ལེའུ་བཅུ་གསུམ་པ། དངོས་གྲུབ་ངེས་པར་བསྟན་པའི་བཤད་པ།
བཅོམ་ལྡན་འདས་ཀྱི་ཕྱག་མཚན་བསྟན་པའི་དོན་དུ་གསུངས་པ། དེ་ནས་ཞེས་བྱ་བ་ལ་སོགས་པ་སྟེ། སྡིག་པའི་ལས་ནི་ཇི་སྙེད་པ། །ཞེས་པ་ལ་སྡིག་པའི་ལས་ནི་སྡུག་བསྔལ་པའོ། །ཤུབས་ཅན་ནི་རལ་གྲིའོ། །ཉོན་མོངས་པ་ནི་འདོད་ཆགས་ལ་སོགས་པ་སྟེ་ཉེ་བར་མཚོན་པ་ལས་སོ། །ཇི་སྐད་གསུངས་པ་གཞན་དག་ལས་ཡང་རྣམ་པར་དག་པ་རྟོགས་པར་བྱའོ། །ནམ་མཁའི་ཁམས་ཀྱི་དབུས་གནས་བསམ། །ཞེས་པ་ནི་བདུན་པོ་རྣམ་པར་དག་པ་དང༌། བླ་ན་མེད་པའི་མཆོད་པ་དང༌། ཚངས་པའི་གནས་བཞི་བསྒོམས་པའི་རྗེས་ལ། འགྲོ་བ་པ་གཟུང་བ་དང་འཛིན་པའི་རང་བཞིན་ལ་སྟོང་པ་ཉིད་དུ་བསྒོམས་པས་རྨི་ལམ་ལྟ་བུར་བྱས་ལ། ཐོགས་པར་བྱ་བ་དང་བྲལ་བ་བདག་ཉིད་འབྱུང་བ་ཆེན་པོ་ནམ་མཁའ་སྟེ། ནམ་མཁའི་ཕྱོགས་སུ་བསྒོམ་པར་བྱའོ། །དེར་ཅི་ཞེ་ན། གསུངས་པ། ཉི་མའི་དཀྱིལ་འཁོར་ཏེ། རེ་ཕ་ལས་བྱུང་བའོ་ཞེས་ལྷག་མའོ། །རྩེ་ལྔ་པ་ཞེས་པ་ནི་ཧཱུཾ་ཡིག་ལས་སྣ་ཚོགས་རྡོ་རྗེའོ། །གནས་དེར་ཞེས་པ་ནི། གཞི་གཞལ་ཡས་ཁང་ཞེས་པའོ། །དེའི་དོན་ནི་འདི་ཡིན་ཏེ། རྡོ་རྗེ་ར་བ་དང༌། རྡོ་རྗེ་གུར་གྱི་ནང་དུ་གནས་པའི་སྣ་ཚོགས་རྡོ་རྗེའི་མུ་ཁྱུད་ལ་གནས་པའི་འབྱུང་བ་ཆེན་པོ་བཞི་ཡོངས་སུ་གྱུར་པ་ལས་གཞན་ཡས་ཁང་ངོ༌། །
དེ་བཞིན་དུ་ཕྱིས་ཀྱི་དག་བ་ལ་ཡང་དཀྱིལ་འཁོར་གྱི་འཁོར་ལོའི་ནང་དུ་རྟོགས་པར་བྱའོ། །དྷི་ཞེས་པ་ནི་ས་བོན་ཉེ་བར་བཀོད་པ་སྟེ། འདིར་ཡང་སྔར་བཞིན་དུ་མངོན་པར་བྱང་ཆུབ་བ་རྣམ་པ་ལྔ་ལ་སོགས་པ་སྟེ། ཁྱད་པར་ནི་ཉི་མ་དང༌། ཟླ་བ་དང༌། རྡོ་རྗེ་དང༌། ས་བོན་གྱུར་པ་ལས་ཞུ་བ་དང༌། ཞུ་བ་ལས་བཞེངས་པ་དང༌། ཡང་རྡོ་རྗེར་གནས་པ་དང༌། ས་བོན་ཉིད་ནི་རྡོ་རྗེ་སེམས་དཔའོ། །དེ་དག་ཡོངས་སུ་གྱུར་པ་ལས་བཅོམ་ལྡན་འདས་མ་དེ་ཉིད་སྐྱེས་པའོ། །དེའི་ཐུགས་ཀར་ས་བོན་ལས་དཀྱིལ་འཁོར་པའི་ལྷ་རྣམས་སྤྲོ་བར་བྱའོ། །ཕྱག་ཅེས་པ་ནི་གཡས་པའི་ཕྱག་གི