ལེའུ་བཅུ་གསུམ་པ། རྡོ་རྗེའི་དམ་ཚིག་བཀོད་པ་དེ་ཁོ་ན་ཉིད་ཀྱི་དོན་སྒོམ་པ་མངོན་པར་རྫོགས་པར་བྱང་ཆུབ་པ་ཞེས་བྱ་བ་སྟོན་པ།
ད་ནི་བཟླས་བརྗོད་དང༌། ཕྲིན་ལས་དང༌། ལས་རྣམས་ཀྱི་མཚན་མ་ལ་སོགས་པ་སྟོན་པས། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ལ་འདིར་དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་ཀྱིས་བཅོམ་ལྡན་འདས་ལ་ཕྱག་འཚལ་ཏེ་བསྟོད་ནས་རྡོ་རྗེ་བཟླས་བ་ཞུས་སོ། །དེ་ལ་རིག་དང་སྔགས་རྣམས་ཐམས་ཅད་ཀྱི། །སྐུ་དང་གསུང་དང་ཐུགས་ཀྱི་མཚན། །ཞེས་བྱ་བ་ལ་རིག་པ་ནི་ཤེས་རབ་དང་ཡེ་ཤེས་ཀྱི་བདག་ཉིད་དེ་མ་རིག་པའི་གཉེན་པོར་གྱུར་པས་མོའི་སྒྲར་བཤད་དོ། །གསང་སྔགས་ནི་ཤེས་རབ་དང་ཐབས་ཀྱི་བདག་ཉིད་དེ་ལོག་པའི་གཉེན་པོར་གྱུར་པས་ཕོའི་སྒྲར་བཤད་དེ། འདི་དག་གི་མཚན་གསང་སྔགས་ཟློས་པའི་སྦྱོར་བ་ནི་སངས་རྒྱས་རྣམས་ཀྱིས་གསན་ཞིང་སངས་རྒྱས་ཀྱི་ཡེ་ཤེས་ཐོབ་པར་འགྱུར་བ་དེ་བཅོམ་ལྡན་འདས་ཀྱིས་བཤད་དུ་གསོལ་ཞེས་གསོལ་བ་བཏབ་པ་དང༌། རྡོ་རྗེ་བཟླས་པ་འདི་གསུངས་སོ། །སྔགས་ཀྱི་དོན་ཀུན་བཟླས་པ་ནི། །རྡོ་རྗེ་མི་ཕྱེད་གསུམ་གྱིས་མཚན། །རྡོ་རྗེ་དབྱེ་བ་གསུམ་གྱི་མཐར། །བཀོད་པ་རྡོ་རྗེ་གསུམ་ཞེས་བྱ། །ཞེས་གསུངས་པ་ནི། རྡོ་རྗེ་མི་ཕྱེད་གསུམ་ནི་སྐུ་གསུང་ཐུགས་ཀྱི་བདག་ཉིད་ཀྱི་ལྷའོ། །དེའི་མཚན་མ་ནི་རྡོ་རྗེ་དབྱེ་བ་གསུམ་ཡིན་ཏེ། སྙིང་ག་དང༌། མགུལ་པ་དང༌། སྤྱི་བོ་རྣམས་སུ་ཉི་མ་དང་པདྨ་དང་ཟླ་བའི་དཀྱིལ་འཁོར་རྣམས་ལ་ཐུགས་ཀྱི་རྡོ་རྗེ་དང་གསུང་དང་སྐུའི་རྡོ་རྗེ་རྣམས་ཀྱིས་མཚན་པའོ། །དེའི་མཐར་དགོད་པ་རྡོ་རྗེ་གསུམ་ཞེས་བྱ་བ་ནི་སྐུ་གསུང་ཐུགས་ཀྱི་ལྷ་རྣམས་ཀྱི་ཐུགས་ཀར་རང་རང་གི་མཚན་མའི་ལྟེ་བ་ལ་རང་རང་གི་ཡི་གེ་དགོད་པའོ། །སྐུ་གསུང་ཐུགས་ཀྱི་གནས་རྣམས་ནས། །སྤྲོ་བ་རྣམ་པ་གསུམ་དག་བྱ། །ཞེས་བྱ་བ་ནི་གནས་དེ་རྣམས་
ནས་རང་དང་འདྲ་བའི་ལྷ་སྤྲོ་བའོ། །ཁ་ཅིག་ནི་རང་དང་འདྲ་བའི་ལྷ་མོ་སྤྲོ་ཞེས་ཟེར་རོ། །འདི་ནི་རྡོ་རྗེ་བཟླས་པའོ། །སངས་རྒྱས་རྣམས་ཀྱི་སྐུ་གསུང་ཐུགས། །བསྒོམས་ནས་ཞེས་བྱ་བ་ནི་མདུན་གྱི་ནམ་མཁའ་ལ་སྐུ་གསུང་ཐུགས་ཀྱི་ལྷ་རྣམས་བསྒོམ་པའོ། །མཆོད་པའི་མཆོག་བརྟག་པ་ཞེས་བྱ་བ་ནི་གནས་གསུམ་ནས་ལྷ་མོ་སྤྲུལ་ཏེ་མཆོད་པའོ། །སངས་རྒྱས་རྣམས་ཀྱི་སྐུ་གསུང་ཐུགས། །བསམས་ནས་ཞེས་བྱ་བ་ཡང་སྔར་བཞིན་ཏེ། ཡེ་ཤེས་ཀྱི་ཏིང་ངེ་འཛིན་གྱིས་བྱ་བ་སྟེ་འདི་ནི་བཟླས་པའི་ཡུལ་ཡིན་ནོ། །ཡང་ན་དབྱེ་བ་རྣམ་གསུམ་གྱིས། །