ལེའུ་བཅུ་པ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་བསྐུལ་བ་ཞེས་བྱ་བའི་བཤད་པ།
རྡོ་རྗེ་ཕྲ་མོ་ལ་སོགས་པ་བསྒོམ་པ་རྫོགས་ནས་ཟླ་བ་དྲུག་བརྟུལ་ཞུགས་ཡང་དག་པར་སྤྱོད་པའི་རྣལ་འབྱོར་པས་ཞག་བདུན་གྱི་བར་དུ་སྙིང་པོས་ཀུན་དུ་བསྐུལ་ཞིང་རྣལ་འབྱོར་བསྒོམས་ལ་དཀྱིལ་འཁོར་བྲི་སྟེ། སྒྲུབ་པ་ལ་འཇུག་པར་བྱའོ་ཞེས་བསྟན་པའི་ཕྱིར་དེ་ནས་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ཐུགས་ཡང་དག་པར་བསྐུལ་བའི་ལེའུ་གསུངས་སོ། །དམ་ཚིག་ཆེན་པོ་རྡོ་རྗེ་ཞེས་བྱ་བ་ནི་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་རྡོ་རྗེ་སེམས་དཔའ་སྟེ། དེའི་དེ་ཁོ་ན་ཉིད་ནི་ཟག་པ་མེད་པའི་བདེ་བ་དང་ཡིད་བདེ་བའི་རྒྱུན་དང་ལྡན་པའི་ཀུན་དུ་བཟང་པོའོ། །དེའི་མངོན་པར་རྫོགས་པར་བྱང་ཆུབ་པ་ནི་དེ་ཉིད་མངོན་སུམ་དུ་བྱས་པ་སྟེ། དེ་ཉིད་ཀྱི་སྐུ་དང་གསུང་དང་ཐུགས་ཀྱི་གསང་བ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལྟ་བུའི་ངོ་བོ་ཉིད་ཀྱི་དེ་བཞིན་གཤེགས་པ་དེ་ལ་ཕྱག་འཚལ་ལོ། །དེ་ཉིད་སྔགས་སྙིང་ཀུན་བསྡུས་པ། །ཞེས་བྱ་བ་ནི་སྐུ་དང་གསུང་དང་ཐུགས་ཀྱི་རང་བཞིན་གྱི་དངོས་པོའི་ངོ་བོ་ཉིད་ནི་དེ་ཁོ་ན་ཉིད་དོ། །དེ་ཉིད་སྔགས་ཀྱི་སྙིང་པོ་ཀུན་བསྡུས་པ་སྟེ་དེ་ཁོ་ན་ཉིད་བསྒོམས་པས་སྔགས་ཐམས་ཅད་འགྲུབ་པར་འགྱུར་བའི་ཕྱིར་དེ་ཉིད་ཀྱི་སྐུ་དང་གསུང་དང་ཐུགས་མི་གཡེང་བར་བསྒྲགས་ཞེས་བྱའོ། །དངོས་གྲུབ་ཆེན་པོ་ནི་རིགས་ལྔའི་དངོས་གྲུབ་བོ། །དེའི་
