ལེའུ་བཅུ་གསུམ་པ། རྡོ་རྗེའི་དམ་ཚིག་བཀོད་པ་དེ་ཁོ་ན་ཉིད་ཀྱི་དོན་སྒོམ་པ་མངོན་པར་རྫོགས་པར་བྱང་ཆུབ་པ་ཞེས་བྱ་བའི་འགྲེལ་པ།
ད་ནི་སྒྲུབ་པ་ཆེན་པོ་ཞེས་གྲགས་པའི་བཟླས་པ་གཙོར་སྟོན་པའི་ལེའུ་གསུངས་པ། དེ་ནས་ཞེས་པ་ལ་སོགས་པ་སྟེ་དད་པོ་འདིར་ནི་གོང་མའི་དངོས་གྲུབ་ཀྱི་ཐབས་བཞི་ལ་བསྟོད་པ་སྟེ་ཡེ་ཤེས་ཉིད་རྡོ་རྗེ་སྟེ་དེ་ཉིད་མཆོག་གོ །འཛིན་པ་ནི་མངའ་བའི་དོན་ཏོ། །ཐུབ་པ་ཞེས་པ་ནི་ལུས་ལ་སོགས་པའི་ལས་ཡོངས་སུ་དག་པའོ། །དོན་ཀུན་ནི་ཀུན་དོན་ནོ། །དེ་ལ་བྱང་ཆུབ་ཆེན་པོའི་ཚུལ་ཞེས་པ་ནི་ཐབས་བཞི་པོ་ཉིད་དོ། །སངས་རྒྱས་ནི་སྐུའོ། །ཆོས་ནི་གསུང་ངོ༌། །སྔགས་ནི་ཐུགས་ཏེ་དེའི་ཚུལ་དུ་གྱུར་པས་ན་བཞི་པོ་སྟེ་བཟང་པོ་དང་ཤེས་པ་དང་བརྟན་པ་སྟེ་ཨེ་མའོ་ཞེ་འོ། །མ་སྐྱེས་པའི་ཆོས་རྣམས་ཀྱང་ཐབས་བཞི་པོ་འདི་དག་སྟེ་འབྲས་བུ་དང་བཅས་པས་ཁྱད་པར་ཅན་ཞེའོ། །ད་ནི་དེ་དག་གི་སེམས་ལ་འདོད་པ་ཞུས་པ་གསུངས་པ། སྔགས་རྣམས་ཐམས་ཅད་བསྡུས་པའི་མཆོག་གོ །ཅེས་པ་ལ་སོགས་པ་སྟེ། ལྷ་རྣམས་ཀྱི་མཆོག་རྡོ་རྗེ་མི་ཕྱེད་པ་གསུམ་བསྒོམས་པས་སྐུ་གསུམ་དང་བདེ་བ་ཆེན་པོའི་ཡེ་ཤེས་འཐོབ་པར་འགྱུར་ཞེས་ཏེ། བཟླས་པའི་སྔོན་དུ་འགྲོ་བ་ཐམས་ཅད་ལས་སྒྲུབ་པ་གཙོར་གསུངས་པ་ཡིན་ནོ། །རིགས་དང་ཞེས་པ་ནི་ཕྲེང་བའི་སྔགས་སོ། །སྔགས་རྣམས་ཞེས་པ་ནི་རང་གི་ས་བོན་དང་སྤྱན་དྲང་པའི་སྔགས་ཏེ་ཡང་གསུངས་པ། སྒྲ་ཡིག་ཐིག་ལེར་ལྡན་པ་ཡི། །མཚན་གྱི་སྔགས་ཀྱིས་དབྱུང་བར་བྱ། །ཞེས་པ་དང༌། ཕྲེང་སྔགས་ལ་ཡང་རིགས་པར་གསུངས་ཞེས་ཏེ་དེ་ཟློ་བ་ནི་རྡོ་རྗེ་ལྷ་རྣམས་ཀྱི་བཟླས་པའོ། །དེ་ཉིད་དོན་ཆེན་པོ་བྱེད་པས་ཡེ་ཤེས་མཆོག་སྟེ་དེའི་སྦྱོར་བས་སངས་རྒྱས་ཀུན་གྱི་བྱིན་གྱིས་རློབ་པ་སྟེ་དེ་བཤད་དུ་གསོལ་ཞེས་སྦྱར་རོ། །ཡང་ལས་ཀྱི་རྒྱལ་བ་མཆོག་ལ་གཏོགས་པའི་རྡོ་རྗེ་བཟླས་
པ་ཞུ་བ་གསུངས་པ། ཡེ་ཤེས་རྒྱ་མཚོ་གནས་པའི་ཞེས་པ་ལ་སོགས་པ་སྟེ། ཡེ་ཤེས་རྒྱ་མཚོ་ནི་རིག་མ་སྟེ་དེ་དང་ལྷན་ཅིག་གནས་པའི་སྐུ་གསུང་ཐུགས་ཀྱི་རྡོ་རྗེའི་མཚན་མ་ཡི་གེ་གསུམ་སྟེ་དེའི་བཟླས་པ་དང་སྦྱོར་བ་ཇི་སྙེད་པ་བཤད་དུ་གསོལ་ཞེས་སོ། །སོགས་ཞེས་པ་ནི་ཡེ་ཤེས་སེམས་དཔའོ། །དེའི་ཡོན་ཏན་གསུངས་པ། སངས་རྒྱས་དུས་གསུམ་ལས་བྱུང་རྣམས། །ཞེས་པ་ལ་སོགས་པའོ། །ལན་གསུངས་པ་དེ་ནས་ཞེས་པ་ལ་སོགས་པ་སྟེ་ཐོག་མར་ལས་ཀྱི་མཆོག་བཟླས་པ་སྟོན་ཏེ། དེ་ལ་སྔགས་ལྷ་རྣམས་ཀྱི་དོན་ཀུན་ཞེས་པ་ནི་ལས་ཀྱི་མཆོག་གི་བཟླས་པ་སྟེ། དེ་ནི་རྡོ་རྗེ་གསུམ་གྱི་མཚན་མ་ཡི་གེ་གསུམ་རྡོ་རྗེ་དབྱེ་བ་གསུམ་གྱི་ཐུགས་ཀར་བཀོད་པ་ཉིད་རྡོ་རྗེ་གསུམ་སྟེ་དེ་ལས་སྤྲོ་བ་ལ་སོགས་པ་འདི་ཡིན་ནོ། །སྐུ་གསུང་ཐུགས་ཀྱི་གནས་གསུམ་ལས། །སྤྲོ་བ་རྣམ་པ་གསུམ་དག་བྱ། །ཞེས་ཏེ། རིམ་པས་ས་བོན་རེ་རེ་ལས་སྡེ་གསུངས་པས་གཟུགས་སྦྲོ་བ་ཞེས་སོ། །དེ་ལ་མཆོད་པ་གསུངས་པ་སངས་རྒྱས་རྣམས་ཀྱི་ཞེས་པ་ལ་སོགས་པ་སྟེ། ནམ་མཁའ་ཐམས་ཅད་ཁྱད་པར་སྤྲོ་བའི་སངས་རྒྱས་དེ་དག་ལ་རང་གི་རིག་མ་ལ་ཐིམ་པའི་ཤིན་ཏུ་བདེ་བའི་མཆོད་པས་མཆོད་ཅེས་པའོ། །ཅིས་ཐིམ་ཞེ་ན། གཟུགས་ཀྱི་མཆོག་ཅེས་ཏེ་ས་བོན་དེ་ལས་འཕྲོས་པ་གཞན་ཡང་གཟུགས་ཀྱི་རྡོ་རྗེ་མ་ལ་སོགས་པ་རང་གི་རིག་མ་ལ་ཐིམ་སྟེ་བདེ་བ་དམ་པས་མཆོད་པའི་དོན་ཏོ། །ཡེ་ཤེས་རྡོ་རྗེ་ཞེས་པ་ནི་གཉིས་སུ་མེད་པའི་སེམས་དང་ལྡན་པའོ། །ཡང་ན་དབྱེ་བ་རྣམས་གསུམ་གྱིས་ཞེས་པའི་དུས་གཅིག་ཏུ་སྤྲོ་བའོ། །སོ་སོ་ཞེས་པ་ནི་རང་རེའི་ས་བོན་ལས་རང་ཁོ་ན་སྤྲོ་བའོ། །ཡེ་ཤེས་སེམས་དཔའི་སྤྲོ་བ་གསུངས་པ། ལུས་དང་ངག་སེམས་བདག་མེད་པར། །ཞེས་ཏེ། འདི་ལ་ནི་ལུས་ལ་སོགས་པའི་སྤྲོ་བའི་བདག་ཉིད་དང་མི་འདྲའོ་ཞེས་པ་སྟེ་དུས་ཅིག་ཁོ་ན་ར་རིགས་ལྔ་སྤྲོ་བའོ། །ཤེས་པ་ནི་ཡེ་ཤེས་སེམས་དཔའོ། །སེམས་ནི་ས་བོན་ནོ། །སྤྲོ་བ་རྣམས་ཀྱི་དུས་གསུངས་པ་བརྗོད་ནས་ཞེས་ཏེ་དབུགས་ཀྱི་ཡི་གེ་དང་པོ་བརྗོད་ནས་སྤྲོའོ། །བསྡུ་བའི་དུས་ནི་རྫོགས་ནས་ཞེས་ཏེ་མཆོད་པ་སླ་སོགས་པའི་ལས་རྫོགས་ནས་བསྡུ་ཞེས་ཏེ། དེ་ནི་སྙིང་པོ་ལ་བཟླས་པའོ། །དེ་ལྟར་ཡང་བཟང་པོ་ཞབས་ཀྱིས། །སྐུ་གསུངས་ཐུགས་ཀྱི་རྡོ་རྗེ་ལས། །ཞེས་པ་ནས། བདག་ཉིད་དབུས་སུ་ཐིམ་པར་བྱ། །ཞེས་པའི་བར་དུ་
ཚིགས་སུ་བཅད་པ་བཞི་གསུངས་སོ། །དེ་ལྟར་ལྷ་རྣམས་ཀྱི་ཐུན་མོང་གི་བཟླས་པ་བསྟན་ནས་ཕྱེ་བའི་རྣམ་པ་གསུངས་པ། སྐུ་དང་གསུང་ཐུགས་བྱང་ཆུབ་པ། །ཞེས་པ་ལ་སོགས་པའོ། །དེ་ལ་སྐུ་ཡང་གསུང་ལ་སོགས་པ་དང་ལྡན་པས་ན་གསུང་ཐུགས་ཞེས་ཏེ་རྟག་པའི་རྣལ་འབྱོར་པས་སྐུའི་དངོས་པོ་དང་དངོས་པོ་མེད་པར་དཔྱད་པ་ནི་སངས་རྒྱས་ཞེས་བྱ་བ་སྟེ་དེའི་བཟླས་པའོ། །གསུང་གི་དམ་ཚིག་བྱང་ཆུབ་པའི་ཚེ་དཔག་མེད་སྦྱོར་བས། སྒྲ་ཡི་རྣམ་པར་དག་སྒྲ་མིན། །ཞེས་བརྗོད་པ་ལས་འདས་པ་ཞི་བར་བརྟག་གོ །ཐུགས་ཀྱི་དམ་ཚིག་བྱང་ཆུབ་པ་རྡོ་རྗེ་སེམས་དཔའ་ཞེས་པའི་རྡོ་རྗེ་ངོ་བོ་རྣམས་གཟུང་འཛིན་དང་བྲལ་བར་དཔྱད་པའོ། །མཉམ་པ་ཉིད་ཀྱི་དོན་རྟོགས་པའི་རིན་ཆེན་འབྱུང་བའི་སྦྱོར་བ་པས་དུས་གསུམ་གྱི་སངས་རྒྱས་དག་མཉམ་ཞིང་གཉིས་སུ་མེད་པར་བརྟགས་པའོ། །དོན་ཡོད་སྦྱོར་བ་ཅན་གྱི་མཆོད་པ་ལ་སོགས་པའི་དོན་དུ་སྐུའི་སྤྲིན་སྤྲོ་བ་དང་བསྡུ་བ་བྱ་ཞེས་ཏེ། དེ་རྣམས་ནི་གཅིག་གི་བཟླས་པ་དེ་གཞན་གྱི་ཡང་ཡིན་ཏེ། འདིར་གཙོར་གསུངས་པ་ཡིན་ནོ། །ད་ནི་རིག་པ་དང་སྔགས་རྣམས་ཀྱི་བཟླས་པ་གསུངས་པ། ཁྲོ་བོའི་དམ་ཚིག་ཅེས་པ་ལ་སོགས་པ་སྟེ་ཁྲོ་བོའི་དམ་ཚིག་གསད་པ་ལ་སོགས་པ་སྦྱོར་བ་དག་གིས་ཕྲེང་བའི་སྔགས་རང་གི་དཀྱིལ་འཁོར་དུ་གྲགས་པའི་སྒྲ་དབྱུང་བའོ། །དེ་ལ་རང་གི་ཞེས་པ་ནི་གང་ཡང་རུང་བའི་ཁྲོ་བོ་བདག་པོར་བྱས་པས་དེ་སྨོས་པའི་དཀྱིལ་འཁོར་ཏེ། དེ་ལྟར་ཡང་སྒྱུ་འཕྲུལ་དྲ་བ་ལས་གསུངས་པ། ལྷ་ནི་གང་ཡང་རུང་བ་ཞིག །དཀྱིལ་འཁོར་དབུས་སུ་བཞག་ནས་ནི། །དེ་ཡི་མིང་སྨོས་རྡོ་རྗེ་ཡི། །དཀྱིལ་འཁོར་ཡིན་ཞེས་སངས་རྒྱས་གསུང༌། །ཞེའོ། །འདོད་པའི་དོན་གྱིས་སྨོས་གྱུར་པ། །ཞེས་པ་ནི་གཏི་མུག་ལ་སོགས་པ་དབུགས་ཀྱི་ཡི་གེའི་བར་དུ་བཅུག་པ་རང་གི་ས་བོན་དང་སྤྱན་དྲང་བའི་སྔགས། བསྒྲུབ་བྱའི་མིང་དང་བསྐུལ་བར་བཅས་ཏེ་བཟླས་ནས་སེར་སྣ་ཅན་ལ་སོགས་པའི་དོན་བྱས་ཞེས་པའམ་ཡང་ན་རིགས་ཀྱི་ལྷ་མོའམ་ཁྲོ་བོའི་ཕྲེང་སྔགས་ཀྱིས་ཏེ་སྒྲུབ་པ་ཆེན་པོར་འདོད་པ་ཉིད་ཡིན་ནོ། །དེ་ལ་འདོད་པའི་དོན་གྱིས་སྨོས་པ་ནི་སེར་སྣ་སྟེ་དེ་དང་ལྡན་པའི་སེམས་ཅན་ལ་ཕན་པར་དགའ་བ་ཞེས་ཏེ། འོག་མ་རྣམས་ལ་ཡང་ཕྲག་དོག་ཅན་ཞེས་པ་ལ་
སོགས་པ་སྦྱར་རོ། །གཏི་མུག་གནས་ལ་ཞེས་པ་ནི་གཏི་མུག་རྡོ་རྗེའི་རྣལ་འབྱོར་ལ་གནས་ཏེ་ཞེའོ། །གཞན་ཞེས་པ་ནི་དེའི་དོན་བྱས་པའོ། །འདོད་ཆགས་རྡོ་རྗེ་ལས་བྱུང་བ། །ཞེས་པ་ནི་དེའི་གནས་གསུམ་ནས་སྤྲོས་པ་སྟེ། ལུས་དང་ངག་དང་སེམས་ཀྱི་གཟུགས་ཀྱིས་དོན་བྱེད་དོ། །དེ་ཡང་གོང་འོག་ཏུ་སྦྱར་རོ། །འདོད་ཆགས་རྒྱ་མཚོ་ཞེས་པ་ནི་འདོད་ཆགས་རྡོ་རྗེའི་རྣལ་འབྱོར་དུ་གནས་པ་སྟེ་འོག་ཏུ་ཡང་ཤེས་པར་བྱའོ། །དམ་ཚིག་ཡང་དག་རྡོ་རྗེ་གསུམ། །ཞེས་པ་ནི་རྡོ་རྗེ་གསུམ་གྱི་རང་བཞིན་ཡི་གེ་གསུམ་མོ། །དབུ་མ་ནི་ཚེའི་ངོ་བོ་ཨ་ཏེ་དེས་ན་སྣང་བ་མཐའ་ཡས་ནི་ཚང་པག་མེད་ཅེའོ། །མ་ནིང་ཞེས་པ་ནི་སྤྲོ་བ་དང་བསྡུ་བ་མ་ཡིན་པའོ། །དེའི་དོན་ནི་རྣལ་འབྱོར་པ་གང་ཡང་རུང་བས་སྙིང་གའི་པདྨ་ལ་གནས་པའི་ཨ་སྲོག་གི་རང་བཞིན་དམར་པོ་བསམས་ཏེ། ཨོཾ་གྱིས་སྲོག་ཁ་དོག་ལྔའི་བདག་ཉིད་སྣའི་ལམ་ནས་སྤྲོས་ཏེ། ཧཱུཾ་གིས་བསྡུས་ནས་ཨ་ལ་ཐིམ་སྟེ་རིང་དུ་བརྟན་ཏེ་བཟླའོ། །ཇི་སྲིད་འདོད་པ་སྤྲོས་པའི་གནས་སམ་རང་གནས་སུ་མཚན་མ་བྱུང་ནས་དེ་ཉིད་ལ་ཐིམ་སྟེ་ཕྱིར་མི་འཆོར་བ་ནི་ཚེ་སྒྲུབ་ཡིན་ཞེས་པ་འདི་ཡིན་ནོ། །རྡོ་རྗེ་བདག་པོ་གཟུགས་ཀྱི་རྡོ་རྗེ་མ་ལ་སོགས་པའི་བཟླས་པ་ནི་འདིའི་རྣལ་འབྱོར་ཅན་གྱིས་རང་གི་བདག་པོའི་རྣམ་པར་དག་པས་དེའི་དབུས་སུ་གནས་ཏེ། ཉིན་རེ་དུས་བཞིར་སྦྱོར་བ་གསུམ་གྱི་འཁོར་གྱི་འཁོར་ལོའི་ཆགས་པ་སྐྱེས་པ་ཉིད་ཀྱིས་ཚུལ་ཇི་ལྟ་བ་བཞིན་བཟླས་ན་བྱང་ཆུབ་འཐོབ་བོ་ཞེས་ཐུན་མོང་གི་ཆོ་ག་སྟེ་དེ་ལྟར་ཡང་བཟང་པོ་ཞབས་ཀྱིས། ཉིན་རེ་ཞིང་ནི་མཚམས་པ་ཞི་ལ། །ཞེས་པ་ནས། ཀུན་ལ་དེ་ཡིས་ཤེས་པར་བྱ། ཞེས་པའི་བར་དུ་ཚིགས་སུ་བཅད་པ་ལྔ་གསུངས་སོ། །རིག་པ་ཆེན་མོ་སྤྱན་ལ་སོགས། །ཞེས་པ་ནི་འདི་རྣལ་འབྱོར་པ་ནི་མ་ཡིན་ཏེ་ཕྲེང་བའི་སྔགས་ལ་བྱའོ། །རྣལ་འབྱོར་ནི་རྡོ་རྗེའི་བདག་པོ་དང་མཐུན་པར་ཟད་དོ། འདོད་པའི་ལོངས་སྤྱོད་ཅེས་པ་ནི་བཅུ་གསུམ་པ་ལས་ལ་ནི་འདི་འབྲེལ་པའི་སྔགས་དང་མིང་དང་བསྐུལ་བས་ཕྱུང་སྟེ་ཞི་བ་ལ་སོགས་པའི་ལས་བྱས་པ་ནི་ལོངས་སྤྱོད་དེ་བརྟེན་ན་འདོད་པ་འགྲུབ་ཅེས་སོ། །དེ་གཉིས་ནི་འདོད་ཆགས་ཀྱི་སེམས་ལས་བྱུང་བའོ། །གཏི་མུག་ལས་བྱུང་བ་བསྟན་པའི་ཕྱིར་གཏི་མུག་དམ་ཚིག་ཅེས་པ་སྨོས་ཏེ། རིག་པའི་རྒྱལ་པོ་སའི་སྙིང་པོ་ལ་སོགས་པའི་བཟླས་པ་ཅན་གྱིས་ཕོ་དང་མོའི་རྣམ་པ་མེད་
པའི་ཡེ་ཤེས་ཀྱིས་གནས་མཚན་མའི་རྣམ་པ་མི་ཤེས་པའི་གཏི་མུག་སྒོམ་ཞེས་པ་འདི་ཡང་ཐུན་མོང་དང་སྦྱར་བའོ། །ཞེ་སྡང་གནས་ལས་སྐྱེས་པ་ཡང་ཁྲོ་བོའི་ཕྲེང་བའི་སྔགས་ཟློ་བ་ཅན་གྱིས་སྲོག་གཅོད་པ་ལ་སོགས་པ་ལ་ཞེ་སྡང་གི་སེམས་ཀྱིས་བྱའོ་ཞེས་པ་སྟེ་ཞེ་སྡང་རྡོ་རྗེ་སྨྲ་བ་ནི་མ་ཡིན་ནོ། །སྒྲུབ་པ་མཆོག་ཆོས་ཅན་ཞེས་པ་ནི་གསོད་པ་ལ་སོགས་པའི་ཆོ་ག་ཇི་སྙེད་པ་དང་ལྡན་པའོ། །ད་ནི་ཡེ་ཤེས་སེམས་དཔའ་བཟླས་པའི་ས་བོན་ལ་སོགས་པ་གསུངས་པ། ཡེ་ཤེས་འཁོར་ལོ་ཅན་རྣམས་ཀྱི། །ཞེས་པ་ལ་སོགས་པ་སྟེ་ཡེ་ཤེས་ཞེས་པ་ནི་ཡེ་ཤེས་སེམས་དཔའོ། །འཁོར་ལོ་ཅན་ཞེས་པ་ནི་རྟག་པའི་རྣལ་འབྱོར་ཅན་ཏེ། ཡེ་ཤེས་སེམས་དཔའི་སྙིང་གར་འཁོར་ལོའི་ལྟེ་བར་གསལ་བ་ལ་སྔགས་དོན་བསྒོམས་ཏེ་བཟླ་ཞེས་ཏེ་སྔགས་ཀྱང་ཡིན་ལ་དོན་ཡང་ཡིན་པས་དེ་སྐད་དེ། སྦྱོར་བ་འདི་ནི་ཀུན་ལ་ཤེས་པར་བྱའོ། །སངས་རྒྱས་ལྔ་ཞེས་པ་ནི་གཙོར་གསུངས་པ་སྟེ་དཀྱིལ་འཁོར་གྱི་ཐམས་ཅད་སྦྱར་རོ། །འོད་ཟེར་ལྔ་ཞེས་པ་ནི་རིགས་ལྔ་སྟེ་དེའི་དོན་ནི་བདག་གི་སྔགས་ཟློ་བ་ལ་དཀྱིལ་འཁོར་གྱི་ལྷ་ཐམས་ཅད་ཀྱིས་ཀྱང་ཟློས་ཤིང་ཡེ་ཤེས་སེམས་དཔའི་ས་བོན་དེ་ལས་རིགས་ལྔའི་གཟུགས་སྤྲོ་ཞིང་བསྡུ་ཞེས་པ་འདི་ཡིན་ནོ། །སྐུ་གསུམ་རྡོ་རྗེའི་བྱེ་བྲག་གིས། །ཞེས་པ་ནི། རྡོ་རྗེ་གསུམ་དང་ཡེ་ཤེས་སེམས་དཔའི་བྱེ་བྲག་ཅེས་པ་སྟེ། རྡོ་རྗེ་གསུམ་ལ་རིམ་པར་སྤྲོ་བ་དང་ལྷན་ཅིག་སྤྲོ་བའོ། །ཡེ་ཤེས་སེམས་དཔའ་ནི་ལྷན་ཅིག་ཁོ་ནར་ངེས་པ་ཡིན་ནོ་ཞེས་པའི་དོན་ཏོ། །ལུས་ཀྱིས་སྐུའི་ངོ་བོ་ཉིད་ཅེས་པ་ལ་སོགས་པའི་དོན་ནི། བཟླས་པའི་མཆོད་པ་ལ་རང་གི་རིགས་ཀྱི་ལྷ་མོའི་ལུས་ཀྱིས་མཆོད་ཅེས་གནས་མ་འཁྲུགས་པར་སྟོན་ཏོ། །ད་ནི་སྒྲུབ་པ་དག་ལས་ལས་ཀྱི་ཁྱད་པར་སྟོན་ཏེ། དེ་ལ་བསམ་གཏན་གྱི་ལས་དང་ཕྲེང་བའི་སྔགས་དང་འབྲེལ་པ་གཉིས་སོ། །འོ་ན་ཡང་བསམ་གཏན་ལ་སྔགས་དགོས་ལ། སྔགས་དང་འབྲེལ་པ་ལ་ཡང་བསམ་གཏན་དགོས་སོ། །བསམ་གཏན་གྱི་ལས་ལ་ཡང་གཉིས་ཏེ་རང་གི་འཁོར་ལོས་བྱ་བ་དང་བཀྲ་ཤིས་པའི་ལྷས་བྱ་བའོ། །དེ་ནི་ཞི་བ་དང་རྒྱས་པ་དང་དབང་དང་མངོན་སྤྱོད་དང་དགུག་པ་དང་བསྐྲད་པ་དང་དུག་གཞོམ་པ་ལ་སོགས་པའོ། །སྔགས་དང་འབྲེལ་པའི་དབྱེ་བ་ནི་
