ལེའུ་བཅུ་བདུན་པ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་དང་སྡོམ་པ་རྡོ་རྗེའི་བྱིན་གྱིས་རླབས་ཀྱི་རྒྱལ་པོ་ཞེས་བྱ་བའི་འགྲེལ་པ།
ད་ནི་སྒྲུབ་པ་ཆེན་པོར་གྲགས་པ་ལ་གཏོགས་པ་བསྲུང་བའི་དམ་ཚིག་གཙོར་གསུངས་པ་དེ་ནས་ཞེས་པ་ལ་སོགས་པ་སྟེ། གསོལ་བ་བཏབ་ཅེས་པ་ནི་བསྲུང་བ་ལ་སོགས་པའི་དམ་ཚིག་ཞུ་བར་འདོད་པའི་བསམ་གཏན་བསྟོད་པའི་ཕྱིར་རོ། །ཡེ་ཤེས་ཆེ་ཞེས་པ་ནི་སྟོང་པ་ཉིད་ཀྱི་ཡེ་ཤེས་པས་སོ། །རྡོ་རྗེ་དབྱིངས་ཞེས་པ་ནི་རྡོ་རྗེ་སེམས་དཔའི་རང་བཞིན་དུ་བཟུང་ན་རྐྱེན་དུ་སྨྲ་བ་ཡིན་ནོ། །རྡོ་རྗེ་གསུམ་མཆོག་ནི་སྐུ་ལ་སོགས་པའི་མཆོག་གོ །དཀྱིལ་འཁོར་གསུམ་ཞེས་པ་ནི་སྐུ་ལ་སོགས་པའི་དཀྱིལ་འཁོར་ཁོ་ན་མཆོག་ཅེའོ། །དེ་བཞིན་དུ་གཞན་ལ་ཡང་རང་གི་ཡེ་ཤེས་རྣམས་དང་ཡོན་ཏན་ལས་རྗེས་སུ་དཔགས་ཏེ་ཤེས་པར་བྱའོ། །དེའི་དོན་གསུངས་པ། སངས་རྒྱས་ཀུན་གྱིས་བསྐུལ་བ་ཡི། །ཞེས་པ་ལ་སོགས་པའོ། །བསྟོད་ཚིག་དག་ཁོ་ན་ལ་རྡོ་རྗེ་འཆང་བས་ཡོངས་སུ་དག་པ་བསྡུས་ཏེ་གསུངས་པ། དེ་ནས་ཞེས་པ་ལ་སོགས་པ་སྟེ་ཆོས་ཀྱི་དབྱིངས་ནི་སྟོང་པ་ཉིད་ཀྱི་ཡེ་ཤེས་ཏེ་དེ་ཨ་ལ་སོགས་པའི་ཡི་གེ་མེད་ཅེའོ། །འོད་གསལ་བ་ནི་མེ་ལོང་ལྟ་བུའི་ཡེ་ཤེས་སོ། །ཡོངས་སུ་དག་པ་ནི་བྱ་བ་ནན་ཏན་གྱི་ངོ་བོའོ། །དྲི་མ་མེད་པ་ནི་ལྷག་མ་གཉིས་ཏེ་ནམ་མཁའི་དབྱིངས་བཞིན་ཞེས་པ་ནི་ཀུན་ལ་སྦྱར་རོ། །ད་ནི་འདོད་པའི་དོན་གསོལ་བ་བཏབ་པ་ཁོ་ན་ལ་གསུངས་པ་དེ་ནས་ཞེས་པ་ལ་སོགས་པའོ། །དམ་ཚིག་བཞི་ཞེས་པ་ནི་བསྲུང་བར་བྱ་བའི་སྡོམ་པ་བརྟུལ་ཞུགས་ཀྱི་སྐབས་སུ་བསྟན་མ་ཐག་པའོ།
ཤ་ཆེན་ཞེས་པ་ནི་བཟའ་བའི་དམ་ཚིག་སྟེ་བཤད་གཅི་ལ་སོགས་པ་ཡང་སྦྱར་རོ། །འདི་ནི་སྐུ་ལ་ཉེ་བར་བརྟགས་པ་སྟེ་དེ་བཞིན་འོག་ཏུ་ཡང་སྦྱར་རོ། །ཁམས་གསུམ་པ་རྣམས་ཀྱི་དམ་ཚིག་ལས་རང་སངས་རྒྱས་ཀྱི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། ལུས་ཀྱི་སྟོན་པ་ནི་ངག་གི་ལུས་ཀྱི་བྱ་བས་སེམས་ཅན་དག་གི་དོན་བྱེད་ལ། ཐུགས་རྡོ་རྗེ་ཆེན་པོའི་སྔགས་པས་དེ་བསྡུ་བའི་ཕྱིར་དེའི་ཚུལ་གནས་པ་ནི་རྡོ་རྗེ་སྐུལ་རབ་ཏུ་གནས་ཤེའོ། །འདིར་ནི་རང་སངས་རྒྱས་སྒྲུབ་པ་ནི་མ་ཡིན་ཏེ། ཐེག་པ་ཆེན་པོའི་དོན་མེད་པར་འགྱུར་བའི་ཕྱིར་རོ། །དེ་བཞིན་འོག་ཏུ་ཡང་ཤེས་པར་བྱའོ། །བྱེད་པའི་ཡེ་ཤེས་སྤངས་ཞེས་པ་ནི་གཉིས་སུ་མེད་པ་མི་ཤེས་པའོ། །མོས་པ་ཆུང་དུ་ཞེས་པ་ནི་ཐེག་པ་ཆེན་པོ་ལ་མ་མོས་པའོ། །གཏི་མུག་ལམ་གྱིས་ཞེས་པ་ནི་མཚན་མའི་རྣམ་པར་ཤེས་པ་མེད་དེ་དེ་ལས་ངག་སྒོམ་པ་ནི་བྱིས་པ་དག་སྐྲག་པར་བྱེད་པས་ན་འཇིགས་ཤིང་ཞེས་ཏེ། །དེ་ཁོ་ནས་སངས་རྒྱས་སུ་སྦྱོར་རོ། །ད་ནི་ཨོཾ་དང་གུནྡྷེ་ལས་གྱུར་པའི་ཚངས་པ་གདོང་བཞི་པ་སེར་པོ་ཕྱག་རྒྱ་ཆེན་པོ་བཞི་དང་ལྡན་པ་གུནྡྷེ་ཐོགས་པ་མི་བསྐྱོད་པས་དབུབ་རྒྱན་པ་བསྒོམས་ཏེ་དེའི་དམ་ཚིག་བསྒོམས་ན་ཕྱིས་འདོད་བ་ཅན་གྱིས་སྐུ་རྡོ་རྗེར་འགྱུར་ཞེས་ཏེ། དེ་བཞིན་དུ་དྲག་པོ་དང༌། བྱི་སྣུའི་རིགས་ལས་ཤེས་པར་བྱའོ། །དེ་ལ་དྲག་པོ་ནི་ཨ་དང་ཏྲི་ཤཱུ་ལ་ལས་བསྐྱེད་པ་ནག་མོའོ། །བྱི་སྣུ་ནི་ཧཱུཾ་དང་དུང་ལས་བསྐྱེད་པ་དཀར་པོའོ། །དེ་གཉིས་ཀྱི་ཡང་འགྱུར་བ་གསུངས་པ། གཏོགས་འདོད་ཅེས་ཏེ་སྨད་ཆེན་ནི་དྲག་པོ་སྟེ་འདོད་པ་ཙམ་གྱིས་གསུང་ཐུགས་རྡོ་རྗེའི་སྐུར་འགྱུར་རོ། །གནོད་སྦྱིན་མ་ལ་སོགས་པའི་དམ་ཚིག་ཀྱང་ངོ་བོ་ཙམ་གསུངས་ཏེ། དེ་དག་ཀྱང་རང་རང་གི་ས་བོན་ལ་སོགས་པ་སྤྱིའི་ཆོ་གས་བསྒྲུབ་པོ་ཞེས་སྔར་བཤད་ཟིན་ཏོ། །འོག་ཅེས་པ་ནི་ཕལ་ཆེར་རིའི་འོག་ན་གནས་པ་ཡིན་ནོ། །བདུག་པ་ཞེས་པ་ནི་ཚིལ་ཆེན་གྱི་བདུག་པའོ། །གནས་ཀྱི་མཚན་ཞེས་པ་ནི་མ་མོའི་གནས་སོ། །ཕན་འདོད་པ་ཞེས་པ་ནི་སྙིང་རྗེས་བརླན་པའི་རྣལ་འབྱོར་པ་སྟེ་དེས་བསྡུས་པའི་དངོས་པོ་ངོ་བོ་ཉིད་འབྱུང་བའི་དམ་ཚིག་སྤྱད་པར་བྱ་ཞེས་བསྡུས་པའོ། །ཉན་ཐོས་ལ་སོགས་པ་དག་ཀྱང་ཐེག་པ་ཆེན་པོའི་སྒྲིབ་པ་གདོང་སྦྱོང་བས་ཁམས་གསུམ་པ་
ཞེའོ། །དེ་དག་གི་དོན་ཡང་གསུངས་པ། ཅི་རིགས་འགྲོ་བའི་དོན་དང་ནི། །ཞེས་སོ། །ཡང་ལུས་ལ་སོགས་པའི་དམ་ཚིག་གསུངས་པ། དེ་ནས་ཞེས་པ་ལ་སོགས་པ་སྟེ་རྡོ་རྗེ་དྲ་པ་ཞེས་པ་ནི་སྲིད་པས་མ་གོས་པའོ། །ཚིག་གི་ལམ་ནས་ཞེས་པ་ནི་བརྫུན་ལ་སོགས་པ་བཞིའོ། །ཡིད་ཀྱི་རྡོ་རྗེ་ཞེས་པ་ནི་མནར་སེམས་ལ་སོགས་པ་སྟེ་དེ་ནི་དངོས་སུ་བསྟན་པ་མ་ཡིན་ཏེ་རྩ་བ་ཆད་པའི་ཕྱིར་རོ། །དེས་ནི་རང་བྱུང་ནའང་རྡོ་རྗེ་འཛིན་པའི་རང་བཞིན་ཡོངས་སུ་དག་པར་བསྒོམ་ཞེས་སོ། །དེ་དག་ནི་ཐམས་ཅད་ལ་སྤྱོད་པས་ན་ཀུན་དུ་བཟང་པོ་ཞེས་སོ། །སྦྱོར་བ་ཤིན་ཏུ་ངེས་པ་རྣམས་ཀྱི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། སྐུ་གསུང་ཐུགས་སུ་སྦྱོར་བ་ཉིད་ཚོགས་ཡིན་གྱི། ཕྱག་གིས་ནི་མ་ཡིན་ཏེ་ཞེའམ། ཡང་ན་ཕྱིའི་བློས་ཚོགས་མི་འགྱུར་ཞེའོ། །འོ་ན་ཇི་ལྟར་བྱ་ཞེ་ན། དེ་ནས་ཡང་ཞེས་པ་སྟེ། ཀུན་དུ་རྡོ་རྗེ་སེམས་དཔའི་དཀྱིལ་འཁོར་དབྱེར་མེད་པས་བསམས་ཏེ་ཞེའོ། །རྡོ་རྗེ་གསུམ་སྦྱོར་བ་ཞེས་པ་ནི་དང་པོ་ལ་སོགས་པའི་སྦྱོར་བ་གསུམ་དང་ལྡན་པས་ཞེས་པའི་དོན་ཏོ། །དེ་ནས་ཡང་ཚོགས་ཆེན་པོ་བསམ་པ་གསུངས་པ། སེམས་ཅན་ཁམས་རྣམས་ཞེས་པ་སྟེ། ཐམས་ཅད་བདག་དང་དབྱེར་མེད་པར་ཕྱག་འཚལ་ལོ་ཞེས་བསམ་པས་བསྐུལ་ལོ་ཞེའོ། །ད་ནི་ཆེན་པོའི་སྒྲུབ་པ་ཆེན་པོ་རྫོགས་ནས། མཆོད་པའི་དམ་ཚིག་གསུངས་པ། དེ་ནས་ཞེས་པ་ལ་སོགས་པ་སྟེ་འདིར་ནི་ནང་གི་གསུངས་པ་ཡིན་ནོ། །གཉིས་ནི་འོག་ནས་སྟོན་ཏོ། །བསྲུང་བའི་དམ་ཚིག་བཞིའི་རྐྱེན་གྱི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། མི་སྣང་བ་ཞེས་པ་ནི་དམ་ཚིག་བཞི་པོ་ཁོ་ན་རྐྱེན་མེད་པའི་བློས་བལྟ་བར་དཀའ་བའི་ཕྱིར་རོ། །རྡོ་རྗེ་མ་ཞེས་པ་ནི་ལས་ཀྱི་ཕྱག་རྒྱ་ཁོ་ན་གསུངས་པ་ཡིན་ཏེ་དེ་ནི་རྐྱེན་ནོ། །ཡང་རྫས་ཀྱང་རྟག་ཏུ་དབྲོག་ཅེས་པ་ནི་དེ་ལ་སྦྱོར་བས་ཕྱུང་བའི་བྱང་ཆུབ་ཀྱི་སེམས་ཟོས་པས་བདག་ཏུ་འཛིན་པའི་རྫས་ཕྲོགས་པ་སྟེ་སངས་རྒྱས་ཀྱི་འཁོར་གསོད་པ་ལ་སོགས་པ་ཡང་སྦྱོར་རོ། །ཡང་རིག་འཛིན་གྱི་དམ་ཚིག་གསུངས་པ། དེ་ནས་ཞེས་ཏེ་རིག་འཛིན་སྦྱོར་བ་པོ་དང་མོ་ལ་དཀོན་མཆོག་དཔལ་དང་ཚེ་དཔག་མེད་དབུ་རྒྱན་དུ་བསམ་
ཞེས་པའི་དོན་ཏོ། །ལས་དང་པོ་པ་རྣམས་ཀྱི་དམ་ཚིག་གསུངས་པ། དེ་ནས་ཞེས་པ་ལ་སོགས་པ་སྟེ། ལུས་ཀྱི་རྡོ་རྗེ་ལ་སོགས་པ་ལ་ཕྱི་རོལ་གྱི་ཁ་ཟས་ཁོ་ནའི་སྟོན་མོ་སྤྱད་ཅེས་མདོར་གསུངས་ཏེ། འདིའི་སྦྱོར་བ་ནི་འོག་ནས་སྟོན་ཏོ། །ཕྱི་རོལ་ཞེས་པ་ནི་བསམ་གཏན་གྱི་བས་ལ་དབང་མ་ཐོབ་པའི་ཕྱིར་རོ། །ད་ནི་ཐུགས་ཀྱི་ཆོས་བསྟན་པ་གསུངས་པ་དེ་ནས་ཞེས་པ་ལ་སོགས་པ་སྟེ། ཅང་མི་གསུང་ཞེས་པ་ནི་མཉམ་པ་ཉིད་ལ་བརྗོད་དུ་མེད་པའི་ཕྱིར་རོ། །དེ་ནས་བྱང་ཆུབ་སེམས་དཔའ་རྣམས་ཀྱིས་དེའི་དོན་ཞུས་པ་གསུངས་པ་དེ་ནས་ཞེས་པ་ལ་སོགས་པ་སྟེ་གོ་སླའོ། །དེའི་ལན་གསུངས་པ་དེ་ནས་ཞེས་ཏེ། དེ་ནི་བརྗོད་པའི་ཚིག་གང་དམིགས་སུ་མེད་པ་དེ་ལ་ངོ་བོ་ཉིད་མེད་པས་བསམས་ཏེ་མི་གསུང་ཞེའོ། །བསམ་པ་བརྟན་པ་གསུངས་པ་རིགས་ཀྱི་བུ་ཞེས་ཏེ། སྐུ་ལ་སོགས་པ་མ་སྐྱེས་པ་ཉིད་ལ་བརྗོད་པ་ནི་གཞན་དག་སྐྱེས་པའི་རྣམ་པས་ལོག་པར་ཟིན་ཏེ་འགྱུར་སྙམ་དུ་དགོངས་པ་ཡིན་ནོ། །དེ་ནས་ཡང་ཞུས་པ་ཕྱིན་ཅི་ལོག་ཏུ་ཟིན་པ་ཀུན་འབྱུང་བ་མི་བརྟག་ཏུ་གསོལ་ཞེས་པ་དེ་ཅིའི་ཕྱིར་ཞེ་ན། མཐུའི་ངོ་བོ་ཉིད་སྤྱོད་པར་གྱུར་པ་སྟེ། མི་སྐྱེ་བའི་སྟོན་པ་ཉིད་ཡིན་ལ། བདག་ཅག་ཀྱང་དེའི་རྗེས་སུ་འཛིན་པས་ལོག་པར་མི་འཛིན་ཏེ་ཞེའོ། །ངོ་བོ་ཉིད་མེད་པར་བསམས་ནས་ཞེས་པ་དེ་ལ་ཞུས་པ། ཚངས་པ་ལ་སོགས་པའི་མངོན་པར་ཤེས་པ་ཐོབ་པ་དག་འོ་ན་ཅི་སྔར་བཤད་པ་དག་ཆོས་རྡོ་རྗེ་སེམས་དཔའི་ངོ་བོ་ཡོད་པར་ཤེས་ནས་འཆད་དམ་སྙམ་པས་ན་དེ་སྐད་མ་གསུང་ཤིག་ཅེས་པའོ། །མངོན་པར་ཤེས་པ་ཞེས་པ་ནི་རྡོ་རྗེ་ཡེ་ཤེས་ཀྱི་སྤྱོད་པ་ལས་མཉམ་པ་ཉིད་མཐོང་བའི་དོན་ཏོ། །དེའི་ལན་གསུངས་པ་དེ་ནས་ཞེས་པ་ལ་སོགས་པ་སྟེ། རྗེས་སུ་འཛིན་ཞེས་པ་དེ་ངེད་ཀྱིས་ཀྱང་མི་ཤེས་ཤིང་མི་འཛིན་ཞེས་ཏེ་ངོ་བོ་ཉིད་མེད་པའི་ཕྱིར་རོ། །ཡང་ཚངས་པ་ལ་སོགས་པ་ནི་སེམས་ཅན་ཆེན་པོ་ཞེས་ཏེ། འདོད་ཆགས་ཆེན་པོས་འདུལ་བས་ན་ཆེན་པོར་གཏོགས་པའོ། །ཆོས་ཉིད་ཡིན་པའི་ཕྱིར་ཞེས་པ་ནི་དེ་རང་བཞིན་ཅན་དེ་སྣམ་བུ་དཀར་པོ་བཞིན་ཏེ་འབྲས་བུ་ཐོབ་པའི་སྣོད་ཡིན་ནོ། །རྡོ་རྗེ་ཡེ་ཤེས་ཐོབ་ཅེས་པ་ནི་མངོན་པར་ཤེས་པ་ཁོ་ན་སྟེ་རྐྱེན་གྱིས་སངས་རྒྱས་ཐོབ་པའི་ཕྱིར་རྟོག་པ་དེ་མི་འབྱུང་ཞེའོ། །དེ་ཁོ་ནའི་
རྗེས་སུ་སྟོན་པས་གསལ་བར་གསུངས་པ་དེ་ནས་ཞེས་ཏེ། དེ་ནི་ངོ་བོ་ཉིད་ཀྱིས་ངག་ལ་སྐྱེ་བ་མེད་དོ་ཞེས་ཆོས་ཀྱི་དབྱིངས་སུ་རྟོག་པ་སྨྲ་བ་དག་ནི་ཡང་དག་པར་སྨྲ་བ་མ་ཡིན་ནོ་ཞེས་པའོ། །དེ་ཁོ་ན་བརྟན་པོར་བྱ་བ་གསུངས་པ་དེ་ནས་ཞེས་པ་ལ་སོགས་པ་སྟེ། ནམ་མཁའ་ནི་ཅི་ལ་ཡང་མི་གནས་སོ་ཞེས་པ་འདི་ཡིན་ནོ། །དེ་ལ་ངོ་མཚར་གསུངས་པ། ཨེ་མ་ཞེས་པ་ལ་སོགས་པ་སྟེ་ལུས་ལ་སོགས་པའི་དངོས་པོ་མེད་པའི་ཆོས་ཉིད་ཁོ་ན་ལས་ལུས་ལ་སོགས་པ་བསྒོམ་སྟེ་དེ་ཁོ་ན། །ཨེ་མའོ་རྡོ་རྗེ་ཚིག་སྨྲས་པ། །ཞེས་སོ། །ད་ནི་རིག་པའི་ལྷའི་སྒྲུབ་པ་ཆེན་པོའི་ཕྱིར་གསུངས་པ་དེ་ནི་ཞེས་པ་ལ་སོགས་པ་སྟེ། རྡོ་རྗེའི་སྐུ་ཞེས་པ་ནི་རྟག་པ་སྟེ་དེའི་སྤྱིན་བོར་རྡོ་རྗེ་ཞེས་པ་མི་བསྐྱོད་པའོ། །སྐུ་གསུམ་ལས་བྱུང་བ་ཞེས་པ་ནི་ཁ་དོག་གསུམ་སྟེ། དེས་རྣམ་པར་དག་པའི་ཕྱིར་རོ། །རྣམ་པར་གཡོ་བ་ཞེས་པ་ནི་ཤིང་ལ་སོགས་པ་ལས་བྱས་པ་ལྟ་བུ་ནི་མ་ཡིན་གྱི། དེ་དང་སེམས་དང་བཅས་པའི་གཡོ་བ་དང་ལྡན་པར་ཤེས་པའི་དོན་ཏོ། །རྡོ་རྗེ་འཁོར་ལོ་འཛིན་ཞེས་པ་ནི་མི་བསྐྱོད་པ་དབུ་ལ་གནས་པ་ནི་རྡོ་རྗེ་འཛིན་ལ་བཞི་ནི་འཁོར་ལོ་འཛིན་ཞེས་པའི་དོན་ཏོ། །གཞན་ཡང་གསུངས་པ། ཐམས་ཅད་རིགས་ཀྱི་བྱེ་བྲག་གིས། །ཞེས་ཏེ་དེའི་དོན་དུ། སངས་རྒྱས་རྡོ་རྗེ་ཅན་རྣམས་ཀུན། །ཞེས་པ་ལ་སོགས་པ་གསུངས་པ་ཡིན་ནོ། །དེའི་རིག་མའི་སྒྲུབ་པ་ཆེན་པོའི་མཐར་ཐུག་ནས་ཆགས་པས་མཉེས་པར་བྱའོ་ཞེས་གསུངས་པ། དབྱིངས་ལས་བྱུང་བར་གྱུར་པའི་ཞེས་པ་ལ་སོགས་པ་སྟེ། ཁྱུ་མཆོག་ཅེས་པ་ནི་ལྷའི་མཆོག་སྟེ་བདག་ཉིད་དོ། །ཡང་བདག་གི་བསྙེན་པ་ལ་སོགས་པ་དེ་དག་གཅིག་ཏུ་དམ་ཚིག་གསུངས་པ། དེ་ནས་ཡང་ཞེས་པ་ལ་སོགས་པ་སྟེ། དམ་ཚིག་རྒྱ་ཆེན་ཞེས་པ་བསྙེན་པ་ལ་སོགས་པ་ཕྱག་རྒྱ་ཆེན་པོའི་ཚོགས་དག་གོ །ཆོ་ག་བཞིན་དུ་ཞེས་བྱ་ནི་སྔར་བཤད་པ་བཞིན་དུ་ཞེས་པའི་དོན་ཏོ། །མཚན་ཉིད་ཀུན་གྱིས་ཞེས་པ་ཕུང་པོ་ལ་སོགས་པ་ཞེས་པའམ། ཡང་ན་འབྲིང་པོའི་ཡན་ལག་ལ་སོགས་པས་ཀྱང་གཟུང་ངོ༌། །ཡང་གསང་བའི་དམ་ཚིག་གསུངས་པ། དེ་ནས་ཞེས་པ་སྟེ་སེམས་ཀྱི་ཆོ་ག་ཁོ་ན་གཙོ་བོ་ཡིན་གྱི་ལག་པའི་ཕྱག་རྒྱ་ནི་གཡེང་བའི་རྒྱུ་
