་མེད་པའི་རྡོ་རྗེ་འཆང་ཆེན་པོའི་གོ་འཕང་ཐོབ་པར་འགྱུར་རོ། །དེ་ལ་འདི་ནི་ཞེས་བྱ་བ་ནས་བྱིན་གྱིས་བརླབ་པར་བྱའོ་ཞེས་པའི་བར་དུ་ནི་འཇིག་རྟེན་པའི་གནོད་སྦྱིན་ལ་སོགས་པའི་བཀའ་ཉན་དང༌། འཇིག་རྟེན་ལས་འདས་པའི་གཤིན་རྗེ་མཐར་བྱེད་ལ་སོགས་པའི་བཀའ་ཉན་དེ་དག་ཐམས་ཅད་སྔགས་ཀྱི་རྒྱལ་པོ་ཡི་གེ་གསུམ་གྱིས་བསྐུལ་བར་བྱས་ཏེ། ལས་ལ་ངེས་པར་བྱའོ་ཞེས་བསྟན་ཏོ། །དེ་ཡང་ལེའུ་བཅུ་པ་ནས་གསུངས་སོ། །དེ་ལ་ཞེས་བྱ་བ་ནས་གནས་སྐབས་ཤེས་པའི་བར་དུ་ནི་བཀའ་ཉན་བསྐུལ་བ་མདོར་བསྟན་པ་བཤད་དོ། །དེ་ཡང་ཞེས་བྱ་བ་ནས་ངེས་པར་སྦྱོར་བའོ་ཞེས་པའི་བར་དུ་བཟང་བ་དང་སྦྱིན་པ་དང་དབྱེ་བ་དང་འཆད་པའི་དབྱེ་བས་བཀའ་ཉན་ལ་བསྐུལ་བ་བསྟན་ཏོ། །དེ་ཉིད་བསྟན་པའི་རྡོ་རྗེ་འཆང་ཆེན་པོའི་བཀའ་ཞེས་སྨོས་ཏེ། རྡོ་རྗེ་འཆང་ཆེན་པོའི་གཟུགས་ཅན་གྱི་སྒྲུབ་པ་པོའི་བཀའོ། །གསོལ་བ་བཏབ་པའོ་ཞེས་པ་ནི་བདག་པོའི་བཀའ་ཉན་ནས་དེ་བཞིན་གཤེགས་པའི་སྤྱན་སྔར་ཕྱིན་ཏེ། མཆོད་པ་སྔོན་དུ་འགྲོ་བའི་ཚིག་སྙན་པའི་ཞུ་བས་དེ་རྣམས་མཉེས་པར་བྱས་ནས། སྒྲུབ་པ་པོ་ལ་དངོས་གྲུབ་སྩོལ་བའི་དོན་དུ་བཀའ་ཉན་
གྱིས་གསོལ་བ་གདབ་པར་བྱའོ་ཞེས་བྱ་བའི་བར་དུའོ། །དེས་ནི་བཟང་པོ་ཞེས་བྱ་བ་ཐབས་དང་པོ་བསྟན་ཏོ། །དམ་ཚིག་སྟོང་པ་ཞེས་བྱ་བས་སྦྱིན་པ་ཞེས་བྱ་བ་ཐབས་གཉིས་པ་བསྟན་པར་བྱ་སྟེ། དམ་ཚིག་དེ་ཉིད་ཀྱིས་ཞེས་བ་ནི་རྡོ་རྗེ་འཆང་གིས་བཀའ་བསྒོ་བའི་བཀའ་ཉན་གྱིས་སོ། །བྱ་བ་རྣམས་ལ་སྦྱར་ནས་ཞེས་པ་ནི་མེ་ཏོག་རྡོ་རྗེ་མ་ལ་སོགས་པའི་ཕྱིའི་མཆོད་པ་དང་བདུད་རྩི་དང་ལྕགས་ཀྱུ་ལ་སོགས་པ་ནང་གི་མཆོད་པ་དང་སྙོམས་པར་ཞུགས་པའི་མཚན་ཉིད་ཀྱིས་གསང་བའི་མཆོད་པས་མཉེས་པར་བྱའོ་ཞེས་སྦྱིན་པ་ཞེས་བྱ་བའི་ཐབས་གཉིས་པ་བསྟན་ཏོ། །དམ་ཚིག་ནི་བསྒྲུབ་པར་བྱ་བའི་དོན་ཏོ་ཞེས་པ་ནི་ཕྱག་རྒྱ་ཆེན་པོའི་དངོས་གྲུབ་ཀྱི་མཚན་ཉིད་ཀྱི་དོན་ཞེས་བྱ་བའི་དོན་ཏོ། །དེ་ལས་བོད་ཅིང་མིང་དང་སྦྱར་ནས་ཞེས་པ་ནི་བཀའ་ཉན་སོང་ནས་དེ་བཞིན་གཤེགས་པའི་དྲུང་དུ་ཕྱིན་ནས་བསམ་གཏན་ལ་ཆགས་པའི་ཐུགས་དང་ལྡན་པ་དེ་རྣམས་ཀྱིས་རྡོ་རྗེ་ཐོ་བས་ཐུགས་ལ་བརྡེག་ཅིང་ཆེ་གེ་མོ་ཞེས་བྱ་བས་སྒྲུབ་པ་པོས་ཁྱེད་རྣམས་ཀྱི་བསྟན་པ་ལ་དགའ་བ་ཞེས་བྱ་བའི་ཞུ་བས་རབ་ཏུ་སད་ལ་སླར་ཡང་བཟློག་ནས་སྒྲུབ་པ་པོ་ལ་དབུགས་དབྱུང་བར་བྱ་བའོ། །དེ་ནི་དབྱེ་བས་ཞེས་བྱ་བའི་ཐབས་བསྟན་པ་ཡིན་ནོ། །དམ་ཚིག་ཏུ་བྱེད་པའོ་ཞེས་བྱ་བ་ནི་རྡོ་རྗེ་འཆང་ཆེན་པོའི་གོ་འཕང་ཐོབ་བའི་མཚན་ཉིད་དེ་འགྲོ་བའི་དོན་བྱེད་པའི་ཕྱིར་རོ། །དེ་ལ་འཆིང་ཞིང་ངེས་པར་སྦྱར་བ་ཞེས་པ་ནི་ཐབས་གསུམ་གྱིས་ཀྱང་མ་གྲུབ་ན་བཀའ་ཉན་གྱི་ལྕགས་ཀྱུ་དང་ཞགས་པས་རླུང་གི་དཀྱིལ་འཁོར་གྱི་སྦྱོར་བས་བཀུག་ལ་ཕྱག་རྒྱའི་པདྨ་ལ་གནས་པའི་གྲུ་གསུམ་གྱི་མེ་ཡིས་བསྲེག་ཅིང༌། དེའི་རྣམ་པར་ཤེས་པ་ཡང་དེ་བཞིན་གཤེགས་པའི་གཟུགས་སུ་བསྐྱེད་ལ་རང་གི་བདག་ཉིད་ལ་འཇུག་ཅིང་རོ་གཅིག་པར་བྱའོ་ཞེས་པ་འདིས་འཆད་པ་ཞེས་ཐབས་བཞི་པ་བསྟན་པ་ཡིན་ནོ། །ཐབས་བཞི་པོ་དེ་རྣམས་ཀྱིས་ཞག་བདུན་གྱི་རྣལ་འབྱོར་པས་དངོས་གྲུབ་ཐོབ་པར་འགྱུར་རོ་ཞེས་བསྟན་ཏོ། །དེ་ལྟར་ཞེས་བྱ་བ་ནས་བཀའ་སྩལ་པར་ཞེས་བྱ་བའི་བར་དུ་ནི་སྒྲུབ་པ་པོས་བསྐུལ་བའི་བཀའ་ཉན་གྱིས་ནམ་མཁའི་ཁམས་གཟུགས་མེད་པ་ཡང་གཟུགས་དང་ལྡན་
པར་བྱེད་དོ་ཞེས་བྱ་བས་ཕུལ་དུ་ཕྱུང་བའི་ཚིག་གིས་མ་བསྒྲུབས་པ་ཡང་གྲུབ་པ་ཉིད་དུ་བསྟན་ཏོ། །དེ་ནི་ཞེས་བྱ་བ་ནས་བཤད་པ་ཡིན་ནོ་ཞེས་བྱ་བའི་བར་དུ་ནི། རེ་ཞིག་དང་པོའི་རྣལ་འབྱོར་པས་སྟོང་པ་ཉིད་ལ་ཏིང་ངེ་འཛིན་མངོན་དུ་བྱས་པ་སྔོན་དུ་འགྲོ་བ་སྣ་ཚོགས་པདྨ་དང་ཉི་མའི་དཀྱིལ་འཁོར་གྱི་སྟེང་དུ་ཡི་གེ་མཾ་ལས་བསྐྱེད་པའི་ཡི་གེ་འབྲུ་དང་བཅས་པའི་རལ་གྲི་ཡོངས་སུ་གྱུར་པ་ལས་བཅོམ་ལྡན་འདས་འཇམ་པའི་རྡོ་རྗེ་ཞལ་གསུམ་པ་ཕྱག་དྲུག་པ་ཁ་དོག་དམར་པོ་དང་དཀར་པོ་དང་ནག་པོའི་ཞལ་གསུམ་མངའ་བ། རྩ་བའི་ཕྱག་གཉིས་ཀྱིས་ཡི་གེ་གསུམ་ཡོངས་སུ་གྱུར་བ་ལས་བསྐྱེད་པའི་གཞུ་དང་མདའ་ལྔ་འཛིན་པ་དེ་ལ་གཞུའི་ཆང་གཟུངས་ནི་ཡི་གེ་ཧཱུཾ་ལས་བྱུང་བ་དང༌། མཆོག་མ་གཉིས་པོ་ཡང་ཡི་གེ་ཨོཾ་དང་ཨཱཿ་ལས་བྱུང་བ་གཞུ་རྒྱུད་ཀྱང་དེ་བཞིན་དུ་བསྒོམས་ཏེ་མདའ་རྣམས་ཀྱང་མདེའུ་ཨོཾ་ལས་བསྐྱེད་པ་དང༌། སྨྱུག་མ་དང་ལྟོང་ཨཱཿ་དང་ཧཱུཾ་གིས་བསྐྱེད་པར་བསམས་ལ། བདག་ཉིད་ཀྱང་རྡོ་རྗེ་སྐྱིལ་ཀྲུང་ལ་གནས་པར་བལྟས་ནས་ཉི་མའི་དཀྱིལ་འཁོར་དང་མེའི་དཀྱིལ་འཁོར་གྱི་སྟེང་དུ། རྒྱལ་པོ་ལ་སོགས་པའི་བསྒྲུབ་བྱ་མདུན་དུ་བཞག་ནས་དེའི་སྙིང་ག་དང་སྤྱི་བོ་དང་ལྟེ་བ་དང་གསང་བ་དང་རྐང་པ་གཉིས་ལ་མདའ་དེ་རྣམས་ཅིག་ཅར་དུ་འཕངས་པར་བསྒོམས་ཏེ། དེ་རྣམས་ཀྱིས་མི་གཡོ་བ་བརྒྱལ་བར་འགྱུར་བ་སྐྱབས་མེད་པ་སྒྲུབ་པ་པོ་ལ་ཞལ་བལྟས་པ་དེའི་ཞབས་ལ་ལྷུང་བར་བསམ་པར་བྱའོ། །དེའི་ཚེ་རྒྱལ་པོ་ལ་སོགས་པ་བདག་ཉིད་དང་ནོར་གྱིས་དབང་དུ་འགྱུར་རོ་ཞེས་བསྟན་ཏོ། །སྨྱོ་བྱེད་སྨྱོས་བྱེད་པ་དང་རྨོངས་བྱེད་དང༌། །གདུང་བྱེད་པ་དང་སྐེམ་བྱེད་ཞེས་བྱའི་མདའ། །འདོད་པའི་ལྷ་ཡི་མཚོན་ཆ་དམ་པ་ནི། །དོན་དང་ལྡན་པའི་ལྔ་པོ་མངོན་པར་འདོད། །ཅེས་འབྱུང་ངོ༌། །དེ་ལ་མདའ་དང་པོས་བསྒྲུབ་བྱའི་དབང་པོ་སྨྱོ་བར་བྱེད་པས་སྨྱོ་བྱེད་ཅེས་བྱའོ། །དེ་ནས་དེའི་དབང་པོ་ཐམས་ཅད་དགའ་བར་བྱེད་པས་ན་སྨྱོས་པར་བྱེད་པ་ནི་གཉིས་པའོ། །དེ་དག་རྣམ་པར་ཤེས་པའི་དྲན་པ་མེད་པར་རང་གིས་བྱེད་པ་དེ་ནི་རྨོངས་པར་བྱེད་པ་སྟེ་གསུམ་པའོ། །དབང་པོ་དང་ཡུལ་དང་རྣམ་པར་ཤེས་པ་ཉམས་པས་གང་གིས་ཤིང་བཞིན་དུ་ས་ལ་ལྷུང་བར་བྱེད་པ་དེ་ནི་
བརྒྱལ་བར་བྱེད་པའི་གྲགས་པ་ཅན་ཏེ་བཞི་པའོ། །རོ་བཞིན་དུ་ཡན་ལག་དང་ཉིང་ལག་གང་སྐུལ་བར་བྱེད་པ་དེ་ནི་མི་གཡོ་བར་བྱེད་པ་དེ་སྐེམ་བྱེད་པ་ནི་ལྔ་པའོ། །མདའ་ལྔ་པོ་དེ་དག་གཞུ་ལས་ཅིག་ཅར་དུ་འཕང་བར་བྱའོ་ཞེས་ཁ་ཅིག་ཟེར་རོ། །གཞན་དག་ན་རེ་རིམ་གྱིས་འཕང་བར་བྱའོ་ཞེས་ཟེར་རོ། །དེ་ནི་འཇམ་པའི་རྡོ་རྗེ་བསྒོམས་པའི་སྒོ་ནས་རྡོ་རྗེ་ཡན་ལག་མེད་པའི་ཏིང་ངེ་འཛིན་རབ་ཏུ་བསྟན་ཏོ། །གདུལ་བའི་དོན་གྱི་ཞེས་བྱ་བ་ནས་སྒྲུབ་པ་པོས་མཐོང་བར་འགྱུར་བའོ་ཞེས་པའི་བར་དུ་ནི་ཡི་གེ་ཧཱུཾ་ཡོངས་སུ་གྱུར་པ་ལས་སངས་རྒྱས་ཀྱི་དཀྱིལ་འཁོར་ནམ་མཁའི་བར་སྣང་ལ་བསྒོམས་ཏེ། བསྒྲུབ་པར་དཀའ་བའི་བསྒྲུབ་བྱ་རྣམས་ཀྱི་མིག་འབྲས་ལ་ཡི་གེ་ཨོཾ་དགོད་ཅིང་ཁྱེད་རྣམས་ཀྱིས་ནམ་མཁའ་མཐོང་བར་གྱིས་ཤིག་ཅེས་བསྐུལ་བས་དེ་རྣམས་ཀྱིས་མངོན་སུམ་དུ་སངས་རྒྱས་ཀྱི་འཁོར་ལོ་མཐོང་བར་འགྱུར་རོ། །དེ་ལྟར་གྱུར་ན་དེ་རྣམས་གདུལ་བར་འགྱུར་རོ་ཞེས་བསྟན་ཏོ། །དཀྱིལ་འཁོར་ལ་འཇུག་པའི་དུས་སུ་ཏིང་ངེ་འཛིན་འདི་ཡིན་ནམ་ཡང་ན་མིག་འཕྲུལ་གྱི་སྦྱོར་བ་ཡིན་ནོ། །བཀྲེས་སྐོམ་ཞེས་བྱ་བ་ནས་རྡོ་རྗེ་འཆང་ཆེན་པོའི་ཞེས་བྱ་བའི་བར་དུ་ནི་རིན་ཆེན་འབྱུང་ལྡན་གྱི་ཏིང་ངེ་འཛིན་ལ་གནས་པའི་རྣལ་འབྱོར་པའི་ཏིང་ངེ་འཛིན་ལས་དུབ་ན་བཀྲེས་སྐོམ་བཟློག་པས་ཚེ་དང་ནད་མེད་པ་དང་ལང་ཚོ་དང་ལྡན་པར་འགྱུར་རོ་ཞེས་བསྟན་ཏོ། །དེ་ནས་ཞེས་བྱ་བ་ནས་དེ་ལ་དེ་སྐད་ཅེས་བྱའོ་ཞེས་པའི་བར་དུ་ནི་རེ་ཞིག་དང་པོ་རྣལ་འབྱོར་པས་ནམ་མཁའི་ཁམས་སུ་ཡི་གེ་དྷི་བསྒོམས་ལ། དེ་ཡོངས་སུ་གྱུར་པ་ལས་ཁ་དོག་སེར་པོའི་རྡོ་རྗེ་བསྒོམས་ལ་དེ་ལས་སྤྲོ་བ་དང་བསྡུ་བའི་རིམ་གྱིས་བཅོམ་ལྡན་འདས་ཁ་དོག་སེར་པོ་ཞལ་གསུམ་པ་ལ་སོགས་པ་ལྟ་བུ་སྣ་ཚོགས་པདྨ་དང་ཟླ་བའི་གདན་ལ་བཞུགས་པ་ཞི་བ་དང་སྒེག་པའི་ཉམས་དང་ལྡན་པར་བདག་གིས་བསྒོམས་ཏེ། རང་གི་བ་སྤུའི་བུ་གའི་ཁོང་སྟོང་ནས་འབྱུང་བའི་འོད་ཟེར་སེར་པོ་ལ་སོགས་པའི་ཚོགས་ཀྱིས་འགྲོ་བ་ཚིམ་ཞིང་རྒྱས་པར་བྱས་ནས་གནས་པར་བྱའོ་ཞེས་བྱ་བའི་ཏིང་ངེ་འཛིན་འདིས་ཞི་བ་ལ་སོགས་པའི་ལས་ཀྱི་ཚོགས་འགྲུབ་པར་འགྱུར་རོ་ཞེས་བསྟན་ཏོ། །དེ་ནས་ཞེས་བྱ་བ་