དེའི་སྐབས་སུ་བཤད་པར་བྱའོ། །དེ་ལ་བསམ་གཏན་གྱི་ལས་ཉེ་བར་གསུངས་པ། དཀྱིལ་འཁོར་ཆེན་པོའི་འཁོར་ལོ་ཡིས། །ཞེས་པ་ལ་སོགས་པ་སྟེ། དཀྱིལ་འཁོར་ཆེན་པོའི་འཁོར་ལོ་ལ་གནས་ཏེ་ཞེས་ཐམས་ཅད་ལ་སྦྱར་རོ། །རྡོ་རྗེ་རྩེ་ལྔ་ཞེས་པ་ནི་གཙོ་བོ་ལྔ་ཞེས་པའོ། །འདིའི་དོན་ནི་ལྷ་གང་ཡང་རུང་བ་རང་གི་ལྷ་ཡི་ལས་གཞིའི་མེ་དང་དབང་ཆེན་ལ་སོགས་པའི་དཀྱིལ་འཁོར་དུ་རྡོ་རྗེ་གསུམ་དང་ལྡན་པ་དག་གིས་གཟུགས་གཙོ་བོར་གྱུར་པ་དེ་ལས་ཀྱི་དབྱེ་བས་ཁ་དོག་བསྒྱུར་ཏེ། སྙིང་ག་རྣམས་སུ་ཡེ་ཤེས་སེམས་དཔའ་ལ་སོགས་པའི་སྔགས་དོན་བསྒོམས་ན་ལས་གང་ཡང་བྱེད་དོ་ཞེས་རང་གི་འཁོར་ལོར་བྱས་པ་འདི་ཡིན་ནོ། །བསམ་གཏན་ཉིད་རྡོ་རྗེ་བས་དེ་སྐད་དེ་འདིར་གཙོར་བྱེད་པས་བསམ་གཏན་གྱི་ལས་སོ། །ཡང་ཤིས་པའི་ལྷས་བྱ་བ་གསུངས་པ། ཞི་བ་ལ་ནི་སྤྱན་གྱི་ཚུལ། །ཞེས་པ་ལ་སོགས་པའོ། །ཚུལ་ཞེས་པ་ནི་རང་གི་ཐབས་དང་འདྲ་བའི་རྟག་པའོ། །རྡོ་རྗེ་པདྨ་ཅན་ནི་སྣང་བ་མཐའ་ཡས་སོ། །རྣམ་པར་སྣང་མཛད་ཅེས་པ་ནི་བསྒྱུར་ནས་དོན་ཡོད་རྡོ་རྗེ་གཟུང་ངོ༌། །ད་ནི་མངོན་སྤྱོད་ཀྱི་ཚུལ་གསུངས་པ། མ་ཆགས་པའི་སེམས་ཅན་དང་ཞེས་པ་ལ་སོགས་པ་སྟེ་དེ་ནི་ཐེག་པ་ཆེན་པོ་སྨད་པ་ཡིན་ནོ། །རབ་ཏུ་བསྐུལ་བ་ཞེས་པ་ནི་ཕྱི་དང་ནང་གི་གསོད་པ་ལ་མིང་དང་མཱ་ར་ཡ་ཕཊ་ཅེས་བསྐུལ་བའོ། །དེ་བསྟན་པ་ཁམས་གསུམ་གནས་པའི་ཞེས་པ་ལ་སོགས་པ་སྟེ་རྐང་པ་གསུམ་གྱི་ནང་གི་བསྟན་ཏོ། །དེ་ནས་ལས་ནི་རབ་ཏུ་བསྒྲུབ། །ཅེས་པ་ནི་ཕུར་པ་ལ་སོགས་པ་ཕྱིའི་སྟེ། ནང་གི་བྱས་ནས་ཕྱིའི་སྤྱད་དོ་ཞེའོ། །དེ་ལ་གཅིག་ཏུ་མི་བསྐྱོད་པས་མངོན་དུ་བྱ་བ་གསུངས་པ། ནམ་མཁའ་དབྱིངས་ཀྱི་དབུས་དག་ཏུ། །ཞེས་པ་ལ་སོགས་པ་སྟེ་འཁོར་ལོ་རྩེ་ལྔ་ཞེས་པ་ནི་རྡོ་རྗེ་རྩེ་ལྔ་པ་མུ་ཁྱུད་དང་བཅས་པའམ། ཡང་ན་ཁྲོ་བོའི་རྡོ་རྗེ་གདེངས་པར་ཤེས་པར་བྱའོ། །རྡོ་རྗེ་སེམས་དཔའ་ཞེས་པ་མི་བསྐྱོད་པ་བསྐྱེད་པའི་རྐྱེན་ཏེ། དེ་ཞུ་བའི་དམ་ཚིག་ལས་འཁོར་ལོ་རྩེ་ལྔ་པ། དེ་ལས་རང་གི་མཚན་མ། དེ་ལས་མི་བསྐྱོད་པ་སྟེ། རྐྱེན་འདི་ནི་རྣམ་འབྱོར་པ་གཞན་མི་བསྐྱོད་པར་བསྒྱུར་ན་བྱའི་རང་གི་ལྷའི་རྐྱེན་ནི་མ་ཡིན་ཏེ། གྲུབ་པ་ཐམས་ཅད་ནི་མཚན་མ་ཐོབ་པས་བྱ་བར་གསུངས་ལ། དེ་ནི་ཡེ་ཤེས་འགའ་ལ་དབང་ཐོབ་པ་དག་ཀྱང་
རང་གི་སྐུ་མི་སྐྱེད་ལ་ཉེ་བའི་སྒྲུབ་པ་ལ་སོགས་པ་དང་པོར་གྱུར་པ་སྟེ། དེ་ལྟར་ཡང་བཟང་པོ་ཞབས་ཀྱིས་གསུངས་པ། བརྟུལ་ཞུགས་ཚུལ་ཁྲིམས་སྔགས་ལྡན་པ། །མིག་ལུས་ལ་སོགས་བྱིན་བརླབས་པས། །ཞེས་པ་ལ་སོགས་པའོ། །དེ་ནས་གྲུབ་པའི་ཆོ་ག་ཐམས་ཅད་ལ་ལྷ་གཞན་དུ་བསྒྱུར་བ་ལ་འདི་དགོས་པར་ཤེས་པར་བྱའོ། །སངས་རྒྱས་འཁོར་ལོ་ཞེས་པ་ནི་མི་བསྐྱོད་པ་དེ་དཀྱིལ་འཁོར་ཆེན་པོས་བསྐོར་བའོ། །ཕྱོགས་བཅུ་ནས་བྱུང་སེམས་ཅན་རྣམས། །ཞེས་པ་ལ་སོགས་པས་ནི་ནང་གི་གསད་པ་གསུངས་ཏེ། སྔགས་ཀྱིས་བསྐུལ་བས་ཕྱོགས་བཅུའི་སེམས་ཅན་རྡོ་རྗེ་གཏུམ་པོས་གསང་བའི་སྦྱོར་བ་བྱས་པས་ཞི་བའི་སྐུའི་ཚུལ་གྱིས་བདག་ལ་བསྡུས་ནས་སླར་ཡང་སྤྲོ་བར་བྱ་སྟེ། ཨོཾ་ཧཱུཾ་རཀྵཾ་ཆེ་གེ་མོ་མཱ་ར་ཡ་ཕཊ་ཅེས་བསྐུལ་བའམ། རང་གི་མཚན་གྱི་སྔགས་སམ་མཱ་མ་ཀཱིའི་ཕྲེང་སྔགས་ཀྱིས་བསྐུལ་ཏེ་ཕྱག་རྒྱ་སྣ་ཚོགས་ཐོགས་པའི་རྡོ་རྗེ་སྲིན་པོ་བཀའ་ནོད་པ་དག་བཏང་བས་བསྒྲུབ་བྱ་ལ་བཅིངས་ནས་ཁྲིད་དེ་བསྐྲད་པ་དང་བརྡེག་པ་ལ་སོགས་པ་བྱ་བ་དང་གཞུག་པ་དང་བཅིང་བ་ཡང་བྱས་ཏེ། ཡང་བཀའ་སྩལ་པས་གསད་པའི་སྦྱོར་བ་བྱས་པས་རྒྱུ་མ་ལ་སོགས་པ་ཡང་ཀུན་དུད་རངས་ཏེ་འོག་ནས་འབྱུང་བའི་ཕོ་ཉ་རྣམས་ཀྱིས་ཀྱང་ཟ་བར་བསམ་ཞེས་ཇི་སྙེད་པའོ། །ཉི་མ་བདུན་དུ་ཞེས་པ་ནི་ཉི་མ་གུང་ངམ་ནམ་ཕྱེད་དག་ལ་ཞག་བདུན་བྱའོ། །འཆི་བར་འགྱུར་བ་གདོན་མི་ཟ། །ཞེས་པ་ནི་མི་སྲིད་པའི་དོན་དུ་བསྟན་པའོ། །ད་ནི་རི་མོའི་དཀྱིལ་འཁོར་གྱིས་གཟུང་བའི་ཕྱིར་བསམ་གཏན་གྱིས་བགེགས་བསྐྲད་པ་གསུངས་པ། ནམ་མཁའ་དབྱིངས་ཀྱི་དབུས་ཞེས་པ་ལ་སོགས་པའོ། །རྣམ་པར་སྣང་མཛད་རབ་ཏུ་བསྒོམ། །ཞེས་པ་ནི་དེའི་གནས་སོ། །དེའི་དོན་ནི་གསོལ་བ་གདབ་པ་དང་སྦྱིན་སྲེག་ལ་སོགས་པའི་དེ་མ་ཐག་སྟེགས་བུའི་དབུས་སུ་རྟག་པའི་ཕོ་བྲང་བསྒོམས་ཏེ། དེར་རྡོ་རྗེ་འཆང་ཆེན་པོའི་སྦྱོར་བ་གསུམ་བྱ་བ་སྟེ་དེའི་དོན་ཡང་བཟང་པོ་ཞབས་ཀྱིས། སྔོན་དུ་བསྙེན་པ་སྤྱོད་པ་ཡིས། །ཞེས་པ་ནས། ཏིང་འཛིན་གསུམ་པོ་མཆོག་ཡིན་ནོ། །ཞེས་པའི་བར་དུ་ཚིགས་སུ་བཅད་པ་ལྔ་གསུངས་སོ། །ཕྱོགས་བཅུ་ནས་བྱུང་སེམས་ཅན་རྣམས། །ཞེས་པ་ལ་སོགས་པ་ནི་གསོལ་བ་བཏབ་པས་ལངས་ནས་བགེགས་
བསྐྲད་བ་གསུངས་པ་སྟེ། སྔ་མ་བཞིན་དུ་ཕྱོགས་བཅུའི་སེམས་ཅན་དག་བསྡུ་བ་དང་སྤྲོ་བ་ལ་སོགས་པ་གཉིས་སུ་མེད་པའི་ཡེ་ཤེས་ཅན་གྱིས་བྱས་ཏེ་ལངས་ནས་རྡོ་རྗེ་གསོར་ནས་ས་ལ་ལན་གསུམ་བསྐོར་ཞིང་འོག་མའི་ཚིགས་སུ་བཅད་པ་ལན་གསུམ་བརྗོད་དོ། །བཀའི་འཁོར་ལོ་ཞེས་པ་ནི་བདག་ཉིད་དབུས་སུ་གནས་ཏེ་ཕྲེང་བ་དང་བསྐུལ་བའི་སྔགས་ཀྱིས་འཁོར་ལོའི་ལྷ་ལ་མངོན་སྤྱོད་ལ་སོགས་པའི་ལས་བཀའ་སྩལ་པའོ། །རབ་སྦྱོར་བ་ཞེས་པ་ནི་བདག་ཉིད་རྡོ་རྗེ་འཛིན་པ་ཡིན་པའི་ཕྱིར་གལ་ཏེ་བདག་གི་ཚིག་ལས་འདས་ན་ལྷ་ཡང་རུང་སྟེ། བཀའི་འཁོར་ལོའི་སྦྱོར་བས་གཞིག་པར་བྱའོ་ཞེས་བསྡིགས་པའི་དོན་ཏོ། །དེ་ཡང་བཟང་པོ་ཞབས་ཀྱིས་གསུངས་པ། འཇམ་རྒྱལ་ཁྲོ་བོས་བལྟས་ནས་སུ། །ཞེས་པ་ནས། དེ་དག་འགས་པ་གདོན་མི་ཟ། །ཞེས་པའི་བར་དུ་ཚིགས་སུ་བཅད་པ་ཕྱེད་དང་དྲུག་གོ །ཡང་མངོན་སྤྱོད་ཀྱི་ཆོ་ག་དེ་གཤིན་རྗེ་གཤེད་ཀྱིས་བྱ་བར་གསུངས་པ། སངས་རྒྱས་དཀྱིལ་འཁོར་འཁོར་ལོ་ཅན། །ཞེས་པ་ལ་སོགས་པ་སྟེ་སངས་རྒྱས་དཀྱིལ་འཁོར་ནི་རྟག་པ་ལས་གྱུར་བའི་ཕོ་བྲང་ངོ༌། །འཁོར་ལོ་ཆེ་ཞེས་པ་ནི་གཤིན་རྗེ་གཤེད་ཀྱི་དཀྱིལ་འཁོར་ཆེན་པོའོ། །རང་གི་རྡོ་རྗེ་ཞེས་པ་ནི་རང་གི་བདག་པོའི་མེ་ལོང་ལྟ་བུའི་རྣམ་པར་དག་པ་དང་སྦྱར་ནས་གཤིན་རྗེ་གཤེད་བདག་པོར་གྱུར་པའི་རྡོ་རྗེ་དཀྱིལ་འཁོར་ཏེ་སྤྱན་དྲང་བ་ཡང་ཛི་ན་ཛིཀ་ཅེས་སྦྱར་རོ། །དེ་བཞིན་ལྷ་མོ་དང་ཁྲོ་བོ་གཞན་དག་རིགས་ཀྱི་བདག་པོའི་རྣམ་པར་དག་པ་དང་སྔགས་དང་སྦྱར་ན་འཁོར་ལོའི་བདག་པོར་འགྱུར་ཏེ་དེ་ཡང་བཟང་པོ་ཞབས་ཀྱིས་གསུངས་པ་ལས། དབུས་སུ་གནས་གྱུར་གང་ཡིན་པའི། །འཁོར་ལོའི་བདག་པོར་དེ་ཤེས་བྱ། །ཞེས་བྱ་བ་ལ་སོགས་པ་གསུངས་སོ། །ཞུགས་པ་དག་ཅེས་པ་ནི་གོང་དུ་གསོད་པའི་སྦྱོར་བ་བྱས་ནས་བདག་ལ་ཞི་བའི་སྐུས་བསྡུས་པ་དག་གོ །འདི་ཡང་ཆོ་ག་ནི་མི་བསྐྱེད་པ་བཞི་སྟེ་ཁྱད་པར་དུ་ཡང་བསྐུལ་བ་ལ་རང་གི་ཕྲེང་བའི་སྔགས་སོ། །དེ་བཞིན་ཁྲོ་བོ་གཞན་ཡང་ཤེས་པར་བྱའོ། །ད་ནི་སྲུང་བའི་འཁོར་ལོ་གསུངས་པ། སྐུ་གསུང་ཐུགས་ཀྱི་རྡོ་རྗེ་འམ། །ཞེས་པ་ལ་སོགས་པའོ། །རང་གི་སྔགས་ཀྱི་ཡོན་ཏན་ནི་རིག་པའི་ལྷའོ། །གཙུག་ཏོར་ནི་ཁྲོ་བོ་གཙུག་ཏོར་རྡོ་རྗེའོ། །ཡང་ན་ཞེས་བ་ནི་གཟི་
