ཕྲ་མོའི་ཏིང་ངེ་འཛིན།
ཐིག་ལེ་རྣལ་འབྱོར་བསྡུ་བྱས་ནས། །ཕྲ་མོ་རྣལ་འབྱོར་བསྒོམ་པར་བྱ། །ཡེ་ཤེས་སེམས་དཔའི་ས་བོན་གྱི། །འོད་ཀྱིས་བདེ་གཤེགས་རྣམས་བསྐུག་ནས། །ཞལ་གྱི་ལམ་དུ་ཞུགས་བྱས་ནས། །རྡོ་རྗེའི་ལམ་ནས་པདྨར་གནས། །དེ་ནས་ལས་ཀྱི་ཚད་ཙམ་གྱི། །རལ་གྲི་ཡུ་བར་གཞལ་མེད་ཁང༌། །རྡོ་རྗེ་སེམས་དཔའི་དཀྱིལ་འཁོར་ལྡན། །པདྨོ་དབུས་ན་མཐོང་བར་བྱ། །གཉི་གའི་དགའ་བ་ལ་སོགས་པ། །ཐིག་ལེ་རྣལ་འབྱོར་ཡན་ཆད་བར། །ཏིང་འཛིན་གསུམ་ཉིད་རྫོགས་པ་ཡི། །རང་གི་རྡོ་རྗེ་རྩེ་ལྔ་ཡི། །རྩེ་དབུས་ལྕགས་ཀྱུར་ལྟ་བུ་རུ། །བསམ་སྟེ་དེ་ཡི་ལྕགས་ཀྱུ་ཡིས། །དམ་ཚིག་སེམས་དཔའི་དཀྱིལ་འཁོར་དང༌། །ལྡན་བའི་རལ་གྲི་མོ་ཉིད། །ཕྱི་རོལ་དུ་ནི་ཕྱུང་བྱས་ཏེ། །པདྨའི་སྣ་རྩེར་གནས་པར་བྱ། །འདི་ཡི་ཐིག་ལེ་རྣལ་འབྱོར་ལ། །དམ་ཚིག་སེམས་དང་འབྲེལ་བ་ཡི། །སྐུ་དང་གསུང་ཐུགས་རྡོ་རྗེ་ལ། །སྣང་བར་བྱས་པ་ཡན་ཆད་ཀྱི། །འོད་ཀྱིས་དམ་ཚིག་སེམས་དཔའ་ཡི། །ཕྱི་ཡི་ལུས་ཀྱི་དཀྱིལ་འཁོར་གྱི། །ལྷ་རྣམས་རབ་ཏུ་གསལ་བྱས་ནས། །གཞལ་མེད་ཁང་ནས་ཕྱིར་བྱུང་བའི། །འོད་ཀྱིས་ནམ་མཁའ་ཁྱབ་བྱས་ཏེ། །ཕྱིར་ཡང་དེ་ཉིད་ཞུགས་པར་བྱ། །དེ་བཞིན་ཡང་དང་ཡང་ནི་བསམ། །མཚན་མ་མ་བྱུང་བར་དུ་ནི། །འོད་ཟེར་ཙམ་གྱི་འཕྲོ་འདུ་ཉིད། །ཇི་ཙམ་འདོད་པ་རབ་ཏུ་བྱ། །མཚན་མ་རྣམ་པ་ལྔ་མཐོང་ནས། །ལྷ་དང་ཕྱག་མཚན་ལ་སོགས་པ། །ཡང་ནས་ཡང་དུ་འཕྲོ་འདུ་བྱ། །ཕྲ་མོའི་ཏིང་ངེ་འཛིན་རྫོགས་སོ།། །།