ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ།
ཡེ་ཤེས་སྙིང་པོ།
ལེའུ་དང་པོ། ལྷ་མོ་སྤྱན་མས་ཞུས་པའི་བཤད་པ།
རྒྱ་གར་སྐད་དུ། ཙ་ཏུར་དེ་བ་ཏི་པ་རི་པྲྀ་ཙྪ་ཊཱི་ཀཱ། བོད་སྐད་དུ། ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཆགས་ཆེན་བཅོམ་ལྡན་དགྱེས་ཆེན་པོ། །བདེ་ཆེན་ཀུན་བདག་ཆེན་པོའོ། །མགོན་པོ་རྡོ་རྗེ་སེམས་དཔའ་ལ། །བཏུད་ནས་རྣམ་པར་བཤད་པ་བརྩམ། །དེ་ལ་ཉན་པ་པོ་འཇུག་པར་བྱ་བའི་ཕྱིར། དང་པོར་བརྗོད་པར་བྱ་བ་ནི་གང་ཞིག་འབྲེལ་བ་ནི་ཅི། དགོས་པ་ནི་ཇི་ལྟ་བུ། དགོས་པའི་དགོས་པ་ནི་ཅི་ཞིག་སྙམ་དུ་རྟོག་པ་ན་དེ་རྣམས་ཀྱི་དོན་བསྟན་ཏེ། དེ་ལ་རྡོ་རྗེ་སེམས་དཔའ་ལྷ་མོ་བཟིའི་མཚན་ཉིད་དང་བཅས་པ་ནི་བརྗོད་པར་བྱ་བའོ། །དེ་སྟོན་པར་བྱེད་པའི་སྒྲའི་ཚོགས་དང་འབྲེལ་བ་ནི་འབྲེལ་པའོ། །དགོས་པ་ནི་སོ་སོའི་སྐྱེ་བོ་འདོད་ཆགས་ལ་སོགས་པ་ལས་བཟློག་ནས་ཡང་དག་པའི་འདོད་ཆགས་ལ་སོགས་པ་བསྐྱེད་པའོ། །དེའི་དགོས་པ་ནི་ཐེག་པ་ཆེན་པོའི་ལམ་རྒྱུ་དང་འབྲས་བུར་བཅས་པས་མངོན་པར་རྫོགས་པར་བྱང་ཆུབ་སྟེ་སེམས་ཅན་གྱི་དོན་བྱེད་པའོ། །ཅིའི་ཕྱིར་འདི་སྐད་བདག་གིས་ཐོས་པ་མ་སྨོས་ཤེ་ན། འདི་ནི་གསང་བ་འདུས་པའི་བཤད་པའི་རྒྱུད་ཡིན་པས་རྩ་བའི་མདོར་གསུངས་པས་ཉེས་པ་མེད་དོ། །གང་གི་ཕྱིར། གང་ཞིག་མཐོང་ནས་གང་ལ་ཞུས་ཤེ་ན། གསུངས་པ། ལྷ་མོ་བཞི་དང་མཉམ་ལྡན་ཞིང༌། །ཞེས་རྒྱ་ཆེར་འབྱུང་བ་ལ་ལྷ་མོ་ཡང་ཡིན་ལ་བཞི་ཡང་ཡིན་པས་ལྷ་མོ་བཞིའོ། །བཞི་ཞེས་བྱ་བ་ནི་ངེས་པར་གཟུང་བའོ། །ཇི་ལྟར་ཞེ་ན། འབྱུང་བ་བཞིའི་རང་བཞིན་ཡིན་པའི་ཕྱིར་རོ། །གང་ལ་དེ་དག་གིས་བསྐོར་བའི་རང་བཞིན་ཡོད་པ་དེ་ལ་དེ་སྐད་ཅེས་བྱའོ། །དེ་ཡང་རྡོ་རྗེ་སེམས་དཔའི་མཚམས་བཞིར་ལྷ་མོ་བཞིས་བསྐོར་ཞེས་བྱ་བའི་ཐ་ཚིག་གོ །དེ་ཡང་སྤྲོས་ནས་ཕྱག་རྒྱ་བཞི་དག་ནི། །དཀྱིལ་འཁོར་དེ་ལ་བསྐོར་བར་བརྟག །བདག་ཉིད་དབུས་སུ་གནས་བྱས་ཏེ། །འཁོར་ལོ་ཐམས་ཅད་བསྡུ་བར་བྱ། །ཞེས་གསུངས་སོ། །དེ་ལྟ་བུ་ནི་གསང་བའི་བསྙེན་སྒྲུབ་བཞི་སྟེ། དེ་ཡང༌། བསྒྲུབ་བྱ་སྒྲུབ་པར་སྦྱོར་པ་གང༌། །དེ་ནི་བསྙེན་པར་གསུངས་པ་ཡིན། །རྡོ་རྗེ་པདྨ་མཉམ་སྦྱོར་བ། །དེ་ནི་ཉེ་བར་སྒྲུབ་པའོ། །ཧཱུཾ་ཕཊ་ཚུལ་དང་ལྡན་པ་རུ། །བསྐྱོད་པའི་སྒྲུབ་པ་གསུངས་པའོ། །རང་
བཞིན་ཞི་བར་གསུངས་པ་ནི། །སྒྲུབ་པ་ཆེན་པོར་གསུངས་པའོ། །ཞེས་གསུངས་སོ། །ཞི་ཞེས་བྱ་བའི་སྒྲ་ནི་ངེས་པར་གཟུང་བ་མ་ཡིན་ཏེ་གཞན་དང་ལྡན་ཞེས་བྱ་བའི་ཚིག་ལྷག་མའོ། །དེ་གང་ཞེ་ན། སངས་རྒྱས་གཟུགས་ཀྱིས་ཉེར་བརྒྱན་པ། །ཞེས་བྱའོ། །སངས་རྒྱས་ཉིད་གཟུགས་ཏེ་དེ་ལ་དེ་སྐད་ཅེས་བྱའོ། །གང་ལ་བརྒྱན་ཞེ་ན། རྡོ་རྗེ་སེམས་དཔའི་ཕུང་པོ་ལ་སོགས་པའོ། །རིགས་ལྔ་དང༌། ལྷ་མོ་བཞི་དང༌། ལྕགས་ཀྱུ་ལ་སོགས་པ་དང༌། བྱང་ཆུབ་སེམས་དཔའ་དྲུག་ལ་ནི་སངས་རྒྱས་གཟུགས་ཞེས་བྱའོ། །དེས་ཕུང་པོ་ལ་སོགས་པ་བྱིན་གྱིས་བརླབས་པ་ལ་བརྒྱན་ཞེས་དེ་སྐད་དུ་བྱའོ། །རྒྱན་དེ་ཙམ་དུ་ཟད་ད་མ་ཞེ་ན། རབ་ཏུ་དགའ་བའི་སྦྱོར་ཆེན་ལ། །ཞེས་གསུངས་ཏེ། དེ་ལ་སེམས་ཅན་གྱི་དོན་མཛད་པའི་རབ་ཏུ་དགྱེས་པའི་དགའ་བ་དང་ལྡན་པ་ལ་དགའ་བ་ཞེས་བྱའོ། །དེ་སྐད་དུ། སྐྱོན་མེད་རྟག་པར་གཏན་དུ་ནི། །ཐམས་ཅད་ལ་ནི་རྗེས་ཆགས་པས། །དེ་ཉིད་གསང་བ་བཅོམ་ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་གསུངས་སོ། །ཐབས་དང་ཤེས་རབ་ཀྱི་སྦྱོར་བ་ལ་རྡོ་རྗེ་སེམས་དཔའ་བཞུགས་སོ་ཞེས་གསུངས་སོ། །དེ་ཡང་རྡོ་རྗེ་ནི་སྟོང་པ་ཉིད་ལ་སོགས་པའི་ཡེ་ཤེས་ལྔའོ། །དེ་ཡང་རྒྱུ་ལྔ་དག་གི་འབྲས་དག་ནི། །རྡོ་རྗེ་ཞེས་སུ་བསྟན་པ་ཡིན། །ཞེས་འབྱུང་ངོ༌། །དེ་ཉིད་ལ་སེམས་ཞེས་བྱ་སྟེ། །བྱང་ཆུབ་ཉིད་དངོས་ཡེ་ཤེས་ནི། །དེ་ནི་རྡོ་རྗེར་འདིར་གཟུགས་ཏེ། །རྡོ་རྗེ་ཡེ་ཤེས་ལས་བྱུང་བ། །དེ་ནི་རྡོ་རྗེ་སེམས་པ་གསུངས། །ཞེས་བྱའོ། །ཇི་ལྟར་བཞུགས་ཤེ་ན། ཆེར་ཞུགས་ཞེས་གསུངས་ཏེ་སྦྱོར་བ་ཆེན་པོ་ལ་བཞུགས་ཞེས་བྱ་བའི་ཐ་ཚིག་གོ །རང་གི་ངོ་བོ་ཉིད་ནི་བདེ་བ་ཆེན་པོ་བྱང་ཆུབ་ཀྱི་སེམས་ཐིགས་ལེ་ཡུམ་གྱི་པདྨ་ལ་གནས་པའོ། །བཞུགས་པ་དེའི་ལས་བསྟན་པ། །འོད་ཟེར་འཆང་ཞིང་འཁྲིགས་པ་ཡི། །ཞེས་པ་ནི་འོད་ཟེར་འཆང་བ་ནི་ལྡན་པའོ།། འཁྲིགས་པ་ནི་འདུ་བའོ། །དེ་ནི་གསང་བར་བྱ་བས་ན་གསང་ཆེན་ཏེ་གསང་བ་ཡང་ཡིན་ལ་ཆེན་པོ་ཡང་ཡིན་པས་དེ་སྐད་ཅེས་བྱའོ། །གཞི་གང་ལ་ཞེ་ན། ཆོས་ཀྱི་འབྱུང་གནས་ལ་ཞེས་བྱ་བ་གསུངས་ཏེ། པདྨའོ་ཞེས་ཁོང་ནས་དྲང་ངོ༌། །ཆོས་ནི་ཕུང་པོ་ལ་སོགས་པའོ། །དེའི་གནས་
ནི་ཆོས་ཀྱི་འབྱུང་གནས་སོ། །དེ་ཡང་རྒྱས་པར་ནི་རང་བཞིན་གྱིས་གྲུབ་པའི་རིམ་པ་ལས་བལྟ་བར་བྱའོ། །ཆོས་ཀྱི་འབྱུང་གནས་ཨེ་གྲུ་གསུམ་སྐུ་གསུང་ཐུགས་ཀྱི་རང་བཞིན་ཁོ་ནའོ། །དེ་ཡང༌། སྐུ་གསུང་ཐུགས་ཀྱི་བྱེ་བྲག་གིས། །ཟུར་གསུམ་ལ་ནི་རྣམ་པར་བསྒོམ། །ཞས་གསུངས་སོ། །ལ་ཞེས་བྱ་བ་བདུན་པ་འདི་ཡང་གནས་གཞི་སྟེ་ཤིང་ལ་བྱ་ཡི་གནས་བཅས་ཞེས་བྱ་བ་ལྟ་བུའོ། །དའི་བྱེད་པ་གང་ཞེ་ན། བྱང་ཆུབ་སེམས་ནི་འཕྲོས་ནས་སུ། །ཞེས་བྱ་བ་ལ་འཕྲོས་པ་ནི་ཞུ་བའོ། །དེ་ཡང་ཐབས་དང་ཤེས་རབ་སྦྱོར་བ་ལས་བྱུང་བ་བརྗོད་ཀྱིས་མི་ལང་བའི་བྱང་ཆུབ་ཀྱི་སེམས་བདེ་བ་ཆེན་པོ་དོན་དམ་པ་རྟོགས་པའི་རྒྱུར་གྱུར་པའོ། །དབྱངས་ཡིག་རྡོ་རྗེ་ཞེས་བསྟན་ཏེ། །ཡི་གེ་བཅུ་ནི་གཟུགས་མའོ། །སེམས་ཡིག་བཅུ་པ་གསུངས་པ་སྟེ། །ཡི་གེ་ས་ནི་བདེ་བ་ཆེ། །ཞེས་འབྱུང་བས་འདིས་བཤད་པར་རིག་པར་བྱའོ། །དེའི་བྱེད་པའི་རང་གི་ངོ་བོ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ནི་བྱང་ཆུབ་ཀྱི་སེམས་གསང་བའི་པདྨ་ལ་ཕབ་པོ་ཞེས་མན་ངག་ངོ༌། །དེ་ཇི་ལྟ་བུ་ཞེ་ན། ཆོས་ཀྱི་དབྱིངས་ནི་ཞུ་མཛད་དོ། །ཞེས་གསུངས་སོ། །བྱང་ཆུབ་ཀྱི་སེམས་དེ་ཡིག་འབྲུར་བྱིན་གྱིས་བརླབ་པ་ནི་བྱང་ཆུབ་སེམས་ནི་ཞེས་བྱའོ། །ཆོས་ནི་བཤད་ཟིན་ཏོ། །དབྱིངས་ནི་རྒྱུའོ། །ཞུ་བ་ནི་ཡི་གེ་ཞུ་བའོ། །དེ་ཡང་འོད་ཀྱི་གོང་བུར་གུར་པའོ། །ཞུ་བའི་དངོས་པོ་དེ་མཐོང་ནས། །ཞེས་བྱ་བ་ནི་ཞུ་བ་ཡང་ཡིན་ལ་དངོས་པོ་ཡང་ཡིན་པས་དེ་སྐད་ཅེས་བྱའོ། །ལྷ་མོ་འདི་ལ་མཐོང་བ་ཡོད་པས་མཐོང་བའོ། །ལྷ་མོ་ཡང་ཡིན་ལ་སྤྱན་མ་ཡང་ཡིན་པས་སྤྱན་མའོ། །དེས་ཞུས་ཞེས་བྱ་བ་དང་སྦྱར་རོ། །གང་ལ་ཞེ་ན། བཅོམ་ལྡན་འདས་ཏེ། བཅོམ་ལྡན་འདས་ཉིད་རྡོ་རྗེ་སེམས་དཔའ་ཞེས་བྱ་བའི་ཐ་ཚིག་གོ །འདིར་སྐལ་བ་ཕུན་སུམ་ཚོགས་པ་དང་ལྡན་པས་བཅོམ་ལྡན་འདས་སོ། །རྡོ་རྗེ་སེམས་དཔའ་ནི་བཤད་ཟིན་ཏོ། །ཚིག་ནི་འོག་ནས་གསལ་བའོ། །ཆོས་ཀྱི་དབྱིངས་རྣམས་འཕྲོ་བ་ནི། །གང་ལས་སྐྱེ་བར་འགྱུར་བ་ལགས། །ཞེས་པ་ནི་ཁུངས་ཞུས་པའོ། །དང་པོ་ཅི་ལས་འོང་པ་ཡིན། །ཞེས་བྱ་བས་ནི་དེའི་ལམ་ཞུས་པའོ། །དེ་བཞིན་ཕྱིར་འགྲོ་ཇི་ལྟར་ལགས། །ཞེས་བྱ་བས་ནི་གནས་ཞུས་
པའོ། །ཡན་ལག་མེད་པ་གང་དེ་ནི། །ཞེས་བྱ་བས་ནི་སྤྱིའི་མཚན་ཉིད་ཞུས་པའོ། །ཡན་ལག་དང་བཅས་གྱུར་ནས་སུ། །ལུས་དངོས་གྱུར་པ་ཇི་ལྟར་ལགས། །ཞེས་བྱ་བས་ནི་རང་གི་མཚན་ཉིད་རིག་པའོ། །དེ་ཉིད་ལ་སྐྱེ་མཆེད་ཀྱི་སྒོ་ནས་ཞུས་པ་ནི། མིག་ནས་དབང་པོའི་བར་རོ། །ཕུང་པོ་དང་ཁམས་ཀྱི་སྒོ་ནས་ཞུས་པ་ནི། ཕུང་པོ་ཞེས་པ་ནས་འཇུག་ཅེས་པའི་བར་རོ། །ཉོན་མོངས་པའི་སྒོ་ནས་ཞུས་པ་ནི། མ་རིག་པ་ནས་འདོད་པ་ལ་སོགས་པའི་བར་རོ། །དེ་རྣམས་བསྡུས་པའི་སྒོ་ནས་ཞུས་པ་ནི་རྣམ་པར་ཤེས་པ་ནས་འདུས་པ་ལགས་ཀྱི་བར་རོ། །བསྒོམ་པའི་སྒོ་ནས་ཞུས་པ་ནི། །དངོས་པོ་མེད་པར་བསྒོམ་པའི་གཟུགས། །ཞེས་བྱ་བས་བསྟན་ཏོ། །གོང་དུ་ཞུས་པའི་འཕྲོ་གཟུགས་ལ་སོགས་པའི་སྒོ་ནས་ཞུས་པ་ནི། གཟུགས་ལ་སོགས་ཞེས་པ་ནས་ཇི་ལྟར་ལགས་ཞེས་བྱ་བའི་བར་དུའོ། །ལྷག་མ་ནི་མཇུག་བསྡུས་པའོ། །དེ་ལྟར་བསྡུས་པའི་དོན་བརྗོད་ནས་ཡན་ལག་ཐམས་ཅད་བཤད་པར་བྱ་སྟེ་དེ་ལ། ཆོས་ཀྱི་དབྱིངས་ནི་རྣམ་འཕྲོ་བ། །ཞེས་བྱ་བ་ནི་བཤད་ཟིན་ཏོ། །གང་ལས་ཞེས་བྱ་བ་ནི་འབྱུང་ཁུངས་ཏེ་ཨ་མྲ་ལས་མེ་ཏོག་ཅེས་བྱ་བ་ལྟ་བུའོ། །དང་པོ་ཇི་ལྟར་བྱུང་བ་ནི་འགྲོ་བའི་ལམ་ཞེས་བྱ་བའི་ཐ་ཚིག་གོ །ཕྱིར་འགྲོ་བ་ནི་འདུ་བའོ། །ཡན་ལག་མེད་པ་ཉིད་ཡིན་པས་ཡན་ལག་མེད་པ་སྟེ་ས་བོན་ཞེས་བྱ་བའི་ཐ་ཚིག་གོ །དེ་དང་བཅས་པ་ནི་ཡན་ལག་དང་བཅས་པའོ། །ལུས་ཀྱང་ཡིན་ལ་དངོས་གྱུར་ཀྱང་ཡིན་པས་དེ་སྐད་ཅེས་བཤད་དོ། །མིག་ལ་སོགས་པའི་ཐ་མར་དབང་པོ་ཞེས་སེམས་ཀུན་ལ་སྦྱར་བར་བྱའོ། །དངོས་པོ་རྣམས་ནི་འབྱུང་བ་བཞིའོ། །འཇུག་པ་ནི་ཡུལ་བསྐྱེད་པའོ། །གང་གི་སྒྲས་ནི་དགེ་བ་དང་མི་དགེ་བ་སྡུད་དོ། །ས་བོན་ལ་མ་རིག་བག་ཆགས་ཞེས་བྱའོ། །སྲེད་པ་ནི་ཆགས་པའོ། །དེ་ནི་ཉོན་མོངས་པ་ཡང་ཡིན་ལ་འདོད་ཆགས་ལ་སོགས་པ་ཡང་ཡིན་པས་དེ་སྐད་ཅེས་བྱའོ། །སོགས་པ་ནི་ཞི་སྡང་ལ་སོགས་པའོ། །རྣམ་པར་ཤེས་པ་ནི་ཀུན་གཞིའོ། །སྣ་ཚོགས་ནི་ལྷག་མའོ། །དེའི་ཕྱིར་ཁམས་གསུམ་པ་ནི་སེམས་ཙམ་མོ།།
མདོ་ལས་ཀྱང་ཀྱེ་རྒྱལ་བའི་སྲས་ཁམས་གསུམ་པ་འདི་ནི་སེམས་ཙམ་མོ་ཞེས་གསུངས་སོ། །གཟུགས་ལ་སོགས་པ་ནི་སྤྱོད་ཡུལ་ཏེ། དེ་ཡང་དངོས་པོར་གྲུབ་པ་ནི་མེད་དེ་ཀུན་བརྟགས་པའི་ཕྱིར་རོ། །དེ་སྐད་དུ་ཡང༌། བདག་དང་གཞན་སྨྲ་དངོས་འདི་དག །ཡང་དག་དུ་ན་གཅིག་པ་དང༌། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་བྱ་བའི་ཆད་མ་འདི་གསུངས་སོ། །དམིགས་པ་ནི་ཡུལ་ལ་དེ་དག་དང་བཅས་པ་ནི་འཛིན་པའོ། །དངོས་པོ་མེད་བཞིན་དུ་རྟོག་ཅེས་བྱ་བའི་ཐ་ཚིག་གོ །དེ་དག་ཅེས་བྱ་བ་ནི་ཞུས་པ་དེ་དག་གོ །ངོ་མཚར་ཆེ་བ་ནི་མ་ཡིན་གྱི་མ་རྟོགས་པ་ལ་ངོ་མཚར་དུ་རྟོགས་པའོ། །བདག་ནི་སྤྱན་མའོ། །ཐེ་ཚོམ་ནི་ཡིད་གཉིས་ཟ་བའོ། །ལྷའི་སྒྲ་ནི་རྡོ་རྗེ་སེམས་དཔའོ། །ཇི་ལྟར་ཞེ་ན། དབང་ཕྱུག་ཆེན་པོ་ལ་སོགས་པ་འདུལ་བའི་ཕྱིར། དེའི་གཟུགས་སུ་སྤྲུལ་པས་ལྷ་མོའོ། །དེ་ལྟར་ནི་ཞུས་པའོ། །ཞུས་མ་ཐག་བ་ནི་དེ་མ་ཐག་པའོ། །གསུངས་བདེ་བཀའ་སྩལ་པའོ། །གཟུང་བ་དང་འཛིན་པ་དང་བྲལ་བ་ནི་ཤེས་རབ་པོ། །དེ་ཉིད་ཟབ་པས་དེ་སྐད་བཤད་དོ། །ཉོན་ཅིག་ནི་གདམས་པའོ། །འདི་ལ་ཡང་དག་པའི་ཤེས་རབ་མངའ་བས་སྤྱན་མའོ། །བཤད་པར་བྱ་བ་ནི་དམ་བཅའ་བའོ། །ད་ནི་ཆོས་ཉིད་དེའི་ཆེ་བ་གསུངས་པ་ནི་ཚད་མ་ལས་འདས་པས་དཔྱད་དུ་མེད་པའོ། །དེའི་ཕྱིར་ཆོས་འདི་དེ་ནི་ཤེས་པར་བྱ་བའི་ཡུལ་ལས་འདས་པའི་ཕྱིར་རོ། །དེ་ནི་རྣམ་པ་ཐམས་ཅད་མཁྱེན་པའི་སྤྱོད་ཡུལ་དུ་བཞག་སྟེ། དེ་སྐད་དུ་ཡང་།གཞན་སེམས་རིག་པས་ཤེས་པ་ནི། །རང་སེམས་ཤེས་པས་སངས་རྒྱས་ཀྱི། །སྤྱོད་ཡུལ་ཇི་བཞིན་མ་ཤེས་ཕྱིར། །བསམ་ཡས་སངས་རྒྱས་སྤྱོད་ཡུལ་ལོ། །ཞེས་འབྱུང་ངོ༌། །ཅིའི་ཕྱིར་ཞེ་ན། སངས་རྒྱས་ཀུན་གྱི་གསང་ཆེན་ནོ། །ཞེས་གསུངས་སོ། །སངས་རྒྱས་ཀུན་ཁོ་ན་ནི་གསང་བ་ཡིན་ཏེ། དཔེར་ན་སྲིད་སྒྲུབ་ཁོ་ན་གཞུ་ཐོགས་བྱ་བ་ལྟ་བུ་ཡིན་གྱི། ནག་པོ་ཁོ་ན་གཞུ་ཐོགས་པ་ལྟ་བུ་བྱ་བ་ནི་མ་ཡིན་ནོ། །དེ་ཡང་ཡེ་ཤེས་ནམ་མཁའ་ལྟ་བུ་ཡིན་ཏེ་དེ་མ་གྲུབ་པར་བསྟན་པའི་ཕྱིར་རོ། །འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང༌། དམིགས་པ་མེད་པའི་སེམས་དག་ནི། །ནམ་མཁའ་ལྟ་བུར་གནས་པ་སྟ། །ནམ་མཁའ་ཁོ་ནར་བསྒོམ་པ་སྟེ། །སྟོང་ཉིད་འདོད་པ་བསྒོམ་པའོ།།
