ལྷ་ལྷག་པར་གནས་པ་དང་། གཤེགས་སུ་གསོལ་བའི་ཆོ་ག
སྐུ་གཟུགས་ལ་སོགས་མཚན་ཉིད་བཟང༌། །མཚན་མོ་ལྷག་པར་གནས་པར་བྱ། །དེ་ནས་ཤར་དུ་ཞལ་ཕྱོགས་པའི། །ཡང་ན་གཞན་དུ་ཕྱོགས་ཏེ་གཞག །རྡོ་རྗེ་ཁུ་ཚུར་ཡུངས་ཀར་བཅས། །གཡས་དང་གཡོན་པའི་སྦྱོར་པ་ཡིས། །ལན་གསུམ་ངེས་པར་བསྐོར་བྱ་ཞིང༌། །དེ་ནས་མེ་དང་ཆུ་ལ་དོར། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། སྦྱང་བའི་སྔགས་སོ། །གསེར་སྣོད་ལ་སོགས་རྣམས་དང་ནི། །གོས་གཞན་ཀདྡྐ་ཎཱ་སོགས་དང༌། །ཤཱི་ཏ་ལི་ཀཱ་ལ་སོགས་དང༌། །ཁམ་ཕོར་སོགས་ཀྱིས་ངེས་པར་བྱ། །མཆོད་ཡོན་ལ་སོགས་བསང་གཏོར་བར། །སྣོད་ནི་མནྗིའི་སྟེང་དུའོ། །ཟངས་ཀྱི་སྣོད་ནི་ཤིན་ཏུ་ཡང༌། །ལས་ཀུན་པ་ལ་རབ་ཏུ་ཤིས། །ཨོཾ་པྲ་བ་ར་སཏྐཱ་རཱརྒྷུ་མྤྲ་ཏཱིཚྪ་སྭཱ་ཧཱ། ལག་པ་དག་ཁ་སྦྱར་པས་དུང་གི་མཆོད་ཡོན་ནོ། །ཨོཾ་པྲ་བར་སྟྐྡ་རཱ་པཱ་དྱཾ་པྲ་ཏཱིཚྪ་སྭཱ་ཧཱ། །ཞེས་པས་མཐེ་བོང་མཛུབ་མོ་དང་བཅས་པ་དག་གིས་མེ་ཏོག་གཅིག་བླངས་ནས་འགྱིད་བ་དང་བཅས་པས་མཐེ་ཆུང་དང་མཐེ་བོང་དག་བཀྲོལ་བས་ཞབས་པ་སིལ་ལོ། །ཨོཾ་པྲ་བ་ར་ས་དཀར་རཱ་ཙ་མ་ནི་པྲ་ཏཱིཙྪ་སྭཱ་ཧཱ། །མཛུབ་མོ་དང་མཐེ་བོང་དག་གིས་ཆུ་བླངས་ཏེ་དབུལ་བར་བྱའོ། །ཨོཾ་པྲ་བ་ར་སྡྐཱར་པྲོཀྵ་ཎཾཔྲ་ཏཱི་ཚཚ་སྭཱ་ཧཱ། །ལག་པས་ཀུ་ཤའི་ཆུན་པོས་བསང་གཏོར་རོ། །མཆོད་ཡོན་ལ་སོགས་པ་འདི་ཐམས་ཅད་རྣམ་པ་གསུམ་དུ་བྱའོ། །བགེགས་དགྲའི་སྔགས་ཀྱི་སྦྱོར་ལྡན་པའི། །བ་བྱུང་ལྔ་དང་བདུད་རྩི་ལྔ། །དཱུར་བའི་པིར་ལ་སོགས་པ་ཡིས། །མི་བསྐོར་བ་ནི་བཀྲུ་བར་བྱ། །བ་ལང་ལྕི་བ་ཆུ་དང་ནི། །མར་དང་ཞོ་དང་འོ་མར་བཅས།། ལྷ་ཡི་ཁྲུས་ནི་སྒྲུབ་པ་ལ། །བ་བྱུང་ལྔ་རུ་ཤེས་པར་བྱ། །ལྕི་བ་དང་ནི་ཆུ་བོར་ནས། །འོ་མ་ཞོ་དང་མར་ལྡན་པ། །ཀ་ར་སྦྲང་རྩིར་བཅས་པ་ནི། །བདུད་རྩི་ལྔ་ཞེས་འདིར་བརྗོད་བྱ། །ཨུ་དུམྦཱ་ར་ཤི་རཱི་ཥ། །ཨ་ཤྭདྠ་དང་བརྐ་ཏི། པ་ཏ་རྣམས་ནི་མདངས་འགུགས་ཕྱིར། །དེ་དག་ཤིད་ཤུན་ལྔ་ཞེས་བྱ། །དེ་ནས་བློ་དང་ལྡན་པ་ཡིས། །དྲི་བཟང་ཏིལ་མར་སྔགས་ཀྱིས་སོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། །ཤིང་ཤུན་ལྔ་དང་དྲི་ཡིས་ཀྱང༌། །དེ་བཞིན་བྱུགས་ཤིང་ངེས་པར་བཀྲུ། །ཙནྡན་གཉིས་དང་གྲནྠི་ལཱ། །དེ་བཞིན་ཁ་ཆེ་ཨ་ཀ་རུ། །དྲི་ལྔ་ཞེས་ནི་རབ་བརྗོད་དེ། །
ལྷ་ཡི་ཁྲུས་ལ་བརྟེན་པ་ཡིས། །རྒྱལ་པོ་དབང་བསྐུར་ཚུལ་དུ་ནི། །ཀླུ་དང་གར་དང་དགའ་སྟོན་ཆེ། །བློ་ལྡན་སྤྱན་སོགས་ཕྱག་བཟུང་པའི། །བུམ་པ་རྣམས་ཀྱིས་སྐུ་ཁྲུས་གསོལ། །དང་པོར་རྣམ་རྒྱལ་བུམ་པས་ཏེ། །དེ་ནས་རྣམ་སྣང་མཛད་སོགས་ཀྱིས། །སྤྱན་མ་སོགས་ཀྱིས་དེ་མ་ཐག །གཤིན་རྗེའི་གཤེད་སོགས་བུམ་པ་ཡིས། །སྔགས་པས་ཚིགས་བཅད་འདོན་ཞིང་བྱ། །དྲི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏཱ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། །རི་མོར་བྲིས་པ་ལ་སོགས་པ། །ཐམས་ཅད་མེ་ལོང་ལ་ཆུས་བཀྲུ། །རྫས་ལ་སོགས་པའི་རང་བཞིན་གྱིས། །རྫིང་བུ་དང་ནི་གཙུག་ལག་ཁང༌། །ཛཾ་གྷ་ལི་དང་དྲི་གཙང་ཁང༌། །ལ་སོགས་མེ་ལོང་ངོས་ལ་བཀྲུ། །རས་རིས་ལ་ནི་ཆུ་མེད་པའི། །གུར་གུམ་བྱུགས་ཤིང་པཉྩ་ར། །མདངས་གསལ་ཤིས་ཤིང་བཀྲ་བ་ཡི། །གོས་སར་གྱིས་ནི་ཡང་དག་དཀྲི། །ཨོཾ་བཛྲ་བཱ་ས་སེ་སྭཱ་ཧཱ། །ཨོཾ་བཛྲཱ་བྷ་ར་ཎ་བྷཱུ་ཥ་ཎྺེ་སྭཱ་ཧཱ། ཆུ་སྐྱེས་དེ་བཞིན་ཐང་ལས་སྐྱེས། །མེ་ཏོག་དམ་པ་འདི་དག་ནི། །བདག་གིས་དང་པས་དབུལ་ལགས་ཀྱི། །ཅི་བདེ་བར་ནི་བཞེས་སུ་གསོལ། །ཨོཾ་ཨཱཿ་བཛྲ་པུཥེ་ཧཱུཾ། ལྷན་སྐྱེས་དེ་བཞིན་སྦྱར་ལས་བྱུང༌། །བདུག་སྤོས་དམ་པ་འདི་དག་ནི། །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགྱེས་པར་མཛོད། །ཨོཾ་ཨཱཿ་བཛྲ་དྷུ་བེ་ཧུཾ། ལྷན་ཅིག་སྐྱེས་དང་སྦྱར་ལས་བྱུང༌། །ཤངས་ནི་ཚིམ་བྱེད་དྲི་འདི་དག །ཆོག་ཏུ་དད་པས་འབུལ་ལགས་ཀྱི། །ཅི་བདེ་བ་ནི་བཞེས་སུ་གསོལ། །ཨོཾ་ཨཱཿ་བཛྲ་གནྡྷེ་ཧཱུཾ། མུན་སེལ་འབྲུ་མར་རྩི་མར་སྐྱེས། །ལྷ་རྫས་འབར་བའི་མར་མའི་འདི། མི་ཤེས་ཐམས་ཅད་རབ་ཞིའི་སླད། །བདག་ཉིད་དད་པས་དབུལ་བར་བགྱི། །ཨོཾ་ཨཱཿ་བཛྲ་དཱིབྦྤེ་ཧཱུཾ། །ཁ་དོག་དྲི་དང་རོ་ལྡན་ཞིང༌། །བཟའ་དད་བཅའ་བར་ཡང་དག་ལྡན། །ཐམས་ཅད་སྦྱར་པའི་ཞལ་ཟས་དག་འབུལ་གྱིས་ཡང་དག་བཞེས་སུ་གསོལ། །ཨོཾ་ཨཱཿ་བཛྲ་ནཻ་བི་དྱེ་ཧཱུཾ། །རྫི་དབུ་ཁྲོན་པའི་མཐིལ་སོན་སྐྱེས། །སེམས་ཅན་ཐམས་
ཅད་ཚིམ་པར་བྱེད། །ཀུན་ནས་དག་པའི་ཆབ་འདི་དག །འབུལ་གྱིས་ཡང་དག་བཞེས་སུ་གསོལ། །ནཱ་ག་པརྞིའི་འདབ་ལྡན་ཞིང༌། །པཱུ་ག་ཛཱ་ཏི་ཡང་དག་ལྡན། །ག་པུར་དང་བཅས་ཚེམས་རྩི་དག །འབུལ་གྱིས་ཡང་དག་བཞེས་སུ་གསོལ། །ཨོཾ་ཨཱཿ་བཛྲ་མཱུ་ལེ་ཧཱུཾ། དེ་ལྟར་མཆོད་པ་བྱས་ཏེ། །དེ་ནས་སྔར་ཤད་པའི་མི་བསྐྱོད་རྡོ་རྗེ་ལ་སོགས་པའི་ཚིགས་བཅད་ཀྱིས་བསྟོད་ཅིང༌། །བཀྲ་ཤིས་གང་ཞིག་ལ་སོགས་པའི་ཚིགས་བཅད་རྣམས་ཀྱིས་ཡང་ཡང་བསྟོད་པར་བྱའོ། །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་ག་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །དེ་ཡིས་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །འགྲོ་ལ་ཕན་ཕྱིར་དེ་བཞིན་གཤེགས་པ་དགའ་ལྡན་ལྷའི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་པ། །དབང་བཅས་ལྷ་རྣམས་ཀྱིས་ནི་བསྐོར་བའི་བཀྲ་ཤིས་གང༌། །དེ་ཡིས་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །བཀྲ་ཤིས་གང་ཞིག་ཕན་མཛད་དམ་པ་གཙང་མའི་མཆོག །བསོད་ནམས་བྱ་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཐུབ་པ་ཤཱཀྱ་སེང་གེས་གང་གསུངས་པ། །དེ་ཡིས་ད་རིང་ཁྱོད་ལ་ཞི་བྱེད་བཀྲ་ཤིས་ཤོག །དེ་ཡིས་ཉེ་བར་སྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞེ་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པ་ཡིན། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་ངས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པ་ཡིན། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱི་ཚོགས་ཀྱིས་ནམ་མཁར་དེ་བཞིན་གཤེགས་པ་རི་རབ་ཀྱི་རྡུལ་ཕྲ་རབ་དང་མཉམ་པ་ཐམས་ཅད་སྤྱན་དྲངས་ཏེ་ཇི་ལྟར་རིགས་བར་མེ་ཏོག་ལ་སོགས་པ་རྣམས་དང༌། གཟུགས་རྡོ་རྗེ་མ་ལ་སོགས་པ་རྣམས་ཀྱིས་བསྟོད་པ་བྱས་ནས་མཁས་པས་བདུད་རྩི་མྱངས་ཏེ། ཞལ་བསིལ་དང་ཏཱམྦུལ་ཕུལ་ནས་ཐལ་མོ་
སྦྱར་བས་ཕྱག་འཚལ་ཏེ་མེ་ཏོག་འཐོར་ཞིང་འདི་སྐང་བརྗོད་དོ། །ཨོཾ་སརྦ་ཏ་ཐཱ་ག་ཏ་སུ་ལ་ལི་ཏ་བི་ལཱ་ས་ན་མི་ཏཻ་རྣཱ་མཱ་མི་བྷ་ག་བཱནྟཾ་ཤྲཱི་མྙྡུ་བཛྲཱ་དྱཾ་ཛཿཧཱུཾ་བཾ་ཧོཿབྲ་ཏིཙྪེ་མཾ་ཀུ་སུ་མཱཉྫ་ལིནྣཱ་ཐ་ཧོཿསམ་ཡ་སྟྭཾ་སམ་ཡ་སཏྭ་ཧཾ་ཞེས་སོ། །དེ་ནས་བདུག་སྤོས་ཐོགས་བྱས་ནས། །བུས་མོ་ས་གཞི་ལ་བཀོད་དེ།། འབྱོན་འགྱུར་མགོན་པོ་སྤྱན་འདྲེན་པའི། ཚིག་འདི་ཆེད་དུ་བརྗོད་པར་བྱ། །བཅོམ་ལྡན་འཇམ་པའི་རྡོ་རྗེ་མཆོག །རིག་སྔགས་རྒྱལ་ལ་ཕྱག་འཚལ་ལོ། །མགོན་པོ་ཐུགས་བརྩེའི་བདག་ཉིད་ཅན། །རབ་ཏུ་ངས་བ་བགྱིད་པར་འཚལ། །སེམས་ཅན་བསོད་ནམས་སྤེལ་ཕྱིར་དང༌། །བྱང་ཆུབ་སེམས་ནི་བསྐྱེད་པའི་ཕྱིར། །བཅོམ་ལྡན་བདག་ནི་དེར་གུས་ལ། །བཀའ་དྲིན་དག་ནི་མཛད་པར་འོས། །ཇི་ལྟར་རྫོགས་པའི་སངས་རྒྱས་ཀུན། །དགའ་ལྡན་དུ་ནི་བཞུགས་བ་ལས། །ལྷ་མོ་སྒྱུ་འཕྲུལ་ལྷུམས་ཞུགས་པ། །དེ་བཞིན་འདིར་ནི་བཞུགས་སུ་གསོལ། །ཁྱིམ་གནས་རྣམས་ཀྱི་དོན་སླད་དང༌། །བྱང་ཆུབ་སེམས་ནི་འཕེལ་སླད་དུ། །མེ་ཏོག་ལ་སོགས་འདི་བཞེས་ལ། །འདི་རུ་མགོན་པོ་རྟག་བཞུགས་གསོལ། །སངས་རྒྱས་འགྲོ་འཁོར་བྱ་དོན་སྩོལ། །དགྲ་བཅོམ་བྱང་ཆུབ་སེམས་རྣམས་དང༌། །གང་གཞན་གསང་སྔགས་ལྷ་རྣམས་དང༌། །ལྷ་དང་འཇིག་རྟེན་སྐྱོང་བ་དང༌། །འབྱུང་བོ་བྱང་ཆུབ་བསྟན་ངས་དང༌། །སེམས་ཅན་བསྟན་ལ་མངོན་དགའ་བ། །གང་སུ་སངས་རྒྱས་སྤྱན་མངའ་རྣམས། །བདག་ལ་དགོངས་པར་མཛད་དུ་གསོལ། །བདག་ནི་ཆེ་གེ་རྡོ་རྗེ་ཆེ། །རིག་པའི་རྒྱལ་པོ་འདི་ཡིས་ནི། །ཅི་ནུས་པ་ཡི་ཉེར་སྤྱོད་ཀྱིས། །རབ་ཏུ་ངས་པ་གྱི་བར་འཚལ། །སྐུ་གཟུགས་རབ་ཏུ་ངས་པའི་ཕྱོགས་ལ་ནི། །བསྙེན་པ་ལ་སོགས་བགྱི་བར་འཚལ། །ཞེས་སོ། །བདག་དང་སློབ་མར་བཅས་པ་ལ། །རྗེས་སུ་བརྩེ་བ་ཉེར་བཟུང་ནས། །དམ་ཚིག་དང་བཅས་ཐམས་ཅད་ནི། །ཉེ་བར་གནས་པར་མཛད་པར་འོངས། །ཞེས་སོ། །ལུགས་མ་ལ་སོགས་པའི་སྐུ་གཟུགས་ལ་དང་པོར་གསོལ་བ་གདབ་པ་གསུམ་བྱས་ནས་སྒྲུབ་པ་ཆེན་པོའི་མཐར། ལུགས་མ་ལ་སོགས་པ་སྐད་ཅིག་གིས་སམ། ཁང་པ་བརྩེགས་པ་ལ་སོགས་པའི་དབུས་སུ་བཞུགས་
པའི་དཀྱིལ་འཁོར་བའི་བདག་ཉིད་འཆད་པར་འགྱུར་བའི་རིམ་པས་མིག་ལ་སོགས་པ་བྱིན་གྱིས་བརླབས་ཏེ་དམ་ཚིག་སེམས་དཔའ་རྣམ་པར་བསམས་ཏེ་དེའི་ཐུགས་ཀའི་སྔགས་ཀྱིས་སྔར་བཤད་པའི་དེ་བཞིན་གཤེགས་པ་འཇམ་པའི་རྡོ་རྗེ་ལ་སོགས་པའི་དཀྱིལ་འཁོར་གྱི་འཁོར་ལོའི་རྣམ་པ་ཡོངས་སུ་གྱུར་པའི་ཡེ་ཤེས་སེམས་དཔའི་རང་བཞིན་རྣམས་ཛཿ་ཧཱུཾ་བཾ་ཧོཿ་ཞེས་པས་གཤིན་རྗེས་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་རྣམས་ཀྱིས་དགུག་པ་དང་གཞུག་པ་དང་བཅིང་བ་དང་དབང་དུ་བྱའོ། གླེགས་བམ་དང་རིག་སྔགས་དང་བཟླས་པའི་ཕྲེང་བ་རྣམས་ལ་ནི་གསུང་རྡོ་རྗེ་ཡེ་གེའི་རྣམ་པ་ཡོངས་སུ་གྱུར་པའི་སེམས་དཔའ་གཞུག་གོ །གཙུག་ལག་ཁང་ལ་སོགས་པ་ལ་ནི་རྣམ་པར་མཛད་དེའི་རྣམ་པ་ཡོངས་སུ་གྱུར་པ་བཅུག་སྟེ་མེ་ཏོག་ལ་སོགས་པས་ཡང་དག་པར་མཆོད་དེ་སྔ་མ་བཞིན་དུ་ཡི་གེ་བརྒྱ་པ་ཡོངས་སུ་བཟླས་བར་བྱའོ། །དེ་ནས། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ནི། །སླར་ཡང་འབྱོར་པར་མཛད་དུ་གསོལ། །ཨོཾ་བཛྲ་མུཿ་ཞེས་བརྗོད་དེ་ཇི་ལྟར་རིགས་པར་གཤེགས་སུ་གསོལ་བར་བྱའོ་ཞེས་པ་ལྷ་ལྷག་པར་ངས་པ་དང༌། གཤེགས་སུ་གསོལ་བའི་ཆོ་གའོ།། །།