ལེའུ་བཅོ་བརྒྱད་པ། གསང་བ་ཐམས་ཅད་སྟོན་པ་རྡོ་རྗེའི་ཡེ་ཤེས་ཀྱིས་བྱིན་གྱིས་རློབ་པ་ཞེས་བྱ་བའི་བཤད་སྦྱར།
དེ་ལྟར་བཅོམ་ལྡན་འདས་རྡོ་རྗེ་འཛིན་པས་རྩ་བའི་རྒྱུད་ལེའུ་བཅུ་བདུན་གྱིས་གསུངས་པ་ལ། དེར་གནས་པའི་རྡོ་རྗེའི་ཚིག་གསལ་བར་བྱེད་པའི་ཕྱིར་རྒྱུད་ཕྱི་མ་ལེའུ་བཅོ་བརྒྱད་པ་དེ་བཞིན་གཤེགས་པ་ཐམས་ཅད་ཀྱི་གསུང་གཅིག་ཏུ་བསྟན་པར་བྱ་བ་དེ་བྱང་ཆུབ་སེམས་དཔའ་རྣམས་ཀྱིས་ཞུ་བའི་སྒོ་ནས་སྐབས་དབྱེ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་པ་ལ། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ནི་སྒྲིབ་པ་མེད་ཅིང་དག་པ་ནམ་མཁའི་ཁམས་ཀྱི་རང་བཞིན་ཅན་ཡིན་པའི་ཕྱིར་རོ། །དེ་ཡང་བཅོམ་ལྡན་འདས་དཀྱིལ་འཁོར་གྱི་བདག་པོ་རྡོ་རྗེ་འཆང་ཆེན་པོ་སྟེ། དེའི་སྐུ་དང་གསུང་དང་ཐུགས་ཀྱི་གསང་བའོ། །དེ་རྣམས་ཀྱི་བསྟན་པ་ནི་བཤད་པའི་རྣམ་པའོ། །དངོས་པོ་ཐམས་ཅད་དེ་མ་ལུས་པའོ། །དེ་དུས་ཇི་ལྟ་བ་བཞིན་དུ་མཐོང་ཞིང་ཐོས་ལ་ཁོང་དུ་ཆུད་ནས་ཞེས་བྱ་བ་ལ་དུས་དེ་གཟུགས་སུ་བསྟན་པའི་དུས་སུ་མཐོང་ལ། གསུང་དུ་བཤད་པའི་དུས་སུ་ཐོས་ཤིང་ཕྱིས་ཁོང་དུ་ཆུད་པ་དེ་མངོན་སུམ་དུ་བྱས་ནས་སོ། །ཇི་ལྟ་བ་བཞིན་དུ་ཞེས་བྱ་བ་ནི་ཕྱིན་ཅི་མ་ལོག་པར་རོ། །དེ་དག་ཅེས་བྱ་བ་ནི་གང་གིས་བསྟན་པ་འདི་གསན་པའོ། །གཟིགས་པ་ནི་ཉིད་ཀྱིས་ཆོས་ཐམས་ཅད་མངོན་པར་རྫོགས་པར་ཐུགས་སུ་ཆུད་པའོ། །དེ་དག་གིས་ཐ་སྙད་དུ་མཛད་པའི་ཕྱིར་ཆོས་གཟིགས་
པ་དང་ལྡན་པའོ། །གསོལ་ཏོ་ཞེས་བྱ་བ་ནི་ཞུས་པའོ། །ཨེ་མའོ་ཞེས་བྱ་བ་ནི་ངོ་མཚར་གྱི་སྒོ་ནས་དྲི་བ་ཞུས་པའོ། །ཀུན་དུ་བཟང་པོ་ནི་རྡོ་རྗེ་འཆང་བ་སྟེ་དེ་ནི་སྐུ་དང་གསུང་དང་ཐུགས་སོ། །དེ་རྣམས་ཀྱི་ངེས་པ་དག་ནི་ཡོངས་སུ་ཤེས་པར་བྱ་བའི་དེ་ཁོ་ན་ཉིད་དེ་དེ་ངོ་མཚར་ཡིན་ནོ། །ཇི་ལྟར་ངོ་མཚར་ཡིན་ཞེ་ན། ཀུན་དུ་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་དུའོ། །གང་དེའི་སྐུ་དང་གསུང་དང་ཐུགས་དག་གིས་རྣམ་པར་བཞུགས་སོ། །གང་ལ་བཞུགས་ཤེ་ན། སེམས་ཅན་ཐམས་ཅད་ལའོ། །ཅི་ཁོ་བོ་ཅག་དང་འདྲ་ཞེ་ན། མ་ཡིན་ནོ་ཞེས་གསུངས་པ་ནི་དུས་གསུམ་གྱི་རྡོ་རྗེའི་ངོ་བོར་ཡང་དག་བྱུང་ངོ༌། །དེ་བཞིན་གཤེགས་པ་ཐམས་ཅད་ཀྱི་གསང་བ་གསུམ་ནི་དུས་གསུམ་ཡིན་ལ། དེ་རྣམས་ཀྱི་རྡོ་རྗེ་ནི་རོ་གཅིག་པར་སྣང་བའི་བདག་ཉིད་ཅན་བྱང་ཆུབ་ཀྱི་སེམས་ཤིན་ཏུ་རྣམ་པར་དག་པ་དེ་ཉིད་ངོ་བོར་ཏེ། རང་གི་རང་བཞིན་དེར་ཡང་ཡང་དག་པར་བྱུང་བ་སྟེ། དེ་རྣམས་ཀྱི་སྒྲིབ་པ་མ་ལུས་པར་སྤངས་པའི་ཕྱིར་རོ། །དེ་ཉིད་ཀྱི་ཕྱིར་བྱང་ཆུབ་རྡོ་རྗེ་ནི་རྡོ་རྗེ་འཆང་གི་གནས་ཆོས་ཀྱི་སྐུ་ཐོབ་པ་ཡིན་ནོ། །དེ་ཉིད་ཀྱི་ཕྱིར་ལོངས་སྤྱོད་རྫོགས་པའི་སྐུའི་སྒོ་ནས་མི་ཟད་པ་ཉིད་ཀྱི་ཕྱིར་སངས་རྒྱས་རྡོ་རྗེ་ཡང་དེ་དག་ཡིན་ལ། སྤྲུལ་པའི་སྐུའི་སྒོ་ནས་དེ་དང་དེར་བལྟམས་པ་དང་མྱ་ངན་ལས་འདས་པའི་ཕྱིར་རྫུ་འཕྲུལ་ཆེན་པོ་ཡིན་པས་ན། སངས་རྒྱས་རྡོ་རྗེ་རྫུ་འཕྲུལ་ཆེའོ། །འདི་ཙམ་གྱིས་ནི་ཐམས་ཅད་དུ་ཐམས་ཅད་ཀྱི་ཚེ་སྐུ་ཐམས་ཅད་ཀྱིས་སངས་རྒྱས་ཐམས་ཅད་ཀྱི་བཞུགས་པའི་གནས་ཉིད་ཀྱི་སྒོ་ནས་ངོ་མཚར་ཏེ་གསུངས་པ་ཡིན་ནོ། །ཡང་ཁྱད་པར་ལྔས་ངོ་མཚར་དུ་བསྟན་པའི་ཕྱིར་ཨེ་མའོ་ཞེས་བྱ་བ་ལ་སོགས་པ་གསུངས་པ་ལ། འདིར་རབ་ངོ་མཚར་ཆེ་ཞེས་བྱ་བ་ནི་རྒྱ་ཆེ་བའི་ཁྱད་པར་གྱིས་སོ། །ཞི་བ་ཞེས་བྱ་བ་ནི་སྤྲོས་པ་མེད་པའི་ཁྱད་པར་གྱིས་སོ། །དབང་པོ་འདས་ཞེས་བྱ་བ་ནི་ཟབ་པའི་ཁྱད་པར་གྱིས་སོ། །མཆོག་ཏུ་མྱ་ངན་འདས་ཞེས་བྱ་བ་ནི་སྤངས་པའི་ཁྱད་པར་གྱིས་ཏེ། ཀུན་ནས་ཉོན་མོངས་པའི་སྒྲིབ་པ་ཐམས་ཅད་མ་ལུས་པར་སྤངས་པའི་ཕྱིར་རོ། །འཁོར་བ་དག་གི་རྒྱུན་ཞེས་བྱ་བ་ནི་སྐུ་རྟག་པ་ཉིད་ཀྱི་ཁྱད་པར་གྱིས་སོ། །དེ་དེ་བཞིན་ནོ་ཞེས་གསུངས་པ་ནི་ལན་ཏེ་ངེས་པར་གཟུང་བས་ཐེ་ཚོམ་གཅོད་པའི་ཕྱིར་རོ། །ཕྱི་མའི་ཕྱི་མ་ཞེས་བྱ་བ་ནི་མཆོག་
ལས་ཀྱང་མཆོག་ཏུ་གྱུར་པའོ། །ཡང་དག་གསུང་བས་ཞེས་བྱ་བ་ནི་རྡོ་རྗེ་འཆང་གིས་སོ། །གང་ཞེས་བྱ་བ་ནི་རྩ་བའི་རྒྱུད་དེ། །དེ་ལ་སྦས་པའི་གནས་གང་ཡིན་པ་དེ་རྣམས་རྟོགས་པ་ཉིད་ནི་དོན་དེ་བྱ་བ་ཉིད་ཡིན་པས་ན་དོན་དེའི་ཕྱིར་རོ། །ཁྱེད་ལ་ཞེས་བྱ་བ་ནི་ཁྱེད་རྣམས་ལའོ། །ལེགས་སོ་ལེགས་སོ་ཞེས་བྱ་བ་ནི་སྤྲོ་བ་བསྐྱེད་པའོ། །སེམས་དཔའ་ཆེ་ཞེས་བྱ་བ་ནི་དགོངས་པ་ཆེན་པོ་སྟེ། སེམས་ཅན་རྣམས་ཀྱི་དོན་ཆེན་པོ་བྱ་བའི་བསམ་པ་ཡོད་པའི་ཕྱིར་རོ། །གསང་བ་རྣམས་ཐོས་པ་དང་འཛིན་པ་དང་སྟོན་པ་ལ་མཁས་པ་དང་ལྡན་པས་ན་ཡོན་ཏན་གྱི་གནས་སོ། །སོམ་ཉི་ཞེས་བྱ་བ་ནི་ཐེ་ཚོམ་ཅན་གྱི་དོན་ཏོ། །འདིར་ཞེས་བྱ་བ་ནི་རྒྱུད་ལའོ། །གསང་བ་ལ་སོགས་པའི་སྒྲ་རང་གི་ངོ་བོ་ཙམ་དུ་བསྟན་པའི་ཕྱིར་འབྲེལ་པ་མེད་པ་ཅན་ཡིན་མོད་ཀྱི་ཞེས་བྱ་བ་བརྗོད་པའི་ཕྱིར་འབྲེལ་པ་ཐོབ་པར་འགྱུར་རོ་ཞེས་བྱ་བའི་སྒྲ་འདིས་ནི་ཞེས་བྱ་བའི་དོན་ཏོ། །དཔེར་ན་འདི་བ་ལང་ཞེས་སྨྲས་སོ་ཞེས་བྱ་བ་ལྟ་བུ་སྟེ། འདིའི་སྒྲ་ཞེས་བྱ་བའི་དོན་ཏོ་ཞེས་བྱ་བའི་སྒྲ་འདི་ནི་རྣམ་པར་དབྱེ་བའི་ཚིག་ཅན་འདི་ཐམས་ཅད་ཀྱི་དོན་ལ་འཇུག་པ་ཡིན་ནོ། གསང་བ་འདུས་པ་ཞེས་བྱ་བ་འདི་ནི་རྣལ་འབྱོར་གྱི་རྒྱུད་ཡིན་ཏེ། དེ་རྗོད་པར་བྱེད་པ་ཉིད་ཡིན་པའི་ཕྱིར་རོ། །འབྲེལ་པ་མེད་པ་ནི་རྗོད་པར་བྱེད་པར་འགྱུར་བ་ཡང་མ་ཡིན་ཏེ། སེའུ་འབྲུ་བཅུ་ཞེས་བྱ་བ་ལ་སོགས་པའི་ངག་ལྟ་བུའོ། །དེ་ཉིད་ཀྱི་ཕྱིར་ཚིགས་སུ་བཅད་པ་དང་པོས་ནི་དྲི་བ་ལྔ་ཞུས་པ་ཡིན་ནོ། །རྣལ་འབྱོར་དང་རྒྱུད་ནི་རྒྱུད་དང་རྣལ་འབྱོར་རོ། །དེ་དག་ཅི་ལ་བགྱི་ཞེས་བྱ་བ་ནི་ཞུ་བ་གཉིས་སོ། །གང་དུ་རྣལ་འབྱོར་ཞེས་འདིར་ཅི་ལ་བགྱི་ཞེས་པའི་ཚིག་འབྱུང་བ་ནི་རིགས་པ་མ་ཡིན་ནོ། །དེ་བཞིན་རིགས་ཞེས་འདིར་ཅི་ལགས་ཞེས་པ་ལ་དེ་བཞིན་གྱི་སྒྲ་ནི་བསྡུ་བའི་དོན་ཏོ་ཞེས་བྱ་བ་ནི་སོགས་པའི་དོན་ཏོ། །འདིར་ཞེས་བྱ་བ་ནི་བསྡུ་བའི་ཚིགས་སུ་བཅད་པ་ཐུགས་ལ་གཞག་པ་སྟེ། རིགས་ལ་སོགས་པའི་སྒྲས་ཅི་ཞིག་བརྗོད་ཅེས་བྱ་བའི་དོན་ཏོ། །བྱང་ཆུབ་སེམས་དཔའ་ཆེན་པོ་ཞེས་བྱ་བ་ལ་དེ་ཁོ་ན་ཉིད་ཡིན་པའི་ཕྱིར་བྱང་ཆུབ་ཆེན་པོ་ཡང་དེ་ཡིན་ལ། དམ་ཚིག་ཉིད་ཡིན་པའི་ཕྱིར་སེམས་དཔའ་ཡང་ཡིན་པས་ན་དེ་སྐད་ཅེས་བྱའོ། །རབ་བསྐུལ་བ་ཞེས་བྱ་བ་ནི་
གསོལ་བ་འདེབས་པར་བྱེད་པའོ། །བཞག་ནས་ཞེས་བྱ་བ་ཇི་ལྟར་ཞེ་ན། དེའི་སྦྱོར་བས་གནས་པའི་ཕྱིར་རོ། །ཞུས་པ་རྒྱ་ཆེན་ཞེས་བྱ་བ་ནི་ཞུས་པ་རྒྱས་པའི་ཡུལ་ཅན་གྱི་དོན་རྣམས་སོ། །རང་རང་གི་ལུས་ལ་སོགས་པ་ལ་རྡོ་རྗེ་འཆང་ཆེན་པོའི་སྐུ་ལ་སོགས་པའི་རྣམ་པར་དམིགས་ལ་ཞེས་བྱ་བར་སྦྱར་རོ། །རང་གི་ཐུགས་ལ་དམིགས་པར་ཞེས་བྱ་བ་ནི་མངོན་སུམ་དུ་མཛད་པས་སོ། །བྱིན་གྱིས་བརླབས་ནས་ཞེས་བྱ་བ་ནི་ནུས་པའི་ཁྱད་པར་གྱིས་དེ་ལ་ཡང་དག་པར་སྦྱོར་བའོ། །གསུང་གཅིག་གིས་ནི་དབྱངས་གཅིག་གིས་སོ། །རྣམ་པ་གསུམ་ཞེས་བྱ་བ་ནི་རེ་རེའི་སྐུ་དང་སྔགས་དང་མཚན་མའི་བདག་ཉིད་ཅན་ཉིད་ཡིན་པའི་ཕྱིར་རམ་སངས་རྒྱས་དང་རིག་པ་དང་ཁྲོ་བོའི་བདག་ཉིད་ཅན་ཡིན་པའི་ཕྱིར་རོ། །འདི་ལ་སངས་རྒྱས་ཐམས་ཅད་ཡོད་པས་ན་སངས་རྒྱས་ཐམས་ཅད་དོ། །གསང་བ་འདུས་པ་ནི་བཅོམ་ལྡན་འདས་རྡོ་རྗེ་འཆང་ཆེན་པོའོ། །དེ་རྗོད་པར་བྱེད་པ་ཉིད་ཡིན་པའི་ཕྱིར་རྒྱུད་ལ་ཡང་དེ་སྐད་ཅེས་བྱའོ། །དེའི་རྗོད་པར་བྱེད་པ་ཉིད་ཀྱང་ངག་གཅིག་པོ་ཉིད་དུ་འབྲེལ་པའི་ཕྱིར་རོ། །འབྲེལ་པ་དེ་ཡང་གསང་བ་འདུས་པ་དོན་གཅིག་ཉིད་ལ་བསྡུ་བའི་ཕྱིར་ལེའུ་ཐམས་ཅད་ཕན་ཚུན་ཕན་འདོགས་པར་བྱེད་པའོ། །དེ་ལ་དང་པོར་རང་གི་དབང་དུ་མཛད་ནས་ཚིགས་སུ་བཅད་པ་བཞིས་འབྲེལ་པ་བསྟན་པའི་ཕྱིར་ལྔ་པ་དང་ནི་ཞེས་བྱ་བ་ལ་སོགས་པ་གསུངས་ཏེ་གསང་བ་འདུས་པ་འདི་ནི་བཅོམ་ལྡན་འདས་ཐབས་ལས་བྱུང་བའོ། །དེའི་ཐབས་ནི་བཞི་སྟེ་བསྙེན་པ་དང་ཉེ་བར་སྒྲུབ་པ་དང་སྒྲུབ་པ་ཆེན་པོ་ཞེས་བྱ་བ་འཆད་པར་འགྱུར་བའོ། །དེ་ལ་ཐབས་ལས་བྱུང་བ་རྡོ་རྗེ་འཆང་ཉིད་ནི་ལེའུ་དང་པོར་བསྟན་པ་ཡིན་ཏེ། གཙོ་བོ་ཡིན་པའི་ཕྱིར་རོ། །དེའི་འོག་ཏུ་ལེའུ་བཅུ་དྲུག་གིས་ནི་ཐབས་བཞི་ཡིན་ལ། དེ་ནས་བཅོ་བརྒྱད་པས་ནི་གཉིས་ཀ་གསལ་བར་བྱེད་པ་ཡིན་ནོ། །དེ་བས་ན་ཐབས་ལས་བྱུང་བ་ཐབས་དང་བཅས་པ་གསལ་བར་བྱེད་པ་དང་བཅས་པ་བསྡུས་པའི་ཕྱིར་ལྟོས་པའི་མཚན་ཉིད་ཅན་ནི་ལེའུ་རྣམས་ཀྱི་འབྲེལ་པ་ཡིན་ནོ། །དེ་ལ་ལེའུ་ཐོག་མ་ཐ་མ་དག་ནི་མ་གསུངས་ཀྱང་འབྲེལ་པ་གྲུབ་པ་ཡིན་པ་དེ་ལྟར་ན་ལེའུ་ལྷག་མ་རྣམས་ཀྱི་འབྲེལ་པ་ཚིགས་སུ་བཅད་པ་གསུངས་པ་ཡིན་ཏེ། འདི་ནི་འདི་རྣམས་ཀྱིས་བསྡུས་
བའི་དོན་ཏོ། །དགའ་བ་ཅན་གྱི་ལེའུས་ནི་སྒྲུབ་པ་ཆེན་པོ་དང་རྫོགས་ལྡན་གྱི་ལེའུས་ནི་སྒྲུབ་པ་དང༌། གཉིས་ལྡན་གྱི་ལེའུས་ནི་ཉེ་བར་སྒྲུབ་པ་དང༌། གསུམ་ལྡན་གྱི་ལེའུས་ནི་བསྙེན་པ་སྟོན་ཏོ། །དེ་ལ་ཐབས་བཞི་པོ་རེ་རེའི་ཕྱེད་ཕྱི་མས་ནི་མཚན་ཉིད་དང༌། ཕྱེད་སྔ་མས་ནི་ལེའུ་ཡིན་ནོ། །རྒྱས་པའི་དོན་ནི། ལྔ་པ་དང་ནི་དགུ་པ་དང༌། །བཅུ་བདུན་པ་དང་བཅུ་གསུམ་པ། །ཞེས་བྱ་བ་ལེའུ་བཞི་པོ་དེ་དག་ནི་སྒྲུབ་པ་ཆེན་པོ་སྟེ། སྒྲུབ་པ་ཆེན་པོ་ཞེས་བྱ་བའི་དོན་ཡིན་ཞིང་སྒྲུབ་པ་ཆེན་པོའི་བཤད་པ་ཡིན་ནོ་ཞེས་བྱ་བའི་བར་དུའོ། །ཐབས་བཞི་པོ་སོ་སོར་རེ་རེ་ཞིང་མངོན་པར་རྟོགས་པ་དང་དམ་ཚིག་གཉིས་གཉིས་སུ་དབྱེ་སྟེ། མཚན་ཉིད་གཉི་ག་ཡང་གཅིག་གི་ནུས་པ་ཐ་དད་ཀྱི་རིགས་པས་ངག་གཅིག་གིས་སྟོན་ཏོ། །དེ་ལས་སྒྲུབ་པ་ཆེན་པོའི་མཚན་ཉིད་སངས་རྒྱས་དང་བྱང་ཆུབ་སེམས་དཔའ་རྣམས་བསྟན་པ་ཞེས་བྱ་བ་ཡིན་ཏེ། དེ་ལ་རིག་པའི་སྐྱེས་བུའི་བདག་པོས་ཡན་ལག་དང་བཅས་པའི་དཀྱིལ་འཁོར་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཕྱུང་བ་ནི་སྒྲུབ་པ་ཆེན་པོའི་མངོན་པར་རྟོགས་པའོ། །དེ་ཡང་མ་ལུས་པར་ནི་བཅུ་བདུན་པར་རོ། །བཅུ་གསུམ་པའི་རིག་པའི་སྐྱེས་བུའི་ངེས་པར་བརྟན་བ་ལས་ནི་ཕྱོགས་གཅིག་གོ །དང་བོར་ཡང་ཐབས་ལས་བྱུང་བའི་ཞོར་ལ་ཕྱོགས་གཅིག་གིས་སོ། །ལེའུ་ལྷག་མ་རྣམས་སུ་ཡང་ཞོར་ལ་བསྟན་ཏོ། །གཉིས་སུ་མེད་པའི་ཡེ་ཤེས་ཙམ་ནི་བྱང་ཆུབ་བོ། །དེ་རྙེད་པ་ནི་སངས་རྒྱས་སོ། །དེ་ལ་ངེས་པར་བསྟན་པ་ནི་བྱང་ཆུབ་སེམས་དཔའ་སྟེ། དེ་རྣམས་ཀྱི་བྱ་བའི་ཕྱིར་བསྟན་པ་སྟེ། ཤིན་ཏུ་གསང་བའི་སྤྱོད་པ་ཞེས་བྱ་བའི་དོན་ཏོ། །དམ་ཚིག་དེ་ཡང་སྒྲུབ་པ་ཆེན་པོ་སྟེ། ཐབས་ཆེན་པོ་ཡིན་པའི་ཕྱིར་རོ། །དེ་ནི་ལྔ་པ་དང་དགུ་པ་མ་ལུས་པས་སྙོན་པ་བཅུ་བདུན་པ་ལ་སོགས་པའི་ཕྱིར་རེ་རེས་སོ། །བཞི་པ་དང་ནི་བཅུ་དྲུག་པ། །བརྒྱད་པ་བཅུ་གཉིས་པ་དག་ནི། །སྒྲུབ་པ་སྟེ་འདི་ན་གནས་མེད་པས་ཚིགས་སུ་བཅད་པ། བཞི་པའི་མཐར་སྒྲུབ་པའི་སྡོམ་པ་ཞེས་པ་དང་སྦྱར་ཏེ། སྒྲུབ་ཉིད་གསང་བའི་ཕྱིར་སྡོམ་པའི། །སློབ་དཔོན་སྤྱི་ཡི་ལས་དང་ནི། །དངོས་གྲུབ་བརྟུལ་ཞུགས་སྡོམ་པ་ཡིན། །ཞེས་བྱ་བ་ནི་མཚན་ཉིད་ཡིན་ཏེ་དེ་ལ་འདོད་ཆགས་ཆེན་པོའི་ཚུལ་གྱི་རིམ་པས་དམ་ཚིག་ཆེན་པོའི་
དཀྱིལ་འཁོར་དུ་ཡེ་ཤེས་སེམས་དཔའ་ལ་དབང་བསྐུར་བ་གསུམ་སྦྱིན་པ་ནི་སློབ་དཔོན་སྤྱིའི་ལས་སོ། །རིག་པའི་སྐྱེས་བུ་བསྐྱེད་པ་ནས་དབང་བསྐུར་བའི་མཐར་ཐུག་པ་ནི་དངོས་གྲུབ་པོ། །རིག་པའི་བརྟུལ་ཞུགས་སོ། །མཆོད་པ་དང་བསྟོད་པ་ལ་སོགས་པ་ནི་སྔོམ་པ་སྡེ། སྒྲུབ་པའི་མངོན་པར་རྟོགས་པའོ། །སློབ་དཔོན་གྱི་ལས་ཐམས་ཅད་དང་དངོས་གྲུབ་ཐམས་ཅད་ཡོངས་སུ་ཤེས་པར་བྱ་བ་དང༌། རིག་པའི་བརྟུལ་ཞུགས་བཟུང་བ་དང༌། བསྲུང་བ་དང་ཟིན་པའི་སྡོམ་པ་རྣམས་ནི་སྒྲུབ་པའི་དམ་ཚིག་གོ །དྲུག་པ་དང་ནི་གཉིས་པ་དང་བཅུ་པ་དང་བཅུ་བཞི་པ་དག་ནི་ཉེ་བར་སྒྲུབ་པའི་སྡོམ་པའོ། །ནི་ཞེས་བྱ་བས་མཚམས་སྦྱོར་བའོ། །ཁ་ཅིག་ལ་ནི་དྲུག་པ་འདིར། །ཞེས་འབྱུང་སྟེ། འདིར་ཞེས་པ་ནི་རྒྱུད་འདིར་རོ། །དྲུག་པ་ཞེས་པ་ནི་གྲངས་དྲུག་པར་ཤེས་པར་བྱེད་པའམ་གནས་དྲུག་པར་ཤོར་བས་ན་དྲུག་པའོ། །ཉེ་བའི་སྒྲུབ་པའི་མཚན་ཉིད་ནི་དྲུག་སྤྱོད་དང་རྗེས་སུ་ཆགས་པའོ།། དེ་ལ་རྗེས་སུ་ཆགས་པའི་མངོན་པར་རྟོགས་པ་ནི་བྱིན་གྱིས་རློབས་པའི་སྔགས་ལྔ་སྟེ། ཐུགས་མེ་ཉེས་པར་བྱེད་པས་སོ། །དྲུག་ཤུལ་གྱི་མངོན་པར་རྟོགས་པ་ནི་ལྔ་པ་རྣམས་ཏེ་ཟབ་ཅིང་ཕྲ་བའི་དངོས་པོ་ལ་དྲག་ཤུལ་གྱིས་ཡིད་འཇུག་པར་བྱེད་པའི་ཕྱིར་རོ། །དམ་ཚིག་གི་དྲག་ཤུལ་གྱི་སྤྱོད་པའོ། །ཉེ་བར་ལོངས་སྤྱོད་པའི་སྤྱོད་པ་དང༌། དཀའ་བའི་སྤྱོད་པ་ནི་ལྷ་རྣམས་རྗེས་སུ་ཆགས་པར་བྱེད་པའོ། །དེ་དག་ཐམས་ཅད་ལེའུ་བཞི་པོ་འདི་རྣམས་སུ་སྟོན་ཏོ། །བདུན་པ་དང་ནི་གསུམ་པ་དང༌། བཅུ་གཅིག་པ་དང༌། བཅོ་ལྔ་པ་སྟེ། བཞི་པོ་འདི་དག་ནི་བསྙེན་པ་ཡིན་ནོ། །འདིའི་མཚན་ཉིད་ནི་དངོས་གྲུབ་ཞིང་དང་མཚན་མ་སྟེ། དངོས་གྲུབ་ནི་འཁོར་ལོས་སྒྱུར་བའི་རྣལ་འབྱོར་རོ། །ཞིང་ནི་ཡན་ལག་དྲུག་གི་སྦྱོར་བ་སྟེ། དེ་དག་གིས་བདག་ཉིད་དངོས་གྲུབ་མཆོག་གི་ཞིང་དུ་བྱེད་པའི་ཕྱིར་རོ། །མཚན་མ་ནི་དམ་ཚིག་དང་རྨི་ལམ་སྟེ། དངོས་གྲུབ་ཀྱི་རྒྱུར་གྱུར་པའི་ཕྱིར་དངོས་གྲུབ་སྟོན་པར་བྱེད་པའི་ཕྱིར་རོ། །ཡང་གཞན་གྱི་དོན་ལས་བརྩམས་ཏེ། རྒྱུད་ཀྱི་འགྲེལ་པ་ཚིགས་སུ་བཅད་པ་བཞིས་བསྟན་པར་བྱ་བའི་ཕྱིར། དེ་བཞིན་གཤེགས་པ་ཀུན་གྱི་ལས། །ཞེས་བྱ་བ་གསུངས་ཏེ། གཞན་གྱི་དོན་ནི་རྣམ་པ་བཞི་སྟེ། གཞུག་པ་དང་དབུགས་དབྱུང་བ་དང་ཡོངས་སུ་སྨིན་པ་དང་ཡོངས་སུ་གྲོལ་བའོ། །
དབུགས་དབྱུང་བའི་ཚིག་ནི་ཚིགས་སུ་བཅད་པ་གཉིས་པའི་ཁོང་ནས་དབྱུང་བར་བྱའོ། །དེ་བཞིན་གཤེགས་པ་ཀུན་གྱི་ལས། གཞན་དག་ཚར་གཅོད་ཕན་འདོགས་སྤྱོད་པ་དག་གང་ཡིན་པ་དེ་ནི་རྒྱུད་འདི་ལ་དུལ་དང་ཞེས་བྱ་བ་ལ་སོགས་པ་སེམས་ཅན་རྣམས་ཀྱི་འཇུག་པ་སྟེ། མངོན་པར་དད་པའོ། །དུལ་བ་ནི་ཚར་གཅོད་པ་ཆུང་དུས་བསྒྲུབ་པར་བྱ་བ་ཡིན་ལ། གདུལ་དཀའ་བ་ནི་ཚར་གཅོད་པ་ཆེན་པོས་བསྒྲུབ་པར་བྱ་བ་རྣམས་ཡིན་ནོ། །ཞི་བ་ནི་ཕན་གདགས་པས་བསྒྲུབ་པར་བྱ་བའོ། །མཆོག་ཉིད་ནི་དངོས་གྲུབ་མཆོག་དང་འབྲེལ་པའོ། །དེ་ལ་ཐུན་མོང་གི་དངོས་གྲུབ་དང་འབྲེལ་པ་གང་ཡིན་ཞེ་ན། གང་དེའི་བསྙེན་པ་དེ་ཡང་རྣམ་པ་བཞི་སྟེ། རྡོ་རྗེའི་ཆོ་ག་ཞེས་བྱ་བ་རྡོ་རྗེ་བཞི་པོ་བཤད་པའོ། །དངོས་གྲུབ་མཆོག་གི་འབྲེལ་པ་གང་ཡིན་ཞེ་ན། བསྐྱེད་པའི་རིམ་པ་དང་འབྲེལ་པ་སྟེ། རང་གི་ལྷ་ཉིད་དུ་བསྐྱེད་པའི་གོ་རིམས་དང་འབྲེལ་པ་ནི་མིག་དང་སྐུ་ལ་སོགས་པའི་སེམས་པ་ལས་ཡང་དག་པར་སྦྱོར་བའོ། །དེ་གཉི་ག་ནི་དབུགས་དབྱུང་བ་སྟེ། རང་གི་ལྷའི་རྣལ་འབྱོར་ལ་ཡང་དག་པར་སྦྱོར་བའི་ཕྱིར་རོ། །དཀྱིལ་འཁོར་ཞེས་བྱ་བ་ནི་བྲི་བའི་དཀྱིལ་འཁོར་དང་མཆོད་པའི་དཀྱིལ་འཁོར་རོ། །བརྟུལ་ཞུགས་ནི་རིག་པའི་བརྟུལ་ཞུགས་སོ། །སློབ་དཔོན་ཕུན་སུམ་ཚོགས་པ་ཞེས་བྱ་བ་ནི་གཞུག་པ་དང༌། དབུགས་དབྱུང་བ་དང་ཡོངས་སུ་གྲོལ་བ་མ་གཏོགས་པར་སློབ་དཔོན་གྱི་བྱ་བ་གཞན་དག་ཡིན་ནོ། །དེ་ནི་བླ་མའི་སྔགས་ཀྱི་ལམ་གྱིས་ནི་སློབ་མ་སྣོད་དུ་རུང་བ་རྣམས་ཡོངས་སུ་སྨིན་པར་བྱ་བ་ཡིན་ནོ། །བརྟུལ་ཞུགས་བཟང་དང་ཞེས་བྱ་བ་ནི་ཡང་དག་པར་གཟུང་བའི་བརྟུལ་ཞུགས་ཅན་གྱིའོ། །སློབ་དཔོན་གྱི་དབང་བསྐུར་བ་གསུམ་གྱིས་ཀྱང་དབང་བསྐུར་བའོ། །རང་གི་སློབ་མ་ནི་བཀའ་ལས་མི་འདའ་བའི་ཕྱིར་རོ། །བདག་ཉིད་ཆེ་ཞེས་བྱ་བ་ནི་འདུས་པའི་དེ་ཁོ་ན་ཉིད་ཐམས་ཅད་བསྟན་པ་ལ་རྗེས་སུ་མཐུན་པའི་དད་པ་དང་ཤེས་རབ་དང་བསྟན་པ་དང་ཟབ་པ་དང་ལྡན་པའོ། །སངས་རྒྱས་ལ་སོགས་པའི་ཤིན་ཏུ་གསང་བའི་དེ་ཁོ་ན་ཉིད་སྟོན་པ་གང་ཡིན་པ་དེ་ཡོངས་སུ་གྲོལ་བ་ཡིན་ཏེ། དགོངས་པ་ཐམས་ཅད་ངེས་པར་འགྲེལ་པའི་ཕྱིར་རོ། །དེ་ལ་དགའ་བ་ཅན་གྱི་ལེའུ་ལྔར་ནི་ཡོངས་སུ་གྲོལ་བ་ཡིན་ལ་ལྷག་མ་རྣམས་ཅི་རིགས་པར་ལེའུ་གཞན་དག་ལ་སྦྱོར་རོ། །དེ་ལྟར་
ན་རྩ་བའི་རྒྱུད་ཀྱི་ཆ་ཤས་བཞིའི་ངག་བཞི་གང་དག་ཡིན་པ་ནི་ཡན་ལག་རྣམ་པར་འཐོར་བ་ཕན་ཚུན་ལྟོས་པ་ཅན་ཡིན་པས་ན་གཞན་གྱི་རེ་རེ་སྡུད་པར་བྱེད་པ་ཡིན་ཞིང་གཞན་གྱི་དོན་མ་ལུས་པར་བསྡུ་བའི་ཕྱིར་རྩ་བའི་རྒྱུད་ནི་ངག་གཅིག་ཡིན་ནོ། །དེ་གསལ་བར་བྱེད་པ་ནི་རྒྱུད་ཕྱི་མ་སྟེ། དེ་གཉི་ག་ནི་བསྟན་པ་དང་བཅས་པ་དེ་ཉིད་ཀྱིའོ། །རྒྱུད་ཀྱི་འགྲེལ་པ་གཉི་ག་དག་ལ་ཡང་ཕལ་ཆེར་དེ་རྗོད་པར་བྱེད་པའི་གཞུང་ཡིན་པས་ན་དེ་སྐད་ཅེས་བྱའོ། །རྣལ་འབྱོར་ཞུས་པའི་ལན་གསུངས་པ། ཐབས་དང་ཞེས་བྱ་བ་ལ་སོགས་པ་ལ། ཐབས་དང་ཤེས་རབ་སྙོམས་པར་འཇུག་པའི་རབ་ཏུ་སྦྱོར་བ་རྣལ་འབྱོར་ཡིན་ཏེ། ཕུལ་དུ་བྱུང་བའི་ཤེས་པ་ནི་ཤེས་རབ་པོ། །གང་ཞིག་ནི་གང་ཡང་རུང་བའི་ཤེས་པ་དངོས་མེད་པ་ནི་རིག་བྱ་དང་རིག་པ་གཉིས་སུ་བྱར་མེད་པའོ། །དངོས་མེད་པ་དེ་ཉིད་ཤེས་རབ་ཏུ་བརྗོད་ལ་དེ་ཉིད་འདིར་བྱེ་བྲག་ཏུ་མཐོང་བས་ན་ལྷག་མཐོང་སྟེ། དགའ་བའི་ཡུལ་ཡིན་པས་དགའ་མ་ཡང་ཡིན་ཏེ་ཡུལ་དང་ཡུལ་ཅན་དབྱེར་མེད་པར་གྱུར་པས་སོ། །ཤེས་རབ་ཉིད་རིག་པ་དང་ཤེས་བྱ་ཞེས་ཀྱང་བྱའོ། །ཉེ་བར་སོང་བ་ནི་ཐབས་ཏེ་སེམས་དེར་ཉེ་བར་འཇུག་པའོ། །དེ་ཡང་དངོས་པོའི་མཚན་ཉིད་སེམས་དེ་ཁོ་ནར་གྱུར་པ་ནི་ཕྲ་མོ་ཉིད་ལས་མི་འཕྲོ་བ་སེམས་དེར་གྱུར་པ་ཁོ་ན་སྟེ་བརྟན་ཞིང་མི་གཡོ་བས་སོ། །དེ་ཉིད་ནི་ཞི་གནས་ཏེ་གྱུར་པ་པོ་གུད་ན་མེད་པའི་ཕྱིར་སེམས་ཉིད་ཐབས་ཡིན་ལ་སྐྱེས་བུ་དང་ཡེ་ཤེས་ཀྱང་ཡིན་ནོ། །རིག་བྱ་དང་རིག་པ་པོ་དང་སེམས་ལས་བྱུང་བ་དང་སེམས་དེ་ཉིད་དབྱེར་མེད་པར་གྱུར་པ་ནི་ཐབས་དང་ཤེས་རབ་སྦྱོར་བ་སྟེ་རྣམ་འབྱོར་རོ། །རྒྱུད་ཀྱི་དྲི་བ་ཞུས་པའི་ལན་ནི་རྒྱུད་ནི་ཞེས་བྱ་བ་ལ་སོགས་པ་གསུངས་པ་ལ་རྒྱུད་ནི་རྒྱུན་རྒྱས་པའོ། །དེ་ནི་རྒྱུད་དེ་སྐད་ཀྱི་དབྱིངས་ལ་རྒྱུད་ནི་རྒྱས་པ་ཞེས་འབྱུང་བའི་ཕྱིར་རོ། །རྒྱུན་ཡང་དེ་ཡིན་ལ་དེ་ཡང་ཡིན་པས་ན་རྒྱུན་ཏེ་དེ་ནི་རྣམ་པ་གསུམ་དུ་འགྱུར་ཏེ་རབ་ཏུ་དབྱེ་བ་ལས་སོ། །ཇི་ལྟར་རབ་ཏུ་དབྱེ་བ་ལས་ཡིན་ཞེ་ན། གཞི་དང་དེ་བཞིན་རང་བཞིན་དང༌། །སྤང་དུ་མེད་པ་ཡིས་ཞེས་བྱ་བ་སྟེ། དེ་ལས་འབྱུང་གནས་རང་བཞིན་རྒྱུ་ཡིན་ཏེ། འགྲོ་བར་བྱེད་ཅིང་འབྲས་བུ་ཉིད་ཐོབ་པར་བྱེད་པས་ན་རྒྱུ་སྟེ། ས་བོན་ཞེས་བྱ་བའི་དོན་ཏོ། །དེ་ནི་རང་བཞིན་ཡིན་ཏེ། གཙོ་བོའི་རྒྱུ་ཉིད་ཡིན་པའི་ཕྱིར་རོ། །
དེ་ཡང་གང་ཡིན་ཞེ་ན། དེ་འབྱུང་གནས་ཏེ་ཐོག་མའི་རྒྱུ་ཞེས་བྱ་བའི་དོན་ཏོ། །བྱང་ཆུབ་ཀྱི་རྒྱུ་དང་པོ་གང་ཡིན་ཞེ་ན། ཐོག་མ་དང་ཐ་མ་མེད་པ་ཆོས་ཀྱི་དབྱིངས་འདི་ནི་བྱང་ཆུབ་ཀྱི་སེམས་སོ། །དེ་བཞིན་སྤང་མེད་འབྲས་བུ་སྟེ་བག་ཆགས་དང་བཅས་པའི་སྒྲིབ་པ་ཐམས་ཅད་སྤངས་པའི་ཕྱིར་རང་གི་རང་བཞིན་དུ་གནས་པའི་ཆོས་ཀྱི་དབྱིངས་ཀྱི་འབྲས་བུ་དེ་ནི་སྤང་དུ་མེད་པ་ཡིན་ཏེ། སྤང་བར་བྱ་བའི་སྒྲིབ་པ་དེའི་ཚེ་ཤིན་ཏུ་མེད་པའི་ཕྱིར་རོ། །གཞི་ནི་ཐབས་ཞེས་བྱ་བ་སྟེ། རང་བཞིན་ལས་རྒྱུ་གཞན་ནི་ཐབས་ཡིན་ནོ། །དེ་ནི་གཞི་ཡིན་ཏེ་དེ་ལ་གནས་པའི་རྣལ་འབྱོར་པས་འབྲས་བུ་ཐོབ་པའི་ཕྱིར་རོ། །གསུམ་གྱིས་རྒྱུད་ཀྱི་དོན་བསྡུས་ཏེ། རྒྱུ་དང་འབྲས་བུ་ཐབས་ཀྱི་རྒྱུད་གསུམ་ཉིད་ཀྱིས་རྒྱུད་ཀྱི་དོན་མ་ལུས་པར་བསྡུས་པ་ཡིན་ནོ། །ཐབས་ནི་སྔགས་དང་ཕྱག་རྒྱ་ལ་སོགས་པའི་དབྱེ་བས་རྒྱུན་དང་ལྡན་པའི་ཕྱིར་ཐབས་ཀྱི་རྒྱུད་དུ་རིགས་པ་མ་ཡིན་ནམ། རྒྱུ་ནི་ཆོས་ཀྱི་དབྱིངས་ཉིད་ཡིན་ལ་དེ་ཡང་གཅིག་ཉིད་ཡིན་པ་དེ་ལྟར་ན། རྒྱུན་མེད་པའི་ཕྱིར་རྒྱུའི་རྒྱུད་རིགས་པ་མ་ཡིན་ལ་དེ་ཉིད་ཀྱི་ཕྱིར་འབྲས་བུའི་རྒྱུད་ཀྱང་རིགས་པ་མ་ཡིན་ནོ་ཞེ་ན། འདིར་རིགས་ནི་ཞེས་བྱ་བ་ལ་སོགས་པ་གསུངས་པ་ལ་རིགས་ཀྱི་སྒྲ་ནི་ཐམས་ཅད་ལ་སྦྱར་བར་བྱ་སྟེ། རིགས་དང་རུས་དང་རྒྱུད་དང་ས་བོན་དང་རྒྱུད་དང་ཁམས་དང་བླ་མ་དང་ཐོག་མ་དང་འབྱུང་གནས་དང་རང་བཞིན་ཞེས་བྱ་བ་ནི་རྣམ་གྲངས་ཡིན་ནོ། །རིགས་ལྔ་ནི་གཏི་མུག་དང་ཞེ་སྡང་དང་ང་རྒྱལ་དང་འདོད་ཆགས་དང་ཕྲག་དོག་ཅེས་བྱ་བ་རིགས་ལྔ་པོ་དག་གོ །རིགས་གསུམ་དག་ནི་གཏི་མུག་དང་ཞེ་སྡང་དང་འདོད་ཆགས་ཞེས་བྱ་བ་རིགས་གསུམ་པོ་དག་གོ །ངོ་བོ་ཉིད་གཅིག་རིགས་ནི་རང་བཞིན་ངོ་བོ་ཉིད་དེ་རང་བཞིན་རོ་གཅིག་ཏུ་འཇུག་པ་དེ་ནི་རིགས་གཅིག་ཅེས་བྱ་བའི་དོན་ཏོ། །རིགས་བརྒྱ་ཞེས་བྱ་བ་ནི་རིགས་མཐའ་ཡས་པ་ཡིན་ཏེ། སངས་རྒྱས་ཀྱི་ཆོས་རྣམས་ནི་རེ་རེ་ཞིང་རབ་ཏུ་མཐའ་ཡས་པ་ཉིད་ཀྱི་ཕྱིར་རོ། །རིགས་ཀྱི་རབ་ཏུ་དབྱེ་བ་གསུངས་པ་དེ་ནི་ཞེས་གསུངས་པའོ། །བྱང་ཆུབ་རྡོ་རྗེ་ནི་རྣམ་པར་དག་པའི་མཐར་ཐུག་པ་ན་བྱང་ཆུབ་ཀྱང་དེ་ཡིན་ལ། བྱང་ཆུབ་ཀྱི་སེམས་ཀྱི་རང་བཞིན་ཉིད་ཡིན་པའི་ཕྱིར་རྡོ་རྗེ་ཡང་ཡིན་པས་ན་བྱང་ཆུབ་དྲོ་རྗེ་སྟེ་དེ་ཉིད་ནི་ཆོས་ཀྱི་དབྱིངས་སོ། །དེ་ནི་ཁྱད་