ཞེས་གསུངས་སོ། །དེ་གང་གི་ཡུལ་དུ་འགྱུར་ཞེ་ན། མི་ཤེས་མུན་པས་བསྒྲིབས་པས་ན། །ཉན་ཐོས་རྣམས་ཀྱིས་ཤེས་པ་མིན། །ཞེས་གསུངས་སོ། །དེ་ནི་ཉོན་མོངས་པ་དང་བྲལ་བ་མི་ཤེས་པ་སྟེ། དེ་ལ་ཐམས་ཅད་མཁྱེན་པའི་ཡེ་ཤེས་དང་མི་ལྡན་པའི་ཕྱིར་རོ། །ཉན་ཐོས་ཀྱང་ཡིན་ལ་རྣམས་ཀྱང་ཡིན་པས་ཉན་ཐོས་རྣམས་ཏེ་དེས་ཤེས་བྱའི་སྒྲིབ་པ་མ་སྤངས་པའི་ཕྱིར་རོ། །དེ་རང་སངས་རྒྱས་ཀྱི་སྤྱོད་ཡུལ་ལོ་སྙམ་ན་ཡང་སྤྱོད་ཡུལ་བག་ཆགས་ཞེས་གསུངས་ཏེ། སྤྱོད་ཡུལ་ནི་གཟུགས་ལ་སོགས་པའི་སྐྱེ་མཆེད་དྲུག་གོ །དེ་བག་ཆགས་བརྟས་ནས་སྣང་མོད་ཀྱིས་དེ་བརྟགས་པའི་ཕྱིར་རོ། །དེ་བས་ཡེ་ཤེས་ནམ་མཁའ་ནི། །རང་སངས་རྒྱས་སུ་སྤྲུལ་པ་སྟེ། །ཞེས་པ་ནི་གོམས་པ་ལས་རང་འབྱུང་བས་རང་སངས་རྒྱས་ཏེ་དེའི་སྤྲུལ་པའོ། །དེས་ཀྱང་མི་ཤེས་པའི་འཛིན་རྟོག་མ་སྤངས་པའི་ཕྱིར་རོ། །དེ་སྐད་དུ་ཡང་འཕགས་པ་བྱམས་པའི་ཞལ་སྔ་ནས་ཀྱིས་ཀྱང༌། གཟུང་པའི་རྟོག་པ་ཉམས་ཕྱིར་དང༌། །འཛིན་པ་མ་སྤངས་ཕྱིར་གྱིས་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པ་ཤེས་པར་བྱ། །ཞེས་གསུངས་སོ། །ཀྱང་གི་སྒྲ་ནི་ཉན་ཐོས་ཀྱིས་མ་མཐོང་བ་དེ་རང་སངས་རྒྱས་ཀྱིས་མི་མཐོང་ངོ་ཞེས་སོ། །ཡང་ན་ཀྱང་གི་སྒྲས་མ་བཤད་པ་བསྡུ་སྟེ་མུ་སྟགས་དག་གིས་ཞེས་བསྡུའོ། །གལ་ཏེ་ཚངས་པ་ལ་སོགས་པས་ཀྱང༌། འཇིག་རྟེན་ཆགས་པ་ལ་སོགས་པ་ཤེས་པས་དེ་ཤེས་པར་མི་རུང་ངམ་ཞེ་ན། ཤེས་མེད་ཞེས་བྱ་བ་ལ་སོགས་པ་གསུངས་སོ། །དེ་ལ་ཤེས་མེད་ཉིད་སོ་སོའི་སྐྱེ་བོའོ། །དེས་ནི་དུས་གསུམ་གྱི་མཚན་ཉིད་ཀྱང་མི་རྟོགས་ན། དེ་ལྟ་བུ་ཤེས་པར་འགྱུར་བ་ལྟ་ག་ལ་ཡོད་རེ་སྐན། བྱོལ་སོང་རིག་པ་ངང་ལྡན་པ་འགའ་ཡང་ཡོད་པས་དེས་མི་ཤེས་སམ་ཞེ་ན། དུད་འགྲོ་ཡི་དགས་ཏེ་བག་ཆགས་ལས་སྐྱེས་པ་ཞེས་སྦྱར་རོ། །དུད་འགྲོ་ནི་གླང་པོ་ཆེ་ལ་སོགས་པའོ། །ཡི་དགས་ནི་ཁ་འབར་མའོ། །དེ་ཀུན་གྱིས་ཀྱང་མི་ཤེས་ཏེ་ཞེས་བྱ་བ་འདིའི་དགག་པ་འདི་ནི་མ་ཡིན་པར་དགག་པ་ཡིན་གྱི་མེད་པར་དགག་པ་མ་ཡིན་ནོ། །གསང་བ་ཆེན་པོ་དེའི་ནི་སུའི་སྤྱོད་ཡུལ་ཡང་མ་ཡིན་ནམ་ཞེ་ན་དེའི་ཕྱིར། སངས་རྒྱས་སྤྱོད་ཡུལ་གསང་ཆེན་ནོ། །ཞེས་གསང་བར་གསུངས་ཏེ་དེའི་དོན་བཤད་ཟིན་ཏོ།། །།ད་ནི་ཆོས་དབྱིངས་རྣམ་པར་འཕྲོ་པ་ནི། །གང་ལས་སྐྱེ་བར་འགྱུར་བ་ལགས། །ཞེས་བྱ་བ་དེའི་ལན་གསུངས་པ། སྙིང་པོ་ཤིན་ཏུ་སྙིང་
པོའི་མཆོག །ཅེས་རྒྱས་པར་འབྱུང་བ་ལས་སྙིང་པོ་ནི་སྐུ་གསུང་ཐུགས་སོ། །དེའི་རང་བཞིན་ནི་ཤིན་ཏུ་སྙིང་པོའི་མཆོག་གོ །དེ་ནི་རྡོ་རྗེ་སེམས་དཔའི་ངོ་བོ་རྣམ་པར་མི་རྟོག་པའི་ཡེ་ཤེས་སོ། །དེའི་ངོ་བོ་ནི་གང༌། དེ་ཀུན་བདག་ལ་གནས་པ་ཡི། །ཞེས་བྱ་བ་ནི་ཐམས་ཅད་ལ་ཁྱབ་པའོ། །སངས་རྒྱས་ཀུན་གྱི་གསང་ཆེན་ནི། །ལྷ་མོ་ཁྱོད་ལ་བཤད་པར་བྱ། །ཞེས་པ་ནི་བཤད་ཟིན་ཏོ། །ཕྲ་མོའི་ཏིང་ངེ་འཛིན་གསུངས་བ་བྱང་ཆུབ་སེམས་ཞེས་བྱ་བ་ལ་སོགས་པ་རྒྱས་པར་འབྱུང་བ་ལ། བྱང་ཆུབ་སེམས་ནི་བཤད་ཟིན་ཏོ། །དེ་ནི་གཟུང་བ་དང་འཛིན་པ་དང་བྲལ་བའོ། །དེ་ཡང༌། གཞན་གྱི་སེམས་ཀྱིས་རིག་པ་མེད། །དེས་ཀྱང་གཞན་སེམས་རིག་པ་མེད། །གཟུང་དང་འཛིན་དང་བྲལ་བའི་ཕྱིར། །རང་དེ་ཙམ་དུ་སྣང་བར་གནས། །ཞེས་གསུངས་སོ། །ཕྲ་མོའི་ཏིང་ངེ་འཛིན་གྱིས་ཁ་དོག་གསུངས་པ། ཟླ་བ་ཤེལ་དང་མཉམ་པའི་འོད། །ཅེས་བྱ་བ་སྟེ་དཀར་བ་དང་དངས་པ་དང་ལྡན་པའོ། །དེའི་ངོ་བོ་ནི། དེ་ཉིད་ཡེ་ཤེས་ལྔ་ཡི་དངོས། །ཞེས་བྱའོ། །དེ་ཉིད་ཅེས་བྱ་བ་གང་ཞེ་ན། དེ་ཁོ་ན་ནི་རིགས་ལྔར་གསུངས་ཞེས་བྱའོ། །དེ་ཡང་མེ་ལོང་ལྟ་བུ་ལ་སོགས་པའོ། །དེ་ཡང་ཚིག་མང་པོར་བྱས་པ་ནི་འདོད་བའི་དབང་དུ་བྱས་པ་ཡིན་ཏེ། དངོས་པོའི་དབང་དུ་བྱ་བ་ནི་མ་ཡིན་པའི་ཕྱིར་རོ། །དཔེར་ན་ཁྱེད་ཅག་ལ་ཞེས་བྱ་བ་ལྟ་བུའོ། །དེ་བས་ན་ཕྲ་མོ་དང་ཡེ་ཤེས་ཐ་དད་པར་གལ་འགྱུར། །དེའི་ཚད། ཡུངས་ཀར་ཆེ་བའི་འབྲུ་ཚད་ཙམ། །ཞེས་གསུངས་ཏེ་ཚད་དེ་ཙམ་དུ་ཤེས་བར་བྱའོ། །དེའི་གནས་ནི། །དེ་ཡི་དབུས་སུ་བཞུགས་པའི་ལྷ། །ཞེས་བྱ་བ་ལ་དབུས་ནི་རིག་མའི་དབྱིངས་སོ། །བཞུགས་པ་དེ་ཉིད་ལྷའོ། །ཐུན་མོང་དུ་ན་དབུས་ནི་རྡོ་རྗེའི་དཀྱིལ་ལ་བཞུགས་པའི་ལྷ་ནི་ཡིག་འབྲུའོ། །དེ་རྣལ་འབྱོར་པ་གང་གི་སྤྱོད་ཡུལ་ཡིན་ཞེ་ན། མི་གསལ་གསལ་བའི་གཟུགས་ཅན་དེ། །ཞེས་བྱ་བ་ལ། དེ་ཡང་མི་གསལ་བའི་གཟུགས་ཅན་དང་གསལ་བའི་གཟུགས་ཅན་ཞེས་སྦྱར་རོ། །དེ་ལ་ཡང་ལས་དང་པོ་པ་དང་ཡེ་ཤེས་འགའ་ཙམ་དབང་དུ་གྱུར་པའི་དབང་དུ་བྱས་ནས་དེ་སྐད་བཤད་ཀྱིས། རྣལ་འབྱོར་པ་འཕགས་པའི་གོ་འཕང་ཐོབ་པ་རྣམས་ཀྱིས་ནི་མངོན་སུམ་དུ་གཟིགས་པས་གསལ་ཞེས་བཤད་དོ། །ཕྱེད་ཚད་ཙམ་གྱི་ཕྲ་མོ་མཆོག །ཅེས་བྱ་བ་འདིར་ཡིག་འབྲུའི་ཚད་ཙམ་ཡིན་ལ་གོང་དུ་དེའི་རྟེན་རྡོ་རྗེའི་ཚད་དུ་གསུངས་པས་ཟློས་པའི་ཉེས་པ་མེད་དོ། །རྟེན་གྱི་ཕྱེད་ཀྱི་ཚད་དུ་རྟེན་ཅན་བཤད་དོ། །དེ་བཞིན་གཤེགས་པ་ཐམས་ཅད་རང་གི་ལུས་ལ་ཐི་མ་ནས། བྱང་ཆུབ་སེམས་སུ་གྱུར་
ཏེ་རྡོ་རྗེའི་ལམ་ནས་བྱུང་ནས། རིག་མའི་པདྨའི་སྣ་རྩེར་རྡོ་རྗེར་གྱུར་ཏེ། དེའི་དཀྱིལ་དུ་དེའི་ཕྱེད་ཚད་ཙམ་གྱི་ཡིག་འབྲུ་བསམ་མོ་ཞེས་བསྟན་པར་འགྱུར་རོ། །དེ་དུས་ཇི་སྲིད་བསྒོམ་པའི་ཚད་ཀྱང་གསང་བ་འདུས་པའི་རྒྱུད་ཕྱི་མ་ལས། མཚན་མ་བྱུང་གི་བར་དུ་བསྒོམ་པར་གསུངས་ཏེ། དང་པོ་ནི་སྨིག་རྒྱུ་འདྲ་བ་སྟེ། ཞེས་བྱ་བ་རྒྱས་པར་གསུངས་སོ། །རྩ་བའི་མདོ་ལས་ཀྱང༌། རིན་ཆེན་ཁ་དོག་རྣམ་ལྔ་པ། །ཞེས་རྒྱས་པར་འབྱུང་ངོ༌། །ཐིག་ལེའི་ཏིང་ངེ་འཛིན་གྱི་དབང་དུ་མཛད་ནས་གསུངས་པ། ཡིད་ཀྱི་དངོས་བོ་ཐིག་ལེ་ཞེས་བྱ་བ་རྒྱས་པར་གསུངས་སོ། །ཡིད་ནི་རྣམ་པར་རྟོག་པའོ། །དེའི་ངོ་བོ་ནི་ཐིག་ལེའི་དངོས་པོ་སྟ། ཡིད་དང་ཐིག་ལེ་ནི་དབྱེར་མེད་པའི་ཕྱིར་དེ་ཉིད་གཟུགས་ཏེ་སྲན་མའི་འབྲུ་ཙམ་ཞེས་བྱ་བའི་དོན་ཏོ། །དེ་ལྟ་བུ་སྙིང་གི་དབུས་སུ་བསམ་པར་བྱའོ། །དེའི་མཚན་ཉིད་བསྟན་པའི་ཕྱིར། །འོད་ཟེར་ཆེན་པོ་འབར་བ་ཅན། །ཞེས་བྱ་བ་སྟེ་དེ་ལ་འོང་འབར་བ་ཡོང་བའོ། །འདི་སྐད་དུ་རྣལ་འབྱོར་པས་རང་གི་སྙིང་གི་དབུས་སུ་དེ་བཞིན་གཤེགས་པ་ཐམས་ཅད་འདུས་ཏེ། བྱང་ཆུབ་སེམས་ཀྱི་འོད་དུ་གྱུར་ནས་ཙན་ཀའི་ཚད་ཙམ་གྱི་ཐིག་ལེ་ཡིད་དང་དབྱེར་མེད་པར་གྱུར་ནས་ཐིག་ལེ་བསྒོམ་པར་བྱའོ། །དེའི་དཀྱིལ་དུ་ཡིག་ཀྵཱུཾ་བསྒོམ་ཏེ། དེའི་འོད་ཀྱིས་ཐིག་ལེ་གསལ་བར་བྱ་སྟེ། དེ་ལས་བྱུང་བས་རང་གི་སྙིང་ག་གསལ་བར་བྱེད། སྙིང་ག་ནས་བྱུང་བས་ལུས་ཀུན་གསལ་བར་བྱེད། དེ་ལས་ལུས་ཀྱི་བ་སྦུའི་བུ་ག་ཐམས་ཅད་ནས་བྱུང་སྟེ་འཇིག་རྟེན་ཐམས་ཅད་སྣང་བར་བྱས་ཏེ་འོད་ཕྱིར་འདུས་ནས་ཡིག་འབྲུ་དང་གཅིག་པར་གྱུར་པ་ནི་མན་ངག་གོ །དེའི་ཚེས་གྲངས་ཀྱི་རིམ་པས་གནས་བསྟན་པ། ཇི་སྙེད་དགུ་ཡི་བར་དུ་ནི། །ཞེས་བྱ་བ་ནི། ནུ་མ་དང༌། ལག་པའི་རྩེ་མོ་དང༌། མགྲིན་པ་དང༌། མཆུ་དང༌། འགྲམ་པ་དང༌། མིག་དང༌། རྣ་བའི་རྩ་དང༌། སྤྱི་བོ་དང༌། ཡན་ལག་མཆོག་རྣམས་སོ། །དེ་ཡང༌། ནུ་མ་ལག་རྩེ་མགྲིན་པ་དང༌། །མ་མཆུ་དེ་བཞིན་འགྲམ་པ་མིག །རྣ་རྩེ་སྤྱི་བོ་ཡན་ལག་མཆོག །དེ་དག་ཀུན་ལ་སྡོད་བྱེད་པ། །ནམ་ཟླ་ཡར་ཚེས་མར་ཡང་ནི། །ཟླ་བ་མར་ཚེས་ལོག་པར་བཤད། །ཅེས་གསུངས་སོ། །དེ་ཡང་གནས་བཅོ་ལྔ་ལ་སྒྲ་ཡིག་བཅུ་དྲུག་པ་བསྒོམ་པའི་དོན་བསྟན་པ། དཔྲལ་བ་ལ་གནས་རྐང་མཐིལ་བར། །ཞེས་གསུངས་སོ། །མཐེ་བོའི་རྩ་བ་ལ་ཨ། རྗེ་ངར་ལ་ཨཱ། བརླ་གཉིས་ལ་ཨི། གསང་བ་ལ་ཨཱི། ལྟེ་བ་ལ་ཨུ། གསུས་པ་ལ་ཨཱུ། ནུ་མ་ལ་རྀ། ལག་པ་ལ་རཱྀ།
མགྲིན་པ་ལ་ལྀ། མཆུ་ལ་ལཱྀ། འགྲམ་པ་ལ་ཨེ། མིག་གཉིས་ལ་ཨཻ། རྣ་བའི་རྩེ་མོ་ལ་ཨོ། །སྤྱི་བོར་ཨཽ། ལུས་ཀུན་ལ་ཨཾ་ཨཱཿདེ་རྣམས་ཀྱི་གཟུགས་སུ་བསྒོམ་པར་བྱའོ། །དེ་ཡང༌། མཐེ་པོའི་རྩར་ནི་ཡི་གེ་ཨ། །རྗེ་དར་གཉིས་ལ་དེ་བཞིན་ཨཱ། །བརླ་གཉིས་ལ་ནི་ཡི་གེ་ཨི། །ཡི་གེ་ཨཱི་ནི་གསང་བ་སྟེ། །ལྟེ་བའི་རྩ་ལ་ཡི་གེ་ཨུ། །དེ་བཞིན་གསུས་བར་ཡི་གེ་ཨཱུ། །ནུ་མའི་རྩེ་ལ་ཡི་གེ་རྀ། །ཡི་གེ་རཱྀ་ནི་ལག་པར་གནས། །མགྲིན་པ་ཁོ་ནར་ཡི་གེ་ལྀ། དེ་བཞིན་མ་མཆུར་ཡི་གེ་ལཱྀ། །འགྲམ་པའི་ཕྱོགས་སུ་ཡི་གེ་ཨེ། །དེ་བཞིན་ཨཻ་ནི་མིག་གཉིས་ལ། །རྣ་བའི་རྩེ་མོར་ཡི་གེ་ཨོ། །དེ་བཞིན་ཨཽ་ནི་སྤྱི་བོར་གནས། །ཨཾ་ཨཿཡན་ལག་ཀུན་ལ་གནས། །ཆོག་རྣམས་ཀྱིས་སྤྱོར་བར་བྱ། །ཞེས་གཙུག་ལག་བརྒྱད་པ་ལས་གསུངས་སོ། །དེ་དག་གང་དུ་བསྡུ་ཞེ་ན་སྨྲས་པ། ཐིག་ལེ་དེ་ཁོ་ནར་བསྡུ་སྟེ་ཞེས་བྱ་བ་གསུངས་སོ། །གནས་དགུ་དང་བཅོ་ལྔ་ལ་ཁྱབ་པའི་བྱང་ཆུབ་ཀྱི་སེམས། སྙིང་གའི་པདྨའི་ཐིག་ལེ་ལ་འདུས་ཞེས་བྱ་བའི་དོན་ཏོ། །ལྟེ་བའི་དབུས་སུ་རྣམ་པར་གནས། །ཞེས་བྱ་བ་ནི་སྙིང་གའི་པདྨ་ལས་བབས་ཏེ་ལྟེ་བའི་པདྨ་ལ་གནས་སོ། །དེ་ལྟར་ཆོས་ཀྱི་དབྱིངས་སྐྱེ་བའི་ཁུངས་བསྟན་ནས། དེ་ནི་དང་པོ་ལྟར་འོང་བ་ཡིན་ཞེས་བྱ་བའི་ལན་རེ་ཞིག་གོང་དུ་ཡིག་འབྲུ་བསྒོམ་པའི་སྦས་པ་བསྟན་པ། ཆ་ཤས་ལྔ་པ་ཅན་ཡིན་ཏེ། །ཞེས་པ་ནི་ཡི་གེ་ཀྵཱུཾ་དེ་ཡན་ལག་ལྔ་དང་ལྡན་པའི་ཕྱིར་རོ། །འདི་ལྟ་སྟེ་ཐིག་ལེ་དང༌། ཟླ་ཚེས་དང༌། ཀ་དང༌། ཥ་དང༌། ཞབས་སྐྱེད་རིང་པོ་དང་ཨུ་རྣམས་སོ། །དེ་བསྟན་པ་བཅུ་གཉིས་ཀྱི་མཐའ་མ་ལ་ཞེས་བྱ་བ་ནི་མ་ནིང་གི་ཡི་གེ་བཞི་མ་གཏོགས་པ་གཞན་ཨ་ལ་སོགས་པའི་མཐའ་མ་ཀའོ། །ཆ་ཤས་དྲུག་གིས་མཚན་པ་ཉིད། །ཅེས་བྱ་བ་ནི་ཡལ་སོགས་པ་དྲུག་པས་མཚན་པ་སྟེ་ཥའོ། །ང་རོ་ཞེས་བྱ་བ་ནི་ཨུའི་ཞབས་སྐྱེད་ལ་བྱའོ། །ཐིག་ལེས་བརྒྱན་པ་ཞེས་བྱ་བ་ནི་ཟླ་ཚེས་དང་ཐིག་ལེའོ། །རྡོ་རྗེ་ཁོང་ནས་ཕྱུང་ནས་སུ། །ཞེས་བྱ་བ་ནི་གསང་བའི་རྡོ་རྗེའི་ལམ་ནས་བྱང་ཆུབ་ཀྱི་སེམས་ཡི་གེ་ཀྵཱུཾ་གི་ངོ་བོར་འཕྲོ་བའོ། །དེ་བཞིན་ཕྱིར་འགྲོ་ཇི་ལྟར་ལགས། །ཞེས་ཞུས་པའི་ལན་ས་བོན་སྐྱེ་གནས་ཞེས་བྱ་བ་ལ་སོགས་པ་གསུངས་ཏེ། །དེ་