སོ་སོ་དག་ཏུ་སྤྲོ་བར་བྱ། །ཞེས་བྱ་བ་ནི་རིམ་གྱིས་སྤྲོ་བའི་དོན་ཏེ། དང་པོར་ཐུགས་ཀ་ནས་སྤྲོས་ཏེ། དེ་ཡང་སྐུ་རྡོ་རྗེའི་སྦྱོར་བས་སྤྲོས་ལ། །དེ་ནས་གསུང་དང་ཐུགས་དག་ལ་ཡང་རིམ་གྱིས་སྤྲོ་བའོ། །ལུས་དང་ངག་སེམས་བདག་མེད་པར། །ཤེས་པའི་སེམས་ཀྱིས་རབ་ཏུ་སྤྲོ། །ཞེས་བྱ་བ་ནི་མི་དམིགས་པའི་ཤེས་རབ་དང་ལྡན་པས་སྤྲོ་བར་བྱའོ་ཞེས་པའོ། །བརྗོད་ནས་རྡོ་རྗེ་སྤྲོ་བ་ནི། །རྫོགས་ནས་རབ་ཏུ་བསྡུ་བར་བྱ། །ཞེས་བྱ་བ་ནི་དམ་བཅས་པ་རྫོགས་ནས་བསྡུ་བའོ། །སྐུའི་བཟླས་པ་ནི། སྐུ་དང་གསུང་དང་ཐུགས་བྱང་ཆུབ་པའི། །དངོས་དང་དངོས་མེད་རྣམ་དཔྱད་པ། །སངས་རྒྱས་སྐུ་ཞེས་བྱ་བར་བཤད། །ཅེས་གསུངས་ཏེ། སངས་རྒྱས་ཐམས་ཅད་ཀྱི་སྐུ་གསུང་ཐུགས་དངོས་པོའམ་དངོས་པོ་མེད་པའི་མཐའ་གང་དུའང་མ་གྲུབ་སྟེ། རྣམ་པར་དག་པར་དཔྱད་པ་ནི་སྐུའི་བཟླས་པའོ། །གསུང་གི་བཟླས་པ་ནི་རྡོ་རྗེ་བཟླས་པར་བཤད་པ་སྟེ། ཇི་ལྟར་གསལ་བ་གསང་བའི་ཚིག ། སྐད་གདངས་མིན་པ་རྡོ་རྗེའི་ཚིག །ཅེས་པའོ། །ཐུགས་ཀྱི་བཟླས་པ་ནི་མི་གནས་པའི་རྫོགས་པའི་བྱང་ཆུབ་ཀྱི་སེམས་གནས་པའི་བདག་ཉིད་རྣམ་པར་དག་པར་དཔྱད་ཅིང་བསྒོམ་པ་སྟེ་འདི་ནི་སེམས་ཀྱི་བཟླས་པའོ། །རིན་པོ་ཆེའི་བཟླས་པ་ནི་མཐའ་གཉིས་ཀྱི་མཚན་མ་དང་བྲལ་བ་དུས་གསུམ་ལས་འདས་པ་ངོ་བོ་ཉིད་མེད་པའི་དོན་རྟོགས་པའོ། །རྡོ་རྗེ་ཐོགས་མེད་ཀྱི་བཟླས་པ་ནི་སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་ཀྱི་སྐུའི་འོད་ཟེར་འཕྲོ་ཞིང་དོན་མཛད་པ་དང༌། སླར་བདག་གི་སྐུ་གསུང་ཐུགས་ཀྱི་གནས་སུ་འདུ་ཞིང་གཟི་བྱིན་བསྐྱེད་པའོ། །དེ་རྣམས་ཀྱང་སྐུ་གསུང་ཐུགས་ཀྱི་བཟླས་
པར་འདུ་བའི་ཕྱིར་རྡོ་རྗེའི་བཟླས་པ་ཞེས་བྱའོ། །ཁྲོ་བོའི་བཟླས་པ་ནི། བདག་ཉིད་རིགས་ཀྱི་བདག་པོའམ། ཁྲོ་བོ་ཉིད་ཀྱི་ཏིང་ངེ་འཛིན་དུ་ཞུགས་ཏེ་ཁྲོ་བོའི་གསང་སྔགས་ཀྱི་སྒྲ་ཡི་གེ་ཧཱུཾ་དང་བཅས་པ་འབྲུག་གི་སྒྲ་ལྟར་ཟབ་པ་བཟླས་པའོ། །གཏི་མུག་གི་བཟླས་པ་ནི་འདོད་པའི་ཡུལ་གྱིས་མྱས་པར་གྱུར་པའི་གཏི་མུག་ཅན་རྣམས་སྐུ་རྡོ་རྗེའི་སྒོ་ནས་བསྐྱབ་ཅིང་ཕན་པར་སེམས་པའི་ཏིང་ངེ་འཛིན་གྱིས་སེམས་ཅན་ཇི་སྙེད་པ་སྐུའི་རྡོ་རྗེར་གཞག་པ་ནི་གཏི་མུག་གི་བཟླས་པ་སྟེ། དེ་བཞིན་དུ་འདོད་ཆགས་དང་ཞེ་སྡང་ལ་གནས་པའི་སེམས་ཅན་རྣམ་པ་ཡོངས་སུ་བསྐྱབ་པའི་ཏིང་ངེ་འཛིན་གྱིས་གསུང་དང་ཐུགས་ཀྱི་རྡོ་རྗེ་ལ་བཞག་ཅིང་བཀོད་པ་ནི་འདོད་ཆགས་དང་ཞེ་སྡང་གི་བཟླས་པའོ། །མ་ནིང་གི་བཟླས་པ་ནི་སྐུ་གསུང་ཐུགས་གསུམ་དབུ་