ལེའུ་བཅོ་བརྒྱད་པ། གསང་བ་ཐམས་ཅད་སྟོན་པ་རྡོ་རྗེའི་ཡེ་ཤེས་ཀྱིས་བྱིན་གྱིས་རློབ་པ་ཞེས་བྱ་བ་སྟོན་པ།
ད་ནི་དྲག་པོའི་ལས་ཀྱི་ལྷག་མ་ཁྲག་འདྲ་བ་བསྟན་ཏེ། དེ་ལ་ཧཱུཾ་ཧྲཱིཿ་ཁཾ་ཞེས་བྱ་བ་ནི་དྲག་པོའི་སྐུ་གསུང་ཐུགས་དང་ལྡན་པའི་སྙིང་པོ་སྟེ། འདིས་ཞེ་སྡང་རྡོ་རྗེ་ལ་སོགས་པ་ཁྲོ་བོ་གང་ཡང་རུང་བའི་སྐུ་གསུང་ཐུགས་ཀྱི་ལྷ་རབ་ཏུ་ཁྲོས་པ་དང་ལྡན་པ་ཅན་རབ་ཏུ་བསྐྱེད་དོ། །གནས་སྐབས་གང་དུ་ཞེ་ན། ཤ་རུས་ལ་སོགས་དཀྱིལ་འཁོར་ནི། །ནམ་མཁའི་དབྱིངས་ཀྱི་དབུས་སུ་བསམ། །ཞེས་གསུངས་ཏེ་རཀྟའི་རྒྱ་མཚོའི་སྟེང་ན་མཱཾ་སའི་ས་གཞི་ཆེན་པོ་གནས་པ་ལས་ཀེང་རུས་ཀྱི་རི་རབ་ཀྱི་སྟེང་ཐོད་རུས་ཀྱི་གཞལ་ཡས་ཁང་དུ་གྱུར་པའི་ནང་ན་རྡོ་རྗེ་སེམས་དཔའ་ཞེ་སྡང་རྡོ་རྗེའི་རང་བཞིན་དྲག་པོ་ཁྲོས་པ་ཨུཏྤལ་
སྔོན་པོའི་མདོག་ཅན་ཞལ་གཡས་དཀར་གཡོན་དམར་བ་ཕྱག་དྲུག་པ་མཚན་གཞན་མཐུན། གཡས་ན་ཐོད་པ་ཞགས་པ་བསྣམས་པ། ལྕེ་ལ་ཧཱུཾ་ཧྲཱིཿ་ཁཾ་ཞེས་བྱ་བའི་ཡི་གེ་མེ་ལྟར་འབར་བ་བཀོད་པ། ལུས་ལ་ཡི་གེ་གསུམ་ལས་བསྐྱེད་བའི་སྐུ་གསུང་ཐུགས་ཀྱི་ལྷ་ཁྲོས་པས་བརྒྱན་པ་བསྒོམས་ཏེ། གསང་སྔགས་ཨོཾ་ཨཱཿ་ཧཱུཾ་ཧྲཱིཿ་ཁཾ་ཧཱུཾ་ཞེས་བརྗོད་པས་སྐུ་གསུང་ཐུགས་ཀྱི་ལྷའི་ཐུགས་ཀ་ནས་ཀྱོ་བ་རྣམ་གསུམ་སྤྲོས་ཏེ། དེས་དགྲའི་ཁྲག་ཐམས་ཅད་དྲངས་ནས་ཐོད་པའི་ནང་དུ་དགང་བ་བདག་གི་འབར་བའི་ལྕེས་རྔུབ་ཅིང་འཐུད་བར་བསྒོམས་ལ་ཏྲི་ཤཱུ་ལ་དང་ཕུར་བ་བྱིན་གྱིས་བརླབས་པ་དག་གིས་ཀྱང་གདབ་པར་བྱས་ན་གང་ཡང་རུང་སྟེ་འཆི་བར་འགྱུར་རོ། །ཁ་ཟས་ཀྱི་དམ་ཚིག་ནི་བཟའ་བའམ་ཡང་ན་བཏུང་བའང་རུང་ཞེས་བྱ་བ་ལ་སོགས་པ་སྨོས་ཏེ། ཟས་ཐམས་ཅད་ལ་བདུད་རྩིའི་ངོ་བོར་བརྟགས་ཏེ་བྱིན་གྱིས་བརླབས་པ་བཟའ་བའོ། །ཁ་ཅིག་ན་རེ་བདུད་རྩི་བྱིན་གྱིས་བརླབས་པ་ཉིད་ཟས་ལ་གདབ་ཅེས་སོ། །མཆོད་པའི་མཆོག་གིས་མཆོད་པ་ནི་འདོད་པ་ལྔའོ། །དབང་པོ་གཉིས་སྦྱོར་བའི་མཆོད་པ་ནི་བྱང་ཆུབ་སེམས་ལ་སོགས་པའི་བདུད་རྩི་ལྔའོ། །ལུས་ངག་སེམས་ཀྱི་སྡོམ་པ་ནི། །བུད་མེད་ཐམས་ཅད་རྡོ་རྗེ་གསུམ་གྱིས་བྱིན་གྱིས་བརླབས་ཏེ། སྒྲུབ་པ་ཐམས་ཅད་ཀྱི་སྡོམ་པ་ནི་རང་གི་ལུས་ངག་སེམས་གསུམ་གསང་བ་སྐུ་གསུང་ཐུགས་སུ་བསྒོམ་པའི་དྲག་པོ་དེ་བསྒྲུབས་ན་ལོག་པར་རྟོག་པ་ཐམས་ཅད་འཇིག་པར་འགྱུར་བའོ། །རྡོ་རྗེ་དེ་ཁོ་ན་ཉིད་ཀྱི་སྡོམ་པ་ནི། རྣལ་འབྱོར་བ་ཁྲོ་བའི་ཏིང་ངེ་འཛིན་གྱིས་དུབ་སྟེ་ལུས་ཉམ་ཆུང་ན་སྤྱི་བོའི་སྟེང་མཐོ་གང་ཙམ་སྤག་པར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཨོཾ་དཀར་པོ་བསྒོམས་ཏེ། དེ་འོད་དུ་ཞུ་བ་ལས་སྤྱི་བོ་ནས་ཐིམ་སྟེ་གཟི་བརྗིད་བསྐྱེད་པར་བྱའོ། །གསང་སྔགས་འཛིན་པ་ཐམས་ཅད་ཀྱི་དམ་ཚིག་ནི་ཏིང་ངེ་འཛིན་དང་ལྡན་པས་མཆོད་རྟེན་བརྩིག་པ་ལ་སོགས་པའི་ལས་མི་བྱ་བའོ། །དུག་གསོ་བའི་ལས་ནི་བདག་གི་ཐུགས་ཀར་ཡི་གེ་གསུམ་བསྒོམས་ཏེ། འཁོར་ལོའི་དབུས་སུ་སྐུ་གསུང་ཐུགས་ཀྱི་ཡི་གེ་དཀར་པོ་བཞག །ཁ་ཟས་ཆེན་པོ་སེར་པོར་བསྒོམ། སྐུ་གསུང་ཐུགས་ཀྱི་འོད་ཟེར་གྱིས་
དུག་དྲངས་པར་བསྒོམས་ན་དུག་འབྱིན་པ་ལ་སོགས་པར་འགྱུར་རོ། །སྲུང་བའི་འཁོར་ལོའི་སྦྱོར་བ་ནི་གྲོ་གའམ་ཤོག་བུ་ལ་སོགས་པ་ལ་རྡོ་རྗེ་རྒྱ་གྲམ་གྱི་འཁོར་ལོ་བྲིས་ཏེ་དབུས་སུ་ཧ་དང་མིང་བྲི། མཐའ་སྐོར་དུ་སྔགས་ཀྱི་ཡི་གེ་ཇི་ལྟ་བ་བཞིན་དུ་བྲིས་ཏེ། ད་ཧ་དང་ཨ་མྲྀ་ཏའི་བར་དུ་བསྒྲུབ་བྱའི་མིང་བཅུག་སྟེ། གསང་སྔགས་ཀྱང་དེ་བཞིན་དུ་བཟླས་ནས་ལུས་ལ་བཏགས་ན་བསྲུང་བར་འགྱུར་རོ། །རྡོ་རྗེ་ཨཉྫཱ་ན་སྒྲུབ་པ་ན་ལམ་གྱི་བཞི་མདོ་ལ་སོགས་པ་ཇི་སྐད་གསུངས་པའི་གནས་སུ་སོང་སྟེ། ཐོད་པ་འཛག་པ་ཞིག་གི་ནང་དུ་ཚིལ་ཆེན་དང་ཁྲག་དང་བཤད་པ་སྦྱར་བ་ཐོད་པ་བཟང་པོ་ཞིག་གི་ནང་དུ་ཕབ་ནས། དེ་ལས་མར་མེ་བྱས་ཏེ་སྡོང་བུའི་རྒྱུ་པདྨའི་སྐུད་པའམ། རས་ཀྱི་སྐུད་པས་བྱས་པ་ཐོད་པ་ཁ་སྦྱོར་དུ་མར་མེ་གཏང་བར་བྱའོ། །དེ་ནས་དུ་བའི་དྲག་པ་དེ་དག་རྒོད་ཀྱི་ཐེའུ་གཤོག་གི་རྒྱབ་ཕྱི་ཟུར་གྱིས་བྲུད་ནས། དེ་ལ་གསང་སྔགས་ཨོཾ་ཨཱཿ་ཨཉྫཱ་ལི་ཧཱུཾ་ཞེས་བརྒྱ་རྩ་བརྒྱད་བཟླས་ཤིང་མིག་ལ་བསྐུས་ཏེ། དུས་ནི་ཚེས་ཉི་ཤུ་དགུའི་ནམ་ཕྱེད་ནས་བཟུང་སྟེ། ཇི་སྲིད་དུ་མ་གྲུབ་པ་དེ་སྲིད་དུ་སྒྲུབ་པ་བྱས་ན་མིག་གི་མངོན་པར་ཤེས་པ་འཐོབ་པོ། །གཞན་ཡང་སྐྱེ་བ་བདུན་པའི་རྫས་ཤེས་པར་བྱེད་དོ། །གཞན་ནི་གོ་སླའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེ་དག་ཐམས་ཅད་སྐུ་གསུང་ཐུགས་རྡོ་རྗེ་བཙུན་མོའི་བྷ་ག་ལ་བཞུགས་ཏེ་ཞེས་བྱ་བ་ནི་ཇི་ལྟར་དངོས་པོ་ཡང་སྟོན་པ་བཙུན་མོའི་བྷ་ག་ལ་བྱང་ཆུབ་སེམས་ཀྱི་ངོ་བོར་བཞུགས་ཏེ། དེ་བཞིན་དུ་འདིར་ཡང་བཙུན་མོའི་བྷ་ག་ལ་བཅུག་པ་ནི་ཆགས་པ་ཆེན་པོའི་ཧོས་ཡོངས་སུ་ཞུ་ནས་བཞུགས་པའོ། །དེ་ལ་ལྷ་མོ་རྣམས་ཀྱིས་གླུའི་སྒོ་ནས་ཡོངས་སུ་བསྐུལ་ཏེ། འདི་ལྟར་སྐུ་གསུང་ཐུགས་རྡོ་རྗེའི་བདག་ཉིད་ཀྱི་གཙོ་བོ་ཁྱོད་ནི་ཐམས་ཅད་ལ་ཐུགས་རྗེ་ཆེན་པོས་གཟིགས་པ་ཡིན། གལ་ཏེ་ཁྱོད་ཀྱི་ཐུགས་རྗེས་བདག་ལ་གཟིགས་ཤིང་བདག་ལ་གསོན་པར་མཆིས་པར་མགོན་པོ་ཁྱོད་ཀྱིས་གནང་བ་ལགས་ན་བཞེངས་ལ་བདག་དམ་ཚིག་གི་དགྱེས་པ་སྤྱད་པར་མཛད་དུ་གསོལ་ཞེས་ལྷ་མོ་བཞིས་བསྐུལ་ལོ། །དེ་སྐད་ཅེས་བསྐུལ་བས་བཅོམ་ལྡན་འདས་དེ་དག་ཇི་ལྟ་བའི་ཚུལ་གྱིས་ཡོངས་སུ་བཞེངས་ཏེ་དམ་ཚིག་གི་བཙུན་མོ་ལ་འདོད་པ་སྤྱོད་པར་འགྱུར་ཏེ། འདི་ནི་དཀྱིལ་འཁོར་འདོན་
པའི་སྦྱོར་བའི་བདག་ཉིད་དང་སྦྱར་བར་བྱའོ། །དེ་ནས་ནམ་མཁའི་དབྱིངས་འདི་ཐམས་ཅད་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དམ་ཚིག་གི་ཁུ་བས་ཡོངས་སུ་གང་སྟེ་བུམ་པ་རྡོ་རྗེ་ཆུས་གང་བ་ལྟར་གནས་པར་གྱུར་ཏོ་ཞེས་བྱ་བ་ནི་ལེའུ་དང་པོར་སྟོན་པ་འདོད་ཆགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་སེམས་ཅན་ཐམས་ཅད་གསང་བའི་མཁའ་ལ་བསྡུས་ཏེ། བྱང་ཆུབ་སེམས་བབས་པས་ཐམས་ཅད་བུམ་པ་ཆུས་བཀད་བ་ལྟ་བུར་གྱུར་པའོ། །དེ་ནས་ནམ་མཁའི་དབྱིངས་འདིར་སེམས་ཅན་གང་སྐུ་གསུང་ཐུགས་རྡོ་རྗེའི་དཔལ་གྱིས་རེག་པ་དེ་ཐམས་ཅད་ཀྱང་ཡང་དག་པར་རྫོགས་པའི་སངས་རྒྱས་རྡོ་རྗེ་སྐུ་གསུང་ཐུགས་རྡོ་རྗེར་གྱུར་ཏེ་ཀུན་དུ་བཟང་པོ་ཞེས་སྐུ་གསུང་ཐུགས་རྡོ་རྗེས་དབང་བསྐུར་ཏོ་ཞེས་བྱ་བ་ནི་དབང་གི་འབྲས་བུའོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཐམས་ཅད་ལ་ཆོས་མཉམ་པ་ཉིད་མཐོང་ངམ་ཞེས་བཀའ་སྩལ་པ་ལས། དེ་བཞིན་གཤེགས་པ་རྣམས་ཀྱིས་འདི་སྐད་དུ་བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ་ཞེས་གསོལ་བ་ནི་ལེའུ་དང་པོར་རིགས་ལྔ་སངས་རྒྱས་ཀྱི་གསང་བ་བྱང་ཆུབ་སེམས་ཀྱི་དབང་ལ་ངོ་མཚར་བ་བསྟོད་པ་དང་སྦྱར་བར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བཙུན་མོའི་ལས་འདས་ཞེས་བྱ་བ་ནི་དབང་བསྐུར་ཟིན་ཏེ། བཙུན་མོ་དང་གཉིས་སུ་མེད་པའི་སྦྱོར་བ་མཛད་པ་ལས་བཞེངས་པའོ། །ཚུལ་འདི་ནི་དབང་ཐོབ་ཕན་ཆད་བུད་མེད་མི་དགོས་སོ་ཞེས་ཟེར་རོ། །འདོད་ཆགས་ཀྱི་ཡི་གེའི་ཚིག་ལ་སངས་རྒྱས་ཀྱི་བྱང་ཆུབ་རྗེས་སུ་ཆུད་པ་ངོ་མཚར་ཏོ་ཞེས་བྱ་བ་ནི་གསང་བ་དང་ཤེས་རབ་ཡེ་ཤེས་ཀྱི་དབང་གི་ངོ་བོ་བུད་མེད་དང་ཆགས་པ་སྤྱོད་པ་ལས་སངས་རྒྱས་ཀྱི་བྱང་ཆུབ་མི་རྟོག་པའི་ཡེ་ཤེས་ཁོད་དུ་ཆུད་དེ་རྡོ་རྗེ་འཛིན་ཆེན་པོར་འགྱུར་བ་ངོ་མཚར་ཏོ་ཞེས་སོ། །བཅོམ་ལྡན་འདས་དེ་སྐད་མ་གསུང་ཤིག་ཆོས་ཐམས་ཅད་ནམ་མཁའ་དང་མཚུངས་པའི་ཕྱིར་གཟུགས་ཀྱི་ཕུང་པོ་ཞེས་བྱ་བ་ལ་སོགས་པས་ནི་ངོ་མཚར་མི་ཆེ་བ་བསྟན་ཏེ། འདི་ལྟར་ཆོས་ཐམས་ཅད་ནི་ནམ་མཁའ་དང་མཚུངས་ཏེ། ཕུང་པོ་དང་ཁམས་དང་སྐྱེ་མཆེད་ཀྱི་ངོ་བོ་མ་ཡིན་ཞིང་འདོད་ཆགས་ལ་སོགས་པའི་ཆོས་ཀྱང་