ལ་ས་བོན་ནི་ཡི་གེ་ཀྵཱུཾ་སྟེ། དེ་སྐྱེ་གནས་སུ་ཕབ་པ་ལ་དེ་སྐད་ཅེས་བྱའོ། །ཆོས་ཀྱི་དབྱིངས་ནི་ཞུ་བར་བྱེད། །ཅེས་བྱ་བ་ནི། གསང་བའི་རྡོ་རྗེའི་ལམ་ནས་ཡི་གེ་ཀྵཱུཾ་ཆོས་ཐམས་ཅད་ཀྱི་རྒྱུ་བྱང་ཆུབ་སེམས་ཆུའི་ཁམས་སུ་གྱུར་པའོ། །ད་ནི། ཡན་ལག་མེད་བ་གང་དེ་ནི། །ཞེས་བྱ་བ་ནས། ཁམས་གསུམ་རྣམས་སུ་འཇུག་པའང༌། །ཞེས་བྱ་བའི་བར་གྱི་ཞུས་ལན་གསུངས་པ། དེ་ནི་རིམ་པར་ཞེས་བྱ་བ་ལ་སོགས་པ་སྟེ། དེ་ནི་ཞེས་བྱ་བ་ནི་ཡན་ལག་མེད་པ་ཆོས་ཀྱི་དབྱིངས་སོ། །རིམ་པར་བསྐྱེད་བྱས་ནས་ཞེས་བྱ་བ་ནི། མེར་མེར་པོ་དང༌། ནུར་ནུར་པོ་དང༌། ལྟར་ལྟར་བོ་དང༌། མཁྲང་འགྱུར་དང༌། རྐང་ལག་འགྱུས་པ་མངལ་གྱི་རིམ་པ་ལྔས་མིང་དང་གཟུགས་སུ་འགྱུར་བའོ། །དེ་ཉིད་བསྟན་པའི་ཕྱིར། སྒོ་དགུ་ལ་ནི་ཀུན་དུ་འགྲོ། །ཞེས་བྱ་བ་སྤྱི་བོ་ཚངས་པའི་བུ་ག་དང༌། མིག་དང་རྣ་བ་སྣ་དང་ཁ་དང་སྙིང་ག་དང༌། ལྟེ་བ་དང་གསང་བ་ཆུ་མིག་གི་བུ་ག་དང་རྣམ་པ་དགུའོ། །དེ་དག་ལ་བྱང་ཆུབ་སེམས་ཀྱིས་ཁྱབ་པར་གྱུར་ཏོ་ཞེས་བྱ་བའི་ཐ་ཚིག་གོ །ཅི་ཙམ་དུ་ཁྱབ་ཅེ་ན། ཁྱབ་ཅིང་ཞེན་ཞེས་བྱ་བ་ནི་གོ་རིམས་བཞིན་ནོ་ཞེས་བྱ་བའི་ཐ་ཚིག་གོ །འགྲོ་བ་ལྔའོ། །མི་གཡོ་བ་ནི་རི་རབ་ལ་སོགས་པའི་རྣམ་པའོ། །སོགས་པའི་སྒྲ་ནི་གཞལ་ཡས་ཁང་ལ་སོགས་པའོ། །གཡོ་དང་བཅས་པ་ནི་རབ་ཏུ་ལྡིང་བའི་གཞལ་ཡས་ཁང་ལ་སོགས་པའོ། །དེ་ཡང་ཚངས་པ་ལ་སོགས་པའོ། །ཚང་པ་ནི་གདོད་བཞི་པའོ། །སོགས་པས་ནི་ཁྱབ་འཇུག་ལ་སོགས་པའོ། །དེ་ཉིད་ལྷ་ཡིན་པས་ཚངས་ལྷའོ། །མིང་ནི་རཱ་ཧུ་ལ་ལ་སོགས་པའོ། །དེ་རྣམས་ནི་ཆོས་ཀྱི་དབྱིངས་ལས་བྱུང་པས་གཞི་ནི་དེ་ལྟར་གྱུར་པའོ་ཞེས་བྱའོ། །ས་འོག་དེ་གཙོ་བོ་ཡིན་པའི་ཕྱིར། གང་ལས་གཙོ་བོར་སྐྱེད་བྱེད་པ། །ཞེས་གསུངས་ཏེ། དེ་ཡང་ས་ཞེས་བྱ་བ་ལ་སོགས་པ་སྟེ། ས་འོག་ནི་འཇམ་བུ་གླིང་མན་ཆད་དེ། ས་བླ་ནི་ཉི་མས་ཁྱབ་པའོ། །ས་སྟེང་ནི་གང་རི་རབ་ཀྱི་ཕྱི་མོའོ། །ནམ་མཁའ་ནི་མ་བསྒྲིབས་པ་ལ་བྱའོ། །དེ་གསུངས་ཞེས་བྱ་པ་ནི། ཆོས་ཀྱི་དབྱིངས་ལས་འཕྲོས་ཞེས་བྱ་བའི་ཐ་ཚིག་གོ །མ་རིག་བག་ཆགས་ཞེས་བྱ་བ་ནས། དངོས་སུ་ཇི་ལྟར་འདུས་པ་ལགས། །ཞེས་བྱ་བའི་བར་གྱི་ལན། ཇི་སྙེད་ལུས་ལ་གནས་པའི་བར། །ཞེས་རྒྱས་པར་འགྱུད་བ་ལ། ཇི་སྙེད་ནི་ལུས་ཀྱི་ཚད་
མཚོན་པའོ། །ལུས་ནི་གཟུགས་ཀྱི་ཕུང་པོའོ། །དེ་ལ་གནས་པ་མིང་གཞིའོ། །བར་ནི་ལུས་ཀྱི་ཚད་དོ། །དེ་ཡིས་ནི་ཆོས་ཀྱི་དབྱིངས་སོ། །ལས་ནི་ལུས་ངག་ཡིད་དོ། །ལས་མིན་ནི་དེ་ལས་བཟློག་པའོ། །དེ་ལས་འཇུག་པ་ནི་བྱེད་པའོ། །དོན་དེ་ལྟར་གསུངས་པ། དགེ་དང་ཞེས་བྱ་བ་ལ་སོགས་པ་གསུངས་པའོ། །དགེ་བ་ནི་སྲོག་གཅོད་པ་སྤོང་བའོ། །དེ་ལས་བཟློག་པ་ནི་མི་དགེ་བའོ། །བསམ་པ་དེའི་འབྲས་བུ་ནི་ལས་ཀུན་བྱེད་པའོ། །དེ་གཉི་ག་ཡང་ཆས་ཀྱི་དབྱིངས་ལ་འཕྲོས་པ་ཡིན་པར་ཤེས་པར་བྱའོ། །དངོས་པོ་མེད་ལ་ཞེས་བྱ་བ་ནས། དམིགས་པ་དང་བཅས་ཇི་ལྟར་ལགས། །ཞེས་པའི་ལན་གསུངས་པ། སྦྱོར་བ་རྟག་ཏུ་དེ་གསུངས་ཏེ། །ཞེས་པ་ལ་སོགས་པ་ལ་དེ་ལ་སྦྱོར་བ་རྟག་ཏུ་དེ་གསུངས་ཞེས་བྱ་བ་ནི། གོང་དུ་ཆོས་ཀྱི་དབྱིངས་ཕྲ་མོའི་ཏིང་ངེ་འཛིན་དང༌། ཐིག་ལེའི་ཏིང་ངེ་འཛིན་རྟགས་ཏུ་སྦྱོར་བའོ། །དེ་ལྟར་ཐབས་དང་ཤེས་རབ་ཀྱི་མཆོད་པས་མཆོད་པ་ནི། མཆོད་པ་བསྒོམ་པར་འགྱུར་བ་ཡིན། །ཞེས་བྱའོ། །དེ་སྐད་དུ་རྣལ་འབྱོར་ཕ་དང་མས་ལེའུ་བཞིའི་ལུགས་ཀྱི་དཀྱིལ་འཁོར་གྱི་ལྷ་བསྒོམ་སྟེ་ཕྲ་མོ་དང་ཐིག་ལེའི་ཏིང་ངེ་འཛིན་བསྒོམས་ཏེ་ཐབས་དང་ཤེས་རབ་ཀྱི་རོལ་པས་མཆོད་ན་དེ་བཞིན་གཤེགས་པར་འགྱུར་རོ། །དེའི་འབྲས་བུ་གསུངས་པ། གང་ཚེ་ལས་ཀྱི་ལུས་ཞིག་ན། །ཞེས་བྱ་བ་ལ་སོགས་པའོ། །གང་གི་ཚེ་ལུས་ཞིག་ན་སེང་ཤི་བའི་ཚེའོ། །ལུས་ལྷའི་དཀྱིལ་འཁོར་དུ་བསྒོམས་པའི་དགེ་བའི་ལས་ཀྱི་བག་ཆགས་དང་ལྡན་པའི་ཕུང་པོའོ། །དེ་འཆི་བའི་ཚེ་ན། དེའི་མཐུས་རྣལ་འབྱོར་པ་བསྒོམས་པའི་རང་མཐུས། དེ་དང་འདྲ་བའི་ལུས་སུ་ཞེས་པ། ལུས་ཀྱི་དཀྱིལ་འཁོར་དེ་རྣལ་འབྱོར་པས་ཐོབ་པར་འགྱུར་ཏེ་མི་གནས་པའི་མྱ་ངན་ལས་འདས་པ་ཐོབ་པར་འགྱུར་རོ། །ཐོབ་པ་མེད་པ་ཇི་ལྟར་འཐོབ་པ་བསྟན་པའི་ཕྱིར། གཡོ་དང་ཞེས་བྱ་བལ་སོགས་པའོ། །ཀུན་ལ་ཁྱབ་མོད་ཀྱི་ནམ་མཁའ་ལ་ཐ་སྙད་ཡོད་པ་དང་འདྲ་བར་རྣལ་འབྱོར་པ་ཡང་དེ་དང་འདྲ་བར་རིག་པར་བྱའོ། །དེའི་ཡོན་ཏན་གསུངས་པ། བཅུ་གཉིས་ཞེས་བྱ་བ་ལ་སོགས་པ་སྟེ་བཅུ་གཉིས་མཐའ་ཚིག་ནི་ཡི་གེ་ཀའོ། །དེ་ཡང་དངོས་སུ་ཀྵཱུཾ་ངོ༌། །དེ་སྒོམ་པ་གོམས་པ་ན་མི་གནས་པའི་མྱ་ངན་ལས་འདས་པའི་
བསོད་ནམས་དང་ཡེ་ཤེས་ཀྱི་ཚོགས་རྒྱས་པར་འགྱུར་རོ། །དེ་ཡང་དཔལ་མཆོག་དང་པོ་ལས། །ཀུན་དུ་བཟང་པོའི་ཡེ་ཤེས་ནི། །རང་ཉིད་ཁོ་ནས་འཐོབ་པའོ། །ཞེས་གསུངས་སོ། །དེ་ལ་རྡོ་རྗེ་འཛིན་པ་ནི་རྡོ་རྗེ་སེམས་དཔའོ། །དེ་འཛིན་པས་རྡོ་རྗེ་འཛིན་པའོ། །གནོད་སྦྱིན་ལག་ན་རྡོ་རྗེ་འཛིན་པ་ལ་སོགས་པ་ནི་མ་ཡིན་ནོ། །ཡིག་འབྲུ་ཡང་མ་གྲུབ་པར་བསྟན་པ། སོ་དང་མ་མཆུ་ཞེས་བྱ་བ་ལ་སོགས་པ་གོ་སླའོ། །དེ་དག་འདུས་ནས་འབྱུང་བའི་སྒྲ་ནི། །མགུལ་ནས་གང་ལ་ཡོད་པ་ནི། །ཞེས་བྱའོ། །དེའི་ཕྱིར། གང་ལ་དེ་ནི་ཡིག་འབྲུ་ཉིད། །ཅེས་བྱ་བ་ནི་ཡིག་འབྲུ་ཡང་སྟོང་པ་ཉིད་དོ། །དེ་ནི་ཟད་དང་འགག་ཕྱིར་རོ། །ཞེས་བྱ་བ་གསུངས་ཏེ། ཡི་གེ་ཀྵཱུཾ་ནི་རང་བཞིན་གྱིས་མི་རྟག་པའི་ཕྱིར་རོ། །འདི་ལྟ་སྟེ། ཀ་བརྗོད་ཙམ་ན་ཤ་མེད། ཤ་བརྗོད་ཙམ་ན་ཀ་འགགས། དེ་བཞིན་དུ་ཞབས་སྐྱེད་དང་ཐིག་ལེ་ཡང་བརྗོད་པར་བྱའོ། །དེ་ལྟར་དངོས་པོར་མ་གྲུབ་པ་སྟེ། ཀླུ་སྒྲུབ་ཀྱིས་ཀྱང༌། མི་རྟག་པ་ཡི་སེམས་ཀྱིས་ནི། །སྟོང་པ་ཉིད་དུ་མི་འགལ་ལོ། །ཞེས་གསུངས་སོ། །ཡི་གེའི་རང་བཞིན་བརྗོད་པ་མེད་ཅིང་ཐེ་ཚོམ་པ། །ཞེས་བྱ་བ་ནི་བརྗོད་པ་ལས་འདས་པའི་ཕྱིར་རོ། །དེ་ཡང༌། བརྗོད་དུ་མེད་པའི་བདག་ཉིད་ཆོས། །མིང་དང་གཟུགས་ལྡན་ངོ་བོ་མེད། །ཅེས་གསུངས་སོ། །ཐེ་ཚོམ་ནི་ཡོད་མེད་ལས་འདས་པས་མྱ་ངན་ལས་འདས་པའི་ཕྱིར་རོ། །དེ་ཡང་ཆོས་ཀྱི་སྐུའི་བསྟོད་པ་ལས། གང་ཞིག་གཅིག་མིན་དུ་མ་མིན། །བདག་གཞན་ཕལ་ཆེར་བཀྲ་ཤིས་རྟེན། །ཞེས་བྱ་བ་ལ་སོགས་པའོ། །ཨ་ལ་སོགས་པའི་ངོ་བོ་མ་ཡིན་པས་སྒྲ་ཡིག་རྣམ་པར་སྤངས་ཞེས་བྱའོ། །རང་གི་ཕྱི་ནང་གི་སྐྱེ་མཆེད་དོ། །འགྱུར་བ་མེད་པས་དེ་བཞིན་ཉིད་དོ། །དེའི་མིང་ནི་བྱང་ཆུབ་སེམས་ཞེས་བྱའོ། །གང་དུ་ཞེན་འདིར་རོ། །ཅི་ཞེ་ན་གསུངས་སོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་སྤྱན་མས་ཞུས་པའི་ལེའུ་དང་པོའི་རྣམ་པར་བཤད་པའོ། །
ལེའུ་གཉིས་པ། ལྷ་མོ་མཱ་མ་ཀཱིས་ཞུས་པའི་བཤད་པ།
ད་ནི་བྱང་ཆུབ་སེམས་ཀྱི་རིམ་པ་མཱ་མ་ཀཱིས་ཞུས་པ། དེ་ནས་ཞེས་བྱ་བ་ནི་འདས་མ་ཐག་པ་ལ་བྱའོ། །ལྷག་མ་ནི་གོ་སླའོ། །བྱང་ཆུབ་སེམས་ནི་ཆོས་ཀྱི་དབྱིངས་སོ། །དེའི་རིམ་པ་ནི་བྱང་ཆུབ་སེམས་ཀྱི་རིམ་པའོ། །གནས་དང་ཁ་དོག་གི་རེམ་པ་བསྐྱེད་པ་དང་མདོར་བསྡུས་པའི་རིམ་
པའོ། །ཁ་སྙིང་ལྟེ་པ་ཞེས་བྱ་བ་ལ་སོགས་པ་གོ་སླའོ། །ཆ་ཤས་རྣམ་པ་དུ་ཞིག་གསུངས། །ཞེས་བྱ་བ་ནི། བྱང་ཆུབ་སེམས་ཀྱི་ཡན་ལག་གི་སྒོ་ནས་ཞུས་པའོ། །གནས་ཀྱི་རྣམ་པར་བསྒྱུར་བ་དུ། །ཞེས་བྱ་བ་ནི་བྱང་ཆུབ་སེམས་ཀྱི་གནས་ཞུས་པའོ། །ཁ་དོག་རྣམ་པ་དུ་ཞིག་གསུངས། །ཞེས་བྱ་བ་ནི་བྱང་ཆུབ་སེམས་ཀྱི་ཁ་དོག་གི་རིམ་པ་ཞུས་པའོ། །དེ་བཞིན་གདན་ཡང་ཇི་ལྟར་འཚལ། །ཞེས་བྱ་བ་ནི་བྱང་ཆུབ་ཀྱི་སེམས་ཀྱི་གདན་གྱི་རིམ་པ་ཞུས་པའོ། །ད་ནི་ལན་གསུངས་པ། རྡོ་རྗེ་ཅན་གྱིས་བཀའ་སྩལ་པ། །ཞེས་བྱ་བ་ནི་བཤད་ཟིན་ཏོ། །ཆ་ཤས་རྣམ་པ་དུ་ཞིག་གསུངས། །ཞེས་བྱ་བའི་ལན་གསུངས་པ། ཆ་ཤས་བཞི་དང་མཉམ་ལྡན་ཞིང༌། །ཞེས་བྱ་བ་ནི་ཡི་གེ་ཀྵཱུཾ་དང༌། ཨོཾ་དང༌། ཧཱུཾ་དང༌། ཨཱཿརྣམྶ་ནི་ཆ་ཤས་བཞི་དང་ལྡན་པའི་ཕྱིར་རོ། །གནས་ཀྱི་རྣམ་པར་བསྒྱུར་བ་དུ། །ཞེས་བྱ་བའི་ལན། པདྨ་བཞི་ལ་ཡང་དག་གནས། །ཞེས་བྱ་བ་སྟེ་ཁ་དང་སྙིང་དང་ལྟེ་བ་དང༌། གསང་བར་པདྨ་རེ་རེའོ། །ཁ་དོག་རྣམ་པ་དུ་ཞིག་གསུངས། །དེ་བཞིན་གདན་ཡང་ཇི་ལྟར་འཚལ། །ཞེས་ཞུས་པའི་ལན་གསུངས་པ། སྙིང་གའི་པདྨ་ལ་གནས་གནག །ཅེས་བྱ་བ་ལ་སོགས་པའོ། །དེ་ནི་ཨོཾ་ཁ་དོག་ནག་པོར་གནས་པ་ཡིན་པར་ཤེས་པར་བྱའོ། །ལ་ནི་པདྨ་ལ་གནས་དཀར། །ཞེས་བྱ་བ་ནི་ཡི་གེ་ཀྵཱུཾ་དཀར་པོའོ། །ངོར་རོ་པདྨའི་ལྟེ་བར་གནས། །ཞེས་བྱ་བ་ནི་ཧཱུཾ་ཁ་དོག་དམར་པོའོ། །གསང་བའི་པདྨ་ངོར་མཐའ། །ཞེས་བྱ་བ་ནི་ཨ་ཁ་དོག་སེར་པོའོ། །དེ་ལྟ་བུའི་རིམ་པས། སྟོབས་ཀྱིས་མཐའ་རུ་འགྲོ་བྱེད་གནས། །ཞེས་བྱ་བ་ནི་ཆགས་པའི་དུས་སུ་འཇིག་རྟེན་ཀུན་ལ་བསྐྱེད་པར་བྱས་ནས། འཇིག་པའི་དུས་སུ་ཡང་ཐིག་ལེ་ཆོས་ཀྱི་དབྱིངས་སུ་བྱས་ནས་སེམས་ཐིག་ལེའི་སྦྱོར་བས་རབ་ཏུ་གནས་ཞེས་བྱའོ། །དེ་ལ་དོན་གསལ་བར་གསུངས་པ། །སྣོམ་བྱེད་པ་དང་ཐོས་བྱེད་པ། །ཞེས་བྱ་བ་ལ་སོགས་པའོ། །དེ་ལ་སྣོམ་བྱེད་ནི་སྣའི་རྣམ་པར་ཤེས་པ་དྲ་ལ་སྤྱོད་པའོ། །ཕྱི་མ་ཡང་དེ་བཞིན་དུ་ཤེས་པར་བྱའོ། །དབང་པོའི་གོ་རིམས་འཁྲུལ་པར་སྣང་སྟེ། འདིར་ཡང་བཅོམ་ལྡན་འདས་ཀྱི་བཀའ་ལ་སྐུར་པ་གདབ་པར་མི་བྱ་སྟེ། རྒྱུད་དང་མདོག་གཞན་གྱི་རིམ་པ་བཞིན་དུ་ཤེས་པར་བྱའོ། །བདེ་བ་ནི་སིམ་པའོ། །དེ་ལས་བཟློག་པ་ནི་སྡུག་བསྔལ་ལོ།
