སྟན་སྟབས་ཀྱི་བཀོད་པ།
སངས་རྒྱས་ཡེ་ཤེས་ཞབས།
སྟང་སྟབས་ཀྱི་བཀོད་པ་བཞུགས་སོ། །བགེགས་རྣམས་ལ་ལུས་སྐྲག་མཛད་པ། །དཔལ་ལྡན་རྡོ་རྗེ་ཧཱུཾ་མཛད་ལ། །ཀུན་ནས་དང་བས་ཕྱག་འཚལ་ཏེ། །སྟང་སྟབས་རིམ་པ་བཤད་པར་བྱ། །གཡོན་བརྐྱང་དཔེ་དང་མཐུན་པའི་སྟབས། །ས་གའི་འདུག་སྟངས་གཡས་བརྐྱང་དང༌། །ཟླུམ་པོར་གནས་དང་རྐང་པ་གཅིག །རུས་སྦལ་རྐང་སྟབས་བདུན་པར་བཤད། །གང་ཡང་གཤོལ་དབྱིབས་ལྟ་བུར་ནི། །གཡོན་པའི་བརླ་དང་བུས་མོ་གཉིས། །གཡས་པའི་བྱིན་པ་བརླར་བཅར་ཏེ། །ཐད་ཀར་འཇོག་པར་བྱེད་པ་དང༌། །རྒྱར་ནི་རྐང་མཐིལ་ལྡར་བཅས་པ། །གཡོན་བརྐྱང་བ་ནི་རབ་ཏུ་གྲགས། །རྐང་མཐེབ་དང་ནི་རྟིང་པ་དང༌། །མཉམ་པོར་ཤིན་ཏུ་བཅེར་བ་ནི། །བསྟན་པ་མཐུན་པའི་རྐང་སྟབས་སུ། །དེ་ཉིད་ཤེས་པ་རྣམས་ཀྱིས་བཤད། །རྐང་པའི་སོར་མོ་ཕྱིར་བསྟན་ཅིང༌། །པུས་མོའི་ལྷ་ང་གཉིས་བརྐྱང་སྟེ། །རྒྱར་ནི་ཉི་ཤུ་རྩ་དྲུག་སོར། །ས་གའི་འདུག་སྟངས་ཡིན་པར་བརྗོད། །གཡོན་ལས་ཡོངས་སུ་བཟློག་པ་ནི། །གཡས་བརྐྱང་བར་ནི་ཤེས་པར་བྱ། །གང་དུ་པུས་མོ་གཉིས་འཇོག་པའི། །གནས་སུ་ལག་གཉིས་འཇོག་པ་ནི། །དང་པའི་གཤོག་པ་ལྟར་བྱས་པ། །ཟླུམ་པོའི་འདུག་སྟངས་ཡིན་པར་འདོད། །གཡས་བའི་བརླར་ནི་གཡོན་པ་གཟུགས། །དེ་ནི་རྐང་པ་གཅིག་ཅེས་བྱ། །གཡས་པས་གཡོན་པའི་སོར་མོ་མནན། །རུས་སྦལ་རྐང་སྟབས་ཡིན་པར་བཤད། །དང་པོ་བཅུ་ཡིན་གཉིས་པ་ལྔ། །གསུམ་པ་དྲུག་སྟེ་བཞི་པ་དགུ། །ལྔ་པ་དེ་བཞིན་དྲུག་པ་གཉིས། །བདུན་པ་ལ་ནི་གཅིག་
དང་སྦྱར། །ད་དག་ཀྱང་གང་ཞེ་ན། སེང་གེའི་སྟང་སྟབས་དང༌། སེང་གེའི་གླལ་བ་དང༌། རྡོ་རྗེ་སྒྲོག་དང༌། རྡོ་རྗེ་ཐོ་བ་དང༌། བུད་མེད་ཀྱི་སྒྱུ་འཕྲུལ་དང༌། རྡོ་རྗེ་དྲལ་བ་དང༌། རྡོ་རྗེ་མཆེ་བ་དང༌། རལ་གྲིའི་ཐབས་དང༌། ལྕགས་ཀྱུའི་ཐབས་དང༌། མདུང་ཐུང་གི་ཐབས་དང༌། ཐག་མདུང་འཕེན་ཐབས་དང༌། རྡོ་རྗེའི་སྟང་སྟབས་དང༌། རྡོ་རྗེ་གསོར་བ་དང༌། རྡོ་རྗེ་རོ་ལངས་དང༌། གཏུན་ཤིང་གི་ཐབས་དང༌། བ་དན་གྱི་ཐབས་དང༌། རྡོ་རྗེ་འགུགས་བྱེད་དང༌། རྡོ་རྗེ་འཇོ་ཚུལ་དང༌། མི་འཇིགས་པའི་ཚུལ་དང༌། འབྲས་བུའི་ཐབས་དང༌། མཆོག་སྦྱིན་པའི་ཐབས་དང༌། ཕྱག་འཚལ་བའི་ཚུལ་དང༌། རྡོ་རྗེ་འཕེན་པ་དང༌། རྡོ་རྗེ་འཇིགས་སུ་རུང་བ་དང༌། རྡོ་རྗེ་སྟོབས་པོ་ཆེས་འདེགས་པ་དང༌། རྡོ་རྗེ་གད་མོ་དང༌། རྡོ་རྗེའི་ཐབས་དང༌། ཞགས་པའི་ཐབས་དང༌། བེ་ཅོན་གྱི་ཐབས་དང༌། མཚོན་རྩེ་གཅིག་པའི་ཐབས་དང༌། མདུང་བུའི་ཐབས་དང༌། རྡོ་རྗེའི་གར་དང༌། སྒོ་བཞི་བྱིན་གྱིས་བརླབས་པ་དང༌། རྡོ་རྗེ་གདུ་བུ་དན། རྡོ་རྗེ་འཁྱིལ་པ་དང༌། རྡོ་རྗེའི་སྒྲ་དང༌། འཁོར་ལོའི་ཐབས་དང༌། པདྨའི་ཚུལ་དང༌། གཞུའི་ཐབས་དང༌། མདའ་གཟུང་བའི་ཐབས་དང༌། མདའ་འཕང་བའི་ཐབས་དང༌། རྐང་པ་ཡ་གཅིག་གི་སྟང་སྟབས་དང༌། བུང་བའི་འཕུར་སྟངས་དང༌། རྡོ་རྗེ་འདེགས་པ་ལ་སོགས་པ་དེ་དག་གོ །དེ་དག་གི་ཐབས་བཤད་པར་བྱ་སྟ། རང་ཉིད་ཁ་འོག་ཏུ་བལྟས་ཏེ་གདངས་ལ་ལག་པ་གཉིས་ཀྱི་མཁྲིག་མ་མདུད་དེ་ཁའི་དྲུང་དུ་བཞག་པ་ནི་སེང་གེའི་སྟང་སྟབས་སོ། །དེ་ཉིད་ལས་ཐམས་ཅད་དུ་བལྟ་བས་ལྕེ་འགུལ་བ་དང་བཅས་པ་ནི་སེང་གེའི་གླལ་པའོ། །རྡོ་རྗེ་སྒྲོག་ནི་རང་གི་སྙིང་གར་རྡོ་རྗེ་བཅིང་བར་བྱད་པ་སྟེ། རྡོ་རྗེ་ཁུ་ཚུར་གཉིས་བསྡམས་ལ། །མཛུབ་མོ་བཀུག་སྟེ་བཅིངས་ནས་སུ། །བསྐོར་བའི་ཚུལ་དུ་བྱ་བ་ནི། །ལྷ་རྣམས་དགུག་པའི་དམ་པའོ། །ཞེས་བཤད་པའོ། །གཡོན་པའི་རྡོ་རྗེ་ཁུ་ཚུར་གྱིས་ཕུར་བུ་བཟུང་སྟེ་བགས་ཀྱི་སྟེང་དུ་བཞག་ལ། གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་ཐོ་བ་བཟུང་ནས་བརྡུང་བ་ནི་རྡོ་རྗེ་ཐོ་བའོ། །གར་དང་བཅས་པའི་རྡོ་རྗེ་སྒེག་མོའི་ཕྱག་རྒྱ་བཅིངས་ལ། མགོ་བོ་གཡོན་