ནས། དེ་ནི་དེ་སྐད་ཅེས་བྱའོ་ཞེས་པའི་བར་དུ་ནི་རེ་ཞིག་དང་པོ་སྟོང་པ་ཉིད་ཀྱི་དེ་ཁོ་ན་ཉིད་ལ་དམིགས་པ་སྔོན་དུ་འགྲོ་བས་སྣ་ཚོགས་པདྨ་དང་ཉི་མའི་དཀྱིལ་འཁོར་ལ་ཡི་གེ་ཧཱུཾ་བཀོད་པ་ལས་བསྐྱེད་པའི་རྡོ་རྗེ་བསྒོམས་ལ། དེ་ཡོངས་སུ་གྱུར་བ་ལས་བདག་ཉིད་ཞལ་གསུམ་ཕྱག་དྲུག་པ་རྒྱན་ཐམས་ཅད་ཀྱིས་བརྒྱན་པ་ཁ་དོག་སེར་པོ་སེམས་དཔའ་གསུམ་གྱི་བདག་ཉིད་ཅན་དེའི་བདག་ཉིད་དཀྱིལ་འཁོར་མ་ལུས་པས་ཡོངས་སུ་བསྐོར་བ། བཅོམ་ལྡན་འདས་མ་སྐུལ་བྱེད་མའི་གཟུགས་བསྒོམས་ཏེ། འོད་ཟེར་གྱི་ཚོགས་སྤྲོས་པས་གདུག་པ་ཐམས་ཅད་འཇོམས་ཤིང་རང་གི་ཏིང་ངེ་འཛིན་ལ་གནས་པར་བྱའོ་ཞེས་བསྟན་ཏོ། །དེ་ནས་ཞེས་བྱ་བ་ནས་དེ་ལ་དེ་སྐད་ཅེས་བྱའོ་ཞེས་པའི་བར་དུ་ནི་རེ་ཞིག་དང་པོ་རྣལ་འབྱོར་པས་སྟོང་པ་ཉིད་ལ་དམིགས་པ་སྔོན་དུ་འགྲོ་བས་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ་ཁ་དོག་སེར་པོ་ཛཾ་བཀོད་ནས་དེ་ལས་འོད་ཟེར་སྤྲོ་བ་དང་བསྡུ་བའི་རིམ་གྱིས་སངས་རྒྱས་ཐམས་ཅད་ཀྱི་ཚོགས་འཇུག་ལ། དེ་ཡོངས་སུ་གྱུར་པ་ལས་བཅོམ་ལྡན་འདས་ཞལ་གསུམ་པ་ཕྱག་དྲུག་པ་ཁ་དོག་སེར་པོ་ཕྱག་གཡས་པ་ན་མ་དུ་ལུང་ག་དང་ལྕགས་ཀྱུ་དང་མདའ་འཛིན་པ། གཡོན་པ་ན་ཞགས་པ་དང་ནེའུ་ལེའུ་གཏེར་དང་གཞུ་འཛིན་པ། དེའི་གཟུགས་པ་དང་འདྲ་བས་བཅོམ་ལྡན་འདས་མ་ནོར་རྒྱུན་མ་དང་སྙོམས་པར་ཞུགས་པ། སེམས་དཔའ་གསུམ་གྱི་བདག་ཉིད་ཅན་མགོ་བོ་ལ་སོགས་པ་ལ། སངས་རྒྱས་ལྔའི་ཡིག་འབྲུ་ཨོཾ་ལ་སོགས་པ་ལྔ་ཡོངས་སུ་གྱུར་པ་ལས་དེ་བཞིན་གཤེགས་པ་ལྔས་བརྒྱན་པ། བདག་ཉིད་འཕགས་པ་ཛཾ་བྷ་ལར་བསྒོམས་ནས་རང་གི་སྙིང་ག་ལས་དེ་འདྲ་བ་སྤྲུལ་ཞིང་དེའི་མདུན་དུ་པདྨ་དང་ཟླ་བ་ལ་གནས་པའི་སྤྱི་བོར་བཅོམ་ལྡན་འདས་རྡོ་རྗེ་སེམས་དཔའ་ཕྱག་རྒྱ་མ་དང་སྙོམས་པར་ཞུགས་པར་བསམས་ཏེ། དེ་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ཀྱི་ཆུ་རྒྱུན་ཨོཾ་ཛཾ་བྷ་ལ་ཛ་ལནྡྲའ་ཡ་སྭཱ་ཧཱ་ཞེས་བྱ་བའི་སྔགས་ཀྱིས་ཚངས་པའི་སྒོ་ནས་བདུད་རྩིའི་རྒྱུན་སྦྱིན་པར་བྱའོ། །དེའི་ཚེ་ནོར་དང་འབྲུ་ལ་སོགས་པ་འཕེལ་བར་འགྱུར་རོ་ཞེས་བསྟན་ཏོ། །