དེ་མྱོང་བ་ནི་ཚོར་བའོ། །དེ་ཡང་ཆོས་ཀྱིས་ཚོར་བར་བྱེད་པས་ཆོར་བྱེད་དོ། །གང་ལས་ཞེས་བྱ་བ་ལ་སོགས་པ་ནི་གོ་སླའོ། །བྱེད་པ་ནི་ཤིང་ལ་སོགས་པའོ། །གཅོད་པ་ནི་སྟ་རེ་ལ་སོགས་པའོ། །དེ་ཁོ་ནས་ཞེས་བྱ་བ་ནི་ཆོས་ཀྱི་དབྱིངས་ཀྱིས་བྱེད་དོ་ཞེས་བྱ་བའི་ཐ་ཚིག་གོ །ཆོ་ག་རྣམ་པ་མང་བོས་ཞེས་བྱ་བ་ནི་དེ་ལས་གཞན་པ་འཇིག་རྟེན་གསུམ་གྱི་གཙུག་ལག་ཐམས་ཅད་དོ། །རྒྱལ་པོ་ལ་སོགས་པ་ཆོས་ཀྱི་དབྱིངས་ཏེ། རྒྱལ་པོས་དོན་ཡང་བྱེད་པར་འགྱུར། །ཞེས་བྱ་བ་ལ་སོགས་པ་ལ་རྒྱལ་པོ་ནི་ཁམས་དང་འཁོར་ལོ་ས་སྒྱུར་བའི་རྒྱལ་པོའོ། །དེ་ལ་འཁོར་ལོས་སྒྱུར་བ་ནི་གླིང་བཞི་པ་དང༌། གསུམ་པ་དང༌། གཉིས་པ་དང༌། གཅིག་ལ་དབང་བ་སྟེ། གསེར་དང༌། དངུལ་དང༌། ཟངས་དང༌། ལྕགས་ཏེ། གོ་རིམས་བཞིན་དུ་སྦྱར་རོ། །གླིང་དེ་རྣམས་ནས་ཁམས་ཀྱི་རྒྱལ་པོ་འོངས་ནས་མངའ་དབུལ་བྱེད་དོ། །དེ་ལྟར་སྣང་བ་ཡང་བྱང་ཆུབ་ཀྱི་སེམས་ཀྱི་རང་བཞིན་ནོ། །ཡང་ཞེས་བྱ་བའི་སྒྲས་ནི་དམག་དཔུང་བསྡུ་བའི་སྒྲའོ། །དབང་ཕྱུག་དོན་ཡང་དེ་བཞིན་ཏེ། །ཞེས་བྱ་བ་ནི་ཁྱིམ་བདག་ཤིང་སཱ་ལ་ལྟ་བུ་ཡང་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ནོ། །ཡང་ཞེས་བྱ་བའི་སྒྲ་ནི་སེམས་ཅན་ཕལ་པ་བསྡུའོ། །དེ་ཡང་ཆོས་ཀྱི་དབྱིངས་ཀྱི་རང་བཞིན་ཁོ་ནར་ཤེས་པར་བྱ་སྟེ་ཆོས་ཀུན་གཉིས་སུ་མེད་པར་གནས་པའི་ཕྱིར་རོ། །དེ་ཡང་གསང་ཆེན་ཐམས་ཅད་ཀྱི་རྒྱུད་ལས་གསུངས་པ། ཆོས་བདག་མེད་པ་ལས་བྱུང་བ། །གཉིས་སུ་མེད་པའི་ཡེ་ཤེས་མཆོག །ཆོས་ཉིད་དམ་པའི་ཡེ་ཤེས་ནི། །ཆོས་ཀྱི་དབྱིངས་ཞེས་བྱ་བའོ། །ཞེས་གསུངས་སོ། །བྲམ་ཟེ་ནི་བསྐལ་པ་དང་པོ་ལ་དགོན་པར་བསྙགས་ཏེ་ཁྱིམ་སྤངས་པས་བྲམ་ཟེའི་ཕྱིར་རོ། །རྒྱལ་པོ་ནི་བསྐལ་པ་དང་པོ་ལ་རྐུན་མལ་སོགས་པ་ལ་ཚར་གཅོད་ཅིང་བསྲུང་བར་བསྐོས་པའོ། །རྗེའུ་རིགས་ནི་བསྐལ་པ་དང་པོ་ལ་ཕྱུགས་ཀྱི་ལས་ལ་བརྟེན་པའི་ཕྱིར་རོ། །དམངས་རིགས་ནི་བསྐལ་པ་དང་པོ་ཞིང་ལ་བརྟེན་པའི་ཕྱིར་རོ། །སྨད་པ་ནི་རིགས་ངན་པ་ལྔ་སྟེ་སོག་མིག་ཅན་དང༌། ཉ་པ་དང༌། གདོལ་པ་དང༌། མདའ་མཁན་དང༌། བཙོ་བླག་མཁན་དང་ལྔ་ནི་དང་པོར་སྨད་པའི་ལས་ལ་འཇུག་པའི་ཕྱེར་རོ། །དེ་རྣམས་དང་པོ་དེ་ལས་བརྒྱུད་པའི་ཕྱིར་རོ། །དེ་ཡང་རིགས་ནི་རྒྱུད་མར་བསྟན་པ་སྟེ་རྒྱུད་ནི་ཐོག་མ་ཞེས་
བྱའོ་ཞེས་གསུངས་སོ། །བུད་མེད་དུ་མ་སྤྲུལ་བྱེད་པ། །ཞེས་བྱ་བ་ནི་བསྐལ་པ་དང་པོ་ལ་འོད་གསལ་གྱི་ལྷ་ལས་བབས་པ་ཕོ་འབའ་ཞིག་ལས་མེད་པ་ལས། འདོད་ཆགས་ཀྱི་དབང་གིས་མོའི་གཟུགས་སུ་སྤྲུལ་པའོ། །དེ་དག་ཀྱང་ཆོས་ཀྱི་དབྱིངས་ཀྱི་རང་བཞིན་ཞེས་བྱ་བའི་ཐ་ཚིག་གོ །དུད་འགྲོ་ཡི་དགས་སྐྱེ་བ་དང༌། །ཞེས་བྱ་བ་ནི་བཤད་ཟིན་ཏོ། །གཟུགས་མེད་པའི་ཁམས་ནི་གཟུགས་མེད་ཅེས་བྱའོ། །འདི་ལ་གཟུགས་ཡོད་པས་གཟུགས་ཅན་ཞེས་བྱའོ། །རྣམས་ཀྱི་སྒྲས་ནི་ཁམས་བཅུ་བདུན་སྟོན་པར་བྱེད་དོ། །སྐྱེ་མཆེད་བཞིར་སྐྱེས་པའི་སེམས་ཅན་ནི་གཟུགས་མེད་དེ། །གང་ལ་གཟུགས་རྣམས་མེད་པ་ནི་གཟུགས་མེད་དེ་རྣམས་ཞེས་བྱ་བ་འདིར་ཡང་སྦྱར་རོ། །འདོད་ཆགས་ལ་སོགས་པའི་སྤྱོད་པའི་སེམས་ཅན་ནི་འདོད་པའི་སྲེད་པ་སྟེ། གང་འདོད་པ་ལ་ཆགས་པ་གང་ལ་ཡོད་པ་དེ་ནི་དེ་སྐད་ཅེས་བྱའོ། །རྣམས་ཞེས་བྱ་བའི་སྒྲ་ནི་གནས་རིགས་ཉི་ཤུ་ལ་བསྙེགས་སོ། །སལ་སོགས་པ་ལས་འབྱུང་བ་ཐམས་ཅད་ཅེས་གསུངས་སོ། །དེ་དག་ཀྱང་ཆོས་ཀྱི་དབྱིངས་ལས་སྐྱེས་ཞེས་བྱ་བའི་ཐ་ཚིག་གོ །དེ་ཁོ་ན་ནི་ཆོས་ཀྱི་དབྱིངས་སོ། །དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གྱུར་པ་ནི། དེ་ཁོ་ན་ཉིད་རྫུ་འཕྲུལ་གནས། །ཞེས་བྱའོ། །དེ་ཡང་གཅིག་ལས་དུ་མར་གྱུར་པའི་ཕྱིར་རོ། །ནུ་མ་དང༌། སྐད་ཕྲ་མོ་དང༌། མོའི་དབང་པོས་མཚན་པ་ནི་མོའི་གཟུགས་སོ། །ང་རོ་དང་སྐད་དང་ཁ་སྤུ་དང་ཕོའི་དབང་པོས་མཚན་པ་ནི་ཕོའི་གཟུགས་སོ། །དེ་གཉིས་ཀྱིས་འཁྲིག་པའི་འདོད་ཆགས་ཀྱང་ཆོས་ཀྱི་དབྱིངས་ཀྱི་རང་བཞིན་ཡིན་པས། བདེ་བ་ཆེན་པོའི་གོ་འཕང་ནས། །ཞེས་གསུངས་སོ། །དེ་ལྟར་ནི་གོང་དུ་བསྟན་པའོ། །མི་འགྱུར་བས་དེ་བཞིན་ཉིད་དོ། །དེ་རྟོགས་པ་ནི་ཤེས་རབ་བོ། །དེ་ལས་དམ་པའི་ཡིག་འབྲུ་མྱ་ངན་ལས་འདས་པའི་ངོ་བོ་ཀྵ་ཨོཾ་ཧཱུཾ་ཨཱཿདེ་ལྟ་བུ་ཤེས་པའི་རྣལ་འབྱོར་པ་གང་ཡིན་པ་དེ་ནི། དེས་ནི་གསང་ཆེན་ཞེས་པ་སྟེ། །ཞེས་གསུངས་ཏེ་དོན་ནི་བཤད་ཟིན་ཏོ། །དེའི་ཁྱད་པར་གསུངས་པ། གང་དེ་བདག་ཉིད་ཀུན་གནས་པ། །ཞེས་བྱ་བ་ནི་སྣོད་བཅུད་ཀྱི་རང་བཞིན་དུ་གྱུར་པའི་ཕྱིར་རོ། །གོང་དུ་ཡིག་འབྲུ་བསྟན་པའི་ཡིག་འབྲུའི་ཁ་དོག་གི་འཕྲོ་བསྟན་པ། ཁ་དོག་མེད་ཅིང་དམར་བ་
དང། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཁ་དོག་མེད་པས་ནག་པོ་དཀར་པོ་ལ་སོགས་པ་མེད་པའི་ཕྱིར་རོ། །ཁ་དོག་དམར་པོ་ལ་སོགས་པ་ནི་གོ་སླའོ། །ཡིག་འབྲུའི་ཚད་ཙ་ན་ཀའི་ཚད་ཙམ་ཐིག་ལེའི་དབུས་སུ་གནས་པ་ལས། ཐིག་ལེའི་གཟུགས་སུ་བསྒྱུར་བ་དེ། །ཞེས་བྱའོ། །དེ་སྤྲོ་བ་དང་བསྡུ་བར་བྱ་བ་ནི། འགྲོ་དང་ཞེས་བྱ་བ་ལ་སོགས་པ་གསུངས་སོ། །པདྨ་བཞི་ལས་ཕྱིར་སྤྲོ་བ་དང༌། ནང་དུ་བསྡུ་བའོ། །གཤེགས་དང་བྱོན་པ་ཙམ་མཛད་དམ་ཞེ་ན་སྨྲས་པ་གང་དེ་ཞེས་བྱ་བ་ལ་སོགས་པ་གསུངས་སོ། །གང་ཆོས་ཀྱི་དབྱིངས་དེར་རིག་པ་རྫུ་འཕྲུལ་ཆེ་སྟེ་གཅིག་ལས་དུ་མ་མེད་པའི་ཕྱིར་རོ། །མཐའ་ཡས་པ་དེ་ཉིད་སྣ་ཚོགས་སོ་ཞེས་དེ་སྐད་ཅེས་བྱའོ། །གངྒཱའི་ཀླུང་གི་བྱེ་མ་སྙེད་དུ་སེམས་ཅན་གྱི་དོན་མཛད་པའོ། །དེ་ལྟ་བུའི་བྱང་ཆུབ་ཀྱི་སེམས་དང་པོ་བསྐྱེད་པ་དང༌། འཇུག་པའི་དོན་བསྡུ་བའི་དོན་གསལ་བར་གསུངས་པ། སྐྱེ་དང་ཞེས་བྱ་བ་ལ་སོགས་པའོ། །སེམས་ཅན་གྱི་ལས་ཀྱི་དབང་གིས་བསྐལ་པ་འཇིག་ཆགས་བྱུང་བའི་ཚེ་ཡང༌། བྱང་ཆུབ་ཀྱི་སེམས་ཡིག་འབྲུའི་ངོ་བོ་ཅན་དེའི་ཐིག་ལེའི་གཟུགས་སུ་བསྡུས་ནས་གནས་སོ་ཞེས་ཤེས་པར་བྱའོ། །བྱང་ཆུབ་སེམས་དེའི་སྐྱོན་དང་ཡོན་ཏན་བསྟན་པ། གང་གིས་ཞེས་བྱ་བ་ལ་སོགས་པ་ནི། རྣལ་འབྱོར་པ་གང་གིས་ཉོན་མོངས་པའི་གཉེན་པོ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དེ་སྙེད་དོ། །དེ་གཅིག་དང་གཉིས་སུ་བརྩིས་པ་སྟོང་ཕྲག་བརྒྱ་ལ་འབུམ་ཕྲག་གཅིག་གོ །ཐ་སྙད་ཀྱི་དོན་དེ་ཙམ་ཤེས་མོད་ཀྱི། རྣལ་འབྱོར་པ་མཁས་པ་དེས་ཀྱང་དེ་ཁོ་ནའི་དོན་མི་ཤེས་ན་ཆོས་ཀྱི་ཕུང་པོ་དེ་དག་ལ་མཁས་པ་མྱ་ངན་ལས་འདས་པའི་འབྲས་བུ་མེད་ཅེས་བྱའོ། །དེ་ནི་གོང་དུ་ཆ་ཤས་ཀྱི་ཡིག་རྩིས་བསྟན་པའི་འཕྲོ། །བཅུ་གཉིས་ལྔ་ཡི་ལྔ་པ་ཡང༌། །ཞེས་བྱ་བ་ལ་སོགས་པ་ལ། དེ་ལ་སྒྲ་ཡིག་ཨཱཿལ་སོགས་པ་མ་ནིང་མ་གཏོགས་པ་བཅུ་གཉིས་ཀྱི་མཐའ་མ་ནི་ཨཱཿའོ། །ལྔ་པ་པའི་ཞེས་བྱ་བ་ནི་ལྔ་པ་སྟེ་ཀ་སྡེ་ལས་བརྩིས་པའི་ལྔ་པ་ནི་པའི་སྡེའོ། །དེའི་ལྔ་པ་ནི་པ་ནས་བརྩིས་པའི་ཡི་གེ་མའོ། །དེས་ཨོའི་ཀླད་ཀོར་དུ་བྱས་མ་ཐག་ཏུ་ཨོཾ་དུ་འགྱུར་རོ། །བརྒྱད་ཀྱི་མཐའ་ཞེས་པ་ནི། ཡ་ནས་བརྩིས་པའི་ཡི་གེ་ཧའོ། །འབྱུང་བ་བསྡུས་ཞེས་བྱ་བ་ནི་འབྱུང་བ་བཞིས་བསྐོར་བའི་ཡི་གེ་དྷིའོ། །སྒྲ་ཡིག་
དང་པོ་ཡི་གེ་ཨའོ། །དེ་ནི་གོ་སླའོ། །ལྔ་པ་ཡིས་ནི་ཡང་དག་བརྒྱན། །ཞེས་བྱ་བ་ནི་ལྔ་པ་ནི་མའོ། །དེས་ཨ་ལ་ཀླད་ཀོར་དུ་བརྒྱན་པ་ནི་ཨོཾ་ལ་བྱའོ། །སྙིང་རྗེ་ཆེན་པོ་ལས་བྱུང་བ། །ཞེས་བྱ་བ་ནི་ཀའོ། །དེ་ནི་མན་ངག་ཏུ་བྱ་བའི་ཚིག་གོ །དྲུག་པ་ནི་ཡ་ནས་བརྩིས་པའི་ཥའོ། །ཡི་གེ་ཐུགས་རྗེས་བརྟགས་པ་ནི་ཀྵའོ། །ཁ་མར་བལྟ་ཞེས་བྱ་བ་ནི་ཁའི་པདྨར་མགོ་བོ་མར་བལྟ་བར་བྱའོ། །དེའི་ཁྱད་པར་གསུངས་པ། གདོད་མ་ཐ་མ་མེད་པའི་ལྷ། །ཞེས་གསུངས་སོ། །དེ་ལ་གདོད་མ་ནི་སྐྱེ་བའོ། །ཐ་མ་ནི་འཇིག་པའོ། །དེ་དང་བྲལ་བ་མ་ཡིན་པས་དེ་སྐད་ཅེས་བྱའོ། །དེ་ཡང་བྱེད་པ་པོས་མ་བྱས་ཏེ། བྱང་ཆུབ་ཀྱི་སེམས་ནམ་མཁའ་དང་འདྲ་བར་རིག་པར་བྱའོ། །དེ་ཡང༌། ནམ་མཁའ་ལས་བྱུང་མཚན་མའི་ཕྱིར། །གདོད་མ་ཐ་མ་མེད་པའི་མཆོག །ཅེས་གསུངས་སོ། །ལྷ་ཞེས་བྱ་བ་ནི་ཡིག་འབྲུ་འོད་དང་ལྡན་པ་དང༌། རྡོ་རྗེ་སེམས་དཔའི་རང་བཞིན་ཡིན་པའི་ཕྱིར་རོ། །དེར་ནི་སྤྱི་བོར་བསྟན་པ་ཡིན། །ཞེས་བྱ་བ་ནི་ཡི་གེ་ཀྵ་གོང་དུ་གཞག་པའི་ཐ་ཚིག་གོ །ཡིག་འབྲུ་དེ་ཆོས་ཀྱི་དབྱིངས་ཀྱི་རང་བཞིན་ཡིན་པས་གསང་ཆེན་ནོ། །ཡིག་འབྲུ་དེ་རྣམས་དེ་བཞིན་གཤེགས་པའི་རང་བཞིན་ཡིན་པས་དམ་པའོ། །ལྷ་མོ་ནི་བོད་པའི་ཚིག་གོ །བདག་གིས་ཞེས་བྱ་བ་ནི་རྡོ་རྗེ་སེམས་དཔའོ། །རབ་བསྟན་ནོ་ཞེས་བྱ་བ་ནི་བྱང་ཆུབ་སེམས་ཀྱི་རིམ་པ་བཤད་པའོ་ཞེས་བྱ་བའི་ཐ་ཚིག་གོ །ལྷ་མོ་བཞིས་ཡོངས་སུ་ཞུས་པ་ལས། ལྷ་མོ་མཱ་མ་ཀཱིས་ཞུས་པའི་ལེའུ་གཉིས་པའི་བཤད་པའོ།། །།
ལེའུ་གསུམ་པ། ལྷ་མོ་གོས་དཀར་མོས་ཞུས་པའི་བཤད་པ།
ད་ནི་ཆོས་ཀྱི་དབྱིངས་བྱང་ཆུབ་ཀྱི་སེམས་སུ་བསྡུ་བ་ལྷ་མོ་ན་བཟའ་དཀར་མོས་ཞུས་པ། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ནི་འདས་མ་ཐག་པའོ། །འདི་ལ་ན་བཟའ་དཀར་མོའོ། །ཡན་ལག་ཀུན་གྱིས་བཏུད་ནས་སུ། །ཞེས་བྱ་བ་ནི་ཤིན་ཏུ་ཡང་བཀུར་པའི་ཕྱིར་རོ། །ཐལ་མོ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེ་སེམས་དཔའ་ལ་གསོལ་བ། །ཞེས་བྱ་བ་ནི་ཞུ་བའི་རིམ་པ་ཞུས་པའོ། །ཆོས་ཀྱི་ཞེས་བྱ་བ་ལ་སོགས་པ་བཤད་ཟིན་ཏོ། །བསྡུ་བའི་དོན་ནི་གཅིག་ཏུ་གྱུར་པའི་དོན་ཞུས་པའོ། །སྐུ་གསུང་ཐུགས་ཀྱི་རྡོ་རྗེ་ནི། །ཞེས་པ་ནི་སྐུ་དང་གསུང་དང་ཐུགས་རྡོ་རྗེ་ཞུས་པའོ། །རང་བཞིན་ཉིད་ནི་ཇི་
