གསུང་རབ་ཀྱི་ཨརྒྷའི་ཆོ་ག
དམ་ཆོས་གླེགས་བམ་རྩོམ་པ་ཡིས། །ཆོ་ག་དེ་བཞིན་བྱས་ནས་ནི། །ཤོག་བུ་ལ་ནི་དྷི་ལས་བྱུང༌། །ཤེས་རབ་ཕ་རོལ་ཕྱིན་བལྟས་ནས། །དེ་ཡོངས་གྱུར་ལས་བྱུང་བ་ཡི། །ཡི་གེའི་ཕྲེང་ནི་བལྟ་བར་བྱ། །སྣག་ཚ་མྱུ་གུ་ཡོངས་བཟླས་ཏེ། །བརྩམ་པར་བྱ་བ་ཉིད་ཡིན་ནོ། །དེ་དག་ལ་བཟླས་པའི་སྔགས་ནི། །ཨོཾ་དྷི་སུ་ཏི་སྨྲྀ་ཏི་མ་ཏི་བི་ཛ་ཡེ་སརྠ་ཨཛྙཱ་ན་པ་ཊ་ལཱ་པ་ཧ་རི་ཎི་ཧྲི་སྭཱ་ཧཱ། སློབ་དཔོན་དང་ནི་འདྲི་མཁན་ལ་འང༌། །སྟོན་མོ་དྲངས་ནས་ནན་ཏན་གྱིས། །ཡོན་ཕུལ་ནས་ནི་གཏང་བྱ་སྟེ། །ལྷག་པ་སྔར་བཞིན་རིག་པར་བྱ། །གསང་སྔགས་ཀྱི་གླེགས་བམ་རྩོམ་པ་ན་ཡང་སྔ་མ་བཞིན་ཐམས་ཅད་བྱ་སྟེ། ཤོག་བུ་ལ་ས་བོན་དང་ཕྱག་མཚན་གྱི་ས་བོན་ཡོངས་སུ་གྱུར་པ་ལས་བྱུང་བའི་འོད་དཔག་མེད་ཡོངས་སུ་གྱུར་པ་བྲིས་པའི་ཡི་གེའི་ཚོགས་
ཀྱིས་དཀྲིགས་པར་རྣམ་པར་བསྒོམ་མོ། །ལྷག་མ་ནི་ཐང་ཀ་རྩོམ་པའི་ཆོ་ག་བཞིན་བསྒྲུབ་པར་བྱའོ། །ཡང་ན་ནི་དམ་པའི་ཆོས་ཀྱི་གླེགས་བམ་ཡང་ཆོ་ག་འདི་ཉིད་ཀྱིས་བྱའོ། །གསུང་རབ་ཀྱི་ཨརྒྷའི་ཆོ་གའོ།། །།