གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ།
དཔལ་འཛིན།
རྣལ་འབྱོར།
རྒྱ་གར་སྐད་དུ། ཀྲྀཥྞ་ཡ་མཱ་རཱི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་ལ་གུས་དེ་རྗེས་གཤིན་རྗེ་གཤེད་ནག་རྡོ་རྗེ་ལ། །རང་འོད་ཡན་ལག་འདུས་པ་བདེ་བ་རྒྱས་པ་གཞན་གྱི་དོན་འཇུག་པ། །རྡོ་རྗེ་རལ་གྲི་འཁོར་ལོ་ཆུ་སྐྱེས་གྲི་གུག་ཐོད་པའི་ཕྱག །ཞལ་གསུམ་འཇིགས་པའི་འཇིགས་བྱེད་ལ་ནི་སྤྱི་བོས་ཕྱག་འཚལ་ལོ། །གཤིན་རྗེ་གཤེད་ནག་སྒྲུབ་པའི་ཐབས། །དེ་ཉིད་རིག་པ་མངོན་འདོད་པའི། །དབང་ལ་སོགས་པ་ཐོབ་པ་ཉིད། །དེ་ཡི་འདི་ནི་སྒྲུབ་ཐབས་རིམ། །བྱིས་རྣམས་བདེ་བར་རྟོགས་ཕྱིར་དང༌། །མཉམ་པ་དྲན་པར་བྱ་ཆེད་དང༌། །མཆོག་རྣམས་བྱིས་པའི་ངག་ལ་ནི། །མགུ་བྱའི་ཕྱིར་ནི་རྣམ་པར་བྲེ། །སྦྱིན་དང་ཚུལ་ཁྲིམས་ལ་སོགས་ལྡན། །སེམས་ཅན་དོན་ལ་རོ་གཅིག་བློ། །བྱམས་སོགས་ཡོན་ཏན་ཡང་དག་རྫོགས། །དད་དང་ཐོས་པས་རྣམ་པར་བརྒྱན། །ཐོ་རངས་སྙིང་རྗེའི་བདག་ཉིད་ཅན། །
དང་པོར་གདོང་སོགས་ཁྲུས་བྱས་ནས། །དབེན་པའི་ས་ཕྱོགས་དུར་ཁྲོད་སོགས། །བདེ་བའི་སྟན་ལ་འདུག་ནས་ནི། །བརྩམ་བྱ་རང་སྙིང་པདྨ་སྟེ། །ཟླ་བ་ལ་བལྟ་ཤིན་ཏུ་གསལ། །ཡ་ཡིག་སྔོན་པོའི་འོད་ཟེར་ཅན། །སེམས་ཅན་དོན་ནི་ཕུན་ཚོགས་བྱས། །བླ་མ་རྫོགས་པའི་སངས་རྒྱས་རྣམས། །ནམ་མཁའ་མ་ལུས་ཁྱབ་པར་བསྒོམ། །དེ་རྣམས་དམིགས་ལ་ཕྱག་བྱས་ནས། །ལུས་སྤྲུལ་པ་ཡི་ཆོ་ག་ཡིས། །སེམས་མ་ལ་སོགས་ཀྱིས་མཆོད་ནས། །སྡིག་པ་བཤགས་པའོ། །ལུས་ངག་ཡིད་ཀྱིས་སྡིག་པ་བགྱིས། །དེ་བཞིན་བགྱིད་དུ་སྩལ་བ་དང༌། །མགོན་པོ་རྗེས་སུ་ཡི་རང་གང༌། །དེ་གསུམ་བྱས་པ་བཤགས་པར་བགྱི། །རྫོགས་སངས་རྒྱས་དང་དེ་སྲས་འཕགས། །བསོད་ནམས་ཚོགས་ལ་རྗེས་ཡི་རང༌། །རྫོགས་སངས་རྒྱས་དང་དམ་ཆོས་བཅས། །ཚོགས་ཀྱི་མཆོག་ལ་སྐྱབས་སུ་མཆི། །ཡོན་ཏན་རྒྱ་ཆེན་ཁྱེད་ཅག་ལ། །བདག་གི་ལུས་ནི་དབུལ་བར་བགྱི། །དམ་པའི་ཆོས་ནི་ཐམས་ཅད་དང༌། །སྟོན་པའི་སྒྲ་མཛེས་གནས་གྱུར་ཅིག །རྫོགས་སངས་རྒྱས་དང་དེ་ཡི་སྲས། །སྦྱིན་སོགས་ལས་ཀྱི་ངོ་བོ་ལ། །སྐུ་གསུང་ཡེ་ཤེས་ཐོབ་བྱའི་ཕྱིར། །རབ་
ཏུ་གུས་པས་གནས་པར་བགྱི། །བྱང་ཆུབ་ཏུ་ནི་སེམས་བསྐྱེད་བགྱི། །སེམས་ཅན་ཀུན་གྱི་དོན་གྱི་ཕྱིར། །གང་ཞིག་བསོད་ནམས་ཚོགས་བསགས་པས། །བྱང་ཆུབ་ཏུ་ནི་བསྔོ་བར་བགྱི། །དཔལ་ལྡན་གཤིན་རྗེ་གཤེད་གྱུར་ནས། །འགྲོ་ལ་ཕན་པ་དག་བྱེད་ཅིང༌། །འདི་ལྟར་སྨོན་ལམ་བཏབ་ནས་ནི། །དེ་ནས་བློ་ཡིས་གཤེགས་སུ་གསོལ། །སྙིང་རྗེས་ཆོ་ག་བཞིན་བལྟས་ནས། །སྣ་ཚོགས་སྟོང་པའི་རྣམ་པར་བསྒོམ། །རང་བཞིན་རྣམས་དང་བྲལ་བའི་ཕྱིར། །རྒྱུ་ཡང་མཚན་མ་མེད་པར་བསྒོམ། །སྤྱོད་དང་བྲལ་བ་ཉིད་ཀྱིས་ནི། །སྨོན་པ་དག་ནི་རྣམ་པར་སྤངས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ལ་སེམས་ནི་བརྟན་བྱས་ནས། །ཨཾ་ཡིག་ལས་བྱུང་ཉི་མ་ལས། །དེར་ནི་ཧཱུཾ་ཡིག་སྔོན་པོའི་མདངས། །འོད་ཟེར་འཕྲོས་པས་ཀུན་ལ་ཁྱབ། །རྡོ་རྗེ་རྩེ་ལྔ་ཐམས་ཅད་དུ། །བསྲུང་བའི་དོན་དུ་བསྒོམ་པར་བྱ། །རྡོ་རྗེ་ས་གཞི་ལྕགས་རི་དང༌། །རབ་གུར་དང་དེ་བཞིན་ནོ། །སངས་རྒྱས་ཞིང་ནི་རྣམ་དག་དོན། །སླར་ཡང་བསམ་གཏན་ཡང་དག་བརྩམ། །དེ་ལ་སྣ་ཚོགས་ཆུ་སྐྱེས་ཟླ། །སཾ་ལས་བྱུང