ཚུལ་ནི་བསྒོམ་པ་ཉིད་དེ་བས་ན་ཕུལ་དུ་བྱུང་བའི་དངོས་པོ་བས་ན་མཆོག་གོ །ཉོན་མོངས་ཀུན་གྱི་རྒྱ་མཚོ་གཙོ། །ཞེས་བྱ་བ་ལ་འཁོར་བ་ནི་ཉོན་མོངས་པ་ཐམས་ཅད་ཀྱི་རྒྱ་མཚོའོ། །དེར་བདག་པོར་གྱུར་པས་ན་གཙོ་བོ་ཉིད་དེ། །སེམས་ཅན་ཐམས་ཅད་རྗེས་སུ་སྟོན་པ་པོར་གྱུར་པའོ། །དེ་ཁོ་ན་ཉིད་ཀྱི་སྔགས་ཀྱི་སྙིང་པོ་ཀུན་བསྡུས་པ་གསུངས་པ་ནི། ལུས་དང་ངག་དང་ཡིད་རྣམས་ནི། །ཞེས་བྱ་བ་ལ་སོགས་པ་ཡིན་ཏེ། བསྒོམ་ཞེས་བྱ་བ་ཇི་ལྟར་བསྒོམ་ཞེ་ན། རྣམ་པར་མི་རྟོག་ཅེས་བྱ་བ་སྟེ་རྟོག་པ་དང་བྲལ་བའོ། །ཅིའི་ཕྱིར་རྣམ་པར་མི་རྟོག་པ་ཡིན་ཞེ་ན། མི་དམིགས་པ་ཞེས་པའོ། །མི་དམིགས་པ་ཉིད་བསྟན་པའི་ཕྱིར། །གང་ནའང་མི་གནས་མཉམ་པ་ཉིད། །ཅེས་གསུངས་ཏེ། ཕུང་པོ་དང་ཁམས་དང་སྐྱེ་མཆེད་དང༌། རྟེན་ཅིང་འབྲེལ་བར་འབྱུང་བ་དང་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བས་ན་གང་ན་ཡང་མི་གནས་པའོ། །དེ་ལྟར་བསྒོམ་པ་ཡོངས་སུ་རྫོགས་པའི་རྣལ་འབྱོར་པ་རྣམ་པར་རྟོག་པ་ཐམས་ཅད་དང་བྲལ་བ་ནི་སེམས་ཅན་གྱི་དོན་ལ་ནུས་པ་ཡིན་ཏེ། དེས་ན་ཐབས་དང་ལྡན་པའི་ཤེས་རབ་བསྒོམ་པར་བྱའོ་ཞེས་བསྟན་པའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་སྔགས་ཀུན་བསྡུས་པ་གསུངས་སོ་ཞེས་བྱ་བར་སྦྱར་རོ། །འདོད་ཆགས་ལ་སོགས་པ་དང་བྲལ་བས་རང་བཞིན་གྱིས་དག་པའོ། །ཕ་རོལ་ཏུ་ཕྱིན་པ་སྔགས་ཀྱི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་ལ་རྡོ་རྗེའི་ཕ་རོལ་ཏུ་ཕྱིན་པ་ལ་སོགས་པ་བཅུ་དྲུག་ནི་ཕ་རོལ་ཏུ་ཕྱིན་པའོ། །དེའི་སྔགས་ཀྱི་ཚུལ་ནི་སྙིང་པོ་དང་ཕྱག་རྒྱ་དང་དཀྱིལ་འཁོར་ལ་སོགས་པ་བསྐྱེད་པའི་ཏིང་ངེ་འཛིན་ལ་དམིགས་པས་ན་ཕ་རོལ་ཏུ་ཕྱིན་པ་སྔགས་ཀྱི་ཚུལ་རྡོ་རྗེ་ཞེས་བྱ་སྟེ། དེ་ལྟར་ཕ་རོལ་ཏུ་ཕྱིན་པ་སྔགས་ཀྱི་ཚུལ་རྡོ་རྗེའི་ཏིང་ངེ་འཛིན་ཐབས་སུ་གྱུར་པས་དེ་བཞིན་གཤེགས་པ་ཐམས་ཅད་འདོད་ཆགས་ལ་སྤྱོད་པའི་སེམས་ཅན་རྣམས་རྗེས་སུ་གཟུང་བའི་ཕྱིར་རིག་པའི་ལྷ་མོ་རྣམས་དང་ལྷན་ཅིག་ཏུ་འདོད་པའི་ཡོན་ཏན་ལྔ་རྣམས་ཀྱིས་མཆོག་ཏུ་རོལ་པར་སྟོན་པ་ནི་མ་འོངས་པ་རྣམས་ཀྱང་ཤེས་རབ་དང་ཐབས་ཀྱི་ལམ་དང་ལྡན་པ་འདི་ཉིད་ལ་སྦྱོར་བར་བཞེད་པས་བཅོམ་
ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་དག་སྔགས་སྤྱོད་པ་ལ་བརྩོན་པ་རྣམས་ལ་སྤྱན་རས་ཀྱིས་མི་འཚོ་སྟེ་ཞེས་བྱ་བ་ནི་རྣམ་པར་མི་རྟོག་པའི་ཟག་པ་མེད་པའི་བདེ་བ་དང་ཡིད་བདེ་བ་མཉེས་པས། དེ་དག་སྔགས་སྤྱོད་པ་ལ་བརྩོན་པ་རྣམས་ལ་སྤྱན་རས་ཀྱིས་མི་འཚོའོ་ཞེས་ཁྱད་པར་བསྟན་ཏེ། ཤེས་རབ་དང་ཐབས་སུ་འབྱོར་བས་འགྲོ་བའི་དོན་བྱེད་ནུས་ཀྱི་ཤེས་རབ་འབའ་ཞིག་ཙམ་གྱིས་ནི་མ་ཡིན་ཏེ། དེའི་ཕྱིར་སེམས་ཅན་གྱི་དོན་བྱེད་པར་འདོད་པས་ཤེས་རབ་ཙམ་གྱི་རྣལ་འབྱོར་ནི་བསྒོམ་པར་མི་བྱའོ། །དེ་ལྟར་ཡིན་དུ་ཟིན་ན་ཆོས་གང་ཞིག་བསྒོམ་ཞེ་ན། གང་གི་སྤྱན་རས་ཀྱིས་འཚོ་བར་འགྱུར་བ་སྟེ། ཀྱེ་མ་འདི་དག་ནི་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱི་སྤྱོད་པའི་ཚུལ་གྱིས་ཆོས་རྫོགས་པར་གྱུར་ཏོ་སྙམ་ནས་ཞེས་བྱ་བ་གསུངས་ཏེ། ཀྱེ་མའི་སྒྲ་ནི་ངེས་པར་གཟུང་བའོ། །འདི་དག་ཅེས་བྱ་བ་ནི་འོག་ནས་བཤད་པའི་རིགས་ལྔ་བསྒོམ་པ་ལ་སྦྱོར་བའི་ཡི་གེ་ལྔ་པོ་ཐུགས་ལ་བཞག་ནས་འདི་སྐད་གསུངས་པའོ། །དེ་བཞིན་གཤེགས་པ་རྣམས་ཀྱི་སྔགས་སྤྱོད་པའི་ཆོས་ནི་ཧཱུཾ་ཨོཾ་ཨཱཿ་སྭཱ་ཧཱ། ཞེས་བྱ་བ་ཡི་གེ་འདི་ལྔ་བ་བསྒོམ་པ་གང་ཡིན་པ་དེས་མི་བསྐྱོད་པ་ལ་སོགས་པ་ཉི་མ་བདུན་དུ་ཡང་དག་པར་བསྐུལ་བ་ནི་རྡོ་རྗེ་ཕྲ་མོ་ལ་སོགས་པ་ཡང་དག་པར་བསྒོམས་པས་མཚན་མ་ཐོབ་ནས་དེའི་འོག་ཏུ་ཟླ་བ་དྲུག་བརྟུལ་ཞུགས་ཡང་དག་པར་སྤྱོད་པའི་རྣལ་འབྱོར་པ་ལ་དངོས་གྲུབ་སྩོལ་བའི་ཕྱིར་སྤྱན་རས་ཀྱིས་འཚོ་བར་འགྱུར་རོ། །དེ་བས་ན་ཞེས་བྱ་བ་ནི་དེའི་ཕྱིར་ཏེ་གང་གི་ཕྱིར་འདི་ཡོངས་སུ་རྫོགས་པ་ཡིན་ནོ་སྙམ་མོ། །སྔགས་སྤྱོད་པ་ལ་མངོན་པར་བརྩོན་པ་ལ་ཇི་ལྟར་ན་དེ་བཞིན་གཤེགས་པ་དེ་རྣམས་གཟིགས་པར་འགྱུར་ཞེན་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་སྔགས་ཀྱི་གསང་བ་ཞེས་གསུངས་པ་ཡིན་ནོ། །དེ་ཉིད་བསྟན་པ་ནི་སྔགས་ཐམས་ཅད་ཀྱི་སྙིང་པོ་ཀུན་དུ་སྐུལ་བར་བྱེད་པ་ཞེས་བྱ་བ་སྟེ་དེ་ཉིད་ནི་རབ་ཏུ་གསང་བའོ། །རབ་ཏུ་གསང་བ་དེ་ཉིད་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་ལ་དམིགས་པ་ཞེས་གསུངས་པ་ཡིན་ཏེ། སྐུ་རྡོ་རྗེའི་རིགས་ཟློས་པའི་སྐུ་དང་གསུང་དང་ཐུགས་ལ་དམིགས་
པའོ། །གཉིས་པས་ནི་མི་བསྐྱོད་པའི་རིགས་སུ་བྱུང་བ་རྣམས་བསྟན་ཏོ། །གསུམ་པས་ནི་གསང་བ་རྡོ་རྗེའི་རིགས་སུ་བྱུང་བ་རྣམས་བསྟན་ཏོ། །ཚིག་གི་ལམ་ངེས་པར་བརྗོད་པ་ཞེས་བྱ་བ་ནི་ཚིག་ཉིད་ལམ་ཡིན་པས་ན་ཚིག་གི་ལམ་སྟེ་སྔགས་སོ། །དེའི་ངེས་པར་བརྗོད་པ་ནི་སྒྲའི་ཚོགས་ཏེ། ཨ་ནི་ཆོས་ཐམས་ཅད་ཀྱི་སྒོ་སྟེ་རྒྱུ་དང་བྲལ་བའི་ཕྱིར་རོ་ཞེས་བྱ་བ་ལ་སོགས་པའོ། །དེ་ས་ན་ཚིག་གི་ལམ་ངེས་པར་བརྗོད་པ་དང་བཅས་པའི་སྔགས་བསྡུས་པའི་རིགས་ལྔའི་སྙིང་པོ་རྣམས་གསུངས་སོ་ཞེས་པ་ནི་བཀའ་སྩལ་པའོ། །སྔགས་བསྡུས་པ་འདིའི་མཐུ་བསྟན་པ་ནི་རབ་ཏུ་འདར་ཞིང་ཞེས་བྱ་བ་ལ་སོགས་ཏེ། འདིས་ནི་ངེས་པར་དེ་བཞིན་གཤེགས་པ་ཐམས་ཅད་ཀུན་དུ་བསྐུལ་བར་འགྱུར་རོ་ཞེས་རྣལ་འབྱོར་པ་རྣམས་ཡིད་ཆེས་བསྐྱེད་པའི་ཕྱིར་བསྟན་པ་ཡིན་ནོ། །དམ་ཚིག་ཅེས་བྱ་བ་ནི་སྐུ་དང་གསུང་དང་ཐུགས་གྲུབ་པར་བྱེད་པའི་ཡི་གེ་ཧཱུཾ་བསྒོམ་པའོ། །བཀོད་པའི་དཀྱིལ་འཁོར་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རིགས་ཐམས་ཅད་ཀྱི་དཀྱིལ་འཁོར་གྱིས་ཡོངས་སུ་བསྐོར་བའི་དཔལ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་རོ། །དེ་ཉིད་ཀྱི་ཕྱིར། དེ་ཡི་དབུས་གནས་ཡི་གེ་ཧཱུཾ། །ཞེས་བྱ་བ་གསུངས་ཏེ། རང་གི་གཟུགས་སུ་ཞེས་པ་དཔལ་རྡོ་རྗེ་སེམས་དཔའ་ལ་སོགས་པའི་སྦྱོར་བས་སོ། །ཅིའི་ཕྱིར་ཞེ་ན། འདི་དག་ནི་རིགས་ལྔའི་ངོ་བོ་ཡིན་པས་སོ། །འདིར་ཡང་སྙིང་པོས་ཀུན་དུ་བསྐུལ་བའི་སྦྱོར་བས་རང་གི་ལྷའི་དཀྱིལ་འཁོར་བསྐྱེད་པར་བྱས་ནས་དཀྱིལ་འཁོར་གྱི་དབུས་སུ་རང་གི་ལྷའི་སྦྱོར་བས་འདུག་ལ། རང་གི་ལྷའི་སྔགས་ཀྱིས་ཕྱོགས་བཞིར་རང་གི་ལྷའི་སྐུ་དག་གཞག་པར་བྱའོ། །དེ་བས་ན། རང་གི་དཀྱིལ་འཁོར་རང་སྔགས་ཀྱིས། །ཞེས་བྱ་བ་ལ་སོགས་པ་གསུངས་སོ། །ཤིན་ཏུ་མཆོག་ཏུ་གྱུར་པའི་སྙིང་པོས་ཡང་དག་པར་བསྐུལ་བ་གཞན་དག་གསུངས་པ་ནི། སྙིང་གའི་དབུས་སུ་ཞེས་བྱ་བ་ལ་སོགས་པ་སྟེ། རྣལ་འབྱོར་བས་རང་གི་ལྷའི་དཀྱིལ་འཁོར་གྱི་དབུས་སུ་འདུག་ནས་རང་གི་ལྷའི་དཀྱིལ་འཁོར་བདག་ཉིད་ཀྱི་སྙིང་གར་བསམ་པར་བྱའོ། །དེའི་ནང་དུ་ཆུད་པའི་ལྷའི་ཐུགས་ཀའི་ཟླ་བ་ལ་ཡི་གེ་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ་དེ་ཉིད་ལས་ཞེ་སྡང་གི་རིགས་
ཀྱི་རྣལ་འབྱོར་པས་ནི་རྡོ་རྗེའི་ལྕགས་ཀྱུའོ། །གཏི་མུག་གི་རིག་སྐྱི་རྣལ་འབྱོར་པས་ནི་འཁོར་ལོའི་ལྕགས་ཀྱུའོ། །འདོད་ཆགས་ཀྱི་རིགས་ཀྱི་རྣལ་འབྱོར་པས་ནི་པདྨའི་ལྕགས་ཀྱུ་བསམ་པར་བྱའོ། །དེ་བས་ན། །རྡོ་རྗེ་ཀྱོ་བའི་ཁྱད་པར་བགྱི། །རྡོ་རྗེ་གསུམ་རྣམས་བསྒོམ་པར་བྱ། །ཞེས་གསུངས་སོ། །དེ་ཡིས་སྙིང་གར་བཏབ་བྱ་སྟེ། །ཞེས་བྱ་བ་ནི་ལྕགས་ཀྱུ་དེས་སོ། །ཡིད་བཞིན་གྱི་ནོར་བུའི་རིགས་ཀྱི་རྣལ་འབྱོར་པས་ནི་རིན་པོ་ཆེའི་ལྕགས་ཀྱུས་སོ། །དམ་ཚིག་གི་རིགས་ཀྱི་རྣལ་འབྱོར་པས་ནི་རལ་གྲིའི་ལྕགས་ཀྱུས་སྙིང་པོ་ཀུན་ནས་བསྐུལ་བར་བྱའོ། །དེ་ནས་འདི་སྐད་སྟོན་པར་འགྱུར་ཏེ། རྡོ་རྗེ་ཕྲ་མོ་ལ་སོགས་པ་བསྒོམས་པས་སེམས་བརྟན་པར་བྱས་ནས་ཟླ་བ་དྲུག་ཏུ་རིག་པའི་བརྟུལ་ཞུགས་ཡང་དག་པར་སྤྱད་ནས་ཉིན་ཞག་བདུན་སྙིང་པོས་བསྐུལ་ནས། བསྐུལ་བའི་རྣལ་འབྱོར་རྣམ་པར་བསྒོམས་ལ་དཀྱིལ་འཁོར་བྲིས་ནས་རྒྱུད་ཕྱི་མ་ལ་སོགས་པའི་ཚུལ་གྱིས་བསྒྲུབས་ན་སྒྲུབ་པ་པོས་འགྲུབ་པར་འགྱུར་རོ། །དོན་དེ་ཉིད་ནི། ཞག་བདུན་པར་དུ་བྱས་ན་ནི། །ཞེས་བྱ་བ་ལ་སོགས་པ་གསུངས་པ་ཡིན་ནོ། །སྙིང་པོ་འདིས་ཀུན་ནས་བསྐུལ་བའི་སྦྱོར་བ་ལས་མི་འདའ་བར་བསྟན་པ་ནི། སངས་རྒྱས་བྱང་ཆུབ་སེམས་དཔའ་རྣམས། །སྔགས་ཀྱི་སྤྱོད་པའི་དོན་བསྒྲུབས་པས། །ཞེས་བྱ་བ་ལ་སོགས་པ་སྟེ། སངས་རྒྱས་སམ་བྱང་ཆུབ་སེམས་དཔའ་སྔགས་ཀྱི་སྤྱོད་པ་སྤྱད་པའི་བྱང་ཆུབ་སེམས་དཔས་སྙིང་པོས་ཀུན་ནས་བསྐུལ་བའི་བར་དུ་ཡང་དག་པར་སྦྱོར་བས་བསྐུལ་བར་གྱུར་པ་ལས། གལ་ཏེ་མི་འགྲུབ་ན་ནི་འདའ་བར་བྱས་པའོ། །རྨོངས་པའི་རྣམ་པར་རྟོག་པའི་ཡེ་ཤེས་ཅན་ནོ། །དེ་ཡི་སྲོག་ནི་དེར་ཟད་འགྱུར། །ཞེས་བྱ་བ་ནི་རྣམ་པར་མི་རྟོག་པའི་ཡེ་ཤེས་ཅན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་སྦྱོར་བ་འདི་ལས་འདའ་བར་མི་མཛད་དོ་ཞེས་པ་སྟེ། འདི་ནི་རྣལ་འབྱོར་པ་རྣམས་ཀྱི་བློ་ངེས་པར་བྱ་བ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ལ་ནི་འདའ་བར་མཛད་པ་དང་འཆི་བར་འགྱུར་བ་མི་སྲིད་དོ། །སྔགས་ཀྱི་སྐྱེས་བུ་ཇི་སྲིད་པ། །ཞེས་བྱ་བ་ནི་མི་བསྐྱོད་པ་ལ་སོགས་པའོ། །རྡོ་རྗེ་གསུམ་གྱི་ཡེ་ཤེས་རྫོགས། །ཞེས་བྱ་བ་ནི་སྐུ་དང་གསུང་དང་ཐུགས་རྡོ་རྗེ་རྫོགས་པ་