བརྗིད་ཕུང་པོ་གཟུང་ངོ༌། །དེའི་དོན་ནི་ཐོག་མའི་ཐབས་དང་ཤེས་རབ་བསྒོམས་པའི་རྗེས་ལ་ཐེག་པ་ཆུང་ངུ་པ་དང་ཐུན་མོང་མ་ཡིན་པའི་དོན་དུ་ལྷ་གང་ཡང་རུང་བས་ཁྲོ་བོ་བཅུའི་འཁོར་ལོའི་ཆོ་ག་ཇི་ལྟ་བ་བཞིན་འབར་བར་བྱ་ཞེས་པ་འདི་ཡིན་ནོ། །དེ་ཡང་བཟང་པོ་ཞབས་ཀྱིས། ཧཱུཾ་མཛད་ཡང་ན་གཙུག་ཏོར་རམ། །ཞེས་པ་ཤློ་ཀ་གཅིག་གསུངས་སོ། །ད་ནི་བཅུ་གཅིག་པར་གསུངས་པའི་རྟག་པ་ལས་གྱུར་པའི་ཕོ་བྲང་གསུངས་པ། ནམ་མཁའ་རྡོ་རྗེ་དབུས་དག་ཏུ། །ཞེས་པ་ལ་སོགས་པ་སྟེ་དམ་ཚིག་ནི་ཕོ་བྲང་ངོ༌། །ཆོས་ནི་བྱང་ཆུབ་ཕྱོགས་ཀྱི་ངོ་བོ་ཉིད་དོ། །གནས་པ་ནི་ཉི་མ་ལ་སོགས་པའི་བདག་ཏི་དེ་ཡང་བཟང་པོ་ཞབས་ཀྱིས་གསུངས་པ། ཉི་ཟླ་ལེགས་པར་མནན་པ་ནི། །སྣ་ཚོགས་པདྨའི་ལྷ་སྟན་ཅན། །ཞེའོ། །ད་ནི་བཅུ་པར་གསུངས་པའི་རྡོ་རྗེའི་སྤྲིན་བསྡུ་བ་བྱས་ནས་ང་རྒྱལ་བྱ་བ་གསུངས་པ། མཁའ་དབྱིངས་སངས་རྒྱས་ཐམས་ཅད་ཀྱིས། །ཞེས་པ་ལ་སོགས་པ་སྟེ། རང་སྔགས་ཡི་གེ་ཡེ་ཤེས་ཚིག །ཅེས་པ་ནི་ཨོཾ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་པའོ། །ཐུགས་ཀྱི་རྣམ་པར་བསྒོམ་པར་བྱ། །ཞེས་པ་ནི་དེའི་ང་རྒྱལ་ལོ། །དེའི་དོན་ནི་རྡོ་རྗེ་ལས་བྱུང་བའི་འོད་རང་གི་འཁོར་ལོར་སྤྲོས་ནས་སླར་བསྡུས་པ་དེ་བཙུད་ནས་སྔགས་བརྗོད་དེ་ང་རྒྱལ་བྱ་ཞེས་པ་དེ་ཡིན་ནོ། །དེ་ཡང་གསུངས་པ། གཟུགས་ཅན་དོན་དུ་རྒྱལ་འོད་བྱེད། །དེ་ཡི་བདག་ཉིད་ང་ཡིན་བརྗོད། །ཅེས་སོ། །ད་ནི་ཐུན་མོང་གྲུབ་པ་གཅིག་གསུངས་པ། རྣམ་པའི་མཆོག་རྣམས་ཀུན་ལྡན་པའི། །ཞེས་པ་ལ་སོགས་པའོ། །རྡོ་རྗེ་སེམས་དཔའ་ཞེས་པ་ནི་ཆུའི་རྡུལ་ཕྲ་རབ་དག་རྡོ་རྗེ་སེམས་དཔར་བསྒོམ་པ་སྟེ་རིགས་ཀྱི་ལྷར་བསྒོམ་པའི་རྐྱེན་ནོ། །སངས་རྒྱས་རིམ་པར་བཀོད་ཅེས་པ་ནི་རྟག་པའི་རྣལ་འབྱོར་པས་ལོ་ཙ་ན་ལ་སོགས་པར་ཆུ་བསྒོམ་པ་དང༌། གཞན་ཡང་རང་གི་རིགས་གང་དང་གང་ཡིན་པའོ། །ཆུ་ཡི་སྟེང་དུ་རྐང་པས་བཅག །ཅེས་པ་སྲ་བར་གྲུབ་ནས་ཆུ་ལ་འགྲོ་བར་བྱའོ་ཞེས་པའོ། །མཉམ་པར་གཞག་ཅེས་པ་ནི་འགྲོ་བའི་དུས་སུ་རང་གི་ལྷར་སྦྱོར་བའོ། །སྤྱི་བོའི་སྟེང་དུ་ཞེས་པ་ནི་ཆུའི་ལྷའི་སྤྱི་བོར་རང་བདག་པོར་བྱེད་པའོ། །ད་ནི་ལས་ཀྱི་ཁྱད་པར་བསམ་གཏན་པ་ལས་དགྲ་དང་དེའི་དབུང་གནོན་པ་གསུངས་པ།
དབང་ཆེན་དཀྱིལ་འཁོར་བསྒོམས་ནས་སུ། །ཞེས་པ་ལ་སོགས་པ་སྟེ། འདི་སྐད་དུ་མིང་གི་ཡི་གེ་དང་པོས་བསྐྱེད་པའི་བསྒྲུབ་བྱ་མདུན་དུ་མོས་ཏེ་དེའི་རྣམ་ཤེས་དགུག་པ་ལ་སོགས་པ་བྱས་ནས། དེའི་སྤྱི་བོར་སུཾ་གྱིས་བསྐྱེད་པའི་རི་རབ་ལ་ལཾ་གྱིས་བསྐྱེད་པའི་དབང་ཆེན་སར་པོ་གྲུ་བཞི་པ་གྲྭ་ན་རྡོ་རྗེ་རྩེ་གསུམ་པས་མཚན་པ་ལ་སྣ་ཚོགས་པདྨ་དང་རྡོ་རྗེ་རྒྱ་གྲམ་དེ་ལ་ཕོ་བྲང་སྤྲུལ་ནས། དེར་ཁྲོ་བོ་སེར་པོའི་རྐང་པ་དག་གིས་བརྫིས་པ་བསྒོམས་ཏེ་རང་གི་སྔགས་བསྐུལ་བ་དང་བཅས་པ་བཟླས་ཞེས་སྟོན་པར་འགྱུར་རོ། །དཔུང་དང་ཆོ་ག་ད་ཁོ་ན་སྟེ་ཡན་མན་བསྐང་བར་བྱའོ། །དཔུང་གཞོམ་པ་གསུངས་པ། དགྲ་ཡི་འཁོར་གྱི་དམ་ཚིག་གི །ཞེས་པ་ལ་སོགས་པ་སྟེ། འདིས་ཀྱང་ཇི་སྐད་དུ། དཔུང་གི་གཟུགས་བརྙན་རུས་ཕྱེ་དང༌། །དུག་དང་ཆུ་འགྲམ་གཉིས་ཀྱི་ས་ལ་སོགས་པས་བྱས་ཏེ་དང་པོའི་ཡི་གེས་བསྐྱེད་ནས་དུར་ཁྲོད་ཀྱི་རས་མ་ལ་ཇི་སྐད་གསུངས་པའི་རྫས་ཀྱིས་བྲིས་པའི་ཕྲེང་བའི་སྔགས་མིང་དང་བསྐུལ་བར་བཅས་པས་ཁོང་པར་བཅུག་སྟེ་ནང་གི་གཞོམ་པ་དག་བྱས་ནས། ལྕགས་སམ་རུས་པའི་ཕུར་བུ་ཚད་སོར་བརྒྱད་པ་སྟེ་རྩེ་ལྔ་པ་ཧཱུཾ་ལས་བསྐྱེད་པ་ཨོཾ་གྷ་གྷ་ཞེས་པ་ལ་སོགས་པའི་སྔགས་ཀྱིས་དེའི་སྙིང་གར་ཁྲོས་ནས་གདབ་པར་བྱའོ་ཞེས་སྟོན་པར་འགྱུར་རོ། །འདིར་མ་རྫོགས་པ་ནི་བཅོ་ལྔ་པ་ལས་སྟོན་ཏོ། །བདག་གིས་ནི་ཤེས་པར་སླ་བའི་ཕྱིར་ཚད་གཅིག་ཏུ་བྲིས་སོ། །ད་ནི་རིམས་ལ་སོགས་པ་གཞིལ་བར་གསུངས་པ། གྲོང་ངམ་ཞེས་པ་ལ་སོགས་པ་སྟེ། འདིའི་དོན་ནི་གང་ཡང་རུང་བའི་རྣལ་འབྱོར་བས་ནམ་མཁའ་ལ་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ་བསམས་ཏེ། སྔགས་ཀྱི་ཕྲེང་བ་ཤཱནྟིཾ་ཀུ་རུ་ཞེས་བ་སྐུལ་ནས་བཟླས་པས་རྡོ་རྗེའི་འོད་བསྐལ་པའི་མེ་དང་འདྲ་བས་ནད་