ལེའུ་བཅུ་པ། རྗེས་སུ་དྲན་པའི་རྣམ་པར་འགྲེལ་པ།
རོ་ལངས་ཀྱི་སྒྲུབ་པ་གསུངས་པ། ཤིང་ལ་བཏགས་པ་ཞེས་བྱ་བ་ལ་སོགས་པ་སྟེ། དེ་ལ་ཤིང་ལ་དཔྱངས་པའི་རོ་བླངས་ནས། དྲི་ཞིམ་པོ་ལ་སོགས་པས་དེ་ལེགས་པར་བཀྲུས་ཏེ། དེ་ལ་མཆོད་པ་ལེགས་པར་བྱས་ནས། དེ་ནས་གསང་སྔགས་བཟླས་བརྗོད་བྱའོ། །འདི་ལྟར་བྱས་པས་དེ་ལྡང་བར་འགྱུར་ཏེ། དེ་ལ་འཇིགས་པ་མེད་པར་གང་གསུངས་པ་དེ་སྟེར་བར་བྱེད་དོ། །ད་ནི་མངོན་པར་དགའ་བའི་བུ་མོ་སྒྲུབ་པ་ཇི་ལྟ་བ་དེའི་སྦྱོར་བ་གསུངས་པ། མ་ཧེ་ཆུ་སྲིན་ཞེས་བྱ་བ་ལ་སོགས་པ་སྟེ། མ་ཧེ་དང་ཆུ་སྲིན་ལ་སོགས་པའི་ཤ་དང༌། གཞན་ཡང་གང་ལ་སྦྱོར་བ་དེ་གྲུབ་པར་བྱེད་དོ། །ཞལ་གསུམ་ཕྱག་དྲུག་ཅེས་བྱ་བ་ལ་སོགས་པ་ནི། ཐོ་བ་གཤིན་རྗེའི་དགྲ་ལ་སོགས་པ་བཞིའི་སྐུ་སྟོན་པ་སྟེ། དེ་ལ་ཐོབ་བསྒོམ་ཞེས་བྱ་བ་ནི། ཐོ་བ་གཤིན་རྗེའི་དགྲ་བསྒོམ་པ་སྟེ། མདོག་སྔོན་པོ་ཕྱག་གཡས་ན་ཐོབ། གཞན་རིགས་ཀྱི་བདག་པོ་དང་མཐུན་པ། འདི་ལྟ་བུར་ཐོ་བ་གཤིན་རྗེའི་དགྲ་བསྒོམ་པར་བྱའོ། །དེ་བཞིན་དུ་བེ་ཅོན་གཤིན་རྗེའི་དགྲ་ཡང་སྐུ་མདོག་དཀར་པོ། ཕྱག་གཡས་ན་བེ་ཅོན་བསྣམས་པ། གཞན་རང་གི་དཀྱིལ་འཁོར་གྱི་བདག་པོ་དང་མཐུན་པ། དེ་ནས་པདྨ་གཤིན་རྗེའི་དགྲ་ཡང་སྐུ་མདོག་དམར་པོ་ཕྱག་ན་པདྨ་དམར་པོ་འཛིན་པ། གཞན་རང་གི་བདག་པོ་དང་མཐུན་པ། དེ་བཞིན་དུ་རལ་གྲི་གཤིན་རྗེའི་དགྲ་ཡང༌། ནག་པོ་རལ་གྲི་བསྣམས་པ་སྟེ་གཞན་ཡང་དེ་བཞིན་དུ་སྦྱར་རོ། །བྷ་གར་མཚན་མ་བསམས་ནས་ནི། །ཞེས་བྱ་བ་ལ་སོགས་པ་ནི། བདག་ཉིད་དཀྱིལ་འཁོར་གྱི་བདག་པོའི་སྒོམ་པ་དང་ལྡན་པས། ཤེས་རབ་མ་དང་སྦྱོར་བའི་ཏིང་ངེ་འཛིན་ལས། དེའི་དུས་ན་ཇི་ལྟ་བའི་རང་རིག་པ་སྐྱེས་པ་དེ་ཉིད་དེ་ལྟར་བཅོམ་ལྡན་འདས་ཡིན་ནོ་ཞེས་ཤེས་པར་བྱ་བའི་དོན་ཏོ། །དེ་ནས་ཞེ་སྡང་གཤིན་རྗེ་གཤེད་བསྒོམ་པར་བྱ་སྟེ། དེ་ལས་གཏི་མུག་གཤིན་རྗེ་གཤེད་བསྒོམ་པར་བྱའོ།། འདི་ལྟར་སེར་སྣ་གཤིན་རྗེ་གཤེད་ལ་སོགས་པ་དཀྱིལ་འཁོར་རིམ་པ་བཞིན་རྫོགས་པར་བསྒོམས་ཏེ། བརྟན་པར་གྱུར་པ་དང་སྔ་མ་བཞིན་དུ་སྤྱར་བ་ལས་རང་གི་རིགས་ཀྱི་འོད་ཟེར་སྤྲོས་པས་བརྩོན་པར་བྱའོ། །འདི་ནི་ལེའུ་བཅུ་པའི་རྣམ་པར་འགྲེལ་པའོ།། །།