ལྟར་ལགས། །ཞེས་བྱ་བ་ནི། ཐབས་དང་ཤེས་རབ་བསྡུ་བ་ཞུས་པའོ། །ལྷའི་དབང་ཕྱུག་ནི་རྡོ་རྗེ་སེམས་དཔའོ། །བོད་པའི་སྒོ་ནས་གསོལ་བ་གདབ་པ་ནི་ཁྱོད་ལ་སྟེ། སེམས་ཅན་གྱི་ཆེད་དུ་ཞེས་བྱ་བའི་དོན་ཏོ། །གང་གིས་འོད་ཀྱི་གོང་བུ་ཞེས་བྱ་བ་ནི་བདུད་རྩིའི་ངོ་བོ་བསྡུ་བའི་སྒོ་ནས་ཞུས་པའོ། །རྡོ་རྗེ་སེམས་དཔའ་ཇི་ལྟར་ལགས། །ཞེས་བྱ་བ་ནི། འོད་ཀྱི་གོང་བུ་དེ་རྡོ་རྗེ་སེམས་དཔར་བསྡུ་བཞུས་པའོ། །གསུངས་ཤིག་དེ་ནི་ཡིག་འབྲུའི་ཚོགས། །འདུས་པ་ཇི་ལྟར་འབྱུང་བ་ལགས། །ཞེས་བྱ་བ་ནི། སྔགས་བསྡུ་བའི་སྒོ་ནས་ཞུས་པའོ། །ཆུའི་ཁམས་ལ་སོགས་པ་ཡི། །ཇི་ལྟར་རོ་ནི་མཉམ་པར་འགྱུར། །ཞེས་བྱ་བ་ནི་སེམས་ཅན་གྱི་ཕུང་པོ་ལ་སོག་པའི་བསྡུ་བཞུས་པའོ། །དེ་ཁོ་ན་རྒྱས་པར་ཞེས་པ་ནི། མ་ལས་སྐྱེ་བ་གསུམ་ཙམ་དང༌། །དེ་བཞིན་ཕ་ལས་སྐྱེ་བ་གསུམ། །དེ་དག་དྲུག་ཚོགས་གོང་བུ་ལས། །ཇི་ལྟར་མི་རྣམས་སྐྱེས་བ་ལགས། །ཞེས་བྱ་བ་ནི་འཇིག་རྟེན་པའི་ཕུང་པོ་གོང་བུའི་སྒོ་ནས་བསྡུ་བར་ཞུས་པའོ། །སངས་རྒྱས་གཟུགས་ནི་བདག་མི་འཚལ། །ཞེས་བྱ་བ་ནི་ཕུང་པོའི་སྒོ་ནས་བསྡུ་བར་ཞུས་པའོ། །ལྷག་མས་ནི་ཞུས་པའི་མཇུག་སྡུད་དོ། །ད་ནི་ལན་གསུངས་པ། རྡོ་རྗེ་ཅན་གྱིས་བཀའ་སྩལ་པ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེ་ལ་རེ་ཞིག །ཆོས་ཀྱི་དབྱིངས་ནི་བསྡུ་བ་དང༌། །ཞེས་པའི་ལན་གསུངས་པ་ལ་སོགས་པའོ། །དེ་ལ་གསང་བ་ནི་གསང་བའི་རྡོ་རྗེའོ། །ཤིན་ཏུ་གསང་བར་གྱུར་པ་ནི་གསང་བའི་པདྨའོ། །དེ་ཡང་གསང་བ་ནོར་བུ་ཐིག་ལེ་ཞེས་བྱ་བའི་རྒྱུད་ལས། རྡོ་རྗེ་དེ་ནི་གསང་བ་སྟེ། །དེ་ལས་པདྨ་ཤིན་ཏུ་གསང༌། །ཞེས་གསུངས་སོ། །ཉོན་ཅིག་ཅེས་བྱ་བ་ལ་སོགས་པ་ནི་གོ་སླའོ། །ཤིན་ཏུ་གསང་བའི་དོན་གསལ་བར་གསུངས་པ། སྐྱེ་གནས་དབུས་སུ་རྩ་གཉིས་ནི། །ཞེས་བྱ་བ་ལ་སོགས་པ་ལ། དེ་ལ་སྐྱེ་གནས་ནི་གསང་བའི་པདྨའོ། །དེའི་དཀྱིལ་ནི་དབུས་སོ། །དེའི་བྱ་ལྕེའི་རྩ་གཡས་གཡོན་གྱི་རྩ་གཉིས་སོ། །རྩ་གཡས་གཡོན་དེ་ལ་ནི། གཡོན་དང་དེ་བཞིན་གཡས་པར་ཞེས་བྱ་བའོ། །དེ་ཡང་གསལ་བར་གསུངས་པ། གཡོན་དུ་བྱང་ཆུབ་སེམས་ཞེས་པ་ནི། གཡོན་པའི་རྩ་ལ་ནི་ལྷག་པའི་བྱང་ཆུབ་ཀྱི་སེམས་འབབ་པོ་ཞེས་བྱའོ། །གཡས་སུ་དེ་བཞིན་རཀྟའོ། །
ཞེས་བྱ་བ་ནི། གཡས་པའི་རྩ་ལ་ནི་རཀྟ་འབབ་བོ་ཞེས་བྱ་བའི་ཐ་ཚིག་གོ །དེ་གཉིས་ཕྲད་ནས་ཞེས་བྱ་བ་ནི་བྱང་ཆུབ་སེམས་རོལ་བའི་དུས་སུ་ཞེས་བྱ་བའི་ཐ་ཚིག་གོ །དེའི་དུས་སུ་ཆུ་དང་འོ་མ་ལྟར་འདྲེས་ཞེས་བྱ་བའི་དོན་ཏོ། །དེ་ལ། ཀྱེ་ལྷ་མོ་ཆོས་ཀྱི་དབྱིངས་ནི་འདུས་པ་ཡིན། །ཞེས་གསུངས་སོ། །དེ་གཉིས་འདུས་པ་ལ་དེ་སྐད་ཅེས་བྱའོ། །སྐུ་གསུང་ཐུགས་ནི་རྡོ་རྗེ་ཡི། །རང་བཞིན་ཉིད་ནི་ཇི་ལྟར་ལགས། །ཞེས་པའི་ལན་གསུངས་པ། མུན་པ་སྐུ་སྟེ་རྡུལ་གསུང་གཟུགས། །ཞེས་བྱ་བ་ནི་དེ་ལ་མ་རིག་པ་ནི་མུན་པ་སྟེ་དེའི་རང་བཞིན་གནས་གྱུར་པ་ནི་སྐུ་སྟེ་སྐུའི་རྡོ་རྗེའི་རང་བཞིན་དུ་ཤེས་པར་བྱའོ། །རྡུལ་དེ་ནི་འདོད་ཆགས་ཏེ་དེ་གནས་གྱུར་པ་ནི་གསུང་གི་རྡོ་རྗེ་ཞེས་བྱའོ། །གཟུགས་ནི་གསལ་བ་སྤངས་པ་སྟེ་དེ་ནི་སེམས་ཏེ་དེ་གནས་གྱུར་པ་ནི་ཐུགས་ཀྱི་རྡོ་རྗེ་ཞེས་བྱའོ། །དེ་ཡང་སྙིང་སྟོབས་ཏེ་ཐུགས་རྡོ་རྗེའོ། །འདི་སྐད་དུ་རྡུལ་དང་མུན་པ་དང༌། སྙིང་སྟོབས་གསུམ་སྐུ་གསུང་ཐུགས་སོ། །དེ་གསལ་བར་གསུངས་པ། རྡུལ་ནི་རཀྟ་བྱང་ཆུབ་སེམས། །ཞེས་བྱ་བ་ལ་སོགས་པ་གསུངས་ཏེ། དེ་ལ་རྡུལ་ནི་རཀྟ་སྟེ་མུ་སྟེགས་པས་རྡུལ་ཞེས་བརྟགས་ཏེ་རས་ལ་རྡུལ་ཆགས་པ་བཞིན་དུ་ཆགས་པ་ཆེན་པོ་དང་ལྡན་པའི་ཕྱིར་རོ། །བྱང་ཆུབ་སེམས་ལ་ནི་མུན་པ་ཞེས་བརྟགས་ཏེ་དེ་ནི་གཏི་མུག་ཆེན་པོའོ། །རང་བཞིན་བསྐྱེད་པ་ཡིན་ཞེས་བྱ་བ་ནི། རྒྱུ་འབྲས་ལ་ཞེ་སྡང་གི་རང་བཞིན་གཉིས་སུ་མེད་པའི་ཡེ་ཤེས་སེམས་ཅན་སྐྱེ་བའི་ངོ་བོར་གྱུར་པ་ལ། མུ་སྟེགས་པས་སྙིང་སྟོབས་ཞེས་བརྟགས་ཏེ་གསུམ་འདུས་ནས་སྐྱེ་བའི་ཕྱིར་རོ། །དེ་སྐུ་གསུང་ཐུགས་སུ་ཇི་ལྟར་གཅིག་ཅེ་ན་རྡོ་རྗེ་པདྨ་ཞེས་བྱ་བ་ལ་སོགས་པ་གསུངས་ཏེ་ཐབས་དང་ཤེས་རབ་ཀྱི་ངོ་བོ་གསང་བའི་རྡོ་རྗེ་དང་པདྨ་བདེ་བ་ཆེན་པོ་དེ་ལས་ལོགས་ཤིག་ན་སྐུ་གསུང་ཐུགས་མེད་པའི་ཕྱིར་རོ། །གོང་གི་འོད་ཀྱིས་གོང་བུར་བསྡུས། །ཞེས་པའི་ལན། དྲི་ཆེན་དྲི་ཆུ་དང་ཞེས་བྱ་བ་ལ་སོགས་པ་སྟེ། དྲི་ཆེན་ནི་བཤད་གཅིའོ། །དྲི་ཆུ་ནི་གསང་བའི་རྡོ་རྗེའི་ཆུའོ། །ཤེལ་ནི་ལུས་ཀྱི་སྣ་ལས་བྱུང་བའི་ཕྱིར་ཏེ་ཤེལ་དང་མཐུན་པའི་ཕྱིར་རོ། །མེ་ཏོག་ནི་པདྨའི་རཀྟ་སྟེ་འབྲས་བུ་ལ་ཉེ་བའི་ཕྱིར་རོ། །དེ་བཞི་ལྔ་པ་བྱང་ཆུབ་སེམས། །ཞེས་བྱ་བ་ནི་བྱང་ཆུབ་སེམས་ཁུ་བ་སྟེ། བྱང་ཆུབ་སེམས་དང་འདྲ་སྟེ་བདེ་བ་སྐྱེད་
པའི་ཕྱིར་རོ། །འཁོར་བའི་བདུད་འཇོམས་པས་ན་ལྔ་ཁོ་ནའོ། །དེ་ཡང༌། དྲི་ཆེན་དང་དྲི་ཆུས་ནི། ལུས་ཀྱི་རིམས་ལ་སོགས་པ་འཇོམས་པའི་ཕྱིར་རོ། །ཤེལ་གྱིས་ནི་ནད་མེད་པ་འཕེལ་བར་བྱེད་དོ། །མེ་ཏོག་གིས་ནི་སྐུ་གསུང་ཐུགས་འགྲུབ་པར་བྱེད་དོ། །བྱང་ཆུབ་སེམས་ཀྱིས་ཡེ་ཤེས་འགྲུབ་པར་བྱེད་དོ། །འདི་ནི་འཇིག་རྟེན་ལས་འདས་པའི་འཕགས་པའོ། །རྫས་འདི་དག་ནི་བདུད་རྩི་འབྱུང་བའི་རྒྱུད་ལས། ཡེ་ཤེས་ཞེས་བྱ་བསྒྲུབ་པའི་ཕྱིར། །ཞེས་བྱ་བ་ལ་སོགས་པ་རྒྱས་པར་གསུངས་སོ། །དེ་ལྔ་དང་དབྱེར་མེད་པའི་འོད་ཀྱི་གོང་བུར་བསྡུས་པ་ནི་བདུད་རྩི་ལྔ་ཞེས་བྱ་སྟེ་གོང་བུ་དང་བདུད་རྩི་ལྔ་ཐ་མི་དད་པའི་ཕྱིར་རོ། །རྡོ་རྗེ་སེམས་དཔའ་ཇི་ལྟར་ལགས། །ཞེས་བྱ་བའི་ལན་གསུངས་པ། དེ་ལ་རྡོ་རྗེ་འདི་གསུངས་སོ། །ཞེས་བྱ་སྟེ་འོད་ཀྱི་གོང་བུ་ལས་རྡོ་རྗེ་སེམས་དཔའ་གྲུབ་པར་རྒྱུད་འདི་ལས་གསུངས་སོ། །མངོན་པར་རྟོགས་པ་ལྔའི་རང་བཞིན་ཡེ་ཤེས་ལྔ་དང་རིགས་ལྔ་དང༌། བདུད་རྩི་ལྔ་དབྱེར་མེད་པ་འོད་ཀྱི་གོང་བུ་རྡོ་རྗེ་སེམས་དཔའ་ཡིན་པའི་ཕྱིར་རོ། །གསུངས་ཤིག་དེ་ཉིད་ཡིག་འབྲུའི་ཚོགས། །ཞེས་བྱ་བའི་ལན་གསུངས་པ། ཆ་ཤས་གཉིས་པ་ཞེས་བྱ་བ་ལ་སོགས་པའོ། །དེ་ལ་ཆ་ཤས་གཉིས་པ་དང་ལྡན་པ་ཞེས་བྱ་བ་ནི་ཀྵ་སྟེ། ཀ་དང་ཥ་ལ་སོགས་པ་ཡིན་པའི་ཕྱིར་རོ། །དེ་ཉིད་གསལ་བར་གསུངས་པ། དེ་བཞིན་དགུ་པ་ཡང་ཡིན་ནོ། །ཞེས་གསུངས་སོ། །ཡའི་སྡེ་ཚན་ལ་སོགས་པ་དགུ་ནི་ཡི་གེ་ཀྵ་ཁོ་ནའོ། །དེ་འདི་སྐད་དུ་བསྟན་ཏེ། ཀྵ་དེ་ལ་མ་དང་ར་དང་ཡ་བཏགས་ནས་ཞབས་སྐྱེད་རིང་པོར་བྱས་ཏེ། ཟླ་བ་ཙམ་དང་ཐིག་ལེ་བརྩེགས་པའི་ཡིག་འབྲུ་ནི་ཀྵྨྲྱཱུཾ་དེ་ནི་མན་ངག་གོ །དེ་ཡང་གསལ་བར་གསུངས་པ། དེ་སྐད་གསུངས་པ་ཞེས་བྱ་བ་ལ་སོགས་པའོ། །དེ་ལ་སུམ་ཅུ་ཞེས་བྱ་བ་ནི་མ་ནིང་གི་ཡི་གེ་མ་བརྩིས་པའི་ཨ་ལ་སོགས་པ་ནས་ཧའི་བར་དུའོ། །བཅུ་དང་ཞེས་བྱ་བ་ནི་དྷ་ནས་རའི་བར་དུའོ། །དེ་བཞིན་ལྔ་པ་ཞེས་བྱ་བ་ནི་ལ་ནས་ཧའི་བར་དུའོ། །ས་བོན་ཞེས་བྱ་བ་ནི་ཧ་དེའི་མགོ་ལ་ཡི་གེ་ཀྵའོ། །ཆ་ཤས་གཉིས་པ་ནི་ཀྵའོ། །ལྔའི་ནི་ཞེས་བྱ་བ་ཀྵ་ལ་མ་དང་ར་དང་ཐིག་ལེ་བྱས་པ་དེ་ནི་ཆོས་ཀྱི་དབྱིངས་ཀྱི་ཡི་གེའི་བསྡུ་བ་གསུངས་པ་ཡིན་ནོ། །འདུས་པ་ཇི་ལྟར་འགྱུར་བ་ལགས། །ཞེས་པའི་ལན། ཡིག་འབྲུ་བྷྲཱུཾ་དང་ཆོས་
དབྱིངས་ཀྱང༌། །ཞེས་བྱ་བ་ནི། བྷྲཱུཾ་ནི་གོ་སླའོ། །ཆོས་ཀྱི་དབྱིངས་ཀྱང་ཞེས་བྱ་བ་ནི་ཡི་གེ་ཀྵའོ། །སྐྱེ་གནས་པདྨ་ནི་གསང་འབི་པདྨའོ། །ལ་གནས་ཞེས་བྱ་བ་ནི་གསང་བའི་པདྨར་ཡི་གེ་རྣམས་བཀོད་པའོ། །དེ་མི་འགྱུར་བས་དེ་ཉིད་ཅེས་བྱའོ། །ཀྵྨྲྱཱུཾ་ཀྵྨྲྱཱུཾ་ཀྵྨྲྱཱུཾ་དེ་ཉིད་ས་བོན་ཞེས་བྱ་སྟེ། སྐྱེ་བ་རྣམས་ཀྱི་རྒྱུར་གྱུར་པའི་ཕྱིར་རོ། །སྭཱ་ཧཱའི་མཐའ་ནི་སྔགས་ཀྱི་མཐའ་ན་སྭཱ་ཧཱ་ཡོད་པའི་ཕྱིར་རོ། །འདི་ལྟ་སྟེ་བྷྲཱུཾ་ཀྵུཾ་སྭཱ་ཧཱ། འདུས་པ་ལས་ནི་ཤེས་པ་ཞེས་བྱ་བ་ནི། ཆོས་ཀྱི་དབྱིངས་ཀྱི་ཡི་གེ་འབྲུ་དེ་ལྟ་བུ་དེ་འདུས་པ་ཞེས་བྱ་བའི་ཐ་ཚིག་གོ །ཆུ་ཁམས་ཞེས་བྱ་བ་ནས། ཇི་ལྟར་མི་རྣམས་སྐྱེ་བ་ལ་གས། །ཞེས་བྱ་བའི་བར་གྱི་ལན། ཆུ་ཁམས་ཕ་ལས་སྐྱེས་ཞེས་བྱ་བ་ལ་སོགས་པའོ། །ཆུ་ཁམས་འབའ་ཞིག་ཕ་ལས་སྐྱེས་པའོ། །མེའི་ཁམས་འབའ་ཞིག་མ་ལས་སྐྱེས་པའོ། །ས་དང༌། རླུང་དང༌། རྣམ་པར་ཤེས་པ་དང༌། ནམ་མཁའི་ཁམས་ནི་དོན་གྱིས་ན་གཉི་ག་ལས་སྐྱེས་པར་ཤེས་པར་བྱའོ། །དེ་ཡང་དཔེར་ན་ལག་བཟངས་ཀྱི་བུ་ཞེས་བྱ་བ་ལྟ་བུའོ། །དེ་ཡང་ནམ་མཁའི་ཁམས་ནི་བུ་ག་དགུའོ། །རྣམ་པར་ཤེས་པའི་ཁམས་ནི་ཟག་པ་དང་བཅས་པའི་ཁམས་སོ། །ཤ་དང་ཁྲག་གང་ལས་ཤེ་ན། ཤ་དང་ཁྲག་དང་པགས་པ་དང༌། །དེ་ཡང་མ་ལས་སྐྱེས་ཞེས་བཤད། །ཅེས་བྱའོ། །ཚིལ་དང་རྐང་དང་ཁུ་བ་གོང་ལས་སྐྱེས་ཤེ་ན། ཚིལ་དང་རྐང་དང་ཁུ་བ་ནི། །ཕ་ལས་སྐྱེས་པར་བཤད་པ་ཡིན། །ཞེས་བྱའོ། །གཉིས་ལས་སྐྱེས་པ་ཇི་ལྟ་བུ་ཞེ་ན། གོང་བུར་ཡང་དག་དུས་པ་ནི། །དེ་དག་ཙམ་དུ་བཤད་པ་ཡིན། །ཞེས་བྱའོ། །སངས་རྒྱས་གཟུགས་ནི་བདག་མི་འཚལ། །ཞེས་བྱ་བའི་ལན། གཟུགས་དང་ཞེས་བྱ་བ་ལ་སོགས་པའོ། །དེ་ལ་གཟུགས་ནི་གླེན་པའི་ངོ་བོ་སྟེ། དེ་རྣམ་པར་དག་པ་ནི་གཉིས་སུ་མེད་པའི་ངོ་བོ་སྟེ་གཏི་མུག་ཆེན་པོའོ། །ཚོར་བའི་ཕུང་པོ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམ་པར་དག་པ་མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་གྲུབ་པ་དང༌། མེ་ལོང་ལྟ་བུའོ། །དེ་ཡང་གསང་བ་འདུས་པའི་རྒྱུད་ཕྱི་མ་ལས། གཟུགས་ནི་གཏི་མུག་ཏུ་བསྟན་པའོ་ཞེས་བྱ་བ་རྒྱ་ཆེར་གསུངས་སོ། །དེའི་ཕྱིར་
དངོས་པོ་ལྔ་ཡི་གཟུགས། །ཕུང་པོ་ལྔ་ཞེས་བྱ་བར་བཤད། །ཅེས་གསུངས་སོ། །ལྷ་མོ་བཞིས་ཡོངས་སུ་ཞུས་པ་ལས། ལེའུ་གསུམ་པ་གོས་དཀར་མོས་ཞུས་པའི་བཤད་པའོ།། །།
ལེའུ་བཞི་པ། ལྷ་མོ་སྒྲོལ་མས་ཞུས་པའི་གསང་བ་མཆོག་གི་བཤད་པ།
ད་ནི་བྱང་ཆུབ་སེམས་ཀྱི་སྒྲུབ་པའི་ཐབས་ལྷ་མོ་སྒྲོལ་མས་ཞུས་པ། དེ་ནས་ཞེས་བྱ་བ་ལ་སོགས་པའོ། །བཞད་པ་ནི་མི་འགྱུར་བ་དང་ངོ༌། །ད་ནི་མཉེས་པར་བྱེད་པའི་མཚན་མའོ། །བཞད་པ་མཆོད་པ་ཡིན་པར་ནི་འཕགས་པ་རྡོ་རྗེ་གདན་བཞི་པའི་མཆོད་པ་ཉི་ཤུ་ལས་གསལ་བར་བསྟན་ཏོ། །ལྷ་མོ་ཡང་ཡིན་ལ་སྒྲོལ་མ་ཡང་ཡིན་ཏེ་སེམས་ཅན་འཁོར་བའི་རྒྱ་མཚོ་ལས་སྒྲོལ་བའི་ཕྱིར་རོ། །དེའི་ཕྱིར་བཅོམ་ལྡན་འདས་མའོ། །ཆོས་ཀྱི་དབྱིངས་ཀྱི་སྒྲུབ་པ་ནི་གང་གིས་སྒྲུབ་པར་བྱེད་པ་དེ་ནི་སྒྲུབ་པ་སྟེ་རྒྱུ་ཞེས་བྱ་བའི་ཐ་ཚིག་གོ །གསུངས་ཤིག་རྡོ་རྗེ་ཅན་ཆེན་པོ། །ཞེས་བྱ་བ་ནི་ཆོས་ཀྱི་དབྱིངས་ཀྱི་སྒྲུབ་པའི་སྒོ་ནས་ཞུས་པའོ། །རྫས་སྒྲུབ་པ་ཡང་བཀའ་སྩལ་འཚལ། །ཞེས་བྱ་བ་ནི། སྨན་བསྒྲུབ་པའི་སྒོ་ནས་ཞུས་པའོ། །དེ་བཞིན་རིག་པའི་སྔགས་རྣམས་ཀྱང༌། །ཞེས་བྱ་བ་ནི་ལས་བཞིའི་སྒོ་ནས་ཞུས་པའོ། །དཀྱིལ་འཁོར་དེ་ནི་བརྟགས་པ་དང༌། །ཞེས་བྱ་བ་ནི། དཀྱིལ་འཁོར་སྒྲུབ་པ་ཞུས་པའོ། །སྦྱིན་སྲེག་སོ་སོ་བྱ་བ་དང༌། །ཞེས་བྱ་བ་ནི་སྦྱིན་སྲེག་གི་སྒོ་ནས་ཞུས་པའོ། །དེ་བཞིན་མཆོད་པའི་ཆོ་ག་ཡང༌། །ཞེས་བྱ་བ་ནི་མཆོད་ནས་སྒྲུབ་པ་ཞུས་པའོ། །དེའི་ལན་དེ་ལྟར་ཞེས་བྱ་བ་ལ་སོགས་པའོ། །ཆོས་ཀྱི་དབྱིངས་བསྒྲུབ་པའི་ལན། ཆོས་ཀྱི་དབྱིངས་ནི་སྒྲུབ་པ་ནི། །ཞེས་པ་ལ་སོགས་པའོ། །གཟུགས་སྒྲ་ཞེས་བྱ་བ་ནི་མདོར་ན་ཆོས་ཀྱི་དབྱིངས་སུ་ཤེས་པར་བྱ་སྟེ། རྡོ་རྗེ་སེམས་དཔའི་རང་བཞིན་ཡིན་པའི་ཕྱིར་རོ། །དེ་ཡང་གཟུགས་དང་སྒྲ་དང་དྲི་དང་རོ་དང་རེག་བྱ་ཁོ་ན་སྟེ་དེ་ལྔ་ནི་རྡོ་རྗེ་སེམས་དཔའ་དང་མཉམ་མོ། །ཞེས་གསུངས་སོ། །དེ་དག་ཉིད་ལས་བྱུང་བ་ནི། །ཁམས་ལ་སོགས་པ་དེ་ལས་སྐྱེས་པའི་ཕྱིར་རོ། །བྱང་ཆུབ་སེམས་ཞེས་བཤད་པར་བྱ་བ་སྟེ་ལྷག་པའི་བྱང་ཆུབ་ཀྱི་སེམས་སོ། །བྱང་ཆུབ་སེམས་ལས་གོང་བུ་སྐྱེ། །ཞེས་བྱ་བ་ནི་དེ་ལས་ས་ལ་སོགས་པའི་གོང་བུ་སྐྱེའོ། །གོང་བུ་ལས་ཀྱང་ཡིད་བསྐྱེད་