བསྲེགས་ནས་སླར་བསྡུས་པ་དང༌། རྒྱས་པ་དང་སྐྱོན་དགག་པའི་དོན་དུ་རིན་པོ་ཆེའི་འོད་རྣམས་དང༌། སངས་རྒྱས་ཀྱི་སྤྲིན་བདུད་རྩིའི་ཆོས་འཛིན་པ་རྣམས་སྤྲོས་ཏེ་དབང་བསྐུར་བར་བྱའོ་ཞེས་པ་ཡིན་ནོ། །དེའི་ཡོན་ཏན་གསུངས་པ། འདི་ཡིས་ཞེས་པ་ལ་སོགས་པའོ། །ཡི་དམ་བཅས་པ་རྫོགས་ནས་ཀྱང༌། །ཞེས་པ་ནི་གོང་དུ་བསྙེན་པ་རྫོགས་ནས་ཞེས་པ་སྟེ་ཐམས་ཅད་དུ་ཤེས་པར་བྱའོ། །ད་ནི་རི་མོའི་དཀྱིལ་འཁོར་བསྲུང་བའི་དོན་དུ་ཕུར་བུས་གདབ་པ་གསུངས་པ། རྡོ་རྗེ་བདུད་རྩི་རྒྱལ་ཆེན་པོ། །
ཞེས་པ་ལ་སོགས་པའོ། །འདིའི་དོན་ནི་བསམ་གཏན་གྱིས་བགེགས་བསྐྲད་པ་གསུངས་པ། སེང་ལྡེང་གི་ཕུར་བུ་དྲིས་བསྒོས་པ་སྲད་བུ་དམར་པོས་བཏགས་ཏེ། ཧཱུཾ་ལས་བགེགས་དགྲའི་གཟུགས་སུ་བསམས་ཏེ་སྔོན་དུ་བློ་ཡིས་རབ་ཏུ་བརྟགས་ནས། ཕྱིས་ཕྱོགས་བཅུར་རམ་གཅིག་ལས་འཕྲོས་པའི་གཟུགས་ཀྱིས་ས་ལ་བསྐོར་ཏེ། གྷ་གྷ་ཞེས་པའི་སྔགས་བརྗོད་ནས། ཐོ་བས་བརྡུངས་པས་ས་ལ་བཟུང་བ་ཡིན་ནོ། །དེ་ཡང་བཟང་པོ་ཞབས་ཀྱིས། ས་ལ་ཡོངས་སུ་བསྐོར་བྱས་ཏེ། །ཞེས་པ་ནས། བགེགས་དེ་ཐམས་ཅད་གཞོམ་པར་བྱ། །ཞེས་བྱ་བའི་བར་དུ་གསུངས་སོ། །ད་ནི་ཞི་བའི་ལས་གསུངས་པ། མདངས་བཟང་དཀྱིལ་འཁོར་དམ་པ་ནི། །ཞེས་པ་ལ་སོགས་པའོ། །འདིའི་དོན་ནི་རྟག་པའི་རྣལ་འབྱོར་པས་རང་གི་ཡེ་ཤེས་སེམས་དཔའི་སྙིང་གར་དང་པོའི་ཡི་གེས་འདོད་པའི་བསྒྲུབ་བྱ་བསྐྱེད་དེ་རྣམ་པར་ཤེས་པ་དགུག་ལ་དེར་བཞག་ནས། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྦྷ་ལོ་ཙ་ནི་སརྦ་སཱ་དྷ་ནི་ཆེ་གེ་མོ་ཤཱནྟིཾ་ཀུ་རུ་ཨོཾ་ཞེས་བརྗོད་པས། སྤྱན་ལ་སོགས་པ་རང་གི་རིགས་ཀྱི་ལྷ་མོས་ནམ་མཁའ་ཁྱབ་པར་སྤྲོས་ནས་འོད་ཀྱི་གོང་བུར་སླར་བསྡུས་ཏེ་ནད་པའི་ལུས་ལ་ཁྱབ་ནས་ནད་བསྲེགས་ནས་སླར་སྤྲོ། སྐྱོན་དགག་པའི་དོན་ཡང་བསྡུས་ཏེ་བདུད་རྩི་བུམ་པས་དབང་བསྐུར་ཏེ་ནད་པ་དེ་གཏང་བར་བྱའོ། །དེའི་ཡོན་ཏན་ནི་དེ་ཡིས་ཞེས་པ་ལ་སོགས་པ་སྟེ་གོ་སླའོ།།རྒྱས་པ་གསུངས་པ། ཟླ་བའི་དཀྱིལ་འཁོར་དབུས་སུ་ནི། །ཞེས་པ་ལ་སོགས་པ་སྟེ་འདིའི་དོན་ཡང་ཟླ་བ་ལ་གནས་པའི་དབང་ཆེན་གྱི་སྟེང་དུ་སྣང་བ་མཐའ་ཡས་སེར་པོ་བསམས་ཏེ། སྔགས་ཀྱང་གང་སྙིང་གར་འདོད་པ་བཞག་པ་སྟེ། ཨོཾ་ཀ་ཊེ་བི་ཀ་ཊེ་ཀ་ཏཾ་ཀ་ཊེ་ཆེ་གེ་མོ་པུཥྚིཾ་ཀུ་རུ་སྭཱ་ཧཱ། ཞེས་རྒྱལ་པ་ལ་ཨོཾ་གྱི་གནས་སུ་སྭཱ་ཧཱ་གཞུག་པར་བྱ་སྟེ། དེ་ཡང་བཟང་པོ་ཞབས་ཀྱིས་གསུངས་པ། ཞི་བ་དང་ནི་རྒྱས་པ་དང༌། །དབང་དང་དགུག་དང་དབྱེ་བ་དང༌། །བསྐྲད་པ་དང་ནི་མངོན་སྤྱོད་ལ། །ཨོཾ་སྭཱ་ཧཱ་ཧོ་ཛཿཧཱུཾ་ཕཊ། སྔགས་ཀྱི་མཐར་ནི་བསྒྲུབ་པར་བྱ། །ཞེའོ། །དེ་བས་ན་སྭཱཧཱས་བསྐུལ་བས་དཀར་མོ་ལ་སོགས་པས་ནམ་མཁའ་གང་བར་བསྒོམ་སྟེ། དཀར་མོ་ཞེས་པ་ནི་ལ་དཀར་བསྣམས་པའི་ཕྱིར་རོ། །དེ་ནས་ཡང་རིན་པོ་ཆེའི་འོད་ལྟ་བུར་སླར་བསྡུས་ནས་བསྒྲུབ་པའི་ལུས་དང་ངག་དང་སེམས་ལ་
དགང་བར་བྱ། རྒྱས་པ་ཁོ་ནའི་ཕྱིར་ཡང་སྤྲོས་ཏེ་ནོར་ལ་སོགས་པ་རྒྱས་པར་འདོད་ན། རིན་པོ་ཆེའི་ཆར་གྱིས་དེའི་ཁྱིམ་དགང་བ་དབང་བསྐུར་བ་དག་བྱའོ། །ཆོས་རྒྱས་པར་འདོད་ན་སྣང་བ་མཐའ་ཡས་ཀྱི་གཟུགས་ཀྱིས་སྟོབས་དང་མི་འཇིགས་པ་ལ་སོགས་པ་ཆོས་ཀྱི་སྤྲིན་བསྟན་ཏོ་ཞེས་ཁྱད་པར་རོ། །དབང་གསུངས་པ། ནམ་མཁའི་དབྱིངས་ཀྱི་དབུས་སུ་ནི། །ཞེས་པ་ལ་སོགས་པ་སྟེ། འདི་ཡང་ཟླ་གམ་ལ་གནས་པའི་ཉི་མའི་སྟེང་དུ་རྡོ་རྗེ་མཁའ་དོན་ཡོད་གྲུབ་པ་ཆོས་མཆོག་དམར་པོའི་གཟུགས་སུ་བསམས་ཏེ། འདོད་པ་སྙིང་གར་བཞག་ནས། ཨོཾ་ཏཱ་རེ་ཏུ་ཏྟཱ་རེ་ཏུ་རེ་ཆེ་གེ་མོ་བ་ཤཾ་ཀུ་རུ་ཧོཿ་ཞེས་བརྗོད་པས་སྔ་མ་བཞིན་ལས་ཐམས་ཅད་བྱའོ། །གཟི་བརྗིད་དབབ་པ་ཞེས་པ་ནི་འོད་ཟེར་ལྔའི་སྦྱོར་བས་