ལེའུ་བཅུ་དྲུག་པ། དངོས་གྲུབ་ཐམས་ཅད་ཀྱི་དཀྱིལ་འཁོར་རྡོ་རྗེ་མངོན་པར་རྫོགས་པར་བྱང་ཆུབ་པ་ཞེས་བྱ་བའི་བཤད་སྦྱར།
བཅུ་དྲུག་པ་ནི་སྒྲུབ་པའི་ལེའུ་ཡིན་པ་དེ་བས་ན་འདིར་སློབ་དཔོན་གྱི་ལས་དང༌། དངོས་གྲུབ་དང༌། བརྟུལ་ཞུགས་དང༌། སྡོམ་པ་
རྣམས་བསྟན་པར་བྱའོ། །དེ་ལ་བྲིས་པའི་དཀྱིལ་འཁོར་ཉིད་དུ་ནི་དངོས་གྲུབ་ཀྱི་སྒྲུབ་པ་དང༌། སློབ་དཔོན་གྱི་བྱ་བ་ཡིན་པ་དེ་བས་ན། དང་པོ་བྲི་བའི་དཀྱིལ་འཁོར་གྱི་སྐབས་དབྱེ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དེ་རྣམས་ཀྱི་དམ་ཚིག་སྟེ། གོ་བར་བྱེད་པ་ནི་ལེའུ་བཞི་པ་ལས། དེ་བཞིན་གཤེགས་པ་ཀུན་ཞི་བ། །ཞེས་བྱ་བ་ལ་སོགས་པ་གསུངས་ཏེ། དཀྱིལ་འཁོར་གསོལ་བ་འདེབས་པའི་ཚིགས་སུ་བཅད་པ་བཞི་ཞེས་བྱ་བའི་དོན་ཏེ། །དེས་གསོལ་བ་བཏབ་ནས་སོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་ཆེན་ཞེས་པ་ལ། དགའ་བ་རྒྱས་པར་བྱེད་པས་ན་རིན་ཆེན་ནོ། །ཉོན་མོངས་པ་ཟད་པར་བྱེད་པས་རྡོ་རྗེ་སྟེ། གཟུགས་རྡོ་རྗེ་ལ་སོགས་པའོ། །དེ་ཉིད་མཆོད་པ་ཡིན་ལ་དེའི་བཀོད་པ་ནི་གང་དག་གིས་ནམ་མཁའ་ཁྱབ་པའི་ཚོགས་སོ། །རྡོ་རྗེ་ཐམས་ཅད་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དོ། །དེ་རྣམས་ཀྱི་དཀྱིལ་འཁོར་དེ་ཉིད་སེང་གེའི་རྒྱལ་པོ་དང་འདྲ་བས་ན། སེང་གེའི་དམ་ཚིག་གི་རྒྱལ་པོའོ། །དེའི་སོ་སོར་སྤྲོས་པ་དེ་སོ་སོའི་མཚན་མའི་རྣམ་པར་བསྡུས་པས་ནི་ཇི་ལྟ་བ་བཞིན་དུ་བཀོད་པ་ནི་བཀོད་པའོ། དེ་ལ་དམིགས་པའི་ཏིང་ངེ་འཛིན་ལ་དེ་སྐད་ཅེས་བྱའོ། །སངས་རྒྱས་ཐམས་ཅད་ཀྱི་རྡོ་རྗེའི་སྐུ་ནི་རྟག་པའི་སྐུ་སྟེ། རྣམ་པར་སྣང་མཛད་ཡིན་ལ། དེའི་དཀྱིལ་འཁོར་ནི་གསང་བ་འདུས་པ་རྟེན་དང་བཅས་པ་བྲིས་པའི་སྐུའི་དཀྱིལ་འཁོར་རོ། །མཆོག་ཅེས་བྱ་བ་ནི་སྐུ་རྡོ་རྗེ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཡིན་པའི་ཕྱིར་རོ། །ཐུགས་ཀྱི་རྡོ་རྗེ་དེ་ནི་རྡོ་རྗེ་འཆང་གིས་སྤྲུལ་པའི་ཏིང་ངེ་འཛིན་གྱི་དཀྱིལ་འཁོར་རོ། །དེ་དང་འདྲ་བ་ནི་དེ་དང་མཚུངས་པའོ། །དཀྱིལ་འཁོར་རྣམས་ནི་ཀུན་གྱི་ཞེས་བྱ་བ་གསང་བ་གསུམ་པོ་འདུས་པ་སྟེ། དེ་ལ་ལྷ་མོ་རྣམས་ནི་གསུང་གི་གསང་བའོ། །ཁྲོ་བོ་རྣམས་ནི་ཐུགས་ཀྱི་གསང་བའོ། །ལྷག་མ་རྣམས་ནི་སྐུའི་གསང་བའོ། །མཆོག་ཅེས་བྱ་བ་ནི་གསང་བ་དེ་རྣམས་དེ་བཞིན་གཤེགས་པ་ཉིད་ཡིན་པའི་ཕྱིར་རོ། །ཁྲུ་ནི་བཅུ་དྲུག་ཅེས་བྱ་བ་ནི་ལོགས་རེ་རེ་ཞིང་ཁྲུ་བཞིའམ་ཁྲུ་བཅུ་དྲུག་པ་ཉིད་དོ། །འདི་ནི་སྒྲུབ་པའི་དཀྱིལ་འཁོར་གྱི་ཚད་ཡིན་ནོ། །དབང་བསྐུར་བ་
ལ་སོགས་པའི་དཀྱིལ་འཁོར་ནི་ལོགས་རེ་རེ་ཞིང་ཁྲུ་གང་ནས་བརྩམས་ཏེ། ཁྲུ་སྟོང་གི་བར་ཡིན་ནོ། །སྐུ་ཡི་རྡོ་རྗེ་རབ་ཏུ་གནས། །ཞེས་བྱ་བ་ནི་དེའི་བདག་པོ་ཅན་ཞེས་བྱ་བའི་དོན་ཏོ། །འཁོར་ལོ་ནི་བྲི་བར་བྱ་ཞེས་བྱ་བ་ནི་དེའི་དཀྱིལ་འཁོར་གྱི་ཕྱེད་ཀྱི་ཚད་ཏམ་རྡོ་རྗེའི་ཐིག་བཏབ་ནས་ཀ་བ་བརྒྱད་ཀྱིས་མཛེས་པར་བྱས་པའི་རེའུ་ཆ་བརྒྱད་པ་ནང་གི་དཀྱིལ་འཁོར་ཟླུམ་པོའོ། །རྡོ་རྗེའི་ཆོ་ག་ཞེས་བྱ་བ་ནི་ཐིག་གདབ་པ་ལ་སོགས་པ་ནས་དབང་བསྐུར་བའི་མཐར་ཐུག་པའི་བར་དུ་སྦྱར་བར་བྱ་སྟེ། དེ་ཁོ་ན་ཉིད་བསྡུས་པ་དང༌། དཔལ་མཆོག་དང་པོ་ལ་སོགས་པའི་རྒྱུད་གཞན་དག་ལས་སྤྱིར་གསུངས་པའི་བྱ་བ་འགལ་བ་མེད་པ་ཅན་འདིར་ཡང་བྱ་བ་ཉིད་ཡིན་པའི་ཕྱིར་ཆོ་གའོ། །གསང་བ་འདུས་པ་ཁྱད་པར་དུ་གསུངས་པ་ནི་འགལ་བ་ཉིད་ཡིན་པའི་ཕྱིར་རྡོ་རྗེ་སྟེ། ཆོ་ག་དང་ལྷན་ཅིག་པའི་རྡོ་རྗེ་ནི་རྡོ་རྗེའི་ཆོ་གའོ། །དེས་ཐིག་གདབ་ཅིང་བྲི་བར་བྱའོ། །དེ་བཞིན་དུ་ཇི་སྲིད་དབང་བསྐུར་བ་དང༌། སྔགས་དང་ཏིང་ངེ་འཛིན་སྦྱིན་པའི་བར་དུ་རྡོ་རྗེ་ཆོ་ག་ཡིས་ཞེས་བྱ་བར་སྦྱར་རོ། །དེ་མ་ལུས་པར་ཡང་དཀྱིལ་འཁོར་གྱི་ཆོ་གར་བལྟ་བར་བྱའོ། །ཕྱག་རྒྱ་ནི་མཚན་མའི་ཕྱག་རྒྱའོ། །དེ་ཉིད་ནི་རྡོ་རྗེའི་གནས་ཏེ། སྔགས་རྣམས་ཀྱི་དེ་ཁོ་ན་ཉིད་དགོད་པར་བྱའོ། །ཅི་འདྲ་བ་ཞིག་ཅེ་ན། གསང་བའི་མཆོག་སྟེ། མཆོག་ནི་དམ་ཚིག་གོ །ཡང་ན་མཆོག་ནི་ཕྱག་རྒྱ་ཆེན་པོ་ལ་སོགས་པ་གཟུགས་སོ། །གསང་བ་ནི་བསྟན་པར་བྱ་བ་མ་ཡིན་པ་སྟེ། བྲི་བར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །རྣམ་པར་སྣང་མཛད་གནས་ནི་འོད་ཟེར་དང་བཅས་པའི་འཁོར་ལོའོ། །མི་བསྐྱོད་པ་ལ་སོགས་པ་ཞེས་བྱ་བ་ནི་དེའི་ངོས་ཀྱི་རེའུ་ཆ་རྣམས་ལ་སྟེ། འོད་ཟེར་དང་བཅས་པའི་རྡོ་རྗེ་དང་ནོར་བུ་དང་པདྨ་དང་རལ་གྲིའོ། །སྐུ་གསུང་ཐུགས་རྡོ་རྗེ་མཆོག་རྣམས་གྲྭ་ཀུན་དུ་ཞེས་བྱ་བ་ནི་སྐུའི་མཆོག་དང་གསུང་གི་མཆོག་དང༌། རྡོ་རྗེ་ཐུགས་ཀྱི་མཆོག་དང་རྡོ་རྗེའི་མཆོག་རྣམས་ནི་གོ་རིམས་བཞིན་དུ་སྤྱན་དང་མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་ཡིན་ཏེ། དེ་རྣམས་ནི་གོ་རིམས་བཞིན་དུ་ནང་གི་དཀྱིལ་འཁོར་གྱི་མེ་ལ་སོགས་པའི་མཚམས་དག་ལ་དགོད་པར་བྱའོ། །ཁྲོ་བོ་རྣམས་ནི་ཞེས་བྱ་བ་ནི་གཤིན་རྗེ་གཤེད་ལ་སོགས་པའོ། །ལྷ་མོ་རྣམས་ནི་མང་པོའི་ཚིག་དང་སོགས་ཞེས་བསྡུས་པར་འགྱུར་ཏེ། དེས་
ན་མཆོད་པའི་ལྷ་མོ་དྲུག་གཟུང་སྟེ། བཞི་ནི་ཕྱིའི་གྲྭ་བཞིར་རོ། །དབང་ལྡན་དང་མེ་མཚམས་གཉིས་སུ་ནི། རེག་བྱ་དང་ཆོས་ཀྱི་དབྱིངས་ཀྱི་རྡོ་རྗེ་མ་དག་རིམ་བཞིན་ནོ་ཞེས་ཀུན་དགའ་སྙིང་པོའི་ཞལ་སྔ་ནས་གསུངས་སོ། །འདི་གཉིས་རྩ་བའི་སྒོའི་ངོས་གཉིས་སུ་སྟེ། དེ་དག་གྲྭ་དང་ཉེ་བས་གྲྭ་ཞེས་བྱའོ་ཞེས་ཡེ་ཤེས་ཞབས་ཀྱིའོ། །སྒོའི་ངོས་རྣམས་ཀྱང་གྲྭ་ཡིན་པས་ཕྱི་རིམ་གྱི་གྲྭ་བཅུ་གཉིས་སུ་སྐྱེ་མཆེད་བཅུ་གཉིས་ཏེ། གླེང་གཞིའི་གཞུང་དང་དཀྱིལ་འཁོར་ཆེན་པོའི་བསྟོད་པ་ལས་དེ་དག་སྨོས་པའི་ཕྱིར་རོ་ཞེས་གཞན་དག་འདོད་དོ། །དེ་ལ་རྒྱལ་མོ་རྣམས་ཀྱི་སྤྱན་དང༌། རྡོ་རྗེ་དང༌། པདྨ་དང༌། ཨུཏྤལ་སྔོན་པོའོ། །མཆོད་པ་རྣམས་ཀྱི་ནི། མེ་ལོང་དང༌། པི་ཝང་དང༌། དྲིའི་དུང་དང༌། རོའི་སྣོད་དང༌། གོས་སྣ་ཚོགས་དང༌། ཆོས་འབྱུང་བ་ཞེས་བྱ་བ་བྲི་བར་བྱའོ། །སའི་སྙིང་པོ་ལ་སོགས་པ་ནི། འཁོར་ལོ་དང༌། རྡོ་རྗེ་སྔོན་པོ་དང༌། ནོར་བུ་དང༌། པདྨ་དང༌། རལ་གྲི་དང༌། རྡོ་རྗེ་བཟང་པོ་རྣམས་སོ། །ཁྲོ་བོ་རྣམས་ཀྱི་འབར་བ་དང་བཅས་པའི་ཐོ་བ་དང༌། དབྱིག་པ་དང༌། པདྨ་དང༌། རྡོ་རྗེ་ཁ་གྱེས་པའི་རྣམ་པའོ། །རྡོ་རྗེ་གསང་བ་རབ་བསྒོམས་པས། །ཞེས་བྱ་བ་ནི་པདྨ་དང་རྡོ་རྗེ་ལས་བྱུང་བའོ། །གསུང་རྡོ་རྗེ་ཐམས་ཅད་ཀྱི་ངོ་བོ་ཉིད་ཀྱི་གསང་བ་གསུམ་མོ། །དེ་སྤྲོས་པ་ནི་སྤྲིན་ཏེ། སོ་སོར་སྤྲོས་པའི་སྤྲིན་ནོ། །དེ་རྣམས་ཀྱི་བཀོད་པ་ནི་རེ་རེ་ཞིང་མཚན་མའི་རྣམ་པར་བསྡུས་ནས་གནས་ཇི་ལྟ་བ་བཞིན་དུ་དགོད་པའོ། །ལྷག་མ་རྣམས་ནི་སྔ་མའི་རྗེས་སུ་འབྲངས་ནས་ཤེས་པར་བྱའོ། །རྡོ་རྗེའི་བསྒོམས་པས་ཞེས་བྱ་བ་ནི་བསྒོམ་པར་བྱ་བའི་དོན་བསྟན་པར་བསྒོམས་པས་སོ། །རྡོ་རྗེ་ཆོས་ནི་འོད་དཔག་ཏུ་མེད་པ་སྟེ། འདི་ལ་རྒྱལ་པོ་ཆེན་པོ་དེ་མངའ་བས་ན་དེ་སྐད་ཅེས་བྱའོ། །རིག་པའི་དབང་པོ་ནི་འོད་དཔག་ཏུ་མེད་པ་སྟེ། དེའི་ངོ་བོ་ཉིད་ཡིན་པའི་ཕྱིར་རིག་པའི་དབང་པོའོ། །འོད་དཔག་ཏུ་མེད་པ་དེ་ཉིད་ཀྱི་རང་གི་སྐུ་དང་རང་གི་དཀྱིལ་འཁོར་གང་ཡིན་པ་དེ་དག་ནི་གནས་ཏེ་བཞིའོ། །གསུང་གི་རྡོ་རྗེ་ནི་འོད་དཔག་ཏུ་མེད་པ་སྟེ། །དེའི་ཡོན་ཏན་དེ་རྣམས་སྐྱེད་པར་མཛད་པ་སྟེ། མཐོང་བ་དང་འཇུག་པ་ལ་སོགས་པས་དེའི་ས་བོན་བཏབ་པ་དང་གསོལ་བ་གདབ་པའི་ཕྱིར་རོ། །དབབ་པར་བྱ་ཞེས་བྱ་བ་ནི་དཀྱིལ་འཁོར་སར་པ་བྲི་བར་བྱའོ། །འཁོར་ལོ་ཆེན་པོ་ནི་དབུས་མའི་དཀྱིལ་འཁོར་རོ། །