མ་ཆེན་པོའི་ངང་དུ་བསྒོམས་ཏེ། མཚན་མ་མཐའ་དག་ལས་འདས་པ་ནི་ཅི་ཡང་མ་ཡིན་པའི་ཕྱིར་མ་ནིང་ཞེས་བྱ་སྟེ། འདིར་བླ་མའི་མན་ངག་ནི་སྐུ་གསུང་ཐུགས་རྡོ་རྗེ་བསྒོམས་པའི་སྙིང་གའི་པདྨ་ལ་ཡི་གེ་ཨཱཿབྶམྶ་ཏེ། ཨཱཿདེའི་རང་བཞིན་ནི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་བདག་ཉིད་ཆོས་ཀྱི་རང་བཞིན་སེམས་ཅན་ཀུན་གྱི་སྲོག་ཡིན་ཏེ། འདིའི་རང་བཞིན་ལ་སེམས་བཞག་ནས་དབུགས་དབྱུང་བ་དང་རྔུབ་པ་དག་ལ་ཨོཾ་ཧཱུཾ་ཞེས་འདིའི་བདག་ཉིད་དུ་གསལ་བར་བྱེད་པའི་ཏིང་ངེ་འཛིན་ནི་མ་ནིང་གི་བཟླས་པ་ཡིན་ནོ་ཞེས་མན་ངག་གོ །འདོད་ཆགས་ཡང་དག་དོན་བསྒོམ་པ། རྡོ་རྗེའི་བདག་པོ་ཐམས་ཅད་ནི། །ཞེས་བྱ་བ་ལ་སོགས་པས་ནི་དུག་གསུམ་གྱི་བཟླས་པའི་ཚུལ་བསྟན་པ་ཡིན་ཏེ། དེ་ལ་འདོད་ཆགས་ཀྱི་བཟླས་པའི་ཚུལ་ནི་རིག་པ་ཆེན་མོའི་སྤྱན་ལ་སོགས་པའི་ལྷ་མོ་དང་གཉིས་སུ་མེད་པའི་སྦྱོར་བའི་མཚམས་སུ་འདོད་ཆགས་ལ་གནས་པའི་སེམས་ཅན་ཐམས་ཅད་བསྡུས་ཏེ། འདོད་པ་བསྟེན་ནས་འདོད་ཆགས་ཀྱིས་བྱང་ཆུབ་ལ་བཀོད་དེ་དོན་མཛད་པའོ། །གཏི་མུག་དམ་ཚིག་ལས་བྱུང་བ། །ཞེས་པ་ནི་གཏི་མུག་གི་བཟླས་པའི་དོན་ཏོ། །རྣམ་པར་སྣང་མཛད་ཀྱི་ཏིང་ངེ་འཛིན་གྱིས་གཏི་མུག་ཅན་རྣམས་མཚན་མ་མེད་པ་མ་ནིང་གི་བཟླས་པ་ལ་དགོད་པའོ། །ཞེ་སྡང་གི་བཟླས་པ་ནི། །ཁྲོ་བོ་ཞེ་སྡང་གནས་ལས་སྐྱེས། །ཞེས་བྱ་བ་ལ་སོགས་པ་སྟེ། དེ་ལ་ཁྲོ་བོ་རྣམས་ཀྱི་གནས་སམ་རྒྱུ་
ནི་ཞེ་སྡང་སྟེ། དེ་ལས་སྐྱེས་པའི་ཁྲོ་བོ་གསོད་པའི་ཕྲིན་ལས་ལ་བརྩོན་པ་དག་གིས་སེམས་ཅན་སྒྲུབ་པ་མཆོག་ཞེ་སྡང་གིས་འདུལ་བའི་ཆོས་ཅན་ལ་གསོད་པས་དོན་བྱའོ། །ཡེ་ཤེས་འཁོར་ལོ་ཅན་རྣམས་ཀྱིས། །ཞེས་བྱ་བ་ལ་སོགས་པས་ནི་རིགས་སོ་སོའི་ཡེ་ཤེས་སེམས་དཔའ་དང་བཅས་པ་བསྒོམ་པ་བསྟན་པ་སྟེ། །དེ་ལ་ཡེ་ཤེས་འཁོར་ལོ་ཅན་རྣམས་ཞེས་བྱ་བ་ནི་རྣམ་པར་སྣང་མཛད་དོ། །དེ་རྣམས་ཀྱི་འཁོར་ལོ་ནི་ཡེ་ཤེས་སེམས་དཔའ་སྟེ། དེ་ནི་སྙིང་གའི་དཀྱིལ་དུ་བསྒོམ་པར་བྱའོ། །གསལ་བའི་དཀྱིལ་འཁོར་ནི་ཟླ་བ་སྟེ་གདན་ནོ། །དབུས་སུ་འཁོར་ལོའི་དོན་བསྒོམ་མོ། །ཞེས་བྱ་བ་ནི་ཡེ་ཤེས་སེམས་དཔའི་ཐུགས་ཀར་འཁོར་ལོ་བསམས་པའི་ལྟེ་བ་ལ་ཡི་གེ་ཨོཾ་གྱིས་མཚན་པ་ནི། །འཁོར་ལོའི་དོན་བསྒོམ་ཞེས་བྱ་བའོ། །དེ་བཞིན་དུ་མི་འཁྲུགས་པ་དང༌། རིན་ཆེན་དཔལ་དང༌། འོད་དཔག་མེད་དང༌། དོན་ཡོད་གྲུབ་པ་རྣམས་ཀྱི་ཐུགས་ཀར་རང་རང་གི་གདན་སྟེང་དུ་ཡེ་ཤེས་སེམས་དཔའི་ཐུགས་ཀར་རྡོ་རྗེ་ལ་སོགས་པའི་མཚན་མའི་སྙིང་པོ་ལ་ཧཱུཾ་ལ་སོགས་པའི་ཡི་གེས་མཚན་པའོ། །དཀྱིལ་འཁོར་ཀུན་གྱི་ངོས་རྣམས་སུ། །སངས་རྒྱས་ལྔ་རྣམས་དགོད་པར་བྱ། །ཞེས་བྱ་བ་ནི་ཡེ་ཤེས་སེམས་དཔའི་ཐུགས་ཀའི་ཡི་གེའི་ཕྱོགས་བཞིར་རིགས་བཞིའི་ཡི་གེ་དགོད་པའོ། །ཁ་ཅིག་ན་རེ། དཀྱིལ་འཁོར་དུ་དགོད་པ་སྟེ་རིགས་ལྔ་ཉིད་ལ་བྱའོ་ཞེས་ཟེར་རོ། །སྔགས་རྣམས་ཐམས་ཅད་སྤྲོ་བ་ནི། །བྱེ་བྲག་རྣམ་པ་གཉིས་སུ་བསྒྲགས། །ཞེས་བྱ་བ་ནི་སྤྲོ་བ་ཉིད་ཀྱི་བྱེ་བྲག་རྣམ་པ་གཉིས་ཡིན་ཏེ། སྐུ་གསུམ་རྡོ་རྗེའི་བྱེ་བྲག་གིས། །ཞེས་བྱ་བའི་ཚིག་གིས་སྐུ་གསུང་ཐུགས་ཀྱི་སྤྲོས་པ་དང༌། །རྡོ་རྗེ་ཟེར་རོ། །ལུས་ཀྱིས་སྐུ་ཡི་ངོ་བོ་ཉིད། །ཅེས་བྱ་བ་ལ་སོགས་པས་ལྟར་གཉིས་སུ་སྤྲོ་ཞིང་བསྡུ་བ་ཡང་ཚུལ་དེ་ཉིད་དུའོ། །ཁ་ཅིག་ན་རེ་དེ་སྤྲོ་བའི་བྱེ་བྲག་གཉིས་ནི། རང་གི་སྐུ་གསུང་ཐུགས་རྡོ་རྗེའི་གནས་གསལ་བ་དང༌། ཕྱོགས་བཅུའི་འཇིག་རྟེན་དུ་སྤྲོ་བ་གཉིས་ཏེ། བསྡུ་བ་ནི་བྱེ་བྲག་མེད་དོ་ཞེས་ཟེར་རོ། །ལུས་ཀྱིས་སྐུ་ཡི་ངོ་བོ་ཉིད། །ཅེས་བྱ་བ་ལ་སོགས་པས་ནི་སྐུ་གསུང་ཐུགས་ཀྱི་མཆོད་པ་བསྟན་ཏེ། འདི་ལྟར་རང་སྐུ་གསུང་ཐུགས་ཀྱི་ལྷར་བསྒོམས་པ་ལས། རང་རང་དང་འདྲ་བའི་ལྷ་མོ་སྤྲོས་པས་སྐུ་གསུང་ཐུགས་ཀྱི་ལྷ་
ལ་མཆོད་པ་སྟེ། དེ་ལ་ཀྱིས་ཞེས་བྱ་བ་ནི་རང་གི་སྤྲུལ་པའི་མཆོད་པའི་ལུས་ཀྱིས་སོ། །སྐུའི་ངོ་བོ་ཉིད་མཆོད་ན། །ཞེས་བྱ་བ་ནི་སྐུ་རྡོ་རྗེ་སངས་རྒྱས་ལ་མཆོད་པ་ནའོ། །མཆོད་པའི་གནས་སུ་འགྱུར་ཞེས་བྱ་བ་ནི་མཆོད་པའི་མཆོག་ཏུ་འགྱུར་བ་སྟེ། གཞན་ལ་ཡང་དེ་བཞིན་དུ་སྦྱར་རོ། །དེ་ཡན་ཆད་བཟླས་པའི་ཏིང་ངེ་འཛིན་ཏེ། ལས་ཀྱི་རྒྱལ་བ་མཆོག་ལ་ཕྲ་མོས་སེམས་ཤིན་ཏུ་ཞུམ་པར་གྱུར་ན་བཟླས་པས་གཟེངས་བསྟོད་པའོ། །ད་ནི་ཕྲིན་ལས་རྣམ་པ་བཞི་སྟོན་ཏེ། དེ་ལ་ལས་ཀྱི་ཏིང་ངེ་འཛིན་ནི་བདག་བསྙེན་སྒྲུབ་ཡན་ལག་ཚང་བའི་དཀྱིལ་འཁོར་ཆེན་པོའི་འཁོར་ལོ་བསྒོམས་ཏེ། དཀྱིལ་འཁོར་གྱི་དབུས་སུ་ལས་ཀྱི་བདག་པོ་བསམས་ཏེ། སྙིང་གར་ཡེ་ཤེས་སེམས་དཔའ་དང་བཅས་པ་བསྒོམས་པའི་བསམ་གཏན་གྱིས་ལས་རྣམ་པ་བཞི་བྱེད་པར་འགྱུར་ཞེས་བྱ་བའི་དོན་ཏོ། །དེ་ལ། དཀྱིལ་འཁོར་ཆེན་པོའི་འཁོར་ལོ་ཡིས། །རྡོ་རྗེ་ལྔ་རྣམས་བསྒོམ་པར་བྱ། །ཞེས་བྱ་བ་ནི་བསྙེན་སྒྲུབ་ཀྱི་ཡན་ལག་ཡོངས་སུ་ཚང་བའི་དཀྱིལ་འཁོར་ཆེན་པོའི་འཁོར་ལོ་ཡིས་རིགས་ལྔའི་དཀྱིལ་འཁོར་དུ་བསྒོམ་པའོ། །དབུས་སུ་བདག་པོ་བསྒོམས་ནས་ནི། །ཞེས་བྱ་བ་ནི་ལས་གང་བྱེད་པའི་གཙོ་བོའོ། །དེ་ཉིད་གང་ཞེ་ན། སྐུ་གསུང་རྡོ་རྗེ་བདག་གི་གཟུགས། །ཞེས་པའོ། །དེ་ཉིད་རང་གི་སྔགས་ཀྱིས་བསྐྱེད་པས་རང་སྔགས་རྡོ་རྗེའི་གཟུགས་སོ། །དཀྱིལ་འཁོར་རྣམ་པ་བཞི་དག་ཏུ། །ཞེས་པ་ནི་ལས་རྣམ་པ་བཞིའི་དཀྱིལ་འཁོར་རོ། །ཁ་དོག་རྣམ་བཞིར་ཀུན་བརྟགས་ལ། །ཞེས་བྱ་བ་ནི་ལས་རྣམ་པ་བཞི་དང་མཐུན་པའི་ཁ་དོག་གོ །སྙིང་གར་སྔགས་ཀྱི་དོན་བསྒོམས་ན། །ཞེས་བྱ་བ་ནི་ཡེ་ཤེས་སེམས་དཔའ་དང་བཅས་པའི་བསམ་གཏན་གྱི་ཏིང་ངེ་འཛིན་ནོ། །དེ་ལྟར་ན་ལས་རྣམ་པ་བཞི་རྣལ་འབྱོར་པ་གོང་མ་ལྟ་བུའི་བསམ་གཏན་དང་ལྡན་པའི་རྡོ་རྗེ་ཅན་གྱིས་བྱེད་དོ། །ཞི་བ་ལ་ནི་སྤྱན་གྱི་ཚུལ། །ཞེས་བྱ་བ་ལ་སོགས་པས་ནི་ལས་སོ་སོའི་རིགས་ཀྱི་བདག་པོ་བསྟན་ཏེ། དེ་ལ་སྤྱན་གྱི་ཚུལ་ནི་རྣམ་པར་སྣང་མཛད་དོ། །རྒྱལ་བ་རྡོ་རྗེ་པདྨོ་ཅན། །ཞེས་བྱ་བ་ནི་རིན་ཆེན་འབྱུང་ལྡན་ཏེ། ལས་ཀྱི་སྐབས་སུ་ཕྱག་ན་པདྨོ་བསྣམས་པ་ཡུམ་གོས་དཀར་མོ་དང་ལྡན་པས་བྱའོ། །དབང་ལ་རྣམ་པར་སྣང་མཛད་གནས། །ཞེས་བྱ་བ་
ནི་སྣང་བ་མཐའ་ཡས་ཏེ་འོད་ཟེར་སྣང་བར་བྱེད་པས་རྣམ་པར་སྣང་མཛད་དོ། །རྡོ་རྗེ་དོན་གྲུབ་ཏུ་ཡང་བཤད། །རྡོ་རྗེ་ཁྲོ་བོ་མངོན་སྤྱོད་ལ། །ཞེས་བྱ་བ་ནི་རྡོ་རྗེའི་རིགས་སུ་མངོན་སྤྱོད་ཀྱི་ལས་ལ་སྦྱོར་རོ། །མ་ཆགས་པ་ཡི་སེམས་ཅན་དང༌། །ཞེས་བྱ་བ་ལ་སོགས་པས་ནི་དྲག་པོའི་ལས་ཀྱི་གནས་བསྟན་ཏོ། །ཁ་ཅིག་ན་རེ་འདུལ་བའི་ཞིང་ཙམ་དུ་བསྟན་པའོ་ཞེས་ཟེར་རོ། །ཁམས་གསུམ་གནས་པའི་སེམས་ཅན་རྣམས། །ཞེས་བྱ་བ་ལ་སོགས་པས་ནི་དྲག་པོའི་ལས་ཀྱི་ཏིང་ངེ་འཛིན་བསྟན་ཏོ། །འདིའི་རིམ་པ་ནི་བདག་རང་གི་ལྷའི་ཏིང་ངེ་འཛིན་བསྙེན་སྒྲུབ་ཀྱི་ཡན་ལག་ཡོངས་སུ་རྫོགས་པས་ཏིང་ངེ་འཛིན་གསུམ་གྱི་མཐར་ཞེ་སྡང་རྡོ་རྗེའི་ཏིང་ངེ་འཛིན་གྱིས་བསྐྱེད་ལ་མདུན་དུ་བསྒྲུབ་བྱའི་ལིངྒ་བཞག་སྟེ། དེར་ཐུགས་ཀའི་རྡོ་རྗེ་ཀྱོ་བས་སེམས་ཅན་ཐམས་ཅད་བཀུག་སྟེ། སྐུ་གསུང་ཐུགས་ཀྱི་ལྷར་བསྒོམས་ལ་དེ་དག་གི་ལུས་ཀྱི་ལྷ་གསུམ་ལ་བསྡུས་ཏེ། དེ་ནས་བདག་གི་བ་སྤུའི་བུ་ག་ནས་ཁྲོ་བོའི་ཚོགས་མང་པོ་སྤྲོས་ཏེ། ལིངྒ་བསྒྲུབ་བྱར་དམིགས་པའི་ཤ་ཁྲག་ཟ་བ་དང༌། རྒྱུ་མ་འདྲེན་པ་ལ་སོགས་པར་བསྒོམ་པའོ། །དེ་ལ། །ནམ་མཁའ་དབྱིངས་ཀྱི་དབུས་དག་ཏུ། །འཁོར་ལོ་རྩེ་ལྔ་ཁ་བཞི་ལ། །ཞེས་བྱ་བ་ནི་རྡོ་རྗེ་སེམས་དཔའ་ཞེ་སྡང་རྡོ་རྗེར་བསྒོམས་པའི་ལག་པ་གཡས་པར་རྡོ་རྗེ་རྩེ་ལྔ་པ་ཁ་གདེངས་པ་བསམ་པ་ཡིན་ནོ། །ཁ་ཅིག་ན་རེ་རྡོ་རྗེ་རྩེ་ལྔ་པ་རྒྱ་གྲམ་དུ་གྱུར་པ་ལ་འཁོར་ལོ་འབར་བའི་མུ་ཁྱུད་ཀྱིས་བསྐོར་བ་ཡིན་ཏེ། འདི་ནི་རྡོ་རྗེ་འཁོར་ལོ་ཞེས་བྱའོ་ཞེས་ཟེར་རོ། །འདིས་ནི་འོག་ནས་འབྱུང་བ་ཡི། །འཁོར་ལོ་རྡོ་རྗེ་འབར་བས་བརྒྱན། །ཞེས་པའང་འཁོར་ལོ་ལས་རྡོ་རྗེའི་འབར་བ་འཕོས་པས་མཚན་པའོ་ཞེས་འཆད་དོ། །བཀའི་འཁོར་ལོ་ཞེས་བྱ་བའི་ཏིང་ངེ་འཛིན་ཏོ་ཞེས་བྱ་བ་ནི་འདི་ལས་གྲུབ་པར་བྱེད་པའི་བཀའ་ཡིན་ཏེ་ངེས་པར་བྱེད་པའི་ཐ་ཚིག་གོ །ནམ་མཁའ་དབྱིངས་ཀྱི་དབུས་སུ་ནི། །འཁོར་ལོ་རྡོ་རྗེ་འབར་བས་བརྒྱན། །ཞེས་བྱ་བ་ལ་སོགས་པ་ནི་སྔ་མ་བཞིན་དུ་བསྒོམས་པ་ལས་ཕྱག་མཚན་འཁོར་ལོ་རྡོ་རྗེས་བརྒྱན་པ་རྣམ་པར་བསྒོམས་ཏེ། བདག་གི་སྤྲུལ་པ་རྣམས་ལ་འདི་སྐད་དུ་བཀའ་བསྒོ་སྟེ། སྐུ་གསུང་ཐུགས་ཀྱི་སྦྱོར་བ་ཅན། །སངས་རྒྱས་ཐམས་ཅད་བདག་ལ་གསོན། །ཞེས་བྱ་བ་
ལ་སོགས་པའི་ཚིག་གི་བསྐུལ་བའོ། །བཀའི་འཁོར་ལོ་འདི་ནི་དགྲ་བསད་པ་དང༌། བགེགས་བསྐྲད་པ་དང༌། ལྷ་གནད་ལ་དབབ་པ་དག་ལ་སྦྱར་རོ། །དེ་ལ་དགྲ་བསད་པའི་དུས་སུ་ནི་གོང་དུ་སྨོས་པའི་ཚུལ་འདི་ཉིད་དོ། །བགེགས་བསྐྲད་པའི་སྦྱོར་བ་ལ་ནི་ཞེས་སྡང་རྡོ་རྗེའི་ཏིང་ངེ་འཛིན་གྱིས་ཁྲོ་བོའི་དཀྱིལ་འཁོར་དུ་སྤྲོས་ཏེ། བགེགས་རྣམས་ལ་འདི་སྐད་དུ་བསྒོ་ཏེ། སྐུ་གསུང་ཐུགས་སུ་བདག་སྦྱོར་བས། བགེགས་རྣམས་ཐམས་ཅད་ང་ལ་ཉོན། །ཞེས་བྱ་བར་སྦྱར་ཏེ་བཀའ་བསྒོའོ། །ལྷ་གནད་ལ་དབབ་པའི་སྦྱོར་བ་ལ་ནི་ཞེ་སྡང་རྡོ་རྗེའི་ཏིང་ངེ་འཛིན་གྱིས་རང་གི་རིགས་ཀྱི་སྤྲུལ་པ་སྤྲོས་ཏེ་བཀའ་དཀྱུས་ཇི་ལྟ་བ་བཞིན་དུ་བསྒོའོ། །སངས་རྒྱས་དཀྱིལ་འཁོར་འཁོར་ལོ་ཅན། །ནམ་མཁའ་རྡོ་རྗེའི་དབུས་སུ་བསམ། །གཤིན་རྗེ་གཤེད་ཀྱི་འཁོར་ལོ་ཆེ། །ཞེས་བྱ་བ་ལ་སོགས་པ་ནི་གཤིན་རྗེ་གཤེད་ཀྱི་བཀའི་འཁོར་ལོ་ཡིན་ཏེ། འདི་ནི་གཤིན་རྗེ་གཤེད་ཀྱི་ཁྲོ་བོ་རྣམས་ཀྱིས་གཙོ་བོ་བྱས་པར་ཟད་ཀྱི་གཞན་ནི་སྔ་མ་ཉིད་དང་འདྲའོ། །སྐུ་གསུང་ཐུགས་ཀྱི་རྡོ་རྗེའམ། །ཞེས་བྱ་བ་ལ་སོགས་པས་ནི་གཞན་གྱི་བཀའི་འཁོར་ལོ་བསྟན་པ་སྟེ། འདི་ལྟར་འཁོར་ལོའི་གཙོ་བོ་སྐུ་གསུང་ཐུགས་ཀྱི་ལྷས་བྱས་པའམ། རང་སྔགས་དོན་གྱིས་ཡོན་ཏན་ཡི་དམ་གྱི་ལྷས་བྱས་པའམ། ཡང་ན་ཁྲོ་བོ་གཙུག་ཏོར་འཁོར་ལོས་སྒྱུར་བས་གཙོ་བོ་བྱས་ཏེ། སངས་རྒྱས་ཀྱི་དཀྱིལ་འཁོར་བསྲུང་བ་ལ་སོགས་པའི་བཀའི་འཁོར་ལོ་བསྒོམ་མོ། །ནམ་མཁའ་རྡོ་རྗེའི་དབུས་དག་ཏུ། ཆོས་ཀྱི་སྣང་མཛད་སྐུ་མཆོག་ལས། །ཞེས་བྱ་བ་ལ་སོགས་པ་ནི་བསྲུང་བའི་ཏིང་ངེ་འཛིན་ཏེ་ཞི་བ་དང་རྒྱས་པའི་རང་བཞིན་དུ་སྦྱར་རོ། །རྒྱ་མཚོ་རྐང་པས་གནོན་པ་ནི་རྡོ་རྗེ་སེམས་དཔའི་ཏིང་ངེ་འཛིན་གྱིས་ཆུ་ལ་མཱ་མ་ཀཱི་ཐིམ་པར་བསྒོམ་སྟེ། ནམ་སྲ་བར་གྱུར་པ་ནི་དེའི་སྤྱི་བོའི་སྟེང་དུ་བསྒོམ་པར་བྱའོ། །མུ་སྟེགས་དང་ཕས་ཀྱི་རྒོལ་བ་ཐམས་ཅད་གནོན་པའི་ཏིང་ངེ་འཛིན་ནི་བདག་ཉིད་ཁྲོ་བོར་བསྒོམས་པའི་ཐུགས་ཀ་ནས་ཀྱོ་བ་སྤྲོས་པས་མུ་སྟེགས་ཅན་ལ་སོགས་པ་བཀུག་སྟེ། དབང་ཆེན་འོག་ཏུ་མནན་ནས་དེའི་སྟེང་ལས་ཀྱི་རྡོ་རྗེ་རྒྱ་གྲམ་གྱིས་མནན་ཏེ། དེའི་སྟེང་དུ་བདག་ཁྲོ་བོར་བསྒོམས་པའི་ལག་པ་གཡས་རྡོ་རྗེ་ཐོགས་པས་མནན་ན་རྒོལ་བ་གནོན་པར་འགྱུར་རོ། །ཁ་ཅིག་ན་རེ་དབང་ཆེན་རླུང་གི་སྟེང་དུ་བསྒྲུབ་
བྱ་བཞག་སྟེ། དེའི་སྤྱི་བོར་ལས་ཀྱི་རྡོ་རྗེས་མཚོན་པའི་རྐང་པས་མནན་ཞེའོ། །དཔུང་གནོན་པ་ནི་རྡོ་རྗེ་གསུང་མཆོག་སྐུ་གསུང་ཐུགས་ཀྱི་ཁྲོ་བོ་བསྒོམ་སྟེ། དེ་ཡང་གསེར་གྱི་རི་རབ་ལྟ་བུ་ཤིན་ཏུ་ལྗིད་ཆེ་བས་མནན་པར་བསྒོམས་ན་སངས་རྒྱས་ཀྱི་དཔུང་ཡང་གནོན་ན་མིའི་དབང་པོའི་དཔུང་དག་ལྟ་ཅི་སྨོས་ཞེས་བྱ་བའི་དོན་ཏོ། །དགྲ་རྨོངས་པའི་ཏིང་ངེ་འཛིན་ནི་ཧཱུཾ་ལས་རྡོ་རྗེ་ཕུར་བུ་སྟོད་རྩེ་ལྔ་པ་སྨད་དཔལ་རྩེར་གནས་པ་རྡོ་རྗེ་རྩེ་ལྔའི་ཕྱག་རྒྱས་བླངས་ཏེ། སྙིང་གར་བཏབ་ན་དགྲ་རྨོངས་པར་འགྱུར་རོ། །ནད་སྤོང་བ་ཞི་བའི་ཏིང་ངེ་འཛིན་ནི་གྲོང་ངམ་གྲོང་ཁྱེར་གྱི་ནམ་མཁའ་ལ་བདག་གི་ཐུགས་ཀ་ནས་རྡོ་རྗེ་རྩེ་ལྔ་པ་གནས་པར་བསམས་ཏེ། དེ་ལས་བསྐལ་པའི་མེ་འབར་བས་ནད་རྣམས་ཐམས་ཅད་བསྲེགས་ཏེ་སླར་རྡོ་རྗེ་ལ་བསྡུ་བར་བྱའོ། །དེ་ནས་རྡོ་རྗེ་ལས་ལྷ་མོ་བདུད་རྩི་རིན་པོ་ཆེའི་བུམ་པ་གང་བ་འཛིན་པ་སྤྲོས་པས་ནད་པ་ལ་བླུགས་པར་བསམས་ན་ནད་ཞི་བར་འགྱུར་རོ། །ཡི་དམ་བཅས་པ་རྫོགས་ནས་ཀྱང༌། །སྔགས་ཀྱི་གནས་སུ་སྤྱད་པར་བྱ། །ཞེས་བྱ་བ་ནི་ལས་འདི་དག་གང་བྱེད་ཀྱང་བསྙེན་པ་རྫོགས་ནས་བྱ་བར་སྟོན་པའོ། །ཁ་ཅིག་ན་རེ། ལས་བྱས་ཟིན་ནས་རང་གི་ཡིད་དམ་རྒྱུན་དུ་བྱ་བ་ཡིན་ནོ་ཞེས་ཟེར་རོ། །སྐྱེ་འགྲོ་འདུལ་བའི་ཏིང་ངེ་འཛིན་ནི་རྡོ་རྗེ་བདུད་རྩི་འཁྱིལ་པའི་རང་བཞིན་གྱི་ཕུར་བུས་ཕྱོགས་བཅུའི་དཀྱིལ་འཁོར་ལ་བཏབ་ན། ལྷ་དང་བགེགས་ལ་སོགས་པ་ཐམས་ཅད་ཞི་བར་འགྱུར་རོ་ཞེས་བྱ་སྟེ་འདི་ནི་བཀའི་འཁོར་ལོ་དང་སྦྱར་ཏེ་བགེགས་བསྲུང་བར་བྱ་བའོ། །མདངས་བཟང་དཀྱིལ་འཁོར་དམ་པ་ནི། །ནམ་མཁའ་དབྱིངས་ཀྱི་དབུས་སུ་བསམ། །ཞེས་བྱ་བ་ལ་སོགས་པས་ནི་གོང་དུ་བསྟན་པའི་ལམ་རྣམ་པ་བཞིའི་ཐབས་བསྟན་པ་ཡིན་ཏེ། དེ་ལ། མདངས་བཟང་དཀྱིལ་འཁོར་དམ་པ་ནི། །ཞེས་བྱ་བ་ནི་དཀྱིལ་འཁོར་ཆེན་པོ་བསྒོམ་པ་ཡིན་ཏེ། དེ་ནམ་མཁའི་དབྱིངས་ཀྱི་དབུས་ཆོས་ཀྱི་འབྱུང་གནས་སུ་བསམས་ལ། བདག་རྣམ་པར་སྣང་མཛད་དུ་བསྒོམས་པའི་ཟུགས་ཀར་འདོད་པའི་བསྒྲུབ་བྱ་བཞག་སྟེ། རང་གི་བ་སྤུའི་བུ་གནས་སངས་རྒྱས་སྤྱན་དང་ལྡན་པའི་རྣམ་པར་སྣང་མཛད་ཀྱི་ནམ་མཁའི་ཁམས་གང་བར་སྤྲོས་ཏེ། ཕྱོགས་བཅུའི་ཡེ་ཤེས་བདུད་རྩི་བསྡུས་ནས་བུམ་པ་བདུད་རྩིས་བཀང་བ་རྣམས་