ཡིན་པས་མ་ཡིན་ནོ། །ཡང་བསྐུལ་བ་ལ་སོགས་པའི་དམ་ཚིག་གསུངས་པ་དེ་ནས་ཡང་ཞེས་པ་ལ་སོགས་པ་སྟེ། བཤང་གཅི་ཞེས་པ་ནི་སྔར་བཤད་ན་ཡང་མི་སྨད་དོ་ཞེས་པ་འདིར་འདོད་དོ། །ཆོ་ག་བཞིན་ཞེས་པ་ནི་བདུད་རྩིའི་སྦྱོར་བ་ཇི་སྐད་བཤད་པའོ། །དམ་ཚིག་ཇི་སྙེད་ཡོད་པ་ཀུན། ཞེས་པ་ནི་དུས་གསུམ་གྱི་སངས་རྒྱས་རྣམས་ཞེས་པ་སྟེ་རྡོ་རྗེ་གསུམ་ཞེས་པ་ནི་སྦྱོར་བ་གསུམ་སྟེ་དེ་ཁོ་ན་གཅིག་ཏུ་སེམས་ལ་བྱས་པས་སངས་རྒྱས་དག་མཉེས་པར་བྱ་བ་ནི་ཐུགས་ཀྱི་དམ་ཚིག་ཡིན་ནོ། །ད་ནི་ཉེ་བར་སྒྲུབ་པ་ལ་སོགས་པ་རྣམ་པར་དག་པའི་སྦྱོར་བའི་དམ་ཚིག་གསུངས་པ། དེ་ནས་ཡང་ཞེས་པ་ལ་སོགས་པ་སྟེ། རྡོ་རྗེ་གནས་ཞེས་པ་ནི་བདག་པོའི་དབང་གིས་ལུས་རྣམས་ལ་ཡང་དེ་སྐད་དེ་སྐྱེ་མཆེད་རྣམ་པར་དག་པའོ། །མཁའ་དབྱིངས་ཞེས་པ་ནི་ཁམས་ཀྱི་ཞར་ལ་གསུངས་པ་སྟེ་རྡོ་རྗེ་ཞེས་པ་ནི་ལྷ་རྣམས་སོ། །འཛིན་པ་ནི་གཞིའི་ནམ་མཁའ་ཞེས་ཏེ་སྟོན་པ་ནི་མ་ཡིན་ནོ། །མི་ལྡོག་པའི་དབང་གིས་ཡོན་ཏན་དང་རྩ་བའི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། གསང་བ་འདུས་པས་ཞེས་པ་ནི་རྒྱུ་ནམ་མཁའི་སངས་རྒྱས་ལ་སོགས་པས་གཟུང་བའི་བྱང་ཆུབ་ཀྱི་སེམས་ཏེ་སངས་རྒྱས་ཐམས་ཅད་ཀྱི་རང་བཞིན་ཡིན་པའི་ཕྱིར་རོ། །ཁ་ཅིག་ན་རེ་རྒྱུད་འདིས་ཞེས་ཟེར་ཏེ། དེ་ནི་རྒྱུད་གཞན་ལས་ཀྱང་གསང་བ་འདུས་པས་དབང་བསྐུར་བ་ལ་ཞེས་སྣང་བས་འགལ་ལོ། །ཡང་འཁོར་གྱི་དེ་བཞིན་གཤེགས་པ་དག་གིས་འོག་ཟློས་སུ་ལན་གསུངས་པ། རིགས་ཀྱི་བུ་ཞེས་པ་ལ་སོགས་པའོ། །ཡང་ཞུས་པ་ཅིའི་སླད་དུ་ཞེའོ། །གཏན་ཚིགས་ཀྱི་ལན་གསུངས་པ། སློབ་དཔོན་དེ་ནི་ཞེས་པ་ལ་སོགས་པ་སྟེ། གསང་བ་འདུས་པ་དབང་བསྐུར་མ་ཐག་ཏུ་སློབ་དཔོན་ཞེས་མིང་ཐོབ་པས་ན་སློབ་དཔོན་དེ་ནི་ཞེའོ། །ཡང་དེ་ལ་སྲི་ཞུ་བྱ་བའི་དོན་གསུངས་པ། རིགས་ཀྱི་བུ་ཞེས་ཏེ། དེ་ནི་སངས་རྒྱས་དང་བྱང་ཆུབ་སེམས་དཔའ་ཕྱོགས་བཅུ་ནས་ལྷགས་ནས་སློབ་དཔོན་དེ་མཆོད་དེ་དེ་ནི་ལུས་ཀྱི་སྲི་ཞུའོ། །ངག་གི་སྲི་ཞུ་ཡང་འདི་སྐད་དུ་བདག་ཅག་དེ་བཞིན་གཤེགས་པ་རྣམས་ཀྱི་སློབ་དཔོན་ཁྱོད་ཕ་ཡིན་ནོ། །དེ་བཞིན་དུ་མ་ཡིན་ནོ། །སྟོན་པ་ཡིན་ནོ་ཞེས་འདོད་དེ། སླར་ཡང་རང་གི་ཞིང་དུ་འགྲོ་བར་འགྱུར་རོ་ཞེས་སོ། །ཡང་
སློབ་མ་རྣམས་ཀྱིས་དེ་ལ་ཇི་ལྟར་གཟུང་བའི་རྩ་བའི་དམ་ཚིག་གསུངས་པ་འདི་ལྟ་སྟེ་ཞེས་པ་ལ་སོགས་པ་སྟེ། སློབ་མས་དེ་ལྟར་གཟུང་ངོ་ཞེའོ། །ཡང་ཞུས་པ་ཅིའི་སླད་དུ་ཞེའོ། །ལན་བཏབ་པའི་རིགས་ཀྱི་བུ་ཞེས་ཏེ། བྱང་ཆུབ་ཀྱི་སེམས་དང་སློབ་དཔོན་མི་གཉིས་པས་བྱང་ཆུབ་ཀྱི་སེམས་དེ་སྐད་དོ། །དེ་ནས་བྱང་ཆུབ་སེམས་དཔའ་བྱམས་པ་འདི་སྙམ་དུ་དེ་འདྲའི་སློབ་དཔོན་ལ་བརྙས་པ་དག་མནར་མེད་པར་སྐྱེའོ་སྙམ་ནས་འཇིགས་པ་སྐྱེས་ཏེ་ཅང་མི་སྨྲ་བར་གྱུར་རོ། །ཡང་སློབ་དཔོན་གྱི་སྲི་ཞུ་བསྟེན་པར་བྱ་བའི་ཕྱིར་ཆེད་དུ་དེ་བཞིན་གཤེགས་པ་རྣམས་ཀྱིས་གསུངས་པ་དེ་ནས་ཡང་ཞེས་པ་ལ་སོགས་པ་སྟེ། ཡེ་ཤེས་ཀྱི་བདག་པོ་ཞེས་པ་ནི་གསང་བ་འདུས་པས་དབང་བསྐུར་མ་ཐག་སངས་རྒྱས་ཐམས་ཅད་ཀྱི་སློབ་དཔོན་དུ་གྱུར་པ་སྟེ། ཚེ་འདི་ལ་སངས་རྒྱས་ཀྱི་གྲངས་སུ་བགྲང་བ་ཡིན་ནོ། །དེ་བས་ན་ཕྱར་མི་ལྡོག་པའི་དབང་ཞེའོ། །དེ་ཡང་ཕྱི་མ་ལས་གསུངས་པ། ཤིན་ཏུ་བརྟུལ་ཞུགས་དབང་བསྐུར་བའི། །ཞེས་པ་ལ་སོགས་པ་སྟེ། དབང་བསྐུར་བ་དེ་ཁོ་ན་དངོས་གྲུབ་ཀྱི་སྣོད་དུ་གསུངས་པ་དེ་ནས་ཞེས་པ་ལ་སོགས་པ་སྟེ་གོ་སླའོ། །ད་ནི་རི་མོའི་དཀྱིལ་འཁོར་ལ་ཡེ་ཤེས་ཀྱི་དཀྱིལ་འཁོར་ལོ་སྤྱན་དྲང་བ་གསུངས་པ་དེ་ནས་ཞེས་པ་ལ་སོགས་པ་སྟེ། གོང་དུ་བཞུགས་པའི་ཏིང་ངེ་འཛིན་ལས་བཞེངས་ནས་བཀའ་སྩལ་ཞེས་འབྲེལ་ཏོ། །ནམ་མཁའི་དབྱིངས་ཀྱི་དབུས་སུ་ནི། །ཞེས་པ་ལ་སོགས་པ་ནི་ཇི་ལྟ་བའི་གནས་གསུངས་པའོ། །བསམ་གཏན་རྡོ་རྗེས་ཞེས་པ་ནི་ཐབས་དང་ཤེས་རབ་སྦྱོར་བའི་སྒྲ་དང་ཡེ་ཤེས་སེམས་དཔའི་འོད་ཀྱིས་དེ་དག་བསྐུལ་བ་སྟེ་དེ་ཡང་བཟང་པོ་ཞབས་ཀྱིས་གསུངས་པ། ཤེས་རབ་འཁྱུད་པ་གོང་མ་བཞིན། །ཞེས་པ་ནས། བགེགས་རྣམས་བསྐྲད་ནས་མངོན་པར་བསྲུང༌། །ཞེས་པའི་བར་དུ་ཕྱེད་དང་གཉིས་གསུངས་སོ། །དེ་རྣམས་དགུག་པ་ལ་སོགས་པ་གསུངས་པ། རྡོ་རྗེའི་དཀྱིལ་འཁོར་ཞེས་ཏེ་འདིར་བསམ་གཏན་ཞེས་པ་ནི་གཤིན་རྗེ་གཤེད་ལ་སོགས་པའི་སྔགས་ཡིན་ནོ། །ཡེ་ཤེས་འཁོར་ལོ་ཞེས་པ་ནི་ཡེ་ཤེས་སེམས་དཔའི་འོད་ཀྱིས་བསྐུལ་བ་དག་སྟེ། དེ་ལྟར་ཕྱི་མ་ལས། ཡེ་ཤེས་སེམས་དཔའ་གང་རེག་པ། །ཡེ་
ཤེས་འཁོར་ལོ་ཞེས་སུ་བཤད། །ཅེའོ། །བཞུགས་པ་བྱ་ཞེས་པ་ནི་ཉེ་བའི་སྒྲུབ་པ་ལ་སོགས་པས་དེ་དག་ཞུགས་པར་བྱའོ་ཞེས་པ་སྟེ་དེ་ཡང་གསུངས་པ། གཤིན་རྗེ་གཤེད་ལ་སོགས་པ་ཡིས། །ཞེས་པ་ནས་དབང་བསྐུར་ཞེས་པའི་བར་དུའོ། །མཆོད་པའི་ཆོ་ག་དེ་ཉིད་ཀྱིས། །ཞེས་པ་ནི། རྡོ་རྗེ་དྲི་མེད་གསུམ་དག་གིས། །ཞེས་གང་དུ་བསྟན་པ་དེ་ཉིད་ཀྱིས་ཤེས་པའི་དོན་ཏོ། །དེ་ཡང་གསུངས་པ་ཡོན་ཏན་ཞེས་པ་ནས་མགུ་བར་བྱ་ཞེས་པའི་བར་དུ་སྟེ་དེ་དག་ནི་བསམ་གཏན་གྱི་དཀྱིལ་འཁོར་ལ་ཡང་ཤེས་པར་བྱའོ། །དཀྱིལ་འཁོར་དང་བརྟུལ་ཞུགས་དང་འབྲེལ་པ་གསུངས་པ། སློབ་དཔོན་ཞེས་པ་ལ་སོགས་པ་སྟེ། དེ་ནི་རང་དང་སློབ་མ་དག་ལ་བདག་པོ་སྙིང་གར་བསམ་མོ། །གནས་གསུམ་གྱིས་ཞེས་པ་ནི་ནམ་མཁའི་སངས་རྒྱས་བསྐུལ་བ་ལ་རྡོ་རྗེ་གསུམ་གྱི་གནས་སམ་ཡང་ན་སྤྱི་བོ་ལ་སོགས་པ་སྟེ། སྦྱོར་བ་དེ་ནི་འདིར་གསང་བ་དང་ཤེས་རབ་ཡེ་ཤེས་ཀྱང་གཟུང་ངོ༌། །ད་ནི་བསམ་གཏན་གྱི་ལས་ལ་གཏོགས་པའི་དགྲ་བོ་བསྐམ་པ་གསུངས་པ་དེ་ནས་ཞེས་པ་ལ་སོགས་པ་སྟེ། ཇི་སྐད་དུ་རྡོ་རྗེ་སེམས་དཔའ་ལས་གྱུར་པ་སྐུ་ལ་སོགས་པའི་སྙིང་པོ་གསུམ་ལས་གྱུར་པའི་ཏྲི་ཤཱུ་ལ་ལས་བསྐྱེད་པ་རྡོ་རྗེ་མཁའ་འགྲོ་ནག་པོ་ཉི་མ་ལ་འདུག་པ། ཕྱག་རྒྱ་བཞི་དང་ལྡན་པ། ཏྲི་ཤཱུ་ལ་དང་ཐོ་བ་བསྣམས་པ་མི་བསྐྱོད་པས་དབུ་བརྒྱན་པ། རང་གི་རིག་མ་ལ་འཁྱུད་པར་བདག་ཉིད་བསམས་ཏེ་བསྒྲུབ་བྱའི་ཤ་ལ་སོགས་པས་ནམ་མཁའ་ལ་བཀང་སྟེ། བདག་གི་ལྕེ་ལ་ཡི་གེ་གོང་མ་དག་འོད་ཟེར་ཅན་དུ་བསམས་ནས་དབུགས་ཀྱི་བསམ་གཏན་དང༌། ཨོཾ་བཛྲ་ཌཱ་ཀི་ནཱ་ཨ་མུ་ཀ་སམྷ་རཀྟ་ཀཪྵ་ཡ་ཧཱུཾ་ཕཊ་ཅེས་པའི་སྔགས་ཀྱི་སྦྱོར་བས་ཐོད་པ་དྲངས་ནས་བཏུང་བར་བྱའོ། །དེ་ཉིད་ཀྱི་དོན་དུ་ཕུར་བུ་གདབ་པ་གསུངས་པ། ཏྲི་ཤཱུ་ལ་རྡོ་རྗེ་ཞེས་ཏེ་ཕུར་པའི་སྔགས་ཀྱིས་ཏྲི་ཤཱུ་ལ་དང་བུར་པ་ཡང་དེའི་གཟུགས་དང་པོའི་ཡི་གེས་བསྐྱེད་པ་མདུན་དུ་མོས་ཏེ་གདབ་པར་བྱའོ་ཞེས་སྟོན་ཏོ། །ལས་དང་པོ་བའི་དམ་ཚིག་གོང་དུ་གསུངས་པའི་སྦྱོར་བ་གསུངས་པ་དེ་ནས་ཞེས་པ་ལ་སོགས་པ་སྟེ། ཆོ་ག་བཞིན་ཞེས་པ་ནི་གོང་དུ་བསྟན་པའི་ཆོ་གས་ཤེས་པ་སྟེ་དེ་ལ་གསུངས་པ། སྙིང་ག་ཟླ་བའི་