ཕྱག་རྒྱ་ཐམས་ཅད་ནི་ཐམས་ཅད་ཀྱི་མཚན་མའོ། །ཕྱག་རྒྱ་ཆེན་པོ་ནི་མཚན་མ་ཆེན་པོའོ། །དེ་ཉིད་དུ་ཞེས་བྱ་བ་ནི་ལེའུ་བཞི་པ་ལས་གསུངས་པ་གང་ཡིན་པ་དེ་ཉིད་དུའོ། །རྡོ་རྗེའི་གནས་ནི་མཚན་མ་དགོད་པའོ། །ཀུན་ནས་སྤྲིན་ནི་དཀྱིལ་འཁོར་གྱི་བདག་པོ་ཐམས་ཅད་ཀྱི་དཀྱིལ་འཁོར་སྤྲོས་པའོ། །དེ་རྣམས་ཀྱི་ཚོགས་ནི་རང་གི་མཚན་མའི་རྣམ་པ་ཇི་ལྟ་བ་བསྡུས་ནས་གནས་ཇི་ལྟ་བ་བཞིན་དུ་དགོད་པའོ། །བརྟན་པ་ཉིད་ཀྱི་ཕྱིར་རྡོ་རྗེའོ། །དེ་ལ་དམིགས་པ་ཉིད་ཀྱི་ཕྱིར་དེ་སྐད་ཅེས་བྱའོ། །རབ་ཏུ་གསངས་བའི་དཀྱིལ་འཁོར་ནི་དཀྱིལ་འཁོར་གྱི་དེ་ཁོ་ན་ཉིད་དོ། །དེ་ཇི་ལྟར་ན་མཆོག་ཏུ་གསང་བ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་བདག་པོ་དཀྱིལ་འཁོར་གྱི་བདག་པོའི་ཚུལ་དུ་བྱང་ཆུབ་སེམས་དཔའ་རྣམས་ཀྱང་འདིར་བསྐྱེད་པའི་ཕྱིར་རོ། །དེ་ཡང་རྡོ་རྗེ་འཛིན་ཞེས་བྱ་བ་ལ་སོགས་པ་ལ་དཀྱིལ་འཁོར་ཡང་ལྷའི་དཀྱིལ་འཁོར་ཡིན་ལ། གནས་ཀྱང་དེའི་རྟེན་གྱི་འཁོར་ལོ་ཡིན་པས་ན་དཀྱིལ་འཁོར་གྱི་གནས་སོ། །ཇི་ལྟ་བུ་ཞེ་ན། སྐུ་གསུང་ཐུགས་ཀྱི་གསང་བ་ལས་བྱུང་སྟེ། དེ་བཞིན་གཤེགས་པའི་གསང་བ་གསུམ་ལས་སྐྱེས་ཤིང་གསུམ་གྱིས་ཡང་དག་པར་བསྡུས་པ་ཞེས་བྱ་བའི་དོན་ཏོ། །རྟེན་གྱི་དཀྱིལ་འཁོར་ཡང་སྐུའི་གསང་བས་བསྡུས་པའི་ཕྱིར་རོ། །འདི་འདྲ་བའི་དཀྱིལ་འཁོར་གྱི་གནས་སུ་དེ་འགྱུར་བ་ནི་བདག་པོར་འགྱུར་བ་ཡིན་ཏེ། གང་ཡིན་པའི་གཟུགས་ཏེ། མཚན་མ་དེའི་དབུས་སུ་ལེགས་བྲིས་པའོ། །རྡོ་རྗེ་འཛིན་མཆོག་ཇི་ལྟ་བུ་ཞིག་ཅེ་ན། དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོ་ཉིད་ཡིན་པའི་ཕྱིར་རྡོ་རྗེ་འཛིན་པ་ཡང་དེ་ཡིན་ལ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ནང་ནས་གང་ཡང་རུང་བ་ཉིད་ཡིན་པའི་ཕྱིར་མཆོག་ཀྱང་ཡིན་པ་དེ་ལྟར་ན་རྡོ་རྗེ་འཛིན་མཆོག་སྟེ། རིན་པོ་ཆེ་དང༌། དོན་ཡོད་པ་དང༌། སེམས་དཔའ་དང༌། འཇམ་པའི་རྡོ་རྗེ་ལ་སོགས་པའི་དཀྱིལ་འཁོར་དེ་དག་ཏུ་འགྱུར་རོ་ཞེས་བྱ་བའི་དོན་ཏོ། །སངས་རྒྱས་བཅོམ་ལྡན་འདས་དེ་རྣམས་དང་བྱང་ཆུབ་སེམས་དཔའ་རྣམས་ཀྱང་ཀུན་ནས་བཟང་བའི་གཟུགས་ཅན་ཡིན་ཏེ། སྐྱེས་པ་དང༌། བུད་མེད་དང༌། ཁྲོ་བོ་ལ་སོགས་པའི་དབྱེ་བས་སྣ་ཚོགས་པར་སྟོན་པ་ཡིན་པ་ལ་འདིར་ཐེ་ཚོམ་མི་བྱའོ། །མུ་སྟེགས་པའི་ལྷ་རྣམས་ཀྱང་རྒྱུད་འདིར་དཀྱིལ་
འཁོར་གྱི་བདག་པོ་མ་ཡིན་ཞིང་དཀྱིལ་འཁོར་པ་ཡང་མ་ཡིན་ཏེ། ཚིགས་སུ་བཅད་པ་ནི་རྡོ་རྗེ་འཛིན་མཆོག་གང་ཡིན་པའོ་ཞེས་བྱ་བ་འདིས་ནི་འཁོར་དེ་དང་འཁོར་ལོའི་དབང་ཕྱུག་སངས་རྒྱས་དང༌། དེའི་སྲས་ཇི་ལྟར་འདོད་པ་བཞིན་དུ་གསུངས། སྐུ་ལ་སོགས་པའི་རྡོ་རྗེའི་གནས་ནི་གསང་བའི་དཀྱིལ་འཁོར་རོ། །དེའི་ཡེ་ཤེས་དང་དེའི་གསང་བ་ནི་དོན་དམ་པའོ། །དཀྱིལ་འཁོར་ཐམས་ཅད་འབྱུང་བ་ནི་ཐིག་གིས་བཀོད་པ་དང་ཚོན་དགྱེ་བའོ། །དེ་ལ་དམིགས་པའི་ཏིང་ངེ་འཛིན་ལ་དེ་སྐད་ཅེས་བྱའོ། །དཀྱིལ་འཁོར་ཐམས་ཅད་ནི་སྐུ་ལ་སོགས་པའི་གསང་བ་རྣམས་སོ། །དེ་གསལ་བར་བྱེད་པའི་ཡི་གེ་གསུམ་པོ་ལ་དེ་སྐད་ཅེས་བྱའོ། །རྡོ་རྗེའི་དཀྱིལ་འཁོར་ནི་གསང་བ་གསུམ་གྱི་དཀྱིལ་འཁོར་རོ། །དེའི་སྔགས་ནི་དེ་ཤེས་པར་བྱེད་པའི་ཕྱིར་རོ། །སྙིང་པོའི་ཚིག་ནི་དེ་ཁོ་ན་ཉིད་སྟོན་པར་བྱེད་པའི་ཕྱིར་རོ། །ཡི་གེ་ནི་ཡི་གེ་གཅིག་ཉིད་ཡིན་པའི་ཕྱིར་རོ། །གནས་ནི་རྗོད་པར་བྱེད་པ་ཡིན་པའི་ཕྱིར་རོ། །དེ་བས་ན་ཡི་གེ་གསུམ་པོ་འདི་དག་གིས་དཀྱིལ་འཁོར་གྱི་ཐིག་གདབ་པ་དང་ཚོན་དགྱེ་བ་དག་པའོ་ཞེས་བྱ་བར་དགོངས་སོ། །ཐིག་གདབ་པ་དང་ཚོན་དགྱེ་བ་གང་ཡིན་པ་དེ་དང་དེ་དག་སློབ་དཔོན་རང་ཉིད་ཀྱིས་རྟག་ཏུ་བྱའམ་ཞེ་ན། དེའི་ཕྱིར་རྡོ་རྗེའི་ཞེས་བྱ་བ་ལ་སོགས་པ་གསུངས་ཏེ། སྔགས་ནི་རང་གི་ལྷ་ཉིད་དོ། །སྔོན་དུ་བསྙེན་པས་བརྟན་པར་བྱས་པའི་སེམས་ནི་སེམས་དཔའོ། །ཡུན་རིང་པོར་རིག་པའི་བརྟུལ་ཞུགས་ཅན་ཉིད་ཡིན་པའི་ཕྱིར་སྔགས་སྒྲུབ་པའི་སེམས་དཔའ་འདི་ལ་ཡོད་པས་ན་སྔགས་ཀྱི་སེམས་དཔའ་སྟེ། བསྙེན་པ་མཐར་ཕྱིན་པ་དང་རིག་པའི་བརྟུལ་ཞུགས་མཐར་ཕྱིན་པ་ཅན་གྱི་སྒྲུབ་པ་པོ་ལ་སྔགས་ཀྱི་སེམས་དཔའ་ཞེས་གསུངས་སོ། །དེས་ཐིག་གདབ་པ་དང༌། ཚོན་རྩི་དགྱེ་བ་རང་ཉིད་ཀྱིས་མི་བྱའོ། །བྱས་ན་བྱང་ཆུབ་རྙེད་པར་དཀའ། །ཞེས་བྱ་བ་ནི་རང་ཉིད་བྱེད་ན། དེའི་བྱང་ཆུབ་ནི་ཐོབ་པར་དཀའོ་ཞེས་བྱ་བའི་དོན་ཏོ། །གང་གི་ཕྱིར་དེ་ལྟ་ཡིན་པ། དེ་བས་དམ་ཚིག་ཚུལ་ཤེས་པས། །ཞེས་བྱ་བ་ནི་དམ་ཚིག་ནི་བཤང་མ་ཐག་པའི་ཚིགས་སུ་བཅད་པའི་དོན་ཏོ། །ཚུལ་ནི་ལེའུ་བཅོ་ལྔ་པ་ལས་གསུངས་པའི་ལྷ་དབབ་པ་ལ་སོགས་པའི་ཆོ་གའོ། །དེ་དག་ཤེས་པ་ཡིན་པས་ན་ཤེས་པའོ། །སྔགས་ཀྱི་ལྷ་རྣམས་ཞེས་བྱ་བ་ནི། རིགས་ཀྱི་ཚིག་གཅིག་པ་
ཅན་ནོ། །ལོ་བཅུ་གཉིས་ལོན་པའི་ཁྱེའུ་དང་བུ་མོ་དག་ལྷག་པར་གནས་པ་ཅི་རིགས་པར་ལྷ་དང་ལྷ་མོའི་གཟུགས་དེ་དག་ལ་ཡེ་ཤེས་ཀྱི་ལྷ་གཉིས་དག་ཕབ་ནས་ཏེ། བཅུག་ནས་སོ་ཞེས་བྱ་བའི་དན་ཏོ། །བྱིན་གྱིས་བརླབ་པའི་གནས་ནི་མིག་དང་སྐུ་ལ་སོགས་པ་བྱིན་གྱིས་བརླབ་པའོ། །རྣམ་པར་བརྟག་པ་ནི་དེ་དག་ཉིད་འདྲ་བ་སྟེ། གཞུག་པར་བྱའོ་ཞེས་བྱ་བ་ནི་ལྷག་མའོ། །སྐུ་དང་གསུང་དང་ཐུགས་ཀྱི་དཀྱིལ་འཁོར་རྣམས་གོ་རིམས་བཞིན་དུ་ལྷ་དབབ་པར་བྱ་བ་གཉིས་པོ་གོ་རིམས་གང་དང་གང་ཡིན་པ་དེ་ནི་རྒྱལ་ཆེན་ཞེས་བྱ་བ་ལ་སོགས་པ་གསུངས་སོ། །སྐུའི་དཀྱིལ་འཁོར་གནས་ཞེས་བྱ་བ་ནི་ལྷ་གཉིས་པོ་དེ་དག་ཉིད་དེ། གོ་རིམས་བཞིན་དུ་སྐུའི་དཀྱིལ་འཁོར་དང་དེའི་རྟེན་གྱི་དཀྱིལ་འཁོར་རོ་ཞེས་བྱ་བའི་དོན་ཏོ། །རང་གི་ཆོས་མ་དང་ཞེས་བྱ་བ་ནི་རང་གི་བཙུན་མོ་འདོད་ཆགས་དགའ་མ་དང་ལྷན་ཅིག་གོ །གཞུང་ལ་ལ་ལས་ནི་རང་གི་ཆོས་མ་ཡིན་ཞེས་འབྱུང་སྟེ། དེ་ནི་བྱེད་པའི་ཚིག་མེད་པ་ཅན་ཡིན་ནོ། །འདི་ནི་ཞེས་བྱ་བ་ནི་ལྷ་དེ་དག་གི་སྙོམས་པར་ཞུགས་པའོ། །སྔགས་རྣམས་ཐམས་ཅད་ཀྱི་གསང་བ་ཞེས་བྱ་བ་ནི་གསུང་གི་དཀྱིལ་འཁོར་རྟེན་དང་བཅས་པའི་དེ་ཁོ་ན་ཉིད་དོ། །རྡོ་རྗེ་སེམས་དཔའ་ནི་མི་བསྐྱོད་པའོ། །རྡོ་རྗེ་ཐམས་ཅད་ཀྱི་ཞེས་བྱ་བ་ནི་ཐུགས་ཀྱི་དཀྱིལ་འཁོར་རྟེན་དང་བཅས་པའིའོ། །སྙོམས་པར་འཇུག་པ་རྣམས་ཀྱིས་དབབ་པ་བྱས་པས་ཅིར་འགྱུར་ཞེ་ན། དེ་ལྟར་བྱས་ནས་ཞེས་བྱ་བ་ལ་སོགས་པ་གསུངས་ཏེ། ཡིད་ལ་དབང་བ་ཉིད་ཅེས་བྱ་བ་ནི་ལྷ་དྲུག་གོ །གཤེགས་ཏེ་ཞེས་བྱ་བ་ནི་མངོན་སུམ་དུ་བབ་པའོ། །གསང་བ་རྣམས་ཀྱི་མཆོག་ཅེས་བྱ་བ་ནི་སྐུ་ལ་སོགས་པའི་དཀྱིལ་འཁོར་རོ། །ཀྱང་གསུངས་སོ་ཞེས་བྱ་བ་ནི་བྲིས་པའི་དགོས་པ་དང་དཀྱིལ་འཁོར་བསྒྲུབ་པ་དང་སྒྲུབ་པའི་མཆོད་པའོ། །སྔགས་ཀྱི་དངོས་གྲུབ་ཀྱིས་ཞེས་བྱ་བ་བསྒྲུབ་པའི་ཕྱིར་གྲུབ་པ་སྟེ། སྔགས་ཀྱི་སེམས་པས་ཞེས་བྱ་བའི་དོན་ཏོ། །རྡོ་རྗེ་བྲི་བའི་གསང་བ་ནི་རྡོ་རྗེ་གསང་བ་སྟེ། སྐུ་རྡོ་རྗེ་ལ་སོགས་པ་བབས་པས་བྲིས་པའི་དཀྱིལ་འཁོར་རོ། །རྨད་པོ་ཆེ་ཞེས་བྱ་བ་ནི་དེ་མཐོང་ན་ལྷ་དང་མི་རྣམས་ཀྱི་ཡིད་དགའ་བར་བྱེད་པའོ། །ཁྲོ་བོའི་རྒྱལ་པོ་སྟེ་གནོད་མཛེས་རྡོ་རྗེས་སོ། །མཆོད་པར་བྱ་ཞེས་བྱ་བ་ནི་རང་དང་རང་གི་གནས་སུ་བཀོད་ལ་མིག་དང་སྐུ་ལ་སོགས་པ་བྱིན་གྱིས་བརླབས་པ་དང་དབང་བསྐུར་བར་བྱས་ནས་
སོ། །དམ་ཚིག་གི་མཆོད་པ་དུས་གསུམ་པ་ནི་ཐུན་མཚམས་སུའོ། །རྡོ་རྗེ་དྲི་མེད་གསུམ་དག་གིས་ནི་རྡོ་རྗེ་ཅན་ཏེ་དེ་ནི་དཀྱིལ་འཁོར་གྱི་བདག་པོའོ། །རྡོ་རྗེ་ཡི་ནི་སྦྱོར་བས་བྱ། །ཞེས་བྱ་བ་ནི་དཀྱིལ་འཁོར་བ་ཉིད་ཀྱིས་སོ། །ཀྱང་གསུངས་སོ་ཞེས་བྱ་བ་ནི་ལྷ་བཤོས་རྣམས་སོ། །སྔགས་རྣམས་ཞེས་བྱ་བ་ནི་ལྷ་རྣམས་སོ། །བཤང་བ་ལ་སོགས་པ་ནི་མིའི་བདུད་རྩི་ལྔའོ། །ཚིགས་སུ་བཅད་པ་ནི་ལྔ་པའི་ཁྱད་པར་གསུངས་པ་ཡིན་ནོ། །དེས་དེ་ལྟར་སྒྲུབ་པའི་དཀྱིལ་འཁོར་ཇི་ལྟར་བྲི་བ་དེ་བཞིན་དུ་གསུངས་པ་ཡིན་ནོ། །དམ་ཚིག་གི་དཀྱིལ་འཁོར་ཡང་མ་གྲུབ་ཏུ་ཟིན་ཀྱང་བྲི་བར་བྱའོ། །དེའི་ཕྱིར་མ་གྲུབ་པའི་དབང་དུ་མཛད་ནས་ཐིག་གདབ་པའི་ཞེས་བྱ་བ་ལ་སོགས་པ་གསུངས་ཏེ། དེའི་ཚེ་སྐུ་དང་གསུང་དང་ཐུགས་ཀྱི་དཀྱིལ་འཁོར་བྲི་བར་བྱ་བའི་ཕྱིར་གོ་རིམས་བཞིན་དུ་བདག་ཉིད་རྣམ་པར་སྣང་མཛད་དམ་ཡང་ན་རྡོ་རྗེ་འོད་པོ་ཆེ་ཞེས་བྱ་བ་འོད་དཔག་ཏུ་མེད་པར་བདག་ཉིད་བསྒོམས་ནས་སུའོ། །རྡོ་རྗེ་མི་འཆིར་གྲགས་སློབ་མ། །ཞེས་བྱ་བ་ནི་ཐིག་སྐུད་འཛིན་པར་འོས་པའི་སློབ་མ་བདུད་རྩི་ཐབ་སྦྱོར་ཉིད་དུ་བསྒོམ་པར་བྱའོ། །གཞན་དག་ན་རེ་བདག་ཉིད་རྣམ་པར་སྣང་མཛད་དམ། དཀྱིལ་འཁོར་གྱི་བདག་པོ་གཞན་དག་ཏུ་བསྒོམས་ནས། སློབ་མ་རྡོ་རྗེ་སེམས་དཔའམ་བདུད་རྩི་ཐབ་སྦྱོར་འོད་ཟེར་འབར་བ་ཅན་བསྒོམ་པར་བྱའོ་ཞེས་ཟེར་རོ། །ལས་ནི་དཀྱིལ་འཁོར་བྲི་བའོ། །དེ་ལ་བརྩོན་པ་གང་ཡིན་པ་དེ་ནི། སངས་རྒྱས་ཀུན་གྱིས་ངེས་བསྟེན་པ། །བསྒོམ་པར་བྱ་སྟེ་དེ་ནི་སངས་རྒྱས་ཐམས་ཅད་ཀྱིས་གོམས་པར་མཛད་པ་ཡིན་ནོ་ཞེས་བསམ་པར་བྱའོ། །སངས་རྒྱས་ཞེས་བྱ་བ་ལ་སོགས་པ་ལ་རྒྱལ་ཆེན་ཞེས་བྱ་བ་ནི་རྒྱལ་པོ་ཆེན་པོའོ། །རྡོ་རྗེ་ཐིག་སྐུད་ནི་ཚོན་གྱི་བྱེ་བྲག་གིས་ཐིག་སྐུད་སངས་རྒྱས་དང་ཁ་དོག་མཚུངས་པའོ། །དེ་དག་ཆུད་པར་དགོད་པ་ནི་སྐུའམ་ཡེ་ཤེས་ཀྱི་ཐིག་གི་རྣམ་པར་ནང་དུ་ཆུད་པར་དགོད་པ་སྟེ་བསྟིམ་པར་བྱའོ། །ཐིག་སྐུད་ཁ་དོག་ལྔ་པར་སོ་སོ་སོ་སོར་བཙོས་ལ་ཐུགས་ཀྱི་དཀྱིལ་འཁོར་བྲི་བར་བྱ་བའི་ཕྱིར་ལག་པ་གཡོན་པའི་མཐིལ་དུ་སོར་མོའི་རྩེ་མོའི་རྩེ་མོ་ནས་བརྩམས་ཏེ། མཐེ་བོའི་རྩ་བའི་བར་དུ་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོ་རིམ་བཞིན་དུ་དགོད་དོ། །སྐུའི་དཀྱིལ་འཁོར་གྱི་དོན་དུ་ནི་ནག་པོ་དང་སེར་པོ་དང་དམར་པོ་དང་ལྗང་གུ་དང་དཀར་པོ་རྣམས་སོ། །གསུང་གི་དཀྱིལ་འཁོར་གྱི་དོན་དུ་ནི་དཀར་པོ་དང་སེར་པོ་དང་ནག་པོ་དང་ལྗང་གུ་དང་དམར་པོའོ། །རིན་པོ་ཆེའི་དཀྱིལ་འཁོར་གྱི་དོན་དུ་ནི་དཀར་པོ་དང་