པར་དེ་དང་བཅས་པར་གསུངས་པ་སྟེ། རིགས་ལྔ་ལ་སོགས་པ་གསུངས་པའོ། །དེའི་ཕྱིར་ཡང་དེ་ནི་བླ་མའི་རྒྱུད་དུ་འདོད་དོ། །དེའི་ཁྱད་པར་དེ་དག་བཅས་པར་གསུངས་པ་དེ་ནི་རྒྱུའི་རྒྱུན་གྱི་རང་བཞིན་ཅན་ཉིད་ཡིན་པའི་ཕྱིར་རྒྱུད་བླ་མ་སྟེ་རྒྱུའི་རྒྱུད་ཅེས་བྱ་བའི་དོན་ཏོ། །དེ་སྐད་དུ་ཡང་དཔལ་མཆོག་དང་པོ་ལ་སོགས་པ་ལས། རྒྱུད་ནི་རྒྱུན་ཞེས་བྱ་བར་བཤད། །བླ་མ་ཉིད་ནི་ཐོག་མར་བརྗོད། །དེ་ཉིད་གསང་བ་གསང་ཆེན་ནི། །བླ་མའི་རྒྱུད་ནི་ཡིན་པར་འདོད། །ཅེས་གསུངས་སོ། །ཇི་ལྟར་འཕགས་པའི་རིགས་གཅིག་ལ་ཉན་ཐོས་ལ་སོགས་པའི་དབྱེ་བས་རྣམ་པ་གསུམ་དུ་བྱེད་པར་འགྱུར་བ་དེ་བཞིན་དུ་བྱང་ཆུབ་སེམས་དཔའི་རིགས་གཅིག་ལ་རིགས་ལྔ་ལ་སོགས་པའི་དབྱེ་བས་སོ། །དེ་སྐད་དུ་ཡང༌། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་རབ་ཏུ་བརྗོད། །ཅེས་གསུངས་སོ། །གཏི་མུག་གཙོ་བོར་གྱུར་པའི་བྱང་ཆུབ་སེམས་དཔའི་ཆོས་རྣམས་ཀྱི་གནས་སུ་གྱུར་པའི་རིགས་ནི་གཏི་མུག་གི་རིགས་སོ། །ཞེ་སྡང་གཙོ་བོར་གྱུར་པ་རྣམས་ཀྱི་ནི་ཞེ་སྡང་གི་རིགས་ཏེ། དེ་བཞིན་དུ་གཞན་དག་ལ་ཡང་སྦྱར་བར་བྱའོ། །རྒྱུའི་རྒྱུད་ཉིད་རྣམ་པར་དག་པའི་མཐར་ཐུག་པ་ཡང་འབྲས་བུའི་རྒྱུད་ཡིན་ནོ་ཞེས་བྱ་བ་དེ་ཡང་མི་རིགས་པ་མ་ཡིན་ནོ། །རྒྱུད་ཀྱི་དོན་ཞུས་ནས་རྒྱུའི་རྒྱུད་ཀྱང་གསུངས་ལ། དེ་ཡང་རིགས་ལྔ་ལ་སོགས་པ་ཡིན་ནོ་ཞེས་ངེས་པར་མཛད་ནས་ཚིགས་སུ་བཅད་པ་ཉིས་ཀྱི་དེ་ཁོ་ན་ཉིད་ནི་རྣམ་པ་དུ། རིགས་ཀྱི་གསང་བ་ནི་རྣམ་པ་དུ། རིགས་ཀྱི་གསང་ཆེན་ནི་གང་ལགས། རིགས་ཀྱི་དམ་པ་ནི་རྣམ་པ་དུ་ཞིག་མཆིས་ཞེས་འདྲི་བའི་ཞུ་བ་བཞི་བོ་བྱས་པ་དེ་ལ་དེ་ཉིད་ཅེས་བྱ་བ་ལ་སོགས་པ་གསུངས་ཏེ། དེ་ཉིད་རྣམ་པ་ལྔ་གང་ཡིན་པ་དེ་རྒྱུད་ཐམས་ཅད་ཀྱིས་བསྡུས་པ་ཕྲ་བ་ཉིད་ཡིན་པའི་ཕྱིར་རོ། །གསང་བ་རྣམ་གསུམ་ནི་དེ་ཤིན་ཏུ་ཕྲ་བ་ཉིད་ཡིན་པའི་ཕྱིར་རོ། །ལྷ་རྣམས་ཀྱི་བདག་པོ་ལྷག་པའི་ལྷའི་རང་བཞིན་ནི་བཅོམ་ལྡན་འདས་སོ། །དེ་ནི་གསང་ཆེན་ཏེ་ཤིན་ཏུ་རབ་ཏུ་ཕྲ་བ་ཉིད་ཀྱི་ཕྱིར་རོ། །རིགས་རྣམ་པ་བརྒྱ་ནི་རིགས་ཀྱི་རང་བཞིན་སྣ་ཚོགས་པའོ། །དེ་ནི་དམ་པ་སྟེ་མཐའ་ཡས་པ་ཉིད་ཀྱི་ཕྱིར་རོ། །དེ་དེ་ལྟར་ན་དྲི་བའི་ཞུ་བ་དགུ་པོ་དང་ལན་གྱི་
རྣལ་འབྱོར་གྱི་རྒྱུད་གསང་བ་འདུས་པ་ཡིན་ནོ་ཞེས་བྱ་བའི་སྤྱིའི་དོན་ཡང་དག་པར་ཕྱེ་བ་ཡིན་ནོ། །གཞུང་གཞན་ནི་ཡན་ལག་གི་དོན་ཇི་ལྟར་སྦས་པ་རྣམས་རབ་ཏུ་དབྱེ་བའི་ཕྱིར་རོ། །དེ་ལ་དང་པོར་ལེའུ་དང་པོ་ལ་སྦས་པའི་ཚིག་གི་དོན་རྣམས་ཞུས་པ་ནི། བྱང་ཆུབ་སེམས་ཞེས་ཅི་ལ་བགྱི། །ཞེས་བྱ་བ་ལ་བརྩམས་ཏེ། དེ་བཞིན་བིགྷནཱནྟ་ཀྲྀ་ཏ་ཅི་ཞེས་བྱ་བའི་བར་དུའོ། །དེ་ལ་བྱང་ཆུབ་ཀྱི་སེམས་ཀྱི་དོན་ནི་ཐོག་མ་ཐ་མ་ཞེས་བྱ་བ་ལ་སོགས་པ་གསུངས་ཏེ། ཐོག་མ་ནི་སྐྱེ་བ་ཡིན་ལ་ཐ་མ་ནི་འཇིག་པ་ཡིན་ནོ། །དེ་དག་མེད་པའི་ཕྱིར་ཐོག་མ་དང་ཐ་མ་མེད་པ་སྟེ། ཆོས་ཀྱི་དབྱིངས་སེམས་ཀྱི་རང་བཞིན་ཡིན་ལ་དེ་ཉིད་ནི་བྱང་ཆུབ་ཀྱི་སེམས་ཡིན་ནོ། །དེའི་ཕྱིར་རྡོ་རྗེ་འཆང་གི་དོན་གྱིས་ན་ཐོག་མ་དང་ཐ་མ་མེད་པའོ། །སེམས་ལ་མ་གཏོགས་པའི་དོན་དུ་རྟོག་པ་ཐམས་ཅད་ཉེ་བར་ཞི་བའི་ཕྱིར་རྣམ་པར་སྣང་མཛད་ཀྱི་དོན་གྱིས་ན་ཞི་བའོ། །ཆོས་དང་ཆོས་ཉིད་ཀྱི་རྒྱུ་མཚན་རྣམས་ནུབ་པའི་ཕྱིར་མི་བསྐྱོད་པའི་དོན་གྱིས་དངོས་དང་དངོས་མིན་ཟད་པའོ། །ཆོས་ཀྱི་དབྱིངས་ཙམ་གྱི་བདག་ཉིད་དང་སངས་རྒྱས་ཐམས་ཅད་དབྱེར་མེད་པར་མཐོང་བའི་ཕྱིར་རིན་ཆེན་འབྱུང་ལྡན་གྱི་དོན་གྱིས་ན་ཁྱབ་བདག་སྟེ་ཐམས་ཅད་དུ་འགྲོ་བའོ། །མཚན་གཞི་དང་མཚན་ཉིད་ལ་དགའ་བ་རྣམས་རྣམ་པ་ཐམས་ཅད་དུ་སྟོང་པ་ཉིད་དུ་ཡོངས་སུ་གཅོད་པའི་ཕྱིར་འོད་དཔག་ཏུ་མེད་པའི་དོན་གྱིས་ན་སྟོང་པ་ཉིད་མི་ཕྱེད་པའོ། །སྣ་ཚོགས་ཀྱི་དོན་མཛད་པའི་ཕྱིར་དོན་ཡོད་པར་གྲུབ་པའི་དོན་གྱིས་ན་སྙིང་རྗེ་མི་ཕྱེད་པའོ། །བྱང་ཆུབ་ཀྱི་སེམས་ཀྱི་དོན་འདི་ཡང་ལེའུ་དང་པོར་སངས་རྒྱས་ལྔ་རྣམས་ཆོས་ཉིད་དང་ལྷན་ཅིག་ཐུགས་ཀར་ཞུགས་པ་དང་དེ་ཞུ་བ་དང་དཀྱིལ་འཁོར་དུ་ཞུ་བ་དང༌། ལོངས་སྤྱོད་པ་པོ་དང༌། ལོངས་སྤྱོད་པར་བྱ་བ་དང༌། ལོངས་སྤྱོད་ཞུ་བ་དང་འོད་ཟེར་སྤྲོས་པས་སྣ་ཚོགས་དབང་བསྐུར་བར་ཤེས་པར་བྱའོ། །བྱང་ཆུབ་ཀྱི་སེམས་དེ་ཉིད་ལས་རིག་པའི་སྐྱེས་བུ་འབྱུང་བར་གསུངས་པ་ཡིན་ནོ། །དེའི་ཕྱིར་དེ་ཞུས་པའི་དེ་མ་ཐག་ཏུ་ལན་སྐུ་ཞེས་བྱ་བ་ལ་སོགས་པ་གསུངས་སོ། །ཚིགས་བཅད་ཕྱེད་ཕྱི་མས་ནི་ངེས་ཚིག་བསྟན་ཏེ། ལྷན་ཅིག་ཅེས་པ་ནི་གསུམ་པའོ། །རིག་པར་ལྡན་པ་ཞེས་པ་
ནི་དོན་གྱིས་ན་སྐྱེས་བུ་ལ་བྱའོ། །རིག་པ་དང་ལྷན་ཅིག་པའི་སྐྱེས་བུ་ནི་རིག་པའི་སྐྱེས་བུ་སྟེ། བར་གྱི་ཚིག་མི་མངོན་པའོ། །ཕྱེད་སྔ་མ་ནི་འདིའི་རིག་པ་སྟེ། མི་ཕྱེད་པ་ནི་འདིར་བྱང་ཆུབ་ཀྱི་སེམས་སུ་ཐམས་ཅད་ཞུ་བར་གྱུར་པ་གང་ཡིན་པའོ། །གང་གིས་མི་ཕྱེད་ཅེ་ན། སྐུ་གསུང་ཐུགས་ཀྱི་རྡོ་རྗེ་ཡིས་ཏེ། རྡོ་རྗེ་ནི་དེ་བཞིན་ཉིད་དོ། །སངས་རྒྱས་རྣམས་ཀྱི་སྐུ་གསུངས་ཐུགས་དང་དེ་བཞིན་ཉིད་ཅེས་ཟླས་ཕྱེ་ལ་ཞུ་བར་མི་ཕྱེད་པའོ་ཞེས་བསྡུ་བའོ། །ཕྱེ་བའི་ངོ་བོས་ཞེས་པ་ནི་དེ་དག་ཉིད་ཕྱེ་བའི་རིགས་པས་རིག་པ་དང་སྐྱེས་བུར་ཕྱེ་བས་ཏེ། སངས་རྒྱས་རྣམས་ཀྱིས་དེ་བཞིན་ཉིད་ནི་རིག་པ་སྟེ། དེ་ཡང་རིག་བྱའི་ཆའོ། །རིག་པ་པོའི་ཆ་ནི་སྐྱེས་བུའོ། །དེ་སྐུ་གསུངས་ཐུགས་ཕྱེ་བ་ལས་ནི་གཉི་གའི་ཞལ་གསུམ་མོ། །མི་ཕྱེད་པར་ནི་དོན་དམ་པར་ཏེ་དེས་ན་དེ་དང་ལྡན་པའོ། །རིག་པའི་སྐྱེས་བུ་དེ་ཉིད་ཀྱིས་དཀྱིལ་འཁོར་ཕྱུང་བ་ཡིན་ནོ། །དེ་ལ་སྔགས་བཅུ་གསུམ་དང་རིགས་ལྔ་བཙུན་མོའི་ཕུན་སུམ་ཚོགས་པ་ཞེས་བྱ་བའི་སྡོམ་པ་གཉིས་ཀྱི་དབང་དུ་མཛད་ནས་འདྲི་བའི་ཞུ་བ་ཉི་ཤུ་རྩ་དྲུག་བྱས་པ་ཡིན་ནོ། །དེ་ལ་ཅི་ཞེས་བྱ་བའི་སྒྲ་བཅོ་ལྔ་ནི་འདྲི་བ་བཅོ་ལྔ་དང༌། རིགས་འདིར་དེ་བཞིན་གང་ཞིག་ལགས། །ཞེས་བྱ་བ་གཅིག་ཉིད་ཀྱིས་བཅུ་གཅིག་གོ །རིགས་ཞེས་བྱ་བ་ལ་སོགས་པའི་སྒྲས་སྡོམ་གྱི་ཚིགས་སུ་བཅད་པ་ལ་གང་ཞིག་ལགས་ཞེས་པ་ནི་ཐུན་མོང་དུ་སྒྲ་གཅིག་ཡིན་གྱི་བྱེ་བྲག་ཏུ་ན་བཅུ་གཅིག་གོ །དོན་གྱི་རིགས་ནི་ཅི། ཞེ་སྡང་ནི་གང༌། གཏི་མུག་ནི་གང༌། འདོད་ཆགས་ནི་གང༌། ཡིད་བཞིན་གྱི་ནོར་བུ་ནི་གང༌། དམ་ཚིག་ཅེས་པ་ནི་གང༌། ང་རྒྱལ་ནི་གང༌། དྲེགས་པའི་དོན་ནི་གང༌། ཕྲག་དོག་ནི་གང༌། ཐར་པ་ནི་གང༌། འདོད་པ་ནི་གང་ཞེས་བྱ་བ་འདི་ཡིན་ནོ། །ཡང་ན་ཞུ་བ་ཉི་ཤུ་རྩ་བདུན་ཡིན་ཏེ། དེ་བཞིན་དུ་བིགྷནཱནྟ་ཀྲྀཏ་བི་ཞེས་པ་དེ་ལ། དྲི་བ་གཉིས་སུ་བྱས་ཏེ་བིགྷནཱནྟ་ཀྲྀཏ་པ་ཞེས་པ་དང༌། དེ་བཞིན་བི་ཞེས་པའོ། །དེ་བཞིན་ཞེས་པ་ནི་དེ་དག་དང་འདྲ་བར་དཀྱིལ་འཁོར་པ་གཞན་དག་གི་མིང་ཇི་ལྟ་བུ་ཞེས་པའི་དོན་ཏོ། །དེ་ལ་དང་པོར་ཞུས་པའི་བཛྲ་དྷྲྀཀ་གི་སྔགས་ཀྱི་དོན་གསུངས་པ། རིག་པ་ལྔ་དང་ཞེས་བྱ་བ་ལ་སོགས་པ་ལ། རིག་པ་ལྔ་ནི་མཚན་མ་རྣམས་ཏེ། ཞི་གནས་སོ། །རིག་བྱ་ནི་ལྷག་མཐོང་སྟེ། དེ་ཡང་རྣམ་པ་ལྔའོ། །བཅུ་པོ་དེ་དག་
གཅིག་ཏུ་གྱུར་པ་ནི་རྡོ་རྗེ་ཞེས་བཤད་དོ། །དེ་ཉིད་མཆོག་ཏུ་བརྟན་པའི་ཕྱིར་དང་མཆོག་ཏུ་ཕྲ་བའི་བསམ་གཏན་གྱི་བདག་ཉིད་ཡིན་པའི་ཕྱིར་རྡོ་རྗེའོ། །དེ་ཉིད་འཛིན་པ་སྟེ་བྱང་ཆུབ་ཀྱི་སེམས་བརྟན་པར་བྱེད་པའི་ཕྱིར་དྷྲྀཀ་ཅེས་བཤད་དེ། བཛྲ་ཡང་ཡིན་ལ་དྷྲྀཀ་ཀྱང་ཡིན་ནོ། །ཞེས་བྱ་བར་དགོངས་སོ། །དེ་ཅི་ཞིག་ཅེ་ན། ཡིད་ཅེས་བྱ་བ་སྨོས་ཏེ་རྣམ་པར་ཤེས་པའོ། །རིག་པ་དང་རིག་བྱའི་ཤེས་པ་བཅུ་པོའི་ཚོགས་རྣམ་པར་ཤེས་པའི་ཕུང་པོའོ། །ཛི་ན་ཛིཀ་གི་སྔགས་ཀྱི་དོན་གསུངས་པ་ཡོད་དང་མེད་པ་ཞེས་བྱ་བ་ལ་སོགས་པ་ལ་ལུས་ཞེས་བྱ་བ་ནི་སྔར་ཐལ་བའི་ཡིད་ཅེས་བྱ་བ་དང་སྦྱར་ཏེ། དེས་ན་ཡིད་ཀྱི་ལུས་སོ། །སེམས་ཅན་ཀུན་ཞེས་བྱ་བ་ནི་སྔགས་ཀྱི་ལྷ་ཐམས་ཅད་དོ། །ཡང་དེ་ཅི་ཞེ་ན། གདན་རྣམ་པ་ལྔ་ལ་གནས་པའི་སྔགས་རྣམ་པ་ལྔའོ། །ཅི་འདྲ་ཞིག་ཅེ་ན། འབྱུང་བ་དང་འབྱུང་བ་ལས་གྱུར་པ་ལས་བྱུང་སྟེ། ས་ལ་སོགས་པའི་འབྱུང་བ་ལྔ་ཡང་དག་པར་བསྡུས་པས་ན་འབྱུང་བ་ནི་པདྨའོ། །མིག་ལ་སོགས་པའི་འབྱུང་བ་ལས་གྱུར་པ་རྣམས་ཡང་དག་པར་བསྡུས་པའི་ཕྱིར། འབྱུང་བ་ལས་གྱུར་པ་ནི་རྡོ་རྗེའོ། །ཡུལ་དྲུག་པོ་ཡང་དག་པར་བསྡུས་པའི་ཆོས་ཀྱི་དབྱིངས་ཀྱི་ཟླ་བ་ཡང་འབྱུང་བ་སྟེ་དོན་དམ་པ་ཡིན་པའི་ཕྱིར་རོ། །དེ་ལ་གནས་པའི་ཡིད་སྣ་ཚོགས་པ་ཡང་འབྱུང་བ་ལས་གྱུར་པ་སྟེ། ཆོས་ཀྱི་དབྱིངས་ལ་དམིགས་པའི་ཕྱིར་རོ། །དེ་དག་ལས་འབྱུང་བ་འདི་ལ་ཡོད་པས་ན་དེ་ལས་བྱུང་ངོ༌། །ཇི་ལྟར་ཞེ་ན། རྡོ་རྗེའི་སྒོ་ལས་པདྨའི་ནང་དུ་གདན་དང་བཅས་པའི་སྣ་ཚོགས་པ་ལས་བྱུང་བའི་དེར་ཆུད་པ་རྣམས་སོ། །ཡོད་དང་མེད་དང་དབུས་ལས་འདས་པ་ལ། གཉིས་ཀྱི་རང་བཞིན་དུ་མེད་པས་ན་ཡོད་པ་ལས་འདས་པའོ། །རྣམ་པར་རིག་པའི་རང་བཞིན་དུ་ཡོད་པས་ན་མེད་པ་ལས་འདས་པའོ། །རེས་འགའ་གཉིས་ཀྱི་རང་བཞིན་དུ་ཡོད་ལ་རེས་འགའ་མེད་པ་མ་ཡིན་པས་ན་དབུས་ལས་འདས་པའོ། །དེ་ལྟ་བུའི་ཡིད་ནི་ཛིཀ་སྟེ། རྒྱལ་བ་ཞེས་བྱ་བ་ནི་རྒྱལ་བ་རྣམས་ཀྱིའོ། །དེ་རྣམས་ཀྱི་སྐྱེ་བ་ནི་སྐྱེ་བར་གྱུར་པའོ། །དེ་བས་ན་ཡིད་ཀྱི་ལུས་ནི་སེམས་ཅན་ཀུན་གྱི་ལུས་ཡིན་ལ་ལུས་ཀྱང་གཟུགས་ཡིན་ཏེ། དེའི་ཕྱིར་དོན་གྱི་གཟུགས་ཀྱི་ཕུང་པོ་ཞེས་བྱ་བར་འགྱུར་རོ། །རཏྣ་དྷྲྀཀ་ཅེས་བྱ་བའི་སྔགས་ཀྱི་དོན་གསུངས་པ། དོན་རྣམས་
ཐམས་ཅད་ཅེས་བྱ་བ་ལ་སོགས་པ་ལ། སེམས་ནི་རིན་པོ་ཆེ་ཞེས་བྱ་བ་ནི་དམ་པ་ཡིན་པའི་ཕྱིར་དང་ཡིད་བཞིན་གྱི་ནོར་བུ་དང་མཚུངས་པའི་ཕྱིར་སེམས་ནི་རིན་པོ་ཆེའོ། །ཇི་ལྟར་ཞེ་ན་དོན་རྣམས་ཞེས་བྱ་བ་ལ་སོགས་པ་སྨོས་ཏེ། མཉམ་པའི་རོར་ཡང་དག་པར་བསྡུས་ཏེ་འབྱུང་བ་འདི་ལ་ཡོད་པས་ནི་ཡང་དག་འབྱུང་ངོ༌། །གང་དང་ལྷན་ཅིག་ཅེ་ན། དོན་རྣམས་དང་སྟེ་བསྒྲུབ་པར་བྱ་བ་ཉིད་དང་འདོད་པར་བྱ་བ་ཡིན་པས་ན་དོན་ཏོ། །བདེ་བ་དང་ཡིད་བདེ་བའོ། །ཐམས་ཅད་ཅེས་པ་ནི་སྣ་ཚོགས་པ་སྟེ། དུས་གསུམ་གྱི་སངས་རྒྱས་རྣམས་ཀྱི་སྐུ་དང་འདོད་པ་དང་བཅས་པ་ཐམས་ཅད་ཅེས་བྱ་བའི་དོན་ཏོ། །དེ་བས་ན་དོན་ཞེས་བྱ་བས་ནི་དུས་གསུམ་གྱི་སངས་རྒྱས་རྣམས་ཀྱི་སྐུའི་ཚོར་བ་ཡང་བསྡུས་སོ། །ཚོར་བ་པོས་ཚོར་བ་ཞེས་བྱ་བ་ནི་སྐུ་དང་གསུང་དང་ཐུགས་ཀྱི་ཚོར་བ་པོ་དང་བཅས་པའི་བདེ་བ་དང་ཡིད་བདེ་བའི་ཚོར་བའོ། །ངེས་པ་ཞེས་བྱ་བ་ནི་བརྟན་ཞིང་རྟག་པ་སྟེ། དེས་ནི་དྷྲྀཀ་གི་དོན་བཤད་པར་འགྱུར་ཏེ། དྷྲྀཀ་ད་དྷྲྀཀ་ཅེས་བྱ་བའི་དོན་གཅིག་པ་ཉིད་ཡིན་པའི་ཕྱིར་དང༌། འཇིག་པ་མེད་པ་ལ་འཇུག་པའི་ཕྱིར་རོ། །རཏྣ་ཡང་ཡིན་ལ་དྷྲྀཀ་ཀྱང་ཡིན་པས་ན་རཏྣ་དྷྲྀཀ་གོ །ཚོར་བ་ཞེས་བྱ་བ་ནི་ཚོར་བའི་ཕུང་པོ་སྟེ། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་བསྡུས་པའི་ཕྱིར་རོ། །ཡིད་ཅེས་བྱ་བ་ནི་སྔར་བཤད་པ་བཞིན་ནོ། །ཨཱ་རོ་ལི་ཀ་གི་སྔགས་ཀྱི་དོན་གསུངས་པ་མཚན་གཞི་ཞེས་བྱ་བ་ལ་སོགས་པ་ཐམས་ཅད་དུ་ཞེས་བྱ་བ་ནི་དྲུག་པའི་དོན་གྱི་བསྡུ་བའོ། །མཚན་ཉིད་ཀྱི་གནས་སུ་ནི་གསུམ་པ་སྦྱར་ལ་མཚན་གཞིའི་གནས་སུ་ནི་དྲུག་པ་སྦྱར་རོ། །དེའི་དོན་ནི་འདི་ཡིན་ཏེ། མཚན་གཞི་ཐམས་ཅད་ཀྱི་མཚན་ཉིད་ཀུན་གྱི་རོལ་པ་ཀུན་ཡིན་པ་དེ་ནི། ཨཱ་རོ་ལི་ཀ་ཅེས་བཤད་པ་ཡིན་ཏེ། འདི་ལྟར་ཨཱ་ཞེས་བྱ་བ་ནི་ཨཱང་སྟེ་མ་ལུས་པའི་དོན་ཡིན་ལ། དེ་ནི་རོ་དང་ལི་དང་ཀ་རྣམས་སོ་སོ་དང་སྦྱར་རོ། །ར་ནི་རོལ་པ་སྟེ། ཨཱ་ཨོར་བྱས་པས་རོའོ། །ལ་ནི་མཚན་ཉིད་དེ་ཨཱ་ཨིར་བྱས་པས་ན་ལའོ། །ཀ་ནི་མཚན་གཞི་སྟེ། ཨཱ་རོ་ལིཀ་གོ །དེ་ལ་མཚན་གཞི་ནི་དུས་གསུམ་གྱི་སངས་རྒྱས་རྣམས་ཀྱི་སྐུ་དང་གསུང་དང་ཐུགས་སོ། །མཚན་ཉིད་ནི་དེ་རྣམས་ཀྱི་མིང་ངོ༌། །རོལ་པ་ནི་མཚོན་པའི་འདུ་ཤེས་ཏེ། དེས་དེ་དག་ཡོངས་སུ་གཅོད་
པའི་བློའོ། །དེ་དག་མ་ལུས་པར་དབྱེར་མེད་པ་བརྗོད་པ་བསྟན་པའི་ཕྱིར་མཚན་གཞི་མཚན་ཉིད་ཅེས་བྱ་བ་ལ་སོགས་པ་སྨོས་ཏེ། མཚན་ཉིད་ཀྱི་སྒྲ་ནི་དངོས་པོ་དང་བྱེད་པ་སྒྲུབ་པ་ལས་གཅིག་ལུས་པ་ཡིན་ནོ། །མཚན་གཞི་དང་མཚན་ཉིད་དང་རོལ་པ་རྣམས་ཀྱི་དངོས་པོ་ནི་དེ་ཁོ་ན་ཉིད་དེ་མཉམ་པས་ན་དབྱེར་མེད་པའོ། །ནི་ཞེས་བྱ་བ་ནི་ངེས་པར་གཟུང་བའི་དོན་ཏེ་དབྱེར་མེད་པ་ཁོ་ན་ཡིན་གྱི་ཐ་དད་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལ་སྐུ་དབྱེར་མེད་པ་ནི་སྐུའི་གསང་བར་རོ། །ཐུགས་ནི་ཐུགས་ཀྱི་གསང་བར་རོ། །གསང་བ་རྣམས་དབྱེར་མེད་པ་ནི་གསང་བ་རྣམས་བསྡུས་པའི་ནོར་བུར་རོ། །གསང་བ་རྣམས་ཀྱི་མིང་ནི། ཨོཾ་ཨཱཿ་ཧཱུཾ་དུའོ། །དེ་རྣམས་ཀྱི་དབྱེར་མེད་པ་ནི་ས་བོན་དེ་དག་ཉིད་བསྡུས་པའི་རང་གི་ལྷའི་ས་བོན་གྱི་ནོར་བུར་རོ། །མཚན་གཞི་ནི་མཚན་ཉིད་ཀྱིས་བསྡུས་སོ། །མཚན་ཉིད་ནི་རོལ་པས་བསྡུས་སོ། །དེ་ཉིད་ཀྱི་ཕྱིར་འདུ་ཤེས་བསྡུས་པ་ཡིན་པས་ན་འདུ་ཤེས་ཀྱི་ཕུང་པོའོ་ཞེས་དོན་གྱིས་ཤེས་པར་བྱའོ། །པྲཛྙཱ་དྷྲྀཀ་གི་སྔགས་ཀྱི་དོན་གསུངས་པ་རྣམ་ཤེས་ཞེས་བྱ་བ་ལ་སོགས་པ་ལ་རབ་མཐར་ཕྱིན་ཞེས་བྱ་བ་ནི་རབ་ཏུ་སོང་བ་སྟེ། བཏང་ཞིང་སྤྲོས་པ་ཞེས་བྱ་བའི་དོན་ཏོ། །ཁྱབ་པའི་ཤེས་པ་ཡིན་པས་རྣམ་ཤེས་ཏེ། དེ་གང་ཡིན་པ་ཤེས་རབ་ཡིན་པར་བཅོམ་ལྡན་འདས་ཀྱིས་གསུངས་པའོ། །དེ་དག་ལས་ཡི་གེ་གཉིས་གཟུང་ཞེས་བྱ་བར་དགོངས་སོ། །ཇི་ལྟ་བུའི་རྣམ་པར་ཤེས་པ་ཞེ་ན། སེམས་དཔས་འཛིན་པ་ཞེས་བྱ་བ་སྟེ། སེམས་དཔའ་ནི་སེམས་མངོན་པར་འདུ་བྱེད་པའོ། །དེས་འཛིན་པ་ནི་འབད་པ་དང་བཅས་པས་ཡུན་རིང་དུ་ཉེ་བར་གཞག་པ་ཡིན་གྱི་རང་གི་ངང་གིས་ནི་མ་ཡིན་ནོ། །དེ་ཉིད་ཀྱིས་ན་འདུ་བྱེད་ཅེས་བྱ་བ་སྨོས་ཏེ་འདུ་བྱེད་ཀྱི་ཕུང་པོའོ། །དེས་ཤེས་རབ་འཛིན་པས་ན་པྲཛྙཱ་དྷྲྀཀ་ཅེས་བྱ་བར་བཤད་དོ། །འདི་ལྟར་སེམས་དཔའ་ཉིད་དུ་བྱེད་དེ། ཇི་སྐད་དུ་འདུ་བྱེད་གང་ཞེ་ན། སེམས་དཔའོ་ཞེས་གསུངས་པའི་ཕྱིར་རོ། །སེམས་དཔའ་ཡང་གཅིག་གིས་ཤེས་རབ་འཛིན་པ་མ་ཡིན་ཏེ། འོ་ན་ཅི་ཞེ་ན། སེམས་དཔའི་ཚོགས་ཀྱིས་ཏེ། དེའི་ཕྱིར་འདུ་བྱེད་ཀྱི་ཕུང་པོ་ནི་ཤེས་པ་འཛིན་པའོ། །རིགས་ཀྱིས་དྲི་བའི་ལན་བསྟན་པའི་ཕྱིར་རིགས་ནི་ཞེས་བྱ་བ་ལ་སོགས་པ་སྨོས་ཏེ། རྒྱུད་ཅེས་བྱ་བ་
ནི་རིགས་རྣམ་པ་ལྔ་རྣམས་ཀྱི་ཐོག་མ་སྟེ། འདི་ནི་བསྟན་པའོ། །ཕྱེད་ཕྱི་མ་ནི་ཉེ་བར་བསྟན་པ་སྟེ། མི་སྐྱེ་མི་འཇིག་ཅེས་བྱ་བ་ནི་ཆོས་ཀྱི་དབྱིངས་ཡིན་པར་བསྟན་པའོ། །དེའི་དབྱེ་བ་ནི་རྣམ་པ་ལྔ་ཞེས་བྱ་བའི་དོན་ཏོ། །དེ་ཉིད་ནི་མགོན་པོ་སྟེ། དེ་ལ་དམིགས་པས་སངས་རྒྱས་ལ་སོགས་པའི་གོ་འཕང་ཐོབ་པར་བྱེད་པའི་གཙོ་བོ་ཡིན་པའི་ཕྱིར་རོ། །སྡོམ་གྱི་ཚིགས་སུ་བཅད་པ་ལས་དེ་བཞིན་ཞེས་འབྱུང་བ་ནི། ཇི་ལྟར་འདོད་ཆགས་ལ་སོགས་པའི་ཉོན་མོངས་པ་བཞིན་དུ་ཡིད་བཞིན་གྱི་ནོར་བུ་དང་དམ་ཚིག་ཀྱང་ཉོན་མོངས་པར་གཟུང་བ་སྟེ། གོ་རིམས་བཞིན་དུ་དྲེགས་པ་དང༌། ང་རྒྱལ་དང་ཕྲག་དོག་ཅེས་བྱ་བའི་དོན་ཏོ། །དེ་བས་ན་ཉོན་མོངས་པ་དྲུག་གི་དྲི་ཡིན་ལ་ལན་ནི་རིག་བྱ་ཞེས་བྱ་བ་ལ་སོགས་པ་ཚིགས་སུ་བཅད་པ་ཕྱེད་དང་གསུམ་གྱིས་གསུངས་ཏེ། རྣམ་པར་ཤེས་པ་ཞེས་བྱ་བ་ནི་རྣམ་པར་ཤེས་པའི་ཕུང་པོ་སྟེ་མི་བསྐྱོད་པའོ། །སྡང་བ་ནི་འཇོམས་པ་སྟེ། གཉེན་པོའི་ཕྱོགས་ཞེས་བྱ་བའི་དོན་ཏོ། །གང་གི་ཞེ་ན། རིག་བྱ་རིག་བྱེད་གཉིས་ཀྱི་སྟེ། །དྲུག་པའི་དོན་གྱི་གསུམ་པའོ། །དེ་དག་སུན་འབྱིན་པར་བྱེད་པས་ན་སྡང་བའོ། །གཞུང་ཁ་ཅིག་ལས་ནི་གཉིས་ཀྱི་བློ་ཞེས་འབྱུང་ངོ༌། །དེར་ཡང་ཞེ་སྡང་ཞེས་བྱ་བ་དང་སྦྱར་ཏེ། རིག་བྱ་རིག་བྱེད་གཉིས་ཀྱི་བློ་ལ་ཞེ་སྡང་བ་ཞེས་བྱ་བའི་དོན་ཏོ། །དེ་བས་ན་གཉིས་ཀྱི་མི་མཐུན་པའི་ཕྱོགས་ཡིན་པས་རྣམ་པར་ཤེས་པའི་ཕུང་པོ་ནི་ཞེ་སྡང་ངོ༌། །བེམས་པོ་ཞེས་བྱ་བ་ལ་སོགས་པ་ལ་གཟུགས་ནི་ཕུང་པོ་སྟེ། རྣམ་པར་སྣང་མཛད་དོ། །བེམས་པོ་ནི་རྨོངས་པ་སྟེ། སྐྱེས་བུ་གླེན་པ་བཞིན་ནོ། །བཅིངས་པ་ནི་འཆང་བ་སྟེ་རལ་པ་བཅིངས་པ་བཞིན་ནོ། །དེས་ན་གཟུགས་ནི་ཕུང་པོ་སྟེ། བཟུང་བས་སྟོང་པར་འདོད་པའི་ཕྱིར་རོ། །བེམས་པོའི་གཞིར་གྱུར་པས་ན་བཅིངས་པ་སྟེ། དེའི་ཕྱིར་གཟུགས་ཀྱི་ཕུང་པོ་ནི་གཏི་མུག་གོ །བདག་ཏུ་ཞེས་པ་ལ་སོགས་པ་ལ་ཚོར་བའི་ཕུང་པོ་སྟེ་རིན་ཆེན་འབྱུང་ལྡན་ནོ། །དེ་ནི་དྲེགས་པ་དང་ང་རྒྱལ་ཡིན་པར་བཤད་དོ། །ཇི་ལྟར་ཞེ་ན། བདག་ཏུ་རློམ་པའི་རང་བཞིན་པས། །ཞེས་བྱ་བ་སྨོས་ཏེ། བདག་ཏུ་རློམ་པ་ནི་ང་རྒྱལ་ལོ། །རང་བཞིན་ནི་དྲེགས་པ་སྟེ། འདི་ལྟར་རང་གི་ཕུན་སུམ་ཚོགས་པ་ཉིད་དུ་གནས་ཤིང་དེར་ཆགས་པས་གཞན་དུ་མི་འགྲོ་བ་སྟེ་དེས་ན་དྲེགས་པའོ། །ཇི་
སྐད་དུ་རང་གི་ཆོས་ལ་ཞེན་པའི་སེམས་ཀྱིས་གཞན་དུ་མི་འཇུག་པ་ནི་དྲེགས་པའོ་ཞེས་གསུངས་པའོ། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བས་བདག་གི་སེམས་དང་དེ་བཞིན་གཤེགས་པའི་ཐུགས་མཉམ་པ་ཉིད་ཡིན་ནོ་ཞེས་སེམས་གཟེངས་བསྟོད་པས་ང་རྒྱལ་ཏེ། སེམས་གཟེངས་བསྟོད་པའི་མཚན་ཉིད་ནི་ང་རྒྱལ་ཡིན་ནོ། །དེ་བས་ན་ཚོར་བའི་ཕུང་པོ་ནི་དྲེགས་པ་དང་ང་རྒྱལ་ལོ། །དངོས་ལ་ཞེས་བྱ་བ་ལ་སོགས་པ་ལ་འདུ་ཤེས་ནི་འདུ་ཤེས་ཀྱི་ཕུང་པོ་སྟེ། སྣང་བ་མཐའ་ཡས་སོ། །དེ་ནི་ཀུན་ཆགས་ཏེ་ཡང་དག་པའི་འདོད་ཆགས་སོ། །དེ་ཅི་ཞིག་ཅེ་ན་བདག་ཉིད་དེ་སེམས་སོ། །ཇི་ལྟ་བུ་ཞེ་ན། དངོས་ལ་སྟེ་དོན་དམ་པ་ལའོ། །ཆགས་པ་ནི་ཀུན་དུ་ཞེན་པ་ཡིན་ལ་དེའི་མཚན་ཉིད་ནི་ཆགས་པའི་མཚན་ཉིད་དེ་འདོད་ཆགས་སོ། །རྟོག་པ་ཞེས་བྱ་བ་ལ་སོགས་པ་ལ་འདུ་བྱེད་ནི་འདུ་བྱེད་ཀྱི་ཕུང་པོའོ། །དེ་ཡང་དོན་ཡོད་གྲུབ་པ་སྟེ། དེ་ནི་ཕྲག་དོག་གོ །ཇི་ལྟར་ཞེ་ན། རྟོག་པས་སྟོང་པའི་བདག་ཉིད་དེ་རྟག་ཏུ་ཞེས་བྱ་བ་ནི་ཡང་དང་ཡང་དུའོ། །རྟོག་པ་ཞེས་བྱ་བ་ནི་འཛིན་པ་ཡང་དག་པར་མཚོན་པའོ། །གཏོང་བ་ནི་ཡང་དང་ཡང་དུ་གཏོང་བ་སྟེ། རྟོག་པར་གྱུར་པས། ཡང་དང་ཡང་དུ་སྤྲོ་བར་བྱེད། །ཅེས་བྱ་བའི་དོན་ཏོ། །བདག་ཉིད་ཅེས་བྱ་བ་ནི་རང་རང་གི་ངོ་བོ་སྟེ། འཁོར་ལོ་དང་པདྨ་ལ་སོགས་པ་སྤྲོ་བའོ། །དེ་ལྟར་སྟོང་པའི་ཨི་ར་དང་ཡང་དག་པར་མཚོན་པའི་ཤ་དང༌། བདག་ཉིད་ཀྱི་ཨ་རྣམས་ནི་ལྷག་མ་ཕྱི་བས་ཕྲག་དོག་ཅེས་བྱ་བར་འགྱུར་རོ། །དེའི་ཕྱིར་འདུ་བྱེད་ཀྱི་ཕུང་པོ་ནི་ཕྲག་དོག་གོ །ཡིད་བཞིན་ནོར་བུ་དང་དམ་ཚིག་དང་འདོད་པ་དང་ཐར་པ་རྣམས་དྲིས་པའི་ལན་བྱང་ཆུབ་སེམས་དཔའ་ཞེས་བྱ་བ་ལ་སོགས་པའི་ཚིགས་སུ་བཅད་པ་ཕྱེད་དང་གཉིས་ཀྱིས་གསུངས་ཏེ། བྱང་ཆུབ་ནི་བདེ་བའི་ཕྲ་མོའོ། །སེམས་ནི་སེམས་ཀྱི་ཕྲ་མོ་སྟེ། བྱང་ཆུབ་དང་རོ་གཅིག་པའི་སེམས་ནི་བྱང་ཆུབ་སེམས་སོ། །འདོད་པ་ཐམས་ཅད་ཀྱི་གདན་དང་བཅས་པའི་སྣ་ཚོགས་པའི་ངོ་བོ་ཉིད་དེ་དུས་གསུམ་གྱི་སངས་རྒྱས་རྣམས་ཀྱི་སྐུའི་བདག་ཉིད་ཡིན་པའི་ཕྱིར་རོ། །དང་པོ་ཉིད་ཀྱི་བྱང་ཆུབ་ཀྱི་སེམས་ནི་སེམས་ཀྱི་རིན་པོ་ཆེ་ཞེས་བྱ་བའི་དོན་ཏོ། །དེ་ནི་སྲིད་པ་ལས་ཀུན་འབྱུང་ཡིན་ནོ། །ཡིད་ལས་བྱུང་བས་ན་སྲིད་པ་སྟེ་གསུམ་
མོ། །སྲིད་པ་ལས་བྱུང་བ་འདི་ལ་ཡོད་པས་སྲིད་པ་ལས་བྱུང་སྟེ། ཅི་ཞིག་ཅེ་ན། ཐམས་ཅད་དེ་འགྲོ་བ་རྣམས་ཞེས་བྱ་བའི་དོན་ཏོ། །དེ་བས་ན་ཡིད་བཞིན་གྱི་ནོར་བུ་དང་ཆོས་མཐུན་པའི་ཕྱིར་ཡིད་བཞིན་ནོར་བུའོ། །སེམས་དེ་ནི་འདོད་པ་ཞེས་ཀྱང་བྱའོ། །ཇི་ལྟ་བུ་ཞིག་ཅེ་ན། འདོད་ཆགས་ཞེས་བྱ་བ་ལ་སོགས་པ་སྨོས་ཏེ། འདོད་ཆགས་ལ་སོགས་པའི་རང་བཞིན་དང་ལྡན་པའོ། །སྣ་ཚོགས་ནི་བདག་ཉིད་ཀྱིས་ཁྱབ་པར་སྤྲོ་བའི་ཕྱིར་ཏེ། དེ་ལྟར་ན་ཡིད་ལས་བྱུང་བས་ན་འདོད་པ་ཡིན་ལ་འདོད་པ་གང་ཡིན་པ་དེ་ནི་དམ་ཚིག་ཀྱང་ཡིན་ཏེ། ཀུན་དུ་འགྲོ་བ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་སྣ་ཚོགས་སྣང་བས་ན་ཞེས་བྱ་བ་གསུངས་ཏེ། རྣམ་པ་སྣ་ཚོགས་ཀྱིས་ཀུན་དུ་རྟོགས་ཤིང་གསལ་བའོ། །སྣ་ཚོགས་ཀྱིས་ཡེ་ཤེས་འབད་པ་དང་བཅས་པ་དེ་ཉིད་ནི་ལས་ལ་སྐྱེས་པ་ཞེས་བྱ་བ་ལ་དེ་ཉིད་རྟག་ཏུ་གྱུར་པ་ནི་མངོན་སུམ་དུ་གྱུར་པ་ཞེས་བརྗོད་དོ། །དེ་ཉིད་འབྲས་བུ་ཞེས་བྱ་བ་ཐར་པ་ཞེས་བྱའོ། །དེ་ལྟར་བྱས་ན་འདོད་པ་ལས་ཐར་པ་ནི་འདོད་པ་དང་ཐར་པ་ཞེས་བསྟན་པར་འགྱུར་རོ། །སྡོམ་དང་བཅས་པའི་མོ་ཧ་ར་ཏཱི་ལ་སོགས་པའི་སྔགས་ཀྱི་དབང་དུ་བྱས་པའི་དྲི་ཚིག་དྲུག་པོ་རྣམས་ཀྱི་ལན་ཚིགས་སུ་བཅད་པ་ཉིད་ཀྱིས་བསྟན་པར་བྱ་བའི་ཕྱིར་ཆོས་རྣམས་ཞེས་བྱ་བ་ལ་སོགས་པ་སྨོས་ཏེ། ཆོས་རྣམས་ནི་ཤེས་བྱ་དང་ཤེས་པ་རྣམས་སོ། །གཉིས་མེད་ཡེ་ཤེས་ཀྱི་ང་རྒྱལ་ཞེས་བྱ་བ་ནི་ཡེ་ཤེས་ཙམ་དུ་གཉིས་སུ་མེད་པར་ངེས་པའོ། །དེ་ནི་གཏི་མུག་སྟེ་གཉིས་སུ་མི་ཤེས་པའི་ཕྱིར་རོ། །ཕན་ཚུན་འཛེར་བ་ཞེས་བྱ་བ་ནི་རྡོ་རྗེ་དང་པདྨོ་འདུས་པའོ། །དེ་ནི་ཞེ་སྡང་སྟེ་གཉིས་འབྱོར་པའི་ཡི་གེ་རྣམས་ལས་ཨ་ཡང་དང་ཤ་ལ་མི་མངོན་པས་སོ། །མཚན་ཉིད་ཅེས་བྱ་བ་ནི་ཞེ་སྡང་དང་གཏི་མུག་ལས་སྐྱེས་པའི་ཚོར་བའི་ཕུང་པོའི་རོལ་པ་དང་མཚན་ཉིད་དང་མཚན་གཞི་རྣམས་དམིགས་པ་མེད་པར་ཡང་དག་པར་མཚོན་པ་སྟེ་དེ་ནི་འདོད་ཆགས་སོ། །ཅིའི་ཕྱིར་ཞེ་ན་ཞེས་པས་ཏེ་གང་གི་ཕྱིར་རྒྱུན་གྱིས་འཇུག་པའི་ཕྱིར་རོ། །ཡེ་ཤེས་འདིར་ནི་རྡོ་རྗེ་བཤད། །ཅེས་བྱ་བ་ནི། དེ་རྣམས་རོ་མཉམ་པའི་ཡེ་ཤེས་གང་ཡིན་པ་དེ་འདིར་རྡོ་རྗེ་ཞེས་བརྗོད་དོ། །བཞི་པོ་འདི་རྣམས་ཀྱི་ཚིག་ཕྱི་མ་ནི་ར་ཏཱི་ཞེས་བྱ་བར་འགྱུར་རོ། །དེའི་དོན་ནི། ཤིན་ཏུ་ལོངས་སྤྱོད་རྫོགས་པ་སྟེ། གཏི་མུག་