་བའི་རྡོ་རྗེ་ལས། །ཡན་ལག་བཟང་པོ་ཡན་ལག་འབྱུང༌། །ཆོས་འབྱུང་དཀར་པོ་གྲུ་གསུམ་པ། །སྟེང་དུ་གནས་པ་མཁའ་མཉམ་བསམ། །དབུས་སུ་པདྨ་ཟླ་བ་ལ། །སླར་ཡང་དེ་དབུས་དཀྱིལ་འཁོར་ཏེ། །བྷཱུཾ་ཡིག་འཁོར་ལོ་ལས་བསྐྱེད་པ། །རྟག་པའི་ཡན་ལག་ལས་བྱུང་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་དང༌། །དྲ་བ་དྲ་ཕྱེད་ཀྱིས་བརྒྱན་པ། །སྟེགས་བུ་ལྷ་མོས་ལེགས་མཛེས་པ། །སྣ་ཚོགས་རྩེ་མོ་རླུང་གིས་བསྐྱོད། །བ་དན་དྲིལ་བུ་དང་ལྡན་པ། །སྣ་ཚོགས་རྡོ་རྗེས་རྣམ་པར་བརྒྱན། །ཟླ་བ་ཉི་མ་རྒྱལ་བའི་གདན། །ཤར་ནི་དཀར་པོ་ཆེན་པོ་སྟེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་བཙོད་དང་མཚུངས་པའོ། །ཨིནྡྲ་ནཱི་ལའི་འོད་བྱེད་པ། །དབུས་ཀྱི་ས་གཞི་རྣམ་པར་བསམ། །ཕྱོགས་ཀྱི་ཁ་དོག་དབྱེ་བ་འདིས། །སྣ་ཚོགས་རྡོ་རྗེ་བསྒོམ་པར་བྱ། །དེ་བཞིན་གུར་ཡང་བསྒོམ་པར་བྱ། །སོ་སོའི་རྩིག་པ་གོ་རིམས་བཞིན། །རྣམ་པ་ལྔ་ནི་བསྒོམ་བྱས་ནས། །སངས་རྒྱས་གཟུགས་ནི་བསྒོམ་པར་བྱ། །དཔལ་ལྡན་རྣམ་པ་ལྔ་དང་བཅས། །རྡོ་རྗེ་ནག་པོ་སེལ་བྱེད་པ། །སངས་
རྒྱས་ཀྱི་ནི་གཟུགས་ཞེས་གྲགས། །དེ་ནི་དབྱེ་བས་བསྙད་པར་བྱ། །ལྟེ་བར་སྣ་ཚོགས་པདྨའི་གདན། །ཟླ་བར་དབྱངས་ཡིག་ཉིས་རིམ་དགོད། །དེ་ཡི་ཟླ་བར་ཀ་ཡིག་སོགས། །ཌ་ཌྷ་ད་དྷ་ཡ་ལ་ཡང༌། །བཅུག་ནས་དེ་དག་ཉིད་ལས་གྲུབ། །འདི་དག་འདི་ལྟར་གྲུབ་པ་ནི། །མེ་ལོང་ཡེ་ཤེས་བརྗོད་པར་བྱ། །མཉམ་ཉིད་དེ་དག་གཅིག་པ་ཉིད། །དེ་སྐྱེས་ཧཱུཾ་ནི་སོ་སོར་རྟོག །བྱ་བ་ནན་ཏན་ཡེ་ཤེས་ནི། །དེ་ལས་སྐྱེས་པ་རྡོ་རྗེར་བསྒོམ། །ནོར་བུ་མེ་ཤེལ་འོད་འདྲ་བ། །ས་བོན་བཅས་པའི་འོད་ཟེར་འཕྲོས། །ཨོཾ་བཛྲ་ཨཱཏྨ་ཀོ྅ཧཾ། ཞེས་པས་བདག་ཉིད་ང་རྒྱལ་བྱ། །དེ་སྐྱེས་དཀར་དམར་མདངས་ལྡན་པ། །འོད་ཟེར་མཛེས་པས་འཁྱུད་པའི་ལུས། །ཁྲོ་བོ་སྒེག་གཟུགས་བདེ་བ་ཡིས། །དཀར་དང་སྔོ་དང་དམར་བའི་ཞལ། །གདན་ལ་གཡོན་བརྐྱང་གིས་གནས་པ། །འབར་བའི་རལ་གྲི་རྡོ་རྗེ་གྲི་གུག་གསོར་བའོ། །འཁོར་ལོ་འདམ་སྐྱེས་སྣོད་ནི་འོད་ཟེར་འཕྲོ་བ་ཡི། །ཕྱག་ནི་གཡས་དང་གཡོན་རྣམས་ཀྱིས། །ཆོས་ཀྱི་དབྱིངས་ཀྱི་རང་བཞིན་ནི། །ཡེ་ཤེས་རྡོ་རྗེ་འཛིན་པའི་བདག །རྣམ་པ་ལྔ་ཡི་རང་བཞིན་གང༌། །རྣལ་འབྱོར་ཞེས་ནི་མངོན་པར་བརྗོད། །ཞེས་པ་ནི་རྣལ་འབྱོར་རོ། །
རྗེས་སུ་རྣལ་འབྱོར།
འདོད་ཆགས་ཆེན་པོས་འདུལ་བ་རུ། །འགྲོ་བ་གསུམ་པོ་ཡང་དག་བལྟས། །རང་སྙིང་ཡེ་ཤེས་འོད་ཟེར་གྱིས། །སྣ་ཚོགས་སངས་རྒྱས་གཟུགས་བྱས་ནས། །རང་གི་ལུས་ལ་ཡང་དག་གཞུག །བདེ་བ་དམ་པ་རྣམ་པའི་གཟུགས། །བདག་གི་ལོངས་སྤྱོད་བསྒོམ་པར་བྱ། །རྟོག་པ་ཐམས་ཅད་ཡང་དག་སྤངས། །སྔགས་མཆོག་དེ་ཉིད་གསུམ་ཞེས་པ། །ཧོཿ་དམར་གཉིས་ཀྱི་ནང་དུ་གཞུག །ཇི་ལྟར་སྐར་མདའ་འཕྲོ་བ་ལྟར། །བྱང་ཆུབ་སེམས་ནི་དེ་བཞིན་གཞུག །སྙིང་རྗེ་ཆགས་པའི་སེམས་ཀྱིས་ནི། །རྡོ་རྗེ་འཛིན་པ་བདག་ཉིད་ཞུ། །བྱམས་སོགས་སེམས་མ་སོགས་རྣམས་ཀྱི། །འཁོར་ལོའི་གཙོ་བོ་སྐུལ་བར་བྱེད། །བཞེངས་ཤིག་གཤིན་རྗེ་རྗེ་བཙུན་སྙིང་རྗེའི་ཁྲོ། །ཁམས་གསུམ་ཐམས་ཅད་པ་ཡི་གཏི་མུག་སོལ། །དེ་བཞིན་བདུད་ལས་རྒྱལ་བར་མཛོད། །བཞེངས་ཤིག་རྗེ་བཙུན་ཐུགས་ནི་གཡེངས་གྱུར་པས། །འཇིག་རྟེན་མགོན་པོ་སྟོང་ཉིད་ཅི་སྟེ་བཞུགས། །བཞེངས་ཤིག་རྗེ་བཙུན་འཇིག་རྟེན་བསོད་ནམས་ཀྱིས། །བྱང་ཆུབ་འདོད་
པའི་འཇིག་རྟེན་མཉམ་མནན་ནས། །ཅི་ཕྱིར་སྟོང་པ་ཉིད་ལ་སེམས་ཤིང་ཞུགས། །བསྐུལ་ནས་དེ་ནི་ཐིམ་གྱུར་ནས། །དེ་ཡི་རོ་ཡི་རྗེས་སུ་སོང༌། །གླུ་འདི་ཡི་ནི་ངོར་བྱས་ནས། །ཕུན་ཚོགས་ཉམས་འདྲ་ལས་བྱུང་བ། །ཞུ་བ་རྗེས་པ་ལས་སྐྱེས་པ། །མཾ་སྔོན་པོ་ལས་ཉི་དཀྱིལ་འཁོར། །མི་བཟད་ཁྲོ་བཅས་མདོག་སྔོ་བ། །རུས་པའི་རྒྱན་གྱིས་བརྒྱན་པ་སྟེ། །སྨ་ར་རྣོན་པོ་འབར་བའི་རྭ། །རྨིག་པ་རྐོ་བ་འཇིགས་བྱེད་པ། །མ་ཧིཪྵ་དེའི་རྒྱབ་གནས་པ། །རྡོ་རྗེ་སྔོན་པོ་འོད་ཟེར་བཅས། །ས་བོན་འོད་ཟེར་བཅས་པ་ཡིས། །གཤེད་ནག་གཟུགས་ནི་དེ་ཡིས་བྱས། །སྣ་ཚོགས་དག་ལ་ཡང་དག་གཞུག །འཇིགས་བྱེད་ཆེན་པོ་འཇིགས་སུ་རུང༌། །མ་ཧིཪྵར་ནི་རྡོ་རྗེར་བསྒོམ། །དཀྱིལ་འཁོར་དབང་ཕྱུག་བསྒོམ་པར་བྱ། །འཇིག་རྟེན་གསུམ་པོ་བདུད་ཀྱི་འཁོར། །འོད་ཟེར་རྣོན་པོ་འཕྲོ་བས་བསྲེག །མི་བཟད་དྲག་ཤུལ་མུན་པའི་ལུས། །འོད་ཟེར་ལྗགས་ནི་འདྲིལ་བ་པོ། །འབར་བའི་མཆེ་བ་གཙིགས་པའི་བྱད། །རལ་པ་སྨ་ར་གྱེན་དུ་འགྲེང༌། །གཡོན་བརྐྱང་བ་ཡི་ཞབས་ཀྱིས་མནན། །ནག་པོ་རྣམ་པར་མྱོས་བྱེད་པ། །རྩ་བའི་ཞལ་ནི་བུང་ནག་འདྲ། །གཡས་པ་ཟླ་བའི་འོད་བྱེད་པ། །གཡོན་པ་དམར་པོའི་མདངས་སུ་བསྟན། །རྡོ་རྗེའི་རྒྱན་གྱིས་བརྒྱན་པ་སྟེ། །སྦོམ་ཐུང་གསུས་པ་འཕྱང་བ་པོ། །མགོ་བོའི་ཕྲེང་བ་འཕྱང་དང་ལྡན། །གཡས་དང་གཡོན་པའི་ཕྱག་དག་གིས། །གྲི་གུག་དང་ནི་ཐོད་པ་འཛིན། །རང་འོད་ཤེས་རབ་ཡན་ལག་སྦྱོར། །བདེ་བ་འབབ་པ་གཞན་གྱི་དོན། །ལྷག་མ་གཡས་པའི་ཕྱག་དག་གིས། །འབར་བའི་རྡོ་རྗེ་རལ་གྲི་འཛིན། །གཡོན་ན་འཁོར་ལོ་ཆུ་སྐྱེས་འཛིན། །སྦྲུལ་གྱི་དབང་པོས་བརྒྱན་བྱས་ཏེ། །སྔོན་པོ་མཐའ་ཡས་སྦྲུལ་དག་གིས། །རལ་པ་བཅིངས་པ་ཤིན་ཏུ་འཇིགས། །དམར་པོ་འཇོག་པོ་ཀླུ་ཡིས་ནི། །མ་རུངས་པ་ཡི་རྣ་བ་བརྒྱན། །སྣ་ཚོགས་རིགས་ལྡན་དཔུང་རྒྱན་ཏེ། །དུང་སྐྱོང་དག་གི་སྦྲུལ་ཉིད་ནི། །སེར་པོ་གདུ་བུ་འཛིན་པའོ། །པདྨ་དཀར་པོའི་དོ་ཤལ་ཅན། །ལྗང་གུ་ཀརྐོ་ཊ་ཡིས་ནི། །ཚངས་པའི་སྐུད་པ་ཤིན་ཏུ་མཛེས། །བདུད་རྩིའི་ཁ་དོག་འདྲ་བ་ཡི། །ནོར་འཛིན་གྱིས་སྐ་རགས་བྱས། །པདྨའི་རྩ་བ་ཁ་དོག་སྐྱ། །པདྨ་ཆེན་པོས་ཞབས་གདུབ་པོ། །ཐམས་ཅད་ཕུཊ་ཀྱི་སྒྲ་བྱེད་པ། །ལྕེ་གཉིས་དྲག་ཤུལ་མཆེ་བའི་ཕྲེང༌། །འདི་ནི་འཁོར་བ་མྱང་
འདས་གཟུགས། །གཤིན་རྗེ་སེལ་བར་བྱེད་པའོ། །རྟོག་པ་ཟད་པའི་ཆེད་བསམས་ནས། །སྔགས་ཀྱིས་ཡང་དག་བྱིན་གྱིས་བརླབ། །ཨོཾ་དྷརྨ་དྷཱ་ཏུ་ཛྙཱ་ན་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པ་ནི་རྗེས་སུ་རྣལ་འབྱོར་རོ། །
ཤིན་ཏུ་རྣལ་འབྱོར།
རང་སྙིང་འོད་ཟེར་ལྕགས་ཀྱུ་ཡིས། །མཁའ་ཁྱབ་རྫོགས་པའི་སངས་རྒྱས་རྣམས། །ཐམས་ཅད་བཀུག་ནས་ཞལ་དུ་གཞུག །བདེ་བར་ཕབ་ནས་སྙིང་གར་ཞུ། །རྡོ་རྗེ་ལམ་བྱུང་ཞུ་བ་དེ། །བློ་དང་ལྡན་པས་སྤྲོ་བར་བྱ། །རང་འོད་པདྨའི་ཁོངས་སུ་གནས། །རང་གི་ས་བོན་གཟུགས་སུ་བལྟ། །ས་བོན་ལས་བྱུང་འཁོར་ལོ་ཀུན། །ས་བོན་ཀུན་གྱིས་བྱིན་གྱིས་བརླབ། །འཕྲོ་ཞིང་སྡུད་པའི་འོད་ཟེར་ནི། །མཁས་པས་ཆོ་ག་བཞིན་དུ་བསྒོམ། །ཡ་ཡིག་སྔོན་པོས་དབུས་མ་བསྐྱེད། །དཀྱིལ་འཁོར་ཅན་གྱི་མཚན་ཉིད་གསུངས། །ཤར་དུ་ཀྵེ་ལས་འཁོར་ལོ་གྲུབ། །རྟག་པ་དཀར་པོ་ཕྱག་དྲུག་པ། །འཁོར་ལོ་རལ་གྲི་གཡས་པའི་ཕྱག །གཡོན་ན་རིན་ཆེན་ཆུ་སྐྱེས་འཛིན། །ལྷོར་ནི་མ་ཡི་ཡི་གེ་ལས། །རིན་ཆེན་ལས་སྐྱེས་རིན་ཆེན་འབྱུང༌། །བཙོ་མ་གསེར་གྱི་མདངས་བྱེད་པ། །རིན་ཆེན་རལ་གྲི་གཡས་ན་འཛིན། །གཡོན་ན་འཁོར་ལོ་ཆུ་སྐྱེས་སོ། །ནུབ་ཏུ་འདོད་ཆགས་རྡོ་རྗེ་ཅན། །ས་བོན་མེ་དང་པདྨ་གྲུབ། །པདྨ་རཱ་གའི་འོད་དང་མཉམ། །གཡས་ན་པདྨ་རལ་གྲིའོ། །ནོར་བུ་འཁོར་ལོ་གཡོན་དུ་དགོད། །ད་དང་རལ་གྲི་ལས་བྱུང་བ། །ལྗང་གུ་ཕྲག་དོག་གཤིན་རྗེ་གཤེད། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་གཡོན། །ཐམས་ཅད་ཞེ་སྡང་གཤིན་རྗེ་གཤེད། །ཁྲོ་བོ་གཟུགས་ཀྱི་མཚན་ཉིད་དོ། །དེ་རྣམས་ཀྱི་ནི་རྩ་བའི་ཕྱག །གྲི་གུག་ཐོད་པ་བསྒོམ་པར་བྱ། །གཉིས་མེད་གཉུག་མའི་ཤེས་རབ་དང༌། །ལུས་བདག་མེད་པའི་ངོ་བོ་དང༌། །ཉི་མའི་དཀྱིལ་འཁོར་ལོ་གནས་པ། །རྟག་པ་ཟླ་བའི་དཀྱིལ་འཁོར་ལའོ། །སྣ་ཚོགས་རྡོ་རྗེ་རྩ་བར་གནས། །སེམས་ཅན་དོན་བྱེད་བསྒོམ་པར་བྱ། །ཤར་སྒོར་ཡ་ཡིག་ལས་སྐྱེས་པ། །ཐོ་བ་སྔོན་པོ་ཡི་ནི་གཟུགས། གཡས་ན་ཐོ་བ་རལ་གྲི་འཛིན། །ནོར་བུ་བཟང་པོ་པདྨ་གཡོན། །རྡོ་རྗེ་ཐོར་གྲགས་གཤིན་རྗེ་གཤེད། །ལྷོར་ནི་ཛ་དང་དབྱུག་པ་ལས། །དབྱུག་པ་གཤིན་རྗེ་གཤེད་དཀར་མདངས། །དབྱུག་པ་རལ་གྲི་གཡས་པ་ན། །ཆུ་སྐྱེས་འཁོར་ལོ་གཡོན་པའོ། །ནུབ་ཏུ་པདྨ་གཤིན་རྗེ་གཤེད། །ནི་སྐྱེས་འདོད་
ཆགས་མཐའ་འཇོམས་གཟུགས། །པདྨ་རལ་གྲི་གཡས་པ་ན། །གཡོན་ན་འཁོར་ལོ་ནོར་བུའོ། །བྱང་དུ་རལ་གྲི་གཤིན་རྗེ་གཤེད། །ར་སྐྱེས་ཕྲ་དོག་མཐའ་འཇོམས་པ། །རལ་གྲི་འཁོར་ལོ་གཡས་པ་ན། །གཡོན་ན་ནོར་བུ་པདྨ་སྟེ། །ཅུང་ཟད་སྔོ་བའི་བྱེ་བྲག་སྟེ། །ཞེས་པ་འཇིགས་པར་བྱེད་པའོ། །སྤྲུལ་ནི་ཐམས་ཅད་པ་ཡི་གཟུགས། །རྣམ་པར་གཙིགས་པའི་གད་རྒྱངས་ཅན། །སྐྲ་སེར་གྱེན་དུ་འགྲེང་བ་སྟེ། །ཉི་མའི་དཀྱིལ་འཁོར་ཡང་དག་ལྡན། །མཆེ་བ་གཙིགས་པ་གད་རྒྱངས་ཆེ། །གྲི་གུག་དང་ནི་ཐོད་པ་འཛིན། །སྣ་ཚོགས་རྡོ་རྗེ་མཚམས་བཞི་ལ། །ཟླ་བ་ལ་གནས་ལྷ་མོ་རྣམས། །ཤར་ལྷོ་མཚམས་ཀྱི་ལྷ་མོ་ནི། །ཛ་སྐྱེས་རྡོ་རྗེ་སེམས་མའོ། །དཀར་མོ་སྒེག་མོ་ཁྲོ་བ་ཆེ། །གཏི་མུག་གཤིན་རྗེ་གཤེད་ཀྱི་གཟུགས། །དེ་ནས་ལྷོ་ནུབ་མཚམས་སུ་ནི། །རྡོ་རྗེ་ཕག་མོ་ས་ལས་སྐྱེས། །ཁྲོ་བོ་ཕག་མོའི་གདོང་ཅན་མ། །ཞེ་སྡང་གཤིན་རྗེ་གཤེད་དང་མཚུངས། །བྱང་དང་ནུབ་ཀྱི་མཚམས་སུ་ནི། །རབ་ཏུ་ཞི་བའི་དབྱངས་ཅན་མ། །དོ་སྐྱེས་ཤིན་ཏུ་དམར་བའི་མདོག །འདོད་ཆགས་གཤིན་རྗེ་མཐར་འཇོམས་གཟུགས། །བྱང་ཤར་གྱི་ནི་མཚམས་སུ་ནི། །གཽ་རཱི་ལྗང་གུ་འཇིགས་སུ་རུང༌། །རུ་སྐྱེས་ཕྲག་དོག་གཤིན་རྗེ་གཤེད། །གཟུགས་དང་མཚན་མ་འཛིན་པའི་མཆོག །སྔོན་པོའི་གཡས་ནི་དཀར་བ་དང༌། །དཀར་པོའི་གཡས་ནི་སྔོ་བ་དང༌། །དེ་གཉིས་ཀྱི་གཡོན་དམར་པོ་སྟེ། །དེ་ལས་གཞན་པ་སྔོ་དཀར་པོ། །དཀྱིལ་འཁོར་གྱི་ནི་མཚམས་བཞི་རུ། །ན་ཡོ་ནི་ར་ཐོད་པའོ། །གྲུབ་ནས་རབ་སྤྲོ་བློ་ལྡན་གྱིས། །ཇི་སྐད་བརྗོད་པའི་རང་སྔགས་ཀྱིས། །ཧྲཱིཿ་ཥྚྲིཿ་ལ་སོགས་པ་སྔགས་ཀྱི་སྒྲས། །དཀྱིལ་འཁོར་གཙོ་བོ་ཡང་དག་བསྐུལ། །སྤྲུལ་པ་མཐའ་ཡས་སྤྲོས་པ་ཡིས། །སེམས་ཅན་དོན་མཆོག་བྱས་ནས་ནི། །རང་གི་ལུས་ལ་ཐམས་ཅད་ཀྱིས། །ཁྲོ་བོ་དཔའ་བོ་ཐམས་ཅད་དགོད། །ཛིན་ཛིཀ་ཅེས་བྱ་བ་འདིས། །ཤར་དུ་གཏི་མུག་མཐར་བྱེད་པ། །རྩིབས་ཀྱི་རྩ་བ་ལ་གནས་པ། །སྣ་ཚོགས་ཆུ་སྐྱེས་ཟླ་བར་དགོད། །རཏྣ་དྷྲྀཀ་ཅེས་བྱ་བ་འདིས། །ལྷོ་རྩིབས་ཆུ་སྐྱེས་ཉི་མ་ལ། །ཕྲ་མ་ཞེས་བྱ་དྲངས་ནས་ནི། །ཆོ་ག་བཞིན་དུ་དགོད་པར་བྱའོ། །ཨཱ་རོ་ལྀཀ་ཅེས་བྱ་བ་འདིས། །འདོད་ཆགས་གཤིན་རྗེ་སེལ་བྱེད་པ། །ནུབ་རྩིབས་འདམ་སྐྱེས་ཉི་མ་
ལ། །ཆོ་ག་བཞིན་དུ་རྣམ་པར་བསམ། །པཛྙཱ་དྷྲྀཀ་ཅེས་བྱ་བ་འདིས། །ཕྲག་དོག་གཤིན་རྗེ་ཟད་བྱེད་པ། །བྱང་རྩིབས་ཆུ་སྐྱེས་ཉི་མ་ལ། །ཆོ་ག་བཞིན་དུ་དགོད་པར་བྱ། །མུངྒར་དྷྲྀཀ་ཅེས་བྱ་བ་ཡིས། །ཤར་སྒོར་ཆུ་སྐྱེས་ཉི་མ་ལ། །ཐོ་བའི་མཐའ་འཇོམས་ཟ་བྱེད་པ། །བློ་དང་ལྡན་པས་བསམ་པར་བྱ། །དཎྜ་དྷྲྀཀ་པའི་སྔགས་འདི་ཡིས། །ལྷོ་ཡི་སྒོ་རུ་ཡང་དག་གནས། །དབྱུག་པ་གཤིན་རྗེ་འདུལ་དཀའ་བ། །སྣ་ཚོགས་ཆུ་སྐྱེས་ཉི་མར་དགོད། །པདྨ་དྷྲྀཀ་ཅེས་བྱ་བ་འདིས། །པདྨ་གཤིན་རྗེ་གཤེད་འཇོམས་པ། །ནུབ་སྒོར་ཆུ་སྐྱེས་ཉི་མ་ལ། །གཏུམ་པོ་སྟོབས་ཆེན་བསྒོམ་པར་བྱ། །ཁཌྒ་དྷྲྀཀ་ཅེས་བྱ་བ་འདིས། །རལ་གྲི་གཤིན་རྗེ་ཟད་པར་བྱེད། །སྣ་ཚོགས་པདྨ་ཉི་མར་བསམ། །བྱང་དུ་བདུད་ནི་འཇོམས་པའོ། །སྣ་ཚོགས་རྡོ་རྗེའི་མཚམས་བཞི་ལ། །ལྷ་མོ་བསྒོམ་བྱ་དེ་བཞིན་མཆོག །ཤར་ལྷོ་ལྷ་མོ་སེམས་མ་སྟེ། །གཏུམ་མོ་མཛེས་མའི་འོད་ཟེར་ཅན། །མོ་ཧ་ར་ཏི་ཞེས་སྔགས་ཀྱིས། །སྣ་ཚོགས་ཆུ་སྐྱེས་ཟླ་བར་གནས། །དེ་ནས་ལྷོ་ནུབ་རྡོ་རྗེ་མོ། །ཕག་མོ་རིགས་ཀྱི་གཙོ་མོ་སྟེ། །དྭེ་ཥ་ར་ཏི་དེ་ཉིད་འདིས། །པདྨ་ཟླ་བར་མཁས་པས་དགོད། །དེ་ནས་ནུབ་བྱང་མཚམས་སུ་ནི། །ཟླ་བར་དབྱངས་ཅན་དགོད་པར་བྱ། །རཱ་ག་ར་ཏིའི་སྔགས་འདི་ཡིས། །དེ་ནས་བྱང་ཤར་གཽ་རཱི་སྟེ། །བཛྲ་ར་ཏིའི་སྔགས་འདི་ཡིས། །ཟླ་བར་ཨོཾ་གྱིས་མཚན་པའོ། །རྩ་བའི་དཀྱིལ་འཁོར་གྲྭ་བཞི་རུ། །དེ་ཉིད་གསུམ་གྱི་ཐོད་པའོ། །འདི་ལྟར་སྤྲོ་བྱ་དཀྱིལ་འཁོར་བཅས། །བརྟན་པར་བྱས་ནས་བདེ་ལྡན་པ། །སྔོན་གྱི་འཁོར་ལོ་དེར་ཐིམ་པར། །མཉམ་པར་གཞག་པས་བལྟ་བར་བྱ། །འདི་ནི་ཤིན་ཏུ་རྣལ་འབྱོར་རོ། །
རྣལ་འབྱོར་ཆེན་པོ།
གཤིན་རྗེ་ནག་པོ་འཇོམས་པ་དང༌། །དཀྱིལ་འཁོར་པ་ཡི་རང་བཞིན་གྱིས། །མིག་དང་སྐུ་སོགས་ངོ་བོ་ལ། །ལྷ་རྣམས་བྱིན་གྱིས་བརླབ་པར་བྱ། །ཀྵིཾ་ལས་འཁོར་ལོ་གཏི་མུག་མདངས། །ཅུང་ཟད་ཁྲོ་བོ་མིག་ལ་ནི། །རྡོ་རྗེ་མིག་དགོད་བློ་ལྡན་གྱིས། །རྣ་བར་ཛཾ་ཡིག་རྡོ་རྗེ་ལས། །རྡོ་རྗེ་རྣ་བ་ནག་པོའི་མདངས། །སྣ་རུ་ཁཾ་ཡིག་རིན་ཆེན་འབྱུང༌། །ཕྲ་མ་ཞེས་བསྒྲགས་དང་མཚུངས་པ། །ཟླ་བར་རྡོ་རྗེ་སྣ་ཚོགས་སོ། །ལྕེ་ལ་རཾ་ཞེས་པདྨ་ལས། །རྡོ་རྗེ་ལྕེ་བྱུང་པདྨར་སོང༌། །འདོད་ཆགས་གཤིན་རྗེ་མདངས་ལྡན་པའོ། །ཀཾ་སྐྱེས་