དོ། །ཞེས་བྱའོ། །གོང་བུ་ལས་རྣམ་པར་ཤེས་པའི་ཁམས་སྐྱེ་སྟེ། རྣམ་པར་ཤེས་པ་རྫས་དང་དབྱེར་མེད་པའི་ཕྱིར་རྣམ་པར་ཤེས་པའི་ཁམས་སུ་ཤེས་པར་བྱའོ། །ཡིད་ལས་ནམ་མཁའི་ཁམས་ཀྱང་ནི། །ཞེས་བྱ་བ་ནི་ཡིད་དེ་ལས་ནམ་མཁའི་ཁམས་སྒོ་དགུའི་བུ་ག་ནམ་མཁའི་ཁམས་སུ་གྱུར་པའོ། །དེ་ལས་ཁམས་ལ་སོགས་པ་འབྱུང་བ་བསྟན་པ། ཁམས་རྣམས་ཞེས་བྱ་བ་ལ་སོགས་པ་བཤད་ཟིན་ཏོ། །དེ་ལྟར་དབྱིངས་སུ་བསྡུ་བ་སྟེ། །ཞེས་བྱ་བ་ནི་ཁམས་བྱང་ཆུབ་ཀྱི་སེམས། དེ་ལས་གོང་བུ། དེ་ལས་འབྱུང་བ་ཆེན་པོའི་བར་དུ་འཁོར་བར་སྐྱེས་པ་ནི་དབྱིངས་སུ་བསྡུས་པ་སྟེ་རྟེན་ཅིང་འབྲེལ་པར་འབྱུང་བ་ཐོག་མ་དང་ཐ་མ་མེད་པའོ། །བསྡུ་བ་དེ་བཞིན་བརྟན་བྱས་ལ། །ཞེས་བྱ་བ་ནི། བསྡུ་བ་ཕན་ཚུན་རྒྱུར་གྱུར་པའི་བསྒོམ་པའི་སེམས་རྩེ་གཅིག་པར་གྱུར་པ་ནི། ཆོས་ཀྱི་དབྱིངས་ཀྱི་སྒྲུབ་པ་ཡིན། །ཞེས་བྱའོ།། དེ་ཅིའི་ཕྱིར་ཞེ་ན། དེ་བས་ཐམས་ཅད་ནན་ཏན་གྱིས། །སྒྲུབ་པ་ཡང་དག་སྤྱད་པར་བྱ། །ཞེས་གསུངས་སོ། །དེའི་ཕྱིར་དུས་ཐམས་ཅད་དུ་ཉན་པ་ལ་སོགས་པའི་ནན་ཏན་གྱིས་མངོན་དུ་སྤྱོད་པར་བྱའོ། །ཐམས་ཅད་ཇི་ལྟར་བསྒྲུབ་ཅེ་ན། །གལ་པོའི་རྒྱུད་ཀྱི་ནང་ནས་འབྱུང་བའི་སྒྲུབ་ཐབས་ཀྱིས་སོ། །དེ་དང་མཐུན་པའི་རང་བཞིན་ནོ། །གལ་པོ་དངོས་ཀྱིས་ཀྱང་བསྒྲུབ་པར་བྱ་བ་རབ་ཏུ་བརྟག་གོ་ཞེས་བྱ་བའི་ཐ་ཚིག་གོ །རྫས་ལས་བསྒྲུབ་པའི་ལན། ཆོས་དབྱིངས་སྒྲུབ་པ་བཤད་ནས་ནི། །ཞེས་བྱ་བ་ནི་དེ་མ་ཐག་ཏུ་ཞེས་བྱ་བའི་ཚིག་གོ །རྫས་བརྒྱད་ཡན་ལག་སྒྲུབ་པ་བཤད། །ཅེས་བྱ་བ་ནི་ཐུན་མོང་ངོ༌། །ཡན་ལག་བརྒྱད་ནི། རི་ལུ་དང༌། མིག་སྨན་དང༌། ས་འོག་དང༌། རལ་གྱི་དང༌། རལ་གྱི་དང༌། ནམ་མཁའ་ལ་འགྲོ་བ་དང༌། མིག་རྣོ་བ་དང༌། འཆི་འཕོ་མེད་པ་དང༌། ནད་འཇོམས་པའི་དངོས་གྲུབ་དང་བརྒྱད་དོ། །དེ་ཡང་གསལ་བར་གསུངས་པ། རི་ལུ་ཞེས་བྱ་བ་ལ་སོགས་པའོ། །དེ་ལ་རི་ལུ་ནི་འོག་ནས་བཤད་དོ། །མིག་སྨན་ནི་ཟླ་བ་མར་གྱི་ངོ་ཚེས་ཉི་ཤུ་དགུའི་ནམ་ཕྱེད་ན། ལམ་གྱི་བཞི་མདོར་ཐོད་པའི་སྟེང་དུ་འདུག་གོ །མདུན་དུ་ཡང་སྒྱེད་པུ་བཙུགས་ནས་ཐོད་པ་གཉིས་བཞག་སྟེ། དེ་གཉིས་ཀྱི་བར་དུ་བདུད་རྩི་ལྔ་དང་ཚིལ་ཆེན་
བསྲེས་པས་བཀང་བའི་བྷནྡྷ་གཞག་སྟེ། དེའི་ནང་དུ་ཁྲག་དང་དྲི་ཆེན་ལ་སོགས་པ་ཤིང་ཨ་མྲའི་བལ་ལ་པདྨའི་སྐུད་པས་དཀྲིས་པའི་སྙིང་པོ་བཙུགས་ནས་མར་མེ་བལྟམ་པར་བྱའོ། །ཤིང་ཨ་མྲ་དང་པདྨའི་སྐུད་པ་མེད་ན་ཡང་གཞན་ཅི་འཚམ་པར་བྱའོ། །མེ་མར་གྱི་ལྕེའི་དུ་བ་ལ་བྷནྡྷ་གཅིག་བཀབ་ནས་སྒྱེད་པུ་གཉིས་ལ་གཞག་གོ །དེ་ལ་རྡོ་རྗེས་རེག་ནས་ཕུང་པོ་ལྔ་ལ་རིགས་ལྔར་བསྒོམས་པའི་རྣལ་འབྱོར་པས། ཨོཾ་ཨཱཿ་ཧཱུཾ་སྭཱ་ཧཱ་ནམ་ལངས་པར་བཟླ་བར་བྱའོ། །ད་ནས་དུད་པ་བླངས་ལ་རང་གི་མིག་ལ་བསྐུས་ན་སྐུ་གསུང་ཐུགས་ཀྱི་དངོས་གྲུབ་འཐོབ་པོ། །དེ་ཡང་གུ་ཧྱ་ས་མ་ཛ་ལས། ལམ་གྱི་བཞི་མདོ་འམ་ཤིང་གཅིག་ཏུ། །མ་མོའི་གནས་སམ་ཞི་གནས་སུ། །དེ་རུ་རྡོ་རྗེ་ཨཉྫ་ན། །ཐོད་པ་དག་ཏུ་དབབ་པར་བྱ། །ཞེས་གསུངས་སོ། །ས་འོག་ནི་ས་འོག་གི་དངོས་གྲུབ་སྟེ། ལྷ་མ་ཡིན་དང་ཀླུའི་བུ་མོ་བསྒྲུབ་པའོ། །དེ་ཡང་འདིར་འཕགས་པ་རྡོ་རྗེ་ས་འོག་ཞལ་གསུམ་ཕྱག་དྲུག་པ་གཡས་བར་མ་ན་ཞགས་པ། དེའི་འོག་མ་ན་དགྲ་སྟ། གཡོན་པ་ན་རྩེ་གསུམ་པ། བར་མ་ན་ལྕགས་ཀྱུ། དང་པོ་གཉིས་ཀྱིས་ལྷ་མོ་ལ་འཁྱུད་པ། སྐུ་མདོག་ནག་པོར་བསྒོམས་ལ། བཙག་ལ་སོགས་པས་ཏ་ལ་ལ་སོགས་པའི་ལོ་མ་ལ་རྡོ་རྗེ་ལྕགས་ཀྱི་གཉིས་བྲིས་ཏེ། དེ་ཁང་བཅུག་ལ་ཟླ་བ་གཟས་ཟིན་པའི་དུས་སུ་ལྕགས་ཀྱུ་འཕྲོས་པས་ལྷ་མ་ཡིན་གྱི་བུ་མོ་བཀུག་པར་བསྒོམས་ནས་སྔགས་ཨོཾ་ཨཱཿ་ཧཱུཾ་ཨཱ་ཀཪྵ་ཡ་བཟླ་བར་བྱའོ། །ལྷ་མ་ཡིན་གྱི་བུ་མོ་ལ་སོགས་པ་གང་མིང་ནས་སྨོས་པ་དེ་དགུག་གོ །དེ་ལྟར་ཡང་གསང་བ་འདུས་པ་ལས། བཙག་གམ་ཞེས་བྱ་བ་ལ་སོགས་པ་གསུངས་སོ། །རལ་གྲིའི་དངོས་གྲུབ་ཅེས་བྱ་བ་ནི། གྱོ་མོའམ་གསེར་ལ་སོགས་པ་རལ་གྲི་མཚན་དང་ལྡན་པ་བྱས་ལ་མདུན་དུ་རལ་གྲི་གཞག་སྟེ། བདུད་རྩི་རྣམ་པ་ལྔས་བྱུགས་ཏེ། དོན་ཡོད་གྲུབ་པ་བསྒོམ་པ་དང༌། ཨོཾ་ཨཱཿ་ཧཱུཾ་ཞེས་བརྗོད་ནས་རལ་གྲི་ལ་སྐུ་གསུངས་ཐུགས་ཐིམ་པར་བྱས་ཏེ། འོད་ཟེར་འབར་བ་བསྒོམ་པར་བྱའོ། །རལ་གྲི་དེ་འཕྲོས་མ་ཐག་ཏུ་གོང་མའི་སྔགས་དེ་བཟླས་ཏེ་ལག་པར་བླངས་མ་ཐག་ཏུ་རིག་འཛིན་དུ་འགྲུབ་བོ། །སྒྲུབ་པ་དེ་ཁོ་ནའི་མཐུས་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སུ་རྒྱུ་བས་ན་ནམ་མཁར་འཕུར་དང་ཞེས་བྱའོ། །རྣམ་པར་སྣང་མཛད་སྒྱུ་འཕྲུལ་དྲ་བའི་རྒྱུད་ལས་
ཀྱང། རལ་གྲི་མདུན་དུ་གཞག་བྱས་ཏེ། །ཞེས་བྱ་བརྒྱས་པར་གསུངས་སོ། །མིག་སྨན་ཞེས་བྱ་བ་ནི་མིག་རྣོན་གྱི་དངོས་གྲུབ་བོ། །ལམ་གྱི་བཞི་མདོ་ལ་སོགས་པར་ཐོད་པ་ལ་འདུག་པ་ལ་སོགས་པ་གོང་མ་བཞིན་བྱས་ལ། འདིར་ནི་ཞ་ཉེའི་ཀོང་བུ་ལ་ཚིལ་གྱིས་བཀང་ནས་ས་ལ་མ་ལྷུང་བའི་རོ་དཀྲིས་པའི་རས་ཀྱིས་སྙིང་པོ་བྱས་ཏེ་མར་མེ་བལྟམ་པར་བྱའོ། །ཕུང་པོ་ལྔ་རིགས་ལྔར་བསྒོམས་པའི་རྣལ་འབྱོར་པས། ཨོཾ་ཨཱཿ་ཧཱུཾ་ཞེས་བཟླ་བར་བྱའོ། །དུད་པ་དེ་བླངས་ནས་མིག་ལ་བསྐུས་ན་སྣང་བ་སྐུ་གསུང་ཐུགས་རྡོ་རྗེ་ལྷ་ཀླུ་ཀུན་མཐོང་བར་འགྱུར་རོ། །དེ་ཡང་འཕགས་པ་གདན་བཞི་པ་ལས་མ་ལྷུང་བའི་རོ་དཀྲིས་རས་ཞེས་བྱ་བ་ལ་སོགས་པའོ། །འཆི་བ་མེད་དང་ཞེས་བྱ་བ་ནི། དྲི་ཆེན་གྱིས་ཚེ་སྒྲུབ་པ་སྟེ། འདི་ལྟ་སྟེ་དྲི་ཆེན་གྱི་ཕྱེ་མ་དང༌། མར་དང༌། སྦྲང་རྩི་བསྲེས་ལ་རྟོག་པ་སྤངས་ལ་རིགས་ལྔར་བསྒོམས་པའི་རྣལ་འབྱོར་པས། ཨོཾ་ཨཱཿ་ཧཱུཾ་བཟླས་ཏེ་ལོ་གསུམ་གྱི་བར་དུ་ཟོས་ན་ཉི་མ་དང་འདྲ་བའི་ཚེ་འགྲུབ་པར་བྱེད་དོ། །དེ་ཡང་རྣམ་པར་སྣང་མཛད་ཀྱི་གལ་པོ་ལས་གསུངས་པ། དྲི་ཆེན་ཕྱེ་མར་བཏགས་ནས་སུ། །མར་དང་སྦྲང་རྩི་བསྲེས་ནས་བཟའ། །ལོ་གསུམ་ན་ནི་ལྷ་ཡི་ལུས། །ཉི་ཟླ་སྐར་མ་བཞིན་ཚེར་འགྱུར། །ཞེས་གསུངས་སོ། །ནད་འཇོམས་དང་ཞེས་བྱ་བ་ནི་རིམས་ལ་སོགས་པ་མེད་པའི་ཕྱིར་རོ། །ད་ནི་རི་ལུའི་བསྒྲུབ་པ་གསུངས་པ། མི་དང་གླང་པོ་ཞེས་བྱ་བ་ལ་སོགས་པའོ། །ཡོན་ཏན་འདི་ལྟ་སྟེ་མིའི་ཤས་སྐུ་གསུང་ཐུགས་འགྲུབ་པ་དང༌། གླང་པོ་ཆེའི་ཤས་མངོན་པར་ཤེས་པ་འགྲུབ་པ་དང༌། རྟའི་ཤས་ནི་མི་སྣང་པ་འགྲུབ་པ་དང༌། བ་ལང་གི་ཤས་ནི་དགུག་པའི་ལས་འགྲུབ་པ་དང༌། ཁྱིའི་ཤས་ནི་འགུགས་པའི་ལས་འགྲུབ་པ་དང༌། བོང་བུ་ལ་སོགས་པའི་ཤས་སྤྱིའི་ལས་འགྲུབ་བོ། །ཅིའི་ཕྱིར་ཤ་དེ་རྣམས་ལ་དངོས་གྲུབ་ཏུ་འགྱུར་ཞེ་ན། འཇིག་རྟེན་པ་ནི་གཙང་སྨེ་ལ་རྟོག་པ་ཡིན་པས་དེ་རྣམས་སྐུ་གསུང་ཐུགས་དབྱེར་མེད་པར་བྱས་ཏེ་ཟོས་ན་རྣམ་པར་རྟོག་པ་བཅོམ་པའོ། །དེ་མ་ཐག་ཏུ་དེ་བཞིན་གཤེགས་པས་བྱིན་གྱིས་རློབ་པོ། །འདི་རྣམས་ཀྱང་གསང་བ་འདུས་པར། ཤ་ཆེན་དམ་ཚིག་མཆོག་གིས་ནི། །ཞེས་བྱ་བ་ལ་སོགས་པ་དང་སྦྱར་རོ། །དེ་རྣམས་ཀྱི་ཚད་གསུངས་པ། ཆ་
བཞི་མཉམ་པར་སྦྱར་བྱའོ། །ཞེས་བྱ་བའི་ཚད་དོ། །དེ་ཡང་གསལ་བར་གསུངས་པ། མཐེ་བོ་ཚིགས་ཙམ་ཚད་དུ་ནི། །ཞེས་བྱ་བ་ནི་ཤ་རྣམས་ཏེ་བསྡུ་བའི་ཚད་དེ། སྲེད་པའི་སྒོ་ནས་ཤ་དེ་དག་མང་དུ་ཚོགས་པ་ནི་མི་རུང་བའི་ཕྱིར་རོ། །ཤིན་ཏུ་མཉམ་པོར་གཞག་ནས་སྦྱར། །ཞེས་བྱ་བ་ནི་སྦྱོང་བ་ལ་སོགས་པ་བྱའོ། །ཚད་གསུངས་པ་དྲི་ཆེན་ཞེས་བྱ་བ་ལ་སོགས་པ་གསུངས་པ། དེ་ལ་བཞི་སྨོས་ནས་ཤེལ་མ་སྨོས་པ་ནི་དོན་གྱིས་ཤེས་པར་བྱའོ། །ནས་ཙམ་ཆེད་དུ་ནི་ཞེས་བྱ་བ་ནི། བདུད་རྩི་ལྔ་ལས་ནས་འབྲུ་ཙམ་རེ་བསྡུ་སྟེ་མང་བ་ནི་སྐྱོན་བའི་ཕྱིར་རོ། །སྔགས་བཟླས་ནས་ནི་སྦྱང་བྱས་ཏེ། །ཞེས་བྱ་བ་ནི་སྦྱོང་བ་ལ་སོགས་པ་བྱའོ་ཞེས་བྱ་བའི་ཐ་ཚིག་གོ །སྦྱངས་ཟིན་མ་ཐག་ཏུ་ཡང་སྔགས་ཀྱིས་བརྟན་པར་བྱའོ། །བྱིན་གྱིས་བརླབ་པའི་སྔགས་བསྟན་པ། །ཕྱག་འཚལ་ཞེས་བྱ་བ་ལ་སོགས་པ་སྟེ། ཕྱག་འཚལ་ནི་ཨོཾ་ལ་བྱ་སྟེ། སྔགས་ཀུན་གྱི་མགོ་ལ་བཞག་པའི་ཕྱིར་རོ། །ཡི་གེ་ཨཱཿ་དབུས་སུ་ཞེས་བྱ་བ་ནི་ཨོཾ་དང་ཧཱུཾ་གི་བར་དུ་ཞེས་བྱ་བའི་ཐ་ཚིག་གོ །དེ་བཞིན་དུ་ཧཱུཾ་ཞེས་བྱ་སྟེ་ཞེས་བྱ་བ་ནི། མཐའ་མར་ཡི་གེ་ཧཱུཾ་གཞག་པར་བྱའོ། །འདི་ལྟ་སྟེ། ཨོཾ་ཨཱཿ་ཧཱུཾ་ཞེས་བྱ་བའི་སྔགས་འདི་ནི་གོང་གི་མིག་སྨན་ལ་སོགས་པ་ལ་ཡང་ཤེས་པར་བྱའོ། །ཐབ་གསུངས་པ། འབར་བའི་ཧྲི་ཡིག་འབར་བྱེད་པ། །ཞེས་བྱ་བ་ནི། དེའི་དོན་ནི་འདི་ལྟ་སྟེ་ཡཾ་ལས་རླུང༌། དེའི་སྟེང་དུ་རཾ་ལས་མེ། དེའི་སྟེང་དུ་པཾ་ལས་བསྐྱེད་པའི་པདྨ་བྷནྡྷའི་ནང་དུ་ཤ་རྣམ་པ་དགུ་དང༌། བདུད་རྩི་རྣམ་པ་ལྔ་གཞག་སྟེ། དེ་ལ་ཧྲི་བཀོད་ནས། དེའི་སྟེང་དུ་ཧཱུཾ་ལས་རྡོ་རྗེ་བསྒོམས་ཏེ་རླུང་གིས་མེ་བུས་ཏེ། བྷནྡྷའི་ནང་གི་བདུད་རྩི་བཙོས་པ་དང༌། སྟེང་གི་རྡོ་རྗེ་ཁ་གབ་ལས་འོད་ཐུར་དུ་འབར་བས་ཤ་དང་བདུད་རྩི་སྦྱངས་པར་བསྒོམ་པར་བྱའོ། །ཡང་ཧྲི་ལས་འོད་འཕྲོས་པས་ཕྱིན་ཅི་ལོག་གི་མཐུ་བཅོམ་སྟེ་དག་པར་བསྒོམ་མོ། །དེ་ལྟར་ཀུན་དུ་བཟང་མོ་ལས་ཀྱང་གསུངས་པ། ཕྱག་འཚལ་འབར་བས་བྱིན་བརླབས་པའི། །རླུང་གི་དཀྱིལ་འཁོར་རབ་འབར་བའི། །ཞེས་བྱ་བ་འདི་གསུངས་སོ། །འདིར་ནི་ཨོཾ་མ་ཡིན་ཏེ། ཧྲི་ཡིན་ཏེ་རྒྱུད་སོ་སོའི་ཡིན་པའི་ཕྱིར་རོ། །དགུ་པ་དེ་ནི་རབ་ཏུ་བསྒྲུབ། །ཅེས་བྱ་བ་ནི་བདུད་རྩི་ལྔ་དེ་ལྟར་བསྒྲུབ་པར་མ་ཟད་དེ། ཤ་དགུ་ཡང་དེ་ལྟར་བསྒྲུབ་པར་བྱའོ་ཞེས་པའོ།།
རི་ལུ་བྱ་བའི་ཐབས་བསྟན་པ། །ལན་ནི་ཉི་ཤུ་རྩ་གཅིག་ཏུ། །ཞེས་བྱ་བ་ལ་སོགས་པ་ལ་ནུབ་ཏུ་ཁ་བལྟས་ལ་ལན་ཉི་ཤུ་རྩ་གཅིག་ཏུ་བརྟགས་སོ། །ཡུངས་ཀར་ཚད་ཙམ་ནི་གོ་སླའོ། །དེ་ལྔ་ཙམ་གཅིག་ཏུ་བྱས་པའོ། །ལྔ་དང་ལྔ་ནི་འབྱོར་པར་བྱ། །ཞེས་བྱ་བ་ནི་ཡུངས་ཀར་ལྔ་ཚད་གཅིག་ཏུ་བྱ་བའི་ཚད་དོ། །དུས་ནི་ཚེས་བརྒྱད་ཅེས་བྱ་བ་ལ་སོགས་པ་ནི་གོ་སླའོ། །རི་ལུ་བསྒྲིལ་པ་ནི་རི་ལུ་རྣམས་ནི་བྱས་ནས་ཞེས་པའོ། །པདྨའི་སྣོད་ནི་བྷནྡྷའོ། །དེ་ལ། བཀང་ནས་རི་ལུ་གཞག་བྱས་ཏེ། །སྟོང་ཕྲག་བརྒྱད་ནི་བཟླ་བར་བྱ། །ཞེས་བྱ་བ་ནི་ཨོཾ་ཨཱཿཧཱུཾ་སྟོང་ཕྲག་བརྒྱད་བཟླས་ནས་བྱིན་གྱིས་བརླབས་པའོ། །མཚམས་བཞི་ལ་ནི་བསྒོམ་བྱས་ནས། །ཞེས་བྱ་བ་ནི་སྔ་དྲོ་དང་ཉིན་ཕྱེད་དང་ཕྱི་དྲོ་དང༌། ནམ་ཕྱེད་ལ་གོང་མ་བཞིན་དུ་སྦྱང་བར་བྱའོ། །དེ་ལྟར་བསྒོམས་ཟིན་པ་དང༌། རི་ལུ་དེ་རེ་རེ་བཟའ་བ་ནི་རྒྱུན་དུ་བཟའ་བར་བྱའོ། །ཞེས་བྱའོ། །དེའི་ཡོན་ཏན་དེ་ནི་བསྐལ་པ་མཐའ་ཡས་པར་ཞེས་བྱ་བ་ལ་སོགས་པ་སྟེ་གོ་བར་ཟད་དོ། །སྲེད་མེད་ཀྱི་བུའི་སྟོབས་ནི། གླང་པོ་ཆེ་བཅུའི་སྟོབས་ནི། སྤོས་ཀྱི་གླང་པོ་ཆེ་གཅིག་གོ །དེ་བཅུའི་སྟོབས་ནི་གཅེར་བུའི་སྟོབས་གཅིག་གོ །དེ་བཅུ་ནི་ཕུང་པོའི་སྟོབས་གཅིག་གོ །དེ་བཅུ་ནི་ཡན་ལག་མཆོག་གི་སྟོབས་གཅིག་གོ །མཆོག་གི་སྟོབས་བཅུ་ནི་སྲེད་མེད་ཀྱི་བུའི་སྟོབས་ཞེས་བྱའོ། །བརྩོན་འགྲུས་ནི་དགེ་བ་ལ་སྤྲོ་བའོ། །ལྔ་པ་ལ་ནི་སྨོན་ལམ་ཡང༌། །ཞེས་བྱ་བ་ནི། སེམས་ཅན་གྱི་དོན་དུ་སངས་རྒྱས་པར་འདོད་པའོ། །མངོན་པར་ཤེས་པ་ལྔ་ཞེས་བྱ་བ་ནི། ལྷའི་མིག་རྣ་བ་སེམས་ཤེས་པ་དང་གནས་དང་འཆི་འཕོ་རྫུ་འཕྲུལ་ལྔའོ། །ཐོབ་པ་ནི་གོང་གི་ཡོན་ཏན་དེ་ལྔའོ། །དེ་གང་ལས་གྱུར་ཅེ་ན། རི་ལུ་ཆེན་པོ་ཟོས་ཕྱིར་རོ། །ཞེས་བྱ་བ་སྟེ། དེའི་མཐུ་ཞེས་བྱ་བའི་ཐ་ཚིག་གོ །དེ་བཞིན་རིག་པའི་སྔགས་རྣམས་ཀྱང༌། །ཞེས་པའི་ལན། རྫས་ཀྱི་སྒྲུབ་པ་ཞེས་བྱ་བ་ལ་སོགས་པ་སྟེ། རྫས་ཀྱི་སྒྲུབ་པ་ཞེས་བྱ་བ་ལ་སོགས་པ་སྟེ། རྫས་ཀྱི་དངོས་གྲུབ་བཤད་ཟིན་ཏོ། །ཨེ་ཡིག་དང་ནི་ཞེས་བྱ་བ་ནི། རཾ་ལས་སྐྱེས་པའི་ཟུར་གསུམ་པའི་དཀྱིལ་འཁོར་རོ། །བཾ་ཡིག་ནི་ཆུའི་དཀྱིལ་འཁོར་ཟླུམ་པོའོ། །ལཾ་ཡིག་ནི་སའི་དཀྱིལ་འཁོར་གྲུ་བཞིའོ། །དབུས་སུ་ཡང་དག་གནས་ཞེས་བྱ་བ་ནི་མེའི་དཀྱིལ་འཁོར་གྱི་དབུས་སུ་རཾ་མོ། །ཆུའི་དབུས་སུ་བཾ།
དབང་ཆེན་ལ་ལཾ། དང་པོའི་མདོག་ནི་མེ་དང་རཱ་གའི་མདོག་དམར་བའོ། །གཉིས་པ་ཡི་ནི་མདོག་དཀར་བ། །ཞེས་བྱ་བ་ནི་ཆུའོ། །གསུམ་པ་ནི་སེར་པོ་དབང་ཆེན་ནོ། །དེ་གང་དུ་བསྒོམ་ཞེ་ན། དགུག་པར་བྱ་བའི་བྷ་གའི་དབུས་སུའོ། །ཐབས་ཇི་ལྟར་བསྒོམ་ཞེ་ན། འཁོར་ལོ་ལྟར་ནི་བསྐོར་བ་ནི། །ཞེས་བྱ་བ་ནི་རྫ་མཁན་གྱི་འཁོར་ལོ་བཞིན་དུ་མེའི་དཀྱིལ་འཁོར་ལ་སོགས་པ་བྷ་གའི་ནང་དུ་འཁོར་བར་བསམ་མོ། །དུས་ནི། ཉིན་ཕྱེད་དང་ནི་མཚན་ཕྱེད་དང༌། །ཞེས་བྱ་སྟེ་དུས་དེ་གཉིས་ན་སེམས་ཀྱི་སྟོབས་ཉམས་པའི་ཕྱིར་རོ། །དེའི་ཡོན་ཏན་དེ་ལ་རིག་པ་ནི་བུ་མོ་དགུག་པའི་ལས་བྱེད་པའི་ཕྱིར་རོ། །རབ་འབྱོར་དེ་ནི་བྱ་བ་ནི་པདྨ་དང་བྷ་གའི་ནང་དུ་དཀྱིལ་འཁོར་བསྒོམ་པའོ། །དེ་ཡིས་སྐད་ཅིག་ཁོ་ནར་འགྲུབ། །ཅེས་བྱ་བ་ནི་མྱུར་བར་རོ། །བསྒྲུབ་བྱ་དངོས་ནི་ལྷ་མོ་ཞེས་བྱ་བ་ལ་སོགས་པ་སྟེ་གོ་སླའོ། །རྣམ་བཞི་ཞེས་བྱ་བ་ནི་པདྨ་ཅན་དང༌། དུང་ཅན་དང༌། རི་མོ་ཅན་དང༌། གླང་པོ་ཅན་མའོ། །དེ་ལ་པདྨ་ཅན་ནི་པདྨའི་དྲི་བྲོ་བ་དང༌། ངོ་ཟླུམ་པ་ལ་སོགས་པའོ། །དུང་ཅན་མ་ནི་བ་ཚའི་དྲི་བྲོ་བ་དང༌། སྐྲ་དང་སྣ་རིང་བ་ལ་སོགས་པའོ། །རི་མོ་ཅན་ནི་ཤའི་དྲི་བྲོ་བ་དང༌། ལུས་ཆུང་བ་དང༌། མཛེས་པ་ལ་སོགས་པའོ། །གླང་པོ་ཆེ་ནི་ཆང་གི་དྲི་བྲོ་བ་དང༌། བྱིན་པ་སྦོམ་པ་དང༌། སྣ་ཡོ་བ་ལ་སོགས་པའོ། །ས་འོག་མ་ལ་སོགས་པ་ནི་སའི་དཀྱིལ་འཁོར་རོ། །སྔགས་ཀྱིས་བཀུག་ཅེས་བྱ་བ་ནི་གོང་དུ་གསུངས་པའི་སྔགས་ཀྱིས་སོ། །བུ་མོ་ཐམས་ཅད་སྤྱད་པར་བྱ། །ཞེས་བྱ་བའི་ཐ་ཚིག་གོ །དཀྱིལ་འཁོར་རྣམས་ནི་བརྟགས་པ་དང༌། །ཞེས་བྱ་བའི་ལན་མེའི་དཀྱིལ་འཁོར་ལ་སོགས་པ་བསྒོམ་པའོ། །དེ་བཞིན་རིག་པའི་སྔགས་ཞེས་བྱ་བ་ནི་རཾ་དང་ལཾ་དང་བཾ་མོ། །དེ་ནི་མན་ངག་གོ །ཀྱེ་ལྷ་མོ་བདག་གིས་བཤད་པ་ཟིན་མཛད་དེ། །ཞེས་གསུངས་སོ། །ད་ནི། དཀྱིལ་འཁོར་རྣམས་ནི་བཤད་པར་བྱ། །དགའ་མའི་སེམས་ཀྱིས་རྩེ་གཅིག་ཉོན། །ཞེས་བྱ་བ་ནི་དམ་བཅས་པའི་ཐ་ཚིམ་གོ །དེ་ལ་དགའ་མ་ནི་སྒྲོལ་མ་ལ་བོད་པའོ། །དེ་ནས་དཀྱིལ་འཁོར་གསུངས་པ། དཀྱིལ་འཁོར་ལུས་ཞེས་བྱ་བ་གསུངས་ཏེ་གོང་དུ་བསྟན་པ་དང་འོག་ནས་འབྱུང་བས་འདིར་མ་འབྲེལ་ཏོ། །དཀྱིལ་འཁོར་བྷ་ག་ཞེས་བྱ་བ་ནི་ཆོས་ཀྱི་འབྱུང་གནས་ཨེ་གྲུ་གསུམ་གྱི་ནང་དུ་
བསྒོམ་པའི་དཀྱིལ་འཁོར་རོ། །དཀྱིལ་འཁོར་བྱང་ཆུབ་སེམས་དང་ནི། །ཞེས་བྱ་བ་ནི། དེ་ལྟར་ལུས་དང་བྷ་ག་དང་བྱང་ཆུབ་སེམས་ཀྱི་དཀྱིལ་འཁོར་གསུམ་ཀ་གཉིས་དང་བཞི་མ་ཡིན་པར་གསང་བའི་རྒྱུད་ལས་ཡང་དག་པར་བརྟགས་སོ། །དཀྱིལ་འཁོར་དུ་མིང་ཇི་ལྟར་བཏགས་ཤེ་ན། བརྟགས་པ་རྣམས་ལ་འདུས་པ་སྟེ། །ཞེས་བྱ་བ་གསུངས་སོ། །བརྟགས་པ་རྣམས་ལ་འདུས་པ་ཞེས་བྱ་བ་ནི། དཀྱིལ་འཁོར་དུ་མིང་བཏགས་པ་ནི་འདུས་པའི་ཕྱིར་རོ། །འཇིག་རྟེན་སྣང་བ་ལས་ཀྱང༌། སྙིང་པོ་འདུས་པའི་དཀྱིལ་འཁོར་རོ། །ཞེས་གསུངས་སོ། །སྙིང་པོ་གང་ཞེ་ན། གང་ན་གཙོ་བོ་ཞེས་བྱ་བ་ནི་གང་དང་གང་དུའོ། །གཙོ་བོ་ནི་ཁྱབ་བདག་རྡོ་རྗེ་སེམས་དཔའོ། །བསྐྱེད་པ་ནི་རྒྱུའོ། །ད་ནི་ལུས་ཀྱི་དཀྱིལ་འཁོར་གསུངས་པ་ཕུང་པོ་རྣམས་ཞེས་བྱ་བ་ནི་ཕུང་པོ་ལྔ་ནི་རིགས་ལྔ་སྟེ། དེ་ལ་གཟུགས་ཀྱི་ཕུང་པོ་དང༌། ཚོར་བའི་ཕུང་པོ་དང༌། འདུ་ཤེས་ཀྱི་ཕུང་པོ་དང༌། འདུ་བྱེད་དང༌། རྣམ་པར་ཤེས་པ་རྣམས་དང༌། རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འདོད་དཔག་མེད་དང༌། དོན་ཡོད་གྲུབ་པ་དང༌། མིག་བསྐྱོད་པ་དང་གོ་རིམས་བཞིན་ནོ། །དེ་ལྟར་ཡང་ཐམས་ཅད་གསང་ཆེན་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས་གསལ་བར་གསུངས་ཏེ། སེམས་ཀྱི་ཕྲ་མོ་སྦྱོར་བ་ཡིས། །ཡེ་ཤེས་ཕྲ་མོ་དང་སྦྱར་བ། །དེ་བཞིན་གཤེགས་ཀུན་ཡེ་ཤེས་ནི། །རྣམ་པར་སྣང་མཛད་ཅེས་སུ་འདོད། །སྙིང་རྗེ་འཕྲོ་བའི་སྦྱོར་བ་ཡིས། །ཐམས་ཅད་ཕན་དོན་བྱེད་པའོ། །སེམས་ཅན་དོན་དང་ལྡན་སེམས་ནི། །རིན་ཆེན་འབྱུང་ལྡན་ཞེས་གསུངས་སོ། །དགའ་བ་འཕྲོ་བའི་ཐིག་ལེ་ཡིས། །ཐེག་ཆེན་དྲི་མེད་པ་ཡི་མཆོག །རང་བཞིན་འོད་གསལ་དག་པའི་སེམས། །སྣང་བ་མཐའ་ཡས་དེ་གསུངས་སོ། །བཏང་སྙོམས་འཕྲོ་བའི་སེམས་ཀྱིས་ནི། །གང་གིས་སེམས་ཅན་ཤེས་བྱེད་པ། །ཐོགས་མེད་བླ་མེད་དོན་བྱེད་པ། །དོན་ཡོད་གྲུབ་པར་དེ་གསུངས་སོ། །བྱམས་པ་འཕྲོ་བའི་སྦྱོར་བ་ཡིས། །མཆོག་གི་སྤྱོད་པ་སྤྱོད་བྱེད་པ། །ཟག་མེད་བརྟན་པར་གྱུར་པའི་སེམས། །མི་བསྐྱོད་པར་ནི་གསུངས་པ་ཡིན། །ཞེས་འབྱུང་ངོ༌། །འདི་སྐད་དུ་བསྟན་ཏེ་རྣམ་པར་སྣང་མཛད་ནི་དང་པོའི་བྱང་ཆུབ་ཀྱི་སེམས་འཕྲོ་བའི་སེམས་སོ། །རིན་ཆེན་འབྱུང་ལྡན་ནི་སྙིང་རྗེ་སྟེ་འཕྲོས་པས་སེམས་ཅན་གྱི་དོན་བྱེད་
པའོ། །སྣང་བ་མཐའ་ཡས་ནི་འཕྲོ་འདུའི་དགའ་བ་རོལ་བཞིན་པའི་འོད་གསལ་བའོ། །དོན་ཡོད་གྲུབ་པ་ནི་བཏང་སྙོམས་ཀྱི་སྦྱོར་བའི་སེམས་སོ། །མི་བསྐྱོད་པ་ནི་བྱམས་པའི་སྦྱོར་བའི་སེམས་ཏེ་ཟག་པ་མེད་པར་བསྟན་པའོ། །དེ་ལྟར་ཕུང་པོ་ལྔ་ནི་སེམས་ཡིན་ལ་དེ་ནི་རིགས་ལྔའོ། །དེ་ཡང་ས་བཅུ་པ་ལས། ཀྱེ་རྒྱལ་བའི་སྲས་ཁམས་གསུམ་སེམས་ཙམ་མོ། །ཞེས་བྱ་བ་ལ་སོགས་པ་གསུངས་སོ། །འབྱུང་བ་རིག་མར་བརྟག་ཅེས་བྱ་བ་ནི། སྤྱན་མ་ལ་སོགས་པ་འབྱུང་བ་རྣམས་རིག་མར་བརྟག་ཅེས་བྱ་བའི་ཐ་ཚིག་གོ །ས་སྤྱན་མ། ཆུ་མཱ་མ་ཀཱི། །མེ་གོས་དཀར་མོ། །རླུང་སྒྲོལ་མའོ།། དེ་ཡང་ཐམས་ཅད་གསང་ཆེན་གྱི་རྒྱུད་ལས་གསུངས་པ། བྱང་ཆུབ་སེམས་ཀྱི་མཐུ་ཡིས་ནི། །སངས་རྒྱས་ཉིད་དུ་ཕ་རོལ་ཕྱིན། །ཐོབ་པའི་ཕ་རོལ་ཕྱིན་ཞེས་པ། །སེམས་མའི་རྡོ་རྗེ་མ་ཞེས་བརྟགས། །བསྡུ་བའི་དངོས་པོ་བཞི་རྣམས་ལ། །ཤེས་རབ་ཕ་རོལ་ཕྱིན་མ་དགེ །ཆོས་བཞི་གཅིག་ཏུ་གྱུར་པ་ནི། །རིན་ཆེན་རྡོ་རྗེ་མ་རུ་འདོད། །གསང་བའི་ཆོས་ཀྱི་ཐིག་ལེ་ལ། །དེ་ཉིད་ཕ་རོལ་ཕྱིན་དགེ་བ། །ཕ་རོལ་ཕྱིན་ཅེས་དགེ་བ་ནི། །ཆོས་ཀྱི་རྡོ་རྗེ་མ་རུ་འདོད། །ཕ་རོལ་ཕྱིན་བཞི་གཙོ་མོ་སྟེ། །རྡོ་རྗེ་ཕ་རོལ་ཕྱིན་པ་དགེ །སྦྱོར་བའི་བསམ་གཏན་བརྟགས་པ་ནི། །ལས་ཀྱི་རྡོ་རྗེ་མ་ཞེས་འདོད། །ཅེས་འབྱུང་ངོ། །བྱང་ཆུབ་སེམས་ཀྱི་རང་མཐུ་དང༌། །ཆུ་ནི་བསྡུ་བའི་དངོས་པོ་དང༌། །མེ་ནི་སྨིན་པར་བྱེད་པ་དང༌། །རླུང་ནི་འགེགས་པའི་ངོ་བོ་ཕ་རོལ་ཕྱིན་པ་བཞི་དང་ངོ་བོ་ཐ་དད་པ་མེད་པའི་ཕྱིར་རོ། །ཆགས་མ་ལྕགས་ཀྱུ་ཞེས་བྱ་བ་ནི། རིག་མ་ལ་རིགས་ལྔའི་སྒོ་ནས་དབྱེར་མེད་པར་སེམས་ཀྱིས་འཛིན་པའོ།། དེ་ཡང་ཐམས་ཅད་གསང་ཆེན་གྱི་རྒྱུད་ལས། འདོད་ཆགས་ཀུན་ལ་ཐབས་ཆེ་བ། །རྡོ་རྗེ་ལྕགས་ཀྱུ་ཞེས་བརྗོད་དོ། །ཞེས་འབྱུང་ངོ༌། །ཞགས་པ་པདྨ་ཆུད་བྱེད་པ། །ཞེས་བྱ་བ་ནི། ལོག་སྲེད་ཅན་མ་ཡིན་གྱི་འདི་ཡང་བྱང་ཆུབ་ཀྱི་སྤྱོད་པའི་ཆེད་དུ་དེ་ལྟར་བྱས་པ་ལ་ནི་ཉེས་པ་མེད་དོ། །དེ་ཡང་རྒྱུད་དེ་ཉིད་ལས། སྤྱོད་པ་བྱང་ཆུབ་ཏུ་སྤྱོད་པ། །རྡོ་རྗེ་ཞགས་པ་དེ་འདོད་དོ། །ཞེས་གསུངས་སོ། །ཁ་སྤྲད་པ་ནི་སྒྲོག་ཡིན་པར། །ཞེས་བྱ་བ་ནི་སེམས་བརྟན་པར་བསྒོམ་པ་ནི་སྒྲོག་སྟེ། རྒྱུད་དེ་ཉིད་ལས། གང་ཞིག་དེ་ལྟར་བསྟེན་པ་གང༌། །རྡོ་རྗེ་སྒྲོག་ཅེས་འདོད་པའོ། །ཞེས་གསུངས་སོ། །སྒྲ་
གྲགས་པ་ནི་དྲིལ་བུར་འདོད། །ཅེས་བྱ་བ་ནི་ཆོས་ཐམས་ཅད་མི་སྐྱེ་བ་ཡིན་ཞེས་པའི་སྔགས་ཀྱི་སྒྲ་བརྗོད་ནས་ཐབས་དང་ཤེས་རབ་རོལ་པའི་སེམས་ནི་དྲིལ་བུའོ། །དེའི་སྔགས་ནི། ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཏ། ཅེས་བརྗོད་དོ། །དེ་ཡང་རྒྱུད་དེ་ཉིད་ལས། ཆོས་ནི་ཐམས་ཅད་མ་སྐྱེས་པ། །ནམ་མཁའ་དང་མཉམ་འདོད་ཞི་བ། །དེ་ལྟར་ཚིག་ཏུ་བརྗོད་པ་ནི། །རྡོ་རྗེ་དྲིལ་བུ་ཞེས་འདོད་དོ། །ཞེས་གསུངས་སོ། །སྤོས་ནི་དྲི་ཆེན་ཞེས་གསུངས་ཏེ། །ཞེས་བྱ་བ་ནི། གཙང་བ་དང་མིག་ཙང་བ་མཉམ་པོར་འགྱུར་ཏེ་མི་རྟག་པར་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་སྤོས་ཡིན་པའི་ཕྱིར་རོ། །དེ་ཉིད་ལས། ཐམས་ཅད་དུ་ནི་མཉམ་པའི་མཆོག །ཤེས་རབ་ཕ་རོལ་ཕྱིན་པས་སོ། །ཞེས་གསུངས་སོ། །མེ་ཏོག་རཀྟ་ཞེས་འདོད་དོ། །ཞེས་བྱ་བ་ནི་ཕྱིན་ཅི་ལོག་གི་འདོད་ཆགས་ཀྱིས་མ་གོས་པའི་རང་བཞིན་བསམ་གཏན་གྱི་ཕ་རོལ་ཏུ་ཕྱིན་པ་ནི་མེ་ཏོག་ཡིན་པའི་ཕྱིར་རོ། །ཡང་དེ་ཉིད་ལས། འདོད་པའི་འདམ་སྐྱེས་མ་གོས་པ། །བསམ་གཏན་ཕ་རོལ་ཕྱིན་མེ་ཏོག །ཅེས་གསུངས་སོ། །མར་མེ་ཤ་རྣམས་ཁོ་ན་ཡིན། །ཞེས་བྱ་བ་ནི་གཙང་བ་དང་མི་གཙང་བའི་རྣམ་པར་རྟོག་པ་ཀུན་སྤངས་ལ། སྨོན་ལམ་གྱི་ཕ་རོལ་ཏུ་ཕྱིན་པའི་རང་བཞིན་ནི་མར་མེ་ཡིན་པའི་ཕྱིར་རོ། །ཡང་དེ་ཉིད་ལས། ཕྱོགས་ཀུན་དུ་ནི་གསལ་བྱེད་པ། །མར་མེ་སྨོན་ལམ་ཕ་རོལ་ཕྱིན། །ཞེས་འབྱུང་ངོ༌། །དྲི་ནི་བྱང་ཆུབ་ཡེ་ཤེས་འདོད། །ཅེས་བྱ་བ་ནི། བྱང་ཆུབ་ཀྱི་སེམས་ལས་དང་པོ་དྲི་ང་བ་ན་ཡང་ཐབས་ཀྱི་དགེ་བའི་རང་བཞིན་དྲི་འདོད་པའོ། །ཡང་དེ་ཉིད་ལས། དྲི་ང་བ་ཡང་དགེ་བ་སྟེ། །ཐབས་ཀྱི་ཕ་རོལ་ཕྱིན་པ་དྲི། །ཞེས་གསུངས་པ་ལྟ་བུའོ། །སྒེག་མོའི་ལིངྒར་བསྟན་པ་སྟེ། །ཞེས་བྱ་བ་ནི། དེ་བཞིན་གཤེགས་པ་ལ་མཆོད་པ་འབུལ་བའི་སྒོ་ནས་དགེ་བའི་རང་བཞིན་གྱི་རོལ་པ་ནི་སྒེག་མོའོ། །ཡང་དེ་ཉིད་ལས། ཅིའི་ཕྱིར་དགེ་བའི་རོལ་པ་ནི། །སྦྱིན་ཕའི་ཕ་རོལ་ཕྱིན་པ་སྒེག །ཅེས་གསུངས་སོ། །ཕྲེང་བ་བྷ་ག་ཁོ་ན་ཡིན། །ཞེས་བྱ་བ་ནི། དམ་ཚིག་གི་ཚུལ་དང་ལྡན་པའི་རྣལ་འབྱོར་མས། དེ་བཞིན་གཤེགས་པའི་ཐུགས་མཉེས་པར་བྱེད་པའི་རང་བཞིན་ཕྲང་བར་འདོད་དོ། །ཡང་དེ་ཉིད་ལས། བརྒྱན་པའི་ལུས་ཅན་ཡིད་འཕྲོག་མ། །ཕྲེང་བ་