དུ་ཅུང་ཟད་འདུད་པར་བྱས་པ་ནི་བུད་མེད་ཀྱི་སྒྱུ་འཕྲུལ་ལོ། །སྙིང་གར་རྡོ་རྗེ་བསྡམས་པ་འབྱེད་པ་ནི་རྡོ་རྗེ་དྲལ་པའོ། །རྡོ་རྗེ་ཁུ་ཚུར་གྱི་མཐེའུ་ཆུང་གཉིས་བསྒྲེང་སྟེ་བཟློག་ལ་ཁའི་འགྲམ་དུ་མཆེ་བའི་ཚུལ་དུ་བཞག་པ་ནི་རྡོ་རྗེ་མཆེ་བའོ། །གཡོན་པའི་ཁུ་ཚུར་གྱི་ཤུབས་ནས་དྲངས་ཏེ་གཡས་པའི་ཁུ་ཚུར་གྱིས་དཔུང་མགོར་རལ་གྲི་འཛིན་པའི་ཚུལ་དུ་བཞག་པ་ནི་རལ་གྲིའི་ཐབས་སོ། །གཡོན་པའི་མཛུབ་མོ་དང་གཡས་པའི་མཐེའུ་ཆུང་མདུད་པར་བྱས་ཏེ་གཡས་པའི་མཛུབ་མོ་ལྕགས་ཀྱུ་ལྟར་བྱས་པས་འགུགས་པ་ནི་ལྕགས་ཀྱུའི་ཐབས་སོ། །རྡོ་རྗེ་ཁུ་ཚུར་གཉིས་ཀྱིས་གཡོན་དུ་འདེབས་པ་ལྟར་བྱེད་པ་ནི་མདུང་ཐུང་གི་ཐབས་སོ། །ལག་པ་གཡོན་དཀུར་བརྟེན་པ་ལ་གཡས་པའི་ཁུ་ཚུར་གྱིས་ཐག་མདུང་བསྐོར་བའི་ཚུལ་དུ་ལན་གསུམ་དུ་བསྐོར་ནས་འཕེན་པ་ནི་ཐག་མདུང་འཕེན་པའི་ཐབས་སོ། །རྡོ་རྗེ་བསྣུན་པའི་ཚུལ་ནི་རྡོ་རྗེའི་སྟང་སྟབས་སོ། །ལག་པ་གཉིས་ཀྱིས་རྡོ་རྗེ་འོག་ཏུ་ལན་གསུམ་གསོར་ལ། དེ་བཞིན་དུ་སྟེང་དུ་ཡང་ལན་གསུམ་གསོར་བར་བྱེད་པ་ནི་རྡོ་རྗེ་གསོར་བའོ། །ལག་པ་གཉིས་ཀྱིས་རོ་ལ་བཟུང་ནས་ཟ་བའི་ཚུལ་དུ་བྱེད་ཅིང་ཡོངས་སུ་བལྟ་བ་ནི་རྡོ་རྗེ་རོ་ལངས་སོ། །རྡོ་རྗེ་བསྡམས་པས་བཟུང་བའི་གཏུན་ཤིང་གིས་བགེགས་རྣམས་རྡུང་བ་ལྟར་བྱེད་པ་ནི་གཏུན་ཤིང་གི་ཐབས་སོ། །གཡོན་པའི་རྡོ་རྗེ་ཁུ་ཚུར་སྙིང་གར་བསྟན་པར་བྱས་ལ་གཡས་པའི་རྡོ་རྗེ་ཁུ་ཚུར་ལས་གུང་མོ་བརྐྱང་པའི་ཚིགས་དང་པོར་མཛུབ་མོ་བཀུག་ནས་དཔུང་མགོར་བཞག་པ་ནི་བ་དན་གྱི་ཐབས་སོ། །གཡོན་པ་དཀུར་བརྟེན་ལ་གཡས་པས་སྙིང་གནས་འགུགས་པའི་ཚུལ་དུ་བྱེད་པའི་སྙིང་ག་དེ་ཉིད་དུ་རྡོ་རྗེ་སེམས་དཔའ་ལྟར་འཇོག་པ་ནི་རྡོ་རྗེ་འགུགས་བྱེད་དོ། །སྙིང་གའི་མདུན་དུ་འགྱིང་བག་དང་བཅས་པས་ལག་པ་ཡོངས་སུ་བསྐོར་བ་ནི་རྡོ་རྗེ་འཇོ་ཚུལ་ལོ། །གཡོན་པ་དཀུར་བརྟན་ལ་གཡས་པ་མི་འཇིགས་པའི་ཚུལ་དུ་བྱེད་པ་ནི་མི་འཇིགས་པའི་ཚུལ་ལོ། །གཡོན་པ་དེ་ཉིད་དུ་བཞག་པ་ལ་གཡས་པའི་ལག་མཐིལ་དུ་འབྲས་བུ་བཞག་པའི་ཚུལ་དུ་བྱས་ཏེ་མདུན་དུ་དྲང་བ་ལྟར་བྱེད་པ་ནི་འབྲས་བུའི་ཐབས་སོ། །དེ་ཉིད་ལས་གཡས་པ་མཆོག་སྦྱིན་པའི་ཚུལ་དུ་བྱེད་པ་ནི་མཆོག་སྦྱིན་པའི་ཐབས་སོ། །ཐལ་མོ་སྦྱར་བ་
བསྟོད་པའི་ཚུལ་དུ་སྙིང་གར་བཞག་པ་ནི་ཕྱག་འཚལ་བའི་ཚུལ་ལོ། །གཡོན་པ་དཀུར་བརྟེན་ལ་གཡས་པ་རྡོ་རྗེ་རྩེ་གསུམ་པ་འཕེན་པའི་ཚུལ་དུ་བྱེད་པ་ནི་རྡོ་རྗེ་འཕེན་པའོ། །ཁའི་སྟེང་འོག་ཏུ་ལག་པ་གཉིས་བཀན་ཏེ་དེ་ཉིད་དང་འཇིགས་སུ་རུང་བ་ལྟར་བྱེད་པ་ནི་རྡོ་རྗེ་འཇིགས་སུ་རུང་བའོ། །སྙིང་གར་ལག་པ་གཡོན་པ་རྡོ་རྗེ་རྩེ་གསུམ་ལྟར་བྱས་ལ་གཡས་པའི་རྡོ་རྗེ་ཁུ་ཚུར་དབྱིག་པ་ལྟར་འདེབས་པས་རྩེ་གསུམ་པར་བྱས་ཏེ་འཇོག་པ་ནི་རྡོ་རྗེ་སྟོབས་པོ་ཆེས་འདེགས་པའོ། །རྡོ་རྗེ་ཁུ་ཚུར་གཉིས་བཀན་ཏེ་ཁར་བཞག་ལ་ཧ་ཧ་ཞེས་དགོད་པའི་ཚུལ་གྱིས་ཡི་གེ་ཧ་ཧ་བཞི་བརྗོད་པ་ནི་རྡོ་རྗེ་གད་མོའོ། །གཡོན་པ་ཁྲོ་བོའི་ཁུ་ཚུར་ལས་མཛུབ་མོ་སྙིང་གར་བསྒྲེངས་ལ་གཡས་པ་བ་དན་གསུམ་པར་བྱས་པས་རྡོ་རྗེ་གསོར་བའི་ཚུལ་དུ་བྱེད་པ་ནི་རྡོ་རྗེའི་ཐབས་སོ། །མཁྲིག་མ་གཉིས་མདུད་པ་ནི་ཞགས་པའི་ཐབས་སོ། །གཡོན་པ་དཀུར་བརྟེན་ལ་གཡས་པའི་ཁུ་ཚུར་གྱིས་མཐེ་བོ་ནང་ནས་བཏོན་ཏེ་བསྒྲེང་བ་ནི་བེ་ཅོན་གྱི་ཐབས་སོ། །དེ་ཉིད་ལས་ལག་པ་གཡས་པས་མདུང་རྩེ་གཅིག་པ་འཕེན་པའི་ཚུལ་དུ་བྱེད་པ་ནི་རྩེ་གཅིག་པའི་ཐབས་སོ། །དེ་ཉིད་ལས་མདུང་བུ་འདེབས་ཤིང་བགེགས་གསོད་པའི་ཚུལ་དུ་བྱེད་པ་ནི་རྡོ་རྗེ་མདུང་བུའི་ཐབས་སོ། །ལག་པ་གཡོན་བརྐྱང་བ་དེའི་རྩ་བར་གཡས་པའི་མཐེབ་ཆུང་ནས་བཀྲོལ་ཏེ་བ་དན་གསུམ་པར་བྱས་པ་ནི་རྡོ་རྗེའི་གར་རོ། །ཤར་ལ་སོགས་པའི་ཕྱོགས་སུ་ས་གནོན་ལ་སོགས་པའི་ཕྱག་རྒྱ་དང་ལྡན་པས་སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་བཞི་བསྒོམ་པ་ནི་སྒོ་བཞི་བྱིན་གྱིས་བརླབ་པའོ། །གཡོན་པ་དཀུར་བརྟེན་ནས་གཡས་པའི་སྡིགས་མཛུབ་བསྒྲེང་བ་ནི་རྡོ་རྗེ་འཁྱིལ་པའོ། །གཡས་པ་རྡོ་རྗེ་སྙིང་གར་འཇོག་ཅིང་གཡོན་པས་རྣ་བའི་དྲུང་དུ་དྲིལ་བུ་དཀྲོལ་བ་ནི་རྡོ་རྗེའི་སྒྲའོ། །སྙིང་གར་རྡོ་རྗེ་ཁུ་ཚུར་གྱི་མཐེའུ་ཆུང་དང་མཛུབ་མོ་རྡོ་རྗེ་མདུད་པ་བྱས་ཏེ་འཁོར་ལོ་ལྟར་བསྐོར་བ་ནི་འཁོར་ལོའི་ཕྱག་རྒྱའོ། །སྙིང་གར་པདྨ་ཁ་འབྱེད་པའི་ཚུལ་དུ་བྱེད་པ་ནི་པདྨའི་ཚུལ་ལོ། །གཡོན་པ་གཞུ་འཛིན་པའི་ཚུལ་དུ་འཇོག་པ་ནི་གཞུའི་ཐབས་སོ། །དེ་ཉིད་མདའ་དང་བཅས་པར་རྣ་བའི་དྲུང་དུ་འགེངས་པ་ནི་མདའ་གཟུང་
པའི་ཐབས་སོ། །དེ་ཉིད་མདའ་འཕེན་པ་ལྟར་བྱེད་པ་ནི་མདའ་འཕེན་པའི་ཚུལ་ལོ། །རྐང་པ་གཡོན་པའི་བརླ་ལ་གཡས་པའི་མཐིལ་བཙུགས་ཏེ། ལག་པ་གཉིས་དཀུར་བརྟེན་པ་ནི་རྐང་པ་ཡ་གཅིག་གི་སྟང་སྟབས་སོ། །དེ་ཉིད་དང་གཡས་གཡོན་དུ་ལག་པ་གཉིས་བསྐོར་བ་ནི་བུང་བའི་འཕུར་སྟངས་སོ། །གཡོན་པ་དཀུར་བརྟེན་ལ་གཡས་པ་སྙིང་གར་རྡོ་རྗེ་གཏད་དེ་འཇོག་པ་ནི་རྡོ་རྗེ་འདེགས་པའོ། །དེ་ནས་སློབ་དཔོན་བློ་གྲོས་ལྡན་པ་ཡིས། །དཀྱིལ་འཁོར་ས་ཡི་དབུས་སུ་འདུག་ནས་ནི། །འདུག་སྟངས་རྣམས་ཀྱི་གོ་རིམས་དབྱེ་བ་དག །དེ་ནི་ཅི་ནུས་ཀྱིས་ནི་རྣམ་པར་སྦྱར། །རྡོ་རྗེའི་སྐྱིལ་ཀྲུང་དང་ནི་པདྨའི་འདུག་སྟངས་དང༌། །སེམས་དཔའི་སྐྱིལ་ཀྲུང་དང་ནི་དཔའ་བོའི་འདུག་སྟངས་དང༌། །བཟང་པོའི་འདུག་སྟངས་དང་ནི་དེ་བཞིན་ཙོག་པུར་འདུག །རོལ་པའི་གནས་ཐབས་འདུག་སྟངས་བདུན་པར་བཤད། །གཡས་པའི་བྱིན་པ་དང་ནི་བརླ་དབུས་སུ། །རྐང་པ་གཡོན་པ་རྣམ་པར་བཞག་ནས་ཀྱང༌། །དེ་ཡི་སྟེང་དུ་གཡས་པ་བཞག་པ་ནི། །རྡོ་རྗེའི་སྐྱིལ་མོ་ཀྲུང་ཞེས་བྱ་བར་བཤད། །གཡས་པའི་བྱིན་པས་བྱིན་པ་གཡོན་མནན་ལ། །པུས་མོ་གཉིས་ཀ་དབབ་པར་བྱས་ནས་ནི། །ལུས་ནི་རབ་ཏུ་ཞི་བའི་ཚུལ་དང་ལྡན། །པདྨའི་འདུག་སྟངས་ཡིན་པར་མཁས་པས་བཤད། །རྐང་པ་གཡོན་པའི་བརླ་ཡི་སྟེང་དུ་ནི། །རྐང་པ་གཡས་པ་ཅུང་ཟད་ཙམ་སྦྱར་ལ། །གཡོན་པ་དེ་ཡི་འོག་ཏུ་བཞག་པ་ནི། །སེམས་དཔའི་སྐྱིལ་མོ་ཀྲུང་ཞེས་རྣམ་པར་གྲགས། །རྐང་པ་གཡོན་པ་ཡིས་ནི་སྐྱིལ་མོ་ཀྲུང༌། །ཕྱེད་དུ་བཅས་ལ་དེ་དང་ཉེ་བར་ཡང༌། །རྐང་པ་གཡས་པ་དྲང་པོར་བཞག་པ་ནི། །དེ་ནི་དཔའ་བོའི་འདུག་སྟངས་ཡིན་པར་འདོད། །རྐང་པ་གཉིས་ཀ་སྟན་གྱི་སྟེང་དུ་ནི། །དྲང་པོ་ཉིད་དུ་ཐུར་དུ་བརྐྱང་བྱས་ལ། །དེ་ཉིད་བརྟན་པོར་རབ་ཏུ་འཇོག་པ་ནི། །བཟང་པོའི་འདུག་སྟངས་ཡིན་པར་རབ་ཏུ་གྲགས། །རྐང་པ་གཉིས་ཀ་མཐོ་གང་ཙམ་གྱིས་ནི། །བར་དུ་ཆོད་པར་སྟན་ལ་བཞག་ནས་ཀྱང༌། །ཙོག་ཙོག་པོར་ནི་འདུག་པ་གང་ཡིན་པ། །དེ་ཉིད་ཙོག་པུའི་འདུག་སྟངས་ཉིད་དུ་བཤད། །རྐང་པ་གཡས་པ་ཉིད་ནི་སེམས་དཔའ་ཡི། །སྐྱིལ་ཀྲུང་ཕྱེད་པ་བརྟན་པར་རབ་བྱས་
ལ། །གཡོན་པ་སྒེག་དང་བཅས་པས་བརྐྱང་པ་ནི། །རོལ་པའི་འདུག་སྟངས་སུ་ནི་གྲགས་པ་ཡིན། །རྡོ་རྗེའི་སྐྱིལ་ཀྲུང་ཉིད་ལ་གནས་ནས་ནི། །རྣམ་པར་སྣང་མཛད་ལ་སོགས་ཕྱག་རྒྱ་བཅིང༌། །པདྨའི་འདུག་སྟངས་ཀྱིས་ཀྱང་སྒེག་མོ་ལ། །སོགས་པ་རྣམས་ཀྱི་ཕྱག་རྒྱ་བཅིང་བར་བྱ། །སེམས་དཔའི་སྐྱིལ་མོ་ཀྲུང་ལ་གནས་ནས་ནི། །རྡོ་རྗེ་སེམས་དཔའ་ལ་སོགས་ཕྱག་རྒྱ་བཅིང༌། །དཔའ་བོའི་འདུག་སྟངས་ཉིད་ལ་གནས་ནས་ཀྱང༌། །རྡོ་རྗེ་ཁྲོ་བོའི་ཕྱག་རྒྱ་བཅིང་བར་བྱ། །བཟང་པོའི་འདུག་སྟངས་ཀྱིས་ཀྱང་བྱ་བ་ནི། །བྱམས་པ་ལ་སོགས་རྣམས་ཀྱི་ཕྱག་རྒྱ་བཅིང༌། །ཙོག་བུའི་འདུག་སྟངས་ཀྱིས་ནི་ཕོ་ཉ་དང༌། །བྲན་ཕོ་བྲན་མོ་ལ་སོགས་ཕྱག་རྒྱ་བཅིང༌། །རོལ་པའི་གནས་ཐབས་ཀྱིས་ནི་བྱ་བ་གང༌། །འཇིག་རྟེན་སྐྱོང་བའི་ཕྱག་རྒྱ་བཅིང་བར་བྱ། །དེ་ལྟར་རྣམ་པར་བསྡུས་པ་ལས་བྱུང་བའི། །དགེ་བ་གང་ཡིན་དེས་ནི་འགྲོ་བ་རྣམས། །སངས་རྒྱས་ཡེ་ཤེས་མགོན་དང་བཅས་པ་དེར། །གཞོལ་བ་ཉིད་དུ་རྟག་ཏུ་འབབ་པར་ཤོག །སྟང་སྟབས་ཀྱི་བཀོད་པ་སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་ཀྱི་ཞལ་སྔ་ནས་མཛད་པ་རྫོགས་སོ།།