བསྟན་བཅོས་ཀྱི་ལུས་བཤད་པ།
རྒྱ་གར་སྐད་དུ། པཉྩ་ཀྲ་མ་པཉྫི་ཀཱ་པྲ་བྷཱ་སཱ་རྠ་ནཱ་མ། བོད་སྐད་དུ། རིམ་པ་ལྔ་པའི་དཀའ་འགྲེལ་དོན་གསལ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་རྒྱལ་བ་ཀུན་གྱི་གཙོ། །རྡོ་རྗེ་སེམས་དཔའ་མགོས་བཏུད་དེ། །རིམ་པ་
ལྔ་ཡི་དཀའ་འགྲེལ་ནི། །དོན་གསལ་བ་འདི་བདག་གིས་དབྱེ། །འཕགས་པ་ཡིས་ནི་མཛད་པའི་གཞུང༌། །ཟབ་མོའི་དོན་ལ་བདག་བློ་ཡི། །གོ་སྐབས་དག་ནི་མེད་མོད་ཀྱི། །འདིར་ནི་གཞན་གྱིས་གསོལ་གདབ་བྱས། །ཉན་པའི་དབྱེ་བ་རྣམ་གཉིས་ཏེ། །མགོ་སྨོས་སྤྲོས་པས་གོ་བའོ། །ཕྱི་མ་རྗེས་སུ་གཟུང་བའི་ཕྱིར། །བདག་གིས་དཀའ་འགྲེལ་བརྩམ་པར་བྱ། །བླ་མའི་མན་ངག་མ་ཐོབ་པར། །གང་ཞིག་འཆད་པར་འདོད་པ་ནི། །བསྟན་བཅོས་མང་ལ་བློ་སྦྱངས་ཀྱང༌། །དེ་འདིར་ཡང་ནི་རྨོངས་འགྱུར་ཏེ། །དེ་བས་གསང་བ་ལ་མཁས་པའི། །བླ་མའི་མན་ངག་ཐོབ་བྱ་སྟེ། །གང་ཟག་གཞན་ལ་ཕན་བྱའི་ཕྱིར། །འདིར་ནི་ཅི་བཞིན་ནུས་པས་བྱ། །འདིར་འཇིག་རྟེན་དང་འཇིག་རྟེན་ལས་འདས་པའི་བསྟན་བཅོས་མཐའ་དག་ཐུགས་སུ་ཆུད་པས་ལེགས་པར་སྦྱངས་པ། ཀུ་ཤའི་རྩེ་མོ་ལྟ་བུའི་བློ་མངའ་བའི་སློབ་དཔོན་ཕྱོགས་གཉིས་ངེས་པར་སྤངས་པས་དོན་དམ་པ་ཇི་ལྟ་བ་བཞིན་མཁྱེན་པའི་ཡུལ་དུ་གྱུར་པ། བདེ་བར་གཤེགས་པའི་བསྟན་པ་སྲུང་བར་མཛད་པའི་ཐུགས་ཀྱི་རྒྱུད་མངའ་བ། སྙིང་རྗེ་བླ་ན་མེད་པས་ཕ་རོལ་ལ་ཕན་པར་མཛད་པའི་དགོངས་པ་ཅན། སྙིགས་མ་ལྔས་འཕགས་པའི་ཉོན་མོངས་པ་དུ་མ་འདོད་ཆགས་དང༌། ཞེ་སྡང་དང༌། གཏི་མུག་དང༌། ཕྲག་དོག་དང༌། སེར་སྣ་ལ་སོགས་པའི་ཉེས་པས་ཡིད་བཅོམ་པའི་འཇིག་རྟེན་གྱི་འགྲོ་བ་ལ་གཟིགས་ནས། གདུལ་བྱ་དེ་དག་གི་དོན་དུ་རང་དད་པའི་ལྷ་ལ་ཕྱག་འཚལ་བ་སྔོན་དུ་སོང་བས། མདོར་བསྡུས་པའི་རིམ་པ་ལྔ་གསུངས་པ་ཡིན་ཏེ། འདིར་ཡང་བརྗོད་པར་བྱ་བ་ལ་སོགས་པ་གསུམ་མེད་ན། ཆོས་ཀྱི་རྗེས་སུ་འབྲང་བའི་གང་ཟག་རྣམས་འཇུག་པར་མི་འགྱུར་ཏེ། འདི་ལྟར་རེ་ཞིག་དེ་ཉིད་བསྟན་པར་བྱ་ན། འདིར་རྫོགས་པའི་རིམ་པ་ནི་བརྗོད་པར་བྱའོ། །སེམས་ཅན་ཐམས་ཅད་ལམ་དམ་པ་ལ་དགོད་པ་ནི་དགོས་པའོ། །ཕྱག་རྒྱ་ཆེན་པོ་གྲུབ་ཅིང་སེམས་ཅན་གྱི་དོན་ལ་འཁོར་བའི་སྲིད་དུ་གནས་པ་ནི་དགོས་པའི་ཡང་དགོས་པའོ། །དེ་ལྟར་བརྗོད་པར་བྱ་བ་ལ་སོགས་པ་བསྙད་ནས། བསྟན་བཅོས་ཀྱི་ལུས་དང༌། བཤད་པའི་རིམ་པ་
ཡང་རྣམ་པར་གཞག་པར་བྱ་སྟེ། གསང་སྔགས་སྐུ་ནི་རབ་བསྒྲུབ་པ། །བསྐྱེད་པའི་རིམ་པ་དང་པོ་ཡིན། །སེམས་ལ་དམིགས་པ་ཙམ་ཞིག་ནི། །རིམ་པ་གཉིས་པ་ཞེས་བྱའོ། །ཀུན་རྫོབ་བདེན་པ་མཐོང་བ་ནི། །ཡིད་འོང་རིམ་པ་གསུམ་པའོ། །ཀུན་རྫོབ་བདེན་པའི་དག་པ་ནི།། རིམ་པ་བཞི་པར་བརྗོད་པ་ཡིན། །གང་ཞིག་བདེན་གཉིས་སྦྱོར་བ་ནི། །ཟུང་འཇུག་ཅེས་བྱ་རིམ་པ་ལྔ། །སྒྲུབ་པའི་ལུས་འདི་ཕུལ་དུ་བྱུང༌། །བསྟན་བཅོས་ཀུན་གྱི་དོན་བསྡུས་པའོ། །གཞན་ཡང་དཔལ་གསང་བ་འདུས་པའི་ཡན་ལག་ཉིད་ཡིན་པས་ན། མཐའ་དྲུག་གི་རྗེས་སུ་འབྲངས་ཤིང་བཤད་པ་བཞིའི་རིམ་པས་ཀྱང་གཞུང་རྣམ་པར་བཤད་པར་བྱ་སྟེ། འདི་དག་གི་མཚན་ཉིད་མ་བརྗོད་དེ་གཞུང་མངས་ཀྱིས་དོགས་པའི་ཕྱིར་རོ། །