རལ་གྲི་ལས་བྱུང་བ། །རྡོ་རྗེ་སྐུ་སྟེ་ཟླ་བར་གནས། །ཕྲག་དོག་གཤིན་རྗེ་གཤེད་ཀྱི་གཟུགས། །དཔྲལ་བར་སྐུ་ཡི་ལུས་ཅན་ནོ། །ལྟེ་བའི་སྟེང་དུ་སཾ་ལས་སྐྱེས། །ཐུགས་ཀྱི་རྡོ་རྗེ་དེ་བཞིན་མཆོག །ཁྲོ་བོ་སྒེག་པའི་གཟུགས་ཅན་ནི། །རྡོ་རྗེ་འཛིན་པའི་རྣམ་པར་དགོད། །ཡན་ལག་དྲུག་ལ་དགོང་པ་ནི། །མངོན་ཤེས་སྒྲུབ་པའི་དོན་དུ་བཤད། །སྙིང་གར་ཧཱུཾ་ལས་རྡོ་རྗེ་དབུས། །ཧཱུཾ་གནས་རྡོ་རྗེ་སྔོན་པོའི་མདངས། །ཐུགས་ཀྱི་རྡོ་རྗེ་གཤིན་རྗེ་གཤེད། །ཁ་དོག་ཕྱག་མཚན་ཡང་དག་ལྡན། །མགྲིན་པར་ཨཱཿ་ཡིག་པདྨ་ལས། །སླར་ཡང་པདྨ་ལས་བྱུང་བ། །འདོད་ཆགས་གཤིན་རྗེ་གཤེད་འདྲའི་ལུས། །དཔལ་ལྡན་གསུང་གི་རྡོ་རྗེ་བསམ། །སྤྱི་བོར་ཨོཾ་ལས་འཁོར་ལོ་སྟེ། །ཨོཾ་དང་འཁོར་ལོ་དཀར་པོའི་མདངས། །སྐུ་ཡི་རྡོ་རྗེ་སྐུ་དབང་ཕྱུག །ཕྱག་དང་ཁ་དོག་མཚན་མ་མཆོག །དེ་ཉིད་གསུང་གི་རྡོ་རྗེ་མཆོག །རྫོགས་ནས་ནམ་མཁར་གནས་པ་ཡི། །སངས་རྒྱས་མཆོད་ནས་སྔགས་ཀྱིས་ནི། །དེ་རྣམས་བྱིན་གྱིས་བརླབ་པར་བྱ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ག་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ག་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །སྣ་ཚོགས་གནས་པའི་སངས་རྒྱས་རྣམས། །སྲད་དང་བཅས་པ་སྤྱན་དྲངས་ནས། །མདུན་དུ་བལྟས་ནས་དེ་རྣམས་ལས། །རྣམ་པར་སྤྲོས་པ་གང་ཡིན་པ། །སེམས་མ་ལ་སོགས་སླར་ཡང་ནི། །ཟླ་མདངས་བུམ་པ་བཟུང་ནས་ནི། །དེ་རྣམས་བཀྲ་ཤིས་ཚིགས་བཅད་དང༌། །དེ་བཞིན་སྙན་པ་གླུ་ཡི་སྒྲས། །དབང་བསྐུར་བར་ནི་བསམ་པར་བྱ། །བདག་དང་གཞན་ཉིད་ཐམས་ཅད་ལ། །སྤྱི་བོར་གཤིན་རྗེ་ནག་པོར་རོ། །རྡོ་རྗེ་ཅན་རྣམས་བདག་སྤྱི་བོར། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་ནས། །བདག་མདུན་བལྟས་ནས་ཁྲོ་བོས་ནི། །བགེགས་བསྐྲད་ནས་ནི་བསྲུང་བ་དང༌། །ཨརྒྷ་ཞབས་བསིལ་ལ་སོགས་འབུལ། །ཨོཾ་མུངྒ་ར་ཛཿ་ཞེས་བྱ་བའི་སྔགས་འདིས་དགུག་གོ ། ཨོཾ་དཎྜ་ཧཱུཾ་ཞེས་པ་འདིས་གཞུག་གོ །ཨོཾ་པདྨ་བཾ་ཞེས་པ་འདིས་བཅིང་ངོ༌། །ཨོཾ་ཁཌྒ་ཧོཿ་ཞེས་པ་འདིས་དབང་དུ་བྱའོ། །རང་སྙིང་ས་བོན་འོད་ཟེར་གྱིས། །སངས་རྒྱས་རྣམས་ནི་བཀུག་ནས་གཞུག །སྙིང་གར་ཞུ་བར་བལྟས་ནས་ནི། །རང་སྙིང་པདྨའི་ལྟེ་བ་ལ། །ཟླ་བ་ལས་བྱུང་ལྷ་མོའི་ཚོགས། །སྣ་ཚོགས་མེ་ཏོག་
ཡོ་བྱད་ཚོགས། །ལག་པའི་འདབ་མས་བཟུང་ནས་ནི། །མཆོད་པའི་གླུ་ནི་ཡིད་འོང་བ། །སྣ་ཚོགས་གར་གྱི་བྱེ་བྲག་དང༌། །བདེ་བ་ཆེན་པོ་སྟེར་བ་ཡི། །འགྱིང་དང་བཅས་པས་མཆོད་པར་བྱ། །ཨེ་མ་ཀྱེ་ཀྱེ་བླ་མ་གཤིན་རྗེ་གཤེད་ནག་པོ། །སྲིན་པོའི་གཟུགས་ཀྱི་རང་བཞིན་གང༌། །ང་ནི་ཁྱོད་མཐོང་བས་འཇིགས་པས། །བླ་མ་ཁྲོ་བའི་རང་བཞིན་ངོར། །ས་སྟེངས་ས་བླ་ས་འོག་རྣམས། །ཁྱོད་ཀྱིས་གར་བྱས་པས་ནི་འདར། །མིག་སྨན་བདར་ནག་ཁྲོ་བོའི་ཡིད། །གར་མཛད་ཁྱོད་ནི་རོ་ལངས་གཟུགས། །གནག་ཅིང་སྦོམ་པ་ཡི་ནི་ཚད། །རྣམ་པ་མང་པོའི་གཟུགས་སྤྲུལ་བྱེད། །རྡོ་རྗེ་དབྱངས་ཅན་འདུད་པར་བྱེད། །ཁྱོད་ནི་གར་མཛོད་བདེ་བ་ཆེ། །ཁྱོད་ནི་ཧྲཱིཿ་ཥྚྲིཿ་སྔགས་ཀྱི་སྒྲས། །ཁམས་གསུམ་པ་ཡི་འཁྲུལ་པ་སོལ། །རྗེ་བཙུན་སྙིང་རྗེ་ཡིས་ནི་ཁྲོ། །ཁྱོད་ནི་འགྲོ་བལྟས་གར་བྱེད་པ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། བྲག་ཅ་དང་མཚུངས་ཐམས་ཅད་ནི། །སྒྲ་ཡི་གྲོང་རྣམས་རྣམ་བལྟས་ནས། །འཁོར་ལོ་ཅན་ནི་དེ་རྣམས་ཀྱིས། །དེ་བཞིན་གཙོ་བོས་དེ་རྣམས་སོ། །གཏི་མུག་རྡོ་རྗེའི་རང་བཞིན་ཅན། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་ལོ། །ཕྲ་མོ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །རྡོ་རྗེ་ཐུགས་བཞིན་རབ་གསལ་བ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །ཐམས་ཅད་དབྱངས་མཆོག་དམ་པ་མཆོག །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་དངོས་པོའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །རྡོ་རྗེ་སྐུ་བཞིན་རབ་གསལ་བ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་ཏུ་སྡུད། །སངས་རྒྱས་ཀུན་དང་མཆོག་གི་མཆོག །དཀྱིལ་འཁོར་དབང་ཕྱུག་ཕྱག་འཚལ་བསྟོད། །ཨ་ཡིག་ལས་བསྐྱེད་དག་པ་ནི། །མགོ་བོ་གསུམ་གྱི་སྟེང་ན་གནས། །པདྨའི་སྣོད་ནི་རབ་རྫོགས་ནས། །དེ་འོག་མེ་ཡི་དཀྱིལ་འཁོར་ནི། །རཾ་ལས་བྱུང་བ་གྲུ་གསུམ་མོ། །དེ་འོག་རླུང་གི་དཀྱིལ་འཁོར་ནི། །ཡཾ་སྐྱེས་སྔོན་པོ་གཞུ་ཡི་དབྱིབས། །གཡོ་བའི་འཕན་གྱིས་མཚན་
པའོ། །དེ་ལ་མིང་ཡིག་དང་པོ་སྐྱེས། །དེ་ནི་རྣམ་པར་སྣང་མཛད་སོགས། །ད་ཡིག་ལས་སྐྱེས་ཡང་དག་བྱུང༌། །གླང་པོ་ལ་སོགས་ལྔ་པོ་རྣམས། །ཧཱུཾ་སྐྱེས་རྡོ་རྗེའི་ཁ་ཆོད་ཀྱིས། །ད་ཡི་ཁ་བཅད་བསྒོམ་པར་བྱའོ། །རླུང་གིས་བསྐུལ་བའི་མེ་ཡིས་ནི། །དེ་ཡང་ཞུ་བར་རྣམ་པར་བསམ། །རྡོ་རྗེ་མཉམ་པའི་རོར་གྱུར་པ། །ཤིན་ཏུ་དྲི་མེད་དག་པར་བལྟས། །དེར་ནི་ཨོཾ་ཡིག་འོད་ཟེར་གྱིས། །སངས་རྒྱས་ཀུན་བཀུག་ཡེ་ཤེས་གཟུགས། །སྔགས་ཀྱི་གཟུགས་ཀྱིས་རབ་ཏུ་གཞུག །བདུད་རྩི་མཆོག་ལྔ་བལྟས་ནས་ནི། །དེ་ཉིད་གསུམ་གྱི་བྱིན་གྱིས་བརླབ། །དཀྱིལ་འཁོར་བདག་པོ་ཚིམ་པར་བྱ། །ཡི་གེ་ཧཱུཾ་ལས་བྱུང་བ་ཡི། །ལྕེ་ནི་རྡོ་རྗེ་དཀར་པོར་བལྟ། །དེ་ཡི་འོད་ཟེར་སྦུ་གུའི་གཟུགས། །དེ་ཡིས་ཡང་དག་དྲངས་ནས་ནི། །སྣ་ཚོགས་གནས་པའི་སངས་རྒྱས་རྣམས། །དཀྱིལ་འཁོར་པ་ནི་དེ་བཞིན་མཆོད། །སྙིང་གར་ཡེ་ཤེས་འོད་ཟེར་གྱིས། །བཀོད་ནས་རྟོག་པ་ཐམས་ཅད་སྤངས། །ཐོག་མཐའ་དབུས་ཀྱི་བྱེ་བྲག་གིས། །འདིར་ཡང་གཅིག་ཏུ་མི་རིགས་སོ། །རྡུལ་ཕྲན་ཆ་ཤས་མེད་པས་ན། །དུ་མར་ཡང་ནི་རིགས་མ་ཡིན། །གཅིག་དང་དུ་མའི་རང་བཞིན་གང༌། །གང་བྲལ་དེ་ནི་དེ་བཞིན་མིན། །འཁྲུལ་གཟུགས་དེ་ཉིད་མ་ཡིན་པས། །གང་ཕྱིར་འཁྲུལ་བ་གཉིས་ལ་གནས། །མ་འཁྲུལ་རྟག་ཏུ་བསམ་མི་ཁྱབ། །སྤྲོ་དང་བསྡུ་བ་ཡི་ནི་ལས། །སེམས་ཅན་དོན་ལ་རོ་གཅིག་བློ། །འདི་ལས་དེ་ཉིད་གཞན་དུ་མེད། །ཡེ་ཤེས་ཞབས་སོགས་མཆོག་རྣམས་ཀྱིས། །འདི་དག་ཉིད་ནི་གསལ་བར་བཤད། །དཔལ་ལྡན་གསང་བ་འདུས་པ་ལས། །གསུངས་པ་ཅུང་ཟད་བཤད་པར་བྱ། །དངོས་པོ་མེད་ཅིང་བསྒོམ་པ་མེད། །ཁམས་དག་མེད་ཅིང་རྣམ་ཤེས་མེད། །ནམ་མཁའ་དང་ནི་མཐུན་པའི་གནས། །ནམ་མཁའ་བཞིན་དུ་བདག་མེད་པ། །ཆོས་འདི་བདེ་བ་ཆེན་པོ་ཡིན། །ས་ཡང་མེད་ཅིང་ཆུ་ཡང་མེད། །མེ་དང་རླུང་ཡང་ཡོད་མ་ཡིན། །རྡོ་རྗེ་སེམས་དཔའི་སྦྱོར་བ་ཡིས། །སྐྱེ་བ་འདི་ནི་རབ་ཏུ་གནས། །ཐམས་ཅད་དངོས་པོ་དངོས་མེད་བཤད། །དངོས་པོ་མེད་པར་དེ་ཡིས་བསྒྲགས། །རྣལ་འབྱོར་རྣལ་འབྱོར་བར་འབྲེལ་བས། །ཆད་པ་མ་ཡིན་རྟག་པ་མིན། །ཕྱག་དང་ཞབས་དང་ཁ་དོག་མེད། །མཆོག་ཏུ་དགའ་བའི་མཚན་ཉིད་དོ། །དངོས་པོ་ཐམས་ཅད་བདེན་པ་མིན། །ཐོག་མ་བར་དང་མཐའ་སྤངས་པ། །འདི་ལྟར་དཔྱད་ན་
