རིམ་པ་ཕྱེ་བ་བཅོ་བརྒྱད་པ། གཏམ་རྒྱུད་ཀྱི་བཤད་པ།
ད་ནི་དེ་ནས་ཞེས་བྱ་བ་ལ་སོགས་པས་རྒྱུད་ལ་འཇུག་པའི་གཏམ་རྒྱུད་གསུངས་ཏེ། དེའི་དུས་ཞེས་བྱ་བ་ལ་སོགས་པ་ལ། བདུད་ཆེན་པོ་ལས་མཆོག་ཏུ་རྒྱལ་བ་ཞེས་བྱ་བ་ལ་བདུད་ནི་ཕུང་པོ་ལ་སོགས་པའི་མཚན་ཉིད་ཅན་ནོ། །གང་གིས་མཆོག་ཏུ་རྒྱལ་བར་བྱེད་པ་ནི་ཟླ་བ་རྡོ་རྗེའི་སྦྱོར་བས་སོ། །དེ་ལ་སྙོམས་པར་ཞུགས་པ་ནི་མངོན་སུམ་དུ་བྱས་པའོ། །ཉིད་ཀྱི་སྐུ་དང་གསུང་ཐུགས་ཞེས་བྱ་བ་ནི་སྐུ་དང་གསུང་དང་ཐུགས་ཀྱི་བདག་ཉིད་ཅན་གྱི་ཁུ་བའོ། །ངེས་པར་ཕྱུང་ཞེས་བྱ་བ་ནི་རང་རང་གི་ངོ་བོས་དེས་པར་སྤྲོས་པའོ། །ངེས་པར་ཕྱུང་ནས་
ཀྱང་ཞེས་བྱ་བ་ནི་སྤྲོས་པས་སོ། །གང་མཛད་བ་དེ་གསུངས་པ། ཕྱག་ན་རྡོ་རྗེ་ཁྱོད་འདི་ལྟ་བུ་ཞེས་བྱ་བ་ལ་སོགས་པ་ལ་འདི་དག་ཉིད་ནི་རིམ་པར་ཕྱེ་བ་དང་བོར་དེ་ནས་ཞེས་བྱ་བ་ལ་སོགས་པར་སྨོས་ནས་བཤད་པ་ཡིན་ནོ། །དེའི་དུས་ཞེས་བྱ་བ་གང་གི་ཚེ་བཅོམ་ལྡན་འདས་བཞུགས་པའི་ཚེའོ། །ཇི་ལྟར་ན་རྣམ་པ་གང་གིས་སོ། །ཐོས་པས་ཞེས་བྱ་བ་ནི་རྣ་བའི་རྣམ་པར་ཤེས་པས་སོ། །སྐད་ཅིག་ལ་ཞེས་བྱ་བའི་དོན་ནི་བཤད་ཟིན་ཏོ། །གཟུང་བ་ནི་དོན་དང་གཞུང་དག་གོ །དོན་བཟུང་ཞེས་བྱ་བ་ནི་མངོན་སུམ་དུ་བྱས་པའོ། །བསྡུས་ནས་ཞེས་བྱ་བ་ནི་གཞན་ལ་བསྟན་པའོ། །ལེགས་པར་རབ་ཏུ་ཞེས་བྱ་བ་ནི་ཕྱི་དང་ནང་གི་རབ་ཏུ་དགའ་བས་རབ་ཏུ་བསྔགས་པའོ། །ཡིད་ལ་བྱས་སོ་ཞེས་བྱ་བ་ནི་གཞན་དག་ལའོ། །དེ་སྐད་ཅེས་བྱ་བ་ནི་བསྟན་པའི་རྒྱུད་མ་ལུས་པའོ། །གང་གི་ཚེ་བཅོམ་ལྡན་འདས་ཀྱིས་ཆོས་ཀྱི་དབྱིངས་སུ་གཏོགས་པའི་གཞལ་ཡས་ཁང་དུ་འདི་སྐད་གསུངས་སོ་ཞེས་བྱ་བར་བསྟན་ཏོ། །དེའི་ཚེ་གཤིན་རྗེ་གཤེད་ཀྱི་ཚོགས་དཔག་ཏུ་མེད་པ་དང་བདག་གིས་ཐོས་ཞེས་དང་པོའི་ཚིག་དང་སྦྱར་བའོ། །གསང་བ་ཆེན་པོ་ནི་གནོད་སྦྱིན་ནོ། །དེ་དག་གི་བདག་པོ་ནི་གསང་བ་ཆེན་པོའི་བདག་པོ་སྟེ་ཕྱག་ན་རྡོ་རྗེའོ། །རྡོ་རྗེའི་རིགས་ནི་ཞེ་སྡང་གི་རིགས་སོ། །དེའི་གཙོ་བོ་ནི་ཞེ་སྡང་དེར་དེ་དག་ཁྱེར་པར་བྱེད་པས་རྡོ་རྗེ་རིགས་ཀྱི་གཙོ་བོ་སྟེ་ན་ཌ་ཀུ་བེ་རའི་ཡབ་བོ། །རྐང་པ་དང་བཅས་པའི་འབུམ་དུ་བརྗོད་པས་ན་དེའི་ཕྱིར་འདི་ནི་རྒྱུད་ཀྱི་རྒྱལ་པོ་ཆེན་པོ་སྟེ་ཡང་དག་པར་འབད་པས་ཕྱུང་བ་ཞེས་བྱ་བའི་དོན་ཏོ། །ཨུ་རྒྱན་གྱི་ཡུལ་ནས་ཡང་དག་པར་བྱུང་ཞེས་བྱ་བ་ནི་ཨུ་རྒྱན་ན་གནས་པའི་རྣལ་འབྱོར་མས་ཕྱུང་ནས་རབ་ཏུ་སྤྲོས་ཞེས་བྱའོ། །དེའི་ཕྱིར་རྐང་པ་དང་བཅས་པའི་འབུམ་ཕྲག་བདུན་པ་ལས་ཞེས་གསུངས་པས་སོ། །རྫོགས་སོ་ཞེས་བྱ་བ་ནི་ཡང་དག་པར་རྙེད་ནས་ཐོབ་ཅེས་བྱ་བ་སྟེ་བཅོམ་ལྡན་འདས་ལས་ཞེས་བྱ་བའི་དོན་ཏོ། །དཔལ་གཤིན་རྗེ་གཤེད་ནག་པོའི་དཀའ་འགྲེལ་ལྷན་ཅིག་སྐྱེས་པའི་སྣང་བ་ཞེས་བྱ་བ་སློབ་དཔོན་ཤྲཱི་དྷ་རས་མཛད་པ་ལས་རིམ་པར་ཕྱེ་བ་བཅོ་བརྒྱད་པའི་བཤད་པ་རྫོགས་སོ།། །།པཎྜི་ཏ་ཆེན་པོ་ཤཱནྟི་བྷ་དྲ་དང༌། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཏེ་ཞུས་ནས་གཏན་ལ་ཕབ་པ།། །།