ལ་སོགས་པ་རྣམས་ཀྱི་ཡུལ་ལ་ལོངས་སྤྱོད་པ་ཡིན་ལ་དགའ་བས་ནི་དེ་རྣམས་ལོངས་སྤྱོད་ཡིན་ཏེ་ཟག་པ་མེད་པའི་ཕྱིར་ཡང་དག་པར་དགའ་བ་ཞེས་བྱའོ། །ཤིན་ཏུ་ཞེས་བྱ་བ་ནི་ཕུལ་དུ་བྱུང་བའམ་རྟག་པའི་ཕྱིར་ཏེ། མཐའ་ལས་འདས་པ་ཞེས་པའི་དོན་ཏོ། །སྡོམ་ལ། བཙུན་མོའི་མཆོག་ཕུན་སུམ་ཚོགས་པ། །ཞེས་བྱ་བ་ལ་ཕུན་སུམ་ཚོགས་པའི་དོན་བསྟན་པའི་ཕྱིར་རོ། །གསུམ་གྱི་བདེ་མཆོག་ཕུན་སུམ་ཚོགས། །ཞེས་གསུངས་ཏེ་རབ་ཏུ་དབྱེ་བ་ལ་ལྟོས་ནས་མང་པོའི་ཚིག་སྟེ། སྐུ་དང་གསུང་དང་ཐུགས་ཀྱི་བདེ་བའི་མཆོག་ཅེས་པའི་དོན་ཏོ། །དེ་དག་ནི་རྟེན་དང་བརྟེན་པའི་འབྲེལ་བས་ན། དྲུག་པའི་མཚམས་སྦྱོར་ཡིན་ཏེ་དེའི་ཕྱིར་གསུངས་ལ་གཏི་མུག་ཞེ་སྡང་ཞེས་བྱ་བ་ལ་སོགས་པ་ལ་དགའ་བ་རྟག་ཏུ་ཞེས་བྱ་བའི་རང་བཞིན་ལ་མཁས་པས་རྟག་ཏུ་ཡིད་བདེ་བར་གྱུར་པའོ། །ཕྱེད་ཕྱི་མས་ནི་དགའ་བའི་བདག་ཆེ་བ་བསྟན་ཏེ། །དེས་ན་ཞེས་བྱ་བ་ནི་གང་ཕྱིར་དེ་ལྟ་བུར་མཚོན་པ་དེའི་ཕྱིར་རོ། །ཐབས་ཞེས་བྱ་བ་ནི་ཕུལ་དུ་འབྱུང་བར་འགྲོ་བའི་ཕྱིར་སེམས་ཅན་རྣམས་ཀྱི་བྱང་ཆུབ་ཐོབ་པའི་ཐབས་ཆེན་པོའོ། །དེའི་ཕྱིར་རྡོ་རྗེ་ཐེག་པ་སྟེ་ཕ་རོལ་ཏུ་ཕྱིན་པའི་ཐེག་པ་ནི་དེར་ཞུགས་སུ་ཟིན་ཀྱང་སྡུག་བསྔལ་མང་པོ་ཉིད་ཀྱི་ཕྱིར་མང་དུ་ཕྱིར་ལྡོག་པར་འགྱུར་བས་བརྟན་པ་མ་ཡིན་ལ་དགའ་བ་རྣམས་ནི་ཤིན་ཏུ་བརྟན་པའི་རྡོ་རྗེ་ཐེག་པར་བརྗོད་དེ། གང་གི་ཕྱིར་སངས་རྒྱས་ཀྱི་བྱང་ཆུབ་སྒྲུབ་པ་རྣམས་བདེ་བ་ཉིད་ཀྱིས་འཇིགས་པ་མེད་པའི་ཕྱིར་རོ། །སྒོ་སྐྱོང་རྣམས་ཀྱི་སྔགས་ཀྱི་དོན་གྱི་དྲི་ཚིག་བཞིའི་ལན་ཚིགས་སུ་བཅད་པ་རེ་རེས་བསྟན་པའི་ཕྱིར་ཆོས་རྣམས་མི་འཇིག་བདག་ཉིད་ཅེས་བྱ་བ་ལ་སོགས་པ་སྨོས་ཏེ། ལུས་ལ་སོགས་པའི་ཆོས་རྣམས་ནི་མ་སྐྱེས་པའི་ངོ་བོ་ཉིད་དེ་གང་གི་ཕྱིར་བུམ་པ་ལ་སོགས་པ་འདི་དག་གཅིག་དང་དུ་མའི་རང་བཞིན་དང་བྲལ་བའི་ཕྱིར་དོན་དམ་པར་ཡོད་པ་མ་ཡིན་ལ་མེད་པས་ནི་སྐྱེ་བ་མེད་དེ་མ་སྐྱེས་ན་འཇིག་པར་མི་འགྱུར། དེའི་ཕྱིར་འཇིག་པ་མེད་པའི་བདག་ཉིད་དོ་ཞེས་བྱའོ། །དེ་ཉིད་ནི་མངོན་སུམ་དུ་རྟོགས་པའི་ཕྱིར་འདིའི་དམ་ཚིག་སྟེ། དངོས་པོ་ཀུན་གྱི་ཞེས་བྱ་བ་ནི་ལུས་དང་གནས་དང་ལོངས་སྤྱོད་རྣམས་ཀྱིའོ། །དམ་
ཚིག་འདིའི་གང་ཡིན་པ་འདི་ཉིད་ཀྱིས་མཐར་བྱེད་གཤིན་རྗེ་སྟེ། གཤིན་རྗེ་མཐར་བྱེད་དོ། །དེ་ཡང་དྲུག་པའི་མཚམས་སྦྱོར་བ་འདི་ནི་ལག་པའི་རྩེ་མོ་དང་རྩེ་མོ་ལག་པ་ཞེས་བྱ་བའི་མཐར་བྱེད་གཤིན་རྗེ་དང༌། གཤིན་རྗེ་མཐར་བྱེད་གཉི་གའི་ཡིན་ནོ། །གཤིན་རྗེ་ནི་དུས་ཏེ་འཇིག་རྟེན་པ་ཡིན་ལ་དེ་མཐར་བྱེད་པ་ནི་བརྟན་པར་བྱེད་པའི་དོན་ཏོ། །ཆོས་རྣམས་རྣམ་པར་མི་ཤེས་བདག །ཅེས་བྱ་བ་ལ། སེམས་ཀྱི་ཆོས་ཐམས་ཅད་རྣམ་པར་མི་ཤེས་པའི་བདག་ཉིད་དོ། །ཅིའི་ཕྱིར་ཞེ་ན། དོན་དམ་མི་འགྱུར་བདག་ཉིད་ཀྱི་ཕྱིར་ཏེ་མི་འགྱུར་བའི་ཆོས་ཀྱི་དབྱིངས་ཀྱིས་སོ། །དག་པ་ནི་འབའ་ཞིག་པ་སྟེ་འདི་ལྟར་གཟུང་བ་དང་འཛིན་པ་མེད་པས་དེའི་སྣང་བ་ཡང་ནུབ་པར་གྱུར་པའི་ཕྱིར་ཆོས་ཀྱི་དབྱིངས་འབའ་ཞིག་ལྷག་མར་གྱུར་པ་ཞེས་བྱའོ། །དེ་ཉིད་མངོན་སུམ་དུ་རྟོགས་པས་འདིའི་དམ་ཚིག་གོ །དམ་ཚིག་འདི་ཡིན་པ་དེས་ན་འདི་ཉིད་ནི་ཤེས་རབ་མཐར་བྱེད་དེ་ཤེས་པ་མཐར་བྱེད་པའོ། །རྒྱལ་བ་ནི་ཤེས་པ་ལས་རྒྱལ་བའོ། །ཆོས་རྣམས་བརྗོད་དུ་མེད་བདག་ཉིད། །ཅེས་བྱ་བ་ནི་བརྗོད་པར་བྱ་བའི་ཆོས་ཐམས་ཅད་གཞན་ལ་ཚིག་གིས་བསྟན་པར་མི་ནུས་པའི་ཕྱིར་རོ། །ཅིའི་ཕྱིར་ཞེ་ན། གང་གི་ཕྱིར་མིང་དང་རང་བཞིན་བློ་དངོས་མེད་པའི་ཕྱིར་རོ། །ཇི་སྟེ་མིང་རྣམས་ལས་དོན་རྣམས་ཀྱི་བློ་སྐྱེ་བ་ཡོད་ན་བརྗོད་བྱ་དང་བརྗོད་བྱེད་དུ་འགྱུར་བ་ཞིག་ན་དེ་ལྟར་ཡོད་པ་མ་ཡིན་ཏེ་དེ་གང་གི་ཕྱིར་མི་བདེན་པས་སོ། །བློ་ལས་ཕྱི་རོལ་ན་མིང་ངམ་རང་བཞིན་ཡོད་པ་མ་ཡིན་པ་ལས་བློ་ཡང་ཡོད་པ་མ་ཡིན་ཏེ། གཟུང་བ་མེད་པས་འཛིན་པ་མེད་པའི་ཕྱིར་དང༌། དེ་སྣང་བ་དག་ཀྱང་ནུབ་པའི་ཕྱིར་རོ། །དེ་ཉིད་ནི་མངོན་སུམ་དུ་རྟོགས་པའི་ཕྱིར་འདིའི་དམ་ཚིག་སྟེ། དེ་ལྟ་བུ་ཡིན་པ་དེས་ན་འདི་ཉིད་ནི་པདྨཱནྟ་ཀྲྀཏ་དེ་འདིས་དོན་རྣམས་གོ་ཞིང་རྟོགས་པར་བྱེད་པས་ན་པདྨ་ནི་ཚིག་སྟེ། དེ་མཐར་བྱེད་པའོ། །མཐུ་དང་ལྡན་པའི་ཕྱིར་ཁྱབ་བདག་གོ །ཆོས་ཀུན་རྣམ་པར་མི་རྟོག་བདག །ཅེས་བྱ་བ་ནི་རྟག་པའི་ཆོས་ཐམས་ཅད་བདག་ཉིད་ཀྱིས་ཀྱང་བརྟག་པར་མི་ནུས་སོ། །ཅིའི་ཕྱིར་ཞེ་ན། རང་བཞིན་གྱིས་ནི་ཞི་བའི་དངོས་ཀྱི་ཕྱིར་ཏེ། ཆོས་རྣམས་རང་བཞིན་གྱིས་དེ་བཞིན་ཉིད་དེས་དེ་དག་རྟག་ཏུ་ཞི་བའོ། །བེམས་པོ་ཡིན་པའི་ཕྱིར་མི་རྟོག་པའོ། །དེ་ནི་རྣམ་པར་རྟོག་པའི་ཡུལ་ཡང་མ་
ཡིན་ཏེ། རྣམ་པར་རྟོག་པའི་མཚན་མ་ནུབ་ན་དེར་སྣང་བའི་ཕྱིར་རོ། །དེ་ནི་མངོན་སུམ་དུ་རྟོགས་པའི་ཕྱིར་འདིའི་དམ་ཚིག་གོ །རྡོ་རྗེ་ཀུན་ཞེས་བྱ་བ་ནི། རྣམ་པར་རྟོག་པ་ཐམས་ཅད་དོ། །དམ་ཚིག་འདིའི་གང་ཡིན་པ་དེས་ན་འདི་ཉིད་བགེགས་མཐར་བྱེད་དེ་བགེགས་རྣམས་ནི་རང་གི་རྣམ་པར་རྟོག་པ་ལས་བྱུང་བའི་ཕྱིར་རོ། །མཐུ་དང་ལྡན་པའི་ཕྱིར་གཙོ་བོའོ། །མི་འཇིག་ཅེས་བྱ་བ་ལ་སོགས་པ་ནི་སྒོ་རྣམས་ཀྱི་ཐུན་མོང་གི་དོན་དང་དེ་དག་གི་འབྲས་བུ་ཡང་གསུངས་པ་ཡིན་ཏེ། འཆི་བའི་གཉེན་པོ་ཡིན་པའི་ཕྱིར་དང་མཚན་མ་རྣམས་ནུབ་པའི་ཕྱིར་དང་ངག་དང་རྣམ་པར་རྟོག་པའི་ཡུལ་ལས་འདས་པའི་ཕྱིར་གོ་རིམས་ཇི་ལྟ་བ་བཞིན་དུ་མི་འཇིག་པ་དང་རྣམ་པར་མི་ཤེས་པ་དང༌། བརྗོད་པ་མེད་པ་དང༌། རྣམ་པར་རྟོག་པ་མེད་པ་རྣམས་སོ། །ཡེ་ཤེས་འདི་ཞེས་བྱ་བ་ནི་ཁྲོ་བོ་བཞིའི་བདག་ཉིད་ཀྱི་སངས་རྒྱས་ཀྱི་བྱང་ཆུབ་ཀྱི་ཡེ་ཤེས་སོ། །ཤེས་ནས་ཞེས་བྱ་བ་ནི་ལྷག་པར་ཁོང་དུ་ཆུད་པའོ། །བདེ་བ་ཐོབ་པར་འགྱུར་ཞེས་བྱ་བ་ནི་བདེ་བ་ཆེན་པོའི་རྡོ་རྗེ་འཛིན་པའི་གོ་འཕང་ཐོབ་པར་འགྱུར་བའོ། །དེ་ལྟར་བྱས་ན་དེ་བཞིན་གཤེགས་པ་ལྔ་དང་རིག་པ་བཞི་དང་ཁྲོ་བོ་བཞི་རྣམས་གོ་རིམས་བཞིན་དུ་རང་བཞིན་དང་རང་གི་བདེ་བ་དང་ཞི་བ་ཞེས་བྱ་བ་གྲགས་པའི་བྱང་ཆུབ་ཀྱི་སེམས་གསུམ་རྒྱུ་དང་ཐབས་དང་འབྲས་བུ་དག་ཡིན་ནོ། །མཐར་ཐུག་པའི་འབྲས་བུ་ནི་རྡོ་རྗེ་འཆང་ཆེན་པོའི་གོ་འཕང་སྟེ། དེ་དག་བསྟན་པར་འདོད་ནས་གཏི་མུག་ཅེས་བྱ་བ་ལ་སོགས་པའི་ཚིགས་སུ་བཅད་པ་ལྔས་དཀྱིལ་འཁོར་གྱི་འབྲེལ་པ་གསུངས་ཏེ། གཏི་མུག་གི་རིགས་གང་ཡིན་པ་སྟེ་རྣམ་པར་སྣང་མཛད་དོ། །དེ་ནི་གཏི་མུག་ལོངས་སྤྱོད་ཀྱིས་ཏེ། གཏི་མུག་དགའ་མའི་ཐབས་ཀྱིས་གཏི་མུག་ཟད་པའི་ཕུན་སུམ་ཚོགས་པར་འགྱུར་ཏེ། ཡེ་ཤེས་ཙམ་དུ་ཤེས་པ་མེད་པ་ནི་གཏི་མུག་གི་ལ་དེ་ཟད་པ་ནི་གཏི་མུག་ཟད་པ་སྟེ། དེ་ཡང་བཅོམ་ལྡན་འདས་གཤིན་རྗེ་མཐར་བྱེད་དོ། །དེ་ན་ཞེས་བྱ་བ་ནི་གཏི་མུག་ཟད་པའི་རྒྱུ་དེས་ནའོ། །ལུས་མཐར་བྱེད་ཅེས་བྱ་བ་ནི་ལུས་ཀྱི་རྟོག་པ་མཐར་བྱེད་པའོ། །དེས་ན་ཤེས་བྱ་མཐར་བྱེད་འགྱུར། །ཞེས་བྱ་བ་ནི་ཤེས་བྱའི་རྟོག་པ་མཐར་འབྱིན་པའོ། །ཉེས་
པ་ཞེས་བྱ་བ་ནི་ཞེ་སྡང་གི་རིགས་གང་ཡིན་པ་སྟེ་མི་བསྐྱོད་པའོ། །ཞེ་སྡང་ཉིད་ཉེས་པ་སྟེ་དེ་དེར་བྱས་པས་དེ་ནི་ཉེས་པའི་ལོངས་སྤྱོད་ཀྱིས་ཏེ། ཞེ་སྡང་དགའ་མའི་ཐབས་ཀྱིས་ཉེས་ཟད་ཕུན་སུམ་ཚོགས་པར་འགྱུར་ཏེ། འདིར་ཉེས་པ་ནི་གཉིས་སུ་སྣང་བ་ཡིན་ཏེ་དེ་དོར་བྱས་པས་སོ། །དེ་ཟད་པ་ན་ཉེས་པ་ཟད་པ་སྟེ། དེ་ཡང་བཅོམ་ལྡན་འདས་ཤེས་རབ་མཐར་མཛད་དོ། །དེས་ན་སེམས་མཐར་བྱེད་ཡིན་ཏེ། འཛིན་པ་པོ་ནུབ་པའི་ཕྱིར་རོ། །དེས་ན་ཉོན་མོངས་པ་མཐར་བྱེད་ཀྱང་ཡིན་ཏེ། དེ་རྣམས་འཛིན་པའི་བྱེ་བྲག་ཡིན་པའི་ཕྱིར་རོ། །འདོད་ཆགས་ཞེས་བྱ་བ་ནི་རིགས་གང་ཡིན་པ་སྟེ། རིན་པོ་ཆེ་དང་འོད་དཔག་ཏུ་མེད་པའོ། །དེ་ནི་འདོད་ཆགས་ལོངས་སྤྱོད་པ། །ཞེས་བྱ་བ་ནི་འདོད་ཆགས་དགའ་མ་ཐབས་ཀྱི་འདོད་ཆགས་ཟད་པའི་ཕུན་སུམ་ཚོགས་པར་འགྱུར་ཏེ། འདིར་འདོད་ཆགས་རོལ་པ་དང་མཚན་ཉིད་དང༌། མཚན་གཞི་ལ་ཉེ་བར་དམིགས་པའི་མཚན་ཉིད་གང་ཡིན་པ་སྟེ། དེ་ཟད་པ་ནི་འདོད་ཆགས་ཟད་པའོ། །དེ་ཡང་བཅོམ་ལྡན་འདས་པདྨ་མཐར་མཛད་དོ། །དེས་ན་ངག་མཐར་བྱེད་པ་སྟེ། རྣམ་པར་རྟོག་པ་ལས་བྱུང་བའི་ངག་མཐར་བྱེད་པའོ། །དེ་བཞིན་སྙོམས་འཇུག་མཐར་བྱེད་འགྱུར། །ཞེས་བྱ་བ་འདིར་སྙོམས་པ་ནི་སྙོམས་པར་འཇུག་པའི་སྒྲིབ་པ་སྟེ། ཚིག་ཕྱི་མ་མི་མངོན་པར་སྙོམས་པར་འཇུག་པའོ། །དེ་མཐར་བྱེད་ནི་འདོད་ཆགས་དགའ་མས་སེམས་བརྟན་པར་བྱས་པས་ན་རྡོ་རྗེ་སེམས་དཔའ་ཞུགས་པའི་ཕྱིར་ཇི་ལྟར་འདོད་པ་བཞིན་དུ་ཏིང་ངེ་འཛིན་ལ་སྙོམས་པར་འཇུག་པའི་ཕྱིར་རོ། །ཉོན་མོངས་ཀུན་ནི་གོ་རིམས་བཞིན་དུ་གཏི་མུག་དང་ཞེ་སྡང་དང་འདོད་ཆགས་རྣམས་སོ། །རྡོ་རྗེ་ཐམས་ཅད་ནི་ལུས་དང་སེམས་དང་ངག་རྣམས་སོ། །སྒྲིབ་པ་ཀུན་ནི་ཤེས་བྱ་དང་ཉོན་མོངས་པ་དང་སྙོམས་པར་འཇུག་པའི་སྒྲིབ་པ་རྣམས་སོ། །དེ་ལ་ཤེས་བྱར་རྟོག་པ་ཉིད་ཤེས་བྱའི་སྒྲིབ་པའོ། །ཉོན་མོངས་པ་ཉིད་ནི་ཉོན་མོངས་པའི་སྒྲིབ་པའོ། །སྙོམས་པར་འཇུག་པ་ལ་སྒྲིབ་པ་ནི་སྙོམས་པར་འཇུག་པའི་སྒྲིབ་པའོ། རྣམས་ཟད་པར་བྱེད་པའི་ཡེ་ཤེས་ཏེ། དེ་ནི་བཅོམ་ལྡན་འདས་བགེགས་མཐར་བྱེད་དོ། །དེས་འདི་སྐད་དུ། ཉོན་མོངས་རྡོ་རྗེ་ལོངས་སྤྱོད་པས། །ཉོན་མོངས་རྡོ་རྗེ་ཟད་
པ་བགེགས་མཐར་བྱེད། །དེས་ནི་ཉོན་མོངས་རྡོ་རྗེ་ཟད་འགྱུར་ལ། །དེ་བཞིན་སྒྲིབ་པ་མཐར་བྱེད་འབྱུང༌། །ཞེས་བསྟན་པར་འགྱུར་ཏེ། གཞན་དུ་དོན་ཡོད་གྲུབ་པ་དང་རྡོ་རྗེ་དགའ་མ་དང་བགེགས་མཐར་བྱེད་རྣམས་ཀྱི་འབྲེལ་པ་བསྟན་པར་འགྱུར་རོ། །དེ་དག་གིས་རིགས་དང་ལོངས་སྤྱོད་རྣམས་ཁྲོ་བོ་རྣམས་དང་འབྲེལ་པར་བསྟན་ནས་འབྲས་བུ་དང་འབྲེལ་པ་བསྟན་པའི་ཕྱིར་ཉོན་མོངས་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་རྣམས་དང་རྡོ་རྗེ་རྣམས་དང་སྒྲིབ་པ་རྣམས་ཟད་པས་བདུད་རྩི་འཁྱིལ་པའི་དུས་སུ་ལས་ཐམས་ཅད་རྣམ་པར་དག་ཅིང་དྲི་མ་མེད་པར་འགྱུར་ཏེ་དེས་ན་ལས་ལས་སྐྱེས་པའི་འབྲས་བུ་རྡོ་རྗེ་འཆང་ཆེན་པོ་གོ་འཕང་ཤིན་ཏུ་རྣམ་པར་དག་པར་འགྱུར་རོ། །དེ་བཞིན་དུ་བིགྷྣཱནྟ་ཀྲྀཏ་བི་ཞེས་བྱ་བའི་དྲི་མ་ནི་བིགྷྣཱནྟ་ཀྲྀཏ་ཇི་ལྟ་བུ་དེ་བཞིན་ནི་ཇི་ལྟ་བུ་ཞེས་རྣམ་པར་དབྱེ་བ་བྱས་པས་གཉིས་སུ་འགྱུར་རོ། །དེ་བཞིན་ཞེས་བྱ་བས་ནི་དེ་དང་འདྲ་བའི་ལྷ་གཞན་དག་གིས་ཡང་མིང་ཇི་སྐད་ཅེས་བྱ་བ་དང་དོན་ཇི་ལྟ་བུ་ཞིག་ལགས་ཞེས་བྱ་བའི་དོན་ཏོ། །དེ་བས་ན་དེ་དག་གི་ལན་གསུངས་པ་གཟུང་བ་དང་ཞེས་བྱ་བ་ལ་སོགས་པ་ལ་གཟུང་བ་ནི་འདོད་པ་རྣམས་ལ་ལོངས་སྤྱོད་པའོ། །འདོད་ཆགས་ནི་བསམ་གཏན་གྱི་སེམས་ཀྱི་དབྱིངས་ལ་རོལ་པའོ། །རྣམ་པ་ནི་དེ་ཉིད་ཀྱིས་རིག་བྱ་དང་བཅས་པའི་དུས་གསུམ་གྱི་སངས་རྒྱས་རྣམས་ཀྱི་སྐུ་དང་གསུང་དང་ཐུགས་ཀྱི་རིག་པ་པོས་རིན་པོ་ཆེ་ཕྲ་མོར་བྱེད་པའོ། །མི་གཡོ་བ་ནི་རིན་པོ་ཆེ་དེ་ཉིད་སྔགས་ཀྱི་ཐིག་ལེ་ལ་བརྟན་ཞིང་མི་གཡོ་བར་བྱེད་པའོ། །རྒྱུ་ནི་རིན་ཆེན་དེ་ཉིད་ལས་མཚན་མ་རྣམས་ཁྱབ་པར་སྤྲོ་བའོ། །འབྲས་བུ་ནི་ཁྱབ་པར་སྤྲོས་པ་རྣམས་དེ་ཉིད་དུ་བསྡུས་ཏེ་ཉི་མའམ་ཟླ་བའི་གཟུགས་གང་ཡང་རུང་བར་བསྐྱོད་པའོ། །རྡོ་རྗེ་ཞེས་བྱ་བ་ནི་བྱང་ཆུབ་ཀྱི་སེམས་ཏེ། ཡན་ལག་དྲུག་པོ་དེ་དག་ལས་ཡང་དག་པར་བྱུང་བའོ། །དེ་བས་ན་དོན་དྲུག་པོ་འདི་དག་ནི་ཇི་ལྟར་རིགས་པར་དྲུག་ཚན་གསུམ་དུ་རིག་པར་བྱའོ་ཞེས་བྱ་བར་དགོངས་སོ། །དེ་ཉིད་ཀྱི་ཕྱིར་གསུངས་པ་འདོད་པ་ཞེས་བྱ་བ་ལ་སོགས་པ་སྟེ། འདོད་པའི་རྒྱལ་པོ་ལ་སོགས་པ་དྲུག་གོ །འདི་ལྟར་འདོད་པའི་རྒྱལ་པོ་ནི་ལོངས་སྤྱོད་ཀྱི་ཕྱིར་འདོད་པ་རྣམས་འགུགས་པའོ། །སྔོན་པོ་ནི་ནག་པོ་སྟེ་དེ་བས་ན་བསམ་གཏན་གྱིས་སེམས་
འགུགས་ཤིང་འདུལ་བ་ནི་དབྱིག་སྔོན་ཅན་ནོ། །ཚོར་བའི་ཕུང་པོས་བདག་ཉིད་གསོ་བ་ནི་སྟོབས་པོ་ཆེའོ། །བརྟན་པར་གྱུར་པ་ནི་མི་གཡོ་བའོ། །འབྲས་བུ་ལ་སྒྲིབ་པ་འཇོམས་པ་ནི་གནོད་མཛེས་རྡོ་རྗེའོ། །རྩེ་མོར་གྱུར་པའི་འབྲས་བུ་ཉིད་ནི་གཙུག་ཏོར་ཁྲོ་བོའོ། །དབང་པོར་རྣམ་པར་གྲགས་ཞེས་བྱ་བ་ལ་ཁྲོ་བོ་གཤིན་རྗེ་གཤེད་ལ་སོགས་པའོ། །དབང་པོ་ནི་དེ་རྣམས་ཀྱི་བདག་པོའི་རྐྱེན་ནོ། །དེ་ཉིད་ཀྱི་ཕྱིར་ཁྲོ་བོའི་འཁོར་ལོ་ལ་བདག་པོ་དང་བཅས་པའི་ལྷ་བཅུ་གཅིག་གོ །དམ་ཚིག་ཅེས་བྱ་བ་ལ་སོགས་པ་ལ་སྔགས་ཀྱི་ལྷ་ཐམས་ཅད་ཀྱི་ལུས་ནི་ཛི་ན་ཛིཀ་ཅེས་བྱ་བའི་སྔགས་ཀྱི་དོན་ཡིན་ལ་དེ་ནི་སྣ་ཚོགས་པ་ལས་སྐྱེས་པ་སྟེ། དེ་ཡང་ཡི་གེ་བྷྲཱུཾ་མོ། །དེའི་དོན་ནི་ཡི་གེ་བྷ་དང་ར་དང་ཨུ་དང་མ་རྣམས་ཀྱིས་གོ་རིམས་བཞིན་དུ་འབྱུང་བ་དང༌། འབྱུང་བ་ལས་གྱུར་པ་དང༌། གཟུགས་ལ་སོགས་པས་སྟོང་པས་ཡིད་སྣ་ཚོགས་པ་ཙམ་ཞེས་བྱའོ། །དེ་ལ་འབྱུང་བ་ལྔ་སྟོང་པ་ཉིད་ནི་པདྨའོ།། འབྱུང་བ་ལས་གྱུར་པ་ལྔ་སྟོང་པ་ཉིད་ནི་རྡོ་རྗེའོ། །གཟུགས་ལ་སོགས་པ་སྟོང་པ་ཉིད་ནི་རྡོ་རྗེའི་ནང་དུ་ཆུད་པའི་ཆོས་ཀྱི་དབྱིངས་སོ། །འབྱུང་བ་ལས་གྱུར་པ་དྲུག་པ་ཡིད་ནི། ཆོས་ཀྱི་དབྱིངས་ལ་གནས་པ་སྣ་ཚོགས་པ་དེ་ཉིད་དོ། །དེ་བས་ན། དམ་ཚིག་རྡོ་རྗེ་སོགས་དྲུག་དང༌། །ས་ལ་སོགས་པ་རྣམ་པ་ལྔ། །འབྱུང་དང་འབྱུང་ལས་གྱུར་པར་གྲགས། །ཞེས་གསུངས་སོ། །རིག་པའི་རྒྱལ་པོ་ཞེས་བྱར་བཤད། །ཅེས་བྱ་བ་ནི། དམ་ཚིག་རྡོ་རྗེ་ལ་སོགས་དྲུག །ཅེས་བྱ་བ་དང་སྦྱར་རོ། །ཇི་ལྟར་ན་རིག་པའི་རྒྱལ་པོ་ཡིན་ཞེ་ན། དག་པའི་འདོད་པ་རྣམས་ཀྱི་རིག་པ་དང༌། བསམ་གཏན་གསུམ་དང་བཞི་པའི་རིག་པ་རྣམས་ཀྱི་བདག་པོ་ཡིན་པའི་ཕྱིར་ཏེ། དེ་དག་གི་སྟོབས་ཀྱིས་དེ་རྣམས་སྐྱེ་བའི་ཕྱིར་རོ། །གཟུགས་ཀྱི་རྡོ་རྗེ་ལ་སོགས་དྲུག །རྡོ་རྗེའི་བདག་པོ་ཞེས་བྱར་བརྗོད། །ཅེས་བྱ་བ་ནི་ཡོངས་སུ་དག་པའི་འདོད་པ་དྲུག་གི་ལོངས་སྤྱོད་ལས་བསམ་གཏན་དང་པོ་དང་གཉིས་པ་ལས་བསྡུས་པའི་རྡོ་རྗེའི་ངག་སྐྱེས་པའོ། །ལྷ་བཅུ་གཉིས་པོ་དེ་དག་དཀྱིལ་འཁོར་པ་ཆེན་པོ་ལ་གང་དང་འབྲེལ་ཞེ་ན། བཅུ་གཉིས་པོ་འདི་དག་ནི་སངས་རྒྱས་ལྔ་རྣམས་ཞེས་བྱ་བ་དང་སྦྱར་ཏེ། དེ་དག་ནི་འབྲས་བུ་ལྔའི་རྒྱུར་གྱུར་པའོ། །ཇི་སྟེ་བཅུ་གཉིས་པོ་དེ་དག་གི་བརྗོད་པའི་སྔགས་ནི་གང་
ཞིག་གང་ལས་ནི་སྐྱེས་སྙམ་དུ་སེམས་ན། དེའི་ཕྱིར་སྐུ་ཞེས་བྱ་བ་ལ་སོགས་པ་སྨོས་ཏེ། དེ་ཁོ་ན་ཉིད་གསུམ་བརྗོད་པས་སོ། །བདག་ཉིད་ཆེ་ལས་ཞེས་བྱ་བ་ནི་དཀྱིལ་འཁོར་ཆེན་པོའི་བདག་པོའི་རིག་པའི་པདྨའི་ནང་ན་གནས་པའི་ས་བོན་ལས་ཆོ་ག་བཞིན་དུ་བསྐྱེད་དོ་ཞེས་བྱ་བའི་དོན་ཏོ། །ཀུན་དགའ་སྙིང་པོ་དང་ཡེ་ཤེས་ཞབས་ཀྱི་ཞལ་སྔ་ནས་འདི་ནི་འདས་མ་ཐག་པ་ཡིན་པའི་ཕྱིར་གཟུགས་ཀྱི་རྡོ་རྗེ་ལ་སོགས་པ་དང་སྦྱོར་གྱི་དམ་ཚིག་རྡོ་རྗེ་ལ་སོགས་པ་དང་ནི་མ་ཡིན་ནོ་ཞེས་ཟེར་རོ། །ཅི་སྟེ་སའི་སྙིང་པོ་ལ་སོགས་པ་དྲུག །ཇི་ལྟར་དབང་པོ་དྲུག་གྱིན་ཞེ་ན། གཟུགས་ལ་སོགས་པའི་ཤེས་པ་སྐྱེད་པའི་བདག་པོ་ཡིན་པའི་ཕྱིར་ཏེ། དེ་བས་ན་དབང་དུ་བྱེད་པའི་ཕྱིར་དབང་པོ་ཞེས་བྱའོ། །དེ་ལ་འཁོར་ལོས་སྒྱུར་བ་རྣམས་ཀྱི་དེ་ཁོ་ན་ཉིད་ཀྱི་གོ་རིམས་བཞི་ནི་གཟུགས་ལ་སོགས་པའི་ཤེས་པ་ཡིན་པར་དྲུག་ཁོ་ན་ཡིན་ལ་དེའི་སྦྱོར་བའི་གནས་སྐབས་ནི་སའི་སྙིང་པོ་ལ་སོགས་པའོ། །དེ་ཉིད་ཀྱི་ཕྱིར་དེ་དག་ནི་དེ་བཞིན་གཤེགས་པ་རྣམས་དང་མཚུངས་པའི་མཚན་མ་ཅན་ནོ། །སའི་སྙིང་པོའི་སྒྲ་ནི་དེ་ལས་གཞན་པ་རྣམས་ཀྱི་རྟེན་དུ་གྱུར་པ་སྟེ་ས་དང་མཚུངས་པའི་སེམས་བསྐྱེད་པ་ལྟ་བུའོ། །སངས་རྒྱས་རྣམས་ཀྱི་གཟུགས་ནི་རྣམ་པར་རིག་པ་ཙམ་ཡིན་པའི་ཕྱིར་གཟུགས་བརྙན་ལྟ་བུར་ཤེས་པར་བྱེད། དེ་བས་ན་གཟུགས་ཀྱི་རྡོ་རྗེ་མདོག་དཀར་མོ་ལ་ན་མེ་ལོང་ཐོགས་པའོ། །སངས་རྒྱས་རྣམས་ཀྱི་གསུང་གི་དོན་ཆོས་ཀྱི་དབྱིངས་སུ་ཤེས་པར་བྱེད་དེ་དེ་ཡང་རྣམ་པར་རྟོག་པ་མེད་པར་ཤེས་པར་བྱའོ། །དེ་ཉིད་ཀྱི་ཕྱིར་སྒྲ་རྡོ་རྗེ་མའི་ལག་ན་པི་ཝང་ཐོགས་པ་སྟེ། པི་ཝང་ཡང་རྣམ་པར་རྟོག་པ་མེད་པར་སྒྲ་སྒྲོགས་པའོ། །སངས་རྒྱས་ཀྱི་དྲི་ནི་ཚོར་བའི་ཕུང་པོ་ཡོངས་སུ་དག་པ་སྟེ། དེས་དུས་གསུམ་གྱི་སངས་རྒྱས་རྣམས་ཀྱི་སྐུ་དང་གསུང་དང་ཐུགས་ལ་བྱུག་པར་བྱེད་དོ། །དེ་ཉིད་ཀྱི་ཕྱིར་དྲི་རྡོ་རྗེ་མའི་ལག་ན་དྲིའི་དུང་ཐོགས་པའོ། །ཡིད་བཞིན་གྱི་ནོར་བུའི་སེམས་དེ་ཉིད་སྔགས་ཀྱི་ཐིག་ལེར་བཞག་སྟེ། བསྒོམས་པའི་རོ་མྱོང་བར་གྱུར་པ་ནི་རོའོ། །དེ་ཉིད་ཀྱི་ཕྱིར་རོ་རྡོ་རྗེ་མའི་ལག་ན་རོའི་སྣོད་ཐོགས་པའོ། །དེ་ལས་འཁོར་ལོ་ཕྲ་མོ་ལ་སོགས་པ་རྣམས་ལས་ཐམས་ཅད་སྤྲོས་ཏེ། བདེ་བ་སྐྱེད་པའི་ཕྱིར་ལུས་ཀུན་ལ་བདེ་བ་སྐྱེད་པ་ནི་རེག་པ་སྟེ། དེ་ཉིད་ཀྱི་ཕྱིར་རེག་
རྡོ་རྗེ་མའི་ལག་ན་སྣ་ཚོགས་པའི་ན་བཟའ་སྲབ་མོ་ཐོགས་པའོ། །ཤིན་ཏུ་ཕྲ་བའི་ནོར་བུའི་སྙིང་པོར་ཤིན་ཏུ་ཕྲ་བའི་རྡོ་རྗེའི་བྱང་ཆུབ་ནི་འཛིན་པའི་ཡེ་ཤེས་སོ། །དེའི་རིག་པར་བྱ་བ་ནི་སེམས་དཔའ་རྣམས་ཀྱི་ཆོས་ཀྱི་དབྱིངས་སོ། །དེ་ཉིད་ཀྱི་ཕྱིར་ཆོས་ཀྱི་དབྱིངས་ཀྱི་རྡོ་རྗེ་མ་ཆོས་འབྱུང་དཀར་པོ་ཐོགས་པའོ། །ལེའུ་དང་པོའི་ཚིག་གི་དོན་སྦས་པ་རྣམས་གསལ་བར་བྱས་པ་ཞར་ལ་བྱུང་བ་དང་བཅས་པའོ། །ལེའུ་དང་པོར་ཐབས་ལས་བྱུང་བའི་དོན་སྦས་པ་རྣམས་གསལ་བར་མཛད་ནས། ད་ནི་ཐབས་ཀྱི་ལེའུ་གསལ་བར་བྱ་སྟེ། དེ་ལས་དང་པོར་སྒྲུབ་པ་ཆེན་པོའི་ལེའུ་ལྔ་པ་དང་དགུ་པ་དང་བཅུ་གསུམ་པ་དང་བཅུ་བདུན་པ་རྣམས་ལས། ལེའུ་ལྔ་པའི་དོན་ཀུན་དུ་སྤྱད་པ་དྲིས་པའི་ལན་གསུངས་པ་ཐབས་དང་ཤེས་རབ་ཅེས་བྱ་བ་གསུངས་པ་ལ། སྔགས་པས་ངེས་པར་སྤྱོད་ཅེས་བྱ་བར་སྦྱར་ཏེ། ཡང་དག་པའི་ཏིང་ངེ་འཛིན་གྱིས་སྔགས་འཛིན་པས་ན་སྔགས་པ་ཞེས་བྱའོ། །ཅི་ཞིག་ངེས་ཤེ་ན། ཕུང་པོ་དང་ཁམས་དང་སྐྱེ་མཆེད་དང་ལུས་སོ། །ཇི་ལྟར་ངེས་ཤེ་ན། ཐབས་དང་ཤེས་རབ་ལས་བྱུང་བའི་ཞེས་བྱ་སྟེ། མཁའ་མེད་པའི་ནམ་མཁའི་རང་བཞིན་གྱི་རྡོ་རྗེ་འཆང་ཆེན་པོ་ནི་ཐབས་སོ། །དེ་དང་ལྷན་ཅིག་སྤྱོད་པའི་ཆོས་ཀྱི་དབྱིངས་ཀྱི་རང་བཞིན་ནི་ཤེས་རབ་པོ། །དེ་ལས་བྱུང་བ་ནི་དེ་དག་སྦྱོར་བ་ལས་སྐྱེས་པ་སྟེ། བྱང་ཆུབ་ཀྱི་སེམས་འབྱུང་བ་ཞེས་བྱ་བའི་དོན་ཏོ། །ཇི་ལྟར་སྦྱོར་བར་ངེས་པར་བྱ་ཞེ་ན། ཇི་ལྟར་རིགས་པར་བྱ་ཞེས་བྱ་བའི་དོན་ཏོ། །དེ་ལ་ཇི་ལྟར་རིག་པའི་དོན་ནི་འདི་ཡིན་ཏེ། དེ་རྣམས་ལ་ཕྱི་རོལ་གྱི་ཁམས་བཞི་ནི་ལྷ་མོ་བཞི་ལས་བྱུང་བའི་བདག་གི་གཞལ་ཡས་ཁང་རྒྱ་ཆེན་པོའོ། །བདག་གི་ལུས་གང་ཡིན་པ་ནི་བདག་གི་ཡི་དམ་གྱི་ལྷའི་སྐུའོ། །བདག་གི་རིག་པ་གང་ཡིན་པ་དེ་ནི་ཁམས་བཞིའི་ལྷ་མོའོ། །བདག་ཉིད་ནི་དཀྱིལ་འཁོར་གྱི་བདག་པོའོ། །བདག་གི་ཕུང་པོ་ལྔ་གང་ཡིན་པ་དེ་ནི་སངས་རྒྱས་ཐམས་ཅད་བསྡུས་པའི་དཀྱིལ་འཁོར་པའི་སངས་རྒྱས་ལྔ་རྣམས་སོ། །བདག་གི་མིག་ལ་སོགས་པའི་སྐྱེ་མཆེད་དྲུག་གང་ཡིན་པ་དེ་ནི་བྱང་ཆུབ་སེམས་དཔའ་ཐམས་ཅད་བསྡུས་པའི་སའི་སྙིང་པོ་ལ་སོགས་པའི་དཀྱིལ་འཁོར་པའི་བྱང་ཆུབ་སེམས་དཔའ་རྣམས་སོ། །འཇིགས་པ་ཐམས་ཅད་ནི་སེམས་ཅན་དང་ལས་
དང་ཉོན་མོངས་པ་རྣམས་ཀྱིས་སྐྲག་པ་སྤང་བའོ། །རྒྱུ་ཅིའི་ཕྱིར་ཞེ་ན། ཐམས་ཅད་དག་པར་མོས་པ་ཡིས་ཏེ། དེ་དག་ཐམས་ཅད་བདག་པོ་ཉིད་ལྷག་པར་མོས་པས་སོ། །དེ་ཉིད་ཀྱང་ཇི་ལྟར་ཞེ་ན། རྫོགས་པའི་རིམ་པའི་སྦྱོར་བ་ཡིས། །ཞེས་བྱ་བ་གསུངས་ཏེ། རྫོགས་པའི་རིམ་པའི་བྱེ་བྲག་གང་ཡིན་པའོ། །དེའི་སྦྱོར་བའི་ཏིང་ངེ་འཛིན་ཏེ་བརྟན་པའི་ང་རྒྱལ་ལོ། །དེ་ནི་བདག་ཇི་ལྟ་བ་བཞིན་དུ་སེམས་ཅན་ཐམས་ཅད་དེ་གཏི་མུག་ལ་སོགས་པའི་ཉོན་མོངས་པ་དྲུག་ནི་སངས་རྒྱས་ལྔའོ། །ལུས་ལ་སོགས་པ་རྣམས་ནི་སྐུ་རྡོ་རྗེ་ལ་སོགས་པའོ། །ལུས་ལ་སོགས་པའི་ལས་རྣམས་ནི་སྐུ་རྡོ་རྗེ་ལ་སོགས་པའི་མཛད་སྤྱོད་དོ། །དེ་ལྟར་སྣང་བ་འདི་དག་ལྷ་རྣམས་ཉིད་དུ་མཐོང་བའི་ལྷག་མར་མོས་པ་འདི་ནི་རྫོགས་པའི་རིམ་པའི་སྦྱོར་བའོ། །དོགས་པ་མེད་པའི་སེམས་ཀྱིས་ཞེས་བྱ་བ་ནི་སངས་རྒྱས་རྣམས་ཉིད་དེ་སངས་རྒྱས་མ་ཡིན་པའི་དོགས་པ་མི་བྱའོ། །སྔགས་ནི་རང་གི་ལྷའོ། །དེ་འདི་ལ་ཤིན་ཏུ་ཡོད་པས་ན་སྔགས་པ་སྟེ། དེའི་ང་རྒྱལ་བརྟན་པར་གནས་པའོ། །སེང་གེ་བཞིན་དུ་རྒྱུ་ཞེས་བྱ་བ་ནི་དོགས་པ་མེད་པའི་སེམས་ཀྱིས་རྒྱུ་བའོ། །ཡང་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏོ། །འདི་ལ་ཞེས་བྱ་བ་ནི་རྣལ་འབྱོར་འདིར་རོ། །མི་བྱ་མེད་ཅེས་བྱ་བ་དང་མི་བཟའ་ཡོད་མ་ཡིན་ཞེས་བྱ་བ་ནི། ལུས་ཀྱི་ལས་དགག་པ་མེད་པའོ། །སྨྲ་བར་མི་བྱ་ཞེས་བྱ་བ་ནི་ངག་གི་ལས་རྣམས་སོ། །མི་བསམ་པ་ཞེས་བྱ་བ་ནི་སེམས་དེ་ལས་ཏེ། སྐུ་ལ་སོགས་པའི་མཛད་སྤྱོད་ཡིན་ཞེས་བྱ་བའོ། །མཉམ་པར་མ་བཞག་ཅེས་བྱ་བ་ནི་ལྷག་པར་མོས་པའི་སེམས་ཀྱིས་སྦྱོར་བ་སྟེ། ཇི་སྐད་དུ་གསུངས་པའི་ཏིང་ངེ་འཛིན་ཏོ། །རྟག་པ་ཉིད་དུ་མཉམ་པར་ཞོག །ཅེས་བྱ་བ་ནི་གང་གི་ཕྱིར་དེ་ཉིད་ཀྱིས་གནས་པས་སོ། །སེམས་ཀུན་ལས་ཞེས་བྱ་བ་ནི་ཁ་ཕྱིར་བལྟས་པའི་སེམས་ཡིན་དུ་ཟིན་ཀྱང་ངོ༌། །གང་གིས་སྤྱོད་པ་ཞེས་བྱ་བ་ནི། སྦྱོར་བ་གང་གིས་སྤྱོད་པའོ། །སེམས་ཀུན་ལ་སྤྱོད་པ་ནི་ཀུན་དུ་སྤྱོད་པ་ཞེས་བྱ་བར་དགོངས་སོ། །ཀུན་དུ་སྤྱོད་པའི་ཞོར་ལ་དེའི་འོག་ཏུ་སྔགས་ཀྱི་སྤྱོད་པ་དྲིས་པའི་ལན་གསུངས་པ་དབང་པོ་ཞེས་བྱ་བ་ལ་སོགས་པ་ལ་དབང་པོ་རྣམས་དང་ཡུལ་རྣམས་དང་བཅས་པའི་ཡིད་ཀྱི་རྐྱེན་ལས་བྱུང་
བ་གང་དང་ཡིན་པ་དེ་ནི་ཡིད་ཡིན་ཏེ། ཡིད་དེ་ནི་མ་ན་ཞེས་བྱ་བར་གྲགས་པའོ། །དེ་ཞེས་བྱ་བའི་སྒྲ་ནི་གང་དང་གང་བྱ་བ་དག་དང་འབྲེལ་པས་དེ་ཞེས་བྱ་བ་གཉིས་སུ་འགྱུར་བར་ཤེས་པར་བྱའོ། །དབང་པོ་ཞེས་བྱ་བ་ནི་འབྱུང་བ་ལྔའི་དབང་པོ་སྟེ་པདྨར་བསྡུས་པའོ། །འབྱུང་བ་ལས་གྱུར་པའི་དབང་པོ་ལྔ་ནི་རྡོ་རྗེར་བསྡུས་པའོ། །ཡུལ་རྣམས་ཞེས་བྱ་བ་ནི་གཟུགས་ལ་སོགས་པའི་ཡུལ་དྲུག་པོ་རྣམས་ཀྱི་ཆོས་ཀྱི་དབྱིངས་ཀྱིས་སྐྱེས་པའོ། །ཡིད་ཅེས་བྱ་བ་ནི་རྣམ་པར་ཤེས་པའི་ཁམས་བདུན་ཡིད་ཀྱི་སྐྱེ་མཆེད་དུ་བསྡུས་པའོ། །དེ་རྣམས་ཀྱི་རྐྱེན་གྱིས་དེ་རྣམས་ལ་བརྟེན་ཏེ་གང་དང་གང་སྐྱེས་པའོ། །ཅི་ཞིག་སྐྱེ་ཞེ་ན། ཡིད་ཅེས་བྱ་བ་སྟེ་ཡིད་ཀྱི་ཡུལ་ཡིན་པས་ན་ཡིད་དེ་སེམས་ཀྱིས་དམིགས་པ་དང་ཏིང་ངེ་འཛིན་ཞེས་བྱ་བའི་དོན་ཏོ། །དེ་ཡང་སོ་སོར་སྡུད་པ་ལ་སོགས་པ་ཡན་ལག་དྲུག་དང་དེའི་ཕྱོགས་གཅིག་གཟུགས་ལ་སོགས་པའི་ཟླ་བ་ཡང་སྟེ། དེ་ཡང་དེའི་ཡིད་མ་ན་ཞེས་བྱ་བར་བཤད་པ་ནི་ཡན་ལག་དྲུག་གིས་བསྡུས་པའི་མཉམ་པར་གཞག་པའི་ཤེས་རབ་ཅེས་བྱ་བའི་དོན་ཏོ། །བཤད་པ་ནི་གྲགས་པ་སྟེ་ལྷག་པའི་དོན་ཞེས་བྱ་བའི་ངེས་པའི་ཚིག་གིས་དེའི་ངང་ཚུལ་ཅན་གྱི་ཏིང་ངེ་འཛིན་ལ་བྱའོ། །དེ་བས་ན་ཡན་ལག་དྲུག་ལ་མཉམ་པར་བཞག་པས་བསྡུས་པའི་ཤེས་རབ་ནི་མ་ནའོ། །མ་ན་ཡང་ཡིན་ལ་ཏྲ་ཡང་ཡིན་པས་ན་མནྟྲ་སྟེ། མ་ན་ནི་ཤེས་པས་མ་ན་ཡིན་ལ་སྐྱོབ་པས་ན་ཏྲ་ཡིན་ནོ། །ངེས་པའི་ཚིག་ཏུའོ། །ཏྲ་ནི་སྐྱོབ་པར་བྱེད་པའི་ཕྱིར། །ཞེས་བྱ་བ་འདིས་མ་ན་ནི་ཤེས་པར་བྱེད་པའི་དོན་ཞེས་བྱ་བ་ཡང་དོན་གྱིས་ཤེས་པར་བྱ་སྟེ། ངན་འགྲོ་དང་སྲིད་པའི་སྡུག་བསྔལ་དང་ཐེག་པ་དམན་པ་སྲུང་བས་ན་སྐྱོབ་པ་སྟེ་དེ་བྱེད་པའོ། །འདིར་ཚིགས་སུ་བཅད་པ་ནི། ལོངས་སྤྱོད་དང་ནི་ཡན་ལག་རྣམ་པ་གང་ཡིན་བློ་དང་ཞིག་ནས་གཅིག་བསྡུས་གང་ཡིན་དང༌། །དེ་ལས་ཕྲ་མོ་གསུམ་གྱི་རིན་ཆེན་དང་ནི་ངག་བསྡུས་ཐིག་ལེའི་རིན་ཆེན་གཟུད་པ་དང༌། ནོར་བུ་སོགས་འོད་ཁྱབ་པར་སྤྲོས་དང་དེ་དབུས་བསྡུས་པ་ལས་སྐྱེས་དཀྱིལ་འཁོར་སྔགས་སུ་གསུངས། །དྲུག་པོ་འདི་དག་རིམ་པ་ཅི་རིགས་ཆ་ཤས་དྲུག་ཏུ་ཕྱེ་བའང་ཡིན། །འཇིག་རྟེན་སྤྱོད་ལས་སྤྱོད་ལས་རྣམ་འགྲོལ་བ་ནི་ཕྱི་རོལ་རྣམས་དང་འདྲ་བ་མ་ཡིན་པའོ། །དམ་ཚིག་ནི་བདེ་བ་ལ་སོགས་པའོ། །
སྡོམ་པ་ནི་འཇིག་པ་ལ་སོགས་པའོ། །བསྐྱོད་པ་ནི་དེ་དག་ཐམས་ཅད་ཉམས་སུ་ལེན་པ་སྟེ། སྤྱོད་པ་ཞེས་བྱ་བ་ནི་ལྷག་མའོ། །རྡོ་རྗེ་ཐམས་ཅད་ཀྱི་ཞེས་བྱ་བ་ནི་ལུས་ལ་སོགས་པ་ཅི་རིགས་པའོ། །དེ་ཞེས་བྱ་བ་ནི་དེ་དག་གཉི་ག་སྔགས་ཀྱི་སྤྱོད་པར་བཤད་པ་སྟེ་བརྗོད་པའོ། །སྔགས་དང་ལྷན་ཅིག་པའི་སྤྱོད་པ་ནི་སྔགས་ཀྱི་སྤྱོད་པ་ཞེས་བྱ་བར་དགོངས་སོ། །ལེའུ་བཅུ་གསུམ་པའི་རྡོ་རྗེ་བཟླས་པ་ལས་བཟླས་པ་ཉིད་དོ། །དེ་བས་ན་བཟླས་པའི་དོན་དུ་དྲིས་པ་བཤད་པར་བྱ་བའི་ཕྱིར་རང་རང་ཞེས་བྱ་བ་ལ་སོགས་པ་སྨོས་ཏེ། བཟླས་པར་བྱ་བ་ལྷའི་རྣལ་འབྱོར་བྱས་ལ་རང་རང་ངོ་བོ་ཞེས་བྱ་བའི་དེའི་སྐུ་དང་གསུང་དང་ཐུགས་འདི་དག་རྣམ་པར་སྤྱད་པ་སྟེ་ངེས་པར་དཔྱད་པར་བྱ་བའོ། །སྙིང་ལ་ཡིད་ཀྱིས་ཞེས་བྱ་བ་ནི་སྙིང་གར་སོན་པ་ཡིད་ཀྱིས་ཏེ། མཉམ་པར་གཞག་པའི་སེམས་ཀྱིས་ཞེས་བྱ་བའི་དོན་ཏོ། །ལེའུ་བཅུ་གསུམ་པ་ལས། ཐམས་ཅད་རིགས་ཀྱི་སྔགས་རྣམས་ནི། །སྐུ་དང་གསུང་དང་ཐུགས་སུ་མཚོན། །ཞེས་གསུངས་ཏེ། དཔེར་ན་རྣམ་པར་སྣང་མཛད་ཀྱི་བཟླས་པ་ལ་དེ་བཞིན་གཤེགས་པ་ཐམས་ཅད་སྐུ་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པ་ནི་སྐུའི་དེ་ཁོ་ན་ཉིད་ཡིན་ལ། །དེ་གསལ་བར་བྱེད་པ་ནི་སྙིང་གའི་ཡེ་ཤེས་ཀྱི་འཁོར་ལོ་སྟེ་ཐུགས་སོ། །དེའི་དེ་ཁོ་ན་ཉིད་ནི་སྐུ་དེའི་དངོས་པོ་དང་དངོས་པོ་མེད་པ་དགག་པ་སྟེ། ལུས་འདི་ནི་ཡེ་ཤེས་ཀྱི་འཁོར་ལོའི་རང་བཞིན་ཏེ་སྐྱེ་བ་མེད་པས་ལུས་ཀྱི་དངོས་པོར་ཡོད་པ་མ་ཡིན་ནོ། །མི་སྐྱེད་བ་ཡང་མ་ཡིན་ཏེ། ཡེ་ཤེས་ལུས་ཀྱི་རྣམ་པར་འབྱུང་བའི་ཕྱིར་རོ། །དེའི་ངག་ནི་འཁོར་ལོ་དེའི་ལྟེ་བར་གནས་པའི་རབ་སྔགས་ཡིན་ཏེ། དེའི་དེ་ཁོ་ན་ཉིད་ནི་གདོད་ནས་སྐྱེ་བ་མེད་པས་སྟོང་པ་ཉིད་ཀྱི་རང་བཞིན་གྱི་ཡིད་ཉིད་དེ་ཞེས་བྱ་བས་འཁོར་ལོའི་དོན་སྟོན་པར་བྱེད་པའོ། །གསང་སྔགས་ཟློས་པ་ཞེས་བྱ་བ་ནི། ཡི་གེ་བཞིའི་སྔགས་ཟློས་བཞིན་པས། །ཞེས་བྱ་བའི་དོན་ཏོ། །ཕྱེ་ནས་སུ་ཞེས་བྱ་བ་ནི་སྣ་ཚོགས་པ་དང་བྱེ་བྲག་པར་ཕྱེ་བ་ཡིན་ཏེ། གསུམ་པོ་ནི་ཐུན་མོང་པ་ཉིད་ཀྱི་ཕྱིར་རོ། །ཟློས་པར་བྱེད་པས་སྤྲོ་ཞིང་བསྡུ། །ཞེས་བྱ་བ་ནི་སྤྲོ་བ་དང་བསྡུ་བས་བཟླས་སོ་ཞེས་བྱ་བའི་དོན་ཏོ། །དེ་ལ་ཕྱི་མ་ཉིད་ཀྱིས་སྤྲོ་བ་ནི་བཅུ་གསུམ་པ་ལས་དངོས་སུ་གསུངས་པས་གཞན་གཉིས་ཀྱིས་བསྡུ་
བ་ནི་ལྷག་མ་ཡིན་ནོ། །འདིར་ནི་སྔ་མ་གཉིས་ཀྱིས་བསྡུས་པ་དངོས་སུ་གསུངས་པས། ཕྱི་མ་གཉིས་ཀྱིས་སྤྲོ་བར་ཤེས་པར་བྱ་བ་ནི་ལྷག་མའོ། །བཅུ་གསུམ་པ་ལས། སྐུ་གསུང་ཐུགས་དང་བདག་མེད་ལས། །ཡེ་ཤེས་སེམས་ཀྱིས་སྤྲོ་བར་བྱ། །ཞེས་གསུངས་ཏེ། ཡེ་ཤེས་ནི་སྣ་ཚོགས་པའོ། །སེམས་ནི་ཧཱུཾ་ངོ༌། །དེ་དག་གི་གོ་རིམས་ཇི་བཞིན་དུ་སྐུ་གསུང་ཐུགས་རྣམས་དང་བདག་མེད་པ་ལས་སྤྲོ་ཞེས་བྱ་བའི་དོན་ཏོ། །བདག་མེད་པ་ནི་སྣ་ཚོགས་པའོ། །རྡོ་རྗེ་བཟླས་པ་ཡང་རྣམ་པར་གཉིས་ཏེ། ཐམས་ཅད་ལས་སྤྲོ་བ་དང་གཅིག་ལས་སྤྲོ་བའོ། །དེ་ལ་དང་པོའི་དབང་དུ་བྱས་ཏེ། གསུངས་པ། སངས་རྒྱས་ཞེས་བྱ་བ་ལ་སོགས་པ་ལ་སངས་རྒྱས་ནི་སངས་རྒྱས་རྣམས་ཀྱི་སྐུ་དང་གསུངས་དང་ཐུགས་ཀྱི་ལུས་དང་བཅས་པའོ། །སྣ་ཚོགས་རྡོ་རྗེ་བདག་ཅེས་པ་ལ་སྣ་ཚོགས་པ་བརྗོད་པ་ནི། རྡོ་རྗེའི་བདག་ཉིད་ཀྱི་རང་གི་ས་བོན་རྣམས་ལས་སྤྲོ་བའོ། །ཧཱུཾ་བརྗོད་པ་ན་སྣ་ཚོགས་པ་ལས་སྤྲོས་ཏེ་སྣ་ཚོགས་པའི་བདག་ཉིད་དུ་རོ་མཉམ་པར་བྱའོ། །ཡེ་ཤེས་ས་བོན་ནི་རབ་སྔགས་ཏེ། དོན་རྣམས་ཡེ་ཤེས་ཙམ་ཡིན་པའི་ཕྱིར་རོ། །དེ་བརྗོད་བཞིན་པ་ན་བསྡུ་བར་བྱ་བ་སྟེ། འདི་བདག་བདག་གི་ཡེ་ཤེས་སོ། །ཞེས་བྱ་བའི་དོན་ཏོ། །དེ་ལྟར་འདི་དག་གཟུང་བ་མ་ཡིན་པས་དེ་དག་མེད་ན་འཛིན་པ་ཡང་མེད་དོ་ཞེས་བྱ་བར་འགྲུབ་པོ། །དེ་ལྟ་མོད་ཀྱི་མཚོན་པར་བྱ་བ་ནི་ཡིད་དོ་སྙམ་ན་དེ་བཟློག་པའི་ཕྱིར་བྱང་ཆུབ་ཅེས་བྱ་བ་ལ་སོགས་པ་སྨོས་ཏེ། བྱང་ཆུབ་ནི་མཚན་ཉིད་དོ། །དེ་མེད་པ་ནི་བདག་མེད་པའོ། །ས་བོན་ནི་དེ་གསལ་བར་བྱེད་པའི་ཡི་གེ་ཨཿ་སྟེ་ཐ་སྙད་ན་ནམ་མཁའ་ལྟ་བུའོ་ཞེས་བྱ་བའི་དོན་ཏོ། །དེས་གཟུང་བ་ནི་ངེས་པར་བྱའོ། །ཇི་ལྟར་ཞེ་ན་བདག་མེད་ཅེས་བྱ་སྟེ། རྣམ་པར་བརྟག་པར་བྱ་བའི་རང་བཞིན་གྱིས་སྟོང་པར་རོ། །གཅིག་ལས་སྤྲོ་བའི་བཟླས་པའི་དབང་དུ་བྱས་ཏེ་གསུངས་པ། སྣ་ཚོགས་བྱ་བ་སོགས་པ་ལ་སྣ་ཚོགས་བཞིན་དུ་ཞེས་བྱ་བ་ནི་ཐམས་ཅད་པ་བཞིན་དུ་སྟེ། ཇི་ལྟར་སྔར་ཐམས་ཅད་ལས་སྤྲོས་པ་དེ་བཞིན་དུ་སྣ་ཚོགས་པ་སྤྲོ་བར་བྱེད་པ་པོ་ཡིན་ཏེ། སྣ་ཚོགས་པ་ཞེས་བརྗོད་བཞིན་པས་ན་སྣ་ཚོགས་པ་ཉིད་ལས་བྱེ་བྲག་རྣམས་སྤྲོ་བ་དང་ཧཱུཾ་བརྗོད་བཞིན་པ་ན་ས་བོན་ལ་བདག་ཉིད་ཇི་ལྟ་བ་བཞིན་དུ་སྐུ་དང་གསུང་དང་
ཐུགས་ཀྱི་སྤྲིན་རྣམ་པ་སྣ་ཚོགས་པའི་སྤྲིན་དང་རོ་མཉམ་པར་བྱས་ཏེ། རབ་སྔགས་བརྗོད་པས་ནི་བསྡུ་ལ། ཨཱཿ་ཡིས་ནི་བདག་མེད་པར་གཟུང་བར་བྱའོ། །ཐམས་ཅད་ལས་སྤྲོས་པ་ནི་སྔ་མ་བཞིན་བཟླས་པས་ཚོགས་པར་བསྡུ་བར་བྱའོ། །བཅུ་གསུམ་པ་ལས། སྐུ་གསུམ་རྡོ་རྗེའི་བྱེ་བྲག་གིས། །སྤྲོ་བ་དང་ནི་བསྡུ་བར་འགྱུར། །ཞེས་གསུངས་ཏེ་རྡོ་རྗེ་ནི་སྣ་ཚོགས་པའོ། །སྐུ་གསུམ་རྡོ་རྗེའི་བྱེ་བྲག་གི་སྤྲོ་བ་དང་བསྡུ་བར་བྱ་བ་སྟེ། གང་གི་ཚེ་སྐུ་ལ་སོགས་པའི་སྐུ་གསུམ་ལས་སྤྲོས་པ་དེའི་ཚེ་རྡོ་རྗེར་བསྡུས་ལ། །གང་གི་ཚེ་རྡོ་རྗེ་ལས་ཡིན་པ་དེའི་ཚེ་སྐུ་གསུམ་ལའོ་ཞེས་པའི་དོན་ཏོ། །བཟླས་པ་སྤྱིར་དྲིས་པ་ལས་བཅུ་གསུམ་པའི་རྡོ་རྗེ་བཟླས་པ་གཉིས་པོ་དག་བཤད་ནས་བཅུ་བཞི་པའི་འགོག་པའི་བཟླས་པ་དང་གྲངས་ཀྱི་བཟླས་པ་གཉིས་ཀྱི་དབང་དུ་བྱས་ཏེ་གསུངས་པ། །ཚིག་ཀུན་ཞེས་བྱ་བ་ལ་སོགས་པ་ལ་འདི་དག་ནི་རང་གི་སྙིང་གར་གནས་པའི་བཟླས་པར་བྱ་བའི་ཡི་གེ་འབར་བ་ལས་འགོག་པས་ཡིད་ཀྱིས་ཟློས་བཞིན་པ་དང༌། བཟླས་པར་བྱ་བའི་ཡི་གེ་ལ་དམིགས་ཏེ་སྔགས་ཡིད་ཙམ་གྱིས་བརྗོད་པས་བཟླས་ཀྱི་སྤྲོ་བ་དང་བསྡུ་བར་ནི་མི་བྱའོ། །འཇིག་རྟེན་ན་སྔགས་ཀྱི་དོན་ནི་ཚིག་ཡིན་པས་ཚིག་ཐམས་ཅད་བརྗོད་པར་བྱ་བའམ་ཞེ་ན། འདིར་ཚིག་ཀུན་ཞེས་བྱ་བ་ལ་སོགས་པ་སྨོས་ཏེ། འཇིག་རྟེན་པའི་ཚིག་ཀུན་སྔགས་ཡིན་པ་བདེན་མོད་ཀྱི། །འདིར་ནི་སྔགས་ཉིད་དུ་གྲངས་པ་ལ་བརྟེན་ནས་སྔགས་སོ། །སྔགས་ཉིད་ཅེས་བྱ་བ་ཅི་ཞིག་ཅན། །དེ་ཁོ་ན་ཉིད་བསྐུལ་བ་སྨྲ་བ་ཞེས་བྱ་བ་ཏེ་དེ་ལ་དེ་ཁོ་ན་ཉིད་བསྐུལ་བ་ཞེས་བྱ་བ་ནི་སྟོན་པ་སྟེ། ཕྱག་རྒྱ་ཞེས་བྱ་བའི་དོན་ཏོ། །དེ་ཡང་ས་བོན་གྱི་ཡི་གེའོ། །སྨྲ་བ་ནི་འཆད་པའོ། །འཆད་པ་ཡང་མདོར་བསྡུ་ན་རྣམ་པ་གསུམ་སྟེ། ཛི་ན་ཛིཀ་ཅེས་བྱ་བ་ལ་སོགས་པ་ནི་སྙིང་པོའོ། །ཨོཾ་ཤུ་ལི་སྭཱ་ཧཱ། ཞེས་བྱ་བ་ལ་སོགས་པ་ནི་འབར་བ་དང་བཅས་ཏེ་ཤིན་ཏུ་ཤེས་པར་བྱེད་པས་ནི་སྔགས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་བྱ་བ་ལ་སོགས་པ་ནི་ཁྱད་པར་དུ་རིག་པར་བྱེད་པས་ན་རིག་པའོ། །འོ་ན་ཅིའི་ཕྱིར་མདུང་ཅན་མའི་སྔགས་ལ་རིག་པ་ཞེས་བྱ་བ་ཞེ་ན། །རིག་པ་རྗོད་པར་བྱེད་པའི་ཕྱིར་ཏེ། བཟླས་པའོ། །རྒྱས་བཏབ་པ་ནི་བཅུ་བདུན་པ་ལས་རིག་པའི་སྐྱེས་བུ་བསྒོམས་པའི་དངོས་གྲུབ་
ཀུན་ནི་བཤད་པ་མཛད་ཅེས་བྱ་བ་ནས་བརྩམས་ཏེ་ལག་པའི་ཕྱག་རྒྱ་མི་འཆིང་ངོ་ཞེས་བྱ་བའི་བར་དུ་གསུངས་པ་དེའི་ཕྱིར་རྒྱས་བཏབ་པ་གང་ཡིན་ཞེས་ཞུས་པ་དེའི་ལན་ནི་ཇི་ལྟར་ཞེས་བྱ་བ་ལ་སོགས་པ་གསུངས་པ་ལ་ཇི་ལྟར་སྐུ་དང་གསུང་དང་ཐུགས་དང་ཡེ་ཤེས་ཀྱིས་བྱིན་གྱིས་བརླབས་པ་མངོན་སུམ་དུ་གསུངས་པ། ཏིང་ངེ་འཛིན་ཀྱང་དེ་བཞིན་དུ་སྙིང་ག་སྟེ་སྙིང་ག་རུ་བསམ་པར་བྱའོ། །ཏིང་ངེ་འཛིན་ནི་ལོངས་སྤྱོད་རྣམ་པ་བཞི་སྟེ། །གདན་བཞི་ལ་གནས་པའི་སྔགས་ཀྱི་དཀྱིལ་འཁོར་བཞིའོ། །སྤྱི་བོར་དབང་བསྐུར་ཞེས་བྱ་བ་ནི་ཅི་རིགས་པར་ཞེ་སྡང་རྡོ་རྗེ་ལ་སོགས་པས་སོ། །མཆོད་པ་ཞེས་བྱ་བ་ནི་ཅི་རིགས་པར་རིགས་ཀྱི་རིག་པའོ། །དེ་རྣམས་ཞེས་བྱ་བ་ནི་འདིར་སྔགས་ཀྱི་སྐྱེས་བུ་གང་ཡིན་པ་དེ་རྣམས་ཀྱིའོ། །ཀུན་དུ་ནི་རྒྱས་བཏབ་པ་དེ་ཙམ་མ་ལུས་པར་རོ། །རྣམ་པར་ཕྱེ་ནས་རྡོ་རྗེ་འཆང་བ་ཞེས་བྱ་བ་ལ་སོགས་པ་གསུངས་པ་ལ་གང་ཡིན་པའི་སྦྱོར་བ་དེའི་རིག་པ་དང་སྦྱོར་བ་ལས་བྱུང་བ་ལ་ལོངས་སྤྱོད་བཞིའོ། །བདག་བྱིན་བརླབ་སོགས་དེ་བཞིན་ཏེ། །ཞེས་བྱ་བ་ལ་དེའི་སྦྱོར་བ་ཞེས་བྱ་བར་སྦྱར་རོ། །དེ་བཞིན་ཏེ་ཞེས་བྱ་བ་ནི་ལུས་ཅན་ཏེ། ཡེ་ཤེས་དང་སྐུ་དང་གསུང་དང་ཐུགས་ཀྱིས་བྱིན་གྱིས་བརླབས་པ་ལུས་དང་བཅས་པ་དེ་རྣམས་ཀྱང་དེ་དང་འདྲ་བར་དེ་ཉིད་ཀྱི་སྦྱོར་བ་ཡིན་གྱི། །གཞན་གྱི་ནི་མ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་འཆང་བ་ཞེས་བྱ་བ་ནི་དཀྱིལ་འཁོར་གྱི་བདག་པོའོ། །འདིས་ནི་དཀྱིལ་འཁོར་བ་རྣམས་ཀྱི་རིག་པ་དང་སྦྱོར་བ་ཡོད་དུ་ཟིན་ཀྱང་བརྒྱད་པ་དེ་དག་གིས་རྒྱས་བཏབ་པ་ཡོད་པ་མ་ཡིན་ནོ་ཞེས་སྟོན་པར་འགྱུར་རོ། །དེ་ལ་ལྷན་ཅིག་སྐྱེས་པའི་ཤེས་རབ་བམ་ལྷན་ཅིག་སྐྱེས་པའི་ཐབས་དང་བདག་བྱིན་གྱིས་བརླབ་པ་ལ་སོགས་པ་ནི་ལུས་མེད་པ་དང་དབུ་རྒྱན་ནི་སངས་རྒྱས་ཡིན་ནོ་ཞེས་དཀྱིལ་འཁོར་རྣམས་རྒྱས་བཏབ་པའོ། །ཕྱག་རྒྱ་ཆེན་པོ་དང་ཡང་དག་པར་སྦྱོར་བའི་གནས་ཀྱི་མཆོག་རྣམས་ནི་སྤྱན་ལ་སོགས་པ་ལ་ཡང་རྗེས་སུ་འཇུག་པའི་ཕྱིར་ཏེ། སྦྱོར་བ་ཡི་ནི་སྔགས་རྣམས་ཀུན། །སྤྱི་བོ་ནས་ནི་བསྐུལ་བ་ཤེས། །ཞེས་གསུངས་པའི་ཕྱིར་རོ། །དེ་བཞིན་གཤེགས་པ་རྣམས་ཀྱི་རིགས་ཀྱི་རིག་མ་རྣམས་ལ་ཡང༌། །རྡོ་རྗེ་སྤྱན་གྱི་གཟུགས་ལ་སོགས། །གཙུག་ཏོར་མཉེས་པར་བྱེད་པར་བཤད། །ཅེས་གསུངས་པའི་ཕྱིར་རོ། །
བདག་པོ་ཞེས་བྱ་བ་ནི་གཅིག་པུ་སྟེ། དཀྱིལ་འཁོར་ལས་ཕྱི་རོལ་པ་ཞེས་བྱ་བའི་དོན་ཏོ། །རྡོ་རྗེ་གཅིག་པུའི་ཞེས་བྱ་བ་ནི་རིག་མ་དང་འཁྱུད་པ་ཅན་ནོ། །རེ་རེ་ཞེས་བྱ་བ་ནི་རིག་མས་མ་འཁྱུད་པ་སྟེ། །དོན་གྱིས་ནི་རིག་མ་དང་བཅས་པ་ལ་རིག་པ་དང་བཅས་པ་ཉིད་དོ། །སྙིང་གར་ཕྱག་རྒྱ་སྔགས་ཙམ་གྱིས། །རྒྱས་བཏབ་པར་ནི་བརྟག་པར་བྱ། །དེ་རྣམས་ཀྱི་སྙིང་ག་རྣམས་སུ་སྟེ། །སྙིང་ག་དང༌། སྤྱི་བོ་དང༌། ལྐོག་མ་དང༌། སེམས་ཀྱི་གནས་རྣམས་ཀྱི་ཕྱག་རྒྱ་ནི་སྙིང་གར་ཕྱག་རྒྱའོ། །རང་རིག་རིམ་གྱིས་ཞེས་བྱ་བ་ནི། །ཡེ་ཤེས་དང་སྐུ་གསུང་ཐུགས་དག་གི་རིམ་གྱིས་སོ། །ཡང་དག་པར་སྦྱོར་བ་ཅན་ལུས་དང་བཅས་པ་དང་ལུས་མེད་པ་ཅན་སྙིང་གའི་ཕྱག་རྒྱ་རྣམས་ལ་སྔགས་ཇི་ལྟར་བསྒོམ་པར་བྱ་ཞེ་ན། །དེའི་ཕྱིར་འབྲས་བུ་ཞེས་བྱ་བ་ལ་སོགས་པ་གསུངས་པ་ལ་འབྲས་བུ་ནི་གདན་ཏེ། སྙིང་གའི་ཉི་མའམ། །ཟླ་བ་ཡིན་ལ་རྒྱུ་ནི་དེའི་དབུས་ཀྱི་མཚན་མ་སྟེ། །དེའི་ལྟེ་བའི་ཉི་མའམ་ཟླ་བ་ཡིན་ལ། །དེའི་དབུས་སུ་སྔགས་ཞེས་བྱ་བའི་དོན་ཏོ། །ཆོས་འབྱུང་བ་བསྒོམ་པ་ནི་བཅུ་པ་ལས། །འགོག་པ་ཁྲོ་བོའི་འཁོར་ལོ་ཡིས། །ཞེས་བྱ་བ་འདིས་བསྟན་པ་དེའི་དྲི་བ་ཞུས་པའི་ལན་ནི་ལོངས་སྤྱོད་བཞི་ཞེས་བྱ་བ་ལ་སོགས་པ་གསུངས་པ་སྟེ། འདི་ནི་ཉེ་བའི་གྲུབ་པའི་དྲག་ཤུལ་གྱི་སྦྱོར་བ་བྱ་བར་མི་ནུས་པ་རྣམས་ཀྱི་ཆོ་གའོ། །རིག་པའི་སྐྱེས་བུ་ཡང་དེ་ཡིན་ལ་རྡོ་རྗེ་ཅན་ཡང་ཡིན་པ་སྟེ། དེ་བསྒོམ་པར་བྱ་ཞེས་བྱ་བར་སྦྱོར་རོ། །གང་དུ་ཞེ་ན་གྲུ་གསུམ་སྟེ། །ཆོས་འབྱུང་བའི་ནང་དུ་ཆུད་པའི་གཞལ་ཡས་ཁང་དུ་ཞེས་བྱ་བའི་དོན་ཏོ། །ཇི་ལྟར་གྲུ་གསུམ་ཞེ་ན། །སྐུ་གསུང་ཐུགས་ཀྱི་བྱེ་བྲག་གིས་སོ། །ཇི་ལྟ་བུའི་རྡོ་རྗེ་ཅན་ཞེ་ན། །ལོངས་སྤྱོད་བཞི་དང་ཡང་དག་ལྡན་པ་སྟེ། །དགའ་མ་བཞིའི་རིག་མས་ཡོངས་སུ་བསྐོར་བའོ། །དབུས་སུ་ཞེས་བྱ་བ་ནི་རྡོ་རྗེ་ཅན་གྱི་སྙིང་གར་འཁོར་ལོ་བསྒོམ་པའོ། །དེ་རུ་ཞེས་བྱ་བ་ནི་འཁོར་ལོ་ལའོ། །རྩིབས་ཀུན་ལ་ནི་ཞེས་བྱ་བ་ནི་རྩིབས་བཅུ་པོ་རྣམས་ལའོ། །ཡེ་ཤེས་བཅུ་ནི་གཟུང་བ་དང༌། འདོད་ཆགས་ལ་སོགས་པ་འཆད་པར་འགྱུར་བ་རྣམས་སོ། །དེའི་བདག་ཉིད་ཅན་ནི་དེའི་རང་བཞིན་དུ་འབྱུང་བ་སྟེ། །འདི་དག་ལ་རང་གི་ས་བོན་ལས་རང་གི་མཚན་མའི་རྣམ་པར་འབྱུང་བ་ཡོད་པས་ན་དེ་སྐད་
ཅེས་བྱའོ། །དེ་ཅིའི་ཕྱིར་ཞེ་ན། །ལྕགས་ཀྱུ་དབྱིག་པ་མདུང་དང་ནི། །རལ་གྲི་མཚམས་སུ་དགོད་པར་བྱ། །འདོད་རྒྱལ་དབྱིག་སྔོན་སྟོབས་མི་གཡོ། །སྟེང་དུ་འཁོར་ལོ་འོག་གནོད་མཛེས། །ཁྲོ་རྒྱལ་རྣམས་ཀྱིས་རྒྱས་བཏབ་བོ། །ཞེས་ཕྱག་རྒྱ་དགོད་པ་ཞུས་པའི་ལན་གསུངས་པའི་ཕྱིར་རོ། །འཁོར་ལོའི་ལྟེ་བར་ཡང་རྡོ་རྗེ་འཛིན་པའི་མཚན་མ་ས་བོན་ལས་བྱུང་བ་ལྟེ་བར་ས་བོན་ཅན་དུ་དོན་གྱིས་ཤེས་པར་བྱའོ། །འདི་ལྟར་ལྷ་བཅུ་གཅིག་གིས་བྱིན་གྱིས་བརླབས་པ་ཤིན་ཏུ་མི་གཡོ་བ་དང་མཚུངས་པར་འཁོར་བའི་འཁོར་ལོ་རྩིབས་བཅུ་པ་དེ་ཉིད་དོ། །རྣལ་འབྱོར་པས་འགོག་པའི་སེམས་ཀྱིས་བསྒོམ་པར་བྱའོ། །བསྒོམས་པའི་སྟོབས་ཀྱིས་རྫོགས་པའི་འགོག་པའི་རྡོ་རྗེ་སྟེ་བརྟན་པར་འགོག་པས་སོ། །ཤིན་ཏུ་གསལ་བར་སྣང་བ་ཉིད་ཀྱི་ཕྱིར་མཆོག་ཏུའོ། །དགའ་བར་བྱེད་པ་ཉིད་ཀྱི་ཕྱིར་མཛེས་པར་གྱུར་པས་སོ། །རྡོ་རྗེ་འབར་བའི་སྤྲིན་སྤྲོ་བས་ཁྲོ་བོའི་མཚན་མ་རྣམས་ལས་ཁྲོ་བོའི་རྣམ་པར་འབར་བ་ནམ་མཁའ་ཁྱབ་པར་བྱེད་པ་རྒྱུན་གྱིས་ཡང་དང་ཡང་ཕྱོགས་བཅུར་སྤྲོ་བར་བྱའོ། །དེ་ལྟར་ན་ཞེས་བྱ་བ་ལ་སོགས་པས་ནི་མཇུག་སྡུད་པ་ཡིན་ནོ། །ཆོས་འབྱུང་ཡེ་ཤེས་དེ་ནི་ཡེ་ཤེས་བཅུར་འབྱུང་བ་བསྒོམ་པའོ། །དྲི་མ་མེད་པ་ནི་ཉེས་པ་མེད་པ་ཉིད་ཀྱི་ཕྱིར་རོ། །ཞི་བ་ནི་ཡོན་ཏན་གྱི་འབྱུང་གནས་ཉིད་ཡིན་པའི་ཕྱིར་རོ། །འདི་བསྒོམས་པས་ཅིར་འགྱུར་ཞེ་ན། །བསྒོམས་པས་ཞེས་བྱ་བ་ལ་སོགས་པ་གསུངས་པ་ལ། །བསྒོམས་པས་ནི་བསྒོམ་པ་ཡོངས་སུ་རྫོགས་པའོ། །སངས་རྒྱས་སྤྱན་ནི་འཇིག་རྟེན་ལས་འདས་པའི་བྱང་ཆུབ་ཀྱི་སེམས་ཉེ་བར་སྒྲུབ་པའི་འབྲས་བུའོ། །སྲུང་བའི་འཁོར་ལོ་ནི་ཕྱིའི་ཁྲོ་བོའི་གཟུགས་བཅུ་པོ་ཉིད་ཀྱིས་བྱིན་གྱིས་བརླབ་པར་བསྒོམ་པར་བྱའོ། །སྡོམ་པ་ནི་ཕལ་ཆེར་ལྔ་པ་དང་དགུ་པ་དང་བཅུ་བདུན་པ་ལས་གསུངས་པ་དེ་དྲི་བ་ཞུས་པའི་ལན་ནི་རྡོ་རྗེ་ཅན་གྱིས་ཞེས་བྱ་ལ་སོགས་པ་གསུངས་པ་ལ། །འདའ་བར་མི་བྱ་བའི་དོན་གྱིས་ན་དམ་ཚིག་ཡིན་ལ། །བགེགས་བཟློག་པའི་དོན་གྱིས་ན་སྡོམ་པ་ཡིན་ཏེ། །རྣམ་གྲངས་ཀྱི་དབྱེ་བས་ཡན་གྱི་དོན་གྱི་དབྱེ་བས་ནི་མ་ཡིན་པ་དེའི་ཕྱིར་སྡོམ་པའི་སྒྲས་ནི་ཞུས་པ་ཡིན་ལ། །དམ་ཚིག་དང་སྡོམ་པ་དག་གིས་ནི་ལན་གསུངས་པ་ཡིན་ནོ། །རིམ་པ་གཉིས་ནི་རྣལ་འབྱོར་རྣམ་པ་གཉིས་
སོ། །དེ་ལ་རང་གི་ལྷ་ལ་སོགས་པའི་སྔགས་དང་ཕྱག་རྒྱ་མཚན་ལ་སོགས་པ་ཡོངས་སུ་གྱུར་པ་ལས་ཉིན་རེ་ཞིང་ཡོངས་སུ་བསྐྱེད་པ་ནི་བསྐྱེད་པ་སྟེ། །དེ་ལ་གནས་པས་ན་བསྐྱེད་པའོ། །རྫོགས་པ་ནི་ཀུན་དུ་སྤྱོད་པ་སྟེ། །ཐབས་གསུམ་གྱིས་འབྲས་བུ་རྟོགས་སོ། །ཐབས་གོང་མ་བཞི་པའི་བསྒོམ་པ་བརྟན་པོར་གྱུར་པས་དངོས་པོ་ཐམས་ཅད་ལ་ཅི་རིགས་པར་སྐྱེས་ཤིང་རྫོགས་པར་སྐད་ཅིག་རེ་རེ་ཞིང་མཐོང་བར་གྱུར་བ་ཀུན་དུ་སྤྱོད་པའི་དོན་ནི་རྫོགས་པའོ། །རྫོགས་པ་དེ་ཉིད་ལས་དང་པོ་ལས་ཀྱང་ལྷག་པར་མོས་པས་དམིགས་པ་ནི་རྫོགས་པའི་རིམ་པའོ། །དེ་ལྟར་རིམ་པ་གཉིས་ལ་བརྟེན་ནས་བཤད་པ་ཡིན་གྱི་རིམ་པ་གཅིག་གིས་ནི་མ་ཡིན་ནོ། །སྒྲུབ་པ་ནི་མངོན་པར་རྟོགས་པའོ། །འབད་པ་ནི་ཉམས་སུ་ལེན་པའོ། །དམ་ཚིག་དང་སྡོམ་པ་གང་ཡིན་པ་ནི་སྔར་རྒྱས་པར་བཤད་པ་ཉིད་དོ། །དེ་ནི་རིམ་པའི་དབྱེ་བས་ཕྱེ་བ་ཡིན་ཏེ། །བསྐྱེད་པའི་རིམ་པ་ལ་མངོན་པར་རྟོགས་པ་ནི་ཏིང་ངེ་འཛིན་གསུམ་མོ། །དེའི་ཉམས་སུ་ལེན་པ་ནི་དུས་མཚམས་དང་ལངས་ནས་མཉམ་པར་མ་གཞག་པའི་རྣལ་འབྱོར་རོ། །དམ་ཚིག་ནི་སྦྱང་བ་དང་སྤར་བ་དང་སྤྲོ་ལ་སོགས་པ་དང་ལྡན་པའོ། །དེ་ཉམས་སུ་ལེན་པ་ནི་བག་མེད་པ་དང་སྤང་བ་དང་བསམ་གཏན་གྱིས་ཀྱང་ངོ༌། །རྫོགས་པའི་མངོན་པར་རྟོགས་པ་ནི་ཀུན་དུ་སྤྱོད་པའོ། །ཉམས་སུ་ལེན་པ་ནི་སྐད་ཅིག་ཅིང་རྒྱུན་མི་འཆད་པར་རོ། །དམ་ཚིག་ནི་ལྷག་པར་མོས་པ་ཙམ་གྱིས་སྦྱང་བའོ། །དམ་ཚིག་གི་ཉམས་སུ་ལེན་པ་ནི་རང་གི་སྐུའམ་ལུས་གཞན་གྱིས་ཀྱང་ཅི་རིགས་པར་རོ། །ལས་དང་པོ་པ་རྣམས་ཀྱི་ཡང་བསྐྱེད་པ་བཞིན་ཏེ་སྡོམ་པའོ། །དབང་བསྐུར་བས་ཀུན་དུ་བཟང་པོ་ཉིད་དུ་འགྱུར་རོ་ཞེས་བཅུ་བདུན་པ་ལས་འབྱུང་ལ། །ཀུན་དུ་བཟང་པོ་དེ་ཡང་དཔལ་མཆོག་དང་པོ་ལ་སོགས་པར། སྙིང་སྟོབས་རྡུལ་དང་མུན་པས་ཀྱང༌། །གང་ཕྱིར་འགྲོ་བའི་དོན་འབྱུང་བ། །དེ་ཕྱིར་ང་ནི་ཀུན་དུ་བཟང༌། །ཞེས་བཤད་པ་ཡིན་ནོ། །དེ་ལ་སྙིང་སྟོབས་དང་རྡུལ་དང་མུན་པ་ནི་འདོད་ཆགས་དང༌། ཞེ་སྡང་དང༌། གཏི་མུག་གོ །དེའི་ཕྱིར། འདོད་ཆགས་ཞེ་སྡང་གཏི་མུག་ཆེས། །སེམས་ཅན་དོན་མཛད་ཇི་ལྟ་བུ། །ཞེས་བྱ་བ་འདི་དྲིས་པ་ཡིན་ཏེ། །དེའི་ལན་ནི་གཟུགས་དང་ཞེས་བྱ་བ་གསུངས་པ་ལ་འདོད་པ་ཞེས་བྱ་བ་ནི་སོ་སོར་སྡུད་པ་ལ་གདན་གྱི་རང་བཞིན་རྣམས་སོ། །བདེ་བ་ནི་
བདེ་བ་བསྐྱེད་པའི་བསིལ་བ་དང་དཀར་བའམ་དམར་བའོ། །སྡུག་བསྔལ་ནི་དྲོ་ཞིང་དམར་བའོ། །གཉི་གའི་བདག་ཉིད་ནི་ཞི་ཞིང་དཀར་བའོ། །སྙིང་ལ་ཞེས་བྱ་བ་ནི་ཚོགས་པའོ། །སྐྱེ་བར་འགྱུར་ཞེས་བྱ་བ་ནི་བསྡུས་པའོ། །འདོད་ཆགས་ནི་ཚིམ་པར་བྱེད་པའི་ཁ་དོག་སྟེ། སེར་པོ་དང༌། དམར་པོ་དང༌། ལྗང་གུ་རྣམས་སམ། །དཀར་ཞིང་བསིལ་བའོ། །ཞེ་སྡང་ནི་ཁྲོ་ཞིང་གནག་པའོ། །མུན་པ་ནི་ཞི་ཞིང་དཀར་བའོ། །ཆགས་པའི་རང་བཞིན་ནི་སྣ་ཚོགས་པའི་རང་བཞིན་ནོ། །རྡོ་རྗེ་ནི་སེམས་ཀྱི་ཕྲ་མོའོ། །དམ་ཚིག་ནི་སྤྲོས་པའི་དཀྱིལ་འཁོར་རོ། །འདོད་པར་བྱས་པས་ན་འདོད་པ་སྟེ་བྱང་ཆུབ་བོ། །དམ་ཚིག་མཚུངས་པ་ནི་དམ་ཚིག་གི་རྗེས་སུ་བྱེད་པ་སྟེ། སྔར་གྱི་འདོད་པ་བཞིན་ནོ། །རྣམ་པ་ནི་སངས་རྒྱས་རྣམས་ཀྱི་སྐུའི་ཡེ་ཤེས་ཏེ། །དོན་བྱེད་དོ་ཞེས་བྱ་བ་འོག་ནས་འབྱུང་བ་དང་འབྲེལ་ཏོ། །རྣམ་པ་མེད་པ་ཞེས་བྱ་བ་ནི་ཐུགས་ཀྱི་ཡེ་ཤེས་ཏེ། །ཕྲ་མོ་གཉིས་པའོ། །ཀུན་འགྲོ་བ་ཞེས་བྱ་བ་ནི་བདེ་བའི་ཡེ་ཤེས་ཏེ། །ཕྲ་མོ་གསུམ་གྱི་རང་བཞིན་ནོར་བུའོ། །ཡི་གེ་གསུམ་གྱི་བདག་ཉིད་ནི་དེ་ཉིད་ཉེ་བར་མཚོན་པ་སྟེ། །གང་དུ་ཡེ་ཤེས་གསུམ་པོ་ཡོད་པས་དེའི་ཡི་གེ་གསུམ་མོ། །བདག་ནི་རང་གི་སྔགས་སོ་།གང་ཞེས་བྱ་བ་ནི་དེར་གཉི་བདེ་བ་སྟེ། འདི་ནི་ཡི་གེ་གསུམ་གྱི་བདག་ཅེས་བྱའོ། །བྱེད་པ་ཞེས་བྱ་བ་ནི་དེ་བཞིན་དུ་སྒོམ་པ་བརྟན་པོར་བྱེད་པའོ། །འཕྲོག་པ་ཞེས་བྱ་བ་ནི་རྡོ་རྗེའི་ནང་དུ་སྤྲོས་པའོ། །སྤྲོ་བར་བྱ་བ་ཞེས་བྱ་བ་ནི་དེ་ཉིད་ཀྱི་འོད་ཟེར་ཕྱུང་བས་ནམ་མཁའ་ཁྱབ་པར་བྱ་བའོ། །རང་གིས་བཟླས་པ་ཞེས་བྱ་བ་ནི་དེའི་བདག་ཉིད་ཀྱིས་འཁོར་ལོ་དང་པདྨ་ལ་སོགས་པ་སྤྲོ་བའོ། །དེ་ལྟར་ཞེས་བྱ་བ་ནི་ཆགས་པའི་རང་བཞིན་ཞེས་བྱ་བ་དང་སྦྱར་ཏེ་བསྟན་པའི་རིམ་གྱིས་འདོད་ཆགས་ཀྱི་རང་བཞིན་སྤྲོས་པས་ས་གསུམ་པོ་མ་ལུས་པར་བསྐྱེད་པར་བྱའོ། །ཞེ་སྡང་གཏི་མུག་ཅེས་བྱ་བ་ཡང་དེ་ལྟར་ཞེས་བྱ་བ་དང་སྦྱར་ཏེ། །རིམ་པ་དེ་ཉིད་ཀྱིས་ཞེ་སྡང་གི་རང་བཞིན་དང་གཏི་མུག་གི་རང་བཞིན་དུ་འགྲོ་བ་རྣམས་བསྐྱེད་པའོ། །རྒྱས་བཏབ་ཅིང་ཞེས་པ་ནི་སྤྲོས་པའི་དཀྱིལ་འཁོར་བསྡུས་པ་ལས་བྱུང་བ་ཤིན་ཏུ་ཕྲ་བའི་གདན་སྔར་གྱི་གདན་དང་མཚུངས་པའི་རེག་བྱ་དང༌། ཁ་དོག་ཅན་ནོར་བུ་ཕྲ་མོའི་ནང་དུ་རྣམ་པར་བསམ་མོ་ཞེས་བྱ་བའི་དོན་ཏོ། །
རྡོ་རྗེ་ཅན་གྱི་ཞེས་བྱ་བ་ནི་རྡོ་རྗེ་སེམས་དཔའིའོ། །དོན་ཞེས་བྱ་བ་ནི་དེ་ཁོ་ན་ཉིད་རྣལ་འབྱོར་པས་བྱེད་པའོ། །དོན་ཇི་ལྟ་བུ་ཞིག་བྱེད་ཅེ་ན། །གསང་བ་དག་པ་སྟེ། སྒྲིབ་པ་དང་བྲལ་བའི་ཡེ་ཤེས་གསང་བའོ། །དེ་དག་ནི་བསྙེན་པའི་སྦྱོར་བའི་ཡན་ལག་སྟེ། ཞར་ལ་འོངས་པ་བཤད་ནས་གཞན་ལེའུ་དགུ་པ་ལས་འདོད་ཆགས་ལ་སོགས་པས་སེམས་ཅན་གྱི་དོན་བྱ་བར་གསུངས་པ། །ཞེ་སྡང་ཞེས་བྱ་བ་ལ་སོགས་པ་ལ། །ཞེ་སྡང་འཁོར་ལོ་བསྐྱེད་ནས་སུ། །ཞེས་བྱ་བ་ནི་བདག་ཉིད་ཞེ་སྡང་འཁོར་ལོ་བསྐྱེད་པའོ། །ཞེ་སྡང་རྣལ་འབྱོར་པས་ཞེས་བྱ་བ་ནི། བདག་ཉིད་མི་བསྐྱོད་པའི་རྣལ་འབྱོར་པས་སོ། །སྦྱོར་བ་ཞེས་བྱ་བ་ནི་ནམ་མཁའི་ངོས་ལ་བསྒོམས་པའི་སངས་རྒྱས་དང་བྱང་ཆུབ་སེམས་དཔའི་བཀོད་པའི་ཏིང་ངེ་འཛིན་གྱིས་བསྟན་པར་བྱ་བའོ། །རྡོ་རྗེ་དྲག་པོ་ཞེས་བྱ་བ་ནི་བདག་གི་དཀྱིལ་འཁོར་བའི་ལག་པས་འཕངས་པས་སོ། །བཅོམ་ནས་སུ་ཞེས་བྱ་བ་ནི་བཀོད་པ་ཆེན་པོ་དེ་དག་ཉིད་བསད་པའོ། །ཡེ་ཤེས་རྡོ་རྗེ་ཅན་ཞེས་བྱ་བ་ནི་བཅོམ་པ་རྣམས་ཀྱི་ཡེ་ཤེས་སེམས་དཔའ་སྟེ། །བསྡུས་ནས་བདག་གི་དཀྱིལ་འཁོར་གྱི་ཡེ་ཤེས་སེམས་དཔའ་ལ་བསྡུ་བའོ། །དེ་ཞེས་བྱ་བ་ནི་བསྡུས་པ་དེ་རྣམས་སོ། །གསད་པར་བྱ་ཞེས་བྱ་བ་ནི་སླར་སྤྲོ་སྟེ་བཅོམ་པ་རྣམས་ལ་རྗེས་སུ་བཅུག་པས་ཡང་དག་པར་གསོ་བའོ། །དེ་བཞིན་དུ་ཞེས་བྱ་བ་ནི་སྔ་མ་བཞིན་དུ་གསད་པའོ། །གོམས་བྱས་ན་ཞེས་བྱ་བ་ནི་ཡང་དང་ཡང་དུ་སྤྲོ་ཞིང་བསྡུས་པའོ། །ཞེ་སྡང་རྡོ་རྗེར་བདག་ཉིད་འགྱུར་བ་ནི་མཐར་ཐུག་པའི་འབྲས་བུའོ། །ཁམས་གསུམ་པོ་ནི་མ་ལུས་པ་བསད་དང་ཞེས་བྱ་བ་ལ་སོགས་པ་ནི་འཕྲལ་གྱི་འབྲས་བུ་སྟེ་གསད་པར་ནུས་པ་ཞེས་བྱ་བ་ནི་སེམས་བརྟན་པར་གྱུར་པས་མངོན་དུ་ནུས་པར་གྱུར་པའོ། །གཏི་མུག་ནི་རྣམ་པར་སྣང་མཛད་དོ། །རྒྱན་ལ་སོགས་པ་ནི་ནམ་མཁར་བསམས་པ་རྣམས་ཀྱིའོ། །བརྐུ་བར་བྱ་ཞེས་བྱ་བ་ནི་བདག་ཉིད་དང་བདག་གི་དཀྱིལ་འཁོར་བ་རྣམས་ཀྱིས་ཀྱང་བླངས་ཏེ་སྤྱད་པའོ། །རྟག་ཏུ་ཞེས་བྱ་བ་ནི་ཡང་དང་ཡང་དུའོ། །གཏི་མུག་སེམས་ཀྱི་རྒྱ་མཚོ་ཞེས་བྱ་བ་ནི་བདག་དང་བདག་གི་དཀྱིལ་འཁོར་བའོ། །གཏི་མུག་འཁོར་ལོ་ཅན་གྱིས་ཀུན་ལ་སྟེ། །བཅོམ་པ་རྣམས་ལ་ནི་རིན་པོ་ཆེ་སླར་སྦྱིན་པའོ། །འདོད་ཆགས་ནི་
སྣང་བ་མཐའ་ཡས་སོ། །ལྷ་མོ་ཐམས་ཅད་ནི་ནམ་མཁར་བལྟས་པའི་ལྷ་མོ་རྣམས་སོ། །འདོད་པའི་སྦྱོར་བ་ནི་འདོད་པའི་བྱ་བའོ། །དགའ་བ་ནི་འཁྱུད་པ་ལ་སོགས་པའོ། །སྡུག་པ་ནི་དགའ་བ་དང་ཡང་དག་པར་མཚོན་པའོ། །བདེ་བ་ཡེ་ཤེས་སྐྱེ་བའོ། །རངས་པ་ནི་བདེ་བ་ལས་བྱུང་བའི་རབ་ཏུ་མགུ་བའོ། འདོད་པའི་རྩེད་མོ་ནི་རེངས་པ་ལས་བྱུང་བའི་ལུས་དང་ངག་གི་འགྱུར་བའོ། །དེའི་རྣམ་པར་འཕྲུལ་བ་ནི་རྣམ་པར་རོལ་པའོ། །ཁམས་གསུམ་ཞེས་བྱ་བ་ལ་སོགས་པ་ན་འཕྲལ་གྱི་འབྲས་བུ་གསུངས་པའོ། །མཐར་ཕྱིན་པའི་འབྲས་བུ་ནི་གཉི་གའི་རིམ་པ་བཞིན་དུ་གཏི་མུག་རྡོ་རྗེ་དང་འདོད་ཆགས་རྡོ་རྗེའོ། །སྐད་ཅིག་ཙམ་གྱིས་ཞེས་བྱ་བ་ནི་ཇི་ལྟར་བསྟན་པའི་དོན་དེ་རྣམས་རྣལ་འབྱོར་དེ་དག་ལ་གནས་ཏེ། བསམས་མ་ཐག་ཏུ་ཞེས་བྱ་བའི་དོན་ཏོ། །དེ་ཡང་རིགས་པ་མ་ཡིན་ཏེ། རྫས་དང་འཁྲུལ་འཁོར་ལ་སོགས་པའི་སྦྱོར་བ་དུ་མས་བསྒྲུབ་པར་བྱའོ། །དོན་རྣམས་ནི་དེ་དག་མེད་པར་མི་སྲིད་པའི་ཕྱིར་རོ་ཞེ་ན། །འདིར་དཀྱིལ་འཁོར་ཞེས་བྱ་བ་ལ་སོགས་པ་སྨོས་ཏེ་ལས་མཆོག་ནི། ལས་དམ་པ་རྣམས་སོ། །ཚོགས་ནི་རྒྱས་པའོ། །ཉམས་སུ་ལེན་པའི་ཐབས་སུ་བྱ་བའོ། །བྱིན་གྱིས་རློབ་པ་ནི་ནུས་པ་ལྷག་པར་གཞག་པའོ། །གྲུབ་པ་ནི་དཀྱིལ་འཁོར་ལ་སོགས་པ་གང་ཡིན་པའོ། །དེ་དག་གི་བགྲོད་པ་གཞན་ནི་རྣམ་པ་གཞན་ཡིན་གྱི། །གདོན་མི་ཟ་བར་རྒྱུད་ཇི་བཞིན་དུ་ནི་མ་ཡིན་ཏེ། །གང་གི་ཕྱིར་ཁྱད་པར་དུ་གྱུར་པ་འདི་དག་ཐམས་ཅད་ནི་དེ་དག་གི་སེམས་ལ་རག་ལས་པའི་ཕྱིར་རོ། །སྒྲུབ་པ་ཆེན་པོའི་ལེའུ་རྣམས་ཀྱི་སྦས་པའི་ཚིག་གི་དོན་ཞར་ལ་འོངས་པ་དང་བཅས་པ་གསལ་བར་བྱས་ནས་སྒྲུབ་པའི་ལེའུ་རྣམས་ཀྱི་སྦས་པའི་ཚིག་དོན་བརྗོད་པར་བྱ་སྟེ། །དེ་ལ་དཀྱིལ་འཁོར་ནི་ཕལ་ཆེར་བཞི་བ་དང༌། བཅུ་དྲུག་པ་དང༌། བརྒྱད་པ་ལ་ཡིན་ལ། །དེའི་དྲིས་པའི་ལན་ནི་བྷ་ག་ཞེས་བྱ་བ་ལ་སོགས་པ་གསུངས་པ་ཡིན་ཏེ། །དེའི་ཕྱིར་ཤེས་རབ་བྷ་གར་བརྗོད་ཅེས་གསུངས་པས་ན། བྷ་ག་ནི་ཤེས་རབ་ཡིན་ལ་དེ་ཉིད་ནི་ངག་ཡིན་ཏེ། །དེའི་ཕྱིར་བྷ་གའི་དཀྱིལ་འཁོར་ནི་གསུང་གི་དཀྱིལ་འཁོར་རོ། །བྱང་ཆུབ་ཀྱི་སེམས་ནི་ཐུགས་སོ། །དེའི་ཕྱིར་བྱང་ཆུབ་སེམས་ཀྱི་དཀྱིལ་འཁོར་ནི་མི་བསྐྱོད་པའི་དཀྱིལ་འཁོར་རོ། །ལུས་ནི་རྣམ་པར་སྣང་མཛད་དོ། །དེ་བས་ན་དེའི་དཀྱིལ་འཁོར་ནི་སྐུའི་
དཀྱིལ་འཁོར་རོ། །ཡང་ན་བྷ་ག་ནི་གདན་དང་སྔགས་སོ། །བྱང་ཆུབ་ནི་མཚན་མའོ། །ལུས་ནི་ཕྱག་རྒྱ་ཆེན་པོའོ། །དེ་གསུམ་ནི་དཀྱིལ་འཁོར་ཡིན་པར་བརྟགས་པ་སྟེ་རྣམ་པར་གཞག་པའོ། །གསུམ་ཆར་ཡང་སྙིང་པོ་བསྡུས་པའི་ཕྱིར་དཀྱིལ་འཁོར་ཡིན་ནོ། །ཕྱག་རྒྱ་དགོད་པ་ཡང་དཀྱིལ་འཁོར་ཡིན་པའི་ཕྱིར་དཀྱིལ་འཁོར་གྱི་དེ་མ་ཐག་ཏུ་དེ་དྲིས་པས་ན་དེའི་ལན་ཕུང་པོ་ཞེས་བྱ་བ་ལ་སོགས་པ་སྨོས་ཏེ། །ཐམས་ཅད་ཅེས་བྱ་བ་ནི་སངས་རྒྱས་རྣམས་སོ། །ཕྱག་རྒྱ་ནི་སྐྱེ་བོ་རྣམས་རྗེས་སུ་གཟུང་བའི་ཕྱིར་རྒྱས་བཏབ་པའོ། །ཕྱག་རྒྱ་གང་གི་ཡིན་ཞེ་ན། །ཕུང་པོ་སྐྱེ་མཆེད་ཁམས་ཀྱིའོ། །འོ་ན་སྒོ་སྐྱོང་རྣམས་ཀྱི་ཕྱག་རྒྱ་གང་ལ་གདབ་ཅེ་ན། །རྣམ་པར་ཤེས་པའི་ཕུང་པོ་ལ་སྟེ། །སངས་རྒྱས་བྱང་ཆུབ་ཡེ་ཤེས་འདི། །ཞེས་གསུངས་པའི་ཕྱིར་རོ། །རྟག་ཏུ་ཞེས་བྱ་བ་ནི་འཁོར་རྣམས་སོ། །ལྕགས་ཀྱུ་ཞེས་བྱ་བ་ལ་སོགས་པ་ནི་མཚན་མའི་ཕྱག་རྒྱ་སྟེ། །སྙིང་གར་སོན་པའི་ཁྲོ་བོའི་འཁོར་ལོ་རྩིབས་བཅུ་པ་རྣམས་ཀྱིའོ། །འཁོར་ལོ་གནོད་མཛེས་དང་འཁོར་ལོའོ། །རིག་པའི་རྒྱལ་པོ་རྡོ་རྗེ་རྣམས། །ཞེས་བྱ་བ་ནི་མིག་ལ་སོགས་པ་ཡིན་ནོ་ཞེས་ཁ་ཅིག་ཟེར་རོ། །གཞན་དག་ནི་དཀྱིལ་འཁོར་ཆེན་པོ་ཉིད་ཀྱིའོ་ཞེས་ཟེར་རོ། །ས་ལ་སོགས་པའི་སེམས་དཔའ་རྣམས་ཞེས་བྱ་བ་ནི་ལྷ་མོ་བཅུ་པོ་རྣམས་སོ། །རང་གི་དཀྱིལ་འཁོར་རོ་ཞེས་བྱ་བ་ནི་ཇི་ལྟ་བ་བཞིན་དུ་སོ་སོར་སྡུད་པ་ལས་ལས་རང་རང་གི་འདོད་པའི་གདན་གྱི་དཀྱིལ་འཁོར་དང་ལོངས་སྤྱོད་བཞིའི་དཀྱིལ་འཁོར་ལས་ལ་སོགས་པ་རྣམས་ཀྱིའོ། །མེ་ལོང་ལ་སོགས་པའི་ཕྱག་རྒྱ་དྲུག་ནི་དཀྱིལ་འཁོར་ཆེན་པོ་ཉིད་ཀྱི་འདོད་པ་རྣམས་ཀྱིའོ། །སངས་རྒྱས་ནི་རྣམ་པར་སྣང་མཛད་པ་ལ་སོགས་པའོ། །བྱང་ཆུབ་སེམས་དཔའ་ནི་རིག་པའི་རྒྱལ་མོ་རྣམས་སོ། །ཁྲོ་བོའི་རྒྱལ་པོ་ནི་སྒོ་སྐྱོང་རྣམས་ཏེ། དེ་རྣམས་ཀྱི་ཕྱག་རྒྱ་ནི་རྩ་བའི་རྒྱུད་དུ་བཤད་པས་འདིར་མ་བསྟན་ཏོ་ཞེས་བྱ་བར་དགོངས་སོ། །གལ་ཏེ་དེ་ལྟན་ཅིའི་ཕྱིར་ས་ལ་སོགས་པའི་སེམས་དཔའ་རྣམས་ཕྱག་རྒྱ་རང་གི་དཀྱིལ་འཁོར་ཡིན་ཞེས་བརྗོད་ཅེ་ན། །དེ་ལྟ་ཡིན་པ་དེ་ཉིད་ཀྱི་ཕྱིར་སོ་སོར་སྡུད་པའི་དཀྱིལ་འཁོར་དང་ལོངས་སྤྱོད་བཞིའི་དཀྱིལ་འཁོར་གྱི་དབང་དུ་བྱས་པའི་གདན་བཅུའི་དཀྱིལ་འཁོར་ཡིན་པར་
ཤེས་པར་བྱ་བའི་ཕྱིར་ས་ལ་སོགས་པའི་སེམས་དཔའ་རྣམས་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་བཞིན་དུ་ལྕགས་ཀྱུ་ལ་སོགས་པ་ཡང་འགོག་པའི་དཀྱིལ་འཁོར་གྱི་དབང་དུ་བྱས་པ་ཡིན་པས་ན་ཕྱག་རྒྱ་ཐམས་ཅད་གཅིག་ཁོ་ནས་དཀྱིལ་འཁོར་ཆེན་པོའི་དབང་དུ་བྱས་ཏེ། གསུངས་པ་ནི་མ་ཡིན་ནོ། །དེ་བས་ན་ཕྱག་རྒྱ་སུམ་ཅུ་རྩ་གཅིག་བདག་པོ་དང་བཅས་པའི་དཀྱིལ་འཁོར་ཆེན་པོ་ལྷ་སུམ་ཅུ་རྩ་གཉིས་ཀྱི་ཡིན་པར་ཁ་ཅིག་སྨྲ་བ་དེ་དག་རིགས་པ་མ་ཡིན་ནོ། །སྐུ་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་ཀྱིས་ནི་སའི་སྙིང་པོ་ལ་སོགས་པ་བཞིན་ཏེ་རིགས་རྣམས་ཀྱི་མཚན་མ་ནི་སངས་རྒྱས་རྣམས་ཀྱི་མཚན་མ་ཉིད་དོ་ཞེས་བྱ་བ་འདི་ནི་གྲུབ་པ་ཡིན་ནོ། །དེ་བས་གཞན་དུའང་ཞེས་བྱ་བ་ལ་སོགས་པ་ལ་གཞན་དུ་ཞེས་བྱ་བ་ནི་རྒྱུད་གཞན་དུ་གསུངས་པའི་ལྷ་རྣམས་སོ། །དཔའ་བོ་གཅིག་ཅེས་བྱ་བ་ལ་དཔའ་བོ་ནི་དཀྱིལ་འཁོར་གྱི་བདག་པོ་ཡིན་པས་སོ། །གཅིག་ནི་གྲོགས་མེད་པས་སོ། །རིགས་ཀྱི་ཁ་དོག་གིས་ནི་བརྟག །ཅེས་བྱ་བ་ལ་བརྟག་ཅེས་པ་ནི་བརྟག་གོ་ཞེས་བྱ་བ་ད་ལྟའི་བའི་དུས་སྟོན་པའོ་།དེ་ལས་ཞེས་བྱ་བ་ནི་ལྟོས་པའི་ལྔ་པ་སྟེ། རྒྱུད་འདིའི་སྐབས་སུ་ཞལ་གསུམ་ཕྱག་དྲུག་པ་ལ་ལྟོས་པའོ། །རིགས་ཞེས་བྱ་བ་ནི་ཁྱིམ་སྟེ་དེ་རྣམས་རང་གི་རྒྱུད་དོ། །རིགས་དེའི་ཁ་དོག་གཅིག་གིས་བརྟགས་ཏེ། དེ་ལ་བརྞ་ནི་སྔགས་དང་མཚན་མ་དང་དཀར་པོ་ལ་སོགས་པ་དང་བྲམ་ཟེ་དང་རྒྱལ་རིགས་ལ་སོགས་པ་བཞིན་དུ་རིགས་དང་རྣམ་པ་བཞི་ལ་བྱའོ། །ཕྱག་རྒྱ་དགོད་པའོ། །པདྨ་དང་ཨུཏྤལ་སོགས་པ་མེ་ཏོག་དང་མཆོད་རྟེན་དག་བརྒྱད་པ་ལས་གསུངས་པ་དེའི་དོན་དྲི་བ་ཞུས་པའི་ལན་ནི་ལྷ་མོ་ཞེས་བྱ་བ་ལ་སོགས་པ་གསུངས་པ་ལྷ་མོ་དགུ་ནི་རིག་མ་དགུའོ། །དེ་རྣམས་ཀྱི་ནམ་མཁའི་ཁམས་ནི་གསང་བའོ། །མེ་ཏོག་ཅེས་བྱ་བ་ནི་མེ་ཏོག་གི་མིང་ཅན་ནོ། །དགོད་པར་བྱ་ཞེས་བྱ་བ་ནི་མེ་ཏོག་དེ་རྣམས་ཉིད་དོ། །སྐུ་གསུང་ཐུགས་ཀྱི་དབྱེ་བ་ཡིས། །རིམ་གྱིས་ཞེས་བྱ་བ་ནི་གཏི་མུག་དང་འདོད་ཆགས་དང་ཞེ་སྡང་སྐྱེད་པར་བྱེད་པའི་སྐུ་རྣམས་ནི་གོ་རིམས་བཞིན་དུ་གཏི་མུག་དང་འདོད་ཆགས་གསུམ་དང་ཞེ་སྡང་ལའོ། དེ་བཞིན་དུ་གཏི་མུག་དགའ་མ་ལ་སོགས་པའི་གཏི་མུག་དང་ཞེ་སྡང་དང་འདོད་ཆགས་གཉིས་དང་རྡོ་རྗེ་ལའོ། །སངས་
རྒྱས་ཐམས་ཅད་ཀྱི་བཞུགས་གནས་ནི་གཞལ་ཡས་ཁང་སྟེ་མཆོད་རྟེན་ནོ། །འདིས་ནི་མཆོད་རྟེན་ཡང་བཤད་པ་ཡིན་ཏེ། གཉི་གའི་དོན་གཅིག་པ་ཉིད་ཀྱི་ཕྱིར་རོ། །ཡེ་ཤེས་འཁོར་ལོ་དང་གནས་ཀྱི་ཡི་གེ་དང་དམ་ཚིག་བསྐུལ་བ་དང་གཏོང་བ་དང་བོད་པ་དང་བཅིང་བ་སྟེ་བཅུ་དྲུག་པ་ལས་གསུང་པ་དྲུག་པོ་འདི་དག་གི་དོན། དྲི་བའི་ལན་ནི་ཡེ་ཤེས་སེམས། །ཞེས་བྱ་བ་ལ་སོགས་པ་གསུངས་པ་ལ། ཡེ་ཤེས་སེམས་དཔས་སྤྲུལ་ཞིང་ཕྱུང་བའི་འཁོར་ལོ་གང་ཡིན་པ་དེ་ཡེ་ཤེས་འཁོར་ལོ་སྟེ། ཡེ་ཤེས་ལས་བྱུང་བའི་འཁོར་ལོ་ནི་ཡེ་ཤེས་ཀྱི་འཁོར་ལོ་ཞེས་བྱ་བར་དགོངས་སོ། །དེ་ཉིད་ནི་ཀུན་དུ་རྟོག་པས་ཞེས་བྱ་བར་བྱས་པས་དམ་ཚིག་གོ །ས་བོན་ཡི་གེ་གནས་ཞེས་བཤད། །ཅེས་པ་ལ། ལྷའི་གནས་ཡིན་པས་ན་ས་བོན་ནོ། །དེའི་བརྗོད་པ་ནི་ཡི་གེ་སྟེ་ངེས་གནས་སོ། །ཇི་ལྟར་རྗོད་པར་བྱེད་པས་ཡི་གེ་ཡིན་ཞེ་ན། གང་གི་ཕྱིར་ཡི་གེ་ཙམ་འདིར་ཡི་གེ་མ་ཡིན་ཏེ། འོ་ན་ཅི་ཞིག་ཅེ་ན། རྡོ་རྗེ་གསུམ་པོ་དེ་ཡི་གེ་མི་འགྱུར་བ་སྟེ། སེམས་གང་ཡིན་པ་དེ་ཉིད་བརྗོད་པའི་ངག་གི་རྣམ་པ་དང༌། ལུས་སུ་ཡང་འགྱུར་ཏེ། རྡོ་རྗེ་གསུམ་པོ་དེ་ལས་མི་འགྱུར་བས་ནི་རྡོ་རྗེ་གསུམ་ཡི་གེའོ། །དེའི་ཕྱིར་རྗོད་པར་བྱེད་པས་ན་ཡི་གེ་ཡིན་གྱི་ཡི་གེ་ཙམ་ནི་མ་ཡིན་ནོ། །སད་པར་བྱ་བ་ནི་དམ་ཚིག་སྟེ་ཡེ་ཤེས་ཀྱི་འཁོར་ལའོ། །སྐུ་དང་གསུང་དང་ཐུགས་རོ་མཉམ་པའི་ས་བོན་གྱི་ཡི་གེ་ཡིན་ཏེ། དེས་ན་དེ་ཉིད་བརྗོད་པས་ཞེས་བྱ་བའི་དོན་ཏོ། །འོད་ཟེར་འབྱེད་པ་ནི་འོད་འབར་ཞིག་སྤྲོ་བའོ། །རྡོ་རྗེ་ཀུན་ནི་སངས་རྒྱས་ཐམས་ཅད་ཀྱིའོ། །རྡོ་རྗེ་ཅན་ནི་སྐུ་གསུང་ཐུགས་ཀྱི་རྡོ་རྗེ་ཅན་ནོ། །དེ་རྣམས་སྤྱན་དྲངས་པ་ནི་འོད་ཟེར་དེ་ཉིད་ཀྱིས་དགུག་པའོ། །དེའི་གནས་ནི་ཡེ་ཤེས་ཀྱི་ས་བོན་ནོ། །དབང་བསྐུར་བ་དང་རིག་པའི་བརྟུལ་ཞུགས་ནི་བཅུ་དྲུག་པ་ལས་གསུངས་པ་དེའི་དྲི་བ་ཞུས་པའི་ལན་ནི་སྐུ་ཞེས་བྱ་བ་ལ་སོགས་གསུངས་པ་ལ། སྐུ་ལ་སོགས་པ་ནི་དཀྱིལ་འཁོར་གྱི་བདག་པོའི་སྐུ་དང་གསུང་དང་ཐུགས་ཀྱི་རང་བཞིན་གྱི་སྐུ་གསུང་ཐུགས་ནི་རྒྱས་བཏབ་སྟེ། རི་མོའི་དཀྱིལ་འཁོར་བརྟག་པར་བྱ་ཞིང་འབྱིན་པར་བྱའོ། །སངས་རྒྱས་ཐམས་ཅད་མཉམ་པར་སྦྱོར་བ་ལ་སོགས་པ་ལས། དཀྱིལ་འཁོར་ཡང་དག་ཇི་ལྟ་བར། །རབ་ཏུ་བརྟག་པར་སུ་ཡིས་ནུས། །རང་གི་ལྷ་ཡི་སྦྱོར་བ་ཡིས། །
དཀྱིལ་འཁོར་བརྟག་པར་འགྲུབ་པར་འགྱུར། །ཞེས་གསུངས་པའི་ཕྱིར་རོ། །དེ་ལྟར་དཀྱིལ་འཁོར་བྲིས་ནས་ཆོ་ག་བཞིན་དུ་བཞུགས་ཤིང་ཆོ་ག་བཞིན་དུ་བཅུག་པའི་སློབ་མ་ལ་དབང་བསྐུར་བ་སྦྱིན་པར་བྱ་ཞེས་བྱ་བ་ལ་སོགས་པ་གསུངས་སོ། །ཅིའི་ཕྱིར་འདིར་དབང་བསྐུར་གསུམ་གསུངས་ཤེ་ན། གསུམ་པོ་ཉིད་ཀྱིས་སློབ་དཔོན་དུ་བྱེད་པའི་ཕྱིར་རོ། །དེ་ལྟར་བཞི་པ་དེ་བཞིན་ནོ། །ཞེས་བྱ་བ་ནི་གསུམ་པོ་དག་ལས་ལྷག་མ་ཉིད་ཀྱི་ཕྱིར་བཞི་སྟེ། རིག་པའི་དབང་བསྐུར་རོ། །དེ་ཡང་དེ་བཞིན་ཏེ་ཞེས་པ་ནི་རྒྱུད་གཞན་ཇི་ལྟ་བ་དེ་བཞིན་དུ་སྟེ། དེ་བས་ན་དེའི་རྒྱུད་གཞན་གྱི་རྗེས་སུ་འབྲངས་ནས་ཤེས་པར་བྱའོ། །དེ་ཡང་དབང་བསྐུར་བ་དྲུག་སྟེ། ཕྲེང་བ་དང༌། ཆུ་དང༌། ཅོད་པན་དང༌། རྡོ་རྗེ་དང༌། བདག་པོ་དང༌། མིང་གི་དབང་བསྐུར་བ་ཞེས་བྱའོ། །དེ་ལ་བུམ་པའི་དབང་བསྐུར་བ་ནི་ལེའུ་བཅུ་དྲུག་པ་ཉིད་དུ་ཡོངས་སུ་གསལ་བར་མཛད་པ་ཡིན་ནོ། །གཉིས་པ་ནི་མིག་ཡངས་ཞེས་བྱ་བ་ལ་སོགས་པ་གསུངས་པ་ལ། སྔགས་ནི་ཡིད་ཆེས་པ་འདི་ཉིད་དོ། །སྔགས་ཀྱི་སྣོད་དུ་རུང་བ་ནི། ཐོས་པ་དང་དད་པ་ལ་སོགས་པའི་ཁྱད་པར་དང་ལྡན་པའི་ཕྱིར་རོ། །མེ་ཏོག་ནི་དུས་སུ་འབྱུང་བའོ། །རྡོ་རྗེ་ཐམས་ཅད་ནི་སངས་རྒྱས་ཐམས་ཅད་དོ། །སྐུ་གསུང་ཐུགས་ཀྱི་རྡོ་རྗེ་ནི་རོ་གཅིག་པར་འགྱུར་བ་སྟེ། དེའི་རྣམ་པ་ཕྱུང་ནས་སོ། །གསུམ་པ་ནི་མཆོག་ཏུ་དད་ཅིང་ཞེས་བྱ་བ་ལ་སོགས་པ་གསུངས་ཏེ། སྦྱོར་བ་གཅིག་ནི་རྒྱུད་གཅིག་ལ་ནན་ཏན་དུ་བྱེད་པའོ། །དམ་ཚིག་དག་གི་དམ་ཚིག་ཅན། །ཞེས་བྱ་བ་ནི་དེའི་ཕྱི་རོལ་རྣལ་འབྱོར་བ་སྒྲུབ་པ་པའོ། །ཤེས་རབ་ནི་རྣལ་འབྱོར་མའོ། །རྨོངས་པ་ཞེས་བྱ་བ་ནི། གཏི་མུག་གི་རིགས་རང་གི་ལྷག་པའི་ལྷར་གྱུར་པ་ནའོ། །གཏི་མུག་བདག་ཉིད་རྣལ་འབྱོར་ཞེས་བྱ་བ་ནི་རྣམ་པར་སྣང་མཛད་ཀྱི་རྣལ་འབྱོར་བྱ་བའོ། །གཏི་མུག་དགའ་མ་ཞེས་བྱ་བ་ནི། རིག་མ་དེ་ཉིད་གཏི་མུག་དགའ་མར་བྱས་པའོ། །གཏི་མུག་རྒྱུན་ནི་བསིལ་ཞིང་དཀར་བའོ། །གཏི་མུག་རྡོ་རྗེ་རང་ཉིད་གྱུར། །ཞེས་པས་དེའི་རིགས་ལས་སྐྱེས་པར་འགྱུར་བ་ལྟ་ཅི་སྨོས་ཞེས་པའོ། །དེ་ལྟར་ཕྱི་མ་གསུམ་ལ་ཡང་སྦྱར་བར་བྱའོ། །འོན་ཀྱང་ཞེ་སྡང་གི་རྒྱུན་ནི་དྲོ་ཞིང་གནག་པའོ། །འདོད་ཆགས་ཀྱི་རྒྱུན་ནི་པདྨ་རཱ་ག་ལྟ་བུའོ། །ཤེས་རབ་ཡེ་ཤེས་ནི་དོན་ཡོད་གྲུབ་པའོ། །རིག་པའི་བརྟུལ་ཞུགས་ལ་སྒྲུབ་པ་པོས་ནི་རིག་པ་གཉི་གཡོངས་
སུ་གཟུང་སྟེ་གཏང་བར་མི་བྱའོ། །སློབ་དཔོན་ཙམ་བཞི་ནི་ཕྱི་རོལ་གྱི་ངེས་པ་མ་ཡིན་ནོ། །བདུད་རྩི་ལྔ་དང་དཔའ་བོ་ལྔ་དག་བསྟེན་པ་ནི་བཅུ་དྲུག་པ་དང་བཅུ་གཉིས་པ་ལ་སོགས་པ་ལས་གསུངས་པ་དེའི་དྲི་བ་ཞུས་པ་འདི་དག་གི་ལན་ནི་ཐ་མལ་ཞེས་བྱ་བ་ལ་སོགས་པ་གསུངས་ཏེ། འདིར་འཇིག་རྟེན་ལ་རབ་ཏུ་གྲགས་པའི་རང་བཞིན་གྱི་ཐ་མལ་པའོ། །ངོ་བོ་ཉིད་དེས་དྲི་མ་ལྔ་རྣམས་དེ་ཉིད་དོ། །ལུས་ཀྱི་ཆོས་ལ་ཞེས་བྱ་བ་ནི་ལུས་གནས་པའི་ཕུང་པོ་ལ་སོགས་པ་ལའོ། །སྣང་བ་ནི་ཡོངས་སུ་གསལ་བར་བྱ་ཞེས་བྱ་བའི་དོན་ཏོ། །དེ་བས་ན་ངོ་བོ་ཉིད་དེ་ཉིད་བསྟེན་པར་མི་བྱ་བར་དགོངས་སོ་འོ་ན་ཇི་ལྟར་ན་བདུད་རྩི་ལྔ་ཡིན་ཞེ་ན། ཡེ་ཤེས་ལྔ་ཡིས་བྱིན་གྱིས་བརླབས་པ་སྟེ། ཡེ་ཤེས་ལྔ་ནི་སྤར་བ་ལ་སོགས་པའོ། །ཡེ་ཤེས་ཀྱི་བདུད་རྩི་དབབ་པ་ནི་ལྔ་པའོ། །དེས་ནི་བདུད་རྩི་ལྔ་ཉིད་བདུད་རྩིར་གྱུར་པའོ། །དེ་བས་ན་བདུད་རྩི་ལྔ་ཞེས་གསུངས་པ་ཡིན་ནོ། །འདི་རྣམས་ཀྱི་འགྲེལ་པ་ནི་རྡོ་རྗེ་ཧཱུཾ་ཞེས་བྱ་བ་ལ་སོགས་པ་ཡིན་ཏེ། རྡོ་རྗེ་ནི་སྔོན་པོ་ཁ་གྱེན་དུ་བལྟས་པའོ། །པདྨ་ནི་ཐོད་པ་དམར་པོ་ཁ་བཀག་པའོ། །དེའི་དབུས་སུ་ཞེས་བྱ་བ་ནི་པདྨའི་ནང་དུའོ། །སྤར་བ་དང་གདུང་བར་བྱ་བ་ནི་ཡེ་ཤེས་གཉིས་སོ། །རྣལ་འབྱོར་པས་ཞེས་བྱ་བ་ནི་རྣལ་འབྱོར་གྱི་སྟོབས་ཀྱིས་སོ། །ཤེལ་དང་མཚུངས་པར་སྣང་གྱུར་ཅིང༌། །ཞེས་བྱ་བ་ནི་ཤེལ་དང་འདྲ་བར་དང་བར་བྱས་ནས་སོ། །དེ་ནི་ཡེ་ཤེས་གསུམ་པའོ། །ཡེ་ཤེས་ཉི་མ་བཞི་བར་གྱུར། །ཅེས་བྱ་བ་ནི་ཡེ་ཤེས་ཀྱི་རང་བཞིན་ཅན་གྱི་ཉི་མའི་དཀྱིལ་འཁོར་ལྟ་བུར་བསྟན་ནས་སོ། །དེ་ནི་ཡེ་ཤེས་བཞི་པའོ། །མཚོན་ཆའི་ཚོགས་ནི་འོད་ཟེར་རྣམས་སོ། འཇིག་རྟེན་གྱི་ཁམས་ན་བདུད་རྩི་གང་ཡིན་པ་དེ་ནི་སངས་རྒྱས་ཐམས་ཅད་ཀྱི་ཐུགས་ཀ་ན་གནས་པའི་ཡེ་ཤེས་ཀྱི་བདུད་རྩིའོ། །ཕབ་ནས་ཀྱང་ཞེས་བྱ་བ་ནི་ཐུགས་ཀར་ཞུགས་ཏེ། སྦུབས་ཀྱིས་འདྲེན་པ་བཞིན་དུ་དྲངས་ནས་སོ། །དེ་ནི་ཡེ་ཤེས་ལྔ་པའོ། །བཟའ་བའི་སྦྱོར་བས་ཞེས་བྱ་བ་ནི་སྔགས་ཀྱི་ལུས་དང༌། རྡོ་རྗེའི་ལྕགས་ཀྱུ་དང༌། རྡོ་རྗེའི་ལྕེ་དང༌། ཡེ་ཤེས་གསུམ་གྱིས་བྱིན་གྱིས་བརླབས་ནས་སོ། །དེ་བཞིན་ཞེས་བྱ་བ་ནི་བདུད་རྩི་ལྔའི་ཆོ་ག་ཉིད་ཀྱིས་སོ། །དཔའ་བོ་ལྔ་ཞེས་བྱ་བ་ནི་ཤ་ལྔའོ། །བསྒྲུབ་བྱའི་དངོས་གྲུབ་ཆོ་ག་ཡིས། །ཞེས་བྱ་བ་ནི་དངོས་གྲུབ་གང་གིས་བསྒྲུབ་པར་བྱ་བར་གང་གསུངས་