དཀྱིལ་འཁོར་ལ། །ཞེས་པ་ནས། ཕྱི་ཡི་སྦྱིན་སྲེག་རྗེས་སུ་དཔག །ཅེས་པའི་བར་དུ་ཚིགས་སུ་བཅད་པ་གཉིས་དང་རྐང་པ་གསུམ་གསུངས་སོ། །ཡང་གོང་དུ་གསུངས་པ་ལས་ཕྱིའི་མཆོད་པ་དང་གསང་བའི་མཆོད་པའི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། ཁུ་བ་ལ་སོགས་པས་ཞེས་པ་ནི་ཁུ་བ་ལས་གྱུར་པའི་ལྷ་མོ་དང་རེག་པ་དག་ཀྱང་ཞེས་པའི་དོན་ཏོ། །ཇི་སྲིད་ཕྱིའི་བུད་མེད་ཡོད་ན་ཁུ་བ་ཉིད་ཀྱང་འབར་བར་བསམས་ཏེ་བདག་གིས་ཁས་བླངས་ནས་ཟོས་པས་མཆོད་པར་བྱའོ། །ཕྱིའི་བུད་མེད་ཁོ་ན་ཆེད་དུ་བཙལ་བ་བསྟན་པའི་ཕྱིར་ཡང་གསུངས་པ་དེ་ནས་ཞེས་པ་སོགས་པ་སྟེ། དམ་ཚིག་འཛིན་པའི་མ་ཞེས་པ་ནི་གསང་བའི་དབང་གི་སྡོམ་པ་ལེན་པའི་ཕྱིར་དེ་སྐད་དུ་འདིར་སྲིང་མོ་དང་བུ་མོ་ཡང་གཟུང་བར་ཤེས་པར་བྱའོ། །སྔགས་ཀྱི་སྙིང་པོའི་སྡོམ་པ་གསུངས་པ་དེ་ནས་ཞེས་ཏེ། ལུས་དང་ངག་སེམས་ལོངས་སྤྱོད་ཅེས་པ་ནི་སྒོམ་པ་མཆོག་གི་དངོས་པོའོ། །གསང་བ་གསུམ་ཞེས་པ་ནི་རིག་མའི་གསང་བའོ། །རྡོ་རྗེ་ནི་གསང་པའི་རྡོ་རྗེའོ། །གནས་ཞེས་པ་ནི་དེ་གཉིས་ལ་གནས་པའི་བྱང་ཆུབ་ཀྱི་སེམས་ཏེ། བདག་གིས་གཟུང་བས་བསྒྲུབ་པོ་ཞེས་པའོ། །དེ་ཁོ་ན་ཡེ་ཤེས་ཆེན་པོ་ཡིན་པས་བཟང་པོ་ཞེའོ། །ཡང་ཉམ་ཆུང་བ་བསལ་བའི་དམ་ཚིག་གསུངས་པ་དེ་ནས་ཞེས་པ་ལ་སོགས་པ་སྟེ། ཇི་སྟེ་རང་གི་སྙིང་པོ་རྟོགས་པས་ཉམས་ཞན་ན་རིག་མའི་གླུས་བསྐུལ་ཏེ། བདག་གི་སྤྱི་བོར་མཐོ་གང་ཙམ་དུ་ཟླ་བ་ལ་གནས་པའི་བདུད་རྩི་ལྔ་ལ་ཨོཾ་གྱིས་མཚན་པ། དབུགས་ཀྱི་ལྕགས་ཀྱུས་དྲངས་ཏེ་ལྷ་རྣམས་ཚིམ་པར་བྱས་སོ་ཞེས་པས་ཏེ་དེ་ཡང་གསུངས་པ། རང་གི་སྙིང་པོ་དེ་ཉིད་སེམས་དཔའི་ཚེ། །ཞེས་པ་ནས། ལུས་ངག་ཡིད་ནི་ཚིམ་པར་བྱ། །ཞེས་པའི་བར་དུ་ཚིགས་སུ་བཅད་པ་གཉིས་གསུངས་སོ། །ཡང་སྦྱོར་བ་བརྟན་པ་རྣམས་ཀྱི་དམ་ཚིག་གསུངས་པ་དེ་ནས་ཞེས་ཏེ། དེ་ལ་ཚ་ཚ་ལ་སོགས་པ་ཕྱིའི་དགེ་བ་དག་གིས་ནི་བྱང་ཆུབ་ལ་སྤྱོད་པར་འདོད་པ་མ་ཡིན་ཏེ། སེམས་ཀྱི་ཆོ་ག་ཁོ་ན་མཆོག་ཏུ་བསླབ་པ་ཡིན་ནོ། །དེ་ཡང་གསུངས་པ་སེམས་ཉིད་ཆོ་ག་ཐམས་ཅད་ཅེས་པ་ལ་སོགས་པའོ། །ད་ནི་བསམ་
གཏན་པའི་ལས་ལས་ལུས་དྲུག་འབྱིན་པ་ལ་སོགས་པ་གསུངས་པ་དེ་ནས་ཞེས་པ་ལ་སོགས་པ་སྟེ། འབྱིན་པ་ནི་གཏོང་བའོ། །འདྲེན་པ་ནི་བསྡུས་ནས་འབྱིན་པའོ། །བྷྲཱུཾ་ཞེས་པ་འདིར་རྟག་པ་འམ་གཙུག་ཏོར་འཁོར་ལོས་སྒྱུར་བས་ལག་པ་གཡས་པ་ལ་བྷྲཱུཾ་ལས་བསྐྱེད་པའི་འཁོར་ལོ་ལ་བྷྲཱུཾ་ཉིད་བསམས་ཏེ་གོང་དུ་རྟག་པ་ལ་བསྟན་པ་བཞིན་གཏོར་བར་བྱའོ་ཞེས་སོ། །ཅི་སྟེ་གནོད་པར་འདོད་ན་སྐུ་སེར་པོར་བསྒྱུར་ནས་བྷྲཱུཾ་གྱི་འོད་སེར་པོས་གནས་གསུམ་དུ་བསྡུས་ནས་དེ་ཉིད་དུ་ཁ་ཟས་དུག་གི་སྟེང་དུ་འཁོར་ལོ་སེར་པོ་དང་ཧཱུཾ་གིས་མནན་པར་བྱའོ། །ཅི་སྟེ་འདྲེན་ན་བྷཱུཾ་ཁོ་ནས་གོང་དུ་ཧཱུཾ་ལ་སྦྱར་བའི་ཆོ་ག་ལྟར་ཤེས་པར་བྱའོ། །འོད་ཟེར་གསུམ་ཞེས་པ་ནི་མནན་པ་སེར་པོ་དང་གཞན་ལ་ནག་པོ་དང་དཀར་པོ་སྟེ་དེ་དག་གི་ས་གནས་གསུམ་ལ་སོགས་པ་ནས་འབྱིན་པར་འགྱུར་ཞེའོ། །ད་ནི་སྔགས་ཀྱི་ཆོ་ག་གསུངས་པ་དེ་ནས་ཞེས་པ་ལ་སོགས་པ་སྟེ། འདིའི་དོན་ནི་གང་ཡང་རུང་པའི་རྣལ་འབྱོར་བས་གུར་ཀུམ་ལ་སོགས་པས་གྲོག་འམ་ཤིང་ལོ་དག་ལ་རྡོ་རྗེ་རྒྱ་གྲམ་བྲིས་ཏེ། དེའི་ལྟེ་བ་ལ་ཡང་འཁོར་ལོ་རྩིབས་བརྒྱད་པ། དེའི་ལྟེ་བ་ལ་ཧ་དང་བསྒྲུབ་བྱའི་མིང་ཡང་ཤར་ལ་སོགས་པའི་རྩིབས་ལ་མི་བསྐྱོད་པ་ལ་སོགས་པ་ཡང་མཚམས་བཞི་ལ་སྤྱན་མ་ལ་སོགས་པ་དེ་བཞིན་དུ་གཟུགས་ཀྱིར་དོ་རྗེ་མ་ལ་སོགས་པ་ཡང་གནས་ཇི་ལྟ་བ་བཞིན་དུ་དགོད་དོ། །གཤིན་རྗེ་གཤེད་ལ་སོགས་པ་ཡང་ཕྱོགས་བཞིར་དགོད་དོ། །མུ་ཁྱུད་ནི་ཕྲེད་པའི་སྔགས་ཀྱིས་བསྐོར་ཏེ་གཞག་གོ །དེ་ནས་ཡང་དེ་ལ་ཇི་ལྟ་བ་བཞིན་དུ་ཡེ་ཤེས་ཀྱི་ལྷ་རྣམས་དགུག་པ་ལ་སོགས་པ་བྱས་ནས་ལེགས་པར་མཆོད་དེ་རས་ལ་སོགས་པའི་སྣོད་དུ་བཞུགས་ནས་བསྒྲུབ་བྱ་ཡང་ཁྲུས་ལ་སོགས་པ་ཡང་བྱས་ཏེ་དཀོན་མཆོག་གསུམ་ལ་སྐྱབས་སུ་གཏོང་བ་ལ་སོགས་པ་བྱས་ཏེ་ས་དེའི་མགུལ་པ་འམ་དཔུང་པ་ལ་གདགས་པ་བྱས་ན་གདོན་ལ་སོགས་པ་བསྲུང་བར་འགྱུར་ཞེའོ། །ད་ནི་ཐུན་མོང་གི་བསྒྲུབ་པ་ལས་ལུས་པ་མིག་རྣོན་གྱི་ཆོ་ག་གསུངས་པ་དེ་ནས་ཞེས་པ་ལ་སོགས་པ་སྟེ། དེའི་དོན་ནི་གང་ཡང་རུང་བའི་རྣལ་འབྱོར་པས་ལམ་གྱི་བཞི་མདོ་ལ་སོགས་པར་ཚེས་ཉི་ཤུ་དགུའི་ནམ་ཕྱེད་ན་བྷནྡྷ་ལ་ཁྲག་ཆེན་
པོས་པདྨོ་བྲིས་པའི་སྟེང་དུ་འདུག་སྟེ། ཡང་བྷནྡྷ་གཅིག་གི་ནང་དུ་བདུད་རྩི་ལྔ་དང་ཚིལ་ཆེན་པོ་ལ་སོགས་པའི་བཞུས་པའི་མར་ལ་རས་ཀྱི་སྐུད་པ་སྡོང་བུ་པདྨའི་རྩ་བའི་སྐུད་པས་དཀྲིས་ཏེ་མེ་བཏང་བས་བྷནྡྷ་གཅིག་གིས་སྟེང་ནས་ཕུབ་སྟེ་སྔགས་བཟླ་བར་བྱའོ། །དེ་ནས་ཡང་བྷནྡྷ་བླངས་ཏེ་གོང་དུ་གསུངས་པའི་ཕྲེང་བའི་སྔགས་བརྒྱ་རྩ་བརྒྱད་བཏབ་སྟེ་མིག་ལ་བསྐུས་ན་སྐུ་ལ་སོགས་པའི་དངོས་གྲུབ་ཏུ་འགྱུར་ཞེས་པ་ཡིན་ནོ། །ད་ནི་རྒྱུད་འདི་ནི་ཡི་གེ་གསུམ་གྱིས་བསྡུས་པའི་ཆེ་བ་སྟོན་ཏེ། དེ་ནས་ཞེས་པ་ནི་གསང་བའི་ཡི་གེ་རྣམ་པར་དག་པའི་ཕྱིར་རོ་ཞེས་པ་ནས་ཅང་མི་སྨྲ་བར་གྱུར་ཏོ་ཞེས་པ་ནི་དེ་མ་ཐག་པའོ། །བྱང་ཆུབ་སེམས་དཔའ་ཆེན་པོ་དེ་དག་ཅེས་པ་ནི་འོག་ནས་འབྱུང་བའི་གསང་བའི་ཡི་གེ་མཐོ་བ་ཅིང་མངོན་པར་སངས་རྒྱས་སོ་ཞེས་པ་དག་གོ །དད་ཅིང་སྒྲུབ་པར་འགྱུར་ཞེས་པ་ནི་ཇི་ལྟར་ན་སྐུལ་བ་མཆིས་ཤིང་སྒྲུབ་པར་འགྱུར་ཞེས་པའོ། །ད་ནི་རྒྱུད་འདི་རྙེད་པར་དཀའ་བ་དང་ལམ་ཉེ་བ་དང་འབྲས་བུ་ཆེན་པོ་དག་གིས་གཞན་ལས་ཁྱད་པར་དུ་གྱུར་པ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་དངོས་གྲུབ་རྣམས་སུ་འགྱུར་རོ་ཞེས་པའི་དེ་མ་ཐག་གོ །ལྷག་མ་ནི་གོ་སླའོ། །དེ་ཅིའི་ཕྱིར་ཞེ་ན་ཞེས་པ་ནི་མ་གསུངས་པའི་རྒྱུ་འདྲི་བའོ། །ལན་གསུངས་པ། བཅོམ་ལྡན་འདས་ཞེས་པ་ལ་སོགས་པ་སྟེ་དེའི་དུས་སེམས་ཅན་རྣམས་ལ་གསང་བ་ཆེན་པོ་བཤད་པའི་སྐལ་བ་མེད་དོ་ཞེས་པ་ཡིན་ནོ། །དེས་ནི་རྙེད་པར་དཀའ་བ་སྟོན་ཏོ། །འོན་ཀྱང་ཞེས་པ་ནི་དོན་ཆེན་པོ་བྱེད་པ་ཡིན་ནོ་ཞེས་པ་སྟེ་སྐད་ཅིག་ཅེས་པ་ལ་སོགས་པ་ནི་ལམ་ཉེ་བར་སྟོན་ཏོ། །སངས་རྒྱས་ཀྱི་བྱང་ཆུབ་ཅེས་པ་ལ་སོགས་པས་ནི་འབྲས་བུ་ཆེན་པོ་སྟོན་ཏེ། ཁྱད་པར་གྱུར་པ་ཁོ་ན་ཡིན་ནོ། །ཚེ་འདི་ཉིད་ལ་ཞེས་པ་ནི་དབང་བསྐུར་བ་དག་གི་རྐྱེན་གྱིས་སངས་རྒྱས་དང་དབང་བསྐུར་ནས་ཆོག་ཆེན་པོས་བསྒྲུབ་པ་དག་ནི་བླ་ན་མེད་པའི་སངས་རྒྱས་ཚེ་འདི་ཉིད་ལ་འགྲུབ་པའི་ཕྱིར་རོ། །སྡུག་བསྔལ་གསུམ་ཞེས་པ་ནི་ལུས་ལ་སོགས་པའི་སྡུག་བསྔལ་ལོ། །གསང་བའི་ཡི་གེ་རྣམ་པར་དག་པ་ཞེས་པ་ནི་ཤིན་ཏུ་ཟབ་པར་སྟོན་ཏོ། །ད་ནི་ལེའུ་དང་པོ་ལ་གཏོགས་པའི་དེ་བཞིན་
