དཔལ་གསང་བ་འདུས་པའི་རྫོགས་རིམ་མཐར་ཕྱིན་པ།
ཨཱཪྱ་དེ་བ།
༄༅། དཔལ་གསང་བ་འདུས་པའི་རྫོགས་རིམ་མཐར་ཕྱིན་པ་བཞུགས། བཅོམ་ལྡན་འདས་གསུང་གི་དབང་ཕྱུག་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཇི་སྲིད་ཡ་རལ་ཧའི་བར། །ཀ་ཁ་གྷ་མཐའ་ན་ཛའི་མཐའ། །ད་དྷའི་མཐའ་དང་མ་མཐར་བཅས། །དེ་དེའི་རྩ་བ་ཡི་གེ་གསུམ། །ཞེས་གསུངས་པས་ནི་རྒྱུད་ཁྱད་པར་དུ་གྱུར་པར་སྟོན་ཏེ། དེ་ལ་ཡའི་མཐའ་ཅན་ནི་ཨ་དྭ་ཡ་བི་ཛཱ་ཡ་ཞེས་པ་སྟེ་གཉིས་སུ་མེད་པ་རྣམ་པར་རྒྱལ་བའོ། །རའི་མཐའ་ཅན་ནི་བཛྲ་ཤི་ཁ་ར་ཏེ་རྡོ་རྗེ་རྩེ་མོའོ། །ལའི་མཐའ་ཅན་ནི་བཛྲ་མཱ་ལ་སྟེ་རྡོ་རྗེ་ཕྲེང་བའོ། །ཧའི་མཐའ་ཅན་ནི་ཨ་ས་ད་ར་གུ་ཧ་སྟེ་ཐུན་མོང་མ་ཡིན་པའི་གསང་བའོ། །ཀའི་མཐའ་ཅན་ནི་སརྦ་དེ་བ་མི་ལ་ཀ་སྟེ་ལྷ་ཐམས་ཅད་འདུས་པའོ། །ཁའི་མཐའ་ཅན་ནི་བཛྲ་མུ་ཁ་སྟེ་རྡོ་རྗེའི་སྒོའོ། །གྷའི་མཐའ་ཅན་ནི་བི་ན་ཡ་ཨ་མོ་གྷ་སྟེ་འདུལ་བའི་དོན་ཡོད་པའོ། །ནའི་མཐའ་ཅན་ནི་སནྡྷི་བྱཱ་ཀ་ར་ཎ་སྟེ་དགོངས་པས་ལུང་སྟོན་པའོ། །ཛའི་མཐའ་ཅན་ནི་ཏྭ་ཏྟ་ས་ཧ་ཛ་སྟེ་དེ་ཉིད་ལྷན་ཅིག་སྐྱེས་པའོ། །དའི་མཐའ་ཅན་ནི་ཀ་ཝ་ཙྪེ་ད་སྟེ་རྟོག་པ་གཅོད་པའོ། །དྷའི་མཐའ་ནི་ཨཱ་དི་བུདྡྷ་སྟེ་དང་པོའི་སངས་རྒྱས་སོ། །སའི་མཐའ་ཅན་ནི་སརྦ་ས་མྱ་ཀ་ག་མ་སྟེ་ཐམས་ཅད་ཡང་དག་པར་འགྲོ་བའོ། །དེ་དག་ནི་རྣལ་འབྱོར་ཆེན་པོའི་རྒྱུད་ལས་རྩ་བའི་རྒྱུད་འབའ་ཞིག་སྟེ། སྤྱིར་རྣལ་འབྱོར་ཆེན་པོའི་རྒྱུད་ཡི་གེ་སུམ་ཅུ་རྩ་གསུམ་གྱི་མཐའ་ཅན་སྟོང་ཕྲག་སུམ་ཅུ་རྩ་གསུམ་དུ་ངེས་སོ། །དེ་ནས་དེ་དག་ཐམས་ཅད་ཀྱི་རྩ་བར་གྱུར་པ་ནི་ས་མ་ཛ་སྟེ་འདུས་པའོ། །དེའི་ཕྱིར། ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གསུངས་པ་ལས། །དཔལ་ལྡན་འདུས་འདི་སྣོད་ཡིན་ཏེ། །དེ་བས་འདི་ནི་རྒྱུད་ཀྱི་རྩེ། །ཞེས་གསུངས་སོ། །རེ་ཞིག་དེ་ནི་ཡི་གེའི་དོན་ཏོ། །ད་ནི་སྤྱིའི་དོན་བཤད་པ། ཡའི་སྒྲ་ལས་དྲངས་ན་བ་སྤུ་སྟེ་རླུང་ངོ༌། །ར་ར་གི་ནིའམ་རཱ་ག་ཏ་སྟེ་མེའམ་ཆགས་པའོ། །ལ་ལ་ཏི་སྟེ་སའི་ཁམས་འབྱུང་བ་རྣམས་ཀྱི་རྟེན་བྱད་ཅིང་འཛིན་པའོ། །བ་བིནྡུ་སྟེ་ཆུའི་ཁམས་སོ། །ཧ་ཨ་ན་ཧ་ཏ་སྟེ། མི་ཤིགས་པའི་ཀུན་རྫོབ་བྱང་ཆུབ་ཀྱི་སེམས་སོ། །ཀ་ཀ་པཱ་ལ་སྟེ་བདེ་བ་སྐྱོང་བའོ། །
ཁ་ཁ་ག་ན་སྟེ་ནམ་མཁའ་ལྟར་ཐ་མལ་པའི་རྟོག་པས་སྟོང་པའོ། །དེ་ཡང་ཇི་སྐད་དུ། །སྲ་བས་ས་ཡི་ཁམས་ཡིན་ཏེ། །ཞུ་བས་ཆུ་ཡི་ཁམས་སུ་འདོད། །དྲོ་བས་མེ་ཡི་ཁམས་ཡིན་ཏེ། །རྒྱུ་བས་རླུང་དུ་རབ་ཏུ་གྲགས། །མི་ཤིགས་ཐིག་ལེར་གསུངས་པ་སྟེ། །བདེ་བ་ནམ་མཁའི་ཁམས་ཡིན་ནོ། །ཞེས་གསུངས་པ་དང༌། ཡང༌། རེག་པ་ལས་ནི་ལྷ་མོ་སྤྱན། །དྲོ་བ་གོས་དཀར་མོ་ཞེས་བྱ། །ཆུ་ནི་མཱ་མ་ཀཱི་ཉིད་དོ། །སྒྲོལ་མ་རླུང་དུ་རབ་ཏུ་བསྒྲགས། །བདེ་བས་རྡོ་རྗེ་དབྱིངས་ཕྱུག་མ། །ཐིག་ལེ་བདུན་སྣང་བདེ་སྐྱོང་མ། །ཞེས་སོ། །གྷ་ཨ་པྲ་ཏི་ག་སྟེ་ཐོགས་པ་མེད་པའི་བདེ་བ་ཆེན་པོ་མྱོང་བའོ། །དེ་ཡང༌། བདེ་ཆེན་བདེ་བ་ཆེན་པོ་ནི། །སྐད་ཅིག་ཙམ་དུ་མྱོང་བས་ན། །འཕྲལ་དུ་ཡིད་ཆེས་བྱེད་པ་སྟེ། །ལོག་རྟོག་མ་ལུས་མཐའ་དག་འགོག །ཅེས་པའོ། །ན་ནི་ཤེ་ཏ་སྟེ་རྟོག་པ་ཐ་མལ་རྣམས་འགགས་པའོ། །དེ་ཡང། དངོས་དང་དངོས་མེད་ལོག་རྟོག་དག །བཀག་ནས་རྣམ་པར་མི་རྟོག་པས། །བསྐལ་པ་སྟོང་ཕྲག་དུ་མར་ཡང༌། །གནས་ནས་ཡེ་ཤེས་སྦྱོར་བར་བྱེད། །ཅེས་སོ། །ཛ་ཛ་ན་མ་སྟེ། གཉིས་སུ་མེད་པའི་ཡེ་ཤེས་གོང་ནས་གོང་དུ་ཁྱད་པར་ཅན་དུ་འགྲོ་བའོ། །དེ་ཡང༌། ཅུང་ཟད་ཅུང་ཟད་གོམས་བྱས་པས། །གོང་ནས་གོང་དུ་ཁྱད་པར་འགྲོ། །མཐར་ནི་མི་རྟོག་ཏིང་འཛིན་དག །ལྷུན་གྱིས་གྲུབ་པ་ཐོབ་པར་འགྱུར། །ཞེས་སོ། །ད་ད་ད་སྟེ་ཐུན་མོང་དང་མཆོག་གི་དངོས་གྲུབ་སྟེར་བའི་ཕྱིར་རོ། །དེ་ཡང༌། མི་རྟོག་ཏིང་འཛིན་ལ་གནས་ན། །དཔའ་བོ་དང་ནི་དཔའ་མོ་རྣམས། །རིང་ན་བཞུགས་ཀྱང་གཟིགས་འགྱུར་ཏེ། དོན་ཀུན་གྲུབ་པར་བྱེད་པའོ། །ཞེས་སོ། །དྷ་དྷ་ར་སྟེ་བྱང་ཆུབ་ཀྱི་སེམས་གཟུངས་ཉིད་དུ་ཟིན་པའོ། །དེ་ཡང༌། དགའ་དང་དགའ་བྲལ་དག་གི་དབུས། །མཚན་ཉིད་དམིགས་པ་བརྟན་བྱས་པས། །ཐུན་ནམ་ཟླ་ཕྱེད་ཟླ་བ་ལོ། །བསྐལ་པར་ཡེ་ཤེས་ཆེ་ལ་སྦྱོར། །ཞེས་སོ། །མ་མ་ནོ་ཧ་ར་སྟེ་ཀུན་དུ་རྟོག་པ་ཡིད་ཀྱི་གནས་འཕྲོག་པའོ། །དེ་ཡང༌། མི་རྟོག་པ་ཡི་ཏིང་འཛིན་གྱིས། །སྒྲིབ་པ་ལྔ་སྤངས་ལྷུན་གྲུབ་པའི། །བདེ་པ་ཆེན་པོ་མངོན་བྱས་ནས། །སྟོབས་སོགས་ཡོན་ཏན་རྣམས་ཀྱིས་བརྒྱན། །ཞེས་སོ། །ཡང་སྦས་པའི་དོན་དུ་
བཤད་པ་ལ། ཡ་ཡ་བ་ཏ་ན་སྟེ་གཟུང་འཛིན་སྤངས་པའི་བྱང་ཆུབ་ཀྱི་སེམས་དང་པོའི་ཡེ་ཤེས་སྐྱེ་ཞིང་མཆེད་པའོ། །དེ་ཡང༌། སྟོན་ཀའི་སྤྲིན་མེད་ནམ་མཁའ་ལ། །ཟླ་བའི་འོད་ཟེར་ཀུན་གསལ་ལྟར། །གཟུང་འཛིན་སྤངས་པའི་ཡེ་ཤེས་ནི། །བདག་གཞན་བཅས་སྣང་གསལ་བྱེད་པའོ། །ཞེས་སོ། །ར་རཱ་ག་སྟེ་ཡེ་ཤེས་དེ་ཉིད་ཁྱད་པར་འགྱུར་བའི་ཆགས་པ་ཆེན་པོར་རང་བཞིན་གཟུང་འཛིན་གཉིས་མེད་པའི་ཡེ་ཤེས་བྱང་ཆུབ་ཀྱི་སེམས་ཀུན་དུ་བཟང་པོ་གཉིས་པའོ། །དེ་ཡང༌། སྟོན་ཀའི་སྤྲིན་མེད་ནམ་མཁའ་ལ། །ཉི་མའི་འོད་ཟེར་ཤར་བ་ལྟར། །ཐབས་ཀྱི་ཡེ་ཤེས་གཉིས་པ་ནི། །དོན་དང་སེམས་ཅན་བཅས་སྣང་བྱེད། །ཅེས་སོ། །ལ་ལ་ཏི་སྟེ་གཟུང་བ་དང་འཛིན་པ་གཉིས་སྤངས་པའི་ཡེ་ཤེས་ལེན་ཅིང་གཟུང་འཛིན་གྱི་རྣམ་པར་རྟོག་པའི་སྒོ་འགགས་ཤིང་ནམ་མཁའ་ལྟར་རམ་མུན་པ་ལྟར་མི་རྟོག་དངོས་པོའི་སྣང་བ་རྣམས་ནུབ་པའོ། །དེ་ཡང་ཇི་སྐད་དུ། སྤྲིན་མེད་མཁའ་དང་མུན་ལྟ་