པའོ། །གཞན་དུ་ཞེས་བྱ་བ་ནི་སྤར་བ་ལ་སོགས་པའི་ཆོ་ག་ཡི་གེ་གསུམ་གྱིས་བྱིན་གྱིས་བརླབས་པའི་མཐར་ཐུག་པ་རྣམས་ལས་འདས་ཏེ་བཤད་བ་ལ་སོགས་པ་དང༌། ད་དང་ཧ་དང༌། ན་ལ་སོགས་པས་ནི་དངོས་གྲུབ་སྩོལ་བར་མི་འགྱུར་རོ། །དངོས་གྲུབ་ནི་བཅུ་དྲུག་པ་དང་བཅུ་གཉིས་པ་དང་བཅོ་ལྔ་པ་དང་བཅུ་གཅིག་པ་དག་ཏུ་གསུངས་ལ། དེ་ལས་ཐ་མལ་པ་ནི་ཇི་ལྟ་བུ་མཆོག་ཀྱང་ཇི་ལྟ་བུ་ཞེས་ཞུས་པའི་དོན་ཡིན་ལ་ལན་ནི་མི་སྣང་ཞེས་བྱ་བ་ལ་སོགས་པ་ཡིན་ཏེ། དངོས་གྲུབ་ནི་ཞེས་བྱ་བ་ནི་དངོས་གྲུབ་རྣམས་སོ། །ཐ་མལ་པ་ཞེས་བྱ་བ་ནི་དམན་པའོ། །མཆོག་ཅེས་བྱ་བ་ནི་དམ་པའོ། །སྒྲུབ་པའི་ལེའུ་རྣམས་ཀྱི་སྤས་པའི་ཚིག་གི་དོན་བཤད་པ་ཞར་ལ་འོངས་པ་དང་བཅས་པའོ། །ཐབས་ནི་རྩ་བའི་རྒྱུད་མ་ལུས་པ་ཡིན་པ་དེ་བས་ན། དེ་ལ་ཐབས་ནི་རྣམ་པ་དུ། །ཞེས་ཞུས་པ་དེའི་ལན་ནི། ཐབས་ནི་རྣམ་པ་བཞི་པོ་དག །ཅེས་བྱ་བ་ལ་སོགས་པས་རྒྱ་ཆེར་གསུངས་སོ། །ཅིའི་ཕྱིར་གསུང་བ་ཤེ་ན། གང་གི་ཕྱིར་རྣལ་འབྱོར་པས་རྟག་པར་བསྔགས་པ་སྟེ། དེ་ཉིད་རྟག་ཏུ་བསྔགས་པའམ། རབ་ཏུ་གསལ་བར་མཛད་ཅེས་བྱ་བའི་དོན་ཏོ། །ཇི་ལྟར་ན་རྣམ་པ་བཞི་པོ་ཡིན་ཞེ་ན། བསྙེན་པའི་ཞེས་བྱ་བ་ལ་སོགས་པ་གསུངས་སོ། །བསྙེན་པ་རྣམ་པ་གཉིས་སུ་འགྱུར། །ཞེས་བྱ་བ་ནི་བསྙེན་པའི་ཆོ་ག་ནི་རྣམ་པ་གཉིས་ཡིན་ནོ་ཞེས་བྱ་བའི་དོན་ཏོ། །ཇི་ལྟར་རྣམ་པ་གཉིས་ཡིན་ཞེ་ན། ཐུན་མོང་གི་བྱེ་བྲག་གིས་ཏེ། དངོས་གྲུབ་དམན་པ་བསྒྲུབ་པའི་ཕྱིར་བསྙེན་པ་ནི་ཐུན་མོང་གི་བསྙེན་པའོ། །དངོས་གྲུབ་མཆོག་གི་ཕྱིར་བསྙེན་པ་གང་ཡིན་པ་དེ་ནི་མཆོག་གི་བསྙེན་པའོ། །དེ་ལ་ཐུན་མོང་གི་བསྙེན་པ་ནི་རྡོ་རྗེ་བཞིས་འགྱུར་ལ། མཆོག་གི་བསྙེན་པ་ནི་ཡེ་ཤེས་བདུད་རྩིས་སོ། །དེ་ལ་དང་པོར་རྡོ་རྗེ་བཞི་ནི་དང་པོ་ཞེས་བྱ་བ་ལ་སོགས་པ་གསུངས་པ་ལ། སྟོང་ཉིད་བྱང་ཆུབ་སྟེ་ཞེས་བྱ་བ་ནི་སྣ་ཚོགས་རྣམ་པར་རིག་པ་ཙམ་ཡིན་ནོ་ཞེས་མོས་པར་བྱས་ལ། རྣམ་པར་རིག་པ་ཙམ་དེ་ཡང་གཉིས་སུ་སྣང་བ་ནུབ་པའི་ཕྱིར་གཉིས་ཀྱིས་སྟོང་བ་རྟོགས་པ། ནམ་མཁའ་ལྟ་བུ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བ་འདིས་བརྟན་པར་བྱ་བ་ནི་སྟོང་ཉིད་བྱང་ཆུབ་སྟེ། དེ་ནི་རྡོ་རྗེ་དང་པོའོ། །ས་བོན་བསྡུས་པ་ཡིན་ཞེས་བྱ་བ་ནི་སྙིང་གར་གནས་པའི་རང་ལྷའི་ས་བོན་དེ་ཉིད་ལས་སྤྲོས་པའི་དེ་བཞིན་གཤེགས་པ་ཐམས་
ཅད་བསྡུས་པའོ། །གཟུགས་ནི་རྫོགས་པ་སྟེ་ཞེས་བྱ་བ་ནི་རང་གི་ལྷའི་རྣམ་པར་རང་གི་ལུས་རྟེན་བསྐྱེད་པའོ། །ཡི་གེ་བཀོད་པའོ་ཞེས་བྱ་བ་ནི་རང་གི་ལྷའི་རྣམ་པའི་བདག་ཉིད་ཀྱི་སྙིང་གར་དེའི་ས་བོན་བཀོད་པའོ། །འདི་དག་གིས་ཞེས་བྱ་བ་འདིས་བསྐྱེད་པར་བྱ་ཞེས་བྱ་བར་སྦྱར་རོ། །སྦྱོར་བ་དྲུག་གིས་ཞེས་བྱ་བ་ནི་ཡན་ལག་དྲུག་གི་སྦྱོར་བས་སོ། །འདི་ཉིད་ཀྱིས་ངེས་པར་བྱས་པ་ནི་བསྙེན་པ་ཞེས་བྱ་བ་ལ་སོགས་པ་གསུངས་སོ། །སོ་སོར་སྡུད་པ་དང་ཞེས་བྱ་བ་ལ་སོགས་པ་ནི་ཡན་ལག་དྲུག་གིས་བསྟན་པ་ཡིན་ལ། དབང་པོ་བཅུ་པོ་ཞེས་བྱ་བ་ལ་སོགས་པས་ནི་རྒྱས་པར་བསྟན་པ་ཡིན་ནོ། །དེ་ལ་སོ་སོར་སྡུད་པའི་དབང་དུ་བྱས་ནས། དབང་པོ་བཅུ་པོ་ཞེས་བྱ་བ་ལ་སོགས་པ་རྐང་པ་དྲུག་པའི་ཚིགས་སུ་བཅད་པ་གསུངས་སོ། །འབྱུང་བའི་དབང་པོ་ལྔ་པོ་ཡོངས་སུ་བསྡུས་པ་ནི་པདྨ་དང་འབྱུང་བ་ལས་གྱུར་པའི་དབང་པོ་ལྔ་པོ་ཡོངས་སུ་བསྡུས་པའི་རྡོ་རྗེ་དག་ནི་དབང་པོ་སྟེ། འདོད་པ་ལ་ཉེ་བར་ལོངས་སྤྱོད་པའི་བདག་པོ་ཡིན་པའི་ཕྱིར་རོ། །དེ་དག་ནི་བཅུའོ། །བཅུ་པ་དེ་རྣམས་ནི་བྱེད་པའི་དྲུག་པ་སྟེ། དཔེར་ན་རལ་གྲིས་བཅད་པ་བཞིན་ནོ། །ཉེ་བར་སྤྱོད་པ་ལ་ལྟོས་ནས་བྱེད་པ་ཡིན་ནོ། །གཅིག་ལས་ནི་བྱུང་ལ་ཅིག་ཤོས་སུ་ནི་འཇུག་པས་སོ། །སྡུད་པ་ནི་སྡུད་ཅིང་ཉེ་བར་སྤྱོད་པ་སྟེ། སངས་རྒྱས་ལྔའི་རང་གི་ས་བོན་གྱི་རྣམ་པའོ། །གང་ལ་སྤྱོད་ཅེ་ན། གདན་གྱི་རང་བཞིན་ཅན་གྱི་འདོད་པ་ལྔ་ལའོ། །དེའི་ཕྱིར་གསུངས་པ་འདོད་པ་ཞེས་བྱ་བ་སྟེ། འདོད་པ་རྣམས་ལ་ཞེས་བྱ་བའི་དོན་ཏོ། །གང་ལས་ཉེ་བར་སྤྱོད་ཅེ་ན། དེའི་ཕྱིར་གསུངས་པ། རང་གི་གཞིར་གནས་ཐམས་ཅད་ལས། །ཞེས་བྱ་བ་སྟེ། རང་གི་གདན་ལ་གནས་པའི་སྣ་ཚོགས་པ་ལས་ཞེས་བྱ་བའི་དོན་ཏོ། །འདི་ལྟ་བུའི་འདོད་པ་ལ་སྤྱོད་པ་གང་ཡིན་པ་དེ་ནི་སོ་སོར་སྡུད་པའོ། །དེའི་ཕྱིར་འདོད་པ་སོ་སོར་ཞེས་བྱ་བ་ལ་སོགས་པ་གསུངས་ཏེ། ཅིའི་ཕྱིར་གསུངས་ཤེ་ན། སོ་སོར་སྡུད་པ་ཞེས་བྱ་བ་གསུངས་ཏེ། སོ་སོའི་སྒྲ་ནི་སོ་སོར་ཕྱེ་བའི་དོན་ཏོ། །སོ་སོར་ཕྱེ་ནས་ཉེ་བར་སྤྱོད་དོ་ཞེས་གཟུང་ཞིང་སྦྱར་བར་བྱ་སྟེ། །སོ་སོར་ཕྱེ་བ་ལ་ཉེ་བར་སྤྱོད་པ་ཞེས་བྱ་བར་དགོངས་སོ། །ཇི་ལྟར་སོ་སོར་ཕྱེ་ཞེ་ན། གང་ཕྱིར་དབང་པོ་རྣམ་སྦྱོར་བའི་རྡོ་རྗེའི་ནང་དུ་སོན་པའི་ཆོས་
ཀྱི་དབྱིངས་ལས། རྡོ་རྗེའི་བུ་ག་ནས་འདོད་པ་ལྔ་པོ་རིམ་བཞིན་དུ་ཕྱུང་སྟེ་པདྨའི་ནང་དུ་བཀོད་དེ་དེའི་རྗེས་ལ་དེ་བཞིན་དུ་སྣ་ཚོགས་པ་ལས་སངས་རྒྱས་རྣམས་ཕྱུང་སྟེ། འདོད་པ་རྣམས་ལ་དགོད་པར་བྱའོ། །གཉིས་པ་ལ་ནི་སོ་སོའི་སྒྲ་ནི་སོ་སོར་ཀུན་དུ་སྡུད་པ་སྟེ། སོ་སོར་ཀུན་དུ་བསྡུས་ནས་ཉེ་བར་སྤྱོད་པ་ན་སོ་སོར་སྡུད་པ་ཞེས་བྱ་བའོ། །དེ་ཅིའི་ཕྱིར་ཞེ་ན། འདོད་པ་ལྔ་ཞེས་བྱ་བ་ལ་སོགས་པ་གསུངས་ཏེ། མདོར་བསྡུས་ཞེས་བྱ་བ་ནི་ཐམས་ཅད་ཅེས་བྱ་བ་གཟུང་བ་ལ་སྦྱར་རོ། །ཨ་སི་ཞེས་བྱ་བ་ནི་གདན་ཏེ་གདན་ལྔའོ། །འདོད་པའི་གདན་ལྔ་པོ་སྣ་ཚོགས་པའི་གདན་ལ་མདོར་བྱས་ཏེ་བསྡུས་པའོ། །རྒྱུ་དེ་ཉིད་ཀྱིས་ན་སངས་རྒྱས་ལྔ་རབ་ཏུ་སྦྱོར་བས་སྣ་ཚོགས་པ་ལ་བསྡུ་བར་བྱའོ། །བསམ་གཏན་གྱི་དབང་དུ་བྱས་ཏེ་གསུངས་པ་བརྟག་པ་ཞེས་བྱ་བ་ལ་སོགས་པ་ལ། བརྟག་པ་ནི་ཞི་གནས་དང་ལྷག་མཐོང་སྟེ་དེ་ནི་བསམ་གཏན་ནོ། །དེ་ནི་རྣམ་པ་ལྔ་ལྔར་འགྱུར། །ཞེས་བྱ་བ་ལ་སོགས་པ་ལ། རྟོག་པ་དང་བཅས་དཔྱོད་པ་དང་བཅས་པ་དང༌། རྟོག་པ་མེད་པའི་དཔྱོད་པ་ཙམ་དང༌། རྟོག་པ་ཡང་མེད་དཔྱོད་པ་ཡང་མེད་པའི་ཏིང་ངེ་འཛིན་རྣམ་པ་གསུམ་ལ་བསམ་གཏན་རྣམ་པ་བཞི་སྟེ། རྟོག་པ་དང་བཅས་ཤིང་དཔྱོད་པ་དང་བཅས་པ་དང༌། རྟོག་པ་ཡང་མེད་དཔྱོད་པ་ཡང་མེད་པ་དང༌། དགའ་བ་མེད་པའི་བདེ་བ་དང༌། སྡུག་བསྔལ་ཡང་མེད་བདེ་བ་ཡང་མེད་པའི་སེམས་རྩེ་གཅིག་པའོ། །དེ་ལ་ཏིང་ངེ་འཛིན་གཉིས་པ་བསམ་གཏན་གཉིས་པར་བྱས་ནས་བསམ་གཏན་རྣམ་པ་ལྡར་བརྗོད་དོ། །དེ་ཉིད་ཀྱི་ཕྱིར་རྟོག་དང་ཞེས་བྱ་བ་སྨོས་སྟེ། འདོད་པ་རྣམས་ལས་འདས་པ་ནི་རྟོག་པའོ། །དེ་ལས་འདས་པ་ནི་དཔྱོད་པའོ། །དེ་ལས་འདས་པ་ནི་དགའ་བའོ། །དེ་ལས་འདས་པ་ནི་བདེ་བའོ། །དེ་ལས་ཀྱང་འདས་པ་ནི་སེམས་རྩེ་གཅིག་པའོ། །བསམ་གཏན་བསྡུས་ཞེས་བྱ་བ་ནི་སེམས་ཡང་དག་པར་བསྡུས་པ་ནི་བསམ་གཏན་ཞེས་བྱའོ། །འདི་ན་ཇི་ལྟ་བུ་ཞིག་ཡིན་ཞེ་ན། གསང་བ་ཞེས་བྱ་བ་ལ་སོགས་པ་གསུངས་ཏེ། གསུམ་འབྱུང་བ་ནི་པདྨའི་ལྟེ་བའི་གྲྭ་གསུམ་དུ། འཁོར་ལོ་དང༌། པདྨ་དང༌། རྡོ་རྗེ་རྣམས་འབྱུང་བའོ། །རྟོག་པ་ཞེས་བྱ་བ་ནི་རྟོག་པར་གྲགས་པ་སྟེ། རྒྱ་ཆེ་བའི་བསམ་གཏན་ཡིན་པའི་ཕྱིར་རོ། །གསང་བ་དེ་རྣམས་ཀྱི་ལོངས་སྤྱོད་ནི་དེ་རྣམས་རོ་གཅིག་པར་གྱུར་པའི་རལ་གྲི་
དབུས་སུ་དགོད་པའོ། །དཔྱོད་པ་ཞེས་བྱ་བ་ནི་དཔྱད་པར་གྲགས་པ་སྟེ། ཕྲ་བའི་བསམ་གཏན་ཡིན་པའི་ཕྱིར་རོ། །དགའ་བ་ཀུན་སྣང་ཞེས་བྱ་བ་ནི་ཀུན་དུ་ཡོངས་སུ་སྣང་བའོ། །གསུམ་པ་ཞེས་བྱ་བ་ནི་དགའ་བ་ཞེས་གྲགས་པའི་བསམ་གཏན་ཏེ། མཚན་མ་བཞིའི་ལྟེ་བར་ཨོཾ་ཨཱཿ་ཧཱུཾ་ཧཱ་ཞེས་བྱ་བ་འདིའི་དགའ་མ་རྣམས་ཇི་ལྟ་བཞིན་དུ་དགོད་པའོ། །བཞི་པ་ཞེས་བྱ་བ་ནི་བདེ་བ་ཞེས་གྲགས་པའི་བསམ་གཏན་ཏེ། བདེ་བ་བསྡུས་པ་ཞེས་བྱ་བ་ལ། དགའ་མ་དེ་དག་བསྡུས་ནས་ཞུ་བའི་ཕྱིར་བསྡུས་པ་ཡང་ཡིན་ལ། བདེ་བའི་ཐིག་ལེ་ཡིན་པའི་ཕྱིར་བདེ་བ་ཡང་དེ་ཡིན་པས་བདེ་བ་བསྡུས་པའོ། །ལྔ་པ་ཞེས་བྱ་བ་ནི་སེམས་རྩེ་གཅིག་པ་ཞེས་བྱ་བར་གྲགས་པའི་བསམ་གཏན་ནོ། །དེ་ཅི་ཞིག་ཅེ་ན། རང་སེམས་ཏེ་ཐ་མལ་པར་གནས་པའི་རང་གི་སེམས་ནི་རང་སེམས་ཏེ། བདེ་བའི་ཐིག་ལེའི་ནང་དུ་ཆུད་པའི་མཚན་མ་བཞི་བསྡུས་པ་ལས་བྱུང་བའི་སེམས་ཀྱི་ཐིག་ལེ་ཞེས་པའི་དོན་ཏོ། །དེ་ཉིད་ཀྱི་ཕྱིར་ཤེས་དང་ཤེས་བྱ་འབྱུང་ཟད་པ་སྟེ་ཤེས་པ་འབྱུང་བ་ནི་མཚན་མ་རྣམས་སོ། །ཤེས་བྱ་འབྱུང་བ་ནི་དགའ་མ་རྣམས་སོ། །ཟད་པ་ནི་དེ་དག་བསྡུས་པའོ། །འདི་ནི་བསམ་གཏན་གྱི་ཡན་ལག་སྟེ་གཉིས་པའོ། །ཞི་བ་ནི་སྣ་ཚོགས་པ་སྟེ། དེར་སངས་རྒྱས་ཐམས་ཅད་བསྡུས་པའི་ཕྱིར་སངས་རྒྱས་ཀུན་དངོས་སོ། །དེའི་གདན་ལ་སངས་རྒྱས་རྣམས་ཀྱི་གདན་བསྡུས་པ་ལ་གནས་པ་ན་འདོད་པ་ཀུན་ལ་རབ་ཏུ་གནས་སོ། །དབུགས་ཞེས་བྱ་བ་ནི་སེམས་ཀྱི་ཐིག་ལེའོ། །མཚན་མ་བཞི་བསྡུས་པ་ལས་བྱུང་བའི་ཞི་གནས་ལྔའི་བདག་ཉིད་ཡིན་པའི་ཕྱིར་ཡེ་ཤེས་ལྔའི་དངོས་སོ། །དགའ་མ་རྣམས་བསྡུས་པ་ལས་བྱུང་བའི་བདེ་བའི་ཐིག་ལེ་ནང་དུ་ཆུད་པའི་ཕྱིར་འབྱུང་བ་ལྔའི་ངོ་བོའོ། །གང་གི་སྒྲ་ཡང་དོན་གྱིས་ཤེས་པར་བྱ་སྟེ། དེ་ཉིད་བསྡུས་པ་ལས་རིན་པོ་ཆེ་ཆེན་པོ་ཕྱུང་ཞེས་བྱ་བ་ནི་སྐྱེད་པ་སྟེ། ཙ་རི་དང་པད་དོའི་དོན་གཅིག་པའི་ཕྱིར་རོ། །ཇི་ལྟ་ཇི་ལྟར། སེམས་ཕྲ་མོའི་འགྱུར་བ་དེ་ལྟ་དེ་ལྟར་རིན་ཐང་ཆེ་བའི་ཕྱིར་རིན་ཆེན་ཏེ་རིན་ཆེན་ཕྲ་མོ་ཞེས་བྱ་བའི་དོན་ཏོ། །འཁོར་ལོས་སྒྱུར་བའི་རྣལ་འབྱོར་ལ་གནས་ནས་ཡན་ལག་དྲུག་གི་རྣལ་འབྱོར་བྱ་བ་ཡིན་པ་ལས་རིན་པོ་ཆེ་ཡང་དེའི་མདོག་དང་འདྲ་བ་དེ་བས་ན་རིན་ཆེན་ཁ་དོག་སྣ་ལྔ་པའོ། །ཇི་ལྟར་བསྐྱེད་པར་བྱ་ཞེ་ན།
གོང་བུའི་གཟུགས་ཀྱིས་ཏེ། ཟླུམ་པས་གོང་བུ་ཡིན་ལ་ངེས་པར་བརྟགས་པས་ན་གཟུགས་ཏེ། དེ་གཉིས་ནི་གོང་བུའི་གཟུགས་སོ། །དེས་ནི་གདན་དང་བཅས་པའི་ཡི་གེ་བྷྲཱུཾ་ཡུངས་ཀར་ཙམ་གྱི་ནོར་བུའི་གོང་བུར་བྱས་ཏེ། དཔེའི་ཐིག་ལེའི་སྙིང་པོ་ཅན་གྱི་སེམས་ཀྱི་ཐིག་ལེའི་ནང་དུ་ཆུད་པར་བྱ་བའི་གོང་བུའོ། །དེ་ནས་ཨོཾ་དྷ་རྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ། ཞེས་བྱ་བས་བྱིན་གྱིས་བརླབས་ཏེ། ངེས་པར་བརྟག་པར་བྱའོ། །དེ་ལྟར་རིན་པོ་ཆེ་བསྐྱེད་ལ་བཏེག་ནས་སྣའི་རྩེ་མོར་རབ་ཏུ་བརྟག་པར་བྱའོ། །སྲོག་ནི་སེམས་ཀྱི་རིན་པོ་ཆེ་དེའོ། །དེའི་རྩོལ་བ་ནི་སྣའི་རྩེ་མོར་གསུངས་པའོ། །འདི་ནི་སྲོག་དང་རྩོལ་བའི་ཡན་ལག་སྟེ་གསུམ་པའོ། །སྲོག་ནི་རིན་ཆེན་དེ་ཉིད་དོ། །ཐིག་ལེ་ནི་སྔགས་ཀྱི་ཐིག་ལེའོ། །གཞག་པ་ནི་དེར་ཇི་ལྟར་སོན་པར་གྱུར་པའོ། །རང་དབང་ནི་ཡིད་ཀྱི་དབང་པོའོ། །དགག་པ་ནི་སྔགས་ཀྱི་ཐིག་ལེར་མི་གཡོ་བར་བྱའོ། །གཟུང་བ་ཞེས་བྱ་བ་ནི་བརྟན་པར་བྱ་པའོ། །འདི་ནི་འཛིན་པའི་ཡན་ལག་སྟེ་བཞི་པའོ། །རྗེས་སུ་དྲན་པ་བརྗོད་པར་བྱ་སྟེ། དེ་ཡང་འཛིན་པས་རིན་པོ་ཆེ་བརྟན་པར་བྱས་པས་དེ་བྱ་བ་ཡིན་ལ་བརྟན་པ་ཡང་མཚན་མ་ཤེས་པ་ལས་སོ། །དེ་ཉིད་ཀྱི་ཕྱིར་སེམས་ནི་ཞེས་བྱ་བ་ལ་སོགས་པ་སྨོས་ཏེ། སེམས་ནི་རིན་པོ་ཆེའོ། །མི་གཡོ་བས་ན་འགོག་པ་སྟེ། དེ་ཉིད་བརྟན་པས་ན་རྡོ་རྗེའོ། །འགོག་པའི་རྡོ་རྗེ་དེར་གྱུར་པ་ནི་ཐོབ་པའོ། །མཚན་མ་དེའི་རྟགས་སོ། །ཉེར་འཛིན་ནི་སོ་སོར་སྣང་བ་འབྱུང་བའོ། །གསུངས་ཞེས་བྱ་བ་དེ་གང་དུ་གསུངས་ཤེ་ན། གསུམ་བར་ཏེ། སངས་རྒྱས་འབར་བའི་འོད་འདྲ་བའི། །རབ་མཆོག་སྤྲིན་ནི་སྤྲོ་བར་བྱ། །ཞེས་བྱ་བའོ། །དེ་ཡང་དེ་ཉིད་དུ་བདག་གིས་བཤད་ཟིན་ཏོ། །སྤྲིན་མེད་ནམ་མཁའ་ལྟ་བུ་ཡང་དེ་ཡིན་ལ་རྟག་ཏུ་སྣང་བ་ཡང་ཡིན་ནོ་ཞེས་བསྡུ་བའོ། །བརྟན་གྱུར་ཞེས་བྱ་བ་ནི་རིན་པོ་ཆེ་བརྟན་པ་ཉིད་དོ། །བརྟན་པ་ཉིད་དུ་གྱུར་ནས་སྤྲོ་བར་བྱ་ཞེས་སྦྱོར་རོ། །པདྨ་དང་ལྡན་པའི་རྡོ་རྗེ་ནོར་བུ་ཕབ་ལ་ཞེས་དོན་གྱི་ཤེས་པར་བྱ་སྟེ། སྐལ་བ་ནི་མི་རིགས་པའི་ཕྱིར་དང༌། ཏིང་ངེ་འཛིན་གྱི་ཡན་ལག་ལ་སླར་གདེག་པའི་ཚིག་ཡོད་པའི་ཕྱིར་རོ། །རྡོ་རྗེ་ལམ་ནས་ཞེས་བྱ་བ་ནི་རྡོ་རྗེའི་བུ་གནས་སོ། །ནམ་མཁའི་ཁམས་སོ་ཞེས་བྱ་བ་ནི་པདྨའི་ནང་དང་ལུས་གཉིས་ཀྱི་ནང་དང་བ་སྤུའི་བུ་གནས་
ཐམས་ཅད་ཇི་སྙེད་པ་རུའོ། །དེ་ལས་ཡང་ཅི་ཞིག་སྤྲོ་ཞེ་ན། རྗེས་དྲན་གང་ཞིག་ཅེས་བྱ་བ་སྟེ། དེའི་རྣམ་པར་ཞེས་བྱ་བ་ནི་པདྨའི་ནང་དུ་མཚན་མར་སྤྲོ་བ་བསྒོམས་པས་དེ་བཞིན་དུ་སངས་རྒྱས་དང་ཆོས་དང་རྡོ་རྗེ་དང༌། རིགས་དང་ཁྲོ་བོ་རྗེས་སུ་དྲན་པ་སྟེ་ལྔ་པོ་གོ་རིམས་བཞིན་དུ་འཁོར་ལོ་དཀར་པོ་དང༌། པདྨ་དམར་པོ་དང༌། རྡོ་རྗེ་ནག་པོ་དང༌། རལ་གྲི་དང༌། འཁོར་ལོ་སེར་པོ་རྣམས་ཀུན་དུ་སྤྲོས་པའོ། །དམ་ཚིག་རྗེས་སུ་དྲན་པ་ནི་སླར་ཡང་མཚན་མ་ལྔ་པོ་དེ་དག་ལས་འཁོར་ལོ་སེར་པོ་གཙོ་བོར་བསྒོམས་ལ་སྤྲོ་བའོ། །འདི་དག་ནི་རྗེས་སུ་དྲན་པའི་ཡན་ལག་ཏུ་ཤེས་པར་བྱའོ། །སོ་སོར་སྣང་བ་ནི་གསལ་བར་སྣང་བའོ། །དེ་ལ་ཞེས་བྱ་བ་ནི་རྗེས་སུ་དྲན་པ་དེ་ལ་སྐྱེ་བ་སྟེ། ཇི་ལྟར་འཛིན་པ་མཐར་ཕྱིན་པའི་ཚེ་མཉམ་པར་གཞག་པ་ན་མཚན་མ་གསལ་བར་སྣང་བ་དེ་བཞིན་དུ་རྗེས་སུ་དྲན་པ་ལས་འཕྲོས་པའི་སྤྲིན་ཁྱབ་པ་སོ་སོར་སྣང་བ་ཡང་དེ་བཞིན་ནོ། །འདི་ནི་རྗེས་སུ་དྲན་པའི་ཡན་ལག་ལྔ་སྟེ། ཤེས་རབ་ཅེས་བྱ་བ་ནི་སྙིང་གར་གནས་པའི་སྔགས་སོ། །ཐབས་ནི་དེའི་རིན་པོ་ཆེའོ། །དེ་དག་གི་སྙོམས་པར་འཇུག་པ་ནི་ཡང་དག་པར་འཇུག་སྟེ། རིན་པོ་ཆེ་ནི་སླར་ཡང་བླང་སྟེ་སྔགས་ཀྱི་ཐིག་ལེར་གཞག་གོ་ཞེས་བྱ་བའི་དོན་ཏོ། །དངོས་པོ་ཐམས་ཅད་ཅེས་བྱ་བ་ནི་ནམ་མཁའི་ངོས་སུ་ཁྱབ་པའི་འཁོར་ལོ་ལ་སོགས་པ་བསྡུ་བའོ། །མདོར་བསྡུས་ཞེས་བྱ་བ་ནི་སྐད་ཅིག་ཙམ་གྱིས་སོ། །གོང་བུའི་ཚུལ་གྱིས་ཤེས་པར་བྱ་བ་ནི་སྲབ་མོར་བྱས་ཏེ་ཞེས་བྱ་བའི་དོན་ཏོ། །དབུས་སུ་ཞེས་བྱ་བ་ནི་རིན་པོ་ཆེའི་ནང་དུའོ། །གཟུགས་ནི་ཟླ་བའམ་ཉི་མའི་གཟུགས་སུ་བསྒོམ་པའོ། །དེ་ལྟ་བུའི་སྦྱོར་བ་ནི་ཏིང་ངེ་འཛིན་ཞེས་བྱ་བའི་མིང་ཅན་ནོ། །ཡིད་ཀྱིས་ཞེས་བྱ་བ་ནི་ཡེ་ཤེས་ཀྱིས་ཁྱབ་པའོ། །རྫོགས་པ་ནི་འབད་པ་མེད་པ་སྟེ། སྒྲིབ་པ་རྣམ་པར་ཟད་པར་དགོངས་པའོ། །འདི་ནི་ཏིང་ངེ་འཛིན་གྱི་ཡན་ལག་གོ །དེའི་རྗེས་སུ་བཅད་པ་ཕྱེད་པོ་དྲུག་གིས་ནི་ཡན་ལག་གི་ཕན་ཡོན་གསུངས་སོ། །ཏིང་ངེ་འཛིན་དབང་དུ་གྱུར་ཙམ་གྱིས་ཞེས་བྱ་བ་ནི་ཏིང་ངེ་འཛིན་གྱི་ཡན་ལག་གི་ཏིང་ངེ་འཛིན་ལ་དབང་ཐོབ་པས་སོ། །སྒྲིབ་པ་མེད་པ་དང་ལྡན་པར་འགྱུར་ཞེས་བྱ་བས་ནི་སྙོམས་པར་འཇུག་པའི་སྒྲིབ་པ་རྣམས་ཡོངས་སུ་ཟད་པའོ། །བསྙེན་པ་ཞེས་བྱ་བ་སྟེ་ཐབས་དང་པོའོ། །སྙིང་པོ་དེ་ནི་ཐུགས་ཀ་རུ། །
ཞེས་བྱ་བ་ནི་མངོན་པར་འདོད་པའི་འཁོར་ལོས་སྒྱུར་བའི་ཐུགས་ཀའི་ས་བོན་གྱི་ཡི་གེའོ། །ཟླ་བ་ནི་དེ་ཉིད་ཀྱི་གདན་ནོ། །རྡོ་རྗེ་ནི་དེ་ཉིད་ཀྱི་མཚན་མ་སྟེ། ཟླ་བའི་རྡོ་རྗེ་དེ་གཉི་ག་ཉེ་བར་མཚན་པའོ། །དེའི་སྦྱོར་བ་ནི་དེའི་སྟེ་བར་བཀོད་པ་སྟེ། དེས་སེམས་དེའི་མཚན་ཉིད་ལ་ལྟ་བའོ། །མཚོན་ཆ་མཆོག་ཅེས་བྱ་བ་ནི་སེམས་དེའི་འོད་ཟེར་སྤྲོས་པ་སྟེ། དེ་ཕྱོགས་ཀུན་དུ་ཁྱབ་པའི་སྔགས་ཀྱི་ལྷའི་བཀོད་པ་རྣམས་བཀུག་སྟེ། སེམས་དེ་ལ་བསྟིམས་ནས་སེམས་དེ་སྔགས་ཀྱི་ངོ་བོར་བྱའོ། །མཚོན་པར་བྱ་ཞེས་བྱ་བར་སྦྱར་ཏེ། དེ་ནས་སྔགས་དེ་ཉིད་ཀྱིས་འཁོར་ལོར་གྱུར་པའི་དུས་སུ་བསྐྱེད་པ་ནི་སྔགས་ཀྱི་ལུས་སུ་རབ་སྦྱོར་བའོ། །རྒྱུ་དེས་ན་བྱང་ཆུབ་ཚིགས་བཅད་བརྗོད་པ་སྟེ། བྱང་ཆུབ་ནི་སྐུ་དེ་ཉིད་ཡིན་ལ་དེ་རྣམ་པར་དཔྱད་པ་ཚིགས་སུ་བཅད་པ་ནི་བྱང་ཆུབ་ཚིགས་བཅད་དེ། ལེའུ་གཉིས་པར་གསུངས་པ་བརྗོད་པར་བྱའོ། །དེ་ནས་སྐུ་དང་གསུང་དང་ཐུགས་དང་ཡེ་ཤེས་རྣམས་ཇི་ལྟ་བ་བཞིན་དུ་ཟླ་བ་དང་རྡོ་རྗེ་སྔ་མ་བཞིན་དུ་བསམ་པར་བྱའོ། །དེ་ནི་བྱང་ཆུབ་ཀྱི་སེམས་རགས་པ་སྟེ། འདིར་བྱང་ཆུབ་ནི་ཕྱག་རྒྱ་ཆེན་པོའོ། །སེམས་ནི་ཚིགས་སུ་བཅད་པ་སྟེ། དེ་གཉིས་ཀར་རགས་པའོ། །ཕྲ་མོ་བརྗོད་པར་བྱ་སྟེ། དེ་ལ་མཚན་མ་ཕྲ་མོའི་ནང་གི་ཤིན་ཏུ་ཕྲ་བའི་གནས་ནི་བྱང་ཆུབ་བོ། །དེ་ལ་གནས་པའི་མཆོག་ཏུ་ཕྲ་བའི་ས་བོན་ནི་སེམས་སོ། །རང་གི་དཀྱིལ་འཁོར་ནི་ཡེ་ཤེས་ཀྱི་མཚན་མའོ། །དེར་གནས་པ་ནི་དེའི་ནང་དུ་འབྱུང་བའོ། །དེ་ཅི་ཞིག་ཅེ་ན། རང་གི་སྔགས་སོ། །ཡེ་ཤེས་གཟུགས་ཀྱིས་བསྒོམ་པ་ཞེས་བྱ་བ་ནི་མཚན་མ་ཕྲ་མོས་ཡང་དག་པར་བྱ་སྟེ། དེའི་ཐིག་ལེ་ལ་མཚན་མ་ཕྲ་མོ་བསམ་པར་བྱ་ཞེས་བྱ་བའི་དོན་ཏོ། །ཅི་སྟེ་མཚན་མ་ཕྲ་མོ་གང་གིས་མཚོན་པར་བྱ་ཞེ་ན། བྱང་ཆུབ་སྦྱོར་བ་བསྒོམ་པ་སྟེ། བྱང་ཆུབ་དང་སྦྱོར་བ་དང་བསྒོམ་པ་དག་གིས་སོ། །དེ་ལ་བསྒོམ་པ་ནི་མཚན་མ་ཕྲ་མོ་ལས་སྤྲོས་ཏེ་སྣ་ཚོགས་བ་ལ་ཁྱབ་པའོ། །བྱང་ཆུབ་ནི་དེ་དག་ཉིད་བསྡུས་པ་ལས་བྱུང་བའི་མཚན་མ་ཕྲ་མོ་ནང་དུ་བྱུང་བའི་ཤིན་ཏུ་ཕྲ་བའི་གདན་ནོ། །ཡང་དག་སྦྱོར་བ་ནི་མཆོག་ཏུ་ཕྲ་བའི་རང་གི་སྔགས་ཀྱིས་དེ་ཉིད་མནན་པའོ། །བྱང་ཆུབ་ཀྱི་སེམས་དེ་གཉི་ག་ནི་ཉེ་བར་སྒྲུབ་པ་སྟེ། ཉེ་བའི་སྒྲུབ་པའི་མངོན་པར་རྟོགས་པའོ། །དམ་ཚིག་ནི་སྤྱོད་པ་གསུམ་མོ། །
དེ་ལ་དང་པོ་གསུངས་པ་ཇི་སྲིད་ཅེས་བྱ་བ་ལ་སོགས་པ་ལ་ཇི་སྲིད་ཅེས་བྱ་བ་ནི་ཟླ་དྲུག་ཕྲག་གཅིག་དང་གཉིས་དང་གསུམ་གྱི་བར་དུ་ཤེས་པར་བྱ་བའི་དོན་ཏོ། །རྣམ་པ་གཉིས་མཐོང་བ་ཞེས་བྱ་བ་ནི་གཉིས་སུ་སྣང་བ་སྟེ། གཉིས་སུ་མེད་པ་མ་ཡིན་པ་ན་ཞེས་བྱ་བའི་དོན་ཏོ། །ཐམས་ཅད་དུ་ནི་ཞེས་བྱ་བ་ནི་གུས་པ་སྟེ། ཤིན་ཏུ་གྲིམས་པའི་སྦྱོར་བ་ཞེས་བྱ་བའི་དོན་ཏོ། །རྟག་ཏུ་ཞེས་བྱ་བ་ནི་རྒྱུན་མི་འཆད་པར་རོ། །དམ་ཚིག་གཉིས་པ་གསུངས་པ། གལ་ཏེ་ཞེས་བྱ་བ་ལ་སོགས་པ་ཇི་སྐད་དུ་གསུངས་པ་ཇི་ལྟ་བ་བཞིན་དུ་བཤད་པ་སྟེ། གཉིས་མེད་པ་ཞེས་བྱ་བའི་དོན་ཏོ། །དམ་ཚིག་དང་པོས་ཟླ་བ་དྲུག་པ་གསུམ་གྱིས་མ་གྲུབ་ན་ལན་བཞི་པར་བརྩམ་པར་བྱའོ། །ཇི་སྐད་བཤད་པའི་ཆོ་ག་དང་སྡོམ་པས་ཞེས་བྱ་བ་ནི་དཀའ་བའི་སྤྱོད་པའོ། །འབྱུང་བར་མ་གྱུར་ཞེས་བྱ་བ་ནི་གང་གི་ཚེ་ཞེས་བྱ་བ་དང་སྦྱར་ཏེ། དེ་ཉིད་ཀྱིས་བཤད་པ་ནི། མ་གྲུབ་པ་ཞེས་བྱ་བ་ཡིན་ནོ། །བྱང་ཆུབ་ནི་གཉིས་སུ་མེད་པའི་ཡེ་ཤེས་ཙམ་མོ། །རིགས་ཀྱི་ཞེས་བྱ་བ་ལ་སོགས་པས་ནི་དྲག་ཤུལ་གྱི་སྦྱོར་བ་ཉིད་སྟོན་ཏོ། །དབང་དུ་བྱ་བ་དང་བསྲུང་བ་ཞེས་བྱ་བ་ནི་དེའི་འོག་ཏུ་ཕུར་བུ་བཏོན་ལ་རྗེས་སུ་ཆགས་པར་བྱའོ། །ཉེ་བར་སྒྲུབ་པ་ཞེས་བྱ་བ་སྟེ་ཐབས་གཉིས་པའོ། །ཆོས་འབྱུང་བའི་ནང་དུ་ཆུད་པའི་རིམ་པ་གཉིས་པའི་གཞལ་ཡས་ཁང་གི་གདན་དབུས་མ་མངོན་པར་བྱང་ཆུབ་པ་རྣམ་པ་ལྔས་རྡོ་རྗེ་འཛིན་པ་རང་སྣང་བའི་རིག་མ་ལ་འཁྱུད་པའི་སྙིང་གའི་སྔགས་ཀྱི་འོད་ཟེར་གྱི་སྒོ་ནས་རིགས་ལྔ་སྤྲོས་པ་ནི་འདོད་ཆགས་ཆེན་པོའི་ཚུལ་ཡིན་ཏེ། མཐར་བྱ་བ་ནས་ཐམས་ཅད་ཞུ་བའི་མཐར་ཐུག་པའི་འདོད་ཆགས་ཆེན་པོའི་ཐབས་སུ་བྱ་བས་ན་ཚུལ་ལོ། །རྒྱུ་དེ་ཉིད་ཀྱིས་དེའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བའི་དོན་ཏོ། །ཡེ་ཤེས་འཁོར་ལོ་ཅན་ཞེས་བྱ་བ་ནི་ཡེ་ཤེས་སེམས་དཔའི་ས་བོན་ལས་སྤྲོས་པ་སངས་རྒྱས་ཀྱི་འཁོར་ལོའོ། །བསྡུ་ཞེས་བྱ་བ་ནི་རིགས་ལྔའི་དེ་བཞིན་གཤེགས་པ་མདོར་བསྡུས་ཏེ། རང་གི་ལུས་ཀྱི་ནང་དུ་གཞུག་པར་བྱའོ། །བཙུན་མོ་དགུ་ཞེས་བྱ་བ་ནི་རིག་པའི་ལྷ་མོ་དགུའོ། །སྤྲོས་ནས་ཞེས་བྱ་བ་ནི་སངས་རྒྱས་དེ་རྣམས་སྤྲོས་པའོ། །བསྒྲུབ་པར་བྱ་ཞེས་བྱ་བ་ནི་ལྷན་ཅིག་སྐྱེས་པ་སྟེ་བཅུ་པའོ། །ཕྱག་རྒྱ་བཞི་ཞེས་བྱ་བ་ནི་འབྱུང་བ་བཞིའི་ལྷ་མོ་སྟེ་ས་བོན་གྱི་ཕྱག་རྒྱ་དང༌། མཚན་མའི་ཕྱག་རྒྱ་དང༌། ཕྱག་རྒྱ་
ཆེན་པོ་ལས་སོ། །དཀྱིལ་འཁོར་ནི་གཞལ་ཡས་ཁང་ངོ༌། །དེར་ལྷ་མོ་བཅུའི་པདྨ་བསྡུས་པར་རོ། །བདག་ཉིད་ཅེས་བྱ་བ་ནི་བསྒོམ་པར་འགྱུར་བའི་རང་གི་ལྷའི་ཡེ་ཤེས་ཀྱི་སེམས་དཔའ་མདུན་དུ་བྱོན་པའོ། །དབུས་སུ་ཞེས་བྱ་བ་ནི་དབུས་ཀྱི་གདན་ལ་དགོད་པའོ། །འཁོར་ལ་ཅན་ཀུན་ཞེས་བྱ་བ་ནི་དེ་དང་ལྷན་ཅིག་ཏུ་འོངས་པའི་རིགས་དམ་པ་ལྔའོ། །བསྡུ་བར་བྱ་ཞེས་བྱ་བ་ནི་བདེན་བཞི་ལ་ལྷ་མོ་བཞིའི་གཟུགས་སུའམ་གནས་ལྔ་རྣམས་སུ་སངས་རྒྱས་ལྔའི་གཟུགས་སོ། །རྡོ་རྗེ་ཀུན་གྱི་གནས་བྱས་ལ། །ཞེས་བྱ་བ་ནི་སངས་རྒྱས་ལྔ་པོའི་རིག་པ་དང་བཅས་པ་རང་གི་སྙིང་གར་བསྟིམས་ཏེ་ཞུ་བར་གྱུར་ནས་ཞུ་བ་རྡོ་རྗེའི་ལམ་ནས་འཛག་པས་པདྨའི་ནང་དཀྱིལ་འཁོར་ལ་དབང་བསྐུར་ཏེ། དཀྱིལ་འཁོར་གྱི་ལྷ་ཐམས་ཅད་ཀྱི་དཀྱིལ་འཁོར་བ་སྤུའི་བུ་གནས་ལུས་ཀྱི་ནང་དུ་ཞུ་བ་དེ་ཞུགས་པས་དེ་རྣམས་ཀྱང་ཞུ་བར་གྱུར་བ་དེས་ཕ་དང་མ་ཡང་ཞུ་བར་གྱུར་པའོ། །རིམ་པ་འདིས་ཐམས་ཅད་བྱང་ཆུབ་སེམས་ཀྱི་རང་བཞིན་དུ་བྱས་ནས་དེའི་འོག་བྱང་ཆུབ་བསྒོམ་པར་བྱའོ། །ཇི་ལྟར་ཞེ་ན། བསྐུལ་བའི་གླུ་ཞེས་བྱ་བ་ལ་སོགས་པ་སྨོས་ཏེ། སྙིང་ལས་ཞེས་བྱ་བ་ནི་སྙིང་ལ་སྟེ་ཞུ་བའི་རོ་དེ་ཉིད་ལའོ། །སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ནི་དུས་གསུམ་མོ། །དེ་རྣམས་ཀྱི་རྡོ་རྗེ་ནི་རོ་མཉམ་པར་གྱུར་པ་སྟེ་དེ་ཉིད་ཞུ་བའི་རོའོ། །དེའི་རང་བཞིན་ནི་བསྡུས་པ་ལས་བྱུང་བའོ། །སེམས་ནི་གདན་ལ་གནས་པའི་རང་གི་ལྷའི་ས་བོན་ནོ། །ཡེ་ཤེས་ལྟ་བུ་ཞེས་བྱ་བ་ནི་ཡེ་ཤེས་སེམས་དཔའ་དང་འདྲ་བའོ། །ལུས་བསྒོམ་མོ་ཞེས་བྱ་བ་ནི་རང་གི་ལུས་བསྒོམ་པའོ། །ཇི་ལྟར་བསྒོམ་ཞེ་ན། སེམས་དེས་མཚན་མ་བསྒོམས་ལ་མཚན་མའི་ནང་དུ་ཡང་སེམས་སོ། །དེ་ལས་དཀྱིལ་འཁོར་པ་ཐམས་ཅད་སྤྲོས་ཏེ་བསྡུ་བ་བྱས་ལ། གདན་དང་མཚན་མ་དང་སྔགས་རྣམས་ཡོངས་སུ་གྱུར་པ་ལས་སོ། །འདིའི་རྗེས་ལ་ཚིག་རྐང་པ་དྲུག་དང་ཚིགས་སུ་བཅད་པ་ཕྱེད་དང་བཞི་ནི་རྡོ་རྗེའི་ཚིག་བཅུའི་བཤད་པའོ། །དེ་ཡང་སྒྲུབ་པ་ཆེན་པོའི་གཞུང་གི་འོག་ཏུ་བལྟ་བར་བྱ་སྟེ། དེ་བས་ན་དེ་ཡང་དེ་ཉིད་དུ་བཤད་པར་བྱའོ། །འདི་ཡིས་ནི་ཞེས་བྱ་བ་ནི་འདོད་ཆགས་ཆེན་པོའི་ཚུལ་ལ་སོགས་པའོ། །ཡེ་ཤེས་ཀྱིས་ཞེས་བྱ་བ་ནི་ཡེ་ཤེས་སེམས་དཔའ་སྟེ། རྟེན་དང་བརྟེན་པའི་འཁོར་ལོ་དང་ཕ་དང་མ་དག་ཞུ་བ་དེ་ཉིད་ལས་ལུས་སུ་