ཀྱིས་སྙིང་གའི་འདོད་པའི་སྟེང་དུ་ཕབ་སྟེ། དབང་བསྐུར་བར་བསམས་ན་ཞི་བར་འགྱུར་རོ། །དབང་གི་ལས་ནི། ཟླ་བའི་དཀྱིལ་འཁོར་དབུས་སུ་ནི། །དབང་ཆེན་དཀྱིལ་འཁོར་བསམ་པར་བྱ། །ཞེས་བྱ་བ་ལ་སོགས་པ་ཡིན་ཏེ། དེ་ལ་ཟླ་བའི་དཀྱིལ་འཁོར་གྱི་དབུས་སུ་དབང་ཆེན་གསེར་གྱི་འཁོར་ལོ་བསམས་ཏེ། དེའི་སྟེང་དུ་ཆོས་འཛིན་སྣང་བ་མཐའ་ཡས་བསམས་ནས། དེའི་སྙིང་གར་རྒྱས་པར་འདོད་པ་བཞག་སྟེ། བདག་གི་བ་སྤུའི་བུ་ག་ནས་གོས་དཀར་མོ་ལ་སོགས་པའི་ལྷ་མོ་རྣམས་སྤྲོས་པས་ཕྱོགས་བཅུའི་ཆོས་རིན་པོ་ཆེའི་བདུད་རྩི་བསྡུས་ཏེ། སྙིང་གའི་འདོད་པ་ལ་ཕབ་ཅིང་དབང་བསྐུར་བས་ཆོས་རིན་པོ་ཆེ་རྒྱས་པར་བསྒོམས་ན་རྒྱས་པར་འགྱུར་རོ། །དབང་གི་ལས་ནི། ནམ་མཁའི་དབྱིངས་ཀྱི་དབུས་སུ་ནི། །རྡོ་རྗེ་དཀྱིལ་འཁོར་ཟླ་གམ་བསམ། །ཞེས་བྱ་བ་ལ་སོགས་པ་སྟེ། དཀྱིལ་འཁོར་ཟླ་གམ་གྱི་དབུས་སུ་རྡོ་རྗེ་ཆོས་སམ་རྡོ་རྗེ་དོན་གྲུབ་བསྒོམས་ཏེ། དེའི་སྙིང་གར་དབང་དང་མཐུ་སྟོབས་ལྡན་པར་འདོད་པ་བཞག་ནས། བདག་གི་བ་སྤུའི་བུ་ག་ནས་སངས་རྒྱས་བྱང་ཆུབ་སེམས་དཔའ་འམ་ལྷ་མོ་སྒྲོལ་མ་སྤྲོས་ཏེ། དེས་ཕྱོགས་བཅུའི་གཟི་བརྗིད་ཀྱི་བདུད་རྩི་བསྡུས་ཏེ། སྙིང་གའི་འདོད་པ་ལ་ཕབ་ཅིང་དབང་བསྐུར་བས་མཐུ་སྟོབས་དང་དབང་ཕུན་སུམ་ཚོགས་པར་འགྱུར་ཏེ། གཞན་ཡང་ཇི་སྐད་སྨོས་པ་ལྟ་བུར་འགྱུར་རོ། །དྲག་པོའི་ལས་ནི། ནམ་མཁའ་རྡོ་རྗེ་སྲིན་པོ་དང༌། །ཞེས་བྱ་བ་ལ་སོགས་པ་སྟེ་ལས་འདི་ནི་བཀའི་འཁོར་ལོའི་སྐབས་སུ་བསྟན་པ་བཞིན་དུ་སྦྱར་རོ། །ད་ནི་ལས་རྣམ་པ་བཞི་ལ་སོགས་པ་བསྒྲུབ་པའི་བྱ་བ་བསྟན་པ་རྣམས་ལ་ལྷ་རྣམས་ཇི་ལྟར་བསྒོམ་པའི་ཆ་ལུགས་བསྟན་པའི་ཕྱིར། རྣམ་པར་སྣང་མཛད་ཞལ་གསུམ་པ། །ཞེས་བྱ་བ་ལ་སོགས་པ་གསུངས་ཏེ། འདི་དག་ནི་ཇི་ལྟར་འགྱུར་ནས་འབྱུང་བ་བཞིན་དུ་སྦྱར་རོ། །ནམ་མཁའི་དབྱིངས་ཀྱི་དབུས་གནས་པར། །ཞེས་བྱ་བ་ལ་སོགས་པ་ནི་ལྷ་གོང་དུ་བསྟན་པ་རྣམས་ཀྱི་བསྒྲུབ་ཅིང་བསྒོམ་པའི་ཚུལ་བསྟན་ཏོ། །ཁ་ཅིག་ན་རེ་སྔ་མ་ལས་ཅུང་ཟད་མི་འདྲ་བའི་མཚན་ཉིད་ལྔ་པས་ཏེ་བསྟན་པ་ཡིན་ནོ་ཞེས་ཟེར་རོ། །དེ་ལ་ཁྲོ་བོ་རྣམས་དབུ་རྒྱན་གྱི་སྒོ་ནས་སྐུ་གསུང་ཐུགས་ཀྱི་ཁྲོ་བོར་རིགས་སོ། །ལེའུ་བཅུ་གསུམ་པའོ།། །།