རབ་ཏུ་གནས་པའི་ཆོ་ག
དེ་ནས་ཉི་མ་གཞན་ལ་སྔ་དྲོའི་དུས་སུ་གཤེགས་སུ་གསོལ་བ་མ་གཏོགས་པ་ཇི་སྐད་བཤད་པ་ཐམས་ཅད་བྱའོ།། དེ་ལ་མིག་ལ་སོགས་པ་བྱིན་གྱིས་བརླབ་པ་ནི། །ཟླ་བའི་དཀྱིལ་འཁོར་དབུས་ངས་པའི། །ཀྵིཾ་ཡིག་དཀར་དང་འཁོར་ལོ་སྐྱེས། །ཞལ་དང་སྐུ་མདོག་ཕྱག་མཚན་རྣམས། །རྣམ་པར་སྣང་མཛད་རང་བཞིན་ཅན། །མིག་ལ་ས་ཡི་སྙིང་པོར་བཤད། །རྣ་བ་ལ་ངས་ཕྱག་རྡོ་རྗེ། །ཟླ་བར་ཛི་ཡིག་རྡོ་རྗེ་ངས། །མི་བསྐྱོད་པ་ཡི་གཟུགས་འདྲའོ། །ཟླ་བར་ཁཾ་དང་རིན་ཆེན་སྐྱེས། །ནམ་མཁའི་སྙིང་པོ་སྣ་ཡི་སྣང༌། །འདི་ཡི་ཞལ་མདོག་མཚན་མ་ནི། །རིན་ཆེན་འབྱུང་ལྡན་འདྲ་བའོ། །སྒྲོལ་མའི་བདག་པོར་ཡང་དག་ངས། །ཏཾ་དང་མཚོ་སྐྱེས་ལས་བྱུང་བ། །འཇིག་རྟེན་དབང་ཕྱུག་ལྕེ་ལ་སྟེ། །ཟླ་སོགས་འོད་དཔག་མེད་བཞིན་ནོ། སྤྱི་
བོར་རི་བོད་མཚན་གཟུགས་གནས། །སྐཾ་སྐྱེས་རལ་གྲི་བཟང་པོ་ལས། །ཞལ་སོགས་དོན་ཡོད་དང་མཚུངས་པའི། །འདྲེན་པ་རྣམ་སེལ་སྤྱི་བོ་ལའོ། །བླ་བར་སཾ་དང་རྡོ་རྗེ་ལས། །རྡོ་རྗེ་འཛིན་པའི་གཟུགས་བརྙན་ཅན། །སྙིང་གར་ཀུན་དུ་བཟང་པོར་བཤད། །བྱང་ཆུབ་སེམས་སུ་རྣམ་པར་བསྒོམ། །སྤྱི་བོའི་ཟླ་བར་ཨོཾ་ལས་བྱུང༌། །འཁོར་ལོ་རྩིབས་བརྒྱད་ལས་སྐྱེས་པ། །ས་ཡི་སྙིང་པོ་དང་འདྲ་བའི། །སྐུ་ཡི་རྡོ་རྗེ་རྣམ་པར་བསྒོམས། །མགྲིན་པར་ཨ་ཡིག་ལས་པདྨ། །དེར་ནི་ཨ་ཡིག་ལས་སྦྲུལ་པ། །འཇིག་རྟེན་དབང་ཕྱུག་ལྟ་བུ་ཡི། །གསུང་གི་རྡོ་རྗེ་རྣམ་པར་བསམ། །སྙིང་གའི་ཟླ་བར་ཧཱུཾ་ཡིག་ལས། །སྐྱེས་པའི་རྡོ་རྗེའི་དབུས་སུ་ནི། །སྔགས་པས་ཐུགས་ཀྱི་དབང་པོ་བསྒོམ། །ཕྱག་ན་རྡོ་རྗེ་ལྟ་བུ་གཞན། །ཐམས་ཅད་རྡོ་རྗེ་སྐྱིལ་ཀྲུང་ཅན། །ཅོད་པན་རིན་ཆེན་འོད་འཕྲོ་བ། །མགོན་པོ་ཞལ་གསུམ་ཕྱག་དྲུག་པ། །རང་འོད་ཤེས་རབ་ལུས་ཆགས་ལྡན། དེ་ནས་ལག་པ་གཡས་པས་རྡོ་རྗེ་བཟུང་སྟེ་ངས་གསུམ་དུ་བསྐོར་བ་གསུམ་བྱས་ནས་དེ་ཉིད་གསུམ་ལན་གསུམ་གྱིས་སྐུ་གསུང་ཐུགས་བྱིན་གྱིས་བརླབས་ཏེ། དངུལ་གྱི་སྣོད་མལླི་ཀཱ་ར་མིག་སྨན་མར་དང་སྦྲང་རྩིར་བཅས་པ་བཞག་ནས་གསེར་གྱི་ཐུར་མས་སྤྱན་དབྱེ་བར་བྱའོ། །ཨོཾ་བཛྲ་ནེ་ཏྲེ་ཧཱུཾ། ཨོཾ་ཙཀྵུཿ་ཨོཾ་ཙཀྵུཿས་མནྟ་ཙཀྵུ་ཤྩཀྵུ་བྲི་ཤོ་དྷ་ནི་སྭཱ་ཧཱ། ཨོཾ་བཛྲ་སཏྭ་ཨཱཿཞེས་པས་མེ་ལོང་བསྟན་པར་བྱའོ། །མེ་ཏོག་དང་བདུག་པ་ལ་སོགས་པ་རྣམས་ཀྱིས་ཕྱོགས་སྐྱོང་བ་རྣམས་ཀྱང་འབད་པས་མཆོད་པར་བྱ་སྟེ། །ཨོཾ་ཨིནྡྲ་ཡ་སྭཱ་ཧཱ། ཨོཾ་ཨགྣ་ཡེ་སྭཱ་ཧཱ། ཨོཾ་ཡ་མཱ་ཡ་སྭཱ་ཧཱ། ཨོཾ་ནཻ་རྲྀ་ཏེ་སྭཱ་ཧཱ། ཨོཾ་བ་རུ་ཎཱ་ཡ་སྭཱ་ཧཱ། ཨོཾ་བཱ་ཡ་བེ་སྭཱ་ཧཱ། ཨོཾ་ཀུ་བེ་རཱ་ཡ་སྭཱ་ཧཱ། ཨོཾ་ཨི་ཤཱ་ནཱ་ཡ་སྭཱ་ཧཱ། ཨོཾ་ཨུརྡྷཾ་བྲ་ཧྨ་ཎེ་སྭཱ་ཧཱ། ཨོཾ་ཨཱ་དྷོཿཔྲྀ་ཐི་བྱཻ་སྭཱ་ཧཱ། ཨོཾ་བེ་མ་ཙི་ཏྲི་བྷྱཿསྭཱ་ཧཱ། ཞེས་པས་སོ། །དེ་ནས་གླུ་དབྱངས་སིལ་སྙན་སོགས། །ལེགས་དཀྲོལ་འདི་ཡིས་བཟོད་གསོལ་བྱ། །གང་ཡང་རྫོགས་པའི་སངས་རྒྱས་དང༌། །ལྷ་དང་དེ་ཡི་སྲས་རྣམས་དང༌། །ཚངས་སོགས་ལྷ་ཡི་ཚོགས་རྣམས་དང༌། །འབྱུང་བོ་ཀུན་གྱིས་བཟད་མཛད་དེ། །སྦྱིན་པའི་བདག་པོ་ཆེན་པོ་ལ། །ཀུན་དུ་ཞི་དང་བདེ་
ལེགས་མཛོད། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །གང་འདིར་རབ་ཏུ་ངས་གྱུར་ལ། །བསྐལ་པ་འམ་བསྐལ་པ་བརྒྱ་རུ་ཡང༌། ས་ཆུ་མེ་དང་རླུང་རྣམས་ལས། །ལྷ་རྣམས་ཀུན་གྱིས་བསྲུང་དུ་གསོལ། །སློབ་དཔོན་སློབ་མར་བཅས་པ་ཡི། །བུ་དང་ཚ་བོ་འང་སྲུང་མཛད་དེ། །རབ་ཏུ་དགྱེས་པའི་ཐུགས་ཀྱིས་ནི། །རང་ངས་བཟང་པོར་གཤེགས་སུ་གསོལ། །དེ་ནས་བརྩེ་ལྡན་བླ་མ་ཡིས། །སློབ་མ་བོས་ནས་འདི་སྐད་སྨྲ། །ཁྱོད་ཀྱིས་སྔོན་དུ་གང་གསོལ་པ། །རབ་ངས་མཆོད་ཡོན་མཆོད་པ་དག །དེ་ནི་ང་ཡིས་བྱས་ཟིན་གྱི། །དེ་ནི་ཅི་བདེར་མཆོད་པ་གྱིས། །དྲི་གཙང་ཁང་སོགས་བཞུགས་ནས་ནི། རབ་སྦྱིན་ཉེས་པར་འགྱུར་མ་ཡིན། །ཨོཾ་སུ་བྲ་ཏིཥྛ་བཛྲཱ་ཡ་སྭཱ་ཧཱ། །ཞེས་བརྗོད་དེ་ཁྲི་ལ་སོགས་པར་བཞག་ནས་མཉེས་པར་བྱའོ།། དེ་ནས་བཟོ་བོ་ལ་སོགས་དང༌། །གཞན་རྣམས་ལ་ཡང་མཆོད་པར་བྱ། །དེ་བཞིན་མགོན་མེད་རྣམས་ལ་ཡང༌། །སྦྱིན་པ་ཇི་ལྟར་ནུས་པ་སྦྱིན། །དོང་དགང་རབ་ཏུ་ངས་པ་ལ། །འཁོར་ལོར་སྦྱིན་སྲེག་གང་ནུས་པ། །དེ་ཀུན་སློབ་དཔོན་ཉིད་ཀྱིས་ཞེས། །རྡོ་རྗེ་མཆོག་ནི་འཛིན་པས་གསུངས། །སྔར་བཞིན་སེང་གེ་འཕྲོག་བྱེད་ལ་སོགས་པའི། །ལུགས་མ་ལ་སོགས་ཀུན་ཀྱང་རབ་ངས་བྱ། །དཔལ་ལྡན་འདུས་པའི་དཀྱིལ་འཁོར་དབང་བསྐུར་བ། །ལྷ་རྣམས་ཀུན་ལ་ཀུན་དུ་དབང་བྱེད་འགྱུར། །རྣམ་པར་སྣང་མཛད་རྣལ་འབྱོར་མཆོག །སྔགས་པས་ཆོ་ག་བཞི་བསམས་ནས། །རྫིང་བུ་ལ་སོགས་དེ་དག་རྣམས། །སྐུའི་དབང་པོ་སྟེ་ཆུ་ལྷའི་གཟུགས། །ཨོཾ་བཛྲ་བ་རུ་ན་ཧཱུཾ་ཞེས་པ་འདི་ཡོངས་སུ་གྱུར་པ་ལས་ཀླུ་བརྒྱད་དུ་བྱས་ཏེ། །ལུའི་ངས་ཡེ་ཤེས་ཀྱི་བདུད་རྩིའི་ཆུའི་བདག་ཉིད་རྡོ་རྗེའི་ཆུ་ལྷར་བལྟས་ཏེ། ཨོཾ་བཛྲ་སྟྭ་ས་མ་ཡ་སྟྭཾ་ཞེས་བརྗོད་དོ། །རྒྱལ་བོའི་དཀྱིལ་འཁོར་ཡེ་ཤེས་ཀྱི་བདུད་རྩིའི་ཚུལ་གྱིས་སྤྱན་དྲངས་པ་དེ་ཉིད་དུ་བཅུག་པས་དེ་ཉིད་ཀྱིས་ཡོངས་སུ་གང་སྟེ་ཆུའི་རྒྱུན་གྱིས་འོག་གཞིའི་བར་ཁྱབ་པར་བསམ་མོ། །དེའི་དབུས་སུ་ངས་པ་དེའི་གཟུགས་བརྙན་གྱི་ཀླུ་ཀླུ་ལུས་གདེངས་ཀ་ཅན་སྤྱི་བོར་འཁོར་ལོ་འཛིན་པ་ཤར་ལ་
སོགས་པའི་ཕྱོགས་དང་ཕྱོགས་བྲལ་རྣམས་སུ་གསེར་ལ་སོགས་པ་ལས་ཡོངས་སུ་བསྒྲུབས་པའི་ཀླུའི་དབང་པོ་རྣམས་དངོས་སུ་གཞག་པར་བྱའོ། །འདི་ལྟ་སྟེ། མཐའ་ཡས་གསེར་ལས་བྱས་པ་སྟེ། །དེ་བཞིན་ནོར་རྒྱས་བུ་དངུལ་ལས། །འཇོག་པོ་ཟངས་ལས་བྱས་རིག་བྱ། །ཁར་བ་ལས་ཀྱང་ཀརྐོ་ཊ། །དེ་བཞིན་ར་གན་གྱིས་པདྨ། །ཞ་ཉེ་དཀར་པོས་པདྨ་ཆེ། །དེ་བཞིན་ཞ་ཉེས་དུང་སྐྱོང་ངོ༌། །ལྕགས་ལས་དེ་བཞིན་རིགས་ལྡན་ཡིན། །དེ་བཞིན་དུ་ཀུན་དགའ་རབ་ལ་སོགས་པ་རྣམས་ཀྱང་རྡོ་རྗེ་རྣམ་པར་སྣང་མཛད་ཡོངས་སུ་གྱུར་པ་ལས་ཇི་ལྟ་བ་བཞིན་དུ་དེའི་རྣམ་པས་རབ་ཏུ་ངས་པར་བྱའོ་ཞེས་པ་རབ་ཏུ་ངས་པའི་ཆོ་གའོ།། །།