བསྐྱེད་པའོ། །སྐུ་གསུང་ཐུགས་ནི་རྡོ་རྗེ་ཡིས། །ཞེས་བྱ་བ་ནི་སེམས་དཔའ་བཞིས་བྱིན་གྱིས་བརླབས་པ་དང་བཅས་པར་རོ། །གཉིས་སུ་མེད་པར་ཕྱེད་པ་ནི་བསྒོམ་པ་གང་ཡིན་པ་སྟེ། དེ་ནི་བསྒྲུབ་པ་ཞེས་བྱ་བའི་དོན་ཏོ། །བསྒྲུབ་པ་ཞེས་བྱ་བ་སྟེ་ཐབས་གསུམ་པའོ། །སྡང་བཤད་པའི་ལེའུ་དང་པོར་བཤད་པའོ། །བདག་དང་འདྲ་ཞེས་བྱ་བ་ནི་རིག་པའི་པདྨོའི་ནང་དུ་སངས་རྒྱས་རྣམས་ཞུ་བ་ཡོངས་སུ་གྱུར་པ་ལས་བྱུང་བའི་ས་བོན་ལས་དམ་པའི་རིགས་རྣམས་སྤྲོས་ནས་བསྡུས་བ་ལས་བསྐྱེད་དེ་བཀོད་པའོ། །དཀྱིལ་འཁོར་ནི་དཀྱིལ་འཁོར་ཆེན་པོའོ། །བསྐྱེད་པ་ནི་དབྱུང་པའོ། །སྒྲུབ་པ་ཆེན་པོ་ཞེས་བྱ་བ་ནི་ཐབས་བཞི་པའོ། །དྲེགས་པ་ཡིས་ཞེས་བྱ་བ་ལ་སོགས་པ་ལ་ཚིག་དྲུག་ལ་དང་པོའི་མཐའ་པ་རྣམས་བཤད་པར་བྱའོ། །གསུམ་པའི་མཐའ་པ་རྣམས་ཀྱིས་ནི་འཆད་པའོ། །དབྱེ་ཞེས་བྱ་བ་རྣམས་ནི་བཤད་པའོ། །གསུམ་པ་ལས་ནི། རིན་ཆེན་ཆེན་པོ་ཁ་དོག་ལྔ། །ཞེས་བྱ་བ་གསུངས་པ་ལ། དེ་ལ་ཝ་ནའི་སྒྲ་ནི་དྲེགས་པས་དབྱེ་བ་སྟེ། དེའི་དོན་དྲེགས་པའོ། །མྱོས་པར་བྱེད་པ་ནི་དྲེགས་པ་སྟེ། བདེ་བ་དང་ཡིད་བདེ་བའོ། །དགའ་བ་བཞི་ནི་ཡིད་བདེ་བ་ཡིན་ལ། དེ་བསྡུས་པ་ནི་བདེ་བ་སྟེ། ཁ་དོག་ལྔ་པོ་གང་ལ་ཡོད་པ་དེ་ནི་ཁ་དོག་སྣ་ལྔ་སྟེ་སེམས་ཀྱི་ཐིག་ལེའོ།། དེ་དང་གཉིས་སུ་མེད་པར་གྱུར་པས་ན། རིན་ཆེན་ཆེན་པོ་ཁ་དོག་ལྔའོ། །ཇི་སྟེ་ལྔ་པ་ཇི་ལྟར་ཁ་དོག་ཡིན་ཞེ་ན། བདེ་བའི་ཐིག་ལེ་ནི་རྗེས་སུ་འགྲོ་བའི་དབྱངས་ཡིན་པ་དང་ཁ་དོག་སྒྱུར་བར་བྱེད་པ་ཡིན་ཏེ། གླུ་རྩི་བཞིན་དུ་མཉམ་པ་ཉིད་ཀྱི་ཡེ་ཤེས་ཡིན་པས་དུས་གསུམ་གྱི་སངས་རྒྱས་རྣམས་ཀྱི་སྐུ་དང་ཐུགས་ལ་བྱུག་པར་བྱེད་པའི་ཕྱིར་རོ། །སྙིང་པོའི་སྒྲ་ནི་དང་པོ་དང་བཅུ་གཅིག་པ་ལ་སོགས་པ་ལས་བྱུང་བའོ། །དེ་ནི་རོས་ཕྱེ་བའོ། །རོ་ནི་སྙིང་པོ་ཡིན་ཏེ། དཔེར་ན་སྐུ་དང་གསུང་དང་ཐུགས་ཀྱི་སྙིང་པོ་ཞེས་བྱ་བ་དང་སྐུ་དང་གསུང་དང་ཐུགས་ཀྱི་སྙིང་ཁུ་ཞེས་བྱ་བ་དེ་བཞིན་དུ་སྔགས་རགས་པ་ནི་སྙིང་ཁུའོ། །མདོར་བསྡུས་པའི་སྔགས་ས་བོན་ལ་སོགས་པ་ནི་སྙིང་པོའོ། །དེ་བཞིན་དུ་སྒྲིབ་པ་མེད་པས་དག་པའི་ནམ་མཁའི་དབྱིངས་ཀྱང་སྙིང་པོ་དང་སྙིང་ཁུ་ཞེས་བྱའོ། །བཅུ་གཅིག་པ་ལས། སངས་རྒྱས་རྒྱུ་དང་འབྲས་བུ་འབྱུང༌། །ཞེས་གསུངས་པ་ལ། འདིར་རྒྱུ་ཞེས་བྱ་བའི་སྒྲ་ནི་མཚན་མ་
ཡང་རྡོ་རྗེ་དབང་བསྐུར་བ་ཡིན་པས་ན་དབང་བསྐུར་གྱིས་ཕྱེ་བའོ། །འབྲས་བུའི་སྒྲ་ནི་བཞིས་ཕྱེ་བར་ཤེས་པར་བྱ་སྟེ། བཞི་ནི་གདན་ཏེ་དེས་ཕྱེ་བ་ཞེས་བྱ་བའི་དོན་ཏོ། །ཆོས་མཆོག་མི་གཡོ་བརྙེས་པ་ཡང༌། །ཞེས་བྱ་བ་ལ་སོགས་པ་ལ། ཆོས་ཀྱི་སྒྲ་གང་ཡིན་པ་དེ་ནི་སྔགས་ཀྱིས་ཕྱེ་བ་སྟེ། སྔགས་ཀྱི་ཡི་གེ་ཞེས་བྱ་བའི་དོན་ཏོ། །བཅུ་གཅིག་པ་ལས་སྔགས་ལ་གནས་པའི་རིན་པོ་ཆེ་རིག་པའི་སྐྱེས་བུར་བརྗོད་པ་དེ་ལ་སྐྱེས་བུ་ནི་སེམས་རིན་པོ་ཆེ་ཡིན་པར་གྲགས་པ་ཉིད་དོ། །རིག་པའི་སྒྲ་ནི་ཆོས་ཀྱི་ཕྱག་རྒྱས་ཕྱེ་བ་སྟེ། དེ་ཡང་ས་བོན་གྱི་ཡི་གེའོ། །འཁོར་ལོས་སྒྱུར་བ་རྣམས་ཀྱི་དབུ་རྒྱན་ནི་བསྙེན་པ་ལ་ཡང་ཡོད་པས་དེའི་ཞོར་ལ་སངས་རྒྱས་ཀྱི་དབུ་རྒྱན་དང་རིག་པའི་བརྟུལ་ཞུགས་བཅོ་ལྔ་པ་ལས་རྒྱས་པར་གསུངས་སོ། །དེ་ལ་ཚིག་རྣམ་པ་བཞི་འདིར་བཤད་པར་བྱ་སྟེ། རྒྱལ་པོ་ཞེས་བྱ་བ་ནི་རྒྱལ་པོ་རྣམས་སོ། །རྡོ་རྗེ་སྤྱན་གྱི་གཟུགས་ལ་སོགས། །གཙུག་ཏོར་མཉེས་པར་བྱེད་པར་བརྗོད། །ཅེས་བྱ་བ་དེར་རོ། །རྣམ་པར་གྲགས་ཞེས་བྱ་བ་ནི་བསྒྲགས་ཤིང་བཤད་པའོ། །ལོངས་སྤྱོད་བཞི་ཞེས་བྱ་བ་ནི་དགའ་མ་བཞི་སྟེ། རིག་པའི་རྒྱལ་མོ་རབ་སྦྱོར་བ། །ཞེས་པ་དེར་རོ། །དེ་ཉིད་ཀྱི་ཕྱིར། ཐམས་ཅད་ལས་བྱེད་སྔགས་རྣམས་ལ། །ཞེས་བྱ་བའི་ཚིག་འབྱུང་བ་ནི་མི་རིགས་སོ། །སྔགས་རྣམས་ཐམས་ཅད་ཉིད་ལས་ནི། །རྡོ་རྗེ་སེམས་དཔའ་རྣམ་པར་བསྒོམ། །ཞེས་བྱ་བ་དེར་ཅི་སངས་རྒྱས་ཀྱི་བྱང་ཆུབ་རྡོ་རྗེ་སེམས་དཔའ་འམ་ཡང་ན་མི་བསྐྱོད་པ་གང་ཞིག་ཡིན་ཞེས་ཐེ་ཚོམ་དུ་གྱུར་པ་དེ་ཉིད་ཀྱི་ཕྱིར་བསམ་གཏན་རྡོ་རྗེ་ཞེས་བྱ་བ་སྟེ། ཐམས་ཅད་ལ་ནི་མི་བསྐྱོད་པས་དབང་བསྐུར་རོ་ཞེས་བྱ་བའི་དོན་ཏོ། །དེ་ནི། བསམ་གཏན་ལྔ་པའི་བདག་ཉིད་དོ། །ཞེས་བྱ་བར་དགོངས་སོ། །རྡོ་རྗེ་ཚིག་བཅུའི་བཤད་པའོ། །ཐབས་བཞི་རྣམས་ལས་གང་དུ་གྱུར་པ་ཅུང་ཟད་ཅིག་བཤད་པར་འདོད་ནས་བསྙེན་དུས་ཞེས་བྱ་བ་ལ་སོགས་པ་སྨོས་ཏེ། དམིགས་པ་ཞེས་བྱ་བ་ཡིད་ལ་བྱའོ། །སྦྱོར་བ་ཉིད་ཅེས་བྱ་བ་ནི་རྣལ་འབྱོར་གྱི་རང་གི་ལྷའི་གཟུགས་དང་ལྷན་ཅིག་གཉིས་སུ་མེད་པར་བྱ་བ་སྟེ། ཁྲོ་བོ་རྗེས་སུ་དྲན་པ་བསྒོམ་མོ་ཞེས་བྱ་བ་ལྷག་མ་ཡིན་ནོ། །བདུད་རྩི་འཁྱིལ་པའི་གཟུགས་ཞེས་བྱ་བ་ནི་དམིགས་པའི་སྦྱོར་བ་ཉིད་ཅེས་བྱ་བ་དང་སྦྱོར་ཏེ། ཕུར་བུས་གདབ་པོ་ཞེས་བྱ་བ་ནི་ལྷག་མ་ཡིན་
ནོ། །ལྷའི་སྦྱོར་བ་ཞེས་བྱ་བ་ནི་དམ་ཚིག་གི་ལྷ་དང་ཡེ་ཤེས་ཀྱི་ལྷ་གཉིས་སུ་མེད་པར་བྱའོ་ཞེས་བྱ་བའི་དོན་ཏོ། །སངས་རྒྱས་བདག་པོའི་གཙོ་བོ་ཞེས་བྱ་བ་ནི་དམ་ཚིག་གི་དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་གཉིས་སུ་མེད་པར་བྱའོ་ཞེས་བྱ་བའི་དོན་ཏོ། །སྔགས་པས་ཆོ་ག་ཤེས་པས་ཞེས་བྱ་བ་དང་འབྲེལ་ཏོ། །དངོས་གྲུབ་མཆོག་ནི་ཡང་དག་པའི་དངོས་གྲུབ་པོ། །ཇི་ལྟ་བུ་ཞིག་ཅེ་ན། མཆོག་ཏུ་ཞི་བ་ཞེས་བྱ་བ་སྨོས་ཏེ། བླ་ན་མེད་པའི་བྱང་ཆུབ་ཅེས་བྱ་བའི་དོན་ཏེ། །སངས་རྒྱས་རྣམས་ཀྱིས་ཀྱང་ཞེས་བྱ་བ་ནི་ཤིན་ཏུ་ལ་བཟླ་བའོ། །ཐབས་བཞི་པོ་རྣམས་ལས་གཙོ་བོའི་དོན་གསུངས་པ། བསྒྲུབ་པར་བྱ་ཞེས་བྱ་བ་ལ་སོགས་པ་ལ། བསྒྲུབ་བྱ་ནི་བྱང་ཆུབ་ཀྱི་རང་བཞིན་ནོ། །སྒྲུབ་པ་ནི་བྱང་ཆུབ་ཀྱི་སེམས་སོ། །དེའི་ཡང་དག་པར་སྦྱོར་བ་ནི་ཡང་དག་པའི་རྣལ་འབྱོར་ཏེ། ཡན་ལག་བཞི་ཡིས་སྒྲུབ་པའི་རིན་པོ་ཆེ་ཕྲ་མོའི་ནང་དུ་ཡན་ལག་གཉིས་ཀྱིས་སྒྲུབ་པའི་གདན་ཕྲ་མོ་བསྒོམ་པ་ཉིད་དོ། །རྡོ་རྗེ་ནི་མཆོག་ཏུ་ཕྲ་བའི་ས་བོན་ནོ། །པདྨའི་མཚན་མ་ཕྲ་མོའི་ནང་གི་ཤིན་ཏུ་ཕྲ་བའི་གདན་ནོ། །དེ་དག་གི་མཉམ་སྦྱོར་ནི་ཡང་དག་པར་སྦྱོར་བ་སྟེ། ཆོ་ག་བཞིན་སྒྲུབ་པའི་པདྨར་རྡོ་རྗེ་བསྒོམས་པ་ཉིད་དོ། །བསྐྱོད་པ་ཞེས་བྱ་བ་ནི་དམ་ཚིག་ཆེན་པོའི་དཀྱིལ་འཁོར་གྱི་བདག་པོའོ། །ཐབས་ཞུ་བ་ལས་ཆོ་ག་བཞིན་དུ་དཀྱིལ་འཁོར་ཆེན་པོའི་དབང་ཕྱུག་ཏུ་བྱའོ། །ཧཱུཾ་ཞེས་བྱ་བ་ནི་དེའི་ས་བོན་ཉེ་བར་མཚོན་པའོ། །ཕཊ་ཅེས་བྱ་བ་ནི་ཕྱི་རོལ་གྱི་ས་བོན་དགག་པའི་ཕྱིར་རོ། །ངོ་བོ་ཉིད་ནི་སངས་རྒྱས་རྣམས་སོ། །རང་གི་བདེ་བ་ནི་རིག་མ་རྣམས་སོ། །ཞི་བ་ནི་སྒོ་སྲུང་རྣམས་སོ། །གཞན་ཡང་བསྒྲུབ་བྱ་སྒྲུབ་པ་ནི་ཤེས་རབ་དང་ཐབས་སོ། །རྡོ་རྗེ་པདྨ་ཞེས་བྱ་བ་ནི་དབང་པོ་གཉིས་སོ། །བསྐྱོད་ཅེས་བྱ་བ་ནི་དལ་བུ་དལ་བུས་སོ། །ཧཱུཾ་ཞེས་བྱ་བ་ནི་རྡོ་རྗེ་པདྨ་དག་གིའོ། །ཀ་ཞེས་བྱ་བ་ནི་སྐུའི་ས་བོན་ཏེ་རབ་སྔགས་སོ། །ར་ལ་སོགས་པ་ཞེས་བྱ་བ་ནི་འདོད་ཆགས་ཀྱི་ས་བོན་ཏེ་ཨའོ། །དེ་དག་ནི་ནོར་བུ་གཉིས་ཀྱིའོ། །ཕཊ་ནི་སྔ་མ་བཞིན་ནོ། །ཡེ་ཤེས་སྐྱེས་པ་ལས་དམིགས་པའི་ཏིང་ངེ་འཛིན་ནི་ངོ་བོ་ཉིད་དོ། །དེའི་བདེ་བའི་རང་བཞིན་ནི་རང་གི་བདེ་བའོ། །དེ་ཉིད་ལས་གཞན་ལ་མི་དམིགས་པ་ནི་ཞི་བ་སྟེ། ཐབས་རྣམ་པ་བཞིའོ། །ཐབས་ལས་བྱུང་བའི་དྲི་བའི་ཚིགས་སུ་བཅད་པའི་ལན་གསུངས་
པ་དཔལ་ལྡན་ཞེས་བྱ་བ་ལ་སོགས་པ་ལ། དཔལ་ནི་རིག་མ་རྣམས་སོ། །སངས་རྒྱས་ཀུན་གྱི་བདག་ནི་དེ་བཞིན་གཤེགས་པ་ལྔའོ། །རྡོ་རྗེ་འཛིན་ཆེན་ནི་གཤིན་རྗེ་གཤེད་ལ་སོགས་པ་རྣམས་སོ། །གནས་ནི་དཀྱིལ་འཁོར་གྱི་རང་བཞིན་ཅན་ཡིན་པས་སོ། །དེ་ལྟར་གསང་བ་འདུས་པའི་བདག་ཉིད་ཅན་གྱི་བཅོམ་ལྡན་འདས་འདིས་ནི་སངས་རྒྱས་ཀུན་གྱི་ཐབས་བྱུང་ངོ༌། །དེ་ཉིད་ཆོས་རྣམས་ཀྱི་ཆོས་ཉིད་དེ་བཅོམ་ལྡན་འདས་དེ་ཉིད་ཆོས་དཀར་པོ་ཐམས་ཅད་ཤིན་ཏུ་རྣམ་པར་དག་པའི་དེ་བཞིན་ཉིད་སངས་རྒྱས་ཐམས་ཅད་ཀྱི་ཐུན་མོང་གི་ཆོས་ཀྱི་སྐུ་གང་ཡིན་པ་སྟེ། གང་གི་དབང་གིས་དེ་རྣམས་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུས་བདག་དང་གཞན་གྱི་དོན་ཕུན་སུམ་ཚོགས་པའི་མཐར་ཐུག་པ་སྟེ་ཐབས་ལས་བྱུང་བའོ། །ཐབས་བཞི་པོ་འདི་དག་གསུངས་པ་གང་ཡིན་པ་དེ་རྣམས་ཀྱི་ནང་ནས་ཅི་གཅིག་གིས་ཀྱང་སངས་རྒྱས་ཉིད་རྟོགས་པར་འགྱུར་རམ། འོན་ཏེ་མ་ལུས་པས་ཡིན་ཞེས་འདི་དཔྱད་པར་བྱའོ། །མ་ལུས་པས་ཞེས་བྱ་བ་ནི་གྲུབ་པའི་མཐའ་ཡིན་ནོ། །དེ་ཇི་ལྟར་ཞེ་ན། གསུམ་པོས་རིམ་གྱིས་དེ་དང་དེའི་ཁྱད་པར་གྲུབ་པ་ཡོད་ན་བཞི་པར་འབྲས་བུ་མ་ལུས་པ་འགྲུབ་པའི་ཕྱིར་རོ། །དེ་ལྟར་ན་བསྙེན་པ་ནི་ཆོས་ཐམས་ཅད་རྣམ་པར་རིག་པ་ཙམ་ཉིད་དང་ཉེ་བར་སྒྲུབ་པ་ལ་ནི་ནམ་མཁའ་དང་མཉམ་པ་ཉིད་དང་སྒྲུབ་པ་ལ་ནི་དག་པའི་ནམ་མཁའི་དབྱིངས་ཉིད་དང་སྒྲུབ་པ་ཆེན་པོ་ལ་ནི་ཤིན་ཏུ་རྣམ་པར་དག་པའི་ནམ་མཁའི་དབྱིངས་ཉིད་དུ་མངོན་སུམ་དུ་གྱུར་པ་བྱང་ཆུབ་ཡིན་ནོ། །གཞན་ཡང་བསྙེན་པ་ལ་ནི་སངས་རྒྱས་ཀྱི་ཆོས་རྣམས་ཀྱི་ཁམས་རྒྱས་པ་དང༌། ཉེ་བར་སྒྲུབ་པ་ལ་ནི་སྐྱེ་བར་འགྱུར་བ་དང༌། སྒྲུབ་པ་ལ་ནི་དག་པ་དང་སྒྲུབ་པ་ཆེན་པོ་ལ་ཤིན་ཏུ་རྣམ་པར་དག་པ་ཉིད་དང་ཡང་དག་པར་སྟོན་པ་ལ་དབང་དུ་གྱུར་པ་ཉིད་དོ། །གཞན་ཡང་རེ་ཞིག་བསྙེན་པས་ནི་མོས་པས་སྤྱོད་པའི་ས་ཉིད་དང༌། ཉེ་བར་སྒྲུབ་པ་ཐོབ་པ་རབ་ཏུ་དགའ་བ་ལ་སོགས་པ་ལྷག་པའི་བསམ་པ་རྣམ་པར་དག་པའི་ས་བདུན་དང༌། སྒྲུབ་པས་ཐོབ་པ་མི་གཡོ་བ་ལ་སོགས་པ་རྣམ་པར་སྨིན་པའི་ས་གསུམ་དང༌། སྒྲུབ་པ་ཆེན་པོས་ཐོབ་པར་བྱ་བ་ནི་སངས་རྒྱས་ཀྱིས་ཉིད་ཡིན་ནོ་ཞེས་བཤད་པར་བྱའོ། །གཞན་ཡང་དངོས་གྲུབ་མཆོག་གི་ཕྱིར་ཞིང་དུ་གྱུར་བ་ནི་བསྙེན་པའི་དོན་ཡིན་ལ། དེ་མ་ལུས་པ་མ་ཡིན་པར་སྒྲུབ་པ་ནི་ཉེ་བར་སྒྲུབ་པའི་དོན་
ཡིན་ཞིང་མ་ལུས་པར་སྒྲུབ་པ་ནི་སྒྲུབ་པའི་དོན་ཡིན་ལ། ཤིན་ཏུ་སྒྲུབ་པ་ནི་སྒྲུབ་པ་ཆེན་པོའི་དོན་ཡིན་ཏེ། ཤིན་ཏུ་རྣམ་པར་དག་པ་དང་ལོངས་སྤྱོད་ལ་དབང་པ་ལ་ལོངས་སྤྱོད་པ་དེ་སྒྲུབ་པའི་ཕྱིར་རོ། །བསྙེན་པ་ནི། འདིས་ནི་དེ་བཞིན་གཤེགས་པའི་སྐུ། །རྡོ་རྗེ་འཛིན་པའི་ཐུགས་དང་ནི། །ཆོས་འཛིན་མཆོག་གི་གསུང་དག་ཀྱང༌། །ཚེ་འདི་ཉིད་ལ་ཐོབ་པར་འགྱུར། །ཞེས་གསུངས་པ་ཡིན་ནོ། །ཉེ་བར་སྒྲུབ་པ་ནི། རྡོ་རྗེ་གསུམ་མཁའ་འདྲ་བ་ཡིས། །བྱང་ཆུབ་འདི་ཡིས་ཐོབ་པར་འགྱུར། །བྱང་ཆུབ་སེམས་དཔའ་རྒྱལ་རྒྱ་མཚོ། །རྡོ་རྗེ་སེམས་དཔའི་མཆོག་དེས་ཐོབ། །ཅེས་གསུངས་པ་ཡིན་ཏེ། འདིར་རྒྱལ་བ་ནི་སངས་རྒྱས་ཀྱི་ཆོས་རྣམས་སོ། །བསྒྲུབས་པའི་འབྲས་བུ་བཅོ་ལྔ་པ་ལས། བསམ་གཏན་སྔགས་ཀྱི་སྦྱོར་བ་ཡིས། །སངས་རྒྱས་ཀྱི་ནི་འོད་འདྲར་འགྱུར། །དེ་ནི་དེ་མ་ཐག་ཏུ་ཡང༌། །རྡོ་རྗེ་སེམས་དཔའ་འོད་འདྲར་འགྱུར། །རྒྱལ་པོ་ཆོས་རྣམས་ཐམས་ཅད་མཚུངས། །འདོད་དང་ཐར་པ་རབ་སྒྲུབ་པ། །དེ་ནི་རྡོ་རྗེ་ཆོས་ཀྱི་བདག །ས་བཅུ་ལ་ནི་གནས་པར་འགྱུར། །ཞེས་གསུངས་པ་ཡིན་ཏེ། འདིར་ས་བཅུའི་དབང་ཕྱུག་ཉིད་ཡིན་པའི་ཕྱིར་སངས་རྒྱས་དང་མཉམ་པར་འགྱུར་བ་ཡིན་ཏེ། སངས་རྒྱས་ཉིད་ནི་མ་ཡིན་པ་དེ་བས་ན། རྣམ་པར་སྣང་མཛད་ལ་སོགས་པ་འོད་དང་འདྲ་བ་ཞེས་གསུངས་པ་ཡིན་ནོ། །སངས་རྒྱས་ཀྱི་ཆོས་ཐམས་ཅད་ཉིད་དང་མཉམ་པ་ཡིན་གྱི་ཤིན་ཏུ་རྣམ་པར་དག་པ་དག་ནི་མ་ཡིན་པ་དེས་ན་ཆོས་རྣམས་ཀུན་དང་མཚུངས་ཞེས་པ་ཡིན་ནོ། །རྒྱལ་པོ་ནི་རྣམ་པར་མི་རྟོག་པ་ལ་དབང་དུ་གྱུར་པ་དང་ཞིང་ལ་དབང་དུ་གྱུར་པ་དང་ཡེ་ཤེས་ལ་དབང་དུ་གྱུར་པ་དང་ལས་ལ་དབང་དུ་གྱུར་བས་སོ། །སློབ་མའི་ས་ནི་ཐམས་ཅད་འདོད་པ་དང་བཅས་པ་ཉིད་ཀྱི་ཕྱིར་རོ། །དེའི་སྒྲིབ་པ་ལས་རྣམ་པར་གྲོལ་བ་ནི་འདོད་པའི་ཐར་བ་སྟེ། དེར་རབ་སྒྲུབ་པ་ནི་དེ་ཐོབ་པར་བྱེད་པའི་ཕྱིར་རོ། །སྒྲུབ་པ་ཆེན་པོའི་འབྲས་བུ་ནི་བཅུ་དྲུག་པ་ལས། དངོས་གྲུབ་ཐམས་ཅད་གཙུག་ཏོར་ནི། །ཡིད་བཞིན་ནོར་བུའི་བདག་པོར་འགྱུར། །སངས་རྒྱས་བྱང་ཆུབ་བྱེད་པའི་མཆོག །སངས་རྒྱས་རྡོ་རྗེར་རབ་བསྒོམས་པའོ། །ཞེས་གསུངས་པ་ཡིན་ཏེ། འདིར་དངོས་གྲུབ་ཐམས་ཅད་གཙུག་ཏོར་ནི་རྩེ་མོ་སྟེ། ཡང་དག་པར་རྫོགས་པའི་སངས་རྒྱས་ཞེས་བྱ་
བའི་དོན་ཏོ། །དེ་ནི་ཡིད་བཞིན་གྱི་ནོར་བུའི་རྒྱལ་པོ་དེ་དང་ཆོས་མཐུན་པའི་ཕྱིར་ལྷུན་གྱིས་གྲུབ་པ་རྣམ་པ་ཐམས་ཅད་དུ་སངས་རྒྱས་ཀྱི་སྐུ་རྒྱུན་མི་འཆད་པར་འཇུག་པའོ། །ཡང་དག་པར་རྫོགས་པའི་བྱང་ཆུབ་དེ་ནི་མཆོག་སྟེ་དམ་པའི་སྒྲུབ་པའོ། །སངས་རྒྱས་རྡོ་རྗེ་རབ་བསྒོམས་པ་སྟེ། སངས་རྒྱས་ནི་དཀྱིལ་འཁོར་གྱི་བདག་པོ་ཡིན་ལ། དེ་ལས་རྡོ་རྗེ་རབ་ཏུ་བསྒོམ་པ་ནི་གསང་བ་གསུམ་པོ་དཀྱིལ་འཁོར་བའི་རྣམ་རྣམ་པར་རབ་ཏུ་ཕྱེ་ནས་བསྒོམ་པ་སྟེ། སྒྲུབ་པ་ཆེན་པོ་ཞེས་བྱ་བའི་དོན་ཏོ། །དེ་བས་ན་ཚོགས་པ་བཞི་པོ་མ་ལུས་པ་འདི་དག་གི་རིམ་པ་འདི་ཉིད་ཀྱིས་སངས་རྒྱས་ཉིད་རྟོགས་པར་འགྱུར་གྱི་མ་ལུས་པས་མ་ཡིན་ཞིང༌། རིམ་པ་གཞན་གྱིས་ཀྱང་མ་ཡིན་ནོ་ཞེས་བྱ་བ་ནི་ངེས་པ་ཡིན་ནོ། །གལ་ཏེ་འདི་ལྟར་རེ་ཞིག་སངས་རྒྱས་ཉིད་སྒྲུབ་པ་ཆེན་པོ་ཉིད་ཀྱིས་འཐོབ་པར་འགྱུར་ན་དེ་ཉིད་ཀྱིས་ཆོག་མོང༌། གཞན་གསུམ་པོས་ཅི་ཞིག་བྱ་ཞེ་ན། བྱང་ཆུབ་སེམས་དཔའ་རྣམས་སངས་རྒྱས་ས་ལ་འཇུག་པའི་ཆེད་ཀྱི་སྦྱོར་བ་གང་ཡིན་པ་དེ་ཉིད་ཆོག་ན་མོས་པས་སྤྱོད་པ་ལ་སོགས་པས་ས་བཅུར་གཏོགས་པའི་སྦྱོར་བ་གཞན་གྱིས་ཅི་ཞིག་བྱ་ཞེས་ཅིའི་ཕྱིར་མི་འདོད། ཡང་ན་ས་སྔ་མར་གཏོགས་པའི་སྦྱོར་བ་མེད་པར་སྦྱོར་བ་ཕྱི་མ་ཕྱི་མར་བྱེད་པར་ནུས་པ་མ་ཡིན་ཏེ་རིམ་པ་ནི་ངེས་པའི་ཕྱིར་རོ། །བྱེད་པ་ཉིད་འཇིག་པ་ཡིན་པ་དེ་ཉིད་ནི་མ་ཡིན་ནོ། །འོ་ན་ཡིན་ཞེ་ན། དེའི་གཟུགས་བརྙན་ཏམ་ཡིན་ཏེ། དེའི་གཟུགས་བརྙན་ནི་དེའི་བྱ་བ་བྱེད་པ་མ་ཡིན་ནོ། །དེ་བས་ན་དེ་རྣམས་འབྲས་བུ་མེད་པ་མ་ཡིན་ནོ་སྙམ་ན་དེ་བཞིན་དུ་བསྙེན་པ་ལ་སོགས་པ་ལ་ཡང་སྔ་མ་སྔ་མ་མེད་པར་ཉེ་བར་སྒྲུབ་པ་ལ་སོགས་པ་བྱེད་པ་གང་ཡིན་པ་དེ་ནི་གཟུགས་བརྙན་ཙམ་ཡིན་གྱི་དེ་ཉིད་ནི་མ་ཡིན་པ་དེ་ལྟར་ན་དེ་ལས་འབྲས་བུ་འགྲུབ་པ་མ་ཡིན་ནོ། །དེ་བས་ན་གཅིག་ཀྱང་དོན་མེད་པ་མ་ཡིན་ནོ། །འོ་ན་ཇི་ལྟར་ན་སྒྲུབ་པ་ཆེན་པོ་ལས་སངས་རྒྱས་ཉིད་དུ་འགྱུར་རོ། །ཞེས་བརྗོད་ཅེ་ན། གསུམ་པོ་དག་ལས་རིམ་གྱིས་རྟོག་པའི་སལ་གནས་པ་དེས་མཐར་ཐུག་པ་ཐོབ་པར་བྱེད་པའི་ཕྱིར། །ཡིད་ཀྱི་ཆོས་གང་དག་གོམས་པས་བོགས་ཕྱིན་བར་གྱུར་པ་དེ་དག་ཤིན་ཏུ་གོམས་པར་བྱས་ན་ན་རབ་ཀྱི་མཐར་ཐུག་པ་ཐོབ་པར་འགྱུར་པར་སྲིད་དེ། བྲམ་ཟེ་གཙང་མར་སྤྱོད་པ་རྣམས་
ཐོད་པ་ཅན་ལ་དགའ་བ་བཞིན་ནོ། །བདག་ཅག་ལྟ་བུའི་སྙིང་རྗེ་དང་ཤེས་རབ་ལ་སོགས་པ་ཡང་དེ་ལྟ་བུར་གྱུར་པའོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །དེ་བས་ན་འདི་ནི་རང་རྒྱུད་རིགས་མཐུན་པ་རྣམས་ལ་སྙིང་རྗེ་ལ་སོགས་པ་རབ་ཀྱི་མཐར་ཐུག་པར་སྲིད་པར་རྗེས་སུ་དཔོག་པ་ཡིན་ཏེ། དེ་དག་ཉིད་ཀྱིས་དེ་རྣམས་སངས་རྒྱས་ཀྱི་ཆོས་རྣམས་དང་བྱང་ཆུབ་ཏུ་འགྱུར་བར་སྲིད་པ་ཡང་རྗེས་སུ་དཔག་གོ །འགྱུར་བ་དེ་ཡང་ཉན་ཐོས་དང་ཕ་རོལ་ཏུ་ཕྱིན་པའི་ཚུལ་གྱིས་ནི་སྡུག་བསྔལ་དང་དཀའ་ཐུབ་ཀྱི་རྣམ་པ་ཐམས་ཅད་ཀྱིས་ཕ་རོལ་ཏུ་ཕྱིན་པ་རྣམས་གོམས་པར་བྱས་པས་བསྐལ་པ་གྲངས་མེད་པ་གསུམ་དུ་བསྒྲུབ་པས་སོ། །རྣལ་འབྱོར་གྱི་རྒྱུད་ཀྱིས་ནི་སྔགས་དང་ཕྱག་རྒྱ་ལ་སོགས་པའི་ཐབས་དཔག་ཏུ་མེད་པས་སྔགས་ཀྱི་ལྷ་རྣམས་ཀྱིས་བྱིན་གྱིས་བརླབས། བདེ་བ་དང་བདེ་བར་སྤྱོད་པས་རིང་པོ་མི་ཐོགས་པར་ཚེ་འདི་ཉིད་ལ་རབ་ཏུ་དགའ་བའི་ས་ཐོབ་ནས། ཚེས་བཅུ་དྲུག་གིས་སངས་རྒྱས་ཐོབ་པར་འགྱུར་བ་ཉིད་དོ། །གསང་བ་འདུས་པ་ནི་རྒྱུད་རྣམས་ཀྱི་བླ་མའི་བླ་མ་སྟེ་ཚེ་འདི་ཉིད་ལ་བྱང་ཆུབ་ཐོབ་པར་འགྱུར་བའི་ཐབས་ཀྱི་ཕུལ་དུ་ཕྱིན་པ་ཡིན་པར་གསུངས་ཏེ། འདི་ལྟར་འདིར་སྔགས་ཀྱི་ལྷ་ཐམས་ཅད་ཀྱིས་བྱིན་གྱིས་རློབ་པར་འགྱུར་བའི་རྒྱུར་ཡན་ལག་དྲུག་གི་ཏིང་ངེ་འཛིན་དབང་དུ་བྱེད་དོ། །ཉེ་བར་སྒྲུབ་པས་ནི་རྣམ་པར་མི་རྟོག་པའི་དབྱིངས་སུ་འཇུག་གོ །སྒྲུབ་པས་ནི་དེ་ཉིད་རྣམ་པར་དག་པའི་མཐར་ཐུག་པའི་བྱང་ཆུབ་སེམས་དཔར་རོ། །སྒྲུབ་པ་ཆེན་པོས་ནི་དེ་བཞིན་གཤེགས་པར་རོ། །དེ་སྐད་དུ་ཡང༌། དེ་ལྟར་བྱེ་བྲག་རྟོགས་བྱས་ནས། །དངོས་གྲུབ་མཆོག་ནི་བསྒྲུབ་པར་བྱ། །གཞན་དུ་བསྐལ་པ་སྟོང་དུ་ནི། །སངས་རྒྱས་སྐྱོབ་པ་རྣམས་ཀྱིས་ཀྱང༌། །དངོས་གྲུབ་མཆོག་ནི་ཞི་བ་དག །འགྲུབ་པར་འབྱུང་བར་མི་འགྱུར་རོ། །ཞེས་གསུངས་སོ། །དེ་བས་ན་བསྙེན་པ་ལ་སོགས་པའི་ཐབས་རྣམས་མ་ལུས་པའི་རིམ་གྱིས་བྱང་ཆུབ་ཐོབ་པར་འགྱུར་རོ་ཞེས་བྱ་བ་འདི་ནི་གནས་པ་ཡིན་ནོ། །རྣལ་འབྱོར་རྡོ་རྗེ་ཅན་ཀུན་གྱི། །བཀའ་ནི་འདི་ལྟར་བསྒོ་བར་གྱིས། །ཞེས་ཞུས་པའི་རིམ་པའི་དོན་དང་ཁ་བསྐང་བའི་དོན་དེའི་ལན་ནི་ལས་དན་ཞེས་བྱ་བ་ལ་སོགས་པ་གསུངས་པ་ལ་དྲག་ཤུལ་གྱི་ལས་དང་རྗེས་སུ་མཐུན་པ་གང་གིས་སྦྱོར་བའི་ལེའུ་བཅུ་གསུམ་པ་ལས་ཀྱང་གསུངས་པ་
སྟེ། ཁྲོ་བོ་དང་བཅས་པའི་སྐུ་རྡོ་རྗེ་ལ་སོགས་པའི་རྣལ་འབྱོར་རོ། །རྣལ་འབྱོར་པ་ཡིས་དེ་དམིགས་ཏེ། །དཀྱིལ་འཁོར་དེ་དང་དེ་ཞེས་བྱ་བ་ནི་བཅུ་གསུམ་པ་ལས་གང་དང་གང་གསུངས་པའོ། །དམ་ཚིག་ཅེས་བྱ་བ་ནི་དམ་ཚིག་གོ །སྐུ་གསུང་ཐུགས་ཀྱི་སྦྱོར་བ་ཅན། །ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་པའི་རང་བཞིན་ཅན་གྱིས་སོ། །དམ་ཚིག་ཅེས་བྱ་བ་ནི་བདག་དང་གནས་དང་ལྷ་ལ་སོགས་པའོ། །དང་པོར་ཞེས་བྱ་བ་ནི་ཐོག་མ་ཉིད་དུའོ། །སྐུ་ཞེས་བྱ་བ་ལ་སོགས་པ་ལ་སྐུ་ལ་སོགས་པའི་རྡོ་རྗེའམ་གཙུག་ཏོར་གྱི་དམ་ཚིག་སྟེ་རྣལ་འབྱོར་རོ། །ཆོ་ག་ཇི་སྐད་གསུངས་པའི་རྣམ་པ་དེས་གང་ལ་བྱུང་ཞིང་སྐྱེ་བ་མངའ་སྟེ། ཁྲོ་བོ་བཅུས་བྱིན་གྱིས་བརླབས་པའི་འཁོར་ལོ་རྩིབས་བཅུ་པའི་བདག་པོར་བྱུང་བའི་དོན་ཏོ། །ལས་ནི་དེ་དེའི་ཞེས་བྱ་བ་གསད་པ་དང་ཡན་ལག་བཤིག་པ་ལ་སོགས་པའོ། །རང་གི་འཁོར་ལོ་ནི་རང་གི་འཁོར་ལོའོ། །སྒྲུབ་པ་ནི་བསྒྲུབ་བྱ་ཉིད་དོ། །དཀྱིལ་འཁོར་ཞེས་བྱ་བ་ནི་ཕུང་པོ་ལ་སོགས་པ་ལ་ལྷ་དེ་རྣམས་ཀྱིས་བྱིན་གྱིས་བརླབས་པའོ། །དེ་ཡི་ལུས་གནས་འཁོར་ལོ་ཅན། །ཞེས་བྱ་བ་ནི་འཁོར་ལོ་ཅན་དེ་རྣམས་ལའོ། །བྱུང་བར་གྱུར་པ་ཞེས་བྱ་བ་ནི་དེའི་ལུས་ལས་སོ། །དངོས་པོ་ཀུན་གྱིས་ནི་བདག་ཉིད་ཐམས་ཅད་ཀྱིས་སོ། །གཟུགས་བརྙན་ནི་བཅོས་མའི་ལུས་སོ། །གསད་ཕྱིར་ཞེས་བྱ་བ་ནི་གསད་པའི་ཕྱིར་རོ། །བསྒྲུབ་བྱ་ཞེས་བྱ་བ་ནི་བསྒྲུབ་པར་བྱའོ། །རྡོ་རྗེ་ཅན་ཞེས་བྱ་བ་ནི་སྒྲུབ་པ་པོ་ཉིད་རྡོ་རྗེ་ཅན་ཡིན་ནོ་ཞེས་བྱ་བའི་དོན་ཏོ། །ཁྲོ་བོའི་རྒྱལ་པོ་དེས་ཞེས་བྱ་བ་ནི་ཁྲོ་བོའི་རྒྱལ་པོ་དེ་རྣམས་ཀྱིས་སོ།། རྡོ་རྗེ་གསུམ་གྱིས་ཞེས་བྱ་བ་ནི་རྡོ་རྗེ་གསུམ་ལའོ། །སྔགས་ཞེས་བྱ་བ་ནི་སྔགས་པས་སོ། །སྣ་སོགས་ཞེས་བྱ་བ་ནི་རྣམ་པ་སྣ་ཚོགས་པས་སོ། །དུ་མ་ལས་བྱུང་ཞེས་བྱ་བ་སྣ་ཚོགས་པའི་རྒྱུ་ཅན་ནོ། །གཟུགས་ཞེས་བྱ་བ་ནི་གཟུགས་བརྙན་རྣམས་སོ། །དེ་ལ་ཞེས་བྱ་བ་ནི་གཟུགས་བརྙན་ནོ། །རང་ལ་ཞེས་བྱ་བ་ནི་རང་གིས་སོ། །གང་དུ་དེ་ཞེས་འབྱུང་བ་དེར་ནི་སྒྲུབ་པ་པོ་ཞེས་བྱ་བའི་དོན་ཏོ། །སྦྱོར་བ་ཐམས་ཅད་ནི་རྩོམ་པ་ཐམས་ཅད་དོ། །ཟོས་པར་གྱུར་པ་ཞེས་བྱ་བ་ནི་ཟོས་བཞིན་པར་རོ། །བཀའ་བསྒོ་བ་ནི་འཁོར་ལའོ། །ལས་ཀྱི་ཚོགས་རྣམས་ལ་སྒྲུབ་པོའི་སེམས་