གཤེགས་པའི་ཕྲིན་ལས་ལ་འབྲས་བུ་རྡོ་རྗེ་འཆང་བསྐྱེད་པའི་ཕྱིར་རོ། །ཆོས་ཀྱི་སྐུར་བཞུགས་པ་ལ་གོང་དུ་ཕྱུང་བའི་མཚམས་ཀྱི་ལྷ་མོས་བསྐུལ་བ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་འོག་ནས་འབྱུང་བའི་ཆོས་མ་ཡིན་ཞེས་པ་ནས་ཅང་མི་གསུང་བར་གྱུར་ཏོ་ཞེས་པའི་དེ་མ་ཐག་གོ །གནས་ཀྱི་དབང་ཕྱུག་ཅེས་པ་ནི་གནས་ཀྱི་བདག་པོའོ། །དགའ་བ་ཞེས་པ་ནི་རེག་པ་ལས་བྱུང་བའོ། །ཡིད་འོང་ཞེས་པ་ནི་བདེ་བའོ། །དེ་ཁོ་ན་དོན་ཆེན་ཏེ་བསྒྲུབ་པར་བྱ་བའི་མཆོག་ཡིན་པའི་ཕྱིར་རོ། །འདོད་པ་ཞེས་ཀྱང་དེ་ཁོ་ནས་ཏེ་དེས་བསྐྱབ་ཏུ་གསོལ་ཞེས་ནས་གནད་ལ་བོར་ཏེ་བསྐུལ་བ་གསུངས་པ། མགོན་པོ་གལ་ཏེ་ཞེས་པ་ལ་སོགས་པ་སྟེ་གོ་སླའོ། །དེ་བཞིན་དུ་ལྷག་མ་རྣམས་ཀྱང་གོ་སླ་བས་བདག་གིས་ནི་མ་བཤད་དོ། །དམ་ཚིག་གི་འཁོར་ལོ་ཞེས་པ་ནི་དེ་མ་ཐག་དམ་ཚིག་ལས་གྱུར་པ་འཁོར་ལོའི་རྒྱན་ཉེ་བར་གནས་པའི་ཚུལ་གྱིས་ཞེས་པའི་དོན་ཏོ། །ད་ནི་རྡོ་རྗེ་ཡེ་ཤེས་ཀྱི་སྤྱོད་པ་གཏོགས་པ། རྡོ་རྗེ་སེམས་དཔའི་ཐུགས་ཀར་སངས་རྒྱས་ཐམས་ཅད་ཞུགས་པའི་དེ་མ་ཐག་ཏུ་དབང་བསྐུར་བ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་ལེའུ་དང་པོ་ལས་ཐུགས་ཀར་ཞུགས་སོ་ཞེས་པའི་དེ་མ་ཐག་གོ །ནམ་མཁའི་དབྱིངས་ཞེས་པ་ནི་རིག་མའི་གསང་པའི་ནང་ངོ༌། །རྡོ་རྗེ་གསུམ་གྱི་ཡེ་ཤེས་ཞེས་པ་ནི་སྐུ་ལ་སོགས་པའི་བཞི་ཆོས་ཀྱི་སྐུ་ཡེ་ཤེས་ལྔ་སྟེ་མངོན་པར་ཤེས་པའོ། །ཀུན་དུ་བཟང་པོ་ཞེས་པ་ནི་སྤྱིའི་རྣམ་པ་སྟེ། ཕྱེ་ནས་ནི་དམ་ཚིག་རྡོ་རྗེ་ལ་སོགས་པ་དེ་ཡང་གསུངས་པ། ས་ཡི་སྙིང་པོ་ལ་སོགས་དྲུག །ཅེས་པ་ལ་སོགས་པའོ། །རྡོ་རྗེ་ཡེ་ཤེས་ཀྱི་སྤྱོད་པ། །ཞེས་པ་ནི་ཡེ་ཤེས་ཁོ་ན་རྡོ་རྗེ་སྟེ་དེ་ཐོབ་པར་བྱེད་པའི་སྤྱོད་པའོ། །བཙུན་མོ་ལས་འདས་ཞེས་པ་ནི་རྡོ་རྗེ་སེམས་དཔའི་བཙུན་མོའི་བྷ་ག་ལས་ཆོས་ཀྱི་དབྱིངས་ཀྱི་ཕོ་བྲང་དུ་འཐོན་ཞེས་པ་སྟེ་འཐོན་ཞེས་ཀྱང་གོང་མའི་དོན་ལ་ངོ་མཚར་གསུངས་པ། བཅོམ་ལྡན་འདས་ཞེས་པ་ལ་སོགས་པའོ། །འདོད་ཆགས་ཀྱི་ཡི་གེ་ཞེས་པ་ནི་འདོད་ཆགས་ལས་གྱུར་པའི་བྱང་ཆུབ་ཀྱི་སེམས་སོ། །ལྷག་མ་ནི་གོ་སླའོ། །ད་ནི་སྒྲར་སྣང་བའི་རྒྱུད་ཀྱིས་ཕན་གདགས་པའི་ཕྱིར་བཀའ་
བསྒྲགས་པའི་དོན་དུ་བསྒོ་བ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་གོང་དུ་འདི་གསུམ་མོ་ཞེས་པ་ནས་ཕྱག་འཚལ་ནས་ཅང་མི་གསུང་བར་གྱུར་ཏོ་ཞེས་པའི་དེ་མ་ཐག་སྟེ། འདི་ནི་སྤྱིར་བསྒོ་བ་ཡིན་ནོ། །ཡང་དམིགས་ཀྱིས་རྡོ་རྗེ་ཆོས་ལ་བསྒོ་བ་གསུངས་པ། དེ་ནས་ཞེས་པ་ལ་སོགས་པ་སྟེ་གོ་སླའོ། །ཡང་ཁས་བླངས་པ་གསུངས་པ་དེ་ནས་ཞེས་ཏེ། ཅང་མི་གསུང་བ་ཞེས་པ་ནི་འདོད་པའི་དོན་རྫོགས་པའི་དོན་ཏོ། །ད་ནི་བསྒོ་བ་དེ་ཁོ་ན་དེ་བཞིན་བགྱིའོ་ཞེས་ཁས་བླངས་ནས་སེམས་ཅན་རྣམས་ལ་བསྒྲགས་པའི་ཕྲིན་ལས་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་རྩ་བ་དང་ཕྱི་མའི་སྒྲའི་རྒྱུད་ཀྱི་རྣམ་པ་མཐའ་དག་རྫོགས་པའི་དེ་མ་ཐག་གོ །དེ་ནས་སེམས་ཅན་རྣམས་ལ་རྡོ་རྗེ་གསུམ་སེམས་དཔའི་རྒྱུད་བསྒྲགས་སོ་ཞེས་པ་སྟེ་ཡོངས་སུ་རྫོགས་པའི་དོན་ཏོ། །རྩ་བའི་རྒྱུད་རྫོགས་ནས་རང་གི་ལས་ལ་ཞུགས་པ་གསུངས་པ་དེ་ནས་ཞེས་པ་ལ་སོགས་པ་སྟེ། དེ་ལ་དེ་ནས་ཞེས་པ་ནི་དེ་བཞིན་བགྱིའོ་ཞེས་པ་ནས་ཅང་མི་གསུང་ཞེས་པའི་དེ་མ་ཐག་གོ །ཅང་མི་གསུང་བར་གྱུར་ཏོ་ཞེས་པ་ནི་ཁམས་གསུམ་ཐམས་ཅད་ཀྱི་ལུས་དང་དེ་བཞིན་གཤེགས་པ་ཐམས་ཅད་ཀྱི་སྐུ་མཉམ་པ་ཉིད་ལ་དམིགས་པ་ཁོ་ནའི་ཕྱིར་ཏེ། འདིའི་ཕྱིར་རྣལ་འབྱོར་པ་དག་ཀྱང་སྦྱོར་བ་རྣམ་པ་གསུམ་རྫོགས་ནས་གཤེགས་སུ་གསོལ་བ་ལ་རྡོ་རྗེ་གསུམ་གྱི་ཐུགས་ཀར་མཐའ་དག་བསྡུས་ཏེ། དེ་ཡང་ནམ་མཁའ་ལྟར་མཉམ་པ་ཉིད་དུ་བསམས་པའོ། །དེ་ཡང་གསུངས་པ། དེ་ཉིད་བདག་ཉིད་གསུང་ལྡན་པའི། །སངས་རྒྱས་ཐོགས་མེད་སླར་གཤེགས་གསོལ། །ཞེའོ། །ལེའུ་བཅུ་བདུན་པའི་འགྲེལ་པ་རྫོགས་ཏེ། རྩ་བའི་རྒྱུད་ཀྱི་འགྲེལ་པ་རྫོགས་སོ།། །།