ནག་པོ་དང་དམར་པོ་དང་ལྗང་གུ་དང་སེར་པོའོ། དོན་ཡོད་པར་གྲུབ་པའི་དཀྱིལ་འཁོར་གྱི་དོན་དུ་ནི་དཀར་པོ་དང་སེར་པོ་དང་དམར་པོ་དང་ནག་པོ་དང་ལྗང་གུ་རིམ་བཞིན་དུ་བཞག་ལ་དེ་རྣམས་ལ་དུས་ཐམས་ཅད་དུ་དེ་བཞིན་གཤེགས་པ་ལྔ་དང་ཁ་དོག་མཐུན་པའི་ས་བོན་བསམས་ལ། དེ་བཞིན་གཤེགས་པ་ལྔའི་རང་བཞིན་ཅན་འབར་བའི་སྲད་བུ་དེ་བསམ་པར་བྱའོ། །དེ་ནས་ཡེ་ཤེས་ཀྱི་ཐིག་ཆོ་ག་བཞིན་དུ་བཀུག་ལ་བཅུག་སྟེ་ཆོ་ག་བཞིན་དུ་བསྒྲིལ་བར་བྱའོ་ཞེས་བྱ་བའི་དོན་ཏོ། །རྣམ་པ་ཉི་ཤུ་རྩ་ལྔར་ནི། །ཚོན་རྩི་དག་ཀྱང་རྣམ་པར་བསྒོམ་པར་བྱའོ། །ཐིག་སྐུད་འབའ་ཞིག་ལ་ནི་མ་ཡིན་ནོ་ཞེས་བྱ་བ་ནི་ཀྱང་གི་སྒྲའི་དོན་ཏོ། །རྡུལ་ཚོན་ཁ་དོག་ལྔ་བ་སྣོད་སོ་སོར་བཞག་ལ་དེ་བཞིན་གཤེགས་པ་ཐམས་ཅད་ཀྱི་ས་བོན་གྱིས་དེ་བཞིན་གཤེགས་པ་ཐམས་ཅད་དང་ཁ་དོག་མཐུན་པའི་རང་བཞིན་ཅན་དུ་བྱས་ནས་འབར་བའི་ལྟ་བས་སྦྱར་ཏེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་མངོན་པར་བསྔགས་ཏེ། ཐུགས་དང་སྐུ་དང་གསུང་དང་ནོར་བུ་དང་སྣ་ཚོགས་ཀྱི་དཀྱིལ་འཁོར་དུ་ཇི་ལྟར་ཐིག་གདབ་པ་བཞིན་དུ་ཚོན་གྱི་གཞི་ལ་པཉྩ་རེ་ཁཱའི་དོན་དུ་རྡུལ་ཚོན་ཕྱི་རོལ་ནས་བརྩམས་པའི་རིམ་གྱིས་ཀུན་གྱི་ནང་དུ་ལྔ་པ་བྱ་བའི་ཚུལ་གྱིས་དགྱེ་བར་བྱའོ། །འདིར་ཚིགས་སུ་བཅད་པ་ནི། དཀར་དང་སེར་དང་དམར་དང་ལྗང༌། །ནག་པོ་མི་བསྐྱོད་དཀྱིལ་འཁོར་དུའོ། །ནག་དང་སེར་དང་དམར་དང་ལྗང༌། །དཀར་པོ་རྒྱལ་པོའི་དཀྱིལ་འཁོར་དུའོ། །དཀར་དང་སེར་དང་ནག་དང་ལྗང༌། །དམར་པོ་དཔག་མེད་དཀྱིལ་འཁོར་དུའོ། དཀར་དང་ནག་དང་དམར་དང་ལྗང༌། །སེར་པོ་ནོར་བུའི་དཀྱིལ་འཁོར་དུའོ། །དཀར་དང་སེར་དང་དམར་དང་སྔོ། །ལྗང་དང་སྣ་ཚོགས་དཀྱིལ་འཁོར་དུའོ། །ཐིག་དང་རྡུལ་ཚོན་དགྱེ་བ་དག །ཕྱི་རིམ་ནང་རིམ་བཞིན་བརྩམ་བྱ། །ཞེས་བྱ་བ་གསུངས་པ་ཡིན་ནོ། །འདིར་ཡང་དཀྱིལ་འཁོར་བསྒྲུབ་པ་སྔ་མ་དང་འདྲའོ། །དེ་ལྟར་དཀྱིལ་འཁོར་ཆེན་པོ་གསུངས་ནས། བསྡུས་པའི་དཀྱིལ་འཁོར་འདི་ནི་ཞེས་བྱ་བ་ལ་སོགས་པ་གསུངས་པ་ལ་སྔགས་རྣམས་ཞེས་བྱ་བ་ནི་ལྷ་རྣམས་སོ། །རྡོ་རྗེ་ནི་རྡོ་རྗེས་མཁྲེགས་པར་གྱུར་པ་སྟེ་ཅི་རིགས་པར་བསྡུས་པ་ཞེས་བྱ་བའི་དོན་ཏོ། །ཧཱུཾ་ནི་བསྒོམ་པར་བྱ། སྐུ་དང་གསུང་དང་དམ་ཚིག་མཆོག །བསྒོམ་པར་བྱ་ཞེས་བྱ་བ་ནི་གང་གི་དོན་དུ་རྟོགས་པར་བྱ་སྟེ། ཡི་གེ་ཧཱུཾ་དུ་བརྟག་པ་དང་སྐུ་ལ་སོགས་པ་བརྟག་པར་བྱ་བའི་དོན་ཏོ། །དེ་ལ་ཧཱུཾ་ནི་མི་བསྐྱོད་པའོ། །སྐུ་ནི་རྣམ་པར་སྣང་མཛད་དོ། །གསུང་ནི་འོད་དཔག་ཏུ་མེད་པའོ། །དམ་ཚིག་ནི་དོན་ཡོད་པར་གྲུབ་པའོ། །མཆོག་ནི་རིན་ཆེན་འབྱུང་
ལྡན་ཏེ། །ནམ་མཁའ་ཐམས་ཅད་ཉིད་ཡིན་པའི་ཕྱིར་རོ། །གནས་ལྔ་དག་ཏུ་ཞེས་བྱ་བ་ནི་དབུས་སུ་བདག་པོ་བྱས་ལ་དེའི་ལོགས་རྣམས་སུ་སངས་རྒྱས་བཞི་དཀྱིལ་འཁོར་ཆེན་པོ་དང་འདྲ་བར་བྱ་བའོ་ཞེས་བྱ་བའི་དོན་ཏོ། །ཐམས་ཅད་དུ་བྲི་བའི་དཀྱིལ་འཁོར་ལ་ཇི་ལྟ་བ་བཞིན་དུ་བསམ་པའི་དཀྱིལ་འཁོར་ཡང་ཡིན་ནོ། །དེ་ལྟར་དུ་བྱས་ན་ནི་ཞེས་བྱ་བ་ནི་ཇི་ལྟར་གསུངས་པའི་ཆོ་གས་བྲི་བར་བྱས་ནའོ། །རྡོ་རྗེ་གསུམ་པོ་རོ་གཅིག་པའི་བྱང་ཆུབ་ཀྱི་སེམས་ནི་རྡོ་རྗེ་མི་ཕྱེད་གསུམ་སྟེ། དེ་ལས་སྐྱེས་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཞེས་བྱ་བའི་དོན་ཏེ། རྡོ་རྗེ་སེམས་དཔའ་ཞེས་བྱ་བ་ནི་རྡོ་རྗེ་སེམས་དཔའ་ཉིད་ལས་སོ། །འཇིགས་ཤིང་ཞེས་བྱ་བ་ནི་དམ་ཚིག་ལས་འདས་པའི་འཇིགས་པའོ། །དེས་སྐྲག་པ་ནི་རབ་ཏུ་འདར་བའོ། །གཞན་དག་ན་རེ་གནས་ལྔ་དག་ཏུ་ཞེས་བྱ་བ་ནི་ཇི་ལྟ་བའི་རིགས་ཀྱི་དཀྱིལ་འཁོར་རྣམས་སུའོ། །སྔགས་རྣམས་ཞེས་བྱ་བ་ནི་ཡེ་ཤེས་ཀྱི་ལྷ་རྣམས་ཀྱིའོ། །རྡོ་རྗེ་ཧཱུཾ་ནི་བསྒོམ་པར་བྱ་བ་ནི་གནོད་མཛེས་རྒྱལ་པོས་དགུག་པར་བསྒོམ་པའོ། དེ་ནས་སྐུ་དང་གསུང་དང་དམ་ཚིག་མཆོག་བསྒོམ་པར་བྱ་བ་ནི་སྐུ་ལ་སོགས་པའི་བྱིན་གྱིས་བརླབས་པའོ། །དེ་ལྟར་བྱས་པས་བྱིན་གྱིས་རློབ་པར་བྱེད་ཅེས་ཟེར་རོ། །བུམ་པའི་དགོད་པ་བསྟན་པར་བྱ་བའི་ཕྱིར་རྡོ་རྗེ་བུམ་པ་ཞེས་བྱ་བ་ལ་སོགས་པ་གསུངས་པ་ལ། སྔགས་རྒྱུད་བདག་པོས་ཞེས་བྱ་བ་ནི་ལྷ་གང་གི་བུམ་པ་གང་ཡིན་པ་དེའི་སྔགས་ཀྱིས་དེ་ལ་བཟླས་པའི་ཕྱིར་དང༌། རྒྱུད་སྡེ་འབྲུ་ལྔ་ལ་སོགས་པས་བྱིན་གྱིས་བརླབས་པའི་ཕྱིར་དང༌། བདག་པོ་སྟེ་རང་གི་ལྷའི་རང་བཞིན་དུ་བསྐྱེད་པའི་ཕྱིར་རོ། །དཀྱིལ་འཁོར་གྱི་བདག་པོ་གང་ཡིན་པ་དེ་ཉིད་ནི་རྡོ་རྗེ་སེམས་དཔའ་ཡིན་ལ། ཏིང་ངེ་འཛིན་གནས་ཞེས་བྱ་བ་ནི་དེའི་རྣལ་འབྱོར་དང་ལྡན་པའི་སློབ་དཔོན་ནོ། །ཅི་ཞིག་བརྟག་པར་བྱ་ཞེ་ན། དེ་ཉིད་དགོད་པའོ། །བརྟེན་པའི་བློས་ནི་ཞེས་བྱ་བ་ནི་ཅི་རིགས་པར་བདག་ཉིད་དམ་བུམ་པ་ལ་སོགས་པ་ལ་ལྷ་ལ་སོགས་པའི་མོས་པ་བརྟན་པའོ། །སྦྱིན་སྲེག་གི་ཆོ་ག་བསྟན་པར་བྱ་བའི་ཕྱིར་དངོས་གྲུབ་ཅེས་བྱ་བ་ལ་སོགས་པ་གསུངས་ཏེ། འདོད་པའི་ཞེས་བྱ་བ་ནི་དོན་དུ་གཉེར་བའོ། །སྔགས་ཤེས་པས་ནི་ཞེས་བྱ་བ་ནི་རྒྱུད་མང་པོ་ཤེས་པ་སྟེ། དེ་ཉིད་ཀྱི་ཆོ་ག་ལྷག་མ་རྣམས་བསྒྲེ་བ་ཤེས་པའི་ཕྱིར་རོ། །བསྲེག་བྱ་ཁྱད་པར་ཅན་ནི་བཤད་གཅི་ཞེས་བྱ་བ་ལ་སོགས་པ་གསུངས་སོ། །རྡོ་རྗེ་གང་བའི་སྦྱིན་སྲེག་ནི་དགང་བླུགས་སོ། །རྡོ་རྗེ་མི་ཕྱེད་གསུམ་ནི་དཀྱིལ་འཁོར་གྱི་བདག་པོའོ། །འཁོར་ལོ་དེའི་དཀྱིལ་འཁོར་པ་རྣམས་སོ། །དབུས་སུ་ཞེས་བྱ་བ་
ནི་འབར་བའི་མེ་ཐབ་ཀྱི་དབུས་སུའོ། །རང་གི་ལྷའི་གཟུགས་ཞེས་བྱ་བ་ནི་བདག་ཏུ་མོས་པར་བྱས་པའི་དཀྱིལ་འཁོར་གྱི་བདག་པོའི་དཀྱིལ་འཁོར་པ་ཐམས་ཅད་ཀྱིས་ཡོངས་སུ་བསྐོར་བའོ། །ཞལ་དུ་ཞེས་བྱ་བ་ནི་དེ་རྣམས་ཀྱི་ཞལ་ཏེ། དེའི་ས་བོན་གྱི་བྱིན་གྱིས་བརླབས་པའི་ལྗགས་ལའོ། །ཀྱང་གསུངས་ཞེས་བྱ་བ་ནི་འཆད་པར་འགྱུར་བའི་ཚིགས་སུ་བཅད་པའོ། །དབང་པོ་གཉིས་ཀྱི་སྦྱོར་བ་ཡིས། །ཞེས་བྱ་བ་ནི་མེ་ལ་བཞུགས་པའི་དཀྱིལ་འཁོར་གྱི་ལྷ་རྣམས་སྙོམས་པར་འཇུག་པ་ཉིད་དུ་བསམ་པའོ། །བརྒྱ་རྩ་བརྒྱད་ཞེས་བྱ་བ་ནི་ཉེ་བར་མཚོན་པ་ཙམ་སྟེ། ལན་འགའ་སྟོང་རྩ་བརྒྱད་དམ་དཔག་ཏུ་མེད་པའོ། །སློབ་མ་གཞུག་པའི་ཆོ་ག་བསྟན་པའི་ཕྱིར་རྣམ་པར་སྣང་མཛད་ཀྱིས་ཞེས་བྱ་བ་ལ་སོགས་པ་གསུངས་པའོ། །སློབ་མ་ཞེས་བྱ་བ་ནི་སྔོན་དུ་བྱ་བ་བྱས་པའི་སློབ་མའོ། །རྣམ་སྣང་མཛད་ཀྱི་སྦྱོར་བ་ཡིས། །ཞེས་བྱ་བ་ནི་ཡི་གེ་ཨོཾ་ལས་རྣམ་པར་སྣང་མཛད་དུ་བྱས་པའོ། །རྡོ་རྗེ་གསུམ་ལས་བྱུང་ཞེས་བྱ་བ་ནི་སྐུ་ལ་སོགས་པས་བྱིན་གྱིས་བརླབས་པས་ཏེ། སྐུའི་དཀྱིལ་འཁོར་དུ་གཞུག་པར་བྱའོ་ཞེས་པ་ནི་ལྷག་མའོ། །ཨཱཿ་ནི་ལུས་དང་ངག་སེམས་ལ་བསྒོམས་ནས་ཞེས་བྱ་བ་ནི་འཇུག་པ་དེ་ལ་དབབ་པར་བྱ་བའི་ཕྱིར་དེའི་སྙིང་གའི་མཚན་མའི་ལྟེ་བའི་དབུས་སུ་བདེ་བ་ཆེན་པོའི་སྐུ་མདོག་དམར་པོ་བསམས་ལ་རྡོ་རྗེ་དེ་བརྡབས་པ་ལས་བྱུང་བའི་དབྱངས་ཡིག་ཐ་མ་ཁ་དོག་དམར་པོ་དཔག་ཏུ་མེད་པ་སྤྲོས་པའི་ཚུལ་གྱིས་དེའི་ལུས་དང་ངག་དང་སེམས་ཐམས་ཅད་ལ་བསྒོམས་ནས་སོ། །ཅི་ཞིག་བྱེད་ཅེ་ན། དེའི་འོད་ཟེར་རྣམས་ཀྱིས་དེ་དག་བསྒྱུར་བར་བྱའོ་ཞེས་བྱ་བ་ནི་ལྷག་མའོ། །དེ་ལས་ཅིར་འགྱུར་ཞེ་ན། རྡོ་རྗེས་གཟུང་བར་བྱ་ཞེས་བྱ་བ་གསུངས་ཏེ། སྐུ་རྡོ་རྗེས་སློབ་མ་དེ་བྱིན་གྱིས་བརླབ་པར་བྱ་སྟེ་དབབ་པར་བྱའོ་ཞེས་བྱ་བའི་དོན་ཏོ། །དེ་བཞིན་དུ་ཐུགས་ཀྱི་དཀྱིལ་འཁོར་ལ་སོགས་པ་ལ་ཡང་དཀྱིལ་འཁོར་གྱི་བདག་པོའི་སྦྱོར་བས་འཇུག་པ་ལ་དབབ་པ་ནི། རྒྱལ་ཆེན་ཞེས་བྱ་བ་ལ་སོགས་པ་གསུངས་པ་ལ། རྒྱལ་ཆེན་ནི་འོད་དཔག་ཏུ་མེད་པ་སྟེ་ཤིན་ཏུ་ཞེན་པ་ཡིན་པའི་ཕྱིར་རོ། །རྡོ་རྗེ་སེམས་དཔའ་ནི་མི་བསྐྱོད་པའོ། །སྐུ་གསུང་ཐུགས་ཀྱི་དམ་ཚིག་ནི་ཡི་གེ་ཨཱཿ་ལས་ཇི་སྐད་དུ་བཤད་པའི་ཁྱད་པར་བྱའོ། །དེ་ལ་འདི་ནི་ཞེས་བྱ་བ་ལ་སོགས་པ་ལ་འཇུག་པའི་ཕྱིར་རྡོ་རྗེ་དམ་ཚིག་ནི་འདའ་བར་དཀའ་བའི་སྔགས་སོ། །དམ་ཚིག་ཐམས་ཅད་ནི་ལྷ་ཐམས་ཅད་དོ། །དེ་
རྣམས་ཀྱི་ལུས་དང་ངག་དང་སེམས་ཀྱི་དམ་ཚིག་ནི་གསང་བ་གསུམ་གྱི་དཀྱིལ་འཁོར་རོ། །དེ་རྣམས་ཀྱི་སྔགས་ཀྱི་རྡོ་རྗེ་ནི་མི་ཕྱེད་པའི་སྔགས་སོ། །འདི་ནི་ཞེས་བྱ་བ་ནི་ཡི་གེ་ལྔ་པོ་འདི་ཉིད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལྔའི་སྙིང་པོ་རྣམས་ཀྱིས་ཐམས་ཅད་བསྡུས་པའི་ཕྱིར་རོ། །དེ་བས་ན་འདི་ཉིད་བརྗོད་པས་དཀྱིལ་འཁོར་ཐམས་ཅད་དུ་འཇུག་པ་དང་འཇུག་པར་བྱེད་པར་འགྱུར་རོ། །ཞུགས་པ་ནི་སློབ་མ་ལ་ཅི་རིགས་པར་ཆོ་ག་ཇི་ལྟ་བ་བཞིན་དུ་དབང་བསྐུར་བ་སྦྱིན་པར་བྱའོ། །འདིར་ཚིགས་སུ་བཅད་པ་ནི། ཕྲེང་བའི་དབང་བསྐུར་དང་པོ་སྟེ། །ཕྲེང་གཏོར་སྤྱི་བོར་བཅིང་ཕྱིར་རོ། །ཆུ་དང་ཅོད་པན་རྡོ་རྗེ་དང༌། །བདག་པོ་དང་ནི་མིང་དང་གཉིས། །འདི་དྲུག་རིག་པའི་དབང་བསྐུར་ཡིན། །སློབ་དཔོན་ཞེས་བྱ་བ་བདུན་པ་སྟེ། །སློབ་དཔོན་ཞེས་བྱ་བ་འདི་རྣམ་གསུམ། །རྡོར་གསང་ཡེ་ཤེས་ཀྱིས་བཤད་དོ། །དེ་ལ་རིག་པའི་དབང་བསྐུར་བ་དྲུག་ཀྱང་རྒྱུད་གཞན་དག་དང་འདྲ་བ་ཉིད་ཀྱི་ཕྱིར་མ་བཤད་དོ། །སློབ་དཔོན་གྱི་དབང་བསྐུར་ཉིད་ཀྱང་ཁྱད་པར་རྣམ་པ་གསུམ་དང་ལྡན་པའི་ཕྱིར་བཤད་པར་བྱ་བ་ཡིན་ནོ། །དེ་ཉིད་ཀྱི་བསྟན་པ་ནི་དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཆེན་པོའི་དབང་བསྐུར་བ་དང་གསང་བ་དང་ཡེ་ཤེས་ཀྱི་གསང་བ་ཞེས་བྱ་བ་ཟླས་དབྱེ་བའི་ཚིག་བསྡུ་བའོ། །ཇི་ལྟར་བསྟན་པ་བཞིན་དུ་བཤད་པར་བྱའོ་ཞེས་བྱ་བའི་རིགས་པས་རྡོ་རྗེ་ཆེན་པོ་བསྟན་པ་དང་པོ་ཉིད་བཤད་པ་ནི་ཀུན་གྱིས་ཞེས་བྱ་བ་ལ་སོགས་པ་གསུངས་པ་ལ། སངས་རྒྱས་ཀུན་གྱིས་ཞེས་བྱ་བ་ནི་འདུས་པའི་དཀྱིལ་འཁོར་ནང་དུ་ཆུད་ཅིང་ཞུ་བའི་དམ་ཚིག་གི་ཡེ་ཤེས་ཀྱི་ཆུས་གང་བའི་རིན་པོ་ཆེའི་བུམ་པ་ཕྱག་ན་བསྣམས་པ་རྣམས་ཀྱིས་སོ། །སིལ་སྙན་དྲི་ལ་སོགས་པ་ཉིད་དམ་ཚིག་ཡིན་ཏེ། དབང་བསྐུར་བའི་ཡོ་བྱད་འདི་ཉིད་ཡིན་པའི་ཕྱིར་རོ། །དེ་རྣམས་ཀྱི་སྤྲིན་ཚོགས་ནི་ནམ་མཁའ་ཁྱབ་པ་སྟེ། ཆེན་པོ་དང་བཅས་པའི་རིག་པའི་ཚོགས་རྣམས་ཀྱི་ཕྱག་ན་བསྣམས་པའོ། །རྡོ་རྗེ་སྐུ་གསུམ་སྔགས་ཀྱིས་ནི་ཞེས་བྱ་བ་ནི་ཡི་གེ་གསུམ་གྱིས་སོ། །ཡུངས་ཀར་ཞེས་བྱ་བ་ནི་སྙིང་པོའི་ས་བོན་གྱི་ཐིག་ལེ་ལས་བྱུང་བའི་འོད་ཟེར་རྣམས་ཀྱིས་སོ། །བརྡེག་པར་བྱ་ཞེས་བྱ་བ་ནི་བསྐུལ་བར་བྱའོ། །ཡང་ན་ཞེས་བྱ་བ་ནི་ཕྱོགས་གཞན་ནོ། །སངས་རྒྱས་ཞེས་
བྱ་བ་ནི་ནམ་མཁའི་ངོས་ན་བཞུགས་པ་རྣམས་སོ། །རྡོ་རྗེ་སེམས་དཔའི་ཏིང་ངེ་འཛིན་གྱིས་ཞེས་བྱ་བ་ནི་ཏིང་ངེ་འཛིན་བརྟན་པོས་སྙོམས་པར་འཇུག་པ་ཡིས་སོ། །དམ་ཚིག་མཆོག་རྣམས་ཀྱིས་ཞེས་བྱ་བ་ནི་སངས་རྒྱས་དེ་དག་ཉིད་ཀྱི་ཐུགས་ཀའི་ས་བོན་གྱི་འོད་ཟེར་གྱི་སྒོ་ལས་བྱུང་བའི་རིག་པའི་རྒྱལ་མོ་རྣམས་ཀྱིས་སོ། །གཟུགས་རྡོ་རྗེ་མ་ལ་སོགས་པའི་ཡོ་བྱད་རྣམས་ནི་སྔ་མ་བཞིན་ནོ། །སློབ་མ་ཞེས་བྱ་བ་ནི་སློབ་དཔོན་དུ་དབང་བསྐུར་བར་འོས་པའོ། །རྣམ་པར་སྣང་མཛད་ཅེས་བྱ་བ་ནི་དཀྱིལ་འཁོར་གྱི་བདག་པོའི་གཟུགས་སུའོ། །སྐུ་གསུང་ཐུགས་ཀྱི་རྡོ་རྗེ་ཅན། །ཞེས་བྱ་བ་ནི་སྐུ་རྡོ་རྗེ་ལ་སོགས་པའོ། །དགོད་པར་བྱ་ཞེས་བྱ་བ་ནི་དེ་ཉིད་ཀྱི་སྤྱི་བོ་དང་ལྐོག་མ་དང་སྙིང་ག་རྣམས་སུའོ། དབང་བསྐུར་བ་ཐམས་ཅད་ཀྱི་གསང་བ་ཞེས་བྱ་བ་ནི་དབང་བསྐུར་བ་གསུམ་ཆར་ཡང་རྫོགས་པར་བྱེད་པའི་དེ་ཁོ་ན་ཉིད་དོ། །དེ་གང་ཞིག་ཡིན་ཞེ་ན། སློབ་དཔོན་ཐམས་ཅད་ཀྱིས་རྡོ་རྗེའི་ཚིག་ཏུ་སྨྲ་བར་བྱ་ཞེས་བྱ་བ་གསུངས་ཏེ། སློབ་དཔོན་ཐམས་ཅད་ཀྱིས་རྡོ་རྗེའི་ཚིག་གི་ཚིགས་སུ་བཅད་པའི་ཚུལ་གྱིས་དབང་བསྐུར་བའི་སྐད་ཅིག་ལ་བརྗོད་པར་བྱའོ། །ཚིགས་སུ་བཅད་པ་དེ་ཉིད་ནི་སངས་རྒྱས་རྣམས་ནི་ཞེས་བྱ་བ་ལ་སོགས་པ་གསུངས་ཏེ། སྒྲིབ་པའི་དྲི་མ་འཁྲུད་པའི་ཕྱིར་འདིས་དབང་བསྐུར་བར་བྱེད་པས་ན་དབང་བསྐུར་བའོ། །གང་གི་སྒྲིབ་པ་ཞེ་ན། ཕྱིར་མི་ལྡོག་པ་ཉིད་དང་དངོས་གྲུབ་ཐམས་ཅད་ཀྱིའོ། །རྡོ་རྗེ་ཆེན་པོ་ཞེས་བྱ་བ་ནི་བྱང་ཆུབ་ཀྱི་སེམས་ཆེན་པོའོ། །སྦྱིན་ཞེས་བྱ་བ་ལ་སློབ་མ་འདི་ལ་ཞེས་བྱ་བ་ནི་ལྷག་མའོ། །དེ་ཡང་གང་ཡིན་ཞེ་ན། སངས་རྒྱས་རྣམས་ནི་ཐམས་ཅད་ཀྱི་གསང་པ་གསུམ་ཏེ། གསང་བ་འདུས་པར་རོ་གཅིག་པའོ། །ཇི་ལྟ་བུ་ཞིག་ཅེ་ན། རྡོ་རྗེ་ལས་བྱུང་སྟེ་དང་པོའི་དབང་བསྐུར་བ་ནི་ལྷ་ཐམས་ཅད་ཀྱི་རྡོ་རྗེ་ལས་བྱུང་བ་ཡིན་ལ་གཉིས་པ་ནི་སྟེར་བ་པོའིའོ། །གསུམ་པ་ནི་ཡབ་ཀྱིའོ། །ཇི་ལྟར་ན་དང་པོ་ཉིད་རྡོ་རྗེ་ཆེན་པོའི་དབང་བསྐུར་བ་ཡིན་གྱིས་གཞན་དག་མ་ཡིན་ནམ་ཞེ་ན། འདིར་རྒྱ་ཆེ་བ་ཉིད་ཡིན་ཏེ། ཕྱག་རྒྱ་ཆེན་པོ་དང་འདྲའོ། །དེ་ཡང་སྐུའི་དབང་བསྐུར་བ་ཉིད་ཡིན་པའི་ཕྱིར་རམ་སྟེར་བ་པོ་དུ་མ་ཡིན་པའི་ཕྱིར་རོ། །ཚིགས་སུ་བཅད་པ་གང་གིས་གསོལ་བ་འདེབས་པ་ཅན་གྱི་སློབ་མ་ལ་དབང་བསྐུར་བ་རེ་རེ་སྩོལ་བ་དེའི་སྐབས་དབྱེ་བའི་ཕྱིར།
དེ་ལ་འདི་ནི་ཞེས་བྱ་བ་ལ་སོགས་པ་གསུངས་ཏེ། སློབ་མ་ཐམས་ཅད་ཀྱིས་རྡོ་རྗེ་འཆང་ཆེན་པོ་ལ་གསོལ་བ་འདེབས་པ་གང་ཡིན་པ་དེའི་ཆོག་གསུང་བ་ནི་ཐབས་ཀྱི་དེ་ཁོ་ན་ཉིད་དེ་ཚིགས་སུ་བཅད་པའི་རང་བཞིན་ནོ། །བྱང་ཆུབ་རྡོ་རྗེ་ནི་རྡོ་རྗེ་འཆང་བའོ། །མཆོད་ཆེན་ཞེས་བྱ་བའི་ཚིག་ནི་དགའ་སྟོན་ཆེན་པོ་སྟེ། མངོན་པར་འདོད་པའི་དབང་བསྐུར་བ་ཞེས་བྱ་བའི་དོན་ཏོ། །ནམ་མཁའ་རྡོ་རྗེ་ནི་རྡོ་རྗེ་འཆང་བ་ཡིན་ལ། འདིར་ནི་སློབ་དཔོན་ཉིད་ནམ་མཁའ་རྡོ་རྗེ་སྟེ། ནམ་མཁའ་རྡོ་རྗེ་དང་མཚུངས་པ་ཉིད་ཀྱི་ཕྱིར་རོ། །ཇི་ལྟར་སྩལ་བ་བཞིན་ཞེས་བྱ་བའི་ཚིག་ལས་དེ་བཞིན་དུ་སྩོལ་ཅིག་ཅེས་བྱ་བར་ཤེས་པར་བྱའོ། །དེ་ཚེ་ཞེས་བྱ་བ་ནི་གསོལ་བ་བཏབ་པའི་དེ་མ་ཐག་ཏུའོ། །སྩོལ་བར་མཛད་པ་ནི་སློབ་དཔོན་གྱིས་སོ། །ལྷ་ཡི་གཟུགས་ཀྱི་སྦྱོར་བ་ཡིས། །ཞེས་བྱ་བ་ནི་རྡོ་རྗེ་རྣམ་སྣང་གི་ཚིགས་སུ་བཅད་པ་བསྟན་པ་ཡིས་སོ། །སྙིང་གར་ཞེས་བྱ་བ་ནི་སློབ་མའི་ཡེ་ཤེས་སེམས་དཔའི་སྙིང་གའི་ཟླ་བ་ལའོ། །བདག་པོ་གཞག་པར་བྱ་ཞེས་བྱ་བ་ནི་རྡོ་རྗེ་སེམས་དཔའི་དགའ་བའི་བདེ་བ་ལ་བཞུགས་པར་བསམས་ལ་དེ་ནས་དབང་བསྐུར་བ་སྦྱིན་པར་བྱའོ། །རྡོ་རྗེ་ཞེས་བྱ་བ་ལ་སོགས་པ་ཆོ་ག་བཞིན་ཞེས་བྱ་བ་ནི་ཆོ་ག་བཞིན་དུ་བཅུག་ལའོ། །དམ་ཚིག་ཀྱང་ཞེས་བྱ་བ་ནི་དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ཞེས་བྱ་བ་ལ་སོགས་པ་རྒྱ་ཆེར་གསུངས་པའོ། །ཀྱང་གིས་ནི་དབབ་པ་ཡང་སྟེ། ཕྲེང་བ་དཀྱིལ་འཁོར་དུ་དོར་ལ་དེ་ཡང་དེའི་སྤྱི་བོར་བཅིངས་ནས། དེ་ནས་སྔགས་ཀྱི་ཡི་གེའི་ཚིག་བྱིན་ལ་ཞེས་བྱ་བ་དེ་ནི་དེ་ཉིད་ཀྱི་མིག་དག་ལ་འབར་བ་དང་བཅས་པའི་ཨོཾ་དཀར་པོ་བསྒོམ་པར་བྱའོ་ཞེས་བྱ་བའི་དོན་ཏོ། །དེ་ནས་མིག་དབྱེ་བའི་སྔགས་ཀྱིས་གདོང་གཡོགས་དགྲོལ་ཞིང་དེ་ལ་དཀྱིལ་འཁོར་དག་ནི་བསྟན་པར་བྱ་བ་ནི་གཤིན་རྗེ་གཤེད་ནས་བརྩམས་ཏེ། དཀྱིལ་འཁོར་གྱི་བདག་པོའི་བར་དུའོ། །དེ་ནས་ཆུ་དང་ཅོད་པན་དང་རྡོ་རྗེ་དང་བདག་པོ་དང་མིང་གི་དབང་བསྐུར་བ་སྦྱིན་ལ་རྡོ་རྗེ་ཆེན་པོའི་དབང་བསྐུར་བ་སྦྱིན་པར་བྱའོ་ཞེས་བྱ་བ་ནི་ལྷག་མའོ། །དེ་ནས་ཞེས་བྱ་བ་ནི་རྡོ་རྗེ་ཆེན་པོའི་དབང་བསྐུར་བའི་འོག་ཏུའོ། །དམ་ཚིག་གི་ནི་འདའ་བར་བྱ་བ་མ་ཡིན་པའི་ཕྱིར་རོ། །གསང་བ་ནི་བསྒྲག་པར་བྱ་བ་མ་ཡིན་པའི་ཕྱིར་རམ་སྦ་བར་བྱ་བའི་དོན་ཉིད་ཡིན་པའི་ཕྱིར་རོ། །
དོན་དེ་ཡང་བླ་མའི་མན་ངག་ལས་ཤེས་པར་བྱའོ། །རྡོ་རྗེའི་ལམ་ནི་བྱང་ཆུབ་ཀྱི་ལམ་མོ། །འདི་དག་གིས་ནི་ཞེས་བྱ་བས་ནི་དམ་ཚིག་བཞི་པོ་ཡིས་སོ། །སེམས་ཅན་ཐམས་ཅད་ཅེས་བྱ་བ་ནི་དེའི་སྐལ་པ་དང་ལྡན་པ་རྣམས་སོ། །བསྐུལ་བར་བྱ་ཞེས་བྱ་བ་ནི་འཇུག་པར་བྱ་བའོ། །འདི་སྐད་ཀྱང་གསུངས་སོ་ཞེས་བྱ་བ་ནི་རྡོ་རྗེའི་ལམ་ནི་ཞེས་བྱ་བ་ལ་སོགས་པའི་ཚིགས་སུ་བཅད་པའོ། །དེ་ཚེ་ཞེས་བྱ་བ་ནི་དམ་ཚིག་བཞི་བསྒྲགས་ནས་སོ། །སྔགས་ཀྱང་སྦྱིན་པར་བྱ་ཞེས་བྱ་བ་ནི་དེའི་འདོད་པའི་ལྷའི་སྔགས་སོ། །སྔགས་ཀྱིས་བསྐུལ་བ་སྨྲས་པ་ཡིས། །ཞེས་བྱ་བ་ལ་སྔགས་ནི་སྔགས་བཟླས་པའོ། །བསྐུལ་བ་ནི་སྦྱིན་པ་བསྒྲག་པའོ། །སྨྲས་པ་ནི་བླངས་པར་བརྡ་སྤྲད་པ་སྟེ། དཀྱིལ་འཁོར་དུ་རང་ཉིད་ཀྱིས་བརྒྱ་རྩ་བརྒྱད་བཟླས་ལ། བཅོམ་ལྡན་བདག་གིས་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་སློབ་དཔོན་གྱིས་བརྗོད་ཅིང་སློབ་མས་ཀྱང་མགོ་བོ་བཏུད་ལ། བཅོམ་ལྡན་བདག་གིས་གཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་བརྗོད་པར་བྱའོ་ཞེས་བྱ་བའི་དོན་ཏོ། །སྔགས་ཀྱི་རྒྱལ་པོའི་ཏིང་ངེ་འཛིན་དང་ཞེས་བྱ་བ་ནི་སྔགས་དེ་ཉིད་ཀྱིས་ཏིང་ངེ་འཛིན་ཀྱང་སྦྱིན་པར་བྱ་བ་སྟེ། དབུ་གསུམ་དང་ཕྱག་དྲུག་པ་ལ་སོགས་པ་དང་ལྡན་པ་སྦྱིན་པར་བྱའོ། །གསང་བའི་སྦྱིན་པ་བརྩམ་པར་བྱ། །ཞེས་བྱ་བ་དེ་ལྟར་འདི་ལ་རིག་པའི་དབང་བསྐུར་བ་དྲུག་དང་རྡོ་རྗེ་ཆེན་པོའི་དབང་བསྐུར་བ་དང་སྔགས་དང་སྔགས་ཀྱི་ཏིང་ངེ་འཛིན་ཀྱང་སྦྱིན་པས་དེའི་འོག་ཏུ་གསང་བ་བརྩམ་པར་བྱ་སྟེ། གསང་བའི་དབང་བསྐུར་བ་སྦྱིན་པར་བྱའོ་ཞེས་བྱ་བའི་དོན་ཏོ། །འདིར་དམ་ཚིག་ནི་ཁུ་བའམ་ཞེས་བྱ་བ་ལ་སོགས་པ་གསུངས་སོ། །དེ་ནས་ཤེས་རབ་དང་ཡེ་ཤེས་ཀྱི་དབང་བསྐུར་བ་སྦྱིན་པར་བྱ་བའི་ཕྱིར་རྣམ་པ་འདི་བཞི་ཞེས་བྱ་བ་ལ་སོགས་པ་གསུངས་པ་ལ་རྣམ་པ་བཞི་ནི་བཞི་པོའོ། །འདི་ཞེས་བྱ་བ་ནི་འདི་རྣམས་སོ། །གསང་ཆེན་ནི་ཤེས་རབ་ཡེ་ཤེས་སོ། །དེ་ལ་སྣོད་དུ་རུང་བ་ནི་གསང་བའོ། །ཇི་ལྟར་ཞེ་ན། ཕྱི་རོལ་གྱི་རིག་མ་རྣམས་དེའི་ཚུལ་དུ་བསྒོམས་པའི་ཕྱིར་ཞེས་དགོངས་སོ། །གང་དག་གི་གསང་བ་ཡིན་ཞེ་ན། རྡོ་རྗེ་ཅན་ནི་ཀུན་གྱི་སྟེ། །ཀུན་ནི་མཆོག་དང་པོའི་གཟུགས་ཅན་གྱི་དང་དམ་ཚིག་སེམས་དཔའོ། །རྡོ་རྗེ་ནི་རང་གི་ལྷའི་རང་བཞིན་གྱི་ཡེ་ཤེས་སེམས་དཔའོ། །དེ་དང་ལྡན་པ་སྟེ་དེ་དང་ལྡན་པར་བསྒོམས་པའི་སློབ་མ་རྣམས་ཞེས་བྱ་བའི་དོན་ཏོ། །བཞི་པ་གང་ཞེ་ན། སྔགས་