ལ་སྣ་ཚོགས་པར་ཇི་ལྟར་བགྱི་བར་འགྱུར་ཞེས་དྲི་བ་ཞུས་པ་དེའི་ལན་ཚིགས་སུ་བཅད་པས་གསུངས་པ་ནི། ཞི་བའི་སེམས་ནི་བྱམས་པའི་སེམས་སོ། །རྒྱས་པའི་ཡིད་ནི་དགའ་བའི་སེམས་སོ། །ཆགས་པའི་ཡིད་ནི་རྗེས་སུ་ཆགས་པ་དང་བཅས་པའི་སེམས་ཏེ། གསུམ་པོ་འདི་དག་བྱས་ནས་ཞི་བ་ལ་སོགས་པའི་ལས་རྣམས་རབ་ཏུ་བསྒྲུབ་པར་བྱའོ། །གཏུམ་པ་ནི་ཁྲོ་བོ་ལས་ལ་གཏུམ་པས་རབ་ཏུ་བསྒྲུབ་པར་བྱ་ཞེས་བྱ་བ་ཚིགས་སུ་བཅད་པའི་དོན་ཡིན་ནོ། །ཐམས་ཅད་སྐུ་ཞེས་བྱ་བ་ལ་སོགས་པ་ལ་ཁྱོད་ཅེས་བྱ་བ་ནི་ཁྱེད་རྣམས་ལའོ། །སེམས་ཅན་ཐམས་ཅད་ཀྱི་ལུས་ནི་ཐམས་ཅད་སྐུ་སྟེ། དེ་ལ་ལུས་འདི་རྣམས་མངའ་བ་ཞེས་བྱ་བ་ནི་འབྲུ་མང་པོ་སྟེ། བར་གྱི་ཚིག་མི་མངོན་པར་བྱས་པའོ། །དེ་བཞིན་དུ་བྱ་བ་ལྷག་མ་རྣམས་ལ་ཡང་ངོ༌། །མཛད་པ་ནི་བྱ་བ་སྟེ་ཕྲིན་ལས་ཞེས་བྱ་བའི་དོན་ཏོ། །དེ་སྐད་དུ་དེ་བཞིན་གཤེགས་པ་གསང་བ་བསྟན་པའི་མདོ་ལས། གཟུགས་དང་སྒྲ་དང་ཡིད་ཀྱི་གཡོ་བ་ཐམས་ཅད་གོ་རིམས་བཞིན་དུ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བའི་རྗེས་སུ་འགྲོ་བ་ཡིན་ནོ་ཞེས་གསུངས་པ་ཡིན་ནོ། །དེ་ཉིད་ཀྱི་ཕྱིར་སྐུ་གསུང་ཐུགས་ནི་ཞེས་བྱ་བ་ལ་སོགས་པའི་རྒལ་བ་ཡིན་ཏེ། གང་དག་ལ་སྐུ་དང་གསུང་དང་ཐུགས་ཀྱི་རྡོ་རྗེ་མངའ་བ་དེ་རྣམས་ལ་དེ་སྐད་ཅེས་བྱ་སྟེ། སངས་རྒྱས་ཐམས་ཅད་ཅེས་བྱ་བའི་དོན་ཏོ། །དེ་རྣམས་ཀྱི་སྐུ་དང་གསུང་དང༌། ཐུགས་གང་ཡིན་པ་དེ་ཐོབ་པར་འགྱུར་བས་ན། སེམས་ཅན་ཐམས་ཅད་ཉིད་སངས་རྒྱས་ཡིན་ནོ། །སངས་རྒྱས་ཅི་འདྲ་བ་ཡིན་ཞེ་ན། མཉམ་མེད་མཉམ་སྟེ་རྡོ་རྗེ་འཆང་ཆེན་པོ་དང་མཉམ་པ་ཉིད་ཡིན་གྱི། ཆོས་ཀྱི་དབྱིངས་ཀྱིས་སོ་སོར་ཁྱབ་པ་ཙམ་གྱིས་སངས་རྒྱས་ཉིད་ནི་མ་ཡིན་ནོ། །དེ་རྣམས་ཀྱི་ནང་ནས་བསྒྲུབ་བྱ་སུ་ཡིན་སྒྲུབ་པ་པོ་གང་རྡོ་རྗེའི་སྐུ་ཅན་ཉིད་ལས་གཞན་འགའ་ཞིག་ཀྱང་ཡོད་པ་མ་ཡིན་ཞིང་ཚུལ་ཁྲིམས་ཤིན་ཏུ་རྣམ་པར་དག་པ་ཉིད་ཀྱི་ཕྱིར་གསོད་པ་པོ་འགའ་ཡང་མེད་པ་དེའི་ཕྱིར་དྲག་ཤུལ་གྱིས་འགྲུབ་པར་མི་འགྱུར་རོ་ཞེས་བྱ་བ་རྒལ་བའོ། །གལ་ཏེ་གསང་བ་གསུམ་གྱི་རྗེས་སུ་འགྲོ་བའམ། ཆོས་ཉིད་ཀྱི་ཆོས་དེ་རྣམས་ཀྱིས་ཐོབ་པ་ཡིན་གྱི་རྣམ་པ་ཐམས་ཅད་ཀྱིས་ནི་མ་ཡིན་ནོ་ཞེ་ན། དེ་ལྟར་
ན་སངས་རྒྱས་རྣམས་ཀྱི་རྟེན་བསད་པ་ན། སངས་རྒྱས་གསོད་པ་ལ་སོགས་པ་ནི་སྒྲུབ་པའི་དབང་པོ་ཞེས་བྱ་བ་ལ་སོགས་པ་རྒལ་བ་ཡིན་ཏེ། སྒྲུབ་པ་པོ་བདག་ཉིད་ཆེན་པོའི་མཚམས་མེད་པའམ། མཚམས་མེད་པ་འདྲ་བའི་ཇི་ལྟར་སྡིག་པས་གོས་པར་མི་འགྱུར་རོ། །འོན་ཏེ་གོས་པར་འགྱུར་བ་ཉིད་ཡིན་ན། དེའི་ཚེ་གང་ལས་འགྲུབ་པར་འགྱུར་ཞེ་ན། ལེགས་སོ་ལེགས་སོ་ཞེས་བྱ་བ་ལ་ཞུས་པ་ཞེས་བྱ་བ་ནི་ལྷག་མའོ། །ཚིགས་སུ་བཅད་པ་འདི་ལ་སེམས་པ་ནི། སེམས་ཅན་ལ་ཕན་པའི་བསམ་པ་ཡིན་ལ་བདག་ཉིད་ནི་དེའི་སྤོབས་པ་ཡིན་ཞིང་གསུང་དབྱངས་ནི་དེ་ཞུ་བའོ། །ཆེན་པོ་ནི་གསུམ་པོ་དེ་རྣམས་ཀྱིས་སངས་རྒྱས་རྣམས་མཉེས་པར་བྱས་པའོ། །དེ་ནས་སློབ་དཔོན་ཞེས་བྱ་བ་ལ་སོགས་པ་ནི་ལན་ཡིན་ཏེ། སློབ་དཔོན་ནི་སྒྲུབ་པ་ཆེན་པོའི་མཐར་ཐུག་པར་གནས་པ་དང༌། དེའི་རྣལ་འབྱོར་ལ་གནས་པའོ། །བྱང་ཆུབ་ཅེས་བྱ་བ་ནི་རང་ཉིད་རྡོ་རྗེ་འཆང་གི་བདག་ཉིད་དོ། །དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་ཅན་ཞེས་བྱ་བ་ནི་སངས་རྒྱས་དང་རིག་མ་བཅུ་དང་ཁྲོ་བོ་བཞིས་ཡོངས་སུ་བསྐོར་བའོ། །དེ་ཡང་བསྒྲུབ་པར་བྱ་བ་ལ་སོགས་པའི་དངོས་པོ་རྣམས་ཐམས་ཅད་སྒྱུ་མའི་རྣམ་པ་སྟེ་སྒྱུ་མའི་གླང་པོ་ལ་སོགས་པ་བཞིན་དུའོ། །བདག་རང་ཉིད་མ་རྨོངས་པ་ཉིད་དུ་སྐྱེད་པ་དང༌། སྡུད་པར་མཛད་པའོ། །རྒྱུ་དེས་ན་དེའི་སྡིག་ཏུ་མི་འགྱུར་ཏེ། སྡིག་པ་སྐྱེ་བར་མི་འགྱུར་བའི་ཕྱིར་སྡིག་པ་དང་ལྡན་པ་མི་དམིགས་པའི་ཕྱིར་ཏེ་རྡོ་རྗེ་འཛིན་པའི་སྤྱོད་པ་རྨད་དུ་བྱུང་བ་ཙམ་ལ་སེམས་མཉམ་པར་འཇོག་པའི་ཕྱིར་རོ། །བསོད་ནམས་ཀྱང་ནི་དེ་བཞིན་ནོ། །ཞེས་བྱ་བ་ནི་བསོད་ནམས་ཉིད་དེ་ལས་འབྱུང་བར་འགྱུར་ཏེ། དེ་ཡང་དེ་ལ་དེ་བཞིན་དུ་ཡོད་པ་ཉིད་མ་ཡིན་ཏེ། བསོད་ནམས་དེ་དང་ལྡན་པས་དམིགས་སུ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཚུལ་འདིས་ནི་གང་ལ་སྡིག་པ་མེད་པ་སྟེ། སྡིག་པ་རྣམས་ཤིན་ཏུ་མ་སྐྱེས་པའི་ཕྱིར་དང་བསོད་ནམས་ཉེ་བར་བསགས་པའི་ཕྱིར་དང༌། །གཉི་ག་ཡང་དམིགས་སུ་མེད་པའི་ཕྱིར་རོ། །གང་ལ་བསོད་ནམས་ཀྱང་མེད་པ་སྟེ། བསོད་ནམས་དང༌། བསོད་ནམས་དང་ལྡན་པ་དང༌། བསོད་ནམས་ཀྱི་འབྲས་བུ་དམིགས་སུ་མེད་པའི་ཕྱིར་རོ། །སངས་རྒྱས་རྣམས་ཀྱིས་དེའི་བྱང་ཆུབ་ཡིན་པར་གསུངས་
ཏེ། ཡེ་ཤེས་དང་བསོད་ནམས་ཀྱི་ཚོགས་དག་ཅིག་ཅར་སྦྱངས་པའི་ཕྱིར་དང་རྫོགས་པའི་ཕྱིར་རོ། །གལ་ཏེ་སྒྲུབ་པ་པོ་ཡང་དེ་ལྟར་དོན་མེད་པར་མི་འགྱུར་ན་ཡང་དེས་སེམས་ཅན་རྣམས་ཀྱང་དོན་མེད་པར་བྱས་པར་གྱུར་པ་མ་ཡིན་ནམ་ཞེ་ན། འདིར་མགོན་པོ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་སྒྱུ་མ་མཁན་གྱིས་སྒྱུ་མའི་གླང་པོ་ལ་སོགས་པ་ཡང་དག་པར་བསྟན་པ་ནི་རྨོངས་པ་རྣམས་སླུ་བ་ཡིན་པ་དེ་བཞིན་དུ་མགོན་པོ་དེའི་ཞེས་བྱ་བ་སྒྲུབ་པ་པོ་ཐུགས་བརྩེ་བ་ཅན་གྱིས་སེམས་ཅན་གདུག་པ་འཇོམས་པ་ནི་རྨོངས་པ་སྟེ། ལུས་ཅན་ཐམས་ཅད་སླུ་བ་ཡིན་ནོ། །འདི་ལྟར་ཐབས་དེས་གདུག་པ་དེ་རྣམས་མཚམས་མེད་པ་ལ་སོགས་པ་ལས་བཟློག་པའི་རྒྱུ་ཅན་དེས་ངན་འགྲོར་སྐྱེ་བར་མི་འགྱུར་ཞིང་བྱང་ཆུབ་ཀྱང་རྙེད་སླ་བར་འགྱུར་ཏེ། སངས་རྒྱས་ཀྱི་ཡེ་ཤེས་ཀྱིས་རྒྱས་བཏབ་པའི་ཕྱིར་རོ། །གང་གི་ཚེ་སྔོན་གྱི་ལས་ཀྱི་དབང་གིས་དེ་རྣམས་དམྱལ་བ་རྣམས་སུ་སྐྱེ་བར་འགྱུར་བ་དེའི་ཚེ། དེ་རྣམས་ཀྱིས་དམྱལ་བ་རྣམས་སུ་གྱུར་ན་ཡང་འབྲས་བུ་ཆེན་པོ་ནི་གང་དེ་རྣམས་ཀྱི་སངས་རྒྱས་ཀྱི་ཡེ་ཤེས་ཀྱིས་རྒྱས་བཏབ་པར་འགྱུར་ཏེ། འདི་ལྟར་འདི་དམྱལ་བ་དེ་ལས་འཕོས་ནས་རིང་པོར་མི་ཐོགས་པར་ངེས་པར་འཚང་རྒྱ་བར་འགྱུར་རོ། །གང་གིས་དེ་ལྟར་བྱས་པའི་རྒྱུ་དེས་འདི་ཞེས་བྱ་བའི་གདུག་པའི་ལས་ཀྱི་མཚན་ཉིད་སེམས་ཅན་རྣམས་ལ་མཆོག་ཏུ་ཕན་བཏགས་པའོ། །དེ་ཉིད་ཀྱི་ཕྱིར་བྱང་ཆུབ་རྡོ་རྗེ་ཅན་ཏེ་རྣལ་འབྱོར་པ་རྣམས་ཀྱིས་བསྒྲུབ་བྱར་ཤེས་པར་བྱ་སྟེ། རྣལ་འབྱོར་ལ་གནས་པའི་སློབ་དཔོན་གྱི་བྱ་བ་ཡིན་པར་ཤེས་པར་བྱའོ། །ཚར་གཅོད་པ་ཞེས་བྱ་བ་ལ་སོགས་པ་ལ་གང་གིས་དེ་ལྟར་བྱས་པ་དེས་ཇི་ལྟར་སེམས་ཅན་རྣམས་ལ་ཕན་འདོགས་པར་བྱེད་པ་ལས་ཞི་བ་ལ་སོགས་པ་བྱ་བ་དེ་བཞིན་དུ་ཚར་གཅོད་པ་དྲག་པོའི་ལས་ཀྱང་བྱ་བ་ཡིན་ཏེ། དེ་ཡང་མཆོག་ཏུ་ཕན་འདོགས་པ་ཉིད་ཡིན་པའི་ཕྱིར་རོ། །འོ་ན་ཇི་ལྟར་ཚར་གཅོད་པ་ཞེས་བྱ་ཞེ་ན། རྨོངས་པ་རྣམས་ལ་ཚར་གཅོད་པ་དང་འདྲ་བར་སྣང་བའི་ཕྱིར་ཏེ་ཁ་བ་དང་ཚ་བའི་སྨན་ཆེན་པོ་ལྟ་བུའོ། །བདག་ཉིད་ཆེན་པོ་ཞེས་བྱ་བ་ནི་བསམ་པ་ཆེན་པོ་སྟེ། ཐུགས་རྡོ་རྗེ་ཅན་ཞེས་བྱ་བའི་དོན་ཏེ། དེ་ལ་ཇི་ལས་དང་པོ་པས་ཀྱང་དེ་ལྟར་བྱ་བའམ་ཞེ་ན། མ་ཡིན་ནོ་ཞེས་བསྟན་པའི་ཕྱིར་སྒྲུབ་པ་ཆེན་པོའི་
ཞེས་བྱ་བ་ལ་སོགས་པ་གསུངས་པ་སྟེ། ཡན་ལག་དྲུག་གིས་བསྙེན་པ་ལ་སོགས་པ་ནས། སྒྲུབ་པ་ཆེན་པོའི་མཐར་ཐུག་གི་བར་དུ་རྟོགས་པར་བྱས་ནས་དེའི་འོག་ཏུ་དྲག་པོའི་ལས་བརྩམ་པར་བྱ་སྟེ། དེའི་ཚེ་ཡེ་ཤེས་དང་མཐུན་པར་སྦྱོར་བ་བྱས་པ་ནི་མཆོག་ཏུ་ཕན་འདོགས་པར་བྱེད་པ་ཡིན་པའི་ཕྱིར་རོ། །བཟླས་པ་ལ་སོགས་པ་ཙམ་གྱིས་ཀྱང་ལས་རྣམས་འགྲུབ་པ་མ་ཡིན་ནམ་ཞེ་ན། འགྲུབ་པར་འགྱུར་བ་ནི་བདེན་མོད་ཀྱི་ངེས་པར་བྱས་པ་མ་ཡིན་གྱི་ཚར་གཅོད་པ་ནི་མ་ཡིན་ཏེ། གང་གི་ཚེ་དེ་མཆོག་ཏུ་ཕན་འདོགས་པར་གྱུར་པ་དེའི་ཚེ་བྱ་བ་ཡིན་ནོ་ཞེས་བྱ་བར་དགོངས་སོ། །རྡོ་རྗེ་ཅན་ཐམས་ཅད་ནི་སངས་རྒྱས་ཐམས་ཅད་དོ། །ཐུགས་རྗེ་ཆེན་པོ་ལས་བྱུང་བའི་ཚུལ་གྱི་ལམ་ནི་ཐུགས་རྗེ་ཆེན་པོའི་ཚུལ་ཏེ། ཇི་སྐད་གསུངས་པའི་དྲག་པོའི་ལས་སོ། །གསལ་བར་བྱེད་པའི་ཆོས་ཏེ་དེ་ཐོས་པས་སོ། །དགའ་ཞིང་རབ་ཏུ་དགའ་བ་ལ་ཡང་དག་པར་མགུ་བ་ནི། ཆུང་ངུ་དང་འབྲིང་དང་ཆེན་པོའི་རིམ་གྱིས་དགའ་བ་ཐོབ་པའི་ཕྱིར་རོ། །མགོན་པོ་ཆེན་པོ་ཞེས་བྱ་བ་ནི་ཐབས་ཐམས་ཅད་ཀྱིས་གཞན་གྱི་དོན་དམ་པའི་ཕྱིར་རོ། །ཐུབ་པ་ཆེན་པོ་ཞེས་བྱ་བ་ལ་ཐུབ་པ་ཆེན་པོ་རྣམས་ཏེ། རྟག་ཏུ་ཤིན་ཏུ་རྣམ་པར་དག་པའི་སྐུ་དང་གསུང་དང་ཐུགས་ཀྱི་ཕྲིན་ལས་ཅན་ཉིད་ཡིན་པའི་ཕྱིར་རོ། །ཆོས་རྣམས་ཆེན་པོ་ཞེས་བྱ་བ་ནི་རྣམ་པ་ཐམས་ཅད་དུ་ཁ་ན་མ་ཐོ་བ་མེད་པའི་ཆོས་རྣམས་སྟོན་པར་མཛད་པ་ཉིད་ཀྱི་ཕྱིར་རོ། །གསུམ་པ་དེ་དག་ཉིད་ཀྱིས་ན་ཐུགས་རྗེ་ཆེན་པོའོ། །ཀུན་དུ་བཟང་པོའི་ཞེས་བྱ་བ་ནི་སྙིང་སྟོབས་དང་རྡུལ་དང་མུན་པ་རྣམས་ཀྱིས་གཞན་གྱི་དོན་ལ་གཅིག་ཏུ་གཞོལ་བའི་བྱང་ཆུབ་ཀྱི་སེམས་སོ། །གདུག་པའི་མི་བཟད་པའི་ལས་བྱས་པ་གང་ཡིན་པ་དེས་ཀྱང་བསྒྲུབ་པར་བྱ་བ་དང་སྒྲུབ་པ་པོ་དག་སངས་རྒྱས་ཉིད་དུ་རྫོགས་པར་མཛད་པའོ། །དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ནི་རྣམ་པ་གསུམ་གྱིས་དབང་བསྐུར་བའོ། །དེས་གསང་བ་གསུམ་པའི་དཀྱིལ་འཁོར་དུ་དབང་བསྐུར་བའི་སྔགས་པ་གང་ཡིན་པ་དེས་དྲག་པོའི་ལས་ལ་སོགས་པ་འདི་ལ་སྐྲག་པ་ལ་སོགས་པ་མི་བྱའོ། །བྱང་ཆུབ་རྡོ་རྗེ་ནི་ཀུན་དུ་བཟང་པོའི་ཐུགས་བསྐྱེད་པའོ། །རྣམ་པ་ཙམ་གྱིས་ན་ཞེ་སྡང་ཡིན་ལ། བྱང་ཆུབ་ཀྱི་སེམས་ཀྱི་རྒྱུ་མཐུན་པ་ཉིད་ཡིན་པའི་ཕྱིར་རྡོ་རྗེ་ཡིན་
པས་ན་ཞེ་སྡང་རྡོ་རྗེའོ། །སོགས་པའི་སྒྲས་ནི་འདོད་ཆགས་རྡོ་རྗེ་ལ་སོགས་པ་དེ་དག་ཐམས་ཅད་ནི་མཆོད་པ་ཆེན་པོ་ཡིན་ནོ་ཞེས་བྱ་བའི་དོན་ཏོ། །བསྒྲུབ་པར་བྱ་བ་རྣམས་ལ་མཆོག་ཏུ་ཕན་འདོགས་པས་སངས་རྒྱས་ཐམས་ཅད་ཡང་དག་པར་མཉེས་པར་བྱས་པས་ཞེས་བྱ་བའི་དོན་ཏོ། །དེ་བས་ན་འདི་རྣམས་སུ་ཡང་སྤང་བར་མི་བྱའོ། །འདི་ལྟར་སྔགས་ཀྱི་རྒྱུན་ནི་རྣམ་པ་དུ་མའི་སྔགས་བསྡུས་པ་སྟེ། ཤེས་པ་དང་སྐྱོབ་པར་བྱེད་པའི་ཕྱིར་སྔགས་ཏེ། ཐབས་དང་ཤེས་རབ་ཀྱི་བདག་ཉིད་ཅན་གྱི་བྱང་ཆུབ་ཀྱི་སེམས་སོ། །དེའི་བསྡུས་པ་ནི་ཡང་དག་པར་སྟོན་པར་མཛད་པའི་སྟོན་པ་སྟེ། དེ་སྐད་དུ་ཡང༌། གང་དུ་འདི་བློས་རྟོགས་པར་མ་གྱུར་པ། །དེར་ནི་དེ་བཞིན་གཤེགས་པ་དབང་མཛད་འགྱུར། །བདག་གིས་མི་ཤེས་རྒྱལ་བ་རྣམས་ཀྱིས་མཁྱེན། །བྱང་ཆུབ་མཐའ་ཡས་བདེ་བར་གཤེགས་པས་གསུངས། །ཞེས་གསུངས་པ་ཡིན་ནོ། །ཐུགས་རྗེ་ཆེན་པོའི་ཚུལ་ལོ། །དེ་བཞིན་གཤེགས་པ་ལ་མངོན་པར་བསྟོད་དོ་ཞེས་བྱ་བ་ལ་བྱང་ཆུབ་རྡོ་རྗེ་ཉིད་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཀྱི་སྐུ་ཡིན་ལ། དཀྱིལ་འཁོར་པ་རྣམས་ནི་ལོངས་སྤྱོད་རྫོགས་པ་ཡིན་ཞིང་ཕྱག་རྒྱ་ལ་སོགས་པར་སྤྲུལ་པ་ཡིན་ལ། ལྷག་མ་རྣམས་ནི་དེས་བྱིན་གྱིས་བརླབས་པ་ཉིད་ཀྱི་ཕྱིར་རོ། །དེའི་རང་བཞིན་ཡིན་པས་ན་དེ་རྣམས་ཀྱི་ཡོན་ཏན་བརྗོད་པའི་ཚིགས་སུ་བཅད་པ་རྣམས་ཀྱིས་དེ་བཞིན་གཤེགས་པ་ཉིད་ལ་བསྟོད་པར་གྱུར་པ་ཡིན་ནོ་ཞེས་བྱ་བར་དགོངས་སོ། །གང་ཡིན་ཞེས་བྱ་བ་ནི་བཅོམ་ལྡན་འདས་དཀྱིལ་འཁོར་ཆེན་པོའི་དབང་ཕྱུག་གོ །དུས་གསུམ་རྡོ་རྗེར་དབྱུང་བ་ཞེས་བྱ་བ་ལ། དབྱུང་བ་ནི་མཆོག་དང་པོའི་སྙིང་པོའི་གཟུགས་སོ། །དུས་གསུམ་རྡོ་རྗེ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རང་བཞིན་དུ་བྱེད་པས་སོ། །ཕུན་ཚོགས་བྱུང་བ་ནི་དེ་ལས་བྱུང་བའི་མཆོག་དང་པོ་རིག་པ་དང་བཅས་པའི་གཟུགས་སུའོ། །ཞི་བ་ནི་བུམ་པ་དང་གསང་བའི་དབང་བསྐུར་བ་དག་གིས་སོ། །སྒྲིབ་མེད་ནམ་མཁའི་ཁམས་དག་པའི་ངོ་བོ་ཉིད་ནི་དབང་བསྐུར་བ་གསུམ་པོ་ཐོབ་པས་ཞུ་བའི་དཀྱིལ་འཁོར་འབའ་ཞིག་གི་གཟུགས་སུའོ། །སངས་རྒྱས་ལྷག་པས་སངས་རྒྱས་ནི། སངས་རྒྱས་རྣམས་ལས་ལྷག་པའི་སངས་རྒྱས་དཀྱིལ་འཁོར་གྱི་བདག་པོའི་གཟུགས་སུའོ། །དེ་ཉིད་ཀྱི་ཕྱིར་བྱང་ཆུབ་མཆོག་ཀྱང་ཡིན་ཞིང་བྱང་ཆུབ་རྡོ་རྗེ་ཡང་ཡིན་ཏེ། ཆོས་ཀྱི་སྐུ་ཉིད་ཡིན་པའི་ཕྱིར་བྱང་ཆུབ་ཀྱང་དེ་ཡིན་ལ། སྐུ་གསུང་
ཐུགས་ཀྱི་གསང་བའི་གནས་ཉིད་ཡིན་པའི་ཕྱིར་རྡོ་རྗེ་ཡང་ཡིན་པས་སོ། །ཡང་ན་དུས་གསུམ་ཞེས་བྱ་བ་ནི་དུས་གསུམ་གྱི་སངས་རྒྱས་རྣམས་ཀྱི་གཟུགས་ཚོགས་ཏེ་སོ་སོར་སྡུད་པའི་སྒོ་ནས་སོ། །རྡོ་རྗེ་ནི་དེ་རྣམས་ཉིད་ཀྱི་སེམས་ཀྱི་ཚོགས་ཏེ་བསམ་གཏན་གྱིས་སོ། །ཕུན་ཚོགས་འབྱུང་ནི་དེ་རྣམས་ཀྱི་ཚོར་བའི་ཚོགས་ཏེ་སྲོག་དང་རྩོལ་བས་སོ། །དངོས་ཞེས་བྱ་བ་ནི་དེ་ཉིད་བསྒོམས་པས་བརྟན་པར་གྱུར་པ་སྟེ་འཛིན་པས་སོ། །གྲོལ་བ་ནི་སྒྲོལ་བ་ལ་དབང་དུ་གྱུར་པ་སྟེ་རྗེས་སུ་དྲན་པ་རྣམས་ཀྱིས་སོ། །གྱུར་པ་ནི་ཡོངས་སུ་གཏུགས་ཏེ་ཏིང་ངེ་འཛིན་གྱི་ཡན་ལག་གིས་སོ། །ཞི་བ་ནི་རྣམ་པར་མི་རྟོག་ཅིང་དམིགས་སུ་མེད་པ་སྟེ་ཉེ་བར་བསྒྲུབས་པས་སོ། །སྒྲིབ་མེད་ནམ་མཁའ་དག་གི་ངོ་བོ་ཉིད་ནི་སྒྲུབ་པ་པོས་སོ། །ལྷག་མ་ནི་སྒྲུབ་པ་ཆེན་པོ་སྟེ། སངས་རྒྱས་ལྷག་སངས་རྒྱས་ནི་དེ་བཞིན་གཤེགས་པ་རྣམས་སོ། །དབང་ཕྱུག་མཆོག་ནི་དགའ་མ་རྣམས་སོ། །བྱང་ཆུབ་རྡོ་རྗེ་ནི་སྒོ་སྐྱོང་རྣམས་སོ། །གང་ཡིན་དེ་ལ་ཞེས་བྱ་བ་ནི་བཅོམ་ལྡན་འདས་ཉིད་ཡིན་པས་ཕོ་རྟགས་སོ། །ལྷག་མ་རྣམས་ནི་ཐུགས་ཉིད་ཡིན་པའི་ཕྱིར་མ་ནིང་གི་རྟགས་སོ། །དཀྱིལ་འཁོར་ཆེན་པོའི་བདག་པོ་ལ་བསྟོད་པས་བསྟོད་པའོ། །ནམ་མཁའ་ནི་སྐྱེས་པ་དང་བུད་མེད་ཀྱི་ལྷ་རྣམས་ཀྱི་ལྷན་ཅིག་སྐྱེས་པའི་ཐབས་རྣམས་དང་རིག་མ་རྣམས་སོ། །བྱང་ཆུབ་སེམས་ནི་རྡོ་རྗེ་འཛིན་པ་སྟེ་དེ་དང་འདྲ་བ་ནི་དེས་སྐྱེད་པའི་ཕྱིར་རོ། །རྒྱ་ཆེན་པོ་ཞེས་བྱ་བ་ནི་རྫུ་འཕྲུལ་ཆེན་པོ་དང་ལྡན་པས་སོ། །དེ་རྣམས་ལ་ཞེས་བྱ་བ་ནི་དཀྱིལ་འཁོར་ཆེན་པོའི་དཀྱིལ་འཁོར་ལ་བསྟོད་པས་སོ། །གཏི་མུག་ཅེས་བྱ་བ་ལ་སོགས་པ་ལ་ཆོས་ནི་སྔགས་སོ། །སྔགས་གང་ཡིན་ཞེ་ན། གཏི་མུག་ཞེ་སྡང་དེ་བཞིན་འདོད་ཆགས་རྡོ་རྗེར་བཅས་པ་སྟེ། གཏི་མུག་དང་ཞེ་སྡང་དང་འདོད་ཆགས་དང་རྡོ་རྗེ་སྟེ། ལོངས་སྤྱོད་བཞི་ཞེས་བྱ་བའི་དོན་ཏོ། །འདིར་ཆོས་ལ་སོགས་པ་བཞི་ནི་དང་པོའི་དོན་གྱིས་གཉིས་པའོ། །རྟག་ཏུ་རྒྱུན་ཆགས་ཞེས་བྱ་བ་ནི་བསྒོམ་པའི་རྒྱུན་ཆགས་སོ། །རྣམ་པ་ནི་བྱེ་བྲག་མང་པོའོ། །སྣ་ཚོགས་པ་ནི་ངོ་མཚར་དུ་གྱུར་པའོ། །དགའ་བ་ནི་དེ་རྣམས་བདག་གི་རང་བཞིན་ནོ། །མྱོས་པའི་དངོས་པོ་ནི་དེ་ལ་ལྷག་པར་ཞེན་པའོ། །དེར་གྱུར་པ་ནི་ཐོབ་པ་སྟེ། དེ་ལ་ཕྱག་འཚལ་བའོ། །ལོངས་སྤྱོད་ཀྱི་དཀྱིལ་འཁོར་ལ་བསྟོད་པས་བསྟོད་པའོ། །རྡོ་རྗེའི་དཀྱིལ་འཁོར་རྣམ་པ་གཉིས་ལས་ལོངས་སྤྱོད་ཀྱི་དཀྱིལ་འཁོར་ཇི་ལྟ་བ་དེ་བཞིན་དུ་བཟླས་པའི་དཀྱིལ་འཁོར་ཡིན་ནོ། །དེ་ལ་ལོངས་སྤྱོད་ཀྱི་དཀྱིལ་འཁོར་གྱིས་ནི་ཏིང་ངེ་འཛིན་འགྲུབ་
ལ་བཟླས་པའི་དཀྱིལ་འཁོར་གྱིས་ནི་རྡོ་རྗེ་ཡེ་ཤེས་འགྲུབ་སྟེ། བཅུ་གསུམ་པ་ལས། ཏིང་ངེ་འཛིན་ཡེ་ཤེས་རྡོ་རྗེ་དག །རྡོ་རྗེ་དཀྱིལ་འཁོར་གྱིས་འགྲུབ་འགྱུར། །ཞེས་གསུངས་སོ། །གང་ཡང་གཟུངས་དང་ཞེས་བྱ་བ་ལ་སོགས་པ་ལ་སོན་པའི་ཆོས་ཞེས་བྱ་བ་ནི་དང་པོའི་དོན་གྱིས་གཉིས་པའོ།། ཆོས་ཞེས་བྱ་བའི་སྒྲ་ནི་འདིར་ཡེ་ཤེས་ཀྱི་ཚིག་གོ །གང་ཞེས་བྱ་བ་ནི་ཆོས་གང་དག་ཡིན་པའོ། །ཁ་ཅིག་ལ་ནི་ཡོངས་སུ་གཟུང་བ་ཞེས་འབྱུང་སྟེ། དེར་ནི་ངག་དང་དེ་ནི་རྟག་ཏུ་འབྲེལ་པ་ཡིན་པས་གང་ཞེས་བྱ་བ་དོན་གྱིས་ཤེས་པར་བྱ་བའོ། །ཇི་ལྟ་བུའི་ཆོས་ཤེ་ན། སེམས་ཀྱི་རང་བཞིན་དུ་སོན་པ་སྟེ། འཁོར་ལོ་སེར་པོ་རྩིབས་བཅུ་པ་ལ་གནས་པ་ཞེས་བྱ་བའི་དོན་ཏོ། །སྟེ་ཞེས་བྱ་བ་ནི་ཚིག་ཁ་བསྐང་བའོ། །ཇི་ལྟ་བུའི་ཆོས་ཡིན་ཞེ་ན། གཟུངས་བ་དང་དགའ་བ་དང་རྣམ་པ་དང་མི་གཡོ་བ་དང་རྒྱུ་དང་འབྲས་བུ་དང་དྲུག་སྟེ། གཟུང་བ་དང་ཞེས་བྱ་བ་ནི་འཛིན་པ་ཉིད་དོ། །རྨོངས་པ་ཞེས་བྱ་བ་ལ་སོགས་པ་བཞི་ནི་རྡོ་རྗེ་སྟེ། གཏི་མུག་ལ་སོགས་པ་ནི་མཐར་བྱེད་རྣམས་སོ། །དེ་རྣམས་ཀྱང་འཁོར་བའི་འཁོར་ལོ་ལ་ནི་མཚན་མའི་རྣམ་པ་ཡིན་ལ་སྲུང་བའི་འཁོར་ལོ་ལ་ནི་ལུས་ཅན་ནོ། །ཁྲོ་བོའི་འཁོར་ལོ་ལ་བསྟོད་པས་བསྟོད་པའོ། །གང་ཞིག་གིས་ཞེས་བྱ་བ་ལ་སོགས་པ་ལ་རྣམ་དག་ནི་སོ་སོར་དག་པའོ། །འདི་ཞེས་བྱ་བ་ནི་འདི་དག་གོ །འདི་ལ་ཐོག་མ་མེད་པའི་ངོ་བོ་ཡོད་པས་ན་ཐོག་མ་མེད་དངོས་སོ། །ཤེས་རབ་ཐབས་དག་ནི་འདོད་ཆགས་ཆེན་པོའི་ཚུལ་ལ་སོགས་པའི་རིམ་གྱིས་བསྐྱེད་པའི་རིམ་པའི་སྐྱེས་བུའོ། །དཔེ་དང་བྲལ་བས་ན་དཔེ་མེད་པའོ། །དེ་ལྟ་བུའི་ལྷ་རྣམས་ཤིན་ཏུ་བསྒོམ་པ་ནི་གསང་བ་ལ་སོགས་པའི་སྦྱོར་བས་ཏེ། དེ་ལ་གསང་བ་ནི་སྐུ་རྡོ་རྗེ་ལ་སོགས་པའོ། །དབང་བསྐུར་བ་ནི་སངས་རྒྱས་ཀྱི་ཅོད་པན་ནོ། །བརྟུལ་ཞུགས་ནི་རིག་པ་དང་ཡང་དག་པར་སྦྱོར་བའོ། །སྡོམ་པ་ནི་བླ་ན་མེད་པའི་བདེ་བ་སྟེ། སྒོམ་པ་པོ་དེ་ཡང་རྡོ་རྗེ་འཛིན་པ་དང་འདྲ་བར་བལྟའོ། །དེ་ཉིད་ཀྱི་ཕྱིར་གསུངས་པ། བྱང་ཆུབ་རྡོ་རྗེ་ཞེས་བྱ་བ་ལ་སོགས་པ་སྨོས་ཏེ། རྣལ་འབྱོར་པ་ལ་བསྟོད་པས་བསྟོད་པའོ། །གང་ཞིག་ཅེས་བྱ་བ་ལ་སོགས་པ་ལ་ཉེ་བར་སྒྲུབ་པ་དང་བསྒྲུབ་པ་དང་སྒྲུབ་པ་ཆེན་པོ་དང་ཞེས་བྱ་བ་ནི། ཉེ་བར་སྒྲུབ་པ་དང་བསྒྲུབ་པ་དང་སྒྲུབ་པ་ཆེན་པོ་རྣམས་ཞེས་བྱ་བའི་དོན་ཏོ། །བློ་མི་གཡོ་བ་ཞེས་བྱ་བ་ནི་མི་གཡོ་བའི་བློ་ཡོད་པའོ། །སྒྲུབ་པའི་དབང་པོ་ཞེས་བྱ་བ་ནི་དངོས་གྲུབ་མཆོག་གི་སྒྲུབ་པ་པོ་ཡིན་པའི་ཕྱིར་རོ། །གང་ཞིག་ཅེས་བྱ་བ་
ལ་སོགས་པ་ལ་ཐུན་བཞི་ཞེས་བྱ་བ་ནི་ཐུན་མཚམས་བཞིར་བྱས་པའོ། །རྡོ་རྗེ་བཞི་ཞེས་བྱ་བ་ནི་རྡོ་རྗེ་བཞི་པོ་རྣམས་ཀྱིས་སོ། །མི་སྣང་བ་ལ་སོགས་ཞེས་བྱ་བ་ནི་མི་སྣང་བ་ལ་སོགས་པའི་ཐུན་མོང་གི་དངོས་གྲུབ་དུ་མ་རྣམས་ཞེས་བྱ་བའི་དོན་ཏོ། །མ་ཉམས་པ་ཞེས་བྱ་བ་ནི་མ་ཚང་བ་མེད་པའི་ལམ་འདིའོ།། རྟོགས་པ་ནི་ཁོང་དུ་ཆུད་པའོ། །དངོས་གྲུབ་གཉིས་ཀྱི་སྒྲུབ་པ་པོ་ལ་བསྟོད་པའོ། །ཉན་པ་ཞེས་བྱ་བ་ནི་གཞན་ལས་གཞུང་དང་དོན་འཛིན་པའོ། །འདོན་པ་ནི་རང་ཉིད་འདོན་པར་བྱེད་པས་ན་རང་འདོན་པར་བྱེད་པ་སྟེ། ཐོས་པ་རྣམས་དེ་བཞིན་དུ་ཡང་དག་པར་དཔྱད་པས་རང་ཉིད་གོམས་པར་བྱེད་ཅེས་བྱ་བའི་བར་དུའོ། །འདིར་འདོན་པའི་ཡུལ་དུ་བྱས་པ་སྟེ་དེས་བྱས་པའོ། །ཀློག་པ་ཞེས་བྱ་བ་ནི་ཚིག་ཏུ་བརྗོད་པས་སོ། །སེམས་དཔའ་དང་ཞེས་བྱ་བ་ནི་ཐེ་ཚོམ་གཅད་པར་བྱ་བའི་ཕྱིར་རང་ངམ་གཞན་ལས་ཡང་དག་པའི་རིགས་པ་དང༌། རིགས་པའི་ཡུལ་ལས་འདས་པ་ལ་ཡང་བཅོམ་ལྡན་འདས་ཉིད་ཚད་མར་བྱས་པས་རྣམ་པར་དཔྱོད་པའོ། །གསང་བ་འདུས་པ་ལ་མངོན་པར་བརྩོན་པ་རྣམས་ལ་བསྟོད་པས་བསྟོད་པའོ། །གང་དུ་ཞེས་བྱ་བ་ལ་སོགས་པ་ལ་འདི་ཞེས་བྱ་བ་ནི་རྒྱུད་འདིར་རོ། །མངོན་ལྡན་པ་ཞེས་བྱ་བ་ནི་མངོན་པར་བརྩོན་པ་སྟེ། ཡང་དག་པའི་སྦྱོར་བ་རྣམས་ལ་དགོས་པ་མེད་པའི་སྒྲུབ་པ་པོ་དང༌། དེ་རྣམས་ཀྱིས་བསྒྲུབ་པར་བྱ་བ་གང་ཡིན་པ་ཡང་ངོ༌། །སྒྲུབ་པ་པོ་དང་བསྒྲུབ་པར་བྱ་བ་ཇི་ལྟ་བུ་ཞིག་ཅེ་ན། ཞི་སོགས་ལས་རྒྱས་ཤིན་ཏུ་བཏབ་པ་ཡིས། །ཞེས་བྱ་བ་སྨོས་ཏེ། །ལེགས་པར་བྱས་པ་སྟེ་འཁྲུལ་འཁོར་ནི་གྲོ་ག་ལ་བྲིས་པས་སོ། །སྔགས་ནི་སྔགས་ཀྱི་ཆོ་ག་ཞིག་གིས་སོ། །དེ་བཞིན་རྒྱས་བཏབ་ཅེས་བྱ་བ་ནི་བསམ་གཏན་ལས་འབྱུང་བའི་རྒྱས་བཏབ་པས་ཀྱང་ངོ༌། །དེ་ལྟ་བུའི་སྒྲུབ་པ་པོ་དང་བསྒྲུབ་པར་བྱ་བ་ལ་ཕྱག་འཚལ་བའོ། །སྒྲུབ་པ་པོ་དང་བསྒྲུབ་པར་བྱ་བ་ལ་བསྟོད་པས་བསྟོད་པའོ། །མཐོང་བ་ཞེས་བྱ་བ་ནི་ལྟ་བའོ། །སྒྲུབ་པ་པོ་གཙོ་བོ་ཞེས་བྱ་བར་སྦྱར་ཏེ། སྒྲུབ་པ་པོ་ཉིད་གཙོ་བོ་སྟེ་ཁྱབ་བདག་རྡོ་རྗེ་འཛིན་པ་ཞེས་བྱ་བའི་དོན་ཏོ། །སྒྲུབ་པ་པོ་ལྟ་བ་ལ་བསྟོད་པས་བསྟོད་པའོ། །ཞི་བ་ཞེས་བྱ་བ་ནི་ཉེས་པ་དང་བྲལ་བའོ། །འདྲེན་པ་ནི་སངས་རྒྱས་སོ། །རྗེས་སུ་ཡི་རང་བ་ཞེས་བྱ་བ་ནི་བསྟོད་པ་མཛད་པ་ལའོ། །མགོན་པོ་དེ་དག་ཅེས་བྱ་བ་ནི་སངས་རྒྱས་རྣམས་སོ། །བྱང་ཆུབ་སེམས་དཔའ་ནི་བྱང་ཆུབ་སེམས་དཔའ་རྣམས་སོ། །གྲགས་ཆེན་པོ་ཞེས་བྱ་བ་ནི་
ཤིན་ཏུ་དགྱེས་པའོ། །དེ་སྐད་གསུངས་ནས་ཞེས་བྱ་བ་ནི་ལེགས་པར་གསུངས་པ་ཡིན་ཞེས་བྱ་བ་ལ་སོགས་པའོ། །གསང་བ་ཐམས་ཅད་སྟོན་པ་ནི་སྦས་པའི་ཚིག་རྣམས་སོ། །འདི་ཉིད་རྡོ་རྗེ་སྟེ་དེ་རྣམས་ཀྱི་ཡེ་ཤེས་ནི་དོན་ལ་ངེས་པའོ། །དེ་བྱིན་གྱིས་རློབ་པ་ནི་བསྐྱེད་པའོ། གསང་བ་འདུས་པའི་བཤད་སྦྱར་སྙིམ་པའི་མེ་ཏོག་ལས་ལེའུ་བཅོ་བརྒྱད་པའོ།། །།བདག་གི་དད་པའི་སྟོབས་ཀྱིས་རྒྱུད་ཀྱི་སྙིང་པོའི་དོན་ནི་རྣམ་འབྱེད་པའི། །སྙིམ་པའི་མེ་ཏོག་བྱས་པ་འདི་ལས་བསོད་ནམས་ཕུང་པོ་གང་བསགས་པ། །དེས་ནི་རིམ་ཅན་འདི་ནི་རིམ་གྱིས་བྱང་ཆུབ་རྟོགས་དང་ལྡན་གྱུར་ཅིང༌། །ལྷ་རྣམས་དད་པས་མེ་ཏོག་སྙིམ་པ་ཞགས་གཏོར་བ་ལ་བརྟེན་གྱུར་ཅིག །འདུས་པའི་སྙིང་པོ་རྣམ་པར་འགྲེལ་པ་འདི། །ལེགས་པར་སྨྲས་པ་དྲི་མེད་རིན་པོ་ཆེས། །མུན་པ་བཅོམ་ནས་གསལ་བྱེད་རྒྱན་ཡིན་ལ། །རྣམ་པར་འགྲེལ་པའང་རིན་ཆེན་འབྱུང་བའི་གནས། །གསང་བ་འདུས་པའི་བཤད་སྦྱར་སྙིམ་པའི་མེ་ཏོག་ཅེས་བྱ་བ་སློབ་དཔོན་ཆེན་པོ་རཏྣ་ཨཱ་ཀར་ཤཱནྟིས་མཛད་པ་རྫོགས་སོ།། །།པཎྜི་ཏ་ཆེན་པོ་ཤཱནྟ་བྷ་དྲ་དང་ཞུ་ཆེན་གྱི་ལོ་ཙཱ་བ་ཆེན་པོ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།