དེ་ནས་ཞེས་བྱ་བ་ནས་དེ་ལ་དེ་སྐད་ཅེས་བྱའོ་ཞེས་བྱ་བའི་བར་དུ་ནི་རེ་ཞིག་དང་པོ་རྣལ་འབྱོར་པས་སྟོང་པ་ཉིད་ལ་དམིགས་པ་སྔོན་དུ་འགྲོ་བས་བདག་ཉིད་འཇམ་པའི་རྡོ་རྗེ་གཞོན་ནུའི་དབྱིབས་ཅན་བསྒོམས་ལ། མདུན་དུ་ནམ་མཁར་རྣམ་པ་སྣ་ཚོགས་ཀྱི་རིན་པོ་ཆེའི་གཞལ་ཡས་ཁང་པ་རྣམ་པ་སྣ་ཚོགས་ཀྱི་ཀུན་དུ་དགའ་བས་བསྐོར་བ་དཔག་བསམ་གྱི་ཤིང་ལ་སོགས་པའི་མེ་ཏོག་གི་དྲིས་ཕྱོགས་བཅུའི་འཇིག་རྟེན་གྱི་ཁམས་ཁྱབ་པ་དེའི་ནང་དུ་རིན་པོ་ཆེ་མ་ར་ག་ཏའི་གདན་གྱི་སྟེང་དུ་ཡི་གེ་ཀྵེཾ་ཡོངས་སུ་གྱུར་བ་ལས་གནོད་སྦྱིན་མོའི་ཚོགས་བསྒོམས་ལ། ཐམས་ཅད་ཡོངས་སུ་གྱུར་པ་ལས་གནོད་སྦྱིན་མོ་གཅིག་ལོ་བཅུ་དྲུག་ལོན་པ་ནུ་མ་དང་སྨད་རྒྱས་པས་མཛེས་པ་ཁ་དོག་སྔོན་པོ་སྐྲ་ཕྱེད་བཀྲོལ་བ་ཆགས་པ་ཆེན་པོའི་མེས་ཡན་ལག་ཐམས་ཅད་གདུང་བ་ལག་པ་གཅིག་གིས་གདན་མནན་པ་དང༌། གཉིས་པས་ཨུཏྤལ་སྔོན་པོ་རྩེ་གཅིག་པའི་དོན་དུ་བསྣམས་པ་བསམས་ཏེ། དེའི་སྙིང་གར་པདྨའི་ལྟེ་བར་ཡི་གེ་ཀྵེཾ་བཀོད་ནས། དེ་བཞིན་གཤེགས་པ་ལྔའི་ས་བོན་གྱིས་བྱིན་གྱིས་བརླབས་པ། སྤྱི་བོར་སྣ་ཚོགས་རྡོ་རྗེའི་སྟེང་དུ་སྨིན་མ་སྡུད་པས་འཇིགས་པའི་འཕགས་པ་བདུད་རྩི་འཁྱིལ་བ་བཀོད་ཅིང་དེས་མནན་པ་སྡིགས་མཛུབ་བྱེད་པ་བསྒོམས་ཏེ། དེ་དང་ལྷན་ཅིག་སྙོམས་པར་ཞུགས་པའི་རིམ་གྱིས་མཆོད་པར་བྱའོ། །དེ་ལྟར་བྱས་ནས་གནོད་སྦྱིན་མོ་རྣམས་དབང་དུ་འགྱུར་རོ་ཞེས་བསྟན་ཏོ། །དངོས་གྲུབ་ཅེས་བྱ་བ་ནས། །གནས་པའོ་ཞེས་བྱ་བའི་བར་དུ་ནི་འཇིག་རྟེན་པའི་མཁའ་འགྲོ་མ་ལ་བསྒྲུབ་པ་བསྟན་ཏོ། །དེ་རྣམས་ནི་འཇིག་རྟེན་པའི་མཁའ་འགྲོ་མ་ལུས་ཀྱི་མིག་འཕྲུལ་དང་ལྡན་པ་ཡིན་ཏེ། གཟུགས་སྣ་ཚོགས་ལེན་པས་ཞེས་པ་ནི་ཕྱུགས་དང་རི་དགས་དང་བྱ་དང་སྦྲུལ་གྱི་གཟུགས་བསྟན་པས་སོ། །སྒྲ་སྣ་ཚོགས་ཀྱིས་ཞེས་པ་ནི་གསལ་བ་དང་མི་གསལ་བའི་ཚིག་གི་བྱེ་བྲག་གི་རྒྱུན་གྱིས་སོ། །ཇི་ལྟར་མངོན་པར་འདོད་པའི་དོན་ཐོབ་པས་ཞེས་པ་ནི་འདོད་པའི་ཡོན་ཏན་ལྔ་ལྷ་དང་མིའི་འབྲེལ་པ་ཅན་འདོད་པ་ཙམ་གྱིས་ཐོབ་པས་སོ། །དེ་རྣམས་ཀྱི་གཟུགས་འཛིན་པ་ནི་དེ་དང་འདྲའོ་ཞེས་པ་ནི་རྡོ་རྗེ་མཁའ་འགྲོ་མ་
དང་འདྲ་བའི་གཟུགས་ཡིན་གྱིས་མཐུ་ནི་མི་འདྲའོ། །ཉེ་བར་མཚོན་པའི་མཚན་ཉིད་ཀྱིས་ཞེས་པ་ནི་རིགས་ཀྱི་དབྱེ་བས་ཁ་དོག་ལྔའོ། །རང་གི་ངོ་བོ་ཡོངས་སུ་འགྱུར་བ་ཞེས་པ་ནི་གཟུགས་བསྒྱུར་བ་དང་ཕྲ་མོ་དང་ཆེན་པོའི་གཟུགས་བསྟན་པ་དང༌། འབར་བ་དང་སྣང་བ་དང་འོད་སྤྲོ་བ་ལ་སོགས་པ་དང༌། ཆོ་འཕྲུལ་སྟོན་པར་བྱེད་པ་དེ་ལྟར་གྱུར་པ་བསྒྲུབ་པར་བྱའོ། །འདིར་བསྡུས་པའི་དོན་ནི་འདི་ཡིན་ཏེ། མི་བསྐྱོད་པའི་རྣལ་འབྱོར་དང་ལྡན་པ་སྔར་བཤད་པའི་གཞལ་ཡས་ཁང་པའི་ནང་དུ་ཁ་དོག་ནག་པོའི་གནོད་སྦྱིན་མོ་བསྐྱེད་ལ། དེའི་སྤྱི་བོར་གནོད་མཛེས་ཀྱི་རྒྱལ་པོ་བཀོད་ནས་བསྒྲུབ་པར་བྱའོ། །དེ་བཞིན་དུ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་ཏུ་མེད་པ་དང་དོན་ཡོད་གྲུབ་པའི་རྣལ་འབྱོར་པ་རྣམས་ཀྱིས། །སྔ་མ་བཞིན་དུ་གཞལ་ཡས་ཁང་པའི་ནང་ན་དཀར་པོ་དང་སེར་པོ་དང་དམར་པོ་དང་ལྗང་གུའི་གནོད་སྦྱིན་མོ་རབ་ཏུ་བསྐྱེད་ནས། དེ་རྣམས་ཀྱི་སྤྱི་བོར་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང༌། པདྨ་མཐར་བྱེད་དང༌། བགེགས་མཐར་བྱེད་བཀོད་ནས་སྙོམས་པར་ཞུགས་པའི་རིམ་པས་བསྒྲུབ་པར་བྱའོ། །དེའི་ཚེ་འབྲས་བུ་ཇི་ལྟ་བུ་ཡིན་ཞེ་ན་སྨྲས་པ། རྡོ་རྗེ་མཁའ་འགྲོ་ཞེས་བྱ་བ་ནས་འགྱུར་རོ་ཞེས་བྱ་བའི་བར་དུ་ནི་རྡོ་རྗེ་མཁའ་འགྲོ་མ་དཔལ་སངས་རྒྱས་ཐམས་ཅད་མཉམ་པར་སྦྱོར་བའི་རྒྱུད་ལས་གསུངས་པའི་གཽ་རཱི་ལ་སོགས་པའམ། འདིར་གསུངས་པའི་སྤྱན་མ་ལ་སོགས་པ་གང་ཡིན་པ་དེ་རྣམས་སྔར་བཤད་པའི་ཆོ་གས་བསྐྱེད་ལ་སྙོམས་པར་ཞུགས་པའི་རིམ་པས་སྤྱོད་ཅིང་རྡོ་རྗེ་འཆང་དང་འདྲ་བར་འགྱུར་རོ་ཞེས་བསྟན་ཏོ། །གནོད་སྦྱིན་ཞེས་བྱ་བ་ནས་ཁྱད་པར་རོ་ཞེས་བྱ་བའི་བར་དུ་ནི་ཟླ་བའི་འོད་ལ་སོགས་པ་འཇིག་རྟེན་པའི་གནོད་སྦྱིན་མོ་བསྒྲུབས་ནས་གླིང་ཐམས་ཅད་ཀྱི་བདག་པོའམ། འདོད་པའི་ཁམས་ཀྱི་བདག་པོའམ། རིག་པ་འཛིན་པའི་བདག་པོར་འགྱུར་རོ་ཞེས་བསྟན་ཏོ། །དེ་ལ་ཞེས་བྱ་བ་ནས་རྡོ་རྗེས་དེ་སྐད་ཅེས་བཀའ་སྩལ་ཏོ་ཞེས་པའི་བར་དུ་ནི་འཇིག་རྟེན་པའི་མཁའ་འགྲོ་མ་དང་འཇིག་རྟེན་ལས་འདས་པ་གང་ཡིན་པ་དེ་རྣམས་ཐམས་ཅད་གཙུག་ཏོར་
འཁོར་ལོས་སྒྱུར་བ་ལ་སོགས་པའི་རྣལ་འབྱོར་བས་བསྒྲུབས་ལ་སངས་རྒྱས་ཉིད་དང་རྡོ་རྗེ་འཆང་ཉིད་བསྒྲུབ་པར་བྱ་སྟེ། ལྷན་ཅིག་སྤྱོད་པའི་ཕྱིར་དང་ཐ་མལ་བ་མ་ཡིན་པའི་གཟུགས་འཛིན་པའི་ཕྱིར་ཞེས་བསྟན་ཏོ། །དེ་ལྟར་ཞེས་བྱ་བ་ནས་སྙོམས་པར་འཇུག་པར་བྱའོ་ཞེས་པའི་བར་དུ་ནི་སྤྲོས་པ་མེད་པའི་སྤྱོད་པ་དང་ལྡན་པ་སྐུ་གསུང་ཐུགས་ཀྱི་རྡོ་རྗེའི་རྣལ་འབྱོར་པ་རྣམས་ཀྱིས། རང་གི་ཤིང་ལ་སོགས་པ་ལས་བྱས་པའི་གདོང་དང་ཕྱག་དང་ཕྱག་མཚན་ལ་སོགས་པ་བྱས་ལ་དེ་དང་འདྲ་བ་ཡང་ཁ་དོག་སྦྱར་ཏེ། བཅུ་གཉིས་པ་དང་བཅུ་དྲུག་པ་དང༌། ལོ་ཉི་ཤུ་པ་སྨེ་ཤ་