བུའི། །སྣང་མེད་ཡེ་ཤེས་གོམས་བྱས་པས། །རང་རིག་ཙམ་ལས་གྲུབ་པ་ཡིས། །སྒྱུ་མའི་ལུས་ནི་ལེན་པར་བྱེད། །ཅེས་སོ། །ཧ་ཨ་ན་ཧ་ཏ་སྟེ་མི་ཤིགས་པའི་ཡེ་ཤེས་དེ་ཉིད་ཀྱིས་ཡིད་ཀྱི་ལུས་ཀྱི་རང་བཞིན་འབྱུང་བའོ། །དེ་ཡང། རང་རིག་ཙམ་དུ་འོད་གསལ་བ། །རླུང་དང་ལྡན་པའི་རྣམ་ཤེས་ཀྱིས། །ཆུ་ཟླ་འདྲ་བར་གཟུགས་མེད་པའི། །ཆགས་མེད་ལུས་ནི་འགྲུབ་པར་འགྱུར། །ཞེས་སོ། །ཀ་ཀ་པཱ་ལ་སྟེ་དེ་ལྟ་བུའི་ཡིད་ཀྱི་ལུས་རང་སྣང་བའི་བདེ་བས་གང་ཞིག་རྫོགས་པ་ནི་བདེ་སྐྱོང་ཞེས་བྱའོ། །དེ་ཡང༌། ཡིད་ཀྱི་ལུས་དང་ལྡན་པ་ཡི། །རྣལ་འབྱོར་པས་ནི་ཁམས་གསུམ་དུ། །བདག་དང་གཞན་གྱི་དོན་བྱས་ནས། །མཐར་ནི་རང་གནས་བདེ་བར་འགྲོ། །ཞེས་སོ། །ཁ་ཁ་ག་ན་སྟེ་སྒྱུ་མའི་ལུས་ལས་བརྟེན་ནས་རིལ་པོར་འཛིན་པའམ་རྗེས་སུ་གཞིག་པའི་སྒོ་ནས་དོན་དམ་པའི་བདེན་པ་མངོན་དུ་བྱེད་པའོ། །དེ་ཡང༌། སྒྱུ་མའི་ལུས་ལ་བརྟེན་བྱས་ནས། །རིལ་པོར་འཛིན་དང་རྗེས་གཞིག་གིས། །དངོས་པོ་ཐམས་ཅད་བཤིགས་ནས་ནི། །དེ་ནས་སྣང་བ་མེད་པར་འགྲོ། །ཞེས་སོ། །གྷ་ཨ་པྲ་ཏི་ག་སྟེ་ཐོགས་པ་མེད་པའི་ཡེ་ཤེས་ཀྱི་ནམ་མཁའ་ལྟ་བུའི་ཆོས་དོན་
དམ་པའི་བདེན་པའི་བདེན་པ་རྟོགས་པར་འགྱུར་རོ། །དེ་ཡང༌། ཐོགས་པ་མེད་པའི་ཡེ་ཤེས་ཀྱིས། །སྣང་བ་ཐམས་ཅད་ནུབ་བྱས་ནས། །རང་ཙམ་ལ་ཡང་ཆགས་མེད་པའི། །སྣང་བ་མེད་པའི་དབྱིངས་སུ་འགྲོ། །ཞེས་སོ། །ན་ནི་ཤེ་ཏ་སྟེ་བདག་དང་གཞན་ལ་སོགས་པའི་མཐའ་འགོག་པ་སྟེ། དེ་ཡང༌། བདག་དང་གཞན་དུ་རྟོག་པ་ཡི། །རྣམ་རྟོག་དྲ་བ་བསལ་ནས་ནི། །མཐའ་མེད་དམིགས་པ་མེད་པ་རུ། །སྣང་བ་མེད་པའི་ཚུལ་དུ་འགྲོ། །ཞེས་སོ། །ཛ་ཛ་ན་མ་སྟེ་སྒྱུ་མ་ལྟ་བུའི་ལུས་དེ་ཉིད་ལས་སྣང་བ་མེད་པར་གོང་ནས་གོང་དུ་འགྲོ་བའོ། །དེ་ཡང༌། སྣང་བ་མེད་པའི་ཏིང་འཛིན་གྱིས། །སྣང་བ་ཙམ་ཡང་འཛིན་སྤངས་ཏེ། །ཡང་དང་ཡང་དུ་དོན་དམ་པའི། །བདེན་པ་མངོན་དུ་བྱས་ནས་འགྲོ། །ཞེས་སོ། །ད་ད་ད་སྟེ་སྒྱུ་མ་ལྟ་བུའི་ལུས་ཀྱིས་འབད་པ་མེད་པར་འདོད་བ་ཐམས་ཅད་ནམ་མཁའ་མཛོད་ཀྱིས་སྟེར་བའོ། །དེ་ཡང༌། སྒྱུ་མའི་ལུས་ཀྱིས་འབད་མེད་པར། །འདོད་པ་ཐམས་ཅད་ནམ་མཁའ་ལ། །འབད་པ་མེད་པར་རྙེད་འགྱུར་ཏེ། །བདག་དང་གཞན་རྣམས་བདེ་བར་འཚོ། །ཞེས་སོ། དྷ་དྷ་ར་སྟེ་ཡིད་ཀྱི་ལུས་སྐྱུ་མའི་དཔེ་བཅུ་གཉིས་ཀྱིས་བསྒྲུབ་པ་འཛིན་པའོ། །དེ་ཡང༌། ཡིད་ཀྱིས་ལུས་ཙམ་བཟུང་ནས་ནི། །བདག་དང་གཞན་གྱི་དོན་སྒྲུབ་ཅིང༌། །དམིགས་པ་ཐམས་ཅད་ཟད་བྱེད་པས། །འགྲོ་མེད་གནས་སུ་ནམ་ཞིག་འགྲོ། །ཞེས་སོ། །མ་མ་ནོ་ཧ་ར་སྟེ་ཡིད་ཀྱི་ལུང་སྣང་བ་གསུམ་གྱི་བདག་ཉིད་རླུང་དང་ལྡན་པ་ལས་གྲུབ་པའི་སྒྱུ་མའི་དཔེ་བཅུ་གཉིས་ཀྱིས་ཉེ་བར་མཚོན་པའོ། །དེ་ཡང༌། རང་སྣང་རླུང་དང་ལྡན་པ་ཡི། །འཇའ་ཚོན་བཞིན་དུ་མཐའ་མེད་པའི། །སྟོང་པ་གསུམ་དུ་གོམས་བྱེད་པས། །ཐོགས་པ་མེད་པར་འབྱུང་བར་འགྱུར། །ཞེས་སོ། །ཡང་མཐར་ཐུག་བའི་དོན་དུ་བཤད་པར་བྱ་སྟེ། སྒྱུ་མ་ལྟ་བུའི་ལུས་ལ་བརྟེན་ཏེ་དོན་དམ་པའི་བདེན་པ་མངོན་དུ་བྱེད་དོ། །དེ་ཡང་ཆོས་བདུན་དང་ལྡན་པ་ཡིན་ཏེ་སྒྱུ་མ་ལྟ་བུའི་ལུས་དང༌། ཐབས་རིལ་འཛིན་དང༌། རྗེས་གཞིག་དང༌། ཐ་མལ་པའི་ཆོས་འགོག་པ་དང༌། རྟགས་མངོན་དུ་སྐྱེ་བ་དང༌། དེ་འདྲ་བར་རྟོགས་པ་དང༌། དབང་
གི་རིམ་པ་ལ་སྦྱར་བ་དང༌། ཉམས་སུ་བླང་ཞིང་བསླབ་པའི་གོ་རིམས་དད་བདུན་ནོ། །དེ་ལ་ལ་སྟེ་ས་ཆུ་ལ་ཐིམ་པ་ལས་སྨིག་རྒྱུ་འདྲ་བར་སྐྱེ་བ་དང༌། བ་སྟེ་ཆུ་མེ་ལ་ཐིམ་པ་ལས་དུ་བ་ལྟ་བུ་དང༌། ར་སྟེ་མེ་རླུང་ལ་ཐིམ་པ་ལས་མཁའ་སྣང་ལྟ་བུ་དང༌། ཡ་སྟེ་རླུང་རྣམ་པར་ཤེས་པ་ལ་ཐིམ་པ་ལས་མར་མེ་ལྟ་བུའོ། །ཧ་སྟེ་རྣམ་པར་ཤེས་པ་འོད་གསལ་བ་ལ་ཐིམ་པ་ལས་ནམ་མཁའ་ལྟ་བུར་སྣང་བའོ། །དེ་ཡང༌། དང་པོས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་བར་འགྱུར། །མེ་ནི་རླུང་ལ་ཐིམ་པར་འགྱུར། །རླུང་ཡང་རྣམ་པར་ཤེས་ལ་འཇུག །རྣམ་ཤེས་འཛིན་པ་དེ་ཉིད་ནི། །འོད་གསལ་བར་ནི་འཇུག་པར་འགྱུར། །ཞེས་སོ། །གཞན་ཡང་ཕུང་པོ་ལ་སོགས་པ་ནི་ཁམས་ཕྲ་བ་ལ་གཞུག་གོ །ཁམས་ཕྲ་བ་ནི་རྣམ་པར་ཤེས་པ་ལའོ། །རྣམ་པར་ཤེས་པ་ནི་སེམས་པ་ལའོ། །སེམས་པ་ནི་མ་རིག་པ་ལའོ། །མ་རིག་པ་ནི་འོད་གསལ་བ་ལའོ་ཞེས་པའི་རིམ་པས་ཀྱང་དང་པོ་ནི་སྒྱུར་མ་ལྟ་བུ་ལ་འོད་ཟེར་ལྔ་དང་ལྡན་པར་མཐོང་ངོ༌། །གཉིས་པར་ཟླ་བ་ལྟ་བུ་དང༌། །གསུམ་པར་ཉི་མ་ལྟ་བུ་དང༌། །བཞི་པར་མུན་པ་ལྟ་བུ་དང༌། །ལྔ་པར་ནི་སྣང་བ་མེད་པ་ནམ་མཁའ་ལྟ་བུ་མཐོང་ངོ་ཞེས་ཀྱང་གསུངས་པའི་ཕྱིར་རོ། །ཀ་སུ་ཀ་སྟེ་སྣང་བ་མེད་པའི་བདེ་བ་ཆེན་པོ་དམིགས་པ་མེད་པའི་མྱ་ངན་ལས་འདས་པ་ཐོབ་པར་འགྱུར་རོ། །དེ་ཡང༌། སྟོབས་དང་མི་འཇིགས་ལ་སོགས་པའི། །ཆེ་བའི་ཡོན་ཏན་རྣམ་བརྒྱན་པ། །བདེན་གཉིས་སྦྱོར་བའི་ཟུང་འཇུག་སྐུ། །བདེ་བ་ཆེན་པོ་དེས་ཐོབ་འགྱུར། །ཞེས་སོ། །ཁ་ཁ་ག་སྟེ་ནམ་མཁའ་ལྟ་བུའི་ཆོས་ཀྱི་སྐུ་སྣང་པའི་ཚོགས་ཐམས་ཅད་ནུབ་པའི་རང་བཞིན་ལས་རྣམ་པར་རྟོག་པ་མེད་བཞིན་དུ་བསོད་ནམས་དང་ཡེ་ཤེས་ཀྱི་ཚོགས་བསགས་པའི་དབང་གིས་ཆུ་ཀླུང་དང་བ་ལས་ཉ་འཕར་བ་དང་གཉིད་ལོག་པ་ལས་མྱུར་དུ་སད་པ་བཞིན་དུ་ཟུང་དུ་འཇུག་པའི་སྐུར་ལྡང་བར་འགྱུར་རོ། །དེ་ཡང༌། མཁའ་དང་འདྲ་ཆོས་སྟོང་པ་ལས། །རྟོག་མེད་ཡེ་ཤེས་འཇའ་འདྲ་བ། །ཚོགས་དང་སྨོན་ལམ་སྟོབས་དག་གིས་།འབད་པ་མེད་པར་ལྷུན་གྱིས་གྲུབ། །ཅེས་སོ། །ན་ནི་ཤེ་ཏ་སྟེ་ཟུང་དུ་འཇུག་པའི་ཏིང་ངེ་འཛིན་གྱིས་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ལ་སོགས་པའི་
སྒྲིབ་པ་རྣམ་པ་དྲུག་གཏན་སྤངས་པའོ། །དེ་ཡང༌། ཟུང་དུ་འཇུག་པའི་ཏིང་འཛིན་གྱིས། །ཉོན་མོངས་སྒྲིབ་སོགས་རྣམ་སྤངས་ཤིང༌། །ཕུན་སུམ་ཚོགས་པ་འཐོབ་འགྱུར་ཏེ། །འདོད་པ་ཙམ་གྱིས་འགྲོ་འོང་སྟོན། །ཞེས་སོ། །དེ་ཡང༌། འཇའ་ཚོན་འདྲ་བའི་ལོངས་སྐུ་ལས། །འབད་པ་མེད་པ་སྤྲུལ་པའི་སྐུ། །མཐའ་ཡས་རྡུལ་ཕྲན་ཇི་བཞིན་དུ། །སེམས་ཅན་དོན་ཀུན་གྲུབ་པར་མཛད། །ཅེས་སོ། །ཛ་ཛ་ན་མ་ཏེ་ཟུང་དུ་འཇུག་པའི་སྐུ་རྡོ་རྗེ་འཆང་ཆེན་པོ་ལས་སྤྲུལ་པའི་སྐུ་དུ་མ་སྐྱེ་ཞིང་འབྱུང་བའོ། །ད་ད་ད་སྟེ་སེམས་ཅན་རྣམས་ལ་གང་དང་གང་གིས་འདུལ་བ་ལ་དེ་དང་དེ་ལྟར་སྐལ་བ་དང་མཐུན་པར་སྣང་ཞིང་འདོད་པའི་དངོས་གྲུབ་སྟེར་བར་འགྱུར་རོ། །དེ་ཡང༌། གང་དང་གང་གིས་འདུལ་འགྱུར་བ། །དེ་དེ་བཞིན་དུ་སོ་སོར་སྣང༌། །མོས་པའི་དབང་གིས་ཐ་དད་པར། །སེམས་ཅན་རྣམས་ནི་འདུལ་བར་འགྱུར། །ཞེས་སོ། །དྷ་དྷ་ར་སྟེ་ལྷུན་གྱིས་གྲུབ་པའི་སྐུ་རྒྱུན་གྱིས་རྟག་པར་སྟུག་པོ་བཀོད་པའི་འཇིག་རྟེན་གྱི་ཁམས་ན་རང་བཞིན་གྱིས་བཙུན་མོ་ལ་འཁྱུད་པའི་བདག་ཉིད་དུས་རྟག་ཏུ་འཛིན་པའོ། །དེ་ཡང༌། ལྷུན་གྲུབ་བདེ་བ་ཆེན་པོའི་སྐུ། །རང་སྣང་རིག་མས་ཉེར་བརྒྱན་པ། །འོག་མིན་གནས་སུ་དུས་རྟག་ཏུ། །མཚན་དང་དཔེ་བྱད་བརྒྱན་པས་བཞུགས། །ཞེས་སོ། །མ་ཙིནྟ་མ་ཎི་སྟེ་ཡིད་བཞིན་གྱི་ནོར་བུ་ལྟར་འབད་པ་མེད་པར་བདག་དང་གཞན་གྱི་དོན་སྒྲུབ་པར་མཛད་པའོ། །དེ་ཡང༌། །ཡིད་བཞིན་ནོར་ལྟར་བསམས་ཙམ་གྱིས། །འབད་མེད་བདག་དང་གཞན་གྱི་དོན། །ཆེ་བའི་ཡོན་ཏན་རྣམ་བརྒྱན་སྐུ། །བདེ་བ་ཆེ་ལས་འབྱུང་བར་འགྱུར། །ཞེས་སོ། །དེ་ལྟར་ཚུལ་བཞིའི་བཤད་པའོ། །དཔལ་གསང་བ་འདུས་པའི་རྫོགས་རིམ་མཐར་ཕྱིན་པ་སློབ་དཔོན་ཨཱཪྻ་དེ་བས་མཛད་པ་རྫོགས་སོ།།