ཚུལ་ཁྲིམས་ཕ་རོལ་ཕྱིན། །ཞེས་གསུངས་སོ། །དབྱངས་མ་དབུགས་སུ་བསྟན་པ་དང༌། །ཞེས་བྱ་བ་ནི། རོལ་པའི་དུས་སུ་སྔགས་ཆེད་དུ་བརྗོད་པ་ནི་དབྱངས་མ་ཡིན་པའི་ཕྱིར་རོ། །ཡང་དེ་ཉིད་ལས། ཆེད་དུ་བརྗོད་པ་ལེགས་བརྗོད་པས། །དབྱངས་མ་བཟོད་པའི་ཕ་རོལ་ཕྱིན། །ཞེས་གསུངས་སོ།། གར་མཁན་མ་ནི་ཁ་སྦྱོར་ཏེ། །ཞེས་བྱ་བ་ནི། འབྲས་བུ་དོན་དུ་གཉེར་བའི་རྣལ་འབྱོར་པས། །ལྷ་བསྒོམ་པའི་རྩོལ་བ་དང་བཅས་པ་ནི་གར་མཁན་མ་ཞེས་བྱའོ། །ཡང་དེ་ཉིད་ལས། མྱུར་བར་སངས་རྒྱས་ཉིད་སྦྱིན་པ། །གར་མཁན་བརྩོན་འགྲུས་ཕ་རོལ་ཕྱིན། །ཞེས་གསུངས་སོ། །དེ་ལྟ་བུའི་ལུས་ཀྱི་དཀྱིལ་འཁོར་ནི་བྷ་ག་དང༌། བྱང་ཆུབ་སེམས་ཀྱི་དཀྱིལ་འཁོར་ལས་ཁྱད་པར་དུ་བསྟན་ཏོ། །དེའི་ཕྱིར། བཅོམ་ལྡན་འདས་ཀྱིས་བཟང་པོར་གསུངས། །ཞེས་བྱའོ། །ཤིན་ཏུ་སྦྱོར་བ་ཡིན་པའི་ཕྱིར་རོ། །དེ་རྟོགས་པ་ནི་བསྐལ་བཟང་ཡིན། །ཞེས་བྱ་བ་ནི་ལུས་ཀྱི་དཀྱིལ་འཁོར་བཟང་པོའི་དོན་ཏོ། །དེ་རྟོགས་པ་ནི་རྣམ་པར་ཤེས་པ་བརྒྱད་དོ། །དེ་རྣམས་བྱམས་སོགས་ཞེས་བྱ་བ་ནི་རྣམ་པར་ཤེས་པའི་ཚོགས་བརྒྱད་བྱམས་པ་ལ་སོགས་པའི་བྱང་ཆུབ་སེམས་དཔའ་བརྒྱད་དུ་བསྒོམ་མོ་ཞེས་བྱ་བའི་ཐ་ཚིག་གོ །འདི་ལྟ་སྟེ་ཀུན་གཞི་དང༌། ཡིད་དང༌། སེམས་ཀྱི་རྣམ་པར་ཤེས་པ་དང༌། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་ཀྱི་རྣམ་པར་ཤེས་པ་རྣམས་བྱམས་པ་དང༌། འཇམ་དཔལ་དང༌། ཀུན་དུ་བཟང་པོ་དང༌། སའི་སྙིང་པོ་དང༌། ཕྱག་ན་རྡོ་རྗེ་དང༌། ནམ་མཁའི་སྙིང་པོ་དང༌། སྤྱན་རས་གཟིགས་དང༌། སྒྲིབ་པ་རྣམ་པར་སེལ་བ་གོ་རིམས་བཞིན་ནོ།། དེ་ལྟར་ན་ནི་དཀྱིལ་འཁོར་གསུངས། །ཞེས་བྱ་བ་ནི་ལུས་ཀྱི་དཀྱིལ་འཁོར་རྣལ་འབྱོར་པ་རྣམས་ཀྱིས་བསྒོམས་ཞེས་བྱ་བའི་དོན་ཏོ། །དཀྱིལ་འཁོར་གསུམ་ལས་གཉིས་མ་གསུངས་པ་ཅི་ཞེ་ན། དཀྱིལ་འཁོར་གཞན་ནི་སྔར་བཤད་ཟིན་ཅེས་གསུངས་ཏེ། རྩ་བའི་རྒྱུད་ལས་ལྷ་ག་དང་བྱང་ཆུབ་སེམས་ཀྱི་དཀྱིལ་འཁོར་རྒྱས་པར་བཤད་ཟིན་ཏོ། །སྦྱིན་སྲེག་སོ་སོར་བྱ་ཞེས་པའི་ལན། སྦྱིན་སྲེག་ལས་རྣམས་བཤད་པར་བྱ། །ཞེས་བྱ་བ་ལ་སོགས་པ་སྨོས་སོ། །རྣམ་པ་བཞི་ནི་ཞི་བ་ལ་སོགས་པའོ། །དེའི་དབྱེ་བ་ནི། སྦྱིན་སྲེག་ཕྱི་དང་ནང་གསུངས་པ། །ཞེས་བྱ་བ་ནི། ཕྱི་ནི་
ཧོམ་ཁུང་བརྐོ་བ་ལ་སོགས་པའོ། །ཐབས་ཇི་ལྟར་བྱ་ཞེ་ན། ཕྱི་ནི་སྔོན་དུ་བསྟན་པ་ཡིན། །ཞེས་བྱ་བ་རྩ་བའི་རྒྱུད་དུ་བསྟན་ཏོ། །ནང་གི་ནི་གང་ཞེ་ན། ཉོན་ཅིག་ཅེས་བྱ་བ་ལ་སོགས་པའོ། །དེ་ནི་ལྷ་མོ་སྒྲོལ་མ་ལ་གདམས་པའོ། །པདྨ་བཞི་རྣམས་འབྱོར་པ་ནི། །ལུས་ཀྱི་དབུས་སུ་ཉེ་བར་གནས། །ཞེས་བྱ་བ་ནི། གསང་བ་དང༌། ལྟེ་བ་དང༌། སྙིང་ག་དང༌། མགྲིན་པ་བཞི་ལ་པདྨའི་གདན་རེ་རེ་བསམ་མོ། །མེ་ཞེས་བྱ་བ་ནི་ལྟེ་བའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་རཾ་གྱིས་མཆེན་པའོ། །རླུང་ཞེས་བྱ་བ་ནི་གསང་བའི་པདྨའི་གདན་ལ་ཡཾ་ལས་རླུང་གི་དཀྱིལ་འཁོར་ཟླ་གམ་མདོག་སྔོན་པོ་ཡཾ་གིས་མཚན་པ་བསྒོམ། དབང་ཆེན་ནི་སྙིང་གི་པདྨའི་སྟེང་དུ་ལཾ་ལས་དབང་ཆེན་གྱི་དཀྱིལ་འཁོར་གྲུ་བཞི་ཁ་དོག་སེར་པོ་ལཾ་གྱིས་མཚན་པའོ། །ཆུ་ཞེས་བྱ་བ་ནི་མགྲིན་པའི་པདྨར་བཾ་ལས་ཆུའི་དཀྱིལ་འཁོར་ཟླུམ་པོ་ཁ་དོག་དཀར་པོ་བཾ་གྱིས་མཆན་པའོ། །དེ་དག་གི་ལས་གསུངས་པ། རླུང་གིས་མེ་ལ་འབར་བྱས་ཏེ། །ཞེས་བྱ་བ་ནི་གསང་བའི་རླུང་གིས་ལྟེ་བའི་དཀྱིལ་འཁོར་ལ་འབུད་པའོ། །ཆུ་ཡིས་ཡོངས་སུ་སྨིན་པར་བྱེད། །ཅེས་བྱ་བ་ནི་དབང་ཆེན་གྱི་དཀྱིལ་འཁོར་གྱི་དྲོད་བྱུང་བས་ཟས་ཐམས་ཅད་མགྲིན་པའི་ཆུའི་དཀྱིལ་འཁོར་ལ་སྨིན་པར་བྱེད་པའོ། །དེ་གསལ་བར་གསུངས་པ། དབང་ཆེན་དཀྱིལ་འཁོར་ལས་བྱུང་བ། །ཞེས་གསུངས་སོ། །དབང་ཆེན་གྱི་དྲོད་ཇི་ལྟར་བྱུང་ཞེ་ན། གང་དུ་མེ་ནི་བསྐྱེད་པའོ། །ཞེས་བྱ་བ་སྟེ་མེའི་དཀྱིལ་འཁོར་གྱི་འོད་ཀྱིས་དབང་ཆེན་གྱི་དཀྱིལ་འཁོར་ལ་རེག་པའོ། །དེ་ལྟར་གོ་རིམས་ཡིན་པ་ལ་རྒྱུད་ལས་དེ་ལྟར་མ་བསྟན་པ་ནི་མན་ངག་བསྟན་པ་དང་ཤེས་རབ་ཅན་ང་རྒྱལ་གཅིག་པའི་ཕྱིར་རོ། །ཡོན་ཏན་རང་རིག་མངོན་སྤྱོད་ཅེས་བྱ་བ་ལ་སོགས་པ་ནི་གོ་སླའོ། །སྲེག་རྫས་ནི། གང་ཞིག་ཟས་དང་བཏུང་བ་དང༌། །ཞེས་བྱ་བ་ལ་སོགས་པ་ནི་ཁ་ཟས་སོ། །དེ་དག་ཐམས་ཅད་ཆུ་ལས་ཏེ། །ཞེས་བྱ་བ་ནི་རྫས་དེ་དག་ཐམས་ཅད་ཆུའི་དཀྱིལ་འཁོར་ལ་སྦྱིན་སྲེག་བྱའོ། །པདྨ་ཀྵ་ཡིག་ཁ་མར་བལྟས། །ཞེས་བྱ་བ་ནི་མགྲིན་པའི་སྟེང་གི་ཆུའི་དཀྱིལ་འཁོར་གྱི་སྟེང་ན་ཡི་གེ་ཀྵ་ཁ་དོག་དཀར་བ་ཁ་ཐུར་དུ་བལྟས་པ། འོད་ཟེར་མེར་འབར་བ་ཁ་གབ་ཀྱི་ཚུལ་དུ་བསྒོམ་པའོ། །སྲེག་རྫས་དེ་དག་ཀྱང་ཆུའི་དཀྱིལ་འཁོར་ནས་མར་
རིམ་གྱིས་བབས་ཏེ་སྙིང་གའི་པདྨར་བཙུད་པར་བྱའོ། །ལྟེ་བའི་པདྨར་འགྲོ་ཕྱིར་རོ། །ཞེས་བྱའོ། །ཐབས་ཇི་ལྟར་བྱ་ཞེ་ན། ཁ་སྦྱར་ཚུལ་ནི་སྦྱོར་བ་ཡིས། །ཞེས་བྱ་བ་ནི་ཐབས་དང་ཤེས་རབ་ཀྱི་སྦྱོར་བས་སྦྱིན་སྲེག་བྱའོ། །ཕྱི་རོལ་དབང་འདྲ་བར་ལུས་ལྷའི་དཀྱིལ་འཁོར་ལ་ཡང་བྱའོ་ཞེས་བྱ་བའི་ཐ་ཚིག་གོ །གསང་བའི་པདྨར་འགྲོ་མ་ཐག །ཐལ་བར་མཐའ་རུ་རྣམ་པར་བསྟན། །ཞེས་བྱ་བ་ནི། སྲེག་རྫས་དེ་དག་གིས་ལུས་ལྷའི་དཀྱིལ་འཁོར་ཚིམ་སྟེ་སྙིགས་མ་ལྔ་ཚིག་པར་བྱའོ། །ཡོན་ཏན་ཇི་ལྟར་སྤྱིན་སྲེག་ཅེས་བྱ་བ་ལ་སོགས་པ་སྨོས་པའོ། །བདག་ནི་སྟོན་པ་པོའོ། །ཚེ་འདི་ཁོ་ནས་འགྲུབ་པར་འགྱུར། །ཞེས་བྱ་བ་ནི། དེ་བཞིན་གཤེགས་པའི་ཞིང་ཁྱད་པར་ཅན་ལ་མཆེད་པ་དང་བསམ་པ་ཁྱད་པར་ཅན་དུ་གྱུར་པས་ཚེ་འདི་ཁོ་ན་ལ་ཆོས་མཐོང་ནས་མྱོང་བའི་འབྲས་བུ་འཐོབ་པར་འགྱུར་རོ། །རྒས་པ་མེད་པ་ནས་དགའ་བར་སྨྲ་བའི་བར་ནི་གོ་སླའོ། །མཐོང་བ་ཙམ་གྱིས་སྐུལ་བྱེད་དོ། །ཞེས་བྱ་བ་ནི། དེ་བཞིན་དུ་མཐོང་བ་ཙམ་གྱིས་ཆགས་པར་འགྱུར་རོ། །དེ་བཞིན་མཆོད་པའི་ཆོ་ག་ཡང༌། །ཞེས་བྱ་བའི་ལན། སྲེག་རྫས་ལས་རྣམས་བཤད་བྱས་ནས། །ཞེས་བྱ་བ་ལ་སོགས་པ་སྨོས་སོ། །མཆོད་པ་ནི་བཀུར་སྟིའོ། །ཕྲེང་བ་ནི་མེ་ཏོག་གི་ཕྲེང་བའོ། །སོགས་པ་ནི་མར་མེའོ། །དབང་པོ་ནི་གསང་བའི་མཆོད་པའོ། །གང་ལ་མཆོད་ཅེ་ན་བདག་ལ་སྟེ་རང་གི་ལུས་ཁོ་ན་ལའོ། །མཆོད་རྟེན་ལ་སོགས་པ་ལ་ཅིའི་ཕྱིར་མི་མཆོད་ཅེ་ན། བདག་ནི་སངས་རྒྱས་ཐམས་ཅད་ཉིད། །ཅེས་གསུངས་སོ། །ཕུང་པོ་ལ་སོགས་པ་ལྷའི་དཀྱིལ་འཁོར་དུ་བྱས་པའི་ཕྱིར་རོ། །སངས་རྒྱས་ཀུན་གྱི་གནས་ཡིན་ཏེ། །ཞེས་བྱ་བ་ནི་ཇི་ལྟར་མཆོད་རྟེན་སངས་རྒྱས་ཀྱི་གཞིར་གྱུར་པ་དེ་བཞིན་དུ། དབང་དང་མན་ངག་ཐོབ་པའི་རྣལ་འབྱོར་པ་སངས་རྒྱས་ཐམས་ཅད་ཀྱི་གནས་སུ་གྱུར་པའོ། །དེ་ཡང་གསང་བ་འདུས་པ་ལས། རྡོ་རྗེ་སློབ་དཔོན་དེ་ལ་ནི། །ཕྱོགས་བཅུའི་སངས་རྒྱས་རྣམས་བྱོན་ནས། །ཞེས་བྱ་བ་ལ་སོགས་པ་གསུངས་སོ། །དེའི་ཕྱིར་ན། དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་རྟག་ཏུ་མཆོད། །ཅེས་བྱ་བ་ཐམས་ཅད་ནི་མཆོད་པའོ། །ནན་ཏན་ནི་བདག་ལྷར་བསྒོམ་པའོ། །གང་ཡང་འགའ་ཡི་བྱ་བའི་ལས། །ཞེས་
བྱ་བ་ནི་གར་ལ་སོགས་པའོ། །རྣལ་འབྱོར་པ་ཡིས་མཆོད་པར་བསྒོམ། །ཞེས་བྱ་བ་ནི་ལུས་ངག་གི་མཆོད་པ་ལ་སོགས་པ་བྱ་བའོ། །བསྒོམ་པའི་ཐབས་ཟས་དང་ཞེས་བྱ་བ་ལ་སོགས་པ་སྟེ། རིག་མ་བཞི་ཡིས་རྣམ་བརྒྱན་པ། །བདག་ཉིད་ལྷ་ནི་བསྒོམ་བྱ་བ། །ཞེས་བ་ནི་འབྱུང་བ་བཞིའི་ངོ་བོར་གྱུར་པ་ཟས་ལ་སོགས་པ་ལྷ་མོ་བཞི་དང༌། རྡོ་རྗེ་སེམས་དཔའི་ངག་བཞིན་དུ་བསྒོམ་མོ། །དེ་ཡང་གསང་བ་འདུས་པ་ལས། ཡང་ན་དེ་ལ་བསྒོམ་པ་ནི། །རིགས་ཀྱི་རྣམ་པར་བསྒོམ་པར་བྱ། །ཞེས་གསུངས་སོ། །རྡོ་རྗེ་ནི་རྡོ་རྗེ་སེམས་དཔའོ། །དེ་ཞེས་བྱ་བ་ནི་གསུངས་པ་ཁོ་ནའོ། །ཅང་མི་གསུང་བར་བཞུགས་ཞེས་བྱའོ། །ཆོས་རྣམས་མེད་པར་བསྟན་པའི་ཕྱིར་རོ། །དེ་བས་མདོ་སྡེ་རྒྱན་ལས་ཀྱང༌། བཅོམ་ལྡན་འདས་མྱ་ངན་ལས་འདས་ཀྱི་བར་དུ། ཐ་ན་ཚིག་ཅིག་ཙམ་ཡང་མ་བསྟན་ཏོ། །ཞེས་གསུངས་སོ། །སློབ་དཔོན་ནཱ་ག་རྫུ་ནས་ཀྱང་ཐེག་པ་ཉི་ཤུ་པ་ལས། ཚིག་གིས་བརྗོད་དུ་མི་ལང་བའི། །ཆོས་རྣམས་སྙིང་རྗེ་གང་གིས་བསྟན། །སངས་རྒྱས་ཐོགས་མེད་མཁྱེན་པ་ཡི། །བསམ་མེད་དེ་ལ་ཕྱག་འཚལ་ལོ། །ཞེས་གསུངས་སོ། །བཅོམ་ལྡན་འདས་དེ་ལར་བཞུགས་པའི་ཚེ་འཁོར་རྣམས་ཅི་མཛད་ཅེ་ན། དེ་ནས་ཞེས་བྱ་བ་ལ་སོགས་པ་གོ་སླའོ། །རྣམ་པར་མི་རྟོག་པ་ཐོབ་ཅེས་བྱ་བ་ནི་མཉམ་པ་ཉིད་ཐ་མི་དད་པའོ། །ཅང་མི་གསུང་ཞེས་བྱ་བ་ནི་ཐེ་ཚོམ་ཁོང་དུ་ཆུད་པའོ། །ལྷ་མོ་བཞིས་ཡོངས་སུ་ཞུས་པ་ལ་ས་སྒྲོལ་མས་ཞུས་པའི་གསང་བ་མཆོག་གི་ལེའུ་བཞི་པའི་བཤད་པའོ།། །། གསང་བ་མཆོག་གི་རྒྱུད་འདི་ནི། །བདག་གི་སྤྱོད་ཡུལ་མ་ཡིན་ཡང༌། །བློ་དམན་རྣམས་ལ་སྨད་སླད་དུ། །རྣམ་པར་བཤད་པ་འདི་བརྩམས་སོ། །འདི་ཕྱེ་དགེ་བ་གང་བསགས་པ། །བདག་ཀྱང་དགེ་དེས་དོན་རྟོགས་ནས། །གཞན་ཡང་དེ་ལ་དགོད་པ་དང༌། །བྱང་ཆུབ་དམ་པ་ཐོབ་པར་ཤོག །ལྷ་མོ་བཞིས་ཡོངས་སུ་ཞུས་པའི་རྒྱུད་ཀྱི་བཤད་པ་སློབ་དཔོན་ཡེ་ཤེས་སྙིང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྲན་པ་ཡེ་ཤེས་གྲགས་པས་བསྒྱུར་ཏེ་གཏན་ལ་ཕབ་པའོ།། །།