ཀྱི་ཞེས་བྱ་བ་ལ་སོགས་པ་གསུངས་པ་ལ་བུད་མེད་ནི་ལྷ་མོ་བཞི་སྟེ། དེའི་གཟུགས་སོ། །སྔགས་ཀྱི་འཁོར་ལོ་ནི་ལྷ་རྣམས་བསྡུས་པའི་དཀྱིལ་འཁོར་དུ་གནས་པ་གང་ཡིན་པའོ། །སྔགས་ཀྱི་རྡོ་རྗེ་གསུམ་གྱི་གཟུགས། །ཞེས་བྱ་བ་ནི་མངོན་པར་མི་ཤེས་པས་ད་ལྟར་གཞུང་དུ་བྱས་པ་ཡིན་ནོ། །འོ་ན་བྱ་བ་གང་གིས་གནས་ཤེ་ན། སེམས་དཔའ་དོན་སྤྱོད་ཅེས་བྱ་བ་ལ་སེམས་དཔའ་ནི་རྡོ་རྗེ་སེམས་དཔའ་སྟེ། ལྷ་རྣམས་ཀྱི་དཀྱིལ་འཁོར་གྱི་བདག་པོའོ། །དེའི་དོན་ནི་བྱ་བ་སྟེ། སེམས་ཅན་ཐམས་ཅད་བླ་ན་མེད་པའི་གོ་འཕང་ཐོབ་པར་བྱེད་པའོ། །དེའི་སྤྱོད་པ་ནི་བཅོམ་ལྡན་འདས་དེ་ཉིད་དང་ལྷན་ཅིག་ནན་ཏན་དུ་བྱེད་པ་སྟེ་གཏི་མུག་དགའ་མ་ལ་སོགས་པ་ཞེས་བྱ་བའི་དོན་ཏོ། །འདིས་ནི་རྡོ་རྗེ་སེམས་དཔའ་བསྡུས་པའི་དཀྱིལ་འཁོར་ཡང་བཤད་པ་ཡིན་ནོ། །དེ་ལ་ཞེས་བྱ་བ་ལ་སོགས་པ་ལ་རྡོ་རྗེ་དཀྱིལ་འཁོར་ཡང་དེ་ཡིན་ལ་ཐམས་ཅད་ཀྱང་ཡིན་ཏེ་དེ་རྣམས་ཀྱི་སྔགས་སོ། །དེ་རྣམས་མཉེས་པར་བྱ་བ་ཡང་ཡིན་ལ་སྦ་བར་བྱ་བ་ཉིད་ཡིན་པའི་ཕྱིར་གསང་བ་ཡང་ཡིན་པས་ནའོ། །ཡིད་ཆེས་པ་ནི་ཡིད་རྟོན་པར་བྱེད་པ་ཉིད་དོ། །དེ་ལྟ་བས་ན་སློབ་མ་དེ་ཐེ་ཚོམ་མེད་པར་ཟད་པར་བྱེད་པའི་དཔྱད་པའོ། །རྡོ་རྗེ་གསང་བའི་ཚིག་དག་སྟེ། །དེ་ནི་ཇི་ལྟར་མནའ་བསྒགས་པ་ལ་སོགས་པ་གུས་པར་གྱུར་བའོ། །སྒྲུབ་པའི་དཀྱིལ་འཁོར་དུ་ནི་དོན་ཡང་ཡིན་ཏེ། ཡིད་ཆེས་པ་ཞེས་བྱ་བ་ནི་སྔགས་ཀྱི་ཆེ་བའི་བདག་ཉིད་ཡིད་ཆེས་པའི་ཡན་ལག་སྐྱེས་བུའི་རང་གི་བྱེད་པའོ། །མཁས་པས་ཞེས་བྱ་བ་ནི་སྔགས་ཀྱི་སེམས་དཔའོ། །ཅི་ལྟ་ཞེ་ན། བཤང་གཅི་བྱ་བ་དང་ཞེས་བྱ་བ་གསུངས་ཏེ། དེ་མ་ཐག་ཏུ་འཆད་པར་འགྱུར་བ་དང་ངོ༌། །རྡོ་རྗེ་གསང་བའི་ཚིག་དག་གིས། །ཞེས་བྱ་བ་ནི་སྣོད་ལ་བབས་པའི་སྐུ་རྡོ་རྗེ་ལ་སོགས་པ་བཙུན་མོ་དང་བཅས་པ་བྲིས་པའི་དཀྱིལ་འཁོར་དུ་སྔར་ཇི་སྐད་གསུངས་པའོ། །བཤད་པ་ལ་སོགས་པའི་དབང་དུ་བྱ་བ་དེ་ཉིད་ནི་སྔགས་རྣམས་ཞེས་བྱ་བ་ལ་སོགས་པ་གསུངས་པ་ལ། སྔགས་རྣམས་ཀུན་གྱི་ཞེས་བྱ་བ་ནི་དཀྱིལ་འཁོར་པ་ཐམས་ཅད་དང་འབྲེལ་བ་སྟེ། དེ་ལས་དེ་རྣམས་སྤྲོས་ཏེ་བསྡུས་པའི་གཟུགས་རིན་པོ་ཆེ་ཕྲ་བས་བྱིན་གྱིས་བརླབས་པའི་ཐིག་ལེ་ཞེས་བྱ་བའི་དོན་ཏོ། །འབར་བ་ནི་བཤང་བ་ལ་སོགས་པ་ལ་ཡི་གེ་ཨོཾ་བསྒོམས་པ་ལས་དེ་ཉིད་ལ་འབར་བ་སྤྲོ་བར་བསྒོམ་པའི་ཕྱིར་རོ། །སྔགས་ཆེན་པོ་ནི་ཡི་གེ་ཨོཾ་མོ། །དེའི་རྡོ་རྗེ་རིན་པོ་ཆེའོ། །དེ་ཉིད་ནི་རིག་པའི་སྐྱེས་བུ་སྟེ། དེས་རྡོ་རྗེ་ནི་
བཤང་བ་ལ་སོགས་པ་འབར་བའོ། །དེ་སྟོན་པར་མཛད་པས་ན་བཅོམ་ལྡན་འདས་ལ་ཡང་དེ་སྐད་ཅེས་བྱའོ། །དེ་ནས་སྔགས་ཀྱི་སེམས་དཔའ་དེས་སྒྲུབ་པའི་དཀྱིལ་འཁོར་དུ་ཅི་ཞིག་བསྒྲུབ་པར་བྱ་ཞེ་ན། དངོས་གྲུབ་ཅེས་བྱ་བ་ལ་སོགས་པ་གསུངས་ཏེ། དངོས་གྲུབ་དམན་པ་ཐམས་ཅད་དང་དམ་ཚིག་ཆེན་པོ་སྟེ། རྫོགས་པར་བྱང་ཆུབ་པ་ཆེན་པོའོ། །སྒྲུབ་པ་ནི་སྒྲུབ་པའི་དཀྱིལ་འཁོར་དུ་བྱ་བ་སྟེ། ཚིག་རྐང་པ་གཉིས་པ་ནི་བསྟན་པའོ། །ཚིགས་སུ་བཅད་པ་ཕྱེད་དང་གཉིས་ཀྱིས་བཤད་པ་ནི་ནན་ཏན་ཡན་ལག་དྲུག་གི་བསྙེན་པ་ལ་སོགས་པའོ། །སངས་རྒྱས་བྱང་ཆུབ་ནི་བཅོ་ལྔ་པ་ལས་གསུངས་པའི་ས་བཅུ་པའི་དབང་ཕྱུག་ཉིད་དོ། །ཉིད་དག་ཅེས་བྱ་བ་ནི་མངོན་སུམ་དུ་གྱུར་པ་ཉིད་ཡིན་གྱི་འདྲ་བ་ཙམ་ནི་མ་ཡིན་ནོ། །ཀྱང་གི་སྒྲས་ནི་མི་སྣང་བ་ལ་སོགས་པ་ཡང་སྦྱར་ཏེ། མི་སྣང་བ་ནི་རི་ལུ་ལ་སོགས་པའོ། །སྟོབས་ནི་རིག་པ་འཛིན་པའི་བདག་པོའོ། །བརྩོན་འགྲུས་ནི་མངོན་པར་ཤེས་པ་ལྔའི་མཚན་ཉིད་ཅན་གྱི་མཐུའོ། །རྡོ་རྗེ་འགུགས་པ་ནི་སངས་རྒྱས་ལ་སོགས་པ་འགུགས་པའོ། །མཆོག་དག་ནི་དམ་པར་གྱུར་པའི་སངས་རྒྱས་དང་བྱང་ཆུབ་སེམས་དཔའ་རྣམས་དང་འདྲ་བ་སྟེ། རྡོ་རྗེ་གསུམ་ཞེས་བྱ་བའི་དོན་ཏོ། །དངོས་གྲུབ་དམན་པ་འདི་དག་ནི་ལེའུ་བཅུ་གཉིས་པར་བསྟན་པ་ཡིན་ནོ། །ལྷན་ཅིག་འཁོད་ཅེས་བྱ་བ་ནི་ལྷན་ཅིག་གནས་པ་སྟེ། དཀྱིལ་འཁོར་གྱི་དབུས་སུ་མཚན་ཐོག་ཐག་བཞག་པས་སོ། །དེ་ལྟར་རྫས་དེ་གྲུབ་པར་གྱུར་ན་མཐུ་ཆེན་པོ་དང་ལྡན་པར་འགྱུར་རོ། །དེ་ལ་ཞེས་བྱ་བ་ལ་སོགས་པ་ལ་གསང་བའི་རྡོ་རྗེ་ནི་རིགས་གསུམ་གྱི་ཁྲོ་བོ་རྣམས་སོ། །དེ་ཉིད་ནི་མངག་གཞུག་པ་སྟེ། བཀའ་བསྒོ་བ་ཐམས་ཅད་བྱེད་པའོ། །དེ་ལྟ་བུར་གྱུར་པ་དེ་རྣམས་ཀྱི་རབ་ཏུ་བསྒྲུབ་པ་ནི་རྫོགས་པར་བྱེད་པའོ། །དེའི་དོན་གྱི་ཚིག་གི་མཆོག་ནི་གསང་བའི་ཁྲོ་བོ་དེ་རྣམས་ཀྱི་ས་བོན་གྱི་ཚིག་ཡིན་ཏེ། སངས་རྒྱས་ཐམས་ཅད་ནང་དུ་ཆུད་པའི་ཕྱིར་མཆོག་སྟེ་དམ་པའོ། །ཧྲི་ནི་ཞེས་བྱ་བ་ལ་སོགས་པ་ལ་རང་གི་འདོད་པའི་ལྷའི་སྦྱོར་བ་དང་ལྡན་པས་མདུན་གྱི་ནམ་མཁའ་ལ། ཡི་གེ་ཧྲི་འབར་བའི་ཕྲེང་བ་ཅན་དང་། སངས་རྒྱས་ཀུན་གྱིས་ནམ་མཁའ་ཡོངས་སུ་ཁྱབ་པར་བྱེད་པ་རྣམ་པར་བསྒོམ་པར་བྱའོ། །སྐུ་གསུང་ཐུགས་ཀྱི་གནས་ནི་སྐུ་ལ་སོགས་པའི་དངོས་པོ་ཐམས་ཅད་དོ། །དེར་ནི་སྔགས་ལ་ཞེས་བྱ་བ་ནི་ཡི་གེ་ཧྲི་ལའོ། །དབབ་པར་བྱ་ཞེས་བྱ་བ་ནི་བསྡུ་བར་བྱ་བའོ། །སྐུ་དང་གསུང་དང་ཐུགས་ཀྱི་སྔགས་
རྡོ་རྗེ་ནི་སྐུ་ལ་སོགས་པའི་གསང་བ་དང་གཉིས་སུ་མེད་པར་གྱུར་པའི་ཡི་གེ་ཧྲིའོ། །དེའི་བྱིན་གྱིས་བརླབས་པ་ནི་བརྟན་པར་བྱེད་པའོ། །དེའི་དོན་གྱི་ཚིག་ནི་སྔགས་ཏེ་ཨ་ཁཾ་ཁའོ། །གཞུང་ཁ་ཅིག་ལ་ནི་ཨ་ཁཾ་པའོ། །ཕྱག་ན་རྡོ་རྗེ་ནི་བགེགས་མཐར་བྱེད་དམ། གནོད་མཛེས་རྒྱལ་པོའོ། །ཕྱག་ན་པདྨོ་ནི་པདྨ་མཐར་བྱེད་དོ། །གཞན་གྱིས་མི་ཐུབ་པས་ནི་གཤིན་རྗེ་གཤེད་དམ་ཤེས་རབ་མཐར་བྱེད་དོ། །བསྒོམས་ནས་ཞེས་བྱ་བ་ནི་ཡི་གེ་ཧྲི་དེ་ལས་བྱུང་བ་བཀའ་ནོད་པར་རྣམ་པར་བསམས་ནས་སོ། །གསང་བའི་གནས་ཞེས་བྱ་བ་ནི་གསང་བའི་གནས་ཉིད་དེ་ཐུགས་ཀྱི་གསང་བ་ཞེས་བྱ་བའི་དོན་ཏོ། །དེ་གང་ཡིན་ཞེ་ན། དེ་ལ་ཞེས་བྱ་བ་ལ་སོགས་པ་གསུངས་པ་ལ་རྡོ་རྗེ་ནི་མངག་གཞུག་པའི་ཁྲོ་བོ་རྣམས་ཏེ། དེ་རྣམས་ཀྱི་གསང་བའི་གནས་སོ། །ཉི་མ་ཞེས་བྱ་བ་ལ་སོགས་པ་ལ་མངག་གཞུག་པའི་སྙིང་གར་ཉི་མ་འབར་བ་ལ་གནས་པ་འོད་ཟེར་གྱི་ཕྲེང་བ་ཅན་གྱི་མི་བསྐྱོད་པ་ལ་སོགས་པ་གང་ཡང་རུང་བའི་རིགས་ཀྱི་དབྱེ་བས་བསམ་པར་བྱའོ། །སྙིང་པོས་ཞེས་བྱ་བ་ནི་ཨོཾ་ལས་བྱུང་བའི་རྩེ་གསུམ་ལ་སོགས་པས་སོ། །བསྐུལ་བར་བྱ་ཞེས་བྱ་བ་ནི་བརྡེག་པར་བྱ་བའོ། །སྡུག་བསྔལ་ཆེན་པོ་ཡིས་ཞེས་བྱ་བ་ནི་སྡུག་བསྔལ་མི་བཟད་པར་བྱེད་པས་སོ། །འོད་ཆེན་ཐམས་ཅད་ཅེས་བྱ་བ་ནི་ནམ་མཁའ་ཁྱབ་པའི་ཡེ་ཤེས་ཀྱི་མངག་གཞུག་པའོ། །རྡོ་རྗེ་ཐམས་ཅད་ནི་ཡེ་ཤེས་ཀྱི་མངག་གཞུག་པའོ། །དེ་རྣམས་ཀྱི་སྙིང་པོ་རྡོ་རྗེ་སྟེ། རྩེ་གསུམ་ལ་སོགས་པ་སྒྲོས་པ་ཡིས་སོ། །བསྐུལ་བ་ནི་བརྡེགས་པའོ། །ཨཾ་ནི་དམ་ཚིག་གི་མངག་གཞུག་པའི་ཐུགས་ཀྱི་གསང་བའི་སྙིང་གའི་ཉི་མ་ལ་བསམ་པར་བྱ་བའི་སྔགས་སོ། །ཇི་ལྟར་བསྐུལ་བར་བྱ་ཞེ་ན། མདུང་རྩེ་ཆེ་དང་ཞེས་བྱ་བ་ལ་སོགས་པ་གསུངས་ཏེ། ཆོ་ག་བཞིན་ཞེས་བྱ་བ་ནི་ཡི་གེ་ཨོཾ་ཉིད་ལས་མདུང་རྩེ་ལ་སོགས་པ་སྤྲོས་པ་དང་དམ་ཚིག་གི་མངག་གཞུག་པ་ལ་བྱིན་གྱིས་བརླབས་ལ་བདག་ལ་གྲུབ་པར་གྱུར་ཅིག་ཅེས་བྱ་བའི་བསམ་པས་བརྡེག་པ་ནི་འདིར་ཆོ་ག་ཡིན་ནོ། །སངས་རྒྱས་བྱང་ཆུབ་ཅེས་བྱ་བ་ནི་སངས་རྒྱས་ཀྱི་ཐབས་ཀྱི་མངག་གཞུག་པའོ། །ས་ཕྱོགས་གང་དུ་མངག་གཞུག་པ་བསྒྲུབ་པར་བྱ་བ་དང༌། དུས་ཇི་སྲིད་ནས་འགྲུབ་པར་འགྱུར་བ་དེ་ནི་ཉམས་དགའ་བའི་ཞེས་བྱ་བ་ལ་སོགས་པའི་ཚིགས་སུ་བཅད་པས་གསུངས་པ་ཡིན་ནོ། །མངག་གཞུག་པ་གྲུབ་པར་གྱུར་ནས་
ཅིར་འགྱུར་ཞེ་ན། རི་རབ་ཅེས་བྱ་བ་ལ་སོགས་པ་གསུངས་ཏེ། རྡོ་རྗེ་ཅན་ཉིད་བྱང་ཆུབ་སྟེ། །དེ་ཡི་དོན་གྱི་འཁོར་རྣམས་སོ། །འགྲོ་བར་འགྱུར་ཞེས་བྱ་བ་ནི། རྫུ་འཕྲུལ་གྱིས་འགྲོ་བར་འགྱུར་རོ། །ཐས་འགྱུར་ཞིང་ཞེས་བྱ་བ་ནི། དེ་ན་བཞུགས་པའི་སངས་རྒྱས་རྣམས་སོ། །སངས་རྒྱས་ས་ཡང་ཞེས་བྱ་བ་ནི། མཐར་འཚང་རྒྱ་བ་ཉིད་དོ། །དམ་ཚིག་རྡོ་རྗེའི་བཞད་པ་ཡང་དེ་ཡིན་ལ་ཆེན་པོ་ཡང་ཡིན་པས་ནའོ། །དེ་ལ་དམ་ཚིག་ནི་དམ་ཚིག་གི་མངག་གཞུག་པའོ། །དེའི་རྡོ་རྗེ་ནི་ཐུགས་ཀྱི་གསང་བའོ། །དེའི་བཞད་པ་ནི་སྙིང་གར་གནས་པའི་ཡི་གི་ཨཱོཾཿ་ལས་བྱུང་བའི་མདུང་ལ་སོགས་པའི་ཚོགས་སོ། །དེ་ཡང་ནམ་མཁའ་ཁྱབ་པས་ན་ཆེན་པོ་ཡིན་ཏེ། ཡེ་ཤེས་ཀྱི་མངག་གཞུག་པའི་རིགས་ཀྱི་སྙིང་པོ་སྐུལ་བར་བྱེད་པ་ཉིད་ཀྱི་ཁྱབ་པར་བྱེད་པ་ཉིད་ཡིན་པའི་ཕྱིར་རོ། །དེ་སྟོན་པར་མཛད་པ་ཉིད་ཀྱི་ཕྱིར་བཅོམ་ལྡན་འདས་ལ་ཡང་དེ་སྐད་ཅེས་བྱའོ། །མངག་གཞུག་པ་སྒྲུབ་པ་རྣམ་པ་གཉིས་ལས་གཅིག་བཤད་ནས་གཉིས་པ་བཤད་པའི་ཕྱིར། དེ་ལ་ཞེས་བྱ་བ་ལ་སྒོས་པ་གསུངས་པ་ལ་དེ་ལ་ཞེས་བྱ་བ་ནི་སྔ་མ་བཞིན་དུ་བསྐྱེད་པའི་དམ་ཚིག་གི་མངའ་གཞུག་པའོ། །མངག་གཞུག་པ་ཐམས་ཅད་ཀྱི་གསང་བའི་རྡོ་རྗེ་ནི་སྐུ་དང་གསུང་དང་ཐུགས་ཀྱི་གསང་བའོ། །དེ་རྣམས་ཀྱི་གསང་བ་ནི་དེ་ཁོ་ན་ཉིད་དོ། །དེ་གང་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སྒོས་པ་ལ་མི་བསྐྱོད་པ་དང༌། འོད་དཔག་ཏུ་མེད་པ་དང་རྣམ་པར་སྣང་མཛད་ཀྱིའོ། །དགོད་པ་ཞེས་བྱ་བ་ནི་སྙིང་ག་དང་ལྐོག་མ་དང་སྤྱི་བོར་འབར་བའི་འཕྲེང་བ་ཅན་འདི་རྣམས་རྣམ་པར་དགོད་པ་ཡིས་སོ། །བསྐུལ་ཞེས་བྱ་བ་ནི་གྲུབ་པའི་ཕྱིར་སད་པར་བྱ་བའོ། །དེ་ལ་ཞེས་བྱ་བ་ནི་གསང་བ་གསུམ་དགོད་པར་བྱས་པར་རོ། །རྡོ་རྗེ་ནི་དེ་ཉིད་ཀྱི་གསང་བའོ། །དེ་རྣམས་ཀྱི་ཡེ་ཤེས་ཀྱི་འཁོར་ལོ་ནི་དེ་དག་ཉིད་ཀྱི་སྙིང་གའི་སྔགས་ཀྱི་འོད་ཟེར་གྱི་སྤྲུལ་པ་རྣམས་རེ་རེ་ཞིང་ནམ་མཁའ་ཁྱབ་པའི་ཡེ་ཤེས་ཀྱི་མངག་གཞུག་པའི་རིགས་གསུམ་པའོ། །དེ་རྣམས་ཀྱི་དམ་ཚིག་གི་གནས་བཞི་ནི་དམ་ཚིག་གི་གནས་བཞི་སྟེ། དམ་ཚིག་ནི་ཡེ་ཤེས་ཀྱི་འཁོར་ལོ་ཡིན་ལ་དེའི་གནས་ནི་ལས་རྣམས་སོ། །དམ་ཚིག་བསྐུལ་བ་ནི་ཨཱཿ་ལ་སོགས་པའི་རང་གི་དེ་ཁོ་ན་ཉིད་ཀྱིས་སད་པའོ། །དམ་ཚིག་
གཏོང་བ་ནི་ཨཱཿ་ལ་སོགས་པའི་འོད་ཟེར་ཕོ་ཉའི་གནས་སུ་གྱུར་པ་རྣམས་གཏོང་བའོ། །དམ་ཚིག་བོད་པ་ནི་འོད་ཟེར་དེ་དག་ཉིད་ཀྱིས་དགུག་པའོ། །དམ་ཚིག་བཅིང་བ་ནི་བཀུག་པ་དེ་ཉིད་ཡི་གེ་ཨཱཿ་ལ་སོགས་པ་ལ་བསྡུས་ཏེ་འཇོག་པའོ། །དེ་ནད་དམ་ཚིག་གི་ཚིག་འདི་དག་གིས་ཅི་ཞིག་བྱེད་ཅེ་ན། མཁའ་དབྱིངས་ཞེས་བྱ་བ་ལ་སོགས་པ་གསུངས་ཏེ། ཡེ་ཤེས་ཀྱི་ཁྲོ་བོའི་འཁོར་ལོའི་རང་བཞིན་ཉིད་ཡིན་པའི་ཕྱིར་ཆོས་ཀྱི་དབྱིངས་སུ་རོ་གཅིག་པའི་རྫོགས་པའི་བྱང་ཆུབ་ཀྱི་སེམས་ནི་ནམ་མཁའི་ཁམས་ཀྱི་རང་བཞིན་ཉིད་ཡིན་པའི་ཕྱིར་མཁའ་དབྱིངས་སོ། །མཐའ་ཡས་པ་ཉིད་ཀྱི་ཕྱིར་རྒྱ་ཆེན་ནོ། །རང་བཞིན་གྱིས་འོད་གསལ་བ་ཉིད་ཡིན་པའི་ཕྱིར་དག་པའོ། །རྣམ་པ་ཐམས་ཅད་དུ་གཟུང་བ་དང་འཛིན་པའི་རྣམ་པ་དང་བྲལ་བ་ཉིད་ཀྱི་ཕྱིར་ཆོས་རྣམས་ཐམས་ཅད་རྣམས་སྤངས་པའོ། །དེ་གོང་བུའི་ཚུལ་གྱིས་ཞེས་བྱ་བ་ནི་རྡོ་རྗེ་གསུམ་དུ་བསྡུས་པའོ། །རྡོ་རྗེ་ཉིད་ནི་ངོ་མཚར་དུ་གྱུར་བའི་ཚུལ་ཅན་ཉིད་ཡིན་ཏེ། དེ་དང་ལྡན་པས་ན་རྡོ་རྗེ་རྨད་བྱུང་གཟུགས་ཅན་ཏེ། ནམ་མཁའ་ཁྱབ་པར་བྱེད་པའི་སངས་རྒྱས་ཐམས་ཅད་ཀྱི་བུ་གཅིག་པ་ནི་གསང་བ་གསུམ་བསྡུས་པ་དེ་རྣམས་ཀྱིས་བསྐྱེད་པ་ཉིད་ཀྱི་ཕྱིར་རོ། །དེ་གང་ཡིན་ཞེ་ན། དམ་ཚིག་གི་མངག་གཞུག་པའོ། །དེ་སྟོན་པར་མཛད་པ་ཉིད་ཀྱིས་ནི་བཅོམ་ལྡན་ལ་ཡང་དེ་སྐད་ཅེས་བྱའོ། །མངག་གཞུག་པ་སྒྲུབ་པ་འདི་ལ་ཡང་དེ་ཉིད་འབྲས་བུ་ཡིན་ཏེ། གཞན་དུ་མ་གསུངས་པའི་ཕྱིར་རོ། །མངག་གཞུག་པ་སྒྲུབ་པའོ། །རྡོ་རྗེ་ལུས་མེད་ཀྱི་སྦྱོར་བ་ནི་སངས་རྒྱས་ཞེས་བྱ་བ་ལ་སོགས་པ་གསུངས་ཏེ། འོང་གི་སྒྲས་ནི་ལྷ་དང་མིའི་དབང་པོའི་བུ་མོ་ལ་སོགས་པའོ། །འདི་ཞེས་བྱ་བ་ནི་འཆད་པར་འགྱུར་བའི་བསམ་གཏན་ནོ། །བསྒྲུབ་པར་བྱ་བའི་ལུས་དང་ངག་དང་ཡིད་ནི་རྡོ་རྗེ་གསུམ་མོ། །དེ་དབང་དུ་བྱས་ནས་མདུན་དུ་འཇོག་པའི་ཕྱིར་རྡོ་རྗེ་མཆོག་གསུམ་འཛིན་པའོ། །རྡོ་རྗེ་འཇམ་པ་ཞེས་བྱ་བ་ནི་ཟླ་བ་དམར་པོ་ལ་གནས་པ་སྐུ་དང་ཐུགས་དང་ན་བཟའ་དང་རྒྱན་དང་ཕྲེང་བ་དམར་པོའོ། །མདའ་ལྔ་ཞེས་བྱ་བ་ལ་སོགས་པ་ལ་བསྒྲུབ་པར་བྱ་བ་ཁ་དོག་དམར་ཞིང་གོས་མེད་པས་འཇིགས་པར་འགྱུར་བ་མདུན་དུ་བསམས་ཏེ། དེ་ཉིད་འབེན་དུ་བྱས་ནས་ཙཾ་ལས་བྱུང་བའི་གཞུ་དམར་པོ་ལག་པ་གཡོན་པས་གཟུང་ལ་གཞུའི་
རྒྱུད་འདྲན་པར་བྱེད་པ་ཅན་སོར་མོ་ལྔའི་ནང་ན་གནས་པའི་ཡི་གེ་རཾ་ལས་བྱུང་བའི་མདའ་ཨུཏྤལ་དམར་པོ་ཁ་མ་བྱེ་བའི་མདེའུ་དང་ལྡན་པའི་མདའ་ལྔ་ལྟོང་འཛིན་པར་བྱེད་པའི་གཡས་ཀྱི་ཁུ་ཚུར་ཅོད་པན་གྱི་མཐར་འཇོག་པ་ནི་མདའ་ལྔའི་སྦྱོར་བདག་གིས་ནི་དབུ་རྒྱན་རྩེ་མོར་རོ། །དེས་ཡང་དག་སྤྲོ་བ་ནི་མདའ་ལྔ་ལས་མདའ་ལྔ་འབྱུང་ཞིང་སྤྲོ་བ་བསམ་པར་བྱའོ། །དེ་ནས་མདའ་ལས་བྱུང་བས་ཅི་ཞིག་བྱེད་ཅེ་ན། གནས་ལྔ་དག་ཏུ་རབ་ཏུ་དབབ་པ་སྟེ། བསྒྲུབ་པར་བྱ་བའི་མིག་གཉིས་དང༌། སྙིང་ག་དང་ལྟེ་བ་དང་གསང་བ་རྣམས་སུའོ། །རྡོ་རྗེ་ཁྲོ་བོས་ཞེས་བྱ་བ་ནི་འབར་ཞིང་ཆགས་པ་དང་བཅས་པའི་ཡི་གེ་ཧཱུཾ་ངམ་ཡི་གེ་མཾ་གྱིས་སོ། །བརྒྱལ་བ་ནི་མྱོས་ཏེ་དབང་དུ་གྱུར་པའི་ཕྱིར་རོ། །དེ་ཞེས་བྱ་བ་ནི་བསྒྲུབ་པར་བྱ་བའོ། །བྱིས་པའི་གཟིགས་ཀྱང་དེ་ཡིན་ལ། སངས་རྒྱས་ཐམས་ཅད་ཀྱི་བློ་ཡང་ཡིན་པས་ན་བྱིས་པའི་བློ་སྟེ་འཇམ་དཔལ་ལོ། །དེའི་གྲགས་ཆེན་ནི་གྲགས་པ་དང་ལྡན་པའི་མདའོ། །གསང་བའི་བསྐུལ་བ་དག་གིས་ཞེས་བྱ་བ་ནི་གནད་དུ་བསྣུན་པ་ཡིས་སོ། །སྔགས་རྣམས་ཀུན་ནི་ལྷ་ཐམས་ཅད་དོ། །དེ་རྣམས་ཀྱི་རབ་གསང་བ་ནི་ནང་གི་ནོར་རོ། །སྒྲུབ་པ་པོས་དོན་བྱ་བ་ཡིན་ལ་བློ་ནི་བསྒྲུབ་པར་བྱ་བ་རྣམས་ཀྱི་བསམ་པ་ཡིན་པས་ན་དོན་གྱི་བློ་ཡིན་ཞིང་དེ་གང་ལས་དབྱེར་མི་ཕྱེད་པར་འགྱུར་བ་དེ་ནི་རྡོ་རྗེ་དོན་གྱི་བློ་སྟེ། རྡོ་རྗེ་ལུས་མེད་ཀྱི་སྦྱོར་བའོ། །དེ་སྟོན་པར་མཛད་པ་ཉིད་ཀྱི་ཕྱིར་བཅོམ་ལྡན་འདས་ལ་ཡང་དེ་སྐད་ཅེས་བྱ་སྟེ། རྡོ་རྗེ་ལུས་མེད་དོ། །མཆོག་དང་ཞེས་བྱ་བ་ནི་ཕྱག་རྒྱ་ཆེན་པོའི་གཟུགས་སོ། །ནམ་མཁའི་དབྱིངས་ནི་ཆོས་འབྱུང་བའི་ནང་དུ་ཆུད་པའི་གཞལ་ཡས་ཁང་ངོ༌། །ཇི་ལྟར་བསམ་པར་བྱ་ཞེ་ན། སྔགས་ཀྱི་རྡོ་རྗེ་ཧཱུཾ་ལ་སོགས་ཏེ། དབྱངས་ཀྱི་ཡི་གེ་ཐམས་ཅད་ལས་བྱུང་བའི་ཟླ་བའི་དཀྱིལ་འཁོར་ལ་གསལ་བའི་ཡི་གེ་ཐམས་ཅད་ཀྱིས་ཡོངས་སུ་བསྐོར་བ་མཆོག་དང་པོའི་སྙིང་པོ་སྟེ་དེ་ལས་རྡོ་རྗེའོ། །དེའི་དབུས་སུ་སྙིང་པོ་དེ་ཉིད་དོ། །སོགས་པ་སྨོས་པས་ནི་སྤྲོ་བ་དང་བསྡུ་བ་དང་རྡོ་རྗེ་འཛིན་པ་བསྐྱེད་པ་འདོད་ཆགས་ཆེན་པོའི་ཚུལ་ལ་སོགས་པའི་རིམ་གྱིས་དཀྱིལ་འཁོར་གྱི་བདག་པོ་དང༌། དཀྱིལ་འཁོར་པ་རྣམས་སྤྲུལ་པ། དཀྱིལ་འཁོར་གྱི་བདག་པོ་ལ་སོགས་པ་དེ་ནམས་ཀྱི་རྡོ་རྗེ་གསུམ་ལ་སོགས་པ་བསྒོམས་ཏེ། སྐུ་རྡོ་རྗེ་ལ་སོགས་པ་དང༌། ཡེ་ཤེས་སེམས་དཔའ་དང་ཅོད་པན་ལ་
རིགས་ཀྱི་བདག་པོ་དང༌། རིག་པ་དང་ཡང་དག་པར་སྦྱོར་བ་ཅི་རིགས་པར་བསྒོམ་པར་བྱའོ་ཞེས་བྱ་བའི་དོན་ཏོ། །ཆོ་ག་བཞིན་དུ་ཞེས་བྱ་བ་ནི་སློབ་མ་གཞུག་པའི་ཆོ་ག་བཞིན་དུའོ། །བསྟན་ཞེས་བྱ་བ་ནི་སྤྲུལ་པའི་དཀྱིལ་འཁོར་འདི་བསྟན་པའོ། །ཨོཾ་ནི་མིག་གི་དབུས་བསམས་ནས། །ཞེས་བྱ་བ་ནི་སྔགས་ཀྱི་ཡི་གེའི་ཚིག་བྱིན་ལ་ཞེས་སྔར་གསུངས་པ་གང་ཡིན་པའོ། །སྤྲུལ་པའི་དཀྱིལ་འཁོར་ཡང་དག་པར་བསྟན་པའོ། །བཀྲེས་སྐོམ་ཞེས་བྱ་བ་ནི་བཀྲེས་པ་དང་སྐོམ་པ་རྣམས་ཀྱིས་སོ། །ཉོན་མོངས་ཆེས་ཞེས་བྱ་བ་ནི་ངལ་བ་ཆེན་པོ་ཡིན་ཏེ། དེ་རྒྱུར་གྱུར་པས་རྣམ་བསམས་ནས་ཏེ་ཞི་བའི་དོན་དུའོ། །དོན་རྣམས་ཐམས་ཅད་འབྱོར་ཞེས་བྱ་བ་ནི་གཟུགས་ཀྱི་ཕུང་པོ་ལ་དབང་ཐོབ་པའི་ཕྱིར་རོ། །བཾ་ཞེས་བྱ་བ་ནི་བུམ་པ་དཀར་པོ་ལྟ་བུའོ། །ཁའི་ནང་དུ་ཞེས་བྱ་བ་ནི་མ་མཆུ་དང་འབྱར་ཞིང་ཅུང་ཟད་ཁས་སྤུབ་པའོ། །བཟའ་བར་བྱ་བ་ཀུན་ཞེས་བྱ་བ་ནི་བཟའ་བར་བྱ་བ་དང་བཏུང་བ་ལ་སོགས་པའོ། །ཡིད་བཞིན་ནོར་བུས་བརྒྱན་པ་སྟེ། །ཞེས་བྱ་བ་ནི་ཟླ་བ་ཕྱེད་པའི་རང་བཞིན་ཅན་ཕྱེད་བཀབ་པའི་ཐིག་ལེའི་གཟུགས་ཅན་གྱི་ཡིད་བཞིན་གྱི་ནོར་བུས་རྣམ་པར་བརྒྱན་པ་སྟེ། བུམ་པ་བཟང་པོ་ཉིད་ཡི་པའི་ཕྱིར་རོ། །ཡེ་ཤེས་རྡོ་རྗེ་ནི་ཏིང་ངེ་འཛིན་བསྟན་པའོ། །དེ་ལས་བྱུང་བ་ནི་བསྐྱེད་པའོ། །ཞི་བ་སྟེ་ཉོན་མོངས་པ་མེད་པ་བཀྲེས་པ་ལ་སོགས་པའི་སྡུག་བསྔལ་སྤང་བ་གང་ཡིན་པ་དེ་འདྲ་བའི་ཡི་གེ་བཾ་བསམས་ནས་སོ། །ཨོཾ་ནི་ལྕེ་ལ་འདུག་པར་བསམ། །ལྕེའི་རྩེ་མོ་ལ་ཡི་གེ་ཨོཾ་བསམ་པ་ཁ་དེར་གཏད་པར་བྱ་སྟེ། བཟའ་བ་དང་བཏུང་བ་ལ་སོགས་པ་རྔུབ་པའི་ཕྱིར་རོ་ཞེས་བྱ་བའི་དོན་ཏོ། །ཡིད་བཞིན་གྱི་ནོར་བུ་རྡོ་རྗེ་འདི་ཉིད་ནི་ཏིང་ངེ་འཛིན་ཏོ། །དེ་སྟོན་པར་མཛད་པ་ལ་ཡང་དེ་སྐད་ཅེས་བྱའོ། །ཟས་ཀྱི་ཡིད་བཞིན་ནོར་བུའོ། །དཔའ་བོ་ཆེན་པོའི་རྡོ་རྗེ་ཡང་དེ་ཡིན་ལ་དེ་བཞིན་གཤེགས་པ་ཡང་ཡིན་པ་སྟེ། དེའི་རྡོ་རྗེ་བསྒོམས་པ་ནི་སྐུ་གསུམ་བསྒོམ་པའོ། །དེའི་དམ་ཚིག་གི་མཆོག་ནི་ས་བོན་གྱི་མཆོག་གོ །རྡོ་རྗེ་གསུང་ལས་ཞེས་བྱ་བ་ནི་རྡོ་རྗེ་གསུང་ལ་སོགས་པ་ལས་སོ། །བསྒོམ་པ་ནི་སངས་རྒྱས་ཞེས་བྱ་བ་ལ་སོགས་པ་གསུངས་པ་ལ། སངས་རྒྱས་དཀྱིལ་འཁོར་ནི་ཟླ་བའི་དཀྱིལ་འཁོར་རོ། །རྡོ་རྗེ་གསུམ་ནི་ཟླ་བ་དང་རྡོ་རྗེ་དང་བཾ་གྱིའོ། །དེ་རྣམས་ཀྱི་སྐུའི་སྦྱོར་བ་ནི་ནམ་མཁའ་ཁྱབ་པར་བྱེད་པའི་རྒྱལ་བའི་སྐུ་བསྡུས་པ་སྟེ་དེས་བསྐྱེད་པའོ། །དེས་ཅི་ཞིག་བྱེད་ཅེ་ན། སྐབས་
ཉིད་ཡིན་པའི་ཕྱིར་དཔའ་བོ་རྡོ་རྗེའོ། །སེར་བ་ཞེས་བྱ་བ་ནི་གསེར་ལྟ་བུའོ། །རྡོ་རྗེ་འགྱིང་བ་ཞེས་བྱ་བ་ནི་ཕྱག་ན་གནས་པའི་རྡོ་རྗེ་འབར་བ་ལྟ་བུའོ། །རང་སྣང་བའི་རིག་མས་འཁྱུད་པས་རྡོ་རྗེ་དང༌། རལ་གྲི་དང་ནོར་བུ་དང་པདྨ་བསྣམས་པའོ། །འདི་ནི་རྣམ་པར་བསམ་ཞེས་བྱ་བ་ནི་ས་བོན་གྱི་ཡི་གེ་བཾ་སྙིང་གའི་ཟླ་བ་རྡོ་རྗེའི་ལྟེ་བ་ལ་གནས་པ་ཟླ་བའོ། །བསམས་ནས་ཞེས་བྱ་བ་ནི་དེ་ལྟ་བུའི་ཡི་གེ་བཾ་གྱི་རྣམ་པར་བསམས་ནས་སོ། །ཐམས་ཅད་བརྩམ་པར་བྱ་ཞེས་བྱ་བ་ནི་བསྒྲུབ་པར་བྱ་བ་མ་ཡིན་པའི་ལས་ཀྱང་བརྩམས་ནས་དེ་ངེས་པར་འགྲུབ་པར་འགྱུར་རོ་ཞེས་བྱ་བར་དགོངས་སོ་ཞེས་བྱ་བའི་དོན་ཏོ། །རྡོ་རྗེ་དཔའ་བོའི་རླབས་ནི་བརྩོན་པས་གཟེངས་བསྟོད་པའི་སྔགས་ཀྱི་འོད་ཟེར་ཏེ་དེ་རྣམས་ཀྱི་ཕྲེང་བའོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །དཔའ་བོའི་རྡོ་རྗེའོ། །ཀུན་ནས་དབྱངས་ནི་སྔགས་ཐམས་ཅད་དེ་སངས་རྒྱས་དང་བྱང་ཆུབ་སེམས་དཔའ་ཞེས་བྱ་བའི་དོན་ཏོ། །དེའི་རྡོ་རྗེ་ནི་ཙུནདའི་རྣམ་པར་བསྡུས་པའོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །རྡོ་རྗེ་ཆེན་མོ་ནི་སྐུལ་བྱེད་མ་དེ་ཉིད་དེ་དེའི་བསྒོམས་པའི་དོན་གྱི་ཚིག་ནི་ས་བོན་ནོ། །རྡོ་རྗེ་གསུམ་གྱི་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་སོ། །ལུས་དང་ངག་དང་སེམས་ཞེས་བྱ་བ་ནི་ཉི་མ་དང་པདྨ་དང་ཡི་གེ་ཙུཾ་མོ། །རབ་ཏུ་བསྒོམ་ཞེས་བྱ་བ་ནི་རབ་ཏུ་བརྟགས་ནས་བསྒོམ་པ་སྟེ། ཉི་མའི་གདན་དང་ཉི་མའི་འོད་མངའ་བ་ཐབས་ཀྱིས་འཁྱུད་པ་པདྨ་དཀར་པོ་དང་རལ་གྲི་དང་ནོར་བུ་དང་འཁོར་ལོ་བསྣམས་པའོ། །རྡོ་རྗེ་སེམས་དཔའ་ཞེས་བྱ་བ་ནི་མི་བསྐྱོད་པའི་ཅོད་པན་ཅན་ནོ། །སྔགས་ཀྱི་ཚིག་ཅེས་བྱ་བ་ནི་སྙིང་གའི་ཉི་མ་ལ་བཟླས་པའི་སྔགས་ཀྱི་ཡི་གེ་ཙུཾ་མ། ཡང་ན་ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ་བྱ་བའོ། །དེ་ལ་སྡིག་པ་རྣམས་བསྐྱོད་ཅོང་སེལ་བར་མཛད་པས་ན་ཙ་ལེའོ། །དེ་རྣམས་ཀྱང་མི་ཕྱེད་པའི་ཕྱིར་ལྡེམ་ཞིང་ཡང་དག་པར་ལྡེམ་པས་ན་ཙུ་ལེའོ། །དཀར་པོའི་ཆོས་རྣམས་ཀྱིས་འབར་བར་བྱེད་ཅིང་གསལ་བར་བྱེད་པས་ན་ཙུནྡེའོ། །ཙུནདའི་དོན་གྱི་ཡི་གེ་ཙུཾ་མམ། །ཡང་ན་ཙ་ལེ་ཙུ་ལེ་ཙུནྡེའི་དོན་གྱི་ཡི་གེ་གསུམ་མོ། །རྡོ་རྗེ་ནི་སྔགས་ཐམས་ཅད་དོ། །དེ་རྣམས་ཀྱི་དམ་ཚིག་ནི་བསྡུས་པ་སྟེ། དེ་ཉིད་ནི་སྐུལ་བྱེད་མའོ། །དེའི་ཡེ་ཤེས་ནི་ས་བོན་ཏེ། དེའི་འོད་ཟེར་ནི་ཕྲེང་བའོ། །དེ་དག་
ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །སྡིག་པ་ཐམས་ཅད་འཇིག་པའོ། །བསམ་པ་ཐམས་ཅད་ནི་ནོར་ཐམས་ཅད་ཀྱི་བསམ་པའོ། །དེའི་རྡོ་རྗེའི་ལོངས་སྤྱོད་ནི་ངེས་པར་རྫོགས་པར་བྱེད་པ་སྟེ། དཔལ་གནོད་གནས་སོ། །དེ་ལ་དམིགས་པའི་ཏིང་ངེ་འཛིན་ལ་ནི་དེ་སྐད་ཅེས་བྱའོ། །ཏིང་ངེ་འཛིན་དེ་ཉིད་ནི་ཏིང་ངེ་འཛིན་རྡོ་རྗེའོ། །དེའི་ཚུལ་ནི་ཐབས་སོ། །སངས་རྒྱས་དཀྱིལ་འཁོར་ནི་ཟླ་བའི་དཀྱིལ་འཁོར་རོ། །རྡོ་རྗེ་བསྒོམ་པས་ཞེས་བྱ་བ་ནི་ཟླ་བ་དེ་ལ་ས་བོན་གང་བ་དེའི་ལྟེ་བར་རྡོ་རྗེ་སྟེ་ཛཾ་བསྒོམས་པའོ། །སངས་རྒྱས་ཀུན་ཞེས་པ་ནི་སངས་རྒྱས་ཐམས་ཅད་དོ། །དབབ་པར་བྱ་ཞེས་བྱ་བ་ནི་ཡི་གེ་ཛཾ་ལ་བསྡུ་བའོ། །ཛཾ་བྷ་ནི་གནོད་སྦྱིན་ཆེན་པོ་ཞེས་བྱ་བ་ནི་སེར་པོའམ་ནག་པོ་ཟླ་བའི་གདན་དང༌། ཟླ་བའི་འོད་ཡོད་པ་མི་ཐུང་གསུས་པ་ཆེ་བ་རང་སྣང་བའི་རིག་མས་འཁྱུད་པ་ལག་པ་གཡས་གཉིས་ན་ས་བོན་གང་བ་དང་རལ་གྲི་ཐོགས་པ། གཡོན་པ་གཉིས་ན་རིན་པོ་ཆེ་སྐྱུག་པའི་ནེའུ་ལེ་དང་པདྨ་ཐོགས་པའོ། །ཐོར་ཚུགས་དང་དབུ་རྒྱན་དང་རྡོ་རྗེ་ཅན་ནི་སྐུ་རྡོ་རྗེ་ཅན་ལ་སོགས་པ་སྟེ། དེ་དག་དང་ལྡན་པའོ། །གནས་ལྔ་དག་ཏུ་ཞེས་བྱ་བ་ནི་ཅོད་པན་གྱི་སྟེང་གི་བར་སྣང་ལའོ། །ཆོ་ག་ཡིས་ཞེས་བྱ་བ་ནི་ལྔ་པོ་ཡང་རང་གི་རིག་པ་རྗེས་སུ་མཉེས་པའི་ཆོ་གས་གནས་པའོ། །རྡོ་རྗེ་བདུད་རྩིའི་ཆུ་ཞེས་བྱ་བ་ནི་དེ་དག་ཉིད་ཀྱི་དགའ་བ་བྱུང་བའི་རྒྱུན་མི་འཆད་པའོ། །དབུ་ལ་ཞེས་བྱ་བ་ནི་སྤྱི་བོར་དབང་བསྐུར་བའི་ཕྱིར་རོ། །རྡོ་རྗེ་སེམས་དཔའི་ཞེས་བྱ་བ་ནི་མི་བསྐྱོད་པའིའོ། །ཆོ་ག་ཡིས་ཞེས་བྱ་བ་ནི་ཆུ་དེ་ཉིད་ཀྱིས་བསྐྱེད་པའོ། །དེ་བཞིན་དུ་རྡོ་རྗེ་སེམས་དཔའ་ལ་སོགས་པའི་སྦྱོར་བ་དང་ལྡན་པས་སྣོད་ལ་སོགས་པར་རྨུགས་འཛིན་གྱི་མཛོད་སྤུ་རུ་གནས་པ་ཡི་གེ་ཛཾ་སེར་པོའི་འོད་ཟེར་རྣམས་ཀྱིས་སྒྲུབ་པ་པོ་ཀུན་དུ་འགེངས་པར་བྱེད་པར་བསམས་ལ་ལག་པ་གཡས་པའི་སོར་མོའི་རྩ་བ་རྣམས་ལ་རྡོ་རྗེ་ཆུ་དེ་བདུད་རྩིར་མོས་པར་བྱས་ལ་ཕྱིའི་ཆུ་དེའི་སྤྱི་བོར་སྔགས་བཟླ་ཞིང་སྦྱིན་པར་བྱའོ། །སྔགས་ནི་ཨོཾ་ཛཾ་བྷ་ལ་ཛ་ལེནྡྲཱ་ཡ་སྭཱ་ཧཱ། རྡོ་རྗེ་རྒྱ་མཚོ་ནི་བྱང་ཆུབ་ཀྱི་སེམས་ཀྱི་རྒྱ་མཚོ་སྟེ་དཔལ་གནོད་གནས་སོ། །དེ་ལ་རྫས་བསྒྲུབ་པ་ནི་ནོར་ཐོབ་པ་ལའོ། །དེའི་དོན་གྱི་ཏོག་གི་དཔལ་ནི་རྒྱལ་མཚན་མཛེས་པའོ། །དེའི་འབྲས་བུ་ཉིད་ཀྱིས་དེ་གསལ་བར་བྱེད་པ་ཉིད་ཀྱི་ཕྱིར་རོ། །རྫས་སྒྲུབ་པའོ། །མི་ཟད་པའི་འདོད་པ་ནི་རྡོ་རྗེ་འདོད་པ་སྟེ། དེ་རྣམས་ཀྱི་ཉེ་བར་ལོངས་སྤྱོད་པའོ། །
དེའི་དོན་གྱི་དཔལ་ནི་དེ་སྒྲུབ་པར་བྱེད་པ་ཉིད་ཡིན་པའི་ཕྱིར་རོ། །དེ་ཡང་ཁྱད་པར་ཅན་གྱི་གནོད་སྦྱིན་མོ་ཡིན་ནོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །གནོད་སྦྱིན་མོ་ཐམས་ཅད་ཀྱི་ཚིག་ནི་བསྡུས་པའོ། །དེ་ལས་སྐྱེས་པའི་རྡོ་རྗེ་ནི་གནོད་སྦྱིན་མོ་གཅིག་གི་གཟུགས་སོ། །དེའི་དམ་ཚིག་ནི་ས་བོན་ནོ། །མཁའ་དབྱིངས་རྡོ་རྗེ་ནི་དེའི་མདུན་གྱི་ནམ་མཁའོ། །རིན་ཆེན་བཞི་ལས་བྱས་ཞེས་བྱ་བ་ནི་ཤར་དང་ལྷོ་དང་ནུབ་དང་བྱང་གི་ངོས་རྣམས་ཤེལ་དང་ཨིནྡྲ་ནཱི་ལ་དང་པདྨ་རཱ་ག་དང་མརྒད་ལ་སོགས་པའི་རི་བོའོ། །ཀུན་དུ་འཁྲིགས་ཞེས་བྱ་བ་ནི་ཁྱབ་པའོ། །རྡོ་རྗེ་གསུམ་གྱི་སྦྱོར་བས་དབབ་ཅེས་བྱ་བ་ནི་ཇི་སྐད་དུ་བཤད་པའི་རི་བོའི་ཕུག་གི་དབུས་ཀྱི་པདྨ་ལ་འདུག་པ་ཟླ་བའི་མཚན་མའི་ཡི་གེ་ཀྵྞིཾ་ནི་རྡོ་རྗེ་སྦྱོར་བ་གསུམ་སྟེ། དེ་ལ་སྦྱོར་བ་དེས་དབབ་པར་བྱ་སྟེ། ཀྵྞིཾ་གི་འོད་ཟེར་རྣམས་ཀྱིས་བཀུག་ནས་ཡི་གེ་ཀྵྞིཾ་ལ་གཞུག་པར་བྱའོ་ཞེས་བྱ་བའི་དོན་ཏོ། །གཟུགས་གཅིག་དག་ནི་ཞེས་བྱ་བ་ནི་རྒྱུད་གཞན་དག་གི་རྗེས་སུ་འབྲངས་ནས་ལོངས་སྤྱོད་ལྡན་མ་ལ་སོགས་པ་གནོད་སྦྱིན་མོའམ། གཞན་གང་ཡང་རུང་བའི་གཟུགས་སོ། །དེ་ལ་ལོངས་སྤྱོད་དང་ལྡན་པ་ནི། རིན་པོ་ཆེའི་རིའི་ཕུག་དེ་ཉིད་ན་གཡོན་པས་དཔག་བསམ་གྱི་ཤིང་དེ་ལ་བརྟེན་པས་གཡས་པར་གདུགས་དཀར་པོ་ཐོགས་པ་གསེར་གྱི་མདོག་ཅན་མ་ཡིད་དུ་འོང་བའི་གཟུགས་དང་ལྡན་པ་དར་ལ་བབ་ཅིང་སྒེག་པས་རྣམ་པར་རོལ་པའི་ཁ་འཛུམ་པ་ཅན་དར་ལའི་སྟོད་གཡོགས་དང་སྨད་གཡོགས་ཅན་རྒྱན་ཐམས་ཅད་ཀྱིས་བརྒྱན་པ། ཁ་དོག་ལྔའི་མེ་ཏོག་ཕྲེང་བས་སྐྲ་ཕྱེད་འཁྱིལ་བའི་མགོ་བརྒྱན་པའོ། །ལས་གསུམ་ཞེས་བྱ་བ་ལ་སོགས་པ་ལ་རང་ཉིད་འཇམ་པའི་རྡོ་རྗེའི་ཏིང་ངེ་འཛིན་ལ་གནས་ཏེ། གནོད་སྦྱིན་མོ་དེའི་བསམ་གཏན་བསྒོམ་པར་བྱའོ། །ཇི་ལྟ་བུ་ཞིག་ཅེ་ན་ལས་གསུམ་སྟེ། ལས་གསུམ་པོ་འདི་ལ་ཡོད་པའི་ཕྱིར་རོ། །ཇི་ལྟར་ན་ལས་གསུམ་ཡིན་ཞེ་ན། རྡོ་རྗེའི་བྱེ་བྲག་གིས་ཏེ། སྐུ་ལ་སོགས་པའི་དབྱེ་བས་སོ། །ཁྲོ་བོ་ཞེས་བྱ་བ་ནི་གཤིན་རྗེ་གཤེད་དོ། །སྔགས་ཀྱི་ཚིག་ཅེས་བྱ་བ་ནི་ཡི་གེ་ཀྵྞིཾ་ངོ༌། །རྡོ་རྗེ་སྦྱོར་བ་ཞེས་བྱ་བ་ནི་སྙོམས་པར་འཇུག་པའི་བདེ་བ་ལ་ཡང་དག་པར་སྦྱོར་བ་སྟེ། འདི་དག་ནི་གོ་རིམས་བཞིན་དུ་དེའི་ལུས་དང་ངག་དང་ཡིད་ཀྱི་ལས་རྣམས་ཡིན་ནོ། །གནོད་སྦྱིན་མོ་ཐམས་ཅད་ཀྱི་མཉམ་པ་ཉིད་ནི་བསྡུས་པ་སྟེ།
དེ་གནས་པ་ནི་བདེ་བ་དང་ཡིད་བདེ་བའོ། །དེ་བསྒོམ་པ་ཡང་ཡིན་ལ་བརྟན་པ་ཉིད་ཀྱིས་ན་རྡོ་རྗེ་ཡང་ཡིན་པའི་ཕྱིར་དེ་སྐད་ཅེས་བྱའོ། །གནོད་སྦྱིན་མོའི་སྒྲུབ་པའི་ཐབས་སོ། །རྡོ་རྗེའི་སྔགས་ཐམས་ཅད་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། དེ་རྣམས་ཀྱི་དངོས་གྲུབ་པོ། །དེའི་རྣམ་པར་འཕྲུལ་པ་ནི་མཐུའོ། །དེ་ལ་དམིགས་པ་ཉིད་ཀྱི་ཕྱིར་དང་དབྱེར་མི་ཕྱེད་པ་ཉིད་ཀྱི་ཕྱིར་ཏིང་ངེ་འཛིན་ལ་དེ་སྐད་ཅེས་བྱའོ། །དངོས་གྲུབ་ཕྲ་མོ་ཞེས་བྱ་བ་ནི་དངོས་གྲུབ་དམན་པའི་བྱ་བའི་ཁྱད་པར་རོ། །སྐུ་དང་གསུང་དང་ཐུགས་ཡང་དག་པར་གྲུབ་པ་ནི་ཐོབ་པའི་ཁྱད་པར་རོ། །སངས་རྒྱས་གཟུགས་ནི་མཚན་ལ་སོགས་པའོ། །དེ་འཛིན་པ་དང་འདྲ་བར་འོད་བྱེད་པས་ན་སངས་རྒྱས་གཟུགས་འཛིན་འོད་བཟང་བོའོ། །འཛམ་བུ་ཆུ་བོའི་གསེར་འོད་འདྲ། །ཞེས་བྱ་བ་ནི་ལུས་གསེར་གྱི་མདངས་དང་ལྡན་པའོ། །དེ་ལྟར་སུ་ཞིག་འགྱུར་ཞེ་ན། དངོས་གྲུབ་ཕྲ་མོ་དག་ལ་གནས་པ་རྣམས་སོ། །དེ་ལྟར་ཐུན་མོང་གི་ཁྱད་པར་གསུངས་ནས་ཐུན་མོང་མ་ཡིན་པའི་རྡོ་རྗེ་འཆང་བའི་གཙོ་བོ་ནི་ཐུགས་ཀྱི་རྡོ་རྗེ་གཙོ་བོར་གྱུར་བའོ། །རིག་པ་འཛིན་པའི་གཙོ་བོ་སྟེ། གསུང་རྡོ་རྗེ་ནི་གཙོ་བོ་ཡིན་ཏེ། ཅིག་ཤོས་ཀྱིས་ནི་གཞན་རྣམས་ལ་ནི་སྐུ་རྡོ་རྗེ་གཙོ་བོའོ། །བཤད་མ་ཐག་པའི་ཚོགས་གང་གིས་གནོད་སྦྱིན་མོ་གྲུབ་པ་དེ་ནི་གནོད་སྦྱིན་གྱི་རྒྱལ་པོའོ། །སོགས་པ་སྨོས་པས་ནི་བཅུ་གཉིས་པ་ལས་གསུངས་པའི་རིག་པ་འཛིན་པ་སྟེ། དེ་རྣམས་ཀྱི་དངོས་གྲུབ་ནི་གནོད་སྦྱིན་རྒྱལ་པོ་ལ་སོགས་པ་གྲུབ་པ་ནའོ། །དངོས་གྲུབ་མཆོག་གི་བྱ་བའི་ཁྱད་པར་ནི། དེ་ལ་ཞེས་བྱ་བ་ལ་སོགས་པ་གསུངས་ཏེ། ཐམས་ཅད་ཞུ་བའི་རང་བཞིན་གྱིས་བཅོམ་ལྡན་འདས་ནི་རྡོ་རྗེ་ཐམས་ཅད་ཡིན་ལ། དེའི་དངོས་གྲུབ་གསུམ་པའི་འབྲས་བུའོ། །དེའི་གཟུགས་དང་གསང་བ་དང་སྔགས་ཀྱི་དངོས་གྲུབ་རྣམས་ནི་སྐུ་དང་ཐུགས་དང་གསུང་གི་ཁྱད་པར་རོ། །ཐམས་ཅད་ནི་མ་ལུས་པའོ། །སྔགས་ཀྱིས་གྲུབ་ཅིང་ཞེས་བྱ་བ་ནི་སྔགས་ཏེ་ངག་གི་བྱ་བ་གྲུབ་པའོ། །མཛེས་པའི་གཟུགས་ནི་མཚན་དང་དཔེ་བྱད་དང་ལྡན་པས་འཇིག་རྟེན་ཁམས་ནི་ཐམས་ཅད་དུ་མཐོང་བ་ཉིད་ཀྱིས་དགའ་བར་འགྱུར་ཞེས་བྱ་བར་སྦྱོར་རོ། །འདོད་པ་ཡིས་ཞེས་བྱ་བ་ནི་འདོད་པ་ཙམ་གྱིས་འགྲུབ་ཅིང་ཞེས་བྱ་བར་སྦྱར་རོ། །ཐམས་ཅད་ཀྱི་མཆོག་བསྟན་པའི་
ཕྱིར་གཙུག་ཏོར་ཞེས་བྱ་བ་ལ་སོགས་པ་གསུངས་ཏེ། ཡིད་བཞིན་ནོར་བུའི་བདག་པོར་གྱུར་པ་གང་ཡིན་པ་དེ་ནི་དངོས་གྲུབ་ཐམས་ཅད་ཀྱི་རྩེ་མོ་ཡིན་ཏེ། ཆོས་ཐམས་ཅད་ལ་དབང་བསྐུར་བའི་ཆོས་ཀྱི་སྐུའི་མཚན་ཉིད་ཅན་གྱི་སངས་རྒྱས་ཀྱི་བྱང་ཆུབ་ནི་ཡིད་བཞིན་ནོར་བུའོ། །དེའི་བདག་པོ་ནི་གཙོ་བོ་ཡིན་ཏེ། དེ་ཐོབ་པ་ཉིད་ཀྱི་ཕྱིར་རོ། །སངས་རྒྱས་བྱང་ཆུབ་བྱེད་པའི་མཆོག །ཅེས་བྱ་བ་ནི་སངས་རྒྱས་བྱང་ཆུབ་དེའི་ཐབས་ཕྱི་མའོ། །སངས་རྒྱས་རྡོ་རྗེ་རབ་བསྒོམ་པའི། །ཞེས་བྱ་བ་ལ་སངས་རྒྱས་ནི་དཀྱིལ་འཁོར་གྱི་བདག་པོའོ། །དེའི་རྡོ་རྗེ་ནི་གསང་བ་གསུམ་པོ་ཡིན་ལ་དེ་རྣམས་བསྒོམ་པ་ནི་དཀྱིལ་འཁོར་ཐམས་ཅད་ཀྱི་རྣམ་པར་རབ་ཏུ་ཕྱེ་ནས་བསྒོམ་པ་སྟེ། སྒྲུབ་པ་ཆེན་པོ་ཞེས་བྱ་བའི་དོན་ཏོ། །དངོས་གྲུབ་ཐམས་ཅད་སྟོན་པར་མཛད་པའི་ཕྱིར་བསམ་པ་ཐམས་ཅད་ཡོངས་སུ་རྫོགས་པ་དེ་ཡིན་ལ་མི་སླུ་བ་ཉིད་ཡིན་པའི་ཕྱིར་རྡོ་རྗེ་ཡང་ཡིན་པས་ནའོ། །དངོས་གྲུབ་མཆོག་འདོད་པ་རྣམས་ཀྱིས་ནི་ཡན་ལག་དྲུག་གི་བསྙེན་པ་དང་ཉེ་བར་བསྒྲུབ་པའི་འབྲས་བུ་ལ་གནས་པས་རིག་པའི་བརྟུལ་ཞུགས་ཟླ་བ་དྲུག་གི་བར་དུ་སྤྱད་ལ། དེའི་འོག་ཏུ་བསྒྲུབ་པ་བརྩམ་པར་བྱ་བ་དེའི་ཕྱིར་འདིའི་རིག་པའི་བརྟུལ་ཞུགས་བརྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ནི་སྐུ་རྡོ་རྗེ་ལ་སོགས་པའོ། །དེ་རྣམས་ཀྱི་སྐུ་དང་གསུང་དང་ཐུགས་ནི་སྐུ་ལ་སོགས་པ་དང་འདྲ་བའོ། །དེ་དག་ཉིད་ནི་རིག་པའི་དོན་གྱི་བརྟུལ་ཞུགས་ཡིན་ལ། དེ་ཡང་དག་པར་ལེན་པའི་སྤྱོད་པ་ཉིད་ནི་བླ་མ་ལས་ཡང་དག་པར་བླངས་པ་སྔོན་དུ་འགྲོ་བ་ཅན་གྱིས་ཉམས་སུ་ལེན་པའོ། །རང་ཚུལ་ཉིད་ཀྱི་ཞེས་བྱ་བ་ནི་ལུགས་མ་དང་བྱས་པ་ལ་སོགས་པའི་གཟུགས་དང་བཅས་པ་ཉིད་ཀྱིས་སོ། །སྐུ་དང་གསུང་དང་ཐུགས་ཀྱི་རིག་པའི་བརྟུལ་ཞུགས་ཞེས་བྱ་བ་ལ། རལ་པ་དང་ཐོར་ཚུགས་ལ་སོགས་པའི་སྐུའི་བརྟུལ་ཞུགས་སོ། །གཉི་ག་ལྷ་ལ་སོགས་པར་མོས་པ་ནི་གསུང་གི་བརྟུལ་ཞུགས་སོ། །རང་གི་རིག་མ་དང་གཉིས་སུ་མེད་པའི་སྦྱོར་བ་ལས་བྱུང་བའི་ཤེས་རབ་ཀྱི་ཡེ་ཤེས་ནི་ཐུགས་ཀྱི་བརྟུལ་ཞུགས་སོ། །ཐོར་ཚུགས་དབུ་རྒྱན་ནི་ལུགས་མ་དང་བྱས་པ་ལ་སོགས་པའི་མི་བསྐྱོད་པས་བརྒྱན་པའོ། །ཁ་དོག་དཀར་པོ་འདྲ་བ་ནི་དཀར་ཞིང་སྣུམ་པས་ཡན་
ལག་བཅོས་པའོ། །ཆོ་ག་བཞིན་དུ་ཐམས་ཅད་ཅེས་བྱ་བ་ནི་ལག་ཏུ་འཁོར་ལོ་དཀར་པོ་རྩིབས་བརྒྱད་པ་དང༌། རྒྱན་དང་གོས་སྲབ་ཅིང་ཡང་ལ་མཛེས་པའོ། །དཔུང་པ་དག་ལ་དཔུང་རྒྱན་གཡས་པའི་རིལ་བུ་གསུམ་སྟེ། ལུས་དང་ངག་དང་སེམས་བསྲུང་བའི་ཕྱིར་སངས་རྒྱས་ཐམས་ཅད་ཀྱིས་ཡང་དག་པར་གཏད་པའོ། །སྔགས་ཀྱི་སྡོམ་པ་ནི་འཆད་པར་འགྱུར་བའི་སྡོམ་པའི་ཚིགས་སུ་བཅད་པ་སྟེ། དེས་བླ་མ་ལས་ཡང་དག་པར་མནོས་པའོ། །རྒྱན་རྣམས་ཀུན་ནི་རིན་ཐང་མེད་པ་ཤིན་ཏུ་མཛེས་པའོ། །སྤྱན་གྱི་གོ་འཕང་ནི་གཟུགས་སོ། །ལོངས་སྤྱོད་ནི་རིན་པོ་ཆེའི་ཅོད་པན་ལ་སོགས་པའོ། །རྡོ་རྗེ་ནི་ཅོད་པན་ལ་འོད་དཔག་ཏུ་མེད་པའོ། །མཚན་མ་ནི་ལག་པའི་འཁོར་ལོའོ། །ཕྱག་རྒྱའི་ཆོ་ག་ནི་ཕྱག་རྒྱ་ཆེན་པོ་ལ་སོགས་པ་བསྒོམ་པའི་ཆོ་གའོ། །སྔགས་ཀྱི་ཆོ་ག་ནི་བཟླས་པའི་ཆོ་གའོ། །སྔགས་ཀྱི་རབ་ཏུ་སྦྱོར་བ་ནི་སྔགས་ཀྱི་རྒྱུད་དེ་དེ་རྣམས་ལ་ལེགས་པར་བསླབས་པ་ནི་སློབ་མར་ཡང་དག་པར་བྱས་པ་ཞེས་བྱ་བའི་དོན་ཏོ། །སངས་རྒྱས་འགྱུར་ཞེས་བྱ་བ་ནི་རྣམ་པར་སྣང་མཛད་དུའོ། །ཟླ་བ་དྲུག་གིས་ཞེས་བྱ་བ་ནི་བརྟུལ་ཞུགས་ཀྱི་དུས་སུའོ། །རྟག་ཏུ་གཞན་གྱིས་ཞེས་བྱ་བ་ལ་སོགས་པ་འདི་ནི་སྔགས་ཀྱི་སྡོམ་པའི་ཚིགས་སུ་བཅད་པའོ། །རྐུ་བ་ནི་རང་གི་ལྷའི་ཆ་ལུགས་འཛིན་པའོ། །བསད་པ་ནི་ལྷར་མོས་པས་ཐ་མལ་བའི་ང་རྒྱལ་ལོ། །འདོད་ཆགས་རྡོ་རྗེ་ནི་ཇི་སྐད་དུ་བཤད་པའི་རིག་པ་དང༌། གཉིས་སུ་མེད་པར་སྦྱོར་བ་ལས་བྱུང་བ་ཆོས་ཀྱི་དབྱིངས་སོ་སོར་རྟོག་པ་བསྒོམ་པའོ། །དེ་ཉིད་ནི་གནས་ཏེ་བླ་ན་མེད་པའི་བདེ་བའོ། །དེ་ལ་སྤྱད་པ་ནི་ལོངས་སྤྱོད་པའོ། །སྡོམ་པ་འདིས་ནི་ཀུན་དུ་བསྡམས། །ཞེས་བྱ་བ་ནི་ང་ཡི་སྡོམ་པ་འདི་རྣམས་ཡང་དག་པར་བླངས་པས་ན་ཀུན་དུ་བསྡམས་པའོ། །རྣམ་པར་སྣང་མཛད་ཀྱི་རིག་པའི་བརྟུལ་ཞུགས་གསུངས་ནས་འོད་དཔག་ཏུ་མེད་པ་དང་མི་བསྐྱོད་པ་དག་གིས་གསུངས་པ་ལ། འདོད་ཆགས་རྡོ་རྗེ་ནི་འོད་དཔག་ཏུ་མེད་པའོ། །དེའི་ལྕགས་ཀྱུ་མོ་ནི་འགུགས་པར་བྱེད་པ་སྟེ་གོས་དཀར་མོའོ། །ཡོན་ཏན་སྐ་རགས་ཞེས་བྱ་བ་འདི་སངས་རྒྱས་ཀྱི་ཡོན་ཏན་ཉིད་ཀྱི་སྐ་རགས་མངའ་བས་ན་དེ་སྐད་ཅེས་བྱའོ། །གསུང་གི་རྡོ་རྗེ་ནི་འོད་དཔག་ཏུ་མེད་པའོ། །ཐུགས་མཆོག་ནི་མི་བསྐྱོད་པའོ། །འདི་ནི་ཞེས་བྱ་བ་ནི་བཤད་མ་ཐག་པའི་
རིག་མ་གཉིས་སོ། །རྣམ་པ་ཀུན་དུ་ཞེས་བྱ་བ་ནི་གཉི་གའི་རལ་པ་དང་ཅོད་པན་ལ་སོགས་པའི་རྣམ་པ་ཐམས་ཅད་སྔ་མ་དང་རྗེས་སུ་མཐུན་པར་གོ་སླ་བེའོ། །ཡོན་ཏན་དང་ལྡན་པའི་ཕྱིར་རིག་མ་མ་རྙེད་པའམ། སྒྲུབ་པ་པོའི་ཕྱིའི་རིག་མ་འགའ་ཞིག་གིས་རྒྱབ་ཀྱིས་ཕྱོགས་ན་ཇི་ལྟར་བྱ་ཞེ་ན། བསམ་གཏན་ཞེས་བྱ་བ་ལ་སོགས་པ་གསུངས་ལ་ཡང་ན་ཞེས་བྱ་བ་ནི་ཕྱོགས་གཞན་ཞེས་བྱ་བའི་དོན་ཏོ། །རང་གི་ཕྱག་རྒྱའམ་ཞེས་བྱ་བའི་སྒྲས་ནི་ངེས་པར་གཟུང་བ་སྟེ། ལྷན་ཅིག་སྐྱེས་པའི་རང་གི་སྣང་བ་ཁོ་ན་ཡིན་གྱི་ཕྱི་རོལ་གྱི་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་བསམ་གཏན་ཞེས་བྱ་བ་གསུངས་ཏེ། ཡིད་ཀྱི་རང་བཞིན་ཅན་ཞེས་བྱ་བའི་དོན་ཏོ། །བསམ་ཞེས་བྱ་བ་ནི་སྔ་མ་བཞིན་དུ་སྤྱན་ལ་སོགས་པའི་གཟུགས་སུའོ། །ཡིག་གསུམ་རྡོ་རྗེ་ཅན་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཡི་གེ་གསུམ་མོ། །དེ་རྣམས་ཀྱི་རྡོ་རྗེ་ནི་སྐུ་ལ་སོགས་པ་དང་འདྲ་བའི་རལ་པ་དང༌། ཅོད་པན་ལ་སོགས་པ་དེ་དང་བདག་ཉིད་ལྡན་པའོ། །གལ་ཏེ་ཕྱི་རོལ་གྱི་རིག་མ་མ་མཐོང་བ་དེའི་ཚེ་ཇི་ལྟར་སངས་རྒྱས་རྣམས་མཉེས་པར་འགྱུར་ཞེ་ན། དེ་ལྟར་ཞེས་བྱ་བ་ལ་སོགས་པ་གསུངས་ཏེ། དེ་རྣམས་ནི་ཐམས་ཅད་མཁྱེན་པ་ཉིད་ཡིན་པའི་ཕྱིར་དེ་རྣམས་ཀྱི་རང་བཞིན་ཅན་གྱི་རིག་མ་དང་སེམས་བརྟན་པར་གཟིགས་པ་ན། ཤིན་ཏུ་མཉེས་པར་འགྱུར་རོ་ཞེས་བྱ་བར་དགོངས་སོ། །རྡོ་རྗེ་ཞེས་བྱ་བ་ནི་བསྙེན་པ་དང་ཉེ་བའི་སྒྲུབ་པ་དག་གིས་རྡོ་རྗེ་གསུམ་དུ་གྲུབ་པའོ། །འདས་དང་ཞེས་བྱ་བ་ནི་བསྐྱོད་པའམ་ཉམས་པའོ། །རྡོ་རྗེའི་ཡི་གེ་ནི་འདོད་པ་དང་ཐར་བའོ། །འཇིག་པར་འགྱུར་བ་ནི་འཇིག་པ་ཐོབ་པར་འགྱུར་བ་སྟེ། འགྲུབ་པར་མི་འགྱུར་རོ་ཞེས་བྱ་བའི་དོན་ཏོ། །རྡོ་རྗེ་གསུམ་གྱི་ཡེ་ཤེས་ནི་རྟོག་པའོ། །དེའི་དོན་སྟོན་ཅིང་གོམས་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཚུལ་ཆེན་ཡིན་པ་ནི་ཐབས་ཆེན་པོ་ཡིན་པའོ། །རྡོ་རྗེ་གསུམ་གྱི་ཡེ་ཤེས་འབྱུང༌། །ཞེས་བྱ་བ་ནི་སྐྱེས་པའོ། །རིག་པའི་བརྟུལ་ཞུགས་ཉིད་ནི་དམ་ཚིག་གི་དེ་ཁོ་ན་ཉིད་དེ། དམ་ཚིག་གི་མཆོག་གོ །དེ་ཉིད་ནི་རྡོ་རྗེ་སྟེ། དངོས་གྲུབ་ཀྱི་སྒྲིབ་པ་ཐམས་ཅད་འཇིག་པར་བྱེད་པ་ཉིད་ཀྱི་ཕྱིར་རོ། །དེ་སྟོན་པར་མཛད་པ་ཉིད་ཀྱི་ཕྱིར་བཅོམ་ལྡན་འདས་ལ་ཡང་དེ་སྐད་ཅེས་བྱའོ། །དངོས་གྲུབ་ཐམས་ཅད་ཀྱི་དོན་གྱི་དཀྱིལ་འཁོར་ཏེ། དེའི་རྡོ་རྗེ་ནི་གསང་བའི་ལས་རྣམས་སོ། །དེ་
རྣམས་ཀྱི་མངོན་པར་བྱང་ཆུབ་པ་ནི་མ་ལུས་པར་ཡང་དག་པར་རྟོགས་པའོ། །དེའི་དོན་གྱི་ལེའུ་ལ་དེ་སྐད་ཅེས་བྱའོ། །གསང་བ་འདུས་པའི་བཤད་སྦྱར་སྙིམ་པའི་མེ་ཏོག་ལས་ལེའུ་བཅུ་དྲུག་པའོ།། །།