ཞུགས་ཏེ་བསྒྲུབ་བྱ་གཟི་བྱིན་བསྐྱེད་པ་ཁོ་ནས་འགྲུབ་པོ། །ད་ནི་མངོན་སྤྱོད་དང་འབྲེལ་བའི་ཆོ་ག་གསུངས་པ། ནམ་མཁའ་རྡོ་རྗེ་སྲིན་པོ་དང༌། །ཞེས་པ་སྟེ་སྔར་བཤད་ཟིན་ཏོ། །མེ་ཡི་དཀྱིལ་འཁོར་ལ་གནས་ཏེ། །ཞེས་པ་ནི། མངོན་སྤྱོད་ལ་མི་བསྐྱོད་པ་ལ་སོགས་པ་དག་མེའི་དཀྱིལ་འཁོར་གྲུ་གསུམ་ལ་གནས་ཏེ་བྱ་ཞེས་སོ། །ད་ནི་ལྷ་དེ་དག་གི་མདོག་ལ་སོགས་པའི་བསམ་གཏན་གསུངས་པ་རྣམ་པར་སྣང་མཛད་ཅེས་པ་ལ་སོགས་པའོ། །ཞལ་གསུམ་ནི་རྣམ་པར་ཐར་པ་གསུམ་གྱི་རང་བཞིན་ནོ། །དཀར་པོ་ལ་སོགས་པའི་ཚུལ་གསུམ་ནི་སྐུ་གསུམ་གྱི་དག་པའོ། །ཕྱག་དྲུག་ནི་ཕ་རོལ་ཏུ་ཕྱིན་པ་དྲུག་གིས་དག་པ་སྟེ། དེ་དག་ནི་ཀུན་ལ་སྦྱར་རོ། །དཀྱིལ་འཁོར་གྱི་ལྷ་ལ་ཉེ་བ་དང་དགུག་པ་ལ་སོགས་པའི་ལས་ལ་ཉེ་བའི་ཁྲོ་བོའི་སྒོམ་པ་གསུངས་པ། ཁྲོ་བོ་ཆེན་པོ་གཤིན་རྗེ་གཤེད། །ཅེས་པ་ལ་སོགས་པ་སྟེ། སྲུང་བའི་འཁོར་ལོ་ཉེ་བ་ནི་མ་ཡིན། འོག་ནས་རྡོར་ཇེ་སེམས་དཔའ་བསྐྱེད་པ་སྣང་བའི་ཕྱིར་རོ། །འོག་ན་ཡང་བསམ་གཏན་ནི་དེ་འདྲའོ། །ལས་ཀྱི་ཁྱད་པར་ལ་ཉེ་བའི་ཁྲོ་བོ་གསུངས་པ། ཊཀྐི་རྒྱལ་པོ་ཞེས་པ་ལ་སོགས་པ་སྟེ་དཀྱིལ་འཁོར་གྱི་ལྷ་མ་ཡིན་པ་དང༌། སྔར་བཤད་པའི་གཏན་ཚིགས་ཀྱིས་སྲུང་བ་ལ་སོགས་པ་ཉེ་བ་ནི་མ་ཡིན་ནོ། །ཕྱག་བཞི་ཉེ་བ་ནི་གཉིས་རིག་མ་ལ་འཁྱུད་པ་སྟེ་ཐམས་ཅད་དུ་ཤེས་པར་བྱའོ། །ཞི་བ་ཞེས་པ་ནི་རིན་པོ་ཆེའི་རྒྱན་ནོ། །གཟི་བརྗིད་ཕུང་པོ་ནི་ཧཱུཾ་མཛད་དོ། །གཙུག་ཏོར་རྒྱལ་བ་ནི་གཙུག་ཏོར་རྒྱལ་པོ་སྟེ། གཞན་ཡང་ཞེས་པ་ནི་དེ་
གཉིས་ནི་བསྲུང་བར་བྱ་བ་ལ་བསྒོམ་མོ་ཞེས་པའི་དོན་ཏོ། །འདི་རྣམས་དང་མཐུན་པ་རུ་ཞེས་པ་ནི་ཤིས་པའི་ལས་དང་མཐུན་པར་ཁྲོ་བོ་དག་སྔགས་གསུངས་ཏེ། འདི་ནི་ཕྲེང་བའི་སྔགས་ཀྱི་རྗེས་ལ་སྦྱར་བའི་དན་ཏོ། །ད་ནི་གོང་མ་དེ་དག་རྡོ་རྗེ་སེམས་དཔའ་ལས་གྱུར་ཏོ་ཞེས་གསུངས་པ། ནམ་མཁའི་དབྱིངས་ཀྱི་དབུས་སུ་ནི། །ཞེས་པ་ལ་སོགས་པ་སྟེ་མེ་ལོང་ལྟ་བུ་ཞེས་པ་ནི་དེའི་ཡེ་ཤེས་ཏེ་དེ་བཞིན་དུ་གཞན་དག་ཀྱང་རང་གི་ཡེ་ཤེས་ལས་བྱུང་བར་སྦྱར་རོ། །མཚན་རྣམས་ཞེས་པ་ནི་སྐུའི་རྡོ་རྗེ་ཉིད་མཚན་ནོ། །སྒྱུ་མ་ཞེས་པ་ནི་མིག་དང་ཡིད་འཕྲོག་པའི་གཟུགས་ཀྱིས་དགའ་བར་བྱེད་པ་སྟེ་དེ་ལྟར་ཡང་སྒྱུ་འཕྲུལ་དྲ་པ་ལས། སྒྱུ་མས་དགའ་བྱེད་བཞི་ཡང་སྤྲོ། །ཞེས་སོ། །ཨུཏྤལ་མཐི་ངག་ཞེས་པ་ནི་དམར་པོའོ། །ཨུཏྤལ་ཞེས་པ་ནི་པདྨ་ཉིད་དོ། །སྒྲོལ་མ་ཞེས་པ་ནི་དམ་པའི་ཆོས་ཀྱི་ཕྱག་རྒྱ་བརྐྱང་ནས་སེམས་ཅན་དག་སྒྲོལ་བས་སོ། །གཤིན་རྗེ་གཤེད་ལ་སོགས་པའི་ཕྱག་མཚན་ནི་ཕྱི་མ་ལས་ཤེས་བར་བྱའོ། །ལྷ་མོ་དང་ཁྲོ་བོ་དེ་དག་ཀྱང་རང་གི་བདག་པོའི་རྣམ་པར་དག་པ་དང༌། སྔགས་དང་སྦྱར་ན་འཁོར་ལོའི་བདག་པོ་ཡིན་བས་རྡོ་རྗེ་དཀྱིལ་འཁོར་ཞེས་པ་ལ་སོགས་པ་སྨོས་པ་ཡིན་ནོ། །འདོད་པའི་རྒྱལ་པོ་ཞེས་པ་ནི་གཟུང་བའི་ངོ་བོ་ཡིན་པའི་ཕྱིར་རོ། །སྟོབས་པོ་ཆེ་ཞེས་པ་ནི་ཡན་ལག་གི་ཚིག་རེ་རེ་འང་སྲེད་མེད་ཀྱི་བུའི་སྟོབས་ལས་ཆེ་བའི་ཕྱིར་རོ། །རྡོ་རྗེ་སྔོན་པོ་ནི་མདོག་ལས་བཏགས་པའོ། །མི་གཡོ་བ་ནི་བྱང་ཆུབ་ཀྱི་དོན་ལ་མི་གཡོ་བ་ཉིད་ཀྱི་ཕྱིར་རོ། །འཁོར་ལོ་འབར་བས་ཡོངས་སུ་བསྐོར། །ཞེས་པ་ནི་འོད་ཟེར་གྱི་ཁ་ལས་བྱུང་བའི་འཁོར་ལོས་བསྐོར་བའོ། །དེ་ཡང་བདུད་ཀྱི་གཙུག་ཏོར་གྱི་ཡི་གེ་དང་ལྡན་པས་གཙུག་ཏོར་འཁོར་ལོ་ཞེས་སོ། །སུམྦྷ་ནི་སྔགས་རྣམས་ཀྱི་བདག་པོ་གཉིས་བས་མཛེས་པའི་ཕྱིར་རོ། །འགོག་པ་ཞེས་པ་ནི་དབུགས་འགོག་པའི་ཁྲོ་བོའི་སྦྱོར་བ་སྟེ། དེས་དགུག་པ་ལ་སོགས་པའི་ལས་རྡོ་རྗེ་ལྟར་གཞན་གྱིས་མི་ཕྱེད་པ་གྲུབ་ཅེས་པའི་དོན་ཏོ། །ལེའུ་བཅུ་གསུམ་པའི་འགྲེལ་པ་རྫོགས་སོ།། །།