མ་ཡིན་ཏེ། ཆོས་མ་ཡིན་པའི་ངོ་བོ་ཞིག་ཀྱང་ཡོད་པ་མ་ཡིན་པས་དེའི་ཕྱིར་འདོད་ཆགས་ཀྱི་ཚིག་ལས་སངས་རྒྱས་ཀྱི་བྱང་ཆུབ་ཁོང་དུ་ཆུད་པ་མེད་དོ། །དེ་ཡན་ཆད་ནི་དངོས་པོ་ཡོངས་སུ་རྫོགས་ནས། དེ་ནི་རྒྱུད་ཡོངས་སུ་གཏད་པའི་ཕྱིར། དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་དེ་དག་ལ་བོས་ཏེ་གསུངས་པ། འཇིག་རྟེན་གྱི་ཁམས་ཐམས་ཅད་དུ་སྐུ་གསུང་ཐུགས་རྡོ་རྗེ་འདི་སྒོར་གསོལ་ཞེས་བྱ་བ་ནི་དམ་པའི་ཆོས་མི་ནུབ་པར་བྱ་བའི་ཕྱིར་འགྲོ་བ་རྣམས་ལ་སྒྲོགས་ཤིག་པའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཆོས་ལ་བོས་ཏེ་གསུངས་པ་ཞེས་བྱ་བ་ལ་སོགས་པ་ནི་ཁྱད་པར་དུ་གསུང་གི་དབང་ཕྱུག་རྡོ་རྗེ་ཆོས་ལ་བོས་ཏེ་གཏད་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་གསུམ་སེམས་དཔའི་སྐུ་གསུང་ཐུགས་ཀྱི་ཡི་གེ་ལ་སེམས་ཅན་རྣམས་བཙུད་པར་གྱུར་ཏོ་ཞེས་བྱ་བ་ལ་སོགས་པ་ནི་རྒྱུད་བཤད་པ་རྫོགས་ནས་ཡོངས་སུ་གཏད་པ་མཛད་དེ། སྐུ་གསུང་ཐུགས་མཉམ་པ་ཉིད་ཀྱི་གནས་ལ་དམིགས་ནས་ཅང་མི་གསུང་སྟེ་འདི་ནི་ཞི་བ་ཆེན་པོའི་གནས་ཉིད་ལ་བཞུགས་ཞེས་བྱ་བའི་ཐ་ཚིག་གོ །ལེའུ་བཅོ་བརྒྱད་པའི་ཕྱེད་ཀྱིས་རྩ་བའི་རྒྱུད་ཡོངས་སུ་རྫོགས་སོ།། །།དཔལ་གསང་བ་འདུས་པའི་སྦས་པའི་མན་ངག་ཏུ་ཕྱུངས་པ་རྣམས་མདོར་བསྡུས་པ་བསྟན་པ་སློབ་མ་ལ་ཕན་པ་ཞེས་བྱ་བ་སློབ་དཔོན་རབ་ཏུ་ཞི་བའི་ཡེ་ཤེས་ཀྱིས་མཛད་པ་རྫོགས་སོ།། །།དམ་ཆོས་ཟབ་མོའི་ཚིག་ལས་རྟོགས་དཀའ་ཡང༌། །བསམ་པ་བཟང་པོའི་ས་བོན་རྒྱུར་བཞག་ནས། །གང་གིས་གཞན་ལ་ཕན་ཕྱིར་ཞུས་པ་ཡིས། །ཅི་ནུས་བསྒྱུར་བ་འདི་ཡིས་ལམ་རྙེད་ཤོག །འགྲོ་བའི་དཔལ་མགོན་གྱུར་པ་འཇམ་པའི་དཔལ། །ཀུན་མཁྱེན་ཡེ་ཤེས་ཉིད་ཀྱི་ཐུགས་རྗེ་ཡིས། །ཀུན་ལ་སྐྱབས་མཛད་བཀའ་དྲིན་ཆེན་པོ་འདི། །སྣོད་དང་ལྡན་པ་ངེས་པར་རྟོགས་ལ་བྱིན།།