སྟེ་ཡོངས་སུ་རྫོགས་པར་བསྒྲུབ་པའོ། །རང་གི་ལྷའི་སྦྱོར་བ་རྣམ་པར་བསྒོམས་ནས་སྐུ་དང་གསུང་དང་ཐུགས་རྡོ་རྗེར་ཞུགས་པ་བསྒོམ་པ་ནི་དབང་པོ་གཉིས་ཀྱི་སྦྱོར་བ་སྟེ། དེ་ལྟ་བུའོ། དབང་པོ་གཉིས་ཀྱི་སྦྱོར་བ་ཡིས། །དངོས་པོ་ཐམས་ཅད་བརྟག་པར་བྱ། །ཞེས་བྱ་བ་སྟེ་ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་བར་འབྱུང་བ་སྟེ། ཕྱི་དང་ནང་དུ་བཅས་པ་རྣམས་ནི། དངོས་པོ་ཐམས་ཅད་དེ་དག་ལ། །གཟུགས་ལ་རྣམ་གསུམ་ཤེས་བྱས་ནས། །ཞེས་བྱ་བ་ལ་སོགས་པར་བརྟག་པ་ནི་དངོས་པོ་ཐམས་ཅད་བརྟག་པར་བྱ་བའོ། །དེ་ལྟར་རེ་ཞིག་ངེས་པ་བཟུང་བ་རྣམས་ཀྱི་རྡོ་རྗེ་སེམས་དཔའ་ལ་སོགས་པའི་ཐུགས་ཀར་དཀྱིལ་འཁོར་རྣམ་པར་བསམ་པ་དང་སྙིང་པོས་ཀུན་ནས་བསྐུལ་ཞིང་བསྒོམ་པ་གསུངས་ནས། ད་ནི་ལུས་ཡོངས་སུ་མི་སྤོང་ཞིང་འདོད་ཆགས་ལ་སྤྱོད་པ་རྣམས་ལ་འདོད་ཆགས་ཀྱིས་འདོད་ཆགས་སྤང་བའི་བྱིར་རིག་པའི་ལྷ་མོ་རྣམས་ཀྱི་སྙིང་པོའི་དཀྱིལ་འཁོར་རྣམ་པར་བསམ་པའི་སྦྱོར་བའི་བསྒོམ་པ་ནི། རིག་མ་དབང་ཕྱུག་ཞུགས་པ་ལ། །རྡོ་རྗེ་སྦྱོར་བ་རབ་བསྒོམ་ཞིང༌། །ཞེས་གསུངས་པ་ཡིན་ཏེ། སྤྱན་ལ་སོགས་པ་ནི་རིག་མའི་དབང་ཕྱུག་གོ །དེའི་ཐུགས་ཀར་གཏོགས་པའི་དཀྱིལ་འཁོར་ལ་ཞུགས་ནས་སྤྱན་ལ་སོགས་པ་དང་རྡོ་རྗེའི་སྦྱོར་བ་བསྒོམ་པར་བྱའོ་ཞེས་བྱ་བ་ནི་ཚིག་གི་ལྷག་མར་ཤེས་པར་བྱའོ། །ཆགས་ལ་ཆགས་པས་བལྟ་བར་བྱ། །ཞེས་བྱ་བ་ནི་རིག་མའི་དབང་ཕྱུག་མོ་དང་སྦྱོར་བའི་དུས་སོ། །གཅིག་བུ་འབའ་ཞིག་སྦྱོར་བ་བསྒོམ་པར་མ་ཟད་ཀྱི་གཞན་ཡང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སྤྱན་ལ་སོགས་པའི་གཟུགས་རྣམས་རྣམ་པར་བསྒོམ་སྟེ། སྦྱོར་བ་བསྒོམ་པར་བྱའོ་ཞེས་བསྟན་པའི་ཕྱིར། །འཇིག་རྟེན་ཁམས་ནི་ཐམས་ཅད་ན། །བུད་མེད་ཇི་སྙེད་ཡོད་པ་ཀུན། །ཞེས་པ་ལ་སོགས་པ་གསུངས་སོ། །སྙིང་པོ་བསྐུལ་ཞེས་བྱ་བ་སྟེ། ལེའུ་བཅུ་པའི་བཤད་པའོ།། །།