ཅན་དང་གར་མཁན་དང་ཁྲུས་མཁན་གྱི་བུ་མོ་ལེགས་པར་བསླབས་པ་དམ་ཚིག་གི་ཕྱག་རྒྱ་སྤྱན་མ་ལ་སོགས་པའི་གཟུགས་སུ་སྦྱར་བ་བླངས་ཏེ་དུས་བཞིན་ཡུལ་ནས་ཡུལ་དུ་འགྲོ་ཞིང་སྙོམས་པར་ཞུགས་པར་བྱས་ཏེ། ཇི་སྲིད་དེ་དང་ལྷན་ཅིག་ཕྱག་རྒྱ་ཆེན་པོའི་དངོས་གྲུབ་ཐོབ་པ་དེ་སྲིད་གནས་པར་བྱའོ། །སྡོང་བུ་ཞེས་བྱ་བ་ནས་བསྔགས་པ་ཡིན་ནོ་ཞེས་བྱ་བའི་བར་དུ་ནི་ཕྱག་རྒྱ་དང་ལྷན་ཅིག་སྤྱོད་པའི་རྣལ་འབྱོར་པས་དམན་པའི་འཚོ་བ་སྤངས་ཏེ་ཇི་སྙེད་པའི་ཁ་ཟས་ཙམ་གྱིས་ལུས་འཚོ་བར་བྱའོ་ཞེས་བསྟན་ཏོ། །ཆོས་དབྱིངས་མངོན་པར་བྱང་ཆུབ་བ། །ཇི་སྙེད་པ་ཡི་སྦྱོར་བ་ཡིས། །ཞེས་བསྟན་པའི་ཕྱིར་རོ། །དེ་རྣམས་ཀྱི་ལེའུ་དགུ་པ་ནས་གསུངས་པའི་དམ་ཚིག་ལྔ་སྤྱད་པར་བྱའོ་ཞེས་བསྟན་ཏོ། །བསམ་གཏན་ཞེས་པ་ནས་སྒྲ་ཇི་བཞིན་པའོ་ཞེས་པའི་བར་དུ་ནི་ཤིན་ཏུ་སྤྲོས་པ་མེད་པའི་སྤྱོད་པ་དང་ལྡན་པའི་རྣལ་འབྱོར་པས་ཡེ་ཤེས་ཀྱི་ཕྱག་རྒྱ་རང་གི་སྣང་བའི་རང་བཞིན་སྙིང་ག་ནས་སྤྲོས་ཏེ། དེ་དང་ལྷན་ཅིག་བདེ་བ་ཆེན་པོ་མྱོང་ཞིང་ནགས་ཀྱི་ལྷ་མོས་བྱིན་པའི་ཁ་ཟས་སྤྱོད་པའམ་བསམ་གཏན་གྱི་ཁ་ཟས་ཅན་གྱིས་ཇི་སྲིད་དངོས་གྲུབ་ཐོབ་པ་དེ་སྲིད་གོམས་པར་བྱའོ་ཞེས་བསྟན་ཏོ། །སྒྲ་ཇི་བཞིན་པའོ་ཞེས་པ་ནི་སྤྱོད་པ་གཉིས་བསྟན་པ་སྟེ། སྤྱོད་པ་ཇི་ལྟ་ཇི་ལྟར་གསུངས། །ཞེས་བསྟན་པས་སོ། །རྡོ་རྗེ་ཞེས་བྱ་བ་ནས་དགོངས་པས་བཤད་པའོ་ཞེས་པའི་བར་དུ་ནི་ཕྱག་རྒྱ་དང་ལྷན་ཅིག་སྙོམས་པར་ཞུགས་ཏེ་ཐ་མལ་བའི་ལུས་སྤངས་ནས་རྡོ་རྗེ་སྐུ་ཞེས་བྱ་བ་རྡོ་རྗེ་འཆང་ཆེན་པོའི་གོ་འཕང་ཐོབ་པའི་
འབྲས་བུ་བསྟན་ཏོ། །དགོངས་པས་བཤད་པའོ་ཞེས་པ་ནི་འཇིགས་པ་ལ་སོགས་པའི་འགལ་བའི་སྒྲའི་སྒོ་ནས་དེ་ཁོ་ན་ཉིད་བསྟན་པས་སོ། །སྔར་བཤད་པའི་ལྷན་ཅིག་སྤྱོད་མ་རྡོ་རྗེ་ས་འོག་གི་རྒྱུད་ལས་གསུངས་པའི་དབང་དང་དགུག་པ་ལ་སོགས་པའི་ཆོགས་དགུག་ཅིང་བསྒྲུབ་པར་བྱའོ་ཞེས་བསྟན་པའི་ཕྱིར་རོ། །ལྷ་མོ་ཞེས་བྱ་བ་ལ་སོགས་པ་སྨོས་ཏེ། ལྷ་དང་གནོད་སྦྱིན་དང་དྲི་ཟ་ལ་སོགས་པའི་བུ་མོ་རྡོ་རྗེ་འཇིགས་བྱེད་དང་འབྱུང་པོ་འདུལ་བའི་རྒྱུད་ལས་གསུངས་པའི་རིམ་པས་བསྒྲུབ་པར་བྱ་བ་དང༌། ལྷ་མ་ཡིན་གྱི་བུ་མོ་དང་ཀླུའི་བུ་མོ་རྡོ་རྗེ་ས་འོག་གི་རྒྱུད་ལས་གསུངས་པའི་རིམ་པས་བསྒྲུབ་པར་བྱའོ་ཞེས་བསྟན་ཏོ། །རྣལ་འབྱོར་བ་རྣམས་ཏེ་ཞེས་པ་ནི་སྔོན་གྱི་སངས་རྒྱས་སོ། །དེས་བསྟེན་པ་ནི་དེ་རྣམས་ཀྱི་སྤྱོད་པའོ། །རིག་པའི་བརྟུལ་ཞུགས་ཞེས་པ་ནི་དམ་ཚིག་གི་ཕྱག་རྒྱ་དང་ལྷན་ཅིག་སྤྱོད་པའི་མཚན་ཉིད་དོ། །ཐུན་མོང་གི་ཆོ་གའོ་ཞེས་པ་ནི་རྣམ་པར་སྣང་མཛད་ལ་སོགས་པའི་རྣལ་འབྱོར་བ་ལ་ཐུན་མོང་ངོ༌། །སྒྲུབ་པ་པོ་ཐམས་ཅད་ཀྱི་ཞེས་པ་ནི་རིམ་པ་གཉིས་ཀྱི་རྣལ་འབྱོར་བ་རྣམས་ཀྱིའོ། །ཤིན་ཏུ་གསང་བ་ཞེས་པ་ནི་བྱ་བའི་རྒྱུད་ལ་སོགས་པ་ལ་བརྟེན་པ་ལ་སྤ་བར་བྱའོ། །དོན་ཆེན་པོ་ཐོབ་པར་བྱེད་པ་ཞེས་པ་ནི་ཐམས་ཅད་ཀྱི་ཕུལ་དུ་བྱུང་བའི་འབྲས་བུ་ཐོབ་པར་བྱེད་པའོ། སྐུ་རྡོ་རྗེ་ལ་སོགས་པ་ཞེས་པ་ནི་ལུས་ལ་སོགས་པའི་རྣམ་པར་དག་པའི་ངོ་བོ་རྣམ་པར་སྣང་མཛད་དང་སྤྱན་མ་ལ་སོགས་པའི་རྒྱུས་སོ། །རྡོ་རྗེ་སྐུ་ལ་སོགས་པ་སྐྱེད་པར་བྱེད་པ་ནི་བདེན་པ་གཉིས་ཀྱི་བདག་ཉིད་ཀྱི་རྡོ་རྗེ་འཆང་ཆེན་པོའི་གོ་འཕང་ལ་འཇུག་པར་བྱེད་པའོ། །དེ་ཉིད་བསྟན་པའི་ཕྱིར། དོན་དམ་པའི་བདེན་པ་ཞེས་སྨོས་ཏེ། མངོན་པར་བྱང་ཆུབ་པའི་རིམ་པས་ཐོབ་པར་བྱེད་པའི་འོད་གསལ་བའོ། །ཐོས་པས་ཏེ་ཞེས་པ་ནི་འོད་གསལ་བ་ལས་ཅིག་ཅར་དུ་བྱུང་བའི་ཟུང་དུ་འཇུག་པའི་ཏིང་ངེ་འཛིན་གྱི་ངོ་བོ་རྡོ་རྗེ་འཆང་གི་སྐུ་སྐྱེད་པར་བྱེད་པའོ། །དེ་ཉིད་བསྟན་པའི་ཕྱིར། འོད་གསལ་བ་ཞེས་བྱ་བ་ལ་སོགས་པ་སྨོས་ཏེ། འོད་གསལ་བ་ནི་མངོན་པར་བྱང་ཆུབ་པའི་རིམ་པས་རྣམ་པར་དག་པ་ནི་སྤྲོས་བའོ། །
ཡེ་ཤེས་ཀྱི་སྐུ་ནི་རྡོ་རྗེའི་སྐུ་སྟེ་ཟུང་དུ་འཇུག་པ་ཞེས་བྱ་བའོ། །ཐོབ་པར་བྱེད་པ་ཞེས་པ་ནི་དེ་རྫོགས་པར་བྱེད་པའོ། །བར་དུའོ་ཞེས་པ་ནི་རྫོགས་པ་རྗོད་པར་བྱེད་པ་ནི་ཚིག་ཕྲད་དོ། །བསྡུ་བར་བྱེད་པ་ཞེས་བྱ་བ་ལ་སོགས་པས་ལེའུ་ཉེ་བར་བསྡུ་བར་བསྟན་ཏོ། །དངོས་གྲུབ་ཐམས་ཅད་ཅེས་པ་ནི་ཞི་བ་ལ་སོགས་པའི་དངོས་གྲུབ་ཀྱི་རྒྱུར་གྱུར་པ་རྣམ་པར་སྣང་མཛད་ལ་སོགས་པ་རྣམས་ཀྱིའོ། །དཀྱིལ་འཁོར་ནི་མཐའ་ཡས་པའི་དཀྱིལ་འཁོར་བས་ཡོངས་སུ་བསྐོར་བའོ། །དེ་ནི་དཀྱིལ་འཁོར་ཏེ་དཀྱིལ་འཁོར་དེ་ལ་བརྟེན་ནས། །སྒྲུབ་པ་པོ་རྣལ་འབྱོར་པ་རྣམས་ཀྱི་མངོན་པར་བྱང་ཆུབ་པའི་ཡེ་ཤེས་བསྐྱེད་པ་ནི་དབང་བསྐུར་བ་ལ་སོགས་པའི་རིམ་གྱིས་ཡེ་ཤེས་ཀྱི་སྐུ་ཐོབ་པ་གང་ཡིན་པའོ། །དེའི་དོན་གྱི་གཞུང་གི་ཚོགས་ཞེས་པ་ནི་དེ་སྟོན་པར་བྱེད་པའི་ཚིག་གི་ཚོགས་སོ། །ལེའུ་ཞེས་བྱ་བ་ནི་སྔར་བཤད་ཟིན་ཏོ། །སྒྲ་ཇི་བཞིན་པ་ཞེས་པ་ནི་ལེའུའི་དོན་ཙམ་སོ་སོར་བསྟན་པས་སོ། །དེ་ཡང་སོགས་པའི་སྒྲས་ཤེས་པར་བྱའོ། །སྒྲོན་མ་གསལ་བར་བྱེད་པའི་འགྲེལ་པའི་ཊཱིཀཱ་ལས་ལེའུ་བཅུ་དྲུག་པའི་རྒྱ་ཆེར་བཤད་པའོ།། །།