་གཙོ་བོའོ། །གཞན་དག་ཅེས་པ་ནི་ལྔ་པོ་རྣམས་སུའོ། །རལ་གྲི་དང༌། གྲི་གུག་དང༌། འཁོར་ལོ་དང༌། པདྨ་དང༌། ཐོ་བ་རྣམས་སོ། །རྡོ་རྗེ་མཁའ་འགྲོ་མ་ལ་སོགས་པ་འདི་རྣམས་ནི་ཞེ་སྡང་གཤིན་རྗེ་གཤེད་ལ་སོགས་པ་བཞིན་དུ་ཞལ་གསུམ་པ་ཕྱག་དྲུག་པ་རྣམས་སོ། །ལཱ་སྱེ་ནི་དཀར་ཞིང་སྔོ་བ་སྒེག་པའི་ཆ་བྱད་དོ། །ཕྲེང་བ་མ་སེར་མོ་ཞེས་བྱ་བ་ནི་ཕྲེང་བ་བསྣམས་པའོ། །གར་མ་དམར་མོ་གར་སྒྱུར་བའོ། །གླུ་མ་སྡོ་བསངས་གླུ་ལེན་པའོ། །དེ་རྣམས་ཀྱང་ཞལ་གཅིག་ཕྱག་གཉིས་པའོ། །དེ་བཞིན་གཞན་ཞེས་བྱ་བ་ནི་སྒོ་རྣམས་སུ་ཐོ་བ་གཤིན་རྗེ་གཤེད་ལ་སོགས་པ་སྟེ་སྔར་བཞིན་ནོ། །གྲྭ་རྣམས་སུ་ཡང་འདིར་མ་གསུངས་མོད་ཀྱི་ཐོད་པ་རྣམ་པ་བཞིའོ། །ཨོཾ་བཛྲ་ཌཱ་ཀི་ནཱི་ཞེས་བྱ་བ་ལ་སོགས་པ་ནི་བཟླས་པའི་སྔགས་སོ། །བསྒོམ་པ་དང་སྔགས་ཀྱི་དགོས་པ་གསུངས་པ། རིང་པོའི་ཞེས་བྱ་བ་ལ་སོགས་པ་སྟེ། རིང་བ་ནས་ཐོས་པ་ནི་རིང་བའི་ཐོས་པའོ། །ཡང་དག་གནས་ཞེས་བྱ་བ་ནི་གཡོན་བརྐྱང་བས་གནས་པའོ། །རིན་ཆེན་ཐོར་ཅིག་ཅེས་པ་ནི་རིན་པོ་ཆེའི་དབུ་རྒྱན་ནོ། །རལ་གྲི་ཞེས་པ་ནི་གཡས་པའི་ཕྱག་ཏུའོ། །སྡིགས་མཛུབ་ཞགས་པ་ཞེས་པ་ནི་གཡོན་པའི་ཕྱག་ཏུའོ། །སྤྱན་མ་ཞེས་བྱ་བ་ནི་སྐུ་མདོག་དཀར་མོའོ། །ཕྱག་གཡས་པ་ན་འཁོར་ལོ་འཛིན་པའོ། །མཱ་མ་ཀཱི་ནི་སྔོན་མོ་ཕྱག་གཡས་བ་ན་རྡོ་རྗེ་འཛིན་པའོ། །གོས་དཀར་མོ་ནི་ཕྱག་གཡས་པ་ན་པདྨ་འཛིན་པའོ། །སྒྲོལ་མ་ནི་ལྗར་གུ་ཕྱག་གཡས་པ་ན་རལ་གྲི་འཛིན་པའོ། །ལྷ་མོ་
ཐམས་ཅད་ཀྱང་ཞབས་གཡོན་བརྐྱང་ལ། གཡོན་པའི་ཕྱག་སྡིགས་མཛུབ་དང་ཞགས་པ་བསྣམས་པའོ། །མེ་ཏོག་མ་ནི་དཀར་པོ་ཕྱག་ན་མེ་ཏོག་གི་ཕྲེང་བ་འཛིན་པ་ཅན་ནོ། །སྤོས་མེ་མ་ནི་སྔོན་མོ་སྦོས་ཀྱི་སྣོད་བསྣམས་པའོ། །མར་མེ་མ་དམར་མོ་མར་མེའི་སྡོང་བུ་འཛིན་པའོ། །བྱུག་པ་མ་ནི་ལྗང་གུ་དྲིའི་དུང་ཕོར་འཛིན་པའོ། །འདི་དག་ནི་གཡས་བརྐྱང་བས་གནས་ཤིང་གར་གྱིས་བསྒྱིངས་པར་བྱེད་པའོ། །ཐོ་བ་ལ་སོགས་པ་རྣམས་ནི་སྔར་གྱི་བཞིན་ནོ་ཞེས་ལྷག་མའོ། །ལས་ཀྱི་ཆོ་ག་མཐོང་ནས་ནི། །ཞེས་བྱ་བ་ནི་བཅོམ་ལྡན་འདས་བསྐྱེད་པའི་རྗེས་ལ། དེའི་སྙིང་གའི་ས་བོན་ཉིད་ལས་ལྷ་ཐམས་ཅད་སྤྲོ་བར་བྱའོ། །བདུན་པའི་རྒྱལ་པོ་ཞེས་པ་ནི་རྟའི་མཆོག་གོ །བསྒོམ་པར་བྱ་ཞེས་པ་ནི་སྔར་གྱི་བཞིན་ནོ། །གཡས་པ་ཞེས་པ་ནི་གཡས་པའི་ཕྱག་གོ །སྔགས་ནི་ཕུ་གསུམ་དང་ཧྲི་གསུམ་མོ། །ཇི་ལྟར་ཕྱག་རྒྱ་མ་གསུངས་པ་དང༌། མ་བཤད་པ་ནི་དེ་ཡང་དེ་བཞིན་གཤེགས་པ་རྣམས་ཀྱི་ཁ་དོག་གི་རྗེས་སུ་འབྲངས་ནས་རྟོགས་པར་བྱའོ། །ལྷ་མོ་རྣམས་ཀྱི་ཁ་དོག་ལ་སོགས་པའི་དབྱེ་བ་ཡང་སྔར་གྱི་དཀྱིལ་འཁོར་བཞིན་དུ་བྱའོ། །བདག་པོའི་ཞལ་ཕྱག་ཇི་ལྟ་བ། །ཞེས་བྱ་བ་ནི་བདག་པོ་སྟེ། གཙོ་བོ་བཞིན་དུ་ཕྱག་གཉིས་མ། རྟའི་ཞལ་གདོང་གཅིག་པ། དེའི་ཕྱག་མཚན་འཛིན་པའིའོ། །སྔགས་འདིས་ནི་ཞེས་པ་ནི་རྟའི་མཆོག་གི་སྙིང་ག་ན་གནས་པའི་ཧཾ་ཡིག་ཉིད་དོ། །འབྱུང་ཞེས་པ་ནི་སྤྲོ་བའོ། །སྨྱུག་མའི་གླིང་བུ་ལ་སོགས་པ་ནི་རང་རང་གི་མིང་གི་མཚན་མ་འཛིན་པའོ། །གདོང་བཟངས་མ་དང་གདོང་ངན་མ། །ཞེས་པ་ནི་བརྡ་ཙམ་དུ་ཟད་དོ། །འདི་དག་ཀྱང་ཡང་དར་པར་ན་ཁྲོ་བོའི་ཆ་བྱད་ཅན་ནོ། །ཁ་དོག་གི་དབྱེ་བ་ནི་སྒར་གྱི་བཞིན་ནོ། །སྒོ་སྐྱོང་རྣམས་ཀྱི་རིམ་པ་ཇི་ལྟར་ཕྱག་གཡས་པ་རྣམས་སུ་ཕྱག་མཚན་འཛིན་པ་གསུངས་པ། །གཏུན་ཤིང་ཞེས་བྱ་བ་ལ་སོགས་པའོ། །རྡོ་རྗེ་ས་འོག་གི་སྔགས་མ་གསུངས་པ་བརྗོད་པའི་དོན་དུ་ཇི་ལྟར་རྟ་མཆོག་ཅེས་བྱ་བ་ལ་སོགས་པ་སྟེ། དེའི་ཕྱི་ན་རྡོ་རྗེ་ས་འོག་གི་སྔགས་ཉིད་དོ། །ས་བོན་གྱི་ཡི་གེ་ནི་ཧྲི་ཡིག་དག་གོ །མཁའ་ལ་ཞེས་པས་ནི་ནམ་མཁའ་ལའོ། །ཁམས་ནི་འཇིག་རྟེན་
གསུམ་མོ། །དངོས་གྲུབ་ངེས་པར་སྟོན་པ་ཞེས་བྱ་བ་ནི། དངོས་གྲུབ་རྣམས་ནི་ས་འོག་གི་བུག་པར་འཇུག་པ་ལ་སོགས་པ་རྣམས་སོ། །གང་དུ་ངེས་པར་བསྟན་པ་དེ་ལ་དེ་སྐད་ཅེས་བྱའོ། །ལེའུ་བཅུ་གསུམ་པའི་བཤད་པ་རྫོགས་སོ།། །།