འཁོར་ལོ་ལ། །དམ་པ་ཡང་དག་རྟོག་པ་སྤངས། །ཕུང་པོ་ཁམས་ནི་བདག་མེད་པ། །བསྒོམ་བྱ་བདེ་བ་དམ་པའི་གཟུགས། །རང་སྙིང་ས་བོན་འོད་ཟེར་གྱིས། །འགྲོ་བ་གཤིན་རྗེ་གཤེད་བྱས་ནས། །སྐུ་གསུང་ཐུགས་ཀྱི་རྡོ་རྗེ་ཅན། །བཀུག་ནས་དེ་ལ་སོང་བར་བསམ། །རྡོ་རྗེ་དྲི་མ་མེད་དང་ཆོས། །ཡེ་ཤེས་ལམ་སྐྱེ་དགོད་པར་བྱ། །དེར་ནི་རང་གི་ས་བོན་རྣམས། །ཡེ་ཤེས་ཧྲཱིཿ་ཥྚྲིཿ་ལ་སོགས་དགོད། །བདེ་བ་དམ་པའི་རྣམ་པ་མཐོང༌། །ཡང་དག་རྟོག་པ་ཐམས་ཅད་སྤངས། །སྤྲོ་དང་བསྡུ་བ་ཡང་དག་རྒྱས། །བདག་ཉིད་མཁས་པས་བཟླས་པ་བརྩམ། །སྐུ་ལ་སོགས་པ་སྤྲོ་དང་བསྡུ། །རིམ་དང་ཅིག་ཅར་དག་ཀྱང་རུང༌། །ཁྲོ་བོའི་ཚོགས་ནི་སྤྲུལ་ལས་བྱ། །འགྲོ་བ་ཧྲཱིཿ་ཥྚྲིཿ་ལ་སོགས་སྒྲ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ལྟར་ཆོ་ག་འདི་ཡིས་ནི། །བསྒོམས་ནས་བཟླས་པ་ཐམས་ཅད་བྱ། །ཟས་སོགས་བྱ་བ་ཐམས་ཅད་ནི། །བྱེད་འདོད་བལྟ་བར་བརྩོན་པ་ཡིན། །མཆོད་བསྟོད་བདུད་རྩི་མྱང་བྱས་ནས། །སེམས་ཅན་དོན་ནི་བྱ་བའི་སེམས། །དེ་ཉིད་གསུམ་གྱི་ཆོ་ག་ཡིས། །ཡེ་ཤེས་འཁོར་ལོ་གཤེགས་སུ་གསོལ། །བདག་ལ་བདག་གི་འཁོར་ལོ་ནི། །ཆོ་ག་ཇི་ལྟར་གཞུག་པར་བྱ། །རང་གི་བསོད་ནམས་ཡང་དག་བསགས། །མངོན་པར་བྱང་ཆུབ་ཡང་དག་བསྔོ། །ཨོཾ་ཨཱཿ་ཧཱུཾ་མུཿ་ཞེས་པ་འདིས། །གཤེགས་སུ་གསོལ་བར་བྱའོ། །འདི་ནི་རྣལ་འབྱོར་ཆེན་པོའོ། །ལངས་ནས་རང་གི་བདག་པོ་ཡི། །རྣམ་པའི་ང་རྒྱལ་བྱས་ནས་འགྲོ། །རྣམ་པ་ཐམས་ཅད་དངོས་པོ་ཀུན། །སྔགས་ཀྱི་དངོས་པོ་དེ་བཞིན་དུ། །གཏི་མུག་གཤིན་རྗེ་གཤེད་པོའི་གཟུགས། །བསྒོམས་ནས་བཅག་པ་དག་ཏུ་བྱ། །ཐུན་མཚམས་སུ་ནི་རྣལ་འབྱོར་སོགས། །དང་པོ་རྣལ་འབྱོར་པས་བསྒོམ་བྱ། །ཅུང་ཟད་ཡེ་ཤེས་རྗེས་རྣལ་འབྱོར། །ཤིན་ཏུ་རྣལ་འབྱོར་རྣལ་འབྱོར་ཆེ། །ཡང་དག་ཡེ་ཤེས་དབང་རྣམ་པས། །ཤིན་ཏུ་རྣལ་འབྱོར་རྣལ་འབྱོར་ཆེ། །ཇི་སྐད་གསུངས་པའི་ཆོ་ག་ཡིས། །ཐུན་གཅིག་ལ་ནི་བསམ་གཏན་འདིར། །རྣལ་འབྱོར་པ་ཡི་སྤྲོ་བསྡུ་ལུས། །དེ་ཉིད་གསུམ་བདག་ཡེ་ཤེས་གཟུགས། །རང་ཉིད་གཤིན་རྗེ་གཤེད་པོ་ཡིས། །དབང་བསྐུར་ཆོ་ག་བསམས་པ་དང༌། །བདུད་རྩི་ལྔ་ཡི་ཆོ་ག་ཡིས། །ཟས་ཀྱི་བྱ་བ་བྱ་བ་དང༌། །གཞན་ཡང་
མཆོད་པའི་རྣམ་རྟོག་གིས། །བདག་དང་ཕ་རོལ་པོ་ཡང་རུང༌། །ཆོ་ག་བཞིན་དུ་རྟག་ཏུ་མཆོད། །དཔལ་ལྡན་གཤིན་རྗེ་གཤེད་གཟུགས་སུ། །མཐོང་བ་ཉིད་ནི་བྱང་ཆུབ་ཆེ། །བདག་གཞན་མཉམ་པར་བྱང་ཆུབ་སྟེ། །གང་ཕྱིར་རང་གི་བདག་པོ་སྦྱོར། །དེ་ལྟར་མིན་ནི་ཇི་ལྟར་འགྱུར། །རྣལ་འབྱོར་པ་ཡི་གྲུབ་པ་མཆོག །ཇི་ལྟར་རྣམ་པ་སྣ་ཚོགས་ཉིད། །དངོས་པོ་གཅིག་ལ་བརྟགས་པ་སྟེ། །གྲོལ་དང་བདེ་དང་སྡུག་བསྔལ་གནས། །སྐྱེ་འགྱུར་ལས་ཀྱི་བྱེ་བྲག་ལས། །རྣམ་པར་མི་རྟོག་པ་བདག་ཉིད་སེམས། །བདེ་བ་དམ་པ་མཐའ་ཡས་གཟུགས། །ཤེས་རབ་ཐབས་ཀྱི་ངོ་བོ་ཉིད། །གང་ཕྱིར་འབྲས་བུ་ནག་པོར་འགྱུར། །སྒྲོལ་འདོད་འཁོར་བའི་རྒྱ་མཚོ་སྐྱེ་དང་འཆི་བར་བཅས་པའི་འཁོར་བ་ཟབ་མོ་འཇིགས། །ཆགས་སྡང་ལ་སོགས་ཆུ་སྲིན་འཁྲུགས་པ་ཤིན་ཏུ་གཡོ་བ་ལྦུ་བ་རྨུགས་གཉིད་སོགས། །དཔལ་ལྡན་གཤིན་རྗེ་གཤེད་པོ་བདེ་བའི་རང་བཞིན་ནོར་ཆེན་སྒྲུབ་ཐབས་བྱས་པ་ཡིས། །ཚིག་གི་སྣང་བ་གྲུབ་བཅས་བདག་གིས་བསོད་ནམས་ཐོབ་པས་འགྲོ་ཀུན་གྲུབ་ཐོབ་ཤོག །ཚིག་གི་སྣང་བ་གྲུབ་པ་ཞེས་བྱ་བའི་སྒྲུབ་ཐབས། སློབ་དཔོན་དཔལ་འཛིན་གྱིས་མཛད་པ་རྫོགས་སོ།། །།པཎྜི་ཏ་དཱ་ན་ཀཱི་རྟི་དང༌། ལོ་ཙཱ་བ་ཚུལ་ཁྲིམས་རྒྱལ་བའི་འགྱུར།། །།